زينب:( تنهدات و دوزات صبعها بالشوية على بشرة ولدها لي ناعس حداها ) تخنق مسكين ( نزلوا دموعها و كملات بصوت مرعد ) خفت عليه بزاااف اياسيين .. شفتوا زرااق حدايا و أنا ما عارفة ما نديرليه .. كنت غنمووت بلاصتوا
ياسيين:( تنهد ) و دابا شوية ؟ شنو قالكم الطبيب ؟
زينب: ااه مزيان ( تحنات باستوا ) الحبيب د ماماه .. ما قالنا والو .. دارولوا الأوكسجين و الاسعافات .. و بقينا معاهم نهار كامل كيسيفطونا من واحد لثاني .. يالاه دخلت دابا لداري .. و غذا غنرجع عاود يديروا شي تحاليل
ياسيين: راك فالدار و لا عند حماتك ؟
زينب: فداري
ياسيين: واخا العشية مور الفطور و أنا معاك .. ارتاحي لك شوية و ما تهزي هم .. ربي مصوبها عندوا
زينب: و نعمة بالله .. ااه بعدا نسيت .. وصلات ماما للدار ؟ و لا باقي ؟
ياسيين: مم وصلات .. كانت معاك !
زينب: وااييه مسكينة غير وصلت للطبيب أنا و خليل عيطتلها جات عندي كطير .. الله يسمحلنا من الواليدين و صافي .. كن ما كانتش معايا يضربوني الحيووط
قطع معاها و دخل للكوزينة جبد كارطونة دالحليب سخن كاس و زاد معاه معيلقة دالعسل .. حركوا مزيان و طلع عند جوهرة لي كانت بدلات عليها و تخشات فبلاصتها كتفرج فالتلفزة .. شافتوا دخل و تقادات فبلاصتها .. مدلها الكاس و حط يديه على كرشها حركها بحنان و عينيه فعينيها
جوهرة:( طلعات معاها الريحة خنقاتها .. مداتلوا الكاس و قالت ) لا لا مزيانة بلاش
ياسيين:( هزوا و قرب عندها و مد يديه يشربها ) يالاه شربيه يسخنك شوية ( حركات جوهرة راسها بلا .. و قال هو بإصرار ) شربي بلا بسالة
تنهدات و غمضات عينيها كتشري فيه بزز .. تا كملاتوا و مداتوا ليه .. يالاه جا يحط الكاس .. كانت دفعاتوا من قدامها .. و مشات للدوش كطير حاطة يديها على فمها .. خلعاتوا من النوضة لي دارت تبعها بالزربة لقاها متكية على لاشاص كتكح بالجههد و الدمووع ناازلينلها من عينيها .. حطات جووفها كامل تما و مع ما واكلة واالو راه الدنيا بدات تدور بيها .. شللات فمها و خلاتوا كيغسلها وجها و يفزكلها عنقها .. حتى ارتاحت و خرجات تكات فبلاصتها و هو واقف على راسها كيشوف فحالتها و وجهها لي صفاار .. زفر و جلس قدامها قابط فيديها
ياسيين: ارتاحي و نوضي كولي شي حاجة ما تبقايش هاكا .. يلا شفتي راسك عيانة بزااف نديك لطبيب
جوهرة:( حركات راسها بالنفي ) تئ ما كاين لاش .. غير مع هاذيك ( لي غيكل ) و صافي .. و الحليب من ديما مكنحملوش كينوضلي قلبي ( تبسمات ) ما تخافش ما بيا واالو و الله
ياسيين:( حرك راسوا ) واخا .. نجيبلك شي حاجة تاكليها و نجي
جوهرة: واخا ( حتى كان ماشي و وقفاتوا و سولات عن طيب خاطر ) ياسيين .. حقا عيطتي لختك هضرتي معاها ؟؟ مسكين ولدها عيان .. خصنا نمشيوا نشوفوها ..
ياسيين:( صغر عينيه و قال بهدووء ) عيطاتلك علماتك مالوا ؟
جوهرة: لا .. قبيلة كنت أنا و خالتي كنصوبوا الشباكية .. حيت قاتلي عزيزة عليك و ما كتبغيهاش ديال الزنقة .. المهم .. شي شوية و عيطاتلها زينب من الطبيب كتبكي مخلوعة .. و ناضت خالتي مشات عندها
ياسيين:( هز حاجبوا و قال مطمر ) اوك .. مور الفطور نتحركوا لعندهم .. هضرت معاها .. راه شوية دابا
جوهرة: الله يشافيه مسيكين باقي صغير .. بغيت غير نعيطلها و ما لقيتش باش .. تيليفوني بقى عند ابتسام واخا تجيبولي معاك
حرك راسوا بواخا و خلاها كتقلب فالإذاعات د التلفزة حتى حاجة ما عجباتها .. فلخر طفاتوا كااع .. كتسناه يرجع .. نيت ما طولش تا كان داخل ببلاطوا فيه شي حاجة خفيفة ما تاكلها ..
حطولها فوق حجرها تعتق روحها .. و مدلها تيليفونها .. فحين هو دخل للدوش .. مخليها بخاطرها .. عيطات على زينب و سولات فيها .. و حطات التيلي فالجنب تا كلات و كملات .. عاد هزاتوا دخلات ليوتيب .. دارت فيلم كوميدي و جلسات كتتفرج فيه و مرة مرة تضحك تا يدمعوا عينيها
خرج من الدوش كيمسح فشعروا .. تلاح حداها هاز حتى هو تيليفونوا كيخربق فيه حتى سمعاتوا كيهضر فالتيليفون .. سكتات كتسمع ليه بفضوول .. حتى كمل و قالت
جوهرة: شكون هاذي لي غتجي غذا ؟
ياسيين:( حطوا فالكوافوز فالجنب و دار يديه على عينيه باغي ينعس ) العيالات لي غيجيوا يعاونوكم فالدار .. غذا فالصباح غتجي واحد لبنت خدامة فالمحل .. و معاها جوج دالعيالات .. يلا ما كنتش تكلفي نتي استقبليهم و هضري معاهم
سكتات مخلياه يرتاح .. حطات يديها على حنكها سااكتة و متبعاه بعينيها .. تا حسات بيه نعس نييت .. و مدات يديها للحيتوا كتلعب فيها و تضحك .. ما حسات بيه غير عضها فصبعها و قال مطمر
ياسيين: غير نتي فطرتي باغى تفطرينا معاك المشة و لا كيفاش ؟ ( حل فيها نص عين )
بعد سااعات كان وذن الأذان و تجمعوا على الفطور حتى كملوا .. و شاف كريم فياسيين .. هاذ الأخير لي نحنح و شاف فختوا
ياسيين: ابتسام أجي معايا بغيتك واحد الدقيقة حتى نتا أ كريم
ناض و تبعوه بجووج للجردة .. كريم لي عارفوا علاش غيهضر و ابتسام لي ما فاهمة واالو .. كتقول عنداك نكون زبلتها معاه فشي حاجة بلا ما نحس ..
ياسيين:( جلس و شاف فيها ) جلسي نهضر معاك
ابتسام:( جلسات و شافت فيهم بجوج باستغراب ) نعام ا خويا ؟
ياسيين: المهم .. بلا زواق فالهضرة .. كريم راك عارفاه و كبرتي قدام عينوا ماشي شي واحد غريب لي عاد غنجلس نهضرلك عليه و على أخلاقوا ( حك عنقوا ) كريم بغاك للزواج .. شنو بانلك فهاذشي ؟ ( شاف فكريم و كمل ) باش يلا كنتي موافقة .. نتسناو عمي يرجع من السفر و ترتاح شوية مرات عمي .. و ديروا خطوبة رسمية
ابتسام:( شافت فيهم بصدمة .. حيت سميرة و باها باقي ما علموها بواالو .. فوهات فمها فيهم مدة و عاد قالت بنرفزة ) لهاذ الدرجة طلعتلكم فراسكم ؟ باغيين غير تتهناو مني ؟ ( وقفات و الدموع كيبريوا فعينيها ) ااه غلطت فحقك و فحق راسي .. و ما نكرها حتى واحد .. كليت من عندكم ما كلا الطبل نهار العيد .. و زدتي حبستيني بنادم ما بقيتش نشوفوا كي داير .. بلا مستقبلي لي ضااع و تبخر .. و تجي من بعد هاذشي كاامل تبغي تزوجني ؟ لهاذ الدرجة باقي ما بردتي من جهتي ؟
ياسيين:( بصرامة ) ابتساام جلسي بلاصتك و نقصي صووتك حسن لك .. كنهضروا هنا ما كندابزوش .. و يلا درت فيك شي حاجة راك تستاااهليها و حد ما ظلمك غير باش نكونوا مفااهمين
ابتسام:( طاحوا دموعها و مسحاتهم بالزربة و هزات راسها لسما ) ما غنتزوج لا بكريم لا بغيروا .. أنا باقى صغيرة و ما منحقكش تفرض عليا شي حاجة بحال هاذي .. هو بالنسبة ليا بحاالك تمااما .. خووويا و ما عمري نشووف فيه شووفة غيرها .. يلا ما ظلمتينيش قبل دابا غتظلمني .. و عمري نسمحلك فحياتي
هبطوا دموعها مرة أخرى و ضارت كتجري للداخل .. مخلياهم موراها كيشوفوا فيها .. كؤيم لي باين فيه تصدم من رد فعلها .. و ياسيين لي عصباتوا و فنفس الوقت كيقول فنفسوا هذا هو الصح .. بقاو ساكتين شحاال عاد نطق
ياسيين:( ضرب على ظهروا ) عارف كلامها غيضرك بزااف .. و لكن شووف الموضووع من جهة ثاانية .. ابتسام مراااهقة باقي ما عارفة راسها من رجليها .. ماشي ديال الزواج غير غتمرضك فحياتك لا غير .. مزال تابعها طريق طوييلة باش دير عقلها و تفيق على راسها .. و كيفما قالت .. فالأخير غير غتظلموا بعضياتكم .. الزين ماشي كلشي .. أنا عارف ختي .. شحال ما بقيتي معاها غطج و آخرتكم الطلاق .. بنت ديال سطاش لعام ترجع مطلقة من ولد عمها .. قاسحة شوية و حتى العلاقة بين العائلات غتخسر بسباب البراهش .. ما بغيتش نقول هاذشي من لول .. و لكن هاذي هي الحقييقة .. و يلا جلستي مع راسك غتعرف بلي عندي الصح ..
كريم:( مسح على لحيتوا و ناض ) صافي على خاطرها .. ماشي مشكل
ياسيين:( وقف تا هو ) الله يجيبلك لي تستاهلك .. شي وحدة بعقلها و مرزنة و درويشة ( شاف فيه ) ندخل نعيط على جوهرة .. زينب ولدها مريض غنمشيوا نشوفوه .. تمشي ؟
كريم:( تنهد ) واخا يالله .. هانا كنتسناكم هنا
مشى عيط عليها و خرجات عندوا .. و من تما نيشان لعند زينب .. دخلوا شافوا ولدها و فوجوا عليها .. واخا القلب ما عالم بيه غير الله .. شاف ياسيين حتى عيى و قال
ياسيين: كريم نوض معايا باغييك فشي بلان .. نخليوا البنات ياخذوا راحتهم ( شاف فختوا بمزاح ) تهلاي فالمدام و لا نتحاطوا هنا
زينب:( ضحكات ) نتهلى فيها بالعصا ؟ اييه ما تهز هم اخويا الحبيب
كريم:( ضحك ) باش يعلقك فالدخلة دالرباط .. الغاذي و الجاي يتشفى فيك
زينب:( ضحكات ) كاين لي معاه هاذ الحلاوة كااملة و ما يتهلاش .. باز لوجهك يا خوويا ( باست جوهرة فحنكها ) كن غير جيتي قبل ما نحمل .. كن توحمت عليك ولدت شي زعييعر موو عوينات بحالك
ياسيين:( وقف كيضحك ) باغيين نربيوا راجل و لا مونيكة يتسابق معاك على المرايا ؟
خرجوا مخليينهم موراهم كيضحكوا و مجمعين فمواضيع مختلفة .. مرتاحين بجوج مع بعضياتهم و مفااهمين .. ما خلاو فاش تناقشوا و ضحكوا .. أما ياسيين و كريم راه خرجوا فسكات .. حتى جبد كريم كاروا كيكميه و قارن حجبانوا بعصبية .. وصلوا للمول و نزلوا
كريم: دابا لاش جايبنا لهاذ **** ناقصنا فريع فالمخ
ياسيين:( قرفدوا ) زيد و هنينا
دخلوا كيتمشاو و البشر خاارج على الجهد أشكاال أنوااع .. مشاو جلسوا فنفس القهوة ديال المرة لي فاتت ( فين جلسوا ياسيين و حنان ) و ياسيين كيحاول ما أمكن يهضروا و يضحكوا .. ما عندوش مع التحزار و لكن فنفس الوقت راه ما كيحملش شي حد عزيز عليه يكون مقلق .. و كريم راه ماشي غير عزيز .. راه خوه لي ما ولداتوش موو .. دازت نص ساعة و وقف كريم و قال
كريم:( ضرب على كتافوا ) الساط ما عنديش الخاطر بالله .. باغي لكااالم .. نجلس بووحدي شوية .. غير نصفي دمااغي و نرتاح و هانا معاك
ياسيين: سيير .. سيير و كان .. غير تفكر دييما ربي ما كيعكس لينا فحاجة حتى كيكون مخبيلنا ما حسن منها ..
خلاه و تحرك من تما باغي غير ينفرد براسوا .. أما ياسيين كمل كاسوا دالقهوة بالشوية عليه .. تا سالاه و وقف خارج كيتسارى و يقلب فجهة المجوهرات .. باغي ياخذ شي حاجة لسميرة و ما عارفش شنو بالضبط ..
دخل لواحد من المحلات .. عجبوا ديكشي لي عندوا كيتمشي يالشوية كيسرح عينيه و يوزن كل حاجة .. حتى سمع صووت مألوف عندوا .. ما عقلش فين سامعوا بالضبط .. بفضول تقلب و شاف فالبنت لي كتهضر .. فنفس اللحظة لقاها كتشوف فيه حتى هي ..
ياسيين:( جاتوا الضحكة لا إراديا .. ضحك و ضرب يد مع يد ) بزاااف و الله حتى بزاااف
حنان:( قربات عندوا كضحك حتى هي و مداتليه يدها .. سلم عليها و قالت ) شي إن فالموضووع .. ما تكونش داير شي حد حاضيني
ياسيين:( شاف فيها بمعنى من نيتك و سكت مخليلها vu )
حنان:( دوزات على شعرها بإحراج ) غير كنضحك معاك .. شنو جاي دير هنا ؟ ( شاف فيها ببرود بمعنى مالك على هاذ الفضول و كملات هي ) ممكن نعاونك ما تفهمنيش غلط !
ياسيين:( دار يديه فجيابوا و قال ) جيت نشري للواليدة شي كادوا .. و ما عرفت ما ناخذ
حنان:( ضحكات و قالت بحماس ) أنا نعاونك ( جراتوا من يديه جهة الكونطوار كتسرح فعينيها .. حتى نعتات ليه ) عافاك جبدلي هاذ السنسلة
مدها لها مول الحانوت .. دارتها فيديها كتشوف فيها .. كانت غليظة ديال الناس الكبار و باينة عليها سااوية .. رجعات كتقلب على شي تعليقة تجي معاها .. حتى وراتوا وحدة و ركبها فالسنسلة .. و مداتها لياسيين لي كان سااكت غير كيتفرج
ياسيين:( عجباتوا .. من نوع لي كتلبس سميرة و يجيوا مع لاج ديالها .. مدها لمولاها ) واخا جمعهالي
---: تفضل معايا أ سيدي
مشى معاه عطاه لفاكتيرة و جمعلوا السنسلة بكلشي لها .. خلص ياسيين بكارط كيشي .. و تم خارج لقى حنان مبتاسمة فوجهوا ..
ياسيين: شكرا على المساعدة
حنان:( ضحكات ) هانية .. لمهم تعجب خالتي لي هي ماماك ههه و لكن ضروري تردلي خيري ( هزات حاجبها ممازحة ) ما بقى حد فهاذ الوقت كيدير شي حاجة لله فسبيل الله أو لا ؟
ياسيين: كاينة ! ( حرك راسوا ) ااش تما ؟
حنان: كيفما عاونتك فكادوا لماماك .. تانا بغيتك تعاونني نختار شي حاجة لبابا .. لقيتيني خذيت لماما شنو غنعطيها و بقيت وااحلة فسيدي الحاج و ااش يعجبوا .. و ها ربي جابك فطريقي بحال درهم لحلال .. نتوما رجال كتفهموا بعضياتكم و غتعرف كيفاش تعاونني
ياسيين:( دوز على لحيتوا .. حشم يقولها لا و هي يالاه فكاتوا .. تنهد و قال ) واخا يالاه نشوفوا ليه شي حاجة .. غير هو ما نتعطلوش ( شافت فالساعة )
حنان:( فرحااات ) نوو كون هاني حتى أنا خصني ندخل للدار بكري شوية
ياسيين: اووك
تمشاو فالمول كيضروروا من محل لمحل يشوفوا و حتى حاجة ما عجبات حنان نهاائيا .. و هو داير معاها الخاطر نيت .. كيهضروا و يتناقشوا بهدوةء و لأول مرة .. حتى بدات كتعاود ليه على راسها و قرايتها و خدمتها ..
ياسيين:( ضحك و قال ) واا موصيبة كحلة كتمشى على رجليها
حنان: هههههه المصائب كيحبووني
كملوا دورانهم حتى لقات لي بغات و فالأخير خذاتليه بواط فيها دوك لي كيداروا فالكمام ديال السوميج ( نسيت سميتهم مهم غتكونوا عرفتوهم ) و عاد تشوف شنو تزيد معاهم .. حيت تعطل الحال و ياسيين مل و عيى من بلانات العيالات .. تفرقوا من بعد ما شكراتوا .. و كل واحد شد طريقوا .. حنان لدارهم و ياسيين مشى جاب جوهرة .. تسحروا مجموعين و قبل ما تطلع سميرة لبيتها كان عيطلها .. جلسات حداه و جبد هو السنسلة لي خذاها لها .. ركبها لها فعنقها و قال
ياسيين: شفناها فالمحل و قلت هاذي ما تجي غير مع لالة سميرة لا غير ( ضورها عندوا و تبسم ) كيفما توقعات جوهرة النخوة و الشياكة ما تجي غير معاك
سميرة:( فرحاات .. من زماااان ما شافت اهتماموا بيها .. بحال تكب عليها سطل دالما باارد طفى العافية لي شاعلة فيها .. بلي هملها و جات مراتوا خذات بلاصتها .. عنقاتوا بفرحة ) الله يخلفها لك بالألووفاات الحبيب .. و يفرشك و يغطيك بالرضى
ياسيين:( تبسم ) أمييين .. و خصك تشكري حتى جوهرة .. هي مولات الفكرة ( غمزها )
سميرة:( كتقلبها فرحانة ) الله يرضي عليكم بجووج
ياسيين: أميين .. يالاه تصبحي على خير
خلاها و طلع بحالوا لبيتوا .. و هاكا داازوا الأياام .. فرتاابة .. لكن على الأقل جوهرة تهنات من نكير حماتها و هضرتها فاش جاو جوج عيالات قاايمين بكلشي .. ما بقى حتى حد كيدير شي حاجة .. قلييييل ..
و اليوم بالضبط الحفلة لي دايرة حنان لي واليديها .. و بحكم البلان لي كان وقع مع ختها فياسيين مكلف بيظيه بكلشي .. صبح الصباح و خرج مخلي جوهرة ناعسة .. داز للمحل لقى ليكيب كاملة تما .. زادوا مجموعين للفيلا .. لي كانت خاوية فيها حنان لا غير .. وراتهم الجردة فين غيخدموا و خلاتهم يديروا شغالهم .. دازوا سااعات طويلة حتى كانوا كملوا و كلشي مقاد على أكمل وجه .. مشاو دراري حيت حفلة عائلية لربعة دالناس لا غير ماشي شي حاجة دالشطيح و الرديح .. غير باغى دير لجيسط لا غير .. بقى ياسيين هو الأخير كيتأكد من كلشي قبل ما يمشي .. شافها و مشى جهتها
ياسيين: على خاطرك ؟ كلشي هو هذاك ؟
حنان:( بفرحة ) ااه شكرا بزاااف .. لهلا يخطيك ..
ياسيين: على واجب ( شاف فالساعة ) غنخليك دابا .. ما بقى والو للفطور .. حفلة سعيدة
حنان:( نقزات ) لا لا و الله ما تخرج من هنا حتى تفطر معانا .. واخا نكونوا ولاد الجوع ما نخليوك تمشي فهاذ الساعة
تفتحات لباب و دخلات لوطوا ديال واليديها .. مشات عندهم كتنقز و الفرحة باينة على وجهها .. سلمات عليهم و قالت
حنان: بابا هضر مع ياسيين يجلس يفطر معانا .. معذباه معايا النهار كامل و دابا باغي يمشي بلا ما نضايفوه .. حشوومة كااع
الحاج:( مشى سلم عليه بحرااارة و كيسول فحالوا و حال مصطفى و فالأخير ختم كلاموا ) و الله اولدي ما تمشي دابا .. نشركوا طعامنا و ديك ساعة يلا بغيتي تتوكل على الله ما نشدكش
ياسيين:( حشم و كلهم كيحلفوا عليه ) واخا .. الله يكبر بيكم .. غير نعيط لمالين الدار نعلمهم و نجي
خلاهم حتى دخلوا و تنهد بتعب .. جبد تيليفونوا و عيط على جوهرة لي حالسة كتسناه على القرص حيت تعطل عليها بزااف واخا ديجا علمها
جوهرة: وي ياسيين فينك ؟ ما بقى والو و يوذن و نتا باقي ما بنتي ؟
ياسيين:( تنهد ) جوهرة غير بلا ما تسناوني غنفطر مع هاذ الناس .. تعطل الحال و كاملين كيحلفوا .. ما جاتش نردها فوجههم
جوهرة: و أنا لي درتلك الشهيوة لي كتعجبك 😞
ياسيين: غير نفرق الصوم و هانا مع حبيبي
بعد مدة قطع معاها و دخل لعندهم لقاهم حاطين الطبلة جلس معاهم مزير و ماشي فراحتوا نهاائيا .. و لكن من الصواب و الأدب ما جاتش يردها فوجههم !
فطروا و موراها وقفات حنان و قالت
حنان: ماما بابا عندي ليكم مفاجأة ( ضحكات مبتاسمة ) أجي و معايا كاملين .. حتى نتا اياسيين
و بالفعل ناضوا و خرجوا تابعينها لجهة الجردة .. و غير وصلوا قدلم الطبلة لي مزوقة على حقها بدا ورد صناعي كيطيح عليهم و حنان تتغوت و تضحك ب " عيد زواج سعيييد " الكاميرا راه خداامة كتصورهم .. فرحوا كعائلة و شكروها من بعد ما عطاتهم لي كادوا دياولها ..
تقطعات الحلوة و ناض ياسيين ساعتها خارج بحالوا مخليهم عائلة مع بعضياتهم واخا عيااو ما يحصروا فيه واالوو .. مشى منير نيشاان للفيلا لقى جوهرة فبيتهم جالسة سلمات عليه بشوق و تا هو عنقها و قال
جوهرة:( ضحكات بفرحة ) حتى أنا توحشتك .. والو بقيت غير جاالسة .. الملل و صافي !
ياسيين: نرتاح و ندي الزين الصافي تفوج شةية ( هز تيليفونوا و سوارت و وراقوا لي فالسروال مدهم لها .. و دار كيفتح السوميج ) خبعيهم فبلاصتهم الله يستر عليك و تيليفوني ها هو حداك يلا عيط شي حد جاوبيه .. غندخل للدوش تسخسخت هاذ النهار
جوهرة:( مشات تتخبعهم و حطات تيليفونوا فوق الكوافوز ) واخا أنا نوجدولك
و ديكشي لي كان وجداتوا ليه و دخل هو يدوش و هي بقات جالسة كتفرج فيوتيب .. مرة ضاحكة مرة سااهية بملل كتسناه فوقاش يخرج حتى بدا تيليفونوا كيصوني مسج تابع مسج ما سكتش كااع .. حتى قفزات من بلاصتها مخلووعة لا تكون شي مصيبة جايا فالطريق .. هزاتوا فتحاتوا .. لقات نمرة ما مقيداش مسيفطة ليه فالواتس تصااور .. بركات عليهم كيطيلاشارجاو و فنفس الدقيقة وصلوا مسج مكتووب
----: داز نهار زويين بزااف و نتا معايا .. بلا بيك ما عرفتش شنو كان ممكن ندير .. ديما عاتقني لهلا يخطيك و صافي .. و حتى لكادوا لي شريت أنا وياك عجب بابا بزااف فاش شاافوا ..
أحسن يووم و أحسن فطور فهاذ رمضان هو هاذ النهار .. أكيد بوجودك معايا ♥♥
يديها رجعووا كيرجفوا و هي كتقرا المسج و تعااود .. الدمووع غلفوا عينيها و كتقول يمكن مولات النمرة غالطة .. حتى طلعولها تصااور طيليشارجاو .. فيهم ياسيين و حنان فالحفلة .. و فالفطور كذلك .. باينين مصورين على الغفلة .. و بيناتهم مسااااحة و لكن هاذشي كاامل ما بانلش لجوهرة .. من غير هو مع نفس البنت لي شافتوا ختها جالس معاها فالقهوة .. و لي قالها دار معاها اكسيدون .. دخل ليها الشك لعقلها بالجههههد و بداو كيطيحوا عليها شي أفكاار دالعدااو .. رجع تسيفط مسج من عندها و قراتوا
هنا صافي يديها بدااو كيرجفوا بالجههههد حتى ما بقاتش قادرة تهز التيلي و طاح فوق النااموسية .. كيفما جلسات هي بدورها فااشلة و عينيها عامرين بالدمووع و الدنيا تااالفة بيها
《الحب هو الاقامة والثبات ، والتدين ..
هو امتلاء وعي العاشق بالمعشوق 🌺 》
جلسات فبلاصتها فااشلة و كلها كترجف .. عينيها عمروا بالدمووع لي رافضة يهبطوا .. و المسجات كيتعاودوا بين عينيها .. العاافية شعلات فقلبها .. عينيها حمااروا و تزنكاات .. جالسة فبلاصتها و كتلعب برجليها بالعصبية و كتفكر شنو دير ؟ مدة و هي هكااك .. فالأخير رجعات هزات تيليفونوا دارت للمسجات non lus و سيفطاتهم لتيليفونها .. و رجعات مسحات الكونفيرساسيون لي سيفطات فيها .. و حطاتلوا تيليفونوا من بعد ما قيدات نمرتها عندها و كتبات عليها " ؟؟ "
الأرض راه ضارت بيها فهاذ اللحظة .. كن كانوا غير التصاور غيجيها الموضووع عاادي .. لكن كلامها ما كانش عادي نهائيا كتهضر معاه بحال شي واحد كتعرفوا من زمااااان و صحبة نييت .. و لا بحال شي حبيب ! ياما سمعات بنات و عيالات كيتشكاو من الخيانة و عمرها تصورات تل هي تتحط فهاذ الموقف شي نهار .. غير فكرة يفكر فوحدة غيرها كتخلي دمها يفوور ..
تقدر تتقبل كلشي إلا هاذ الموضوع .. واخا تايقة فياسيين ثقة عمية و عارفاه شنو كيسوى .. و لكن الشك بدا كيتسلل لعقلها و ياكل فيها .. و فهاذ اللحظة راه ما عرفات ما دير نهاااائيا .. عينيها تغمضوا .. واش تتسناه يخرج و تواجهوا ؟ و لا تسكت حتى تزيد تتأكد و تفهم الموضوع مزيان ؟ و لا تعيطلها و دير معاها يتلاقاو و تهضر معاها و تفهم هاذ السيدة علاياش كتقلب ؟
لقات حل واحد قدامها هو تسيفط لشي حد يعاونها و يقولها ها شنو ديري و يثبثها .. و بالفعل هزات الفون و دخلات للواتس سيفطات مسج لوئام .. لي كتعتبرها مخبئ أسرارها و عارفة غتقدر تعاونها
جوهرة:( مسحات على وجهها ) بغيتك تعاونيني .. ياسيين هاذ النهار كان عندوا شي خدمة و داك الناس حصروه للفطور و بقى معاهم .. يالاه دخل يدوش و شي نمرة دشي بنت سيفطاتلوا شي تصاور و شي هضرة دالخرا .. قالك أحسن نهار عندي حيت كنتي فيه .. و خليتيلي أحسن تذكار معاك ( ساطت ) شمن تذكار خلاه لها بالسلامة ؟ لا و السيد خارج معاها و شارين كادوا و لا ما عرفت ااش ( دموعها طاحوا ) غنطرطق .. عرفتي و يكون كيخوني ا وئام و الله تا نمشي عليهم للحبس بجووج .. و داك نهار جالس كيدور فيك .. و سكتني بجوج كلمات ..
وئام: واش نفسها ديال القهوة ؟ واخا تنفسي و بردي شوية .. ما ديري وااالووو دابا كتسمعيني ما ديري واااالووو .. شووفي قولي ليه يجيبك لعندنا للدار و ساعتها غنتصرفوا .. غير هزي نمرتها عندك
جوهرة: دخلتها هي و مسجاتها كاملين
وئام: صاافي مزيان .. و بردي راسك دابا و طمري على الموضووع و شوفيه هو شنو غيدير و كي غيتصرف .. و أهم حااجة لسقيه تجي عندي
جوهرة: المشكل هو دغري و اكثر وااحد عرفتوا فحياتي عندوا نيشان نيشان و كيضربها فالوجه .. أنا عاارفاه ماشي من نووع لي يخوون ... و هاذشي لي محمقني كثثر .. ما دام سيفطات ليه بحال هاكا يعني السيد مضضضضسرها عليه .. ما يمكنش من ذاتها لراسها تهضر مع رااجل هاكا .. و هو المشكل هو ما كيضسر حد عليه .. و كن كان فيه الغذر ما غيخليليش تيليفونوا من لوول بلعكس غيبقى حااضن عليه ( شدات راسها ) اوووف يااا ربي
ياسيين:( دق عليها فباب الدوش و نطق بصوت مرتفع باش تسمعوا ) جوهرة جيبيلي الفووطة
حطات تيليفونوها و هزات الفوطة مداتها ليه و رجعات بحالها فتحات الماريوا كتجبدلوا حوايجوا .. حتى حسات بيه معنقها من ظهرها و يديه ضايرين على كرشها .. مزيرها معاه عندوا .. باسها فعنقها .. بالضبط فوق النبض .. لي كيضرب بالجهههد
ياسيين:( حسها كترجف بين يديه .. ضورها عندوا و قال بتساؤل ) مالك ؟
جوهرة:( بزز تبسمات و حركات راسها بمعنى والو ) لبس عليك .. عنداك يضربك البرد
ياسيين:( هز راسوا ) واخا ا لالة .. نوضي تانتي يالاه يكفينا الوقت نخرجوا و نضوروا شوية
جوهرة: بلاش ( شاف فيها و قالت بتفسير ) بغيت نمشي نشووف ماما .. تال نهار آخر و نخرجوا !
صغر عينيه و ضار كيبدل عليه بلا ما يجاوبها .. حتى كمل و خرجوا بجووج .. مدات ليه وراقوا و تيليفونوا .. خبعهم فجيبوا بلا اهتمام .. تا خرجوا منطالقين فاتجاه دار واليدين جوهرة .. طول الطريق و هي سااهية و ماشي بخاطرها نهااائيا .. و هاذشي قدر يلاحظوا .. ماشي صعيب عليه نهااائيا يقراها بحال شي كتاب مفتوووح بين يديه ! لكن خلاها على خاطرها حتى تجي هي عندوا و تهضر .. وقف قدام دارهم .. حلات لاسانتير و جات نازلة تا حسات بيديه حبسوها .. شافت فيه
جوهرة:( هزات حاجبها تا هي ) ايوا شوف نتا شنو داير و غتعرف !
ياسيين:( دوز يديه على لحيتوا و تنهد ) جوهرة ! يلا واحلة لك شي حاجة فالحلق حزقيها و هنينا .. ما عندي ما اعدى من هاذ البهلان ديال شدلي نقطع لك ( حرك يديه بسلاسة )
جوهرة: ما عندي والوا .. ما فهمتش لاش تعصبتي ؟ يلا ما داير والوا .. غتقولها عااادي .. دابا عاااد غدخلي الشك و نولي نقوول يعلم الله رااجلي شنو دااير مور ظهري
ياسيين: عرفتي اش يجيك مليح ؟ هبطي تدردبي لدااركم حسن ما نق*** سوايع أنا و ياك
جوهرة:( هبطات و زدحات لباب بالجهد )
ياسيين:( خرج راسوا من السرجم و غوت ) دييهاا معااك حسن ( دخل و حك الروايض بالجهد و زاد كيتمتم )
جوهرة:( شافتوا تا مشى و عوجات وجهها ) بناادم
دقات على دارهم و دخلات لقات ختها بوحدها .. أنا البقية فراه خرجوا مجموعين .. عنقاتها و بدات كتبكي بالجهههد .. كااع ديكشي لي حبسااتوا قبيلة فرغاتوا فحضن ختها .. حاسة بحال شي حجرة ثقيييلة محطووطة على صدرها خاانقاها .. برداااات و بقات سااكتة شحاال عاد قالت
جوهرة: غلطت فاش جيت لهنا .. كان حسن كن واجهتوا ( وقفات ) غنعيطليه و نهضر معاه ما نقدرش نبقى هاكا .. حارقة دمي بيدي
وئام:( وقفات و طيراتلها التيليفون و قالت ) لاااا .. خلينا بعدا نهضروا معاها هي و نفهموا منها .. يقدر ما تكونش عارفاه مزوج .. و يقدر يكونوا بزااف دالأسباب حنا ما باينينش لنا .. و يلا سبقتيه هو و ما كان وااالو من لي فبالنا .. غيقول كتشك فيا .. و العلاقة لي ما فيها ثقة ما فيها واالو
جوهرة:( تنهدات ) و لكن أنا ثاايقة فيه ما ثايقاش فالبشر لي ضااير بيه .. أما هو عاارفة طينتوا ( هزات عينيها فيها ) شفتي يلا ما بقاش بغاني متأكدة غيجي و يقولها ببرووود فوجهي .. ما عندوا علاش يحشم ..
وئام: وا صافي دابا ..أراي تيليفون نعيطولها
بقات عليها بالهضرة حتى قنعاتها ما تعيطش عليه و ما تقول واالو ..مداتلها تيليفونها مهدوودة و إحساس خاايب فالداخل ديالها .. صونات وئام مرة و جوج و ثلاثة و لااا جوااب ..
جوهرة:( وقفات ) ها تيليفوني معاك ..تخنقت و الله و راسي كيحرقني بزاااف .. غننعس شوية و يلا كانت ما جاوباتش غنهضر مع ياسيين نيشان
وئام: واخا سيري ارتاحي
أماا ياسيين فراه كان جالس فكافي .. حاط حداه قهوة و كاوكاو .. هاز جورنال فيديه كيقرا فيه .. حطوا و هز تيليفونوا .. دخل للواتس و سيفط لجوهرة
--- جاتك البيريود ؟ الهرمونات عاود ؟ واخا الكحلة غير قيدي عندك تمشي و نتفاهموا .
سيفطوا و عقلوا راه كيتفكر فوقاش ااخر مرة جاتها لي غيكل و كيقول ما تكون غير هي لي قلباتها عااود .. باقي كيحرك راسوا بلا حول و ملامحوا مبسمين .. تا شاف المسجات ديال حنان .. استغرب حيت ما عرفش النمرة .. دخل و قراهم و شاف التصااور .. عض على فموا و وجهوا تززززنك ..
هز كاسوا دالقهوة هبط عليه دقة وحدة .. تا حرك راسوا بالزربة من مروريتها .. بقى مدة جااامد و الفقصة رجعات عليه بالبرووودة .. ربط الساعة فوقاش تسيفطوا بتصرفات جوهرة من بعد ما خرج من الدوش .. و فالبلاصة قلعها طااااير .. دخل لجهة دالبلوك .. ديبلوكا حنان و داروا فوذنيه كيعيط عليها .. و حتى هو ما كتجاوبوش ..كيبقى حتى كيقطع و لا رد !
💫💫 قبل سااعات 💫💫
جالسة ابتسام فبيتها .. حداها لبسي مشعوول .. طالقة مسلسل تركي كتفرج فيه و مرة مرة تهز تيليفونها تلعب فيه بملل .. حتى بداو كيوصلوها فالجيمايل .. المسجات لي بين ياسيين و جوهرة .. ربعات رجليها بفضوول و دخلات كتقرا ديكشي لي سيفطات حنان .. و كااع الهضرة لي ضاارت بين جوهرة و وئاام .. ضحكات تا بانتلها الخوية ديال الضرسة دالعقل .. وقفات حامية فيها البيضة كتسناهم غير يخرجوا و تمشي عند سمييرة تعاودلها كلشي .. و ديكشي لي كان ما دازش بزااف تسمع صوت طونوبيل قلعات و خرجات من الفيلا .. هبطات بلحفى كدردك عند امها .. وصلاتلها كتلهث .. جراتها من يديها و دخلاتها لبيتها ..عطاتها التيليفون كتقرا فيه .. حتى هزات راسها فيها
سميرة: ما فهمتش ؟ شنو هاذشي ؟
ابتسام: هاذشي لي غيهنينا من مرات ولدك اللفعة .. كنت متأكدة تيليفونها غينفعني فشي حااجة ( شافت فيها ) كنت طلبتولها و دخلت برنامج مراقبة .. كاع لي مسج و التصاور و المكالمات يوصلوني .. و هاذشي راه جا لياسيين من عند شي وحدة كتدور بيه ( غمزاتها ) و ما كيقضي على المراة غير المراة .. هاذشي سيفطاتوا لراسها ( وراتها ) ها فين هما .. و هاذوا .. ديال هضرتها هي و ختها
سميرة: واخا كاع لي قلتيه ما فهمتش هاذشي فاش غينفعنا ؟
ابتسام: أنا لي عارفة فاش ( ضحكات و دخلات نمرة دحنان و دارتوا فوذنيها كيصوني حتى قبطلها و جاوبات ) ألوو
صبح يوم جديد .. بعد ليلة طوييلة نعسات فيها جوهرة فدارهم ما حساتش براسها و بالبكى لي بكات طاحت دوودة .. ما بغاتش تفيقلهم .. فالأخير خلاها ياسيين معاهم حتى يجيلها فالصباح .. دخل للفيلا معصب و طالعالوا القردة بالفري .. لقى ابتسام جالسة كتفرج و صوت ضحكاتها كيتسمع من بعييد لبعييد .. شاف فيها و سرح عينيه عاد قال
ياسيين: فين هي سميرة ؟
ابتسام: خرجات شوية و تجي .. بغيتي شي حاجة ؟
حرك راسوا بلا و طلع لبيتوا بدل عليه و خرج للبالكون كيضرب فيه الغربي و تيليفونوا فيديه كيصوني و يعاود على حنان لي سنانوا قد خيزوا عليها .. لكن كالعادة لا رد .. فالاخير طفاه حتى هو و نعس .. واخا عياو يدقوا عليه ينزل يتسحر ما بغاش .. أما التحت فراه غير دخلات سميرة كتلهث .. ربعات ابتسام رجليها و قالت بحماس
ابتسام: أمدرا ؟
سميرة:( جلسات حداها كترد النفس ) صافي .. ديكشي لي قلتيلي قلتوا .. واخا كن غير مشيتي معايا .. ما عرفت هاذشي ديالك .. ما بانليش فيه ا ابتسام
ابتسام: فين غنخرج فين ؟ باش يتلاقاني المعقد دولدك و يهرسني من شي قنت ( طلقات شعرها و رجعات جمعاتوا و كملات بلا مبالاة ) ماشي ضروري يبانلك نتي أنا راه باينلي فيه .. غير تبعي هضرتي و غتشوفي البرهان ..اما نتي بلاناتك راه ما فعايل ما واالو
سميرة:( بقات جالسة ساكتة فلخر ناضت توجد السحور على ما يتجمع كلشي )
💫💫 يوم جديد 💫💫
فاق ياسيين بقى شحال متكي فبلاصتوا حتى صحصح مزيااان و ناض دار روتينوا و خرج من بعد ما لبس عليه .. وصل لدار واليدين جوهرة .. جبد تيليفونوا شعلوا و صونا عليها .. كانت بدورها فايقة ردات عليه فالبلاصة
ياسيين: هبطي عندي لتحت
قطع معاها و بقى كيتسناها حتى بانتلبه خارجة عندوا بلباسها المحترم جدا و لي كيحمقوا عليها و كيزيدها براءة على براءة .. هزات عينيها فيه مزنكة و عينيها منفوخين شوية .. وصلات عندو .. فتحات لباب ركبات و قربات جهتوا سلمات عليه .. قبل ما تبعد كان قبطها من ذقنها تا جات العين فالعين و رجعات هرباتهم ..
ياسيين: غير دالتصرفيق بالله ( طلقها و حرك لوطوا ) فرغتي المخزون و لا باقي ؟ " على الدموع " ( شاف فيها و رجع ركز مع طريق ) يلا مزال واحلة لك شي دمعة فشي قنت طلقيها قبل من الفطور
جوهرة:( عرفاتوا شافهم ) ياسيين
ياسيين:( قاطعها ) باش يلا هضرت من بعد و لقيت شي دمعة كتسارى فشي قنت .. غنبكيك ساعتها بصح
جوهرة:( شافت فيه )هانية ! غير بكيني نتا و ما تخليش غيرك يبكيني ! دير راسك بلاصتي و شوف باش غتحس يلا وصلني من عند شي حد مسجات هكاك و عاد ساعتها هضر
ياسيين:( مسح على وجهوا ) برب تا غا كتخوري قلا ( عض على فموا و سكت ما كملهاش ) خلينا صايمين .. نفطروا و تما هضرة ثااانية ا لالة جوهرة
تكات على الشرجم و سكتات حاضية الطريق .. حتى وقفوا فالمرصى .. شاف فيها و فتح لاسانتير
ياسيين: تنزلي و لا تبقاي هنا ؟
جوهرة: ننزل
هبطوا بجووج .. غادي سابقها و هي موراه متبعاه بعينيها .. شافت فيديه و قربات جهتوا مشابكة يديها مع يديه .. شاف فيها و رجع شاف قداموا فصمت .. مخليها مسندة راسها عليه و زايدين فسكات .. من غيروا مرة مرة كيهضر مع الصيادة .. حتى اختار الحوت لي عجبوا و جمعوه ليه .. و تموا راجعين للفيلا فنفس السكات دقبيلة ..
دخل هو لول مخليها جايا بالشوية عليها .. حط الحوت فالكوزينة هلاه للعيالات يتكلفوا و خرج هو كيتنهد تا خرجات فيه سميرة .. عاقدة حجبانها
سميرة: باغى نهضر معاك ضروري !
واقفة جوهرة فباب الفيلا هازة تيليفونها كتهضر مع ختها لي عيطات كتسول فأحوالها و كي بقات .. كملات و دخلات بهدووء .. حتى سمعات كلام سمييرة لي كان موجه لولدها .. كلام دخل بحال السم فعروقها ..تكات على الحيط و عينيها مبرقااهم فيها .. هي لي واقفة معاه فالصالون و كتهضر بكل جدية و عاقدة حجبانها
سميرة: ياسيين حتى وحدة فهاذ الدنيا ما كتولد معلمة ..ضروري لواحد يغلط و يطيح و عاد يرجع يوقف .. و بالمواقف لي كيدوز منها عاد كيتعلم ..و لكن باش نضيعوا حياة واحد الانسانة غير حيت غلطات فينا .. و تصرفات بلي قالها عقلها الطايش و قلبها العاشق .. ف هنا لا .. كاينين طرق بزاااف باش تفيقها .. عوض تتقلب حياتها سفاها على علاها .. ممكن نمشيو للتوعية و حتى للعقاب و لكن بطريقة .. لا ظالم و لا مظلووم !
ياسيين:( هز حاجبوا و نحنح ) ابتسام ماشي غير غلطات .. فااتت الخطوط الحمرة ب
سميرة:( قاطعاتوا ) كنهضر على مراتك .. ماشي على بنتي
ياسيين:( كمش وجهوا و قال ) مالها جوهرة ؟
سميرة:( تنهدات ) من بعد ما خرجتي من عندنا كنا جالسين هانيين .. حتى جات واحد لبنت حاالتها حالة بالبكى بغات تسخف .. ما فهمت أنا واالو من هضرتها .. يسحابلي غير غالطة فالعنوان .. حتى قاتلي واش ولدك ياسيين بنمسعود و عطاتني الوصف بالتدقيق .. دخلتها و جلسات فهاذ البلاصة ( نعتات ليه بيديها ) و يلا كانوا هاذ الحيووط ينطقوا راهم ينطقوا و يقولولك حالتها كي كانت
ياسيين:( دوز على لحيتوا و تكمل بنفاذ صبر ) شكون هاذي ؟ و ااش دخل جوهرة فالموضوع ؟
سميرة: أنا جااياك فالطريق .. ايوا اسيدي هاذ البنت سميتها حنان ( شافتوا هز حاجبوا و خنزر و هي تكمل ) ما تقاطعنيش حتى نكمل .. و فلخر دير لي عجبك نتا حر ( حرك يديه بمعنى كملي ) لبنت عاوداتلي كلشي .. بصح هي غلطااات و ما كانش عليها تسيفطلك شي حاجة لتيليفونك و لا تتقرب منك من الأصل .. و لكن القلب تا حد ما يقدر يتحكم فيه و لهلا يعلقنا بلي ما مكتابش لينا ..ما يحس بحرقتها غير لي مجرب .. سيفطاتهم من قلة عقلها و لكن ما تصوراتش من دوك جوج كلمات غادي يخلقولها مشااكل كباار بحال هاذوا لي طااحت فيهم ( ربعات يديها ) مراتك أسيدي شافتهم و مشات عندها لبارح مور صلاة ديال العشا هي و ختها .. و يعلم الله منين طلعوا عنوانها .. دخلاتهم امها لدارهم من بعد ما دخلوها بالصواب ..كانت العائلة كلها مجموعة .. ايوا غير شافت وئام البنت طارت عليها نتفاتها ما خلات فيها عظم صحييح .. و جوهرة مولات العقل يا حسرة دازت لباها مخلية ختها محامية فالبنت و مها .. و سرسبات ليه كلشي ما خلات سحاارة ... خطافة الرجاال .. كضورلي برااجلي بحال بنات الزنقة و زيد و زيد ( تنهدات ) ما خرجوا من تما تا غرقوها لها .. و باها حلف حتى يجوجها بأول واحد يجي يدوي فيها و سخط عليها كاع .. ما خلى فيها غير لي نسى .. و امها طاحت فالركنة على شوية يهزوها للطبيب كوومة بالفقاايص .. كتعاودلي و تبكي دم عوض دمووع قطعاتلي قلبي مسكينة
ياسيين: اييه و شنوا المعمول ؟ ياكما وليتي خدامة فالخط الأبيض بلا خبارنا ؟
سميرة:( نحنحات و قالت باحراج زعما راه حشمانة ) ما عرفت ما نقولك .. بنات الناس ماشي لعبة .. لا جوهرة و لا حنان .. و لا حتى بناتي ما نبغيهم يتحطوا فبحال هاذ الموقف .. اييه هي غلطاات و حتى حد ما قال العكس و لكن باش تمشي هي و ختها عاامرين عليها و يسببولها فهاذ المشاكيل .. و يقلبوا حياتها سفاها على علاها .. لا عاود .. احم و نتا عارفاك حقاني .. هضر مع باها و خطبها منو ( شافتوا غيهضر و حبساتوا ) حتى يلا ما بغيتيش تزوج بيها .. على الأقل خطبة على ما يبرد السوق .. و ينسى لي وقع .. و ساعتها قولوا ما تفاهمتش أنا و بنتك الله يعوضها .. و ها نتا حليتي المشكل و سليتي الشوكة بلا دم
جوهرة هاذي كانت النقطة لي فيضات عندها الكاس .. كتشووف فيها من الجنب و عينيها عاامرين بالدمووع و كتقوول واش هاذ السيدة ما كتهدش ؟ بنادم هاذي ولا شنو ؟ كاين شي حد كيطيح الباطل قد هذا و فعز رمضان ؟ ما كتخافش من خالقها ؟ هاذي هي غنحطك بحال بنتي و خاطرك قبل من خاطري ؟ هذا هو الحب و الحنان لي كانت كتبينلها فلول و تهزها و تحطها ببنتي بنتي ؟ كاينة شي أم فهاذ الدنيا غادي دير لي كدير فيه هاذ السيدة ؟
هي ماشي مكلخة نهاااائيا و ماشي عورة ما كتشووفش لي ضااير بيها .. راه كتشوف و كتسمع و كتفهم كل حاجة فين مااشية .. و لكن كتسكت و كدير راسها ما فاهمة واالو .. باغى غير السلااكة لا غير .. عمرها فحيااتها تصورات كاينين ناس بحال هااكا .. ديما كترد اللومة لراسها و تقول أنا لي تصرفت خايب .. أنا لي ما فهمتش نية بنادم .. أنا لي تسرعت .. أنا لي حساسة بزااف و كنااخذ الاموور بجدية كثر من اللزوم .. يمكن الواحد ما قصدش ديكشي لي فهمتوا غير أنا محسوسة .. حيت ما كاين لاش الواحد يجرحك و يبيتك كتبكي و دمعتك على خذك غير هكاك ..
ما كاينش بنادم خايب نهاائيا .. كاين غير المزيان .. و لكن الدقة لي كلات من عند سميرة ما كلاتها من عند حتى حد آخوور تتغاضى على كلشي تال بااطل جووج دالمرات حطاتوا على راسها بلا ما تخاف و لو شوية .. ضحكات بفقصة و كتقول فبالها يمكن مشيت نتفتها و أنا ناعسة .. بحال واالو .. درتها فمنامي ؟ أكيد و هي منين مشات لدارهم و هي كتبكي فلخر نعسات تال الصباح و جا موراها ياسيين ..
مسحات دمووعها بالجهههد فاش سمعاتها قاتلوا تزوجها .. ما حسات براسها غير طيرات داك الفولار بالجهههد حيت خنقها نييت .. حلات شعرها و جمعاتوا لفووق و دخلات عليهم بعينين حوومر مخنزرين .. بنظرة عمر ياسيين شافها فيهم من نهار عرفها .. يالاه انتابه لها و جا يهضر كانت دازت فيه بكل قوتها .. و مشات لسمييرة غير وصلاتلها و دفعاتها من صدرها بيديها بجووج
جوهرة:( بالغوات و بحرقة ) وااش نتي شييطاان على هيئة بنااادم ( رجعات دفعاتها ) ما كتتهدييش ؟ ما كتخاافيش من لي خلقك ؟
سميرة:( شافت فياسيين لي مصدوم فجوهرة و قالت ) شووف هاذ قليلة الترابي دمراتك .. كي كدفع فيا و تغوت .. و نتا سااكت بحال النعيوة ( هزات صبعها بتهديد ) نااقصاك تربية الكلبة
جوهرة:( صعرااات حاسة بكل ذرة فداخلها منهاارة على الآخر و برد فعل لا إرادية هزات يديها تا هي تا السماا و نزلات عليها لوجهها كتغوت ) ماامااا مربياااني أحسن تررربية .. ما كاينة شي كلبة هنا قدك
يالاه كملاتها كتنهج حسات بيد ضوراتها بالجهد .. كانت يد ياسيين ... حدها رفعات راسها فيه هز يدو حتى للسما ومو كتشوف فيهم بدهشة .. مزال ما مستوعبة لي كيوقع .. جمع مع جوهرة بتسرفيقة تسمعات فالطبقة التحتانية كااملة .. حتى خرجوا العيالات من الكوزينة كيطلوا و يولولوا .. و رجع فالبلاصة جمع معاها للحنك الثااني مخرج عينيه فيها
تسرفيقة ياسيين كانت بحال يلا مخشية فشي بير غااامق ما قادراش تتنفس نهااائيا و جا هو جبدها بالجهههد حتى رجع فيها النفس .. شدات على حنكها لي حمر و عينيها تغرغروا عاد حسات براسها شنوو داارت .. تصرفات بلا عقل بغات غير تبرد الحر لي شااعل فقلبها و فالأخير تقلب عليها كلشي .. لكن الظلم و الحكرة و البااطل صعااااب و فاش كيبقى يصبر الانسان مرة على مرة على مرة ..كيوصل لواحد النقطة كيتفركع بمعنى الكلمة و ما كيحسش براسوا شنو كيدير .. حتى يبرد عااد كترجع سخوونية الراس بالبرودة
جوهرة:( شافت فيه كتترعد ) ما منحقكش تهز يديك عليا .. ما كفاكش لي دارتوا مك و ختك فيا ؟ حسبي الله و نعم الوكييل حسبي الله و نعم الوكييل
ياسيين:( جرها من شعرها بقسوة حتى غوتات و نطق بحدة ) صوووتك ما نسمعووش ( غوت ) كتسسسسمعي ؟ و لا لسانك نقطعوا نلوحوا للكلاب
شاف فسميرة لي كتبكي بالجهد و هز يدوا كيترعد بالغضب .. تا كان غيعاودها و هبط كريم كيجري من الفووق .. بالزربة دخل بيناتهم تا جات فيه الضربة هو نيت .. دفعوا من صدروا مبعدوا عليها دايرها مووراه و لاخوور راه هاايج باغي غير يوصلها
ياسيين:( غوت ) كريييم قوود من هنا ( شاف فيها بعصبية ) يديك شااطت عليك .. وليتي تهزيها على سيادك ( دفعوا و جرها بنثرة و رجع فكها كريم كينهج )
كريم: وااا صااافي الزمممر ( شدوا من عليها و حتى ياسيين راه ما دايرش مجهوود نيت باش يوصلها .. غوت كريم لجوهرة ) طلعي لبيتك دغيااا
و بالفعل دازت من حداهم كتترعد و طلعات لبيتها شدات عليها الباب بالساروت و طاحت على وقفتها كتبكي و ترعد من صوتوا لي مسمووع تال عندها كيحيح .. تخلعات منو بالجههد بحال يلا ماشي ياسيين لي حداها غير شي حد كيشبه لي لا غير .. تقلب عليها قلبة وحدة و عينيه كيخرجوا منهم الشراار .. واحد عمرها عرفاتوا بحال ماشي هو لي كيقيل يضحك معاها و يدلع فيها و يحن عليها .. تهز واحد و تحط ثاني .. و نفس الشيئ بالنسبة ليه ما بغاش يدخل لراسوا كيفاش جوووهرة داك لبنت البكوشة الضريفة لي دااخلة سوق راسها و ما كتجبد حد بعيبها .. تنوض تغاوت مع موو و تمد يديها عليها فحضووروا .. سخط عليها بالجهههد و عينيه تغمضوا نهااائيا ..
جوهرة:( هزات تيليفونها كتترعد و حاسة بلي كريم شادوا بزز أما غيطلع و يهرس عليها الباب .. دوزات الخط لأمها تا جاوباتها و قالت كتتبكي ) ماما أجييوا عندي داابا 😭😭
رحمة:( بخوف ) جوهرة ؟ مالك ابنتي ااش واقع ؟
جوهرة:( كتشهق ) ياسيين ضربني ا ماما .. ما نزيدش حتى دقيقة هنا .. غيطلع يكمل عليا .. أجييو عندي عافاك 😭
رحمة: اويلي على ضربك ..صاافي ما تبكيش ها حنا جايين دابا
قطعات معاها و مشات هزات لاكارط ناسيونال ديالها و وراقها لي تقد تحتاجهم .. دارتهم فساكها و دارت فولارها .. جالسة كتسناهم و تبكييييي بكل جهدها حتى كتبغي تسخف .. سمعات الصدااع و الهضرة لتحت .. هبطات بالزربة كتبكي .. عنقات رحمة كتترعد فصدرها و ياسيين كيتغاوت هو و باها ..
رحمة: صافي أ سيدي بنتنا غنديوها معااناا .. ما عندها ما دير هنا
ياسيين: بغات تمشي الباب وسع من كتافها
هزات جوهرة عينيها دامعين فيه و وجهها مصورين فيه صباعوا .. ما توقعاتش منو هاذ الجواب .. جات عينيه عليها و قلبها بطريقة خلات قلبها يزيد يتحرق و تقول لهاذ الدرجة ما بقاش حاملني .. جراتها رحمة معاها هي و باها و هي وسطهم كتبكي و تعيط على لي يبكي معاها .. تا خرجوا من تما و شدوا الطريق لدارهم .. أما هو راه هز سوارت الطونوبيل و خرج مخيخ من تما .. يالاه غيحك الروايض و يزيد كان ركب حداه كريم .. و خرجوا من تما
《 الحـب لا يؤخـذ مـن ڪتـاب
و إنما هــو نسخ مـن قلــب إلــى قلــب
و للحــب أربعــة فصــول :
الشعور.. الإعتراف ..الشوق.. البقاء
أجملهم الأول
ولذتهم الثاني
و أصعبهم الثالث
و أمـا عـن أصدقهـم فهـو الرابـع ❤ 》
خرجات جوهرة منهاارة على الأخر كتسمع لواليديها كيهضروا منفاعلين و ما كتجاوب حد غير ساكتة و كتبكي بحرقة ..حتى وصلوا لدارهم سمحات فيهم و طلعات بالجرا لبيتها طاحت فوق ناموسيتها كتبكي من أعماااق أعماااقها حتى النفس كتتقطع فيها و تبدا تشهق بالجهههد و ذاتها كلها كتترعد عليها .. طرقات عليها و ما بقات جاوبات كيتسمع غير صوتها و شهقااتها .. خلاوها على خاطرها جايا لساعة عاد رجعات رحنة كتدق
رحمة: جوهرة بنتي فتحي الله يرضي عليك .. غير نفهم منك شنوو واقع .. فتحي لميمتك
بعد دقائق وقفات و فتحاتلها .. غير شافتها تخشات فصدرها كتبكي و رحمة مزيرة عليها .. تا جلسوا فوق ناموسيتها ..
رحمة:( تحرقات على بنتها كتشووف عينيها رجعوا بحال الجمر و منفووخين و طبايع حوومر تحتهم و فجبهتها دليل على أنها بكات فووق القياس .. عاد حناكها لي تنفخوا و مصورين فيهم يديه و بداو كيتبدلوا لهم لون .. دوزات على ظهرها بحنان ) تووضي ابنتي غسلي وجهك و استغفري الله و أجي نهضروا .. يالاه نووضي الله يرضي عليك
وقفات بانصياع ماشية بالشوية .. يالاه فتحات باب بيتها تمشي للدوش و هي تسمع صوت رحمة موراها
رحمة:( بخوف و استغراب ) بنتي واش فيك لي غيكل ؟ ( حركات جوهرة راسها بلا و كملات هي ) وقتها هذا ؟ راه حوايجك مطبعين ( مشى بالها تكون حاملة و خسرات و وقفات فالبلاصة كتقلب فيها و تسولها )
جوهرة:( مهدودة ) قولي لوئام تجيبلي اولويز من عندها بلا ما تخافي .. ما عندي والو .. لا حريق لا حتى حاجة .. أصلا ولات ديما كديرلي هاكا .. كتجيني يوماين و تحبس و تولي تجي مقطعة ( شنافتها رجفات و خبعات وجهها بين كفوفها ) حتى حاجة ما مقاادة فحيااتي ( ضربات يدي مع يد ) وااالووو 😭
عنقاتها عندها كتسكت فيها حتى مشات لدووش .. خلاتها بخاطرها و هزات تيليفونها كتعيط على ياسيين .. لي كاان جالس فداروا و كريم جاالس حداه بحال الجمااد .. بجووجهم سااكتين كل واحد فيهم و فاش كيفكر .. قاطع تأملهم صوت التيليفون .. طلعات ليه نمرة رحمة و جاوب من بعد السلام دخلات نيشان فالموضوع
رحمة: مابغيتش نهضر قبيلة قدام كلشي .. و لكن هاذشي لي درتيه اولدي ماشي ديالك ! شرحلي شنو وقع غير نفهم مالكم و شنو وصلكم لهاذ المواصل ؟
ياسيين: سولي جوهرة تقولك ( شافها سكتات ة كمل ) و لا ما عندهاش الوجه باش تهضر ؟
رحمة: على شمن وجه ؟ لي شوية و تهرسولها ؟
ياسيين:( زفر بحرارة ) تستااهل الحاجة تستااهل .. كنت عاطيها قيمة كبيييرة و حاطها فمكاانة حد ما يوصل لها .. و لكن ( سكت )
رحمة: اييه اولدي ؟
ياسيين: لي ما تحتارمنيش و دير قيمة ليا فحضوري و غيابي ما عندي ما ندير بيها الحاجة
رحمة: واخا .. ما قلتي عيب .. الله يعاونك
جالسة جوهرة فجنان كيفتح النفففس كلووا مزهههر غير كتشووفي المنننطقة كتفرررحي و نفسك تترتاااح ما تكرهيش تبقااي حيااتك كااملة تماا بين الشجر دالتفااح و الزيتوون و الخيرات لي ضاايرة بلالة جوهرة من كل جهة و طريق ..
جوهرة لي كاانت بحال شي جوهرة كتتتتلمع بمكياجها الناعم الموضوع على حرووفها المسرااارين .. بلبستها التقيييلة المزينة بالمجوهراات الغاالية .. كانت لبسة ديال عرووس " الأميرة "
شاافت فسميرة لي جاالسة حداها و قالت بابتسامة
جوهرة: فين مشى ياسيين ؟ شفتوا تعطل ياكما تلف علينا ؟ ننوضوا نمشييوا نقلبوا عليه لا يتوضر فهاذ الخلى ؟
سميرة : بصح تععطل ! صبري نصوني عليه و نشووف ( وقفات حاطة تيليفونها فووق وذنيها كتصوني و تعاود و جوهرة حااضياها بقلق حتى شافتها ضحكات و هي تقول بلهفة )
جوهرة: واش جاوبك ؟ راه بخير ؟
سميرة : لا رااه هو فين جاي شفتيه ؟
جوهرة:( ضارت بانلها جاي من بعييد بجلابة فالأبيض .. كيبان بحال شي ملااااك .. ابتاسمات من أعمااااق قلبهاا و وقفات بالشوية عليها كضحك مع سميرة بخجل ) انمشي نتلاقاه و نجييوا بجووج ..
تمشاات جهتوا بحال شي فرااشة .. عينيها ضاااحكين و بااينة عليها فرحاااانة .. كتشووف فيه بكككل حب ..حتى قرباات جهتووا و هو يضحك لها ضحكة غرييبة .. مدلها يدووا و قال
ياسيين: أجي معااياا
جوهرة:( بابتسامة ) فين ؟ راه مشى الحاال خصناا نمشييوا قبل ما يطيح الظلام و يتهولوا علينا
ياسيين:(باصرار ) غير أجي ماال رااسك قااسح
مدلها يديه كينعتلها بعينيه جهتها .. ما ارتاح حتى قبطات فيه و زادت معاه موكلة أمرها لله .. تمشااو مساافة طويييلة و كل شوية تسولوا وااش باقي ؟ راني عييت .. ما مرتاحاش يالاه نرجعوا .. و هو كيسكتها بها حناا قربناا .. غير صبري راك معاياا ما عندووا ما يوقع !
و فوااحد اللحظة اختفى كااع دااك الجناان .. استغربات و هي كتشووف شلال قباالتها .. ناازل بغزااارة وااحد منظر زوين بزااف بل راائع .. خصووصاا هما جاايين فالرااس ديالوا الفوق .. ضحكات بفرحة
ضارت عندوا بابتساامة لي سرعاان ما تبدلات لخوووف و عينيهاا خرجووا من بلاصتهم .. كااع ديك الصوورة الجمييلة لي كاان مرسووم بيها فعينيها تبدلاااات و جاات بلاصتها صورة شيطاانية ما تقدريش تكملي فيها الشووفة بكثرة ماا كتخلع و عينيه كيخرج منهم الشششر ..
غمضااات عيينييهاا كتترعد و تعيط بصوت خاافت على يااسيين حتى تسمعاات ضحكة قوووية و دفعها بيديه بجووج من الحاافة .. حتى فقدات التواازن و طااحت و هي كتغوووت بكل حرررهاا خصووصاا فاش باانلها كااع دااك الشلااال رجع عبارة على بركان والعااافية شااخضة فيه كيتسمع صوتها كيبقبق برعب خطييير كيبووورش اللحم .. قبل ما توصلي ليها قلبك يسكت بالخووف .. عافية شاااعلة خااصها غير ماا تااكل و هي أكييد غتكوون وقوود لييهاا ..
طااحت دمعة حااارة من عييينيهاا و فااااخر لحظة حسااات بشي يد قويية جبدااتهاا .. و فالبلاااااصة فاااقت جوهرة من كاابووسهاا كلهاا عرقااااانة كتتتترجف و عينيها كيضوروا فالغرفة بخوووف .. مسحاات عينيهاا لي كاانووا داامعين .. و بدات كتردد
جوهرة: أعوووذ بالله من الشيطان الرجييم ...أعووووذ بالله من الشيطااان الرجيييم ..
باقي كتكررهاا و تسمع صووت أذاان الفجر .. تسنااتووا حتى كمل و نااضت توضاات و قاامت صلاتها .. بإسدالها نااصع البيااض .. دعااات من قلبهاا و رجعات تخشات فبلاصتها و قلبها مرعووود و خاايف من الحلمة .. لي برراتها بلي غير الشيطان و حيت نعسات مقلقة و خايفة من هضرة جدتها و عمتها و ديكشي تعكس فحلمتها ..
دازت عليها ليلة طويلة .. كتنعس شوية و ترجع تفيق مخلووعة .. دماغها بقى مرمجة مع الحلمة .. ما لقاتش راحتها نهائيا .. حتى شرقات الشمش فجو مغيم و باارد شوية .. ما حسات غير بمها لالة رحمة كدوز على راسها كتفيقها
رحمة: نووضي ابنتي الله يرضي علييك ..نووض نخلي قداامك البووطة نمشي نتقداا لي خااصني .. راه عيطات عليا لالة سميرة و علماتني بعد غذا غيجيوا لعندنا نديروا خطبة رسمية
رحمة: ايوا خير البر عاجله منين مفاهمين .. ما كاين لاش نزيدوا نطولوا
كريم:( شاف فيه و تنهد ) ياسيين .. ما تاخذش شي قرار دابا و نتا معصب .. خلي حتى تبرد و فكر بالعقل
ياسيين:( حك سنانوا معصب ) ما نتعصبش ياك ؟ و لاش غنتعصب كااع وااايلي ؟ ياك غير مراتي صرفقات مي قداام عيني ! عادي ماشي شي حاجة ياك ؟ غير سباتها و ضرباتها ! خصني نهزها فوق رااسي و نصفقلها ( شاف فيه و صفق ) برااافوو ا لالة جوهرة .. زييديها لا تقصريش .. بااقي ناقصاها تربية .. عطي لمها علاياش كتقلب ( خنزر بحدة ) ياك ؟
كريم:( حك جبهتوا ) شوف .. أي وااحد بلاصتك غيدير بحالك و لا ما كثر كاااع .. و من حقك .. انا نلقى مراتي مشادة مع مي راه غندخل فيها طول و عرض .. صعيييب تشووف مك كتتضرب .. واخا يوقع لي وقع يديها ما تتهزش .. و لكن حاول تفهمها حتى هي .. و لقاو حل بالعقل .. دابا لي وقع وقع
ياسيين:( زفر بحرااارة و بقى ساكت شحاال عاد نطق ) المشاكل كيوقعوا فأي داار .. سميرة كنعرفها مزياااان و ما غاديش تخفى علياا .. حافضها و شاربها ماا .. و ماشي جوهرة و لا غيرها لي غادي يوريوني كي كتفكر ( عض على فموا بعصبية ) و لكن فعلة جوهرة ما غاديش دووز طرييفة نهااائيا ( ضرب برجليه صوندري حتى تقلب و تسمعات صوت تهريسة دالزاج .. و كمل كلاموا بغضب ) ماا تحطش يديها عليها .. ما تحطهاااااش .. ما حتارماتنيش أناا لي واااقف حدااها .. و دارت بوجه راني رااجلها يا حسرة .. اسيدي ما ديرش بوجهي .. تشوف غير عمر لي قبالتها .. وحدة قد مها و لا كبر تتطاول عليها ؟ واخا تكون هاذيك كلبة لي والداني
كريم:( مسح على وجهوا ) ما عرفت ما نقولك و الله ما عرفت !
ياسيين: جوهرة كن طلبات عيني .. نحطهم لها بلا ما نفكر و لا نتردد حتى ثانية ( شاف فيه بتمعن ) بغيتها من دوون غيرها و عزيتها فوق القياس .. ماشي بزينها و لا بشي حاجة فيها ( حك جوج صباع ) بالمعدن ديالها ... و لكن لي دارتوا ضيع كلشي .. عمري ننساها لها .. و بيديها جابت النهاية ديالنا
كريم :( مسح على وجهوا ) نكذب عليك ؟ فبلاصتك غنرمي عليها يميين طلاق نيشان و نجمعلها حوايجها تتكركب لدار باها .. و لكن جوهرة ! جوهرة ماشي د هاذشي بالله .. ما فهمتش شنو وقعلها ( ضرب على ركبة ياسيين ) غنقولك حاجة وحدة إن أبغض الحلال عند الله الطلاق .. ما تتسرعش .. كن كانت وحدة ثانية ما غنهضرش و ما غنشدكش واخا تطحنها .. و لكن ديك البنت نية و درويشة فوق القياس ما تستاهلش
ياسيين:( سد على كلامهم ب ) يكوون خير
💫💫 عند جوهرة 💫💫
خرجات من الحمام و جلسات حدا أمها رحمة .. كتعاودلها الموضووع من لول .. حتى وصلات لكلام سميرة و بدات كتبكي بحرقة و كملات لها الواقعة و هي كتشهق
رحمة:( تنهدات و دوزات على ظهرها بحنان ) صافي سكتي دابا .. لي وقع وقع .. الدمووع ما عندهم ما يزيدوا و لا ينقصوا .. شفتي هاذي يلا ما دارتلكش العقل عمرك ديريه يا بنتي
جوهرة:( بحزن ) ياسيين كرهني .. الشووفة هي لخرة ما دارهاش فيا ا ماما .. خسر عليا جوج كلمات .. " لباب وسع من كتافك " ( طاحوا دموعها ) حرااام عليييه 😭
رحمة:( بجدية ) جوهرة ! ما كاينش شي حد فهاذ الدنيا يرضاها على موو من لخر .. اييه عمرك قللتي منوا و عمرك غلطتي معاه .. و نهار بغيتي تفركعي درتيها يزلق فيها جمل .. ما فهمتش أنا لداابا كيفاش قدرتي تهزي يديك على مراة كبر منك ؟
جوهرة:( بالبكى ) ما عرفتش كي وقعلي .. ما حسييتش اماما و الله ما حسييت .. عمري فحيااتي كرهت شي حد تال ديك السيدة .. غير نعرف شنو صرفت فيها خاايب و نبكي على عمري و نقول ااححح و بردات .. حنيتلها الراس و درتها بلاصتك و كلامها هو لي كاين .. و هي فكل مرة كنلقاها كتحفرلي و تحط عليا البااطل ( تنهدات بحرقة تا تسمعات بالجهههد ) عيييييت و اللله حتى عييييت
رحمة:( تنهدات ) لا حول و لا قوة إلا بالله
وقفات و خرجات عند راجلها لي كيتسناها تفهموا شنو واقع باش يعرف كيفاش يتصرف حتى هو .. عاوداتلوا الواقعة من لول حتال اللخر .. غير كملات و هو يصعر ناض لعندها للبيت .. فتح عليها الباب بالجهد حتى شافت فيه و قال
الأب: هاذي هي التوصية لي وصيتك عليها ؟ هاذي هي التربية لي ربيتك ا جوهرة ؟ السلام عليكم تسرفيقة لحماتك ؟ و معيطالنا كتبكي و مخليانا كنتغاوتوا مع السيد على أساس غالط فحقك .. و نتي الخطأ لاسقك من ساسك لرااسك !
جوهرة:( كتبكي ) ااه أنا غالطة و لكن الخطأ جاي من موو هو
الأب:( هز صبعوا فوجهها و قال بصرامة ) هضرة وحدة غنقولك .. غنفطروا و ترجعي لدار راجلك تطيحي على يد مو و تطلبي منها السمااحة و ديري عقلك فراسك و لا ما غيعجبك حاال هانا فين قلتها
خرج من تماا كينكر مخليها مووراه كتبكي بحر جهدها .. بغات تسخف .. فشلااات و النفس بزز كطلعوا .. أما باها راه دوز لابيل لياسيين .. لي غير شاف نمرتوا و ماصى راسوا لي كيحرقوا و جاوب بهدوء .. من بعد السلام .. دخل ياسيين فالهضرة هو نيت
ياسيين: شوف ا سي محمد .. بنتك اعتبرتها أماانة عندي .. درت فووق جهدي معاها باش ترتاح فالعيشة معايا و ما يخصها خير .. اييه و مع ذلك حتى واحد ما كاامل .. كلنا فينا عيووب و الكمال لله .. صبرات عليا و صبرت عليها .. و لكن باش تمد يديها على المراة لي حملات بيا تسع شهوور .. لي تشركات باش جابتني .. لي صبرات على سهيير و العذاب ..و شحال من حاجة .. هنا سطووب .. تعدات الخطوط الحمرة ببزاااف ( تنهد ) تديرها مع ختي و لا شي حد آخور ندوزها عاااادي و لكن لديك السيدة لا !
الأب: فاهمك اولدي .. ما كنتش عارف الموضوع فلول ! تستاهل كاع لي قلتيه .. لي دار الذنب يستاهل العقوبة .. و هي دارت علاش و ما ظلمتيهاش ( سمع صوت تنهيداتوا ) جوهرة غتجي تطلب السماحة من الواليدة ديالك مور الفطور .. بالخاطر و لا بزز
ياسيين: الحاج ! نهار لول حطيتلها كلشي فوق الطبلة و بإرادتها بغات تزوج بيا و نبنيوا عشنا حتى حد ما بزز عليها شي حاجة .. تا دابا بغات ترجع تطلب السماحة بإرادتها بلا غصب مرحبا .. ما بغاتش تدير لي ريحها
الأب: الله يصفي النفووس .. غترجع و يديها فوق راسها .. ما تتعاود غير الصلاة على النبي
قطع معاه و ناض لبيتوا كينكر .. مخلي جوهرة موراه كتسمع هضرتوا كااملة و كطيح عشرة د الدمعات من العين .. الحضن الحاامي لي يرأف بيها و يقولها أنا معاك واخا كااع لي وقع .. ما لقاتوش ! هضرتوا خنقااتها .. حاسة بإحساس خااايب بزااااف و هي عاارفة غتمشي بزز منهاا .. و عاارفة الجحييم لي غيكوون كيتسناها .. و هاذ المرة حتى ياسيين قالب عليها وجهوا و نافخ ! هاذشي يلا رضى يدخلها لداروا !
قتلات راسها غير بدمووع القهرة و الحكرة و الباااااطل .. سمعات صووت الأذاان فعز قهرتها .. تنهدات بقوة و تمنات لو ما كانتش غيكلي تصلي و تدعي من قلبها لله عز و جل يفرجها عليها .. الأذان كان مؤنسها فوحدتها و فحزنها .. كأن الله كيقولها يلا ما لقيتي حد أنا كااين و قاادر نسير حيااتك أحسن تسيير .. و قادر نفتحها عليك فرمشة عين .. وقفات مهدوودة و هزات التسبيح ..كتستغفر الله و تدعي من قلبها بحسبي الله و نعم الوكييل لا غير !
أماا سميرة راه ما خلات لمن عيطات و لمن قاالت على فعلة جوهرة .. هضرات حتى شبعات و ما خلات فيها غير لي نسات .. و ابتسام حداها كتزيدلها فيه ..
سميرة: جيبيلي تيليفوني نسول على ياسيين فين مشى ؟
عطاتوا لها بنتها كتصوني عليه و تعاود بلا حتى جواب و بعد ساااعات تم دااخل من الباب .. وجهوا صففففر .. نقطة دالدم ما فيهش .. باين عليه متألم و عينيه فيهم حزن فششششكل .. شافتوا و تقادات فبلاصتها
سميرة: ياك اوليدي هاذي هي يماك .. مشيتي بلا ما تسول عليا كيف بقيت و لا
ياسيين:( حبسها بيديه و بلع ريقوا بصعووبة حتى تحركات تفاحة آدم .. غمض عينيه و قال ) ولد زينب توفى الواليدة
سميرة:( شافت فيه ما متيقاش ) سير سير قالاك عاد قبيلة هضرت معاها و ما كان بيه والو .. ما تضحكش معايا فهاذشي
ياسيين:( هز عينوا للسما و تنهد بقوة ) الموت ما فيهاش ضحك .. ولدها توفى .. عاد كنا معاهم ( مسح على وجهوا و مدلها يديه قبطات فيه كترجف و الدموع نزلوا من عينيها ) نوضي تمشي عند بنتك .. لله ما أعطى و لله ما أخذ .. صبريها و ما تزيديش على ما بيها
ابتسام:( وقفات كتترعد حتى هي و الدموع نزلوا من عينيها بحرقة ) زينب غتحمااق .. اويلي على ختي
خرجوا من تما بالجرا و عقلهم كلهم مرفووع وصلوا لدار بنتهم .. لقاو الباب مفتووحة دفعوها و دخلوا .. لقاو قبالتهم خليل و واليديه و خوتوا عاد كريم ... صوت زينب مسمووع على الجههههد .. طارت سميرة دخلات عندها للبيت ..
لقاتها معنقة ولدها بقوة لصدرها و كتبكي بكل قوووتها و تغوووت .. وصلات لدرجة الانهيااار .. دموووعها شلااال ناازلين على خذها لي هبطااتوو بظفارها و شعرها كلووا نتفااتووا ..شافت مها و قالت بألم
زينب: مااماا قوولوا يفييق ا ماامااا الله يرحم وااليديك يلا ما نوضيييه .. علاش ما بقااش كيتنفس ؟ علاااش ما كيردش عليااا و يضحك معاياا بحال لي موااالف ( تحنات باستوا فحنكووا كتبكي بحرقة ) فيييق ا ماما ..اااخر مرة نقوولك سكت و خليني ننعس .. نبقى حيااتي كااملة بلا نعااس غير بقى معااياا
ضربات على قلبها بالجهد و عنقات مها لي حيداتلها ولدها و خشاتها فصدرها كتبكي معااهاا
سميرة: الله يرحموا ابنتي الله يرحموا .. مشى لجنة ابنتي خصك تكوني فرحانة .. ما ديريش هاذ الحالة فراسك
زينب: غنموووت ا مااماا بلا بييه و الله حتى نموووت ..دنيتي و حياااتي كلها مرتابطة بيه .. يلا مشى تانا غنمشي معااه
ابتسام:( معنقاها من الجهة الثانية ) صاافي اختي الله يستر علييك يااا ربي .. قطعتيلي فقلبي صاافي
زينب: أناا قلبي شااعلة فيه العاافية ا ختي شااعلة فيه العاافية .. شمن ذنب درت فحيااتي باش يخرج فولدي لي بااقي حتى ما فرحت بيه كيف بغييت ..بااقي ما سمعت تا كلمة ماما من عندوو .. بااقي ما شبعت من ضحييكتوو
سكتات مخنووقة كتبكي بكل جهدها و مها و ختها كيبكيوا معاها حتى دخل ياسيين .. لي غير شافتوا طلقات منهم و مشات عندوا ..حطات يديها على الكول ديالوا و تعلقات فيه
زينب: يااك دييما كتقوولي غتبقى دييما معاايا و حد ما يوصلني بحر و شنوو ما طلبت منك تحققولي غير نكوون فرحانة ( حرك ياسيين راسوا بااه و عينيه تغرغروا من منظرها و كيفاش كتهضر بحال الحمقة ) واا فيقلي ولدي و الله ماا نصبر عليه ا يااسيين و لا نصبر ( هزات يديه و باستها تا خطفها و حطها على راسها معنقها عندو تا فشلات بين يديه ) مشى ضوو عييني ؟ ما غنعاودش نشووفوا ؟ صافي ولدي مشى من بين يدي ( هزات راسها و غوتات بحررر جهدها ) يااااااا ربييييييي يااااا ربييي ( تسمع صووت أذان المغرب مع كملات كلامها )
زادت فبكاها حتى عينيها بدااو كيتقلبوا و سخفات بين يديه هزها مخلووع حطها فووق الناامووسية كيضرب فوجهها تفييق ..و البقية كيجريوا بالعطر و الماا باش تتوكض .. مع ذلك ما فتحاتش عينيها .. تحنا هزها بين يديه و خرج من تما .. لقى فوجهوا رااجلها .. لي ما قدرش يصبر على حالتها و خرج محطم من عندها .. شافها و تخلع .. و تبعوا فالبلاصة بالجرا ..
داوها للكلينيك .. دخلوها فالبلاصة للفحص لقاو الطونسيون طاح لها .. ضربولها شووكة و رجعوا خرجوها من تما هكاك ناعسة .. كانت الدنيا بدات تعمر بالبشر .. طلعوها لبيتها لي كان خااوي .. حطها ياسيين فبلاصتها و لمح البيبي فلفتوا البيضة .. حاطينوا فكونتوا .. قرب منوا و هزوا باسوا فجبهتوا .. و رجع حطوا .. حتى يتافقوا على الدفن فوقاش .. الخ الخ
ياسيين: طير من طيور الجنة يا رب
دازوا سااعات كحلة عليهم تا حد ما حط النعمة فحلقوا .. حدهم شربوا باش يفرقوا الصوم لا غير .. حالة الكل متدمرة على الآخر .. خاصة زيينب مسكينة .. صووت القرآن مسمووع على الجهد فالدار .. و لي كيسنع الخبار راه كيجي يعزي ..
جالس ياسيين حدا الرجال حاني راسوا فصمت تا سمع صوت تيليفونوا ..لقاه أب جوهرة .. تنهد و جاوبوا .. علموا بالخبر و نعت ليه دار العزوا عاد قطع معاه .. داز وقت لا بأس بيه .. تا شافوا دااخل و موراه مراتوا رحمة .. عاد جوهرة .. لي عينيها مبوقين و حوومر و تحتهم كحل ..
تنهد و وقف مشى عندهم .. عزاوه و دازوا عند واليدين خليل .. من غير جوهرة لي بقات ثابثة فبلاصتها و عينيها مغرغرين بالدموع بلعات ريقها و قربات جهتوا
جوهرة: البركة فراسكم .. الله يرحموا و يصبر واليديه على فراقوا
ياسيين:( تنهد ) عزانا و عزاك واحد .. دخلي عند زينب راها لداخل
حركات راسها بواخا و دخلات لبيت زينب لي كانت نااعسة و حالتها حاالة ..باينة مألمة لأبعد حد .. تنهدات بقوة ..عندها عزييزة بزااف و جاها الخبر حتى هي صددمة لدابا ما متقبلاهش !
ركزات غير فزينب و ما انتابهاتش شكون آخور فالبيت ..على عكس ابتسام لي غير شافتها كحلات بالعمى .. يالاه شدات جوهرة الباب و تمات داخلة ..اندافعات عندها ابتسام بعصبية تا وقفات عليها
ابتسام: جايا تشمتي فيها ؟ عندك لوجه لي تقربي لعندنا مرة أخرى ؟ ( بالغوات ) ضااربة مي ابنت الحراام ما لقيتي لي يهرسلك داك اليدين لي فرحانة بيهم ؟ ( زادت عندها عوالة على خزيت )
جوهرة:( شافت فيها و خنزرات .. حاسة بذاتها كلها كتترعد عليها ) تقيسيني غنشتف عليك و نوريك لي عمرك شفتيه الحماارة .. يلا نتي مواالفة بالشمااتة على عباد الله أنا لا ( ضحكات باستهزاء و قربات منها و همسات ببرودة ) ما عرفت شكون فينا حاافضة طريق الغابة بعينين مغمضين و مولفة بالتشلقيم فالهواء الطلق ( بعدات و غمزاتها )
أما ياسيين راه رجع جلس فبلاصتوا .. حداه كريم لي ساكت تا هو بحزن كبيير .. شاف فيه و قال
غير كمل كلاموا و دارت ليه فالرااس طننن .. ناض من تما بالخف و مشى لبيت ختووا .. فتحوا على غفلة لقاهم مقاابلين و وحدة كتشووف فالثانية باغية طيرها ..شافت فيه ابتسام و قالت
ابتسام:( بالغوات ) هاذي شكدير هناا ا يااسيين .. وااش حتا ما غنرتاحوش من الهم و المشااكيل .. ضاربة ماما و زايدة مع طريق و بلا حشمة و بلا حيا جاية دابا لهنا
جوهرة:( شافت فيها و تنهدات ) العزا هذا و غنكون بنت الحرام و قليلة الاصل يلا ما جيتش و وقفت معاكم .. و خصوصا مع ختي زينب لي ما صرفات فيا غير الخير ( شافت فياسيين ) يلا بغيتوني نمشي ما نزيدش دقيقة هنا .. يكفي من لي دخلت للبيت و أنا كنسمع فالهضرة على وذني
ابتسام:( بانفعال ) منيين ما درتش فيك يدي .. ما درت واالووو و لكن غير تسناي و تفرجي فراسك شنوو غيطارلك
ياسيين:( مربع يديه كيتفرج فيهم .. حتى سكتوا و قال بروود ) كملوا علاش سكتوا ؟ ( شاف فختوا ) نوضي نتفيها .. يالاه ديري فيها يديك نشوف !! يالاه مديها ! ( قلب عينيه لعند جوهرة ) و نتي نوضي سرفقيها و قلبوها معاطية ديال الطيابات .. يااالاه شكتسنااو ؟
ابتسام: راه هي لي
ياسيين:( قاطعها بصرامة و قرب جهتهم ) قسما بالله و نسمع حلق شي وحدة فيكم تا نجبدلها حلاقمها من بلاصتهم .. غتجلسوا بحال الناس تبارك الله .. ما غتريحوش غنقلبوها كااملين دراري صغاار ( هز سبابتوا بتهديد ) انا هضرت ! ديروا لي عجبكم و تفرجوا ساعتها
خرج و خلاهم وحدة كتشوف فالثانية فالأخير قلبات ابتسام طريقها لجهة الشرجم عاطياها بالظهر و جوهرة قربات من زينب .. تحنات على جبهتها و باستها و دوزات يديها بحنان على شعرها
جوهرة: الله يقوييك و يعطيك الصبر احبيبتي .. ربي بغااه و ان شاء الله يشفعلك فالآخرة
جلسات حداها شوية و ناضت بحالها .. ما بغاتش تفيقها حتى تنوض بوحدها و تهضر معاها و تحاول تصبرها .. خرجات عند أمها لي جالسة مع العيالات فصالون مقابل مع الصالون فين جالسين الرجال .. فاصلين بيناتهم بخامية فالوسط .. رمات عينيها كتقلب على سميرة .. لكن ما بانتش لها !
تنهدات بخنقة و هي حااسة بعينين الناس كااملين عليها .. نسااو العزا و بقاو حاضيين وجهها و يحنزوا بلا حشمة ..
رحمة:( زفرات مفقوصة ) قتلك غطي داك الوجه بشي حاجة و نتي جاية بيه مخضر
جوهرة:( هزات كتافها بلا مبالاة ) واش نماكي و أنا جايا لجنازة ؟ و زايدون خليه يشوف شنو داار و يتقلى تا هو
رحمة:( عوجات فمها ) و الله ا بنتي ما كاين لي كيتقلى هنا قدك و لكن سرك .. وااش بشرى الصغييرة فيكم مطورة كثر منك و ما ديرش فعلتك !
جوهرة:( حسات بالخنقة و باغى تبكي خصوصا مع أجواء الحزن و صوت القرآن كيبوورش .. ما حسات غير بدمووعها دااروا فرررر و طاحوا ) زيديني حتى نتي .. حتى واحد فيكم ما فاهمني ..حتى واحد ما حاس بيا .. كل واحد كيفكر غير فراسوا لا غير .. و جوهرة لهلا يقلب بيها
رحمة:( مسحات على وجهها فقصاتها ) بكي يا بنتي بكي،هاذشي لي كتعرفي ليه ( ضربات فحنكها ) ميمتي على فقصتي ..البنت غطرطقلي المرارة و تصفيهالي قبل الوقت ( خرجات عينيها فيها ) سكتي و نوضي هضري مع راجلك و عوض تخوي عليا المزيودة خويها عليه هو نيت و رديه لصفك
جوهرة:( هزات راسها بلا و زمات فمها)
رحمة: ياك اختي ! ايوا سدي مهروزك قبل مانوريك من المنقي خيارو قدام أمة لا إله إلا الله ( عطاتها صبع بينها و بين بنتها بلا ما يشوفها حد ) هاكي جلسي عليه .. و من بعد ما تجيش تبكي عليا عرفي درتيها لراسك ما تسمعيش الهضرة خليك!
《مَـن جَعلَـت الحِجآب تَاجهآ
والرسُول قُدوتُهـآ والقُرآن نبرآسهَا
والحيآء بأخلآقها كآنَتْ أسْعد فتيَآت زمآنِهآ 🌸》
جوهرة: ما غنبكيش عليك .. يلا ما بغانيش ما عندي ما ندير ليه .. نلسق فيه بزز ؟ ( كملات بصوت مخنووق ) يلا من أول خطأ ليا معاه غيقلب عليا و يلوحني بحال عمروا عرفني .. صافي ماشي مشكل
رحمة: قاتلك ما غتبكيش ! رااه اناا لي غطرطقي لمي عرق فالراس ( تنفسات براحة و قبطات فيديها ) رااه ماشي موضوع عمروا عرفك و لا واش كيبغيك .. راه الرجال كاااملين توصل ليهم لواليديهم ما يعقلوش عليك .. واخا يكونوا ما يسواو ما يصلاحوا .. يحصلك غير كتنهضي و تغوتي عليها يطليييك ..حرااك ما تهزي يديك فحضرتوا .. كيفما نتي مجروحة حتى هو مجرووح و كثر منك كااع .. راك صدمتيه فيك .. و غتلقايه لدابا ما متقبلهاش .. قلة احترام كبييير ليه و لمكانتوا ابنتي .. و لو واحد غيروا غيدير ما كثر .. شفتي كيفما حنا العيالات كنفهموا بعضياتنا .. حتى الرجال نفس الحاجة .. و باك شرحلي وجهة نظروا مزيااان ..و لقيت عندوا الصح فكل كلمة
جوهرة: واش انا ماما قلت ماشي غالطة ؟ عارفة راسي غالطة و لكن وصلات بيا للعظم معاها و فكل مرة كتحط عليا باطل قد الجبل و كندوزها .. واش كتكذب عليا فنص نهار فرمضان و هو ساكت ما نطق بحتى كلمة
رحمة: غلطات فيك ؟ ااه غندخل عندهم و غنوقف حدا راجلي و غنهضر ببروودة و نقول تانا لي عندي و نحطها بوجهها .. ما قادراش ؟ ما عندكش القوة باش تديريها ؟ غتدخلي و تقوليلها الله يكثر خيرك اخالتي هاكا يكونوا الامهات و هاذشي باش واعدتيني و وفيتي الله يكثر من خيرك .. و تطلعي تجمعي حويجاتك و تكركبي مع الدروج .. يلا كيعرف دار باك يجي عندك .. و لكن باش ديري فعلتك ..طيحتي بيه أولا قداام كلشي و العينين لي يحلهم فيك ما غيبقاوش .. هاذي واحد .. ثانيا طيحتي براسك نتي بمستواك و بأخلاقك و تربيتك و زدتي بينتي ليه بلي ممكن هضرتها تكون صحييحة .. و لي تضرب قداموا تدير العجب مور ظهروا .. و فالأخير فعوط تجلسي و تحاولي تصلحيها .. زدتي كفستيها ..من لخر ابنتي خريتي و جلستي فووقها .. و كن غير دgيتي لوتاد و درتي بلاصتك نقولوا يقدر يدوزها واخا ما نظنش ! و لكن نتي العام باقي ما كملتيه .. خمس شهور لي عرفك فيهم و بغيتيه بفضلك على مو لي 36 عام و هي حاضنة عليه ! واخا يكون وااكل عليك التقاشر ابنتي ما يديرها .. و عاد هو بعقلووا و مقرص كثر مني أنا .. و الله و ما بغى يهضر ما تدي منوا لا حق لا باطل .. ضارب حسابوا فراسوا و عارف شكيدر .. كيهضر بالمعااني و متبث راسوا .. لا نتي تقدري تسيريه على كيفك .. لا واليديه .. كان عليك تصبري حتى يهضر هو .. نتي زربتي و خرجتي للعيب قبل ما تشوفي ردة فعلوا هو كي دايرة !!
جوهرة:( بقات ساكتة ما لقات ما تقول .. عندها الحق فكل كلمة قالتها .. بقى الصمت مدة لا بأس بها ..و عاد قالت بتردد) كاع ما شفت ماماين ياسيين ( حكات عنقها ) نوضي هضري معاه و قولوا يكلمهالي نطلب منها السماحة قداموا
رحمة:( شافت فيها و بانوا عليها ملامح الرضى نوعا ما ) وا هكاك الله يرضي عليك .. نوضي نتي عندوا و قوليها ليه ..و طلبيها قدام كلشي باش تسكتيلها الحس .. و ما تلقى ما تقول و ما تخيب فصورتك للناس
جوهرة:( شافت فيها بتردد ) ندخل عندوا جهة الرجال غينوض يلسقني مع حيط .. ما نقدرش .. سيري نتي عندوا .. أصلا محلف عليا بلا واالو كيتسنا غير لوجيبة ( جمعات فمها بحال النقطة )
رحمة:( ميقات فيها ) لا باينة كتخافي .. الله يمسخك و يمسخني معاك .. لبنت طارت على مو بحال فاندام و قاتلك ما نقدرش محلف عليا !! وااا باااز اطرزان باااز
جوهرة: وا صافي ا ماما .. غتبقاي تفكريني فيها كل دقيقة تشوفيني فيها ؟
رحمة: يلا جات غير فيا أناا .. راك مباااركة ( حطات يديها على حلقها ) غتلقايه واحلة ليه هنا ..
جوهرة:( شافت فيها مغبنة ) و كتقوليلي مكفساها و معيطالنا .. كن بقيت كن قطعني طرااف و دابا كتاكلوا فسكسوا ديالي
رحمة: نتي راه شي سلك فداك العقل تبوشالك ما فيهاش و لكن بصح .. خاص شي مصييبة كثثثر من لي درتي يتلاهى معاها .. باش ينساها لك و شووف تشووف .. دابا خلينا منك نتي وياه .. ماشي وقت الهضرة ..حتى نكونوا نايضين و يحن الله غير عنداك ترجعي فهضرتك
جوهرة:( بلعات ريقها و حكات يديها مع بعضهم بتوتر ) لا
💫💫 فالبيت لداخل💫💫
جالسة سميرة حازمة راسها و عينيها منفووخين و دمووعها غير كينزلوا .. كتفكر ولد بنتها شحال هزاتوا .. شحال سهرات معاه و خصوصا فالاسابيع لولة ديال ولادة بنتها .. ما كانت كتعرف زينب دير والو .. و كلشي مكلفة بيه أمها ،بين عينيها ضحييكة ديالوا تبجغيطوا .. و لومبيونس و الحركة لي كان خالق فالداار زويين لوااحد الدرجة لا تصور .. كيخليك لا إراديا تسهاي فيه و بحركاتوا البريئة تبغييه و يدخل لقلبك من أوسع أبوابوا .. و فلحظة تبخر و طار من بين يديهم بحال عمروا كاان
سميرة:( غطات وجهها بين كفوفها كتبكي بحرقة كيتسمعوا غير صوت شهقاتها ) الله يا ربي الله ... يااا ربي صبر ديك البنت و كون معاها .. ياا ربي ما توريني فيها ضر .. يااا ربي 😭
دخلات عليها أم خليل لي بدورها متألمة و قلبها وااكلها على ولد ولدها .. و ما عز من الكبدة المعاودة ..
الأم:( جلسات حداها و دوزات على ظهرها بمواساة ) الصبر اختي الصبر .. ربي بغاه ما عندنا ما نديروا من غير نعضوا فالصبر و ندعيوا مع دوك الوليدات ربي يقويهم و يعطيهم الطاقة
الأم:( تنهدات ) الموت ما كتعرف لا كبير و لا صغيير .. كتخطف ناس عزااز فرمشة عيين .. سعداااتك ياا فااعل الخير ( عرات على يديها كان لحمها مبووورش و عينيها دمعووا ) يااااا ربي يسمحلناا و يغفرلنا .. ما عرفنا ساعتنا فووقاش تكون ( شافت فيها ) كنتأزم فالمووت واخا نكون ما كنعرفوش .. قلبي غيسكت من الخلعة يا ختي سمييرة .. حتى وااحد فينا ما مستااعد للحظة لي يمشي فيها عند الله و يتحاسب لأعماالوا .. مقصريين بزااااف من جهتوا .. الدنيا جرااتنا و غراتنا فووق القيااس
سميرة:( فهاذ اللحظة بالذات جات بين عينيها جوهرة و تطرطقات بالجهد كتبكي .. كلام أم خليل جاها على الجرح تمااما )
الأم: سمحيلي ما بغيتش نزيد عليك قلبي وااجعني على وليداتنا و على راسنا .. فكل مرة ربي كيعطينا فرصة فين نفيقوا .. و حنا كنتماداو .. و المووت أكبر دليل .. واحد يبات معاك ما بيه واالوا .. الغذ ليه يصبح متوفي .. كيفاش و علاش ؟ قضاء الله .. و وفى أجلوا .. و حنا يعلم الله فوقاش تجي ساعتنا .. الله يوصلنا لداك النهار مؤمنين يااا ربي
ناضت معاها و خرجات منهاارة على الآخر .. ماشية فالكولوار حتى خرجات فياسيين .. مد يديه قبط فيها و هي بدورها زيرات عليه و خشات راسها فصدروا كتبكي بحرقة و هو معنقها ساكت .. مخليها تخوي و ترتاح .. حدو كيدوز يديه على ظهرها بحنان ..
جوهرة: ماما غنمشي للحمام و نجي
حراكتلها راسها بسيري و هي متخشعة مع القرآن ... ناضت جوهرة حانية راسها بالضورة باش ضارت فالكولوار .. لمحات ياسيين و موو .. تا هو حس بشي حد موراهم ..هز راسوا شافها بنظرة بااردة و رجع حنا عينيه لموو .. تحنا باسلها راسها .. و بعدها بالشوية عليه
ياسيين: باركة عليك .. ارتاحي شوية زينب محتاجاك ما تقتليش راسك تا نتي و تقتلينا معاك على جوج مرات
سميرة: الله يرضي عليك اولدي .. الله يرضي عليك ( قلبات عينيها و هي تلقى جوهرة واقفة بعيدة عليهم بخطوة تقريبا .. حافضات على ملامحها و نطقات ) جوهرة ؟
ياسيين:( شاف فيها و تقلب عاطيها بالوجه .. ربع يديه كيشوف شنو غادي دير )
جوهرة:( تزنننكااات رجعات بحال ماطيشة و كااع ديك الهضرة لي كانت كتقول فراسها غير وصلات للصح تبخرات .. ما حساتش حتى كانوا الدموع جراو فعينيها و هي كتقرب من سميرة .. تحنات باستلها راسها و بعدات شوية و قالت بصوت مخنووق ) سمحيلي اخالتي .. ما عرفتش كي وقعلي حتى درت ديك الفعلة ..عافاك سمحيلي 😭
ياسيين:( ساط بحرارة و مسح على وجهوا كيستغفر الله و جوهرة كتبكي قبالتهم من نيتها .. حتى رجعات كلها كترجف ) جوهرة ماشي وقتوا
سميرة:( تنهدات و شافت فولدها ) ما عليش .. صافي ما وقع باس ..
جوهرة:( شافت فيها كتترعد و رجعات شافت فياسيين لي بانلها اعتذارها ما بدل حتى حاجة عندوا .. بقى فيها الحال بالجهد .. تنفسات مترعدة ) شكرا .. البركة فراسك
سميرة:( حركات راسها متألمة .. جاوباتها و زادت مع الطريق ) ما مشى معاك باس
جوهرة:( شافت فياسيين .. لي بقات هي وياه الراس فالراس .. مسحات دموعها و قالت كتشهق ) ما غتقول والو ؟
ياسيين:( ركز فيها بتمعن ) يلا هضرت غنبكيك ا جوهرة ( دوز على لحيتوا و ساط ) سيري جلسي حدا مك .. هاذ الوقفة ما عندها معنى فهاذ الوقت
دارت بناقص من شي حمام .. رجعات من الطريق كتجري عاضة على فمها و دموعها شاقين طريقهم فعينيها .. تخنقات و خرجات للباب تتنفس .. هزات راسها للسما كتنفس بثقااالة .. بحال يلا شي حجرة ثقييلة محطووطة على صدرها .. هزات يديها كتشوف فخاتمها تتلعب بيه فصبعها و عقلها ماشي معاها .. حتى حسات بشي خيال حداها .. هزات عينيها بانتلها حنان بجليلبة و فولار فراسها .. هازة التيليفون كتهضر .. حدها سمعات جوج كلمات .. و الباقي ولا غير طننننن فوذنيها ..بحال يلا عاايشة فشي كاابووس .. باغى تفيق منووا و كلما كتحاول تلقى الخرجة كتزيد تغرق كثر و كثر .. عرفااتها و كي دير ما تعرفها و هي التصااور تطبعوا فرااسها هما و مساجتها حفضااتهم
---- أنا فالباب اصحبتي بزز لقيت الدار .. خرجي عندي
قربات جوهرة لجهة حنان لي قطعات لابيل .. و فكل خطوة اتجاهها كتفليها بعينيها .. كأنها باغى تعرف شكون هاذ خيتي لي جات قلبات لهم حياتهم راس على رجلين .. ما غتنكرش بلي حتى هي زوينة .. واخا زينها بعييد على جوهرة كل وحدة و كيفاش ( وحدة زعرة و وحدة حنطية ) .. ربعات يديها و نطقات بهدووء
جوهرة: نتي لي صدقتي فينا كاااااملين بنت دارهم !
حنان:( شافت فيها باستغراب .. حتى أنها ما عرفاتهاش ) عفوا ؟ ما فهمتش ؟
جوهرة:( ببرود ) تهجمت عليك أنا و ختي و نتفناك فقلب داركم و فالأخير جايا لعندنا تعزي ! ( باستهزاء ) زعما الله يعطينا غير شوية من حسن نيتك .. و نعم التربية تبارك الله !
رمات كلامها و ضربات فيها بكتفها و دخلات بحالها ما باغاش تزيد معاها لا تمشي دير شي زبلة كثر من لي فاتت و تصدق مكحلاها كثر على راسها .. فحين حنان التازمات الصمت .. بقات غير متبعة لها العين .. حتى خرجات عندها ابتسام مسلتة
ابتسام:( سلمات عليها بالزربة ) دخلي ا صاحبتي هاذي الوجيبة فين تتقربي منوا و تواسيه و هكذا غتبان نيتك .. المهم انا دخلت ما خصهمش يشوفونا بجوج .. زيدي شوية مورايا و تبعيني ( دخلات كطير قبل ما يشوفها شي حد )
رحمة:( شافت فبنتها لي كتترعد حداها بالأعصاب ) مالك عاد كنتي بخير ؟ ااش واقع ؟
جوهرة: مشيت هضرت مع خالتي و طلبت منها السماحة .. قبلاتها و ما قالت والو .. و لكن ياسيين
رحمة:( قاطعاتها ) عادي ما يرضاش .. و لكن فالداخل ديالوا غيكون عجبوا الحال .. المهم درتي لي عليك .. هاذشي لاش معصبة ؟
جوهرة:( عينيها كيضوروا على ياسيين .. تا شافتوا دايز قبالتها .. رجعات ضورات وجهها لجهة الباب .. بانتلها حنان .. شيراتليه و قربات عندوا .. غززات شفايفها كتبرد فيهم العافية لي شعلات فيها .. و رجليها راه كتتحركهم بعصبية بلا ما تحس .. عياات صاابرة فلخر وقفات ماشية عندهم .. وقفات عليهم و مدات يديها لجهة ظهروا .. ضوراتها عليه تا شاف فيها .. هي لي مزننننكة و شراار دالغيرة كيطيروا من عينيها .. شافت فيه و بزز تبسمات ) حبيبي قاتلي خالتي بغيتيني فشي حاجة ؟ و من قبيلة و نتا كتسول عليا ؟ عارفة ما تحلالكش الجلسة بعيد عليا .. و لكن راك عارف الظروف ( قلبات عينيها بعفوية و شافت فحنان ) اااووه كااع ما شفتها .. يمكن كنتوا كتهضروا فشي حاجة مهمة .. نمشي ؟ ( غرزات ظفارها فظهروا و كتشوف فيه بديك النظرة ديال تقولي سيري يترحموا عليكم )
ياسيين:( ببرود كيشوف فيها شنوا باغى تصنع ) خليك !
حنان:( بابتسامة صفرة ) ما عليش البركة فراسكم !
جوهرة:( رداتلها نفس الضحكة ) ما مشى معاك باس .. ما تبقايش هنا .. دخلي احبيبة للصالون جلسي مع العيالات ( ببرود ) ضيفة بحالك بحالهم .. دوزي وقيتك و تمشي بحال أيها الناس !
ياسيين:( جاتوا الضحكة من الموقف و مع ذلك كيشوف فيها ببروود )
حنان: معلوم ضيفة احبيبة و أي واحد فلول كيكون دخيل من بعد كيدير بلاصتوا غير بالفن ( غمزاتها )
جوهرة: بصح هاذي عندك .. ممكن فعائلتكم .. لكن ماشي عندنا حنا ! حيت احبيبة كاع لي هنا رجاااال ماشي شماايت ! هو زوين لواحد يحلم و لكن غير على قدوا حين ما يتصدم و يدخل فاكتئاب ( رداتلها الغمزة )
ياسيين:( نحنح ) حنان دخلي بحالك
حنان: اووك ! و كيفما تافقنا دوز هاذ الثلث الأيام و نتلاقاو على موضوعنا
مشات بحالها مخلية جوهرة كتعيب فيها .. غير شاف فيها ياسيين و هي تخنزر
جوهرة: وليتي تدير الرونديفويات اخويا ؟ ( الدموع بغاو ينقزوا من عينيها و صوتها ترعد ) وا سير تلاقاها و شووف الفضيحة لي نديرلكم
ياسيين:( ضربها بجوج صباع لحنكها ) بقالك شوية تنوضي تسلخيني ( حمر فيها ) تاقاي شري و جلسي مركنة فبلاصتك .. ديري عقلك حسن لك
طلقات منوا و كلها رجع لبلاصتوا .. جوهرة حدا يماها مقابلة مع حنان باغى طيرها .. و ياسيين مع الرجال حدا كريم .. لي شاف المسرحية كاملة
ياسيين:( شاف فيه بمعنى من نيتك ! ) بقاتلي غير هي فالحساب ! و لكن مزيان منين جات برجليها
كريم: ااش ناوي ؟
ياسييين:( تكلم مطمر ) غنلاقي لهم الريوس بجوج ( مسح على وجهوا ) سووق العياالات خااااوي غير لي بغى يدير فيهم راسوا و صاافي
كريم:( حرك راسوا ) ارا ما يعاودوا عليك .. نشوفوك باش غتفكها
ياسيين:( ببرود ) ما غنفك ما غادي نشربك غير صبر نسالي لهم ! كل وحدة فيهم غتتخلص على فعلتها ..
تحط العشا .. و موراها بداو الناس كيخرجوا و كتخفاف الدنيا شوية .. حتى تسمع صوت غوات زينب .. قفز فالبلاصة ياسيين و طاار عندها لبيتها و تابعوا كريم من لوور .. لقاو خليل واقف قبالتها متألم من حالها و هي واقفة كتقلب و تزدح فلي جا حداها .. صوت بكاها و شهقاتها مسمووعين على الجهههد .. و ففمها جوج كلمات
قرب منها ياسيين و بعدها من تما خاشيها فصدروا .. تا هي ترخات ليه حتى جلسها فبلاصتها و مدات يديها حطاتهم على صدروا مزيرة عليه و دموعها ما نشفووش
زينب: فين هو ولدي ؟ بشمن حق تهزوه من بلاصتوا ؟ ( عضات على فمها كترجف ) ما تهزووهش ( شافت فراجلها لي بدوروا مهمووم ) خليل جيبلي ولدي 😭 مسكين غيكون كيبكي و ما حداه حتى واحد .. ما غيلقى راحتوا فحتى بلاصة من غير حدا ميمتووا ( متبعها بألم .. لكن مكيجاوبش و ما عارف ما يقول ) واا خليل راه هذا وقت ماكلتوا .. جيبولي نشم ريحتوا و نشبع من عوينااتوو
خليل:( حط يديه على كتاف ياسيين و حركلوا راسوا ينوض و ديكشي لي كان .. جلس فبلاصتوا و عنقها عندوا كيحاول يسكتها ) زينب .. استغفري الله .. هاذشي مقدر علينا .. ما تقتليش راسك هاكا و تقتليني معاك .. يكفي لي راحنا فيه دابا ( دوز يديه على حناكها بحنان كيمسحلها دموعها ) ولدنا طير من طيور الجنة .. غذا غادي ندفنوه مع الظهر .. أنا لي خرجتوا من هنا .. ما غيبقاش حداك حتى تحماقي .. غذا و تشوفيه
زينب:( تنفضات منوا بالجهد و وقفات مبعدة عليهم كااملين و عينيها خاارجين فيهم و صوتها كلوا ألم فألم ) كلكم أنانيين .. حتى واحد ما حاس بيا و بكبدتي المحروقة .. حتى واحد ما باغي يرحمني ( طاحت على ركابيها للأرض كتبكي بحرقة و ضرب فصدرها بكل قوتها ) علاش أنا من دوون النااس يااا ربي 😭
فهاذ اللحظة دخلات جوهرة عليهم .. تضهشرات فاش ضاروا شافوا فيها بثلاثة بيهم و باين فيهم معصبيين و مألمين من حالة زينب .. تزنكات و حنات راسها و مشات بالخف عند زينب .. تحنات على ركابيها عنقاتها بكل قوتها و الأخيرة متمسكة فيها و كتبكي
جوهرة:( شافت فيهم ) واخا تخليونا بوحدنا واحد الشوية .. نهضر معاها !
زينب:(بانهيار ) قولي لهم يجيبولي ولدي أختي .. نبوسلكم رجليكم ما تديوليش ولدي ( شهقات ) غيجيه الجوع و ما يلقى لي يطعموا .. غيجيه البرد و ما كاين لي يدفيه .. و لا يفكر فيه و يحن عليه قد ميمتوا ( شافت فخليل و قالت بأمل ) ياك كتبغيني ؟ يلا كتبغيني بصح جيبلي ولدي .. هو غير ناعس مسكين .. شوية و يفيق يقلب عليا و ما غيلقانيش حداه غيخاااف فالظلام 😭
حرك خليل راسوا متألم و خرجوا كاملين من البيت مخليينها مع جوهرة .. لي نوضاتها بالشوية داتها للدوش غسلاتلها وجهها و زينب مرخية بين يديها .. خرجاتها لبلاصتها و جلسات حداها .. رداتلها شعرها لور .. و حطات يديها بحنان على حناكها و قالت باصرار
جوهرة: زينب شوفي فيا و سمعيلي شنوا غنقولك ( طبطبات عليها تا شافت فيها و بدات كلامها )
جوهرة : أول حاجة ازينب ..الله يأجرك فمصيبتك و يصبرك على فقدان ولدك .. أنا معاك و مقدرة إحساسك بزاااف لا ليك لا لباباه ..بحال يلا الشمعة لي كانت مضوية حياتكم طفات .. و لكن عليك بالصبر و ما تنسايش الآية :《الذين إذا أصابتهم مصيبة قالوا إنا لله و إنا إليه راجعون ، أولئك عليهم صلوات من ربهم و رحمة وأولئك هم المهتدون 》" سورة البقرة"
شكون عطاك سمير ؟ ياك الله ! هو لي بث روح فيه و جاد عليك بيه ! فرحتي فاش عطاك النعمة .. و دابا باغى تسخطي حيت حيدها من بين يديك ؟ كتقولي علاش انا من دون كلشي ؟ علاش عاقبتيني بكبدتي ؟ ( تنهدات فاش شافتها بدات كتسكت و تسمعلها بتمعن ) ها نتي سخطتي و كرهتي و لمتي الله و العياد بالله .. واش ولدك غيرجع ؟ غتولي روح ليه ؟ أكيد لا !
لكن يلا صبرتي و بينتي لله بلي نتي رااضية و قاابلة بكاع قضاءوا و قدروا .. و كتحمديه صباح و عشية و تستغفريه .. غتلقاي الراااحة من بعد و غيدخل السكيينة لقلبك .. بعد المرات ربي كيألمنا فالدنيا باش يكرمنا و يريحنا فالآخرة .. يلا كان البلاء ما غيزيدش بيك خطوة باش نتقربو من الله فأكيد غيرجع بيك خطوة للوراء .. و فالأخير نتي لي بيديك القرار لول و الآخر .. واش تتلاقاي بولدك فباب الجنة و يدخلك معاه ان شاء الله و يكون سترة و حجاب ليك من النار و هذا كلام الرسول .. تخيلتيها ؟ شفتي شحال زوينة ؟ و تصوري عوض تتلاقايه فباب الجنة .. دخلي لجهنم بسباب كلام عاابر ! قااسحة ياك ؟ ( حركات زينب راسها بااه ) غنقولك حديث زويين تمعني فيه
عن أبي موسى الأشعري أن رسول الله صلى الله عليه و سلم قال:《 إذا مات ولد العبد قال الله لملائكته: قبضتم ولد عبدي ؟ فيقولون: نعم . فيقول: قبضتم ثمرة فؤاده. فيقولون: نعم. فيقول: ماذا قال عبدي ؟ فيقولون: حمدك و استرجع . فيقول الله: ابنوا لعبدي بيتا في الجنة و سموه بيت الحمد 》" رواه الترمذي"
زينب:( غمضات عينيها و نزلوا دموعها بحرارة ) الحمد لله .. الحمد لله .. ياا ربي تغفرلي و تقويني
جوهرة:( حطات يديها على ظهرها و حركاتها بحنان ) هكاك احبيبتي حمدي الله و رضاي بلي كتب عليك نتي و عائلتك .. عوض تبكي على مخذتك .. بكي فوق السجادة و دعي الله و طلبيه و استغفريه من أعماااقك و أكييد غيستاجب لك
بقات معاها حتى سكتات من البكى و ناضت توضات و خرجات كتصلي و تتضرع من الله الصبر و الرحمة و القوة .. خلاتها على خااطرها و خرجات من تماا .. كانت الباب مردودة .. لقاتهم بثلاثة قبالتها .. تحرجات و تزنكات فالبلاصة .. عرفاتهم سمعوا كلامهم ..
خليل: شكرا بزااف اختي .. وقفتك معانا و معاها هي بالخصوص عمري ننساها .. الله يكملك بعقلك .. غندخل نشوفها ( دخل و سد عليهم الباب )
كريم:( قال بطنز ) كن خدمتي هاذ الدين و هاذ العقل فحياتك كن راك فووق السلك
شاف فياسيين لي ما هضرش غير كيشوف فيها .. و تا هي حاسة بنظراتوا و حانية راسها ما باغاش تشوف فيه حيت متأكدة غتبكي .. جرات فولارها و قالت
جوهرة: حتى واحد ما كامل .. كل واحد فينا فيه الزوين و الخايب اخويا .. و بعد المرات كيبان منا جانب لي حنا براسنا عمرنا عرفناه فراسنا و لا توقعناه .. و كلشي من كثرة الضغط ( هزات عينيها فياسيين و رجعات حناتهم ) غنمشي غيكونوا كيتسناوني .. الله يصبركم
مشات كتخلف من تماا حتى اختفت على أنظارهم .. لقات واليديها واقفين كيتسناوها .. رمات عينيها كتقلب على حنان .. ما بانتش لها عرفاتها غتكون مشات قبييييلة حيت الدار بقاو فيها غير العائلة المقربة .. ركبات معاهم و خرجوا من تماا .. تحت عينين ياسيين لي حاضيها من السرجم و حداه كريم
كريم: زرقتيها ا صاحبي .. باش ضربتيها ها العار
ياسيين:( شاف فيه و ضرب على كتفوا و مشى من تما )
💫💫 بعد مرور 3 أيام 💫💫
دازت أيام الجنازة و تدفن ولد زينب .. لي قوات راسها و حاولات تصبر و عوض تبكي تحمد الله .. و هاذشي كلوا بفضل جوهرة لي يوميا كانت كتجي عندها و تبقى معاها النهار كاامل كتحاول تعطيها شوية دالقوة واخا هي بدورها مكفسة عليها من كل جهة .. لكن ما تقدرش ما تمدش يد العون لشي واحد محتاجها .. لي فيه شي طبيعة راه فيه و عمرها تتبدل .. فهاذ الايام ما كانتش كتلاقى بياسيين نهاائيا و كتتفادى الموضوع ما أمكن ..
جالسة فبيتها وجهها بدا كيبرا و ما بقاش كيفما كاان .. هازة تيليفونها كتلف فيه الوقت و الملل محاصرها من كل جهة و طريق .. خصوصا واليديها خرجوا مور الفطور يصليوا التراويح و يتمشاو شوية .. و وئام و بشرى مشاو للمول .. من غيرها هي لي رفضات تخرج .. بغات تريح مع راسها شوية و تشوف حياتها فين غاذية .. طلعلها سطاتي ديال ابتسام .. دخلات ليه و هي تلقى تصويرة ديال طارط مكتووبة فيها 🌸خطبة سعيدة ،ياسيين♡ حنان🌸 و لتحت كاتبة .. الله يبعد عليكم العين و يحميكم ياا رب ..
كانت ناعسة غير قراتها و هي تتوكض و جلسات مربعة رجليها و كترجع تشوف التصويرة و تتأكد واش ديكشي لي فهماتوا هو لي كاين و لا غالطة !
💫💫 ابتسام 💫💫
كانت جالسة حتى صوناتلها حنان لي رجعات هي وياها صحبة نيت .. جاوباتها و تسمع صوت حنان كتهضر بحماااس
حنان: عرفتي قبيلة عيطلي ياسيين و جاب الله جاوبتوا أما كنت غنتزرف حياتي كااملة .. اووف قالي غيدوز لشي كافي ياخذ قهوة و غيجي عندنا لدارنا .. يعني داابا شوسة تلقايه فدارنا
حنان: و الله العظيم ! قتلوا مرحبا بيك و نهار كبير هذا ! دابا عيطت عليك تنصحيني شنو نلبس ؟ نتي عارفة ذوقوا كي داير .. بغيت نجي زويييينة و نخطف الأنظار فعينيه
تبسمات الأخيرة و بدات كتفتي عليها رأيها حتى هي .. تا كملوا و اختارت حنان شنوا غتلبس باش تستقبلوا عندهم فالدار .. قطعات معاها و مشات توجد راسها غطير بالفرحة .. حيت ديكشي لي دارتوا فبالها صدق !
أما ابتسام فلبلاصة دخلات كتقلب على شي طارط دالخطبة و فيها سمية ياسيين و حنان .. بقات شحااال عاد لقات وحدة بزز .. دارتها فالسطوري تشوفها جوهرة بووووحدها لا غييير .. و جلسات عاسة عليها فوقاش تشوفها .. حتى طلعات ليها vu ديالها عااد فرنساات برااحة بحال داارت انجااز !
💫💫 جوهرة 💫💫
《 مَن يدّعي النسيان كاذب ٌ، ومَن يدّعي القوّة هشٌ ، ومَن يتظاهر باللاّمبالاة هو أكثر النّاس ألماً ، لا تصدّقوا الوجوه هي أكثر الأشياء خِداعاً وتضليلاً ♥ 》
وقفات كتترعد فبلاصتها و الدمووع بغااو ينقزوا من عينيها من الصوورة .. و كتقول فبالها .. واش يقدر ياسيين يديرها و يتزوج عليا ؟ يبدلني بوحدة ثاانية بسبب ردة فعل ما جاتش فمحلها ! صافي بخطأ بسيط يدمر كلشي ؟ ااه غلطات و معتارفة و لكن ماشي يعاقبها هاكا ..
باقي كتدي و تجيب فعقلها و فالأخير قالت
جوهرة: مستحيييل يديرها ماشي فعايل ديال ياسيين .. و أصلا ختوا باقى محروقة على ولدها و ينوض يخطب ؟ واخا يكون مجعوور على العيالات !
باقي كتخمم و هو يصوني تيليفونها فيديها .. طلعاتلها سميتوا و بدا قلبها كيضرب بالجهههد بحال يلا خايفة تسمع شي حاجة دمرها كليا ! عضات على فمها ساكتة كيتسمعوا غير أنفاسها المتسارعة بحال يلا كتجري ..
قطع معاها من بعد ما خذا جوابوا .. كمل طريقوا لدار واليديها غير وصل و صونا عليها .. نزلات عندوا مترعدة بحال يلا أول مرة غتشوفوا .. و عمرها عرفااتوا و عاشراتوا .. فتحات لباب و ركبات .. كان داير جالس كيشوف قبالتوا بهدووء
جوهرة: السلام ! شنوا هو الموضوع لي بغيتيني فيه ؟
ياسيين:( شاف فيها ) ديري لاسانتير .. غنتحركوا و غتعرفي !
دارت لي قالها فصمت ما هضراتش طريق كااملة حتى وصلوا لقدام فيلا ديال حنان .. بلاصى و نزلوا بجوج .. صونا فالباب و فتحات لهم الخدامة .. دخلاتهم حيت عقلات على ياسيين و بلا والو راه وصاتها حنان .. خلاتهم فالصالون مشات تعيط على الحاج و مراتوا .. و جوهرة راه غير كتضور فعينيها ما فهمات وااالو و فينما تسولوا يسكتها بدابا تفهمي .. صبري !
نزلوا واليدين حنان سلموا عليهم و رحبوا بيهم .. فحين هي باقى فبيتها كتقاد راسها .. سولوه على واليديه و على العمل و رمضان كي دوزوه .. يعني هضرة عاادية حتى نحنح ياسيين و شابك يديه بجدية
ياسيين: المهم الحاج ندخلوا فالموضوع نيشان .. ما كاين لاش نطولوا فالهضرة .. كان ممكن نتصرف لرااسي و ما نجيش عندكم كااع .. و لكن حيت عاارفك حقااني و ماشي دالعيب .. قصدتك !
الحاج:( استغرب كان عوال عليه جاي يخطب بنتوا .. لكن من هضرتوا بااين الموضوع كبير و عكس تماام لي فاهمين كااملين ) اييه ا ولدي ؟ الله يقدرني نعاونك !
ياسيين: فهاذ الزمان كااع لي قليل التربية كيسحاب ليه راسوا عندوا شخصية قوية و فارض وجودوا .. و هو حس الشخصية ما عندوش .. ما علينا غنبدالك الهضرة من لول الحاج .. بنتك حنان صبرتلها حتى وصلات بيا لهنا ( حط يديه على حلقوا ) غتزيد معايا قد هاكا ( دارلوا حركة بصباعوا .. بمعنى غير شوية ) غنتكرع عليها و ندمها على النهار لي عرفات هاذ الكمارة فيها .. و حيت عارف راسي ااش كنسوى جيت عندك .. بعدا نكون درت عليا .. حتى يلا خرجت للعيب ما يجي حد يلومني ! واخا تعيط عليها باش الهضرة تكون قداام كلشي .. غنتبرا منها قدامكم .. و يلا ما قلباتش عليا .. تتحمل مسؤوووليتها من لي غيجيها ( شاف فجوهرة لي بدات تفهم شنوا واقع و كتربط الأحذاث فراسها و كتتسنى تعرف شنو غيوقع )
الحاج:( تعصب من هضرتوا و حيت كيعرف بااه كي داير ما بغاش يتسرع و ينوضوها حتى يفهم منوا .. غوت بعصبية حتى قفزات حنان لي كانت هابطة فالدروج .. حيت الطريقة لي عيطلها بيها ديال دايرة شي زيلة قد راسها ) حناااااااااااااان
نزلات بالزربة لعندهم مخلووعة ما فهماتش لاش عيطلها بهاذ الطريقة .. وقفات فباب الصالون مصدوومة من جوهرة لي معاه .. كلشي شاف فيها .. و واليديها كيتسنااو تفسييير .. أما جوهرة خلااص عمرها شمتات فشي وحدة تال حنان .. حسات بديك العافية لي كانت شاعلة فقلبها بدات كتبرد ..
ياسيين:( ببرود ) دخلي ا حنان جلسي .. باغي نهضر و ما جاتش نبدا بلا بيك ! ( تسناها حتى جلسات حدا مها لي مخرجة عينيها فيها و كمل كلاموا ) المهم ! كيفما قتلك غنبدالك الموضوع من لول سمع و حكم .. أنا الحاج مزوج ( شاف فجوهرة و شابك يديه مع ديالها ) مع هاذ السيدة .. عايشين بحال أيها الناس .. و كيفما عارف .. عندي خدمتي فمراكش .. دونك ديما كندير لانافيط مرة هنا مرة تما .. و فواحد النهار درت أكسيدون مع بنتك .. او بمعنى أصح هي دخلات فيا .. المهم بلا ما ندخلوا فلي ديطاي بزااف .. سمحتلها فداك جوج دريال دالاكسيدون و قلت سديت بابها .. حيت لي تعاونوا و يتهز و يتحط عليك و يبدا يتعاير راه تنزلوا و تطحن مو و ما تحنش ! و باااين بلانوا !
حنان:( صدمها و كتقول واش من نيتوا هذا كيهضر ) حبس حبس راه نتا لي بديتي لول .. عاد هضرت انا ..نتا لي استفزيتيني
ياسيين: حيت برهوشة يالاه شمات ريحة بيطانها و حسابلها راسها دون ناس ( شاف فباها و كمل ) و لكن بنتك ما تهداتش .. رجعات كتعيط و تعيط و تعيط و المسجات لعلك ترضى .. بلوكيتها و قلت غتفهم راسها .. و لكن للأسف ما فهماتش ! و لا كتتغابى عليا هنا ! حيت باش تقولها فوجهها بلوكيتك و مزوج و كنحمااق و نتوفى على مراتي و تلصق من الفوق .. راه فشكل ! المهم دازوا لأيام و بالصدفة تلاقيتها فالمول و تعاود نفس لبلان لصقاتني و بلا ما تتشاور صدقات كتعاوني .. ما نكذبش كان جيسط زوين منها حيت كنت حااير .. اعتابرتها بحال أخت ليا .. ما دام صافي قتلها مزوج راه فهمات راسها و طلبات مساعدتي و تانا ما بخلتش عليها حيت ما جاتش واحد يعاونك و فاش يوقف عليك تقول لا .. واخا بيييزاار تصرفاتها و لكن قلت ممكن هي تكون هاكا و شخصيتها هاكا دايرة حيت بزاااف ! ما علينا من تما نيشان لقيتها عندي فالمحل و أنا متأكد كيفما كنشوف فوجهكم دابا جات قااصداني حيت عارفاني شكوون .. واخا نكون حماار بالوذنين ما غاديش دوز عليا حفلة بالطريطور لربعة دالناس .. و لاش ؟ لذكرى عيد زواج لناس كبااار ! و مع ذلك ما جاتش نجري عليها و لا نقول شي حاجة ما هياش .. فمجال خدمتي .. و دوزتها عاااادي .. لكن باش بلا إذن تصورني و تسيفطهم لياا و تجلس تتق*** بالعلالي .. هنا و سطووب ( شاف فيها عاقد حجبانوا ) شمن تذكار خليتلك ؟ ياكما كنت مشارك معاك الفراش بلا خباري ؟ بيناتنا خدمة الأخت ساليناها الله يعاون الله يعاون .. فعايل الباطرونات ما عندي ما ندير بيهم .. و مراتي بلاااااارة فدارها ما غنشووف لا فيك لا فغييرك .. غير بردي عافيتك و لا قلبي على لي يطفيها ( بلقات جوهرة فيه عينيها و كتقول فنفسها و الله ما كيحشم و لا كيحشم .. واخا بردلها قلبها و فرحاات من كلاموا ..لا إراديا تبسمات .. أما هو شاف فباها و قال ) يرضيك هاذشي الحاج ؟ بنتك تضور بحال بنات الزنقة على الرجال مزوجين ؟ ( شاف فيها ) شفتي غير التصاور لي صورتي و كن ما حشمت نجرجرك عليهم فالمحاكم و يلا وصلتي لوذنيك تقبيها ماشي غير تعضيها
جوهرة:( حنات راسها كتولول و هي طلعات معاها التزنييكة فبلاصتوا .. كيهضر بوجهوا صحيييح .. تا سمعات صووت تسرفييقة .. هزات راسها لقات حنان شادة حنكها و الحاج واقف قبالتها كيترعد بالأعصاب )
ياسيين:( وقف و حبسوا بكلاموا ) جيت قصدتك باش تجمع بنتك .. مشاكلكم العائلية حلوها فاش نخرجوا أنا و مراتي من هنا .. و نتمنى هاذي آخر مرة توصلنا
حنان:( عينيها تغرغروا و شادة فحنكها مصدوومة ) و لكن ابتسام ماشي هاذشي لي قاتلي ! ( بدات كترجف كتشوف كلشي غيضيع من بين يديها ) انا ماشي بنت الحرام نهدم عشكم .. ختك لي فهماتني هضرة أخرى .. ماشي هاذشي لي كتقوول نتا .. قسما بالله ما ليا دخل فهاذشي
ياسيين:( هنا صعر كان ماشيلها حتى قبطات جوهرة فذراعوا و زيرات عليه .. شاف فيها و زفر و هز سبابتوا بتهديد ) التصاور تسيفطوا قبل من داك المسرحية .. بلا ما تمسحي فعايلك فظهر شي حد ! ما جبدتش بلاناتكم العوجين حيت داك البهلان دخل من هاذ الوذن و خرج من هاذي ( ضحك بفقصة ) بنتلكم دري صغير قدامكم غتلعبووه على صباعكم ؟ ( زفر ) داك الموضووع ما غنتحاسبش معاك فيه .. حيت عااارف معامن غنهضر .. نتي غير جمعي ك** معايا و عطي لسااحتي بالتيسااع و غنكونوا هااانيين !
جر جوهرة و خرج من تما مخلي العاافية شااعلة موورااه .. أما هو ركب و زاد مع طريق كيغلي ..رمى عينيه لجهة جوهرة لقاها كتفرنس و هو يقول
ياسيين: كضحكي ؟ ها نوبتك جايا فالطريق !
يتبع...
لي باغي يشمت فحنان كثر من سكان الصين 😂
غير صبروا قلبكم غيبرد من جهتها هاذي غير البداية .. و كلشي غيتوضح 😇
النقرة الصافية الجزء الثامن
محتوى القصة
التنقل بين الأجزاء