عشق النوارس الجزء الثاني

طوول الطريق ..ماتكلم حتى واحد منهوم مع الاخر..كل واحد كايتسنى من الاخر يهضر..كل واحد كايتسنى الاخر يطلب السمااحة..كل واحد كايدافع على موقفوو..وكل واحد كايبان ليه الاخر هو الغالط..نسااو باللي الحب تناازل..وباللي مني يكون واحد معصب خااص الاخر يكون مهدن...هاد التوازن اللي كايخلي العلاقة زوينة...وللأسف أشقر وفاطمة الزهراء ماداروش هاد التوازن ..وسمعوو من بعضهوم كلام جاارح..كلام ماخارجش من قلوبهووم بجوج..كلام جاا فلحظة غضب ..

وقفاات الطونوبيل قدام الدار د فاتي..هبط أشقر من الطونوبيل وهو مخنزر..جبد ليها الفاليز ديالهاا ورجع گلس بلاصتوو..وكايتسناها تهبط فحالها..بقات غيكااتشووف فيه ..للحظة كاانت غاتقوليه سمحلي ..ولكن تفكراات باللي هو مزوج...حتى لو تصالحوو ..باشمن صفة غاتكون فحياتو..عشييقتو ههه مستحيل...خرجات من الطونوبيل وهي حانية راسهاا سداات الباب وبقات واقفة وعاطيااه بالظهر ..كاتسنااه يقوليهاا ماتمشيش ..

-فاتي :غانحسب حتى ل 3 الى ماشدنيش..مابقاش امل فعلاقتنا..1..2..3..(لارد...تمشات جوج خطواات حتى كاتحس بشي حاجة شادة ليها فحوايجها..دغياا بانت على وجهاا ابتساامة كبيرة....)...بهمس..هو اه هو ماغايتخلااش علياا..(دارت وياريتهااا ماداارت كان الكاب اللي لاابساا مشدوود مع الطونووبيل..شاافت فاشقر اللي لقاتو كايشوف فيها ببرود...وعلى وجهوو ابتسامة كايحااول يخفيهاا..أكيد عارف تفكيرها)...حلات البااب حيداات حواايجهاا وعااوداات سداتوو..من بعدهاا مباشرة انطلق بسرعة وبلاا مايشوف فجهتهاا..بقااات وااقفة كاتشووف فالفرااغ..والدمووع بدااو كاينزلوو من عينيهاا بغزاارة...كاتبغيه...كاتموووت عليه..ماتقدرش تعيش بلاا بيه..من ديماا كان هو بطلهاا ..من ديماا وهو حاارسهاا من كل خطر

-فاتي:هه لاا نتاا غاترجع عندي وغااطلب السمااح ...ملااكي الحارس ماايقدرش يعييش بلا بياا(كاتمسح دمووعهاا بكم حوايجهاا..حتى عمراتهووم بالماكياج ..وجهاا ولا لوحة فنية)ااه ماغايخلينيش..

أشقر فسياارتوو..بتخنزيرتوو المعهوودة ..غادي بسرعة كبييرة..ومرة مرة كايضرب فالفولوون بعصبية

-كيفاااش قدرتي تقولي هاكاااا كيفاش عطاتك نفسك...اناا شمااتة(بشر)اواا دابااا شوفي فعااايل الشماايت...نتي اللي بغيتي ابب هه(بضحكة كلها شر)...

اليووم ريم دوزات نص نهار اللول فالكلية من بعد ماداها مروان..وكيف العاادة مافطرااتش ..شداااتهاا الدوخة وقررات ترجع للداار ..مابغاتش تبرزط مروان..شدات طاكسي ..وحطهاا حدا الباب وهي الريح كاايديها ..عاد كانت غاتدخل مع البااب..حتى جا اشقر مكسيري كان غايدخل فيهاا..هي بالخلعة والسخفة طاحت فالارض وبقاات شادا فراسها

-اشقر:سلاام

-ريم:(مادا ليه يديها)نوضني قببل ماانبدا ندعي(لاااا ماتدعيش عطييك الستر باقي باغيين قصصنا 😂)

نوضهاا اشقر بيد وحدة..يالااه كان غايدوي معاهاا وهي تمشي مخليااه بلااكة..

مشات ريم للكوزينة شربات كاس دالعصير و طرف دالكيكة باش تمشي منها الدوخة ..وهي خارجة اصطدماات معااه..

-ريم:هوووف شوف قداامك

-اشقر:نت اللي دخلتي فيا...كيف داايرة ؟!

-ريم:حسن منك هاد الساعة

-اشقر:ماتوحشتينييش؟!

-ريم:بزااف گااع

-أشقر:بصااح؟!

-ريم:واا علا قبلك العمر شربت قرعة دكووكااا كولاا وقلت احححح..نوض على سلاامتك..حيد من الطريق بغيت نمشي لبيتي

أشقر حيد ليهاا من الطريق بلاا حتى كلمة...مالقاا مايقوليهاا....دار كايشوف فيها طاالعة مع الدروج وشادة فالجنااب ..ومن مشيتهاا بااين فيها التعب....وحتى هو ماكانش اقل منهاا....

هادشي اللي دوز اليوم والبارح من غواات بينو وبين فاتي رجع ليه بصداااع راس ..مشاا شرب كينة دالرااس ودخل لبيتوو ...هز تيليفونوو ودخل للواتساب اللي كان ملياااان ميسااجات دالبناات القلووبة غيكااايتشتتو..

-بففف منين كايجيبوو هادو نمرتي 😕

مشاا ديريكت لكونطااكت اللي مكتوبة فييه My angel ..دخل للصورة ديالهاا يشووفهاا ولقااها دايراا تصويرة سوداء مكتووب عليها بالابيض..""هل قطعنا كل هذه الطريق معاا كي ننتهي غرباء؟""

ضحك لأنوو عاارف الهضرة علييه دخل لكونفيرسااسيون ديالهاا كايقرا فليميسااج الحمقيين ديالهاا ..ونكتهاا البايخين...وحتى طلبااتهاا اللي ماكايساليوش ..و كايشوف تصاورهاا اللي غالبيتهم صور مجنوونة..وتصااور شهيوااتها اللي عمر صدقات ليهاا فيهوم وحدة ..ورغم ذلك كان ديماا كايشكرهووم ليها..طلعاات لييه الفووق بالليي كاتكتب ..وبسرعة خرج من الوااتسااب قبل ماتحصلوو متلبس😂...عاود دخل للواتسااب وكايتسنى لميساج ديالهااا يوصلوو..بقا شحال كايتسنى حتى عيا وطفا تيليفونوو ..

-اشقر:هه وليتي مراهق ا اشقر..نعس حسن لييك نعس ...

غط فنوم عمييق...ومخلي فااتي كاتكتب لييه فميسااج طويييل كاتتخوي فيييه قلبها...وتشبع فيه سباان..ومن بعد ترجع تمسحوو...وتعااود تكتب وااحد اخر مني تفكر معيوورة جديدة فيه...كاتدخل للفاييسبوك والانستاا ديالو وتبقاا تشوف فتصااوروو..وتضحك بلا هواهااا وتبووس الشااشة دهاتفهاا ..حتى كاتفلت مرة مرة جيم وتحيدهاا بسرعة... وتفقص مع البناات اللي كايعلقوو ليه بكلمااات كولهووم حب.....الحاجة اللي كاتبردهاا هي أنه ماكايجااوب حتى وحدة فيهوم...هي برااسهاا كايدير ليها غي جيم ومرة مرة كايرد عليهاا بقليب هه...سيري تنعسي احبيبة سيري..هادا اللي فاقصة رااسك على قبلووو رااه عاد دابا تقلب على جنبوو ليمن وشخيروو هاز الدار كولهاا...اوديي 😑😑

يوم جدييد..وبأحدااث جديدة..

فاقت ريم مخسرة وغيكاتقلب معاامن ...نااضت بعكز وجاارة سرواالهاا اللي كل ماازادت خطوة كايزيد يطيح...شافت راسها فالمرااية وهي تشهق

-ريم:بسملحمنرحييم تف تف ...خلعتيني الله يخليني بالخلاا 😑...كملاات روتينها الصبااحي وخرجاات كيف العادة فأبهى حلة..شكون يقول هي ديك المخلووقة دديك السااعة...هبطاات مع الدرووج وشكارتهاا مجرورة موراهاا..

هاد المرة قررات أنها تفطر معاهوم...شحال قدها تفادى خالها ومرتووو..غادي ضر غي صحتهاا...مشات جرات الكرسي بلا ماتشوف فحتى واحد..نقزاات على الخبز..جراتو لجيهتهاا ..جرات حداهاا الفروماج ..العسل...العصير ...بقاات كاتااكل حتى مالقات باقي فين تزييد

-ريم:اللله الحمد لله....(طلعاات عينيها فيهم)كان كل من خالهاا ..سمية وحتى اشقر كايشوفو فيهاا و فكيفاش كاتاكل...عفواا كيفااش كاتفتاارس

-ريم:صبااح الخير

-سمية:ماشفنا خير من وجهك

-ريم:(سمعااتهاا وتظاهرت بعدم الاستماع...وهي كاترمش فعويناتها بسرعة)قلتي شي حااجة اخاالتوو 

-سمية:قلت ليك بصاحتك الفطور ..تبارك الله منورة احبيبة

-ريم:مانكوونش فحاالك من نااحية النوور ..بولة 90 وخلااص هه

-مصطفى:الله يا بنتي وعلاش حرمتينا من هاد الضحكة هاد الشهورة كولهووم

-أشقر:(باستفهام)علاش فين كانت؟!

-ريم:ساحل العااج😑

-مصطفى:هه كانت معانا فالداار غي ماكانتش كاتفطر معاناا وصافي..حتى جيتي نتااا عاد جات تفطر حتى هي هه

-ريم:ممم هههه يااك اخالو هههه..المهم بصااحتكووم اناا باركة علياا ماكانقدرش ناكل بزااف فالصبااح

-اشقر:لاا كوليني اناا

-ريم: لحم الحلووف حراام 😅(تيليفونها كايصوني)اوووب غانمشي داباا تعطلت

-اشقر:شكون صونا ليك😕...صافي صافي بلا ماتهضري..سيري سيري

-ريم:هوكاك نبغيك..صحة فطووركوم ....

-مرواان:سربي راا تعطلتي

-ريم:(وهي طالعة)هااني..مالناا على الغواات 

-مروان:فطرتي؟!

-ريم:(بملل..قرباات ليه وحلات فمها)بفف هاانتاا شوف

-مرواان:مم اش طراا..(شدها من نيفها)شطورة هه

-ريم:ايي قصحتيني..وازيد سربي راا الوقت...

-مروان:شيفوورك اناا😑

مشااو هاد الجووج ومخليين مورااهوم أشقر اللي داز الفيلم كولوو قداموو..كان فالباالكون دبيتو...وأكيد عقلوو ماجاابش ليه فكرة الفطووور...وانمااا افكاار خرااا...ايه ايه...داكشي اللي كايدوور فعقلك ...تمااامااا 😂

-اشقر:بفف علاش معصب نتا ماالك ومالهااا...ولكن رااا مرتك...شمن مرتك حتى نتا كدبتي كدبة وتيقتيهاااا ...بفف كاتهضر بووحدك هه حماقيتي ا اشقر مافيهاااش..

الوقت كاايدووز سوااء بغيتي او كرهتي...الوقت كايدوز سواء كنتي مقلق او فرحاان...ريم اللي دااز النهاار عندها وااعر خصوصاا انوو معندهاش الحصة دمعااذ..وفرحاانة حيت سمعاات كلااام زوين من اساتذة دياالهاا اللي تنااو على اجتهاادهاا.... باغا تقراا وباغاا توصل بشدة وتححقق ذااتهااا..بااغااا تحقق حلم مامااهاا..باغاا تولي طبيبة مشهوورة ...وتعتق حياااة الناااس...مابغاااتش نااااس اخريين يعيشو نفس معااناة ماماهاا وباباهاا ...مروان غارق وسط المرضى ديالو..وكل واحد كاايعطيه وقتوو...والابتساامة مامفارقااش وجهووو..وكون تعرف شحال من وحدة طااحت فيك بسباب ديك الابتساامة..وبنااات مستقبلهااا معاااك وكااتفكر شنو تسمي ولادهاا معااك..وشنو طيب ليك للفطوور.. كون رااك عاقدهااا😂...أماا سيهووم أشقر مخلوضهاااا...گاالس فالمكتب ديالوو وعقلووو مشوش مع فاتي وحتى مع ريم وقضية زواجهم المزيف ...ضرو راسوو وهو ينعس فالفوتووي دالمكتب...وفااتي اللي مااخرجاتش من بيتهاا وكااتسمع الاغاااني الحزيينة ..وحداهاا علبة دكلينيكس...تبكي وتمسح...مابغات تجااوب لا ماماهاا لا بابااها..مابغاتش تاكل ..كاتفكر باللي حبيبهاا اللي ماشي غي كاتبغيه..لا لا كاتعشقوو..أنوو مزوج..أنوو غايكون عائلة اللي طالماا حلمات بيهاا معااه ..غايبنيهاا مع وحدة اخرى...وحدة اخرى اللي غاتشااركوو بزاااف دالحواايج ...بزااف دالحواايج اللي كانت كاتحسبهووم ملكها هي فقط...غاتشااركووو منزل واحد...غرفة وحدة...فرااش وااحد...كاتحس بقلبهااا مقبووط عليهااا ..كاتحس بالتنفس ديالهااا محبووس...أكسجينهااا هو أشقر...كاتحس براااسهاا غاتمووت مني ماسمعااتش صوتووو لما يقارب يوم كاامل ...صعيب تولف شخص ويعطييك كل ماا كاتمناايه ويعيشك السعااادة ..يطلعك لأعلى المراتب...وفالأخير يطلقك ويخليك طيحي...والصعييبة هي أنوو حتى واحد مايقدرش يطلعك من جدييد ...من غيروو هو...ممكن تلقااي شخص جدييد ..وتبغييه ..وممكن لاا..فااتي كاتشووف رااسهاا والو بدوون أشقر...كاتشوف حياتهاا سوااد فسوااد...علااش؟!..حيت ربطاات حيااتهاا بشخص يمكن يبقى ويمكن يمشي...وماعطااتش لحيااتهاا هدف ...

نااضت فاتي من بلاصتها ورااسهاا عاطيهاا الصداااع..مشات لطواليط وبقاات شحااال كاتشووف فوجهاا ...عينيهاا تنفخوو بالبكاا ..ووجهاا ولا كولو حمر ..حتى من حبووبة ناضت ليهاا حدا فمهاا..غسلاات وجهها وهبطات للكوزينة خدات مكعباات دالثلج وطلعااتهوم لبيتهاا..بقات كادوزهوم على عينيها حتى زاال الانتفاخ شوية ...جبداات ماتلبس...وداارت ماكياج...ولبساات حذاء ذو كعب عالي ...عملا بنصائح مجلات الموضة اللي كايقولو باللي الحذاء العالي ماكايزيدش للأنثى طول فقط وإنماا كايعطيها كاريزماا خاصة وكايبينها أكثر ثقة فنفسهاا...بخلاصة كايبينها أنثى قوية...شافت فالمرآة وهي مطلعة راسهاا للفووق...

-فاتي:غانمشي نشووف مرتوو كيداايرة ..نشوفو باش بدلني واش شي وحدة تستااهل بعداا..ولا تعمااو عينييه...هوووف والى تلااقيت معاااه ..اهئ..ماخصنيش نبكي غانخسر ماكياجي...شش كالمااا كالمااا...أكييد نتي حسن منهااا...انا غانمشي نكدهاا عليهوووم شوية..وزاايدوووون هاديك دار خالتي ماغاديااش عندووو ...اهئ غاايقوول جيت على قبلوو..وشنوو فيهااا كاااع يمشي فحاالو انا مادرتش حتى غلط وماغانطلبش منو السماااحة واصلاا مابقيتش كانبغييه.....لااا كانبغيييه اهئ

دخلاات مامات ريم...ناادية اللي تقريباا فنفس مواصفاات سمية ..وبقااات كاتشووف فبنتهاا

-نادية :الله يااا بنتي الله وليتي كاتهضري بوووحدك !!

-فاتي:مامااا ...اناا غانمشي عند خالتي سمية ونقدر نبات عندهااا ...واخاا ؟!

-نادية:سيري سيري قولي غاداا عند ولدهااا ..واحضي رااسك وبرااكة من ديك الخفة الزاايدة قداام خالتك وراجلهااا

-فاتي :كوني هاانية اماماااا راني زعماا تربية يدييك (الله يعطيناا وجهك) ماكاتيقيش فياا ؟!

-نادية:شوية وصافي ...سيري سيري حتى يجي بابااك يبقى يخاصم عاود تااني

-فاتي:ماححح بسلاامة ماماتي

ركباات فاتي فطااكسي اللي حطااتهاا حداا باب الفيلاا دخالتهاا ..خداات نفس عمييق تقوي بيه رااسهااا...ودقاات البااب

عااارفة راسهاا غاتهبط من قيمتها..وغاتجرجر بكرااامتهاا..ولكن مااا باليد حيلة..بغااتوو بكاااع جواارحهاا...لدرجة عقلهاا مابقااش كايخدم مزياان مني كاتسمع اسموو...اه حتى هو كايبغيهااا..الفرق بينها وبينوو..انه هو كايقدر يتحكم فمشااعرو وأحااسيسو...عكسهاا هي عفوية بطبيعتهاا ..ماكاتقدرش تخبي إحسااسهاا...حتى لو بغااات عينيها كايفضحووهاا...وقبل ماتحل ليهاا الخداامة...سمعاات طونوبيل جااية ووقفات حدا البااب ..ومشات بسرعة تخبعاات مور الشجر... 

-مروان:ريم تسنااي..(هبط من الطونوبيل)انااا غاانمشي لسلااا حيت وصلاات نوبتي فالمشفى عااود تااني...ماغانتعطلش بزااف ومني غانجي غانجيب معايااا واحد الشخص نعرفك عليه اوكي؟!

-ريم:(كاتغبن)اهئ دابااا نتاا غاتمشي..وغاانبقاا بوحدي هناا ...

-مروان:كااين راجلك..

-ريم :مادكروش لياا رحم والدييك هه(عنقاتو)بسلاامة عليييك 

-مروان:(عنقها بدوروو وباس على راسها)بسلااامة..ونتااابهي لقرااايتك...واللي مافهمتيهاش سوليني...وبقاااي تفطري..وعندااك تنوضي الصدااع مع شيوااحد فالكلية..

-ريم:ممم ..صرااحة مااكرهتش نمشي لمديينتي توحشتهاا وتوحشت هند ..كون ماا القرااية كون مشيت معااك

-مروان:من اللخر غاتشدي الارض مااعندك فيين تمشي هه(باسها فحنكها اليمين واليسار)غاانتوحشك 

-ريم:مم حتى اناا واسير فحالك ماكااانحملش هاد اللحظات الدراامية..بااي

بين الاشجاار وااقفة فاتي وكاااتشووف فريم ومروان...ومن هضرتهووم عرفاات باللي ريم مراات اشقر...شاافتهااا وطلعاااتهاا ونزلاااتهاا مزيااان

-مم مابيهااش ااناااا حسن منهاا ...😑

سمعااات فاتي حس ريم جاية يااالااه بغااات تخباااا وهو يتهرس طاالونهااا

-ويلي ويلي ....مشااات الكاااريزماا...مشات الشخصية القوية..اهئ اهئ..

عاااد كاانت غاتخباااا حتى سمعات صوت ريم موراهااا

-ريم:وقفي... شكون نتي ؟!

بقاات وااقفة جاامدة ..كاتعض ففمهاا ...وهي كاتلعن حظهاا ..داارت ببطء وعلى وجها ابتسامة كاتحاول تخبي بيها توترها

-فاتي:هه سلاام

-ريم:السلاام شكون نتي؟!

-فاتي:نتي اللي شكون انا جاية عند خالتي

-ريم:و انا عند خالي ..شنو سميتك؟!

-فاتي:سميتي فاطمة الزهراء ونتي؟!

-ريم:نتي هي فااطمة الزهرااء ..عاود ليا عليك أشقر..أناا ريم..متشرفين حبيبة

-فاتي:ميغسي...قلتي عاود ليك عليا شنو قاال لك ؟!

-ريم:وعلاش كاتسولي؟!

-فااتي:فضوول وصافي..بلا ماتقولي اصلاا غانعرف

-ريم(فنفسهاا ):الله جااب ليا الله معامن نستمتع هه.....إواا احبيبة شنو كنتي كاديري حدا الشجر

-فاتي:(بتوتر)اا كننت كانقلب على الحلقة دودني طاحت ليا

-ريم:هه راهوماا بجوج فودنيك ياكما عندك ثلاثة دالودنين هه

-فاتي:(كاتقيس فودنها)هه مارديتش الباال ..اا يالااه ندخلو

-ريم:يالاااه خالتي الحبيبة غاتفرح مني تشوفك..

حيدات طالون ديالهاا دارتو فيدهاا وبقات كاتمشى حفياانة وريم كاتشوف فيها وشاداها الضحكة ...دخلوو وسلمااات عليهاا سمية ...عاد كانو غايكلسوو احتى دخل عليهوم أشقر وكايتمشى ويتبندر..شاافهااا وتصدم من مجيتهاا...خااف تكوون ريم فرشااتوو..وقالت باللي زواجهم مزيف...دغياا دور عينوو جيهة ريم اللي بدورهاا فهمااتوو ومات ليه بعينيها باللي كولشي هو هادااك...ماحسش براسوو حتى بتااسم ليهاا...هاد الابتساامة اللي خلاات فاتي غاتموووت من الفقصة وماكرهااتش تنوض داباا تنتف ريم...گلس بين ريم وفاتي ...ودور وجهوو جهة فاتي

-اشقر:هووو بنت خالتي مشرفاناا مرحبا بيك 

-ريم:ماكااين لااش راني رحبت بيهاا

-اشقر:(شد يد ريم وباسها)الله يخليك لياا

ريم فهماات باللي اشقر كايحااول يخلي فاتي تغير...كان فودهاا تخسر ليه خططوو..ولكن قالت علااش لاا نلعبوو شوية...

-ريم:(حطات يدهاا على فخد اشقر وضغطات عليه)غاتكوون عييتي من الخدمة..ندير ليك ماسااج

-اشقر:ماكرهتووش صرااحة ..يالااه نطلعووو (شدها من يدهاا وجرها)شوية وحناا جايين..يالااه ابب 

-ريم:صافي طلق مني ..نتا لاش كاتخطط همم

-أشقر:ماكانخطط لوالوو عادي بغيت مرتي تديرلي ميساج فيها شي حاجة

-ريم:ههه مضحك ...دورات وجهاا يمين وشمال حتى كايبان ليها الظل ومن الهيئة ديالو عرفاات أنهاا فاتي..

شاافت فأشقر اللي كان عاد غاينطق بمعنى اسكت..غمزاتوو وحركاات راسهاا جهة الدرووج..فهمهاا بسرعة ..ورجع لتمثيلو من جديد...

شد ريم من خصرها وقربهاا ليه

-ريم:(بهمس)واازمر بلا بسالة

-أشقر:حتى اناا كانبغييك ...(زااد زيرها)بزااف

-ريم:حتى اناا هه(بهمس)واغاتخرج روحي يعطيك المووت..

-أشقر:يالااه أحياتي يالااااه ندخلوو

دخلوو هاد الجووج لبيت أشقر مخليين مورااهوم فاتي بأسوأ حالااتهاا ...كاتبكي وشاادة على فمها باش مايتسمعش صوتهاا ...كاتشووف حب حيااتهاا أو ملاكها الحارس كيف كاتسمييه ...كايمشي من بين عينيهاا...مع وحدة خراا...وكون غير كاانت بنت عاادية غاتعتابرهاا سحاابة عاابرة وماغاتعقدش الأموور...لأنها كاتييق فأشقر كيفما حتى هو كايتيق فيهاا...ولكن لااا هي راهاا مرتوو...الثقة دابااا مابقاتش نافعاهاا فوالو...سمعاات صوت خطواات جايين جهتها..وجرااات بسرعة للطواليت...تكمل مابداتوو من بكااء..

🌻🌻فغرفة اشقر..

-ريم:نتااا شنوو كادير هااا؟!رااك كاتجرح البنت بهاكااا كاتجرهاا...من عينيهاا اللي ماكايحيدووش عليك باينة باللي كاتبغيك... ماتستااهلش حبهاا ليك 

-اشقر:نتي راك ماعارفة والووو سمعتي

-ريم:شنو اللي ماعارفاش ؟!

-اشقر:اناااا كانعااقبهاا بهاد الطريقة...كون بصاح كاتبغيني كيف قلتي كان خصهااا تيق فيااا واخاا يوقع اللي وقع...سمعتي

-ريم:هه تيق قالك..وحتى نتاا كون كنتي بصااح كاتبغيهاا ماكنتيش غاتقدر تستحمل الشوفاات ديالهاا اللي كلهم حزن وألم...انا اللي عااد شفتهاا ولاحظت هادشي ...ونتاا اللي علم الله من ايمتااا وهي معاااك...مالااحظتييش...صرااحة درت غلط اللي تعاونت معااك فهاد اللعبة وهاد التبرهييش ...وداباا غانصححوو وغانمشي نقوليها باللي زواجنا غير على الورااق...

-اشقر:(شدهاا من فكهاا)لاا نتي ماغاتمشي لفيين سمعتي...عند بالك اناا ماحااسش بيهاا..تيقي بيااا انااا كانتألم كثر منهاا...هي شخصيتهااا ضعييفة بزاف ..انا كانحااول نقويهااا ...ونبني الثقة بينااتناا..هاداا هو أسلوبي وسواااء عجبك او لااا انا غانبقى هاكاااا حيت مقتاانع باللي كانديير سمعتي

-ريم:اواا دابااا جااا الشخص اللي غاايبدل أسلوووبك سمعتي...وهااد الشخص هو أناااا ...وداباااا حناا غانطلقووو سمعتي هااا وااش سمعتيي😠

-أشقر:هه نطلقووو...اوااا ماتحلمييش بيهااا ...نشوفووو واش تقدري تبدليني كيف قلتي..والى نجحتي فكلاامك ديك السااعة غانطلقوو اوكي .؟!(طلقهاا )

تمشى جوج خطواات ...حتى كايحس بضربة فأسفل عنقوو...ضربة اللي قدرات تفقدو توازنو...وبسرعة كاان هو لتحت وريم فوق منوو ...

-ريم:هه متاافقين غانطلقوو مني غانقدر نغيرك...وأول حااجة غانغيرهاا فيك هي أنك ماتصغرش من قيمة أي أنثى كيفمااا كانت(ضرباتوو بخفة على حنكو)سمعتي 

وقفاات كاتقاد فحوايجها وتنفس كأنو حتى حاجة ماوقعااات...ساست يديهااا ودارت كاتشوف فيه كيفااش مفرش فالأرض بدون حركة..باقي مامصدقش اللي عاد وقع دابا..

-ريم:اووووو سي أشقر بفخامتوو ماقادرش يتحرك ههه..كايبان ليااا وقت طلاقنااا قرييييب هه

خرجات ريم وهي فرحاانة ...حاسة بطعم الانتصاار ...وأخيرااا قدراات تهد داك المتكبر اللي شافت أول نهااار ليهاا فهاد الداار..وداباا مايقدر يديير ليهاا والو...ببساطة حيت هو اللي عطاهاا الاذن بذلك...باقي الابتسامة مرسومة على فمهاا حتى كاتسمع صوت فاتي من موراهاا ...

-فاتي:قااادرة تضحكي هه ...أنااا غانبين حقيقتك لأشقر سمعتي ..

ترسمات ابتسامة استهزااء على فم ريم ودااارت عندهاا...

-ريم:كيفاااش ماافهمتكش ؟!

-فاتي:كيف سمعتي نتي كاتفلاااي على أشقر اللي (بصوت متقطع)بااين ..كايبغيك وأناا ماغانسمحش ليك تضيعي سعادتوو

-ريم:كاتظني باللي سعاادتو معاك نتي؟!

-فاتي:اناا شنو دخلني..أصلا حنا مابيناتناا والو

-ريم:متأكدة؟!

-فاتي:علااش كاتسولي ...نتي اللي غاتجاوبيني داباا...نتي كاتخوني أشقر..شفتك كيفاش جابك هادااك بطونوبيل ..وكيفااش تعاانقتوو...كاتبغيه؟!

-ريم:وفشنو كايهمووك مشاعري ؟!

-فاتي:ماكايهموونيش ...اناا غي خايفة على أشقر

-ريم:وفشنوو كايهمك اشقر؟

-فاتي:ماكاايهمنيش

-ريم:اواا احبيبتي ماكايهمووكش مشاعري وماكايهمكش اشقر..سوو شنو هو السبب اللي خلاك تسولي على هادشي

-فاتي:مانقدرش نسكت على المنكر

-ريم:المنكر هه احبيبة مادخليش فالشغال اللي ماكايعنيوكش...هاديك حياتناا الخااصة..

-فاتي:تقولي اللي قلتي...اناا غانقول كولشي لأشقر وغانبينك على حقيقتك

-ريم:اوكي قوليهاا ليه يالااه سيري هه

-فاتي:اه غانقولهاا ليه باش يعرف حقارة هادي اللي بدلني بيهاا

-ريم:اوووو دونك هاداا هو السبااب اللي خلااك تدخلي فهاد الموضووع ...كاتبغيه؟!

-فاتي: شنوو كااتقولي نتي .. شمن كانبغيه ولا ...

-ريم:(مقاطعاهاا)كاتبغيه اه لاااا

-فاتي:اااه كانبغييه...ولو أنك تبغيه حتى نتي ويكوون سعيد معااك ..اناا غانبعد منوو وعمروو عمرو غايشووف وجهي عمرووو

-ريم:هااد السؤاال خاصك تطرحييه على أشقر ..حيت هو اللي يقدر يجااوبك...وعادي تقدري تقولي ليه اللي شفتي ..المهم مابغيتكش تكرهيني ولا تحقدي عليا..حتى اناا غي القدر اللي جاابني هنااا...وماعلياا غي ندير اللي مقدر علياا ونرضاا بيه..كيفماا رضيت بموت واليدياا..بسلاامة عليك

-فاتي:ختي...(عنقاتها)سمحي ليا اختي عيني تعمااو لياا ...عافااك تقدري تقولي لياا شنوو طاري بلاا خباري...حاسة باللي شيحااجة مخبية...وهي اللي خلاات أشقر يتعامل معاياة هاكاا وينهي علاقتنا بهاد الطريقة..عافاك اختي قولي لياا

-ريم:(سداات على عينيهاا بأسى وحاولاات تقوي راسها..وبعداتها عليها)تقدري تسولي أشقر ....

مشاات ريم مخلية فاتي غاارقة فدواامة من الأسئلة...ماعندهااش جوااب...مشاات للحديقة الخلفية.. گلساات حداا واحد الشجرة كبييرة فرووعهاا وأغصانهاا قربو يلامسوو الأرض..بقاات كاتشووف فالفرااغ لمدة...كاتفكر فحيااتهاا حتى هي...كاتشووف الحب القوي اللي بين اشقر وفاتي...رغم انهم مخااصمين...حتى واحد مايقدر يفرط فالاخر...كاتقول مع رااسهااا...وانااااا ايمتاا غايدق الحب بااب قلبي؟!...ايمتاا غانجرب إحساس الحب؟!...ايمتاا نحس بقلبي كايدق بسرعة منين نشوفوو؟!...لايمتاا غانبقى وحييدة هاكاا؟!...حتى اناا باغااا اللي يحميني ويكون معايا مني نكون خاايفة...

اييه ريم عرفااات بزاااف دالرجاال فحيااتهاا..ولكن عمر شي مرة قلبهاا دق لشي وااحد...ببسااطة ماكايغروهاااش المظااهر ...وكاتآمن بكون النصف الاخر ليك...خاصوو يكون متقاارب ليك...نفس الأفكاار ونفس الشخصية...اييه ماشي 100% ...لأنوو ماغايكوونش تكاامل بينااتهوم...بغااتووو مايكوونش صاارم زيادة عن اللزوم...ومايكوونش طااالقهاا بزااف...كاتآمن بشي حااجة سميتها الإعتدااال ...باقي مااقدراااتش تحلل شخصية كل من اشقر ومرواان بالشكل اللازم..مخلياا كولشي للزمن..هو اللي غايوضح ليهاا الاشيااء المبهمة اللي كادوور فدماغهاا....وااش فعلااا ريم غااتلقى الشخص اللي رااسمااه فمخيلتهاا ولا لاا؟!..هاادشي اللي غاانعرفوو فبقية القصة ..

في المطار..

غادي بمشيتوو الرجولية..كتاافو العراض كايتحركوو..وعلى وجهوو تخنزيرة..وابتساامة صغيرة على فمو...(كيفاش قدر يجمع بين هاد الجووج الله وأعلم😂)بجاانبوو طفل صغير فعمر 3 سنوات تقريباا...شااد فيه بيد وجاار لافاليز ديالو باليد لاخرا....حتى كاايوقفوو صوت نسائي ...

-الشرطية:هييه مووسيوو وقف

داار كايشوف فيها بمعنى شنوو..

-الشرطية:(متوترة من شوفتو)شنو سمييتك

-كتاافاا بأنه يمد ليها الورااق ديالو...

-الشرطية:همم ألماني الجنسية..السي ديااب تفضل معاياا عافااك

-دياب:همم اوكي

سبقااتوو فالمشية وخلاتو تابعهاا ..كايطلع ويهبط فجسمها...و اووووب بانت على وجهو ضحكة شيطانية 😈

-دياب:واش كولو المسافرين كاتكاالبوهوم(كاتقلبوهوم) ؟!

-الشرطية:نو ميسيوو ..إجراءات أمنية فقط..

-دياب:همم اوكي كاالبيني(قلبيني)نحيد شوميز ديالي؟!

-الشرطية :اا اوكي

بداا ديااب كايحيد فشوميز ديالو..من بعد حيد التيشورت اللي لااابس..وكوولشي هادشي وهوكايلاحظ ردة فعل الشرطية..السيدة شاافت العضلاات وهي تصدم ..وقف قداامهاا وشااد فقميجتوو بسنانوو..وبداا مداابز مع الصدفة دالشوورط

-الشرطية:اسيدي اش كاتدير؟!

-دياب:نتي قلتي اتكاالبيني(اتقلبيني) ...هبط راسوو مكمل خدمتو

-الشرطية:اسيدي وقف ...صافي صافي 

-دياب:(طلع حجبانو وهبطهوم بمعنى واخاا)اوكي يمكلي نامشي فاميلياا اتكون تواشحووني(توحشوني)..

-الشرطية:اوكي يمكن ليك تمشي...بلاتي بلاتي عطيني كاميرتك نشووفهاا...

-دياب:كاميرتي..اوكي ولكن نتصور معاك بعداا 

-الشرطية:هه اوكي

-دياب:بلااتي نطلع معاهاا كارت ميمواار

-الشرطية:فيها فيها هه

-ديااب:هه(بضحكة ذوباااتها فبلاصتها) هادي بزااف دعاام ماجيت للموغرييب..اوكي اجي نتصوروو

وقفاات الشرطية حداا ديااب و حطات يدهاا على كتف دياب...ضحك ضحكة استهزاء وخداا معاهاا صورة

-دياب:خودي كاميرا شوفيهاا

خداات الشرطية الكاميرا قلباتها ومالقات فيها والوو..

-دياب:(وهو كايسد صدايف قاميجتو)كولشي نورمال ياك 

-الشرطية:وي موسيووو يمكن ليك تفضل 

-دياب:(مخاطب ولدو)يالااه احبيبي يالااه...

-الشرطية:فرصة سعييدة موسيو دياب

-ديااب :الليحفضاااك 😉

مشااا هو وولدوو فاتجااه مرااحض المطاار مخليين الشرطية كاتكلم بووحدهاا

-الشرطية:اويليي كيداار حتى عرف يهضر هاكاا

-الشاف:انسة شنوو درتي مع المساافر

-الشرطية:(ماحااسااش بتواجدو)هااححح شحاال زوين يماا يماا على ليزاابدوو..

-الشااف:امااادموزيل ليزااابدوو را معااك داوي

-الشرطية:(مفزوعة)ويي مون شاااف

-الشاف:اش درتي مع المساافر اللي قلبتي

-الشرطية:كولشي هو هاداااك مون شااف

-الشااف:همم مزياان..سيري لخدمتك

-الشرطية:اوكي مون شاااف 

🌻🌻في المرحاض...

متكي على لافابووو وعلى وجهوو ضحكة كبيرة

دياب:هوووف كولشي داز هو هاداااك...ماتفااكينا غي ب 66 كشييفة مع هاديك(غيكاان كايمثل على الشرطية) ..باايناا غانستمتعو بزااااف فالمووووغريب ياااك ا باسل

داار جيهة ولدوووو وهو يتصدم ...لقااه حااال الساااك ديالو دالكاميرا ولايح كولشي فالارض

-دياب:نتاا شنو درتي...

بدااا كايقلب فكل مكاااان على شيحااجة وماالقاهاااش..بقاا كايدور فرااسو ووالووو..

-باسل :باباااا ههه

داار عندووو دياااب وعااد مازاادو خرجوو عينييه كثر من الصدمة....كايباان ليه دااكشي اللي خبااا وتعذب علييه كولوو مشااا هبااء منثورااا...بقاا كايشووف فدييك الغبرة البيضااء كيفااش كاتعووم فوووق الماااء

-دياب:ههه لاا اناا عواريت مافيهااش...اشنوو درتي شنووو اعبااد الله 1000 أوروو مشاات وااع غاتسطينيي ياهاد الفاار...غاتخرج لياا عقلي ..

كب المااا فوق الغبرة حتى ماابقااتش كاتباان ...كايباانوو ليه الفلوووس قداام عينيه مشاااو 

-دياب:بسباابك يا الفاار وليت نلووح الفلووس فالطوااليط زيد قداامي زييد..اوووف نبقاا مقطووع اناا دابااا وحتى لادرووگ اللي مولف ماغانلقاهااش هنا بفف 

خرج ديااب هو وولدووو وبقااو كايتسنااو توصلهووم السيارة اللي استأجر من الانترنت

-ديااب:هوووف تعطلوو 30 دقيقة اش هاادشي (نتااا راك فالموووغريب اسي فالموووغرييب)دور وجهووو بعصبية حتى كاتباان ليه وااحد الشهبة ..قرطااااسة ..دغياا نساا العصبية وبتااسم عااود تاني بشر😈

غمزهاا ديااب وابتااسم ليهاا..ابتساامة اللي دوخااتهاا ونسااتهاا على القبلة بقاات غااداا وكاتشووفيييه ومبتسمة بلاا هوااهاا

-الشهبة:ايي احح راسي...

كانت دخلااات فوااحد الطونوبيل وخلااات دياااب فشلاان بضحك...لدرجة تفرش فالارض وماقدرش يوقف ...كرشو ضرااتو وبقاا شاادهاا وكايضحك ...شافو باسل وجاا گلس حدااه وبقا حتى هو كاايضحك ويشد فكرشوو كمحااولة منو لتقليد باابااه...هاد الحركة عااد مازااادت فحاالة ديااب وخلااتووو يضحك بهستيرية ...تفرش فالارض ...واللي دااز كايشوف فيه...كاين اللي كايقول الله يستر...وكااين اللي كاايضحك لحاالتوو....وبلاا مانسااو دوك اللي تزعطوو فيه 😂

🌻🌻عند فاطمة الزهرااء

شنووو ممكن نديير...درت اللي علياا وكثر...عطيتوو فرصة بااش يهضر ويعطيني مبرر لأفعالو ولكن ماابغااش...هو ماكايبغينيش وانا زدت تأكدت مني شفت تصرفاتوو وحبوو لمرتوو...كنت غانمشي نسولوو وااش مخبي شيحااجة...ويمكن نطلبوو ونترجاااه گاااع...ولكن لااا...كفاااية ماانطيح بكرااامتي للأرض...اااه بصااح كنت كانآمن باللي الكبرياااء وحتى الغروور خاارجين على نطااق الحب ...وباللي اللي كايقووم بيهووم فهو كايهيين الحب بفعلتووو...ولكن علاااش هو تعاامل معايااا هااكااا....هااد الهضرة كوولشي اللي قلت داباااا ...كتبتهاا ليه فرساالة...رسالة اللي بكثرة مابكيت عليهاا الورقة انكمشت...كتبتهاا ودخلت مسلتة لبيتوو...لقيتوو نااعس بوحدوو ومامعاهش مرتوو...وهذاا من حسن حظي حسن مانشووفهوم فموقف مايعجبنييش...حطيت الورقة حداا رااسووو وقربت لييه...بقيت كانشووف فيه لمدة..ربماا كانحااول نحفض ملاامح وجهوو...هبطت جيهتووو وبست على جبهتوو بحراارة...ومن بعد خرجت فحاالي....

غانمشي لمديينة اخرى ....حتى واحد ماغايعرفهاا...مدينة نحاول نداوي فيها الجروووح اللي تسبب لياا بيهوووم..فاللول مابغاوش واليدياا...ولكن مني شافوني أصرييت عليهووم قبلوو...غانخدم فالمجال اللي قريت فيه...تصميم الأزيااء...غانرجع للمجال اللي كانبغي ..واللي تخليت عليه باش نبقى مع أشقر فالرباط..ونبقااو قراااب من بعد مارجع من ألماانياا...هه قدمت بزااف دالتضحياات..وفالمقاابل هو ماقدملي والوو....شكوون عرف يمكن نلقااا شخص اللي يضحي على قبلي...

🌻🌻عند أشقر

فقت على أشعة الشمس ضاربة فوجهي...فقت وفراسي كاضرب مياات مطرقة...موضووع فاتي...موضووع ريم وزوااجناا اللي ماكاينش أصلااا...دورت وجهي جيهة تيليفوني حتى كاتبانلي ورقة مطوية ومكتوبة فيهاااا "إلى ملاكي الحارس♡"...شفت فيهااا بتعجب...هادا هو اللقب اللي كاتعيط لياا بيه فاتي...نضت من بلاصتي بهلع كبيير وقريتهااا....قريتهاا وكل كلمة كانحس بيهاا كاتدخل لقلبي بحاال موووس ...My angel غااتمشي لبلاااصة اخرى ...ياااك كانت كاتقوول ماتقدرش تعيش بلااا بياا...كيفااش طرااا....انااا كنت باغي غينخوفهاااا ...ماكنتش باغي نتخلى عليهااا...شنوو درتي ا اشقر شنوووو ...نضت بسرعة لبست عليااا هزيت تيليفووني ...عاد غانخرج حتى كانسمع تيليفوني كايصوني...فاللول كنت كانظنها فاتي ...ولكن لقيتوو نمرة ماكانعرفهااش..مابغيتش نجااوب ولكن قلت يمكن تكون فاتي..

-اشقر:الوو شكون معايا؟!

-؟؟:(بصوت رقييق)اويليي دغيااا نسيتيني اناا حبيبتك

-اشقر:شكوون نتا وبلا طنز مامساليش ل ** مك

-؟؟:(حاابس الضحكة)اويليي ياك صيفطك تجيب لياا ليكووش للولد هادي عاامااين ومازاال مارجعتي...حتى ولااا الولد يمشي للطواليط ويگلس فيهااا بالسوااايع علم الله اشكاايدير ..استغفر الله

-أشقر:(ببرود)غاانقطع

-دياب:وااصبر ازمر اناا دياب هه

-أشقر:(ماامصدقش)دياب نووو ههه جيتي للمغرب؟؟

-دياب:لاا دارو تيلي بوتيك دالمغرب هناا تامالك مقلوب ماكاتشووفش النمرة

-أشقر:فيينك نتاا دابااا؟!

-دياب:فوااحد الاوطييل ..

-أشقر:وعلااش مشيتي لاووطييل ال**..واش اناا ماكاينش هاا ...ياك نتاا فالربااط

-دياب:اه الربااط

-أشقر:نتلااقاااو دابااا فكافيي **** ونهضروو وجييب معاك باسل

-دياب:اوكي..ماتخلي حد يرتااح تلاااح

تمشى أشقر مغير الوجهة دياالووو من داار فاتي للكاافي...وعند بالوو باللي غيكاتفشش كيف ديماا..وباللي ماغاتقدر تمشي لحتى بلااصة...

🌻🌻عند ريم

اليووم فااقت ريم ماعندهااش الگاانة دالقرااية وتفكراات باللي خصهاا تشد طاكسي حيت ماكاينش مرواان اللي يديهاا...عگزااات.. وقرراات ماتمشيش..لبساات بيجاامة بنووتية مرسوم فيها دب البانداا.. سروال والفوق ديالو ..ولاحت عليها شاال..دارت شوية دالماكياج وخرجاات تفطر معاهوووم...كيف ديما منين كاتكوون كاتفطر ماكاتديهاا فحتى وااحد..وزاادت خدات راحتهاا منين مالقااتش أشقر...غالباا خرج بكري..ولا ماباتش فالداار..جااتهاا على باالهاا فاتي..للحظة بداا ضميرها كايأنبهاا..وتفكراات فعلتهاا هي ودااك الشيطاان داشقر...ولعناات عقلهاا اللي ماكايوريهاا غي المصاايب...بقاا فيهاا الحاال وطااح عليهاا الضيم..حيت ماامولفااش تلعب بمشاعر حتى وااحد...لأنوو حتى هي ماتبغيش اللي يلعب بمشااعرهاا...يمكن ضحكهاا اللي خااايب..تنهداات بعمق...وكأنوو همووم الدنياا كولشي فووق كتاافهاا...بقاا كايشووف فيهاا خالهاا وسمية متعجبين ليهاا...تبسمات ليهوم ببلااهة..وطلعاات جابت اورااق الرسم وأقلام الرصااص...اليوم بغات تمارس هوايتها اللي هي الرسم...هواايتهاا اللي كاتقدر تنسيهاا فكوولشي...وكاتخليهاا تحس بواحد النشوة عجيبة...تماماا كيف النشوة اللي كايحس بيهاا المرء أول مرة يتعااطى لشي مخدر..أياا كان نوعوو...مشات للحديقة الخلفية...وگلساات مربعة تحت ديك الشجرة الكبيرة ومفرشة الاورااق قداامهااا....دغيااا دخلات فالجو..ونعاازلت على العاالم الخارجي ....حساات برااسهااا كاطيير فالاعاالي...بعيد على الصدااع والمشااكل...فالسمااء وحدهااا هي والغيووم...والطيووور...هااد الشعوور ألهمهااا أنهاا ترسم منظر طبيعي...من ديماا وهي مولووعة بجميع المداارس التشكيلية..خااصة المدرسة الرومنسية(هادي بحالي 😂)..جااهاا فباالهاا طيوور النورس...من ديماا وهوماا كايثيروو إعجاابهاا بلونهم البيض..اللي كايدخل الرااحة على كل من شاافهووم...

🌻 🌻عند دياب

رااكب فالطونوبيل ومگلس ولدوو فالمقعد الخلفي...طاالق أغنية أجنبية شباابية بصوت عالي...وصايگ وكايرقص معاهاا فنفس الوقت...وااحد الحياة اللي كايناا نعل بوو العاالم 😂...بقاااا شحاال وهو كايضوور بين الأحياااء ويقلب على الداار دأشقر حتى لقااهااا...ماكاانش باغي يجي ولكن حكر علييه ...وقف الطونوبيل...طل على ولدوو لقاه نااعس..هز كاميرتوو اللي ديما معااه..خرج و طلع سروالوو...هادي هي الحركة اللي كايدير ديما ...سد الطوونووبيل على ولدوو ..هضر مع العسااس ووصاااه على الطونوبيل وأمنوو على وولدوو...سمح ليه هاد الأخيير أنو يدخل من بعد ماعرفو صديق أشقر..

🌿🌿دخل يستكشف المكاان...وبقاا كايدووور فالحدييقة...دااوه رجلييه الحدييقة الخلفية...وكأنوو شيحااجة كاتجذبوو...هو هاكاا حس..حتى كاتبااان ليه بين الوروود...وكيفااش ضايريين بيهااا...وحدااهاااا الأورااق والأقلاام مشتتين فكل مكاان...ماحسااتش بيه لأنهاا كانت منهمكة فرسمهاا...هز كاميرتوووو ونعس على كرشوو وبداا كاياخذ ليهااا فالصور وهو عاض على لساانوو...طلعاات راسهااا وكادور فييه ...فمحااولة منهاا لفك التشنج اللي جاهاا...حتى كايبان ليها شي شخص كايصور فيهاا...خرجاات عينيهاا بصدمة..ووقفااات غادية باتجااهوو وهي نااوية على خزييت ...وهو كأنوو ماكايشوفهااش مكمل فأخذ الصور واخاا هي فحركة..

-دياب:عندااك عنداااك حنشش

-ريم:(قفزات من بلاصتها من الخوف)فينووو وااااععع 

جاات كاتجري لجيهتوووو وشداات فظهروو وعينيهاا كايدوورو ويقلبو على الحنش

-ريم:فينو لحن...اععع كاتفلى عليااااا(طلعااات فووق ظهروو)شكوون نتاا...شكون مصيفطك ليااا...وعلااش كاتصورني هااا...شي مؤاامرة هادي؟!

-دياب:(ميت بالضحك)هههههههه مؤامرة صهيونية ههههه وااع خاصك تشوفي رااسك...هههههههه واهبطي من فوقي ونقوليك شكون أناا

-ريم:(حساات براسهاا شنو دارت ووقفات بسرعة وهي كادور فوجهها)

-رياض:(مد ليهاا يدييه تنوضوو وهي تضربهاا ليه...)

ناض وقف لراسوو وبقا كايشوف فيهاا...حتى هي بقاات كاتشوف فيه...زوين بزاااف...كاتبان قدامو بحال النملة بديك الفورمة الرياضية ديالو ...بقاا كايشوف فيها لثواني من بعد انفجر بالضحك

-دياب:واااع ههه خاصك تشوفي رااسك كيف بنتي فاش قفزتي ...لحسن الحظ صورتك ههه

-ريم:عطيني نشوووف عطينيييي

-دياب:(شاادهاا بيدوو ومطلعهاا للفوق)الى شديتيهااا هه

-ريم:واازمر طلق...اووف واراااك طويييل بحاال السلووم وااطلق ...

-دياب:سلوووم اواا طلعي نشوفوو حدااگتك..

-ريم:ااعععع 

دفعااتوو بالأعصاااب...ماقدرش يشد تواازنوو...شدهاا كمحااولة من أنه مايطيحش.. صدقاات طاايحة هي وياااه....هو التحت وهي فووق منوو..كانو قرااب من بعضهووم بزااف...ماكايفصل بينهووم الاا بعض السنتيميترااات...حساات برااسهاا مخدرة من قربو ليهاا...وحسااات بقلبهاا كايضرب بزااااف ...يمكن سمع دقااتووو...بقاات كاتشووف فعينووو وهو كذلك...عينيهااا سحرووه....لدرجة ماقدرش يبعد عينيه من عليهم...تنويم ميغناطيسي من نوع خااص....طااح شاالهاا على وجهوو مخبي وجهووم بجووج ...بدااو شفاايفهووم كايقتااربوو بدون إرادتهوم...وأنفااسهووم السخوونة امتازجاات...تلامسوو شفايفهاا مع شفاايفوو...حتى كانوو غايدخلوو فقبلة بلا هوااهم...و فيقهووم صوت من بعييد...

-سمية:(مخرجة عينيهاا فالمنظر قداامهاا..ولحسن الحظ شاال ريم ماسمحش ليهاا تشوف داك التلامس بين شفااهووم)ريييم

حلات ريم عينيهااا على حدهووم ولقاات حتى دياب مصدوم وماعارفش شنو طاري..دغيااا نااضت من فوقوو 

-ريم:خ خخااالتي سمية...

-سمية:نتي شنوو كااديري هناا وشكوون هادااا؟!...ديااااب

توجه دياب لجهتهااا وعنقهاا

-دياب:ماماا سمية كيدااايراا؟!

-سمية:بشوية علياا بزااف دالصدمااات فوقت وااحد

-دياب:(كايتمسكن)يااك اماماا سمية داباا اناا صدمة

-سمية:اويليي نتاا اش كاااتقول اولدي مرحباا بيك...غير هو المشهد اللي شفتك فيه نتاا وريم صدمني وصافي

-ريم:(متوترة)خخ خاالتي انااا...

-دياب:(مقاطعها)هانتي تشوفي اخاالتي صحااب ليهاا اناا شفاار خنقاااتتني كانت غااتقتلني..ونتي عاارفة أناا مبادئي ماكايسمحووش لياا نهز يدي على بنت

-ريم:بصااااح اواا الى قدرتي غي دييرهااا

-سمية:هه اويلي مالكووم هه اجي فينوو البخووش دبااسل

-دياب:رااهو كايشخر فالطونوبيل

-ريم:(بفضوول )شكوون هو !!؟

-سمية:ولد ديااب

-ريم:هاا مزيان..وشكوون هو هاد دياب أصلاا؟!

-دياب:(هااز يديه قدام وجه ريم)أناا صدييق أشقر..ونتي شكوون؟!

-ريم:(حتى هي هزاات يديهاا قدام وجهوو)انااا مرات أشقر

-دياب:(طلع حجباانوو وجمع ابتسامتو)هااا مزياان

-سمية:سمح ليناا اولدي مااعلمنااكش..كولشي جاا بزربة

-دياب:عادي عادي زرباانين للزواج هه مزيااااان يجي داك بوراااااس ونتفاااهم معاااه ولاا كايخبي عليااا..

دخلوو مجموعين للدااخل ...وريم من ملامحها ظاهر عليها التوتر ...وكاتفرك فصبعاانهاا...دياب رد البال لتصرفااتهاا...وقال مع راسو نتصرف عادي ونساا اللي طراا..الإنسان كايخطأ..الخطأ الكبيير هو أنوو يكمل على الغلط ومايصححووش..فالاخيير راهاا مرات صاحبوو...لا ماشي مرات صاحبوو راها مراات خووه...ماادوزووش القليل هو وأشقر.. 

-ديااب:أجي اباباا لهناا...اوباا(گلس باسل فوق رجليه)كيف جااتك ماماا سمية؟!

-باسل:güzel

-سمية:ههه الزويون ديالي..انا نمشي نشووف الخداماات غبرو غاتكونووو عطشتوو ..

-دياب:(ابتسم لسمية حتى بانوو غمازااتو..ريم بقات غي حاالة فمهاا فيه..دور وجهوو جهتهاا ولقاها حاضياه هه)همم وكيفاش جاتك ريم؟!عجباتك

-باسل:ya ! çhoc güzel

-دياب:ههه ااه بزاف

-ريم:(وهي مادة يدها)هه اجي اجي عندي Hade aşkum hade 

مشاا عندهاا بااسل وهو مبتسم وگلس فوق رجليها

-دياااب:اووو براافوو كاتعرفي للتركية

ريم وهي كاتقيس فكتاافهاا ومطلعة راسهاا للسماا

-ريم:الله يباارك فالمسلسلاات التركية ههه

وهي كاتخااطب باسل

-ريم:حبيبوو انااا çhoc güzel هه اخلييك ليليي موااااح .. عطيني قنينفاات نبووسهووم عطيني هه دياب شنو هوما قنينفاات 

-دياب:(سااهي فيها وفكيفااش كاتضحك مع باسل )هااا؟!

-ريم:هه مالك تلفان ..شنو هوماا قنينفاات؟!

-دياب:(حول ملامحوو لجدية وقرب ليهاا)هووماا هاادوو هه(حاط يدوو على شفافو)

-ريم:(شاافت لشفاافوو وللحظة سهاات فيهوم ..سداات عينيها وبعدات عينيها عليهوم)..بفف معامن داوية أناا مالك باسل 😕

-دياب:(وهو حاط يدو على كتفها)علاش كيف جييتك بوكووص بشهاادة الجمييع

-ريم:الجمااال فآخر المطااف كايمشي كايبقااو حواايج خرين اللي مانظنش عندك

-دياب:إن بعد الظن إثم ..راك واخدة علياا نظرة خاطئة على مابانلي

-ريم:مم يمكن ..حناا غانشوفوو واش غاتقدر تصحح هاد النظرة ولا لاا😉واحيد يدك راني مرات صاحبك يمكن

-دياب:يمكن هه اناا عندي عادي وكانظن حتى أشقر مايكونش عندو مشكل ..كوني هاانية أنا ماشي منحرف

-ريم:همم عادي..وفينهاا الغيرة دالرجل الشرقي..ولا صافي عشتوو فبراا غاتوليو بحالهووم..قلدوو الغرب فحااجة زويينة ماشي فالخواا الخاوي..

يتبع ...