عمر دور تخنزيرة عند جدو كلثوم تدخلت و دارت تشوف في الحاج : تهدن الحاج (دورات عينيها للعمر) هادي زهرة اوليدي جبتها معايا من الجبل (دورات عينيها لحليمة لي كلها مغلفة و مطرطقة عينيها و جامعة يديها ) بنيتي اجي جلسي حدانا هنايا تعشاي ....حليمة معاودتش معاها الهضرة حنات راسها و دارت باش تجلس حدا خالتها ...و عينين عمر عليها و تخنزيرة مطلعها مجات فين تجلس حتى هضر قفزها
عمر : واش نتوما مرااض كتجلسو الخدامة معاكم في الطبلة فين عمركم شفتو هادشي ...حليمة جلست مخرجة عينيها و تدورهم تلعب بيهم
كلثوم تشوف في ولدها : اويلي ا عمر
الحاج يخنزر فيه : و تاااا شكون لي قالك درية خداامة دوي ؟ شكون قالها ليك ؟ واا درية رااه براجلها مجوج بيها و حنا غا مخلينها عدنا بينما روحها للدارو و راااجلها سيد رجااال قاااامة وشان هة شيخ قبيلة لي حدانا ....كلثوم و حليمة يشوفو في الحاج و مخرجين عينيهم يشوفوه اش ساير يقول ...دارت حليمة عند كلثوم تطلب تعتقتها بعينيها و كلثوم تنغز فيها
كلثون دارت يد على يد و دورات وجهو عندها بللهضرة: ايه اوليدي دريرية جايبينها امانة عندنا طلبنا سيد لي باغي ياخدها باش نخليوها معانا بينما جا ومع نفسها حارة مسيكينة مبغاتش تبرك و ناضت تعاون دريات و هاهيا معانا حتى يجي راجلها
عمر غير مطلع وحد الحاجب البلان ديال هاد الجماعة مشكوك فيه : و علاش مالنا حنا عندنا ملجأ
الحاج تقابل معاه : و تا لول مجلسك عديي
عمر جمع حجبانو و دار كيشوف في الحاج : ياك نتا الشيخ هنا في دكالة كيفاش غيكون شيخ اخر
الحاج هنا ناض يغوت : اييييه كييين اش تعرف نتااا داير فيها مطور زعمة ...عمر زاح بعينو عليه مابغيش يتشاد معاه في الهضرة يخاف يتكوانسا ليه و دار عند حليمة نيشان لي كانت مخرجة فيه عينيها ...غير شافتو يشوف في جيهتها و هي تقفز و نزلت راسها في لرض و حنات عينيها
عمر كيشوف فيها نيشان و ناري على شوفات عدو و نبرتو فحالا كينهض في بنادم : مااالهاا دايرا داكشي على وجهها (كيحقق معاهم حيت بلانها مدخلش ليه للدماغو )
عمر : اااه بقيت غير انا ادن انا لي مخاصنيش نشوف وجهها ... حليمة و تقولي نطقت حرف ياربي غير طلع عينها تشوف
كلثوم : لا وليدي ليك نتا و للخدامة لي بارا حتى راجل من غير للحاج مخاصو يشوفها....عمر كيشوف فيهم و يرجع عينو يشوف فيها : و كي غادي دير هادي تاكل
الحاج نقز علييه : وتاااا مااالك عيقتي بالسؤالات اسيدي هاد درية انا لي جيبها و معدك سوق فيها يلاه كولي ابنيتي كوليي ....هزات حليمة شوية الماكلة لي خاصة وصحية على قبلها وصا عليها طبيب من مورا العملية .......كدخلها من تحت النقاب غير طلعت عينيها بان ليها يشوف فيها و عينو تقتل و هي تنزل عينيها لرض مقدت تاكل موالو ....الحاصول عمر جامع غوباشتو دار يشوف فيهم و نزل راسو ياكل من طبسيلو ...و كلثوم و الحاج طلعو راسهم فيه ....حتى هو متسوقش كياكل و معاود شاف في حد حتى كمل و ناض فحالاتو
عمر غادي كيتمشى و يهضر : الوليدة القهوة ديالي ...و مشا لجيهة الدروج
كلثوم تحنات : تاشمن جواج ا الحاج ...حليمة تهي بنقابها تسمع و مطرطقة عينيها
الحاج : ميستهلهاش ميستهلهاش
كلثوم تدوي بشوية : وااهيا ناري شد في هاد الكلمة تانيي وااا الحاااج اتا رجوع الله درية مجوجة
الحاج : انا كاااره نجوجها و نحضرو عرسها و لباباه نخليه يدووور في الزناقييي حفيااان
كلثوم : رجوع الله الحاج و نوض استغفر الله و اجي معايا تيي ....ناضت و نوضات معاها حليمة جاراها من وراها و تطلع عينيها
كلثوم : زيدي معايا نيت باش طلعي قهوة لراجلك
حليمة وقفت دارت الفران : ءءءء؟؟ لا لااا منقدش اميي نموت فيها
كلثوم رجعت ضربتها للكتف : تيي كوني مرة و تبعي داكشي لي نقوول دوزي تدي لراجلك لقهوة
في البيت ديال عمر ....جالس في البيرو ديالو رمادي طبيعتو مخنزر عاقد دوك الحجبان و البيسي آبل قدامو و الكاسك دايرو في عنقو و خدام كيخربق فيه داكشي ديال الشيمي و الهندسة الفلاحية ... حتى سمع دقات خفاف بلاما يطلع عينو و هضر بداك الصوت عدو : دخل .....كانت ورا الباب حليمة هازة كاس ديال القهوة فوق طبسيل و ترعد بيه غير دوا من ورا الباب بغات ترميه ...و ليني تشجعت و دخلت مخرجة عينيها في البيت لي متبدل فيه والو و القهوة في يدها تقرقب بيها دورات راسها و بان ليها حاني ...و بدات تمزكو بصوت ترعيدة ديالها و تقرب منو و نفس طلعها و تنزلها درية غتموت مافيهاش حتى وصلات عدو هو يطلع فيها راسو ....لقاها المرأة الملثمة نيت هي نزلت عينيها و حطات القهوة دغيا و دارت غادا كتمشى للباب ....عمر ديك تخنزيرة ميحيدهاش شاف فيها و نزل للقهوتو هزها بيدو
حليمة يلاه كانت غتخرج حتى سمعاتو من وراها عيط عليها او بالاحرى غوت عليها
عمر ناض من بلاصتو : شنووو هاد الزمر اجيي لهناا نتيا ....وقفت مسمرة بلاصتها و وقلبها غيوقف ليها و مجبدة عينيها و دارت عندو : م م معايا انا
عمر ناض و جاي لعدها : لاا مع مخيي مال ديك القهوة هاكاك
حليمة غير واقفة و دور في عينيها معرفت متقول و بصوت خرج بشوية : م م مالها ؟
عمر قدامها و نزل راسو عندها : شنوو ؟؟ ...مقدات تقول والو ولا تدعي غير كلثوم تجي تعتقها
عمر محمر فيها : شنووو قلتييي (بقات تشوف فيه و علاين تبكي و تمتم عليه ) حيدي عليا هاد الزمر و دويي ...و طلع يدو و نصل ليها النقاب و كملات قدامو الصورة اش غنقوليكم درية آية من الجمال مخرجة عينيها فيه و فمها يترعد و غزالة تحمق ...هو كيشوف فيها و باقي غير مخنزر هي زوينة ااه متافقين و ليني هو حاس براسو في السموات السبع ...هو يدور كيغوت و عروقو خارجيين حل داك الباب : الولييدة الولييدة ... حليمة قدامو متابتاش ترعد و تقول مشينا فيها و تعض في فمها ...حتى دخلات كلثوم و هي تخرج عينيها لقاتو محيد ليها نقاب و هي تشوف فيها بعينيها و دارت تشوف في ولدها : ه ها هانا نشرح ليك اولييديي غير متعصبش
عمر : اش غتشرحي ليا مسيفطة لياا هادي جيبة ليا القهوة مسوسة ...خرجو فيه عينيهم بجوجات
كلثوم : و واش على لل قهوة الق قهوة (عمر كيشوف فيها مستغرب وهي دور عند حليمة لي مصدومة ) خ خ خرجي نتيي غتكون اويليدي غير وحدة من دريات غلطت ليك في القهوة بينك و بين الحاج سير رجع اوليدي لخدمتك انا نسيفطها ليك ....هو مصعصع ببادرو عينو حولها للحليمة و رجعها للكلثوم و دار لبيروه ....و كلثوم دارت جرت معاها حليمة و سدو الباب من وراهم ...و غادين و يهضرو ويدويو
حليمة فرحانة : ياااه امي كلثوم معرفنييش
كلثوم : اويليي بصح نيت دري معرفك اويلي سحبناه غيعرفك زيدي زيدي نقولوها الحاج ....مشاو هي وياها دغيا دغيا عند الحاج لتحت لي جالس و يشرب اتاي و يسمع الشربة حتى خلطو عليه كلثوم و حليمة
كلثوم : وااا الحاج و عمر معرفش درية حيد ليها للنقاب و معرفهاش
الحاج صلق فمو باتاي يحسابلكم تسوق دار عدهم و خنزر : وتااا معرفهاااش وو؟
حليمة تضحك : لاا معرفنييش ا با الحاج
كلثوم : و حنا مغطيين دريا على والو الحاج
الحاج : تااا هاويه تااا معرفش العلم و الحمار بووه لاش خاسر عليه فلووسي نقرييه باش ميعرفهاش ميعرفش العلم كاان عليااا نخرجوو طبيييب شو تازي تبارك الله نوريها ليه يعرفها (و طلع عينو في كلثوم ) هاهو فحالو فحالي هانا ماقريش و معرفتهاش لاش خاااسر عليه فلوسي هاوي هاوييي ضيعت فلوس فيه هو مسخوط الوليدين فالصو فالصوو
حليمة جامعة يديها عندها : دابا نحيد اللثام و لا نخليه
كلثوم تشوف فيها : لا غحيديه منين ماعرفكش لاش نديروه ....الحاج باقي غير يهونيي تما جالس و يتحصر على قراية حفيدو لي ملقات نفع حيت معرفهاش
ياو صباح الصباح و نهار جديد على دكالة و الحصادات و الزروعات غير مشتة في هاد الارض السعيدة ...القصر تهو طلعت عليه الشمش ...و الشهيوات بداو يتحطو في طابلة سيد الحاج المسمن و البغرير و غريبة و الفقاص و برارد اتاي و القهوة و عواصر ديال ليمون ....فايق الحاج على نبوري جالس و واقفة عليه كلثوم دايرا يدها على جنابها تشربو في الدوا لقاتو هادي شهر مشاربوش ناسيه
كلثوم : و دابا الحاج كون مرضتي ياك قلت ليك شرب دواك فاش نكون غايبة
الحاج : هاهو شربتو ولد لحرام حار ماشي فحال دوا ديال الكحبة بنين و زين و حلو لاش ميديروش داك الحلو لمرضي يانا و هاد الحار لي مراض بالكحبة
كلثوم : الحاج شرب الما ...الحاج كان غيشرب الما هو يقشع حفيدو جاي يتبودر عليه و كيتمختر في المشية حيد الجغمة من فمو و تبعو بعينو تاجلس : اوديي ا القرايا ووو؟ و بزق فمو
عمر اصلا كينوض خاسر من نعاس طلع فيه عينو نيشان فيه : مااالك عوتانيي الحاج اش واقع ...كلثوم غير تخرج في عينيها
الحاج يشوف فيه و ينفر : خاسر فلووسي ...و نزل راسو يكمل شريب الما ...وعمر يشوف فيه طالع ليه الزعف حول عينو للمو لي ساريا تغمز فيه ....عاد خرجات لالة حليمة مولات الدار ...طالقة السوالف مكريبيي و لابسة كسوة بالصفر مبينة ليها لحمها البيض الزين ودايرة سنسلة ديل دهب في عنقها و المكياج ...و مع لاطاي كلشي عندها سانك سانك جايا و كتبسم طلقت صويتها حنين و ثقيل: صباح الخير ...كلثوم الحاج طلعو فيها رساهم ردو عليها و تبسمو ليها ...و عمر طلع غير راسو جنب مع الشربة ديال القهوة تفيكسات عينو عليها و تبعها كيشوف فيها حتى جلسات قدامو و هي ترفع فيه الشوف و تعود تنزلها تخافو لا يولي يعرفها
عمر حط القهوة في الطبلة كيشوف فيها : مابقيتيش دابا كتحشمي ا لالة زهرة ولا شنو فين هو نيقاب ...حليمة هزات فيه عينيها حيت استهدفها بلعلالي
عمر طلع غير عينو في مو مجوبهاش مي هادشي مدخلش ليه للدماغ اما الحاج غا منيش عليه غير يهضر ينقز عليه تقول حالفها فيه
عمر كيحرك في القهوة : امتا غيجي هاد راجلها يديها من هنا
حليمة ولات كيف الفرخة دور غير راسها سيد باغي يجري عليها
كلثوم جبدات فيه عينيها : أويليي ا عمر حشومة
الحاج ناض تقاد في الجلسة : واش الدار ديالك ولا ساير تصرف علينا و تقلت عليك ( تكا عمر على للكرسي يشرب في القهوة و يتفرج في الحاج ) راه نتااا متقل عليناا لا مفخباركش شوف ااه مابقيش تجبد الدرية و لا تحاديها
عمر حط القهوة و ناض شبك يدو : دابا من لخر متقولش ليا جايبها عوتاني باش تزوجني بيها ...حليمة و كلثوم طرطقو عينيهم في عمر و كيتفرجو ...و الحاج يجاوبو : هاها هاها كتحلم اوليدي غير ساهلا ليك تاتجوجها نتااا هادي يستاهلها سييد رجااال لي يعرف ليها بزاااف عليك ختى توصل ليها عاد تزوجها
عمر : غير لا كان في راسك هاد البلان غير نساه و رجعها منين جات ...ودار شاف فيها و ناض فحالو قالب وجههو ....خلا الحاج غيفيض و كلثوم مخرجة عينيها ...و حليمة نزلت راسها و شداتها البكية حتى فرحت بزينها و قاليها هاد الهضرة
كلثوم : اويلي تاني مبغاهاش هادا ديرين ليه شي حاجة مافيهاش على مرتو
الحاج : ياو والله لا خليتها في الحمار بوه نجيب ليها سيد سيدو يديها و نخليه يسعاها و بشلاغميي باش يحلفو رجال حتى نوريه على هاد ضسارة لي هو فيها
كلثوم شدات على فمها وتشوف في الحاج...و حليمة جالسة حداها مهبطة راسها ومزيرة على يديها والبكية غتخرج ليها زهرها هادا متعطيهش لعدوك هاراجلها رافضها و هي مبغاش وحد خر باغاه هو ....هو خرج ركب في طموبيلتو الكحلة و زاد مع الطريق للخدمتو
في المكتب الفلاحي ...لتحت في المختبر مجموعين تما لمهنديسين و لي سطاجير لابسين طابلياتهم بيضيين ...كيتمشاو كيخدمو على لرض شنو صالح يتزرع فيها و شنو ماصالحش ولا قادة تولد و لا والو ....كانت تما واحد سطاجيرة بكوصة فاسية زعرة اوريجينال و عامرة شوية يلاه جديدة من هادي شهر و بيضة كتسايب تفاعلات الكميائية تدوي مع صحبتها : والله يا الحبيبة يا نسرين حتى المرة لي فاتت درت خطأ قدو قداش و شافو شاف ديكيب و ماقالي والو
نسرين كتبسم : ياكما كيعجبك مسيو اليعقوبي ا سلوى
سلوى: هه وا صراحة راه انا لي عجبتو كندير الخطأ تنعيا و مكيهضرش معايا و ديك المرة سمير دار خطأ غير صغير و بقا كيهضر معاه قاصح
نسرين : هه ايوا منعرف اختي يمكن حيت سطاجير
سلوى : نونو هانتي تشوفي بعينك هانا غادي نوقف تفاعل دابا و تشوفي على عينيك
في القصر ديال الشيخ ... جالسة لالة كلثوم مع حليمة في الصالة و يهضرو
كلثوم مخنزرة و تفكر : لاا والله دري تسطا
حليمة تنهدت تقولي هازا جمل و عينيها في لرض (هاد النوع اهم حاجة عدها هي راجلها كيكونو مبرمجينها على هاد الاساس ) : واش غنديير دابا اخالتي
كلثوم : انا غاديي نفكر لييه دابا نوضي يوسف مول سيبير علاين يجي يدخلك داك الخضر (الواتساب ) منعرف اش سماه الله و يوريك كيف تشعلي كينيسيو و يدخليك لاغاني ....حليمة عاد فرحت : بصح ؟! واخا كنت ناوية نعاود نسايب الحلوة لسي عمر
كلثوم : الااا نساي طياب دابا سيري تشوفي يوسف لي يدخلك لاغاني راه عيطت عليه
حليمة : اييه كنعرفو
في المختبر ديال الفلاحة ... عمر لابس طابلية و خاشي يدو في جيابو و قدامو ديك الفاسية قصيرة و تدوي ليه و تجبد فيه شفارها الطوال
عمر بنبرة كينهض فيها و كيشوف في تفاعل مكاملش : و في كان عقلك ؟(هي تصدمت وهو محمر فيها عينو ) هادشييي خاصو تركيييز ا لالة مغنبقاوش نضيعو في لي شونتيوو دوزناه ليك المرة لولة حيت سطاجيير شكون علمك نتيي ء؟ (درية ولات كلها حمرة و نزلت راسها متقدش تجاوب في الاخير هي غير سطاجير طلع راسو ) شكوون لي مكلف بهادشي
سمير : انور و لكن ليوما ماجاش داير شهادة طبية
عمر عاقدهم عليه : فاش يجي قول ليه يعاود لهادي الفورماسيو باقا ماشي ديال البراتيك ...و دار خلاها تما تضرب عينيها من لتحت تي راه هاد عمر مايقد عليه غير لي خلقو ... الحاصول الحاج عاااندو الحق طبع حفيدو ماشي غير صعيب زايد الكرادات ....مشا طلع البيرو ديالو يكمل خدمتو من بعدها يمشي للدار يتغدا تماا
ياو جا ظهر بشميشتو الحارة ...و على برا القصر في دوك الجرادي مفرشة جليسة مغربية بالمخاد و قدامهم طبلة دايرة ...و جالسة حليمة و جالس حداها دري يكون في ديك 18 عام شاد ليها تليفون
يوسف هاز تليفون و يشوف فيه : و تييي هي حلييمة وو؟
حليمة : واااه هي انااا
يوسف : واش بنت السبيطي
حليمة : و صافي ا يوسف دابا دخل ليا الخضرة و زرقة كيف قالت ليك خالتي و الاغاني بغيت العيطة و ستاتي
يوسف غير حال فيها فمو : وااا الفلووس ديييرها واللهتا دييرها واش تي بصح هي حليمة
حليمة عصبها خنزرت فيه وكتهضر بتقالة :وا صافي ايوسف غتبقا غا تسول فيا راه قلت ليك اااااه
يوسف تنهد و رجع راسو للتليفون : شنو بغيتي الواتساب و الفايسبوك وليني الفايسبوك معدك ماديري بيه
حليمة تشوف في تيليفون : يعطيني العما لا فهمت حاجة من هادشي لي قلتيي بغيت غير الخضر و زرق و لا كان شي لوين اخر زيدو
يوسف ضحك : ههه كتخيري في تواب ...هما يسمعو صوت طموبيل واهيا ناري مجهد موطورها مزعزع لرض طلعو راسهم بجوج ...عاد داخلة طموبيل سي عمر كلها كحلة و جاج فيمي كيشوفو غير وجههم
يوسف : حفيد الشيخ جاا ...حليمة جمعت يديها و جبدت عينيها كتشوف فيه وقليبها بدا تاني يشطح ركادة...و عمر داخل بنضاضر كحلين ضايرين و عينو عليهم جالسين و هي تشدو فحال الدهشيرة كيشوف في حليمة جالسة بكسوتها الصفرة وكتبان زينة بلحمها بيض باين و معرية شعر و جالس حداها برهوش على حساب العلم ديالو هي كتحشم من الرجال شواقع دابا
بلاصة الطموبيل لي طلعو بيبنها للسما و نزل لابس سبرديلا بيضة طالعة و لباس رياضي و دور راسو ليهم نيشان
حليمة نزلت راسها و بان فيها توتر و تدوي من لتحت مع يوسف : م م متقولش ليا حليمة قدامو ....يوسف حال فمو في الحديدة مهواش معاها ....و عمر جاي كيتعنكر و كيتمشى بشوية عليه غادي للعندهم
يوسف شافو و جمع الوقفة كيضحك : سلام ا حفيد الشيخ ....حليمة طلعت فيه عينها و ناضت تهيا وقفت مجموعة
عمر شاك في بلانها : هادا هو راجلك ؟
حليمة طلعت فيه عينها : ءءءءء؟ لا لاا ماشي هو هادا يوسف مول سبسي و الله ماعقلت على سمية .... دارت عند يوسف لي مفهم حتى وزاا خاصة منين سول عمر هاد السؤال
عمر هنا زاد شك فيها و هز حاجبو : خووك؟ (حليمة كتشوف فيه و دير ليه براسها لا ) خالك ؟ عمك ؟
حليمة : لا لاا م م مكيجينش ع عيطات عليه غير مي ءءء خالتي كلثوم باش يدخل ليا غنية ...هو يزيد خطوة عندها حتى وقف على الحد ديالها و كيشوف فيها و هي قدامو ولا قلبها يضرب و مقدتش تزيد و لا ترجع بللور ...و يوسف غير يتفرج
عمر صغر عينو فيها بشك :شفتك مبقيتيش كتحشمي من الرجال ؟ و كديري ل لثام
حليمة جبدات ح حجبانها : خ خالتي ك كلثوم لي قالت ليا حيديه ....عمر دار نص دورة عند هاداك لي كيتفرج و غلض صوتو عليه : غتبقااا هناا ؟
يوسف : ءءءء؟ لااا ...حط الايفون فوق الطبلة و دار يمشي فحالو و حليمة قدام عمر باقا ليها غير تندب و تدور في عينيها شي حد يعتقها حتى رجع عينو ليها عاد تما برد ليها الما في ركابي غير تشوف فيه بدوك العوينات عدها
عمر : بلانك نتي مداخلش ليااا المخيي
حليمة تدور في عينيها : إ ينا ب بلان
عمر : بلاما تبقاي تمتمي عليا تما منين جيتيي
حليمة سرطت الريق و تشوف غير الريح لا حنين لا كريم غير الخدامة : ر راه قالت ليك خالتي ك ك كنت في الجبل
عمر : اينا جبل ؟
حليمة : ج جبل
عمر : ديال عرفة ولا شنو؟ تيييي دوييي لا بغا دويي ...قفزها و كتشوف فيه : ج ج جبل لي فيه قرية عويفية....قالت ليه لي وصاوها تقولو هو استغرب و كمش وجهو : فين جااا ؟ حدا اينا مدينة ...هنا حصلت مقالوش ليها بدات تطلع في نفس و تنزلها و تخرج في عينها : ءءء؟ مدينة ؟ (هو واقف مقرب ليها معدها كي دير تهرب و هي تدوي بشوية ) ع ع علاش هاد سوالات ؟
عمر عطاها ودنو باش يتأكد من لي سمعو : شنووو ؟
حليمة : م معرفتش س سير سول خالتي هي تقوليك انا نعرف غير جبل عويفية لي كنت فيه
عمر رجع عينو ليها : و داك راجلك ؟ علاش حاطك هنا ؟ و زايداها مجمعة ليا هنا مع البراهش
حليمة : ب بغيتو غير يدخل ليا غنية و راه في خبار خالتي و الله
عمر قرب ليها وجهو : ديري في بالك حاجة وحدة هاد الهدرة لي قلتي مادخلات ليا لا من هنا لا من هنا ....حليمة تشوف فيه و دير ليه براسها اااه..
عمر ميل راسو و عينو محمرة فيها : يلاه غبريي من قدامي ... حليمة طرطقت فيه عينيها و نزلت دغيا هزات تليفون و دارت تمشى بزربة مدارتش من وراها مكرهاتش تجري ...عمر دور راسو كيفكر و جامع حجبانو هادشي مابانش ليه فيه شي حاجة مراكباش في بلاصتها هنايا
حليمة غير دخلت للقصر مشات تجريي للبيت كلثوم على الله تلقاها تما دخلات عندها كتلهث و ترعد ....كانت كلثوم جالسة تقاد في الدبالج ديال الدهب في يديها
كلثوم دورات راسها تشوف فيها : تي مالكي واقفة لهيه
حليمة كتمشى عندها و ترعد : ناري ناارييي اميي شدنيي عمر برا كنت مع يوسف و بقا عليا بسوالات منين نتي و اينا مدينة تخلعت بزاف و قاليا هادشي ما دخلش ليه راسو
كلثوم طارت عليها : عداك يكون عرفك هانارييي تي اش قلتي ليه ؟ راه لا عرفك غينوض يهز علينا عصا كاملين
حليمة : لا لا مقالت ليه واااالووو امي قلت ليه داكشي لي قلتي ليا فاش قاليا حدا اينا مدينة قلت ليه سير سول خالتي عليك نتي و بلي انا معارفاش و خرجت من باب واسع و راه جراا على يوسف
كلثوم : أمممم شت الدري ولا يحقق معانا شوفيي المرة الجاية يسولك قولي ليه ماشي سوقك و لا شكون نتا لي تسولني
حليمة تشوف فيها : لا منقدش ا خالتيي غادي يتقلق
كلثوم : فحالا شتيه دابا غير فرحان راه ديما مغوبش المرة جايا قولي ليه لاا منقولش ليك ماشي سوقو فيك تعلمي تقولي ليه لا الرجال ميبغيوش لي تمشي معاهم في الخط كيبغيو ديما يمشيو مع العكس بالاخص ولدي انا واحد المعكس منو مكان دابا لا تلقا ليك شنو تقولي ليه
حليمة تشوف فيها : نقولو لا اش دخلك ياكي ؟
كلثوم : يلاه دابا زيدي قدامي تا لعشية و سيري عند يوسف لداك ليكترونيك لي عدو
حليمة ضحكت : كيقولو ليه السبسي امي
كلثوم : هههه كبرنا و وليتو تصحو لينا يلاه زيدي ... خرجو من البيت كلثوم سيفطت حليمة عند دريات في الكوزينة تقوليهم يسربيو يديهم في خدمة راه سي عمر جا و كلثوم هزات جلايلها و طلعات عند عمر للبيتو ....دخلت حليمة على دريات في الكوزينة : فين وصلتو ادريات ....دارو يشوفو فيها و يطلعو و ينزلو و يتغامزو بيناتهم زعمة هادي مالها و هي تطنق وحدة فيهم بالنفخة و تقلب عينيها : كلشي واجد و كنتستاو غير لالة كلثوم تعطينا لإدن باش نحطو فوق المايدة
حليمة : ااه صافي حطوهم راه هيا لي سيفطاتني انا نعاونكم في الهزان ... و دارت تشوف الطباسل ...و هما غير يجبدو في عينيهم و يطلعو فيها و ينزلو و فوق من راسها يهضرو بالاشارة
كلثوم طلعت عند عمر ...دخلت عليه هو كيبدل تي شورت ديالو طلع فيها غير عينو و دار تبسيمة على فمو : الوليدة
كلثوم سدات الباب و تمشى عندو داير يد فوق يد : اويلي ا عمر تا مالك جيتي للدرية نيشان تسول فيها تا اش بينك و بينها حتى تسول فيها
عمر كيشوف فيها و كيلبس تيشورت على دوك العضلات عندو : الستون ديالها مدخلش ليا لدماغي
كلثوم : بعد من درية غدا ولا بت الغد يجي سيد لي خاطبها يديها فحالاتها
عمر مطلع غوباشتو:بلاما تحمقوني دابا واش مخطوبة ولا مزوجة
كلثوم ولات دور في عينيها:ءءء مهم ا وليدي هو دوا فيها مع ناس لي مربينها ولايني مزال مدربوش لكاغط كنقولو ليها راجلها غير باش نولفوها
عمر لبس عليه و كيشوف و مخنزر فيها : أش غتولفوها وهي جالسة مع راجل برا
كلثوم : هاداك يوسف انا لي قلت ليها تجلس معاه
عمر : يوسف من الصحابة المبشرين بالجنة يمكن ؟
كلثوم : وصافي من هضوراتك بعد من درية و يلاه نزل تتغدا الحاج راه مكينش ليوما عدو شي خدمة هوك في زمامرة ...عمر حرك غير راسو اما ماشي سوقو في هادشي كولو و خرجو نزلو للتحت كانت تما واقفة حليمة توجد مع دريات الطبلة
كلثوم هزات حجبانها و دور في عينيها : تبارك الله زهرة زينة
عمر نازل و كيشوف في التليفون ديالو غير عاقدهم ماجوبها لا بيه لا بلا
كلثوم : راني كندوي معاك ا عمر و نتا مامديهاش فيااا وو؟
عمر طلع راسو : كين شي مشكل عندنا في لابوراطوار خاصني نمشي دابا ...و دار تليفون في جيبو و خرج فحالو ...كلثوم تشوف فيه مافيه فايدة مامعاه حيلة ....مشات عند الهبلة ديال حليمة لي باركا تقاد في الطبلة حتى جرتها من دراعها بعدتها على دريات : بلاما تبقاي تنقزي و تسابقي مع دريات على الشقا
حليمة تخرج فيها عينيها : ولاا باش يسربيو راه سي عمر عندو خدمة
كلثوم : بلاما تسنايه راه مشا عندو خدمة في لابطوار
حليمة : خدمتو ؟
كلثوم : ايه دابا تعالي نجلسو في الطبلة و لا لقيتك تسابقي مع البنات دبري راه غنضربك
حليمة كتمشا معاها للطبلة : لا صافي كنت بغيت نقوليك امي كلثوم توحشت ميي و با و خواتاتي
كلثوم جلست فوق الطبلة : اممممم واخا منقدش نعيط عليهم هنا لا يعود يشوفهم عمر تديري و سيري عدهم دابا تغداي و تكاي ليك باش تهبطي عند يوسف يكمل ليك داكشي ديال البرطابلات .....هي هاديك جلسو بجوجات تما و قدامهم طاجين مضخم ديال اللحم و البرقوق هزو يديهم عامرين دبالج ياكلو و يتعاودو دور دور و تقريي فيها
حليمة : دابا امتا غنقولو ليه انا حليمة
كلثوم تاكل : تي بغاك تا زهرة عاد نقولو ليه بدلناك بلاااتي بشوية تنشوفو بلانات الحاج فين غيخرجو ....صافي كملو ماكلتهم تهزت الماكلة و تحط اتاي منعنع شربوه و جغموه و ناضو للصالة يتفرجو في مسلسل مصري متبعينو تاوصلت و قيتة ديال العاصر
كلثوم : نوضي سيري عند يوسف و رجعي داغي راه لبغيتي طموبيل قوليها للمسعود
كلثوم : وعداك يدسر عليك شي حد حدك غوتي راه كاع رجال لحاج مشتيين تما
حليمة تضحك : ههه لا ميدوي معايا حد
كلثوم : يلاه نوضي سيري
ناضت حليمة تطير مع الضعف ولات خفيفة ...مشات لبيتها لبست جلابة عصرية ديال مليفة نص كم و الشعر مطلوق و نضاضر فوق الراس كيف علمتها لالة كلثوم و لبست سباط كومبونسي هزات تليفونها في ساكها ...و خرجت من البيت تمشى و تعيويج و جلابة تمشي و تجي دازت عند لالة كلثوم باست ليها يديها و زادت طرقت طريق ...خرجت من القصر تمشى غادة فتح ليها العساس الباب ديال برا و عاد خرجت من باب القصر ...طلعت النفس و نزلتها و هي تشوف في الدنيا زاهرة قدامها شحال توحشت تتمشا ...هي هاديك بقات غادا و تعفط و تدور راسها تشوف لراضي و الخيورات و الناس باقا خدامة في لرض ...كتمشى و شي جوج دريات كيتمشاو في الحاشية ديال الطريق هما يشوفوها جايا تشالي
البنت 1 : تي هادي شكون
البنت 2 : والله معرفت ؟
البنت 1 : تكون شي بنت المدينة نزلت للدوار
البنت 2 : شوو كي كتعوج يخ منعرف لاش محملتهاش
حليمة كانت تمشى دورات فيهم راسها و شافتهم كتعرفهم ساكنين غير في الخرجة ديال دواور : سلاام البنات كي ديرين لاباس ...خرجو فيها عينيها و دارو ليها ضحكة صفرة ضحكت معاهم و دارت كتمشى ...هما يوقفو البنات من وراها
البنت 1 : واش كتعرفنا ؟
البنت 2 : غير شافتنا نشوفو فيها بغات دير فيها الصواب فين غتعرفنا هادي ....دازت عليهم حليمة تمشا و بدا السباط يضبرها مع الحفاري ولات غادا و تلوي في رجليها مع الحجر وقربت تدخل للدخلة ددوار ....هو يقشعها واحد من لفلاحة داير طربوش ديال القصب فوق راسو و كان يضرب في العتلة و غير طلع عينو ضرباتو على الشعا ....ياو حضاها تادازت عليها هوكا تمشا و غلبها السباط ديالها و معدبة معاه و تنزل راسها تشوف ...داك الفلاح دغيا دغيا طار للساقية غسل وجهو و يدو و تبعها مكينش مقدمات زعمة في دقيقتو لولة كان وراها يدوي : هاي هاي على زيين عدنا في الدوار اش كيدير هاد زين هنا
حليمة قلبها وقف و مجبدة عينيها كتدور فيه غير عينيها و تخلعت : اويليي رجوع الله اولد القاسمية سير فحااالك
ولد القاسمية ولا يتسابق معاها و خاشي فيها وجهو يفرنس : واي واي و تعرفي ميي غوتي عليا غير الهاشمي
حليمة تبعد عليه و تزرب في الطريق و ريحة العرق منو تفوح : سييير بعد منيي راني مجوجة
الهاشمي : ههه هاد زين كامل و يخليه راجلو يخرج وحدو كديديبة و ليني قرطاسة تي شوفي و الله ناويي الحلال
حليمة باقا غير على حالها و دور عينيها يمين و شمال لا يعود يشوفها شي حد : هاويليي كون تحشم و لا والله حتى نغوت ولا نتبرا من مي القاسمية
الهاشمي : انا نديك عدها و دابا غاوقفي نهضرو ...و حط يدو على دراعها هربتها منو و ليني شدها
حليمة تعنتت معاه و هو موقفها قدامو : ويليي طلق منيييي ولا والله حتى نغوت
الهاشمي : و تيي وقفي غير ندويو ...سمعو صوت الحديد جاي و دورو راسهم بجوج من تما كين غير واحد لي كيدوز من هاد الطريق و الحديدة ديالو واعرة ...حليمة شافت الحديدة و جبدت عينيها و قلبها يضرب و دارت تحيد يدها من الهاشمي لي كان تهو يشوف في الحديدة و دار عدها
حليمة : حيد حيد يدك منيي
الهاشمي دار عدها : و غير وقفي نهضرو ....وقفت ديك الطموبيل ...و عمر شاد من الكيدون و عينو عليهم جمع حجبانو وهو كيشوف لالة مولاتي الضيفة واقفة مع واحد عوتاني طلع بيبان الطموبيل و خرج من تما كيتبودر كيشوف فيهم و عينو مصغرها تحت من النظاضر ديال الشمش ...حليمة طلقت من الهاشمي و جات تجري عد عمر و و قلبها يضرب و وقفت قدامو ترعد و تطلع فيه عينها : ك ك كان ي يتبسل عليا ... و وقفت حدا دراعو عمر شاف فيها و طلع فيه القنت ديال عينو لقا لهااشمي باقي واقف يشوف
عمر : ماغتغبرش من قدامي
الهاشمي : علاش ا حفيد الشيخ انا شنو درت راه بغيت غير نتعرف على درية (كلشي عارف بلي عمر مجوج بحليمة )
حليمة تشوف في عمر و تقرب لعندو و مدورش تشوف في الهاشمي : لا لا اسي عمر هو من الصباح هو تابعني
عمر مدواش معاها غير زاد في الفوليم ديال الصوت وقندش : قلت ليييك غببر من قداااامييي مغنعاودش الهضرة ....الحمار و مولاه مع حفيد الشيخ مغيردش عليه واخا بقات فيه درية قرطاسة دار فحالو مشا ...و حليمة تسرط في ريقها و تشوف في الهاشمي هو يدور ليها : ساليتييي من تسلكيييط الالة (حليمة دارت طلعت فيه راسها و شهقت ) ماشي يحسابليك جيتي هنا غادي تسلكطي مع لي سوى و لي ميسواش عارفي مزيان فين حاطة رجلك محدك في القصر حضيي راسك اش كدييريي ماشي فينما كان شي راجل تمشي معاها ديك تابعنييي مكدوزش عليا انااا و نتي خارجة كتعوجي ....حليمة غير تشوف فيه و تشهق من هادشي لي ساري يقول ليها و مطرطقة فيه عينيها ماشي هوكا كانت الخطة : س س سي ع عمر ب بلاتي نش شرح ليك
عمر : معندك ماتشرحي لمي انا شرحي لداك الراجل لي باغي يتزوج بيك و مخليك دايعة (هو يهز عليها صبعو و هي ولات تفيفري قدامو و طلعات معاها السخونية) ديري في مخك حاجة وحدة غنلقا موك مع شي حد مغاديش نعقل عليك حتى تخرجي من عند الحاج و ديري لي بغيتي ماشي حنا لي غتشمتنا برهوشة ....حليمة بدات تشدها البكية قدامو : انا والله ما درت شي حاااجة هيء هيء راه هو لي تابعني هيء
عمر : زعمة غتأثري فيا دوز طلعي الهضرة ماشي هنا و ماشي معاك
حليمة زيرت على راسها و الدموع ف في عينيها : م م مغاديش ن نمشي نرجع د دابا قالت ليا خالتي سيري عند يوسف يكمليا تدخال في التليفون
عمر حيد نضاضر : و عند موك الوجه تقوليها ليااا دابا غدوزيي قدامييي و غنتفاهمو لهيه ....خسر معاها الهضرة شدات من فمها و عينيها باكيين
حليمة : ل ل لااا م مغاديش ن نمشي قالت ليا خالتي سيري عند يوسف ...هي غير شادة العكس كيف قالت ليها لالة كلثوم هو بدات تعصب فيه و طلع ليه الدم هو يشد مها من دراعها حتى نقزت عندو و بدات تلوى حيت قصحها و جرها عندو : ادن بلاما تحلمي ترجعي لليوم للقصر ... و طلقها مخليها مخرجة عينيها كتشوف فيه وهو دار فحالو للطموبيل نزل للبيبان و وزاد مخلي العجاج عليها ....و هي بدات تندب في حناكهاااا : اويليييي هاويلييي لا منرجعش ... رجعت فحالاتها دغيا بجرية و مشية بداك الطالون عندها راجعة القصرة و لرض ديها و تجيبها و غير شادة البكية و دموع نازلين
دخل عمر بالطموبيل للقصر و دخل مكشكش على كلثوم كيغوت : الوليييداااا (غير سمعاتو غوت خرجات تجري من الصالة مخلوعة و تسول مالو ) آاااخر مرة هادييييك زهرة و لل منعرف دخل للهناا
كلثوم : و تي سيري دخليي انا غادا ندوي معاه و نسيفط مسعود يجيب يوسف يقاد ليك داكشي في الصالة
حليمة خرجات فيها عينيها : لا لا مبغيت لا يوسف لا والو لا تليفون
كلثوم حمرت فيها عينيها : اتييي سكتييي خاصك تبانييي مثقفة هازا تليفون حدا راجلك سيري لبيتك خاليني نطلع لهاداك لي منعرف اش جابو دابا ....حركت ليها راسها بإيه ...و دازت تحركات غادا و تضرب في فخاضها و تويل تخاف راجلها يتقلق عليها الحاصول ناس الزمان يوصوي على طاعة الزوج كيف قال لينا نبي رسول الله و والبنيات هاكا المغميضات كيكونو ترابي واليديهم يخافو لا رجالتهم يتقلقو عليهم ....كلثوم طالعة عند ولدها و تويل غادي تقوليه كلمة غادي يشعل كيفو كيف جدو و باه الله يرحمو معكسين مايقبلو هضرة حتى دخلات عندو كان يلاه طفا تليفون
كلثوم : عمر تا ملك مع درية راه غير تبسل عليها سيد
عمر طلع فيها شي تخنزيرات ياربي السلامة : جاااتك عادييي الوليدة
كلثوم تسايس معاه : وااا سمعني اولدي انا لي سيفطتها عند يوسف
عمر نزل حجباو و خفض من صوتو و هو كيقرب منها : شفت هاد يوسف مهم عندكم
كلثوم : وااا يعلم درية كي دير لتليفون تعلمها تاااا
عمر : مسالييي ليهاا انا دابا من لخر دخلتيها ياكي
كلثوم : وااا درية مدارت والو هي عاطية لعين هاكا زين و تشقشق بالبيوضة و راه يسمعك الحاج حلفتي عليها ما دخل راه طيح روح
عمر غير مقندش : اش غيدير ليا كااع هو نيت غيجريي على مها لا لقاها تدور مع رجال
كلثوم تخرج فيه عينيها فيه : هاااويلي درية مدارت والو ساير تحط عليها في الباطل رجوع الله و استغفر الله العظيم ....هز فيها غير حاجبو بلاما يجاوب و زفر و دار فحالو كلثوم تجبد في عينيها فحالا اقتانع و دارت خرجت من البيت و نزلت لتحت هزات تليفونها كبير ديال البصمة و دوزات للتليفون لمسعود لي برا قالتها ليه يمشي يجيب يوسف
دخلت عند حليمة لقاتها تمسح دموعها مخلطين بالكحل في حناكها و تشوف في المرايا
كلثوم : انوضي شوفي حالتك كي ولات و ديري نفس و دافعي على راستك قولي ليه لااا انا ماشي ديال هادشي انا مكنخونش راجلي انا نبغي راجليي هكا و خرجي عينيك
حليمة تشوف فيها :منقدش نطلع فيه حتى عيني
كلثوم دارت يد على يد : و تقدي غاتبكي نوضي تكادي و صيبي و جبدي فيه هاكا عينيك باش يشوف الشفار و قولي ليه لااا باش يشوف القنانف راه رجال ميبغوش المرة الحانية الراس يركبو عليها يبغيو يشد معاهم قطع .....حليمة تشوف فيها و تلعب بيديها موحالش تقد دير هادشي
و كلثوم تشالي بيديها : نوضي دابا بدلي عليك و تقادي و تفتحي كي الوردة باش تباني قدامو و راه سيفطت ليوسف يجي لهنا
حليمة خرجت عينيها : و لا تقلق
كلثوم : علاه فين عمرو كان ضاحك و زيدون نتي مديريش شي حاجة خيبة و دري غيجي غير يوريك كي تسيبي البورطابل
بقات تشوف فيها تا سلات كلثوم و تحلفت عليها تنوض تلبس ...شوية ناضت دغيا تلبس و غسلات وجهها و قدات المكياج ديالها و عاد خرجت مشات ديريكت للصالة و عينيها لفوق يشوفو لا يكون هابط و لا شي حاجة دخلت للصالة متيسعة مغربية اصيلة تحلفي عليها غير ديال فاسة جالس تما يوسف يشرب في اتاي و كلثوم جالسة حداه جات حليمة جلست و عطاو تليفون ليوسف يدخل ليها كاع لوينات كيف حبت حتى من الصفر (سناب شات )دخلو ليها و هي جالسة معاه و عقلها مرة معاه مرة مهوش معاه دور تشوف واش جاي و كلثوم تشرب في اتاي ....دخل ليها الاغاني العيطة و الستاتي و الداودية و اغاني الزمن الجميل اسمهان و نبيلة و عبد الحليم حافظ ....دورات معاه كلثوم و خرج فحالاتو حدك عمر لي منزلش و لا طرق بابهم
ياو جا ليل ....و شعلو الشمع و الضواو برا القصر في جردة واااحد الجلسة هاكا مفرشة في لرض و المخاد و الطابلة محطوطة فيها طبسيل ديال الجاج عامر فاكية(فواكه الجافة ) مخلطة و براد كبيير ديال اتاي ....جالس الحاج الوسط يشرب في اتاي و يضحك و مدور بيه كلثوم و حليمة مجمع معاهم ....هو دايما يحتارم المرا و يعطيها قيمة و يخلليلهم وقت فين يجلس معاهم و يهضر معاهم ......ماعلينا نازل سي عمر غير بسروال كيطما و تيشورت كيخشي صباعو في شعرو يردو للور يلاه فايق و دوك الحجبان عندو غير مقرونين يالطيف شاف وحدة من لخدمات : اييه نتي
سويعدة حانية راسها : برا اسيدي عماار ... شاف في الباب و ضرب فيها و زاد كيتمشى و من حدو يقرب الباب هو يسمع في الضحك و تكركير ديال الحاج بلعلالي و مخلط بيه صويت زويون مأنث حتى هو كيضحك ....حتى خرج بان ليه الحاج جالس و شاد تليفون و حليمة بداك الشعر ترجعو اللور و داك الجمال باركة و تورييه في الفيدوات ديال الضحك داكشي ديال عتروس هرب تربية تخلعت و بدات الضحك ...و كلثوم غير جالسة تشوف فيهم وتبسم و مسنطة لعظامها حتى وصل عدهم عمر
عمر : سلام عليكم ...ردوها عليه و طلعو فيه راسهم الحاج هجر الضحكة خنزر فيه و لالة كلثوم تبسمت ليه و حليمة كتشوف فيه و ترمش و نزلت راسها تستحيي ... هو نزل عينو للحليمة غير بنص شوفة قرطاسة
كلثوم : جلس جلس اويليدي حدا حلي(الحاج و حليمة خرجو فيها عينيهم ) ءءءء زهرة زهرة ...عمر مطلغ شوكتو تاني و نزل جلس حداها ...حليمة غير تشوف فيه بنص عين تهو دور عينو بتخنزير فيها و دار خدا شوية الفاكية و بدا ياكل بالوحدة بالوحدة
الحاج فرحان شاف في داك تليفون : نكملو زيدي زيدي هاد الحمر (يوتيوب )راه خرج منو للعجب
حليمة دارت عندو و تبسمت و بدات تضرب تاني في الفيديو : هانتا اعمي لحاج
كلثوم تنخوى على اتاي و تشوف في ولدها : درية مثقفة
كان كيشوف في الفاكية و سمع شي همسة دايزا طلع راسو فيها : شنو ؟
كلثوم : اتااا والو ااه ....بدا الحاج تانيي و يطلق حلقووو للسما و هي حدااه تضحك و توري فيه ....عمر دار خنزر علاقتهم في شكل ماشي ديال شي وحدين يلاه جابوها ضيفة و استاضفوها ....بقا مستغرب كيشوف فيهم شحاااال فحالا شاك فشي حاجة
الحاج عطاها لمشقوف : والله هاد نصارة يعرفو اش يديرو هههه دروك غدوا فكريني ندوز نشري ليك واحد جديد هادا قدام ليك
عمر رفع راسو : متقوووولش لياا بلي نتاا هو الشيخ لي باغيي يتزوج بيها ....و هيا ناري طلقها على ودنيهم نيشان حتى صماكو كلثوم كانت تشرب في اتاي شرك ليها ...الحاج عينو كي البيات وصلو عند عمر ...و حليمة لي حطت يديها على فمها مصدومة و مخرجة عينيها
الحاج باغي ينوض يهجم عليه و عينو ولاو حمرين : هاويليييي الحمار بووووه يقلل من الاحترام هاويليييب اش ساريييي يقوول
كلثوم : كح كح اويلي كح كح اولييدييي ....حليمة شادة على فمها و نزلت راسها لرض عجب فيها و عرف كيف عجب
عمر كيخرج فيه عينيها : واااا هيا هاديي شنو بغيتيني انا نحساب راه ماشي مكلخ و نتا بارك ضحك معاها و هي جالسة تلوى تما و جايب ليها تليفون ....الحاج ولا كامل يتفتف و يشوف فيه و حليمة ولات كلها حمرة مطيشة و تولول
و كلثوم ناضت جمعت الوقفة و دارت عند عمر تنوض فيه
الحاج مخرج فيه عينووو : الحمار بوووه شو اش ساير يقول واش تا عارف هادي لي ساير تدوييي عليهاا شكون الحماااار بووه ...حليمة دارت تهدن فيه و تشد فيه : تهدن الحاج
كلثوم تنوض في عمر : هاويليي ا عمر تقول لحاج هاد الهضرة نووض معايا غتقتلوووو نوووض
عمر دار عندها مخنزر : مكتشوفيش كيف كيتعامل معاااهااا
كلثوم : نوووض معاياا نوض ....نوضاتو بزز و الحاج باقي باغي يطير في بلاصتو غير عضامو تقالين: رجع عندي لولديييك رجع عنديي اقليل ترابيي كبرنا و قريييينااا و يجي يتعنكر علينا بن المسلكط لاخر مخليتي تا قنت مامشيتي ليييها دوي....حليمة تجلس فيه : تهدن ا الحاج غتمرض عاوتاني
كلثوم جرات عمر داخل القصر و بدات تندب عليييه : اويييليييي تقول الحاج ديك الهضرة هاويليييي وحدييي
عمر : شنووو بغيتينيي نفهم اناا و انا كنشوف هادشي مع ديك البرهوشة ليوجبتووو
كلثوم : نتاااا باغييي تقتل الحااااج اش غيجييك ملييح طلع فحالك لبيتك متخرجش عند الحاج ابدا و لا متعرفني فين زدت كي درت المرة لي فاتت
عمر كتفاتو بهاد الهضرة و دور وجهو لهيه عضلات وجهو كيتحركوو رجع راسو و زاد طالع فحالو ....الحاج طيح للحليمة كتف هو يدوي و يعاير و يكشكش تا رجعات كلثوم عاد كلماتو بالدوا يشربو ... الحاصول نكد عليهم الجلسة و خلا كلشي حاط يدو على حنكو حليمة دارت تشوف في الحاج و قلبها يضرها و هو تشوفو كيغلي هاكا على هضرت حفيدو لي حركاتو الحاج عزيز عليها كثر من باها لي ولدها فضلو عليها عمرها تنساه
حليمة تنهدت : انا جايا ...شافت فيها كلثوم لي تهيا حاطة يد على يد و حركت ليها راسها بأيه و الحاج باقي غير يعير في نفسو ...ناضت جمعت الوقفة و ناضت تمشى و قلبها يضرب يضرب و وجها مخطوف تقول منعرف فين غادة تخطي خطوة و تعود تفكر ترجع بقات جراها رجلها طلعت في دروج و وجهها بدا يصفار بانت ليها هاد الزعامة مهياش ....حتى وصلات قدام باب البيت عندو ...هنا طاح ليها هي طونسيو و لات ترعد ترعد و مخرجة عينيها طلعت يديها و بدات دق في الباب و تطلب ربي ميسمعش الدقة ...دارت دوقة لولة الثانية صافي ممكتابش بغات تمشي فحالها و هي تسمعو قال دخل ....و هي دخل في حالة موت بطيئ هزات يديها حطاتهم على باني كترعد و حلات الباب
حلات لباب غير شوية و لي ليها ليها و دخلات عدو جنب ...هو كان حاط الفوطة على شعرو فزكو بالما بارد يبرد شوية هز غير عينو تحت الفوطة لشكون دخل حتى كتبان ليه هي ...وقفة عند الباب و حالاه و تشوف فيه و تلعب بيدها بالخلعة
عمر زعزعها بصوتو : شنووو كين
حليمة قفزت : ج ج جيت ن نقول ليك على قبيلة
عمر حيد الفوطة كيشوف فيها و الشعر ديالو فازك : شنو غادي تقولي لياا ءء ؟؟.....و بدا كيتمشى لعندها
حليمة كتحرك في رجليها مرة عين فيه مرة عين في لرض : الحاج ر راه ك كيتسهم مني حيت انا يتيمة (في خاطرها : الله يسمح ليا من مي و با ) و معدي حد و ي يضحك م م معايا باش يخليني نولف شوية
عمر كيتمشى عندها : لا تبارك الله ممولفاش
حليمة طلعت فيه راسها و حلات عينيها : واااحق الله اسييي عمر ....مجات فين تكمل الهضرة ...حتى حط يدو على كتفها و زرب عليها مرجعها اللور بزدحة مع لباب حتى تسد و هي تقصحت و قفزت ...و هي خرجت فيه عينيها قلبها محزم الركزة النفس هي لخرة مقدات تطلعها و يديها كيترعدو ...عمر نزل راسو مقابل معاها مباشرة و عينو في عينيها : شتي ديك الهضرة كوليها مغاديش دخل ليا
حليمة فمها يتفتف و يديها يقفقفو و كتزيد تجبد فيه عينيها زوينين : ع ع علاش انا ش شنو درت ليك ....و عينيها بداو يحمارو شوية مع الشفار طالعين بالماسكارة ....عمر كيشوف في عينيها و سهى طلقة جاتو من العين نيشان حركت ليه داك القلب الغامل عدو ولا يحس بيه في صدرو فتح فمو شوية ...حليمة البكاية بقات تشوف فيه و نفسها الطلعها و تنزلها ...هو باقي غير مبلوكي معاق براسو حتى طلعات معاه السخونية هو يحيد يدو و رجع خطوة للور و خنزر فيها : شنووو كديري نتيي (حس بيها فحال سحراتو ) برااا عليااا منلقاكش هنا (حليمة شافت فيه و نقزت بالخلعة و دارت خرجت دغيا فحالاتها تجري ) آخر مرة تجي للهنا ....هي كانت تما طارت ....و هو دار فحالو مخرج عينيه و كينهج و قلبو بدا يضرب فحالا كان كيجري أميال و كيسوط : شنوو هادشي؟ ... حليمة هاديك هي درديكتها جاها الحماس ديال دقيقة فاش دخلت عندو ندمت و و مشات تتجري نازلة ما تصادفت مع كلثوم و ترعد و تفتف و تدوي : ناااريي ا مي ناريي
كلثوم تخلعت : مالكي ااه ياناري
حليمة : ط ط طلعت عند سي عمر ندوي معاه ز زدحني م مع الباب ياكي مع الباب و جراا عليا
كلثوم تشوف فيها و هي تهز يديها بدات تنفض فيها : و لاااش طالعة عدووو شاورتينيي هاا دويي ؟
حليمة : اي ميي قصحتيني على ود الحاج اميي
كلثوم : دوزي تنعسي متبقايش ديري من راسك زيدييي
حليمة لسانها ثقييل : باقيي الحال امي فين هو با الحاج ؟
كلثوم : بنتي ليا باغا تقصريي دوزي تركدي غدا صابح بكري باش توجدي اش تدي باش تمشي تزوري موك
حليمة جبدات عينيها و فرحت : بصح امييي فرحتينيي كي شتي انا توحشتهم
كلثوم : زيدي نعسو يلاه ...في البيت ديال عمر جالس سبع البرمبا فوق الناموسية و دوك الحجبان غير عاقدهم و كيشوف فحتى حاجة كيسمع غير للضربات ديال قلبو لي مبغاوش يرجعو كيف كانو ....كان ينهج بشوية و بين عينيه غير عينيها ...
صبحنا على الله و الفروج كيعوك ....ياو على النبوري ...كلثوم في البيت مع حليمة تقاد فيها و مشانقة معاها على قبل كسوة قصيرة
حليمة تعنتت : لا لااا امي كلثوم منقدش امييي نخرج هوكااا غيشوفنيي با الحاج و بااا
كلثوم ناضت ليها : تييي مالكي فقصتني كثر من الفقصة لي دير فيا ولدي راك لابسة ليبة كحلة من لتحت و الحاج راه مكيقول والو و باك عارفك وليتي محسوبة على عمر
حليمة : لا والله منقد امييي
كلثوم ضربتها لكتفها ضربة صحيحة و حليمة طاكات على راسها و كترمش
كلثوم : متكونيش معكسة و سعفيني خاصك تلبسي و تقاديي و تكوني في مقام راجلك و متحسيش براسك ناقصك شي حاجة و حداه تباني فخامة و قمامة هو ميبغيكش تبقاي مخشية في الكوزينة تعجني المسمن و تصيبي في المسكوتة
حليمة تلوى و تهبط في السايا : راه قصيرة اميييي ...ضربتها تانيي و جرتها خرجتها : لا تعصبينيش باركا غير لاكريز لي يجيني راه طومبيل واقفة برا جمعت ليك شي خيورات و هاكي هاد البركة عطيها للموك ديريها ليها في عبونها ....و دارت ليها في يديها شي فلوس ملوية كتبان ليك غير زرقة تنطح زرقة
حليمة حلات فيها عينيها و مبغاتش تشد من عدها : لااا ويليي ميي حشومة ديري هاكا
كلثوم قريب تفركع : تي مالكيي غتخرجيي ليااا العقل راه تي لي غتعطيي لموك ماشي اناااا راه فلوسك هادو شدييي
حليمة سايرا تشوف فيها مكرهتش تعنقها واخا دير لي دارت عمر خير هاد ناس ماتنساهم هي و الحاج و هي تعنقها و هي تحيدها كلثوم و تبسمت : يلاه ابنيتي سيري و جلسي مع ميمتك و سلمي عليها و رجعي بكري
حليمة : صافي كوني هانية اميي ....و دارت تمشى دارت نضاضر ديال الشمش و خرجت من الباب هاكاك زينة لابسة لباس ديال المدينة مع الطاي مقادة و الشعر مطلوق و سنسلة دهب رقيقة في عنقها و طونكات و دبالج و خاتم ديال المارياج في اليد لقات مسعود يسخن في الطوميبل طلعت جلست اللور حيت من قلت لحيا تجلس حدا الراجل واخا غير خدام
مسعود : صباح الخير ا لالة حليمة
حليمة تبسمت : صباح الخير ا مسعود كيف داير لابس
مسعود : هاني الالة بفضلكم ...تبسمت و هو زاد بيها و خرج بيها من القصر و هي الفرحة و تبسيمة على وجهها توحشت مها و خوتاتها بزاف ... شوية نزلت راسها للتليفون شعلاتو لقات مسيفط ليها ميساج واتساب حلاتو كان ميساج واحد مكتوب مولاه عبد الخالق حلاتو و طلقات الاوديو كانت كلثوم : و عداكي تقولي ليهم شي حاجة
حليمة تهي خدمت لوديو و قرباتو لفمها كتغوت : كونييي هانييية ا مييييي ...و سيفطت لوديو فرحانة و رجعت تليفون للساك ....و طلعت راسها تشوف قدامها اييه على يامك احليمة كنتي دوري بسندالة الميكة دابا نتي بشيفور و تليفون و تقزيبة
غير شي دقايق بحال هكاك دخلت لكاط كاط للدوار كحلة تبري ....و العينين تفتحو تانيي و تبركيك لا عيالات لا رجالة اما دراري الصغار ينقزو فرحانين تقول عندهم عيد ...حليمة دور في راسها و تشوف فرحانة توحشت قنتهم و خيمتهم (خيمة بمعنى منزل صغير ماشي خيمة لي على بالكم ) حتى وقفت الطموبيل قدام خيمتهم بابها محلول مغطي غير بخامية ....حليمة تبسم و تهبط في السايا : عفاكاا هبط هادوك
مسعود : واخا الالة حليمة ....هبطت لالة حليمة بنضاضر كحلين قدام العينين و الصاك في اليد و تمشى بطالون و تهبط السايا و تمشى كين غير لي يسول و يقول شكون هادي و منين تبان عليها الشخصية و الزين الفلوس دخلت نيشان لخيمتهم تبسم
كانو خواتاتها يلاه كملو الشقا و بغاو يتنشرو و مهم متخرجش من الكوزينة تحلفي سانيا معاها كونطرادا (كونطرا ) و تغوت عليهم ...حتى دخلت عليهم حليمة ....لبنات كانو يلاه جلسو حتى دخلات عليهم بنت مدينية و باينة فيها ترفيحة و زينة هما يشوفو مبلوكيين يطلعو و ينزلو اش كدير هاد الماركة عندهم حيدت نضاضر تشوف فيهم و تبسم ...تمن لالة حكيمة قشعتها داخلة من الكوزينة و خرجت تمسح يديها في الطابلية و تشوف شكون
حكيمة : سلام
حلييمة دارت عندها ديغيا و تبسمت : مييي ...و رجعت تلاحت عليها تعنق ...حكيمة مفهمت والو و ليني هاد الصوت مغريبش عليها و هي تحيد منها حليمة : ميي توحشتك ...دخل مسعود هاز الخير الخمير حطهم تماا ....و حكيمة غير تشوف في حليمة و الدريات ناضو وقفو يفهمو اش واقع ...درية هكا دايرا خلطت و نزلت عليهم تعنق و تبوس
حكيمة : ش شكون نتي ابنيتي ؟
حليمة جبدات عينيها : تنتيي معرفتينيش اميي اناااا راه حلييمة ... اغنية الصدمة ولات مطلوق في هاد الدار السعيدة ...و عاد بداو يشهقو و يخرجو عينيهم و يطلعو و ينزلو ....حكيمة على داك الباب تشوف فيها و مجبداهم و طلع و تنزل : ح ح حليمة ؟
حليمة : اااه امي حليمة راني ضعافيت و وليت هكا ... فتيحة قدما خرجات عينيها قدما بدات تشدها السخفة و بدات ترجع باللور باش طيح على خاطرها فوق السدادر و عويشة و فضيلة هاديك هي وقفتهم عقلهم متقبلهاش حليمة لغليضة هي هادي و العين تشوف و العقل مايصدق
حكيمة بدات تضحك بشوية بشوية : واااهيا سعدي و فرحيي ببنتيي ولات حسن من درياااات (و تشوف فيها ) و هي زينتيي كنت مربية لالة البنات (حليمة تشوف فيها و تضحك ) يازينة الضحكة (و دارت لقات غير فضيلة لي واقفة و فتيحة مشبحة فوق السدادر و عويشة طجت البيت كتبكي وتندب ) اجيي سلموو على ختكم (و دارت عندها ) زيدي زيدي متبقايش واقفة الله كنت مربية زينة عندي في الدار ...حليمة تضحك و مشات عند ختها الصغيرة فضيلة عنقتها : كيف دايرا اختيييي لاباس كيف غادا ...و حيدت تشوف فيها
فضيلة مجوبتش غير تشوف فيها و بدات متحاول تضحك بزز وكطلع وتهبط فيها : ل ل لاباس اختيي ؟
حليمة : لاااابس الحمد الله و نتيا ؟ ...حكيمة مشات دغيا تقرص في فتيحة : تيي نوضيي ختك جاات نوضي عمري اتاي ...نوضتها قافزة بقرصة ....فتيحة دورات راسها بانت ليها حليمة جايا عنقتها و سلمت عليها : كيف ديرا فتيحة لاباس عويشة فيناهيي ؟ ...فضيلة نزلت عينيها للسنسلة ديال الدهب او الحوايج و النضاضر و لا طاي
حكيمة : غتكوون في البيت متكية راها تخطبت لوحد الجدارمي جابو ليها الشيخ الله يكثر خيرو
حليمة فرحت من قلبها و شهقت : بصح فينهياااا نبارك ليها كانت غير هنا
فضيلة تلاحت عندها تبسم و تحلون : ويلي جلسيي نتيي هنا ارتاحيي ليك انا نعيط عليها فتيحة : نوض رودي الما
فضيلة جرات عويشة من يديها و جلست حليمة و جلست حداها حكيمة تشوف فيها و تلمس فيها و عينيها دمعو : بنيتي سعدك زين و كصتك زينة تبارك الله على بنيتي
حليمة تبسم : توحشتك اميي بزااف
حكيمة تدوز يديها على شعرها : كيف دايرا ابنيتي مع دارك و راجلك و عكوزتك لالة كلثوم
حليمة : لاااباس اميي كيشتي راها تسلم عليك
حكيمة قربت ليها : و سيي عماار غادي معاك مزيان ؟
حليمة دور في عينيها : ءءءء؟! ايه ايه مزيان والله
في البيت فضيلة دخلت عليهم جارا معاها فوتيحة لعند عويشة لي سايرا تندب
حكيمة : ههه نصايب كويس و نجي نجلس عدك ....ناضت وقفت مشات عاد خرجو لالياتي كيشوفو فيها
حليمة شافت في عويشة : عويشة توحشتك مبروك مدرتي ....عيشة تهيا نزلت عدها تبوس و تسلم و تضحك ضحكة الصفرة و جلسو حداها دوروها و حدة في ليمن و وحدة في ليسر و وحدة من ديك الجيه و يتلمسو فيها و في حوايجها و حليمة والله كتبغيهم في قلبها يقطرو ليها من العين حيت خواتتها
فضيلة : هادشي زيين عدك كي درتي تا زيانيتي
عويشة : وراه باينة الفلوس
فضيلة طرطق فيها عينيها : دابا منين نتي وليتي هوكاا انا كيف غنوليي حسن منك يااك
حليمة تقرصت تمن ضحكة علاين تهجرها : ءءءء؟ ااااه
فتيحة نقزت على سنسلة : هاد سنسلة زوينة عطيها ليا
حليمة شافت فيها : ءءءءء؟
عويشة : ياك نتي لباس عليك دابا و عدك بزااف
فضيلة تقلب في الحوايج : تانا عجبوني هاد الحويج لي لابسة
حليمة تشوف في الحويج : هو كون كان عندي باش نمشي نعطيييهم ليك
عويشة تجبد في عينها : اويلي حتى هادي هضرة تقولي حنا نعطيوك حويج اجي معانا لبيتنا ...ناضت معاهم بقلبها كبير داخلة تعطيهم حويجها لحاصول هاد البنت حاجتها ماشي ديالها ...مجات فين حكيمة خرجات تحط الصينية ...حتى خرجو حليمة من لبيت مكشطة في راس مالها جلابة بالية و سندالة الميكة و دبالج في يديها و خاتم عرسها اما كلشي باح باقا غير الساك في يدها
حكيمة : هاويلي اش درتو لدرية ....هما تساخرو اللور يخافو من مهم و حليمة تقدمت عليهم : لا امي غير خليهم عنديي بزاف منهم
حكيمة : اويلي و عداك ناسبك يخاصمو عليك
حليمة : لا لا ميي كلثوم ضريفة ... حكيمة ملقات متزيد عليها صافي جلسو يشربو اتاي و يضحكو كل وحدة واش خدات ها سنسلة ها الزواهك ها البراصلي ها الحويج ...حتى وصلات وقيتها سلمات عليهم و عطات لمها شي باركة و خرجوها قدام العينين يحنزو واخا غير بسندالة الميكة و جلابة بالية كتبان فيها زينة و شخصية و الشعر مكريبي طلعت في الطموبيل دير ليهم باي باي و تضحك
مشات بيها الطموبيل للقصر ....غادا فرحانة و تفكر في خواتتها مسخاتش بيهم و ليني دابا دارها و مكانها ولا عد راجلها مهواش مع ولديها ....ماعلينا دخلت الكاط كاط للقصر بعدما ضربت طريق نيت و نزلت حليمة فرحانة تمشا بسندالة الميكة و الضحكة من القنت تال القنت : مييي كلثووم ااا ميي كلثوووم ... خرجت كلثوم تمشا و تنخوى كانت متبسمة حتى شافت مرت ولدها بجلابة بالية و سندالة ميكة ...كحلت بالعما ما كحلت بهادشي لي لابسة جات حليمة و سلمت عليها و كلثوم غير تشوف : تيي اش لابسة ؟ و فين دهبك ؟
حليمة : هاديي جلابة ختي فضيلة عطاتها ليا حيت مساكن عجبوهم حوايجي و عطيتهم ليهم ... هنا طلعت القنديشة للكلثوم و هي تبدا ضرب فيها : وااش حمقة واااش هبييلة جالسة و تعطي فيي حويجك
حليمة ترمش مع الضربة و تقصحت : ااي مي كلثوم قصحتيني
كلثوم : سكتيي يسكت ليك الحس كين لي يفرق في حويجو ويعطي دهبو بغيتي تعطيهم شري ليهم و دي ليهم ماشي تحيدي حويجك و تجيني بسندالة الميكة غنشويك بيها نيت باش تعلمي تجيني هكا ...حليمة هربت ليها : صافي امي مبقيش ندير هوكا
كلثوم : زيدييي قداميي ....مشات بيها للبيتها غادا و ضرب فيها على هبالها وقلت عقلها
في المختبر الفلاحي ...جالس سي عمر في الكرسي ديالو ....معرف يخدم معرف يفكر ... داك القلب عندو من البارح مابغا يوقف و غير يشد البيسي و لا الستيلو يجيوه عينيها في البال ....الحمار و مولاه رجع على الكرسي متكي و شاد من راسو عينيها مغمضين و عاقدهم و يزفر حل عينو مخنزر تنهد و هز الستيلو باش يكمل خدمتو و حنا على الدوسي لي قدامو بدا كيقراه بشوية باش يسني حتى عقلو غاب عليه رجعو لبارح في ليل مكرهش يشوف نفس العينين هو يتعصب و شير بالستيلو : الززززمررررر ....و ناض بزعفة حتى خلا لكرسي من وراه يدور دار يدو في جيابو و خرج ياخد الهوى راه علاين النفس التقطع ليه
ياو ليل نزل و الضواو شعلو و لبيبان تسدو ....جالسين الخدمات يوجدو في الطابلة و الحاج جالس و يشوف و يتشهى عينو كبيرة يبغي يشوف غير الحاجة زينة تحط قدامو ...حليمة فرحانة في الكوزينة هي و الخدامات يتسابقو هزات كاس الما في يد و دوا الحاج في يد و خارجة كتبسم فرحانة و تمشى بزربة و تشوف في الكاس لا يتكفح ما خرجت نيشان غير في عمر يلاه داخل مخزز كفحت عليه نص كاس على تيشورت و شهقت و جبدات عينيها ....عمر اصلا كان يشوف لهيه حتى خرجت ليه من جنب لاخر و نصو عمر بالما جمع يديه شاد عليهم و مزير و غمض عينو و كيتغدد
حليمة ولات تاني حمرة مطيشة و ترعد : سمحليا سمحليا اسيدي عمر مقصدتشاي عطيني عطيني تيركو نحطو ليك غدا في الشمش (حل فيها عينيه مخنزر و محمر فيها غير شوفة خلاها تشطح قدامو ) والله مدرتها بلعانييي ...عمر كيشوف فيها هاد العينين لي حمقوه من البارح قلبو مكيحش بيه بقوة السرعة لي فيه ....هو يحيد التيشورت قدامها و عطاها ليها ...يديها كيترعدو حولت الدوا مع الكاس في يد وحدة و شدات من عندو تيشورت دغيا و طلعت فيه عينيه كتموت قدامو في الخط هو يبدا يقرب لعندها حتى طرطقات فيه عينيها و تنهج و باغا تهرب
عمر عينو نيشان في عينها : مغنلقاهش غدا غادي نكب على موك سطل ديال الما ....هي تحرك ليه في راسها بايه و هو من هادشي كلو مابيه غير هاد العينين لي يلاه بدا ينتابه ليهم
حليمة قفزت من بلاصتها : ك ك كي شتي عمي الحاج خاصو يشرب دوااااه واش باغينيي على شي حاجة
عمر حول عينيه : يلاه غبري ...دارت فحالها دغيا راجعة فحالاتها للكوزينة تمشا باش تعمر الكاس ديال الما و هازا في يدها تيشورت
عمر دار يدو في جيابو و حول عينو : اش هاد النم هادشي لي بقا نيت نحضي في البراهش
كلثوم جايا كتمشى قشعاتو واقف و كيكشكش غير راسو : وليدي جيتي (كتبسم و تشوفو عريان ) مالك اويلدي ملابسش
عمر دار شاف فيها : سولي ديك الضيفة عندك ؟ ...و تمشا ضرب فيها و زاد خلا كلثوم غادا تجري لكوزينة تقلب عليها
حليمة دخلت تعمر الما : الحمدالله اللحمدالله منين خرجت هوكااا ... عمرت الما و دارت فحالها لقات كلثوم قدامها و الدريات يشوفو
كلثوم : كل وحدة تشوف شغالها اجي نتي ...جرات حليمة : تي اش وقع ؟
حليمة : كفحت على سي عماار المااا هانتيي تشوفي التريكو ديالو
كلثوم : سميتو عمر شهر وانا نعلمها ليك اري ليا هادشي و زيدي قدامي
حليمة : لا راه حلف عليا نكرمو غدا
دخل عمر كيتبودر على الحاج ...و الحاج يشوف فيه تحلفي دايز على قلبو
الحاج : أمممم زعمة صعصع
عمر طلع فيه غير عينو جلس حداه و شبك يدو و شاف فيه : صافاا الحاج ؟
الحاج قرب ليه : بصحيحتي و ضد فيك ؟ يكما تقول هادا شرف و يخليك تلعب العشرة اوالله لا كانت ليك ...عمر غير كيشوف فيه و عاقد دوك الحجبان...عاد جايا كلثوم هازا الدوا للحاج و راه الما محطوط تما ....و حليمة جايا معاها و حانية راسها و جلست بشوية متشوفش في جيهة عمر و كلثوم جلست تعطي الدوا للحاج ....عمر دار بشوية و بدا ياكل و رفع عينو عليها وخا عاقد حجبانو بدا يتمنظر في دوك العينين و كيصغر عينو و كيتسناها طلعهم غير طلعاتهم فيه كيضربو الضو في قلبو و كيتنهد ...هي بدات دور في عينيها و تنزلهم و نظراتو حادين ممفهومينش يحسابليها كيخنزر فيها بدات تنغز في كلثوم من لتحت و وجهها حمر ....و عمر مشا بعينو كيتسارا ها عينيها شوية داز لنيفها مقاد شوية لفمها كلشي في بلاستو مقاد و متيول ... و سراح بعينو فيها ...كلثوم دارت بغات تشوف هادي لي تنغز فيها مجات عينيها غير في ولدها لي محشم من حد بارك ياكل في الدرية بعينيه ....كلثوم فهمت و تبسمت و رجعت اللور و بدات تنغز تهيا في حليمة و شداها الضحكة ....وحد الحاج مقابل غير الكينات مكيتسرطوش ليه يمشيو و يرجعو في حلقو
كلثوم شافتو طول الشوفة : كول اولدي عمر
عمر دغيا حول فيها عينو و عاق براسو و حليمة ولات حمرة قدامو ...و حرك لكلثوم راسو و نزل كياكل
كلثوم تبسمت و دارت عند الحاج : امتا غيجي سيد ياخد الدرية
عمر طلع فيهم عينو بحاجبها
الحاج طلع فيها راسو : قريب قريب و شري درية لي بغات باش ميخصها والو باش راجلها ميتشكاش
عمر ضرب يدو مع الطبلة قفز كلشي و ناض كيشوف في الحاج : كتعطيي غير البرانيي ....و دار مشا فحالو ....ناض سيكم الحاج فهمها غالط يحساب ليه على داكشي لي غيشري لحليمة وسي عمار داوي على حليمة وبدا سي لحاج يدماري : هاويي هاويي ...
زهر الخايبة الجزء الرابع
محتوى القصة
التنقل بين الأجزاء