قطعات عليها وقابلات بيازيد وشغل الدار كتلف من هنا ومن لهيه ودوز الوقت وتسنا فغدا يوصل بفارغ الصبر .
صبح الحال ومع حلة دعينيها طارت على تيليفون قبل مايفيق الكل ودخلت كتجري لتيندر .. لوات عليها الشال وبعتات الكام .. تسنات شوية حتى قبلها وكان فالبيرو جالس بحال العادة
اشراق: شنو درتي ؟؟ ماتحبطنيش عفاك اعلي شنو درتي ؟
بقا ساكت مطولا وتلفت قائلا بإحباط
- لبارح ضرت على كاع الناس اللي كنعرف واحد واحد بالتيليفون ... كل واحد شنو كيقول وكل واحد عندمن كيسيفطك .. كااااينين الناس ديال ماغياج بلون ولاكن راه ماشي كونفيونص 100% وانا مكنعرفهمش شخصيا باش نحكم ... واحد لي وراه ليا واحد صاحبي عيطت ليه قاليا راه ديرو مع شي وحدة كيتسنا يطلع ليها الوراق .. ماعندوش كي يدير ..
ردت بإحباط : اويييلي وشنو ندير انا نبقا هنا فالمحنة
طلعات السطح ووقفات كتعض فشنايفها وتقفقف وتسنا فيه يقبل الكاميرا وهي كتشطح بالخلعة فبلاصتها
فتح الكام وهوا جالس فالدار بتيشورط كحلة مربع يديه على الطبلة وحداه استريلا بالبيجامة ديال المشاش جامعة شعرها و مشتتة الدفاتر وشادة ستيلو . باينة كان كيحفض معاها حتى قاطعاتهم اشراق بكامرتها.. هز الكيت دارو فودنو ورد
- وي اشراق
ردت بتوثر : علي انا فموصيبة
تنهد ورد : عرفناااك فموصيبة
اشراق: هضرتي مع صاحبك ؟
علي: هضرت معاه ... وعييت فيه ... ميقدرش .. عندو صاحبتو غيوقع ليه معاها مشاكل مقدرش يغامر
رد بهدوء: نعلي شيطان واش حساب ليك غترمي راسك غترتاحي!! هادشي اللي نتي فيه مقارنة مع دتكشي اللي غتولي فيه من بعد الانتحار راه كيف والو
ردت ببكاء: بابا كان غادي ليوم للجبل وقفتو بلا منشعر ... قلت ليه غيجي واحد يخطبني من كندا... عطاني مهلة من هنا لعشيا ... الى عاق بيا غادي يدبحني ماشي غيزوجني وصافي
جمع حواجبو وقال بجدية : كفاش قلت ليه غيجي يخطبك وهاهوا هاد العريس ديالك صدق مجاياش ... شنو غديري دابا
بدا ضرب فمها وترغب: عفاااك عفاااااك اعلي الله يرحم ليك لميمة انا نعطيك نمرة دبابا هضر معاه تبتو على بيدمن نلقا شي حل .. لميمة اعلي
تعصب وهز تيليفون وناض من حدا استريلا دخل للبيت وسد الباب وقال
- اشرااااق مادخلينيش فمشاكلك الشخصية الله يخليك ... خلينا مزيانين وماتندميننيش على هاد العلاقة عفاك ... انا ماعندي مندير ليك فهادشي هادا وحاولت معاك مجابش الله تيسير .. كثر من هادشي مكاينش
ردت بتوسل: علي ... نتا عارف الوحلة اللي فيها انا ... ماطلبت منك والو ... ياك مغاديش يشوفك ولا يعرفك ..صافي عيط ليه هضر معاه غير باغ تيليفون هوا كيتسنا تيليفون ... متجبدش ليه حس ماغياج بلون راه غيبدا يبحث ويقلب حتى يعرف .. نتا قوليه غير انا باغي نتزوج بنتك وغنجي نخطبها
رد بصرامة : الاااا ... الا هي لا ... هادشي اللي كطلبي من سابع المستحيلات .. منقدرش نضحك على راجل كبير ونوهمو بشي حاجة مكايناش ... ساط) اشراق غادي نقطع استريلا عندها متيحانات خاصني نراجع معاها شوية
ناضت كتبكي وتغوت انا ماعندي زهر ما عندي حياة ما عندي اللي يحن فيا .. دخلت فهستيرية من البكاء ومشات بغات تنقز من السطح بالفقصة .. حمار وجه وتعصب بدا كيغوت عليها توقف .. فقد اعصابه وقال بغضب
بقات ساكتة كتشوف فيه مصدومة وقبل متنطق حط صبعو على فمو وقال
- حتى كلمة ... نمرة دباك
هبطات الراس وملات عليه الرقم دباها وهوا كيقيد ... حدو خداه قطع عليها فالبلاصة خلاها جالسة كتبرد غدايدها فالبكا بوحدها فالسطح حتى ضلام الحال .. سمعات صوت الطموبيل رصات حتى الدار وطلات شافت باها خارج .. نزلات كتجري دخلات للدار قبل ميدخل ومشات دارت راسها كتجمع فالكوزينة ... سمعات تحنحينتو وهوا كيدور فقلب الدار وخرجات دايزة من حداه .. تلفت شاف فيها وقال
- اجي هنا
قربات : نعام
رد : جلسي .... دابا باااغيا تمشي لكندا ؟
ردت: الى كتاب ماعنديش مشكل
رد : اممم ... المهم ... غادي تمشيو نتي ومك للجبل ... شي يامات غادي نعاود الصباغة للدار ... تقشرو لحيوط ... والناس الى جاو خاص يلقاو لحيوط نضاف
ردت : واخا
رد : سيري جمعي حوايجك غنسيفطكم الصباح يالاه
ناضت غادية بأدب حتى دارت مع الحيط ورجعات وقفات كتسنط عليه كيهضر هوا والحاجة
الحاجة : امدرا ؟؟؟ عيط ليك؟؟
رد كيشرب اتاي : اممم ... السيد باينة فيه معقول كيهضر نشان
الحاجة شنو قالك ؟
الحاج: تنهد وحط الكاس ) عيط ليا ... السلام عليكم عليكم السلام .. الحاج عبد الغني .. ايه هوا هادا ... مع علي ماعقلتش على كنيتو اللي قال .. من كندا وداكشي .. سول على العائلة وكيهضر مزيان ويعرف يهضر . ... باغي بنتك اشراق على سنة الله ورسوله الى قبلتي علينا .. قلت ليه اللي جا من الباب مرحبا بيه .. صافي قالي انا عايش هنا هادي ربعطاش لعام .. باغي نتزوج ونجيب معايا المدام تعيش معايا هنا .. ولاكن دابا راني يالاه جيت من المغرب من الموت ديال الواليدة ... صبر عليا شي شوية وغنجي باش نخطب
الحاجة : اممم مسكين الله يرحمها
الحاج : داكشي اللي قال .. قالك ماتو الواليدين بقاو غير الخوت ... قلت ليه شحال غادي تجلس ... ؤته الهضرة فتيليفون مكتقضي والو ... خاص ضاروري نشفوك .. دير اللي كيديرو الناس بعدا ... حتى الى كنتي نتا بعيد مافيها باس تجي بعدا العائلة ونتعرفو عليها وماشي مشكل ديك الساعة راه الى جاو نابو عليك بحال الى جيتي نتا .. حتى وكان تجي
الحاجة : وشنو قالك؟
الحاج : مقال عيب ... قالي ماقلتي عيب .. نرصي مع العائلة وميكون غير لخير ... هادشي اللي كاين .. انا جاني معقول والله وعلم ... ماشي شي واحد تالف كيهضر ويقفقف ولا معارف اش كيقول... انا بعدا من الهضرة ديالو بان ليا السيد معقول كيهضر نيشان
الحاجة: وشنو دابا فوقاش غتجي العائلة ديالو ؟
الحاج: غادي يعلمهم يوجدو ويجيو ... ماشي مشكل السيد معقول نصبرو واحد السيمانة بعدا راه مراهش هنا فالمغرب .. المهم جا نيشان وحتى هوا مقال عيب .. قلت ليه جيب العائلة قالي واخا مزادش معايا الهضرة .. خير الكلام ما قل ودل
رجعات اشراق اللور كتنفس الصعداء ومشات شدات بلاصة فالبيت ساكتة .. دخلات سوق راسها وتكمشات .. اما خليج ضرباتها بتسافيرة هي وعماد وخلات اشراق و الحاجة وبيازيد شادين الطريق للجبل فالكار .
تلفت غادي هاز التقل للدار وهما دايزين تحت من الخضورة والدالية والعنب حتى لباب الداار البيضا فين عندها وسعة حدا الباب باازربية وسداري ودريجات بويض كيهبطو اللبحيرة اللي حداهم . البير مقابل مع الدار معلق فيه السطل والفران بجنبو ديال التراب .. حط التقل حدا الباب وجلسو هما فوق داك السداري كيرتاحو وهوا كيجري ويرحب
- مرحبا مرحبا ... خير الله ماجيثو للشاون ... شحال مجيث عندنا اشراق
ردت ببرودة كتلمس لورد بابتسامة : دوماج لا... انا خاطيبي شكل اخر ... طويييل ... عريض ... زوين ... وفوق هادشي كامل حنييين وصغير .. وقلبو بياااااااط من لحليب ...
قال بغضب: انا قلبي بيااط من الحيط ... الحليب كيفسد الحيط كيستر
اشراق: حتى هوا تبارك الله قد لحيط ... ماعند الريح منين يدوز ليا ... صاااافي با عطاه الكلما ... وبا عندو كلمة وحدة ... قريب نتزوجو ونمشي معاه
خلاتو واقف معاجبوش الحال ومشات هازة تيليفون كتصور ودور فالبحيرة
اشراق: والو ريزو اووووف
رجعات بحالها كتسارا لقات الحاجة كتفطر قدام الباب وتخوي اتاي
- والله لعضيم الى رتاحييينا هاد اليوماين ... الراحة الراحة
اشراق: الجو زوين هنا ... انا طالعة السطح
طلعات السطح هزات تيليفون فااسما شدات الريزو ودخلات لتيندر مترددة .. تعيط ولا متعيطش؟ اربع ايام معيط ليها ... تعيط هي تشوف قبل ماتكمل السيمانة ويقول ليها باها فين الخطاب؟ صافي تسناتو بما فيك الكفاية ماعيطش .
صونات عليه وعاودات وكل مرة تبعت كامرة بدون ملل او كلل . قبلها اخيرا بملامح صارمة جدية وسط ضوء خفيف وهوا ناعس وحنكو على المخدة ناعس على كرشو ... كتافو عريانين كيبانو فالكامرة كيبريو وشعرو مايل جهة المخدة ... حال عينيه بزز وعاقد حجبانو واضح انه كان ناعس وفاق على غفلة .. بصوت غليض باح رد
- وي؟؟؟
ردت بابتسامة : ياكما فيقتك ؟
رد بجدية : شنو؟؟؟
اشراق: بغيت غير نسول عليك كي بقيتي ؟ لاباس ؟
رمش بتتاقل كأنه كيقول ليها من بعد
- الحمد لله ..
اشراق: شكرا اعلي ... شكرا بزاف على كل حاجة درتيها معايا
المفضل: كا عطيتومي خدوج حسن .. فالاويل قلتي ليا خدوجة وزوجتيها ودابا اشراق وماشي تزوجا !!!.... انا كانت لايقا لي خدوجة ... اشراق لا .. ماشي دزواج اعزيزي
الحاج : ماقلتي عيب ... نوض الحاجة نمشيو بحالنا
المفضل : جلس اعزيزي حتى لصباح مادمشيشي دابا
الحاج: يلاه نوصل ندير الخطبة لبنتي اللي مليقاشي للزواج ... مليقاشي ليك نتا اما هي لايقة للرجال ديال الصح والعمل .. الله يجيب ليك اللي تليق ليك.... ايوا هاك رضينا بالهم مارضا بينا
ضحكات وفرحات بدات تنقز فبلاصتها ودارت راسها داخلة على غفلة عليهم وحنات الراس قدام بابها
- بابا!!!
الحاج : سيري لبسي جلابتك نمشيو
خرج لبرا كيتسناهم والمفضل كيرطب لاكن فكرة الزواج ابدا واش ولات كتبان للمفضل ... غير الفاسقة الفاسدة اللي رجعات تبان ليه واخا طتقطر بالزين وصغيرة و تزوج بيه محرومة من لولاد طول حياتها .. المفضل باغي وحدة كاملة مكمولة .
تبعوه لاطموبيل ركبو معاه وشد الطريق معصب كينفخ ويسوط
- رضينا بالهم مارضا بينا
الحاجة: السيد كيتحرس بيها فين ما مشات ! فاش هربات منو قالك فاسدة ... حقا ما حقا كتهضر مع الرجال !... وهي كانت كتهضر مع السيد كيقول ليها على النهار اللي يجيو فيه عائلتو
رد الحاج: عندو الحق ... سمعها كتهضر غيقول عليها خارجة الطريق .... خلينا ساكتين حسن (شاف فالمرايا) فوقاش غيجيو عائلتو
ردت بتوثر : بعبعبعبد غدا نشاء الله
الحاج: بصرامة ) نشاء الله
وصلات للدار فنصايص الليل مهدودة ... باتت ليلة كاملة كتخمم وتغزز دفارها حتى صبح الحال .. .هاهوا بقا نهار ؟ شنو الحل دابا؟ شنو غادي دير ؟
- علي .. اخر كلمة غتسمعني مني ليوم .. بغيتك تجاوبني وكنواعدك عمرك تسمع صوتي مرة اخرى ... بغيت نقول ليك كلمة وحدة قبل منموت"
بعتت الرسالة وبدات تغزز دفارها وطل مع الدروج لا يكون تابعها شي حد .. من المفضل تعلمت ترد البال . صونا ليها هوا بالكامرة وفتحاتها بسرعة محبطة شافت وجهه صفر وهوا جالس عندو الشمش ساطعة داخلة للدار .. واقف حدا لكوزينة كيشوف فيها ياكما بغات تنتاحر
بلعات ريقها وقالت: علي سمح ليا بزاف .. شكرا بزاف على كل حاجة درتيها معايا ... انا بت الليل كلو كنفكر وتاخدت قراري ... مع اذان الفجر غنوضع حد لحياتي حيت وصلت اطريق مسدودة . شكرا بزاف ... وعمرك ما كنتي السبب ولا غتكون السبب .. عارفاك غادي تسمع خباري من بعد ويأنبك ضميرك .. ولاكن انا بغيت نريحك على الاقل منكونش السبب فتأنيب الضمير . شكرا .
قطعات عليه وهوا كيسمع ويشوف فيها مخلوع قبل مينطق .. عضات على شنايفها كتغزز سنانها وهوا كيصوني ليها ويعاود ويبعث المساجات ويصوني موراهم
- اشراااق جاوبيني .. جاوبيني ضاروري ...
- اشراااااااااااق فتحي الكام
- اشراق غنقول ليك كلمة وحدة و ديري اللي بغيتي
بقا يصوني يصوني وهي جالسة حتى بداو عينيها كيغرغرو بالدموع .. واش بقا فيها معدباه معاها ولا ولا حيت شافت الخوف فعينيه من جهتها .. ولا ضميرها كيأنبها عليه وعلى ما كيدر فيه والجحيم اللي دخلاتو ليه . ولد الناس ماصرف فيها غير الخير وهي كتلعب ليه على اعصابو .. ولاكن هادا هوا منقدها الوحيد وحتى طريقة مغتنفع معاه من غير هادي
اشراق: حكم عليا بالاعدام ... خصوصا فاش شافك فلكاميرا ... شافت الويل اعلي ومابقيتش قادرة عيت صافي ... عطاني مهلة من هنا لغدا ... يجيو الناس ... وانا ماعنديش شي حل صافي طاحو كتافي
غمض عينيه كيسوط وتكا براسو على البلاكار الابيض اللي قدامو وخبطو بيدو كيردد تحت سنانو بغضب ورجع شاف فيها هاز يدو وساد عينيه كيتغدد وقال
- بشرط حتى واحد ميعرف باماغياج بلون .. مابغيت صدع مع لافامي ... لمغياج غيكون حقيقي قدام كلشي ...
دور وجهه وتكا بجبهتو على البلاكار ساد عينيه مطولا ورجع شاف فيها وهي مصدومة وقال
- غدا غتجي عندكم لافامي ... بسلامة عليك (قطع)
وصل النهار الخطبة وباقا اشراق مصدومة .. جالسة فالبيت يدها على خدها مقادراش تيق ! واش هادشي بصح ولا كتحلم ؟؟ اخر واحد كان من المتوقع تزوج بيه هوا علي !... واخا اصرت عليه فهادشي لاكن مكانتش كتوقع انه فعلا يقدر يكون فيوم من الايام ... واخر تصورتها انها تقدر تزوج جوج مرات فحياتها ! لاكن الاقدار كانت صادمة ليها . دخلات الحاجة عليها عبسات فيها وقالت
انوضي ورينا هاد الناس اللي غيجيو فين وصلو راه الربعة هادي !
دورات وجهها كتشوف فداكشي اللي وجدت الحاجة وبدات تستف وتقاد فيه ودور فلكوزينة وتقاد بلاكو الحلويات حتى سمعات الصونيط فالباب ومشات طلات . حل الحاج عبد الغني الباب بجلابة بيضاء لقا قدامو راجل باين على وجخه الوقار بكادومة شايبة شوية وطويل فالقامة وعامر .. لابس بذلة سوداء كيبان عليه شخصية . ومعاه مرى بالحجاب وجلابة انيقة بيضاء البشرة وصويك فاليد ومعاهم راجل اخر كبير شوية طويل بجلابة بيضاء شعرو ابيض وابيض البشرة لابس صباط ابيض فرجلو وجوج عيالات اخرين بالحجاب انيقات كيتشابهو لبعضياتهم باقين صغار ومعاهم ولد صغير .
تعجب الحاج فهاد الناس اللي جاو عندو .. كان متوقع يكونو ناس عاديين يتفرعن عليهم الحاج شوية ويتعنثر .. ساعة طلعو كل قلدة يا قلدة ومن وجههم كيبان عليهم الوقار ..
صاحب البذلة بصوت رجولي : حنا ضياف الله ..
الحاج : مرحباااا .. مرحبا ..
رحب بيهم الحاج فالصالون كاملين .. اما الحاجة اللي كانت غتستقبلهم بالبيجامة رجعات تجري بدلات بالقفطان والبلغة وقادات الشال و رشات ريحة ودخلات تسلم على النساء البشوشات اللي مللي دخلو وهما ضاحكين .. جلسات حتى هي معاهم كترحب وتهضر معاهم واشراق طالقة ودنيها بغات تلقط شي هضرة ساعة مافرزات حتى كلمة ... العيالات كيهضرو مع بعضياتهم والرجال مع بعضياتهم ... رحبات الحاجة وخرجات تجري بسرعة للكوزينة في حين اشراق هربات مشات تخبات خلات الحاجة مشطونة كتحط فالطبلة وتوجد .. حتى حطات وسالات ومشات جلسات كتعارف حتى سخنو الجلسة وناضت كضحك مشات للبيت طلات على اشراق
- نوضي تسلمي على الناس غتبقاي مخشية هنا
اشراق: شكون هادو ؟ شكيجيوه ؟
الحاجة: واحد مول الجلابة بيضاء خالو ..ومعاهم واحد المرة كبيرة قدي خالتو
اشراق: شكون داك مول لكوستيم ودوك العيالات ؟
الحاجة : خواتاتو هادوك ولاخر عمو .. هاداك عمو برلماني
اشراق: اييه!!
الحاجة: وا غير نوضي الناس راه مزيانين غير كيضحو .. بغاو يشوفوك .. بدلي ديك الدربالة وتلقي راسك انا فلكوزينة
ناضت اشراق بسرعة هازة حاجبها كضحك بوحدها وتردد وتبدل
- هاي هاي على علي مساهلش
لبسات قفطان رماضي بلدي بالمليفة وشال على راسها وقادات وجهها شوية وخرجات بابتسامة وخجل كتسلم عليهم .. وقفو العيالات بابتسامة سلمو عليها ودازت مدات يدها للرجال ومشات جلسات بخجل حدا مها والعيالات اللي دارو ليها بلاصة بيناتهم كيتجمعو معاها ويضحكو .. ناضت من بعد للكوزينة مع مها حطو مابقا فالطبلة للناس ومشات خلاتهم كيهضرو بيناتهم .. مقالو والو ماهضرو فتفاصيل .. فقط طلبو يدها لولدهم وبدلو الموضوع فاتجاه اخر .
- الناااس مزياااانين ... ولادنا اللي ماشي مزيانين ....... الناس الله يعمرها دار .... ولادنا اللي خاص يترزنو يديرو عقلهم .....
قوات فيه الهضرة ونفخ ليهم راسهم وهما كيفكو روينة الكوزينة ويسوطو من نكيرو ..
تكمشات فالليل فبلاصتها معنقة بيازيد عندها ناعس كيشخر لايح رجلو عليها .. شدات تيليفون كتلعب بيه وتفكر واش تسيفط ليه كلمة شكر ولالا ... شنو نسيفط مسج تشكرو على الاقل ؟ ... ولا بلا متعيق عليه صافي براكة .. لالا على الاقل تشكرو !
ترددات وبعثت رسالة شكر ليه صغيرة وطاحت نعسات بلا ميرد عليها .
الايام كتمر والجو كيتبدل والحاج عبد الغني حتى هوا تبدل .. رجع كيضحك وغادي ناشط جاي ناشط .. معلوم .. هم البنات حيدو على كتافو ورتاح .. اخيرا غيتهنا من مشاكلهم وصداعهم ويرتاح شوية .. ويهز حتى راسو وسط العائلة اللي ماخلاو ما قالو فيه وفبناتو .. الحق يتقال ! طلاق جوج بنات صعيب ماشي ساهل فمجتمع مغربي .. واخا يرضاو بيه البنات ويتقبلوه العائلة والمحيط مكيسمحش بقبولو وكيفرض عليك حوايج اخرى انت فغنى عنها ولا تمثلك بشيء .
اول زيارة لخليج فدار باها بعد عودتها من السفر . حلات ليها اشراق الباب ودخلات عليهم بالفرحة عنقاتهم هازة الصيكان فيديها تعرضو ليها فرحانين ودخلات كتجري هزات بيازيد كتعنق وتبوس فيه وجلسات وسط الدار بسعادة
خليج: تزحشتكم .. (عضات بيازيد) توخشتك اخنوووزي اخر مرة نمشي لشي بلاصة ونخليك
اشراق: هاي هاي هاي ... جا معاك الزواج
خليج : تقولي اول مرة نتزوج والله لعضيم
الحاجة : فين عماد ؟
خليج : مشا عند مو (بميوعة )
اشراق: واش ماعمرها عيطات ليك ولا سولات فيه ؟
خليج: عممرها عيطات وحتى انا مكنعيطش .. اللي مابغاني هناني .. كتعيط غير لولدها تسول فيه .. قهراتو بالشكاوي .. ها ضهري ها راسي ها جنبي .. ديما هي كتموت ويقطرو ليها
الحاجة: وراه هضر معاه قاليه راه شهر هادا باش قطع فالطيارة ... هاد السيمانة غادي يجي .. وماعندوش الوقت عندو سيمانة صافي خصو يرجع بحالو
شدات حنكها : اوييلي وانا مافراسي والو !
خليج: مالو ماقلك والو؟ راه نتي اللولة خصك تعرفي صدقو هما كيجيبو ليك لخبار!
اشراق: راه ماجبدش معاه الموضوع ماشي هاكاك ...
الحاجة: هي كتهضر غير فالخوى الخاوي وصافي
خليج : سيمانة ونتوما مزالين جالسين ما وجدتي حوايج ما درتي والو ؟
اشراق: بارتباك) والو ياختي.. دخت
خليج: نخرجو فلعشية ؟
اشراق: وشنو غنشري فهاد الخوايج!
خليج: هأ!!! شنو غنشري!!! عطا الله ميتشرا راه الزواج هداك
دارت اشراق يدها على خدها مهمومة كتفكر .. واش تعاود لخليج ولا بلاش؟ تعاود ليها واقيلا حسن ؟ صافي فاش يخرجو تعاود ليها كلشي برا .
لبسات جلابتها و دارت شالها وخرات هي وخليج فطموبيل الراس فالراس . تكات على الزاج بارتياح وقالت
- الله شحال توحشت نخرج وندور ... مكنحسو بالنعمة حتى كطير من بين يدينا
خليج : انا رجعت لداك لاصال كانت غضربو تلافة... الحاج كان غيخرج علينا والله ... خصنا دابا نبداو من الاول ونوقفوه على رجليه عاوتاني ... غدا غنبدا ليه الاشهارات نشاء الله
وقفات حدا قيسارية كبيرة فيها ربعة ديال الطبقات ونزلو دخلو ليها كيتساراو... داتها خليج مباشرة لمحل كبير ديال الملابس دالعرايس وكل ما يخص النساء وقالت
اشراق: وا غا قضي دابا شتيني قلت ليك لا .. اجي ياك من هنا غتمشي معاه ديريكت ...
اشراق: ماعرفتش اختي شغيدير والله
هزات حاجبها: اويلي تي مالكي نتي وياه ماعارفين راسكم من رجليكم ! وشكون جمعكم !لحماق هادا
اشراق: راه مامضاسرااش انا وياه باش نجلس نبحث فيه اصاحبتي .. صافي غنتزوجو صافي بلا منبقا نعيق بحال الة مشواقة فالزواج (برعات يديها ودارت )
خليج: زوينة هادي!!... والفيزة طلبتيها ؟؟؟
اشراق: با اللي كيهضر معاه فهادشي ... ماعرفتش اشنو غيدير
خليج: واقيلا غتمشي معاه حتى يطلع ليك لوريقات ديك الساعة
اشراق: ماعرفتش اش كيصنع هوا وبا ... هانتي سمعتي ماما شنو قالت .. قالت ليك راه كيجري على الاوراق ... انا مهم قالي يالاه تمشي دفعي الفيزا مشيت معاه دفعناها ورجعنا ما عرفت اش كيصنع ومكنقدرش نهضر معاه .. منو ليه
خليج: نتي ها شغلك دابا .. مدام كيجري ويجاري عوال يسيفطك معاه فدقة مور الزواج .. شوف شنو غيدير ليك دابا واش سياحة ول اقامة ولا شنو حتى يطلع ليك الاوراق ...
اشراق: الله واعلم
خليج: دخلي قيسي هادو ... شوفي البيجامات كي دايرين بنادم عزيز عليه يتلاح فالاورق وبلعمان ! شوفي كي رطبين وزوينين .. تلبسهم فالدار بسريويل وقويميجة .. رطيطبين سامبل ماتقالش ودافيين ديال داك الجو تما
هزات اشراق البيجامات تخشات كتقيس وخليج كدورها وتشوف وتعزل ليها .. حطات ليها ربعة دبيجامات كل وحدة فشكل .. وحطات ليها ليزميج دو نوي سامبل كتوريها ولاخرى كتنفخ وتسوط وتهز وتحط فااجنب .. ختارت ليها خليج حويجات فنين مانسات حتى حاجة ... خداو تكشيطة طالعة مرصعة فالاخضر وصباط سندريلا وشال باج ناعم مذهب وشانطة تكفيها احوايجها ودازو لحوايج الرجال
تقدات اشراق الحوايج ورجعات بحالها للدار كتوجد ودير الخاطر كتبين للكل باللي زواجها حقيقة .. طول الوقت وهي محافضة على هدوئها حتى للحضة اللي سمعات فيها الحاج كيهضر مع الحاجة فالبيت ويضحك فرحان
الحاجة : على سلامتو ههه
الحاجة : الله يسلمك ... ولاكن راه غير شي سيمانة ويمشي .. الاوراق وجدتهم ليها درت معاه غدا يجيو نطيحو العقد
درات يدها على فمها وهي واقفة مور الباب وخرجات عينيها
- جاا! ... ولاهيلا جا !!! (شدات حنكها) ويييلي باشمن وجه دابا غادي نشوف فيه ونوقف قدامو ... اويييلي اخر مرة بسلامة بسلامة اصدقاء دابا اجي نتزوجو ونمشي معاك كندا !!! (عضات شنايفها)
الحاجة : قلتي ليها راه غيجيو غدا
الحاج : راه كيعاود ليها كووولشي دابا واش عاد غادي نعلمها انا .. ااااودي ...
جبدات ليها المكياج كتقاد ليها شوية لاكن الشعر ماتصايبش تغدا بالحجاب . لبسات التكشيطة والمضمة ، وبينما هما كيلبسو سمعو الهضرة فالباب وطلو لقاو الحاج داخل ومعاه العائلة .. وهاد المرة عدد الاشخاص كثار زايد على الناس اللي جاو المرة الاولى .. رجعات خليج راسها اللور وقالت بسعادة .
- تبارك الله بيهم بزاف
اشراق: واش بزااااف كاع
خليج : يكونو كثر من 10 .. حيدي لبس تكشيطتي راهم عيالاتهم جايين بالتكاشط وحنا الله يستر بقينا نحشمو حتى فاللباس باز ..
ردت اشراق بتوثر هازة تكشيطة كتسول
- شفتي علي؟؟؟ واش شفتيه ؟
خليج: كتلبس بسرعة ) انا غنخرج ونشوف ونرد عليك .. جاب الله عرضنا على العائلة اما كن قالو واش هادو ماعندهم عائلة ..
خرجات خليج على اساس تسلم ساعة سكنات وخلات اشراق كتغلي فالبيت بوحدها وتسنا شي خبيرة .. كل مرة طل كتبان ليها الحاجة غادية جاية فرحانة وكتخرج من الصالة كضحك .. الهضرة والضحك من الصالون واصل حتى لعندها وهي فالبيت جالسة بوحدها وتشير لمها اللي مشايفاش كاع جيهتها .
حل الحاج للباب للعدول دخلو للصالون ورجعات خليج كتشالي وتلالي بالتكشيجة وضحك وقالت
- يالاه نوضي زيدي يالاه لعدول جاو
اشراق: تسنييتك حتى عييت تعطلتي
خليج: هههه راه شدوني بالهضرة ... كنت كنتجمع مع عماد وعلي ههه
اشراق: كيفاش بان ليك علي مامعصبش؟
خليج : اويلي وعلاش غيتعصب ! عادي ... بان ليا حشمان .. شفت استريلا مجاتش معاه !
اشراق: بصح!!!! علاش مجابهاش!!!
خليج: سولتو عليها قالي خلاها فالدار مع الدراري صغار جالسة مقابلاهم عمتو
دخلها الشك اشراق وردات : امممم
باينة مابغاهاش تعرف بقضية الزواج .. ميمكنش فضريب صداقو يخلي بنتو فالدار ميجيبهاش ! .. ولاكن عندو الحق ! علاش يدير راسو مشاكل على قبل زواج ابيض مجرد عقد غادي يتفسخ .
تنهدات ووقفات قدام المرايا سدات الفولار فعنقها ولاحتو فالجناب على كتافها .. خرجتت مزنكة كتستجمع قواها اللي خصها تحضرها قدام علي .. وتقصح وجهها ودخل واخا ما عندهاش الوجه اللي دخل بيه عندهم
هزات تكشيطة بالجنب ورشات الريحة .. خشات رجلها فالصباط ووقفات كتشوف واش كلشي هوا هاداك .. الحق يتقال الزين زوينة واخا ضعافت بالهم والغم .. ولاكن مع شوية ديال التعديل بان فيها الضوء وتنور وجهها واخا غير بتكحيلة وكلوس خفيف وحنيكات حمرين طاح عليها السر .. واش من الخلعة ولا الحشمة !؟
تبعات خليج كتشوف فالارض بالتاويل ودخلات بدات كتسلم على الناس وهما كيوقفو ليها باحترام حتى وصلات لعلي ودورات وجهها جهة عماد كضحك معاه ومادة يدها كتسلم .. كتحاول تخفي ارتباكها بأي طريقة... صافحات يدو الدافية بلا متسرق حتى الشوفة فيه .. جلسات فبلاصتها بجنبو وهبطات راسها بتوثر شادة فيديها .. ميلات عينيها لجهتو بان ليها السروال اسود ديال التوب ويدو محطوطة على فخدو .. كم القميجة ابيض وساعة يدوية وكيحرك صبعو بتوثر . الكل كيضحك ويتجمع الا هي اللي ساكتة وغير كتشوف . بداو العدول بالمراسيم ومدو ليه هو الاول لكتاب .. حولات عينيها كتشوف فيدو كتوقع ودوز ليها الكتاب وستيلو .. وقعات وبداو الزغارت كيتعالاو والمباركات والتصاور ... مشافت منو والو من غير السروال واليد والريحة دالرجال اللي منثورة فالمكان . فاجآتها خليج وهي جاية بالصينية ديال الحليب والتمر والخواتم محطوطين
عطاتها خليج الكاس الكاس الثمر هزات حبة كترعد فيها الكركاع مطحون .. بلعات ريقها ودورات وجهها شافت فيه اخيرا .. كانت ملامحو عادية مكيضحك م عابس .. لاكن فعنيه كيبان اليأس وقلة الحيلة .. اللي ممكن واحد اخر يفمو خجل و توثر العرسان.. لاكن كأي عريس مكانش ناقص وسامة خصوصا بترتيب اللحية على وجهه وشعرو الاسود الامع ونضراتو الحادة
عطات ليه الثمرة بابتسامة كتخفي توترها عض منها شوية وبعد وجهه كيمسح فمو بمنديل .. حطات داك النص ومكيجي غير فيدو هزو عطاه ليها بنفس النضرات كملاتو ودورات وجهها بارتباك .. جات نوبة الحليب وعطاتو داق .. كذلك ذاق من كاسها وهبط راسو . لاكن كان عماد قايم بالواجب .. كل مرة يضحك معاه ويخرجو من داك الجو بدون شعور .
مدات ليهم خليج الخواتم وعطاتو ليه هوا الاول .. كان عبارة عن خاتم ذهبي واحد رقيق فيه ماسة مربعة لامعة .. مدات يدها بابتسامة فوق راحة يدو وركب ليها الخاتم .. لاكن كان صبعها رقيق عليه شوية .. خدات الخاتم الفضي ديالو وبسرعة ركباتو ليه فنص صبعو ويدها كترعد وكمل هواخلو راسو وجمع يديه . كان الحوار مع علي احسن من السكوت بالنسبة ليه وفضل يبقا شاد الحديث وداير للجهة الاخرى احسن .
تحط العشا تعشاو واخا مادازش لاشراق بالكهمة .. اما الحضور كانو فرحانين وكان الجو زوين والكل منساجم الا بنت خالت اشراق اللي جات مع مها لضريب الصداق كتسوط وتنفخ وتردد حدا مها
- هادا ماشي زهر ماتقوليش ليا ... هادو فقيهم صحيح فصيح مايقدر عليه تا واحد ... واااه!!! الاول كان شهوة منو !! قاضي كاع والطولة والتجريدة ! وجابت الثاني من كاااندا قال للول ماتعرفش !!! هادي غير مطلقة وشبعنا عليها ضحك
الام : بقاو ضحكو مالكم ؟ وشكون غيضحك الى مضحكتوش نتوما ! نتوما كضيعو الوقت فالضحك وهما قاضيين الغرض .. ماقدرتو تجيبو حتى واحد فهو .. لا داك الساعودي لا هاد المغاربة ! .. تقول بنات الناس على راسهم بولة شاعلة ونتوما على راسكم بولة طافية !
البنت : ولاهيلا تصدمت ... قلت غيكون شي شااارف ! السيد باقي صغير اماما ... يكون فثلاتينات ياك
الام : بقاي تحسبي ليهم حسبي ... بلاصة ما ديري شي حاجة راسك وتجيبي شي راجل حتى نتي بحال هادا كيحمر الوجه .. بقاي تسنايهم يطلقو ويتزوجو ! هاهي ماخدامة ماردامة .. مطلقة و حدها الاجازة بحااالك بحالها .. عاد نتي باقي كاع مفات فيك الزواج ! وماقدرتي حتى تجيب شي مسكد يساومك ...
البنت : تربعات مع الاول طلع ليها فراسها وجابت واحد اخر كي الطول كي العرض يديها كندا تبرع مع راسها
الام : باااقي .. باقي ماشفتي والو ... هادي راه فرتن وقاد بحومة بحال ختها ... ختها مشات ورتات الساعودي وجات ضرباتها بتزويجة دالفريع من مدير وصغير وعندها الولد .. قبل عليها بالولد كااع وهوا عزري . العيالات المسكدات .. اللي عارفين شكايديرو وفين كيحطو رجليهم .. ميبدلو الحاجة غير بماحسن ... قاريات سواريهم .. ماعرغت فين كيلقاو هاد الرجال هادو العجب! (دارت يدها حدا راسها) نتوما كلكم عزبات وفاش كتمجهدو كتجيبوه مزنزن .. الى مكان مزلوط معول على باه يكون شارف بولادو وفرحانين بيه عند بالكم تزوجتو .. شوفو شوفو العيالات ديال بصح ... بقات فالزواج طزض
سالات الخطبة وخرجو العائلة مثنى مثنى .. وقف علي عز لافيست ديالو على يدو ووقفات معاه اشراق بالابسامة اللي متحيداتهاش الوقت كامل .
تلفت دافع صدرو كيتسوط ويطلع السروال من اللور وقال بصوت منخفض شوية
- الاوراق غيتعطلو شوية .. على بيدمن تخرج ليك الفيزا انا غنمشي حتى توصلي عليا.. ونكملو الاجرائات تما
حركات راسها : غتعطل بزاف
علي: يالاه درنا العقد وغندفعوه .. شنو فيها الا تعطل شوية
ردت برضى : ماشي مشكل ما قلت والو غير سولتك وصافي
مادرش عليها ومشا خشا رجلو فصباطو .. ودع العائلة بيدو وخرج مشا بحالو.
من الساعة اللي خرج فيها والهضرة غير عليه .. يشكرو فيهم ويعاودو .. اما اشراق مشات نيشان لبيتها لقات خليج كتلبس ولدها تديه معاها وعماد كيتسنا فوسط الدار جالس . حيدات الحوايج وغسلات وجهها وتكات كتنفس بارتياح من بعد ما مشات خليج وطفات الضو .. اخيييرا كتشم ريحة الراحة من بعد هاد المعانات كلها اللي عاشتها ... اخيرا ... نسيم عليل كيدخل من السرجم دافي كيدوز على وجهها وهي حاطة يدها مور راسها كترمش بتتاقل ... بدات كتحس بالطمئنينة .. احساس كتعيشو كيذكرها فإحساسها قبل الدخول فهاد المتاهة كاملة . زادت طمأنت اكثر مللي ناضت صلات جوج ركعات شكرا لله وهزت كفوفها للسما بوحدها وسط البيت النضلم المنور بضوء القمر الداخل من النافدة . سلمات ومشات عنقاتها مخدتها في سلام وتكمشات فيها .
فالشمس الساطعة قاطعة الشانطي بجلابة وفولار .. شادة تيليفون كتهضر مع علي وهوا كيشرح ليها شنو دير .. فيدها ملف وغادية دفعو بتعليمات علي على الهاتف . يالاه قطعات للضفة الاخرى كتسنا طاكسي كبير وهي كتشوف يمين يسار حسات بيد جراتها من دراعها .. تلفتات بسرعة مصدومة وقالت
كمشات يديها عندها تالفة وقالت : من نهار وقع داك الحادث وانا محبوسة فالدار .. (سكتت شوية ) مبروك عليك
رد : اشنو اللي مبروك
ردت مبروك عليك حمل نهاد ...
تلفت يمين يسار كيتنهد وقال : مجاتش الفرصة باش نشرح ليك اشراق
ردت : ماعندك ماتشرح اطه .. كواشي باين .. وفات الوقت على الشرح
رد : وقعو شي حوايج ماكنتش ضارب ليهم حساب... حتى من نهاد ماكنتش متأكد من حملها ... كنت شاك ... نهار الكومسارية عاد تأكد .. وكان فات الفوت ... هربات لسبانيا
ربعت يديها كتشوف فيه مطولا وقالت
- ايوا ؟ وتبعتيها ياك
رد بالايجاب كيتسوط: تبعتها
اشراق: ولقيتيها ؟
رد : لقيتها ... (دار يديه فجنابو) حساب ليها مغنلقاهاش .
اشراق: ومن بعد ؟
رد : عرفتها فين كاينة ... ولاكن شاداتني من يدي اللي كضرني ... مابغاتش تجي ترجع للمغرب ...
تلفت عالي بغضب وقال : مغتفوتش عليك والديا دابا ولاشنو؟؟
عماد : وصاف اصاحبي راه كيتعصب صافي سيرو نتوما
علي: ال كيتعصب يشرب الدوا
دفع طه عماد وتم غادي جهة علي بغضب .. هز يدو بغا يضربو للمرة الثانية وحدها ليه علي بواحد اليد وعطاه لكمة لعين نيشان بغضب طيحو وهز صبعو كيردد
- فوتني عليك اطه ... اشراق مراتي دابا سمعتي ااخر مرة تجبدها على فمك (كينهج) سير شوف مرتك وقلب على ساحتي
ناض بجنون عندو وهوا يجرو عماد في حين جر علي اشراق من دراعها بقوة حتى كانت غطير داها للطموبيل لاحها لداخل وسد عليها وطه كيدفع فعماد.. تنتر من يدو ومشا كيجري عندو لاكن علي ديمارا السيارة قبل ميوصل ليه وزاد خلاه كيسب وعماد كيجر فيه
عماد : بغضب ) سيري نتي لاصال هانا جاي
شافت خليج فطه بحدة ومشات طلعت فطموبيل رجعات منين جات .. اما عماد مد قرعة دالماء لطه شرب منها وخواها على راسو ودار ليه شنق عليه
- علاش متقلتيش ليا تزوجووو علاااش ماقلتي ليا والو
هبط ليه يديه وقال : واش نتا كااااين بعدا فين كنتي هضر فين كنتي عاد جاي؟؟؟ ..
طه : كفاش حتى تزوجو علي مشا لكندا شنو اللي ردو لهنا؟
عماد : مارعفتش شنو بينو وبين اشراق انا راه ماساكنش وسط الخط اللي شادين .. انا براسي صدموني بزواجهم
رد كيزفر : اشراق مكتبغيهش ... باغا ترد ليا الصرف بيه وصافي انا كنعرفها ... باغا تفدي فيا داكشي اللي وقع اخر مرة ... ولاكن علي ... علي ماصدقش ... طلع شماتة
- وي عماد ... مشينا .. مالو دابا شنو كاين مافهمتش شنو بغا ؟ ...... الى كيتعصب يشرب الدوا كلنا كنتصعبو .... لا اعماد ماشي هاكاك لا ... ماعندوش الحق كاع يجبد معايا هاد الموضوع نهاااائيا وماشي شغلو فحتى حاجة .. الى عندو معايا شي مشكل يجيني نيشان شزو المشكل ؟ .... هوا دابا ما هضر ما عرفناه اش باغي يقول وماعارف اصلا مايقول جاي ديييريك باغي يدابز !!!!......
ومااااعندوش الحق ماعندووووش صافي طلق ماعندوش الحق كاع يدور بساحتها واش حنا دابا كنشرحو لدري صغير ولا شنو ؟ ... الى كان كيقلب على المشاكيل هادا حاجة اخرى اما الى عندو شي حاجة معايا يجيني نيشان ....
شوف اعماد ماتقولش ليا متعصبش هادشي راه كيمرض وهوا ماخلا فيها عشرة ما خلا فيها صحبا ما تا لعبة .. دوزو ليا سمعتو اش كيقول دوزو ... اراه نهضر معاه .... طه شوف شوف شوف ماتقاطعنيش سمع شغنقول ليك .... غاا تتخربق هضرتك كلها تخربيق انا ماديت ليك ما والو .. بغيت تفهمها بلعربية مرحبا مابغيتيش شغلك هاداك ....
وت طلقتييييهااااا شوف مغنزيدش نهضر معاك صافي براكة كلمة وحدة غنقولها .. اخر مرة تقرب ليها ولا دور بساحتها سينو غادي نوصلو لشي حوايج فشكاااال عاوتاني ديك الساعة غنكبتوها ديال بصح ... هادشي هادا راه مكاينش حتى عند النصارا ! اااو وا السيد طلق وتزوج والسيدة تزوجات وراجع كتقول ليا مراتي وديتيها واش اصاحبي بعقلك !!!! كن بغيتيها ماطلقهاش صافي دير هاد الحالة قبل ماطلق دابا صافي سالينا ... يا دير عقلك معانا يا غنخرجو ليها نيشان
الحلم الأسود الجزء 20
محتوى القصة
التنقل بين الأجزاء