يامنة الجزء 37

جيه حتى لوسخ والخنز لا وهو تقريبا جوج المرات فنهار كيدوش ...غالا غبر فالزنقة كيرجع يرجع ولا غبر غير ساعتين وهو مدوش كيمشي يغسل وجهو وايديه بالما وصابون ...نضافة ثم النضافة ...وروايح تعطعط والباس يتبدل جوج المرات فنهار والي لبسها ليوم ميعاود يلبسها ...ادق تفاصيل عندو نقية ....خاصو غالوضوء وصلاة وهاهو كامل مكمول ...

والكمال لله سبحانه وتعالى ...الانسان ماشي كامل الانسان فيه عيوب مع زمن تصلح عيوب وتبان عيوب اخرا ....تاحد مغايكون كامل هادشي علاش الكمال لله وحده ...كيدور علينا زمان كيعلمنا وكنصححو العيب ولكن كلقاو. راسنا فينا عيب جديد ....

فؤاد "غوبش وبدا يشمشم فراسو " : شنو ؟؟؟ "هز فيها عينيه لقا دموعها هوادين " ...

يامنة "كتبكي وشادة على فمها " : اهى اعق اععع ...

فؤاد : شنو كاين مالك ؟. 

يامنة : حل ليا الباب بغيت ن اعق ...

بزربة حل ليها الباب من جنب حلاتو وخرجات راسها كتستفرغ كاع داكشي الي كلات بقات تقيا تقيا حتى بغاو يخرجو ليها حلاقمها ....مد ايدو لثلاجة بزربة جبد منها قرعة الما وحل الباب خرج وضار جيهتها ...

لقاها عقلها بغا يخرج وهي مضاربة تخرج ما في جوفها حتى ولاو عينيها حمرين وشداتها الكحبة ودموعها دايزين بديك الكحبة وردان ....

تحسر على حالتها غير مكتزيد تعز عليه ويتعصب ...هادشي كلشي جديد عليه حيث مكانش داير ليه الحساب وعمرو دار ليه الحساب ....حتى ناسي ان في الزواج كيكونو الولاد ...!!!....شي حاجة الي هي طبيعية عندنا فحياتو هو تلغات ...تحيدات تحذفات ....

يامنة "بقات تكحب حتى حست بحلقها تجرح ..." : كحكح اكحح قغف ...

فؤاد "حل لقرعة وخوا شوية الما في ايدو ورش ليها على وجهها ودوز عليه كيمسح ليها ومخصر سيفتو كيشوف في وجهها الي ولا حمررررر ..." : هاكي شربي ...شنو كلتي اش ؟؟

يامنة : كليت غير خبز والحليب ...كحكح ...

فؤاد "غوبش " : خبز والحليب ؟؟ هذاك عشا هذاك ؟ علاش متعشيتيش مزيان ...الحليب كيضرك مكتقدرييش عليه ايامنة وشربتيه مع الحليب ؟. 

يامنة "ببرائة ...كتكحب وحادرة عويناتها كتلتاقط انفاسها .." : غيير قريت راه مزيان ل..."حبسات لهضرة وحتى هو فهمها .." ...غير كيقولو العشا مزيان يكون خفيف ...

فؤاد "كيشوف فيها ..." : تت شربي الما غادي نخلي ليك الشرجم محلول باش تنفسي خاصنا نرجعو دابا عندي ميدار فالمكتب خاصك ترجعي تعشاي مزيان وشربي دوا الي جبت ليك وطلعي رتاحي ونعسي ... هاكي شربي هذا دابا "مد ايدو لساشية ديال دوا ....عطاها فيتامين كان خاصها تشربو باش يفتح ليها شهية ومعاه دوا ضد التقيئ ...خاص بالحوامل باش يخفف ليها القيء ...فاش شرحات ليه طبيبة انها خاصها تشربو قبل والى استفرغات يعطيه ليها باش ينفسها …

اومات ليه براسها مزادتش هضرات وخا حسات باهتمامو زاد على اللول عجبها الحال ولكن مبيناتش ليه ...

ركب فجهتو وضار لعندها حتى تاكد انها وجهها بدا يتنفس وديمارا رجع مارشريار وانطالق رجع لفيلا ...

قبل ميخرجو ضور وجهو لعندها ...

فؤاد ؛ لبسي شي حاجة سخن من هادشي … البرد بزاف ...وخا كنبغيك تلبسي جلالب ولكن فالبرد هنا قاصح على جلالب ....لبسي شي حاجة سخونة وطويلة ...معندكش غادي نخرجك تقداي شنو خاصك ...

نوصلو لهيه تقداي شنو خاصك قبل منديك لداركم ..."شاف فيها " ...عندك حوايج طوال ؟ 

يامنة "جاوباتو براسها " : لا عندي داكشي مبغيتيش نلبسو عندي كسيوات طوال ديال الصوف ومونطويات ولكن قلال ...

فؤاذ : ماشي مشكيل نزيدو وحدين خرين ...المهم تكوني دافية ....

يامنة : واخا ...

نزلو من سيارة ضور وجهو كيشوف فجناب كيف العادة وجرها حاوطها حتى دخلو لداخل مشا هو المكتب وهي دخلات حتى كتفاجئ بعشا واجد ...كان هو وصا عليه بميساج يجيبوه ليها ...وكان عشا كلو صحي مفيه حتى ضرر ...لمعدتهاااااا....

اهتمامو بيها من قبل متحمل ومن قبل ميبغيها كاين وفاش حملات وخا ممتقبلش الفكرة الا انها كتبقى انسان هاز روح فكرشو ...وكيف قال هو ماشي غادي نقتل روح بغير حق ...مسالة الحمل برزطاتو مبغاش يربي الكبدة على الولد غايصدق مخليها حداه والاوضاع الي جايا صعيب تحملها سفرياتو كثيرة وهو ميقدرش يخليها وحدها ديما كيديها معاه ...غايتبرزط بالي فكرشها حتى هو ...هادشي بحد ذاتو سبب انه ميبغيهاش تحمل وهي اصلا كلها مضغوط بيها لو ما عشقها كان تصرف اخر

صباح يوم جديد ...اول ما حلات عينيها حلاتهم على ريحة جاتها مجهدة ....بلا سلام ولا كلام ناضت من الفراش طايرة لدوش عينيها بغاو يخرجو وهي باغا ترد ما في جوفها ولكن معدتها خاوية عالصباح ....

كان هو واقف قدام المرايا كيرش فالعطر ديالو ...حتى دازت من حداه كي البرق الشي الي خلا ملامح ديالو تعقد ويحط القرعة ...

كان لابس قميجة بلومارين وسروال كحل وفوق منو مونطو رجالي كحل بالقب كبير فيه ريش ...كان غادي يخرج ويخليها ناعسة ...حتى شافها ناضت تجري ....حيد المونطو ومشا لعندها دخل لدوش لقاها واقفة محنية على لاشاص وشادة كرشها الي حسات بيها تلوات ليها وهي كتستفرغ ....

ربع ايديه وحاضيها مخسر وجهو كيشوف فيها هاد القيء الي كثير ...كره هاد الحمل اكثر حيث كيعذبها ...الحمل الي ماشي فوقتو وزايد معذبها من الفوق ...حدر راسو وعاود طلعو وساي ايديه مشا لعندها ...

فؤاد : رشي على وجهك الما ...

يامنة "روحها بغات تخرج ..." : عف كح كح عفاااك بعد ...اهى اهى ...

فؤاد "خنزر فيها " : اشنو ؟؟؟؟ يامناااا ...

يامنة : اهى اهى والله حتى ريحة الي داير خانزة بدلها ودير هاديك الي كتعجبني امم اهى ...

فؤاد : يامنة يااامنة هادي هي ريحة الي كندير …كتفلاي عليا؟؟؟ ...كانت كتعجبك كيفاش خانزة دابا ...

يامنة : ماعرفتش اهى والله حتى خانزة هي الي فيقاتني ...

فؤاد "كيخنزر وحاضيها كيفاش كتهرب باش متشمش وسادة منخرها ..." : انا خارج رشي شي حاجة حيديها ولا حلي شراجم ...

تم غادي وهي توقفو ...

يامنة : فؤاااااد "بصوت خفيف وحنين هاد صوت تينوض فيه ريگاطة لداخل ..." 

فؤاد "غمض عينيه ورجع حلهم وشا فيها من جنب " : شنوو تاني ؟؟

يامنة "مدلية شنيفاتها " : وخا نطلبك طليبة ؟ ..

فؤاد "ضار لعندها وشاف فيها " : هضري نيشان ...

يامنة : و و وخا احم و وخا نطلبك متمشيش تبقا فدار ؟ 

فؤاد : كيفاااش ؟؟ علاش نبقا عندي خدمة ايامنة ممساليش نبقا فدار ...عندي منقضي غادي نرجعو لمغريب هاد اليومين ...من هنا ليومين ممساليش باش نبقى فدار ...راكي مولفة ايامنة ....موووولفة ...

يامنة "جاتها البكية بغاتو وبغاتو بعيد ريحتو بلا ريحة العطر كتجهلها وعندها رغبة فيه كثييييييييرة ...كون تصيب تبقا مخشية فيه ولا تحضيه ...هو كيهضر وهي حاضية ليه فمو وحالا فيمها فيه شوي ...غير قاليهت هاد الهضرة الاخيرة وهي تقلق " : و واخا اهى اهى ..."كتمسح فدموعها بطرف كمها ...

واحد المنضر يجيب ليك البكية تعز عليك ...هو ضراتو فخاطرو ..." ...

فؤاد "عض شفايفو بنفاذ صبر ودوز على شعرو بايدو ورجع حل عينيه وشاف فيها " : شنو دابا لاش هاد البكا ...مم ممممساليييييييش ايامنة ...شنو ندير ليك ؟ لاش كبقاي تبكي غاتعصبيني وانا على نقشة ؟ 

يامنة "خرجت عينيها فيه وهما مدمعين وشفارها فازگين " : وصااافي مقلت والو اهى "جمعت البكية " صااافي هاني ...

بقا كيشوف فيها كتبغي تخرج فيه عينيها حيث عصبها وخافت وتقلقت وتقلقيتها خايبة صافي مكتبقاش تعاود الهضرة ...مكتبغيش تكثر الهضرة الى عارفاها مغاتقضي ليها والو مع هاد صعصع بن صعصع ....

فؤاد "مزال كتنخصص وخا حبسات البكية...بقا كيشوف فيها وهي تم غاديا باش تخرج حتى تخطاتو وهو يجرها بزربة قابلها معاه..." : سكتي ..."بغات تبدا تهرنن وهو يخرج عينيه " ...شششش هضرت ...سكتي ب راااا كة ...

يامنة "حابسة نفس وديك ريحة لا هي بغات تحلى ليها ...جاوباتو غير براسها باه غا باش يطلق سراحها راه تجيفا جافت وهي حابسة نفس ..." 

فؤاد "شاف وجهها بدا يتبدل فيه لون وهو يطلقها وبعد " : خاصاك شي حاجة ؟ 

يامنة "افحال قاليها واش مشهية شي حاجة " : اه بغيت هذاك الخبز عفاك و ..."حدرت راسها تاني " ...

فؤاد : شنوو ...

يامنة "حادرة راسها " : بغيت واحد الحاجة و مم ...صافي ...

فؤاد "عدوه داك تلاقيط فالهضرة جي نيشان ولا سكتي " : هضريييي.....

يامنة : بغيت خبزة شحمة 😯

فؤاد "كان مغوبش حتى طلق حجبانو بصدمة " : اااا ؟ 

طلق حجبانو ...ماعرف باش تبلى ..اش تتقول واش تتخرج ...ااااش هادشي كلو وتقلبات سفاها على علاها ...ايعقل الحمل هاكا كيدير في المراة ....كيتخربقو ليها الفيزيبلات ديال مخها ....

فؤاد : شنووو ؟؟

يامنة : بغيت خبزة شحمة ...والله حتى مشهياها اهى اهى ...

فؤاد : سكتيييي من البكا كلشي عندك بالبكا ...ديريها قولي شنو خاصك ونجيبوه ليك ...

يامنة : وراه بغيت نديرها ولكن ....

حتى خبط فالباب حتى قفزات ...عصباتو كتگراطي فالهضرة باغا تقول ومتقول ......

فؤاد : وااا هضرييييي هضريييي نيشااان ...قولي شنو بغيتي وميخصك خير ...ياااامنااا ...

يامنة : وااا بغيت نديرها ولكن فاش كطيب مكاااينش اهى اهى وتوحشت ديال ميمة كانت كديرها فصباااح فاش كنت صغيرة ونشربوها مع اتاي انا وسارة ومي زهور ....اهى اهى حلمت بيها البارح وبقات ليا فبالي ....

فؤاد "دار صباعو فجبهتو ...باغي يطرطق وخاص يشد ليها الخااطر" : شنو نديرو دابا ؟ 

يامنة : والو ...وااااالو اهى ...مدير وااالو ...صااافي ...

فؤاد "تنهد بعصبية نفس ديالو طايبة بالعصاب وشلا ممجموع عليه ..." : وخا سمعيني مزيان ...من هنا يومين غادي نرجعو ...غانحاول نرجعو قبل ...يعني وجدي من دابا ...فيك ميصبر هاد اليومين ؟ 

يامنة "بفرحة مسحات دموعها " : اه اه نصبر اصلا شحال من حاجة بغيتها مكايناش هنا ...واخا ...

فؤاد : شحال من حاجة !! شنو خاصك ؟ 

يامنة : بغيت داك الخبز اصلا بلاصتو هنا ...وبغيت كسكسو بالعشوبة غاترسلو ليا ماما نجود ...وبغيت كواح كان كيجيبهم با من سوق طايبين ...( كواح هما كبدة وطيحال والقلب مشويين ...الزمرة غاتولد مفترس ماشي بنادم 😂)

فؤاد "بقا غير يبرق فيها عينيه " : نعااام ؟كواح ؟

يامنة "بقات ترمش فيه لقات راسها غا غاديا بداك الفم من قاليها اشنو خاصك فحال فتح ليها مغارة الكنز وعطاها كود افتح يا سمسم هههه " : صافي حتى نمشي لهيه ...

فؤاد : حاجة بحاجة ماشي كلشي دقة وحدة ..كلشي غادي يجيك ولكن رخفي غادي تاكليه وترجعيه فالبلاصة ....

هبطي فطري انا خارج ...الي خصاتك راها كاينة ...

مشا كيحسبن فنفسو ههههه منين خرج هادشي منييين هههه ....

هي بقات تشوف فيه مكرهاتش تخشا فيه ولكن غا كتشم ريحة الي باقا كضور تما كتعبس وجهها وكدير بناقص وهنا كينطابق المثل تاع يخ منو وعيني فيه ...عينها فيه وريحتو خلاتها تقول يخ ....

غسلات وجهها مزيان ولكن مقنعهاااش باقي ريحة حست بيها فحال لصقت فيها ...حيدات حوايجها ودخلات لبلاصة تدواش ...طلقات رشاشة بركات على واحد البوطونة وهما يطلقو رشاشات من جناب كانو دافيين هزات باندوش شماتو مغيلفهاش بالعكس ريحتى عجباتها ...كان ديال الفاني ...

دوشات بيه وغسلات شعرها قبل كتفرك فذاتها مكرهاتش تجبد الكيس من تما الي جايبة معاها وتبدا تحك خافت طيب لحمها وهي عاد عايمة عومان ديال الحكان ...دوشات مزيان حتى حسات بريحة مشات وخرجات نشفات حالتها ومشات ذهنات لحمها بكريم فاني ...

ولبسات بيجامة دافية مزيرة شوي ...لفوقي ديالها فحال بودي بالابيض فيه زواق بالالوان وكولون سخون فالگري لان زواق غالب عليه الگري ...لبسات تقيشراتها وبانطوفة فرجليها نشفات شعرها وخلاتو مطلوق على راحتو ...ذهنات وجهها بكريم مرطب باش ميتققوش ليها حناكها بالبرد وفمها كذلك حتى ولا حمر حيث المرطب كيطلق لحمورية داير فحال عكر ربعة وعشرين ساعة ...حتى ولا فحال الكرز ...

هزات تيليفونها وهبطات ...يلاه غاتدخل حتى سمعات صوت سوارت ديال الباب كان دخل هو ناسي شي حاجة ...فرحات كيحساب ليها رجع على قبلها ...حتى هز فيها عينيه ...

يامنة : رجعتيييي 😍...

فؤاد "كيهضر ومركز مع فمها " : لا نسيت شي حاجة "صغر عينيه فيها " ...شنو داكشي في فمك ...

يامنة "حطات ايدها على فمها " : هاا والو غير كيرطب ليا فمي مع البرد قاصح هنا ...

فؤاد "تلف" : مزيان ..."هز عينيه كيشوف قدامو بعيييد نسا علاش رجع وهو يضرب ضورة وخرج مبقا بغا شااااي هههههههه ....

الحياة ديما يا كتعطينا على قد نيتنا او كتعطينا الي ماشي فنيتنا ...شحال من حاجة بغيناها ومكانتش لينا ...كنعيشو ايامنا الي تكتبات لينا بحلوها ومرها ...شحال من حلم حلمناه ومتحققش لينا ...فينا الي بغا حياة طبيعية بالي قسم الله وفينا الي باغي حياة الرفاهية ومقانعش بالي عطاه ليه الله وحتى ولو عطاه كيبغي المزيد هذا حال طماع ...لكن انسان يبغي حياة عادية ومعطاهش ليه الله وعطاه حياة رفاهية وحياتو ماشي هانية ...فؤاد عانى فحياتو انه بغا يقرا ويخدم باش يوفر لدارهم او خوتو الي بغاو وميحسسهمش بالنقص وخا باهم كان نجار على قد الحال ...لكن كيبقاو مخصوصين ...

قرا ومشا يكمل قرايتو ويخدم حتى لقا راسو وسط هاد المستنقع وهادشي غير على قبل خوتو معرض حياتو لخطر ...متمني يكون فحالو فحال ناس يدير دارو ووليداتو ويعيش مع الانسان الي غاتكون شريكة حياتو وام ولادو سوى زواج تقليدي او حب الي قسم الله ...ولكن ربي كتب عليه حياة ماشي طبيعية وزواج بشريكة الحياة وتقليدي بلا حب والاهم انها بنت عمو وهاهي غاتولد ليه ولادو ....هذا علاش تنقولو ماااتمشي غير فين مشاك الله 🤷🏻‍♀️....

نهار كلو وهو غايب وهي فطرات وتغذات وطلعات ترتاح ارتاحت شوي من الاستفراغ وفينما تجي فنيفها ديك ريحة كتمشي تشم تراب ديال واحد المحبق عندها فالكوزينة ( الي حسات بقلبها مروع تشم تراب فازگ كيحيد ترويعة ) ....وطلع تهضر مع نجود الي فرحات بيها ووصل الخبر لدار والحاج الي قلبو كون حلوه يلقاوه كيشطح ...حس براسو لخطة ديالو نجحات تقريبا باقي غير يفرح باستقرار ولدو بجنبو ....

بغات تقولها لجداها عارفاها طلية كل نهار صباح وعشية تسول وشري وشربي اجلات حتى تمشي لعندها وتقولها ليها وهادشي علاش خبرات سارة ولكن طلبات انها تكتم على الامر لان فالاصل كانت في حيرة ومعارفاش شنو غايتصرف فؤاد ولكن ملي ارتاحت انه مطلبش منها الاجهاض فكان خبر ريحها وفرحها وعطاها امل انه يتقبل ويرجعو اسرة عادية ...

حسات بمعدتها فيها جوع ثاني ...تشهات داك الخبز دوزو مع قهيوة ...ولكن مجابوش ليها ...ناضت من الفراش وهزات تيليفونها فايدها خشات رجليها فبانطوفة ...وهبطات لتحت دخلات لكوزينة ...

وجدات شي حاجة خفيفة اغلبها غير مالح ...دارت خبز فبلاطو وحداه فرماج ذهن بواطة و فرماج احمر كثييير وزيتون و زبدة ...داتهم لصالون فين كتفرج وعمرت تيرموس قهوة وحليب صاوبت الكيسان فبلاطو وحطاتها مع سنيدة وداتها لصالون ...شعلات تلفازة وبقات تفرج وتكب فالقهوة حتى بدات تشمشم ....نفسها باغية ليها غير المالح ...

ضورات راسها حتى بان ليها واقف عند باب صالون هاز في ايدو كريطنات المخبزة ...

يامنة : جتييييييييه 😍😍...ناضت كتنقز حتى لعندو خذات من عندو الميكة ..

فؤاد : غير بشوية عليك ...شنو كديري ...

يامنة : كنتفرج جاني جوع وهادي وقيتة الگوتي ...وجدت هادشي ...نكب ليك ؟ 

فؤاد : لا كولي شنو بغيتي ..."تم غادي وضار لعندها ...كيهضر وديك عقدة الحجبان كتوحي انه معصب من شي حاجة " ....وجدي حوايجك ليوم ...غذا فالصباح راجعين لهيه .. ...

يامنة "حسات بحزن انه قريب تفارق معاه واحد الفترة وغايبذا يجي عندها مرة مرة وهي ولفات تشوفو صباح وعشية ....وااااه من ولف صحيح كيقولو الحب صعيب والولف مصيبة ..." : دغيااا 😿..."بغنغنة فصوتها " ....

فؤاد "فىق خاطرو فوووق خاطرو معذب اكثر منها ولكن مباغيش يربي الكبدة فالوقت الراهن على ولدو " : هادشي الي كاين ..."شاف فيها " ...ياك بغيتي تمشي لداركم تاكلي شنو تشهيتي ...

يامنة "مدلية شنيفاتها وحادرة راسها كتلعب بصباع ايديها " : بغيييتك تانتا معايا اهى ...

فؤاد "ضور.راسو لجيهة لاخرا حاط ايدو على جبهتو غادي بيها مكرززز حتى طلعها لراسو ورجعها على وجهو ...باغي يطرطق ...واصلة بيه لطوب ...شير بايديه بزوج كيعبر " : هادشي الي عطا الله ...هذا احسن حل ...هادشي كنضن "شاف فيها رافع حجبانو " ...دوينا عليه او لا ....

يامنة "جاوباتو براسها باه " : اه دوينا ...وخا غادي نجمعهم ...

فؤاد : مزياان ...انا طالع ندوش غادي نهبط لمكتب غير تعشاي ليلة بلا متعيطي عليا ...

خلاها ومشا طلع لبيت كيفك فصدافي القميجة بنترة وبعصبية حتى طير صدفة وهو ينترها كاملة تا طرطقو صدافي طارو لارض ...كيصوط بغضب طالع ليه دم دنيا ودين باغي يفوت ولا يفرس شي حد مكرهش ...حتى هز الفون ودوز لايلاف ...

فؤاد : غذا غادي نكون فالمغريب ...تصرف نتا نهار يتحدد الوقت ديال الاجتماع بلغني ...

ايلاف "عارفو معصب ودعوة عندو متعجبش " : تمام ...انا بعد ايام راح اجي هنيك ...خلص بس نحدد راح خبرك ...

فؤاد : مزياان ..."قطع عليه ." ومشا حيد ديك القميجة وسروال وصباط وتقاشر بثا صولو ...دخل نيشان لدوش دوش مزياان ...شم فيها ريحة الفاني قبيلة وعرفها انها مكتزعجهاش ...على قبلها هز باندوش ديالها وهو باش غسل وغسل بشامبو ديالو وخرج لاوي على نصو فوطة ....كيمسح عينيه حمرييين لا بسخونية لا بكثرة التفكييير ....والاعصاب ....

جاي كيمسح حتى لقاها واقفة كتقلب فحوايجها وكتبكي ...هاد البكا كيفقصو ...مكيحملهاش تبكي ...عينيها طابو بالبكا زاد كمل عليها الحمل والوحم ...كون كانت راجل كون لصق مها مع الحايط تكمل تهرنينها ...

فؤاد "غوت حتى طارت ونزلت " : علااااش هاد البكا اااا ؟ 

يامنة : اهى والو كيهبط بوحدو اهى ...

فؤاد "خرج فيها عينيه " : سكتيييييي من البكا ...معندو باش ينفعك مااااا عندوووو بااااش ينفعك ...هضرنا وهضرنا ...كلمتي مكنبغيييييش نعاودها ...يامنا متجعررينييييش راكي عارفاني خااايب وكيداير غاتجي فيك شي ضربة ...

يامنة "بدات تغوت بلا شعور " : واااااا مقدرتش مقدرتش اهى اهى ....وااااا بغيتك تكون حدايا متخلييييييييييينيييييييش بغيتك تبقا حدايا مقدرتش اهى اهى ماااقدرتش ...ماشي لخاطري ..."مشات كتجري لعندو تلاحت عليه عنقاتو بايديها ضايرين على خصرو وراسها فكرشو منخششها فيه ...تلاحت عليه حتى تكحاز لور وهز ايديه ...." ...عفاااك ...

فؤاد "نفخ بعصبية هز ايدو معرف ميدير بيها حتى حطها على جبهتو كيحك فيها ..." : يامنة ...ميمكنش هضرنا وعاودنا ...كترة الهضرة مكاين لاش ...مقلتش ليك غادي نخليك قلت مؤقتا ...حياتي ايامنة راك عرفتيها وعشتيها معايا ...وخا مشفتيش كيف دايرة بصح ...ولكن راه حياتي خايبة ...حاليا حتى نقاد الامور وديك ساعة نشوفو حل باش نبقى معاك ديما ....

يامنة : اممم اهى واخا ...وخا ...

كانت كتسنى ينزل عليها هادي هي حالتها كتغامر تعطيها غالبكا المخلط بالغوات باش تسلك راسها وخا درويشة شي مرات راسها تيقصاح ...ساعاك محشمهاش ...بعد تردد كبيييييير حتى هبط ايديه بزوج وهزها ضور رجليها على خصرو ...وخاشي وجهها فعنقو ....

تنهد تنهيدة عميييييييييييييييقة هاز فيها هم ما بعده هم ....واش عندو ميدير ااااش ...باسها في راسها وهبط لعنقها باسها بوسة خفيفة وطلع لودنها همس ليها فيها ...

فؤاد : شنو بغيتي دابا ايامنة شنووو ؟؟ "قالها بمعنى اخر " 

يامنة "فهمتها فشكل اخور خههه " : بغيتك نتا وتجي حدايا ناكل الخبز والقهوة ...

فؤاد "كحز راسو شاف فيها حال فمو ...استغفر الله ونعل شيطان وحطها " : سيري هبطي هاني جاي ...

ابتاسمت ليه وخرجات من البيت هبطات لتحت ....

هادشي خربق ليه سلوكة ديال راسو ....هاد المرة غايتيري ف ايلاف وراسو 🤣🤣🤣 

هذا هو الحال يبيتها في شان ويصبحها في شان ...ماتمشي غير فين مشاك الله ...البارح كانت فدارها فموسكو مع راجلها وحبيبها واليوم هاهي جمعات حوايجها وودعات دويرتها الي جمعاتها براجلها اولا. وحبيبها ثانيا عاد بو ولدها الي كيكبر فاحشائها ....هاهي الان حاطا رجليها فطيارة للمرة مجددا ...قبل متسافر سول طبيبة واش تقدر فاش كانو فالكلينيك وعطاتو الموافقة مدام كاينة طيارة ماشي طوموبيل باش متطوالش عليها طريق وتعيا ...

من بعد ساعات وهما محلقين ...كانت هي فداك البيت متكية فيه ناعسة مجايبة لدنيا خبار ...وهو جالس على برا البيت كيبقشش فتيليفونو ...حتى جات المضيفة بلغاتو بالوصول وبالي يقدرو يهبطو ...

حل سانتيغ وناض قاد قميجتو ومشا فاتجاه البيت عندها ..فيقها وناضت من الفراش قادت حالتها ولبسات مونطو حد الركبة فالاسود تحت منو قبية طويلة ديال صوف فالبيج وسروال سليم كحل ...وبوط فالبيج ...لاوية عليها شال كحل وضافرة شعرها جايباه جنب ...حنيكاتها مزنكين بنعاس وسخونية الي فطيارة ....

تمش قدامها وهزات صاكها خشات فيه تيليفونها وخرجات تبعاتو ...خرجو من طيارة ودخلو شادها بايدو فايدها ودخلو لمطار لداخل حتى عطا الوراق طبعوهم كياكدو دخول وخرجو ليه الفاليز من جيهة لاخرا وحيث فاش كيدخل لمغريب معندوش رجالو كيولي حر ....

عيط لواحد من المستخدمين الي تما دار ليهم الفاليز فشاريو وتبعهم حتى خرجو لبارك فين حط ليه يوسف السيارة الي رسلها مع شيفور من فاس لمطار مراكش المنارة حيث هو الي نزلو فيه ....

كان معول فاخر مشية ليهم لروسيا تكون غير يامنة راجعة لدارها جنب راجلها وتحت جناحو وفدارو حيث هي عمارة دارو ولكن وقع ما لم يكن في الحسبان ...هاهي راجعة لبلادها وغير كل المرات هاد المرة ممكن طول او ممكن تكون قصيرة وتاواحد معارف شنو مخبي القدر ....

ركبو فسيارة وانطالق بيها لاقرب مول فمراكش كيف واعدها باش تقدا شنو خاصها من حوايج ....عاد خذا الوجهة لنواحي وبالضبط دوار ديالهم الي تقريبا جايا عام باش بعدات عليه وخرجات منو وهي عروسة وهاهي غادي دخل ليه وهي امراة براجلها وهازة فكرشها ثمرة زواجها ...

يامنة " كتشوف انه عارف طريق دوارهم بالضبط ..." : عارف طريييييق دارنا ؟ 

فؤاد "كيشوف فطريق سايق " : عارف ...

يامنة : باش عرفتيها ...

فؤاد : مااشي صعيب نعرف دار عمي ...

يامنة "ابتاسمات وخا فلداخل ديالها حزن ...كان قرب العصر ياذن ...من دخلو البيست الي كتدي لدوارهم بدا كياذن العصر عليهم جايين فلبيست وناس كيشوفو ...دراري كيتجاراو من بعيد كيشوفو فسيارة داخلة فديك البيست " ....

حتى وصلو لباب دارهم وحبس ...خرجات من سيارة حالا فمها فدارهم الي تبذلات كليا ولاو فيها زوج ايطاجات وكلها مصلوحة ...والباب الي كان حمر مقجقل ولا واحد جديد مصبوغ بالكحل وولات الواجهة ديالو فيها رخام صناعي وبسرسار واحد الفوق واحد لتحت وشراجم الاليمنيوم وبالكون ...ومصبوغة بالغوز والبيض ...

يامنة : واااعرة ولات ...وخا اللولة ولفتها وحليت عليها عيني 😞...

فؤاد "خرج من سيارة وضار حل الكوف ...كيشوف في دار وفي يامنة الي كتشوف بعينيها " : يامنة دقي الباب باش دخلي البرد عليك ...

يامنة "ضارت عندو " : اا واخا ...سرسرات وسرسرات حتى تحل الباب ...وخرجات سارة ...

سارة "حلت تشوف شكون حتى بانت ليها يامنة " : يامنة 😍 واااعععع صحيييييبتييييي "طارت عليها عنقتها حتى كانت غاطيح ....تعانقو بزوج شحال عاد طلقو من بعضياتهم ..." على سلامتك ...عاد وصلتو ...

يامنة : اه عاد دابا "حنحن فؤاد وهي ضور عندو " ....اجي دخل ...

فؤاد : سيري دخلي غادي نتبعك ...

داكشي الي كان دخلات سارة ويامنة وهو يتبعهم هاز الفاليز ديالها ...ورجع جاب ساشيات الي تقداو ....

لقات جداها عاد خرجات من دوش ...الدوش الي ولا فشكل اخر ودار الي تسقفات وتبدلات كليا ...مشات كتجري تلاحت عليها تعنق وتبوس ...

يامنة : ميييييييييمة 😍

زينة"طارت بالفرحة " : واربيييييي على فجيلتي واربي هااا ...واتي بنيتي الفجلة ولاو ...

يامنة : هههه هي انا ميمة حبيبتي ...

زينة : وفرحي واسعدي ....واجيتي وحدك ولا مع راجلك ...

يامنة : جيت معاه هاهو ...

زينة " باقي مقلقة منو وخا هكاك " : ايييه مرحبا مرحباا ...

فؤاد " مشا باس ليها راسها " ....

جر يامنة ....وهضر معاها بجنب ...

فؤاد : غادي نمشي دابا نشد طريق لصويرة نشوف شي غراض ونرجع عندك من بعد ونهضرو ...

يامنة "بحزن " : بات تالصباح وسير بكري 😿

زينة " نقزات عليه " : دخل اولدي رتاح ... دار هاهي دارك والى مهزاتك نهزوك فعينينا ...برك حدا مرتك ولا تشد طرقان ليل ….يصبح ويفتح ...

فؤاد "حشم منها سيدة كبر منو ملقا ميقول ...خاشي ايديه فجيابو وحادر. راسو " : مقلتي عيب ...

يامنة : هههههه ..."شوي حتى نطقات ثاني " ...

زينة : سيري رتاحي راكي واحلة فروحك ابنتي سيري ...

يامنة "تصدمات شافت فسارة ةتحلف ليها بعينيها مقالتها ليها " : مييي باش عرفتي 😳...

زينة : دازو على ايدي ولاد وولاد ولدت اجيال واجيال ...مغايصعابش عليا نشوفك ومنعرفش السر الي نزل والزين الي تبدل المنخر الي تنفخ والغلض الي تزاد ...وان شاء الله ولدك على ايدي يتزاد ...

فؤاد "كان حاني راسو كيرسل فتليفون غير سمع على ايدي يتزاد وهو يغوبش تحركت فيه حاجة فلداخل ديالو وشنو هو من غير الخوف الابوي الي بدا يتحرك ...هز فيها راسو عاقد غوباشتو راسم حداش وتخنزيرتو ولات تخلع وهاد مي زينة الي داير هو وياها كي المش مع الفار ونطق " : لاا مكاين لاش زمانك فات …ديها غير فصحتك هذاك رباح ...

زينة : علاااه اولدي باقي نشوف ونعرف ونميز صح من الغلط ...فرحني راني حالفة بحلوفي ولد بنتي اخر ولد يتزاد على ايدي ولا بغات تجي الموت تجي ...على ايدي تزادو دراري ولاو رجال يحنتو عشرة ...

فؤاد "بغا يصعر ولكن متبت فهضرتو ودوا بثقالة وبكل احترام والفاهم يفهم ههههه" : الحلوف الحل ديالو الصوم اميمتي ...غايتزاد راجل من ضهر راجل يخافو منو رجال ...حييث باه راجل ...الحاجة الي متشبه مولاها "رفع حاجبو وسط الغوباشة " ....حرااام ...

يتبع ...