من البعيد وبالضبط حدا العمارة كان واقف واحد الرجل عمرو فالخمسينات حاضي جبل ونورسين فاش شافهم مشا تخبع فواحد البلاصة حتى طلعوا للعمارة عاد خرج وابتسم بشر
- بنت محمد طلعات بنت الزنقة ماتسواش *شاف فساعة اللي كانت فيدو* هادي ستة د الصباح وخارجة هي وياه ههه لقات باها ما ماكاينش و دارت اللي بغات
فنفس الاثناء كانت جاية واحد الطاكسي بيضة نزل منها محمد اب نورسين مع فاطمة
فاطمة:*كتفوه* الله كن غير خليتينا نعسوا تما حتي يزيد يصبح الحال و نجيو
محمد:يا هاد المراة يا دابا شفتي الليل راه صباح هادا ومزيان اللي جينا بكري راني خدام ا شريفة ولا نسيتي الا مزال فيك نعاس ها دارك نعسي حتى تطيبي ما كاينش اللي يهدر معاك
فاطمة: اوا صافي ما قلنالك والو نتا خاصك غير تشعل و زيد نطلعو راني عيانة باغا غير نعس
تمشاو محمد و فاطمة حتى لباب لعمارة و هما يتلاقاو بالعساس فالباب كان كيشوف فبهم شوفات ديال الاشمئزاز
محمد:سلام عليكم
العساس: وعليكم التيساع كثرتو فهاد العمارة غير المفسيدين لا حول ولاقوة الا بالله
محمد: اش هاد الكلام على الصباح ا شريف
فاطمة: تا مالك جالس تخنزر فينا و ماحملناشاي ياك لابس
- بنتكم اشريفة ولات تدخل مع رجالة لقلب دار
محمد:*خنزر فيه* قل اعود بالله من شيطان رجيم راك وليتي تدخل و تخرج فالهدرة ربيت وعرفت اش ربيت غير تغالطاتلك مع بنتك واقيلة
- ههه وتربية عندك اسي محمد بنتك راها مع داك الرجل اللي عاد جا جديد
فاطمة: دوز نطلعو ا محمد ما تديش عليه راه جالس يخرف واقيلا بايت يحلم بينا تقا الله ودخل سوق راسك
- الا ما تيقتينيش نطلعو نشوفو
محمد: يالاه زيد
فاطمة: دوز نطلعوا بحالنا لدارنا
محمد: كيقولك وصل الكداب حتى لباب دار يالاه زيد نشوفو هادشي ديالك فين غادي يوصلنا
عند جبل و نورسين
دخلو لدار و خلاو الباب محلول حيت كان متكي عليها مالقات كيفاش تسد الباب نورسين
جبل جلس من فوق الفوطوي
جبل : شكرا على وقفتك معايا
نورسين : لاشكر على واجب الا بغيتي اي حاجة انا فالخدمة ديالك*شهقات * كبوطك عامر بالدم خاصك تبدل الفاصمة واقيلة
حيد التيشورت و تكا و دار على ضهرو هي حيداتلو الفاصمة و بدا كتدهنلو بومادة غير بشوية
فجأة تحل الباب والصدمة كااانت قوية على اب نورسين ومها
العساس: هاهي بنتك العفيفة ههه
نورسين هزات راسها شهقات ووقفات
نورسين: باابا
جبل حتى هو ناض من فوق الفراش
عم الصمت بيناتهم مازال واليديها تحت تأثير صدمة من المنظر اللي شافو خصوصا ان جبل ما لابس والو من الفوق و نورسين كانت كتدهنلو البومادة فهموا الموضوع غلط نورسين عرفات راسها قفرتها خصوصا مع باباها اللي ما كيتفاكش و صعيب بزاف بداو دموع كيهبطولها من عينيها و حتى ماماها عارفة باها كي دايرة
محمد: بالعكس ا لا لا انا فاهم كلشي صحيح من اليوم انا مبري منك نساي بلي عندك واليديك
سمعوا جيران صداع كلهم هبطوا يشوفو اش واقع تبركيك و الفضول اللي فالمغاربة
- سي محمد ياك لابس اش واقع
محمد: اليوم مرحبا بيكم كلكم للجنازة ديال نورسين بنتي ماتت دعيولها بالرحمة كانت بنت شريفة
نورسين طاحت على رجلين باها كتبكي
نورسين :*كتحرك راسها يمين و شمال * عفااك ما تقولش هاكا ابابا اهئ اهئ الله يرحملك الواليدين ابابا علاش كتحكم عليا ونتا ما عارفش شنو واقع 😭😭😭😭
فاطمة: محمد نعل شيطان خلينا نعرفوا شنو كاين بعدا
محمد: اللي خاصني نعرفوا راني شفتو
محمد دفعها برجليه انهارت نورسين بالبكا جبل شاف داك المنضر وهو تنوض فيه العافية
جبل : ماااااااااااتقيسهااااااااااااااش *حنى على ركابيه و شدلها فوجها بيديها * تهدني انورسين غادي نحل كولشي ما عندك مناش تخافي
وقف جبل ووقف اونفاص ل محمد وكيخنزر فيه
جبل :بنتك نورسين اللي جالس كتعاير فيها وطعنها فشرفها اطهر من الشرف نفسو ولكن نتا كتحكم على الواحد غير بشوفة العين بحالك بحال بزااف ديال الناس الجاهلين حاشا واش تكون اب نتا حيت كن كنتي بصح اب غادي تجلس وتسمع من بنتك الحقيقة *رفع صبعو فوجهو☝️☝️ وشاف فيه بنظرة تحدي* دابا نتا نكرتي بنتك و قتلتيها كاع وباغي ديرلها جنازة ولكن كنواعدك بنتك نورسين غادي نهزها بسناني الا ما هزهاش هاد الكتف يهزها هاد الكتف والا ما هزاتهاش الارض نبنيلها قصر فالسما و تفكر مزيان هضرتي بنتك غادي تولي احسن و انا اللي غادي نوصلها بيدي وانا اللي غادي نديرلها القيمة اللي ماعطيتيهالهاش نتا اللي باها يا حسرة فاقرب فرصة تخليتي عليها و فاش غادي تندم غادي تلقا فات الفوت و تفكر هدرتي مزياااااااان
جبل مشا زدح الباب على دوك جيران اللي واقفين كيشوفو و كيهدروا بيناتهم
نورسين طايحة فالارض كاتبكي مشا عندها جبل عنقها وكيطبطبلها على ضهرها
جبل : ما عندك مناش تخافي انا معاك من هنا الفوق ما عمر دمعة تنزل من عينيك كنواعدك
نورسين زادت تحشات فيه و عنقاتو كتبكي بحرقة
نورسين:ظلمني ا خويا ظلمني بابا اهئ اهئ حشومة عليه اهئ اهئ دارلي الجنازة وانا حية ما بقيتش فيه ما سمعش مني حتى الحقيقة اهئ اهئ انا بغيت غير نعاونك اهئ اهئ مادرت حتى حاجة غلط اهئ اهئ ظلم صعيب و صعيب بزاااف خصوصا الا كان من اقرب ناس ليك اهئ اهئ
جبل دوز يدو على شعر نورسين
جبل : انا معاك *طلق منها و حط يديه على خدودها * ديري هادي فبالك نتي مادرتي حتى حاجة اللي تندمي عليها انا سباب سمحيلي
نورسين :*حركات راسها بنفي * نتا مادرتي والو انا اللي جيت عندك اهئ اهئ كن غير ما جيتش ما كانش غادي يوقع هادشي من اللول
جبل : هادشي قضاء و قدر ماتلوميش راسك نار لم تحرق سيدنا ابراهيم و سكين لم يقتل سيدنا اسماعيل
وبحرلم يغرق سيدنا موسى و حوت لم يأكل سيدنا يونس قل لن يصيبنا الا ما كتبه الله لنا
جبل وقف و هز تيشورت ديالو لبسو بالخف و مدلها يدو باش يعاونها تنوض من الارض
جبل: يالاه نمشيو نهضرو معاه
نورسين :*بفرحة* واخا
خرجوا و طلعات نورسين فالدروج و جبل من موراها فاش وصلات لدارهم لقات باب دار محلولة و القرآن مطلوق و الجيران كيدخلو لدار و كيقولو" الله يرحمها "
نورسين بدات كتكرر ليها فودنيها جملة "الله يرحمها " واش هادو من نيتهوم قتلوها وهي حية واش ما عندهومش القلب ؟ هي ما دارت والو ظلموها بزاااف ما عارفينش حتى الحقيقة
غمضات نورسين عينيها وبداو دموع كينزلولها احساس خايب بزااااف حسات بروحها غادي تطلع كانت غادي طيح كن ماشدها جبل
جبل: نورسين عفاك ما تخلعينيش عليك
نورسين حلات عينيها و شافت فيه و قالت
نورسين : حشومة عليهم يديرولي هاكا شنو درت ليهم واش قصرت معاهم فشي حاجة اهئ اهئ علاش علاش اهئ اهئ
جبل :*شدلها وجها بيديها بجوج و قرب و حط جبهتو على جبهتها * ما زال ما تزاد هدا اللي يحطمك و لا اللي ينزل دمعة من عينيك ما دامني حي
بعد عليها و شدلها يديها و جرها
جبل :اجي معايا
دخلو لدار و جبل قابطلها فيديها شافوهوم جيران بداو يتغمازو بيناتهم و يهضروا فودنين بعضياتهوم عليها
نورسين طلقات منو و مشات حدا مها اللي كانت كتبكي فطرف
نورسين : ماما
فاطمة هزات راسها من الارض و شافت فيها
فاطمة: اش جاية ديري هنا راه باك الا شافك يقتلك سير ابنتي بجلدك صحيح كبدتي كتشوا عليك ولكن ما لقيت ليك جهد نتي ختاريتي داك الراجل سيري معاه
خرجات كنزة من الكوزينة شافت نورسين حدا مها وهي تسعر
كنزة: هييييي نتيا اش جاية كديري هنا مرمدتي لبابا وجهو فتراب الله ياخد فيك الحق فهاد النهار
مشات لعندها بغات تخرجها وهو يشدها جبل من يديها
جبل: *رفع حاجب و حط لخور *نتابهي لكلامك و عرفي راسك اش كتخرجي على فمك
كنزة نترت منو يديها
كنزة: نتا هو صحيبها ياك جايباك دافع عليها
جبل :*دور وجهو بجنب وضحك وعاود شاف فيه* نتي هي كنزة ختها ياك
كنزة: انا ما خت حد
جبل: غادي تندمي على كل كلمة خرجتيها من فمك
كنزة: خرج صاحبتك وسير فحالك من الاحسن
مشات دخلت كنزة وحطات لنورسين شانطتها د الحوايج حدا الباب
فاطمة: سيري من هنا ابنتي الله يرضي عليك باركة غير داكشي اللي شفنا هاد الصباح
نورسين : حتى نتي ا ماما اهئ اهئ ما تيقتينيش
كنزة:*جبدات التيليفون من جيبها و دخلات لتصاور اللي صيفطلها علي* و هاد التصاور الالا اللي جالسة معاه فالقهوة صدقتي غير موسخة بنت زنقة
ما حسات بطرشة منين جاتها كان جبل بالطبع
جبل:*هز جبل صبعو كتهديد ليها * مازال غادي دور ليام و نفكرك فهاد الهدرة و من اليوم مرحبا بيك فجهنم كيفما كحلتيلها حياتها غادي ندمرك انا بيدي
مشا جبل عند نورسين
جبل:يالاهي نمشيو من هنا
جرها من يديها و وقف حدا الباب وقال
جبل: * بالغوات* الا نتوما تبريتو من نورسين و مابغيتوهاش مرة هي ما باغاكومش الف مرة وتفكرو مزيان اش غادي نقول ليكم مزال دور ليام و تجيو تبوسولها رجليها باش تسمحليكم على هادشي ولكن غادي يكون فات الفوت *شاف فنورسين اللي كانت كتشهق بالبكا *نورسين جوهرة غالية ما عارفينش قيمتها نورسين غير كتبكي و تشهق هزات صاك د حوايجها من الارض و دارت لقات نضرة اخيرة على دار اللي تربات فيها وعاشت فيها شحال من حاجة دوزتها فيها كلشي تبخر فرمشة عين تبسمات و مسحات دموعها
نورسين : ظلم ظلمات يوم القيامة الله ياخد الحق فلي كان حيلة و سباب
★★★★★
عدالة ربانية منصفة و ربما مخيفة للبعض حيث ان كل ما تفعله سيرده القدر لك و سيكون حصادا لايامك
المقبلة سواء كان قمة اللطف أو الشر
هز جبل لنورسين صاك اللي كان فيديها و هبط هو وياها كارزلها على يديها بحال كيقولها انا معاك و ما عمري غادي نتخلا عليك واخا تخلاو عليك اقرب ناس ليك بحال كيقولها انا سند وانا ضهر اللي غادي يحميك من هنا للفوق ما عمري غادي نخلي شي حد يآديك
" أخبرني كيف أحميك من الحياة
ومن وجعها من خوفها من حزنها
كيف أتشكل على هيئة برد و سلام على قلبك "
هبطوا لتحت ووقفوا حدا باب العمارة جبل جبد التيليفون من جيبو و دوز الرقم د الكارد ديالو
جبل: جيب الطوموبيل
- واخا اسيدي
قطع و رد التيليفون لجيبو نورسين واقغة مصدومة مازال ما تقبلاتش واليديها يلوحوها للزنقة ما حنوا فيها ما رحموها لا ومن الفوق دايرين ليها جنازة كاع تكات على الحيط اللي كان موراها وبدات تبكي وكتشوف فنقطة واحدة تجمعوا عليها الاحاسيس الخايبة اللي كتقطع القلب ديال الانسان من لداخل احساس ظلم الخيانة الحزن حالتها فهاد اللحظة ما تمنايه لحد جبل كيشوف فيها بقلة حيلة ما عندو ما يدير ليها غير انه يواسيها هو الوحيد اللي جرب هاد الاحاسيس اللي كتشعر بيهم هزات راسها كتشوف فناس اللي غاديين و اللي جايين كايجيبلها بالها كيضحكوا عليها و كيهدروا فيها دارت يديها على ودنيها و بدات كتكرر بفمها بالغوات "بعدووووااا منيييي " و كترعد كلها
جبل فاش شافها بداك الحالة تزعزعلو قلبوا من لداخل فكراتو فنوبات الهيستيرية اللي كانت كتجيه فالصغر ماحس براسو حتى وقف حداها و عنقها باقصى ما كيملك من قوة خايف عليها بزااااف هو اللي مر من مثل هاد الضروف بدا كيقرا عليها القرآن بصوت جميل و خشن فنفس الوقت
حس بيها ترخات بين يديه و بدات تهدن شوية بشوية جبل عاد رتاح نسبيا
جبل :*باسلها راسها وحتى هو تغرغروا عينيه بالدموع و صوتو ولات فيه بحة خطيرة * ما كايناش الحاجة اللي غادي تستاهل ثيقي بيا كنواعدك غادي نعيشك ملكة فوق الارض اي حاجة تمنيتيها ولا بغيتها انا نحققها ليك ولكن عندي طلب واحد
بعد عليها و هزلها راسها بصبعانو
جبل : ما تعاوديش تبكي و لا تقلقي كنترجاك انورسين الا كنتي نتي كتبكي عينيك اش غادي نقول انا اللي قلبي كيبكي دم امم
نورسين غير كتشوف فيه و جها ولا حمر
نورسين : عفاك ديني من هنا كنترجاك ما بقيتش قادة نصبر كنحس براسي كنموت شوية بشوية
جبل : شووووت ما دكريش الموت على فمك عفاك ما نقدرش نستحمل هاد الكلمة هادشي كامل غادي يفوت ما عندك مناش تخافي
نورسين :*بترجي * عفاك عاوني نخرج من هادشي ما قاداش اخويا على هادشي ما عمري عشتو اهئ اهئ
طاحت لارض و ناضت كتبكي
جبل : *حنا على ركابيه و شدلها فوجها بيديه * انا غادي نعاونك بلا ما تقوليهالي
وقفات واحد السيارة فااخرة من نوع الهامر حداهم ونزل منها الشيفور حل الباب
جبل وقف ومدلها يدو
جبل : كنظن جا الوقت اللي غادي تمشي لبلاصة اللي كتستاهلي
نورسين هزات عويناتها وشافت فيديه مدة عاد مداتلو يديها و قفات طلعات فالطوموبيل و تبعها جبل سد الشيفور الباب
حطات نورسين راسها على زاجة و دموع من عينيها كينزلو شلال
جبل هز التيليفون و دار فيه ليزيكوطور وحط وحدة فودنيها وو حدة فودنيه
طلقلها القرآن سمعاتو و تهدنات كتحس بربي كيخاطبها و كيسيفط لها رسائل من خلال الآيات خاصة فاش سمعات آية " نَعْلَمُ أَنَّكَ يَضِيقُ صَدْرُكَ بِمَا يَقُولُونَ (97) فَسَبِّحْ بِحَمْدِ رَبِّكَ وَكُنْ مِنَ السَّاجِدِينَ (98) وَاعْبُدْ رَبَّكَ حَتَّى يَأْتِيَكَ الْيَقِينُ (99)"
تهدنات و ترخات حسات بلي ان الفرج قريب وربي ما كيحيدلك حاجة حتى كيعطيك حاجات هوما غمضات عينيها ونعسات
جبل فاش شافها نعسات قادلها راسها فوق من كتفو و دور يدو مور عنقها و عنقها جنب ظهرات الابتسامة على وجهوا أكيد هو فرحان فهاد اللحظة شكون كان يقول غادي يجي هاد النهار اللي تنعس فيه نورسين بين أحضان جبل داتو كلها كترجف العرق كينزل منو وهي بالقرب منو تأثيرها عليه خطير ماليه حدود ماحس بدمعة حتى نزلات من عينو كتعبير على الفرحة و السعادة اللي كيشعر بيها حبيبتو لي عشرين عام و هو يتمنى يشم غير ريحتها او لا غير يطمن على أخبارها هاهي بين يديه مسح ديك الدمعة اليتيمة من عينيه وقال
جبل : اللهم إنك انت العزيز الكبير وانا عبدك الضعيف الذي لاحول ولا قوة له الا بك اللهم سخر لي نورسين كما سخرت فرعون لموسى ولين لي قلب نورسين كما ألنت الحديد لداوود فإنه لا ينطق الا بإذنك ناصيته في قبضتك قلبها بيديك جل ثناء وجهك يا أرحم الراحمين إرحمني من ألم العشق
سنين ديال العداب و الالحاح في الدعاء جبل عمرو يأس من انه يدعي ان نورسين تكون ليه هو رغم انه انسان عصبي وكيدير شي حوايج فشكل و لكن قلبو عامر بالله و عندو علاقة وطيدة معاه
جبل ميل راسو و شاف فنورسين اللي كانت ناعسة ما جايبة لدنيا خبار مرر يدو على خدها
جبل : ملاكي الطاهر
حط يدو حدا نيفها كيتأكد واش كتنفس خايف الموت تسرقها منو ما يقدرش يتخيل انها تبعد عليه ولو لحظة
جبل : نتي انسانة انانية انورسين عرفتي علاش ؟ انا غادي نقولك علاش حيت نتي ناعسة براحة كيف شي ملاك وانا عمري دقت النعاس كيف داير نبات و نظل نفكر فيك اه انا بصح انسان مريض ولكن داية و دواية نتي قوليلي غير شنو درتلك باش تعدبيني هاد العداب كامل ا عمري امم
قاطعو صوت الشيفور اللي قالو
-سيدي ما قلتيليش فين غانمشيو
جبل : للفيرمة د العائلة
-واخا اسيدي
مسافة طريق استغرقات أربع ساعات باش يوصلو للفيرمة اللي غادي يو قعوا فيها أحداث غادي تجعل من نورسين انسانة بشخصية جديدة و جميلة
وقفات اللوطو نورسين بدات كتحرك عويناتها غير بشوية حتى حلاتهم لقات راسها فوق من كتف جبل بعدات عليه و تفوهات
جبل:صباح الخير أنعاسة هه
نورسين غير كترمش بعينيها مازال مدهشرة بنعاس
نورسين : فين حنا
جبل : غادي نز لو و غادي تعرفي
نزل الشيفور وحل الباب لجبل ولنورسين
نزلو من الطوموبيل و حلات نورسين فمها فجمالية المكان
جميع انواع الورود كاينين فهاد المكان اشجار اوراقها مختلفة الالوان الشيئ لي عطا للمكان رونق خطير مساحات شاسعة كتحسي براسك واقفة فجنة من فوق الارض حولات نورسين نضرها لقات مجموعة من الاحصنة كاينين فهاد المكان مكان رائع بامتياز
الطبيعة ديما كتبعث احساس الراحة و الطمأنينة و ديما فاش الواحد كيكون مخنوق كيمشي يا للطبيعة يا للبحر كتحس بنفسك كتفاجا و كترتاح سبحان الله
نورسين شافت فجبل
نورسين : زوينة هاد البلاصة ديالمن
جبل : ديال أمهر أطباء نفسيين عرفتهم فحياتي
نورسين :نعاام؟؟؟
جبل: تفضلي
تقدمات نورسين للامام وجبل من موراها كان واحد الممر طويل كتمتد على طولو جميع انواع الاشجار و الازهار كانت واحد الفيلا كبيرة كتبان من البعيد شافتها نورسين و استغربات
نورسين : سمحلي و لكن واش ممكن نعرف فين جايبني جبل:*شاف فيها بنص عين * ما كثيقيش فيا
نورسين : من بعد هادشي لي عشت حوايجي ما بقيتش كانثيق فيهم
جبل : من حقك
وصلو لحدا ديك الفيلا شافوه واحد لكارد جاو كيطيروا حلوا ليه البوابة الخارجية بابتسامة
لكارد: سلام موسيو جبل شرفتينا بقدومك
جبل اكتافى انو يحرك راسو ليهم كانت فيلا كبيرة و برا ديالها كاينة واحد النافورة كترش الماء و لكن الغريب فالامر ان الورود اللي كاينين داخل هاد الفيلا كلهم بلون الاحمر عكس الورود اللي كاينين برا مكان رائع بامتياز
تمشاو حتى و صلو لباب الرئيسي دق جبل الباب وهو يتحل
كانت واحد البنت جميلة عويناتها فالرمادي و بطيزة شوية و حنيكاتها منفوخين و حميمرين و عاقدة راسها بواحد الدرة د حياتي ولابسة واحد البيجامة فالاحمر عمرها 18 سنة
شافتو وهي تصدم ضهرت ابتسامة جميلة على و جهها وترمات فأحضانو غادي طير بالفرحة منين شافتو
-خويااااااا جااااا هههه مرحبا بيك
جبل : *عنقها بدورو حتى هو فرحان بيها * ترحب بيك جنة أزوينة
طلقات منو و شافت فنورسين اللي غير كتشوف ما فاهمش اش واقع
-خويا شكون هاد البنيتة
جبل: واش دابا غادي تخلينا واقفين فالباب
-أ سمحولي هههه تفضلو
دخلوا لداخل ونورسين زادت حلات فمها من روعة المكان اللي هي فيه الارضية كانت برخام الديكورات على الاشكال والالوان اما مساحة المكان شاسعة بلا قياس
- ما غاديش تقولي شكون هاد البنت
جبل: فعوط ما تطرحي قوة الاسئلة سلمي عليها و رحبي بيها
مشا جبل جلس من فوق واحد الفوتوي و دار رجل على رجل
نورسين : سلام اختي
- وعليكم السلام مرحبا بيك عندنا شنو سميتك
نورسين : نورسين
- امم سميتك زوينة بزااف انا اسميتي جوهرة
نورسين : متشرفين اختي
جبل : جوهرة بانلي ما كاين حد هنا
جوهرة: لا راهم الفوق
وقف جبل وتمشا بخطوات ثابتة و واثقة كيفما العادة قبط فيد نورسين و زاد طلع فالدروج نورسين نترت منو يديها
نورسين : ممكن تفهمني فين انا
جبل حول عينو ليدو و هز راسو شاف فيها
جبل : علاش حيدتي يديك من يدي
نورسين : شوف الله يرحم ليك الواليدين عنداك تشوفني يصحابلك غادي تقدر تلعب عليا يصحابلك انا بحال دوك البنات اللي كتمشي معاهم حتى لهنا و باركة عييت انا عييت من هاد الحياة اللي جا كيجرني كيف بغا حتى لامتى غادي نبقى هاكا اهئ اهئ جاوبني عفاك هادشي نزل عليا دقة وحدة بين ليلة ونهار وليت مقطوعة من شجرة
جبل : *شاف فيها ودار عندها كامل * ما تبكيش عفاك سمعني صافي ما غاديش نعاود نحادي فيك الا كنتي كثيقي فيا غير شوية اجي معايا واخا
نورسين حركات راسها بالايجاب و طلعات معاه
ما حدهوم كيطلعوا و ما حد صوت موسيقى كلاسيكية هادئة كتسمع حتى و صلوا لطابق الثاني اللي كان لايقل جمالا عن طابق الاول نورسين بقات غير حالة فمها من المنظر اللي شافت
كانو جوج ديال الاشخاص رجل وامرأة شعرهم يكسوه البياض بفعل الشيب اللي كيدل على شحال مسنين يكون كيترواح عمرهم في الثمنينات
موسيقى كلاسيكية و هادئة مطلوقة و الرجل حاط يدو على خصر المرأة العجوز و كيرقصوا باستمتاع و فرحة و كيشوفوا فبعضياتهم بحب كبير متبعين الالحان و الابتسامة ما فارقاتش وجهم
جبل شافهوم و تبسم بحب بقاو مدة المرأة و الرجل العجوز يرقصون غير مبالين بمن حولهم حتى طفات الموسيقى الرجل العجوز قبل رأس المرأة
- اجمل ما قدمته الدنيا لي هي انتي يا حبيبتي مجنون بك انا يا سيدتي * حنا و باسلها يديها *
جبل صفق بيدو كدليل على اعجابو بيهم
جبل : عصافير الحب
دارت المرأة و الرجل العجوز و بدات كتضهر الابتسامة على ملامحهم الجميلة
المرأة: جبل
مشات كتجري لعندو عنقاتو وحتى الرجل العجوز ايضا عنقهم بحب
جبل : او غبرت عليكم حتى توحشتوني
المرأة: * كتمسح عينيها من الدموع * غبرتي علينا اولدي
الرجل : السبع ديالي فين شادها
جبل : امم ما بايناش عليكم توحشتوني نتوما عايشبن الحياة
المرأة : حرام عليك ما تصورش شحال توحشتك
هزات عينيها و لمحات نورسين واقفة فالطرف و كتبقلل فيهم بعينيها ما فاهمة حتى وزة من هادشي اللي كيوقع
المرأة:جبل شكون هاد البنيتة
جبل : نورسين
المرأة و رجل العجوز ظهرت على ملاميحهوم علامات الدهشة و الاستغراب و الصدمة
ديك المرأة العجوز تقدمات بضع خطوات لامام حتى وصلات عند نورسين حطات يديها المتجعدة على خدها و ميلت راسها دمعات عينيها وقالت
المرأة: بنتي نورسين
نورسين : سلام
الرجل حتى هو تقدم بضع خطوات حتى وصل لعندها و عنقها و دمعوا عويناتو حتى هو فكراتهم فشخص اللي كانت قيمتو كبيرة فحياتهم بنتهم نورسين اللي هي أم جبل كيمتالكو نفس الاسم هاد المرأة و الرجل هما الاجداد ديال جبل المرأة اسمها ياسمين والرجل العجوز عبد المالك دابا نتعرفوا على كيفاش تعرف عليهم
نورسين مسكينة حسات بدفئ الاسري معاهم كانت بصح محتاجة لشي حد اللي يعنقها و يطبطب عليها حتى هي ناضت تبكي و عنقاتهم بجوج اللي شافهوم يقول بصح هادو كيعرفوا بعضياتهم واخا هما عاد تلقاو
نورسين بعدات عليهم
نورسين : *الدموع فعينيها * بغيت نرتاح
جبل : واخا
ياسمين : جبل ولدي خليها معانا شوية عفاك
جبل: خاصها ترتاح هادشي اللي عاشتو هاد النهار بزاااف على الواحد يستحملو
تقدم جبل وقبطلها فيديها كيفما العادة و طلعها لطابق الثالث اللي كانو فيه مجموعة د البيوت حلها واحد البيت اللي حاشا واش بيت تقوليه فيلا وحدة اخرى
جبل :* طلق من يديها و حط يدو على خدودها * اي حاجة حتاجيتيها عيطيلي واخا
نورسين :واخا شكرا على كلشي
دخلات نورسين و سدات الباب فوجهو و مشات تكات من فوق الناموسية و الدموع هابطين من عينيها شلال تكمشات كيف شي جنين فكرش مو و عطاتها للبكا كتفكر غير اللحظات اللي كانت كدوز مع ماماها هي الوحيدة اللي كانت تحس بيها و حنينة فيها ما قدرتش تصبر على فراقها عنقات المخدة و بدات تبكي بالجهد وبكل حرقة
★★★★★★
واش يبقالي الا راح الغالي
ما يحس بيا غير لي حالو من حالي
حتى الدمعة ما قادرة تواسيني
شكون بحالك فدنيا يبغيني
وميمتي هي المرايا اللي كنشوف راسي فيها
كنحس بروحها معايا
حياتي نا قصة بلا بيها
واش يبقالي الا راح الغالي
ما يحس بيا غير لي حالو من حالي
حتى الدمعة ما قادرة تواسيني شكون بحالك فالدنيا يبغيني
جبل حط يدو على الباب وغمض عينو بأسف شديد هو كيتألم اكثر منها كيتمنى كن يستطع يسلب منها دوك المشاعر الحزينة اللي كتحس بيهم كيحماق عليها ما يقدرش يشوف دمعة وحدة نازلة من عينيها اللي كيشوفهم أروع ما خلق الله سبحانه وتعالى علاش ديما الناس اللي كيبغيهوم كيتألمو واش ما عندو زهر حتى لهاد الدرجة أقصى أمنياتو هي تكون نورسين ديما فرحانة و ضاحكة و عمرها تشعر بالنقص من شي حاجة طاحت دمعة من عينيه و تكا على الباب و بقا ساحت حتى طاح لارض
جبل:سمحيلي أحبيبتي ما قادر نديرلك والو باش نخفف عليك هاد الآلام اللي كتحسي بيهم دابا *هز عينيه و شاف فالسقف* كنواعدك أ ملاكي طاهر عمري ما غادي نخلي دمعة وحدة تنزل من عينيك من هنا لفوق كنواعدك غادي نعيشك ملكة فوق الارض غادي نحققلك أحلامك و اهم حاجة غادي نبعدك على عائلتك اللي هي سبب فأحزانك *وقف من الارض و حط جبهتو على الباب* ماكاينش اللي كيحس بيك غيري انا و ما كاينش اللي كيبغيك كيفي انا واللي قربليك ولا حاول يأديك غير يحفر قبرو *حط شفايفو على الباب * كنعشقك أعمري
دار جبل و اتاجه لواحد البيت اللي كان اونفاص مع البيت اللي كاينة فيه نورسين حيد التيشورت ديالو وبقا عريان من الفوق ومشا تكا على كرشو فوق السرير حيت ضهرو مجروح ما يقدرش يتكا عليه جبد تيليفونو من جيبو و فتح الشاشة و ضهرات صورة ديال نورسين نائمة على كتفو كيف شي ملاك التاقط لها هاد الصورة
فاش كانت فسيارة قرب الصورة لشفايفو و باس الصورة
■■■■■■■
يوما ما سأستبدل وسادتي بصدرك
وغطائي بحضنك
وسأغفو مع دفئ قلبك
لكنني لن أحلم حينها
فما حاجتي للحلم بعد ان تحقق اجمل أحلامي
♥️♥️♥️♥️♥️
جبل حط التيليفون فوق الطبلة الصغيرة اللي كانت حداه و سرحات بيه داكرتو قبل عشرين سنة الماضي الاليم ديالو اللي ديما تابعو كي ضلو بعض الدكريات كنتمناو كن يتمسحوا من داكرتنا بقوة ما هي مؤلمة و محزنة ولكن مع الاسف داكرتنا لا بد تفكرنا فيها
⏩⏩فلاش باك
طفل صغير جالس فوق السرير و كيشوف فالسرجم كينتظر الشمس تطلع باش يمشي يشوف ملاكو طاهر كيفما سماها هو فرحان بزاااف حيت وأخيرا غادي ترجع نورسين صديقتو الوحيدة من السفر اللي ما حكراتوش و ما قالتلوش نتا خايب و باطوز بحال الاطفال لوخرين
جالس على أحر من الجمر كيتقلب فسريرو كيفكر واش غادي يعجبوها لكادو اللي جابلها ولا يزيدها فلكادو واعد نفسو بلي أي حاجة بغاتها يشريهاليها وقرر انو يدير حمية ويقول لمربية ديالو ليلى باش دخلو لاصال باش يولي بفورمة أحسن و يولي زوين باش نورسين تشوف فيه غير هو هاد الافكار كولهم دازو فراسو و بدا كيبتاسم ولكن فجأة سمع شي صداع برا وداك الصوت كيقرب و كيجهاد تكمش فبلاصتو و بدا كيقرا بعض الايات القرآنية ولكن فالاخير تشجع ووقف حدا الباب و حط ودنيه وادا به ينصدم من الصوت اللي سمعوا كان صوت ديال أعز انسانة على قلبو ليلى اللي كيعتابرها ماماه ماشي مربيتو ما فكرش جوج مرات حل الباب و بدا كيعيط بصوت طفولي فيه بحة د الخوف على ليلى
جبل: طاااااتي طاااااااتي فينك
قرب حدا واحد البيت وسمع صوتها كتغوت حل الباب وادا به ينصدم من المشهد اللي شاف
لقا ليلى كتغوت و من فوق منها عمو كيحاول يغتصبها و هي كتفركل تحت منو
جبل مشا كيجري كيحاول يدفعو بيدو و دموع فعينو
جبل: بعد علييييها عفااااك أ عمي
دار عمو و عطاه بتصرفيقة حتى دار حنكو
عم: سير فحالك تنعس هادشي كبير عليك
ليلى من تحت منو كتحاول تفك منو و هو داير كي شي وحش كيقبلها فسائر جسدها و ليلى كتبكي و كتغوت جبل :*كيجرو من ضهرو * عفااااك أ عمي الله يرحم الوالدين ما تأديليش طاتي ليلى ما تعداش عليها أهئ اهئ اهئ عفاك
دار عمو و دفعو حتى طاح جبل من فوق السرير و هز صبعو كتهديد
عم: سير فحالك يالاه
جبل ما قدرش يشوف عمو كيتعدى على ليلى اللي عندها قيمة كبيرة فحياتو منين حل عينيه على الدنيا وهي مهتمة بيه و مهلية فيه هي الوحيدة اللي كتفهمو حتى قبل ما يهدر هي الوحيدة اللي كتحس بيه هي اللي فاش يمرض تسهر معاه ليالي باش تداويه هي الحضن اللي كيدفيه ما قدرش يستحمل يشوفها كتغتاصب قدامو خرج من البيت بسرعة و مشا للكوزينة حل واحد المجر لقا واحد جنوي هزو و اتاجه لبيت اللي كاين فيه ليلى و ما فكرش جوج مرات و حشا فعمو جنوي على حر جهدو و عاود خرجو و عاود حشاه فيه طعنوا ثلاثة ديال طعنات عمو طاح لارض و بقات دمياتو كتشرشر جبل طيح الموس من يدو و بدا كيترعد
وكيحرك راسو يمين شمال و كيردد بصوت منخفض
جبل:انا ماشي قتال انا ماشي قتال
ليلى غير شافت دم سخفات
جبل طاح لارض و بقا كيفركل وحط يدو على ودنو و بدات كتكرر لو فودنو الهدرة اللي كيقولها ليه باباه
*نتا قتال بسبابك ماتت ماماك * كيتخايل شي أصوات فودنو كيقولولو *نتا قتلتي ماماك و دابا قتلتي عمك نتا قتال* كيتخايل ناس كيضحكو عليه بدا كيترعد حيد يدو من و دنو لقاهم عامرين دم
فنفس الاثناء الاب ديالو سعيد دخل لدار و مالقا حتى واحد و بدا كيعيط على ليلى
سعيد:ليلى لييييلى *لا من مجيب * فين مشات هادي
حيد لافيسط ديالو و ادا به كيسمع صوت الغوات ديال جبل طلع فالدروج و اتاجه لبيت اللي سمع فيه هاد الصوت فاش حل الباب لقا ولدو كيترعد فالارض و طايح حداه جنوي و البيت كلو دم حول عينو لقا خوه طايح و دمياتو كتشرشر وليلى سخفانة حط سعيد يدو على فمو و بقا مصدوم من هادشي اللي شاف
سعيد:* بالغوات و شد ليه فيديه بجوج و بدا كيدي فيه و يجيبو *قللللتلك شنو واقع هنااا فهمننني
جبل: دخلت لقيييت اهئ اهئ لقيت لقيت طاتي طاتي ليلى كيتعدا عليها اهئ اهئ عمي و و و و قلتلو بعد منها و ما بغاش و ما بغاش أهئ اهئ و مشيت لكوزينة أهى اهئ هزيت موس و ضربتو *حط يدو على وجهو كيبكي* انا ماشي قتال اهئ اهئ
سعيد طاح لارض و شد على راسو و فجأة بدا كيضحك بشكل هيستيري
سعيد: ههههههههههههه
جبل حيد يدو من على وجهو و بدا كيشوف فسعيد
سعيد: عرفتي دابا شنودرتي قتلتي عمك و قتلتي ماماك ياك كنقولك نتا قتال ههعهههه واخيرا غادي تعاقب و دخل للحبس هههههه اخيرا غادي نتاقم لنورسين اللي ماتت بسبابك هههه
وقف سعيد من الارض و حيد الساروت من لداخل و فاش خرج طرق الباب مزيان باش ما يحاولش يهرب جبل و مشا اتاصل بالبوليس
سعيد: عندي جريمة قتل فدار نتمنى تجيو فاسرع وقت
قطع سعيد الخط و صعد لبيتو و جبد جميع التصاور ديال نورسين زوجة ديالو و حطهوم فوق النامسية و بدا كيهز كل تصويرة و كيبوسها
سعيد: غادي ناخدلك حقك من داك المجرم اللي قتلك و نجي عندك أعمري غادي تكوني عييتي من ظلمة د القبور عارفك غادي تكوني خايفة من ظلام ههه هه ولكن قريب غادي نجي باش نونسك
تكا على السرير و عنق تصويرة ديال مراتو و بدا كيضحك بشكل هيستري
بعد مرور بضع ساعات
تسمع اندار سيارة الشرطة داك الصوت المزعج مالي المكان اللي كيدل على ان حرية داك الطفل البريئ غادي تسلب منو بعدما كان كيعيش حياتو فاكبر الفيلات غادي يولي يعيش ما بين اربع جدران سبحان مبدل الاحوال
البوليس بداو كيدقو فالباب سعيد سمعوهم جاو و هبط كيطير فالدروج و فرحان حيت واخيرا غادي يحقق حلمو و غادي ينتاقم من دالك الطفل البريئ اللي فنضرو هو سبب موت حبيبتو و زوجة ديالو نورسين حل ليهم الباب
-سي سعيد جانا بلاغ بلي كاينة عندك فدار جريمة قتل
سعيد:اجيو معايا
طلعهم لداك البيت و جبد الساروت من جيبو و حلو الباب وقال
سعيد: ولدي قتل عمو اللي هو الاخ ديالي
جبل مزال طايح فالارض و كيترعد ما زال ما استوعبش انه قتل عمو دخل واحد الشرطي ووقف جبل من الارض ودارلو المينوط و شرطي آخر مشا كيقلب تنفس ديال الضحية لقاه مات و مول الامانة دا امانتو بحكم انه نزف بزاااف من دم
-سي سعيد خاصك تجي معانا حتى نتا وهاد السيدة اللي كاينة هنا و غادي نصيفطو ambulance باش تنقلهوم
سعيد: واخا هانا غادي نجي معاكم
هبطو شرطة جبل لصطافيط و هو مازال ما متيقش هادشي لي وقع لو راسو مرفوع غير دموع اللي كيتساقطو من عينو بغزارة
طفل صغير كان همو الوحيد انو يشوف صديقتو الوحيدة نورسين و يلعب معاها و يعاودلها اسرارو ولا بين ليلة و ضحاها مجرم الحياة غير عادلة كتكون غادي فطريق حتى كتلقا راسك غادي فطريق أخرى
💎هكدا هي الحياة💎
تطعنناوتغدر بنا و نحن على غفلة
تاركة وراءها نزيف من دكريات الجميلة
التي دبحتها على قارعة الطريق
جبل داوه للمخفر مع الاب ديالو سي سعيدو ليلى داوها لسبيطار أما الضحية فداوها لتشريح و جات الشرطة العلمية لدار خداو اداة الجريمة باش يعرفو شكون اللي قتل عن طريق علم البصمات
عند سعيد
- ممكن تقولنا شنو وقع اسي سعيد
سعيد: فاش دخلت لدار لقيت و لدي هاز جنوي و يدو عامرة دم و ليلى سخفانة و خويا ميت انا براسي ما فهمتش
- امم يعني كتقول بلي ولدك الصغير اللي قتل
سعيد: هادي حاجة باينة
-و زعما محامي كبير بحالك معروف فالبلاد كلها ما غاديش تدافع عليه
سعيد: كندافع على الابرياء ماشي المجرمين
- *البوليسي حك لحيتو و قال* بامكانك تمشي لدارك فاش غادي نبغيوك غادي نعيطو ليك خلي تيليفونك شاعل و ما تحاولش تخرج برا البلاد
سعيد ناض و وقف
- ما غاديش تشوف ولدك
سعيد: انا ما عندي ولاد
دار مشا بحالو سي سعيد
و جابو جبل حتى هو يستنطقوه
- نتا اللي قتلتي
جبل:* كيحرك راسو يمين و شمال * انا ماشي قتال انا ماشي قتال * دار يدو على ودنو و رجعاتلو نفس النوبة الهيستيرية بدا كيترعد حتى طاح سخف *
عند ليلى
حلات عينيها بتثاقل لقات راسها فغرفة بيضاء و غير صوت دقات قلبها اللي كيتسمعوا فيها دورات عينيها بشوية لقات السيروم معلقينو ليها هزات عينيها و شافت فالسقف كاتحاول انها تفكر شنو وقع فاش استرجعات داكرتها ناضت بشوية من الفراش و بدات كتبكي و كتضرب فحناكها
ليلى: اويلي وحدي اويلي وحدي الولد صغير قتل بسبابي اهئ اهئ يعلم الله شنو واقعلو دابا *شدات في قلبها و كتبكي بحرقة *
تحل الباب وهو يدخل الطبيب لقاها ناضت من بلاصتها
طبيب: عفاك ألالا رجعي لبلاصتك راكي عيانة و مريضة
ليلى: الله يرحم الواليدين بغيت نمشي فحالي أهئ اهئ
طبيب:عفاك ألالا صحتك هي الاولى
ليلى:*انهارت بالبكا * عفاك اهئ اهئ كبدتي كتشوا على ولدي يعلم الله فين داوه ليا أهئ اهئ
طبيب: عفاك ا لالا تهدني
ناضت ليلى من الارض
ليلى:*كتهدر بالغوات* كيفاش بغيتيني نتهدن وانا ما عارفاش جبل واش واكل ولا شارب واش مغطي ولا معري واش بايت فدارهم ولا فالحبس كيفاش بغيتيني نتهدن
طبيب: واخا واش ما عندكش شي واحد قريب من العائلة تواصلي معاه
ليلى:انا ما عندي حد من غير الله و جبل
سمعوا شي دقان فالباب
طبيب: دخل
تحل الباب وهو يدخل واحد البوليسي
- الا كانت السيدة بصحة جيدة خاصها تعطينا أجوبة لاسئلتنا على شنو وقع
- ليلى: عفاك قولولي كي بقا ولدي جبل
- راه مشدود فالحبس
طبيب: واخا ولكن خاصني نهدر معاها بخصوص واحد الموضوع ومن بعد تقدرو تستنطقوها لالا واش ممكن تفضلي معايا لبيرو
خرجات ليلى مع الطبيب و دخلو لبيرو
ليلى: اش كاين
طبيب: تفضلي جلسي بعدا
ليلى جلسات
طبيب: المهم امدام ما بقا ما يتخبا نتمنى تهدني من مور هادشي اللي غادي تسمعي نتي عندك سرطان فمراحل جد متقدمة هادشي تاكدنا منو عن طريق صور الاشعة اللي درنالك لقينا عندك حبوبة كبيرة فالرية هي اللي سببات ليك فهاد المرض و نتاشر فداتك كاملة نتمنى انكي تفهمي
ليلى بقات غير حالة فمها جملة * عندك سرطان فمراحل جد متقدمة* كتكرر فودنيها كيف شي لحن مزعج واخا ما باغاش تسمعوا كيزيد يجهاد دارت يديها على فمها وبداو دموع كيهبطو من عينيها بغزارة زادت صدمة على صدمة و اول فكرة طاحت فبالها هي كيفاش غادي يعيش جبل الا ماتت هي
وقفات وخرجات من البيرو و دماغها مرفوع اش هاد الكم الهائل من الصدمات اللي نزلوا دقة وحدة طاحت ليلى على ركابيها و بدات تبكي بحرقة على هاد المكتاب اللي كتاب عليها
جات واحد الممرضة عاوناتها توقف حسات ليلى بركابيها خواو عليها وفاشلين
جلسات فوق واحد الكرسي وحطات راسها على الحيط و كتشوف فنقطة وحدة و كتفكر غير جبل فاش كان يلاه تزاد كيفاش كان كيف شي ملاك هي اللي كبراتو و رباتو بيديها و علماتو دين والعبادة و كيفاش يكون ولد صالح هاهو اليوم قتل بسبابها و غادي يدخل للحبس ما فكراتش جوج مرات مشات خرجات و شدات طاكسي وصلها لكوميسارية خرجات ومشات دخلات كتسول على جبل كيف شي هبيلة اللي لقاتو كطيحلو على يدو تبوسهالو باش يوريوها فين كاين جبل حتى قالولها دخل عند الكوميسير كمال هو اللي يقدر يعاونها
دقات الباب و دخلات بعدما سمحلها بدخول
ليلى: سلام أسيدي الله يرحم ليك الواليدين الله يجعل ليك نبي شفيع غدا امام يوم لقاء الله وريني فين كاين ولدي جبل راه كبدتي كتشوا عليه أهئ
كمال: مانقدرش ألالا نخليك تشوفيه هادي جوج د الليل و زيارة ممنوعة رجعي غدا فالصباح
ليلى:*طاحتلو على يدو كتبوسهالو* ها العار راه الا ماشفتوش غادي نتسطا أهئ اهئ
كمال : ألالا هادو هما القوانين ما نقدرش نخالفهم
ليلى :*طاحت على رجليه * الله يعطيك ما نويتي فخاطرك أسيدي
كمال بعد عليه و شاف فيها بقلة حيلة و عيط لواحد البوليسي
كمال: سير ديها تشوف ولد سي سعيد ولكن عندك غير عشرة دقايق ما تفوتيهاش
-واخا أسيدي
خرجات ليلى مع داك البوليسي و داها تشوف جبل اللي كان ناعس فوق واحد الملاية خفيفة فوق الارض و مسجون مابين أربع حيطان ومكمش فبلاصتو حل ليها الشرطي الباب و دخلات عندو ليلى دايرة يديها على فمها مصدومة من هادشي اللي كتشوف قدامها
مشات عندو و عنقاتو بجهد فاق جبل مخلوع حل عينو وشاف فيها
جبل:*كيحك عينو* طاتي ليلى جيتي عندي ولا راني غير كنحلم
ليلى: انا معاك اولدي أهئ اهئ
جبل: *كيمسحلها دموع من عينيها * ما تبكيش أطاتي عفاك
ليلى:*٠كتشهق بالبكا و عنقاتو* عفاك اولدي سمحلي نتا هنا بسبابي
جبل : طاتي عفاك قولهم يخرجوني من هنا هاد البلاصة خايبة بزاف
حط جبل راسو على حجر ليلى كيفما العادة و بدا كتمسدلو راسو حتى نعس قاداتو فبلاصتو و خرجات
بعد مرور شهر
جبل طيلة هاد الشهر كان مسجون بوحدو نضرا لانه قتل شخص فاصبح كيشكل خطر على الاطفال الاخرين حيت هو مسجون فالاصلاحية اللي كاتعتبر سجن للاطفال اللي كيكونو عمرهم اقل من سن الرشد ومانعين عليه الزيارة ليلى ديما كتجي تراغب و تزواك والو ما كيبغيوش يخليوها دخل حتى دوز لمحاكمة ديالو عاد بامكانها تشوفو
ليلى تزاد عليها الحال والالم نهار على نهار كيجهاد كتشرب غير دوا باش كتكالمي الحريق ونضرا لانها كتديري جلسات كيميائية و اشعاعية فشعرها كلو طاح و حجبانها و ضعافت ولات حالتها حالة وزايداها الفقصة ديال جبل اللي فالسجن
اما سعيد فزاد حماق على اللي كان ولا كل ليلة كيمشي ينعس فالقبور حدا مرتو نورسين
وبما ان سي سعيد انسان معروف فالبلاد فوسائل الاعلام كلها هضرت على هاد الموضوع فالتلفزة كلشي عرف بلي ابن سي سعيد تسجن بجريمة قتل
جاء اليوم الموعود نهار اللي غادي يخرج الحكم
فاقت ليلى مع الفجر كتدعي و تبكي وتناجي الرحمان باش يدير لجبل مسلك د الخير حتى طلع الصباح ناضت وجمعات حوايجو و مدكرتو اللي كان كيكتب فيها احزانو كلها وشعر ديالو و دارتهالو فواحد الحقيبة و داتها فيديها
كان صمت رهيب فقاعة المحكمة دخلت ليلى و جلسات فمقدمة الصف و دموعها شلال كانو القضاة و المستشارين جالسين كيدرسوا القضية ديالو تحلت الباب و دخل جبل قابطينو جوج ديال شرطيين فيدو حتى دخلوه للمحكمة حالتو ولات حالة يرثى لها حوايجو موسخين ضعاف بزااااف على كي كان هز راسو و شاف فالقاعة اللي كانو جالسين فيها ناس ما كيعرفهومش طاحت عينو على ليلى اللي كانت حاطة يديها على فمها و كتبكي بحرقة تصدم من شكلها بزاف ابتاسم ليها بحب و حتى هي ابتاسمت ليه وسط دموعها
باباه تدخل باش ما يكلفو ليه حتى محامي لدلك فالحكم اللي غادي يتطبق عليه غادي يكون قاسي بزااف
بعد عدة مشاورات بين القضات و المستشارين ضرب القاضي المطرقة و قال
- حكمت المحكمة على جبل الابراهيمي ابن سعيد الابراهيمي بثمان سنوات نافدة
جبل نزلت من عينو دمعة يتيمة وهو كيسمع لهاد الحكم
المؤلم بزاااف لطفل ا الله حل عينو على الدنيا مع الاسف ليس كل مايتمناه المرء يدركه
******
هل سمعتم يوما بالحزن الراقي !
هو دلك الحزن الدي يحرق العيون دون دموع
ويسكن في أيسر الصدر لا أحد يعلم به
لان صاحبه لايشكيه ولا يبكيه
بل يتعايش معه وفيه
◀️◀️ عودة للواقع
مافيقو من دكرياتو الاليمة غير صوت جوهرة اللي كتدق فالباب
جوهرة : خويا جبل
جبل وقف و لبس تيشورت ديالو و حل الباب باينة فيه مأزم و طالعلو الدم اكيد وهو حبيبة قلبو حزينة كيحس بنفس احساسها و اوجاعها اللي كيبغيك بصح هو اللي كيحس بيك ما كدبوش اللي قالوها
جبل: نعام
جوهرة : خويا واش ضاراك شي حاجة
جبل :*تنهد* ضاريني حاجات هوما
جوهرة: خاصك تمشي عند طبيب
جبل: *ابتاسم باستهزاء* عارف مرضي و عارف دواها ما كاين لاش نمشي عند طبيب كنضن هو اللي ما غاديش يعرف يشخص المرض المهم ما علينا شنو جابك
جوهرة : والله ما فهمتك ا خويا كيفما العادة حرام واش نعرفوك علايش كتهضر جدة قالتلك هبط تغدا نتا و ديك البنت
جبل :*جبدها من نيفها * سميتها نورسين ماشي ديك البنت صافي غير سيري انا غادي نعيط عليها
جوهرة: نمشي نفيقها راه بانتلي ناعسة
جبل: شنو قلت انا
جوهرة: احم نتا اللي غادي تمشي تفيقها
جبل: برافو عليك يالاه سيري شوفي شغالك
جوهرة: واخا
مشات جوهرة هبطات وجبل مشا وقف حدا الباب و دق ثلاثة دقات منين ما جاوباتوش دفع الباب و ما بغاش يتحلو عاود حلو و مابغاش يتحلو
جبل: لا ما يمكنش علاااااش سادة الباب عليها *دوز يدو بالاعصاب على شعرو * ياكما تكون دارت فراسها شي حاجة
رجع بلور و دفع الباب بكتفو على حر جهدو
وهو يتحل فاش دخل لقاها متكية مكمشة فبلاصتها و مغطية بواحد الايزار خفيف تقدم بتثاقل عندها حتى وصل لحداها و طاح على ركابيه و قرب لوجهها و دوز يدو على خدها
جبل: ياربي تحفضها لي ياربي ما نقدرش نعيش بلا بيها انا الا ماشفتهاش نحماق *هز يديها اللي كانت سخونة و قربها حدا شفايفو و باسها بوسة طويللللللة و هو مغمض عينيه *
نورسين بدات كتنين جبل حل عينو و هز راسو شاف فيها بانتلو ماشي عادية حط يديه على جبهتها لقاها طايبة راسها سخووون
و قف و دوز يدو على شعرو بالاعصاب
جبل: لالالالا ما يمكنش * عاود حنا حداها وبدا كيعيط ليها بصوت مرتفع و مخلوع عليها * نووووورسين نووووورسين * كيحرك فيها و هي والو ما كتجاوبوش حدها كتنين * و قف جبل و بدا غادي جاي تخلع بزااف عليها و ضرب رجلو مع الارض و مشا خرج كيعيط بجهد
جبل: جوهرررررة جوووووهرة
مشا دخل حداها و جلس من فوق السرير و حطلها راسها على ركابيه و كيدوز يدو على وجهها و هو كلو كيترعد
جبل : كبي عليها الما بارد غادي نمشي نجييلها حوايجها من لتحت باش تبدلي ليها الله يرضي عليك غير بشوية عليها
جوهرة : واخا اخويا نعس على جنب راحة
هبط جبل بسرعة فالدروج و مشا لصاك ديالها اختارلها الحوايج اللي غادي تلبس و طلع كيطير فالدروج حط الحوايج فوق الناموسية و جلس من فوق السريرو حط يدو على راسودنيا دارت به فاش شافها بديك الحالة
جبل: ياربي ما عنديش القوة باش نتحمل نشوفها فهاد الحالة اللي هي فيها يا ربي تصبرني
بعد عدة دقائق
خرجات جوهرة من الحمام
جبل هز راسو شاف فيها
جوهرة : عطيني لبس ليها حوايجها
ناض جبل مد ليها حوايجها
جوهرة: واش عيطتي لطبيب
جبل: وي راه جاي
دخلات جوهرةلبساتلها حوايجها و بقا جبل كيمشي و يجي فالبيت و مخلوع عليها بزااف متوتر لاقصى درجة تحل الباب وهو يدخل عبد المالك و ياسمين * جدو و جداتو*
عبد المالك: جبل مالك ما هبطتيش
جبل:*جلس من فوق الناموسية * نورسين مريضة
ياسمين:*شدات ففمها* هاء مالها مسكينة
جبل : ماااعرفتش مااااعرفتش
ياسمين مشات جلسات حداه وشداتلو فيدو
ياسمين : شكون هي
جبل طلع راسو و شاف فيها شوفة خطيرة
جبل : my life *حياتي*
ياسمين :واش هي نفسها ملاكك الطاهر *حطات يديها على فمها وشهقات*
جبل : اه هي اللي حمقاتني و رداتني مريض هي نفسها البنت اللي كنعشقها من صغر و اااا كنتعدب بزاااف أعباد الله قلبي كيتقسم على جوج وهي ما حاساش بيا هي نفسها البنت اللي فاش كنغمض عيني و نبغي نعس كندعي الله الف مرة باش ما نخسرهاش و ما يحرمنيش منها *وقف و دوز يدو على شعرو بغضب * هي نفسها الاوكسيجين اللي كنتنفسوا هي اه نفسها روحي و حياتي هي نفسها اللي فاش ما كاتكونش كنتخنق هي نفسها اللي كل ليلة كنبكي وندعي ربي يجعلها من نصيبي * غرغروا عينيه بالدموع وشد فقلبو * كنحماق عليها وكنموت على ادق التفاصيل فيها اشمن دنب رتاكبت فحياتي باش نعيش معدب هاكا اشمن دنب اشمن دنب
تحل الباب و خرجات جوهرة و نورسين حاطة راسها على كتفها ركابيها فشلانين مشا جبل بسرعة هزها مابين أحضانو و حط شفايفو على راسها
جبل: غادي تولي بخير غير صبري كلشي غادي يفوت
ياسمين : واش نزلت ليها الحرارة
جوهرة: شوية دابا احسن من قبل
عبد المالك :الله يشافيها مسكينة
ياسمين : شي واحد كيدق واقيلة طبيب وصل سيري جوهرة حلي الباب
جبل حطها من فوق السرير و دار من جيهة لخرى و تكا حداها و بدا كيمرر يدو على شعرها وهي مسكينة مغيبة ما حاساش كاع اش واقع
نورسين :*كتهتهت بالسخانة *مااا...ماااا عفااالك ما تخلينيش بابا انا مادرت والو *كتنين و كتهدربصوت منخفض*
ياسمين : جبل شنو واقع لبنت
جبل :*هز راسو و شاف فيها * هي بخير ما واقع ليها والو غادي تبرا و غادي تولي مزيان *كيشوف فنورسين و كيهدر بشكل هيستيري * هي ما عمرها ما غادي تفرق عليا *هز يديها وباسها و مرر صبعو على خدها * ياك أحبيبة
عبد المالك : ولدي الله يرضي عليك فهمنا اش واقع ما بقيت فاهم والو
جبل : دابا نعاود ليكم كلشي
دخلت واحد الطبيبة شابة و زوينة لابسة واحد الطابلية بيضة و شعرها مقطعاه كاري ولابس كسوة كحلة حد الركبة و كتقطر بالماكياج و فيديها حقيبة سوداء داخلة و كتبتاسم
جبل هز عينو لقا ديك الطبيبة جالسة كتمنضر فيه
جبل : إلا كان ممكن تجي تشوفي مالها فعوط ماتبقاي تفرجي فيا
طبيبة فاقت من سهوتها و تقدمات لامام
طبيبة: سمحولي ما عرفتش شكون اللي مريض فيكم
جوهرة: راه اختي هي البنت اللي ناعسة راه باينة هي اللي مريضة
جبل: *شاف فسقف و تنهد وعاود هبط راسو*يا ربي تصبرني هانتي عرفتي شكون اللي مريض ديري خدمتك الله يرحم الوالدين
طبيبة جبدات الحقيبة السوداء ديالها وهي كلها كترعد ما رضاتش بالقمعة اللي دارلها جبل
بعدما فحصات الطبيبة نورسين كتباتلها واحد الدوا و حطاتو فوق الطبلة
طبيبة: غير طلعتليها سخانة شوية وصافي خاصكوم تشريولها هاد الدوا اللي كتبت ليها ضروري و ردولها البال
جبل: غير تهناي غادي نردلها البال اكثر من راسي جوهرة وصلي طبيبة لباب
ياسمين : شكرا ابنتي
طبيبة : شريولها دوا و خليوها ترتاح باش تبرا دغيا
جبل : فلوسك غادي يدوزو لحسابك بامكانك تفضلي
جوهرة : تفضلي معايا ا ختي
هبطات طبيبة و جوهرة
جبل كيمرر يدو على شعر نورسين و مرة مرة كيبوسلها راسها
ياسمين : جبل قولي شنو واقع كيدرتي حتى لقيت
ملاكك الطاهر
جبل : هي ديما كانت بجنبي *هز راسو شاف فيها * فين عمرك شفتي الروح كتفار ق الجسد الا فالموت
عبد المالك : واش باغي تحمقنا هدر الا غاتهدر
جبل : الهدرة بزاف و السكات احسن
ياسمين : انا نقدر نعاونها تخرج من هاد الحالة اللي هي فيها ولكن خاصني نعرف شنو سبب اللي خلاها فهاد الحالة
جبل :*كيمرر صبعوا على خدها برفق و هز راسو شاف فياسمين * قصتها بحال قصتي بجوج تخلاو علينا واليدينا
ياسمين :*شهقات * واش هاد الواليدين ما عندهم قلب غير اجي ولوح
جبل : من هنا لفوق انا هو عائلتها
عبد المالك : لا حول ولا قوة الا بالله
جبل : اش كتسناي من اب قاصح ما فقلبو لا رحمة و لا شفقة اتجاه بنتو ما عارفينش بقيمتها ما حاسينش بيها اصلن بلاصتها ماشي حداهم بلاصتها حدايا انا
عبد المالك : ياسمين يالاه نخرجوا نخليو البنت ترتاح
ياسمين وقفات و مشات عند جبل
ياسمين : ر دليها البال اولدي الله يرضي عليك
جبل : ما تحتاجيش توصني على نفسي
ياسمين خرجات مع عبد المالك
وبقا جبل حدا محبوبتو اللي سالبالو العقل و كتخلي قلبو ينبض بسميتها غير هي اصبح من أعظم العاشقين
حط راسو على المخدة و بقا كيشو ف فيها بتمعن كبير
كيفاش ناعسة كيف شي ملاك و زادتها الحمورية د سخانة ولات كيوت بزاف
جبل :كنبغيك 🖤
ماتسولينيش علاش و كيفاش
حيت انا براسي ما عارفش
اللي عرف هو انكي سلبتي عقلي وتفكيري وقلبي ولا كينبض بسميتك غير نتي
يستحيل يمر نهار واحد وما نفكرش فيك
بغيت نعتارف ليك بواحد السر عرفتي فاش كتهضري معايا الكلام كيتلف لي كنولي كيف شي حمق ياك *ابتاسم باستهزاء *
عرفتي انتي دايرة كيف اللعنة
مابقيتيش كتخرجي من بالي كاع
لعنة اللي كتخلي قلبي ينبض بجنون فاش كنهضر معاك
ولا كنجلس حداك بحال دابا
محادثة بسيطة بيني وبينك كتخليني فرحان
على طول اليوم فوقاش غادي تحسي بيا احبيبتي غير قوليلي فوقاش انا عارفك دابا كتشوفيني بحال خوك اللي كيحميك ماشي مشكل المهم هو انه عندي معزة و مكان فقلبك واخا ما كرهتش يكون قلبك ديالي انا بوحدي ولكن يمكن مع مرور الوقت تحسي بيا و تبغيني
والا ما بغيتينيش عادي اصلن عشقي ليك كافينا بجوج
هز يديها و حطها على قلبو و نعس
هاد النهار داز كحل لا بالنسبة لجبل و لا بالنسبة لنورسين جبل بقا نهار كامل حدا نورسين ما تفرقش عليها بقا معاها حتى بدا يضلام الحال و جات كدق عليه جوهرة
جبل : شكون
جوهرة حلات الباب و دخلات
جوهرة:هبط ا خويا تعشا ما طاح فحلقك منين جيتي
جبل :*كيلعب فشعر نورسين * ما بغيتش غير سيري
جوهرة:واخا اخويا نسولك
جبل :*هز راسو وشاف فيها * باغا تسولي على نورسين قتلك الفضول و بغيتي تعرفي شكون هي
جوهرة: بحال علمك الله
جبل : الفضول ما مزيانش مضر للصحة بقاي دخلي سوق راسك و ديها فقرايتك *غمزها *
جوهرة: موالف فاش كتجي كتجيبلي معاك لكادو و كتهتم بيا غير انا منين جبتي هاد البنت وهي تاخد بلاصتي
جبل:*هز راسو شاف فالسقف* يا ربي واش انا زهري غير فيهم ها كاميليا من جيه ها جوهرة من جيه *هبط راسو شاف فيها * راني موجدلك الكادو غير سيري خرجي بحالك
جوهرة:حلف بالله
جبل: واهضرنا اجوهرة واش بنالك دراري صغار راه راسي متبوخ ما تزيدينيش حتى نتي
جوهرة: اه حقا راه قبيلة هدر معايا يعقوب وقالي غادي يجي هو و سلمى و سارة غدا حيت شحال و هو يعيطلك ما جاوبتيهش و راني قلتلو راك عندنا
جبل: كنت طافي تيليفون مرحبا بيهم
جوهرة : هانا مشيت ما غاديش تمشي لبيتك
جبل :*خنزر فيها * جووووهرة
جوهرة سدات الباب و خرجات وبقا جبل حاضي نورسين مقابلها وجهها جبد واحد المخدة من تحت راسو تكا عليها و شد فيديها مزير عليها
جبل: كن غير قدرت نخفف عليك هاد الالم و نخليك ديما فرحانة شفتي انا وياك كنعيشوا نفس الالم حتى انا تخلاو عليا وليديا ولكن ما تخافيش نتي موراك جبل اللي غادي يحميك وما يخليش نسمة د الهوا توصل ليك
ابتاسم و غمض عينو ما مصدقش انها بقربو مغمض عينو و كيباتسم غير هو وراسو هل يعقل انسان يكون كيبغي شي حد لهاد الدرجة ؟؟ جبل كسر مقولة ان الحب خلق للفتاة الجميلة بل خلق ايضا لتلك الفتاة الطيبة الخلوقة قلبا هو ماشافش شكلها الخارجي وانما شاف جوهرها داخلي هو اكثر واحد عارف بلي الجمال نسبي و اكبر دليل هو فاش كان صغير كان بشع ما كيديها فيه حد وها هو الان البنات كيبغيو يشوف فيهم غير نظرة وحدة بحال الاية تقلبات هو فاش كان صغير ما كان كيديها فيه حتى حد ولكن هي الفتاة الوحيدة اللي بغاتو و عطاتو وقت حتى هي ماشافتش وجهو بالعكس هي اول فتاة قالتلو نتا جميل كأن تاريخ يعيد نفسه سبحان الله
☀️☀️☀️ أشرقت شمس يوم جديد معلنة على ان الاماني مهما تأجلت سيأتي فجرها لتشرق
بدات نورسين كتقبح وجهها و كتخسر ملامحها استعدادا لنهوض حلات عينيها بتثاقل و حسات بشي حاجة من فوق راسها مثقلة عليها ناضت وهي تصدم من داكشي اللي شافت
كان محطوط فوق راسها واحد دمية كبيرة على شكل دبدوب فلون البني وحداه بوكي د الورد ناضت نورسين و بقات غير مصدومة جبدات واحد الوريدة من البوكي اللي كان كولو فلون الاحمر و حطاتها حدا نيفها واستنشقاتها كانت فيها رائحة رائعة غمضات عينيه مستمتعة بهاد العطر
نورسين : الله على رويحة كتفاجي الخاطر
جبل : صباح الخير
حلات عينيها و قفزات من بلاصتها دورات وجهها لقات جبل جالس فوق واحد الكرسي خشبي و داير راحة يدو على خدو و صبعو صغير ففمو حاضيها في كل حاجة كديرها
نورسين :*بابتسامة* صباح النور
جبل : عجبك الكادو
نورسين هزات داك دبدوب و عنقاتو
نورسين: شكرا بزاااف ما عرفتش كيفاش غادي نشكرك من ديما كانو كيعجبوني هاد الدباديب كيحمقوني
جبل: شكريني غير بالابتسامة البريئة ديالك *وقف و دار يدو فجيبو و قربلها * حيت الا شفتي راسك فالمراية غادي تعرفي الحياة شحال زوينة ما تستاهلش نتقلقوا او لا نحزنوا ابتسامتك اللي شافها غادي يكون اكثر شخص محظوظ في العالم داكشي علاش خليك ديما مبتاسمة *دار يدو على هاد الشكل 🙏🙏* عفاك
نورسين دمعوا عينيها فكرها فالاحداث اللي و قعوا لبارح فكرها بهدرتو فالحزن اللي كتشعر به و بلي عائلتها لاحوها للزنقة كن مالقاتش هاد ولد ناس فجنبها شنو كان غادي يكون مصيرها دورات وجهها و بقات كتشوف فنقطة وحدة و هبطات دمعة من عينيها و هزات راسها شافت فيه
نورسين : بغيت نبقا بوحدي عفاك
جبل جلس من فوق السرير و قرب ليها و مسح ديك دمعة بصبعو بحنية و رفق
جبل : واش قلت شي حاجة ما عجباتكش سمحيلي عفاك
نورسين :*بعدات وجهها من على يديه * نتا مادرتيلي والو بالعكس عائلتي اللي لاحوني نتا لقيت فيك الخير على واليديا الخير اللي درتيه فيا عمري نساه و دابا الا كان ممكن بغيت نبقا بوحدي الا سمحتي
جبل : طلباتك أوامر *ابتاسم ليها بحب *
جبل ناض خرج من البيت واتاجه لبيتو جبد المدكرة ديالو اللي كتشهد عل جميع احزانو و كتشهد على هوسو المدكرة اللي عمرها ما فارقاتو هي المتنفس الوحيد عندو هي خبايا أسرارو كان مخبيها فواحد المجر و جبدها وحلها وبدا كيكتب بعض الاحاسيس ديالو فهاد اللحظة
💘💘💘💘💘💘💘💘
أحبك في حضورك وفي غيابك
احبك و مازلت عاجزا عن فهم الطريقة التي أحببتك بها
أحبك بمشاعري الغريبة
أحبك بخوفي الباطن الدي يجعلني أضم إسمك بدعواتي قبل اسمي
أحبك يا ملاكي
جبل سد المدكرة ديالو و تكا على الناموسية سمع تيليفونو كيصوني دوز الخط
جبل : وي يعقوب
يعقوب: افين غابر أصاحبي
جبل:غابر مع اللي محمقاني و مهبلاني و مطيرالي العقل
يعقوب:اواه اصاحبي هادي ما تكون غير نورسين
جبل:وشكون من غير غزالي
يعقوب: هههه وعنيبة مع راسك
جبل : اودي نولي حتى فريزة مع نورسين ما عنديش مشكل برب المعبود اخويا لكنتسطا عليها ما كرهتش نخرج للزنقة ونغوت ونقول "كنبغيك أ نورسين " بغيت العالم يعرفها
يعقوب:ههه ضحكتيني حق الله شوف اليوم غادي نجيو عندك انا و سلمى و سارة
جبل: غادي تجيبو حتى سارة أحسن ما غادي ديرو
يعقوب: ناري فاش قلنالها غادي نجيو عندك و ناضت كتنقز و تجري تقول سمعتنا غاديين عند الملك
جبل: توحشتها بزاف حتى انا شحال هادي ماشفتها شديتو طريق ولا مزال
يعقوب: عاد غاظي نشدو طريق
جبل: طريق السلامة
جبل قطع الخط و حط التيليفون فوق لطابل و وقف
مشا بدل حوايجو لبس تيشوت غري مع شورط كحل ورش البارفان ديالو و هبط للكوزينة لقا ميلودة فالكوزينة اللي هي خدامتهم حنحن جبل و دارت عندو تقدمات ميلودة اللي كانت امرأة كبيرة شوية و لابسة واحد البيجامة وعاقدة الفواطة على نصها
-ولدي بغيتي شي حاجة
جبل حنا على راسها باسولها
جبل: مابغيت والو بغيت نوجد الفطور
-الله يرضي عليك اوليدي راه حنا اللي كنوجدوه
جبل: هاد النهار بامكانك تمشي خلي غير جوهرة تكلف
-هه اوا الله يرضي عليك لهلا يخطيك وخلاص كنت نيت باغا نشد هاد النهار عندي واحد العرس فالعائلة هه
جبل:*بابتسامة* بصحتك
-سير أوليدي الله يفاجيها عليك والله يعطيك ما تمنا فخاطرك والله يرزقك بشي بنت الحلال اللي تبغيها وتبغيك
جبل: امين
-هانا غادي نمشي الله يعاون
خرجات ميلودة و تقدم جبل بخطوات ثابتة حل الباب ديال الثلاجة وجبد الفواكه اللي كاينين تماك كلهم و قشرهم و حطهم فطبسيل و دارهم على شكل قلب ❤❤❤ و وجد عصير د الليمون و حط داكشي فالبلاطو و هزو و طلع عند نورسين دق فالباب وهو يسمع نورسين سمحاتلو بالدخول حل الباب ولقا نورسين واقفة حدا نافدة ومعنقة داك دبدوب فيديها و مع كانت النافدة محلولة كان الريح كيطير شعر نورسين اللور دارت نورسين شافت شكون لقات جبل واقف كيشوف فيها بتمعن كيشوف كيفاش داك الريح كيطير خصلات شعرها للخلف كان مستمتع بهاد المنظر اللي شاف
نورسين :أجمل منظر شفتو فحياتي هو هاد البلاصة
جبل:حتى انا اجمل منظر شفتو فحياتي هو دابا
نورسين: كيفاش علايش كتهدر؟؟
جبل: كلها و المنظر اللي كيعجبو
حط داك البلاطو فوق الطبلة
جبل: اجي تفطري
نورسين رجعات كتشوف فالنافدة
نورسين : مابغيتش
جبل تقدم حتى وصل لعندها و قال بترجي
جبل: عفاك كولي شي حاجة غادي ضري صحتك هاكا البارح كنتي مريضة وما كليتي والو واش باغا تهلكي صحتك الا كنتي نتي ما كتخافيش على صحتك كاين اللي كيخاف عليها 💓💓💓
نورسين :*٠شافت فيه و ابتسمات باستهزاء * من نيتك كدوي شكون اللي غادي يخاف على صحتي الله يهديك
جبل: وادابا الله يرضي عليك اجي تاكلي
نورسين :*هزات عينيها شافت فيه و تغرغروا عينيها بالدموع* حتى ماما كانت ديما كاتقولي نفس الهدرة
علاش تخلاو عليا هاكا بحال كنت مثقلة عليهم بحال كان خاصهم غير يتهناو مني علاش انا حياتي كلها مشاكيل شنو درت فحياتي *حنات راسها و دموع كيهبطوا من عينيها شلال *
جبل هزلها راسها بيدو و شاف مباشرة فعينيها و بدا كيهضر بصوت حنين وخافت
جبل: نتي دنبك انكي ملاك طاهر في وسط عالم فيه الوحوش *عينيه ولاو حومر و دمعو شوية ما كيقدرش يشوفها كتبكي وما يتقطعش قلبو عينيه كيبداو يدمعوا لا شعوريا * ما عليهش ما يبقاش فيك الحال الا منع الله عليك شي حاجة حيت كن عرفتي كيفاش الله سبحانه كيدبر و كيسير الامور ديالك لذاب قلبك في محبته حنا غير بشر ضعيف خاصنا نتفاءلو بالقضاء اللي اختارو لينا الله تبارك و تعالى واخا يكون خارج الرغبة ديالنا *كيعض على شنايفو وهز عينو شاف فالسقف كمحاولة منو انو يحبس الدمعة ولكن دمعة مع الاسف خانتوو هبطات كتجري هبط عينو و شاف مباشرة في قلب عينيها و كمل وقال بصوت منغنغ بالبكا * ولكن ربي كبير غادي يرزقك سعادة كني أكيدة انني غادي نسهر على سعادتك تقدري تعاتبريني خوك صاحبك باباك عمك انا اعتابريني عائلتك كاملة انا غادي نحميك من هادالوحوش ديال دنيا كلها ولكن كنطلبك ونترجاك 🙏🙏 ما تبقايش تعاتبي نفسك على دنب ما ارتاكبتيهش من أساسو هاد اللحظات الاليمة اللي كتعيشي فحياتك كيفما جات غادي تمشي خاصك تعرفي أنه وراء كل غيم كثيف كاين المطر ووراء كل فشل كاين نجاح عظيم خاصكي ثيقي بالله فإن السقوط لا يليق بكي خاصك تكوني قوية خاصك تعلمي تقاومي الدنيا ماشي من اول ضربة تستسلمي خاصك تكوني قوية فالضعف لم يخلق لكي
ابتاسم ليها بحب كبير وخرج وسد الباب ما بقاش مستحمل يشوفها فهاد الحالة المكسورة ولات دابلة بزاف بين ليلة ونهار وواعد نفسو انه كل انسان كان سبب فهاد الحالة اللي هي فيها غادي يكون حسابو عسييييييييييير وغادي يندموا على نهار اللي قرر يؤديها فيه
هبط لسفلي و دخل للكوزينة لقا جوهرة و جداه كيوجدوا الفطور حيت مالقاوش ميلودة
جبل تكا على الحيط حاس براسو منهزم وكيشوف فالسقف و عينيه حومر بالدموع
ياسمين :مالك اولدي واش واقعالك شي حاجة
جبل:*بانهزام*ما بقيتش قادر نصبر ما بقيتش قادر عييت *دوز يدو على شعرو بسرعة و هز واحد الكرسي خبطوا مع الارض حتى تقسم على جوج ياسمين و جوهرة قفزوا من بلاصتهم
ياسمين قربات ليه و حطات يديها المتجعدتين على خدودو وقالت بصوت حنين
ياسمين : ألم الحب صعيب اولدي ياك
جبل:*صدرو كيطلع و ينزل وعينيه زادو حمارو اكثر من لول * كنحس براسي مخنوق النفس ما قادرش نطلعوا علاش كيوقعلي هادشي انا ديما نبقا عايش فالعداب شنو دنبي منين كنت صغير عمري حسيت بدنيا ضحكاتلي حتى شفت نورسين هي الوحيدة اللي قدرات تغير داك الطفل الصغير اللي كان حاس براسو انه تزاد باش يتعدب هي كانت بحال داك نور اللي كيبانلك فاش كتكون فبلاصة كلها ظلام هي اللي خلاتني نوصل لهادشي اللي انا فيه كن ماهي كن راني مت شحال هادي حاس براسي ما قادر نديرلها والو كنشوفها كتعدب و انا ماقدارش نخفف عليها علاش انا من دون ناس اللي يصرا لي هادشي
ياسمين: صبر أحبيبي دابا يفاجيها سيدي ربي و علاش اللي ما تصارحهاش بحبك ليهاو تزوجها
جبل: *ابتاسم باستهزاء* الا طلبت منها زواج و صارحتها بحبي ليها اللي دام عشرين عام فهاد الفترة غادي تقولي غير كتكدب عليا وانت غير شفقتي عليا حيت عائلتي لاحوني كنشوف راسي ما مناسبش ليها كيفاش غادي ترضى بيا وانا قاتل روح منين كانت عندي عشر سنين وزيد عليها داخل للحبس الماضي ديالي موسخ ما نرضاش يقولو عليها مرت القتال
ياسمين: *بأسف* وشنو عوال دير معاها دابا
جبل: نحميها ونحققلها احلامها اللي ما قدرتش تحققهم فجنب واليديها يا حسرة المهم غادي نخرح عند سيزر باش ننسا شوية
انصارف جبل و خلا موراه انسانة مصدومة جوهرة اللي عاد عرفات طبيعة العلاقة ديالو مع نورسين شدات على فمها بقوة الصدمة و تكات على البوطاجي بيديها ما متيقاش هادشي اللي كتشوف واش بصح جبل اللي كتحماق عليه و كتبغيه هاديك حبيبتو
دارت ياسمين عند جوهرة لقاتها حاطة يديها على فمها و واقفة مصدومة
ياسمين : مالك ابنتي
لا من مجيب
ياسمين: جوهرة واااا جوهرة * كتحرك يديها قدامها باش تجاوبها حتى قفزت جوهرة من بلاصتها *
جوهرة:جدة هضرتي معايا
ياسمين : الله يرد بيك ابنتي كملي توجاد الفطور غادي نطلع عند نورسين نهدرمعاها شوية
جوهرة:واخا اجدة
انصرفات ياسمين و جوهرة طلقات العنان لدموعها اللي كانت واقفة على حافة عينيها ما حسات براسها حتى طلعت لبيتها و دخلت وسدات الباب و بقات ساحتة و كتبكي بحرقة على جبل (دابا نتعرفوا من بعد على القصة ديالها معاه ) اللي شافت فيه عائلتها كان مفششها بلا قياس اي حاجة حلات فمها عليها كيجيبهالها
جوهرة وقفات و شافت راسها فالمراية و بدات كتحدث مع نفسها
جوهرة:*حطات يديها على قلبها و تنهدات* علاش كيضرني قلبي لهاد الدرجة اهئ اهئ علاش تعلقتي بيه و بغيته أقلبي أأخ على ألم كنحس بيه كيقطعني طراف طراف ياربي اش داني نتعلق بشخص ماشي ديالي كان خاصني نعتابرو مجرد أخ ولكن انا بنيت أحلام كبيرة معاه كنت كنشوف فيه راجلي و حبيبي المستقبلي أهئ اهئ *دارت يديها على شكل دعاء 🤲🤲 وقالت بكل حرقة*اللهم لا تعلق قلبي بشيئ لم تكتبه لي يارب
انهارت جوهرة فالارض كتبكي
💔💔💔💔💔💔💔
قد يعشق العصفور سمكة
ولكن المصيبة أين سيعيشان ؟
في الماء أم في الهواء؟
هده هي مأساة من يقع في حب ما ليس له
وفي النهاية يطير أحدهما و بينما الآخر
يسبح في بحر من الأحزان
أو يحاول الطيران فيموت
عند نورسين
دقات ياسمين الباب
نورسين:دخل
دخلات ياسمين و سدات الباب و تمشات بخطى بطيئة حتى وصلات حدا نورسين اللي كانت مزال فنفس الوضعية ديالها واقفة كتشاهد جمالية الطبيعة اللي هي فيها دارت نورسين تشوف شكون اللي دخل عندها و ابتاسمات فاش شافتها ياسمين
نورسين :جدة سلام
وصلات ياسمين حداها و مررات يديها على شعرها بكل حب
ياسمين: كي بقيتي أبنتي مزيان
نورسين :*حنات باستلها يديها وقالت بصوت حزين* نقولو الحمد الله حتى يفاجيها سيدي ربي
ياسمين: شنو وقعلك أبنتي مع عائلتك
نورسين: ما بقات عندي عائلة عندي فهاد الساعة الله و نتوما الله يكثر خيركم فتحتولي باب داركم واخا نعيا نشكركم و ندير اللي درت محال نوفيكم حقكم
ياسمين:*تنهدات* من هاد النهار أبنتي حنا هوما عائلتك ما عندك لاش تهزي الهم لاي حاجة لي ثقالت عليك خففات علينا
نورسين: من بعد الله سبحانه و تعالى خير جبل و فضلو عليا كبير عمري نساه من بالي داكشي اللي دار ما دارتو عائلتي
ياسمين: جبل و ما أدراك ما جبل *ابتاسمات* هو ولد بنتي نورسين *دمعوا عينيها فاش دكرات سميتها *الله يرحمها و يوسع عليها حتى حنا ارتاكبنا أخطاء فحياتنا نتمنى من ربي يغفر لينا و يسمح لينا جبل داكشي اللي عاناه ما عاناه حتى واحد الحبيب ديالي دازت عليه بزاف قاسى فحياتو لاقصى درجة كنحمدالله اللي مازال واقف على رجليه اللي شافو هاكا يقول أقصح منو ما كاين و لكن هو قلبو بريئ حتى هو ما زال بحال داك طفل اللي كيقلب على الحنان من ماماه مازال داك طفل اللي فاش كيغوت عليه شي حد خاصو يلقا فين يتخبع و يحط راس *تنهدات* فهاد الدنيا حتى واحدما لقاها كي بغاها ابنتي الواحد ما خاصوش غير يبقا جالس و كيبكي و حابس راسو بحال نهاية العالم بالعكس ماشي من اول فشل لينا فهاد الحياة كنطيحو لارض بالعكس خاصنا نتعودوا على بحال هاد ضربات و نوقفوا و الا طحنا ألف مرة خاصنا نوقفوا عشرة ألف مرة
نورسين:*ابتاسمات* ما ساهلش عليا هادشي والله ما ساهل كيف غادي نقدر نصبر على فراق واليديا و عائلتي راه قاصحة بزاف واخا نبغي نقوي راسي راني كنبقا بشر ضعيف ماساهلش بين ليلة ونهار نسا هادشي اللي دزت منو
ياسمين: هانتي قلتيها ما ساهلش تنساي ولكن ماشي مستحيل
نورسين: شكرا بزاااف على هدرتكم اللي كتقويني بزاااف و كتخليني صابرة
ياسمين: حنا ديما فجنبك ابنتي حتى تنساي و ديما شوفي ما أقل منك فاش تبدا تجيك دوك الافكار القباح فراسك تفكري هادوك الاطفال اللي كيتخلاو عليهم عائلتهم فاش كيتزادو وكيلوحوهم فطارو د زبل شنو دنبهم
نورسين : عندك الحق كلها وشنو مقسملو سيدي ربي *دورات و جهها لسرجم و شافت جبل مع واحد العود أسود كيحمق 🐴🐴 *واااو ناري على عود كيحمق
ياسمين:*دورات وجهها شافت فالسرجم حتى هي* هاداك سيزر عزيز بزاف على جبل تبغي تهبطي عندو
نورسين: ماكرهتش صراحة
فنفس الاثناء هز جبل راسو و شاف نورسين واقفة كتهدر مع جداه ابتاسم تلقائيا و كان واقف حداه واحد الولد لابس سوفيطمة كحلة مع سروال فزيتي مع بروطكان كحل و عضلاتو مفتولين هو الولد اللي مكلف بمراقبة الاحصنة حتى هو هز عينو و جات عينو على نورسين اللي كان كيطير ريح شعرها المبوكل و كتعاود ترجعوا من مور ودنيها كيعنكشها حتى هو عجبو منضرها و بقا حال فمو فيها دور و جهو جبل وهو يلقاه حال فمو فيها
جبل:*خنزر فيه* سد فمك لا يمشي يتهرس
-سمحلي أسي جبل
جبل:ماتبقاش غير حال فمك فعباد الله و عينيك بقى تحدرهم شوية 🤨🤨🤨
جبل نورسين الجزء الرابع
محتوى القصة
التنقل بين الأجزاء