أنا لست إبنتك أنا زوجتك الجزء الثاني

كاظم حرك راسو يمين شمال و الابتسامة فوجهو كيحماق على ماماه بزاف و خصوصا كلامها كيعجبو و كيحس بيها كتفاجي عليه همو 

كاظم: فين لقيتي بنتي ؟؟ 

هزات عينيها شافت فيه و حطات يديها على دقنها و قالت 

زبيدة : إوا حتى كنقولو درتي عقلك و ترجع لحماقك ثاني اينا بنت الله يهديك 

كاظم تنهد و ساط أنفاس سخونة و قال 

كاظم: هنادي البنت اللي بغيتي تخطبيها ليا 

زبيدة : اوا قول فنظرك فين لقيتها ليك ؟؟؟ 

كاظم: *حك ذقنو و قال * ما عندي حتى فكرة صراحة غير هو غالبا غاتكون فريدة عندها شي يد فهادشي 

زبيدة طرطقات فيه عينيها و قالت 

زبيدة : تسليييم أ وليدي كي درتي عرفتيها 

كاظم غمز ماماه و رد راسو اللور و قال بابتسامة 

كاظم: معاك كاظم و أجرك على الله 

زبيدة :*حطات يديها على صدرها كضحك * كتعوجني ياك أوليدي عزيز عليك طنز على ميمتك 

كاظم: حاشا غير هدا هو التفسير و التحليل اللي درت لأنه أنا عارفاك ما يمكنش تلقايها بهاد السرعة حيت هنادي إسم جديد و عدد البنات اللي غايكونو مسمينهم واليديهم بهاد الإسم غايكونو معدودين على رؤوس الأصابع و بما أنه فريدة من ديما كتحل المشاكل و عارف عندها الحل لكلشي تبارك الله عليها قلت يمكن تكون كتعرف شي وحدة بهاد الإسم 

زبيدة : اييه أولدي راك بعقلك كاتصدمني شي بعض المرات 

كاظم دور وجهو جنب و حك لحيتو و شاف فيها و قال 

كاظم: ياكما بنتلك كنضرب بالحجر ولا كنلوح فحوايجي 

زبيدة : واشي بعض المرات كيمشيلك ريزو و كتخلعني 

كاظم : فعلا عقلي و المنطق ما كيبقاش يخدم فاش كايتعلق الموضوع بجوج د ناس هنادي و ملاك من غير هادشي ما يصحابلكش بلي راني هبيل 

زبيدة حطات يديها على كتفو و ابتاسمت ليه و قالت 

زبيدة: أحيااني عليك يا وليدي نتا راك تهبل قبيلة و تجيك قليلة أنا عارفاك دكي تبارك الله عليك و حنين الله يحجبك من العين الخايبة و الله يبعد عليك ولاد الحرام غير هو واعدني بلي غاتبغي هاد البنيتة و عمرك تقهرها و ديرها فعينيك 

كاظم: راه قلت ليك أ الحنانة غانتعامل معاها كأنها بنتي اللي ما شفتهاش و اللي ما عنقتهاش و اللي ما سمعتش صوتها و الي ما شمتيش ريحتها غانلعب دور الأب فحياتها واش كتفهميها ولالا 

زبيدة : هاهو بدا يمشيلك ريزو من بدا و جديد عاد كنتي بعقلك يا وليدي ياك قلتي غاتقرب منها و ما نعرفت أش و غاتفتح قلبك ليها و غاتبغيها 

كاظم: قلت كنواعدك غايوقع هادشي الا نساتني ملاك 

زبيدة : ياو إلا ما قدراتش تنسيك فهاد ملاك 

كاظم : غانبقا عايش معاها على أساس هي بنتي و انا باباها 

زبيدة :* ضربات على فخدها و قالت * اوييييلي يا ولدي واش باغي تحمقني شوف اخويا بناااقص من شي زواج ما فيا اللي نتقابح مع عباد الله 

كاظم : نفهم من هدرتك بلي خسرتي تحدي 

زبيدة : اويلي اينا تحدي واش حنا لاعبين فهادشي 

كاظم : تعلمي واحد الحاجة أ الحنانة الا ما كنتيش كتغامر فالحياة بحال راك غير عايش غير حيت ربي مزال ما صيفط ليك ملاك الموت يقبط روحك و انا كايعجبني تحدي و حياتي ولات مملة مؤخرا عجباتني الفكرة و بغيت نتحداك و نجرب نتي فكرتي غير الا ما نساتنيش فملاك و الا قدرات تنسيني فيها امم * بانلو الكأس ديال أتاي فيه نص محطوط من فوق الطبلة هزو ووراه لماماه و قال * تعلمي أ الحنانة تشوفي هنا فهاد نصف الكأس الممتلئ و ما عمرك تشوفي فنصف الكأس الفارغ بحال مثلا الا طحتي من الدروج ابتاسمي و قولي وصلت دغيا 

زبيدة بقات دايرة يدها تحت خدها و قالت 

زبيدة : و الله أولدي ما عرفت منين نشدك تلفتيني 

كاظم حط نيفو على نيفها و قال 

كاظم: * بابتسامة * ياك انا غير أحمق أو لا 

زبيدة : الله يرد بيك

قاطعهم صوت فريدة اللي جات من بدا و جديد كتناديهم باش ينوضو يتغداو 

فريدة : لالا الغدا راه برد وعاودت سخنتو 

كاظم: غير جيبي الغدا لهنا و اجي تغداي معانا بغيت نهدر معاك 

فريدة : و الله يسمعنا خبار الخير 

مشات فريدة و دخلات ليهم الغدا لداخل فصالون طويجين د الخضيرة مع الخبز مقطع بالموس و شلايض فطبيسلات حطاتهم و دخلات جلسات عرات على طاجين قربات زبيدة و كاظم لطبلة و حطات فريدة حداهم الخبز مدات يديها فريدة و زبيدة غير كاظم اللي كيدير شي شوفات ففريدة وتروها و صرطات داك الشدق د الخبز غير بزز 

فريدة : قلتي بلي بغيتي تهدر معايا ياك لابس 

كاظم حنا شوية و جمع يدو بجوج و حطهم على الطبلة و قال بصوت رجولي خشن 

كاظم: سمعت بلي كاتعرفي هنادي 

فريدة : اه أولدي انا اللي اقتارحت على لالا زبيدة واحد البنيتة كانعرفها سميتها هنادي 

كاظم رخا يدو من مور زبيدة و قال بصوت حنون 

كاظم: عاوديليا عليها بغيت نعرف عليها كلشي ما تنساي حتى حاجة حتى شنو كايعجبها تلبس كيفاش كتصرف شحال فعمرها فين عايشة بغيت نعرف كلشي على بنتي

وصلات الستة د العشية و كلشي خارج من الجامعة و من بينهم هنادي اللي كانت حاشية دراعها فدراع إلهام و ساكتة عكس إلهام اللي كتكلم حيت من ديما ما كاتسكتش فيها الهدرة بزاف 

إلهام: نااري يا ختي ديك العويقة اللي كانت جالسة حدا صاحبها ما حملتها ما قبلتها تفووو محشية فيه علاين تبوسو شي وحدات ما كيحشموا ما كيرمشوا غير كايطلعوا لهاد لافاك كيبغيو يطيروا 

هنادي :أودي كيتي أنا وياك اللي كنمشيو و نجلسو فالطرف كيف شويش د الهم ما كيديها فينا حد 

إلهام: لااالاااا اختي هدري على راسك انا عاد جا البارح واحد خينا بغاني نتصاحب معاه و انا تعفرت عليه 

هنادي : حيت ما لقيتيش فيه داكشي اللي بغيتي حتى نكون ما كنعرفكش نتي غير كاتشوفي زين كاتحوالي و عينيك كايخرج منهم القلوبة 

إلهام: أختي علاه شكون ما يكرهش شي حد زين ياختي انا كيصطيوني تواركة و ديك لحية و داك الجمال راه بزاااف انا غير كنشوف لحية و العضلات كندوخ اما فاش كتكون عندو طوموبيلة واااعرة ناري كنتوفى عليه كنولي نشوف فيه راجلي حبيبي و كنتخايل راسي معاه و عندنا وليدات واش حالتي طبيعية 

هنادي: وجودك فحياتي كيشكل ليا خطر حيت راك هاربة ليهم من سبيطار د الحماق وانا وحلت فيك 

إلهام: بزاف على حسك علاه نتي كرهتي شي حد بهاد المواصفات 

هنادي: اودي انا حريرتي حريرة غير خليها على الله انا ما باغاش نتزوج و لكن خاصني ضروري نتزوج و لكن راجل ما كاينش 

إلهام: بان ليا راك ضاربة شي طرف كتامي صحيح تي مالك وليتي دخلي و تخرجي فالهدرة ضرباتك الشمش لراس دوخاتك 

هنادي : قالتلي مي ما تحلميش تخدمي حيت خوتك ما غايخليوكش و غانضطر نبقا فالجحيم الأبدي داكشي علاش الزواج هو الحل الوحيد باش نتفك منهم حيت اختي تقهرت عييت راه شي حاجة فوق بزاااف طلعولي فراسي ما بقيتش كنحمل نرجع لدار و الله حتى كنلقا راحتي فالزنقة غير كندخل لدار كيتقبض قلبي و المشكل كيغوتو عليا على شي حوايج تااافهين كرهت الخاوة و ما يجي منها كرهت حياتي ولات كتبان ليا دنيا ظلام فظلام و المشكل ماشي هنا المشكل واش غانلقا هاد الراجل اللي غايتهلا فيا ولا غانمشي لشي جحيم أكفس و طلس 

إلهام تنهدات بحزن و قالت 

إلهام: و الله يفاجيها عليك أختي والله حتى ماما كتبقاااي فيها و حتى خالتي فريدة كاتقيل تدعي معاك 

هنادي: اه مساكن الله يكثر خيرهم واحد خالتك فريدة غبرات ما بقاتش كتبان شحال هادي ما جات 

إلهام: راه اليوووم غاتجي لعندنا نيت 

هنادي: مسكينة توحشناها حتى مي كتسولني عليها و كيف بقات حتى هي مع تمارة 

إلهام: مزيان الحمد الله دوك ناس اللي خدامة عندهم حلوة ضرييفين لأقصى درجة كتعاود ليا عليهم شي حاجة بزاف 

هنادي: شنو كاتقولكم 

إلهام: المرأة مولات الدار سميتها زبيدة مراة متيولة و ضريفة مات راجلها من شحال هادي وخلا ليها جوج ولاد لقمان هو صغير مزوج مطلق و عندو بنيتة كتحمق سميتها جنات و أما الكبير ياااختي سميتو كااظم و يا ختي غير من سمية يبان البرهان *حطات يديها على قلبها و قالت * أشمنك يا زين أشمنك يا ضرافة تاكليه بحواااايجو ياختي تصوري يا صاحبتي مرتو كان كيتجوااانطا عليها و كيموت على تراب رجليها على حسب ما كتعاودخالتي كان كيفيق بكري و يصاوب ليها الفطور بيدو و ما يخلي ما يشري ليها فلكادو و قالتلي كان كيوكلها بيدو فوق من الطبلة حدا مو و خوه و شاد ليها الخاطر و هادشي غير شوية من بزاف سيد كان طاااايح فيها ديال بصح ...

هنادي :*بحزن* سعادتها يا ختي الله يجيب لينا شي راجل بحالها حتى حنا 

إلهام: أودي ساعة ماتت 

هنادي بقات فيها و قالت بصوت حزين 

هنادي: مسكيينة الله يرحمها و ويوسع عليها 

إلهام: و المشكل مااشي هنا و سيد ولا مسطي وتهز فدمااغو 

هنادي: بلاتي بلاتي واش كانت مريضة ولا كيف وقع ليها 

إلهام: تصوري معايا نهار اللي غايمشيو لطبيب يعرفو جنس الجنين دارو أكسيدون فطريق مرتو ملاك ماتت و هي حاملة مسكينة و هو دخل فكومة و ما فاق حتى لمور شهر من الأكسيدون و فاش عرفها ماتت تسطا و حماق و شحال و هو كيتعالج عند الأطباء النفسانيين و لكن تقريبا هادي عامين ولا مزيان و لكن على حسب ما قالت خالتي ما قادرش ينسا مراتو حيت مزال ما تزوج 

هنادي ضرها قلبها عليه نورمال أي وحدة غاتعرف بلي داز شي واحد من هاد الأزمة راه غاتأثر فيها و خصوصا هنادي اللي قلبها حنين 

هنادي: مسكين بقا فيا الله يرحمهم مساكن ما ساهلاش صراحة و خصوصا هو كيبغيها بزااف ناري يا ختي دمعو ليا عينيا 

إلهام: اودي يبقا فيك راسك اما هو راه لاااابس عليه و عندو الفلوس نيت أصلن هو عايش ففرنسا كايجي للمغرب غير يشوف مو و يرجع 

هنادي: علاش هو فاش خدام 

إلهام: هو مهندس ديكور و عندو شركة ديال الأثاث و الديكور ففرنسا و خوه عندو شركة ديال الخشب فالمغرب و لكن الشركة ديال المغرب عندو فيها نص حيت هو وخوه شركاء فيها 

هنادي : و نيت ملعقيين ديال بصح و خصوصا خوهم الكبير 

إلهام: آه أختي خاصني نوريهالك راك و الله حتى تكالاي فيه بلهلا يطريهلك

هنادي: نتي عمرك شفتيها ؟؟؟ 

إلهام: شفتوا مباااشرة أحبيبة ديالي 

هنادي: فين شفتيه؟؟؟ 

إلهام: من شحااال هادي شفتوا فاش كانت مرتو عايشة كنت صغيرة يكون فعمري ديك خمسطاش العام كنت رغبت خالتي فريدة باش تديني اوا و دارتلي خاطري و داتني معاها و من زهر كان عند مرتو عيد ميلاد اوا يالالا كنت واقفة مع خالتي فالكوزينة دخل و لقاني و سلم عليا و بقا كيهدر معايا بحال كايعرفني ياختي قمة التواااااضع داك السيد و الله و مشا جاب ليا داك الشكلاط الواااعر اللي كيبان فالتلفازة ف كاغيط مذهب و مدور 

هنادي : أه عرفتو سميتو feroro rocher 

إلهام : اييه هداك انا ما كنعرفش نطق سميتو 

هنادي:كتعرفي غير تاكليه يا الحلوفة ههه 

إلهام: ههه اوا داكشي باش معروفين المغاربة المهم ما عالينا جاب ليا باكية قدها قداش و عطاها ليا انا بقيت غير حالة فمي 

هنادي: و يا الحلوفة ما جبتي ليا حتى حبة 

إلهام: و صراحة بقيتي فيا و بغيت ندوقك و لكن عجبني ما سخيتش نعطيك 

هنادي: وا بصحتك يا الحلوفة ما كاين مشكل حتى انا شهوتي فيه نيت كانشوفوه غير فالتلفازة 

إلهام: و يا ختي لديد داك شكلاط 

هنادي: و صافي دابا عرفناك دقتيه بلا ما تشهينا فيه عارفة راسي عمري ندوقو 

إلهام: و علاه مالك مادوقيه فاش تخدمي تهلاي فراسك و شري اللي بغيتي بلا ما يتجمل عليك حد 

هنادي: واش باغا تحمقيني و الخدمة مااااكينااااش انا غير كنقرا دابا و صافي حتى يحن مولانا راه عاد قلتلك دوك الكنوس د خوتي عمرهم يخليوني نخدم قالك هوما ما عندهمش العيالات اللي يخدموا قالك المرأة خاصها تبقى غير فالدار و تزوج و تولد و صافي أفكار د الزبل تفووو 

إلهام: فاش تحسي بالقهرة هزي كفوفك لسما و قولي ياااربي عطيني شي هزة 

هنادي : ههه و من ديما كنهز كفوفي لسما كنقول ياااربي تعطيني شي هزة لفرنسا ههه كنحماق على داك البلاد و كتعجبني ثقافة ديالهم 

إلهام: اوا خلاص عليا اشمن ثقافة اشمن زبل انا غير تزرفت و درت معاك الأدب الفرنسي فلافاك العام جاي غانقلبها إقتصاد ولا حقوق هادشي ما واكلش 

هنادي: حرام عليك و تخليني بوحدي انا بقوة اللي كنبغيك تبقاي معايا ما نكرهش الراجل اللي ندي يتزوج بينا بجوج ههه 

إلهام: لااالااااا أختي كنبغيك أه و لكن لاش نتشاركو راجل 

هنادي: ياك لحسك بنتي على حقيقتك نتي غير تزوجي تقلبي عليا 

إلهام: لا احبيبة انا ماشي من هادوك 

هنادي: و الله أعلم 

إلهام: انا راني تنحب سيدي كاظم و ما باغاش ندي من غيرو هااح تنتسطى وا تناكل السبرديلات و تقاشر على قبلو 

هنادي: شكون واش هداك اللي قلتي ماتت ليه المراة 

إلهام: إييه أختي و شكون من غيرو 

هنادي : و صراحة شوقتيني نشوفو باين غايكون مزيون بما انه عجبك 

إلهام: لهلا يحوجك نوريهلك دااابا نيت 

وقفوا فطريق و جبدات إلهام تيليفون من صدرها كانت عندها الكونيكسيون دخلات لإنستغرام كتبات سميتو فالبحث و خرج ليها و دخلات لبروفايل ديالو باش توريه ليها و قالت 

إلهام: غانوريهلك ولكن بشرط 

هنادي : إينا شرط؟؟؟ 

إلهام: ما تزعطيش فيه ههه راه تنغير و تنحبو و نموت عليه 

هنادي : ههه ودابا غير أري نشوفو هاد كاظم اللي دالك العقل 

إلهام دورات ليها التيليفون ...

هنادي خدات من عندها التيليفون و بقات كتشوف فيه عجبها جاها تيتيز و من الستايل اللي كيعجبها حتى هي ما حسات بالإبتسامة حتى بانت على شفايفها و قالت بهمس 

هنادي: كاظم 

إلهام طيرات ليها تيليفون من يديها و قالت 

إلهام: اوا شفتي أول مرة فحياتي نطيح فشي واحد ما عندوش لحية و لكن يا ختي زينو فشكل 

هنادي : وي مزيون 

إلهام: قلتلك ما تزعطيش فيه أ زمر راه غانخسر معاك 

هنادي حطات يديها على قلبها و ضحكات و قالت 

هنادي: يااااااااربي يكون راااجلي يااااااربي هههههه 

قالت هاد الجملة و هربات من حداها و تبعتها إلهام كضحك ضرباتها لضهرها و قالت 

إلهام: كاتفقصيني زعما غير تهناي هدا خينا ما غايكون لا ليا لا ليك هدا تاليتو غاتديه شي ملعقة ديال بصح تكون زوينة و واصلة بحال ديك ملاك كيتي أنا وياك 

هنادي: أنا أصلن ما باغاش نتزوج غير الله يربح أنا باغا نخدم و ندي ميمتي للحج غير تسناي نشد الإجازة فلغة الفرنسية و نهرب من دار باش نخدم 

إلهام: أودي فين غاتهربي الله يهديك 

هنادي: أختي انا ما كنشوفش حياتي مع راجل اللي يتحكم ليا فحياتي و يكون بحال داك يوسف راجل ختي كيسكر كيقمر كيتحشش هاهي سعاد بغات تهرب من دار ساعة طاحت فحفرة أكبر منها أي وحدة كاتشوف بلي زواج هو الحل باش تهرب من داك الواقع المر اللي كاتعيشو مع دارهم دماغها زيروووو واخا نعرف ندير المستحيل باش نخدم و نقد راسي عوالة نهرب و نخدم و ما نبقاش مع دوك الرهوط فدار و عمر زواج كان حل 

إلهام : نفهم من كلامك بلي زواج مشروع فاشل بالنسبة ليك ؟؟

هنادي تنهدات و قالت 

هنادي: العزوبة كتكون نعمة ملي الزواج كيكون مشروع فاشل ملي الزواج كيرجعك خطوات للوراء بدل ما يزيد بيك للقدام ملي كذبل بدل ما كتفتح بحال الوردة و تزيان العزوبة كتكون نعمة منلي الزواج كيقيدك و كيحد الطموحات ديالك و منلي كيكون الزواج من أجل نكتب أميرة زوجي فالفايسبوك ملي كيكون الزواج باش ديري وليدات و نتي و باهم مازال ما عارفين شنو باغيين فالحياة هدو هما المبادئ ديالي الواحد خاصو يحسن الإختيار ولا يبقا سيليباطير 

إلهام: نفهم من هدرتك أنكي الا لقيتي زوج المثالي تزوجي إذن 

هنادي إبتاسمت بإستهزاء و شافت فيها و قالت 

هنادي: مع الأسف ما كاينة حتى حاجة مثالية فالعالم الكمال لله أختي و من هنا نقولهالك واخا تلقاي راجل زوين و غزال غاتلقاي فيه شي عيب يا كايسكر يا كيخونك يا ما متاقيش الله يا كيضربك يا فيه النكيير و ما أدراك ما نكييير المهم كاين بزاف د العيوب و لكن راه أمبوسيبل تلقاي راجل الكامل هادي هي الحقيقة أما داك الهدرة د القصص و الروايات و الأفلام نسايها راه الحب و الغرام أ الله كيوصلكم لعتبة د الباب أما الزواج كيكمل بالصبر بالإهتمام و بشحال من حاجة اللي حتى نتزوج و نقولهالك هههه 

إلهام :*دارت يديها على قلبها و قالت * يا ختي كاااين الراجل الكامل و المكمول كااااظيم حبيبي 

ابتاسمت هنادي باستهزاء و قالت 

هنادي: اودي فيقي من الأحلام ياك نتي بفمك قلتي بلي هداك غايشوف فشي وحدة واااصلة ديال بصح و ملعقة مالو غايجي لدرب نوايل و يقلب عليك 

إلهام:و ماعرفتي أختي مالي ما نستاهلش 

هنادي بقات ساكتة و فالأخير قالت و الإبتسامة مرسومة على شفايفها 

هنادي: و إلا كنتي كاتبغيه صارحيه لايمشي يوقعلك بحال السعدية اللي جات فالبرتقالة المرة ههه

إلهام : لوااه لوااه ماشي حتى لديك درجة دابا بصراحة كيف جاك منين وريتوليك شنو هو أول إنطباع خديتي عليه 

هنادي سكتات مدة و فالأخير صدرات منها تنهيدة و سهات فالطريق و بدات كتهدر 

هنادي: هو إنسان جميل قلبا و قالبا باينة فوجهو هو راجل ماشي بحال رجال باينة فعينيه حزن كبير و حسب هدرتك أن هاد الحزن سبب فيه أنه ما نساش الزوجة ديالو ربما حتى هو يكون بحالي كيقلب على شكون يفاجي عليه همو و يريحو و يحط عليه راس و يقولو شنو ضارو فقلبو ربما ما عرفتش هادي هي نظرة اللي خديت عليه فاش شفتو فالصورة 

إلهام: أنا من زمان و انا كنشوف تصاورو ما عمرو بانلي هاد الحزن تسليم ليك أختي 

هنادي: ياك كيقولو بلي القلب على القلب فاش كتكون نتا عايش الحزن و مهموم فقلبك أي واحد مهموم تقدر تعرفو غير من شوفة العين الله يفاجيها عليه مسكين واخا ما كنعرفوش بقا فيا و قطع ليا فقلبي الله يرحم مراتو و الله يجيب ليه شي مراة اللي تنسيه و تفاجي عليه و انا الله يعطيني شي هزة لفرنسا 

إلهام : أمين 

بقوة الهدرة لقاو راسهم وصلو دغيا لمحطة يعني قربو يوصلو لدارهم ...إلهام وقفات و شافت فهنادي و قالت

إلهام: الله يعاونك أزين غانخليك 

هنادي: فين غاتمشي ؟؟ 

إلهام: غانمشي ندور مع بنت خالتي دايرين انا وياها نشريو شي حوايج 

هنادي: واخا صافي أختي الله يعاونك 

إلهام: أجي بعدا داك الصاك اللي فيديك ولا حالتو أصاحبتي شوفي كيف ولا كولو مقشر 

هنادي تحرجات من كلام صاحبتها و ياما كيكونو عندنا هاد صديقات فحياتنا اللي كيدخلو فأشياء كاتخليك تحس بقمة الإحراج واخا نتا ربما ما كتبينش ليهم فداك ساعة و لكن قلبك كيضرك من هاد الكلام واخا هما ما كيقصدوا حتى حاجة و لكن نتا راه كيآديوك داكشي علاش كيقولك بلي أي كلمة قبل ما تخرجها من فمك جربها على نفسك هو الأول ...

هنادي حنات راسها و قالت 

هنادي : إوا أختي هادشي اللي عطا الله عييت ما نرغب و نزاوك فماما تشريلي ساعة قالتلي بلي ما بقاوش ليها الفلوس أ الله شراتلي التيليفون مسكينة هاحنا كنقضيو حتى يحن الله 

إلهام: نقدر نشري شي واحد و نعطيك الصاكادو ديالي و الله أختي دابا راه لافاك خاصك تكوني ديما زاز لوز راك كتشوفي البنات كيف كايجيو 

هنادي هزات راسها و شافت فيها و قالت بحزن 

هنادي:وعلاه شكون كره يلبس و يتقاد ويدير المكياج و راك عارفانا حنا البنات كنبغيو شحال من حاجة و لكن لظروف أحكام هاد نهار شراتلي ختي الحوالق زوينين و درت توربان باش نجي بيه لفاك ساعة خويا ما خلاليش بالمعيار داكشي علاش كنت كنبكي اودي غير خليها على الله مكبتة علينا الله يفاجيها 

إلهام: و دابا بلا ماتبقاي تحرقي فدمك غايجي واحد الوقت اللي غايولي فيه هادشي غير تعاويد يالاه نخليك باي باي 

سلمات عليها و مشات و كملات هنادي طريقها فإتجاه دارهم ديما كتمشي حانية راسها و فيديها معنقة واحد الدفتر حيت كبير ما كيتساعش ليها فالصاك اللي كتهز وصلات حدا واحد القهوة قريبة لدارهم وهي تسمع واحد الصوت من موراها كيناديها و باين فيه صوت ديال دري 

~هناااااادي

وقفات فمكانها والتافت تشوف شكون هو صاحب صوت لقات واحد الدري كتعرفو ولد جيرانهم كان كيقرا معاها فالباك و حتى هو داير لفاك سميتو أيمن ...

وقف حداها و جا اونفاص ليها و مد ليها يدو والابتسامة مرسومة على وجهو و قال 

أيمن: سلام أختي هنادي 

هنادي ترددات فأنها تسلم عليه و بقات كتشوف فجنابها لا يكونو خوتها واقفين فشي قنت يخرجو ليها و هي ما قادة على صداع حمدات الله اللي مابانوش ليها و مدات ليه يديها سلمات عليه و قالت 

هنادي: سلام خويا أيمن 

أيمن : عفاك أختي بغيت نطلبك على الدفاتر ديال الباك بغاهم واحد صاحبي عندو السيزيام و غايطلع لباك و محتاااجهم الله يحفظك زعما نتي كنتي قرااية و غاتكوني مزال محتافضة بيهم 

هنادي : لا أخويا دفاتر قطعتهم مع الأسف سمحلي حتى هو أدبي ياك

أيمن: اه أختي راه أدبي بحالنا 

هنادي : دابا نسولك إلهام صاحبتي و نشوف واش عندها 

أيمن حط يدو على صدرو و قال 

أيمن: الله يحفظااك أختي نتي اللي كاينة و ما كاين ما احسن يتووب عليك 

هنادي ضحكاتها هدرتو و قالت 

هنادي: ما كاين مشكل أخويا كلنا كنقلبو نديروا الخير و كيقولك دير الخير و نساه 

أيمن : داكشي اللي كاين 

هنادي : يالاه الله يعاون أخويا 

أيمن: الله يعاون أختي 

عطاها بضهر و مشا و هي دارت و كملات طريقها غافلة على عيون خوها عصام اللي كان جااالس فالقهوة و كيشوف فختو واقفة مع دري فراس الحومة بغا ياكل ريتو و خصوصا كان جالس حداه صاحبو سمير واحد الشمكار مخزز أسمر و وجهو عامر ضرابي و رقييوق غايتكرض ...قال بصوت مشرمل 

سمير : تشا بربي إلا هاد ختكم غاتجيب ليكم العار لدار أصااحبي شتي ما غاتكونش راااجل الا ما شوهتي ديلمها فزنقة وعطيتيها شي جوج تصرفيقات تعقل عليهم حياتها كاملة ولات توقف مع دراري فراس الدرب مانرضهالكش أبا عصام 

كلمات سمير كانو بحال العافية فقلبو بحال شي حاجة كتحفر فصدرو مارضاااااش يسمع على ختو كلام بحال هاكا و مارضاش ختو توقف مع دراري فراس الدرب شنو كيصحاب ليها راسها واش داك الدق اللي كاتقيل تاكلو من عندهم و ديك الكلام اللي كاتقيل تسمعوا من فمهم مشا هباء منثور واش هضرتهم ما كاتكَرش فيها هادشي اللي كايقولو عقلو فهاد الساعة ...

عصام ضرب الوقفة و خرج من القهوة وازن التسعين يعني مخنزرررر و باينة فيه معصب لأقصى درجة و كيصوط أنفاس سخااان و عضلات يدو تزيرو عليه و العروق برزو فيهم بقوة الأعصاب بانتلو قربات حدا دار سرع خطاويه باش يلحق عليها ....

هنادي كاع ما عارفة بشنو هادشي اللي كايوقع غادية فأمان الله و حفظه و هازة فيديها الدفتر و كتدندن فنفسها ... بانتلها طوموبيل من نوع jeep واقفة حدا دارهم إستغربات بعض الشيئ و قالت بهمس 

هنادي: يعلم الله ديالمن هاد الحديدة 

بانلها شخص طويل و صحيح واقف حدا الطوموبيل و حاني راسو كيخندش فالتيليفون اللي فيدو اللي كان من نوع أيفون 11 لابس قويميجة فالبيض و حال ليها الصدايف اللوالة مع سروال بيض و صبيبط رجالي فالأسود ...

بقات هي غير حالة فمها فالحديدة أكثر طوموبيل كتعجبها و قليل فين كتشوفها ما داتهاش فشكون واقف حداها قد ما داتها فاللوطو من بين احلامها تمتالك طوموبيل من هاد النوع كيجيها ستيلها مزيون ....

فجأة سمعات صوت مجهد كينااديها حسات بدنيا مشات و جات حيت عرفات شكون مولاه تزعزع قلبها و البولة قربات تهبط ليها عرفات شكون قبل مادور و كتدعي فخاطرها ما يكونش شافها مع أيمن حيت غاتكون حصلات أكبر حصلة فتاريخ البشرية 

عصام : هنااااااااادي 

على إثر إسمها اللي تسمع صداه فمساميع الشخص اللي واقف حدا الطوموبيل و شكون من غيرو كاظم اللي اللي حس بتبوريشة فداتو و قلبو دق ألف دقة فالثانية بمجرد ماسمع {هنادي } لدرجة ان التيليفون طاح من يدو حيت كانت صدمة قوية بالنسبة ليه و فهاد اللحظة عليه كتنطابق مقولة {نادوا اسمك...و إلتفت قلبي ❤} ....

حسات بيد قوية جراتها من صاك اللي كانت دايرة على كتفها حتى تقطعات ليه اليد بدورة باش كدور عندو كينزل عليها لحنكها بطرشة قوية 

و هاد المنظر شافو كاظم اللي مزال كيستوعب واش حقا هادي هي هنادي واش هادي هي البنت اللي ناوية تخطب ليه مو واش هاد البنت هي اللي غاتشاركو حياتو و اش هاد البنت هي اللي غاتكون بنتو و غاتلعب دور البلسم لجروحو واش هاد البنت حقا غايعتبرها بنتو و لا مرتو أحاسيس و مشاعر تخالطو فقلبو و عدة أفكار طاحو فبالو و لكن سرعان ما تلاشاو منين شاف هاد الولد اللي ما عرفش حتى شكون هو مد يدو عليها يعني مد يدو على بنتو حبيبتو اللي واعد نفسو يحميها اكثر من نفسو قبل حتى ما يشوفها ....

حط عصام يدو على راسها من اللور و جرو لتحت و قال بصوت مرتفع خلا ناس يتجوقو عليه فالبلاصة 

عصام : يااااااا بنت الق*** تردينااااا حنا شمااايت ويولي اللي يسوا و اللي ما يسواش يتكلم علينا بسبااااااابك يا الحماااارة الا ما رباتكش مك و فششاتك انا غانعاود لز*** بوك ترااااااابي وليتي توقفي مع الز*** فراااااس درب يااااااا الق*** هااا زغتي يا الكلبة 

جرها لتحت و طلقها حتى جات مزدوحة لأرض ....

كاظم بمجرد ما فاق من الصدمة تقدم بخطوات مسرعة كيدفع فدوك ناس اللي تجوقو عليهم كيتفرجوا و حتى واحد فيهم ما قدر يفكها من بين يدين داك الوحش ...

لمحها كاظم طايحة فالأرض كتبكي و شانها تخربق و يديها تجرحات و الدم كيسيل منهم و حانية راسها كتبكي و تشهق و خوها واقف من فوق راسها كيسب و يعاير فيها ما كاين غير من السمطة لتحت 

ماحس كاظم براسو حتى جرو من كتفو حتى دار لعندو حيت كان عاطيه بضهر ....

كاظم عطاه بونية لكمارتو حتى داخ ما جا فين يستوعب عصام ديك البونية دخلو وحدة اخرى قوى منها جاتو فالحنك لاخور ...

رد كاظم راسو اللور و نزل على عصام بضربة لنيفو رعفو زاد دوخو هز رجلو و حشاها ليه فكرشو بقوة حتى طاح عصام على طولتو حدا هنادي اللي كاتبكي و تشهق و ناس كيغوتو و ما قدر حتى واحد يدخل يفك ...

اوا و نزل كاظم على ركبتو و بدا يدخل ليه فالبوني مزيااااان و عصام صافي داخ فالبلاصة يديه تشلو ما بقاش قادر يقاوم ولا يضرب وجهو تخمج بقوة الضرب اللي عطاه كاظم ....

هنادي حسات بقلبها غايوقف و داتها كترعد ما عرفات مادير تكمشات و زيرات على صاكها فيديها و حطات يديها على ودنيها و غمضات عينيها حيت صافي ما بقاتش قادرة تسمع ولا تشوف داك اللكمات اللي كينزل بيهم كاظم على خوها 

و هادشي كامل ما سايقين ليه خبار امها فضيلة و ختها سعاد و أم كاظم لالا زبيدة ....

كانو جالسين لداخل فدار شاعلين تلفازة و مجهدين لصوت شوية و كيتفرجو فدوزيم و حاطين الطبلة ديال كاسكروط القهوة و أتاي و الحرشة و الملاوي و المسكوتة اللي جابت لالا زبيدة و فريدة و مع الفرماج الكاشير زيت زيتون و جالسين فالصالون صغير اللي كان مفرش بفراش بسيط ...

لالا زبيدة اللي كانت لابسة جليليبة فالغرونة و فيها رشيمة من جيهة اليمن زوينة و دايرة زيف شفاف على راسها مبين نص فشعرها جالسة من فوق السداري و كتدور عينيها على دار و كتبتاسم و جالسة حداها فريدة اللي همسات فودنيها 

فريدة : إوا جبدي ليهم الموضوع 

زبيدة جاوباتها بصوت همس فقلب ودنيها 

زبيدة : إوا بلاتي نسخنوا بلاصتنا علاه غير أجي و خطب 

فضيلة كتكب القهوة و جالسة حداها سعاد و مجلسة فحجرها ولدها ريان 

فضيلة : مرحباااا بلالا فريدة توحشناك أختي شحال هادي ما جيتي عندنا و مرحباااا بلالا زبيدة نهار كبييير هدا 

زبيدة :*بابتسامة * ترحب بيك الجنة و نعايمها ألالا فضيلة سمحولينا هجمنا عليكم هاد العشية 

فضيلة حطات كاس د الحليب حدا زبيدة و حطات كاس د القهوة حداه و قالت 

زبيدة : لااا ما تقوليش ديك الهدرة أ لالا زبيدة ما كاين ما هجمتوا علينا بالعكس مرحبا و ألف مرحبا 

فريدة : الله يكثر خيركم أ ختي فضلية سمحولينا عدبناكم هاد العشية 

فضيلة : اودي ما كاين عداب بالعكس توحشناك حتى نتي شحااال هادي ما بنتي غبرتي غبرة وحدة 

فريدة : إوا غير مع الدنيا و نيت جابنا شي غاراض ياك أ لالا زبيدة 

زبيدة تقادات فالجلسة و قالت بصوت جدي 

زبيدة : إوا أش ماش نقوليك أ لالا فضيلة جينا قاااصدينك و المقصود الله 

فضيلة غير سمعات هاد الجملة حتى هي تقادات فالجلسة و قالت 

فضيلة : ياك لابس بعدا ؟؟ 

فريدة : لابس الحمد الله 

فضيلة : و الله يسمعنا خبار الخير 

زبيدة: سمعنا عندك بنيتة ما تعزلي فالبنات غير هي الأدب و الصواب و الضرافة و الحنانة إسمها هنادي كاين هادشي ولا ماكاينش 

فضيلة : اييه عندي بنيتة سميتها هنادي و لكن مزال ما فهمت أشنو دخل بنتي فهادشي 

زبيدة هزات يديها كتقاد بيها درتها و سكتات مدة و فالأخير قالت 

زبيدة : إوا راه باينة المعنى بغينا بنتكم لسيدي كااظم ولدي على سنة الله و رسوله 

على إثر هاد الجملة سمعوا صدااااع و الغوات برا

فضيلة شافت فبنتها سعاد و قالت 

فضيلة: ويلي أش هاد صداع برا 

سعاد: حتى نتي تلقاي غير الشمكارية سخن عليهم راسهم الله يلكيها ليهم ديما دايرين الشوهة 

زبيدة : إوا الله يهديهم أبنتي ما عندك ما ديري إوا نرجعوا لموضوعنا أش كنا كنقولو 

عصام ولا كولو دمايات و طايح لأرض و كلشي كيتفرج و لكن بعاد عليهم حيت تخلعوا من كاظم ما قدروش يدخلو يفاكوا و ناس كيتفرجوا من السراجم و كلهم بقا فيهم عصام ولد لالا فضيلة المعروف فالدرب و هنادي كترعد و ما قاداش توقف حيت صافي قالت هادي هي اللخرة لخوها فشلو ليها الركابي و شفايفها نشفو ....

كاظم بغا يزيد يدخليه البوني ساعة منين لمح بطرف عينيه هنادي كترعد وقف و يدو كلها دمايات كتقطر ....

شاف فيها مدة كيفاش مخلوعة حس بنغزة فقلبو تقدم بخطوات بطيئة ووقف على راسها و حنا لعندها و ودار يدو من مورعنقها و يد تحت من ركبتها وهزها فحضنو تحت نظرات الجيران اللي كلشي كيشوف فهاد المنظر و ما قدرينش يستوعبوا شنو هادشي كيوقع ...

هنادي مسكينة غايبة عن العالم الخارجي واخا حالة عينيها و ولكن غايبة فدماغها شي بعض المرات الصدمات كايكونو قوية بالنسبة ليك لدرجة كتبقا مدة من الزمن عاد كتستوعب شنو وقع ...

خرج من ديك الدائرة اللي دايرين ناس و اللي شافو كيخوي ليه الطريق كلشي خايف على عظامو ..

حل الباب ديال اللوطو اللي حدا شيفور بيد وحدة ...

وحط فيها هنادي وهي مسكينة غير ساهية فالفراغ و الدموع كينزلو و ما كتنطق لا بكلمة لا بجوج بحال مخدرينها سهى فيها مدة من الزمن استغرقت بضع ثواني كيحاول يستاغل الفرصة باش يسقي عويناتو بشوفة الإنسانة اللي غاتشاركوا حياتو من هنا لفوق الإنسانة اللي غايعتابرها بنتو ماشي حبيبتو الانسانة اللي ممكن تنسيه فملاك و لكن غالبا هنادي غاتنسيه فجرح بنتو اللي توفات ماشي فجرح مرتو حيت ملاك ما كايناش شي بنت المراة اللي تقدر تعوض مكانها هادشي اللي كيقولو راسو فهاد اللحظة ..

ضرب الدورة و جلس فالبلاصة ديال السياقة و ديمارا اللوطو و قلع و كلشي بقا متبع ليه العين حتى شافوه مشا عاد مشاو جيران كيدقوا فالباب على فضيلة ...

هنادي ساهية فالفراغ و دموع نازلين و الصمت هو سيد الموقف كاظم كيسوق و حاضيها بطرف عينيه عارفها مزال صدمة لاعبة عليها ...

ماهي إلا ثواني قليلة حتى سمع شهقاتها كتزيد تسمع لودنيه الشيئ اللي كيخلي قلبو يتألم و يتكسر ...

ما عرفش فين يديها ولا شنو يدير معاها باش تهدر معاه بقا ساكت كيتسنى المبادرة تكون منها هي و هو خلاص ولا حالتو بدمايات تقول دابح خروف داكشي علاش فكر فأنه يتاجه لفيلا ديالهم و يبدل حالتو بعدا و يحن الله فشنو يدير من بعد ...

هنادي حطات راسها على الزاجة و دموع ما بغاوش يحبسوا دموع القهرة دموع الظلم دموع ديال أنك صافي طلعلك كلشي فراسك دموع ديال أنك كتمنى الموت على أنك تعيش فهاد العداب دموع ديال أنك كترجى اللي خلقك باش يحبس كلشي و تهنى من هاد الصداع اللي فحياتك ...

قلبها عمر و بغات تخويه ولات كتهدر مع راسها كيف الحمقة وهي عند بالها بلي راه غير بوحدها ما بقاتش كتحس بشنو داير فالمحيط ديالها باغا غير تهنى و ترتاح و تريح قلبها من هاد الآلام اللي كتحس بيه...

هنادي: من نهار تزاديت عمري شفت نهار الأبيض مع خوتي أهئ اهئ علااش و كيفاش أنا براسي ما فهمتش من نهار حليت عينيا على الدنيا و أنا اللور اللور عمري حسيت بشي حد حن عليا من غير مي و ختي سعاد اللي كنعتابرهم دوا ديال داء اللي ابتلاني بيه ربي الحبيب المرض ماشي ديما كيكون جرثومة كدخل لدات يقدر المرض يكون على هيئة إنسان كيتحط فحياتك و كيكون مرض خطير أخطر من السرطان و أخطر من السيدا اللي كيقولو أكثر الأمراض كيضرو و كيألموا الواحد و لكن كن جاو و شافو فاش انا عايشة كانو غايبدلو وجهة النظر ديالهم أهئ اهئ بغيت شي نهار نتكا على شي حد اللي نحس بيه واقف وقفة د راجل فحياتي اهى اهى ياك كيقولك راجل كيكون مهم فحياة البنت و غالبا ما كايكون هاد الشخص هو الأب و الأخ ياك كيقولو هما سند اللي خاص يكونو فحياة كل بنت و لكن انا هاد السند ما عنديش تشهيت شي نهار نسمع كلمة أختي من فمهم من غير حمارة كلبة معزة بقرة جميع الحيوانات كيعيطو ليا بيهم أهئ اهئ علاش زعما حيت انا بنت ضعيفة ما عندي لا حول و لا قوة أمامهم ما يمكنش يدوز نهار و ما ناكلش العصا من عند واحد فيهم يا عصام يا حمزة و لكن اليوم شوهني امام الملأ و نعتني بكلمات اللي حتى وحدة ما غاترضا يتقالو ليها علاش؟؟ حيت بكل بساطة سولني واحد الولد على دفاتر ديال الباك واش عندي يعني سبب بسيط ما كايستاهلش شوهة اللي دار ليا على قبلو أهئ اهئ ولكن داك الراجل اللي ضربو تمنيت للحظات كن قتلو ماشي حيت انا قبيحة و لكن حتى أنا بغيت نرتاح ولو خمسين فالمية اه واقيلة ولا قلبي كحل وحقدت على رجال أهئ اهئ...

حسات بيد تحطات على كتفها و هي تقفز من مكانها...

حسات بيد تحطات على كتفها و هي تقفز من مكانها هاد اللمسة كانت بمثابة صفعة ليها باش تفيق و تعرف شنو واقع فالمحيط الخارجي ....

بدورة باش كدور كتشوف راجل اللي كان كيضرب خوها هو اللي جالس حداها كيسوق و لقات راسها فالطوموبيل بحال كبيتي عليها سطل د الما بااارد ما فهمتش شنو واقع تخلعات و تدهشرات شنو هادشي فين هي ؟؟ كيف وقع ليها باش وصلت لهنا؟؟ وشكون اللي عطاه الحق يهزها و يدخلها لطوموبيل ؟؟؟ شكون هو أصلن؟؟ وشنو كان كيدير حدا دارهم ...

تساؤلات كثيرة طاحت فبالها ما لقات ليها جواب شهقات و حطات يديها على فمها بمجرد ما بانو ليها الملامح د وجهو و تفكرات الصورة اللي و راتها إلهام يعني هو ولد المرأة اللي خدامة عندهم فريدة و لكن شنو كان كيدير حدا باب دارهم؟؟؟ و يعني هو اللي عنفج لخوها كمارتو بقات غير كتشوف فيه و لسانها تربط ...

كاظم مركز مع طريق و عينيه حومر بقات فيه فاش سمعها شنو قالت يعني هي عايشة الجحيم مع دوك الخوت اللي عطاها الله و لكن واعد نفسو بلي ما عمرها تعاود تعيش فهادشي حيت بكل بساطة ما غايخليهاش ليهم مزال هي هنااادي هي كتمتالك نفس الإسم د بنتو ما عرفش علاش حس برابطة قوية إتجاه هاد البنت بقات فيه بزاف و قطعات ليه قلبو يعني داك الآلام اللي كان كيعيشو ما يسوا والو قدام داكشي اللي كانت عايشة فيه هي ...عندهم نقطة مشتركة اللي هي الآلام و بجوج بيهم خاص اللي يفهموهم عجيب أمر هاد الحياة كلها كيعاني بطريقتو و درجات الألم كتختالف من شخص لآخر ...

هنادي كسرات هاد الصمت بصوتها المرعود الخائف و قالت 

هنادي : ش...شكون نتا عفااااك أخويا حطني الله يرحم من رباك عفاااك خوتي غايقتلوني أهئ اهئ غايقتلوني الا عرفوني طالعة فطوموبيل مع راجل ما كنعرفو ما كايعرفني عفاك أهئ اهئ 

كاظم بقا ساكت مدة و عينو فالطريق من نهار دار أكسيدون ولا كيركز فطريق و ما كيشوف فحتى بلاصة أخرى ولات عندو عقدة من حوادث السير .. ..

كاظم صدرات منو تنهيدة و فالأخير رحمها و تكلم بصوت حنون و عينو كيشوفو فطريق 

كاظم: شوووت ما تخافيش انا معاك و مسحي دموعك حتى حاجة ما كتستاهل يطيحوا على قبلهم و خصوصا على قبل دوك الشماايت دموعك غاليين ما تطيحيهمش على الرخيص 

هنادي مسحات دموعها بكفوف يديها و قالت بصوت غالبة عليه الشهقة د البكا و كتدور عينيها كتشوف فطريق و كتشوف فيه و رجليها كيترعدو متوترة لأقصى درجة و الخوف لاعب عليها حيت هي اللي عارفة شنو كايساينها فدارهم...

هنادي: شوف اخويا راه والله حتى يقتلوني حاميتي عليا قبيلة الله يجازيك بخير فالوقت اللي حتى واحد ما قدر يقرب و يدافع عليا الله يعطيك ما تمنيتي ردني لدارنا و لا غير حطني و نشد طاكسي و نمشي عفاك كنترجاك 

كاظم ما كيشوفش فيها حيت عينو غير على الطريق و قال بصوت حنون كأنو كيواسيها 

كاظم: غانعطيك واحد المثال زوين باش تفهميني و ما تبقايش خايفة و ثيقي فيا تخايلي معايا كنتي غادية فالغابة و معاك السبوعة و خرجولك الضبوعة واش غاتخافي ولالا؟؟؟ 

هنادي بقات غير كترمش فيه جاتها هدرتو فشي شكل و خصوصا هي كتهدرلو فالشرق و هو كيجاوبها فالغرب هي كتقولو حطني و هو جابدليها الغابة و الضبوعة و السبوعة اويلي تفكرات كلام إلهام فاش قالت ليها راه مهزوز فدماغو تخلعات و صرطات ريقها و فينما كانت شي فكرة تافهة طاحت ليها فبالها هاد الساعة بقات ساكتة و كتشوف فيه حتى قال 

كاظم: كنساين جوابك أبنتي ؟؟ 

هنادي جاتها غريبة انه يناديها ببنتي و لكن قالت ربما حيت هو كبير و هي كتبان صغيرة عيط ليها هاكا ربما جاوباتو بصوت مرعود و مازال فيها الشهقة د البكا 

هنادي: قلتي الا خرجولك الضبوعة و نتا معاك السبوعة واش غاتخاف ولالا ياك هدا هو سؤالك ؟؟ 

كاظم : * بابتسامة * وي برافو على بنتي هدا هو سؤالي كنتسناك تجاوبي 

هنادي : السبع قوي على الضبع و هدا الاخير ما عمرو يوصل لقوة اللي عاطي سيدي ربي لأسد و لكن أكيد ما غانخافش حيت عارفة معامن انا و أمبوسيبل يقربوليا الضبوعة حيت كتبقا القوة ديالهم ضعيفة مقارنة بالأسد و الأسد هو ملك الغابة يعني من الغباء أنني نخاف 

على إثر كلماتها حبس الطوموبيل حدا واحد الفيلا كبيرة و التافت شاف فيها و ابتاسم و قال بصوت حنون دافئ كيفما العادة كيحسسك بالطمأنينة 

كاظم: الا كان معاك سبع ما غاتخافش من الضبع إعتابري خوتك ضبوعة و انا السبع يعني ما عندكش مناش تخافي من اليوم إعتابريني أنا هو داك الأسد اللي الا تجرأ شي حد و قرب لشبل ديالو يمحيه من الوجود و يولي فخبر كان

هنادي سهات فيه مدة ....سهات فالإبتسامة اللي ترسمات على شفايفو و هو كيهدر سهات فصوتو الحنين اللي كتحس بيه كيلامس قلبها عمرها سمعات شي راجل كيتكلم.بهاد الحنية كاملة موالفة غير بصوت ديال دوك الوحوش دخوتها اللي كيقفزوها من بلاصتها عمرها سمعات شي واحد قال ليها هاد الكلام كلامو غريب و لكن عندو معنى عميق ...تفكرات كلام إلهام فاش قالتلها بلي كاظم إنسان حنين بزاف و ضريف و حلوة واش فعلا هادي صدفة أنها تلاقاه وهي عاد شافت صورتو واخا مزال عندها داك الشك ديال عشرة فالمية بلي ماشي هو و لكن بكلامو كيأكد ليها بلي هو نفس الشخص اللي هدرات ليها عليه إلهام فطريق....

مرر يدو حدا عينيها و قال بإبتسامة 

كاظم :hello ؛ علاش سكتي جاوبيني سمعيني صوتك أبنتي 

هنادي دهشرات من كلامو تلفات ما عرفات باش تبلات حنات راسها و بدات كتفرك يديها بتوتر و قالت 

هنادي : ما لقيت ما نقول أخويا شكرا على كل كلمة قلتيها و لكن * تنهدات و كملات كلامها * و لكن خوتي قباح و ما كاينش اللي غايفكني منهم الله يفاجيها و صافي 

حسات بدموعها هبطوا و كملات كلامها 

هنادي: غادي يضربوني فاش غانمشي و ما غايخليو ما غايقولو ليا و يقدرو يطيحوا عليا شي باطل تفووو 

كاظم هز حاجب و هبط لاخور و قال بصوت خشن 

كاظم: علاش ما كثيقيش فيا شنو قلتلك دابا ؟؟؟ 

هنادي سكتات مدة و شافت فيه و قالت 

هنادي: أخويا أش غانقول ليك نتا قلتي الا دخلتي لغابة و معاك سبوعة ما تخافش من ضبوعة و لكن أنا الا مشيت لغابة اللي هي دارنا راه غانلقا ضبوعة اللي هما خوتي حالين فمهم كايتسناوني غير ندخل باش يفرسوني حيت ديك ساعة سبع اللي هو نتا ما غاتكونش معايا 

كاظم حط راسو على الفولون ديال طوموبيل و سمعات صوت ضحكتو اللي دخلو لمساميعها كيف إيقاع على لحن موسيقي جميل دور وجهو شاف فيها و مزال على نفس وضعيتو قال 

كاظم: شكون قالك بلي سبع ما غايكونش معاك 

هنادي : هاء و لكن نتا عندك شغالك واش غاتمشي ترغبهم باش ما يضربونيش لاأخويا لااا و الله 

غير ديني عفاك الله يعطيك ما تمنا اهئ اهئ راه غانمشي فيها و الله حتى غايشبعوا فيا عصا و يقدرو يخرجوني من لافاك و ما نقدرش نحقق أحلامي أهئ 

كاظم تقاد فالجلسة و هز صبعو سبابة و حطو على شفايفها وهي تجمد فبلاصتها و قال 

كاظم: شووت شوووت ما تكونيش ضعيفة بحال هاكا كنترجاك باراكة من البكا أبنتي خاصك تكوني قوية كوني جيش بلا قائد الحياة بحال شي وحش وإلا كنتي ضعيفة بلا ما تحلمي تكملي فيها تعلمي تبتاسمي واخا تكون فقلبك العافية شااعلة كوني قوية ما تخلي حتى واحد يبكيك كيفما سبق و قلت بلي فاش كتكون قوي الضعيف ما عمرو يتجرأ عليك و حتى هداك اللي كيظن براسو قوي ما عمرو ما غايطوف بساحتك حيت كايعرف بلي نتا قوى منو 

حيد صبعو من شفايفها و هي بقات مسمرة فبلاصتها كتستوعب كلامو عكسو هو اللي دار يدو تحت دقنو كيتسنى من أنها تكلم و تجاوبو فاش شافها ساكتة قال بإبتسامة

كاظم: علاش ما كتكلميش واش كتخلصي على الهدرة ابنتي فاش كتهدري كتنوضي تبكي و تدكري دوك الشماايت اللي حاشا واش يكونو رجال كنقسم ليك بلي خلقني و خلقك حتى ندمهم على العداب اللي كانو معدبينك 

هنادي على إثر كلماتو حسات بقلبها كيضرب بقوة و الفراشات كيلعبو فكرشها إحساس فشي شكل حسات بيه ما عمرها سمعات من شي شخص كلام بحال هاكا ما نعرف علاش جاها هاد السيد بحال داك الملاك الحارس اللي كتشوف فرسوم كايكونو عندو جنيحات و كيحمي داك الشخص اللي كيكون مكسور و ما عندو حد فدنيا ضحكات على غبائها و قالت 

هنادي : صراحة عجبتيني فيه ناري فرشختييه مانكدبش عليك عجبني الحال غير هو تخلعت شوية حتى الا رجعت لدار ووكلوني العصا بعدا راك بردتيليا قلبي فيه الله يعطيك الصحة هههه 

حطات يديها على قلبها كضحك و كتفكر العصا اللي عطاه كاظم شداتها الهيستيرية ديال الضحك بقات غير كضحك كتفاجي على راسها من داك البكا و داك الهم و الغم اللي كانت عايشة فيه كانت محتاجة لهاد الضحيكة باش تفوج على راسها ...

عكس كاظم اللي كان كيشوف فإبتسامتها و ضحيكتها اللي غي كتضحك كيتغمضوا عويناتها و كيبرزوا الحفيرات د زين اللي عندها فخدودها الشيئ اللي كيخليها تبان أكثر جمالا { الإبتسامة أحسن زينة يمكن ان تضعها المراة } ....

ماحس بالإبتسامة حتى شقات طريق شفايفو هو الآخر و حس بقلبو كيبتاسم فهاد اللحظة إبتسامتها جميلة و هي أجمل إحساس زوين تشوف شي حد مغموم كيبتاسم خصوصا الا كان هاد الشخص بدا كيدير مكانة فقلبك ...كيتأملها كأنه كأب كيتأمل ملامح بنتو اللي عاد تزادت و شافت نور ديال دنيا ....

قال بعدما فاق من تأمل ديالو ليها 

كاظم: على قبل إبتسامتك مستعد نضرب خوتك كل نهار 

أبنتي

حبسات ضحك و دورات وجهها شافت فيه و نظراتها مشاو ديريكت لشوميز اللي لابس ولات كلها دمايات و يدو اللي يبس فيهم دم حطات يديها على شفايفها و قالت 

هنادي: خويا ..*سكتات مدة و قالت * صراحة هاد الكلمة كنكرهها و ما كنبغيش نعيطلك بيها و لكن المهم بغيت نقولك بلي حوايجك عامرين دم 

كاظم : وي عارف أصلن جيت لدار باش نبدلهم و نردك لدار 

هنادي بفرحة و بترجي 

هنادي: آه الله يعطيك الستر بدلهم دغيا باش نمشيو راه غاتكون دنيا مقربلة عليا 

كاظم غمزها و قال بصوت كلو ثقة 

كاظم: مزال غاتقربل أكثر من هاكا و لكن كوني أكيدة بلي نتي ما غاتآدايش و ما عمرك غاتآداي 

حل الباب و خرج و ضرب الدورة و حل ليها الباب و قال بصوت هادئ 

كاظم: نزلي 

طرطقات فيه عينيها و قالت بصوت خائف 

هنادي: فين غانزل اويلي 

كاظم قال بابتسامة 

كاظم: دخلي لدار و الله ما كاناكل أنا ضريف ماشي بحال خوتك 

هنادي ابتاسمت و قالت بصوت جدي 

هنادي : كتبقا فالمبادئ ديالي ما نقدرش ندخل لدارك و انا ما كنعرفكش و ما بيناتنا حتى علاقة هادشي ما غايبغيه لا ربي لا عبدو ياك غير سير بدل حوايجك على خااااطر خاطرك و اجي تمشي معايا عند ضبوعة أ بغيت نقول لدارنا ههه 

كاظم هز يدو و حك بيها مؤخرة شعرو و قال 

كاظم : واخا على خاطرك أبنتي ما غانبزز عليك حتى حاجة واحد عشرة دقايق و غانجي أوكي 

هنادي :اوكي 

كاظم : ما بغيتي والو ؟؟ 

هنادي : بغيت غير شريبة د الما راه نشفلي الحلق بالبكا 

كاظم حرك ليها راسو بالإيجاب و سد الباب عليها و دخل لداخل و خلاها فاللوطو كتدور عينيها على جردة و كتشوف فالنافورة اللي جاية فالوسط كترش الما بقات غير حالة فيها فمها و كتقول مع راسها 

هنادي :و نيت ملعقين ديال بصح هاد ناس معدر إلهام قالتها ليا و لكن ياك هدا هو كاظم اللي ماتت ليه المراة و قالتلي تهز فدماغو هي اللي مهزوزة فدماغها بنت الهم راجل غزااال قالتلك هبيل انا اللي هبيلة ناااري شحال ضريف معدر إلهام قالتلي متوااااضع مصاب حتى انا يجيبلي باكية د شكلاط بحالها ههههه ناري تسطيت انا و لكن عطا العصا لعصام و لكن عجبني فيه ما كرهتش كن قتلو نرتاح منو و لكن مع الأسف انا متأكدة غانلقاه واقف كي البغل كيسايني ولد الهم بغيتلو دقة *حطات يديها على قلبها و قالت * ياااختي و شحال غزال هاد الراجل معدر ديك الصكعة ديال إلهام طايحة فيه دابا شنو نقولو راني كنعرفك ولا نسد حلقي لالا كنظن نسد حلقي حتى نعرف بعدا شنو كان كيدير حدا دارنا زعما يكون دا خالتي فريدة لحومة و لكن علاش غايديها ياك هي ديما كتجي غير فطاكسي و الله ما فهمت شخصيا هاد البلان و علاش كايقوليا بنتي ياكما كنبانلو قد بنتو * هبطات زاجة باش تشوف راسها فالمراية اللي من جيهتها و كملات كلامها * زعما أنا واحد البنت اللي كلشي كايعطني أكثر من عمري و علاش هو بالضبط كيقولي بنتي زعما بلا ما تحلمي تكون بيناتنا شي علاقة * دارت يديها تحت دقنها و كملات كلامها * مطيور هاد كاظم فعوط ما يقولي ختي كيقولي بنتي امم وانا نفهم و أصلن واخا نحاول عارفاك عمرك تشوف فيا انا فييين و نتا فين هههه قالك بنتي زوينة هادي و لكن صراحة عجباتني غير ما يقولش ختي واكرهت الخاوة و ما يجي من طاسيلة مها 

قدات درتها فالمراية حيت كانت مخربقة و و بقات كتساينو يخرج قتلها الملل و هو ما بغا يخرج خلاص ...

خرجات راسها من زاجة و ربعات يديها و تكات راسها عليهم كتنتاضرو يخرج ....

سمعات صوت ديال سيارة بورش فالأسود وقفات حدا الدار بقات حاضية شكون غاينزل منها ...

تحل الباب وهو ينزل شخص يضاهي كاظم فالوسامة شكون من غيرو لقمان اللي رجع من الخدمة كان لابس كوستيم أسود و محيد الفيستة دايرها فيدو و السوارت ديال اللوطو فيدو سدها بدورة باش كيدور كيلمح بنت مخرجة راسها من زاجة إستغرب بعض الشيئ ...

عكس هنادي اللي قشعاتو شافها و هي تقاد فالجلسة و شافت قدمها و ربعات يديها بغات تطلع الزاجة و هو يبانلها جاي لجيهتها تخلعات سرطات ريقها و بقات ثابتة ما دارات والو ...

تقدم عندها بخطوات بطيئة حتى وصل لعندها و حك لحيتو و قال 

لقمان: سلام 

هنادي دارت عندو بالعرض البطيئ و ابتاسمت ليها بإبتسامة صفرا و قالت

هنادي : و عليكم السلام أخويا 

لقمان ابتاسم بإستهزاء و قال 

لقمان : شكون قالك انا خوك زوينة هادي 

هنادي تخلعات من كلامو فكرها غير فكلام خوتها حنات راسها و بدات كتفرك يديها بتوتر لقمان لاحظ بلي مخلوعة و متوترة زاد بغا ينشط عليها و يطلع عليها الطوبية 

لقمان : شكاتديري نتي هنا ؟؟ غانعيطلك دابا لبوليس 

هنادي غير سمعات آخر جملة حسات بالارض مشات و جات بيها و الخلعة حشات ليها الركابي دارت عندو و الدموع تجمعو فحافة عينيها و قالت بصوت خائف و متقطع 

هنادي : ب..بول..بوليس لا ...لا أخويا لاا انا انا جيت مع كاظم

لقمان ربع يدو و بقا كيشوف فيها كيفاش تخلعات و بغا يكمل عليها جاتو على الكانة ...

لقمان : فهاد الفيلا كاين غير انا و بنتي ومرتي نتي اش جابك لهنا و ما عندي ما نسالك جالسة فطوموبيل أحسن من ديالي سارقة محترفة أكيد غاتكونو نتوما شي عصابة 

جبد التيليفون من جيبو و كمل كلامو 

لقمان: دابا نيت غانعيط لبوليس يا الشفارة 

هنادي صافي قالت هادي هي لخرة ليها بدات كلها كترعد ولا وجهها أصفر و الخلعة ديال قبيلة و زيد عليها الخلعة ديال دابا ما بقاتش قادرة تستحمل ...حسات بدنيا كتلعب بيها و راسها كيعطيها الحريق داتها فشلات و ما حسات براسها حتى غابت على الوعي ...

لقمان غير شافها فقدات الوعي تصدم عرفها غاتكون مع كاظم و محال واش يدوز ليه هادشي بساهل داكشي علاش رجع خطوات الى الوراء و حل الباب ديال طوموبيلتو و قلع خلاها سخفانة و هو مشا في حالتو كأنه مادار والو و كيموت بضحك عليها عرفها خوافة و لكن ما توقعش انها تسخف و يوقع ليها بحال هاكا هو كان غير باغي يطلع طوبية و ينسا السطريس د الخدمة صدق مغيب البنت ...

كاظم بدل حوايجو و لبس سروال ديال تجين مع تيشورت أسود كيحاول ما امكن يسرع باش يخرج لعندها دار ساعة ديالو فيدو و رش عطرو و اتاجه لكوزينة كيبتاسم حاس براسو فرحان لما لا و هو غايتزوج ببنت كتمتالك نفس الإسم دبنتو المتوفية و ما ينكرش بلي حس بيها قريبة ليه حس بيها حتى هي كتعدب و بقات فيه ربما حس بالشفقة من جيهتها و حس بلي من اليوم خاصو يحميها من خوتها بل من العالم بأكمله حتى واحد ما عندو الحق يآديها ولا يهضر معاها ماهو كيعتابرها بنتو و باغي يحس بداك الإحساس د الأبوة معاها ....

دخل لكوزينة اللي كانت كبيرة و كلها رخامات و مجهزة على حقها و طريقها ... حل الثلاجة و جبد قرعة د الما و هز شرائح الديك الرومي المبخر و هز الخص و مطيشة و الجبن و الكيتشوب و المايونيز و قادهم فالباكيط و خرج من الكوزينة و حل الباب ديال برا و هاز فيدو قرعة د الما و السندويتش اللي غايعطيها حيت أكيد غايكون جاها جوع ...

خطا خطوات ثابتة فإتجاه السيارة بالحلة باش كيحل الباب كيشوفها سخفانة و مغمضة عويناتها علامات الصدمة بانت بشكل كبير على ملاميح وجهو لاح داكشي اللي كان هاز لارض و مشا بسرعة حل الباب ديال دار بالساروت و رجع هزها بين يديه و تمشا بخطوات مسرعة و هي مرخية بين يديه و طالقة يديها ما عارفاش كاع شنو واقع طلعها لبيتو اللي من حسن الحظ انه خلا بابو محلول ...

دخل و حطها فوق الناموسية و حاس بقلبو كيضرو عليها و عدة اسئلة فبالو شنو وقع ليها ؟؟؟ ياك كانت صحة سلام؟؟ ياكما مريضة بشي حاجة ؟؟ ياكما غاتموت و تخليه بحال ملاك ؟؟ لاا لااا لااا مايمكنش تمشي و تخليه بعدما لقا على الأقل اللي غاتنسيه فجرح بنتوو مرتو لااا ما يمكنش يوقع هادشي حس بداتو كترعد و ما عارفش شنو يدير ...

من غير انو جثا على ركابيه و مرر يدو على خدها و قال بحزن و بترجي 

كاظم: هنااادي فيقي عفاااك هنااادي ما تخلعينيش * هز يديها باسها و حاس بقلبو غايسكت بالخلعة * مااااتموتيش و تخليني بحال ملاااك ي...ياك انا غانحميك من خوتك و ما عمري غانأديك بحالهم عفاك اللي بغيتيها نديرها غ..غاندمهم على كل حاجة كيديروها ليك و غانديك معايا لفرنسا و غانديرلك اللي بغيتي s'il te plaît حلي عينيك هنااادي بنتي ما تمشيش و تخليني بعدما لقيتيك كنترجاك لاااالاااا نتي ما غاتمشيش بحالهم ما غانسمحش ليك الا درتيها ابنتي 

كيتصرف كيف شي أحمق و كيدخل و يخرج فالهدرة ما عارفش براسو اش كايقول من غير انو ما باغيش هنادي تضيع ما بين يديه ما باغيهاش تمشي و تخليه كيف دارت ملاك واخا يعرف يفديها بروحو ....

لا من مجيب هنادي مسكينة غايبة على العالم الخارجي الصدمات اللي دازت منهم هاد نهار ما كانوش ساهلين و صعيب على الواحد يتقبلهم ... 

وقف و حيد داك تيشورت اللي كان لابس صهدو ولا كولو عرقان فالبلاصة حاس بداتو كترعد و ماعارف مايدير حار و تلبك مرر يدو على شعرو بسرعة بانتلو ريحة ديال العطر الرجالي اللي كايدير تمشا بخطوات مسرعة ناحيتو و هزو و رجع جلس حدها و رش العطر على يدو و حطو حدا نيفها و ما هي الا عدة دقائق حتى بدات كتفتح عينيها بتثاقل حتى حلاتهم و بقات غير كترمش فيه و كيفاش جالس بجنبها بسرعة تفكرات كلام لقمان اللي قالها و بلي غايعيط ليها لبوليس تجمعو دمعو فحافة عينيها و مسكينة بالخلعة ما حسات براسها حتى عنقاتو بكل ما أوتيت من قوة كتزير عليه و تبكي و تشهق ما عارفاش شنو كادير ....

❤❤❤ 

كم أتمنى أن أختبئ في قلبك 

ويصمت الكون من حولي 

فلا أسمع سوى صوتك 

كم أتمنى أن أدس رأسي 

بين أضلعك وأتغيب عن واقعي

عن عالمي؛ 

فلا أستنشق سوى عطرك 

# إقتباس 

زيرات عليه و كتنخصص فأحضان كاظم اللي ما عرف راسو باش تبلا صدماتو و لكن رتاح على الأقل منين فاقت و حلات عينيها و لكن ما عرفش شنو سر هاد الحضن المفاجئ و شنو وقع ليها باش غاتغيب عن الوعي ياك كانت مزيانة شنو اللي خلاها تسخف فجأة بغا يحط يدو عليها و لكن سرعان ما تفكر زوجة ديالو ملاك اللي ربما بهاد التصرف غادي يخونها و غادي يقيس بنت من غيرها بقا راخي يدو و خلاها تبكي و تفرغ فشنو فقلبها .. . و ما بغاش يتكلم خلا المبادرة تجي منها هي باش تهدر قالت أخيرا بصوت غالبة عليه البحة د البكا 

هنادي: غايعيط ليا البوليس ماابغيتش ندخل للحبس هو فهم غلط اهئ اهى 

كاظم: شكون هو ابنتي شنو واقع ليك 

هنادي غير سمعات كلامو اللي كان بمثابة الصفعة ليها باش تفيق من صدمتها هزات عويناتها اللي كانو عامرين دموع شافت فيه و بعدات فالبلاصة و حنات راسها و قالت 

هنادي: اهى اهئ سمح ليا اهى اهئ 

كاظم مرر يدو على ذقنو و قال

كاظم: علاش غانسمح ليك و شنو درتي باش غانسمح ليك و علاش كنتي كاتبكي و علاش سخفتي و خلعتيني عليك *سكت لعد ثواني و كمل كلامو * تعلمي ما تبقايش غير كاتبكي هدري تكلمي ما تسكتيش ابنتي انا كنسمع ليك و اللي أداك فشي حاجة أجي عندي و قوليها ليا ندموا على نهار اللي قرر يديرلك شي حاجة 

ولو تكون بسيطة 

هنادي هزات عينيها كتشوف فيه و كتنخصص .. كتحس بكلامو كيف شي مرهم كيداوي جروح قلبها كلامو كيحسسها بالأمان اللي ما عمرها حسات بيه مع خوتها إحساس ديال أن شي شخص يقول لك هاد الكلام و تحسي بلي كاين شي حد اللي يحميك و يلعب دور الأسد فحياتك ما عمرها حسات بيه رغم ان أمها و ختها كانو كيدافعو عليها و لكن ماشي بحال هاد الإحساس اللي كتحس بيه فهاد اللحظة حيت كيفما كان الحال كيبقاو حتى هما لا حول لهم و لا قوة و لكن كاظم كلامو غييير حسات بقلبها كيضرب بسرعة و ماحسات براسها حتى بدات كتعاود ليه شنو وقع ليها 

هنادي: ق..قبيلة فاش دخلتي ب..بقيت فطوموبيل اهئ اهئ و هو يدخل واحد الراجل و جا لعندي و قالي شنو ك..كديري هنا اهئ اهى و قالي غانعيطلك لبوليس قالي غير انا و م..مرتي و بنتي اللي عايشين فهاد الدار اهى اهى و قالي نتي غاتكوني شفارة و هز تيليفون و ..و عيط لبوليس اهئ اهئ و انا خفت و ما عرفت شنو وقعلي من بعد 

كاظم بقا كيشوف فيها مدة و كيتصنت ليها بإهتمام حتى كملات و بقات كتشوف فيه كتسناه يعطيها شي تفسير فالأخير دار تصرف اللي ما كانتش متوقعاه شداتو الهيستيرية ديال ضحك من كلامها بقا غير كيضحك و كيشوف فيها و هي ما فاهمش علاش كيضحك بهاد الشكل .. و مع كل ابتسامة كتحس بقلبها كينبض بسرعة و بأحاسيس فشكل كتكون فقلبها ما بغاتوش يحبس من ضحك تمنات كن بقات غير كتشوف فيه العمر كامل و هو كيبتسم أش هادشي كيوقع ليها براسها ما فهماتش ما حسات براسها حتى إبتاسمت حتى هي ...

كاظم : و نتي ثقتي بيه و تخلعتي و نضتي كاتبكي كيفما العادة ياك * جر ليها حنكها و الابتسامة على وجهو * ما كانش كيصحابلي بلي اللي جا يديرها بيك كتبان فيك دكية 

هنادي تصدمات من تصرف اللي دار كيفاش حتى زعم عليها و بدا يجر ليها فخدها شنو يصحاب ليه راسو بدات كتخايل يقدر يشدها يديرلها شي حاجة و هي ما كتعرف عليه والو من غير بعض المعلومات القليلة من صديقتها ما حسات براسها حتى ناضت من الفراش و قالت بصوت مرعود و بترجي و عينيها كيشوفو فالارض 

هنادي: ديني لدارنا عفاك انا ما كنعرفكش و ما باغاش نعرفك اهئ اهئ بغيت نمشي أخويا ديني الله يرحملك الواليدين 

كاظم بقا كيشوف فيها مدة عض على شنايفو و ناض و تمشا بإتجهها ووقف أونفاص ليها هز يدو بتثاقل و حطها تحت ذقنها و هز ليها راسها بشوية حتى تلقات عيونها السوداء مع عيونو العسلية عم الصمت لثواني حتى كسرو صوت كاظم 

كاظم: هداك لقمان خويا تفلا عليك و نتي ثيقتيه بسهولة علاش كثيقي بكلام ناس امم 

هنادي : ما كنتش عارفة 

كاظم حرك راسو يمين شمال و مازال يدو تحت دقنها 

كاظم: من هنا لفوق ما تثيقي بحتى واحد ثيقي غير بيا أنا واخا أبنتي 

هنادي بعدات عليه و حنات راسها و قالت بصوت مكسور 

هنادي: انا ما باغا نثيق بحتى واحد انا باغا غير نرتاح و نتا ما كنعرفكش باش نثيق بيك 

كاظم : حتى لقمان ما كتعرفيهش و ثقتي بكلامو 

هنادي ماعرفات ما تقول من غير انها قالت 

هنادي: عفاك بغيت نمشي خوتي غايضربوني و مي غاتكون مقلقة عليا الله يرحم الوالدين ياك قبيلة قلتي بلي غير غاتبدل حوايجك و نمشيو 

كاظم : ما عندك فين تمشي بلاصتك هنا معايا مع رجااال ماشي مع شمايت ختاري يا غاتكوني مع السبع و لا تكوني مع الضبع

هنادي حسات بالخوف و الرعب تسللو لقلبها قالت 

هنادي: ك...كيفاش بلاصتي معاك شكاتقول نتا عاود 

كاظم: *حشا يدو فجيبو * بلاصتك حدايا 

هنادي صرطات ريقها و قالت 

هنادي: واش اخويا كنعرفك شوف فكتيني قبيلة الله يجازيك بخير و لكن راه....

كاظم: كنظن ما سمعتينيش مزيان قلتلك بلاصتك معايا 

هنادي شنايفها نشفو و داتها كترعد بالخلعة و جميع الافكار السلبية طاحو عليها فهاد اللحظة قالت بعد صمت ما تعداش عشر ثواني 

هنادي: شنو بيناتنا باش نكون معاك 

كاظم: بنتي 

هنادي تصدمات من كلامو و بدات كتفكر كلام إلهام فاش قلتلها مهزوز فدماغو ناري على حصلة حصلات بقات غير كترمش فيه و الدموع بغاو ينزلو ليها و كتقول مع راسها واش هربت من وحوش طحت فأحمق و مسطي 

هنادي: ك....كيفاش بنتك 

كاظم: غانتزوج بيك و غانديك معايا لفرنسا داكشي علاش كنت أنا و الحنانة عند داركم حيت مشات تهدر مع الام ديالك 

هنادي بقات غير مسروطة و حطات يديها على فمها و بقات مسمرة فبلاصتها كتشوف فيه ...

سمع كاظم صوت الام ديالو مع فريدة فطابق سفلي شاف فهنادي و قال 

كاظم: غانجي عندك دابا ما عندك مناش تخافي أنا معاك 

قال هاد الجملة و خرج و سد الباب و هبط لطابق السفلي لقا ماماه كتويل غير هي و عظامها و حداها فريدة دار يدو فجيبو و بقا واقف كيسمع حديثهم 

زبيدة : ياااا ميمتي على مصيبة طحنا فيها أش دااااني لشي خطبة كنا هاااانييين مهنييين مشيت كنقلب على البلا بيديا أوييلي ميمتي على زهر عند ولدي قلتلك ديك مرتو قبل ما تموت دارتلو شي عكس أويييلي وحدي على وليدي مسكين تا قلنا غانخطبو ليه كيف عباد الله و يتزوج صدقنا طحنا فما أكفس و طلس 

فريدة : و دابا بلا ما تفقصي راسك 

زبيدة : و هااادشي راه كيطيح الملحة و سكر اويلي على وليدي و على مصيبة و على طاااسيلة عند ديك البنت لااااا لااااا اختي بناااااقص من شي زواج بلاااش غير خليه بوحدو 

سمعو صوت كاظم قال 

كاظم : غانتزوج بها أ الحنانة 

التافتو عندو بجوج و زبيدة طرطقات فيه عينيها و ضربات على فخدها 

زبيدة : نتا هنا و دنيا مقربلة عليك لهيه فين ديتي البنت 

تقدم عندهم كاظم بخطوات ثابتة و كيتكلم بكل برودة بحال ما واقع والو 

كاظم: لفوق فبيتي 

زبيدة : اوييييلي على الفوق فبيتك شووف شرحلي شنو هادشي كدير راه راسي اولدي كيفور بالاعصاب زعما نتا أكاظم ماشي ديال هااادشي واش باغي تحمقني لاااااش ضربتي خوها و خليتيه منشور حدا دار كيف البطانة و باش زدتي كملتيها هزيتي البنت و درتي من هنا دازو هادو ماشي خصايلك 

كاظم جثا على ركابيه و باس لمو يديها و هي غير كتشوف 

كاظم : سمحيلي عصبتك أ الحنانة 

زبيدة : أ حبيييبي واما بقاتش فأنك عصبتني و عرفتي شنو وقع ولا ما عرفتيش 

كاظم: كنتسناك تعاوديلي 

زبيدة رخفات زيفها و حيداتو و بدات تنش على وجهها و بدات تعاود 

زبيدة : ياااخويا كنا جااالسين خلاها داك جدر ديال يسار متورخة المهم ما علينا كنا جالسين كنشربو القهوة في أمان الله و حفظه جبدت ليهم الموضوع قلتلهم بغينا نخطبوا بنتكم المصونة لولدنا كاظم الا كتاب شوية سمعنا شي ضجيج و هراج برا قلنا ماشي مشكيل راه واقيلة غير الشمكارية سخن عليهم راسهم ساعة قوليا نتا اللي مقربلها برا المهم ما علينا كملنا كلامنا و قلتلهم بغينا نخطبو لولدي و راه ماتت ليه المرأة و قلتلها راه عايش فرنسا و يديرها فعويناتو و ما يخصها معاه حتى خير و بانلي عجبهم الحال و قالتلي حتى نتشاورو مع هنادي و يكون خير شوية يا و ليدي و حنا كنسمعو دقان فالباب ناضت حلات الباب و هما يدخلو خوها منشور كي البطانة و كولو دمايات و سخفان عاد دارولو البصلة جا واحد خوهم وحد أخور قالك شكون دارلو هاد الحالة كلشي شهد فيك قالك واحد الراجل كان واقف هنا و دا معاه البنت اوا و هو يجعر داك خوهم و بدا يسب و يعاير و ما كاين غير من السمطة لتحت و شي كلامات و شي هدورات غير لا حول و لا قوة الا بالله ماماهم سخفات و كلشي ناض كيقلب عليك بغاو يشكيو لبوليس انا و فريدة شفنا القضية حامضة و حنا نسلتو شدينا طاكسي و جينا اما كن عرفوك ولدي كن قتلوني عندها واحد خوها و مسخوط و نتا بعدا اش قربك لخوها ولاش جايب معاك البنت بغيت غير نفهم 

كاظم كان كيستمع لماماه بإهتمام و فالأخير مرر يدو على دقنو و قال 

كاظم: غانتزوج بها يا بالخاطر يا بزز ما نقدرش نخليها ليهم 

زبيدة : و خوتها غوال أولدي ماشي بحال بنادم يحسن عوانها معاهم فينا هي هاد هنادي بعدا نشوفها و نهدر معاها 

كاظم: راها لفوق كتبكي و كتقولي ردني عندهم 

زبيدة :*ضربات على فخدها * اوييلي فين غاتردها ليهم راه غايقتلوها 

كاظم: غانردها ليهم و لكن غاندخل خوتها للحبس و نتزوج بيها و ندي معايا بنتي

زبيدة تنهدات و ناضت و قالت

زبيدة : و الله يدير شي تاويل ديال الخير 

كاظم: سيري هدري معاها انا غانمشي نهدر مع وليد هو اللي غايتكلف بيهم و ديك ساعة نرجعوا نهدرو مع ماماها و نخطبوها منهم و نديروا لاكط و نديها معايا 

زبيدة : بهاد السرعة أحبيبي و الوراق بعدا ما غايطلعو ليها حتى غايشحفوك 

كاظم: * حرك راسو بنفي و قال * عندي المعارف دغيا يطلعو و ما عندهم لاش غايتعكسوا الحمد لله ميسرة القضية 

زبيدة :*بابتسامة * اوا بعدا كيف جاتك هنادي عجباتك 

كاظم سها فالفراغ و قال 

كاظم : دارت بلاصتها فقلبي و ما نقدرش نتخلا عليها حيت كنشوف فيها بنتي و كتعاني بحالي و بقات فيا تحرمات من باباها و هي مزال صغيرة شفتي أ الحنانة سبحان الله العظيم انا كنت محتاج اللي يعوض ليا نقص د بنتي و هي محتاجة اللي يعوض ليها نقص د الاب وهاكا غانكونو متعادلين و مكملين بعضياتنا 

زبيدة :*صاطت بغضب * أشمن بنتك حتى نتا الله يهديك باراكة من الحماق ديالك و تهلا فالبنت و اعتابرها مرتك واخا مزال ما درتو لاكط و لكن راه غاديروه إنشاء الله اجي بعدا و هي موافقة 

كاظم: ما عرفتش أ الحنانة و لكن واخا غاترفض نتي غاتقدري تقنعيها 

زبيدة : اوا شوف أش قال الله حنا نديروا اللي فجهدنا المهم نتا سير هدر مع وليد ولد خالتك يتفاهم مع دوك الغوال و انا نتفاهم مع هنادي و منها نيت نشوفها 

كاظم وقف و ناضت ماماه باش تطلع وهو يحط يدو على خد ماماه و قال 

كاظم: عفاك قولي لهنادي ما تبقاش تبكي و فاجي عليها همها أ الحنانة بقات فيا بزاف و ما بغيتهاش تبكي مزال 

قولها ولدي ما عمرو يخلي دمعة تنزل من عينيك قولها ولدي غايعاملك بحال بنتو و غايحقق ليك كاع اللي بغيتي قولها ولدي غايديرك ملكة غير دموعها ما بغيتهمش يبقاو فعينيها قولها غايحميك بنفسو واخا يبقى فيه غير عرق واحد 

زبيدة :* بابتسامة * الله يرضي عليك أحبيبي ما تخافش غانخليها تقبل و الضحكة واصلة عند ودنيها 

كاظم: عارفك أ الحنانة قادة عليها 

زبيدة : غير هو واحد الشرط عنداك يزغبك الله و تمشي تقولها راه خطبناك غير حيت سميتك كتشبه لسمية بنتي ويااااك أولدي 

كاظم: انا من ديما كنعيط ليها غير بنتي 

زبيدة دارت يديها من فوق راسها و قالت 🙆‍♀️🙆‍♀️🙆‍♀️ 

زبيدة : و العدااااو اوليدي الا سكتليا القلب غايكون بسبابك شوف ما نسمعكش كتقولها بنتي عيط ليها بسميتها أحبيبي راه البنت غاتدخل ليها الشك هاكاك و شوف واحد القضية ياك ما قلتيلها والو لا على مرتك لا على بنتك 

كاظم: لاا 

زبيدة : وياااك و هانا كنوصيك و سير دير اللي قالك راسك 

كاظم: علاش ما ناديهاش بنتي شنو فيها 

زبيدة تنهدات و قالت 

زبيدة : راه ما كيناش شي بنت المراة اللي غاترضا تزوج بشي واحد حيت كيشفق عليها ولا غير حيت سميتها كتشبه لسمية بنتو ولا مرتو دابا نتا كن تزوجات بيك ملاك حيت غير سميتك كتشبه لسمية شي صاحبها و سقتي الخبار شنو غايكون الموقف ديالك ؟؟ أ دوي جاوبني مالك بقيتي ساكت اوا راه نفس القضية عيطلها غير بسميتها و هني شعب واخا اولدي 

كاظم دوز يدو على دقنو و قال 

كاظم: نشوفو أ الحنانة حتى نفكر 

زبيدة : انا غانمشي نهدر مع البنت اما الا بقيت حداك راه غاتصيفطني بلا وقت 

عطاتو بضهر و دور يدو على خصرها و باس كتفها و قال 

كاظم: الله يخليك ليا 

بعد عليها و مشا يتاصل بولد خالتو وليد اللي خدام كوميسير فالشرطة ...

طلعات زبيدة بخطوات ثابتة فدروج حتى وصلات لبيت ديال كاظم لقات الباب مسدود حطات يديها على البوانيي و دخلات و بقات واقفة فالباب كتطلع و كتهبط فهنادي اللي كانت جالسة من فوق السرير و عينيها منفوخين بقوة البكا و مزالها كتحاول تستوعب الكلام الي تقال ليها من طرف كاظم ..

سمعات الباب تحل و هزات عينيها تشوف شكون كانت كتظن غاتلقا كاظم حتى لقات زبيدة اللي من ملامحها باينة كاتشبه لكاظم عرفاتها غاتكون ماماه ...وقفات إحتراما ليها و بقات حانية راسها ...

زبيدة ابتاسمت ليها و سدات الباب و خطات خطوات لامام حتى وقفات اونفاص ليها 

زبيدة : ما تحشميش مني انا بحال ميمتك هز راسك شوف فيا 

هنادي داكشي اللي دارت هزات راسها و شافت فيها و ابتاسمت ليها و قالت 

هنادي: سلام خالتي 

زبيدة :*حطات يديها بجوج على درعانها و قالت * تباارك الله تبارك الله و صلاة على النبي اوا هانتي كي الخير لاش تحرمينا من شوفة دوك العوينات 

هنادي دخلات ليها لخاطرها و ارتاحت ليها و قالت بإبتسامة 

هنادي: شكرا اخالتي ربي يخليك لهلا يخطيك 

زبيدة :اجي معايا نهبطو لتحت بغيت نهدر معاك 

هنادي تفكرات دارهم و ماماها غاتكون مشطونة عليها و قالت بخوف 

هنادي: شوف اخالتي الله يرحملك الواليدين ديوني لدارنا الله يعطيكم ما تمنيتو راه غايقتلوني 

زبيدة دارت يديها بجوح فوق كرشها و متقات و قالت 

زبيدة : إوا هانتي قلتيها بفمك الا مشيتي غايقتلوك و غاتحرمينا من هاد الزين كاامل يالاه نهبطو لتحت و للحديث بقية اجي معايا

هبطوا لتحت و فالأمام زبيدة و من موراها هنادي اللي عاد كتكاتشف دار كيفاش دايرة و كتدور عينيها على الأثاث و الديكورات و الرخامات فيلا كبييرة نيت بقات غير حالة فمها فيها ...

وصلوا لطابق السفلي و هنادي غير حالة فمها ما عمرها شافت هادشي حتى فالأفلام ...

جلسات لالا زبيدة من فوق الفوتوي و حطات يديها حداها و قالت 

زبيدة : جلسي أبنتي دار دارك ما تحشميش 

جلسات هنادي و حنوكها غايطرطقوا بالحشمة و حانية راسها حسات بتوتر كبير خصوصا جالسة فدار ناس ما كتعرف عليهم غير القليل من المعلومات و كتعرف بلي بغاو يخطبوها لولدهم كاظم اللي فكها من خوها دماغها تخربق و بغات تفهم هما فين عرفوها باش يجيو يخطبوها بقات غير مصدومة جاها هادشي فشي شكل و كتقول مع راسها دنيا ما يمكنش ضحك ليك حتى لهاد الدرجة بقات غير ساهية و كتخمم حتى قفزاها صوت لالا زبيدة اللي حاضية تصرفاتها ...

زبيدة : تشربي ابنتي شي حاجة 

هنادي: لا أخالتي شكرا 

زبيدة : منين أصلكم أبنتي 

هنادي :با الله يرحمو صحراوي أبا عن جد و الام ديالي مكناسية 

زبيدة :*بابتسامة * لونك بحال العسيلة حريفاتك زوينين الله يحفظك لواليديك صحراوى معروفين بالمعقول 

هنادي :*بخجل * شكرا اخالتي لهلا يخطيك 

زبيدة : فاش كتقراي وشحال عندك من عام 

هنادي : عمري عشرين عام عندي العام الثاني فلافاك كنقرا الأدب الفرنسي أخالتي 

زبيدة : تبااارك الله تبااارك الله يعطيك نجاح أبنتي 

هنادي: امين 

زبيدة : عرفتي علاش كنت عندكم فدار ؟؟ 

هنادي :*كتهدر حانية راسها * لا أخالتي ما عرفتش 

زبيدة : اوا أبنتي بغيتك لولدي كاظم على سنة الله ورسوله و هدرت مع ماماك قالتلي بلي خاصك غير نتي توافقي 

هنادي بقات حانية راسها و ساكتة ما نطقات بحتى حرف .. و كملات زبيدة كلامها عرفتها غاتكون حشمات و هادي هي الفرصة فين تشكر كاظم و تعاود ليها عليه ...

زبيدة : ولدي كاظم تبارك الله عليه ما تختاري من الرجال غير هو أقسم لكي يمينا الا واخا دوري العالم كامل ما تلقايش بحالو لا فظرافة لا فالمحنة قلبو هشيش ولكن خلاوها ماليها مول القلب صافي زهرو ديما حافي كان مزوج هادي خمس سنين بواحد البنيتة غزالة ما فضلتها قدام وجهك كانت كتقرا معاه على الهندسة ديال ديكور ففرنسا و لكن ربي بغاها و داها ماتت و هي حاملة نهار عرفو بلي عندها بنيتة اييه أبنتي راه قالك دنيا ما كتعرف لا صغير لا كبير غير ديرها زوينة ما علينا ولدي الحبيب حتى هو دخل فكومة لمدة شهر و فاش فاق منها بقا مصدوم موت مرتو و بنتو اللي مزال ما خرجات لدنيا دمراتو شحال و هو كيتعالج عند الأطباء النفسنيين و درنا ليه الرقية باش يصح ويولي كيف كان و شحال و انا ندعي معاه حتى وقف على رجليه اوا يا بنيتي و انا بغيت نشوف وليداتو اوا و قررت نزوجو و هي تقتارحك عليا فريدة اخت جارتكم راكم كاتعرفوها ياك أبنيتي 

هنادي حركات ليها راسها بالإيجاب و كملات كلامها زبيدة 

زبيدة : اوا و قالتلي كاينة واحد البنيتة مؤدبة و مصااوبة و ما تختاري من البنات غير هي و يتيمة و عاودتلي يا بنيتي على خوتك و بقيتي فيا ما نكدبش عليك و قلت بنتي هنادي هي اللي غاتصلاح لولدي تكملو و يكملها 

هنادي بقات ساكتة حتى حطات زبيدة يديها على كتفها و هزات عويناتها و شافت فيها و يديها كتفرك فيهم بتوتر 

زبيدة : اوا جاوبيني أبنتي 

هنادي بقات ساكتة و فالاخير ريحاتها و نطقات 

هنادي: و لكن اخالتي انا باغا نقرا و نخدم و ندي ميمتي للحج و ..

ما خلاتهاش تكمل و قالت زبيدة 

زبيدة : ابنيتي راه ولدي كاظم عايش ففرنسا و غايديك معاه و مع نتي كتقراي الادب الفرنسي غاتجيك العيشة ساهلة تماك ما غاتلقايش مشكل و تماك نتي كملي قرايتك و شدي دكتورة و شكون قال تقدري تولي تقري فالجامعة د فرنسا كااع و ماعرفتي و راه وليدي كاظم عمرك تلقاي معاه المشكل أقسم لكي يمينا يعيشك ملكة اوا أش قلتي 

هنادي: و يخليني نخدم 

زبيدة : ابنيتي راه وليدي و الله ما تلقاي معاه المشكل و اللي بغيتيها يديرهالك بغيتي تخدمي خدمي بغيتي تجلسي جلسي اللي حبيتيها ديريها معاه 

هنادي بقات ساكتة دورات وجهها و هي تشوفو داخل كيبتاسم كان لابس غير سروال تجين و من الفوق ما لابس والو ... هي بقات مسمرة فبلاصتها و كتشوف فيه وسامتو خطيرة و كيكملها بديك ضحيكة و كتحس بقلبها كيضرب بقوة كتفكر كلامو و فاش كيناديها {بنتي } بصوت حنون .. بقات ساهية فيه و خرجات من فمها بلا ما تحس 

هنادي: مواافقة 

❤❤❤❤ 

هو وسيم جدا وسيم للحد الذي يجعلني 

أتأمله بهيام بعشق بسكرة حب و لذة عناق 

شيئ يشدني إليك لا اعرف ماهو منتهاه 

يوما أراه نهايتي يوما أراه الحياة 

عندما نلتقي سأكتفي بالتحديق في عينيك 

فهي الكلام و هي القصيدة و اللقاء 

كل ما أعرفه أني وقعت به بكامل 

قواي العقلية 

#إقتباس 

قفزتها صوت التزغريتة اللي خرجات من فم لالا زوبيدة اللي خلات كاظم يلتافت و يشوف فجيهة ماماه و إذا به كتجي عينو فعيون هنادي بقا واقف فبلاصتو كيشوف فيها كيفاش كتشوف فيه إحساس زوين حسو بيه بجوج بيهم خصوصا كاظم اللي ما عرفش كيفاش يوصفو واش إحساس ديال أنها وافقت فرح حيت غاتبقى معاه حياتو كاملة و يعتابرها بنتو و تعوضو و تداوي جرحو و لا فرح حيت غاتولي مرتو على سنة الله و رسوله و كاين إحتمال ديال انها تنسيه فملاك تخالطو الاحاسيس فقلبو و ما عرفش فإينا صنف غايصنفهم ...

هنادي فالبلاصة حنات راسها فاش التافتت زبيدة تشوف فين كتشوف ...

زبيدة : حبيبي أمدرا شنو قالك وليد ؟؟؟ 

كاظم ما جاوبهاش تقدم بخطى ثابتة وواثقة فنفس الوقت حتى قرب ليهم و وقف على هنادي كيشوف فيها كيفاش حانية راسها و باينة فيها حشمانة ابتاسم بلا ما يحس و خرج من فمو كلام خلا دقات قلبها يزيدو بشكل كبييير 

كاظم : Tu es plus belle quand tu es timide ( كتباني زوينة بزاف فاش كتحشمي ) 

هنادي هزات راسها و شافت فيه بطبيعة الحال فهماتو شنو قصد تنهدات و صرطات ريقها غير بزز و كتقول مع راسها واش سمعت مزيان ولا غير جابو ليا ودنيا ياكما ما بقيتش كنفهم الفرونسي ياكما ودني صماااكو ...

زبيدة ما فهماتوش حيت ما قرياش هي بقات غير كتشوف فيهم ولكن فهمات بلي قال شي حاجة فشكل غير من نظرات اللي كيشوفو بيها فبعضياتهم ...

كاظم التافت و شاف فالام ديالو و قال بصوت حنون 

كاظم : هنودتي وافقت ولالا ؟؟؟ 

هنادي كتقول واش قال {هنودتي } ولا غير جابو ليا ودنيا قلبها زادو علاو نبضاتو مابقات فاهمة والو كتحس بقلبها غايسكت ويلي اش هادشي ما يمكنش يكون هاد الراجل حقيقي عاد كان كيقولها {بنتي } فالبلاصة قلبها {هنودتي } ياكما طاح فحبها من اول نظرة ياكما كيبغيها اويلي شنو هاد التغير المفاجئ اللي وقع فحياتها هادشي اللي كيقولها راسها ...

زبيدة ابتاسمت ليه حيت ما قالش بنتي بعدا على الاقل ريحها و لكن فرحات فنفس الوقت اللي حسات بيه بداا كيتطلق و كيرطااب و قلبو بدا كيفتح أبوابو لحب جديد ...

زبيدة : هنودتك واااافقت أسيدي تزوج بيك علاه ما سمعتيش تزغريتة اللي طلقت حتى بح حلقي 

كاظم التافت و شاف فهنادي و قال 

كاظم: كنواعدك ما عمري نخلي دموعك يهبطوا حيت معاك راجل اللي غايحميك و ما تبقايش تخافي من خوتك من اليوم ما عندهم ما يديرو ليك حيت انا معاك و الا كان ...

هنادي ابتاسمت و كملات كلامو 

هنادي : الا كان معايا سبع بلا ما نخاف من ضبع 

كاظم عض على شنايفو و مرر يدو على دقنو و ضحك حتى تغمضوا عويناتو و غمزها واحد الغميزة خلات قلبها يرجف بين ضلوعها

كاظم : حافظة دروسك مشاء الله عليك 

زبيدة دارت يديها على دقنها و كتشتت نظراتها عليهم بجوج و بقات مستغربة كتقول مع راسها اييه يا اللي قالك ما ينساش ملاك جات هنادي فجوج دقايق خلاتو يضحك معاها و يدلعها و مزال الخير لقدام تنهدات براحة حيت عرفات بلي هنادي حقا هي اللي تصلاح ليه تقول غير حك و صاب غطاه 

زبيدة : اوا أ كاظيم شنو قالك وليد 

جلس كاظم حدا هنادي اللي ما كرهاتش ما ينوضش من حداها ناري ريحتو خطييرة سطااتها ريحة رجاالية عمرها شمات بحالها ما هو أغلى عطر رجالي فرنسي كيديروا غمضات عينيها و استنشقات أكثر كمية ممكنة منو بقوة اللي حمقها و خرجليها العقل ...

♤♤♤♤ 

عطرك يا سيدي يعانقني 

منذ متى كانت للعطور صدور و أذرعة ؟ 

# إقتباس 

♤♤♤♤

صاط أنفاس سخونة و قال 

كاظم: غايديوهم للحبس بسبب انهم كيتعداو على ختهم و كيضربوها و زيد عليها خوتها عندهم ضوسي عامر كيدابزو بليل و كيسكرو شي بعض المرات و كاينين ناس كيتشكاو منهم 

هنادي دورات وجهها و شافت فيه و قالت 

هنادي: واش كتهدر على خوتي 

كاظم هز صبعو و ضربها لنيفها و قال بابتسامة 

كاظم : مبروك عليك غاتهناي منهم 

زبيدة : هههه سير يا وليدي كيفما فاجيتيها على هاد اليتيمة الله يجعل سيدي ربي يفاجيها عليك 

هنادي: واش خوتي غايتشدوا فالحبس ولا كيفاش شنو واقع فهموني راه دخت و ما بقيت فاهمة والو 

كاظم: هدرت مع ولد خالتي كوميسير دو بوليس فالكوميسارية اللي حداكم عاودت ليه شنو كيديروا ليك خوتك و فاش قلب لقا ديجا عندهم شكايات من طرف جيران كايصدعهوم و كيدابزو بليل مع الشماكرية كاين هادشي ولا ما كاينش 

هنادي حركات راسها بالإيجاب و قالت 

هنادي: وي خوتي كيدابزو بزاف مع شماكرية و كيسكرو شي بعض المرات فصيف و مي مسكينة كايحمقوها معدبينها و لكن عمرهم تشدوا 

كاظم قال بابتسامة و مرر يدو على ضهرها 

كاظم: اليوم غايتشدوا و على الأقل غايبقاو فيه عام و غايسنيو إلتزام باش ما يقربوش ليك و الا زغبهم الله و طافو بساحتك من مور ما يخرجو و لا وقعتلك شي حاجة بسبابهم غايتضربو بالمؤبد يعني غايبقاو مدى الحياة فيه

هنادي ما عرفات واش تفرح حيت وأخيرا غاتهنا من عقدة حياتها اللي هما خوتها ولا تحزن حيت كيفما كان الحال كيبقاو خوتها و الخاوة حدها دنيا و المسامح كريم و يديك منك وتخا تكون مجدامة خلاوها ماليها ضروري غايبقا فيها الحال و حتى ماماها ما غاترضاش و ناس فالحومة غايبقاو يتشفاو ما عرفات شنو دير من غير انها بقات ساكتة حيت أكثر شخص غايضرر من هادشي كامل هو ماماها...

كاظم شاف فماماه و قال 

كاظم: الحنانة وجدي راسك باش غانمشيو عندهم 

زبيدة : اييه اولدي نيت نمشيو دابا باش نهدرو مع ماماها و نطمنوها عليها راه تكون كبدتها كتشوا

انصارفت زبيدة و خلات كاظم مع هنادي فالسيجور هاد الاخيرة حانية راسها عكس كاظم اللي كيشوف فيها و كيتسناها تهدر و تقول شي حاجة و لكن والو بحال تربط ليها لسان كتخمم غي فماماها و خوتها ...

كاظم قال بصوت مستهزء بعض الشيئ 

كاظم: على ما أظن بلي غرقو ليك لي باطو فالبحر و الشركة ديالك دارت فاييت و جراو عليك من دار و بقيتي فالزنقة ...

هنادي استغربات من كلامو الشيئ اللي خلاها تلتافت و تشوف فيه بعدم فهم 

هنادي: ما فهمتش شنو كا تقصد 

كاظم: حيت شفتك سااهية و كتفكري بحال واقعة شي مشكلة كبييرة فحين ان الأمر ما كيستاهلش هاد التخمام كاامل ريحي بالك ابنتي ما تعبيش راسك على الخاوي 

هنادي :*بابتسامة * شكرا على كلشي درتيه معايا بحالك قلااال و الله 

كاظم عض على شنايفو و قال بصوت زوين دخل لمساميعها كأنه لحن موسيقي جمييل 

كاظم: مازال ما شفتي والو اعتابريني انا باباك اللي عوضك بيه الله و خوك اللي ما عمرك حسيتي بوجودو و ماماك اللي كاتحطي عليها راسك و تقولي شنو ضارك و الأهم من هدا صاحبك اللي فاش تكوني باغا تخوي قلبك تقصديه و سند و الضهر اللي يكالي عليك الدقة 

و الأهم من هدا السبع اللي يفرس أي شخص قرب ليك و أداك 

قال كلماتو و ناض و هو ما عرفش شنو دار فيها بكلامو ما عارفاش شنو تأثير اللي خلا فقلبها ... حقا خلا قلبها يتخربقو نبضاتو كانه لاح عليها تعويدة عشق ما عمرها تفك من لعنتها ااااخ كن يعرف شنو كايدير فيها بكلامتو و تصرفاتو كينوض براااكين العشق داخلها كيخلي قلبها يقول هل من مزيد لكلماته باش يداوي جروحو كلمة سند و أخييرا عرفات معناه عرفات شنو كاتعني و حظات بأروع و اجمل سند فدنيا كاظم فخامة الإسم تكفي ❤

حطات يديها على قلبها كتحس بيه غايسكت ما بقاتش عارفة شنو واقع ليها من غير أنها تعلقات به ففترة قصيرة حطات يديها على خدها و سهات فالفراغ و قالت بابتسامة 

هنادي: كاظم 

سمعات خطوات من موراها يصحابلها كاظم ساعة لقات زبيدة لي لبسات جليلبة فالمارون مزيونة و دايرة زيف شفاف كيبين نص فشعرها ...

جلسات حداها كتشوف فيها و كتبتاسم 

زبيدة : تبارك الله على مراة ولدي شحال توحشت هاد الكلمة و هانتي أبنتي بلا ما نوصيك راك شفتيه كيف داير و تهلاي ليا فيه و راه ما يخصك معاه حتى خير 

هنادي ما جاوباتش بقات ساكتة و عم الصمت لثواني حتى سمعوا خطواتو كيقربو ... بسرعة إلتافتت هنادي وهو راه قلبها اللي التافتت أما جسدها غير وسيلة ...

كاظم قرب ليهم بكامل هيبتو و ريحة رجالية قوية ديالو ملات المكان و لابس قويميجة فالبلوسيال فاتح ليها الصدايف لوالة مع سروال أسود و طاويه من لتحت مع صبيبط رجالي كحل كيبان أنيق ....

كاظم : الحنانة هنودتي يالاه 

ناضو و خطاو خطوات اتجاه الباب وهو من موراهم حتى لمح جرح فيد هنادي من طيحة د قبيلة ...

كاظم: هنودتي 

وقفات زبيدة و هنادي بقات مصدومة و كتشوف فالفراغ حشمات من إسم الدلع اللي كيناديه بها قدام ماماه و هو مازال حتى ما خطبها ...

التافتت بالعرض البطيئ و شافت فيه 

كاظم: يدك مجروحة تسناي نجيبلك الدوا 

زبيدة: يا وليدي راه مشا الحال 

كاظم : ما غانتعطلش غير دقيقة و نجي 

دار و مشا بخطوات مسرعة طلع لبيتو جبد صنديقة فيها الفاصمات و المعقم ديال الجرح و نزل لعندهم لقاهم رجعوا جلسو خطا خطوات باتجاه هنادي و جلس على ركابيه لارض تحت نظراتهم ...

كاظم هز يديها و بقا كيشوف فالجرح و دار حركة ما توقعتهاش منو لا هنادي لا ماماه حركة صدمتهم بجوج خصوصا هنادي اللي ولا وجهها كي مطيشة هاد نهار ناوي يسكت ليها القلب ...

هز يديها و حط شفايفو دافيين على بلاصة الجرح حتى حسات برعشة رهيبة سرات فداتها و هز راسو شاف فيها و قال 

كاظم: غاتبراي و ما غاتبقاش ضرك أبنتي 

جبد القطن من صنديقة و دار ليها المعقم و دار ليها ضمادة الجرح و زبيدة غير كتشوف بعويناتها و حاطة يديها تحت دقنها و كتخمم عكس هنادي اللي مسكينة كتحس بلي صافي ما بقا ليها والو و تسخف ...

وقف كاظم و تبعوه خرجوا حل ليهم البيبان ديال طموبيل طلعات مو للقدام و هنادي للور ...و هو يتفكر شي حاجة و عاود دخل وهي تهبط زبيدة خدها بيديها 

زبيدة : اوييلي هاد الولد غايطرطق ليا المرارة لاش دخل تاني لا حول و لا قوة الا بالله 

ماهي الا عدة دقائق خرج بقريعة د الما مع ميكة عامرة بسقاطة تقدم بخطى مسرعة و حل الباب الخلفي اللي من جيهة هنادي هزات راسها شافت فيه ابتاسم ليها و حط حداها داكشي اللي جاب ليها 

كاظم: كولي شي حاجة من هادشي غايكون فيك جوع ما تحشميش تصرفي عادي 

سد الباب و ضرب الدورة و حل الباب ديال شيفور و طلع و ديمارا و زاد خلا قلبها مسكينة غايخرج من بلاصتو بزااااااف على ضرافة بزاااف على المحنة هاد سيد راه بزااف قلبها و عقلها ما قادرينش يستوعبو هاد تصرفات الجديدة اللي كيدير معاها ونورمال وحدة اللي كانت عايشة مع دوك الغوال فدار كيجيها بنادم ضريف غريب ....

تنهدات و هزات يديها كتشوف فالبلاصة ديال الجرحة و تفكرات فاش باس ليها يديها حسات بقلبها غايقفز بين ضلوعها حولات نظراتها كتشوف فيه بنص عين و كتفكر كلام صاحبتها إلهام 

🔙🔙🔙 فلاش باك 

إلهام : أشمنك يا زين أشمنك يا ضرافة تاكليه بحواااايجو ياختي تصوري يا صاحبتي مرتو كان كيتجوااانطا عليها و كيموت على تراب رجليها على حسب ما كتعاودخالتي كان كيفيق بكري و يصاوب ليها الفطور بيدو و ما يخلي ما يشري ليها فلكادو و قالتلي كان كيوكلها بيدو فوق من الطبلة حدا مو و خوه و شاد ليها الخاطر و هادشي غير شوية من بزاف سيد كان طاااايح فيها ديال بصح ...

🔚🔚 نهاية الفلاش باك 

حسات بقلبها ضرها فاش تفكرات كلام إلهام حسات بشعور غريب غارت من مرتو الميتة أكيد غايكون كايعاملها فشكل شوف هي أ الله شافها و كيفاش كيتعامل اما مع مرتو علم الله شنو كان كيدير ليها عضات على شنايفها بالفقصة و جبدات بيمو ديال الشوكولا من ماركة أوروبية فتحاتو و دورات وجهها لزاجة كتاكل فيه و تبرد فيه حر الغيرة ...

فنفس الأثناء هز عينو بسرعة فالمراية كيشوفها شنو كدير بانتلو كاتكل فبيمو حرك راسو يمين شمال و رجع ركز فالطريق حتى قالت زبيدة 

زبيدة : شعل لينا راديو 

كاظم شعل راديو و هي تطلق أغنية سعد المجرد {يا لميمة } 

🎵🎵🎵

يا لِمِيمَةٍ وَلِيدَكَ لاباس

يا لِمِيمَةِ خَلِيِّكَ مِنْ حَديثِ النَّاسِ

***********

شحال كنت تجي في بالي وحشك يغلب عليا

نبكي و نقول و انا مالي أش داني لهاد جريا

فرقتنا لغربا هذا مكتاب الله علينا

لا ما تبكيش يا ميمتي دموعك غالين عليا

هااا يالميمة هااا يالميمة

***********

نهار نجي و رسي مرفوع و قلبي طير بالفرحة

تقولي ولدي رجع لي و عمر الدار عليا

نشوف الحوما و صحابي وقتاش اتزال لهم عليا

يا أمي مابغيت والو من غير رضاك انتيا

هااا يالميمة هااا يالميمة

***********

شحال كَنَّتْ تجي فِي بَالِي وَحْشِكَ يَغْلِبَ عَلِيَّا

نَبْكَِيٌّ و نُقُولٌ و أَنَامَالُي أش دَانِي لِهَادِّ جُرّيا

مَكْتُوبُ لِغَرِبَا هَذَا مِكْتاب اللَّهِ عَلَينَا

لَمَّاتبكيش يا مِيمَتِي دُموعِكَ غَالَيْنَ عَلِيًّا

هااا يالميمة هااا يالميمة

🎵🎵🎵🎵 

كاظم كتعجبو هاد الاغنية و حتى لالا زبيدة ديما كيعجبوا يغنيها ليها حيت كتحكي على الغربة مع هو عايش ففرنسا و ماماه كتوحشوا ... غير سمعها شاف فماماها بطرف عينو و حتى هي شافت فيه و بقاو كيضحكو طلق ليها يديه و تكات على كتفو و بقا هو سايق بيد وحدة و لوخرى معنق بيها ميمتو و كيغني مع كلمات الاغنية بصوت زوين كيطرب الادن 

كاظم:شحال كَنَّتْ تجي فِي بَالِي وَحْشِكَ يَغْلِبَ عَلِيَّانَبْكَِيٌّ و نُقُولٌ و أَنَامَالُي أش دَانِي لِهَادِّ جُرّيامَكْتُوبُ لِغَرِبَا هَذَا مِكْتاب اللَّهِ عَلَينَالَمَّاتبكيش يا مِيمَتِي دُموعِكَ غَالَيْنَ عَلِيًّا

هااا يالميمة هااا يالميمة 

زبيدة فرحانة بولدها و جالسة كتصفق بيديها و فرحانين عكس هنادي اللي كتشوف فيه كيف معنق ماماه و كيغني معاها ما كرهاتش تكون فبلاصتها عضات على شنايفها بغضب و هزات بيمو واحد أخور كاتكل فيه 

دورات وجهها لزاجة و هي تحبس الأغنية و ناضت زبيدة من على كتفو و تقادات فاىجلسة و دارت يديها تحت دقنها و متقات و قالت 

زبيدة : كنخمم يا وليدي كيف ندير فاش غاتمشي عليا عاوتاني اش جا ما سكتني من البكا 

كاظم: ماشي حتى لهاد الدرجة أ الحنانة غانعاود نرجع إنشاء الله 

زبيدة التافت و شافت فهنادي اللي كاتكل و مدورة وجهها لزاجة و دارت يديها بجوج على كرشها و قالت 

زبيدة : غاترجعوا احبيبي من هنا للفوق ما غاتبقاش بوحدك هنادي غاتولي مرتك على سنة الله و رسوله

دارت عندها هنادي وجهها عامر شكلاط و صرطات ريقها غير بزز ...

هنادي : إنشاء الله أخالتي 

كاظم : هنادي و انا واحد أ الحنانة ماكاين لاش نخدم صيغة الجمع باراكة غير صيغة المفرد كاافية ياك اهنودتي 

يتبع...