خلاتو بلاكة وهي تيشوف..سرط الهضرة لي كان معول يقول ليها وخلاها تمشي قدامو حانبا الراس كي ديما..مدازش بزاف تاتبعها تاهو وداز من حداها طاير..مخليها هي تتشوف..جبدات تيليفونها تصوني لاميمة لقاتو بيطرطق بابيلاتها..دوزات ليها الخط ومتوقعة ردة فعلها:الو
اميمة:افينكي؟؟بيت هي نعرف فين زدتي مخلياني كي الحمقة تنقلب عليك
زينب:(بنفس ضيق)فمرااكش
اميمة:ويلي كيدرتي ليها؟؟
زينب:جابني عثماان(تغرغرو عينيها)شافناا
اميمة:حلفي بالله هيييه ناري شقيتها
زينب:معرفتش
اميمة:فينكي دروك
زسنب:(بتعب)غاديا لدار
اميمة؛شوفي سيري لدار والى سولاتك مي قوليها تلاقات مع صاحبتها
وصلات للدار مع دخلات مبانش ليها الموطور بتاتا عرفاتو مكاينش..دخلات للدار ولقات السلام..نطقات فاضمة:فين اميمة
زينب:كنا جايين وتلاقينا ع واحد لبنت وبقات معاها تيهضرو
جلسات حداها بعدما باست يديها وقالت:اوى اش تقديتو
زينب:هااء..المقدية كي شتي ضرنا المدينة كاملة وملقينا والو
فاضمة:ويلي هادشي كولو ضوران ومالقيتو والو
زينب:(توترات)ااه اه مكاين والو..والغلا
فاضمة:واش شريتو؟؟
زينب:والو
كمشات فاضمة عينيها وقالت:هي تعذبتوو كون مشيتو هي لسويقة فيها شي بيجامات زوينين
زينب:اه واخا شي نهار تمشيو قبل رمضاان
فاضمة:ان شاء الله
زينب:نوض نبدل علي
ناضت زينب كتجر رجليها وتفك فالشال لي حسااتو تزير عليها..طلقات شعرها ولعبات فيه شوي وبدلات عليها ببيحامة بيتية جديدة خداتها..كوميم بانو فيها فلوس سوايع..كل مرة شاريا حاجة جديدة ..لان هوسها فالحوايج بكثرة مكتشوف ومكتشريش ولات تاحماق عليهم
خرجات حداها وريحات كيتفرجو فسامحيني وهي ساهية تتفكر فيه..رجعات لنفس الحالة تاع قبل..شاغل تفكيرها على جهد
اما هو راه هي وصلها مشا للقهوة تكيف شوي وشرب قهوة كحلة ورجع للدار مبرد بعدا شوي..تيقها وعارفها مديالش تمشي لتما وتا ملامح وجها مكانوش مرتاحين مع معامن كانت جالسة ولايني داخلو كان كيرفض اتيق ..بحالا كان تيقلب القا عليها شي حاجة باش اتفركع عليها
ومن جهة خرا ندم أشد الندم حيت دوا معاها كااع وغضب شهور تلاشى فدقائق..معرف لاش ناض وهضر معاها وغوت عليها..اش ليه فيها
دخل للدار لقى السلام وتلاح حداهم وقالت مباركة:جيتي من وريكاا
عثمان:اه
مباركة؛مفجحة اوليدي؟؟
شاف فيها:تبي تمشي جمعة جايا
وئام:اه اه عفاااك
مباركة:انا مافيااش سيرو نتوما
عثمان:انا دايك نتي وصافي
ناض مخلي وئام بتاكل راسها والو سيد مزير عليها الحانوت وبزز باش كتخرج..
دخل لبيتو حيد حوايجو ولبس تاوع دار وتلاح على سريرو تيخمم فيها..محش تا يديه مشاو للنماري لمبلوكيين وكان غيديبلوكيها ساعا تراجع ولاح تيلي
جمدو ملامح زينب وفيكسات شوفة فعمها..نفس الذكرى نفس اليوم..نهار توفا الغالي..نهار مشا السقف باش مغطية..نهار مشا لحنين
تجمعو دموع فعينيها وطاحو بزربة مقدراتش تمسحهم..وها عام اخر كيدوز على وفاة باها..لي مقدراتش تنساه
شافت فيها فاضمة بحزن وقربات منها طبطبات على ظهرها وقالت:لتبكييش ابنتي حنيني..مكتاب الله دعي معاه بالرحمة والمغفرة الله يرحمو فهاد نهار
تنهد العربي بحزن وقال تيشوف قدامو:اييه الله يرحمو ويوسع علييه..كان حنيين وادير الخير كون بقا تاواحد فينا مغيوقغ ليه هاكا..
فاضمة:(كدوز على ظهر زينب)الله يرحمو فهاد نهار..عمر خيرو مانسااه هو لي عطانا باش نجيو للمدينة
العربي:الله يرحمو
شاف فزينب لقاها تتبكي وتشهق مقدراتش تنسا ولا تحمل..لو انه كان اب عادي كان ممكن اجبدوه وتدعي ليه بالرحمة لكنه كان كلشي..مها باها خوها..كان يلعب معاها الى ملقاتش معامن تلعب..اهزها معاه فالفجر للجامع فخور بيها..وميخليهاش تبات فبيت مع رقية ديما مخششة فيه وتعلق فيه..تعاونو فالزيتون
دموعها شلال وشهقاتها مسموعين قطعات ليهم فالقلب..بقاو هي تيشوفو فيها مسوكرو ليها والو..تا كلمة مغتقدر تبردها..كل مرة كتفكر انها معندهاش كيضرها خاطرها..خلى فراغ كبير عندها ودموعها منشفوش عليه من سنين هادي
حلسات حداهم هي تتشوف فزينب تتبكي ونطقات:وا مالها؟؟
فاضمة:هي نفكرات باها وصافي
العربي:الله يرضي على بنتي..براكا راه غتمرضي هي راسك..بوجمعة كون بقا مغيبغيش اشوفك كتبكي هاكا..فرحي وقراي باش تاهو فقبرو ابقا مرتااح
وئام:(بقات فيها)مسكيينة..خالتي انا مشيت
فاضمة:جعدي
وئام:لا جيت هي نشوف اميمة(شافت بحزن فزينب)هاني مشيت
خرجات من عندهم محسرة عليها بقات فيها..وتاهي راها يتيمة وبلا أب ولايني ماشي بحالها..هي مات ولقات حنانو فعثمان لي عوضها على كلشي لدرجة كتنسا واش مات ليها..ومعمرها جبداتو وبكات عليه..ديما كترحم عليه وصافي حيت معاشتس معاه بزااف عكس فاتي وعثمان لي خلى بلاصتو عندهم
تقدا عثمان ورجع للدار حط المسمن وقال:ياله نوضي حطيه
ناضت وئام حطاتو وحطات كاسكروك جلسو كياكلو على خاطرهم تا سالاو وقال:وئام جيبي ليا باكي تتلكارو من بيتي والبريكة
شافت فيه بنفخة:سخارتك اناا..
عثمان:تنوضي ولا نقل مك
ناضت مبجقة جابتهم ليه وقالت:متكميش هنا تنتخنق
وقف وقال:عمري كميت قدامك اوا تكمشي
خرج من الدار عارفينو غادي للسطاح..طالع مع دروج وكيشعل فالكارو..مجاش فين اوصل ليه تاكان نطر النطرة لولة..لقى لباب محلول وبقا واقف قدامو كيحلل واناقش عرفها هي لتما..بتاسم بجنب ودفع لباب شوي ودخل..قلب بعينيه عليها مبانتش ليه..توجع لبيت صابون لقاها جالسا
نطر نطرة خرا وقال مكمش عينيه فيها:مالكي مكمشة تما كي جنون
خلعها مع كانت ساهيا تا قفزات من بلاصتها مخلوعة..شافتو قدام الباب مكروازي رجليه وكيكمي ببرود ..وعينيه عليها..معرفات مدير وهي تنوض جمعات الوقفة وبغاتوتخرج مبقاش عندها الوجه لي تشوف فيه..تسحابها سيد صافي خدا عليها نظرة خايبا..نطقات كتوجه للباب تخرج لي كان سادو بجسمو:سمح لياا
بغات تخرج وهو يحبسها وقال:رجعي رجعي جلسي
زينب:(حانيا راسها )لا بنزل
بغات تدوز وحبسها وقال:رجعي رجعي نشوف مالكي
هزات فيه راسها ببراءة ونيفها وفمها حمر وقالت:مممالي والو
عثمان:(حقق فيها شوفة)وقتما تلاقيت معاك نلقاك كتبكي؟؟مالكي على هاد الحالة
شافت فيه بحزن وقالت:مغتبقاش تلاقا معايا صافي
عثمان:(باهتمان)علاش؟؟
مجاوباتوش وبغات تخرج وحبسها بيدو..لاح لكارو فالارض وعسف عليه وقال:راه هضرت واقلة ولى ولفتي تعطيني مشي
شافت فيه بحزن وقالت:عفااك والله مافيا لي يهضر بيت هي نرتاح
زفر بقلة حيلة عرف ضرب ليها على لوتر الحساس وقال:زينب انا هي..
زينب؛معليكش(طاحت دمعة م عينيها)سولتي وهاني جاوبتك بنخرح عفااك
قرب منها ومد يدو بلا ميحس لجيهة عينيها مسح قطرة كانت بتخرج بصبعو وقال:ولاش اابكا؟؟البكا مورا الميت خسارة
زينب:(بحزن وحسات بلمستو حتينة)توحشتوو بزااف
عثمان:تاهو بيكون مسخاش(قرب تاني تاولا وجهها تحت من ذقنو)تاواحد مكيسخى بالدنيا وتاواحد مكيسخا اخلي ولادو وحبابو ولكن هادي هي دنيا..نهار فاش كيموت واحد كيتزاد واحد وهاكا غادية
زينب:(بحرقة بدات تتبكي)مشبعتش منو ..كون بقا منتكرفصش انا هاكا من دار لدار..كون بقا منسمعش الهضرة من عند شحال من واحد ومنثقلش على النااس كون كنت معززة فدار با..كون بقا شحال من حاجة كانت بتبدل(دارت يديها بين وجهها وبدات تتبكي)
فحين هو رجع لور بخطوة وهز يدو حك بيها شعرو من لور ملاقي ميدير ليها..مكرهش احضنها حيت عارف بنت مات ليها باها بغات حضن لا غير مابات جاه مابات مال بغات حضن لاغير..لو انه هو الاخر مكانش حنين مع وئام كان ممكن اكون عندها هاد نقص
كملات على هضرتها من وسط دموعها:تاحاحة مكانت بتكوون..كون راجل ختي نحتارمني ودايرني فوق راسي..كون منبقاش نضور من دار لدار..كون با بقا مغياكلنييش عمي فحقي وخلي مي كتقاتل باش تخلص ليا فلوس طوبيس..وااباقي خصني اما نصبر ولا نخدم ونتعذب باش اجيو الفلوس هءهءهءهءه با أ عثمان كان كيهز ليا الهم..با هو لي متينعسش الى مبتش واكلة..مكبرتاح تا كنشبع انا..ومكينعس تا كنكون انا بين يديه
زفر بنرفزة وقرب منها..حط يدو وحدة على راسها من لور هاز ليها راسها عندو..شاف وجهها المدور وعامر بدموع..كيزلقو دموع فيه وقال بجدية:عارفك باش تتحسي وعارف صعيبة عليك..تانا مات ليا با وخلاني مني للزمان هي انا راجل طمرت وخدمت ودمرت ونتي لا..نتي مقدرتيش عرفتي علاش؟؟(باقي كدمع)حيت هشيشة وحيت نية وكنتي بنت بااك..ونهار مشا مالقيتي تاحد..هادشي كولو لي قلتي حاس بييه ولاكن راه كفرتي فهاد اللحظة..كتعاندي قضاء الله وصافي..ربي باه اموت فديك اللحظة وربي باك نتي تعيشي هادشي كولو..الله فاش كيسلط علينا شي مصيبة خصنا نفرحو حيت الله منساناش..شحال من واحد تنشوفوه عايش فرحان مكيصلي مكيصوم وعندز لفلوس وواليظيه حداه وتنقولو ناري عندو زهر ولايني لا..ربي نااسييه والمنسيون فالدنيا هوما لي كيتعذبو فالاخرة...ربي مناسيكش مفكرك ودوزك من هادشي كولو باش تصبري وتحمدي الله
بقات متبعة معاه هضرتو وعينيها كيتحولو من عين لعبن فيه..كان كلامو بمثابة ابرة مهدئ ليها..ضرباتها فذراعها وكالماتها..من ملامحها بانت بلي رتاحت..عمر شي حد دوا معاها هاكا ديما تيقولو ليها صبري والله يرحمو وصافي هذا جاها نيشاان وهضر معاها فااصميم لدرجة دموعها حبسو وبقات هي تتسمع ليه..مكان تاواحد ممكن انصحها من غيرو هو لي عاش اليتم
طوالت النظرة بيناتهم كل واحد كيمرر من عين لعين لوخرا نظرتو..هي شفارها ملصقين بدموع وهو شوفتو جادة وبزااف
تنهداات بتعب وغمضات عينيها بتعب ياله بغات تحلهم تاكان جرها وحط راسها على صدرو بنفس اليد لي واخد بيها راسها مستعملش يد خرى..زفر وقال:كلشي تيدووز..تيبقا هي تعاويد
تنهدات بتعب وشفايفها تيترعدو من رعشة لي جاتها من تعنيقتو...بحالا كانت واقفا عام وملي جلسات ماسخاتش بالراحة..هاكاك حسات معاه..عياات بجهد ومكرهاتش ترتاح وفاش جرها عنقها بقا عقلها كيضرب باش تبعد وتقول عيب وحشومة ولكن قلبها لي كيقلب على راحة
حضن عثمان كان البديل ليها..حسات فيه بحنان الاب وعطف الام لي تحرمات منو بالاضافة لانها معمرها عنقات راجل..محسات هير وهي مغمضة عينيها وحاطا حنكها على صدرو ويديه مكاليا راسها وريحة الكارو لي تخلطات فحوايجهم بجوح..
وتاهو محاسس اش كيدير..عزات عليه بزاف وعارف بحرقتها..تيقوليك واحد المثل:الى مات باك وسد الركبة والى ماتت مك وسد العتبة
هو باقي عندو الركبة اتوسدها ولكن زينب نهار مات باها وسدات العتبة ديركت داكشي باش حس بيها محتاجة حضن ومينكؤش انه تاهو بغا يتقرب منها كثر وازيل الحواجز لي كانو مرضينو شهورا بتفكير فيها
***
لولا الاشتياق لما كان للعناق معنى
***
عنقها بيد متحركش وباقي محتاضنها وتاهي محكراتش ونسات راسها..تا بعدها هو ونطق:زيينب اجي تغسلي وجهك
وعات وبعدات بزربة منو عاد عاقت اش دارت..حشمات منو ومن الموقف وحنات راسها بخجل ونطق هو بهدوء:اجي غسلي وجهك
جرها من مرفقها وخرجها للروبني لي فسطاح وهي الخجل قاهرها..حشمات من اش دارت عنقااتو وبلا متحس باقي شبح لمستو على كتفها..
تحنات غسلات وجهها مزيان وهزاتو فيه هو لي مترقبها بابتسامة جانبيى..حقق فوجها لي كيقطر وقال:شوي دابا
حركات راسها باه وقرب هو منها خلاها بتطيح ليه..تسحابها معرت اش بيدير..وسطاح وهوما بجوج..تا مد يدو مسح ليها وجهها بشوي ولامسات يدو الخشنة وجها الدافئ الرطب خلات السيد اولي دايب قدامها..وهي راه تتحسس يديه لحنينة بحال رحمة سيدي ربي..محسات هي بتسامة ظهرات على شفايفها خلاتو تاهو افرنس بحالا تيقوليها نسييت كلشي ملي وقع..بحالا تمسح موقف الرفض وبحالا ماعمرو تقلق منها..
لان لحظتهم انداك لحظة الهدوء كانت حميمية اكثر واهم اكثر من انه اتفكر اشنو وقع
ناضت لبيت لما قضات حاجتها وخرجات كتلف فالوقت وعثمان هو لي فبالها..وهضرتو وكيفاش حضنها وراحتها لي حسات بيها..محسات هي ببتسامة بانت فشفايفعا من الفرحة..مغتنكرش ان حضنوو حنين بزااف
دازت أيام وايام فيهم زينب متلاقاتش بعثمان بتاتا..وتاهو مشافهاش واخا عيا اخلق فالصدف ولايني والو..هي تتخرج صباح بكري هو ناعس وترجع فلعشية وهو خارج..مكاينش فين اتلاقتو تال نهار جمعة كان هو روبو وهي خدامة فالغشية..
كانت فسطاح وقربات تسالي
طلع كيف عادتو يكمي ومعول القاها تما..باغي اهصر معاها..دخل وسمع صداع لبراهش..ضحك بجنب ومشا تكون فقنتبعييد شعل كارو وسرج رجل وخلا رجل مطوية وبدا كيتكيغ وثوت البراهش مسمووع وهي قليل فين كيسمت صوتها الرقيق..كما لكلرو لول وبقا مريح حالف مينزل تا يشوفها..واخير بعد ساعة كانت كملات وبدات تتخرج دراري..وتهضر:عمران بشوي فدروجج..سناء شدي فختك
نزلاتهم مع دروج ودارت تتسد باب بيت السطاح
ناض وقف هاز باكي تالكارو فيديه ونطق:بشوي عليك نتي
تلفتات وشافتو وزلقات بتسامة ففمها وقالت:اهلان
طلعها ونزلها كانت باقي لابسة جوايج الخروج..دجين مزير وشوميز طويلة تال حد الركبة وخفيفة وشال مرخوف عليها..رمشات بزربة ونطق هو كيقرب:ساليتي؟؟
عثمان:حيت خاص مي العقل والله..معارفش اصلا اش موقفني حداك واش تندير..ماشي الحماق هذاا ...الذل بعينيه هو هذاا..واقف مع وحدة محاملانيش وتنحاول معاها مرة خراا
حثقات فيه الشوفة باحراج وحشمات منو..كتحس بيه تيقول هاد الهضر ومحاملش كيعتارف انها كتعجبو وكاره راسو هنا عرفاتو فصراع مع عقلو وقلبو..نص فيه باغي ابعد عليه ونص فيه تيحن فيها..علاش هي بضبط اشمن صفة فيها مخليااه بلا قلب..زينها زوين مي عادي ماشي شي حاجة خارقة..لاطاي معمرو خقق فيها ولا شافها باش اقول معلق بيها على قبل لفصالة..يمكن داك الخاطر لي كيشوف شي حد وارتاح ليه هو السبب تا رتاح ليها..وحتا حيت جايبا العين من البراءة لي فيها
نطقات باحراج:سمح لياا مكنقصدش
شاف فيها بجدية وقال:ماشي موضوعنا باقي بنهضرو فهادشي مزيااان ونوضحو شحال من حاجة..دابا نمرتك مغتعطيهاش لياا
تحرك من بلاصتو داير ليها طريق وقال بنظرة حنونة ومليئة بالاعجاب:دووزي
بتاسمات ليه تا طلعو حناكها ودازت حشمانة حانية راسها وخرجات من سطاح مخليه هو واقف تيبرق فيها..تحلفي عليه ساحرة ليه
اما هي راه كلشي رجع ليها..راحة نفسية خطيرة وعاد فرحة كبيرة فقلبها..كانت هازا فيه من جهتو وفرحات فاش دوا معاها ولغا الفواصل..كيجيها مكيتفهمش..مرا تقول هذا مكاين ماحن منو ومرا تيخلعها فاش تيقندش ولاحظات دغيا كيطلع ليه دم واعدى حاجة عندو اعاود الهضرة
زينب:(ضحكات وجلسات حداها)خهههه والو..عجبني الحال ههه
فاضمة:اوا الله يخليك ديما ضاحكة
زينب:ياك باقي بينا نمشيو نتقداو لمي
فاضمة:سيري كولي وبداي عليك وياله نتقداو من سويقة
ناضت بنشااط وحيوية وتتمتمت ببعض الالحان الامازيغية بفمها..بدلات عليها ولبسات بيجامة تدار صيفية فالغوز بارد جايا كوم وواصلة تال الفخص مع سروالها ..مشات للكوزينة كضحك مع راصها صايبات خبز فيه زيت وهزات كاس تاناي تتاكل وتدوز وتفرنس..
سالات وناضت لعند فاضمة لقاتها تتلبس عليها ومشات تاهيا لبسات جلابتها الطويلة تالزقنة وشال خفيف على راسها وجرات بلغة فرجليها..هزات فلوسها مداتهم لفاضمة تديرهم فبزطامها وخرجو لجوج بيهم..شادا فيها زينب وتيهضرو وهي راشقا ليها
دخلو للسوبقة وبداو كيضورو من محل لمحل من فراشة ها لبيجامات ها الماعن ها الصبابط..وعامرة مع قرب رمضاان كلشي كيوجد وكلشي كيخرج فلعشية مكيقدروش على صهد النهار
شدات لمها بيجامة صيفية زوينة فالاخضر بارد بزااف وصابوو وتوب تجلابة ولختها مفس الشيء..حطات اغلب فلوسها تما ومتسوقاتش المهم تكسيهم وبززات على مرات عمها شرات ليها بيجامة تاهي واخا مبغاتش وبدات عليها لا حشومة وعاد غتكافاي..ولايني بززرات عليها
رجعو لادار محملين بالمياكي..حل ليهم محسن لي دخل ياكل وقال:على السلامة
عثمان:(عقد حجبتنو)نفس ااسبة لي لقيتي باش تمشي لوريكاا
زينب:(عرفاتو منساش)
عثمان:طلعي طلعي قوليهم بتجيبي شي لعبة من الحانوت ..منعطلكش هي حيت بديتي لهضرة فهادشي ومابيتش نحبس..حسن نكملو هضرتنا ونبينو شحال من حاجة دابا
زينب:معرفتش
عثمان:(بدل نبرتو لترجي)شوفي كي ديري تطلعي
زينب:(تنهدات)واخا نشوف كيندير
عثمان:هاني سبقتك
قطع عليها وحطتت تيلي بين يديها تتفكر فهضرتو..رتااحت راحة خطيرة معاه يمكن حيت معندها على من تحط الراس..
تفكراتو وناضت تتفكر اش دير ومالقات هي روشارج وخرجات عند مرات عمها وقالت متوترة:لالة هاني فالحانوت نجيب روشارج
فاضمة:اييه واخا
سرطات ريق وتمشات جيهة الباب خارجا وتترعد..سداتو وطلعات بزربة للسطاح..فاتت طاج فاش كاينا دارو وطلعات مع دروج سطاح لقاتو تاهو فاخر درجة وبيحل باب سطاح..سمع خطواتها وضار جيهتها شافيها بنظرة عادية وقال:طلعي خلاص
حل لباب وهي حشمانة منو هي حادرة عينيها..تبعاتو دخلو للسطاح كان لابس تيشورا نص كم وشورط واصل الركبة مبين رجليه كاسيهم زغب وتا يديه فيهم..وقف وتلفت ليها وقال:تجلسي؟؟
زينب:هاء واخا
مشا لبيت صابون حلو وبغا يهز منو علاش تجاس تا تبعاتو وقالت:خلينا هي هنا..حسن
مبغاتش اطلع شي حد والقاهم وتاهو طمر وقال مشير ليلاصة حدا ماكينو تصابون:جلسي لهيه هاني جاي
خضعات لامرو وريحات جامعا رجليها عندها..وحطات يدها على حنكها تتسناه ارجع..هو لي مشا سد باب سطاح من لداخل ودخل عندها ورض باب بيت الصابون..شعل ضو ونطقات هي مفزوعة:علاش سديتيه
شاف غيها بنظرة اشناهو ونطق:هي على قبلك ليطلع شي حد
زينب:ااه
جا ريح حداها فصندوق خاوي تالموناضة..باقي مضهرش معاها هي لي تتشوف فاص ليها وتتحس بتبوريشة فذاتها من قربو ليها..جبد باكي تالكارو هز منها كارو بغا يشعلو ونطق:شي مشكل الى كميت
زينب:(حركات راسها بنفي)تيخنقني عفااك
رضو لجيبو وقال وهو ملفت ليها وتيشوف فوجهها لي كساه التعب:ياله الالة تنسمعك
زينب:(بغباء)اشنو؟؟
عثمان:مبيتي تعاودي ليا والو..نبداو من خرجو مع اميمة..علاش خرجتي معاها
زينب:(شاف فيه بترجي)نعاود ليك ولكن عفااك متقولهاش لباها ولا لمحسن راه نقفرها
شاف فيها بنظرة جدية وقال:تقفريها؟؟مالها بتقتلك هضري هضري
زينب:مابيتش نشري ليها صداع وصافي
عثمان:واخا الالة هي هضري
زينب:حم دابا انا كنت بيت(شافت قدامها)نتقدا لاينا وختي شي حاجة وقلت للالة تمشي معايا
قاطعها:اجي بعدا لاش تتقولي ليها لالة؟؟
زينب:هااء حيت مرات عمي..حنا شلوح تنقولو لمرات العم لالة
عثمان:(شاف فيها وصايب الجلسة)ممم كملي
زينب:(شافت فيه تاهيا)ونطقات موراها اميمة وقالت ليا بتديني للمدينة نهار جمعة فوسط النهار نتقدا تتعرف شي حد تما
عثمان:اوى(حك لحيتو)
زينب:مشيت معاها شدينا طوبيس ودزنا للمدينة..دخلاتني لشي دروبا فيهم حوانت ولاكن تاع البناات ماشي العيالات قد اينا..وانا نقول ليها نخرجو براا..خرجنا لبرا وعيط ليها شي حد وداتنا لحدا لكتبية تاوقفات واحد طونوبيل كحلة فيها جوج رجاال
زينب:واخا .بديت عليها متمشيش وره حشومة وعاد اقدرو اديرو ليك شي حاجة..ووالو مبغاتش تكرع شويا قالت ليا ياله معانا
عثمان:(بنرفزة)ونتي معندك كلمة متتعرفيش تقولي لا
زينب:(باسى)مقدرتش..مقدرتش اثرات علي بهضرتها ومشيت معاها وكيما كان الحال راه بنت عمي منقدرش نخليها نمشي
شاف فيها بسخرية كيعيبها:بنت عمك أمسكينة؟؟بنت عمك هي لي بايعا ليك تيليفون مساوي تا خمسين درهم بخمسميات درهم..بنت عمك الالة هي لي دارت من هنا دازو وخلاتك مع ز*** براني ومتسوقاتش ومشات ضبر على راسها
بتاسم نيت وقال:مممالي والو..هي قامعاني اكبر قمعة ومحشماني مع ميي
زينب:ااصمت
عثمان:انا بيت هي نعرف اش لي خلاك تدمعي قدامها
زينب:معرفتش
عثمان؛وشكون بيعرف انا؟؟
زينب:مبيتش نتزوج اعثماان
عثمان:واش بيتي؟؟نبقاو هاكا شوف فيا نشوفيك
زينب:(ضحكات بشوب)هههه نتا لي تتشوف فياا
هز حاجب وضحك:يااك الالة هههههه زعما نتي لا هههه
زينب:ههه لا
عثمان:واخا الالة..انا لي تنشوفيك وانا لي تابعك هههه
زينب:هههه
رجع للجدية ديالو بعدما لطف الجو وقال:مكيجيكش راسك فشكل فاش متتقوليش لا
زينب:مفهمتش
عثمان:(شتف قدامو)نتي دابا تقدر نجي انا ونطلب منك شي حاجة وتحشمي ترديها فوجهي ونتي ديك الحاجة معاجباكش وتقبليها
زينب:الى كانت غتفرحك علاش لا
شاف فيها بنظرة حادة:وفرحتك نتي فين؟
زينب:معرت..متنقدرش نقول لا
عثمان:خصك تعلمي تقوليها..ضروري واحد نهار تقولي لا مصلحتي خي لولة..ال بقيتي هاكا لي جا يمسح فيك رجلييه(شافها تقلقات)باش منكذبش علييك..هذا هو بلان لي متيخسرش خاطر نااي وخاطرو اخسر..لهلا يقاب ولا يشقلب بشي خاطر لشي قواد..المهم خاطرك ورااحتك
زينب:(تتشوف فاص)الصمت
عثمان؛(كمل كلامو)تصوري كون شدوكم لبوليس فطريق اوريكا ولا هي تصادفتو مع الحملة كون جمعو مك نتي وياها تبردو فالكوميسارية وديك ساعا بتقوليهم اميمة ديالك راه هي لي داتنا
زينب:(بسرعة)لا ميتيقوهاش
عثمان:(بسخرية)شكون لي بنتهم؟؟نتي ولا هي؟؟بيثيقو بنتهم من لخر..بعدي على طريقها ونهار نبي تخرج ولا تقود مديركش طريق..هي تطير ونتي دريويشة مديالكش طريقها
زينب:(تنهدات بتعب)وحدة كابرة فالبلاد مع مها لي تتقىيها الحشمة والصواب وتحني الراس لنااس لكباار كي بيتيها تطلع؟؟(شافت فيه بتعب)انا نيت تنعيا وبزااف..تنشوف راسي دايرا خاطر للناس وانا نبقا بلا خاطر..تنسمع لنااس وانا تاحد مبسمعني
عثمان:معندكش لمن تعاودي؟؟
زينب؛كون عندي لمن نعاود منكونش مريضة فراسي هاكا..انا فليل فاش كنعس كنبقا نفكر ياكما درت شي حاجة لشي حد وابقا ضارني راسي ونوض معولة نطلب سماحة من داك الانساان..كنمرض فرااسب وكنشد فخاطري تكنطيح
سها فيها متبعها كتحل ليه قلبها وتتهضر بعفوية وهي لي معروف عليها حشومية ومكتهزش الراس بتاتا وتا بنادم مكتزعمش عليه ولاكن فاش كينوض شي حد اجبد ليها معاناتها تتطلق وتعاود وتعاود تكتبرد..نطق بحنان:فايتا مرضتي بهادشي؟؟
زينب؛(دمعو عينيها)ثلاثة تالخطرات..
هثمان:(كمش عينيه)ايمتا؟؟
زينب:(شافت قدامعا)واحد لمرة كنت تعصبت جمعت جمغت فقلبي تا مباقيش قديت..كنت تنقرا فالسيزيام ولي دار ليا شي حاجة كنسكت معندي لمن نعاود..وتنبقا مخبية مخبية تكنطيح..داك نهار جيت من لمدرسة فسبت وحد وتخاصمات معايا مي واصلا كنت جامعا شحاال..طلعت لبيت باا وزدت تنبكي تا تكوانسييت من يدي ورجليي شحاال وانا هاكاك..طلعات رقية ختي هي تشوفني فين غبرت لقاتني هاكاك وتخلعات..جاو تيجريو داوني لسبيطار نعست فيه شي سيمانة تا وليت بخيير زرجعت للدار..وكلشي كيهاملني مزياان هي بريت ورجع بنادم كي ديما..يعني لاش نبقا نعاود معرفت واش ناس لي خايبين ولا انا لي دغيا كنتهرس
حقق فيها شوفة مزياان وكيقرا ماامح وجهها..كيفاش ان بنت بحالها فعمر زهوور تكون كتعاني هاكا..وهذا هو الواقع واحد متيقولش لا ومكيديش على ناس راه تيقولو عليه عادي مكيتقلقش ..عادي راه ضريف ..مي الواحد الى كان قافز وكيحمر عينيه فنااس كيضربو ليه الف حسااب..
وزينب جات نوع لاول لي ماقدرش تخسر خاطر شي حد..ومتثدرش تقلل الادب على شي حد..ولا تنقص منو ولا تديه للهاوية
بتاسمات ليه بخجل وقلبات وجهها قدامها حشمانة وتتحبس الضحكة..تاسبد ولا هي تيفرنس ليها هاجبو الحال شويا وهي تشهق زقالت:هءءء ويبي تعطلت
ياله بيهضر وهي تجمع نوضة من حداه معرفها كي دارت ناضت من حداه حلات الباب تالبيت وااع سطاح وخرجات دارت من هنا دازو ونازلة تتدردك فدؤووج..محس بيها اش دارت تا نزلات سيدة..بقت تيبيض فعينيه تا لخر وضحك عليها..تا بسلامة ماقالتهاش خلاتو بلاكة..ضحك عليها تاشبع وفهم انها تخلعات..جبد كارو كماه على خاطرو كيفرنس بوحدو لانه حيد الحواجز معاها وخلاها تكون على راحتها
اما هي راه موقفات تال درجة لخرا حدا باب دار عمها تتنهج..قادات شالها وتنفسات مزيان عاد دخلات حيت الياب محلول..لقات عمها وفاضمة سلمات عليه وجلساات ونطق العربي:فين كنتي؟؟
زينب:تافين اعمي..عمي نهار لحد بنمشي لدارنا ان شاء الله
العربي:وايلي سخيتي بينا
زينب:والله مسخيت ولايني توحشت اينا وختي وخالي
العربي:(بتاسم)مافيها بااس..داركم لهيه وهنا
زينب:دلكشي
فاضمة:نوض نرض شوي تروز
ناضت وتبعاتها زينب نقات ليها الروز حيت تاشوف عندها ناقص..وجلسات حداها تيهضرز ولوخرا مرفوعة وتتفكر فيه وتفرنس هي بوحدها
تحط العشا لي عبارة عن روز بالحليب وتعشاو بهناء وكلها تشقلب انعس فحالو
شدات زينب قنت حدا الحيط متكية ومغطيو بايزار حمر..شعرها نازل على وجهها حيت مخربق وبجنبها اميمة..تا كيصوني بنمرتو هو لي كان فبيتو حاط قدامو بيسي تيتفرج ففيلم وطاحت فبالو وتاصل بيها فورا..مبتاسم وداير يدو ورا عنقو
حطات تيلي بعدما تأكدات انه اخر مبساج عاضا على شفايفها وتتفرنس بوحدها..عاجبها هاد لمود جديد..اهتمام..اعجاب..حديث وشيء يشغل البال
***
حينما تخجل المرأة تفوح عطرا لا يخطئه انف رجل
#احلام مستاغنمي
***
وكل الليالي التي تبدأ بك لها معنى
أود لو فقط اوسد رأسي المهموم على فخديك
تتحسسين خصلات شعري الضعيفة..
تخبرينيني عن يومك الجميل واحكي لك عن يومي بدونك
نتبادل اطراف الحديث..نسأل بعضنا عن احوالنا..ثم ننام في حضن يعضنا
تلك كانت ولا تزال اقصى امانينا..
ولكن من يدري فالامنيات لاتموت..والاحلام تنتهي في ديسمبر
***
ككل الصباحات..فاقت زينب نشيطة..مرت ايام قليل على اخر مرة شافت عثمان فسطاح..تيهضرو فالوانساب اغلب المرات.ولات تتشارجي ااباص باش تبقا مجمعة معاه..ولاو تيهضرو صباح عشية وسط نهار زفليل كيطلبها تمشي لطواليط تهضر ابييل وتيهضرو شوي وتقطع..
خرجات معاها فاضمة وتمو غاديين وسط النهار فديك الحرنة باش اشدو طاكسي ولا طوبيس لباب غمات منين بتمشي لايت اورير عاد لبلادهم
باقي مخرجوش على درب رمقات فاضمة محسن جالس مع ضحاابو ووقفات وعيطات ليه..تم جاي كيتعثر ويتمختر فرجلييه وعينه مكمشهم من شمش..وقف عليهم وقال؛فين شادينها
زينب:بنطلع للدار
محسن:وايلي اختي صافي سخيتي..(سلم عليها بوجهو وعنقها تا تصدمات)
عنقها باخوة وقال كيضحك:بتخلي بلاصتك اختي والله
بتاسمات بتونر من الموقف وعاد فشارع وقالت:براك الله وفيك
فاضمة:اوى براكا لتعطلنااش باقي تابعاها طرييق
محسن؛سلمي عليهم
زينب:مبلغ اخويا تهلى فراسك
بناسم ليها وحط يدو على صدرو كعلامة الله يحفظك..تحركلت زينب رفقة فاضمة كيخرجو على دروب سيدي يوسف العريقة خارجيم جيهة سووق..نعتات لطاكسي ووقف وقالت؛سوق ربيع اسيدي
الشيفور:اييه ابنتي..صبري نحل ليك فين تحطي صااك
بيدما هو نزل تعانقاات مع فاضمةبحرارة وقالت :سمحو ليا الالة سمحو ليا
فاضمة:نني لي سمحي لينا..متغيبيش عودي جيي واخا بلاقراية..وسلمي على داركم وختك وخالك وتا داك الشلاهبي تعمك ههه
ضحكات زينب بخفة وطلعات للطاكسي وتا شيفور طلع وتحرك بيها فاتجاه سوق ربيع فين غتشد طوبييس ايت اورير باش موراها تشد مركوب اخر لدارهم
وبالفعل توجه بيها ليوق ربيع ونزلات فرحاانة حيت غتشوف مها وختها..ركبات فاول طوبيس تابت اوريرلقاتو قدامها مع تيكونو موجودين حيت المحطة لولة هي هاديك..ترصات فبلاصتها وجبدات تيليفونها تتخربق فيه وتدور فالواتساب وتشوف عثمان واش حل ساعا من صباح محلش..رضاتوو لبلاصتو فجيبها ودورات وجهها جيهة شرجم وساح بيها تفكيرها فايام فاش كانت تتركب فهاد طوبيس كل نهار تاكتكره شي حاجة سميتها ايت اورير بكثرة ماحفضات التراجي تاع طوبيس هاهي اايوم فرحانة فيه وتتسنا بفارغ الصبر امتا تنزل فايت اورير باش تشد طريق لعند مها
وصل طوبيس نفس الطريق والصهد فيه بنادم كيتقطرو منو العروقات..تا كتسمع تيلي كيفيبري فجيبها جبداتو لقات نمرتو..بتاسمات وترددات باش تجاوب حيت فطوبيس..ولكن فالاخير جاوبات وقالت بصوت شبه منخفض :الو
قطع عليها ياله بتهضر خلاها تتبيض فعينيها بصدمة..شافت فتياي بعدم تصديق وعرفاتو تعصب مي مفهماتش لاش..مظناتوش اكبر الموضوع هاكا..ساعا بان ليها تعصب نييت..ولامت راسها لتبدأ دواامة التفكير والتحليل كيفاش تشرح ليه..دخلات للواتس دغيا لقاتو حال وكتبات ليه:عثمان واش تقلقتي؟؟راه مقصدتش والله
طالعين جوج شرطات ومشافش الميساج..فجين هو راه لاح المشقوف على ناموسية وخرج مخنور لبرا ايااكل لماكلة لي حطات ليه وئام بلا هضرة بلا جوج..معصب هي مع راسو..هو كان معول اليوم اقنعها اشوفها وسيدة مشات ولي عصبو انها مقالتهاش لييه يعني رأيك ميهمش
ترينفا بالمعقول وتقلب ليه المود..مهضر ماتكلم لا مع مو ولا ختو..تا كمل وناض دخل لحمام قضا حاجتو وخرج مخنزر توجه لبيتو ديركت..تلاح على سريرو معصب وتيدور هضرتها فراسو..وتيسمع لتيلي كيفيبري..مافيهش لي يجاوب كااع
تا صدعو زهزو لقا ميساجاتها..عقد حجبانو باستفهام ودخل اقراهم لقاها مصيفتا ليه جريدة؛عثمان شوف زالله مقصدت هي معرفت كيدرت تانسييت والله انا راه هي نسييت والله سمح لياا مفصدتش..متقلقش ومتعصبش
ماحدو تيقرا وهو تيفك تغوبيشا وافرنس تا كملو وعرفها بتكون تتفتفت ..تسند على مرفقو وكتب ليها :بنعس درووك عياان نفيق ومعيط ليك بيدما توصلي
هادشي لي خسر عليها وطفا لكونيكسيون ورجع انعس حين كيعيا..اما هي راه جالسة فترانزيت مع نااس شلووح طالعين لنفس وجهتها..اغلبهم شلوح..وهي مقنتة تتشوف فتيلي تتسناه اجاوب وملامحها حزنو تا طلع فيي وهي تفافا بلاصتها وخي شافتو كيكتب بدا قلبها تيضرب اما فاش صيفت ليها لميساج بحالا خوا عليها الما بارد بمعنى اخر عطاها البارد وحسابها باقي مفكووه..كمشات فمها بحزن وكتبات ليه:واخاا..رتاح شوي
شافت شرطا وحدة وسدات كونكسيون تاهيا وبقات شادا تيلي
تحركات ترانزيت والوجهة سوق الاربعاء تغدوين نواحي مراكش..ومحدهم كيسرعو فطريق وبتسامتها كترسم على شفاهها..حالها بحال اي مهاجر مغربي خارج برا البلاد وفاش تيجي للمغرب تتولي فرحتو فرحتين..
كتبتاسم وتشم الهوا من الشرجم..ااه شحال توحشات ريحة اابلاد..وريحة اابساطة..
دازت ساعة ونص عاد وصلات للسوق الاسبوعي الاربعاءتغدوين..بلاصة بحال فيلاج صغير فيه بعض ديور وكذلك بزاف تالحوانت تالتجارة
توقفات ترانزيت فالسوق ونزلات منو زينب مقاظاها فرحة ..تتشوف البلايص والحوانت كلشي بلاصتو..وتسرط الفرحة..شدات صاكها الكبير الثقيل وبدات كتمشى وسط السوق لي قرب اخوا مبقاو فيه هي ناس لي غيركبو سوا اطلعو للدواور اولا ارجعو لمراكش..ومع ااصيف كانت العوينة عاامرة بزااف..بقات كتمشى وتقرنس موحشا بلادها بزااف تاوقفات حدا واحد المحل تاع الماكلة مولاه باقي كيشوي الكبدة وباين فيه العيا..بتاسمات ونطقات بشلحة:عفااك بنسولك سي علي فيناهو؟؟
شاف فيها وطلعها ونزلها وقال بنفس لغتها:شكون نتي لي تتسولي عليه؟؟
زينب:بنت ختو
بتاسم تاهو بدورو وقال:اشاوا بنت عيشة هادي..تبارك تبارط الله نتي لي تتقراي فالمدينة
زينب:ااه
خرج من بلاصة الطياب وجا كيمسح يديه فسروالو واسلم عليها زاضحك وقال بترحيب:زيدي زيدي دخلي تاكلي شويي
زينب:(بامتنان)الله يعطيك الخير..بلاش والله الى واكلة..فيناهو خالي؟؟
..:)تيعيط)سي عليي وا سي علييي عللييي وااا علييي
تم جاي سابقو صوتو الامازيغي:ايهااي على عليي تقادو لكتااف
..:اجي راه بنت ختك تتسول فيك
بان علي لزينب لابس جلابة خفيفة مع بلغة وداير رزة وقال كيضحك مقاداه فرحة:واش زينب؟؟(شافها)زيينب ايينووو
تقدمات بزربو لعندو عنقاااتوو بحرارة وتاهو كيضرب على ظهرها واعنقها فرحاان:على سلامتك على سلامتك المرضية
طلعو لرانزيت لي غتديهم وتقربهم لدوارهم..دوار مريوات بضبط دوار اينر..
هضرة من هنا ومن لهيه على لحال والاحوال والعيشو تما والعيشة فالبلاد واش طاري..وبدا كيعاود ليها عاى عمها وبطشوو واتشكاا..تاوصلو..نزلو لقاو راسهم فشانطي وقربات المغرب وقدامهم هي الدواور لي خصهم ادخلو ليهن علىرجليهم..تعاونو فصاك تاهزوه بجوج وتمو داخلين بين التراب الحمر ووسط الشجر..وانزلو من الشهقات وللهضبات..تابان ليهم دوارهم ودخلو ليه كيضحكو واهضرو..وشحال توحشات زينب هنا..فكل بلاصة تدوز منها تتفكر انها لعبات فيها ولا زارتها..حنين فكل بلاصة وشغف فكل مكان كيردها لذكرى زمان
***
مع دخلة للدوار تسمع اذان المغرب وهوما واقفين فوق حجرة كببيرة تتشوف منها زينب الصمعة تجامع والاراضي لي عند عمها ولي دياولها..خمسة تالاراضي على طولهم تاوعها شرعاا..وفنفس الوقت تتشوف دار باها..دارو تالبقاء المقبرة..
سهات وتذكرات فاش تتجي عندو للمقبرة وفاش كان كيهزها فاراضيه قبل مايموت..تهندات بحزن وقالت:توحشت اابلاد
نطق خالها بفرحة:شووف شوف رااه مك منين جااياا
تلفتات بسرعة متخلية على ملامح الحزن وراسما ملامح الفرحة..شافتها من بعييد جايا هازا الحشيش على ضهرها..بزاف تالربيع على ظهرهاوالبقرة قدامها تتكود فيها كانت سارحاها..
شافت عيشة لي حانية راسها حين الثقل قدامها كي لمحاتها بتاسمات وستغرباات..وهي تحط من ظهرها داكشي مع اقتراب زينب لي سرعان ماتلاحت عليها معنقاها بحرارة..وتا عيشو عنقاتها ممصدقاش وقالت بشلحة:ايهااي على لمدينية هههه
عيشة:اوهو لااا..نتي عاد جيتي زيدي زيدي بتفرح رقية فاش تشوفك
زينب"توحشتها هههه
هزات عيشة الربيع وتمو طالغين للدار لي جات لفوق مبنية تما..وتتهضر مع زينب وتسولها على لحال والاحوال وتضحك معاها..تفارقو مع علي لي داز لجامع الحق صلاة المغىب..
بانت ليها دارهم عن قريب كيما هي ..دار كبيرة مبنية بتراب حمر ومصبوغة بزرق ..كبيرو بزااف وفيها جوج طااج
دار كتفكرها بطفولتها وبفترة بلوغها..كبيرة لتحت فيه باب قصديري تيتحل تا كدفعو وحداه بلاصة قين تيحطو البقرى..دخلاتها مها لبلاصتها وسدات عليها وخرجات لقات زينب فبلاصتها تتشوف فدار كأنها عاد كتستكشف فيها
هزات صاكها من جديد ودخلات من الباب لي دفعاتو مها..نزلو على عتبة خشبية ومع النزلة فاحت ريحة قهوة لذيذة بالحليب تاللبقر والقهوة معطرة فارجاء المكان ستنشقاتها ةقالت:احح الله فهوة رقية مبحالاش هههه
شافت زينب جيها الضو لي خارج من لكوزينة تتنسا ختها تخرج..هي اخت من الام لكن احن من اي اخت..
خرجات مرا فعمرها ديك 27 سنة..لابسا بيجامة طوييلة وصندالة تالميكة باينين منها رجليها لي مشققين ومكحلاخم شمش ..دايرا زيف على راسها..سميمرة مي سمورية شمش اما هي بيضة..غليضة على زيمب باضعاف وزينها مايل لعيشة وقالت؛خااني هاني شكون جاا(شافت زينب)ااااه زييين اييينووو ههههه
مشات تتزرب لعندها ولوخرا جرات لعندها تلاحت فحضنها كيف العادة..عنااق حاار بيناتهم ومبغاوش اطلقو تا تسمعو شهقات رقية لي تتبوس فزينب وتعاود:ااصغييوىة هههه تتبيرت نباباس ديااي هههه
زينب:ههخخه لتبكييش ههههه
رقية:(باستها فحنوكها)توحشتك توحشتك
زينب:تانااا(عاودات عنقاتها)بزاااف فين ولادك
تمو خارجين جوج دراري من بييت بعييد فاخر الطوالة باينين عاد غاسلين من شعرهم لي مغطيينو بطاقياات..واحد فيهم سمرر بجهد ولاخر بيض..تيتجراوا ماي سافوها..محسات تاوقفو عليها واتغااتوو
زينب:احححح اي اي توحشتكم(نزلات عندهم عنقاتهم بجوج)
عيشة:ياله بستوها سيرو تفرجو ومنسمعش حسكم ولا نكويكم بااقتييب
رقية:بديتي تاني ههههه زينب اجي اجي معايا ههه
جراتها من وسطهم وخلات عيشة تتقابح مع ولاد بنتها لي ضاسريين على جهد كيطيرو مع طيوور وتدعي فيهم..فحين زينب دخلات للكوزينة مع رقية لي فرحانة بيها..
كانت كوزينة ببوطاجي مضسس وفيه رزبيني واحد لا غير وثلاجة لا غير والماعن..حطات ليها حك ديال نيدو فيه سكر وجلسات عليه وتقابلات معاها فوق خنشة عامرة بالربيع وقالت بحماس:لبتاس علييك بخيير ...كي دايرا مع القراية نجحتي؟؟
زينب:(ضحكات وهي شادا يد ختها)بخيير هههه وحدة وحدة هههه
رقية؛هههه توحشتك والله...مزيان ملي جيتي
زينب:نانا وتوحشت رمضان فدارناا
رفية:احسن مادرتي هههه اوا كيجاتك المدينة؟؟
اول ماطاح فبالها هو عثمان وهي تبتاسم بعذوبة وقالت:زوييينة هههه
رفية؛(هزات حاجبها)هي ولفتي هههه صافي وليتي مدينية
زينب؛هههه لا انا بنت جبل هههه زوينة والله..سلمو عليكم دار عمي كاملليين
هزات رقية صينية تالقهوة فيها بريق والكيسان وقالت:نوضو ناكلو ونجمعوو
وقفو وتبعوها مع دخيلة تا دخلو للبيت صغير فيه تلفازة محطوطة على طبلة طويلة كانت فالال تاع الماكلة وفوقها تليكوموندات..ويحيى زياسين مكسلين تيتفرجو هي شافوها وناضو صايبو الجلسة فوق التلقان لي منهم للارض وهي بونج هاابط على جهد والمخاد فلون وتلقان فلون والحيوط مقشرة صباغتهن بين الزرق والبيض..جلسو واخشااو فيها دراري وهي تنطق عيشة:ادووك القرود بعدو بعدو خليو خالتكم تساراحو
عنقاتهم زينب بحب وقالت:خليهم توحشتهم بزااف
دحلات رقية هازا صينية خرا فيها زلافة تالزيت اابلدية مقطرة وزبدة بلدية وزيتون والعسل الحر..والخبز فشبكة..حطاتهم وقالت:تاهوما تيضلو علي تتبيرت تتبيرت ههههه
تجمعات العائلة الصغيرة بيناتهم على وجبة الكاسكروط بحيوية ونشاط تيضحكو وانشطو ودراري تينقزو عليهم وعيشو تدعي وتشير باشما لقاات..تا شهموها وحطات يديها على راسها وقالت:لا اله الا الله محمد رسول الله مع هاد الجنوون..واشدي ولادك شدييهم
رقية:(تضحك مع زينب ممسوقاش)ههههه سكتي اينا خليني هههه
رجعات كضحك معاها واتعاودوو وعيشو تتنكر تانطقات؛بدوزي معانا رمضان ياك
زينب:اه هه
عيشة:مزيان غدا نوجد ليك واحد تخليطة تردي بيها صحتك شوي ...الحناك مبقاوش عندك(تتقلب ليها فيهم)وشوفي تحت عينيك واقلة تتسهري لا؟؟
رقية؛(عوجات فمها)لي تزوجو طفرووه..قراي تالاعنداك هادي اه مساليا راسك عندهت الزواج هو كلشي مكرهاتش تفرش صلاية تحت رجلين الرجال وتعبدهم
نزلات عليها الدقة لكتافها من طرف عيشو لي بغات تبخ سم وبدات تتغوت:نعلة الله وعليك المااسخة ماحشمتييش هاا..الله يمسخك
ضحكات رقية وناضت تحك فدقة تحلف عليها ممزوجا مامطلقا ماوالدة عندها عقل بنت صغيرة..وبدات تتقول:اوا نتي لي تتفطرينا براجل وتغدينا بييه الى عينيك فيه تزوجي وهني الوقت
ضحكات زينب عليها وتتخرج فعينيها باش تحشم من مها ساعا سيدة موافا تتخرج لعين فعيشة وتجاوب معاها عكس زينب
عيشة:(ناضت تتقلب على صندالة وتدعي)الله يخليك بحالك بحال ولادك تتاكلو من الخنشوش
وقفات زينب تتحبس فيها وتضحك ودراري تينقزو حداهم:صافي صافي امي متديش عليها ههه
عيشة:الله يديها ان شاء الله..بنت الحراام
رقية:ههههه واعبووش برااكاا ههههه
خزات الماعن وخرجات وتتغني وتحرك ليها فكتافها وتشطح بيهم مطلعاها عليها ولوخرا مخرجا عينيها وتتدعي فيها وزينب تتبرد فيها
وقفات تتفك فشالها وخرحات من البيت وقالت:نطاع لبيتك اينا
عيشة:طلعييي
هزات صاكها وطلعات مبتاسمة ..خرجات من دار حيت دروج الفوق كاينين برا..طلعات معاهم ولقات باب خشبي مصبوغ بصفر وزرق وقدامو سطولة تاع الغرس بانواعو..حلات ااساقطة ودخلات باش تلقا جوج بيووت واحد على ليمن ولاخر ليسر وفاص ليها السطاح لي طاح عليه الظلام والسر تالليل..ضرب فيها الغربي..حولات عينيها لبيت مها وباها وتنهدات وهي تتفكر فاش تتجي عندهم باش تنعس حدا باها..بتتسمات بحزن وقلبات الوجهة للبيت لي فاص معاه ولي عبارة عن بييت كبير فيه جوج شراجم للتهوية ..مفرش بزرابي كثاار مصنوعين باليد مع مخيداات كتوسطهم طبلة ملمطة بميكة فيها وريدات..والحصيرة من لتحن..وفاخر البيت كاين الفراش..بزاف تالمانطات للضياف باش اتغطاو موضوعين وحدة فوق وحدة..حطات صاكها وبدلات حوايجها ببيجامة بيتية مريحة..تفكرات تيليفونها وجبداتو لقات بزاف تالاتصالات من عندو..شي عشرة تالمكالمات تخلعات وحافتو اكون تقلق..وطلقات 3G وناضت تتقلب على ريزو مزيان تا لقاتو وطتبات ليه سمح ليا مشتوش كنت مع دارنا
ناضن من بلاصتها وشدات الخط وتمات خارجا وهي تسمع صوتو تيهلل عليها معصب؛نهار باقي نكون تنهضر مع دلمك وتقطعي علي نقطع لييك لساانك من الجذر..لبااقييشش تقطعيي ايناادم لاش تقطعي لاش
خلعها صوتو وزربات باش تخرج من الكوزينة عند بالها بتسمعهم رفية..وقالت باحراج وصوت منخافض"دخلات ميي
عثمان:(مزال بنفس الغضب)وتكون تا جدااك..خلي الخط مشدود وقولي ليها صاحبتي
زينب:متنعرفش نكتب عععع سمح لياا
عثمان:نتي لي سمحي ليا تنبرزطك(بغيض)اخر مرة باقي نعيط لييك
قطع عليها تاهو وخلاها الكلمة على وشك تخرج من فوهها..بلاكة بالكعقول..سرطات الريق ودمعو عينيها بقت فيا الحال..فهمات انه مغيبقاش اسول فيها باقي ولا يهضرها وبدات تتلوم فراسها وتلعن..اما هو رراه خشا تياي فجيبو معصب وجبد كارو تيكميه محاملش اابلان..متعصبو بهاد لبلانات تاع الخوف وزعما ديجا هاضر معاها فهاد الموضوع
كما كااروه وبقا مخنزر..عاد نزل فحالو اتلف الوقت..اما هي راه رجعات حدا ختها وجلسات مكونة حزينة..
رقية:مالكي؟؟
زينب:والو
رفية؛واهي قولي
زينب؛تليل فففف
رقية:اييه صافي اليوم نسهروو
زينب:(من غير نفس)ان شاء الله
كملات رقية طيابها تتغني وولادها كل مرة داخلين خاطفين خيزو ولا بطاطا وهي تتنهي فيهم..اما عيشة رىه شادا تمازيغت وتتشخر حداها
تحط العشا لي عبارة عن طاحين تتلخضرة بزااف ولحم قليلة وتجمعو عليه تياكلوه تاني واهضرو وهي هي دايرا الخاطر..تاسالاو زناضت رقية هزات الماعن تتبعاتها زينب:اري نغسل دوك الماعن
رقية؛لا لا هي سبقي للبيت نغسلهم ونطلع
زينب:(باصرار)لا هي سيري نعسي دراري وانا نخلط عليك
رقية:اخا ودغيا باش نسهرو هه
بتاسمات ليها بزز ومشات مخلياها تتغسل فلماعن وتخمم فيه بحزن..عزيز عليها وتيعاملها مزيان وكيلوح لهضرة بلي باغيها للحلال
كملاتهم ونشفات الكوزينة وخرجات منها ملاقية مع مها ...سدو الدار لتحت وطلعو كلهم للفوق انعسوو..باست على كتفها وقالت:تمنسوين
عيشة:الله يمسيك على خيير
دخلان عيشة لبيتها تتسغفر الله وزينب لبيت لاونفاص معاه لقات ختها محيدة الطبلة لجنب..ومفرشا الكواش والمخاد مهودين وولادها مكوخيين حداها تتغطي فيهم بالمانطات مع تيتحرك البرد..
زينب:نعسوو
رقية:بالعصاا باش نعسوو الله يخلييهم
زينب:هههه ضاسرييم ولاكن حلويين
رقية:(باست ولادها)اودي راه دنيا ديالي هادي..
زينب؛لله يخليهم ليك
رقية:اميين
حيدات شالها وكذلك رقية لاحت لفوق تالبيجامة وقالت:ففف صهد ههه
تكاو بجوج قراب لبعضهم وجبدات رقية ميكة من المخدة علاش متكية فيها الكركاع واللوز وقالت:ندوزو الوقت
ضحكات زينب وقالت:مالكي مخبياهم تما هههه
رقية؛هههه الى هرفاتني مك هزيت من الخزين تذبحني فالعيد هههه
رقية:سمعي ازينب نقوليك لي ينفعك..تزاديتي وسط مك وباك وبقيتي تتي ومك لا حنين لا رحيم..ها عمك واكلك فحقك وها تمارة تضىبيها باش تقراي الى لقيتي لي يفكك علاش لا؟؟
زينب:عاد قييل قلتي لمي عقلك فيه الراجل
رقية:حيت الرجال لي بغات ليك مي بحال داك حمار المعصرة لي جابت ليا تا صدقت مطلقة بجوج ولاد ةانا باقي صغيرة مزال مشفت متشوفت اما واحد بيخرج من هاد القهرة واعيشك فالمدينة وبدارو علاش لا
زينب؛فهميني ترقية..عثمان راه تمناه اي بنت والله راه كون تشوفيه كي تيتعامل معايا واخا عصبي ولكن ضرييف وحنييين بزااف ولاكن نعرفتش والله..
رقية:عرفتي مايجيك مليح..صلي شي جوج ركيعات وطلبي فيهم الله ايسر ليك امرك
زينب:ان شاء الله..
رقية:(فرنسات)دابا بيناتنا هههه مكيعجبكش ههه
ضحكات زينب بحشمة وتلفتات نعسلت على ظهرها وقالت:ههههه اه..
رقية:زوين هو فوجهو؟؟
زينب:(بدون وعي)زوييين بزااف تافات القيااس هههه
رقية:ايهاي على لي مبغاتوش هههه فاش خدام بعدا
زينب:تيبيع صبابط
رقية:مزيانة نشبعو هي صبايط ههههه
ضحكات زينب وقالت:حمقة لوخراا اوا هذا ماكان..عرفتي فاش جيت لهنا ومشفتوش بغا ياكل راسو وتعصب وتقلق ولكن دغيا تيبرد
رقية:(حطات ولدها بلاصتو)ههههه اوا الله يدير ليك لي فيه الخير
زينب:امين عنداك تعاودي هادشي لمي
رقية:من غدا بتنوض تجمع ليك وراق العقد هههه
ضحكات زينب:هههعع والله الى
تكات رقية حداها وقلبو الهضؤة كيتعاودو هنا ولهيه وعلى ايام زمان وعلى كلشي تيهضرو الحاصول اجموع البنات فسهرة عائلية لا ينتهي خاصة فبيت وحدة ومكمشين كامليين..تاغفااو مع الوحدة تليل كل وحدة منشورة فقنت
****
وهاهو الصباح..بشمس جديدة لم تنتظرني كي تشرق
صباح جميل كرائحة القهوة المسائية
كمسك..كعطر..كورد وكذخان سجائر
***
مع بدات تتبان الشمس وتدخل اشعتها من النوافذ..وصوت الدجاج كيبقبق مع اصوات بعيدة تاع البقر..وكذلك صوت فيبرور فتيلي تاع زينب لي كانت ناعسة على ظهرها ويديها لفوق منشورين وشعرها مليوح على وجهها وحداها رفية منشورة كلها مشتتة ناعسة وولادها مبوقين كثر ننها..فيبرا تا صدعها وهزاتو وجاوبات بلا متشوف شكون خصها هي تهنا من لفيبرور لي صدعها وقالت بصوت ناعس:الو
عثمان:زين ديالي
خرجات عينيها بصدمة باقي معمشيين..اش قال اش قال عاود..سرطات الهضرة ومالقات هي تنوض قافزة جالسة مصدومة وشعرها طايح على وجهها
عاود عثمان لي من صوتو باينا مبرد:زينب
زينب:هءء اه اه صباح الخير
عثمان:(بابتسامة)صباح النور..هي باقي ناعسة
زينب:(باقي مصدومة)لا لا اه اه نااعسة
عثمات:واش اه ولا لا هههع
زينب:اه ناعسة عاد فقت
عثمان:رتاحيتي شويا
زينب:الحمد لله ونتا نعستي مزيان
عثمان:اش بان ليك؟؟
زينب:(شافت جوايها)عثمان بلاتي واحد دقيقة
عثمان:ياكما بتقطعي تااني
وينب:(نايضة)لا لا هيبنوض نخرج من للبيت ريزو قليل..وبالفعل بقا معاها فالخط تالبسات صندالتها وحلات الباب بشوي ودازت جيهة السطاح لي كبير وضاربا فيه شمش الصباح سخونة..وكيطل على دوار كامل..
زينب:هاني معاك
عثمان:علاش نضتي؟؟
زينب:ناعسة ختي وولادها ومبيتش نفيقهم
عثمان:هههه زعما بهاد شوي باش تتهضري بتفيقهم هههه ولايني مزياان فاش نكون كنهضر معاك ميكون حداك حد
زينب:ههه علاش؟؟
عثمان:باش ناخدو راحتنا كثر هههه
زينب:(بعد تردد)عثمان عصبتك البارح؟؟
عثمان:كفرتيني ماشي عصبتيني هههه وانا دندير معاك جهدي كولو باش تطلقي معايا شوي ونتي كتقطعي علي
زينب:هانتا هي سمعني نشرح ليك..انا تنهضر معاك ودخلات مي على غفلة وتدعقت وقطعت والله
عثمان:وااخواافة مع راسك
زينب:(بدون وعي)بزااف واحق الله
عثمان"الى جيتي للصراحة نتي لي بيتي هاد الحالة..تخباي وتهضري بشوي وتقطعي مالكي عليها..كون مصديتينيش نهار لول كون دابا تتهضري بالعلالي
زينب:ولكن..
سكتات مالقات متقول وعاةد نطق هو:ولكن اش؟؟زيينب راه مبيتش نضحك عليك هي داير ليك خاطرك فهاد المصاحبة تالويل معنديش مع هاد تبرهييش..لي قدي راه عفاا عليهم الله من الهضرة فالتيليفونات..انا مدابيا تقبلي ونديرو المعقول حسن لينا من هاد الحرام لي عايشين فيه..زعما نتي تتصلي ةعارفا الله واش تيقول..مغتبيش الحرام
زينب:الصمت
عثمان:اش قلتي؟؟
زينب:فاش؟؟
عثمان:( زعف)فلي طاب ومحلاش..صباح هذا ازينب باقي مبداش نهار بطلعي ليا الخز
زينب:وقرايتي؟؟
عثمان:مالها؟؟
زينب:بيت نقراا اعثمان
عثمان:واهو نجيك للصراحة انا فلول تنقول لي بندي مغتقرااش حيت صعيب تسلك بين الدار القراية ولكن الى نني بيتي تقراي وتكملي كملي ماشي مشكل
زينب"زعما هي نقرا؟؟
عثمان:قرااي وانا نعاونك تاتكملي على خاطرك
زينب:والخدمة؟؟
عثمان:اشمن خدمة؟؟
زينب:سواايع لي تندير
عثمان:ونتي لاش بديرهم اصلا..لي خصك نعطيه ليك انا زعما فين المشكل..من صباح ونتي تضوري وتخرجي فالهضرة ..هاد سوجي خليه تا ترجعي ونهضرو فيه فاص اما دابا بيتي هي تحرقي ليا دمي وصافي
زينب"(حساتو تقلق)وصافي سنح ليا متنبيش نقلقك
عثمان:شكون قاليك انا مقلق هههع مبرد واش لي مصبح على هاد صويت بيتقلق
ضحكات ليه بدلال عن غير قصد وقال:ياريت نشوف هاد الضحكة قدامي
عاودات ضحكات حشمانة وقال:بتبقاي هي تضحكي ههههه
زينب:هههه اه اش ندير
غثمان:نوضي وجدي الفطور هههه
زينب:هههه صبح الحال واينا مفيقاتناش ههه معرت كي طراا
عثمان:وهاني فيقتك انا..بيت الفطور
زينب:ههههه اش بيتي فيه،؟
عثمان:انا تنطيح عليك عليك رخيص تنفطر هي بقهوة كحلة
زينب"بوحدها؟؟والفطور،؟
عثمان:متنفطرش تالسوق
زينب:اش تتاكل؟؟
عثمان:(تسحلاها معاها)لي لقيت ..اكثرية متناكل والو تالغدا وندمق بشي لعبة
زينب:(على نيتها)متضركش معدتك ولا كريشتك
ضحك عثمان على كلامها وقال:كريشتي اماما ههههه لا متتضرنييش ههه تضرني هي المعدة
ضحكات بخجل وقالت:كون كانت فراسي فاش كنت تما نعود نطلع ليك الماكلة ديما
عثمان:شو شحال من حاجة باش قاولتيني ديك المرة كسكسو وهاد المرة الماكلة هههه راخ فيك الحق
زينب:ههههه نخلصووو ماشي مشكل
عثمان:واىى على الخلاص بتخلصبييي نيييت هي بلاتي عليك تاتباني قدامي ههه..ياله سيري مشا علي الحال للخدمة
زينب :هههه صافي واخا سير..الله يسر ليك
عثمان:اميين نهضرو فليل
قطع معاها مبتاسم وناض من فراشو مع كي فاق عيط ليها بعدما برد وشاف راسو زرب عليها بالهضرة وهو معصب..دوش وصايب قهوة كحلة وخرج لخدمتو نااشط
اما هي قطعات معاه وبقات تتفرنس بوحدها كي الهبيلة وتفرنس..وسط السطاح لي فيه هي اابصلة يابسة..حتاضنات تيلي بيديها فصدرها وبتاسمات فوجه الشمش لي مسلطة على عينيها ..
جمعات زينب البيت وردات كلشي ليلاصتو عاد خرجات سداتو ونزلات لتحت لطواليط بي تاهيا خارج دار غسلات وجهها وشللات فمها عاد مشات لداخل تدار وبضبط الكوزينة حيت سمعات فيها الهضرة..
بعد ساعة كانت زينب جالسة فالخنشة المعمرة وقدامها قصرية تتعجن فيها وشعرها جامعاخ لفوق ورقية تتغسل الماعن..دخلات عيشة هازا ميكة قهوية وقالت:ويليي عاد تتعجني(شافت فرقية)ماعن لفطور وباقي عاد تتغسليهم الله يغسلكم من الدنياا
رقية:لالا عيشة جيتي ولا جاابووك
عيشة:تجيكم فالرااس(جلسات حدا زينب تتعجز)احححح الله اربيي
عيشة:(بغات تبخ دم)الله ينعلك قولي امييين..الله ينزل عليك المسخ المسخوطة ضيقت عليك بيتيني تصيفتيتي قبل الوقت
زينب:الله ينجيك ايناا نموتو حنا قبل منك
عيشة:نوتوو هي بوحدكن انا باقي صحيحة فصيحة..سيري سيري جبدو فيا الغدايد مع صبااح(شافا فرقية)متعيشي واوقع ليك
خرجات زينب تضحك عليهم حيت ديما هاكا
خرجات وسط شمش ااصباح القاسحة وصوت البقر كيغوت من كاع جوايه وكذلك بعض الاصوات تناس من وسط الحقول ديالهم..توحشات هاد الجو..
كانت لابسا بيجامتها ولايحا فوقها كاب طويل كحل مغطي ليها وراها..ولي تلاقات معاه تسلم عليه وتعطيه وقتو وتضحك معاه..توحشات جو البلاد وناسها زكلشي عارفها ببوجمعة..اعنقو وابوسو تا مباقي اقدو..وأخيرا وصلات المقبرة لي جات حدا مدرسة بتدائية..وقفات تتشوف فيها بحزن عاد دخلات
كتمشى بين القبور وتلقي السلام..مقبرة قديمة عمرات ومبقاوش ناس البلاد كيدفنو فيها دارو مقبرة جديدة
كانو قبور راشيين وبكثرة الشتا ولاو العظام كيبانو تناس لي ميتين..دخلات وسط القبور كتمشي بصندالتها تالميكة..تاوقفات حدا القبر لي شحال ماشافتو..مع وقفتها مع نزلات دمعة من عينيها ودغيا مسحاتها واعدات راسها متبكييش
هزات يديها وقرات الفاتحة على روحو وتحنات باست قبرو وناضت فيساع..كانت اقصر زيارة ليه كتزورها موالفا كتجلس بسوايع معاه ولكن اايوم لا..حيت تعلمات من عثمان انها بلاصة متبكي وتقضي سوايع تتعاود مع راسها ظنا منها انها تتعاود ليه..فضلات تعود تمشي تصلي وتدعي معاه
خرجات من المقبرة ومسحات اخر دمعة من عينيها وتمات راجعة للدار ..وفطريقها دازت من حدا الجامع وهي تلمح شبح ابيها من بعيد بتاسمات تلقائيا وندات باسموو:عمييييي
تلفت الراجل ااشايب لي ضهرو محني ونسخة طبق الاصل على باها تا فزينو شابهو للا فطبيعتوو..هذا مشرار وكياكل حق نااس ومسخوط الوالدين
شافيها ومقشعاش ونطق بالشلحة:شكون هادي؟؟
قربات عندو تتزرب وقالت؛انا هادي اعمي زينب زينب بنت خوك
جرها معاه معنقها وتيهضر معاها واسول فحالها واحوالها بحالا مداير ليها والو وتاهي مكتلوموش حيت عندها عزيز رغم انه عندو مشكل مع باها قبل مايموت وانه واكلها فحقها ولكن عزيز عليها وتهو كذلك..على عكس ولاد خوتو لخرين تيضل اشكر فيها..متناقض هي مع راسووو
توادعات معاه ورجعات للدار لقات الغدا طااب ومها وجدات ليها التخليطة..طحناتها ودارتها مع العسل الحر وقالت:شوفي هاهياا كولي منها معلقة على رييق ومعلقة قبل ماتنعسي..راه زيينة
عثمان:وانتي راسك متتهزيهش من لارض كي بديري تشوفيني
زينب:ههههه مكنقظرش نمشي هازا راسي
عثمان:حسن حنييه..فيك واحد زيين(تنهد)اش بنقوليك فتااان ههههه هي خليها هالله وكاان
زينب:هههههه..تغديتي
عثمان:بااقي عاد بنمشي نتغظا مع واحد صاحبي وقلت نعيط ليك نتي ونتي؟؟
زينب:باقي مكنتغدااو
عثمان:اجي عندكم ريزو تلانترنيت تما
زينب:اه شويا الى طلعت لسطاح
عثمان:اوا صافي نهضرو واتساب مزيانة باش تانتي مدخلش مك وتقطعي علي
زينب"هههه زاخا صافي ان شاء الله نشارجي ونهضرو
عثمان:ممم ان شاء الله..ياله سيري نمشي نتغدا تاليل ونهضرو
زينب:بسلامة بصحتك الغدا
عثمان:الله يعطسك صحة خاصاني هي نتي فيه
زينب:ههههه بحالا كلتوو تانا هي بصحتك
عثمان:تبتيني بهاد الهضرة خههه بسلامة..تهلاي فراسك
زينب:بسلامة
الايام كدوز وتوالى وحال زينب وعثمان هو هو..يهضرو فالصباح وفليل ووسط نهار..تعاوظ ليه على نهارها واعاود ليها على يومو..اتناقشو فمواضيع عامةواهضرو اقلقل رأيها فمواضيع باش اعرف شخصيتها كي مبنية وهذا هو النقاش لي خصو يكون بين اي كوبل ..ماشي تعناب والحب واش كديري واش لابسة وديري بلاصة حداك
نقاش زوين وحلو تيهضرو واضحكو واتغزل بيخا مرة تا يحشمها ساعا مع ورا تيليفون تتقد ر تجاوبو
ولات جزء لا يتجزأ من حياتو..خصو ضروري اعيط ليها اسول فيها وتاهي كذلك..
دخل شهر رمضان المبارك بخيرو وخميرو..كل دار مغربية كتوجد لهاد الشهر المبارك..الاغلبية كيتقداو واتسطوكاو فالثلاجة ها البطبوط ها مسمن ها لبغرير.ها لبريوات
كذلك زينب مبخلاتش علىدارهم هي ورقية..فليلة رمضان كانت مجموعة زينب ورقية على ااقصاري وحدة تتعجن الخبز للصحور ولوخرا لمسمن لغدا..واهضرو واقشبو..
كذلك فمراكش راه فاتي تتوجد مع مها للشهر واتقداو واشريو من هنا ولهيه وسي عثمان اخلص..
هاد الاخير لي مع دخول شهر كيبغيو الناس اتقداو قبل مايوصل للعيد ها لي بغات صابو ها صباط ها بلغة ها لي عندها العرس مورا العيد وخصها للوازمها فصبابط تالعرايسات..من كليانة لكليانة مكيرتاحش والعرق متصبب فجبهتو..تا براهيم مابقاش تيجمع معاه فوسط الخدمة حيت هو الاخر عندو الاكتظاظ..وتحركات عندهم الحركة كيبغيو اضربو يديهم
واخيرا سالا نهارو بمشقة الانفس وشاف سوق خوا وناض سد حانوتو حيت عيا بالمعقول..توادع مع براهيم لي تاهو قصد دارو ..ومشا فاتجاه دارو فوق موطورو وللطريق عامرة ها الحامض ها القزبور ها ماطيشة وكلها تيغوت من قنت..
دخل مع درب وعطات ريحة للعسل والعجينة تشباكية ناس تتشبك وتصايب..
بريق عينيك الجزء السادس
محتوى القصة
التنقل بين الأجزاء