جيت وجبت لييكم معايا قصة كومييدية وهي اول تجربة ليا في عالم الكتابة ويااا ربحة ياا ذبحة قال ايه من عاشر قوما صار منهم......قصتي مافيها لا فيلات لا طيارات لا طوموبيلات .....هي قصة بنت حي شعبي الا طلات من شرجم طل على جيراان ...والا مشااات حتى نقزاات من السدااري يتقطع علیهم الضو....قصة بنت فاتت الثلاتينات لا زواج لا خدمة لا سعد مگود .....ققرات تشاطر معاكم نهاارها وزبايلهااا وفقايصهااااا
👰 سعد البايرة 👰
✏ بقلم ....اميمة الغزواني
في حي شعبي كيتوسط مدينة الرباط و بالضبط في دوار الكورة كتواجد واحد البنت عندها سمية ثانية بلا ذبيحة الغادي و الجاي يعيط ليها بيها الكبير و الصغير يقوولها ليها لدرجة ولا لي داز من حدا دارهم يتنسى دقة من حيث ... كيف ديما و مع كل صبااااح تفيق بغوات مهااا عبوووش
عبووش ..." واقفة دايرا عكستها و هازة مغرف في يديها" ... ا عيفة البنات و العيالات .. نووضي الله يغبر ليك الشقف
مليكة ..." ناعسة لابسة غا سليب بلا سوتيامات وشادة في بزولتها" ... مالك اعبووش اختي حرشووك علييااا اش بغيتي في هاد الصباح
عبوش ..." طارت ليها على شعرها" نووضي طوي فراشك وجي عونيني رااك خريتي وجلستي عليه متنفعي متضري كيف حليب لحمارة .. گاع بنات الناس تزوجو و دارو علاش يرجعو و نتي بقيتي بايرة ليا هنااا
مليكة ..." تكات على كرشها " هاااه شوفي اعبوش تا انا دايرا علاش رجع " كضرب في طرماحتهااا"
عبووش ... و اش درتي بيهااا والو جالسة ملسقاها مع اللحوفة .. الجنس القصيف و دابا نوضي تابعنا شلا وبلا والي شوية يبداو يتكبو علينا نااس
مليكة ... " حيدت عليها الغطى ووقفت قدامها" .. واااا مي استهدي بالله و قلبي ساعة بختهااا .. نووض نموت ولا نسخف شغلي هدااك شي يتزوج شي تجي فيه
عبوووش ... كلمة و قلتها غتنوضي تعاونيني في عرس خوووك ولا نوريك ..
ناس يصبحو على الورد....وشي يصبح على بوسة في الخد وانا من ديما كنصبح على ديسك حياتي مدرتي مفعلتي ماتي كي....گرانک تزوجو ونتي برتي ليا هناااا وهادا هو حالي وحال بزااف بنات بحالي لبنت منا تفوت الثلاثينااات كيجيها اليأس قبل من سن اليأس...وكتولي على نقشة وخاصها لي يجبدهااا ...وبسيف وهي كتشووف راسها مدگات وتاد مولدات ولاد ...قل من ستة سنين ويفوتني قطار لحياة ونودع كلمة ماما منزيدش نسمعهااا مكرهت ترجع بيا الوقت اللور ونوافق على لعريس اللول لي قلت عليه حگا والواد قدی فی طول الا لبست الطالون غیغبر ...ولا لي عيبت هضرتو ولا لي معجباتنيش مووو ....كان يسحاب ليا الراسي غنطول في العشريناات غير نخيط ونفصل ونعزل راجل على گانتی حليت عيني وفرمشة عين لقيتني وصل لربعة وثلاتين عام والحالة هي هي لحاصوول لكلام كثير وسكت حسن
...
جريت رجلي لطواليط قضييت حاجتي وخرجت مقابلة مع المرايا لي كاينة حدا لباب هزيت شعري الفووق وعينيا في درب لي كاع شراجموو حاضيينا ملييكة.....اميييييي فين الصابونة ديال وجهي .. الله يغبر لييكم الشقف داها داك الحشايشي ثاااني نحطها رجع لقاها طارت
عبووش ... غوتي مزيان مزال مسمعو الجيران ....واتي سربي راسك قبل متعمر علينا الدنيا
علوش ... هزي شدگ دالخبز و الزيت و كاس اتاي راه قدامك
مليكة ... هاويلي على دلومي الصگع شتك امي اليوم عندنا عرس مكاين حلوى مكاين **.. غنقولها قد راسي
عبوش ... ايوا علاه نتي تحمشي سيري السطل لي في الكوزينة راه تحت البلاكار غتلقاي فيه تفرايت تاع لفقاص
مليكة ...... ايوا لاهما الفقاص و لا الخبز و الزيت ... اححح هاد البزولة كلاتني ميكون غا السلام هذااا .. هزيت لسطل حطيتو قدامي تنهز و ناكل و دوز بكاس ديال الحنطل كيف تنسميه .. فطرت و ساليت جمعت لي خاصو يتجمع وجففت الدار لحيس البگر خرگت جلابتی وقصدت صاالون نزيد نبين زيني ....
مغاداش نشكر راسي ولا نحگرو الا حطيتوني مع الخايبات نبان زينة فيهم ولا تحطيت مع زينات نبان المتوسطةة. غادة و عاقدة الحضاش تقول عندنا جنازة ماشي عرس .. ايوا هذا حالي نفرح لقرح و نكره الفرح .. كيف دخلت لقيت السلام و عينيا يتقالبو و نتحلف يا ويل شي وحدة نشوف غا شوفة مهياش . ...بنات درب كلشي تصااف عند لكوافورة مدلين زغيباتهم وطاليين وجهم
- تبارك الله على خت لعرييس لقووبة ليك تاناي نفرحو ليك ونجيو نصايبو كيف كتصايبو لعرس خوك
- واش ممشيتيش مع لعرووسة لصالون
مليكة..... " دفلت وسط صدري "..الله ينجيني اختي ثبت من مشيان مع لعريسات نجابت ليا غا لعكوسات تا ولاو قد بناتي يدعيو معايا
- تانتي كل فول يجيه كيالوو
مليكة ... " بضحكة صفرة سكتها ووردت عند مولات صالون "..خديجة ختي راني مزروووبة و ما عند جدي الوقت سبقيني اختي عندي ميدااار
عطيتها وجهي تلعب فيه هادشي مكان طاز عليا ولا فرحانة ليه حتال واحد في ميةة .....عيينا نطليو ونتقادو ونمشيو ونبانو في العرساات بالحق السعد الحار ..
مليكة ... ايوا اخديديج بشحال طلعتيني
خديجة .. راك عارفة امليكة البروشيغ و لاسيغ و المكياج شحال ولكن حيت نتي ديالنا اري غا 200 درهم
مليكة ..." غا سمعت 200 درهم غوت و خبطت صدري" ... اويلي اختي مالي غنطلع في تغريدة وراه غااا عرس الرعاوين " لاحت ليها 100 درهم " شدي و تسالي ا خديجة حتى لمن بعد ... خرجت و خليت مولات الصالون غتاكل جنابهااا .. غادية في الطريق و الكل كيتجنبني .. معروف علياا البايرة المجنونة نعطيك دقة نخليك شام ريحت السبيطار .. يديا يدين البناي .. كيف وصلت لدارنا لقيت الدفوع وصل و الدار تتنغل بالبشار .. دخلت عليهم كي عاصي ربي غير شافوني شي يخنزر و شي يدفل و انا هازة قنانفي السما تقول مرات الباشا ودايزا مشيت الكوزينة لقيت مي تتوجد و طيح و تنوض غا بوحدها ..
مليكة ... واااا مي تي مالك غيطرطق فيك عرق رخفي فيك النفس شوية
عبوش ... " ضارت تتشوف فيها و طلعاتها من رجليها حتى لراسها " ... هاي هاي هاي غاا بشوية عليك ابنيتي ليخصر ليك الجير ..." هبطت راسها تتقدي في لي كان في يديها و تعاير فيها " .. عند بالك بنت الوزير يا بنت الخانزة هادشي ما دارتو لي داخلة عروووس بقى غا البايرات
مليكة ... قطعي خيط الشر اعبووش و لا رجع جدها جنازة مطلعاش مطلعاش لهما الحبس مع جدكم .. تميت خارجة قاصدة بيتي و دزت من حدا الصالوون حتى سمعت بنت عمي تتهضر في التليفون مع راجلها و قاصدة تسمع ليا الهضرة ... بقيت واقفة حدا وجهاا تا سالات هضرتها "... ا بنت العميم لديريش ليا فيها عايشة في النعيم و جنان ضاير بييك ... وراه واخدك غا ما كينة الحرت .. الله يا ربي عمرنا سمعنا بهذا .. بقيت نتناگر معاها تا سمعت مي تعيط ليا باش يخرجو الدفووع...خرجت و خليت بنت عمي تضرب غا في الحيووط .. مشيت حدا الباب لقيت خويا لي هو العريس هاز مشموم ديال الورد و قدامو الهوندا عامرة من كل فن طرب .. غا شفت داكشي مشيت لعند عبووش و عينيا غا فردي و بغا يتيري ... أما عبووش غا شافتني بدات تقرا المعودتين في خاطرهاا و طلب ربي يدوز هاد العرس على خير
عبوش .. قياس الخير ابنت كرشي مالك مدلية وجهك و قصداني اش كاين
مليكة .." مصغرة عينيا فيهاا "... واحد مية وعشرين الف كنت خازناها في گرصوني الگرونة لي فيه الجيب .. عقلتي عليهااا
عبوش .." بدات دور في عينيها و تخطاتها ودازت علمت الدقايقية و الشيفور ديال الهوندا يتحركو " ... زيدي ا مليكة تترجعي و سولي علييها
مليكة .. أراه كيقوليك تبع الكذاب تالباب دار ا عبووش غا قضي .. و ميمتك الحنانة تا غطيح البطانة زيدي وفرحي بداك الحشايشي هو اللول...تبعت مي و انا تنعض في شرادلي غا بالفقصة .. تا طاحت عينيا على مول الدربوكة و سالو ريوگي .. بقيت نتشطح و نتحير حتى قربت حدااه و عينيا غا على يديه واش فيها الخاتم .. لقيتو لابسوو كحلت بالعمى تقولوني الى مكانش دايرو غيجي يجري على عودو و كيشالي .. دفلت حدا رجليه السيد ما فهم مالو السيدة بحرا كانت تحير ليه على كتافو تا تقلبت كيف زمان .. رجعت حدا مي كملت طريقي غا كنصفق بيدي تا وصلو ناالدرب لي مورانا .. لقينا ناس العروسة ملقيين لينا في الباب و عاطيينا صوابنا و عبووش تعنق و تبووس و تعيط على لي يبوس معاها ..بعد ما شطحو و تحيرو في الدرب و الناس شي معروض شي مخاصمين معاه وشي كيطل و يعيب عليهم مهم كل واحد عاطي حقوو حي شعبي و هكا باش معروف ...دخلنا الدار كملنا على ما بدينا في الزنقة و حتى بداو الجوق كيغنيو العلوة .. غا هوما بداوها و نضت لالة و زينت البنات سرحت عينيا بان ليا الزين و الفسورية حلفت تا نخليها على جدهم و شعاري هو لي جا بسم الله .. نضت درت موزون على وسطي و عطيتها التحيارت خليت كل شي فمو فيا ... هذا يضحك ليها انا نتفرشخ لييه وداك يغمزني نعاودها ليه و لي بغا نمرة نمدها ليه مهم سخية غير كنعطي ونمد ... او كيقوليك لي مشرى يتنزه مهم المشاركة ... داز داك النهار على خير بمساندة عبوش لي ولدها طول برزتو وهو شاداه البكية بالخلعة مني .. وصل الليل و تسالا العرس و كلا شد طريق رجعتو لخربتو .. اما انا و مي وخويا بقينا مع العريس و عروستو تا نديوها معانا .. غير حنا تمينا خارجين حتى وقفتنت مها
... لالة عبووش صبرو تمشي معاكم ختها الصغيرة راك عارفة العادة خاص السروال يخرج
عبوش ... اييه ا لالة مقلتي عيييب هاديك هي العادة و الصواب .. فقلب كلامهم دخلت و صطهم كي جهنم الكحلة.
مليكة ... اش بغيتو السروال غا الى خرج حني ليا بمداري تعرفي اعبوش المداري
عبوش ..." قرصتني من دراعي " ... منعروفووووش زيدي قدامي
مليكة .... ها هي غادة قدامك و دابا تعرفيه .." شدت مي من كتفها " شوفي اميمتي بنتك جالسة بلا زواج و بنت بنووت و كارهيني ولهيلا الواحد هو لي يزهى مع مخو .. خليت عبوش مورايا غير تدعي و تسيفط ليا ..تبعتني مي على طريقي تا وصلنا لخربتنا .. يا الله دخلت غنتلاح فوق السداري تا تمت قاصداني عبوووش و تتليمس
عبوش ..." تتمسح ليها في كتفها و هي تتشوق فيها بنص عين " ميليكتي حبيبتي حشيشة قلب ميمتها
مليكة ... ا والله لا لاحو وسخهم فييه ولا نعسو فيه هكاواا شي ينعس دايو قيام الليل و مرتاح و مليكة تنعس على الحلفة .. وا سيري امي خليني عليك الليل هذا بلا منخليو لي يسوا و لي ميسواش يتفرج فينا انا مشيت نتخمد تصبحي على خير
كيف عادتي و شكون مايعرفني مليكة البايرة صابحة نغوت و نحك على مرة خوويا غاا من التحت ... واقفة في الكوزينة و مرة خويا سعاد في صالة شادة تليفونهااا و تهضر مع صحاباتهااا تفقص فييهم و توريهم تصاور العرس .. "..هاي هاي هاي على نص ميترو ديال التوب .. قالك عرضنا عليه الفريك ولا دخل معانا شريك طفرتوو انااا و مسنوني في هاد الدار بقى غا نتي .. غا جوع و النوع .. تميت خارجة قاصدااهاا ونتحلف فيها
مليكة ..." حاطة يدي على يد نتبوزا قدامها " ...صباح الخير ا سعاد صبحية مباركة اختي .. كيف صبحتي ياكما معدبة و الجلسة ممريحاكش .. قولي احبيبة و شنو تشربي شي كويس ديال اتاي عويصير باارد
سعاد ..." تتهضر غا من تحت نيفهاا " .. شوفي ا ملوكة صباح هذا و انا ممسالياش لييك .. نيڤو ديالي و ديالك مفاوتين بسنوات ضوئية .. وزايدون كنضهر مي زامي " كتهز تيليفون قدام وجها "
مليكة ... برا و الباس علييك احنينتي هكاوا قالت ليك مي زامي تگعدي أوا تگعدي شمري على درعانك .. ياكما اختي جايبيني ليك نترس و نخدم سيادتك
سعاد ... " لاحت تليفونها ووقفت قدامي" .. ومالك اختي لاش تصلاحي لا خدمة لا زواج لا ولاد لا وتااد ... سيري سيري عمري شي براد ديال اتاي تلهاي بيه معندك ما يدار لاهوما تلهاي ..." دازت قدامي تتعوج وتمشى كيف البطريق" .. حيدي ندووز مقداش نتحرك اووف
مليكة ... اسم النبي حرصك .. هو على اساس وخدك بنت بنوت افيقي معايا رانا عارفة مسنونك .. و حفاري الدروبة شاهدين عليكم و جميع البراتش فيك ا يعقوب المنصور دخلتوو ليهم .. ولهيلا قالت ليك مقداش نتحرك
سعاد ..." غير سمعت كلامي الفار خرجو ليها من وذنيها " .. مليكة فمك سديه بلا مندير فيك يدي وداكشي بيني و بين راااااجلي
مليكة ... واا لي سمعك تقولي رااجلي يطيح ليه النص وهو غااا شياطة المجمتع .. لكان غا على داك الحترووف الله يطليك بييه تا رجليه ميغسلهم خخخخ أتفوو حيدي من قدامي الله ينوض عليكم ضرسة نشاء الله كترتووو ملي ولاو بنات الزنقة يتزوجو و الفنات و الغزالات بحالي يجلسو بلاش
سعاد ... واشتي نتي اميليكة بهاد الحقد ديالك و الكره لي فييك و هاد الشكل لي نتي فييه ..كوني اكييد الكبيدة مكاينش لي يشمك
مليكة ... يشمني ريحة العبار اناا .. واتي غا لكان ماركة بحال هداك بالصحة و الراحة .. هاويلي و الذباااانة الذبانة لدازت من حداه تموت ..جيفة وًانا عارفاه
سعاد ... ايوا اللهما جيفة و لا نبقى بايرة الغادي و الجاي بييك .. وآخرتك تموتي بيها و تكتب على قبرك بااااايرة
مليكة ... ايييه بااايرة بايرة بايرة و بشاني و مرشاني و شرافي اش يصحاب لييك داك مشقف الگدام غيتوب ليك ... وغا لا تاب ليييك اجي شرطي ليا بالفاس ... مشيت وخليت سعاد تحلف عليا تحرر عليا عيشتي و لكن هيهات ثم هيهات راني مليكة وًمن لا يعرفني نحررها على قبيلة و تجيني قليلة ... تمت داخلة عبووش وولدها و غير شافتهم سعاد جلست طيح في دموع التماسيح ..
عبوش ... ويلي ستغفر الله مالك سايرا دمعي
سعاد ... اش غنقوليك اخالتي بنتك تكرفصت عليا و مخلات فيااا غير لي نسات
خالد ... " خو مليكة و راجل سعاد غير سمعها تتبكي و تشكي فار دموو" ... شووفي امي ديك البايرة ديال بنتك شديها عندك و ربطيها بسناسل و الى مقديتيش عليها انا نربيها ليك ...مع الدخلة الصالون سمعت كلامو وآخر كلمة خرجت من فم الترعة
مليكة ... ا سمع اشياطة العجينة الى باغي التربية انا نربي ولدي و نعاود نختنو و نرضعوو گاع لابغيتي .. اما ديك نص ميترو لي حداك تجمع معايا قلوعهااا ولا تولي تشوفني في حلمهااا ...
خالد ..." تم غادي شدها من شعرها حتى حس براسوو ناعس في الارض و الدوخة شاداها .. تحنات طلعت فوق منوو شداتو من دوك جوج زغبات ليا داير
مليكة ... ااه ادوي يا رعواني يا خانز البيطان ااه باغي ضرب ختك كبر منك يااا مقطع الگراصن
خالد ... ااااي امي وا عتقيني و نتي تتفرجي
عبوش ... " طارت عليا تتجر و تقول ما جرت و انا غا سبع و كانو حابسينو " انوضىي البگرة معستي خووك
مليكة ... حيدي يدك عليا غنوض راسي ريحتوو تعطي .." ضرت شفت في مرتو" ... بقاي تفاگدي في زمانك راه ريحت گرصونو تعطعط الله يعطيكم شي عشرين عام غا حبس تواخر
كيف العادة حالنا هذااا جالسة في بيتي شادة مشقوفي بين يديا و داخلة نتفرج في سطوريات مون بيبي و صوفيا ... نموت على الفضائح و الشوهة بعد ما برگگت اش كاين و شنو مكاين طلقت أغنيتي المفضلة .. يا عمري لا يجوز و نغني على بووه حتى يجي هاد العمر و الى ما جا نخطفو .. يا الله نضت نشطح و نتعلم حركات جديدة حتى الى مطلعاتش نخدم راقصة في كباري ومالها راقصة ماشي خدمة ... يا الله نويت نشطح ديك الشطحة الغريبة ديال عوازة تا دخلت عليا عبووش بسطمتهااا ... تغوت وتلالي شي نهار نكركب حبها مع دروج العمارة
عبوش..." الحالة هي الحالة ديما نواضرها خارجين وتغوت" ... اويلي اويلي طفي الله يطفي ليك السعد ... بغيتي تردي ليا الدار مرقص ادوي
مليكة ..." غا سمعت حفيظة طرت و نزلت و مشيت لبست و تقاديت ايوا الواحد هو لي يفكر بعيد عندها واحد العزيز تحطيه عبو الجرح يبرى " .. هاني تبعاك امي غير خرجي ... غا خرجت عبوش سرفقت حناكي باش يطلعني السر و خرجت عندهم ... اهلا عمتي الغزالة و زينت العمات اش خبارك غبور هادي
حفيظة ... والو غا دنيا تتلاوح فيا من هنا الهنا
مليكة ... ايوا صبر اعمتي .. "هبطت عيني الطبلة لقيتها خاوية و انا نشوف في مي لي لقيتها حاطة يديها على حنكها و تتشوف ليا مصدومة " ... ويلي ا مي الطبلة خاوية .. ايوا نوض نعمر ليكم كويس ديال اتاي ... نضت تشمرت و عمرت كاس ديال أتاي و حطيت الصينية قدام عمتي .. هي تتناول و تهضر و انا طالقة ودنية معاها
حفيظة ... ايوا راني جيت عندكم اليووم نعرض عليكم ان شاء الله لعرس ولدي رشيد في الشهر الجاي ان شاء الله ... " غير هي خرجت هاد الجملة من فمها هزيت عيني في عبوش سيفطت ليا فلتر على مزيناتووو و بالكولور .. وطرت على الصينية هزيتها من قدامها
مليكة ... ايوا ممرگتيش اعمتي هادي هي بنت خوويا .. زوجتي اللول قلنا ما كاين باس .. الثاني قلنا تااا هووو هااااانية .. ولكن الثالت او انتي لي تتختاري العروسة لا سمحي ليا هادي ليهوود و مداروهااا .. نووضي نووضي لحقي دارك جاية تعرضي قااالك
حفيظة ... عجبك كلام بنتك امرت خوويا
عبوش ... بيييناتكم تفصال الكلام علاه باقا تنرضع فيها راه كتافها كبر من كتافي ..
حفيظة ..." تمت نايضة و تتخبط و ما عاجبها حال " ... ايوا ملي ولينا تجريو علينا من دار خونا ما بقى خير
مليكة ... و خوك الله يرحموووو بغيتيه سيري تبعيه و الى تلفت عليك طريق الروضة ندير ليك مخيط ليهااا .. وكلامنا هنا يسالي هزي بلغتك تحت باطك و شدي طريق الحيط تتوصلي لخربتك ... خرجت عمتي تتنخصص يعطيها العمى .. ايوا راه كيقولوها لا تيقة في تريكتك ابدا ابدا واش تريكتك تبغي ليك الخير .. اش خلاها المثال خيرنا ما يديه غيرناا و حنا غيرنا دخل وكلاه و نفس عليييه .. الحاااصوول جمعي امليكة وجهك ليفرسووه الكلاب .. يا الله نايضة نتخشى في بيتي تا تمت داخلة العروس لالة سعاد .. حلفت على بوووها تا نخرج فيها فقصتي و ما كرهت نشدها نبقى نريش نريش نريش تا نطيح حداها
مليكة ... هاي هاي هاي على العروس شتك عاد دخلتي البارح خرجي اليووم
سعاد ..." لاحت بزطامها هازاه في يديها قد السباط " مالك شاعلة غا بوحدك .. غا عقرب و باغا تقرص مشيت نشوف مي مانشوفهاش
مليكة ... و حطي طرماتك الارض يا ويلي العروس تتبت حتى كدوز سيمانة ونتي غا سلم عليه زرب عليه ... گاعدة هنا و السر لهيه .. وراه كيقووولوووها مكيعطي الفووول غا لي عندى ضراااس .. الله يطيركم علياااا
سعاد ... خالتي عبووش هضري مع هاد بنتك تفوتني عليها
عبوش ... قالت ليك الصح ابنتي البنت تجلس تبتت و تقال في دار راجلها اش خرجها من دارها
سعاد ..." ضارت شافت فيااا تطلع و تهبط " ... شووفي انا منديش علييك حيت انااا صغر منك و تزوجت و اما نتي قد ختي الكبيرة راها تزوجات وولدات ربعة الكبير فيهم قدي ... عاد نجي نتشاد معاك نتي
مليكة ... ا لا كان غا زواج الدل خليتو لييك .. بحال ديك الماركة لي عندك غاا الله يطليك بييه خانز و عيفة يجي يتكى حداك يقلب ليك سفاك على علاك .. اما اناا لالاك الى مكان راجل طوول و عرض و غير مووسطاااجو تتحلى بيه الرجولة اما الى هز فيا عينيه و ما تبورش شعر فشلووقي معندي مندير بييه ... اما زواج الهم و الدل جاوني سياد داك الشياطة لي عندك و كركبت بووهم مع الباب ... خلاصة القوووول خليني نعل شيطان ولا نخليك غدا في باب المحكمة طالبة الطلاق ... دازت من حدايا كطير متلفتاتش موراها .. تمت مقربة ليا عبووش و تتهضر غا بالحس
عبوش ... اويلي يا هاد الموصيبة بغيتي تفارقي خوك على مرتو .. بحرا ما ولا كيدخل بكري
مليكة ... شووفي ا عبووش فعايلك ديريهم مع هادي لي عاد جات جديدة ... راني منساش الگرصون الگرونة لي عرستي بيه لمشقف الگدام حيدي و لا نشد فيك في بلاصتها ...تي جمعي راسك ا مي و جمعي بزطامك تي غا حالاه و تمدي لييه ... و تدعي معااه و الدعوى الخايبة هي الله يرضي عليييك ... الله يديه اختي الله يديه
عبوش ... ومالي اختي العوينة ديالي هداك هو لي هاز ليا الهم نووض نشحشح ونعطيه سيري تتولديهم و دعي عليهم
مليكة ... تولدو الحناش مع اللفاع ان شاء الله تريكة الويل و الجوع النووع ... كحزت عبووش بيدي و مشيت الكوزينة نكمل تمارتي و نشقى على الحترف و لكن والله ثم والله تا يطوال و يعجبهم .. اما عبوش هزات جلابتها و ما عرفتها فين عطات الراس
جالسة ما عليا ما بيا مكملة تمارتي و مشيت لبيتي طويت داك الماريو لي ولا فين ما نحلو يغوت بالشراوط و درت مكينة ديال الصابون .. و ناوية كيف نسالي ندير ماسك في وجهي واخا يطرا لي يطرا نتهلا في راسي منعرف مسنوني شمن وقت يدق لهما نوجد راسي و نكون هي هاديك ... يا الله سكتت الماكينة بغيت نحيد الحوايج .. حتى كنسمع الباب تحل و مي تتعيط ليا
مليكة ... " مشيت عندها تنجري و هازة واحد العابية كحلة و بقوت تصبين منقوليكم باج ما نقوليكم گري " اويلي ا مي مالك يا كما دابزيتي مع شي قردة اليوم نحسبها ليها شحال من زغبة تتكتساب في داتهاا
عبوش ... "جراتني من يدي وسدت الباب "... ازيدي اوا زيدي تي خاصك غا معامن .. مشيت اليوم عند خالتك رقوووش مت ربيعة كي شتي بنتها راه عاد تزوجت .. تا هي شحاااا و هي بلا زواج تا قالو لينا راه جاها شي واحد خدام في وزين الفوطة خداها ..
مليكة ... راني مزااال مفهمت اشنو بغيتيني امي و مالي انا في هاد الهضرة
عبوش ... يا بنت كرشي هاد سلطية ديال اللسان لي عندك هي خلاتك هكاا
مليكة ..." و قفت طلقت شعري و نديه لهاد الجنب و نردو الجنب لاخر " مالي اختي كي جيتك غزااالة غزااالة غير سعدي و مسنوني لي مكوز ... وتي غا دوري فمك فمك و هاد الفم نهار خلقني بيه الله عارف لاش عاطيه ليااا
عبوش ..." شد في راسها و سبقتني و خلاتني واقفة تنشووف هزت يديها السما "... الله ا ميمتي انا عاقلة نهار خرجت في صغري بلا خبارك و رجعت قلتي ليا الله يسخط عليك ابنيتي ا عبوووش ... وا غااا رتاحي في قبرك اميمتي دعوتك وصلت و خرجت ليا في موصيبة كحلة ... شدتها بجرية و حدة و انا غا تابعاها تا وصلنا لدار خالتي رقوش لي تا هي غير صونات عليها مي و تمت هابطة تتجري ولبست جلابتها في الزنقة ... شفت تا عييت و ضربتها بطم نتبع هاد سفاج و مهيول تنشوفوهم في غاديين .. و كون تعرفوهم في غاديين تريكة قيمش.. كيف وصلنا لدوار الگرعة وسط البرارك و بالضبط الدلالة .. وقفت خالتي رقووش قدام واحد البراكة و دقت تلاتة الدقات غا خفاف
مليكة ... خالتي رقووش هاد الدقة لي درتي تتجيب النعاس .. حيدي نوريك الدقان “يا الله غنحط يدي على الباب طارت عليا عبوش بعضة من يدي خلاتها توزوز “... ا عبوووش راك غا تتجيني مي اما راني ندي السخط من عندك
عبوش ... ايوا تركني و جمعي يديك عندك .. يا الله غنجاوبهاا تا تحل الباب و خرج واحد الشارف بقا ليه غا نهار و يموت
مليكة ... عبووش شهادشي اختي بتزكري من ورايا هههه ختاريه غا نحيلة بعدا .. "جمعتها معايا بتليعة تا عينيا طارو بدموع لحمي زرق غا بعضان و قريص عبوش تمو داخلين و انا بقيت اللور واقفة تا جراتني مي و انا نتنر من يديها " هووووب ا عبوش هووب و لاواه جلدتي خليها ليااا مناوياش يشرگها شارف
عبوش ... بغيت ليك علي مومن ابنت كرشي و اخر يامك دوزيها في سنطرال ... زيدي دخلي دخلي في زوبية ... حدرت راسي و تبعتهم و يا ريتني ما دخلت .. صدقت عبووش جايباني عند فقييه ريحت دخاخنو تعطعط ... ايوا دخلنا لواحد البيت تم فين كاي قاد شغلوو .. جلسنا و مشا جاب شي وراق و شي ستيلويات الخشب باش يخطط لينا على القلب .. غا جلس قدامنااا و هي طير ليه عبووش على رجليه
عبوش ... انا مزاوگة ا سي الفقيه لما شووف من حالي و حال بنتي راها طالعة في 35 و مزال لا راجل لا والو و سعدهاا غادي و كيطفى معرفناه من عند الله و لا من عند العب .. وجينا و طالبين رجاك .. غا شفت مي هكاك و انا نطير عليهاا رجعتها لبلاصتها
مليكة ... و عبوش جهلتي و لا جهلك الدخان تي مالو غيدخلني نخدم في لامارين ويلي على شوهتك و شوهتي معاك
عبوش ... سكتي يا بنيتي راع ببراكتو
مليكة ... لواه بزن... غنقولها قد راسي سكتي خليني نسمع اش غيقول ... ايوا سكت عبوش و هو غا كيشوف فيااا شوية و هو يبدا يتگرع زعما راه طلعوه الجواد ... و هو يبدا يسول فييها و هي تتجاوبو .. وًانا عقت ليه بقوالبو و حلفت على بووه اليوم نتوبو نخليه غير يسمع حس مليكة يحط جبهتوو الارض ... قاليا قربي عندي وعطيني يديك .. درت داكشي لي قاليا وعطيتو يدي بدا يقرا فيها و يبخ و انا تنقوليه غاا بخ تتكمل .. يا الله بدا يقرا شي خزعبيلات و انا نطيح ليه تم تنتركل جا شدني من عنقي ..
مليكة ... طلق طلق يا الكذاب يا المنافق اليوووم نخرج على والديك اليوووم
الفقيه ... من انت يا عدو الله اخرج اخرج
مليكة ... هاهاهاهاها اناا ميموون الى معرفتينيش نعرفك براسي و اليوم نوقف عليك و نخليك على الضس .. تتخدم بسمياتنا و بكدووبك اليوم نصفيها ليك ... ا هو غا سمع ميمون و هي تشدو الرعادية مشا عند عبووش قاليها انا جاي و متقربوش ليهاا .. غير هو خرج و انا ندير راسي كنفيق .. جات عندي رقوش و مي كيسولو فياا .. هو سمع حسي فقت و تم داخل منزل گمگومو
الفيقة ... لالة عبوش هادشي لي في بنتك هو لي ممخليهاش تزوج وصعيب و حتى انا هددوني مغنقدر ندير ليها والو .. نا عليكم غير بالرقية الشرعية و الله يشافي ... خرجت مي تتبكي و رقوش تتسكت فيها و انا نرجع ليه غا شافني قفز .. بيا ولا بييك الشيبة العاصية .. تبعتهم على برا لقيت خالتي رقووش متكية على مي تتعمر ليها راسها بداك المرض ديال الفقهى .. بقيت واقفة بعيدة عليهم شوية تا تمت جاية عندي عبوش
عبوش ... هانتي ابنيتي غنبقى معاك تتفكي راه رقوش قالت ليا كاينة وأحذ الشوافة دقة ببطلة .. قالت ليك العريس يتم جاي واخا يكون قاطع البحور
عبوش ... علاش لي منتيق و بنت رقوووش ربيعة تا قربات لربعين و تزوجات
مليكة ... تنقول فييك شي عرق مكلخ و اليوم تأكدت و بنت رقوش ربيعة داك لي خدام في وزين الفوطة راه طيحت مع تلاتة الكروش عاد جا خداهااا زيدي راسي ضرني تفووو ..
عبوووش ... هاويلي على تلاتة الكروش هكاااوااا و انا يصحاب ليا دقة الفقيه .. تميت جارة مي تا تبعنا رقوش
عبوووش ... علاه بنتك خداتو بدقة الفقهى ولا بدقة المعلم عبد السلام .. ايوا خليت مي ورقوش بقى ليهم غير يتشادو من الريوس .. الواحد لهلى يدخل بشي خيط بيض .. ياك كحلة ايوا نكحلها على كل شي .. رقوش كانت باب جايب ليا البرد هاني طرقتوو اليوم .. مشيت فكيتهم وجريت مي لي الطريق كلها تشحشح و تعطي لرقوش او انا معاوناها
مليكة ... اييه اعبوش يا النية غا لي جا يديرها بييك .. شكون قالك متكونش متافقة مع دوك الفقهى و يديو ليك رزقك
عبوش ... " جلست تتندب في وجها " اويلي اويلي اويلي على قباحتك اعبووش كلهاا مشات في الزيرو جات خانزة ديال الخلا و بغات تلعب عليا ... بالحق دارتها ليااا تبوريتك ابنيتي
مليكة ... عبوووش ساليتي من رقوش ضرتي ليا اناا نبور ولا نجلس سووقك يا كما كنخرى ليك في سدادر ... "وقفنا باش نقطعو سكت الطرام و هو يتم جاي " تعت لي يلگيك ليه بداك الفم عندك غا تاع التهراس
عبوش ... ايوا راك ديريهاا و تدي السخط
مليكة ... انتي غا فين ما تبغي تحل بين سنانك تقولي ليا السخط .. كاين شي سخط خيي من هذااا ايوا زيدي الشمش طنطنت ليااا راسي ... سيري ا رقوووش الله يعطيك فاش تلهاي ان شاء الله .. و انا تنهضر تا حسيت بعبوش وقفتني
عبوش..." مصغرة عينيها فياا " ... وقفي توقف ليك في الحلق ديك الطيحة لي طحتي عند الفقيه غا كدبتيها ابنيتي
مليكة ... ايوا هنا تعرفي طريقك اللارووب ا عبوش غادة بيا عند فقيه ما يعرف من الطايحة من النايضة
مليكة ... ايوا راك سخية و فلوسك تتعطيهم غا لداك العفريت لي عندك ... ويلي ويلي راسي طنطن انا غنشد طاكسي تمشي معايا و تجي على رجليك .. غا شافتني وقفت طاكسي وركبت جات تتجري طلعت فيه
عبوش ... بنت بووك و طسيلة بووك فيكم فعايل ديال العقارب .. ايوا موصلنا لخربتنا تاا راسي غيتشق على عشرة غا بالغوات و الشمش
وااا عبوووش يا ويلي هادي كلها طواليط تقوليك تتولدي .. ايوا هادي هي تسحر مع دراري تصبح فاطر هي ديالي مع مغميتي .. جالسة منشرة تنصبغ رجلي قالت ليك يوووك نوضي معايا عند الخياط عابد في القيسارية نحط جلابتي .. قالت ليك نتي لي تتعرفي لييه غير كيشوفك تتلف الهضرة .. درت ليها الخاطر و نضت لبست حلاسي وخرجت نتسناها .. نوضي اعبوش شداتها الكرش و سكنت في الطواليط وخلاتني جالسة نش في الناموس لي بغى يبووس .. ساعة عاد تمت هابطة شادة في كرشها
مليكة ... ساعة اعيباد الله ونتي مخشية في الطواليط .. اش ولدتي التوام
عبوووش... سكتي الصگعة قتلاتني الكرش
مليكة ... ايوا غا لا مبغاتش طيح هاد الكرش ونتي تگيتي على گصعة ديال الدلاح بقيتي عطي الباباه وعطي ليماه
عبوش ... قتلتني قتلتني ..تمت راجعة الدار
مليكة ... والله وترجعي. تانطلع نكوز ونخليك زيدي قدامي خلاص .. خليتها تابعاني وتدعي فيااا ايوا راه قالوها دير خير ما يطرا باس .. وًانا شخرجني في عاد الشمش غا هي بالحق غا بلاتي .. الطريق كلها و هي عقلها يفصل و فمها يخيط تا تبخت ليا المخيخ .. غا وصلنا عند عابد الخياط و هي تولي تبربص و دفع فيااا ... اما هو غا شافني تقوليه شاف جن
مليكة ... سي عابد اش خبارك الامور هانية
عابد ... ختي مليكة لباس علييك صحيحتك لباس
مليكة ... خلخل الله عضامك احينيني انا ما خت حد ..." جبدت التوب و حطيتو قدامو وجريت مي من قبهااا " زيدي قوولي ليه شمن خياطة و نتي تقبتي ليا الضهر اختي
عبوش ... العيالات ولدو البنات وًانا والدة لفعة
مليكة ... ملي مزال مقرصتك غاا مكرفصة على سميت لفعة .. دابا جينا من الاخر و قولي ليه اشمن خياطة بغيتي ... عاااد ارا داك الكتاب لي حداك تشووف .. مد ليا الكتاب وهو الرعدة شاداه معلووم مع اخر مرة عطيتو يخيط ليا جلابة عوجها ليا من الجنب .. خليت بوووه شهر وهو هاز يديه .. بقات مي شادة داك الكتاب قلباتو عشرة المرات عاد عجبها واحد الشكل .. ايوا تفقنا مع الخياط و علمها من هنا لعشريام تجي تديها ... تمينا خارجين من عندو حتى بان ليا واحد الزين المسرار .. شديت في مي و تمشيت تنقرب حدااه .. ايوا بقيت ندبل في عينيا باش يقوليا النمرة وهو هاز خنافرو السما .. وزاد كملها قاليا سمحي ليا الالة ندوز .. اييه اسيدي دوووز دووز ... خليتو حتى داز من حدايا و انا نغوت حتى من عبووش ما عرفت راسها باش تبلات غا شافتني غوت وتلاحت شنقت على الدري
مليكة ... شديه امي شديه ولد الحرام قاليا سمحي ليا ندوز وهو ناوي يقيصني من اللور
عبوش .. كيفاش قاصك من اللور " عبوش هي داك المساند الرسمي الصداع شدات الدري تتريش و تعض و جمعت عليه عيباد الله .. بقيت شادة فيه تا جاو البوليس .. والله يا ميمتو لا دوزت ليه سمحي ليا ندوز الالة ... تمو جايين البوليس و انا نطيح سخفت و بديت ندمع تا وقفو ليا فوق راسي
البوليسي ... مالك ا مدام شنوو عندك
مليكة ..." غا سمعت ا مدام و نخنزر في" ... اول حاجة انا مازمزيل ماشي مدام وثاني حاجة هاد الاخ خورني
عبوش ..." قربت ليا حدا ودني " ... هو تشوهنا تشوهنا غير زيدي بهاد خورني ولكن عليا بليمين ما خورك ... عجينتي و انا عارفاك .. قرصت عبوش باش تسكت و قالو لينا البوليس غنمشيو في سطافيط
مليكة ... هانتي اعبوش غتركبي في العمارية زيدي زيدي هههه
عبوش ... ايوا السبيطار و مشينا ليه و الروضة مشينا ليهاا بقا الحبس ها حنا اليوم نباتو فييه دعيتك الله هو يا خد فيك الحق ...
... إيوا وصلنا الكوميسارية و دخلوونا عند الشاف الكبير ديالهم و الدري شاداه الرعادية و مرة مرة يضور يزاوگ فيااا .. و لا يضور عند البوليسي يحلف و يعطي لراسو ما حط يدوو علياا .. كيف دخلنا عند شاف و بانت ليا كترت السين و جيم و جاني الصهد و انا نجلس قدامو و تندبل في عينيا
الشاف ... " غا هز فيا عينيو و انا نعض على شلقومتي اححح الرجولة يا خواتي " واخا نعرف اش جابكم عندي الهنا ... يا اله غنجاوبو تا نقزت من مورايا عبوش
عبووش ... شووف الشاف نعاودها لولدي كي الخرافة خارجة انا وبنتي عوينتي تنتساراو داز هاد السيد قاصها من اللور و هادشي ما يقبل بيه الله و لا عبدو
الشاف ..." شاف فيا " ...كيفاش قاصك من اللور
عبووش ... خورها الشاف خورهااا
مليكة ... شووف ا شاف دابا مع انا حسااااسة و قلبي هشيش او واااقيلة غا تهيئ ليا خورني واااقيلة
الشاف ... كيفاش تهيئ ليك واش كنبانو ليك عندنا الگروون واش يصحاب ليك اللعب مع المخزن ساهل
مليكة ... ويلي يا الشاف موالفين تجيو حتى تسمعو الدم و انا غا قلت البوليس جيتو تجريو غا سمج لينا الشاف لهيلا
الشاف ... تگعدووو خرجو عليا و لا نهبطكم لألسكة فين تبردو
مليكة ... لي تجي منك سمن و عسل ا شااف تا انا قتلني الصهد و جات في وقتهااا
عبوش ..." نقزت عليها قرصتني من دراعي " ... سمح لينا اولدي هاحنا خااارجين .. ايوا نوضتني مي من تم غا بالكشايف غا خرجنا و هي تولي عبووش تغوت
عبووش... يااا ربي الله يجيب ليها شي راجل يطيرها عليااا .. سير يااا ربي غا لكانت نيااا و عندي شي جدووود يتگعدووو يفكوني من هاد العفطة الكحلة لي خرجت كرشي .. غاديا و تتغوت وتندب
بعد ما خرجنا من الكوميسارية و عبوش تشحشح و تسيفط ليا و انا عقلي غا مع داك الشاف لي شفت .. تا وقفت علينا صاحبة مي عيشة غا كنشوووفها كايطلعوني الجنون كنبغي نشدها نديرهااا تحت مني .. ولكن القالب غالب حالفة عليا عبووش قالت ليك گاع صحاباتها دابزتها معاهم بقات ليها غااا هادي .. ايوا زدت وسديت فمي و طلقت ودنيا معاهم واش سائرين يقولووو .. عبووش تقول گاع مشاكل الدنيا تقاداو ليها وهمها الوحيد هو اناااا ... ايوا شديت عكسة في راسي و قربت ليهم باش ودني تسمع مزيااااان
عبوش ..." تقوليها قاصتهااا في الجرحة جلست في الطروطوار وتشكي و تعاود " ... اش غنقولك ا عيشة ما بقى ما يتخبى غا الخبز و الما را حنا فرقناه بجوج ... مزال ما جاها تاا سعد مگورة والو يا ختي ... غا خوها تزوج و هي ضل مشادة ليا مع مرت خوهااا شي نهار طيح البطانة عندي في الدار .. الله يجيب ليهااا شي بلاكيور فين يغبر صداها
عيشة ... تي اجي نقوليك سيري عند مقدمة الحومة راه تتجيب العرسان .. دي ليها تصويرة مليكة و على الله يجيب ليها شي ولد الناس يهنيك منهااا ..." ضارت شافت فيا" ... شفتك ا مليكة ساكتة ماشي منعوايدك
مليكة ... و اش غنقوليك مثلا راني غا مشهية نديرك تحت مني و نرفس ساعة ربي واقف معاك اختي غاا هضري و زيدي فيييه .
عبوش ... وا عيشة خليك معايا و زيدي شرحي ليا كتر باش نعرف تا انا شنووو ندير .. و هانتي الى صدقت راكي بحلاوتك يا و الله تندير ليهم فريع الطرح ... كنفكر غدا ولا بعدو يقبط الله الروح و انا ممهنياش من جيهتهااا
عيشة ... الله يطول في العمر ا عبووش ..نوضي بعدااا انا غنشرح ليك .. راه ساهل ما هلة زيدي نوصلو لدارك هبطي معاك شي تصويرة لمليكة و عطيها شي براكة و هي غتكلف .. ايوا بقاو حتحت الطرق كلها و هوما على الهضوور غير وصلنا لدار خليتهم و طلعت تلاحيت فوق السداري ترمتي ضراتني اليووم غا بخيطي بيطي ... اما عبووش هزات تصويرة و مشات هي وعيشة لعند مقدمة الحومة واحد النصابة ما قال ليها ربي منين جيتي .. ايوا كيف وصلو عندهاا استقبلاتهم ودخلات مي في الموضوع طوول عرض .. وتعاود و تنوح الغابرة جبدتهاا غا باش تلقى ليا راجل .. المقدمة بلا عگز قالت ليهااا الراجل موجود و عطاتها تصويرتو .. و هي خدات تصويرتي و خرجات من عندها .. عبوش بقوة الفرحة شدت طاكسي صغير باش توصل عندي .. ما دقت ما صونات موالفة تنوضي من نعاسي باش نحل ليها وهي بسوارتهاا ... دخلت تتجري مخلية الباب موراها محلول و تتشالي بتصويرة و تزغرت
عبوووش ... ايوا هاني ابنيتي جبت ليك عريس تمناه كل حبيبة و بنت
مليكة ... اش جبتي ليا امي على حساب كلامك ميكون غت شبيه كمال كوزجي اوغلووو
عبوووش ... حسن منو حسسسسن فين بان كوزي ولا اش سمو قدامو ...
مليكة ..." نضت تگعدت ايوا قالت ليك حسن من كمال هكاوااا " ... ماطي ماطي ديك التصويرة نشووف اش جبتي ..." غا شديتها في يدي ضربتهاا بتخنزيرة في مغميتي " ... عبووش باش تقولي ليا حسن من كمال لااا قولي ليااا حسن من محماد الگلاي نتقبلها ولكن طمعيني لااا هي لا
عبوووش... " حيدت جلابتها و جلست فوق السداري" سيري جيبي ليا كاس الما نعتق بييه و انا من الكوميسارية هادي رجلي عند المرأة .." ايوا مشيت نجيب ليها الما تميت راجعة تكنسمعها تتهضر في التيليفون و تنقز فوق اللحوفة .. هكاوا عبى عبووش مبقاش فيها السياتيك حطيت داك الكاس و جلست نتسناها تسالي تخوي ديك المزيودة " اش تم ا عبوووش
عبوووش ... ياا و الله تندير ليهم فريع الطرح و نخلي العديان يموتو في سمهم
مليكة ... ديري ليهم نتي السم من دابا لاش غتسناي تا ديري فريع الطرح ... وااا تي خويييهاا امي
عبوووش ... نوضي وجدي ليا راسك العريس جاي اليوووم .. مخلاتني تا نجاوبها نقزت الكوزينة و مشان طرگت بيت العروس جراتها من شعرها مجرجراها الكوزينة .. و انا سيفطاتني لبيتي نلبس و نتقاد .. ولكن نكدب عليكم فرحت حيت سعدي تگعد و غنخوي هاد الدار و نتجمع مع زماني واخا غا في باياص هو الاخر ايوا مشيت نقاد حالتي و نتزوق ... ساليت و كملت هبطت لقيت عبوش كدگ في مسمار في الحيط .. قالت ليك اودي باش يدگ الوتاد ماااا سمعنا بي هذا ... شوية تنسمعو الباب سرن سرن ... مشات مي تحل لقاتو العريس مع موو اسقبلاتهم احسن استقبال تقوليه الوالي الصالح لي داخل تم داخل و انا متبعة ليه العين شفت شي حاجة ما هياااش قلت بلاتي ا ميليكة لا تزربيشاي تتأكدي .. شوية ها مي داخلة عليا بقالب تاع السكر هزات المهراز دگاع منو شوي و قالت ليا هاكي خشيه في عبونك ...
عبوش ... شدي هاد السكر جابوه دار العريس ديريه في عبونك واريه ليا نعمرو بيه اتاي
مليكة ... لاواه نخشيه في فشلوقي ماشي عبوني تي اش سايرة تتصنعي
عبوش ... " خشاتو ليا بزز مني " ... ولدت بگرة و حطيتها هذا ا لالة باش تبقاي ديما حلوة في عينيه .. ايوا بقيت غا كنشوف في هاد الاختراعات عمرات مي اتاي و سعاد ستفات الحلوى .. و عطاوني الصينية ندخلها ليهم ... ايوا جلسنا و مي و مو تيهضرو و خيطو في الكلام تا تم خوويا الخانز داخل ... تلفات ليه مرتو في الباب علماتو جاو فيا الخطاب ... ضربها بتزغريتة في الباب بالحق والله لا بقات في ميمتو غا بلاتي ... هزات مي تنخوي في اتاي و انا نحبسهاا
مليكة ... حبسي امي واحد الدقيقة قبل منشركو العام بغيت نهضر انا وياه الى كان ممكن .." ووركت عليها حيت رجلي يعلم بيها غا الله بالعفيط بگدام عبووش دايرين كي المحكة ... ايوا داكشي لي كايم نضت انا وياه البيت الثاني السيد عندو واحد المشية تشووفيه نتي تنگي علييه ... ولاو شكوكي كيزيدوو ... جلس ودار رجل على رجل
العريس ... سلام لباس مهم شووفي الله يجازيك بيخير اناا طول عمري مهلي في راسي .. ونموسة الى قرصتني تتديني ماما السبيطار و ميمكنش ليا نعيش معاك في ظروف القهرة .. خاصنا نتافقو مزيان عفاك
كان كيدوي ويلاوح بيديه صافي هنا و قفت و خرجت عيطت لعبووش تجي عندي .. غا سمعتني جان تجري
عبوووش... انا مزاوگة الراجل متتعيبو تا حاجة زين و الطولة و العرض و خدام .. وقالك اصلا الراجل يعيبو غا جيبو ايوا هذا جيبو راه عامر
مليكة ... لا اعبوووش الراجل كيعبووو زنطيطو ماشي جيبو .. واش هذا غدا ولا بعدو واش انا ندير ليه الدخلة ولا هووو ... غتمشي تفرتكي عليا هاد الجوقة قاليك ناموسية الا قرصاتو مو كتديه سبيطاار بغيتي الا سلمت عليه غدا ةلا بعدو وقرصو موسطاجي لحرش يدعييني هااا مزوجةة رااجل ولا هو مزوج راجل
عبوووش..." بدات تخبط في فخادها و حناكهاا " ... تي اش سايرة تتقولي ا بنت كرشي دووزي قدامي و غضربي الطم
مليكة ... هكاوا على الطم لاواه اللم امي واش اعيباد الله عشرين عام و انا نتخير في الرجالة وأحذ يمشي وواحد يجي اخر يااامي ناخدو انا مرجلة عليييه ... واش ا عيباد الله كلامي تيتفرق بين الرجال نتزوج بواحد حساس و تيتكى على كرشووو ... دوزي فكي هاد الجرة لي درتي قبل منختنو ليك هناااا
واش اعيباد الله ما نديرش براد تاع اتاي و نجلس نتنشوى علييه ... يا الله عمرت واحد سيدي بريريد و الدار فيها السقيل قلت الله سا مليكة نهارك هذا ودنيك يبردو من ديك نص ميترو تاع التوب و من نگير عبووش .. لي هزات صاكها كي شيخة السواق و مشات لعند خووها لتمارة .. يا الله غنحط الكاس في فمي تا كنسمع واحد خيتي كانت شحال هاادي دايرا فيها بنت دارهم والواحد الصباح كنسمعو الغوات باتت ما صبحت طجت الامارات خليكم منهاا ما عندكم ما ديرو بيها ... ايواا جلست نتحسس انا غا سمعت صوت عرفتهااا .. مشيت جيهت شرجم باش ودني تسمع على خاطرها و يلقى نيت لساني ما يعاود .. بقات يديها في الباب بالدفاع يا الله غنطلع نقوليها ما كايناش حتى كنسمع تسلام و غبورات هادي ...
سعاد ..." تتعنق و تبوس فيها " ... اهلا راويا كيدايرة لباس عليك ... زيدي اصحبتي متبقايش في الباب
راويا... لا اصحبتي غير خلينا هنا نخاف نجبد ليك الصداع مع دار راجلك ولا شي حاجة
سعاد ... تي زيدي اصحبتي يقدر شي واحد فيهم يدوي .. هكاوا راني قاطعاها فيهم هنااا .. اصلا راه راجلي حبيبي كتب ليا دار وولات ديالي تنتسنى غير وقتاش نكركب مو وختو مع الباب ..." ايوا هاك على نص ميترو اش سايرة تقول ايوا واخااا غا بيا ولا بيك الحبيبة ألبي ... رجعت لديك الصينية و ديتها معايا لبيتي .. وهوما دخلو الصالون الاخرى تغني ومرت خويا تلحن ليها ... مهم كتاشفت مشقق الگدام ديال خويا عندو طموبيل فورد فوكيس ... لقا تا باش يخيط سليبو ماشي حتى يشريه .."
راويا ... ايوا نتي عاودي ليا كيفاش درتي حتى درتي ديك البايرة تحت رجليك ... ناري يا ختي عنداك تكون هنااا اليوم تبيتنا في الرودة عندها شي دقات يا ختي ... لمشات حتى ضرباتك غيو يقراو عليك
سعاد ... غير سكتي ديك البايرة غا ما زايدة فيه ولكن بيا ولا بيهااا .. وليت دايراها في هاد الصبع الصغيور تتمشي الى قلت ليها تمشاي
راويا ... ايوا ميتسالكش اصحبتي اجي نتي نهار لي هزيت فيه راسي من هاد الحومة البريئة عرفتي شحال تسنيتك حدا كوليج ايميك ... جاية لساعة و الصرف وًانا في داك الضلام
سعاد ... غير سكتي على داك النهار الكحل علاه انا ماشي تا جمعت صاكي و تميت خارجة و حصلني با في الباب .. لي كليتو داك النهار شافو ليا الله و زاد كملها حبس عليا الزنقة بصفة عااامة و نهار بغيت نخرج تزوجت بداك المعفون ولد عبووش ... ولكن ما عليش راه بدا كيترقع و يبان ..." ايوا خليتهم كيهضرو و هزيت داك الفردي لي عندي لي هو التليفون و سجلت كل حرف خرج من فامهم ... انا غراضي بنص ميترو لي قالت ليك دايراني تحت الرجل .. خليتهم تا عمرو الطلبة و تميت داخلة عليهم غااا شافوني اللون تخطف ليهم من الوجه "
مليكة ... اهلا اهلا اهلا بالهاربة و الهاوية لالة راويا تي اختي شمن قرينة شداتك
راويا ... هااا اهلا ختي مليكة لباس عليك والو اختي كنت غير في الامارات
مليكة ... العماراااااات وهاد العمارات اش كنتي تديري فيها
راويا ... اختي كنت خدامة كنمسح غا الطموبيلات
مليكة ..." مشيت طليت من الشرجم بانت ليا رانج ايڤوك تتعيط على العلوى" ... ضربي عاام في الامارات تتمسحي الطموبيلات وجبتي معاك ايڤوك موحال تا واش تتمسحيها تم
سعاد .. ختي مليكة جلسي تاكلي
مليكة ... نص ميترو تگعدي وجدي الغدا و الما سخون لراجلك و ديري فيه الما القاطع على الله ديك ريحة الرجلين لي فيه تنقص ... ووجدي ثاني ديك البرة و الخيط راك عارفة سبرديلتو تتجي مقطعة يضل يشفر و يهرب ..." ايوا خليت سعاد الدموع تكورو ليها في العين ...وضرت نكمل مع الايڤوك " ايوا ا راويا كملي ليااا .. تمارة يا ختي دوزتي باينة
راويا ... ايوا مسيح الطموبيلات ماشي سااهل ونتي مزال لا راجل لا ميمون
مليكة ... تنتسناك تشووفي ليااا شي واحد من لي تتمسحي ليهم زناططهم ااه سمحي ليا طموبيلاتهم باش نضربها بشي تزويجة .. اتگدي اوا تگعدي هادشي كدبيه على مك مع بام لي كل شهر تسيفطي ليهم في الفلوس باش تغمضو ليهم العينين ضلي دكي فيهم بالفلوس ... ماشي مع مليكة ولهيلا ضربت عام في الامارات دخلت معاها ايڤوك و خدات برطمة في الوفاق و قالت ليك مسيح الطموبيلات ... ماااا سمعنا بهذااا
راويا ... " ناضت تتسلم على سعاد لي بقات في بلاصتها بنفس البوزيسيو لي كانت فيها " ... بسلامة اختي سعاد ولينا نتعايرووو هنااا انا مشيت فحالي
مليكة ... ربي اراويا شوفي ليا شي واحد المعقوول تكون عندووو اللحية هههههه .. متنسايش تسدي موراك ديك الدفة ... غير خرجت راويا و انا نضور لمرت خويا و جبدت التسجيل .. السيدة عي تتسمع ووجها تيتلون " ... ويلي سعاد مالكي شفت وجهك ما شد تا لوون ... ولد عبوش المعفووون قرب يجي نووضي وجدي ليه ما يحنجر ... ااه هادي دوزتها ماشي دوزتها دوزتها ولكن تايجي وقتهاا ... باش نشوفو مليكة بنت عبووش واش كدار تحت السباط
سعاد ... انا مزاوگة لي في العزيز ستريني
مليكة ... واش في راسك ما عندي عزيز غاا تهناي لكان على تريكيتي نضل ندعي و مول الدعوى يشووف يطيرهم عليااا ... يا الله ساعتك سواتش نمشي نعس و متنسايش ضربي معاك واحد التسييقة لهاد الدار ...مشيت تركنت في بيتي و طلقت موسيقتي على جهدها ... جبدت واحد حوج دراهم زريعة بايتة واخا باردة ندوز بيها الوقت ... ويلي تنحس بالملل .. طلقت شعري و كحلت عويناتي الواحد هوو لي يضرب لحساب لكل شي شكون يقول يدوز سعدي و يشوفني و نطيحو من اول نضرة ... شديت الزريعة وجلست نقي وندخل من الشرجم ... لي دازت مكنحملش جدها تنجمعها نيت و نسيفطها ليها .. تا شوية بانت ليا مي فاطمة الفراگة خارجة مع ولدهاا ... هاكاواااا ولد مي فاطمة رجع من السبليون ... نقزت على مشقوفي نعيط لعبووش
ايوا طرت على مشقوفي نعيط لعبووش ... باقي تا ماسعت طووط صمكت ليااا الوذن ...
عبووش... ااااااش بغيتي لاش تبعاني تالعند خويا .. ياكما قتلتي شي حد اناري .. وهياااا خووويا عتق اخر يامي نولي نتسارا في العرجات ما عندي تا فلوسها
مليكة ... وااااا عبوووش راه غندي من عند جدك السخط تي سمعي و حلي ودنيك
عبووش..." تتقرا في المعودتين و تدعي الله " ... يا ربي يا ربي يا ربي السلامة .. يا الله قوولي
مليكة ... من حشووونك امي هاهااااي ها واحد لزيرو .. واا عبوووش شدي طاكسي وهبطي .. واه عمر لي في السبليون لي جااا اجي باش نمشيو نطلو على خالتي فاطمة
عبوووش ... خلل ليك الله الضراس مع العضام علاه خالتك فاطمة ما ريشتيهاش داك العام
مليكة ... ها حي على ريشتها واتي غا جي نديو السكر حشوومة نتصالحو مع خالتي فاطمة درويشة
عبوش ... انا اصلا مسخووطة وداك السخط لي سخطت عليا مي راه سايرة تنصرف فييه ... حيدي بعدي مني انا جاية .. ايوا قطعت مع عبووش مشيت ضربتها بتدويشة .. وخرجت نشفت شعري و قاديت حالتي و بقيت تنتسنى في مي .. غا سمعت الغوات في الدرب عرفت عبووش وصلت .. ملي تم داخلة و هي تغوت تتوصل لباب الدار .. غا حلات الباب و عطاتها الغوات
فاطمة ... ايه مرحبا بيكم دخلوو الله يا ودي .. يوا دخلنااا وجلسنا هي واخا شبعات فينا تخنزير ولكن كبرات بيناا .. نايضة باش تعمر ليناا اتاي حلفت عليها تنوض انا نديرو .. ايوا نضت و هزيت داكشي ستفتو و عمرت البراد و رجعت عندهم لقيتها هي مي طلقووو ودارو الما منين يدووز ...
عبووش ... اختي فاطمة الواحد شغايدير من غير يصبر ونتي بوحدك دابا گاع وليداتك خرجو صبري
فاطمة ... و الحمد الله واخا وليداتي ممخليني نحتاج تا حاجة ولكن نبغي الونيس ... ولدي عمر بحرا دخل اليوم الصباح المغرب
مليكة ... عمر جاا على سلامتووو اخالتي كيف داير صحبتو مزيانة كياكل شوية ولا باقي كيف كان
عبوش ... ايوا على سلامتو غير يونسك شوية
فاطمة ... اييه راه جا هو و مرتو ووليداتو يدوزو معايا هاد للعطلة ... " عبووش سبحان الله فين مااا نتزدح تسيفط ليا صبع "
مليكة ... علاه عمر تزوج .. بغيت غا نسولك اخالتي .. بعيدا على التريشة لي ريشتك واخا تستاهلي ... زعما كنت نضل مجمعة معاك نتي وداك المخنن ديال عمر .. خمسنين و انا وياه خيطي بيطي في الزناقي هادشي نتي عارفاه مقدرتيش تقوليه ليه لاااا اولدي كون ولد الاصل و خود مليكة .. لي معاك من الصغر ولا توما اصلا معند بوكم اصلا .. " جمعت الوقفة " ا نووضي ا عبووش
فاطمة ... علاه شيصحابليك ابنت عبووش راه غادا ناخدك ليه
مليكة ..." مشيت تا قربت ليهاا " ... فاطمة تتقلبي على شي قتلة ديال صحاب الملاح راني موجودة ..
عبوووش... مليكة زيدي قدامي والله يا ميمتك لا بقات فيك انا كنت نسيفطك تقراي ولا تحفري الطرقان ... تمينا خارجين و انا نرجع الكوزينة هزيت گاع داكشي لي خدينا ... هكاوا على ولدي و مراتو و انا جايبة ليها حلوة الكراميل تاكل فيها السم و العطبار .. ايوا غا وصلنا الدار شداتني عبووش من شعري
مليكة ... واااا الحفيظ واا عبوووش العفو الله مالك طلعوووك جنونك ثاني
عبووش ... ياك ابنت الحرام انا نسيفطك تقراي و نتي صلي تساراي ليا مع الداري في الزناقي .. و انا كنقول مال سبابط مليكة كيتكالو من اللور
مليكة .... تعت لي يديرك تحت منو و يدي السخط اش درت بيهم هاني خيطت الدروبة و لا ز ... سيري جيبي طبسيل تعالي نكرمو هاد الحلوة قبل ميجي المعفووون
عبوووش ... لتعايريش ليا ولدي هذاك راه زين الدراري الله يرضي علييه
مليكة ..." تميت غادة الكوزينة " ... الله يديه قالك يرضي علييه .. شمي شمي في گاع القنات تلقاي ريحتو كي الجيفة
الليل كولو و انا فايقة خيطي بيطي الطواليط قتلتني ديك الحلوى ديال الكراميل منعست تا صبح الصباح .. غا وصلت 9 دخلت عندي عبووش قالت ليك بغات تخمل و تصبن ..
عبووش ..." لقاتني ناعسة غا بسليب و شادة في بزولتي و تنضحك " ... بسم الله الرحمن الرحيم مليكة ا مليكة فيقي ابنيتي راني باغاك ... والو هي تتفيق فيااا و انا عاد مكنغرق بالنعاس ... ممولفاش على صويت عبوش هكااا الى منوضتني بالغوات و لا النتيف منرتاح .. ولكن باغا حاجتهاا راها تتغني عليا و تلحن ... جهد ربع ساعة و هي تفيق فيااا و انا على نفس الحال تا حسيت بصباعها في فخاضي " واااش انااا كنفيق فيك ولا كنعس فيييك تگعدي نووضي معايا نطلعو السطح راه الحاجة تحج على كلب عور ... غا سمعتني البارح تنقول باغا نخمل صبحت تتقرب في اللحوفة ولكن ميمتها لشدت السلوكة
مليكة ... نسولك وجاوبيني .. دابا واش باغاني نوض نريشك عاد نكمل بالحاجة ولا شنو ساير تيقولك داك الراس ... واش تا الحلم منحلمش تي عرفتي فين كنت انااا ولا معرفتيشاي
عبوووش .... معرفتش ومابغاش نعرف سوليني خلاص قبل مطلع ديك العقرووشة
مليكة ... سيري دي معاك مرة ولدك الحنين
عبووش ... علاه مدگهاش الصباح ملي كان خارج وهزات راسها لدارهم
مليكة ... " ايوا لي سمع داكشي لي قالت عليه راه يدگها بقا غا لي تقال علييه " اااه ايوا صافي انا جاية .. و معرفتيش علاش دگها
عبوووش... بالعمى واش بغا يقوليا .. شووفي فيا ا مليكة في عينيا و قوليا ماشي نتي لي نوضتي ديك القتيلة
مليكة ... غا لي خرا شي خرية تطليها مليكة زيدي امي خلاص انا سبقتك السطح تا داك كاس الحنطل مغنشربوشاي تنهبط .. ايوا دزت هزيت التيد او واحد الشطابة قصيرة باس نحكو الزرابي و طلعت سبقاهاا ... تا لقيت الحاجة مصبنة و ناااشرة و سالات ..
مليكة ... ويك ويك اليوم طيح البطانة .. " مشيت الدروج نعيط ليها " عبوووووش وااا عبوووش .. حضيتي تا عيتي ودارتو ليك الحاجة هههههه .. " غا سمعتني طلعت تتجري .. نفهم غاا مي لي تضل شادة ركابيها و راسها غا تطرا شي حاجة تتولي دردك .. غا دخلت السطح لقاتو عااامر
عبووش ... هاي هاي على الحاجة قالك علاه لي حاج كيدير هاد فعايل ليهود
مليكة ... حشومة ا مي راها حاجة زعمااا
عبووش... وا حشومة راها خت و مرت الشيطان .. علاه العام لي جا تمشي دير عمرة فيها شهر و نص ديال رمضان وتتجي مكيلة .. 11 عام و هي خيطي بيطي منين تيجويها فلوسو ... عليا بليمين تا كطلب في الحج
مليكة ... ا بسم الله الرحمن الرحيم صاافي تا هي مفلتتش ليك .. دابا طلقينااا اش غديري
عبوش .. اي غندير سيري سدي باب السطح هانتي غتشوفي اش غندير .." ايوا كيف ضرت نسد باي السطح بانت ليا عبووش هزات على بيجامتها و تتحيدت في سروالها "
عبوش ... وا سيري الله يمسخك المدودة ..." مشان طلعت فوق الزربية و بالت ليها فيهااا و ناضت لبست سروالها " ايوا دابا زيدي نهبطو تتهبط الحاجة زربيتها و حوايجهاا
عبووش... ايوا هي بغات تلعب معايا حشوومة نخليوها بلا لعب ... هزي داكشي وتبعيني نجمعو الدنيا و نمشيو نجيبو مرت خوك
مليكة ... علاه تا نمشي نجيبها ياكما دگيتها انا واخا كنت مشهياها نفرسها ولكن دابا تجيبها الوقت
عبوش ... زيدي ونتي بقاو الجناوح ديريهم و طيري ابنيتي الله يجيب ليك شي راجل لي يطيرك عليا
مليكة ... وا قلت ليك شحال لبقاش دعي معايا غا شديهم عندك مكاينش قد دووك الدعاوي لي خلاوني حداك ... "ايوا الدروج كاملين و حنا كنتناگروو" ... شوفي تسكتي ما تسكتيش ندوز عند الحاجة نقوليها راه مي بالت ليك على الزربية ..." غا قلتها ليها و هي ضرب الطم عارفاني نديرها و نفوتها لهيه .. ايوا هبطنا و جمعنا ديك الدنيا في الدار ... حتى كنسمع وااا مليكة و ااا عبوووش عتقووو ... جيت نطل من الشرجم كيبان ليا المشگف ديال خوويا هاز جنوية و مدابز ... يا الله غنضور نعيط لمي تا بانت ليا بشعكاتها وسط المدابزة محاميا هي ولدها على الدري .. هزت عبوش راسها في الشرجم لقاتني تنتفرج "
عبوووش ... واااا عااارفة راسي ولدت لفعة هبطي فكي خوووك
مليكة ... لا لا اختي علاه مال خويا يخوي ليه الضهر اش فييه ... راه لا مشيت حتى هبطت غتهزي نتي وولدك السبيطار هزي برهوووشك و طلعي و لا نهبط ندمك نتي وياه ... "دخلت وردخت الشرجم .. تا بانت ليا داخلة مع الباب و شداه فحالة هو لي كان كيتضرب" ... دويو يااا الكفارة شادين الدري قد الضفر تضربوو فيه .. ونتا هاز عليه جنوية واعر نتا ديك الساع سير دابز مع ولد العلوى لمااا لقيت جدك ناعس لي السبيطار و العالم الله اين واحد فيهم
عبووش .... بعدي ليا من ولدي راه هو لي جبدو وزايديون هادي هي الخاوى
مليكة ... واتي الله يقطعها هاد الخاوى گنس قصيف ... تي شووفي كي داير تا فين الرجلة الزمر فين ..." يا الله تندوي معاه تا بدا يدمع و باغي مرتوو توحشهااا ... ايوا هاااكي ا مليكة هاااكي " ... عرفتي امي ولدك سيري ديريه في الملينيكس و طحنيه على الله يترجل شوية
عبوووش ... " تتمسح ليه في دموعو و تبوس فيه وهو ريحتو كي القط" ... بغيتي مرتك واخا اوليدي بدل غا حوايجك ونمشيو نجيبوهاا معانااا ... مليكة لبسي جلابتك زيدي قدامي
مليكة ... ايييه مليكة عسكري في الدار انا هو داك المردة حميدة ..." مشيت لبست جلابتي على سواد و عدي تسنينا داك المعفون تا سالا و تم خارج لابس كومبلي ... مكاينش لي تيتقتلي و يفقصني قد رجليا لي غادين مع هادووو .. ايوا خرجنااا و شدينا طريق لعند كحلة الخطاوي ... ايوا دقينا و حلات علينا مهااا .. ما نكدبووش رحلات بينا .. ايوا ما جيت فين نحط ترمتي تا دخل واحد سيدي مولاي راجل واا توما اشمن رااجل وميمتي قلبي بدا يميل ..اما عبوووش غا شاافتوو ولا تبسم و تضحك ليييه و تنغز فييا ... اما سعاد و مها عمرو الطبلة ودارو الصواب .. حتى نقزت على سعاد تنعنق ونبوس فيها لي هاد الاخيرة مسكينة ضربتها صدمة ثلاتية الابعاد
مليكة ... الله اختي سعاد و سخيتي تخوي علينا الدار .. عرفتي ملي خرجتي الدار ضلما بلا بيك ..." ضرت غمزت عبوش تجي تا هي دير حقها "
عبوش ... هانتي بنيتي وليدي جاي و حادر الراس ملي خرجتي و هو يبكي ... خليتي علينا ديك الدار كحلة اكبيدتي ..." ايوا عبوش تغني و انا نلحن "
ايوا مرة مرة نهز عيني فييه لقاه كيشووف فياا .. ويلي قلت و اخيييييرا زهري صافي ناااض و غيفيض السيد طيحتو بعيوني القتالة ... اما سعاد فين ما تبغي تحل فمها نتلاح نعنقهاا ..
محجووبة ..." لي هي مت سعاد " .. ايوا هانتي ابنيتي عدوزتك باغاك هي و لوستك و راجلك شاريك نعلي الشيطان ابنيتي ورجعي مع راجلك
سعاد ... ولكن ا ماما باش يبقى يضربني لااا هادي منقبلهاش ليه
خالد ..." مشا تحنى على ركابيه و حط راسو على يديها و خلاني انا و مي مطرطقين عينينا" ... حبيبتي سمحي ليا اليد لي باقا تمد عليك نقطع بووها
عبوووش ..." قربت حدا وذني " هذا فشمن فيلم تيتفرج
مليكة ... الطريق الى جهنم تتعرفيه
عبووش ... لا منعرفوش بغين نعرف شكون هاد العزري لي ملي جلسنا نا سمعنا حسو
مليكة ... اويلي عنداك يكون زيزون امي
عبوش ... " ضارت خنزرت فياا " ... كي شتيه هو درك غا حاط يدو عندنا في باب الدار و جاي يخطب فييك حيدي كحزي نجلس حدا المرأة " ايوا كحزتني اللحاف لي حدااه و فين ما نضور لقاه حاضيني نيييت ... يا ويلي هذا مالو جاب ليا التبوريشة .. ايوا شنو راني حساسة بقيت تنفكر تا سولت مي شكون هو " ... ايوا يا لالة. محجوبة شكون هاد العزري
محجوبة ..." غير سمعت عبوش شماتهااا" هذا ولد ختي رشيد كان في قنصلية ديال بلجيكا و طرگ يشووفنااا
عبوش ... اييه مسيكين بان ليا ميتيهضرش .. ياكما زيزون ... « ياو هنا كانت الصدمة فاش حل فمو و نطق صااافي رجليااا فشلووو والله يا ميمتو منخرج تا نديه في يدي "
رشيد ... لا اميمتي بصوتي .. ايوا كنتمناو ديرو سعاد في عينيكم
مليكة ... اويلي على عينينا راه في قلبنااا متخممش ا سيدي رشيد ..
عبوووش ... " بقات تكحز تا وصلت حدايا " نقصي شوية و تقلي فضحتينا الله يفضحك
رشيد ... " ضحك عليا انا و مي مع حنا شوهة فين ما مشينا نتفضحو .."
مليكة ... اش عندنا امي ميتقدا يا كل شي قديتو و طيبتوو " قربت لوذنها " سليبي الگرونة قريب نخرجو منك ا عبوووش ..
عبوووش ..." شافت في سعاد و غمزتها تجيب حوايجهاا و جمعت الوقفة " لالة محجوبة نخليوك في ساعة الخير
محجوبة ... الله يا ودي ا لالة عبووش غير هاد الدراري الله يهديهم على راسهم ... خرجات مي و محجوبة و خويا الباب و انا تقول دارو ليا كولا في ترمتي على داك اللحاف .. يا الله وقفت وهو يوقف علياا سيدي رشيد ..
رشيد ..." شدني من يدي الله يااا ربي شداتني التبوريشة من جلافطي " ... مليكة خلي ليا نمرتك قل متمشي ... ميمكنش نفلت هاد العينين
مليكة ..." الله يرحمني راني عند سيدي ربي وا الجنة هادي ابنات العند الجنة " ... احم اييه واخا عطيني تيلي ديالك ..." ايوا مد ليا التيلي قيدت فيه نمرتي و بقيت واخا تنتأمل تا ضحك .. و سمعت خسرو عاد فقت و تبعت عبووش تنجري لي لقيتها معرية ودنيها كي السلوگي "
عبووش ... اش تم و اش قالك و اش درتووو
مليكة ... هاد درنااا مصفاتش لا النية معاها اعبووش حسني مصطلحاتك راه قلبي هشيش .. والو خدا من عندي النمرة
عبوش ... هاكاااواااا على بنتي و زينت البنات ولات تعطي النوامر
عبوووش ... اييه عطيني و زيديني مزال ما شبعت علاه شكون قالك زيدي نرجعو مرت خوك
مليكة ... و ياااو شحال مشهية ندگهااا هااا دگداگة هاااا ختي هااا عينيا ..." كملنا طريقنا و انا و مي على الخطط و شنو ندير تا وصلنا لخربتنااا .. غير حلينا الباب طار خالد و سعاد لبيت نعاسهم الدودة و ما دير ... دخلت نيشان البيتي و خليت عبووش مورايا تعاير قالك كلا طرق عليه بيتو ... ايوا تعالي امي نديرو ما تيدير و لدك ومرتو استغفر الله عليها كلمة ... يا الله حيدت جلابتي و غنتلاح في فراشي تا صونا تليفوني ... بانت ليا النمرة واخا ما عرفاهاش مغيكون غا هو تا من تليفوني غمل مسكين عاد رجع ليه النبض تا هو .. مهم جاوبتو و انا تنعض في شلقومتي
مليكة ... " جلست في الفراش وكنلعب بشعري " الو السلام عليكم
رشيد ... اووه معرفتينيش حشوومة علييك .. انا رشيد ولد خالت سعاد
مليكة ... ااه سمح ليا نمرتك ممقيداهاش
رشيد ... ايوا لالة مليكة كيف وصلتي الدار مزيان
مليكة ... الحمد الله يا الله كيف دخلنا
رشيد ... على سلامتك ا لالة .. عيطت ليك باش نقووليك واش ممكن غذا نشووفك
مليكة ..." غير قالها كوزت ترمتي و عطيتها الشطيح " امم منقدرش نجاوبك تا نشوف واش معندي تا حاجة
رشيد ... كتمنى تلقاي ليا وقت يا الله تهلاي ليا في راسك ... قطعت معاه و انا ترمتي تتسفق .. نضت خارجة الطواليط لقيت مي حاطة ودنها على باب البيت ... قاعيدتها غا تسمع مشقوفي صونا طير على الباب ... غا حليت الباب لقيتها مصغرة عينيها
عبوش .. اش قالك و فين غتشاوفووو و في شمن سااعة
مليكة ... الله يخليها قاعدة فييك ا عبووش .. زعما مثلا بغيت نشبع حب غا في التليفون مدخليش سووق عضااامك .. الالة ما سوقكش نشووفو فين بغيت
قصة سعد البايرة
محتوى القصة
التنقل بين الأجزاء