رودينة ~ لا والله تاهادي ماعاندا غاراض بهاد الراجل ..
وسناء ~ " تاقربات للباب وهي دور " هههههه عاد عرافتيها لايصحابليك يانا مشتااقة فهااد زواااج لا يا الحبيييبة دقاالبيي غاخودو لابغيتي ...
ومشات كملات خطواتها تعشات على خاطرها أما البنات بقاو تما عاسين على التيليفون حتا من رودينة غادي تبات تما داك النهار ..
ݣلسات حتى كلات على خاطرها وكتسمع فباها وعمتها ومها كيجمعو هي منساحبة من الموضوع ديالهوم غير كتاكل وساكتة كانو كيهضرو على الورث والأراضي ديال باها لي فجبل وعلى شحال ديال الغلة ديال الزيتون كانت هاد العام وواحد عمهوم لي كيسرق الربع فالغلة كل عام .. وكيدرها فجيبو عاد كيفرق بحكم العائلة مفرقة أحمد كاين فطنجة هو وخوه .. وجوج كاينين فتطوان .. عاد خواتاتو كاينة عايشة لي كاتبقا بين الجبل وطنجة كل مرة فين هي بحكم هي الكبيرة ديال الدار وكيعتابروها هي الحكيمة ومولات الراي والشوار بللى مهوم لي كاينة فالجبل هي لي ساكنة مع عمهوم فبني عروس .. هي لي كتخليهوم يبقاو ساكتين فينما يهضرو تقوليهوم داك الحق كاناكل منو تانا .. وكتربط ليهوم يديهوم، ولكن شحال قدهوم يسكتو الأراضي عندهوم لي يتحرق مايتم فالجبل .. وخوهوم واخدليهوم واحد القطعة كيدير فيها الحشيش نهار إيحصل غايمشيو فيها كاملين بهم بحكم الأرض ديال الورثة ومزال ماتقسمات .. وزيد عليهوم المزاريع ديال الزيتون والدار ديال باهوم لي كاينة تما كون جاو إقسمو كون راهوم بيخير.. ولكن كولشي مستافد منو غير خوهوم لي مور عايشة لي فبني عروس أما هوما ملهيين غير مع حياتهوم فالمدينة .
دخلات لقات زينب ورودينة كيعاودو على ليوم وعلى فاطمة الزهراء وخديجة، مشات لبسات بيجامة باش غاتنعس شورط حد الركبة فالأسود واسع، مع دوني فالأبيض وحيدات حمّالات السدر باش تبقا مرتاحة رجعات لوات شعرها كعكة عاد مشات ݣلسات حداهوم هزات تيليفونها كتقلب فيه لقات رودينة مسحات ليها كولشي، وباها بدل ليها النمرة، تنهدات نافخة الهوى من فمها ..
وسناء ~ شكون قاالكوم تبدلولي النمرة ..
رودينة ~ قولا لباباك هوا لي بدلا ياكما باغا تعاياط لحبيبش ديااالك ..
عثمان ~ مهيم أبنت الناس عارفة بلي حنا مقبلين على علاقة زواج .. وعلى عقد قران .. الواليدة ختارتك ومدام شافتك البنت المناسبة لي غادي تكملي معايا أنا تايق فالإختيار ديالها، باش نحطو كولشي من اللول أنا مزوج جوج، اللولة مرات خويا الله إرحمو ونهار مات خلى ليها الولد باقي صغير تزوجتها باش ماضيعش، وعندي المرا الثانية، بيني وبينها دابا عاماين ديال الزواج، وإلى كتاب غاتكوني نتي الثالثة، ٱلى كان عندك أي إعتراض أو شي موشكيل قوليه ماحدنا باقين مادرنا والو، وأنا ماعنديش موشكيل حيت هادا من حقك ..
وسناء ~ " بقات غير مبلقة عينيها وكتسمع كيفاش جاها نيشان وبلى داك الدوران والخروج ودخول فالهضرا مالقات باش تجاوب تقادات فالݣلسة مزيرة على يديها حيت أكيد غايقول فراسو هادي خاسها غير تلاوح وأي بنت ماتقبلش براسها تكون الثالثة " نتينا عارف ماكيناشي شي بنت تبغي تكون الثالثة !! وتدخوول لدار رااجلا ذاارة بااعد ماكانت كاتحلاام دخول اللولة لداارو ؟؟ ..
عثمان ~ " بقا كيسمع بهدوء لصوتها الأنوثي وهدرتها الملحنة الحلوة جاتو ماشي كيف أي بنت عرفها من قبل " عارف .. وداكشي لاش سولتك واش قابلة بهاد الزواج !؟ ..
دقيقة صمت ورودينة كتحرك راسها بلا عنداك عنداك تخربيقها، ماحملاتش راسها فهاد اللحضة، أول مرة تحس براسها رخيصة تالهاد الدرجة، علاش زعما هي بالضبط، كل ماطلبات تكون براجل ديالها بوووحدها دخل لداارو معززة ومكرمة وٱمييرة فداارو، ماشي دخل على الذريرات، ماشي دخول عند راجل مشروك، راجل مايقدرش يقنع بيها بوحدها، واخا يبغي يبغيها ولكن خاسو يكون معا عيالاتو لوخرين هاداك حقهوم تاهوما، هاد الفكرة غاتحمقها غادي تجننها، وخصوصا مين شافتو وسمعات صوتو، كيفاش غادي تصبر تشوف وحدا خرة كيعاملها كيف كايعاملها هي، أكيد من مور مدة ديال الوقت غادي تولي كاتبغيه، هادي حاجة أكيدة، وهي عارفة حبها أناااني بزااف، وكرامتها ناافخة بزاااف، ومااشي شيي وحدة سوييهلة، ولاحطات عينيها على شي حاجة ماكاتمشي تاكاتديها فيديها، كيغادير تقبل، وهادا أبشع موقف حكوها فيه واليديها، ماكانتش كتضن شي مرة غايوقليها بحال هاكا، ماشي لاحوها ولاكن هانوها، حيت فكل الأحوال غاتمشي بشان والعز وبالعرس والخطبة والملاك كأي بنت مغربية، ولكن فكرة أنها غادخل على عيالاتو فالدار هاديك فين بقات، ومنهنا للقدام متأكدة بلي غاتواي سميتها خطافت الرجال، والمجتمع ماكيرحمش، وأي حاجة لقاوها كيشدو عليها ومكيحسوش ولا كيعرفو بنادم مناش داز ..
وسناء خرجات يديها من تحت ليزار وعطاتليها الصبع ورجعاتو معاها فوسط الغطا ..
زينب ~ والله لابقات فوالديك ..
صباح جديد فاقت لالة العروسة تالوحدة ناضت كتكسل شافت فتيليفونها باقي مطفي خلاتو هاكاك .. وناضت لطواليط قضات حاجتها وغسلات وجها عاد خرجات باش تفطر لقاتهوم مجموعين فالكوزينة وكيتعاودو على شغايديرو فالملاك ( الخطوبة ) دخلات نيشان لثلاجة جبدات منها قرعة دالما وكتسمع لحديثهوم كانت حبيبة كتقول بلي خسها تعيط لهادوك لي عيطوليها باش طيب فعرسهوم تلغي المواعيد واخا صعيبة حيت مين كيكون عند شي واحد العرس وكيعول على شي حد وكيخوي بيه كاطلعلو الفقصة وكاطيح من قيمتو .. هي كانت دايرا الحساب غير بالعرس درودينة ماكانتش ضاربا الزواج دالغفلة لي جابتليها وسناء ..
رودينة ~ دابا شني غاتعمل فالعورس دغادا ...
حبيبة ~ لا هاداك غانمشيلو ديال واحد المحامية وكاتكون مزررة القادية، غانمشي هاد العشية باش نسالي دجاج وغدا نمشي بكري باش يالاه يقدني الوقت كيف ديما ..
حبيبة ~ " لحسات صبعها ومسحاتو فالرخامة دالكوزينة " لافتي باب الدار وشمييليياا وماانتسمااش ياااانا حبيييبة لي دبح علياا الوااليد الظرووبة ..
رودينة ~ أواااااااعدي واااش بديييتو عااااود ..
دخلات لبيتها معصبة، ردخات الباب وتكات فبلاصتها، هزات تيليفونها شعلاتو مالقات حتا أپيل من عند عثمان عوجات شفايفها مغزفة على الأقل إقول ليها صباح الخير فميساج زعما راه خطيبها، قلبات عينيها .. ورجعات دخلات كتقلب فݣوݣل على المشاطي ديال العرايس والميكاب وعلى زيانات، بقات غادا فحلم وبدا نوعا ما بدا كيعجبها راسها أنها غاتولي محط الانظار والإهتمام ...
تغداو مجموعين وهاد المرة كان حتا راجل زدينة نور الدين معاهوم ... وٱخيرا حضاو بجو مرح من مور أيام عاشوها كيالزفت ...
مشات حبيبة لعند العرس لي غادي تطيبلو غدا كاتصايب ليهوم الدجاج بليلة قبل .. بقات عايشة وزينب ووسناء فالدار أما رودينة مشات مع راجلها ...
زيينب ~ " ݣالسين فصالون مع جوايه المغرب عايشة شاداليهوم سامحين قتلاتهوم بيه وهوما شادين على خذهوم وغير متبعين الأحداث وخا كارهين راهوم " دابا فيناهي داك خيتي لي كانو كيعيطوليها منار ..
تعصبات وسناء وناضت من حداها تبعاتها زينب ودخلولبيت كيختارو ويتشاورو على الثمن حلفات وسناء تاتخرجها من مها، على دوك الغدايد ديال الزواج لي فيها ياك هوما لي باغين إزوجوها إيوا يتحملو الغلا ديالها ...
صباح جديد فيقات زينب وسناء بكري مع 10 ( للعلم هنايا فالشمال بالنسبة ليهوم 10 راه النبوري ههه ) اليوم غادي إخرجو مع مو وختو باش إشريوليها الحوايج، ناضت بشوية عليها كتكسل وكتفشش على خاطرها مشات فطرات تحت نݣير ديال زينب كتوصي فيها أما حبيبة تهنات منها مشات مع الصباح بكري لعند دار العرس هادا حالها مين كتكون خدامة فشي مناسبة فيها الغدا، هي هاديك فطرو وخلات روينة لزينب مسكينة ماهية يديها مايقيسوش الما من غير لاكانو شي شهيوات مرحبا .. مشات لبيتها لبساتليك سروال دجين فالأزرق مع تريكو فالأحمر مشبك من اليدين وخفيف توب صيفي خشات القدام فالسروال وخلات لوراني برا طلقات شعرها سرحاتو، وخلاتو طويل واصل للخصر، دارت باندا فالأحمر جاتها أصوغتي وبينات برائتها وأنوثتها بيها، طوات لتحتاني دالسروال ولبسات سبادري فالأبيض وهزات ساك جا طوييل بالسنسلة ديالو مذهبة فالأبيض جات فنة فنة .. وحلوة .. خلات وجها طبيعي كتافات فقط ببودر إحمرار لحنيكاتها، ورشات الريحة لي كتحمقها j'adore طبعا من عند زينب، عاد خرجات عندها حيت الأخرى كانت سالات وسبقاتها, لي كانت لابسة سروال فالأسود مع بيل نص كوم فالغوز بيبي ستايل ديالو راقي وزوين وسندالة عالية فالغوز بيبي وجمعات نص شعرها وخلات لتحتاني مطلوق، مع ميكاب خفيف أصوغتي مع اللبسة تاهية جات فزالة وعاطية العين، خرجو بجوج من الدار بعد ما علمو عايشة، ومشاو من بين الحومة ووسناء معلية خنافرها غادا بشوية وبكل رقة بحالي كتمشى على أنامل صباع رجليها، فداكشي ديال البروتوكول ماتخافش عليها وقاضية الغراض وزيادة ...
شدو طاكسي لسيتي مول تما فين دارو غادي يطلاقاو مع لالة ياقوت وفاطمة الزهراء، كيف وصلو لتما ونولهوم الطاكسي بانوليهوم واقفين فالدخلة ديال المول كيبتاسمو ليهوم، مشاو متاجهين لناحية دياله م، إبوا بداو فالصواب والتسلام وياقوت فرحانة بلي غاتكون مرات ولدها وماقاداها فرحة بزينها وتاويليها ورزانتها ( غابلاتي اخالتي ياقوت صبري عليها )، ياقوت وفاطمة الزهراء عاد المرا كانو مختارين الستايل التركي، طبعا أناقتهوم المعتادة طاغية، دخلو للمول فجو من الضحك، وطبعا الحشمة ووسناء حناكها حومر وفنفس الوقت فرحانة بهاد الإهتمام وكأي بنت مين كتشوف كل الإهتمام توجه ليها راه كتولي طالبة المزيد ..
ديكشي لي كان بداو بالبوتيك ديال الملابس الداخلية والأشياء المتعلقة بالدوش الفاطي والپينوارات والباديلوشن دالحمامات، مع الدخلة بانليهوم خويݣو مجموع فيه كولشي پينوار وربعة ديال الفاطي من الكبيرة للصغيرة جاو فلون واحد الغوز بيبي طلبات ياقوت من المكلفة تجمعو ليهوم ورجعو شافو سلسلة نتشكلة من شوميز دونوي حريري فالأبيض، مع دوبياس ديالو للعروس فالأبيض، پانوطوفة وحتا من بوندو كيمشي معاهوم بالريش فالأبيض، خداوه وزادو معاه ربعة ديال لي دوبياس تحت إختيار وسناء كل واحد ولونو وشكل ديالو، وتقول واش حشمات كاتختار
لي بغات وبعناية، خرجو من تم ومشاو لبلاصة الماكياج والمنتوجات التجميلية، خداوليها بواط مشكل من كولشي ديال الدهاز لي ديما كيجيبوها، ماقدراتش طلب المزيد واخا عينيها فبزاف دالحوايج وكانت كتسنا فوقاش تزوج باش ديرهوم ودابا شراوليها غير البواطة، دارت عين ميكة وخدات باديلوشن وجيل دالوجه وصابونية ديالو مهيم خدات مجموعة وحدة متكونة من منتوجات لي كيتحتاج فالدوش، كل مرة من دايزين وكيقلبو وكل واحد كيعطي الرأي ديالو وهادشي لي ماكاتحملوش وسناء وكيعجبها تركز وتاخد الحاجة لي باغا هي بلى مايفرع ليها شي حد مخها، مي دارت الصبر وعارفة بلي ماشي هو باش غادي تكتافي مازال عاد غايجي الوقت فين غاتشري الحوايج لي كيخسها، خرجو من تم كلها وشنو هاز فيديو من بلاستيكات تاكتبعد عليهوم وكتهضر بقات واقفة زينب ووسناء وفاطمة الزهراء مجمعين ..
فاطمة الزهراء ~ مين قاتلي ماما لقات بنت لمرات خويا من الشمال مايصحابليش غاتكوني غزالة تالهاد الدرجة ههه ..
بقات زينب كتقرص فيها من اللور وهي كاتضاهر أنها كضحك ..
فاطمة الزهراء ~ ولاهيلا نشاء الله تسعدي مع خويا ..
وسناء ~ " من فوق القلب " إنشااااء الله " شوية دورات عينيها كانت ياقوت باقي كاتهضر فتيليفون " مم فااااطنة زووهرا كييف عاامليين هااد مرااواات خااك !!؟ ..
فاطمة الزهراء ~ شغادي نقوليك الغزالة كاينة منال هي قدي وهي مرات خويا خالد " حنات راسها لوهلة بحزن ورجعات طلعاتو " الله إرحمو مات وخلالينا مراتو وولدو لي يالاه فعمرو عام وشهراين إيوا صافي بابا قال لسيدي عثمان يتزوجها حيت هو لي كان عزري أما خوتي لخرين مزوجين والتني باقي صغير .. ولكن كان زواج غير فالوراق سيدي عثمان كيحتارمها وكيعتابرها مرات خوه لي خلا أمانة، ومن مور عام تزوج عبير شغادي نقوليك الصراحة بيني وبينك كيقولو زوينة مي هي كولها ماكياج وداك ليلونتي ماكيتحيدوش من عينيها فعمرها واقيلة شي 27 مها خاليجية وباها مغربي هي وسيدي عثمان مشاركين فشي مشروع تما ففاس كان شافها وعجباتو وتزوجو ولكن ماصدقاتش كيف بغات نهار ومطال حاضيا غير راسها وعاجبها غير راسها، ولكن ماعرفتش المشاكيل لي وقعو بيناتهوم، تاقال لماما باش تشوفلو شي بنت ..إيوا .. قاطعاتهوم ياقوت ..
ياقوت ~ بنتي وسناء هاكي عثمان بغا يهضر معاك !! ..
وسناء ~ " كانت مركزة مع كلام فاطمة الزهراء تادهشات بالهضرة دياقوت بحكم البارح كان كيصوني فليل وخلاتو بلاكة ماجاوباتوش " هاا اا ..
بغات وسناء تقوليهوم على الخواتم ورجعات سكتات مدام مادكروش حسهوم إذن راه غايجيبوه على ذوقهوم ..
كملولي باقي وشرات وسناء جوج صبابط ديال العرايس واحد فالرهبي وواحد فالنقري عاالين وكيبريو معا لي بوشيط ديالهوم .. عاد خرجو من تم وهوما خارجين ودقات قلب وسناء كيتزادو .. خرجو من المول كان الجو باقي على خالو كيف لقاتو فالصباح الجو مغيم وبعض السحب مغطية السماء الصافية ..
كيف خرجات لهواء الطلق كاتبانليها BMW X7 فالبلو مارين مغموق واقفة فالشاريع وهو واقف عاطيهوم بضهرو، لابس سروال فالخزي مع تيشورت سانبل فالأبيض وصباط فالبوردو، يدو لي فيها ساعة بسميطة من الجلد فالأسود معاها ݣورميط خفيفة فالنقري شاد بيها تيليفون فالأسود كيهضر فيه ..
كلما قتاربو كلما زاد علا سدرها كياخد نفس أكثر ..
كتمعن فتفاصيلو الصغرة والكبرى، قبل مايضور بعد.نا أنهى المكالمة، ومكاتجي غي عينو فعينيها نيشان، حسات بنفسها تخطف فديك اللخضة وعينيه العسلين المايلين لزيتي كيتمعنو فعينيها المعسلين، حتا كيحولها لمو قرب بساليها يديها وحطها على حبهت بعد ما رضات عليه وهي غير ساهية فيه، لحيتو لي كتيفة شوية فالذقن ومطراسية على حنكو فالأسود لون بشرتو الأسمر، عينيه المشفرين الكوووحل زادوتو غمق وروجولة أكثر ...
دازت ياقوت ݣلسات فالكرسي الأمامي وفاطنة الزهراء كتكط الحوايج لي شراو أما هو فتقدم شوية وزينب تاهمية غير مبلقة سنيها فيه وكتقرص فوسناء من اللو مرداتها .. عكس وسناء لي حناكهارجعو متوردين وعينيها محلولين على جهدهوم تاولات مفارقاهزم مسافة قصيرة ..دار شاف فزينب مدليها يدو سلم عليها عاد داز لوسناء ، ماتخيلهاش تكون بهاد الزين، الشعر الطويل لي قايص المؤخرة ولون بشرتها الناصعة البياض، ووجها الطبيعي وكيبان جذاب بشفايفها المنتفخين، وشفرانها الطوال والكثاف، مدليها يدو وهبطات عينيها كتشوف فيديو عاد مداتلو أنامل صبيعاتها رقيوقين والبويض روكب حطاتهزم فيدو الصلبة والمشدودة بالعضلات ديالها ..
عثمان ~ دابا عاد خسني نقول متشرف بيك اولا لا !! ..
فتحليها الباب اللور ركبات وسد عليها وركب هو بلاصت الشيفور .. وديمارا ..
ياقوت ~ فين خليتي الحاج !؟ ..
عثمان ~ " مركز مع الطريق شاد الڤولون بيد واليد الأخرى فوق فخضو كيهضر بهدوء ومن طبعو ثقيييل فهضرتو " مين صلينا العصر تفارقنا خليتو وجيت لعندكوم ..
يياقوت & فاطمة الزهراء : الله إيتقبل ..
عثمان ~ ٱمين ..
وسناء بقات غير كضور فعويناتها، وكتسمع بوديناتها وساكتة قارمة على ساكها بين يديها، متعجبة لهاد قمة الإحترام لي كاينة بيناتهوم وحتا من فاطمة الزهراء رداتليها البال باش قبيلة كانت كتهضر عليه وكتسبق ديما سيدي عاد سميتو زعما واش كاملين كيعيطولو هاكاك ولا غير هي .. قاكع تفكيرها صوت ياقوت ..
ياقوت ~ بنتي وسناء لاحتاجيتي أي حاجة عيطيلينا وحنا نقومو بالواجب ..
وسناء ~ تشووكرا اخالتو رابي يخااليك ..
غير سالات عضات على شفايفها وهاد الحركات ماخفاوش عليه بل كولشي منتابه ليهوم بدون مايعيق بلعكس عادي وبهدوء ..
وصلها لحدا الدار ونزل من الطونوبيل معاها تسناها تاسلمات على ياقوت وفاطمة الزهراء وزينب كذلك، عاد دارت عندو من بعد ماسلمات على زينب ..
عثمان ~ " مدليها يدو سلمات عليه وبقا شادليها فيديها " نخليك دابا .. غادي نعيطليك فالعشية جاوبيني ..
وسناء ~ إنشاء الله ..
عثمان ~ تهلاي فراسك .. يالاه دخلي دابا ..
كتافات تحركلو راسها ومشات عطاتو بالضهر دخلات عاد ركب فالطوموبيل وزاد أما هي غير سدات الباب ددار دارت إبتسامة وصلات ليها تاودنيها .. مشات نيشان لبيتها طلاقات بزينب خارجة من كواليط بحكم كانت حابساها ..
قطعات عليه وناضت بسرعة البرق حيدات داك تيشورت المهرول لي كانت لابسة وبقات بدوني فالأبيض وطلقات شعرها رجعات شوية على سدرها من الجناب دارت شوية ديال البودر ورشات الريحة ( واخا مايشمهاش عزيز عليها تخوي فيها ) عاد خدات نفس .. غادي تعيطلو ههه نو منيتكوم ماديرهاش واخا تبقا الليلة كاملة هاكاك .. وديكشي لي كان بقات نص ساعة تارجع صونا هو بوحدو وهاد المرا أبيل فيديو دارت إبتسامة جانبية .. وطفات الضوء دالبيت وخلات غير الفيوز مضوي عليها وتقادات فالبوزيسيون لي باغا عاد جاوبات ...
بعدما شافت راسها فالمرايا ولقات كولشي هو هاداك ناضي، وكل مرة تجرب بوزيسيون قدام المرايا كيفاش غادير حداه، عاد طفات الضو وشعلات غير الفيوز خفيف فالبيت باش تالكانو شي عيوب مايبانوش ونعسات فوق الناموسية مقادة لبوزيسيون، وكاتسناه هو يصوني طبعا هي ماغاديش تصوني، طلعات ليها الأبيل ديالو ... طلعات النفس وهبطاتو وحيدات داك الإبتسامة لي واصلة ليها لودنيها رجعاتها إبتسامة خفيييفة، عاد جاوبات، كيف حلات لاكام بان ليها كيشوف فيها وعينيه معسلين بضوء القمر لي ضارب فيهوم، تاهو ناعس بحالها على فراش أسود كيبان فهواء الطلق، وهي كدور عينيها من شعرو لي هابط شوية على جبهتو عكس مين كيكون مطلعو بجيل، لتيشورت لي لابس سانبل فالأبيض ومطلع يدو تحت راسو، فعلا جذبها بملامحو الرجولية وأي مرأة غادي إخليها تنجاذب ليه فالأول، حاولات تحبس إعجابها باش ماتهبطش كواريها، أما هوا فشوفاتو كانو كفيلين باش إبينو إعجابو بيها .. هضر معاها بصوتو لي سمعاتو أول مرة هادئ تقيل وهو كيبتاسم إبتسامة خفيفة بينات ليه غميزة عندو فالخذ ديالو الأيسر ..
عثمان ~ ههه ديرتي ليا سوسبانس فهاد الساعة لي خليتيني كانتسناك تصوني ..
عثمان ~ لا غير كيجيبليك الله وصافي، بلعكس ماعنديش مع التغوبيش بزاف من الأحسن الإنسان إكون كيضحك أولا لا !؟ ..
وسناء ~ اييوا بلحااق كيقوولو الضحك بلى سبب من قلة الأدب ..
عثمان ~ هه بصح هادي كاينة ..
تنهدات وقلبات عينيها كتشوف فالقمر لي باين فالسماء ورجعات دورات وجها لقاتو ساهي فيها رجعات كترمش فعينيها وتحرك ففمها تاسمعاتو كيتنهد وهي كادير داك الحركات بلعاني واخا كيبانو عفويين ..
عثمان ~ أول مرة سمعت صوتك عيت ناخدليك شكل فالأخير طلعتي لاعلاقة مع داكشي لي خديت عليك ..
وسناء ~ وشني كونتي كتشوفني !! حسن من هايدا ؟؟ ..
عثمان ~ لا .. نتي خذيتيلي عقلي ..
هبطات راسها كضحك مي مابغاش تبينلو أما كون لقات كون ناضت تدردك، وهو كيشوف فيها وغير مبتاسم ترجعات شافت فيه كتهضم الضحكة بللات شفايفها شوية بلسانها وهضرات ..
وسناء ~ فاين ݣالس ؟ تانتينا كيبانليك القمر ! ..
عثمان ~ ݣالس فلاطيراس .. وتانا كيبانلي القمر غير الفرق هو أنك نتي كتشوفيه فالسما وانا كنشوفو فتيليفون ..
عثمان ~ A bon ... حنا بينا خمسة ديال الدراري و 3 دالبنات .. كولشي مزوج من غير ختي وخويا الصغار .. أنا لي قبل من الصغير فالدراري ووجاو جوج ينات من مورايا عاد خويا الصغير وختي من موراه كبيرة عليك بشي عاماين بحال هاكاك ..
وسناء ~ تبااارك الله هاادش كاامل ..
عثمان ~ هههه علاش جاتك غريبة !؟ ..
وسناء ~ لا غير ياعني واش كاملين ساكنين فدار وحدة ..
عثمان ~ مم وي من غير خواتاتي المزوجين ديجا كتعرفيهوم كسكنو فدار رجالتهوم ..
وسناء ~ اااه إيواا مزياان " وطولات فيها عرفات بلي عيالاتو بجوج فدار وحدة " ..
عثمان ~ ونتي ! ..
وسناء ~ حنا غيير ربعة " أشارتلو بيديها رببعة " كينا مصطفى هو الكبير قاد ختااك خديجة وكينا رودينة فعومرا 25 ويانا عاد خاي حمزة هو صغيير فعومرو 10 سنين ..
عثمان ~ مزياان ماباغا تعرفي عليا والو ! ..
وسناء ~ " ماباغاش تصدم " نو ماشي دابا ..
عثمان ~ مم Sûre ! ..
حركاات .. راسها بأه ..
تنهدات بصوت مرتافع بحالي فيها النعاس وهي كتلصق فعويناتها سيد نوضاتو قبل الوقت ..
مصطفى ~ سماع سمااع دابا خالينا من داك الماوضوع ماباقيشي غانجبدو أجي شبار ..
غمضات عينيها ورجعات حلاتهوم كتنهد منفخة ومشات شداتها من عندو حتا كيجرها من يديها كيتعابز معاها وقلبوها مضاربة وهي كضرب فيه ديال بصح أما هو غير كيشدليها يديها وكيضحك، تاعيطاتلو حبيبة باش إمشي إجيبها ومشات هي لبيتها لقات زينب كتشخر تخشات تاهية فبلاصتها ونعسات ..
دازت 3 أيام غير فالتوجاد ومنهنا لهنا ماختارت وسناء زيانة لي غادي تصايبليها الشدة ديال الملاك تاحمقات رودينة وزينب ... وكل نهار من هادي لهادي باش إشوفو لالة وسناء لي مكرهاتش داكشي إخرجليها من المصممين خاصة .. وفينما تشوف شي حاجة تقوليك هادي فايتليها شافتها عند ديك فلانة وعرس فلانة وسبوع فلانة .. مكاتقاداش .. عاد أراك لبيفي لي غادي ديرو فداكشي دالملاك ختارتليك داكشي دوولووكس وحبيبة كتجبد من جيبها وتحط بزز منها ووسناء عاجبها الحال حيت لقات مابغات ولي بغاتها طبق ولا دير بناقص ... صايبو الحلوة غير راسهوم بلى مايعتامدو على تاشي مولات الحلوة غير راسهوم تجمعو ليلة عليها كملوها ... ودابا لغدليه الملاك خوت حبيبة الكبار جاو أم زينب ووحدة أخرى وخالهوم وبناتو حيت ماباغينش إكترو وهدا غير ملاك خصوصا أنهم عارفين عمام باهوم غير فالشمال كاملين غايجيو موال حبيبة فالجديدة وكاتجيهوم طنجة فقرطة خنة ...
وسناء مامسوقاش هي عارفة بلي هادي خطوبتها ولكن مزال مادخلاتش ليها لراسها أنها غادي تودع العزوبية باش دخل لمرحلة جديدة وهي عارفة باي هاد المرحلة ماشي سهلة وخصوصا أنها ماداتش راجل ديال راسو .. وهادشي لي كيخليها ماتجاوبوش و3 أيام دابا كيعيط ماكاتجاوبوش وحتا ليميساج كتخليهوم هاكاك وماكاتبغيش طلعلو حتا Vu .. وهي ههه عاااجبها الحال تمرمدو لا هي بغات من النهار اللول يموت المش باش نهار دخل لدارو تكون هي المرتبة اللولة وعلاش لا تديه فخطرة .. اللهم تمرمدو من دابا ..
صباح جديد فاقت وسناء على النݣير ديال حبيبة .. ناضت ساخطة على الوضعية شعرها طالع فسما .. والسروال كيطيحليها .. وديباردور كيبانو منو الريوس ديال سدرها حيت ماكاتلبسش حمالات الصدر فنعاس السدر لي عندها متوسط ومواتي مع طايتها ماشي داك الكتتتترة وماشي عاوتاني ملس بين أو بين أما ليهونش لي عندها عامرين والسروال دجين مزيرين كيقتلو الفورمة عندها ..
دخلات لطواليط قضات حاجتها وخرجات لبسات بيجامة زوينة بحكم كاينين الضياف فالدار عاد خرجات لقات بنات خالها ديجا ݣالسين فالصالون كيجمعو ݣلسات معاهوم من فوق القلب ماعندهاش معاهوم .. تادخلات عليهوم رودينة عاد جات دارها .. دخلات هازا جلايلها ولابسة قفطان خفيف فالݣري بالسفيفة البلدية .. وشالها على راسها عاد نوضات وسناء باش إمشيو لحمام ..
مشات غير هي وياها الراس فراس ضرباتهاليها بتفريكة من داكشي لرفيع والأخرى كذلك تارجعو كيشعلو عاد تمو راجعين لدار غير دخلات وسناء مشات نيشان لبيت مها لقاتها ݣالسا كاتحسب مع مليكة ( ختها ) المخسور ولي ماجي ولي باقي غاتخسر ..
وصلات العشية تجمعو البنات كوولهوم بالبيت عند وسناء كيتعاودو أما وسناء غير متكية وكتسمع لكل وحدة شكاتقول وتعاود وهي كتفكر غدا وغادي تكون عروسة،مامتيقاش أنها جا الوقت لي غادي ترتابط تاهية براجل، وغادي تبعد على الدار لي كبرات فيها ودوزات فيها الخايبة والزوينة، جا الوقت لي غارجع زوجة ومسؤولة .. ولكن من هادشي كامل هي ماكتستوعبووش ليي لاصق ليها فرااسها هي كييغاادير لدوك الذرات لي كيتسناوها هاديك لي حارفا ليها أما داكشي كامل لخاس تفكر فيه أي بنت قبل الزواج مادايرش ليها ݣاع فمخها ..
مشات جمعات حوايجها ولبسات عباية فالأسود والشال محطوط فوق راسها مبين النص فشعرها ودارت النضاضر دالشمس عاد خرجات لقات زينب لي كانت تاهية جامعة حوايجها حيت غاتمشي معاها كاتسناها ..
خرجو بجوج لبرا كان مصطفى كيتسناهوم باش إمشيو لكوافورة دخلو فطوموبيل ..شوية بدا التيليفون ديال وسناء إصوني كانت دايرالو الڤيبرور شافت المتصل دار إبتسامة جانبية ودوزات الحمرة ..
وسناء ~ ستنا شوية باقي الحال ..
وصلهوم مصطفى تالقدام الصالون خلاهوم تما ومشا، كيف دخلو رحبات بيهوم لي خدامة من حيت دابا وسناء عروسة، دخلات أول شيء دارت ( manipulation ) للحمها كامل من غير المنطقة الحساسة ماقداتش عليها فضلات تخليها تالعرس حسن، عاد دازت لحجبانها أول مرة غاتعدلهوم ومع هوما غلاض وكثاف، خلاتهوم على فورمتهوم وقادات السطر من الفوق ومن الجناب، وفنفس الوقت وحدة أخرى كاتقاد ليها ضفرانها ..
وسناء ~ عافاك عملي غير لافخونش ..
الزيانة ( هي لي كانت كاتصايب ليها الحجبان وهي أصلا النݣافة ) : نتيينا غاتلبس الحمر من الأحسن تعملك الحمر ..
وسناء ~ لا لا مابغيتشي تشو ماتقصليشي من الطول خاليهوم هايداك، وعملي لافخونش فالأبيض وعملي الپيرلا فالصباع الوسطاني ..
الخدامة ~ صافي أختي ..
رجعات إسترخات مستحلية أش كيديرو ليها عمرها بصح دارت هادشي وجاتها الحلاوة أول مرة غادير هادشي .. الزواج زوين ولكن أصلا كاانت ناوية دير هادشي مين غاتخدم .. بفف مين كتجيها فكرة أنها ماغاتبقاش حرة كيفما كانت كتجنن ( يخخ منو عيني فيه ) ..
كيف سالات تسنات الصباغة علاما نشفات وفنفس الوقت الكوافورة كاتقادليها بوكلي للشعر .. أما زينب دخلات تاهية دير لاسير .. مين سالات البوكلي ناضت لبسات ديباردور فالأبيض مع السوتيامات دالونج وخشات البونج باش إتعلا ليها السدر .. عاد لبسات الشورط ديال الديباردور فالأبيض حد الفخاض وبدات النݣافة تقاد ليها فالميكاب .. لي كانت ديجا ختاراتو مع اللبسة .. عكر حمممر وإبرااز العينين .. عاد لواتليها الفوطة على الخصر باش تشدليهت الحزام .. ودارتليها الشال على وجها ولبساتليها القفطان كان فالأحمر توب حريري وكامل مطروز بالذهبي .. وݣلساتليها كاتصايب ليها فالمشطة لي جات خفيفة وفنفس الوقت جات أصوغتي مع الميكاب والقفطان .. بغات تخلي المعقول تالعرس .. ركباتليها ليزاكسيسوار مع سمطة مشبكة دالحديد فالذهبي حزماتليها .. عاد التاج فالذهبي عاد توب شبكة مشدود من المشطة وشداتو تالفضهر .. ناضت كتشوف راسها فالمرايا ..جاااات قتاااااالة ... أول مرة غاتشوف راسها بداك الزين ..هزات تيليفونها تجاوب رودينة ..قاتليها باش تصور راسها مي رفضات تاتشوفها مين غادي تجي .. خرجات عند زينب لي كانت مسالية كولشي ولابسة قفطان فالقهوي توب حريري مطروز خفيف من السدر .. ومحزم بالصمطة ديال الصم .. دارت ميكاب مواتي ومشيطة خفيفة .. تصدمات عالٱخر مين شافت وسناء ..
عجبها راسها وزادت فيخرات حيت تامن الزيانة ولي خدامين تما كولشي كيشوف .. خافت غير إضربوها بالعين وعين الحساد فيها عود ..
تسيلفات هي وزينب وبقات غي كتصور فراسها ..تاعيطاتليها رودينة كاتعلمها بلي جايين فالطريق باش إجيبوها ..
طبعا من 2 دالنهار تال8 دليل يالاه وجدو ..وماهي إلا دقائق حتا كيتسمعو الطوموبيلات لتحت وطالقين الموسيقى وكيطيطو .. طلات عليهوم زينب كانت الطوموبيل ديال مصطفى وديال واحد ولد عمها ..
دارت زينب عند وسناء لقاتها مامسوقاش السيدة ماطالعة معاها لاخلعة لا توتر بلعكس فرحانة وكتسيلفا ..
طلعات رودينة الفوق لعندهوم بحكم الصالون جا فعمارة كان ديجا الباب محلول كيف دخلات وشافت وسناء تغرغرو عينيها بالدموع ..
بدات تقربيليها وهي كتشوف فيها ..
رودينة ~ شحال جيتي مزييونة ( وهي كتمسح الدمعة من عينيها ) ..
وسناء~ تشوف ديك الدراما بلى ماتعملا .. يانا ماشي غانموت غير غانمشي نضارب ونجماع شوية دالفلوس وغانزوركوم مرة مرة ماتخافوشيي ..
بقاو كيضحكو جابت ليهوم الضحكة ..
لبسات ليها السلهام فالأبيض عاد هبطوها بالصلاة والسلام تاوصلو لتحت خرجو بنات عمها من الطوموبيل كيصفقوليها وهي غير حانية راسها وشادا فايدين ديال رودينة وزينب باش ماطيحش بالطالون لي لابسة مذهب ..
مصطفى ماقدو فرحة وكيف ركبات اللور مشا طالق الشعبي وكيطيط فالطريق .. تاطلق أغنية ( Tiiw Tiiw - ) دارتها بيك ديك الجنية ...وبقات زينب كتحيح وحالة الشرجم وكتشير لبينات خالها لخرين لي فطوموبيل ديال ولد عم وسناء ..
وصلو لدرب بالكلاكصون والموسيقى كتسمع من الدار وقفو جوج طوموبيلات مصافين حدا الدار ... والعائلة خرجات كاطلاقا العروسة وحبيبة لابساليك لمليفة المطروزة فالزرق الملكي ودايرا زيف بنفس اللون والمظمة ديال النقرة مشللة بالذهب باش محزمة فيديها ماء الزهر وكتنيش ..
تعالاو الزغاريت وهي فالدخلة غير فاتت باب الدار حيداتليها مها السلهام وكملو بيها لصالة فين كان كولشي كيتسنا العروسة وعائلة عثمان لي كانت مستفة والطبوقة من الݣلسة فين دارو البوفي ديال الخطوبة لخرجة ديال الباب كولشي مستف وكواشي مبلق عينو فيهوم تادخلات عليهوم العروسة خلات كولشي فحالة دهشة وتاجهات ليها الأنضار ...
تطلقات أغنية أنا العايلة مولاتي مع الدخلة .. وقفو بعض البنات فبلاصتهوم كيصفقو ليها .. وهي داخلة رافعة راسها وكتبتاسم ودور عينيها على الحضور .. ومشات بدات تسلم على عائلة العريس .. بدات من عند ياقوت ..فاطمة الزهراء ..خديجة .. وبنت من موراها ولي دازت عليها تبارك ليها وتشكر زينها صافي ورجعات ݣلسات فراس الصالة جنب ياقوت .. عاد علات عينيها كتشوف فطبوقة وكيدايرين .. داكشي مذهب وزوين .. وكل واحد باش معمر .. وكانو كثار تقريبا 6 ديال الطبوقة زائد الطبق ديال الحليب .. والأخر ديال ليدراجي تاهوما جابوهوم .. وواحد ٱخر ديال الشكلاط نوع ferrero .. كولشي مستف ومقاد منهوم الحوايج ىي ختارتهوم ومنه م لي زادو عليه م مهيم حمروليها العين عاد إضافة لطبلة لي كانت مصايبة بالبيڤي لي دوموندات ..داكشي غزال ..ومع تقداتو من كاصاباراطا دايما لجديد ( نصيحة لي بغات تقدا داكشي ديال المناسبات طووب والرخيس ماعليها غير بطنجة كاصا باراطا ولا كازا ) .. الحمر واتاها وجاها غزال .. طلعات عينيها كاشوف بنات عمها كيتمايلو مع الموسيقى الشمالية ديالهوم لي طلقو فلول .. وكترجع تشوف فعائلة عثمان وتبرݣݣ فيهوم ماكانوش كثار .. ياقوت بناتهالي جاو داك النهار إضافة لبنت وربعة ديال العيالات كاملين كانو ٱنيقين ولابسين القفطان بالطرز والذهبات كيتشايرو وشعورات مطلوقين والميكاب مجهد .. ..
فاطنة الزهراء ( ختو ) ~ ( كانت طالقة شعرها أسود وواصل النص فالضهر دايرالو بوكلي ولابسة قفطان فالأسود كيحمق بمضمة من الذهب ومجوهرات ديال الذهب مركبين فعنقها وودنيها ونبالة فيديها بينات زين لي عندها ) مشاء الله أحبيبة جيتي فنة
ياقوت ~ ( تاهية كانت زوينة وطلقات شعرها لي مصبوغ بليميش مابايناش عليها مو وهي عݣوزتها ظايراليك ميكاب خفيف ولابسة تكشيطة بالصاري ستايل خفيف فالباج وسفسفة هوادا حتالتحت والذهوبات تاهية معمرين عندها ) تبارك الله على الغزالة ديال بنتي ..
وسناء ~ " شافت فينا " رابي يخالي أخالتو ..
ياقوت ~ " أشارت ليها للبنت لي سلمات عليها من مور خديجة " هاديك بنت ختي نهال ولي قدامها مها خالت عثمان ..
وسناء ~ " شافت فيه م وحركات راسها كتسلم عليهوم بإبتسامة وهوما كذلك " متشرفيين ..
ياقوت ~ ولي حداها ختو ديال شيخك عمت عثمان الصغيرة تاهية سميتها فاطمة الزهراء ..
وسناء ~ متشرفيين أخالتو ..
فاطمة الزهراء ~( كانت واخا هي مرأة كبيرة ولكن مهلية فراسها بحال ياقوت ) لينا الشرف ألحبيبة ...
ياقوت ~ ولي بقاو بعيالات ولادي الأخرين سهام وياسمين ..
مع كانو جاو حداها كانو كيسمعوها وكتسمعهوم وعاد الموسيقى ماشي مجهدة بزاف بين وبين كتقدر تهضر ويسمعك الواحد ..
طلعات عينيها كتشوف رودينة جايبة البلاطو دالخواتم حطاتو فالبيڤي .. بين الحرف ديال سميتها ( W ) والحرف ديالو هو ( O ) وشميعات مكتوب فيه فيهوم التاريخ دهاد النهار .. وعاد الورد من الجناب وداك الطبق ديال الشكلاط مطوط تاهو فوق الطبلة ..وزيد عليها شي بواطات فالأحمر باينة فيهوم الذهب .. وطبق ٱخر زايد فيه الماكياج على داكشي لي ختارت والبواطة ديال الريحة باينة منها ديال ( la vie est belle ) .. عجبها الحال وطلقات إبتسامة هي هاديك فرشخات فيها عينين العديان خصوصا من بنات عمتها المزوجين بنات خالها .. وهي كتقوليهوم غير صبرو مزالين غادي تصدمو مزيان مين غادي يدخل سيدي مولاي السلطان .. تفرقو طبيسلات صغار فرقاتهوم رودينة وزينب وٱلهام من موراهوم بكاس ديال العصير .. عاد رجعو ببلاطوات ديال المالح دارو ثلاثة ديال الشكال الپريوات بشعرية الصينية والحوت .. والقنينطات ديال الجبن من فوقهوم العسل .. وعاد طبيسلات معمرين بالكفتة ولاصوص بيشاميل ومن فوقهون الفورماج الصفر .. داكشي كولشي تعدل فالدار من يد حبيبة ورودينة ومليكة ..سهرو عليهوم تاقادوهوم .. عائلة العريس كان ݣالسا فالطبلة ديال العروسة ديال البيفي .. وطبلة الأرى ديال عائلتها هي .. جوج رباعات لي كانو ..
ياقوت فرحانة بمرات ولدها الجديدة وماقاداها فرحة .. وكل شوية دور عندها وتبتاسم ليها وتعاود ليها .. دايرا ليها كيريش فالما .. وتاوسناء عجبها هاد الفشوش وهاد الإهتمام كامل .. طلعات عينيها بانتليها رودينة أشارت ليها بعينيها كتعلمها بلي غايدخل عثمان .. حركات ليها عينيها وهنا تترات ماعرفاتش علاش ولكن .. دابا عاد بدات تحس بالتبوريشة طالعة معاها من صبع رجليها الصغير .. وقفات الموسيقى رودينة الموسيقى لي كانو سدشاعلينها غير من التلفازة ديال الصالة مركبين فيها اليوسبي .. وهضرات بصوت مرتافع ..
كيف هضرات رودينة عائلة عثمان ناضو كاملين كيلويو الشيلان على راسهوم من غير بنت خالتو وخواتاتو ومو .. وكذلك هي من عائلتها باها مازال عائلة مها ماشي كولهوم كيديرو الحجاب .. سمعو دقان فالباب وتم داخل سيدي مولاي السلطان بسروال كلاص فالأسود مع شوميز فلبلو غوا مفتوحة جوج سديفات من الفوق والساعة فاليد جنب الكورميط المقرية الخفيفة فيدو وشعرو مطلعو للفوق مشيك .. ناضو تم نيت عائلتو كتصلي على النبي وتزغرت .. أما عائلتها هي ضربو العمى فالضلمى وبقاو غامبلقين عينيهوم .. هو حنا راسو وخطواتو مزروبين شوية مشا لجيهتها ووغاريت مالين الدنيا خواولو البلاصة حداها .. بقا واقف حداها عاد ناضت تاهية واقفة وياقوت كذلك .. وخواتاتو كيزغرتو وي عاودو وقفات زينب كتوجه الكاميرا ليهوم وتصور ...
مد يديه تاهو باش إعطيها تمر خرجات غير سنانها شوييييية وعضات غير الراس .. البروتوكول أو مايدير ..
عثمان ~ صافي زيدي وكان !! ..
هزات صبعها شوية لجيهت نيفها برواق شافت فيه ..
وسناء ~ أصلا ماكيعجبنيش ..
حلات رودينة فمها بصدمة بنت الحرام فرمضان كانت كضرب 10 فالفطور عاد كتبدى الماكلة ..
ضحك بخفوة مدور راسو عاد رجع شاف فيها .. هي كانت بملامح جامدة وكتسنى بفارغ الصبر الخاتم ..
وديكشي لي كان حطات رودينة البلاطو وهزات بلاطو ٱخر فيه بواطة فالأحمر صغيرة ووحدة متوسطة ووحدة كبييرة ..
هزات البواطة حلاتها تاكيبان خاتم ذيال الذهب رقيق ولكن بمجوهرة كبييرة وكتبري مع الثاني ديالو لي جا غليض شوية وفيه مجوهرات صغيييييورين مزيناه على ضورتو ..
دارت إبتسامة ولوهلة خفاتها باش ماتبينش طيحتها .. مدات إلهام الخاتم لعثمان .. ووسناء علات يديها الصغيرة والبيضة ماداهالو ..بلل شفايفو كيشوف فيهوم والزغاريت باقا خداما وتطلقات الموسيقى .. سيف نبيل - غلاي أنت .. روحي غلاي أنت ولو خيروني بين البشر لأحتار بس إنت ..
.. حاوط بيديه الروجولية لي متوسطاهوم خاتم فالنقري بمجوهرة فالأسود وبشعيرات كوحل باينين يديداتها .. وركبليها الخاتم فصبعها الخنصر .. عاد بداو كيصفقو ويزغرتو .. تفتحات بواطة أخرى فالأحمر وتجبد منو خاتم رقيق فالنقري مزخرف بالأسود شكل ديالو بسيط وسانبل ورجولي أكثر .. شداتها الرجفة فيديها باش تركبولو .. وهو علا يدو ليسرية ليها .. شداتها بصبيعاتها الرقاق المصبغين بلافخونش جاوها كيحمقو ... ركباتلو الخاتم ديالو عاد رجعو التصفيقات والزغاريت ..
تفتحات البواطة الثانية فالأحمر وجبدات منها السنسلة ديال الذهب والحوالق ديالها ..
شدها من عند إلهام وقرب لوسناء وحنا لعندها تابدا النفس ديالو كيضرب فعنقها أما هي تشدات عليها المعدة ديالها وحسات بركابيها بردو همس بصوت بورش لحمها روجولي خافت وهادئ ..
عثمان ~ مايصحابليش نتي غزالة تالهاد الدرجة ( دوز صباعو متعمد إبورشها من مور عنقها باش إركب السنسلة وهو باقي كيهضر ) ماشي حشومة عليك تخليني معلق 3 أيام !! ..
عوجات عنقها شوية من جيهتو حيت صوتو بورشها ..وهو رجع شوية كيشوف فيها ويشوف فالسنسلة فعنقها البيض ولي مزيناه العضومة باينن دايرين حفرة الزين فعنقها ..
عثمان ~ بصحة ! ..
ماجاوباتوش .. ودورات عينيها كتسنى مزال شنو كاين فالبواط الثالثة ... تفتحات وكانت نبالة مذهبة وتقيلة هزها باش إلبسهاليها فيديها لي فيها الخاتم وكيف سدها بقا شادليها فيديها ..
زينب ~ إيوا ماتحݣريش عيالاتو راه قاتليك داك النهار ختو مراتو الثانية زوينة، وعاد راه السيد تيتيز ومهلي فرااسو شوفي غير ساعة لي فيدو تكون ساوية القليلة واحد 7000 درهم ..
بعدما جر يديها خشاها بين يدو شادا هي الموس قطعو طرف من الطارطة وجات رودينة هزاتو من تم حطاتو فطبسيل ومداتها ليهوم مع لي فورشيت هزات قطعة صغيرة مداتها لفمو وهي كتشوف فعينيه .. وتاهو كلا من عندها الطرف وهو مخذر بشوفاتها .. نفس الشيء هز فورشيت ومدليها الطرف من لاطاغط كلاتو عاد بداو إصفقو ..
جات عندهوم حبيبة طلبات منهوم إكلسو باش إتصورو .. رجعو بلور ݣلسات هي لولة عاد ݣلس حداها بعد ماطلع سروالو شوية من جيهت فخاضو باش إليق ليه إݣلس .. دوز يديه لي فيها الخاتم من تحت يديها ليمنية تاشبكهوم مع بعضهوم وزينب كتغمز فرودينة باش تشوف ..
كحزات حبيبة ݣلسات جنب يحيى وياقوت من جهة وسناء .. ودرباتليهوم زينب تصويرة وأيضا فاطمة الزهراء بالأيفون8 plus .. عاد ناضت حبيبة من حداه ودارت ياقوت كتهضر مع ختها .. تاجات فاطمة الزهراء خوو دور وهو يعيط ليها غير بشوية مد يدو لجيب وجبد الأيفون إيكس ماكس فالأسود ومدو ليها أو وسناء دايرا الدنيا بيها .. غاحالة عينيها كتمشي وتجي وتقشع الصغيرة والكبيرة بنص عين ..
عثمان ~ " هضر بصوت رجولي غليض عكس مين كيكون كيهضر مع وسناء " غدا غادي نجيو ٱنشاء الله باش نتافقو على الأمور لي غادي نتكلفو بيها .. الواليدة خليت ليك الخير ..
حبيبة ~ ٱنشاء الله أولدي ... مرحبا ..
ياقوت ~ إنشاء الله أسيدي عثمان ...
رجع دار عند وسناء غمزها كيضحك ومشا .. كيف خرج حولات عينيها لبنات خالها لي كانو باقين متبعين عثمان .. خنزرات فيهوم بلى ماتبين ورجعات شافت فرودينة وزينب كيتهامسو عليها ويضحكو ماحملاااتش رااسها وبغات الأرض تنشق وتبلعها ..
طلقات الموسيقى ثاني وهاد المرة الطرب الأندلوسي .. ورودينة وزينب وإلهام وليلى كولشي كيتسخر .. قادو طوابل والرباعات .. وطابلة العروسة لي غاتݣلس فيها حبيبة وياقوت وعائلتو هو ..وعايسة معاهوم .. عاد طبلة الأخرى فين غايكونو الباقية ..
تحط العشى الدجاج محمر بدغميرة والحامض من الفوق بالحار والزيتون .. غير منريحتو يعطيك الخبار .. عاد تحط من موراه اللحم بالبرقوق الكحل والصفر والأناناص واللوز المحمر من فوق منو فصوينيات صغار ديال النحاس .. وكل شوية حبيبة ترحب بيهوم ورودينة كذلك كادور على الطوابل وترحب بالناس .. تهز وتحط الديسير .. تاكلاو كولشي عاد تكطات الطارطا لي كانت تقطعات فطبيسلات صغار بويض تكلفات بيهوم زينب ورودينة وإلهام فرقو كولشي مع العصير ووسناء كتاكل غير بشوية ومخدمة البريستيج واخا قاتلها الجوع بحكم ماكلاتش النهار كامل وعيات بغات غير فوقاش تنوض تنعس .. وداكشي لي دايرا تقل عليها .. تجمع كولشي وحيدو الطوابل من حداهوم عاد جات رودينة جايبة فيديها سلة ديال ليدراجي مداتها لوسناء ونوضوها بالزغاريت والصلاة على النبي بدات بعالئتو كتفرق وتقول مرحبا بيك حتا كملات مع عائلة مها .. عاد ناضت ياقوت هازا فيديها صاكها كتسلم على حبيبة ..
ياقوت ~ خليت ليك الخير أختي حبيبة والله إجعل كولشي مبارك أو مسعود وهادا نهاري لي ديت لولدي لالة ومالي ..
رودينة ~ هههه هانتيينا كتشوف .. إيوا تصبااح على خير الحبيبة ومبروك المناسبة ..
فاطمة الزهراء ~ الله إبارك فيك أحبيبة ومبروك على الرسان والله إكمل عليهوم بالخير ..
رودينة ~ ٱمين أزين ..
تسالمو ودارت باش تمشي تسلم على وسناء لي كانت كتسلم على ياقوت باركاتليها ورحبات بيها معاهوم عاد مشاو نازلين مع الدروج .. كيف خواو الصالة مشات وسناء نيشان لبيتها دخلات ومشات كطل من الشرجم .. كانو ربعة ديال الطوموبيلات فالحومة ديال ولد عمها ومصطفى ووحدة لي كانت شافت ديك النهار عرفاتها ديال عثمان ومع ماكيبانش شكون فوسط منها حيت الضلام وزاج فيمي .. وعاد وحدا من موراه مسطاسيونيا كاط كاط فالكحل .. شافتهوم خرجو كيركبو فالطوموبيلات حتا قلعو ومشاو وعائلة باها كذلك من حيت غايمشيو عند عمهوم لاخور لي كاين فطنجة ..أما هوما مصاب إتكافاو غير مع عائلة مها ...
زينب ~ بصح أخالتي وسناء عندها الحق مايمكنش غدا الناس جايين إهضرو فالمعقول ويلقاو الضياف عندنا شوفي فين تصدريهوم أنا مانقدرش نهضر مع خالي وحتا مراتو ماجاتش دير الصواب ..
وسناء ~ هاديك بلى ماتهضار عليها منهار عملاتلا مما ديك نهايراتي ديك الفلاش ماعاودات بغات تجي عاندنا وتايانا سبحااان الله ماعنديشي معاها ولا مع بناتها شوفتي قبالاتي كيف كانو كيشوفو فيا تقول غابغاو ياكلوني ..
حبيبة ~ تف تف تف لهلا ينزل عليك عنين الحساد يا ربي .. أجي أكبدتي نقرا عليك القرٱن راه قبيلة نتي داخلة وانا نشهد ..
وسناء ~ " دفعاتها مغزفة " انا ماشي هي نتينا يا الحبيبة زول من قودامي نشوف .. " هزات الريحة ديال la vie est belle " تفو كغيير جابولي الريحة ديال جادوغ ..
زينب ~ هاااكاك عطيي لسيدي عثمان غير فالحلاوي باش تحلاايلو فعينو ويقلب على لخرين ..
طلقات الضحكة هي ورودينة أما وسناء طلعليها الدم ..
وسناء ~ مما تشووف علياا هاادو ..
حبيبة ~ جمعو نتونا فمكوم باراكة من الضحك، من الصباح ونتوما تنممو اش كاين ..
زينب ~ لا والو يا خالتي مالكي ابنادم إلى ماهضرادناش فيك فيمن نهضرو ..
رودينة ~ لا انا بااعدا بااش عجبني هو بااش جرك عندو هايداااا من نووصك حتاا لااصقك معااه .. مسييكنة بلااقتي فييه عايننك ..
رجعو كيضحكو ثاني تاعصبوها وبدات تجري عليهوم .. الصورة
خرجو من عندها رودينة أو زينب وحبيبة بعد ماجمعو كولشي وخواو الطبوقة باش إرجعوهوم غدا لمالينهوم من حيت هوما ليتكلفو يكريوهوم مع ياقوت ..
تغطات هي فناموسيتها مستحيلة المعسة فيها الموت دنعاس حتا من العشا مابغاتش تاكل .. وهي كتفكر بطريقتو باش كان كيهضر معاها وباش حط شفايفو على صبيعاتها غي كتفكر لحمها كيبرش تاكيوصلها ميساج غير هزات شافت فدشكون بتاسمات بلى ماتحس ..
Othmane : rata7iti chwiya !? .. 1:23
شافت فالميساج شحال وهي كتفكر فراسها واش هاكا كيعامل داك عبير مراتو الثانية وهاكا كيعامل مراتو اللولة، مجرد ماوصلاتها هاد الفكرة بغاات تموووت،هي ماغاتقدرش تشرك راجل واحد ماتقدرش هو غير بمعاملتو الحنينة و وينةلي عاملها اليوم ستحلاتها وحسات راسها أميرة فوق الأمراء، فمابلك تشوفو قدامها كيمشي عند مراتو الأخرى ويعاملها بنفس الطريقة، تفكرات بلي بحال والو يكون دابا حداها وناعس حداها .. قبل ماتجاوب على سؤالو تم نيت سولاتو ..
Wasnae : Faynek daba ? ..1:27 ✓✓
Otamane : fedar .. me7taja chi 7aja ? 1:27
عوجات فمها كتقرى فالرد ونفسها طالعة على قلبها ..
Wasnae : ghir swelt .. 1:29 ✓✓
كيف شاف الميساج طلعات لأبيل ديالو كيصوني .. بداو ثاني دقات قلبها كيضربو خدات نفس وجاوبات رققات صوتها وكيف عادتها هضرات بشوية ..
حبيبة ~ هااوييلييي علا شكوون تي نوضي راه السيد قال بغا يخرج معاك الراس فراس وتوووما تافقو على الأمور دياال العررس بااك مابغاش نديرو هااكا الجماعة رجال ونساااا نوضي سيري معااه وتاافقو وانا ويااقوت بيناتنا التيليفون ..
وسناء ~ احح لااهلا يخاطي عليينا الزااااين نتيناا " ضرباتليها بوسة فالهوا وغمزاتها عاد دارت باش تلبس " ..
لبسات سروال كحل ما واسع مامزير بين وبين مزير شوية على ليهونش من الفوق وواصل للعضم .. لبسات من الفوق معاه تيشورت فلبلو مارين مخطط بالبيض طويل شوية من اللور مغطيليها المأخرة .. عاد طلقات شعرها وفرقاتو جنب بعفوية باش طيح القصة على عينيها ..مشطات حجبانها ودارت ݣلوس خفيف وماسكارا وپودر باش تبان طبيعية وكيوت .. هزات ساك طبعا ديال زينب صغير فالبلو مارين تاهو حيت كانت شرات اللبسة مكمولة .. حطاتو على كتفها وخشات فيه البوركابل صافي أصلا حازقة وداكشي لي كاتكساب .. عاد دارت النضرات ديال الشمس فعينيها والخاتم فيديها لبسات النبال والساعة فاليد الأخرى والسنسلة لي كان جابليها باها .. جات ففنننة .. سرقات تاني الريحة لرودينة ودارتها طبعا جادووغ .. عاد لبسات سنيدلة پلا مبينة دفيراتها البوويض ومقادين بلافخوونش .. بانت شخصية مهمة والخاتم دزواج باين فيديها غامازاد زينن صبيعاتها الرقاق والبويض .. هزات تيليفونها شعلاتو ... لقات 3 ديال ليزابيل من عندو من البرح لي قطعات عليه واليوم وحدة .. عوجات فمها .. عاد تمات خارجة عند زينب لي كانت وجدات ديجا ..
زينب ~ " نفخات مخرجة النفس من الأعماق " زيدي زيدي العفو معاك هاد النهار غير الله إستر مع الله إحفض ..
هبطات مع الدروج وخرجات لبرا تاطلاقاتو قبالتها متكي على الݣابو داللوطو ديالو BMW لابس سروال دجين فالأزرق وتيشورت فالأسود مع نضارات شمسية وطربوش فالأسود خاشي يديه فجيبو وموقف رجل على رجل .. قلبات عينيها الحمد لله لابسة لدالنضاضر اما كونؤاهوم حوالو أما زينب ندمات تاجات معاها مين شافت السيد بداك الوقفة قربات تسخف ..
قربو لعندو تاتعدل فالوقف ومد يدو لوسناء عطاتهالو جرها سلم عليها من وجها .. جات زينب يالاه غاتمد يديها وهو يحرك ليها راسها سلم عليها غير من عينيها الشيء لي صدمهوم بجوج بقاو غير مبلقين عينيهوم ..
عثمان ~ " شاف فوسناء " طلعي ..
وسناء مشات تحركات لبلاصة لي حداه وطلعات وزينب لور عاد ركب هو فبلاصتو ..
عثمان ~ " دور عينو شاف فيها ورجع شاف فالطريق كيديماري " صاڤا ..
وسناء ~ " باقا ساهية مع المنضر لي دار لزينب " لاابااس ونتيينا ..
عثمان ~ الحمد لله بيخير ..
وسناء ~ " سرطات ريقها ودارت شافت فيه كتعض على شفايفها حيت لاحضات بلي ماشي على طبيعتو كيف ديما .. عاد هضرات " هادي راه ببنت خاالتي زينب " أشارت بيديها لزينب لي لور وغير مصمرة أحسن قمعة وقعاتليها فحياتها كتعلمو زعما بلي راه ماشي شي وحدة غريبة "
العايلة مولاتي الجزء الثاني
محتوى القصة
التنقل بين الأجزاء