يامنة الجزء 48

شافت فيه ورجعت تخشات فنجود

فؤاد"رافع حجبانو وكيشوف فيها شوفة طويييلة " : مبغيتيش طلعي تنعسي فبيتك ؟؟؟

يامنة "جاوبات بنفي " : ا احم ..لا غانعس حدا ماما نجود...ومشات لبيت سدات لباب ..

فؤاد "خرج عينيه " : كيفاااااش ؟؟؟؟ 😡 يامناااااا ....

تم غادي ليها وهي توقف ليه نجود فطريق ...

فؤاد "غزز سنانو " : الوليدااا "هز صبعو بمعنى حبسي مدخلييش " ...

نجود : ولدي عفاك غير الليلة الله يرضي عليك ...

مجاوبهاش دفعها بشوي ومشا جيهة بيتها بغا يحلو وهو يلقاه مسدوذ ..."بصدمة مشعرش تاهز ايدو وبدا يفتخ فيه والي بغا يسمع يسمع ...معندوش مع ديك حلي الله يخليك ولا ديك يامنة شنو واقع نيشان خبط جندخ ..." 

نجود"دارت راسها بين ايديها كتولول حيث كيخبط فيه بجهد وهي دخلات سداتو حيث عرفاتو غايتبعها ...منها يبعد ومنها تنفد بجلدها ههههن " : ولدي راه غايفيق باك الله يرضي عليك طلع تالصباح وتفاهمو ..."قاطعها حتى قفزت حيث باش قاطعها قاطعها بغوتة خلات يامنة تكمش بلاصتها ..." ...

فؤاد : ضصااااااااااارة مبغيتهاش ...تحاااااال لباب طلع لبيتها وطرطق هي ..."زادت على الكلام الي قال...دلات شنيفاتها وطاحو دموعها كيسرسروووووووووو ...حست بالحكرة يامنة الي معمر دارهم مدو عليها ايديهم حتى وخا طبعها مهدن وخا فصغرها شقاوة الصغر مكانوش كيمدو عليها ايديهم مكينهضوش فيها ...وهو كل كلمة كيخرجها من فمو كتزيد تجرحها زيادة على الوحم مع تقدم الحمل كيزيدو الهرمونات يلعبو عليها ..." ...

نجود : ولدي راه غايسمع بااك صداع الله يرضي على ولدي عيشك غالليلة تباات حدايا مافيها باس راني فحال ميمتها تعاود ليا الي ضرها ماشي عيب ونهضر معاها ويكون خير ...راه الوحم اولدي لاعب عليها ...يهديك الله مفيهاش باس دير فحال مسافر خرج يضربك البرد وطلع نعس دير فحال مكاينش هنا كاين فموسكو ولا ف بلاصا اخرا خدام ممساليش العار اولدي راه مقلقة مديش عليها الوحم الله يعطيك منويتي عارفاك متبغيهاش تباات برا بيتها ايييه هكا يكون رجال ويني راكم تحت سقف واحد ماشي فمدينة اخرا ولا فدار اخرا الله يرضي على ولدي 

صبر غالليلة ولا هاد اليومن...

فؤاد "خرج عينيه تا قربو ينطحو نجود " : شنوووووو ؟؟ طلق تخنزيرة ديال لقرطاس ...ضار باش يفرع الباب وهي تغوت نجود ...

نجود "شافتو ممعاهش لعب وعارفاه جلاخة ": بالله العلي العضيم وتفرعو ولا تقرب ليها عمر كلمتي متحي فكلمتك ...وخا ماشي مك الي ولداتك راني ربيتك بين ايديا الى قربتي ليها نسخط عليك وعمر وجهي يحادي وجهك "خرجت فيه عينيها كانو نضراتها جديين مشربنة بالخوف عليها " ...

فؤاد "بقا يعض فشواربو يعض والفك بغا يطرطق غوباشتو زادت حدة ...قبل ميهز صبعو ويوجهو ليها وهو كيهضر بحروف متقطعة ويغزز فسنيه " : يومييين لااا ل يييييييلة منقدرش ماااانقدرش ...

هز رجلو وقبس واحد الفاز كبير محطوط ديكور تما لصقو مع الخيط مشتت ....ومشا زاد...

اما واحد مولاتي يامنة الله الله مهضرت ولا تهضر ...وخا يريب دنيا …الى تقلقت تقلقت وقطيع الهضرة عندها من خيبو دير ليك الي بغيتي وليني تهضر ؟ واخا تريب سجن غوانتنامو الي كان خدام فيه غيث المرواني لا هضرت 😹😹😹

معرفاتو فين زاد المهم بدل ساعة باخرا وخرج فين الله واعلم اما هي مشات لبيت حيث وصاتها ملي طلبتها فالكوزينة وحكات ليها ...وصاتها باش تسد عليها البيت بينما هضرت معاه وتفاهمت معاه يبدل ساعة باخرا ...وصلت عند الباب ودقات عليها بشوي ...

نجود : بنتي حلي راه مشا ...

تسنات شوي حتى بان ليها الباب تحل وهي دخل كان بيت نجود فالسفلي من جيهة لاخرا ...بيت كبير فيه صويلين صغير دايرة فيه سدادر ملمطين بمخادهم وكوطياتهم وفيه بلازمة وبلاصة الصلاة عاد باب البيت نعاس ...دخلت وسدت الباب وراها بزربة لا يغفلها ويدفعو هههه 

ودخلات لقاتها جالسة وكتمسح دموعها بطرف كمايمها ...شحال عزات عليها بهاد الحركة قطعات ليها قلبها وخا مزال معرفاتش اشنو طاري بالضبط ...حيدات الكاب الي كانت لابسة والزيف وجمعات شعرها كان مقطع كاري قصيرة ولكن فدار كتنقل بحجابها ....جمعاتو بفيليل ...وجلسات حداها ..

نجود : هاني درت شنو طلبتي مني ابنتي ...بغيتي تبعدي عليه هاهو مغايوصلكش هاد الليلة ولكن قولي ليا شنو وقع علاش تقلقتي ابنتي وانا عارفاك مغاتجيش وتقلقي غير هكاك ...همم شنو جرا لهادشي وفؤاد هو عقلك ...

يامنة "عيات تجمع شفايفها باش متبكيش ولا كيجيها بكا كتير فاقل حاجة ...مقدراتش وهي تطلق العنان لشهيق حتى خلعات نجود " : اهى اهى اممم اهى اهى ...مبغيت والو ...اهى اهى ...

نجود : الله ابنتي مالك "ناضت لقرعة الما كبات ليها كاس وعطاتو ليها تشرب كتشرب وتنخصص وتمسح بطرف كمايمها ..." ششش غير تهناي ابنتي انا معاك ...غير تهدني تهدني "هزت ايدها حطتها ليها على شعرها كتدي فيها وتجيب ...."ششش تهدني تهدنييي الله يرضي عليك وقولي ليا شنو كاين ...

يامنة : اهى اعى اهى ..."هزت فيها عينيها شفيراتها فازكين بدموع وعينيها حمرييين " ...قبيلة اهى ..عاودت ليها شنو جرا والهضرة الي قاليها ....اهى اهى ...مبغيت والو ...مبغيتش نبقا حداه ...

نجود : شش ابنتي واخا ..غادي نهضر معاه ...وليني قوليها ليه علاش ساكتة يعرف علاش تقلقتي ...

يامنة "كتنفي براسها " : عاارف اهى اهى عاارف ...انا معمر دارنا ضربوني معمرهم عايروني ...قاليا وخا تموتي منعقلش عليك ...اهى اهى ودفعني كان غايضربني غير سكت خفت ...هو اماما مكيبغينيش هو بززتوه يتزوج بيا "نجود شرعت عينيها " ...وداني معاه ضد فيكم وغير انا كنسكت حيث حتى هو بزز عليه ولكن هو وخا هكاك كان مفششني ...وكان غايجي واحد نهاار يضربني ...ولا يعايرني ولا ينقص مني اهى ....

مبغيتش نهضر غير خليني مبغيت والو من غير حاجة وخا مستحيل تكون ليا بغيت نعس ونحلم بيها تنفس عليا ...باش منحسش بيه كيحگرني ...بغيت نعس ونشوفها "بصوت رقييق غالب عليه البكا " ...

نجود "دموعها على طرف عينيها " : شنو هي بنتي ...شنو بغيتي معرفتي نجيبو ليك معرفتي يجيبوه ليك امري واحنا نفدو هاد الهضرة قلناها ليك نهار اللول وحنا قادين بيها ...شنو بغات بنتي ...

يامنة : اهى متقدروش حيث كون كانت مغايوقعش ليا هادشي ..ومغاديش نحس براسي بلاش ومعندي حد اهى ..."هزت فيها عينيها " ...بغيت نعس باش نشوف ماما الي عمري شفتها 😢...

نجود فهاد اللحضة زوج دمعات كانو محبوسين ليها فعينيها هبطو كيجرييييييييو بسرعة ....

وخا تربات بلا ام وخا عاشت وسط باها وجداها لكن بلاصة الام كتبقا وحدها فهاد اللحضة حست براسها محگورة الامان الي كانت كتحس بيه وجناحها الي لگا عليها دياب دنيا هو نفسو الي قهرها ....محستش غير وهي جبدتها لعندها وحطت راسها على صدرها كطبطب عليها بايدين حنينة ديال الام واخا ماشي امها ....هاد الاحساس بالضبط مغايحسو غير الي محروم من الام ديالو او واليديه

واش بقالي الى راح الغالي ....

بقات شحال وهي خاشياها فيها وتحك ليها على ضهرها ...شحال وهي تنخصص حتى ولا يتسمع غير صوت انفاسها ممنتاضمينش ...حتى حسات بيها سكتات...عزات عليها معندها متقول طبيييعي غاتحس بهاد الاحساس ...هاد الاحساس بالضبط مغايحسو غير الي محروم من الام ديالو او واليديه ...احساس انك تكون تحت جناح حتى كيمشي هاد جناح ومكيبقا ليك لا حنين لا رحيم ...طبيعي تحس بهاد الحگرة من ابسط الاشياء وتصرفات فما بالك لو ضربها او قاليها كلام كيضر ....مغاتحسوسش باحساس يامنة الى مكانت حالتكم فحال حالتها بلا ام وهي فهاد سن ....وخا توقف معاها ميك نجود ونجود....

طلات عليها لقاتها نعسات ...وهي تكيها على ناموسية طلعات ليها وهي ناعسة وغطاتها بمانطة وزادت مانطة اخرا ...مبغاتش طلق المسخن بحكم هي حاملة الى سخنات وخرجات لبرد غادي تمرض ...خاصها جو طبيعي ماسي اصطناعي ...تسخن بمانطات سدات عليها شراجم ونفسات واحد واحد شوي وهي تضور هزات الكاب ودارت زيفها وخرجات من البيت من بعد ما سداتو....

تنفسات بعمق وهزت راسها وخرجات لجردة فين اكيييد عرفاتو غايكون ...مشات لمطبخ دارت ليه كبسولة ديال القهوة مشات جبدات صينية دارت فيها كاس وقرعة صغيرة ماء معدني كيف كيبغيه ديما وهو الي كيشرب و مشات لاماشين حيدات الكاس الي عمر وهزات صينية وخرجات من باب المطبخ لقاتو واقف معنطز داير ايديه لور واحد الايد هاز بيها الكارو شاعل وهاز راسو ساط دخان ...

نجود "حطات صينية فطابلة وجلسات كتشوف فيه" : ولدي اجي من شتا ...

فؤاد "ضار عندها مخنزر " : فين هي ؟؟ 

نجود : احم وخا اجي جلس حدايا ونهضرو بعدا ...

فؤاد "هز ايدو لفوق وراسو لتحت كيشوف لتحت " : مكاين هضرة ...صباح ترجع لبيتها مغاديش نهضر غادي نبدل ساعة باخرا حيث لا هضرت معاها غادي تعواج من شي بلاصة ...معنديش مع فشوش دراري صغار ...بغات تفشش تفشش بعيد ...

نجود "ربعاات ايديها وتكات عالكرسي مخنزرة فيه " : وخا مغاديش تفشش عليك علاه مالك شنو كتجيها نتا فهاد البلاد تتفشش عليك علاه مالها مرتك ؟ "هز عينيه خنزر فيها " ...بنتك ؟ حاملة منك مثلا ؟ ..."بغا يهضر وهي تشير ليه بعينيها باش يجلس حداها ...." جلس نقوليك شنو كاين والي عجبك ديرو ...كتبقا مرتك ونتا الاحق بيها ...

بقا كيشوف فيها ...لاح الكارو شتف عليه طفاه فداك ربيع الفازگ بشتا ومشا هكاك لابس تيشرت وسروال الي لبس وجلس فالكرسي دار رجل فوق رجل مفرقهم بشكل رجولي وعاطي بجنب دار ايدو على لحيتو معصببببب وعينيه كي جمر ...شير ليها بايدو باش تبدا ...

نجود "رجعت تقادت فوق طبلة حطت فيها ايديها مربعين وبدات تهضر عاودت ليه شنو ضرها وعلاش كتبكي اصلا والهرمونات ديال الحمل الي غالبين عليها " : يامنة افؤاد بغات الي يفششها هي مطلبات والو ...عادي مبغاتهاش ...ولكن 

راه اقل هضرة تكون جارحة راه تقلقها طبع يامنة بقد ماهي حنينة ودرويشة بقد ما طبعها اصعب منو مكاين ...مكتقلقش بسهولة ومكتقلقش كاع ولكن لا تجرحت راه صعيييييب باش ترجع عادي دغيا ...صعيب ...هادشي ماشي عاشرتو معاها هي طبعها كنعرفو 

كيقوليك الله ينجيك من ساكت لا دوا ...ويامنة تقليقتها صعيبة هادشي عرفتو من باها وجداها هما عارفينها ...راه الى ضربتهيا غادي غير تزيد تنفر منك والى غوتي وهي مقلقك دابا غادي تزيد تاني ...يامنة اولدي باغيا صدر حنين ...تخيل قالت ليا بغيت نشوف ميمتي ...

امها افؤاد ماتت وهي كتولد فيها عني حالا عينيها وهي مكايناش ونتا ادرى بفقدان الام افؤاد ..."زير على ايديه وعينيه ولا حمرييين " ...معندكش الحق تقوليها هاكاك وخا مرتك حشومة عليك تقوليها وخا تموتي ...

عرفتي باش غاتحس. ؟ غاتحس بالي وحدها فدنيا لا حنين لا رحيم غاتحس بالحكرة ....خليها هاد اليلة ويصبح ويفتح ....طلع لفوق تنعس وصباح يفتح طلع ...

ناضت من الكرسي وخلاتو جالس كيحك فلحيتو وجهو وشعرو ...باغي يغوت وناعل الشيطان باغي يهرس عليهم الفيلا يدخل يهزها والى بغات تقلق را الحايط زيادة على ضغط والتبرزيط هز ايدو على شكل بونية وضرب بيها طابلة حتى ضغطات وتزلعت صينية والكاس ديال القهوة ..

ناض دخل لبس جاكيط وهز كونطاكت وخرج ركب فسيارة وديمارا حتى تسمع صوت الكسيراتور حتى ناص العساس كيشوف من بعد ما حل ليه الباب....

اصبح يوم جديد ...هاذ المرة شرقات شمس اليوم على عويناتها مكاين لا غيوم لا امطار صبح الجو ساحي وصباحات شميشة على العينين الخضرين زينين ...صباح الخير الخير ورباح ...صباح الجمال ...على العينين الي تفتحو وقاستهم شمس عطاتهم لون زوييين ...صباح جديد في طياته احداث جديدة ...حلات عويناتها وهي شاذة كريشتها بايذها ومخشية فالمانطة ...شحال عاد استوعبات فين هي ...رجعات بيها ذاكرة لبارح وهي ترجع تقلب وجهها لملامح ممفهومينش ...متكية كتشوف شرجم حتى هبطت ليها دميعة ومسحتها وناضت من الفراش ...

طلات على تيليفون لقاتها سبعة ونص ديال صباح ...جمعات الفراش وقاداتو وهوات دنيا ومشات لدوش غسلات وجهها مزيان ومشطات شعرها جمعاتو كعكة مهملة ودارت روتينها عاد خرجات ...حلات الباب وهي تمشي نيشان لمطبخ ...لقات نجود واقفة كطيب فالفطور وتهضر فتيلفون كضحك مع صهيب ودراري ...

نجود : والله يمسخك واش جايين فطريق دابا ؟ 

صهيب : وتي راه كانت عندنا طيارة مع ربعة صباح عاد وصلنا مزال عاد داخلين لمطار من طيارة ...

نجود : يلاه ودغيا باش تحصلو لغذا ...الله يرضي عليك ...قطعات عليه وهزات راسها بانت ليها يامنة جالسة فطابلة ودايرة ايديها على حناكها ...حتى جلسات حداها صباحات عليها ومهضرتش ليها على شي حاجة فضلات تسكت تتنفس راسها ...

تحط الفطور وناضت نجود عيطات على الياس الي فاق تاهو باش يفطر ويخرج لخدمة والحاج ...الا هو مكانش ...جلسو فوث طابلة وجلسات حدا الياس تاني ونجود ...

الحاج : فين فؤاد ؟ 

نجود : يمكن خارج يجري ولا يدير رياضة ...غير فطر الحاج دابا يجي ...

الحاج : بنتي يامنة كتباني ليا عيانة ...

يامنة "حادرة راسها جاوبات على قد سؤال وهادشي خلاهم يشكو وهي الي مولفة تجاوب بعينين ضاحكين ومبتاسمة ..." : لااا عمي معياناش ...

الياس : كتباني عيانة نيت الفجيلة هنهه ..ياك بيخير اختي ..

نجود : بيخير بييخير غير مع الحمل كتعيا راك عارف الحاج ...ونتا فطر وسكت من الفجلة ...

بدات تكب لكل واحد شنو بغا كبات ليامنة الحليب وبداو يفطرو حتى ناض الحاج استاذن وخرج لخدمتو ...والياس تاهو وهي ونجود من بعد ماعطات تعليمات يوجدو الغذا بحساب دراي وهي تجرها لبسات بينوار سخون فوق منها وخرجات لجردة ...

وصات ليها على كاس حليب بلويزة ...وجلسو ...

حتى بانت ليهم سيارة ديالو داخلة من الباب ...وبلاصا وخرج منها لابس سورفيت كلحة حال ليها سنسلة وتحت منها تيشرت بيض وداير طاقية على راسو مهبطها حتى لعينيه ...داير نضاضر شمس ...خرج من سيارة وخرج معاه ساشيات فايديه ...ونزل شادهم فايد من جيه ولايد لاخرا شاد بيها تيليفون 

دايرو فودنو كيهضر وحاجب منزلو ولاخور ..تبت تيليفون بكتفو ..كمل اتصال وخشاه فجيبو من بعد ما سد سيارة هز عينيه بانو ليه جالسين او عفوا بانت ليه جالسة وحادرة راسها قدامها كاس الحليب ديالها ...حتى وقف عليهم كيحنحن ...باس راس نجود وحتى هي باس راسها ولكن مدارت حتى رد فعل ...

نجود : جلس اولدي ...

فؤاد "جاوبها براسو بواخا وجلس قريب ليها حط دوك ساشيات قدامها ...حك لحيتو وحيد نضاضرو حطهم هما والكونطاكت وتيليفون قدامو فطابلة ...دوز ايدو على رقبتو ووجهو " : دراري ؟ 

نجود : جايين فطريق ...

فؤاد : مزيان "شاف فيامنة " ...وكحز ليها ساشيات لعندها حلهم وهز منهم داكشي الي جاب حطو قدامها وحلو ليها كانو كريطانات شكلاط الي كيعجبها والجيلي والمارشميلو الي كانت مشهية وكيحمقوها ...وواحد البواط زرقة ... : غزالي ...

نجود : اوووه شكلاط وداكشي الي بغيتي ...خوديهم ابنتي ...

يامنة "هزت فيهم عينيها ومدت ايديتها ليهم قلبتهم وهزتهم شافتهم وهي ترجع حطتهم وناضت لوات عليها بينوارها وناضت من قدامهم ودخلت بلا متهضر ولااااا تكلم بحرف ...

فؤاد "غزز سنااااانو حتى خبط طابلة بجهد طار الكاس ديال الحليب وتخوا حتى ناضت نجود شاذة على قلبها ...

نجود : الله يرضي عليك اولدي وسع خاطرك وسع خاط...مكملاتهاش لقاتو هز طابلة وشير بيها لهيه حتى غوتات ....هز الكراسا قبسهم ...

فؤاد "كان غادي ليها وهي تحبسو نجود فنص تاني كطلب وتزاوك ...شاف فيها بعينين فحال جمر " : ال و لييييييييدة طلقييييييي مني...."داير صبعو على فمو كيتحلف " 

نجود : الله يخلي ليك ما عز عليك راها مريضة واحلة فنفسها راه قلت ليك ماشي دغيا كتراضا راه شوي بشوي انا الي عارفة هادشي قالتو ليا جداها ...الله يرضي على ولدي الله يرضي عليك ...سير بدل ساعة باخرا متبانش ليوم نتا كاع ...

فؤاد "قبس واحد الكرسي " : والو واااالو متزيد ليلة برا بيتها ...

نجود : راه غادي تجيب فيها شي دقة سير برد اولدي سيييير راك محدك كدير هاكا وهي كتزيد تقلق منك ...سييير برد وفكر وراجع راسك الله يرضي عليك ...

فؤاد "دار راسو بين ايديه وضار لجيهة لاخرا هاز راسو كيسووووط يسووووط بانت ليه طابلة مليوحة مشا ليها قبيها تا تشتاات تشتااات وهو يضرب ضورة ومشا لطوموبيل طار من تم ...

غادي مكسيييري بواحد سرعة كيجري ويقول ماجريت ...كتبان طوموبيل طاااايرة كتهز وترجع لطريق ...ما وقف الا قدام واحد النايت فواحد الاوطيل في فاس طبعا ...بلاصا قدامو لاح الكونطاكت لسيكيريتي ودخل نيشان لبار ...ماتسوقش واش غايسكر ولا دارهم كتبان ليه غير هي بين عينيه ونفس الهضرة كتعاود ليه " الى تقلقات صعيب ترجع ...برد اولدي برد الله يرضي عليك وسير فكر وراجع راسك ...يامنة محتاجة الامان تاني راها يتيمة وفقدان الام راك عارفو عااارفو عاااارفو ....

دخلات البيت عند نجود حتى بان ليها خرج وهي تخرج طلعات دوشات وبدلات حوايجها عاد هبطات ...ودخلات لبيت نجود وجلسات شادة تيليفون فايدها كتشوف وتقرا قبل مطفيه وتحطو عند راسها ...حتى وصلات وقيتة الغذا وجاو دراري ....

صهيب "كيعيط عند الباب " : امي الحنون ...اووووومي ..."خرجات نجود ومشا لعندها باسها وباس ايديها وراسها وعنقها " ...

نجود : وليدااتي على سلامتكم ...

يوسف "جا تاهو باسها " : الله يسلمك ..."تشبح " ...اوووو ضهري قتلنيييي ...غانمشي ندوش ونبدل ونجيو كاين شي غذا شي فجلة شي فؤاد خويا شي الوليذ ...شي المسنطح الياس بعدا هضرت معاه راه خدام ...

نجود : باك عارفو ميجي تالعشية ...يامنة راها فبيتي ...فؤاد خارج ...ايوى الغذا غايوجد دابا يلاه تهبطو ...تغذاو ...

مشاو دراري يدوشو باش يهبطو يتغذاو ...حتى دخلات نجود عيطات ليامنة لقاتها تاني كتبكي شافتها مسحت دموعها وناضت مبغاتش تحكر عليها مخلياها على راحتها مزيان البكا احيانا كينفس ...وتبرد ...هبطو دراري سلمو عليها وحتى هما لاحضو انها ماشي على طبيعتها ...غمزو لنجود الي غمزتهم تاهي باش يميكو تاهما ....

حتى تغذاو وناضو يرتاحو ....

نهار كامل غايب مبانش ليه الاثر وهي كيف وصل الليل مشات لبيت نجود وتكات ...من بعد ما تعشاو وكل طلع لبيتو ينعس ...كملات نجود وجات صلاة العشا وتكات حداها من بعد ما بدلت ...يلاه بغات تغمض عينهم حتى سمعو صوت سيارة فرانات بجهدددد ....حتى قفزو وخرج منها صاعر عينيه حمرين ...

فؤاد "جاي مبلط متمل بالبيااان نهار كلو وهو يسكح فيه سيك ...دخل لفيلا عند الباب

ضور عينيه هنا وهنا كي جمر عاقد غوباشتو ...حك لحيتو وفمو ...وعيط بسميتها باعلى صوتو ..." : يااااااااااااامناااااا 

حتى ناضو كلهم ...كيسمعو فيه كيعيط ...باعلى صوتو ...

نجود ناضت هي ويامنة الي كمشت فيها بايديها ...ويوسف الي ناض. على وقفتو كان داخل يحنزز في البروفيل ديال هاديك البنت ...وصهيب الي كان داخل لطواليط تيزبل ولا شتيدير ههههه ...

صهيب : ارسول الله ...

يوسف وصهيب خرجو من بيوتهم كيجريو لابسين تيشرت وشورط فحال فحال مختالفين غي فلون والياس تاهو ولكن بقبية ...

يوسف : اش واقع ؟؟ 

صهيب : صوت فؤاد هذا ؟ ناااري مك سكر ناااري غايفيق الوليد ...

الياس : هبط جري لعندو نتا ايوسف ...راه يسمع منك ...

يوسف : نهننن باغين تجربو فيا نجير ههههه نهبطو كلنا ولا نبقاو ....

صهيب : وغا زيد ...سمعو غوتو فدار وسمعو صوت نجود كترجع فيه ...وهما يهبطو ...

غادين فدروج بالغوتة قفز صهيب حتى طيح فاز تاهو وتشتت وفاز غااااالي ...

صهيب "شاد على راسو لقا يوسف هبط بقا غير هو والياس ...شاف فيه " / ناااري معرفت واش الوليدة غاتهبط ستار فالمسامح الكريم ولا لا 😱...

بدا يجمع فداكشي حتى سمعو صوت تهراس والتشخشيخ فدار وهو يلوح داكشي بالخلعة وهبط كيتراجل هو والياس تبعو يوسف لقاوه باغي يشدو ومقدرش ...

نجود : يهديك الله اولدي اش هاد الحالة "دايرة ايدها على فمها " ...اولدي راه غاتخلعها ...اش هادشي واش هبلتي نتا مول العقل زعما ؟ 

فؤاذ "حك راسو " : عيطي ليها طلع لبيتها وتفاهم ديك ساعة كترت الفشوش معنديش معاها ...هانا "هز ايديه كيشوف لتحت " ...ايدي مغاديش نمدها عليها ماشي رجولة نمد ايدي على مرتي ...

نجود : وعرفنا عرفنا ساعة الله يصبح ويفتح 

فؤاد "شير بواحد الديكور لحايط حتى بعدو دراري كان غايجي فيهم " : ديما يصبح ويفتح يصبح ويفتح ...مااااااغاصبحش ويفتح "كيهبط صبعو " د داااااابا تطلع ولاااااا نعرف شغلي ...

يوسف : احم وخا خويا دابا طلع ...دااابا ..

فؤاد : ششش "هز صبعو " سكت نتا ...

تم جاي الحاج كيحك فعينيه ويدير نضاضر شوف حتى وقف عليهم ...

الحاج : ياك لباس اش واقع ؟ فؤاد ؟ اش هادشي رجعتي تشرب اااا ؟ 

فؤاد : الوليييييييد نشرب منشربش انا الي نتحمل مسؤليتي ...عارف سواريا ...ولااا ياكما بغيتي تخليني نتوب بلا منحس تزيدني نسني نتا ولادك ااا ؟ 

الحاج : لا حول ولا قوة الا بالله ..."شاف في نجود " ...اش واقع ؟ 

نجود : غير مغاير هو ويامنة وتضغط شلا مشاكيل وقعو ليه ساعة الله ...هاهو غايطلع ويدوش يتوگض وصباح هضر معاه ...

الحاج : اش غانهضر اااش عند بالي راه دخل سوق راسو بعد عالحرام تحمل مسؤليتو هاهو غا زايد فيه ...شارب ليا الحرام ...راه بعقلو عندو 33 عام وباقي فنفس الطبع ...اش غانهضر راه ولا بمرتو وغايدير ولادو معامن نهضر ؟ 

في هاد الاثناء يامنة دخلات بالخلعة كتقفقف سدات عليها البيت بساروت ...وهي كتفتف واش سداتو ولا لا ...ولات تغزل ...حابسة البكية عرفاتو وصلات بيه لطوب وفضل يشرب ولا يدير شي مجزرة فدار ....ولات غاضور بجنابها ...البرد داخل لبيت وهي كتقفقف بالخلعة كتر من البرد ...

.....

يوسف : الوليد راك عارف هو بعقلو بلا متعصب ...خويا ا ا اجي برا ...

فؤاد"ضروه فراسو " : وشحااال فيكم ديال لهضرة شحاااال ..."خنزر في يوسف " زممممو عليا فامكم ...

الحاج : لا حول ولا قوة الا بالله العلي العضيم ...واش هاديك بنت ناس مدايرش ليها اعتبار ؟ ااا ...

نجود "فنفسها " : داااير هي علاش نايض هادشي كلو ..."رجعات تهضر " ...احم الحاج ...را....

فؤاد دعقوه بالبلا بلا خلاهم مدهيين وضرب ضورة بالخف كي ريح مشا خرج ...

يامنة بقات تقفقف وراجعة بلور ...كتسمع فتشخشيخ ...وهي تجلس فواحد سداري تما ...عاطية بجنبها ...مدهية ...سمعات تخرشيش ... نسات شرجم وخلاتو محلول ومع كيطل عالجردة حيث البيت سفلي …تلاح بجنبها بجهد ...مع ضورة الي غاضور...ضارت نيشان كان مقرب وجهو باش يهضر معاها بالهمس وهو يجي فمها في فمو ...حتى خرجت عينيها...

فؤاد "استغل الفرصة وضغط عليها بفمو على فمها جر ليها ريقها ...حتى رجع ليها راسها لور وطلقها بعينين معسلين شاف فيها فحال بغاو يتغمضو بشراب ونطق " : ااااح على جنة ولادي مقلقة مني ...

يتبع ...

وحق الله والله العضيم الى البارح كي ساليت البارت الليل كلو وانا فايقة منعست تالستة صباح صداع وسخانة بضرصة العقل ويلاه هيلي بدات تزگا وجاني شي راحة ونعاس خطييير ...لذلك اليوم متسناوش تالغذا ان شاء الله …بلاش من الله يشافيك لانني انا الي جبتها لراسي مال عام هذا كون ملي حبسات عليا نحيدها انا الي باركة نتقحبن ...فينما تزگا عليا تنشر باقلي هههه
التتمة غذا ان شاء الله ...وغانذكركم بواحد الحاجة ..الي حكرك ونتي فوضع يامنة وحيدة ومزال محتاجة واليديك بجنبك راه صعييييب تراضي خاصة لا كنتي درويشة ومكتقلقيش دغيا فنهار تشديها فقلبك خاصك الوقت هو الي كيداوي ..ومول الخيمة كيعاني ويجمع ويقاسي ههههه
اعتذر مرة اخرى ❤️❤️❤️