بولترا : تسناي رسالة من عندي غدا غاتلقاي التفاصيل ...
جيكساو : ايلا كان عزرائيل غايخليك تسيفطو
بولترا : كيفاش؟
ماجاوباتش الميساج ديالو عاود سيفط لها ميساج اخر كايسولها شنو قصدات ولكن ماجاوباتش صونا لها لقاها طافياه .. حط طيلي فوق الطبلة و بقا كايدوز بيديه على الكلب ديالو
بولترا : ( كايشوف جهة لابيسين ) مابقاش بزاف و غانعاودو نطلاقاو .. داكشي لي بديتو داك النهار غانكملو
•• عند جيكساو ••
غير سيفطات ليه الميساج هرسات النمرة باش مايتتبعهاش و جبدات وحدة جديدة ديال النمسا خدماتها ( للعلم فقط راه تقدرو تخدمو بكارط سيم ديال دول خرا واخا ماتكونوش فيهم ) ... مشات لجهة الكوفر ديالها جبدات بيسي و سدات الكوفر حطات من فوقو البيسي و شعلاتو و جبدات واحد سيدي DVD ( القرص ) مكتوب فيه TAILS Linux باش ماتخلي موراها حتى شي اثر من مور ماغادير هادشي لي باغا دير دابا دخلات لمتصفح TOR باش تخبع الايبي IP و دخلات لمتصفح اخر على ود لVPN باش تتغير بلاصتها عشرات المرات فدقيقة وحدة و مايقدروش يرصدو بلاصتها .. خدمات تطبيق كايغير الصوت لصوت راجل عاد برونشات طيلي مع البيسي بكابل .. تكات على الكوفر و دوزات الرقم ديال واحد الشخص بقا شحال كايصوني عاد جاوب
***** : ( صوت أنثوي ) الو وي؟
جيكساو : باغي نبلغ على واحد المجرم
***** : سمح لي ا سيدي ولكن هاد الرقم ماشي ديال الكوميسارية .. عيط لهم فرقمهم الثابت 133
جيكساو : ( ميلات راسها ) ولكن حتى نتوما بوليس
***** : ا سيدي حنا ماشي هدا اختصاصنا
ضارت لجهة الكوفر و بدات كاطقطق بصبعانها فوق الطوموبيل
جيكساو : الصحافة كلها كاتهضر عليه واش هادي حاجة صعيبة
لوجين : منين جاك الرقم ديال طيلي ديالها؟؟
سيلين : ( بإستغراب ) سميتي كي درتي حتى عرفتيها؟
جيكساو : واش باغيين تعرفو بلاصة القاتل ولا نقطع؟
مايكل : ( بصوت خافت ) تبعوني بالزربة و حاولو تخليوه يزيد يطول فالهضرة
دارو داكشي و مشاو تبعوه اما فالجهة الثانية كانت جيكساو كاتجاوبهوم بشكل عادي و هادئ و مدام هو بوليس عارفة مزيان بلي غايحاولو يعرفو بلاصتها .. وصلو لواحد الغرفة فيها البوليس لي مختصين بالمجال الالكتروني
مايكل : طلقو داكشي من يديكم عندنا شاهد كايعرف المجرم جيكساو فين كاين خاصنا ضروري نعرفو بلاصتو و نجيبوه لعندنا تقدر تكون عندو معلومات كتر من هاد المعلومات لي غايعطينا
غير سمعو هادشي بدا كلشي كايزرب و كلشي باغي يشارك فهادشي باش يجيبو الشاهد الوحيد من غير جوزيف لي كان مركز مع الصوت ديال هاد الشخص
جوزيف : ششششش
لوجين : مالك؟؟
جوزيف : ( دار اشارة بصبعو لودنيه ) سمعو مزيان
مايكل : ( حبس من داكشي لي كان كايدير .. اش غانسمعو؟
جوزيف : كاين ذبذبات زايدة على المعتاد فهاد الاتصال
لوجين : هادشي كايعني مخدم تطبيق كايبدل الصوت؟؟؟ ...
جوزيف : هادشي كايعني هاد الشخص عندو علاقة بالقاتل لي كانقلبو عليه
مايكل : عندو عداوة مع القاتل على ما بان لي
لوجين : متافقة مع مايكل
جوزيف : الاحتمالات كلها واردة ممكن يكون فخ لينا
لوجين : من بعد و نهضرو فهادشي ماشي دابا
ضارو عند سيلين لقاوها باقا كاتماطل بالهضرة .. هادشي لي كايظنو هما ولكن مافخبارهمش بلي هي لي كاتماطلهم بالهضرة فحين داكشي لي خططات ليه غادي هو هداك
سيلين : و ماخفتيش على راسك يعرفك و تكون نتا ضحيتو التالية؟
جيكساو : القانون معايا ولا لا ا انسة القانون.؟
سيلين : وي بطبيعة الحال علاش واش عندك شك فهادشي؟ نتا شاهد مهم عندنا ولكن كانظن حياتك فخطر ايلا بقيتي على برا .. يقدر القاتل يحس بالتهديد و يقتلك فديك الساعة ماغايكون عندنا مانديرو حيت ماشي تحت الحماية ديالنا
كانت كاتهضر حتى شافت دوك لي متخصصين بتعقب الاثار كايهضرو مع جوزيف و مايكل و لوجين لي بان عليهم السخط
جوزيف : ( بغضب ) كنت متأكد غاتكون من موراه شي حاااجة
***** : مخبع الايبي و مبدل الVPN
مايكل : حاول تعرف البلاصة جرب اي حاجة
***** : حاولت ولكن هاد الشخص ضارب حسابو لكلشي قبل مايعيط ليكم ( كايوريه فشاشة لوغديناتوغ ) شفتي شحال من دولة كاطلع منها الاشارة ديال هاد الاتصال؟
جوزيف : يعني هو ماكاينش فالنمسة الحقيير
مايكل : من حقو حيت المعلومات لي عندو خطيرين حاجة طبيعية يخبع راسو و مايتيقش
لوجين : ( كاتفكر ) شي حاجة مامفهوماش هنا .. سيلين شدي من عندو العنوان
سيلين : ( أومأت بواخا ) عيطتي لينا على العنوان ديال القاتل تقدر تعطيه لينا؟
جيكساو : **************
سيلين : ( قيداتو ) عرضنا باقي كاين .. فحالة حسيتي بالخطر تقدر تلتاجئ لينا و شكرا على التعاون ديالك معانا ولكن دير فبالك البلاصة الأمنة ليك هي مع البوليس ... حيد لها جوزيف طيلي من مور ماسخط بالمعقول
جوزيف : شكون نتا؟؟؟؟
جيكساو : فاعل خير
جوزيف : كاضحك علينا دابا؟؟؟؟ علاش مخبع الموقع ديالك
جوزيف : ماتختابرش صبريي .. هادي لي كادير فيها بحد ذاتها جريمة
مايكل : جوزيف تهدن خاصنا نجيبوه غير بالحيلة
جيكساو : ماجاوبتينيش
لوجين : سايرو ا جوزيف
جوزيف : ماكانتيقش
جيكساو : علاش غانتيق فواحد ماتايق حتى فراسو؟ ... شافت فالساعة بتاسمات ابتسامة جانبية و قطعات عليه فنفس الدقيقة عاودات دوزات رقم اخر شحال و هو كايصوني حتى واحد ماجاوب عاودات جربات ماجاوب حد رجعات للبيسي سدات جميع النوافذ و المتصفحات لي خدمات بيهم طفاتو و عاودات شعلاتو باش تضمن بلي مابقا لهم منين يتبعو اثرها .. دخلات لمتصفح اخر و بدات كاتتعقب الاشارة ديال الشخص لي عاد كانت كاتعيط ليه لقاتو فالجهة نيت لي كانت باغاه يكون فيها .. سدات كلشي و ركبات فطوموبيل ديمارات لدارها و هي مرتاحة داكشي لي كانت باغا توصل ليه صافي وصلات ليه
•• فمكتب التحقيقات ••
جوزيف : هاد الحقير انا متأكد شريك ديال داك القتال 1000‰ ناصبين لينا فخ و كايتسناونا ندخلو ليه
مايكل : ايلا كان هاكا هادي هي الفرصة فين نشدوهم هما و الافخاخ ديالهم
سيلين : مايمكنش نضيعو بحال هاد الفرصة ا جوزيف .. غاناخدو الاذن باش نقتاحمو ديك البلاصة و نديو معانا كاشفوا الألغام الارضية و قوات الدعم و الشرطة الجوية باش مايلقاو منين يهربو
مايكل : مابقاش الوقت ضروري نتصرفو دابا
مشاو كايجريو تفرقو كل واحد شنو مشا كايدير شي مشا يهضر مع السلطات العلوية باش يعطيوهم الدعم و شي مشا باش ياخد الاذن و شي مشا باش يوجد راسو ...
غانرجع لكم باللور شوية و بالضبط من مور ماقطعات جيكساو على بولترا
▪ كان جالس حدا لابيسين حتى جاو رجالو كايجريو لعندو
البودي كارد 1 : سي رياس
رياس : اش كاين؟
البودي كارد 1 : ( كايتلعثم ) مدام ماري ماكايناش ا سي رياس فالفيلا كاملة
بقا جالس و ساكت ثواني .. دوز صبعو على نيفو بحال دوك المدمنين على الكوكاين موراها وقف قدام داك البودي كارد حط يديه على قرفادتو بحالا كايهضر صاحب مع صاحبو
مع سالاها طردق ليه عنقو و لاحو فلابيسين .. ساس يديه و شاف فلي كاردكورد لاخرين يلاه بغا يهضر و هو يصوني عليه رقم غريب
رياس : ماكنتش متوقع غاتصوني بهاد الزربة
***** : ( صوت رجولي ) دغيا عرفتيني؟
رياس : شكون غايصوني عليا فهاد الوقت من غيرك ..
***** : بغيتي داداك الحبيبة؟ اجي لهاد العنوان لي غانسيفط لك فميساج
رياس : ( بإبتسامة ) غانتسنا العنوان
قطع عليه و ما هي الا ثواني حتى وصلو عنوان ديال واحد القصر مهجور
رياس : تبعوني
تبعوه الكارد و مشاو لداك العنوان لي فالميساج ماكانش بعيد بزاف .. عيط على رجال خرين باش يتبعوهم لداك القصر .. من هادشي كامل نفسيتو لي كانت عادية مامعصبش و ماخايفش على داداه حيت ببساطة عارفهم ماغايديرو لها والو حيت هو لي مقصود ماشي داداه .. مشا بخطوات سريعة باش يدخل و هاز فيديه الفردي ديالو كايعمرو وصل للباب و يلاه شوية و هو يبان ليه خيط من فوق الباب عاق بيه دايرين لهم فخ رجع للجنب و هضر مع رجالو يشدو الجناب و مايكونوش قدام الباب .. دفع الباب و هو باقي مخبع فالجنب يلاه تحلات نص حلة و هي تتسمع صوت كايشبه لصوت التفركيع طل جهة الباب لقاها ولات فيها تقبة بحالا ضرباتها دبابة .. زاد دفع الباب و دخلو للقصر كايقلبو على لي خطفو داداه ماري .. بقاو كايقلبو الكارد بيت ببيت اما هو هبط للاكاب لتحت كانت الباب مسدودة تبعوه الكارد و بغاو يسبقوه زعما باش يحاميو عليه ولكن رجعهم اللور و هز الفردي ديالو وجهو للمقدمة و بدا كايتيري فالباب حتى رجعها غربال دفعها برجليه و هي تبان ليه داداه مربوطة فوق كرسي و سادين لها فمها
دادا ماري : اممممممممممم
فك الحبال ديالها و حل لها فمها غير وقفات
رياس : دادا واش اذاوك؟؟
دادا ماري : ولدي رياس شكون هادو؟؟؟ معامن عندك العداوة؟؟؟؟
رياس : يلاه نخرجك من هنا
خرجها و يلاه بغاو يخرجو من الباب لقاو القنابل محاصرين الباب مشاو باش يخرجو من الشراجم لقاوهم كلهم محاوطين بالقنابل ...
الكارثة هي ايلا طردقات قنبولة وحدة يتطردقو القنابل لي حداها و القصر يتهدم عليهم و خصوصا ان القنابل قراب من بعضياتهم زيد عليها القنابل مم النوع الخطير ايلا قربو لهم غايتفركعو عليهم و من فوق هادشي قنابل بالوقت يعني فكلا الحالتين غايطردقو و هادشي كامل بسبب الكاردكورد لي تصرفو بغباء و دخلو كاملين مابقا حتى حد لي يحضي .. و لي كارد كورد لي وصاهم باش يتبعوه مزال مابان لهم الاثار .. هادي غير البداية و مزال الانتقام عاد فبدايتو .. دارت ليه طعم لي هو داداه و و خلاتو يدخل للمصيدة برجليه و حاصراتو بالقنابل المميتة لي ممكن فأي وقت تتفركع
رياس : دادا بقاي هنا
دادا ماري : ولدي فين غادي؟؟؟؟؟
خلاها فالدروج و خلا معاها الكارد كورد مشا كايقلب فالقصر على اي ألة حادة يستعملها .. من زهرو لقا واحد القرعة ديال شراب خاوية هرسها و مشا لجهة الباب .. جلس على ركبة وحدة و حيد الفوقي ديال سورفيط قرب للقنبولة لقا باقي فيها دقيقة بالضبط و تتفركع .. هز ديك الجاجة و مشا كايشوف فالخيوط كانو فيها 4 واحد حمر و واحد زرق و واحد صفر و واحد كحل يعني كل 2 لاياش خدامين .. قنبلة ثناوية كاتخدم ب2 طرق الحل هو يقطع 2 خيوط دقة وحدة باش يعطل العد العكسي و باش ماشي غير يدوزو من فوقها تتفركع شد الخيط الكحل لي هو الخيط الصاعق و الخط الاصفر ديال تعطيل العد العكسي و بحركة سريعة قطعهم بجوج بلا مايتسنا .. من زهرو هو ديجا عندو خبرة فالقنابل و اخييرا تعطلات ديك القنبلة ولكن واخا هكاك كان باقي مشكل لي هو القنابل لي ضايرين بالدار كلهم باقيين يخدمو يعني عندهم اقل من دقيقة يخرجو كلهم من القصر ولا غايبقا فيهم غير لفتات .. مشا كايجري لعند داداه جرها من يديه و مشا كايجري .. تبعوه الكارد عرفر بلي ماعندهمش الوقت بزاف غير خرجو و هما يتلاحو بعيد و مع اللوحة لي تلاحو تفركعو القنابل كلهم لي فالقصر فدقة وحدة كون زادو تعطلو غير شوية كون راب عليهم .. ماجاو فين ينوضو حتى تسمع صوت القرطاس من فوقهم بحال الشتا .. جر داداه و مشا كايجري لجهة واحد الشجرة خبعها موراها و بدا كايتيري هو و رجالو فهادوك لي تما حتى صفاوها لهم كاملين خلاو واحد لي حي او بالاحرى هو لي خرج لعندهم كايعرج مضروب فرجليه من حيث لا يد رون .. وصل داداه للطوموبيل و سيفطها سيفطها مع الكارد للفيلا .. جا واحد نن رجالو كايجري عطاه باش يمسح داك الدم لي تلوث بيه الجسم ديالو و فيستا يلبسها
البودي كارد : سي رياس ها واحد فيهم باقي حي واش نقتلوه
بولترا : علاش هاد الزربة؟ مزال غايبقا فضيافتنا .. مشا لعندو و بغا يهزو من شعرو ولكن لقاه قرع مالقاش منين يهزو ضور راسو شاف فدوك لي ميتين كانو كلهم قورع
بولترا : ( عقد حجبانو و ذلا شنايفو ) والداكم قنية علاش لي ماكبرتوش شعركم؟
المختطف : ( كايضحك و كايستافزو ) ههههههههه يسحابلك غاتخلعني بهاد الوجه الحمق عرفتي كون تعطلتي غير شوية اش كنت غاندير فداداك؟ كنت غانعطيها لرجالي يغتاصبوها واحد من مور واحد و موراها غاندبحها و نسيفط راسها لقدام باب دارك مغلف ببابي كادو
تبدلو ملامح بولترا لملامح خاويين مافيهم حتى تعبير و هز الفردي فراس داك لي جالس على ركابيه
المختطف : ( ببكاء تمثيلي احترااافي ) عتقوووووني من هاد المجرم الله يخليكم .. باغي يقتلني و ييتمني على ولادي
لوجين : حط سلاحك للارض
المختطف : عتقوووني الله يخليكم ياك عطيتكم المعلومات لي كنتو محتاجينها و واعدتوني بالحماية
غير سمعات سيلين بلي هو لي عطاهم المعلومات مشات كاتجري لجهتو ولكن ماجات فين تعتقو حتى تيرا فيه ...
الشرطة : لوحو السلاح للارض
لوجين : ماتقربوش لعندووو يقدر يكون داير شي فخ
هز يديه بجوج و عطا اشارة لرجالو باش يحطو السلاح للارض و حتى هو لاحو .. بقا كايقرب لعندهم و كايقاد فالفيستا ديالو ماحدو هو كايقرب و هما كايبعدو .. جوزيف ضرب فالشجرة بيديه و مشا و تبعو مايكل مخليين ديك روينة ديال البوليس تما حيت عارفينو ماغايديرش شي تصرف غبي .. ركبو فطوموبيل و بدا كايضرب فيها
جوزيف : علاااش لي ماقلهاش لينا علااااش
مايكل : كالم ا صاحبي كالم .. حنا ماعارفينش اش واقع بالضبط ولكن رياس مايمكنش يكدب علينا و يخبي علينا بحال هاد الامور
جوزيف : شنو كاتفسر هادشي؟؟؟ شنو كاتفسر البلايص لي سافر ليهم فنفس اوقات الجرائم؟ شنو كاتفسر بلي قتل الشخص الوحيد لي عندو معلومات بزاف عليه؟؟ شنو كاتفسر البلاصة لي كان فيها و هي نفسها لي نعتها لينا داك الشخص؟ و ماشي غير هادشي واش فخبارك بلي هو سبق لي لقيتو فنفس البلاصة لي ماتت فيها المرا بسم السيناييد؟ و هو نفسو لي كتاشف كيفاش حتى ماتت .. كيفاش انا و سيلين ماكتاشفناش و هو لي ماعندوش علاقة بهادشي دغيا كتاشف؟؟؟؟
مايكل : ماتشوفش القضية من هاد الجهة و ماتنساش حنا مزال ماهضرنا معاه و مزال مافتشنا مكان الجريمة باش نعرفو اش وقع بالضبط .. ماتنساش اش دار على قبل كل واحد فينا و ماتنساش بلي بينا و بينو عشرة عمر
جوزيف : هادشي لي مخربقني ا مايكل
مايكل : خلينا نرجعو لمكان الجريمة و ديك الساعة نفكرو فهادشي
▫كانت واقفة فالمطار كاتتسنا طيارتها و بو فجيبها حتى بدا كايصوني لها تيليفون هزاتو و لقات نفس النمرة لي عيطات لها و ماجاوباتش .. مشات جلسات و جبدات البيسي من شكارة صغيرة و عاودات برونشاتو مع طيلي و قادات اللعب باش تغير الصوت و البلاصة عاد جاوبات
جيكساو : ساليتو؟
***** : ساليت و كون متأكد غايديرو ليه الاعدام ماشي غير المؤبد
جيكساو : واحد اليومين و غايخرج
***** : لا ماكانظنش غايخرج فيومين بسبب الهضرة لي قلتي لي نحفضها لداك الراجل باش يقولها للبوليس .. كون متأكد الاعدام
جيكساو : فلوسك غايوصلوك للكونط ديالك فالبنك غدا
***** : ولكن ياك قلتي لي غاتعطيهم لي كاش؟
قطعات عليه و هي مرتاحة الضمير .. سالات النص الكبير فإنتقامها .. الطعم و المصيدة و الفخ ديال البوليس و دابا بقات اخر مرحلة .. وصل وقت الطيارة لي غادا للنمسا مشات عطاتهم باسبورها و قادات الاجرائات و طلعات
•• في النمسا ••
مشا مع مايكل و لوجين لمخفر الشرطة الطريق كاملة و هما ساكتين اما سيلين و جوزيف بقاو فمكان الجريمة
سيلين : كيفاش قضية صاحبك هو نفسو جيكساو؟ كنتي عارف ياك؟؟ و كنتي كاتعاونو
جوزيف : الصمت
سيلين : لا و زوينة مخليه فمكان الجريمة باش يمسح البصمات ( بدات كاتصفق بيديها ) وااااو زعما على ذكاء عندهم شي حاجة زايدة الما دايز من تحتنا و حنا مافخبارنا والو .. حتى حاجة ماكانت صدفة كلشي خططتو ليه دخلتي لهاد القضية ماشي غير هكاك قول باش تتلفنا .. خليتيه يدخل لمسرح الجريمة ماشي غير هكاك و زيد عليها وشيتي بالشاااهد الوحيد واش ماعندكش ضميير؟؟؟؟؟ كيفاش عطاك خاطرك ديرها القتاااال ولكن غير تهنا ماغانتهنا حتى تتخشا مع صاحبك فالحبس .. هزات طيلي باش تصوني و هو يحيدو لها و خبطو مع الارض حتى تشتت مشا الباتري فجهة و الغطا فجهة اما لافيشور ولات مزوقة زواق الزليج ...
جمعاتها معاه بتصرفيقة حتى شاف النجوم قدامو خلاتو مصدوم و هبطات كاتجمع فطيلي لي تشتت هزها من يديها و قابلها معاه بوجه غاضب و مزير لها على يديها
سيلين : هز يديك و رجعها لاسميتك راجل .. هرستيه زعما ماغانقدرش نعيط للسلطات العليا تسنا و شوف بعينيك ( شافت فواحد البوليسي و بدات كاتعيط عليه اجي عافاك الله يخليك
جوزيف : اش كاتخربقي؟؟؟؟؟ كيفاش كاتهضري و نتي ماعندك حتى شي دليل؟؟؟ و اش خلاك تتيقني بلي رياس هو مول الفعلة؟؟؟؟ هادي راها مؤاااامرة واش مكلخة حتى لهاد الدرجة؟؟ واش شفتي لي كاردكورد لي مع رياس ولا مشفتيهمش؟؟؟
جوزيف : اشمن دلائل؟؟؟ ايلا كان هداك بالصح هو الشاهد علاش لي جاب معاه هاد الرجال لي ميتين.؟؟ هدا راه دفاع عن النفس كون ماقتلهمش كانو غايقتلوه هو
سيلين : نتا لي اش كاتخربق دابا .. ا سي راه صاحبك هو لي هجم على القصر ماشفتيش كي قنبلو؟؟؟ و زيد عليها قتل الشاااهد قدام عينينا .. هاد الهضرة ديالك كاملة ماغاتبدل والو جميع الدلائل ضدكم و صاحبك هو لي تهجم على القصر ماشي هما لي تهجمو على دارو
مشات و خلاتو كايفكر .. منين شاف دوك خياتنا ميتين عرف بلي صاحبو تعرض لفخ و الدليل هو لي هضر معاهم فطيلي كان كايبان فيه ذكي و كان مخبع كلشي كيفاش زعما حتى تشد دابا؟ اكيد هادشي متقصد باش يطيح رياس فهاد الفخ
•• فمخفر الشرطة ••
▪ كان جالس و حاط رجليه من فوق الطبلة لي فغرفة استجواب كانت كلها مراقبة بالكاميرات و قدامو مايكل و لوجين
مايكل : لوجين تقدري تخليني معاه الراس فالراس
لوجين : لا مانقدرش هدا راه مجرم خطير و بزاااف
مايكل : لوجين رياس كانعرفو و حتى سي البرت و جوزيف كايعرفوه
لوجين : كيفاش كاتعرفوه؟؟
مايكل : تقدري تخرجي تخلينا بوحدنا
لوجين : فاش تسالي كانتسنا الشرح .. خرجات و خلاتهم
مايكل : رياس واش عندك عداوة مع شي حد؟؟
بولترا : ( هز يديه براحة ) علاقتي مزيانة مع كلشي
مايكل : شنو وقع حتى مشيتي لديك البلاصة؟؟
بولترا : دادا
مايكل : ( بفرحة ) واش جات؟؟
بولترا : جات مدة هادي راها معايا فالفيلا و كاتسول عليك و على جوزيف .. شي حد بغا يلعب معايا و خطفها
لوجين : كمل نتا التحقيق معاه انا غانشوف شكون كايصوني .. مشات و هو رجع لعند بولترا جلس حداه
مايكل : لا لا لا مايمكنش يكون هادشي كلو صدفة .. انا متأكد نتا مستهدف فهادشي .. كلشي تسمم ا رياس البرت و اعضاء الكونغرس و اعضاء البرلمان .. كاع لي يبرأوك تسممو معامن عندك عداوة ا رياس؟؟؟؟
بدا بولترا كايضحك حتى سالو دموعو على هاد الموقف لي راه فيه .. فين عمرو دخل للمخفر؟
بولترا : ههههههههههههههههههههه واااو هدا كاع حقد؟
مايكل : ماعرفتش بالضبط شكون دا ر لك هادشي ولكن لي متأكد منو هو التسمم ماشي صدفة و لي دار لك هادشي ماشي عدو عادي...
مايكل : كاينا مشكلة
بولترا : شي حاجة خرا لي غاتفاجئني؟
مايكل : ماعرفتش كي غ انقولها لك ولكن غاتضطر تبقا فالحبس حتى يوصلنا الجواب من السلطات الامريكية حيت عندك علاقة مزيانة معاهم هدا هو انسب حل كاين دابا حيت لا تسنينا المسؤولين ديال النمسا حتى يبراو غايخصك تبقا شي سيمانة ولا جوج ... حط رياس رجليه على الطبلة و تكا على الكرسي
بولترا : و شكون قال الويكاند لي يدوز فالحبس خايب؟
مايكل : راه هدا احسن حل ماغانتسناوش بزاف حيت الجواب غايوصلنا من هنا يومين
بولترا : ماعنديش إشكال فهادشي
مايكل : غانهضر مع مسؤولين السجانين باش يحطوك فزنزانة بوحدك فيها خاص نعلم جوزيف باش يعلم جميع القوات لي كايقلبو على جيكساو بلي هدا كان انذار غالط و مزال ماتثبتات الصحة ديالو ... زاد رجع راسو اللور و ترسمات ضحكة على وجهو عرفها هي مولات هادشي كامل علاش شكون غايقدر يدير هادشي من غيرها؟
بولترا : هممم
مايكل : واش شاك فشي واحد
بولترا : ( أومأ براسو بمعنى لا )
مايكل : واش خاصك شي حاجة؟؟ قبل مانوصيهم يديوك؟؟
بولترا : عيط على أدلر
مايكل : واحد الدقيقة
داكشي لي دار عيط على ادلر لي كان مع داداهم ماري .. شدد عليها الحراسة و موراها مشا لعند بولترا قبل مايديوه للزنزانة لي غايجلس فيها .. دخل عندو لمكتب التحقيقات سلم على مايكل و جلس حدا رياس كايتسناو مايكل يخليهم بوحدهم حيت كاينين شي حوايج لي كايبقاو غير بيناتهم
مايكل : انا غانمشي نهضر مع جوزيف و نرجع ... مشا و خلاهم
ادلر : ( كايضحك ) على اخر يامك وليتي كايحبسوك
بولترا : شكون قالك كايحبسوني ههههههه
ادلر : خسارة ماعاطيينيش الحق نجلس معاك
بولترا : عارفك غاتتوحشني
ادلر : شكون سبابك باش وصلتي للهنا
بولترا : و شكون من غيرها
ادلر : جيكساو عاوتاني؟؟؟
بولترا : مابقاش بزاف و غانعاود نطلاقا بيها
ادلر : غاتقتلها؟
بولترا : غانحرق لها مراحل حياتها و شكون بحالها توصيلة سريعة للأجل ديالها ههههههههه
ادلر : خاص دير فيديو و نتا كاتتفنن فيها باش مرة مرة نبقاو نتلفو بيه الوقت
ادلر : دابا نجيب ليك حوايجك غاتحتاجهم فهاد الويكاند لي غادوز هنا .. غاتحتاج حتى شي بيجامة ياك ههههههههه
•• فبلاصة خرا فنفس الكوميسارية ••
كانو جالسين مايكل و جوزيف و سيلين و لوجين فغرفة وحدة و مايكل كايشرح لهم و لوجين كاتعطيهم الدلائل بلي هاد الموضوع ملعوب
مايكل : فهمتو دابا؟
سيلين : يعني رياس هو ملك سوق السوداء؟ و نفسو كايعرف سي البرت؟
جوزيف : و اخيرا بديتي كاتفهمي
سيلين : لي مابغاش يتفهم لي هو شمن علاقة كاتجمعكم بيه؟
مايكل : رياس صديق الطفولة ديالنا
سيلين : منين هو صديق طفولتكم علاش لي مامشيتوش معاه فطريقو نيت.؟
شاف جوزيف فمايكل و رجعات بيهم الذاكرة لقبل سنيين طويلة ...
" Flash Back "
قبل سنوات طويلة فحي من احياء أمريكا بالضبط وسط الفندق قديم و مهدوم كانو جالسين اشخاص من حوايجهم باين فيهم متشردين و على ماكايبان ديك الخربة هي ديارهم و هي منين كايتغطاو من الشتا و يتخبعو من الشمس .. ها لي مفرش كارطونة ها لي مفرش مانطة قديمة باش يحمي لحمو من قسوة الارض الباردة فواحد القنت كان واحد الولد صغير فسن 8 سنين شعرو اشقر و عويناتو زورق بحكم اصلو الامريكي كان خايف من دوك لي قدامو .. خايف من الرجال المتشردين لي باغيين يغتاصبوه و يعقدوه فطفولتو كل شوية كايقربو ليه و هو ماعارف مايدير حتى ناض و دفع واحد فيهم بكل قوة و ناض كايجري خرج من ديك الخربة و بقاو تابعينو من اللور باغيين يشدوه حتى دخل فواحد طوموبيل كانت جاية تحرد من لحمو كامل
▪ داخل طوموبيل ▪
كان جالس الشيفور و دري صغير تكون فعمرو 10 سنين اللور هو و راجل كبير ماشي باه حيت ماكايشبهش ليه حتى لديك الدرجة و نظراتو ليه ماكانوش نظرات الاب لولدو .. نزل الشيفور من اللوطو باش يشوف اش واقع بغا يتبعو حتى دري صغير ولكن شدو الراجل الكبير من يديه
العم : ها شيفور هبط فين غاتهبط حتى نتا؟ .. تنطر الولد من يديه بلا مايجاوبو و خرج من طوموبيل مشا لحدا شيفور و هو يلقا دري صغير ناعس فالارض و شاد فرجليه و كايغوت بسبب التهريسة لي كلاها فرجليه و زيد عليها غير كايضور عينيه فالبلاصة لي هو فيها و باين فعينيه الخوف و من نظراتو قدر الطفل لاخر يعرف بلي الولد المضروب هارب من شي حاجة
***** : واش كاضرك رجليك بزاف؟ ... ماجاوبوش الولد الصغير حيت ماكانتش عندو القدرة ديال الهضرة بسبب الحريق
العم : ( من داخل طوموبيل ) واش غانباتو هنا
الشيفور : سيدي راه ضربنا ولد صغير و بان ليا عندو شي كسر فرجليه
العم : لوح ليه 10 دولارات و خليه يضبر راسو بيهم هدا هو حال هاد المتشردين خاصهم غير فين يلصقو
الشيفور : واخا ا سيدي
***** : لا غادي نديوه معانا
الشيفور : سيدي راه ولد خوك رياس مابغاش يخليه هنا
العم : واش غاتسمع ليا انا لي كانخلصك ولا غاتسمع لهاد البرهوش هادشي لي بقا ناقص
ماجاوبوهمش و ماهضرش معاهم رجع للطوموبيل و هز محفظتو الصغيرة حلها و كانت فيها بلاستيكة مخشي فيها وراق او بالاحرى نسخ على شي ورقة .. هز وحدة منهم و عطاها لعمو لي غير شافها و هو يصوط بعصبية حيت ببساطة وراه وثيقة فيها شكون هو الوريث الشرعي لأملاك باه كاملين لي مامذكورش فيها نهائيا بلي شي حد من عمامو غايكون وصي عليه حتى يوصل للسن القانوني
العم : ( كايهضر مع شيفور ) هز داك الحثالة و جيبو للطوموبيل حتى نشوفو اش نديرو معاه من مور مانرجعو من هاد الاجتماع
الشيفور : واخا ا سيدي
داو معاهم الولد الصغير و وصلو العم للبلاصة لي عندو فيها اجتماع و موراها نيشان دازو للكلينيك مشاو جبرو ليه رجليه و خداو ليه 2 عكاكيز على ود رجليه و عاودو ركبو للطوموبيل و شدو الطريق للبلاصة لي كاين فيها عم رياس
رياس : شنو سميتك؟
***** : سميتي جوزيف
رياس : مناش كنتي هارب فاش ضربناك
جوزيف : الصمت
الشيفور : واش عندك شي عنوان ا ولدي نوصلوك ليه
جوزيف : كان عندي ولكن دابا مابقاش
الشيفور : كيفاش واش واليديك بدلو المدينة ا ولدي
جوزيف : كانعرف غير ماما
الشيفور : و فينها نوصلوك لعندها؟؟
جوزيف : ( حاني راسو ) قتلوها هادوك لي كانو تابعيني و باغيين..
رياس : ماعندكش دابا فين تمشي؟
جوزيف : لا ماعنديش
الشيفور : دابا نشوفو لك شي دار اليتامى قبل مانرجعو ماتخافش غايتهلاو فيك
رياس : تبغي تعيش معانا؟ ... هز فيه جوزيف راسو بصدمة حيت غير طوموبيل و كي دايرا فما ادراك بالدار لي غايكونو ساكنين فيها اكيد شي قصر ولا فيلا
جوزيف : ولكن انا ماكانعرف ندير والو من غير نلمع الصبابط ماعنديش فاش نفيدكم
رياس : ولكن انا ماقلتش لك غاتخدم عندنا .. قلت لك واش تبغي تعيش معانا حيت ماعندكش دار دابا
جوزيف : ( بفرحة ) اه قابل
جا العم ساخط و ركب معاهم و هو ماعاجبو حال
العم : هاد الحثالة باقي هنا
الشيفور : السيد الصغير قال بلي باغيه يعيش معاكم ا سيدي
العم : صافي هادشي لي بقا ناقصني ولات عندنا خيرية فداك القصر مزال ماتفكيت من داك البوهالي لي مانعرفت منين جابو و دابا زادنا هدا مافهمتش فين باغي يوصل بهادشي ديالو ...
" Flashback End "
رجع للحاضر من مور ما غاص فذكرايات الماضي فاش نقذو رياس من ديك الحياة و فاش عرض عليه يعيش معاه بلا مايتسوق لهضرة عمامو واخا كان صغير الا و انه كان شادهم من اليد لي كاضرهم .. تما فين تعرف على ادلر لي كان حتى هو مع رياس فالقصر ديال العائلة اما مايكل كان باقي غارق فذكريات الماضي و كيفاش طلاقا برياس و جوزيف
جوزيف : قصة طويلة من بعد و نعاودوها لكم
مايكل : رياس صديق بالمعنى الحقيقي .. حتى نساليو من هادشي و نعاودو لكم ولكن لي خاصكم تعرفو الفعايل ديال داك المجرم ماشي فعايل رياس
لوجين : ماشي فعايلو ولكن مؤكد هادو فعايل جيكساو و عندو شي حسابات معاه
سيلين : هاد الهضرة ماشي نتوما لي غاتأكدوها .. فاش يوليو المسؤولين لاباس غادي يأكدو هضرتكم
لوجين : هادشي ايلا فاقو حيت حالتهم خطيرة بزاف .. خاص ضروري توصلنا الموافقة من عند المسؤولين لي فأمريكا من زهرو جات مع السبت و الاحد ماغادي نلقاو حتى شي جواب حتى لنهار الاثنين
مايكل : كانظن خاص نعاودو نبحثو مزيان فقضية الاتصاا حيت مادخلاتش لراسي يكون داك الشخص لي قتلو رياس هو نفسو لي تاصل
سيلين : فهادي كاين شك .. مدام هو قال هارب من جيكساو اش داه للعنوان لي عطانا؟ و اش وصلو ليه و هو اصلا كان خارج البلاد على ما كنا كانظنو
لوجين : الا ايلا كان جيكساو
سيلين : ( بصدمة ) هو نفسو لي عيط لينا و هضر معانا
جوزيف : ماكنتش عارف بلي حتى نتي كاتفكري
سيلين : ( تجاهلاتو ) هاد التسمم لي وقع غادي يسبب الهضرة بزاف فعامة الشعب من الاحسن يبقا هادشي غير بين البوليس بلا مايوصل للصحافة باش مايتخلعوش ... شوية بدا كايصوني تيليفون ديال جوزيف
جوزيف : وي ادلر
ادلر : مسالي فهاد الويكاند؟ ( كايحك راسو ) واخا كانظن ماغاتكونش مسالي مع داكشي لي وقع
جوزيف : راك عارف هادشي لي وقع .. موصيبة كبيرة ماكانظنش غانكون مسالي حيت خاصني نركز مع هاد المشكل باش ماتتسربش الاخبار لبرا و دير ضجة كبيرة
دار جوزيف الوقت معاياش غايمشي للفيلا غير قطع تيليفون ضار خنزر فمايكل جيت ماعاودش ليه بلي داداهم لي هي بمثابة الام ديالهم كانت فخطر
سيلين : ماغاتعاودش لينا اخر الاخبار؟
جوزيف : اخر الاخبار ا لالة سيلين .. دادا داروها طعم باش يستدرجو رياس لديك البلاصة و يلصقو فيه التهم ديال جيكساو باقي باغا شي دليل اخر ولا باراكا عليك
مايكل : تهدن ا صاحبي .. دادا غاتكون بيخير معانا
جوزيف : واش بقات فهادشي.؟؟ كانشوفو صديق طفولتنا و خونا مشدود فالحبس و ماعندنا مانديرو ليه و المرا لي رباتنا هاد النهار دازت الموت قدام عينيها و كاتقوليا نتهدن ( بقا كايدوز على وجهو بعصبية و ساط و عاود شاف فيهم ) هاد المجرم مابقاش حسابو مع البوليس .. حسابو ولا معايا سالا وقت اللعب و سالا وقت رخيان الحبل .. داك الحبل لي رخيتو عليه فهاد القضية غانرجع نزيرو حتى نشنقو بيه
مايكل : ماغانتهنا حتى يشد عقوبة فيها الاعدام عاد يبرد دمي عليه
جوزيف : الاعدام هو لي غانديرو ليه فاش غايطيح بيدي ماغانتسناش يتطبق عليه القانون .. فات الخط الحمر و وصلات بيه يمس حاجة كاتخصنا ( شاف فيهم بجدية ) سالا وقت اللعب .. مايكل شوف الوشم لي لقيناه فدوك لي ماتو فالبلاصة لي لقينا فيها رياس و تحقق ليا اينا عصابة مولاتو .. سيلين هضري مع الشرطة الالكترونية تحل الشفيرات لي كاينين فالمكالمة لي وصلاتنا من عندك داك الحثالة .. لوجين نتي تكلفي بالسجلات ديال المسافرين ديال السيمانة كاملة .. و غدا غانبداو الخدمة و نرجعو اللور للنقاط لي غفلنا عليهم
تافقو و خرجو من المخفر كل واحد متاجه لبلاصة باش يتكلف بمهمة و موراها كل واحد يمشي لدارو يرتاح باش لاغد ليه يبداو اما بالنسبة لجوزيف و مايكل مشاو للفيلا باش يديو داداهم و يأمنو لها الحماية نحيدو من عندهم و نمشيو لبلاصة خرا
" داخــل الـمــخــفــر "
كان الوضع عادي ولكن هادئ كتر من المعتاد .. لي خدامين فالليل دايرين خدمتهم ما عليهم ما بيهم حتى بداو كايتفوهو و بدا كايطيح واحد من مور واحد بقوة النعاس حتى ولاو كي مشتتين كي دبان فالارض .. دخلات جيكساو فحوايج راجل و دايرا كاسكيط باش تخبع الملامح ديال وجهها و قناع باش ماتصدقش طايحة فالحفرة لي حفراتها .. و فضهرها كاين صاك رياضي .. سدات الباب ديال الكوميسارية و طلعات لغرفة المراقبة من مور ماتأكدات بلي دابا كلشي ناعس بسبب الغاز المنوم لي تسرب لهم مع الهواء .. طفات كاميرات المراقبة بإستعمال ليكات فيديها واخا ماغاتحتاجهمش حيت كالعادة بصماتها مجهولين و مامعتارفة بيها حتى دولة .. هبطات للزنزانات لي لتحت و هي رادة البال .. كان كلشي فسابع كومة حتى لي فالزنزانات .. بقات كاتقلب على بولترا مالقاتش ليه الاثر فالزنزانات لي لتحت .. كالعادة النفوذ كايديروها .. طلعات كاتقلب عليه فالبيروات واحد بواحد حتى لقاتو فواحد البيرو و من سوء حظو مافلتش من الغاز المنوم بتاسمات ليه بشر .. سدات الباب و هزات كورسي و قلباتو و حطاتو حدا واحد الفوطوي كان ملاوح فيه و جلسات تقابلات معاه من مور ماحطات الصاك .. دارت يديها على الكرسي و حطات راسها على يديها و ميلاتو كاتشوف فيه و تتمعن فيه اشمن طريقة غاترد ليه الصرف بيها .. جا فبالها تقتلو ولكن لا ماشي من سماتها تقتل منافسينها و هما ناعسين و خاصة ايلا كان منافس بحال بولترا لي حقن لها السم فأخر مرة شافها .. عقل كايقولها قطعي ليه صباعو و كل نهار سيفطي ليه واحد و عقل كايقولها حيدي ليه لسانو و خليه أخرس طول حياتو و عقل كايقولها جبدي ليه عينيه و حنطيهم و ديريهم خاتم فيدك ولكن هادشي كامل ماجاتش ديرو و هو ناعس .. يعني من الاحسن ديرو و هو فايق و كايحس باش تتلذذ بغواتو فكرات حتى فكرات و خدات وقتها حيت باقي 6 ديال سوايع عاد يفيق و لقات الطريقة لي غايبقا يتفكرها بيها فوقما يشوف راسو فالمرايا .. حلا الصاك ديالها و جبدات جنوي و فاش كانقول جنوي راه كانقصد جنوي نييت .. قلبات الكرسي و تحدرات لعندو بدات كاتحل صدايف ديال الفيستا ديالو و القاميجة حتى عراتو من الفوق .. هزات جنوي و بدات كاتخطط فصدرو بواحد الاحترافية بيان سيغ حيت هاد الحرفة عندها ديال سنين و مينين .. والفات تخطط فبنادم .. بدات كاتخطط ليه فصدرو و كاتغرقو جنوي ولكن دايرا حسابها لاتمشي تضرب ليه شي عرق ولا تقيس القلب .. مخلية الحد ديال عمق الجروح هو اخر حد ديال الجلدة و اللحم لي فالصدر باش مايقدرش يحيدها واخا يدير 1000 عملية تجميل حيت ببساطة ايلا دارها غايعرض راسو للخطر و خاصة من ناحية القلب .. كملات التخطيط ديالها فصدرو حتى ولا كلو عامر دمايات و الدم غير كايشرشر .. جبدات المعدات الطبية لي كانت ديجا هازاهم فالصاك ديالها و بدات كاتحبس الدم موراها بقات كاتنضف ليه الجرح حتى ولات الكتابة ديالها واضحة عاد جبدات طيلي و صوراتها مع الوجه ديالو موراها رجعات طيلي لبلاصتو و لوات عليه فاصمة و عاودات لبساتو حوايجو فهدوء ولكن ضروري ماكايكون شي حد كايخرب اللحظات السعيدة و كايحول داك الهدوء و الكالم لصداع و الهراج .. بدات كاتسمع صوت الدقان بجهد فالباب ديال الكوميسارية و شي واحد بحالا باغي يفرع الباب حيت داك الدقان تحول لضريب و زديح فالباب حبسات كاتتسنط لداك الصداع شوية تحبس مابقاش ...
بيان سيغ مارتاحتش حيت باينا هدا واحد من صحابو لي جا .. بقات كاتتسنط حتى سمعات صوت ديال تهراس زاج عرفاتو غايكون هرس زاج ديال شي شرجم .. بدات كاتلبس الحوايج بزربة لبولترا و جبدات فوطات من صاك و الكلور باش تمسح الدم لي فالارض .. سمعات الخطاوي فالكولوار و جايين لجهتها .. مسحات داكشي و رجعات تخربيقها للصاك .. هزات الصاك و رجعات الكرسي لبلاصتو ماجا فين يتحل الباب حتى كانت هي حلات الشرجم و نقزات منو و مشات كاتجري ماشي خايفة من لي دخل حيت عارفة راسها غادير فيه كتر مادارت فبولترا ولكن لي مافهماتش كيفاش كاتأثرش بالغاز المنوم و زيد عليها ماكانتش باغا دخل فشي عراك فهاد الساعة ...
كانو اسباب لي ماخلاوهاش تصفيها لداك لي دخل ولكن ماكانش عندها الوقت الكافي ... فالوقت لي هي مشات دخل ادلر داير كمامة فنيفو كايقلب على بولترا حتى لقاه فاقد الوعي عرفها هي مولاتها حيت فاش دخل لقا البوليس كلهم فاقدين الوعي يعني ماكانش يخفا عليه بلي كاين غاز منوم فالهواء .. جلس حدا بولترا كايتسناه يفيق حتى لواحد الشوية و هو يشوف الارض باقا فازكة شوية دوز يديه فالارض و شمها لقا ريحة الكلور فيها واخا جاتو غريبة فواحد اللحظة اش جاب الكلور لتما ولكن فاللخر قنع راسو بلي غاتكون تكفحات شي حاجة .. جلس مقابل مع بولترا كايتسناه يفيق على خاطر خاطرو و عاس عليه و فنفس الوقت عقلو كايخدم ولكن ماشي كايخدم فحاجة لي تفيدو و إنما كايرجع للماضي و ايام الطفولة
" Flash Back "
- في النمسا -
كان كايتسمع صوت بكاء ديال طفل صغير فسن 12 سنة كايبكي و يغوت وسط يذين مرا و راجل باينين جارينو بزز عليه
••••••• : زيييد قدامي هادشي لي بقا ناقصني غير نربي الحماق كل مرة تالف لينا فقنت و حنا غاديين نقلبو عليه
••••• : ( كايبكي حتى كايتلاقاو ليه دموعو فذقن ديالو ) ماما كانطلبك ا ماما ماترجعونيش لديك البلاصة .. ديك البلاصة خايبة بزاف ا ماما ( كايتقطع لو الصوت بسبب البكا و كايتنخصص ) ماما عافاااااااك غايضربوني بزاف تما
زوج الام : ولد الملقط باقي كايطلب بلا حشمة بلا حيا ديك الساعة لاش هارب لعندنا كون بقيتي عندهم
تفلت لهم من يديهم و مشا ركع على رجلين مو كايبوسها و كايرغبها باش ماتديهش لمستشفى المجانين كان كايسحابليه غا تشدو من كتافو و توقفو و تعنقو كان كايسحابليه غاتحدر لعندو و قلبها يحن عليه و تقوليه يلاه ا ولدي نرجعو للدار نتا ماشي حمق ولكن هادشي كامل ماوقعش و عطاتو ردة فعل عمر شي ام تقدر ديرها لولدها من كبدتها ولكن فاش كايدخل الزوج و يحتل بلاصة الأب هنا خاص يتوقع اي حاجة من مو .. ضرباتو برجليها حتى تزوا فكرشو و نعس كايتلوا بالحريق فكرشو مكمش فراسو كي الجنين
الأم : كان عليا نزطم لك على عنقك نهار لي تزاديتي فيه حمد الله منين خليتك حي و عطيتك هاد الحياة لي راك عايش فيها .. غير داك الشماتة ديال باك مات و تهنا منك و انا وحلت فيك
هزو راجل مو بعنف و بقا جارو من تريكوه قدام امة ديال البشري كلشي مستغرب فيه و كلشي قطع ليه فقلبو لدرجة شي وحدين وقفو قدامهم و هددوهم بلي غايعيطو لجمعية حقوق الطفل و شي وحدين هددوهم بلي غايعيطو للبوليس و شي وحدين وبخوهم ولكن هما اش دارو؟ شدو طاكسي و مشاو من تما قبل مايشريو لهم الصداع واخا هكاك بقا الطفل كايبكي
الام : ( خرجات فيه عينيها ) ادلر سسسكت ... ضورو لعندو راجل مو و جمع معاه بتصرفيقة لي خلات صوتو يتقطع صبعان يديه تطبعو فحنك ادلر و حسو تقطع .. بقاو هكاك حتى وصلو لقدام مستشفى المجانين و بداو كايتقاتلو معاه باش يدخل و هو كايتمرغ فالارض و كايجر فرجليه باش مايدخلوهش لديك البلاصة .. بغا راجل مو يزيد يصرفقو ولكن ايلا دارها قدام المستشفى ماغايقبلوهش و غايصدقو مدخلينهم للحبس بتهمة الاعتداء على الطفل و هما هادشي لي ماباغيينش .. ولكن هادشي مامنعوش يكرز عليه بيديه فجنبو باش يسكت .. فاللحظة لي كان كايكرز عليه كان واقف طفل اخر صغر من ادلر حدا واحد الطوموبيل كايتسنا عائلتو يخرجو و حداه واقفين 2 كاردكورد حاضيينو ماجات عينو غير فزوج ام ادلر لي كرز بيديه على جنب ادلر بقا كايشوف فيه بإستغراب
رياس : ( كايهضر مع الكارد ) واش الضرب هو التربية
الكارد 1 : بعض المرات كايكونو شي اشخاص دواهم هو الضرب
رياس : و دراري الصغار؟
الكارد : هاديك تربية
رياس : اش دخل التربية بالضرب
الكارد : الضرب باش دري الصغير مايعاودش يدير نفس الغلط دابا يشرح لك عمك ا ميسيو رياس فاش تكبر ... رياس واخا صغير ولكن كانت فيه واحد الظاهرة غريبة و مرض نادر جدا .. كاتعرفو بلي كاين اشخاص كايتولدو و الجسد ديالهم كايكبر ولكن عقلهم كايبقا صغير تقدرو تلقاو شخص فسن 30 عام و عقلو عقل واحد عندو 10 سنين ولكن واش عمركم شفتو الظاهرة ديال شخص فسن ل5 سنين و عقلو فايت السن ديالو بسنين؟ هادي هي الظاهرة لي عايشها رياس و هادشي بالضبط لي مخلي عمامو يخافو و هادشي لي مخليهم كايسولو و يخططو موراه
من مور ما حبسات الهضرة بين رياس و الكارد دازو دقائق قليلة و هو يخرج واحد من عمامو و بقا واقف قدام باب المستشفى غمز للكارد و هو فهمو طاير هضر مع رياس و دخلو للمستشفى ديك الساعة كان ادلر حتى هو لداخل دخلوه عائلتو .. دخلو للمكتب ديال واحد دكتور و سدو الباب
الدكتور : هو هدا الولد ا سي ماريانو
ماريانو عم رياس : هو هدا
الدكتور : شنو سميتك الصغيور
رياس : رياس
الدكتور : معامن عايش دابا؟
رياس : مع عمامي
الدكتور : همم و عارف عنوان الحي لي ساكنين فيه؟
رياس : ماساكنينش فحي
الدكتور : و فين ساكنين؟
رياس : فقصر **** فالشرق الغربي ديال النمسا بعيد على الغابة الغربية ب8 كيلومتر و على المدينة ب20 كيلو متر
الدكتور : و فين واليديك؟
رياس : ماتو
الدكتور : و عارف دابا فين نتا؟
رياس : فطبيب الحماق ... شاف الدكتور فعمام رياس و عاود شاف فرياس
الدكتور : لا ا صغيور هدا ماشي طبيب ديال الحماق هادي بلاصة غاتعجبك بزاف و غاتخليك تتجاوز الصدمة لي تصدمتي بسبب موت واليديك لي قاليا عليهم عمك مادازش عليه شهر ... شاف رياس الصغير فالدكتور بنظرة عميقة ماشي ديال نظرات الناس لي قدو
رياس : علاش غانتصدم ا دكتور و هما ماتو
الدكتور : حاجة طبيعية ا ولدي ولكن حنا غانخليوك تتجاوز هادشي .. غاتبقا معانا مدة راه عندنا الالعاب و عندنا وليدات صغار يلعبو معاك و ممرضات يقراو لك قصص قبل ماتنعس
رياس : علاش ... شاف الدكتور فعم رياس و خرج و تبعو ماريانو
الدكتور : شوف ا سي ماريانو حالة ولد خوك نتا عارفها ماشي مرض عقلي و هو مزال ماوصل للسن لي القانون كايعطينا الحق فيه باش نشخصو ليه حالتو و نعرفو واش مريض عقلي ولا لا .. كانغامر معاك بزاف فهاد القضية و نتا عارف و انا عارف ولد خوك ماكايعانيش من مرض عقلي .. الحاجة لي عندو هي سن العقل ديالو كايتجاوز سن طفل فسن ل5 سنين
ماريانو : ايلا ماحمقش نحمقوه .. ماغاديش تخدم معايا فابور كانظن الشيك لي عطيتك كافيك و زايد .. مابغيتيش تتعاون معانا غانحيد لك شيك و نشوف طبيب اخر نعطيه غير نص داك المبلغ و غايقبل بلا مايزيد معايا الهضرة
الدكتور : لا ا سي ماريانو ماعندك لاش .. انا غادي نتكلف و خليه على حسابي .. عطيه غير شهر يبقا مع الحماق لي هنا و زيد عليهم دوايات يتلفو ليه الخلايا العقلية ديالو و غادي يرجع حمق بالوراق مايقدر حتى انسان على وجه الارض يرجع ليه عقلو
ماريانو : هادشي علاياش خلصتك ... خلاه و حل الباب باش يدخل مع الحلة لقا رياس واقف فالباب
ماريانو : فين خارج؟
رياس : غانرجع للطوموبيل ا عمي
ماريانو : ( كايضحك بخبث ) ماعندك فين تمشي ا ولد خويا غاتبقا هنا حتى تموت .. الناس كايولدو الولاد و داك الغبي ديال خويا والد شيطان ... ماجاوبوش و خرج للكولوار يلاه بغا يتحرك و هما يشدوه الكارد
ماريانو : ماسمعتينيش واقيلا ا داك الممسوخ ... جبد رياس الصغير تيليفون لي كان هزو فاش كان كايهضر مع الكارد على برا .. و دخل للواتس اب و طلق ليه واحد التسجيل .. من سوء حظ عمامو داك التسجيل كان فيه هضرة الطبيب و هضرة ماريانو .. و هدا هو السبب لي كان خلاه يوقف من مور الباب من مور ماخرجو ديريكت حيت عرفهم خرجو باش مايهضروش قدامو .. ما سالا التسجيل حتى كانو كاع لي حاضرين مصدوميني
ماريانو : حيدو ليه التيليفون .. سربيو دغيا ا دوك الكياضر حيدوووه للبرهوش .. مشاو حيدوه لو و عطاوه لماريانو غير شدو لاحو فواحد الحوض ديال الحوت كان فالمكتب
ماريانو : البرهوش .. قدك فيهم هاد التاحراميات الممسوخ
العم 2 : ماقلتي عليه ممسوخ حتى كان ممسوخ .. منين جاك تيليفون هضر؟؟؟؟
ماريانو : صافي يسحابلو راه سجل داكشي غادي يبدا يبتزنا حتى نتا تعلمتي الابتزاز .. مابقا تسجيل و ماكاين عندك شهود غاتبقا هنا حتى تموت .. ماجا فين يكمل هضرتو حتى بداو تيليفونات ديالهم ب2 كايصونيو ...
شافو تيليفوناتهم بجوج لقاو المحاميين لي خلاوهم واليدين رياس باش يتكلفو بأملاكهم ايلا وقعات ليهم شي حاجة و رياس باقي صغير ... جاوبو فتيليفون و كل واحد بعد شوية على لاخر
ماريانو : وي كانسمعك
المحامي : سي ماريانو اش هادشي كانسمعو؟؟ كيفاش باغيين تدخلو سي رياس لطبيب الحماق و هو ماكايعاني من حتى شي خلل عقلي و ولد فهاد السن مزال مانقدرو حتى نشخصو ليه حالتو بالتدقيق
ماريانو : ها نتا قلتيها ولد فهاد العمر ماغانقدروش نشخصو ليه حالتو ولكن ا سي جاكسون حنا عائلتو و حنا لي عايشين معاه ماكناش غانديرو شي حاجة ايلا ماعرفناهاش فمصلاحتو
المحامي جاكسون : سي ماريانو عندكم نص ساعة ايلا مارجعتوش فيها سي رياس للقصر غادي نرفع عليك نتا و داك لي تافق معاك دعوة قضائية و كون اكيد ايلا عرفات جمعية حقوق الطفل هادشي لي واقع ماغاترحمكومش بجوج فاش غانوريهم التسجيل ديال هضرتكم ... قطع عليه و خلاه كايغلي فبلاصتو كانت خطتو تقدر تنجح ولكن غير ايلا كان الولد فسن 16 سنة للفوق اما فهاد السن لي فيه رياس فراه بالنسبة للقانون النمو العقلي ديالو فالاصل غير مكتمل يعني ايلا دخلوه لطبيب الحماق و ديكلارات بيهم غايتشدو بتهمة التحايل على القانون اما ايلا خدمو التزوير فسن رياس غايكونو ضمنو لراسهم الحبس ... سالا العم لاخر حتى هو هضرتو و كان ساخط بالمعقول
ماريانو : اش قالو لك
العم 2 : الحثالة قال غادي يأمنو ليه الحماية حتى يوصل للسن القانوني
ماريانو : فااااك ( ضرب يديه مع البيرو )
رياس : ( ببراءة ) نقدرو نرجعو للدار دابا ا عمي
شافو فيه بشوفات كون كانو جناوة كون شروطوه .. سبقهم من الباب و يلاه بغا يخرج و هو يلقا نفس الولد لي كان شافو فالزنقة و كان معاهم حتى داك الدكتور كايهضر معاهم و تبارك الله عينيه ماكايجيو غير فالكوارث .. جاو نيشان فالفلوس لي كايعطيو للدكتور و مشا لعندهم
رياس : علاش شديتي من عندهم الفلوس
الدكتور : ( شاف فماريانو و خبع الفلوس ) واش صافي نكلف الممرضين يديوه للغرفة ديالو
ماريانو : ( بسخط ) مابقيناش غاندخلوه بدلنا رأينا
الدكتور : و داكشس علاياش تافقنا؟؟؟
ماريانو : علاش دخلناه باش نعطيك؟ نتا لي بقيتي ناقصني
رياس : ( كايهضر مع ادلر ) شنو سميتك
ادلر : ( كايبكي و كايضحك ) انا ماحمقش قول لهم انا ماحمقش
رياس : شحال فعمرك
ادلر : ( رجع كايضحك و كايهضر ) 12 ولا واقيلا 13 .. ماما قولي ليه شحال
عم رياس : هو مزال صغير عندو 5 سنين ايلا خليناه فسبيطار غانجبدو على راسنا النحل و ايلا اذيناه غادي يتجبد لينا الصداع دابا المحاميين عرفونا علاياش ناويين غايمشيو يديكلاريو بينا ولكن حنا غاننكرو كلشي و ماغايقدروش يشدو شهادة البرهوش حيت صغير يعني اش غايديرو البوليس؟ .. غادي يأمنو الحماية لرياس لواحد المدة
ماريانو : دخل ليا فالموضوع نيشان
عم رياس : راك شفتي داك الهبيل لي باغينا نديوه معانا للدار كي كايدخل و يخرج فالهضرة .. ايلا ديناه معاه حنا لي غاتكون عندنا الفايدة .. قد مابقا مع رياس قد ما غايزيد يأثر على عقل البرهوش ديالنا .. كيما كان الحال راه باقي ولد صغير ايلا دوز معاه غير واحد العامين و هما مقربين راه غادي يأثر عليه و بطبيعة الحال حنا ماغانعتامدوش غير على هادشي ضروري مانزيدو من عندنا .. غانرشيو الدكتور باش يعطينا سمية الادوية لي كايعطي للمجانين و نبقاو نوكلوه لو و نشربوه لو ... تسعات الابتسامة الخبيثة ديال ماريانو و عاد رشقات ليه
ماريانو : ماعندي مايتسالك راك ماسويهيلش مع راسك ا خويا
عم رياس : هادشي لي كايطلبو الوقت
دارو داكشي و فعلا رشاو الطبيب و عطاهم اخطر دوا عندو .. ماراعاوش لسن رياس و الجسد ديالو واش يقدر يتحملو حيت ببساطة عماهم الطمع .. و هاكا تعرف رياس بأدلر لي موراها ولا اقرب واحد ليه
" FlashBack End "
ناض من الكرسي و مشا للكرسي لي فالبيرو جلس فيه و بقا كايلعب فيه .. جبد من جيبو المكعب ديال الروبيك و بدا كايحل اللغز و ديالو و كايرجع يخربقو مزيان و يعاود يحلو بسهولة حتى حس ببولترا كايفيق
ادلر : امنيتي هي كون عشت ف1970 باش نعدم لاري نيكولز على هاد المكعب .. واش ماكانش قادر يحط شي لغز مقاد بحالو بحال الناس
بولترا : شي حاجة ماشي هي هاديك بدا كايطردق عنقو و ضورصو و مع ديك تجبيدة حس بوخز فصدرو .. حط يديه على صدرو و حس بشي حاجة من غير حوايجو كاينا فصدرو
أدلر : جيكساو كانت هنا ولكن خسارة جيت معطل
غير سمعو قال جيكساو جات .. بدا كايحيد حوايجو الفوقانيين بزربة و هنا كانت الصدمة فاش لقا بلي صدرو مضمد .. بدا كايحيد الضمادات و ادلر عارفو غايتصدم شي صدمة .. شداتو الضحكة و بدا كايطلعها من الكرجوطة كايتسنا غير ايمتا رياس يحيد الضمادة كاملة .. غير حيدها و هو يتهرق عليه بالضحك فاش شافها اش كتبات .. اما رياس حدو شاف بلي صدرو مخطط ولكن ماقدرش يشوف اش مكتوب بالضبط حيت ماكايقدرش يهبط راسو بزاف لصدرو باش يقدر يشوف داكشي بالعكسي .. ناض بزربة و مشا لجهة شرجم باش يشوف الانعكاس فزاج و هنا كانت الصدمة .. لحم صدرو محلول و مكتوب فيه سميتها نيت [ J I G S A W ] و من زهر زهرو قبل ماتنضف ليه الجرح حقنات ليه واحد النوع من الادوية كايختر الدم ل8 ساعات دارت فيه بليزير باش مايتعرضش للخطر كايشوف اللحم محلول و مزال حتى ما مخيط .. ضار لعند ادلر و ماكاينا فوجهو حتى ردة فعل عكس ادلر لي من فاش بدا الضحك و هو شادها تال دابا ...
ادلر تهرق بالضحك ولكن رياس هاد المرة ماضحكش فهم اش بغات توصل ليه بهاد الفعلة .. ماشرطاتش سميتها فصدرو بجنوي حبا فيه و إنما باش دارتها باش تشروط ليه كبريائو و كرامتو و فوقما يشوفها فالمرايا يتفكرها بيها .. رجع ضمدها بالزربة حيت ايلا خلاها كتر غاتتعفن و غايصدق فحالة لا يحمد عقباها .. تحل الباب ديال المكتب و دخلو جوزيف و البوليس هازين الفرادة ديالهم
ادلر : تزاكلتو معاه ( نعت لهم للشرجم ) يلاه خرج من هنا
جوزيف : فاااااك سربييييو خرجو قلبو عليييه ماغايكونش بعد من هنا سربيييو دغيا .. و نتا و نتا سيرو شوفو كاميرات المراقبة بالزربة سربييو علاش باقيين واقفين .. فااااك فااااك فااااك ( بقا كايضرب يديه مع البيرو بالاعصاب )
ادلر : ( خشا يديه فجيبو و بقا كايلعب برجليه ) ماعندك علاش تقلب عليه غير
عيط ليه و غايجي لعندك برجليه
جوزيف : ( كارز على سنانو ) ماغانخليش العدالة لي تاخد مجراها .. غاااناخد روحو بيدي
( شاف فصدر رياس ) مالك فصدرك؟؟؟؟
ادلر : دار ليه عملية جراحية هههههههههه
بولترا : ( جلس فوق الكرسي ) جوزيف بغيت نسولك
جوزيف : رياس راه خاصك تمشي للكلينيك .. الجرح غايتعفن بك
بولترا : علاش واش حنا مامزيانينش لهاد الدرجة باش مانتكلفوش بمراسم موت حبابنا هههههههههههههههههه
ادلر : حنا ناس كانبغيو الخير هههههههههههههههههههه
جوزيف : رياس راه خاصك تمشي للكلينيك غايولي عندك التهاب
بولترا : ( هبط شنايفو و هضر بصوت طفل ) ياك انا محبوس ا جوزيف واش غادي تعاوني باش نخرج من هنا
جوزيف : غادي نمشيو للكلينيك عاد نشوفو موضوع هاد المجرم .. واحد الشوية غادي تعمر الكوميسارية بالبوليس .. كلشي وصلاتو الخبار بلي جيكساو كان هنا ... لبس حوايجو من الفوق و ناض باش يمشيو .. ركبو فالطوموبيل و ديماراو للكلينيك نيشان
جوزيف : و نتا كي درتي عرفتيه جاي لعند رياس؟؟
ادلر : واش هادي حاجة خاصها التفكير .. ستدرجو بدادا و جابو للحبس و سمم المسؤولين يعني علاش دار هادشي كامل
بولترا : كنت كانتسناه ( عاود ذلا شنايفو ) ولكن غفلني
جوزيف : ماعندوش الشجاعة الكافية باش يجي يواجه فالوجه ... وصلو للكلينيك و دخلوه ديريكت باش يخيطو ليه الجرح قبل ماتدهور حالتو .. فالوقت لي كان هو فالكلينيك و البوليس باقيين كايقلبو حدا الكوميسارية كانت هي شدات طيارتها راجعة لروسيا و كالعادة متنكرة حيت المطار كان عااامر بالبوليس كايقلبو عليها ... سالاو ليه الغراز و بقاو كايتسناو طبيب اش غايقول ليه حتى هو كان فايق حيت دارو ليه غير تخدير موضعي ماشي تخدير عام
جوزيف : غايخصك دير عملية تجميل باش مايبقاوش الندبات
الدكتور : مع الاسف بحال هاد الجروح كايكون صعيب يمشيو الندبات ديالهم
جوزيف : ياك اللحم كايلتاحم؟؟؟
الدكتور : ماغايلتاحمش بالزربة غايخصو وقت طويل
جوزيف : ضروري مايكون شي حل راها غير ندبة
الدكتور : ا سي جوزيف .. الجروح كانو غارقين بزاف و لقيت صعوبة باش نقدر نجمع ليه اللحم ...
**
مـلاحـظـات هـامـة
•• بولترا هو رياس
•• فبداية الحوار ديال رياس ايلا لقيتوني كاتبة [ رياس : ] .. ديك الساعة ماكايكونش فعالم الجرائم و اي حاجة كاتتعلق بخدمتو و فاش كانكتب [ بولترا : ] كايكون فيهم
•• و هو راه راجل ماشي مرا ولكن داز من شي حوايج لي خلاوه يفقد التوازن العقلي ديالو داكشي علاش شي مرات كايهضر بحال طفل شيطاني
•• جوزيف و مايكل ماشي كايغطيو على بولترا و اصلا ماغايحتاجوش حيت هو علاقاتو ماعندهاش حدود
عموما مع الأجزاء غاتزيد توضاح لكم القصة مزيان ..
**
جوزيف : هادشي لي كان باقي ناقص .. واش عارف اش كاتقول؟ راحنا فالقرن 21 .. مابقاتش شي حاجة بحال هادي حتى من الوشم يقدر يحيدو بالليزر .. ماغانحيروش فندبات بحال هادو
الدكتور : بان ليا مامقدرش خطورة الوضع الصحي لي كان يقدر يطيح فيها المريض سي جوزيف .. معجزة كبيرة منين الالة الحادة ماختارقاتش اللحم ديالو كتر حيت كون زادت غير 1 سنتيمتر كنا غانضطرو نديرو ليه عملية جراحية سريعة بلاصة الغراز و علاوة على هادشي كان ممكن يجيه التهاب حاد فديك المنطقة بسبب النزيف و كان غايكون الوضع خطير ولكن قدرتو تتصرفو فاللحظة المناسبة و خثرتو ليه الدم فديك المنطقة دابا غايحتاج ضروري يشري..
رياس : عندي
الدكتور : شنو عندك؟؟
رياس : ( شاف فيه و بتاسم ) حقن الهيبارين
الدكتور : ( شاف فيه بريبة ولكن مابينش ) وي هادوك علاياش هضرت ياكما تبغي نعطيهم لك
رياس : ماتحتاجش .. ناض لبس حوايجو و بغا يخرج
جوزيف : رياس فين غادي؟؟
رياس : باغي نقاد رونديفو
خرج للكولوار ديال الكلينيك و خلا جوزيف كايهضر مع الدكتور و حداهم ادلر متكي على الحيط و هاز فيديه الطابليط .. مشا رياس لبرا و جبد طيلي كتب ميساج قصير ماكايتجاوزش 15 حرف .. رجع تيليفون فجيبو و مشا للحديقة لي كاينا فالكلينيك فين كايجلسو المرضى جلس فكورسي و بقا كايشوف غير قدامو بملامح فارغين عكس العروق ديال دماغو لي كايزدحو بقوة التفكير .. كايرتب افكارو بواحد السرعة كبيرة و كايفكر غير فهاد الفعلة لي دارت ليه .. خلات ليه بصمة فالجسد ديالو عمرو ينساها ولكن واش هادشي خلا خلايا الاعصاب ديالو يحياو؟ هههه ابدا حيت هو ماعندوش اصلا الاعصاب هادشي لي دارت فيه غير ما خلاه يفكر فالطريقة لي تخليه يتفنن فالقتل ديالها فاش غاتخسر الرهان .. بقا جالس حتى خرج لعندو ادلر و جوزيف
جوزيف : هضرنا مع الدكتور و شرح لينا اش كاين .. ماغاديش يبقاو دوك الندبات ديما .. خاص غير يتشافا لك الجرح بشكل كامل و عاد تقدر دير عملية تجميل
▫خرجات من مطار روسيا و شدات الطريق للماكازا باش تشري الماكلة لبوو و ليها .. جبدات تيليفونها شعلاتو لقات عندها ميساج واحد
[ جزيرة هاواي 01/01 /2018 ] كان من عند رياس .. رجعات تيليفون لجييها و مشات شرات اش خاصها و رجعات للدار دوشات و لبسات حوايج قطنية .. طيبات الماكلة ليها و حتى لبوو البومة ديالها موراها
جيكساو : ( بنفس النبرة ) ولكن ماغاتمشيش معايا هاد المرة للبلاصة لي غانمشي ليها
بوو : ( صوت الضبح ) .. و باين فعويناتها نظرات الحزن
جيكساو : لا ا بوو هدا ماشي بحال لاخرين .. هدا غايأذيك ا بوو و ايلا أذاك غاناكل لحمو و نشرب دمو و نمص عضامو ماغايأذينيش ولكن مابغيتش يأذيك
بوو : ( صوت الضبح ) و بنفس النظرات
جيكساو : ( ضحكات لها ) غادي نرجع ا بوو ماتخافيش عليا ... طلعات البومة لصدر جيكساو و بقات طالعة تا وصلات لعنقها و بقات كاتمحكك فيه بحالا باغا تعنقها ولكن ماقادراش حيت ماعندهاش اليدين باش تعنقها ولكن هادشي مامنعش جيكساو تحس بشعور بوو فهاد اللحظة و كيفاش ماغاتحسش بيها و بوو عندها غير جيكساو و جيكساو عندها غير بوو .. بقات كادوز بصبعها على راس بوو حتى حسات بقطرة صغيييرة تقطرات على عنقها هزات بوو بلطف و قلبها ضرها فاش شافتها هكاك .. ولكن حاجة طبيعية حيت عمرهم تفارقو من نهار لقاتها جيكساو طايحة فالغابة وسط الثلج صغيرة بزاف ماقادراش طير و ماقادراش تحمي راسها من البرد
جيكساو : غير نسالي منو و نرجع لعندك دغيا ا بوو ..
دازو 2 اسابيع لي ماغانقولش كانو ملل فملل .. جيكساو فهاد المدة قتلات 2 اشخاص و ماوقفاتش سلسلتها ... بولترا خرج من الحبس من مور ماوصل الخبار للسلطات العليا خرج فالبلاصة و كايتسنا النهار لي طيح بين يديه بفارغ الصبر باش يتفنن فقتلها اما بالنسبة لسي البرت و الاشخاص لي تسممو من حسن حظهم ماماتوش و راهم حسن من اللول دابا ... جوزيف و مايكل و باقي الفريق كايقلبو على جيكساو و هاد المرة القضية تزيرات كتر من اللول .. و هادشي لي وقع قبل من تاريخ اليوم لي هو
"2017/12/31 "
▫بدات جيكساو كاتجمع فاليزتها حيت هي معتابرة هادي المشية لجزيرة هاواي إجازة و غادا تستمتع بوقتها سواء كتاب لها تعيش سواء كتاب لها تموت .. بقات كاتجمع حوايجها و " بوو " حاضياها فوقما كاتحط شي حاجة فالفاليزا كاتهزها بوو بمنقارها و تحيدها من الفاليزا ماباغاهاش تمشي .. تقدرو تعتابرو هاد الخوف كاامل ديال بوو شي حاجة خارقة للطبيعة و خيالية ولكن الحيوان هاكا داير ايلا عتانيتي بيه و عتابرتيه صديقك .. كايقولو بلي البومة كاتحس بالموت ايلا جاية واش حتى بوو كادير هادشي حيت حسات بلي جيكساو غاتوقع لها شي حاجة؟ ولا غير حيت غاتتوحشها؟
جيكساو : ( بنبرة حنينة ) بوو ماغانتعطلش عليك .. نحيدو من طريقي و غانرجع نديك من الغابة هانتي شوفي شنو قاديت لك ( جبدات واحد تريكو ديال الصوف صغييييور فالكحل فمقاس بوو ) هدا غادي يحميك من البرد ا بوو على مانرجع
بوو : ( صوت الضبح )
هزاتها برفق و حطاتها فوق الطبلة و بدات كاتلبسها داك تريكو جاها على مقاسها نيييشان .. صوراتها و مشات كاتكمل جميع ديال الفاليزا .. مشات للكوزينة و جبدات الماكلة ديال بوو حلات لها الباكيات باش تلقاهم ساهلين فاش يجيها جوع و خلات لها الما شافت فالماكانة لقات وقت الرحلة ديالها قرب لبسات حوايجها و عنقات بوو كتوديع
▪ فالجهة الثانية فالنمسا كان جالس رياس و لابس الحوايج لي من الماركة ديالو كالعادة و قدامو كان واقف واحد المعالج نفسي و فجناب واقفين الكارد ديالو
المعالج النفسي : من خلال هاد الجلسات لي درت معاك قدرت نتوصل للمشكل لي كاتعاني منو و لي هو الثقة .. فقدتي الثقة فالناس لي ضايرين بيك من داكشي لي دزتي منو فالطفولة ديالك
بولترا : و شنو الحل ا دكتور
المعالج النفسي : وقف الله يخليك
بولترا : خود راحتك و كمل ا دكتور
المعالج النفسي : اول خطوة هي حلقة الثقة هادي خطوة كبيرة و مهمة كاتخليك ترجع الثقة فالناس لي ضايرين بيك مستعد ا سي رياس
بولترا : بدينا
مشا الطبيب لحدا رجال رياس و ختار منهم 2 .. شابكو يديهم بحالا غايلعبو دويخة و وقفو كايتسناو رياس
المعالج النفسي : دابا من مور ماعقدو يديهم .. عاكس يديك على شكل علامة و ديرهم على صدرك و عطيهم بالضهر و لوح راسك بين يديهم ( شاف فدوك 2 ) و نتوما شدوه عنداكم تفلتوه ... دار بولترا يديه على صدرو بشكل معاكس و لاح راسو على يدين دوك 2 و فعلا ماطلقوهش .. بطبيعة الحال ماغايطلقوهش و هو فهاد الاسابيع زاد تسطا كتر من اللول
المعالج النفسي : ( بإبتسامة ) شفتي هانتا دابا درتي خطوة كبيرة و بديتي كاترجع الثقة فالناس لي ضايرين فيك بفضل حلقة الثقة
بولترا : ( بادلو الابتسامة ) اش بان لك ا دكتور تشارك معانا فحلقة الثقة
المعالج النفسي : بكل سرور غانشارك حيت هاد الحلقة كاتفيد المعالج و المريض
عيط بولترا لواحد من رجالو و شابك يديه معاه بحال دويخة ديال البنات الصغار و جا المعالج وقف و دار نفس الوضعية لي كان دار بولترا .. غير لاح راسو باش زعما يشدوه و هما يطلقو يديهم جا مزدوح على الارض .. كانو كايتسناو بولترا يضحك عليه باش حتى هما يضحكو عليه ولكن هاد المرة ماضحكش
المعالج النفسي : ( باقي مجبد فالارض ) علاش طلقتوني؟؟؟ ياك كان خاصكم تشدوني انا تقت فيكم
بولترا : ولكن واش قلت لك تيق فيا ا دكتور؟
هز رجليه و حطها ليه على عنقو و بدا كايهزها و كايزدحها مع عنقو كايهزها و يعاود يزدحها بحال الركلة ... حبس و بدا كايحك الصباط مع عنق المعالج
بولترا : ( كايهضر مع رجالو ) هادي هي نتيجة حلقة الثقة .. الثقة خايبة ماتيقوش بزاف باش مايوقعش لكم بحال لي وقع لسي دكتور .. كان كايهضر شوية و هو يسمع تنخصيص الضحك ديال واحد من رجالو ... حيد رجليه من على المعالج و مشا بخطوات سريعة فجهة واحد من دوك الرجال .. شدو من راسو و بقا غادي بيه لجهة الحيط زدح لو راسو زدحة وحدة مع الحيط خرج فيها كاع الطاقة السلبية ديال هاد النهار مات فالبلاصة ... طلقو طاحت الجثة ديالو ... قاد تيشورط ديالو و شاف فرجالو و ساط بأريحية
بولترا : ( بإبتسامة ) بحال هاد الطاقة السلبية ماخاصهاش تبقا داخل الجسد ديالنا ضروري نخرجوها مرة مرة .. ايلا بقات لداخل غاتضر بصحتنا .. دخل ادلر و شاف 2 جثث طايحين
ادلر : داك المعالج من اللول ماكنتش مرتاح ليه ماعرفتش علاش خليتيه عايش حتى لهاد الوقت
بولترا : كنا كانهضرو على حلقة الثقة ( بحزن ) ولكن ماكتابش ليه يكمل لينا الفوائد ديالها للاسف
ادلر : ( بعلامة حزن اشد ) للاسف ... حيد طربوشو و دارو على صدرو كعلامة تعزية ...
هز يديه زعما باش يشوف فالماكانة عاد تفكر بلي هو اصلا ماكايديرش الماكانة فيديه
بولترا : متافق معاك فهادي ( سكت شوية و عاود هضر ) شكون لي باقي كايحتاج يشوف شحال فالساعة فهاد العصر .. راحنا فالقرن 21
أدلر : كاين لي باقي عزيز عليه داكشي كلاسيكي بحالي
بولترا : الاناقة الاناقة
أدلر . داكشي علاش كاع رجال الاعمال لي كانعرفوهم كايلبسوها باش يكملو الاطلالة ديالهم هههههههههه
بولترا : شحال باقي للطيارة
أدلر : ساعتين و 20 دقيقة و 45 ثانية ولكن عرفتي أحسن مادرتي هو غاتكمل باقي الطريق فسفينة من الولايات المتحدة لجزر هاواي
بولترا : الحياة ماطويلاش بزاف خاصك تستمتع بكل ثانية فيها واخا تكون الموت قريبة لك هز نخب ديال شامبانيا و حتافل بوصولك للمرحلة الاخيرة فلعبة الحياة
أدلر : فاش ترجع غاتلقا الدكتور لي غايحيد ليك ديك الندبة كايتسناك و على اتم استعداد
•°• فبلاصة خرا •°•
كان واقف هالك كايشوف فالمرايا و كايسد صدايف القميجة
أب هالك : نتمنى ماديرش المشاكل حتى تما .. مابقينا قادين على مشاكل
هالك : الصمت
أب هالك : كانهضر معاك ا هالك ماتتجاهلنيش ... سد اخر صدفة فقميجتو و ضار لعندو خشا يديه فجيبو و شاف فالاب ديالو
هالك : ( بملامح باردة ) خايف عليا ولا خايف على سمعتك
أب هالك : بطبيعة الحال غانخاف عليك ماباغيكش تتشد فالحبس راه ايلا شدوك غايغبروك واش كاتسمعني عمرك باقي تشوف الضو هادشي ايلا ماعدموكش على الجرائم لي درتي و ارواح البنات لي خديتيهم
هالك : ماتخافش ماغاتخصرش صورتك وسط المجتمع ( بإبتسامة باردة ) ماغايعرفونيش ولدك ولا نسيتي مابقيناش مشاركين نفس النسب
أب هالك : ا ولدي ماكاتهمنيش السمعة كاتهموني نتوما .. قلبي ماغايدرش يتحمل ايلا وقعات شي حاجة لشي واحد فيكم ... شاف هالك فالماكانة و بغا يخرج ولكن وقفو الاب ديالو بسؤالو
أب هالك : ( حشم و سكت ) بقات 3 ديال السوايع للرحلة ديالك عنداك تتعطل عليها .. جلس لك واحد الاسبوع تما حتى ترتاح و رجع
▫من مور ماودعات جيكساو بوو خرجات و شدات الطيارة لي ماتجاوزاتش ساعتين باش توصل للولايات المتحدة .. هاد المرة قررات ماتغيرش ملامحها بالمكياج ولا دير شعر مصطنع لا ولا تزيد البونج باش تبان غليضة .. مشات بشكلها الطبيعي من غير الهوية لي مغيرة .. غير وصلات للولايات المتحدة حسات بشعور الوحدانية و هاد الاحساس ماحساتش بيه من مدة طوييلة من نهار ماتت جداتها .. مي دابا حسات بيه حيت موالفة كاتدي معاها رفيقة حياتها بوو لأي بلاصة بغات تمشي ليها .. جاها الصهد و حيدات تجاكيط الفوقانية حيت الجو هنا مختالف على جو روسيا البارد .. شدات طاكسي باش يوصلها للميناء .. جبدات تيليفونها باش تشوف بوو اش كادير حيت ركبات كاميرات فالدار باش تحيد الوحشة ديالها من بوو شافت المساحة ديال الكوزينة لي شاداها الكاميرا ولكن مابانتش لها بوو .. عاودات شافت الكاميرا ديال الصالون و نفس الشي مابانتش لها .. بقات كادوز كاميرا بكاميرا ولكن مابانتش لها بوو عرفاتها غاتكون ناعسة فشي بلاصة ..
▪ من مور ماوصل للسفينة و حط صاكادو ديالو فالجناح عيط ليه ادلر فتيليفونو
ادلر : غاتكون دابا راكب فالسفينة ايلا ماخفت نكدب
رياس : منين عارفها علاش باقي كاتسول
ادلر : ماعنديش مع المقدمات ديال الهضرة كانظن هادي بداية مزيانا ياك
رياس : باقي ساعتين و غانوصل ( خرج من الجناح و مشا فإتجاه الخارج فين كايجلسو الناس )
ادلر : خسارة فوت عليا بحال هاد الرحلة
رياس : الرحلات البحرية عندهم واحد النكهة خاصة .. من دابا للفوق ماتبقاش تشد ليا الرحلات الجوية عجبني الجو ديال البحر
ادلر : عندك اليخت علاش غاتحتاج للسفن
رياس : بنادم مرة مرة خاصو يتخالط مافيها باس مرة مرة نتفكر اصلي
ادلر : ايلا كان غير على هاد الحساب نشوفو ايلا دازت على يدينا شي سفينة فسوق السوداء نشريوها لراسنا غاتفيدنا فالاجازات
رياس : حتى هدا نظر
ادلر : مابقاش بزاف و غاتعاود طلاقا ديك المجرمة
رياس : ( بدا كايضحك عليه بشكل جنوني ) هههههههههههههههههههههههههههههه كاتقول عليها مجرمة على اساس حنا ملائكة
ادلر : واخا هكاك كاين فرق بيناتنا هي مجرمة مطلوبة دوليا اما حنا واخا عارفين خدمتنا الدول داعمينا ههههههههههههه
رياس : كاين 2 انواع ديال البشر فالعالم
ادلر : الناس لي عندهم الزهر و الناس لي ماعندهمش
رياس : ماكانأمنش بالحظ .. كاين لي الحياة ضاحكة ليه و كاين لي ضاحكة عليه و لسوء حظها هي من النوع الثاني
ادلر : و غدا غاتعرف راسها بلي هي من النوع الثاني
رياس : فهاد القضية مزال كانفكر فيها .. ماسخيتش نضيع هاد الاسبوع معاها و باش مانكونش شرير غانخلي لها 3 ايام دوزهم فالنعيم مبحرة فجزر هاواي راك عارف الدعاوي ديال الاموات خايبين
ادلر : كانحسدك على قلبك البيض
•°• فبلاصة خرا فنفس السفينة •°•
دخل للجناح ديالو حط الفاليزا ديالو و يلاه جا يخرج و هو يصوني ليه تيليفون شاف السمية كان الاب ديالو لي عيط عليه .. جاوبو و خرج من الجناح
هالك : ( بإبتسامة جانبية ) واش توحشتيني بهاد الزربة ولا خفتي على البروستيتيس [ العاهرات ] لي هنا
اب هالك : هالك انا سيفطتك لتما باش تريح اعصابك ماشي باش تخلق المشاكل ماعرفت واش غانخبي الجرائم ديالك ولا المشاكل و الضرب و الجرح لي وليتي كاتمارسهم من نهار رجعتي من روسيا مال المورال ديالك ولا هاكا
تفكر النهار لي مشا لروسيا و طعناتو جيكساو زاد دمو سخن من داك النهار و هو كايقلب على خبارها و قطع وعد على راسو غايرجع لروسيا و غايقلب عليها شبر بشبر حتى يلقاها و ينتاقم منها اشد انتقام
▫ركبات فالسفينة من مور ما سالات الاجرائات .. و مشات للبيت لي عطاوه لها كان ماكبيرش بزاف و فنفس الوقت ماشي صغير .. الارض ديالو خشبية و فيه ناموسية و خزانة و بيرو صغير و واحد الشرجم كبير كايطل على البحر .. بطبيعة الحال ماشي كبير كون السفينة فيها بزاااف ديال المسافرين كاين غرف قلال لي كبار و هادوك خاصين غير برجال الاعمال و كايكونو ديجا حجزوهم .. حطات الفاليزة فوق الناموسية و جبدات منها حوايج صيفية مدام مابقاتش فروسيا باش تستمتع بالشمس ديال الولايات المتحدة .. جبدات سروال تجينز تقاطع و كسيوة سماطي قصيرة من القدام حتى لفوق الكرش و طويلة من اللور واصلة للركابي بالرغم من حوايجها لي كايبينو انها انثى ولكن هادشي ماغطاش شخصيتها لي كاتحاول تبان لبنادم من عينيها بنظرتها الغامضة .. خرجات من الغرفة من مور ماسداتها و مشات باش تستكشف السفينة غير خرجات للشمس و شافت فيها لون عينيها تبدلو و ولاو عسليين فاااتحييين و هادي حاجة طبيعية حيت هي من الاشخاص النادرين لي عينيهم كايتلونو مع العوامل الطبيعية بحال الشمس و البحر و القمر و السما و اي حاجة طبيعية .. جبدات تيليفونها باش تعاود تشوف بوو بقات مركزة فتيليفون حتى تزدحات مع جسد قاصح ...
بقات مركزة مع تيليفون حتى دخلات فشي جسم قاصح حتى كان غايطيح لها تيليفون و يا للصدفة كان رياس .. يلاه جات باش تبدل الطريق و هو يدخل فيها وحداخر حتى تدفعات على رياس و من صدف الحياة كان الشخص الثاني هو هالك لي حتى هو بدورو كان ملهي مع تيليفون حتى لواحد اللحظة ضار كايتمشا باللور و هو يدخل فيها تا تدفعات على رياس و طاح لها تيليفون ... حيد كل واحد فيهم تيليفون من ودنيه و بقاو كايشوفو فبعضياتهم حتى واحد ماعرف لاخر حيت كانو كلهم محيدين الاقنعة ديالهم من غيرها هي لي عرفاتهم ب2 .. شافت فيهم بنظرة سخرية مع إبتسامة إستهزاء و هزات تيليفونها من الارض و مشات بلا ماتعتاذر ولا تتسنا اعتذارهم ماعبراتهمش اصلا لا لزينهم لا للفلوس لي باينين عليهم .. باين فيهم من البورجوا يعني نوبتهم جاية ماكاين علاش لي تهضر معاهم ... من مور ما مشات حتى رياس رجع هز التيليفون فودنيه و كمل طريقو ماهتمش لهاد الموقف حيت اصلا بالنهار الواحد كايشوف العشرات ديال النساء اشكال و انواع جمالها ما اثر فيه بوالو و هادشي راجع للذكاء ديالو و عقليتو .. هو ماشي من داك النوع لي كايغريوه العيالات و ماشي من داك النوع لي غير كايشوف الزين و كايحوالو عينيه عقليتو بوحدها و بعيدة كل البعد على النساء اما هالك بقا متبعها بعينيه و ديك النظرة و الابتسامة ديال السخرية لي دارت فيهم ترسخات ليه فعقلو و حتى تصرفها ترسخ فعقلو .. بوكوص و شاب عندو جسم رياضي و لاباس عليه كيفاش ماحاولاتش تلصق فيه و زعما راه جاتها الفرصة لبين يديها باش تحاول تشد معاه الهضرة علاش لي مادارتهاش؟ بقا متبعها حتى نسا الاب ديالو لي كايهضر فتيليفون
▫كملات الجولة ديالها فالسفينة و هي ولا على بالها بيهم وصلات السفينة لجزيرة هاواي فين كاين 5 ديال البراكين من اخطر البراكين فالعالم ولكن هادشي ماكايمنعش السياح باش يجيو لهنا ... خدات نفس عميييق و خلات الهواء ديال هاد المنطقة يتسلل لرئتيها ... هاواي لي كاتعتابر جنة من جنات الارض بغاباتها الاستوائية و سكانها البسطاء ... مشات لواحد لوطيل كانت حجزات فيه من الانترنت هضرات مع الاستقبال و مشات للشومبر ديالها فهاد الاثناء كان واحد الشخص تابعها من بعيد و من عينيه باين فيه ماناويش على الخير .
وصلات للشومبر رتبات حوايجها فالخزانة و هزات تيليفون بزربة تشوف بوو حيت بدات كاتتخلع عليها ماموالفاش ليها تغبر عيات تقلب عليها ولكن مالقاتش ليها الاثر بدات كاتتخلع عليها و فواحد اللحظة حسات بالندم حيت ماجابتهاش معاها .. مادخلاتش لراسها قضية تغبر و مايبانش اثرها فجميع الكاميرات .. حاولات تحد من القلق ديالها على بوو و قنعات عقلها بلي بوو غاتكون مخبعة غير من تحت الناموسية ولا من مور شي فوطوي باش تخلع جيكساو و ترجع لعندها لروسيا .. دخلات دوشات باش تحيد العيا ديال السفر موراها طلبات الماكلة يجيبوها لها للبيت بلا ماتخرج .. اما عند هالك من مور ماوصل للوطيل لي هي حاجزة فيه لقا بلي ماعندوش الحجز فنفس لوطيل لي هي فيه داكشي علاش قلب على جناح فيه نيت و حجز باش يكون قريب للشخص لي هو كايعتابرو ضحية .. من مور ماحجز حط حوايجو و خرج ، نفس الشي مع رياس وصل لنفس لوطيل لي بالصدفة كان نفسو لوطيل لي حاجزة فيه جيكساو و شد جناح ديجا كان حاجزو ليه ادلر .. حط حوايجو و دخل يدوش ... داز النهار عادي فالفندق ماكانتش شي حركة مختلفة شي دوز النهار لداخل و شي على برا حتى وصل الليل
▫ تخشات جيكساو فبلاصتها باش تنعس و طفات الضو و بالها مع كامل مع بوو لي مابانش لها الاثر .. قررات قرار ايلا مابانش لها الاثر غدا غاترجع لروسيا .. بدات كاتغمض عينيها باش تنعس شوية و هي تسمع واحد الصوت حدا الباب ديال البالكون بحالا شي واحد كايحاول يحل الباب ...
لعبة الشطرنج الجزء الثالث
محتوى القصة
التنقل بين الأجزاء