روح الموت الجزء 12

رجع جلس فوق السرير و هديل حدا راسو واقفة دايرة ايد على ايد و مكمشة فمها : اويليي على السيد قالك عاد خارج من العملية ، تا شد لرض شوية و تبت ها حيي راك باقيي مرييض، تكاا تكاا نمشي نعيط على الطبييب يقادلك هادشي..

بغا تمشي حسات بيه جرها من ايدها : اجيي لهناا فين غادة.. ؟! اصلا انا شوية و نخرج من هناا..

خرجات فيه عينيها كارزة على سنانها : واش نتا هبييل باغيي تقتل رااسك، سمع اش غيجييك ملييح، را يا غتبت لرض و لا نغبر كمارتي فمرة هاويليي، خااص تهلا فراسك بااش تبرا، براكة غير الخلعة لي دازت علياا را كون وقعات ليك شي حاجة كنت غنتبعك و الله..

مسح على عينو و على وجهو نفخات ليه راسو : جلسي لرض دبا، شحال فيك ديال الهدرة مكتقادايش..

جلسات جنبو فالسرير حابسة البكية : لهلا يعلمك اش داز عليا مبقيت ندوي و لا نتكلم، حتا الماكلة مكدوزلييش و الله..

قرب خشا راسو فعنقها سكران بريحتها : باغا تقتليليي ولديي..

هديل : راه نتا و ولدك لي غتقتلوني، معندي صحة و كملتو عليا، نتا بخلعتك و هو بفقصتو، نضل الليل كللو نخمم فييك و فاش ديني عيني هو عاد يحلالييه الركييل ...

نزل راسو عند كرشها تكا عليها و دور عليها ايدو : ولديي كيعدب ماماه..

هديل : عدابك نتا كثر و الله، كنت غنتسطاا..

نزلات راسها كتشوف فعينيه : عرفتي عاد حسيت بقيمتك مزياان فحياتي.. كانت ضلام بلا بييك، كيسر سمحلياا اناا لي غالطة، ندمت بزااف و الله، مكانش خاصني ندير شي حاجة من راسي، كنت عمية و غير غادة معارفاش راسي شكنديير...

طلع عندها باسها جنب فمها بشوية : صافيي هادشي فاات دبا، كنت عارف غيجي النهار لي يبان فيه كلشي قدامك، و لكن مدرتش فبالي يكون هككا..

هديل : عرفتي فاش عرفتك فايت مزوج و كانت عندك بنت، را مشيت نهبل مقديتش نتيق، و خصووصا تصويرتها مزال عندك، غير قولي واش راها ميتة نييت و لا مزال حية، مزال كتفكر فيها ؟!

كيسر : ميتة غير نسايها عليك..

هديل : و شنو لي مخلليك متأكد ياللااه !!

تنهد و جرها لعندو من كتفها حطات راسها بين عنقو و كتفو، طلع ايدو فوق شعرها كيدوزها بشوية و كيهدر : شي نهار غيقتلك هاد الفضول لي فيك.

هزات غير عينيها فيه شحال ذابلين : شنو مننحقيش نعرف، مرانيش مراتك !

كيسر : اماندا قتلتها بيدي، و مشيت فجنازتها برجلي، و تحفر قبرها قدام عيني، غير تهناي من ناحيتها..

بقات ساكتة كتشوف بعيد و هدرتو كتزنزن فودنها، بلعات ريقها و نطقات : كضحك ياك ؟!

هز راسو بلا : موالف نضحك معاك فهادشي..

تنفضات مننو و بعدات كتشوف فيه و ذاتها كترجف، كان رد فعل غير إرادي : وااش كتبهلل علياا و لا كيفاش، ميمكنش نتاا شنوو كتقوول.. !!

زفر بالجهد و رجع جرها من كتفها و رجعها على الوضعية كيف كانت : و مباغاش تعرفيها اش دارت باش قتلتها..

سكتات و خللات دموعها نازلين : اش دارت گااع، ياكما نوبتي وصلات و قريب نلحق عليها..

حط ايدو على خدها ساهي فعويناتها، دوا بحالة مسمعهاش : هي كانت موسخة، وحدة موسخة بزااف، الدار لي قتلتها فيها كانت فوق فراشي مع واحد اخر، كانو مستحمريني و مخلليني وسطهم بحال شي دمدومة، هي قتلتها بداك العصاب لي جاني و خلليتها تم، و هو هزوه رجالي خلليتهم يتفننو فموتو، حيت كان عندي ما اهم، لالة ياسمين لي ماتت بنتي على ايدها.. 

هديل : و لكن، نتاا نتا كيفاش قتلتيها، هككا باردة..

كيسر: كان دمي كيفور، غير ماتت برد دمي، لو تعاودات نفس الحاجة مرة خرى كنت انرجع نقتلها، و لكن كنت انطول فموتها شوية، حتا ذوق العذاب على ايدي، تقدي تقولي ياسمين خرجت فيها مصيبتها و مصيبة صاحبتها فدقة..

هديل سكتات و خللات دموعها نازلين بوحدهم، هو زاد خشاها فيه بلا ميزيد كلمة، هاهيا الحقيقة كاملة عرفاتها، فاش غتنفعها دبا، من غير انها زادت كفسات الاوضاع بينهم، عمرها توقعات هادشي كامل، حياتها كلها طالبة غير راحة البال، و هادشي لي عمرها تحلم بيه محدها مرات كيسر، و سميتو فوق اسمها ... !!

دازو ايام مورا ابام كتجري، كيسر تشافى و وقف على رجليه، دوز هاد ليام فالمصحة واخا محاملهاش و ماشي هو لي يبقا جالس بلا حراك، و لكن هديل مخلاتوش، تلحونات و عيات تزوق فالهدرة و بكلامها الحلو قنعاتو واخا مموالفاش ليها مع الحمل، من نهار عرفات راسها حاملة و هي حاتية على النگير، و لكن خوفها عليه خللاها تحط البهلان فجيه و دير عقلها بزز منها ماشي لخاطرها..

صدمتها فكيسر نهار على نهار كتزيد تكبر،مزال هدرتو بللي هو لي قتل مراتو لولة كتزنزن فراسها، شحال من مرة كتوقف قدامو و كتبغي تقولو خلليني بحالي و كتسكت، على الأقل غير حتا يبرا لحمو و يرجع لصحتو، كتزيد فصبرها كثر و لكن حياتها هي لي عمرها ماتكمل معاه و فجنبو، حيت صافي وصلات بيها للعضم شافت مننو حتا عيات و هادي هي لخرة معاه، هادشي لاش كتخطط و تهندس بلا حس و بلا ميجيب ليها حد الخبار...

ليوم فاقت بكري دوشات و غسلات لبسات حوايجها و تعطرات بفرحة مالية وجهها، نزلات للكوزينة واقفة عند راسهم باغا كلشي يكون واجد على حقو و طريقو حيت اليوم حبيبها ايرجع من المصحة.. 

خرج من بلاصة التبدال كيمسح على شعرو و هز عينو فاوگدان واقف قدامو عاد قطع لابيل : لقينا مشكيل مع الصحافة عرفوك فقتي و راهم واقفين فباب الكلينيك..

كيسر : ندورو من الباب لوراني، معنديش الگانة لاسئلتهم..

اوگدان : و البوليس تا هما باغين ايديرو معاك استجواب، حاولت نقاد امورهم و لكن راك عارف..

كيسر تنهد و جلس فوق السرير كيشعل تيليفونو : راسي عامر دبا و تابعني ما اهم شوف كيدير ليهم..

اوگدان حك ورا راسو مكمش عينو : امم سمحليا و لكن ماشي بهاد السهولة، راك نتا لي ضربتي بالرصاص و خاصهم اجوبة، بالنسبة ليهم الموضوع كبير داخل فيه امن الدولة ...

هز فيه كيسر راسو مصغر عينيه ؛ علاش الموضوع ماشي كبيير..

اوگدان : لا بغيت نقول..

كيسر قاطعو : حتا ندير لقاء صحفي نجاوب على أسئلتهم، عارفني مغاديش نجلس مع بوليسي و نتحمل الطريقة باش كيدوي، ايخرج ميت من عندي ما فيهاش.. 

اوگدان : اووكي حتا هادا حل..

كيسر : اوگدان باغي تقول ليا شي حاجة ؟!

اوگدان طول فيه الشوفة، نظرة كيسر حادة هاد المرة ماكيتفلاش : احم فالحقيقة اه..

كيسر : كنسمع..

اوگدان : هادشي مبغاتكش هديل تعرفو خايفاك تقلق منها، و لكن منقدرش نخبي عليك، مكانش عندنا حل اخر واخاا..

كيسر وقف هز فرديه دارو فبلاصتو و تم خارج مع الباب : واش عند بالك مغنكونش عارف الراجل لي ولدني..

اوگدان ابتاسم جنب و تبعو غادي وراه : هاد المرة متصدمتش عارفك تعرفها طايرة..

كيسر : باقي متعلمتي مزيان واخا هاد الوقت كامل..

اوگدان : و علاش خبيتي بللي كايلي كانت مزالة حية، و كنتي عارف كلشي مزيان..

كيسر : الى قلت ليك معندي فاش نفيدك، عارفك كنتي باغيها، و لكن بعدها كان حسن باش تهدا الاوضاع، الى تعرفات حية كلشي كان غيحط اللومة عليها و الشكوك غيضورو جيهتها، حيت مكاين حنا سبب مقنع لي يخلليها تدير نفسها ميتة، اكييد مغتقدش ذكر سميتي..

دخلو للمصعد و ضرب كيسر الايطاج لي بغا، شاف فيه اوگدان باستغراب : فين طالع مغتخرجش ؟

كييسر : لا مزال عندي ما يدار هنا ..

اوگدان سكت و خللاه مفيكسي شوفتو لجهة وحدة و فبالو مية مسمار كيدق فيه ، تابعاه خدمة بزااف بعد هاد السيمانة، تحل المصعد و خرجو بزوج، خطوات تابثة و راسو الفوق كيف عادتو، نظرتو حادة علاين يثقب الناس بشوفاتو، وقف قدام باب الغرفة شحاال كيشوف فيها و كيفكر، ماشي حاير و لا معارفش اش ادير، مباغيش اواجهو و يشوف وجهو، مقزز من شوفتو لاخر حد..

اوگدان : مغدخلش ؟!

كيسر : خلليك هنا..

حل الباب و دخل بشوية، خللا الباب محلول و تقدم بخطوات محسوبة كيشوف فيه متكي فوق السرير و البلاطو د الفطور قدامو كياكل مننو، و مراتو جالسة جنبو ، غير شافو سرط الدغمة بزز و شاف فيه، كان حتا ولدو كريس و بنتو سوزان، كيسر بان ليه كرسي قلبو و جلس فوقو مقابل معاهم كاملين : را غير طرف من الكبدة هاد الوقت كامل و مزال مريض..

ليندا : احم غير الطبيب خللاه باش ادير ليه فحوصات و يتأكد بللي كلشي عندو مزيان، كيف عارف راه كبر ا ولدي..

كيسر : توو لا ماشي ولدك، ميزي هدرتك قبل ما تخرجيها..

كريس خنزر فيه و بدا كيغوت كيف عادتو : نتاا اصلاا اش جابك لعندناا شنو باقيي مزاال باغيي، يااك طرف الكبدة و راك خديتيه..

كيسر هز نص عين فيه : متهزش صوتك مرة خرى، و لا احبال صوتك نخرجهم لك تفرج فيهم، و هااد بااك كون بغيت نخرج كبدتو كاملة بيدي ناخدها دبا، و مكاين لي يحبسني سمعتي..

ليندا : دبا هاد الهدرة معندها فاش تفيد..

كريس : هو اصلا غير كيدوي، متبقاش تهدد فالفراغ..

كيسر صغر فيه عينيه مزال مبرد و غادي معاه فالخط : برهوش.. و لكن بصح عندك الحق، دبا نيت راني كنهدد فالفراغ..

سمع الباب تحل و داخل مننو شي حد مقاطع كلامو، كانت فرملية جايا طمن على حالة المريض، بلا ميشوف فيها هز فرديه شاف فيها بنص عين و تيرا فيه جاتها رصاصة وسط راسها نيشان : لااا ها لي منبغيش، مكنحملش لي يقاطعني..

هز راسو فكريس لي مخرج عينو : جيتيني خويا الصغيير، اما نتبعك لييها..

اوگدان دق بشوية الباب خللا كيسر يهز راسو، شاف فيها بمعنى اش باغي، اوگدان طلع النفس و نطق : احم استسمح على المقاطعة، 

دور وجهو شاف فالگارد لي فهم راسو تحنا جر الجثة لداخل، و خرج حاني راسو..

اوگدان : المهم خودو راحتكم دبا

ابتاسم و دغيا جمعها فاش شاف كيسر مخنزر فيه رجع اللور و سد الباب، بانت ليه طبعة د الدم فالأرض، وقف فوقها بصباطو قبل لا يشوفها شي حد، و رجع كيدور راسو مبتاسم، الدم نتاشر غير فالغرفة حيت حتا دخلات الممرضة عاد قتلها..

نرجعو لداخل

فادي : شكون نتاا ؟

كيسر ابتاسم جنب : و اخيرا سمعنا صوتك، انا ولدك معرفتينيش..

فادي : لا انا عمري كان اكون عندي ولد بحالك..

كيسر : على القتيل زعما، لا خايبة فحقك، انا و ياك عارفين شحال من واحد قتلتي سنين طويلة هادي، واش عند بالك يللا غنعرفك و لا نتا لي غتعاود ليا على حياتك، لا نتا بصح مزال معارفنيش، انا هو الموت لي غيتبعك كون هانيي، مغنخليكش ترتاح فحياتك..

سوزان : دبا لي فات خاص نساوه، هادا كيبقا باك دبا اولى..

كيسر : اه شنو كيتسناني نبوس ايدو، لا هو باك نتيي لي كبرتي تحت جناحو، اما انا كبرت راسي براسي مولد حد..

وقف كيرجع شعرو لور : خلليك بعيد عليا ا السي فادي من دبا نعلمك..

كان خارح و رجع زوج خطوات لور، شاف فسوزان طلعها و هبطها عاد نطق : داك راجلك، ا نكلف ليك محامي باش طلقيه، مفهمتش شنو لي مخلليك معاه حتا لدبا واخا داكشي كامل لي كتعيشيه !!

سوزان : هاديك حياتي الخاصة مدخلش فيها سمعتيي..

كيسر : لا ا ندخل فييك وقت ما بغيت، نتي خايفة على بنتك يااك، مصاريفها انا لي غنتكلف بيهم و غتعيش كيف بغات، المهم منلقاكش مع داك الزا*ل مزال واخااا..

سوزان : بااشمن حق كتامرنيي، ياك قلتي نبقاو بعاد عليك، حتا نتاا بقا بعيد عليينا ا السيي كيسر..

كيسر : لاا لاا معرفتيش تحسبيها مزياان، نتوما خاص تخافو على روسكم و مدوروش بساحتي، و لكن انا نهار نبغيكم ا نلقاكم، و كيفما بغيت انا ا تمشي الامور، تفاهمنا ا ختي الزوينة...

دور وجهو شاف ففادي : بالشيفا ا السي لطفيي 😉..

غمزو و خرج كيحك على لحيتو مخنزر، شاف فاوگدان لي غير كيدور عينو : علمهم يجمعو عليا ديك بنادمة من تم و يسيقو الدنيا، منبغي يبقا حتا أثر..

قال هاد الكلمات و نزل مخللي اوگدان ينفذ وراه....

فرانا بالجهد قدام الباب وقفات سيارة اوگدان وراه عاد سيارات لي گارد.. نزل كيطرطق عنقو غادي بشوية حيت مزال مريض و الضربة صعيب تبرا دغيا، مزال خاصو الراحة، مشا للحديقة لقاهم مجموعين على الطبلة بثلاثة، كايلي و اسماء و هديل، طبلة ملكية عامرة حتا لخر و مقادة مزياان، ماشي ديما كتكون هككا، قرب لهديل من وراها، حط ايدو فوق كتفها بشوية حتا قفزات شادة من قلبها، نزل راسو لعندها و طبع قبلة فوق عنقها : مالك.. ؟!

هديل : هاا والوو غير قفزتينيي..

دارت عندو مبتاسمة بزز : على سلاامتك، دارك نوراات برجووعك..

شاف فيها بشك معاجبوش حالها، و مشا جر كرسي جنبها فراس الطبلة، جلس كيشوف فيهم واحد واحد، كايلي حانية راسها مكدويش، اسماء ملاهية مع اوگدان لي جلس جنبها مكاينينش هنا، و هديل كدور عينيها و صدرها طالع نازل، من نهار عاود ليها على قتلو لمراتو لولة و هي هككا كلما شافتو..

تنهد و هز كاس د العصير جغم مننو و هز الفورشيط كياكل، بهاد الحركة كلشي بدا كياكل فصمت، هديل هزات راسها لقاتو حاضيها بنص عين بلا ميدوي، هزات طبسيل د لي ماكارون قرباتو ليه : كول لييك شوية متبقاش حاضيني، دووق هادوو ا يعجبووك انا لي صاوبتهم..

هز حاحبو بابتسامة : بصح !!

هديل : ااه بصح، فقت بكريي و قلت بينما وصلتي نعاونهم فشي حاجة فالفطور، و نصاوب ليك شي حاجة من ايديي.. 

كيسر : وقفي..

هديل : شنو ؟!

كيسر : قلت ليك وقفي..

بلعات ريقها و وقفات، دار ليها اشارة تقرب عندو و داكشي لي 

دارت، جرها من ايديها و جلسها فوق رجلو : دبا مزياان..

هديل : و لكن راني ثقييلة علييك و نتا باقي مرييض..

نزل راسو باس على عنقها و حط ايدو على كريشتها : انا مريض غير بيك نتيي.. 

هديل : ههه حيد حيد ايديك كتهرني.. 

كيسر : انا كنلعب مع ولدي..

هديل : و لكن كتهرني، را انبدا نتلوا لك هناا رصاا..

هز ايدو الفووق : صاافي هااهوااا.. يللا وكلينيي ا مراتي الحادگة داكشي لي صاوبتيي..

هديل : كوول راسك معندكش ايدييك..

هز حاجبو و وسع عينيه فيها : لا انا مزاال مرييض، خاصك تهلاي فراجلك..

هديل : باااز يا خوياا كتمرض غير وقتاش بغيتيي..

نزل راسو و عضها من عنقها حتا غوتاات : هادي باش توللي عارفة راسك اش كتقولي..

حطات ايديها جيهة العضة كتماصيها : احح حرام علييك شوية و ما طير ليا الجلدة مالك جعرتيي..

كيسر : غنبداو تانيي..

هديل : هاا لاا لااا صافيي، انا نوكل حبيبيي بيديااتيي..

ابتاسمات و هزات لي ماكارون كتوكلو و هو مبتاسم ليها و كيتلذذ، عجبو الحال فاش شافها ضحكات....

داز الوقت ... كان جالس فجليسة صغيرة فالجردة فوق كنابي مسرح ايديه، اوگدان جالس فكنابي اخر جنبو و كيشوف فشيهاڤير و ياسمين لي قدامهم مكتفينهم لي گارد و دايرين بيهم، كيسر كيلعب بخواتمو فيدو و كيشوف فيهم بابتسامة جانبية على وجهو، هما صافي عارفين اخرتهم على ايدوو.. هديل كانت خارجة كتقلب عليه فرحانة، غير شافتهم مشات الضحكة، بللات شفايفها و دارت راجعة بحالها، حتا سمعاتو ناداها، دارت بالعرض البطيء و هزات صبعها جيهتها بحالة كتقوليه واش انا، ضحك و لكن هاد المرة حتا بانو سنانو و دار حركة بيدو باش تجي عندو، بلعات ريقها و تمشات بخطوات صغيرة حتا وصلات عندو، وراها فين تجلس، جلسات جنبو و خللاتو مدور ايدو على كتفها.. قرب بشوية و همس فودنها بصوت هادي كيورك على الحروف، خللاها بصح تفزع منو : كيفاش بغيتيهم يموتو ا مراتيي العزيزة ... !!

بلعات ريقها و تمشات بخطوات صغيرة حتا وصلات عندو، وراها فين تجلس، جلسات جنبو و خللاتو مدور ايدو على كتفها.. قرب بشوية و همس فودنها بصوت هادي كيورك على الحروف، خللاها بصح تفزع منو : كيفاش بغيتيهم يموتو ا مراتيي العزيزة ... !!

بعدات وجهها و حدرات عينيها مشتتة شوفاتها : كيسر بلاش هاد الضحك عفااك..

هز حاجبو و ضحك، زاد قربها ليها كثر حاط جبهتو على جبهتها : ياك كنتي قلتي ليها غتخرجي ليها قلبها بيديك و تعصريه قدامها، مبقيتيش على كلمتك دبا.. !!

حللات عينيها حتال اخرهم و هزات راسها شافت فاوگدان مخنزرة حيت هو لي كان معاها فاش قالت داك الهدرة، عاق بيها كيسر و ضحك جنب : ماشي هو لي قالها ليا، عرفتها راسي..

هزات عويناتها فيه كترمش بشوية و نطقات : انا كنت خايفة عليك بزااف فاش قلت ديك الهدرة، و قلت ليها الى وقعات ليك شي حاجة....

قاطعها قبل ما تكمل : علاش دبا موقعش ؟!

هديل : لاا لا هو وقع، و لكن صافي الحمد لله نتا رجعتي لينا سالم حسن من لول.. 

كيسر : و بغيتيها دوز هككا حيت انا رجعت سالم...

هديل : لاا، نتا لي تعرف كيف تعاقبها، و نتا عارف شغلك معاها، اما انا منقدش ندير ديك الهدرة لي قلت، جات فوقت كنت معصبة فيه و محطمة...

ابتاسم جنب و قرب باسها فوق فمها : اصلا مكنتش نخلليك ديريها واخا تبغي، انا كنبغيك هكما و مباغيكش توسخي ايديك فشغلي، صافي !!..

هزات راسها باه و رجع هو شاف فشيهاڤير و بنتها قدامهم، مكانوش كيسمعوهم حيت بعاد عليهم، ميل راسو مبتاسم عاد هدر : هادييك..

هز صبعو فياسمين و كمل : رجعوها فين كانت تكمل حياتها فين بدات....

يللاا غيهزوها لي گارد بدات كتفركل، جرات فردي من عند واحد فيهم و بالزربة حطاتو فوق راسها كلها عرقانة و كترجف : نمووت و منرجعش لدييك البلااصة..

دغيا ضربات الرصاصة حتا طوش دمها فوق شيهاڤير لي غوتات محروقة على بنتها، كلشي تصدم و حل فمو، و لكن توقعوها حيت الموت اهون ليها من داكشي لي دازت مننو، كيسر عقد حواجبو و هز فرديه عاض على سنانو تيرا فالگارد لي خدات مننو الفردي، مكانش باغي هادشي و مزال باغي بتلذذ فعذابها كثر : هزوهم عليا من هنا، و هاديك لي بقات، ممساليش ليها، ديوها لشي قنتة خشيوها فتابوت و دفنوها، حية ماشي ميتة، حتا تعفن، و الى وقع غير خطأ بسيييط غنخشيكم فبلاصتها سمعتووو، يللااا تحركوو من قداميي... 

خشا فرديه فبلاصتو و وقف ساخط على الوضع، شاف فاوگدان لي فهم راسو وقف حتا هو تابعو بلا كلمة بلا زوج، كل واحد ركب فسيارتو و خللاو هديل جالسة حاطة ايديها على حناكها و كتفكر فهاد الوحلة لي طيحات فيها راسها : يا ربي واش انا معندي زهر، منرتاحش حتا كنقول هاهيا تقادت من جيه كنلقاها عواجت من جيه.. 

سكتات حاضياهم كيجمعو الجثث و كيسيقو الدنيا، هاد المنضر مبقاش كيقززها بحال قبل، ولفات عليه دبا....

داز الوقت و ضلام الحال جالسين بربعة فالصالة مجموعين، كل زوج مع بعضهم هايمين، كيسر مدور ايدو على كتف هديل و حاط بيسي قدامو خدام عليه، و مرة مرة كيتناقش هو و اوگدان من بعيد فأمور الخدمة لي مكتفهم فيها اسماء و هديل حتا حرف غير كيدورو فعينيهم و صافي، هزات هديل راسها شافت كايلي لابسة مونطوها هازة ساكها و غادة خارجة، شافت فكيسر و دوات بشوية : ا نطلع نعس عييت..

بعد ايدو و قرب طبع قبلة على خدها : سيري، شوية و غنطلع..

هزات راسها باه و خرجات تابعة كايلي حتا جراتها من ايدها موقفاها : فين غادة فهاد الليل ؟!

كايلي : انمشي بحالي ا ختي، مبقات عندي بلاصة هنا..

هديل : نتي ديك المرة قلتيلي معندك فين تمشي و فلوسك تقاداو لييك، و معندك حتا عائلة من غير اوگدان، حتا باش ترجعي لاستراليا معندكش كيفاش..

كايلي : و شغندير ا ختيي، ماشي لخاطري، نمشي نضبر على راسي فشي خدمة و نلقا ليا شي حل ميمكنش نبقا مثقلة عليكم هككاا..

هديل : علاش ا ثقلي علينا، الخير موجوود و غير ضايع ا ختي، و كيسر مقال حتا كلمة و بالعكس مرحب بيك هناا..

كايلي تنهدات كتشوف فاوگدان مجلس اسماء فوق رجليه من بعيد و خاشي وجهو فعنقها مهواش فهاد العالم : و لكن اوگدان مباغيش، هو صافي نساني و كمل حياتو بحاليلا عمري كنت فيها من قبل، اناا ندمت بزااف و الله حتا ندمت، و تعاملو البارد معاياا كيقتلنيي ١٠٠ مرة و مرة فالدقيقة..

هديل تنهدات فاهماها و مابيدها حتا حاجة ديرها ليها : دازت مدة طوييلة ا ختيي، حتا قصاح قلبو من جيهتك، ماشي بيدو حتا هو، و كيفما نتي مراضياش حتا هو معاجبوش الحال، و لكن صافي، هو تزوج و دار دارو، حتا نتي جا الوقت لي تنساي فيه و تبني حياتك من جديد راسك.. 

كايلي : داكشي لي غنديير دبا نييت..

هديل : عفاك ا ختيي بقاي غير حتا لغدا و سيري، معندك فين تمشي فهاد الليل..

كايلي : لا غير خلليني كنعرف واحد صاحبتي كاينة هنا، ا نبقا معاها بينما قاديت اموري..

هديل قربات و عنقاتها : الله اعاونك ا ختي و يقادلك اموورك، كلشيي ايكون مزياان مع الوقت..

كايلي بادلاتها العناق حتا هي، توادعو و خرجات كتودع القصر بعينيها من بعييد...

هديل طلعات لبيتها و جلسات فوق السرير ساهية و كتخمم فاش وقع اليوم، مزال ممتيقة راسها بيمن مزوجة و معامن كانت ناوية تكمل حياتها، بزاف د الاحاسيس كيدورو داخلها، خايفة على راسها و على ولدها، و خصوصا ولدها، جلسات فوق السرير فكرة ديها و لاخرة تجيبها، افكارها مشتتين و حتا حاجة ممفهومة فبالها، واخا نعيا نوصف حالتها منقدش نوصلها ليكم كيف خاص تكوون ... !!

تقول هي :

تجمدت عبرات عيناي قبل ان تسقط، جف ريق شفتاي قبل أن تبتل، ارتجفت جفوني قبل انا تهدأ، تسارعت انفاسي قبل أن تنتظم، ضيق صدري قبل ان يتسع، غبار مسموم داخل صدري انتشر، و شعلة نار بروحي توقدت، شعاع نور بفؤادي اختفى، مخلفا ضلاما دامسا لا حياة فيه و لا أمل، تكونت عاصفة بداخلي ما إن حضر، عاصفة هزت أرجاء جسدي بعنف، رفعت بصري فإذا بي ألاقي عيناه، ما فهمت يوما سر بريقهما الغاليي، لا هو بريق محبة، و لا بريق ملاك، ا يعقل أن يكون بريق كره، او بريق شيطان.. !! أكاد ألامس نظراته الثاقبة، التي لم أستطع تفسيرها قط، لا أنفك أتخيل للجحيم طريقا بين مقلتيه، يخفي أسراراا عدييدة، خبث و قتل و دمااء، دماء تسيل قرب قدميه، اااه ... و هل تنسين، ا تنسين ذاكرتيي اللعينة، كم روحاا لقت حتفها من يديه، نفس اليدين اللتان حملتاك يوما ما، نفس اليدين هما من حضنتاك، و الى صدره ضمتاك، ا تنسين يا ذاكرتيي كيف قتل ارواحا بريئة بفضل عنادك يا بلهاء، كيف يسعك النسيان، كيف انجرف عشقه الى قلبك كانجراف الرمال بين الصخور، كيف و قد رأيت جرمه و بروحك لامست خبثه، اااه كم انت بريئة ياا نفسيي، غفلت عن الشيطان داخله و اكتفيت بما خيلته نفسك لك فرأيته الملاك، اكتفيت بالحب و العشق و الهيام، و جعلت عقلك غائبا وسط بحر الأحلام، قد سلمت فؤادك قربانا للموت بلا إحساس، و ياا حسرتاه، ما عاد لك نفع من الندم الآن، و كم تغابيت حين ظننت نفسي في أمان، صدقت انه الوجاء و الحام من كل مكروه و خطر، فالكل يهابه و يخاف امره، و مالهم لا يفزعون، فكل من دقق النظر في عيناه توقف قلبه فيما رأى، لكني نسيت أمرا بسييطا، أمرا و بكل بساطته، وضع روحي على حافة الموت، إن هو من يحميني من العالم، فمن يا ترى سيحميني منه ... ؟؟ من هذا الذي سينقذ نفسي من بين فكيه، و من له الجرأة في مخالفة أمره حتى ... !! 

أ هذه النهاية حقا ..؟ أ سينتهي بي المطاف جنبا الى جنب في قبر فتاته الأولى ..؟ على يديه ماتت، و بعد مدة عن عقله غابت، و عن أخرى اصبح باحث، و هاذا ما سأمر به أيضا يوما ماا، ليتني القى حتفي الآن، و لا أنتظر جفاء دمي الذي بدأ يسيل منذ اللحظة، قطرة قطرة، الى أن تذرف آخر قطرة، ماذا سيحدث بعد ذالك، لا شيء، مجرد امرأة بين ملايين البشر، ستغدو روحا ذابلة، ارتجفت ثنايا اوراقها و تساقطت في صمت، ستنهار أرضا في غرفة مظلمة موحشة، تنقبض منها النفس جراء سكونها، سترفع بصرها لتكون ملامح وجهه آخر ما تراه، ستنتظر بصبر أي كلمة تخرج من بين فكيه، فتكون آخر كلمة تسمعها، ستتسارع أنفاسها، و تتضارب أفكارها، ضباب يقف أمام ناظريها يمنعها الرؤية، و شيء ثقيل فوق صدرها، مانعا إياها من التنفس، سترى أمها، ترتديي ثوبا أبيضا طاهرا، وسط حديقة واسعة، حديقة تملؤها الزهور و الورود، أشجار كثيفة بها أغلى أنواع الفواكه و اجودها، ترتاح لها النفس من رؤيتها و استنشاق روائحها العطرة، و هاهي أمها تمد ذراعها نحوها منتظرة عناقها، ستركض نحوها دون مبالاة لأي شيء، ستنسا كل الدنيا في اللحظة ذاتها، ستنسى من هي و كيف هي، و ستغلق عينيها ببطئ شدييد لتغلقهم للأبد، لن تفتحهم بعد الآن أليس كذالك ... ؟! و هاهي أصبحت جثة ساكنة بين دمها بلونه الأحمر، لا تقلقو، سيتكبد هذا الدم بعد قليل لن يدوم طويلا ...

انتظرو قليلا، أراني أصور مشهد موتي، و مالي أستبق أواني، و كيف تموتين، اااه.. إني غبية أكثر مما كنت أتصور، و ذاكرتي أضعف مما تخيلت، ا نسيتي ابنك يا مجنونة، ماذا سيحدث له بعد موتك، ا معقول ان يكون مصيره كمصير ابنة زوجك، لاا أبدا، لن أسمح بذلك، ابني عزيزي، لا تخف، فأمك لن تسمح لهم بإيذائك، سأقتل كل من يفكر في هذا أعدك عزيزيي، سأخرب العالم من أجلك، لا تفكر كثيرا يا ابنيي، سأحميك و لو بآخر نفس من حياتيي، لن أسمح لهم، أعدك للمرة المئة، أظن ان الأوان آن للخلود الى النوم، على عقلي الصغير أن يرتاح قليلا، و انت أيضا يا ابني، ما وجب أن تسهر في أحشاء بطن أمك، فلنخلد للنوم معاا، تصبح على خير، فلنأتمل واقعا أجمل، رغم أنني على يقين بأنه لن يتغير إلى الأفضل، سيؤول إلى الأسوء فحسب، أجل الأسوء. و أنتم ألن تغمضو جفنا.. ؟ كفاكم سهرا و تحديقا بين السطور، ألم تتعبو بعد.. ؟ هلموا إلى النوم، فغدا ينتظرنا يوم طويل و متعب و عمل مضن أكثر مما مضى و أكثر مما تتوقعون ....

تخشات هديل ففراشها متكية على ضهرها و سدات عينيها، كيف قالت هي خاص عقلها يرتاح، حل الباب بشوية و رجع سدو، شاف فيها و ابتاسم، كمل طريقو حيد التريكو ديالو و تكا جنب حداها، حط ايدو على خدها كيدوز ايدو بشوية و قرب باسها على راسها : كنبغيييك..

ابتاسم و بقا كيشوف فيها شحال، طفا الضو و رجع تقاد و سد عينيه، هي عاد حللات عينيها فالسقف و نزلات دمعة من عينها، مباغاش هاد الحل و محاملاهش، و لكن ما بيدها ما دير، سدات عينيها و سرعان مستسلمات للنعاس...

صبح صباح جديييد.. 

حللات عينيها و طللات براسها بشوية كتأكد واش خرج، ناضت دغيا جمعات الوقفة و مشات للحمام غسلات وجهها و حكات سنانها فرمشة عين، حطات ايد فوق كرشها و التانية فجنبها و نزلات عند اسماء كدق عليها ، حللات ليها للباب حالة عين و سادة التانية مزال كتفوه مشابعاش نعاس : هدييل هادي نتيي..

دفعاتها هديل بشوية و دخلات نيشان جلسات فوق السرير : اجي خلااص راني باغا ندويي معاك ضرووريي..

تنهدات اسماء و سدات الباب : يا ربي السلامة من هادشي لي جايبك تاني، فينما كتجيني فهاد الوقت كتوقع شي مصيبة.. 

هديل : المصييبة هي لي غنطيح فيها الى معتقتش راسي دغيا..

اسماء جلسات قدامها : خيير ا ختي اش واقع خلعتينيي.. ؟

هديل طلعات نفس قوي و نزلاتو كتحاول تشجع راسها عاد دوات : باغا نهرب من هنا..

اسماء مسحات عينيها : نوضي ا ختي كملي نعاسك راك مشابعاش نعاس..

هديل : اسماء انا مكنتفلاش، خاص نهرب اليوم قبل غداا، محد كيسر مشغوول مع الخدمة و البوليس و الصحافة كلشي مجموع عليه...

اسماء : واش نتيي حمقة، لاش ا تهربي بالسلامة مالك حمقة، شكوون تهرب من راجلها لي كيبغيها و من هاد الخيير كاامل، عمر راجلك مخصر لييك، داير معااك غير الخاطر و لي حلليتي عليها فمك تحضر، و زايدوون كيسر اجبدك يجبدك واخاا من سابع ارض،.. 

هديل : اسماء فهمينيي عفااك ا ختيي، هو قاتل مرتو لولة بيديييه، عرفتي شنو معناها يقتلها بيدييه، يمكن تاناا كيتسناا منني غير امتا نغلط شي مرة و يصفيها ليا و يتبعنيي ليها....

اسماء قاطعاتها : لااا ا ختيي كيسر ميدييرهااش، كون بغا يصفيها لييك كون دارها نهار تلاقيتي ديك شيهاڤيير و خرجتيي ياسمييين، و كان براسو غيموت فيها و لكن مدارهاش حييت كيبغييك بزااف ا ختيي و عمروو يدييرها ...

هديل : اسماء نتي مكتعرفيهش، هو الى مشا حتا تعصب ماكيبقا يعقل لا على خضر و لا يابس، كيخلط كلشيي دقة وحدة، رااه انا ليي جربتو و عشت معااه، و شتيي كون غيير كنت راسي، نصبر حتا نهار نمووت على ايدو و منتشكااش حيت كنبغييه..

سكتات فاش نزلو دموعها وقفات شوية عاد رجعات كملات : و لكن ولديي ا ختيي، ولديي لاا منقدش نخللييه حتا يمووت بيين ايديي، بنتو لولى حتا هي ماتت و تبعات مها، انا ولديي خايفة علييه، راه ا نحمااق الى بقييت هناا، ولليت فيما نخرج ندور فهاد القصر كيبان لي الدم نازل من كل جييه، و الريوس مقطعة و مستفة فوق الطوابل، را هادشي لي كيتخيل ليااا، عييت من هاد العييشة و مللييت..

اسماء تنهداات عارفة بللي عندها الحق فكلامها و لكن فكرة الهروب مداخلاش ليها : و دبا شنو المعموول.. ؟!

هديل : غنهرب انا و ولديي للمغرب، عندي تما فين نمشيي، نولد و نقاد اموري نقلب فشي خدمة و لا نشوف اش نديير، المهم ا نهز راسي و ا نهز ولدي، و مغنخللي حتا حد يآديه، اما الى بقا هناا، مكاين غير الدياب ضايرين بييه، حتا حد محاملوو.. 

اسماء : و تقدي عليها زعمة، من هااد عيشة القصوور فنهار و ليلة توللي تلاوطي من جيه لجيييه..

هديل : و مالي ا ختي تزاديت فالقصور، تانا تولدت غا فرياض كاريين بييت مع الجيران، مالي غا جيت نقزت و وصلت لهناا، و زايدوون اللهم عيشة الفقر و راحة البال، و لا الفلووس و الخووف راكبنيي من كل جييه كنتسنا غير امتا توصل نوبتي و نوبة ولدي...

اسماء : ا ختيي معرفت منقوولك و الله العظييم..

هديل : معندك متقولي انا جييت عندك بااش تعاونينيي..

اسماء : هااا..

هديل قربات حطات ايدها على ايد اسماء : ااه، خاصني نقطع البيي د الطيارة للمغرب، و منقدش نمشيي براسي، غيعييق بيا كييسر و يصدق مجلسنيي، الى مشيتيي قطعتيه نتيي مكاين لي يرد لييك الباال..

اسماء خرجات عينييها : واااش نتي حماقيتيي، باغاا راجلك يدفنيي حية كيف دار لشيهاڤيير، لاا لااا ا ختيي منقدش، الى عرفها و الله حتا يدبحنيي، نتي كيبغييك ميقدش اوصل لييك اما انا اش لي غيمنعو مننيي..

هديل : اوگدان مغيخلليهش اقرب لييك، اصلا هما مغيشكووش فييك و مغيعرفوو والوو..

اسماء : لا ا ختيي راجلك يقشعها طايرة فالسما، و اوگدان الى عرفها را مغيعجبوش الحال، حتا الى بعدني من كيسر غيخاصمنيي، و نتيي عارفة هادشيي..

هديل بدات كدمع حاطة ايديها على قلبها : ا ختي نتي غيخاصمك نهار و يوماين، سيماانة گااع و يرجع اصالحك و يدوي معاك، اما انا را غنبقا حياتي كااملة عايشة فالرعب، الله اخللييك اليووم جاتنيي فرصة مضيعيهالييش من ايديي، را الى مشيييت حتا ولدت معنديي كينديير نهرب و الولد معاياا، الله ارحم لييك مييمتك لما عتقينيي غير هاد المرة، غيير على وجه هااد الدريي الصغيير لي قريب يتزااد...

اسماء تنهدات بمرارة حااسة بيها : الله يا ختيي قطعتيليي فقلبيي، صافيي اناا نقطعهاا لييك غير رتاحيي و مديرييش فراسك هاد الحاالة..

هديل محساتش حتا طارت عليها بتعنيقة مزيرة عليها، بعدات و هي مبتاسمة : عمري نساا خيرك و الله..

وقفات و تمات غادة جيهة الباب : لبسيي حوايجك دغياا و سيريي دباا صافيي، على الله تلقاي شي طيارة غادة للمغرب..

كانت خارجة حتا تفكرات شي حاجة و دارت عندها : ااه و متخلصييش بكارط گيشيي ابدااا، واش عندك شي حاجة كاش و لا نشوف من عنديي...

اسماء : لاا لاا عنديي غير رتاحي، انا نوض نبدل دبا و نمشي...

هديل : لهلا يخطييك عليا بلا بييك معرفتش شنو كنت نديير..

خرجات و خللات اسماء وراها حايرة حتا هي و هازة ليها الهم، محاملاش هادشي لي غدير و فنفس الوقت مباغاش تخسر ليها و هي دايراها فمقام ختها، تنهدات و ناضت تبدل عليها....

نبدلو البلاصة فجهة خرى، وسط حي من الاحياء الشعبية فروسيا، و لكن حي بكامل التجهيزات رغم شعبيتو، فبرطمة صغييرة و تحديدا فالكوزينة، واقفات كيوجدو فطورهم و كيتحتوو.. 

كايلي : اوا هاد خوك معرفناه منين خرج حتا هو..

سوزان كدور شعرها البرتقالي بطرف صبعها و ساهية : امم هو الصرااحة مقال ليا حتا عييب، و انا هدرتو جاتني من الجنة و النااس، نطلق داك خونا حتا اناا و نرتاح خلااص، عييت من عيشة تمارة و العذاب معااه، كوون ما كريس لي خللاني جالسة فدارو، كوراني مزالة مع داك وجه البلا، اوا و هاد خويا الجديد قالك ايتكلف بنفقاتي و نفقات بنتيي، و باش تعرفي داكشي مسربي، البارح نييت عيط ليا المحامي و جا عندي باش ندويو فالتفاصيل، بااين عندو معرفة صحييحة و قضية الطلاق دغيا غدووز...

كايلي : اوا مزياان تهنااي من ديك العيشة ديال الذل، و دبا تلقاي ما حسن مننوو..

سوزان : لاا لااا ا ختيي، هادي و التووبة عمر داوود مايعاود، كرهت جد بوه حب و لا زواج كلهم بحال بحال..

كايلي : بصح عندك الحق، ا ويليييي...

خرجااات عينيها فاش سمعات صوت الحليب فايض، دارت دغيا طفات علييه البوطة : ويليي بقينا فالحتييت و نسينا البوطة..

سمعو الصونيت فالباب و دارو بزوجات كيشوفو فبعضياتهم : شكون ا يجيك فهاد الصباح.. ؟

سوزان هزات زوج طباسل مداتهم ليها : ميكون غير كريس، هاكي ديي هادو للطبلة و حللي الباب انا نكمل عليك..

هزات كايلي راسها باه، و خداتهم من عندها حطاتهم فوق الطبلة و مشات حللات الباب، كان متكي على الحيط كيحك على لحيتو، لابس شوميز مخططة بالحمر و البيض و حالها مخللي صدرو عريان، معلق سنسلة فضية فعنقو و باين الوشم لي على كتفو، حروفو كحلين شابه لباه عكس سوزان لي نسخة من مها، طلعاتو و هبطاتو، و حتا هو طول الشوفة فيها حتا نطق كيطل على الداخل : كاينة سوزان.. !!

عاقت على راسها و بعدات من على الباب : اه كاينة، نتا هو كريس ياك.. ؟

هز راسو باه و مشا نيشان للكوزينة عند ختو، هي سدات الباب و مشات لبيت سوزان فاش سمعات صوت اميرة كتبكي، هككا سماها جدها فادي، بغا سميت حفيدتو يختارها هو بنفسو، مشات هزاتها من سريرها كتراري فيها و تلعب معاها، كدير حركات طفولية بيديها باش ضحكها، يللا فعمرها عام و نص، كايلي كتعرف سوزان من زماان فاش كانت فروسيا، سوزان كانت خدامة فشي مطعم كبيير كتجي ليه كايلي ديما، و هي لي كتسربيها، تما تعارفو، كبرات صداقتهم و طولات.....

فالمغرب ...

جالسين كيفطرو غير بثلاثة عادل و امنية و اشراق لي بحالة مجلسينها على الشوك كتسرط الدغمة بالسيف تحت عيون امنية، مكتحملش تجمع معاها فشي بلاصة بلا ميكون فهد، حيت كتلقا حريتها باش تسممها و تسمعها المنقي خيارو بلا ميحبسها حد، كملات ماكلتها و مسحات فمها حتا نقزات امنية : لااا لاا لوااه ا بنتيي مكليتيي وااالوو، راك حاملة زعما خاصك تهلاي فولدك و تاكلي مزياان، لا يصدق فهد مرجعناا مكنتهلاوش فييك و تمشي تباكااي علييه و تشكااي مناا تانيي..

اشراق : لاا ا خاالتيي الحمد لله شبعت..

امنية : يخويي لييك الضرااس، نوضيي غبريي زلاافتك من قداامي شفتك تيقتيي راسك، على خر ايامي ولليت نتجمع فطبلة وحدة مع خانزة د الزناقي..

عادل خبط الطبلة : حتارمي رااسك شوية هاديك راها مرت ولديي الى مفخباركش..

امنية : ياكما وكلووك محامي عليها، كوول و هنيينا و متبقاش دخل فشغل النساا، سيير قابل خدمتك و لا عاون ولدك و نتا النهار و مطال و نتا شاد ليا القنتة بحال جدة لي شرفت و هترت، و لا عرفتيي اش، انا غنووض بحالي نييت و نخللييكم طلييو روسكم، نتاا قتلتيليي ختيي و هي ناوية ديلي ولدي من بين ايديي جايين من طيينة وحدة ايخخخ منكم..

وقفات و مشات كتسووط و تخبط فرجليها نيشان للجردة، اشراق وقفات و حطات ايديها على كتف عادل كتماسيه بشوية : مدييش فكلامها ا عميي، را هي لي كبرات و مبقاتش عارفة راسها اش كتقول، غير داوية و صافي مدييرش فبالك،

تنهد كيشوف بعيييد : هادشي داازو علييه سنيين، و لكن عمرها هي فهد قدو ينساو هادشيي، انا تخلليت عليهم بلا منقصد حيت فداك الوقت كان قلبي محرووق، هادي منديهاش فكلامها عارفها اش كتسوا، و لكن ولدي فهد، امتا غيسمح ليا و ينسا اش دااز..

اشراق نزلات راسها باستو على خدو : دبا ينسا كلشي ا عمي متخافش، الوقت كتحل كلشيي.. 

عادل جر الكرسي بشوية و وقف : غنخرج نمشي للشركة نييت نشوف الخدمة كيف غادة..

اشراق : سير ا عميي الله اعاونك، ربيي معااك..

هز راسو باه و مشا خرج بحالو نيشان لسيارتو، اشراق قلبات الدورة تطلع بحالها حتا كتسمع صوت نباح شي كلب، دارت مخرجة عينيها كتشوف امنية مدخلة الكلب لي موالف يكون فالجردة، عمرها دخلاتو للدار، واخا نقي و مربيي، اشراق ركابيها خواو و هي كتشوفو جاي جيهتها حال فمو و كيجريي، غوتاات و دارت عاطية رجليها للريح غير كتجارى، عدووها الكلااب و عندها فوبيا منهم متجلسش معاهم فبلاصة وحدة واخا منعرف اش اوقع، هو فاش شافها هاربة مننو عاد ما تبعها، بداو لاعبين طوم و جيري، كتنقز فوق الكنابيات و تلوح عليه فالمخاد، كتجري من هنا و لهييه و گااع الصالوناات دشنااتهم.....

امنية متكية على الحيط ضاحكة جنب و كتشوف فيها اتموت بالخلعة كتنهج كثر من الكلب، و تقوول واش قال ليها راسها تمشي تجروو ليهاا، بقات اشراق كتجري حتا سخفات و فشلات و جهدها تقادا، بدات كتبكي و طلب فامنية باش تجرو و واخا هككاك مسمعااتش ليهاا، رجعات تاني كتنقز فوق السدادر و الكلب تابعها كينبح فينما مشات، حتا جات مزدوحة على فمهاا، جمعات رجليها عندها كتقصحهاا حيت هي لي كالات بيها، هزات راسها كتشوف فالكلب واقف قدامها و جاي بخطوات بطيئة مخرج لسانو و عينو عليها بحالة كيقولها شديتك دبا، بدات كتزحف راجعة باللور و كتبكيي : خالتيي امنية الله احفضك لماا جرييه رانيي كنخاااف من الكلااب، الله اخللي لييك معز علييك، يرحم مييمتك ا خالتيي لما عيطيي لييه..

سكتات فاش لصقات على الحيط و مسمعات حتا جواب منها، صافي قلبها قرب اسكت بالخلعة و هي كتشوف فالكلب قدامها : وااااااع لاااااا....

دارت ايديها قداام وجهها قبل ما يتلاح عليها، حتا حسات بشي خيال مغطي عليها، هزات عينيها كتشوف فيه قدامها، دفع الكلب و جلس جلسة القرفصاء قبالتها، محساتش حتا تلاحت علييه بتعنييقة مزال كتبكي و تشهق : فهد فهد عتقتينييي، كاان ا يتلااح عليااا، كنخااف منهم بزاااف ا فهد و الله كنخاااف منهم، كاان ا يعضنييي..

وقف و وقفها معاه مزال معنقها و خاشيها فيه : شووو هو مربي مكيعضش، مكاين لاش تخافيي..

اشراق : لاا لاا كان ا يعضنيي، خالتيي امنية حرشااتوو علياا، هي مكتحملنييش و باغا تقتلنيي انا و ولديي..

سكتات كتبكيي و تشهق و امنية من وراها كتحرك راسها بلا، بمعنى هدرتها كدوب، هو خنزر فيها و بعد اشراق عليه بشوية كيمسح دموعها : هاد الهدرة مكايناش واش نتي لابااس..

اشراق حركات راسها بلا : لاا فيا الوجع هناا..

حطات ايدها على جنبها و هو تنهد براحة : غير حيت عاد واكلة و جريتي، و لكن تحت كرشك عادي محاسة بوالو..

حركات راسها بلا : عرفتي خفت بزاااااف ا فهد و الله، انا كنخااف منهم عمرك دخل شي واحد للدار عفاااك..

فهد : صافيي ميكوون غير خاطرك،

دور ايدو على ضهرها و التانية نزلها تحتها و هزها بخفة بين ايديه طالع بيها، داها لغرفتو بقا شوية كيحاول يهدييها حتا جلسات و رجع نزل، شاف امنية جالسة فوق الكنابي و كتلعب مع الكلب لي غير شاف فهد تكمش حتا من النبحة مشات ليه، مع دفعو بالحهد و غير كلب صغير، زير على قبضة ايدو و مشا عندها ساخط : علاياش كتقلبيي.. ؟!

امنية زفرات بالجهد، وقفات و حطات الكلب فالارض : فهد نتا عارف الكلب مكانش غيعضها..

فهد : و الخلعة لي ركبتي فيها حتا وللات كترعد. 

امنية : خلااص حتا نتاا راها غير كتفشش علييك، مالها عمرها شافت شي كلب فحياتها..

فهد زير على ايدو كثر : فرقيي علييك اشراق حسن لييك، مراتي حاملة و مباغيش نخسر ولدي على ود هاد التخربييق دياالك سمعتييي، المرة الجااية ا توقع ابسط حاجة و لا تشكا منك اشراق غير بنبشة، غتخوي هاد الدار و عمرك مزال متخطي فيها الخطوة..

امنية خرجاات عينييها : ياااك ا ولديي تجريي على خالتك لي ربااتك على ودهاا..

فهد : شفتك تيقتي راسك، انا ربيت راسي براسي مكنتسناكش توريني اش ندير، و الى مزال محتارمك را غير بوجه الوليدة لي بيناتنا سمعتيي، كلامي ميتعاودش زوج المرات، هاد المرة دازت، فلتات منها اشرااق، و حتا نتي فلتي منها، و لكن المرة الجااية منظمنلكش اش ناوي نديير..

قال كلامو و دار طالع بحالو فاتجاه غرفتو مرة خرى يشوف اشراق و يعيط ليها على الطبيبة حيت حالتها معجباتووش، الجنيين مزال حتا ما شد بلاصتو مزيان فكرشها، و خلعة بحال هادي تقد تأثر عليها، كان ناوي يجيب غير شي ملف نساه و يرجع لخدمتو، و لكن بعد هادشي مبقات خدمة..... 

داز الوقت، كانت جالسة فبيتها على ركابيها قدام واحد المجر، كتقلب وسط وراقيها و امورها هزات لاكارط ديالها و شي امور خاصة بيها، و منساتش نسخة على عقد زواجها تقد تحتاجها فشي وقيتة، خشاتهم فساكها و هزات بيجامة وحدة ديالها و تبديلة وحدة عبارة على كسوة طويلة، عاد شي حاجة من ملابسها الداخلية، متقدش تهز بزاف د الحوايج، غتخشيهم غير فالساك، ميمكنش ليها تهز باليزتها حيت مستحيل تخرج من هنا و هي جاراها، مشات للحمام هزات الشيتة د سنانها و حتا الدونتيفريس و شي كريمات، خرجات جمعات حتا واحد ساك صغير د ماكياجها و شي ذهب و مجوهرات ديالها، خشات كلشي فالساك و سداتو، كان كبير شوية و حتا هي دكساتو مزياان، سمعات الدقان فبابها، ناضت حللات كانت اسماء قدامها، وسعات ليها الفتحة د الباب و تسوخرات للور مخلياها منين دخل، دخلات و سدات وراها الباب،

اسماء : جبت ليك داكشيي..

هديل : عمريي نساا خييرك سمحيلياا عدبتك معاياا..

اسماء جبدات من ساكها البييي و مداتها ليها : هاكي هاهي، عندك الطيارة مع 4، و عندك الزهر حيت كانت هادي ااخر رحلة، الرحلة الماجية من بعد زوج سيمانات، خاصك تكوني تما قبل بساعة، راك عارفة الامور كيف كدووز، و راني خديت ليك من درجة رجال الاعمال باش تمشي مرتاحة،

بقات كتشوف فيها ساكتة و ساهية فالبييي، تنهدات و رجعات كملات : هديل عفاك عاودي فكري مرة خرى، الهروب عمروو كان حل غير مغتزيدي تكفسي الاموور، ماشي عليا انا و لا حيت غيتجبدلي الصداع لاا، و لكن خويا كيسر رااه القاك القااك، واخا يعرف يقلب الدنيا كاملة سفاها على علاها، هو كيبغييك، و حتا نتي كتبغييه، نساو الماضي و عيشو حياتكم را قريب تولليو اب و ام..

هديل : العيشة حرامت فهاد القصر ا اسماء، محدي هنا غير غنبقا نتعدب كثر و كثر، مبقيتش قادرة نعيش مع واحد مفقلبو رحمة، القتيلة كتمشا ليه فالدم، يصبح عليها و يمسي عليها، عييت ا ختيي منبقاا نشوف فالدمايات كيتسيقو قدامي كل نهار، مبغيتش ولدي فاش يتزاد يعيش هككا، لاا ا ختيي مبغييتش ولدي يعرف الحياة لي عايش بااه، و متخافيش هو مغيلقانيش، عمرو باقي يلقاني صافي،

هديل : و كيف غديري ليها ؟!

اسماء : انا عارفة شغندير، المهم شكراا بزاااف..

اسماء تنهدات : المهم نخللييك دبا الى حتاجيتي شي حاجة انا غير فبيتي..

هديل : لهلا يخطيك، 

رجعات جلسات بلاصتها كتشوف فالبييي، خشاتها فالساك و وقفات هزات شي فلووس من الخزنة، كيسر ديما مخللي ليها القفول و السوارت د كلشيي، باش الى خصاتها شي حاجة تلقاها، بقات كتفكر شحال واش تهزهم و لا بلاش، خافت لا يحبسوهم ليها فالمطار، تنهدات و هزات شي حاجة قليلة عارفة عملة المغرب نازلة، غيفيدوها واخا قلال، خشاتهم حتا هما فالساك و جلسات، معليها غير تسنا الوقيتة باش تمشي...

كانو جالسين مجموعين كيتغداو، سوزان هازة بنتها كتراريها و كتاكل فنفس الوقت، 

سوزان : شفتيه ا خويا كيفاش قتلها بدم بارد، مفهمتش داك السيد مناش مصنوع، مزال داك المنظر بين عينيا متحيدش..

كريس : باغي غير ادير فيها صعصع قدامنا و صافيي..

كايلي : ههه فكرتوني غير فشخص واحد لي كيتعامل هككا..

سوزان : انا لي متسرطش لياا هي مراتو لي جاياا تعتاذر، بابا مشا يموت فديك العملية و قالتلك لاا الاطباء عندنا مكيعرفوش الخطأ..

كايلي : اشمن عملية ؟!

سوزان : ااه مقلتش لييك، داك خويا الجديد كان مريض، و خاصو لي يتبرع ليه بطرف من الكبدة، اوا مرتو مابانليها غير بابا فالبلان، العملية صعييبة و الى وقع شي خطا بابا كان ا يمشي فييها، و هما را قلبو عليه غير على ود العملية..

كايلي بدات كتكحب هزات كاس د الما شربات مننو عاد نطقات : صبريي قلتيي عملية على الكبدة، و غيير هاد السيمانة، و قتل فرملية وسط البيت لي ناعس فيه بااك، لاا ميمكنش هادوو كامليين صدف، خووك هو كييسر.. !!

سوزان : امم يمكن هو..

كريس: علاش نتي كتعرفيه ؟!

كايلي عينيها خرجوو : واش عارفين راسكم اش كتقولوو و لاا، شكوون ميعرفش كييسر..

سوزان : واحد قتاال و صافيي ..

كريس: نتي شنو علاقتك بييه.. ؟

كايلي: انا كنعتابرو فمقام خويا الكبير، و هو تقدو تقولو مدايرش ليا الحساب گااع ههه، و لكن بااش كييسر يكوون خوكم من الاب، هاداا را سميتو قمة الزهر، عرفتو شنو معنااهاا، يعنيي دبا نتووماا دخلتوو لحيااتوو صافيي، و مللي دخل فييك ا سوزان و وصلات بيه الامور لقضية طلاقك، يعنيي ا يبقى دييما يدخل، و داركم فراسوو..

سوزان : اواا صاافي هادشي لي بقا نييت..

كايلي : واش نتيي حمقة، هاداك دبا خووكم خاصكم تقربو مننو ماشي تنفرووه، هو بين بللي باغي مصلاحتك، يعنيي غيوقف دييما فصفكم..

كريس: داكشي غير تمثيل باش اكسب تيقتنا و ندخلووه فالعائلة بحال واحد مننا..

كايلي هزات شفاتها التحتانية معوجاها و هزات حاجبها : من نيتك، كيسر عاش حياتو كاملة بوحدوو، و هككا ا يكمل حيااتو ماشي هو لي محتاجكم، و لكن نتووما لي فحاجتوو، هو اصلا مكيحملش كثرة البشار قالك ندخلووه فالعائلة، واش عارفوو شكون بعداا، مشتييش فاش طااح فالفرااش ناضت القياامة، كلشيي كيدوي عليه فالاخبار و الجرائد و حتا مواقع التواصل، شغل الرأي العاام فروسيا كاملة، و البوليس عتابرو قضيتو فاش ضرب بالرصاصة داخلة فامن الدولة كاملة، لدرجة ان المخابرات بدات كتبحث فالامر، و مشتووش المافيات كلهم كيفاش توقفو و وللات خدمتهم غيير يقلبو على الكبدة لي اتناسب كيسر..

كريس ضحك جنب : متبقاايش تزيديي فييه بزااف..

كايلي: انا مكنزيدش فيه، سير قلب و اتعرف هادشي راسك، 

سوزان : و لكن هادشي كامل لاش، مالو شكون هو فملك الله گااع.. ؟!

كايلي: اول حاجة، هو من أغنى أغنياء روسيا، الشركات لي عندو مكيتحسبوش، و شللا ماركات تابعين لييه، من غير الفرووع لي عندوو فالعالم كاامل، و من فووق هادشيي، هو ليي متحكم فمافيات روسيا كاملة، كلشي كيمشي على ايديه، و الى دخل وسط عالم المافيا، را مكيبقاش كيسر لي عرفتوه، كلشيي كيحني راسوو لييه، و مكاينش لي يقد يشووف فيه، ماشي كيقتل و لا كيتاجر فالاعضاء و لا فالبنات، داكشي لي كيديير كفس من هادشيي كاامل، داكشيي لااش كلشي كيحتارموو، حتا من المخابرات الروسية عندوو علاقات معاهم، حييت كيحتاجووه واخا كلشي عارف اجرامو، داير بحال شي اخطبوط حاط ايدو على گاع المجالات، و البلاصة لي حط فيها ايدو كينجح فيها، اقتصاد و سياسة و مافيات، هو واحد مكيرحمش، بصح خاص تخافو على روحكم مننوو، تخيلو عندوو حبس تحت من دارو، كيحبس فيبه لي بغاا، وجمييع انواع التعذييب حاطهم عندوو، هادشي غيير شوية من داكشي لي كنعرف علييه..

سكتات و خللاتهم مصدومين مزال حالين فمهم فيها، سوزان نزلات راسها كتشوف فبنتها نعسات : انا غنمشي نديها لبلاصتها..

وقفات و مشات هازة بنتها بشوية باش متفيقهاش، كايلي هزات زوج طباسل قدامها و وقفات : اه و تانا غنجمع الدنيا..

بغات تمشي حسات بايد جراتها، شاف فيها عاقد حواجبو : و نتي اش عرفك فهادشي كامل، كنتي خدامة معاه !!

كايلي حطات الطباسل و جلسات : اه خدمت معاه فواحد المدة و جلست معاه فنفس الدار..

هز حاجبو كيطلعها و ينزلها هي منشوفاتو فهماتو و دوات كترجع فشعرها ورا ودنيها : متفكرش بزااف، ولد عميي صاحبوو و اييدو ليمناا، و عمرو مخللاني بعيدة علييه فاش سكن معاه فدارو جابني حتا انا، كنت كنمل بزاف فالدار داكشي لاش اقتارحت نخدم معاهم، و كانت عاجباني الخدمة بزااف..

كريس : و اش جابك لهناا، على هاد الحساب مبقيتيش خدامة معاهم..

سهات كتشوف بعيد و تلعب بشعرها : وقعو شي مشاكيل، كنت خايفة من كيسر لا يقتلني و يصفيها ليا، مكنت دايرة والو، و لكن شفت شي حوايج خلعوني، و كيسر فاش كيتعصب مكيعقل لا على قريب و لا بعيد كيخلط كلشي دقة وحدة، خفت على راسي و هربت لاستراليا قبل ثلث سنييين، و فاش رجعت حتا حد مقبلني، حتا من ولد عمي جرا عليا..

تنهدات كتشوف فالارض مقاداش تهز العين : و هانا دبا مع سوزان بينما لقيت شي خدمة و وقفت على رجلي بحال لول..

هزات عينيها فيه كان ساهي فيهم مصغر عينو، وقفات دغيا و هزات الطباسل : احم انجمع هادشييي..

مشات للكوزينة و خللاتو متبعها بعينيه بلا مينطق ...

داز الوقت، كان جالس فالبيرو ديالو، طرطق عنقو و هز تيليفونو دوز لابيل باوگدان، ما هي الا ثواني حتا جاوب..

اوگدان : الاجتماع بعد عشرة الدقايق ا كيسر..

كيسر : عارف ممعيطش على هادشي، مراتك لاش كتخطط..

اوگدان : اسماء.. !!

كيسر : اه اسماء، علاش شارية بييي د الطيارة للمغرب ؟ مفخبارك والو ياك !

اوگدان : شنو كتقول نتاا ؟!

كيسر : عيط ليها سولها براسك.. 

قطع و خللاه دايخ مفاهم والو، داك الساع دوز لابيل باسماء ،

اسماء : حبيبيي..

دخل معاها بدون مقدمات : علاش واخدة بييي د طيارة للمغرب.. !!

اسماء : هااا

بسكتات عاضة على شفايفهاا و هو غوت بعصبية قفزااتها حيت اول مرة يغوت عليها هككاا : اسمااااء.. قوولي شنو كااين ، اش باغا البيي من وراا ضهري..

اسماء : هانتا اوگدان انا، انا نقولك و متعصبش صافيي..

اوگدان تنهد : اسمااء قولي اش كاين، ثايق فييك و عارف عندك شي سبب غير دويي..

زادت عضات على شفايفها محاملاش الموقف لي تحطات فيه، مباغاهش يتقلق منها و لا يتعصب عليها و لكن ما بيدها ما ديير : احم فالحقيقة البيي مخديتوش لياا..

اوگدان : و لمن ؟

طلعات النفس سدات عينيها و قالتها : لهدييل..

اوگدان : كييفاش، و هدييل اش باغا دير بيها..

اسماء : باغا تهرب من هناا..

حط ايدو على جبينو كيماصيه بعصبية : واش عارفة راسك شنو كتقولي، براكة من التفلية..

اسماء : اوگدان انا و الله ما كنتفلا، هي عيات من الخوف لي وللات عايشة فيه، خايفة على راسها و على ولدها داكشي لاش هربات..

وقف مخرج عينييه و غوت بلا ميحس : و نتيي مشااركة معاهااا ا اسمااء، معاااش الطياارة ديالها دويي..

اسماء : هانتا اوگدان غير سمعني الله اخللييك..

هاد المرة نهض فيها و غوت بطريقة رعباتها و خللات دموعها ينزلوو : اسماااااء، متجعرييش ملتييي و جاوبيي دغياا معااش ؟؟!

جاوباتو كترجف : مع 4، مع الربعة..

اوگدان : واخاا، و هادشي لي درتيي من بعد و نتفاهموو علييه..

قطع عليها و خللاها حاطة ايدها على فمها كتبكي، عرفاتو ايتعصب و لكن متوقعاتش تعاملو معاها يكون هككا، رعبها و اخر جملة بقات كتزنزن فوذنها..

اوگدان خرج طاير نييشان لقاعة الاجتماعات حل الباب و دخل كي شي عجاجة، كلشي تلفت كيشوف فييه : كييسر، كييسر..

كيسر من وجهوو عرف الموضوع مافيهش اللعب، خرج و جرو معاه، سد الباب عاد نطق : شنو واقع ؟

اوگدان : البييي لي خدات اسماء على ود هدييل، هي باغا تهرب و طيارتها مع الربعة..

كيسر اللون تبدل من وجهو، هز عينو فيه و عقد حواحبو مزال كيحاول يستوعب : قلتيي مع الربعة..

اوگدان هز راسو باه و نفسو متسارعة كطلع و تهبط، اما كيسر مزادش معاه كلمة، تاكد من الكونطاكت ديال لوطو فجيبو و مشا للاسانسور، حبد تيليفونو كيعيط ليها و كيضرب رجليه مع الباب وجهو بدا يحمار و خصوصا فاش لقا تيليفونها طافي، غير تحل لاسانسور خرج طاير نيشان لسيارتو، طلع و كسيرا بالجهد خللا كلشي ملفت جيهتو مصدومين ، اما هو غادي فالطريق طاير، معاقل لا على ناس و لا اشارات مرور و لا حتا حد، ضارب فكلشي و غادي باقصى سرعة...

فجهة خرى، سمعات بللي وصلات نوبة طيارتها، هزات ساكها و تمشات بشوية متبعة الاجراءات حتا طلعات للطيارة، مشات لبلاصتها شداتها، شافت جنبها مرى كبييرة فالسن وجهها مكمش و عينيها مغرزين كيبان فيهم غير البيض، تنهدات و سدات عينيها كتشوف بنادم مزال طالع و الموضفات كيتساراو عليهم كيشوفو شكون خاصو شي حاجة، حتا قالو ليهم يقادو الحزام و يديرو التيليفونات على وضع الطائرة، دارت الحزام اما التيليفون طافي خلوق، سدات عينيها و زيرات على المقبض جنبها فاش حسات بالطائرة بدات كطلع، هي ماشي اول مرة طلع فالطائرة، و لكن ديما فاش كتبغي طلع و لا تنزل كتحس هككا، تفكرات راسها فاول مرة ليها، كانت جايا من المغرب فاتجاه ايطاليا، كانت محطمة و مافراس مالها حتا حاجة، وحدة مبقا ليها والو من الدنيا من بعد ما ماتت مها، و هاهيا دبا اترجع للمغرب مرة خرى، كيفما مشات مننو مدمرة كليا و معندها حتا حاجة، الفرق دبا يمكن هو ولدها لي ايغير حياتها من لول، ولدها لي عمرها تسمح فيها و لا تخلليه يتآذى....

كان داخل بعجاجتو لي جا قدامو كيضرب فيه و يزييد، وقف قدام لوحة الكترونية صدرو كيطلع و ينزل، مكتوب عليها بللي الطائرة المتاجهة للمغرب قلعات، عض على شفاتو التحتانية بالجهد حتا قرب يسيل منها الدم : تقت فيك ا هديل و مبغيتش نراقبك و لا نحبس عليك الخروج، خلليت كلشي فيدك حيت عارفك بعقلك، و فلخر هادشي باش جازيتيني ... !!!

نزلات من الطيارة شاداها الدوخة غادة جنب الحيط بزز، نزلات فالمطار ديال كازا، خدات تيليفونها خرجات مننو لبيس لي كانت عندها، هرساتها و لاحتها عاد شعلاتو، خرجات لعلى برا و ضرب فيها البرد ديال المغرب، طلعات النفس و شافت ليمن و ليسر، الليل و الضلام طاح، غير جنب المطار لي عامر اما تزيد زوج خطوات مكاين غير التصفار و الريح كيضرب فجنابك، و حتا الفلوس دبا معندهاش، فين ا تلقا شي بنكة حالة تصرف بيها عملة روسيا، طلعات النفس و شيرات لطاكسي، تيكونو موجودين قدام المطار، جلسات و حطات ساكها حداها لاوية ايدها بالسمطة ديالو باش متنساهش، هزات راسها كتشوف فالشيفور، راجل كبير فالسن رتاحت نسبيا، عاد نطق هو : بنتي فين غادة ؟

سكتات كتشوف فيه معارفاش اش خاص تقول، زيرات على توب كسوتها مكمشاه بيديها عاد دوات : عمي واخا نسولك..

الشيفور : سولي ا بنتي سولي.

هديل : مكتعرفش شي بلاصة كيتباعو فيها التيليفونات ميطاسيون..

الشيفور سكت شحال كيدورها فدماغو : كيتباعو ا بنتي فشي بلايص من القريعة، و لكن البلاصة ديال دوك الالكترونيات كاملين هي درب غلف، تما تلقاي اش باغا، و لكن ا بنتي فهاد الوقيتة مغتلقاي حد حال، حتا للصباح و سيريي..

بلعات ريقها و زادت مزيرة على التوب : مايمكنش و انا كيغندير نبيع هاد التيليفون دبا..

الشيفور : علاه ا بنتي نتي باغا تبيعي شي تيليفون..

هديل : اه ا عميي واقفة على فلوسو ضرووري و هاد الليلة قبل من غدا..

الشيفور تنهد كيفكر فيها : اصلا فدرب غلف موحال تلقاي لي يشري من عندك فهاد الوقت، ا بنتيي انا كنعرف واحد السيد على قد الحال، معرفتش واش تفاهمو و لا لا، و راه كيبقا حال تال ايينا وقت من الليل..

هديل : اه ااه دينيي عندوو ا عميي، تكوون درتيي فيا خيير كبيير..

الشيفور هز راسو و كمل طريقو هي هاديك نييت، حيت ديما المطار تيكون خارج من المدينة، طريق وحدة كيشدوها حتا يوصلو للاحياء..

دازت مدة و هما غادين فصمت، هي غير كتشوف فالطريق و الاحياء و الناس بالجلالب توحشات بلادها و ناس بلادها، اما الرجل حاضي غير الطريق قدامو و مركز معاها، وقف فحي من الاحياء الشعبية وسط السوق، مزالين كيجمعو فوسخ السوق و روينة الحوت، شاف فيها الشيفور من المرايا و دوا : هانتيي ا بنتيي را هو المحال لي مقابل معانا نيشاان..

طلات من الزاجة تشوف فين كينعت ليها و هزات راسها باه : شكرا بزاف، الله اخلليك ا عمي واخا تسناني هنا..

الشيفور : هانا ا بنتي مزال كنتسنا..

حللات الباب و خرجات بشوية شادة من كرشها، دورات عينيها على الدرب مزال صحاب الديسير حاطين كرارسهم و كيغوتو ها البنان ها التفاح ها الخوخ كلشي موجود، و حتا لجزارة و صحاب الدجاج مزال حالين، شاف مجموعات ديال الدراري مفرقين، ها لي مقصر كارطة و ها لي كيتكيف و لا يتحشش ماهواش هنا، و هالي مجموعين غير على الحضية يقشرو الغادية و الجاية و حتا وحدة متفلت من لسانهم، شافت مع جنابها و قطعات الشانطي دقة دقة مغافلينش عليها شوفات العيالات لي خارجين بجلالبهم غادين جايين وسط الدرب، وقفات قدام المحال لي كان صغيور فيه غير زاجة كبيرة و مشققة القدام، باين منها التيليفونات و البيسيات شي مهرس شي مزال مزيان، حاط حتا شي ميكرويب و مولينيكس مخلطة عندو القضية، حنحنات بشوية حيت كان جالس فالارض مربع و خدام فشي حاجة معرفاتهاش كتبان ليها غير حديدة و السلوكة خارجين منها، هز راسو فيها و حط داكشي لي فبديه واقف مبتاسم : اهلاان اهلاان ا ختيي، فاش نقد نعاونك ؟

هديل : عنديي ا خوياا واحد التيليفون باغا نبيعو، و محتاجة فلوسوو داباا ماشي حتا لمن بعد، نعتك ليا واحد السيد و جيت قاصداك نيشان نتا لول..

سكت شحال كيحك ورا عنقو عاد هدر : ختيي منكدبش علييك صعيبة شوية، و هاد ليام الحركة فالتيليفونات عيانة...

قاطعاتو قبل ما يكمل : هادا ماشي اي تيليفون، باقي جدييد، و الثمان باش ا نبيعو ليك ماشي ديالوو، غير الى مبغيتيهش..

الراجل : واخا اري نشوف اش عندك..

حللات ساكها و جبدات الايفون كبير و غزال مزال كيبري و كيبان جديد مافيه حتا خدشة : هانتاا اخر مكاين فالايفون، و باقي جدييد ماشي بزاف باش واخداه، ماشي حتا ديال المغرب، همزة مزياانة لييك..

هو غير شافو خرجو عينييه، كملات كلامها و مداتو ليه : هانتا قلبو راسك و اتعرف..

خداه من عندها كيفلي فيه، شغلو هاداك و عارف كيفاش يطيرو واش دوريجين و لا اش فيه، شحال كيهز و كيف غادي السيستيم، ملقا فيه ميتعاب، كلشي فيه هو هاداك و ممسوح مننو كلشي بحالة باقي جديد، هز حاجبو كيشوف فيه شحال عاد جاوبها : اهاااه و شحال طالبة فييه..

هديل : ماشي بزاف، غير الفاين درهم، مقارنة بييه را الفاين مساوية واالووو قداموو، راك ولد السووق و عارف اش كاين..

حك على راسو : فالحقيقة معنديش الفاين كاملة، الى بغيتي تسنايني حتا لغدا و نكملها لييك..

هديل : لاا راني كنقولك واقفة على الفلووس داابا و اليووم قبل غدا، شحال عندك نتا دبا ؟

الرجل : عندي الف و سبعمية مقاادة و واجدة، بغيتيها مزيان..

هديل : درت معاك ثمان فووق المزياان و خسرت فيه بزاف غير حيت محتاجة لفلوسو، اما راك عارف راسك متاخدووش بثمان بحال هككاا، راك حگرتي عليا مزياان و لقيتيني مافيا ميتلاج بالهدرة معاك و لكن مكاين باس، ارا الفلوس و الله اسخر..

دغيا جمع ليها الفلوس حطهم قدامها، حسباتهم مزيان و حطاتهم فالساك من غير واحد ١٠٠ درهم خللاتها فيدها، اما التيليفون بقا عندو كيشوف فيه : الله اعاونك ا ختيي..

هديل : واخا نسولك ا خويا..

هز راسو باه : مرحباا..

هديل : كتعرف شي مصور هنا كيخرج التصاور، يكون باقي حال حتا فهاد الوقت..

ضحك جنب و نطق : فهاد الدرب مكينعس حد، كلشي كيبقا فايق حتا يودن الفجر ا ختي عاد كل واحد كيشد الطريق لدارو..

هديل : اوا وريه لياا الى كان الله ارحم ليك الوليدين..

خرج راسو كيطل بشوية و كينعت ليها : هانتي غطلعي مع هاد الطلعة حتا لخر ديالها و دوري على ايدك ليمن...

بقا كينعت ليها و يوريها و هي كتسمع ليه و كتحفض فراسها حتا سالا، شكراتو و زادت بحالها مخلياه غير كيشوف فالتيليفون و يضحك مع راسو، همزة صحييحة هادي لي طاح فيها اليووم و الفرصة مكتعوضش زوج د المرات ...

مشات عند مول الطاكسي دقات عليه من الشرجم نزل الزاجة و شاف فيها، عطاتو ديك ١٠٠ درهم : هاك ا سيدي خلاصك، سمحلياا بزااف خلليتك تسنا فياا، الله اكثر من خيرك...

مشات بحالها متبعا النعت لي وراها السيد حتا وقفات قدام المصور، دخلات كدور فعينيها المحال كبيير و مروج و الدنيا عامرة حتا لخر، لدرجة كاينين لي وقفين برى كيتسناو نوبتهم، مشات نيشان عند السيد لي مكلف تما من بعد السلام دخلات معاه فالموضوع : خويا الله اخلليك بغيت نخرج شي تصاور من واحد الكارط ميموار الى ممكن..

هز راسو باه : اهاه اريها ليا نشوف..

حللات ساكها جبداتها مننو و مداتها ليه ، غير كارط ميموار صغيرة : عفاك خرجلي گاع التصاور لي فيها، را ماشي بزاف..

خدا منها الكارط و دارها فكلي نيشان باش اطلعو ليه التصاور : واخا ا لالة لي بغيتي..

هزات عينيها كطل عليه بشوية و كدوي فنفس الوقت : و بشحال يطلعو لياا.. ؟؟

هو كيدور وسط التصاور وحدة مورا وحدة هاز حاجبو، التصاور كلهم هي و كيسر، مرة معنقاه مرة معنقها مرة مخشية فصدرو مرة متكية فوقو، شي تصاور بكرشها قدامها و وحدين اخرين قبل ما تبان، مرة فوق السرير مرة فالصالة كيبانو الفوطويات مستفين مرة فالجردة ممخلية فين مصورة، هز عينو فيها و هدر : عشرة دراهم للتصويرة ا ختي..

هزات حاجبها : غاالية، زعما راك فحي شعبي ماشي تمرمقني هككاا..

حفظ التصاور و خرج الكارط ميموار : مغالية والو، هادا هو الثمان باش كنخدمو و راه معروف، دبا اش قلتيي..

تنهدات كتشوف فراسها معندها حتا حل : صافي غير خرجهم.. 

مد ليها الكارط : اوا صافي هاكي ا ختي الكارط ديالك دبا التصاور عنديي..

هديل : اه و امتا يخرجو، عفاكم متعطلهمش ليا حييت واقفة عليهم ضروووري..

شاف فيها مطولا : قلتي ضروري..

هديل : اه اااه، متفوتش ليا غدا الله ارحم بااك..

تنهد عاقد حواحبو كيفكر : واخا ا ختيي غدا فالعشية رجعي لييهم..

هديل : الله اكثر من خيرك ا خويا شكراا..

عطاها ورقة باش ترجع عندو، عاودات شكراتو و خرجات، شدات ديك الكارط ميموار هرساتها و لاحتها، مبغات تخللي حتا حاجة الكترونية من لي كانو عندها، خايفة كيسر لا يتعقبها، هادشي لي كان كيقول ليها راسها، معارفاش بللي كيسر الى دارها فدماغو يلقاها يلقاها واخا تكون تحت الارض....

نرجعو لروسيا، من برى غرفة واسعة كيتسمع الغوات و الصدااع، لالول مرة اوگدان يغوت على اسماء بديك الطريقة، كيشوف فيها كارز على سنانو و عينيه حمريين بحال شي عافية، ضرب فالحيط وراها حتا قفزات و زادت عاضة على شفايفها كتبكي بلا حس : اووگدان الله اخلليك لما تهدن، انا بقاات فياا بزااف مقديتش نقولها لااا..

اوگدان : و مزاال كتعاوديي فييها مزاال بوجهك حمر، باغااني ندفن مووك هناا ياااك، علاش معاوناهاا ، بااش تهرب، هاداك وجهك ا اسمااء باغاا تزيدي تجعري جديين ميي..

هزات فيه عويزاتها الحومر و شفارها كيتلسقو : حرام عليك ا اوگدان، و الله الى درت غير لي قالتليي، حييت صاحبتيي مقدييتش نقولها لاا، مجاتنييش نديرها و حالتها قطعات ليا فقلبيي..

اوگدان : كنتيي تجيي تقولييها لياا اناا ماشي تلعبيي ورا ضهري و مخلياني ناعس على ودني مجايب خباار.. 

قربات مزال عاضة على شفايفها حتا حبسات فيهم الدم، حطات ايدها على دراعو كتحاول تهدن فييه : هي مجاتني حتا للصباح ا اوگدان، ملقيت كيف ندير نفكر واش ندير، جبتها ليها بلا منحس و الله كون شفتي حالتها نتاا تشريها ليها، ندمت و الله و لكن ما بيديي مانديير دبااا، الله اخلليك فهمنيي ...

سكت شحال كيشوف فعينيها و صدرو طالع نازل بدا كيتفش، عقد حواحبو ساهي فيها عاد نطق : مبغيتش هدرة سمية تكون بصح فيك، زعما تكون بصح ... !!

تنثر من ايدها و تم خارج، وقف قدام الباب عاطيها بضهرو : تخطي خطوة من ورا هاد الباب متلومي غير راسك..

خرج و خللاها كترمش بعويناتها مفاهمة والو، جلسات فوق السرير مزال كتبكي، شهقات و حطات ايدها على قلبها : فيين ا تكوني ا هدييل دباا فيين، ياا ربي انا اشنو درت..

تلاحت على السرير كتبكي، جات بين نارين، هديل لي محروقة من جيهتها و كترد اللومة لراسها على كلشي، عاد حسات براسها اش دارت، و من جهة خرى اوگدان لي موحالش يسامحها دغيا...

هو طلع للمكتب عند كيسر، المكتب التاني غير لي فغرفتو، دق عليه كيتسنا، مجاوبوش و مسمعش حسوو، حل الباب بشوية و دخل كيحنحن، شافو جالس متكي فوق الكرسي و رجلو فوق البيرو ساهي كيشوف فنقطة وحدة و ايديه ورا عنقو مشابكهم، ضرب طلة على الدنيا كلها مشخشخة مخللا حتا حاجة فبلاصتها و هرس كلشي، تنهد و جلس فالكرسي قدامو : غنلقاوها صافي..

كيسر زفر بقوة و تقاد فالجلسة مقابل معاه : رخف على اسماء، ما ليها حتا ذنب فهادشي..

اوگدان هز حاجبو كيشوف فيه، من امتا وللا كيسر يفكر فواحد اخر، جديدة عليه هادي، كيسر حط ايدو على جبهتو كيماصيها بشوية و كمل : نتا عارف هديل فاش كتبدا تمسكن و طلب، واخا تكون جبل تخلليك تلين معاها، اما الى بدات فالبكا خلاص، كتبقا حتا توصل لاش بغات، مراتك بغات غير تعاونها صدقات واحلة الوسط..

اوگدان حك على لحيتو كيفكر فكلامو : و لكن حتا هي كتفكر، خاص تميز افعالها و تعرف راسها اش كدير ... معلينا هادا ماشي موضوعنا دبا، انكلف الرجال لي فالمغرب يقلبو عليها، عرفتها نزلات فمطار كازا، متخافش ا يلقاوها و راني خدام.....

قاطعو قبل ما يكمل : ما تكلف حتا واحد، و مادير والو...

وقف و تم خارج، خللا اوگدان كيشوف مفاهم والو حتا ناض تابعو : كيفاش شنو كتقول..

كيسر : خلليها، هي لي باغا تهرب، خلليها تجرب الهروب واش نافعها، و فاش ا ترشق ليا راني ا نلقاها، رركز فخدمتك و نسا عليا هاد الموضوع ...

مشا نازل مع الدروج و خرج، خللا اوگدان مزال واقف كيدور فعينيه مفاهم والو و هادشي مداخلوش لراسو، مسح على شعروو و طلع بحالو، تفكير كيسر مزال لحد الان حتا حد مكيفهمو و الى جا يفهمو ا يضرو راسوو....

صبح صباح جديد، ناصت قافزة على صوت الغوات، وقفات كتحك عينيها بشوية و طللات من الشرجم، مول القراعي للبيع خدام كيبرح، غير داز هو جا مول البيض حتا هو و بدا طالق حلوقو، حطات ايدها على فمها كتفوه، كانت غادة تحل الباب باش تمشي للحمام حتا رجعات دغيا مخرجة عينيها على المصيبة لي كانت ا دير، هي كارية غير بيت، و الحمام لي غادة ليه مخلط كلشي كيدخل ليه، نزلات عينيها على راسها ناعسة غير بدو بياس كيف عادتها، ضربات على جبهتها و مشات هزات كسوتها من الساك لبساتها، كانت كحلة طويلة حتا لتحت و واسعة شوية جاياها هي هاديك مع الحبالة، البيت لي جالسة فيه غير صغير، صباغتو مقشرة و لا موزيك تحتها مزعزع من بلاصتو، فيه زوج سدادر ملاصقين و طبيلة د الخشب قصيرة و كلها شقاق من الجناب.. هزات دونتيفريس ديالها الشيتة د السنان الصابون و شي مسائل قلال ا تحتاجهم فالحمام، حللات بشوية كطل مابان ليها حد، خرجات السوارت و خرجات، سدات البيت و مشات للحمام بشوية شادة من كرشها، دخلات و سدات وراها الباب، كتشوف فالكرسي د الحمام داك البلدي القديم، كللو مشقوق و خانز ريحتو كتعيف، تقول غير ثقبة حافرينها تم، الزليج طاير من بلاصتو و كيتخيل ليها فراسها الحشرات معششين تحتو، شافت فالباب، محكووك من التحت غير اطل شي حد براسو تبان كاملة، وكلات امرها لله و قضات غراضها و كل مرة كتقفز الى سمعات شي صوت جاي لجيهتها حتا كيمشي عاد ترجع تشوف اش دير، مخرجات من داك الحمام حتا سيقاتو مزياان، گاع داك جاڤيل لي تم خواتوو، و حتا من قرعة صغيرة د سانيكروا استنزفاتها، غير حللات الباب شافت صف واقف قدامها شادين نوبتهم كيتسناوها تخرج، نقزات وحدة منهم لابسة واحد مولاتي جلابة ديال الكاشمير بياس وحدة لاصقة علييها الصدر طايح و الكرش خارجة و الترمة معصوورة من البيجامة، صابغا الحجبان بالكحل و عاقداهم شوية و يلصقو، زيف حياتي فوق راسها حاطة ايدها على جنبها و كشاكشها خارجيين : وااا ختييي تيي كنتيي كتولديي تمم و انا مفخباريييش، مخلية صففف ديال البشاار كيتسنااا، طيرييي من قداامي يا بنت الكلبة غا جيتينيي الصبااح هاداا ما فيااا مايطيح علييك الموراال...

قالت كلامها و دخلات للطواليط كتخبط برجليها، اما هديل جرية وحدة شداتها مرتاحت حتا سدات عليها فبيتها، عاد طلعات النفس، كون مكانت كرشها كون طارت، خلعاتها و شكلها خرجها منها خلعة، و هي من دوك صحابات شاطة ماطة مينفع معاهم لا كلام و لا هدرة بالعقل، عضات على شفايفها و بدات كتجمع فحوايجها و طرف فالبييت و حالتوو، طرفات غير شوية حيت واخا تخملو و تسوسو ميتقاد، هزات ساكها و طلعات للسطح كدق على مولات الدار، عطاتها الكرا ديال هاد الليلة و خرجات بحالها نادمة على الساعة لي وصلاتها لهنا، و لكن ما بيدها ما دير غير تصبر و تزيد فصبرها، هي لي دارتها لراسها...

خدات طاكسي حطها فكورنيش عين الدياب، نزلات للرملة حيدات سباطها و بقات كتسركل و تمشا بشوية حتا سخفات، اصلا المشي مزيان ليها، عيات و طلعات بحالها خدات طاكسي، حطها حدا المصور، مشات عندو الساعة مزال موجد ليها التصاور، اصلا داير معاها فالعشية، مشات لسناك قريب تغدات و ناضت تاني كتسركل فالدروبة و تخيط فيهم، لي دازت من قدامو كيبقا حال فمو كيشوف فيها، كيف لا و هي البيوضة العينين مشفرين النيف نازل مقاد و الشفايف حمرين و منفوخين، و لكن غير كيشوفو كرشها واصلة لفمها كيميكو، واخا هككاك مفلتاتش من الهدرة و التزلال و كل مرة يخرج ليها واحد من جيه، هككا حال المغرب حتا من العيالات كيوقفو حاضينها شادين فيها النميمة حتا دوز، كاين لي حاسدها و كاين لي معحب لحالها مكتبانش بنت المغرب گااع، و علاش هي تسوقات لشي حد، غير غادة و ساهية مجايبة خبار للدنيا لي دايرة بيها، مامسوقة لا لي كيدوي و لا لي يتبسل، كتفكر غير فكيسر، كيفاش حالتو دبا و اش ا يكون كيدير، كتقول واش واكل و لا مواكلش، عارفة هروبها ايخلليها ينسا هم الماكلة و ايكون مشغول كيقلب عليها، مزال هازة ليه الهم و قلبها عامر غير بيه، وصلاات لمحطة الكيران، مشات كتسول على الكار ديال مراكش لي غادي اليووم، من زهرها كاين واحد من بعد زوج سوايع، تنهداات قالبة الدورة عند المصور، خدات التصاور و قلباتهم وحدة وحدة فرحانة بيهم حيت جاو كيف بغات، خلصات السيد ففلوسو و مشات لمحطة الكيران تاني، جلسات لداخل فواحد الدرحة حاطة ايديها على حنكها و الايد التانية معنقة ساكها كتسنا فالكاار..

جا نهار جديد..

ضربات فيه شمس قوية خللاتو يحل عينو، حط ايدو على وجهو حابس الشعا و جا واقف، طاحت من فوق صدرو شي حاجة، تحنا هزها و بقا كيشوف فيها، كانت صورتها، مسح عليها و بقا ساهي فيها، موالف افيق و يصبح على وجهها هو لول، ضروري ميتحنا يشم ريحتها و يذوق طعم شفايفها و هي ناعسة، لا بد ما يلعب بشعرها، تنهد و وقف من فوق الكنابي، حط صورتها فوق الكوافوز مسح على وجهو و مشا فاتجاه الحمام، مزال مصدوم من تصرفها، مناويش اتبعها و لا يقلب عليها، حيت عارف راسو ايغلط فيها الى جات بين ايديه و خصوصا فهاد الوقيتة، داكشي لاش من الاحسن يخلليها حتا ترتاح و يبرد الشمتة لي طاح فيها بوحدو بلا متصولها العافية...

صبحات كتحل عينيها بشوية على صوت الغوات، قفزات دغيا و ناضت كتمسح عينيها فاش تفكرات راسها فالكار، شافت لليمن و ليسر سمعاتهم كيغوتو بللي وصلو لمراكش، هزات ساكها و تمات نازلة، بقات كتشوف فالناس مزال دايخة، شعرها مخربق و حواجبها معقودين على الشمس لي ضاربة فيها ، تفوهات و دارت كتقلب على طاكسي، شيرات ليه و عطاتو العنوان بعد نص ساعة و هي كتحاول تفكرو و حتا الشيفور لقاتو من البهجة شاد معاها الخط و غادي معاها بالخاطر باش اترزق الله...

حطها الطاكسي فالدرب، شكراتو و خلصاتو نازلة كضحك، فوج عليها فالطريق، مشات داخلة فالدرب بشوية، كلشي كيشوف فيها و حاضيها، هادشي باش كانت كتحس، كملات طريقها كدور عينيها و كتفكر كل بلاصة عندها معاها ذكرى فشكل، هنا كانت كتجري و تلعب و هي بنت عشر سنين، و هنا طاحت، و لهيه ضربوها الجارات، و فالجهة لاخرة بغات تلعب مع البنات و مخللاوهمش واليديهم، حيت بكل بساطة هي بنت الحرام، الكلمة لي من صغرها و هي كتسمعها و مكتفهمهاش، وقفات قدام باب خشب كبييير و عاليي، طالع بالنقش من التحت حتا الفوق، حطات ايديها بشوية على حديدة غليضة معلقة فيه دقات بيها، رجعات لور شوية كتسنا الباب يتحل، حللات بنت الباب كتشوف فهديل، لابسة گاندورة توب خفيف فالزرق، بلا كمام و نازلة حتا لتحت فيها زوج فتحات باينين منهم سيقانها بيضين، شعرها مجموع الفوق شفنجة مخربقة و كتمسح فعينيها لي منفوخين باين فيها مناعساش مزيان و عاد فايقة، حروفها زوينين بلا نقطة مكياج، حاطة ايدها على جنبها و كطلع و تهبط فهديل : نعام ا ختيي..

هديل : واش كاينة خالتي رابعة..

سكتات ساهية فيها شحال كتشوف فكرش هديل قدامها عاد دوات : خالتك رابيعة !

ابتاسمات و خوات الطريق قدامها : مرحبا مرحبا دخليي انا نكلمها لييك، جيتيي للبلاصة المزيانة.. 

دخلات هديل كدور عينيها على الرياض مفاهماش النص فكلام البنت لي بدات كتحك ورا عنقها و كتوريها الطريق : جلسيي تما فالصالوون هاناا نكلمها لييك.. 

مشات هازة الگاندورة كتلعب بشعرها بشوية عليها و خللات هديل كدور عينيها مبتاسمة، كل بلاصة من هاد الرياض كتفكرها فمها، حسات بيها بحالة معاها ، بقات جالسة ساهية راسها حتا سمعات صوت جاي جيهتها : مرحباا ا بنتيي مرحباا..

هديل سمعات الصوت وقفات كتشوف فيها، لابسة قميص طويل مگفداه و جامعاه بشمار حتا الكتاف مخلية درعانها عريانين، حاطة شللا دبالج فيديها منهم النقرة و منهم الذهب، فوق راسها زيف كيبري مزوق و نازل بالهدب على جبهتها و تحت ودنها، فعنقها قلادة غليضة نقرة غادة للكحولية فيها رسومات فشكل، و سنسلة ذهب رقييقة نازلة حتا الصدر، مكحلة عينيها الكوحل و كتشوف فهديل مصغرة عينيها و كطلعها و تبهطها حتا قشراتها كاملة، هديل ابتاسمات و دوات : خالتي رابيعة..

رابيعة : اييه هي هاديي، جلسي ا بنتي بعدا جلسيي، 

جلسات هديل و جلسات ربيعة قدامها كتشوف فيها : اش حب الخاطر ا بنتيي، كاين شي منقضيو.. 

هديل : معرفتينيش ا خالتيي..

شافت فيها ربيعة شحال فالتالي هزات راسها بلا : بالعما ا بنتي معرفتكش..

هديل : انا بنت رحمة، ديك المرى لي جات قبل 22 عام هادي هازة فيديها بنيتة صغيرة عاد زايدة، انا هي ديك البنت..

رابيعة بقات ساهية كتشوف فيها، وقفات جلسات حداها و شدات من ايديها بزوج : بنتي هديل، هادي نتيي.. 

ضحكات هديل كتهز راسها باه فرحانة حيت تفكراتها : ااه ا خالتيي هدييل، مزاال عاقلة علياا..

رابيعة : و علاه انا نقد نسااك ا بنتيي، مزاال عاقلة على النهار لي هزيتك فيه و نتي قد هككاا..

بدات كتعبر ليها بيديها و عينيها مغرغرين : درتك بحال بنتيي و كثر حيت معنديش الولاد، و كنت نقابلك و نهزك فالصباح فاش موك كتمشي تخدم و تدمر فديور عيباد الله، و نهار مشيتي لايطاليا حسيت بكبدتي مشات معاك، الله يا ربيي سلامتك حتا رجعتي لياا، اش طرا و جرا حتا تفكرتينا..

هديل : قصة طويييلة ا خالتيي، طوييلة بزااف..

ربيعة : بالفرحات عليا نسمعها ا بنتيي..

دورات وجهها جيهة الباب كتغوت : نسيييمة، واا نسيييمة..

نسيمة جات كتجري مبتاسمة هي نفس البنت لي حللات لهديل الباب : نعام ا خالتيي هاناا..

ربيعة : سيري قولهم يوجدو واحد الصينية د اتااي فاعلة تاركة الله ارضيي علييك.. 

نسيمة : هي الضيفة ا توللي جارة جدييدة ا خالتيي..

ربيعة : يا تي سيري يا هاد البنت ديري اش قلت ليك و براكة متخشي راسك فكلشيي، هاد الفضوول ا يقتلكم شيي نهاار..

عوجات نسيمة فمها و مشات دير اش طلبات منها بلا متزيد الكلمة، رجعات ربيعة كتشوف فهديل و مزال شادة من ايدها : عرفتي كتشبهي لرحمة موك بزااف، فكرتيني غير فيها فاش جات لهنا اول مرة، 

تنهدات كتشوف فكرش هديل : قوليلي ا بنتي اش راجعة ديري هنا، هادي ماشي بلاصتك..

هديل : الزمان و الوقت ا خالتي مرحمونييش، درت حتا عيت و فلخر رجعاتني الدنيا لهنا منين بدييت..

ربيعة : ياك وصاتك رحمة حتا عيات، ياك ا بنتي كبراتك و عرفات كييف تربييك، منقصاتك من والو و كان طلبها الوحييد هو مديريش كيف دارت هي، قراتك و صرفات عليك و خلاصها هو تحافضي على راسك حتا من نهار كانت كتموت هادا اخر ما طلبات، علاش ا بنتي مشيتي فنفس الطريق علاش ضيعتي راسك و ضعيتي هادشي لي فكرشك كيف دارت موك..

هديل خرجات عينيها : لاا لااا ا خالتي رابيعة متفهمينييش غلااط، هاد الولد ليي فكرشيي ماشيي ولد الحراام لا ا خالتيي، انا مزوجة و بوراقي الى بغيتي نورييك، عمريي مخلليت ولد المرا يقيس فيا قبل راجليي..

رابيعة عاد تنهدات و رجعات فيها الروح : الحمد لله ا بنتيي، حالتك خلعاتنيي و حيت هاد الرياض مكيجيو لييه غير لي ضاعو فشرفهم و خرجو للطريق، و مالك ا بنتي شواقع معاك و فينو راجلك..

هديل : الصراحة ا خالتي انا هربت مننو، كنت عايشة معاه فروسيا و فاش لقيت كيفاش نهرب هربت و زدت بحاليي..

رابيعة : الله يا بنيتيي، و مالك اش هربك..

هديل : عييت ا خالتيي عييت، عييت من الخووف و الرعب لي عايشة فيه كل نهار، منعس مرتاحة منفيق كيف الناس، كنقول شي نهار يقتلني و ميجيب ليا حد الخبار، خفت على راسي و على ولدي و هربت بروحيي، الخوف لي ولليت عايشة فييه كثر من داكشي لي نقدر نصبر عليه..

ربيعة : كيضربك ياااك، و مكرفس علييك ولد الحراام، لقاك ولية بوحدك معندك حد و دار فيك ما بغاا..

هديل سكتات كتشوف فيها معرفات متقوول لسانها تربط، كملات ربيعة كلامها : الله ياخد فيه الحق، بغيتو عمروو يشوف الرباح، بغيت ربيي يحرموو من النهاار الزويين ولد الحراام، لقاك غير وحدك مكاين لي يحميك و يسخن كتيفاتك تعداا علييك، يااا ربيي....

هزات كفوفها ناوية دعيي شي دعوة مضخمة نييت حتا نزلات ليها هديل ايديها مخرجة عينيها : لاا لاا ا خالتيي متبقايش دعيي فييه صافيي خللييه..

ربيعة : و مزال كتفكري فيه ا بنتيي، شغنقوولك الله اخلصوو و صافيي الله اخلصوو..

هديل : دبا خللينا مننو ا خالتي، انا دارت عليا الدنيا و تسدو فوجهي البيبان، ملقيت فين نحط الراس من غير هاد الرياض لي هزني من صغري..

ربيعة : مرحبا بييك ا بنتيي الدار داارك، و البييت المخير دياالك، غا هو ا بنتيي النص فالرياض دياليي و انا لي كاريااه، و لكن النص التانيي ديال ماليه، متقربيي لييه متحطيي فييه رجلييك احتراما لصحابوو، صافي ا بنتيي..

هديل ابتاسمات و تحنات باست ايد ربيعة لي دغيا جراتها من عندها : الله اكثر من خيرك ا خالتيي، لهلا يحرمنا منك انشاء الله..

ربيعة : لواه لواه ا بنتيي، هاداا راه واجب و كيف قلت لييك نتيي راك كثر من بنتيي، 

تنهدات كتشوف بعييد : واخاا هاديي ماشيي بلاصتك، نتي مقامك على من العيشة فبحال هاد البلاصة عامرة وسخ.. 

هديل : حاشا ا خالتيي، هاد الرياض هو لي كبرت فييه..

ربيعة : لاا لااا، انا منبغييش لبنتيي تعييش فبحال هاد البلايص، حتا يوللي كلشي يدوي فيك و سيرتك على كل لسان، و مللي قصدتي هاد الباب كلشي غيحل فمو و يقول هازة ولد الحراام، هادي معرووفة فالمدينة كاملة، غيير تولدي و تهزيي راسك و نكريي لييك فشي بلاصة بعيدة على هناا، هاد البلاصة ماشي ديالك و مغنخلليكش تفني فيها حياتك كيف درت انا و موك...

هديل تنهدات عارفاها الى قالت شي كلام ماكيكون فيه لا رجوع و لا نقاش واخا تعيا معاها : الله اديير لي فيها الخيير..

ربيعة : اوا فينو هاد اتاي واخا يكون كينجوو فيبه، نسيييمة...

سمعات صوتها داخلة هازة صينية د النحاس قدامها شاعلة كتبري، و الكيسان كبار منقوشيين دوك الحريين القداام : هاناا ا خالتيي هانااا..

حطات الصينية فووق الطبلة و جلساات كتخوي فاتاي كطلع البراد حتا الفووق و دوز للبراد التاني، عمرات نص الكيسان و النص تاني غير رزة، مدات كاس لهديل : بسم الله ا ختيي..

مدات لربيعة و خدات ليها كاس، تمات جايا بنت اخرة، هادي طوييلة و عامرة و لابسة حتا هي گاندورة، حروفها شهبين و السالف ذهبي مليوح ورا ضهرها، حطات دواز اتاي و دوات كتشوف فهديل مبسمة : مرحباا ا ختيي كوليي الدار داارك..

هديل : ربي يخلبيك ترحب بيك الجنة..

ربيعة : وجدوو لبنتيي هدييل شي بييت متييول الله ارضيي علييكم، اه و بلا ما نوصييكم يكوون بعيد على بيوتكم مبغيتش يوصلها صداعكم بالليل، راها ضيفة عزيييزة بحال بنتيي و كثر..

نسيمة : هي لي متعاود ا خالتيي، بالفرحات علينا نوجدووه..

ربيعة : الله ارضي علييكم...

داز الوقت..

كانت خارجة من البنكة من بعد ما صرفات الفلوس لي عندها، جاتها غير 2500 درهم، حيت هزات غير فلوس قليييلة نصهم ضرباتهم فالطاكسي من القصر للمطار، غادة كتجر فجلايلها لابسة جلابة فالغوز بارد عطاتها ليها ربيعة، عرييضة عليها و طويلة شاداها بيديها باش متعكلها و طيح على وجهها، طايحة من جهة الكتاف و واسعة من الكمام، قبها عرييض شاد ضهرها كامل و نازل عليه مزال، فصالتها قدييمة قليل فين كدار دبا، شعرها جامعاه شفنجة مخربقة و مخلية شي زغيبات خارجين، الفلوس خشاتهم فصدرها قبل ما تخرج باش متلقى مشكيل مع حد، غادة شادة من كرشها كتشوف غير قدامها و مفلتاتش من هدرة الرحال لي غير تابعينها بعينيهم، ميوقرو بنت و لا مرى، مزوجة و لا مطلقة كلشيي كيدوز على لسانهم بلا حساب، ماوصلات قدام الرياض حتا سخفات مع البنكة بعيدة، بدات كدق و طالقة ودنيها مع العيالات جنبها حاطين كراسا و جالسات مجمعات على النميمة و الهدرة فعيباد الله، 

...... : شفتيي يا ختيي هاديي هي البنت الجدييدة لي جات عند رابيعة اليووم..

....... : مفهمتش انا خللات كرشها حتا وصلات لفمها عاد جاياا، فين كانت هاد الوقت..

....... : اوا شكون عرف الله استر بنادم متعرفي اش تحت راسو كون كانت تفهم كوراها طيحاتو من لول علاش ضروري يعدبو حتا دوك الدراري معاهم..

........ : كوراها كتفكر تبييعو معرفتيي، لي دايرة هادشيي تقد دير ما كثر..

قفزات فاش سمعات الباب تحلات، دارت لقاتها ديك الشهبة د الصباح تبسمات فوجهها : دخليي ا ختي على سلامتك..

شافتها متحركاتش و رجعات كتشوف فالعيالات لي مصغرين عينيهم حاضينها بنص عين، عوجات الشهبة فمها و دارت مخرجة عينيها فييهم : ااا لاليااتيي مكنفرقووش الشرييحة هنااا، هزوو علياا قشاوشكم و تگعدوو خوييو علياا القنت، مزاال مشبعتوو من لحم عييباد الله، نوضووو خلااص مزياان تباارك الله مبانت لييكم غيير هاد العتبة..

ناضو جمعو كراسيهم مخنزريين غادين بحالهم حتا نقزات وحدة فييهم : اوااا الله العن ليي ما يحشم، الله ارد بييكم و صافيي شغنقوول المنكر وسط النهاار..

هزات الشهبة حاجبها مخنزرة فيها قربات تاكلها بعينيها : مكااين لي مكيحشم قدكووم، ديوهاا فشغالكم و خلليونا علييكم فالتييقار و لا عرفتوو اش ديوها غير فرجاالكم و شدووهم عندكم، مزال معرفتوو فلوسهم فيين كتسييح و فين كيضلوو مخشيين الليل كللو بلا حجة، اوا ليي قافزة فيكم و طلعات لالة مولاتي تعرف تشد راجلها عندها قبل ما تبدا دوي فعيباد الله..

قالت كلامها و جرات هديل، ردخات الباب فوجوههم و صدرها طالع نازل : بنات الحراام من فعايلهم، غير بلاتيي على هادييك لي دواات، اللييلة نقاد ليها الضووسي مع راجلها، عند بالها مفخبارييش دااك الذهب و الفراش لي باعت باش تسيفط الفلوس لولد عمهاا، و الله يا مها لا بقات فيها، غدا يطلقها و لا يجيب عليها الضرة..

دارت عند هديل شافتها حالة عينيها مفاهمة والو، ابتاسمات و جراتها غادة و كدوي و ضحك : ماديهاش فييهم حتا نتيي، را قلة ما يداار كتخلليهم جالسين ياكلو لحم عيباد الله بلا ميحسو، دبا تسمعيي منهم عدد، ولفناهم و هدرتهم مبقاتش كضرنا..

جلسو بزوجات فالصالون، هديل سرحات رجليها عاد دوات : و لكن انا ا ختي ضراتني فخاطري حيت غير ضالمينيي..

تنهدات الشهبة : اواا معندك ما ديريي ا ختي بنادم عمروو يقولها فيك زويينة، قالت ليا خالتيي ربيعة راك مزوجة و مكنتييش عايشة فالمغرب گااع..

ابتاسمات هديل و هزات راسها باه : كنت عايشة فروسيا حيت راجلي روسي..

حطات الشهبة ايدها على قلبها : ربيي ربيي ا ختيي روسي، ا اللااااااه يا ختيي و كيفااش تلات بييك لياام هناا، من روسياا و خيرها اش رجعك للمغرب..

هديل : توحشت بلاديي ههه..

الشهبة : ايييه كطنزيي علياا نتي لي عطاتك ليام،

هديل تنهدات : ا ودي قصة طويلة لا بديتها منساليهاش..

الشهبة : اوا على خاطرك ا ختي، كلنا عندنا قصص و حتا وحدة مجات لهنا بخاطرها، لهلا يخطي علينا لالة رابيعة هي لي هزاتنا وقت الشدة خدات بينا وقت دارت علينا الدنيا، تقدي تقولي واش حتا هادي عيشة عايشينها، و لكن حامدين عليها الله، واخا خدامين فالحرام عندنا بلاصتنا، مكاين لي يهز صوتو علينا و لي دارها توريه خالتي رابيعة الوييل لي عمرو شافو و لا عرف ليه سمية، دايرانا بحال بناتها، بكرامتنا و مكاين لي يقرب لينا، ماشي بحال شي بنات الله استر مخللاو مدوزو عليهم.. 

هديل : اوا الحمد لله على كل حال..

الشهبة : مسولتكش شنو سميتك..

هديل : انا هدييل..

ابتاسمات الشهبة : و انا آلاء مشرفين ا حبيبة، نخلليك دبا نطلع نوجد راسي مبقا والو للسهرة، خودي رتحتك و الى بغيتي شي حاجة عيطي ليا...

طلعات و خللاتها، حتا هي بقات ساهية كتخمم، حالتهم معاجباهاش واخا هادشي كامل، كتبقا البنت معندها قيمة وسط العالم الى خدمات هككا، بكرامتها و لا بلاش بالنسبة ليها مكاين فرق و كدعي الله عمرو يوصلها لهاد الطريق واخا راها غادة جنبها، تنهدات و طلعات لبيتها تخبي فلوسها..

عاد داخل للدار، طالع نيشان لغرفتو حاط ايدو ورا عنقو كيطرطق فيه ضارو راسو و حاس بالعيا بعد خدمة طويلة اليوم، حتا كتوقف امنية قدامو حاطة ايد على ايد، عقد حواجبو كيشوف فيها : خالتي..

امنية : ولدي ديك المرى عندك واش حاجبة فالبييت، الى مكنتي نتا متخرج ما درج ما تخللينا نشوفو وجهها، حتا تجي نتا عاد كتبان، مالها فسعد ربع حيووط..

حط زوج صبعان على جبهتو كيماصي فيها : شكات علييك، انا لي قلت ليها متبقاش تخرج، خلليها علييك..

خرجات امنية عينيها : ا ويليي و مالها حتا متخرج، مالك هبلتيي..

فهد تنهد ما عندوش الگانة ليها و لنگيرها دبا : خالتي من بعد الله اخللييك..

كمل طريقو و خللاها كتنفخ و تفش غير بوحدها، حل الباب كيشوف فيها جالسة قدامو بكسوة قصيرة فالزرق الداكن، بلا كمام مزيرة من جهة الصدر مخللياه بارز و طالع، و مخلية شعرها كريبي طايح فوق كتافها دايرة رجل فوق رجل و حاطة ايدها فوق السرير كتصبغ ضفيراتها، هزات راسها شافت فيه، ميلات وجهها و ابتاسمات : جيتيي على سلامتك..

سد الباب و دخل، لاح شي ملف فوق الطاولة بدون اهتمام و جلس جنبها كيشوف فيها : شنو كديري.. ؟؟

اشراق : والو كنصبغ ضفاري..

هزات ايديها كتوريه : كيجاتك زويينة..

ابتاسم : بزاااف..

اشراق : صافيي دباا ا نخلليوها تنشف..

هزات راسها حققات فيها و عوجات فمها : كتبان ليا عيان..

هز راسو باه و تلاح تكا فوق السرير شاد راسو : دوزت ثلاثة الاجتماعات و لقيت الخدمة مرونة و زيد عليها الخدمة د ايطاليا تا هيا بدات كتجمع خاص نرجع نشوف اش كاين..

اشراق : الى رجعتي ا دينيي معااك يااك..

فهد : بلااش نقد نمشي غير يوماين و نرجع، نتي حاملة دبا مخاصكش تبقاي تحركي بزاف..

اشراق : و تخلليني مع امنية راسي..

فهد : قلبتولي رااسي بزوجات مكتقادااوش، ا لالة الولييد كاين هناا مكاين لي يقرب لييك..

سكتات كتعوج ففمها و دوات بصوت منخافض : فهد بيني و بينك، عمي عادل معندو كلمة قدام خالتي امنية..

دور وجهو عندها مصغر فيها عينيه هي بلعات ريها خايفة تكون زبلاتها حتا سمعاتو كيضحك : هادشيي لي حاضية النهار كامل، معندك ما يدااار..

اشراق : و راه بصح مكاين ما يدار، ا نمووت بالقنطة.. 

جرها من ايدها حتا طاحت فوقو و بدا كيحيد ليها الشعر من فوق وجهها : شحال كتزيدي فيه، ولليتي بوحاطية..

اشراق : كنتشكاا بزااف يااك، و ديما مصدعااك، مغتخللينييش على هادشيي ياااك ؟!

ضحك جنب : حمقة علاش ا نخللييك.. !!

هزات ايديها الصباغة فيهم مزال منشفات مزيان و تجرات : شووف اش درتيليي شتيي، گااع تمسحات فحوايجك..

فهد : هانيا نحيدووهم.. 

اشراق بعدات عليه هازة ايدها و وقفات : انغسل ايدي و نرجع..

مشات غسلات حالتها و رجعات لقاتو بدل حوايحو و متكي غير بشورط عريان من الفوق، خاشي وجهو فالمخدة و مزير عليه، قربات عندو جلسات على ركابيها جنبو و حطات ايدها على شعرو كدوزها بشوية : كيضرك راسك ؟!

هز راسو باه بلا ميتحرك ابتاسمات و وقفات : ا ندير ليك مساج يخفف علييك 

مشات هزات زيت و طلعات فوقو كتماصي ليها كتافو و ضهرو.....

جالسة فبيتها كتقرا فشي كتاب حتا بدات كتسمع صوت الغنا و الضحك مجهد، نايضة الزدحة، خرجات بشوية من البيت كطل جيهة ليمن و ليسر مكاين حس حد هنا، زادت شوية كطل من الفوق على الساحة التحت و شعرها الحرير طايح قدامها، كتشوف البيفان دايرين بالساحة لي جامعة زوج صالونات محلولين على بعضهم و مراح طوييل الوسط، كاين عيالات كبار شادات البندير و دايرين خدمة الشيخات مكاين غير القعدة و الركزة كلشي حال فمو، اما البنات خدامات كيتسخرو على الكليان لابسات القصيير و ماكياج ليلي ثقييل و لي شدات فشي حد كتحط عليه و تبقا حداه حتا تسكرو يا بالشراب يا بالخير لي عطاها الله، كاين لي كتشطح و كاين لي تبوس و تعنق، منظر مألوف بالنسبة لاي دار دعارة بحال هادي، هزات راسها فاش سمعات سميتها كانت نسيمة، هاد المرة لابسة كسوة كحلة حد النص فالفخاد، مشبكة من جهة الصدر و عريانة كاملة من الضهر، لاصقة عليها و كاشفة كثر ما ساترة، وجهها مقاد مزياان جات غزالة و زادت بينات حروفها، قربات كثر لهديل عاد دوات : ختي نتي اش خارجة كديري دبا، الى شافتك لالة رابيعة مغيعجبها حال، نتي غزالة و الكليان لي شافك تعجبيه، متخلليهمش يغلطوو فييك و رجعي بحالك باش تبقاي هانيا فبالك..

هديل : اه واخا صافي، غير سمعت الصداع و خرجت..

ابتاسمات نسيمة و جراتها جيهة البيت : غيير سمحيلينا ا نخلليوك بلا نعاااس، و لكن هادشي لي موالفيين هنا و دبا عاد بدات السهرة متسالي و تفرق حتا يوذن الفجر، يللا سيري ترتاحي الى جاك الصداع بزاف خودي القطن ديريه فودنيك، كنديرو فاش كنكون مريضة باش نعس فخاطري ههه..

هديل : ههه واخا علااش لااا..

رجعات لبيتها و سدات عليها، حيدات الگاندورة لي كانت لابسة و بقات بدو بياس كيف عادتها، تكات فوق السرير على ضهرها كتشوف فالسقف و ساهية موحالش يديها النعاس هاد الليلة بكثرة التخمام..

يتبع...