الحاجة : راكي كتعرفيني مكنبغيش ناكل بوحدي ... غادي نمشي نصلي ليا شي ركيعات حتى تجي لينا
رانيا : واخا الحاجة
خرجات الحاجة وخلات رانيا فلكوزينة كتوجد الغدا حتى سمعات صوت الخطاوي والروايض كيتجرو وتلفات موراها .
كانت بنت صغيرة لابسة كسيوة زوينة وطابلية من لفوق دايرة كرينات وشعرها اسود وقصيصة على عينيها . الشبه بينها وبين رانيا واضح ... حتى هي عندها عيون كبار بالشفار كوحل ووجه دائري و شفايف متلئة .. الفرق بينها وبين رانيا هوا البرائة ... بحيث رانيا مشاو من ملامح وجهها التعابير بالسهير والتعب والارهاق . تلفتات عندها وهي تحل فمها مخلوعة
- اوييييلي !!!! شكون ضربك ؟ شكون دار ليك هاد الحالة ؟ !!!!! هضري شكوووةون دار فيك هادشي اويييييلي!!!!
كتجر فيها وتقلبها بهستيرية ولينا ساكتة ويدها على حنكها باغا تبغي في حين رانيا كدور بيها ودورها بين يديها مخلوعة
- هضريييي شكون دار ليك هاكا هضرييي
قالت الطفلة لينا بتردد وهي خايفة والدموع محجرين فعينيها
- قال... لي ... الى .. قلتيها .. شي واحد ... ننندبحك
رانيا : واخا الى بقات فيك هاد المرة راني منسواش ... البرهوش غتبقا حتى تجبد ليها عينها شي نهار ... واخا غا بلاتي على والديك . اجي اماما عند الحاجة تغداي راه كاتسناك .
داتها غسلات ليها يديها وحيدات ليها الطابلية ومشات داتها عند الحاجة .. للصالون فوسط الفيلا . غير شافتها هاد الاخيرة تخلعات
الحاجة : ويل الشيطان ! شكون دار ليك هاد الضربة
جلسات حداها رانيا كتسوط : شفتي يا لحاجة ... هاد الولد باااسل وكل مرة يضربها ... عييت نتشكا ليه وااه ... حاكر عليها غير هي مالها شدارت ليه كااع ... بنتي سكوتية وفين ما حطيتيها كتبقا مكتجبد حد . وهوا كل مرة يضربها ومعدي عليها . (تنهدات وتغرغرو عينيها ) ولا ... حيت ماعندهاش باها ولا راجل فحياتها يدير عليها الهبة... اللي جا يمسح فينا رجليه انا وبنتي
شدات الحاجة لينا عندها معنقاها وقالت
- لا حولة ولا قوة الا بالله ... اللي ماعندو هم تولدولو حمارتو ... هاد الباسل مابغاش يحشم .. انا غدا غنمشي معاها ... والى مابغاوش يديرو لينا شي حل معاه انا غادي نحولها من ديك المدرسة
رانيا : كيديرو لقيمة غيير لي عندو لفلوس... اما اللي بحالي انا (جنات راسها بعات تبكي ) كيمسحو فيه رجليهم ...
قاطعاتها الحاجة : لواااه ... داكشي اللي كيخلصو عليه والديه على داك الولد راه كنخلصو حتى انا على بنتي لينا ... مراهاش كتقرا تما فابور ولا كيخلصو عليها من جيبهم ... مزيان تبارك الله
قالت رانيا وهي كتمسح دموعها : الله يكثر خيرك الحاجة .. ويطول فعمرك
الحاجة .. يالاه حطي لينا نتغداو ... الله يرضي عليك .. راك بحال بنتي ... ماتبقايش تبكي ... نبكي انا اللي سامحين فيا ولادي كااملين ... (كدور راسها ) ايييه ياحسرا ... حتى كبرتهم ... ورديتهم رجال ... وزوجتهم ومشات صحتي كاملة فترابيهم ... على اخر يامي سمحو فيا ... اللي تزوج وخدم كيزيد ويتلها مع ولادو ... مكيكلفو راسهم حتى يطلو عليا ... خلاوني بوحدي وكون ما هاد الدار ديالي كن راه تلات بيا الايام فدار العجزة
باست رانيا راسها وبدات طبطب عليعا باش ماتبكيش عاوتاني وقالت
- هانا معاك الحاجة ... خيرك سابق وانا عمرني نسمح فيك الله يطول ليك فالعمر
هادي الحاجة مسكينة .. كبرو ولادها وخلاوها ... وفكل مرة تفكرهم كتبدا تبكي بوحدها وتقول . دابا يجي النهار اللي يجيو يطلو عليا بزز منهم .. وداك النهار الوحيد اللي غيشوفوني فيه .. ومانقدرش انا نشوفهم ديك الساعة ونمشي لداري اللي تحت التراب وتشوووف شوف واش يطلو عليا واحا غير مرة فالعام . الحاصوا حتى واحد مامهني فهاد الدنيا ... لا اللي عندو لفلوس ولا اللي ماعندوش .. ولا للي كبير ولا اللي صغير ... هاهيا الحاجة ورانيا ... وحدة كبيرة بقات ليها خطوة للقبر .. ووحدة صغيرة يالاه بدات فلعشرينات ... وحدة شايط عليها الخير مالقات فين تحطو .. و وحدة كتحفر بدفارها وتعض بسنانها باش تكسي بينتها وراسها وتشبع كرشها ، لقاهم الله باش وحدة تحن فالاخرى .. رانيا هازاها ودايرة ليها اللي مدايرينوش ليها ولادها .. والحاجة كاسياها و موكلاها وحاطة بنتها فعينيها ودايرة ليها اللي ماداروهش ليها واليديها . كتقري ليها بنتها فاكبر مدرسة غير مع ولاد الاغنياء .. وكتعطيها وتصرف عليها بلا حساب . وهادي هي الحياة . وهاكا كدور الايام . كيحطو راسهم على المخدة بالليل و كل وحدة كتراجع همومها بتنهدية طالعة من العمق وسط الضلام فبيوتهم . رانيا معنقة بنتها عندقها بيت صغيرة فوق ناموسية .. والحاجة معنقة التسبيح وطيح فالدميعات على اللي مشاو ماسولو فيها
الشيفور : الحاجة صباح الخير ... فين عوالة هاد الصباح
الحاجة : زيد ديني للمدرسة ديال لينا
الشيفور : هي اللولة الحاجة ... لينا ... صباح لخير والاجتهاد
ابتاسمات لينا بخجل وقالت : صباح لخير عمي لعلبي
العربي : الله يرضي عليك وينجحك ... يالاه طلعي حدا الحاجة المجتهدة
سد عليهم الباب بسرعة فسيارة فاخرة ومشا .
رجعات رانيا لشغل الدار... تسمح وتجفف وتنضف وطيب ... مامقصراش من جهدها حاسبة الدار دارها حتى رجعات الحاجة ومشات تعرضات ليها ات ليها فيديها وهي سخفانة جلساتها وعطاتها الماء
الحاجة : صافي .. طرقت معاهم المسمار
رانيا : سمحي ليا الحاجة سخسختك على الصباح ...
الحاجة : صافي ... غادي يحولوها من داك القسم ... ماجيت حتى جلستها فالطاولة ديالها مع المعلمة الجديدة وفالقسم الجديد .. عاد جيت
رانيا : الله يخليك لينا الحاجة ويطول فعمرك
الحاجة : سيري ... سيري جيبي ليا الدواء ديالي سخفت
رانيا هي اللولة الحاجة .
× في الاستراحة .
وسط الساحة وتحت انضار المعلمين كيلعبو الوليدات الصغار فالالعاب ويتزحلقو ومنهم لينا اللي فرحانة وهي الصغيورة فيهم وقلييولة بحال النميلة مكتبانش .. كتجري بشوية عليها وتشوف قدامها فرحانة حيت وصلات نوبتها باش طلع فدريجات وتزلق حتى هي حقها . ومن جهة اخرى جاي جهتها ولد صغير قدها فالسن لاكن وافي عليها .. عاقد حجبانو وقاصدها مباشرة حتى للسلم ديال الالعاب اللي واقفة فيه هي وهز صبعو شار ليها وقال بغضب بالعربية مخلطة مع الفرنسية
- نتي اللي شكيت بيا للمدير ... انا غنوريك
جرها من يديها وهي فالدرجة الرابعة وطيحها حتى غوتات غوتة وحدة وكرمات فالارض .
حطات السماعة ومشات كتجري بلا عقل وتمات راجعة ماعرفات مادير ... مشات للكوزينة هزات اول جلابة شافتها معلقة لاحتها عليها وخرجات كطير لقات الشيفور شاد التيو كيرش الجردة وبدات تشير ليه وتعيط وهي كتجري
- لعربييي ... واسي لعربيييي .... وزيد جري جري
هز لعربي راسو شاف فيها وقال : الله يسمعنا خبار لخير .. (لاح التيو ) واااحمد .. واقطع الماء امسخوط الوالدين قطع هانا جاي .(تبع رانيا ) اش كاين واش الحاجة وقعات ليها شي حاجة ؟
رانيا : بالخلعة ) بنتي بنتي العربي ... بنتي جري ديني للمدرسة ماعرفت اش وقع ليها ..الله يا ربي الله
طلهات كتجري بلا عقل حالتها حالة والسبنية مايلة على شعرها للور والصندالة دالميكة والبيجامة فالشيبي كطل تحت الجلابة وججها صفر بقاو كيبانو فيها غير لعينين .
نزلات حدا باب المدراسة والعربي موراها كيجري تالف .. دخلات الادارة بحال الحمقة وهي تلقا المدير جالس فالمكتب وحداه راجل طويل وعامر شعرو اسود لابس قميجة شيبية وسروال توب باين عليه الثراء من الهاتف والساعة اللي
فيدو . هز عينيه فالباب بسرعة مباشرة فاش دخلات عليهم رانيا وهوا عاقد حجبانو ورجع شاف فالارض طالع ليه الدم ، وفالكرسي اللي قدامو جالسة مرى لابسة صاية ديال التوب فوق الركبة وقميجة انيقة شعرها زعر تحت الكتاف وطالون بيضاء البشرة وهازة حاجبها كتدي فرجلها وتجيبها
رانيا بالخلعة : بنتي ... في بنتي ... فين بنتي
المدير وقف : مدام رانيا .. بنت لاباس عليها الحمد لله وهي حاليا مع الممرضة والدكتور ماعندك مناش تخافي
رانيا : اويييلي على الدكتووور شمو وقع لبنتي
أفأفات المرى اللي جالسة وبدات كتشوف فيها بنص عين وطلع وتهبط ورجعات قلبات عينيها لجهة اخرى
خرجات السيدة الانيقة شادة لولدها فيدو كضحك معاه وتمسح على شعرو وبغات طلع فالطموبيل لاكن تصدمات فاش شافت راجلها جبد لودو ودنو وقال بغضب
- عقل على هادشي اللي درتي ... انا غنعاود لوالديك الترابي زيد طلع
المرى : لا ماديرش ليه هاكاك علاش تجبد ليه ودنو مالو شندو دار كاع
شار بصبعو ليها بغضب : غتسكتي دابا ولا غنخلي الشارع كامل يتفرج فيك وفالترابي ديالك ... انا اللي غنربي ولدي من هنا لفوق وماتدخليش سمعتي
المرى : كفاش منتدخلش ولدي حتى انا وزايدون راه ماشي شي ناس مهييييمين اللي دير عليهم هاد الحالة راك شفتي مها كي دايرة حالتها حالة وهمجية ... بنتها غتكون بحالها وهي اللي جبداتو
طلع ولدو فسيارة كيبكي وسد عليه الباب بالجهد كيردد ويحرك راسو " ماشي ناس مهميني ماعندناش علاش نتقلقو نخليوه يدير اللي بغا حيت غير دراوش
المرى :
دراوش وكتقري بنتها فأيكول بحال هادي بااز ... هادي غتكون غير شي مربية ربات الكبدة على بنت الناس
طلع فالسيارة سد عليه وديمارا متجاوبهاش . طلعات حداه وكل شوية دور موراها وتسكت ولدها في حين الاب كل شوية يهز عينو فالمرايا ويحلف فيه حتى وصلو لفيلا بتصميم حديث ودخل السيارة لداخل ونزل فتح الباب على ولدو جرو خرجو
الاب: دخل نتفاهم معاك ... نوريك لبسالة وقلة الاداب شكادير
الام : سي محمد بشوية راه ولدك
تلفت وشار بصبعو بجدية : ماااتدخلييش حسن ليك
جرو من قرفادتو كيبكي وطلعو لبيتو وسد الباب وراه بالجهد وبدا يشمر على يديه قدام ولدو اللي غيموت بالخلعة
- محمد : كيفاش ؟ طيحتي البنت وهرستيها من يدها ...داير ليا تما صعصع .. انا كنسيفطك تقرا ولا كنسيفطك تهرس ليا ولاد الناس ونبقا انا تابعك نصلح اخطائك ... هضر يالاه جاوبني
تركن جود فواحد الركنة كيترعد ويتمتم
- منعاودس... صافي اخر مرة ... اخر مرة منعاودش
محمد : عرفتي شنو قال ليا المدير .. قال ليا ديما كضربها وكتجي ماماها كتشكا منك ... يعني نتا ديما معندي على بنت الناس وليوم طيحتيها ... انا غنوري والديك . يالاه جيب ديك الشبكة لهنا ... (بصوت عالي) تحرررراك
مشا جوج كيشطح بالخلعة تلف على الشبكة وهي زرقا قدامو كنقول ليه هانا ..
- انا كنموت عليك ونتلاح عليك فالعافية .. نتي هي ضوء عينيا وحياتي .. الله يحفضك ليا ابنتي . صافي نساي ليديدة راه فيها الجبص مغيضركش .
دخلات الحاجة : بنتي لينا ... كي يقات يديك ... الله الله على بنيتي ... وااخا غير بلاتي دابا نوريهم وجههم فالمرايا ...
قالت رانيا بتردد : كن غير ... حولناها من تما الحاجة
الحاجة : نشاء الله نشوفو ليها مدرسة حسن كااااااع من هاديك .. شحال عندي انا من لينا غييير وحيدة لكبيدة ديالي ... غير خليها دابا حتى تسالي الايام ديالها ديال الراحة وديك الساعة نعيط لعبد لكبير (من العائلة ) هوا يمشي ينقلها .
ناضت رانيا تقضي شغلها بالزربة .. نعسات بنتها وبدلات ليها وخلات فراحة الله ودخلات الحاجة للحمام فركاتها وتهلات فيها ورجعات للحمام غسلات ودارت بحالتها شوية وجمعانو ومشات عند بنتها عنقاتها وحطات راسها على المخدة فالضلام ساهية وكتبكي حتى بردات ونعسات .حتى صبح الحال
طيييننن طوووون.....طييييين....
رانيا : بلااااتي بلاااتي
خرجات من الكوزينة بالبانطوفة كحلة وبيجامة صفراء نص كم نقية وجامعة شعرها باين عليها الحمام اللي دارت لبارح . حلات الباب وتمات نازلة مع الدروج ديال الجردة باش تحل الباب الثاني وهي تلقا العربي جاي منو نيت
العربي : شي حيد بناني بغا يشوفكم
استغربات رانيا وقالت : سي حد بناني ؟؟
العربي : قال باللي جاي بغا يشوفكم !
رانيا : حيد نشوف
مشات حلات الباب لقات جود بناني واقف هاز كارطونة فيدو بوحدو حاني راسو .. هبطات راسها عندو مستغربة شافت فيه وهي تسمع صوت اخر غليض
- صباخ لخير الاللة
هزات راسها لقات نفس الراجل بدجينز وتيشورط بيضاء ونضرات شمسية وعقدات حجبانها وبقات كتشوف فيه .
الحاجة جلسو تشربو بعدا غير ديال اتاي ... جلسو والله جتى تجلسو
حار محمد وقال لجود : بلاتي شوية وغنمشيو .. نديرو لخاطر للحاجة يالاه جلس
ناضت رانيا هزات بنتها وتمات غادية ومحمد كيشوف فيها حتى تكلمات الحاجة
- اييه يا وليدي ... شووف سبحان الله الدنيا شحال صغيرة... ... البشير بناني ... راه كان صاحب المرحوم ... باقي فلحياة ؟
محمد : باقي فالحياة الحمد لله
الحاجة : اللع يطول ليه فلعمر ... قول ليه سلمات عليك الحاجة فخيتة ... راه غيكون مزال عاقل عليا
محمد : نشاء الله مرحبا بسلامك
الحاجة : ايوا عندك شي وليدات اخرين .
محمد : هاد الساعة كاين غير هاد بوراس فيه عشرة مشاء الله
الحاجة : الصلاة على النبي الله يخليه ليك ...ايوا اوليدي شماش نقولك ... رانيا مسيكينة راه مرى وحدانية عايشة معايا هي ولينا بنتها .. اما انا ولادي ... مشاو وخلاوني مابقاوش كيسولو فيا لوكان ما رانيا الله يرضي عليها هي اللي مونساني وهازاني .
تنهد محمد وقال بأسف : الله ماخلق الحاجة ... نخليك دابا والله يلاقينا فساعة حسن من هادي
الحاجة : جلس باقي الحال ... جلس والله ماتمشي حتى تاكل الحلوة (رجع محمد جلس) ايوا قلت ليك اوليدي ... انا مريضة ماسكيت عليك ... و ولادي عاارفيني مريضة ومكيجيوش عندي! ايوا شفتي ولاد اخر الزمان .. درت ديك البنية رانيا مسيكينة معمرة عليا هاد الدار .. كي شفتي دابا من نهاار طلقات ... الراجل مشااا! مشافش وراه !!! ايوا شفتي الرجال ديال اخر الزمان !!! مكيسول حتى على بنتو عيفة الرجال الله يعطيه مصيبة ...
محمد : لا حولة ولا قوة الا بالله
الحاجة : ااايه ... وفالمزتمع ديالنا ... المرا الى طلقااات كيتحلو عليها الفام وكتقال على واليديها ... ايوا مسيكينة رانيا بنتي ... حتى هيا مابعاوش يقبلو عليها واليديها وهي مطلقة بالبنية !! اايه !!! وخلاوها تهز همها بوحدها ... وهي مسيكينة ثالت اللهم نخرج نعري على كتافي ونسكن بوحدي .. ولا نبقا نسمع الهضرة بالليل وبالنهار والبنية كانت ماشي تعقد ليها ....
سكتاتها رانيا اللي وقفات عليها كتسوط من مناخرها وقالت
- ااالحاجة راه وقت الدواء دابا وخاصك تنعسي ...
محمد : الله يشافي الحاجة ... خليت الراحة هاد الساعة
الحاجة : ااباقي الحااال ... خليني مابغيتش نعس دابا بغيت نتجمع اااجي بلاتي نعاود ليك راه مزااال فالرزمة مايتعاود
محمد : مرا اخرى الحاجة ... مرا اخرى
رانيا : سمح لينا السي بناني ...
قاطعها : نتوما اللي سمحو لينا
مشات معاه رانيا للباب وحلات ليه باش يخرج .. تلقت وراه شاف فيها بابتسامة ومد يدو وقال
- فرصة سعيدة هادي لاللة رانيا
مدات ليه يدها صافحاتها حسات بيها سخوونة وبعداتها بسرعة وقالت
- متشرفين السين بناني
محمد : كنتمى ماتخرجيش بنتك من لقرايا بسبب هاد المشكل ... وكنواعدك عمرو يتكرر مرا اخرى
قالت بابتسامة حشمات من الصواب ديالو
- نشاء الله السي بناني ... حتى نتا سمح لينا
حنا راسو بابتسامة وقال : مرحبا لاللة رانيا (جبد كارط فيزيت ) هادا الكارط ديالي ... الى وقع شي مشكل .. ولا شي حاجة بحال هاكا تاصلي بيا
خدات الكارط : شكرا السي بناني
محمد : صباحك مبروك الاللة
شدات رانيا الكارط فيدها من بعد ما سدات الباب وبقات كتشوف فيه وتقرا " MOHAMMED ALI BENNANI
Promoteur immobilier "
داتها معاها ورجعات لأيامها العادية حتى لواحد الصباح فنفس الاسبوع هزات البلاطو فيه الدواء وطلعات لبيت الحاجة حلات الباب ولقاتها مزالة ناعسة ..
يااايتها النفس المطمأنة ..ارجعي الى ربك راضية مرضية ... وادخلي في عبادي وادخلي جنتي .
جالسة كتسنط للقرآن مع الناس
اللي معمرين الفيلا وشادة بنتها عندها حتى خوات الدنيا وبقاو غير ولادها جالسين مناقشين على الورث في حين ناضت رانيا للكوزينة وخلاتهم . شوية دخل عندها الابن الكبير بكوستيم وغوباشة وقال
- رانيا .. هزيييتي الواليدة و ماسمحتيش فيها ماعندي مانقول . هاكي هاد البركة باش تقضي .
شدات رانيا الجوا الابيض فيدها وقالت : الله يرحمها ويوسع عليها دائقة القبور
الابن : اميين يا ربي . تقدري تمشي دابا
هزات عينها شافت فيه متفاجأة وقالت بارتباك
اه .. واخا ... غدا نشاء الله نمشي فالصباح
الابن : نشاء الله الله يعاونك
خرج من الكوزينة وخلاها جالسة ساهية كتخمم ... اش هاد الاولاد ! ولاد اخر الزمان خلاتها الحاجة الله يذكرها بلخير .. كيقول فيها وببرودة بحال الى كانت متقلة عليهم ! ولاكن هادا هوا حال الدنيا الله يستر وصافي .
صبح الحال وصبحات رانيا كتجمع فحوايجها وكتبكي غير بوحدها ... شنو دابا غترجع لدار باها وتبقا تصبح وتمسي على النكير وبنتها كتسمع فديك الهضرة ؟ وشنو غدير دابا مللي ماتت الحاجة ؟ باش غتخلص لبنتها المدرسة ؟ وفين غتخدم ؟ وشنو المعمول ؟
خرجات جارة بنتها فيدها وشدات طاكسي لدارهم فالحي ونزلات جارة باليزتها وبنتها فيدها وهازة راسها مابغاتش تبين حقيقتها المأسفة قدام الناس او تخلي شي واحد يشفق عليها ، هي ماعندهاش فلحقيقة ومقاتلة مع الوقت .. ولاكن قدام الجيران والناس مكترضاش وخصوصا من بعد الطلاق مابغات تبين ليهم باللي تلات بيها الايام . لبسات احسن ما عندها ولبسات حتى لبنتها باش تعطي صورة مضهرية يحتارموها عليها الناس وطلعات للعمارة فدارهم ودقات وهي كتسرط بيضة وتحط بيضة كارهة نضرة واليديها ليها ودواسكمهم المتكررة . حلات ليها امها ومع الحلة قالت فدهشة
هزات رانيا حاجبها وقالت : هييه !! الله ينجيني انا متنفست حتى تفكيت منو عاد شميت لهوا ونرجع عندو !! اصلا هوا ماشي قد المسؤولية ... ماعندو لا طموح ولا احلام ولا حتى لعبة ! السيد ماباغيش يزيد لقدام باغي غير ياكل وينعس ويتصاحب ... الجدارمي الخانز الله يلكيها ليه كحلة زحلة
الام : سيري خودي غير نفقةبنتك بعدا
رانيا : وقال ليا ندوزها حبس ومانعطيهاش ليك !! السيد مسااالي قبو وماعندي ماندير انا بلحبس ديالو .. نخاف على راسي نحيد ليه ديك الكسوة اللي كيموت عليها ويفديها فيا بشي طريقة يندمني بلااااش منو ونفاقتو انا قااادة ببنتي
هزات رانيا حوايجها مدابزة مع دارهم عاوتاني وخرجات مشات للدار اللي رهنات . دخلات لقات غير لحيوط وهي تنهد ... ااراك عاوتاني للجرا والفراش والمقاتلة . بدات تفرش شوية بشوية وتشري شوي من لقديم شوية من الجديد حتى فرشات الدار وتولاتها بأشياء بسيطة وجميلة ونقاتها ومابقا كيدور فجيبها حتى ريال باش تكمل الشهر وبدات تبعي فحوالقها ومرة تبيع سنسلتها ومرة خاتم وفنفس الوقت كتقلب على خدمة . دارت حتى عيات فالمدارس و الروض كتلقا غير الميناج هوا اللي تقدر تخدم فيه .
فاقت الصباح فدارها المتولة وفيقات لينا لبسات ليها حوايجها ولبسات جلابتها السوداء الجميلة وجمعات شعرها الاسود كوتشوفال وبلغة كحلة . كما سبق قلت ليكم .. واخا محتاجة ومخصوصة كتحاول تلعب على المهضر باش تنال احترام الناس وتقديرهم حيت هادي هي الحقيقة .. الدنيا مضاهر .
رانيا : الشيطان راه فلحبس دابا... هل الشيطاااان هوا هادا واللي بحالو ... خخخخختفووووو (لاحت ليه بزقة على وجهه ) الله ينعل ديلمك
الراجل : وقف هنا .. وقف نزل انا كاع بناقص
وقف الشيفور ونزل الراجل كياكل فلعصى من عند رانيا . اما الناس فالطاكسي غير كيشوفو ماهضروش بحال الى شافو لعجب وهادشي عمرو ماكان اول مرة !! طبعا حيت ماشي هما اللي فالموقف بقاو غير من المتفرجين وكيشوفو بطريقة احتقار حتى فرانيا واخا ماشي هي اللي لاحت راسها . بنادم خايب ماقدرو حتى يهضرو مع الراجل اللي ماحشمش ويا حسرا كاينين حتى لعيالات واللي ممكن يكونو هما فبلاصتها كن جلسو حداه .. حتى هما بقاو كيشوفو بنص عين مكمشين فمهم بحال الى رانيا غتمسح فيهم ولا طليهم من داكشي اللي واقع ليها . كملات طريقها كتنكر وتسوط حتى للسبيطار ونزلات كتجمع شعرها من جديد وتسب .. جرات بنتها ودخلات حناكها حومر غيطوش منهم الدم وبدات تسول فسبيطار العام لكبير وسيفطوها لجناح العضام وطلعات كتجر فبنتها . خدات الورقة وشدات النوبة فوق الكرااسة مع الناس حتى وصلات نوبتها وهما يسيفطوها ثاني لديال الاطفال ومشات كتنكر
محمد : اااه ... هي اللي قالت ليك سيري حتى لهاد التاريخ واجي (تيلي كيصوني ) الو وي ... بلاتي خليه معاك نسالي شي حاجة ونجي (قطع ) اري دوك الاوراق واجي معايا
عطاتو الاوراق ومشات معاه وهوا كيقراهم داها لجناح اخر وعدا لوحدة فالاستقبال الاوراق وبدا كيهضر معاها ورانيا بعيدة واقفة كتسنا هي وبنتها
لينا : مغيقصحونيش اماما ؟
وقف عليها محمد بابتسامة ودوز يدو على راسها
- مغيقصحوكش ماتخافيش .. اجيو ندخلو عند الطبيب
دخلو عند الطبيب رحب بيهم بالفرحة عليه ورانيا مبتاسمة اول مرة كتحس براسها عندها قيمة كبيرة و الطبيب براسو مكبر بيها . شعور لا مثيل له خلاها تبقا ضحك غير بوحدها ورجع ليها الثقة فنفسها .. عطاتها الممرضة كرسي جلسات
وكاس ديال الماء وجلسو لينا فوق كرسي بالطبلة وكيضحكو معاها ويلهيوها والطبيب كيقطع فالجبص بشوية .. تلفتات رانيا بابتسامة لقات محمد كيشوف فيها وبسرعة شتت النضر .. حصلاتو ما مرة ماجوج ما ثلاتة .. كل مرة تشوف فيه كتلقاه كيشوف فيها حتى دخلات عليهم الطبيبة المعلومة بابتسامة صفرا لقات عندهم لجو صافي وهي تبتاسم لرانيا وقالت
- تبارك الله عليك قادة بشغلك
تلفت محمد هز يديه من فوق البيرو كيسوط ويقلب فعينيه
- اسماء .. اجي معايا لبرا
بعدات اسماء وقالت بعصبية فوجه رانيا
- ياك لاباااس ياك عطيتك الغونديفو شنو مزالة كديري هنا ولا انا بنتك انا المكلفة بيها واش ماعلموكش تحتارمي القوانين
وبقات عليها الطبيبة بالفرونسي ورانيا شي كتشدو شي مكتشدوش ومحمد بناني كيجرها باغي يخرجها من البيرو وهي كتهاجم رانيا اللي حتى كلمة فالفرونسي مابغات تخرج ليها على الاقل تعطيها جواب . تمحات ليها الداكرة ومالقات ماتقول وهي تقول ليها
رانيا : فا فيغ فوتخ
ماعرفاتش راسها واش خرجاتها عوجة ولا صحيحة المهم عطاتها وخلات الطبيبة مصدومة ويدها على فمها
خرجات رانيا جارة بنتها ودازت حدا ديك السيدة اللي كانت فالاستقبال .. شافت فيها وهبطات عرفاتها باللي هي اللي وصلاتها للطبيبة سخونة وجات عندهم . شدات طاكسي وهاد المرة مابغاتش تركب حدا الراجل وبقات كتسنى فالطاكسيات يدوزو حتى ركبات حدا المرا ورجعات بحالها لدارها سخنات لبنتها الدوش ودخلات معاها لبسات سوتيان فالاسود وسليب اسود وغسلات لبنتها وبدات تلعب معاها بالماء بحال شي جوج بنات صغار ماعندهمش العقل خاص اللي يربيهم بجوج . وحتى رانيا مابايناش عليها حالة المطلة ولا الوالدة .. تقول عمرها حملات ولا رضعات .. الكرش ماكيناش حسها والصدر واقف واللحم مجبد لا غلض لا ضعف كلشي متوازي . شبعات تنقاز حتى عيات وشللات هي وبنتها وخرجو مكاين لا حمد ينكر لا محمد يتشرط .. لا صدع ولا حريق الراس .. طيب وقت ما بغات و دير اللي بغات حتى واحد ميفرع ليها راسها .
لبسات لبنتهل ورشقات ليها على شي شهيوة ديرها للعشاء . واخا الميزيرية مكتعز فبنتها حتى حاجة . خدات شوية ديال فخيدات بالفلوس اللي بقاو عندها كتصرف منهم وشرملاتهم مزيان مع ليقامة ديالهم وهبطاتهم عند كزار الحومة شواهم ليها مع خضيرة مقطعة وطلعات دارت شلاضة وحطات العشا لبنتها تاكل ويدات تكحك فالروشارج ديال 5 دراهم ودخل فتيليفون . هزات كارط فيزيت وجلسات مربعة حدا الطبلة بشورط مزير غوز وديباردور ديالو و دوزات النمرة بتردد كبير .. فالاخير ربطات الخط وبقات كتعصر وتعض على شنايفها حتى جاوب
محمد : الو
سمعات صوت الطريق ومرتو كتهضر حداه مع ولدها وقالت بسرعة
- سمح ليا بغيت غير نن .. نقول ليك سمح ليا .. على داكشي اللي وقع الصباح وشكرا بزاف
محمد : بنبرة عادية ) ماشي مشكل
رانيا : الله يعاون سمح ليا
محمد : الله يعاون
قطعات نادمة اشد الندم على الاتصال وكارهة راسها وحسات براسها تدلات وطيحات من قيمتها .. تقطعات ليها الشهية وتمنات كن ماتاصلاتش كاع واخا كان عليها تتاصل على الاقل تقدم ليه الشكر من باب الصواب . حطات داك تيلي وبقات تشوف فبنتها كتاكل وبدات تجمع معاها حتى نساتها لينا فشنو وقع وجلسو كيتعشاو ويضحكو بجوج .. قولها وضحك عليها وبداو يتجاراو فالدار كيلعبو وعاد ماكتزيد رانيا تحمس وباغا تلعب بحال الى مالعباتش فصغرها . كينقزو فوق الفراش ومكاين غير الشتيف والتكركير حتى بدا تيلي كيصوني ومشات ليه رانيا كتلهت سخفانة وكضحك وفتحات الخط
رانيا : الو
محمد : الو بونسواغ
تفاجآت رانيا وجلسات كترد النفس وقالت
- الو السي بناني ؟!!!
السي بناني : سمحي ليا قبيلة كنت سايق ماصلاحش ليا نهضر وانا كنسوق ...
رانيا : اه واخا سمح ليا ... بغيت غير نقول ليك شكرا على وقفتك معايا وسمح ليا الا كنت درت ليك شي مشكل مع المدام
السي بناني : لالا مكاين لا مشكل لا والو ياك البنية بعدا مزيانة؟
رانيا : مزيانة الحمد لله الله يكتر خيرك
السي بناني : ايوا الحمد لله كي دايرة الحاجة لاباس عليها ؟
رانيا : الحاجة الله يرحمها مشاااات عند الله والربعين ديالها دازت هادي شي شهر وزيادة
رد فدهشة : وااايلي!!! الحاجة الله يرحمها !! ان لله وان اليه راجعون ... الله يوسع عليها دائقة القبور
رانيا : اميين يا ربي كانت مرى مزيانة وكدير لخير
قال بأسف : الله يرحمها ويوسع عليها .. واش مزال دابا فنفس الفيلا ؟
رانيا : لالا صافي جاو الوراثة وخرجت رهنت بوحدي
السي بناني : ااه ... (بقا ساكت ) و .. وليكول ديال البنية شنو درتي فيها ؟
رانيا: سبقت ليهم شي بركة تهنيت فخطرة ..بقا غير شهر وتشد العطلة وديك الساعة نحولها للعمومي
السي بناني : ولاكن غضيعيها هاكاك البنت غتخربق الى حولتيها
رانيا : ايوا شغانديرو الله غالب
السي بناني : الله يسهل الامور . شنو درتي دابا ... لقيتي شي خدمة اخرى ولا شنو
تنهدات وفنفس الوقت كتلمح ليه باش يضبر ليها فخدمة تاكل منها طرف دالخبز حيت البيبان كاملين اسدة فوجهها وكتسنا منو غير شي مساعدة وهي قادة تخدم بدراعها وتكمل مشوارها
رانيا : والو ... اللي مشيتي عندو كيشوف فيك شوفة فشي شكل وكيبغي غير يطمع فيك ... المجتمع عندنا خايب .. مزال كنقلب حتى يدير الله شي تلويل ديال الخير المهم ناكلوها حلال هادشي اللي بغينا
بقا ساكت شحال وقال : اشمن نيفو عندك ارانيا ؟
رانيا : عندي نيفو باك ... ولاكن شحال هادي بيني وبين لقرايا نسيت على شنو قريت كاع
السي بناني : يدير الله خير ... نشاء الله ... يكون خير .
رانيا: سمح ليا صدعتك السي بناني ... تصبح على خير
السي بناني : تنهد) مرحبااا ... ماصدعتيني ما والو ... بوسي ليا لينا وتصبحو على خير
رانيا : شكرا
قطعات وتلفتات عند لينا كتنقو وقالت : غادي يلقااااا ليا خدماااا غادي يلقااااا ليا خدمااااا ... باااينا غادي يضبر ليا فشي حاجة فاش نخدم (هزات يديها للسما ) يااااربي سهل عليا ماطلبت والو طلبت غير شدق ديال الخبز حلال .. مابغيت فيلا مابغيت طموبيل وماطلبتهاش كبيرة ... بغيت غير خديمة زوينة نعيش منها انا وبنتي ومانحتاج لحد .. يا ربي سهل عليا ونقي طريقي من الشوك وبعد عليا ولاد لحرام ياربي ... يااااربي رجايا فيك كبير عاوني حتى نكبر هاد البنية ومانخليها مخصوصة من حتى حاجة وماتحسش بالنقص ولا تعقد ليا ... يا ربي عاوني ياربي
لينا : اميييين ياربي
تلفتات رانيا شافت فيها فدهشة وعنقتها بقوة وطيحاتها عليها فوق الفراش كضحك
طيحات لينا فوق الفراش وبقات كتعض فيها وتهرها والاخيرة كتموت بالضحك وتفركل حتى سخفو وطفاو الضوء و طاحو نعسو
صبح الحال وصبحات رانيا فايقة تدي بنتها المدرسة برجليها من بعد ما كان الشيفور كيديها ويجيبها ... رجعات هي تدي بنتها بيديها وتجيبها وتبقا واقفة ليها فالباب حتى يخرجوها ليها . داتها للمدرسة ورجعات بحالها للدار حتى قربات تخرج فلعشية ومشات باش تجيبها ..يالاه دارت مع الزنقة وقف عليها شفار حط ليها الموس فعنقها وقال
خدا تيليفون وزاد بحالو وخلاها واقفة كتلهت بالخلعة ... بعدات على البلاصة فين تكريسات ووقفات كتنفس الصعداء وجبدات تيليفون من صدرها .. تيليفون كبير جديد وزويين غالي .. شافت فيه شحال الساعة ورجعاتو لصدرها طفاتو ومشات كملات طريقها جابت بنتها من المدرسة وتمات طالعة للدار ، تلاقات مع مولات الدار كتسيق الدروج ولقات السلام سخفانة
- رانيا : رقيا ختي لاباس
رقية : رانيا !! مال وجهك صفر
رانيا : تكريسيت اختي داو ليا تيليفون اللي فيه نوامري كاملين وكنهضر فيه
رقية : الله الله الله ... مسكييينة فين داوه ليك
راينا : فالدورة اختي ... كن غير جا عندي طلبو ليا نعطيه ليه ضاحكة وميحطش ليا الموس فعنقي الخلعة كتر من تيليفون اللي مشا (جبدات تيليفون من صدرها شعلاتو )
رقية : هاهوا تيليفون !!!
رانيا : هادا واحد اخر كان عندي فاش كنت مع الحاجة اللي عاودت ليك عليها ... عمرني نعاود نخرجو لبرا اصلا مكنهضر فيه ... اللي كنهضر فيه داوه الله ياخد فيهم الحق
رقية : بأسى ) متأ... طلعي طلعي ديري معايا كاسكروط راه جالسة غير بوحدي
رانيا : ارس نسيق معاك
رقية : ساليت صافي غير يالاه
رانيا : يالاه ابنتي نجلسو مع خالتك رقية شوية
دارت الايام ورانيا كتدي بنتها يوميا للمدرسة فالصباح وتجيبها فلعشية حتى لواحد النهار مشات كالعادة تجيب بنتها بالجلابتها وبلغتها وشعرها مدفور للور ولافخونش فالجناب وهي تلقا السي بناني واقف حدا السيارة كيشوف فالساعة داير النضاضر ديال الشمش وكيهز راسو يشوف يمين يسار .. وقفات بعيدة عليه باش متبسلش ودارت راسها مكتشوفش وربعات يديها حتى بدا كيبان ليها الخيال قدام كيكبر وهي تسمع صوتو
محمد : السلام عليكم
تلفتات وردات السلام لقاتو شاد شاد تيلي فيدو وكيتسائل بيه قبل ميهضر
محمد : مال تيليفونك كنصوني كنلقاه طافي
رانيا : ااه سرقوه ليا
محمد : كفاش سرقوه ليك ؟
رانيا : تكريسيت ... وقف عليا واحد الشفار وداه ليا
محمد : داه ليك !! كفاش وقع ؟
رانيا : كنت جايا نجيب بنتي ووقف عليا واحد الشفار خداه ليا وصافي
محمد : دابا عندك شي تيليفون ولالا ؟
رانيا اه عندي ودرت فيه نمرة جديدة
عطاها تيليفونو : اوك ..قيدي ليا نمرتك الجديدة
شدات تيلي كتقيد الرقم وهوا متبع معاها وكيشوف فيها وعطاتو تيليفلون
محمد : بغيت غير نقول ليك ..راه لقيت واحد الخدمة ... الى كنتي مزال مابديتي الخدمة
رانيا : فين هاد الخدمة ؟
محمد : فمكتب البيع ... معايا
رانيا: مافهمتش؟!!
محمد : من بعد وغنشرح ليك كفاش
رانيا : ولاكن لقيت واحد الخدمة
حل عينيه وقال : فين ؟
رانيا : مع واحد الدونتيست مساعدة
محمد : امم ... المهم الى ماكنتيش مرتاحة بدلي ... انا فكرت وشفت باللي الخدمة فمكتب البيع حسن ليك ومريحة
رانيا : لالا صافي غنبقا غير فهاد الخدمة شكرا
محمد : بمحاولة اقناع ) فكري مزيان ... انا لقيت ليك هاد الخدمة مناسباك بزاااف وحتى التوقيت ديال مناسب مع بنتك جربي بعدا وديك الساعة عاد قرري
رانيا : ماعرفتش .. المهم نفكر وديك الساعة نرد ليك
محمد : فكري مزياان راه خدمة زوينة وحتى الصالير ديالها زوين ... ماشي كلشي كيلقاها ولاكن ...
* رقية ثسسست احح تبارك الله على دكة عندك ارانيا ... الله يعطيك الصحة اتاي كتلقميه زوين ... ايوا وشنو قلتي ليه
رانيا :هازة البراد ) هههه المشكيلة خفت نخدم معاه وتم جايا ديك مرتو ... عرفتي الراجل الله يعمرها دار .. مرتو اللي جرثومة
قالت رقية وهي كتحزم العقدة ديال الزيف فوق راسها
- واش هادا كبير ولا باقي صغير؟
رانيا : باقي صغير .. يكون فثلاتينات
رقية بحماس : و ووو زوين زوين كي داير ؟
رانيا : الغزال الصافي ... كيحمق ههه ... وزيين النضرة وزين الوقفة وزييين الهضرة .. وزين الضحكةهه طويل تبارك الله وعريض اش غنقول ليك ... اللي عندو لفلوس الصراحة يزيان بسيف عليه ... اللي لبسو كيجي معاه ارقية ... لبس لكلاص تقولي رئيس .. لبس الصبور تقول بطل عالمي ... والصواب والاداب ... الشعر كحل كيبري والشوفة طيح الزرزور من فوق الصور والحواجب ااااش غنقول ليك يا رقرق .. عود تبارك الله والصلاة على النبي ونقي كيضوي وعندو واحد الوليد كيشبه ليه كيحمق بالزين .
بقات رقية هازة حاجبها وقالت : يا كسيري كسيري راه السيد مزوج
شافت فيها رانيا وقالت : دخلنا عليك بالله ... واش اللي دار معاها الصواب بحال اللي دار معايا واش مغطيحش فيه على زنافرها ! هاا؟ واخا انا نيتي صاااافيا ربي شاهد بغيت غير نخدم ماطامعاش فيه كاااع ... بلعكس خفت ندير ليه شي مشكل مع مراتو ... هوا بغا يعاوني باش نقاد حياتي .. ولاكن ماشي نجي انا نخسر ليه حياتو
رقية : اااه ... يحسابني
رانيا : لالا بلعكس ... السيد تعامل معايا مزيان وكنحتارمو وحتى هوا كيحتارمني ... راحنا ولاد الناس ارقية ماشي ولاد لحرام وبااين اللي كيبغي حاجتو وباين اللي باغي غير يدير لخير واش هادشي فيخفا عليا انا اللي كنعيشو يوميا
رقية : واشتي الى جيتي عليا ... الشرع راه عطا ربعة ... ربي عطاهم الحق يتزوجو واللي عندو باش يقد عليهم علاش ميتزوجش اش فيها .
رانيا : لالا منجيش على الضرة واخا يوقع اللي بغا يوقع ... منقدرش ناخد لشي وحدة راجلها كما منبغيش اللي ياخد ليا راجلي
رقية : ايوا سمحي ليا بنتي ... المرى هي اللي تعرف تحافظ على راجلها... راه هوا اللي غيتلاح للزواج الثاني ماشي وحدة اخرى اللي غتديه .. الراجل كيتزوج فجوج حالات انا كبر منك ونقولك ... الا مالقاش الراحة وحاس بالنقص مع المرى وعايش فالمشاكل ديما ومامعمراش ليه العين ... ولا الا مال قلبو لجهة اخرى وماقدرش يتحكم فيه . صافي
رانيا : ديما المرى اللي عليها اللومة ... هوا الى مرتاحش يمشي يتزوج وهي الى مرتاحتش تصبر ! باز ! انا ورقة ديال الوساخ وسنييتها مافيا اللي يعاود يسنييها مع شي قمقوم يشربني المرار وعاد مع الضرة نغرق فالمشاكل حتى لودني .. شربي شربي راه اتاي طلع ليك السكر
رقية : وانتي تعرفي اللي يصلاح ليك
رانيا : خليه حتى يعاود يصوني وعاد نقول ليه راه قبلت لخدمة ... ماعندي مندير ... ربي جابها فوقتها ونيت مابقا عندي باش نصرف ..... رمضان جاي وتابعو العيد .. باش غنكسي بنتي وباش نفطر ... طرف ديال الخبز صعيب مكيجيش بالساهل ... وانا عندي البنت ... مسكينة مرضات ليا مالقيت باش نشري ليها الدواء .. وعندي واحد الضرسة كتنوض عليا بالليل كنبغي نحماق بالبكا ... حتى كنبغي نعس عاد كتنوض ليا بغيت غير نعمرها ماعنديش باش... مول الحانوت كيتسالني الكارني عاامر رجعت كنحشم نمشي عندو
رقية : الله يدير ليك تاويل ديال لخير ابنتي
سهات رانية جامعة يديها عندها وقالت .
- عييت ارقية عيييت ... يكدب عليك الكداب اللي يقول ليك التربية ساهلة ... عييييت واخا نشكي حتى نعيا مكاينش اللي يحس بيا ... حيت كل واحد فين كيشوف راسو حتى واحد مشايف راسو ببنت صغيرة وهاز المسؤولية اللي هازة انا
رقية : الرجال وكيتهدو حسبلاك النسا ... وعاد نتي فيك معا وفيك باها .. شحال دابا عندك ارانيا
رانيا : باش كنحس ... عندي 40 عام . وفالعدد عندي 23 عام
رقية : اممم الله على بنيتي باقا صغيرة وعلاش تزوجتي صغيرة؟
رانيا : ايوا العقل والتخربيق .. كان كيحسابني الحب كنت عورة ... ساعة مكاين لا حب ولا يحزانون غير سحابة ودازت ولقيت راسي واحلة
حلات سراجم دارها فصباح جديد .. صباح وغمضات عيونها السوداء من اشعة الشمس الضاربة فيهم . تلفتات موراها لقات لينا كتكتسل فوق الفراش . مشات حلات الباب لقات رقية طالعة كتجر القفة ومكفضة الجلابة
رقية : ايوا الله يسهل عليك ابنتي والله يعاونك ... و لينا كي غاديري معاها ؟
رانيا: لينا داخلة مع الوحدة ليوم غانديها قبل مع 12 نخليها فلاكخيش مع واحد المعلمة كنعرفها وهي راسها غتمشي لقيسمها ... فلعشية مع الخمسة غندوز عندها نديها ونجي بحالي
رقية : ايوا الله يسهل الامور
رانيا: اميين ياربي
نزلات رانيا عند لينا نوضاتها كتجبد غسلات ليها وجهها و جلساتها وكلاتها ودارت ليها شوية ديال اللوز ولكركاع فطاسة مع ليمونة وخشاتهك ليها فالشكارة . لبسات جلابة خيطاتها راسها فالوقت اللي كانت جالسة فيه ماعندها لا شغل لا مشغلة .. واخا مقارياش عليها مشات شرات توب رخيص وفصلاتو على جلابتها اللي عندها وبقات معاه شوية بشوية حتى طلعاتها وزوقاتها بشوية ديال لعقيق ولبساتها وهاهيا حتى هي لابسة جلابة ديال رمضات جديدة بحالها بحال الناس ... الحاصول .. الحاجة ام الاختراع وقلة الشي كتعلم المشي .
دارت دفيرة لشعرها وخرجات جوج زغبات لقدام ودات بنتها للمدرسة حطاتها وبقات واقفة كتسنى تيليفون حتى صونات عليها نمرة جديدة وفتحات الخط
رانيا : الو ؟
الشخص: رانيا كتابي ؟
رانيا : ايه شكون معايا ؟
الشخص: انا اللي غنديك معايا للخدمة راه عطاني السي بناني نمرتك قالي كتجيه من لافامي
سكتات وقلبها كيضرب بالخلعة خايفة يديها لشي بلاصة . ركبات معاه فواحد البارطنير كاملة مغبرة من برا ومن لداخل عامرة بالاوراق والملفات مشتتين .
وقف السيارة حدا تجزئة كبيرة جديدة على الطريق الكبيرة ونزلو بجوج ، بقات غير تابعاه وساكتة ودخلو لمكتب فالحوانت ديال ديك التجزئة اللي لتحت .. كان كراج كبير خاوي فيه 3 ديال المكاتب واحد فيه ولد وواحد فيه بنت و واحد
خاوي .. دخلات حشمانة وبقات السلام وبقات واقفة حتى عيط ليها السيد اللي جابها جلسها فالمكتب و وقف حداها كيشرح ليها . ها كفاش تشرحي للناس وها الديور اللي مزال ماتباعو وها شحال فكل وحدة فيهم من متر كاري وها الحوانت اللي مزالين حتى هما وشحال فكل واحد .. ها الفينيسو اللي فكل وحدة .. ها كفاش تعمري الملف وها كفاش دفعي الدوسي وكفاش كيتم البيع . ماعليها غير تعمر الملف وتدون داكشي فالحاسوب و تدفع للشركة هما يتكلفو باالدفع والاستلام .
فهمات رانيا طريقة العمل كفاش غادية لاكن باقا فيها الخلعة مع اول تجربة ليها . عجبها البوسط وفرحات بيه ولاكن ااالخلعة طلقي مني .
دوزات لعشية فالمكتب كتراجع داكشي اللي قال ليها وكتجمع مع زملائها فالعمل اللي جالسين تما وكتسول على كل حاجة تنسات ليها ولا مافهماتهاش وحتى هما مكيبخلوش عليها بالشرح و وراوها حتى تصاور الديور اللي تما فديك التجزئة فين هما . بدات كتشوف فالتصاوور بوحدها فالحاسوب وحدة تنسيها فالاخرى .. اشمنك يا صباغة فالحيط كيدايرة ... والسقف بالخشب منقوش .. والكوزينا كضوي .. والطواليطات عصرية ... كاين اللي دايرين ليها الزليج وكاين اللي دايرين ليها الباركيه .. ها اللي فيها 150 متر ها اللي فيها 60 متر .. البالكونات ياسلام والعمارات بالمصاعد والدخلات ديالهم بالرخام . بقات رانيا حاطة يدها ساهية فيهم وطلب الله يرزقها حتى هي شي دويرة بحال هادوك واخا غير صغيرة ... ولاكن فيين هي وفين الدار فاش طلات على الاثمنة حلات فمها حتا للتحت وتصدمات . مكاين غير 90 مليون حتى ل200 مليون . اللخرة فيهم دايرة 90 مليون . تراجعات عن احلامها وشدات آلة حاسبة وبدات تكحسب بشحال غيطيحو هاد الديور كاملين الى تباعو .
رانيا: امم .. عندنا هنا ... شحال باقي ماتباعو ؟ 4 ... تبارك الله كلشي تباع .. الناس عندها لفلوس سعداتهم .. شحال عندنا من دار فالطوطال ... بلاتي تجزئة فيها 8 ديال العمارات دايرين .. كل عمارة فيها 10 ديال الديور كل طبقة فيها جوج .. وكل عمارة فيها 5 ديال الديور ب 150 مليون والباقي كل وحدة بشحال .. الى ضربنا هادي فهادي وزدنا عليها هادي .. و...
زداف .. طلعو فالسيارة وسدو البيان .. حسنا كتملك سيارة صغيرة جميلة كتمشي وتجي فيها و ركبات معاها رانيا وهي كطلب الله يرزقها بشي طموبيل حتى هي كما رزق حسنا .. شدو الطريق وبداو يتجمعو
رانيا : مابعيداش الخدمة على سونطر فيل
حسنا: لالا قريبة غير بتي طاكسي وهانتي تما ...اصلا دابا ديك التجزئة دارت للناس اللي لاباس عليهم كيبغيو يبعدو شوية من صدع الشانطيات وفنفس الوقت ييقاو قراب من السونطر
رانيا : اممم ... مزيان نتي من شحال هادي ونتي خدامة فهاد الشركة
حسنا : جايا لشي خمس سنين ... فاللول بديت فواحد التجزئة ديال الفيلات حتى تباعو كاملين .. وجيت لهادي دابا عام وانا فيها ... غير يتباعو هادو غنمشي لوحدة اخرى
رانيا: تبارك الله شركة مربحة هادي
حسنا : مولاها هوا السي محمد بناني ... منعش عقاري .. هادي هي خدمتو كيبني التجزئات ويبيع ... ولاكن هاد المرة كيبنيو سونطر كوميرسيال كبير فمراكش ماشي ديور .. كل عام كيبداو البني فشي حاجة .
رانيا : الله يزيدو ويرزقنا حتى حنا
حسنا : واخا هاكاك هاد الخدمة فيها لوغيسك .. الى غلطتي غير فشي رقم مشيتي فيها
رانيا: هههه يجي ليك مول الشي
حسنا : كاع ميجي ليك مول الشيء يجي ليك الكونطابل ديال هاد التجزئة ولا المراقب ديالها يغسل ليك ودنيك مايخلي فيك غير اللي نسا ... يخ مكنحملوش ... اما مول الشي مكيجيش كاع ... كيجي يطل فاش كيكونو كيتبناو وفاش كيكملو ومكييقاش يبان ... كيمشي يشوف حاجة اخرى ... راه المساخط اللي خدامين معاه جنوون البق ميزهق ... اما مولاها الله يعمرها دار كيتعامل
رانيا: ايوا اختي الله يسهل علينا .... انا عندي بنتي غارقة معاها يا ربي نكملو غير الشهر بحال الناس .
حسنا : الله يسهل عليك .. كاين اللي مكيحمدش الله ...
رانيا : صافي غير هنا انا غنكمل على رجلي ... شكرا اختي
حسنا: يالاه الزين بسلامة عليك حتا لغدا ونتلاقاو نشاء الله رمضان كريم
رانيا : علينا وعليك
نزلات رانيا مشات خدات بنتها ورجعات بحالها للدار .. علاش لا هادل النهار اللول فرمضان تمشي تفطر مع دارهم .
جرات بنتها ومشات عند مها كالعادة .. دخلات عادي وعاوناتها فالتوجاد وفطرو كاملين وبدات تعاود ليهم على الخدمة الجديدة وباها جالس وكيبحت فيها ساعا مالقا منين يشدها . بقات حتى تعشات وخرجات ضربات دورة مع بنتها ورجعات بحالها للدار تقصر مع رقية فالسطح على الزريعة
رانيا: الدار فيها غير بيت واحد عندو الباب وجوج الصالونات صغار مقابلين مع بعضياتهم وكوزينة وحمام خااوين غير وسط الدار اللي مفرشة فالارض كناكل فيه انا وبنتي .. اما دوك الصالونات مافيهم والو
حسنا: هانيا ماشي مشكل نجيب فراشي نعمرو ونتمرح فيه .
رانيا: شوفي الى قالت ليك مولات الدار زيديها .. زيديها ديك 100 درهم وصافي .. حيت الصالونات مامستافداش منهم خوديهم نتي
حسنا صافي .. مور الخدمة نمشي معاك ... اجي نتي معندكش مشكل الى تعطلت بالليل
رانيا: وانخاف مولات الدار تبقا تنكر
حسنا : المهم نتي معندكش مشكل هادا المهم
رانيا: انا بغيت غير اللي يهز عليا ديك الشهرية ويخلص معايا الضوء والماء تقهرت
حسنا : الضوء والماء نخصلو انا ماتخلصيهش كاع ... شناهي 600 درهم للكرا تا تنتي... واخا تكون الف درهم راه مزيانة ماشي بحال 1800 كاملة
رانيا : ايوا مرحبا بيك من غدا
سالات الخدمة وماجا حد .. فلعشية دوزاتها حسنا هزات بنتها من المدرسة ومشاو يتقابلو مع رقية البلدية اللي عندها ديريكت واخا كتشوف مصلاحتها حتى هي . طلعو عندها للدار لقاهوها جامعة جلايل البيجامة الليمونية وسروال قندريزي كيبان وجالسة تنقي الجنجلان .
رانيا : رقية ها البنت اللي ثلت ليك عليها
حسنا: السلام
طلعات فيها رقية وهبطات كتشوف فالدجين اللي لابسة مزير والقميجة الصدر باين وهي طلع قنانفها وقالت
بقاو منين منك مني منك ورانيا كتفرج فسوق الدلالة اللي طول حتى خلاوها ف 750 درهم وسكنات حسنا مع رانيا فالدار ومشات الايام كتجري حتى للنهار اللي تخلصو فيه . مشات رانيا فرحاانة تيري لفلوش حتى هي من لكيشي .. ماقادها فرحة ... وجاوها مع السبعة وعشرين نيت باش تكسي بنتها . قبطاتهم فلعشية وجرات بنتها داتها كدور بيها وتقيس ليها لحوايج ولينا غطير بالفرحة .. شحااال هادي ما مشات تكسا حتى هي ... كانت كتشري ليها غير من البال
وهاد المرة برعااتها حتى نونوسات شراتهم ليها وشرات لراسها واحد جليليبة زرقا بالتحتية مشبكة تلبسها فالعيد وبلغتها ومشات للدار حطات كولشي فبيتها وسورتات عليه ودات بنتها للحمام كسلو عضامهم ورجعو سخفانين للدار حلات ليهم حسنا الباب
قصة جنازة حفل زواج
محتوى القصة
التنقل بين الأجزاء