مزال ماكملاتهاش دخلات لاللة عيشة فرحانة .. تلفت انصار شافها وضحك ومشا باس ليها راسها ويديها وهيا كتعنقو وتبوسو وتبين قدام قدس شحال راها عزيزة على ولدها وشحال عزيز عليها ولدها ... اما قدس كتشوف قدامها مكتقلبش كاع وجهها جيهتهم .. حس بيها أنصار عندها شي حاجة لاكن ماسمحش ليه الوقت فين يعضر معاها.. دغيا جراتو مو ومشات لاسقة فيه جيهت الفوطويات .. شافت كاتي مكمشة مكتبان وسط الشعر حساب ليها مخدة وهي تجلس عليها حتى غوتات كاتي وطارت لاللة عيشة من بلاصتها بالخف واخا مكربزة وهرجات قدس كتجري مخلوعة وجهها صفر
طارت قدس على القطة عنقاتها مخلوعة وغرسات فيها المشة دفارها فكاتافها لاسقة فيها اما لاللة عيشة طاح منها النص .. وقفات كتسب وتعاير وأنصار مهبط وجهو كيضحك مابقاش ليه الجهد باش يهضر
- خرج الزمر لبرا علاش مدخلها عندك الدار ... موصيبة كحلة هادي
عقد حواجبو وقال : ايوا صافي .. نعلي الشيطان ... القطة ديال قدس والقطة ماشي ديال الزنقة ديال الدار بلوراق ديالها
لاللة عيشة : علااش جايبة هاد القطة اش هاد البسالة
شاف فيها بصرامة حتى قطعات الحس وقال
- لبنت كتسمع فيك صافي هنينا ... ديالها ومغاديش تخرج من الدار وما حيرات لينا فحتى حاجة .
لاللة عيشة : ولاكن ...
انصار: مكاين ما ولاكن صافي هضرنا .. خلينا زوينين الاللة عيشة لعيب راه خايب
قلبات وجها كتسوط ورجعات بدلات الموضوع بدات تجمع هي وياه .. بدات قدس تحط الطبلة كما موالفة واخا معصبة .. لاكن الطبع ديالها لا يمكن يتبدل .. جابت الشلايض والطاجين حطاتهم وجلساتايرة رجل على رجل مكضحكش وكتحرك بحال شي بوليسي
بداو يتغداو وتلفت انصار عند لاللة عيشة وقال وهوا كيمد يدو ببطىء للطاجين : نتي اللي طيبتي لينا ليوم
- كفاش!!! غير باش نفسر ليك واحد الحاجة ... انا راه كنبغي نحتارمك .. ولاكن ماكتخلينيش نحسبك بحال ماما ... وماما وبابا وماكيقولوش ليا بحال هاد الهضرة وكون قالوها ليا غادي نجاوبهم ... انا راني بداري وخدمتي والى رجعت بحالي مغديش نتقل على واليديا ... خليني اخالتي عيشة نحتارمك راني ماشي خدامة هنا وماجيتش من الزنقة وراني كنفهم غير بلعينين ... الدار دارك وكلشي ديالك ولاكن حتارميني باش نحتارمك
خلاتها قدس مخرجة عينيها ومشات للكوزينة نافخة ريشها .. تبعاتها لاللة عيشة مارضاتش ترد عليها الكلمة وقالت كتحلف بصبعانها
- انا كبر منك وكترضي عليا الهضرة
. ماردوها حتى الرجال بشلاغمهم ! ولايني غير بلاتي دابا نوريك
ماتسوقاش قدس لكلامها وخلاتها كدير مابغات فالدار قلبات فالديكورات اللي بغات وكل شوية تمشي عند كاتي وتبقا عليها صببب مات صببب وكاتي مكتفهمش الصب وكتقلب على ضهرها وتقلش رجليها وتبقا لاللة عيشة كدفعها برجلها باش تنوض ولاكن المشة عاد مكتزيد تشقلب وتبدا تفركل برجليها كتلعب... شافتها قدس كدفعها برجلها بديك الطريقة بغات تنوضها من فوق الفوطوي ومشات خرجات عينيها فيها وقالت بعصبية اكثر
- راه حيوااان هادا... اش دار ليك ... مسحتي فيا رجليك سكت ليك بقات ليك غير هادي تبردي فيها جنونك ... راه حيواااااان حيوااان واش فهمتي شنو معنى حيوان ! راه حيواان مربية مكتفهم لا صب ولا باع ... والى ضربتيها مغتعرفش علاش كلات لعصا وغترجع تعاود نفس الشيء (تنهدات بتعب) خلي عليك المشة فتيقار راه نصبر على راسي ومنصبرش على كاتي
طجات لاللة عيشة وهزات كشاكشها وقالت
- ايوا ها لبااااب ... الى مصبرتيش ها لباب اللي دخلك يردك هادي دار ماشي حديقة دلحيوان ... لباب وسع من كتافك راه ماشي غير نتي اللي مرا
تنفسات قدس بنفاد الصبر وقالت : الهضرة معاك زايدة ناقصة والى كان الزواج بحال هاكا بنااااقص منو انا نخلص براتي ونمشي بحالي غير هني بالك
لاللة عيشة: الما والشطابة ...يخخ
مشات قدس خلاتها كتنكر .. دوزات العشية فالسيراط وحتى كاتي سدات عليها فلبيت اللي فرشات فيه حتى كتسمعها كتخبش فالباب وتمشي تحل عليها تديها للطواليط وتردها للبيت . اما لاللة عيشة غير غادية جايا بحال الى حرشوها عليها ... بعات تبين ليها باللي هي الري وهس الشوار وتحكمها حتى هي .. الحاصول بغات ديرها ليها .. نهار الاول يموت المش.. ساعة قدس حتا هي باغا تصفيها لهاد المش . واحد الشوية قشعاتها لاللة عيشة دخلات لبيت النعاس .. تبعاتها لقاتها لقاتها حاللة الماريو وهي توقف عليها
- لاللة عيشة : قلتي ليا الى شفتك دخلتي لهاد البيت ندير فيك اللي بغيت
- انا هضرت ... الى بان تالف وماشي هي اللي قربات ليه غادي نتفاهمو ديك الساعة
البيت تقلب سفاه على علاه .. رونو وفين ما كانت شي حاجة جبدها ولاللة عيشة جالسة شادة واحد المخدة فالصالون وفيديها موشوار كتنخصص تنخصيص وتمسح فعينيها . واحد اللحضة مشات قدس لافاليز ديال البيسي ديالها حلاتها وهوا يبان ليها تما .. غير شافتو تفكرات فاش حطاتو بيديها تما مللي كانت جايبة لبيسي .. صفار وجهها وتلون وبدات تزراق وقلبها كيزدح وحلقها نشف .. طيحات باطل بلا متقصد .. وباطل واشمن باطل . وعلااامن ! على مو ... الام اللي ليها معنى كبير واخا كلماتها معدودة ... لاكن وزنها لايساوي ثمن ... بكاتها ووخلاتها كتحلف واخا مكانش فنيتها يوقع هادشي كامل وهادشب مزال حتى ماكملات السيمانة وسخنات بلاصتها . كفاش غيكةن موقفها قدامو ؟ كفاش غيكون قدام مو اللي غتقطع ليها فالساتيام من مور ها
الموقف ... كفاش غادي تكمل لحياة معاهم وبيناتهم من مور هاد هادشي اللي وقع .. وكفاش يقدر يتصرف معاها انصار وهي مزالة ماعرفاتش الجانب العصبي منو و كل ما عارفاه وخايفة مو هوا بلاصتو مو الكبيرة فقلبو وبرضاها هوا ناجح وكيسعا من ديما لرضاها .
سدات الحقيبة بالزربة وانصار موراها كيرون الدنيا .. بدات تقلب بلعاني كتفتف وتكحز الباليزة للجنب باش تركنها ماتبانش حيت ماعندها فبن تفنفن حدا أنصار .. لاكن لحسن الحظ خرج من البيت كيقلب بعيد واستاغلات الفرصة هزات الباليزة خرجاتها برا البالكون دالبيت وماقدراتش تغامر وتحلها . بدا يقلب فوق الطبلة وهوا يشوف مو رجعو عينيها حومر بالبكا .. كتبكي بحال شي دريس صغير وتشهق .. أثر فيه البكا ديالها اكثر مللي اثر فيه بكاها فالموت ديال باه ... ومن موت باه ماشافها كتبكي واخا كتعصب وتغضب ... ويبقا فيها الحال من ولادها لاكن عمرها بكات ولا ضعافت قداهم ... ماقدرش يصبر ورجع عند للبيت لقاتها كتجمع ديك الروينة اللي مشتتة وخرج فيها عينيه وهوا كيحيد لافيست
- واش حطيتيه فشي بلاصة ونسيتي ولا كفاش . . . راه نعرفك طيحتي عليها الباطل غادي تشوفي وجه عمرك فحياتك ماشفتيه
قالت بارتباك : صافي دابا الكارني تلف .. بان تبارك الله مابانش ماشي مشكل
أنصار: هاد الليلة غيبان هاد الكارني ... كان فالسما ينزل كان فالارض يطلع ... قلتي مّي اللي هزاتو ليك .. غادي نشوفو واش هي ولا ماشي هي
بدا يقلب على حوايجو مو و قدس كترعد فبلاصتها .. لقاهم حدا الباب وهبط الباليزة حلها قدامها بكل تقة كيبين ليها ان مو ماشي ديال هزان الحوايج وباش يرد الاعتبار لمو ، جبد حوايجها قدام قدس حاجة بحاجة وهي كتوقفو بندم شديد وترغبو
- صافي أنصار الله يعطيك الستر .. صافي بلا متجبد حوايجها
قال بجدية : لااا غنجبدهم ... قلتي هي اللي هزاتو ... دونك غتكون حطاتو هنا حيت مغتهزو الا وعندها بيه الغراض وغاتخبيه فحتى بلاصة من غير حوايجها . على الله اقدس تكون ماهزاتوش هي باش ديك الساعة نعرف شنو غندير معاك
جبد كلشي ماخلا حتى حاجة من حوايج مو ... قلب الجياب والصاك ديالها الصغير والبزطام ... ماخلا حتى حاجة ماجبدهاش . قدس ماحملاتش الموقف وتمنات الارض تشق ودخل فيها وماتبقاش قدامو وهوا كيوريها الحوايج قدام عينيها كانها تاهماتو حتى هوا ماشي غير مو .. مالقا والو ورجع كلشي بلاصتو كما كان وقال بحواجبو مكرونين
خرجات من البيت نادمة اشد الندم على داكشي اللي دارت اما هوا وقف دار يديه على جنابو كيسوط بالصهد والاعصاب و ويشوف فجنابو على الله تبان شي حاجة مزال ماقلبو فيها .. قادوه رجليه لباب البالكون باش يحلو يتنفس وهوا يقشع الحقيبة ديال البيسي... هزها حطها على الطبلة كيقلب فيها بالزربة واحساس قوي كيقول ليه كاين تما وفعلا لقاه وخرج من البيت هازو فيدو والغضب مالي عينو لقاها واقفة حادرة راسها على الصاك ديال كاتي كتقلب فيه بتتاقل وساهية كتفكر شنو دير . بالحر ديال الباطل ضربها بيه وغير هزات راسها فيه هز يدو حتى للسما ومو كتشوف في دهشة وجمع مع قدس بتسرفيقة للحنك تسمعات فالدار كاملة ... شار بيدو فالارض وهي كترمش ماعرفات شنو نزل عليها وقال
- شنو هوا هادا ؟؟؟ دوي ... شنو هادا ؟
شافت فيه بعيون مدمعة ووجه حمر وقالت
- ماعندكش الحق تهز عليا يدك .
يالاه بغا يجرها وهي تنوض مو كتجري تدخلات بيناتهم مخلوعة وكتشدو وتحلفو بالله وتبعدو وقدس كترجع اللور وكتبكي ... شافت لاللة عيشة ولدها سخن ولغضب عامي عينيه وخافت طيح الروح بالاخص فاش ردات عليه قدس الهضرة ... تخلعات لاللة عيشة وتخلعات حتى قدس .. كأنه ماشي أنصار اللي قدامها .. كأنه الشبه ديالو ... كأنه عمرو فحياتو مضحك ولا مزح معاها ولا هضر بصوت بشوية ... كأنه عمرو كان هادىء ولا ضاحك .. اللي شافت قدامها شخص اخر ماشي نفس الشخص اللي كان كيضحك معاها ولا غازلها ولا كان حنين . تبدل لدرجة كبيرة كأنه مكيعرفهاش وهي مكتعرفوش .. خلاتو ساخط ومشات لبيتها سدات لباب .. مشا بغا يتبعها وهي تجرو مو كتزاوك وتلسق فيه .
انصار: متشدينيش خليني نوريها الباطل اش كيسوا .
لاللة عيشة : الله يرضي عليك اولدي ... سمع لي انا مك ... راني غنطيح ليك هنا بالسكر ... ماتقربها ماتحط فيها يدك ... صافي خليها منها لمولاها
مسح على لحيتو يرتجف غضبا في حين شدات قدس تيليفونها وخرجات للبالكون كتعيط وترعد وتشهق بالبكا
ناضت جمعات شعرها وحلات الباب وهزات فوطاتها اللي كتستعمل فلحمام لاخر خشاتهم فواحد الصاك وبدات تجر لباليزة وسط الدار قدامهم بلا متهز فيهم العين .. كان انصار جالس باقي بصباطو حطا يديه مجموعين على فكو ومو حداه ساكتة .. الصمت سيد الموقف حتى بانت ليهم قدس لابسة جلابتها دالعرس وجارة الباليزة ورجعات للبيت جابت التانية .. جمعات لاللة عيشة يديها عندها وقالت
- فين غتمشي دابا؟
قال بلا ميبدل وضعيتو : بغات تمشي ها لباب
صونا الصونيت وفتحات هي لباب وعنقات ختها فم الباب كتبكي عليها وتشهق .. قالت ختها بلا مدخل لداخل وراجلها معاها واقف برا ساكت ماقربش للباب
حسنا: صافي ماتبكيش راه دار باك واسعة وعريضة ...
لاللة عيشة : امنم واسعة وعريضة
حسنا: جمعتي كولشي؟
قدس: صافي جمعت كلشي
حسنا : يالاه تمشي بحالك ... مابقا ليك ماديري هنا ... وصلنا للضرب ومزال ماكملنا حتى لسيمانة باااااين لعربو .
خرجات قدس من الدار وخدات حوايجها معاها وكلشي قدام عينين انصار اللي واخا سمع ختها شنو قالت ماردش عليها وحتى راجلها ماتدخلش ومافاتوش العتبة ديال الدار حتى خرجات عندهم قدس
طلعات قدس مع لور مع ختها ومشات كتبكي فالطريق وكتعاود لختها وراجلها اللي باغيين يعرفو المشكل فين كاين وعلاش كلات ديك الدقة كاملة . حتى كملات هضرتها وقال كريم
- انا غنهضر .. مي كتقلقيش مني ... دابا هوا معارفش شنو واقع حكم بداكشي اللي شافت عينو ... واللي شافت عينو هوا الضلم واخا نتي ماقصدتيش .. والمشكلة طحتي مع مو .. كن طحتي مع ختو ولا شي حد اخر راه سالكة ... المشكل مو هاديك اقدس حتى واحد ميبغي يشوف مو كتبكي والناس قتلو الارواح على مواتاهم .. راه كنقول ليك اللي كاين واللي شايف بعيني ... حتى هي منها لافوت ولاكن حنا كنحكمو على الراجل دابا
قدس: دابا نتا وكيل الملك علاش متدخلتيش تهضر معاه مثلا ولا اوموان تقول ليه علاش يضربني
قال كريم في حيرة : المشكل مابقاش فوكيل الملك اقدس .. المشكل راه راجلك ورجع من لافامي .. يقدر باباك عندو رأي اخر .. الى تدخلت وكبرت الموضوع يقول ليا علاش تدخلتي ... وماتنسايش راه حتى هوا يقدر مايبغيش راجل ختك يتدخل واخا وكيل الملك وعندي منصب يخليني نتدخل .. وحتى هوا راه عندو منصب يدافع عليه وراه مدير ونتوقع منو اي رد حيت صحاب المناصب العليا مكيخافوش .. راه ماشي بحال الى غنهضر مع شي واحد عادي يقدر يتفعف ملي يسمع وكيل الملك مثلا ومايلقا ليه جهد فهميني علاش مابغيتش نتدخل .. الموضوع غيكبر ويقدر يتحداني كاع ونوليو فمشكل كبير والد لينا مشكل اخر . لو مثلا ماعندك بيه علاقة وكيقربناش كنت نتدخل وفين مابغات توصل توصل ولاكن باباك عاوتاني ميبغيش اللي يتدخل بيناتكم راني كنعرف باباك مزيان
حسنا: واخا هادشي كاااامل اللي قلتي راه ماعندوش الحق يمد يدو ... ماعندوش الحق يضربها ومو ماعندهاش حق تقرب لحوايجها ... هي ماشي دارتها بلعاني وهوا كان خاصو يجلس يتحاور ماشي يبدا بالضرب
تنهد كريم وقال : شوف .. دابا انا غيحساب ليكم كنجي من جيهتو ولا شي حاجة .. انا كنهضر على لا غياكسيو ديال اي راجل مني انا لبزاف دالرجال .. بلاصتو هوا فديك الحالة ... توقع منو اي حاجة .. باش نكونو مفاهمين .. نتوما البنات بوحدكم كتفهمو بعضياتكم .. وحنا الرجال كذلك باش نكونو واضحين ... هوا شاف الباطل تحط على مو راه ميصبرش .. لو كان صبر انا شخصيا نقول ليه ها لبوجور ديالك ومع ذلك منصدقش عيني... دابا اللي وقع وقع ... المشكل حاولو تحلوه بلعقل ماشي العكس والضدد وسي ميو يتدخل باباكم حيت كيعجبني كفاش كيتعامل وخليكم نتوما خواتاتها بعاد ..يقدر يوقع الصلح يشيط ليكم نتوما غير لعيب
حسنا :بابا الى ساق ليه لخبار ضضريها مزال ماكملاتش عندو سيمانة غادي يتفاهم معاه مزياان وهي مدارت والو هي مضلومة .انا غنعيط دابا لبابا باش الى كان غيجي يجي فالضوء ماحد مزال مطاح الضلام
- حيت ماخصكش تبقاي فالدار بوحدك لبزاف ديال الاسباب ... لمرى الى خرجات من دار راجلها كتمشي عند عاءلتها .. حتى تفك الجرة وديك الساعة تمشي فين بغات اما ماحدها على الدمة ديالو ماخصهاش تبقا بوحدها
قدس: وعلاش زعما ؟ راه داري !
كريم: واخا دارك ا قدس .. المشكل كيزيد يكبر كتر ويقدر الى كان غيوقع الصلح يقدر الراجل كيبدا يتنوا .. الشيطان اقدس .. راه كيبقا يتخيل شي حوايج فشكل .. وسمحيلي على هاد الهضرة ... كيبقا يقدل ليه راسو ساكنة بوحدها .. راه كتخرج بالليل .. ولا راه مانعرف شنو كدير ... ويقدر يبانو شياطين فالسيفة دبنادم اللي يزيدو يشعل العافية بيناتكم ويبنيو ليك شي فخ مثلا... التقة تقدر تغيب ... ماشي بحال راكي فدار باك وراجلك عارفك تما يعني تحت مسؤوليتو .. هي راكي فالدار الحرية التامة معارفك شنو كديري. بزاف ديال لحوايج بزااف هادشي راه كيدوز قدام عيني ..شحال دالشكاوي كيوصلو بحال هادشي وكاين اللي كيقلب القضية للمرة واخا يكون عندها الحق ويقول راه خرجات من الدار وسكنات بوحدها و واليديها حيين وكتخوني وكدخل ودير وتفعل المهم بزاف ديتل التخربيق
سكتهم ماخلا ليهم فين يزيدو ومشا بيهم للدار عند وليداتو اللي خلا بوحدهم على بديمن يوصل باها ويعرف مايدير معاه . اما لاللة عيشة جالسة فالدار وعيطات لبناتها كاملين قالتهم ليهم و ولادها ..واغلبية دولادها خدامين فكازا ومنهم جوج رجال .. صلاح ولدها لكبير و ولدها المتوسط "ربيع" وهاد ربيع حالة خاصة بعيد على خوتو وعلامو بوحدو ... اخر كيتسوق للمشاكل .. مضروب على القرعة وكلشي عارفو وحتى مرتو من الستيل ديالو وجات معاه .. غليضة من نوع باطرونات .. المؤخرة والصدر والدوق ديالها ديال منمر واخا كتماشا مع الموضة لاكن شي مرات كتخرج على السطر وتعورها ، هي بنت الوقت لاكن الدوق ديالها يستحيل ينطابق مع دوق قدس . جالسة فوق الفوطوي حدا لاللة عيشة لابسة جلابة ديال الراندة فلغوز فوشيا ومعاها بحالها تماما فالدوق والفورمة ومكيعجبهمش العجب .. حجبانهم خفاف ودايرين ليهم الطاطواج ماهوا خضر ماهوا كري والصباعة دهبية فليدين ولبلاغي وجلالب مزيرين .. مرت ربيع جامعة شعرها لاكن ختها طالقاها وملسقا الكلابسات وصابغينو بالكحل والخالات حدا الفم وكيشوفو بعينيهم ويصبرو لاللة عيشة اللي جالسة كتشكي .. اما ربيع ساكت غير جا يدير الصواب لانه ساكن قريب ليهم وجات معاه مرتو وكرت ختو .. وصلاح الوحيد اللي كيهضر مع انصار ويوجهه كلامو لمو
صلاح : دابا خاصنا نعرفو واش هاد البنت غير جات وطيحات الباطل غير هاكاك ولا كفاش؟ .. انا كااانعرفك آ مي مزيان راكي ماشي ساهلة .. الى كنتي ضلمتيها راه ربي فوق منك .. الى مشات حتا شكات بيك لسيدي ربي خافي على راسك .. شنو درتي ليها حتى قالت ليك نتي اللي هزيتيه .. يا اما مشيتي رونتي ليها حوايجها .. ولا بان شي حاجة اخرى حنا معارفينهاش ... باش تخرج من دارها عروسة مزال ماكملات سبعيام راه ماجاتش !
ناض انصار من حداهم هز راسو فالسقف تنهد تنهيدة طويلة ... مشا حيد لبيتو على نية يتوضا يصلي وخلاهم مجمعين ... ناض ربيع مشا للطواليط وناض صلاح نوض مو بغا يستفسر بينها وبينو وخلا نجية مرت ربيع وختها لمياء جالسين شادين يديهم فوق كروشهم المنفوخة واللي كيتمناو فوقش يحيوها ويتهناو كيتجمهو
نجية : شووفي ليك الدار .. شوفي الزهر ماعرفت اش كيديرو حتى كيديو الراجل كامل مكمول ... حنا والو الزهر ملاعبش معانا ... عندنا شي عكس ولا شي تابعة ... عينينا نبخرو عيينا نزورو وا لو
لمياء: وشنو ندير ؟ عييت نسبب ليه والو فاللخر تزوج ... عندي لعكس انا عاارفة راسي وخاصني نحيدو عاد باش نبان ليه ويشوف فيا
خرج انصار من البيت لابس شورط فوق الركبة وتيشورط من بعد ما صلى .. رجليه نقيين وحومر بالنقا كيشعلو حسن من رجلين لمياء اللي دفر طويل دفر مهرس والقشرة الميتة واكلة منهم النص ومغطياهم بالصباغة وغلاض .. على الاقل ختها ناجية رجليها نقيين شوية اما لمياء حتى من يديها باقا فيهم طبقة ليمونية بلحنا دلحمام الليارت ودفارها مدرقاهم بالذهبي .. المكياج والتكحيلة وليباك فالسنان بهتو بيها سنانها ...جلس معاهم أنصار حال رجليه طالع ليه الدم .. زفرات نجية وقالت المزابية وقالت
- لاديرش فراسك راه المشاكل كيوقعو .. الباطل خايب وماشي ساهل .. ولاكن راه درتو لعرس (تنهدات) خاصها طلب منها السماحة وطيح ليها عند رجليها راه بحال ميمتها
شافت نجية مطرطقة واحد العين كتمعني ليها بيها فين غانديها معايا يعطيك اللقوة .
اما انصار ساكت مكيهضرش .. كيشوف قدامو بلا مينطق ولا يشوف جيهتهم . رجع ربيع جلس متكي كيسمع للهضرة .. شوية وهي ترجع لاللة عيشة جلسات هي وصلاح .. ودباو يتناقشو مجموعين
صلاح : شوفي أمي .. انا كنعرفك مزياان ... راه واخا تقولي اللي قلتي مغاديش نتيقك ... ضلماتك اه .. ولاكن ماشي غتجي هاد بنت الناس وطيح عليك الباطل وانا كنقولها ونعاودها ... مغانجي لا من جهتك لا من جهتها ومزاااال غادي نسمعو منها هي ونشوفو شنو كاين .. اما باش نجيو ونحكمو عليها غير هاكاك راه مكايناش .
ساط ربيع وقال بلا مبالات : لبنت دروييييييشا باينة على وجهها وعاءلتها مزياااانين .. غير ملي خلاوكم ديرو مت بفيتو فلعرش ما تشرطو ما والو راه باااينين شبعانين ... وااااقيلا بغيتي ديري عليها لاربيط الاللة عيشة
كمشات نجية شلاقمها وتلفتات عند لمياء لقاتها تاهيا نفس الشيىء وقالت ليها بسخرية وصوت خافت
- ويلي با... عتقوني !
بلا مينطق أنصار ناض وهز معاها كاتي تحت يدو داها للكوزينة يعطيها تاكل وخلا لاللة عيشة غطرطق ولمياء ونجية كيعصرو الحامض تكلم صلاح وقال
- راه دارها هادي دير فيها اللي بغات .. الى هوا قابل على لقطة تبقا عندو ماعند واحد اخر مايقول
لاللة عيشة: اسيدي يتبع ليها البازار ديالها .. واش هي كتغوت عليا علاش نهبط القطة من فوق الفوطوي .. علاش نهضر معاها . انا كنشوف الغلط كنهضر عليه مانبقاش نشوف المنكر ونسكت
تنهد صلاح وقال : نوضي يالاه تمشي فحالك ... ماعندك ماديري هنا
نجية : ال بغات تبقا خليها على راحتها
صلاح: لا غتمشي معاكم اش غتجلس دير هنا فالدار وحتى نتوما غتنوضو ماعندكم ماديرو هنا فدار بنت الناس وهي مكايناش
لاللة عيشة : الدار دولدي هادي
صلاح: غاتنوضي تمشي .. كانت ديال ولدك وداكشي اللي كيدور ليك فراسك غير خرجيه ... مغاديش يكون ولبنت غاترجع لدارها ... والى عزيز عليك أنصار عطيه التيقار ماشي هوا راسو منفوخ ونتي غتبقاي هنا تكملي عليه .. ضلماتك ... طيحات عليك الباطل... غادي نشوفو هاد البنت شنو كتقول فهادشي .. اما باش تجلسي هنا فالدار وتبغي توصليها ليها داكشي اللي عندك فعقلك لا
ربيع: الى بغيتي تمشي معانا يالاه
نوض صلاح الكبير فخوتو اللي الكل كيلتاجأ ليه فشي خصومة حيت عارفينو مكيبغيش الضلم وحقاني .. اما ربيع المرضي دمو كيخليها منها لمرتو مكيدخلش راسو وغالبا سكران ومكتبغيش لاللة عيشة تجلس معاه فالدار .. اما عتمان اللي قبل انصار .. كيخرج فمو طول وعرض عندو كي السخط كي الرضا ومكيعرفش يتفاهم ديما مسبق العيب ومو مقلقة منو .. اما انصار اللخر فالدراري فهوت اللي جلس مع مو مدة اربع سنوات من بعد باه الراس فالراس تحت سقف واحد ومكاتش مو كتبغي تعتب فدار حتى واحد من ولادها ولاقية راحتها مع انصار ودايرة ما بغات مكيهضرش معاها وفين ما تمرض هوا اللي كتلقا حداها وفيت ما تبفي تسافر هوا اللي كيديها وعارفها معولة عليه بوحدو وتقيل تشكي عليه من ولادها .. وحيت كان زوفري فين ما تبغيه تلقاه واجد وفين ما تبغضب تم راجعة للدار كتنكر وتشكي وماتخلي فيهم غير اللي نسات .. اما دابا تزوج ورجع حتى هوا واحد من خوتو اللي استاقلو ولقات لاللة عيشة راسها مقطع بيها الحبل مابقا حتى واحد فيهم مقابلها . . . وبقا كيبان ليها غير انصار وبقات المعاملة ديالها معاه كما كانت من قبل .. تبغي دير ما بغات عندو فالدار و واخا كا يلقا شي حاجة ماشي هي هاديك مكانش كيهضر معاها .. لاكن من بعد ما نغير الوضع حسات براسها كانها بوحدها ومابقا ليها حكام واخا فين ما مشات كتحكم وترجع تقول ماحكمت والو .
مشات تجمع حوايجها في حين بقا صلاح الخمسيني فالعمر جالس كيخمم ويهضر بوحدو وحداه ربيع متكي والخواتات كيتساراو بعينيهم من الطبلة الكلاسيككية للتلفازة الساوية 3 دالملاين للفوطويات للرخام الابيض فالارض للخشب فالسقف ..
صلاح : تمشي معاك حسن ... داك شغل الحسابات ماعندنا مانديرو بيه ... واخا يبغي انصار يقول ليها سيري غتقول كيجري عليها .. الله نقولها ليها انا بعدا ماداري هادي ما مراتي اللي هاربة .... هي بغات تجلس هنا باش توصل لخرى باللي راها فدار ولدها مرتاحة دايرة مابغات ... واش حنا كنسعاو للصلح ولا نبقاو سمم فيا نسممك ... قلة الشغل
ربيع: وا تمشي ها الطريق .. واش انا عمرني جريت عليها ؟ !!! فين مامشات دارها وكووولشي ديالها
قالت نجية بصوت خافت كتحلف : غير بلاتي حتى للدار ونوريك ... شي يرتاح من الصدع وشي يمرض فصحتو
لمياء: غمزاتها ) نا غنوض للطواليط ..
مشات لمياء حادرة راسها وقزيبتها كتهز وتحط موراها ، تلقات مع انصار خارج من لكوزينة كيجر كلاكيطة فرجلو .. قالت بصوتها الغامق وكتخرج الهضرة شوية من نيفها وكتداعي الاداب والدلع والصواب
- عفاك .. انصار فين جات طواليط
شار بصبعو وقال : هاهي
لمياء: ميغسي
مشات كتهز وتحط كي لميزات ودخلات لطواليط سدات عليها .. لقات قدامها لاشاص والمرايا ولخشب mdf تحت من المرايا ابيض فيه المجورة .. قدات حاجتها بالزربة وناضت كتهز شورطها المشبك تحت الجلابة وتحل لمجورة بالزربة وتقلب .. لقات تما غير مواد التنضيف مستفين والبابي جينيك والجفافات ملوين واقفين فواحد السطيلة وعرام ديال برودويات اليدين مستفين فواحد الرف . فقط وفوطة معلقة فالحيط .. حتى حاجة مكدور تما حيت الحمام معزول على المرحاض ومافيهش لاشاص ومكيدخل ليه غير اللي بغا يدوش وماعند بنادم مايدير فيه الى مكانش غيدوش لان الطواليط حتى هي فيها فاسك لغسيل ليدين
خرجات لاللة عيشة هازة صاكها ومرت ولدها وختها هازين معاها وكيعونقوها وبوسو راسها .. خرج كلشي بقا غير انصار واقف عاقد شوكتو حدا خوه صلاح ..
صلاح : سمع ... ان ابغض الحلال عن الله الطلاق ... المشاكل كتوقع و مي راه عارفيينها مزياان ماشي غادي تخفا علينا ... حتى واحد ماحضر لشنو وقع بيناتهم ... عيط لمرتك هضر معاها
أنصار : انا سمعت بودني وشفت بعيني .. هي كتقول لمي فين درتي كارني دشيك ! فاللخر لقيتو بيدي فلافاليز ديال بيسي ديالها ... رجعات مي هي اللي هازاه وهي اللي متلفاه زعما مكاينش اللي غيهز داك الكارني ديالها من غير مي حيت هي اللي معانا فالدار! ونيشان كتقول ليا هي اللي دخلات لهنا! وفاللخر نلقاه خاشياه بيديها فجهة اخرى !!! ماشي الضلم هادا ! .... انا مغاديش نردها .. غلطات تجي طلب من الواليدة السماحة .. مابغاتش خليها تبقا تما ... اون بلوس انا مكنعرفهاش كي دايرة .. كان كيحساب ليا بنت الناس ! صدقات من النهار الاول مخرجة عينيها وبدات بالواليدة هي اللولة وحرقات لينا اعصابنا على حاجة دايراها هي بيديها .. صافي تمشي الله يعرضها السلامة ماتسناش مني ننمشي عندها ومغاديش نردها هي مليون ... بنادم اللي داير بحال هاكا ماعندي ماندير بيه ومّي انا اولا ليا من وحدة بحالها وكاع لاطلب منها شي سماحة تعطينا التيساع
تنهد صلاح وخرج كيردد : لا حولى ولا قوة الا بالله ...
مشا الكل بقا غير أنصار بوحدو بين الحيوط ... تنهد ويالاه بغا يجلس وهوا يصوني ليه تيليفون .. هزو لقا اب قدس كيتاصل بيه ..
فتح الخط : الو السي خليل
السي خليل : بصرامة )ياك لاباس؟ واش من النهار الاول بدينا بالضرب ؟ واش عطيتك الامانة تكرفص عليها ؟
رد انصار بصرامة : هي دارت علاش انا مضلمتهاش
السي خليل: اااش دارت كااع ... اشنو اللي يخليك تهز يدك عليها وضربها ... الى دارت ليك شي حاجة سيفطها لدار باها ... والى غلطات هضر معاها راه كتفهم ... السلام وعليكم التسرفيقة !! سمع نقول ليك جوج كلمات اولدي انصار باش نكون معاك واضح ... مزال يالله بديها ... الى ماكنتيش غادي تهلا ليا فبنتي غير خليها راه باهت قابل عليها
أنصار : بان ليك ديرو .. والى بغات تجي مرحبا ... طلب السماحة من الواليدة اولا
السي خليل : طلب منها نتا السماحة وماشي عيب طلب السماحة من الواليدة ديالك الى كانت هي اللي غالطة .. ولاكن اولدي راني عاارف بنتي ... تقول ليا سلوى ولا حسنا دارو نقول اه يديرو .. ولاكن قدس لا .. قدس ماديرش شي حاجة ومكضلم حتى واحد وبنتي وتربيتي كنعرفها مزياان .. وانا كنقول ليك راه ماضلمش الواليدة ديالك... راجع حساباتك مزياان ... الى كنتي غتبقا كل مرة تهز يدك عليها فكل مرة غلطات اسيدي غيييير خليها راه ما واقفاش عليك
انصار: وانا مابززش عليها ترجع وما بززتش عليها الزواج و ما ضلمتهاش فين ما لقات راحتها الله يهنيها .
السي خليل : اسيدي ما قلتي عيب ... العربون بان ... الله يهنيك
قطع السي خليل تيليفون وطلع للعمارة من بعد ما عاودات ليه قدس كولشي وبكات عليه وشاف الدقة فحنكها ، دخل للدار طالع ليه الدم لقا بنتو وراجلها ومرتو ام قدس جالسين كيناقشو الموضوع وقدس بيناتهم شادة تيلي كتهضر وتشهق بالبكا مع اخت انصار ضحى اللي مصدومة من الموضع
قدس: انا فعلا غلطت اه .. مي الغلط جاي من ماماك حيت مللي جات وهي عاسة عليا ودخلات لبيت النعاس ديالي وحلات الماريو وجبدات حوايج انصار كاملين و الوراق ديالي كانو تما .. فاش هضرت معاها قلت ليها لحوايج مطويين انا طويتهم قالت ليا بيت ولدي .. ماقللتش عليها الادب انا ... هي قصحات معايا ومكنتش اصلا كنجاوبها .. فالاخير قالت ليا نعس فين بغيت والى لغيت نعس فهاد البيت نعس .. خرج اختي خليتها دير فيه اللي بغات وماعرفتهاش كاع شنو كدير ومشيت فرشت راسي فبيت اخر ودخلت البيت باش نجمع الاوراق ديالي خفت تلف ليا شي حاجة ... كترات عليا ماماك الضغط بزاااف من الساعة اللي جات فيها ... حتى نسيت فين حطيت كارني دشيك ديالي وقلت ليها فين هوا راه درتو هنا حساب ليا تكون طيحاتو ولا ماشافتوش .. غير سولتها بقات تغوت ... راه هي اللي كانت عند لماريو حدا وراقي حتى دخلات ليا الشك وقلت تلفاتو حيت مامعانا حتى واحد فالدار .. انا غلطت مي الغلط جاي من ماماك و انصار فاش لقا الكارني تعصب عليا و انا مزال حتى مشرحت ليه .. ضربني وخفت يعطيني شي دقة وهربت بحالي . انا كنعتاارف .. غلطت اااه .. مي الغلط من ماماك حيت هي اللي قلبات الماريو من ساسو لراسو ... ماعرفتش علاش عاملاتني بديك الطريقة وانا مادرت فيها حتى كؤام ديالي العيب
تنهدات ضحى وقالت : شوفي .. حنا ماما عاارفينها مزيااان وكن ماكنتش كنعرفها مغاديش نعيط ليك ... وهاد الهضرة والله حتى توصل لأنصار .. كن عرف دارت هادشي مغاديش يبغي ... الغلط وقع مي حنا مابغيناش نخسروك ا قدس .. سيلتوبلي حاولي تبردي اعصابك وماديريش شي حاجة تندمي عليها عافاك احبيبة ... عنداكي ديري شي حاجة وتكبري لموضوع
قدس: انا نقول ليك اللي كاين اضحى .. مغاديش نرجع صافي ونتي مادرتي ليا حتى حاجة وانا مغاديش نرجع
بعدا ... الله يعطيك الستر ماتسرعيش وماما انا غنهضر معاها وغادي نشرح لكولشي شنو وقع ... رتاحي شوية وصافي
لميااء : اييه يا لحبيبة مكتفهمش... تشوف لحنة والشمع واللون موف وانا جالسة نقش والطبق فيه اللعوب وماتفهمش! مالي عندي العرس باش متعيقش! لالا اختي شوفي كي ديري .. مابغيتش تحرم ليا الليلة خاصرا فيها زبالة ديال لفلوس ويوقع ليا كما وقع ليك عند عيشة ودخل الزمر دراجلك سكران قلب لينا الطبلة وخرجات فيك .. لاالا اختي
باتت لمياء وختها كيتجمعو .. من زمان ونجية كضرب على ختها باش تزوجها لأنصار ونهار خطبات ليه مو بغاو يطرطقو وشعلات فيهم العافية ورجعو بحال الحنش مقطع ليه الراس .. ماخلاو حتى طريقة ما داروها لاكن تزوج ومع ذلك ماتسرطاش ليهم ومزال ماسلمو وحطو السلاح ... لمياء سبق ليها كانت مزوجة وطلقات .. ومن مور طلاقها مشات لتركية ضبر على راسها .. ماعطاتهاش تركية وضبرات على مشية للامارات ومشات جلسات تما عام كضبر على راسها .. زنزن ليها الشيطان ورجعات للمغرب وصدقات لا تركية لا امارات وشكون اللي غيديها لامارات تاني مرة .. كيتها بقات ليها فلحق و مها مابغاتش تهز ليها هبالها .. شافت نجية ضاربة الدنيا بركلة وراجلها سكايري عزيز عليه النشاط ومامسوقش وهي تهز حوايجها وجات سكنات معاها .. ضبرات على خدمة سونطر كبير كلاص خاص بالمساج والحمامات المغربية وجلسات فيه .. منها مساج وحمام للرجال ومنها ضبر على راسها وتجمع نوامر .. دفعات فشقة اقتصادية لاكن مزال مسالاو البني وجالسة كتبريكولي وفنفس الوقت محنها انصار اللي خرج ليها عقلها بغاتو للزواج وهوا حرام واش شي مرة عطاها وجه حتى بالضحك .. الفقصة فيها طلع وتهبط وختها متبغاتش ضيعو وتديه وحدا اخرى وتجمعو بجوج بيهم و وصلو حتى لعندهم وتحدات ليهم لفهامة .. ماخلاو شوافات ولا سبوب ومزال ماجا فالشبكة من نهار تزوجات نجية ربيع هادي 5 سنين وهما كيدورو بانصار
صبح الحال وصبحات لاللة عيشة فايقة كتنكر .. اما لمياء شدات الطريق لخدمتها ونجية مزالة فبيتها ناعسة . . . دارها كبيرة ومفرشة بحال اي دار مغربية لاكن من غير نضام ... دقات عليها لاللة عيشة كتنكر فيقاتها وقالت
- ايوا مغنفطروش ؟ راه وقت لغدا هادا
حلات نجية الباب مقلوبة بالنعاس مقزبة وبزز منها دير ليها الخاطر ولا تخرج ليها فعودها حيت وتحرر فيها العيشة هادشي بلا الحب اللي بغات تكسبو باش لاللة عيشة تزوج ولدها لختها لمياء . بدات نجية تساوي وتراري ودير لخاطر ومخليا باب بيتها محلول ومولفة لاللة عيشة دخل ليه .. اما ربيع واخا جا سكران صبح ساحي يمشي للخدمة وتلاي شافو فداك الصباح لابس وخارج يحلف هادا عمرو شاف الشراب كي داير .
بدات نجية تجمع الدار وتسمع هضرة لاللة عيشة اللي غير كتسوط ... دوك لحوايج يبقا تما خانزين؟ دوك الماعن ميتغسلوش ؟ ... داك الضوء ماطفيهش؟ ماشي من جيبك كيخرجو داكشي علاش مكتحسيش بيهم .
نجية غير كتنفخ وتقلب فهينيها بنفاد الصبر ... طارت حتى عيات وجات حتى لعند لاللة عيشة وتحدو ليها ... متقدرش ترد عليها الهضرة وألا غادي تسيفطها لدار مها هي و لادها وتزوج ولدها لوحدا اخرى .. وحيت ولدها نيت ماكرهش يزيد التانية ومو ماباغياش داكشي علاش نجية محكومة من طرف لاللة عيشة حيت الورقة الرابحة عند هاد الاخيرة . اما لو مكانش هادشي كامل .. كانت مجية تخرجهم من عين لبرا حيت بخبيزتها وماسويهلاش وشيطانها خايب وتقدر تهرس الدار كاملة على راس الاللة عيشة وترجع هي تبورد غليها كيف بغات .. لاكن فين غادي تمشي الى خرجات من دارها المفرشة والممرحة ... مكاينش ماحسن با غتمشي الأسوء .. لعند مها اللي غادي تنكد عليها عيشتها ... شهموها وهي تجري عليهم خلاتهم يضبرو راسهم . شكون غيقبل عليها بولادها .. من بعد ما كانت عايشة كيف بغات فدارها ترجع هي اللي تخدم ودمر . لالا مافيها اللي يدوز الحرب اللهم هبال لاللة عيشة اللي غادي دوز فترة وتمشي ولا تخرج على راسها وتندم من بعد .
رجعات لمياء فلعيشة مع 4 كتجري هازة قشها اللي غتحتاج ودخلات للدار لابسة دجين مطرطق وهي غليضة عندها فورمة ديال الباطرونات ... بدات توجد وطير وتنزل ونجية كتعيط من بيت النعاس .. طار لكاس من يد لمياء جا فالارض تهرس وهي تعصب
- لمياء ولا خرااا ..... سيري ت...
خرجات لاللة عيشة من الطواليط نيشان لاكوزينة مخرجةة عينيها
مشات لاللة عيشة طالع ليهم الدم ومن موراها جمعات لمياء الضحكة كيتخيخ وتفتف
لاللة عيشة : عشرة دالنسا والكربة يابسة ... بعدا بعدا هاديك كانت ضارها نقية .. دفلي فصدرك ومادفليش فدارها ... الله ينعلها قاعدة فيكم
خرجات نجية بالجلابة كتسوط وبقات تساوي معاخا باش تخرجها وتخلي لمياء تقضي عراضها حتى خرجاتها من الدار
تفرغات لمياء للدار بوحدها وضرباتعا بواحد التدويشة فاعلة تاركة واخا نسات كدام رجليها العاصين ماحكاتهم ودفارها مانجراتهمش لاكن مايهمش المهم صبغاتهم بالموف غطات لعيب واخا داك العيب فأصلو مكيبانش ليها كيبان للي مولف يشوف كولشي مقاد اما هي مولفة تشوف رجليها هاكاك حتى رجعو عندها عادي ومابقاتش كتعطيهم اهمية اكثر وخلات الاهمية للشعر اللي حمقات لكوافورة باش تجبدو ليها حتى طيحات ليها حتافها ومن فوق هادشي كتزعف ويطير ليها بالزربة وتعصب غير بوحدها بلا مدفع .. بلكشايف باش تقادات لثها ديك القصة اللي كتبغي مفروقة فالوسط وملوية واخا عمرها عجبها لعجب واللي دازت من حداها تبقا تميق فيها كأن الناس كاملة عوجة الا هي اللي مقادة ومافيها مايتعاب . كتكره اللي بقا يشوف فيها وهي كتحيد الغبادية وتبقا بالشورط وديباردور فالصابون والخير مدفق كيجلب الانضار .. كتكره اللي يبقا متبع ليها العين وهي حركاتها وتمياقها بداك الطاطواج اللي دايرة لحجبانها وديك الفورمة الناعسة اللي دارت ليهم كيلفت الانتباه .. الحاصول كتكره اللي يبقا حاضبها وهي فالاصل اللي كتجيب الحضية لراسها بدوك التصرفات اللي كدير والنفخة الزايدة وتأفاف على والو كأن الغيب ماشي منها من الناس كاملين ، خرجات ملسقة لكلابسات فالكحل ومشات طير للدار وجدات الطبلة .. اشمنك يا حليب يا خبز الشعير يا شمع يا حنة يا ورد يا مازهر يا شلا قوام و شلا ماحطات وطبق ديال الفاكية ولحلاوي والمكياج والروايح وزيد وزيد باش دير للحاجة ماليكة صوابها كما قالت لصحاباتها وعضراتهم وجاو حتى هما كيجريو مع النقاشة وبدات لقراجة فالدار كأنها لحنة دلعروسة ، سدو السراجم والباب وجلسو هما والدقايقة هاك بالاك ولمياء كتنقش لابسة الموف وتماكيجة وعكار موف وبارزة بحال لعروسة لعشية كاملة في حين جالسة نجية كدور بلاللة عيشة ومعاها ولادها فالمدينة وتقيس ليها لييجامات.. هادي زوينة هادي خايبة .. هادي جاتك هادي ماجاتكش وكيتساراو وختموها بجلسة فالجردة كيتجمعو على الماضي والحاضر والمستقبل .
سالات العشية عند لمياء وسالات الحنة وخرجو الدقايقية وتوادعات مع صحاباتها وخرجو ضاحكين ناشطين ولاكن ولابد من الهضرة .. فاتو لباب وهي تقول وحدة لصاحبتها
- دابا انا اللي مابغاش يتفهم ليا واش هي مسكونة ؟
تنهدات لخرا وقالت : ماعرفتش اختي هي وختها ديما كيديرو العشيات بحال هاكا . . . ولابد ما يكون فيهم شي عجب حيت كيديرة العشية
- ايوا علاش كيديروها؟
- كاين اللي كيوقف عليه شي بسم الله رحمان الريحيم فالنعاس كيقول ليه دير ليا ودير ليا .. والى مشا حتى دار وجبد عليه النحل غيبقا داكشي كل ليلة يوقف عليه ويقول ليه دير ليا وكاين اللي ماكيوقف عليه والو كيبغي يدير لقبول ولمياء انا حضرت ليها شحال هادي قالت ليها وحدة الى بغيتي يكون عندك لقبول وكلشي يايسر ليك ديري لعشية لبسم الله رحمان الرحيم كيقولو ليها مليكة وهاد مليكة اللي كاينة فلمياء كتبغي الزهو والنشاط ولحيوح وكولشي عندها داكشي مخلط
- وباش عرفات هي عندها هاديك بالضبط
- اختي مشات كتسول وتقلب باش تعرف عند الفقهة وهما اللي قالو ليها ها شنو عندك وها لمن غاديري باش يتقضا ليك الغرض وداكشي اللي دارت .. دارت ليها العشية بحال الى كتعيط ليها وترحب بيها وهما الى درتي ليهم شنو كيبغيو راه كيجيو بلخصوص الى تهليتي فيهم كيتهلاو فيك .. داكشي اللي دارت لمياء .. وجدات وحطات وقادات كولشي ومن ديك الساعة لدابا وهي كدير لعشيات وختها حتى هي
- ايوا كيتقضا ليهم داكشي اللي كيبغيو
- شوفي .. انا عارفاك علاش كتقلبي .. نصيحة نعطيها ليك عن تجربة .. بعدي من داكشي ماتبقايش تسولي فيه وعنداك تجبديه عليك.. راه تجيهم وديري ليهم شنو بغاو ويلقاو عندك داكشي اللي كيبغيو واخا نتي قصدتي وحدة فيهم مثلا ودرتي ليها شنو بغات ... غادي يوليو يدورو بيك كااملين ويوقفو عليك حيت ديك العشية اللي كيديرو راه مكيكونش فيها غير الانس كيكون فيها حتى بسم الله رحمان الرحيم .. وداك بسم الله رحمان الرحيم كيعرض حتى هوا علامن ما بغا وكيحضرو وفاش كيشوفوك تهليتي فهاديك اللي قاصدة نتي كيبغيو يلسقوك وكل ليلة توقف عليك وحدة وتبقا طلب منك وتبقاي تحلمي شي احلام مخربقة والى مشيتي فداك العالم .. مشيتي فيها .. راه مرة يطلبو ليك عشية مرة دجاجة مرة دبيحة مرة حولي مرة بقرة مرة تور .. وهانتي ديك الساعة وليتي تشركي بالله حيت الضحية غير لله عز وجل فقط كنضحيو لله صافي ماشي لشي واحد اخر.. كذب الساحر ولو صدق ... واخا يقول ليك داكشي بصح قوليه لا كدوب واخا يكون بصح ... الغيب كيعلم بيه الله عز وجل فقط ... والى مشيتي حتى رجعتي درتي عقلك شي نهار ومابقبتي ديري عشيات ما والو غادي تولي حالتك حالة ويعكسو ليك وينرضوك ويخرجو ليك على حياتك .. ها ودني منك .. الى كنتي باغا تبقاي طوووول حياتك كديري ليهم فلعشيات وتسناي المقابل منهم ضبري راسك .. راه من لفاكية تولي دبحي فالتور وتمشي بيه لمواسم وتبقاي دالعة من زاوية لزاوية كل مرة يطلبو من زيارة لشي قرينة اللي مكايناش فلخريطة دالمغرب .
- ولمياء كيعطيوها شنو بغات ؟
- مانعرف مالها غتجي تقولها لينا ... راه واخا هاكاك مريضة لا هي لا ختها بهادشي... الى ماصدقاتش ليهم شي حاجة كيقول العكس ..اه حقا يمكن مادرناش العشية باش تيسر الامور .. اه حقا التابعة .. اه حقا هادي... كيتربطو بداك التخربيق حيت عارفين الى مادروش داكشي مغاديش يتحيد العكس واخا يكون داك العكس غير صدفة وصافي وشي حاجة طبيعية مثلا ماصدقش شي زواج و كان مكتاب .. مكيقولوش اه حقا مكتاب! واخا هوا مكتاب.. كيقولو عكس حيت مادرنا مافعلنا ماتركنا .. كلشي هما عندهم عكس... وشوفي لمياء واخا عندها حقها من الزين ماشي خايبة.. ولاكن سبخان الله داك النور ديال الوجه ولقبول مكاينش .. ومادرات حتى حاجة فحياتها هاهي تابعة التخربيق نسات باللي الله اللي خلقها وخلق هادوك نيت بسم الله رحمان الرحيم اللي تابعة يرزقوها ويعطيوها ويسرو امورها هوا الرزاق .. ربي اللي كيرزق وطلبي الله مغاتخيبيش وهوا اللي كيسر الامور بدون حساب بلا مقابل.. صلاتك وادعية صااافي اش داك نتي ولا هي تسعاو واحد اخر استغفر الله العضيم ... انا نصحتك .. بغيتي تمشي فديك الطريق سيري واخرتها حياتك عداب معاهم وغتولب حالتك حالة حيت غتبعدي على طريق الله بزاف وفعوض ما تولي تحلميهم غيولي يجلسو حداك ويهصرو معاك نيشان .. مع المدة داكشي كيكبر كتولي وحدة منهم اااجا ماردك ديك الساعة .. تبقاي لا دنيا لا خرة تلقاي راسك فيك هادي وهادا وهادو .. السماوي وصحاب لواظ ورجال الغابة وكل مرة كفاش تولي بحال شي مسطية كل واحد اش بغا يدير منك مانبقاينش نني هي نتي .. مرة هانتي مزوقة كي الطعريجة .. مرة حالتك حالة كي لبوهالا .. مرا شعالة العوافي بين الناس ودارك مرونة عمرها تجمع وتجيك ليك لاللة مولاتي مولات لكارو والشراب والرجال وتولي تمشي فابور ونتي عاجبك داكشي
رجعات نجية من بعد ما عيطات لمياء لقاتها جمعات وطوات عاد دخلو للدار.. جلسات لاللة عيشة فوق السداري سخفانة مسرحة رجليها كتعيط على الماء.. عرات راسها وبدات تنش عليها بالفولار .. ناضت نجية دخلات للكوزينة لقات لمياء كتغسل لماعن والحنا حمرا قاصحة فيديها .
نجية : صافي ساليتو ؟
لمياء : سالينا ... كانعطلناش
كمشات نجية شلاقمها وقالت : طفت بيها كراج علال من راسو لساسو قلت نشري ليها بيجامة ساعة قالت ليك بغات هي بيييجامة ديال 300 درهم ... انا كنوريها بيجامات 150 130 وهي تقول ليا هادشي سواقي مكنلبسوووش.. ايييه لفيسية بغات ليك بيجامة سانك ايطوال
لمياء: وشريتيها ليها؟
نجية : طيرات مني 350 درهم فواحد سورفيت سروال ولفوقية ديالها حد الركبة بلكول مالبستها حتى انا ... شويرفة بغات ليك سبور زيدي ينعل ز **ر مك اري 350 درهم .. نخوي ليك الدار ونزيد نحط 350 درهم حيدتها من فلوس لقرعة باش نكمل السرتلة ديالي
صبح الحال وصبحات لمياء كتوجد وتقدا وطير وتنزل بوحدها بلحناني الصحراوية ونجية جالسة حدا لاللة عيشة كتقلب منين دخلها ودوز ليها من هنا ومن لهيه حتى جبدات ليها الهضرة وبقات عليها بحلاوتنا وخلاتها تعيط وتشكي على ولدها وتجيبو للعشا .
داكشي اللي كان .. فرحات لمياء وتزادو فيها 12 لخيل وبدات توجد .. اشمنك يا شلايض ودجاج محمر بالدغميرة وغسلات شعرها من جديد وضرباتها بجرية هي ولكلابسات للصالون هبطات للكوافورة كتافها وفقصاتها وديك للقصة ديال نجوم هوليود مابغات تصدق ليها فشعرها كما بغاتها واخا لواتها ليها حتى طابو صبعانها . طلقات رجليها صبغاتهم بلحمر ودازت لليدين وبقات تفهم على لكوافورة
لمياء: ديري ليا صبع مذهب وصبع زرق
لكوافورة : مابقاش داك الستيل قدام
لمياء: سيري سيري.. انا راه خدامة فلمعااااريف وكيجيو عندنا يديرو بحال الشكالات تسحابيني جايا مور الشمش راه بنت الدومين انا ابنتي وزايدون اختي ماشغلكش انا بغيتو ... انا غنلبس واحد بيجامة منمرة غيجيني فيها الديكور غير ديريه
سكتات لكوافورة ودارت ليها صبع حمر وصبع زرق وماتهنات حتى تفكات منها وسيفطاتها بسوالفها المركبين للدار فجلابة دايزة عليها ستين عام .
وصلات وبدات تسطر بالقهوي فوق الحجبان وتجبد بريسيل وتماكي وتقاد ولبسات بيجامة سروال وتيشورط مزيرين ديال النمر . قادات الحالة وزيزات .. غير هي الحالة درجات وكل واحد والدوق ديالو وهي هادا دوقها وهادا ماكتبغي . زادت واحد الانسومبل ديال الذهب رقيق دارتو وبدات تمشي وتجي فالدار وتقاد وتوجد كتسنا .
لمياء: بصااح ! ماعزيزاش عليك الحنة ؟ راه خارجة من الجنة زعما
انصار: لا عادي غير بالصحة
سكت مازادش هضر واخا عياو يهضرو ويجبدو ليه مواضيه باش يتشارك معاهم الكلام لاكن والو وباين عليه ماشي حتى لهيه وماعندوش لخاطر ... ماجبدوش ليه موضوع مرتو وحتى هوا ماجبدوش ودوز معاهم سويعة ديال المكانة وناض ماداق فيها حتى حاجة من غير الحلوى .
دازت ايام والحال على ما هوا عليه .. مشات قدس لألمانيا مع فريق العمل ديالها دوز لفوغماسيو ديالها ورجعات من بعد تعرضات ليها ختها فلمطار وداتها للدار نيشان حطات باليزاتها فدارها وجلسات كترتاح من السفر .. هضرة تجيب هضرة حتى سولاتها امها وقالت
- أنصار ماعيطش ليك ؟
تبدل وجهه قدس وقالت بأسى : لا ... صافي مللي مسولش فيا اشنو درت ولا عيط صافي حتى انا مغنبقاش نتسناه ... تسنيتو 15 ليوم ماسولش فيا بحال الى مكايناش .. غادي نهضر مع بابا ونشوفو شي حل مغنبقاش انا هاكا
الام: ماباغاش طلق انا عارفاها ... كتبغيه المشكلة وكتسنا يعيط ليها ولا يدير شي حاجة
حسنا: هوا مابغا يدير والو واش تبقا هاكا كتسناه !
الام : راه غاادي ترفع عليه دعوى .. وغادي طلق منو .. وغادي دير لعز راسها .. راني كنعرفها .. ولاكن راه غادي تمرض .. وغادي تمحن ... وماباغاش طلق وبزز منها غادي طلق راسها منو براسها مرفوع وتخلص بريتها وتخرج فيه عينيها ولاكن هنا بيناتنا راه عارفين لحقيقة .. غادي تجي وطيح بشي مرضة وانا خايفة عليها ... 15 ليوم هادي ماسولش ... مابغيناش نسولو حنا كنتسناو هوا زعما يدير شي حل
تنهدات حسنا وقالت : انا قالي بابا ندخل سوق راسي .. هاني غندخل سوق راسي مندخلش حيت هضرتي قاصحة ومكيبغيها حتى واحد .
حارو فالمشكلة ديال قدس ... شنو الخل وشنو غادي دير ؟ هاهما صابرين حتى يدير الله تاويل ديال الخير... فرقات عليهم الكادوات اللي جابت وجبدات حوايجها رجعاتهم كي كانو ورتاحت من لعيا والسفر .. دوزات الويكاند غير فالدار ماخرجات لحتا بلاصة حتى لنهار لحد باللي ومشات لصالونها مدوشة صايبات شعرها دفيراتها وحالتها كتجهز راسها للغد ليه اللي غتصبح خدامة ، حددات حوايجها دلخدمة اللي جابت من المانيا مطوين اغلبية سراول توب وقميجات باش كتمشي لاخدمة وبدات توجد لبداية اسبوع جديد .
صبحات الصباح بحال عادتها فطرات ودارت مكياج خفيف ناعم .. طلقات شعرها الاسود بوكلي وهزات صاكها فيدها والشانطة ديال البيسي وخرجات حلات باب سيارتها الحمراء من نوع " اوبيل" ومشات مباشرة للخدمة . وقفات السيارة بين السيارات ونزلات رجلها فيها سباط اسود متلت من لقدام " لبوتين" وليبا موس كحلة .. خرجات وقفات كاملة لابسة سروال توب رمادي مخطط بالاسود " جاكار" قصير شوية ومامزيرش من لتحت بزاف السمطة طالعة حتى للسرة ولقميجة كحلة سامبل بالصديفات مخيشة فالسروال .. جميلة .. انيقة .. راءحة غربية جدابة .. جسم متناسق ومشية راقية .. يالاه وصلات للباب بغات تدخل فيديها الصاك وهي تلفت بالزربة رجعات نسات الشانطة ديال البيسي .. مع الدورة راجعة انتبهات لسيارة رونج سوداء دازت وتخطف قلبها بسرعة . . . مالحقاتش تشوف شكون فيها حيت مع الدورة كانت السيارة فاتت وعطات بضهرها ... بقات متبعة ليها لعين واللي زاد من شكها انها باقا دوبلفي ... يكون هوا ؟ وشنو كيدير هنا مع 9 ديال الصباح ! شنو اللي جابو من كازا للرباط ؟ لالا موحال يمكن بقوة تفكير ديالها فيه ولا كييبان ليها فكل بلاصة ... مالو غير هوا اللي عندو رانج دوبلفي ! .
لالة عيشة الجزء الرابع
محتوى القصة
التنقل بين الأجزاء