شريك القرن 21 الجزء 12

كانت نقطة لصالحهم.. وجاب ليهم ربي حل من عندوو هوما لي كانو يفكرو فاش جبدو لموضووع لردة فعلها وواش تبغي يديوها معاهم.. مهم شائت الأقدار وجرت الرياح بما تشتتهي سفنهم.. جمعو حتى هوما حوايجهم وخرجوو مخليين من موراهم مصطفى وبشرى مع ليوون أما حتى من فاتي رجعاات هي ورجلها وولادها لسعيدية حيت مابقالعاش بزااف ترجع فحالها.. 

شدو طريق أنگاد ديرييكت.. حطووهم ودخلو معاهم غا حدا البااب حتى طمن منصف قلبو عليهم كيوصي ويعااود فسيدوو على كبدتوو.. حتى سالى وداار عندها تاني كيعاود ليها نفس السينتة ديال ربعياام.. يبوس فراسها ويديها وحنااكها ويعاود ماساخيش تبعد عليه.. جاتو صعيبة وهي كثر.. على شحال عااد جر زينب بزز وطلعوو لطموبيل شدو طرييق افران.. 

[نهاية لفلاش باك ⏯]

گالسة.. جامعة رجليها عندها بيدها بجووج.. وحاطة دقنها على ركابيها.. حداها سبرديلتها.. الشمس لي مني جاات لقاتها فموضها فاش كتكون وقيتة العاصر بداات كتغرب وتنسااحب شوية بشوية.. وهي باقا كتفكر فمنصف وفطريقها لهنا.. كتراجع فالأحدات وكتهبط فيهم دم.. من جيهة توحشات بابااعا .. وماكرهاتش كون بقاات غير حدااه.. ومن جيها خرى أي جيسط حز فيها وكتماتوو صرفااتو دمووع..

عينيها تنفخو بكثرة لبكى.. ولا هوما بغاو يسالييو ولا ينشفوو.. 

لفت انتباهها تليفونها لي كيصوني للمرة الألف بعد المئة.. طلات عليه لقاتوو منصف نيت باغي يطمن.. وبااش غتطمنوو؟ سدات التيليفوون وجمعاتو عندها عارفة راسها الى مشات حتى جوباتو بداك الصوت الباكي ماغتجي فين تقطع حتى تلقاه حداهاا..

حبس وعاود صووونا تاني.. ماعاودااتش شاافت جيهتوو.. خلاتوو كاسر دنيا بصوتوو.. أصلا كانو ناس قلال حداهاا مباعديين وأغلبيتهم گور.. يعني شي مامسوق لشي وكولا مديها فالجيهة لي ضارااه.. 

عكس لمرة لي قبل هاد المرة كاات أنييير لي كيعيط.. ولي ماشافهاااش أصلا فاش دااز من حداهاا ولا باانت ليه.. كاانت أصلا على عينو ضباابة وكيقلب غا كي يبرد حر شمتة الدقة لي كلاها فوجهوو.. وعند بالو أصلا لبنت باقاا كتتفرج من بلاصتها.. ولا گاع جات لعندوو غيلقاها فلڤستيير.. باش عرف الدرااري غيتحيمروو ويتلاخو عندوو منزلينها معاااهم؟

فيوونا (شافت فيها وعاوداات شافت فيه زايدة فلا دووز كتتبغجن هامها هاد السااعة غا يگول ليها اه): وا عافاااك.. عفاااك.. عفااك.. 

زينب (بنفس الوتيرة): واااپرييز (please بلعاني كتگول ليها هكاك) 

منصف (سد ودنيه): كون غا صرفتو هاد لغوات بوسان 😏 

وقفات فيونا على ركابيها كتبوس لييه راسو وزينب كتبوس فكتفو حتى طيبوه.. 

منصف (ولا باغي غا يتفك): واهياناري صافي.. سيري راه لبيي ديال الطيارة ديالك نتي وسيدو فوق الطابل دونوي.. خلاهم ليكم أنير قبل ما يمشي.. 

فيونا (بغات تنقز تجيبهم من الفرحة يالله غتتحرك وستوعبات شگال فاللخر): مشى؟ فين؟

منصف: الداخلة.. فين غيمشي؟

فيونا: ياك حتال غدا ولا بعدوو؟

منصف: مشاو مع السبعة.. عيطو ليهم على شي وراق صدقو شادين أول طيارة لقااو.. 

فيونا (باستغراب): وكيدار قطع لينا؟

منصف: لوقيتة لي كان كيقلب على فاش يمشيو عيط دوا معاياا.. فاش عطيتو الاوكي قضى غرض وجا دوزووهم ليا بالواقف وزادوو..

فيونا (ناضت غادية لبيت): بففف.. غيكون حتى سفيان مشى معاهم.. 

مشااات جابت دووك لي تيكي كتقلب فيهم وتعااود متحمسة وفرحانة فنفس الوقت.. منها غتسافر بوحدها ولأول مرة.. وبخبار باهاا.. منها غتشووف مدينة جديدة.. والداااخلة گااع أبعد مايكون.. عمرها توقعاات توصلها ولا تشووفها.. ومنها غتتفرج فالكومبا دأنيير مباااشرة😻.. 

دوزاات ديك ربعياام لي بقاات گاملة غا فجميع حوايجها.. مني طلعاات لبيتها نييت حلاات شانطتها فالأرض ولات دوور وتحط فييها.. حتى جا نهاار سفرهم.. وسفر منصف وزينب نييت لي كانو مخططين ليه كأياام عسل لي فوتوو من مور عرسهم أما شهر أكيد ماغيقدروش يكملووه لما كيتسناهم.. 

جاتهم تسافرة فيونا لداخلة كي السمن.. سيلات ليهم الشوكة بلا دم.. حيت باشغاالها بسفرها ماتسوقاش ليهم يمشييو ولا يگلسوو.. حماسها نساها كلشي رغم أن زينب فاش كانت كتطلب معاها طلباات بصفاء نية گاعما كانت عارفة بقضية التيكي ومشات من بالها حتى هضرت منصف على السفر.. 

حتى قرب لبلاصة منين غيدخل وداار كيشووف واش باقة فلبلاصة لي بانت ليه فيها فاش كاان فلاكااج مابان ليه حتى حد فيهم.. كمل طريقوو وسط يوسف وريم لي حكمااتو جارااه موراهاا من بعد ما شنقاات عليه من يدييه وجراااتو دغياا على فيونا.. خوفاا عليها منوو.. ومع وسط الزحاام ماكان عندها كي دير تجرو وتعاود تدوور عندها تشير ليها.. زيادة على الجمعوور لي تگج كاامل وحتى الى جات تغوت ولا تدوي.. الصحافة اڤري ويير.. وما غتسمعهااش أصلا.. وكون زعما بغات طير عندها أكيد ماغتقدش توصلها قبل ما تقيسوو ويصدقوو فشي فضيحة تاني وتصدق جاية فلبنت شي دقة بحال لي فايت عاطيها ومفعفع ليها لعظاام من بلاصتهم..

فوحدة من كومباتوو اللولة فاش يالله بدى يشارك فالبطولة الوطنية.. كان باقي أنيير كيخرج عن طوعوو وماكيتحكمش فانقلابااتو.. بدا يتأقلم مع مشكيلتو شوية ولكن انفعالاتوو باقا حاادة وفيها نوع من العنف.. 

يالله سالا الماتش نازل راجع منين جا.. دمو سخووون كيفوور.. وجهو نازل بالدم.. حتى تماات جاية ريم عندو فرحاانة باغاا تعنقوو.. مع قاستوو باغا يتلفت عندها مع داار بدقتوو مطاكي على راسو.. جاب الله ما علاش يدييه وجابها ليها فراسها أما كوون شلها.. جاتها الصگعة فلكتف هرسوو لجد بووها.. ردة فعلوو كانت لا ارادية.. ماوعى على راسو حتى طاحت الأرض.. هزوها يتجارااو بيها والسبيطاار نيت لي دارو ليها فيه الگبس ضمضو لييه فيه جرووحو ونقااو ليه وجهوو.. وأرااك لتأنيب الضميير.. 

فاش شاافت فيوناا غادية عندو ماطاح ليها فبالها غا دااك السيناريوو ورجع ليها لفيلم.. صدقاات جارة أقرب واحد فيهم باش مايوقع نفس الشي مرة خرى بلا قصدوو.. هي بعدا راها بنت خالتو ماهما كاان غتصبر أما فيونا أش دنبها مسكينة حتى تولي مشخشخة.. وياليتها ماتدخلاات.. حسن نيتها خرجاتهم فطرقاان مقطووعة.. ماعارفاش أنو أنير يتمس فعويناتو مايتمس فلقليب ديالوو عااد يأديها هو.. مستحيل.. وأصلا سبق لفيونا كانت معااه وهو صااعر نهاار أسوااق السلام فاش خلا داربوو لحماار لي تبسل عليها وعاادي تجاوز ديك القضية من زماان وقدر يتغلب على نفسوو ويتحكم فيها من نهاار عطب رييم..

وصل جيهة البااب كيقلب بعينييه.. 

فاات لبااب داخل كيقلب بعينييه عليهم مالقى حتى حد داار عند لخرين مع حلة سفياان لبااب.. عنقوو كيبارك ليه فرحاان لوقت لي كيتسناها فيه تبان من مورااه ساعة والوو.. 

أنير: فدوى؟

سفيان: أهوما جايين..

أنير (دازو شي دقايق وعاود دوى عاقد حجبانو): فينهم؟

سفيان (دار باستغراب): كانت ورايا هي وسيدو.. 

أنير (زاد خطوات جيهة الباب) 

يوسف (وقفو بصوتوو): خليك.. أنا نشوف.. 

خرج سفيان يشوف فينهم.. دخل أنير دوش دغيا.. ماكاملاش تلاتة الدقاايق وخرج لابس سروال دالسورڤيط وتيشوورط.. 

أنير (بنفاد صبر): وشتا؟ عاد ماولى؟ (مزال مارجع)

سفيان: مزال.. 

أنير (كيقلب): تيليفوني فين راه؟

ريم (مداتو ليه كان محطوط حداها): هاهو.. 

أنير (غير شعلوو وهو يبدا يصوني فيدييه أبيل مور لخرى)

يوسف (تم راجع): مابانوليش.. قلبت حتى على برى ووالو.. 

أنير (دار عند سفيان بقلق ماد ليه يديه): تيليفونك..

عطاه ليه.. دوز أنير نمرة فيونا هي اللولة ماجاوباتووش.. تبعها سيدوو لي غير صونا عليه جاوبوو.. 

أنير (غير دازت لا ليين هضر): فين راكم؟

سيدو (ماعارف أش يديه خايف مايلقاهاش فااش يوصل): راجع لاوطيل؟

أنير: علااش مستنيتوش؟

سيدو: ماعرفتش مال فدوى..

أنير: أراهالي.. صونيتلها ماجاوباتنيش.. 

سيدو (كيصووط بتوتر): حتى أني ماكتجاوبنيش؟

أنير (بداو علامات الخوف كيترسنو على وجهو): وشتا؟ ماراهاش معاك؟ 

سيدو: لا.. (سكت شوية وزااد) ماعرفتش وشتا بيها.. حتى بغات تمشي.. يالله كنسولها عطاتني بالظهر وزات.. ماجيت فين نوصلها مع الزحام لقيت الطاكسي لي ركباتو مشا.. 

قطع بلا مايزيد معاه الهضرة.. لاح عليه كابيتشووه ودار قبوو وجا خاارج.. متجاهل أسئلتهم على شوااقع وشنو طرى؟

يوسف (مني ماردش عليه وقفو بيديه قبل مايفوت لباب): ريض أصاحبي الدعوة مگلووبة برى.. ووجهك شو كي راه داير..

أنير (دار مخنزر فيه فحالا هو سبابها): ماهمنيش.. 

جر يديه منو وخارج مهبط راسو باش مايوقفووهش الصحاافة ولكن معامن مع المغاربة دياولنا؟ قمة التبرگيك يقلعووك وخا دير الخيماار.. تبعووه كيتجارااه ما ان لمحاات وحدة فيهم وغوتاات بسميتوو.. سارع خطوااتو هو بدوروو حتى تخطااهم دغياا وسد عليه فالطموبييل وزااد ألف مطرقة كتضرب فراسوو..

عفط بسرعة جنوونية لحق على سيدوو لاوطييل وهو باقي كيعيط ليها ويعاود.. حتى وصل ودخل لقااه گالس حدى الشومبغ ديالها هي وريم بخيبة أمل كيتسنى فيه.. 

سيدو (غير وقف نطق ماعارف اش يدير): ماراهااش هنا.. 

أنير (زااد حقد وعطاه بظهروو غادي لريسبسيوو)

سيدو: ريض نروح معاك.. 

أنير (جاوبو بلا مايدور): خليك هنا لاتولي (لترجع) 

بقى سيدو وقف كيشوف فييه حتى غبر من قداامو عاد تم غادي جااي كيخمم كيرد السينة لعلو يفهم أش وقع وأش خلاها دير هكااك.. أكيد شي حاجة ضراتها وماقادااش دير ردة فعل أما كون كسرات دنيا هو لي عارفها وحافض طبعها.. 

نص سااعة من مورااه وصل سفياان ويوسف وريم.. دار ليه محضر..

أما أخضرنا الحبيب.. رجع لطموبيلتوو تليفونوو فيدييه.. جرب حتى عيا وبرونشا المشقووف مع الزمرة دلحدييدة مشعود.. خدم google Maps كيقلب على بلايص يطل على لبحورة هوما اللولين لتكون باغاا يضرب فيها لبرد ويلقاها فشي واحد فيهم.. عااد يدوز لحاجة خرى.. وهو كيدوور فشوارع الدااخلة فطريق لبلايص لي طالعين ليه وهو حااضي مع الطرييق وجنابها لا تبان لييه فشي بلاصة.. 

لوقت كيدووز وصبروو كينقص.. حتى ولا يربرب ويعاير بوحدوو فالطموبيل كي شي مصطي.. نزل لأخر واحد ليلقاها تم ووالو.. عيط لواحد من معاارفوو بوليسي فلا la DST يختاصر عليه غا شوية بعدا..

عطااه سميتها وكنيتها هوما اللولين يقلب ليه فالسبيطارات والكوميساريات لا تكون واقعة ليها شي حاجة الله يحفض.. وقطع حايرة بيه لياام ماعارف فين يصد.. قلبو كياكلوو عليها ماعرفش مالها.. للحظة تفكر بوستوو ليها.. يمكن هي السبااب.. يمكن تقلقاات وماعجبهاش لحال يقرب ليها مع أنوو كانت هادية وقيتتها.. يقدر يكون تجاوز حدوو وتسرع.. خصوصا أنو ماشافش ردت فعلها حيت كان خاصوو يخرج.. غتكوون مابغااتش تشوشوو حتى يكمل زمروو عاد تمشي.. كون غيير بقاات وحيحاات وكسراات دنياا ووقفاتو عند حدوو ولاغبراات فحال هاد الغبرة..

عااود عيط لييها وبلا جدوى.. طاح فبالوو لمطاار.. عيط كيسول ويبحث فيهم لا كاين شي حجز تحت سميتها ولا مشاات فشي طيارة بلاصت شي حد فوت لڤويااج.. ووالو.. قلبو معااه حتى عيااو مني لقاضية فيها لمعرفة وباك صااحبي.. يالله قطع معاهم وعيط ليه البوليسي صاحبوو باغي نمرتها عطاها ليه بلا عقل وقطع عليه كيعاود يصوني علييها.. لقى التيليفوون طافي گااع وكملاااات.. 

وقف جنب ملامح وجهوو مبدليين مية وتمنيين درجة زدح يدوو لمضربة مع الڤلوون حتى زادت تورماات ماحااسش بيها.. عقلو بغا يخرج من بلاصتوو.. داكشي لي كان ناقصوو باش يكمل لفيلم.. كأنو خلعتوو عليها ماكافياات باش تتزااد كل مرة بحاجة جديدة.. بغا ياكل راسوو.. 

گااع الاحتمالاات تراكماات علييه.. والى ماعاودش شافها مرة خرى؟ والى طرات ليها شي حااجة؟ وبسبابوو.. أش غيدييير؟ يقتل راسو ويتبعها؟ ولا يحمااق ويخرج ليه عقلوو من بلاصتوو؟ أش غيديير ياااربي.. مااعارفهااش فين زاادت.. هادي هي أمانة منصف لي غيصوون ويديرها فعينييه؟ فأول فرصة وأول سفر ليها معااه ماعرفش يحافض عليها عااد تبقى فرقبتو حياتو كاملة؟ كيفاش غفل عليها؟ كيفاش تاق فدووك الجووج وعول عليهم.. كيضرب ويعاااود فراسوو حتى كتكلاكسوني الطموبيل غيتسطى..

قاطعوو الزمر دالتليفوون تاني.. صاحبوو هداا.. جااوبو دغيا متأمل يسمع شس حاجة ترد فيه الرووح.. 

أنير (كيدوي بزز): واه أسيموو..

سيمو (براحة): راني لگيت فين كانت أخ.. ------------- 

(مابقى كيسمع واالو بعد التليفوون لقااه طفى اوا وأجييو شدوووه نتوماا)

الله ينعل الق*** طيييييط.. مالگيت عبد ربك فوقاش تديشارجا غي دروك.. الله ينعل الز**** الله يحرق ******* 

شخشه ديل مووو داا التليفوون برد فييه جنونوو وحر فقصتوو..

زاد حتى لقى منيين ياخد واحد أخر.. ركب فييه السيم وجااب الله مع شعلوو عاود عيط لييه سيموو.. 

جاوبو دغيا أنيير كيسول على فين كاينة غا گااليه بلاصتها ولي كانت فبحر من لبحور لي دااز ليهم وماردش لباال مع الزربو والدعقة لي كاانت فييه.. مامنعاتوش سرعتو يولو كيفااش وعلااا وكي داار حتى وصل ليها.. شرح ليه السيمو بلي ستعمل شي تخربيق باش عرف فين راها من خلاال نمرتها نيت وهادي حتى هي مشاات من بالوو.. 

وصل فيين نعت لييه.. نزل دغياا سااد طموبيلتوو من بعييد بالزربة لي غادي بيها.. 

كاان ظلاام الحاال مضوي ديك الرملة ضوااو شي كواااخ مبنيين فواحد الجبيل صغيير ملاصقيين شاديين فبعضيااتهم.. والقمرة لي باارزة وسط السما.. 

غادي وكيتلفت ويدقق فعباد الله.. كيحاول يدوز عينييه على أكبر مساحة ممكنة باش يلقاهاا متأمل ماتكوونش بدلاات لبلاصة مشاات لشي قنت اخر حتى طاحت عينييه عليها..

گالسة منقة رجليها.. حاطة حنكها على ركبتها وسااهية فالما قدامها.. كأنها بوخدها تما غير معنية بشنوو ولا شكوون حداهاا.. 

قلبوو تهز.. أخييرا لقاهاا.. كيحل هينييه صحة باش يتأكد لا يكوون غا تخيل لييه ولا تشابهاات ليه مع شي وحدة.. 

قرب نااقص من سرعتوو باش مايقفزهااش.. ساعة داكشي لي طرى نييت.. غا حساات بيه قرب قفزاات من بلاصتها مخلووعة.. صفرة وزااد كملات.. تخطف فيها اللون فمرة..

ماسحة دمووعة بلي لانجيط (كلينيكس فازگ لي كيمسحو بييه لدراري صغاار) هابطين ليها غير دميعاات من الجنب لجيهة لي كانت متكية عليها.. هازاا راسها لي تقاال عليها بزز.. عينيها مايليين لحموورية.. 

أنير (كيطمن فيها): ششش.. غي أنا.. 

ماعرفااا باش تبلاات فاش شافتو نسااتهم گااع.. دوراات راسها كتشوف راسها فين وصلات وفين گالسة الوقت لي زاد قرب عندها أنير حيد كابيتشووه لاحو ليها على كتافها وقرد قدامها.. 

أنير (بصوت هادي كيحاول يكبح فقصتو): وشا بيك؟ شتا راك ديرس هنا بوحد؟ لا..

بين سؤاال وسؤاال كيسكت شوية.. وهي غير كتحل فييه فعينيييها بزز.. دارها راسها بكثرت لبكا لي بكاات.. 

حتى جاوباتوو عليهم جملة.. أي حاجة باقا فكرشها يجي بسم الله.. رداات علييه كلشي.. حب وتبن.. عمراتلييه حالتوو كاملة..

البنت ماواكلة حتى زمرة من فطوورها.. سوايع وهي تحت الشمس.. والفقصة والغداايد كياكلوو فيها من لدااخل.. معدتها لواات عليها بالعصااب..

نزلات يدها على الرملة موگفة راسها بيها بزز.. متكية رجليها بجوج جامعااهم كيما كانوو وكملات على ما بداات..

نااض دغياا جا ورااها على ركابييه للأرض شاادها من كرشها مكالييها.. مرجعها عندوو لا تخوي بيها يدها وكيرد بيدوو الشعرااات لي كينزلوو على وجهها ولي أصلا جمعاتو ببانضة.. مخليها تتعصر على خاطرها أصلا من غير داكشي لول ماعاودش تقياات حتى حاجة من غير لمراار.. مساارنها بغات تحطهم.. 

على شحاال عاد حبساات سخفااانة بلاجهد.. غتموووت.. 

جبد لانجيط لي كانو كيبانو من صااك وهو باقي شادها بيدوو من موور ضهرها من بعد ماقلب على لما حتى عيا ومالقااهش حدااه وگلس كيمسح ليها فوجهها وطريكووها مامسوق گااع لراسوو هامااه غا هي.. جمع ليها تخربيقها.. دار صاگادوها على كتفوو.. هز سبرديلتها بصباعوو وخطفها دغيا فيديه راجع بيها لطموبييل يمشي يشووف ماالها..

ماوقف حتال قداام أول كلينييك لقى.. دخلها سخفاانة ومغيبة ليه بين يدييه كيتجارى بيها ليرجونس.. خداوها من عندو ما ان شافوو على بايااص ودخلووها لدااخل مانعينوو من أنوو يتبعهم.. 

زااادو فصعرتوو وزااد كره وحقد ماحبس تزاييدوو معااهم وحيحتوو لي ماكيقابلها غيي رجائهم ليه يخلييهم يديروو خدمتهم غير الطبيب لي كان مناوب ديك الليلة.. جروو كيحاول يوصل ليه أنو غير كيعطلهم ودخلتو معاهم ماغتنفعها بوالوو.. كثر عليه الهضرة وحاول ياكل ليه راسوو دغياا ودخل يعااين حالتها.. 

مخلييه واگف حااط جبهتوو على الحييط وكيضرب فيدييه معااه كيحااول يبرد فييه جنوونو.. حتى بصدفة دازت واحد الممرضة من حدااه.. وحتى تماات غادية ورجعاات عندو معيطة ليه بسميتوو.. ستغرب فلول على شحال عاد تفكر اش جااي كيدير هنا.. اكيد كلشي غيكون عارفوو شكون.. قنعاتو بزز تداوي ليه جروح يدييه ونساحبات بادب مخليااه گالس شااد راسو كيتسنى فيهم يخرجوو..

من بعد مدة.. خرجوها من قدامو غاديين بيها لبيت فين غيتبقى الوقيتة لي خاصهم يشدووها فيها.. نااض بغى يتبعها ووقفوو الطبيب تاني كيشرح ليه حالتها وأنها سخفاات غير بسبب الارهااق وقلة التغدية وصااه يردوو ليها لباال وماتخرج حتى ترتااح شوية وتسترجع قوتها باش تقدر توقف على رجلييها.. عطااه رقم الغرفة لي غيلقاها فييها وزااد متمني ليها الشفااء العااجل.. مخلي ليه ورقة الڤيطاميناات لي تقدر تاخد باش يعاونوها شوية.. طمنوو شوية وخا بالو مايتهنى حتى يشوفها واقفة قدامو كتتشيطن وكاسرة دنيا.. تمشى بتتاقل كيرد النفس.. جاوب سفيان فالتليفونووو أخيرا من مور ماكان كيقطع علييه متوتر.. طمنوو بدو و عليها وعطااه سمية لكلينييك لي هوما فيه وطع متااجه عندها.. 

دور لبوانية بشوية ودخل بلا مايديير لحس وتصد فايقة..

كانت متكية على ضهرها فووق الناموسية الطبية.. معلق حداها السيرووم.. مغمضة عينييها وناعسة بهدووؤ مامسوقااش لشنوو كيدوور حداهاا.. قبل ما يدخل سد البااب حتى عيط لسفياان موصيهم يجيبو ليهم معاهم حوايجهم.. عاد رجع عندها مقرب واحد الفطووي ديال بلاصة وكدة كان على لحييط لجيهتها وگلس حداهاا كيتفحصها ويتفحص حتالها.. لايم راسوو على هادشي لي وصلات لييه.. فالاخير هو لي ماردش ليها الباال.. 

ساهي.. كيفكر وكيتفكر لحظاتوو معاهاا.. فعيلها.. ضحكاااتها.. جنوونها وتبوحيطها.. غروورها وتعجرفها عند اللزوم.. ثقتها فنفسها.. عفويتها.. حناانها ونعومتها.. خجلها فاش كيقرب ليها.. ضعفها وبكاها فحضنوو فاش كتوصل ليها لعضم.. اللييلة لي عرفاات فيها حقيقتوو.. تفاصيلهم مع بعضياتهم.. ساهي وكيدوز صبعوو على يديها لي كانت من جيهتو ولي فيها السيرووم نيت.. نزل راسو متأسف على حالتها حتى حط شفافوو على يدييها وباسها بوسة من القلب.. 

لاحظاات وعاود هز فيها راسو عينيه حمرين مغرغريين.. أكيد مايستاهلهااش وهو لحاجة لي قرب منها كيتتأدى.. أكيد تجاوز حدوودو وتطاول على لي ماشي ليه.. تاق فراسو كثر من لقيااس.. غير تقبلاتو طمع فكثر وولا باغي يتملكها هو گااع.. قبل مايعرف حتى واش كتكن ليه شي مشااعر.. تصرع بزااف.. كان عليه يصبر مزاال.. أصلا كون كنبغييه كون تبطل سحروو..

على حساب المغزى لي وصلوو من لبنيوتة ولا لعجب لي جااه تلى سيفتها ومابقااش كيتحول.. يعني غير تعامى.. 

بقى شحاال كيتأمل وجهها الملائكي الناااعس ولي ظاهرين عليه علامات التعب بقوة.. عويناتها وشفيرااتها وحنيكاتها لي صفااارو.. شعرها لكحل الطوييل لمسرح حدااها.. ماكارهش يضمها ويقرب ليها كثر.. ماكرهش يبقى ديما حداهاا ولكن ما باليد حيلة.. ماداام غير فعل بسيط قلقها هكاا وخلاها توصل للي هي فيه فلمصلاحتها يبعد.. ولمصلاحتها يخليها عليه فالتيقاار.. يكفي يبقى صدييقها فحال ديما.. هادشي الى بقاات شافت فوجهوو مزال.. والا غيكتفي بحبها من بعييد وخا صعييب عليه لحاال ووخا يتعدب اللهم فيه ولا فييها.. 

حط راسوو بتعب فجنب الناموسية لي ناعسة علييها بعد ما هز يديها بحدر وحطها فووق حنكوو وبقى كيحل فيها عينييه بشوية وببطء مميت كيحاول يحفظهم ويتأمل فيهم برااحة لاخر مرة.. كيشم فيدييها ويتحسسها رااد البال ليوعتهت حتى غلبوو النعااس قبل گااع مايوصلوو عندهم ويطمنهم.. نعس حتى هو من فرط لعيااا ولي دااز علييه من خلعة وجرى.. هارب من تفكيروو ومن لمناشر ولمااس لي طالعة نازلة فأعمااقوو كتاكل فييه.. من شعوورو المميت ومن حرقتوو على فقداانها.. نعس مستاغل اخر فرصوو فانو ينعم بهاد السلاااام النفسي لي ماكيحسوو الى بوجودها وقربها..

تحل عليهم لباااب بشوية ودخلوو واحد من موور لاخر ناقصيين من الأصواات لي كيصدروو من بعد مالقاوهم ناعسين.. 

قربوو عندها بشوية كيشوفو فيها بأسف.. تقدم سيدو هو لول مخلوووع.. كيدوز يدو على راسها ويقلب الى بيها شي حاجة ولا فيها شي طراس ديال لي ضربة.. حدااه سفياان على نفس الحاال وريم شاداهاا لبكية موراهم.. 

قاطعهم صووت دخوول وحدة من لفرملياات.. دگاات ليها شي برى فالسيرووم.. طمناتهم على حاالتها بهمس وخرجاات موصيااهم مايطولووش مجموعين حداهاا.. 

داكشي نيت لي كاان غير شوية وخرجوو مخليين معاهاا غير أنير.. 

عيا فيهم يوسف يمشييو الاوطيل ولكن سفياان متانع بشدة لانو فعلا خااصو يبقى لايدخل عليهم شي حد فليل ويشوفوو فسيفتوو لخرى.. 

نساحب هو وسيدو بزز حتى يرجعو فالصبااح..

گلس فالكرسي لي فالكولواار.. مكالي ظهرو وحاط راسوو على الحيط.. گلساات فجنبوو ريم لي باقاا كتدمع في صمت بقااات فيها.. 

حط سفياان يدوو كيدوزها على ظهرها بحناان ونطق.. 

سفيان: كي والو.. الصبااح نلگاوها تنگز گبالتنا.. (قداامنا)

ريم (دارت عندو بحسن وتخوفوو من انو لي فبالها يكون صحييح): ي.. يمك.. ☹️ (حتى كتجي تدوي وتبدا تتنخصص)

سفيان (هز يدوو طلعها عند خدهاا كيمسح فدمووعها بصبعوو وكيهمس ليهاا): وشتا احبيبي؟ وشا كاين؟ (بقلق) ياكما كتوجعك شي حاجة؟

ريم (هبطات راسها لتحت وكتدوي بزز): ي.. يمكن زعفت (تقلقاات) گبيلة مني جريت أنير.. مني هُوَد من لكاج.. 😢

سفيان: وهانتي جريتيه! وشتا فيها؟ 

ريم: لا 😭 راها كانت جايا لعندو.. خفت يصرالها كيما صرالي ويصدق صاربها بلا مابحس وحيدتو عليها گبل ماتوصل ليه.. يكون بقى فيها لحال يحسابها مابغيتهاش تقرب ليه ولا مانعرف.. 

سفيان (كيضحك بشوية عليها): فدوى؟ هههههههه راك عارفة على من راك تهّضري؟ هههه لحريگة هاديك كون زعفت على هكااك كون تبعاتك حيداتو من يدك وشوهاتك مايهمها لا صحافة لا سيدي زكري أنا لي راني نعرفها هههه.. (جمع ضحكتوو شوية بشوية) ماعرفتش وشتا بيها.. بلحق مايكونش على فحال هادشي غير خوي راسك ورحمي هاد العنين العمر.. (جرها من راسها عندوو عنقهاا) روااحي لهنا خاطيك.. دروك تفيق ونعرفو شتا ضارها..

تخشاات فيه حتى هي كتحبس البكية وتمسح فعينييها بضهر طريكووها حتى نشفاات وجهها وبقااات غير كتتنخصص.. حتى عاود هز ليها وجهها..

سفيان (يالله غيبدا يدو تاني وهو يتكرشخ بالضحك على وجهها كي ولا): ههههه تعّرفي لمن وليتي تشّبهي؟

ريم (عقداات حجباانها كتتسنااه يكمل من بعد ماسكت لوهلة)

سفيان: باااندا 🤣

ريم (صرباتو لصدرو باليد لي كانت حاطة عليه)

سفيان (قرب حتال عند وجهها كيهمس وهو كيقرب لشفايفها): تهبليني فگاع حالاتك😍

يالله باااسها البوسة اللولة وهي دووز واحد لفرملية فيدوورة گدها گدااش كتحنحن.. قاطعاتهم.. مرگاات ريم.. خشاات وجهها فيه مابقاااش بغاات تهزوو لوقت لي خنز فيها هو ماحاملهااش.. ماعارفش بلي غادنووب أنير هادوو كيتصرفوو فيه..

🕚🕛🕐🕑🕒🕓🕔🕕

في هذي الدنيا..

كلنا سيلتقي بشخص لا تنساه الذاكرة.. 

و العجيب أنه لن يكون لنا..

ستعجب به.. 

ستكون به جميع المواصفات التي قد نقشها قلبك لعقلك 

سيكون أنت في مكان آخر 

ستعيش معه حياة مختلفة.. لن تقدر أن تقترب و لا أن تبتعد..

هو مرة حبيبا و مرة صديقا و مرة أخرى غريبا..

و تمضي الأيام.. 

تتمنى أن تجد سببا لتكرهه.. و لن تجد 

تخشى التعلّق به.. و أنت فعلت حقا.. 

أحيانا ستظنه لك .. 

لكنك ستقبض على روحك بتنهيدة صامتة و تهمس " هو ليس لي"

بداات كتحل فعويناتها لگرى لمشفريين بزز.. مضااربة معااهم حتى قدراات توضااح ليها الرؤية.. كتحاول تكتاشف فين ناعسة.. زعجااتها الريحة وضراتها فراسها كثر ماهو ضارها.. دوراات عينييها بتعب.. حتى استقروو على يدييها لمحطووطة على ملمس خشن.. لحيتوو لي كطيح لقلبها سروالوو 🙈 بتاسماات بمراارة وألم رادة راسها لووور.. عااد عوداات دورات وجهها جيهتو وناتو كتشووف فيه وفوسااامتوو وحروشيتوو الطاغية محاولة تحرك يديها فووقها ودوزها على وجهوو رغم الالم لي عاطيها السيرووم لي غارسين ليها فظهر يدها نييت.. 

حركاات صبعها لكبير على خدودوو منزلااه شوية بشوية لشعر وجههو المخفف كتتحسس فيه بحب وصوت أنيين صادر نتيجة كبحها للألم لي كتحس بيه ومع دااك ماقدرااتش تحبس وما تسمسووش.. ماقدرااتش ماتقربش ليه.. على الأقل تقدر ديرها داباا وهو نااعس وهو غاايب عن وعيوو.. وهو ما حاسش بيها 😿..

ماحيلتها للألم المادي لي كتحس بيييه.. ما حيلتها للمعنوي.. كتحس بقلبها كيضرها.. كثرت الأسبااب والنتيجة وحدة.. علاقتو بريم باينة كتتعدا الصداقة درجاات.. 

هي لي كانت كتحس براسها متميزة بالنسبة ليه وعندها مكااانة خاصة فحياتو من طريقة معاملتوو ليها.. تصرفااتو لي كتفضحوو غيرتو بعض المراات.. نظراتوو بساالتوو وقباحتوو الى تقاست شعرة منها.. گااع تصرفاتو كانت كتدل وكتبين ليها أنو كاينة انّ وأنوو رغم عدم اعترافوو كيكن ليها شي حاجة.. ماتقبلاتش تشوف انثى خرى قريبة ليه.. زاعمة عليه كثر من الجرأة لي كتتجرأ عليه هي بنفسها.. كأنو خاصو يتحااط بخط حمر ومايخلي حتى وحدها تفووت حدودوو غيرها.. 

بيناتهم شيحاجة أكيد والا أش غيزعم السيدة حتى تولي مادة عليه يدييها كل ساعة.. هاهي معنقااه ها هي جارااه هاهي مزمرااه.. كون مافتحش ليها لمجاال وخلا ليها منيين وكون ماكانش مضسرها حتى هي راه ماغتقربلووش.. 

ومن هادشي كامل لاش مدخلينها فهاد الزمر وهاد المعمعة.. مني هو معاهاا لاش مقرب ليها ولاش بايسها؟ 

تكون غير غريزتو غلبات علييه وماقدرش يتحكم فراسوو؟ ماشي فعايلوو.. ماشي أنير لي يتحيون لكن باش غتفسرها من غير هكاا.. 😞 لي زاد حز فنفسها أنو حتى هي استحلاتها.. لعناات نفسها على تحوميرها وسداجتها.. حاولاات تقنع راسها أنو استغلها فديك القضية باش ماتبقااش حاملااه وحتى كانت غيحيد عليه يديها وردااتها بضعف ماقادرااش تحقد علييه.. معزتوو فقلبها كبر.. 

نزلات دمعة سخوونة من عينيها على لمخدة لي حااطة عليها راسها.. باقاا كدوز صبيعاتها على عينييه ونيفوو ودقنوو.. ماكارهااش يضمها ليه فحال لي موالف كيديير فاش كتحس براسها بوحدها.. يارييت كون كانت تقدر تفيقوو وتتخشى بين يدييه من هاد العاالم لي ديما قاسي علييها.. 

للأسف ماشي من حقها.. وكيما ولفاات كل مرة الدنيا تاخد منها واحد جا دوور أنير من مور منصف وغيروو وغيروو.. باش تلقى راسها فالأخير بوحدها تاني.. 

نفس الفيلم نفس السيناريوو نفس الديكوور.. نفس الصفعة لي كتصفع بيها ديما ولي هي أعز النااس وباقي مابغاات تتعلم.. باقا ماحفضاات الدرس.. ورغم أنها نفس الحرقة للمرة الالف باقا كتحس بيها وكأنها الأولى.. مابغااتش تنقص حدتهاا رغم تكااار التجربة.. 

باقا ماقنعاات وفهماات أنها خاصها ديما تخلي مسافة أماان بينها وبين أي وااحد كاان باش حتى الى ادعت الضروورة وشاءت الاقدار يبعد ماتتأدااش.. 

كتعيا ماتوصي فراسها بينها وبين نفسها وحتى كتلقى بلي بلا ماتحس تدارت بيها تاني.. ووحلوو رجليها مرة خرى فلغييس.. 

حتى سفياان صدييقها.. ولكن أنير غيير.. كتحس بيه قرب.. كبر من كلمة رفيق.. كبر من كلمة صدييق.. كبر من كلمة ح.. 🙊

يمكن حيت كيحن فيها وكيعاملها فحاال بابااها ليها داكشي علاش تعلقاات بيه دغيا ولهاد الدرجة.. يمكن حيت ديما كتلقااه جنبها.. ويمكن حيث أكثر واحد كيفهمها قبل حتى ماتدوي.. 

لكن ماشي أي واحد كيهتم لامرنا غيكون كيبغينا.. أكيد ماشي بالضروورة.. تصرفاتو ماكيلغيوش كونوو ماشي ديالها.. دياال غيرها.. حق وحدة خرى وماعلييها الا الانسحااب.. ماشي هي لي تحط عينيها على حاجة غيرها وماشي هي لي تدخل بين جووج وتفرقهم.. تدخل وتحاارب وتتقاتل الى شي وحدة عاد عرفها حطات عليه عنيها ولا كتدور بيه ماشي بينوو وبين وحدة سابقااها وكتعرفو كثر منها..

ماتنكرش أنو كيعجبها وبجهد گااع مي ماعندها ماديير من غير أنها ترضى بالأمر الوااقع.. تشد كرسي مستسلمة ومكتافية بمراقبة الاقداار كتتصرف كيما تكتباات.. 

فيوونا (بصوت مبحوح): أححح 😿 

نطقاات بحرقة فحالا هي هي لي واكلاها فاش جاات عينيها على لاطرااس ديال الضربة👊 لي كلا فوجهوو ولي كانت فالجيهة لخرى لي متكي عليها.. حتى حرك وجهوو شوية مقااد راسو عااد بانت ليها غادية شوية لزروقية.. خصراات وجهها ضارها خاطرها علييه.. باقا على وضعها كتشووف فوجهوو حسات بحركتوو كتتزاد.. هزاات راسها قدااتو على لمخدة كتمسخ دغيا فدمعاتها لي خانوها بصبااعها مخليا كف يدها لخرى على حنكوو كيما كاان..

عقد حجبانوو ضاروو راسوو وخاصر بالنعااس لمزفت لي نعس.. طااح طيحة وحدة على غير عادتوو لدرجة ماحسش حتى براسوو فاش تحول.. 

حل عينييه حاقد على الوضعية.. تحسس يدها لي باقاا على وجهوو بيدوو لكبييرة.. وبااس كفها عاد نااض كيتحسس شعرها ويطمن على حالها قبل مايخرج يجيب ليه قهوة كحلة تفيقوو..

غير سد لبااب دارت شاافت جيهتوو من موور ما كانت دايرة راسها ناعسة.. تنهداات وهزاات عينييها فالسقف كتتأمل فالزوااقات لي فييه حتى سمعاات صوت ميسااج وصل لتيليفوونها.. جراتوو من فووق الطبيلة لي عند راسها وديڤيغوياااتو بيد وحدة حالا طيكسط لي سيفط ليها منصف مصبح عليها بيه جامع ليها فيه الحب والغراام.. طلعاات شوية لقاات مسااج گااعما عقلاات على رااسها أنها كتبااتو مجاوبوو على مساجااتو نيت دالنهاار لي قبل فاش كان مشكوون عليها وكيعيط وماكاتجاوبووش.. عرفااتو غيكوون غا أنير مولااها هو لي عارف الكوود ولكن لي لفت انتبااهها وخلاها تبتاسم شوية أنو الميسااج بنفس كتبتها وطريقتهاا فالهضرة.. 

بغاات ترد التليفوون بلاصتوو وهو يشدوو من عندها سفياان وحطوو كيضحك عليها..

سفياان: حي وميت 😂 فقتي ولا هههه

فيونا (كتشوف فيه مبتاسمة وكتهضر بزز): لي تعجب.. يتبلي.. 😏

ريم (تبعاتو.. فيقها مني تحرك من حدااها): صبااح لخير.. (قرباات مترددة) كي بقيتي؟

فيوونا (غمضات عينييها بفقصة كتصبر راسها باش تستحمل ومانطلقش ليها شي صارووخ جوي-أرضي يخليها تقلب على غياار لكراامتها لي غتتشرشم)

سفيان (مبتاسم بحزن وباين عليه لعيا): نگاد ليك لوسادة؟ (لمخدة) (قبل ماتجاوبوو قرب كيزيد وحدة خرى تحت لي متكية عليها باش تتگعد شوية) ريضي.. 

فيونا (بانزعااج من السيروم لي فيدها باغاا غا امتى تخرج من السبيطاار): كيضرني بزااف.. (حطاات عليه صبااعهاا لعل وعسى يبرد عليها شوية) بغيت نمشي فحالي.. 

أنير (ماجات فودنيه غي الجملة اللخرة): لعشية نشدو الطريق.. 

سفياان (تلفت عندوو دغيا مصدوم): وشتا؟ فين؟

أنير (دخل مقلق): وجدة.. 😒

فيوونا (هزاات فيه راسها كتشووف فيه بنص عين)

ريم (بحزن): ياك راحنا متافقين نحوصوو (ندوروو) شوية قبل مانوليو (نرجعوو).. ☹️

أنير (گلس بعيد): البنت راها عيانة.. 

فيونا (كتدوي بلا ماتوجه ليه الهضرة): مافيا والوو.. بلا ماتخصرو بروگرامكم على قبلي.. 

سفيان: وااه أصاحبي.. هي بروحها حسن لها تبدل جو..

أنير: لي عجبكم 😒 نتوما تعَّرفوو.. 

قاطعهم دخوول سيدوو سابق يوسف مخليه حدى لبااب ومشا ديريكت عندها فحالا غير هي لي كاينة تماا وغير وقف حداها بلا ماينطق شد راسها بيدييه وگلس كيبووس فحناكها مورك عليها بلعااني.. 

جمع أنير قبضت يدييه بافعاال ماعاجبووش يقرب لييها ولا يقيسها.. لي فييه مامهنييه.. جن جنووونو من داك الجيسط.. فحالا ناقصوو هو هااد العصااب وهااد النار لي شعلات فييه.. ناض فحالوو ساخط خارج من تم قبل مايتعمااو عينييه وصدق خابطوو مايعقل لا على صحبة ولا علا دمهم لمشرووك..

فيوونا (كتحاول تتخلص من شدتوو): ... أن.. (حتى كانت غتعيط ليه يفكها وتفكراات) طلقني الخلااا 😾

رد لبااب مورااه مامستحملش يسمع حتى صوت ضحكهم.. گلس حااط راسوو باللوور على الحييط مغمض عينييه حتى كصوني التليفوون.. خشى يدوو فجيبوو وهو على نفس الحااالة جبدوو وطل كيشووف شكوون.. جاوب باستغرااب.. 

أنير: وي شمسوو.. كي راك داير؟

شمس الدين: وشا هاد لغبوور خو؟ ماتسقسيش..

أنير: راك عارف وشتا كاين.. كثرت لمطارق حتى كيكرهووك.. 

شمسوو: أوااه.. خليها هكاك وصافي.. 

أنير: وش حوالك؟ هاني؟

شمسوو: الحمد لله اصاحبي.. گولتلك.. لبارح جا هنا لسوق لغزاال واحد ال*امل ديل موو معرفت وشا راه يصنع.. 

أنير (كيتصنط ليه بلا ما يقاطعوو): ...

شمسوو: گالك خاصو شي دراري باغي يسيفطهم يضّربو شي واحد.. جبد لفلوس وكلشي فاش جا يوريهم شكون هاد بنادم مايجبدلهم غي تصويرتك.. 

أنير (باهتماام): اواا.. ؟

شمسوو: گبضووه (شدوه) فالحومة وجابوه عندي للگاراج.. والله الى كلى ما رااه ياكل الطبل نهار العيد..

أنير (بتسائل): ماعرفتوهش وشكون هو؟

شمسوو: ولد لعلج خوو..

أنير (بضحكة استهزاء): ولد ال***.. 

شمسو: گالك يصفي حسابوو.. رانا ففيلم هناياا ولا؟ هههه رد الباال لروحك..

أنير (تلفت عند الدراري لي خرجوو): يحفضك أصاحبي.. 

شمسوو: خيرك سابق..

أنير (حرك ليهم راسو بمالكم وهو كيقطع التليفوون)

سفيان: راها تبدل..

أنير: قدرات تنوض بروحها؟ (بوحدها)

سيدوو: معاها ريم.. 

ريم (تمات خارجة تابعاهم حتى هي.. شافو فيها كاملين وهي تهز يديها): مابغاتش نعاونها 😰

أنير (ناض بلا ما يشعر دق عليها بشوية): ✊✊✊

فيوونا: دخل..

قبل أن يفوت الأوان... في نفس تلك اللحظة التي حدث فيها ما حدث رأيت في خيالي نهاية أخرى للموقف ولكن ... بعض قصص الحب تنتهي قبل أن تبدأ. 

حل عليها لبااب بشوية لقاهاا گالسة مدلية رجليها من الناموسية شادة بيدها السيرووم لي ماقدراتش تنتر.. داارت جيهت البااب كتشووف شكون دخل.. 

طل عليها مستني تأدن ليه يدخل.. 

أنير: نقدر؟.. 

فيونا (ومات ليه براسها ب اه..)

أنير (تقدم جيهتها حتى وصل قداامها جار فيديه لفطووي لي بات عليه تاني مقربو من بعد ما دفعوه الصبااح فاش جااو حتى قابلو معاهاا وگلس شااد يدييها كيشووف فالتيوو لي ماصقين شحال عاد طلع فيها عينييه): ماقدرتيش تحيديه؟ 

فيونا (حركاات راسها بلا)

أنير: علاش ماتسنيتيش حتى تجي الفرملية؟ 

فيونا (هزاات كتافها بطفوولية)

أنير (شاف فيدييها وعااود شاف فييها): نسايي أنا؟ (نجرب)

ماداارت حتى شي ردة فعل بقاات غير كترمش فيه عينييها حتى هبط راسوو كيحااول يجر بيدوو لخرى من غير هاديك لي حااط فووقها يدها السكووتش الطبي لي متبتين بييه السيرووم.. تحت شوفااتها لي كتتفحص كل حركة كتصدر منوو..

قفزاات على اثر لبرى لي حسات بيها تجراات من يدها.. غفلها وحيدها فدقة وحدة باش مايوعتهااش كثر.. مدور صبااعو على يديدتها.. جر واحد من لي كلينيكس لي حداا راسها مسح بيها النقطة ديال الدم لي خرجاات منها وتحنى مقرب وجهوو من فيين كانوو غارزيينو ليها وبدا كيصووط ليها بشوية وبحناان على بلاصة السيرووم نيت باش يخفف حر الحريق.. 

بداات كتفك ملامحها لي كمشااات مستحلية لبريد لي كينفخ عليها ونسييم انفاسوو لي كتحس بيهم كيضربوو فيدها.. بعد شوية جار بلاستيكة ددوى خدى منها واحد لصقة ميديكاال صغيرة شوية فيها فاصمة من لدااخل لصقهاا ليها مدوز عليها صبااعو بحناان باش تتبث.. 

مني سالاا ناض جر الصاك الصغير لي كان حدااه ولي جابووه معااهم الدرااري وحلوو.. وقف دافع برجلييه علاش كان گالس بلوور.. جبد تيشوورط وسرواال حطهم وقرب عندها.. يالله غيشد التيشورط لي لابسة وهي تنطق.. 

فيونا (ببراءة): نبدل بوحدي.. 

أنير (بلا مايشوف فيها كمل تطلاع الطريكوو): هزي يديك.. 

ماكان قداامها الا تخضع لاوامروو وتسمع هضرتوو.. حيد عليها داك لعجب وبقاات غير بالسوفيطما حتى بدلوو بلاخر لي نقي.. 

جر ليزاار من فووق الناموسية دارو على فخاضها مغطيها.. فهماتوو أش بغا يديير.. خاولاات تفك السرواال وتحيدوو من الجيهة الفوقانية علايااش گالسة بيد وحدة كل مرة كتجر من جيهة حتى هبطاتو شوية وجروو هو من رجليها حتى نصلوو فمرة.. عااد گلس على حاشية الزمر لي دفع باش تحدر على رجليها.. شد اللولة بيدييه لكباار هزهاا عندوو حاطها فوق فخدوو.. كيشووف فيها بيبضة بضفيراات نقيين فنيين بكثرة ما ديما خاشياهم وسط التقااشر.. ووخا فيها لاطرااس ديال الشمش لي كتشد بنت لحراام فلبلاصة لي كتفصل بين السرواال والسبرديلة حمقووه بملمسهم الرطييطب.. أصلا كلها كتجيه رطييطبة كي لفريمييجة.. لبسها تقاشرهاا عااد داز لسرواال دخلوو حتى وصلوو ليها لجيهة ليزاار ودوروو على خصرها شاادو من واحد جنب باش يبقى مغطييها.. 

أنير (ناض محني جيهتها): وگفي فوگ رجلي باش مايتوسخوش تقاشرك..

كالااها بيديبه لي حط أسفل ظهرها حتى وقفاات وبقى شاادها حااكمهاا.. مقربها عندوو ولا نگولوو ضامها لييه حسن 😈.. خشاات يدااها تحت ليزاار شادة السرواال كتطلع فييه بشوية بشوية ماساخياش بقربوو.. سامحة لشعرها ينزل كاامل على وجهها.. وهو كيحااول يبقى ندور وجهوو عليها وخا كيسرق طليلاات على وجهها مرة مرة.. باتت تما عاد كملاات.. وياريتها ماسالااات.. بزز باش رجعهاا فوق الناموسية ماساخييش بدوروو بريحتها لي كاان كيتنفس.. گلساات.. تحدر تاني لبسها سبرديلتها..

وعطاها بظهروو كيقلب فصكادووها على لي لانجييط حتى لقااهم ودار عندهاا..

قرب حتى تقاابل معاهاا كيمشط ليها شعرها غير بصبااع يدييه لي دوزهم وسطوو كالعادة حتى جمعوو وگلس تقابل معاها تاني كيمسح ليها فوجهها من ريحة السبيطار.. ينقصها بعدا غير شوية حتى تعااود تدوش..

منها حجة منها زياارة.. قادي حاجة وكيحااول يشبع شوقوو ليها لي مالييه حدوود.. كيمسح ليها بكل حب حنيكااتها.. نيفها.. جنب فمهاا.. دقنها نزولاا لعنقهاا ويدييها.. حتى قرب يسالي وتسمع دقاانهم.. عيااو ماصبروو فالأخير دخلوو عندهم.. 

كمل من يدها لي كان شااد وناض طوى شكاانت لابسة وداروو فالصااگ.. بعد بدل عليه حتى هو دغياا.. 

دخلاات عندهم من موراهاا فرملية كتفرنس.. ماعجبهااش لحال مني لقاتها هكااك واجدة باش تخرج فخاالها.. عاتباتهم حيت ماعيطولهااش تعاونهم.. تدخل أنير شاكرها باش تسكت وتهنيهم.. قلبات ليها ضغطها بالخف هو وشي تخربيق أخر وعاودات ليهم وصايا الطبييب عاد مشاات فحاالها.. تقدم عندها أنير.. لاح الصااك لسفياان وهزها خطفها دغيا على غفلة منها خلاها مدعووقة مافاهمة واالو وتم غاادي بيها..

حطات يدها لخرى على عنقوو شادة فييه وراسها ميلاتوو عليه جاية جبهتها على عنقوو.. 

دقاات قلبوو لي كتسمعها من قرييب على شكل نغماات.. نفسوو لي كتطلع وكتنزل.. ريحتوو لي كتفتن.. قوة قبضتوو لي شاادها بيهاا وجامعها بين يدييه كي لقطييطة.. 

حتى واحد فيهم ماساخي بلاخر.. حركااتهم كيگولوو كلشي بلا ماينطقوو.. عقوولهم لي ماباغيااش تفهم.. مستبعدة فكرة انوو الشوشرة لي فقلووبهم تقدر تكون حقيقة.. ولا حتى يكون ليها احتماال.. جاهلين بقيمة نفسهم عند بعظيااتهم..

حلوو ليه بااب الطموبييل حطها هي اللولة.. سد عليهاا عاد داار طلع بلاصتوو..

من بعد عدة ساعاااات.. من موور ما رجعوو الأوطييل بززو عليها تاكل شوية وخلاوها تزييد تنعس سويعاات باش ترتاااح.. 

گالسييين فاحدى شوااطىء الدااخلة المعرووفة بمناظرها الخلابة ولي غالباا ما كيكوون فيهم لبحر والرملتوو لاصقين ديرييكت مع رمااال الصحااري ولا الجباال وصخوورها القااحلة..

بالتحدييد فاحدى الريسطوو بار الشاطئية.. مجموعيين على طبيلة صغييرة مسطووكية بطبااسل فيهم أشكاال وأنواااع لي زويطخ (فحال بوزرووگ وغييروو.. كل ماهو كوكيااجي ههه) بكااع الأنوااع لي معروفة بيهم المنطقة.. بين كل طبسيل وطبسيل طبسيل أخر.. بزز فيه لاقيين لبلاصة لي يحطوو فيها الحاامض لي كيعصروو فوقهم.. 

كيااكلوو بستمتاااع.. ضااربة فيهم ريحة لبحر.. مرة مرة يطلق سيدو ولا سفياان لي مگلسيين فيونا وسطهم شي نوطة يخليهم يتهزوو بالضحك.. حتى كملوو وتحط ليهم الحووت ساطوو فيه ماخلااو فيه غا الشووك وشي تفرتيت..

ماهي الا نص ساااعة من موور ماتهز من قداامهم داكشي وناضوو دخلوو لداخل يلبسوو مخليين ريم وفيوونا بوحدهم الرااس فالرااس.. بلا مايبدلوو لبلاصة من تحت لباراسولاات دياال لقش لي مطلوقيين على طوول لبلاج.. 

گالسة كل وحدة فيهم مدرقة من الشميسة.. فووق كراسة كباار.. ولا نگولوو مخااد فلوااان على شكل فطوياات معمريين بكويراات صغاار من لدااخل فحاال لفرشي.. مرافقيين كولا براسبراسوول..

واخديين راحتهم.. فيوونا لي بالها مع قطيطة بقاات حداها من وقيتة لغداا ومع هي تجر وتعطييها وتدوز يدها كل مرة عليها موحشة ليوون.. لمشة لقاات الدفى هههه مابقااتش ساخية تتزعزع من حدااها.. لا طلعاات هي گااع تخشاات فيها.. تحت نظراات رييم لي كتلعب بيديها بتوتر.. كتزعم فراسها وتعااود باش تنطق وتدوي معاهاا مداام جات قدامها الفرصة ونفارداات بيها أخيرا.. 

بين عقل يزعم وعقل متخوف.. نطقااات أخيرا مترددة.. 

ريم (بصووت شبه مسمووع): فدوى.. (مني مادارتش عندها زادت فالڤولييم وعاادات عيطاات) فدوى.. 

فيوونا (من بعد ماكانت دايرة راسها ماكتسمعش): اممم

ريم (بثقة كثر من جاوباتها): على لباارح.. 

فيونا (قلباات عينيها فبلاصتهم مستفصها صوتها من أصلوو ودارت جيهتها)

قااطعهم صوووت الدراري جايين كيطنز وااحد فيهم على لاخر.. لابسين لبسة السوورف كحلة مغطية جسمهم كااامل حتال حد عنقهم.. ومع لاصقة على أجساامهم وكل واحد ليهم عندوو حقوو من الوساامة ومع مجموعيين دقة وحدةة عطااو لعيين وولات الطايحة كثر من النايضة والنايضة سخفاانة.. ومع هوما على باال ودغيا كيرضوو لباال حسوو بجناابهم وبلعنيين عليهم.. يوسف وسيدو لاقيين السيبة.. أنير ث

مثقل كيضرب على البشر غا من لتحت لتحت.. بقى سفياان مسكيين دورو لييه السمطة شاديين بيه الستوون.. وهو كيحاااول ماتفلتش ليه شي شوفة وتصدق محصلااح ريم ومع الگور گثاار تم والگورياات كيحشموو بزاااف صعااب التعلييق فدووك اللحظاات.. 

وصل صدااهم قبل منهم.. شافت فيهم ريم كتتفحصهم وحبسات موجها ليهم بهضرتها.. 

ريم: حتى أنا بغيت ☹️ علاش راكم ديرولي هكا..

سفيان (نطق هو اللول أكيد هو المعني بالأمر): تريحي لا؟

ريم: 😠 راك تحگرني.. 

سفيان: وااه لمك.. 

حتى كانت ريم غتگول لأنير يدافع عليها وتراجعات داخلة سوق جواها يكفيها داك الشك لي كياكلها تكوون هي سبااب لي وقع وخاا سفيان ستبعد الفكرة ونفى أنوو تكوون بصح مالقاات حتى تفسير للبرود لي لاحظاات بينهم ولا نگولوو تباعدهم حيت أصلا كلا صااد لجييه.. وخا كيبانوو عادي وهوما مجموعيين مي تأنيب الضميير لعب دوروو وخا غا احتماال مابغاتش تكون زعمة تسسبات فشي سوء فهم ولو بدوون قصد..

رجع السيرڤوور جايب ليهم باش يتبردوو.. رشفوو منو جغماات محسووبة وزادوو يسورفييو.. 

يالله تحركوو الدرااري.. عاود دارت ريم عند فيوونا تكمل معاهاا مابدااات وقبل ما تنطق سبقاتهاا لخرى.. 

فيوونا (بشوفة حاادة عاقدة حجبانها): ماباغاش ندوي فالموضووع 😾 (شددات على الكلمة لخرة معبرة على انزعاجها ورفضها تهضر معاهاا) عفااك 😒

رجعاات شافت قدامها حادرة راسها عند لقطيطة كتداعب فيها وتمرر فيديها عليها.. فايضة عليها بحناانها وهي فأمس الحاجة ليه.. 

دخلات ريم سوق جوااها من موور ماصدااتها بشكل باين.. 

أما لخرى فا بغض النظر على حرقتها وعلى الزمر لي طااري باقا كتغفلها عينييها وكتقلب علييه.. وعلى بلاصتوو.. 

بقاو كيتفرجوو فيهم من بعييد وهوما كيدخلوو السورفة فيدييهم 🏊 كيدخلوو بيها حتاال لدااخل.. كيقادووها ويطلعوو فوقها يسورفييو بيها 🏄 حتى يوصلوو لمااج لأخرها.. 

توالاات الساعااات وبداات كتغرب الشميييشة.. 

گلسااات ريم حتى عياات حدا فيوونا لي ماخاصهااش تضرب فيها الشمس لاتصدق لاعقااها تاني.. مونساهاا ومابغاش تخليها بوحدهاا حتى عيااات وملااات ونااضت مشاات قرباات عندهم.. كتعيط وتشير بيدييها باش يخرجوو خلاص وشكووون تسوق.. كانوو هوما مضااربين غا مع لماااج.. شي يالله داخل.. شي كيقااد وشي جااي ماردو ليها لبااال حتى تمو خارجين واحد مور لاخر وغي بانت ليهم تمو غاديين ليها بشر.. 

هرباات كتحير عليهم وتطلب.. كتفى أنير بيرشها من بعييد هااز لما ب جلييه.. عاد ستالمها سفياان كيخربق ليها شعكااكتها ويجرها عندوو باش تفزگ.. 

خشى يدوو فشعروو كيدوزهاا جاار لماا لفاازگ ناقسوو منوو.. كيتمشى ويتمختر فارض ريشووو كالعاادة.. 

ضرباات عليهم جايين بنص عيين وهي تحل تيليفوونها كتخربق فييه ملاهيا راسها.. كتحاول تعرف فين وصلوو غير برييط وغير بنص عيين بلا ماتهز راسها ولا تشوف فيهم مباشرة.. خصووصا أنوو سابقهم..

وقف حدااها هااز كاسها لي جددات هو لي باقي بارد أما كاسوو هو ولا كي لبلوول.. شرب منوو وعااود كيشووف فيها حتى هو بلا ما يبين.. ميكة علييه وماعلا بالهااش.. ربط يدييه حتى عياا ولي فيه شي بلا رااه مايهنييهش.. تحدر شوية جيهتها جاار فيطة صغييرة حدااها.. راشها فنفس الوقت بالماا لي مزاال جاامع فلحيتوو وأنحااؤوو وجهوو.. 

قطر ليها على حوايجهاا وتيليفوونها وعلى لمشة حتى طاارت قاافزة هرباانة نافرة من لبلى گااع..

يتبع.. 😝