و بينها...و لكن حبي ليها أكبر من أني نستسلم(شاف فيه)مستحيل تكون لواحد آخر من غيري و عمرني نفقد أمل أنها تبغيني شي نهار...يوقع لي بغا يوقع
مستحيل نستسلم...ماغاتكون غير ليا.
جهاد(ابتسم):مغرور و تايق فراسك بحال ديما...
و لكن هي إلا بغات شي واحد آخر و..
أوس(قاطعو وهو مزير على يديه معصب و كايدوي كارز على سنانو):جهاد غاتزيد كلمة أخرى غانسا الصحبة لي بيناتنا..
جهاد(تنهد):المهم أنا ماجيتش باش نخسر مع أنا صديق عندي..بالعكس أنا هنا بصفتي صاحبك لي
باغي يعاونك..
أوس(ربت على كتفو و خفف من غضبو):أنا عارف و لكن ماكاين لاش..
جهاد:متأكد؟
أوس:متأكد!!صافي دابا يالاه ندخلو دابا..
#أيات
دخلات مع البنات للمنتجع الداخل...تصميمو على شكل
فندق و لكن هو فالحقيقة أفخم..مصمم بطريقة عصرية أوروبية و لكن داخلة فيه شوية من الثقافة
المغربية....
جالسة ساهية وسط منهم..هما كايهضرو و هي عقلها غايب ماحاضرش معاها...كتفكر فالكلام لي قالت ليه..
زعما تقدر تكون نقصات منو و من ديانتو...رجعات فبالها الكلام لي قالت ليه...عرفات غلطها و حسات بيه..
ماوعات على راسها حتى نغزاتها ميساء و سولاتها بعينيها...اومأت ليها ليها براسها زعما والو....حولو نظراتهم للمؤطر لي جا و لكن ماكانش بوحدو..كانو وراه مرأة و راجل...
محمد(تقدم عندهم بابتسامة كبيرة مرسومة على وجهو..هو باقي شاب و ملامحو أجنبية لي كتبين عكس أصلو):السلام شباب...نقدم ليكم راسي...أنا محمد و هادي مراتي و شريكتي سكينة...
سكينة(شابة فأوائل الثلاثينات ديالها..زوينة بملامح
عربية بريئة..ومآت ليهم براسها بضحيكة ساحرة):متشرفة بيكم...نتمناو هاد الرحلة تكون عند حسن ظنكم...
تفارقو معاهم و كلا طلع لبيتو باش يرتاحو و ينزلو باش يتغداو...طلعات أيات لغرفتها و مشات دوشات
و تخبطات مع السرير على وقفتها و غاصت فسابع
نومة بالعيا....
كتحل عينيها بثتاقل منزعجة بصوت الدقان لي فالباب...
تقلبات ففراشها و دارت المخدة على وذنيها و لكن الدقان عاد ماكايزيد يتجهد...ناضت مقلوبة و مشات
حلات الباب لقاتها ميساء لي قالبا عليها الدنيا..شافت فيها و رجعات سدات الباب فوجهها و خلاتها واقفة
كتشوف فالباب مامتيقاش...رجعات كتدق و تغوت عليها باش تحل...و لكن ماحلات عليها حتى شحفاتها..
دخلات و ردخات الباب من موراها معصبة..
ميساء:باقا ناعسة و زايدايها سادة عليا الباب فوجهي..
ماحشمتيش...
أيات(كاتقاد فنعستها):لاش جايا..؟..لا كنتي غاتصدعيني غير سيري خرجي عليا..
ميساء(ضرباتها بمخدة):نوضي تهزي..كاين برنامج واعر اليوما و نتي خامرة..
أيات(بصوت غالب عليه النعاس):آش كاين؟اشمن برنامج..
ميساء:غانمشيو للمزرعة ديال العائلة..
أيات: علامن داويا؟؟
ميساء:ديال رئيس الجامعة...هو لي اقترح الفكرة..
أيات(ناضت منزعجة):واخا..صافي سيري سبقيني نلبس و نهبط عندكم..
ميساء: واخا و متعطليش!!
أيات:صافي فهمت فهمت..
مشات ميساء و وقفات أيات جمعات شعرها و غسلات وجهها و مشات للباليزة هزات سروال كحل مزير شوية و الفوق طوب كحل نصفو مشبك و دارت ميكاب زوين كاياخد العقل.. لبسات سبرديلتها و هبطات هازة فيديها الكاميرة لي ماكتخطاهاش فهاد الرحلة...
كلشي مجموع التحت...تقسمو على جوج مجموعات
و كل مجموعة كتاكل فطاولة كبيرة بوحدها...كان جالس على أحر من الجمر..باغي غير يشوفها...توحشها
واخا يالاه كان معاها...كان جالس مع جايك لي
كايهدر معاه و هو غير جسد جالس معاه مخلي عقلو و قلبو معاها...ناض على غفلة باش يطلع عندها
و هي تدخل كتقلب على شي واحد بعينيها....شافت
فالبنات ابتسمات و كانت غادة عندهم حتى دورات راسها و شافت فيه...كان واقف كيشوف فيها...نزلات
عينيها و مشات جلسات حدا سارة كتقلب على ميساء
بعينيها..
أيات(مع سارة):فيناهيا ميساء واش باقا ماهبطاتش؟
سارة:مشات غير للحمام شوية و ترجع...
#ميساء
جاية خارجة من الحمام و متوجهة لطابلتهم...حتى
كتحس براسها مزدوحة مع شي حد و شي حاجة تكبات عليها...حلات عينيها على جهدهم بالصدمة كتشوف فكسوتها لي كلها عمرات عصير...تعصبات
و طلعات راسها شافت فيه معولة على خزيت و نظراتها ماكايبشروش بالخير...
ميساء:واش نتا عور ولا كيفاش...شوف آش درتي ليا.
ميساء:واش نتا عور ولا مالك؟شوف آش درتي ليا!!
الشخص(ببرود):شنو؟
ميساء(كانت كتمسح الكسوة بيديها غير سمعاتو و هي تقندش..طلعات راسها و شافت فيه):أشنو؟لا واش قلتي أشنو؟ واش نتا غادي مدرم ماكتشوفش قدامك
أيات(هزات حاجب و هبطات الآخر): ميساء سيري قبل ما نخسر معاك..
ميساء مشات كتضحك و أيات دورات راسها و هي تشوفو واقف مع جهاد كايشوف فيها...هبطات عينيها
و تمات غادة لطاولتهم...كملو غداهم و هو يجي عندهم محمد علمهم بلي خاصهم ينطالقوا دابا...هبطات
ميساء و طلعو للحافلة شدو الطريق للمزرعة...
# وصلو للمزرعة لي كانت كتتوسطها جبال عالية...
وسط من الخضورية و المساحة الهائلة ديال الشجر كاينة فيلا شاهقة مبنية على الطريقة الأوروبية...
هبطو و هما كيتعجبو فهاد المنظر....وقفو و بقاو المؤطرين كايهضرو معاهم و هي مامعاهمش غير كتشوف و تتعجب...جبدات الكاميرا من ساكها
و خلاتهم و زادت كتمشى فالجنان و تصور فلي عجبها...بان ليها اسطبل ديال الخيول...تبسمات و
مشات دخلات ليه...لقات واحد من العمال واقف حدا
واحد كيوكل فيه...مشات وقفات حداه كتشوف فالخيل..
أيات:واش نقدر نركب على واحد فيهم؟
العامل(بتردد):سمحيليا ولكن..
أوس(من موراها):صافي غير سير نتا
العامل(حنا راسو مشا)
أيات(دارت عندو و لكن ماقدراتش تشوف ليه فعينيه
و بغات تخرج حتى وقفها صوتو)
أوس(ببرود):مابقيتيش باغا تركبي؟
أيات:بغيت و لكن...
أوس(مشا خرج واحد من أجمل الخيول لي كاينا..لونو بيض...فيه سرج من الجلد فاللون الكحل و وقف حداها):ركبي..
أيات(شافتو عالي و ماتقدرش تمتطيه):ما..ماشي مشكل..سمحليا برزطتك..(كانت غادة حتى جرها من يديها و هزها من خصرها على غفلة و هي مصدومة من التصرف لي دار..حطها فوق العود...شاف فيها لقاها كترمش فعينيها مصدومة)
أوس(ركب فواحد أسود قاتم مسرج بنفس لونو):يالاه
أيات(عاد فاقت من الغلبة..شدات فاللجام و جراتو لعندها و تحرك بيها العود بالشوية..خرجو من الاسطبل
و مشاو للطبيعة...منظر خلاب..جبل بعيد و هائل كايبان صغير و قريب ليهم...فرحانة و ضحكتها مرسومة على وجهها و هو غير ساهي فابتسامتها...بدا
العود كيزرب بيها وهي متحكمة بيه و فرحانة و هو
فجنبها الفرحة لي حاس بيها ماكتوصفش...مرة يخبي
الابتسامة لي خارجة ليه من قلبو و مرة يخليها مايتسوقش ليها...
وفجأة ولى التحكم بالعود مستحيل...درع بيها و وقف غير على قوامو اللخرين و صدر صوت زعزع المكان..و بدا كيجري بسرعة كبييرة..
تخلعات و قلبها بدا كيدق من الخلعة...و لكن الخوف ديالها على راسها ماكانش كبر من خوفو عليها...تبع العود بسرعة و قلبو دقاتو مسموعين...يديه لي شاد بيهم اللجام ولاو كيرجفو...
#غادي كايجري بيها و هي الدموع محجرين فعينيها
مغطية بيديها لي تجرحو على وجهها من أغصان الشجر لي كتختارقهم....فقدات سيطرتها عليه بالكامل..
مابقاتش قادة تتحكم بيه...حتى كتحسح بشي واحد فجنبها و خطوات مسرعة ديال الخيل حداها...غادي
و كيقرب ليها حتى كتحس براسها تهزات من فوق العود و تحطات قدام صدر عريض كيطلع و يهبط
عرقان و كينهج...بقا غادي بيها و هي شادة فيه بالخلعة...و كتشوف فيه..وقف على غفلة و هبط جلس على ركابيه كارز على القبضة ديالو كيسكت فقلبو لي شوية و يخرج من بلاصتو...
واقفا ما فاهما والو و حتى الدموع مابغاوش يخرجو
ليها....مشات حداه و وقف معصب...
أوس:ماغاتهناي حتى تقتلييني شي نهاار واااش باغاني نتسطى و كون وقعات ليك شي حاجة...حسي بياااا
أيات(واقفا مافاهما فيه والو..مرة متعجرف و متكبر و مرة منقذ):ك..كيفاش
أوس غادي و كيقرب ليها حتى اختالطو أنفاسهم للمرة الأولى...هي توقفات على الحركة جمدات و هو كثر منها
كايعشق عبير أنفاسها لي أول مرة يحس بيهم...
أوس غادي و كيقرب ليها حتى اختالطو أنفاسهم للمرة الأولى...هي توقفات على الحركة جمدات و هو كثر منها
كايعشق عبير أنفاسها لي أول مرة يحس بيهم...
حلات عينيها بالشوية و بدات كترمش برموشها بتثاقل و شافتو قريب منها و مامخلي للهواء منين يدوز بيناتهم....رجعات خطوة باللور و هبطات عينيها مابقاتش قادة تشوف ليه فوجهو...
هو باقي فبلاصتو ماكيتحركش مغمض عينيه و باقي كيستنشق ريحتها لي كدخل معاه بدون سابق إنذار...
أيات(كتشوف فالأرض حشمانة و حناكها توردو):راه..
راه تعطلنا...
أوس(حل عينيه و هو حاس بخيبة أمل كبيرة..ماجاوبهاش و رجع بخطواتو اللور و مشا سبقها)
أوس(قاطعها معصب):بلاش...ماتشكرينيش...مادرتش هادشي على قبلك..
أيات(تفاجئت من كلامو..يالاه كان خايف عليها..توترات و ماعرفات باش تجاوبو...هزات يديها
و حكات على عنقها بتوتر)
أوس(هز راسو و جات عينو نيشان فالجروح لي فيديها...قرب ليها و هز يديها عندو و هي غير مصدومة
حط يديها لي كيرجفو من قربو ليها على قلبو لي كيخفق بسرعة غير اعتيادية وقال بصوت متعب):
الجرح لي فيك نتي مستحيل يوصل للجرح لي فقلبي....كل نهار...
كل دقيقة..كل جزء من الثانية...كنحس بقلبي غاينفاجر
و هو بعيد على الإنسانة الوحيدة لي قدرات تدخل ليه...كانعشقها....حتى من الهواء لي كتنفسو كنغييير منو...الريح لي كيمسها ماكرهتش نحرقو...باغي نغوت بسميتها قدام العالم كلو باش كلشي يعرف شحال كنعشقها...هه عشق..لا
كلمة قليييلة فحق لي كنحس بييه....هو غير نقطة فبحر مشاعري ليها...انا كانضعاف غير قدامها...عمرني
حنيت راسي حتى لعندها...نظرة وحدة منها و لمسة
حنينة من عندها كافية باش تحييني...نفديها بحياتي
و قليلة فحقها...(شاف فيها و كانت مصدومة من التصرف لي دار...حيد يديها و خدا المنديل ديالو
و غطا ليها الجرح و هي غير ساهية كتشوف فيه....أسئلة كثيرة
كايدورو فراسها.....واش يمكن شي واحد يبغي بهاد الطريقة الجنونية؟....شكون هي؟... و علاش كايعاود ليها هي من دون كلشي؟
أيات(كتشوف فيه و بحالا نغزتيها فقلبها ملي سمعات كلامو):و..واش نتا كتبغي شي بنت؟؟
أوس(شاف فيها و قال باستهزاء):أنا ما كنبغيهاش...حيت مشاعري واخا نوصفهم حتى كلمة ماتوفي بحقهم...
أيات(حنات راسها و سكتات كتشوف فيه كيعقد ليها
المنديل فيديها)
#ميساء
غادة كتشوف فالطبيعة الخضرة لي محاوطاها
كتجر فرجليها و تقطع فالوريقات ديال وردة
كتفكر فالشخص لي اصطادمت به و مخنزرة غير بوحدها....مارضاتش يعايرها و باقا مانساتهاش ليه واخا فالصراحة ماخلات فيه غير لي نسات...باقا فسهوتها حتى كتسمع حس شي خطوات من موراها...دارت و مالقات حتى واحد...كملات طريقها و مشات جلسات فأرض خضرة كلها ورد حتى وقف عليها شي خيال...دارت يديها كتغطي بيها على الشمس
و طلعات راسها شافت فيه...
ميساء(مصدومة):هادا نتااا؟
جهاد(معصب ماجاوبهاش)
ميساء(عقدات حجبانها و ناضت بغات تمشي حتى وقفها):اش داكشي فشعرك؟
ميساء(شافت فيه):شنو؟
جهاد(قرب منها):واقيلا شي حشرة...
ميساء(قاطعاتو و ماخلاتوش حتى يكمل هدرتو بغواتها...كتسوس فحوايجها و شعرها): لااا ماتقولهاش فييين هي؟؟حيدها ليا عافاك!!!
جهاد(قرب ليها بخطوات بطيئة و هز يديه حدا شعرها
و فجأة هو يتراجع):ماشي نتي مولات مصايبي اليوما؟
ميساء:واا صافي من بعد و نتفاهمو حيدها ليا دابا!
جهاد(باستهزاء):علاش لي مانتفاهموش دابا؟ اعتذري مني نعاونك باش تحيديها.
ميساء(بغضب):صافي بلاش مالي على حالتي...ياك غير وحدة اوا صافي نحيدها راسي!!
جهاد(باستهزاء):و شكون قال ليك غير وحدة؟!!
(دار يديه فجيبو و دار باش يمشي مخليها واقفا مصدومة...كتكرهم و عندها حساسية خايبة منهم...ماحسات براسها حتى مشات وقفات قدامو و وقفاتو):احم صافي..(بالشوية)أنا كنعتاذر منك...غير حيدهم عليا راه عندي منهم حساسية..
جهاد:ماسمعت والو..واش عتاذرتي بعدا؟!!
ميساء(صبرها تسالا..عصبها و غوتات):راااه قلت ليك سمحليا...منين كتسمع؟!!
جهاد(قرب ليها كثر):آش قلتي؟
ميساء(توترات من قربو ليها و تخربقات ليها الهدرة):اه..أنا..انا..ما قلت والو..
جهاد(ضحكاتو و لكن جمعها دغيا قبل ماتشوفو...
بعد منها و دار باش يمشي و قال):ما فيك والو و المرة
الجاية تعلي عليا صوتك نتفاهم معاك..
ميساء(تعصبات):و شكون قال ليك كاينة شي مرة جاية
فينما نشوفك دير ليا شي موصيبة...و هاد المرة غير تشوفني جاية قلب الطريق(ضربات فيه وزادت.. مشا كمل طريقو و هو مبتسم ماعارفش علاش..)
#أوس
شاف فيها و طلعها على عودو و ركب قدامها..
أوس:شدي فيا..
أيات مترددة...جمعات يديها و ربعاتهم عندها...شاف فيها بنص عين و تحرك بسرعة خلاتها تردخ مع ظهرو
العريض و تحاوطو بيديها بلا هواها...شاف فيديها لي محطوطو عليه و تبسم....تحرجات منو و لكن ماطلقاتش واخا سرعة الخيل رجعات عادية ولكن حسات بالأمان معاه و مابقاتش خايفة...
كتشوف فالخيل كتجري و المروضين معاهم و الطبيعة محاوطينهم...مبتسمة و معلية راسها كتشوف فالجبال الشاهقة لي ولات كتبان صغيرة من كثرة بعدهم عليها هبطات راسها و حسات بنفس سخونة وراها...دارت
بالشوية و شافت فيه...كان واقف كايشوف فيها..
نظراتو غير مفهومة بحال ديما...مرات يتحكم بيها حتى كتولي تكرهو و مرات ظريف و يتفاهم معاها...بعض المرات ماكايتفهمش ليها....
علاش هاد التحكم لي زايد على حدو لي فيه؟؟
و علاش غير معاها و ماشي حتى مع ختو؟؟
. أسئلة كثيرة كايطيحو عليها فينما تشوفو مهتم ومتحكم بيها كثر من القياس...
سارة(ابتسمت ليه و مادواتش)
جايك(كايشوف فالبنت لي بغا طول عمرو..من نهار عقل و هو مغروم بيها و الدموع مايبغيش يشوفهم هابطين من عينيها...
الحب فنظرو هو احساس مقدس و نقي..مشاعرو القوية اتجاهها ماعمرهم خرجو من قلبو...
لكن فاش كايكون هاد الاحساس المقدس من طرف واحد...كايكون جحيم...أنك تعيش معاه و تشوفو قدامك كل نهار و لكن ما تقدرش تبوح ليه بمشاعرك...بالشوية بشوية كيتحول هاد الهيام
لسهم كيخترق قلبك المجروح و عاد ماكيزيد يجرحو كثر و كثر...
وهي نظراتو الغير مفهومة كتفاداهم...بالنسبة ليها هو شخص نسونجي..طايش و همو الوحيد هو المتعة...
المتعة هي حاجة اختار يتجسدها باش ينساها..وصل
لمرحلة عشق مايمكنش ليه بل مستحيل ينساها...
هبطات راسها كاتفادا نظراتو ليها و رجعات كتشوف
فالمناظر لي دايرا بيها متوترة و عينيها كايدورو....
.....
#خاج من الطيارة الخاصة و منظر الجبال داير بيه و لكن غادي بمشيتو المعتادة بلاما يتلفت ليه...هدف واضح جاي على قلبو و ناصبو قدام عينيه ماغايمشي
من هنا إلا و هو محققو...ركب فلوطو و راسم على
وجهو ابتسامة نصر...إحساس مالك ماكايخيبش و هو حاس بلي هاد المجية ديالو عندها ليه مفاجئات كثيرة...
#أيات
وصلو و هبطات بلا كلمة بلا جوج و زربات فخطواتها بلاما تلفت ليه...دخلات و لقاتهم مجموعين..كانت غادة
طالعة حتى جراتها ميساء و جلسو معاهم...
سكينة(جلسات حدا الطلاب):المهم عندي جوج أخبار كاين لي غايجيه الخبر الثاني سيئ و كاين لي العكس...باش بغيتو نبدا؟!!
واحد فيهم:هه بداي بالاول حسن.
سكينة:هه كاينة حفلة اليوم بالليل على شرف الجامعة ديالكم..غايكونو حاضرين شخصيات بارزة و هادي سابقة حيت عمرهم جاو هنا داكشي باش هاد العام مميز...أما الخبر الثاني(شافت فيهم) غانبداو التخييم من غدا حيت كاين تحسن فالأجواء و ماكاين لاش نتسناو إذن غير جمعو حوايجكم و استعدوا
ميساء(كحلات بالعمى و جاتها الغبينة):شنووو؟؟لا لا هادي مامعاناش ياك قلتو حتى لثلاثة الأيام الأخيرة؟!!
سكينة(كضحك):قلت ليكم كاين لي غايجيه الخبر سيئ...المهم تبعوني دابا للمطعم باش نتغداو
جهاد(لي كان داخل و سمعها بدا يضحك بغرور)
ميساء(شافتو وخنزرات فيه):مالك نتا؟
جهاد(شاف فيها و رجع كيشوف فالطلاب لي كانو خارجين من الباب و خنزر فيها...طبعو صعيب
بالطبع ما دمو عربي...عصبي و كيغضب على اتفه الأسباب..و شحال من مرة ضبط راسو باش مايفلتش فيها شي دقة و لكن هي كتلعب معاه اللعب لي عمر شي واحد تجرأ يديرو حيت عارفين طبيعتو):
توقعاتي كانت صحيحة...(قال باستهزاء)نتي وحدة رخيصة!!(مشا و خلاها مصدومة من جوج جوايه و معصبة)
جالسين مجموعين البنات فالبيت ديال أيات و ميساء غادة جاية عليهم معصبة و كتعاير و تبركم تحت سنانها حتى قاطعاتها سارة..
سارة:ميساء بان ليا نتي لي غالطا ماكانش عليك تجابدي معاه..جهاد طبعو صعيب نتي ماعارفاهش..شخصيتو قريبة لخويا شوية..حتى هو متعصب بزاف...
ميساء(قاطعاتها):صافي اسارة ماتزيديش عليا
أنا مشيت لبيتي نقلب على شي كسوة للحفلة(شافو فيها بجوج فدقة وحدة)مالكم؟؟راه واخا معصبة
مانبغيش داك راس الطبل يستهزأ بيا(مشات و سدات الباب)
أيات(شافو فبعضياتهم و بداو كيضحكو حتى تفكرات أيات كلمة سارة لي قالت على خوها #متعصب
جاتها غريبة):كيفاش؟واش خوك بالصح متعصب؟؟
سارة(بأسف): اه..يوسف ولى مؤخرا عصبي كثر من القياس و ماكايتحكمش فراسو و لكن ماكنلوموش السبب كايرجع للعائلة...هما متشددين دينيا بزاف...و هادشي مخليه ديما فاقد السيطرة على راسو ماعرفتش علاش و لكن فينما يكون حفل ديني ماكيحضرش..ماكيبغي
حتى واحد يفكرو فدينو...لاحظت هاد التغير لي ولى
فيه هاد الأعوام اللخرة...مابقاش كيتفهم ليا..انغلق على راسو فعالم بوحدو كيعرف غير الأعمال
و القسوة لي ولات فيه ماكانتش من قبل....كنت كنقول غير ضغط اللقب لي مثقل عليه..و لكن لا...يوسف مشكلتو كبر من هادي ببزاف(شافت فيها)مشكلتو بغا بنت مستحيل تبادلو نفس المشاعر..
أيات(هبطات راسها و ماعجبهاش كلامها اللخر ماعرفاتش علاش):و علاش لا؟
سارة(بأسى و حزن واضح على وجهها ولكن كتحاول
تغطي عليه بابتسامة ساحرة): حيت بكل بساطة مختلفة عليه ببزاف و واخا هي تغامر و تقبل العائلة مستحيل تتقبل عندهم قوانين صارمة حنا لي
كنعانيو منهم.
أيات حدرات راسها و سكتات...مشات سارة و ماحساتش بيها فاش خرجات..استلقات على سريرها
كتسترجع كلامو...جبدات المنديل لي كانت خشاتو فجيبها...و حطاتو بين يديها كتشوف فيه...كلمة غريبة
منقوشة فيه ماميزاتهاش... بقات مزيرة عليه بيديها كتشوف فيه حتى نعسات...
#سارة
دخلات لبيتها و سدات الباب من موراها و ترسمات على وجهها ابتسامة ساحرة ملي تفكرات كلام خوها و اعترافو بلي كيبغي شي وحدة و لكن ماقالش ليها شكون و لكن هي قدرات تعرفها...نظراتو لأيات و تعاملو المختلف معاها فاضحينو...على طول الرحلة كانت شاكة و لكن دابا تأكدات..سرعان ماتمسحات ديك الابتسامة و ملامحها الفرحانة تحولات لملامح خوف و ارتباك...
نظراتها تحولات لخوف و ارتباك و هي كتفكر عائلتها لي غايعارضو حيت مقررين زواجو من آنا "بنت عمو"
و هادشي لي ماعارفش هو...
#وصل الليل و حلات عينيها بالشوية ناضت من بلاصتها و مشات للحمام و ملي خرجات لقات ميساء قدامها متأنقة و لابسا كسوة حمرة أنيقة و دايرة مايكاب صارخ على قبل الحفل طالون كحل طوييل و بحال عادتها جات غزالة...شافت فأيات لي باقا بحوايج
النعاس و بدات تحلف عليها..
مساء:مالك مازال مالبستي؟؟الناس راه هبطو غا حنا لي بقينا هنا
أيات:واخا صافي أنا غانلبس(يالاه كانت غادة تحل الباليزة حتى وقفاتها)
ميساء:على نتي عندك شي كسوة بحال البنات؟!!
أيات(كضحك):هي لا مشيتي جريتي و جبتي ليا وحدة.
خنزرات فيها و مشات بجرية لبيتها و جابت معاها كساوي و حطاتهم قدامها و أيات غير كتشوف فيها..
ميساء(حطات ليها كسوة زوينة):يالاه نوضي لبسي
أيات:لا هادي قصيرة بزاف.
ميساء(تنهدات و بدات كتقلب على وحدة أخرى..حتى
شافت أيات وحدة زوينة بالكحل طويلة و كمامها هابطين..مزيرة على الخصر ولكن مطلوقة من التحت..
هزاتها و جبدات ليها ميساء طالون فالكحل...لبساتها
و شافت راسها فالمرايا..اول مرة تلبس بحال هاكا..
لبسها ديما كيوحي على القوة و البرائة لي فيها و لكن
دابا كتبان بنت متفجرة الأنوثة و بلباسها و المايكاب
الخفيف لي دارت زاد برز جمالها...هزات ساك صغير و حطات فيه المنديل و خرجو هبطو التحت و وقفو
حدا حسام و سارة كيضحكو...كانت حفلة راقية و شبابية...حسام مشا عند ميساء وطلب منها ترقص
معاه وحتى هي ماكانتش من العاكزين و مشات معاه
وسط حلبة الرقص كيشطحو تحت نظرات جهاد لي كلها استهزاء و غضب فنفس الوقت...
دخل أوس و جايك للحفل...كانت عاطياه بظهرها و كضحك مع سارة حتى وقفو عليهم....
لباسها المحتشم ولى كايبان ليه بحالا معري..تعصب و وقف حدا سارة متحكم فأعصابو بزز و انتبه لنظرات الشباب ليها...كان واحد فيهم جاي عندها ...تمشا أوس بخطواتو اتجاهها ووقف حداها و شاف فالشخص لي كان جاي بغضب...قلب الطريق و هبط راسو رجع بلاصتو....
وقف جايك حدا سارة وطلب منها ترقص معاه استغربات منو و لكن وافقات و مشاو و بقات أيات كتشوف فيهم و ضحك طلعات راسها لقاتو كيشوف فيها و ماد ليها يدو....
شافت فيدو لي ماد و رجعات كتشوف فيه...دار ليها
إشارة براسو باش تشد فيه و مدات ليه يديها شدها
بقوة وتمشاو للحلبة...حط يد فخصرها ويد ماطلقاش ليها يديها...و على لحن متناغم كيرقصو بحالا متدربين عليها و كتلاقا أعينيهم...أيات ماكتسخاش تهبط عينيها من على عينيه لي كيجذبوها و هو كثر منها هايم فعينيها لي كيعبرو على بزاف ديال المشاعر و حاليا هي فرحانة و هادشي واضح عليها...ماعارفاش علاش!! ولكن فرحانة و حاسة بالأمان وهي معاه....
سالات الأغنية و عينيهم باقا على بعضياتهم...احساس
ماكيتوصفش كايحس به هي دابا بين يديه ماكرهش يعترف و يريح قلبو لي شوية و يفرشو.. باغي غير تحس بيه و دابا ها هو عارف بلي مرتاحة معاه و هادشي كافي بالنسبة ليه....
سالات الرقصة و سالا الحفل من بعد مدة ماكانتش قليلة نشطو و ضحكو و حتى جايك انساجم معاهم..
خرجو و كلا مشا لبيتو باش يرتاح حيت الغد ليه غاتبدا المغامرة الحقيقية..
#أوس
دخل للجناح ديالو...لقا الضوء شاعل و البيت مزين بالشمع و المنظر رومانسي بامتياز...خرجات بنت كايبان خلخال رجليها و اللباس المثير لي لابسا جات من موراه و حاوطاتو بيديها...
...:توحشتك!
أوس(بعدها عليه بعصبية وقال باشمئزاز):هادييي نتي!!
#أيات
دخلات لبيتها حيدات الطالون و جلسات كتسترجع فالرقصة ديالها معاه و كضحك حتى تفكرات المنديل لي مارجعاتش ليه ناضت فرحانة لبسات الطالون و هزات المنديل فيديها و خرجات متوجهة لغرفتو و الابتسامة مرسومة على وجهها...
#أوس
جرها و ردخها مع الأرض كيغوت..
خرجي علياااا من هنااا...آش جاابك عندي ؟؟؟.
آنا"ان ماري"(ناضت كاتمة دموعها و وقفات قدامو):علاااش؟؟
علاااش ديما صادني...باش مختلفة انا؟؟؟
أوس(بغضب):خرررجي....مانشوفكش قداامي(جرها من يديها بقوة حتى بكات و بدات كاتنثر منو و مشات وقفات قدامو...
آنا: أنا كنبغيييك ايوسف شحال من مرة خاصني نعاودها...
اعتارفت ليك شحال من مرة و نتا ديما رافضني علاااش؟اهئ..عطيني سبب واحد!!(هبطات على ركابيها كتبكي و تشهق)أهئ اهئ علاش ؟؟!!!
اوس(تعصب و ضرب ايدو مع الحيط...كيفما كان الحال كتبقا بنت عمو و ماباغيش يجرحها...دور راسو للجيهة الأخرى وقال بهدوء): آنا سمعيني...مشاعرك اتجاهي غالطة...نسايها حيت أنا مستحيل نفكر فيك بالطريقة لي كتفكري فيها..
آنا(ناضت و دموعها شلال):كتبغي شي وحدة اخرى..اهئ ياك هادا هو السبب؟!!
أوس(كيدوي معصب):آنااا...دوييت معاك
صافي خرجي عليا من حدي مازال مهدن..
آنا(معصبة):نتا راك ماعارفش العائلة..راه..
أوس(قاطعها مزير على القبضة ديالو و شدها من شعرها بقوة):نتي واقيلا مااكتفهميش بالهضرة....
جرها للباب و خرجها معاه و لاحها حتى وقفات قدامو
بعينيها لي عامرين دموع و تلاحت عليه باستو ففمو و هو كيحاول يبعدها عليه و لكن مزيرة عليه و ضفارها
مغروسين فعنقو بقوة شوقها ليه.....
واقفا بعيدة كتشوف فالمنظر لي ضرها فقلبها..ماعرفاتش علاش...
ولكن عينيها غرغرو...دورات وجهها للجيهة الأخرى مزيرة على المنديل لي فيديها....و مشات قلبات الطريق
و خرجات برا كتمشا....
جلسات فالحديقة الخاوية كتشوف فقطعة الثوب لي فيديها...
أيات(بصوت خافت):هي البنت لي كيبغي...(لاحتو)
و انا مالي يبغيها ولا تبغيه...شغلهم هاداك...(تكات على ظهر المقعد و يديها على قلبها لي كيضرب و ملامحها
لي حزينة)و لكن علاش نتا كضرب دابا...
بقات مدة على نفس الوضعية حتى سمعات شي خطوات من موراها...
شافت المنديل لي كان طايح فالأرض و عاودت هزاتو وناضت مشات جيهتو...كان عاطيها بالظهر و واقف
كيشوف فالقمرة لي مضوية ديك الليلة....
وصلات وراه و وقفات و شافت فين كايشوف...كان القمر مضوي و السماء زرقة غامقة و الريح قوية
كتضرب فيها حيت كان الليل...منظر قد ما هو زوين
قد ماكيخلع....
حس بشي واحد و دار....شاف وجه ماخافيش عليه كيشوف فالقمر و معجب بيه...ماعاقلش فين فايت ليه شايفها...
هبطات راسها و دوراتو و شافتو....عرفاتو و اول حاجة تفكرات هي الضربة و لوطو ديالها لي عوجها...خنرات
سارة(كتشوف فيها مصدومة):دابا نتي يخرج منك هادشي!!!!
ميساء:ههه لهلا يوريك..ماتحكريهاش..هادي راه لا بغات تخلي الواحد يمشي بلا حوايج..
أيات(شافت فيها):لاواه..زدتي فيه!!(مع سارة)
غاتعاونينا ياك!!!
سارة:نعاونكم و لكن واش متأكدة هو فالرحلة؟زعما يقدر يكون غير سائح..
أيات:سولت و قالو ليا المنتجع محجوز غير للجامعة
يعني غانطلب زهري مايكونش غير خدام هنا..ولا ديك
الساعة خطة الانتقام ضااااعت!!
ميساء(غادة خارجة):اوك صافي...اوا تصبحو على خير هاد الساعة!!
سارة(ناضت):خاصنا نفيقو بكري غدا..تصبحي على خير..
أيات:بسلامة..تصبحو على خير!
مشاو البنات و ناضت لبسات حوايج النعاس و توجهات لفراشها غمضات عينيها كتفكر حتى نعسات...
〰️〰️صبح الصباح و فاقو..كل و همو...مشات دوشات و لبسات دغيا...جمعات حوايجها و هزات باليزتها معاها..خرجات من بيتها و دقات على البنات و هبطو يفطرو مجموعين..
عينيها كايدورو و رجليها كتهزهز بيهم و متوترة....و لكن ماشافتوش...هبطات راسها و كملات فطورها و ماهزات راسها حتى جاو يعلموهم بلي غاينطالقو....
ناضت و جرات ميساء و سارة و زادو خلفة مع الطريق
متوجهين للحافلة...
ميساء:واش ماشفتيهش؟؟
أيات:لا..
سارة:صافي نساو علينا هاد الموضوع!!
أيات كتشوف فبلاصة وحدة و عينيها مفيكسيين..
سارة:أيات واش سمعتيني؟؟(دارو بجوج كيشوفو فين كانت كتشوف)
ميساء(مع سارة):شكون هاداك؟؟
سارة(باقا كتشوف فنفس النقطة):ماعرفتش!!
ميساء:على ماشي واقف مع خوك؟!
سارة:اه ولكن ماعرفتش شكون معاه!
أيات(شافت فيهم ورجعات شافت فيه):هو!!
أوس(ببرودة):آش كادير هنا؟
مالك: موريلي!! هاذا نتا؟ماتوقعتش تكون هنا..
أوس:جاوب.
مالك(قرب ليه):لقيتيني كنفكر فهاد السؤال...
أوس(باستهزاء قرب ليه و عينيه نظراتهم ثاقبة ماكايتحركوش): فينما مشيت نلقاك تابعني...
موريلي دايرة فيك هاد الحالة كاملة..
مالك(باستهزاء):الرحلة جامعية اموريلي...إذن شنو
كادير هنا..هاذا سؤال موجه ليك ماشي ليا...(كايدوي و عينيه على أوس)غاتكون رحلة مثيرة للإهتمام!!
أوس(ملامحو ماتبدلوش وقال بصوت رجولي مهدن و مثير للاستهزاء):مثير للإهتمام...قول جيتي تبرد
على راسك حيت انت فالمرتبة الثانية..
مالك(تفكر انهيار الاسهم ديالو ملي دخلات شركة أوس
و مارجع ماكانتو فأمريكا من بعد مدة طويلة..):
أنا ماكنمولش الصهيونيين باش يطلعو الأسهم...
اوس(ماخلاش ليه الوقت فاش يكمل):كايزيد ظني
بيك يخيب الجابري...بالطبع نتا غير زعيم المافيا الأمريكية..نتا ماكتمولش (قرب ليه)نتا كتقتل..(مشا
و خلا مالك لي ماتصدمش من كلامو...دور وجهو بابتسامة لي ماكتعبر على والو من غير الإستهزاء و مشا)
أسرار هاد العائلة كاتزيد تصدمو...يقدر يكون عدو أوس و منافسو و لكن من المستحيل يكون عدو عائلة مسيطرة على العالم و حاطاه فكف يديها...
#أيات
طلعو للحافلة و جلسات فبلاصتها كتشوف من الشرجم حتى حسات بشي واحد جلس حداها...شافت فيه
و دورات راسها...
أوس(ماكايشوفش فيها):صباح الخير.
أيات(تفكرات المنظر لي شافتو فيه و بقات على نفس
وضعيتها و قالت بصوت خافت و مخنوق):صباح الخير.
أوس(نبرة صوتها المختلفة عرف من خلالها شي حاجة مقلقاها...شاف فيها):واقعة شي حاجة(جر ليها يديها لي باقي باين عليهم آثار الجرح)باقا كضرك؟
أيات كتشوف فيه....و عينيها على عينيه لي باين عليهم السهر ودابا الخوف و القلق...دورات راسها و شافت نفس البنت لي كانت معاه البارح طالعة للحافلة..
جرات يديها بغضب و تقادات فبلاصتها مادواتش معاه...
.....
وصلو من بعد مسافة الطريق الطوييلة و مناظر الجبال الشاهقة مقابلة معاهم...كلشي
هبط و ووقفو قدام هضبة كبيرة داير بيها الجبال و الشلالات...
محمد(وقف قدامهم وشافهم معجبين بهاد المنظر و كل واحد فالطلاب حال فمو و كايدور فعينيه):
بلاصة التخييم لهيه..كل واحد يختار البلاصة لي بغا و نصبو الخيام ديالكم...ميساء جمد ليها الما فالركابي ملي شافت غابة كبيرة مابعيداش عليهم و مشات
عند المؤطر كادوي معاه و تشكى وهو مامسوقش ليها..
كانت واقفة حتى شافت مالك خارج من لوطو ديالو و متوجه للمخيم...مشات بالزربة وقفات حدا سكينة باغا تدوي و ماعرفات منين تبدا...
سكينة:هه آش واقع؟!
أيات(كتدور عينيها):بغيت غير نسولك واش كاينة شي صيدلية قريبة من هنا؟؟
سكينة(كضحك عليها):يهديك الله ا أيات راحنا وسط الغابة...
أيات(تنهدات و ساطت بغضب و قالت بالشوية ): الحمقة ديال ميساء عولت لك بكري..
سكينة: أشنو بغيتي من تما؟؟
أيات(كتدور فعينيها):احم لا والو غير واحد الدوا...
سكينة: لاكنتي محتاجاه ضروري..نقدر نوصي شي واحد...
أيات(زربات عليها):لا..لا..صافي..شكرا ماشي ضروري
(مشات شداتها مشية وحدة عند ميساء معصبة..لقاتها
كادور بجنابها و خايفة و قالت و هي كتغوت):ميسااااء...(كلشي دار عندها و ميساء غاكتشوف فيها..)تي فيناهوا الدوا ؟؟؟
ميساء:اينا دوا؟؟
أيات(دورات راسها و شافت كلشي مقابلهم...قربات ليها و هدرات بالشوية): ماتجهلينيش...فيناهوا دوا الحكة؟!!
أيات(جعرات عليها و كانت غاتلاح تنتفها كون ما جات سارة و جراتها):ياك وصيتك تجيبيه قبل مانجيو...دابا آش غاندير أنا؟!!
سارة(كضحك):صافي نساي هاد الموضوع و خلينا مستمتعين بهاد الرحلة...
أيات ساطت بغضب و دورات راسها...
➿➿
الخيام تنصبات و تغداو و كل واحد و فاش مشغول..
إلا هي لي حاطة رجليها و كتلعب بيهم فالما ديال البحيرة لي حداهم...ساهية كتشوف قدامها و ماحساتش فالشخص لي جا و جلس حداها بلاما يدوي
بقات مدة جالسة ماتحركاتش من بلاصتها كتستمتع
بالطبيعة لي دايرة بيها حتى عيات و بغات تمشي
عاد دارت و انتابهات ليه...ناضت و كانت غادة حتى وقفها...
أوس(ناض تبعها و شدها من يديها باش توقف):ثاني مرة كتتهربي مني..شنو واقع؟.
أيات(دارت عندو و نثرات يديها بالشوية): ماواقع والو!!
غير هو هدرتي قليلة مع الناس لي ماكنعرفش...(مشات
و بقا هو واقف راسم على وجهو ابتسامة حسرة لي
كتعبر على لي حاس بيه...
رجعات لبلاصة التخييم و عقلها غايب...ماعرفاتش علاش تعصبات عليه...هي براسها حايرة فتصرفاتها الجديدة عليها...
كان واحد من المؤطرين جامعهم و كايدوي معاهم...مشات جيهتهم و وقفات حداهم مرة تسمع ليه
مرة عقلها يسرح فالتفكير....
➿➿
واقف بعيد عليهم حتى جات عينو على نفس البنت...
ابتسم غير بوحدو و كان غايمشي عندها حتى جات عندو آن ماري مبتسمة و وقفات قدامو...
آنا(بدون مقدمات):خاصنا نهدرو!!
مالك(شاف فيها و ابتسم باستهزاء):و شكون نتي؟
آنا(بادلاتو نفس الابتسامة):أنا هي لي غانعاونك تدمروا!!(شافت فأوس لي كان جاي من البحيرة و رجعات كتشوف فمالك)
مالك(باستهزاء):لي عارف هو بنت عمو كتبغيه( شاف فيها)إذن علاش غاتبغي تدمرو؟؟
آنا(باستفهام): باش عرفتيني؟؟
مالك(ماجاوبهاش)
آنا(كتكمل كلامها و كتشوف فأوس):حيت كنبغيه..ضروري ندمروا..
مالك(شاف فيها باستهزاء و ماجاوبهاش)
➿➿
دخلو للغابة كايتمشاو و مرة مرة يوقفو يجمعو حطب صغير للعافية لي بغاو يشعلو بالليل... هما كيهدرو و ميساء غير كتسمع ليهم و تدور بجنابها خايفة...سالاو و كانو غادين حتى جات عينها على آخر حاجة كانت متوقعاها ..ابتسمات و مشات لقطات كمشة من واحد النبتة...و داتها معاها...سبقوها البنات وهي تبعاتهم كضحك...غير وصلو و هي تجي عينيها نيشان على مالك لي واقف مع آنا....وقفات مع البنات حتى شافت
مالك مشا و تبعاتو...دخل لواحد من الأكواخ لي كانت بعيدة على المخيم...ابتسمات و وقفات بعيدة كتسناه يخرج و قلبها كيزدح بالخلعة و لكن معولة تخرجها منو هاد النهار...
خرج و التيلي فوذنيه كيهدر و يلبس الجاكيط ديال سبور..
ضحكات بشر و دخلات بدات كتدور...الكوخ كايبان صغير من برا و لكن كبير من الداخل...شافت بيت صغير و دخلت ليه...لقات جاكيط محطوطة فوق السرير...دارت قفاز و جبدات الوراق ديال النبتة و حكاتهم فيها و كضحك....سالات و رجعاتها بلاصتها و
خرجات بحال الشفارة من تما...غادة و تلعب برجليها
فالطريق و تضحك....
#أوس
كان واقف مع جايك وجهاد لي لاحظ عليه القلق
و لكن مادواش معاه....مشا جايك و بقا واقف مع جهاد لي مراقب ملامح أوس كيفاش مبدلين..
جهاد:هادشي لي كادير فيه ماغايوصلك فين..
اوس هز راسو و شاف فيه باستفهام كيتسناه يكمل..
جهاد: الحب اقل حاجة نقدر نقولها على داكشي لي كتحس بيه من جيهة هاد البنت...و انت مادرتي حتى حاجة تخليك محطم
كتبغيها..اه...و لكن إلا ماعتارفتيش ليها غاتبقا فبلاصتك و عمرها تحس بيك...
اوس(قاطعو): كاتظن جاتني صعيبة لهاد الدرجة نعترف ليها؟؟(باستهزاء) عائلة يهودية حاكمة متعصبة و بنت مسلمة...شكون كاظن غايتعذب؟؟
جهاد(كايشوف فيه): و الوريث أوامرو كتخطى العائلة..
ما عندهم مايديرو!!!
اوس(دور راسو و قال باستهزاء):و لكن القوانين فوق من الوريث...
جهاد:يوسف..من شحال بغيت نسولك و نتا خاصك تجاوب راسك على هادشي...
اوس(شاف فيه و عرف السؤال لي غادي يسولو هو براسو الجواب ديالو باقي ماعارفوش...)
جهاد(شاف فيه):تقدر نتا تبدل ديانتك على قبلها؟؟
أوس شاف فيه بملامح ممحية و ساد الصمت بيناتهم لمدة طويلة....
بجوجهم كايشوفو فغروب الشمس لي
هابطا كتعلن على انتهاء النهار و لكن احداثو باقا فبدايتها مع الأمسية لي دايرين بالليل...
واقف كيتأمل الغروب بتمعن...و لكن تفكيرو كامل مع هاد الجواب لي من نهار شافها و هو كل نهار و كل دقيقة شاغل بالو...تغيير ديانتو كيعني تخليه على لقبو كوريث و ثروتو كاملة كتمشي لفرد من العائلة و كايتولى اللقب....يوسف موريلي بتخليه على ديانتو غايتخلى على كل ماكيملك فحياتو..
تقلبات موازين حياتو و و أصبح هدفو يخليها تقرب ليه و تبغيه على شخصو وماتهتمش لديانتو...عارف فصميمو استحالة مهمتو هي بنت إيمانها بخالقها قوي
و مستحيل يهزو شي واحد و ماغاتعصاش شريعتو واخا تكون تبغيه...مواقف كثيرة خلال مراقبتو ليها خلاتو يتعرف عليها و يتألم على الحقيقة المرة لي
صبح عايش فيها....
➿➿
كلشي مجموع على نار دافية شاعلة وسط منهم...
كيهضرو و يلعبو واخا الريح و البرد و لكن النار مدفياهم...
ميساء جالس حداها حسام كيهضر و هي مامعاهش..
أيات جالسة مع سارة و كادوي معاها وهي مرة مرة
تفكر الفعلة لي دارت و تضحك غير بوحدها...حتى شافتو جاي و نفس الجاكيط هازها فيدو...جلس معاهم كيشوف فيها عاقد غوباشتو و هي غير كتدور عينيها و مرة مرة تلوح عينيها على الجاكيطة لي هاز فيديه...
➿➿
جات آنا و أوس فنفس الوقت...الضحكة مامفارقاهاش و كاتبان مثيرة فلباسها لي شبه معري...
أوس جلس فالارض حدا أيات...تصدمات وبدات كتبعد و هو يزيد يقرب عصبها و ناضت جمعت الوقفة
و مشات بدلات بلاصتها و ماجات غير حدا مالك لي غير مخنزر و ماعاجبو حال وهي قالت ليه ماكتعرف والو فالتخنزير..
ناض غايتبعها حتى جات آنا وقفاتو و شداتو من يديه و طلبات منو يجلس حداها..
أوس(نثر يديه بغضب و شاف فيها):علاش باقا هنا؟؟
آنا(هبطات راسها بحزن):أنا عارفاك ماكتبغينيش و لكن
على أي حال أنا مايمكنش ليا ننساك بين ليلة و نهار...
أنا هنا غير باش ننسا...غير جلس معانا دابا..سارة و جايك معانا...شحال ماتجمعنا هاكا...
أوس شاف فيها و ساط و مشا جلس على أعصابو.....
جلسو معاهم المؤطرين و كلشي تجمع دابا..
جايك:اوك بما أن كلشي مجموع دابا غادي نلعبو!!
كلشي بدا كيضحك و هو غير كيشوف فيهم...نغزاتو
سارة و قالت تحت سنانها: واش حنا دراري صغار آش
من لعب؟!!
جايك(شاف فيهم):حقيقة أو تحدي!! القوانين معروفة..آش قلتو؟
وافقو و قربو كثر من بعضهم و جابو ليهم قرعة داروها وسطهم....دورها جايك للمرة الأولى...جات فجهاد و سارة..بداو كيضحكو و جايك تعصب و دوا معاها فوذنيها:غاتجمعي فمك و لا تبداي تحسبي فسنانك.
سارة(دارت عندو و على غير عادتها..ماتعصباتش منو..و بدات كضحك)
جهاد(مع سارة):حقيقة ولا جرأة؟!!
سارة:حقيقة.
جهاد:واخا اوا قولي واش كتبغي شي واحد؟؟
سارة:لا(جاوباتو بكل برودة و لكن ماحاساش بالنار لي شعلات فجايك ملي سمعها)
دورها جهاد للمرة الثانية و ما جات غير فيه و فميساء...ساط و كان غايعاود يدورها حتى سولاتو...
ميساء(باستهزاء):واش ماعارفش قانون اللعبة؟
جهاد:متأكدة ماغاتندميش؟؟(شافت فيه بتحدي)
واخا...اوا حقيقة ولا جرأة؟
ميساء(كضحك):جرأة..
جهاد(شاف فيها باستهزاء و ضحك..ناض من بلاصتو و وقف قدامهم):المهم الآنسة اختارت جرأة...(شاف فميساء)واش تجرأي اآنسة تهزي وحدة من أخطر الحيوانات بيديك؟
ميساء(شافت فيه و بلعات ريقها)
جهاد(باستهزاء):اااه...لا؟؟
ميساء:ا..اا..اااه..
دخل واحد هاز حية كبييرة ملوية ليه على عنقو و راسها فيديه...هو عارفها كتخاف من هادشي و الريح لي جا يهزها...المهم عندو هو يخرجها منها.
ميساء(بزز كتدوي بالخلعة لي طلعات معاها):ك..كضحك عليااا!!
جهاد(دار ليه إشارة بيديه باش يجيبها ليه...خداها من عندو عارف يتعامل معاها و هي غير كتشوف فيه و شاداها الغبينة...قرب ليها و ناضت من بلاصتها كتقفقف
و وقف قدامها):كانبان ليك كنضحك؟؟يالاه نفذي التحدي!!(بعدات منو و رجعات باللور و هو كيضحك عليها)شنو؟واش خفتي؟؟
ميساء(دافعة الجبهة واخا الهدرة بزز باش كتخرج ليها):لا..لا غير مامستتعداش!!
جهاد(ضحك)مامستعداش؟!!(قرب ليها و غمزها)علاش مالي شنو باغي ندير ليك!!
ميساء حبسات فبلاصتها...تزنكات و خرجات عينيها...استغل وقت سهوتها و حطها فوق عنقها وهي عاد فاقت و لكن كثرة الصدمة مخلياها واقفة فبلاصتها
ماكتحركش...كيشوف فيها و يستهزأ بيها بنظراتو ..كلهم كيشوفو فيهم مافاهمينش هاد العداوة بالأخص أيات لي ماعاودات ليها والو...
ميساء(بدات كتهبط عينيها و تشوف فيها وهي تطلق غوتة تنوض الميت من قبرو):واااااااا عتقوووووووو الروح اعباااااد الله باغي يقتلني..وااا الحبس(لاحتها
عليه و هربات...و كلشي بدا يضحك...ناضت سارة بغات تبعها وهو يوقفها جهاد ومشا تبعها و الضحكة
مابغاتش تحبس ليه)
دورو القرعة وكل واحد جات فيه و معامن جا...إلا أيات لي ماتسالت ماسولات حتى قالت تهنيت عاد جا
دورها معاه...
#جهاد
تبعها حتى لقاها داخلة للغابة و واقفة على جذع شجرة كتنهج وهازة كفوفها للسماء تعاير فيه و تدعي عليه..
ميساء: سير يا لي كان سباب بغيت ليك شي لفعة تلوى
عليك ماطلقك..بغيتك ا(حبسات)شناهيا سميتو؟؟
دابا كي غاندير ندعي فيه و حتى السمية ماعارفاهاش..
باقا ماكملاتش كلامها حتى سمعات شي صوت من وراها قال: جهاد
ميساء(معصبة و مادارتش عندو)
جهاد(كيضحك عليها):اوا صافي المرة الجاية نجيب
ليك عقرب إلا ماكايعجبوكش الزواحف..
ميساء(حلات عينيها على جهدهم و دارت عندو):
نتا خرج ليها نيشان وقول باغي تقتلني بالخلعة!!
جهاد قرب ليها كيشوف فشعرها..سكتات و بدات كترجع باللور جرها من يديها حتى تساطحات معاه و حيد ليها شي حاجة من فوق شعرها...هبط عينيه لقاها
كتشوف فيه و ساهية..
جهاد(ضحك و شاف فيها): زوين و بوكوص..عارف راسي...
ميساء(صغرات عينيها كتشوف فيه ضربات فيه و زادت)
أوس(كيشوف فيها):حقيقة ولا جرأة.
أيات(كتحاول تفادى أسئلتو):جرأة!!
أوس(باستهزاء..شاف فيها و نطق):تتجرأي تقبلي حب واحد من غير ديانتك؟
أيات(شافت فيه بصدمة..حاولات ما أمكن تفادى نظراتو ليها لي ماقدراتش تفسرهم..و لكن ماقدراتش...كتشوف فيهم شوق...ترجي.. غضب... مستحيل شي واحد يقدر يفسر تصرفاتو لي كيتبدلو فور ما كيكون معاها):و لكن هادا ماشي تحدي!! و قانون اللعبة راه..
آنا(قاطعاتها كتشوف فيها من راسها لرجليها):
القوانين تخلقات باش لي بحالنا يخالفوها!! اوا جاوبي...
أيات(شافت فيها و قالت باستهزاء):و شكون نتوما؟؟
آنا( كانت غاتجاوبها و هي تقاطعها)
أيات: الحقيقة هي نتوما بحالكم بحال أي واحد هنا و غاتكوني غالطة إلا شفتي العكس...و شكون نتي بعدا؟
آنا(ناضت ووقفات قدامها و كتهدر بغرور):فين عمر شي واحد قدر يهدر مع فرد من عائلتنا بهاد الطريقة!!
أيات(ملي سمعات عائلة..عرفاتها كتهدر على موريلي..ناضت و وقفات قدامها..
كان جالس مقابل معاها كارز على قبضة يدو بملامح باردة ماباغيش يتهور عارف مالك كيتسنى غير الفرصة فين يخليه يغلط...):تقدري تكوني شكون مابغيتي تكوني.. كاتعتبري بحال أي واحد كاين هنا و ماكاينش فرق...
آنا:فهادي نتي غالطة..أنا ماكنتعتبرش بحال كلشي...
أيات ابتسمت باستهزاء و عرفات مايمكنش ليها تتناقش مع وحدة مامستعداش تسمع لرأي آخر و مقتنعة كليا بوجهة نظرها الخاطئة...
ناض و وقف حداهم..جر آنا من يديها و عينو على أيات لي حتى هي ماباخلاش عليه بنظراتها ولكن نظرات غاضبة...جرها و كان غايمشي حتى وقفو صوتها): ماسمعتيش جوابي على سؤالك!!
وقف فبلاصتو و مادارش..
كملات:أنا بنت عربية مسلمة..كأي بنت إيمانها غالب عليها مستحيل تقبل ولا تحط احتمال أنها تزوج بواحد من غير ديانتها.. هادا جوابي
واقف على الحركة و جامد فبلاصتو زير بيديه على يد آنا لي شد فيها بقووة كثر...
بكثرة ماكانت عائلتو متعصبة..هو كان كثر...معروف بشخصيتو الطاغية و الكارهة للمسلمين...مجموعة شركات العائلة
هادفة لتحطيم العرب و ديانتهم و هادشي بطريقة غير مباشرة كتخلي العائلة مسيطرة...طريقة تفكير أفراد عائلة موريلي مختلفة على اليهود إلا فحاجة وحدة
الدين و النسب...ضد التبني...ولا زواج مختلط الديانات
محرمات العائلة كثيرة..ارتكبتيها..ماكايناش فرصة ثانية...
كتحذف من شجرة العائلة بحالا عمرك كنتي أو تختار الموت..
كيفضلو الموت بنسب العائلة المقدس بالنسبة ليهم ولا يعيشو بلا بيه...
➿➿
كتمشا بالشوية و تشوف فمناظر خلابة مدوراها محاوطة كتافها بيديها و كتحس بالبرد و الريح كيطير خصلات من شعرها...كتفكر فجوابها ليه هاد الليلة واش كان فمحلو؟
وقف عليها هاز تجاكيطتو فيديه و ساد الصمت بيناتهم لمدة طويلة حتى نطق هو..
مالك: آش كاديري هنا فهاد الليل؟
أيات(مخنزرة):و نتا آش كادير هنا؟ ياكما تابعني؟
مالك(باستهزاء):وعلاش غانتبعك؟(شافها كتقفقف بالبرد و يديها على كتافها..هز تجاكيطتو وكان غايدورها ليها على كتافها وهي حانية راسها ماكتشوفش فيه حتى جا هو وقف بيناتهم مزير على
يديه و عروق جسمو بارزين...
كايشوفو فبعضياتهم...مالك بنظراتو لي كتسفزو و أوس بنظراتو لي كلها غيرة فوق غيرررة و عينيه خارجة منهم العافية..
أيات انتابهات لأوس لي جا و بقات كتشوف فيه
مالك: موريلي كتمشا بوحدك فالليل...
أوس(كيشوف فيه):و نتا كانشوف معاك رفقة
(شاف فأيات لي حنات راسها و دورات وجهها..كيدوي و يشوف فمالك)أيات.. دخلي راه سارة كتقلب عليك
أيات أول مرة تسمعو عيط عليها سميتها بقات غير واقفة و كتشوف فيه حتى قفزها بغواتو
أوس:دخلييييييي...
أيات شافت فيه بغضب ضربات فيه و زادت...تبعها مالك بنظراتو حتى اختافات و ماحس براسو حتى كان طايح فالأرض و أوس لي وقف قدامو و رخف على قبضتو و صدرو كيطلع و ينزل بالعصب..ناض معصب و عضلاتو خارجين و عاود ليه الضربة لي ماحركاتوش
من بلاصتو...شنق عليه أوس و بعينيه الحمرين و صوتو لي كيزعزع..
السبب علاش جاي عارفو و غاتمشي من هنا هاااد الليلة ولا تشوف وجهي لي عمر شي حد شافو سمعتيييي..
نثر ليه يدو بقوة و قاد قاميجتو بكل برود و بنبرتو لي كلها استهزاء: اشمن سبب اموريلي...(شاف فيه) إلا ماكانتش فخبارك أنا دابا شريكك فالجامعة...
شاف فيه أوس بغضب و كايتسناه يكمل!!!
مالك : بالطمع كلشي يمكن اموريلي!!
أوس عرفو داوي على عمو و ماتصدمش منو...شاف فيه و مشا...
.. مسح الدم لي دايز من فمو و مشا حتى و على وجهو ملامح سخرية...عندو شكوك و لأول مرة
عندما يعشق الوريث الجزء الرابع
محتوى القصة
التنقل بين الأجزاء