نورسين كتشوف فيه بعينيها مدمعين ما قدراتش توصف إحساسها فهاد اللحظة علاش كيدير معاها هاكا و ديما كيفششها ما تقدرش شي نهار تبعد عليه ما كرهاتش تعنقو و تشم ريحتو فقرارة نفسها عارفة بلي كتبغيه ولكن هو واش يكون كيبغيها بحال اللي كتبغيه واش يقدر يجي شي نهار يبعد عليها تقدر تحماق تمنات كن ما عارفاتوش حيت أكيد تعلقات بيه بزاف و نورسين ما كتقدرش على الفراق تمنات كن بقات كتشوف فيه على أساس صديق أو أخ كيفما من قبل ولكن دابا شي حاجة تغيرات لداخل ديالها و لكن فاش كتفكر نهار اللي شافتو مع كاميليا بنيس و كيف كانو قراب من بعضياتهم فهادشي كيخليها تفيق من الاحلام اللي دايرة فراسها
ولكن الحاجة اللي ما بغاتش دخل ليها لراسها علاش عرض عليها زواج وهو على علاقة بكاميليا اكيد غادي يكون مخبي عليها اكيد هو مزوج بيها غيرحيت شفق عليها و ما بغاش يكونو فدار بوحدهم اكيد غادي يجي نهار اللي غادي يتفارق عليها و يرجع عند كاميليا حيت هو على علاقة معاها
جبل:مالكي ساهية ما قلتي والو ياكما ما عجباتكش
نورسين: شكرا على الكادو
جبل: بصحة و راحة انا عطيتك طوموبيل حيت بغيتك حتى نتي تعلمي تسوقي و تكوني إمرأة قوية عندها قيمتها فالمجتمع باش ما تخلي حتى حد يحكرك بغيتك تكوني إنسانة مثقفة انا نهار اللي لاحك الاب ديالك و وقفت فوجهو وقلتلو بلي نورسين غادي نديرلها قيمة و ما نخلي حتى حد يحل عليك فمو فهمتيني
نورسين غير كتشوف فيه و كتسمع لكلامو علاش كيزيد يعلقها بيه أكثر و أكثر بهدرتو
نورسين: ممكن نسولك عفاك
جبل: سولي
نورسين:*تنهدات* أنا وياك دابا مزوجين وانا واحد نهار كنت شفتك مع كاميليا بنت خالك اول مرة كانت فالعمارة حيت هو اول نهار تلاقيت معاك فيه كنتو مقربين من بعضياتكم بزاااف و ثاني مرة واحد نهار شفتها كانت مقربة ليك فاش كنا فالفيرمة واش نتا على علاقة معاها واش الا عرفات بلي تزوجت بيك هادشي ماغاديش يأثر على علاقتكم و سمحلي على هاد السؤال الشخصي اللي طرحت عليك حيت جاتني غريبة تكون مع علاقة معاها و نتزوجوا انا وياك فهاد الفترة
جبل تشوكا و تصدم من هدرتها ما عرف مايقول بقا غير كيشوف لسانو تربط و عقلو توقف واش ديك كاميليا بنت خالو ما غاديش يتهنا منها ديما دايرة لو المشاكيل سوى كانت حاضرة سوى كانت غايبة دوز يدو بالفقصة على وجهو و شعرو و ضرب الارض برجلو حيت نورسين كانت كتشك أنو على علاقة مع كاميليا بنيس وهو اللي ما عمرو قاس بنت المرا يعني هاد المدة كاملة ملاكو كانت فاهمة غلاط ماعجبوش الحالة على هاد سوء تفاهم اللي وقع ليها
جبل:*كيهدر مكره و معصب و ضاغط على سنانو* انا ما عمري ما كانت عندي علاقة بكاميليا و ما عمرها ما غادي تكون حيت انا وياها كتربطنا علاقة وحدة هي العائلة كتجيني بنت خالي فقط لا أقل و لا أكثر هي من ديما كانت باغا نتزوج بيها باغاني نبغيها بسيف اول مرة شفتيها معايا فالعمارة كانت ديك ليلة سكرانة و دارت أكسيدون بسيطة و مشيت جبتها لدار حيت عيطو لي فنص ليل و هي اللي تقربات مني انا عمري قستها و ثاني مرة فالفيرمة جابت لي الكادو باش تبارك لي عيد ميلادي و عاودات تقربات مني *شد ليها يديها * صدقيني عمري كنت على علاقة معاها حيدي هاد الافكار من راسك عفاك
نورسين فرحات حيت عرفات بلي جبل ما عندو حتى علاقة مع كاميليا بنيس ما كرهاتش طير بالفرحة منين سمعاتها من فمو الله عاد ارتاحت و تهنات يعني بامكانها تبغيه بكل راحة ولكن السؤال اللي بقا محيرها هو واش يقدر يبغيها ولكن علاش كيتصرف معاها هاد التصرفات اللطيفة الكيوت و هنا بدا صراع بين قلبها و عقلها من جديد
قلبها 💓💓: أكيد غادي يكون كيبغيك حلي عينيك و شوفي مزيان كيفاش كيعاملك ومفششك و اي حاجة كيجيبهالك قبل حتى ما تنطقيها أكيد كيحس بشي حاجة من جيهتك واش كاين شي حد على وجه الكرة الارضية يسكنك معاه و يبرعك كادويات غير هاكاك
عقلها:شووت سكت نتا ما كتعرف والو أكيد كيدير هاكا حيت ضريف ومصواب هو هاكا مع البنات كلهم هو قالها غادي نكونو عير أصدقاء فهمتي
قاطع تفكيرها صوت جبل
جبل: نورسين دخلي لدار انا عندي شي شغال غادي نقضيه و نجي راه كاينين لداخل الخدمات غادي يوريوك بيتك نعسي رتاحي غادي تكوني عييتي بطريق
نورسين: واخا
جبل: تسناي واحد الدقيقة
مشا حل جبل اللوطو و جبد منها لبواط ديال التيليفون اللي شرالها و مشا وقف حداها و مدو ليها
جبل: تفضلي
نورسين: *شافت في يدو و شافت فيه*ديالمن هدا
جبل: ديالك
نورسين: شكرا ولكن راه ما كنعرفش نخدم هاد نوع ديال التيليفونات
جبل: شكون فينا اللي تزاد معلم أنورسين انا نعلمك كلشي غير تهناي كلنا كنتزادو صفحة بيضة
خدات نورسين داك التيليفون من يدو
جبل: راه فيه نمرة د سلمى و نمرة ديالي الا بغيتي شي حاجة اتاصلي بيا تقدري تاصلي بسلمى أبيل فيديو باش تشوفيها و تهدري معاها عارف علاقتك معاها قوية ما غاديش تقدري تبعدي عليها ياك
نورسين شافت فيه و عقلها غايب و قلبها كيضرب بجهدواش كيفكر فيها حتى لهاد درجة راه بزاف على صداقة صافي نورسين طاحت فجبل طيحة خايبة ولا كيبانلها غير هو حتى أدق تفاصيل كينتابه ليهم و كيرد ليهم البال ابتاسمت نورسين و شافت فيه
نورسين:شكرا
جبل جرلها حنيكاتها
جبل: ماكاين لاش تشكريني كاندير غير الواجب ديالي آخر مرة نسمعك كتقولي شكرا واخا
حركاتلو نورسين راسها بالايجاب و دخلات للفيلا و دورات وجهها لقاتو واقف كيساينها تدخل ودار ليها باي باي بيدو بابتسامة 👋👋👋
حنات راسها ودخلات حتى سمعاتو كيعيط ليها بجهد
جبل: نووورسين
دارت عندو بسرعة كإستجابة لنداء
نورسين: نعام
جبل: تهلاي فراسك
قال هاد جوج كلمات و مشا طلع لطوموبيلتو و قلع بجهد هز تيليفونو كيقلب على الميساج اللي كيتسناه يوصلو او بالاحرى العنوان اللي كان باغيه صيفطوه لو رجالو
عند نورسين
دخلات دقات فالباب حلات ليها واحد الخدامة و ابتاسمت ليها
-مرحبا بيك أ لالا
نورسين: شكرا
دخلات نورسين و لقات أربعة د الخدمات أخرين واقفين عند الباب و فيديهم الحليب و التمر و كيبتاسمو ليها على مايبدو فوجهم ضريفيين ولكن القلب يعلم بيه الله
نورسين بقات غير مصدومة نطقات وحدة أخرى
-خودي أ لالا حليبة و تميرة مرحبا بيك فدارك
نورسين شربات الحليب و خدات تمر بقات غير كتشوف ما فهماتش عاد إنتابهت لديكور ديال الفيلا اللي كان رائع بكل ما تحمله الكلمة من معنى وراااقي جدا كتحسي براسك بحال واقفة فقصر ملكي
-لالة تفضلي معايا نوريك بيتك ترتاحي
نورسين: قوليلي غير نورسين أختي ما كاين لاش ديك لالا كلنا بشر و حنا كلنا غير عبد ضعيف تحت سيدي ربي ما كاين لاش نديروا الفرق
منال:حنا كنديرو غير خدمتنا ألالا كنشكروك على تواضع ديالك معانا و لكن راه ما نقدروش نعيطولك بسميتك احتراما لمقام ديالك
نورسين: فين هو بيتي نمشي نعس عصبتوني ههه
منال:اجي معايا ا لالا
تقدمات منال و طلعات فالاسانسور ولكن نورسين زادت تصدمات منين شافت الاسانسور فالفيلا ديالو واش هادا كولو ثراء وتفكرات ليلة اللي وقع ليها داكشي فالعمارة كرزات على يديها و بدات كترعد و قالت بصوت متقطع
نورسين: عفاك ما بغيتش نركب فيه *بدات كتحرك راسها يمين و شمال و دارت يديها على ودنيها* لا عفاك ما بغيتش
منال تخلعات عليها و خرجات منو و مشات قبطات فيها
منال: لالا عفاك تهدني
نورسين: *بداو كينزلولها دموع من عينيها * عفاك ما بغيتش اهئ اهئ
منال: *عنقاتها جنب* صافي أ لالا سمحيلي سمحيلي ما كانش يصحابلي ما بغيتكش تعدبي فدروج و صافي
نورسين: اهئ اهئ واخا تكون مية درجة نطلعها ولكن الاسانسور لا
منال: صافي الالا اجي معايا نطلعك لبيتك ترتاحي
تمشات منال قدامها و نورسين من موراها كتمسح دموعها طلعاتها فدروج ووراتها بيتها اللي كان فالطابق الاول اولا نقولو الجناح ديالها
منال: تفضلي أ لالا
دخلات نورسين و تشوكات من قوة ما البيت كبير تقوليها فيلا وحدة أخرى واش بصح هادشي اللي كتشوف بعينيها واش بصح دابا هي فهاد المكان ما بغاتش دخل ليها لراس هادا كامل زهر عندها من الحمارة لطيارة
منال: أي حاجة بغيتيها ألالا عيطي عليا انا اللي غادي نكون مكلفة ببيك راه الحمام واجد أ لالا الا بغيتي ترخي عظيماتك
نورسين: صراحة دابا باغا غير نعس هه
منال: اللي بغيتي أ لالا
نورسين: *مدات ليها يديها *أصدقاء
منال ما توقعاتش نورسين غادي تكون بهاد اللطف كامل و بهاد التواضع دخلات ليها لقلبها بزاااف
منال:*صافحاتها*أكيد أ لالا
خرجات منال من عندها و تخبطات نورسين من فوق السرير عيانة مطحطة انتابهت بلي مازال هازة فيديها التيليفون اللي عطا ليها جبل شافتو و ابتاسمات حطاتو على قلبها وتنهدات و تفكرات الرانج اللي عاطيها فصداقها بدات كتضحك ناضت من فوق السرير و مشات و قفات حدا المراية كتشوف راسها و لاطاي ديالها
نورسين: واش بصح دابا انا ولات عندي رانج *حطات يديها على فمها كتضحك* هادشي كولو بفضل جبل
مشات طلعات من فوق السرير كتنقز بالفرحة و تزدحت من فوق الناموسية كتصرف كيف شي طفلة فرحانة حيت قالولها جا العيد و غادي تقدر تلبس حوايج العيد هادا هو إحساس نورسين فهاد اللحظة و تفكرات بلي ماكتربطوا حتى علاقة بكاميليا بنيس شدات على قلبها بيديها غادي طير بالفرحة قالت
نورسين: جبل ما كينش بحالو الحمد الله اللي لقاني ربي بيه فين كنتي مخبع فين هههه
عند جبل
سايق طوموبيلتو و كيدقق فداك العنوان اللي صيفطولو و دار GPS حتى وصل لمكان اللي باغي وقف الطوموبيل و نزل بكامل هيبتو و لكن الغريب فالامر ان الحي كان شعبي بامتياز الشمكارة متكيبن على الحيوط شادينهم لا يطيحوا الدراري صغار كيلعبو كرة والعيالات كيطلو يبرككوا من السراجم و كيشوفو شكون هادا اللي جاية بهاد الحديدة الواعرة لحومتهم اما فين ما كانت شي بنت دايزة من تما و قفات تشوف فيه حالين فمهم فيه كي ضبعات
جبل ما عجبوهش هاد الاجواء ما كيحملش الصداع و بنادم و جبد تيليفونو يزيد يتأكد من العنوان داز من حداه واحد الراجل الشارف
- جمع أولدي تيليفونك هنا هاد الكنوس دايرين كي الزواق غفل طارت عينيك
جبل: بغيت نسولك عفاك
-مرحبا أولدي أش حب الخاطر
جبل: كنقلب على خديجة اللي ساكنة هنا
-شكون فيهم أولدي راه هنا خديجات عطا الله كاين خديجة مرت شفناج و خديجة مرت نجار و خديجة مرت سودور و واحد خديجة مزوجة بتخبيعة بواحد الراجل سميتو محمد كيقولو سامح فمرتو و كت
ايجي يعيش معاها هادو هما خديجات اللي عندنا فسيكطور
جبل فرعلو راسو بالهدرة ما كيسكتش
جبل: كنقلب على خديجة اللي مزوجة بتخبية فين نقدر نلقاها
- هاهي اولدي ساكنة غير فهاد دار اللي من موراك اللي بابها كحل
جبل: صافي شكرا
- وما تعطيناش باش نكميو أخويا راه جبناليك المعلومات و كدا
جبل ضرب فجيبو تهزاتلو 200 درهم حطها لو فيدو و مشا كيدق على باب خديجة
خديجة:شكوووون
جبل كيزيد يدق بجهد
خديجة: ويلي صباااارو ما حاطينش كرسي عند الباب وااااهيا ناري خلتها باطمة
تحل الباب وهي تبان خديجة اللي كانت طالقة شعرها فالكحل قصير و دايرة مكياج شاااارجي بزااااف ثقييييل بحال ديال الخليجيات تعكييرة فالحمر و ضاربة شرطة قدها قداش لعينيها وضاربة صباغة حمرة لضفارها وقصيرة و بيطيزة وسمرة و كتمضغ المسكة دارت يديها على الحافة د الباب و بدات كتطلع فجبل و تهبط نفخات المسكة و طرطقاتها
جبل جابتلو تقية كتصرف كيف شي ق***
جبل: ممكن نهضر معاك
خديجة: هضر أش بغيتي طلقنا للفراجة
جبل إشمئز منها مصبر راسو غير بزز ولكن جبل ما يخفاش عليه هاد نوع هو اللي كيعرف الواحد شنو فراسو من شوفة العين جبد واحد جوا من جيبو فيه عرمة د الفلوس غير زرقات أربعة د المليون حل داك جوا و دورو ليها هي شافتو عينيها حوالو بالمعقول خصوصا خديجة كتعبد شي حاجة سميتها الفلوس
جبل: جيت نعطيك هاد البراكة و نهدر معاك و لكن الا ما بغيتيش هانية
دور و جهو و شاف فيها و خنزر فيها و دخل دارها كتقلب بريحة ديال البخور جبل جابتلو الخنقة كان غير بيت صغير
خديجة : جلس شنو تبغي تشرب العصير و لا أ تاي
جبل: ماجايش نشرب جاي باغي نهدر معاك بخصوص شي حاجة و نمشي بحالي
خديجة: والفلوس
جبل:*دو وجهو و ابتاسم باستهزاء و عاود شاف فيها * حتى هوما غادي نعطيهوملك مال صبرك قليل نهدرو بعدا و يحن الله
جلسات خديجة كانت لابسة غير بيجامة طويلة ديال دار و من تحت منها لابسة غير شورط قصير طلعاتها بالعاني زعما باش تغريه جبل عيفاتو بهاد تصرفات ديال القح*** اللي كدير قدامو كن ما كان غاراضو فيها ينوض يلصق ليها راسها مع الحيط
جبل رد راسو لور و طلق يدو و كيتكلم بواحد برودة دم رهيييبة
جبل:مزوجة راجل بمرتوو عندو جوج بنات وهادشي فالخفاء ما نرضاهالكش
خديجة بدات تسرط فريقها
خديجة: ما سوق حتى واحد مزوجين على سنة الله و رسوله
جبل: ما قلنالكش كتزني حنا عارفينك مزوجة على سنة الله و رسوله و لكن بتخبية حشومة كاع ما عارفاش من شروط زواج الاشهار هادشي اللي كيديرليك راجلك كيدل على حاجة وحدة
خديجة : شنو هي
جبل:ماراضيش بيك
خديجة بدات كتدور هدرتو فراسها و شافت فيه
خديجة :ونتا شنو مصلحتك فهادشي كامل
جبل: ما عندي مصلحة جيت بغيتك ديري فيا واحد الخير ونمشي ولكن غادي تزاجاي عليه بالطبع * حط ليها داك جوا فوق من الطبلة* أشنو قلتي
شافت خديجة فداك جوا د الفلوس و عينيها كيخرجوا منهموم القلوبة و هزات راسها شافت فيه
خديجة : موافقة
عند نورسين
واخا بغات تنعس ما جاهاش نعاس حاسة براسها ناقصاها شي حاجة
نورسين: اووف علاش جبل حطني و مشا ؟ فين غادي يكون مشا؟ ياكما عندو علاقات مع بنات أخرين؟ لالا جبل ما يمكنش يشوف فشي بنت ؟ ولكن علاش ياك هو زوين و عندو لعاقة وأي بنت تبغي ترتابط بيه ؟ *شدات على راسها* اوووف غادي نحماق
ناضت كتطل من السرجم على الله تبان ليها طوموبيلتو خيبات وجهها منين ما بانلهاش
نورسين: راااجلي أعباد الله رااااجلي و ما عارفاه فين مشا * بدات كتضحك بشكل هيستيري* لالا بانلي تيقت راسك الثقة فالنفس ما مزياناش أنورسين أطانسيون
مشات هزات تيليفون حلاتو و جبداتو من لبواطة عجبها بزاااااف شكلو بقات غير حالة فمها فديزاين ديال تيليفون
نورسين: امم ناري على دوق عندو كيخردل داك سيد كيهبل وااا كيحمق أعباد الله كي ندير ما نحبوش كي ندير
هزات التيليفون وبدات كتنبش فيه غير جالسة تدخل و تخرج دخلات لواتساب بانتلها تصويرة د سلمى ومكتوبة عليها salma
نورسين: اوو هادي نمرة د سلمى و لكن كي ندير نصيفطلها ميساج الكيدارة لوخرى علاش مشات لتركيا علاش لمن نشكي همي حمارة تفو عليك مشيتي تشوفي تيتيز و مخلياني مع المروك الله ينعل حسك * ابتاسمت* ولكن معايا جبيلو اححح عليه *تكات على المخدة* امم دابا الا بغيت ندلعوا بيني و بين راسي شنو نقولو جوجو لالا اشمن جوجو انورسين حضري عقلك مالو ولا كلب امم بلاتي نشوف اوووف هاد الزمر سميتو مشعككة بحالو كيف غادي نلاقالو انا شي إسم دلع بلاتي نقولو روحي احح هو أصلن روحي*بدات كتصرفق راسها وتبكي*أهئ اهئ ما خاصنيش نتعلق بيها أكثر من هاكا حنا غير أصدقاء أنورسين ولكن كنبغيه اهئ اهئ شنو ندير اهئ اهئ أصلن غير ليريكل اللي كتديرلي هاكا
ناضت نورسين لبسات صندالتها و هبطات عندهم لسفلي داخت ما عارفت فين تمشي
منال: سمحيلي ألالة فهمت غلط سيري جلسي فصالون انا نجبيبلك الما بغيتي شي حاجة أخرى
نورسين: الشيشة ههههههههه
منال شافت فيها و بدات كتضحك هي وياها دغيا تقربوا من بعضياتهوم نورسين ضريفة بزاف دغيا كدير صديقات عندها روح جد مرحة و حتى منال بغباءها المبالغ فيه بعض الاحيان كتخليك تقرب منها و تكون علاقة صداقة معاها الشيئ اللي غادي يشعل فتيل الحقد فقلوب و ناس أخرى
فمكان قريب ليهم و بالضبط فالكوزينة واقفين الخدمات مستفين بأربعة كيشوفوا فيهم بحقد و غل ما كرهوش يريشوهم بجوج
هدى: هانتي شوفي لفعات دغيا تقربوا من بعضياتهوم
نجوى: انا بغيت غير نفهم ديك نورسين علاش جابها موسيو الابراهيمي و جالس كيوصي عليها ياك هو عمرو ما دخل بنت المرا لدار شكون بغات تكون هادي فملك الله
بسمة: اختي انا ما كرهتش نطير عليها نقجها نقتلها شنو عجبوا فيها لا زين لا لاطاي لا مجي بكري غير اللي عندو زهر عندو
سليمة : لا اختي الكدوب على الله حرام هي زوينة و لكن جبل حبيب قلبي أحلى منها بكثير
كلهم خنزروا فيها
هدى:ديك منال لاش خاشية نيفها معاها منين جات و هي لاصقها تفو كتشري معاها بلاصتها و حنا هنا كي ضبعات حالين فامنا و جالسين
نورسين قطعات و جاها الملل ما كيعجبهاش تبقا غير جالسة مشات حدا رانج روفر ديالها و شعلات الكاميرا و جلسات تصور حداها كيف شي حمقة
جبل كان داخل بطوموبيل لمحها جالسة برا كتاخد صور و كتخسر ملاميحها و تلعب بشعرها بشكل عفوي
و طفولي فنفس الوقت حبس اللوطو و دار يدو بجوج تحت من راسو و بقا كيتفرج فيها و كيباتسم رد شعرو لور
جبل: شنو كديري فيا غير قولي شنو كديري فيا علاش فين ما شفتك قلبي كيبغي يسكت *كيضرب صدرو بيدو* نتي درتي #مخدر العشق لقلبي ولا مدمن عليك
وما يقدرش يستغنى عليك أخخخ
نزل من الطوموبيل و اتاجه لعندها كانت عاطياه بضهر ما نتابهاتلوش كدير البوزات غير هي و عضامها جا وقف أونفاص ليها و من زهر كانت دايرة فمها على شكل بوسة 💋💋
جبل غلباتو ضحكة و فنفس الوقت كيشوف فشنيفاتها الغوز اللي كيسطيوه اللي باغي غير فوقاش يجي نهار اللي يتدوق من عسلهم ما كرهش يجرها ليها و يمارس معاها العشق بأنواعو ما كرهش أنفاسو تخالط مع أنفاسها ولكن إمتى هادا هو سؤال اللي كيطرح نفسو ؟؟؟
جبل: نورسين أش كديري
نورسين بقات بنفس الوضعية مصدومة مشوكية اي عبارات صدمة كتوصف حالتها فهاد اللحظة
جبل: خارجة فشمس و كتصوري غادي تضري راسك هاكا على الاقل غير على ما تبرد شمس و نخرجوا و نصورك شحال ما بغيتي امم
نورسين عضات على شنايفها و حنات راسها لارض كاتزيدو تجننو عليها ما عارفاش بلي بهاد الحركات كتشعل العافية فقلبو و كيبقا غير يتنهد
نورسين: غير بغيت نبدل الجو و صافي قنطت بوحدي
جبل: كليتي شي حاجة ولا بقيتي بجوع
نورسين هزات راسها شافت فيه و حركات راسها بنفي
نورسين: لا
جبل: أش بانلك نطيبليك شي حاجة تاكليها من يد أمهر شاف هه
نورسين: *دلات شنايفها * ما فياش جوع شكرا
جبل:ومالك مقلقة واش هدر معاك شي حد واش عصباتك شي وحدة من الخدمات *شدلها فيديها بجوج* جاوبيني
نورسين: كنقنط بوحدي وانت مشيتي و خليتيني
جبل: *بفرحة* واش باغاني نبقا حداك
نورسين:*كتحك شعرها بيديها* واش نتا غادي تبقا مقابلني غير انا حتى نتا عندك شغالك
جبل: شنو بغيتي تقصدي
نورسين: بغيت ندير شي حاجة فحياتي بحال نقرا ولا نتعلم شي حاجة جديدة ماشي نبقا حاطة يدي على خدي و كنتفرج
جبل دور وجهو و اتاجه لداخل هي بقات غير كتشوف ما فهماتش مالو عاود
جبل:*عاطيها بضهر و كيهضر* دخلي باش ما تفرعكش شمس
نورسين ما كتحملش بنادم يقمعها و يخليلها هدرتها ففمها ما حسات براسها حتى ضربات رجليها مع الارض وقالت
نورسين:*ربعات يديها* علاش خليتيلي كلامي ففمي و دخلتي جبل دور شوف فيا جبببل ما تعصبنيش كنهدر معاك
جبل دار شاف فيها و الابتسامة ما فارقاتش و جهو ضحكاتو بهاد التصرف اللي دارت و هاد الجرأة اللي نزلات عليها دقة وحدة عارفها كتحشم و لكن دابا شخصيتها غادة و كتبدل و كتقوى و هادشي اللي باغي هو من الاول هو ما كتعجبوش الشخصية ضعيفة باغي ملاكو تكون قوية باش ما يزطمش عليها بنادم و يديرها تحت صباطو باغيها تكون قطة شرسة مع الجميع و ملاااك معاه بوحدو
جبل: نعام عيطتي ليا واقيلة
نورسين: ما جاوبتينيش وانا جني و جنوني اللي ما يعطينيش خو كلامي
جبل: ماشي ما جاوبتكش ما بغيتش نبقا واقف فالشمش جاني صهد و نتي غادي تفرعك فراسك الا ما دخلتش غادي تبقاي تماك و انا هادشي اللي ما بغيتش ما باغيكش تمرضي
نورسين حنات راسها و مشات حداه واقفين حدا الباب د الفيلا
نورسين: ها حنا حيدنا من شمش ياك و دابا شنو قلتي بغيت ندير شي حاجة فحياتي ما بغيتش نكون عالة عليك
جبل هز صبعو كتهديد و عينيه حمارو
جبل: عمرررك تقولي هاد الهدرة عمرررك أ نورسين نتي ما عمرك كنتي عالة عليا و ما عمرك غادي تكوني الا ما هزكش هاد الكتف يهزك هاد الكتف و الا ما قداتكش الارض نطلعك لسما و لكن ما عمرك ما عمرك ما تفكري بلي انتي عالة عليا و لا كندير هادشي باش نشفق عليك عمرررك انا باغيك تقراي و تخدمي و تثبتي مكانتك فالمجتمع وتكون عندك طوموبيل و دار اللي كتحلمي بيهم باش ما يزطموش عليك ما بغيتكش تشوفي لراسك نظرة إحتقار من دابا لفوق ويصحابلك بلي نتي مثقلة عليا ولا ما نعرفت و كبفما واعدتك من قبل انا معاك حتى تحققي داتك و توصلي لداكشي لي فبالك أنورسين عرفتي فين كنت دابا
نورسين عينيها حومر و دموع نازلين ليها حركات راسها بنفي
نورسين:لا
جبل:مشيت سجلتك فالمعهد اللي غادي تخرجي منو أكبر مايكاب أرتيست انشاء الله أنورسين *شدلها فيديها* انا ماعمري كنت كنشفق عليك انا باغي نعاونك باش توصلي للقمة باغي نشوفك قوية باغي فاش توقفي مع المشهورين اولا اللي عندهم مكانتهم فالمجتمع ما تبانيش قدامهم كيف شي حشرة و يحتاقروك حيت هادوك داكشي ما كيعرفوا داكشي علاش *مشا لطوموبيلتو جبد واحد الساشي ثقيل فيه بزاف د الكتوبة * شريتلك هاد الكتوبة فيهم قصص زوينين اللي غادي يعاونوك تعلمي ل English غادي نعلمها ليك ونزيدك حاجة أخرى انا غادي نعلمك تسوقي بيدي بغيتك تكوني مراة بميات راجل
نورسين هزات عويناتها المدمعين من الارض و شافت فيه مدة و قربات ليه حتى مابقات كتفصلو عليها والو و ضماتو لعندها بقوة بحال كتقولو عمرك تخلا عليا هي مجرد تعنيقة بريئة ولكن كتضم الكثير من المعاني لداخل ديالها ما قدراتش تحكم فالمشاعر ديالها قلبها اللي سيرها فهاد اللحظة العقل تلغا و بقا القلب هو المسيطر الدموع من عينيها نازلين شلال ما قدراتش تعبر على إحساسها فهاد اللحظة بالكلمات كتبكي نورسين و تشهق بحال شي بنيتة صغيرة قالولها بلي باباك رجع بعد مدة غياب طوييييييلة محتاجة لهاد تعنيقة بزاف محتاجة اللي يضمها شحال من مرة كاتكون باغي غير شي حد اللي يطبطب عليك فالوقت اللي تكون نتا فأمس الحاجة لداك الحنان اللي كتلقاه فحضن شخص الآخر كانت محتاجة لهاد العناق باش تنسا داكشي اللي مر عليها جبل بهدرتو جبد عليها أوجاع قديمة
جبل بقا غير مصدوم من هاد التصرف واش بصح ملاكو طاهراللي تقربات منو واش بصح هي دابا فأحضانو واش بصح قادرة يلمس شعرها بكل راحة و يشم عطرها اللي كيهبلو
بقا مدة وهو طالق يدو ما متيقش عاد جرها لعندو بجهد و حشا راسو فعنقها مغمض عينو مرفوع على العالم الخارجي بحال شي حد مسحور عايش فعالمو الخاص اللي فيه غير هو و ملاكو الطاهر بحال شي حد متعب بزاااف خاصو يرتاح من هموم دنيا باغي حتى هو ينسا داكشي اللي مر عليه وهادشي كيتحقق غير فاش كيكون فأحضانها
نورسين بقات ساكتة مدة و بدات كتهدر بصوت غالب عليه البكا و التنخصيص و الظلم و القهرة
نورسين: شكرا بزاف على كلشي اهئ اهئ انا منين كنت صغيرة ما عمري سمعت هاد الهدرة اهئ اهئ ديما كانت ختي و عائلتي كلها كيضحكوا عليا و كيقولولي عمرك تولي مايكاب أرتيست كنت كنقولهم لا انا غادي يجي واحد نهار و غادي نولي مشهورة كلهم كايقولو بلي عمرك تحلمي بيها كانو كيقولولي بلي الا كنتي قبيحة كيفاش غادي تقدري تصاوبي لناس وجههم كانو حاكريني بزااف اهئ اهئ هوما اللي خلاوني فقدت الثقة براسي اهئ اهئ عمرهم ساندوني عمرهم وقفوا معايا ديما كيضحكوا عليا اهئ اهى كنت كنقولهم غادي يجي واحد النهار اللي غادي ندير فيه الدار و طوموبيل اهئ اهئ كيقولولي نتي تاليتك شي براكة فسطح اهئ اهئ *كتزيد تضمو لعندها* مع الكلاب و القطوط اهئ اهئ كانو ديما كيقولولي نتي مكلخة ما لايقة لوالو غير بايرة اهئ اهئ هوما اللي ردوني هاكا اهئ اهئ علاش شنو درتليهم اهئ اهئ ديما كانو كيسمموني بهدرتهم اهئ اهئ
جبل كان كيستمع ليها بكل حب حس بيها بحال شي بنيتة صغيرة كتشكي لباباها يعني ولا عندو قيمة فحياتها منين ولات تشاركو أسرارها ضرو قلبو عليها بزاااف حتى هي تعدبات من أقرب ناس ليها حتى هي قاسات فحياتها بحالو علاش ديما ناس كتحكر على الواحد و كتدخل فالاقدار ديالو كلشي بيد الله
نورسين بعدات على جبل فيقاتو من حلم جميل كان عايشو عطاتو بضهر كتمسح دموعها
جبل: نورسين شوفي فيا
جبل شدلها فيديها و دورها عندو بسرعة و حط جبهتو على جبهتها و عينو حمارو و الدموع واقفين على حرف عينيه و عينو كتشوف فعينيها مباشرة
جبل: علاش أنورسين علاش هازة فقلبك هادشي كامل علاش نساي عليك ديك العائلة صافي دابا غادي تبداي حياة جديدة و غادي تبتيلهم العكس و نهار غادي تنجحي العالم غادي يشهد على نجاح ديالك وتأكدي بلي غادي تولي أكبر نجمة فالمغرب على صعيد الوطني و على صعيد العالمي اللي بغا يشوفك خاصو يشد نوبة غادي تعلمي لكولشي و غادي تبهري العالم بإبداعاتك انا ثايق فيك داكشي اللي دزتي منو نسايه *بعد عليها و شدله خدود ها بيدو * ديما تفكري بلي الله سبحانه و تعالى ديما كيحطنا فمواقف قادرين نتغلبوا عليها و ديما تفكري بلي ان الله سبحانه و تعالى لا يكلف نفسا الا وسعها
نورسين بعدات عليها و هزات عينيها المدمعين و شافت فيه
نورسين: علاش كدير معايا هادشي كامل عطيني شي تفسير
جبل دور و جهو و كرز على يدو و ديك دمعة اللي كان حابسها هبطات من عينيه بسرعة
جبل: كندير هادشي بدافع الصداقة اللي بيناتنا
دخل و خلاها كترمش ما كانتش كتوقع منو هاد الجواب البارد على الاقل يعطيها تلميح انو كيحس بشي حاجة من جيهتها حطات يديها على قلبها اللي كان كيلعب الحيدوس كيضرب بسرعة فائقة حسات بدوخة دخلات و اتاجهت لدروج باينة فيها عيانة و فشلانة ماشي من تعب وانما من ألم الحب اللي كيقطع شرايين قلبها من لداخل إحساس خايب انك تكون كتبغي شي حد ويقولك حنا مجرد أصدقاء علاش حطمها بهدرتو علاش ديما كيحاول يبعدها عليه فعوط مايزيد يقربها منو أكثر و أكثر معقول يكون انسان أحمق علاش ما باغيش يعتارف ليها حتى لامتى غادي يرتاحو من عداب الحب
نورسين مشات لبيتها و تزدحات فوق الناموسية مرفوعة مخدرة ما حاساش بشنو واقع فالعالم الخارجي جملة *كندير هادشي بدافع صداقة * كتكرر ليها فودنيها كيف شي لحن مزعج غمضات عينيها و هبطات دمعة على خدها ناضت شافت راسها فالمراية
نورسين: قلتلك ما تعلقيش بيه أ نورسين قلتهالك اهئ اهئ علاش انا اللي بغيتو ما كيبغينيش اهئ اهئ واش انا منحوسة حتى لهاد درجة
عند جبل
واقف فالدوش و القطرات د الما كتقطر من شعرو و جسدو الضخم و الما مطلوق عليه كان حال عينيه كيشوف فواحد المراية قريبة ليه وجهو و كيتفكر جملة نورسين*علاش كادير معايا هادشي كامل عطيني شي تفسير * جاتو الفرصة حتى لبين يديه علاش ما بغاش بعتارف ليها علاش فاش كيبغي يقولها الحقيقة لسانو كيتربط وكيفقد القدرة على التعبير على شنو بداخل ديالو من أحاسيس غمض عينيه و ضرب زاج بيدو حتى تفرشخات خوفو انو يفقدها الا قالهالها لاعب ليه على تفكيرو مزيان هو إنسان مريض ماشي طبيعي والهوس ديالو بيها مسيطر عليه لدرجة كبيرة لدرجة انو قادر يكتم حقيقة مشاعرو باش ما يخسرهاش و باش تبقا ديما حداه شنو بغا من دنيا أكثر
حس براسو ماشي هو هاداك خاصو ضروري يمارس رياضتو المفضلة اللي كتخليه ينسى همو شوية خرج و لبس شورط من لاكوسط فلون الاسود لبس الكلاكيطة ديالو و هبط هاكاك كيقطر فالاسانسور شافوه الخدمات شي سخفان على شي
هدى: واش شفتي لوز أ ختي
نجوى: اختي هاداك راه البرقوق
سليمة: الكركاع أخوتي
بسمة: ها لوز ها البرقوق ها الكركاع و عيقتو هاداك شي حاجة ما دايراش انا اللي ما بغاش يتفهملي علاش جايب لينا ديك سفود البرادعية لدار لا صدر كي البنات لا طرمة دايرة كي البوطو ديال ضو تفو شنو عجبو فيها اخوتي فاش كان الزهر كيتفرق ما عرف فين كنا حنا
هدى:كنا فالكوزينة كنشقاو أحبيبتي مول المليح باع و راح و جبل داتو ليكم و جلسوا حالين فمكم
سليمة: ما عرفت زعما شنو تكون دايرالو ياكما موكلها مخ ضبع
بسمة: حنا أحبيبة لي عندنا مخ ضبع اما هاديك خيتي دايرة كي لفعة تلوات عليه ما تعرف شنو دارتلو فقيها صحيح
جات منال من الخلف كانت كتسمعهم
منال: كلها كايدي لي مكتابلو و نتوما هاكا غادي تبقاو ديما محسدات اييخ على بنات نتوما اللي مطيحين دل علينا توما كونو تآمنوا بشي حاجة سميتها القضاء و القدر و دخلو سوق راسكم غير بعينيكم الله يستر غادي تفرقوهوم تفو
هدى: شفتك نتي دغيا تصاحبتي معاها شنو ز عما كتشري بلاصتك و لا كيفاش راه ما كاينش شي محسادة قدك احبيبة نتي دايرة كيف ديك تاتة اللي كتلون حتى نكون ما كنعرفكش
منال: اش غادي نقولك الله يهديكم حيت نتوما مراض ما غاديش نزيد نهضر معاكم والا درتي بحال الاحمق باش فتيه الا كنتي نتي خايبة ماشي ناس كلهم بحالك
هدى: غادي نمشي ندي لموسيو جبل الفوطة باش نتهنا من شي كمامر
سليمة: لا اختي علاه مالك نتي كتسمحيلي فنوبتك غادي نمشي انا
منال: لا حول و لا قوة الا بالله
هدى: شفتك نتي كثرتي من دكر الله ياكما تشيرتي هههههه اولا كتحاولي ديري فيها فقيهة
عند نورسين
جالسة من فوق ناموسيتها و حاطة حداها باكية د كلينيكس كتبكي و تمسح و تلوح فوق الناموسية حتى ردات داك ناموسية عامرة كلينيكسات
نورسين: جبل علاش كدير فيا هادشي علاش اهئ اهئ تفوو و راااجلي نتا قالك حنا مجرد أصدقاء دابا انا مانا مطلقة مانا مزوجة اهئ اهئ ولكن انا بغيت جبيلو ديالي اهئ اهئ واااا كنبغيه * كتمسحها دموع*
وقفات كتدور فالبيت كتحاول تنسا مشات و قفات فالبالكون ديال بيتها اللي كان كيطل على المسبح شافت شي حد كيعوم و هو يطلع جبل راسو و دوز على شعرو بيدو وعاود غطس راسو تحت الما وبدا يجدف بكل احترافية و حتى البنية ديالو الجسمانية معاوناه نورسين مسحات دموعها و بدات كتبتاسم و متبعاه بعويناتها كيفاش كيتحرك قلبها تغرم بيه بلا ما تحس شنيفاتها كيدكروا اسمو بحب عينيها فيهم بريق من نوع خاص ليه بوحدو دورات عويناتها و هي تلمح سليمة هازة الفوطة و جالسة كتشوف فيه و تعض فشنايفها و عينيها كيخرج منهم القلوبة ما كرهتش تلاح فلابيسين تعوم معاه
نورسين كمشات ملاميحها بغضب و قلبها شعلات فيه العافية شي صوت من لداخل ديالها كيقولها تلاح على سليمة من البالكون تريشها
نورسين: مزيان أ جبل تبارك الله عليك خاليني انا هنا كنتفقص و نتا جالس كتعوملي مع راسك دنيا هانية زعما انا زايدة ناقصة فالح غير فيا انا حنا غير أصدقاء نتا راااااجلي على سنة الله و رسوله و قدام جدي عبد المالك و جداتي ياسمين و سلمى و يعقوب تفووو علا شوفات كادير فيه الكيدارة لوخرى كوليه نتي احسن ديريه فشكلاط و لحسيه الله يقلل حياك يا الموسخة *ضربات وجهها بيديها* والله لا بقيت هنا غادي نهبط نحضي رزقي
دخلات جلسات من فوق الناموسية و دارت يديها على راسها
نورسين: و كرامتك أ نورسين *ضربات المخدة اللي كانت حداها مع الحيط ووقفات* فالحب ما كاينش الكرامة داكشي غير الهدرة ديال الروايات الواقع حاجة اخرى الا ما حضيتش جبيلو ديالي يطيرو لي بيه والله حتى نحماق *عضات كف يديها بقوة الفقصة ولات كي المجنونة*
عاود خرجات كطل من البالكون بانتلها طلقا شعرها و جالسة تنش بيديها و جالسة كدير حركات مغرية بفمها
نورسين:*دارت و ضربات رجليها مع الباب* واش جبل مخدم معاه العاهرات فدار و انا ما فراسيش ولكن انا لكي بالمرصاد نوريك تحطي العين على جبيلو *جمعات شعرها كو د شوفال* انا غادي نوريك بنت فاطمة العيشورية ديال درب شنو كتسوا
خرجات نورسين بسرعة من بيتها و هبطات فدروج بسرعة فائقة
نورسين: مناااال
جات عندها منال كطير
منال: نعام أ لالا
نورسين: فين طريق د البيسين
منال: واخا اجي معايا الالا
تبعات نورسين منال و داتها من الجردة الخلفية و وراتها طريق ومشات
نورسين و صلات لمسبح و وقفات من بعيد كتشوف فسليمة بغل و حقد
نورسين: اييخ ما تشوف فيك لا موحمة لا شادة فحبل *حكات شعرها بيديها* دابا شنو غادي نقول لجبل الا شافني اووف ولكن خاصني نغامر و نديرها فيد الله انا كنحافظ على الاسرة ديالي الصغيرة انا فمهمة شريفة تشجعي أ نورسين تشجعي
تقدمات نورسين بشوية بخطوات متباطئة حتى وصلات حدا سليمة اللي كانت حالة فمها فجبل ما حاساش كاع اش واقع حدا عينيها وهي تخطف ليها نورسين الفوطة من يديها عاد دارت سليمة شافت فيها
سليمة: *حنات راسها* لالا اش كديري هنا
نورسين: جيت نشوف جبل عندك شي مانع أحبيبة
سليمة: لا أ لالا غير هو و كان كنت قابطة الفوطة فيدي و انتي خديتيها لي من يدي ما عرفتش علاش
نورسين: حشومة تبقاي غير واقفة قابطة الفوطة غادي تعاياي بالوقوف بامكانك تمشي لكوزينة تعاوني البنات راهم محتاجينك احسن ما تبقاي واقفة هنا كي السارية اولا
سليمة عضات على شنايفها بالفقصة حيت ما خلاتهاش تكمل احلى مشهد واجمل منظر شافتو فحياتها كلها
سليمة: ولكن حتى هادشي اللي كندير داخل فخدمتي أ لالا
شافت فيها سليمة و ما عجبهاش الحال ما كرهاتش ضرب لنورسين نتفة عالمية فالاخر ابتاسمت ليها ابتسامة صفرا و حنات راسها و خرجات
جبل كان دايرة نظارات الخاصين بسباحة و كيتحرك فالما بكل سهولة نورسين حلات فيه فمها و مشات جلسات فالواحد الكرسي و دارت الفوطة فوق ركابيها و حطات يدبها بجوج تحت دقنهاو كتقول بصمت همس و ضحك
نورسين:*بابتسامة* جبيلو ديالي احح شنو درتي فيا و فهاد القلب اللي ولا كينبض غير بسميتك اووف وليت دابا كنغير عليك ما كرهتش نديرك تحت من مخدتي و نعس باش ما يشوف فيك حتى واحد ياربي تصبرني
فنفس الاثناء جبل هز راسو من الما و حيد نظاظر و بدا كيرمش عينو حيت فيهم الما باش توضاح لو الصورة بانتلو نورسين جالسة ساهية فيه جبل بدا كيغمض عينو و يحلهم عند بالو غير كيتخايل وقفات نورسين و قربات اكثر لمسبح
جبل:*بإستغراب* نورسين أش كديري هنا
نورسين: احم جبتلك الفوطة
جبل: ولكن كانت الخدامة اللي هازها فين مشات
نورسين: جيت بغيت نهدر معاك وقلتلها تعطيهالي بلا ما تبقا واقفة كتساينك وانت تعطلتي و كيفما كتعرف الوقوف مضر للجسم و هي مسكينة مازال صغيرة يقدرو يتنفخوا ليها رجليها و تمشي لسبيطار مسكينة على والو غير حيت كانت واقفة تبغي يقولو على موسيو جبل الابراهيمي ما كيردش البال لعمال ديالو
جبل حس بشي حاجة ماشي هي هاديك فنورسين
جبل: نورسين مالك كدخلي و تخرجي فالهدرة
خرج جبل من لابيسين كلو كيقطر وو قف حداها كيشوف ليها مباشرة فعينيها وحط يدو على جبهتها
نورسين: ا لا راني جيت بغيت نهدر معاك انا بعقلي هانتا و الله ما كندخل ما كنخرج فالهدرة هانا كنهدر عادية مالي على مزيناتي راه غير جابلك بالك و الله
جبل بدا كيدخلو شك من تصرفاتها وبدا كيتساءل مع راسو هي أش وصلها لمسبح و علاش غادي طلب من الخدامة تعطيها الفوطة تفكر بلي البيت اللي عندها كيطل على المسبح و الا كانت باغا تهدر معاه غادي تخليه حتى يخرج علاش غادي تجي لعندو حتى لابسين و من فوق هادشي كامل كتدخل و تخرج فالهدرة و متوترة بحال باغا تخبي شي حاجة جبل كيشوف فيها بشك بدات كتوضاح ليه الفكرة شوي بشوي و عرفها ولات كتغير عليه من الخدامة ما حس براسو حتى جلس و بدا يضحك ادن هو غادي فطريق صحيح ادن نورسين مشاعرها بداو كيتحركوا و بدا قلبها كيميل ليه
نورسين ما فهمتش شنو واقع لوكيضحك
نورسين: جبل
جبل هز راسو شاف فيها و عينيه كيلمعوا بالفرحة معقول ملاكو طاهر بدات كتحن فيه و بدات تفتح ليه قلبها دوز يدو على وجهو و الابتسامة ما فرقاتش وجهو
جبل:*بصوت خافت و حنين و كيدير فيها واحد الشوفة خطيييييرة * نعام أ نورسين
نورسين مسكينة دابت بقات غير كتشوف فيه نسات شنو كانت باغية تقول وقف حداها جبل و حنا عندها لوجهها كيشوف فعينيها ما كيفصلو عليها حتى حاجة و الما كيقطرمن شعرو و الوسامة اللي عاطيه سيدي ربي و العضلات منظرو مثير جدا نورسين مسكينة تلفات ليها الهدرة بقات غير كتشوف فيه و تسرط.ريقها و قلبها كيضرب من قوة قربو ليها وقال جبل بصوت خافت
جبل: كنسمعك انورسين هدري
نورسين توترات مزيان وبعدات عليه و هبطات راسها لارض
نورسين: انا ...احم انا
جبل:*زاد قرب ليها بالعاني كيعرف كيفاش يلعب ليها على مشاعرها * شنو أنت
نورسين كتحاول تبعد عينيها عليه و كتشوف فالارض و السقف و جاتها الحرارة بدات كتنش بيديها و كتسوط
نورسين: وا الحرارة هاد الجو غير ديال شي تبحيرة
جبل غلباتو ضحكة
جبل: الحرارة فيها جوج د الانواع كاينة الحرارة ديال الجو و كاينةEl calor del amor *حرارة الحب*
اينا وحدة فيهم كتحسي بيها
نورسين:*كتبعد عينيها عليه* انا كنعرف غير الحرارة د سيدي ربي هاد الحرارة تانية عمري سمعت بيها
جبل:*كيشوف فيها بحب كبير و تنهد* مزال ما قلتيش علايش جيتي لعندي
نورسين بدات كتقلب على الكدبة اللي تسلكها معاه دوزات يديها على نيفها و عضات شنايفها هادو هما حراكاتها فاش تكون كتقلب على الكدبة اللي تسلكها و تبان واقعية شوية
نورسين: احم انا جيت حيت بديت كنقرا دوك الكتب اللي جبتيلي ديال الانجليزية و ما قشبلت فيهم والو جيت عندك باش تعاوني
جبل ما قدرش يحبس ضحكة حيت زاد تأكد من شكوك ديالو اللي كانت فمحلها حيت نورسين مسكينة غير خبز ربي فطبكو ما كتعرف حتى تكدب الكتب اللي جابلها ما زال ما عطاهومش ليها داهم معاه لبيتو هز راسو فسقف و غمض عينو و ابتاسم و شاف فيها
جبل: امم مزيان برافو عليك اللي درتي مجهود و بديتي تقراي راسك واخا ما كتفهميش هادي خطوة مزيانة خاصك تغلبي على الخوف ديالك من الحاجة حيت غير غادي تبدايها غادي تجيك ساهلة امم شنو هما الكلمات اللي مافهمتيش اللي بقاو لاصقين ليك فدماغك و بغيتي تعرفي معانيهم
نورسين حسات بتأنيب ضمير حيت كدبات عليه
نورسين: احم ما عقلت على والو
جبل:شحال كنتي كتجيبي فل English فاش كنتي كتقراي
نورسين: *فنفسها : اشداني الوم نتشوه مع جبل* امم شي باراكة و صافي
جبل: 18/20
نورسين حلات عينيها بقوة صدمة و شافت فيه
نورسين: لا واش من نيتك راني قلتلك شي باركة و صافي كن كنت نجيب فيها 18/20 كن تلقاني دابا راني عايشة فميريكان
جبل:*بابتسامة* 10/20
نورسين: من 18/20 الى 10/20 قفزة صاروخية هادي
جبل:*دوز يدو على عنقو و الابتسامة ما فارقاتش وجهو* دابا شحال كنتي كتجيبي فيها خاصني نعرف المستوى ديالك كي داير باش نقدر نعلمك
نورسين دورات و جهنا و بغات تمشي
نورسين: اودي ما قادين على شوهة بلاش من هاد لونكلي كاع
جبل شد ليها فيديها
جبل: و دابا هدري خاصني نعرف نتي غادي تعلمي بسيف عليك انورسين ما كنحاملش الواحد اللي كيبدا الحاجة و ما كيكملهاش
دارت نورسين لعندو و شافت فيه و هزات يديها بخمسة 🖐🖐
نورسين: خمسة فعينين العديان و المحسادة
جبل كيشوف فيها باستغراب
جبل: كيفاش ؟علايش كتهدري
نورسين:احم بكل افتخار أقولوها و برأسي مرفوع الى السماء انا نورسين بنت فاطمة و محمد كنت كنجيب فلونكلي 5/20
جبل بقا غير مصدوم و و كيشوف فيها و بنفس الوقت كيضحك على عفويتها الجميلة اللي أسرات قلبو شداتو الهيستيرية ديال ضحك من كلامها شكون من غيرها كيخلي الابتسامة و الضحكة تبان على شفايفو شكون من غيرها ما عمرو عرف الضحكة حتى تلاقا #بملاكو الطاهر نورسين
حتى نورسين بدورها ناضت كتضحك على راسها جبل نسا راسو و بقا كيشوف فيها غير هي كتبتسم و كيفاش عويناتها كيتسدو فاش كضحك و الغمازات كيبانو على وجهها جبل غراق فتفاصيل ابتسامتها الجميلة هادا هو الهدف ديالو يشوفها ديما فرحانة و عمر الحزن يدخل لقلبها حس بشخصيتها بدات كتطلق معاه و هادشي اللي باغي هو باغي يشوف شخصيتها الحقيقية معاه ما باغيش يكون بيناتهم حواجز باغي يكون هو الاب ديالها و هي بنتو باغي يكون هو عبد تحتها و هي ملكة قلبو باغي يكون هو دواها اللي يشافيها من الالم ديالها ما كرهش الارض توقف فهاد اللحظة اللي عندو اغلى من دنيا و ما فيها ما عارفاش نورسن بلي برائتها و عفويتها كتخلي قلبو يتوقف و دماغو يتشلل عينيه اللي كيبقاو خدامين كيشوفو فيها
♤♤♤♤♤
كانت إذا إبتسمت تأخد الارض
راحة من دورانها و تتنهد
♤♤♤♤♤♤
نورسين حبسات الضحك و شافت فيه عم صمت لعدة دقائق بيناتهم غير نظرات اللي كتحدث على الاشياء اللي كيحملها قلب كل واحد فيهم
جبل زاد قرب ليها بزاف و قال
جبل: ما ناويش تعطيني هاديك اللي فيديك
نورسين ضربات على راسها بغباء و عطاتهالو وهو يعطس بجهد
نورسين:رحمك الله ياكما ضربك البرد
جبل دار الفوطة من فوق كتافو
جبل: اودي ضارباني حاجة اخرى المهم هانا مشيت نلبس حوايجي ونجي نلقاك موجدة الكتوبة اللي كنتي كتقراي فيهم توريني الحوايج اللي ما فهمتيش و نبداو بعض القواعد واخا أ الكسولة *غمزها و عطاها بضهر و مشا *
نورسين:*ضربات رجليها مع الارض*انا ماشي كسولة هاديك أصلن لغة الكفار
دار عندها جبل
جبل: قولي شي حاجة كاتعرفيها بالانجليزية أ الكسولة ههه
نورسين: ما تندمنيش حيت قلتلك شحال كنت كنجيب
جبل: ودابا بغيت نسمع من فمك شي حاجة من فمك ب English
نورسين :*دارت يديها على جبهتها* امم كنعرف فيها حاجة وحدة الا بقيت عاقلة
جبل:شنو هي
نورسين: I love you *أحبك*
فهاد اللحظة جبل حس بقلبو تقبض عليه و داتو بدات كترعد شعر بحال الدم إنفجر فالعروق ديالو حس براسو غادي يموت بقوة الصدمة جملة * i love you* كان عندها تأثير خطير على أحاسيسو هاد الجملة بالضبط ما عمرو توقع بلي غادي يسمعها من فمها واخا ما قصداتهاش بمعناها الحقيقي و لكن أهم حاجة هو سمعها من فمها حس براسو ترفع لعالم خاص بيه غير هو و ياها غمض عينو و بانت قدام عينو بنيتة صغيرة كتشبه لنورسين معقول يجي نهار اللي تقولهالو د بصح معقول يجينهار اللي تكون عندو بنيتة منها
جبل ابتاسم و دور و جهو و مشا خرج ما يمكنش يبقا تماك حيت كان غادي يعنقها و يتهور و يقبلها و يقدر يوصل لاشياء أخرى معاها و لكن كيخاف يضعاف عارف بلي قلبها بدا كيحس بشي حاجة من جيهتو و لكن ما زال ما عارف كيف غادي تكون ردات فعلها فاش غادي تعرفو *قتال * كيفاش غادي تصرف معاه
نورسين: اووف ديما كيخليلي هدرتي ففمي و يزيد خلفة واش ما كيسمعنيش ياكما صمك اوا راه قالوها حتى زين ما خطاتو لولة *تنهدات *ولكن غزال غزال
خرجات حتى نورسين من تماك و مشات كتدور و تستكشف المكان حتى وصلات لدار دخلات و طلعات لبيتها و مشات تكات فوق ناموسية و فجأة تفكرات دبدوب اللي كان جاب ليها جبل ناضت كطير كتقلب فشوانط ديالها عليه حتى لقاتو و عنقاتو و ضماتو لصدرها و حطات نيفها عليه أحسن كادو عندها هو هادا نورسين رعم أنها كبيرة لداخل ديالها مزال طفلة طفولتها ما عاشتهاش مزيان باباها عمرو ما جابلها الالعاب بحال باقي البنات و ماماها قليل فاش كانت كتشريلها شي حاجة كانت ديما كتجلس مع بنات درب هوما اللي كيعطيوها تلعب عمرها ملكات شي لعبة جميلة خاصة بيها كان كيبقى فيها الحال فاش كتشوف بنيات عندهم دميات و نونوسات كبار و هي الا ما مشاتش عندهم ما تلعبش شحال من مرة كانو كيجريو عليها بعض شي بنات و لكن كتبقا تزاوك و ترغب باش يعطيوها تلعب معاهم هبطات من عينيها واحد دمعة حيت تفكرات مثل هاد الدكريات المؤلمة اللي كانت كتعيشهم و لكن مع جبل خلاها تعيش أجمل أيام حياتها ديما كيفكر فيها و يجيبلها كادويات اللي كيحمقوها كتنسى بيهم كاع داكشي اللي كانت محروم منو تنهدات و عنقات دبدوبها و صورة جبل ما فرقاتش خيالها خصوصا فاش كان فالمسبح و فاش كان كيضحك على كلامها صورتو تحفرات فدماغها سمعات دقان فالباب
نورسين: شكون
منال: غير انا أ لالة
نورسين حلات ليها الباب و دخلات ليها الماكلة لبيتها
منال: بصحتك ألالا
نوريين: علاش جايبة لي الماكلة لهنا
منال: موسيو جبل اللي وصانا نعطيوك تاكلي هو حس براسو عيان راه متكي فبيتو بانلي بحال ضربوا البرد قالك كولي مزيان حقك و حقو
نورسين ناضت من سريرها كتشوف فيها
نورسين: واش مريض ؟
جبل: اه أ لالة كان كيكح و كيعطس و باينة فيه عيان بزاف المهم جا عندنا لكوزينة واخا باينة فيه مطحطح وصانا عليك و رجع لبيتو
نورسين: منال فين كاين بيتو عفاك
منال: قالي ما نخرج حتى تكملي ماكلتك ما نقدرش نوريك أ لالا
نورسين: *دوزات يديها على شعرها و مشات و قفات حداها و شداتلها فيديها * منال عفاك وريني بيتو راه ما نقدرش ناكل و هو مريض
نورسين خرجات من بيتها بسرعة و طلعات فدروج كتقلب على الشومبر ديالو بخوف و قلبها كيرجف لقات بزاف ديال البيوت الباب اللي بانلها كتحلو حتى طاحت فبيتو شافتو ناعس من فوق الناموسية و شعرو نازل على وجهو و ريدويات طايحين البيت مظلم عليه و كيحكب وهو ناعس نورسين حطات يديها على وجهها ما متيقاش شنو كتشوف عينيها ياك عاد كان صحة سلام اكيد غادي يكون ضربو البرد هي اللي ما عطاتوش الفوطة و بقات شاداه بالهدرة هي سباب فمرضو هادشي اللي كيقولها راسها تقدمات بخطى بطيئة حتى وصلات لعندو وطاحت على ركابيها ومررات يديها على شعرو و دموع نازلين من عينيها لقاتو طايب الحرارة طالعة لو و داتو كترعد
نورسين:*شهقات*جبل
جبل حل عينو بتثاقل و شاف فيها و ابتاسم
جبل:*كيهدر بصوت متقطع* نورسين علاش ما كليتيش كح كح
نورسين: باش كتحس
جبل هز يدو مسحلها دموع بصبعو الكبير
جبل: غير رواح عادي دغيا كنمرض بيه ما تديريش فبالك
نورسين: ولكن داتك سخونة بزاف فين كاين دوا
جبل:*ابتاسم ليها * دوا حدايا *كيقصد نورسين*
قال هاد جوج كلمات و رجع غمض عينو نورسين شداتها رجفة من حالتو ناضت كتقلب على دوا من نيتها وبدات تحل المجورة اللي حداه مالقات والو
نورسين دوزات يديها على شعرها وداتها كترعد تخلعات عليه بزاف ما عمرها ماشافتو بهاد الحالة عاودتاني حنات على ركابيه و شداتلو فيدو
نورسين: جبل عفاك حل عينيك عفاك هدر معايا جبل* كتحرك فيه*
جبل ما قادرش يحل عينيه بقوة الرواح هو من ناس اللي دغيا كيمرضوا برواح و كيسخسخهم مزيااان
جبل:*كيهدر غير بشوية مغمض عينيه* نورسين سيري ترتاحي انا دابا يفوتني الحال
نورسين كتحرك راسها يمين و شمال و دموع نازلين من عينيها شلال
نورسين: لا ما غاديش نمشي حتى تبرا فين تيليفونك عطيني نهدر مع طبيبة
نورسين: واش كضرك شي حاجة واش بغيتي تاكل شي حاجة عفاك جاوبني جبل أ هئ اهئ
جبل واخا ما قادرش حل عينيه و شاف فيها و حط يدو بتثاقل على خدها
جبل: نووورسين قلتك ما تبكيش انا من ديما كنمرض برواح و كيدير لي هاكا بلا ما تشطني بالك
نورسين شدات يدو و بقات حاطاها على خدها و كتهضر
نورسين: فاش كنتي بوحدك شكون كان كيكون معاك فاش كتمرض
جبل:*بابتسامة* كنبقى مع راسي حتى كنبرا كح كح او لا كيجي عندي يعقوب كح كح
نورسين: واش ما عندكش شي دوا قريب كتشربوا
جبل: توتو ما كنشرب والو ما كيعجنيش دوا
نورسين جاها بحال شي وليد صغير فهاد لحظة ابتاسمت ليه و قربات و حطات يديها على شعرو و كتهدر بحنان و بلطف بحال شي أم خايف على ولدها
نورسين: ولكن ضروري خاصك تشرب دوا باش تبرا بعض الاشياء فحياتنا واخا مرة و ما كنحملوهاش خاصنا نديروها حيت هي اللي غادي تشافينا ياك
جبل حس بيها بدات كتنضج ما بقاتش نورسين اللي عرفها نهار اللول ولات بشخصية أخرى مغايرة ما بقاتش نورسين الخجولة اللي غير حانية راسها ما بقاتش نورسين اللي غير ساكتة و الا هدرات كتلوح الهدرة بالغرام ولات وحدة أخرى حس بيها فتحاتلو قلبها و بدات كتقرب منو شوية بشوية حس بيديها فوق شعرو وو بدا كيبتسم ما كرهش يقولها دوا ديالي هو تنعس بجنبو و يعنقها و يشم ريحتها حيت أكيد غادي يبرا من الرواح و غادي يبرا من ألم قلبو اللي كيشعر بيه من عشرين عام بقا غير ساهي فيها و كيشوف كيفاش كتعاملو و كيفاش ولات قريبة ليه حاس بدنيا عاد ولات كتضحك ليه عاد ولا عايش عاد ولا كيتنفس كيف عباد الله قبل نورسين كان ميت
جبل: انا داتي ما متعوداش على الدوا حيت ما كيديرلي والو انا من ديما كنت كنمرض و كنبقا بوحدي ولكن ما تخافيش عليا دغيا كنبرا كح كح * كيمسح نيفو بكلينيكس ولا حمر * حتى نتي سيري تاكلي ياك و نعسي ارتاحي ما تبقايش معايا فالبيت غادي نعاديك أنورسين كح كح ما باغيكش تمرضي بسبابي كح كح سمعي لهدرتي الله يرضي عليك
نورسين ضرها قلبها على حالتو ما عمرها شافتو ضعيف بحال هاكا ديما ولفاتو قوي و هو اللي كيساندها و يدعمها منو كتستمد قوتها شافت فيه لقاتو مغمض عينو و ناعس ونيفو أحمر ووجهو عيان و شعر طايح لو على راسو
خرجات نورسين من البيت و هبطات مشات الكوزينة طلبات من منال تصوبلها كاس د الليمون و تطلعو ليها لبيت جبل و رجعات طلعات لعندو و تحنات على ركابيها و هزاتلو يدو شبكاتها مع يدها و حطات خدها عليها و كتشوف فيه بحزن و دموع من عينيها هابطين هي من نوع اللي دغيا كتأثر و كيبقا فيها الواحد ولكن جبل ماشي أي واحد جبل هو اول واحد بغاتو بهاد شكل الجنوني اما كمال فكان غير مجرد إعجاب مع جبل عاشت شحال من حاجة عمرها كانت كتظن بلي غادي يجي نهار اللي غادي تعيشها فيه جبل هو اول واحد سرق قلبها منها ما قدراتش تشوفو ضعيف بهاد شكل سمعات دقان فالباب و مشات حلات لقات منال اللي كتدق عطاتها كاس د العصير د الليمون و مشات
دخلات نورسين لعند جبل لقاتو كيكح جلسات فالناموسية و حطات يديها على جبهتو لقات الحرارة نزلاتلو شوية عاد ارتاحت
جبل حل عينو و شافها جالسة فوق من راسو و هي طيح ليه فكرة فراسو واخا مريض دماغو ديما كيفكر فتحراميات عاود غمض عينو و كحز راسو و حطو على حجرها بحال شي طفل مع ماماه نورسين بقات غير كتشوف ما فهماتش شنو هادشي
نورسين : جبل
جبل: امم
نورسين: نوض تشرب هاد الكاس د الليمون باش تبرا
جبل: *بصوت متقطع* ماا قادرش
نوض انا نشربو ليك كيحرك راسو فوق من أحضانها كيف شي طفل
جبل: ما بغيتيش
نورسين: نوض انا نشربو ليك عفاك ديرلي خاطري
ناض جبل غير بشوية حال عين وساد عين
نورسين هزات كاس د الليمون و بدات تشربولو ودارت يديها من مور راسو ما كرهش يطول فهاد المرض باش يبقا بين أحضان ملاكو طاهر هادي هي أروع مرضة جاتو فحياتو زادت قرباتومن نورسين سارقة قلبو
كمل داك الكاس فاش بغات نورسين تنوض تكا لها من فوق حجرها بسرعة بحال كيتسابق معاها
نورسين ترجمات تصرفو غير حيت مريض و ما عمر شي حد.حن فيه و قابلو داكشي علاش كايتفشش عليها بهاد الشكل بقات كضحك على تصرف ديالو و حطات داك الكاس من فوق الكوافوز و حطات يديها من فوق شعرو كتلعب فيه وهو كيبتاسم مع كل لمسة كتلمس بيها شعرو ما عمرو ما حمل يمرض اول مرة كيتمنى يبقا مريض العمر كامل الا كانت غادي تبقا تعامل معاه بحال هاكا هاد المرضة أكداتلو قلب نورسين شحال حنين و شحال كتبغيه وشحال كتعزو ولكن فاش تفكر بلي غادي يقدر يعاديها برواح كره راسو لكن ما عندو مايدير بغاها تبقا معاه و كيطلب الله فنفسو يحميها شحال كان محتاج لهاد الحضن الدافئ هو بين يديها كينسا العالم و تعب ديالو و المعاناة اللي عاش هي الجنة ديالو
♤♤♤♤♤♤
اشتهي ان اضمك بين احضاني
و ان اوْدعْ روحي بين احضانك
دعني اتنفسك
دعني اغفي على اكتافك
دعني اكون طفلاً في احشائك
طفلاً لا يولدُ بعد تسعة شهور
طفلاً يبقى عالقاً داخلك
طفلاً لا يفارقك
يزعجك حتى في غفواتك
اريدك ان تصبح وطني
اريدك ان تكون منزلي
اريدك ان تكون سريري
اريدكُ ان تكون وسادتي
اريدكُ ان تكون حتى داخل احلامي
فعيناي لا تشبع منك
ماذا افعلُ ..
و كيف اطفئُ هذا الاشتياق
♤♤♤♤♤♤♤
نورسين حسات بجبل نعس وقداتو فبلاصتو و تكات حداها و حطات يديها على و جهو و بقات تلعب ليه فشفارو و حطات يديها على جبهتو لقات الحرارة نزلات و نعس براحة حتى هي غمضات عينيها و غفات بجنبو
🌤🌤🌤 أصبح يوم جديد
كانت نورسين ناعسة بكل راحة حتى حسات بشي حاجة كتهرها فوجهها ناضت طافجة و مخلوعة و كضرب وجهها كيصحابلها شي حشرة فوق منو
جبل كان حاني على ركابيه و هاز واحد ريشة كان كيلعب بيها على وجهها باش تفيق و كيحشيها فودنيها حتى تخلعات
نورسين:*كتفوه* جبل
جبل: صباح الخير الكسولة
نورسين شدات على راسها و شافت فيه مازال دايخة بنعاس و شعرها شاد ريزويات وعينيها معمشين
نورسين:*ضربات على خدها * اويلي ما علمتينيش فوقاش غادي ندخل و انا ما عارفة والو
جبل:*شاف فساعتو* غادي دخلي مع العشرة هادي التسعود خاصك تنوضي توجدي راسك و تفطري باش نديك
نورسين: ولكن زربتي عليا *بقات كتضحك و دوزات يديها على شعرها* عرفتي ما متيقاش بلي غادي نرجع نقرا حاسة بحال نفس الاحساس اللي حسيت بيه فاش دخلت الابتدائي
جبل:* بابتسامة* بقا خاصك غير اللوحة و شكيكرة د باربي و الكرينات
نورسين حطات يديها على فمها و جلسات كتضحك
جبل:*حيد ليها يديها على فمها* ما تبقايش تحطي يديك على فمك ما تخفيش الابتسامة البريئة ديالك
ناض جبل من حداها و عطاها بضهر وقال
جبل: كنتسناك لتحت
ناضت نورسين من فوق الناموسية و خرجات من بيتو وعاد تفكرات بلي ليلة كلها و هي ناعسة حداه ضربات على فخادها
نورسين: اويلي على شوهتي دابا انا ليلة كاملة و انا ناعسة حداه ما حشمتيش أنورسين * ابتاسمت* الله الحبيب ديالي جبيلو ما جاش معاه المرض اجي علاش ما شكرنيش علاش زعما ما عطاش قيمة لداكشي اللي درت على ودو بحال كيسالهالي اووف
هبطات فدروج دخلات لبيتها و دوشات بالخف و دهنات شي كريمات لقاهم تماك واخا دارت الكريمات د الوجه ليدين و الكريمات د اليدين لوجه لبسات تيشورت فالبيض مع سروال ديال دجين مزير وزادت من فوق منو جاكيط بحال ديال العسكر و دارت عليها الكاسيكط جات كيوووووت بزاف و لبسات واحد الصباط ديال طالون فالمارون عالي
نورسين:اودي خايفة نمشي نجيب ربحة بهاد الصباط غير الله يدير اللي الخير ديك سلمى باغا تخرج عليا فين ما شافت شي صباط قمقومو عالي تم جايباهلي
هبطات نورسين فدروج بتثاقل و صوت خطوات صباطها مالي المكان بصداعو جبل كان جالس كيشرب القهوة و حاط حداه بواطة صغيرة كيساينها تهبط
وصلات لعندو و شافت فيه
نورسين: غادي نتعطلو خاصنا نمشيو دابا
جبل هز راسو و شاف فيها و بقا مبهور بجمالها اللي كتزيد تزيان نهار على نهار ممكن حيت سعادة اللي ولات عايشة فيها مع جبل انعاكسات إيجابيا على وجهها اولا العشق و الحب اللي ولات كتحس بيه غيرها من لداخل ولا وجهها مبشور و غير كتضحك و لات عفوية معاه بزاف و تقربات منو شحال من مرة جبل عض على شنايفو و هو كيشوف فيها باعجاب ما كرهش يقولها تجلس و يدير بناقص من شي معهد و من شي زمر رغم انها ملكو كيخاف يجي شي نهار تبعد عليه عندو عقدة من الفراق ناس اللي كيبغي ديما كيمشيو من قدامو ونورسين الا مشات حتى بعدات عليه يحماق اولا ينتحر حين الواحد ما كيقدرش يعيش بلا اوكسجين و نورسين هي الاوكسجين ديالو
نورسين: واش باغي تخرج عليا من اول نهار نصدق مغيبة اش غادي يقولو عليا
جبل:*بابتسامة* كسولة
نورسين:*كتضحك*وادابا شنو ما غاديش نوضو
جبل: ما غادي تخرجي من داك الباب حتى تفطري
نورسين مشات جلسات من فوق الطابلة ضربات كاس د العصير د الليمون فريش مع الفواكه و بتيبان و الفرماج و الكاشير و عركتها مزيان شي ربع ساعة و هي تحشي ففمها
جبل كان حاضيها بعينيه حتى سالت
نورسين شربات كاس د الما و زدحاتو فوق الطابلة
نورسين: يالاه
جبل:قلتك فطري ماشي تغداي
نورسين:*خنزرات فيه* كتبيع القرد و ضحك على اللي شراها
جبل وقف كيضحك و هز داك البواط حطها من فوق الطابلة
نورسين هزات راسها شافت فيه
نورسين: شنو هادشي
جبل: حلي و غادي تعرفي
نورسين حلات لبواط و شهقات جبدات خاتم ديال الالماس و منقوشة فيه سميتها بخط جميل و رائع
و عينيها دمعو بقوة الفرحة هزات راسها شافت فيه
جبل: هاد الخاتم ما نبغيكش تحيديه من يدك باش كلشي يعرفك مزوجة اللي قلل عليك الحيا فالمعهد و لا جرحك غير بكلمة صغيرة اجي عندي قوليهالي نبغيك تواعديني بلي اللي وقع ليك كيفما بغا يكون سوى حاجة صغيرة و لا كبيرة ما تخبيهاش عليا عفاك كنترجاك انورسين نتي امانة فرقبتي و ربي وصانا على الامانة واخا
حنا على ركابيه و خدا من عندها الخاتم وركبو ليها و ناض من الارض و عطاها بضهرو و نورسين كتبكي و تشهق معقول ربي عوضها بهاد الانسان باش تنسا داكشي اللي داز عليها معقول يكون هاد الانسان ملاك حيت ما عمرها فحياتها توقعات بلي غادي يجي نهار اللي غادي تحظى بهاد التعامل كامل و بهاد الرقي فتعامل كيف دير ما تبغيهش كيف دير ما تغيرش عليها من نسمة د الهو ا اللي كتلامسوا كتبكي و تشهق كتفكر الا جا شي نهارو تفرقات عليه تقدر تمشي فيها غيبوبة ولا تنتاحر ما بقاتش قادرة على فراقو قلبها تسد بقفل و المفتاح عند جبل بوحدو و مشى حتى وصل لباب و دار عندها
جبل: نسيت ما قلتلك شكرا على ليلة د البارح اللي قابلتيني فيها ما عمري نسا خيرك انا حياتي كلها و انا بوحدي و ما عمري تلقيت داك الاهتمام كامل شنو ما قلت ليك ما غاديش نوفيك حقك الوحيدة اللي كانت كتعاملني هاكاك هي المربية ديالي الله يرحمها اللي ماتت هادي عشرين عام ديما كنمرض و ما كلقا اللي يمدلي حتى كاس د الما شكرا اللي خليتيني نحس بلي عندي شي حد فجنبي اللي نقدر نعول عليه
نورسين:*كتنخصص بالبكا* انا درت الواجب ديالي داكشي ما يسوا والو قدام داكشي اللي ديما كدير معايا نتا اللي هزتيني فاش لاحتني عائلتي اللي من لحمي و دمي شنوما درت ما غادي يوصل حتى لربع اللي دىتي معايا شكرا بزاف الا على الخاتم اللي عجبني بزااااااف و كنواعدك ما غادي نحيدو من يدي غير الا تفارقنا حيت كيبقا زواجنا مزور *كتهظر بغصة فحلقها و مخنوقة بزاف*
جبل على إثر كلمة الفراق خرج و زدح الباب بجهد و خرج حاس براسو مخنوق حاس بدموع واقفين على طرف عينو حاس بلي روح غادي تزهق منو أكثر كلمة ما كيحملهاش و معقد منها علاش ديما خاصو تفكرو فيها و تزيد على مابيه
خرجات نورسين كتجري عندو كتمسح دموعها لقاتو طلع فالفيراري ديالو و طار مادارش وراه طاحت لارض كتبكي علاش ديما كيتهرب منها و كيمشي ديما بلا ما يحاول يفسر ليها أكثر قاعدة ما كتحملهاش فيه علاش واش يقدر يجي نهار اللي يغبر بلا حتى شي تفسير هادو هما الافكار اللي كيطيحوا لها فبالها بقات كتحرك راسها يمين و شمال و كتردد بصوت همس
نورسين: ما عمرو ما غادي يتخلا عليا انا متأكدة واخا نعيش عبدة تحت رجلو اهئ اهئ ما نقدرش يبعد عليا * كتخرك راسها يمين شمال و كتبكي بكل حرقة*
حسات بشي حد واقف عليها بالطوموبيل مع عينيها تضببوا بدموع بدات كتمسحهوم بيديها باش توضاح ليها رؤية شافت طوموبيل ديالها اللي هي رانج روفر اللي عطالها جبل شافت جبل واقف من فوق و مادلها يدو باش تنوض من الارض
جبل: علاش كتبكي أنورسين واش دموعك على سبة
جبد واحد القرعة د الما من طوموبيلتو و نوضها و بدا كيغسلها وجهها برفق وهي مهبطة عينيها ما كتشوفش فيه غضبانة منو
جبل: دابا نتي كسولة وزيد عليها حتى بكاية
هزات نورسين عينيها شافت فيه و ابتاسمت بقا كيشوف فيها مدة و رد ليها شعرها مور ودنيها بيديها
جبل: علاش كاتبكي
نورسين:*كتهدر و ما زال فيها الشهقة د البكا* حيت يصحابلي غادي تمشي و تخليني هنا بوحدي ما كاين حتى لي يديني لمدرسة حيت شفتك غادي طاير بطوموبيلتك
جبل: اوا شفتي كتظلميني دابا انا ديت طوموبيل لكراج و جبت طوموبيلتك باش نشوفو ركبة فيها كيف دايرة ما عوالش تسوقيها
نورسين:*بحماس *فوقاش غادي تعلمني
جبل: فوقتما بغيتي انا هنا باش نعلمك و تبقاي تمشي لمعهد بطوموبيلتك راسك ما بقيتيش مقلقة دابا ياك
نورسين حركات راسها بنفي
نورسين:لا
جبل ضربها لنيفها و قال
جبل:واش كاين شي حد كايخلي بنتو تمشي لنهار الاول د المدرسة و يسمح فيها و يخليها تمشي بوحدها شفتك كاع ما درتي الكرينات و فينا هي شكارة ديال باربي
نورسين بقات غير كتضحك و كتشوف فيه و قلبها غادي يطير بالفرحة حيت رجع عندها و مامشاش كيفما كانت كتظن
♤♤♤♤
تزوجي رجلا يحترم عقلك يعاملك بطيبة
يحارب لاجل أحلامك رجلا تكونين معه
على طبيعتك رجلا تشعرين معه بحنان والدك وخوف أخيك عليكِ💘💘💘
♤♤♤♤
حلها الباب و طلعات و مشا هو لمكان السياقة و شد طريق لمعهد اللي ما عرفاتش نورسين شنو كيتسناها فيه حطات راسها على زاجة و بقات ساهية كتخمم
جبل: نورسين مالك ساهية واش خايف من اول نهار عندك فالمعهد
نورسين قادات الجلسة
نورسين:لا بالعكس انا فرحانة بزاف و اخيرا الحلم اللي من زمان وانا نحلم بيه هاهو غادي يتحقق دابا إنشاء الله اروع احساس كاتحس بيه هو منين كتبدا تقرب من الاهداف اللي حاط فدماغك و فاش كتشوف راسك راك غادي فطريق صحيح نتمنى نبدع فهاد المجال و نعطي فيه
جبل: انشاء الله انا ثايق فيك و عارفك فنانة غادي تكوني أمهر مايكاب أرتيست فالعالم و غادي تحققي اي حاجة كنت باغاها غير ثيقي فالله و فنفسك و ما غايكون غي الخير
نورسين ساهية فيه و كتقارن جبل مع الرجال اللي عندهم فالعائلة فرق كبيرو وشااسع هي كان عند بالها بلي راجل المغربي ما عمرو ما غادي يكون كيدعم المرأة عمرها توقعات شي راجل غادي تكون عندو بحال العقلية ديال جبل انسان اللي لقات فيه الدعم اللي مالقاتوش فاقرب الناس ليها شحال من مرة كايكون خاص غير اللي يشجعك و يقولك كلمة د الخير و كتحس بواحد الحماس رهيب لداخل ديالك كتحس براسها هي محظوظة اللي طاحت فشخص بحال جبل و ليها شرف ان قلبها يبغي شي حد بحالو حيت شخص بحالو نادر و كتسائل اشمن خير دارت فحباتها باش ربي حطوا فطريقها
نورسين:ممكن نسولك
جبل: تفضلي
نورسين: نتا شنو هي المهنة ديالك
جبل: انا قريت تصميم الساعات اليدوية عندي شركة الاصلية فاسبانيا و الفروع ديالها فالمغرب و فتركيا
نورسين:والاوطيل و المطعم
جبل :*شاف فيها و ضحك* كتحسبيلي ممتلكاتي
نورسين: تبارك الله حجاب الله شافك ربي و ملوكو ماشافك العبد مشرط حنوكو انا غير ضرني راسي و بغيت نعرف اللهم لا حسد
جبل: هادوك ديال الواليدة الله يرحمها
نورسين: *باسف * الله يرحمها و يوسع عليها عندك شي تصويرة ديالها بغيت نشوفها
جبل حبس اللوطو حدا المعهد
جبل: وصلنا
نورسين دورات وجهها و شافت المدرسة اللي غادي تقرا فيها بقات غير مصدومة كبيرة بزاف ما عمرها توقعات بلي غادي يكون شي معهد ديال ميكايب و وداير بحال هاد الستيل دورات و جهها لقات غير طوموبيلات ديال الفريع اللي واقفين حدا المعهد و البنات خارجين من طوموبيلات كيقطروا بالماكياج ولباس غير د الفريع بانلها هاد القوم فشي شكل
جبل هبط حل ليها الطوموبيل وخرجات بقات غير حالة فمها كيفما العادة و كترمش بعويناتها
نورسين: بشاااخ واش متاكد بلي هاد المعهد كاين فالمغرب
جبل: هاد المعهد تابع لامريكا كيجيبو اساتد من لاميريك كيقريوك هنا المايكاب لمدة 2ans كتخرجي ميكاب أرتيست الديبلوم اللي كتشديه بامكانك تمشي لاي بلاصة خارج المغرب تخدمي بيه
نورسين: واو كنظن خاصني ندخل فوقاش غادي تجي من مورايا
جبل:عندي شي شغل ما يصلاحليش نجي غادي نصيفطلك الشيفور هو اللي غادي يجي موراك جبتي تيليفونك
حركات نورسين راسها بنفي
جبل:*دوز يدو على شعرو بالفقصة* نورسين كنترجاك تيليفونك عمرك تخليه فدار ديما جيبيه معاك الا قدر الله ووقعاتلك شي حاجة *تعصب* المهم اخر مرة تيليفونك ديما يكون معاك الله يرضي عليك
نورسين: واخا
جبل : تهلاي فراسك و قراي مزيان أ الكسولة * جرلها حنكها و مشا طلع فطوموبيلتو و دارلها بيدو باي باي 👋👋👋 وقلع *
مشات نورسين دخلات لمعهد ما عارفة فين تمشي غير غادة لقات لي ليسيط فالباب مقيدين عليهم الاسماء و لاصال ديال كل واحد بقات تتقلب على سميتها حتى لقاتها مع رقم ديال لاصال اللي غادي تقرا فيه بقات غادة كتسول حتى لقاتها و دخلات ما لقات حتى واحد من غير واحد الوالد جالس لور و راد راسو على الحيط و عندو شعر طويل شوية و يديه عامرين خواتم و باينة فيه كيلي ميني
نورسين: سلام
بقا كيشوف فيها و هي كتشوف فيه جاها غريب و هزلها يديها زعما قربي
نورسين بقات غير مستغربة منو مشات وقفات حداه
-جلسي حدايا ما كنعضش واقيلة
جلسات نورسين حداه و بقا كيشوف فيها شوية و هو ينوض يضرب على طبلة و كيغني
- وفين غادية فهاد الليل غادة لدارنا و فين غادية فهاد ليل غادة لدارنا شكون قلقك أ الحبيبة قلقاتني ختك قللات عليا العفة شكون قلقك أ الكبيدة قلقاتني ختك قللات عليا العفة مك لا يعمرها دار ما تظي ما تجيب هدرة ختك هي اللي مشرباني المرار العفو منها لا اله الا الله واش لوسة و لا ضرة صلى وسلام على رسوله زغرتوا يا العيلات 💃💃💃
نورسين تخلعات مسكينة جاها بحال حمق شوية حطات يديها على قلبها و كتقول اشداني نجي لشي معهد كن غير بقيت جالسة على قاعي ولا و جهها صفر و داتها كترعد و هي عندها الفوبيا من الحماق بدات كتدعي الله فنفسها يفكها منو بغات تنوض من حداه و هو يشدها فيديها
-جلسي فين باغا تنوضي ياكما ما عجباتكش الاغنية
نورسين: لا اخويا غزالة بحال وجهك غير خليني نمشي بحالي الله يرحملك الواليدين
- واسمعي غير هاد المقطع وسيري
نورسين: ووواخا
- هي بغات بزطامو و هي بغات سلهامو و انا بغيت محبوبي اللي نشطح قدامو ليل يا ليل لووووولووووي تبارك الله عليكوم أ العيالات
نورسين:واش أ خويا نتا مريض ياكما ما شاربش دواك
-*مد ليها يديه* تقادالي يا ختي دوايا غير صبري معايا *طلق ليها يديه * انا ربيع عندك عرس ختانة سبوع عيد ميلاد خوك ربيع فدمة ما تخميميش ما تديش عليا قنطت و جاني الملل و بغينا نشطوك شوية نتي زينك زين مسرار ولكن ما عندك الزهر لا مع نسا لا مع رجال و انا شريف مجدوب ما كنعرفش الكدوب قاري سبعة كوتوب اري الفتوح نقولك شنو ضارك فقلبك الدرهم كيدوز و دولار كيدوز و ريال كيدوز سعودي ماشي مغربي ديري نيتك و باتي مع الحية وفتحي قلبك ليا
نورسين غير كتشوف فيه ضحكها بهدرتو ما لقات ما تقولو فنفس الاثناء بداو كيدخلو البنات و الدراري اللي غادي يقراو معاها القاعة عمرات شوية دخل الاستاد ديالهم و هي دور نورسين راسها شافتو وهي تشهق شهقة وحدة بقات غير مصدومة
جبل نورسين الجزء التاسع
محتوى القصة
التنقل بين الأجزاء