بعد ليلة طويييلة كل مرة مفيقهم .. شرقات الشمييسة معلنة عن بداية يوم جدييد .. ناضوا بجووج مبوقيين ..
ياسيين:( عينيه حوومر و حاط يديه على فموا كيتفوه ) نعس اولدي نعس .. نتا معامن جاات
جوهرة: ههههه خليه نااعس حسن ما يفييق و يخليني بلا شغاال
ياسيين:( دخل للدوش كيهضر ) ها هو نااعس ا ختي .. حطيلنا نفطروا باش نمشي نتيسر
جوهرة: امم وااخا ( خرج عندها كيمسح فوجهوا لقاها كتجمع شعرها شافت فيه من المرايا و قالت ) غنعيط لخالتي تجي عندنا تبقى معايا حتى نمشيوا للقاعة !
ياسيين: لي بانلك ! ياكما ندوز تا على الحاجة رحمة نوصلها لعندك ؟؟
جوهرة: نوو بلاش ... غتمشي تجيبلي لبستي من الحداد و دوز على الكوافورة لي غتقادلي تجيبها معاها و عاد تجي
ياسيين: مزيان الله يسخر
خلاتوا مع زكريا و خرجات هي للكوزينة كتوجد للفطوور و تهضر فالتيليفون مع سمييرة
جوهرة: وي خالتي صباح لخيير ، كي صبحتوا مزيان ؟
سمييرة: حمد لله ا بنتي و نتوما ؟ و زكريا ؟ كيكبر شي ؟
جوهرة: هههه من لبارح هو و يوغوغ تيعيط عليكم تجييوا عندوا تفطروا معااه
سميرة: هههه ياك
جوهرة: معاك بصح ا خالتي كنتسناوك للفطوور أجي فطري معانا و بقاي مع زكريا يلا جات على خاطرك .. راكي عارفة ليوم السابع و كلشي مقلووب و هو بااقي صغيير ما كنتييق فحتى حد يبقى معاه من غيرك نتي و ماما
سميرة:( فرحاات و عجبها الجيسط ) تانا غنحطوا فعوييناتي رااه ماا عز من الولد غير ولد لولد .. دابا شوية و هاني معااكم
جوهرة: يالاه ها حنا كنتسناوك ( قطعات معاها و كملات حطانها حتى سمعاا تنحنيحة ياسيين موراها ) لبستي ؟
ياسيين:( تبسم لها ) الله يكملك بعقلك .. غنمشي نزيد شي حاجة للفطوور .. زكريا ما تغفليش عليه انا شوية و هانا معاك !
جوهرة:( تبسمات ) واخا سيير
خرج و خلاها خايذة تا كملات و مشات للبيت جبدات لبيسة جدييدة و مع لي برودوي ديالوا و مشات عندوا بابتسامة كتبدل ليه و تداعبوا و تهضر معاه
جوهرة: نبدلووا ا مااميي هاا ( حطات نيفها على كريشتوا كتلعب بيه و تضحك ) تجي المييمة تلقى فيك روييحة زويينة يااك الحبيب هاا اغغغ اغغغ ( كملاتلوا و باستوا فجبهتوا ) اححح على العمر غناااكلك
شافت ضحييكتوا و عينيها بغاو يحواالوا بالفرحة .. ما سخاتش تحطووا كااع .. حتى شافت الوقت غيزحمها و حطاتوا فبلاصتوا و مشات هزات قفطانها و ملابس داخلية و برودوياتها و دخلات للدوش طرفات و لبسات عليها .. يالاه كملات جات مع صوت الدقان فالباب و صووت ياسيين كيهضر مع سمييرة .. عرفاتها جاات .. تأكدات من ولدها ما محتاج واالو و خرجات عندهم للصالون فين جالسين و الابتساامة مزينة ثغرها
جوهرة: هههه دخلي حماتك كتبغيك جيتي مع الطبلة نييشاان
رحمة:( داخلة كتهضر ) أنا وريني غير فين هو داك الفوير نفطر بيه كااافي و موفي
جوهرة: هههه راه لداخل مع خالتي
رحمة:( شافتهم و تبسمات عينيها مشاو نيشان لزكريا لي حاطينوا فالكوان فالجنب بين واليديه و مضورين المخاذ عليه ) هاي هاي على الناس كبروا و رجعوا يشركوا الطبلة حتى هماا ببليصتهم
سميرة:( ضحكات ) اييه و شنوو يحسابلك
سلمات عليهم و دازت عندوا هزاتوا عندها كتهضر معاه و تضحك ، رفضات تفطر .. لأنها سبقاتهم قبل .. بقات مقابلة غير لبيبي و هما كيضحكوا حتى كملات سميرة و قالت
سميرة: ارايه عليك .. شربي بعدا غير كاس د القهوة
رحمة:( شافت فيها بابتسامة ) ما كنشربهاش الحاجة .. ما خرجت من الدار حتى فطرت نتي مولات الخير
رحمة:(هزات يديدتوا و باستها ) هاذ الفوير غاذي يعييني اا ؟ ( ضحكات معاه و قالت ) واخا نحزموا على ظهري ليل نهار ما يتقل عليا .. غير خليه
سميرة:( جمعات فمها ) ااه صاافيي ما علييش .. انا غيير قلت ( شافت فجوهرة ) هي نوض نجمع معاك الطبلة .. ما كاين ما يداار ما كاين ما يدار .. حتى زكريا ها هو مع جداتوا ! عادي بحالي بحاالها
ياسيين:( متبع الفيلم فصمت ) غير خليك مرتاحة ها حنا غنجمعوها
رحمة: غير خليك الحااجة
سميرة: ايوا لا ندير شي حاجة ! ( شافت فجوهرة ) عندك ابنتي الصريرة ؟ نديروا ليه شوية ديال تمر مبخر و نعطيوهلوا يقويه شوية و يتعاون بيه مع الحليب
جوهرة:( حركات راسها بالايجاب ) كااع لي يحتاج كاين اخالتي .. أنا نجمع و نجبدها لك .. ماما الكوافورة ما جاتش معاك ؟
رحمة: درت معاها الوقت .. بلاتي شوية و تكون معاك .. يالاه تكوني كملتي
سميرة:( وقفات ) و أنا غنووض نبخر التمر .. عندكم فالتلاجة ياك ؟
جوهرة: اااه !
رحمة: عرفتي شنوو الحاجة ! ديري ليه غير بطيعة مع زويتة بلدية و شوية دسنيدة حسن ليه من التمر
جوهرة:( باستغراب ) لاش سنيدة ؟
رحمة: ايوا الدراري الصغار كيتبعوا غير الحلاوة .. بلا سنيدة ما يشدلكش الصريرة
ياسيين:( ناض ) نهاركم مبرووك .. جوهرة اجي واحد الدقيقة
جوهرة: واخا ( تبعاتوا حتى مشى و قالت ) الكوزينة حداكم ما يحتاجش نعرض عليكم لي بانلكم ديروه .. غير وحدة فيكم تبقى مع زكريا ما تخليوهش بوحدوا عافاك .. أنا نشوف ياسيين و نجيبلكم لي بغيتوا
مشات مخلياهم كيهضروا و كل وحدة باغى تدير لي قالها عقلها و باغى تقنع الثانية بهضرتها .. مناكرة لكن فالبااارد و بهدووء أما لداخل فواقفين كيهضروا
ياسيين: ما تخليهمش يلعبوا فالولد كي بغاو .. شي حاجة فيها المضرة ما تسكتيش .. بحال هاذشي عادي شي حاجة أخرى لا !
جوهرة:( تنهدات ) هي قبل ما تخرج هضر معااهم نتا !
ياسيين: دابا نوصيهم .. مهم سويعة و تفووت ديريلهم الخاطر بجووج باش حتى وحدة ما تتقلق و لكن زكرياء ما يقربوش ليه بشي حاجة ماشي تال تما .. راني كنعرف سميرة فاش كتبغي تحمااق
جوهرة:( ضحكات ) صافي واخا .. غير نجمع الطبلة و نهزوا عندي أصلا .. ما نويتش يتجمعوا يديروا هاذ الحالة .. خالتي ما بغيتهاش تهز فخاطرها مني و تقول تبدلت مور الولادة و ماما ضروري ما تجيبلي اللبسة و كدا
ياسيين:( حرك راسوا ) فهمت ( قرب باسها من جبهتها ) يالاه تهلااي و سلكي
جوهرة: ربي يتهلى
خلاها كتتنهد و فالأخيير مشات جبداتلهم لي بغاو .. لقاتوا خرج رحمة فالصالون هازة زكرياء و سميرة فالكوزينة
جوهرة: هاذي هي اخالتي ياك ؟
سميرة: ااه قطعيلي غير طريف انديرولوا قلبها التمر و نعقدوها و هو غيمص فيها من هاذ الفتيحات و هو تابع الحلاوة .. جلسي حدايا عقلي باش تبقاي ديريهالوا مزيانة ليه تعااونك و تقوييه حتى هو
جوهرة: ااه واخا
بقات معاه حتى وجدوهالوا و مشات عندوا مداتها ليه و رحمة شداها باش ما يجرهاش و تخنقوا .. واقفة جوهرة كتفرج فيه كيمص فيها و يعوج فوجهوا و عينيه و تضحك بحب
رحمة:( هزات عينيها فبنتها ) ما جبدتيش اللبسة تشووفيها ؟؟ ( ضحكات ) و تشوفي لجابادور د سيدي و مولاي زكرياء .. شحال و أنا تابعاهم عليه حتى وجدووه ليا بالشهوة
سميرة:( جمعات حجبانها و قالت ) تانا وجدت ليه جابادور غزااال يلبسوا فالساابع الحااجة .. خلي ديالك تال شي مناسبة أخرى .. ياك باااقي الختانة ! سااعتها يلبسوا
رحمة:( عقدات حجبانها و ردات بعدم رضى ) و علاش نتي لي جابادورك ما يتسنااش تاال من بعد ! تال الختاانة !
سميرة: ايوا أنا غييير قلت ( شهق الولد و هي تقفز ) أراايه اراايه عنداك تخنقييه
رحمة: مالي علاه نخنقوا ؟ راني واالدة و مربية ثلاااثة تبارك الله ( دوزاتلوا على صدروا ) حلالك اولدي ( شافت فجوهرة لي مصدومة فيهم بانولها شوية غيقلبوها صباااط ) عندك شي صووفة حمرة و لا شي خويط صغيير ؟؟ كورييه و ديريهلوا بين حجباانوا تتحيد عليه هاذ الفواقة
سميرة: اويلي يا الحاااجة على صووفة حمرة !!! لا عسااك ابنتي ما ديريهاالووش شوية و تمشي منووا .. هاذشي غييير خزعبلات ما تديهاش على مك
رحمة:( ساطت من منااخرها بفقصة ) الحاااجة ! كلنا كبرنا هااكا و كبرنا ولادناا .. ما غنديرلوش شي حاجة لي تضروا غير تهنااي !!
جوهرة:( صدمووها ندماات لي جمعاتهم .. نحنحات و قالت ) خالتي نووضي وريني الجابادور لي جبتي .. غنلبسهم ليه بجووج .. واحد فالدخلة و واحد فالعشية .. بااينيين غيكونوا زويينين منين وقفتوا عليهم بيديكم
سميرة:( فكراتها فيه و مشات تجبدولها و فنفس الوقت كتهضر ) و لاهيلا متأكدة غيحممممقك .. غزااال غزااال .. أناا سطاني بعداا
جوهرة:(مدات يديها لأمها ) عطيهلي أ ماما نمشي نرضعوا و نعسوا .. شوية و تجي لبنت خاصها تلقاني وااجدة باش تبداالي
رحمة: يالاه هااك .. بسم الله
جوهرة:( هزاتوا عندها بحنان مبتاسمة .. دازت من حدا سميرة و قالت ) غندخل ننعسوا و نجي .. باش يخلينا نوجدوا فرااحتنا
سميرة: واخا سيري
و بالفعل دخلات رضعاتوا و بقات معاه حتى نعس فبليصتوا و خرجات عندهم لقاتهم هازين جبادوريات عندهم و كل وحدة تشكر فديالها .. ضحكووها و سالاو معاها .. لكن ما قالت واالو و عطاتهم الخااطر كااملين .. تا جات الكوافورة و بداتلها فالخدمة .. لا لوجه لا الشعر ..
سميرة: عنداك يفييق و ما يحس بيه حد مع الصداع !
جوهرة:( بهدووء ) لا ! يلا بكى غادي تصوني عندي ( وراتهالها ) راه باقي نااعس
رحمة: مزياان اصلا .. غير ولفيه على الهضرة و الصدااع حداه .. ما تخليهش يولف السهاات و نهار تكون شي مناسبة يبقى محنك معاه ما يسكتش من البكى
سميرة: ايوا لواه راه باقي صغيير !
رحمة:( هزات حجبانها ) يلا الشهر راه كملوا ! لواحد يولف الدري و هو صغيير ماشي تا يكبر و يوحل معاه .. راه غير تولفوا على الهضرة و الحركة ماشي تطلقلوا موسيقى فوذنوا حتى طرشوا !
سميرة:( ساطت و قالت فنفسها ) نتي ما معاك هضرة ! كلامك هو لي كااين و ربي كبيير
رحمة:( فنفسها كذلك ) اووه اووه على كعراارة يااا ربي السلااامة مع هااذ النااس ما يرحموا ما يخليوا رحمة ربي تنزل ! تئ !
جوهرة: ديريلي شي حاجة خفيفة ما تتقليش .. راك عارفة ما مولفاش بالمكياج .. نهار كندير غير شوية كيجي باااين .. مهم خفيف و زويين
----: غيير تهناي بشرتك حمقااتني .. شفتي واخا تشوفيني شدييت الوقت و خدمتلك بزااف غير كوني هاانية .. غيجيك راائع .. راني عاارفة شنوو كندير .. حتى شعرك تباارك الله و صلاة على نبي عليه .. كديريليه شي حاجة تا قوي و طويل هاكا ؟؟ حيت أغلب البنات ما حدوا كيطواال و هو كيخفااف
جوهرة:( قاست فيه و قالت بابتسامة ) الصراحة شي حاجة محددة لا ! كل مرة و شنو كنخلط و نجرب ليه و لكن ما كنهملووش .. كلشي طبيعي .. مرة مااسك مرة زيت .. دايرة لهم نووبة ههه و خلاص فالشامبوان كنطحن وراق السدر و كنخلطهم معاه .. خطييرين للشعر
---: تباارك الله .. حتى تعطيني لي ماسك و الزيوت لي كتديري شنوو فيهم !!
جوهرة: مرحبا
💫💫 عند ياسيين 💫💫
واقف هو و مصطفى و محمد و كريم و حداهم جوج حوالة و الكزاارة لي كيمضييوا فالموااس .. شاف مصطفى فولدوا و قال
مصطفى: ياسيين نتا لي غتذبح ياك ؟
ياسيين: ااه و هما غيتكلفوا بالباقي
مصطفى: مزياان !
جروهم ليه دايرين بيناتهم ليزار فالأبيض باش ما يقيسش حوايجوا .. هز الموس عندوا و هما مكتفينوا ليه و هاز راسوا للفوق .. سمى الله و دوز عليه .. نفس الشيئ بالنسبة للثااني .. و عاد تكلفوا الكزارة يديروا خدمتهم
كريم:( هاز قرعة ديال الما كيكب لياسيين بالشوية يغسل يديه و كيهضر ) صاافي قتلتييه ا عدو الله ! هاذي هي دياالك المجرم القتاال ! مسكيين عينيه زووورق و كيشووف فيك و الدمووع مغرغرين ليه .. كيترجاااك بعينيه و وااالووو ! تصور كن كنا كنضحييوا ببناادم و أناا هااز عليك المووس و نتا كترغبني ما نذبحكش و نهز أنا يدي و ندوز عليك باش غتحس ؟؟
ياسيين:( هز داك الجنوي نيت لي حدا رجليه و قال ) لاش نتخيلوا ؟ أجي ندوز عليك من الوذن لوذن و قولي باش حسييتي من بعد فاش نتلاقاو لهييه
كريم:( ضحك ) لا اخوويا لحمي حاار حدنجل ما دايزش للضحية ! غير جيب سبتك على حد ثاااني
💫💫 فالمساء 💫💫
واقفة جوهرة بلبستها الجمييلة و مكياجها النااعم و شعرها الحريري .. كتتحرك بأنووثة و بهدووء تاام فالغرفة لي عاطيينها فالقاعة .. منعسة فوسط الناموسية زكرياء لي حتى هو يا سيدي لابس لك جابادور فالأزرق الملكي و الطرز الرباطي فيه كيفتن العين و تا هو بالبليغة يا لالة فرجيلاتوا .. جالس حداه ياسيين بالتقليدي لي فكل مرة كيلبسوا جوهرة كيحواالوا ليها العينين ..
ياسيين:( بابتساامة ) يالاه خرجي بالشوية عليك ها الحاجات فالباب غيعاونوك و انتاااابهي فين كتزطمي ( هزوا بحذر و مدوا لها )
جوهرة:( قادات ليه اللفة و حنات راسها بالشوية كتقرا عليه المعوذتين و أية الكرسي .. تا كملات و شافت فيه بابتسامة ) غتبقى غير هنا ياك ؟
ياسيين: سي ! الرجال تال ليل و نديرولهم الطلبة فالفيلا لهييه .. أنا معاكم يلا احتاجيتوا لشي حااجة .. و حاضي الامور هنا
جوهرة: ااه احسن حاجة درتي ( فتحات لباب تخرج و سمعاتوا عيط عليها ) نعام ؟
ياسيين: انتابهي فالعمارية .. راني هضرت مع البنات يحاولوا
جوهرة: كن هاااني ( بفرحة ) شكرا بزاااااف و الله
ياسيين:( ضحك ) بصحتك ا لالة
خرجات لقات رحمة و سميرة و ابتسام و وئام واقفين كيتسناوها .. شدات فيها وئام و زادوا كااملين كيعشقوا و يصليوا على النبي .. حتى خرجات للقاعة فالوسط لي عاامرة غير بالنسا ..دازت على الصالونات بابتسامة جمييلة كترحب بيهم و تعااود .. تا كملات و بانولها لبنات حاطيين العمارية لوسط .. داوها لها ركبات هازة عندها زكرياء مزيرة عليه و منتاابهة معاه .. تا هزووه و غمضات عينيها و غوتات بصوت خفييف ما مسموعش مع الموسيقى
جوهرة: اااااااه ( فتحات عينيها فاش طلعات و ضحكات كتشير ليه فرحاانة و ترجع تشوف فولدها بحب )
《 مبروك عليك و على ما درتي يا نفيستنا الغزاالة .. سيدي ربي لي عطاك ا خيتي هاذ الزين لي ما يتبالى .. ا مبرووك فهاذ النهاار واهيا لالة .. ضواات علينا الداار واهيا لالة .. نفيستنا جايا يا الحباب كي القمرة ضوات علينا .. جايبة مولود بين يديها ها الفرحة هلات علينا 》
دوزات دوورتها كيفما تمنااتها و حيدات شهوتها منها و من العرس لي ما دارتش .. واخا هي لي ما بغاتوش فلول لكن فعرس وئام جاها الحنييين للعمارية و بغات تجربها تا هي .. واعدها فالسابع تطلع فيها و وفى بوعدوا ..
كملات و دات ولدها للبيت عند باه و رجعات خرجات عند العيالات جاالسة معاهم و اجواء الفرح بامتيااز .. أما وئام و ابتسام عااطيينها للشطييح لعلك ترضى .. و الحجامة لبنات كيدوروا بسواني دالمشروبات و الحلويات على الجهد .. و الكاميرات كيطيروا فالسما كيوثقوا اللحظات عاد لبنت لي كتاخذ لهم التصااور
وئام:( مشات عند ختها كتغني و نوضاتها تشطح معاها ) زغرتووا يا لبناات .. النفييسة برزااات .. زغرتوا بالهمة .. النفييسة فنة يووويووويووووي
جوهرة: ههههه
ناضت كتشطح معاها بالشوية و بخجل .. حتى قاتلها شي حاجة فوذنيها و خرجات من تماا فاتجاه لبيت
ياسيين:( شاف فيها ) هاذشي بااقي ؟
جوهرة: شوية و نكملوا .. دابا نخرج زكرياء باش نفرقوا عليهم الدراجي ( داك لفانيد لي كيكون ملفوف عرفتوه هه )
هزاتوا عندها و خرجات تال الصالون عطاتها وئام السليلة .. فرقاتها على عشرة دالناس لي كانوا حداها و المصورة كتصورها و الباقي عطات للحجامة تتكلف بيه .. تا تطلقات أغنية و ضااروا عليها كااع بنات العائلة كيشطحوا بشكل داائري
البنات: يا ربي يا ربنا تكبر و تبقى قدنا و تيجي تعيش وسطنا وسط الحبااايب .. تكبر و ترووح المدرسة و تصاحب شلة كويسة و تشوف عيوون أمك ( شيروا لجوهرة لي مبتاسمة بفرحة ) و ابووك فرحاانة بييك
وئام:( قربات منها كتشطح الشرقي الله يعطيك صحيحتك و تحني راسها لعندوا تشوف فيه و تضحك و هي كتقلب فشعرها بهدووء و تغني ) أنا عيزاك تطلع ود مكدع و فعز الشدة تكون أكدع من أيها حد .. صيتك بيسمع و يلعلع .. أخلاق .. ود قوي و رجولة و لا زايك حد
ابتسام:( دخلات حداها و دفعاتها بمؤخرتها جنب .. و بدات تغني بدورها و ملامح وجهها كيتغيروا مع كلامها .. حاطة يديها على جنبها و هازة حاجبها كضحك ) و انا عيزاك تطلع شيييك .. صحبااتك بتمووت فييك ..تهرب من دي و تتبث دي و الكل بيجروا عليك .. تسرح و تبيع حكايات و لا فارقة معاك رناات .. دي بتشكيلك و دي بتحكيلك و انتا مقضيها مزااات
جوهرة:( هزات حاجبها و شافت فيه ) ايييوعا تسمع كلاام لي دوول .. دا عياال شقااوة و أناا مش مسؤوولة.. حيغرقووك و أنا قلبي علييك و تبقى نمرة و يلعبوا بيك ..قال اييه ؟ عيزيناك تتروش
خارجة من وسطهم و هي كتغني و تشطح بيه حتى وصلات لبيتها و خلات موراها الموسيقى و الضحك و البنات مترابطين وحدة موور وحدة كيشطحووا و يغنيوا .. أما الحجاامة راه بداز كيقادوا الطبالي و يجمعوا الناس باش يتحط العشى .. واخا باقي الحال .. باش يطلقوهم بكري و يمشيوا لديورهم و تجي نوبة الرجاال فالفيلا
و تجي نوبة الرجاال فالفيلا لي غيديرولهم الطلبة و يقراو ما تيسر من القرآن الكرييم .. و أكييد غيختموا لهم بالعشى
رحمة:( دخلات لعندهم للبيت و مداتلها ساك و قالت ) هاذي الزرورة لي شدينا انا و الحاجة بلا الكادويات راه ديناهم للطونوبيلات .. مهم ها هي عندك .. لبسي لولدك مزياان باش تخرجوا .. باقي ما كمل ربعيين راه ما مزياانش ليه يبقى تال هاذ الوقت فالزنقة
رحمة: ااه بدات كتخفاف .. وئام راه واقفة بلاصتك ا جوهرة كتسلم عليهم و تعطيهم صوابهم .. نتوما غير توكلوا بحالكم مع التربية
جوهرة: صافي واخا .. خرج اياسيين منين توقف حدا لباب صوني عليا و قطع
ياسيين: تماام !
جمعات كلشي و لبسات عليها هي و ولدها تا صونا عليها و خرجات عندوا .. مساافة الطريق و كانوا وصلوا لدارهم
ياسيين: بلا ما تتسنايني .. غنتعطل معاهم غاالبا .. غير نعسوا ( طبطب عليه بهدووء )
جوهرة: واخا رد بالك ( باستوا فحنكوا و نزلات )
نزلات بالزربة و دخلات لعمارتهم .. بقى متبعها حتى اختفت على أنظااروا عاد تحرك بحاالوا من تما للفيلا
💫💫 يوم جديد 💫💫
فاقت جوهرة كتكسل فبلاصتها براااحة و الجو كيغيم علييه الهدوووء .. ما حساتش براسها تا نعسات و هي كتتسنى فياسيين يرجع !
شافت فجنبها فين نعسات زكرياء و مكالياه بالمخاذ .. لقات بلاصتوا خااوية .. تخطفات من بلاصتها و قالت بصوت مرتفع
جوهرة: ياسيييين جيتي ؟؟ زكرياء معاااك ؟؟
ما كان حتى رد .. وقفات بالخف و خرجات من البيت كتقلب عليهم .. لكن ما كاين حد .. الصمت و الهدوووء .. ما كاين حس لا ياسيين لا ولدهم .. مشات هزات التيليفون كطيير كتعيط عليه .. بعد مدة جاوب
جوهرة: زكرياء معاك ا ياسيين ؟؟ لاش مخرجوووا ؟؟ ( سمعات صووت البكى دياالووا قالب الدنيا و فالبلاصة قلبها تهز من بلاصتوا بالخووف ) مااالووو ؟؟ ااش وااقع ؟؟
ياسيين: صااافي ا جوهرة ها حنا جاايين .. ما كاين والوا بلا ما تخلعي .. شششش ا بابا صااافيي
قطع عليها مخليها كتمشي و تجي فبلاصتها بحال يلا كتوجع و باغى تولد .. ما دازش بزااف حتى كاان تفتح لباب و دخل ياسيين هاز عندوا زكرياء لي صوت بكاه قالب الدنيا و وجهوا مززنك
جوهرة:( طارت عندوا هزاتوا كتشوف فوجهوا و فالدموع لي نازلين ليه و قلبها كيزيد يتقبط عليها ) شششش ا حبيبي شششش .. مالووا ؟؟ علاش كيبكي هاكا ؟؟
ياسيين: بلا ما تحركيه تمشي تعكريه .. حطيه فبلاصتوا و رضعيه على الله يسكت .. ما مالوا واالو .. مشيت ختنتوا
جوهرة:( خرجات فيه عينيها لي سرعاان ما تعمروا بالدمووع و قالت ) بااقي صغييير .. حشوووومة عليييك
دخلاتوا للبيت و حطاتوا بالشوية و هو كيبكي و هي كتبكي معاه .. عطاتوا يرضع و بزز شدها لها و كل شوية يكمش عينيه كيدمع و كيشوف فيها بعويناتوا كأنوا كيشكي عليها
ياسيين:( دخل شافها كتبكي و تنهد جلس حداها ) ا البكااية ! نسكتوك نتي و لا ولدك ؟ هاذشي علاش ما علمتكش عارفك غير يدخلوه غتسخفيلي ..
جوهرة:( بشهقة ) باقي صغيير و لحموا طري مسكيين .. غيكون تقسح بزاااف هئ
ياسيين: ها نتي قلتيها اللهم صغيير و لا حتى يكبر ! هاكا لحموا دغيا غيبرا و يتجمع و ما غيبقاش عاقل عليها .. تبعي ليه غير البومادا مزيان و أيام قلييلة و ها هو سانك سير سانك
جوهرة:( بانلها بدا ينعس بالعيى دالبكى و قالت بأسف ) مسكين غيتقسح بزاااف .. أنا ما نقدرش نقيسليه تماا هئ و الله تا حشوومة عليك .. يدير غير ستة شهوور بعدا
ياسيين:( بهدووء ) فوقما جات تنفع و نتهنااو .. يلا ما تقدريش أنا غندااويه غير ارتاحي و باركة من البكى الله يرضي عليك
جوهرة:( حركات راسها بالايجاب و حطاتوا بالشووووية خايفة تعكروا )
جالسة جوهرة لي ما زادها العمر إلا جماال على حماال و رقة على رقة .. فجردة كلها زهوور و أشجاار مقاابل معاها بيسين كبيير .. حاطة رجل على رجل فكسيوة صيفية و شعرها مظفراه قدامها كل مرة كتلعب فيه و هي كتسمع لوئام لي جالسة حداها و كريشتها مكورة قداامها
جوهرة: و لاهيلا أحسن حاجة درتي هو جيتي عندي نتي و ريم و تونسوني شوية
وئام:( رمات عينيها للجردة تا بانتلها طفلة تقريبا فعمر الخمس سنوات .. بشوورط د الدجيين و سويفيطمة سماطي دالخرووج .. محنية حدا واحد الشجرة و كتلعب فالتراب بيديها و طبطب عليه .. ضحكات و قالت ) داك ريم غتحمق طااسيلتي .. نص عقل لي نكساابووا غادي يفرفر معاها
جوهرة: هههه غير نتي مع الحمل رجع نفسك ضيق و صاافي أما هي كتدوز وقتها عاادي بحالها بحاال كاع ولاد جيلها !
وئام:( تنفسات بهدووء و الهوا نقي كتستنشقوا من الجردة ) كهماااتني .. كطيير مع الطيوور .. قاتلي أنا ما كنعرف وااالوو .. و لي أمها موحمة على المناتفة و الضرب بنتها كي غطلع ؟؟ ( ضحكات ) ههههه و لاهيلا الحماااق مع هاذ البراهش
جوهرة: ايوا الصبر و كاان .. دابا تتهدن ( حطات يديها على كريشة ختها و قالت بسعادة ) الفنوون د خالتوا ما بقى ليه واالو و يشرفنا
وئام: ههه واالوو .. هذا شهري كل مرة نقول ليوم لا غذا .. تا هو شاد معايا الضد ! ( غمزاتها ) و نتي ما عوالة تزيدي واالوو ؟
جوهرة:( تبسمات ) هاذ الساعة ما فبالي واالو .. و لي جات من عند ربي مرحبا بيها ( شافت فيها و كملات ) كنت كنقوول ما نزيد واالو من مور ولادتي الثانية و لكن دابا تشهييت شي بيبي يعمر علينا فالدار .. و ما كرهتش تكون شي بنوتة نخاويها مع زكرياء و عثمان
وئام: علاش لا ! ربي يسهل عليك احبيبتي .. ربي كبيير .. مشى كريم عند ياسيين للأوطيل غيدوزوا على الدراري للمدرسة و يجيوا مجمووعين
جوهرة: و لاهيلا أحسن حاجة درتي .. أكادير ها هي غير حدا مراكش .. مرة مرة ضربي عندنا .. و حتى حنا فينما نلقاو الخطفة ها حنا عندكم .. كنت فلول متخوفة بزااف نبقى بوحدي متوحة فهاذ المدينة و لكن منين جيتوا سكنتوا قراب لينا تا نتوما .. الحمممد لله
وئام:( ضحكات ) كريم ما قدرش يصبر على فراق الفردة دياالوا شعلات فيه العاافية يجي تا هو .. و ديجا كان كيوجد لمشروعوا فأكادير .. جاتوا من الجنة و الناس .. أجي بعدا شي خبار على دارهم ؟؟
جوهرة: ههه واييه غير شد ياسيين المحل فالرباط و دخل معاه الصح و لا يقلب تا هو على السكنة قريب لينا .. علاقتهم زوييينة بزاااف فوق الخوت لهييه .. الله يدومها محبة ( هزات كاس دالما شربات و كملات كلامها ) ضرووري ما كان خاصوا يطلع لهنا .. مشاريعوا كاملين هنا و كاين شي نوع ديال بنادم خبييث خاصوا غير الفرصة فين يضربك تا تنقز .. دارهم بخييير راك عارفة مرة ها هما عندنا و ها حنا عندهم .. ابتسام لي غرقات فداك كاازا
وئام: ايوا بسييف .. كتطلع مشرووعها حتى هي .. كملات فالاقتصاد ياك ؟ ( حركاتلها جوهرة راسها بالايجاب ) شفتي الناس لي كيفكروا بعييد .. حلفات لا تزوجاات و لا دارت شي حاجة حتى تخدم و تكون راسها .. كيتنا حنا
جوهرة:( ضحكات ) واش لي طلعات حااملة مور ثلث شهوور من ولادتها يصلاح لوالديها شي قرااية .. كنتفكر داك ليام لعفووو و صااافي هههه
وئام: ههههه غفلك
جوهرة: واااييه حشمت حتى نقولها لدارهم و دارنا و شحال بكييت على القراية .. تما بصمة عليها تبخرات فالأعاالي كنت غنمووت غير بالفقصة .. و لكن من بعد لقيت احسن حل هو نجلس حدا وليداتي نربيهم .. ياسيين ما مخصصنا من واالوو .. قبل ما نفتح فمي الحاجة كتكون عندي .. يعني المستقبل لي غنوض نكاافح عليه راه اصلا مبني .. لاش غنعذب راسي و نعذبوا معايا هو و وليداتنا ؟ قلة نعاس و نهار كاامل فالزنقة و نزيد بالدار و المقااتلة و عنداك بالاك .. ما بلانش الصراحة ! كن كنت بنت ديال راسي واخا .. اما بولادي و راجلي لا ! و يلا جينا نهضروا على الوعي .. راه عمروا كاان بالقرايا .. كتلقايه دكتوور و المنصب و الشخصية و كدا و فاش تجلسي للأرض تهضري معاه و تتناقشي كتلقاي دمااغوا زيييروا لا يفقه شيئا و منهم لي متعصبيين لأقصى حد .. أكييد ماشي كلشي ..
وئام: بصح ! كاين لي كتلقاها عمرها دخلات للمدرسة و فاش تهضري معاها تحنت عشرة .. تبقاي غير تشوفي فيها و فعقليتها و لبااقتها فالهضرة
جوهرة: فواالا ! هاذشي لي كنهضر علييه .. و يلا جينا للواقع أغلب الشباب كيقراو باش يفاليديوا لا غير .. و غير يكمل تمشي تسوليه على شي حاجة كتلقى دماغوا ملحووس أصلا ( بهدووء ) أنا فالدار و كل مرة كنقرا كتاب يفقهني .. كندخل لغوغل و نبحث و نشوف العالم شنو واقع فيه .. الفيس براسوا فيه العجب المعجب خاصك غير تعرف فين تبحث .. و تبعد على الجروبات لي عاامرين تفاااهة ما ينفعووك ما يضرووك مركبيين فيك غير الوسواس و الفقصة على واالوو
ريم:( جات كتجري عندهم يديها عامرين ترااب و شعرها الأسود طايح على وجهها معنكشها .. بنووتة وجهها كلوا براااءة خاصة عيوونها العسلية الصااافية .. لكن أفعاالها د الجنووون ) ماما فيا زوع
جوهرة:( تبسمات و ناضت معاهم ) نيت ما بقالهم والو و يجيوا .. نلبس عليا و نوجد كسكرووط
دخلوا مع باب الجردة و بانوا الصالونات قبالتهم مفتووحين على بعضياتهم مجهزيين آخر تجهييز و مقابل معاهم درووج كيطلعوا للفوق و دوزة فالجنب .. مشات وئام مع بنتها للدوش غسلاتلها و خرجات قابطاها .. لقات جوهرة ناازلة لابسة قميص ناازل مرخووفة .. و دايرة شاال فعنقها خفييف باش فاش يدخلوا تلبسوا
ريم:( شافت واحد الجلسة فجنب معزولة بووحدها فيها كرسي لا غير .. عاطي وجهوا للحيط و قالت بفضول ) حالتوا شنو هذا ؟
جوهرة:( شافت فين نعتاتلها و قالت بهدووء ) لي كيدير لي بيتيز لماماه و ما كيسمعش الهضرة كنجلسوه تما و كنتخاصموا معاه ( ضحكات و نزلات عندها خربقاتلها شعرها ) نتي زوينة ما ديريش البسالة ياك ؟
مشات معاها و دارتلها الرسوم و خلاتها عاد مشات للكوزينة مع ختها لي كتسول فيها
جوهرة: راه بصح معاك كنهضر ! شفتي ياسيين تربيتوا فشششكل و عمري شفت شي حد بحاالوا الصراحة داك الغربة لي تغرب نفعاتوا بزاااف .. بحال زماان فاش كانت الحضارة د العرب كيتضرب ليها المثل و كيجيوا الكور ياخذوا من عندنا كل ما كينفعهم و يلوحوا جنب لي ما صالحش ليهم بلا ما يتأثروا بيه .. هاكا تمااما دار ياسيين
وئام: و أحسن حااجة هي هاذي !
جوهرة: الصراحة تتقال عااوني بزااااف فوقما تتصوري فيهم واخا كنت خاايفة و كنقول ما عرفتش كي غتكون تربيتوا و تعاملوا مع الدراري صغار .. و لكن صدمني ( حبسات من لي كدير و قالت ) ست سنين دابا و عمروا فحياااتووا حط يدييه على وااحد فيهم .. ما كيضرب ما كيغوت ما وااالوو ..
وئام:( حطات يديها على حنكها ) اييه و شكيدير ؟؟ عطينا سر المهنة ! راه بقاالي شوية نربطها من رجليها و نتهنى .. شهماااتني
جوهرة: هههههه كيتصرف معاهم على أساس أنهم ناس كباار .. ماشي صغاار .. عاطي لكل واحد وقتوا الكااافي .. كيسمع لهم و يناقش معاهم و يخليهم يخرجوا كااع لي فعقلهم و قلبهم و يصحح لهم الفكرة بهدووء .. عمرنا كذبنا عليهم نهااائيا .. فاش الواحد كياخذ الموضوع بسلاسة و كيوصلوا بطريقة طبيعية بلا تضخيم حتى دراري الصغار كيجيهم عاادي .. عكس يلا قلتيها بلهجة دهشة و خوف و تضخييم .. و أكييد بحالهم بحال أي دراري فلاج ديالهم كيديروا حقهم من الصداع و الدباز .. و داك الكرسي تما هو العقوبة ديالهم .. لي دار شي حاجة خايبة و هضرنا معاه و عاودها كنجلسوه تما ما يتحركش .. عشرة دقائق .. ربع ساعة .. نص و لا حتى ساعة على حساب الفعلة و ما ينوض من تما حتى يقولنا فاش غلط ؟ و شنو الحاجة لي خايبة ففعلتوا ! و يعتااذر عاد نتصالحوا و نجيبوه حدانا
وئام: و علاش ما يعلمش كريم معااه علاااش ( تنهدات ) شهمني أنا داك الرااجل كيشوفها قااالبة الدنيا و كيزيد يشجعها
جوهرة:( ضحكات ) ههه راه حتى حنا عاطيينهم حريتهم .. و ماشي أي حاجة كنقطوا عليها بستيلوا احمر .. إلا للضرورة ( نعتات لها فالحيط معلقة واحد الجدول من ورق ) هاذي نهار كتعمر بلان عاد كيتفاهم معاهم .. كاينين نجيمات فالذهبي و وحدين فالأبيض .. الذهبي راها بون بوان .. يعني دار شي حاجة لي زويينة و يستاهل عليها المكافأة و موفيز بوان ديال الابيض .. كل واحد و صفوا .. هاكا هما كيبداو يتساابقوا شكون يدير شي حاجة زوينة باش تكون عندوا مكافأة لي فرييمن أنا فهاذ العمر و كتعجبني حرااك هما هههه
وئام: و ما كيدابزوش لكم على هاذ القضية ؟ و لا واحد يبدا يشكم بالثاني بلعاني !
جوهرة: نوو ! فلول كانت ااه .. و باش نتفاداو هاذ القضية و واحد ما يكره الثاني .. لي شكم بخوه عندوا نجمة بيضة .. على عكس يلا عاونوا و وقف معاه ليه ذهبية .. و هاكا تعلموا كيفاش واحد فيهم يعاون الثاني و يكون بئر أسراروا
جوهرة: تمااما و حتى المدرسة معاونانا بزااف و ماشية معاهم تقريبا بنفس السيسطيم
وئام: تانا بغيت ندخلها لمدرسة بسيسطام د فرنسا بحال دولادكم .. و باقي كنقلب على شي وحدة تكون فالمستوى
جوهرة: وااييه الواحد كيعطي كيعطي فلوسوا .. اللهم على شي حاجة لي بصح كتستاااهل !
قاطع كلامهم صووت طونوبيلات لي تسمعوا حدا الباب مجهدين .. عرفوهم وصلوا .. هزات جوهرة شالها قاداتوا فوق راسها .. و خرجات بالخف للباب فتحات لهم .. بان مقابل معاها ياسيين بابتسامتوا المعتاادة .. ما بدل فيه الزماان واالو من غير الشيب لي متسلل فشعروا و لحيتوا
ياسيين:( غمزها و قرب باسها فحنكها و همسلها فوذنيها ) ما عندي ما نتساالك .. الوقت دييما عندك مضبوووط
جوهرة:( ضحكات ) ههه و شنوو ( شافت فكريم و تبسمات ) خويا كريم .. مرحبا بييك عندنا
كريم: الله يكبر بيك اختي
زكرياء و عثمان : بون سواغ مامون
جوهرة:( تحنات باستهم ) بونسواغ العميرات ديالي
وئام:( عاد لحقات سلمات على ياسيين و دازت عند كريم باستوا فحنكوا )
كريم:( عنقها جنب و حط يديه على كريشتها ) كي بقى السبع ديالنا ؟؟ عذبك هاذ العشية ؟
وئام: ههه لا مزياان
ياسيين: الله يفكك على خيير دخلوا جلسوا .. ما تحتاجوش عراضة زعما ؟؟
شاف فولادوا لي مشاو للخزانة لي حدا الباب حيدوا سبرديلاتهم و حطهم فبلايصهم و جبدوا الصنادل ديال الدار
جوهرة: زكرياء .. عثمان .. يالاه ديريكت للدوش غسلوا يديكم و بدلوا حوايجكم و أجييوا ديروا الكووطااي
---: اوكي ماما
جلسوا مجمووعين فالصالون و حداهم السينية د القهوة و الطبلة عاامرة بالخيرات على الاشكال و الأنواع .. رجعوا زكرياء و عثمان مبدلين حوايجهم بملابس ديال الدار و جلسوا حدا ماماهم بأدب .. كباتلهم الحليب و عطاتهم كااع لي بغاو و بقاو هما كيتحذثوا و يتناقشوا بيناتهم
زكرياء و عثمان بجووج شبهوا فالملامح لياسيين تمااما واخذيين من عند جوهرة العينين و بيوضيتها و قلبها الصافي لا غير
دوزوا معاهم العشية كااملة حتى وذن المغرب و بدا كريم كينحنح عليهم يتكعدوا
ياسيين: بقاو باتوا مالك ا صاحبي ! ترجع فهاذ ليل ؟؟
كريم: المهم شفناكم ( حط يديه على فخض بنتوا مزير عليها ) برااكة هاذ الهرابة بطلنا ليها ليوم .. نزيدوا حتى غذا ؟
ياسيين: ماشي مشكل هي هاذيك تجي مع الويكاند .. ندوزوه اونسومبل .. نطلعوا لأوريكا غتكون زااهية فهاذ الوقت
وئام:( شافت فيه بترجي ) خليينا عافاك .. باااقي ما شبعت من ختي و وليداتها .. أصلا ريم ما بقالها واالوو و تسالي القراية
ريم: ااه عافاك ا بابا
ياسيين:( ضحك ) صافي الحكوومة حكماات .. جلس ها حنا مونسيين .. نلعبوا شي طرح ديال البارتشي هو هذااك
كريم: هههه اييه ا سيدي هي لولة
خلاتهم جوهرة مجمعين و نوضات ولادها .. كل واحد ببيتوا .. تعمدوا ما يشركوهمش باش كلها يتصرف فحاجتوا الخاصة بارتيااح و الأهم يبنيوا شخصيتهم الخااصة بيهم .. كلها و الأثاث ديال بيتوا كي دااير .. مشات مع زكرياء هو لول جبداتلوا دفاتروا و كاع لي يحتاج و جلساتوا فوق البيروا الصغير ديالوا و هي حداه كتقرا الملاحظات د الأساتذة و التمارين لي عطاوهم
زكرياء:( رمش فيها بعويناتوا و قال ) مامي
جوهرة:( بابتسامة ) نعام ا حبقلب مامي
زكرياء:( تبسم بسعاااادة و تعلق فيها بايسهل بقووووة فحنكها .. كيتسطى و يتوفى عليها فكل مرة كتقولوا حبقلبي ههه ) وكرياء كيبغييييك بزاااااف
جوهرة:( ضحكات معنقاه عندها ) حتى جوهرة كتبغيييك كثاااار من بزااااااف
زكرياء: لاميطخيس قاتلي نقولكم تجييوا غذا نتي و بابا للإدارة بغات تهضر معاكم هي و المديرة عليا ( رمش فعينيه .. جامع شنيفاتوا ) و لكن أنا ما درت والو ا مامي و الله
جوهرة:( ضحكاتها الرياكسون ديالوا .. خربقاتلوا فشعروا و قالت ) أصلا أنا ولدي زويين و ما كيدير واالو .. صافي دابا نعلم باباك و نمشيوا عندهم ( باستوا فحنكوا ) يالاه بدا تخرج تمارينك لي معلمة ليك عليهم هنا .. و يلا ما عرفتيش شي حااجة أنا غيير حداك هنا .. عيطلي نشرحلك صافي
زكرياء: اووكي مامي
سدات عليه الباب و مشات لعند عثمان يالاه فتحات عليه الباب و هو يقفز شاف فيها كيفرنس
عثمان: مااماا هيهي ( ناض من فوق الفراش نقز لجهة الثانية )
جوهرة:( شدات على راسها ) واش نتا فينما ما تلقى ما دير تبدا تفكك فطابليطاتك ؟؟ ( سدات لباب و قربات من الناموسية كتشوف الطابليط مفكك جابدلوا مساارنووا ) هذا لخااامس هاذ السيمانة ! واش حنا غنبقاو غير نشرييوا و نتا تفكك ؟؟
عثمان:( ببراءة ) مكنعرفس نزمعهم
جوهرة: ما كتعرفش تجمعهم ؟ كتعرف غير تفككهم ياك ؟؟ دووز دابا تصوب لي دوفوار ديالك هاذشي نتفاهموا عليه من بعد .. يالاه دوز جلس نشووف شنو عطاتك لاميطخيس
عثمان:( جلس فكرسيه فوق البيروا و هي حداه .. جبداتلوا دفتاروا و هزات قلم دالرصاص كتعلموا يكتب الحروف و الجمل ) نعاود فوكهم ياك ؟
جوهرة: ااه .. عاود فوق هاذ الجووج و بالشوية ما عندناش باش نمسحووا ( بقات حاضية معاه طلع يديك نزلها تا كمل و قالت بابتساامة ) براااافوو على ولدي المجتهد .. دابا غتكتبها هنا بووحدك .. يالاه وريني نشووف
بقات غاذية من لبيت لبيت عندهم كتشوفهم شنو داروا و تشرحلهم شادة معاهم فووق الخااطر لهييه .. تا كملوا و باسووها بجووج و هبطوا فدرووج كيجيريوا و يعيطوا على باباهم .. غير شافوه طاروا عليه معنقينوا كيتفششوا .. و وئام جالسة متكية على كتف كريم عياات .. اما هو موقف ريم بين رجليه و كيلعب معاها بهدووء
ياسيين:( باسهم فحناكهم و قال ) يالاه سيروا توضاو و أجيوا عندي نصليوا المغرب .. تال لويكاند و ناخذلكم لي بغيتوا .. يالاه
وقفوا بالشوية عليهم و مشاو للحمام يتوضاو كيفما معلميينهم من نهار بدااو يفهموا .. أما هو شاف فريم و قال
ياسيين: ريم كتعرفي تتوضاي ياك ؟
ريم: ااه تنعرف !
ياسيين: يالاه نوضي للدوش لي هنا .. توضاي و أجي غنصليوا جمااعة
كريم:( ضربها لفخضها بالشوية ) سيري
ضار ياسيين يمين شماال و ناض للكوزينة كيقلب على جوهرتوا .. لقاها مشغوولة كتوجد فالعشا .. ما حسات بيه غير هز يديه و نزل عليها لمؤخرتها حتى قفزات من بلاصتها و شافت فيه مبلقة عينيها
جوهرة: وااش نتا ما غيهديكش الله يا هاذ الرااجل ( حطات يديها على الضربة كتحكها )
ياسيين:( هز حاجبوا طلعها و هبطها عاض على شنافتوا ) اهيتا واش هادشي ديال مولانا ولا صيدلية لي حدانا ؟؟
جوهرة:( ضحكات و قالت ) ديال دناب دعموا الحاج
ياسيين:( قهقه بالجهد تا طارت عليه شداتلوا فموا .. عضها بالشوية حتى زولات يديها و قرب من جهة عنقها ) اححح على عموا الحااج و شحال توحش شرييكة حيااتوا لي كيتفااهم معاها فالسراء و الضرااء
جوهرة: هههههه و العزييز على موو عمروا يتخص ! ااش بغيتي دابا غيسمعنا شي حد ؟
ياسيين:( باسها تا طبعها و طلقها ) نتي لي ااش بغيتي عندي ! نعاود الوضو على سعدي و وعدي !
جوهرة: هههه تسنااوني نجي نصلي معاكم .. صبار غير نشعل على الطااجين
ياسيين: علاه أنا دوزلي شي حاجة بلا بيك ؟ يالاه فكي راسك ها حنا كنتسنااو
مزااليين كيهضروا تسمع صووت الغوااات ديال دراري .. شافت فيه و شاف فيها و طاروا كيجريوا .. ياسيين سابقها و ماشي نييشاان للدوش .. فتحوا عليهم .. لقى زكرياء طايح للأرض و فوقوا ريم ناتفاه و مع الحلة مع عثمان تزدح عليه و مشى لرجليها لعرياانة و حتى عليها بعضة ديال الغذااااايذ تا سرسرات لربي لي خلقها و عاد بعد كينهج
عثمان: نورييك ضربي خوويا .. سيري بحاالك عليينا
جوهرة:( تصدمات فالمنظر ديالهم .. الحمام كلووا فاازك و ريم كتبكي و واحد الحنك مصور فيه صبعاان دواحد فولادها ) شنووو هاااذشي اويييلي !!
وئام:( جاية كتخلف و كريم شاد فيها طلات عليهم و قالت ) صاافي نوضتيها معاهم ؟؟ هما لي بقاااولك ما قلبتيهاش معاهم صبااااط ( شدات راسها ) ياا ربي شغندير مع هاذ البنت !
كريم:( شافها كتبكي .. عزات عليه و قال بحنان ) مالك ا بابا ؟؟ شنوو وقع ؟؟
وئام:( بغات طير عليه ) زييد ملس علييها و سكتها .. واش جلسات معاهم عشرة دقائق قلبات الدنيا و باقي تتسول مااالها ؟؟
جوهرة:( شافت فياسيين لي من قبيلة و هو سااكت غير كيشووف تا بانلها غمض عينيه كيسووط و قالت ) صافي ا وئام .. باقي ما عرفنا شنوو واقع
ياسيين:( فتح عينيه محمر فيهم بثلاثة و هز صبعوا فاتجاه الباب ) تهزوا خرجوا من هنا واحد واحد و تسناوني فالصالون نتفااهموا مزيااان
ريم:( شافت فباها كتدمع و تمسح حنكها ) بابا
ياسيين: هضرت وااقيلة !! ياااالاااه !!
حناو راسهم الدراري و خرجوا قدامهم عاد تبعاتهم ريم من لوور .. و تبعوهم البقية باغيين يفهموا شنوو وقع !
واقفين بثلاثة مستفيين و ياسيين و كريم مربعين يديهم كيشووفوا فيهم .. أما جوهرة و وئام راه شدوا لأرض كيتسنااو يفهموا ااش واقع !
ياسيين: زكرياء ! ( هز عينيه فيه و هو يقول ) شنو وقع لداخل فالدوش ؟ سيفطتكم تتوضاو ماشي تتداابزوا يااك ؟
زكرياء:( حرك راسوا بالايجاب و قال بصدق ) كنت واقف أنا و عثمان تنعمروا السطيلة باش نتوضااو و جات هي فتحات علينا الباب و مشات جرات السطل عندها فاش قلتلها لا ديالي ديري الصف معانا .. ما بغاتش و بقينا كنتجاابدوا حتى تهرق فالأرض و رجعت خديتوا نعمروا و دفعاتني للأرض .. و طاحت عليا ناتفاني من شعري هاكا بالجههد ( كيوريه بيدوا هه ) و ضربتها أنا لحنكها باش تطلق مني و صافي
ياسيين:( حرك راسوا بالايجاب ) ايييه ! و نتا اسي عثمان ؟؟
عثمان:( هز عويناتوا فيه و قال ببراااءة و هدووء ) هي ضرباتلي خوويا !! نخليها تضربوا ؟؟
مشااو زكرياء و عثمان داروا لي قال لهم بلا ما يزييدوا معاه و بقات ريم كترمش فيه عينيها .. تا هو ما هضرش معاها .. هضر مع ولادوا لااا غيير ..
وئام: و نتي شكتسنااي ؟؟ يالاه تبعييهم !!
ريم: باابااا
كريم:( مد يديه جرها حداهم و قال ) يالاه نتفااهمووا على هااذ البساالة ! و حتى نتي داك الطابليط ما بقيتش شااريوا
ياسيين:( مشى للحمام جمعوا و توضى و خرج كيشوف فيهم بنص عين عاد هضر مع البقية ) يالاه نصلييوا
تسناهم لي غيتوضى و وقف فالمقدمة قلم الصلاة بيهم و بصوتوا القوي لي عام على عاام اتقانوا للتجويد و لقواعدوا كيتحسن للأفضل .. كملوا و مشاو لبنات للكوزينة فحيين الرجال جاالسيين مجمعين و ياسيين حاضيهم فينما يبان ليه شي واحد حط رجليه كينبهوا تا بانوا ليه عيااو و ناض عندهم
ياسيين: آخر مرة يوقع بحال هاذشي هنا ! نتوما بحال الخووت حشوومة هاذشي كاااع ! ( شاف فريم ) لقيتيهم دايرين النوبة شدي نوبتك معاهم .. ما نتي حسن منهم ما هما ( لزكرياء ) و نتا خذاتلك نوبتك و ضرباتك أجي عندي ما ديرش يديك ( شاف أخييرا فعثمان لي مبلق عينيه فيه كيرمش .. جاتوا الضحكة بزز شدها و قال ) نتا غير بلا ما نهضر .. دابا تصالحوا قداامي .. يالاه بوسوا بعضياتكم و تسامحوا
بقى حاضيهم حتى تسالموا بالحناك و طلبوا السماحة من بعضياتهم و قال
ياسيين: مزياان ! دوزوا تصلييوا و أجييوا جلسوا حدايا
خلاهم و مشى للكوزينة يشوف جوهرة واش محتاجاه يعاونها فشي حاجة .. مع الدخلة سمع وئام كتهضر
---: دابا أوريكا بااح ؟؟ اييه هما تعااقبوا و حنا ماالنا !! اختي أنا بغييت نمشي هااء
ياسيين:( نحنح و قال بهدووء ) بغيتوا تمشيوا غنمشييوا .. هما لي لا ما كاين خرووج سالينا
جوهرة:( شافت فيه و ضحكات ) نخليوهم بثلاثة هنا باش نرجعوا نلقااو السقف رااايب !!
ياسيين:( مسح على وجهوا ) هههه لا حول و لا قوة إلا بالله .. غنخليهم فالأوطيل مع شي وحدة تما تردلهم البال
وئام: و زعما ثقة ؟
جوهرة:( ضارت كتكمل شغالها ) سي ! شحال من مرة كنخليوهم معاهم يلا كان عندنا شي شغال و ما عندنا كي نديرولهم !
جوهرة:( قربات منوا و قالت بلطف ) زعما ما تصالحوش و نخرجوهم كاملين ؟ من زماان ما خرجوا فوجوا حتى هما مساكن ( رمات عينيها لبرى ما بانلها حد و قربات باستوا بالخطفة ) المساامحة .. راها هي لي جبدااتهم
ياسيين:( ضحك و مد يديه زيرها عندوا ) شنوو دايا كترشيني ا مدام و لا غير جابلي الله ؟
جوهرة:( عضات على شنافتها ) فيما يرضي الله العمر
ياسيين:( ضحك و هز زيتونة موراها كلاها و قال ) غنشووف يلا ما داروا واالوا فهاذ اليوماين و قنعوني بلي يستاهلوا نسمح ليهم انديرها ( غمزها )
جوهرة: صافي كلشي وااجد .. خاصنا غير نحطوا ( تفكرات ) ااه قبل ما ننسى .. المدرسة عيطولنا على زكرياء بغاونا فشي موضوع فالادارة قالك
ياسيين:( حرك راسوا باهتمام) اوك غذا نمشيوا نشوفوا
صبح الصباح فاقت جوهرة هي لولة بقات شحاال سادة عليها فالحمام و عاد خرجات عند ياسيين بملامح جاامدة .. فيقااتوا و خلاتوا يفبق عثمان و زكرياء و ندللت هي توجد لهم السناك ديالهم و الفطوور .. فطروهم و خرجوا يوصلوهم للمدرسة و هي هاذيك يدوزوا للإدارة .. أما البقية كانوا بااقيين نااعسيين ..
وصلوا للمدرسة و دخلوا كل واحد للكلاس ديالوا تا تأكدوا من أنهم دخلوا و بخيير عاد قلبوا الطريق للإدارة .. كان راجل فرنسي كبير فالعمر و المساعدة ديالوا هي زوجة ديالوا .. سلموا عليه و جلسوا كيتحذثوا بهدووء و كيسولوه على سلوكهم داخل المؤسسة و على نقطهم كي دايرين .. و كلمة تجبد كلمة حتى وصلوا لسبب لاش طلبوهم .. نحنح المدير و قال بهدووء باللغة الفرنسية
----: كيفما كتعرفوا مدرستنا عندها منهجية خاااصة بييها غير كل المداارس الثاانية .. كنتميزوا على الكل بأننا كنحثوا مواهبهم و كنلعبوا على الأوثار بجوج .. القرايا و المواهب .. لي كيتزادوا معانا و حنا صغاااار
ياسيين:( حرك راسوا بالاييجاب ) بالفعل ! و هاذشي لي مخليني مطمن على ولادي و ثايق كل الثقة فمجهوداتكم الأكاديمية
----: شكرا مستر ياسيين .. الموضوع و ما فيه هو أنا و الاساتذة ديال زكرياء لاحظنا فيه واحد الخاصية لي نقدر نقولكم كتوقع فواحد فالمئة .. يعني فئة قلييييلة و كتتزااد معاهم
ياسيين:( شابك يديه و قال باهتمام ) لي هي ؟
---: انعيط عليه و تفهمووا كلشي
بعد مدة دخل زكرياء و سلم بأدب و وقف عند ياسيين كيشوف فيهم بهدووء حتى قال المديير
---: غنسولك و جاوبني ا زكرياء صافي ؟ ( حرك راسوا بالايجاب و بدا كلاموا ) 45 ضرب 87 كم تساوي ؟
زكرياء:( بهدوء رد ) 3915
ياسيينو جوهرة :( شافوا فيه باستغرااب )
---:( دارها فكاليكيلاطخيس و طلعات نفس الرقم لي قال .. وراها لهم و قال بسؤال للابن مرة أخرى ) 46 ضرب 12 ضرب 580 ضرب 96 كم تساوي ؟ ( كيهضر و يطابي فنفس الوقت )
زكرياء:( سكت جوج ثواني بالضبط و قال )30735360
----: بالضبط ! صافي رجع لقسمك أولدي
خرج زكرياء و خلاهم مووراه مستغربين ز متفاجئيين لأنهم عمرهم لااحظووها نهااائيا .. شاف فيهم و قال
---: زكرياء من الناس لي عندهم هاذ الموهبة من الصغر .. هبة من عند الله نقدروا نقولوا .. كان ضروري نعلمكم .. لأن الموضوع ما يتسكتش عليه .. لازم تنحتوا ليه هاذ الموهبة الربااانية ( هز واحد الورقة مكتوبة و مدلها لياسيين ) من دابا كاينة مساابقة للنوع لي بحال زكرياء .. و لي تأهل فيهم غينتاقل للولايات المتحدة الأمريكية للاقصائيات .. و فحالة هو لي تأهل آفااق كبييييرة غتفتح فوجهوا .. ما نصحكمش تضيعووه .. و بدورنا غنعانوه بحصص مكثفة من عند أساتذة الحسااب الذهني
ياسيين:( حنى راسوا كيقرا فيها باهتماام حتى كمل و قال ) اووك مستر جاك .. شكرا بزاااف على المعلوومة .. اكييد ما غنضيعلوش موهبتوا و غنقوموا معاه بلازم
---: و حنا مستااعدين نقدموا لكم المساعدات اللازمة ( وقف و مد يديه لياسيين سلم عليه و شاف فجوهرة مدلها يديه )
جوهرة:( تحرجاات تا تزنكات و قالت بأدب ) شكرا امستر جاك .. حنا دورنا فالمنزل و نتوما فالمدرسة و هاكا غنقدروا نجحوا فتربيتهم
---:( فهم راسوا و جمع يديه و رد )أكييد مادام بنمسعوود و فرصة سعييدة أنك شرفتينا .. دائما كنت كنتمنى نعرف اللون الغرييب و الفاااتن فعيون أبنائكم و السر موراه و دابا عرفت !
جوهرة:( شافت فياسيين لي تزنك عروقوا بغاو يخرجوا عليه .. مدات يديه ذرعاتوا و قالت بهدوء ) السر كيكمن فالله عز و جل فقط فرصة سعييدة ! ياسيين مشيينا ؟
ياسيين: ياالاه ! ( خرجوا و هو كينكر و يعيب فيه ) عاااد عرفت السر فلوون عينين ولاادك ( قلب عينيه ) بقاالوا غير يقوولك طحت مغرووم فعينيك ا مداام .. و لاهيلا ! آخر مرة نبقى نجييبك لهنا !! ما فهمتش أصلا لاش جيتي ؟؟
جوهرة:( شادة الضحكة بزز ) مسكيين ما نوى فيها وااالو صافي
ياسيين:( ركبوا فالطونوبيل بقى سااااكت حتى وقف فالسطووب و قال ) جوهرة !! ما تديريش النقااب !! ( غمض عينيه و رجع فتحهم كيسووط ) و هاااذشي لي بقالنا ما درناااهش
جوهرة:( طاحت على كتافوا كضحك ) هههههه أوييلي حمااقيتي نتاا ( ببطئ هزات يديه و حطاتها على كرشها .. فوق رحمها بشوية و قالت ) نمشييوا لطبييب نشووفوا الخنفووشة لي غتتزااد فشجرة العاائلة
ياسيين:( شاف فيها بدهشة .. ما قدرش يهضر .. مدة و هو غير كيرمش فعينيه عاد قال بابتساامة ) حاااملة ؟؟ حاااملة ؟؟
جوهرة:( بابتسامة حركات راسها بالايجاب ) كنت شااكة و فالصباح درت الطيسط و طلعلي بووزيتيف .. خاصنا نمشييوا نتأكدووا دابا ( الله يرزقكم حتى نتوما الذرية الصالحة و يحفظ وليدااتكم )
ياسيين:( ضحك و مد يديه عنقها بقووووة ) أخيييييرا
جوهرة: هههههه فزكرياء و عثمان كنت حاااسة بلي درااري و دايا عندي إحسااس قوي بلي بنووتة غزييولة غتشرفنا
ياسيين:( باسها بالجهد و تحرك من بعد ما قوى الكلاكسوون عليه ) أحسن جووج دالأخباار صبحت علييهم هااذ النهااار
جوهرة: يالاه نمشييوا للطبيبة نتأكدوا بعدا ( انطالقوا فحال سبيلهم مرة منااقشيين مرة ضاحكين و مقشبيين ) دابا على هاذ الخبار الزويينة غتسمح لدراري و نطلعوا كااملين لأوريكا ياك ؟
ياسيين:( حرك راسوا بالايجاب بابتساامة )
جوهرة: خاصك تعيط على المدرب ديالهم تعلموا بلي ما غيجييوش هاذ الويكااند للاصال
ياسيين: ان شاء الله ( فتح لاسانتير ) يالاه مشيينا !
نزلوا بجووج و دخلوا للعماارة مشاابكيين يدييهم و حبهم كيتجدد كل مرة .. كان ليها الأخ و الحبيب .. الأب و السند فوقت الضعف و القوة .. كان كذلك الأستاذ و المرشد لي بدل شحاال من حاجة فحياتها و علمها معنى الحب الحقيقي .. و كانت ليه نعمة الزوجة و الأم و الحبيبة و الصديقة و بئر الأسراار .. بجووج بنااو عشهم درجة درجة بالحب و التفاهم و الاحترام .. و الانسان لي ما كانت كتعرف فشخصيتوا و فنفسوا حتى حاجة .. رجع في يومنا هذا كل شيئ بالنسبة ليها .. و هي كذلك رجعاات الهواا لي كيستنشقوا و ما يقدرش يفرط فيه
جوهرة:(جالسين شاديين نوبتهم و هي ساااهية فيه بكل حب و فنفسها كتردد ) سأبقى لك الحبيبةُ ، الأُخت ، الصديقة ، الروح ، والنّبض ،سأحتويكِ، وأحتضنكِ ، وسنعيش الأيام سويّاً ، بِحُزنِھا قَبل فَرحِھا ، سأبكي مِن دُموعِك ، وسأَبتَسِم مِن ضِحكتك ، سأَكون لكِ المَلاذ حين تَضطَّرِب الأجواء ، مَهمَا كَان حجم الصعوبات ، أعِدُكِ بأن أبقى بقُربِك ، إلى أن يحتويني التُراب .💚
《 في حضن قرة عيني جالسة و في عيوني بريق لامع يعكس السعادة و الهناء...أبتسم لحظة مرت ذكرى تعارفنا في مطعم شعبي..حبنا رواية لن تنتهي عنوانها #النقرة_الصافية .. عشت حياة لم تكن على الخاطر فسبحان من رزقني إياه،الرزق أنواع و كان رزقي أنا على هيئة بشر من من لحم و دم رجل متميز بصفاته حنون بطبعه شهم بتعامله مساند في كل وقت و حين زوج محب رجل صادق و واضح و أنا بالمثل كنت له الأنثى المحتشمة،الزوجة المخلصة الإبنة المدللة إلتقينا بطباع و أفكار و تربية مختلفة كلانا عن الآخر و تحت سقف الزوجية تلاحمنا بالروح و الجسد و بعد العشرة توافقنا بأفكارنا و شرارة عشقنا تزداد يوما بعد ...
أعشقه بكل تفاصيله...
أعشقها بكل تفاصيلها...
"و في النهاية من سابع المستحيلات
أن يذهب رزقك الذي كتبه الله لك لغيرك ف إهدأ..و إطمئن..لا تحسد..لا تحقد..و عش بقلب سعيد،و نية صافية،و كن مع الله يكن معك،ليكن في الله ظن لا يخيب 》
النهااااية♥
ما سخيتش بيكم لكن لكل بداية نهاية غنتوحشكم بزااااف ♥ رمضان مبارك سعيد مسبقا الله يدخلوا عليكم بالصحة و السلامة و رفع الوباء يا رب دمتم في رعاية الله
النقرة الصافية الجزء 15 والأخير
محتوى القصة
التنقل بين الأجزاء