قصة أحاسيس محظورة

من تأليف هناء المنصوري
2019قصة كاملة سفالة مرتفعة

محتوى القصة

رواية أحاسيس محضورة

💡تقديم💡
-هل أحببتِ يوما!!
-نعم أحببت
-وكيف وجدتِ الحب!!
-قاسي، حقير، بشع، مقزز، مؤلم، لم أعد أريده
-تعذبتي؟؟
- لا ! .. من هو لأتعذب لأجله!! أكملت حياتي ببساطة و أنا أكرهه أو تستطيع أن تقول لا أحس بأي شيء ناحيته!
-أنتي تتعذبين كثيرا
-لا
-تشتاقين كثيرا
-لا
-تريدين رأيته
-لا
-نعم
-لا فأنا قد حظرت تلك الأحاسيس، منعتهم من التطور، حبستهم في قفصي الصدري و نسيت أنه كان في حياتي يوما
-لا أرى هذا!؟
-حسنا أنت أعمى
-ههه يا لكي من عنيدة
-جدا .. أنا عنيدة جدا

بينما مرت هاته السنوات .. أضحيت أكثر جمودا من ذي قبل أكثر نضجا و أكثر قسوة .. لم أعرف للحب عنوان .. غير القسوة و البرود، لقد كرهت تلك الكلمة "حب" كلمة من حرفين .. صغييييرة جدا لكنها قاااسية .. قااسية جدا .. مقتتها لأقصى درجة بحرفيها الإثنين، لقد أرجعت أحاسيسي محظورة على الحب .. لقد منعته من حياتي، أنا الآن مغرمة فقط بتلك الصغيرة و لا أحد آخر سيدخل هذا القلب حتى و إن كان ذلك الفرعون نفسه .. لأنني حقا كرهته في كل يوم مر على قلبي اليتيم🔥



فكولوار طوييل، كايتمشاو جوج فتيات، وحدة بلباس عادي تيشرت أسود و سروال جينز .. هازة فيديها طابليط و كاتدوي فميكرو عند وفمها و كاتشوف ففتاة شقراء الشعر .. ممشوقة القد و القامة .. الزين ولاطاي كولشي كااين، شعرها زعر طوييل وعينين زرقين و ابتسامة خفيفية ففمها كاتسنط للبنت اللي معاها شنو كاتقولها و تومألها براسها

البنت كادوي باللغة الاسبانية:اذن غاتمشي من هاد الكولوار نيشان الكاميرا غاتلقطك من بداية الدخيلة ديالو، و هالأسئلة قرايهم دغيا، خمسة دقايق و غاتباني مباشرة على الهوى

الشقراء بتاسمات و تمتمااتلها بصوت ناعم أنثوي بالإسپانية:واخا

البنت غمزاتها عاطياها الطابليك و الشقراء بدات كاتقرا الأسئلة على الخفيف .. بانولها مزيانين مافيهمش إزعاج .. حطات الطابليط فالجنب و قادات شعرها، الميكرو فخصرها لاصق .. و سمعات فوذنيها كلمات من عند شخص كايخبرها انها غاتبان على الهوى بعد خمس ثواني .. رسمات ابتسامتها الواثقة ففمها و 5 .. 4 .. 3 .. 2 ..1 بانتلها الكاميرا ضربات فيها فلاشها .. تمشات مشية متناسقة داخلة للپلاطو .. توازى دخولها مع تصفيق الجمهور و المذيع كايصفق و يشوف جيهتها واقف فوسط البلاطو .. تقدمات عندو الشقراء مبتاسمة و مداتلو يدها البيضاء مبتاسمالو

المذيع بابتسامة:ليا الشرف نستاضفك فبرنامجي المتواضع مدام كنزة

كنزة تبسماتلو:الشرف ليا

المذيع شارلها لگلسة قريبة كايجلسو فيها ضيوفو:تفضلي معايا

كنزة ومآتلو براسها و تمشات معاه بفستان نصو مكشوف فاللون الأسود .. باينة سو سيكسي واخدة اللقب اللي تعطالها فالسنوات الأخيرة عن جدارة و استحقاق "أيقونة الموضى، المصممة كنزة العربي"

المذيع شاف فيها بابتسامة و نظرة إعجاب .. الحوار بيناتهم بالاسپانية

-مداام كنزة .. أخيرا قبلتي تشرفي برنامجي (شاف جيهت الجمهور) للإشارة هادي المرة الرابعة باش كانعيطولها للبرنامج أخيرا لقات وقت لينا

كنزة قهقهات بخفة باينين سنيناتها البيضين مع أحمر شفاه وردي فاقع مبين شفايفها مغريين:ههه غي مع المشاغل و كانو عندي مشاريع كثيرة .. اكيد راكم عارفين خرجت ثلاثة ديال لي كوليكشن مؤخرا .. يعني كان ضغط كثيير

المذيع:صرااحة تعاملتي مع نجووم عالميين و فوقت قصيير كتاسحتي سوق الموضة .. شاپو ليك (الجمهور بداو كايصفقو و كنزة مبتاسمة ابتسامتها الواثقة .. تغيرات بزااف فسنين كثييرة فاتو)

كنزة بابتسامة:كانلقى راسي فمجال التصميم .. الأزياء بالنسبة ليا شغف مللي كانكون گالسة ملاقية ماندير كانصمم .. كانكون مثوثرة كانصمم فرحانة حزنانة فگاع حالاتي خاصني نصمم شي حاجة باش نرتاح

المذيع:بالصح مانشكركش حاليا هاد الكوستيم اللي لابس من تصميمك، كاتصممي رجالي و نسائي و كولشي عندك روعة

كنزة بابتسامة:شكراا ذوقك الزوين

المذيع:دابا نمشيو لموضوع آخر .. كنزة العربي عرفينا عليك كثر، نتي حياتك الخاصة شوية غامضة .. قليييل اللي كانعرفو شي حاجة خاصة عليك و درنا بزااف تحرياات صراحة كلفاتنا مجهود باش نعرفو شي حويجات غاتعرفيهم خلال الحلقة، 

كنزة تبسمات:،هههههه ماتحتاجش مجهود كبير .. تقدر تسولني ونجاوبك

المذيع:بغيت نعرف .. شكون كنزة العربي بصفة عامة

كنزة:كنزة .. هي مجرد امرأة فحال گاع النساء .. ناضجة و مناظلة باغا سميتي تتعرف فمجال التصميم، كنزة هي إنسانة وقعولها ظروف خلاوها تقوى و ترجع للي هي عليه دابا و أنا حاليا كانشكر دوك الظروف

المذيع:براڤو عليك صراحة ههه سمعنا عندك بنيتة فعمرها ثلث سنين و نص! (بانت فشاشة كبييرة صورة كنزة مع بنت صغييورة شعرها أسود قصيور مجعد، سمراء البشرة .. مع عيوون زرقيين صافيين كي صفاوة البحر) تبسمات كنزة بهدوء ابتسامة مزيفة و بانو فملامحها الإنزعاج شوية

كنزة بهدوء:وي بنتي سارة

المذيع:عمرك دويتي عليها فشي لقاء صحفي، واش كاتخبيها؟

كنزة علات فيه حواجبها و تمتمات بهدوء:ماعندي لاش نخبيها غي مكانبغيش ندوي فأموري العائلية .. هذا مكان

المذيع:اوووه واخا .. كانعتاذر لا سببتلك إزعاج

كنزة بهدوء:لا مكاينش إزعاج

المذيع شاف فالشاشة بانت صورتها قبل أربع سنوات مع آخر شخص توقعات أنها تتفكرو بعد طوول هاد السنين
-كنزة العربي و "الفرعون" .. صراحة هادي صورة ناااذرة و كان التصميم اللي صممتيه بان على أنه الرئيسي مع تصميمو الخاص، أشنو قصتك مع تصميم الأحذية فشركة الفرعون!

كنزة تزيراات و تزنگات شاركة حواجبها بشدة و تمتمات بعصبية:أصلا كان عندي الحق فاش ماجيتش لهاد البرنامج دوك الثلاثة المرات اللي فاتو (وقفات كاتحيد الميكرو اللي لاصق فيها، المذيع وقف كايشوف فيها باستفسار)

-مدام كنزة؟؟

كنزة مشات خارجة من الپلاطو للكواليس و المذيع مشا تابعها مع الطاقم التقني للبرنامج كذلك، و هي كاتجري مزروبة و تنتر منهم

-بعدووو منيي .. مغانبانش فهاد البرنامج دالزييرو .. نتاا شدخلك فحياتي هااا؟؟ و علاش هاد الأسئلة مكانوش فالطابليييط .. راك باقي معارفنييش

المذيع:غي سمعيني .. مدام عفاك غي دقيقة

كنزة دفعاتو من قدامها مكملة طريقها و خرجات من المبنى اللي كانو كايصورو فييه مزروبة .. ركبات فسيارتتها المازيراتي آخر مكاين فالسوق كاتمتم فنفسها

-صافي ماوقع والو أكنزة .. ماوقع والو، هداك خرج من حياتك هادي ربع سنين .. ماتفكرتيهش و حتى دابا غاديري فحالا ماسمعتييش سيرتووو (غززات سنانها بقوة و ديمارات مخلية الكاميرات تابعينها كايصورو و الطاقم التقني كولو كان تابعها حتى من المذيع و المشكلة أن البرنامج كان مباااااشر يعني قطعاتلهم الحلقة فالنص و مشااات، كولشي بان مباشرة على الهواء


توقفات سيارة كنزة بصوتها العاالي قدام فندق من أفخم الفنادق فمدينة مدريد/إسپانيا كايجيولو غا رجال الأعمال المعروفين و المشااهيير .. نزلات من السيارة معلية راسها لفوق بشموخ و نخوة و تعجرف .. غي مشات من قدامها جا شخص مكلف باش يركنهالها و هي دخلات للفندق بمشية متناسقة .. صوت طالونها كايتسمع صداه عاالي فالأرجااء .. و بنظرة ثااقبة مشات مباشرة جيهت الأسانسور .. ركبات فيه و جبدات تليفونها من صويك صغير كان بين يديها .. لقاتو كايصوني مع كان فوضع صامت ماسمعاتوش .. تبسمات و جاوبات كاتمتم بصوت غنوج

-ماماتييي ديالي توحستيني

صوت طفولي دلووع:مامي علاس مابكيتيس فالبرنامز .. تكطع دغيااا

كنزة بهدوء:حيتاش هادوك ناس خايبين مابقيتش عندهم

سارة:ههههه پاپي صيفطليك بوسة

كنزة تبسمات:صيفطيلو وحدة حتى نتي

سارة بقهقهة طفولية:فخبالك غدا مغانمسيس لللووض .. عندي دلس پيانووو

كنزة تبسمات:مزيانة ماعندكش الروض انا غدا غانجي لكوريا، ساليت خدمتي هنا

سمعات صوت رجولي دوا بلهفة:علاش ماتجيش اليوم؟

كنزة:غانرتاح شوية عييت و مافيا مانشد طيارة .. حتى للصباح أمصعب

معصب تبسم:اوكي نتسناوك أعمري

كنزة ومآتلو:واخا .. بوسلي سارة و غطيها مزيان فالليل

مصعب تبسم:ماتوصينيش على بنتي

كنزة بتاسمات و تنهدات قاطعة عليه .. خرجات من الأسانسور اللي وصل بيها قباايلة و تمشات فرواق الأوتيل مباااشرة للغرفة الخاصة بيها، دخلاتلها كاتعوج عنقها و طرطقو حاسة بالتعب هلكها .. مشات مبااشرة للحماام دخلات كاتقلع حوايجها، دارت الما سخون عمرات بيه البانيو و عمراتو بالرغوة و الزيوت المرطبة و تخشات فوسطو كاتكمد عضيماتها و ترتااح من أسبوووع طويييل و حااافل دازلها، تقريبا ساعة و نص و هي فالدوش حتى رتاحت مزيان و بدا كايبرد بيها الما تشللات و خرجات بپينوار فاللون الغوز البارد و فوطة لواتها على شعرها .. مشات برجيلاتها الفازگين جلسات فوق واحد الفوطويات و جراتلها واحد لاطخوس كانت ديجا محطوطة فوق واحد الطبلة .. هزات منها مبرد و بدات كاتبرد ضفار يدييها كاتشوف قبالتها مباشرة، طولات يدها لجهاز التحكم شعلات الپلازما جات نيشان فبرنامج كايدوي على الفضايح دالفنانين عوجات فمها للجنب و تمتمات باستهزاء

-جبتلكم خبرية تدوزو بيها السيمانة يييخ على بشر كايحماقو ينبشو فحياة الناس (لاحت المبرض من يدها و ناضت غادة جيهت الپلاكار .. جبدات دوبياس فاللون الأزرق البارد، لبساتهم و مشات مباااشرة للفراش تكات فوقو و غمضات عينييها بععمق ناااعسة من كثرة ماعيات اول ماحطات راسها على المخدة غفات)

🔔فمكان آخر🔔
گالسين جوج دالناس فجردة ديال ڤيلا كبيييرة .. كبار فالسن شوية ولكن باقي فيهم الضو و مهليين فرااسهم .. امرأة و رجل مابين الربعينيات و الخمسينيات

المرأة كاتشوف فخبر فتليفونها وتمتم:مقادراش نزيد نتخبى مزال .. بغيت نتلاقاها خلاص

الرجل زير عليها بين يديه و تمتم:دبرت لقاء بيناتكم، حتى أنا باغي غي فوقاش نشوفها مباشرة .. ولكن حااليا غانمشي للمغرب فاش تتلاقايها خاصك تجيبيها معاك لتم

المرأة:الخطر زاال من زماااان اللي خلاني مانقربلهاش طول هاد المدة هو خوفي، أنا خايفة لاماتقبلنيش و ترفضني فحياتها

الرجل تنهد بعمق:انشاء الله غاتقبلك .. على معاودتيلي متأكد غاتقبلك غي تهنااي

المرأة بتنهيدة عمييقة:انشاء الله يا ربي .. انشاء الله .. توحشتها بزاف و متأكدة غاتكون توحشاتني .. متأكدة غاتفاجئ من شنو غايطرا فحياتها من هنا القدام، خبيت عليها بزاف دالأسرار فالماضي و دابا جا الوقت اللي غايتكشفو دوك الأسرار و أنا و ياها نتجمعو من جديد (تبسمات للرجل بأمل) ياك نتا موافقني فهضرتي؟؟

الرجل ومألها براسو بهدوء:طبعا موافق .. ثيقيني أنا متحمس كثر منك نشوفها و نسمع صوتها .. الصور مكاتنفع بوالو

المرأة تنهدات حاطة يدها على قلبها كاطبطب عليه و تبسمات كاتهمس:مجرد فكرة انني قربت نشوفها خلات قلبي يضرب بالجهد .. يعلم الله مللي نتقابلو وجه لوجه .. نقدر نفقد وعيي ههههه

الرجل ضحك ضحكة رجولية خفيفة و زير عليها فوسط حضنو:لا مغاتديريهاش بالعكس، غادي تعوضو السنين اللي تحرمتو من بعضكم فيها و غاتمشطيلها شعرها فحال زمان و توجديلها الحويجات اللي تلبس .. غاترجعو لأيامات 7 سنين و 5 سنين. .. أيامات الطفولة

تبسمات الإمرأة بأمل أكثر من كلام الرجل .. تنهدات فحضنو بعمق أكثر و غمضات عويناتها ببطئ


🕯بعد غياب طويل كرهتك في كل يوم مر على قلبي اليتيم🕯

يوم جديد🔥
فالمطار الخاص بمدينة مدريد، كنزة جارة ڤاليزتها و دايرة نظارات شمسية كبار على عينيها، ففترة الأربع سنوات .. تشهراات و ولات مصممة عاالمية معرووفة بزااف .. مااركتها كتاسحات السوق كيفما قال المذيع و ولاو كايستاضفوها فبرامج و يديرو معاها حوارات كثييرة، و حفلات كذلك .. مشات كادير الإجراءات الرسمية باش تطلع فالطيارة .. غي سالات دوزات الڤاليز فالماشين ديالها و بقات كاتسناها، هزاتها فاش وصلات عندها و مشات جيهت بوابة المسافرين باش تطلع فطيارتها .. حاسة براسها موحشة بنتها بزااف .. انشغالاتها كاتخليها تغيب عليها و شي مرات بالشهورة غي التليفون اللي كايلاقيهم هي و مصعب اللي لحد الآن باقي ملازم الكرسي المتحرك .. دار عمليات كثاار و ترويض كذلك ولكن بدون نتيجة .. رجليه معاودوش تحركو فخطرة

طلعات فالطيارة فالدرجة الأولى و گلسات مرووولاكسية .. حيدات النظارات و تكات على كرسيها .. تنهداات بقوة و جبدات ستيلو من صاك هازاه معاها و دفتر صغيور مربع الشكل أوراقو بنية غامقة

تنهدات بقوة و بدات تخربش بالستيلو فالدفتر
-مذكراتي الغالية .. البارحة نمت باكرا .. أردت أن لا أفكر في الماضي .. مجهودات جبارة أقدمت عليها طيلة أربع سنواات .. دمرها لي ذلك المذيع الغبيي .. لماذا يذكرني بذلك الحقيير! .. أنا حقا نسيته و كرهته في كل يوم يمر في حياتي، مجرد ذكر لقبه أمامي يشعرني بالغضب .. كم أتمنى العودة لذلك اليوم الذي أخبرني أنه فقط أراد اصطيادي .. أتمنى حقا لو أستطيع أن أغرس خنجرا في منتصف قلبه الأسود .. أريد أن أراه ميتا أمامي .. غلي له كبيير جداا، و قلبي اليتيم يتمنى شيئا واحدا .. و هو عدم رؤيته مجددا في حياتي

سدات دفتر اليوميات مغوبشة من تفكيرها فيه .. اي حاجة كاتنوغشها ولات كاتكتبها فدفتر اليوميات هادي نصيحة من الدكتور النفسي اللي تبعات عندو طيلة سنتين حيت طيف تيمور كان ديما مرافقها و مامخليهاش ترتاح فحياتها


🛬🛬🛬🛬🛬🛬🛬🛬

أخييرا تم هبوط الطاائرة فالأراضي الكورية بنجاح .. خارجة كنزة من المطاار كاتدور فعينيها فالأرجاء حتى تبسمات ابتسامة وااسعة مللي بانتلها مشاغبتها كاتحنقز قدام مصعب .. حلات يديها مقربة عندها و المشاغبة غي شافتها مشات عندها كاتجري و تقهقه بطفوولية مقربة عندهاا

-مامااتيييي

كنزة قربات عندها كاتجري هزاتها معنقااها بقوة كاادور بيها فالهوى و تبوس و تشم فريحتها:حبييبة قلبييي توحاااشتك

سارة بفرحة:هههه حتى انا بزاااف بزااااف (زيراات عليها كتبووس فييها)

قرب عندهم مصعب بكرسيو المتحرك:ههههه توحشاتك

كنزة معنقاها:حتانا توحشت خنيفيستي (حنات عندو باستو فحنكو وهو مبتاسملها، مشات هازة سارة و خارجين لبرا .. ركبو فسيارة بالشيفور كانت كاتسناهم فالبااب و نطالقات بيهم)

كنزة بالكورية نطقات:عمي كانگ نتمنى تكون بخير!

العم كانگ:بخيير أبنتي و نتي كي دازتلك السفرة

كنزة بابتسامة:بخير هههه (شافت فمصعب) كي غادية الأحوال فالشركة؟

مصعب ومألها براسو:مززيانة .. اليوم عندنا عشاء عمل مهم .. غايجيو عملاء من فرنسا غايتعشاو معانا فالدار

كنزة باستغراب:الدار گاع؟

مصعب ومألها براسو:ياس .. حيت عملاء مهمين كيفما قلتليك

كنزة ومآتلو براسها:واخا (حنات عينيها لسارة قااارمة كاتفرج فالطرييق .. عاادتها هاادية و مشاغبة غي مع اللي كاتعرفهم و ترتاحلهم) قوليلي سرسوورتي .. مشيتي لدرس الپيانو اليوم؟؟

سارةة ومآتلها براسها:آاااه و تعلمت عزف مقطوعة نمسيو للدار و نسمعهاليك

كنزة تبسمات:واخا أحبيبتي (شافت فمصعب) مكاينش شي جديد فحالتهم؟

مصعب علا حواجبو بجوج و تمتملها بالنفي:للأسف لا

كنزة تأفأفات:و لاخر باقا ماتلقاش؟ شحال من عام دازت .. انا خايفة غي على سارة منو

مصعب تنهد:حتانا خايف عليها ولكن ماليهش أثر

كنزة غززات سنانها و تمتمات:نتمنى مانعاودوش نطلاقاوه فحياتنا

مصعب:نتمنى


وقفات السيارة عند بوابة ڤيلا كبييرة الحجم و أنييقة فديكورها، نزلو كنزة و سارة هوما اللولين و تبعهم مصعب اللي عاونو الشيفور .. دخلو لداخل كايضحكو و مشاو مبااشرة لقاعة خااااصة بالپيانو، سارة متحمسة توري لكنزة المقطوعة اللي تعلماتها، گلسو جنب بعضهم و سارة كاتعزف بصبيعاتها الصغار مبتاسمة .. عقلها خفييف دغيا كاتعلم و كنزة و مصعب دايرين جهدهم معاها يربيوها أحسن تربية سالات العزف و شافت فكنزة بعينين لامعين بالحماس و كنزة صفقاتلها كاتشجعها

-برااڤوو البخانسييس ديااالي موااااح (باستها فحنووكها بقوة)

سارةة كاضحك:و نتي مكاتعرفيش تعزفي؟؟

كنزة بابتسامة:ههههه لا كاانعرف، كنت تعلمت فصغري حتانا فحالك

سارة:واعزفيلي حتانا

كنزة بابتسامة حطات صباعها على لوحة الپبانو كاتعزف ببراعة و الصغيرة بدات كاتغنيي معااها .. وقت طويييل و هوما مع بعضهم فالغناء و العزف حتى وقفات كنزة صباعها كاتشوف فسرسورتها

كنزة بابتسامة:،كي جيتك؟؟

سارة كاتنقز فوق الكرسي و تصفق بيديداتها الصغار:زوينة زوينة🤩

كنزة بضحكة عالية:هههههه مكاينش اللي زوينة قدك هناا .. وينو على الزين .. وليت طبوووزييية ناااري غناكل يماااك (بجغاتلها حنيكاتها بالبوسان و سارة كاتضحك)

سارة بابتسامة:أنا كانسبهلك

كنزة عنقاتها مبتاسمة و تمتماتلها:لهلا يحرمني منك .. نتتي اللي ضويتي حياتي بعدما كانت مضلمة و بااااردة .. نتي دفيتيها، أول ماشفتك فرحت .. قلت فنفسي أنك نتي بنتي الصغييورةة اللي مستحيل نفرط فيها

سارة بابتسامة:ههههه بابا كايقولي فحالك

كنزة:حيت حنا كانبغيوك بزاااف

سارة بابتسامة:حتى اناااا كانحمااااك عليييكممم😍😍

كنزة عنقاتها:اجي لهنا لمك نبجغك بشي بيسة ثوني اجييي ههههه‍ههه

برات الغرفة مصعب كايطل عليهم مبتاسم .. تمتم براحة:أخيرا رجعتي لدارك أحياتي

كنزة دارت على صوتو .. شافت فيه وتبسمات: هههههه توحشتيني؟

مصعب غمزها:ضروري نتوحش مرتي الفنة

كنزة تبسمات ابتسامة خفيفة و تمتمات:نتا باقي عند وعدك و رهانك ياك! آخر رهان بيناتنا

مصعب بهدوء:حتى نولي نتمشى عاد نطلقو عارف

كنزة:مباغاش نزيد نضلمك معايا مزال .. عارفاك درتيلي غي خاطىري و تزوجتيني .. ولكن فديك الفترة كنت حمقة شوية، كنت أنانية كانعتارف بيها فكرت غي فراسي .. بغيت نرد إعتباري لنفسي .. كانو عيني مغشيين فحالا مكانشوفش شنو كانخربق فحياتي و محسيت بشنو كاندير حتى عرفت راسي حاملة، ماعرفتش شنو جاني لذماغي باش طلبت منك الزواج، و حتى نتا تابعني فهبالي ماقلتيش أري ننبهها هه المهم انني دابا رديت عقلي لراسي و باغا أول ماتولي تتمشى و يكون عندك أمل كبيير تشوف حياتك مع اللي تستاهلك كثر مني انا

مصعب تبسم بهدوء:عارف شنو كاين أكنزة (دارت بكرسيو خارج من عندها بلا مايزيد حرف كايتمتم فنفسو)

-مستحيل نخليك .. داك الطلب اللي طلبتي مني زمان هو اللي رجع فيا الروح و خلا عندي أمل كبير فالحياة، زواجنا هو أملي الوحيد فالدنيا .. نتي ديالي بوحدي مغانخليش المجال لواحد آخر ياخذك مني ولو نعرف راسي نموووت و نتدفن تحت الثراب على قبلك نتي (تنهد بقوة و خرج مخليها كاتلعب و ضحك مع سارة بفرحة عااارمة و شاف فرجليه بنظرة ثااقبة) نعرف نخلييك عمرك كامل معايا ونفرط فرجلي مانستاعملهمش، وجودك معايا أكنزة اهم من اي حاجة أخرى فهاد الدنيا هادي .. مباغي والو من غير وجودك نتي


🌑المساااااء🌑
على الساعة الثامنة مساءا
كنزة نازلة من الغرفة الخاصة بيها بفستان راااقي فاللون الأزرق من تصميمها .. فيه فتحة فالصدر كبييرة و فتحة فالفخض كذلك .. الشعر الأشقر طالقاه على رااحتو و دايرة مكياج ثقيييل .. نزلات لتحت و هو يبانلها مصعب بكوستيم فاللون الأزرق كذلك باين وسيييم .. غي بانتلو تبسم كايشوف فيها بشغف و حب كبيير .. توجهات عندو كاتدور فعينيها و تمتم

-فين سارة؟

مصعب بابتسامة:خداتها جين للبيت باش نبقاو على راحتنا مع الضيوف

كنزة ومآتلو براسها و جلسات جنبو تكاتلو على صدرو مغمضة عينيها و هو عنقها بقووة مولفين بهاد الݣلسة، و هاد التعنيقة كاتحسسها بالراااحة

كنزة بهمس:توحشتك

مصعب بابتسامة:أنا كثر

كنزة:فوقاش غايجيو العملاء

مصعب شاف فساعتو باقي معنقها:باقي شوية .. النيت علاما يوجد العشا

كنزة بابتسامة:شي شركةة كبيرة و عزيزة باش خبرتيهم يجيو للدار؟

مصعب تنهد بقوة و تمتم بنبرة خافتة:عزااز صراحة و متأكد غايعجبك الحال معاهم، تقدري تصدمي صدمة كبيرة و تقدري تبكييي من معزتهم لقلبك

كنزة شافت فيه:شنو؟

مصعب حرك راسو بالنفي كايشوف جيهت فمها الكرزي المغري .. بداك أحمر الشفاه الفاقع و تمتم بنبرة عميييقة:والوو (قرب بشوووية لفمها منجااذيلو .. ماكرهش يشبع من ريقها و ياكلو ماااكلة ،، هي بقات كاتشوف فيه بهدوء بدون حرام عينيها فعينيه اللي مثبتين على شفايفها .. غي وصل لفمها غايحط فمو و هي ترجع راسها اللور كاتحنحن و تدور فعينيها)

كنزة:احم غانمشي نطل عليهم فالكوزينة 

ناضت كاتقاد شعرها مخنزرة .. رجعات كاتكرره دوك التفاصييل الحميمية بين ليكوپل، مكاتحملش تتقاس من طرف جنس بني آدم لدرجة كبيرة ولات كاتكره الملامسات الجدية .. دخلات للكوزينة بهدوء، دورات عينيها فالأرجاء على الخادمات .. كانو جوج اللي كاينين .. تفحصات الأطباق اللي كايوجدوهم بهدوء و خرجات بعد فترة من عندهم .. مشات طالعة لفوق صوت طالونها كايتسمع صدااه فگاااع أرجاء الڤيلا، مشات أول شي لغرفتها هزات تليفونها و خرجات جيهت بيت المشاغبة ديالها .. حلات الباب ببطئ كاطل عليها ..


حلات الباب ببطئ كاطل عليها .. بانتلها كاتلعب مع بنت سوداء البشرة مقبوولة فملامحها ميلحين .. هي جين المربية ديالها .. سدات عليها الباب و مشات نازلة لتحت كاتشوف فالتليفون، حتى طلعلها اتصال من دوك اللي حضرات لبرنامجهم البارحة .. برنامج خاص بالمصممين المشهورين و بالموضى .. عوجات فمها بعدم رضى و قطعات عليهم و بلوكات نمرتهم، وصلات لتحت و هو يبانلها مصعب كايدوي فالتليفون قربات جيهتو ببطئ و بخلسة، صوت طالونها العالي مابقاش كايتسمع كاتصنطلو حيت بانتلها ملامحو جدية و كايدوي فشي موضوع مهم بصوت خافت 

مصعب:ممممم اذن جايا بوحدك؟ .. واخا كانتسناوك .. كنزة أكييد غاتتصدم فاللول و تقدر گاع ماتقبلكش ولكن..

قاطعاتو كنزة بفضول:معامن داوي أمصعب؟

مصعب شاف فيها مفافي و تحنحن كايتمتم بثوثر:أاا احم حتى مع واحد (قطع التليفون بالزربة كايعراق)

كنزة قربات عندوو معلية حاجبها:مصعب سمعتك شنو قلتييي، كنزة أكيد غاتصدم فاللول و تقدر ماتقبلكش .. لمن قلتي هادشي؟؟ شنو مخبي عليااا

مصعب زفر بقوة و تمتم بهدوء:هذا سر عذريني مانقدرش نجاوبك دابا

كنزة علات فيه حواجبها و گلسات جنبو مخنزرة:واااخااا غانسكت دابا ولكن لاكان هادشي فايت الحدود راني نحسب الله ماخلقك، إلا الكذوووب و الاسرار مكانحملهومش .. مكانحملش كثرة الوجوه معايا و راك عاااارف

مصعب خرج تحنحينة هااادية:احم .. البارح تعصبتي من شنو قالك المذيع!

كنزة شافت فيه بقنت عينها و تمتمات بعصبية مكتومة:علاش غانتعصب؟؟ و زايدون هاد قليب المواااضيع راه كاينرفزني بلا ماتبقى تنقز بوووحدك

مصعب تحنحن كايركزلها غي على هضرتها اللولة .. بلعاني باغي يتهرب من أسئلتها لوخرى:الفرعون؟؟ تعصبتي بسبابو!

كنزة تبسمات بهدوء و شافت فيه بنظراات شاااعلة:لا ماشي على قبلو .. تعصبت حيت داكشي اللي قالو مكانش اولا فالطابليط دالأسئلة اللي قريتهم ثاانيا ذكرو سارة و نتا عارف موضوعها حساس بالنسبة ليا .. ولا نقول بالنسبة لينا انا وياك

مصعب تأفأف:عاارف مخاصوش يعرف بأنها كاينة 

كنزة ومآتلو:خصوصا عمرها مخاصوش يتعرف و هوما داكشي اللي ذكرو

مصعب تنهد بعمق:ماتخافيش عمر تطرا شي حاجة خارجة عن سيطرتنا .. كولشي مدروس .. كيفما ماقربش من زمان حتى دابا مغايقربش

كنزة ومآتلو براسها و شدات تليفونها كاتخربق فيه .. دازت مودة طوييلة دالصمت بيناتهم .. مصعب حاضي كنزة كايشبع شوفاات فيها و كنزة كاتشوف فتليفونها شادة واحد اللعبة مدوزة فيها الوقت حتى تسمع صوت الصونيط فباب الدار، شافو فبعضياتهم بهدوء و وقفاات كنزة مبتاسمة فالوقت اللي مصعب تحنحن بثوثر من السر اللي طول سنيين و هو مخبيه على كنزة و جا الوقت باش يتفرش، قلبو ولا كايضرب بسرعة عارفها تقدر تبعدو من حياتها بسباب هاد السر الخطير اللي يقدر يقلب حياتها مية و ثمااانييين درجة

ثواااني فقط و تسمع صوت طالون فالأرجاء موازي لصوت الطالون اللي كان كايصدر من عند كنزة .. نفس المشية و نفس وقع الخطوات .. كنزة كاتشوف بفضول باغا تعرف شكون هاااد العملااء العزاز على مصعب اللي بغا يستقبلهم فدارو گاااع .. عمرو دارها .. غي بانت قدام عيينيها صاحبة الكعب العالي و الفستان الأصفر القصيير حد الركبة و الشعر الأسود الفحمي .. و العيون الزرقاوتااان الصافيتان، ملامح امرأة نااضجة .. كنزة عارفااها مزياااان .. غي شافتها حسات بالفشلة و الدنيا كادووور بيها تمتمات بهمس

-م م مامااا

مع شنو قالت تزدحات مع الأرض بقققققوة فاقدة وعيها .. الصدمة بوجود تلك المرأة و اللي هي ماماها اللي عارفاها ماتت من زماااااان يا رحمان، كانت قووية علييها .. قووية بزااااف


كنزة بهمس .. كاتشوف فالمرأة امامها بعدم تصدييق .. عينييها ولاو كايشوفو الضباابة و الكحوولية وواااحد البرووودة نزلات مع ركااابيها حساااتها ثلجاااتها .. المرأة مبتاسمالها كاتشوف فيها باشتياق و عينين لامعييين بالدموووع

كنزة بهمس:م م مامااا

مع شنو قالت تزدحاااات مع الأرض بقوووة فااقدة وعيها .. الصدمة كاانت كبيييرة علييها برؤية الأم ديالها .. ضناتها ميتة من سنيييين حتى فجأة لقاتها قبالتها .. الصدمة فقداتها وعيها

المرأة قربات عندها كاتجري:كنزة .. بنتييي

مصعب بذعر:كنزة .. كنزة حبيبة

المرأة شدات الصاك اللي كان بين يديها فتحاتو و هزات منو ريحة دوزااتها قدام أنف كنزة .. مترقبااها بخوووف وحاسة بقلبها كايخفق بشدةة .. أخيييرا قربات من بنتها حبييبتها بعد طوووول سنيييين كثاااار .. بعد ماتحرمااات منها .. بعدما هربات من عذااابها، أخيييرا تلاقات مع بنوتتها

كنزة كاتشابك شفارها الطواال بشددة مع بعضهم كاتحل عينييها و تمتم بهمس:م ما مامااا

الأم بابتسامة .. كاتملك ملامح قريبة لملامح بنتها و بزاااف گاااع .. كنزة نسخة مصغرة شابة منها:حبيبت ماامااها .. هانا معاك أحبيبتي .. الله على رااااحة أخييرا شفتك و سمعت صوووتك .. أخيييرا لقيت الشجاعة باش نطلاقاك .. عارفة فعلتي مكاتتغفرش .. عاارفة كنت أنانية ولكن نتي معارفاش ضروفي .. عفاك أحبيبتي سمحيلي عفاااك (باستلها يديييها بقوة و كنزة كاتحل عينييها بالزز .. ملامح عدم التصديييق ترسمو فوجهها و دورات عينيها لمصعب اللي كان كايشوف جيهتهم بابتسامة خفييفة .. رجعات شافت فالأم ديالها .. الأم اللي ضناتها مااتت، كااانت كاتتمنى تعاود تطلاقاها من جديد ولكن غي بانتلها قبالتها و شافت نظراتها ليها و ملامحها اللي ماتبدبوش غا بان فيها شوية دالكبر فالعمر، نترات يدها من عندها و وقفات قلبها كايضرب بسرعة و كاتنهج .. صدرها طالع نااازل بسرعة

تمتمات:ش ش شكون نتييي؟؟ م م مصعب واااش كاتشوووفها ولا كانتخايل ولا كانحلم ولا شنو هااااادشيييي (خرجات فمصعب عينيها) جااااوبنييي ماااالك سااااكت .. شهااااادشيييي


الأم بغات تقرب عندها:كنزةةة ع عفاك م ماديريش هاكا .. بنتيي أن!!!

قاطعاتها كنزة بصوت عالي كاترجع اللور بانفعاال:شششششش مابنتكششش مابنتكش أناااا ماما مااتت هاااادي سنييييين شكون نتييي

الأم عينيها دمعو:كنزة عفاك ماديريش فيا هكااا

كنزة بصووت عاللي بعصبية:خرررجييي علياا .. سييريي سييريي انا مابنتكش .. سييييرييييي علياااا من داااارييييي (غوتااات بصوت عاالي حتى حسات بصوتها قريب يبح)

مصعب بصوت خافت:كنزة سمعيلها بعدا ماديريش هكا راه...

كنزة شافت جيهتو بعصبية .. ديك النظرة حبساتلو الحروف فحلقو ماقدرش يزيد ينطق .. ملامحها متجهمة و عينيها كاينقطو بالغضب:نتاااا كنتييي عااارف و كذبتييي عليااا ياااك .. طول هاد الفترة كنتتي كاتكذب علياااا

مصعب:كنزةة .. ماماك راها عندها سبب مهم

كنزة بصوت عالي عصبي:ماسوقيييش فظروووفها ولا أسباااااابها (شافت جيهتها مخننزرة) كااانكرهككك .. گاااع الناااس الكذااابيييين كانكرههم .. كااانكرهكم كاااملييين حتى نتاااااا ألغداااار .. (شافت فمصعب بعصبية و مشات كاتجري طالعة لفوق .. خلاات ماماها كاتبكي بشدة وتشهق من تصرفها معاها شادة على قلبها .. الحرقة خلاتها تفشل .. مصعب عاض على فمو بقوة كايتفكر هضرتها و كلمة كانكرهك اللي قالتها قاصداه حتى هو .. تأفأف بقوة و شاف جيهت مامات كنزة)

مصعب:مدام يامنة .. كانصحك ماتستاسلميش .. طلعي للبيت عندها و شرحيلها .. غاتتفهمك أكييد .. هي غي تصدمات دابا و صافي .. هادي ردة فعل متوقعة منها

يامنة ومآتلو براسو و جرات صاكها معاها غادة بخطوات ثقااال طالعة لفوق .. حافظة الدار غير من خلال الصور اللي كايتصيفطولها من طرف مصعب .. وصلات قدام باب بيتها .. تنهدات بقوة كاتنفس بصوت عالي و تمتمات بصوت مرعود

-ب بنتي .. ك كنزة

ماسمعاتش حرف من لداخل .. حطات يدها على الپوانيي تدفعو و هي تلقاه مسدود .. زفرات بقوة و تكات على الباب كاتمتم


-عارفاك غاتكوني كرهتيني ولكن واللهما لخاطرريي، فاللول خفت عليك من عبد الهادي لا يآذيك لا خذيتك معايا و من بعد خفت منك نتي و من ردة فعلك لارجعت بعد سنييين .. و نييت ها خوفي كان فمحلو و نتي كرهتيني أبنتيي (شهقاات بصووت مسمووع و تمتماات) شحاااال توحشت نشوفك مبااشرة و نعنقك و نضفرلك شعرك و نبوووسك و ننعسك بقصي اللي كانو كايحمقوك .. شحال توحشتك أحبيبتي .. بزااااااافففف توحشتك ماتقديش تتخاايلي شحااال، أنا فاش كنت مع عبد الهادي كنت صابرة على قبلك .. و اللي طمني أنه مغايآذيكش أنه كان كايبغييك بزاااف، حاولت ننتاحر وانا معاه كثر من ربعة دالمرات و مااقدييتش .. كان كاينقذني و فاش كانصح كايتعدا عليا و يضربني و يعنفني، دوزت معااه سنواات فالجحييم كنتي نتي هي نقطة الجنة فدوك السنيين .. عبد الهاادي إنسااان خاايب بسبابو طلقني حب حياتي .. راجلي اللول .. هادشي أول مرة غانقولولك .. خاصك تعرفيه باش تتفهميني أبنتي .. عافاك سمعينيي و تصنطيي مزيااان، أ أنااا كنت مزوجة براجل كانبغييه و كانحماااق عليييه .. ههههه من صغرنا كنا كانتحاابو فاللول عارضنا باه مابغانااش نتزوجو .. حاربناه هو و گاااع هادوك اللي وقفو فطرييقنا و تزوجناا فعلا .. بقيت سنيين طواال معااه حتى ولدت أول ولدة ليا كان ولد .. زوييين و بوگوص ههه دابا غايكون كبر (عينيها لمعو بالدمووع) .. من بعد ماولدتو بخمس سنين دخل راجلي فصفقة مع رجل أعماال معرووف .. داك الرجل كان هو عبد الهادي .. و فعشاء عمل كان كل واحد خاص ياخذ معاه مرافقة ليه .. خذاني أنا .. طول العشاء و عبد الهادي طان كايرمقني بنظرات فهمتهم .. نظرات إعجاب .. حاولت نتفادى للشوفة فيه ما أمكن .. سالينا العشا و رجعنا للدار .. دازو أيامات كثار علينا و فنهار من النهارات صونا تليفوني .. ستغربت من رقم مكانعرفوش .. غي جاوبت لقيتو عبد الهادي، أصر على أننا نطلاقاو لشي حاجة مهمة .. أنا استغرابي تزاد و فنفس الوقت جاني فضول نعرف شنو ديك الحاجة المهمة .. مشيت باش نشوفو .. فاش طلاقينا دوك النظرات دالمرة اللولة بقاو نفسهم .. انا حاولت مانطولش معاه كانسولو شنو باغي و هو غي ساكت .. حتى قالي هضرة صدماتني


قالي نطلق من راجلي و نتزوج بيه و أي حاجة بغيتها يجيبهالي شنو مابغيت .. طبعا انا رفضت حبي ليه كان و باقي أكبر حب فحياااتي .. رجعت فحالي للدار بعدما حذرتو يعاود يتاصل بيا .. گلست مودة طويلة فالدار الحياة هاادية وانا ماقلتش ليه شنو وقع مابغيتش نشطنو .. دازو أيلمات و عاود صونا تليفوني بنفس الرقم .. قطعت عليه شحال من مرة ولكن بقى مصر .. فاش جاوبتو قالي نطلاقاه ولا غايتصرف تصرف مايعجبنيش .. انا ماعرفتش شنو يقدر يدير قلتلو اللي فجهدك ديرو و قطعت عليه .. حتى عاود صونا و قالي جاياك مفاجئة .. غي قطع وصلوني صور مركبين .. باينة فيه معاه فحالا حقيقيين .. و صور خاايبييين بزاف، انا خفت .. صونيت علييه كانستفسر منو و هو يقولي أجي لهاد العنوان ولا نصيفط الصور لراجلك .. انا خفت على علاقتي بحب حياتي .. خفت يفارقنا بسباب دوك التصاور، زربت ومشيت للعنوان اللي عطاني خايفة .. وصلني غي الطاكسي .. فاش وصلت لقيتها ڤيلا .. دخلت لداخل مخلووعة كانعيطليه حيت لقيت الباب مفتوحة .. حتى ماحسيت براسي غي فاقدة وعيي فاش فقت لقيت راسي ففراش عريانة و داك الحقير ناعس جنبي .. فيقتو كانستفسر منو وهو يتبسم .. و قالي بأنه غتاصبني وانا ماشي فوعيي .. تصدمت .. كانشوف فيه بلا مانقول حتى حاجة حتى تحل علينا الباب و دخل حب حياتي شافني بداك المنظر اللي مكايتشافش .. غي شافني بانت عليه الصدمة وانا كثثر .. ماعرفتش شنو جابو و شكايدير تما ولكن عرفت ان مؤامرة خايبة تحاكت ورا ضهرنا .. مؤامرة من داك عبد الهادي .. شاف فيا نظررة كأنني رخييسة و تمتم بكلمات باقا عاقلة عليهم فوذني لداابا "خسااارة حبي لييك .. ماتستااهليش ألخااينة .. الله يعطيك الموت" ديك الدعوة خلاتني نتمنىى أنها تتحقق ..خرج مخليني مع داك الوحش ضربتو و سبيييتو .. و عييت تهدييت بالبكا .. حسيت براسي ضعت .. حسيت براسي وحيييدة .. حب حياتي ثيق شنو شاف و داك الموسخ نجحات خطتو الموووسخة .. قلبي طاااب بالبكااا .. حتى ناضلي ثاني و عاود غتاصبني .. تما تدمررت .. و بزاااف .. حسيت براسي ساهلة غتاصبنيي جوج خطرات و فنهار واحد .. خسرت كولشي .. راجلي و عائلتي .. شرفي .. سمعتييي كوولشي مشااا كوولشي


كوولشي مشااا كوولشي .. ولييت نكرةة .. حاولت ننتااحر فديك الليلة .. نقذني عبد الهادي و فاش وليت بخيير هلكني عصا و عااود تعداا عليا ثاني .. حبسني عندو الخرووج ماعمري خرجت من عندو .. واحد النهار جا عندي كايضحك ورالي وراق الطلااق .. صافي رجلي و كل حياتي طلقني و تخلا عليا .. زدت تدمرت عااودت حااولت ننتاحر بعد داك الخبر الصادم .. كنتت فاقدة الأمل فحيااتي .. ولكن نقذني عبد الهادي و فاش كانت معانا الطبيبة خبراتو انني حااملة .. كنتي نتي حاملة بييك .. بكييت و رفضت مابغيتكش فاللول .. ولكن ولدتك بالزز مني .. فاش ولدتك تقبلتك اول ماشديتك بين يديي حسيت بقلبي تفااجا .. وليت كانضحك معاك غي نتيي .. كانفرح معاك غي نتيي .. كانلعب معاك غي نتيي .. فنهار جا عبد الهادي سكران .. بغا يقيصك مابغيتش دغيا خبيتك فيا خاايفة عليك من بطشو ولكن هو جلس جنبي و بدا كايدوي و يخرج و يدخل فالهضرة .. قالي أنه مغايآذيكش واخا متأكد أنكي ماشي بنتتو .. هو كان عااقر أبنتي، مرتو اللولة خانتو مع واحد آخر قالي راه قتلها و علي حتى هو ماشي ولدو .. قالي راه كايبغيك نتي كثر حيت نتي بنتي انا، داك الساع زدت بغيتك فاش عرفتك ماشي بنتو سعادتي بيك تزادت .. بقاتلي ذكرى من فخر اللي تحرمت منووو .. سنيين دازو و عمرني جبدت موضوعك مع عبد الهادي وحتى هو ماعقلش شنو قالي مللي كان سكران .. كان كايبغيك و يعاملك على أساس أنك بنتو .. كان كايفضلك على علي فكووولشي .. و حتى علي كان عارف أنكي ماشي بنتو .. فنهار جهلت علييه تعصبت و ضربتو كانغوتت و نقولو بعد من بنتي هادي ماشي بنتك .. قتلو نتااا متأكد و عارف أنها ماشي بنتك ماتبقاش توهم راسك بالكذووب .. تما سمعنا علي و حقد عليك .. كيفاش ماشي بنتو و كايبغيك كثر منو، مور ديك الليلة عبد الهادي زااد وحشية ولا كايضربني بلا رحمة حتى كانفقد وعيي و يغتاصبني حاولت ننتاحر جوج مرات ثاني واخا عمرني بغيت نتفرق معاك إلا ان حياتي معاه كانت جحييم .. جهنااام و كفس منها .. تخايلي الخروج كان بالسيف باش كايخليني غي لا خرجتك للجردة ولا للمول .. دازو سنيين كبرتي وليتي شااابة كنت مخبية عليك ألمي ووجعي و كانتبسم فوجهك باش ماتحسيش بمعاناتي


فواحد النهار خرجتك للملاهي و تما تفاجات حياتي من جديد .. شفتو بعد سنييين كثيييرة دازو, قلبي حسيتو مشا و جا بغا يوقفف .. وليت كانترعد بوحدي .. تفافيت و حتى هو بقا كايشوف فيا بحزن و عتااب .. خليتك كاتلعبي فواحد اللعبة و مشيت تبعتو كانجررييي .. جريتو لبلاصة خاوية و عنقتو بكل جهدي .. كنت موحشاااه بزاااف، حتى هو عنقنييي و زير عليا و قالي انه توحشني و عمرو مانساني انا فرحت و شرحتلو كوولشي فديك اللحضة .. مابغيتش نعاود نخسرو مرة اخرى .. قلتلو كولشي اللي وقع و هو تفهمني تعصب من شنو وقع .. لامني علاش مصارحتوش بتحرش عبد الهادي من اللول .. طلب مني السماحة و قالي نرجعو لبعضنا .. قتلو كيفاش قالي نفكر و نرد عليك .. درنا فوقاش نطلاقاو مرة أخرى و مشيت معاك للدار، دازت سيمانة و عاودت خرجتك للمول و تم طلاقينا .. فاش طلاقينا كان خطط كيفاش غانهرب منو .. صافي قالي الخطة و فاش قلتلو عليك .. قالي حتى نتي ناخذوك ولكن انا رفضت حيت انااا خفت عليك بزاااف .. خفت لا يآذيك عبد الهادي .. خفت ينتاقم مني بيك .. كنت عارفة لا بقيتي معاه مغايآذييكش

دازت مدة و واحد النهار خرجت فغفلة من كولشي خذيت الطموبيل و مشيت بسرررعة كبييرة .. فنص الطريييق قريبة لواحد الجرف خرجت من الطموبيل و هو جاب جثة بنفس مواصفاتي تقريبا .. كانتت مرا ميتة مجهولة الهوية تقريبا بنفس مواصفاتي .. درناها فديك الطموبيل و هربنا .. الطموبيل نزلات من الجررف بسرررعة و تفررگعاااات .. زاااد باباك زند الحريق مابغيناش ملامح الجثة يتكشفو و بهكا انا تعرفت متت .. حتى فالتشرييييح دالجثة تزور التقريير على انني انا صاحبة الجثة و هربت مع باباك لبعيييد .. ماكنتش باغاك أبنتي تحقدي عليا .. ماكنتش باغا نبعد علييك، ماكنتش باغا هادشي يوقع ولكن حياتييي كانت غادة للهاوية و شحاال من مرة كنت غاننتاحر و نرتاكب جريمة فحق نفسي و معصية مع الله .. تعطاوني فرص كثااار و الحمد لله اللي مامتش شانقة راسي ولا قاطعة عروق يدي ولا شاربة دوا ولا ولا ولا .. أنا دابا كل ليلة قبل مانعس كانحمد الله اللي عطاني فرص كثيييرة باش نكمل حياتي .. كنزة كانتمنى تفهميني عفاااك .. انا توحشتك بزاااف .. توحشنااك انا و باباااك .. توحشنااك بزاااف .. باغي يعنقك و يبوسك .. باغي يعطيك حنانو و حتى انا .. تحرمنا منك سنييين كثييييرة .. كنا خايفينك ماتقبليناش فحياتك .. خفناك تهربي مننا، بغيت أبنتي نحن عليك فهاد المدة اللي باقيلي نعيشها .. الحاافز اللي قواانييي باااش نجي عندك اليوم هو أنني عرفت راسي مريضة بالسرطاان دالرحم .. كانخضع للعلاج حاليا و كانتمنىى تسامحييني أحبيبتي .. لا سامحتيني غانمووت مرتااحة .. عفااك احبيبتي عفاك حلي البااااب

سكتاات يامنة مدة طوييلة متكية براسها على الباب كاتشهق و تبكي باغا تعننق بنتها اللي بدورها متكية على الباب حاطة يدها على الپوانيي و مزيييرة عليه كاتنهج و تمتم بصوت خافت بحرررررقة

-م مامااا (نزلات دمعة من عينها ولات كاترجف) توحشتتتك أمااامااا توحشتك هئننننننن (حلات الساقطة دالباب بسرعة و حلات الباب خارجة لبرا .. غي خرجات شهقاات بصوووت عاالي كاتشوووف فماماها طااايحة فالأرض مكاتحركش .. نزلااات عندها بسررعة قلبها كايضرب بسررعة و خووف و غوتااات بصوووت عاالي ملهوووف و خاااايف)

:عيطووووو للإسعاااااااف .. ماماااااااااا حبيييبتييييي .. مااامااا انا سمحتليييك عفاااك ماتموتيش بعدما رجعتييي .. عفاك اماما عفااااااك 😭😭😭😭


فمكان آخر و في دولة أخرى

گالس فمكان عااالي .. قرعة دالروج بين يديه، عيونو كايشوفو فالسما و نجووومها ساااااهي .. بقا على حالو شحااال مكايتحرك مكايتململ .. عينيها و نظراتها ليه كايبانو بلمعانهم مكان النجوم فالسماء .. تبسم ابتسامة ساااهية و نطق بخمول و حروف ملوية بسباب الخمر اللي كايشرب

-أربع سنين، ثلاث شهور، خمس أيام و ساعتاين .. آخر مرة شفتك كانت قبل هاد الوقت كااامل .. توحشتك يا قلب قلبي .. توحشتك موووت (طاح على ديك القرعة كاااملة كايكركبها ففمو .. عينيه دمعو و حماااارو بششششدة .. غمضهم بألللم أكبر و تكا براسو على الأرض كايكمل تذكرو ليها و لتفاصيلها اللي مانساهم حتى ثانية فهاد السنين اللي فاتو)

#المشفى

توقفات سيارة الإسعاف فباب المشفى .. تحل الباب الخلفي و نزلو جوج ممرضات دافعين يامنة فوق الپاياص و كنزة معااهم مخلووعة و مرعوبة على ماماتها تابعااهم بسررعة عينيها كايدورو بلهفة على تقاسيم وجه أمها .. تقاسيمهم الشاحبة .. دخلات معاهم كاتجري و هوما ديجا موجدين غرفة الفحوصات ليها .. غا دخلو خداوهالها مبااشرة، و كنزة تابعاهم .. وقفو كنزة فالباب مانعينها من الدخول معاهم و سدو الباب عليها مخليين المسكينة مخلوعة على ماماها اللي كانت ضاناها ميتة .. الأم اللي تصدمات بوجودها فالحياة .. الأم اللي من زمان و هي كاتمنى لو كانت باقا حية تضمها و تطبطب عليها و تواسيها فمحاينها، تجط الراس على ركابيها و تشكيلها قهر الزمان ليها .. ماعرفاتش كيفاش تتصرف أول ماشافتها تصدمات و تدعقات .. غضبات منها، كانت عايشة و عمرها قالت أري نطمن بنتي حبيبتي عليا .. حطات يدها على قلبها كاطبطب عليه و تواسيه، و نزلات بطووول جسمها جالسة فالأرض، حاوطات نفسها بقوة بيدياتها و تنفسات بوهن و خوف من خسارت الصدر الحنين من جديد، حطات يدها على فمها كاتمتم بخوف

-م ماتموتيش دابا عفاااك انا مزال ماشبعت مننك😭 مزال محتاجااك فحياتي عفااك ماثيقت راك رجعتيلها .. انا تعصبت منك فاش شفتك حيية .. غضبت حيت ماجيتيش عندي شحال من عااام دابا كنت محتاجاك كثر من القياس، ولكن راني فرحت فداخليي انكي عاايشة .. فرحت بزاااف و قلبي تفاجى عليا .. عفاك أماما عفااك بقاي معايا مزال (بقات ضامة راسها لمدة طويييلة مخلوعة عليها .. دازو لحضات جا مصعب بكرسيو المتحرك عاد كي وصلو الشيفور للمشفى .. قرب عند كنزة و وقف قدامها كايتسائل)

-اش طرا؟؟

كنزة شافت فيه بنظرة ذاابلة و تمتمات بنبرة حزينة:ماعرفتش، مااااعرفتتتش (حطاتت يدها على وجهها ياني كاتشههق .. و تبكيي بحززن .. مصعب تنهد و قرب عندها حط يدو على كتفها و تمتم بخفوت)

-غاتكون بخيير أعمري

كنزة تنطرات منو و وقفات كاتشوف فيه بعينين لامعين بالدمووع:نتااا علاااش خبيتي علياا هااا؟؟ من فوقاش عارف هادشييي امممم .. كنتي عااارفنييي أنني كانتمنى ماامااا تكون معاايا ولكن خليتيني ضانة أنها مييتة .. كنتييي عاارفني كااارهة داااك القواااد دعبد الهااادييي و كانتمنى لو مكاانش بابا وماخبرتينيييش بهاااادشيييي، قولي من فوقاش و نتا عااارف أاااا من فووووقااااش

مصعب حنا راسو للأرض و تمتم بتنهيدة عمييقة:من أول ماشفتك و من قبل گاع كنت عارف بكولشي عليك و على عائلتك

كنزة خرجات فيه عينيها بششششدة و حلات فمها بعدم تصدييق:😮😮

مصعب تنهد:كيفما سمعتي .. انا من اللول كنت عارف بكولشي، من اللول صيفطاتني ماماك و باباك باش نحمييك من شر عبد الهادي و نكون معاك و نعاونك فحياتك بالتخبية .. ديجا هوما اللي عاونوني باش طورت ديك الشركة اللي عندي .. ماماك و باباك هوما السبب باش طلاقينا أنا وياك أكننزة

كنزة غمضات عينييها بقوة و حلااتهم كاتعض شفايفها مامثيقاش أش كايقول داك اللي كاتقول عليه، صديق عمرها و سندها فالدنيا .. فكل حزة كاتلجئ ليه و تبكي فوسط حضنو و تشكي عليه و هو مخبي عليها أكبر سر خااااصها تعرفو فجل حياتها، تمتمات بعدما صرطات ريقها بعدم استيعاب:حتى .. ح حتى نتااا كذبتي عليا .. مالكم كاملين كاذبين علياا هاااا!! انا ساهلة لهاااد الدرررجةة باش نثيقكم دغيييا؟؟ واس انا هبيلة لهاد الدرجة أمصعب هممم؟ گاع اللي عزاز عليا كايكذبو .. حتى حاجة مافحيااتي ماصحييحة .. كولشي معوج كولشي كذووب .. نتا و ماما و عبد الهادي و گااااع الناس اللي عرفتهم كايكذبو و يستغفلووني .. علااش أمصعب علااششششش

مصعب قرب بكرسيو جيهتها باغي يشدها و هي ترجع اللور مخنزرة:لا ماتقيصنيش .. ماتعاودش تقيصني ولا تهضر معاايا .. ماتسناش أنني نسامحك بهاد السهووولة

مصعب عض على فمو بقوة:كنزة

كنزة طلعاتو ونزلاتو بعينيها بعصبية:أحسنلك ماتزيدش حرف معااايا و إلا مغايعجبك حاااال

شافت للجنب مزادتش دواتو مزال بعد الشي اللي قالتو و حتى هو لزم الصمت كايشوف فيها بهدوء، مدة ماطويلاش خرج الطبيب من غرفة الفحص بصنطات معلقين فعنقو و شاف جيهت كنزة اللي قربات عندو بلهفة

-شنو طرالها؟؟

الطبيب تبسملها:حاليا ولات بخيير .. غي عفاكم حاولو ماتعصبوهاش .. ماثثوثرش و ماتخلعش .. هاد الفترة اللي دايزة منها حساسة بزاااف .. العلاج جاري ليها و كانتمناولها كل خير

كنزة ومأتلو براسها:واخا .. نقدر نشوفها؟

الطبيب شارلها بيدو جيهت الباب:تفضلي .. كاتسول عليك راها فايقة

كنزة ومآتلو براسها و مشات ببطئ جيهت الغرفة .. قلبها كايضرب بسررعة و خوف و ثوثر و ملبكة، حطات يدها علىى البوانيي و دفعاتو داخلة لداخل .. طلات براسها و هي تنهد بقوووة كاتمتم

-تشجعي أكنزة (كملات طريقها لعندها .. و هي توقف فلحضة كاتشوف فماماها فوق السرير .. السيروم لاصق فيدها و باقا بالفستان اللي كانت لابسة مغطية بلحاف السرير و حالة عينيها بتعب كاطلع النفس بالزز .. طلقاات نفس طوييييل سخون و قربات عندها بالزز باش حابسة الدموع من عينيها .. غي وصلات لقدامها .. يامنة شافت فيها و ميلات راسها بابتسامة كاتمتم) قربي عندي أبنتي .. قربي بغيت نعنقك أحنينتي يا ضو عينيا قربي عندي قربي و ماتحرمينيش منك و من ريحتك .. ماتحرمينيش وانا فآخر أيام عمري


كنزة قربات ببطئ عند ماماها عاضة على سنانها بثوثر، جلسات جنبها كاتزير على يديها و تشوف فيد يامنة اللي ممدودة لها .. تنهدات بصوت مسموع و مدات يديها كايترعدو ليدين مها .. كولها كانت كاترجف و يديها أكثر و أكثر .. غي شداتلها يديها حسات بدفئهم و حنان ملمسها وهي تشهق بصووت مسموع .. شافت فملامحها بنظرااات عناد .. كل شوية كاتحس بيد ماماها زيرااات عليها و تمتماتلها بصوت خافت

-حبيبة قلبي

كنزة بهمس مزيرالها على يدها:م م ماما اهئ

يامنة تبسماتت ابتسامةة وااسعة و غمضات عينيها بقوة:الله على راحة .. أخييرا سمعت صوتك أكبيدتي .. أخييييرا

كنزة عينيها زادوو دمعو و تكات على ماماها كاتشهق و تنخصص و تزيير عليها:توحشتك أماما توحشتك بزاااف .. عمرني نسيتك ديما كنت كاندعي معاك بالرحمة وترتاحي فقبرك .. عمرني نسيتك عمرني .. فاش كنت كانبكي ولا كاتوقعلي شي حاجةة كانتفكر فاش كنتي كاتعنقييني و تواسيني و نتخايلك راك معايا و نتهدن .. ديما راك فذماغي .. صورتك عمرها تنساتلي .. فوقما كانشوف راسي فالمرايا كانتفكرك، نتي و حنانك و رضاك .. ضحكتك و أيااامنا مع بعضنا زمااان .. اهئ اهئ حرااااا عليك أمامااا حراام .. علاااش ماجيتيش من قبل .. ماتخيليش شحاا كنت محتاجاااك تواسيينيي و تقوليلي كولشي غايرجع حسن من قبببل، اهئ أ انا توحشتك بزاااف .. كنت كاندعي كون كنتي عاايشة و كانتمنىىى نشوفك مرة اخرى هئ هئ هئ 😭😭 مامااا علاش ماخذيتينيش معاك فااش مشيييتيي اممم. علااااش خليتيني نتعذب مع داك الشيييطان اللي عمرو كان أب ليا، عمرو كان حنييين .. طوول عمرو كان وحش .. طووول عمرو

يامنة كاتزير عليها بدوورها و تبكي بصووت عالي:كنت خايفة عليييك أكبييدتي اهنننن كنت خايفة عليك لا نتي ولا خوك .. تخلينا عليكم أنا و باباك .. خليناكم ومشينا ولكن باش تكونو فأمان على داكشي ختارينا نخليوكم .. نتي خفتو يآذيك و خفتو يوصل لخوك حتى هو يديرلو شي حاجة خايبة .. خفت عليكم بزاف على داكشي بغينا نحاربوه بوحدنا بلا بيكم ولكن كتاشفت ان القرار اللي تاخذناه كان غاالط بزاف، ضلمناكم بزوكم معانا .. نتي عانيتي كثر من القياس و خوك حتى هو كرهنا فحالك و يمكن أكثر منك .. أنا توحشتك و بزاااف كثر من القياس، توحشت بزااف دالحاجات فيك .. ضو عويناتي نتييي .. حبيبتي و أميرتي الصغييييرة نتييي .. اللي كانو مصبريني عليك طوول هاد السنييين هوما تصاورك من عند مصعب، هوو ديما كان عاطيني خبارك .. كنت خاايفةةة من ردة فعلك اتجااهي، عفاك أحبيبتي سمحييلي واللهما لخاطري .. عمرني كنت باغا نخليك بوحدك معاه عمرنييي


كنزة رجعات براسها اللور كاتمسح دموعها و تمتم بصوت مرعود و الشهقة كاتقطعلها الهضرة:ص صااافي .. أنا س سامحتتتك.. ب براااكة من البكااا دااابا مغايفيدنا فوالو، أهم حاجة أنك باقي عايشة و انا ماتحرمتش منك و و عاودت شفتك (شداتلها يدها و باستها بقوووة كاتمتم) عفاك واعديني غاتستااجبي للعلاج و مغاتموتيش .. عفاااك بقاي معايااا .. مباغاكش تموتي ثاني و نتحرم منك (شداتلها وجهها كاتشوف فملامحها) شوفي راسك كبرتيي و شرفتي هههه شوفي التجاعيد اللي ماكنتيش كاتحمليهم هههه .. شعرك بدا يشيب ألملعوقة هههه

يامنة تبسمات فوسط بكاها و تمتمات بصوت خافت:كانواعدك غانبرا على قبلك نتي و خوك و باباك .. غانعيشو بسعادة مع بعضنا، ديك السعادة اللي تحرمنا منها زماااان غانعوضوها دابا

كنزة قلبها خفق بقوة من شنو قالت حسات بالتبووريشة طاالعة معااها .. عضااامها رتااعشوو و قلبها رقص على إثر دوك الكلمات "خوك و باباك"

صرطات ريقها بقوة و تمتمات بخفوت:ب بابا و و خويا

يامنة تبسمات كادوز أناملها على شعرها:اه .. باباك و خوك هههه غايكونو متحمسين يشوفوك، باباك مشا باش يخبرهم برجوعنا .. أنا و نتي غانمشيو لعندهم .. و متأكدة أنك غاترتاحي معاهم بالخصوص باباك .. هو حنييين .. قلبو بيض و كايحمااق عليك يشوفك أبنيتي

كنزة تبسمات ابتسامة وااسعة وتمتمات كاتومئ براسها:ب بغيت نشوفهم د داابا .. ب بغيت نشوفهم

يامنة:اذن نمشيو للمغرب فأقرب وقت .. فوقاش نمشيو؟

كنزة ملامحها تغيرو و عبسات بشدة:المغرب!!

يامنة ومآتلها براسها:اه المغرب، غانمشيو عن قريب .. عائلة باباك كايسكنو فمكناس عندك جدك و عمامك و ولادهم، غايعجبك الحاال .. عندنا عائلة كبيييرة ماشي فحال شحال هادي عبد الهادي و داك علييي، شحال كانكرههم

كنزة بصوت خافت:و ولكن المغرب .. أنا واعدت راسي مانرجعلوش، عندي فيه ذكرياااات خايبين بزاااف .. لا لا قوليلهم يجيو لهنا حسن

يامنة تنهدات بقوة وتمتمات:عرفت شنو طرا معاك هادي ربع سنيين ولكن ماتخافيش حنا مغانكونوش فطنجة .. زيادة غي فترة جوج سيمانات و غانرجعو لكوريا هنا .. حتى أنا ساكنة هنا على قبلك أبنتي بانية حياتي هنا .. باش نكونو قراب لبعضياتنا


كنزة سكتاات موودة بلا ماتجااوبها، ماعرفاتش شنو تقولها .. من جهة تحمسات لقاء باها و خوها .. تبسمات مللي فكرات فيهم .. قلبها نبض بقوة و حنييين .. بغات تحس براسها عندها عاااائلة .. العاائلة السعييييدة ماشي العدوااانية، ماشي ديك العائلة اللي خلاتها تعاااني و تبكي .. ماشي العائلة اللي دمرااتها .. ولكن واخا باغا تشوفهم .. إلا أن المغرب بالنسبة ليها حظ سيء .. مدينة الموووت بالنسبة ليها، طغا الصمت بيناتهم .. هي حاطة راسها فوق حضن ماماها اللي كاتطبطب عليها و مرتاااحة من ريحتها اللي كيف المسك و لمستها الحنونة ليها

نبض الأمان
نبع الحنان
من تحت قدميك لنا الجنان
عندما تضحكين، تضحك الحياااة
تزهر الألوان في طريقنا
نحس بالأماااان
أمي، أمي، أمي
نبض قلبي .. نبع الحناااان

تذكرها لكلمات هاد الأغنية و هي فهاد الموضع مع ماماها .. خلا ابتسامتها الواسعة تزيد توساع .. خلا دقات قلبها يزييدو فوثيرتهم .. خلا الراااحة و السكييينة و الطمئنييينة تنزل عليها، خلا عينيها يلمعو بتفاائل .. خلاها تآمن أن الله عمرو يخيب الإنسان .. طول ماعاشت أحزان .. هاد الفرحة هادي بغات تنسيها فيهم كاااملين، تنهدات بنبرة صوووت مسسموووعة حتى .. سمعو صوت الباب تدق شافو جيهتو بجوجاتهم، دخل مصعب بكرسيو المتحرك مبتاسم بهدوء

-كي وليتي أمدام .. بخير دابا؟

يامنة بابتسامة:بخير أولدي الحمد لله

كنزة خنزرات فيه و شافت فماماها:صافي غانمشيو للمغرب نشوفوهم ولكن بشرط مصعب لا

مصعب خنزر فيها:كنزة!!

كنزة خنزرات فيه:نتاا سكت واااخااا .. سكتتت مباغاش نسمعلللك صوووت .. كذاااب نتا

يامنة حطات زيراتلها على يدها:بنتي عفاااك ماتقصحيش معاه .. راه أنا اللي رغبتو و زاااوگتو .. ماكنتش قادرة نقرب منك و لكن المشكلةة اللي وقعاتليك مع عبد الهادي كان خاصنا ننقذوك منو .. فالسبيطار دالحماق عيينا نحاولو باغيين نهربوك ولكن ماقديناش و فاش خرجتي و مشيتي لأمريكا تبعنااك خطوة بخطوة وأول ماهربتي لكوريا وكلنا مصعب يعاونك .. بهكا حتى حنا نطمنو عليك و أنا اللي رغبتووو باش مايخبرك والو .. عفاك ابنتي ماتهزيش فقلبك عليه

كنزة بصرامة:هو عارفني انا كيفاش دايرة و عارف عندي مشكلة مع الكذابين و هو كل نهار كان كايكذب عليا فوسط وجههيي و عينيه كايشوفو فعيييني و بلا حيا بلا حشمة قالي فمرة من المرات نمشي نزورك فالمقببرة هه .. على أساس أنك ميتة .. صدق ممثل كايتقن دورو .. مغانسامحوش بهاد السهولة، مايحلمشش بيها

مصعب تنهد بصوت عالي و تمتم:غانمشي دابا نتوما دوزو وقت زويين مع بعضياتكم و شبعو .. فاللخر صدقت أنا اللي ماشي مزياان (قرن حواجبو بشدة و مشا خارج فحالوو مخلي كنزة و يامنةة متبعينو .. غي خرج يامنة تبسمات كاتشوف فبنتها) 

يامنة:كايبغيك بزاااف
كنزة شافت فيها بهدوء و تمتمات:أحسنلو مايبقاش يبغيني حيت أنا قلبي سادة عليييه بقفل .. أحاسيسي منعتهم باش يبغيو شي حد من جديد .. أحاسيسي أماما ولاو أحاسيس محظورة من الحب و ماجاورهم .. أحاسيس مسجووونييين و عمرهم يتحررو مزال


⚡بعد مرور تلك الليلة أو تلك الليلة و ليالي بعدها .. تقريبا ثلاثة ليالي⚡

اليوم الرابع .. كنزة مع سارة فغرفتها كاتديرلها گرينات لشعرها مبتاسمة وسارة كاتدوي بلا توقف

-كي دايل المغليب و فين زات و علاس غانمسيييو اليووما و بابا لا؟؟

كنزة بهدوء:المغرب زوين .. جا فبلاصة زوينة و باباك مغايمشيش معانا حيت انا دايرالو عقوبة و مخاصمة معاه

سارة دلات شفتها التحتية:ولكن أناا كانبغيييه هو ينعسني بعد الخطلاات .. عفاك أمامي عفاك يمسي معاااناااا

كنزة عنقاتها من اللور زيرات عليها بابتسامة:و براكة عليك أنا غانعسك گااااع الخطرااات .. يومياا غانعسك هههه و گاااع نقرالك قصصك المفضلة و نقولك وحدين جدااد زوييينين

سارة بابتسامة واسعة:يااااييي .. لاكان هكااك انا موااافكةةة .. غانمسي نسلم علييه و نبوسو البووسات داليوم وغدا و بعدو و و و (بدات كاتحسب بصباعها) و و بعد ثلث يام و لبعيااام و دااااكسييي كااامل (خرجات من البيت كاضحك و كنزة وقفات مبتاسمة بدورها .. لابسة سروال جينز مزير من لفوق ومن لتحت كايجي قصير و واسع شوية و تيشرت بيضة .. السالف مطلوق و المكياج خفيف .. شافت فالخادمة اللي شافت فيها مبتاسمة)

-جمعتلها گاع اللي قلتيلي أمدام

كنزة ومآتلها براسها:اوكي خوذو الڤاليزات للطموبيل لتحت انا غانجيبها و نزلو .. بعدا ماما واجدة؟

الخادمة:اه وجدنالها الڤاليز ديالها و كاتسناك لتحت

كنزة ومآتلها براسها و مشات بهدوء جيهت بيت مصعب .. حلات الباب و دخلات بانلها معنق سارة بقوووة و كايبوس فيها مساااخيش بيها، تبسمات بهدوء و قربات عندو بصوت طالونها المسموع فالأرجاء

كنزة مصطانعة الحدة:صافي عطيني بنتي غانمشيو دابا و نتاااا بقا هنا بوحدك .. باش نوريييك تكذب عليا مرة اخرى

مصعب طلق من سارة مبرگم:كنزة نتي حگااارة والله .. حرام عليييك 🥺

كنزة هزات سارة وعوجات فمها للجنب:حوفيك يالكذااااب لاااخووور .. باش نوريكك أنااا مساهلاش كيفما كاتحسبو كاملين .. لا نتااا ولا دوك اللي سبقوووك

مصعب بهدوء:دوك اللي سبقوني؟ كاتقصدي تيمور؟ حيت بنتيلي استثنيتي ماماك و باباك!!

كنزة بقاو ملامح وجهها على حالهم تمتماتلو بنبرة قاااسية:كانشفق علييك لا حطيتي راسك فمرتبة داك التيموور ولا مرتبة بابا و ماما .. نتا بالنسبة ليا شخص عاادي صديق دسنوات عاونييي حيت كان كايتخلص من واليديا ياك؟ كون مكانوش عطاوك الفلوس و عاونك فمشروعك و شركتك كنتي غاتشوفني فالزنقة و تدوز فحال گاع دوك الناس

مصعب زير على قبضة يدو بقووة و تمتم بصوت مخنوق:لا كنتي كاتضني أنني لهاد الدرجة مثير للشفقة و ماعندي كرامة ولا إنسانية ولا قلب ف نتي غالطة أكنزة .. سيري فحالك دابا حسنليك .. غانغلط فيك حتانا فشي كلمةة

كنزة حتافضات على ملامحها القاسية و دارت خارجة بسارة فيديها و مصعب حاضيهم .. هضرتها قصحاااتو فقلبووو .. شاف جيهت رجلييه مخنزر و تمتم بصوت حاد

-عمرك غاتتهناي مني .. عمرك أكنزة

🏮لتحت🏮
نزلات كنزة لعند يامنة بقا فيها الحال لشنو قالت لمصعب ولكن فقرارة نفسها كاتقول حوفيه حيت حتى هو دار علاش و خبا عليه .. مالمحلهاش حتى مجرد تلميح .. كان يقولها غي على عبد الهادي ماشي باها و يهنيها شوية، صدق أناني فحالو فحال اللي سبقوه .. كذاب و هي ولات عندها فوبيا من الكذابين ..

سلمات على ماماها معنقااها بقوة .. فوقما كاتلقى الفرصة كاتعنقها و تبوسها .. كاتبغي تعوض سنوات الحرمان اللي دازو عليهم .. خرجو بثلاثة من الڤيلا و كنزة كاتمتم بتسائل

-بابا كانشبهلو ولا لا؟

يامنة بابتسامة:ههههه لا خوك اللي كايشبهلو .. نتي جيتي كاتشبهيلي أنا هههه

كنزة بابتسامة:متشوقة نشوفهم .. من زماان باغا تكون عندي عائلة كبيييرة

يامنة بهدوء:حتى عائلتك مع مصعب خاصها تكبر

كنزة شافت فيها بهدوء:كانضن نتي عارفة شنو طرا مع كلير و سي گي؟؟؟

يامنة تحنحنات و حنات راسها بحزن:للأسف ولكن (عضات على شفتها التحتية بقوة) عارفة أن كولشي كان خارج السيطرة ديالكم وووو افففف، الموهيم كانو ناس مزيانين مساكن .. شفت تصاورهم معاك .. و عارفةة مكايستاهلوش شنو طرالهم، بعدا داك المجرم باقي ماشدوه؟


كنزة حركات راسها بالنفي:للأسف لا .. طول هاد السنين البحث عليه جااري (ركبو فالطموبيل بالشيفور و كنزة زيرات على سارة بين يديها) من هادشي كاامل انا خايفة غي على بنتي .. خايفة لا تتدمر هاد العائلة

يامنة شدااتلها يدها بقوة و تمتماات:انشاء الله مغايطرا والو .. باباك غايحميكم

كنزة تبسمات و تكات على كتفها مزيرة ليها سارة بقوة .. و يامنة حاوطاتها بيدييها مبتااسمةة برااحة لوجود بنتها .. المرأة النااضجة جنبها .. ماشي ديك البنوتة الصغيييورة البرييئة .. إنما مرى دالزمان يتعول عليها .. تحكات و تحردات مزيان و عاارفة بقساوة الدنيا كثر من أي واحد

🔔بعد مرووور وقتت طويييل🔔
الطائرة المتوجهة من كوريا الجنوبية للمغرب أوشكت على النزول .. كنزةة غا عرفات أنهم قربو ينزلو قلبها تزييير واخا جات لمدينة غييير المدينة القديمة اللي عاشت فيها أكفس أيامات حيااتها إلا أن المغرب خلا أثر خااايب فقلبها .. دارت السمطة ليها و لسارة و شافت فيامنة اللي قادات سمطتها و بدات كاتمتم بدعااء مزيرة على يد بنتها اللي عندها أغلى شيء فالدنيا حاااليا .. حااالما نزلات بيهم الطيااارة قلبها زااد تزير و الإبتسامة فارقااتها حنى من لمعة الفرحة فعويناتها طفاات و الذكريات الخاايببن بداو كايزوروها لذماغها قبل حتى ماتنزل من الطيارة .. غي ستاقرات بيهم الطيارة فأرض مدينة الدار البيضاء .. تأفأفات بقوة و ناضو واقفين هزات بنتها و تمشات بخطوات ثقاال باش يخرجو من الطيارة .. غي وصلات لسلم النزول حساات بقلبها تنفض من جمل ترددو فذهنها أول ماشمات هواء المغرب

"كذبت عليك فاش قتليك كانبغيك، أنا عمرني بغيتك أكنزة ولو حتى ثانية وحدة .. أنا كنت باغي ندخلك للمصيدة اللي بغيتي تدخليني ليها أول ماجيتي للشركة"

"شنو بغيتي؟؟ علاش جايا؟؟ معامن دوزتي الليلة أااا؟؟ هه شغانتوقع من بنت عائلة العربي، أكيد دوزتي اللي مع شي حد من ديك الحفلة ياك؟؟"

"تيمور كايبغي قلب قلبو"

"غانطلقو .. صافي نتي تسالا وقتك، ملييييتك"

شهقاااات بقوووة من دوك الجمل كايتعاودو فذماغها ورا بعضهم فحالا عاد تقالو كايتعاودو و يتعااودو مزال، شافت فسارة و زيراات عليها بقوة و سارة مكمشة فيها كاتشوف للخارج مبتاسمة بحمااس لسفرها خارج كوريا .. ولكن واخا متحمسة إلا انها متكية على ماماها مرخية الطيارة دوخاتها ترخااات بين يدييها .. حسات بنغزة فضهرها دارت تشوف شكون و هي تقفز .. بانلها داك الكذاب، المنافق، الغدااار واقف وراها .. ولات كاترعد وتقفقف من شوووفتو .. زيراات على بنتها بين يديها كثر حتى غوتااات مقصحةةة كاتمتم

-ماميييي ضليتيييينييي

كنزة شافت فيها مجبدة عينيها رخفات عليها شوية و علات عينيها لجيهت تيمور قلبها كايضرب بقوووة غي علات عينييها وسعااتهم بقووة و تمتمات بهمس

-علاش كايوقعلي هادشي هذاا علاااش ياربي علااش

يتبع...
شااااااافتووووو وااااهياناااري شاااافتو😱😱
ناري ناري ناااري


التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.