خرج حتا هو وخلاها ناعسة..وتم غادي كيتمشى بشوية على عكس فاش كان داخل..دابا كيتمشى بهدوء وباين على وجهو مكالمي..وصل حدا سيارتو وطلع فبلاصتو وتنهد..وخشى يدو وهز نصو شوية باش يقدر جبد تيلي من جيبو ودوز النمرة دحياة..صونا لوقت لا بأس به عاد جاوباتو مقلوبة بالنعاس..
براء:الو
حياة:(صوتها ناعس)شكوووون!
براء:توكضي معايا..هذا انا براء
بعدات حياة تيلي على وذنيها شافت الاسم من بين رموشها وحلات عينيها وتجلسات..
حياة:براء..صافا..بيخير..ياك لباس..شي حاجة!
براء:أنسولك!
حياة:اه مرحبا..سول شني!
براء:البنت لي كانت عندك
حياة:شني!!..شمن بنت!
براء:حياة..راه قلتلك توكضي
حياة:اااااه البنت..ولكن مناين عرفتي..(بلهفة)واش جيتي لبارح..لا ما تقولاشي
براء:كيفاش وعلاش ماشي وقتو..بغيت غير نسولك منين كتعرفيها!
حياة:علاش..انا راه خليتها البارح هنا جيت ما جبرتاشي..واش معاك!
براء:اه
حياة:علاش!
براء:شنو قلنا
حياة:اوك اوك..البنت جبرتها حدا باب العمارة وحالتها كانت ماهياش وبقات فيا وطلعتها عندي
براء:وشنو اخر!
حياة:وصافي..ااااه عاد تفكرت..كانت باغية تمشي لدار الايتام كانت كتسقسي فين جات
براء:اممم..اوك..شكرا يله بسلامة
حياة:اتجي اليوم!
براء:لا..محال..يله تهلاي
قطع عليها ورمى تيلي حداه فالكوسان وديمارى الاوطو وخرج فحالو..كيضرب أخماس فأسداس وحال هاد البنت شطنو وخلاه يخمم..
وصلات لعشية..وتم داخل عاود مقاد حالتو بقميجة شيبي وشورط دجين باج فونصي حد الركبة وصبردينة بيضة..شعرو فازك مرجعو لور وعطرو خفيف..حتا دخل عليها وهي حانية كتخدم وطل عليها مور الباب..
براء:الواليدة!
هزات راسها فيه وعقدات حجبانها وحطات يديها تحت ذقنها..
رؤيا:هاد الواليدة كيجي موراها غير لمصايب..شكاين عاود!
براء:(سد الباب كيضحك)ياك..هذا هو ولدك حبيبك
رؤيا:انا ما ولداشي سكايرية
براء:ففف وصااااافي الواليدة
رؤيا:إلا صفى خوضو..(شاف فيها بطرف عين)دابا شعندك..شني باغي..علاش ماجي عاود!!!
براء:كيبقات ديك البنت
رؤيا:وعلاش كتسقسي!
براء:يهديك الله الواليدة
رؤيا:فففف باسل..مشيت قبايلة طللت عليها كانت مزالة ناعسة..دابا تكون فاقت(شافت فالساعة)اوووف تعطلت..باك ايجي ما يجبرنيشي فالدار ايعمل حالة
براء:(قلب عينو وتنهد ورجع شاف فيها) مهم دابا قالتلي بلي كانت كتقلب على دار الايتام..باينة البنت ما عندها حد لافين تمشي لافين تجي
رؤيا:الله أكبر..الحبييييييبة ديالي ومزالة صغيرة..و الأمان عليها ما تستاهلشي الزنقة..لا حول ولا قوة الا بالله
براء:وشني اتديري دابا!
رؤيا:زيد نشوفوها ويكون خير
هزات صاكها وزاد قدامها فتحلها الباب مرجات وسد موراها..وتم غادي تابعها حتا وصلو لباب غرفتها..دفعات الباب رؤيا وشافت فمكانها ما لقاتهاش..
رؤيا:هاء فاين هيا..فاين البنت!
براء:كيفاش فين هي..ياك كانت هنا!!
دخلات رؤيا كتقلب فالحمام ما لقات فيه حد وخرجات عندو مبهوضة..
رؤيا:البنت ما كيناشي..فاين مشات!!!
براء:ما يمكنش فين عندها تمشي
خرجات رؤيا كتخلف بسرعة حتا وقفات احدى الممرضات كتسولها عليها ولي هي براسها ما عرفاتش فين هي..تفرق براء عليها كيقلب بوحدو ورؤبا بوحدها وكيقلبو فالجوايه لي تكون فيهم ويسقسيو ولكن بدون فائدة ورجعو تلاقاو عند باب المشفى
رؤيا:جبرتيها!
براء:(سرط ريقو)لا والو
رؤيا:فاين اتكون مشات يا ربي
هما مزالين واقفين كيهضرو حتا تمو مجموعة ديال المسعفين داخلين دافعين بياص وكيغوتو باش يبعدولهوم من الطريق وهما خرجو عينيهم مبهوضين بزوج..
حلو عينيهم بصدمة..كان باياص فيه راجل كيتوجع..مجروح من جبهتو وعنقو ملفوف بكالة ديال العنق وجامع يدو عندو كيتألم..وموراه تماما كانت تالاسين فباياص اخر ساكتة ومزيرة عندها قطة صغيرة بيضاء..حنكها محرود ودراعها حتا هما..وسروالها لبيض رجع مبهدل..وهي شانقة على قطة فوق صدرها ما بغاتش طلقها..جرات رؤيا معرضالهم وهما دافعينها
رؤيا:شعندها..شني وقع!
المسعف:اكسيدون..على ما فهمنا البنت شافت القطة وسط الطريق وبغات تعتقها ومول الاوطو كان جاي بالزربة حتا خرجات قدامو..هو ضرب فالطريطوار وهي فاش هربات جات طايحة على وجهها
ما فهماتهاش رؤيا واكتفات أنها تبتاسم وهي هازة لقطة الصغيرة بين يديها..وخرجات من الغرفة لقات براء واقف فالباب..
براء:شنو عندها!!
رؤيا:ماعرفت..عاد ايشوفو..واخة ما كنضنش عندها شي حاجة خطيرة..غير شي جرحات دغيا يبراو
براء:(شاف فالقطة)مكلخة..كانت اتقتل راسها على قطة
رؤيا:ماشي مكلخة..عندها قلب حنين
براء:ايوا ها محنتها فين كانت أتوصلها..رمات راسها لموت على قبل قطة
رؤيا:البنت صغيرة ما كتعرفش(شافت فالساعة)..بفففف انتعطل
براء:ههه هاد النهار الواليد يطلقك
رؤيا:(ضرباتو لصدرو)بزاف على حسك..نوض مشي فرقني عليك هاد النهار
براء:غير سيري انا نبقى نشوف شنو ايقولولي
رؤيا:لا أنتسنى حتا نديها معايا
براء:انديوها للدار!!
رؤيا:اه..البنت قلتي يتيمة..وكي كتشوف ما كتفهم لي كيهضر معاها ما حنا كنفهموها..وحالتها راك شفتيها قبايلة..وزيد عليها دابا..البنت باينة ما كتعرف حتا حاجة ونخليها مرمية هنا..حتا نشوف حريرتها كيفاش وعاد ديك الساعة نشوفلها شي حل..اما دابا انديها معايا
براء:اه مزيان..والواليد
رؤيا:(كتدوز يديها على راس القطة وحانية راسها) شعندو الواليد!!
براء:شنو اتقوليلو ؟؟
رؤيا:(ببرود)انقولو لي كاين ولدك سكر وسحابو تكرفص على هاد البنت ودابا هي ما عندها فين تمشي وانخليوها معانا..عاااااادي
براء:من نيتك الواليدة !!
رؤيا:من كيتي أوليدي
براء:وا معاك بصح دابا
رؤيا:دابا زيالك الا ما قلتلوشي انا سكر ما ايعرفشي..تجبرو وصلاتو لخبار شلاه حطيتي فراقشك تما
براء:وا دابا السكرة خليها أبار..أنا وتبت من هادي من عاود..ولكن بلا ما تزيدي تكمليهالي معاه وتقوليلو عليها
رؤيا:اممم..وا باز زعما نتينا..تخاف ما تحشم
براء:شمن خوف..راه غير الواليد وكنحتارمو
رؤيا:لا باين العربون
براء:دابا شنو ؟؟
رؤيا:شنو لي شنو !
براء:الواليدة..كيعجبك تلعبيلي على أعصابي
رؤيا:(عوجات فمها)مشي دابا ويكون خير
براء:فين انمشي خليني حتا نمشيو كاملين
رؤيا:اوا سد دقمك ما تهضرنيشي الله يرحم يماك..مزال ما نسيت فعلتك
براء:(ضحك وجلس فكراسي الانتظار)ها هو الالة رؤيا ما تبقايلي غير على خاطرك الزاين دالعااالم هههه
رؤيا:(جلسات حداه)زلايلي ياخور
بقاو جالسين حتا تمو مخرجين تالاسين مرة اخرى وداوها لغرفة اخرى يضمضولها جروحها من بعد ما تأكدو بلي ما عندها حتا شي ردود..وقفات معاها وبراء حتا سلاولها حطولها بيندة صغيرة على حنكها واخرى فيديها وغير وقفات على رجليها مدات يديها للقطة خذاتها من عند رؤيا وشنقات عليها مرة اخرى..وهي غير ساكتة بحال الا صرفقتيها..تمو خارجين بيها..ركب براء فسيارتو وشدات فيها رؤيا باغة تركبها لور فالسيارة ديالها وهي تجر يديها عندها..
رؤيا:(عقدات حجبانها ما فاهماش)شكتقول هادي !! (تبسمات)شو احبيبة..ما تخافشي مني..(حطات يديها على حنكها)اتمشي معايا حسن ما تبقى فالزنقة..
رجعات خطوة لور وزيرات على ديك القطة لي معاها فالمحنة روحها اتزهق وهي شانقة عليها..شافت فيها رؤيا وحنات قرفصاء قدامها كتحاول توصلها شي كلمة ورجعات حطات يديها على حنكها..
رؤيا:سمعني..عارفاك دابا ما كتفهم والو مني..بلحق شو فعيني وثيق فيا ما انأديكشي وما انخلي حد يأديك..أتمشي معايا الا بقيتي هنا غير اتكرفص فالزناقي..واخة أحبيبة(باستها)... ثيق فيا
براء:(من السرجم دسيارتو)مزالين معطلين..وا مدام راه راجلك تلقايه قالب الدار عليك ونتي جالسة تحابيلي تما
رؤيا:وااااا مشي فحالك اللصقة..ديها فراسك..ياااااه على أشكال ولدت
مدات يديها لتالاسين لي زعمات وحطات يديها فيدها..طلعاتها جلساتها لور وركبات حتا هي وديمارات خارجة وتبعها براء حتا هو..
بعد مدة وقفو بزوج بيهم حدا باب حديدي أبيض كبير كلاكصونات رؤيا وتفتحلها الباب ودخلو بزوج بيهم وما وقفو حتا فاتو الجردة لمضوية ووصلو لفيلا ضخمة واخذة مساحة كبيرة..نزلو بزوج من سيارتهم ودارت رؤيا نزلات تالاسين لي غير كتشوف بعينيها..جراتها وزاد براء قدامها وتمو داخلين
وقف براء فاش وصل لإحدى الصالات البلديين..تبسم ولقى السلام
براء:سلااام عليكم..مساء الخير
تقدم وقرب من إمرأة مسنة كي لكميشة..ضعيفة وقصيرة جالسة فجنب السداري مغطية رجليها بليزار خفيف والمسبحة بين صباعها..شالها الابيض ملوي فوق راسها وهي بقميص شيبي..حنى على راسها باسولها وضحك
رقية:(نزلات عليه لراس)يغصبك..زعزعتيلي طبل وذني..ما كاينش لي صمكني ئدك
براء:ههههه
بعد عليها كيضحك وقرب لهنية لي جالسة حداها وحنى حتا هي باسلها راسها..حتا هي كبرات وبااان فيها لكبر وضعافت..ولابسة قميصها حتا هي وشالها وتبسمات فوجهو
هنية:يرضي عليك اولدي
براء:كيبقيتي مزيانة
هنية:الحمد لله..مزيانة
داز لإمرأة اخرى جالسة حداهم ببيجامة سروال وفوقاني ديالو..كبرات حتا هي وبان على وجهها التقدم في السن..ولكن مزالة شادة فراسها ومهلية فيه..واخة ما حطاش الماكياج كتبان زوينة ومأنتكة..وسلم عليها بلابيز حيث ما كتخليهش يبوسلها راسها باش ما تحسش راسها شرفات
براء:كيقيلتي صافا
زينب:(ابتسامة)صافا مون شيغي
براء:فين هو ميسيو ديالك ههه
زينب:ههه راه كيصلي
براء:اااه..الواليد جا!
زينب:قبااااايلة..ماماك لي تعطلات فين هي
براء:ها..(قاطعو صوت رؤيا)
رؤيا:سلام عليكم
هزو راسهم فيها باربعة بابتسامة وسرعان ما تبدلات ملامحهم لملامح استغراب..كيشوفو فديك البنت لي معاها
هنية:وعليكم السلام ابنتي
زينب:مسا الخير..تعطلتي؟
دخلات جارة تالا من يديها وكتسلم عليهم وتهضر
رؤيا:وي عارفة..خرجي شي شغال
جاها صوت رجولي غليظ من موراها: وشمن شغال هذا الالة!
تبسمات وهي مزالة كتسلم على زينب بلابيز..ودارت بشوية عليها وملامح الفرحة مرسومين على وجهها..كان لابس سروال ثوب رمادي مع سوميج بيضاء طاويلها لكمام..الوانو المفضلة..باين مزال ما بدل حوايج السفر عليه..حاط يديه فجيبو وكيطلع فيها ويهبط مطلع حاجبو..مزال محافظ على هيبتو لي غير ما زادت مع الشيب لي تسلل بين خصلات شعرو الاسود ولحيتو الكثيفة..ونظارات ديال الشوف سوداء دالرايبن فعينيه عطاتو جاذبية خاصة..حرك عينيه بينها وبين تالاسين وشاف فيها بتعجب ورجع قلب عينو جيهتها هي لي غير مبسمة فوجهو
رؤيا:جيتي
فراس:ايييه جيت ونتي ما جيتي
براء:الواليد
قرب تسالم هو وياه سلام رجالي باليدين وضربو بكتاف بعضهم وفراس طبطب على ظهرو بقوة
براء:على سلامتك
فراس:(ابتسامة جانبية)يسلماااااك اوليدي(غمزو)
بعد عليه براء كيحك فعنقو وهو فهم ديك وليدي لي قالو..حيث ما كيقولهالو غير فاش كيكون مزبلها معاه ورجع بعد عليه وجلس كيحك عنقو بتوتر
قربات منو رؤيا وهي مزالة شادة فتالاسين وتهزات على صباعها كتسلم عليه بلابيز وهو هاز راسو معصب منها وواخة هاكاك سلم عليها ببوسات حارين فلحنك
رؤيا:(ابتسامة)على سلامتك
فراس:الله يسلمك امدام..شهاد التعطيلة..منين وصلت هادي ثلاثة دالسوايع..هي هادي لي gلتي اتلقاني كنتسناك همم!
رؤيا:وراه ماشي لخاطري شعندك ههه
فراس:كضحكي!
تسمع صوت بعيد هابط من الدروج..كانت بنت مراهقة هابطة كتجري فالدروج..الضحكة مشرgالها فمها وباينة عليها الفرحة..شعرها بني مغلووووق مايل لسواد..حجبانها وعينيها كوحل وكبار فحال ديال مها ولي خذات منها شحال من حاجة..بشرتها بيضاء حنطية شوية..ووجهها بيضاوي مع فم صغير..بنت يله عندها 17 لسنة..مقبلة على الحياة بكل ما عندها..هابطة كتجري بسرعة فاتجاه باها لي عاطيها بظهرو ونقزات بكل جهدها حتا تعلقات فعنقو ودورات رجليها على ظهرو
بيسان:ههههه هاانتينا حصلتي..ما بغيتيشي تهزني
فراس:ههه نزلي القردة
بيسان:ولاااا..هربتيلي قبايلة دابا ما نزل حتا تجيب بيا دورة فالدار
فراس:(شدها من شعرها وهي فوق كتافو)نزلي راه انتف مك هههه
رؤيا:وا هاااتخصار لهضرة..شعندك مع يماها
بيسان:(عاد ردات البال لرؤيا)الواااليييدة ههه ما شفتكشي ههه
رؤيا:ايوا لي شاف حبابو نسى صحابو
جبدات بيسان يديها حتا وصلات لحنك مها لي كانت واقفة قريبة من فراس وضحكات
رؤيا:واخا..(شافت فبراء ورجعات شافت ففراس)اححم..هاد لبنية اليوم جابوها نلكلينيك..حيث كانت مضروبة فرجليها ايوا فاش داوينها وخليناها فشومبر ديالها ترتاح رجعت ما جبرتاشي فتشنا عليها حتا كنشوفوم مدخلينها فوق الباياص..بغات تعتق هاد القطة وكانت اضربها الاوطو غير ربي ستر..ومول الاوطو راه مضروب ومهرس وهي الحمد لله غير تجرحات
فراس/بيسان:همم..ومن بعد!
شاف فراس فبيسان بطرف عينو لقاها كتشوف فيه حتا هي وتبسم ابتسامة جانبية ورجع شاف فرؤيا..
رؤيا:ههه الله يستر..مهم فاين كنت..ااااه ايوا وعلى ما فهمنا البنت يتيمة وما عندها حد..وكانت كتفتش على دار الايتام..وما كتعرفشي تهضر هضرتنا..هضرتها غير دالشلوح..ويانا الصراحة فاش شفت حالتها وعاد مزالة صغيرة..ما طاوعنيشي قلبي نخليها وجبتا غير حتا نعرف قصتها ونشوف شني نعمل
فراس:(حك لحيتو)اممم..ايوا gلتي كتهضر بالشلحة..نتي باش فهمتيها وعرفتيها يتيمة..هممم!
رؤيا:(حلات فمها)هاااا..امم واحد الفرملية خدامة فلكلينيك كتهضر نفس اللهجة ديالا وفهماتا عليها..وهي لي ترجماتلي هضرتا
شاف فيها فراس لمدة بتشكيك وهي كدور فعينيها ودارت عند تالاسين كتلعب فشعرها
زينب:ايوا وشنو دابا..اتخليها معانا!
رؤيا:اه..غير هاد الفترة بعدا حتا نقررو شني نعملو!
هنية:اهاه ابنتي..ما فيها عيب خليها معانا..الدار واااسعة وعريضة تبارك الله ما عندها فاين ضيق علينا..ولبنية صغيرة وغزالة تبارك الله..الا بقات فالزنقة غير أيطمعو فيها ولاد لحرام
رؤيا:حتا يانا داكشي لي قلت..خفت عليها بوحدها من الزنايق
نقزات بيسان جلسات حداهم وتالاسين بينها وبين مها
بيسان:باغة تجيبيلي الشريكة اماما..غير قوليها قوليها..هادي هي ديالك اماما..هادي هي بنتك..باغة تجيبيلي لي تزاحمني
رؤيا:(جبداتلها حنوكها)وشكون هادي لي تزاحم بنتي شكوووون..حسبيها بحال صاحبتك واتجلس معاك وهي هاديك تونسك..شني ضهرلك ههه
بيسان:(طلعات حاجبها وعوجات فمها)اممم..اوك هههه..اصلا غير كنت كنضحك معاكم ههه انحسبها بحال ختي الصغيرة يانا كاااع ههه..شني اسمك ههه
حطات يديها على كتف تالاسين وهي تخلع ولصقات فرؤيا..
بيسان:اواعدي..شعندا هادي ضربها تريسينتي
رؤيا:غير ما موالفاشي احبيبة..راها مسكينة حالتها حالة..يعلم الله شني داز عليها حتا رجعات كتخاف هايدا..قبايلة بقات تغوت حتا ضربنالها شوكة ونعسات عاد تهدنات
رؤيا ما جاوبتهاش حيث مولفاها وحنات طلات على تالاسين ودوزات يديها على كفها المحرود وتبسمات وبكلمات وحركات حاولات تشرحلها بلي اتطلع مع بيسان تبدل حوايجها وتدوش..باستها فراسها وناضت وقفات شافت فبراء بطرف عين وطلعات بحالها..
وصلات حدا باب بيتهم ودخلات كتقلب عليه كان واقف عاطيها بالظهر مزول قميجتو وبقى غير بالسروال وكيجبد حوايجو..وقبل ما يدور قربات عندو بالزربة وخشات يديها تحت ذراعو معنقاه وحاطة راسها على ظهرو..
رؤيا:توحشتك توحشتك توحششششتك بزااااف
تسمع صوت ضحكتو وحط يدي على يديها لي مدوراها على صدرو وهزها قربها لفمو باسها وجرها منها وجابها وقفها قدامو مكاليها مع لبلاكار وحاط وجهها بين كفوفو
فراس:سيمانة بلا ما نشوفك..لعذاب والله
دورات يديها على كرشو كتبسم فوجهو وهو كيداعب وجهها..
رؤيا:ههه حتا نتينا توحشتيني!
فراس:وكثر منك(باس خذها بقوة وخذا نفس كيشم ريحتها)اخخخ عليك..كتشرفي وتعمري بلاصتك كثر فقلبي المصيبة
رؤيا:(ضرباتو لصدرو)الشارف هو نتينا بزاف عليك
فراس:هههه مالكي..ما عجباتكش..شارفة وغزالة فيها شي حاجة
رؤيا:ما شارفاشي..يله 46 عام
فراس:لا ما ماتش غير خرجو مصارنو هههه
رؤيا:(تنترات منو دايرة راسها معصبة)رخي مني..جيتي ولا جابوك
فراس:(جرها لصق ظهرها مع كرشو وحط حنكو على حنكها)هههه جابني هاد القلب البزوزة ديالي
زولات شالها وصباطها ودخلات للحمام بانلها من وسط الزاج
فراس:افففف الريحة الريحة ما تسديش الباب انتخنق هههههههه
رؤيا:(كتزول عليها)وموت نتينا كاع شكون داها فيك
ضحك عليها بصوت مرتفع تسمع صداه فالحمام وهي واقفة كتزول عليها ومرة مرة كتشم فجنابها دخلها الشك فراسها..
شداتلها بيسان فيديها مطلعاها وهي غير حانية الراس وقاجة ديك القطة..فوضات أمرها لله وخلاتو هو لي كيقرر مصيرها وشنو لي ايتسناها مور هادشي..تقبلات وجودها وسطهم حيث بالنسبة ليها اي مكان من غير دوار الشيخ هو جنة فوق الارض..واخة حياتها عمرها ما ترجع لحلاوتها فغياب واليديها لي ما كيفارقوش بالها..ولكن الوجع لي حساتو فقلبها وداكشي لي داز عليها خلاها توقع اي حاجة وأكيد الا صبرات على لي داز اتصبر على لي جاي
ما كانتش مهتمة تشوف فين هي..الفيلا كانت ضخمة اه..شحال من حاجة فيها عمرها شافتها هي اصلا..وديك لفخامة عمرها حضرات عليها..ولكن شكون داها فجاه الدنيا لي كتضحك فوجهك وتضربك فظهرك..لي عاش لي عاشتو ايبقى يتمنى غير خبز وجغيمة دلما وحصيرة وغطى وسقف يجمعو
دخلات هي وياها لبيتها وسدات الباب موراها وقرباتها جلسات فوق لفوطوي وبيسان غير كتشوف فيها وتبسم..جبداتلها حوايج من عندها وحاولات ما امكن تجبد اصغر حاجة عندها..ودخلات وجداتلها لحمام ودخلاتها تدوش..وأكيد ما فارقاتش ديك القطة لي دخلاتها خشاتها معاها فالماء حتا زكات وتشوك عليها زغبها ما حملاش الماء
ما زولات لا لفاصمة دفخضها ولا دوجهها ولا ديديها هكاك غسلات حالتها وناضت لبسات لبينوار لي عطاتها بيسان وخشات القطة فصدرها وخرجات..لقات بيسان ناعسة على كرشها كتلعب فالبيسي
بيسان:بصحتو..اجي ها هما لحوايج
بقات تالاسين واقفة فمكانها حدا باب الحمام..عرفاتها كيما قالتلها مها ما فهمتهاش وناضت هزات لحوايج ومداتهوملها..شداتهم منها ورجعات دخلات للحمام..تبعاتها بيسان باستغراب من صمتها وبرودها الغريب..هي بطبعها حركية بزاااف وبحال هاد الصمت ما كتحملوش..بعد دقائق خرجات تالاسين بشورط تحت الركبة وتيشورط ديالو جاها تحت نصها شعرها كان مزال فازك وشادة القطة بين يديها..غير شافتها بيسان وهي تنوض جراتها من يديها وجلساتها قبالة لمراية
بيسان:(ابتسامة)جلسي نشفلك شعرك
جابت سيشوار برونشاتو وصوباتو ناحيتها غير خدماتو وهي تالاسين تطلق زواكتها بغوتة مفزوعة من صوت السيشوار...وغواتها خلا القطة لي بين يديها حتا هي تغوت ونقزات هربانة كتزطم فلكوافوز وتفرطط مخلوعة وتطيح فالماكياج ولعطورة لي فوقو وبيسان بلا ما تشعر غوتات مع غواتهم بزوج وخرجو عينيها فداكشي لي تهرس ورمات السيشوار فالارض كتحاول تشد القطة لي ما بغاتش ترصى
هي كتجري موراها وتالاسين لاصقة فالحيط مخرجة عينيها والقطة تخلعات هربانة فالبيت من هنا لهنا وكل ساعة طيحلها حاجة تهرسهالها حتا شافتها قربات جيهة خزانة للجوائز ديالها لي واخذاهم فبطولات السباحة..وهي تغوت الشيء لي غيييير ما كيزيد يخلع لقطة كثر
بيسان:لاااااااااااااااااااااااااا
غمضات عينيها حتا سمعات شي حاجة جات فالارض تشخشخات وتالاسين نقزات تعرضات للقطة شداتها قبل ما تهرب عاود وزيراتها كتلعبلها فراسها باش تهدنها..وبيسان مزالة واقفة فبلاصتها مزيرة على عينيها..وبشوية بشوية حلات كل عين بوحدها..كتشوف بين رموشها..شافت زوج جوائز زاجهم مترش فالارض وهما يخرجو عينيها..وبعد صمت وهي كتحاول تقبل الصدمة..غوتاااات غوتة وحدة وقربات طايحة على ركابيها كتجمع فالزاج وتبكي
براء:ششش صافي اختي حبيبتي..صافي..مكتاب عليهم صافي بركة من لبكى
هو مزال كيسكت فيها حتا دخلات زينب كتشوف شكاين وتبعاتها رؤيا وفراس لي باين عليهم يله خرجو من لحمام وشعرهم فازك..ودخلو عليهم مخلوعين..اما بيسان غير شافت باها وهي تنوض كتجري وترمات فصدرو معنقاه وكتشهق وهي مصدوم ما فاهم والو وما عاجبوش الحال يشوفها كتبكي
هزات بيسان يديها جيهة تالا كتنعت جيهة القطة ولكن هما ضنوها كتقصد تالا
بيسان:هي!
نعتات جيهتها وخشات راسها فصدر باها كتبكي وتمسح فيه دموعها وهو حاط يدو على راسها وكيسكتها..
شافو كاملين فتالاسين ورجعو شافو فيها هي لي كتشهق ونطقات رؤيا..
رؤيا:اكيد ما عملاتاشي بلعاني احبيبة(قربات كدوز يديها على ظهرها)صافي مسحي دموعك
بيسان:شبرا الصعر اههئ اهئ يانا كنقولا وقف وقف وهي غير ما كتزيد تجري وتنقز اههئ اهئ هرساتلي كلشي اههئ ماكياجي..عطوراتي بلحق الجوائز دياااااالي اههئ اهئ الا هادوك اهئ اهئ
فراس:ششش وا بركة من لبكى كلشي كيتعوض ابنتي غير سكتي
بيسان:(كتشالي بيديها وتبكي)دابا شعندكم كوووولكوووم جيتو ضددي على قبلهااااا..وااااا هرساااتلي ديااااالي اعباد الله..أ والله ما تبقى فيها
شافت فالقطة كتغذذ وترمات جيهة تالاسين مادة يديها باغة تشنق على القطة..وبراء غير شافها هكاك سحابو بلي اتشنق على تالاسين وهو يجرها من يديها ردها موراه وهي مزالة شانقة على القطة..شاد تالا موراه بيد وكيبعد بيسان باليد لوخرا وكيدور فبلاصتو كيبعدها عليها وبيسان كدور معاه و كتماطى وتغوت باغة تشدها..
بيسان:أ رخيييييي..والله يااااا لمزغبة ديمااااها ما تبقى فييييها اهههئ اهئ..زغبة زغبة نتفها..رخي ابراء زول اههئ انهنننن
براء:واش حماقيتي
فراس:(جرها بقوة وهي مزالة كتجابد)بييييساااان..ترصاااااي
شافت فيه بيسان مخلوعة من الخلعة لي غوت..كلشي قطع الزي فاش سمعو الغوتة ديالو..وهو شادها من دراعها بزوج وموقفها قدامو وعينيه خارجين فيها معصب..وهي مصدومة فيه حيث عمرو غوت عليها بهاد الطريقة..
بيسان:(بصوت خافت)كتغوت عليا ابابا
فراس:حمدي الله ما ضربتكش..شهاد المستوى همممم..هادي هي تربيتي فيك..هاكة علمتك تهضري مع الناااس هاااا دوي يله..واخة تكون حتا دارتها بلعاني كاااااع تهضري عليها هاكة دوي..
رؤيا:ماشي حشومة عليك..كتعايريها بالزنقة..زعما هي كرهات
بيسان:واش من نيتكم..محاميين عليا على قبل قطة..شني قلت فيها يانا كاع..واش ماشي ماجة من الزنقة..ياك ما بنت دارهم ويانا ما فخباريشي!!!!
شافو فيها كاملين ورؤيا عيات حابسة الضحكة وطلقاتها فوجهها كتكركر وفراس حتا هو وجرها عندو من راسها عنقها وخشاها فصدرو..وبراء قلب وجهو كيضحك على لموقف هو وزينب..وطبعا تالاسين كيف الاطرش في الزفة لا هي لا قطتها..
فراس:ههه وا صافي ابنتي..انا نقولهم يصايبولك بحالهم فوووطوكوبي عليهم غير كوني هانية..الجائزة كتبقى غير شي حاجة رمزية..مهم نتي واخذة اللقب اولا
بيسان:حركات راسها كتغبن وتمسح دموعها
فراس:ايوا هكاك الله يرضي عليك..ومسحي دموعك ما نبغيش نشوفهم
عنقاتو من كرشو وحطات راسها على صدرو جايبة فشوشها عليه ومدلية شنايغها..
بيسان:واخة
زينب:شغانقولك ابنتي..بحالك بحال مك..كتموتو على تطياح لقلب
رؤيا:علاش شعندي يانا
زينب:(ضحكات)شعندك نتي..علاش نسيتي شعندك..نسيتي شحال من مرة طلعتيني انا ولحاجة رقية كنتجاراو فالدروج ولا نفكرك هااا!!
رؤيا:(كدور فعينيها)ههه ايوا عقل صغر
هما كيسكتوها وبراء مزال شاد فبيسان لي واقفة موراه حتا حس بيها كتجر يديها او بالاحرى كتنترها من بين يديه..ودار شاف فيها باستغراب وطلق منها..وغير طلق بعدات هي وزيرات على قطتها..شاف فيها ببرود ورجع قلب وجهو جيهة ختو لي عنقها باها مخرجها وزينب معاهم...
خرجو كلهم..وبقات غير رؤيا وتالا وبراء فالبيت..داز براء بشوية كيتخطى الزاج زول السيشوار من لبريز..وقربات رؤيا من تالا كضحك ولوخرا غير حانية راسها وحطات يديها على شعرها كتدوزها ببطء وضحك..
رؤيا:ههه اجي معايا ابنتي..اجي ههه
جراتها جلساتها فوق الناموسية ودارت عند براء..
رؤيا:براء..جيب معاك لبواط ديال دواء لي فلحمام
براء:شبغيتيها!
رؤيا:جيبها وماشي سوقك
شاف فيها باستغراب وداز حاضي لا يزطم على شي زاجة..دخل هز لبواطة وخرج مدهالها..
براء:قولي فاش بغيتيها..
رؤيا:(كتفتح لبواطة)ما كتشوفشي لفاصمة فزكات على لعايلة..خاصني نبدلالا
براء:اااه اوك..هانا نعيطلهم يجيو يجمعو هادشي
رؤيا:واخة
قرب للفيكس هزو وهضر مع لخدامات وهو عينيه فمو لي مجلسة تالا وكتداويها وعينيه فيها هي لي مستسلمة ومخلياها تحركها كيما بغات وهي فقط كترمش بعينيها فلقطة وتمرر يديها على راسها..حط السماعة ودخل يدو فجيبو وشاف فيهم وعقد حجبانو كيفكر..
براء:الواليدة!
رؤيا:امممم
براء:(قرب جلس حداها وهي عاطياه بالجنب كتقاد لتالا)كاع ما قولتيلي..منين جاها داك الدم لي لقيتو فيها..قبايلة بقوة الفرحة نسيييت وما سولتكش وما رديتش البال
رؤيا:ايييه قالوها شاف ربيع ما شاف لحافة..غير عرفتي راسك نجيتي وما عملتي والو ما تسوقتيشي ليلا لا هي لا دمها
براء:وا هضري الواليدة
رؤيا:عندها واحد الجرحة ففخضها..باينة ديال شي مضا (موس) ولا زيزوار ولا شي حاجة فحال هايدا..مهم ضربة خااااايبة
براء:ماشي غريبة..راها كانت عايشة فالزنقة
رؤيا:(تنهدات)عرفتي..قبايلة بقيت نقول مع راسي..الحمد لله منين تلاقيتيها ووقع معاكم لي وقع..حيث كون ما ديك الزبلة لمكفسة ديالك وكون ما مشيتيشي عند ديك صاحبتك كاع ما تلاقاها وتجيبا..وكون يعلم الله فاين وصلات ولا شني وقعلا
براء:(تفكر حياة)هادي كاينة
رؤيا:(ميقات فيه)ايوا ماشي تفرح براسك ويزيالك راك عامل مزية
براء:الصمت
رؤيا:مهم خرج فحالك خليني نداويلها فخضها
براء:وا غير داويه مالي شديتك
رؤيا:خرج بحالك بلا ضسارة
براء:بحال الا ما نعرف شغانشوف فيها..مزالة برهوشة صغر حتا من ختي
دخلات عليهم للصالة فين مجموعين كاملين..لقات السلام وقربات لحسن لي عاد جا بابتسامة وحنات على راسو باستو..كبر وزغب راسو بدا كيطيح وبانت صلعتو..وجسمو ضعاف على لي كان
حسن:يرضي عليك ابنتي..(شاف فتالا)شكون هادي
رؤيا:هادي تالاسين..ضيفتنا
بيسان:سميتها تالاسين!
رؤيا:اه..تالاسين..مزيون ياك
بيسان:وي..
قربات جلسات حدا فراس لي بيسان جالسة حداه معنقاه من كرشو وجايبة فشوشها عليه وهو كيلعب فشعرها وعاطيها جانة..جلسات وجلسات تالاسين بيناتها هي وفراس..
رؤيا:جبرت لي تفهم هضرتا..سلوى صدقات كتعرف لسوسية وهي اتعلما هضرتنا
بيسان:مزيااان بحرا ما تبقاشي ساكتة هايدا فحال زيازن
رقية:كيفاش..واش نتي هرستي الكيسان!..(كدور فراسها)تديرها أبنتي..كتحنئز كي الزوائ..ما كتهدش تبارك الله عليك
رؤيا:(لبراء)هضر معاها فوذنيها نتينا حداك
براء:ههه هي لولة..كانو كيقولو أيما بلي خاصهم يزوجوك
نغزها من جنبها كحركة بيناتهم موالفينها فاش كيبغيو يطلعوها عليهم..
رقية:شناااهوااا..يزوجوني..أمولاي دغيس الشرييييف..اللهم إن هذا منكر..ويلي على شوهتك ياااا رئية..باااغين ديرو فيا الضحكة على اخرة ياااامي..يئولو عليا حتا شرفات عااااد تبرزات..ايوا صفاااااات..(رخات عينيها كتمسكن بحال الا باغة تبكي)..هي هادي ديالكم..الا تئلت عليكم ئولوها..أما باش نتسمى مراة شي حد من غير سيدي عبد الئادر فهي لي ما عمرها تكون ولا تكوووون..
فراس:يهديك الله أيما شمن تقلتي علينا..واش نتي غريبة دابا كتgولي هاد الهضرة..(خنزر فبراء) عجبك حالك دابا..شهاد الهضرة دالويل..ها هي هزات من خاطرها
رقية:لاااا تغوتشاي عليه..جالس تغوت عليه حيث فضحكم أرباعة الشلاهبية منك ليهم..هذا هو لي فيه الخييير فيكم كيفطمني بتنوعيركم..لئيتوني ما بئيت نسمع وااالو وبئيتو تافئو عليا ئدام عيني عاين باين..بلحئ اااانا لي درتها لراسي..ااانا لي تلات بيا ليام حتاااا بغيتو نتوما تفضحوني ئدام الناس..اااانا تزوجوني ااانا..ياك افراس اولدي ياااك..ياك ارؤيا..ياكو أجماعة لخييير..سخيتو بيا وبغيتو تكركبوني
فراس:اااا يما شنو هاد الهضرة دواااالو..نتا حسابك معايا من بعد غير صبر..يمااااا سمعيني حنا ما هضرناش عليك..غير هاد خينا مطلعها عليك وصافي
رؤيا:واش ايما من نيتك حنا نسخاو بيك..الدار داارك واش نتينا غريبة باش تنوا ويدخلك الشك فينا..اتديها على براء..راه غير جالس كيضحك معاك وصافي
شافت فيهم مخنزرة وكتقلب فعينيها ورجعات شافت فبراء لي غير حادر راسو وحابس الضحكة وغير جات عينيها فعينو ضحكات وضربات يديها مع يديه..
قبل ما يجاوبها فراس..قاطع هضرتهم دخول زوج ولاد كيجريو..واحد طبق لأصل لياخور..فسن 14 عشر..لابسين نفس اللباس..نفس التحسينة..نفس الملامح..نفس الفورمة..بشرتهم بيضاء بحال مهم..وملامحهم سوداء شرقية بحال باهم..جسمهم ملائم تماما لسنهم لا فطولة ولا فالوزن..وداخلين بتيشورط وشورط نفس الشكل وكاسكيطة مقلوبة لور وكلاكيطة فرجليهم..
التوأم:مسا لخييير على وجوه لخييير
رؤيا:جاو هاجوج و ماجوج..فاين كنتو
حسن:كانو معايا فالجامع..ديتهم يصليو
رؤيا:يييه ويانا كنقول شعندها الدار ساكتة ومهدنة
تبسمولها بزوج وجلسو فمكانهم كيضحكو..وغافلين على تالاسين لي منين دخلو وهي حالة فمها فيهم مصدومة..كتشوف بنادم مدوبل قدامها ما فهمات والو..حيث عمرها صادفات شي توأم فحياتها..حتا لاحظوها هما وهزو راسهم فيها مستغربين..ونطقو بزوج بيهم فنفس الوقت فحال الا حافضين..
التوأم:جاونا الضياف وحنا ما فخبارناش
رؤيا:اييييه اولادي هانتوما كتشوفو.. سمحولي ما تشاورتشي معاكم قبل
التوأم:الله يسامح الواليدة
رؤيا:هضرو واحد بواحد كتسابقو على لهضرة..
وقفو بزوجهم على راس تالاسين ونطقو بزوج دقة وحدة: أنا جواد ونتي؟
شافو فبعضهم ورجعو شافو فيها كل واحد كينعت لياخور : لا..هو جهاد ونتي؟
وقفو قبالة بعضهم واحد كينعت نلاخور بصبعو وكيهضرو فنفس الوقت:نتا جواد..(سكتو)..لا أنا جهاد!
هنية:اجي اداك البرهوش نتينا وياه..كبرتو بقالكم غير الزواج!!
جواد:غمضي عين
جهاد:فتحي عين
جواد:تلقاينا كابرين
جهاد:وفلبرزة جالسين
حسن:(ضحك )ههههههههه مزروبين!
التوأم:لا.. مكبوووووتيييييين
هزات هنية بلغتها شيرات عليهم بيها وهما يهربو..
هنية:ياااااا مساخط لواليدين
التوأم:(من بعيد)والله حتا مرضيييين
ضربو فيدين بعضهم وتغامزو كيضحكو..والباقي ما لقاوليهم جهد غير يضحكو..موالفين بهبالهم..غير تالاسين لي كانت جالسة وسطهم مبلقة عينيها فدوك الزوج وحالة فمها..حتا جات لخدامة عيطاتلهم يتعشاو وناضو كاملين تجمعو على الطبلة..وتالاسين حشمانة وسط منهم وغير رؤيا لي كتقربلها الماكلة وكتحاول تخليها تطلق معاهم..
كان جو عائلي مزيييون..كلشي كيهضر ويضحك وشي كيمد لشي..مولفين الجماعة على الطبلة الا زينب لي الاتيكيت ما كيسمحلهاش تهضر وهي كتاكل...اما حتا فراس لي كان ما كيهضرش وهو ياكل..فولادو رجعو كيهضروه بلهلا يطريه ليه..جو خلاها تحس بإحساس خايب..إحساس بالغربة..و لحنين لأيام كانت كتجمع فيهم مع واليديها على الطبلة..يمكن طبلتهم ما كانتش قد هادي..ويمكن دارهم ما كانتش حتا قاد هاد الصالة لي جالسين فيها..ويمكن عددهم كان قليييل مقارنة بيهم كعائلة..ولكن كانو عايشين فرحانين وهانيين وضاحكين مع بعضهم..ولكن الأيام شائت تفرق الشمل
حبسات دمعتها بزز وهي جالسة فوسطهم..وحنات راسها لتحت باش ما يبانوش فعينيها الدموع لي تغرغرو..وزيرات على فمها عاضة عليه باش ما يتسمعش صوت شهيقها..لوهلة هزات عينيها بالزربة شافت فيهم هما لي جالسين قبالتها..وطاحت عينيها فعين براء لي هز راسو من بعد ما حط اللقمة ففمو..وقبل ما يحقق الشوفة فعينيها حدراتهم دغيا..ديك الشوفة لمخطوفة خلاتو يحبس لمضيغ ففمو ويحقق معاها عاقد حجبانو كيقلعها واش بصح كتبكي..وهي ما رجعاتش هزات فيه الراس..شاف فيها مطولا كيتسناها تشوف فيه مرة أخرى حتا لاحظ مو لي هزات عينيها فيه من بعد ما كانت كتهضر مع فراس وهو يغمزها ونعتلها بعينيه جيهة تالا..عقدات حجبانها مستغربة ودارت شافت فيها لقات شعرها مغطيلها وجهها..هزاتو كتطل عليها وهي تلقى وجهها حمار بقوة ما مزيرة لبكية ودموعها كيقطرو مباشرة فوق لقطة لي بين يديها..تخلعات وجمعاتلها شعرها لور بالزربة كتهزلها راسها تشوف فيها..
رؤيا:تالاسين..حبيبة..شعندك..شني بكاك..علاش كتبكي
كتهضر وتمسحلها دموعها وكلشي وقف الماكلة كيشوف فيها
فراس:مالها!
رؤيا:وباش عرفت..شعندك احبيبة قلي..شعندك!
سكتات تالا ما فهماتش وما جاوباتش..فقط حنات راسها كتمسح عينيها وخلات كلشي مبهوض كيتسائل مالها..ولكن ما كانش غريب بالنسبة ليهم بكاء بنت صغيرة بوحدها وسط ناس ما كتعرفهومش وعلى ما عرفو عليها من فوق يتيمة
رؤيا:(حطات يديها على فخضها)كيضرك!
هزات تالاسين راسها فيها وفهماتها كتنعتلها للجرحة وحركاتلها راسها بلا..شافت فيها رؤيا بقلة حيلة وجراتها من راسها عنقاتها لصدرها كتمسحلها دموعها وتسكت فيها وطبطب..وما إن زيراتها عندها حتا انفجرات تالاسين بلبكى..طلقات من القطة وضورات يديها على كرش رؤيا وزيرات عليها كتبكي وتشهق وتقول ما بكيت..داك الحضن توحشاتو..حضن دافي يخليك ترتاح..حضن شبهاتو لحضن أمها..صحيح مونية وتلمسان كانو كيواسيوها..ولكن تواجدها فدار الشيخ ما كانش كيخليها ترتاح..عكس دابا..خلعاتهم بطريقة بكائها ودارو بناقص من شي ماكلة..كلشي تبهض وحال فمو فيها..وهي يبسات على رؤيا يبسة وحدة..وحتا هي ما بعدتهاش وزيراتها عندها كثر كتبوس فراسها وتسكتها حتا بدات تبكي معاها بلا ما تشعر..تقلب عندهم لعشاء جنازة وشطناتهم حالتها..وناضت بيسان وقفات عليهم كدوز يديها على شعر تالاسين كتسكتها وهي تعابير وجهها مغبنين بحال الا باغة تبكي حتا هي..حيث ما كتحملش تشوف شي حد قدامها كيبكي..
هكاك بقات مزيرة عليها وما طلقاتش حتا داتها عينها وهي بين يديها..وكتشهق فوسط نعاسها
رؤيا:اربي ويعلم الله بشني دايز عليها حتا وصلات نهاد الحالة..قطعاتلي فقلبي
هنية:لا حول ولا قوة الا بالله
رقية:طلعا تنعس ما تخليهاش معذبة هكاك..طلعا ترتاح
رؤيا:واخة
فراس:(ناض وقف)اري نهزها
براء:غير خليك الواليد انا نطلعها
فراس:شاف فيه وسكت
بيسان:جيبها لبيتي..تنعس حدايا حسن ما تبقى بوحدها
رؤيا:اه بصح..حسن
براء:واخة
قرب حدا مو وحنى هزها بين يديه..خفيفة بحال الا ما هاز والو..تقدمات قدامو بيسان طالعة لبيتها ورؤيا موراهم..وهو غادي بيها كيشوف قدامو وحاس بخذها لي فوق دراعو سخووون بقوة ما بكات..حتا وصل لبيت ختو لي تقدات وهزاتلو لغطى دناموسيتها لكبيرة وخلاتو حطها وشاف فوجهها لي جا قبالتو ورجع بعد..وخلا مو جلسات بجتبها كتبعدلها الشعر على وجهها
رؤيا:صافي خليوها تنعس وترتاح..حتا لغذا ويكون خير
براء:الصمت
قربات بيسان تغطيها بليزار وهي تلاحظ لوشم لي على رجليها ولي عاد رداتلو لبال..وحطان يديها عليه كدوز صبعها تشوفو واش بصح..
بيسان:وشم والله حتا وشم..ماما شووو..واشمة..شو على وشم عندها
تبعاتها رؤيا بعينيها وهي كتحرك راسها بمعنى لا حول ولا قوة الا بالله..
موراهم كان براء..ساكت وما هضرش..تابعهم يدو فجيبو..وغير كيسمع فقط..حيث اذا كان تعلم شي حاجة فهاد 20 عام لي عاشهم..فهي أن الهضرة لي ما عندها فائدة بلاش منها..عارف ختو راسها قاصح وعارف باه ما ايخليهاش توشم..فمعندو علاش يضيع الحجرة معاها..هاكة هو كبر وتعلم يهضر فالساعة لي تنفع فيها الهضرة ويسكت فالساعة لي تكون الهضرة غير زايدة..كيعجبو يضحك ويقشب ولكن عندو ساعة المعقول معقول..
لحق عليهم لصالة لقى ختو كترغب وتزاوك فباها وتحلس عليه..
بيسان:عافاك ابابا..نعملو غير رقييييوق..شو هي غير صغيرة وعملاتو
فراس:لا ابيسان..الحاجة لي كتصلاح راه ما كنgولكش عليها لا..والحاجة لي ما صلحاش ما تشاورنيش فيها اصلا
بيسان:وا يانا بغيت نوشم انعهنننن
فراس:سيري شدي شي ستيلو وخططي فلحمك حتا تعياي الله ينعل لي يgولك شكديري
بيسان:كطنز عليا ابابا يااااك
فراس:نتي لي كطنزي عليا ابنتي..ولاهيلا..gالتلك توشم
بيسان:عافاك ابابا..غير خويط رقيق فحال لخويتم
فراس:(خنزر فيها)لا هي لا..وما تعاوديهاش
ضربات الطم كتشوف فيه وهو حاني راسو على تيليفونو ودارت شافت قدامها مربعة يديها ونفخانة..
🍂🍂🍂🍂
تفرقو كاملين..وكلها وطلع لبيتو وشد بلاصتو..وبيسان ترمات حدى تالاسين من بعد ما بدلات عليها..وهزات راسها كتعريلها على رجليها وطل عليها وتغبن..وفلخر طاحت نعسات ما هزاتش الراس..
فبيت فراس ورؤيا..هو لابس نضاضر دالشوف وكيقرى فكتاب وهي خرجات من الحمام من بعد ما بدلات عليها وطلعات تكات حداه وزولاتلو لكتاب من يديه..
فراس:(زولها يديها وشدها بين يديه وشاف فيها) اممم..اوك جاتك
رؤيا:(بغنج)والا ما كان عندها حد ومقطوعة من شجرة نخليوها معانا يااااك!
ضحك بالجنب ودور يدو على عنقها جرها ونعسها على صدرو..
فراس:نخليوها أحبيبة..ونحسبوها فحالها فحال ولادنا..منها منهم..ربي ما حرمناش من خيرو وهي ما عندها ما تنقص علينا..بلعكس..الا كانت يتيمة أجرها أيكون كبييير..ونصيبها جابها عندنا
رؤيا:(ضحكات وباستو من حنكو)يخليك لييييلييي.. كنموت فيك انا
فراس:(باس راسها)وما يحرمنيش منكم
رؤيا:احححم..فراس
فراس:هممم!
رؤيا:نقولك واحد الحاجة وما تعصبشي
فراس:(طل على وجهها هاز حاجبو)شنو!
رؤيا:ولا..هاد الشوفة ما كنحملاشي..قلنالك ما تعصبشي ماشي خنزر من لول
فراس:(بعدها عليه حتا تقابل وجهها مع وجهو)شناهوا..(خنزر)كذبتي..فاش!
رؤيا:هانتينا غير بلا ما تعصب ويانا أنقولك كووولشي..راه ما قدرتشي نخبع عليك..عارفاك ما كتحملشي لكذوب
فراس:ومنين عارفاها..لاش كذبتي
رؤيا:هانتينا غير تهدن ويانا انقولك..
ربع يدو كيسمعلها مخنزر..وهي كتعاودلو كيفاش جابلها براء تالاسين وماشي كيما قالتلو فلول بلي جات فكسيدة..ما عجبوش لحال وتعصب..منها لي كذبات ومن براء لي سكر وزاد حط راسو فموقف بحال هذاك..وما شدو غير لحلوف لي حلفلها وهي لي بقات كتهدن وتطلب فيه وكتحاول تكالميه وتخليه يدير فراسو ما عارفش ويفوتهالو هاد المرة..
🍂🍂🍂🍂
فجوف الليل..وكلشي ناعس والسهات..من بيتو لي لاصق حدا بيت ختو..ومن وسط نعاسو لخفيف..سمع صوت أنين وغوات غادي وكيتزاد..الطبقة لي هما فيها مجموع فيها بيوت الدراري ورقية وهنية..وبيت فراس ورؤيا وزينب وحسن فالطبقة الفوقانية..ناض جلس كيحاول يسمع مزيان حتا تأكد وناض لبس كلاكيطتو وخرج بالزربة ودار جيهة بيت ختو..فتح الباب ودخل كان الضو ديال الاباجورات مشعول حيث بيسان ما كتقدرش تنعس فالظلام..
بانتلو ختو مشبحة حالة فمها ما جايبة خبار لحد واخة يموت حداها..وتالاسين بجنبها كتغوت فنعاسها وتبكي..قرب منها بالزربة جلس بجنبها وبانلو وجهها لعرقان وشعرها لي لصق عليه بقوة ما فازك..وحط يدو على حنكها كيضرب فيه بشوية ويفيقها وهي كتحرك راسها وتغوت..
تالاسين: اهووو ..إمييي...بااا..اهووو..اهوو..حيد gيسن..اهووو..امممم (لا لا لااااا..يما..بابا..لااا..لااا..بعععد منهم..لااا..امممم)
براء:فيقي..هييي فييقي
هو كيحاول يفيقها وهي غير ما كتزيد تعصر كثر..حتا شدها من كتافها ومخضها بقوة..
براء:تالاسييين..فييييقي
ناضت من نعاسها مفزوعة..تجلسات وهي مخرجة عينيها قدامها وكتشوف فجنابها وتبكي..صدرها كيطلع ويهبط كتنفس بالزربة..ولعرق هواد معاها كيشرشر..حتا هزات راسها فيه هو لي قبالتها وشافت يديه لي حاطهم على كتافها وضرباتو ليهم بعداتهملو ورجعات لور..
ناض وقف كيشوف فيها مكره وهي كتفاداه وترجع لور بحال الا فيه جدام..شاف فيها مطولا ورجع خرج وخلاها..
بقات جالسة شحال كترد النفس..وكتفكر ما شافت فمنامها وتبكي كمان تبرد لحريق لي فقلبها..بكااات حتا عيات وبيسان حداها لا خبار..وما حساتش حتا داتها عينيها وهي جالسة..
🍂🍂🍂🍂
-بعد مضي أسبوع:
دازت سيمانة وتالاسين بدات كترتاح شوية..كلشي مهلي فيها وما مخليينهاش تحس بلي غريبة او برانية..الدارجة مزال ما تعلماتها ولكن بدات كتفهم شي كلمات وتقلع لعربية..الخدامة كل نهار كتجلس تعلمها وتوريها وهي مرة معاها مرة ساااهية فهمها وما عطاتها دنيا..ولقطة من يديها ما كتحطش وعلى عينيها ما كتغبرش وفما مشات حاضنة عليها كي لقنية..فراس دار ما طلبات منو رؤيا وجاب خبارها وعرف لي قصحو فقلبو من جيهة ديك لبنية..عرف بلي واليديها ماتو والعافية فدارهم وشعلات وما خلات لا الراجل لا لولية..ودخلو الشك فاش شاف الضوسي ولي دغيا تضمص وتنوى فهاد القضية..وعرف بلي كاينة إن تما وموتهم ماشي عادي وإنما كانو ضحية..أما خبار تالاسين فمن مور ديك الليلة تقطع وما بقى حد عارفها فين صدات ولا فين مجلية..وحيث زواجها من الشيخ ما كان لا بأوراق لا بوثيقة مسنية..فراس ما عرف والو وحتا حد ما عرف بقصتها وما داز عليها من أدية..أما رؤيا فاش كسبات لخبار ما بغات تسكتلو من لبكى دور دور وتعيط يااا مسكينة ومزالة غير صبية..فكراتها غييير فراسها فاش تيمات وهي مزالة فgماطها مخشية..ولكن هي بعدا لقات معاها جلال و حسن وابراهيم وهنية..ماشي فحال تالاسين تقطعات من شجرة وبقات وحدانية..
براء حكى لمو على مناماتها..وغواتها كل ليلة وفياقها..ورؤيا قالت خلي حتا تعلم الدارجة وتديها لشي طبيب هو لي يعرفلها ويعرف لحالتها..أما تالاسين فارتاحت لرؤيا وحباتها..حيث بالأمان والحنية حسساتها..وبالها رتاح شوية..كيما كان كيبقى حسن من قبل ولكن مزال ما نسات معاناتها..
🍂🍂🍂🍂
هاد الصبح صباح العيد لكبير..العائلة مجموعة وكلشي فرحان وحامد الله..تجمعو على لحوالا من بعد صلاة دالعيد فساحة مور الدار مزلجة وتناوبو عليهم فراس وحسن كلها وكيسمي ويذبح واحد..تهزو لحوالا يتسلخو ويتقطع لحمهم ودوارتهم تغسل وتنقى باش فالليل مولفين يتعشاو بيها فكل عيد كبير..وهما ها لي بقفطانها..ها لي بدراعيتو..ها لي بقميصو..ها لي لابس جبادور وعاطيها للجري واللعب..شي كيبارك لشي والتيليفونات ما هداوش ما كاين غير مبروك عواشرك والله يبارك فيك
مور الظهر تجمعو كالعادة على الطبلة الطويلة لي فالجردة..وريحة الشواء عاطية والدخاخن..هنية ورقية ما يدوزلهمش العيد الا ما قطعوش الكبدة والطيحان بيديهم وداروهم بولفاف ورؤيا خاشية راسها معاهم وغير زينب وبيسان لي كيشوفو من بعيد لبعيد وكل وحدة لابسة قميص خفيف..فراس وبراء واقفين على الشواية شي كينش هنا وشي لهيه فراس بدراعية يديها حد المرفق فالباج والسفيفة فلgرونة وبراء بوحدة فحالها فالشيبي وسفيفتها فلبيض..وجهاد وجواد نهار تجلس الشيخة وتسمح فلغرامة يجلسو هما..كيجريو ويجبدو هذا ويشقمو هذاك وكينقزو من قنت لقنت بجبادوراتهم لي فلخضر بحال بحال ما تفرق هذا على هذاك..وتالاسين جالسة فوق مخذات كبار فوسط الربيع على جنب الطبلة..لابسة سروال قندريسي رجليه مجموعين فوق لكعاب بشوية مع الجبادور ديالو فلحمر وسفيفتو ذهبية..شعرها ممشوط وجامعينهلها بضفيرة دالسبولة وضاربة فيه الشمس ولونو باين ذهبي كيبري..طالقة رجليها وحاطة لقطة البيضة وسط حجرها كدوز يديها على راسها...
الشمس ضاربة فيها وهي حاطة القطة وسط حجرها..كتلعب بشعرها الابيض وداعبها..رجليها حفيانين فوق الربيع الاخضر..ولوشام باااين فرجليها البويض..تعابير وجهها هادئين..ما كيبانلك لا واش فرحانة ولا لا..فقط الجماد..هي لاهية مع القطة وعينين خرى لاهية معاها..كينش الدخان وتارو شكلها وشكل جلوسها وقبل ما تفوتو اللقطة حط داكشي من يدو ودخل للدار كيجري طلع لبيتو..وهز كاميرتو علقها فعنقو..كاميرتو هي حب حياتو..حيث كيحماق على شي حاجة سميتها التصوير..وهبط كيجري مرة أخرى..وقف بعيد عليها بشوية وخذا كاميرتو قدام عينيه..قرب العدسة حتا بانت صورتها واضحة قدامو وهي حانية راسها وضفيرتها مايلة للجنب على كتفها..تبسم ابتسامة خفيفة..وخذالها صورة..بعدها على عينو كيشوف الصورة كيجات ويقرب فيها ويدقق فالتفاصيل الصغيرة حتا من لوشام لي فرجليها عجباتو الصورة ورخى من لكاميرا خلاها معلقة فعنقو ولعب بشعرو رجعو لور حتا نطقات بيسان..
بيسان:وحنا ما تصورناشي!
براء:(تبسم)نصوروك علاش لا
وداكشي لي كان..خذالهم صور وهما مجموعين..ورجع كيعاون باه فالشوا حتا كيتم جاي كلب ما كبير ما صغير..شعرو نازل بني ومخرج لسانو كينبح..دار شاف فيه وتبسم فرحان وحنى عندو تعرضلو يلعب معاه ولاخور كينقز ويدور بيه ويلحس فيه..
براء:Amiiiiiino..صاااااحبيييي..توحشتك ههه
رقية:عاود رجع هاد السلوgي
براء:(هز طرف داللحم ووقف كيعليهلو ولاخور كينقز ياخذو من صباعو)اوووووه برااافو أعشيري..دابا رجعتي أونفورم
حنى كيشوفلو راجلو لي كانت تهرساتلو وداوه عند البيطري يعالجهالو..لقاها مزيانة وهو يدوز يدو على راسو بالزربة فرحان بيه..ناضت حتا بيسان وجواد وجهاد دارو بيه كيلعبو معاه وهو كينقز وسطهم..
بيسان:(معنقاه)احححح اعباد الله..توحشناااك أ جن هههه
رؤيا:جا حبيبك..ايوا على سلامتو ههه
براء:الله يسلمك الواليدة
فرحو بيه وكلها رجع لبلاصتو وبراء كمل الشواء والكلب كيدور حداه..وتالاسين شافتو ورجعات حنات راسها على قطتها..تجمعو على الطبلة..وتالاسين حطات قطتها حدا رجليها وجلسات معاهم..وبراء كيحطلهم فالقطبان والطبلة عامرة بأطباق الزيتون والشلايظ والعصير..هو كيقرب والكلب جاي موراه..شافتو القطة وتشوك عليها شعرها ووقفات كتغوت والكلب غير شافها غوتات غريزتو خلاتو يتبعها كيجري..تخشات هي تحت الطبلة وتخشى هو موراها..وناضت الحرب تحت الطبلة..هما كيغوتو ويهربو رجليهم ولوخرين لتحت كيتحاربو..وتالاسين خرجات عينيها مخلوعة على قطتها..
رقية:(هازة رجليها من الارض مخلوعة ومزيرة على لكرسي بيديها)وااا يعطيكم هزة..بغيتلك البرغوووووث اولد الكلبة..امووولاي دغييييس وااااا شد السلوgي ديالك عندااااك.. أربيييييي..رجلييييي..ئلبييييي..ويييليييي ميييييي
الكيسان كيتهرقو..وهما شي كيتعرضلهم من هنا شي من لهيه وحرام ولا بغاو يتشدولهم..هو كينبح وهي كتزوي وتغوت وما كاين غير عيط جبد..
نقز عليهم..وجا براء واقف قدامهم تعرضلو قبل ما توقع شي كارثة..من بعد ما رمى القطبان من يدو..وطاح كيتمرغ معاه فالأرض ويلعب معاه حتا هدنو وناض وقف هازو..وتالاسين مزيرة على قطتها بين يديها وكتشوف فبراء عاقداهم..مكمشة فمها وصدرها طالع هابط كتنهج..شداتها الفقصة والنفس على قطتها..وهو واقف كيأنب فالكلب ولاخور كيلحس فيه وملااااهي معاه..حتا حس بيديها ضربوه فكرشو ودفعوه لور بالجهد على غفلة وبغى يكالي ما لقى غير الشواية موراه وحط يدو فوق منها كردة فعل طبيعية حتا حس بالتشويطة فيدو ولحمو تشوااااات وطلق من الكلب مقصح..حس بالشياط طلع من يدو ولحمو تشوات..زير على سنانو وغمض عينيه كيحرك يديه فلهوى ويمشي ويجي فبلاصتو..
رؤيا:اواعديي يانا..ولدييي..وري يديك وري
براء:اححححح افففففففف(عض على شفايفو)
حطات رؤيا يديه وسط يديها بانولها لقطبان ديال الشواية تطراساو فيدو واللحم تشوطات حيث فاش كالا بيديه ثقلو كامل جا عليهم وبرك على شواية..
رؤيا:بيساااان..شلط جيب بيافين دغيا دغيا
بيسان:ااا..وو..واخة
رؤيا:أجي للما دغيا..
قرباتو حدا الطبلة وهزات قرعة دالماء كتكبهالو على يدو.. وهو غير مطمر لحريق ومزير على سنانو..
فراس:(شاف فيدو وخيب سيفتو)اووووف..يدو تشوطات
رقية:(ناضت مخلوعة عندو يله كتحرك)أمالو الغنضور ديالي..مالو لحبيب..تشوطات يدو..(شافت فيديه حاطة يديها على صدرها) احححح وبالنااااائص..بالنااائص منو عيد هذا لي يتشوط فيه لحمك مع لحم لحوالا...احححح أ كبدي على الغنضور ديالي
براء:صافي صافي ما وقع والو
رقية:بالنااائص منهم كلاب وئطوط تريكة البرئطيييز..وا هاااادا لعب الدراري..وهااادي اخرة لي يصاحب السلوgيات..على ئلة بناااادم لا نتين لا هي..مصاحبينلي هاد زوج حفنات ديال الشعر..خليه ياكلها ولا تاكلو هانتين كليتها فجنابك.. وااااا كمدها دابا..و نتين يا بنتي ما حشوماش عليك..هانتين حرئتيه!
شافت فتالاسين لي كتشوف فبراء حالة فمها..ما كانتش باغة تحرقو وما حملاتش راسها فاش شافتو تحرق..هي لي مجربة لحريق وشكيسوى وعمرها تنسى نهار خشاتها لكبيرة فالبانيو كتشوي فيها..شافت غير رقية كتشوف فيها وحنات راسها..
فراس:خلي البنت عليك أيما را ما دارتهالوش بلعاني..
رقية:ايوا شماش نئولك اوليدي..هذا لي كيسميوه اللعب الماسخ
بيسان:(جابت لبوماد والفاصمة)هاك أماما
حسن:وا صاااافي كبرتو الطرح على والو..ولدي راجل يكبر وينسى
جواد:واااا يما..وااا لفلووووس دالعيد(دارلها حركة بصباعو) هادو هادو
رقية:اممم لفلوس..شبغيتي لفلوس!
جواد:وا دوري معايا ياك العيد هذا!
رقية:ندور معاك..من صغيورك مزال خاصك فلوس العيد!
جواد:دابا اتدوري معايا ولا لا!!
شافت فيه مطولا من بين رموشها بطرف عين والتسبيح فيديها وهو كيترجاها بعينيه حتا ضحكات..
رقية:واااخة اسيدي..يله صبر
حطات التسبيح ومدات يديها لدرتها لي عاقدالها طرافها وطالقاهم على صدرها..حلات العقدة خازنة داكشي لي فيها وجبدات منها عشرين درهم عطاتهالو
جواد:عشرين درهم!! ديالاش عشرين درهم!
رقية:(جمعات لفلوس وعقداتهم فالذرة) رضى باش ئسم عليك الله وئول الحمد لله..ما عجباتكش أراها!!
جواد:ألااا عجباتني عجباااتني..غير خليها(ناض باس راسها) الله يخلف عليك ويزيد مالك ويزكي صريرة ذرتك هههه
رقية:ئل أعوذ برب الفلئ
خلاها جواد كتقرى علي رزقها ومشى كيضحك وتم راجع عاود عندها مرة اخرى على أساس أنه جهاد وجلس كيتبحلس عليها عاود ويتلمس حتا دورات معاه مرة خرا وخرج ورجع جا جهاد عاود..
رقية:ياك لباس عاود!
جهاد:يمااا كاع ما دورتي معايا!
رقية:(خرجات عينيها) شناااااااهوااااااااا!
جهاد:مالك..كاع ما دورتي معايا!!
رقية:وديك عشرين درهم لي خذيت عاد دابا!
جهاد:انااااااااااا..فوقاش!
رقية:اشوف اداك البعلوك..بركة من داك التنوعير ديالك!
جهاد:اناااا والله ماا خذيت شي فرنك من عندك ولا خذيت..الله يرزييييني فصحيحتي ما خذيت..انا كنت فالطواليط ااااااااصلا
رقية:امولاي دغيس..وشكون لي جا عندي مدوبل عاد دابا عاد..ياك جا الحلئوم لول وجيت نتين عاود!
جهاد:(ضرب يديه بزوج كيتضاهر انه معصب) تفووووو دارها الصعلوك
رقية؛شكتئول..علي صوتك!
جهاد:هذاك راه جواد لي جا عندك زوج مرات وضحك عليك..أما أنا والله ما عطيتيني شي درهم..وحق مووووووولانا
رقية:وا شووووفيلك الحلئوم لاخور..ئولبني!
جهاد:وا هو قولبك وانا نتقولب معاك..دوري معايا حتا انا
رقية:سير بعد عليا ئالك دور معاي..خزينة الدولة انا..صرتي خوات وفضات سير عند داك دوبل ديالك يعطيك رزئك
جهاد:ما ايبغيش ايما وتلقايه حطهاااا فصندوقتو وأنا لي اتمشي على عيني عجاجة..ماشي حشومة عليك دابا..هو عاطياه زوج مرات وانا ما تعطيني حتا مرة..ما بقيتش فيك ياك!
رقية:وانا ما بئيتش فيك..كنت ناوية على دوبل صدئت مخلصة تريبل!!
جهاد:حسبيها صدقة..والصدقة فالمقربين أولى..(شدلها فيديها كيرغب) عااافاك ايما عافاك الله يشدلك فالصحيحة ويعلي مقاامك قاادر يا كريم
رقية:(نترات يديها) الله يخليهم بلخلا مئربين..(ضربا يديها للعقدة كتحلها معصبة) مئربين ديال لويييييل يييخ..وداك الحلئوم غير حتا نشدو لا ما نحلبش منو ديك عشرين درهم راني خليت ذل...اااااانا يئولبني أنااااا..على اخرة يامك ارئية يئولبك برهوش مزال حتاااا ما سgم الهضرة!!..هاك شد..ويجي عندي شي حلئوم رئم اربعة عاود نعلئو فعاوط الحوالا..ايوا صفاااات..
جهاد:(باس راسها)يخليلك صحييحتك ارئوش ههه
ناض خرج خلاها كتقلى على الشمتة لي تشمتات وطل على خوه لي كيتسناه فالدورة دالحيط كيضحكو بشوية..
جهاد:(عطاه يدو)ارى خمسة
جواد:ها هي ههه
جهاد:ها عشرين درهم عندك ووحدة عندي وثالثة انقسموها
جواد:مشاااات..يله شكون الثاني دابا
جهاد:عزيزة هنية ههه
جواد:يله بسم الله..سير نتا لول دابا
جهاد:واخة هههه
مشاو عاود لهنية قولبوها حتا هي..ودازو على لي فدار واحد بواحد قولبوهم الا زوج..رؤيا حيث حافضة ولادها وكتعرف تميز بيناتهم..وفراس لي ما يقدروش يقولبوه اصلا حيث كيخافو منو..
تعاشات لعشية وتجمعو عاود فالصالة على براد دأتاي والقهوة ولحلاوي مشكلة..كلها وفاش كيتجمع وكلها فاش لاهي..تالاسين جالسة فوسط جماعة وما جالسة..كي الحجرة ما تكلم ما تهز الراس..براء جالس شاد كاميرتو بيد وحدة كيتفرج فالتصاور لي خذا ومرة مرة كيكرز على سنانو فاش كتشوطو يدو..وأمينو محرم عليه يدخل للفيلا حدو الجردة حيث باه قاطعها فيه ما يدخلوش لكلب للدار..وفوسط ديك الجماعة كااملة كانت غايبة غير بيسان..لي راها فبيتها كتدوش وتقاد حالتها فرحااااانة..واقفة قدام لمراية بكسوة صيفية صفراء نص كم طويلة محزومة من الكرش وصندالة كلاكيط بيضاء فرجليها..سنسلة رقيقة وكورميط بحالها..وشعرها نشفاتو وسرحاتو بلبلاك باش تبان طولتو..تعطرات وقادات وجهها بداكشي لي مسموح ليها من ماكياج..فوندوتان وماسكارا وكلوز..ووقفات كتمنضر فراسها قدام لمراية وطاالقة الضحكة..
بيسان:هههه اخخخخ وفوقاش غير يجي
دارت هزات تيلي ديالها وهبطات كتجري فالدروج وهي تسمع صوت الزايد والهاراج وشي كيسلم على شي..ومن بين كاع الاصوات فرزات صوت ما كيخفاش عليه..
بيسان:جاااااااا ههه
دخلات كتجري حتا وقفات فباب الصالة عينيها خارجين بالفرحة وقلبها كيفرفر..كانو ثلاثة دالناس..شامة بنت خالة رؤيا وياسين راجلها لي خذا الزمان حقو منهم وبان فيهم النضج..شامة بجلابتها وحجابها وصباط بلا..وياسين بقميجة كحلة وسروال دجين..كيتسالمو ويباركو لعواشر..ومعاهم سعد ولدهم..كبر وطوال وزيان..الفرق بينو وبين بيسان غير عام..طلع كيشبه لباه ومو خذا من عند كل واحد حاجة..وتخلط الزين الشاوني مع الزين الريفي..كان بتيشورط رمادية وشورط باج وصباردين كحلة..شعرو محسنو ما مخليهش طويل بزاف ولحيتو يله كي بدات تقول بسم يله حيث يله كمل 18 لعام..تربات هي وياه وكبرو بزوج..ونهار حلات عينيها حلاتهم عليه..ونهار طاح قلبها فلغرام كان سعد هو المحظوظ بيه..قربات فرحانة كتسلم على شامة وياسين وتباركلهم حتا وصلات عند سعد وهو يشوف فيها كيضحك وخربقلها شعرها ودور يدو على عنقها راميها فوق كتفها..
سعد:ناس بالصفر ههه
بيسان:(بثقة)وجاااا معاهم
سعد:مي لصفر كيجمع الناموس
بيسان:ويانا كنقول شعندك لاصق فيا !!!
سعد:هههه ياك الزرمومة!
بيسان:هههه ييييه العتروس..عواشر مبروكة
سعد:علينا وعليك ياا ربي
جلسو كيتجمعو وتالاسين غير شافت الزايد تزاد وهي تزير..ما قالت ولفات مع هادو..شامة كانت جالسة حدا رؤيا كتهضر مرزنة واخة هضرتها قلااالت..ما بقاتش ديك شامة لي كطير وتنقز وتقول لطيور نزلو نجلس بلاصتكم..كضحك ولكن بااااين فعينيها حزن مخبعها وكاتماه فوسط قلبها..وياسين خذا بلاصتو حدا فراس وحسن..
شامة:رؤيا!!..شكون هاد لبنيتة!(شافت فتالا لي جالسة لاصقة حدا رؤيا)
رؤيا:(دوزات يديها على شعرها)ههه هادي بنتي..حملت وولدت وما قلتالكشي ههه
شامة:(كتشوف فيها حابسة دموعها)الحبيبة ديالي..ومزالة غير صغيرة مسكينة..وشني دابا اتخليوها معاكم!
رؤيا:اه صافي..حبيتها اختي ودخلااااتلي فخاطري ومن دابا لفوق منها من ولادي
شامة:ومسكينة غير ساكتة وحانية الراس
رؤيا:هاكة هي من نهار جات..دروييشة ما تهز دجاجة على بيضها..هي راها ما كتفهمناشي حيث كتهضر بالسوسية ولكن ياختي حرام واش تعمل شي صداع ولا شي روينة..غير فليل كتبات تحلم وتغوت
شامة:(تنهدات) يانا لي حاسة بوجعها..وجع لفراق ما يحس بيه غير لي مجربو..
تبسمات بحسرة ومدات يديها دوزاتها على خذها وتالا رجعات لور شوية تقول غير خيفانة وغير كدور فعينيها..
شامة:كتشبهلها بزاااف..عويناتها بعدا غير هما منزلين..وفمها حتا هي كان غيير صغيور
رؤيا:(دوزات يديها على ضهرها وتنهدات) الله يرحمها ويوسع عليها
شامة:(خرجات نفس طويييل)أمييييييين
سكتات رؤيا ما عرفات باش تجاوبها..وحاولات تجبد معاها الهضرة فجيهة خرى..وفالطرف لاخور كانت ببسان كتوشوش لسعد وتعاودلو على تالاسين حتا هي..حيث ضرو راسو يعرف شكون وخوها كيشوف فيها بطرف عينو..
براء:بيسااان!!
بيسان:هاا..نعام اخاي!
براء:اجي نوريك!
بيسان:شني..غير خليني
براء:وا أجي!
بيسان:ففف..واخة
ناضت عندو ما حملاش يعيطلها وجلسات بالزعفة حداه وهو يجرها عندو مدور يدو على عنقها ولصق وجهها مع وجهو..كيهضر بين سنانو ويضحك ضحكة صفراء..
براء:شحال من مرة كنقولك بعدي على السيد ونتي غير لاصقة فيه ههه راكم ما بقيتوش صغار
بيسان:(شافت فيه بطرف عينيها) وشحال من مرة كنقول ديها فراسك ماشي شغلك
براء:وشحال من مرة كنقولك راه غادي نهرسلك هاد الراس القاصح
بيسان:وشحال من مرة كنقولك لي فجهدك عملو
براء:صافي دابا بلا هضرة بزاف..جلسي حدايا شوفي التصاور لي صورتك
عطاها الكاميرا كيوريها وتلاهات حتا هي مع تصاورها كتشوف وعاجبها راسها وخلات سعد جالس مربع يدو وعينو فتالاسين كيحقق فيها..
"لم يخطئ من قال أن الحياة مدرسة..فهي أطول حصة تعليمية.. 🍀
فهي علمتني ما لا يمكن تعلمه في أكبر المعاهد الفرنسية.. 🍀
لم تعلمني بالكتب والأقلام..فدروس الحياة ليست نظرية.. 🍀
بل علمتني بالتجارب..المحن..العقبات..المآسي والمسرات..فدروسها تطبيقية.. 🍀
علمتني أن الموت يباغتنا في طرفة عين.. 🍀
علمتني أن هناك من القلوب من فاقت الحيوانات وحشية.. 🍀
علمتني أيضا أن الفراق موجع بطريقة هستيرية..🍀
علمتني أنه ليس هناك ذكريات منسية.. 🍀
فكل ما نعيشه يظل في الباطن مخزون..فقط نتعلم التعايش معه بروية.. 🍀
علمتني أن أستحمل الألم..وكان أكثر الدروس فائدة في زمن إجتاحته ثورة أكل اللحوم البشرية.. 🍀
وبعد كل هذا علمتني التفائل..فبعد عتمة الليل لابد أن تأتي الشمس بطلتها البهية.. 🍀
علمتني أنه مهما قست القلوب فهناك من لازالو يتسمون بالإنسانية.. 🍀
علمتني أن الحب..المودة..الألفة..مشاعر ليس لها علاقة بروابط دم او روابط أسرية.. 🍀
كما علمتني أن أبتسم..أضحك..أسعد..وأستغل اللحظات السعيدة وأعيش بتلقائية.. 🍀
فعندما سوف يحين وقت البكاء..سأبحث عن تلك اللحظات لكن لن أجدها ولو قايضتها بمليارات القطع الذهبية.. 🍀
لهذا..إضحك مادمت قادرا..وابتسم في كل فرصة أتيحت لك..فالحزن كما الموت..يباغث في طرفة عين..🍀"
🍀 🍀 🍀 🍀 🍀
سدات مذكرتها الباج ورداتها لمجر دلكوافوز لي على جنبها..ودارت على يسارها كتشوف فالشميشة دالصباح لي داخلة من البالكون..تبسمات وطلقات يديها كتكسل وحمدات الله على نهار اخر من حياتها داز هاني..وناضت متوكلة على الله فيومها الجديد..كل ما داز عليها خلق منها تالاسين جديدة..تالاسين كتقدر نعمة راحة البال..وكتعرف قيمة الضحكة والدمعة وشنو كيسواو..خلق منها تالاسين ما كتبكيش على اسباب تافهة..حيث عارفة فاش ايجي وقت الصح ولبكى دالمعقول اتندم على وقت ضيعاتو فلخوا الخاوي..تالاسين عارفة ومزيااان بحق الزمان وبلي الدنيا شحال ما عطاتك اتواطيك شي نهار..ما كانش ساهل عليها تنسى لي داز..او بالأحرى ما نساتوش ولكن تعلمات تعايش معاه..هادشي كامل ما كانتش تقدر تعلمو لولا طبيبها ولولا ثلاث سنوات دالمعالجة النفسية لي دوزات..3 سنين علموها كيفاش تكمل حياتها بلا ما توقف..وبلي لي فات عمرو ما كيموت..لي فات كيبقى حاضر ولكن قوتك كتجسد فقدرتك على الاستمرار من بعدو..
ناضت من فراشها بشورطها لقصير لي مبين فخاضها البويض..ديباردو لاصق مبين معالم أنوثتها لي بانو وترسمو مناسبين لسنها لي ما بقالها والو وتكمل 19 سنة..شعر بني فاتح طويل مغطي درعانها ونازل على ظهرها..خشات رجليها لي لوشام مزال ما تمحى منها فكلاكيط بيضة ودخلات كتجر رجليها للحمام وتجمع فشعرها..هاد الست سنين لي دازو بدلو فيها بزاااف سوى من داخل سوى من برا..قضات حاجتها ووقفات قدام لمراية كتشوف فوجهها وتغسل يديها..عينيها الخوضر لمدورين..حجبانها الرقاق..نيفها لي مقمقم شوية..شفايفها الصغار وفمها المجموع..حنوكها لي بارزين..ووجهها البيضاوي..تقاسيم وجهها بالنسبة ليها شيء مقدس..ماشي غرور منها ولكن حيث كتعتابرهم ذكرى من أمها وباها..ولي فيما تشوف شي تفصيل فيها تشبهو لواحد فيهم..حيث صورتهم هي لي عمرها تمحالها من بالها..
غسلات وجهها وفمها..وسمات الله كتوضى وخرجات صلات الصبح..وفكل صلاة ضروري ما تفكر واليديها بالرحمة..ناضت لبلاكارها جبدات ملابسها الرياضية لبساتهم وجمعات شعرها فكسكيطة وخرجات بكل نشاط متوجهة لبيت بيسان لي قبالتها..
دخلات بلا ما دق..لقاتها كالعادة مزالة ناعسة وجلسات فوق راسها كدوز يديها على راسها بحنية وبصوت أحن كتفيقها..
تالاسين:بيسااان..بسوونتي..حبيبة ديالي..نوض
بيسان:الصمت
تالاسين:بييسان..نوض راه 6 هادي نوض
بيسان:اممممم
تالاسين:يله أحبيبة بركة عليك..نوض من النعاس
بيسان:(بصوت ثقيل منغنغ)ها عار ربي واش كتفيقني ولا كتنعسني
تالاسين:(بعذوبة)ههه علااش!
بيسان:صوتك أختي صوتك..
تالاسين:شعندو!
بيسان:وا حنين بزااااف..وعاد زايدة كتلعبلي فشعري
تالاسين:ههه وا هو هايداك..وا نوض دابا ولا نعيط لجواد وجهاد هما لي ايفيقوك
بيسان:حتا يفيقولك هما بعدا ههه
ناضت حتا بيسان كتكسل ولي رجعات أنثى بالغة..شعر بني غامق بخصلات فاتحة شوية..عيون كبيرة سوداء..وأنف صغير..فم بارز للأمام شوية ووجه دائري..كاع معالم الأنوثة كملات عندها..وهذا أمر طبيعي فسنها حيث كملات 23 سنة..تبسمات فوجه تالا وناضت من بلاصتها كتهضر..
حطو يديهم على حناكهم كيبردو حر الدقة ويحكو فيها. ..وتالا وبيسان شدو الضحكة حتاااا شدوها وطلقوها وحدة كطيح على لوخرى وجواد وجهاد غير ساكتين وكيرمشو ما رضاوش..
تالاسين:ههههه تصرفيقات تدوزو حياتكم كاملة وما تنساوهومشي..تصرفيقة فوسط خضرة الطبيعة وجوها الصباحي المنعش هههه
جواد:(حاط يدو على حنكو ما راضيش) شفتو هاد التصرفيقات..عقلو عليهم..اتخلصو غير صبرو
جهاد:(كيحك فحنكو لي مغطياه لحيتو الكثيفة) بغيت غير نعرف باش عرفتونا!!!!
تالاسين:الحبيب ديالي شحال من مرة كنقولكم ما دوشوشي بلعطر عاد تخرجو وما كتسمعوشي مني..عاد نتوما ريحتكم مضوبلة هههه
دار جهاد عند خوه مخنزر ونزل عليه بصلية لعنق حتا نقز..
جواد:اححححح..أمالك الدحش!!
جهاد:(مغزف) الله ينعل البويضة لي خصباتك وشركاتني معاك على هاد لبلانات دالويل لي ديما مطيحني فيهم
جواد:(كيحك فعنقو) ضربتك على يدك..ياك نتا لي تابعني
جهاد:دابا انا نايض من نعاسي باش ناكل تصرفيقة على صباح ونرجع بحالي!!!!
جواد:ياك كليتها معاك..ايوا سكتنا
شافو بزوج فلبنات لي جلسو فالارض كيتكرشخو بالضحك عليهم وهما كيتناكرو..مزالين بنفس الطباع..نسخة طبق الأصل..نفس الطولة ونفس العينين نفس الفم ونفس الفورمة لي بداو كيخدمو عليها..ملامح رجولتهم بانت..شعرهم الأسود لي مغطيينو بكاسكيطات مبدلين غير باللون..نفس الثوني فنفس اللون ونفس الصبرديلات..كيما العادة قليل لي كيفرق بيناتهم..ولحيتهم لكحلة لخفيفة زينات ملامح وجههم..
جهاد:ها وجهي صرفقوني مرة خرا لابقات فيكم
تالاسين:هاء..وا هادي ضربني وبكى وسبقني وشكى!!
بيسان:هههه خليه يبرد على قلبو مسيكين هههه
ناضو وقفو راجعين للدار باربعة كيتمشاو وهما يدورو يدورو ويضحكو عليهم حتا وصلو للدار وطلع كل واحد لبيتو يدوش..
دخلات تالاسين لبيتها وتوجهات مباشرة للبالكون فين كاينة سليلة كبيرة وسطها مخذة..وحنات على ركابيها هزات قطتها لي كبرات وعمارت..
تالاسين:مينوشتي..صباح الخير..الكسولة عاد فايقة
كتلعب معاها ولوخرا كتلحس فرجليها وتحك راسها مع عنق تالاسين..رجعات حطاتها ودخلات لحمامها وخرجات بعد مدة لبسات سروال دجين طاي هوت وبودي بيض خفيف..شعرها مطلوق مدرج عادي وقالباه لواحد الجيهة..هزات مينوشة بين يديها وهبطات للصالة فين مجموعين باش يفطرو..كالعادة كلشي داير بالطبلة..زينب حدا راجلها..ورؤيا حدا فراس..بيسان وتالاسين بجنب رؤيا وهنية..والجهة المقابلة جالسين فيها التوأم حدا زينب..وبقى كرسي واحد بجنب فراس خاوي..هو الكرسي دبراء..لي هادي عام ونص ما شافوه..كان كيجي يدوز معاهم غير الأعياد ويرجع لقرايتو لي فسويسرا..ولكن هاد المرة ما جاش وطول الغيبة..مقابل شغل باه تما بزيادة على انه كيوجد لدكتورا ديالو فدراسة الأعمال باش يقدر يعاون باه وفوق هادشي عندو آخر عام فمدرسة الفنون الجميلة..لي كيقرى فيها التصوير..حلم حياتو..
فطرو وسالاو وناض كل واحد لشغالو..فراس لخدمتو وخذا رؤيا فطريقو..وبقى الباقي كيدور فالدار لا شغال لا مشغلة..الصيف ولجلاس فالدار..
بقاو جالسين ما كاين ما يدار..ناضت تالاسين دخلات للكوزينة كتفنن..حيث هي لبلاصة لي كترتاح فيها..من مورا الباك ديالها دخلات لمعهد متخصص في فن الطبخ..وتعلمات الطبخ على أصولو..شي حاجة لي هي كتبغيها وكتعطي فيها من كل قلبها..وقدرات تحول هاد الهواية لمصدر رزق ليها..صحيح أنها معاهم ما خصها حتا خير ولكن كانت مصممة أنها تخدم شي حاجة هي لراسها..وبعد أخذ ورد خلاوها تدير لي بغات بشرط لفلوس لي ربحاتهم تحطهم فالكونط ديالها ما تخسر منهم حتا فرنك وداكشي لي كان..دارت شين ديالها فاليوتوب..وصفحة على الإنسطا..ونظرا لجمالها حلاوتها وإبداعها تلقات دعم وإقبال كبير وبشوية بشوية بداو كيجيوها لي كوموند وهي كتصاوب ودفع على قد جهدها..وهكذا غادية أيامها..
سالات الكيكة لي كانت كتصاوب صوراتها وبرطاجاتها..وفالحين توافدو عليها لي لايك ولي كومونطير..كتفرح بزااااف فاش كتسمع مديح الناس لشي حاجة هي كتخدمها من قلب قلبها..
وصلات لعشية وتلاحت عليها بيسان باش يخرجو..ما عطلتهاش حتا هي وطلعو هزو صيكانهم وهبطو مشادين بالدرعين لابسين سروال دجين وكبابط خفاف عاديين وصبردينات..ما كيلبسوش لباس معري بزاف..بلحق السراول كيعطيوهم صلية..تلاقاتهم رقية لي خارجة من بيتها بعكاز حديدي كتخلف بشوية ووقفاتهم..
بيسان:لي عندي ما عندكشي..لي عندي مزال بميكتو نتينا ديالك دفع التقاعد
رقية:(نزلات عليها بعكازها عاود) سير الله يئل حياك..كون ما حشمت نعريهلك هنا تشوفو واش تئاعد ولا لا!..مزياااان تبارك الله.. لمعيور بطااايطاي..تسناو هنا انلبس جلابتي ونجي
بيسان:(شداتها) اواعدي على تجيب جلابتك..خاصك ساعة باش طلع وساعة باش تنزل..يانا انجيبالك غير جلس
رقية:(عوجات فمها) ايوا طلع..وجيبلي جلابتي لخزية لي عاد خيطت وشالها ربيعي
بيسان:ايوا ييه قبطة دالنعناع كتمشى
رقية:شئلتي!!!!
بيسان:وااااالو..هانا مشيت..
طلعات بيسان كتجري جابتلها لي بغات وشدوها كيلبسوها فالدروج وهي تنكر وتقول ما نكرات وزيداتهم قدامها وخرجو..ركبو فطوموبيل وهبطو لوسط لمدينة كيدورو ويتساراو وسط المحلات ولي مول..ورقية يله يله كتزيد وتحرك ولي شاف فيهم ولا ضسر عليهم تنزل عليه بعكازها..حتا عياو وجلسو فواحد الريسطو كيتعشاو..كلاو وسالاو وناضو خارجين..رقية فالوسط وهما بجنابها متوجهين لسيارتهم لي موقفينها فلباركينج..زادو بمسافة وهي توقفلهم فالطريق مقوصة ظهرها ومزيرة على عكازها...
بيسان:يما شعندك وقفتي!
تالاسين:يما ياك لباس!!
كيهضروها وهي مخرجة عينيها وجامعة فمها للقدام كي لكمشة..
دفعاتهم للجنب وقربات كتعوج للسيارة لي كانت واقفة مباركيا هي وصف ديال الطوموبيلات..وقفات قدامها وموراها السور..رمات عكازها وهزات جلابتها وقردات مفرقة رجليها وهما بقاو غير حالين فامهم وصوت بولتها كيتسمع مع صوت تنهيدتها..
رقية:اححح..اللللللللله على راحة الله..ويلي كنت أنطرطئ..(طلات على حجرها) أمولاي شفت هادشي مزال ما بغا يتئادى!!
بيسان:(كتمتم وضرب وجهها)اواعدي يااااا وعدي على شوهة..اواعدي ويجي شي واحد
مزالة بيسان كتويل ويشوفو فجنابهم عنداك يجي شي حد ورقية خدامة على راسها حتا كيضرب فيها الضوء ديال الطوموبيل لي قدامها وخرجات عينيها مصدومة..عينيها مبلقين وهي مفرقة وحالة رجليها والضوء ضارب فيها..ما رداتش البال لمول الطوموبيل لي كان وسطها حيث كان الظلام..ولبنات غير شافو داك المنظر غوتو وعطاو رجليهم للريح وحدة كدخل فلوخرا..نكروها كاع..
رقية:(خرجات عينيها والضو عاميها) ياك ما الموت هادي😳!!..أمووولاي دغيس وأنموت مهبطة سروالي
ناضت وقفات بزز كتقاتل مع ظهرها وطلقات الجلابة هبطات سترات العورة وبقى سروالها حاصل بين رجليها... هزات شالها غطات بيه وجهها ودارت كتشوف فلبنات من بعيد مخرجين عينيهم فيها وبدات كتحاول تخلف بالزربة وهي يله كتحرك وسروالها واقف عند رجليها مكمل لباهية ومزال كتقطر فالبولة..
رقية:ويااااا فضيحتك وياااا شوهتك يا رئية... ويااااا رئية وتفضحتي..وياااا رئية وفشلوئك على اخر يامو يضربو الشعا ويشوفو لي يسوى ولي ما يسوى..(ضربات فخضها) هااااااا لفشلوئ لي ما يحبس البووولة..هااااااا لفشلوئ لي يخليني نفرئ رجلي فالزنائي..اوييييييلي وفضيحتي.. اويلي يااااا ويلي انهنننن
بقات غادة وتويل والسروال عند رجليها حتا لحقات بيسان وتالاسين لطوموبيل وطلعات حداهم مخرجة عينيها وقلبها ايسكت وبيسان كطيح عليها بالضحك وتالاسين حابساها بزز.. حتا رضات النفس وتوگضات وهي تقلب عينيها جيهتهم
بيسان:ههههههههه واااااااا يماااااا اواعدي يانا ههههههه غذا المغرب كاااامل يتفرج فيك..خبر اليوم بعنوان..فشلوق رقية يُشرشر هههههههههه..أجي بعدا مكرط ولا مغوفل ههههه
رقية:(طارت عليها جراتها من شعرها ولوخرا اتموت بالضحك) تهجرو أبنت الهم..كضحك عليا هااااا كضحك..فشلوئي هادي 30 عام ما شاف الضوء جيتي نتين ئوصتي عليه فنهار شاف لي عمرو شافو..هااااااااا..
تالاسين:(كتفرقهم وكضحك) واصافي أيما ههههههه يهديك الله..راها غير كضحك
رقية:(جراتها من شعرها حتا هي) ونتييييين يا ديك العوجة يااا دريييويشة..سمحتي فياااا هاااااا..فعاوط ما تجي تهزني خليتيني مفرئة كعابي حتا سروالي ما لئيت كي ندير نطلعو..
شداتهم كتريش فيهم وتبرد فيهم فقصتها وهما كيتغاوتو ويضحكو ما عرفو يسكتوها ولا يسكتو راسهم..حتا سخفات وتسالالها الجهد وطلقات منهم ورجعات تكات على لكوسان لور كترد النفس والبكية شاداها..
رقية:اححح عليك أفشلوئي وتلات بيك ليااااام انهنننن.. الله يئطع باباها بولة اهنههننن هااا ويلك يا رئية..
طلعات سروالها بزز وهي كترعد وبيسان حلفات ولا تحبس الضحكة ولا تسكت وتالاسين كتغمزها باش تحبس وهي غير ما زايدة في..وديماراو الاوطو وتحركو....
إرحموني الجزء الرابع
محتوى القصة
التنقل بين الأجزاء