إرحموني الجزء السابع

زيرات على فمها كتبرد لوجع.. حتا فاتتها ديك النغزة وتقدمات كتجر فرجليها وخرجات كتقلب على الكوزينة حتا لقاتها.. لاحظات بلي دارو كاملة بلا بيبان كلشي مترع..بقات كتبقشش على شي اناء تحط فيه الماء حتا لقاتو وعمراتو بالماء وطروفة دالثلج.. ورجعات عندو للبيت.. قلبات فلمجورة على لفوطات حتا لقاتهم حتا هما.. وقربات جالسة على ركابيها فوق راسو وكتأسف لحالتو.. حطات الفوطة اللولة فالماء وعصراتها وحطاتها على جبهتو وهو يرجف بقوة ما باردة.. عصرات الثانية حطاتها تحت الابط ديالو وجمعاتلو يديه.. ووحدة اخرى تحت عنقو.. هادشي كامل شافتو غير فغوغل.. وعصرات الفوطة اللخرة وبعداتلو ليزار عراتو من الفوق وقلبات وجهها حشمانة تشوف فيه وتفصل.. وهو نيييييت فيه ما يتفصل لخير ولخيورات.. الفتنة مجبحة قدامها.. بقات كدوز ديك الفوطة على صدرو وكرشو تمسحلو وتعاود وترجع تفزك الفوطات لوخرين وهو مغمض عينو راااااخي راسو.. وهي مرة مرة تزير على كرشها مصبرة راسها.. حتا نطق بصوت خافت ولسان ثقيييل..

براء:لم.. لماء!

تالاسين:(حنات عندو شوية) نعام!

براء:لماا!

تالاسين:تشرب! واخة هانا ماجة

خرجات جابت قرعة دالماء والكاس.. وهي يله راجعة وهي تلاقى مع الكونسييرج لي كيفتح الباب.. وقفات كتشوف فيه حتا دخل كيخلف بالزربة.. 

الكونسييرج :ها هو دواء!! قالولي ياكل عاد يشربو! 

تالاسين:واخة نزلو تما يانا انعطيهلو

الكونسييرج:اتبقاي هنا! 

تالاسين:لا انخليه يموت ونمشي مزيان! بفففف وا عمو وراني ختو ختو ماشي سراقة هاء

الكونسييرج:ختو!! بصح! سمحيلي ابنتي بلحق ما عرفتكش! 

تالاسين:وا هانتينا عرفتيني دابا.. وغير تهنى راه ماشي سراقة 

الكونسييرج:(حط الدواء) واخة.. ها هو دواء حطيتولك هنا.. والا بغيتي شي حاجة عيطلي طيااااارة نكون عندك

تالاسين:واخة كون هاني! 

الكونسييرج:واخة.. خليتكم هاد الساعة.. الله يشافيه

تالاسين:اميين

خرج ورجعات دخلات هي لعندو.. عمرات الكاس بالماء وحطات القرعة فوق كوافوز صغيييير بمجر واحد لاصق مع الارض بنفس مستوى السرير.. وحطات يديها تحت عنقو العرقاااان والفازك بالماء.. هزاتلو راسو وعاونها هو هز راسو.. وقرباتلو الكاس كتشربو والماء كيقطر مع جناب فمو ويهبط على صدرو وهي كتقلب عينيها ما تبعش الماء وهو غادي سارح مع صدرو لعريض حتا كيغبر وسط شعرو لخفيف.. سالا ورمى راسو على لمخدة وهزات فوطة ناشفة كتمسحلو فمو وعنقو.. 

هاكاك بقات مقابلاه.. جابتلو ما ياكل وشرباتهالو بزز وتبعاتلو الدواء موراها وهي مزالة كتبرد عليه بالفوطات.. ولوجع مزال كيدگ فيها مرة مرة حتا كتسقر جامدة فبلاصتها.. داز الوقت وقرب الظهر يأذن وهي معاه حتا نعس وحرارتو بدات تهبط شوية بشوية وحسات بيه ارتاح.. وناضت كتخلف بزز مشات للكوزينة كتقلب على القرفة حتا لقاتها.. طبخاتها مع الحليب وهبطات على غراف شرباتو وهي كتخيب فسيفتها ما حاملاهش.. ما جات فين تكملو حتا رجعات كتجري للحمام كترد وتبوع.. وخرجات صفراء فشلانة كتمسح وجهها بالفوطة.. رجعات جلسات فوق راسو على لحرف دلفراش وثانية رجليها للجنب ومزالة كتكمدلو بالفوطات.. كتشوف فيه نااااعس مرتاح ونيفو مزال حمر.. حتا بداو عينيها يتغمضو وشدات فيه الفشلة.. ولالة خالتي بدات دير خدامتها وجابتلها النعاس.. وبشوية بشوية بداات تمشي وتجي فبلاصتها بالنعاس حتا ما حسات كي دارت وطاحت فوق صدرو موسداه وناعسة والفوطة لي كانت كتمسحلو بيها مزالة فيديها.. 

🍀🍀🍀🍀

ضرباتو الفيقة.. كيكمش فجبهتو ويعقد فحجبانو راسو ضارو.. كيحس بداكشي كيهرو فوجهو وعنقو.. وشي حاجة مثقلة على صدرو.. هز يدو حطها على جبهتو زول الفوطة لي فوق منها وقابلها مع عينيه كيشوف فيها بين رموشو.. طلع حاجبو باستغراب ورخاها طاحت فوق لفراش ورجع كيحك عينيه بطراف صباعو.. زاد فتح عينيه شوية ويديه كيتساراو فوجهو باش يشوف شهادشي كيهرو.. حتا كيحس بالشعر وسط صباعو.. عقد حجبانو مستغرب وفتح عينيه كثر هاز راسو شوية.. حتا كيبانلو وجهها مقابل معاه نيشان فوق صدرو.. وشعرها مرمي فوق منو.. راخية يد ويد حطاها فوق من كتفو.. ناااعسة وما جايبة لدنيا خبار.. حل عينيه مبهوض وغير كيرمش.. حتا بدى كيرجع سينتة لور وهو يستعقل بلي جات عندو وهي لي كانت مقابلاه.. شاف فيها مطولا ورجع رمى راسو فوق لمخدة كيشوف فالسقف.. وبشوية بشوية بدات كترسم ابتسامة خفيفة على فمو.. وهو كيحس بنفسها كضرب فلحمو.. رجع هز راسو وطل عليها مبسم.. حط يديه تحت عنقو موسدها باش يتعلا راسو شوية.. ومد يدو لوخرا لأطراف شعرها كيلعب بيهم ويسرحهم خصلة خصلة فوق صدرو.. وعينيه هاايمين فيها.. فهاد اللحظة تمناها تبقى غير ناعسة بحال هاكة.. وهو ما يرمش ما تطرفلو عين غير يبقى مقابلها.. عينيه مبسمين قبل من فمو وضربات قلبو كيتسمعو فوذنيه دقة دقة.. يااااه لو كان يبقى مريض وتبقى هي هاكة حداه ومقابلاه.. فرحتو ما هي فرحة.. نسى المرض وطار لعيا وبقى غير القلب لي كفرفر.. ما باغي يفكر فحتا حاجة دابة باغي ينسى كلشي ويشبع غير منها ويستغل هاد اللحظة الثميييينة لي ما كتقدرش باموال الدنيا بالنسبة ليه.. 

"اتعلمين ماذا تمنيت الآن.. ✨

بيتا صغيرا باربعة جدران.. ✨

يضمني انا وانت ويحمينا من برودة شهر نيسان..✨

بيتا خاليا من الاغطية والوسادات وكل ما جاورهما..✨

فتتوسدين صدري مخدة... وتحتضني دراعي غطائا.. وتكتسين بدفء حبي لك.. ✨

فلعل حينها تصغين لدقات قلبي وتعلمين اني عاشقك الوَلهان... ✨"

هاكاك بقى.. ما تحرك ما تململ.. ومستمتع باللحظة قدر الامكان.. ما حاسش بالوقت وما كرهوش يزييييد يتجبد.. تحركات فوق صدرو كتمضغ وتقلبات لجيهة لوخرا عطاتو بالظهر وراسها رجع فوق كرشو ويديها رماتها فوق حجرو.. خرج عينو مصدوم وتفافى ولحمو تشوك.. ما عرف ينوض ولا ينوضها ولا يبقى كما هو ويخليها.. زير على عينو بقوة وبدا كيجر فنصو لتحتاني شوية بشوية باش يبعدلها يديها ويسوط مكره.. حتا حس بيها كتحرك وهو يجمد فبلاصتو مخرج عينيه فيها..شافها هزات يديها كتحك فعينيها ووجهها عرفها فاقت.. وهو يرخي راسو لجنب وغمض عينيه زعما ناعس.. ودار موتة حمار.. 

حلات عينيها هي بشوية عليها.. شافت قدامها ورجعات سداتهم ورجعات حلاتهم كتشوف فجنابها.. بانولها رجليه قدامها وبانتلها يديها فجهة ماشي هي هاديك وحسات بحنكها ملاصق مع لحمو.. خرجات عينيها مطرطقاهم وناضت تجلسات بالزربة وشهقات.. 

حطات يديها على فمها مخرجة عينيها وكتشوف فيه وهو قالب وجهو لجهة لوخرا.. ناضت وقفات ولصقات فالحيط وقلبها كيضرب.. 

تالاسين:اواعدي! اواعدي وعلى شوهتي! اواعدي وشني كنت عاملة! (غمضات عينيها بقوة) اعععععععع ويلي فاين كنت حاطة يدي! اواعدي يا وعدي وما جبرت فاين نعس!! تفووو عليا تفو تفو! (قربات كطل عليها غير من لفوق) اربيييي.. الحمد لله غير مزال ناعس اما كون شوهتك شووووهة البغلة! اعععععع حماااارة تفو عليا.. 

تنهدات ومسحات على وجهها ودوزات يديها على حنكها وعنقها.. عطاتو بالظهر غادة للحمام.. وهو يفتح نص عين وهز راسو كيطل عليها.. يله زادت شوية وهي تدور عاود وهو يرخي راسو مغمض عينو عاود.. رجعات عندو ووقفات فوق راسو وحطات ظهر يديها فوق جبهتو.. تكرز عليه لحمو من لمستها وعلى شوية ما يتفرش..لقات حرارتو هبطات. وتنهدات بارتياح ورجعات توجهات للحمام باش تغسل وجهها وفمها..

حل عينيه هو كيسوط ويتنهد بارتياح.. ناض تجلس كيسرط فريقو ويحرك راسو يمين شمال بقوة.. حط يدو على حجرو كيحكو ودوز يدو على وجهو كيمسحو ويحك فعينيه.. 

خرجات هي كتمسح فوجهها ويله زطمات برا لحمام وهو يبانلها مجلس كيحك فعينو وهي توقف فبلاصتها..

تالاسين:(سرطات ريقها) فقتي!

هز راسو فيها بالزربة سرط ريقو ورجع هبط راسو كيحك فعنقو بلا ما يشوف فيها..

براء :وي..اححم

تالاسين:كي كتحس راسك دابا! صافا!

براد:(كيشوف فجنابو) اححم مزيان.. انا اندخل ندوش.. عرقان!

تالاسين:اا.. اه دخل يانا انخرج

خرجات هي كتدخل فبعضياتها بالتلفة والمنظر دقبايلة كيتعاود قدام عينيها.. وخلاتو هو ناض كيسوط وكل ساعة يمخض راسو ودخل للحمام ووقف كيغسل وجهو ويرشو بالماء.. هز راسو موكي يديه على لافابو وكيشوف فلمراية حتا بانت على وجهو ابتسامة.. ما عرفها ابتسامة فرحة ولا ابتسامة كيضحك بيها على راسو ولا على الموقف لي تحطو فيه.. ضحك ورجع قلب الدورة ودخل لدوش..

خرج بعد دقائق.. لبس ملابس داخلية وسروال دالكيطمة وحط فوطة فالازرق على عنقو كينشف بيها شعرو وخرج كيقلب عليها فين هي.. سمع تقرقيب فالكوزينة وتمشى ببطء حتا وقف فباب الكوزينة لعرييييض..بانتلو كتجبد ةشي حاجة من الثلاجة ويله دارت وشافتو وهي توقف فبلاصتها قبل ما طلعو وتهبطو قلبات وجهها لجنب وتوجهات لبوطاجي عاطياه بالججنب ووجهها حمااااار..

تالاسين:ااا.. ببب..بصحة

براء :(كينشف فشعرو ويشوف فيها مطلع حاجبو بابتسامة جانبية) يعطيك الصحة

تالاسين :(ما كتشوفش فيه) يانا انوجدلك ما تاكل باش تزيد شرب دواء

براء:(وكى على الحيط مكروازي رجليه ويديه فجيبو) بلا ما نعذبك انطلب شي حاجة من برا..

تالاسين:(هزات راسها بلا ما تشعر) اشمن قالاك.. (ردات بالها وهي ترجع تقلب وجهها مغمضضة عينيها) بففففف مشي لبس عليك الله يرحم يماك..

ضحك عليها ورجع خرج وخلاها هي كتأفأف.. حتا تهدنات ورجعات كملات شغلها..

دخل هو لبيتو لبس عليه اكس خفيفة وقندورة وهز صلايتو باش يصلي لي فاتو..ورجع خرج كيحك فنيفو ومبسم بلا هواه وتاجه مباشرة عندها للكوزينة لقاها مزالة خايدة.. هزات راسها فيه وشافت فيه غير بطرف عين حتا لقاتو لابس عليه وعاد ارتاحت..

تالاسين:يانا شوية ونسالي.. ايكون فيك الجوع

براء :(تبسم وقرب وقف موكي على البوطاجي) ماشي بزاف.. الفرحة كهماتني

هزات عينيها شافت فيه مربع وكيشوف فيه ويتبسم ورجعات شافت قدامها كتلف..

تالاسين:اححم..كتاكل الخضرة كاملة ياك!! باش نعمل حسابي

براء :لي جات من عندك مرحبا

تالاسين:واخة.. شوية وها هو واجد

براء:خودي راحتك

بقى واقف نفس وقفتو موكي على البوطاجي مكروازي رجليه ويدو فجيبو وعينو ما غفلاتش عليها هي لي غادة جاية ما كرهاتش تخشى فشي حيط وتغبر من قدامو.. كلاها بعينيه ولا بغى يحدرهم.. وهي دور دور وتنسى حتا شنو كانت باغة دير.. وكل شوية ترجع شعرها مور وذنيها وهو كيتبسم ويضحك عليها فخاطرو.. حتا عيات وهي تهز راسها فيه هازة حجبانها..

تالاسين:ما بقيتيشي مريض!

براء:(بهدوء وابتسامة) لا.. صحيت

تالاسين:وا مشي جلس ولا شوف شني تعمل.. اتبقى مقابلني!

براء :(ضحك) لا.. ما عندي شغل

شافت قدامها كتسوط ورجعات كتكمل شغلها بلا ما تشوف فيه وهو عاجبو حالو مبرزطها.. وفرحان بيها وما قاداه فرحة.. جات عندو دواتو وقبلاتو وباش تكمل الفرحة يفيق ويلقاها ناعسة حداه وبين يديه.. مزال تأثير نعستها فحضنو كيلعب فقلبو.. تنهد بارتياح كيشوف فيها وهي واقفة عاطياه بالجنب كتحرك فالخضرة لي فالمقلة ومنغاامسة فشغلها..

براء :شكرا!

تالاسين: همم.. علاش!

براء :شكرا حيث بقيتي وقابلتيني

تالاسين :(كتهضر وتقضي شغالها) ما عملت والو..عملت غير لي خاصو يتعمل.. ليلة كاملة ويانا نعيطلك.. كنت باغة نهضر معاك..(عقد حجبانو باستفهام) كنت باغة نهضر معاك على حساب خروجك من الدار.. حيث بقات فيا خالتي.. ليل كامل ويانا نصوني ووالو سحابني غير ما بغبتيشي تجاوبني ولكن فلخر تشطنت الصراحة!

براء :(بتعجب) تشطنتي!! وعليا!!

تالاسين:مالها جاتك غريبة!

براء :وي الصراحة

تالاسين: علاش!

براء :ما عرفت.. جاتني غريبة وصافي

تالاسين:علاش كتفكر هايدا!! علاش واخد عليا فكرة بلي يانا كنكرهك ولا ما كنحملكشي

براء: ماشي كتكرهيني مي ما عندكش معايا

تالاسين:غالط!

براء:(ضحك طانز) هي كتبغيني هه

شافت فيه وما جاوباتوش ورجعات كملات شغلها.. وبقى هو كيشوف فيها مصغر عينيه وراسم ابتسامة تهكمية على وجهو.. هزات طرف عينيها فيه لقاتو كيشوف فيها وهي ترجع تحدرهم وهزات شعرها مور وذنيها.. فاش كتعمل هاد الحركة كدوبو وتجيبلو تمام.. ما كيكرهش يدو تكون فعاوط يديها.. تبسم متبع يديها واستقرات عينو على خذها لحمر لمزنك.. تبسم كثر وقرب جهتها فجأة وبدون سابق إنذار وبحركة ما فكر فيها لا هو ولا دارتلها حساب هي.. حركة ما عرف راسو كي دارلها مهم قلبو قالو ديرها.. ميل راسو وهبطو لمستواها وقبلها قبلة حارة فخذها..قبلة ترجملها فيها حبو وامتنانو وشكرو حيث وقفات معاه وفرحتو لي ما قادرش يكبحها... 

خرجات عينيها مصدومة ومتفاجئة منو وبلا ما تشعر حتا هي بعدات عليه بالزربة وهزات يديها وصرفقاتو..

بقات واقفة مخرجة عينيها فيه ويديها كيرجفو.. ما عرفت بوستو منين خرجات ولا تصرفيقتها منين جات.. كتشوف فيه واقف قدامها مدور وجهو لجنب على إثر الصفعة ديالها.. كارز على فمو بقوة ووجهو حمار ووعروق جبهتو بانو.. حرك فكو وحط يدو على حنكو كيمسح على الدقة.. وضحك بسخرية وشاف فيها مزير على فمو.. 

تالاسين :(حطات يديها على فمها) ااا.. ما قصدتشي نضربك.. ما كنتشي باغة نضربك ولكن شني عملتي! علاش تبوسني.. فففف علاش بستيني! مَا كانشي خاصك تبوسني

براء كان فقط كيشوف فيها ويحك فحنكو ويعصر فالفك ديالو.. 

تالاسين:شو ما تفهمشي المجية ديالي لهنا غلط.. يانا جيت غير حيث كنت باغة نهضر معاك.. وقابلتك غير حيث عزيز وكنحسبك ففحال..(سكتات كتشوف فيه) كنحسبك فففف.. فحال..(سرطاتها) مهم ما يمشيشي بالك لبعيد وتفهمني غلط ولا طمع فشي حاجة

مسح على وجهو ورجع هز عينيه حوووومر فيها قرب يبخ الدم.. عقد حجبانو وبنظرة قاصحة ونبرة قوية نطق.. 

براء :خرجي

تالاسين :شافت فيه بدهشة وبقات فمكانها

براء :خرجييي.. خرجي من هنا! خرجي وما تعاوديش ترجعي..

تالاسين :اا.. يانا ما..

براء :(غوت) خرجييييييييييييييي 😡

رجعات لور مخرجة عينيها وكتسرط فريقها.. حتا استدركات راسها وهي تعقد حجبانها ووقفات وقفة مستقيمة هازة راسها.. 

تالاسين :كون هاااني.. واخة نموت ما نعاودشي نزطم عندك

دازت فيه وخرجات كتزدح وضرب فرجليها.. هزات صاكها لي كان فالصالة وخرجات طالعينلها لقرودة للراس.. وهو بقى واقف فبلاصتو حتا سمعها زدحات الباب حتا كانت اتهرس.. ومع الزدحة دالباب مع دار وبغوتة وحدة هبط كاع داكشي لي كان فوق لبوطاجي ولي من الصباح وهي خايدة فيه جابو كلو مترش فالارض.. ووقف كينهج وموكي بقبضة يديه على البوطاجي وكيشوف فلحيط قدامو وعينيه خارجين ولباخ خارج من وذنيه.. 

خرجات من عندو ساخطة وذاتها كلها كترجف معصبة من المنظر لي دارلها وعاد الطريقة باش جرى عليها.. ندمات علاش جات اصلا وكرهات الساعة لي زطمات فدارو.. طلعات لطوموبيلتها وزدحات الباب حتا طلبات معاها الشرع وجلسات كتسوط وتنفخ وكتحاول تكالمي راسها.. صونالها تيلي ورجع قطع ورجع صونا وهي تهزو شاعلة لقات نمرة سعد وهي تجاوب مقندشة..

تالاسين :ما تبقااااشي تعيطلي.. صافي (قطعات عليه وديمارات وزادت)

هو كان مزال واقف فمكانو.. لقرودة كيشطحو عند راسو.. علاش باسها هو براسو ما عارفش يمكن الفرحة خلات عقلو يحبس وغير قلبو لي يحركو.. ولكن باش تصرفقو!! ما بغاتش تسرطلو وكون غير طلبات السماحة هي عااد ما زايدة ناوياها فيه غلط وحاسباه بلي طامع فيها وللمرة لمليووووون كتعاودلو ديك نتا فحال خويا.. هاد لكلمة لي رجعات معقداااه فحياتو وكره لخوت وما يججي منهم هو كاااع.. ضرب لبلاكار لي فوق راسو ورجع قلب الدورة لبيتو غادي ويسوط ويشعط لي لقاها قدامو..وكااااع ديك الفرحة لي فرح هجرها فلخر.. دخل لبس حوايجو وخرج متاجه لشركة يبدل الساعة.. 

☘️☘️☘️☘️

- بعد مضي 15 يوم:

15 ليوم دازت عليهم.. ما شافتو ما شافها.. ضرب على الدار فمرة ولي بغاه كيمشي عندو ولا كيتلاقاه برا.. ومتجنب اي احتكاك بينو وبينها.. مقابل غير لخدمة مع باه والتصوير مرة مرة وكيحاول يلهي راسو بأي حاجة باش ما يفكرش فيها واخة محاولاتو ما جابت حتا نتيجة.. ورؤيا عيات فيه ولا بغى يرجع.. 

اما تالاسين فكانت فالحرب مع سعد.. كل ساعة معيط ومصرد فالميساجات وكيجي للدار كيبغي يحصلها فشي قنت يهضر معاها وهي ديما هربانة منو وما كتجاوبوش وحتا لخروج قطعاتو غير باش ما تلاقاهش.. اما واحد بيسان فحالتها ما تحسناتش.. مزااالة مضيووومة وهازة الهم بلحق قالت صافي تالاسين تراجعات وما اتزوج بيه خاصة منين هضرات معاها وقالتلها بلي لغات الفكرة من بالها.. 

كانت رؤيا فبيتها جالسة كتقاد شالها وفراس موراها كيلبس حوايجو من بعد ما دوش..

رؤيا :دابا داك ولدك ما عوالشي يرجع!! 

فراس:(هز راسو فيها) عاود رجعنا لنفس سيجي ارؤيا!! خلي الولد عليك يجلس فين ما ارتاح

رؤيا: وراه كنتوحشو افراس! ايوا واخة نقولو باغي يجلس بوحدو وكيرتاح فدارو.. واش حتا لمجية قطعها فمرة!! من نهار مشى ما رجع زطم هنا!! ياك لباس! وفما نقولو نشوفك يتلاقاني برا ولا فلكلينيك ولا خاصني نمشي عندو! مالو على حالتو! 

فراس:وا هو هاكاك.. داكشي ما عطاه الله شغانديرولو! 

رؤيا :ييييه دابا نتينا فالح تحكمني غير يانا.. وهو ما عندك ما ديرلو

فراس: (تقابل معاها) دابا شنو واش بغيتيني نربطو بشي كوردة ونجرو ونجيبولك همم! ما بغاش صافي راه ما بغاش خليه براحتو

رؤيا:لا وااالو.. ماشي شغلي.. اليوم يجي عندي نهنا للدار.. اجي ياكما مقلقو شي حد! 

فراس:بفففف وا رؤيا يهديك الله.. ما قلقو حد الالة غير گانتو وما gالتلو.. بدلي الموضوع الله يخليك

شافت فيه عاقداهم وجامعة فمها معصبة ودارت عطاتو بالظهر وكتشوف فيه من لمراية بنص عين وهزات تيلي ديالها..

رؤيا:الو! 

براء :اححم.. الواليدة صباح الخير 

رؤيا:صباح النور.. كيبقيتي لباس

براء :لباس الحمد لله ونتي

رؤيا:الحمد لله.. (شافت ففراس) اححم.. فوقاش اترجع لدار اولدي

فراس:(خنزر فيها) 

براء:الواليدة ياك هضرنا.. 

رؤيا:وا بغيت غير نفهم علاش! 

براء :ما عندك ما تفهمي.. هاكاك وصافي انا هاكة مرتاح بلا ما تحكري الواليدة عافاك

رؤيا:(تنهدات باسى) واخة اولدي واخة.. بلحق اجي غير تعشى عندنا راك من نهار مشيتي ما بقيتي جيتي.. أاااو حتا لهاد درجة!!! 

براء:بفففف الواليدة ر.. 

رؤيا :ما كاين لا واليدة لا حْميدة.. جيتي تعشى مزيان ما جيتيشي ضرب على نمرتي

قطعات عليه وخلاتو مزال باغي يهضر ورمات تيلي فوق لكوافوز.. هزات عينيها ففراس من لمراية لقاتو واقف حاط يديه على جنابو وعاقدهم فيها وهي تخرج عينيها فيه..

رؤيا:شني كاين! 

فراس:ارتاحيتي!! 

رؤيا:اه ارتاحيت.. شي حاجة؟؟؟

قصح فيها الشوفة وهي تجمع فمها وناضت كتبرگم وما كتشوفش فيه ومخلياه هو متبعها بعينيه ومخنزر..

تعاشات لعشية.. وكلشي مجموع فالدار.. كلها وفين ملاهي مع شغلو.. بداو يوجدو لعشا ويستفو فالطبلة ورؤيا ججالسة على الشوك.. غير حاضية الباب وفراس كيطلعها ويهبطها ويعيط الله يستر.. شداتها البكية وقالت صافي ما دارش بغلاوتها وما ايجيش.. عيطولهوم يتجمعو على الطبلة وناضت بزز جلسات على ديك الطبلة وغير حادرة عينيها ومهمومة.. ويله غادي يقولو بسم الله وهو يوقفهم صوتو.. 

براء:اتاكلو بلا بيا 

هزو عينيهم كاملين فيه.. واقف فباب الصالة بسروال باج وسوميج بلومارين.. كيتبسم فوجههم وملامحو فنفس الوقت ما مرتاحاش.. ناضت رؤيا وقفات فرحانة وعينيها كيبريو وترمات عليه معنقاه وهو حنى على جبهتها باسهالها.. 

رؤيا :سحابني ما اتجيشي ههه

براء :وانا نقدر نخسر لخاطر لزين ديالي

رؤيا :(فرحات) الله يرضي عليك ههه

ناضو لي ناضو كيسلمو عليه وقرب هو عند الباقي كيبوسلهم راسهم باحترام وهما كيسولوه على احوالو ويعاتبوه على غيبتو.. 

رقية:(نزلات عليه لراس) ياك المتعوس.. منين دفنوه ما زاروه

براء :اححح دقتك قاصحة ارئوش ههه

رقية:ما بئات فيها رئوش.. علاش نتين خليت فيها شي رئوش.. (باسى) كون مت ودفنوني ما تجيبلي خبار

براء :(باس راسها) لباس عليك.. الله يطول فعمرك 

كمل سلامو عليهم و صابر لعتابهم..كلشي سلم عليه.. خوتو ناضو عندو وهو قرب عند لكبار سلم عليهم.. وهي جالسة فبلاصتها ما تحركات ما تململات غير هزات عينيها فيه ومتبعاه.. حتا سالا وشاف فيها واقف فالجهة لوخرا من الطبلة وتبسم ابتسامة دبزز.. 

براء:تالا! صافا! 

تالاسين :(جاوباتو بابتسامة صفراء) الحمدلله 

قلب وجهو وما رجعهش شاف فيها ولا جات عينو فعينها واخة غير بالغلط... واخة راه مكابر بزااااف ومقاتل مع نفسو باش ما تغلبوش ويشوف فيها.. جلس وسطهم فرحانين بيه كيقزربولو فالماكلة وخدامين عليه ضعافيتي ما كتاكلش وهي غير كيتبسم ودايرلهم الخاطر.. وتالا غير كتقلب فيه عينيها بالفقصة ديال داك نهار لي ما بغاتش تسرطلها.. 

سالاو لعشاء وناضو يتجمعو فالصالة.. وججلسو كاملين على الضحك والهضرة.. وتالاسين وسطهم ساكتة وحتا بيسان قليل فاش كتهضر.. 

صونالها تيلي ديالها وهو فيديها وهي تهز راسها فيهم وقطعات دغيا وقالت مفافية.. 

تالاسين :نمرة بريفي..باينشي حد باغي يتبرهش

رؤيا:ما تجاوبيشي.. لي بغى يعيطلك بالنمرة ماشي بريفي.. تجبرو شي برهوش باغي يتفلا

تالاسين :اه وي.. حتا يانا داكشي علاش قطعت ههه

حكات وذنيها بتوتر وحنات راسها دارت لتيلي سيلونس.. وهو هاز حاججبو وكيشوف فيديها بنص عين ورادلها البال وهي كل شوية تقطع المكالمة وباين عليها توترات.. جاها ميساج وفتحاتو عاقدة حجبانها.. 

سعد:ما بغيتيش تجاوبي على خاطرك.. اتخرجي اتلقايني فالجردة لي مور لفيلا.. خرجتي مزيان ما خرجتيش اندخل لداخل نفرگعو هاد الزمر

قراتو وساطت معصبة وسدات تيلي كتعض فضفارها.. بقات كتشوف حتا عيات وهي تنهد وسيفطاتلو.. 

تالاسين :خليك تما.. هانا ماجة

ناضت وقفات وهي توقفها بيسان بتسائل

بيسان:فاين ماشة

تالاسين:هاااا..اا غير طواليط.. ونطلل على مينوشة نشوفها واش كلات ولا مزال

بيسان:اه اوك

تبسمات فوججههم وخرجات كتلعب بصباعها وتشوف موراها بحال الا ما عرفت شنو دايرة.. غبرات من قدامهم وهي تقلب الدورة لكوزينتها ومن تما خرجات من الباب للجردة اللورانية ووقفات كتقلب عليه بعينيها حتا كيخرجلها من مور الحيط وقفزها فبلاصتها ومد يدو جرها حتا هي مغطيين بالحيط داادار.. 

حطات يديها على قلبها مفزوعة وعينيها خارجين.. وهزات راسها فيه ساخطة ودفعاتو كتهضر بصوت خافت.. 

تالاسين :شهاد الزمر.. خلعتيني

سعد:توحشتك

تالاسين :(ختزرات فيه) جمع راسك

سعد :علاش ما كنتيش كتجاوبي همم!! 16 اليوم وانا انحماق منين ما دزتلك تقمعيني!! لا واتساب لا فيسلا انسطا لا ابيل لا ميساج.. حتا لخروج قطعتيه

تالاسين :حيث ما بقالنا فاش نهضرو

سعد:(خنزر فيها) علاش كديري هاكة

تالاسين :نتينا لي علاش كتعمل هادشي.. فاين باغي توصل

سعد :نتي عااارفاني مزيااان شنو باغي.. انا راه ما نتفرقش عليك غير تهناي

تالاسين :(خرجات فيه عينيها) واش بزز!!! 

سعد :اه بزز.. شفتي كون نهار طلبتك قلتيلي لا والله حتا كنت نميك علبك.. ولكن باش تسمحي فيا على قبل داك خينا والله ما تكون ولا تكون.. هو بغى يحيدني باش تخلالو الساحة.. بلحق والله لا كانت ليه

تالاسين :لا نتينا لا هو.. يانا ما بقيت باغة حد غير فرقوني بزوج

بغات تمشي وهو يشدها من يديها ورجعها مخرج عينيه فيها وغوت ساخط.. 

سعد :ا والله مااااااااااا نفرقك سمعتييييي

حطات يديها قدام فمو بلا ما تقيسو وصبعها على فمها مخرجة عينيها فيه وكتشوف فجنابها.. 

تالاسين :ششششش فضحتينا.. سكت

شافت فجنابها مخلوعة عنداك يكون شي حد ورجعات شافت فيه عاقداهم ودفعاتو بعد عليها..

تالاسين:شني بغيتي دابا!!

سعد:(بعصبية) واش مزالة كتسولي شنو بغيت!!

تالاسين:(خدات نفس عميق وهضرات بهدوء ) سمعني اسعد الله يخليك.. يانا نهار لول كون زيالي ايوقع هادشي كامل ما كنتشي انجي حتا نتلاقاك.. فهمني عافاك.. يانا ما باغاشي ينوض بينك نتينا وبراء مشاكيل بسبااابي فهمها..

سعد:شفتي الا ما قبلتيش عاد انوض باباهم هاد المشاكيل

تالاسين:(زفرات) ما عوالشي تفهم!

سعد :لا مخي زليجة

تالاسين:فهادي ما كذبتيشي

سعد :دابا شنو.. ما اتخلينيش نجيب الواليدة ونجي

تالاسين :(مسحات وجهها بقلة حيلة) بفففف مشي فحالك اسعد الله يرحم يماك

خرج عينيه فيها وضرب فالحيط لي موراها معصب..

سعد:ما ماااشيش ما ماااشيش.. (شدها من دراعها) ما انمشي حتا نسمع منك اااه.. ما انفرقك حتا تقبلي سمعت.. ما انمشيش

تالاسين :(دفعاتو عليها مخرجة عينيها وكترجف) لااااا سمعتي لاااا.. (صوتها تنغنغ) بركة عافاك مشي فحالك

شاف فيها باسى وخفض صوتو وقرب منها بملامح متوسلة..

سعد:عافاك اتالا.. عافاك ما ديريش فيا هاكة.. راه كنبغيييييك فهميها كنبغييييك.. ما نقدرش نتفرق عليك.. ماشي حتا قلت صافي اسعد ضحكاتلك الايام.. عافاك اتالا ما ديريش فيا هاكة.. 

تالاسين :(شداتها البكية) الله يخليك ما تزيدشي تضغط عليا.. حاسة براسي ايتفرگع عافاك 

سعد:نتي راسك ايتفرگع وانا شنو نقول هااا!! شنو نقول انا! شنو نقول فقلبي لي ايخرج من بلاصتو.. 

حنات راسها كتفادى تشوف فيه وهزات يديها بزوج لي كيرجفو ورجعات بيهم الشعر مور وذنيها..

تالاسين:(بهدوء) مشي فحالك اسعد.. قلتلك داك نهار سالينا

سعد:(تعصب) وااااش باغة طرطقيلي شي عرق فلمخ!! سير فحالك.. سير فحالك امااا مااشيش الالة.. وما ساليناش.. (رجع تنفس وخفض نبرة صوتو) شوفي فيا اتالا.. راه والله حتا كنبغيك وبزاااف.. 

تالاسين :فهمني ر.. 

سعد :(قاطعها) فهمييني نتي ابنت الناس.. فهميني نتي.. راه كنبغيييك وما قادرش نفرقك.. ما قادرش نتيق بلي الحلم لي حلمتو شحال هادي تسالى قبل ما يبدى..

تالاسين :هانتينا قلتييها.. قبل ما يبدى.. وحيث باقي ما بدى خلينا نحبسو هنا.. حسن ما داك لحلم زويييين لي حلمناه يتقلب لكابوووس خاااايب اسعد

سعد :(حل عينو بفرحة) هانتي قلتيها.. حلمناااه.. اذا حتي نتي فحالي ياك.. حتا نتي كتبغيني وباغانا نكملو.. 

تالاسين:(هزات عينيها فيه) واش يانا كنشرق ونتينا كتغرب!! واااااا دخلا نرااسك.. سااالينا اسعد سااالينا نسااااني رجعني ديك لبنت لي كنت حاسبها فحال ختك ونسااااا شي حاجة اسمها يانا وياااك

سعد:(سخط) دابا وااااااش حاالفة تخرجي مني شي حااجة لي ما تعجبكش.. وما انفرقكش فهميييها واخة نعرف نبقى تابعك حتا لمووووت ما مفارقكش.. كنبغييك وانبقى نبغيييك وما انمشي حتااااا ندييييك.. (شدها من دراعها كيمخضها) علاااااش كديري فيا هاكة علااااش علااااش

هزات راسها فيه ونترات يديها منو بقوة ودفعاتو وهي كتمجنن باغة طرطق حيث بصح حاسة براسها اتنفاااجر.. براد من جهة سعد من جهة واعجابها بيه من جهة.. وهو غير ما كيزيد يضغط عليها.. شافت فيه كتنهج ودموعها نازلين فخط واحد وذاتها كلها كترجف عليها..

تالاسين :صااافي صااافي بركة اهههئ اهنئ اهء عييييت صااااافي حبس حد هناااااا اهئ اههئ بعدو مني كلكم ما بقيت باااغة حد اههئ اههئ صااافي نسااااني نساااني.. محيني من حياااتك اههئ اهئ..

سعد:(بغي يشدها) تالا انا.. 

تالاسين :(بعدات عليه) بععععععد مني.. بععد منييي اهئ اههئ اههئ مشيييي فحااالك مشيييي.. خليني علييييك اههئ انهئ اهئ مشي وخليني.. نسااااني اسعد نسااااا

سعد:ولكن انا.. 

تالاسين:(حطات راسها بين يديها) واااا مشييييي اهههئ اههئ مشيييييي صااافي بركة

شاف فيها مخلوع وهي قدامو عقلها ايخرج وهز يدو كيكالميها وكيبعد بشوية بشوية..

سعد :صافي صافي.. هانا انمشي.. كالم كاالم.. صافي غير سكتي هانا انمشي

تالاسين :(حاطة كفوفها على وذنيها) مشي فحالك مشي اههئ مشي وخليني اههئ انههئ

سعد:اوك اوك.. مي ديري فبالك مزال ما سالينا.. مزال راجع.. وما انفرطش فيك

قلب الدورة ومشى خارج بحالو ومرة مرك يدو يشوف فيها.. وهي باقة على نفس الوضع.. حتا لواحد اللحظة وهي تهز راسها لسماء كتشهق ودوزات يديها على عنقها وخرجااات صوت الاااااااااااه وطاحت هابطة مع الحيط بشوية حتا جلسات وحنات راسها بين رجليها كتبكي وتشهق..وشعرها هااابط مدرق وجهها فمرة.. بقات هكاك حتا كتحس بشي حد جلس حداها.. وهزات عينيها حومر كيبريو بالدموع فضوء القمرة.. لقاتو جالس حداها وهي تخرج عينيها فيه.. جالس مسرح رجل وثاني لوخرا وراخي يدو فوق ركبتو.. وكيشوف قدامو عاقد حجبانو فصمت.. 

هزات عينيها فيه وبعدات الشعر على وجهها لي مجلط بالدموع وبقات مبلقة عينيها فيه كتفكر واش سمعهم او لا لا.. وهو ساكت حداها وكيشوف قدامو ساهي وموكي على الحيط حداها..فجأة تنهد تنهيدة طويييييلة وبصوت خافت مبحوح شوية بزز باش خرج نطق بلا ما يشوف فيها.. 

براء :كتبغيه! 

سكتات كتمسح دموعها بظهر يديها وشافت قدامها حتا هي جامعة رجليها عندها ومعنقاهم بيديها.. شافها ما جاوباتش وعاود سولها.. 

براء :سولتك.. كتبغيه! 

تالاسين :(بصوت منغنغ بلبكى) كنبغيه او ما كنبغيهش.. شنو الفرق

براء :(ساهي قدامو) كاين فرق.. وفرق كبيييير

تالاسين :الصمت

براء :(سرط ريقو عاقد حجبانو وصوتو باين فيه مقهور) ودابا جاوبي.. كتبغيه! باغة تكملي معاه! 

تالاسين :يانا ما بقيت باغة والو (حنات راسها بين رجليها كتبكي) ما بقيت باغة واالو اههئ اههئ 

براء :(تنهد) وعلاش كتبكي! 

تالاسين :كنبكي على زهري.. كنبكي على ما عطاتني الدنيا اههئ اهنهئ كنبكي حيث عرفت بلي لي بحالي مكتاب عليهم لمحنة ولعذاب فما مشاو اههئ انهنئ اهء اهء اهء 

شاف فيها بالجنب ورجع قلب وجهو عاقد حجبانو ولكن واخة هكاك باااين فوجهو القهرة لي حاس بيها.. 

براء :هزي راسك ومسحي دموعك

تالاسين :دابا نتينا علاش لحقتيني.. سمعت كلشي ياك 

براء: مسحي دموعك.. 

شاف فيها بنظرة جادة كيتسناها تمسحهم.. هزات راسها فيه بنظرة باردة شافتو كي كيشوف فيها وهي تقلب وجهها ومسحات دموعها.. وهو يقلب وجهو مرة اخرى.. 

براء : دابا انبدل السؤال! فرضا كون ما كنتش انا.. او كون ما عرفتيش بلي كنبغيك.. واش كنتي اتكوني فرحانة و مرتاحة معاه!! 

تالاسين :دابا علاش هاد الاسئلة!! 

براء :جاوبي

تالاسين:(شافت فيه كتفكر ورجعات كتشوف قدامها) على الاغلب

براء:(عض على شفايفو) اوك.. خديت جوابي 

تنهد وبقى ساكت لمدة باغي ينطق وحاس بلكلام ما باغيش يخرجلو من الحلق وكيتضارع باش يخرج ديك الكلمة من فمو.. وفآخر المطاف هز راسو موكيه لور وعينيه فالسماء.. 

براء :(بهدوء) تزوجي بيه

هزات عينيها فيه مبهوضة وكترمش وهو مزال على نفس الوضع ما دار حتا حركة ومخليها هي متفاجئة بكلامو.. 

تالاسين :شني قلتي! 

براء :منين كتبغيه ومرتاحة معاه وفرحتك اتكون حداه...تزوجي بيه

تالاسين :(سرطات ريقها كتشوف فيه) 

براء :كنبغيك اه.. وحيث كنبغيك نبغي نشوفك ديما ضاحكة وفرحانة.. واخة على حساب فرحتي.. تمنيتك حلالي اه.. ولكن ماشي ونتي قلبك مع واحد اخر.. تزوجيه اتالا.. انا ما انوقفش فطريقك من هنا لفوق.. وما تخافيش ما ايوقعو حتا مشاكيل بيني وبينو وما انجيش فطريقو..بلحق الا بكاك شي نهار ما نواعدكش نسكت.. انا انحسب راسي ما قلت والو ونتي اتنساي بلي جيت وهضرت معاك داك نهار.. ورجعي حسبيني كما قبل (ضحك بسخرية) خوك لكبير هه.. 

قلب وجهو شاف فيها لقاها مبلقة عينيها فيه وحالة فمها وهو يتبسم ورجع كيشوف قدامو..

براء: الصراحة فاش كنفكر كنلقى راسي نستاهل.. حيث انا لي بقيت ساكت سنيييين.. وسكوتي هو لي وصلني لهاد الحالة.. يمكن كون هضرت من شحال هادي كون ما حسبتينيش خوك.. ساعة نهار بغيت نهضر جااا المكتاب وسكتني.. ما تلوميش راسك وحتا انا ما كنلومكش.. حيث هادي عقوبة سكوتي وهاني كنخلصها.. الدنيا هاكة.. ماشي ديما كتعطينا لي بغيناه وماشي ديما كتجي فصفنا.. وواخة كنعياو نخططو لحياتنا كيجي لمكتاب وكيقلب كلشي.. (شاف فيها بابتسامة مخبية موراها شحال من حاجة) ودابا خرجيني من حساباتك وفكري فراسك.. وخاصك تعرفي بلي فرحتي من فرحتك..وراحتي من راحتك.. ونهار نتي كتبكي دموع انا قلبي كيبكي الدم.. 

وتروها شوفاتو وقلبات وجهها قدامها كتفكر فهضرتو وساكتة وهو شاف فيها مزيان ورجع قلب وجهو..

سكتات كدور هضرتو فدماغها وهو جالس حداها ساكت وصدرو كيطلع ويهبط ببطء.. حتا سمعها هضرات بصوت خافت وهي كتشوف قدامها.. ما فرزش شنو قالت مزيان ورجع سولها.. 

براء :شنو! 

تالاسين :رجع لدار

براء :(رجع شاف قدامو) لا خليني بعيد حسن

تالاسين :ياك قلتيلي نساو كلشي ونرجعو كي كنا ايوا صافي رجع فحالك.. كلشي فالدار باغيك ترجع

براء :ما نقدرش نرجع.. حيث الا رجعت عمري نسى

تالاسين :(بدون تفكير) شني اتنسى! 

دار شاف فيها مطولا مع ابتسامة خفيفة خلاها تفهم بلي قصدها بكلامو وهي ضرب طم..

براء :بغيت غير نسولك اخر سؤال!! 

تالاسين :(شافت فيه باستفتار) شنو؟؟ 

براء :علاش هو!! 

تالاسين :(سكتات شوية وجاوباتو) وعلاش انا!!

شاف فيها وضحك على راسو.. حيث عطاتو جوابو.. دبصح القلب هو لي ما فيهش علاش وكيفاش.. القلب ما يشاور.. وكون كنا نتحكمو فيه كون شلاااااااا ما يكون.. 

براء :(تجلس عليه معاوط) شوفي فيا!.. هزي راسك وشوفي فيا

هزات راسها متوترة وكدور فعينيها حشمانة منو وتقابلات مع عينيه.. تبسم ابسامة خفيفة فوجهها.. ابتسامة كون تعرف شحال مخبية ديال الصراع وسط منو وشحال عانى باش خرجها كون حشمات من راسها.. 

براء:(تنهد)تهلاي فراسك.. ضحكي وفرحي.. وما تخليش دموعك ينزلو.. فرحتك مع سعد 

اذاً كملي معاه.. وانا اكيد ايجيني يوم ونسى ههه (ضحك بقهرة حيث عارف راه غير كيكذب على راسو) شنو انديرو القلب هو لي كيحكم ونتي قلبك ما اختارنيش.. 

شاف فيها مطولا كيتشاور بينو وبين راسو وفلخر زعم وقرب وحط شفاهو على جبينها فقبلة خفيفة وبعد وخلاها هي كترمش.. 

براء :ردي لبال لراسك

تبسملها مرة اخيرة وناض وقف خدا نفس عميق وقلب الدورة داخل فحالو وخلاها هي جالسة كتشوف فيه حتا غبر من قدامها.. 

بقات شحال جالسة كتخمم وتفكر مع راسها وفلخر ناضت حتا هي دخلات.. رجعات عندهم للصالة لقاتهم جالسين وبراء ما كاينش..

تالاسين :واش مشى براء! 

هنية:اه ابنتي مشا.. 

رؤيا:(بحزن) عييت نشد فيه ما بغاشي حتا يبات.. تقول مجلسينو على الشوك

بيسان:(بصوت خافت بينها وبين راسها) لهلا يوريك الشوك لي جالس عليه.. (تنهدات) يانا لي حاسة بيه

جواد:خليه الواليدة براحتو.. المهم يكون على خير وبيخير

رؤيا:(بغصة) نتوما راه حتا واحد ما حاس بيا.. واش عام ونص وولدي بعيد عليا وفلخر يبقى يجي عندي بحال الضيف.. علاش مالو! كنهزو عليه لحجر باش ما يجلسشي براحتو هنا

زينب:ما ديريش فبالك ابنتي.. ولاد ليوم كلهم كتعجبهم الاستقلالية.. وهو راه ولف العيشة بوحدو عليها

رؤيا:(بدات دمع) غير كتهضرو وصافي.. يانا بغيت ولدي حدايا نصبح عليه ونمسي عليه اهئ اههئ اهء اهء .. جالس تما بوحدو فحال لمقطوع ما عرفناه واكل ولا شارب اهء اهء

فراس:(عقد حجبانو) دابا علاش كتبكي! مسحي دموعك بلا ما تمرضيني

رؤيا:(زادت فوتيرة لبكاء) اههئ انههننئ خليني نبكي.. ولدي ما بقاشي حتا حامل يجلس معايا اهئ اهئ اههئ ونتوما تقولولي راحتو.. زعما فحال الا يانا ما نعرف شني كنعملو اههئ اهئ اهء 

حسن:يهديك الله ابنتي.. ما دخليش لمحبة فهادشي.. معزتك حاجة وراحتو حاجة

رؤيا:ما شغليييشي اهء اههئ اههنهئ ماشي شغلي.. لي يبغيك يجلس معاك واخة وسط لعافية اهنهئ اههئ اهنهئ 

فراس:(خنزر فيها) رؤياااااااااااا.. بركة من لبكى

رؤيا :جيبولي ولدي اهنهئ اهئ اهئ 

جواد:(جر جهاد وقفو حداها) ها هو.. ما كفاكش هذا.. ها انا

رؤيا: (شافت فيهم كتغبن) 

جهاد: (عنقها)هانا العمر بغيتيني..

رؤيا:بغيت براء اهء اهئ

جهاد:(طلع حاجبو) كتوحمي عليه.. (سكت مخرج عينيه) ويلي عنداك تكوني حاملة.. الواليد درتيها 😳 حملتيلي الواليدة!!!!!! 

جواد:(شهق مبهوض) ويلي مك يا مك.. شَرَفنا ضاااااااااااع 😳😳

فراس:(جمع مع جواد لي جالس حداه بدقة لعنق) نوض تحرك من حدايا.. (ناض وقف جر رؤيا ونزل على جهاد بدقة لراس) نحمَّلها ونفوتها لهيه وبتوام گااااع ويله تجمع عليا.. نوضي نتي ونتي غير تغبني عليا.. زيدي قدامي

رؤيا:(كتمسح عينيها وتغبن) بغيت ولدي اهء اههئ 

فراس:جمعي خناينك

طلعها بحالها هي كتخنن وتبكي وهو كينگر عليها.. وخلاهم هما كيهضرو وتالاسين جلسات طايح عليها الضيم وهي كتشوف رؤيا فديك الحالة وكتلوم راسها بلي هي السباب ففراق الولد على مو..

دازت الايام وبالضبط شهر.. سعد مزال تابع تالا وشاقمها فالدخلة والخرجة وحالف ما يستسلم ولا يهز الراية.. اما هي فمنين ما جاها كتهربلو.. ورجعات ديما ساهية ومرفوعة.. حيث من واحد الناحية باغة تكمل معاه ومن ناحية خرا كتفكر فشنو يقدر يوقع اذا قبلات وهو غير ما كيزيد يضغط عليها بإصرارو عليها.. اما براء ف فشهر كااامل شافتو مرة وحدة وتلاقاتو غير عند الباب خارجج بحالو من الدار من بعد ما جا يطل على رقية لي كانت عيانة شوية ومن تما ما رجعات شافتو.. وكلامو فديك الليلة مزال مسجل وكيدور فراسها.. كانت كتشوف رؤيا لي ديما مغبنة ودمع على قبلو وكيضرها خاطرها وتلوم راسها كثر وكثر حيث عارفة ومأكدة بلي هي سبابو حتا طج.. شحال من مرة فكرات فمشاعرو تجاهها ولكن كتلقى بلي هي عمرها شافتو بديك النظرة باش تقبل حبو ليها.. اما بيسان.. فكانت بين نارين.. عايشة وما عايشة رجعات ضحك بزز وديما ساهية كثر من تالا.. ما قدراش تحقد عليهم وما قدراش تنسى حبها ليه.. واكتفات انها ترتاح نسبيا حيث موضوعهم تسد ومزالة عاضة فالصبر وزاطمة على قلبها وساكتة.. وبراء يا براء.. بالنسبة ليه لحياة وقفات.. أحلامو الوردية تلاشات.. وقلبو كيدق ولكن ما حاسش راسو عايش.. ايامو رجعات بحال بحال.. الرياضة الخدمة الدار والتخمام طول ليل حيث النعاس تخاصم معاه.. والايام غادةة جاية وكلها خايد فهمو وحتا حد ما هاني.. 

🌿🌿🌿🌿

"أحبك.. 

تُحبني.. 

يُحبني.. 

تُحبه.. 

والقلب سُلطانُنا 👑.. 

ننحني له سَمعاً وطاعة فالحب ليس بإرادتنا..💘" 

🌿🌿🌿🌿

جالسة فالبالكون... مربعة رجليها وسط سلة دلقصب معلقة فالسقف وموكية راسها لور كتشوف فسماء.. شعرها طالقاه يلعب بيه هواء ليل.. وبيجامة خفيفة دالنعاس ساترة لحمها.. بين يديها مينوشة مكمشة فيها وخاشية راسها فكرشها.. ويدين تالا كتداعبها ببطء.. تنهدات حتا تهزو كتافها وهبط صدرها بالبطيء.. وبصوت مهموم نطقات كتشكي همها لمينوشتها.. 

تالاسين :شني نعمل أمينوشة! حاسة براسي مقسومة على مئة جهة.. عقلي فجهة وقلبي فجهة.. باغة وما قدراشي.. خاصني وما خاصنيشي.. شني نعمل غير قلي!!! وكووولو كوم وخالتي كوم يااخور.. دموعها كيقتلوني.. بعدت على سعد غير باش ما نشتتشي شمل مي فلخر لي خفت منو طحت فيه.. الولد فجيهة ويماه فجيهة.. هي كتعذب ويانا كنتعذب معاها.. عييت امينوشة والله!! كلشي يهون ولكن خالتي هي لي ما باغاشي تسرطلي حرقتها.. نصبر على كلشي ولكن ما نقدرشي نصبر على شي حاجة تآديها ولا تآدي شي واحد من هاد العائلة.. شنو فنظرك نتينا!!! نعمل بكلامو ونتبع قلبي! باغة امينوشة ولكن فاش كنتفكرو ونتفكر كلامو ما كنقدرشي.. ما باغاشي نجرحو امينوشة.. واخة راني جارحاه اصلا.. اووووووف راسي ايتفرگع.. كنفكر فراسي وفيه وفسعد وفخالتي وما باغة نظلم حتا حد فينا.. بلحق كيفاش ما عرفتشي!!! 

سكتات شحااااال ساهية قدامها وعاقدة حجبانها كتفكر.. وفلخر جمعات النفس وبنظرة جادة شافت قدامها.. 

تالاسين :شفتي شنو! اكثر واحد فينا معذب هي خالتي.. ويانا لي عارفة فراق لحباب شنو ساوي.. (غمضات عينيها هازة راسها) بلاصتي فهاد الدار خاصها تخوى باش يعمرها مولاها.. خاصني نخرج باش هو يرجع.. (عقدات حجبانها) ولكن الا بغيت نهز راسي ونمشي بحالي حد ما ايخليني.. وعمي فليلتو يرجعني.. بفففففففف حتا كنقول فكيتها وترجع تعقدلي.. 

سمعات تيلي ديالها كيصوني.. طلات عليه كان فوق الطبلة قدامها.. شافت شكون ورجعت لور وتنهدات وشافت قدامها.. 

تالاسين :هو حل واحد لي كاين.. واخة انظلمو ولكن مرجوعتو ينسى.. 

هزات تيلي ديالها كتشوف فيه حتا قطع.. سرطات ريقها وهي كتضارب مع نفسها.. وفلخر سمات الله وصونات.. 

🌿🌿🌿🌿

صبح صباح فحال كل صباح.. ناضو كلها لشغالو.. ودخلات هي وبيسان من برا من بعد ما كانو كيجريو كالعادة.. واخة كل وحدة فين كانت ساكتة وقليل فاش كيهضرو.. حيث بيسان من يوم يومها ما كتعرفش تهز فخاطرها او تكره شي حد عسى تكره تالا لي بحال ختها وكثر ما تقدرش واخة تبغي.. كتقصح وتسرطها وتكمدها وتسكت.. واخة بقى فيها راسها وبزااااف.. دخلو وكل وحدة مشات لبيتها.. ومن بعد الحمام ومن بعد ما قادو حالتهم نزلو يفطرو مع العائلة بحال كل صباح.. كلشي مجموع وبلاصتو هو خاوية ورؤيا فيما تشوف بلاصتو تبدى بكاسيطتها لي حفضوها كل صباح.. تجمعو كياكلو حتا صونا تيلي ديال رؤيا وهزاتو كتجاوب.. حتا خلعات كلشي لي جالس حداها... 

رؤيا :شنييييييييييي! 

كلشي هز راسو فيه باستغراب وهي هزات راسها فتالاسين كتشوف فيها مبهوضة وتالا كدور فعينيها فبلاصتهاَ.. 

شافو فيها كاملين باغيين يفهمو منها شنو واقع.. وهي عينيها على تالاسين ومبجقة عينيها فيها..

رؤيا :واش كتهضري بصح!!

شامة: ههه والله.. فلعشية وجدو راسكم

رؤيا :كيفاش فلعشية!! اصحبتي راكي شلطتيني! فوقاش وكيفاش راه ما فهمتشي

شامة:بحالي بحالك.. الولد البارح جاي عندي فنصاص ليل كيدق عليا فيقني قالك غذا انمشيو نخطبو تالا.. ما فهمت وااالو مهم لي عرفتو هو أنهم هاضرين بيناتهم وتالا قابلة وهو باغيها وايتسطى راه قرييب يحماقلي بالفرحة هههه

رؤيا: (شاف فتالا) هادشي راهم متفاااهمين بيناتهم..(تبسمات) ههه ناري على خبار.. ما عرفت واش نفرح ولا شني

شامة:أ فرح اصحبتي.. شكون فحالك انتناسبو هههه

رؤيا :وييييه ولكن ماشي زربتو شوية

شامة:اختي واالو هاد خينا عندي واش بغى يصبر.. قلتالو قالك لا والو اليوم هو اليوم ونضربو لحديد ما حدو سخون

رؤيا:هههه فشكل هادشي.. مهم مرحبا بيكم أنا انهضر معاهم فالدار ونرجع نعيطلك صافي

شامة:اوك احبيبة.. يله بسلامة

قطعات وشافت فتالا كضحك وفنفس الوقت متفاجئة.. 

رؤيا :بصح كنت عارفة!! 

تالاسين :الصمت

فراس:شنو كاين! 

رؤيا:ههه خير خير..غير لخطاب جايين عندنا اليوم

زينب:لخطاب!!! لمن!! 

رؤيا:لتالا هههه

بيسان:(خرجات عينيها) ششش.. ششكون! 

رؤيا:ههه سعد ولد خالتك! 

وكانت الصدمة.. خرجو عينيها وهي جالسة فبلاصتها واللقمة وقفاتلها فالحلق..وبقات غير كتبرقق فعينيها وعينيها تجمعو فيهم الدموع.. تشللات فبلاصتها لا كلام لا حركة.. 

فراس:(شاف فتالا ورجع حك لحيتو) امممم مزيان..الله يكمل بالخير.. (تنهد)انا انمشي.. تعطلت

رؤيا :ههه شعندك! هذا ما اتقول؟؟ 

هنية:تجبرو ما سخاشي بيها ههه الله يكمل بالخيييير ابنتي فرحتونا

رقية:شكون ايتزوج! 

حسن:تالا ايخطبوها اليوم ههه

رقية:(خرجات عينيها) تالا!! بيمن؟؟ واش ببراء

شاف فيها فراس عاقد حجبانو عرفها عارفة لي كاين وجهاد وجواد غير كيدورو فعينيهم.. 

رؤيا :هههه شني جاب براء نالهضرة!! سعد لي جاي يخطب.. بالي هادشي كان من زمان غير حنا لي فدار غفلون 

رقية:كيفاش بسعد!!! اوييييلها!! ما يمكنش

رؤيا:علاش ما يمكنش!! 

رقية:ااا وو هو انن..(شافت فتالا) نتين ئابلة؟؟؟ 

سكتات تالا كتشوف فيها وخلات رقية مبهوضة حالة فمها وهما كيبركولها وفنفس الوقت جاتهم غريبة حيث علي غفلة.. لي ما فخبارو ما يعاود راه فرحان ولي فخبارو اش كاين جالس مبهوض

ما عارف ما يدير ولا يقول.. فراس خرج فحالو واخة ما هضرش ولكن قلبو محروق على ولدو.. وجواد وجهاد ساكتين سارطينها حيث بقى فيهم خوهوم.. وتالا غير ساكتة وتبسم ليهم.. وبيسان ورقية بقاو فالوسط غير كيرمشو بعينيهم وضرباتهم اللقوة..

ناضو كلهم ها لي مشى يوجد للخطبة دلعشية ها لي ناض طلع لبيتو يتصنت على حريقو ها لي خرج فحالو.. وبيسان طلعات لبيتها كتمشي وتجي ودموعها هوادين ما عرفات ما دير.. علاش ياك كانو سدو الموضوع علاش دابا رجعو!!! شنو وقع؟؟ بغات تحماق وذاتها كلها كترجف عليها.. وقفات فبلاصتها لوهلة وقلبات الدورة خارجة ساخطة والوجهة بيت تالا.. دخلات عليها مدرمة لقاتها جالسة شادة مذكرتها كتكتب وهي توقف عليها عينيها خارجين..

بيسان:شنو هادشي؟؟ علاش رجعت قبلتي!! ياك كنتي ساليتي علاش رجعتو؟؟

تالاسين :(حلات فيها فمها) بيسان شعندك!!

بيسان: كيفاش شعندي؟؟؟ علاش رجعتو ياك قلتي صافي؟؟ وخاي مسكين لي كيبغييك ماشي حشومة عليك!! هاااا باغة تشعلي بيناتهم لعاافية؟؟ واش عارفة راسك شني كتعمل؟؟ ما فكرتيشي فخاي لي ايتعذب والمشاكيل لي اينوضو فكرتي غير فراسك!!

تالاسين :خاك هو لي قالي نزوج بيه

بيسان:بلااااا كذوب!! ما تلصقاشي فخاي!! براء كيبغيك هادي سنييييين غير نتينا لي ما كنتيشي كتشوف ما ايجيشي دابا ويقولك مشي زوج بواحد ياخور!!! شعندو حماااق؟؟؟ 

تالاسين :دابا علاش كتغوت!! خاك بدوقمو قالي مشي زوج بيه ولا ما تيقتيشي مشي سقسيه.. 

بيسان: (سكتات مبهوضة) لا ما يمكنشي

تالاسين: شافت فيها وسكتات

بيسان:(سرطات ريقها) نتينا ما خاصكشي تزوج بسعد!! راه اتنوض روينة بيناتهم!! عارفة ولا لا!! 

تالاسين :عاااارفة.. وعليها نهار لول عملت بالناقص.. ولكن خاك قالي بلي صافي ما كاين حتا مشكيل وفاش فكرت جبرت بلي هاد الحل هو انسب واحد

بيسان:(غوتات) انسب حل!!! علاش هذا حل اصلا!!! واش ما بقاااااشي فيك خاي!! هاااا؟؟ راه تجبرو غير بزز منو قالك مشي زوج بيه!! واش ما كتفكرشي!! 

شافت فيها تالاسين وخدات نفس طويييل ووقفات عاطياها بالظهر توجهات لجلسة صغيرة عندها فالبيت وجلسات..

تالاسين :فكرت وفكرت مزيان.. نتينا ما عارفة والو ابيسان غير كتهضر

بيسان:يانا لي عارفة كلشي! حراااام عليك والله اههئ انهنئ ما بقاشي فيك براء!! اهئ اهئ راه كيبغيييك فهمتيها كيبغيك!

تالاسين :(سخطات) ويانا ما كنبغيييهشي!! واش اعباد الله بزز!! ما كتفهموووشي؟؟ ما كنبغيهشي!! كنشوفو فبلاصة خاي ؟؟ ما عمري فكرت فيه بديك لا فاصون!!! ونجي فيوم وليلة نبغيه؟؟

بيسان:(قربات عندها وجلسات قرفصاء قدامها كتوسلها بعينيها ) عطيه فرصة عافاك.. قرب منو اتبغيه والله حتا اتبغيه غير جرب عافاك اهئ اهئ اهئ

تالاسين :(مسحات على وجهها وساطت) عافاك ابيسان خليني عليك.. حتا واحد ما باغي يفهمني

بيسان:(وقفات) فهمتي نتينا شي حد باش يفهموك الناس!! اهئ انهنههئ حرام عليك حرااام اهئ اهئ ايجي شي نهار واتندم فيه دابا تشوف اهئ دابا تشوف..

خرجات كتجري من عندها ودموعها نازلين وخلاتها هي جالسة متبعاها بعينيها حتا غبرات ورجعات حنات راسها عند رجليها وتكمشات على راسها كتبكي..

🌿🌿🌿🌿

كان جالس فالبيرو ديالو.. خاشي راسو فلبيسي ولوراق دايرين بيه.. لابس سروال توب بلومارين مع سوميج بيضة طاويلها لكمام وكرافاط راخفها على عنق.. عاقد حجبانو ومركز حتا سمع تيلي ديالو كيصوني ومد يدو هزو بلا ما يشوف حتا شكون وعينيه مزالين فلبيسي.. وجاوب..

براء:الو!!

بيسان:(بصوت منغنغ) فاينك؟؟ 

براء :(عقد حجبانو وبعد يديه من لاصوغي) بيسان!! مالك!!! واش كتبكي

بيسان:فاينك أبراء!!

براء:انا فالشركة علاش!

بيسان:انا ماجة عندك!

براء :ياك لباس..

قبل ما يكمل كلامو كانت هي قطعات.. بعد تيلي على وذنيه كيشوف فيه باستغراب.. حطو ورجع كيكمل شغالو وهو بالو مشطون مع ختو..

🍂🍂🍂🍂

دخلات بلا دقان بلا والو.. دفعات الباب ودخلات مدرمة وهو كان واقف كيجبد شي ملفات من الخزنة حتا دار ولقاها قدامو.. استغرب وعقد حجبانو كيحقق فوجهها.. وقبل ما ينطق سبقاتو هي.. 

بيسان:بصح قلتي لتالا تزوج بسعد!!

براء :كيفاش!

بيسان:واش قلتي لتالا تزوج بسعد! هضر؟

حنا راسو كيحك فعينيه وجبهتو ورجع هز راسو فيها..

براء :اه قلتها..!!

بيسان:(خرجات عبنيها) من نيتك!! واش حمقتي!! شني قالك عقلك! ككك.. كيفا.. كيفاش قدرتي؟؟ ما بقيتيشي كتبغيها! ياك كتبغيها اولا! هضر شعندك ساكت؟؟ 

براء :(عقد حجبانو) دابا علاش هاد الهضرة كاملة!! شنو كاين! 

بيسان: (بسخرية) ههه شني كاين!! اسيدي ها هي عملات بكلامك.. عملات بيه وفلعشية خطبتهم!! عملات بكلامك واتزوج بيه.. تهنيتي!!! 

سكت.. ما نطقش غير كيشوف فيها..تصدم واخة هو لي قالهالها.. اولا نقولو جاتو قاصحة يسمع خبارها.. بقى غير كيبرقق فختو ويسرط فريقو وهي قدامو كلها كترجف.. 

بيسان:(شداتها البكية) علاش ابراء!؟ شني عملت فراسك وفينا شنيييي!!! اههئ انههئ خرجتي علينا اهئ اهئ علااااش ابراء فاش فكرتي فاااش.. ؟؟

براء :شكون حنا!! 

شافت فيه ساكتة وكتنهج وحسات براسها شنو قالت.. بقات كتشوف فيه والشهقة كطلع فيها وتهبط وهو عاقد حجبانو فيها باستفهام.. حتا نطقات بصوت هادئ كيرجف.. 

بيسان:خاصك تعمل شي حل.. واش اتبقى ساكت.. ما اتخليهاشي تزوج بيه ياك!! 

براء :(تنهد وحط يدو فجيابو هاز راسو مخبي بيها الحسرة والعافية لي شاعلة فيه) ما انبزر على حتا حد يبقى معايا.. كون بغاتني كون اختارتني.. لكن هي بغاتو واختارتو هو!!

بيسان:كك.. كيفاش زعما..!! ووو.. وواش اتخليها ليه!! اتخليهم يزوجو؟؟ ما اتعمل والو!!! 

براء:(عطاها بظهرو غادي للبيرو ديالو) الله يعاونها

بيسان:(خرجات عينيها ووقفات قدامو حابسالو الطريق) كيفاش الله يعاونها كيييفاش!! واش ما كتبغييهاشي هضر!! (ضرباتو لصدرو) ما كتبغيهاشي هاااا (ضرباتو لصدرو مرة اخرى) هضاااااار

بغات ضربو مرة خرا وهو يشدلها يديها ونطق ساخط.. وخرج عينيه فيها.. 

براء :كنبغييييها وانبقى نبغيها حياتي كاااملة ولا نتي لا غيرك ايوريني شنو اندير

بيسان:ومنين كتبغيها علاش خليتيها.. علاش قلتيلها تزوج بيه اهئ اهئ علاش!!

براء:باغيها بخاااطرها ماشي بزز منها.. فهميها.. ما بغاتنيش ما انزيدش نطيح بكرامتي كثر.. 

بيسان:ولكن.. نتينا ما خاصكشي تخليها!! 

براء :(طلق منها) سيري فحالك ابيسان

عطاها بالظهر وجلس فبيروه وحنا على وراقو خدام وهي وقفات عند راسو حابسة دموعها.. 

بيسان:اتندم سمعتيني.. اتندم وبزاااااف

شافت فيه مطولا وهو ما هزش فيها الراس وفلخر خرجات.. خرجات وخلاتو هو كيتشوى.. رجع راسو لور موكي على الكرسي.. تنهد تنهيييدة طويييييلة ودوز يدو على وجهو.. هو اه قالها تزوجيه.. ولكن واخة هكاك جاياه صعيبة يتقبلها وماشي ساهلة عليه.. ما كرهش دابا يمشي يشدها من يديها ويقولها نتي ديالي وحد ما يديك مني..ولكن ايصدق غير مطيح بكرامتو وبلا فايدة حيث عارف جوابها.. 

براء :صافي ابراء تواگض.. بففف صافي.. ياك نتا لي قلتيها تزوجيه ايوا صافي!! ها هي دارت بكلامك.. (ضحك بسخرية) ههه اول مرة تسمع لكلامك ههه

حنا راسو كيحك فجبهتو... وفجاة هزو وبحركة وحدة من يديه جر كاع داكشي لي فوق لبيرو جابو مترش فالارض وشاف فيه كينهج.. حط يدو على لكرافاط كيجر فيه وهي معكسة ما بغاتش تجر حتا جرها هي وصدايف سوميج قطعهم.. وناض وقف كيدوز يدو على صدرو ويمشي ويجي عاقد حجبانو..دار هز قرعة دالماء هبط عليها وخوا نصها على وجهو وحط يديه على الزاج لي هابط مع الحيط كيطل على الشارع وبقى واقف فمكانو وساكت..

🌿🌿🌿🌿

كثيرا ما زارتني في الاحلام..🎗️

بفستانها الابيض وطرحة وباقة ورود..🎗️

إنتظرت الحلم ليصبح حقيقة في احد الايام..🎗️

وها هي اليوم.. 🎗️

ستذهب اليه بنفس الثوب الابيض والطرحة وباقة الورود.. 🎗️

لم يتغير الحلم كثيرا..‼️🎗️

فقط حصل تغيير طفيف في الادوار..⁉️ 🎗️

وانكسرت بعض القلوب..‼️🎗️

وانهمرت بعض الدموع..‼️🎗️

وعروستي لن تُزَفّ لي.. 🎗️ 

فعلا لم يتغير الحلم كثيرا.. ⁉️🎗️

🌿🌿🌿🌿

وصلات لعشية.. شي غادي شي جاي وكلها فين خايد.. تالاسين كانت بوحدها فالبيت جالسة بقميصها فالشيبي بااارد وطالقة شعرها ومكحلة عينيها.. كتلعب مع قطتها وساااكتة.. ما قادراش تفرح واخة باغة تفرح.. وحاسة بالضيم طايح عليها حيث عارفة راسها اتجرح شخص اخر بهادشي لي كدير فيه.. وماشي اي شخص وانما انسان عزيز عليها.. تنهدات وهزات راسها تشوف شكون فتح عليها الباب.. دخلات عندها رؤيا كتبسم فرحانة بيها.. 

رؤيا:هاي هاي هاي تبارك الله والصلاة على النبي.. اخوتي لي زين زين ههه.. فاين هي بيسان!! زيالي راها معاك

تالاسين :ناعسة..فيها وجع لي غيكل وراسها كيحرقها 

رؤيا :بفففف ما لقات فوقاش تجيها غير هاد نهار.. 

جلسات حداها كدوز يديها على شعرها وتضحك وتالا تبسماتلها ابتسامة خفيفة.. 

رؤيا:كبرتي يا لحبيبة وجاو فيك الخطاب 

تالاسين: الصمت

رؤيا :هههه حشمانة زعما.. مهم دابا نوض بلا ما نعملو فيها داكشي ديال المشاعير ههه.. نوض نهبطو راهم كيتسناونا

تالاسين :جاو؟؟؟ 

رؤيا :اه دابا شوية

تالاسين :(تنهدات) واخة

رؤيا:قبل ما نهبطو.. ياك بخاطرك!! نتينا باغاه ياك؟؟ 

شافت فيها تالا ورسمات على وجهها ابتسامة كجواب على سؤالها.. 

رؤيا :ايوا صافي.. مهم تكون فرحانة.. وحتا سعد ولد الناس ايتهلا فيك.. ولي كنعرفوه حسن من لي ما كنعرفوهشي.. مهم زيد يله نهبطو

ناضت ونوضاتها وخرجو هابطين عندهم.. لقاتهم جالسين ودخلوها بالزغارت والاغلبية فرحان.. من غير لي عارفين لحكاية.. شافها سعد وناض وقف كيتبسم وحتا هي بدلاتو الابتسامة.. قرباتها رؤيا جلساتها حداه.. وقدامه طبلة يا ما حلاها.. والطيافر فالارض جايبين فيهم كادووات.. وعائلة سعد من مو وباه وجداه وجدو و عمتو حاضرين.. جلسوها حداه وهو غير كيحنزز فيها.. ودازت اجواء الخطبة فحال أي خطبة من كلام وماكلة حتا وصلو للمعقول.. وتكلم جدو كيطلبها.. وحتا هما عطاواه وناضو كيزغرتو حتا كينقز سعد.. 

سعد:العرس بغيناه من دابا شهر

كلشي شاف فيه مبهوض وطلقوها بضحكة.. 

حسن:هههه راك مزروب اولدي

رؤيا :شهر ههههه من نيتك!!!! 

سعد:ما كنضحكش.. كنهضر بصح

كانت بيسان هابطة ببيجامتها ودمعتها فعينيها.. باغة غير طل من بعيد واشوف بعينيها.. يمكن تكون كتحلم.. وهي تصادف مع الهضرة لي قال وشهقات حاطة يديها على فمها وعينيها خارجين وحومر من لتحت بقوة لبكى طيباتهم.. بداو دموعها يتسرسبو بلا هواها مرة خرا وهي راجعة بلور وكتحرك راسها بلا.. حتا كدخل فشي حد.. دارت وهي تلقى زينب موراها.. غير شافتها بديك الحالة وهما يخرجو عينيها مخلوعة..

زينب:بيسان!! ما شيغي!! مالك!! شهاد الحالة مالك ابنتي

شهقات بيسان كتبكي وهربات من بين يديها وطلعات كتجري لبيتها.. وتبعاتها زينب مخلوعة عليها ومستغربة لحالتها.. وصلات لبيتها لقاتها سادة عليها الباب.. عيات دق وما بغاتش تغوت ولا تنوض الفتنة فالدار.. هبطات كتقلب على شي وحدة من الخدامات حتا لقاتها وقالتلها تمشي تجيبلها دوبل دالسوارت.. مشات وجابتولها وطلعات كتزرب.. فتحات عليها ورجعات سدات الباب ودخلات كتشوف فحالة البيت كلو مرون.. لفراش والحوايج فالارض.. الماكياج كلو مشخش.. وهي جالسة فالارض كتشهق وتبكي.. قربات عندها عينيها خارجين وهبطات جلسات حداها فالارض كتهزلها راسها وتشوف فيها...

زينب:بيسان!! .. بنتي!! مالك.. شنو واقعلك..؟؟ هضري مالك راكي خلعتيني... هضري الحبيبة.. ششش سكتي من لبكى انبدا نبكي معاك.. مالك هضري

هزات بيسان راسها فيها.. وجهها حمر وعينيها ايطرطقو.. وترمات فحضنها معنقاها كتشهق..

بيسان:ما بقيتشي قادرة اهئ اهههههئ انهنهئ ما نقدرشي ما نقدرشي انهنهنننئ كنموووووت اعزيزة كنموت اهههئ اهنهئ

عنقاتها زينب مزيرة عليها وقلبها ايخرج بالخلعة عليها وهي بين يديها كتشهق وترجف..

زينب:(بعداتها عليها) هضري ابنتي.. قوليلي مالك.. شنو واقعلك

بيسان:كنبغيه اعزيزة.. كنبغيه وختي داتولي.. اهئ انهئ اههئ علاش اختارها هي وماشي يانا اهئ انهنههئ ياك حتا يانا زوينة وضريفة اهئ اههئ علاش اعزيزة علاااااش اهئ اههئ كنموت وحتا واحد ما حاس بيا اههئ اهء اهء

زينب:(خرجات عينيها) علامن كتهضري!!! واش سعد؟؟ ها هضري فهميني!!

بيسان:علاش اعزيزة ما بغانيشي يانا اهنهنههئ يانا والله حتا كنبغيه اهء اهئ اههئ علاش بغاها هي!!

زينب:(مبهوضة) من فوقاش😨

بيسان :من نهار عقلت على راسي اعزيزة اهنهئ اهئ من نهار فتحت عيني اهئ اهئ شني نعمل فراسي شني.. هي ختي اعباد الله اختي اهههئ اهئ قلبي كيتشوا اعزيزة وما بيدي ما نعمل.. هو كيبغيها وهي كتبغيه ويانا وخاي كنتعدبو وحتا واحد ما حاس بينا اههئ انهنهئ هما فرحانين وحنا محرووقين اهنهئ اهئ اههئ

زينب:علامن كتهضري! مالو خوك؟!

بيسان:براااء اعزيزة.. برااء كيبغيها ويموت عليها وهي لا.. ويانا كنحماق عليه وهو كيبغيها هي علاش علاااااش اهئ اههئ

طلقات منها زينب مخرجة عينيها.. شداتها اللقوة ووجهها صفار وبقات غير كتبرقق فبيسان لي كتلوى وتعصر حداها.. شافت حتا عيات وجراتها عندها خشاتها فصدرها مزيرة عليها..

زينب :انا معاك ابنتي.. معاك وما نخلي لي يقلقك ولا ينزل دمعة من عينيك..

بيسان :شني نعمل اعزيزة اهئ اهنهئ يانا كنتشوى وخاي كيتشوى معايا وما قدرنا نعملو وااالو اهئ اهنهئ هما ياتزوجو من دابا شهر اعزيزة

زينب :نتي ما اديري والو.. انا لي اندير صافي سكتي(كتمسحلها على راسها) صافي سكتي.. ششش بركة من لبكى

عنقاتها كتسكت فيها ولوخرا تهرنق وتبكي.. بقاو هكاك شحال حتا حسات بيها سقرات وبدات كتهدن..طلات عليها لقاتها نعسات وشفايفها كيرجفو ومرة مرة كطلع معاها الشهقة..هضرار فوذنيها بشوية فيقاتها مدوخة بالنعاس وداتها لبلاصتها وغطاتها.. باستها ودارت كتجمع ديك الروينة لي دارت باش ما يشوفها حد وبالها خدام كيبلاني فهاد لحريرة.. عاقدة حجبانها وكتفكر فولاد ولادها لي كيتعدبو وحد ما سايق ليهم خبار.. 

دازت الخطبة وقدر سعد يقنعهم بالعرس من مور شهر..وحتا تالا داكشي لي كانت باغة.. هادشي كامل دارتو باش تخرج من الدار بلا هضرة وبلا شوشرة.. خرجو الضياف فرحانين وسعد ايطير وسطهم.. وتفرقات العائلة كلها فاش كيخمم.. وكلها ويلغي بلغاه.. اما تالا فطلعات لبيتها زولات قميصها ولبسات بيجامتها وتلاحت تنعس.. ما باغة تفكر فحتاااا حاجة.. باغة غير تنعس وترتاح.. يله داتها عينها وبدا يدخل معاها النعاس وهو يصوني تيلي ديالها.. وهزاتو كتجاوب مدوخة بالنعاس..

تالاسين :الوو

سعد:الفنون ديالي نعستي

تالاسين :اممم.. عييت

سعد:ههه وانا عاد كنت عوال نقصرو انا وياك

تالاسين :ما نقدرشي اسعد..عيانة والله وفيا النعاس

سعد :اوك احبيبة.. ماشي مشكيل حتا لغدا ونهضرو يله تصبحي على خير..

تالاسين :ان شاء الله تلقى الخير

قطعات ورخات تيلي من يديها ورجعات تنعس.. يله بغات تديها عينيها عاود وهو يصونيلها تيلي مرة خرا وهزاتو كتحمض..

تالاسين :بببف شني اسعد.. راه والله حتا فيا نعاس

ما جاوبها حد.. حدها سمعات شي حد زفر بقوة وسمعات الطيحة ديال تيلي ولا نقولو تشخشيختو ومن بعد صوت الصافرة.. قطع عليها الخط وبعدات تيلي كتشوف فيه بتعجب وتشوف فالنمرة.. كانت نمرة بريفي.. عوجات شنايفها باستغراب وعملاتلو سيلونس وتقادات تنعس

15 يوم دازت.. جري عليا نجري عليك.. شري من هنا تسخر لهادي جيب هاديك عيط لهداك.. مهم كلشي غادي جاي وكيوجدو للعرس لي ما بقالو والو.. وحالة العشاق هي حالتهم.. كلها وفين كيتكوى فجيهة وهما كيشوفو الشخص لي بغاه قلبهم كيعرس مع واحد اخر..

اليوم كانو فحال كل نهار.. جالسين فالصالة وكيهضرو على تفاصيل العرس.. تالا رامية كلشي عليهم ولي قالوهالها تقولهم بسم الله.. رقية ما قادراش تفرح وغير كتبسم التبسيمة الصفراء وساقرة.. ومن نهار كسبات خبار زواجهم وهي كتعيط لبراء وتطلبو يجي عندها حيث هي عيانة ما تقدرش تخرج وهو ما قادرش يزطم فديك الدار مزال..

بركات على بوطون فالفيكس حداها جات عندها الخدامة كتجري.. طلباتها تدوزلها النمرة دبراء وشداتو كتهضر معاه..

رقية:ما جيتيش عندي.. هادي هي ديالك ياك.. واخة عرفتيني عيانة

براء:يما.. ما عندي خاطر نجي دابا لتما.. خليهم يجيبوك عندي

رقية:لا اجي نتين.. بغيتك تجي عندي..

براء:ولكن راه..

رقية:بلا ما طول فالهضرة.. انتسناك تجي عندي اليوم

قطعات عليه وجلسات كتنهد وهازالو الهم.. وخلاتو هو حاير يمشي ولا لا..

وصلات لعشية وهما جالسين فالصالة.. الاغلبية مجموع تما الا لقليل لي ما عندو خاطر وما حاملش الجلسة.. وهما جالسين حتا كيدخل سعد صاعر وما كيشوفش قدامو..

سعد:فين هي فيييين! تاللااااااا تاااالاااا فينك

ناضو كلهم وقفو مخلوعين.. حتا دخل عليهم كي لعجاجة وغير كيغوت..

سعد:(كينهج) نتي هنا الغدارة!

فراس:(خنزر فيه) شكاين.. مالنا على هاد لغوات!

سعد: راه خاصني نرعرع اعباد الله..(شاف فتالا بحقد) علاش درتي هاكة علاش.. شنو بغيتي تصنعي.. شنووو.. هضري الغدارة.. كنتي باغة ضحكي عليا

تالاسين :الصدمة

جهاد:(بغضب)اتحتارم راسك وتهضر معاوط معاها ولا ما يعجبك حال

رؤيا:شكاين.. شني هاد الحالة!! ياك لباس

سعد:شنو كاين!!! انا نقولك كاين.. لي كاين امدام رؤيا هو انني اليوم مشيت نشوف وراق زواجنا فين وصلو حتا كيقولولي واش باغي تزوج مرى مزوجة..

رؤيا:كيفاااااش!!!

سعد:(عينيه خارجين) كما سمعتي.. بنتك مزوجة وجالسة ضحك عليا

رؤيا :شني كتخربق تينا..!! راه داكشي داز عليه زماااان وكانت مزالة صغيرة وداك الشارف لي زوجوها بيه مات وأصلا ما ضربو لا كاغيط لا والو.. شني جالس كتخور علينا دابا

فراس:(عاقد حجبانو)

سعد:وااااا شمن شاااارف.. كضحكو عليااااا.. دايريني ضحكة.. زوجتوها لولدكم ومدوريني انا كي لحمار وسطكم

فراس:(بحدة) شكتخربق علينا نتا.. هضر مگاد وفهمنا

سعد: هادشي عاد فيه ما تفهمو..(نعت لتالا) هاد خيتي صدقات مزوجة ببراء فهمتوها دابا!!!

الصدمة.. كلشي بقى حال فمو.. شكيقول هذا!! شكيخربق!! حتا حد ما فاهم!!! لي كانو فبيتهم جالسين خرجو فاش سمعو الصداع ولغوات.. ومن بينهم زينب وبيسان.. وكلشي واقف مخرج فيه عينيه وهو وسطهم عينيه خارجين..

تالاسين :(بغضب) شني كتقول نتينا!! شني هاد الباطل؟ من نيتك.. فوقاش زوجت يانا ولا زمرت.. كضحك علينا ولا شعندك

سعد:(غوت) وراه نتي لي كضحكي عليا الغدااارة.. منين باغاه من لول علاش ضحكتي عليا انا علاااش؟؟علاش مخليانا كنوجدو ونتي مشبتي تزوجتي بيه؟؟

فراس:(سخط) دابا نتا شنو جالس كترگع علينا من صباح.. كيفاش تزوجو؟؟؟ عارف راسك شنو كتگول؟؟

سعد:ايييه اسي فراس!! تزوجو ونتا وانا ناعسين على وذنينا؟؟ عييتي طير وجاو هما تزوجو مور ظهرك ونتا لا خبار

فراس:(خنزر فيه) احتارم راسك وخليني موقرك

جواد:هييييييه نتا.. اتجمع راسك وتهضر بالاداب ولا راه ما يعجبك حال

جهاد:داخل صاعر علينا مالنا ما نخافوش.. حدر صوتك ونتا كتهضر مع الواليد حسن ما نخَصّر خويا

سعد:سيرو تق**** عليا كاااملين بيكم!!

فراس:سااااااااعد.. حتارم راسك

حسن:دابا بركة من لغوات وغير بالهدنة.. فهمنا اولدي راه هادشي لي كتقول فيه ما كيدخلشي نالراس

سعد:شنو باغيني نفهمك اعمي.. مشيت لمحكمة نشوف لوراق لي دفعت حتا كيجبدولي الضوصي ديال اخت مزوجة وبيمن ببراء.. صورتها وصورتو وتوقييعها هداك ما يخفاااش عليا.. وهادي 4 ايام باش تزوجو.. يعني حتاااا لمن مووور الخطبة.. (شاف فتالا) فهميني علاش.. غير علاش؟؟؟

تالاسين :راك واقيلة شارب شي حاجة.. واش من نيتك.. يانا زوجت!! وبيمن ببراء!!

براء:كيفاش!!

دارو كاملين بيهم فاش سمعو صوتو.. واقف فالباب بسروال دالثوب وسوميج رمادي طاويلها لكمام ولا فيست ديالو فيدو.. باين عاد خارج من الخدمة.. بقى واقف كيشوف فيهم ما فاهم والو سومع غير الهضرة ديال تالا لخرة.. ومزال واقف حتا كيحس بسعد تلاح عليه وعطاه بكلاك لفمو حتا سال دمو ورجع لور غادي يطيح حيث الدقة جاتو على غفلة..تسمع غوات نساء وجهاد وجواد غير شافوه ضرب خوهم وهما يتلاحو باغيين يضربوه ووقفهم فراس فاش غوت سااااااخط وخلا كلشي يجمد فبلااصتو...

فراس:حبااااااااااااس!!

بقاو ساكتين مبرققين فيه.. وبراء هز راسو حاط يدو على حنكو وكيشوف فسعد كيطحن فسنانو عليه.. يله بغى يتلاح يفدي دقتو وهو يوقفو باه..

فراس:(بحدة) وقف عندك

حبس فبلاصتو وشاف فباه عاقدهم ووجهو حمار بلعصب..

فراس:(كيشوف فبراء بغضب) شنو درتي هممم! گولي شنو خروضتي!!! نتا مولاها ياك!! مشيتي ودرتي شغل يدك ياك!!

براء :علاش كتهضر!! شنو واقع!! (شاف فسعد) ونتا الحمار علاش حاط يدك عليا

تقدم خطوة باغي يترمى على سعد حيث ما برداتلوش وهو يوقفو باه مرة اخرى..

فراس:گلتلك حبس فبلااااصتك! (زفر بغضب) جاوبني دابا.. تزوجتي بتالا!!

براء:(بدهشة) شنووووووووووو!! تزوجت!! شكون!! فوقاش!!

فراس:بلا ما تكذب ابراء

رؤيا:دابا شني هادشي يانا راه دخت.. علاش براء ايتزوجها اصلا! وعلاش هي اتقبل! وفوقاش وقع هادشي.. وفاين كنا حنا!!(جلسات فوق السداري شادة راسها) اواعدي يانا تلفت

براء:(بالزعفة) دابا فهموني شنو كاين!! شكون تزوج شكون!

بيسان:(من موراه) نتينا تزوجتي تالاسين

دار براء شاف فيها مبهوض وبقى ساكت شحال كيتأكد واش سمع مزيان..

براء:كيفاش.. انا.. تزوجت.. وبتالا.. هههه من نيتكم

سعد:اه اسيدي.. وبلا ما دير علينا لا نتا لا هي ديك هبل تربح.. شفت لاكط ديالكم بعيني.. نتا وهي تزوجتو وهادي 4 اياااااام..

شاف فيه براء بدهشة ورجع شاف فتالا لي غير حالة فمها مصدومة دبصح.. ورجع قلب وجهو كيموت بالضحك حتا دمعو عينيه..

براء:هههههههه من نيتكم.. انا تزوج.. ههه انا تزوجت بتالا هههه اه تزوجنا ودوزنا لهاني مون وراها حاملة بتسع شهور دابا هههههه

حسن:ما بقيت فاهم والو..!! ولدي سعد عنداك تكون غالط.. هادشي لي كتقول فيه ما كيدخلشي لعقل

سعد:ما تيقتونيشي.. اوك.. صبرو وشوفو بعينيكم

جبد تيلي ديالو كيخربق فيه وهما كيتسناوه شغيصنع حتا وقف قبالة فراس لي كيفور فبلاصتو وحط تيلي قدامو.. صورة لعقد زواجهم لي مسجل فالمحكمة.. صورتها وصورتو وااضحين..هز عينيه فبراء ساخط ولعافية خارجة منهم..نقزات تالا خطفاتلو تيلي من يدو تشوف شنو وراه.. وهي تصدم كتقرب وعاود وتاكد من شوفة عينيها وكلها كترجف وتحرك راسها بلا..

تالاسين :لا.. لا.. ما يمكنش.. ما يمكنش..

شاف براء فباه عاقد حجبانو بنظرة جادة.. وقرب حتا هو خطف تيلي من يديها بالزعفة خلاها غير كتبرقق فيه حالة فمها.. عقد حجبانو كثر وكيتاكد ويعاود.. جاتو اللقوة.. وما عرف باش تبلا ورؤيا نقزات واقفة كطل معاه مخرجة عينيها وشهقات حاطة يديها على فمها..

فراس:(تحت سنانو) نتا مولاها!

براء :(هز راسو فيه مخرج عينيه ما متيقش مزال شنو شاف)

تالاسين :ما يمكنش ما يمكنش.. هادشي كذوب.. راه ما يمكنش

بيسان:علاش كتكذبي اتالا!!!!!

شافو فيها كاملين وهي واقفة كتسرط فريقها ودور فعينيها وتشوف فتالا وترجع تقلب عينيها كأنها حشمانة تشوف فيها.. 

فراس:(بحدة) كيفاش كتكذب! شنو عارفة نتي؟

بيسان:(بتردد كتحك فيديها) يانا! يانا!

فراس:نطقي

بيسان:اححم.. (شافت فتالا ورجعات حنات راسها) يانا البارح تصورت شي تصاور يانا وياها فتيلي ديالها!! ووو.. بقيت كنشوف فتصاور ويانا نجبر عندها شي تصاور!

رؤيا:شمن تصاور!! ديالاش؟

هزات راسها فتالا لي غير كتبرقق فعينيها.. ما بقات فاهمة والو.. حاسة براسها فحال الا كتحلم شي حلم غريب.. اولا حاطينها فشي كاميرا خفية وكيضحكو عليها..وبراء كفس منها.. بزوج بيهم هبطاتلهم النقطة وما عرفو باش تبلاو وهما كيشوفو لاكط دعرسهم وتوقيعهم عليه.. 

بيسان:تصاور عرسهم!!!

تالاسين :(بصدمة) كييييييفااااااش!! 

براء :شنو كتخرفي نتي؟؟

سعد:هااااا لي قلت..

تالاسين :زدتو فيه!!! واش كضحكو عليا! كيفاش هادشي!! باغيين تحمقوني!! شمن عرس وششمن تصاور وشمن زوااج!! واش من نيتكم ولا عاملينها بيا!!!

سعد:نتي الغدارة لي ضاحكة علينا كاملين

مع هاد الكلمة مع كيحس بحنكو تخلخل وبراء شدو قبل ما يطيح وزادو بضربة لنيف براسو حتا قلبلو مخو..

براء :جمع فمك الكلب 😡

جراتو رؤيا وحسن مخرج عينيه فسعد وكياكل جنابو عليه.. اصلا الدقة لي عطاه ما برداتلوش وزاد هو جالس كيعاير ويسب فيها.. 

حسن:نعلو شيطان.. كلشي كيتحل بلعقل

براء :لحمار لاخور تحلك لفم

سعد:(دايخ شاد فراسو) ما كاينش شي حمار قدك اشماتة.. لي مزوج بوحدة بلا خبار حد

فراس:(غوت) سكتووووووووني نتا وياااااه.. (شاف فتالا) هضري!!! بصح اه او لا!! وبلا كذوب.. تزوجتيه!!

تالاسين :ما تزوجتووشي اعمي ما تزوجتوشي.. شني نعمل باش تيقوني

زينب :(مربعة يديها) والتصاور لي شافت بيسان

تالاسين :ما يمكنشي.. يانا ما عندي والو.. ما تزوجتوشي

فراس:اوك.. وريني تيلي ديالك نشوف.. ونلقاك كتكذبي ما نعقلش عليك سمعتيني!!

تالاسين :ما كنكذبشي وهانتينا اتشوف

طلعات من حداهم غادة لبيتها وكلها كترجف وعاقدة حجبانها.. قلبات عليه حتى لقاتو ونزلات كتجري هابطة وكتفتح لجالوغي ويديها كيرجفو وكتقلب فالتصاور وتعاود ما جات فين توصل عندهم حتا وقفات فباب الصالة جامدة مخرجة عينيها فتيلي.. 

شافو فيها كيتسناوها دخل وهي حالة فمها حتا كيوقف عليها فراس ونترلها تيلي من يديها مخنزر.. شاف شكتشوف وكانت طامة.. صور ديالهم بزوج هي بكسوة دالعرس وهو بالكوستيم.. جالسين كيسنيو على لاكط مبسمين والشهود بجنبهم.. حل عينيه وزير على تيلي فيدو وهز عينيه فيها كيبخ الدم.. 

رؤيا :وريني نشوف!! ارى نهنا! 

خدات منو تيلي وهي تشهق.. صافي فين باقينلهم ما ينكرو.. تصاورهم كاينين.. لاكط كاين.. وكلشي كيأكد بلي بصح مزوجين.. 

رؤيا:(دارت عند براء) شني هادشي!! كيفاش قدرتو تعملو هادشي!! هضرو.. فهمونا!!

خدا من عندها تيلي ودوز يدو على شعرو ما فاهم والو..

براء :ما يمكنش.. هادشي ما كيدخلش لعقل

فراس:(دار عندو صاعر) بلاااااا ما تزيد تكذب لا نتا لا هي.. كلشي واضح وبااين..غير فهموونا علاش.. منين نتا باغيها وحتا هي كانت باغاك علاااش ما گلتوهاش..فهمووووووني😡.. (دار عند تالا) ونتي الالة شنو هادي هاااا شنوووو!! منين باغاه علاش مخليانا كنوجدو لعرسك!!

حنات راسها مخرجة عينيها قدامها.. كيفاش.. فوقاش.. ما عارفاش.. مزالة ما متيقة.. هزات راسها ببطء والدمعة مزالة فعينيها وشافت فبراء لي مضروب بتصرفيقة ومصدوم كثر منها.. كيشوف فيها وتشوف فيه.. لا هو فاهم ولا هي.. وكلشي كيشوف فيهم كيتسناو شي تفسير وهما براسهم خاصهم لي يشرحلهم.. ووسط هاد الدوامة كااااملة زوج دالناس كيشوفو فبعضهم ويدورو فعينيهم.. علات عينيها فيها مفافية وكتسرط فريقها وشداتها البكية ما حاملاش اش دارت وزينب مخرجة عينيها فيها ورجعات كتطمنها بعينيها..

فلاش باك...

يتبع...