هنادي خرجات من الحمام من بعدما غسلات وجهها مزيان بالما بااارد و طار داك المايكاب اللي كانت دايرة ...
منين ما بانلهاش كاظم تحشو ليها الركابي بالخلعة دخلات لعندهم و دنيا كدور بيها و قالت بصوت مرعود
هنادي: ف..فينو كاظم أمي فيينو يااا كما خرج لعندو
فضيلة : لا ابنيتي طلع عاد دابا لفوق هو و سعاد
هنادي:*باستغراب * علاش طلعوا
فجأة سمعو فيصل كيتعاير معاه و صوت د الما مجهد كيتسمع كيتكب كلهم وقفو و طلعو كيتجاراو كيشوفو شنو واقع لفوق و صدمة كانت قوية منين لقاو سطولة د الما حدا كاظم بقاو غير واقفين مسمرين فدروج و اولهم هنادي اللي حلات فيه فمها و غلباتها الضحكة فنفس الوقت حيت عرفوه هو اللي كان كيرش داك الما اللي تسمع ليهم ....
لقمان : هههه كااظم
التافت بانولو كلهم واقفين فدروج و كيضحكو ابتاسم حتى هو و قال
كاظم: كثرة الهم كضحك ياك
هنادي طلعات ووقفات حداه وحطات يديها على دراعو و قالت و الضحكة على ملامح وجهها
هنادي: واش من نيتك أكاظم كترشو بالما حماقيتي
كاظم :*هز كتافو بجوج و قال * ما كانش عندي حل اخور باش نسكتو ما بغيتكمش تسمعو داك الكلام اللي دون المستوى ما لقيت غير هاد الحل و هاهو بعد من حدا الباب و مشا بحالو ما رضااش
لقمان : برب الجليل حتى هارب ليك اخويا
زبيدة : لواه تا اشمن هارب ليه وليدي دكي ما كاينش بحالو وراه قالك الحيلة احسن من العار
هنادي : ياكما يصحابلك مشا راه غيرجع انا اللي عارفاهم
فضيلة : ما حنا على فالك
لقمان : ما كرهتش كن نزلتي عليه بالطوبية لراسو تشقو ليه نتهناو منو اصلن اشكالو غير مثقلين على الكرة الارضية
كاظم : ما نكدبش عليك فكرت فيها مي دوماج ما كايناش
زبيدة : مال وليد تعطل ياك عيطتي ليه قبيلة كن جاو هزوه بلا شوهة
كاظم : الحنانة واش يصحابلك الكوميسارية ديالو غير غاتعيطي ليه غايجي راه ضروري غايتعطل حنا ماشي فأوروبا ولا لاميريك
كاظم كيتكلم و هنادي ساهية فيه و كضحك غير هي وراسها و كتخايل المنظر ديالو وهو كيرشو بالما عضات على شنايفها و تنهدات من ديما كانت كتحلم بشي شخص بحالو يكون مسطي و هبيل و لكن بعقلو يكون صاارم و عندو هيبة فالمكان و فنفس الوقت فيه جانب طفولي هزلي جاها شخص كيفما كاتمنى و اكثر فااات توقعاتها ....
لمحها كاظم بطرف عينيه كتشوف فيه حنا راسو و شاف فيها لقاها ساهية فيه و غاتكلو بعينيه قدر يقرا شنو كيدور فبالها غمزها و قال بهمس باش تسمعو غير هي...
هنادي خرجات لسانها دوزات بيه على شفايفها و بقات ساكتة و غمزاتو و قالت
هنادي: بصراحة طحتي ليا من عيني هههه
كاظم دور وجهو لجيهة السرجم كيضحك و هو يبانلو فيصل راجع و هاز فيدو جوج جناوى و معاه صحابو بيهم شي اربعة كلهم مزبطين و هازين جناوى ...غمض عينو و عاود فتحهم بالفقايص التافتت هنادي لجيهة السرجم و هو يبانلها داك المشهد المرعب رجعات كلها كترجف ...
هنادي:ف...ف..فيصل
كاظم: جايب ضبوعة بحالو ولد الكلبة
فضيلة : دخلو ما تبقاوش واقفين فدروج راه صافي مشا بحالو
قفزات فضيلة من بلاصتها منين سمعات زديح فالباب رجع ضربات على فخادها و غوتات ...
فضيلة : الله ياربي و أش هاد المصيبة سلاطت علينا
فيصل :واااااحلو و الله لا تفاكيتو مني برب الجليل اليوم ياااا بيا يا بيكم
لقمان طلع وقف حدا خوه فسرجم و تعصب و عضلاتو تزيرو عليه حيد داك الفيستة اللي كان لابس و هو يغوت
لقمان : وااااش ما غاتمشيش بحاالك
هز راسو فيصل كيشوف فيهم و زاد فغواتو
فيصل : غانمشي بحاالي فاش غاتمشيو حتى نتوما هناادي حوووبي والله لا ديتوها
هنادي دورات يديها على كاظم و حطات راسها على صدرو و كلها كترجف حتى قالو تهناو منو و هو يرجع اما كاظم على إثر آخر كلمة قالها حس بالعروق ديال يدو برزو بقوة الاعصاب و قلبو شعلات فيه العافية و كلمة {هنادي حوبي} كتكرر فودنو بشكل سريع كأنه لحن مزعج فقد السيطرة على راسو ...
بعد على هنادي و هبط فالدروج كيجري و كلهم تابعينو اما واحد هنادي حاسة بروحها غاتزهق و حاسة بلي هي السبب فهادشي كامل و الا وقعات ليه شي حاجة بسبابها عمرها تسامح نفسها ....
حط يدو على الباب باش يحلو و هي توقف ليه زبيدة و فضيلة بجوج بيهم حدا الباب ...
زبيدة: و الله ما تعتب برا
كاظم : الحنااااانة الله يرحم باااااك و مك خليني نخرج
فضيلة : لا اوليدي قالك الا درتي بحال الاحمق باش فتيه هو داكشي اللي باغي
كاظم دور وجهو و مرر يدو على شعرو حاس بيهم بحال مكتفينو باغي يخرج يخلي دار بوه و لكن واقفين ليه فطريقو مرر يدو على شعرو بعصبية و رجع شاف فيهم و قال
كاظم : واااش ما سمعتوش ديلمو اش كايقول * حيد الفيستة ديال الكوستيم لاحها * وااااش أ الحنانة يجي برهوش د الخلااا يبدقني أقسم لكي برب الكعبة الا ما قتلتو ما نتسماااش كاظم
هنادي واخيرا وصلات لعندهم و شدات كاظم من يدو بجوج ...
هنادي: على وجهي الله يرحملك واليديك ما تديرش فيه راسك عفاك دابا يجيو البوليس مابغاش نخسرك بسبابو الا وقعات ليك شي حاجة ما نسامحش لراسي اهئ اهى
لقمان : وا ما فهمتش نتوما مناش خااايفين أعباد الله واش سلكوط ديال الخلا غايخلعنا
زبيدة :*خنزرات فلقمان * سد فمك نتا كاتزيد تشعلو
لقمان : دابا عاجبكم الحال نسمعو هاد الهدرة و الكلام د الزنقة كن خرجت قبيلة انا و كاظم نفرشخوه و نوريوه ولاد زبيدة علاش قااادين
كاظم غمض عينو و جمع يدو على شكل لكمة و كيبرد الحر فشفايفو كيعضهم غايطيرهم من بلاصتهم و هنادي واقفة حداه شادة فدرعانو بجوج كتبكي ...
فيصل :وااااااا هناااادي الا كنتي كتسمعيني برب الجليل ما غاتديه *كيزدخ فالباب * واااااااا حلو اليوم نخرج ليه مساااارنو
كاظم طلق منها و مشا كيجري قاااصد الباب و بدا حتى هو كيغوت
زبيدة : لا اوليدي ما تخرجش عندو الله يعطيك ما نويتي
لقمان : الا ماااخرج هو غانخرج عندو انا
كاظم: الحناااااانة حيدي من طريقي عفاااااك كيقيسني فرجولتي ما نقدرش نبقا ساااكت ليه فهميييني أ الحناااانة فهمييني عفاااك
زبيدة شافت فهنادي اللي متكية على الحيط و دايرة يديها على فمها و دموعها شلال فشلات بالخلعة و كتدعي فنفسها باش ربي يهديه و ما يخرجش عندو
زبيدة : عفاك أبنتي دخليه لشي بيت و سدي عليه
كاظم زاد تجنن وقال بصوت مرتفع
كاظم: واااش برهوش انا باش تسدو عليا
زبيدة شدات ليه فخدودو بجوج و قالت بصوت حنون
زبيدة : الا خرجتي ما غاتبقاش ولدي سمع الهدرة الله يرضي عليك
جراتو لداخل و عضلاتو تزيرو عليه تعصب ديال بصح بانلها البيت صغير محلول دفعاتو ليه و شافت فهنادي و قالت ليها
زبيدة: اجي ابنتي الله يرضي عليك شديه غانمشي نشد لقمان
هنادي حركات ليها راسها بالايجاب و مشات لعندو و سدات الباب عليهم بجوج اما زبيدة مشات تهدن لقمان اللي جالس كيعاير و يسب باغي يخرج عندو ...
كاظم جلس من فوق السداري و بدا يفسخ فأزرار الشوميز اللي لابس حتى بقا عاري من الفوق و تكا على الحيط و حط يدو بجوج على وجهو و كيطلع نفس و يهبطو باش يرتاح و يتكالما حيت حاس براسو غايطرطق...
هنادي خلعاتها حالتو جلسات حدا الباب و بقات كتشوف فيه كتسنى منو شي ردة فعل و كدعي فنفسها غير باش يتهدن و ما يبقاش معصب ...
حيد يدو على وجهو و بقا بنفس وضعيتو متكي راسو على الحيط و كيشوف فهنادي اللي بانتلو مخلوعة ووجها صفر ما فيها قطرة ديال دم و وجهها مزين بقطرات دمووع و أحمر و الشهقة ديال البكا كطلع منها ....
عم الصمت لثواني غير عينيهم اللي كتكلم فهاد اللحظات كيشوفو فبعضياتهم بشكل خطييير هو كيشوف فيها و كيضرو خاطرو على حالتها و خاف عليها دموع ما كيجيوش معاها و كيتفكر كيفاش كانت مخلوعة عليه كيحس بقلبو غايخرج من بلاصتو و اما هي مخلوعة عليه و خايفة يتآدى الا خرج و كدعي غير يجيو البوليس اللي تعطلو و نظراتها ليه كأنها كترجى منو يتهدن و ما يخرجش عندو ...
فهم شنو باغا توصل ليه غير من شوفات اللي كدير فيه ما هو بارع فقراءة لغة العيون ابتاسم ليها بلا ما يحس باش يحسسها بطمأنينة و أنه تكالما واخا ربي اللي عالم بالعافية اللي شاعلة فقلبو طلق ليها يدو كأنه كيطلب منها انها تجي حداها ...
داكشي اللي دارت وقفات بتثاقل و رمات خطوات بطيئة فاتجاهو و جلسات حداه بجنبو الايسر ...
رخا يدو من مور كتفها و قربها ليه حتى لصقات مع جنبو هنادي حطات يديها اليسرى على صدرو و هزات عويناتها كتشوف فيه كتنتاضر منو يقول شي حاجة ...
كسر هاد الجو الصامت صوتو اللي قال كلام ربما صدمها و لكن ما عرفش هو براسو كيفاش دار حتى خرج من فمو واش حقا لسانو و شفايفو اللي تحركو و لا قلبو اللي قال داك الكلام و لسانو و شفايفو كانو مجرد وسيلة باش يخرجو ...
كاظم: je t'aime
كيفاش تقدر تعبر كيفاش تقدر توصف إحساسها فهاد اللحظة اللي سمعات من فمو كلمة اللي كانت كتنتاضرها منو من اول لحظة دق قلبها ليه ...
قلبها وقف بل جسمها كامل دم تجمد فعروقها حسات بشلل إن صح تعبير غير عينيها لي كترمش بيهم بسرعة لدرجة ان دموع الفرحة نزلو منهم ...صرطات ريقها بصعوبة و عضات على شنايفها و كتشوف فيه كأنها ما مصدقاش شنو قال و لولا خجلها فهاد لحظة تقولو عاود كلمة {je t'aime } ولكن مع الاسف ما بقات قادة تخرج حتى كلمة من فمها تجمعو عليها عدة أحاسيس إحساس الفرحة و الصدمة و الخوف من المستقبل و من علاقتهم ما عرفاتش شنو هادشي كيوقع ليها فقط كلمة خلاتها ترتعاش و تلف و تنسا شكون هي حتى من التعبير تلف ليها ....
تنهد و حط جبينو على جبينها و غمض عينو و يدو الاخرى كيمررها على ضهرها بحنان و قال بهمس
كاظم : ما تبكيش البكا ما تخلقكش ليك خليك ديما ضاحكة و ما عمرك تخافي السبع ديما غايكون قدامك اللي قرب ليك غايفرسو ...
هز يدو اليمنى و مررها على خدها بطريقة زوينة خلاتها ترتاعش و تغمض عينيها مستمتعة بلماساتو ليها اللي كيلامسو روحها قبل خدها ...كمل كلامو و قال بصوت حنون
كاظم : عمري نسا الخوف ديالك عليا عمري لمحت فعينين شي أنثى داك الخوف يمكن هادشي اللي وقع زاد علقني بيك و كأقل حاجة نديرها على قبلك هي نقولك الكلمة اللي بغيتي تسمعي من فمي حيت بصح فهاد اللحظة كنعنيها شنو درت فيك باش تبغيني حتى لهاد الدرجة أراحة قلبي ؟؟
هنادي حلات عيونها السوداء اللون اللي مضببين بدموع و حطات يدو على خدها و طلعات نفس و عاودت هبطاتو و قالت بصوت حنون دافئ كدفئ يدو اللي محطوطة على خدها
هنادي: حنانك كلامك كيفاش كنحس بيك واقف معايا و كتحميني من كلشي كتهتم بأدق تفاصيل إهتمامك بيا لواحد الدرجة كبيرة كيفاش كتخليني نضحك واخا نكون فقمة الحزن كلامك كنحس بيه كيخاطب روحي و قلبي و من فوق هادشي كامل بغيتك حيت نتا *حطات يديها على قلبها * خليتي إحساس جديد يدخل لقلبي ما عرفتش واش الحب واش العشق اللي كنقرا عليه فالقصص و كنشوفو فالمسلسلات المهم انا اللي عارفة هو بلا بيك الهوا كيخنقني ما عرفتش حتى انا علاش تعلقت بيك فظرف يوماين ربما حيت نتا اول رجل دخل لحياتي و خربقها ما عرفتش واش زواجي بيك تقليدي ولا عن حب انا اللي عارفة هو انني ما باغاش نكمل حياتي مع راجل واحد أخور من غيرك نتا... معاك كنحس براسي طفلة و تارة أخرى كنحس براسي أنثى و تارة أخرى كنحس براسي إمراة ناضجة ما عرفتش واش قدرت نعبر على حبي ليك بطريقة صحيحة و لكن الحاجة اللي عارفة هي ان كلمات دنيا و العالم ما كافياش باش نعبر ليك على شنو واقع عندي لداخل فقلبي ...
ماقدراتش تكمل فاش شافت دمعة هابطة من عينو كلامها عندو تأثير خطير على قلبو ما قدرش يتحكم فراسو هو شخص حنون و كلماتها لامسات قلبو و روحو و كيانو كرجل أي رجل فدنيا كيبغي يسمع مثل هاد الكلمات و خصوصا إلا كان كيحب ديك الأنثى يكدب عليكم الكادب اللي يقولكم بلي رجال ما كيتأثروش و ما كيضعافوش أكيد كلنا بشر و كلنا بني آدمين و كلنا عندنا قلب و عواطف غير هو كاين رجل اللي ما كيبينش و كاين الراجل الحنون بحال كاظم اللي مع الاسف فئتهم قليلة إن لم نقل منعدمين خصوصا فالعالم العربي لأن الأجانب هما اللي كيبينو عواطفهم و أحاسيسهم أكثر من الرجال الشرقيين ....
دور وجهو جنب و مسح ديك دمعة نورمال ما غايبغيش يبين ضعفو ليها كيبقى رجل عربي ...حط يدو تحت ذقنها و قرب لشفايفها و غمض عينو باش يقبلها حتى حس بالباب تحل ...
سعاد: جاو الب....
ما جات فين تكملها حتى لمحات المنظر ديالهم بجوج و بقات غير مطرطقة عينيها فيهم هنادي التافتت و شافت فيها و حسات بواحد الحشمة و بواحد الخجل بوحديتو لدرجة تمنات الارض تشق و تبلعها ...
ناضت من حداه بسرعة و كلها كترعد و كتصرط ريقها بصعوبة و قالت بكلمات متقطعة
هنادي:خ..خ...خ..ختي
سعاد مزال كتحاول تستوعب داكشي اللي شافت حولات عينيها كتشوف كاظم مزبط مالابس والو من الفوق و الوضعية اللي كانو فيها مشا بالها بعيد ...
سعاد: من فوقاش و نتوما هنا
كاظم ابتاسم باستهزاء و ناض هز القاميجة ديالو لبسها و قال
كاظم : جاو البوليس
سعاد: اه
سد أزرار القاميجة كلهم وخرج ووقف حدا سعاد و قال بهمس باش تسمعو غير هي
كاظم: ما تديريش فهنادي دوك الشوفات ما تحرجيهاش أكثر من هاكا و ما يمشيش بالك بعيد
قال هاد الكلمات و خطا خطوات اتاجه الباب رئيسي فتحو و خرج لعندهم ...
هزات هنادي راسها من الارض و شافت فختها اللي مصغرة فيها عينيها ....
هنادي: واش داو فيصل
سعاد: مزال سطافيط واقفة حدا الباب راه كيتفاهمو معاه
هنادي تنهدات براحة كأنه هم و انزاح ..
هنادي: حمد الله اختي ما تصوريش شحال فرحت
سعاد :*دارت يديها فجنبها * بسيف ما تفرحي و داك الزين كاامل كان جالس حداك بدوك العضلات يا ختي و غايبوسك مالي نفرح انا اللي مزوجة بداك الفردة د صباط غير ريحة عطر داك كاظم كتحمق و شخصيتو و هيبتو وتعامل ديالو زوين شفتي قلتلك راك عفريتة غاتقدري تنسيه فمراتو
هنادي ابتاسمت بخجل و قالت
هنادي: ضحكتيني واخا ما فيا اللي يضحك
سعاد: المهم دوزي نخرجو نشوفو شنو واقع برا
خرجات سعاد من البيت و اتاجهو لباب رئيسي فتحوه و بقو واقفين فالعتبة د الباب ، لقاو الجووقة مزالة مكجكجة عليهم كي الذبان و زبيدة و فضيلة و بوجمعة و لقمان واقفين كلهم كيتكلموا مع واحد الشخص طويل و صحيح متيتز حتى هو و لكن مغوبش باينة فيه مكره و لكن عيون هنادي مشات ديريكت لكاظم اللي باين فيه مغلغل و كيتكلم بعصبية واضحة بشكل كبير على ملامح وجهو مع داك الشخص اللي واضح وضوح الشمس بأنه ولد خالتهم وليد الكوميسر اللي غير شافتو سعاد حلات عينيها على وسعهم و شدات فيد هنادي ...
سعاد: نااااري هو و الله حتى هو
هنادي التافتت شافت فختها
هنادي: شكون هو
سعاد: وليد صااحبي و الله حتى هو
هنادي: اويلي نتي شنو كتقولي
سعاد:و كنت مصاحبة معاه قرا معايا فليسي يا بنت اللدينة ناااري على شوهة ناااري كي تبوكص الحمار لاخور
هنادي غلباتها ضحكة و جاتها الصدمة فنفس الوقت
هنادي: وااايلي
سعاد: برب الجليل ما كنضحك أصاحبتي كان كيقرا معايا راه ما عرفتوش فلول حتى حنززت فيه مزيان كي ولا كبر و صحااح يا ختي كنت كنحمااق عليه اييه يا ليام
هنادي: و علاش تفارقتي معاه ههه
سعاد: خفت من دوك الكلاب د خوتك و انا ندير بنااقص من شي تصاحيب راه غير كنا ناشطين و صافي اصلن هو كان كسول و انا كان دايرني طريق ولد الكلبة كنت كنكتب ليه الدروس و نخرج ليه تمارين و نقلو فالفروض شوفي دنيا شحال صغيرة يا ختي
هنادي: ناااري عنداك يشوفك و ديري لينا شوهة مع كيمو و عائلتو
سعاد: تي شكون هاد كيمو اناري
هنادي: رااجلي تاع قلبي
سعاد: مزينك سيد بقدو و قامتو تعيطي ليه كيمو ارتاقي شوية أصاحبتي
شبكات هنادي يديها مع بعضياتهم و دارتهم تحت خدها و ميلات عليهم راسها و سهات فكاظم اللي مزال كيهدر مع وليد و كملات كلامها
هنادي: شحال تيحمق يا ختي و خصوصا منين كيكون معقول و كيربط الغوباشة كيزيد يزيان اما فاش كيضحك كنحس بقلبي كيضحك معاه نااري يا ختي شنو هادشي كيوقع ليا ياكما هدا هو اللي كيقولو ليه فيروس كورونا ههه
سعاد: ههههه هدا فيروس عشقونا و حبونا هو اللي دخل لقلبك و مرضو و المشكل كورونا تلقاي ليه الدوا و هاد الفيروس عمرك تلقاي ليه الدوا تزعطتي ابنتي نوضي على سلااامتك
هنادي: هاااح يا ختي فوقاش غانتزوجو خلاص ما بقيتش قادرة نصبر
سعاد دارت يديها تحت دقنها و كتشوف فيها ديك شوفة ديال الله يرد بيك
سعاد: خايفك غير طيري على الرجل فعوط ما يصدق هو داخل بيك تصدقي نتي داخلة بيه هههه الله يرد بيك ابنتي
هنادي: *تنهدات * شوفي ياختي كيفاش كيهدر و كيفاش كيحرك يديداتو مع فمو دبت انا و الله ياك صافي غانتزوجوا دابا كيمو غايولي رااجلي ياك اختي من ديما كنت كنقرا فالقصص بطل زوين وسيم شخصية لابس عليه من ديما كنت كانقولك داكشي كاين غير فالقصص ساعة صدق حتى فالواقع لااا بزااف و الله ما قادرة نثيق
سعاد: الإستثناء ماشي هو القاعدة الا كنتي نتي محظوظة ماشي كلشي بحالك و خير دليل و مثال هي انا
هنادي: الله يشوف من حالك أختي
سعاد: اودي ها حنا صابرين على ود ريان ما بغيتش نفرق شملو مع باه حتى يدير لينا ربي شي تاويل ديال الخير
كاظم واقف فالوسط كيهدر مع وليد ولد خالتهم اللي كيضاهيهم فالوسامة ...
كاظم :*مرر يدو على شعرو * ما نكرهش نطلع نخلي دار بوه باش يتعلم ضسارة كيفاش دايرة
وليد :*حط يدو على كتف كاظم * لا أخويا حنا غانتكلفو ما تخافش غانعمر ليه ضوسي
لقمان: وليد ما نخافش عليك راك تم أ العشير تهلا ليا فيه
وليد :*مرر يدو على دقنو المزين بلحية خفيفة * جا حتى لبلاد فليو و قال فيا الرواح و الله يا ديلمو حتى نغبر ليه الشقف يولي يتمنا الشمس ما يوصلها طبت بهاد الاشكال الله يحرق أصل مهم من جدر
زبيدة : القضية راه فيها التهديد و حمل السلاح الأبيض و إزعاج جيران
وليد:هانا ثااني على خالتي ما عندي ما يتسالك راك عارفة شنو كاين
لقمان:*باستغراب * حتى انا صدماتني الحنانة برجولة فين تعلمتي هادشي
زبيدة ابتاسمت باستهزاء و قادت جلابتها طلعات ليها الكتاف و قالت بابتسامة
زبيدة : خمسة فعينيكم فسيكفيكهم الله و هو السميع العليم شافني ربي و ملوكو ما شافني العبد مشرط حنوكو
فضيلة : تبارك الله عليك أ لالا زبيدة
بوجمعة : قولي أوليدي شحال غاتعطيوه ديال الحبس
وليد : و الله ما عرفت ولكن غايتضرب بالأعوام غالبا
كاظم : تعطلتو أ صاحبي على شوية كنت غانخرج نقتلو
وليد: قالتهالي خالتي ، مزيان اللي شدوك اما كن خرجتي غاتوقع كارثة أصلن هوما كانو باربعة بيهم و هازين جناوى و بحال هاد القماقم عندهم كي الحبس كي الزنقة كي الدار ما عندهمش مشكل كن خرجتي كن آداوك و نتا خطبتك هاد نهار أصاحبي باش تعرف راسك منحوس نتا واقيلة هو هداك اللي تزاد و طفا عليه الضو
زبيدة : غير المكاتيب أولدي و صافي كي بقات كريمة ختي شوية
وليد: تهلا و مبروك عليك مرة أخرى و سمح لينا على التأخير راه ماشي بيدي
كاظم: منين ماقتلتوش الحمد الله
وليد:بحال هاد الكمامر ما تعمرش راسك بيهم اه بعدا و فيناهي عروسة الغفلة نتعرفو عليها هههه
إلتافت كاظم لجيهة الباب بانتلو واقفة السيدة ساهية فيه و دايرة يديها تحت خدها ابتاسم و عض على شنايفو و حرك راسو يمين شمال كل مرة كيتأكد بلي طاايحة فيه ديال بصح...
هز يدو و كيدير ليها إشارة باش تجي لعندو ..هنادي عاد فاقت من شرودها منين شافتو كيناديها و حطات يديها على صدرها كأنها كتقولو واش انا ابتاسم ليها كاظم و حرك راسو بالايجاب ...
هنادي ضحكات على كلامو و تفكرات معتز منين هدر معاهم فالقهوة و قال ليها {مرحبا بيك فعائلة الحماق شخصيا } ما كدبش عليها ....
زبيدة : هههه واسير الله يمسخك
وليد: يالله الله يعاون تهلاو عاد تابعني تحقيق مع هاد القماقم د الحبس
بوجمعة : الله يعاونك أولدي اه و عمر ليه ضوسي مزياان
وليد: ما تخافش اعمي تهلاو نتقاشعو غدا دير عقلك أسي العريس
كاظم دار يدو فجنابو بجوج و تنهد و شاف فراحة قلبو و قال بهمس ...
كاظم : الا خلاتو لينا بعدا لالا هنادي
إنصارف وليد و مشات جوقة و دخلو لدار جلسوا فالصالون و سعاد مشات لكوزينة دير كويس ديال اتاي يردو بيها المجاج و ينساو داكشي اللي وقع باش يدخلو فالموضوع الأصلي اللي جايين على قبلو من اللول ...
كاظم هز فيدو جنات و جالس حداه لقمان و زبيدة و مقابلة معاهم فضيلة و بوجمعة و هنادي اللي كتلعب فصباعنها بقوة التوتر و غير صوت التلفازة اللي كيتسمع
كسر هاد الجو صوت لالا فضيلة اللي قالت ..
فضيلة : سمحو لينا على هادشي اللي وقع
زبيدة تنهدات و جلسات مستقيمة و قالت
زبيدة: ما كاين علاش طلبو سماحة أ لالا فضيلة قدر الله و مشاء فعل حتى عين ناس صعيبة و الحمد لله اللي خرجات طريفة و ما وقع والو
بوجمعة : الحمد الله بعدا اللي داوه انا قلبي كان غايسكت حتى بديت نقول اش جابني
كاظم : كن ما جاش كنت غانخرج لعندو يا بيا يا بيه يا الحبس يا القبر
هنادي و زبيدة قالو دقة وحدة
~الله ينجيك
هنادي حنات راسها و طلعات نفس بصعوبة و كاظم سها فيها و عض على شنايفو و باس جنات اللي كانت جالسة فحجرو فحنيكاتها بقوة الفرحة اللي كيحس بيها فهاد اللحظة ....فاش كتبين خوفها عليه كيحس بإحساس زوين لداخل فداتو و بعبارة اصح فقلبو ....
لقمان : ناس كيخافو عليك اما أنا ضربني جايحة الكحلة ما كاينش اللي يتسوق ليا
زبيدة : لواه لواه اوليدي و انا فين نسيتيني
لقمان: الخوف ديال شريكة حياتك عليك كيكون بوحديتو
فضيلة : ههه علاه نتا ما مزوجش اولدي
لقمان: اودي يا الحاجة الا عودت ليك قصتي مع العيالات تبكي
فضيلة : الله يا ولدي ياكما وقعات ليك شي حاجة مع العيالات
زبيدة متقات و حطات يديها يجوج على كرشها و قالت
زبيدة : غير كيتفلا لقمان ولدي مطلق و عندو بنيتة
لقمان : و باغي نتزوج أ خالتي ما نلقاش عندك شي بنية مع نتي تبارك الله كتولدي غير زين
بوجمعة: هههه كاينة أولدي ها هي هنادي و الله ما نحيدها ليك ياك جيتو على قبلها زين و الصواب و الادب و تقاابلك بنيتك من داكشي رفيع و الحداكة و سكااات ما تزيدش معاك الهضرة اوا اش قلتو نهزو فاتحة
هنادي حلات عينيها على وسعهم فخالها و لقمان غلباتو الضحكة و بدا كيكح و فضيلة و زبيدة بقاو غير كيرمشو فيه أما كاظم تصدم مسكين ما فهمش هاد خالها اش كايقول وأش كايخرف ...
فضيلة : سكت أخويا سكت *ضرباتو لرجلو و ابتاسمت ليهم بابتسامة مزيفة * ههه ما تديوش عليه ما عارفش مسكين
بوجمعة: علاه مالي ما عارفش الولد كيسولك على شي بنية لزواج و ما يلقاش ما احسن من هنادي
زبيدة: أشريف راه حنا جينا أصلن على قبل هنادي لولدي كاظم ماشي للقمان وأصلن لقمان غير كيتفلا ما باغيش يتزوج
بوجمعة التافت و شاف فكاظم و قال
بوجمعة : تبارك الله تبارك الله وفاش خدام و فين غايسكن الطفلة
كاظم حنحن و تقاد فالجلسة و قال بصوت رجولي حرش
كاظم: اول حاجة كان خاصك تسولني عليها واش كتصلي واش كتقرا القران واش غاثاقي الله فديك البنت واش غاتبغي ديك البنت واش غاتعطيها حقوقها واش ما غاتضلمهاش معاك و عاد من بعد كاتجي الخدمة و تعرف فين غانسكنها
بوجمعة تحرج بقا غير مبرقق عينو فيه عكس فضيلة و زبيدة اللي عجبهوم كلامو أما هنادي هزات عينيها بشوية كتشوف فيه و ابتاسمت و تنهدات من أعماقها كلماتو مختارة بعناية كأنه محضرها من قبل ما يتكلم كتحس بكلماتو كيتسللو لقلبها قبل ودنيها فكل مرة كتحس بيه رااجل بمعنى الكلمة ...
كمل كاظم كلامو بعدما سكت مدة صغيرة ...
كاظم: و لكن ماشي مشكل انا غانقولك و غانجاوبك على التساؤلات اللي طاحو فبالك بطبيعة الحال ما يمكنش غير تجيو و تعطيو بنتكم لمن ما كان حيت أكيد ثقة ما بقاتش فهاد الزمان اللي ولينا كنشوفو بنات كيتقتلو من طرف رجالهم و كيتنصب عليهم و كاين اللي كيبيع مرتو لدلك من حقك تعرف شكون أنا و نتمنى نكون بشروط المناسبة باش نقدر ندي بنتكم اللي كنشوفها جوهرة غااالية وغالية بزااف *سكت لثواني و كمل كلامو * انا كاظم مهندس ديكور عايش ففرنسا الحمد الله مسلم و فخور بديني كنصلي صلاتي كنقرا قرآن رغم تقصيري فبعض الأحيان نطلبو من الله الهداية مغربي كيفما كتشوف ديجا كنت مزوج ولكن * طلع نفس بصعوبة و كمل كلامو * ماتت الله يرحمها و يوسع عليها فهاد النهار موتها كان صدمة بالنسبة ليا و لكن حمد الله على كل حال و هنادي كان إقتراح من الام ديالي و هاكا تعرفت عليها صدفة و كانت أجمل صدفة واليوم جيت طالب يد بنتكم المصونة هنادي باش تكون زوجتي و حبيبتي اللي تشارك معايا ما تبقى من حياتي الا قبلتو بيا طبعا ..
زبيدة: اوا اش قلتي أ لالا فضيلة
فضيلة : انا الا بغات البنت ما عندي ما نقول
هنادي بقات ساكتة حتى دخلات ليهم الشك حتى قالت بصوت قريب للهمس
هنادي: موافقة
كاظم عاد رتاح منين سمعها من فمهاو ماماها طلقات
تزغريتة فاعلة تاركة...
بوجمعة : إوا أسيدنا مبارك و مسعوود الله يتاويكم
كاظم: أمين شكرا
لقمان: نقراو الفاتحة واقيلة
كاظم :اهاه مرحبا
كلهم هزو يديهم على شكل دعاء وكاظم هو اللي قرا سورة الفاتحة بصوتو اللي كان جميل بزااف ...
تسالمو مع بعضياتهم وطاحت عيون هنادي على عيون كاظم و غمزها وحرك شفايفو بطريقة خلاتها تقراهم و تعرف شنو قال
كاظم : كنبغيك
هنادي صرطات ريقها بصعوبة و قالت بهمس حتى هي غير شفايفها اللي كيتحركوا
هنادي:حتى أنا
كاظم هز يدو بلا ما يعيق ودارها على فمو وصيفط ليها قبلة فالسما مع إبتسامة خطيرة ترسمات على شفايفو الشيئ اللي خلا قلبها ينبض بسرعة و دقاتو يزيدو ...
❤❤❤
لو كان القلب ينطق لنطق بإسمك، لو كانت العين تنطق لنطقت برسمك، لو كانت اليد تنطق لنطقت بأمان لمسك، ولكن ليس لي إلا شفاه لا تستطيع سوى أن تقول أحبك
❤❤❤
جابت سعاد صينية وحطاتها من فوق الطبلة و ناضت هنادي كتعاونها كيحطو طبلة... الحلاوي (دواز ديال اتاي 🌚) على الاشكال شراوهم عالة وعلم عليهم والفاكية ورجعو جلسو حدا فضيلة اللي بدات تكب فاتاي وحطات الكيسان حداهم وقالت بفرحة كبيرة مرسومة على ملاميح وجهها ..
فضيلة : مرحبا بيكم
زبيدة : ترحب بيك جنة أ لالا فضيلة عدبتو راسكم
فضيلة : وا نتي مولات الخير ما تقوليش ديك الهدرة
كاظم بانتلو هنادي ساهية فالتلفازة وكلشي كايكل وكيدوز كاسو وفضيلة وزبيدة كيتحدثوا وبوجمعة ولقمان كيشاركو فالحوار مرة مرة وسعاد ملهية مع ولدها صغير ولكن هو ما كانش كيسمع ليهم كأنه
غايب ماكاينش فداك العالم اللي فيه هما ماعندوش مع البشر بزااف وخصوصا فهاد اللحظة اللي كيشوف فراحة قلبو ساهية فتلفازة وساكتة ماكرهش ينوضو من حداه كلهم و يبقا غير هو و ياها راس فراس محتاج يجلس معاها و تمتعوا بكلامها الحلو و ضحيكاتها اللي كتزين ملاميح وجهها و خجلها و خوفها عليه شحال كتحمقو فاش كتحني راس و تفرك يديها بقوة التوتر كيعجبوه دوك التفاصيل الصغيرة اللي ما كينتابه ليها حتى واحد معقول يكون بدا كيحبها ؟؟؟ معقول يكون عشقها ديال بصح ؟؟؟ معقول يكون قلبو ماال لجيهتها ؟؟؟ ما يمكنش بهاد السرعة واش يمكن الانسان يبغي فنهار او لا فيوماين ؟؟؟ اولا من اول نظرة ؟؟ واش بصح مزال الحب من هاد النوع ؟؟؟ واصلن شنو هو هاد الحب اللي كلشي منوض عليه صداع و المشاكل ؟؟؟ و شكون اللي حط قوانينو ؟؟؟ معقول يكون نسا ملاك ؟؟؟ ياك هو كيبغيها هادي خمس سنين ولكن شنو سر ديك اللمعة اللي كتبان فعينو فاش كاتكون معاه او حداه هنادي؟؟؟ وشنو سر دوك الألقاب اللي طلق عليها بحال هنودتي و بحال راحة قلبي و بحال حبيبتي ؟؟؟ شنو سر دوك القبلات اللي طبع بيهم شفايفها ؟؟؟ شنو سر كلمة {je t'aime } ؟؟؟ وشنو سر كلامو المعسول ؟؟ و شنو سر الحماية و الامان و الاهتمام اللي كايعطيها بلا مقابل ؟؟معقول يكون هادشي عندو شي سر او لا كلشي كيجي من دافع تلقائي حر و اللي كيتحكم فيه قلبو ماشي عقلو
شكون عرف واش بصح هادشي من قلبو اولا كاين أسرار و خبايا ما زال ما تكشفو ؟؟ ممكن الايام اللي غاتكشف على كلشي ....
هز طبسيل و حط فيه الحلوى و الفاكية عمرها و قال بصوت حنون خلا كلشي يلتافتت و يشوف فيه
كاظم: هنادي
هنادي ساهية فالتلفازة حتى قفزها صوتو اللي ما كانتش متوقعاه و دايراه فالبال ...
هنادي صرطات ريقها بصعوبة قبل ما تدور و تجاوبو
هنادي: نعام
كاظم مد ليها طبسيل و حطو حداها و قال
كاظم: ما كاتاكليش ابنتي غاضري صحتك هاكا
هنادي حشمااات قدام ماماها و خالها و عكوزتها و لوسها يدير هاد التصرف اللي ما كانتش متوقعاه بتاتا غلباتها ضحكة و فنفس الوقت الحشمة ما عرفات ما دير من غير أنها تبتاسم ليه
هنادي: شكرا
لقمان قرب حدا ودن ماماه و قال بهمس
لقمان : الحنانة واش هاد ولدك مزال كيقوليها بنتي
زبيدة : أ لااا راه غير مرة مرة كيعجبو يعيط ليها بنتي حتى ملاك كان كيعيط ليها بيها مالك نسيتي
لقمان :*باستغراب * امم بانلي بحال الا طاح فيها و عجباتو أ الواليدة
زبيدة : نتمناو اولدي ولكن ما نكدبش عليك نخاف يتعلق بيها و توقع ليها شي حاجة و يتسطا ليا وليدي رجع تنادم معايا الحال
لقمان : الله يكتب علينا مكاتيب الخير أ الحنانة ما تقوليش ديك الهدرة ما تكونيش متشائمة إنشاء الله ما يكون غير الخير
زبيدة: أميين أولدي ما بقيت قادة على الصدمات و الله
لقمان : و كيبانلي حتى أنا تعلق بيها يا ربي غير يكون دار عقلو و ما يكونش كيشوف فيها بنتو
زبيدة : أنا خايفة ماشي على انه يكون كيشوف فيها بنتو خايفة على ما أكثر من هادشي غير الله يدير شي تاويل د الخير اولدي
لقمان : مناش خايفة ؟؟؟
زبيدة : الهدرة بزاااف والسكات أحسن ناس كيشوفو فينا و غايبدا يتنواو و يقولو كنهدرو فيهم سد حلقك
وقف كاظم و هاز فيدو جنات اللي معلقة فيه ما بغاتش طلق منو ...
زبيدة هزات راسها و شافت فيه
زبيدة: مالك أولدي
عطا للقمان جنات و شاف فهنادي وقال
كاظم: هنادي واش ممكن تجي وتوقفي حدايا الا سمحتي
كلشي استغرب و كيشوف فيه ما فاهمنيش شنو واقع ناضت هنادي ووقفات حداه وكلهم كينتاضرو تفسير لشنو هادشي اللي كيدير سي كاظم أماامهم ...
وقفات حداه هنادي و عينيها كيشوفو هنا و لهيه ما ثابتين فحتى قنت حشمانة منهم و ما زال ما عرفاش شنو سبب اللي غايخليه يناديها باش توقف حداه ...
كاظم ربع يدو و ابتاسم و سها فيها للحظات و قال بصوت حنون
كاظم: سمحيلي على أي حاجة درتها ما عجباتكش و سمحيلي على أي تصرف مني جرحك سمحيلي على كلشي كنواعدك غانحميك و ما غانخلي حتى حاجة تآديك ولو بسيطة كنواعدك قدام هاد ناس و هاد الشهود غانحميك حيت أنا قبل ما نكون حبيبك و زوجك و خطيبك انا باباك و نتي بنتي ...
لقمان شاف فماماه و صرط ريقو بصعوبة
لقمان : اش كيحاول يدير هاد ولدك حتى كانقولو دار عقلو و يعاود يفلت ليه الريزو
كاظم سكت مدة و رجع كمل كلامو و قبط فيدين هنادي اللي كتحس بالعرق نازل من ضهرها و داتها كترجف و دقات قلبها كيتسارعو كأنهم فسباق ...
كاظم: نتي فقدتي الاب و ما عمرك شفتيه مات الله يرحمو *تنهد* داكشي علاش انا كنشوف فيك بنتي اللي من الواجب عليا أنني نلعب دور الأب اللي يحميها و يعطيها الحنان لازم و من ناحية اخرى حتى انا محتاج لأنثى فحياتي اللي تعوض ليا فراغ خلاتو ملاك فقلبي و فحياتي لذلك قبل ما ندخلو فعلاقة زواج نبغيك تواعديني أمام هاد الملأ انكي عمرك تخلاي عليا مهما وقع وشنو ما وقع و انا غانواعدك أمام هاد الملأ انني نحميك و نعتابرك بنتي و مرتي فنفس الوقت بشرط الفراق ما غايكونش
لقمان بقا غير كيرمش و كيشوف فيه و هاد الكلام اللي قال دابا فايت ليه سامعو فشي بلاصة و المشهد كانه كيتكرر أمام عينو بحال القضية ديال "déjà vu " نفس الكلام نفس الحركات كيتكرروا شنو هادشي كيوقع و شنو كيحاول يدير كاظم بدا كيدخل ليه الشك لدرجة انه بدا كيحط فرضيات لشنو كيدير كاظم ...
كاظم جثا على ركبتو و جبد من جيبو بواط فالأحمر مزيونة و فتحها و ضهر خاتم ديال ذهب رقيق وفيه حجيرة فالوسط رغم انه بسيط و لكن رااقي جدا ...
هنادي إحساسها فهاد اللحظة لايوصف جاب ليها بالها بحال راها عايشة فشي فيلم ...عرض زواج اللي كانت كتشوفو غير فالمسلسلات كيوقع دابا امام عينيها مع أحب شخص لقلبها و قدام عائلتها شنو بغات أكثر من هادشي دارت يديها على فمها و بتاسمت و علامات الفرحة واضحة بشكل كبير على ملامح وجهها عم الصمت لثواني و كلشي كيشوف فكاظم كيتسناوه يهضر ...
كاظم : واش تقبلي بيا نكون زوج ديالك و كوني متأكدة بلي غانكون أسعد راجل فالعالم *كمل كلامو بابتسامة * واخا عارف بلي غاتكوني موافقة ولكن ما بغيتش نحرمك من هاد اللحظة
هنادي تنهدات و دارت شافت فماماها و خالها اللي كانت واضحة بشكل كبير علامات الفرحة على جههم ...طلعات نفس و هبطاتو و التافتت شافت فيه و قالت
هنادي: أكيد موافقة
ابتاسم ووقف من الارض و حيد الخاتم من البواطة و هز يديها ما بين كفو و ولبسو ليها تحت تصفيقات الأسرة الكريمة ... ووقفات سعاد كتصفق ليهم فرحانة لختها و كلشي وقف كيصفق 👏👏👏 ...
هنادي التافتت كتشوف فيهم و كتعض على شنايفها حاسة براسها طايرة من فوق السحاب و الفراشات كيحلقو فبطنها إحساس فشكل أنكي تشوفي الراجل الي تغرمتي بيه و طحتي فيه كيدير قدامك جيسط زوين بحال هدا رغم اننا مغاربة و تقاليدنا و عادتنا ما فيهمش هادشي و لكن بقوة اللي كنشوفو الاجانب كيعرضو الزواج بهاد الطريقة اي بنت كتحلم أنه شاب يتقدم ليها بنفس الطريقة كيبقا تصرف زوين منو أنه يفرحها و يطلب منها الزواج بهاد التصرف البسيط اللي عنا ليها الكثير ...
جبدات سعاد تيليفونها من صدرها ووقفات و قالت
سعاد: بلاتي نصوركم تبقا دكرى زوينة
كاظم هز يد هنادي و قبل الخاتم اللي كان فيديها والتاقطت ليهم سعاد الصورة اللي صرعاتها جات زوينة بزاااف مع هي كيعجبها تصور فأكيد غاطلعها زوينة ....
سعاد علات التيليفون و قالت بصوت مرتفع
سعاد: شوفو هنااا
كلهم التافتو و شافو فصورة و تلتاقط أحسن سيلفي عائلي ..
مرر كاظم يدو بحنان من مور ضهر هنادي و قال فودنها بهمس
كاظم: يدك ولات أجمل بالخاتم ما عمرك تحيديه باش كلشي يعرف بلي هنادي ديال كاظم و حتى واحد ما غا يطمع فراحة قلبي حيت انا خطفتك من العالم و وليتي ديالي بوحدي وحتى واحد ما عندو الحق فيك من غيري bien sûr
هنادي حركات راسها بالايجاب و قالت بهمس فودنو
هنادي: من نهار سلختي عصام و انا عارفة راسي غانكون ليك
كاظم دور وجهو جنب و ضحك و قال فودنها
كاظم: علاش بالضبط؟
هنادي: حيت حققتي حلم من بين أكبر أحلامي و ربما من ديك لحظة بغيت نكون ليك
كاظم شاف فيها و ضحك حتى بانو سنيناتو المسيتفين بطريقة زوينة و الغمازات اللي كيبانو بشكل جميل على خدودو زادو عطاوه جادبية خطيرة الشيئ اللي خلا إبتسامة طفيفة تظهر على محياها و قالت بهمس
هنادي: الله يخليك ديما ضاحك
كاظم سمعها و تنهد و قال بابتسامة
كاظم: غير بقاي معايا و ما عمر الضحكة تفارقني أ بنتي
لقمان ناض إنصارف من حداهم و خرج برا باش يكمي حيت حاس براسو غايطرطق بقوة التفكير فهادشي اللي كيوقع مع خوه نفس الكلام قالو قبل خمس سنوات فاش خطب ملاك نفس التصرف معقول يكون كيشوف فيها ملاك و كيتخايل صورتها فوجهها لااا لااا ما يمكنش هادي هنادي كيفاش غايشوف فيها ملاك ؟؟ ولكن أصلن هو مريض نفسي ما يمكنش ينسا ملاك بسرعة و لكن هو فلول بغاها حيت سميتها هنادي بحال الاسم اللي كانت غاتسمي بيه بنتو كي دار حتى ولا كيبغيها و كيحماق عليها وهو يلاه كان كيبكي على ملاك ؟؟؟ الله يا ربي على حصلة شنو هادشي كيوقع مع خوه ما فهمش، هادشي اللي كيقوليه عقلو فهاد اللحظات ...
نتر نتيرات من الكارو اللي فيدو حتى سفو بسرعة ما حسش براسو فوقاش سالاه بقوة الاعصاب لاحو و عفط عليه بصباطو و مرر يدو على شعرو باغي شي تفسير لهادشي اللي كيصرا لخوه و احسن حل هو يتاصل بصديقو سيف الطبيب نفسي اللي كان متبع حالة كاظم يعطيه شي تفسير على هادشي اللي كيوقع حيت ما بقا فاهم فيه والو ...
طلع لطوموبيل ديالو باش ما يسمعو حد و جبد التيليفون ديالو قلب على رقم سيف حتى لقاه و دوز الخط و حطو على ودنو ما هي الا ثواني قليلة حتى سمع صوتو...
سيف: ألو
لقمان: ألو سي سيف صافا
سيف: أهلن أهلن بسي لقمان فين غبورك أولدي
لقمان :*تنهد* غير مع الدنيا أ العشير و المشاكل
سيف: خاصك دوز عندي تخوي قلبك
لقمان: أهاه باش ترزيني ف 500 درهم للحصة مالي على حالي أحمق
سيف: ههههه علامة نتا أجي اسيدي فاابور غير كن مرتاح
لقمان: غير كنضحك معاك راني مرتاح الحمد لله هادي هي الحياة لا بد من المشاكل و لا بد من انك طيح و تنوض
سيف : exactement بحال شي دري صغير كيبقى يتعثر و يوقف و يطيح اليوم و غدا و بعدو حتى كيتعلم يوقف على رجيلاتو و ما كيبقاش يطيح حلاوة الحياة فمشاكلها و بلا بيهم ما غاتعرفش قيمة سعادة
لقمان:كاينة أ العشير و الله داكشي نيت علاش اتاصلت بيك
سيف: مالك ياك لابس ؟؟؟
لقمان بقا ساكت مدة و حط يدو على جبهتو و تنهد و قال بصوت متعب
لقمان: ماشي انا كاظم
سيف : مال كاظم ؟؟ دخل فحالة إكتئاب ولا وقعاتلو شي صدمة عاوتاني؟؟؟
لقمان : لااا ما عرفت منين غانبدا ليك ، خويا تدمرات نفسيتو منين ماتت ملاك ما بقيتش فاهمو
سيف : خوك تعالج كليا و ما عندو حتى مشكل فعقلو إنسان دكي تبارك الله عليه و من خلال كلامو إنسان طيب ديال العشرة ولكن المشكل اللي عندو و اللي ما فاهمو حتى واحد هو واقع ليه إضطراب فقلبو فعلاقاتو العاطفية مع الإناث بصفة عامة و الحاجة زبيدة هدرت معاها مؤخرا فهاد الموضوع
لقمان تقاد فالجلسة تصدم من آخر حاجة قالها سيف
لقمان: وااايلي واش هدرات معاك الواليدة عليه قولي كولشي ما تخبي عليا حتى حاجة من شنو دار بيناتكم الله يرحم باك
سيف : أسرار المرضى أ لقمان
لقمان: مااكاين لا اسرار لا زمر أصاحبي واش حنا بيناتنا هادشي
سيف: واخا غانقولك و تبقى بيناتنا ، زبيدة حتى هي طلبات مني شي حل لكاظم اللي غير معلق بملاك مراتو اللي ما بغاش ينساها و قلتلها بلي ولدك حقا كيبغي ملاك و لكن عند بالو بلي هو سبب فقتلهم و كأقل حاجة يديرها هي يبقى وفي ليها حتى من بعد موتها و خصوصاا انها ماتت و بنتهم فكرشها الشيئ اللي زاد مرضو و عقدو و ولات كتبان ليه الحياة الضلام و خدا قرار أنه ما يتزوجش من موراها و ما يفتح قلبو لحتى أنثى من بعدها ...بعد تحليلي لحالتو لقيت بلي أنسب حل ليه هو يتزوج بأنثى أخرى باش هاكا ينسا مراتو الاولى على الأقل ولو بنسبة خمسين فالمية و يبدا حياة جديدة اللي أكيد غاينسا فيها مراتو و غايلهي راسو بشي حاجة جديدة
لقمان مرر يدو على لحيتو و قال
لقمان: إذن نتا مول الفكرة ديال زواج عليها الحنانة كانت كضغط عليه باش يتزوج
سيف: si حيت هدا هو أنسب علاج لحالتو
لقمان: و ما فخباركش بلي قال لواليدة بلي باغي نتزوج بنت تكون عندها نفس سمية ديال بنتو اللي كان ناوي يسميها بيها
سيف: وي وي فخباري كلشي قالتو ليا الحاجة و قالت بلي باغي يعاملها بحال بنتو و ما إلى ذلك
لقمان: إوا و هدا بان ليك دابا بعقلو و عاد دابا بانلي كايتصرف و كيقول ليها كلام كان كيقولو لملاك
سيف : كنت متوقعها منو لأن الحالة ديالو العاطفية شوية معقدة مرة كيلوم راسو حيت بسبابو ماتت ملاك مرة كيفكر فالانتحار باش يمشي لعند ملاك بقوة الحب اللي كان كيكن ليها و لكن هادشي قبل ما يتعالج دابا البنت اللي غايتزوج بيها نورمالمون خاصها تعرف بلي غاتعيش مع شخص مضطرب فقلبو هو إنسان حنون فقد بنتو و مرتو دقة وحدة و بما ان البنت اللي غايتزوج بها عندها نفس السمية ديال بنتو فهادشي غايخليه يشوف فيها كأنها بنتو من دمو و لحمو المشكل الثاني أنها ربما هنادي غاتكون كاتفكرو فملاك فتصرفاتها لدرجة إلا دارت غير تصرف بسيط بحال مرتو الاولى غايمشي بالو لملاك و هنا غاتطرح المشكل أنه غايبقا يشوف فيها ملاك و بنتو دقة وحدة و المشكلة الثالثة ان الا كانت عندها شخصية زوينة عاد غايكتشفها بحركاتها بتصرفاتها غايعشقها لشخصها و هنا غاتكون المشكلة الرابعة انه مرة غايشوف فيه بنتو مرة غايشوف فيه ملاك و مرة غايشوف فيها بشخصيتها و المشكل الخامس يقدر يتعلق بيها لواحد الدرجة كبيييرة لانها غايتجمعو فيها ثلاثة أشخاص كيعشقهم دابا خوك كيشوف فهنادي ثلاثة د شخصيات بنتو و ملاك و هنادي نفسها لذلك خوك غاتلقاه تعلق بيها بزاف و غايكون عشقها ولو فمدة قصيرة و إحتمال كبير عشقو ليها غايمرضو و غايولي مهووووووس بيها و المشكل السادس أنها الا قدر الله ووقعات ليها شي حاجة يقدر يمشي فيها و إحتمال كبير يحماق ...
لقمان مرر يدو على شعرو رطيطب و ضرب يدو مع الفولون ديال طوموبيل .
لقمان: حتى لهاد الدرجة
سيف: و اكثر كاع لذلك هاد الفتاة اللي غايتزوج بيها حقا غاتكون محظوظة أنها تزوجات بشخص بحالو طيب و حنين و ضريف و الله يعمرها سلعة و لكن يقدر حبو ليها يرجعو مريض بيها وفاش كانقول هوس كانعنيه ديال بصح ما غايبقا يبان ليه حتى حد من غيرها و كيفما سبقت و قلتلك خوك كيشوف فيها جوج شخصيات ملاك و بنتو و شخصية ثالثة ديالها الشيئ اللي غايخليه يتعلق بيها و الا قدر الله و تكررات التجربة الاولى غايمشي فيها و غايحماق و ما غانقدروش نعالجوه ديك الساعة و حتى الفراق ما خاصوش يكون حتى هو غايأثر عليه
لقمان: دابا انا ما فهمتش واش كيبغي ديك البنت ولالا
سيف: ما عرفتش و لكن الحاجة اللي عارفها هو ممكن يبغيها أكثر من ملاك و لكن صورة ملاك و بنتو كاتبان ليه فيها وبلا شخصيتها اللي ممكن يعشقها و يبغيها أكثر حتى من ملاك
لقمان: اوا و الحل؟؟؟
سيف: الحل ما كاينش من غير إلا...
لقمان: من غير إلا شنو ؟؟؟
سيف: من غير الا كره ملاك و هادشي ما يمكنش يوقع
طفا ليه التيليفون حيت ديشارجا تعصب لقمان حيت كان مزال باغي يهضر معاه على حالة كاظم و مع الأسف تقطع الخط ...
خرج من الطوموبيل ديالو و رد تيليفونو لجيبو و مشا لناحيتها ..
سعاد: دخل أخويا تعشا
لقمان ابتاسم ووقف حداها و قال
لقمان: واش انا وياك شاركانا كرش وحدة ولا راضعين بزولة وحدة ؟؟؟
سعاد صدماتها هدرتو و حلات فمها فيه و قالت
سعاد: كيفاش ؟؟
لقمان: علاااش كتقولي ليا خويا أكثر كلمة كنكرهها معقدااني انا ماشي خوك
سعاد: امم و علاش شنو سبب ؟؟
لقمان :*تنهد * كرهاتني فيها مرتي الاولى حيت قبل ما نتزوج بيها كانت كتقولي خويا داكشي علاش ما تديش عليا راني زنزان شوية
سعاد: ههههه اه هاكاك صافي واخا و شنو نقول ليك ؟؟؟
لقمان: لقمان سميتي زوينة احسن من خويا
سعاد: المهم دخل تاكل راه غانحطو دابا * ضحكات و قالت بابتسامة * أخويا
عطاتو بضهر و دخلات عرفها كتفقص فيه و دارتها بالعاني ابتاسم و دخل سد الباب و دخل لصالون لقاهم مزالين مجموعين غير الفرق هنادي جالسة حدا كاظم و هاز التيليفون فيدو كيوريها شي حاجة...
جلس حدا زبيدة اللي كانت كتهدر مع فضيلة فأمور الحنة و داكشي د العرس....
زبيدة : ما ترفدي الهم لحتى حاجة أ لالة فضيلة الحنة غدا نديروها و انا نتكلف بكلشي حتى من حوايجها و اللي حلات عليه فمها يوصلها
فضيلة : الله يعطيك الخير و الله يكثر من امثالكم
زبيدة : هنادي كنعتبرها بنتي ماشي مراة ولدي أ لالا فضيلة و ربي يحاسبني بلاصتها كبيرة و بسلامتها كتدخل لخااطر الله يخليها ليك عزيزة عليا
فضيلة : الله يعز معزوزك أ الحاجة لهلا يخطيكم غير تكون بنتي مزيان مع راجلها و فدارها و تقرا و تحقق داكشي اللي بغات انا هدا هو الفضل عندي راك شفتيها مزال صغيرة و مسكينة دازت عليها مع خوتها و لكن الحمد الله ها ربي عوضها بسيد رجال سي كاظم اللي حتى انا كنعتابرو بحال ولدي و ربي شاهد عليا
زبيدة: عارفة اللي كاين أ لالا فضيلة
كاظم حاط يدو من مور كتفها و يد شاد بيها التيليفون ديالو و كيوري لهنادي تصاورو ففرنسا و كيوريها البلدان اللي زارهم الشيئ اللي خلاها تفتاخر بيه ما خلا حتى قنت ما مشا ليه ما كرهاتش حتى هي تكون بحالو ولات كتشوفو بمثابة قدوة ليها ...
هنادي: وااو مشيتي لهاد البلدان كاملين سعداتك
كاظم: امم و غانمشيلهم للمرة الثانية و لكن الفرق ما غانكونش بوحدي غاتكون حبيبتي معايا
هنادي عضات على شنايفها و قالت بهمس
هنادي:إنشاء الله ، دابا شحال من بلاد مشيتي ليها المجموع ديالهم
كاظم: شي خمسين بلاد و مزال شحال من بلاصة ما شفتهاش
زبيدة: علاه مالها شنو دارت ليك مرأة عمك هديك و خاصك تبغيها كيفما كتبغي عمك آخر مرة نسمعك كتقولي هاد الهدرة بغيتي عمك يتقلق منك
جنات: لاااءح عمو عمرو ما يتقلق مني
كاظم: شكون قالها ليك الا ما بغيتيش هنادي غانعرف بلي نتي ما كتبغينيش حيت *التافت و شاف فهنادي اللي ساهية فيه وكمل كلامو * حيت انا وياها واحد
مرر يدو على كتفها و قال بهمس فودنها
كاظم:ياك احبيبي
هنادي طلعات معاه الحرارة و شافت فيه و نطقات ببلاهة
هنادي: ها...
سمع شهقات ديال جنات اللي جالسة فجنبو دار لقاها جالسة كتبكي من جدر عقلها ..
زبيدة: يا هاد البنت مالك شوف جدرة ديال بنتك هاد نهار شحال بكات غاتضر عينيها
لقمان: دابا مالنا على البكا
جنات: صاافي عمو باح ما بقاش كايبغيني اهئ اهئ
كاظم هز عندو جنات و حطها على رجلو و ضمها لصدرو و قال بصوت حنون
كاظم: صافي بنتي واش عمو غايتقلق منك همم
جنات حيدات راسها من على صدرو و دلات شنيفاتها و قالت
جنات: قلتلك غاتبغيها اكثر مني
هنادي: عمك كايبغيك أكثر مني شكون قالك كايبغيني انا
جنات:*بفرحة * حلفي
كاظم التافت و شاف فهنادي
كاظم: ونتي شكون قالك ما كنبغيكش ؟؟؟
هنادي ولا وجهها أحمر فالبلاصة و خصوصا منين شافت زبيدة و لقمان كيتغامزو عليهم و يضحكو تمنات الارض تشق و تبلعها ...
كاظم دور وجهو شاف فجنات اللي كانت بين يدو و قال
كاظم: نفهم من هدرتك بلي كاتغيري على عمو أ جنتي
جنات: كانغير بزاااف عليك بوحدك
كاظم عض على شنايفو و ضحك و قال بصوت حنون
كاظم: و باباك ما كتغيريش عليه
جنات: لااءح ماشي بحالك
لقمان: انا راني عدوها ماشي باباها
زبيدة : لواه لواه راك عارف دراري صغار فاش كترشق ليهم على شي حد و عمها مفششها بزاف عادي تبغيه
لقمان: و حتى انا كنغير علاش زعما كاتبغيه هو و انا لا هانا غانوض نبكيلكم حتى انا
جنات سمعات هضرة باباها و دارت شافت فيها و ضحكات حتى بانو سنيناتها و صيفطاتلو قبلة فالسما
جنات: ما تبكيش نتا راك بابا الحبيب و ما يعجبنيش نشوف دموعك
لقمان : هه ياك بعدا اوا لابس
هنادي سهات فجنات و عجباتها علاقتها مع عمها و باباها ، و عجبها كيفاش مفششينها و كيفاش كيهدرو معاها و فنفس الوقت تمنات كن حتى هي تشوف باباها تمنات كن حتى هي عاشت نفس الطفولة ديال جنات تمنات و تمنات و لكن كيبقى الواقع هو الحقيقية اللي ما يمكنش نغيروها و باباها مات و ما عمرها حظات بهاد الاجواء العائلية اللي كتعيش فيها جنات ضحكات على تفكيرها سخيف و تنهدات ....{ ما كل ما يتمناه المرء يدركه تأتي الرياح بما لا تشتهي السفن -المتنبي }
كاظم مرر يدو بحنان على ضهر جنات و دار شفايفو على شكل بوسة 💋 و جنات شدات خدودو بجوج و باستو ففمو بوسة طويلة خلات هنادي غير كتشوف و كتفقص غير هي و عضامها ماشي غيرة من بنت صغيرة عارفاه عمها و علاقتهم زوينة و حاجة عادية تبوسو فشفايفو و لكن ما عرفاتش علاش ما كرهاتش تكون هي فبلاصتها عضات على شفايفها و نعلات الشيطان فآخر لحظة حيت شافت الوضع بدا كيخرج على سيطرتها ....
بعدات جنات عليه و قال ليها كاظم بصوت حنون كما العادة
كاظم: شنو خاصك ديري دابا همم
جنات: نبوسك مرة أخرى أعمو
كاظم هز راسو شاف فسقف و ضحك و حرك راسو يمين شمال و رجع شاف فجنات و قال
كاظم: لا غاتطلبي السماحة من هنودة على الكلام اللي قلتي ليها
جنات: امم نبوسها حتى هي
لقمان: نتي غير مدلية شواربك اللي بانلك كتبوسيه كيف ديك الحمقة
زبيدة : ههه بعد من البنت باقا صغيرة ولايني معدرها علاه اللي غايكون عندو أب بحالك غايكون بعقلو
هنادي و كاظم ضحكو على كلامهم و جنات دلات شنيفاتها باش تبوسها عطاتها هنادي خدها و هي تعضها فيه حتى طلقاتها هنادي بغوتة حيت قصحاتها ...
جنات بعدات عليها كضحك و كاظم بقا مصدوم من تصرف لي دارت الشيئ اللي خلا لقمان يتعصب و ناض حيدها ليه من يديه و جلسها حداه و قال بصوت رجولي خشن خلا جنات ترعد فبلاصتها
لقمان: وااش ما بغيتيش تحشمي نردك عند مك اش هاد تبرهيش اللي ولا فيك باغا نقلب الفيستة عاوتاني نوض نديك عند ماماك دابا راه ما عنديش المشكل و بقاي تعصبيني عاوتاني
جنات تجمعو فعويناتها دموع و سكتات و هبطات راسها التافت لقمان لعند هنادي و قال
كاظم حط يدو على خد هنادي اللي فيه سنان جنات مرسومين الشيئ اللي خلاه يتعصب بدورو و شاف فجنات و قال بصوت رجولي قااصح
كاظم: شنو هاد التصرفات أجنات قلتلك طلبي السماحة ماشي عضيها comme un chien * بحال الكلب *
لقمان: راه غير الكلب نيت اللي كيعض ماشي بنادم هادشي اللي تعلمتي من ماماك
زبيدة : شووت صافي بعدو منها
ناضت هنادي من حدا كاظم و جلسات حدا جنات و عنقاتها و قالت بصوت طفولي
هنادي: صافي أماما الله يسامح ما تبكيش عفا بنتي
جنات حشات وجهها فصدر هنادي و كتنخصص بالبكا
جنات:ع..ع...ع..علاش ك..كيغوتو عليا اهئ اهئ
هنادي: صافي غير حيت درتي تصرف قبيح داكشي علاش
جنات هزات عويناتها المدمعين و شافت فوجه هنادي و حطات عليه يديداتها الصغيورين و قالت
جنات: سمحيلي غير بغ..ب .بغيت نلعب معاك اهئ اهئ
هنادي ضماتها لصدرها و قالت بصوت حنون
هنادي: و صافي انا سامحتك و لكن بشرط نوليو des amis
جنات :* بابتسامة * oui avec plaisir *نعم بكل سرور *
هنادي حطات صبعها على خدها و قالت
هنادي: و دابا بوسيني ديال بصح عنداك تعضيني ههه
جنات ضحكات ببراءة و قربات لخدها و هاد المرة باستها بوسة طويلة كدليل على صداقتهم اللي تكونات فمدة ثواني قليلة الشيئ اللي خلا هنادي تفرح حيت على الاقل ما غاتبقاش تكرهها....
لقمان: مازال اختي كاثيقي تعطيها حنكك ههه
هنادي: صافي حنا دابا ولينا أصدقاء ياك أحبيبية ياك
حطات هنادي يديها على بطن جنات كاتهرها الشيئ اللي خلا هاد الاخيرة تفرك بضحك و اللي خلا كاظم يسها فهنادي و معاملتها لجنات زادت كبرات فعينو بحنيتها و بتعاملها اللطيف مع الدراري الصغار 😇😇 أما الابتسامة و الضحيكة اللي مرسومة على ثغر هنادي ديك ضحكة جميلة اللي كتخلي حفيرات الزين يترسمو على خدها و عويناتها يتغمضو هديك الضحكة بالضبط كتخلي قلبو يطلب غير قبلة من شفايفها تسوى عندو الدنيا و ما فيها كن غير تعرف شنو كدير فقلبو بشخصيتها الحنونة اللطيفة الكيوت اللي كدخل لخاطر قلبو غراااااااق فيها و ما عرفش علاش و لكن واش بصح كايشوف فيها ملاك ؟؟؟ ولا كيشوفها بشخصيتها ؟؟؟هدا هو السؤال المطروح ماشي ديما كايكون تفسير الأطباء صحيح حيت كايبقاو بشر و البشر خطاؤون و شحال من حالة كيعجزو يشخصوها كيفما وقع لسيف فتحليلو و تشخيصو لحالة كاظم هو ما دخلش لقلبو باش يعرف باش كيحس من جيهة هنادي هو بصح مريض نفسي و لكن شخصية هنادي كتأثر عليه بشكل كبير و ممكن هي العلاج ديالو اللي كايتشفى على يدو بحال داك الدوا اللي كتناولو فاش كتكون مريض و كيتخلط مع الدم ديالك و كيمشي لبلايص محددة و لكن كيخصو الوقت باش يعطي الفعالية ديالو داكشي اللي كيحدث لكاظم فهاد اللحظات هنادي بمثابة جرعة دواء كيتناولها يوميا و كل نهار كتخفف عليه آلامو و كتحيد المرض الخبيث اللي بقا لاصق فذاكرتو اللي هو ملاك ...
تنهد و حط يدو على قلبو اللي كيحس بيه غايخرج من قفصو الصدري بمجرد ما كيشوف ابتاسمتها واش حتى لهاد درجة طاح فيها و عشقها فمدة قصيرة هنا غايكون تحليل ديال سيف صحيح لانه تهوس بيها حيت جاتو ففترة اللي كان محتاج لانثى فحياتو اللي تخفف عليه حيت هو كان منغلق على ذاتو و نهار كامل كيفكر فملاك و بنتو اللي توفات و الزواج حقا هو أنسب علاج لحالتو لانه بهاكا غايكتاشف شخص جديد و حياة جديدة غاتخليه ينسا الماضي شوية بشوية يعني كاظم كان خاصو شي حد اللي يخلق الاثارة فحياتو كان خاصو الشخص اللي غايخليه ينسا ملاااك و ما يبقاش يفكر فيها نهار و ما طال حيت كيفما قال سيف كان كيرد اللومة لراسو و ربما الحب ديالو لملاك من زمان مات غير بقا متعلق بيها و عند بالو بلي الا بقا بلا زواج غايبقى وفي ليها و هاكا غايكون كيكفر على دنب ديالو حيت بسبابو ماتت هي و بنتو و ما نساوش بلي هنادي عندها نفس الاسم ديال بنتو الشيى اللي خلا هنادي تكبر فقلبو حيت بالنسبة لكاظم هنادي اسم مقدس اسم قريب لقلبو و كلما ناداها بيه ربما كيحس بيها بنتو و كيحس بلي من الواجب عليه يقدم ليها الحماية و الحنان لازم و لكن الايام القادمة اللي غاتحكم على هادشي و غاتأكد صحة هاد الفرضيات ؟؟؟....
ريان حرك ليه راسو بالايجاب و كلشي كيشوف فيهم وخصوصا هنادي اللي ساهية فكاظم ما حيداتش عينيها عليه كأنها كتحفظ ملاميحو ...
ريان: نتا غاتولي راجل خالتو هنادي
كاظم : براافو عليك دكي مشاء الله * باسو فحنكو و رجع راسو اللور * كيف كاتجيك خالتو هنادي؟؟ ضريفة معاك ولا ..*هز عينو و شاف فيها لقاها ساهية فيه ابتاسم و كمل كلامو * هنودة شريرة ولا ضريفة ؟؟ هدر ليا عليها
ريان حرك راسو بنفي وعوج فمو جنب وقال
ريان: شريرة بزاااف
هنادي صرطات ريقها بصعوبة تمنات الارض تشق وتبلعها وكتحلف على ولد ختها داخلها غير هي و راسها واما تا ما باقي ضحك على كلام ريان ...
سعاد كتحط شلايض و الزيتون من فوق الطبلة وكتهدر
سعاد: قلبك عامر على خالتك اولدي
كاظم:*بابتسامة * شنو كدير ليك شريرة ديال هنادي
ريان : ما كتبغيش تعطيني الوراق فاش كاتكون كتقرا و ما كتخليليش ستيلوياتها و فاش كانكون كانغني كضربني و كتقولي سير حدا ماماك و كتغوت عليا فاش كتكون كتفرج و كندير ليها صداع
كاظم دار راسو مصدوم و شاف فهنادي و عض على شفتو السفلية و قال
كاظم: كتديري ليه هادشي كامل ما حشمتيش
زبيدة كتقاد درتها و قالت بابتسامة
زبيدة : ههه و حيت كيدير ليها البسالة داكشي علاش
لقمان : اوا نتا كتدير ليها هادشي كامل و ما بغيتيهاش ضربك كن كنت انا كن علقتك من شفارك ههه
سعاد : ولدي ضريف ما كيديرش بسالة ياك احبيبي
لقمان : تبااارك الله هادشي كاامل و ما كيديرش بسالة
سعاد خنزرات فلقمان الشيئ اللي انتابهات ليه زبيدة و قرصاتو ففخدو و قالت بهمس فودنو
زبيدة : مالك مبلوز مالك سد حلقك بيناتها هي و ولدها نتا اش حشاك
سعاد إنصارفت للكوزينة عند لالا فضيلة و بقا ريان فأحضان كاظم اللي مرر يدو على ضهرو و قال
كاظم : انا غانديها معايا و غاتبقا فراحتك ما كاينش اللي غايضربك
ريان قال بصوت طفولي
ريان: فين غاتدي خالتو
كاظم: غانديها معايا لداري وتسكن معايا ففرنسا
ريان تجمعو فعويناتو الدموع و قال
ريان: واش بعيدة بزااف
كاظم حرك راسو بالايجاب و قال
كاظم: بعيدة شوية كنمشيو ليها بطيارة
ريان دلا شنيفاتو و طاحت دمعة من عينو
ريان: لاا عفاك ما تديهاش خليها معانا واخا هاكاك هي زوينة عفاك ما تديش خالتو
كاظم مسح دموع ريان بصبعو الكبير و قال بابتسامة
كاظم: شوت ما تبكيش غانبقا نجيبها ليكم تشوفوها
ريان بسرعة فرح و مسح دموعو
ريان : واااو يعني ما غاتمشيش فخطرة
كاظم حرك راسو بنفي الشيى اللي خلا ريان يفرح و عنقو و كاظم ابتاسم و مرر يدو على ضهرو و واحد البريق زوين كايكون فعيون كاظم منين كايتكلم مع الاطفال او لا فاش كيكونو فأحضانو الشيئ اللي انتابهات ليه هنادي و تفكرات كلام زبيدة فاش قالت ليها بلي باغا تولد ليه شي بنيتة ولا ولد حيت كيحماق على الاطفال تنهدات فاش تخايلات كيفاش غايكونو أبناءهم فالمستقبل دابا بصح غايتزوجو و غاتقدر تولد الا بغا الله و غاتولي عندها كريشة بصح غايكونو أبناءها من كاظم الشخص اللي بان فحياتها كيف قطرات الماء فأرض جافة متعطشة شنو دارت فحياتها باش يرزقها الله بشخص بجمالو و بهيبتو و الاهم من هدا جمالو دااخلي و روحو طيبة كتحس بدماغها و قلبها و عيونها و روحها و داتها تعلقات بيه كيف تعلق الطفل بواليديه ما بقاتش قادرة تخايل حياتها بلا بيه اااخ كن يعرف كاظم شنو دار فقلب هاد اليتيمة اللي حياتها كلها و هي عايشة مع خوت صعاب عمرها ما شافتهم شي نهار حنو فيها ولا قالو ليها كلام طيب بمجرد ما لقات فكاظم حنان عمرها لمساتو فحياتها بغاتو و طاحت فيه ديال بصح كانت متعطشة و محتاجة لشي شخص بحالو و كيفما كتقولو ديما كاظم هو رحمة اللي جاتها من عند الله بهيئة إنسان كأنه جزاء على صبرها سبحان الله ما كدبوش اللي قالو كلما إشتدت لا بد من الرخاء ما كدبوش اللي قالو بعد ضلام الليل كايجي نور صباح و بل الاكثر من هدا كلام رب العالمين {سَيَجْعَلُ اللَّهُ بَعْدَ عُسْرٍ يُسْرًا }
جابت لالا فضيلة الطبسيل فيه ثلاثة ديال دجاجات محمرين نعام سيدي و فوق منهم عويدات فيهم طريفات د الكاشير و الجبن و مع زيتون فجناب داكشي مقاد على حقو و طريقو مع شليضات و زويتنات مشرملين و تكتوكة فطبسيلات و جابت سعاد شبكة د الخبز و قطعاتو و حطاتو ليهم حداهم و قالت لالا فضيلة بابتسامة
فضيلة : مرحباااا بيكم نهار كبير هدا غير قبلو علينا
زبيدة : الله ياودي الخير و البراكة
بوجمعة : اوا قولو بسم الله لايمشي يبرد هادشي سي كاظم مد يديك عفا ولدي سي لقمان لالا زبيدة كولو ما تحشموش دار راه داركم و دابا حنا عائلة أو لا هههه
زبيدة : الله يكبر بيك أ شريف
كاظم:*بابتسامة * شكرا
لقمان : الله هاد دجاج بااين وااعر نتي اللي طيبتيه أ الحاجة ولا ياكما مراة خويا
فضيلة : ههه مراة خوك ما تعرف طيب حتى بيضة انا اللي طيبتو أوليدي بصحتك و راحتك
زبيدة : دابا تعلم مسكينة مزال صغيرة
فضيلة : اوا راك عارفة هاد جيل الكوزينة تقوليها عدوتهم ما كيحملو يدخلو ليها و انا قلتها ليكم نهار اللول راه طياب ما كتعرف منين تجيه
هنادي تحرجات من كلام مها و لكن حبيبها كيمو كاين اللي كايدافع عليها ديما ... قال بصوت رجولي خشن
كاظم: حتى انا قلتلك نهار اللول قابل عليها كيفما كانت و زايدون انا ما مزوجش بيها باش تطيب ليا أ ميمتي انا بنتك غانتزوج بيها باش تكملني و تشاركني حياتي و الحمد لله طياب و داكشي كامل كاين اللي كايتكلف بيه
فضيلة : اوا الله يكمل ليكم بالخير اولدي
كاظم : هنادي حاطها فقلبي أميمتي قبل عينيا ما تحتاجيش توصيني
بوجمعة : الله يرضي عليك اولدي هاكا يكونو الرجال و لا بالاك
زبيدة متقات و خنزرات فبوجمعة ما حملاتوش منين دخلات ما تسرطش ليها و بقات كتقرا فأيات الكرسي و المعودتين فنفسها باش ما يعينش ليها ولدها بكلامو ...
زبيدة : اوا الله يجيبنا فصواب أ لالا فضيلة
فضيلة : اه بعدا وجدو ليها الوراق ولا مزال
كاظم : الباسبور غدا إنشاء الله يكون واجد غير الفيزا مازال تعطل شوية
لقمان : شحال ديال الوقت
كاظم :و الله ما عرفت ما زال ما هدرت مع صاحبي اللي غايتكلف بالاوراق و لكن ما غايفوتش une semaine
زبيدة : و لكن نتا راه خاصك تمشي نيت فهاد الصيمانة
كاظم : اوا و عاود الا ما طلعاتش الفيزا دغيا خاصنا نتسناو شوية ما عندك مادير
فضيلة : اوا الله يسهل الامور اولدي
كاظم: اللهم امين أ الحاجة
فضيلة : هه ما حاجاش اوليدي مازال ما كتاب
زبيدة : كنفايلو عليك
فضيلة : اوا لهلا تحرمنا من داك المقام
كاظم : انا نديك أميمتي هاد العام تزوري داك المقام
فضيلة بالفرحة ودنيها تسمكو و طاح الطرف د الخبز من يديها و قالت بصوت متقطع
فضيلة : ك..ك..كيفاش اولدي
كاظم هز عينو و شاف فيها بابتسامة و قال بصوت حنون
كاظم : ياك قلتي بغيتي تمشي للحج اوا صافي هاد العام غاتمشي ليه بإذن الله و انا نتكلف ليك ...
التافت شاف فهنادي اللي كانت مشوكية و مسمرة فبلاصتها و كتبادلو نظرات هي براسها تخلطات عليها الفرحة و الصدمة و كمل كلامو
كاظم : هنادي قالت ليا بلي من بين أحلامها تديك و انا غانتكلف ليك حيت انا ولدك ياك أميمتي
فضيلة حطات يديها على قلبها و حسات بدموع تجمعو فحافة عينيها و بدات تدعي معاه
فضيلة : الله يعطيك ما تمنا اولدي سير يا وليدي بغيت ربي يحفظك كيفما حفظ لسان بين سنان بغيت العين اللي شافتك ترضاك انا بغيتلك الستر و جيبك يعمر انا بغيتك تبقا ديما لفوق لفوق انا بغيت كلامك يحلا و عدوك يتجلا انا بغيتك نهار الخايب تكون غايب انا بغيتلك يا وليدي ستر اللي ما يبلا ما يخسر و الرضا و الحلوة المكرضة
كاظم : بصحتك أ ميمتي إنشاء الله ما ترفدي الهم حتى لحاجة انا نهار اللول قلتلك انا غانكون ولدك و اللي بغيتيني فيها انا موجود
سعاد : الله يجازيك بخير أخويا ميمتي من شحال هادي غير كتشوف مكة فالتلفازة عينيها كيدمعو سير كيفما فرحتيها الله يفرحك
زبيدة فرحانة بولدها و مفتاخرة بيها ابتاسمت و قدات كتاف جلابتها و قالت
زبيدة : حنا عائلة دابا أبنتي راه حتى لالا فضيلة ميمتو
هنادي ما عرفات ما تقول او بالاحرى حشمات غير شوفات اللي كدير فيه كيلخصو كلشي فرحانة و ممتنة ليه و مفتاخرة بيه لاقصى درجة غير شوفتها كيلخصو كلماتها اللي ما قدراتش تنطق بيهم ...شاف فيها كاظم و ابتاسم و غمزها عضات على شنايفها و هبطات راسها كتاكل ...
كلاو و سالاو و ناض كاظم و قال
كاظم : هنادي عفاك فين الحمام
رغم أنه عارف مكانو بغاها تنوض معاه حيت توحش ينفرد بيها و يتكلم معاه ... هنادي ناضت على نيتها و قالت
هنادي: واخا اجي معايا
خرجات من صالون و تبعها هو حتى وصلات للحمام و حلات ليه الباب و قالت بصوت خجول
هنادي: تفضل
كاظم : شكرا أ حبيبتي
بغات تمشي و هو يشدها من يديها و قال بصوت حنون
كاظم: ما توحشتينيش أراحة قلبي امم
هنادي طرطقات فيه عينيها و قالت
هنادي: ياك عاد كنت معاك و حداك
كاظم : واخا هاكاك توحشتك بمعنى توحشت نسمع صوتك و نكون غير انا و ياك أحبيبي هاكا عين لعين توحشت نهدر معاك
هنادي : ههه واخا اسيدي هانا كنهضر معاك و هانا حداك و لكن ماما و ختي و لا خالي غايشوفونا و انا ما فيا اللي يتشوه قدامهم كنحشم
كاظم: كاتحشمي توقفي مع راجلك ؟؟؟
هنادي : مزال ما تزوجنا
كاظم حط يدو على خدها و كيمرر صبعو بحنان على خدها و قال بلطف
كاظم : غدا إنشاء الله غاتكوني مراتي على سنة الله و رسوله ما كاين لاش هاد الخجل اللي كانشوفو انا لا اساس له من صحة فوضعيتي انا و ياك
هنادي صغرات فيه عينيها و قالت
هنادي: كطمعني دابا باش ناخد راحتي معاك فالكلام و باش تدير اللي بغيتي ياك سمحلي و لكن ما غانعطيكش الادن
كاظم:*باستغراب * اش كتقصدي ما فهمتش ؟؟
هنادي: راك فهمتييني بلا ما دير فيها ما فاهمش
كاظم بقا ساكت مدة و عاد فهمها شنو قصدات دور وجهو جنب و ضحك و رجع شاف فيها و قال بابتسامة
كاظم : صافي فهمت توء ما يمشيش بالك بعييد ، انا باغيك تهدري معايا و تقوليلي اي حاجة طاحت على بالك شنو كايعجبك شنو ما كيعجبكش بغيت نحس انا و ياك وااحد ديال بصح ماشي غير بالهدرة و الكلام بغيت نعرف كلشي على راحة قلبي و ما نبغي تخبي عليا حتى حاجة من هنا للفوق واخا ابنتي
هنادي حركات راسها بالايجاب و كتدور وجهها كتشوف واش جاي شي حد منين مالقات حد ارتاحت و رجعات شافت فيه و قالت
هنادي: بغيت نطلبك واحد الطلب صغييير عفاك
كاظم : شنو هو آمري أ راحة قلبي واخيرا غانسمعك كطلبي مني شي حاجة يالاه vas-y حبيبتي شنو بغيتي
هنادي: بغيت غدا فالحنة نعري شعري واش ممكن تخليني ياك غايكونو غير العيالات بيناتنا ما فيها والو
كاظم عض على شنايفو و ربع يدو و بقا ساكت كيشوف فيها و من ملاميح وجهو قدرات تعرف بلي طلب ديالها مرفوض ...
هنادي: صافي انا غير قلت الا ما بغيتيش بلاش
كاظم : ديري ديك الشدة اللي درتي فصباح كتعجبني و لكن باش تحيديها ويشوفو شعرك لااا ما نقبلهاش
هنادي بعدم رضا قالت معوجة فمها
هنادي: أصلن على زين شعري
كاظم مرر لسانو على شفايفو و حك لحيتو و قال بابتسامة
كاظم: علاش وصفيه ليا
هنادي : عادي ماشي يصحابلك مسبسب حرير شعري غير على قد الحال
كاظم : بغيت نتأكد من السلعة ديالي دابا قبل ما نديها عري شعرك نشوفو لا تمشي تصدقي بلا شعر و نصدق مقولب
هنادي : ههههه عندي شعر غير هو أكيد ماشي شي شعر اللي يحمر الوجه المهم الحمد لله عليه كاين اللي ما عندوش
كاظم: واخا تكوني بلا شعر انا قابل عليك
هنادي تزيزنات و حنيكاتها حماارو وهبطات وجهها بسرعة كتحس بصهدة طالعة معها اما قلبها كيدق بسرعة كأنه باغي يقفز من صدرها لبين يديه ما بقاش قادر على هاد الكلمات قلبها صغير ما يقدرش يتحمل هاد الكلام الحلو اللي نزل عليه بين ليلة و ضحاها حتى هو معدور كيبقى غير عضو صغير لانثى ضعيفة بحال هنودة كيف دير ما تغراقش فحبو كيف دير ما تطيحش فيه و هي اللي ما عمرها سمعات بحال كلامو و ما عمرها شافت بحال شخصيتو حتى فالقصص اللي كتقرا ....
كاظم دار يدو فجيبو و قال
كاظم: غدا إنشاء الله غانصيفط ليك بنات خالتي يديوك لصالون و ديري لي بغيتي فشعرك المهم صبغيه قطعيه خليه فلونو المهم شنو ما طاح على بالك ديريه ما حدي مازال ما شفتو و لكن نهار غانشوفو انا اللي غانولي مسؤول عليه * جر ليها حنكها * فهمتي أ زوينة
كاظم : كنظن بلي نتي عروسة و من حقك تمشي و تهلاي فراسك او لا
هنادي : شكرا على كلشي
كاظم : ما بيناتنش أحبيبتي خودي راحتك اخر مرة نسمعك كتشكريني على شي حاجة غير هو بشرط ما تكثريش المايكاب كلما كنتي طبيعية كتباني زوينة و من وجهة نظري ما تديريهش كاع خليك طبيعية داكشي غير des produits chimique كضر la peau ديالك و من فوق هادشي كامل المكياج مديور لناس اللي ما كيثيقوش بجمالهم و لكن نتي مشاء الله زوينة من عند الله ما تحتاجيش كاع لداك تخربيق
هنادي رمشات عويناتها بسرعة و قالت بدلع
هنادي: دابا كتعتارف بزيني بطريقة غير مباشرة
كاظم ابتاسم و حرك راسو يمين شمال و قال
كاظم: نعتارف بزينك حتى مباشرة ما عنديش مشكل
هنادي دارت يديها بجوج تحت خدها و تكات عليهم راسها جا شكلها كيوت كيف شي بريهة و قالت
هنادي: ههه و را هما اللي فاش كيشوفو راجل زوين و حنين و رومانسي كيقولو عليه عنيبة
كاظم: شنو زعما خاصني نعطيك العصا و نرفع صوتي عليك باش نتسمى راجل * ابتاسم باستهزاء * غير خليني نتسمى عنيبة ولا حتى فريزة ما عنديش مشكل
هنادي قالت بدون وعي منها كأنه قلبها اللي تحدث
هنادي:هههه من ناحية نتا فريزة فريييزة و حلوة من الفوق
كاظم عض على شنايفو بفرح و قال بابتسامة
كاظم: حتى نتي عنيبة على هاد الحساب
هنادي صرطات ريقها بصعوبة فاش تفكرات شنو قالت ما لقات ما تقول بقات غير كترمش فيه و كتعض فشنيفاتها حتى سمعات خطوات ديال شي حد موراهم التافتت شافت لقمان اللي كان حابس ضحكة بزز و شاف فخوه و قال
لقمان: اودي يا ودي مشيتي تغسل يديك صدقتي ساكن هنا
كاظم: بديتي عاود
لقمان: ناشط عليك أسي العريس هانا ثاني على با كاظم و عش زوجية غادخل للقفص ذهبي
هنادي بغات تنصارف وهو يشدها لقمان من دراعها و قال بابتسامة
لقمان: تي مالك غير كنهضرو كتحني راس و تبغي تسلتي دوي معانا
كاظم : كتحشم
لقمان : و معانا طيري لبلايك راه حنا عائلة حمقة مسطية ما عندناش مع هاد الحشمة زايدة
هنادي: ههه لا والله ما كنحشم غير ما كنلقا ما نقول
لقمان عض على شنايفو و شاف فكاظم و قال
لقمان: سمعتيها قالتلك كاع ما كتحشم صافي اخويا واقيلة هاد البنت كاع ما صالحة ليك ما عندك ما دير ببنت ما كتحشمش
هنادي طرطقات فيه عينيها و قالت
هنادي: لاااا لاااا ما قلتش هاكاك ما تفهمش غلط
كاظم دار يدو فجنابو بطريقة زوينة و قال مع ابتسامة و شاف فلقمان
كاظم: بعد منها
هنادي: لااا غير خليه ناشط و مطلع عليا طوبية نسيتي نهار سخفت بسبابك
لقمان : هههه لا و الله غير كنت باغي نضحك معاك و تا نتي على سبة
هنادي: ههه و لكن راه تخلعت ديال بصح و الله و لكن ماشي مشكل كلشي داز
لقمان : اوا انا نواااور ماشفتيش واحد معتز ولد خالتي الا جلستي معاه غير نهار يفلاشيك يردك كتلوحي حوايجك فزنقة و الضحكة على وجهك
هنادي: اه زعما يقدر يجي ياك أ كاظم باغا نتعرف عليه مباشرة
كاظم طلع حاجب و نزل لاخور وقال بصوت رجولي
كاظم : راك تعرفتي عليه ديجا نتي غاتبقاي غير كاتعرفي عليه
هنادي: لا حيت عجباتني شخصيتو و صافي مثيرة للإهتمام زعما
كاظم : مزيان انا اللي راجلك عمرك شكرتي فشخصيتي
و ولد خالتي كتشكريه قدامي هانية القضية عندك ما عندكش مشكل
هنادي: و دابا انا ما قلت والو علاش كتدوي معصب بحال تقلقتي
لقمان شاف طرح بدا يحماض و مد يدو لهنادي باش يسلم عليها حيت غايمشي
لقمان : أ لالا نهار غليض هدا اللي شفناك على خير و بخير مرحبا بيك معانا الله يعاون
هنادي: صافي غاتمشي
لقمان : خاصني ندي جنات لماماها و الله ما يصلاحش ليا المهم نتلاقاو غدا
هنادي: و فينا هي جنات ؟
لقمان : بقات مع لالاها هانا نعيط ليها تجي...جنااات
جنات سمعات باباها كيناديها و مشات كتجري لعندهم
جنات:oui papa
طلق ليها يديه و شدات فيها و قالت بصوت طفولي
جنات: صافي غانمشيو
لقمان: الا بغيتي
جنات: ما سخيتش بيهم
طلقات من يدو و تشبطات فعمها كاظم هزها من الارض و عنقها عندو و باسها فخدها و زيرات عليه و قالت
جنات:tu vas me manquer beaucoup ( غانتوحشك بزاف)
كاظم: moi aussi ma belle
دلات شنيفاتها و التافتت شافت فهنادي و قالت ببراءة
جنات: ما تقلقيش عمو واخا
هنادي ضحكات و حركات راسها بالايجاب و قالت
هنادي: واخا شنو آخر
جنات دارت يديها على ذقنها كأنها كتفكر 🤔🤔 و رجعات شافت فكاظم و باستو ففمو و بعدات و حطات صبيعاتها على شفايفو و قالت .
جنات: ما تبقايش تبوسي عمو من هنا هادي بلاصتي بوحدي
هنادي غمضات عينيها و عاودت فتحاتهم و غلباتها ضحكة من كلام جنات و حنات راسها ...
جنات: ما قلتيليش واخا
لقمان حيد جنات من يد كاظم وقال
لقمان:ما تديش عليها اختي هنادي راه شوية زنزان دات ليا شي عرق من معتز يالاه الله يعاون
حل الباب و خرج هاز فيدو جنات ...طلع بنتو فالطوموبيل اللور و دار ليها حزام السلامة و باسها فخدها و زدح الباب بالدورة باش كيدور كيلمح جسم فتاة ممشوق كأنها لوحة مرسومة ما فيها حتى خطأ فورمتها طرباتو بل الاكثر من هدا سطاتو عض على شنايفو و بقا واقف كيطلعها و يهبطها بعينيه كانت عاطياه بضهر داكشي علاش كان واخد راحتو أما شعرها الاسود الطويل حكاية أخرى فيا ترى من هي هاته الفتاة؟؟؟.....
أنا لست إبنتك أنا زوجتك الجزء الخامس
محتوى القصة
التنقل بين الأجزاء