جبل نورسين الجزء السابع

من تأليف Fatima zahra ouba
2019

محتوى القصة

رواية جبل نورسين

هز جبل المخدة باش ينعس عليها و هي تطيح واحد الصورة ديال بنت صغيرة بالكرينات هزها جبل من الارض و عطاها ليعقوب
جبل: هاك أخويا هاد تصويرة طاحتلك 
يعقوب:*هز ديك تصويرة و مسحها و باسها * شكرا أخويا 
جبل: واش ختك 
يعقوب:*حرك راسو بنفي * مرتي المستقبلية 
جبل:*علامات الاستغراب و الدهشة بانت على ملاميحو* كيفاش ؟ 
يعقوب :*مشا جلس * اجي جلس و نعاودلك 
جبل مشا جلس حداه و قال يعقوب بصوت منكسر و حزين 
يعقوب: سميتها سلمى كانت كتجي ضيفة عند جيرانة لابس عليهم بزاف وانا كتعجبني بزااااف حيت زوينة بلاقياس واحد نهار كانت كتلعب و طاحتلها هاد التصويرة من يديها و كنت حاضيها وفاش مشات هزيتها من الارض و بقيت محتفظ بيها 
جبل:*بابتسامة* بحال ملاكي طاهر 
يعقوب: شكون ؟؟
جبل: حتى انا بحالك ملاكي طاهر زوينة بزاااف كتسكن حدا طاتي ليلى هي صديقتي الوحيدة اللي بغات تلعب معايا تلاقيتها تحت من واحد الشجرة كيقولولها شجرة ليلك كانت كترسم و شعرها كيطيروا الريح و كتجري بحال شي فراشة كانت زوينة لدرجة أنني ما قدرتش نحيد عليها عيني فاش شفتها غير هو كاين واحد المشكل 
يعقوب: أشمن مشكل 
جبل:*دمعوا عويناتو*هي كتبغي واحد الولد سميتو رشيد عرفاتو قبل مني و كاين مشكل أخور هو انني ما غاديش نقدر نتلاقا بيها مرة أخرى *هبطات دمعة من عينيه * اهئ اهئ الناس اللي كنبغيهم ديما كيختافيو من حياتي يمكن ربي ما كيبغينيش انا واقيلة مكتابلي نكون شقي فالحياة السعادة ماشي ديالي ممكن 
يعقوب:*مسحلو دموعو*ما تقولش هاد الهدرة انا متأكد بلي غادي تعاود تلاقاها 
جبل:*بلمعة و بريق فعينيه * انشاء الله عارف انا ربي ما كيخيبش الواحد اللي كايكون كايدعيه من قلبو 
يعقوب: ونتا علاش دخلتي لهنا 
جبل: حيت قتلت عمي كان با غي يتعدا على طاتي ليلى 
يعقوب:*شهق * وشحال غادي تبقا هنا من عام 
جبل:*هبطات دمعة من عينيه * ثمن سنين غادي نبقا هنا و انتا شنو درتي باش جيتي لهنا 
يعقوب: شفرت واحد المرأة و ديتلها دمليج ديال دهب من يديها صدقت مراة بوليسي اوا و جيت لهنا 
جبل: وما عارفش بلي شفارة حرام 
يعقوب: عارف ولكن ماما عندها ورم فراسها كيعاونونا غير المحسنين و بابا سامح فينا وانا مازال فعمري 12 العام مالقيت فين نخدم و ماما خاصها تعالج ما كنلقا منين نجيب الفلوس لقيت بلي الشفارة هي أسهل طريقة 
جبل: من فوقاش ونتا هنا 
يعقوب: شي شهر تقريبا 
جبل: و ما كيزورك حتى واحد 
يعقوب حنا راسو بأسف 
يعقوب: حتى واحد ونتا 
جبل: انا غير طاتي ليلى اللي عندي و حتى هي شحال هادي ما شفتها كنظن تقدر تجي غدا تشوفني 
تحل الباب ديال الحبس و هو يدخل واحد الشرطي و قال بالغوات 
-جبل الابراهيمي 
ناض جبل قافز و مشا عندو عطاه صاك ديال حوايجو ومشا خرج 
حط صاك ديال حوايجو فجنب و حلو لقا المدكرة ديالو من فوق الحوايج وفجنبها ستيلو هزها و مشا جلس حد يعقوب و حلها و هز ستيلو 
يعقوب:ديالمن هاد المدكرة 
جبل: هادي كنكتب فيها داكشي كامل اللي كنحس بيه كانت صديقتي الوحيدة قبل ملاكي طاهر 
يعقوب:ودابا 
جبل هز راسو فيه وقال 
جبل: انا كنت كنطلب من ربي صديق واحد و عطاني ثلاثة مدكرتي و ملاكي طاهر و انت شفتي ربي شحال كريم 
يعقوب: مزيان اللي كاتعرف تكتب و تقرا انا ما عمري دخلت للمدرسة 
جبل: بصح ما كتعرفش 
يعقوب حركلو راسو بنفي 
يعقوب : ماما ما كتعرفش و كيفما قلتلك الاب ديالي سامح فينا 
جبل: انا نعلمك تقرا وتكتب 
يعقوب : انشاء الله 
جبل هز ستيلو و بدا كيكتب كيفما العادة
♧♧♧♧♧♧♧
أشتاق إليك ليل نهار 
وليس بيدي سوى ان أشغل مخيلتي بك كل صباح 
وأحلم بك كل مساء

عند ليلى 
جات كدق عليها فاطمة فالباب 
ليلى: *بصوت متعب* شكون 
فاطمة: غير انا أختي حلي 
ناضت ليلى بشوية عليها حلات ليها الباب 
ليلى:كح كح كي بقيتي أختي 
فاطمة: ليلى بنتيلي عيانة بزاف 
ليلى: اوا اختي هاحنا كنتسناو الاجل ديالنا 
فاطمة: ما تقوليش هاكا الله يطولنا فعمرك أختي 
ليلى: امين 
فاطمة :*مداتلها يديها *هاكي ها هي التصويرة ديال نورسين اللي طلبتيلي قبايلة 
ليلى:كح كح الله شكرا بزاف لهلا يخطيك*شافت فتصويرة* جات كي الملاك فهاد التصويرة مشاء الله عليها 
فاطمة: لهلا يخطيك أ ختي و الله يشافيك 
ليلى: امين 
فاطمة: نخليك دابا خاصني نمشي الله يعاونك والا حتاجيتي شي حاجة هانا غير حداك أختي 
ليلى: ربي يخليك أختي 
مشات فاطمة و بقات كتشوف ليلى فديك تصويرة ديال نورسين اللي فيديها 
ليلى: نتمنى تخفف عليك هاد التصويرة همك أ حبيبي ولو غير شوية *دخلات و سدات الباب * 
مشات ليلى توضات صلات و قرات شوية د القرآن و بدات كتدعي 
ليلى : يا الله قصدتك و أنت الكريم دعوتك و أنت العظيم ناديتك وأنت أرحم الراحمين فيا خالقي و سندي إشفني شفاء تاما وعافيني في بدني وأخرج جبل مما هو فيه من الهم و الغم و الحزن فأنت الله الدي لا يرد سائلا اللهم إني متوكل عليك واثق بوعدك راضي بصنعك محسن ظن بك منتظر فرجك
تنهدات ليلى و مشات وقفات كطل من السرجم فجأة طاحت ليها واحد الفكرة ممكن انها تنقد بيها جبل ابتاسمت 
ليلى: الحمد الله يا ربي سهل الامور ياربي يحن قلبهم عليه 
ناضت لبسات جلبتها و مشات لفيلا ديال أب جبل و دخلات ليها بعدما حلها العساس الباب لقات دار خاوية كتصفر مشات غير بشوية حلات البيت ديال أب جبل و بقات كتقلب فالماريو على الله تلقا العنوان ديال جد جبل و جداتو هما الحل الوحيد اللي بقاو ليها قلبات داك الماريو سفاه على علاه والو ما لقات والو طاحت لارض و ناضت كتبكي شافت لبيبان كلهم تسدوا فوجها شحال خايب فاش كتلقا ان الحل ما بقاش عندك اصعب إحساس فدنيا هو تحس براسك عاجز و ما قادر دير والو باش تنقد أعز ناس ليك ناضت ليلى و ساست حوايجها و خرجات منهازمة والاحساس بدنب من جيهة جبل كايكل فقلبها و المرض ديالها ولات حالتها حالة كانت غادي طيح و هو يشدها العساس من يديها 
-ختي ليلى مالك 
ليلى: اخويا تسدوا البيبان فوجهي اهى اهئ ما عرفتش الحل 
- واش عندك شي مشكل 
- ليلى: جبل ولد سي سعيد ما فراسكش بلي دخل للاصلاحية و حكموا عليه بثمن سنين د الحبس 
- الله على داك الوليد كان كي الوردة ما كتسمعيش حلقوا بقا فيا بزاااف و الله كان بحال ولدي وربي اللي شاهد 
ليلى: بغيت نطلبك و ما تردهاليش فوجهي الله يستر عليك 
- نعام 
ليلى: بغيت نسولك واش كاتعرف العنوان ديال واليدين نورسين مرت سي سعيد 
- ما نكدبش عليك عارفوا ولكن ما نقدرش نعطيهلك حيت سي سعيد ما باغي حتى واحد يعرف بلاصتهم 
ليلى: الله يجازيك بخير الله يخليلك ما عز عليك الله يرحم من رباك الا ما قولولي راه هادا هو الحل الوحيد باش نفك داك الوليد الله يجازيك بخير الله يخليبك وليداتك 
- *كيحك لحيتو *نعطيهلك بشرط حتى واحد ما يعرف بلي عطيتو ليك راكي عارفة ما بغيتش نخرج على خدمتي 
-ليلى:* طاحت على يدو*كيفما عاونتيني بغيت سيدي ربي يفاجيها عليك 
دخل العساس و جابلها واحد الورقة فيها العنوان ديالهم 
- هاهو العنوان ماشفتيني ما شفتك واخا 
ليلى: كن هاني الله ينورك 
خرجات من تماك و كلها أمل انها تقدر تعاون جبل فشي حاجة حيت عارفة عائلة نورسين لاااااابس عليهم بضوبل اولا بطريبل مقارنة مع سي سعيد 
مشات لدارها و شربات دوا و كلها أمل انها تقدر تعاونو يخرج مشات تكات و نعسات 
🌤🌤🌤🌥 يوم جديد 
ناضت ليلى في الصباح بكري وجدات لجبل كاع داكشي اللي كيعجبوا واخا ما قاداش دارت دراع ودارت داكشي فالصاك و هزات تصويرة د نورسين فيديها و خرجات من دار بشوية عليها كتكى على الحيط حيت كتحس بالحريق و كتحس بأجلها قرب و ما بقا والو و تودع شدات طاكسي و مشات لعندو سمحولها بدخول و طلبوا منها تناضروا فإحدى القاعات المخصصة لزيارة

دخل واحد الشرطي فين كاين جبل و عيطلو بسميتو ناض قافز مسكين كيحس بداتو سخونة و العرق كينزل منو والدوخة حيت ما كلا والو ما عجباتوش ديك الماكلة اللي جابولهوم 
ناض جبل بتثاقل لعندو و شدوا من يدوا و داه لقاعة زيارات ابتاسم فاش شاف ليلى واقفة و كتنتضرو طلقات لو يديها و مشا عندها كيجري تعلق فيها و حتى هي عنقاتو و ضماتو عندها بقوة كبيرة 
ليلى: توحشتك اولدي اهئ اهئ 
جبل: حتى انا توحشتك بزاف أطاتي ليلى 
ليلى طلقات منو و شدات فخدودو لقاتهم طايبين 
ليلى: مال داتك سخونة واش كتحس بشي حريق 
جبل: *ابتسامة منكسرة * الحريق فقلبي أطاتي ليلى 
ليلى عنقاتو جنب 
ليلى: دابا ربي يفاجيها انا شنو كنقولك ديما 
جبل: أمورونا بين يدي الله فلتطمئن قلوبنا 
ليلى: ونعم بالله شحال ما حسنتي ظن بسيدي ربي أكيد غادي يخرجك من ضيق اللي نتا فيه 
ليلى كتحس بالحريق كيجهاد عليها و بدا العرق كيتصبب منها دورات جبل لعندها و عنقاتو بقوة بحال كتودعو و قالت 
ليلى: شنو ما وقع ديما تفكر بلي انا أكثر وحدة بغاتك فدنيا انا ماكانتش المربية ديالك وإنما ماماك و ربي اللي شاهد عليا و ربما كون كان عندي شي ولد ما كنتش غادي نبغيه قدك كح كح قبل ما نموت كون اكيد بلي غادي ندير اللي فجهدي باش نخرجك من هنا ماماك خلاتك ليا أمانة و انا حاسة براسي قربت نموت و ربي وصانا على الامانة ياك باش ندخل لجنة *ابتاسمت وسط دموع اللي كينزلو من عينيها * 
جبل زاد زير عليها 
جبل: فين غادي تمشي و تخليني عفاك نتي اللي بقيتي ليا ما تمشيش عفاااك أهئ اهى اهئ عفاااك أطاتي ليلى خليك معايا نتي ما غاديش تموتي نتي غادي تبقاي معايا حتى نكبر و نديك للحج بيدي ياك كانت هادي هي امنيتك عفاااك ما تخلينيش كنترجاك أطاتي 
ليلى : ضروري من الموت واش كاين شي واحد يقدر يوقف أجلو أعمرنا بيد الله 
جا عندها واحد الشرطي 
- الزيارة سالات أ لالا 
جبدات ديك تصويرة ديال نورسين و حطاتها فيدو 
ليلى : آخر كادو غادي نقدر نعطيك قبل ما نموت تهلا فراسك و كون راجل *باست راسو* قبل ما نموت غادي نخرجك الله يعاونك *صيفطاتلو قبلة فالهواء 😘😘😘* 
خرجات من عندو و جبل إنهار بالبكا عرفها كتودعوا عرف هادا بلي هو آخر نهار غادي يشوفها فيه قلبو حس بيها حط يدو على قلبوا و بدا كيبكي بحرقة كبيرة الوداع هو أكثر كلمة ما كنبغيوش نسمعوها خصوصا من ناس اللي كيكونوا عزاز علينا بزاف كتحس بقلبك شاعلة فيه العافية ولكن الوداع ضروري منو فالحياة كيفما كاينة البداية كاينة نهاية و كيفما كاينة الولادة كاين الوفاة 

♤♤♤♤♤♤♤
إن كنت ستغادر فأترك ذكرى طيبة فإن كنت مرغما على مفارقة أعز الاشخاص على قلبك هدا لا يعني أنك لاتستطيع قضاء بعض الوقت معه قبل أن تغادر فلا تفوت الفرصه إذا كان الوقت يسمح امضى الساعات الأخيرة معه ما قبل الوداع واحرص على الاستمتاع بكل لحظة منها اذهبا إلى مكانكما المفضل افعلو أي شيء تستمتعان به سوياََ حتى لو كان سخيفاََ لا يهم فقط أترك له ذكرى جميلة يتذكرك بها دائماََ.


خرجات ليلى من تماك و طاحت لارض كتبكي راه ماساهلاش تشوفي الولد اللي ربيتي مسجون و حالتو حالة ونتي ما بقالك والو و تودعي و تخليه بين و حوش دنيا شكون اللي غادي يحن فيه بحالها و شكون اللي غادي يتهلا فبه بحالها و شكون اللي غادي يبغيه بحالها حسات براسها ما قدراتش تحافض على الامانة اللي عطاها سيدي ربي حسات بضيق تنفس فصدرها و الضبابة فعينيها جاو ناس تجوقوا عليها و طاحت سخفات داوها لسبيطار طبيب تأسف لحالتها المرض خدالها صحتها كاملة و بقات ليها أيام معدودة على رؤوس الاصابع فاش فاقت ليلى حسات بداك الحريق تكالما شوية و لقات راسها فسبيطار ما عارفاش كيفاش حتى وصلات ليه ناضت و شدات على راسها 
جات عندها الممرضة 
- ارتاحي ألالا راك عيانة بزاف 
ليلى: خاصني نقد ولدي 
- ولكن راه صحتك.. 
ليلى: لا الله يرحم الواليدين غير خليني نمشي فحالي الله يجازيك بخير 
ناضت ليلى كتشد فالحيط و كتمشى غير بشوية حتى خرجات مشات باش تخلص سبيطار لقات بلي المحسنين خلصوه 
ليلى خرجات و شدات واحد الطاكسي و ركبات فيه و مشات للمحطة باش تمشي عند سي بنيس اللي هو الاب ديال نورسين شدات الكار حيت المسافة بعيدة حطات راسها على زاجة د سرجم و دموع من عينيها شلااال كتبكي على المرض ديالها و على أجلها اللي قرب كتحس براسها ما بقالها والو و تمشي عند اللي خلقها و كتدعي باش جدو و جداتو يقدر يعاونو جبل يخرجوه من الاصلاحية كتفكر واش يقدرو يتقبلوه ولا لا حيت كيبقا حفيدهم من دمهم و لحمهم 
حطها الكار قريب من ديك الفيرمة و بقات غادة و كتسول على دارو حتى وصلاتلها حيت ما كاينش اللي ما كايعرفش موسيو بنيس فديك البلاصة وصلات لحدا ديك الفيلا اللي كانت كبيرة و جميع انواع الورد تماك منظر رائع بامتياز لقات واحد جوج ديال لبودكارد واقفين تماك 
ليلى: عفاك بغيت نشوف موسيو بنيس 
داك البوديكارد كايشوف فيها 
- شكون نتي 
ليلى: انا كنعرف بنتهم نورسين الله يرحمها عندي ليهم شي خبار 
دخل واحد من البوديكارد قالها لميلودة الخدامة اللي مكلفة دخلات عند مدام ياسمين اللي كانت جالسة مع عبد المالك لابسين ملابس سوداءو هازين تصاور ديال بنتهم نورسين كيشوفوا فيهم بأسف و عينيهم عامرين دموع و حاطين راس عند راس دازت عشر سنين على وفاة أم جبل اللي كانت بنتهم الوحيدة وسط دكورة كانت مفششة و كانو كيبغيوهاااا بزاف و ندمانين حيت ما خلاوهاش تخاد سي سعيد بموافقتهم وكيجيب لهم بالهم بلي كيتحاسبو على هاد الخطأ من خلال موتها المفاجئ اللي نزل عليهم بحال صاعقة مازال ما شبعوش حتى منها هربات مع سي سعيد وخلات كبدتهم مشوية واخا كان بامكانهم يجيبوها لعندهم ولكن خلاوها على راحتها معاه ما كانوش متوقعين بلي الموت غادي تسرق منهم ولكن القدر كان عندو كلام أخور ودابا هاهوما عايشين فالندم و تأنيب ضمير حياتهم كاملة 
♧♧♧♧♧♧♧♧
الندم؛ بالرغم من صغرها ككلمة، إلا أنّ الإحساس بها جدّاً مؤلم، تُرى لماذا نشعر بالندم على أفعال فعلناها بكامل قوانا العقليّة، والأغرب لماذا نفعلها ونحن مدركين أنّنا غداً سنندم عليها؟.
♧♧♧♧♧♧
-لالا 
دارت ياسمين عند الخدامة 
ياسمين: ميلودة شنو كاين 
ميلودة: * كتهدر حانية راسها * جات واحد المراة ألالا كتقول بلي كانت كتعرف لالا نورسين الله يرحمها 
وقفات ياسمين و عينيها كيبريو بدموع 
ياسمين: دخليها عفاك دغيا 
ياسمين جلسات و حطات يديها على قلبها كتحس بقلبها كيضرب فاش كتسمع سمية د بنتها كيرجع ليها الحنين و كتفكر كاع لحظات اللي قضاتهم معاها فاش كانت حية كانت بنت ضريفة و من أطيب خلق الله ديما كتبغي دير الخير و ما عمرها آدات شي حد كانت ملاك فصفة إنسان وهادشي من بين الاشياء اللي حممقوا سي سعيد فيها و ولا كيحماق عليها بالاضافة أنها كانت جميلة و بيضة كي جبينة و عويناتها كبار ومشفرين كانت حليلوة بزاف 
تنهدات ياسمين و غمضات عينيها شاف فيها عبد المالك و عنقها جنب 
عبد المالك: الله يرحمها 
ياسمين : امين 
ميلودة: هاهي المراة ألالا 
التافت ياسمين عندها ووقفات 
ياسمين: تفضلي
تقدمات ليلى بشوية عليها حيت عيات بطريق و زايدها المرض مهلوكة ديال بصح وجلسات من فوق الفوتوي و بدات كتفرك فيديها بقوة التوتر 
ياسمين: * جلسات حتى هي و تقبلات معاها * قلتي بلي كتعرفي بنتي 
ليلى هزات راسها شافت فيها 
ليلى: أنا كنت خدامة عندهم فالدار ألالا و كانت لالا نورسين كتعاودلي كلشي كانت حاسباني بحال ختها الله يرحمها و اليوم جيت قاصداكم والمقصود الله 
عبد المالك: تفضلي ألالا 
ليلى: حفيدكم ألالا مشدود فالاصلاحية 
قفزات ياسمين من بلاصتها 
ياسمين: كيفاش 
عبد المالك: ممكن توضحيلنا أكثر عفاك 
ليلى: قتل عمو حيت كان باغي يتعدا عليا أ لالا أنا سباب *حطات يديها على وجها و بدات كتبكي بكل حرقة *اهئ اهئ 
عبد المالك:وفين باباه 
ليلى: *حيدات يديها على وجها و شافت فيه* باه ما كاينش منين تزاد و هو راميه عمرو ما بغاه و لا حن فيه حيت تهز فدماغو لدرجة كيقولو بلي نتا اللي قتلتي نورسين كيقولو نتا سباب و ديما كيضربوا و يغوت عليه واخا ما يكون دايرلو والو 
ياسمين كتحرك راسها يمين شمال و دموع كيتساقطوا من عينيها بغزراة حطات يديها على فمها بقوة الصدمة و الشمتة اللي حسات بيها فهاد اللحظة و شافت فعبد المالك 
ياسمين: * كتهدر بالغوات* يااااااااااااك كنت قلتللللللك نجيبوااااا حفيدنااااااا من عندوووووو اهئ اهئ يااااااااك كنتيييي كتقوووووولي غادي يكووووووون عايششش مزيااااااان مع بااااباااه سمعتييييي دااااابا شنو كيدير لوووو اهئ اهئ سمعتيييييي *طاحت لارض و حسات براسها تخنقات * 
ناض عندها حلها صدايف د القميجة اللي كانت لابسة مزيرة عليها و ناضت حتى ليلى كباتلها تشرب و شرباتها 
عبد المالك: والله حتى كان كيصحابلي عايش مزيان مع باباه 
ياسمين: مااااااا تقيسنييييش بسبابك حفيدي تعدب اهئ اهئ * قبطات فيد ليلى* عفاااااك ديني عندو عفاااااك اهئ اهئ راه الا ماشتوش نحماق عفاااااك 
عبد المالك: ياااسمين تهدني عفاك راه انا براسي كنحس بدنب من جيهتو ما توقعتش باه غادي يكون داير فيه هاد الحالة 
ياسمين:*خنزرات فيه* نتاااا من ديماااا ما كتسمعش لهدرتي كن كنتي أب مزيان كن فاش نهار جات قالتلك نورسين بنتي بغيييت نتزوج بسعيد كن زوجتيهالو علاش اهئ اهئ كن بحال دابا راه جالسة معانا و كن راه حفيدي تربي حدايا اهئ اهى كلشي من تحت راسك نتا سباااااب اهئ اهئ 
ليلى: لالا عفاك تهدني الله يجازيك بخير انا جيت عندكم باش تعاونو جبل يخرج من الاصلاحية راه حكموا عليه بثمن سنين 
ياسمين: كيفاااااش 😲😲😲 
عبد المالك: ولكن سعيد أحسن محامي فالبلاد واش ما دافعش على ولدو 
ليلى: وراه سي سعيد حماااق أ سيدي فاش ماتت نورسين و بدا كيحمل دنب لجبل اللي ما داير لا بيديه لا برجليه اهئ اهئ عفاكم عاونوه يخرج منها الله يجازيكم بخير راه انا اللي ربيتو و كبرتو بيدي راه حتى انا ولدي هاداك وانا مريضة ما بقالي والو و نودع نمشي بحالي عند اللي خلقني *دارت يديها على هاد الشكل 🙏🙏🙏* الا مت عفاكم عندي واحد الدار كتبوهالو بسميتو الله يجازيكم بخير كح كح وديما فكروه فيا باش ما عمروا ينساني 
ياسمين بقات فيها و شظاتلها فيديها 
ياسمين:* بأسف * شنو عندك باش مريض 
ليلى:* ابتسامة منكسرة* السرطان فمراحل جد متقدمة و على حساب هضرة طبيب اليوم ولا بعدو غادي يسالي الاجل ديالي كح كح 

♤♤♤♤♤♤♤♤♤ 

العلاج الكيماوي هو إحتراق داخلي جفاف في الحلق آلام في العظام إحساس بأن الطعام بلا طعم شعور بأن الملابس كريهة نار تسري في الاوردة وألم فجائي في الجسد تجعلك تصرخ من شدته اللهم اشفي مرضانا و مرضى المسلمين اللهم إرحم كل من عانى من مرض السرطان واشف من لا يزال يعاني من ألمه أمييين ❤


ليلى بدات تكحب و كتحس بشي حريق والعرق كيتصبب منها و الحريق كيجهاد طاحت على الفوطوي كتحس براسها غادي تموت 
ياسمين:*ناضت عندها كتضرب ليها فوجها* فيقي أشريفة 
عبد المالك ناض و هزها بين يديه و خرجها و طلعها فالطوموبيل ديالو فاتجاه المستشفى و ياسمين طالعة معاها اللور و قابطالها فيديها 
ياسمين: عفاااك صبري عفااااك قربنا نوصلو 
ليلى:* كتهدر غير بشوية و الحروف كتخرح من فمها متقطعة* اناااا كنحس براسي كنموت * العرق كيتصبب منها و الالم كيزيد يجهاد عليها شدات ليلى فيد ياسمين بقوة* عفااااك تهلاو فولدي جبل كيفما خلاتولي ماماه امانة فرقبتي جات نوبتكم حتى نتوما باش تهلاو فيه هو عمرو ما فرح فحياتو عفااااك عاونوه يخرج من الحزن اللي هو فيه كح كح أأأأه * كتغوت من شدة الالم * انا دابا عاد غادي نمشي مرتاحة عند ربي أأأه يا ربي *هزات صبعها باش تشهد* أشهد أن لا إله إلا الله وأشهد أن محمدا رسول الله *هبطات دمعة من عينيها و تقطع صوتها* 
ياسمين:*كتضرب فوجها باش تفيق* عفاااك هدرررري معااااااايا عفاااااك عبد المااااالك واقيلة ماتت * كتقيسلها نبض ديالها *مااااابقاتش كتنفس أهئ اهى * غمضاتلها عينيها *إنا لله وإنا إليه راجعون 
عبد المالك حبس اللوطو حدا واحد المستشفى 
ياسمين : مااتت أعبد المالك مااااتت أهئ اهئ 
عند جبل 
كان ناعس على سرير و معنق تصويرة ديال نورسين حدا قلبو حتى بدا كيحلم بليلى كانت لابسة فستان أبيض كتبعد عليه شوية بشوية و هو تابعها كيجري من موراها و هي غير ما كتزيد تبعد عليه وهو كيعيط ليها بصوت مرتفع وهي ما كتجاوبوش حتى إختافات على أنظارو ناض من فوق سريرو وشاد على قلبو و بدا كيبكي جا عندو يعقوب بسرعة 
يعقوب:جبل مالك 
جبل عنقو وقال 
جبل: حلمت حلمة خايبة بزااااف اهئ اهئ *مسح الدموع من عويناتو* حلمت بطاتي ليلى كتبعد عليا اهئ اهئ ياكما تكون واقعاتلها شي حاجة 
يعقوب: شوف غير تهدن * كيدوز يدو على شعرو* سمعني قالتلي ماما فاش تحلم بشي حاجة خايبة تفكر شي حاجة زوينة باش تنساها 
جبل بعد عليه و مسح دموع من عينيه 
جبل: *حل يدو وهي تبان صورة ديال نورسين و ابتاسم تلقائيا* هاهي الحاجة زوينة فحياتي 
يعقوب شاف فصورة و خداه من عندو و غمزو 
يعقوب: صدقتي حتى نتا ما ساهلش أصاحبي عندك هاد زين كامل و مخبيه علينا 
خطفلو صورة د نورسين من يدو 
جبل: *خنزر فيه 🤨🤨*حتى نتا عندك صورة ديال صاحبتك شوف فيها 
يعقوب:*خربقلو شعرو* تا مالك مغيار أصاحبي 
جبل: ما تبقاش تهدر على أميرتي إلا بغيتي نبقاو صحاب 
يعقوب: شوف غادي نواعدو بعضياتنا واحد الوعد 
جبل : شنو هو 
يعقوب: فاش غادي نكبروا غادي نتزوجوا انا وياك و نديروا عرس واحد انا نتزوج بسلمى ونتا بملاكك الطاهر 
جبل: *كيفكر 🤔🤔*امم واخا صافي

بعد مرور ثلاثة أيام 
واحد الشرطي دخل للزنزانة وعيط بصوت مرتفع على جبل ناض و مشا عندو و شدو من يدو 
جبل:واش عندي شي زيارة اليوم *بفرحة* اكيد غادي تكون طاتي ليلى 
- اليوم غادي تخرج من هنا و راه عائلتك كتنتاضرك 
جبل بقا غير مصدوم أولا سمع أنه غادي يخرج من هاد الغمة و هاد السجن و ثانيا سمع عائلتك هو ما عمروا اعتابر أنو عندو عائلة كانت ليلى هي ماماه و باباه و ختو وصاحبو كانت فيها عائلتو كلها 
قال و علامات دهشة و الاستغراب على وجهو 
جبل: واش متأكد 
- زيد قدامي بلا هدرة 
دار جبل ومشا عند يعقوب اللي كان ضاربها بنعسة و بدا كيفيقوا 
جبل: يعقووووب نوض اليوم غادي نخرج من هنا 
ناض يعقوب قافز يسحابلو غير كيتخايل 
يعقوب: سير بحالك خليني نعس 
جبل: والله ما كنكدب عليك بالله نوض 
ناض يعقوب طافج و شاف فيه بعينيه مبرققين 😲😲 
يعقوب: واش بصح كتهضر من نيتك 
جبل:*بفرحة* والله حتى اليوم غادي نخرج 
يعقوب:*كيحك شعرو* ولكن نتا محكوم عليك بثمن سنين أصاحبي كي درتي ليها 
جبل: هههه ربي ما عمرو ما كيخلينا فنص طريق كيفما كيديروا ناس ربي ديما كاين و كيشوف فينا وهو أكثر واحد حاس بحالتنا كيسيرنا بالحكمة ديالو ربي ديما كيسمع لصوتنا وما عمروا ما كان بعيد هو ديما قريب لينا نقدروا حنا نبعدوا عليها و لكن هو ديما كيعيطنا و كيقولنا أنا قريب من ديما كان قلبي حاس بلي غادي يجي واحد نهار و ربي غادي يستاجب لدعائي شفتي كنت ديما كنقولهالك 
يعقوب: نتمنى حتى انا ربي يستاجب لي 
جبل: هادا هو الخطأ اللي كيديروا أغلب ناس كيتمناو دعائهم يتقبل لا خاصك تدعي سيدي ربي وانت متيقن ومتأكد أنه غادي يسمعك هو الحنين هو الكريم هو السميع 
يعقوب:* ابتاسمة انكسار*غادي نتوحشك و لفتك بزااف 
جبل عنقوا بجهد 
جبل: حتى انا غادي نتوحشك بزاااف و لكن انا متأكد حتى نتا غادي تخرج من هنا 
مشا جبل هز صاكو و دارلو باي باي بيدو 👋👋 و يعقوب دمعو عينو و حتى جبل 
جرو داك شرطي و خرجو من تماك حلو الباب الكبيرة و خرج جبل وهو يضرب فيه أشعة شمس د برا حط يدو كيخبي عينو من شعا اللي ضارب فيه بقا كيحول عينو مالقا حتى واحد كيساينو حط الصاك ديالو فالارض و جلس عليه و ربع يدو ما عارف شنو يدير ولا فين يمشي 
كانت واقفة واحد السيارة من نوع ميرسيديس فلون الاسود بعيدة عليه كان فيها عبد المالك وياسمين فالخلف شافتو ياسمين و هي تحط يديها على فمها و شهقات 
ياسمين: راه هو أعبد المالك اهئ اهئ حفيدي 
هبط شيفور وحل ليهم الباب و نزلوا عندو بتثاقل وغير بشوية عليهم حتى وقفوا حدا راسو 

جبل حس بشي واحد واقف على راسو هز عينو شاف فيهم 
جبل: شكون نتوما 
هبطات ياسمين و جلسات فنفس المستوى ديالو 
ياسمين: أنا * كتهدر بشوية و حروف متقطعة و دموع فعينيها *انا جداتك أولدي 
عبد المالك حتى هو حنا عند جبل و عنقوا بقوة وضموا ليه 
عبد المالك: حنا عائلتك اولدي 
جبل: *بفرحة و عينيه كيلمعوا حط يدو على خد جدو * بصح نتوما عائلتي 
ياسمين حركاتلو راسها بأسف و دموع كيطيحو من عينيها بغزارة 
جبل: ولكن أنا ما عمري شفتكم علاش ما عمركم جيتوا لعندي 
ياسمين شهقات و دورات و جهها الإحساس بدنب كياكلها من لداخل ما قدراتش تشوف فعينو 
عبدا المالك: ماشي لخاطرنا أولدي والله ما لخاطرنا ماكناش عارفين كان باباك مخبيك علينا 
جبل: *حط راسو على كتف جدو* بابا ديما كان كيعدبني و شحال من مرة بغا يقتلني وانا ما عمري درتلو حتى حاجة اهئ اهئ * ناض من فوق كتفو*عرفتي كان شي بعض المرات كيخنقني بيدو وانا ناعس اهئ اهئ عمرو ما بغاني كن غير كنت ميت اهئ اهئ *كيمسح دميعاتو بيدو* كن غير ما تزاديتش كنت كل ليلة كنتعدب بسبابو اهئ اهئ غيرطاتي ليلى اللي كانت كتبغيني بوحدها فيناهي طاتي ليلى 
ياسمين مابقاتش قادرة تسمع لهدرتو اللي قتلاتها من لداخل واش بصح حفيدها كان عايش هادشي كامل فهاد سن صغير واش بصح كاين شي أب فالكرة الارضية غادي يسخا عليه يعدب ولدو لدرجة انو يتمنا الموت بالاضافة انو طرح عليها سؤال صعيب بزاااف ما قدراتش تجاوبو عليه غمضات عينيها و تكات على الطوموبيل ديالهم كتبكي و تشهق 
عند جبل 
جبل: مال جداتي كتبكي 
عبد المالك: ما عرفتش أولدي * كيحاول يحبس دمعة من عينو* 
جبل: فين هي طاتي ليلى 
عبد المالك: كاينة فوحدة البلاصة زوينة تبغي نديك تشوفها 
جبل: اه توحشتتتتتتتتتها بزاااااااااااااف كانت كتبانلي كوابيس و أحلااااام قبيييييحة بليل على طاتي ليلى 
حنا عبد المالك و هزلو صاكو و شدو من يدو و دخلو لطوموبيل و سد عليه الباب و مشا عند ياسمين 
عبد المالك: باركة ما تبكي راه هكا كدخلي شك لولد 
ياسمين : ما قدرتش أعبد المالك ما قدرتش واش فالوقيتة اللي كان حفيدي كيتعدب كيصحابلي انا عايش بخير مع باه راه ما ساهلاش عليا وهاهو دابا تيبكي على المربية ديالو اللي ماتت الله يرحمها 
عبد المالك: خاصو يتقبل ما عندنا ما نديرولو 
طلع عبد المالك و ياسمين لطوموبيل بعدما وصا الشيفور يديها لروضة فين مدفونة ليلى وصلو لقبور و نزل عبد المالك و نزلت ياسمين 
عبد المالك : نزل أولدي 
نزل جبل بشوية عليه كيشوف فالمكان بانتلو البلاصة عامرة قبورة عرفها ماتت غمض عينو جبل و دموع كيتساقطوا من عينو عرف بلي مات الحضن الحنبن اللي طول عمرو وهو يحط عليه راس عرف بلي مات اللي كان يعرفوا من شوفة العين شنو خاصو عرف بلي مات أرحم إنسان عليه و ما غاديش يعاود يشوفوا مسح دموع من عينو و قال 
جبل: وريني لقبر د طاتي ليلى 
شد فيديه عبد المالك و وقفوا حدا قبرها طاح لارض و حط راسو على راس د قبرها و عنقو 
جبل: انا غادي نحاول ما نبكيش أطاتي نتي اللي كنتي كتقوليلي بلي دموع كتحرق الميت انا مابغيكش تحرقي انا بغيت نتلاقا انا وياك فجنة ما غاديش نبكي حيت نتي مشيتي عند أرحم الراحمين *دموع كينزلولو و كيتقاتل باش ما يبكيش اي دمعة طاحت من عينو كيمسحها * كن غير مشيت انا قبل منك باش ما ندوقش الالم ديال فراقك انت ربيتيني و علمتني شحال من حاجة فالدين والاخلاق ربي اختارك باش تمشي لعندو أنا عارف بلي الاشياء الزوينة ما عمرها دامت ليا وانت اول و أغلى أشيائي اللي مشات وخلاتني توحشتك بزاااف تمنيت كن خرجت و شفتك ولكن قدر الله و ماشاء فعل كنتمنى نفيق ونلقا غيابك كابوس وتسالا الله يرحمك أطاتي *باس راس د قبرها بحب كبيرر و ناض * 
طلعوا عبد المالك لطوموبيل و حط جبل راسو على زاجة د طوموبيل و بدا كيبكي و يشهق حتى عنقاتو ياسمين جنب و حتى هي ناضت تبكي معاه حتى هي قلبها طايب أكثر منو 
جبل: علاش خرجتوني من تماك أهئ اهئ كن غير خليتوني اهئ اهئ 
ياسمين: ما تقولش هاد الهدرة أحبيبي بالعكس هاكا غادي تبدا حياة جديدة 
جبل:كي درتو خرجتوني من تماك كانو حاكمين عليا بثمن سنين 
ياسمين: كلفنا محامي تكلف بقضيتك أ حبيبي نتا غير دافعتي على المربية ديالك الله يرحمها 
جبل:*شاف فيها و قال * ممكن نطلبك طلب واحد أجدة 
ياسمين:*باستو فخدو * طلب اللي بغيتي أحبيبي عيني نعطيهوملك 
جبل: عندي واحد صاحبي حتى هو مظلوم واش يقدر يخرج من تماك 
عبد المالك : يكون خير أولدي الاهم عندنا دابا هو صحتك ونتا تكون فرحان 
جبل:*بابتسامة* شكرا 
جبد جبل صورة ديال نورسين اللي كانت فجيبو و بقا كيشوف فيها و كيضحك قربها حدا فمو و حط عليها شفايفو مدة طويلة و تكا فحضن جداتو ياسمين وحطها حدا قلبو ونعس 
🔚🔚🔚🔚 نهاية الفلاش باك

ما فيقوا من سهوتو غير صوت دقان فالباب وقف وخبع تصويرة ديال نورسين بعدما باسها حطها فواحد المجر حدا راسو و مشا بخطوات موزونة حل الباب لقا نورسين واقفة و كتبتاسم هو حس بقلبو فرفر و ضرب فالالف ما مصدقش انها تجي عندو بقا غير حال فمو فيها و كيحاول يستوعب واش بصح نورسين اللي واقفة قدامو ولا غير كيتخايل 
نورسين: احم واش ممكن نهضر معاك 
جبل:*حل فيها فمو * أ عاودي شنو قلتي 
نورسين: بنتيلي بحال دايخ ياكما كنتي باغي تنعس وفيقتك صافي حتى لصباح و نهدر معاك 
دارت و شدلها فدراعها 
جبل: مدوخاني حاجة أخرى مصاب كن كان نعاس 
نورسين: واخا بغيت غير نقولك شكرا على أي حاجة درتيها معايا وبغيت نطلب منك واحد طلب الا كان ممكن 
جبل: *بعينين هايمين فيها * آمري وانا نفد 
نورسين: نتوما رحبتو بيا و ما خليتوا ما درتوا معايا الله يجازيكم بخير والله يكثر من أمثالكم غير هو خاصني نمشي من عندكم 
جبل:*بانفعال* علاش واش قلقك شي حد نمشي نتفاهم مع طاسيلتو دابا 
نورسين: لا ماشي هاكاك كنبقا انا بنت غريبة عليكم والا جات على خاطرك بغيتك تلقالي شي أبارطمون نكريها غير نخدم ونردلك فلوسها 
جبل شداتو دوخة فهاد لحظة واش هادي من نيتها كدوي باغا تبعد عليه وهو اللي يدير المستحيل على قبلها وعلى قبل غير شوفة من عويناتها حس بحال كتقولو باغا نحبس عليك الاوكسجين حس بحال شي خنجر وتحشا فقلبو هو ولفها حداه كيفاش غادي يقدر يدوز عليه نهار واحد بلا ما يشوفها فيه ما يقدرش والله مايقدر يبعد عليها راه يقدر يتسطا 
جبل:*بصوت خافت و حنين و كيشوف فيها بابتسامة انكسار * صافي دغيا سخيتي بينا 
نورسين: لا ماشي هاكاك والله حتى وليت كنحس بيكم عائلتي رحبتوا بيا ما خليتو ما درتو ليا وكيفما كيقول المثل الله يرحم من زار و خفف 
جبل: ونسيتي بلي إكرام ضيف واجب 
نورسين: حتى نتوما راكم كرمتوني الله يعطيكم الخير ما نقدرش نبقا عندكم حياتي كاملة حتى انا خاصني نعول على راسي حتى لامتى غادي نبقا عايشة معاكم 
جبل: * بحزن* هادا هو قراراك الاخير واش متأكدة 
نورسين:*بابتسامة* كن ما كنتش متأكدة ما نجيش نقولك هاد القرار 
جبل: واخا اللي بغيتي غير هو خاصني الوقت باش نقلب على دار 
نورسين: شحال د الوقت 
جبل:*بابتسامة* عمري كامل 
نورسين: ههه ودابا كنهضر معاك بصح 
جبل: نتي شحال بغيتي د الوقت 
نورسين: انا ما نكرهش من غدا صراحة 
جبل: * بأسف* اوو حتى لهاد درجة ما باغاش تبقاي معانا ما توقعتهاش منك 
نورسين: و دابا راه ماشي هاكاك كيفما كيصحابلك راه والله ماسخيت بيكم ولكن ضيافة نبي ثلاث أيام 
جبل: *بتدمر* يكون خير 
نورسين: شكرا بزااف تصبح على خير 
جبل: تصبحي على خير 
طلعات نورسين لطابق ثالث وهو بقا متبعها بعينيه حتى إختافتو على أنظارو شد الباب و دخل حط راسو عليه وبدا كيزدح راسو مع الباب بقوة الفقصة وكيردد 
جبل: نورسين لجبل و جبل لنورسين و ما غادي تفارقهم غير الموت ما عمري غادي نسمحلك تبعدي عليا باغا تقطعي عليا الاوكسجين باغا تقتلني ياك ما غادي تهناي حتى تسكتيلي القلب 
تمشا حتى وصل لبالكون اللي كاين فبيتو و جلس من فوق واحد الكرسي و جبد الكارو من جيبو وبدا كيكمي و كيشوف و كيفكر كيفاش غادي يقدر يخليها حداه ما يمكنش يخليها تمشي بعدما لقاها وهي الاوكسجين اللي كيتنفسوا الدم اللي كيجري فعروقو هي قلبو اللي كينبض بالحياة الا مشات غادي تاخد روحو معها وقلبو معاها وقف و بدا كيمرر يدو على شعرو ولكن هي مقررة انها غادي تمشي و شحال ما طولات لا بد غادي تبغي تعيش بوحدها حيت كيبقاو ناس ما كتربطهوم معاها حتى علاقة عاود جالس و بدا كيتأمل و كيحاول يلقا شي طريقة اما خلاص داك الباكية د الكارو كلها كماها حتى صبح صباح وهو جالس كيفكر حتى طاحت عليه الفكرة اللي غادي تخليها تبقى بجنبو و حداه تبسم بشر وقال 
جبل: ماشي مشكل الا بغيتي تمشي ولكن غادي ترجعي أحياتي

لمح جبل شي سيارة داخلة لمزرعة و كتكلاكسوني باش يحلها العساس الباب جبل جمع يدو على شكل لكمة بقوة الاعصاب و ناض ضرب داك الكرسي برجلو حتى تفرشخ و مرر يدو على وجهو بقوة الفقصة 
جبل: ياربي عطيني صبر يا ربي 
خرج من بيتو و هبط فالدروج وحل الباب 
فنفس الاثناء نورسين ضربتها الفيقة على صوت الكلاكسون ديال طموبيل ناضت طافجة دوزات يديها على وجها و تفوهات و رجعات حطات راسها على المخدة كتشوف فالسقف ديال بيتها 
عند جبل 
خرج وهو يشوف الطوموبيل ديال كاميليا واقفة نزلات منها كتعوج غير بشوية عليها لابسة كسوة فالابيض حد الركبة مع طالون فالأسود و ضاربة تمكيجة نيت وهازة فيديها علبة فلون الاسود 
لمحات جبل و مشات كتعوج تعلات و باستو فخدو حيت واخا بطالون جبل طويل خاصك سلوم باش تلحقيه بقا لاطراس د العكر حمر فخدو 
كاميليا: happy birthday to you jabal *غمزاتو 😉😉* واخا جات معطلة أولد عمتي
جبل: *خنزر فيها و دفعها من عليه* واش نتي رب د مك ما باغاش توبي واش بايتة كتحلمي بيا جاية على صباح واش حمقة 
كاميليا :* دلات شنايفها* حشومة عليك تقول هاد الهدرة انا كنت مريضة و واخا هاكاك جيت نبارك ليك عيد ميلادك حيت كنحماق عليك * ابتاسمات و مداتلو الكادو * فتحوا شوف شنو جبتلك 
جبل: واش باغا تحمقيني ياك عاد كنتي فالاوبيطال * دوز يدو على شعرو بقوة الفقصة* مريضة واش خلاوك واليديك تجي 
كاميليا: خايف عليا ياك 
جبل:* ابتسامة استهزاء* والله حتى مريض انا نيت اللي داير فيك راسي 
كاميليا: وادابا فتح الكادو 
حل لبواطة اللي كانت فيها صورتو فواحد الاطار فيه بعض القطع من دهب الخالص و الالماس و كاتبة تحت من تصويرتو my love 
جبل لاح داك الكادو على وجها 
جبل: كاميليا غير قوليلي واش ما عيتيش من 
هاد الدل اللي نتي فيه هدرت معاك بالخاطر هدرت معاك بالغوات شنو ما فهمتيش فأنا كنبغي إنسانة أخرى قلبي محجوز لانسانة أخرى 
كاميليا حنات هزات صورة ديالو اللي لاح 
كاميليا: نفهم من هدرتك بلي ما عجبكش الكادو ديالي 
جبل: كاميليا الا كنتي كتبغيني ديال بصح نساي عليك شي حاجة اسميتها جبل 
كاميليا:*قربات لحداه وشدات عنقو بيديها وقرباتو ليها و قالت وعينيها كتشوف فعينيه مباشرة و ضحكات ضحكة محلونة* بحال كتقولي ما نتفسش 
قربات ليه حتى ما بقا كيفصلو عليها والو وعينيها كتشوف فشنايفو 
فنفس الاثناء ناضت نورسين لسرجم فتحاتو و ما تجي عينيها غير عليهم ردات بسرعة ريدو و بقات غير مصدومة وحطات يديها على قلبها اللي كان كيضرب بجهد و ردات شعرها لجنب و مشات جلسات فسرير 
نورسين:كيقرب لديك البنت و مازال ما عاقد عليها ما والو اويلي وحدي المنكر بعينو هادا *شدات على قلبها* اويلي وانا مالي بحال ما عجبنيش الحال لاااااا أنورسين لاااااا عنداك تكوني تعلقتي بيه لااااا أنورسين عنداك رجاااال كلهم بحال بحال كيشوفو غير المظاهر *حسات بالخنقة فصدرها * انا بغيت غير نعرف شنو واقعلي اووف 

♤♤♤♤♤ 
سئل أحدهم عن تعريف يليق بإخفاء الغيرة فقال : 
{كأن ألمس الجمرة في راحة يدي ثم أدّعي أنها مكعب ثلج }


جبل بعدها عليها وعطاها تصرفيقة
جبل: واش باغا تسطيني واش بنت لدينمك انا ناقص حماااق واش كتفهمي العربية ولالا واش نقولها بلغة أخرى عيقتي بزااااف 
كاميليا شافت فيه و عينيها عامرين بدموع و يديها على حنكها و قالت بالغوااات 
كاميليا: ماااااقدرتش نساااك و مااااااقدرتش وااااافهم فهم أجبل فهمنيييي حتى انااااا ماشييي لخاطري ماشيييي لخاطري نتاااااا ديالييي بغيتي ولا كرهتي و دابا نشوفو 
مشات حلات طموبيلتها و كسيرات و مشات بحالها 
جبل ضرب رجلو مع الارض و حل الباب و دخل لكوزينة باش يشرب الما لقا نورسين واقفة فيها والتافتت لعندو 
جبل:*بابتسامة* صباح الخير 
نورسين:صباح الخير 
جبل: واش بغيتي شي حاجة 
نورسين: بغيت نصوب القهوة و ماعرفتش فين كاينين الماعن 
جبل: امم القهوة ما نصحكش بيها فالصباح خاصك العصير هو اللي فيه الفيتامينات القهوة فيها الكافيين تقدر ضرك 
نورسين: واخا ولكن ما عرفتش فين نقدر نلقا الماعن باش نوجدوا 
جبل: غير سيري ترتاحي انا نصوبو و نجيبو لبيتك 
نورسين: اويلي لا بلا ما نعدبك غير و ريني فين العصارة 
جبل: غير سيري ترتاحي والله انا نيت كنت جاي نصوبوا 
نورسين: ما كايعجنيش نرجع نعس واش ممكن نبقا معاك هنا حيت ما عرفتش شنو ندير 
جبل:*ضحك حتى بانو الغمازات اللي عندو فوجهو سبحان مبدل الاحوال اللي شافو ما يقولش هادا اللي كان معصب عاد دابا* واخا بقاي معايا بكل فرح و سرور 
نورسين : شكرا 
مشا جاب ليها كرسي 
جبل: جلسي ما تبقايش واقفة غادي يضروك رجليك 
نورسين: شكرا ولكن انا بغيت نعاونك 
جبل: شنو قلت انا 
نورسين: اوكي صافي هه * مشات جلسات و ربعات يديها * عندكم الكوزينة زوينة و كبيرة بزاااف من ديما كنت كنحلم تكون عندي بحالها حتى ديزاين ديالها زوين 
جبل مشا جبد العصارة وبدا يقطع فليمون و كيهدر 
جبل:كاين ما أحسن منها هادي راه ديزاين ديالها قديم شوية 
نورسين: امم مزيان 
جبل:واش موالفة كتفيقي فالصباح بكري ديما 
نورسين: فقت حيت سمعت الكلاكسون ديال طموبيل 
جبل: دارتلك الازعاج ديك بنت ...* كان غادي يخسر الهدرة وهو يشد فمو * خالي
نورسين: اه شفتك واقف معاها قبيلة 
جبل طاحلو الموس من يدو و دار شاف فيها 
جبل: عنداكي تكوني فهمتي غلط راه غير بنت خالي 
نورسين: عرفتها بنت خالك الله يخليكم لبعضياتكم 
جبل: كيفاش الله يخلينا لبعضياتنا 
نورسين: زعما حيت هي بنت خالك ونتا ولد عمتها وكتجيو لبعضياتكم فهمتي شنو بغيت نقصد 
جبل:* دار كمل تعصار * فاش ما كنتش ما وقعلك والو 
نورسين:*حاطة يديها على خدها* لا ما وقعلي والو 
جبل عصر الليمون و كبو ليها فكاس و عطاه ليها 
نورسين: شكرا 
جبل: بصحتك 
نورسين: كتجيني غريبة نشوف رجل المغربي فالكوزينة
جبل: كيفاش 
نورسين: حيت الرجال د المغرب قليل اللي كتلقاهم كيعاونوا عيالاتهم او لا كيعرفوا يطيبوا كيقولك بلي المرأة هي اللي خاصها تعرف دير كلشي واش نتا عندك هواية اولا نتا تربيتي فشي بلاد غير المغرب 
جبل ضحك و شاف فيها حاس براسو فرحان و قلبو كيضرب مجرد انها كتدي و تجيب معاه فالهضرة حس بيها بحال بدات كتقرب منو و صوتها الرقيق و الجميل و كيفاش كتحرك يديها و هي كتهدر بعفوية و براءة بادية على ملاميحها اااأح كتسطيه فمثل هاد اللحظات 
جبل: لا انا تربيت فالمغرب و كيعجبني نطيب تقدري تقولي هواية فخبارك انا فاش كانت عندي عشر سنين كنت كنعرف نصاوب معظم الاكلات راسي
نورسين:* شهقات * وااااو و شكون علمك 
جبل:* بابتسامة* المربية ديالي الله يرحمها و يوسع عليها كانت ديما كاتقولي بلي راجل خاصو يعاون المراة و ما خاصوش يعتابر هادشي كينقص من رجولتو الرسول صلى الله عليه و سلم خير ناس و افضل خلق الله كان كيعاون زوجاتو فدار فشكون حنا اللي ما نعاونوش المراة اولا

نورسين:*حاطة يديها و ساهية فيه و فبحة صوتو و فكلامو الموزون و كل كلمة كيعطيها حقها * اه عندك الحق واش المربية ديالك ماتت موتة عادية ولا بشي حاجة كي و قعلها 
جبل:سرطان 
نورسين: الله يرحمها و يوسع عليها مسكينة كانت عزيزة عليك بزاف ياك 
جبل:*تنهد * كانت ماشي مربيتي و إنما ماما الي ما ولداتنيش رباتني و كبراتني و قراتني و أدباتني الله يرزقها الجنة 
نورسين: اللهم أمين 
قاطع حديثهوم صوت ياسمين الللي كانو عينيها مدمعين كانت كتصنت عليهم خصوصا فاش بدا كيهدر على ليلى 
ياسمين: صباح الخير 
شاف فيها جبل و مشا باسلها راسها 
جبل: صبا ح الخير 
قاطع صوتهم يعقوب اللي دخل عريان من الفوق غير بشورط كيفيق ما حامل يهضر مع حد بغا حتى هو يشرب مشا شرب 
جبل: يعقوب مالك أصاحبي فايق مبوق 
يعقوب: قلب عليا الله يرحم باك راني مدابز مع سلمى ما فيا اللي يمشي يحزر فيها عاود 
ياسمين: شنو دارتلك 
يعقوب: شي حاجة بيناتنا دارت واحد الخطأ متاعت اللي يمشي يخبط ليها راسها مع الحيط 
جبل:*ببرود*تقيسها نخسر معاك أيعقوب عارفك فاش كتعصب يدك سابقاك 
يعقوب:*غمزو* كنشبهلك 
جبل: لا انا ماشي بحالك كنفكر بعقلي و ما كنضرب حتى كتكون شي حاجة خطيرة بزاف اللي بصح ما نقدرش نتحملها 
دخلات عليهم الخدامة ميلودة من واحد الباب خاص بيها كاين فالكوزينة
ميلودة: صباح الخير عليكم 
ياسمين: صباح الخير 
ميلودة تشغلات بدات كتصوب ليهم الفطور و هما خرجو لصالة 
يعقوب: اووف المللل أصاحبي برب مانكره شي خريجة نسا فيها العالم 
ياسمين: وشكون حيدلك سير خرج تسارى مع سلمى و فوجوا شوية 
يعقوب: ما تجبديلش سلمى اجدة 
جبل: هي مخاصمين على شي حاجة كبيرة 
يعقوب:*كيهدر فنفسو* اودي كن تعرف علاش مخاصمين تنفيني انا و ياه فجايحة الكحلة اللي ضربني انا و ياه نيت 
نورسين: سمحلي أخويا يعقوب الا تدخلت و لكن سلمى انسانة ضريفة بزاااف و قلبها بيض و على ما كتعاودلي كتبغيك بزاااف ما تخليوش شيطان يتدخل بيناتكم 
يعقوب: اودي أختي حتى حنا ما قلناش ولكن راه عصباتني ما قدرتش كتطير من المقلة هادا الله معاها 
هبطات سلمى بواحد البينوار فالحمر ديال نعاس طويل و كيوت و جامعة شعرها كو د شوفال ووجها عيان وباينة فيها باكية مزيااان 
سلمى وقفات عليهم و حولات عينيها شافت فيعقوب الللي خنزر فيها و دور و جهوا 
سلمى: يعقووب عفاك ما تدريليش هاكا الله يرحم الوالدين مادرتهاش بالعاني 
يعقوب: كنسمع بحال شي تشاش ديال شي راديو مخشخش جاية من ديك جيه طفيوه عفاكم 
ياسمين: حرام عليك 
سلمى بدات كتبكي و تهرنن ناضت عندها نورسين عنقاتها 
نورسين: وصافي دابا يتصالح معاك راه غير حيت مقلق منك داكشي علاش كيقول هاكا 
سلمى: اهئ اهئ حشووومة عليه دابا انا وليت راديو مخشش كيعاير فيا داك وجه موكة ما تشوف فيه لا موحمة لا شادة فحبل 
يعبوب:*شد على راسو*اوا زيد معاها دابا انا وليت موكة 
سلمى: * طلقات من نورسين و شافت فيه * اهئ اهئ ياك انا غير راديو مخشش ياك أيعقوب هادي هي سلمى حبيبتي و كنحماق عليك و كناكل شرواط عليك فين مشا داك الحب و الحنان ديال نهار الول و لا قولي سبع يام د الباكور دغيا دازت 
يعقوب:*شاف فجبل اللي كان شاد على فمو و كيضحك عليهم *دابا هادي ماشي تنوض تخبط ليها راسها مع أقرب حيط 
سلمى: اوا نوض آش كتسنا 
يعقوب وقف و مشا لعندها وشاف فيها ما قدرش يتحمل دموعها و وجها الحمر اللي كي الدراري صغار و شنايفها اللي جالسة كتعض فيهم رداتهوم حومر 
يعقوب: * بابتسامة* هو غادي نخبطلك راسك ولكن ماشي مع الحيط *جرها عندو* غادي نخبطو على صدري وقلبي *باس راسها *واش انا تسخى عليا سلمى حبيبتي 
سلمى عنقاتو كتمخشش فيه و تضحك واخا مازال فيها ديك تنخصيصة د البكا 
سلمى:دابا تصالحنا ياك 
يعقوب:ههه أش بانلك أ غزالي 
سلمى ضحكات و عنقاتو بجهد وقالت 
سلمى: كنبغيك 
يعقوب : حتى انا أ الزين ديالي غير هو ما تعاوديش ديري لبسالة لبابا واخا 
سلمى:ههه واخا ما نعاودش 

جبل كان كيشوف فيهم و كيتخايل كن كان هو فبلاصةيعقوب و نورسين فبلاصة سلمى شحال كينتاضر يعيش مثل هاد اللحظات ولكن زهر الكافر اللي عندو و ضروف اللي عاشهم لاعبين على حياتو ومأثرين ليه على تفكيرو لدرجة كبييييرة معقول يكون شي حدكيبغي شي وحدة حتى لهاد درجة و ما يقدرش يقولهالها باش ما تسماش مرت القتال حقا ولا جبل كيعيا من هاد العدر و كيحس بلي يكفيه سنين العداب اللي عاشهوم بعيد عليها ولكن الا قالهالها واش ممكن تقبلو ولا غادي تبعد عليه خااايف بزاااف ينطق هاد الكلمة و ما يبقاش يشوفها حاس براسو بين نارين ما عارفش شنو يدير دكائو كلو كيجي حتى لعندها و المنطق ديالو كيوقف و اللوجيك كيحبس 
ياسمين: اوا هانتوما تصالحتوا مبروك عليكم 
يعقوب: ما كناش مدابزين غير كنت كنربيها على قلة عقلها 
سلمى: هي وليت دابا أنا حمقة 
يعقوب: لالا نتي بعقلك انا اللي غادي ترديني كنلوح فحوايجي 
قاطعهم صوت سارة اللي كان هزها عبد المالك و جالسة كتبكي وتشهق و كتحك فعينيها رداتهوم حومر 
سلمى: ويلي مالها كتبكي 
عبد المالك: لقيتها جالسة فالدروج كتبكي قالتلك توحشات ماماها و باباها 
نورسين: مسكينة مازال صغيرة ما غاديش تقدر تبعد عليهم الله يخليهم ليها 
ناض عندها جبل و خدها من عند عبد المالك هزها عندو 
جبل: بغيتي نتقلق منك اولا 
سارة حركات راسها بنفي 
جبل: صافي بغيتي تمشي عند ماماك و باباك و تخليني بوحدي ما بقيتش فيك 
سارة: لا نتا ماشي بوحدك هاهي خالتو نورسين تبقى معاك 
جبل:*بأسف* حتى هي ما بقاتش باغا تبقى معايا 
ياسمين: *شافت فنورسين* علاش فين باغا تمشي 
نورسين: اجدة ما بغيتش نثقل عليكم و الله غادي نكري شي دار و نخدم على راسي 
عبد المالك: هانتي جالسة معانا أبنتي إعتابرينا عائلتك و هادي داركم 
جبل:*شاف فجدو * هي إتاخدت قرارها و ما بقاتش باغا تبقى معانا ما نقدروش نشدوها بسيف عليها كتبقى راحتها أولى تقدر تكون ما لقاتش راحتها هنا 
قاطعهم صوت الخدامة اللي كتناديهم باش ينوضوا يفطروا 
جبل: غادي نطلع نبدل حوايجي و نجي *شاف فسارة*ونتي باركة من البكا *حط نيفو على نيفها* ولا عاد غادي ندير علاش نبكيك د بصح و بنية 
سارة: ههه *عنقاتو *كنبغييك أعمو جبل 
جبل: وانا نموت فلي يقول عمو جبل 
حطها و طلع و خلا موراه نورسين ساهية فحنيتو و كتساءل مع راسها واش بصح هاد السيد كيعجبوه الدراري الصغار حتى لهاد درجة الا كان هاكا كيتصرف مع دراري صغار فمراتو كيفاش غادي يعاملها أكيد غادي يكون إنسان رومانسي بحال أبطال روايات اللي كتقيل تقرا فيهم اكيد غادي تكون كاميليا أسعد إنسانة فالعالم وهي بين أحضان جبل ما تنكرش فهاد اللحظة حسدات كاميليا بنيس اللي مرتابطة بشخص بحل جبل هي من ديما كيعجبوها رجال الحنان ولكن ما تصوراتش جبل غادي يكون رومانسي حتى لهاد الدرجة و فنفس الوقت عندو هيبة اللي كتفرض على الجميع يحترموه بزز منهم بصح كاميليا بنيس إنسانة محظوظة حيت كاتمتلك شخص بحال جبل فجنبها و سندها اكيد غادي يكون بغاها حيت هي إنسانة مثقفة و جميلة اكيد حتى هي كون كانت زوينة بحالها و مثقفة بحالها و عندها مكانتها فالمجتمع غادي يبغيها شخص بحال جبل هادشي ما كيقولها عقلها 
سلمى:*كتمرر يديها حدا عيون نورسين*أ سبحان الله أ شريفة فين مشيتي فطري لغادي تفطري 
نورسين: أ واخا 
يعقوب: نورسين شنو هو المستوى اللي عندك فالدراسة 
نورسين:*بأسف *الباك 
يعقوب: ما كتفكريش تكملي قرايتك فدومين اللي كيعجبك 
نورسين: ظروفي ما كتسمحليش صراحة نكمل 
عبد المالك: علاش بامكانك تكملي قرايتك أ بنتي وتوصلي بإدن الله لمراتب عليا
ياسمين:نتي تبارك الله عليك باينة فيك دكية و اللي درتيها غادي تمشي فيها مخيرة حنا ثايقين فيك 
نورسين:* ابتاسمت* شكرا على تشجيعكم ليا و لكن انا خاصني دابا نخدم و نعول على راسي اما الدراسة قاصحة عليا 
جر جبل الكرسي و تقابل معاها كيشوف فيها كان لابس تيشورت غري لاصق على صحتو كيبينلو العضلات و سروال كحل مع سبرديلة فنفس اللون جاي كيووووت بزاف اما ريحة عطرو كتشميها على بعد مئات الامتار

جبل:*دار رجل على رجل و رشف من كاس د القهوة و تكلم ببرود * علاش الدراسة قاصحة عليك علاش كاتعطي لراسك أعدار بحال هاكا نتي غادي تقدري تكملي قرايتك و انا غادي نوقف معاك الدومين اللي بغيته غير قوليه ما تهزي الهم لحتى حاجة انا نورسين الي كنعرف قادرة تحقق أحلامها اللي ما قدراتش تحققهم مع واليديها ربما غادي تجيك هدرتي قاصحة و ما غاديش تعجبك ولكن انا ما كنبغيش نشوفك حاكرة راسك بزاف ديال العيالات كتلقايهم عندهم وليداتهوم و كيقراو و كيبداو من زيرو و كيدفعوا لباك و كيتقاتلو و كيقراو حتى كيوصلو هوما باش احسن منك نتي اللي مازال صغيرة و قادرة ديري شحال من حاجة و آخر مرة نشوفك كتحججي بظروف حيت هادوك كيبقاو غير أعدار خاوية كيديرهوم دماغك باش تبقاي ف le confort zone ( منطقة الراحة) دماغك ما باغيش يقرا و كيبغي يلقا السبة باش يخليك اللور ولكن نتي خاصك تحدايه و تحداي نفسك و انشاء االه غادي توصلي و نشوفوك فالبلاصة اللي كتستاحقي 
نورسين ما توقعاتش غادي تلقا هاد الدعم كامل منهم و خصوصا هدرة جبل اللي أثرات عليها و دارت فيها الحماس باش تدير شي حاجة فحياتها هدرتو كان عندها تأثير كبير عليها حقا هاد ناس ما كاينش بحالهوم صعيب تلقا اللي يشجعك و يدعمك فالوقت اللي نتا كاتكون ما كتآمنش فيه براسك نادرا ما كتلقا ناس كيآمنو بيك و بقدراتك نورسين حسات معاهم بدفئ اللي ما حساتوش مع عائلتها عينيها دمعوا و ناضت كتبكي 
سلمى: *شافت فيها *اويلي واش كتبكي من نيتك 
جبل: اوا ها اللي ما بغيناش علاش دابا كتبكي ما فهمتش واش دمعوك على سبة دغيا كينزلو *جبد كلينيكس من جيبو و مشا لحداها و بدا كيمسح ليها عينيها * 
نورسين خدات من عندو كلينيكس و بدات كتمسح عينيها 
نورسين: شكرا على دعمكم ليا صراحة نتوما لقيت فيكم الدعم و تشجيع اللي ما لقيتوش فعائلتي سمحولي انا دغيا كنتأثر و دموعي على سبة 
سلمى عنقاتها جنب 
سلمى: الله على صحيبتي الله قلبها و شحال هشيس
قاطعهم صوت جوهرة اللي عينيها حومر باينة فيها حتى هي باكية جرات الكرسي و جلسات طالعة ليها الدم 
يعقوب:*تفرشخ بالضحك منين شافها *لا واش هاد نهار اليوم العالمي للبكاء و انا ما فراسيش وا كلشي بكا بقيت غير انا وجبل و جدي 
جبل وقف و مشا رجع لبلاصتو 
جبل: جوهرة مال عينيك منفوخين 
جوهرة: ماسخيتش بيكم والله 
جبل: ما تفكري فحتى حاجة شوفي غير الهدف ديالك و نتي شنو باغية وفين كتشوفي راسك حمدي الله اللي قدرتي تحققي حلمك كاين اللي مالقاش اللي يدعموا و يساندو 
يعقوب: اوووف جبتولي الملل أشنو بانلكم نضربوا شي دويرة هاد نهار كلنا اولا نمشيو نتعشاو برا 
سارة:واسير قابل خدمتك قالك جاني الملل كن كنتي شاغل راسك بخدمتك كاااع ما يجيك الملل 
جبل:*بابتسامة* عندها الحق خاصني نمشي لشركة نشوفها راه شحال هادي ما مشيت 
يعقوب: على سلامتنا منين بغيتي تمشي تشوف شركتك 
وقف جبل و طلع يبدل حيت بطبيعة الحال غادي لشركة وخاصو لباس رسمي 
يعقوب: *كيشوف فسلمى* وجدي راسك نتي و نورسين باش فاش نجيو نمشيو نتعشاو برا*خنزر فيها* و عنداك تخرجوا بوحدكم عارفاني شنو كنقصد أسلمى 
سلمى:صافي واخا فهمنا 
يعقوب: الله يرضي عليك 
وقف يعقوب و حتى هو طلع يبدل حوايجو 
بعد مرور عدة دقائق هبط جبل و موراه يعقوب كانو لابسين كوستيم فالازرق جد أنيق جا معاهم وديك الهيبة اللي عندهم واعرة كتخلي كلشي يحنيلهم راس واخا هوما فالحقيقة قلبهوم هشيش و هبال اللي كيعرفهم عن قرب ماشي بحال ناس اللي خدامين معاهم كيعرفوا يفرقوا ما بين حياتهم العملية و الشخصية

يعقوب: الله يعاونكوم نتلاقاو فالعشية 
خرج جبل و تبعوا يعقوب طلعوا فالطوموبيل اللي كانت من نوع رانج روفر فلون الاسود ديمارا جبل و مشاو فاتجاه شركة ديالهم 
يعقوب: وشحال هادي ما مشيتي لشركة أصاحبي كتشوف نورسين كتنسا العالم كتبقى غير حاضيها 
جبل: باغا تستقر أصاحبي غير كنتفكر هاد القضية النفس ما كنبقاش قادر نطلعوا باغا تبعد عليا بهاد السهولة امبوسيبل نخليها 
يعقوب: ما فيها باس الا بغات تستقر 
جبل:*ضرب الفولون ديال الطوموبيل* واش ما كتفهمش شنو هي ما نقدرش نشوفها بعيدة عليا 
يعقوب: ما كتحسش براسك غادي تخنقها بحال هاكا بهاد التصرفات ديالك 
جبل:*ابتسامة مستهزءة* واشنو نقول انا اللي مخنوق هادي عشرين عام 
يعقوب: ولكن واخا تولي على علاقة معاها الا بغات تخدم او لا تخرج اولا تسافر واش غادي تبقا حياتك كاملة غير حاضيها فداخلة و الخارجة 
جبل: يااااا ريت نولي على علاقة معاها راه غير كنتخايلها قلبي كيبغي يخرج من بلاصتو راه واخا تشوفني هاكا عندك يصحابلك غادي نخنقها او لا راه انا اكثر واحد كيقدر و كيحترم حقوق المراة بالعكس خاصها تخرج و تخدم و تسافر و لكن بشروط اللي شاف فيها نتقب لدينمو عينيه 
يعقوب: اصلن ما كاينش اللي غادي يتجرأ عليها و انت معاها 
جبل: ما حدك عايش فدنيا كلشي كاين ولكن حاجة وحدة اللي قربلها كيسني على موتو انا مغياااار و ما كنبغيش ممتلاكاتي تقاس فيهم شعرة وحدة ونورسين هي كل ممتلكاتي واناااا اكثر واحد احمق و مسطي كنعترف بيها وهادشي كامل بفضل نورسين 

وصلو لشركة اللي استغرقوا باش يوصلولها ساعتين ديال طريق 
يعقوب:*كيحيد سمطة* عرفتي تقول سافرنا اواه أصاحبي ساعتين باش نوصلو 
جبل: واش فراسهم بلي غادي نجيو ولا لا 
يعقوب: لا 
جبل:مزيان باش نشوف شنو كيديروا 
خرج جبل و تبعوا يعقوب كانو جوج ديال البوديكارد واقفين دايرين سماعات فودنيهم ولابسين كوستيمات فالاسود و لابسين نظرات سوداء مخنزرين شافو جبل قدامهوم حناو راس دخل جبل من الباب اللي كان زجاجي و تابعوا يعقوب من موراه كلشي شافوا و تصدم ما توقعوش غادي يجي لعندهم بعد غيبة طويلة كلشي وقف و كيلقيو عليه التحية طلع فالاسانسور الخاص بيه و تابعوا يعقوب حتى هو 
يعقوب: شافوك بحال شافو ملاك الموت ههه 
جبل:*بصرامة* التقارير واجدة 
يعقوب: كلشي واجد مالك تقلبتي أصاحبي كي زمان 
جبل:*كيقاد صدايف د قاميجتو* الخدمة حاجة و الحياة الشخصية حاجة أخرى ونتمنى حتى نتا تفرق بيناتهم 
دخل جبل لبيرو ديالو اللي كان كبيييير بزااااف و الواجهة ديالو زجاجية جلس فالبيرو ديالو و هز الوراق كيدقق فيهم 
جبل:كنظن المجموعة الجديدة ديال تصاميم خاصها تكون دابا واجدة 
يعقوب: واصاحبي غير بشوية عليك سخن غير بلاصتك بعدا 
جبل:*هز عينو خنزر فيه* سولتك جاوبني 
يعقوب: واجدة أعباد الله واجدة و من دابا شهر غادي نبداو نشهروها و غادي نظموا الملتقى الصحافي 
جبل: *رجع راسو اللور*ادن غادي نضطر نطلع لاسبانيا 
يعقوب: ضروري خاصنا نطلعوا 
جبل: *كيحك لحيتو* حتى نورسين غادي نديها معايا خاصك تبدا توجدلها الوراق ديالها 
يعقوب:*بابتسامة* ياك نتا اللي قلتي الحياة الشخصية حاجة والحياة العملية حاجة أخرى أ ولا 
جبل: * قاد الجلسة ديالو و شاف فيه بنظرة تحدي* انا كنجي لنورسين و كيحبس المنطق ديالي و العقل دونك نورسين هي جبل و جبل هو نورسين ما بيناتنا حتى فرق كنفكر فيها فكل بلاصة و فكل زمان و فكل مكان فما تبقاش تحاول تخلط الامور ولا نجي نخلطلك عظامك 
يعقوب: احم ام صوري ما نعاودش نهضر 
جبل: بقا ترد البال لشنو كتقول و صافي ما قلنالكش ما تهدرش و سير شوف خدمتك وبقا مقابلني انا و نورسين 
يعقوب: هاد نهار غادي نخرجوا نتعشاو مجموعين وجد راسك 
جبل: واخا يكون خير 
يعقوب لمح واحد الاطار فوق البيرو طل عليه و لقا صورة د نورسين فاش كانت صغيرة 
يعقوب: لا نتا والله حتى بزاف حاط تصويرتها حتى هنا 
جبل: يعقوووب ق***من حدايا 
يعقوب: وبرد أصاحبي ونتا على سبة

عند نورسين 
سلمى: هاد نهار غادي نخرجوا نتعشاو برا خاصنا نلبسوا شي حاجة كلاس أ زمرة 
نورسين: انا كن غير خليتوني نعس والله ما فيا اللي يمشي 
سلمى: واش نتي ديما خاصنا نعرضوك و نحزروك باش عاد توافقي تخرجي دوزي تخرجي الا غادي تخرجي 
نورسين: حاسة بكرشي كضرني كنظن الحريق ديال ليريكل المسخوطة 
سلمى: وعندك أولويز أ المصيبة و لا لا 
نورسين:فاش لاحني با لزنقة دخلت هزيتو و خرجت واش كتفلاي عليا
سلمى: راه غادي يكون غير البرد قالا ليريكل 
نورسين: اجي ونتي علاش كنتي مدابزة مع يعقوب 
سلمى:*عوجات فمها 🙄🙄* شي حاجة خاصة أختي 
نورسين: ولكن يعقوب حنين بزاف عجبني قبيلة كيفاش عاملك 
سلمى:امم عنداك تشوفيه هاكاك راه غير العكر على الخنونة اختي غير كيبانليك حتى هو فاش كاينوض أتسونامي ولا هو اتولي طلبي سلة بلا عنب 
نورسين: ولكن شخصيتو زوينة والله حنين وفنفس الوقت ضحوكي و ناشط مع راسو 
سلمى:*صغرات فيها عينيها* ياكما بانلك فيعقوب أختي شفتك دوري دوري و تجبديهلي راه قالك صحابات ما فيهم ثقة 
نورسين: حشومة عليك تقولي هاد الهدرة الله يخليكم لبعضياتكم 
سلمى: والله يسهل عليك بشي ولد ناس 
نورسين:*ابتاسمات باستهزاء * ما نكدبش عليك من بعد داكشي اللي عشت كرهت الرجال و ما يجي منهم 
دابا كنفكر غير نخدم و نستقر ونعول على راسي 
سلمى: ياك كنتي باغا تزوجي من قبل 
نورسين:هانتي قلتيها كنت باغا نتزوج و ماشي حيت كنت باغا نتزوج حيت كنت باغا نتهنا من هدرة ختي اللي كتقيل تعايرني ومن هدرة عائلتي اللي ديمانفس الهدرة كيقولو امتى غادي تلقاي شي بوركابي يسترك و يهنينا منك واخا كيقولو غير كنضحكوا كنحس بهدرتهم حقيقة و كنت باغا نتزوج حيت كنت كحس بواليديا بحال مثقلة عليهم *ابتسامة مستهزءة* كنت كاناكل ليهم الخبز ولكن دابا صافي اصلن لاحوني و هادشي كلو تهنيت منو * تنهدات*و قبيلة الهدرة اللي قلتو صراحة شجعتوني ندير شي حاجة فحياتي و نعول على راسي و نعيش حياتي و نسافر و نشوف العالم اما الراجل ما بقاش من اهتماماتي 
سلمى:*بتأسف* وشنو ناوية ديري 
نورسين: عوالة نكري شي دار و نكمل خدمتي فالمكتبة و من بعد كنفكرندير شي مدرسة ديال تصميم الازياء او لا المايكاب 
سلمى: امم مزيان الله يوفقك 
نورسين: امين 
قاطعهوم صوت جوهرة اللي حلات الباب 
جوهرة: سلمى نورسين واخا تخرجوا معايا نشري شي حوايج حيت خاصني نبدا نوجد لسفر 
نورسين:انا غير عفيوني والله كضرني كرشي مانقدرش غادي نتكا نعس على ما ترجعوا 
سلمى: واخا هانا غادي نجي معاك تسناي نبدل حوايجي و نهدر مع يعقوب 
خرجات سلمى و دخلات لبيتها و عيطات ليعقوب 
يعقوب: الو وي 
سلمى: حبيبي خاصني نخرج مع جوهرة بغات تشري شي حاجة 
يعقوب: غادي تمشي معاكم حتى نورسين 
سلمى: لا غير انا و جوهرة 
يعقوب: بقاي تردي البال أ سلمى راكي شفتي آخر مرة شنو وقع لنورسين من زهر التصاور تصيفطولي انا حيت هو التيليفون ديالو خاسر دابا تصوري كن شافهوم كيفاش غادي يتصرف و راكي عارفة جبل كيخاف على نورسين أكثر من راسو راه هاداك هبيل انا اللي عارفو حمدي الله اللي ماساقش الخبار بلي نورسين تكريسات 
سلمى: وصافي واش دابا كل مرة غادي تفكرني راه ما كانش كيصحابلي غادي يوقعلها هاكاك 
يعقوب: انا غير فكرتك المهم قولي لشيفور يوصلكوم 
سلمى: صافي واخا أحبيبي الله يعاونك 
بعد مرور ثمان ساعات 
رجعات سلمى مع جوهرة من المول بعدما خداو بزاف د الحوايج لجوهرة و حتى سلمى خدات واحد الكسوة واعرة فالكحل و البيض باش تلبسها فاش يخرجوا حد الركبة طلعات سلمى عند نورسين لقاتها ضرباها بشخرة 
سلمى بدات تضرب فخادها ومشات كتحل سراجم و كتهدر 
سلمى: اويلي وحدي على هاد البنت غادي تخرجلي العقل نورسيييين نوووورسين فيقي أ زمرة 
ناضت نورسين طافجة و دايخة بنعاس 
نورسين:*كدوز يديها على وجها و كتفوه*شنو واقع 
سلمى:ما واقع واااالو أ ختي غير رجعي نعسي *رفعات صوتها* اوييييلي على غداااايدي نووووضي تقعدي تلبسي تقادي حالتك غادي نخرجوا نتعشاو ليلة ما بقا والو و يوصل جبل و يعقوب باش نخرجوا 
نورسين: واخا هانا نايضة 
سلمى: راني جبات ليك الفوط الصحية الا كانت فيك ليريكل ديريهم إحتياط بعدا واش مزال كضرك 
نورسين:كيزورني وجع خفيف و كيمشي 
سلمى: شنو غادي تلبسي 
نورسين:غادي نلبس غير الكيطمة باش نبقا مرتاحة 
سلمى: وادابا لبسي اللي بغيتي غير نوضي فكينا 
ناضت نورسين قضات حاجتها و غسلات وجهها و لبسات واحد الكيطمة واعرة فلون الرمادي مكتوبة فيها 34 فالوسط مع سبرديلة فالابيض و جمعات شعرها كو د شوفال و جلسات 
سلمى : درتي الفوطة الصحية احتياط 
نورسين: درنها شي حاجة أخرى 
سلمى: علاش داك الفم عندك مشقق اجي نديرلك واحد العكار فالغوز يجي معاك 
نورسين: اوكي 
ناضت عندها و دارتلها عكار فلون الوردي لشنايفها جاها كيوت بزاف 
سلمى: مشاء الله عليك غير كنديرلك حاجة خفيفة كاتجي مع وجهك 
نورسين:*عوجات فمها 🙄🙄🙄*جمال رباني أختشي

سلمى: وايلاه نهبطوا لتحت باش نتسناوهم 
نورسين:*كتطلع فيها و تهبط* هاي هاي على ناس و الكساوي و داكشي هاي جيتي كلاس و زوينة تبارك الله عليك و خلاص 
سلمى: اكيد اختي خاصني نبان زوينة باش سيهم يعقوب يشوف فيا غير انا بوحدي 
نورسين خرجات من البيت كضحك و تبعتها سلمى و هبطوا لسفلي لقاو ياسمين و عبد المالك جالسين كيتفرجوا التافتوا لعندهم و ضحكوا معاهم 
ياسمين: جيتو مزيونين الله يحفظكم من العين 
نورسين: شكرا أجدة لهلا يخطيك 
سلمى: فين واحد سارة ما بنتليش 
عبد المالك: راها ناعسة بانتلي توحشات ماماها بزاف 
سلمى: اوا هادو هما البراهش دغيا كيتوحشوا ماواتهوم 
عبد المالك: الله يخليها ليكم 
صونا تيليفون دسلمى و هزاتو جاوبات 
سلمى: وي يعقوب وصلتو كتسناونا برا اوكي هاحنا جايين 
خرجات سلمى و نورسين لبرا لقاو يعقوب متكي على واحد الرانج فالاسود و حداه جبل واقف كيكمي حدا واحد الفيراري و هاز واحد التيليفون فلون الاسود فيدو سمعوهوم خرجوا هزوا راسهم شافو فيهم 
يعقوب:*كيطلع فسلمى و يهبط وصفر* هانا ثاني على زين ديالي انا اللي خطبت و عرفت اش خطبت 
تقدمات عندو سلمى كتبتسم و كتلعب فشعرها بدلع وكتشوف فيه نضرات جميلة مع بريق فعينيها 
اما واحد نورسين فبقات واقفة كتحول نضرها يمين و شمال ما عرفات شنو دير حشمات منهم 
جبل رجع تيليفون لجيبو و تقدم عندها 
جبل: نورسين 
نورسين هزات راسها شافت فيه و يا ريتها ما شافت فيه واو اش هاد الجمال واش هاد الاناقة عجباتو بزاااف ما كرهش يخبيها فقلبو ما يشوفها حد واش بصح هادي نورسين حبيبة قلبو و لا وحدة أخرى رغم انها كانت عادية شافها هو اروع و اجمل مخلوق على وجه الارض واش حتى لهاد الدرجة كيعشقها و متيم بيها خاف عليها من عينو و بدا كيقرا المعودتين باش ما يقيسهاش بالعين خايف عليها من نفسو واش كاين شي إنسان فهاد الوقت كيعشق شي إنسانة حتى لهاد الدرجة راه بزاف على العشق و الغرام 
نورسين هزات راسها شافت فيه و ابتاسمات والقت التحية عليه بكل إحترام 
جبل: * مد ليها يدو بكل جنتلمانية فالفضاء و حنا ليها راسو و قال* تفضلي 
حنات نورسين راسها و تقدمات واخا حشمانة بزاااف من تعامولو معاها حشمات تطلع معاه بوحدها حيت كيبقى شخص ما كتربطوا معاها حتى علاقة ما كرهتش طلع مع يعقوب و سلمى و لكن حتى هوما خاصهوم ياخدوا راحتهم 
جبل تقدم بسرعة و فتح ليها الباب حنات راسها وإحمر وجهها خجلا 
نورسين: شكرا كنعدبك معايا 
طلعات لطوموبيل و جبل مرفوع ما كيسمعهاش كيفكر كيفاش غادي يقدر يحميها من عيون البشر الخبيثة اللي تقدر تشوف فيها شي نضرة ماشي هي هاديك مجرد تفكير فهاد الامر كيخليه منزفز و معصب غير هو و راسو واش يقدر يشوف فيها شي حد و تعجبوا واش يقدر يشوف فيها شي حد و يتمناها معاه اكيد غادي يبغيوها رجال حيت اصبحت أكثر جمالا من قبل كان غادي يلغي هاد العشا من أساسو و لكن نعل شيطان فآخر لحظة و طلع لسيارة اللي كانت من نوع فيراري فالاسود و كسيرا بسرعة و نورسين غير كتشوف فسيارة اللي ما عمرها شافت بحالها جاتها فشكل غريبة عجيبة ولكن سرعة اللي غادي بيها جبل خلاتها تغمض عينيها و جمعات يديها هي من طبعها كتخاف من سرعة بزااف و ما قدراتش تقولو نقص كمداتها لقلبها و سكتات 
جبل حول عينو و شاف فيها عرفها مخلوعة من السرعة اللي غادي بيها حاول يقلل منها باش ترتاح محبوبتو نورسين 
عند يعقوب و سلمى 
كيمرر يدو على شعر سلمى بكل حب 
سلمى: عجبتك أحبيبي شفتك كاع ما حيدتي عليا عويناتك 
يعقوب: الله يا ودي اكيد عجبتيني *كان مهبط يدو على طولة شعرها شوية و هو يلوي ليها شعرها بيدو بسرعة حتى تأوهات بألم * 
سلمى: يعقوووب أش كدير طلق 
يعقوب: توتو حشومة تقولي هاد الهدرة * عينيه ولاو حومر *أش هاد اللباس خرجي نتي عريانة احسن شفت بحال رخيتلك صمطة خاصني نزير 
سلمى:*قابطة فشعرها* وطلق و نتفاهموا 
يعقوب:*بالغوات* علااااايش غاااااادي نتفاهمو على العرا اللي وليييتي تجيييينيي بيه لواااالديك فرحااااانة بلحمك ولا كيفااااااش ياااااكما بغييييتييينييي نزوقو ليك 
سلمى: *بدات كتبكي* واراه البنات كلهم كيلبسوا بحال هاكا حشومة عليك 
يعقوب طلق منها وبدا يمرر يدو على شعرو 
يعقوب: نتيييي ماشييييي هييييي البناااااات نتتييييي سلمى حبيييييبتي اللللي ما نخلييييي حتى واحد يشووووف فيهاااااا نظرة مااااااشي هي هاديك حييييت كنغييييير علييييك واسييييري زييييدي عليك شي حاجة و لا نخسر انا وياك أ سلمى 
دخلات سلمى بتدمر ما عجبهاش الحال و وزادت عليها واحد الفورور من الفوق جاي انيق و كلاس و خرجات و طلعات معاه لطوموبيل مدورة راسها منو ما عجبهاش الحال

عند جبل و نورسين 
جبل: صافا دابا سمحيلي زدت فسرعة 
نورسين عاد رجعات فيها روح 
نورسين: عادي دابا مزيان ونتا لابس عليك 
جبل: *كيحل صدايف ديال القاميجة ديالو من الفوق* كنحس براسي مخنوق و قلبي كيضرني 
نورسين:*بخوف و قلق باديين على وجهها*واش ما شفتيش طبيب 
جبل:*بابتسامة مزيفة* ما كاينش العلاج لمرضي حيت هادشي كامل بسباب واحد البنت 
نورسين حسات بنغزة فقلبها و صرطات ريقها و خجلات شوية و دورات و جهها لسرجم بحال ما سمعاتش هدرتو 
جبل: كنبغي واحد البنت من عشرين عام هادي 
نورسين تشوكات فهاد اللحظة و دورات وجهها وشافت فيه 
نورسين: مافهمتش كيفاش عشرين عام 
جبل: منين كانت عندي عشر سنين 
نورسين:*شهقات و حطات يديها على فمها ماعرفات باش تجاوبو*وفين هي وواش هي ما عرفاش بهادشي 
جبل: لا و ماباغيش نقولها خفتها تبعد عليا قوليلي شي حل و عندي شي ضروف ما نعيني نقولها عيييت عيييت بالله 
نورسين:* فنفسها : الله يجيب اللي يبغينا غير نهار بقا غير عشرين عام أميمتي وحدي اكيد غادي تكون كاميليا بنت خالو * ما عرفتش انا براسي صدمتيني الله يحقق ليك ما كتمنا 
جبل: * تنهد بألم* أميييين 
وقف الطوموبيل حتى تحكو روايضها حدا واحد المطعم رااااقي بإمتياز واقفين حداه جوج د الحراس و جاي خارج على المدينة و الاضواء و الديكور ديالو فلون الاحمر كيوحي على أنه مكان العشااااق بامتياز 
نزل جبل و حلها الطوموبيل ونزلات و راسها كيفصل و يخيط هل يعقل انسان يبغي شي وحدة منين كانت عندو عشر سنين ياكما غير كيتفلا عليها بقات ساهية كتشوف فالفراغ حتى ضربها لنيفها بحركة سريعة و تبسم بابتسامة مزيفة كتوحي على انه هاز قفلبو هم كبييير و كبييير بزاف 
جبل: بانلي ما عندكش مع الضحك 
نورسين: كيفاش؟
جبل: دغيا الواحد يضحك عليك 
نورسين: يعني غير كنتي كضحك داكشي اللي قلتي غير كدوب 
جبل: * ابتسامة استهزاء* اكيد غير ضحك 
نورسين ابتاسمات و شافت فيه 
نورسين: صراحة ممثل رائع هههه و الله حتى تيقتك كنتي كدوي بحال حقيقة 
جبل: * ابتسامة منكسرة* ممثل خاصني ناخد الاسكار ياك لدرجة انني نقدر نقول الحقيقة و نحولها لضحك ونضحك و نحولها لحقيقة * تنهد*شكون قال بلي الضحك ضحك و الحقيقة حقيقة شحال من ضحك حقيقة و شحال من حقيقة ضحك كاين اللي قال الحقيقة وخسر ناسو و نعاسو و شحال من واحد بالضحك فك راسو اولا 
نورسين دوخاها بهدرتو بقات غير كتشوف فيه ما عرفات باش تجاوبو حاولات تبدل الموضوع 
نورسين: سلمىو يعقوب ما بانوليش 
جبل: راه هوما جايين 
وقفات الطوموبيل ديال يعقوب و نزلات منها سلمى منفوخة على يعقوب و نزل حتى يعقوب داير فيها مقلق منها 
سلمى: جبل نورسين علاش ما دخلتوش 
نورسين:كنا كنتسناوكم 
دخلو لريسطورون اللي كان كبير بزاااف و باينة ناس اللي تماك من طبقة الراقية جدا البنات كلهم حولو نظرهم كيشوفوا فجبل و يعقوب و كيتغامزو عليهم قشعاتهم سلمى و مشات قبطات فيد يعقوب و كتبتاسم ليه ابتسامة صفرا و كتخنزر فدوك البنات زعما هادا ديالي بوحدي

يعقوب: مالك لصقتي فيا كي الغرادة 
سلمى: حاضية رزقي ما شفتيش هادوك خياتنا بغاو ياكلوك بعينيهم 
يعقوب:*ضربها لنيفها*رزقك محضي أحبي غير ما تبقايش تقلقيه منك 
سلمى :*ابتاسمت ليه بحب* تصالحنا 
يعقوب:*عنقها جنب* ماعمري ما تقلقت منك أ حبيبتي غير مجرد لحظة غضب و صافي عارفك باغا تلبسي و تقادي و لكن ماشي لكلشي غير ليا بوحدي فهمتي خاصك ديري فبالك انك ما بقيتيش بوحدك سيليباطير راكي مرتابطة *هز يديها باسها* بيعقوب أ الحب 
سلمى حركاتلو راسها بالايجاب و ابتاسمات ليه 
سلمى:ما نعاودش ندير الحاجة اللي تقلقك كنواعدك 
يعقوب: الله يرضي على بنتي 
سلمى هزات يديه باستها 
سلمى: كنبغيك 
يعقوب: وانا أكثر 
وراهم النادل البلاصة اللي محجوز ليهم و جر جبل لنورسين الكرسي باش تجلس و جلسات و جلس هو اونفاص ليها و جلسات حداها سلمى و يعقوب اونفاص ليها تطلقات موسيقى هادئة و زوينة 
يعقوب: شنو تبغيو تاكلو 
سلمى:اللي بغيتي نتا 
جبل: نورسين نختارلك بدوقي 
هزات راسها شافت فيه بخجل و ردات شعرها من مور ودنيها و قالت 
نورسين: واخا 
اختارو الاطباق اللي غادي ياكلو و جابهوم ليهم النادل نورسين حسات بشي حريق فكرشها و شدات فيها 
جبل: نورسين حاسة براسك مزيان 
نورسين: مزيان غادي نمشي للحمام و نجي 
جبل:سلمى سيري معاها 
نورسين: لا غير خليك غادي نمشي و نجي 
انصرفات نورسين للحمام و جبل متبعها بعينيه حتى مشات 
جبل:سلمى حالتها ما عجباتنيش ياكما مريضة و لا عندها شي حاجة 
سلمى: قربات تجيها ليريكل كضرها كرشها بزاف 
جبل:*ضرب على طبلة*وعلاش ما قلتيليش نجيبلها دوا 
سلمى: راني شريتولها قبيلة 
جبل: كضرها بزااف هي 
سلمى: اه مسكينة كتحرقها بزاف فكرشها 
وقف عليهم واحد الشاب ثلاثيني داتو كلها وشامات و لكن وسيم و عندو عضلات فولادية طويل و صحيح و زعيعر و عويناتو زورق اللي شافو يقول ماشي مغربي -سمحولي على الازعاج 
جبل هز عينو فيه و طلع حاجب و نزل لاخور 
يعقوب: نعام اخويا تفضل 
- واخا نجلس نهدر معاكوم 
يعقوب: تفضل 
جلس داك شاب فبلاصة نورسين وقال 
-البنت اللي كانت معاكم عجباتني و بغيتها على سنة الله و رسوله الا قبلتو عليا باغي نستقر و صراحة الشكل ديالها عجبني بزاف و حتى أخلاقها طيبة عل ما بانلي منين جات ما هزاتش راسها على الارض الا كنتو نتوما خوتها بغيت نطلبها منكم 
جبل تشوكا و تصدم حس بحال شي خنجر مسموووم كيتحشا فصدرو شوية بشوية مع كل كلمة كينطقها العرق بدا كينزل منو بغزارة و عينووو حمارو بزااف و العروق ديال يدو تنفخو يعقوب و سلمى تصدموا بقاو غير كيشوفو عرفوا قفرها مع جبل 
وقف جبل و حيد الفيستة ديال الكوستيم و دارها من مور الكرسي و بدا كيطلع الكمام دالقميجة شوية بشوية و قال بصوت مخييييف و كيهضر وهو عاض على سنانو و تخنزيرة طيح فيك النص 
جبل: وقف بغيت نهدر معاك 
وقف الشاب اللي كان كيضاهي جبل فالطولة و الوسامة البنات اللي تما علاين يسخفو 
- شفتكوم كاع ما جاوبتوني 
جبل: مال صبرك قليل هانا غادي نجاوبك دابا 
جبل هز يدو و عطاه لكمة قوية لفمو حتى دار بغا يردهالو و هو يلويلو يدو من مور ضهرو و عكلو و طيحو لارض و نزل عليه بالبوني وحدة مورا لاخرى 
كلشي تجوق عليهم و يعقوب كيفكوا منو و جبل والو ما بغاش يطلق منو خمجلو و جهوا مزيان بقات دماياتو فالارض و جا السيكيريطي باش يفكو واااالو حتى واحد ما قدر يقرب لو خافو يزديهم معاه 
حتى داك الشاب غفلو و عطا لجبل لكمة لفمو و هو يزيد يجعر جبل و نزل عليه بالبوني 
يعقوب: جببببل غادييي تقتلو نوض أ صاحبي 
يعقوب بستة و ستين كشيفة باش نوضو من عليه 
جبل كيرد شعرو للور كيعنكشو يدو ولات كلها دمايات و كيهدر بالغوات 
جبل: ماااااااااا لقيييييتي شكوووووون ماااااا لقييييتي شكون تزوووووج ياااااااااا ولد ق*** دووووووي يا الز*** باااااغي تستقر هاناااا غادي نورييي لدينمك الاستقرار كيييفاش دااااير 
طلق جبل من يعقوب و مشا بغا يكمل عليه و هو يشدو يعقوب 
يعقوب: صااااافي أ صااااحبي غاااادي تقتلوو شو كي رديتيه نعل شيطان و نوض نمشيو بحالنا 
جبل: لاااااااا قااااااالك باااااغي يتزوج بيهاااااا واااااش ماااااا بانتلووووو غيررررر نووووورسين واااااش أ عباااااااد الللله اناااااا ما غنرتااااااحش ديييييما خاااااارجلي شيييي حد فعودي وااااابزاااااف هاااااادااا اللله وانااااعييييت *ضرب داك الكرسي برجلو حتى تفرشخ* وااااااش خااااصني نخبييييها فقفص باااااش ما يشووووفها حد هاااااداااا اللله ايمتااااا نرتاااااح حتى أنااااا بحال ناس امتى أخوياااااااا غير قولي امتاااا 
ناض داك شاب من الارض كيمسح حدا فمو اللي كان عامر بالدم و قرب لو و قال 
- عقل مزييييان على da Costa (دا كوسطا) مزال غادي تلاقينا ليام

مشا و خلا جبل كيتفقص عليه و كلشي مشا بحالو جلس جبل على الكرسي كينهج و كيشوف فنقطة وحدة و ساهي حتى قاطعهوم صوت نورسين اللي وقفات عليهم كلها عرقانة وكرشها كتقطع بالحريق و كتحس بدوخة بالهزة باش كيهز راسو جبل باش يشوف فيها طاحت نورسين على وقفتها ناض جبل بسرعة هزها من الارض كيضرب ليها على وجهها و عينو تغرغروا بدموع 
جبل: نووووورسين نوووورسين 
وقفات سلمى مسكينة حتى هي كانت كتبكي من المصارعة اللي وقعات قدامها وعاود تاني تصدمات فاش شافت نورسين طايحة 
جبل هزها خرجها لطوموبيل و حطها و طلع بسرعة لمكان القيادة ديمارا جبل و زاد كيحول عينو لطريق و ليها حتى سمعها بدات كتنين و كتستعيد الوعي ديالها عاد رجعات فيه الروح و العرق كيتصبب منها شدلها فيديها و كيبوس فيها و خاااايف عليها بزااااف حاس بقلبو كيرجف ما بين ضلوعو و داتو كترعد أكثر منها
تيليفونو كيصوني ما تسوقش ليه مرفوع كيفكر غير فنورسين الا وقعتلها شي حاجة يقدر يتبعها كيخاااف عليها بزاااف ما يقدرش يشوفها كتعدب بحال هاكا 
جبل: غير صبري أملاكي قربنا نوصلو 
حبس جبل الطوموبيل حدا واحد العمارة و خرج و هزها فيدو و سدالطوموبيل وطلع فالاسانسور و حل الباب بصعوبة ديال واحد الابارطمون و دخلها ليها و حطها من فوق ناموسية و شعل الضو الابارطمون كانت كبيرة بزاااف و كيغلب عليها اللون الرمادي و الاسود كانت جد رااااقية حط جبل واحد الكرسي حداها و قرب ليها و شدلها فيديها و بقا كيتأمل فيها قرب يديداتها لحدا شنايفو و طبع قبلة عليهم و بقا هاكاك لمدة عدة دقائق كان مغمض عينيه و نورسين غير كتنين و مغمضة عينيها ليريكل ديما كتديرلها بحال هاكا بقوة الالم كتسخف ما كتقدرش تحمل تيليفون ديال جبل كان كيصوني زعجوا بزاااف ما كرهش يهرسوا كيخسر عليه مثل هاد اللحظات مع ملاكو الطاهر هز التيليفون بغضب و دوز الخط 
يعقوب: جبل فين ديتي البنت أصاحبي 
جبل: ماسوق حتى واحد *طفا التيليفون و لاحو من فوق الناموسية* 
يعقوب: ألووووو جبل ألوووو 
سلمى: اويلي فين دا البنت 
يعقوب:انا عييت مع داك السيد حق الله الا بدا كيحماق خاصو يتعالج
عند جبل 
هز يد نورسين و حطها على خدو 
جبل:ملاكي فيقي بغيت نهدر معاك أحبيبتي ما كيجيش معاك المرض فيقي وريني عويناتك زوينين خايف يديوك مني شفتي داك الز***بغا يخطبك حدا عيني الا خداك شي حد مني غادي نقتلو والله حتى نقتلو *دمعوا عويناتو*علاش انا ما من حقيش نفرح علاش انا خاصني ديما نعاني فحياتي أحبيبتي علاش *باس كف يديها* نتي هي أجمل حاجة وقعاتلي فحياتي و الا مشيتي نموت من موراك و الله حتى نموت ما كاينش اللي غادي يبغيك قدي و الله ما كاين برررب العالي ما كاين عشرين عام و انا كنتعدب نتي سبابي نتي اللي عطيتي لداك الطفل الصغير الامل عقلتي فاش قلتيلي انا ماماك ههه عاقل بضبط على كل كلمة قلتيهالي *دموع هابطين من عينو* نتي اللي خليتيني نتعلق بيك لهاد الدرجة يا ريت كن كانت عندي شجاعة نقولهادشي حدا عينيك يا ريت و لكن أنا جبان كنعتارف بيها ولكن حتى انتي عدريني و فهميني ماشي لخاطري خايف نخسرك و الا خسرتك نموت *مرر يدو على خدها وقال* ماذا فعلت أنا كي أرزق بملاك جميل مثلك أنت يا حبيبتي *تنهد وغطس و جهو ما بين يديها سمعها كتنين ضرو قلبو على حالتها و ناض شعل التيليفون عيط لسلمى* 
سلمى: هاهو كيعيط أيعقوب 
يعقوب: اوا جاوبيه دغيا 
دوزات سلمى الخط و دارت مكبر الصوت 
سلمى: الو خويا جبل فين ديتي نورسين 
جبل: واش خايفين على نورسين مني واش بنتلكم حمق 
يعقوب: انا بالله الا وليتي كتخلعني غير قولي فين ديتي البنت 
جبل: هاهي معايا انا معيط لسلمى باش نهدر معاها نتا أش دخلك
يعقوب:*بغضب* اوا هاهي اخويا منك ليها 
سلمى: نعام أخويا 
جبل: نتوما البنات كاتعرفوا شنو كاديرو باش كيهمد عليكم الحريق و نورسين دابا كتوجع عطيني شي حل 
سلمى: شريلها دوا 
جبل: اوو برافو عليك ما كنتش عارف وااااش انااااا حرت نشريييلها دوا ولكن داكشي كيدير العقم من بعد 
سلمى: ديرلها الما سخون على كرشها هو اللي غادي يهمد ليها الحريق 
جبل قطع عليها و لاح التيليفون و ناض لكوزينة بتثاقل سخن الما و حطولها فواحد اللعيبة و دخل لعندها لبيت ومشا جاب ملاية و غطاها بيها ووقف كيشوف فيها حيد صباطو و دخل تحشا حداها و عنقها عندو وحطها ديك لعيبة فيها الما سخون و حطاهالها على كرشها و بدا كيقرا عليها دعاء الشفاء 
جبل : اللهم يا من تعيد للمريض صحته و يامن تستجيب دعاء البائس الضعيف أسألك ان تشفي نورسين و ان تلطف بجسدها الضعيف و اكتب لها الشفاء يا أكرم الاكرمين * باسلها راسها و ضمها عندو بقوة * ما عمري غادي نتخلا عليك أحبيبتي واخا يبقى فيا غير عرق واحد انا ديما معاك واخا نتي بغيتي تبعدي عليا دغيا سخيتي بيا ولكن ماشي مشكل غادي نردك عندي حيت انا ونتي بحال الروح و الجسد صعيب تفرقهم على بعضياتهم 

🌞🌞🌞 أصبح يوم جديد تسللت أشعة الشمس الدهبيةالى نوافد غرفة نورسين 
فاقت نورسين على شي صوت كيخرشش حداها بدات كتحل عينيها شوي بشوي و كتحكهم استعدادا للاستيقاظ 
نورسين:*كتفوه و جلسات من فوق الناموسية* فين أنا 
سمعات شي تقرقيب و ناضت لبسات واحد البانطوفة كانت حداها و ماحدها كتقرب ما حدها كتسمع تخرشيش حداها حتى قربات لكوزينة و كلها كترعد مخلوعة 
نورسين: شكون هنا 
ما كيجاوبها حتى واحد حتى دخلات للكوزينة و هي تلقا شي واحد عاطيها بضهر و لابس كلشي كحل هي جمد ليها الما فركابي فشلات و طاحت لارض 
نورسين: شكون نتا 
دار عندها داك الشخص اللي كان لابس سلهام أسود و ماسك كيخلع شدات على قلبها و بدات كتشهد 
نورسين: التسليم لرجال البلاد *كتهدر بصوت متقطع و بدات تقرا القرآن و الدموع كينزلو من عينيها شلال ما عرفاتش شكون اللي جابها لهنا و من الفوق شي واحد معاها فدار بلباس كيخلع شكون ما نعرف* 
قرب عندها داك الشخصو حنا حداها وهي حاطة يديها على و دنيها و كترعد و مغمضة عويناتها 
نورسين: بعد مني 
- *بصوت غليظ*خرجيلي من داري 
نورسين: *بصوت متقطع*والله ما عرفت شكون اللي جابني لهنا انا براسي ما عرفتكش عفااااك بعد مني خليني نمشي بحالي*بغات توقف و فشلات ليها رجليها بالخلعة و عاودت جلسات* 
-علاش باغا تنوضي انا قلتلك نوضي 
نورسين: لا سمحلي 
تحيد الماسك و هي تبان سلمى اللي كانت ميتة عليها بالضحك طاحت لارض حداها 
سلمى: ههههههههه واشحال خوااافة 
نورسين بقات غير مصدومةكتشوف ما عرفات راسها باش تبلات 
نورسين:سلمى
سلمى:ههه هي هادي سلمى بشحمها و لحمها و سلهامها و الماسك ديالها 
نورسين ضربات سلمى لكتفها بقوة و ناضت 
نورسين:*شادة على قلبها و كتهدر* حرام عليك طيرتيها مني خلعة 
سلمى: تكبري و تنساي ههه 
نورسين: *ضرباتها لضهرها* عارفاني كنخاف غير انا و راسي و الله حتى كنتي غادي تسكتيلي القلب 
سلمى: وا غير بغينا نضحكوا معاك شوية 
نورسين:*كتشوف فدار*فين حنا 
سلمى: فالمريخ راحنا جالسين فدار أ زمر 
نورسين:*شدات على راسها* زعما كيفاش جينا لهنا و ما عاقلة على والو ياك البارح مشينا نتعشاو فواحد المطعم *سكتت لثواني و شهقات* و سخفت و من موراها ما عقلت على والو 
سلمى: ما عمري ماشفت شي حد كتسخفوا ليريكل حتى و صلت ليك نتي يا مزغوبة ليام 
نورسين: ماشي هي اللي كتسخفني راه غير بقوة الحريق ما كنقدرش نتحمل من شحال هادي كنت كنغيب باليوماين ديما كانت ماما كتهزني لسبيطار كتضربلي شوكة عاد كنحل عيني دابا راه شوية كانو كلهم كيعرفوا بلي فيا ليريكل بنت الحرام كديرلي شوهة 
سلمى: الله يشافيك 
نورسين: *جلسات*فهميني اختي شنو و قع 
سلمى: *كضحك*اوا يا لالا مرات سيدي البارح كنا جالسين كنتعشاو مابينا ما علينا حتى وقف علينا واحد التيتيز قالك من نورسين نخلاق قلنالو نعل شيطان و سير بحالك قالك لا والو بغيت نتزوج بيها اوا شدو جبل عطاه قتلة د العصا عاد مشا بحالاتو 
نورسين: اوا الله يمسخك هضري و قوليلي شنو وقع باركة من طنيز 
سلمى: اوا يا لالا نعاودهالك بحال الخرافة كنا جالسين حتى وقفتي علينا و نتي طيحي لارض نضنا هزيناك و جبناك لهاد الابارطمون اللي كانت قريبةمن المطعم حيت كراهالك جبل ديجا 
وقفات نورسين و طرطقات فيها عينيها 
نورسين: حلفي بالله الا هادي داري 
سلمى: وي شفتي على صدفة 
نورسين:دابا واش كتفلاي ولا كتهضري من نيتك 
سلمى: والله حتى بصح 
نورسين: يعني انا مابقيتش غادي نسكن مع دار د جبل 
سلمى:*عوجات فمها* علاه شنو دارولك مساكن اللي سمعك يقول كانو كيعطيوك العصا ليل و نهار 
نورسين: لا ماشي هاكاك غير هو تيقار مزيان 
سلمى: راني جبتلك حوايجك و كلشي و جات الخدامة قداتلك كلشي فالماريو 
نورسين: علاه شحال هادي فساعة 
سلمى: هادي الوحدة د نهار أحبيبة شخرتي حتى خمرتي 
نورسين:اجي بعدا و شكون اللي بقا معايا البارح فدار 
سلمى: جبل 
نورسين:وادابا هدري مقادة طلعتيلي فراسي بهاد الطنيز الخاوي ديالك 
سلمى: انا اللي بقيت معاك صافي و قابلتك وليل كامل و نتي دخلي وتخرجي فالهدرة كي الحمقة فرعتيلي مخي 
نورسين: شكرا عدبتك معايا لهلا يخطيك عليا 
سلمى: *هزات البلاطو اللي كان فيه الفواكه مقطعين مع كيسان د العصير* اجي تفطري بعدا 
حطات البلاطو فوق الطبلة و بداو كاياكلو فصمت ونورسين كتشوف فدار شحال كبيرة و زوينة بزاااف حمقاتها حيت عصرية وهي مولفة غير بالديور التقليديين ديال المغاربة

نورسين: اختي غزاااالة هاد الدار كتحمق واقيلة غادي تكون غالية فالكرا ياكما نقولو يلقا لي شي دار جديدة و لا عرفتي شنو غادي نخرج عند شي سمسار نقولو يلقالي شي دار اخرى تكون صغيرة 
سلمى: جلسي لارض و حمدي الله لقا سفنجة و قال عوجة واش بعقلك ولا بلا عقل ما فهمتش أختي منين كتفهمي جبل كرالك دابا واللي عطا الله عطاه تبغي ضيعي سيد ففلوسو 
نورسين: اختي راه باينة غالية بزااف و انا خلصتي فالمكتبة على قد الحال و زيد عليها شحال هادي ما مشيت يقدروا يكونو جراو عليا من الفوق 
سلمى: اللهم صبرنا يا رب سدي حلقك و فطري عصبتيني 
نورسين: اوووف و الله حتى حرت بالله و انتي بعدا خلاك يعقوب تبقاي معايا 
سلمى: علاه مالو بوعو راني ديما معاك زعما
نورسين: احم و جبل ما عيطلكش 
سلمى: وعلاش غادي يعيطلي مثلا 
نورسين: احم زعما جا و حطني و مشا ما سول فيا كي بقيت ولا كيف دايرة حالتي راني زعما سخفت حدا عينيه 
سلمى:*ابتاسمات* امم وهو صراحة سول فيك فالصباح و جاب معاه دانون و رايبي و بيمويات و جا يشوفك كي بقيتي ولقاك ناعسة و مشا 
نورسين:*لمعوا عينيها* مسكين حنين بزاف ديما كيسول فيا 
سلمى:*تفركعات بضحك* لا واش من نيتك واش سيد كتجيه مو ختو مرتو خطيبتو باش يسول فيك بالعكس انتي بينتي لو بلي ما باغاش تبقاي معاهوم وبلي ما هامكش الخير اللي دايرين فيك دغيا بغيتي تبعدي عليهم و تستقري فدارك و تحملي العواقب 
نورسين:*عبسات و جهها* وانا غير قلت عندك الحق بصح ما كنجيه والو و ما عندي معاه حتى علاقة علاش غادي يسول فيا عرفتي شنو غادي نوض نعس كضرني كرشي *ناضت مشات لبيت اللي كانت متكية فيه* 
سلمى: نتي داكشي ما مقابلة غير نعاس و الماكلة كي الباندا 
عند جبل 
كانت واحد الطوموبيل فالبيض من نوع الهامر و سايقها جبل و حداه يعقوب و فالمقعد الخلفي كان جالس ياسمين و عبد المالك و جوهرة كتبكي و تقول شي مابكاتو ياسمين عنقاتها عندها و باستلها راسها 
ياسمين: لا حرام عليك علاش كتبكي 
جوهرة:*كتمسح دموع بكلينيكس اللي فيديها* ما سخيتش بيكم و الله *كتنخصص* خيركم عليا كبير و كبير بزاف ما عمري غادي نساه 
عبد المالك مرر يدو على شعر جوهرة بكل حب و حنان 
عبد المالك :نتي راك بنتنا و حنا مادرنا فيك حتى خير هاداك واجبنا 
ياسمين: جبل ولدي و قف طوموبيل نغسلها و جهها 
جبل كيفكر مرفوع سايق ما كيسمع حتى واحد 
ياسمين: جبل وا جبل 
جبل : امم نعام أجدة هضرتي معايا 
يعقوب: قالتلك وقف الطوموبيل 
وقف جبل الطوموبيل و هبطات ياسمين مع جوهرة و عبد المالك كيغسلو لجوهرة و جهها و كيعنقوا فيها و يبوسها باش تهدن 
يعقوب: مالك أصاحبي مرفوع كنهضروا معاك ما كتسمعناش كاع 
جبل:كنفكر فداك الز*** 
يعقوب:*بابتسامة*شكون فيهم 
جبل:*دار يدو من مور راسو * دا كوسطا 
يعقوب: تهدن أصاحبي وتكالما رجالنا هاد النهار غادي يجيبوا معلومات عليه هون على راسك شوية شي نهار غادي تمرض بقوة هاد التفكير 
جبل: وزيد عليها نورسين اللي خايف من داك البلان اللي غادي نديرلها 
يعقوب: حنا كنديروا كلشي لمصلاحتك أصاحبي 
دخلات ياسمين و جوهرة و عبد المالك و سدو الباب ودار جبل شاف فجوهرة 
جبل: كي بقيتي شوية 
جوهرة شافت فيه و بداو دموع كينزلولها كيفاش غادي تقدر تبعد على فارس أحلامها اللي من ديما كتحلم يكون زوجها و حبيبها لدرجة انها كانت كتفكر كيفاش غادي يكون نهار عرسهم و شنو غادي تلبس و شنو هوما الكساوي اللي غادي يجيو معاها نهار زفافها معاه و لدرجة انها فكرات فأسماء أبنائهم بنات و علات غير هي و راسها و عاشت أوهام و تيقاتهوم شحال صعيبة ما قادراش تحمل فراقها عليهم و بالخصوص فراقها مع جبل ملك روحها 
جوهرة:*ابتسامة انكسار* غادي نتوحشكم بزاااف اهئ اهئ *غطسات وجهها من بين يديها و ناضت كتبكي*

ديمارا جبل الطوموبيل و زاد قلبو كيضرو عليها بزاااف عارفها باش كتحس عارفها شنو قصدات بغادي نتوحشكوم بزاف عارفها قصدات غادي نتوحشك بزااف جبل عارف بإحساسها اللي مخبياه فقلبها من جيهتو من نهار اللي بدات كتشوف فيه شوفات كيفضحوها و كيبينوا على انها مغرمة بيه و متعلقة بيه لدرجة كبيرة لما لا و هو اللي مجرب إحساس الحب و العشق من كانت عندو عشر سنوات عرف الحب فسن صغير بزاااف لدرجة انو كيعرف الواحد شنو هاز فقلبو غير من شوفة العين هو حاس بيها و عارف إحساس انك تبغي الواحد وهو ما يبغيكش و ما يهتمش بيك و مايتسوق لريح لا اللي داتك ولا اللي جابتك جبل معروف عليه انو كيدرس الخطوة قبل ما يديرها مية الف مرة انسان دكي بامتياز هو تعمد يقول انه كيبغي نورسين حدا جوهرة باش يدخلها لدماغها بلي كيبغي و كيعشق نورسين فقط لا غير كان كيشوف نضرات الحقد و الغيرة و الكره فعيون جوهرة اتجاه نورسين لدلك قرر انه يرسل جوهرة تدرس فأمريكا حيت بهاد الخطوة غادي يضرب عصفورين بحجر واحد اولا غادي يتهنا على نورسين حيت خاف تمشي تآديها جوهرة و ثانيا غادي يحقق ليها حلمها اللي لطالما حلمات بيه و راودها مند صغر 😉😉 
حبس جبل اللوطو و دور و جهو لعند جوهرة و ابتاسم ليها 
جبل: وصلنا 
حيد جبل السمطة و حتى يعقوب ونزلوا هبطو شوانط 
جوهرة طاحت ليهم فالارض كتبكي و تشهق دموع من عينيها كيطيحوا شلال خلعاتهوم عليها حنى جبل عندها و فيدو قرعة د الما كب شوية دالما و بدا كيغسل ليها وجهها بكل حنان هزات راسها شافت فيه بعينين حومر و حزينين 
جبل ابتاسم ليها و قال 
جبل:دموعك غالية بزااف أبنتي 
جوهرة سمعات الكلمة د بنتي و غمضات عينيها حسات بلي الامل ديالهاضاع و تبخر كيفاش قدرات تبغي شخص كيقولها بنتي كيوصلها جبل ليميساج بطريقة غير مباشرة 
جبل: انا بنتي عمرها ما غادي تبكي كوني قوية *حط ديك القرعة د الما فالارض و حط يدو على خدودها*جوهرتي اللي ربيت انا قوية بمية راجل 
عنقها عندو و هي ساهية كتشوف فنقطة وحدة عم الصمت وخيم عليهم لعدة دقائق حتى قال يعقوب 
يعقوب: جوهرة باركة من البكا طيبتي عينيك واش باغا تشوهينا فميريكان أ صاحبتي 
هزات جوهرة عينيها و شافت فيه و ابتاسمت و سط دموعها وقف جبل وعاونها باش تنوض و عنقاتها ياسمين و من موراها عنقها عبد المالك اللي كانو حتى هوما كيبكيو على فراق جوهرة اللي كانو كيشوفوا فيها بنتهم اللي توفات ملئات ليهم دااك الفراغ اللي كان عندهم من فقدان بنتهم نورسين 
جبل: *شاف فساعتو الانيقة الي كانت فيدو* جوهرة طائرة ديالك غادي تقلع من دابا شوية غادي تلقاي واحد البنت كتسيناك فلاميريك غادي تسكن معاك فنفس الابارطمون و غادي توريك لاميريك كلها الا بغيتي فين تساراي او عندها خبرة فدومين د الموسيقى غادي تعاونك فيه بزاف نتمنالك حظ موفق و تفكري ديما بلي كنبغيوك و ديما عندك عائلة اللي تحميك 
يعقوب:غادي نتوحشوك بزاف أجويهيرة ههه ردي البال لراسك وما تيقي فحتى واحد خبارك توصل توصل *غمزها*
ياسمين:*معنقها جنب* الله يوفقك أبنتي 
عبد المالك:*جرها و باسلها راسها* غادي نتوحشوك غادي تخلي بلاصتك ما عرفت كيفاش غادي ندخل لدار الا ما كنتيش فيها 
جوهرة كتسمع لكلماتهم اللي كيألموها فقلبها و دموع ما بغاوش يحبسو من عينيها هزات الصاكادو ديالها و دارتو من فوق ضهرها وجرات لي فاليز دياولها و جا واحد تماك مكلف هزهوم عليها و عطاتهوم بضهر و زادت بضع خطوات حتى وصلات لباب د المطار و دارت عندهم و صيفطتليهم قبلة فالهواء و دارتلهوم باي باي و قلبها كيتقطع طراف طراف دورات وجهها وهي تسمع صوت اللي كيزعزها من لداخل و كيخلي قلبها يطير بالفرحة 
جبل:*بالغوات باش تسمعوا* جوهرتي 
الله على كلمة كتحماق عليها فاش كيعيط ليها بيها كلما عيط ليها بيها كتحس بقلبها اللي كينطق و كيقول نعام قبل من شفايفها دارت عندو و عينيها مضببين بدموع 
كلهم دارولها قلب بيديهم ❤❤ ابتاسمت ليهم و دارت مشات بخطوات مسرعة لداخل قبل ما تنهار و دير بناقص من شي سفر و من شي حلم ومن شي ميريكان 
حان وقت صعود طائرة ديالها طلعات فيها و حطات راسها على سرجم و دموع كيتسابقو و كيطيحوا من عينيها بسرعة بدات دكريات كترجع ليها و كتفكر فجبل اول نهار شافتو و كيفاش حتى شافتو و كيفاش عاونها و كيفاش بغاتو تبسمات وسط دموعها و قالت 
جوهرة: جوهرة صاحبة الرداء الاحمر 

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.