كان واقف ويديها فدراعو هاز كاسو فيديه ومرة مرة كيجغم منو واقفين حداه أهم رجال أعمال كيهضرو على الخدمة وهو مركز معاهم ساكت وكيسمع لكلامهم من غير مرات كينطق شي كلمة .صونا ليه طليفون جاوب:اش واقع
تمو غادين فتيجاهو كانت كتشوف فيه من لبعيد ماحسات بوالو كانت فوقما تشوفو قلبها كيبدا يضرب وكتحس بشي خوف فشكل ولكن دابة لا متحمسة تشوف نضراتو وهي قدامو بتاسمات وهزات حاجبها حتى وصلو قدامو
مجد: يوسف الزعيم مبروك الافتتاح
دور وجهو يشوف فيه وهو يتصدم تبلوكة وهو كيشوفها قدامو كتشوف فيه وهي مبتاسمة ومعلية حاجبها
بقاا غير ساكت
نرجس دورات وجها وهي تشوفها تاهي تصدمات طلعاتها هبطاتها مزيان ورجعات شافت فيوسف كيف كيشوف فيها
يوسف كيشوف فيديها كيف شادة فدراع مجد طلعها من صبعانها تا لراسها ضغط بيديه على لكاس كيبرد فيه صدمة وتدارك الامر ودار بتسامة جانبية:الله يبارك فيك
عائشة:مبروك
بقة ساكت شحال عاد جاوب:شكرا
نرجس :احم عائشة غبرتي فين كنتي
عائشة قربات لعندها وسلمات عليها:غير فدنيا اووه نسيت ماباركتش ليكم مبروك الزيادة ويتربة فعزكم ان شاء الله
نرجس بتاسمات مجاملة ليها: الله يبارك فيك شكرا
عائشة:تا سمية لي ختاريتو زوينة عجباتني الله يخليكم لبعضكم
قرب واحد مم سيرفورا خاص بالاستقبال وقف حداها:سمحيلي الالة ناخد عليك لكاب
بتاسمات:واخة
حلات صدافات وهو من لبعيد حاضيها وكيشرب من كاسو
حيدات لكاب ومداتولو:شكرا
بتاسم ليها:مرحبا
ومشا
قادات شعرها ولكسيوة لي لابسة ستايلها كلاس عبارة عن كوبليزو بيضة كلها مشبكة لكمام واصل لنص دلفخاد كيبانو رجيلاتها لبويض فيها فتحة من جيهة الصدر بارز جات كيوت
عرفاتو كيشوف فيها بقات كضحك وتهضر مع مجد وكولين وتلعب بشعرها ومرة مرة تشرب من لكاس دلعصير ديالها ماعلابالهاش بيه
فالجيهة لوخرا
دينيز:هاديك ماشي عائشة
فاتي شافت فيها:ايييه هي
دينيز شهقات:عويشتي
مشاو كيطيرو عندها طارو عليها بتعنيقة بجوج ضحكات وعنقاتهم تاهي
عائشة: تانا توحشتكم بزاااف بزاااف ماتصوروش قداش .غا كنت مسافرة كل مرة وفين كنت كنجلس عند العائلة عييت وقلت نمشي نرتاح
دينيس ضرباتها على كتافها:داك ساع علمينا الموصيبة
عائشة:صافي كنت مليت قلت نمشي نبدل الجو ونبعد ولكن كنتو فبالي والله
دينيس رجعات عنقاتها:حمارة ماتعاوديش ديريها
عائشة:كوني هانية اتبداو تشوفوني بزاف
فاتي:الحمد الله على سلامتك بعدة ملي رجعتي
عائشة:هههه الله يسلمك
بقاو كيهضرو سولوها على لقراية وداكشي المهم خواو قلبهم نسات راسها وهي معاهم توحشاتهم ديال بصاح
كان واقف وكيشوف فيها من لبعيد لكاس شوية ويتهرس فيديه بكترة ماضاغط عليه كيشوفها كيف كتضحك وكيف كتهضر وتلعب بشعرها طويل جاية بكل تقة فالنفس تا لعندو رجع بتفكيرو لاخر مرة شافها واش دارت ليه وهربات من داك النهار وهو حالف حتا يندمها ومزال عند وعدو
نرجس عيات صابرة ولكن ماقدراتش تصبر تغرغرو دموع فعنيها: يوسف عيقتي من صباح ونت تشوف فيها حتارمني علاقل
شاف فيها ورجع كيشرب من كاسو ماجاوبهاش
فجيهة لوخرا
دخل للقاعة وقف وهو كيدور عنيه على الحضور داز من قدامو سيرلور وقفو خدا كاس دلويسكي من عندو شرب منو شوية كمل طريقو وهو خاشي ليد لوخرا فجيبو وقف فاش شافها من لبعيد بتاسم ومشا فتجاها
حط يدين على خسرها وقرب لودنيها:نفكرك علاش لا.انا يوسف الزعيم لي غيعذبك فحياتك
هزات راسها وشافت فيه وبتاسمات:مشرفين وأنا عائشة لي غنقلبك حياتك وترونها لا ما بعدتيش منها
يوسف سكت وهو كيشوف فعويناتها فيهم نضرة تحدي وواتقة من راسها مافيهاش داك الخوف لي موالف كيكونن فيهم
شد فيديها مافيهمش داك الرجفة لي موالفة كتكون فيهم .همس ليها ولكن هاد المرة مختالفة على طريقة لولا:فين مشيتي هاد المدة كلها
عائشة:كنت فجهنام بعد مني
بعداتو عليها:شوف بعد مني ماتبقاش تقرب لساحتي
بغات تمشي وهو يجرها من شعرها تا تضربات فصدرو هاد المرة قصح الهضرة كيهضر وهو عاض على سنانو: واش كيحساب ليك غندوزها ليك واش عرفتي راسك معامن لعبتي
عائشة:شكون بغيتي تكون كاع ياك غا بشار بحالي بحالك
يوسف هز راسو بلا: لا لعبتي مع الشخص الغلاط لي غتندمي على نهار دخلتيه لحياتك.داك ليلة ستحمرتيني ومشيتي يحساب ليك ماغاتجيبكش الوقت بين يديا
عائشة تنهدات:عرفتي شغا دير دير لي بغيتي لي قديتي عليه ديرو دابة غير رخي مني مامسالياش ليك عندي حياتي كتسناني ما انبقاش ماقابلاك غير نت
حيداتلو يديه من شعرها:عندك ولدك عندك مراتك سير قابلهم
قلبات الدورة باش تمشي وهي تلقاها موراها
نرجس :اش واقع هنايا
عائشة كملات طريقها: سوليه
ومشات
نرجس شافت فيه وهي كترجف غير بوحدها:شنو واقع هنايا
زدح لكاس فالارض ومشا خلاها واقفة بحال شي حيط
يوسف دخل للقاعة شافها لبسات الكاب وواقفة حدا خوها ماكرهش يشدها من شعرها ويخرجها من لهنا يديها يبرد فيها كاع هاد الاعصاب لي فيه ولكن صبر راسو كلشي كيجي فوقتو زوين
عيطو ليه يعطي كلمة هدن راسو وطلع وبدا كيهضر بالانجلش على الشريكة الجديدة
عائشة شافت فخوها كان قريب ليها:عصام
شاف فيها بمعنى شنو
عائشة:ماغاديش تسمح لي
عصام:ماشي وقت هاد الهضرة
عائشة:وفوقاش انهضرو
عصام:سكتي دابة
سكتات ونزلات راسها دير اي حاجة غير يرحع معاها خوها كيف كان توحشاتو بزاف.
فاتي وقفات حدا عصام:مالك مغوبش
عصام:والو سعاتو الله
فاتي:ضربنا حسن
عصام شاف فيها وبتاسم:هي لولا بغيتي كروشي ولا صقلة
فاتي:لا اخويا بعد مني
عصام:ههههه وت سكتي
فاتي بتاسمات:المهم ضحكتي
عصام:نني ضحكي لي مايضحك
فاتي:وجودي ضاروري فحياتكم
عصام:نتي هي الاكسيجين
فاتي:تماما
عصام:اوكسيد الكاربون
فاتي:بزاف عليك
خربق ليها شعرها وهو كيضحك
دينيز كتشوف فيه كيف كيهضر وكيف كيضحك كتحس براسها كدوب سهات فيه حتى كيدور وجهو
عصام:بوكوص انا
دينيز حسات على راسها:شكار راسو عاد داز
عصام:سلم عليا عاد مشا
بتاسمات:ماكاتسالاس
عصام:شوية وصافي جات معاك الكسوة تيتيز
تزنكات وحمارت كلشي قالهالها ولكن من عندو هو جات فشكل خلات قلبها يضرب
حس بيها حشمات بقة كيضحك:ههههه اغا ضاحك جيتي خايبة بلا ماديري فيها حشومية
كانت واقفة بعيد وهي كتسنة عصام قالها هو لي ايوصلها
شافتو سلم على يوسف ومشا كيهضر مع عماد ومهدي
تنهدات شافت نرجس كيف كتشوف فيها بحاليلا حاقدة عليها ماهتاماتش اصلا مابقة كيهمها حد هي خواتو من راسها
قلبات على عصام بعنيها مابانش ليها مزال مطول شافت فساعة 12 قل ربع باقة ربع ساعة ماباغاش تخسر مع مها.مشات كتقلب عليه والو ماكاينش زعمة يكون مشة وخلاها..خرجات من القاعة كتقلب حتى كتسمع صوتها من موراها:عائشة
عائشة ضارت شافت فيها:نرجس مالكي
نرجس قربات لعندها:شنو بينك وبين يوسف
عائشة بقات غير مصدومة
نرجس:قوليلي شنو بينك وبينو حتى ولا كيجبد سميتك وهو ناعس وانا حداه شنو درتيلو
عائشة تلفات مالقات ماتقول:نرجس راه ماكاين والو..
قاطعاتها:ماتكذبيييش اعائشة انا ماشي مكلخة
عائشة:عرفتي شغا ديري سولي راجلكانا خرجوني من مشاكيلكم
بغات تمشي وهي تشدها من دراعها:لا جاوبيني
عائشة:أنا مابيني وبينو والو أنرجس بنتيلي معصبة ماشي وقت الهضرة
تنترات منها بغات تمشي وهي ترجع تجرها:اجي فين غدا
شافهم منلبعيد وجا:اش واقع هنايا
نرجس نزلو دموعها:انا لي بغيت نفهم اش واقع هنايا مابغاتش تقولي
عائشة:الله يخليكم خرجوني من مشاكيلكم وشرح لمراتك انه ماكاين والو بيني وبينك
نرجس:لااا كاينة انا ماشي مكلخة كنشوف غير شوفاتكم حركاتكم وغير نتي لي كنعرفوك سميتك عائشة.ماتدكبيش شنو درتي لراجلي
يوسف تعصب جرها :واش حماقيتي
نرجس:اه حمقة
يوسف:من بعد وغنتفاهمو على هدشي لي كديري ونتي اجي معايا سيري من لهنا شنو مازال واقفة كديري
زرب عليها وجرها معاه وهي كتنتر منو:اويلي رخيييي منييي بعد مني
وقف وهو كيزير على دراعها:علاش غادة لعندها
عائشة:واش حمق هي لي جات لعندي انا مادرت ليها والو ومستحيل ندير ليها شي حاجة نت لي كتأديها بهاد التصروفات ديالك بعد مني وسير شوف مراتك خرجني من عقلك
يوسف:ماشي بهاد السهولة حنا داكشي لي بيناتا صعيب يتحل بهاد السهولة مزال بزاف دلحوايج خاص نعرفهم
تنترات منو وتمات غادة:بعد مني
يوسف:مزال غنتشاوفو
خرجات لعلى برة شافت خوها واقف مشات عندو
عصام:فين كنتي
عائشة بلعات ريقها:كنقلب عليك
عصام:ركبي
ركبات وصلها لدار
عائشة:ماغانهضروش
عصام:نزلي دابة غدا نجي لدار ونهضرو
نزلات وهو ديماراا ومشا
طلعات لدار
فجيهة لوخرا
حطها تاهي حدا الدار
نرجس شافت فيه بعنيها دامعين:سمحلي انا
قاطعها بهدوء:دابة نزلي
نرجس:فين غتمشي
يوسف:قلت نزلي
نزلات وهي كتبكي كسيرا بالجهد ومشا يبات فدار لوخرا دخلاتلدار وطلعات للجناح جلسات فوق النموسية وهي كتبكي ماقدراتش تستحمل شوفاتو لي كان كيشوف فيها ماقدراتش تبقة ساكتة ماتحكماتش فراسها كتبغيه وكتغير عليه شنو بغاها دير
سمعات صوت الخدامة:سمحيلي الالة ولكن وليد حرارتو مرتافعة بزاف
مشات لخدامة دا ت داكشي لي قالت نعساتو من بعد مادارت ليه قويلبات وخرجات
نرجس بدلات عليها وتخشات فبلاصتها عنقات الخدية وهي كتبكي تا داتها عنيها.وهي ماعارفاش ان ولدها كيعاني من أخطر أنواع ااحمة .
دازت مدة كانت شي تلاتة ديال الصباح ضرباتها الفيقة تفكرات ولدها .مشات نيشان عندو شافتو ناعس قربات لعندو وحطات يديها على جبهتو كان بارد رتاحت حيت نزلات حرارتو هزاتو بين يديها بشوية وخرجاتو تكات فوق النموسية وحطاتو حداها بتاسمات:نت هو احسن حاجة وقعات ليا فهاد الدنيا نت وباباك .باباك راه مايمكنش يتخلا علينا اولدي ياك
بقات كتشوف فولدها وتحقق فمالاميحو شحال لاحضات شي حاجة قربات صبعها حدا نيفو ماكايتنفس حطات يديها على قلبو كيضرب ناضت طافجة بقات كتزعزعو والو ماكايتحركش ولات كترجف غير بحدها:ولدي فيق عفاك ولدي ها ماماك فيق الله يخليك
ناصر خداه منها بااسيف وبعد وهي تابعاه كتبكي:عمي ناصر ولدي مافيه والو ياك
جلس وحطو بين يديه كيقيس النبض ديالو ناض كيطير:لولد خاص يمشي لطبيب مخنوق وفيه سخانة لباردة
خرج كيجري بيه ونرجس وطاهرة تابعينو ركبو معاه من بعد ماشدات طاهرة الولد كسيرا نيشان لطبيب
وصلو غير شافوهم دغية جات ااممرضة هزاتو
ناصر كيهضر وهو مخنزر:طيري بيه شوفي اش عندو جري
مشات كتجري دخلاتو للغرفة وعيطات للطبيب الخاص بهاد الحلات
ناصر جبد طليفونو عيط ليوسف بقة كيصوني شحال
عند يوسف كان جالس فوق الفطوي ومرجع راسو اللور داتو عنيه وهو على هاد الوضعية فيقو صوت طليفون صونا كتر من مرة تنهد وهزو شاف المتصل ضغط على القبول:الوليد
ناصر:اتجي دابة لطبيب.... وليد مريض بزاف
ناض طافج:كيفاش
ناصر:دابة اجي
قطع هز سوارتو وخرج بالزربة ركب فلوطو نيشان للطبيب
فالطبيب
كانت واقفة وكتبكي كل مرة كتخرج الممرضة وترجع تاني كتجري تخلعات شافت فطاهرة هضرات بصوت كيرجف باكي:ماغايوقعلو والوووو ياك اخالتي راه غنموت لا وقعات ليه شي حاجة
طاهرة قربات لعندها شدات ليها فيديها:ماغايوقع والو
نرجس كتاكل فدفارها ودموع شلال فعنيها كلما كتفكر انه يمكن تفقد ولدها قلبها كيبغي يخرج هزات راسها بلا وتمات داخلة للغرفة ماقدراتش تصبر:لا لا خاص ندخل نشوف ولدي مانخليهش تماك
هزاتو بين يديها وبدات كتبكي:صافي اولدي انرجعو لدار ماتخافش هنا معاك
كانو على برة مصدومين طاهرة كتبكي ناصر واقف وغير كيشوف فالخوة.يوسف مازال فبلاصتو حاس بحال شي جبل طاح فوق راسو حاس براسو كيحلم كيفاش ولدو يلاه تزاد مات عقلو بغة يخرج شاف فالطبيب خرج فيه عنيه شنق عليه ولسقو مع الحيط كيهضر وعنيه ولاو حومر ريقو نشف بالصدمة:كييييفاش مااات علااش خليتووه يمووت شكا ديرو هنااا ملي هو أيمووت غندفنك فبلاصتووو هو
ناصر تدخل كيجرو:يوووسف الاعمار بيد الله تهدن ماديرش هكا
ااطبيب مشا من قدامو مولف بهاد الحلات
يوسف ضرب يديه مع الحيييط:راااه ولدي لي مااات كي بغيتيني نتهدن
تنتر من باه ودخل كيشي عجاجة للغرفة حاس بلعافية شاعلا ليه فقلبو كيتشوة من لداخل حاس بطرف منو مشا وقف وهو ربي لي عالم بيه كيشوف فنرجس كتبكي ومعنقاه وكتهضر:ها باباك غوت عليهم وصافي نوض عمري نخليك بوحدك اولدي حل عويناتك شوف فماماك كترغبك عفاك اولدي ماديرش فيا هكا الله يخلييك
يوسف غينفاجر .
نرجس شافت فيه هضرات بصوت باكي:يووسف الله يخليك دير شي حاجة خليه يحل عنيه مابغاش يحلهم الله يخليك
يوسف قرب لعندها بخطوات تقال مد يديه باش يهزو لقاهم كيرجفو غمض عنيه ورجع حلهم:اريه
مداتولو شدو بين يديه بقة كيشوف فيه حاس بروحو تاهو أتخرج عنقوو مقهوور لدرجة كبيرة لدرجة دموعو نشوفو كيف نشف ريقو
يوسف كيشوفها كيف ولات عقلها ايخرج مامتقبلاهاش مد ااولد للمرضة ووشدها وهي كتغوت ربي لي خلقها باغة تاخدو شافتهم داينيو حسات بروحها غادة معاهم:ولييييد لا اراولي ولدي يووسف حرام عليك
شدها مزيان وعنقها وهي كتنتر منو وهو واقف بحال شي جمد تاجات الممرضة وفيديها شوكة دالمهدئ تكاها فوق البياص وحكمها ضرباتها ليها بقات شوية بشوية تا غابت
دازو يوماين
كلشي كان مجموع فالدار شي داخل وشي خارج جاين يعيزيوهم خبر وفاة لبي بي نتاشر كلشي بقة فيه لحال حيت الولد باقي صغير يلاه جاو باركولهم الزيادة ودابة جاين يعزيوهم صعيبة كاع
كان واقف جتة هامدة موت ولدو كان صعيب عليه واخة يكون بنادم قلبو من لحجر يكون هو مالك العلام راه الموت كتحطم لي مايتحطم خصوصا لا كان ضناك كبدتك وطرف منك .
بدر واقف حداه حاس بخوه بقة فيه بزاف واخة كيشوفو غير ساكت وما علا وجهو تاشي تعبير عارفو ايكون مقصح ملداخل
لفوق
كانت فالجناح من نهار دفنوه وهي حالتها حالة كتفيق بليل كتغوت وتضل نهار كامل كتبكي هازة تصاورو حطاهاهم قدامها وهوما وحويجاتو كتشم ريحتو ماسخاتش بيه .كانت جالسة حداها ملاك وطاهرة وليلى .ملاك كتشوف بنتها كتعذب قدامها وماعارفاش شنو دير ليها حارت معاها الهضرة ماغاتبردش عليها.طاهرة نزلو دموعها تاهي واحد الوقت شربات من نفس الكاس نهار يحساب ليها واحد من ولادها لي تقتل حسات بروحها اتخرج صعيبة بزاف..ليلى كتشوف فيها اكتر وحدة حاسة بالكية ديالها عارفة انهم واخة يقولولها لي قالو ماغايبردوش عليها واخة يواسيوها يبكيو معاها والو كتبقة العافية شاعلة فالقلب
ليلى شدات ليها فيديها:حاسة بيك ابنتي عارفة اننا ماغانعاونوك بوالو من غير دعاء .تانا مشاليا ولدي لي عمري شتو ولا شميت ريحتو نتي بعدة قدرتي تقيصيه وتشوفي فوجهو واخة غير يامات معدودة ولكن انا راه والو ماعارفاش تا كيف داير واش ميت ولا حي رزاوني فيه وخلاوني كي لهبيلة قلبوليا حياتي ومرضوني راه بعد المرات كنقول مصاب كون غير لقيتو واخة يكون ميت غير مانبقاش هكا المهم نعرف راه تحت تراب نمشي نزورو ديما فقبرو ولا هاد العذاب انا هاد الاحساس لي نتي كتحسيه حسيت بيه جوج مرات تصوري تشوفي ولدك يلاه تزاد مقتول بأبشع الطرق راه الموت بعنيها ديري ليه الجنازة وتعيشي فالرعب بصورة ولدك مقتول وتولي تسمعي انه ماشي ولدك وتبداي من لول تقلبي وماتلقاي تاشي خيط يولصك ليه 26 عام دلعذاب و مزال كنتعذب قولي الحمد الله ودعي من ربي يعوضك وماتحمليش راسك مسؤولية موتو مكتابة ليه هو مات مشا عند الله راه ملاك ربي يلاقيك بيه فالجنة ماديريش هكا فراسك مزال ربي يعطيك وليدات نتي وراجلك
نرجس تلاحت عليها عنقاتها وبدات كتبكي:خالتي ليلى دابة عاد حسيت بيك عاد حسيت بنار لي فقلبك راه نفس نار شاعلة فيا كنت ديما كنقول واش لهاد الدراجة نتي مغبونة على ولدك دابة عاد فهمت عاد.حسيت اخالتي حسن عوااانك
ليلى نزلو دموعها تاهي بهاد الموت زاد كمل عليها رجعوها 26 عام للور تنهدات وهي كتبكي
ليلى:نوضي جمعي الوقفة الموت علينا حق ربي بغاه مات موتة دالله وقفي مع راجلك ابنتي براكة عليك من لبكة
بدر شاف فيها كيف محطمة الحزن باين على وجها بقات فيه حنا راسو ومشا
نرجس وقفات حدا يوسف نزلو دموعها:يووسف
شاف فيها قرب لعندها جرها لعندو وعنقها حطات راسها على صدرو وبكات تا عيات وهو مخليها على راحتها هزات راسها وشافت فيه:يوسف عندك تسمح فيا هدشي ماغايأترش على زواجنا ياك
بقة كيشوف فيها بقات فيه مسح ليها دموعها:لا ماتخافيش
رجعات عنقاتو:غير نت لي بقيتلي أيوسف مانتحملش نخسرك تانت
مسح ليها على راسها:شش ماتفكريش فهادشي انا معاك
فالجيهة لوخرا
كانت متكية فوف الصداري كتفرج هي ومريم فالجاسوسات وزاهية جالسة حداهم .ولبي بي فالمهد.ديالو وسطهم كيبجغط
مريم شافت فالبي بي:هارون بدا يفيق
عائشة:سكتي خليه ناعس ايبدة عوتاني بالبكة
مريم:صافي هاهو ولا نعس
الزاهية:ماوليتيش هضرتي مع دينيس
عائشة:لا من داك النهار لي عيط عزيتهم ايكونو مشغولين مع الجنازة
الزاهية تنهدات:صعيبة بزاف يموت ليك ولدك يلاه تزاد
عائشة:صراحة بقات فيا غير نرجس مسكينة بنت حساسة وضريفة بزاف اتكون كتعذب
الزاهية:الله يصبرهم
عائشة:امين
سارة كانت فلبالكون كتكمي على ود هارون ماخاصش يشم ريحت الدخان خرجات وجلسات حداهم
سارة:كوراه بغاو يحماقو اول حفيد ليهم مات حسن عوانهم
الزاهية:مكتاب شغا يديرو
سارة شافت فهارون:ناري نهار يعرفو ان هارون حفيدهم شغا يدرو
عائشة شافت فيها:ماعندهم مايديرو ماغايعرفوش حتى نبغيهم انا يعرفو
الزاهية:كيبقة حفيدهم تاهو
عائشة رجعات كتفرج مشا بالها ليوسف اكيد ايكون تفقص على ولدو وايلا عرف انه عندو ولد اخور ايبغي ياخدو باش يعوض ولدو لي مات شافت فهارون ناعس ورجعات كتفرج
الزاهية:عصام كاع ماجا
عائشة:اه قاليا غيجي ولكن ماجاش
سارة:خليوه على خاطرو
عائشة:وشغا نديرو فالولد معاه
اازاهية:شحال قدنا نخبيو عليه لا خبيناه ومن بعد عرف يقلب دنيا فوق راسنا
عائشة:ادن عمرو يسمح لي
سارة:علاش لاكان غيسمح ليك خاص يتقبل حتى ولدك براكة من لكذوب
عائشة:ماعرفتش
لتحت
نزل من طوموبيل عندو سوارت ديال الدار حل لباب وطلع لفوق مابغاش يشد ويدخل شوية دالاحترام دق جوج مرات
الزاهية:شكون غيكون
سارة ناضت:ماعرفتش
مشات حلات لباب :عصام
بتاسم:ليها هو هدا
دخل وهي شدات لباب
عائشة ناضت وقفات بدون شعور
عصام شاف فيها:كان عندي شي شغال عليها ماجيتش
عائشة هزات راسها باه:ماشي مشكل
شاف فالولد تحنا لعندو وبتاسم:شكون هاد الفنكوش
كلشي سكت
مريم:هدا راه ولد عائشة اخويا مالك ماعارفش
تصدم شاف فعائشة مخلوعة من ردة فعلو:كيفاش ولدك
عائشة بلعات ريقها مالقات ماتقول
عصام شاف فسارة:واش بصاح
سارة بقات ساكتة شحال عاد نطقات:اه ولدها هدا ما عطة الله
عصام مسح على راسو وهو معصب :بغيت غير نعرف انا شنو درت باش نطيح فهادشي عمري أديت شي بنت لمرة باش يخرجو فيا دنوبها وتمسحو بيا الارض
عائشة نزلو دموعها
سارة:دابة ماعندك مادير لي وقع وقع كنتي جتي باش تهضر مع ختك وتحلو المشكل ختك راه محتاحة ليك وقعات فالغلط وندمات بزاف الولد راه ماعندو تاشي ذنب أعصام ربي جابو
تنهد وهو كيشوف فعائشة :اجي
خرج للبالكون خرجات لعندو
شاف فيها:علاش دابة كتبكي
عائشة مسحات دموعها:حشمانة منك انا أديتك بزاف أخويا خنت التقة ديالك فيا ولكن كنقسم ليك اني نذمت بزاف مامرتاحاش ونت حاقد عليا عارفاك كرهتني ومن حقك حيت داكشي لي درت ليك يستاهل تقتلني خويا انا راه قلت ليهم نطيحو الولد هوما لي مابغاوش سمحلي اخويا عفاااك الله يخليك
عصام تنهد:علاش اتقتلي الولد ماعندو تاشي ذنب جا من نتيجة أخطائك نتي
عصام تكا على الحيط وهو كيشوف فيها:عاوديلي كيف وقع هدشي
عائشة عاودات ليه كلشي انها كانت باغة غير تعاون جداها وتخفف عليهم الحمل ودير شي حاجة مفيدة تعاونهم ولكن قالت ليه الغلاط ترتاكب مع النفس الشخص لي كانت باغة تاخد منو لفلوس ماجبداتلوش فمرا حس يوسف :صافي اخويا هدشي لي وقع مشيت للعافية برجلي ولكن كنقسم ليك الحد الان ماعرفتش كي دار تا وقع داكشي انا عارفة راسي مستحيل نديرها ولكن ماعرفتش كيفاش مصدومة من راسي
سارة:راكي كتبقاي مو لي رباتو كون بغة يسمح فيك كونكون دارها شحال هدا هو عارفك ماشي مو ااحقيقية ومع ذالك عمرو بين شي حاجة ماكايجبدش الموضوع حتى على فمو كبر على أساس نتي مو وصافي ببساطة عصام ماشي نكار الخير باش يلقة عائلتو الحقيقية وينساك وينسة خوتو ماتخليش هاد الدنب على رقبتك دنيا والزمان هادي ازاهية عطيه لبرية لي خلا ليه باه يقرا ويعرف عائلتو شكون
كانت جالسة فصالة مابقاتش كتقدر تبقة تجلس فالجناح بزاف كيفكرها فولدها وهي كتحاول تستوعب انه صافي مات .تنهدات نفسيتها تخربقات مابقاتش كيف كانت مزال تحت تأتير الصدمة ولات منعازلة حتى من يوسف حاس مخليها على خاطرها ولات كتشوفو غير من ليل ليل فاش كيجي ينعس .صابر عليها فكل ليلة كيزيد ينزل عليها ضيم كتبقة تبكي وهي حاطة راسها على الوسادة حتى كتحس بيه جرها لعندو وعنقها على هدشي هي دابة كتحاول تفوت هاد الازمة ماباغاش تخسرو حتى هو
شافتو خارج ناضت لعندو:فين غادي
يوسف:عندي شي شغال
نرجس:بغيت زعمة نجلسو شوية انا وياك
يوسف:خليها لغدة ان شاء الله رتاحي نتي
هزات راسها باه وهو خرج رجعات جلسات فصالة نزلات امونة لي منهار مات لبي بي وهي معاهم جلسات حداها:كيف بقيتي
نرجس:الحمد الله
جلسات حداهم طاهرة شافت فأمونة:امينة بنتي ماشي طولتي على راجلك
امونة:علاش زعمة تقلت عليكم ولا شنو
طاهرة:نتي عارفاني ماكانقصدش هاد ااهضرة
امونة:سمحيلي اماما غير اعصابي شوية متوترة محمد هاد الايام مشغول فالخدمة كنقنط بوحدي هدا ماكان
طاهرة ولو ابنتي كتبقاي مراتو خاص فاش يرجع وهو عيان يلقاك فدار
امونة بغات تسالي الموضوع:عندك الحق فالعشية نرجع لدار
طاهرة:ان شاء الله
فجيهة لوخرا
كانت فالحصة ديالها متبعة مع لبروفيسور ديالها وهو كيشرح الدرس عجبها عالم البزنس بغات مازال تزيد تعمق فيه شافت شحال من سيدة اعمال ناجحة فحياتها وفارضة راسها فالمجتمع بغات تكون بحالها سلات الحصة جمعات كتوبها وخرجات مشات بحالها لدار..دخلات بدلات عليها رتاحت وجلسو دارو كاس كروط.
عائشة:زيدي يلاه كاينة وحدة على لبحر زوينة غا هي غالية
سارة:غا زيدي مانفوتوش جيدوغونج
عائشة:هههه يلاه
مشاو دخللو للقهوة شدو بلاصتهم وجلسو كيتمنضرو عجباتهم وجالسين فيها غا ناس نقين طلبو لي بغاو وشدو لحديت ونميمة فعباد الله
سارة:شفت داك زع زع غبر
عائشة:تلقايه خايد.كيواسي فمراتو
سارة:هداك غيواسي هداك يزيد يطرطق ليها لمرارة بالفقصة
عائشة بقات كضحك دورات وجها وهي تشهق:شوفي شكون جعفر
سارة شافت فيه:ناري جاي
عائشة:يلاه هدشي لي بقة
جعفر كان عندو لقاء عمل سلاه كان غادي بحالو وهو يشوفها لقاها فرصة .قرب لعندهم:فرصة زوينة هادي
عائشة دارت ليه بتسامة صفرا:اه
جعفر عرض راسو براسو:ادن نجلس معاكم شوية
عائشة:لا لقيتينا غادين بحالنا
جعفر شاف فالولد بتاسم وشد ليه فيديداتو:شكون هدا
عائشة جرات لكروسة لعندها:ولد جارتنا
جعفر:اه زوين كيشبه لشي حد اممم ماعرفتش شكون تانتفكر
عائشة:اه خلق من الشبه اربعين
جعفر:سبحان الله
فجيهة لوخرا
كان سايك لوطو صونا ليه طليفون جاوب:اش كاين
الراجل:قولتيلي لا قرب جعفر متوكل لجيهتها نعلمك داك ساع
يوسف:ايوا...صافي.فين بالضبط..مزيان خليك تماك
قلب الدورة للكافي نيشان كانت قريبة ليه وصل نزل بخطواتو تابتين دخل للقهوة دور عنيه علة الموجودين حتى كيشوفهم
جعفر:مزال كنعاود هضرتي انا نسيت لي فات واي مساعدة حتاجييها مرحبا كصديق او كأخ
عائشة بتاسمات ليه مجاملة ليه:شكرا
قفزات فاش شافتو وقف عليهم
جعفر بتاسم:ديما حاضر
يوسف ببرودة:اجي نهضرو
جعفر ناض شاف فعائشة:نمرتي عندك مرحبا فأي وقت نتي والانيسة الجميلة
سارة دارت ليه باي باي بيديها
خرج هو ويوسف لعلى برة
يوسف:صافي يمكن ليك تمشي
جعفر:هادشي لاش جاي كان بامكانك تعيطلي وتقولي بعد من عائشة ماتعدبش راسك
يوسف:لا كيعجبني نوقف على شغلي بيدي
جعفر:اه بصاح.اجي بعدة كي بقيتي مع الفقصة دولدك اولا عائشة نساتك فيه
يوسف بنفس البرود بنضراتو الحادة:ركب فطوموبيلتك وسير
جعفر بتاسم:هاهو غادي
مشا وهو كيضحك ركب فطوموبيلتو وكسيرا
جعفر:تايق فراسك بزاف ازعيم ليام بيناتنا
لداخل
عائشة:اويلييي الولد اسارة شغا نديرو فيه ناري علاش خرجناه يلاه
سارة:صافي تبتي حنا انوضو نمشيو بحالنا كاع ماسوقوش
غطاوه وتمو خارجين كان واقف على برة حنات راسها دازت من حداه حتى كتحس بيه جرها من دراعها :فين غادا
عائشة:رخي مني
سارة شادة الكروسة:يوسف الله يخليك رخي منها خلينا نمشيو بحالنا
شاف فالكروسة ورجع شاف فعائشة:شكون هدا
عائشة:اش دخلك فشي دري صغير
سارة:هذا راه ولد خالتها دابة وهي جات موراه اتلقانا دايرين هاد الشوهة خلينا نمشيو بحالنا
يوسف جر معاه:سيري نتي بحالك هي مزال ماغاتمشيش عندي بيها الغراض
عيات تنتر منوو او والو كان قوة منها سارة شادة الكروسة دلولد ماعرفات مادير شافتو لاحها فطوموبيل ركب وديمارا بالجهد
فالجيهة لوخرا
كانت جالسة فالبيت ولبرية فيديها تشجعات حلاتها خاص تعرف شكون عائلتو قرات لي مكتوب وهي مصدومة كانت واحد تصويرة تماك ديال الاب والام ديال عصام الحقيقين تصدمات:ليلى خت طاهرة وعماد
بقات شحال عاد ستوعباتها شافت القدر كيف لعب لعبتو عائلتو قراب منو بزاف وباه ديما معاه عرفات ان ربي كبير نزلو دموعها بعدة حتى ايلا عرف شكون عائلتو غتكون مطمنة عليه عرفات دابة اش واقع وفهمات تنهدات براحة خاص تحيد عليها هاد الحمل باش ترتاح عائلتو هوما مصدر قوتوو مشة تفكيرها ليوسف الزعيم لي كانو خايفين عليه منوو نهار يسيق لخبار دابة ولدها نفس الرتبة معاه فنفس المقاام ولكن ضاروري تلقة شي طريقة باش تقربو من عائلتو بقات كتفكر
سارة جرات الكروسة دهارون ومشات جلسات فواحد الجردة كانت تماك تنهدات ماعرفاتش شغا دير وماخاصش ترجع بلا عائشة لدار جبدات طليفون كتصوني عليها ماماتجاوبش:تفووو هلى مرض شغا ندير دابة
شاف فساعة 7 دلعشية
شافت فالكروسة بعدات لغطا على وجه هارون حال عويناتو:مك وباك ايحمقوني
فجيهة لوخرا
كان سايق وهاي حداه من صباح وهي تغوت وتقولو رجعني والو ماكايجاوبهاش غير ساكت تنهدات وشافت فالطريق دخل من طريق البحرية ماعرفاتش فين غادي بيها تفكرات خوها ومها لي قالت ليها ماتعطليش:يوووسف فين غادي بيا واش باغي تجبد ليا صداع مع دارنا رجعنييي اويلي
شافتو وقف الطموبيل دورات وجها بان ليها واحد اليخت كبير رجعات شافت فيه:شنو انديرو هنايا
يوسف ببرودة :نزلي
عائشة هزات راسها بلا :لا ماغانزلش
تنهد نزل من طموبيل ومشا لجيهتها حل لباب تحنة لعندها بكامل جسمو وكيهضر بنفس البرود عكس شوفاتو الحادين:نزلي
عائشة:قلت ليك ماغانزلش
مازادش معاها الكلمة جرها بالجهد تاحسات بدراعها تهرس وهزها بين يديه وهي كتغوت:نزلنيييييي اويلي عتقوووني نزلنييي
طلع بيها لليخت دخل بيها لداخل وصوتها كاسر الدنيا .نزلها بغات تمشي وهو يشدها من خصرها زير عليها تا غوتات ركز فعنيها:ماشي فمصلاحتك تعانديني الحد الان أعائشة ماشفتيش وجهي التاني ماشفتيش يوسف الزعيم على حقيقتو قباحتي خايبة بزاف غنأديك اعائشة بزاف
عائشة عضات على شفايفها مع كل حرف كينطق كيزيد يورك عليها :قصحتيني
رخف عليها:كلما زدتي عاندتيني ودرتي راسك فراسي غتزيدي تشعليني خلصي بعدة القديم عاد نفكرو فالجديد بشوية عليك
خلاها واقفة ومشا لجيهة لوخرا حل واحد التلاجة كاينة تماك جبد منها قرعة دلويسكي عمر كاسو ورجعها لبلاصتها ورجع وقف حداها:داك ليلة مزال هنا محفورة
حط يديه على راسو:يحساب ليك غنساها
عائشة كانت غير ساكتةة كتسمع لصوتو وكتشوف كيف كيهضر عارفة انها كيعني كل كلمة كينطقها وكلامو ماشي غير فالخوا:يوسف شوف راك غتجبدلي الصدع ماشي وقت هاد الهضرة خليني نمشي بحالي
جغم من كاسو شوية وهو كيشوف فيها
بغات تهضر وهو يحط يديه لي فيها لكاس على شفايفها وقرب لعندها:ششش فيك الهضرة بزاف
بعد يديه بشوية حتى تفرقو شفايفها عن بعضهم بطريقة متيرة خلاوه يركز عنيه عليهم سها وهو كيشوف ماحسش براسو وهو كيقرب لعندها.بلعات ريقها شافتو كيقرب شوية بشوية وعنيه على شفايفها بغات ترجع لور وهو يدور يديه على خصرها وجرها لعندو بالجهد تاتضربات فيه حطات يديها على دراعو بغات دفعو ولكن كان قوة منها حسات بقلبها كيضرب بجهد وهي كتحس بحرارة جسمو حط لكاس فو واحد طبلة كانت حداه ورجع كيشوف فيها هز يديه وبعد شعرها وردو لجيهة لوخرا
عائشة:يوسف شكا دير
يوسف قرب لعنقها بحاليلا كيتنشق ريحتها حس برجفة ديالها من حرارة انفاسو همس ليها قدام ودنيها:فين كنتي هاد المدكاملة كيفاش انا ماقدرتش نلقاك
عائشة تخنقات ماعجبهاش الوضع بغات تنتر منو ولكن لسقها مع ااحيط بالجهد عقدات حواجبها ففاش ضربها ضو فكرشها وملتحت ديالها مزال ما طاب الجرح مزيان بغات تحط يديها على كرشها ولكن ماخلالهاش الفرصة فين تزيد تحرك هزات راسها جات عنيها فعنيه نطقات بصوت قريب للهمس كتحرك شفايفها بتقالة بلوجع لي كتحس بيه :رخي مني أيوسف.راك...
قاطع كلامها بقبلة على شفايفها خلاتها تبلوكة أنفاسها حبسو فهاد اللحضة كتحس بشفايفو كيتحركو فوق شفايفها بشوية دافين ويديه على خصرها مزال مزيرين .عائشة جمعات قوتها وطلعات يديها بغات دفعو ولكن معامن حكمها مزيان فجأة قبلتو الدافية لحنينة تقلبات لقبلة همجية شرسة لدرجة تقصحات حسات بيه كينتاقم من شفايفها عيات تنتر منو او والو قوتو قوة منها واخة هكاك ماستسلماتش ماخلاتوش يستمع بالقبلة بعد بشوية وشاف فيها كيف كتلهت شفايفها ولاو حومر وعنيها دمعو بالحريق لي كتحس بيه :كنقولك ماتعاندينيش
يوسف حط صبعانو على شفايفها بحاليلا كيماصيهم بشوية وعنيه فعنيها:داك ليلة قلت ليك نتي لي دخلتيني لحياتك وصعيب نخرج منها غير لا بغيت انا ستحملي هدشي ماحدي انا فحياتك راه كلشي من حقي غندخل فحياتك
نزل يديه على جسمها من دراعها حتى لخصرها:وغنقيس فين ما بغيت وفالوقت لي بغيت
عائشة ستفزها بهضرتو لعب ليها على الاعصاب:من نيتك انا راه ديال لراسي ماشي ديالك وأنا خرجتك شحال هدا من حياتي نسيتك فمرا ونسيت اي حاجة كتعلق بيك لا كان غير على داك ليلة المنحوسية انا راه كرهتها ونسيتها واخة خسرت فيها شرفي ولكن ماكايهمش ماشي نهاية العلام عايشة حياتي الحمد الله وشوف هضرتك ديال داك النهار اني درت داكشي باش نتقرب منك وزعمة تزوج بيا مزال كنتفكرها ومانسيتهاش بينتيلي شحال نت ماكاتسواش ونسيتي ان الدنيا فيها ولاد ناس ربي كبير يقدر يلاقيني بشي واحد لي مايهموش شرفي ويبغيني كيف انا ونعيش معاه حياتي مرتاحة ديرها فبالك حياتي ماكاتوقفش عليك غير نت ..تزوج بيا ولا ماتزوجش بيا ماكايهمنيش حيت انا اصلا كرهتك وعفتك ومستحيل نقبل نكون مرات راجل بحالك كون هاني ادن ماتعطيش قيمة راسك بزاف ويحساب ليك انبقة تابعاك حياتي كاملة الحمد الله باقة صغيرة وزوينة والف واحد يتمناني وحتى ايلا ماجابش الله هاد ولد ناس راه البكرة ولات كتباع ماغانخسر والو ادن ماكاين تاشي مشكل او مانع يخليني نكره حياتي ونتبعك نت كلشي عندو الحل اسي يوسف الزعيم فهم راسك وبعد منيي سمعتيني بعد مني بهاد العبارة
يوسف كيشوف فيها كي كتهض وكل حرف نطقاتو شعل فيه العافية كلامها جهلو وستافزو كيفاش برهوشة بحالها يطلع منها هاد الكلام كيفاش تعيش حياتها مع واحد اخور هز يديه تا لسما وجمع معاها بصقلة تا حسات بوجها ضار كانت غطيح وهو يجرها من شعرها لعندو حط راسو على راسها وهضر بصوت حاد ماتنكرش انها خلعها:ها حنا غنشوفو هاد ولد الناس لي غتلاقايه عرفتي قبل يوصل ليك وتجي عينك فعنيه ويفكر انه يكون معاك او فقط يتجرأ يقرب منك غيلقا راسو ممحي من الوجود من اليوم عتابريني اسوء حاجة غتخرب ليك حياتك عمرك تحلمي تعيشي حياتك هانية كيف ناس وعمرك تحلمي تكوني عروسة شي نهار هكا اتبقاي حتى تموتي ونتي ديالي بغيتي ولا كرهتي اندخل فحياتك فأصغر التفاصيل انرون ليك حياتك اعائشة
عائشة بتاسمات واخة حاسة بقلبها كيضرب فلمية مابغاتش تبين خوفها بغات تبين ليه انه مستحيل يوقف فطريقها:لهاد الدرجة كلامي قاسك ناري لهاد الدرجة خلاك تجهل وتمد يديك عليا تهدن ازعيم تهدن
زير ليها على شعرها :ليام بيناتنا اعائشة هاد العياقة لي فيك غنقطعها كوني هانية
بعد عليها حيت ماضامنش راسو شنو يقدر يدير مزال
هز كاسو نزل عليه فدقة
هي غير رخة منها حطات يديها على حيط حسات بالدوخة وليد لوخرا حطاتها فلتحت دكرشها كيدرها بزاف تنهدات بصوت مرتافع
جلسات فأقرب فوطوي حداها
يوسف ضار لجيهتها قرب لعندها وجلس اونفاص معاها فوق الطبلة :ودابة غاتعاوديلي على داك ليلة
عائشة:مالها
يوسف هضر بصوت قفزها:راكي عارفة فين هو هاد الحمل وشنو بلانو
عائشة:زعمة غنكون حاملة وغنبعد .راه ماكاين لا حمل لا والو بغيت نمشي و نخليلك داك ليلة ذكرى مني وصافي
ختمات هضرتها بابتسامة
جغم من كاسو شوية وبقة كيشوف فيها شحال حتى كتشهق فاش رشها بالويسكي لوجها بغات تنوض وهو يدفعها بيديه:ها حنا غنشوفو هاد الذكريات
عائشة كتمسح وجها:شووف شنو درتيييي هدا راه شراب حرااااااام
سارة:اش وقع فين داك وشنو دار ليك شوفي وجهك كلو حمر وشعرك مخبل اويلي شنو دار
عائشة:والو واش حمقة ماعندو مايدير زيدي نطلعو من بعد ونهضرو شنو انقولو لماما
سارة:ماعرفتش امم نقولولها دزنا تفرجنا جابو شي مغني على لبحر نسينا راسنا وماسمعناش طليفونات مع الصداع
عائشة جمعات شعرها شفنجة :يلاه
وطلعو لدار
فجيهة لوخرا
كان واقف على برا حدا طوموبيلتو قلب عليها ومالقاهاش تعصب من لمزيان كون لقاها دابة حداه يتيري فيها ويدفنها فبلاصتها عرف راسو داخل المعركة مع برهوشة مطرقة :غير زيدي هربي اخيرتك اتجي بين يدي
ركب فطوموبيل وكسيرا
عائشة دخلات للحمام من بعد ماسمعات نكير من عند مها ..غسلات حالتها من ريحة دشراب لي بقات فيها لوات عليها فوطة وخرجات جلسات فوق النموسة لتحت ديالها مزال كيضرها وزادتها بالجرة جبدات حوايجها لبساتهم نشفات شعرها وجلسات فوق النموسية حتى كدخل عندها سارة:عاوديلي اش وقع
عائشة عاودات ليها كلشي
سارة:ايييه على زعزع مازال باغي يزيد ياكل ااحلوة ماحشم ماستحية وزايدها بتهديدات لا اختي هدا الواحد يخاف منو ولكن بينني وبينك راه طايح مايمكنش يدير هادشي كامل وزيدي داك نهار قالت ليك نرجس ناعس وكيقول سميتك
عائشة:ماكايهمنيش هدشي هو راه تابع غا حاجتو باغي يدوز بيا الوقت ولكن والله لا كانت ليه انا غنوريه عائشة شكا تسوة انخليه يندم على النهار لي عرفني فيه انا لي غنرون ليه حياتو لما بعدش مني
سارة:علاه شغا ديري
عائشة جبدات طليفونها دخلات للتصاور هنا غنوريك شغا ندير
جبدات نمرتو وصيفطات ليه تصاور لي كانت دار ت هي وياه فوق النموسية صيفطاتهم مع مساج:سي الزعيم لا مابعدتيش مني هاد التصاور اتلقاهم عند كاع عائلتك ومراتك غيعرفو داكشي لي وقع بيني وبينك كلو حسن ليك بعد من طريقي
ورات لسارة طليفون فرات داكشي
سارة:هههههه نتي راك خطار
كان سايق حتى كيوصلو ميساج فتح طليفون وحل الميساج غير شاف داكشي وقف الطموبيل على الجنب قرا داكشي مزيان وشاف التصاور عصبوه استفزازاتها وتهديداتها داك الساع دوز نمرتها عيط ليها
عند عائشة
عائشة:هاهو كيعيط
جاوبات:الو ماقدرتيش تصبر حتى تستوعب داكشي هههه
قفزات فاش سمعات صوتو :كيحساب ليك هدشي غيخلعني واش مازال ماعارفاش راسك معامن راه لا تصاور لا تهديداتك غيفكوك مني راه تاحاجة ماكتهمني شحال قدك تهربي مني وشوفي كنقولها وكنعاود راه غنأديك بزاف اعائشة
بغات تهضر ولكن قطع عليها
عائشة شافت فسارة:ومزال كيهدد ايلا هاد تصاور ماحركو فيه تا شعرة راه كاين الولد هو سلاحي فهاد الساع كنت باغة نخرجو من حياتي ونبعد منو ولكن هو لي كيقلب عليا اسارة ماغانسكتش ليه لا كان أيلعب معايا هكا ويبقة تابعني ويمرمدني فوقاش مابغة انا غنوريه شكا نسوة
عند يوسف
رجع ديمارا طوموبيل
بامكانو يمحيها من الوجود بامكانو دابة يمشي يخرجها من دارهم قدام عائلتها ويمرمدها وعمرها تولي ترجع لعندهم حتى يسالي منها ولكن شي حاجة مانعاه واش حيت الام ديالو لي من الصغر وهي كتقولو مايضلم تاشي بنت ما يحكرش على الوليات كبراتو على هاد الاساس ولا باه لي ديما كيقولو ماديرش نفس الغلط ديالي بسباب الماضي ديالو كره كاع لعيالات وعذب طاهرة باش يفش غليلو فيها . ولكن عائشة هي لي جات فطريقو هي لي جبداتو حتى دار معاها الغلاط هو عمرو كان يديرها ولكن وقع لي وقع بقات تابعاه حتى طيحاتو هو عمرة كان يدر بحال هكا تززح باش يبعد من هاد العلام ولكن هي لي دخلاتو لحياتهت ادن ختص تحمل داكشي لي غيجيها دابة ولات ديالو وصافي وماغايسمح لتاشي حد.يقرب ليها من غيرو كتبقة شي حاجة من ممتلكاتو وصافي باقي ماعارفش شغا يدير معاها ولكن خايف لا يتقادة صبرو وينسى كلشي ويأديها خايف عليها من راسو .تنهد وزاد فالسرعة ومشا
فالجيهة لوخرا
الزاهية هزات لولد ودخلاتو ليها للبيت:تهزي عطي الولد يرضع واش خاص نفكرك انا باش ترضعيه ماتنوضيش راسك تشوفي اش ناقصو
عائشة كانت كتخنتش فطليفونها تقادات فالجلسة وخداتو من عند مها حطاتو فحضنها وبدات كتردعو:هاهو كيرضع
الزاهية خنزرات فيها وخرجات لبرا كانت كتهضر هي وسارة فالموضوع
سارة مزال مصدومة:صدمة قوية هادي بحاليلا ضربتيني بصقلة ازاهية
الزاهية:اييه المرحوم باش ينقد الولد من يدين داك العصابة داه معاه وقالهم قتلتو سافر بيه لمدينة خرا وتما فين تزوج بيا دوزنا سيمانة وهو يجيبو لدار قالي الولد يتيم ماعندو تاشي حد ستقبلتو وحبيتو واخة ماشي ولدي كبرتو وعطيتو من وقتي واخة كنت صغيرة حتة جاب الله وولدت عائشة يسهد عليا الله ايلا ميزتو بينو وبين ولادي كبرتو على اساس ولدي ولد كرشي .داز الوقت وقلنا لعصام الحقيقة فلول بقة فيه الحال ولكن تقبلها حيت لقا فينا حنان الام والاب .صالح الله يرحمو ربة عليه الكبدة ماقدش يقولو الحقيقة تا انا ماكنتش عارفة حتى جا يموت عاد قالي الولد مو وباه حيين ملي يموت ويجي الوقت لي يكون اولد محتاج لواليديه نعطيه لبرية وانا كنت خايفة فلول ولكن دابة خاص يعرف الحقيقة جا الوقت اسارة حنا كاملين فهاد اللحضة محتاجين لعائلة عصام ااحقيقية
سارة شدات ليهافيديها:هادشي لي خاص ديري ازاهية
جا نهار جديد
كانو مجمعين عند عيماد فدار كيهضرو على تفاصيل المبارة لي مابقة ليها والو
عماد حط يديه على كتاف مهدي وبتاسم:انا كنعرف مزيان البوكسور لي غتلعب معاه هو امريكي شحال من مرة خدا لقب البطولة ولكن كنقسم ليك ماعندوش المهارات لي عندك نت خليك تايق فراسك وعطيه علاياش كيقلب امهدي عارفك قدها وديما كنقولها
علي:سميتو دافيد معروف بالضربة القاضية من الدقة لولا هو من النوع لي كيدخل من لول مجهد وكيعطي طاقتو كلها فأول لكمة كنضن هاد النقطة فالصالح ديالك
عصام:اه بصاح مهدي يمكن ليك فلول تعييه فالشوط اللول ماتعطيش داكشي ديالك كلو خليه هو يعية خودلو طاقتو من بعد عاد عطيه لي عندك وخرج طاقتك كلها ايجيك ساهل داك ساع تعطيه الضربة دلكاو
عماد شاف عصام وبتاسم:تماما
عماد:هدشي لي بغيت نقول قالو عصام
عماد:مهدي البوكس ماكايعتامدش غير على القوة وصافي راك عارف خاص الذكاء والتركيز خاص تقرا الخصم ديالك تحفض حركاتو بيديه ورجليه وشنو الحركة لي كتخليه يرجع اللور هي لي خدمها
مهدي كان كيتصنت ليهم ومركز معاهم مزيان هز راسو باه :ان شاء الله ماغايكون غير الخير
فاتي كانت فبيتها نزلات لعندهم وجلسات حداهم
مهدي:ميدو مابقالك والو
مهدي:العد العكسي
فاتي:عماد خليني نمشي نتفرج تانا مالي ماعلياش الله
عماد:واش ماكاتسالايش قابلي قرايتك
فاتي:على نهار
عماد:فاتي راه دوينا تفرجي فدار فتلفازة غيبان ليك حسن
فاتي:ياك الوليد ياك ايوا هاهاهي فيك ولكن غتعوضهالي سمعتيني مامفاكاش
عماد:ان شاء الله غا سكتينا
فاتي سكتات وهي كتسمعهم كيناقشو المبارة لي غتدار فالمريكان
حتى كتجي الخدامة:سي عماد الغدا واجد
عماد:نوضو نتغداو طولنا فالهضرة
ناضو كاملين تجمعو فوق الطبلة يتغداو
قبل يبداو دخلات ليلى غير شافتهم بتاسمات:مرحبا بيكم
عماد كيشوف فيه بتاسم مايكرهش يكون عندو ولد بحال عصام
كملو غداهم من بعد ناضو مشاو بحالهم
دازو ساعات قرب لحال يضلام
فبلاصة خرا
رجعات من الخدمة ديالها كأستادة فوحدة من المدارس الخصة تابعها الممجموعة ديالهم من صغرها وهي باغة تولي استادة واخة عندها شهادة فايدارة الاعمال وداخلة فمشروع خاص بيها كتزورو مرة مرة ..ملي سلات خدمتها دازت شرات شي حوايج ناقصينها طلعات لبيتها دخلات نيشان للحمام دوشات وخرجات لبسات دوبياس ديالها ووقفات وجلسات على جنب النموسية كتدهن لحيمة ديالها بكريم هي من النوع لي كتهتم براسها بزاف
كان داخل كي شي عجاجة تلاقاتو الخدامة غوت :فييين هي
االخدامة قفزات:راها لفوق
طلع كيجري فدروج نيشان لبيتها زدح الباب حتى قفزات :شنوووو درتييي
امونة وقفات هي مافاهمة والو دورات وجها بغات شي حاجة تغطة بيها مالقاتش :خرااااج واش حمق مالابساش عليا
قرب لعندها وهي راجعة اللور حاطة يديها على صدرها وكتشوف فيه عاد فهمات لاش كيغوت لسقات مع الحيط وهي كتشوف مع جنابها ماعندهاش فين تهرب نساات اش دارت ليه بلعات ريقها فاش قرب تا لعندها هز يديه تا لسما على شكل بوكس غمضات عنيها حتى كتسمع صوت ضربة حلات عنيها ضربها مع الحيط شافت فيه قريب ليها بزاف ويديه حاطها على حيط كيشوف فيها شوفات بحال لقرطاس:عرفتي راسك اش درتي ليوم
امونة كتحاول تخفي الخوف ديالها:ماكايهمنيش حيت قلت ليك انرد ليك الصرف نت لبارح قطعتي ليا الفروض ديال التلاميذ ديالي وانا اليوم قطعت ليك وراق المشروع ودرت ليك رسومات ديال دراري صغار ياك ما عجبوهم وبغاو الجديد هههههه
محمد حط يديه على عنقها وزير :عجباتك اللعبة ايوا تحملي لي غيجيك
امينة بقات كضربو على يديه خنقتينييي رخي مني
رخف عليها وشدها من شعرها:درتي فيا الضحك قدام الموضافين ديالي والشركاء ديالي لي فأمريكا واش عارفة شحال كان الاجتماع مهم
امونة بتاسمات وهي كتخايل المنضر بردات ليها دابة:باش تعاود تبعد مني من لول قلت ليك نت فحياتك وانا فحياتي راك نت لي مابغيتيش
محمد يشوف فيها كيف كتهضر بكل ثقة والابتسامة على وجها مرسومة :كتزيدي تحدايني دابة
امونة:اه بعد مني نبعد منك
محمد كان راخف على شعرها زاد زير تا غوتات:ايوا عمري نبعد منك محدنا بجوج اندخل فيك تانسنيو الورقة طلاق
امونة قصحها عضات على شفايفها:ودابة رخي مني
نزل عنيه على جسمها الشبه عاري بدوبياس وردين مناسبين جسمها المنحوت لمبرونزي كلشي فيها هو هداك بغة يستافزها شوية حط يديه على سميطات سوتيان ودخل صبعانو بحاليلا ايحيدهم:جا مع الغوز
امونة ضربها الضو:جمع عنييك عندك شكا دير حيد يديك
محمد زاد قرب ليها :راني راجلك زعمة
امونة بلعات ريقها وهي كتحس بحرارة انفاسو على وجها:محمد بعد منييييي مالاعبينش هكا
محمد عجبو الحال وهو كيشوفها معصبة ووجها ولا حمر تزنكات:بغيت نشوف داكشي لي تحت هاد الدوبياس راه من حقي اولا
وبدا كيهبط ليها فسمطة دسوتيان قفزات وشدات ليه يديه وخنزرات فيه:شمن من حقك عارفاك دابة باغي غير تردلي الصرف ولكن ماشي بهاد الطريقة سمعتيني ماشي بهاد الطريقة
بتاسم باش يستافزها وقرب لعنقها وهو كيستنشق ريحتها همس ليها:ريحتك زوينة بزاف طبع قبلة على عنقها
امونة حسات بلحرارة طالعة معاها دفعاتو على حر من جهدها وهي حاسة بقلبها غيسكت:اخخخر مرة تولي ديرها سمعتيني اخر مرة
محمد زرب عليها وجرها من خصرها تا تضربات فيه وباسها على شفايفها بالسيف عليها وهي كضربو على صدروو حتى بعد ودفعها عليه بقات كتمسح ففمها:حقييييييير كنكرررهك ااحيوااان
محمد كيشوف فيها وهو مزال مبتاسم:عجباتني هاد القضية نتي ديري لي فراسك وانا غندير هدشي
قطع عليهم صوت لباب
الخدامة من مور لباب:لالة امينة سي بدر خوك لتحت كيتسناك
امونة:واخة واخة هنا هابطة
شافت فمحمد:خرج خليني نلبس عليا ومن بعد نتفاهمو على هادشي لي درتي والله تاندمك تانا لعبي خايب غا تسنة
بتسام وحل لباب وخرج هبط لتحت عند بدر سلم عليه ورحب بييه وجلس حداه
محمد:ماعرف كيف طرا جيتي زرتينا
بدر بتاسم:غير مع الوقت وصافي
محمد:ايوا سلاك
نزلات من بعد مالبسات عليها سلمات على خوها جلسات وسط منهم:زارتنا البراكة
بدر:هههه وشنو ماشي تويميتي
جات الخدامة حطات ضيافة
بدر شرب شوية من العاصي وشاف فيهم:ايوا كي دايرين نتوما الامور هانية مفاهمين
محمد بتاسم ودور يديه على خسرها:حنا الحمد الله بيخير ماتكون نت ان شاء الله
بدر:ايوا الله يكمل عليكم
امونة كتحاول تبعد ليه يديه ولكن هو مزير عليها
محمد:ناقصنا غي شي وليد يعمر علينا الدار
امونة خنزرات فيه ماقدراتش تصبر:محمممد
بدر فسرها حشمة بتاسم
طول الجلسة ومحمد حاط يديه على خسرها كيهضرو ومرة مرة كيزير عليها حتى كتقفز
بدر ناض:نخليكم دابة جيت غي نشوفكم
امونة ومحمد وقفو معاه:خليك مزال
بدر:لا مرة خرا ان شاء الله
امونة عارفة خوها مايقدش يزيد يجلس :واخة اخويا على راحتك
وصلو معاه لباب سلمو عليه ركب فلوطو ديالو ومشا بحالو
دخلات لدار طلعات لبيتها تكات فوق النموسية غمضات عنيها باش ترتاح وتنعس وهي تجي فبالها القبلة ديالو الحد الان مازال كتحس بيها وكتحس بالقرب ديالو تنهدات:اميينة نعسي حسن ليك
غمضات عنيها ونعسات
جا نهار جديد
نزل من لوطو طلع للجناح ديالو نيشان
باغي شي وراق يخدم عليهم حيد القميجة ورماها فوق النموسية ودخل للمكتب ديالو هزهم وجلس كيراجعهم
فبلاصة بعيدة على الدار
خرجها كيف واعدها داها للمطعم لي كيعجبها جاي على البحر تغداو فيه من بعد دازو لليخت ديالو كملو فيه نهار..كانت جالسة وحاضياه وهو كيعوم تنهدات تفكرات شحال كان كيبغي ولدو كيهتم بيه بزاف كان قريب ليه بلا قياس كيجي بكري غير باش يشوفو واخة كتشوفو هكا ماكايبينش ولكن حاسة بيه تاهو مشوط مالداخل ديالو بتاسمات فاش شافتو خارج من لما بصدرو العاري ولما كينقط منو رجع شعرو اللور وقفات هزات فوطة وقربات لعدو حطاتها على صدرو وبدات كتنشف ليه بشوية وهي مبتاسمة بتاسم ليها وخدا ليها الفوطة نشف بالخف وتحنة هز باكيتو دلكارو خدا واحد شعلو نتر منو نترة طويلة ومشا وقف اونفاص مع اابحر وهو كيكمي قربات ووقفات حداه .شاف فيها وساط الدخان:وليتي مزيان دابة
تبعاتو كان واقف قدام الفولون دليخت قلب الدورة باش يرجعو
نرجس قربات لعندو حطاتويديها على صدرو وبدات كتحركهم بشوية:خلينا مزال هنا.نباتو هنا حسن
يوسف :عندي شي شغال غدا خاص نرجعو
تنهدات نزلات يديها :واخة
هو قاد الاتجاه داليخت وريكل السرعة ونزل لتحت دوش ولبس عليه خرج شافها واقفة ولابسة تاهي حوايجها كتسناه بقة كيشوف فيها واقفة فنفس لبلاصة فين كانت واقفة تفكرها كيف كانت كتهضر بكل تقة متأكدة من راسها تفكر القبلة لي باسها بسيف عليها وبتسامتها باش تستافزو فيقو صوتها:يوسف فين سهيتي
يوسف:شوية ونوصلو
هزات راسها باه وجمعات حوايجهم داز الوقت وصلو لبلاصتهم نزلو ركبو فلوطو باش يمشيو لدار رجعات راسها اللور وهي كتشوف فالطريق حتى كتجي عنيها على راجل جار لكروسة دلبي بي ومراتو حداه شاد ليها فيديها وكيتمشاو باينة شحال فرحانين تنهدات نزلات دمعة حارة من عنيها مسحاتها دغية حتى كيوقفو فالصطوب كانت حداهم طموبيل سايكاها مرا ومركبا موراها ولدها فلكرسي لخاص بيه باقي صغير وحالة الشرجم لي من جهتو والريح مجهد عليه بقة فيها كيف كيحل ويغمض عويناتو ريح غلبو ماحسات براسها تا هبطات الزاجة :أختي طلعي الزاج على لبي بي ريح مجهد عليه يقدر يمرض
المرا:اه بصاح شكرا راه مزروبة مارديتش لبال طلعات عليه الزاج وبتاسمات ليها
نرجس بقات كتشف ف لبي بي كيف رتاح ملي طلعات عليه زاج حتى تحركات طموبيل ومشات تمنات تبقة كتشوف فلبي بي نزلو هاد المرة دموعها كتار هدشي كامل وهو مراقبها ديمارا الطموبيل حتى كيسمع صوت بكاها شاف فيها وتنهد
نرجس:راه ماقدرتش ننسا ولدي ايوسف مزال ماقدرتش كون مات فكرشي شوية ولكن راه ولفتو وهو بين يديا ونرضعو ونفيق فليل ملي كيبكي ونعسو راه صعيبة عليا
يوسف غير كيسوق ماعندو مايقولها هو براسو كيعيش داكشي لي كتعيشو هي غير كيصبر راسو وكيحاول ينسى
حلات لباب ونزلات هو ديمارا وكسيرا بالجهد دخلات لدار وهي كتمسح دموعها رتاحت فاش مالقات تاشي حد طلعات نيشان للجناح بدلات عليها وجلسات كتبكي حاسة براسها اطرطق بغات دير شي حاجة تخوي قلبها تهضر ماتبقاش ساكتة ماجا فبالها غير بدر صديق طفولتها لي كانت فوقما تبكي او تحتاج لشي ونيس كتلقاه فجنبها ناضت مشات نيشان للجناح ديالو دقات لا رد زادت دقات مرة وجوج وتلاتة من بعد حلات لباب:بدر
شافت طليفونو ادن راه كاين لحمام محلول ماكاينش فيه عرفاتو تيكون فالمكتب ديالو حلات المكتب شافتو جالس ولوراق ضايرين بيه
نزلو دموعها وهضرات بصوت باكي :بدرر
هز راسو وهو يشوفها تصدم كانت كتبكي وهي واقفة فباب المكتب ماحس براسو تا كان واقف حداها بصدرو العاري هي براسها ماهتاماتش لهاد الوضع:بدر انا حاسة براسي ماشي هي هديك خايفة نخسر كلشي
هز كلينيكس ومدو ليها خداتو ومسحات دموعها تنهدات وبدات كتهضر بصوت باكي:بدر انا راه من صغري وانا كنبغي يوسف كنت انطير بالفرحة ملي سمعت انه باغي يتزوج بيا ماتصورش شحال فرحت بكيت كاع تزوجنا وتحقق حلمي وزدت فرحت فاش عرفت راسي حاملة ادن غيولي عندا بي بي يزيد يقربو ليا كتر ولكن فرحتي ماكملاتش مات ليا ولدي الحد الان مابرداتليش يوسف حسيت بيه بعد عليا ماغانلوموش حيت وليت غير كنبكي مابقيتش كي كنت ولكن راه كنحاول نتأقلم مع الوضع ابدر ماساهلش عليا يموت ليا ولدي يلاه تزاد عارفة تاهو ربي لي عالم بيه وانا كنزيد نكمل عليه
رجعات كتبكي تاني:بدر انا خاايفة لا نخسر راجلي راه نموت لا خسرتو
بقات كتبكي بقات فيه وفنفس الوقت كيحس بقلبو كيتقطع تاهو كيبغيها وكيحس بنفس شعورها وكيزيد يكمل عليه ضميرو لي كيانبو كيبغي مرات خوه
نرجس شدات ليه فيديه:عفاااك قولي شنو ندير خايفة بزاف خايفة يولي يبغي شي وحدة من غيري راه نهبل والله بدر قولي شي حاااجة
بقة كيشوف فيديها لي على يديه قلبو ولا كيضرب بالجهد حس على راسو بغة يبعد يديه وهي تزيد تزير عليه:تانت ساكت عارفو غيسمح فيا ياك قالك شي حاجة باينة قولي نت خوه كتعرفوو
بدر بعد عليها ووقف :نرجس ماديريش هاد الحالة فراسك ماكاين والو من هدشي يوسف كيبغيك غير تاهو مقصح لموت الولد وكيحاول ينسى ماديريش فبالك صبري تانتي وغيرجع كلشي كيف كان وحسن عادي تكون حالتو هكا تاهو اب
ناضت وقربات لعندو:واش بصاح
هز راسو باه:اه
ماحساتش براسها حتى عنقاتو:شكرا بزاف نت لي كتفهمني
بدر بحاليلا ضربو الضو بقة مصنم فبلاصتو وهو كيحس بثقل جسمها غمض عنيه وهو كيحس بيها بين احضانو جمع يديه عندو خاف لا يتهور ويعنقها تاهو حيت هو بدورو محتاج ليها كانت صعيبة عليه يقول داك الهضرة باش يصبرها
حسات على راسها عاد نتابهات مالابسش عليه مسحات دموعها:سمحلييي بزاف والله ماقصدت
بدر رجع اللور :ماشي مشكل دابة بيخير.هزات راسها باه
نرجس:صدعتك معايا ولكن راه غير نت لي جيتي فبالي
بدر:عادي راه تربينا هكا
نرجس بتاسمات:بحال لخوت
هز راسو باه
نرجس:احم نخليك دابة وشكرا بزاف بزااف
بدر:خودي راحتك
خرجات من عندو وهي كتمسح دموعها دخلات لبيتها غسلات وجها وتكات كتفكر شغا دير
بدر غير خرخرجات ضرب بيديه أقرب فاز حداه صعيبة بزاف الانسانة لي كيبغي من طفولتو معاه فنفس الدار ومرات خوه راه العذاب لبس قميجتو هز سوارتو طليفونو وخرج من دار ركب فطوموبيلتو وكسيرا بالجهد حتى وقف قدام واحد الاباغطومو كلاس نزل ركب فالمصعد تا وصل للايطاج لي باغي جبد ساروت حل لباب ودخل لقاها فالكوزينة غير شافتو غسلات يديها وجات لعندو وهي مبتاسمة باستو على خدو:وأخيرا جيتي قلت اليوم ماغانشوفك
جلس فالفوطوي شافتو ماشي هو هداك جلسات حداه:ياك لاباس مالك
بدر شاف فيها وتنهد:والو أزينب
تنهدات تاهي:هي عاود ياك
هز راسو باه شدات ليه فيديه:مع الوقت غتنساها
بدر:هدشي لي باغي ولكن كنشوف هدشي صعيب بزاف
زينب:حيت مرات خوك وضاروري تشوفها كل نهار حداك
سكتات شحال عاد كملات:ومازال مالقيتيش البنت لي تنسيك فيها يقدر نت ماعاطيش فرصة لراسك تشوف من غيرها ماكانهضرش على راسي حيت عارفة راسي علاش انا هنا زواجنا سيري غتقادة المدة وكل واحد ايشد.طريقو ولكن بغيت نقولك أبدر عطي الفرصة لراسك تولي تحب من جديد لقة البنت المناسبة باش يرتاح بالك ويرتاح قلبك
بقة كيشوف فيها وهو كيفكر فهضرتها هادي هي الونيس ديالو هي لي كيجي عندها باش يفاجي زواجهم سري وهي قابلة بهادشي حيت معاونها فحياتها فقرايتها متكلف بمصاريف الجامعة لي هي فيها وهاز ليها عائلتها لقات فيه الخير على باقي الناس لي دازو فحياتها واخة مزوجها فالسر ولكن كتسمة مراتو فلحلال ...
زين:نوجد ليك الحمام
هز راسو باه
ناضت دخلات للبيت قادات ليه الحمام خرجات للبيت لقاتو واقف بتاسمات وقربات لعندو:كيف كتقول نت الله كبير دابة يفاجيها
بتاسم ليها
بغات تمشي وهو يجرها من خصرها:فين غادة
زينب دورات يديها مور عنقو:نووجد ليك شي حاجة تاكلها
زاد جرها لعندو:من بعد
بتاسبتات وقربات دخلات معاه فقبلة طويلة حتى كتلقة راسها فوق النموسية وهو فوقها مستسلمة ليه كليا
دازت هاد ليلة وجا نهار جديد
كانت كتلبس عليها هاد اليوماين عصام وجد لوراق باش يدير الولد فالحالة المدنية بسميتو هو مايبقاش الولد بلا سمية كيعرف شي عاونوه فلقضية وطبعا ضاروري مايدور لفلوس .عائشة غتمشي باش تسني على شي وراق ضارورين تاهي هدشي لي بغات ماكاين ماحسن من خوها يتكلف ليها بولدها دنيا وزمان هادي ..حلات لبلاكار تجبد شي كاب وهي تجي عنيها على تيشيرط هزاتو بقات كتشوف فيه تفكرات شحال من حوايج قرباتو شمات ريحة دعطرو لي بدات كتختافي من داك النهار ما ولات شافتو رجعات تي شيرط لبلاصتو:اصلا ماعندي ماندير بيه غير يبعد مني
لبسات لكاب وخرجات كان عصام جالس فصالة :نمشيو
عائشة:يلاه
خرجات هي وياه مشاو للمركز سناو لوراق وقادو كلشي دابة ولا الولد معترف بيه دوليا خرجو من المركز
عصام:دابة مزيان
عائشة:تهنينا من هاد الناحية
عصام:غنوصلك لدار عندي شي شغال فليل ونجي نشوف ولدي
عائشة:ماجاتش معاك الابوة
عصام:وراه نتي لي ماجاياش معاك الامومة
ركبو فلوطو وهوما مناقشين تا وصلو لدار نزلات وهو مشا
طلعات لدار
الزاهية:مابقاش ليكوش للولد
عائشة:اوووف عاد دخلت مافيا لي يولي يخرج كون منين كنا خارجين قوليهالي
الزاهية:اوووه سمحيلي ابنتي سمحيلي الولد ولدي وخاص انا لي نعرف شنو ناقصو الله يعطيني وجهك هدا ماغانقولك
عائشة تنهدات:اوووف نمشي نشرب بعدة بشوية عليا
سمعاتو بدا كيبكي:هاهو عاود كيبكي باغي يرضع
الزاهية:سربي سيري جيبي ليكوش واجي رضعي الولد
عائشة شربات لما وخرجات مشات لسوبير مارشي بعيد عليهم شوية من عندو كيجيبو ليكوش ختص بالبي بي كانت الشمس ضاربة ليها لراس شوطاتها دخلات لسوبير مارشي :الله لبرودو
بدات كتمشى مستمتعة بالبرودة حتى وصلات لبلاصة فين كاين ليكوش خدات باكية تفكرات شكلاط مشات كتقلب عليه
فالجيهة لوخرا
كانت فدار أمين وجنات جلسات معاهم شوية جات من فرانسا ومازارتهمش وهي اصلا فراسها شي أخور
ناضت باش تمشي:عمو امين ماجبتش طموبيلتي واخة توصلني معاك
اكرام:دابة حنا غير كنهضرو عادي انا عارفة حكيتكم كنتي كتبغيها لدرجة تحديتي صاحبك على ودها ولكن فتالي داها بابي صعيبة بزاف والله خصوصا انه اول حب فحياتك
امين :احم اكرام هاد شي داز عليه أعوام
اكرام مكملة هضرتها:واخة اعوام الحب الحقيقي ماكايتنساش امم كون نت لي تزوجتيها كنتي اتكون سعيد كتر من هكا انا متأكدة خالتي جنات ضريفة تاهي وحنينة ولكن تزوجتيها غير باش تسترها
امين:بغيت نعرف شكون لي عاود ليك هدشي
اكرام:ماكايهمش .نعطيك رأيي ماما متواتية معاك نت كنتي غتهلا فيها كتر من بابا وتاهي كانت اتكون سعيدة معاك كوما دخلش بابا وفارقكم يعني حبكم فرقوه الضروف كي راكم عايشين هانيين
امين كيسوك ومرة مرة كيشوف فيها كيفاش عارفة هادشي كامل فلحضة رجع بذاكرتو لاعوام اللور كيسوق وهو كيتفكر اول مرة شاف طاهرة فيه نهار كان داخل الاوطيل وبقات كتشوف فيه وفالاجتماع فحفل خطوبة ناصر ولارا وفدار لي على لبحر فعيد ميلاد لارا داك ليلة المنحوسة لي فرقاتهم فيقو صوت اكرام لي مبتاسمة قدرات تشوش ليه افكارو:عمو امين فين سهيتي
واكرام كتشوف فيهم وهي مبتاسمة غتحقق داكشي لي فبالها .
امين شاف فطاهرة لي غير ساكتة تفكر الهضرة داكرام دغية رجع نفض افكارو هو دابة كيبغي مراتو ومات ولدو لي ولا راجل ..وصلهم لحدا الدار مع النزلة مع الوقفة دطوموبيل دناصر
اكرام:بابيي جيتي
ناصر كيشوف امين موصلهم وهي راكبة لقدام شاف فطاهرة وخنزر طاهرة بلعات ريقها
ناصر تنهد مابغاش يكبر الموضوع:ماشي مشكل دابة غير ماتعاودش
طاهرة بتاسمات وقربات لعندو:كون هاني .الزعيم باقي كيغير عليا
ناصر:الزعيم مازال كيحماق عليك بحال اول مرة شافك ماتبدل والو
بتاسمات:الله يخليك ليا
عنقاتو
اكرام:ايوا هاخنا غانشوفو هاد الحب
وطلعات لبيتها
كان راجع من الخدمة جات فبالو شحال ماشافها
جبد طليفونو صونا عليه جاوبو داك ساع:الو سي الزعيم
يوسف:فين هي شكا دير
الراجل:هاهي فسوبير مارشي
يوسف:فين جا
نعت ليه فين قلب الدورة نيشان ليه حتى وقف حدا سوبير مارشي بقة واقف شحال حتى كيشوفها خارجة وشي ساشيات فيديها بقة واقف يشوفها غا من لبعيد ويمشي يلاه ايديماري يرجع لدار وهو يشوف شي واحد وقف عليها بطوموبيل نزل عندها سلم عليها وهي كضحك معاه زاد تعصب فاش شافو خربق ليها شعرها ماحسش براسو حتى نزل لعندهم جرها من دراعها هي تخلعات جاها على غفلة الدري بغة يتدخل جمع معاه بكروشي جابو فالارض بقة شادها :المرة جاية غير شهد على روحك
عائشة عصبها:شكاا دير لاش دايني معاك ولاش جاي لعنديي نزلنييي والله تندير ليك الشووهة.نزلنييييي نزلنييي عتقووني باغي يخطفني
يوسف لعباتلو على لميموار دلفيزيبلات ديال مخوو جرها من شعرها لي طالقاه وجرها لعندها حسات بشعرها تقطاع:غتسكتي ولا قسما بالله حتى نغبر لمك الحس فمراااا
بلعات ريقها حسات بيه كيعني كلامو
رخة منها بقات ساكتة وهي كتشوفو كيديماري:دابة فين دايني
حرك بلا مايجاوبها:واش دابة فوقاش مابغيتي تجي تديني اتديني ولا شنو
يوسف ضرل يديه مع دريكسون:سكتي
سكتات حتى كتشوفو غادي فتجاه دارو:لاش غادين لدار
ماجاوبهاش حتى وقفو نزل عرفاتو غينزلها بالقوة نزلات تاهي :شوف لاكان فبالك شي حاجة غا حيدها
جرها من دراعها وهي كتنتر دخلها لدار وشد لباب مشا عمر كاس هو لول نزل عليه فدقة وقرب لعندها:شكون هداك
عائشة:شكون
رما لكاس فالارض تا تهرس:كتحيمقي عليا
عائشة كتشوف فلكاس كيف مهرس:دابة لاش هدشي هدااك راه كيقرا فالمدرسة لي كنقرا فيها عندو اخر عام فايدارة اعمال اش داك ليه تاهو بقالك فالحساب
شدها من فكها وزير:ماكاتعرفيش تسكتي ونزيدك انا راه ماكانعرف لا هدا كيقرا معاك لا هدا ماكايقراش معاك من الاحسن بعدي من طريقهم كاملين
عائشة تنترات منو ورجعات اللور:لا والله زيد زيد شي حاجة ياك ما مزوجين وانا مافخباريش ياك ما خويا ولا خويا فرضاعة ياك ما بابا لي مات الله يرحمو لا هدشي لي بقة خويا ومادارش هدشي نت لي ماكانعرفك ماكاتعرفني داير لبلبالة لي شافك يقول اتهبل عليا متشي سوقك فيا اسيدي ندير لي بغيت انا حرة ديال لراسي ماديال حد باش يتحكم فيا سمعتيني انا ديال راااااسي راااسي بوحدي
ماجات فين تكمل هضرتها حتى كتلقة راسها لاسقة مع الحيط تزدحات بالجهد تا ضرها ضهرها ويديه مور عنقها مزير عليها حسات بالنفس تقطعات فيها:عائشة كنقولك كلما تحديتيني نتي لي أتخسري راه غنمرضك فحياتك
عائشة موجعة:رخي مني
رخة منها ورجع اللور بقات كتلهت ضهرها ضرها بزاف :بغيت غير نفهم لاش هدشي كامل مزوج اش غدير بيا
بغة يجاوب وهي تنتر منو بغات تاخدولو ضغط على زر القبول وهي بالمفافية ضغطات على الهوط باغلور:غا قوليلي فين غبرتي الموصيبة الولد داير فضيحة بلبكة فيه جوع وخاص ليكووش شغا نقولك باز لكبدتك بااااز ليك اجي رضعي ولدك انااري كوغا مشيت راسييي وتهنيت تقول انا لي مو هازة همو كتر منك
الزاهية شافتها غير ساكتة ماكاتجاوبش:عائشة مالك ماكاتجاوبيش موصيبة هادي ولدك خارج عقلو بلبكة
عائشة بحاليلا تكب عليها لما بااارد حساتةبقلبها صافي وقف وغير كتحلم كتشوف فيه وفعنيه لي شوية ويخرجو شاد طليفون وكيشوف فيها وهو مصدوم وصوت لبكة ديال هارون مسموع من طليفون .عائشة بلعات ريقها ولات كلها كترجف .يوسف قطع على الزاهية وهو مازال كيشوف فيها بقات راجعة باللور وهو تابعها بلا ماينطق تاشي كلمة مصدوم صدمة عمروو
أسقطته في شباكها فعذبها حتى أذاب فؤادها الجزء السابع
محتوى القصة
يتبع...
التنقل بين الأجزاء