إرحموني الجزء التاسع

بقى مبرق عينيه كيسمع فيها كتغوت ودعي وعقلها ايخرج من لحمام.. حتا طلقها بضحكة بلا ما يشعر حتا تغمضو عينيه وهبط عند امينو كيلعب معاه ويحكلو فشعرو ومزال صوت قهقهاتو كيتسمعو الشيء لي خلاها تضرب الطم كتسمعو..

براء :ياك الخايب ياك ههههه حبستيها فالحمام ههههه عبرتي عليها..

تالاسين :(فتحات الباب كطل عليه غير من الشقة) كتشفااااااا.. فرحان بكلبك

براء:(هز راسو فيها وما جوبهاش وكمل لعبو مع امينو) شنو.. نخليوهم يباتو فالحمام هههه

تالاسين :(خرجو عينيها) اوااااااعدي لا!!! براااااء عنداك تعملها.. راه طبت وانا جالسة هنا انهننننن عافاك شبرو

ضحك مع امينو ووقف ضربو بركلة خفيفة للمؤخرة ديالو وهو يمشي كيجري لسليلة ديالو ونعس فيها.. وهو هز راسو فيها وحط يدو فجيابو كيشوف فيها بطرف عين.. 

براء :يله خرجي

تالاسين :عنداك بمشي ينقز علينا عاود

براء :غير خرجي.. ما ايقيسكمش دابا

خرجات كطل عليه بشوية بشوية حتا سلكات وخرجات كتجري من البيت شانقة على قطتها وهو يتبعها وبقى واقف فالباب موكي عليها بكتفو.. 

تالاسين :بفففف.. حشومة عليك والله.. دوزت لعشية كلها فالحمام

براء :(تبسم بسخرية) ههه ما يكونش عقاب رباني زعما؟؟؟

تالاسين :(خنزرات) مزال كتشفاا!؟

براء :حاااشة.. مهم انا خاصني ندوش ونصلي.. نتي سيري الا فيك الجوع كولي

بغا يقلب الدورة لبيتو وهي توقفو قبل ما يدخل.. 

تالاسين :صبر.. ما قلتيليشي شني عملت؟! ؟

طلع فيها حاجبو ورجع قلب الدورة داخل لبيتو وخلاها هي واقفة كترمش فبلاصتها..زفرات ما عاجبها حال وقلبات الدورة للكوزينة.. 

خرج هو من بعد ما دوش وصلى.. جلس فالصالة كيرتاح.. بشورط وما لابس والو من لفوق كعادتو.. مولف هكاك ماشي كيقصدها.. ولكن فدارو هكاك مولف يلبس خصوصي فالصيف.. حط قدامو الكاميرات ديالو ستفهم.. وحط الماتريال باش كينضفهم من فرشات صغار ودي بانسو.. وماء خاص بيهم.. وبدا كيفتح فيهم ويمسح وينقي.. حتا كتم خارجة هازة طبسيل فيه زوج سندويتشات فيديها.. غير طلات عليه وهي تبلق عينيها ورجعات بحالها للكوزينة وجلسات كتنگر وما قاداش تهضر ولا تغوت حيث هي لي فدارو.. وجلسات حاطة الطبسيل قدامها فالصالة مونجي عاطية للباب بالظهر وكتاكل.. حتا كيتم دايز من حداها كيجر فرجليه بلحفى ووقف حدا الثلاجة كيجبد الماء يشرب.. وقفاتلها وخرجو عينيها وقلبات وجهها للجنب كتكح ووجهها حماااار.. وهو كيشوف فيها بنص عين ما مسوقلهاش.. جبد القرعة وقرب كيشوف فيها هز الكاس من فوق الطبلة فين جالسة وعمرو.. 

براء :(بابتسامة جانبية) تشربي؟! 

حركات راسها بلا وهي حانياه.. شرب هو وجلس قبالتها وجر الطبسيل لعندو هز السندويشة الثانية كياكل وكيطلعها ويهبطها ويتبسم وهي كتاكل ما هزاتش فيه الراس..

براء :علاش معكسة؟!؟ (عض من السندويش) 

تالاسين :(هزات راسها ورجعات قلباتو) اححم.. ما معكساشي

براء :لا معكسة وراسك قاصح

تالاسين :(هزات راسها كدور فعينيها وتعوج فمها)

براء :ياك هضرت معاك.. ياك جيت وقلتلك ما اتقديش على العيشة بوحدك.. قلتلك يله معايا!! وفلخر شنو؟!؟ فلخر وقفتي على هضرتي وجبتيها غير فراسك..

تالاسين :باش بغيتيني نعرفوم نصابة.. يانا بغيت نشري دار عااادي فحالي فحال الناس.. ساعة زهري فحال ديما ملاقيني غير ببنادم ما كيسواشي..

براء : راه نتي لي مزالة ما عارفة واالو فالدنيا.. عمرك ما گاليزيتي حتا ورقة هي لخرة غادة تكاتبي وتبيعي وتشري.. دوزتي سيمانة ما كملاش بوحدك شوفي شنو وقعلك..

تالاسين :(مكمشة فمها ما رضياش) شني بغيتيني نعمل الا هما صدقو ولاد لحرام مطرقين..

براء :نتي ما عندك ما ديري.. انا لي كان خاصني ندير ونهرك بزز منك ونجيبك.. ساعة راهم قالوها.. لي كيتسحر مع لبراهش كيصبح فاطر

تالاسين :برهووووشة؟! دابا يانا برهوشة؟!

براء :(كياكل) ومالك كبرتي عليها.. مزالة برهوشة

تالاسين :واش عارف شحال عندي من عام!

براء :شحال؟

تالاسين :راه تسعطاااااااااش لعام

تبسم بسخرية وهو كياكل وشاف فيها بنص عين فحال الا كيقولها راك واخة هكاك مزالة برهوووشة ورجع كمل ماكلتو وخلاها كتقلا فسمها.. زفرات وهزات راسها فيه وكتغاضى تشوف فجسمو او تحقق فعينيه بزاف.. 

تالاسين :دابا قولي شني عملت؟!

براء :فاش؟

تالاسين : ياك قلتيلي اتحل القضية

براء :شمن قضية!! اممم هاد سندويش مزيون

تالاسين :(ساطت) فالقضية ديالي

براء :ااااااه زعما تقوليبة لي قولبوك ههه

تالاسين :(كتحك فسنانها) اه فالتقوليبة لي قولبوني

براء :هضرت مع واحد صاحبي عميد.. هو ايتكلف

تالاسين :وزعما يجبروم؟؟ يرجعولي فلوسي؟!

براء :هما ايلقاوهم ايلقاوهم.. ولكن فلوسك ما نضمنلكش

تالاسين :وعلااااش

براء :الا كانو خسروهوم وما عندهم منين يجيبوهوملك غير نساي لفلوس.. حيث البوليس فهاد الحالة ما يقدرو يديرو والو.. والقاضي حدو ايزيدهم شي شهورة زايدين دالحبس وصافي

تالاسين :كضحك ياك؟!؟ شني دابا انا فلوسي بااح؟! مشات على عيني عجاجة

براء :ما عرفت.. مهم تفائلي ما عرفتي هههه

تالاسين :دابا علاش كضحك نتينا.. عاجبك الحال.. كتقول حو فيها ياك.. بردلك قلبك عليا..

براء :الا قلتلك لا انكون كنكذب هههه حيث ديييما نيتي كتغلب سبحان الله ههه

تالاسين :(كتعض على فمها) اه.. مزيان.. مزيااان تشفى.. خود راااحتك.. يانا لي ماجة حتا لعندك.. اما كون مشيت نسعى ولا هاد الحالة

براء :نقصي شوية من هاد عزة النفس لي فيك والتعفااار.. حيث هما لي داروهالك.. كون من لول سمعتي الهضرة كاع ما نوصلو لهاد لحالة.. هادشي ناشف.. تشربي شي عصير

ناض وقف عطاها بظهرو غادي جيهة الثلاجة كيحرك فكتافو وعضلات ظهرو كيتحركو معاه وهي تغمض عينيها وقلبات وجهها لجنب كتزفر.. 

براء :سولتك.. تشربي

تالاسين :لا.. ما خاصنيشي

براء :حسن.. اصلا ما بقاش بزاف وما فيا لي ينوض يعصر

خنزرات فيه وهز هو كاس كيكب فيه العصير لي باقي.. 

تالاسين :دابا نتينا هايدا كتبقى مسفح.. ما عندكشي لحوايج ولا

براء :لا عندي.. بلحق كيقنطوني فالدار

تالاسين :ايوا واخة كيقنطوك.. عمل غير بحساب بلي كاين معاك الزايد فالدار.. راعي شوية

براء :(كيتقدم جيهة الطبلة) شكون هاد الزايد..؟؟ (دار شاف فمينوشة لي كتاكل حتا هي فالارض) زعما مينوشة..؟؟

تالاسين :(عقداتهم) يانا ما عجبتكشي

براء :علاش نتي خاصني نراعيلك.. نسيتي ولا نفكرك.. راكي مدامتي (غمزها).. لي مزوجين راه حتا هاد الشورط ما كيلبسوهش.. ديريها فبالك 

تبسم بسخرية وهبط على الكاس دالعصير كيشرب فيه وتم خارج وهو يرجع هز السندويش لي بقى وشاف فيها وهي مخننننزرة اطرطق وهو كيلعب معاها باابارد 

براء :يعطيك الصحة..امدام هههههه

خرج كيضحك وخلاها هي كتقلى فبلاصتها وتغزز فشفايفها وتعض على سنانها وهزات راسها وتبعاتو..

ناضت خرجات تبعاتو لقاتو موكي طالق رجليه وحاط رجل على رجل وحاط الطبسيل فحجرو والكاس فيديه كيكمل الماكلة والكاميرات مزالين فوق الطبلة.. جلسات قبالتو وهو شاف فبها بالجنب ورجع كمل ماكلتو..

تالاسين :مزيان منين جبدتي هاد سيجي.. راه خاصنا نعرفو كيفاش وقع حتا وقع وتزوجنا..يانا والله مزالة ما متيقة..حيث والله ما بغات دخلي لعقل.. كنا ما علينا ما بينا حتا جبرنا راسنا مزوجين ولا يانا ولا نتينا ما عندنا خبار!!! راه والله حتا لحماق هذا

براء :مزال ما عرفتو.. بلحق انعرفو..

تالاسين :شكون يكون فنظرك.. شكون هذا لي يقدر يعملها؟!؟ وكيفاش عملها وعلاش اصلا؟ 

براء :ما عرفت.. بلحق كلشي انعرفوه.. يبان يبان.. واخة ما خلا حتا اثر موراه ولكن نشدو نشدو..

تالاسين :اجي.. مشيتي المحكمة!! ما سقسيتيشي؟! اولا لعدول لي زوجنا ما يكونشي عارف شكون زعما!! حنا ما عارفينشي وما فخبارنا والو.. يعني ياااا زواج مزور ياااا شي حد يمكن خلانا نسنيو على شي ورقة خاوية 

براء :(مزال عاطيها بالجنب كياكل) الزواج ماشي مزور.. حقييقي.. والقضية دورقة خاوية ما نضنش.. ما تنسايش التصاور.. 

تالاسين :علاش زعما؟ ما يكونوش فوطوشوب؟! 

دار شاف فيها مصغر عينيه وحط الكاس وتجلس عليه.. 

براء :مزالين عندك؟ 

تالاسين :اه.. مزالين

براء :جيبيلي تيلي نشوف

تالاسين :واخة.. صبر

ناضت جبدات تيلي من صاكها ومداتولو وجلسات كتشوف حداه محتافظة بمسافة بينها وبينو وريحة باندوش والشمبوان مزالة عاطية منو.. بقى هو كيبقشش لدقائق وفلخر حط تيلي من يدو.. 

براء :ماشي فوطوشوب

تالاسين :مأكد؟! باش عرفتي؟ 

براء :راه خدمتي هادي يمكن

تالاسين :بففففف وا لعجب هذا؟!؟ كيفاش هادشي.. حق الله حتا غادي نحماق.. كيفاش تزوجنا وتصورنا وبلاغوب والكوستيم ولا يانا لا نتينا عاقلين.. واخة نكونو سكرانين

هز راسو فيها عاقد حجبانو وهي شافت فيه باستفهام وفلخر طلعات معاها وحركات راسها بالنفي.. 

تالاسين :لا ما يمكنشي.. لا اواعدي؟! 

براء :وعلاش لا

تالاسين :زعما سكرونا😨

براء :يمكن ماشي شراب.. مهم شربونا شي حاجة.. هذا اكثر حل منطقي بانلي فهاد الساعة

تالاسين :اواعدي.. وعلاااش.. شمن ربح عندوم

براء : وباش انعرف انا.. فاش نعرفو شكون نعرفو علاش

تالاسين :وكي انعملو نعرفوهوم؟ 

براء :نعرفو نعرفو.. 

تالاسين :ايوا ومن هنا لتما شني انعملو

براء :شنو بغيتينا نديرو

تالاسين :بففف.. ما عرفت.. واجي بعدا هاد صاحبك ايطول عاد يجبر هاد خياتنا

براء :ما عرفتلو.. 

تالاسين :(حمضات) بففف روينة هادي.. ويانا انبقى هايدا دابا

براء :(طلع حاجبو) علاش مالك.. 

تالاسين :وراه ما يمكنشي نبقى جالسة هنا بلا موجب شرع.. خاصني نشوف شي حل لراسي

براء :(عبس) جرا عليك شي حد.. 

تالاسين :لا بلحق راه ما يمكنشي نبقى هايدا.. خاصني نشوف شي حل.. شو يانا كنتسنى تجيني شي كوموند فحال ديما ولا يانا انشوف شي ممون حفلات نخدم معاه ولا شي ريسطو.. مهم فاش ما كان.. غير نجمع شي بركة باش نقدر نكري ونزطط راسي وديك الساعة نمشي فحالي.. ما نبغي نثقل على حد

براء :(حط يدو تحت ذقنو مطلع حاجبو) دابا شكون لي هضر معاك ولا قالك شي حاجة 

تالاسين :بلااا ما تقول.. شني بغيتيني نبقى حياتي كاملة هنا.. 

براء: دابا نتي مزال ما بغيتي تحشمي..ما شفتيش شنو وقعلك بسباب هاد النفس الخاوية.. 

تالاسين :(كدور فعينيها) ولكن دابا تعلمت.. ما يعاودوشي يعملوها بيا

براء :لواه الزعتر.. شوفي بلا ما نبقاو نهضرو بزاف.. ديك المرة غلطت وخليتك وهاحنا شفناك شحال طفرتيه.. هاد المرة ما انخليكش تخرجي من هاد الدار غير تهناي.. ما عندك فين تمشي

تالاسين :شني هوااااااا؟! ما تخلينيشي..واش بزز

براء :اه بزز حيث نتي ماشي دلخاطر

تالاسين :وبشمن حق

براء :(وكى ظهرو لور كيحك فنيفو) الحق كلو عندي.. راكي مراتي واش خاصني كل مرة نفكرك

تالاسين :نتينا شفتك ثيقتيها وجات معاك.. كل ساعة مراتي مراتي.. واش حتا هذا كيحسبوه الناس زواج

براء :اه.. بالشرع والقانون نتي مراتي دابا.. بغينا ولا كرهنا.. واتجلسي هنا.. فدار راجلك حتا تكمل هاد العامين

تالاسين :من نيتك؟!؟ 

براء :اه من نيتي.. شفتيني كنضحك

تالاسين :ايوا راك كتحلم

براء :واخة دابا نشوفو

تالاسين :ايوا واخة دابا نشوفو.. نهار نخرج حبسني

براء :ما انحبسكش.. نتي اتخرجي فيما بغيتي وفاي وقت بغيتي.. عيشي حياتك كما كنت عايشاها.. ولكن اتخرجي وترجعي لهنا.. لدارك

تالاسين :داري!! ههههه والله حتا عشتي الدور.. 

براء :ما عنديش مع الهضرة بزاف.. (تكسل) اااااه جاني نعاس.. تصبحي على خير(ناض) 

تالاسين :راه ما انبقاشي هنا

براء :(عطاها بالظهر غادي وكيهضر) اممم دابا نشوفو

تالاسين :اجي بعدا فاين ماشي!! فاين انعس يانا؟؟ 

براء :نعسي فما بغيتي.. راه كاين زوج بيوت لهيه ختاري لي عجبك.. (تبسم كيضحك عليها) ولا معجبوكش وبغيتي تنعسي حدا راجلك مرحبا هههه

تالاسين :شو نتفاهمو.. ما تبقاشي تضحك معايا هاد الضحك الباسل

سد فمو مزير عليه حابس الضحكة ودار حركة بيديه فحال الا سورت فمو وهو كيتبسم من لتحت لتحت.. وهز يدو عطاها تحية عسكرية وغمزها وقلب الدورة كيضحك ومخليها كتغذذ موراه..

دخل لبيتو.. تبسيمتو مزينة وجهو.. يمكن زواجهم كان اغرب زواج.. ما عارفش كيفاش وعلاش وفوقاش.. ولكن ما قادرش يكبح فرحتو.. جانب منو كيقولو بلي هذا لمكتاب او ربي نصفو ونصف حبو ليها.. زواجهم اه خلقلهم مشاكيل وخلا العائلة تبرا منهم ولكن عارف بلي غمامة وادوز.. هو ما يفرط فيهم وهما ما يفرطو فيه.. وشحال ما طال زمان اتبان لحقيقة ويبان شكون مور هاد لفعلة.. بينو وبين راسو ما كرهش يعرف هاد الشخص باش يشكرو اولا عاااد يحاسبو ثانيا.. حيث بالنسبة ليه هادي معجزة الاهية وتحققات.. وهو فوض امرو لله من زماااااان وخلاه هو يتصرف.. وفعلا.. "فلسوف يعطيك ربك فترضى" (صدق الله العظيم)..

وهاد ليلة شكون فحالو.. حبيبة قلبو ناعسة فدارو تحت سقفو.. ونفسها كتسارا معاه فنفس الدار ما كيبغيش يبين ولكن هو راه قلبو كيشطح ساااالسا بالفرحة بلاااا هواه.. 

ترمى فبلاصتو على طولتو جا مزدوح.. هز تيلي ديالو من فوق لكوافوز حداه.. وطلع التصاور ديالو هو وياها فتيلي ديالو.. وبدا كيتبسم حيث سيفطهم قبايلة فاش كان كيبقشش فتيلي ديالها.. هو ما كان بيه يعرف لا فوطوشوب ولا والو حيث دييييجا نهاار عرفو بزواجهم باه قلبهم واش فوطوشوب ولا لا وعرفهم حقيقيين.. هو كان باغي التصاور وما باغيش يقولها سيفطيهوملي.. ضحك على راسو وجلس كيتفرج فتصاورهم.. كيقرب وجهها ويرجع يبعدو.. وفكل صورة كيتأمل لدقائق وهكاك بقى حتا نعس.. 

🎗️🎗️🎗️🎗️

معجزة الاهية..✨

قدرة ربانية..✨

هبة سماوية.. ✨

اختارو اي اسم شئتم فكلها تليق بزواجي انا وهي.. ✨

هذه كانت هدية اخلاصي لحبي وثقتي بخالق البشرية..✨

فوضو اموركم له.. فأنتم لا تعلمون كم يحب الله المخلصين..👌✨

🎗️🎗️🎗️🎗️

شدات بلاصتها حتا هي من بعد ما بدلات عليها ببجامة سروال وتيشورط.. تكات كتشوف فالسقف وكتفكر فحالتها.. فين داياها الدنيا.. شنو مزال كيتسناها.. شحال من صدمة مزالة جاية فالطريق.. علاش زعما وقع معاها هاكة.. وشكون لي دار فيهم هاد الحالة.. وعلاش!!! فاش كتبقى تفكر فهادشي كيضرها راسها وكتشدها الدوخة حيث فعلا من اغرب الحاجات اللي يقدرو يوقعو للواحد.. كيفاش اتكون حالة سعد دابا.. وكي ايكونو فالدار.. توحشاااااتهم وبزااااف ومقصحة من جيهتهم.. ما بقاش فيها راسها قد ما بقى فيها نظرتهم ليها وكيفاش رجعو كيشوفو فيها.. تنهدات هازة هم ثقيل.. تقلبات على جنبها وغمضات عينيها باغة تنعس وما تفكر فوالو..

صبح عليهم الصباح.. وما حلات عينيها غير على الشمس لي ضربات فيها وريحة القهوة لي عمرات الدار.. كاع داك النشاط والهمة لي كانو فيها والسيستيم لي كانت متبعة تخربق.. ما بقات لا كتريض لا كتفيق بكري.. حدها تفكر فلمصائب لي كينزلو عليها.. ناضت كتحك فعينيها دايخة وكتكسل.. لبسات فرجليها وتمات خارجة معمشة متبعة ريحة القهوة منين جاية وعينيها مزالين منفوخين ومجبدين بالنعاس.. حتا وقفات عليه فباب الكوزينة.. عاطيها بالظهر كيوجد لفطور وحاط لكاصك فوق راسو كيتموسق ويدندن وريحة القهوة كتفتح النفس على الصباح.. لابس شورط احمر وتيشورط رمادية وشعرو باين فازك.. مينوشة فقنت كتاكل فطبسيلها.. وامينو فقنت اااخر حتا هو وماكلتو قدامو وما قادرش يقرب من مينوشة وبراء محلف فيه.. مع الدورة لي دار باش يحط الطباسل فوق الطبلة كيلقاها واقفة فبلاصتها كترمش فيها.. طلعها وهبطها وتبسم.. كانت اول مرة يشوفها وهي فايقة من النعاس.. عينيها المنفوخين.. فمها الناشف.. حوايجها لمخربقين.. شعرها لمشنتف.. جاتو حلوة فطلتها الصباحية وهي يله فايقة.. 

زول لكاصك على وذنيه وتبسم كيحاول يخفي اعجابو بيها.. 

براء :صباح الخير

تالاسين :(جوباتو بصوت مبحوح بالنعاس) صباح النوووور.. ااااه(حطات يديها على فمها كتفوه) 

براء :(تبسم كيقضي شغالو فاش سمع نبرة صوتها الجديدة عليه فهاد الصباح) نعستي مزيان

تالاسين :وي الحمد لله .. معاش فقتي؟ 

براء : بكرييي.. ترينيت وجيت

تالاسين :بففف سعداتك.. انا شحال ما ترينيت تخربقلي سيستيم كامل

براء :ولا عليك من دابا لفوق نبقاو نترينسو بجوج

تالاسين :(شافت فيه بطرف عين وبدلات الموضوع) خلي عليك يانا انغسل وجهي ونجي نعدل فطور

براء :نوووووب.. لفطور انا لي انصاوبو.. وباش نتفاهمو من دابا.. من هنا لفوق لفطور عليا.. لغذا عليك.. ولعشاء نتعاونو عليه.. شنو بانلك

تالاسين :راه يانا ما انبقاشي جالسة هنا

براء :(قلب وججهو فيها) سيري غسلي وجهك واجي.. سيري

تالاسين :اوك.. والقهوة ديالي.. 

براء :(قاطعها) بلا سكر.. عارف

تالاسين :(بلقات عينيها فيه كترمش مستغربة) باش عرفتي

براء :كنعرفك عليك بزاااااف.. مهم سيري نتي غسلي وجهك واجي باش نفطرو

بقات غير كتشوف فيه ورجعات قلبات الدورة ودخلات لبيتها دوشات من لي غيكل باش تقدر تصلي.. وخرجات صلات وبدلات عليها تيشورط ابيض عادي دخلات نصو فسروال دجين مفتووووح وجمعات النص فشعرها وخلات الباقي مطلوق.. وخرجات عندو لقاتو حط كلشي على الطبلة وكيتسناها..

جلسو كيفطرو ساكتين.. هي ما نطقات وهو هكاك.. غير العينين لي كيتحركو ومرة مرة كيتلاقاو.. جو غريب.. كيخليك توتر.. خصوصي هي لي غير كدور فعينيها.. هزو راسهم شافو فبعضهم ملي سمعو صوت الصوني دالباب وناض وقف.. 

براء :كملي فطورك.. هانا انفتح

خرج هو من الكوزينة وحطات كاسها دالقهوة حتا هي وتبعاتو تشوف شكون.. يله خرجات من الباب دالكوزينة ووقفات وسط الصالة.. وهي تبانلها رؤيا داخلة من الباب.. ودافعة رقية قدامها فكرسي حيث ما بقاتش كتقدر على لمشي بزاف.. شافت فيهم وخرجو غينيها وسرطات ريقها ما عرفات ما دير.. وهزات عينيها فبراء لي موراهم كيسد الباب وعاقدهم ومكمش جبهتو.. رجعات شافت فيهم لقات رؤيا كطلع فيها وتهبط بنص عين.. 

تالاسين :(سرطات ريقها) خالتي!!!!! 

رؤيا:(شافت فيها وقلبات وجهها وبنبرة. جافة نطقات) سلام عليكم

تالاسين :(تزيرات) لباس عليك

رؤيا :الحمد لله

جلسات رؤيا فالفوطوي مخنزرة ورقية بجنبها فوق الكرسي كترمش وتشوف فيهم.. 

تالاسين :يما.. لاباس! 

رقية :(تبسمات فوجهها) لباس ابنتي.. ونتين

تالاسين :(تبسمات براحة فاش ضحكاتلها وقربات باستلها راسها) لباس الحمد لله

جلس براء كيشوف فيهم وساكت وهي بقات واقفة باغة تسلم على رؤيا وما زاعماش وفلخر رجعات لور.. 

تالاسين :تشربو شي حاجة! تشربو القهوة ها هي كاينة

رؤيا :ما بغينا والو

رقية :جيبلي انا شي كويس يرضي على بنتي

تالاسين :واخة هي لولة

رؤيا :(شافت فرقية) يماااااا! 

رقية :مالك.. ياك لباس.. ما نشربوش الئهوة.. راه الئهوة دالصباح ما كاينش ما حلا منها.. (شافت فبراء) وعاااد الا كانت من يدين الغنضور ديالي وهو لي صايبها ههه كيصرعها

براء :(ضحك) هههه انااااا لي صايبتها ارؤوش

رقية:ايوا على هاد لحساب غير اااتيني بيها ابنتي

تالاسين :هي لولة(مشات كتجري للكوزينة)

رؤيا :زفرات من مناخرها

رقية:مالك نتين غير كتسوط.. عندك طرطئ 

رؤيا:ماشي هادشي علاش جينا 

رقية :انا جيت نشوف وليداتي لي توحشتهم.. شوف نتين علاش جيتي.. شغلك هداك

رؤيا :يااااااك ايما

رقية:ييييييه.. براء اولدي اجي عاوني نوئف نجلس حداك

براء :هي لولة

ناض وقف كيضحك معاها وهي كتقلي سم لرؤيا بعينيها لي كتفقص فبلاصتها.. حيث جاية وجايباها معاها على اساس واخذين منهم موقف.. ساعة قولباتها فلخر.. حنى براء هزها بين يديه كي الكمشة وهي ضحك حشمانة.. 

رقية: فكرتيني فالهينوون الله يعطيك شي خير ههه

براء :(تبسم) فكرتك فالمرحوم ههه

رقية:ايييه حتا هو كان هاكة كيهزني فصغري (كتقولها وحشمانة) ههه الله يرحمو ويوسع عليه

براء:اميين يا ربي ههه

جلسها حداه وجلس حتا هو ورؤيا قالبة وجهها كتزفر ورقية كتميق فيها عينيها وبراء غير كيتبسم..حتا جات تالا هازة بلاطو فيديها فيه كاس دالقهوة وحطاتو قدام رقية وجلسات كتشوف فيدها وتلعب بصباعها وكتشوف بنص عين فرؤيا حابسة البكية.. 

براء :ايوا الواليدة.. صافا! 

رؤيا :(مكمشة فمها) علاش نتوما خليتو فيها شي صافا؟! 

براء :(طلع حاجبو) شكون حنا! ؟

رؤيا:(شافت فتالا بطرف عين) نتينا وديك خيتي

تالاسين :(شداتها البكية) 

براء :ديك خيتي ما عندها سمية؟؟ 

رؤيا :(تجلسات مقادة كتشوف فيهم بزوج) دابا غير قوليلي.. شهاد العملة عملتو!! شني رونتو!! ماشي حشومة عليكم لا نتينا لا هي!! عارفين على روينة ناضت بسبابكم ولا لا!! علاش عملتو هايدا غير فهموني!! منين كنتو باغين بعضكم قولوها.. والعيب والعار الا ما عملنالكم احسن عرس ونزوجوكوم بالهمة والشان!! بلحق شني عملتو نتوما هااا!! مشيتو زوججتو من مورا ظهرنا.. ومخليينا فحال لحمير كنوجدو لعرسها هي وسعد.. ماشي حرام عليكم!! ماشي هايدا ربيتكم يانا!! 

براء :دابا واش لي قلناه نعاودوه.. واا راه قلناالكم ما تزوجناااش.. ماشي حنا.. راه حتا حنا ما عرفنا هادشي منين خرجلنا.. 

رؤيا :(بسخرية) اه تيقتكم!! منين حصلتو حصلتو غير اعتارفو وبركة ما تنكرو وتزييدو تغرقو راسكم.. غير اجيونا نيييشان وقولو لي كاين وبركة ما تستحمرونا.. ولاااهيلا.. قالك ما عارفينشي.. وشكون لي ايعرف يانا!!!

براء :شوفي الواليدة بغيتو ثيقو ثيقو.. ما بغيتوش نتوما تعرفو.. لا انا ولا تالا عندنا خبار بلي وقع.. هاديك لعبة لعبها شي حد معانا ولكن كيفاش وعلاش مزاال ما عرفنا..

تالاسين :(حابسة لبكية) اه والله اخالتي.. كما قالك براء.. حنا والله ما عملنا شي حاجة وحنا بيدنا ما عرفناشي حتا كيفاش زوجنا والله القسم..

رؤيا :دابا نتوما جالسين كطنزو عليا!! كيفاش زوجتو وما عارفينشي كيفاش.. راه هادشي ما كيدخلشي لعقل..

براء :ما عارفينش كيفاش ولكن هادي هي لا فيغيثي.. ما كذبنااش عليكم ونتي عاارفاني مزياان الواليدة.. ماشي شماتة وما عنديش مع تخرويض.. كون كنت باغي نتزوج بتالا انتزوجها بخباركم ما انجيش ونتزوجها بتخبية.. ما هما لا فعايلي ولا تربيتي..وحتا تالا نتي عااارفاها مزياااان ومربياها على يدك وعاارفاها شكتسوى.. ولكن انا ما نلومكومش انا وشكيت فراسي فاش شفت لاكط والتصاور ولكن راه ماشي حنا.. حنا براسنا حتا لداك النهار عاد كسبنا لخبار

رقية:(حاطة يديها تحت ذقنها الموشوم) كيفاش زعما؟؟ دابا هي ماشي كانت غادي تزوج بسعد وفلخر تنادم معاها لحال ولئات راسها كتبغيك ونتين كتبغيها وئلتو نتزوجو ونحطوهوم ئدام الأمر الوائع فحال داكشي دالافلام

شافو فيها كاملين مبهوضين.. ما عرفو يضحكو ولا يسكتو.. هما فين وهي فين..

براء :(ضحك على سذاجتها) ههه لا ارقية ماشي فحال داكشي دالافلام

رقية:(ميقات فيه) ايوا كيتك بلكواااوي.. انا ئلت يااا سعدي يا فرحي بالغنضور ديالي خرج فيهم خرجة دالابطال.. ونتين صدئتي غيييير مدرم..

رؤيا :من نيتك ايما!!! حنا فين ونتينا فين!! فعاوط ما دور فيهم جالسة كتزينلو! 

رقية:وشبغيتيني ندير.. نجلس نويل ونرفد لهم على اخر ايااامي.. لا لا الحبيبة.. رفدوه نتوما لي مزالين صغار.. اما انا ما نزيدهم غير الله يبارك والله يسخر.. راه ديك نهار كنت باغة نزغرت غااااا حشمت وجاتني ماشي ساعتها.. وبيني وبينك اصلا ما كانتش راشئالي على زواجها بسعد.. ولكن ربي كرييييم سمع لدعاوي ديالي وجمعهم

رؤيا :دابا نتينا عاجباك هاد الحالة ايما!! عاجبك هادشي لي وصلنالو.. العائلة ترشات وكل واحد فين هاز فقلبو.. وشامة لي تقهرات وولدها لي حالتو رجعات حااااالة.. ما بقى ياكل ولا يشرب ولا ينعس وغير حابس راسو عاجباك حالتو!! 

رقية:ما عاجبانيش.. مالي ميتة لئلب!! راه حتا انا بئااااا فيا سعد وبئااااو فيا ولادي كااملين.. ولايني نكذب الا ئلت ما فرحتش..شنو بغيتيني نكذب!! على اخر يامي نكذب ونرجع كذابة!! 

رؤيا:لا حاشة.. ما تكذبشي.. حشومة

رقية:ايوا هكاك.. دابا شرحلنا هاد الئضية كيفاش تزوجتو وما عارفينش

براء :كما سمعتي.. شفتي نهار عرفتو نتوما بلي تزوجنا عرفنا حنا.. ولكن كيفاش الله اعلم.. 

رؤيا :وا زوينة هادي.. واخة تكونو مقرقبين.. دابا نتوما بغيتونا نثيقو هاد الهضرة

تالاسين :والله ما كنكذبو اخالتي والله القسم.. نتينا كتعرفني.. كتعرفني كنكذب؟! ؟ والله ما عارفين كيفاش!! وحق الله

رؤيا :(عقدات حجبانها بتشكيك) واش باغين تحمقوني.. راه هادشي ما كيدخلشي لعقل! 

براء :عاارفينو ما كيدخلش لعقل.. ولكن راه ما كنكذبووش.. ياك لحلوف وحلفناه.. وشي حاجة كثر من الله راه ما كايناش

رقية:واش حجاية هادي! 

براء :(كضحكو) ههه اييه وا فكيها 

رؤيا :وا هااادي وحدة ههه.. واش عارفين هادشي لي كتقولو ولا لا!! راه ما كيدخلش لراس

تالاسين :(ناضت جلسات حداها ودموعها بداو يهبطو) عافاك ثيقيني اخالتي اههئ انهنههئ راه والله ما كنكذبو راه والله ما عارفين.. والله ما حنا لي عملناها اههئ انهنههئ نتينا كتعرفيني واش يانا نعمل هادشي!! عافاك ثيقيني اخالتي عافاك اههئ اهئ اههئ 

براء :(خنزر ما عحبوش الحال تبكي) 

شافت فيها رؤيا كي كتبكي وتشهق وترغبها اتحماق.. وكاع ديك القهرة لي كانت فيها خرجاتها.. وهما يغرغرو عينيها معاها.. وبقات كتشوف فيها ولوخرا كترغب فيها وتحلف بلي ما عارفة شي حاجة.. حتا حن قلبها بلاااااا هواها وجراتها عندها كتسكت فيها وتبكي معاها.. 

رؤيا :صافي ابنتي صافي.. ما تبكيشي.. مكتاب الله.. حتا واذا زوجتو بخااطركم ما عندنا ما نعملو لي عطى الله عطااااه.. صافي غير سكت. 

تالاسين :(زيرات عليها) والله ما عارفين اخالتي اههئ اهئ والله ما عارفين.. حق الله اهههئ عافاك سمحيلي اخالتي عافاك اهههئ اههئ والله ما عملتا والله اهههئ اهء اهء..

رؤيا :(كتهزلها الشعر على جبهتها وهي معنقاها) الله يسامح ابنتي اههئ اهئ وا صافي غير سكت بركة من لبكى.. صافي احبيبتي صاافي

رقية:اويييلها.. اديك لهبيلة مسح دموعك.. راك عروسة جديدة زعما!!!!

عنقاتها كتسكت فيها وطبطب ورقية كتسكت فيهم بزوج و براء غير ساكت وكيشوف فبهم بزوج ما حامل حتا وحدة فيهم تبكي..واخة فرحان حيث تصالحو.. هكاك بقاو حتا شبعات منها عاد هزات راسها كتمسح دموعها ووجهها حمر وتقاد شعرها.. 

رؤيا :مشي غسل وجهك واجي

تالاسين :واخة

مشات كطير غسلاتو ورجعات جلسات حداها فرحانة وجلسو كيحاولو يفهمو هاد لحجاية خلاتها رقوش.. وحرام ولا فهمو شي لعبة.. منين ما جاوها ما كتفك.. حريييييرة محرحرة ما فهمولها راس من رجلين.. 

رؤيا :ودابا شني اتعملو!!! 

براء :شغانديرو.. ها حنا كنقلبو حتا نلقاو شكون موراها

رويا:لا زعما شني اتعملو فزواجكم

براء :(شاف فتالا) زواجنا هاد ساعة مكملين فيه.. حيث ما يمكنش نطلقو واخة نبغيو

رؤيا :وعلاش ما يمكنش! 

رقية:وعلاش نتوما طلئو اصلا! 

براء :واخة نبغيو ما عندنا كيفاش.. العقد دالزواج فيه شرط انه ما يمكنلوش يتلغى الا من بعد عامين

رؤيا :اواعدي!! 

رقية:(ضحكات) ربي ربي ههه.. ضحكاتلك ليام اوليدي ههه

تالاسين :بلحق واخة هيداك.. زواجنا ماشي بصح..يانا كنفتش غير على شي خدمة ونمشي نكري بوحدي.. وحتا تكمل عامين ونطلقو وصافي

براء :(خنزر فيها) 

رؤيا :تعيش بوحدك!!! من نيتك.. نتينا اتبقى هنا قالاك.. اتبقى مع براء حتاااا وكان يرطاب عمك ونعرفو هاد لحريرة كيفاش وقعات وديك الساعة رجع للدار.. اما باش تعيش بوحدك هادي هي لي عمرها تكون.. من نهار خرجتي ويانا لي مصبرني ومهنيني عليك هو بلي راكي مع براء حيث عارفاه ايرد بالو عليك..

تالاسين :بلحق يانا ما كنتشي معاه

رؤيا:(قوصات حجبانها) وفاين كنتي؟؟ 

تالاسين :كنت فالاوطيل

براء :(تبسم بسخرية) اه كانت فالاوطيل وبغات تمشي تشري دار وقولبوها وخداولها فلوسها

رؤيا :كيييفاش.. اواعدي؟؟؟؟؟ 

رقية:اوييييييلها..كيفاش وئعلك!!! 

خنزرات فيه وهو يعقد حجبانو كيشوف فيها بتحدي.. 

رؤيا :كيفاش وقع.. شرحولي هادي عاود

تالاسين :والو اخالتي.. بلا ما تحمق راسك 

رؤيا :هضر برة ما تمرضني.. شني وقع معاك

تالاسين :(شافت فيه معصبة) بفففف اوك هانا انقولك.. 

بدات كتعاودلها القصة من طاق طاق حتاااا لسلام عليكم ومرة مرة تميق فيه عينيها حيث فرشها قدامهم واخة هو بلعاااني دارها حيث عااارفها ما كتسمعلوووش ولكن كتسمع ليهم وخاصة رؤيا..

رؤيا:اواااااعدي.. داااوهوم دابا😨

تالاسين :(بحسرة) وي.. خدااوهم

رقية: طررررر يااا وليدي طررر..خطييييية ابنيتي.. خطيييييية ولي جا يضحك عليك

تالاسين :ويانا باش عرفتوم ايما هاء

رقية:ديك السااااع علاش غادة نتين تشري ولا تكري اصلا..ياك دار رااجلك كاينة.. علاش غادة تحنئز حتا جبتيها فراسك

رؤيا :ما كذبااتشي عليك.. علاش ماشة تسكن بووحدك ودار براء كاينة.. شني فيها الا جلستي معاه.. اياكلك

براء :(شاف فيها بابتسامة سخرية وغير ساكت )

تالاسين :(حنات راسها) لا.. ولكن ما يصلاحشي نجلس معاه

رقية:ومااالها عيب ولا حراااام

تالاسين :اححم.. ماشي هايداك.. ما نقدرشي وصافي.. من الاحسن نمشي نكري بوحدي ونهز راسي براسي

رؤيا :(خنزرات فيها) ايوا حرررررررربش.. سمعني نقولك.. هناااا اتبقى ما عندك فاااين تململ ولا تمشي..حتا يصفى خاطر عمك وترجع للدار.. اما تعيش بوحدك وهاد الهضرة الخااااوية شلل بيها لحيوط.. ما عندناشي لبنات لي يخرجو يسكنو بوحدهم سمعتيني..

تالاسين :ولكن راه..

رؤيا :بلاااا ما تجبد فالهضرة.. كلمة وحدة قلتها ونتينا شغلك هداك دابا.. بغيتيني نهز فخاطري من جيهتك خرج من هنا.. نتينا كتشوف شني وقعلك وباغة تمشي تعيش بوحدك.. والله حتا ياكلك بنااادم.. راه ما كيرحمشي.. وعاد نتينا باااقة صغيرة.. ذغيا يدورو بيك الذياب

تالاسين :بلحق راه ما يصلاحشي

رؤيا :(هزات يديها قبالتها) هضرتك خليها عندك.. انا قلت لي عندي ونتينا عمل لي يسلكك دابا شغلك هذاك

شافت تالا فبراء كتحك سنانها عليه وهو كيتبسم ليها بالباااارد عجباتو مو فيها.. كان عاارفها ما اتخليهاش وداكشي لي كان باغي.. 

تالاسين :واخة اخالتي.. ما تبقا غير على خاطرك

رؤيا :ايوا هايداك يرضي عليك.. باش يبقى خاطري مهني عليك.. واخة راه ماشي فحال الا كنتي حدايا وقبالة عيني 

رقية:شفتي نتين واخة تعيا تئابل فيها.. ما تحضيهاش فحال براء غير تهنى.. هو راه يديرها فمومو عينيه..اولاااا 

شافت فبراء غمزاتو واخة ما كتعرفش وغير كترمش و عاضة على شنوفتها لتحتانية وهو ضحك وهز يدو باسهالها.. 

براء :عارفة لي كاين

رؤيا:(ميقات فيه) راه قالي باك كووولشي.. وعرفت شني كان واقع من مورايا.. ما صدق حتااا واحد فيكم.. مخلييني فدار غفلون

رقية :راك نتين لي عمية.. لا نتين لا هاديك لي جالسة حداك.. اما هي كانت باينة من الطيااااارة.. نتين بركة عليك غير فراس خدااالك لعئل وتعماولك لعينين عليه..

تالاسين :(تحرجات وبقات غير كتبرقق ) 

رؤيا: يانا راه نحياااااا علاش.. كنت كنقول راه حاسبها فحال ختو.. عليها مارديتشي لبال

براء :احححم قلبو سيجي.. خليونا من هاد الهضرة

بدلو الموضوع كما قال ورجعو يهضرو على الموضوع لي شاغلهم دابا لي هو الدار وامورها.. بقاو شحاااال جالسين وفلخر ناضو سلمو عليهم وتالا ما ساخيااااش بيهم قربات تبكي وحاابساهم.. بلحق ارتاحت منين تصالحات مع رؤيا بعدا وصفى خاطرها من جيهتها.. حنات عند رقية كتبوسلها راسها وتسلم عليها وهي تشنق عليها رقية كتهضر عند وذنيها بلحس وهي كتشوف فبراء لي كيهضر مع مو بعاد عليهم بشي خلفات.. 

رقية:سمع اديك لهبيلة.. شفتي هداك لي كنت اتخليه وتزوج بغيرو.. يئربل الدنيا عليك.. كون تعرف لمحبة لي فئلبو ليك ما تبدلوش واخة بمال ئاااارووون.. راه من دييييما كنئولك خطية ومعمية.. الا ما شفتيش شحال كيبغيك ويفني روحو عليك غير سير تموت.. شفتي ومشيتي حتا خسرتيه.. اتندم عليه حياااتك كااااملة وهانا فين كنئولهالك.. هذاك راه لغنضور ديااالي الناس بغاوه لدواء وما لئاوهش.. كيتك نتين لي لئيت النعمة وجالسة ترفس فيها.. 

تالاسين :(غير كترمش فيها حشمات) 

رقية:سمع مني.. وباش تعرف راكم مكتااابين لبعضكم شوف شنو وئع.. تزوجتو ونتوما ما كانت ليكم لااااا على البال ولا على الخاطر... غير هادي تخليك تخمم مياااات مرة.. باش تعرف بلي نتين من نصيبو وهو من نصيبك.. 

تالاسين :(بقات غير ساكتة وتبسماتلها ابتسامة صفراء ما عرفات باش تجاوبها) 

رقية:مهم هانا وصيتك.. وعمل عئلك الله يرضي عليك.. (تبسمات وحطات يديها على حنكها) الفرحة لي فرحت بيكم ما فرحتها نهار عرسي.. ردو لبال لبعضكم.. هو راه يديريك فعينيه.. غير نتين لي تهلا فيه.. ربي يواااتيكم ويزرع لمحبة فئلبك من جيهتو اما هو راه لمحبة منو كتفرئ ههه

تالاسين :(حانية راسها) راه حتا يانا كنعزو ولكن فحال خويا

خرجات عينيها وعطاتها دقة لفخاض مع هي جالسة فالكرسي وتالا واقفة جاتها هي هاديك وشداتها بقرصة ليعاااااااتها مزيااااان وتالا ما قداش تغوت غير مخرجة عينيها كتوجع.. 

رقية :يخوييييلك جنااااااب اباردة لئلب.. خوك منين جاك خوك.. شفتي هذاك الزين كاااامل واخة يكون خوك تبرا من طاسيلتك كااااااملة على ئبلو وتكره نهاااااار لي خرجتو من كرش وحدة.. ئالتلك خويا.. تهز من ئدامي اتعصبني.. تريكة ناااائصة.. 

تالاسين :اححح قصحتيني ايما

رقية:سكت لا نزيد نكمل عليك.. نتين ما تهنى حتااا يتعرى عليك ويوريك الاخوة دبصح كي دايرة

تالاسين :(خرجات عينيها) اواعدي.. يما.. شني كتقول😳

رؤيا :(وقفات حداهم وقرب حتا براء) شكتقولو نتوما؟ 

رقية:(خنزرات فتالا) والو.. زيد فحالنا.. راه خاصني نشرب دوايا وانا نسيت ما جبتو معايا

رؤيا:(وقفات موراها باش دفعها) واخة.. يله نخليكم.. وردو لبال لراسكم.. (شافت فتالا) ونتينا والله ونكسبلك لخبار مشيتي لشي قنت انتفاهمو

تالاسين :(حانية راس) واخة.. 

خرجو كيتوادعو معاه وهما واقفين فالباب كيودعوهوم حتا ركبو فالسانسور وهبطو.. تنهدات ما ساخيااااش بيهم ودارت غدخل ومع الدورة وهي دخل فيه هو لي كان واقف موراها مباشرة جتا ضربات فصدرو ورجعات شادة فنيفها.. 

تالاسين:اححح..

براء:(حط يدو على يدها لي شادة بيها نيفها باغي يزولهالها ويشوف) تقصحتي؟ 

تالاسين :(هزات عينيها مخنزرة فيه وهبطات يديها لي شاد فيها) صدر هذا عندك ولا حيط.. خلخلتيلي دماغي.. وزايدون علاش واقف مورايا

دازت فيه وتمات داخلة كتحك فنيفها وجلسات فوق الفوطوي مخنزرة.. وهو سد الباب ودخل كيضحك عليها عارفها معصبة حيث حطها بوجهها قدام رؤيا.. 

براء :نوضي ديريلو ثلج عندك يتنفخ ويتسمى عليا زرقت نيف مراتي

تالاسين :(شافت فيه مصغرة عينيها) كيعجبك تفقصني ياك

براء:(عطاها بالظهر غادي لبيتو) وبزاااااف.. 

زفرات فبلاصتها وبردات الدقة وناضت للكوزينة جمعات الروينة لي فيها.. حطات لماعن فلافيسيل.. حتا كيوقف عليها فباب الكوزينة كيلبس ساعتو.. 

براء :انا خارج

تالاسين :فاين ماشي! 

براء :(هز راسو فيها وتبسم ووكى على باب الكوزينة مكروازي رجليه) شفتك ثيقتي راسك وبديتي تسوليني فين غادي وفين جاي.. 

تالاسين :(طلعات شنوفتها لفوقانية للجنب) شو على بنادم.. مشي حتاااا لجهنم لحمراء يانا غير سقسيت نشوفك واش ماشي عند داك صاحبك تشوف حريرتي فاين وصلات.. 

براء :اممم.. ثيقتك

تالاسين :كاعلك لا ثيق.. مهم غير ما تنساشي القضية ديالي 

براء :(تم خارج) الا بقالي شي وقت

تالاسين :بو عاعا.. (خراي) 

براء :(رجع مارشاريان مطلع حاجبو) شنو هادي؟ راه سمعتها؟ شنو هاد بو عاعا

تالاسين :(توترات) ااا.. والو.. 

براء :وشنو كتعني ؟! 

تالاسين :(كدور عينيها) امم.. غير سمية دواحد الراجل كان واااااااحد لمبعصص منو ما كان فزمانو وباسل طععععن وهاز مناخرو لسما وعلى خلااااها.. لا زين لا مجي بكري.. ومن داك نهار فيما كان شي بنادم فحالو كيقولو بو عاعا.. (تبسمات كتقليلو السم وكضحك فخاطرها) فهمتيها دابا

شاف فيها مطلع حاجبو وتبسم بسخرية وقاد لكول دالقميجة وخرج فحالو كيصفر وخلاها هي واقفة كترمش ما كتحملش فاش كتهضر ويعطيها النخال..

ساطت من مناخرها حتا سمعاتو خرج وسد الباب وخرج امينو معاه.. دارت هي فتحات الثلاجة تشوف شنو اتوجد لغذا.. بقات كتشوف فيها ما لقات حتا حاجة مقادة بقات واقفة كتعوج فمها.. ورجعات سداتها ومشات لبيتها هزات شي بركة دلفلوس من صاكها واخة ما بقالهاش بزاف.. وتمات خارجة جارة مينوشة موراها.. يله وصلات حدا الباب وجات تهز السوارت من فوق لبلاكار الصغير وهما يبانولها لفلوس منزلين حداهم.. خلاهملها تما وعاد خرج.. شافت فيهم وهزاتهم

تالاسين :بعدا صدق كيفهم.. يله امينوشة.. فااازي

خرجات وسدات الباب وهبطات تلاقات الكونسييرج فالباب لي غير شافها وناض كيتفتف وهي شافتو وتبسمات.. 

تالاسين :صباح الخير. 

الكونسييرج :(كيرمش) صباح النور

تمات خارجة وهي تسمعو عيطلها ورجعات عندو.. 

تالاسين :وي

الكونسييرج :نسولك ابنتي.. وما ديريهاش مني قلة الصواب

تالاسين :(بابتسامة) وي.. مرحبا

الكونسييرج :دابا نتي.. واش مراة السي براء ولا ختو!! غير بغيت نفهم

تالاسين :(قوصات حجبانها) ختوو..شكون قالك مراتو؟ 

الكونسييرج :ختوو!! (حنا راسو كيتمتم) دابا واش ختو ولا مرتو؟! 

تالاسين :ما جاوبتينيشي

الكونسييرج :ااا.. وو.. والو ابنتي والو.. غير انا يمكن ما بقيتش كنسمع مزيان.. ماديش عليا

تالاسين :امممم..اوك الله يعاون

الكونسييرج :بسلامة.. (جلس تالف كيخمم) بغيت غير نفهم..واش مرتو ولا ختو ولا نص نص.. 

خرجات هي كتمشى على رجليها حتا وصلا لسوبر مارشي قريب ودخلات تقدات داكشي لي باغة وتمات راجعة كتشوف فالطريق وبالها ماشي معاها.. حتا قربات توصل لباب وجات تدخل وهي تحس بشي يد شداتها وجراتها بالجهد حتا ضارت مخلوعة.. غير شافتو وهما يخرجو عينيها.. واقف عليها مخنزر وكيطلع فيها ويهبط.. ضعاف شوية من وجهو وباااانت فيه القهرة.. لحيتو تغوفلات هي وشعرو وتحت عينيه زرااق.. شداتها الخلعة والخوف منو ما عرفاتش علاش.. ولكن شوفاتو كانو اياكلوها.. 

سعد:(مزير على يديها) لالة لعروسة.. لباس! 

تالاسين :اااي يدي.. رخي مني

سعد:(زاد زير) ياك فرحانة بعدا.. 

تالاسين :رخي مني اسعد.. قصحتيني

سعد:(خرجج عينيه فيها) ونتي ما قصحتينييييش.. نتي قتلتيني بهاد الفعلة.. قتلتيييني ونتي عااايشالي مع راسك فحال الا ما درتي والو..

تالاسين :يانا ما عملت والو والو.. ما عارفاشي كيفاش زوجت بيه.. ما عارفة والو.. يانا ماشي بنت لحرااام ولا قليلة الاصل.. لي وقع وقع ولكن كيفاش ما عرفاشي فبلاااا ما تبقى تلومني

ضحك بسخرية وهزها من دراعها حتا لصقات فيه وهي كتوجع وتقوص فحجبانها مقصحة وكتنتر.. 

سعد: كذبة زوينة هادي!! ما عرفتيش شي كذبة ما احسن

تالاسين :ما كنكذبشي.. ااااي رخي مني

نترات يديها منو بالجهد حتا رجعات لور وشدات فيديها مخيبة سيفتها حيث قصحها وهزات راسها فيه مخنززززززرة.. 

تالاسين :تعاااود تمد يديك عليا نقطعهااالك

سعد: انا لي ما كرهتش ندوز عليك نتي وداك الشماتة بموس حااافي ونوريكم

تالاسين :مشي فحالك اسعد حسن ليك

سعد :ما غاااديييش.. يله شنو اديري.. انا هناااا انبقى.. وانبقي تابعكم حياتكم كاااملة حتا نحررها فيكم.. صدقتي وحدة ما كتسوااايش

تالاسين :(طلعاتو وهبطاتو باستحقار) نتينا لي ما صدقتيشي.. وطلعتي واحد يااااخور.. (عقدات حجبانها) سمعني نقولك زوج كلمات وما انرجعشي نعاودوم.. وبغيتي ثيق ثيق.. ما بغيتيشي نطح راسك ما بقى سوقي فحد.. يانا هاد الزواج ما كسبتلو لخبار حتا نهار جيتي وقلتيهالي.. وما عندي حتا خبار بيه قبل.. ما عرفاشي لا كيفاش لا فوقاش وقع.. ولي عارفاه بلي شي حد لعب معنا لعبة خبيييييثة وما انمشيو حتا نجبروه.. ونهار نعرفوه شكون وتعرفو بلي ما كذبناشي اتندم على هادشي لي كتقول

دارت داخلة فحالها وهو يرجع شدها وجرها عندو وهي تحممر فيه حتا كيوقف عليهم الكونسييرج.. 

الكونسبيرج:ياك لباس.. بنتي شنو واقع..واش كتعرفيه! 

تالاسين :(كتشوف فسعد بتحدي) والو اعمو.. غير معرفة قدييييييمة وجبرتيه ماشي فحالو

تنترات منو وشافت فيه.. طلعاتو وهبطاتو وقلبات وجهها وتمات داخلة فحالها وخلاتو هو واقف كيبخ الدم بالعصب وكياكل شفايفو بالفقصة.. خنزر فالكونسييرج وقلب الدورة وقطع الشانطي ركب فالاوطو ديالو وزاد فحالو.. 

وخلاو الكونسييرج كالعادة واقف كيرمش ما فاهم والو.. حتا كتم داخلة بنت كانت متبعة لفيلم كااامل من لول.. لابسة شورط دجين قصييير وديباردور لاصق وجامعة شعرها لي بلون الاكاجو كوتشوفال.. زوينة ومسرارة ووقفات على الكونسييرج وكانيشها موراها.. 

البنت :عمي المختار.. صافا! 

الكونسييرج: مدام وصال.. اهلا.. 

وصال:(خنزرات فيه) شحااال من مرة كنقولك ما تقوليشي مدام.. راه طلقت صااافي.. واااه 

الكونسييرج:ااا سمحيلي امدا.. امدموزيل وصال غير لسان ما فيه عضم

وصال:(كتشوف فتالا لي واقفة كتسنى السانسور حتا دخلات) شكون هاديك!! وشنو كان واقع هنا

الكونسييرج:شنو كان واقع هنا ما عرفت.. وشكون هاديك انا براسي تالف.. ولكن على ما كتقول هي راها خت السي براء

وصال:(خرجات عينيها) خت سي براء!!! بصح؟؟! 

الكونسييرج:(كيحك راسو) وا ياااامكن.. علاش كتسولي

وصال:(ضحكات) لا والو غير سولت وصافي.. يله خليت ليك الراحة هاد الساعة.. بسلامة

طلعات هي كتزفر غطرطق بالعصب ما حملااتش الطريقة باش كان كيشوف فيها ويهضر معاها.. دخلات للدار وحطات السخرة من يديها بالشنتة وجلسات على الفوطوي شادة راسها.. تقهرات من طريقة تعاملو معاها.. وديك كلمة ما كتسواايش جاتها قاااصحة.. وعارفة بلي شحال من واحد فالعائلة راه كيشوف فيها بنفس النظرة.. تنهدات حابسة دموعها وشافت فدراعها حمرااااا وصباعو مطراسسين فيها مع كانت غير بالتيشورط ودراعها معربين.. قصحها بالمعقول.. خيبات سيفتها كدوز يديها على الدقة وناضت هزات السخرة ودخلات للكوزينة طيب لغذاء..وجداتو وحطاتو فالفران يطيب وجمعات الكوزينة وخرجات كتجمع الدار مهم تلاهي الوقت حتا يدوز.. سبقات ببيتها جمعاتو هو لول.. وعاد مشات لبيتو دخلات للحمام جمعاتو هو لول وحطاتلو فيه فوطات جداد وخرجات كتجمع لفراش.. وهي حانية على ركابيها كتقادو بركات على تيليكوموند صغيرة بركبتها بلا ما تشوفها حنا كتسمع داكشي كيتحرك ودارت تشوف موراها وهو يبانلها الحيط كيتفتح.. قوصات حجبانها باستغراب والحيط طالع بشويييييية حتا بداو عينيها كيخرجو.. شافت صورتها معلقة فالحيط.. واقفة بكسوتها لحمراء شادة الحيط كااااامل بقات غير كترمش وجاتها لقوة وجمدات فبلاصتها..كتفكر فوقاش خدالها هاد الصورة.. وعاااد عقلات على عيد ميلادها هادي عامين كانت بنفس لاغوب.. يعني هادي شحااال وهو كيبغيها.. وكلامو بصح.. بقات غير كتشوف وتسرط فريقها.. ما عرفات باش حسات مهم ترون عليها كلشي.. هزات ديك التيليكوموند سدات الحيط وناضت كملات الجميع وبالها مرفوووووع مع الصورة.. 

🎗️🎗️🎗️🎗️

قرب وقت لغذاء ورجع هو للدار عارفها اتكون كتسناه.. مع تم داخل كيلعب بالساروت فيديه وحاط اليد لوخرا فجيابو مع كيوقفو الكونسييرج.. 

الكونسييرج :سي براء.. 

براء :سلام.. 

الكونسييرج :وعليكم السلام 

براء :(بغى يمشي) 

الكونسييرج :سي براء.. صبر

براء:وي

الكونسييرج: بغيت غير نقولك شي حاجة

براء :خبار لخير

الكونسييرج :قبايلة اسي براء.. ختك كانت خارجة.. 

براء :(خنزر فيه) مرتي مرتيييييي..

الكونسييرج :(تخلع) ااا.. علاش ماشي ختك

براء :لا ما ختيش.. شكون قالهالك

الكونسييرج :هي لي قالتها

براء :(عض على فمو بالفقصة) امممم اوك.. مهم ماشي ختي.. ونهار نعاود نسمعك كتقولها انخسر معاك اسي لمختار

سي لمختار:انا راه ما بقيت فاهم والو.. كطلع نتا تقولي مرتك.. كتهبط هي كتقول ختك.. 

براء :مرتي وسدينا.. دابا شنو كنت باغي تقول

السي لمختار:صافي اسيدي مرتك.. مهم مرتك قبايلة كانت خارجة وجا شي حد ووقفلها فالباب وما نكدبش عليك ما عجباتنيش الوقفة.. باين عليه شي واحد شراااني وهي كانت كدابز معاه وهو كيعلي فصوتو.. 

عقد حجبانو كيشوف فيه وقلب وجهو للجنب كيزفر.. عرفو هو لي جا لهنا عاود.. شاف فالمختار حركلو راسو وتم غادي ومخليه واقف.. وطلع مغدد اياكل ججنابو.. غير وقف بيه السانسور وهو يخرج فوصال واقفة كتسناه حيث ساكنة اونفاص ليه فنفس الطابق.. تبسمات كترمش فعينيها وهو شاف فيها مخننننزر ما عندو گانة خاصو غير فوقاش يوصل عندها ويشوفها.. 

وصال:(بصوت محلون) ميسيو براااء.. صافااا

شاف فيه مصغر عينيه عااايق بيها وبتحلوينها حركلها راسو وهو مزال مخنزر وعطاها بالظهر وفتح الباب ودخل وخلاها هي واقفة حااالة فمها فيه.. 

وصال:اخوووتي قلبي والتخنزيييييرة كتحممممق.. (ودخلات لسانسور فرحانة حيث شافتو) 

🎗️🎗️🎗️🎗️ 

وقفات بسيارتها قدام الفيلا الصغيرة ديالهم..خدات نفس عمييييق ودخلات.. صونات وعودات صونات.. حتا سمعات صوتها من الانطيرفون.. :شكوووون... 

بيسان:هادي يانا بيسان

فتحتلها الباب.. لابسة بيجامة ديال الدار وجامعة شعرها الزعر بمقبط والقصة هابطالها على وجهها.. شافت فيها مكمشة فمها للقدام وكتشوف فيها بنص عين.. 

بيسان:خالتي لباس! 

شامة:(بنبرة جافة) لباس

بيسان :اتخليني فالباب

شامة:(تنهدات كتنعل الشيطتن وبعدات من الطريق) دخل ابنتي دخل.. 

دخلات حانية الراس وسدات الباب موراها.. علات عينيها فيها ودموعها كيبريو وسطهم وطارت عليها عنقاتها كتبكي.. 

شامة:ششش.. علاش كتبكي

بيسان:نتينا وماما ما خاصكومشي دابزو اههئ انهنههئ نتوما خواتات اهئ اههئ 

شامة:(طبطبات عليها) دخل ابنتي وسكتي..صافي دخل

دخلاتها وجلسو فالصالة وحدة قبالة لوخرا وبيسان غير كدمع من نهار وقع لي وقع وهي ندمااانة وكتحسر..

بيسان:خالتي شامة!! دابا نتينا وماما اتبقاو هايدا؟؟ عمركم تخاصمتو ولا قطعتو الهضرة

شامة:(قالبة وجهها) داكشي لي عمل خاك و ديك خيتي عمري نساهلهم.. خرجولي على ولدي.. هو لي بقالي فهاد الدنيا بغاو يحمقوهلي.. فعايل الشمايت.. لا هي لا هو صدقو ما يسواوشي.. 

بيسان:(تزيرات وهي كتسمعها كيفاش كتهضر عليهم) بلحق هما راه ماشي هايداك هما راه.. (سكتات) 

شامة:بلاااا ما تعذب راسك وتبقى دافع عليهم.. عارفاه هو خاك وهي فحال ختك واتجي من جيهتوم.. 

بيسان:(بقات غير كتشوف بحسرة ورجعات هضرات) ولكن نتينا وماما ما خاصكومشي دابزو.. هي ما بيديها والو.. هي براسها ما كانت عارفة والو

شامة:(تنهدات) اودي الله ينعل الشيطان وصافي.. راه فاش كيحضر غير الله يستر.. يانا ديك نهار كنت معصبة ما كنشوفشي قدامي.. نتينا ما شفتيشي سعد كيف كانت حالتو.. جا لهنا ما خلا ما هرس وهو غير كيغوث يصرصر حتا تهد وطاح على حجري كيبكي.. (دمعو عينيها) ولدي بطولتو وقامتو طاح وبدا كيبكي ويشهق.. عمري شفتو فديك لحالة.. بغيت نتسطى معاه.. ومن ديك نهار وهو حالتو لور لور.. ما كياكل ما كيشرب.. ساد عليه فداك البيت وجالس.. وفليل كيخرج ما كنعرفو فين كيمشي حتا كيرجع فالصباح.. خرجولي على ولدي الله ياخذ فيهم الحق.. 

بيسان :(بغات تبكي)ما دعيشي اخالتي عافاك..

شامة:(زيرات على فمها قالبة وجهها) 

بيسان:(مسحات دموعها) وفاين هو دابا! 

شامة:راه لفوق.. جبرتيه عاد دخل.. ما عرفت مالو عاود جا كي لعجاجة وداز فيا وطلع.. ولدي كنشوفو قدامي كيضيع وما فيدي ما نعملو

بيسان:(تنهدات) واخة نطلع عندو؟ 

شامة:(شافت فيها ورجعات تبسماتلها) طلع ابنتي..وشوف معاه كمان يبغي ياكل.. الخدامة طلعاتلو الصينية دلفطور راها مزالة كما هي.. الصينية لي طلعناها كنهبطوها كما هي.. شوف معاه نتينا كتفاهم معاه

بيسان:(وقفات كتسرط فريقها) واخة.. 

تقدمات طالعة وشادة فالحيط وكتقوي راسها.. بشمن وجه اتشوف فيه وهي عارفة بلي هي السباب فحالتو.. ندماااات وما نفعاتها ندامة.. كتشوف راسها خرجات على كلشي بهاد الفعلة.. ختها خرجات من الدار.. خوها حتا هو.. سعد حالتو حالة.. العائلات دابزو.. كلشي تشقلب.. وحتا واحد ما استافد غير رونوها والسلام.. وقفات حدا بابو كتمسح عينيها وتقاد شعرها خدات نفس طويييل ودقات الباب.. المرة لولة ما جاوب حد والثانية والثالثة.. وفلخر فتحات الباب ودخلات كطل بشوية حتا دفعاتو كامل ودخلات ورداتو موراها.. دخلات كتقلب عليه بعينيها حتا كتلقاه جالس فوق كرسي فلبالكون وكيشوف قدامو.. شافت فالبيت كلو مشقلب لي خاصها تكون لفوق راها لتحت.. وحتا حاجة ما فبلاصتها وفيه ريحة كتخنق..جات عينيها فالطبلة الضغيرة لي فالبيت وكانت الضينيةة مزالة كما هي ما قاسهاش.. شافت فيه وهي كتقرب. . لاحظات شعرو لي تغوفل ولحيتو لي بانتلها من جنب وجهو زااادت كبرات.. شافتو هز يدو وقرب لگارو لفمو وهما يخرجو عينيها من بلاصتهم.. رجع كيكمي!! من فوقاش!! .. زااااد تزير قلبها كثر وهي كتشوفو فين وصل.. علاش وقع هادشي كامل علاااش؟ علاش ما بغاهاش هي من لول وهي كانت قدامو حياتها كاملة؟؟ اولا كون ما بغاتوش هي اصلا كاع ما وصلو لهادشي.. تلوم راسها لي بغاتو ولا تلومو هو لي ما بغاهاش.. تزير عليها قلبها وبداو دموعها كينزلو وبقات واقفة كتشوف فيه ما قدراش تقرب منو..

حس بشي حد معاه فالبيت.. قال اتكون غير الخدامة بحال ديما.. تسنى يسمع باب البيت تسد ووالو.. شم ريحة دشي عطر غريبة عليه كتقرب منو.. ودار شاف شكون موراه.. شاف فيها واقفة بكسوتها البيضة مزوقة بورادي حد الركبة.. لاصقة من لفوق وواسعة من لتحت.. ومزيرة على طرافها بيديها وهي كتشوف فيه ودموعها نازلين على وجهها.. طلعها وهبطها ورجع قلب وجهو ونتر نترة طوييييلة من لكارو وساط الدخان قدامو.. 

قربات بشوية وجلسات فكرسي حداه وهي كتحسر على حالتو.. وهو ما شافش حتا فيها كيشوووف قدامو وكينتر فداك لكارو ويصغر فعينيه وسااااكت.. حتا هي بقات ساكتة ما عارفة ما تقول.. كتشوف راسها فين وصلاتو.. سلالو الكارو لول وبغى يجبد الثاني وهي تحط يديها على يديه باش تحبسو.. 

بيسان:(بصوت منغنغ بلبكى) بركة عافاك.. 

بعد يدو من يديها وشاف فيها عينو فعينيها وهو كيجبد لگارو وكيحط ففمو وكيشعلو ورججع قلب وجهو.. 

سعد:(ساط الدخان) شنو جاية ديري هنا!! (كيشوف فلكارو لي بين صباعو) جاية تشفاي فما دار خوك فيا؟ 

بيسان :شني هادشي كتعمل فراسك.. شني هاد الحالة؟؟ كتكمي اسعد؟؟ من فوقاش؟ عممرك عملتيها؟ 

سعد:(ببرودة) ديها فراسك.. 

بيسان:كيفاش نديها فراسي؟؟ ما شفتيشي حالتك كي رجعات؟؟ شو راسك.. شميتي غير ريحتك؟ علاش هادشي كامل.. ما كتابيتوشي نبعضكم صافي.. فنات الدنيا؟؟ ما بقاشي فيك ويماك وباك لي كيشوفوك فهاد الحالة وكيمرضو معاك.. خلينا منوم.. ما بقاشي فيك رااااسك؟؟ ماشي هذا هو سعد لي كنعرف نتينا ماشي هايدا.. 

هي كتهضر وهو مبرد كيشوف قدامو ويبخ فالدخان حتا عصصبها ونتراتو من يديها ورماتو وشافت فيه كتنهج وترجف وهو شاف فيها محممممممر.. 

بيسان :(بدات كتبكي) معاااك كنهضر ابنادم معاااك.. شني هاد الحالة نتينا فيها.. وهاد الزبل لي كتكمي راه ايخرج عليييك.. فيق على رااسك فيييييييق.. تالاسيييين صافي مشاااات باااااح نسااااها عليك.. هي رجعات مراة واحد ياااااخور.. شوف حياااتك ونساااااا.. شوف فحالتك ومستقبااالك.. شوووف قدااااامك.. اههئ انهنههئ اههئ رجع كما كنتيييي عافاك.. نتينا ماشي هايدا.. ما خاصكشي تكون هايدا اههئ اههئ ما تعملشي فراسك هاد الحالة عااافاك اهنهئ اههئ اهئ 

سعد:(تحت سنانو) خرجي فحااالك

بيسان:ما خرجااااشي.. ما انخرجشيييي.. هنا انبقى حتاااا تفتح عينك وتشوف راسك.. (ناضت كتجر فيه) نوض تشوف راسك نوووض.. نوض لمراية تشووووف حاالتك نوووض

تنتر منها بالجهد حتا مشات وجات فبلاصتها ووقف قرييييب منها عينو فعينها محمرهم وكينهج وعروقو تنفخو.. وكيسوط النفس سخووونة على وجهها حتا كتهز معاها القصة لي طايحة على عينيها لي مخرجاهم فيه بقوة الخلعة.. وهو كيغوت بصوت زعزعها.. 

سعد:اتهزي عليا من هنا ولا ما ايعجبكش حااالك.. علاش جاية عندي اصلا.. باااقي عندك لوجه تجي عندي من موووور ما دار خوووووك.. باقي عندك لفم لي تحليييي.. هاد الحالة لي انا فيها خوووووكو سباابها.. خوك لي وصلني لهاد الحالة..

بيسان:(رجعات خلفة لور كترجف) خاي ما عملك واالو.. هداك المكتاب وصافي..تالاسين ما مكتبالكشي.. 

سعد:لي دار شي فعلة موووسخة يسميها فلمكتاااب.. (قرب هو ديك لخلفة لي رجعاتها هي وشدها من دراعها) ماشي لمكتاااب لي فرقنا.. ولكن الشمااتة دخوك لي دااارها.. (طلعها وهبطها ونترها من يديه) ونتي دابة جاية عندي كتفلسفي عليا..

بيسان:(شدات فدراعها ودموعها كيقطرو) 

سعد:خرجي فحالك.. خرجي فحااالك وما ترجعيييش.. ما تعاوديش توريني كمارتك.. كلكم سلعة وحدة.. 

بيسان :(زيرات على فمها) ما انديييشي عليك دابا.. عارفاك معصب وجبرتيني قدامك جالس تبرد فيا.. عارفاها ماشي ساهلة عليك.. ولكن رضااااا بما عطاك الله ونساها عليك.. هي من لول ما كانتشي ديالك.. وكون كانت ديالك كاع ما يوقع لي يوقع.. رضااا بلمكتاب

سعد:(قلب وجهو للجنب) مزالة كتقولك المكتاب.. (شاف فيها وهز يدو نعتلها جيهة الباب) خرجي عليا.. خرجي من هنا حسن ليك.. ما باغيش نغلط فيك.. خرجي من قدامي هاد الساعة

زيرات على فمها ما رضااااتش وهزات راسها وتمات خارجة بالزربة مع الدورة تعكلات فالعتبة دالبالكون وكانت غادي تجي ب على فمها كون ما شدها ودور يدو على كرشها قبل ما طيح.. حس بكرشها كتمشي وتجي تحت يدو بقوة ما كتنهج وتنفس بالزربة بالخلعة.. هزات راسها فيه وهو مزال شادها وعبنيها حومر كيقطرو بالدموع وتنترات منو بعدات يديه عليها وخنزرات فيه وتمات خارجة بحالها.. زدحات الباب موراها وهبطات كتجري فالدروج وكتشهق.. تلاقات بشامة ما خلاتهاش حتا تهضر دازت فيها وخرجات كتبكي وتقول ما بكات وما وقفات حتا وصلات للاوطو ديالها وحطات راسها على لفولون بغات تحماق بلبكى.. ما قاداااش تحقد عليه ولا تلومو على كلامو ولا على تصرفو معاها تستاااهل هي لي دارتها بيديها.. خرجات عليهم وعلى راسها.. هادشي ما دار غييير وهو حاسبها خت هذاك لي خذالو خطيبتو اما اذا عرفها هي مولاة الفعلة شنو ايدير.. تعماولها العينين وقلبها خلاها تصرف بلاااا ما تفكر.. ما كذبوووش فاش قالو الحب اعمى.. حيث بصح كيخليك دير شي حوايج عمرك تخايلتي ديرهم.. سواء مزيانين سواء خايبين.. 

🎗️🎗️🎗️🎗️

يقودنا الحب دائما إلى الحافة.. 

فإما ان نسقط في الجنة ام في الجحيم.. 🕊 

يستولي على قراراتنا..

على مبادئنا..

على قناعاتنا..

فإما نصبح على هيئة ملاك او شيطان.. 🕊

الحب كارتداء عبائة سوداء تحجب الرؤية وسط متاهة لا بداية لها ولا نهاية..

تسير في عتمتها مترجيا حظك اللئيم..

فإما أن تجد النور او تظل غارقا في الظلام .. 🕊.. 

دخل هو كيقلب عليها بعينيه وكيعض على شفايفو.. ما بغاهاش تشوفو.. ما بغاهاش ترجع تلاقاه.. اباااار خوفو عليها منو غيرتو عليها تزاادت دابا كثر وكثر.. واخة زواجهم لحد الان ما فاهمووش ولكن كتبقى مرااتو وهذاك كان ايكون راجلها.. غير هاد القضية كتخليه يغلي غييير بوحدو.. كيقلب فلبيوت ما بانتلوووش دخل للكوزينة كيشم غير ريحة الماكلة لي كطيب.. فاش ما لقاهاش عرفها اتكون فبيتها.. تم داخل ما كيشوفش قدامو ومع البيت بلا باب ما دار لا حس لا والو حتا تم داخل مدرم ومع الدخلة مع وقف مكوانسي..

كانت جالسة فوق الناموسية وعاطياه بالظهر ما شافتوش.. الفوطة ملوية على نصها لتحتاني ونصها الفوقاني كلو عريان وهي كتسد السوتيان من القدام.. كانت يله خرجات من الدوش باش تزول عليها ريحة الطياب ولعرق.. وشعرها مجموع للفوق بمقبط.. سرط ريقو وما خداش حتا ثواني ورجع خرج بالزربة ووقف كيمسح على شعرو ويحك فعينيه.. حلقو نشف وهو كيتفكر ظهرها لعريان قدام عينو.. عمرو شاف مساحة كبيرة من جسمها عريانة.. كانت ديما كتلبس المستور لي ما كيبينش مفاتنها.. صورة ظهرها الأبيض المقسوم فالنص بخط واحد مع زوج حفرات فجناب ظهرها من لتحت.. ديك الثواني لي استغرقهم واخة عيا يحاول ما يدققش فيهم الا انه خدا من الشوفة ما يكفيه.. سرط ريقو ومسح على وجهو ودخل للكوزينة جبد قرعة دالماء باردة كيهبط عليها..

بقى دقائق واقف وكيشرب حتا كيشوفها داخلة للكوزينة غير شافتو وهي توقف فبلاصتها وهو شاف فيها بنص عين ورجع قلب وجهو كيشرب.. 

تالاسين :فوقاش جيتي.. ما سمعتكشي

سرط الجغمة دالماء لي ففمو وحنحن وكيشوف فيها بالزربة ويرجع يشوف قدامو..

براء :اححم.. عاد دابا شوية..

تالاسين :امم مزيان.. لغذا واجد.. غير نطفي عليه وصافي.. فيك الجوع؟؟

تمشات قدامو ووقفات عاطياه بالظهر كتفتح الفران تشوف الماكلة واش طابت وشعرها مزال فازك ومجموع ولابسة سروال قندريسي فلغري مبرد مع تيشورط بيضة.. مشات عينو لشعرها لي كيقطر على عنقها وكيهبط مع ظهرها حتا كيغبر وسط التيشورط وهو يدور عطاها بالظهر ورجع كيشرب فديك القرعة..

تالاسين :ما جاوبتينيشي فيك الجوع

وقفات بجنبو كتحط الطبسيل دالزجاج لي كان فالفران وهي كتشوف فيه باستغراب من حالتو وهي كتشوف جبهتو عراقت..

تالاسين :شعندك؟؟ واش مريض؟؟؟ (شافت فالقرعة خواها) شربتي ليترو ونص دالماء فدقة😨

براء :(شاف فيها ورجع قلب وجهو كيبعد تيشورط عليه بحال الا كينش) الصهد ياك

تالاسين :هاااا.. شوية..راه لكليمة مشعولة

براء : لا الصهد.. انمشي ندوش

تالاسين :(مزالة مصدومة من الكمية دالماء لي شرب) اه مزيان. .. دوش..

خلاها واقفة كترمش ودخل هو لبيتو كيمسح على وجهو ويسوط.. قلع تيشورط رماها فالارض وهبط السروال ودخل للحمام يبرد على قلبو وصورتها مزااالة ما بغات تمحالو.. 

حطات هي الماكلة وقداتها فوق الصالة مونجي فالبالكون مغطية من لفوق ببراسول من الشمس..وعطات لمينوشة تاكل.. وحطات لامينو فبلاصتو حتا هو حتا.. وجلسات كتسناه يجي.. وهي كتسناه صورات الطبلة لي قدات وبغات تبارطاجيها وهي تلقى الكونكص تسالاتلها وجلسات كتعوج ففمها.. حتا كيبان خارج عندها فحال ديما.. مسفح عليها من لفوق.. ولابس غير سروال دالكيطمة مبرد.. والفوق عريان ولكرش مطراسية مزغبة شوية والصدر عريض والشعر فازك كيقطر..قلبات وجهها وحمارت فلبلاصة وهو شافها هكاك وتبسم.. عارفها كتعصب فاش كيبقى يتسارا معري.. 

براء:(جلس وعينيه فالطبلة ) يعطيك الصحة.. الماكلة غير من الشوفة كتشهي.. 

تالاسين :(دارت شافت فيه وعينيها كتفادا تشوف فلتحت حدها كتشوف فوجهو) زعما ما عوالشي يهديك الله وتستر راسك

براء :(هز حبة دلعنب من الطبسيل دالديسير) راه قلتلك هاكة كنرتاح

تالاسين : ويانا ما كنرتاحشي.. شو.. الا كنت انعيش معاك فهاد الدار خاصك تعمل بحسابي.. 

براء :وحتااا انا والله حتا داير بحسابك.. اما انا (شد فالسروال) هذا وما كنلبسوش فالدار.. كيعجبني نتسفح ويضرب فيا لهواء دربي (تكسل) ااااااه الجو زوين

تالاسين :وهي حتا يانا نتسفح ونجلس نتسارا عليك هنا كي اتجيك

حطات يديها على فمها عاد سرات معاها وخرجات عينيها فيه وطلعات معاها تزنيگة.. 

براء :(ضحك بالثقااالة وهو كيرمي حبة دلعنب ففمو) تسفحي شكون شدك.. ياك مراتي وانا راجلك...وكلشي حلالا طيبا(غمزها) 

تالاسين :(زولات يديها من على فمها وخنزرات فيه) ضبر راسك.. ياك دارك ايوا صافي شغلك هذاك..

براء :(حرك راسو يمين شمال وهو مبسم) كولي كولي.. ها لماكلة اتبرد

ميقات فيه ومدات يديها كل واحد كيحط فطبسيلو.. بداو كياكلو وهي كتاكل بالثقاااالة كتبقى ساعة وهي كتمضغ فاللقمة حتا كيكون ضرب هو شي خمسة.. سالا طبسيلو وزاد وهي مزال ما كملات حتا طبسيلها لول.. مولفها هكاك.. وعارف قاعدتها فالماكلة.. كتاكل بشوية وما كتاكلش بزااف عليها ضعيفة.. مرة مرة كيهز عينو فيها بلا ما يعيق ويبقى متبع حركات فمها وهو مسدود كيفاش كتحركو وتمضغ.. تبسم وهو سااارح فشفايفها لي رجعو غووز مع الماكلة ومزيتين شوية.. 

تبسم وعينيه مع فمها وعينيها لي مصغراهم من الشمس لي واخة مدرقين منها الا ان الشعا ديالها كيوصل.. مسح يديه وناض وقف.. هزات راسها فيه باستغراب.. 

تالاسين :شبعتي

ما جاوبهاش وعينيه مزالة على فمها وراسم ابتسامة خفيفة كأنه كان منوم معاهم ومع حركتهم.. داوه رجليه لعندها ووقف فوق راسها قرييييب منها وهي كتعقد حجبانها كل ما زاد قرب منها..وعينيها كيدورو فبلاصتهم ومزالة كتمضغ وتحرك فشفايفها بشوية.. حنا قدامها وجلس قرفصاء قبالتها وعينيه كتمشي بين فمها وعينيها وهي تسرط ريقها مفافية.. هز يديه بشوية حط صباعو على شفايفها كيدوزهم ببطء والتبسيمة مرسومة على وجهو.. ما كيسمع والو وما كيشوف والو.. كأنه تسحر.. وهي وقفاتلها اللقمة وخرجات عينيها مصدومة.. وقبل ما تفهم ولا دير شي حركة قرب كثر وعوج راسو وحط شفايفو على شفايفها بقوة..هز يدو الثانية حطها على عنقها وحكمها مزيااان.. وهي كانت مكوااانسية فبلاصتها.. وهو عاايش اللحظة وكيستمتع بالطيبة ديالهم ومرفوووع ما هواش فهاد العالم..شحااال وهو متمني هاد اللحظة فوقاش يحط شفايفو على ديالها ويطيب مذاقهم.. كان عاارف بلي مذاقهم ايكون كي الشهد وما خابش ظنو.. حيث بوسة الشخص لي كتبغي كتكون احلى من العسل.. 

🎗️🎗️🎗️🎗️

اااااه من سحر القبلة.. ✨

يذيب الصخر قبل الثلج.. ✨

يحملك للأعالي..ويسحبك إلى عالم الاحلام.. ✨

تتدفق الدماء في العروق بسرعة كأن الكريات تتسابق فيما بينها.. ✨

تتعالى نبضات القلب كأنها تنادي من أعلى سفوح الجبال.. ✨

وتلك القشعريرة.. تسير في الجسد كأنها صعقة كهربائية.. ✨

انه سحر القبلة.. قبلة الحبيب.. سحر من نوع آخر.. ✨

يتبع...