ثار شكلها ومنظرها انتباه بعض الزوار لي جالسين بينما الباقي ما شافهاش ومن بين الناس لي ردو ليها البال..كان شاب من لي كاغصون شافها وشاف حالتها لي ماهياش وقرب عندها بالزربة..
النادل:خرجي من هنا!!
شافت فيه تالاسين مبرقة ما فهماتوش شنو قالها وبقات غير واقفة مبيضة عينيها..رجع قالها تخرج وهو كينعتلها لبرى و بنضراتو الحادة فهمات بلي كيجري عليها..
النادل:ما فهمت والو..هاكي ها عشرة دراهم ويله مشي من هنا!!
جبد عشرة دراهم بالزربة من جيبو وحطهالها فيديها وهي كتشوف فيه وتدمع..بقات غير حالة يديها وكتشوف فديك عشرة دراهم وهو كيدفعها تبعد من حدا باب المحل حتا بعدها وخلاها واقفة كتشوف فالعشرة دراهم مبهوضة..عارفة بلي هاديك كتسمى صدقة وتفكرات فاش كان باها كيغوت عليها ويقولها ما تشديش لفلوس من عند شي حد ما كتعرفيهش..زادت كتبكي كثر فاش تفكراتو وبلا ما تخمم رخات ديك لفلوس طاحت من يديها وزادت كتخلف ببطء..كتمشى وتشوف فالناس شي ضاحك شي مزروب شي غادي مهموم..كتسمعهم كيهضرو وما كتفهم من كلامهم والو كأنها فبلد اجنبي..كتقلع شي كلمات لي كيتشابهو مع اللغة العربية لي قراتها والتباقي حتا حاجة..وبقوة الجوع لي فيها ما بقاتش فكرات فشي حاجة خرى وحتا قضية دار الايتام مشات من بالها هاد الساعة..همها هو تاكل وتشرب..وهي غادة فطريقها كتبكي فصمت دازت من حدا احد المحل لبيع المواد الغذائية وبانتلها الثلاجة فبابو عامرة بالماء وبانولها السقايط لمشكلين والخبز ووقفات كتشوف فيهم من بعيد وكتسرط فريقها..وحتا كتبغي دخل وكتفكر المنظر لي دارلها النادل وكيفاش جرى عليها وكتراجع..بقات لمدة لابأس بيها كتشاور تدخل ولالا ومن بعد ما غلبها الجوع صافي تقدمات بخطوات مترددة ودخلات للحانوت وقبل ما توقف قدامو حلات سنسلة دجيبها وجبدات منها ورقة 100 درهم ومداتهالو هي لولة..بقى كيشوف فيها باستغراب وشدها منها..
البائع:شني بغيتي!
شافت فيه ما فاهماهش ومن بعد بدات كتنعتلو غير بيديها لأي حاجة بغاتها واول حاجة خذات هي قرعة دالماء لي غير شداتها زربات تفتحها وما قدراتش حتا حلهالها هو وطاحت عليها بلا بسم الله كتgرgب بقوة الشحفة لي فيها..خذات داكشي لي بغات وردالها الصرف رداتو لجيبها وسدات عليه وخرجات هازة ميكة فيديها ودارت جلسات فجنب الباب عند العتبة ديال احد المباني كتاكل بشراهة وكتاكل شوية من كل حاجة وهي فغمار اكلها هزات راسها وبانتلها بنت قدها او اكبر منها بشي حاجة قليلة..كانت كتشوف فيها وتشوف فداكشي لي كتاكل وحالتها ما كانتش حسن من تالاسين وإنما أسوء..ملابس موسخة وصندالة مقطعة وشعر مشنتف وتقاسيم وجهها الهزيلة كانت جميلة..تبادلو النظرات لفترة وتالاسين كطلع وتهبط فيها شافت حتا عيات وجبدات بيمو من داكشي لي شراتو ومداتولها ومداتلها عصير وطارت عليهم البنت لوخرا وجلسات حداها كتفتح فيهم وبدات كتاكل بلهفة كثر منها..شافت فيها تالاسين باستغراب ورجعات قربات الميكة فتحاتها ودارتها وسطهم كياكلو بزوج...
زينب:واااا يما على سطوربو(مشكيل)عملت نراسي..زيد ابنتي راه باغة نعمل فيك خير غير على وجه ديك اللقمة لي عطيتيني ونعمل معاك بحق رايبي والسقاقط لي شركنا..ماشي من عيبي نكر الخير..(جراتها)وا زيد قدامي راه ايطيح الليل وتبقى حاصلة زيد..
شافت فيها لقاتها مزالة مترددة وكتشوف فيها عاقدة حجبانها ووقفات كتشيرلها بيديها وكتحاول تفهمها..
زينب:نمشيو نعسو نعسو..(حطات يديها بزوج تحت حنكها)نعملو شخ شخ..فهمتيني دابا!!!
تالاسين: أهو أجي (لا غير خليني)
زينب:(كتجرها)وا الله يهديك زيد قدامي وبلا ما تبدى تمرط فيا..
شافت فيها تالاسين مطولا بتشكيك ولوخرى كتجر فيها وتعاود وهي ما فاهمة منها حتا كلمة..شافت حتا عيات وزادت معاها ولوخرى بدات كتفرنس وغادة بيها فوسط الشارع كتجر فصندالتها ولي داز من دراري لي باينين عايشين غير فالزنقة كضربلو سلام..
زينب:خسارة ما كتفهمني ما كنفهمك..حيث بالي يانا وياك انتفاهمو خاصنا غير نفهمو الهضرة دبعطنا..
تالاسين:!!!!
زينب:شفتي يانا فهاد السيكتور من هادي 4 سنييين..حتا يانا كنت جديدة فحالك وما جبرت لي يوريني..بلحق تينا ما تخافشي(ضربات على صدرها)..معاك زنوبة طوطاحة الدروبة واجرك على الله..شفتي هاد طنجة حافظاها درب درب حومة حومة
زينب:هههه ربي يحفظك اختي عارفة راسي واعرة..يانا ما انسقسيكشي كيفاش وصلتي نهاد الحالة حيث هي وحدة من ثلاثة..يااااا شي بقرة ثاقت فشي حمار وبزوك نتينا وسيبوك يااااا ماتو الله يرحمهم وخلاوك لا حنين لا رحيم ياااا طجيتي منهم ومن تريكتك كااااملة..(تنهدات)هادي حالتنا كااااملين..(سكتات)..شعندك وقفتي..شكتشوف!
دارت كتشوف فيها لقاتها واقفة حالة فمها فلبحر لي قدامها وريحو الباردة كضرب فوجهها..كانت أول مرة تشوفو قدامها..ما كانش واضح بسبب ظلام ليل ولكن هيبتو وريحتو وصوت امواجو كانو واضحين وبزاااف..بقات وقفة كتسمعلو وغمضات عينيها كتشم ريحتو لي حسات بيها كتدخل معاها وتغسل روحها..
زينب:عمرك شفتي لبحر!!..وا باينة فيك اصحبة عاد نزلك الكار
طلقات من زينب وتقدمات ببطء كتقرب منو وزولات صباطها كتمشى فوق رملتو حتا ضربو مواجو فصباعها وحسات بتبوريشة دالبرد طلعات معاها وبعدات بشوية لور كتشوف فيه وسااااكتة..بقات هاكاك لمدة وزينب كتهضر بوحدها ولكن شكون يجاوبها..حتا نطقات فلخر وهي كتجر فيها..
دارت عندها تالاسين وشافت فيها بنظرات غريبة وفلخر زادت تابعاها وساكتة كتسمعلها..زادو كتمشاو على جنب لبحر وغير زينب لي مgيداها حتا لقات راسها فمكان خالي من البشر..غير لكلاب كيدورو..ريحة لحوت كانت عاااطية منو وصوت لبحر كان مزال كيتسمع..قوارب صغيرة فكل مكان وشبكات دالصيادة مترشين فكل جيهة..
تالاسين: ماني غنلا!!(فين حنا)
زينب:نعام اختي..اه اه هايداك غير زيد
زيداتها جاراها من دراعها كيخلفو الشباكي ويتجاوزو القوارب البحرية الصغيرة حتا وصلو لمكان مجنب حدا واحد الحيط ومدرق بلفلايك..كانت فيه براكة صغيرة مصنوعة من قزدير وخشب وبلاستيك والميكات وبجنبها كانت جماعة ديال الدراري ولبنات من اعمار مختلفة مدورين على العافية كيسخنو من برد لبحر لي كيسوط فيهم..دراري قدهم وصغر منهم وكبر منهم..كيتسمع صوت هضرتهم وضحكهم وكيبان البعض منهم هاز خناشي دميكة خاشيها فوجهو ولقراعي دزاج خوضر بزاف خاويين مرميين تما..شافتهم زينب وهي ترميلهم سلام من بعيد...
زينب:لعشران راكم هنا!!!
هزو عينيهم فيها كاملين ونطق واحد فيهم مبوق..
أشرف:واااا تعطلتي الصحيييبة..فين كنتي دايعة هااا
زينب:ديها فراسك..نتينا شغلك!!!
أشرف:ههه شغلييي العسيلة ديالي
زينب:ييييخ الشمكار ياخور
وقفات فوق راسهم وهما بقاو غير ساكتين كيطلعو ويهبطو فتالاسين لي غير ساكتة وكضور فعينيها وتشوف فيهم بدهشة ما فاهمة وااالو وحتا لهضر لي كيقولوها ما فهماهاش كأنها فكوكب آخر..حتا نطقات وحدة من لبنات لي كانت باينة كبر منهم..
زينب:(ضرباتلو يدو)جمع زبلك عندك المرط..هادي فوتها عليك وهاد الباكور ديالك خليه عندك..(شافت فتالاسين)شوف فيا..(كتشرحلها بيديها)ما تشبر حتاااا شي حاجة من عند هاد لكمامر ها فاين كنوصيك..ونتوما لي شفتو عطاها شي سم ولا قرب جيهتا نجبدلو مصارنو نعمل بيهم لعلاوة فهاد العيد لكبير..وا هاااانا فاين وصيتكم
...:قااالتا الباطرونة هههه
سعاد:وشكون داها لا فيها لا فيك..خاي أشرف ارالي يانا ارا
أشرف:هاكي الحب
....:وشعندك كتهضر معاها بالاشارات..ياك ما صمكة هههه
زينب:ديوها فراسكم واخة..(ناضت وقفات وجرات تالاسين)يله تصبحو على خير..ونتوما كلها يمشي لخربتو بلا ما تجيو داحسو معانا فهاد شبير ونص..ماشي دار باكم هادي..سعاد دخليهم عاود نتقابح مع ختي
أشرف:وا غير سيري تسهطي شكون داها فخربتك
زينب:خربتي وجمعااااني وعندها سقف ومغطياااني..كية لي ما عندوش
تبسمات بسخرية وعطاتهم بالظهر وجرات تالاسين لي ما نطقات ما تكلمات كتفكر غير بينها وبين راسها فهاد المصيبة لي حطات راسها فيها..فين هي وشكتعمل فوسط هاد الناس..شهاد الحالة لي وصلاتلها وشمن بلاصة هي دابا..ما عرفات تجاوب على حتا واحد من هادو وما فيقها من افكارها غير صوت زينب..
زينب:هانتينا تكا هنا ويانا انعس ها فاين حداك وسعاد اتجي تخشى حدانا..هي دويقة ولكن ساترانا بعدا..
شافت تالاسين فلبلاصة لي كتوريها..كانت مفرشة فيها ملاية راشية وقدييييمة وموسخة..ولبراكة كلها تقابي شي مسدود بميكات شي مخليينو وداخل منو الريح ومجموعة ميكات مجموعين على شكل كومة ومعقودين بلخيوط كيتوسدوهم على شكل خدادي..كانو فقط زوج..ترمات زينب باش تنعس وجبدات غطا زرق كان ملوي فميكة باش ما يتوسخش زعما تغطات بيه وشافت فتالاسين لي مزالة واقفة..
زينب:نعس الصحبة شعندك!..اتبقى واقفة فوق راسي ولا!
شافت فيها تالاسين ورجعات شافت فلبلاصة لي كتوريها ومدات يديها لسنسلة ديال جاكيطتها كتفتحها حلاتها وفرشاتها تحت منها ونعسات عليها وتكات مكمشة فوضع الجنين..حسات بلغطا ترمى فوق منها وتكمشات فيه ساكتة ومغمضة عينيها وكتصنت لحريق فخضها لي فاق عليها..وبالعادة لي ولفاتها ديما كدندن الاغنية المعلومة عاد كتنعس وبدات كترددها بصوت خافت ولكن كان مسموع لزينب لي لاصقة بجنبها
زينب:ضربوك مالين لمكان باش كتغني فهاد الساعة ههه
تالاسين:(ما جاوبتهاش)
زينب:غني غني..اصلا صوتك كيجيب النعاس بحرا نسهطو
غمضات حتا هي عينيها كتصنت لتالاسين واخة ما فاهمة منها والو اما تالاسين فبقات كتقلب بوجعها شحااال عاد نعسات حيث كانت عيانة بزااااف..الليل كامل وهي كتحلم وكل ساعة تفيق معاها زينب وترجع تنعس عاود وسعاد كتسوط حداهم مكرهة حتا طلعلهم الخز عاد تهدنات ونعسات..
🍂🍂🍂🍂
صبح الصباح وتسمع صوت الطيور لي كتحوم فوق لبحر وصداع الصيادة لي بداو كيجيو للمرصى..ومعاهم تسمع الهراج ولغوات وناضت تالاسين مفزوعة على زطمة حسات بيها ففخضها المجروح حتا غوتات من شدة لحريق..
كانت تالاسين حانية راسها وشادة ففخضها كتوجع ومزيرة على سنانها..
زينب:نوض ولا انمشي ونسمح فيك نووووووض..
جراتها بقوة وقفاتها وتبعاتها تالاسين كتعرج برجليها ولحريق فيها وصابرة و هي ما فاهمة حتا علاش نوضوها هكاك..خرجات هي وياها من لبراكة وهما يبانولهم زوج رجال من المخزن هابطين من واحد السطافيط من بعيد وجايين جيهتهم وباينين عوالين على خزيت..
زينب:اواااااعدي يانا..وااااا جرييييييييي
شافتها تالاسين جرات وتبعاتها كتجري منين شافت لبوليس لي غير شافهم هاربين وهما يكعطو موراهم..
بوليسي:واااا شد شاااااااد..
كانت زينب كتجري بسرعة ومرة مرة كضور كتشوف فتالاسين لي ما كتقدرش تجري بزاف برجليها وكتزربها وهي كتشوف فلبوليس قربو يلحقو عليها..
وقفات تالاسين فنص الطريق كتنهج ولحريق فيها كيقطع وما قدراتش تزيد تجري..وزينب واقفة كتشوف فلبوليس لي ما بقالهم والو ويلحقو عليها وهي حانية وشادة ففخضها..
شافت زينب حتا عيات ورجعات بالزربة وجراتها معاها كتجري بيها وكتشوف موراها وبحكم عيشتها فزناقي فتعودات على الجريان كي الزواق هي كطير ومطيرة معاها تالاسين وكدخل وتخرج بيها بين المداخل ديال المرصى كتحاول تلفهم حتا غبرات عليهم شوية ووقفات مخبعة فواحد القنت متكية على واحد الحيط مدرق و كترد النفس..وتالاسين غير وقفات بيها حنات جالسة كتوجع وتبكي بفخضها..رداتلها البال زينب وهي تهبط كتشوف مالها...
سمعات الحس وطلات بطرف عينيها من مور الحيط وهما يبانولها البوليس واقفين كيقلبو عليهم فالدخالي..خرجو عينيها وضارت عند تالاسين كتهضر بهمس وكتجرها..
زينب:نوض خاصنا نمشيو يله..وا نوض اصحبة..(حنات عندها كطل عليها)..واش ما قدراشي..شعندا رجليك هاا!!..(طلات عليهم بانولها كيقربو جيهتهم)اووووف مشكيلة هادي..شفتي جبرتيني بنت الناس وعملت فيا خير بديك زوج لقمات ويانا ما كنساشي الخير..اما يانا نسمح فيك ونخليك ضبر محاينك..اووووف وعاد يانا لي جبتك نهاد المعماعة كاملة تفو تفوووو..شو سمعني(كتحاول تشرحلها)..يانا انمشي ياك وانحاول نلاهيهم ونتلفهم حتا يبعدو من هنا وخرج نتينا ديك الساعة..واش واخة!! على الله تكون فهمتيني..يانا انمشي ورد البال نراسك..الا ما تشوفناشي بسلامة يله ربي يعاونك..
ضربات على كتفها وشافت فيها تالاسين مخلوعة كأنها خيفانة تبقى بوحدها وبقات متبعاها بعينيها اما هي فضربات الدورة وخرجات من الجيهة لوخرا وبقات مخبعة كتطل عليهم وهما كيقلبو عليهم وحضات واحد حتا رجع كيشوف جيهتها وهي تخرج وضرباتها بجرية وهما غير شافوها بداو كيعيطو ارا جبد موراها وهي قالتلهم ما كتعرفو والو..تلفاتهم بين الزناقي وخرجاتهم من المرصى وبعداتهم على تالاسين لي كانت مزالة جالسة فبلاصتها وفقط أنينها لي كيتسمع وفخضها كتحس بعروقو كيخبطو..
بقات جالسة وكتشوف فجنابها وكلها كتقطر بلعرق والنفس مقطوعة فيها ووجهها حمار بقوة ما جرات وبقوة ما كتزير على سنانها باش تصبر راسها على لحريق..بقات لمدة كتستريح وناضت من بعد كتخلف وكطل وتشوف شكاين..طمنات بلي ما كاين حد وخرجات كتعرج وتجر فرجليها والصيادة ما دايينهاش فيها حيث مولفين باطفال حالتهم ما كفس..بقات كتمشى وكتقلب على المخرج منين تخرج للشارع وديك الساعة تشوف فين تعطي الراس...وهي كتقلب دازت فبالها الهضرة لي قالتلها مونية...وتفكرات القضية ديال دار الايتام وهي مزالة كتخمم ضربات فيها ريحة دالحوت مشوي.. وتمات دايزة من حدا صف ديال المحلات الشعبية خاصين بالحوت على انواعو تحركو مصارنها بالجوع وبقات غادة كتقلب على الباب حتا بانلها الشارع من بعيد وتوجهات ليه...شدات واحد الطوالة دالطريق على لبحر كتمشى فيها والشمس دالصبح كطنطن فيها وصابرة لحريقها حتا وصلات لحدا حانوت ديال المواد الغذائية كاين فالجهة لوخرا من الشانطي...وهنا كانت عندها المشكيلة كيفاش اتقطعو...بقات كتخلف وترجع وتعاود تبعد فيما تشوف شي سيارة جاية حتا ما قالت قطعاتو ووصلات حدا الحانوت...ضربات يديها فجنبها دخلو فالجيب ديال الجاكيطة وهي تلقى راسها لابسة غير تيشورط ديال البيجامة لي كانت لابسة وتفكرات بلي خلات جاكيطة فلبراكة حيث فرشاتها فاش بغات تنعس..
خرجو عينيها وبقات واقفة فبلاصتها كتشوف فباب الحانوت وكتشاور واش ترجع ولا لا!!..وهي بعدا تعقل على الطريق..وحتا واذا عقلات والا رجعو البوليس وشدوها..وتقدر ترجع هاد المسافة كاملة وهي فخضها بزز باش كتمشى بيه..بقات كتشوف حتا عيات وبعدات على بابو وتقدمات غادة هي وفين صدات وحانية الراس..
كان الشارع ما فيهش بزاف دالناس نظرا لأنه الصبح والناس مزالين قلال وهي كتمشى بدات كدخل فالدروبة من هنا لهنا وفيما تعيا تجلس ترتاح..حتا بداو كيبانولها الناس وزعمات ووقفات اول واحد كتسولو..
تالاسين: دادا..أربي مغدتوشكا تgمي نيgيgيل!!(عمو..عافاك فين جات دار الايتام)
خنزر فيها وزاد وهبطات راسها باحباط وتمات غادة عاود حتا تلاقات واحد اخر ونفس المنظر كيتكرر فكل مرة كتوقف شي حد وكيسحابهم غير كتسعى وما كيفهموهاش شكتقول وشحال من واحد فيهم جبد لفلوس عطاهالها وما بغاتش تشدها..تمشات وتمشات حتا لقات راسها وسط حي نقي وفيه مجموعة من العمارات تابعة للطبقة المتوسطة..كانو زناقيه خاويين والوقت دالعصر وصلات تقريبا وهي مزالة لا ماكلة لا والو..هلكاتها الطريق ولعيا والجوع وبلا رجليها لي مزالة ضراها..ومشات لإحدى العمارات لي مظللين وجلسات فعتبتهم كترد النفس مغمضة عينيها..
داز الوقت وما حساتش كيفاش حتا نعسات فبلاصتها..بعد مدة ضرباتها الفيقة وحلات عينيها على صوت احدى السيارات لي دايزة بسرعة وخلات صداعها موراها..ناضت مطفوجة كتحك فعينيها وخيبات سيفتها فاش حسات بالضو ضربها ففخضها.. لقات الشمس بردات ولعشية وصلات وهي مزالة كتحك فعينيها وكتحاول تواكض..تمات دايزة من حداها بنت شابة داخلة للعمارة..كانت فتاة بملامح جميلة باينة فيها مزالة صغيرة ما كبيراش بزاف..لابسة لباس نقي ومقادة حالتها..
ومتولاها..شافتها وشافت حالتها وبقات كتشوف فيها عاقدة حجبانها باستغراب..ومدات يديها لصاكها جبدات البزطام وقربات منها مداتلها شي بركة..شافت فيها تالاسبن وفيديها وحركات راسها بلا..
البنت:هاك شبر..ما تحشمشي!
تالاسين:(حنات راسها)
البنت:ما بغيتيشي!
شافت فيها تالاسين مطولا حيث اصلا ما قشبلات منها والو..وبصوت خافت كأنها حشمانة وخيفانة من نفس المنظر يتكرر وتحبطها هاد البنت عاود نطقات..
تالاسين: أربي مليي تgمي نgيgيلن مغدتوشكا...اريخ يات..ريخ غير أسرس دوخ(عافاك وريني غير دار الايتام فين جات..ما بغيت والو بغيت غير نمشيلها)
شافت فيها البنت باستغراب ورجعات يديها عندها..
البنت: كمين تgيت تشلحيت؟(نتي سوسية)
هزات تالاسين عينيها فيها مذهولة..واخيرا سمعات شي كلمة وفهماتها..واخييرا لقات شي حد لي يفهمها علاش كتهضر وشكتقول وبفرحة قالت وهي كتبسم..
شافت فيها تالاسين مطولا وعينيها بمجرد ما كيتفكرو لي وقع والعافية لي كلاتهم والعذاب لي دوزات كيتغرغرو بالدموع..حنات راسها كتمسح عينيها بالقبضة ديديها ومخبعة وجهها ونطقات بشوية..
تالاسين:(بأسى)ماتو..الله يرحمهم
شافت فيهاد ديك البنت بأسى واضح على عينيها وحنات وعندها كطل على وجهها وقبضاتها من الذقن ديالها علاتلها راسها كتمسحلها دموعها..
البنت:الله يرحمهم..صافي ما تبكيش..فخبارك حتا انا واليديا ماتو
تالاسين:(سكتات شوية عاد نطقات)اه واخة..صافي هانا انتسناك هنا وفالصبح نمشيو..عنداك ما تجيش!
البنت:ههه لا ما تخافيش ما نخويش بيك..بلحق ما اتسناينيش هنا..اتطلعي معايا لداري ياك..باتي معايا حتا لغذا ونمشيو..واخة!
تالاسين:(بدهشة)فين هي دارك
البنت:(شيراتلها لباب الاقامة)هنا..
تالاسين:كتسكني هنا!
البنت:اه ههه..يله زيدي
وقفات تالاسين فمكانها وكتشوف فيها مترددة..عاد لبارح ثاقت فوحدة وشافت شنو وقعلها..ولكن فكرات مع راسها فين اتبقى فهاد الليل وهي بالجوع ولحريق فيها كل مرة كينغزها..
البنت:(بابتسامة)ما تخافيش..غير يله
زادت تالاسين قدامها بخطوة طامعة فيها على الاقل توكلها او تشربها وتقدمات حتا ديك البنت كتقرقب بالطالون والمشية عندها بلعبار..تمشات تالاسين طالعة فالدروج وهي تعيطلها..
البنت:لا اجي..انطلعو فالسانسور
تالاسين:شنوو هو!
البنت:السانسور..ههه اجي وتعرفيه
قربات عندها ووقفات حداها حتا تفتحات باب المصعد وحطات يديها على كتاف تالاسين وزيداتها قدامها حتا دخلات..ولوخرى غير حالة فمها وكضور فعينيها باستغراب حتا تسدات عليهم الباب وتهز السانسور وهي تغوت مخلوعة ولصقات عليها شادة فتريكو لخفيف لي لابسة وخاشية راسها فكرشها ومغمضة عينيها..
تالاسين:الحفيظ الله انههنننن..انموتو انموتو اههنهنننن..
البنت:(ضحكات البنت بلا خاطرها)هههه ما تخافيش هههه..ما ايوقع والو
البنت:(دوزات يديها على راسها)هههه صافي راه ما ايوقع والو..ما تخافيش ها حنا قربنا نوصلو..هذا غير السانسور كيطلعنا بالزربة حسن من الدروج
تالاسين:لا لا الدروج حساااان اهنههنن انهبطو بحالنا
البنت:واخة ها حنا وصلنا اصلا ههه
تفتحات الباب وخرجاتها كتضحك عليها وهي مكمشة فيها..وقفات قدام باب خشبية كبيرة منقوشة بنقش عصري مع لمسات ذهبية ومحيبقات خوضر دايرين بالباب..جبدات السوارت من صاكها وفتحات ودخلات
البنت:يله..دخل
تقدمات تالاسين بخطوات بطيئة وحانية راسها حشمانة..كان السكااات والهدوء باين بلي ما كاين حد..سدات البنت الباب ونترات الصباط من رجليها وحطات صاكها فوق خزانة حدى الباب وتقدمات فالكولوار وهي كتهضر
البنت:أربيييي رجلي طابولي
جلسات فوق فوتوي gري كترتاح وهزات رجليها عندها كتبرك عليها كأنها كتماسيها..هزات راسها بانتلها تالاسين مزالة واقفة فالباب ما زادتش..
البنت:دخلي..مالك واقفة..زيدي ما تحشميش
زولات صباطها حتا هي وعطات ريحة رجليها لي عرقانة..قربات منها ببطء وهزات عينيها شوية كتشوف بطرف عينيها..كان شكل الدار غريب عليها..بفوطويات وديكورات عصرية ما مولفاش بيها هي..الارض لي كانت كتمشى عليها مرخمة ونقية كتشعل..ودخلات جلسات فطرف الفوطوي كتلعب بصبعانها..بقات البنت جالسة لمدة ممدة كترتاح ومغمضة عينيها..حتا هزات راسها وناضت تجلسات
البنت:فيك الجوع!
شافت فيها تالاسين وفرحات بلا ما تبين حيث دبصح كانت جيعانة..ورجعات حنات راسها وحركاتو بالايجاب
البنت:واخة..انطلبو شي حاجة يجيبوهالنا
ناضت كتمشى بلحفى على طراف صبعها..وهزات الفيكس دوزات نمرة باينة حافظاها..هضرات بالدارجة لي ما فهماتهاش تالاسين ورجعات حطات السماعة وشافت فتالاسين
تالاسين:(حركات راسها بالرفض)لا..بلاش..الا بغيتي واخة تعطيني غير نشرب!..فيا لعطش!
البنت:وعاد أطلبي..هانتي راها لكوزينة دخلي وشربي..أنا اندخل ندوش دغيا حيث قربلي وقت الخدمة
خلاتها ودخلات لأحد الغرف..وبعد مدة ناضت تالاسين حشمانة غير بوحدها ودخلات لجيهة لي نعتاتلها..كانت كوزينة عصرية فالابيض والرمادي..كلها مجورة وبلاكارات..بانتلها قرعة دالماء وكاسها فوق صالة مونجي وقربات منها كتعمر فلكاس وتشرب بلهفة حتا تزوات ورجعات خرجات جلسات فبلاصتها ساكتة وكتسنى..حتا خرجات البنت وريحة باندوش عاطية منها..لابسة كسوة بيضة صيفية حد الركبة ولحمها بيض بلق ومقادة شعرها وحالتها وماكياج خفيف جاها حلو فوجهها..تبسمات فوجه تالاسين ويله بغات تهضر تسمع الصوني ديال الباب وهي ترجع متاجهة جيهتو..فتحات وخذات من عند أحدهم علب كرطونية مجموعة فصاكادو خاص باسم المطعم..هزات صاكها لي كان مزال فوق الخزانة لي حدا الباب جبدات منو لفلوس خلصاتو ودخلات خاشية وجهها كتشم ريحة الماكلة لي عااطية..
البنت:الله هادشي كيشهي..
حطات داكشي فوق الطابلة كتفتحو وتطل عليه وتنزل فوق الطابلة..كان كلشي مزال سخون ومعلب بعلب أليمنيوم..خلاتو ودخلات للكوزينة جابت لمعالق ولفراشط وشي حاجة دالخبز حطاتهم فوق الطبلة وقرعة دالعصير كباتها فالكيسان وجلسات..
البنت:اجي جلسي هنا
ناضت تالاسين وعينيها غير على لماكلة ملهوفة جلسات حداها..قرباتلها الماكلة حداها وعطاتها باش تاكل وهي كتبتاسم ليها..
البنت:يله كولي..ما تحشميش(بدات تاكل)امممم هادشي بنييين ههه حتا انا فيا لموت دالجوع..كولي ما تخلي حتا حاجة يله
داكشي لي كان طاحت تالاسين فداكشي عمية ما هزاتش الراس..كانت وجبات متنوعة ولي عمرها ذاقتهم..كتاكل بزوج يدين وتعمر فمها ودوز بالعصير..والبنت كتشوف فيها باستغراب ولكن عاذراها حيث حتا هي كانت فواحد الوقت قدها وما لقات لي يوكلها ولا يشربها..كانت يتيمة بحالها وعايشة فالزنقة لا والي لا تالي..الزنقة علماتها بزاااف وخذات منها بزااااف..وأهم حاجة خذات منها هي شرفها وعفتها ولي باعتهم باش تعيش العيشة لي عايشة دابا..
البنت:شنو سميتك!
تالاسين:(فمها عامر)..اممم..تالاسين..
البنت:ههه حتا تسرطي وجاوبيني بشوية عليك ههه
تالاسين:(سرطات الدغمة لكبيرة بزز)اححم..تالاسين
البنت:اوووه إسمك مزيييون..عارفة شنو كيعني!
تالاسين:ماما الله يرحمها كانت كتgولي كيعني مفتاح الخير
البنت:ههه بصح هذاك هو المعنى..اسمك فنيون بحال مولاتو ههه عمر شي واحد قالك شحال غزالة..وعندك عينين فنيونين ما شاء الله ربي يحفظك
مشى بال تالاسين لكلام الشيخ لي كان كيقولها..غزالة وفنة بحال مك..كلام كرهات تسمعو حيث كيفكرها غير بالذي مضى..سهات قدامها ما جاوباتش حتا نطقات البنت..
فتحات الخط كتجاوب وخرجات سدات الباب وتسمع صوت السوارت كطرق بيهم الباب..وبقات تالاسين جالسة كتكمل ماكلتها حتا سالات ورجعات لور كترتاح وتشوف قدامها..ناضت جمعات الطبلة وداتها للكوزينة وحلات لبلاكارات كتقلب على لويزة باش تشربها كمان تهدن عليها حريق فخضها..حيث تفكرات نهار كانت تلمسان كرشها ضاراها ودارتلها مونية لويزة..قالت يمكن حتا انا تهدنلي وداكشي ما عرفات وقالها عقلها..بقات كتقلب هنا ولهيه حتا لقات قبطة ديالها وعقلاتها حيث سبقلها شافتها..جبداتها وحطاتها فوق البوطاجي وخلاتها تما..ومشات للبيت لي نعتاتلها حياة..كان بيت واسع فيه بالكون كيطل على الشارع..أثاثو قليل ما فيهش قوة الربل على والو ونقي ومستف ومفرشاه بالابيض بحال اغلب الدار لي غالب عليها هاد اللون..دخلات للحمام كتدور عينيها فيه كان كيما قالتلها حياة فيه كلشي واجد..زولات حوايجها بشوية عليها من بعد ما طرقات عليها..حلات الفاصمة على فخضها لقاتها كلها مطبعة بالدم لي بدا كيكحال وبزز باش بعداتها على الجرحة حيث الدم يبس ولصقات معاه الفاصمة..وهي كتزولها نترات بالجهد حتا تقصحات وتفتحات الجرحة كتسيل بالدم مرة اخرى..خيبات سيفتها مقصحة وزيرات على سنانها ورمات ديك الفاصمة فسليلة منزلة حداها ووقفات كطل على فخضها وضرب رجليها مع الارض..
تالاسين:(مغمضة عينيها ومزيرة على فمها) افخضيييي اممممم..ايمااااا اهئ اوووف
بقات لمدة هاكاك..وقربات من البانيو لي كيفكرها بذكريات السيئة..تخشات فيه حيث كانت حياة معمراهلها..غمضات عينيها فاش حسات بالتشويطة دالماء ففخضها وهو مزال سايل بالدم وهي كتدوز يديها عليه ببطء..بقات فوسط الماء لمدة وغسلات حالتها وشعرها غير دوزات عليه مهم دارت داكشي لي كتعرف..وهزات حوايجها لموسخين خشاتهم معاها فركاتهم بين يديها..وناضت خرجات من البانيو كتقطر بالماء نشراتهم فوق لافابو وقربات لبينوار منزل فوق كرسي فالحمام هزاتو ولبساتو جاها كبير عليها..حياة لي كيوصلها ليها حد لفخض جاها هي حد الكعاب درجليها ويديه طوال مدليين..سداتو عليها ولوات راسها فلفوطة وحسات بالدم مزال سايل من فخضها..شافت فجنابها كتقلب على شي حاجة تحبسو بيها..وبانلها غير بابي جينيك هزات منو رولو طويييييييل لواتو على رجليها ولصقات طرفو ببزاقها وخرجات من الحمام مكمشة فلبينوار وحيث الجو صيفي ما حساتش بالبرد بزاف..توجهات نيشان للكوزينة وهزات قبطة كبيرة داللويزة دارتها فلماء كيما شافت مونية دارت وشعلات عليها البوطة بعد معاناة عاد عرفاتلها..خلاتها كتغلي وجلسات على صالة مونجي كتطل على فخضها لي غير ما كيزيد ويضرها كثر..سهات كتخمم فنهار لي تحفرات فيها هاد الجرحة..دوك الايام عمرهم يتنساولها ولا يمشيولها من البال..وما فطنات غير على صوت الماء لي فاض على البوطة وناضت بالزربة كطفيه..طلات عليه باخو طالع فالسماء سخوووون واللويزة طلقاااات فيه مزياااان وعاد هي حطات كمية كبيرة..هزاتو كباتو فغراف كبير لي لقاتو فاش كانت كتقلب عليها وفرقات لوراق على الماء بيديها وهزات الغراف ومشات للبيت ردات الباب عليها وسدات البالكون والسراجم من البرد دالليل وتخشات فلغطاء وما رداتش البال بلي حردات فخضها مع لفراش حتا تحل البابي جينيك..وهزات الغراف لي حطاتو فوق لكوافوز كتشرب منو بشوية وكتسوط عليه يبرد..وكلما تزاد عليها لحريق كلما gرgبات كثر حتا سالاتو وما بقات فيه حتا قطرة..ومع الجغمة لخرا مع عينيها بداو يتلاصقو وشداتها الدوخة بقوة اللويزة لي شربات وهي ما موالفاش بيها بلا لعيا لي كانت عيانة..وما دازوش دقائق حتا كانت طايحة فوق لفراش كتشخر وما بقات حاسة بحتا حاجة كدور بيها
في نص الليل ومع قرب لفجر..تسمعو السوارت فالباب..تفتح ورجع تسد..وتم داخل منو شاب في مقتبل العمر..ملامحو ما وضحاش بسباب ظلام الليل..كيغني ويدندن ويصفر..ورجليه كيلعبو بيه..من حالتو كان باين فيه سكران..رمى السوارت فوق طبلة صغيرة لقاها فطريقو وتم داخل كيعيط بصوت مرتفع وهو كيقلب عليها فلبيوت..
الشاب:حياااااة..فينك...حيااااااة
دخل لبيت النعاس ودفع الباب لي كانت مردودة..كان الظلام طاغي على البيت وضوء خفيف عاطي من البالكون لي فيه ستائر مغلوقة كتحبس الاشعة دالصبح..قرب من الناموسية كيضيق فعينو وكيحقق الشوفة..وهي تبانلو ناعسة فوق الناموسية..كان شعرها مطلوق حداها والفوطة لي كانت جامعاه بيها ترمات فالارض..وجهها ما باينش واصلا بقوة ما سكران ما ميزش..ريحة باندوش لي مولفة تدوش بيه كان عااطي من جيهتها الشيء لي خلاه يظن بلي هي حياة..
الشاب:نتي هنا وانا كنقلب عليك
بدى كيزول فحوايجو بشوية عليه حد ما زاربو كيزول ويغني منغاااااام غير مع راسو..حتا بقى غير بلبوكسور وهو يتلاح حداها على طولتو حتا تبومبات الناموسية..أما هي لويزة دارت مفعولها وسهطاتها بمرة...
شرقات شمس النهار..ومعاها بدى يوم جديد..حس بركلة قوية جاتو فجنبو وهو يخيب سيفتو..عقد حجبانو وحل عينيه بشوية عليه..شاف فالغرفة من بين رموشو وبقى شوية عاد عرف فين هو..وغير عاق براسو فين زفر كأنه ما عاجبوش حالو يلقى راسو تما..رجع غمض عينيه وبقى هاكاك لمدة وشعرو الاسود لي مطولو بسنتيميترات قليلة طايح على جبهتو وعينيه..لحيتو خفيفة يله بدات كتقاد فوجهو..هز يدو كيحك عينو وهو ناعس على كرشو..وقلب راسو مخسر غير بوحدو وراسو ضارو بزاااااف كيشوف على جنبو..ويله أيفتح فمو وينطق وهو يتصدم من شوفة عينو..وبلا ما يشعر ناض قافز تجلس فبلاصتو..حس بلغطا زهق عليه وهو يطل على راسو لقى راسو غير بلبوكسور..زاد تبهض كثر وكثر وخرجو عينيه..كانت هي قدامو مسفحة..لبينوار دلحمام ترخف حزامو وتحل على صدرها لي اصلا ما كاينش ويله بدى يخرج الريوس..شعرها لي كان فازك نشف وتريش ومزلع حداها..وهي ناشرة كل رجل فين وما لابسة والو من تحت..والبينوار مفتوح عليها من واحد الجهة ومبين فخضها..دوز يدو على راسو هز شعرو على جبهتو ومزير على فمو ورجع زولها ورجع شعرو هبط على عينيه..ناض وقف من بلاصتو وكيشوف فيها ما مصدقش وكيحاول يوهم راسو بلي غير كيحلم..وباش يتأكد ضرب جبهتو بالقبضة ديالو كيحاول يصحصح وفاش رجع حل عينيه..لقى داكشي لي قدامو بصح..تحركات من مكانها وتقلبات على جنبها وهو يطيح فيه النص منين شاف قطرات من الدم فوق لفراش..كانت هاديك هي لي سلات معاه..حط يدو على فمو ولوخرا على جنبو وهو كيحرك راسو يمين شمال..
الشاب:لا لا..ما يمكنش..ما نديرهاش انا ما نديرهاش..يا ربي لا ما يمكنش..شهادشي!
حنى هز لغطى رماه فوقها من بعيد..ووقف كيشوف فيها وغادي جاي حداها..شابك يديه مور عنقو وكيعض على فمو وكيتمتم..كيشوف فحالتو ويشوف فيها وبقى شي ثلث ساعة على ديك الحال ما بين الصدمة والخوف..
ترمى فوق الناموسية على طولتو جا جالس وحط يدو بزوج على وجهو كيتنفس بالزربة وكيخمم..فجأة..بعدهم وناض وقف كيلبس حوايجو لي كانو مليوحين فالارض بالزربة..حتا سالا وقرب منها هي لي حالة فمها وريوكها نازلين ما جايبة خبار..بغى يحط يدو عليها يفيقها وتردد كأنه خيفان ورجع كينغزها غير بصبعو..
تزعزعات من بلاصتها كتغبن لثواني..يله سمعات صوتو الرجولي لمدعدع بالنعاس وهي تنوض طافجة كتخشى فراسها خيفانة قبل حتا ما تشوفو..خرجات عينيها فيه وهي لاصقة مع ظهر الناموسية..شعرها طايح على وجهها مغطيه كامل تقريبا وعينيها كيبانو من تحتو خوضر كيدورو فبلاصتهم بالخوف..كتحقق فيه ما عرفاتوش وتخلعات منو..هو كيشوف فيها وهي كتشوف فيه وبزوجهم كيسرطو ريقهم..هو من التوتر وهي من الخوف..لاحظ صغر سنها كثر وزاد تفاجئ وزادت الصدمة لعبات عليه..ودام الصمت لثواني حتا نطق هو..
الشاب:(بحدة)شكاديري هنا!
~~~
باش نوضح لي ما عرفينشي شكون هو براء !!! براء هو ولد الابطال ديال قصتي لولة خلقت له... مهم هذاك ولدهم وهاد القصة والقصة لولة أيتشركو فقط فالابطال والشخصيات والأحداث لا علاقة يعني لي ما قراتشي لولة ماشي شرط ما تفهمشي هادي 😊 وحد ساعة كلشي واضح كنضن غير هو البطل كاين لي كيعرفوه منين كان فكرش مو وكانت توحم بييييه على الرملة 😁😁 شكون باقي عاقل ديك ليلة حمقات فراس 😂😂 (بس لي ما عرفاتشي فراس هو البطل ديال خلقت له) 💜 💜 💜
~~~
زادت بعدات عليه كترجع بلور..وهي راجعة حسات بالهواء كيضربها لصدرها وحنات عينيها شافت حالتها..وجرات البينوار ولغطا عليها وهي غير خلعاتها نبرتو كثر..اما هي طبعا ما فهماتوش..شافها وشاف خوفها وعرف بلي خلعها..وهز يدو كيديرلها حركة كأنه كيكالميها ونطق بصوت حاول ما أمكن يكون حنين..
الشاب:شكديري هنا..عافاك قولي شكون جابك..شكون نتي..راه أنحماق..قولي بلي ما وقع بينا والو..عافاك الا ما هضري !!!!
تسناها تجاوبو..وبقى ساكت كيشوف فيها حتا نطقات بتردد..
تالاسين: متgيت !!!(شكون نتا)
الشاب:(بتعجب)نعام..شكتقولي..ما فهمتش!!!
تالاسين: مgيgي تريت!!! (شنو بغيتي مني)
الشاب:شكتخربقي..هضري معاوط!!
دوز يدو على راسو ثلاثة دالمرات ذهابا وإيابا بالزربة وشعرو كيمشي ويجي معاه
الشاب:اوووووووف يا ربي لطفك..يااا ربي لطفك..شوفي فيا..فين هما حوايجك هااا..فين هما؟؟
بقى كيتسناها تنوض ما ناضتش وتحرك هو كيقلب على حوايجها فأرجاء البيت بلهفة وهو كينهج ولعرق بدى ينزل منو..ما لقاهمش وشاف فيها لابسة لبينوار قال خلاتهم فالحمام ودخل كيقلب عليهم وداكشي لي كان لقاهم منشورين هزهم كانو مزالين ما ناشفينش مزيان وخرج رماهملها فوق لفراش
خرج بحالو وخلاها هي جالسة كتشوف قدامها مبهوضة..ما فهمات والو ولكن عرفاتو كان كيقولها لبسي وقالت بلي حتا هو ساكن فالدار ودابا كيجري عليها تمشي بحالها..وناضت كتمسح فدموعها سدات الباب عليها وهي كتعرج برجليها..شافت فالناموسية بانلها الدم وطلات على الجرحة كان الدم يابس عليها وتنفخات..خلاتها هاكاك ومدات يديها كتلبس حوايجها حتا سالات وتمات خارجة كتجر فرجليها غادة نيشان جيهة لباب بلا هضرة بلا زوج....
قبل ما توصل لباب تشدات من يديها ودورها عندو بالزربة..
الشاب:(عاقد حجبانو)تسناي..فين غاديا!!!
واقفة قدامو هازة راسها باش تشوف فيه وهي يله ضاربالو لكرشو..وبلا ما تشعر ومن خوفها حطات يديها على كرشو ودفعاتو حتا رجع لور..
عقد حجبانو بعدم فهم ورجع شدها من يديها وهز صبعو عليها..
الشاب:بقاي هنا..ما تزعزعيش..ما عرفتك كتفهمني ولا لا..بلحق بقاي هنا سمعتي..ما تحركيش
خلاها وبعد عليها كيضور عينو يقلب على السوارت..بانولو فوق الطبلة وقرب هزهم بالزربة ورجع دار عندها لقاها كتفتح الباب تخرج..وجرى حتا وصل عندها وشدها من ذراعها وزير وهي تبدى تنقز فيدو باش تفك وكتغوت..وهو ما مسوقلهاش بالو مرفوع ويدو كيرجفو وخايف يكون بصح قاسها..بزز باش قدر يتحكم فيدو ويسد الباب وتم غادي جيهة السانسور وزادت ركبات فيها الخلعة فلش شافتو غادي جيهتو..
كان واقف كيبرك على البوطون ديال السانسور بالزربة وكيعض على شفايفو ويفيفري برجليه..كيخمم وعقلو خدام كيحاول يتفكر حتا بغى يتسطى وزاد حريق الراس كثر وكثر..تحلات الباب وجرها دخلات وهي كتنقزلو فيدو وتغوت..كان متوتر وأعصابو مشحونين وهي كتزيد تلعبلو عليهم بغواتها..وبلا ما يشعر دار عندها وغوت بحدة وهز يدو كأنه باغي يضربها..
الشاب:سكتيييييييييييييييييي 😡
شاف فيها كيزفر..وهي تكمشات وخرجات عينيها قاطعة لحس وغير كتشوف فيه مبهوضة..هرب الدم من وجهها كثر ما هو هربان..ويبسات فبلاصتها بلا حركة..
تحل باب السانسور وجرها موراه وتم خارج بيها..هز السوارت فتح السيارة من بعيد..وقرب لسيارتو الحمراء الرياضية لي فيها غير زوج كراسا وحادرة للارض..دار فتحلها الباب ودخلها تجلس ودارلها السمطة..ودار بالزربة لجيهتو ركب وديمارى وتحرك بسرعة حتا مشات وجات فمكانها وغير السمطة لي شداتها..كانت أول مرة تجلس فشي سيارة بحال هكاك..وأول مرة اصلا تركب فشي طوموبيل من غير الكاميون دلكسيبة لي جات فيه..زيراتها لبولة بقوة الخلعة من الموقف كامل..والسرعة لي كان ماشي بيها خلاتها تزير على جناب الكرسي لي جالسة عليه ملصقة ظهرها مع الكوسان ومزيرة على عينيها ودموعها كيهبطو بلا صوت..أما هو فكان جالس حداها وربي لي عالم بيه حاط المرفق ديالو على السرجم وكيدوز يدو على شعرو ومرة مرة كيزير عليه بحال الا كيريش راسو..صوت تنفسو السريع كان مسموع وهو مركز فالطريق قدامو وكل شوية يدور يشوف فيها هي لي جالسة حداه مزال ما باغي يتيق..
وقف بسيارتو فساحة أحد المصحات المعروفة في طنجة باسم "مصحة الرأفة" حتا تحكو الروايد مع الارض..وهبط بالزربة دار جيهتها وهبطها جارها..يله وقفها زهقاتلها البولة وهبطات كتقطر مع رجليها..وجرها موراه مدخلها وهي لا حركة لا سكون فشلها بالخلعة..
ما وقف بيها حتا وصل لأحد الغرف ودفع الباب ودخل مدرم ايسخف ولعرق كيقطر منو وجرها دخلها معاه..ووقف فمكانو ونطق من بعد ما سرط ريقو..
الشاب:الواليدة..!!!
هزات راسها فيه بالزربة فاش سمعات صوتو..كانت جالسة مور بيروها لابسة طابلية بيضاء وفولارها الرمادي مزين وجهها ونظارات ديال الشوف فوق راسها..إمرأة ناااضجة فأواخر الأربعينات بوجه أبيض وملامح جميلة ..كبرات اه ولكن مزالة محافظة على جمالها..كيما كيقولو كيمشي الزين ويبقى حروفو..عقدات حجبانها الكوحل ونظرات عينيها الكوحل بان فيهم الخوف وبصوت مستغرب نطقات وهي كتشوف فيه..
رؤيا:براااء!!(طلعاتو وهبطاتو وشافت فتالا لي فيدو)..شعندك..ياك لباس..شكون هادي!
براء:(كينهج وعرقو هابط مع جبهتو)الواليدة..نتي لي اتعتقيني!
رؤيا:(شدات فذراعو)شو بلا ما تخلعني..شني عملتي هضر دغيا..هضضضر شني كاين..براااااء شني عملت!
شاف فيها براء وطلق من تالاسين لي غير طلقها دارت باغة تهرب وتخرج بحالها..ساعة غفلها ورجع شدها من يديها وجرها عندو ردها وقرب من الباب سدو ودفعها هي تجلس فوق الفوطوي لي كاين تما وخلاها جالسة كتبكي وكتشوف فيهم ورجليها كيرجفو ورؤيا مخرجة عينيها فيه ما فاهمة والو...
براء:(خذا نفس عميق وزفر)سمعيني الواليدة..البارح انا مشيت وو..وو(زفر)
رؤيا:وووو..وآااااش!
براء:(رجع شعرو لور)فففففف..مشيت وسكرت
رؤيا:(خرجات عينيها) شنييييييييي!! سكرتييييي..!! عاااااود أبراء!!!..عاااوتاني..واش حالف طرطقنييييي..ياك هضرناااا معاك وحلفت فيك..وباك شحف معاك..ونتينا باغي تخرج على راااسك؟؟.. شداك نشي سكرة هاااا..شداك نداك السم غير قولي..راه لحراااام هذاك لحراااااام..واش ما كتفهمشي لحرااااام!
براء:(خيب سيفتو بضيق)عارف الواليدة عااارف..ماشي وقت هاد الهضرة وماشي هنا فين كاين المشكيل دابا
رؤيا:علاش كاين شي مشكيل ياخور من غير هذا؟؟..(دارت شافت فتالاسين)..وشكون هاد البنت بعدا!!!
براء:غير صبري الواليدة وانفهمك
رؤيا:(خنزرات فيه)ها هي صابرة..يله فهمني
براء:مهم قلتلك سكرت..وما بغيتش نمشي لدار بديك الحالة..ومشيت لدار واحد صاحبي كنعرفو..ومع قليل فاش كنشرب وهاد المرة كثرت دخت دبصح..وما عقلتش شنو وقع ولا كيفاش..مهم نضت فالصبح لقيت راسي..ففففف..(حدر عينو)لقيت راسي عريان وهادي حدايا
رؤيا:(باستغراب)هاااا!!...كيفاش حداك!..شني زعما..(حركات صبعها بينو وبين تالاسين مخرجة عينيها)واش لي فبالي هاااا!!..واش..واش زعما قستيها!!
براء:ما عرفتش الواليدة ما عرفتش..نضت لقيتها حداية والدم مقطر فوق الناموسية..ما عاقل على والو واااالو واااااالو(كيضرب فراسو)...انحماااااق الواليدة انحماااااق
حطات يديها على فمها مصدومة وعينيها خارجين فيه ودارت كتشوف فتالاسين لي شادة فجيهة فخضها وكتبكي حانية راسها..شافت شكلها..صغر سنها..ضعف جسمها..ما يمكنش ولدها يديرها ما قادراش ثيق..ولدها صغير اه مزال يله كمل العشرين ومزالة المراهقة لاعبة عليه..ولكن ماشي حتا لدرجة يغتاصب بنت فديك السن..نزلات دمعة من عينيها وبلا ما تحس ناضت وقفات على غفلة جامعة فمها بحدة وشافت فيه هو لي حاني راسو بغضب وخذلان وهزات يديها حتااااا هزاتها ونزلات عليه بطرشة حتا دار حنكو وبقى هكاك مزير على فكو وما دارش حيث عارف راسو يستاهل..
رؤيا:دوزتلك كلشي..وندوزلك كلشيييي..الاااااا هادي..سمعتي الاااا هااااادي..كنقسملك بالله وكنت بصح قستيها حتا غنتبرى منك هاد المرة..وما نتينا ولدي ما يانا يماااااك..وهاد الكبدة لي مخلياني نسمحلك على فعااايلك انقلع باباها من الجذر..ماااشي ولدي يااااانا لي يغتااصب بنت وصغيييرة من فووووق..ماااااشي ولدي سمعتييييي!!
براء:(زير على فمو)نستاااهل لي درتيها فيا..حيث الا كنت بصح درتها انا وما انسمحش لراسي..وأنا جيت عندك حيث نتي لي اتخرجيني من هاد الشك..(شد راسو بين يديه)والا كنت درتها بصح قتليني الواليدة..قتليني وما تخليش حمار بحالي يعيش..(صوتو تنغنغ شاد البكية)قتليني الواليدة...
شافت فيه رؤيا مطولا وحابسة دمعتها بزز..مجرد فكرة أن ولدها هي يكون غلط غلطة بحال هادي خلاتها تحماق..جمعات النفس وهزات راسها وقصحات فيه الشوفة وهزات صبعها عليه..
رؤيا:اتجلس هناااا وما تحركشي..انمشي نتأكد وانجي والا كنت بصح عملتيها..غير ما تبقاشي توريني وجهك
طلعاتو وهبطاتو ودارت مخلياه جالس حاني راسو وشاد شعرو بين قبضات يديه...شافت فتالاسين بشفقة وقربات عندها ببطء كتشوف فحالتها وكيفاش كتبكي والبولة لي طالقة تحت منها...زادت قربات منها حتا وقفات عند راسها...وتالاسين غير حسات بيها رجعات لور مكمشة يديها عندها وشعرها طايح على وجهها كتخبى وشفايفها كيرجفو...زادت رؤيا تقصحات من جيهتها كثر وجلسات حداها وهزات يديها حطاتها على راسها وهي تهرب راسها منها..
رؤيا:(بصوت حنين حابسة لبكية)ما تخافشي..ما تخافشي مني ما انأديكشي
بقات تالاسين على نفس الوضع ما شافتش حتا فيها حتا حسات بيدين رؤيا كيدوزو ببطء فوق راسها...فكروها لمساتها لحنينة بمها وشهقات بصوت مسموع...ورؤيا عيات تحبس لبكية وطلقاتها بلا هواها وجرات عندها تالاسين خشاتها فصدرها كتطبطب على راسها..
رؤيا:اهئ اهئ ما تخافشي احبيبة ما تخافشي..
زيرات عليها كثر كتسكتها ورجعات بعداتها عليها وحطات يديها على حنوكها كتمسحلها فدموعها وتالاسين غير كتشوف فيها باستغراب ورموش عينيها تلاصقو بالدموع..
رؤيا:انمشيو يانا وياك نواحد لموطع واخة!..ما تخافشي غير انشوفك باش مريضة وصافي(حاولات تبتاسملها باش تخليها ترتاح)...يانا هي خالتو الطبيبة واخة هههه
براء:(نطق بصوت خافت وهو حاني راسو)محال واش كتفهمك...(هز راسو فيها)ما كتهضرش بالدارجة عادية...هضرتها يمكن دالشلوح
خنزرات فيه رؤيا وهو يرجع يدور راسو مسرح عينو فالسرجم...
شافت فيها رؤيا ووقفات مداتلها يديها بابتسامتها المعهودة لي كتخليك ترتحيلها بلا ما تشعري وبصوت حنين قالتلها..
رؤيا:ارى يديك..وأجي معايا!!
شافت فيها تالاسين وشافت فبراء ورجعات شافت فيديها لي ممدوة..وبعد تردد مداتلها يديها وحطاتها فيد رؤيا لي زيرات عليها ووقفاتها وتمات خارجة بيها ولوخرى حانية راسها وشادة فطرف التيشورط وحشمانة من راسها حيث بايلة فحوايجها..دارت رؤيا شافت فبراء..
رؤيا:هانا وصيتك..نرجع ما نجبركشي ما تلوم عي راسك
ما دارش شاف فيها حتا سمع الباب تسدات وسد عينيه كيتمتم فخاطرو وحط يديه بزوج شابكهم مور عنقو وداهم وجابهم كيحك بيهم راسو وكيسوط..
شدات فيها رؤيا غادة بيها فلكولوار وساهية والموظفين دالمصحة كيلقيو عليها التحية ولكن هي كاع ما كانت كتجاوبهم كعادتها.. حيث بالها اصلا ماشي معاها وهادشي لي خلاهم يستغربو وعرفوها عندها شي حاجة...حيث هي كمديرة المصحة معوداهم ديما الابتسامة...دخلات بيها لإحدى الغرف لي كانت فيها دكتورة جالسة مور البيرو ديالها....غير شافتها وهي توقف كترحب بيها..
الدكتورة:مدام رؤيا..مرحبا زارتنا البركة هههه
رؤيا:(بابتسامة بزز باش رسماتها)هه الله يبارك فيك
الدكتورة:بغيتيني فشي حاجة!
شافت فتالاسين وحطات يديها على كتفها وجراتها عندها معنقاها بالجنب..
رؤيا:اححم..انطلبك عافاك..تخويلي لا شومبر غير واحد 30 دقيقة هايداك..محتاجة شي حاجة!
الدكتورة:(باستغراب)ياك لباس..علاش بغيتيها!
رؤيا:بغيتها على شي حاجة شخصية..وكنظن ما ايكون عندك حتا شي اعتراض ياك!
الدكتورة:(شافت فتالاسين ورجعات شافت فرؤيا) اوك هانا انخليك..حتا يانا كنت باغة شي وراق من عند موسيو الحسني نمشي نجيبوم..خودي راحتك
رؤيا:شكرا ليك
الدكتورة:العفو
خرجات الدكتورة وسدات موراها الباب وتقدمات رؤيا مزيدة تالاسين معاها..هزات ستار ابيض وبان بياص ابيض بزوج بزوج حدايد كيتحطو فيه الرجلين وتلفازة فوق منو ومعدات طبية..حنات عند تالاسين وشداتها من خصرها وعلاتها جلساتها فوق الباياص وهي غير حانية راسها...شافت فيها رؤيا لحسرة وما حساتش براسها الا وهي كطبع بوسة على حنكها الشيء لي صدم تالاسين وخلاها غير كتشوف...شافت فيها رؤيا بابتسامة وبعدات وقفات جيهة السرجم دوزات الريدو ورجعات عند تالاسين..
رؤيا:هانتينا سمعني..نتينا اتكى على طهرك ويانا أنشوف واش عندك شي حاجة واخة!!
رؤيا:ما تخافيش..غير انشوفلك عااافاك ما تخافيش مني ما انآديكش غير ارتاحي
كانت كتهضر بطريقة صادقة خلات تالاسين ترتاح لكلامها واخة ما فهماتوش وطلقات من السروال لي كان فازك خلاتها تجرولها وجرات معاه الشورط..
جراتلها حوايجها وبمجرد ما هبطاتهم على فخاضها خرجات عينيها بصدمة...كان فخضها مقيوس بالدم لي يبس عليه وجرحة عميقة كحلة بقوة لعشوب لي تخلطو فيها والدم لي كل مرة تعقر ويسيل منها...دايرة بلحمورية وخلات مكانها يتنفخ وفحال الا باغي يزراق...خنازتلها الجرحة حيث ما تلقاتش الرعاية الطبية اللازمة حيث جرحة بحالها كان خاصها ضروري لغراز..
حطات يديها كتقلبلها مكان بدهشة وهي تجر رجليها عندها مقصحة...رجعات رؤيا طمناتها وحطات يديها ببطء كتفحصو...
رؤيا:شني هادشي..اواعدي شكون عمل فيك هادشي!
تالاسين:!!!!
رؤيا:اربيييييي على ضربة..احححح عليك ابنيتي
خلاتها رؤيا فاتحة رجليها وتقدمات كتهز اللوازم لي اتحتاج باش تعالجلها الجرح وجرات الكرسي قرباتو كثر وجلسات تحت منها وهي فاتحة رجليها وكتعالجلها الجرحة وتغرزهالها من بعد ما ضرباتلها البنج...
سالاتلها وضمداتلها الجرحة من بعد ما نقاتها من الدم وشافت فيها هي لي مدورة وجهها للجنب حشمانة تشوف فيها...تنهدات وغمضات عينيها وخذات نفس عميق وهزات اللوازم لي خاصها..سرطات ريقها وسمات الله وهي كطلبو ما يكونش داكشي لي شاكين فيه بصح...وبعد وهلة من الخوف من داكشي لي تقدر تشوف خشات راسها بين رجليها كتقلبها واش تقاست ولا لا...
هي كتقلبها وقلبها كيضرب مخلوعة وزادت كملات فاش لقاتها مجروحة شوية...عينيها خرجو من بلاصتهم...قلبتها كثر وكثر وهي تلقاها مجروحة جرحات قدام بمدة..قدرات أنها تكون قبل سيمانة او كثر ولكن ماشي جروح ديال ليلة وحدة...قلبها ضرها وتجمعولها الدموع فعينيها..بعدات يديها مصدومة حيث عرفاتها تعرضات لشي محاولة اغتصاب...واخة هي باقة بنت وإنما شي واحد حاول...بلحق شكون وكيفاش ما نعرف!!!...زعما يكون صاحب براء لي كانت عندو فالدار!!...وهي آش جابها عندو لدار أصلا!!!...حاجة وحدة لي خلاتها ترتاح هي أن احتمالية أن براء لي يكون دارها لغاتها...ولكن قلبها ما هناهاش على تالاسين..
رؤيا:(حابسة لبكية)الله يا بنتي وشني داز عليك باش وصلتي لهاد الحالة!!! يعلم الله شكون هاد ولد الكلبة لي حط يدو عليك!! افففففف لا حول ولا قوة الا بالله...الله ياخذ الحق الله يعطيه موصيبة ولد لحرام
شافت فيها تالاسين ببلاهة..بحال الا كتقول مال هادي....قربات رؤيا هزات ايزار مطوي فجنب الباياص رماتو عليها غطاتها وهي كتحسر عليها...مسحات دموعها وخلاتها متكية وجبدات تيلي ديالها من جيب الطابلية..دوزات نمرة ma premier joie ...سرطات ريقها وجمعات النفس كتحمد الله حيث ولدها ما قسهاش وحيث ربي نجاها من هذا لي كان باغي يتعدا عليها ورسمات ملامح الجدية على وجهها..
براء:(بلهفة)الواليدة..ياك لباس..امدرا!
رؤيا:مشي جيبلا شي حوايج تلبسوم واجي
براء:وا هضري الواليدة بعدااا..واش..
رؤيا:(بحدة)هضرت معاك!!!!
قطعات عليه ورجعات تيلي لجيب ودارت كتشوف مرة اخرى فتالاسين...قربات جلسات حداها كدوز يديها على راسها قلبها ضارها عليها وعلى حالتها...ولوخرا غير ساقرة وتشوف فيها وفخضها لي كان كيوجعها تكالما عليها...
داز الوقت ورؤيا غير جالسة وكتشوف فتالا...وبالها خدام كيفكر شكون تكون وفين هما واليديها وشنو جابها لدار صاحب براء...ومنين جاتها ديك الجرحة ...وشكون هذا لي بغى يتعدى عليها...شلاااا أسئلة طاحو عليها وما لقاتلهم جواب وحتا البنت لي تجاوبها ما كتفهمهاش...وما فاقت من سهوتها غير على صوت تيلي ديلها وهزاتو جاوبات..
رؤيا:جبتيهم!
براء:اه..فينك!
رؤيا:اجي نلاشومبر 208
قطعات عليه وتنهدات..تبسمات فوجهها وناضت وقفات خرجات واقفة كتسناه حدا الباب مخنزرة..حتا بانلها جاي فلكولوار كيقلب غير بانتلو وهو يتم جاي عندها كيجري ووقف عليها عينيه خارجين..
براء:امدرا الواليدة..عافاك لما ريحي بالي راه انحماق..هضري الواليدة..شنو واش بصح درتها!
رؤيا:(نترات الصاك من يدو وشافت فيه بغضب)هادشي كان خاصك تفكر فيه فاش يله حطيتي رجليك فالبيران أولد كرشي..ودابا رجع فاين كنت حتا نجي عندك
دارت دخلات وزدحات الباب فوجهو وخلاتو هو واقف اياكل جنابو وعقلو ايخرج..ضرب رجليه مع الحيط بقوة حتا حس بصباعة تطواو فالصبردينة لي لابس...مسح على جبهتو وطلع الشعر عليها...ومن بعد ما خذا نفس عميق تهز فيه صدرو وتحط..ودار بحالو راجع لبيرو دمو...حس بهم الدنيا نزل على كتافو فهاد اللحظة...وتمشى عاقد حجبانو لكوحل وعينيه لكوحل باين فيهم كمية الأسى لي هازو فقلبو...وعرقو نازل مع بشرتو الحنطية حتا كتحبسو اللحية دوجهو لي ماشي قوية بزاف...وكل شوية يحك فشعرو ويرجعو لور وهو معصب غير مع شراوطو...
وصل للبيرو ودخل من بعد ما زدح بابو حتا تسمع صدى صوتها فلكولوار وقفز الناس لي تما..ورجع جلس فالكرسي كيفيبري برجليه وكيزفر وكيحك فجبهتو بحركات دائرية كيحاول يتذكر أحداث ليلة لبارحة ولكن بدون جدوى...
طال عليه الوقت بزاااف حتا سمع الباب تحل وهو راسو بالزربة...بانتلو رؤيا داخلة عاقدة حجبانها وباينة فيها معصبة وهبط عينيه شاف يديها فيد تالاسين لي لابسة سروال ابيض مع تيشورط كري وصباردين حمراء..كان داكشي لي عطاتو البنت لي شرى من عندها..بانت وحدة اخرى ومن بعد ما جمعاتلها رؤيا شعرها وقداتلها حالتها..كانت كأنها رجعات فيها الروح..
ناض قافز ووقف عليهم كيسرط ريقو
براء:الواليدة بلا ما تحرقيلي دمي كثر..لي فيا كافيني..الله يخليلك صحيحتك الا ما قوليلي شكاين..واش اه او لا!!
رؤيا:(خنزرات فيه ساكتة)
براء:الوااليدة..نبوسلك يدك لما هضري..واش قستها..قولي..قستها ياك!!..
شاف فيها كيتسناها تجاوبو وهي ساكتة..وبغضب زير على فمو وهز يديه لفوق حاط راسو بينهم..
براء:قستها ياك!..(ضرب راسو وبعد عليهم كيمشي ويجي وكيهضر بين سنانو معصب)حمااااااار..انا حمااااار حمااااار..شنو درت شنووو..حماااااار!!
رؤيا:اه حمااار..وكبيييرهم من لفوق..
شاف فيها بحزن وعينيه تغرغلولو بالدموع..ما حملش راسو وحس براسو واحد مسخ ما يسواش..وجهد تسالا وطاح على وقفتو جا جالس فوق الفوطوي وحط وجهو بين يديها مدرق وجهو كان كأنه باغي يبكي..هادي هي لي عمرو يسمح لراسو عليها ابدا فحياتو ويفضل يموت على انه يعيش بذنب بحال هذا فرقبتو..اما تالاسين فكانت بحال الاطرش في الزفة غير حالة فمها فيه وفحالتو ورؤيا كتشوف فولدها وهازة راسها بغضب حيث باغة تربيه..
رؤيا:باش حسيتي هااا..موسخ.! حمار!!..ما تسواشي ياك!! واااااه بصح نتييينا حماااااار..ومووسخ وما تسواااااشي.. من الساااعة لي حطيتي فيها رجليك فبلاصة موسخة جامعة فيها غير لحرااام..ومن الساعة فاش حطيتي فدقمك داك السم ونتينا عااارفو حراااام.. شفتيه فاين كيوصل شفتيه!..ما بقيتيشي عاقل حتا على راسك شني عملت..كنت تقدر تقتل ودفن ونتينا ما حاسشي براسك..شفتي اااخرة لحرام فين كيوصل..!!!
براء:(جاوبها وهو مزال حاني راسو وحاطو بين يديه) واش كضحكي عليا الواليدة!! (هز راسو فيها) واش أنا كنقولك ما عاقلش حتاااا على راسي كتسوليني عليها وعلى صاحبي! (رجع حنى راسو) دابا انا شنو اندير شنووو..شنو اندير فهاد المصيبة..عمري نسمح لراسي..عمري !
رؤيا:هاد المصيبة نتينا حطيتي راسك فيها
براء:الصمت
رؤيا:(شافت فيه بتشكيك)دابا قولي..وبلاااا كذوب..الدار واش دار صاحبك ولا صاحبتك!
براء:(هز راسو فيها) هادشي ما شاطنك الواليدة!! واش صاحبي ولا صاحبتي!! واش ما كتشوفيش على مصيبة انا فيها!
رؤيا:جاوبني وبلا قوة تفلسيف بزاف..مزال عندك لوجه لي يتجبه وا باز..دابا قول صاحبتك ياك!!
براء:الصمت
رؤيا:وا هضر شعندك!! صاحبتك باااااينة.. واحد سكران ومنغاااام فاين ايمشي..طبعا عند شي وحدة طامع يكمل ليلتو معاها ياك!!
هز براء راسو فيها ما عاجبوش الحال ودور وجهو كيسوط ويمسح وجهو وقلبو باغي يزهق..
رؤيا:شفتييييي..عرفتهااا..قالك صاحبي! دابا خاااايلاه واش ما حشمتي ما رمشتي.. قدامنا وقدام باك الصلاة والعبادة وقال الله قال الرسول... غير تشوفو غبر ولا سافر وتجبر شي فجيوة تمشي لبيران تضربلي الطاسة وباش تكملها وتجملها.. تزيدلي بنات ليل!! ما كفاكشي شراب زدتيلي لبنات! كون زيالي تكبر وتخرجلي لحرام كون نهار طهارتك قلتلهم يدوزولك عليه من جذر!
براء:(شاف فيها)لوااااليدة!
رؤيا:شني شني!! كذبت عليك! لاش يصلاح الا كان ايجرك غير لحرام.. اتخرج على راسك وعلى صحتك وعلى حياتك.. (نعتات لتالا) ها آخرة السكرة ولبنات فاين كتوصل..
براء:(حط يدو على وذنيه)عافاك الواليدة صافي.. صافي بركة.. ندمت وما نفعاتني ندامة.. ندمت ندمت ندمت..
عض على سنانو حابس البكية..وهي كتشوف فيه ساكتة ومخلياه جالس باغي يحماق..
رؤيا:كنتمنى هادي تعملك لعقل وتجمع راسك حيث الا بقيتي متبع طريق لحرام..شحال ما طولتي تجيبها فراسك..(سكتات).. مهم دابا حمد الله..ربي جا من جيهتك ومن جيهة هاد لبنيتة وحفظها..(بسخرية) غير رتاح اوليدي ما قستيهاشي..مزال ربي صاينها من البشر بحالك
هز راسو فيها مبهوض وعينيه خارجين من بعد ما كان حانيه..وبعدم تصديق عقد حجبانو وبانت ابتسامة خفيفة مترددة على وجهو..
براء:كيفاش..واش زعما..واش انا..هه ما قستهاش الواليدة!!!..واش لي سمعتو بصح.. ما قستهاش..ياك ما قصتهاش ههه
رؤيا:(كتشوف فيه بطرف عينها)ما قستيهاشي..الحمد لله
براء:وااااااااااااااااو
ناض وقف ونقز فبلاصتو بقوة الفرحة..وبلا ما يشعر طار على مو بتعنيقة حتا كان ايطيحها وزير عليها كيضحك..
براء:ما قستهاااش ههه..ما قستهاش الواليدة ههه انا ما قستهااااش
براء:(باسها فحنكها بقوة)وااااا ما قستهاااش ههه ولدك ما قسهااش
حنى شاف فتالاسين بفرحة..بغى يطير وبلا ما يشعر حنا هزها وطلعها عندو حتا غوتات مخلوعة وتهزو رجليها كيضربو عند ركبتو.. وعنقها بقوة كيدور بيها فرحااااان وغير كيضحك..
براء:ههههه ما قستكش ههه اناااا ما قستكش هههههه
هو كيدور بيها وهي كتفركل بين يديه وعينيها خارجين وجابلها الدوخة وهو كيدور ورؤيا كتحاول توقفو وتفكها من يدو ساعة هو ما كاينش فداك العالم مرفوع والفرحة ما قداه..
رؤيا:رخي منها الملعووووق رخييي..نزل العايلة عليك
الفرحة زادت خلاتو يطبع قبلات متتالية على خذ تالاسين الشيء لي خلاها تستنكر ما حملاش راسها وهزات يديها وبظفارها لي طوالو ولي جامعين لوسخ...حيث شحال هادي ما قطعاتهم حيث مولفة مها لي كتقطعهملها...وغرزاتهم فرقبتو بقوة وبغل وغضب وجرات بحدة حتا سال الدم وبقى فصباعها..وهو حس كأن سكين جرحاتو فعنقو وبعدها عليه مقصح حطها فالارض وهي غير نزلها لعبو بيها رجليها حيث داخت..حط يدو على رقبتو مخيب سيفتو...وشاف فيديه لقى الدم فيها
براء:اححححح..قمشاتني اووووف
شافت فيه رؤيا مخيبة سيفتها كانها هي لي مقصحة ولكن ما بغاتش تبينلو ونطقات بسخرية..
رؤيا:عبرات عليك..انا ما كرهتاشي كون خشاتوم فgراجمك(حلاقمك) طرطقاتهملك وخلات يماك..
شاف براء فتالاسين لي كتشوف فيه عاقدة حجبانها ومعصبة وواقفة قدامو فوضعية دفاع وهازة راسها فيه
براء:اححح قصحاتني والله..هههه بلحق مهم ما قستهاااش ههه الحمد لله..دابا عاد ارتاحيت..
بقى هو واقف كيحك فالقمشة وتالاسين قدامو مخنزرة فيه ورؤيا دارت جلسات فبيروها وحطات جبهتها بين يديها حانية راسها..حتا حسات بيه وقف حداها وقرب راسها لعندو باسو بقوة..
براء:لهلا يخطيك عليا الواليدة وصافي
رؤيا:(دفعاتو)مشي بعد مني..ما تقربلي ما نقربلك السكايري ياخور
زيرلها راسها كيتعافر يبوسها من حنكها وهي كتجابد معاه تبعدو مخيبة سيفتها
رؤيا:واااا بععععد مني
براء:هههه أ والله حتا نبوس ههه
رؤيا:وا فرقني عليك..الدقم لي يتحط فيه لحرام ما يبوسنيشي
دار براء مخلوع كيحاول يقبط يديها..بزوجهم تفاجئو من ردة فعلها غير الطبيعية والهستيرية بلش كتغوت وضرب فيه..وما حدو كيبغي يشدلها يديها وهي عاد ما كتزيد تمجنن كثر وكثر..
تالاسين: رزميي أهئ أهئ زميي ايي أرتgرت أهئ أيي أرتgرت أيي أرتgرت...اهووووو.. (طلققققنيييي اهئ اهئ طلقنيييي ما تقيسنييييش اهئ اهئ ما تقيسش ما تقيسش..ولاااااااااااااا)
دورها ملصق ظهرها مع كرشو وخالف يديها قدامها كيزير عليها..وهي كتهز حتا تهز وترجع طيحلو فالارض..رجع فيها جهد عشرة..وكتغوت ربي لي خلقها الشيء لي خلاهم يتصدمو ورؤيا استغربات لحالتها..ما عرفوش مالها وما عرفوش بلي داك الموقف ديال براء وهو باغي يبوس مو بزز فكراتها بذكريات قااااصحة..تفكرات راسها فاش كانت تحت الشيخ وهو فوق منها كينهش فيها..وما حد براء كيزيد يبغي يحكم يديها ما حدها كتزيد تصعر وهي بحال الا ترفعات وحاسة بنفس الشيء كيتكرر معاها..فتح الباب ودخلو بعض الاطباء والممرضين كيتفحصو شنو كاين مخلوعين..غير شافتهم رؤيا وهي تدارك راسها ذغيا
حماقتلهم بلبكى ونحيط ولغوات..وبراء كياكل فالدقات هي وفين جات..عاقد حجبانو ومزير على فمو وجامعها عندو كيتعافر معاها..ضرباتو ضربة براسها لفمو حتا عض على لسانو وحس بطعم الدم ففمو
براء:اححح..وا الله ينعل لللل..تفووووو
دخل أحد الممرضين كيجري كيقاد فالشوكة ويضربها بصبعو وهي مفرشة فالارض كتفرطط..حتا لباياص لي تحط عليه ما كاينش فالبيرو درؤيا حيث هي فقط مديرة فالمستشفى..وبصعوووبة كبيرة قدر يضربلها الشوكة فيديها لي شادهالها براء ومنعسها فحجرو وهي طالقة رجليها فالارض كتفركل بيهم..بعدو عليها وبقى غير براء شادها بين يديه وهي كتبكي وتغوت طلقني طلقني..وهما ما فاهمينها حتا شكتقول..وبشوية بشوية بدا غواتها كيخف وعينيها لي عامرين دموع كيتعسلو وكتشهق بشوية حتا غفااات بين يدين براء لي باقي مبهوض فيها..
إرحموني الجزء الثالث
محتوى القصة
التنقل بين الأجزاء