قصة المفروحة ومول الحانوت

..قصة كوميدية بإمتياز ..وشعبية واقعية كيتجمع فيها كل من : الكوميديا .. الدراما ..الرومنسية ..التشويق ..التفرشيخ.....الحب .. الحياة ديال ولاد الشعب و بناات شعب

قصة بعنوان : المفروحة و مول الحانوت

بقلم : رجاء جاكار

-البطلة :

النحس تابعها فيينماا كاان شي نحس جمعااتو فيهاااا

الكوااارث د دنيا و دين كيجيو تال فوق راسها و كيطيحو

لشخصيتها مرحة و كوميدية بمتياااز القزديير و واحد الصنطيحة عندهااا تكدب عليه فوجهك و تخليك تيقهاا وااخا تكون متأكد من العكس مقزدرة بالمزيان

-*- البطل ..:

الرزانة .... و التباااثة .. الزين ..و التبوكيصة و ... عارف بينو وبين لله مكااينش فالبناات لي مكتزعطش فيه و لكن هو عااااطي لرااسو مكيحملش شي حد يقمعو و مكيحمل يقمع

في حي شعبي بإمتياز .. الساعة تشير إلى الرابعة مساءا ..

جالسة حدا باب دارهم صوت ضحكاتهم كيتسمع من بعيد وصوت الأطفال كذلك .. وسخ الزريعة مالي المكان ..فين جالسة كتنقي وتلوح

فرح~ شوفي شوفي شكون داخل لدار الطبيب ههه واش عرفتيها شكون ..

عائشة ~لا .. لا شكون هادي راكي زعما نتي برگاگة د الدرب منخافش عليك قولي ليا هادي شكون راه فلتات ليا ..

فرح~ هاديك راها السكرتيرة لي كتكون معاه هاااح باينة كاينة تم ..

عائشة~ خاص نعرفو كلشي ..

قاطع حديثهم صوت إمرأة خارجة من الدار مكشكشة بسباب هاد الحالة شافت ف لبنات بزوج دايرين الراس على الراس وكالسين .. شدات فرح من شعرها لي كان طالع شاد ريزو

بشرى ~ الخطية لي عطاني سيدي ربي مفالحة فوااالو أربي أربي ناس والدين الطفلات الحداگة و الأنوثة نعام أسي واش شفتي راسك ..ونتي (شيرات جهة عائشة ) حسبي دروج يالاه داركم ..

عائشة ~ مبالي دروج لي نحسبهم ولله أخالتي

بشرى ~ داركم يلاه

جرات فرح من يديها وزدحات الباب فوجه عائشة وبدات الأسطوانة الشهيرة كيف سماتها فرح ..

بشرى ~ ولله ياا مك و ماتقادي معايا وتكوني مرأة حرة .. يا حتى نقادك بطريقتي.. مساطجك الا منغزتك متحيديه دوووش هو لخر شهر باش دوشي حتى بنادم الا كلس حداك يهرب ..

فرح ببرود : ساليتي ..

شافت فيها بشرى كتغدد من البرود لي عندها و الهضرة كيف ديما كضربها ف عرض الحائط ..

بشرى قربات ليها هزات كمام البيجامة و كطرطق صباعها ..

بشرى : اش قلت ؟

فرح : صافي صافي غندير بهضرتك اخر مرة

بشرى : اوا بيني ليا شطارتك الآلة فرح .. ها أنا نخرج نمشي عند خالتك نشوفها نجي لدار نلقاها كتشعل

فرح : واخا أ بووووشرى (طولاتها)

بشرى : قولي ماما اشمن بشرى ازمر !

فرح : صافي صافي ماما حبيبتي كبيدتي صافي

بشرى : واا صبغيني صبغيني

دخلات بشرى لبيت لبسات جلابة كحلة مخيطة ب الأسود و شال وهزات بزطام وخرجات ..

بشرى : ا منين يجي باك حطي ليه لحرشة وجديها ليه ونسايها ثاني راني ناكلك

واقفة ف الكوزينة كتفكر منين تبدا من هنا ولا من هنا ولا من لحرشة ..

غسلات ماعن الغداء .. و جمعات الصالون و بيتها لي هادي شهر ما تجمع ..جفات الدار كلها .. ومشات دخلات لكوزينة ثاني تشوف اش دير

وقفات حاطة يديها على خدها .. شافت الفيترينة د الماعن لي عندهم ف الكوزينة قررات تتحدى بشرى وتبين ليها شطارتها و حداگتها كيف قالت ليها بشرى ..

بدات ب الحرشة هي أولى جبدات سميدة روناتها مع مقادير ديالها و جبدات مقلة د الحرشة دهناتها ب الزيت و السميدة وحطات لعجينة كتكرس .. سالات وغسلات يديها دارتها ف البوطة مجهدة عليها مرداش لبال ..

كانت مزيرة تدخل لطواليط هزات تلفونها ودخلات لطواليط گالسة مگونكطية هانية ناسية راسهاسالات غرضها و مزال جالسة ..

دازت نصف ساعة بالضبط و هي ف الحمام ..

غسلات يديها ب الصابون .. خرجات كتشم ريحة الحريق عااد تفكرات اش دايرة فوق البوطة

الدخاخن خارجين بسبب حريق الجزء لي حاطة عليه الحرشة بسرعة طفات البوطة كتويل على زهرها المكووز ..

فرح : ويلي ويلي ليوووم حسن يقطع داك لورقة لي ف الحالة المدينة ..

قلباتها كانت كحلة فاخرة .. هزاتها دارتها فميكة و مشطات شعرها ودارت قب و خرجات ..

مشات لجهة الأزبال خاصة ب المواد الغدائية رمات الميكة ورجعات نيشان لحانوت لي كان أونفاص لدارهم ..نقي و راقي مقاد و متول كيشبه لمرجان

فرح : باا علي لباس عليك هانية الوقت بيخير ..

كان جالس رجل ف أواخر الخمسينات هاز كتاب لله وداير الرجل على الرجل لباسه انيق ..

حيد نضاضر من عينيه و حط كتاب شاف فيها و تبسم ..

علي : بنتي فرح الحمد لله و نشكروه فرح : بغيت سميدة ابا علي وعفاك ستر عليا يرزقك جنة هابليييز

علي: صافي ابنتي

عيط على الولد لي كان خدام ف المحل هو لي مكلف ب الطلبات

عطاها السميدة ف كيس ورقي وخرجات غادة بخطوات سريعة ..

المغرب كيأذن وباها مبقا ليه والو و يدخل ..

عاودات بسرعة من جديد وهاد لمرة بقات عليك عليها حتى طابت عاد رتاحت ..

جمعات كوزينة وخرجات ساهلة التلفازة كتفرج ف فيلم فرصة ثانية ..

مدازش بزاف د الوقت حتى كان باها دخل .. سلمات عليه وحطات ليه لماكلة ..كتاكل معاه ..

حسن : راه مك صونات قالك جيبي ليا جوج طباسل الطاوس وغسليهم عنداك دخليهم بغبرتهم ..

فرح : وابا الحال ضلام فين انخرج

حسن : انمشيو أنا وياك .. نوضي قادي داك شي ..

فرح : واش اعباد لله حتى طباسل يديوهم منين معندهمش لاش يديرو العرس ..

حسن : اش هاد ل أنانية هي بعدا صغر منك وتزوجات سيد الرجال ونتي كيجيو فيك غا لي مسالين لا خدمة لا والو وباه مزال كيصرف عليه باغي ي استغفر لله استغفر .. سيري لبسي حوايجك دغيا ا لخطية لي عطاني لله

متسوقاتش لهضرتو كيف العادة مشات لبسات .. بيجامة جديدة وقادات شعرها ودارت شوية د المكياج كتبغي تبان قدام بنات خالتها لي مكاينة غا وحدة تبان على الأخرى ..

خرجات هي وحسن هازة طباسل ف إتجاه منزل خالتها خدوج ..

كانت الدنيا مرونة ب المزيان العرس مبقا ليه والو و مقاتلين مع الحلوى مجموعين

حسن دخل لصالون فين جالسين الرجال و هي مشات ف أتجاه لكوزينة

جات داخلة بزربة ومشافتش بنت خالتها لي كتسيق و الصابون كاين محسات براسها حتا جات مزدوحة ف الأرض و طباسل على شوية كانو مشاو

اسمهان : ويلي ويلي واش مكتشوفيش راني كنسيق فين كانو عينيك افرح

فرح : ستري ما ستر لله ها حميمتك ياك عزيزة عليك

اسمهان : وقفي وقفي

هزات اسمهان طباسل وحياتهم على لبوطاجي عاونت فرح توقف ..

فرح : لباس عليك الوقت هانية ؟

اسمهان : لحمد لله ازين علاش مجيتيش مع خالتي ..

فرح : اوا حتى نتي معندي ماندير بشي شقاا

اسمهان : نتي لي عبرتي ههههه

فرح : فين تريكة ؟

اسمهان : راهم ف السطح

طلعات السطح و سروالها مطبع ب الماء بسبب الطيحة

كانو جالسين خولاتها و بنات خالاتها كل وحدة حاضية فران ..

‎فرح : ا تبارك لله مصحابش ليا كاين عرس الأميرة هذا خمسة د لفرارن لا بزاف

بشرى : جيتي أ لخطية على سلامتك ..

مداتهاش فكلام أمها دارت مسمعاتش كتبين البرودة على برا لكن قلبها كيتحرق على هاد لكلام و ب الأخص هاد لكلمة و خصوصا الا وقالت ليك ف المجمع

الخالة : اوا فرح متجي تعاونينا ولا تركبي علينا

فرح سلمات على لي كاين ف السطح خولاتها وبنت خولاتها

فرح : غا لوقت أخالتي عارفاني من التكوين لدار

الخالة : لله يعاونك ابنتي

قربات جهتها بنت خالتها سارة خت العروسة ..

سارة : اويلي افرح واش بايلة ف سروالك ولا اش ..؟ شفت هادشي مطبع

كلشي دار شاف ف فرح و فين مطبعة

سدات عينيها بحرج من الموقف و ردات بنبرة باردة و مضحكة فنفس لوقت ..

فرح : منيتك ا سارة ههههه راه طحت لتحت كانت اسمهان كتسيق و مشفتهاش

سارة : اييه

فرح : فين جدة ؟

سارة : راها فصالون لتحت

هبطات تشوف جداتها مخلياهم يوشوشو وراء ضهرها معندهاش لغرض ف البشر ..

دخلات لصالون كانت جالسة جداتها شادة تسبيح كتسبح ..

فرح : فطووش لبااس عليك ..

فطوش : حرفية ابنت بشرى ياك

باست ليها راسها وكلسات شادة معاها الحديث ..

فطوش : مكاين خطاب ؟ مكاين زواج ها بنت خالتك هند تزوجات بسيد ميسور

فرح : مبغيتش نتزوج افطوش قلتها لكم خمسين مرة

فطوش : شفتيهم ملاوحين ف الباب كيتسناوك

فرح : وا كتعرفي داك أمير أوغلو ياك ؟

فطوش : الحب ديالي هداك

فرح : رجوع لله ا فطوش راه تسبيح فيديك

فطوش : لديها غا فراسك مال أوغلو ديالي

فرح : غيتزوجني

فطوش : غيخرج من تلفازة يتزوجك ؟

فرح : لا لا غا كنكدب عليك واسيري عاودتها لدرب كامل عنداك

خرجات خلات جداها متبعة لمسلسل

دخلات لكوزينة مجمعة مع اسمهان لبنت لوحيدة لي كترتاح ليها فبنات خالتها

تعشاو و نشطو مع العرس ديما نايضة عندهم هوما ..

صباح جديد .. أشعة الشمس مضوية على الدار ..

ناعسة ف الصالون من بعد ما جاو من دار خالتها طاحت نعسات تما ..

وقفات بشرى عند راسها كيف ديماا

بشرى : أتي فيقي راه صاحبتي كتعيط ليك تمشيو لتكوين ..

فرح : هوف ها انا نايضة يحرق بو التكوين ..

~ فرح .. 20 سنة خدات لباك ودارت التكوين تعليم الخياطة و التفصيل كطمح أنه باغة تكون مصممة ..

لكن الحاجة غير كتهضر مكطبقهاش ..

شعرها أسود قصير واصل لكتفها ..بشرة بيضاء حواجبها مقادين كاتنتفهم .. عينين كحلين وشافيف جذابين وكذلك ضحكتها الحاجة المميزة فيها ..

الشقا هو عدوها لي نقدرو نقولو كتعجبها الحاجة ديرها كيف باغة هي و ميفرضش عليها شي واحد شي حاجة .. لدرجة كلمة الخطية لي كتسمعها ف الأول كانت كتأثر لكن ف الأخير تكونات المناعة ..ولا عندها عادي ..ممسووقاش

لبسات قبية حمرة .. وسروال أزرق عريض طلقات شعرها ودارت الطربوش وزادت القب وخرجات عند عائشة

دازت لحانوت لي اونفاص ليهم خدات رايبي و بيمو وقبل متخرج سولات لي خدام تما ؟

فرح : با على مبانش ليا ؟

لي مقابل الحانوت : مبانش لينا هاد صباح حتى حنا مخرجش من الدار

مجاوباتوش وشدو الطريق هي و عائشة غادين كيبركو فهادي وهادا ..

قراو الحصص لأولى وخرجو ثاني

اليوم ليلة الحنة ديال بنت خالتها و مموجدة والو ..

دخلات لدار من بعد ما توادعات مع عائشة ..

كانت بشرى كتحدد لحسن القميجة و السروال ..

بشرى : على سلامتك ا لعزري لي عاطني لله ..

فرح : لله يسلمك مم (غمزتها) اش كاين تما ؟

بشرى : متمشيش تقادي راسك بحال أيتها الناس راه عرس بنت خالتك هدا و الناس غا الفن من عائلة راجلها ..

فرح : وهي لا عطيتيني باش نقاد راسي ..

بشرى : لله يا ودي ب الفرحات عليا جبدات 200 درهم عطاتها ليها

فرح : كوني هانية غنحمر لك وجهك ..

دخلات لبيتها أول حاجة دارتها .. جمعات بيتها ودخلات لفيس ..وتشوف من هنا و هنا سيفطات مساج ل اسمهان دوز عليها تمشي نكري و تقاد راسها .. باغا ترد اعتبار لرأسها على كلمة الخطية لي قالتها ليها مها فوسط المجمع وكلشي ضحك عليها ..

دازت عليها اسمهان ساكنين فنفس الحي ..

خرجات بنفس الحوايج .. مشاو لعند مولات تكاشط كرات واحد أسود مع الإكسسوارات بسيطة و اسمهان كرونة .. ليلة الحنة كبيرة

دازو عند ميكاب ارتست صديقة اسمهان

تكلفات بيهم .. دارت ل فرح ميكاب لي برز وجهها و جمالها أكثر و شعرها دارتلو بابيليز من لتحت .. جات كيوت

اسمهان : هادي فرح لا لا .. تي فين هي فرح ؟

فرح : ماتت لله يرحمها ..

اسمهان : امين ..

المسخوطة جيتي كتحمقي ناري اليوم طايح كثر من الواقف

فرح : شكغاا شكغا عارفة جمالي ..

اسمهان : شكاار راسو .. احح ليوم مريم أم التيتيز و أب مول الحانوت احح

فرح : اوا شطحي و باني باش تجي تخطبك لولدها اش سميتو ..؟

اسمهان : عهد الدييين احح

فرح : غا بعدي عليك داك نوع اختي ميليقش بيك ..

اسمهان : كيفاش زعما ؟

فرح : ممم والو

كملو طريقهم غادين ف اتجاه الحي ولي شاف فرح يقول هادي ماشي هي هاديك مستحيل

فتحات ليهم بشرى لباب لي غير شافتهم تصدمات ف بنتها ..

بشرى : اش هاد الجمال و الأنوثة كاملة عندي انا .. بنتي لحبيبة

فرح : عاد وليت بنتك اوا لله يعطيني وجهك ا بشرى

بشرى : وراك نتي عوينتي لوحيدة غا كا تعصبيني و تتسمعيش لهضرتي..

اسمهان : وأنا كيف جيتك مم

بشرى : كتحمقي ابنتي

كلسو ف الصالون يستارحو وحتى بما بشرى جمعات راسها .. يمشيو دابا وتما تلبس ..

وخرجو متاجهين .. كانت قاعة ف السطح ومجهزة و الديسك مطلوق .. وشي داخل وشي خارج

دخلات لبيت ديال جداها خلطا حوايجها تما .. وخرجات ضرب دورة عاجبها راسها ..

كان سطح مجهز زوين .. وناس باينة هاي كلاص غير من لباسهم ..

مشات هي و اسمهان لبسو ودارو لمسات الأخيرة و مشاو لبيت العروس ..

ليلة الحنة دازت نايضة و ناشطة مع العائلة و عائلة العريس ..

أشعة الشمس داخلة من الشرجم الساعة تشير إلى الرابعة مساءا عاد فايقة كتحك فعينيها .. بحكم لبارح بقاو قصارين حتى بربعة د صباح ..

وقفات قدام لمراية كاملة مجخلطة الكحول هابط على عينيها كلشي مجخلط تفوهات بكسل .. وخرجات ف إتجاه الحمام

رغم كل الكلام لي كيتقال عليها كترد لقلبها بزاف وساكتة و كتحسب الأمر بضحك ..

لكن فرح فالحقيقة نوعا ما كيعجبها تديها فراسها وتكون زوينة لكن ماشي ديماا الا منين كترشق ليها وهذا خطأ بالنسبة لكل ..

غسلات وجها من المكياج د لبارح و مشطات شعرها و خرجات كان السهات ف الدار معارفة مها فين مشات ولا اش كدير ..

مشات لكوزينة اول حاجة دارتها كلات وهزات تلفون صونات على أمها لي هاد لأخيرة خلات ليها فلوس الكرا و الصالون ..

لبسات كيطمة كيف لعادة خرجات غادة دوز على عيشة تمشي معاها ..

لفت إنتباها سيارة فاخرة ب بلاكة ديال الخاريج و تحديدا فرنسا ..

عرفاته ولد علي .. لي قالت ليها عليه اسمهان ..

طولات فيها الشوفات و شافت فدار سي علي .. عصرية زوينة مميزة على الديور الأخرين .. السراجم مفتوحين .. و أولاد داخلين و خارجين ..

تمشات بخطوات غادية ف اتجاه دار عيشة لي ملاصقة مع دار با علي

عيطات بصوت كيف العادة كيزعزع الميت من لقبر و يفيق لي ناعس ولي فايق ..

فرح : عييييييييييييييييشة ..

ركبات بنت ف العشرينيات من سرجم من دار با علي .. شعرها طالع ب النعاس و عينيها مبرقين باينة عاد فايقة من النعاس ..

.......: اش هااد لحليق عندك اشررريفة متخلي لي ينعس ولا لي يموت ولا تعرفو لي عاد جا من السفر

هزات فيها فرح عينيها تشوف مصدر الصوت لقات فدار با علي عمرها شافتها هزات عينيها و حاجبها فنفس الوقت وشافت فيها ببرودة ..

فرح : اجي كوليني حسن

ورجعات عيطات بنفس النبرة بصوت كيف الأول ..

ولي كانت فدار با علي عينيها خرجو معصبة

خرجات عندها عيشة كتسد ف سنسلة د السروال و تنكر

عيشة : اا ياك لاباس ..

فرح : تحركي معايا نمشي نكري شي تكشيطة ..

~ منزل با علي ~

ف الطبقة الفقانية التالية كاع مبنية و مصمة بتصميم راقي و جديد أروبي

خارج من بيت النعاس كيطلع شعرو لي طايح على عينيه ..

توجه لحمام غسل وجهو و سنانو وخرج بخطوات ثابتة لابس سروال كيطمة كري و تيشورط لاسق عليه ابيض و فرجليه كلاكيط نتاع الدار ..

فتح باب الشقة هابط لسكنة تحتية

دخل كان جالس علي و مراتو مريم

جالسة جنب با علي لي مجبد على الفراش

كيف شافتو مريم تبسمات بفرحة ..

مريم : الحبيب الغالي دخل دخل هاد نهار عيد بالنسبة ليا

حنحن ورد بصوت هادئ مبتاسم ليها

عهد الدين : الوليدة ها انا معاك

جالس معندي فين نمشي

‎قرب ليهم باس ل علي راسو و كذلك لمريم و جلس فوسطهم ..

نطق على كيشوف ف ولده ب إفتخار فرحان بيه ..

علي : اوا اولدي انا صحة مبقات عندي و التيقة مبقااش وهاد لحانوت شكون يقابلو ..

عهد الدين ضحك بخفة ورد عليه : انا الواليد

علي : هاديك هي لفرحة لكبيرة عندي منين تقابلو ليا نتا

عهد الدين : اييه

مريم : ولدي وجد راسك تمشي معانا لعرس بنت العربي لقاعة المراكشية

عهد الدين : الوليدة عرفاني معنديش مع داك تخربيق

مريم : وعفاك اولدي دير ليا خاطري يرضي عليك

عهد الدين : منتعطلوش ؟

مريم : نديرو غا صواب ..

دخلات بنت ف العشرينيات شعرها زعر كتشبه لمريم بزاف ف الزعورية و البشرة عكس عهد الدين لي نص نص

دخلات مكشكشة معاجبها حالة داخلة كتنكر ..

كوثر : بنادم ميخليو لي ينعس ولا لي يرتاح بف

مريم : ياك لاباس ابنتي مالك ؟

كوثر : كنت ناعسة حتى سمعت شي وحدة غوتات بجهد قفزاتني من بلاصتي

مريم : هههه ولفتي أروبا ياك هههه

علي : هادي متكون غا فرح المفروحة

كوثر : شكون هادي

علي : بنت حسن لي ساكنة اونفاص ليهم

عهد الدين جالسة كيسمع لحديث وعينيه مع الهاتف كيشوف فيه

سمية : نوضو ابنتي نوجدو راسنا لا

-كوثر 24 سنة طالبة كتكمل قرايتها ف الخاريج باش تكون شي حاجة ف المستقبل نسخ طبق على سمية أمها مرأة شابة مزالة شادة فراسها وجه بشوش من نضرة أولى ترتاح ليها

-عهد الدين 29 سنة بعد ما خدا لباك قرر يمشي يكمل قرايتو ف فرنسا و طبعا هادشي بمساعدة أبيه قرا الهندسة و تخرج مهندس

ملامحه حرشة عربية ب إمتياز .. شعر مايل لقهوي لحية خفيفة بشرة بيضاء

ملامحه كلشي فيه رجولي و جدي

~~ عند فرح ~~

جالسة فكرسي ومولات الصالون كتقاد ليها لميكاب من بعد مسالات ليها شعرها لي خلاتو على طولتو وبدات ليها لمكياج يليق ب التكشيطة لي بلون الكرونة عصرية جديدة ..

خرجات ثاني الميكاب كيردها غزالة وكانت هاد الصالون غير ف الحومة ..

دخلات لدار كانت بشرى كتقاد حتى هي راسها و حداها حسن كيلبس سعاتو ..

حسن : هااي هااي على فرح

فرح : شفتي أ لعشير تبدلت لا

حسن : اييه وراه مقبيلة و حنى نتسناو فيك تعطلتي

بشرى : اجي شدي ليا لحزام مزيان ..

لبسات وتقادات تكشيطة جاتها عبار كتبان بنت بعقلها .. جات سو كيوت

ركبو ف طنوبيل غادين دايزين على العروسة باش يمشيو لقاعة ..

واقفة هي مها داخلين مع لعروسة ب الصلاة على النبي هازة تلفون غا كتصور عاجبها راسها ..

جلسو العروسة ف البرزة .. شافت مها جلسات مشات جلسات حداها وأسمهان جنبها شادين نميمة كتكركر ب إبتسامتها الجذابة

حتى جات عينيها فطبلة لي كانت جالسة فيها مريم و كوثر ركزات فيها شوفة عرفاتها غير من لخلاف لي وقع

حتى جات عينيها فعينيه جال داير رجل على رجل بكوستم ف لبلومارين وقميجة بيضةوبابي ف الاحمر وساعة

هربات عينيها بسرعة من عينيه ..

هربات عينيها بسرعة من عينيه .. شي حاجة جذباتو ليه ولكن هي من نوع لي مكتهتمش ..

وقفات اسمهان فرحانة ونوضات معاها اسمهان يشطحو مع لآلة لبنات شدوها لهوايش فمكاين غا لله يعطيك صحيحتك ..

~ عهد الدين ~

كالس على الكرسي مسرح داير رجل على رجل .. كيشوف ف تلفونه ممسوق لحد حك على لحيته بملل شاف ف مريم لي ناشطة كتسفق فيديها وكتضحك ..

مريم : هااكاك سيييري عليها افرح ابرررع ..

كوثر : ههههههه مسخووطة هاد لبنت

شاف فين كيشوفو ركز الشوفة مصغر عينيه .. كانت واقفة على القعدة محزمة كتشطح وتهز ف كتافها ناشطة و البشار مجموع عليها والزرقالاف من خرالها كتلاح ..

دور عينيه بملل كيستغفر ف نفسو ..

عهد الدين : شيخة ..

ورجع لهاتف متلف بيه لوقت كيتسنا فوقاش يسالي هاد التخربيقةكيف سماها هو

العشاء غيتحط .. كلشي جلس ف بلاصتو و السهات و أغنية هادئة ..

جلسات ف طبلة د العروس مع طويلة جلسات كل العائلة .. حطات تلفون على الطابلة و كتقاد تكشيطتها من لتحت .. لهزة لي غتهز عينيها جات ف عهد الدين لثاني مرة

كان جالس داير يديه المزعبة و العروق بارزين فيهم وساعة .. حاطها على ذقنو كيتحدث مع باه

سهات فيه واخدة حريتها كتبان عليه الحروشية و الصرامة و الجدية من ملامحه

هزات اسمهان عينيها حصلاتها كتشوف ف عهد الدين قرصاتها وشافت فيها كضحك ..

اسمهان : ياك ما حتى نتي تزعطتي لا هههه ميمكنش

فرح ردات عليها بتوثر : ا .. الأمن نتي كتهضري

اسمهان : مكنرضعش صبعي ابنتي هداك لي كنتي كتشوفي فيه على شوية كنتي غاتاكليه

تحط العشاء وبدا ديسك جديد الشعبي واجي شكون يگلس ولا يسخى منه

{06:00 AM}

العرس سالا و العروسة مشات مع راجلها

داخلة ب لحفة من بعد مانزلات من طنوبيل عينيها مغمضين الشمس ضاربة فيها ،هازة الطالون فيديها .. طاحت بحالتها ناعسة

‎~منزل با علي ~

القهوة معطرة عاطية الريحة فدار رجعو من العرس بكري .. قبل نهايته

حطات القهوة و طبلة منوعة ها الحرشة ها بغرير لآلة مريم فرحانة بولادها

دخل عليهم الصالون بعد روتينه الصباحي .. باس راس مه و با علي وكوثر

وجلس حداهم كيفطر بهدوء

علي : عهد الدين نمشيو لسوق !

عهد الدين : اه صافي

علي : ها أنا كنتسناك

طلع لبيته لبس سروال جينيز و قميجة بيضاء قاد شعره .. ولبس ساعته رش ريحة ديالو وخرج بمشيتو الرجولية

غادي تابع باه لسوق الشعبي د المدينة ..

كأي فتاة مغربية منين كتحضر لشي عرس و كتسهر فيه أكيد غتفيق حتى لجوايه الخمسة د العشية و هذا هو حال فرح حاليا ..

واقفة باقة بتكشيطتها .. عينيها منفوخين ب النعاس و شعرها كيف العادة شاد ريزو

حيدات التكشيطة وحطاتها فمكانها ..لقات حق الشهر جاتها تأفأفات بسخط أعدى حاجة عندها

شافت ف الماريو بقات ليها أولويزة وحدة لبسات كيطمة كيف لعادة وهزات التكشيطة تردها لمولاتها

فرح : بشررررى .. بشرررى

بشرى : ها انا مالك

فرح : غندوز نشري أولويز و شي ساقطة عرفاني كتجيني ب لوحم

بشرى : هااكي .. ودوزي عندي عند خالتك

مدات ليها ربعميةشداتها و خرجات

مع الخرجة .. مع شافته جالس على لكرسي هاز كتاب رواية باينة ب الإنجليزية

شافت فيه .. وطولات شوفة بلا عياقة وخرجات ..

دخلات لمحل مهزش فيها عينيه كاع

دخلات هزات أولويز و سقاطة الشوكولا و البطاطا اي حاجة ..

مشات عند هداك لي كيخلص .. ضاسر عليها وديما مخاصمين حيت أعدى حاجة عندها هي الضحك الباسل

ودابا جاتها مع ليغيكل لي كيكون المزاج مبدل كليا غا كتعصب وتزعف وكترجع حساسة ..

جواد(لي مقابل مكان لفلوس) : هااح والزين غبر علينا لاطاي سعدات لي غيديرك فدارو الرجولة و الأنوثة

غوتات معصبة محاملاهش يقول ليها هاكا ..

هزات يديها بتهديد فوجهه وغوتات ب أعلى صوت عندها ..

فرح : ااااااخر مرة تولي تهههضر معاااياا بهااااد الأسلوووووب ولا مغيعجبك حااال عيقتي و ضسرررتي

قبل متكمل جملتها دخل عهد الدين مخنزر معصب كثر منها عاقد حواجبه مع بعضهم ..

شاف فجواد ب معنى اش كاين ؟

عهد الدين : اش وااااقع اش هاد الصداع ؟

فرح : لا غير هاد خوناا كيتحرش بيا

عهد الدين ببرود: كون كنتي ساترة راسك و متاقية لله عمرو يهزو فيك لعين يحشمو منك

فرح خرجات عينيها ف ردة فعله

فرح :و اش دخلك نتا ياك لباسي هذا وحرة فيه وهادشي غيوصل لبا علي وإلا بقا هاد خينا هنا وشموني تفور

عهد الدين بتحدي : مخارج فين اشريفة سيري شوفي ليك شي قنت

بحال فين كنتي لبارح

دارت كتشوف فيه عينيها حومر ماشي ب الدموع لكن ب الأعصاب

فرح : اش كتقصد نتا

عهد الدين ببرود وغمزها : الفاهم يفهم .. الزين يحشم على زينو و الخايب الا هداه الله

حاولات تهدن راسها ومتديرش كلامه فبالها تحلل و تناقش ..!

ردات عليه حتى هي ببرود

فرح : أولا لله يهديك ..

كانت خارجة من لحانوت مكشكشة من بعد ما عطات لعهد دين خو جوابو .. حتى ضربات فبنت الحي معروفة ب اسم ~بنت عبوش~ بنت مشرملة من نوع نميلو و مانطيحوش .. عامرة و شعرها صابغاه ب لميش و لحجبان حالتهم ...

كانت خارجة فرح عينيها مشدودين بسبب الغضب حتى كتفها تخبط مع كتف المدعوة ب إسم بنت عبوش لي هاد لأخيرة دارتها ب لعاني .. خرجات فرح من الحانوت الغضب عامي عينيها وقربات تبكي عرفاته كيمعني بهضرتو على لبارح حيت شافها فداك لحال ..

تعرضات ليها بنت عبوش ف طريق قاطعة عليها ..

بنت عبوش : اهيااااتا

فرح : حيدي من قدامي يرحم باك اختي!

بنت عبوش : اخر مرة تهزي صوتك على سي عهد الدين

فرح : تا واااش مريضة ولا مزعزة ف مخك ولا شارية شي حااااجة ابنت عبوش حيدي عليا يديك راها طالعة ليا لقردة راه غنطويك ..

بنت عبوش : أمتغوتيش على سيد رجال أ شريفة الا عهد الدين خط احمر

فرح : واش لبوك ضاربك حمار ليل ولا مال مك .. سيري تيتي نيني حدى موك ولا نجمع معاك

بنت عبوش : اخر مرة اوكي ..

وجهها حمار ب الأعصاب وخرجات معصبة زادت جعرااات..

فرح : عيت نسايس معاك إوا اجي خدامة تأكدي فيا ياك مدايرك محامية دياله أ لمذلولة ؟

شداتها من شعرها لي مصبوغ ب ليميش .. كتجر لقات فين تفرغ لغضب غير ف بنت عبوش وتزاد معاها العشرة ..

واقف على الشخص بحواجبه معقودين ونطق بنبرة تحذير ..

عهد الدين : اخررر مرة اخر مرة هاد لمرة دازت لمرة اخرى مغنرحمكش تبقا تفلاو على بنات ناااس .. عنداك يصحاب ليك دافعت عليك راك غالط اشريف ..

جواد : اخر مرة اشاف

سمع أصوات كثيرة و السب غا من سمطة لتحت .. خرج عاقد حواجبو ثاني فرح وبنت عبوش شداها وناس كالسين كيتفرجو .. بنت عبوش شعر لي ملصقة طاح وفرح كتنهج وجها حمر .. قرب ناحيتهم بغضب .. شد فرح من مرفقها من لور كيحكمها ..

عهد الدين : واااش جهلتي ولا مااالك اش هاااد لحالة

كتنهج و تغوت وتفك من يدين عهد الدين

فرح : متقصنيييييش بعد مني

تنترات منو بقوة .. شافت ف بنت عبوش بكره ومشات غادة داخلة لدارهم .. معصب اعصاب الدنيا و دين

شربات كاس د لماء بارد كتحس براسها سخفانة و معصبة ل أقصى درجة و كلام بنت عبوش كيرجع ف داكرتها مكتزيد غير تعصب ..

🔚🔚

بنت عبوش : سيري شوفي غا راسك ف لمراية شعرك هو تالي شهر مدوشتي ولا دازت فيه لمشطة لا أنوثة ولا زمر باش غا تحديني

فرح : مرا و قادة و نقد بحومة المذلولة سيري دخلي عبديه و بوسي ليه رجليه حسن نتي ..

بنت عبوش : ياكما نسيتي راسك منين كانت مك كتجلسك تحت السرجم و تحيد ليك ف القمل ههههههههههه

على أثر هاد لكلام مرضاتش كاع ومع شاعلة معقلاتش على راسها كاع

🔚🔚

رجعات من تفكيرها كتسوط و تبخ ب الأعصاب ف الأخير شداتها بنعطية و الدموع فعينيها بهاد الكلام الجارح لي ملات منه

صباح جديد فاقت على أشعة د الشمش ناشطة و الحماس طبعا .. من بعد ماداز أسبوع وهي غير ف المنزل من نهار الواقعية ..

فهاد الأسبوع لأول مرة غتگلس مع راسها و تسول راسها و تهضر معاه .. غااالطة ف بزااف حاجة

أولا : راسها لي مدياهش فيه كاع وربي عطاها من الزين ..

ثانيا : تكوين لي مديراش فيه عقلها وهي باغة توصل تكون مصممة أزياء و تفتح محل خاص بيها

ثالثا : مقصرة من جهة الواليدين بزاف لله يسمح لينا منهم ..

غسلات وجها وحكات سنانها على غير العادة و خرجات بكري تجمع مع مها فايقة بكري ..

فرح : صباح الخير ..

بشرى : صباح منور هذا

فرح : ههههه ياك

بشرى : ااايه ابنتي بانلي درتي عقلك وخدمتيه

فرح : غا بان ليك أبشرى لله يهديك ههههه

بشرى : نوضي ابنتي سيري جيبي ليا من لحانوت أتاي سلطان

فرح : نطلع لفيلاج

بشرى : هاهوا غا حدا الباب

فرح برفض : لا ..

بشرى : وعفا بنتي ..

أما عند عهد الدين أسبوع داز مابين غير الحانوت لي مقابل لباه .. و فلعشية يتقهوى و يكلس مجمع مع عائلته ..ضرو خاطرو وضميره تحرك من جيهتها حيت عرف غيكون بقا فيها لحال بزاف و أسبوع مبانت ليه وعارفها ساكنة أونفاص ليه ..

قررات هاد المرة ب الفعل تبث راسها حيت هاد لفكرة ماشي اول مرة كتجيها و إنما بزاف د لمرات .. كدوز يومين وترجع لحالتها ولكن هاد لمرة قررات قرار لا رجعة فيه كتحاول تحدى راسها !!

-متبقاش تسمع كلمة ~خطية~

-اي واحد شافها يحترمها .. كلام عهد الدين و بنت عبوش بقا لاصق ليها فوذنيها وبهاد الكلام غتحدى راسها !!

دارت خاطرها ل أمها و خرجات ..

مبانش ليها عهد الدين ف الحانوت كاع وحتى داك المدعو بجواد و إنما شخص اخر حتى هو خدام تما ، مع الدخلة لي غدخل لحانوت دخلات حتى بنت جيرانهم لي ساكنة ف الحي لي موراهم وكانت عزيزة عليها أسرارها عندها و كلشي .. أيام الدراسة و التكوين لي قرات فيه النص

فرح بفرحة و إبتسامة كبيرة : إبتساااام هادي نتي

شافت فيها ابتسام بنضرة عادية ماشي بحال نضرات فرح لي كلها فرحة

طارت عنقاتها و المدعوة ب ابتسام عنقاتها باردة عكس فرح تماا

حسات بيها فرح .. لكن مفتحاتش مجال لنقاش

فرح : هههههه ابتسام غلاضيتي اعشيرتي و زيانيتي

ابتسام : هه ياك

فرح : اييه مالك بلوكيتيني من الواتساب و الفيس

ابتسام : على مفخباركش !! تزوجت وراجلي منع عليا الصحابات احبيبة

سطل د الماء تخوا عليه كتحس بيه بارد يماااا كانو كيهضرو أيام ليسي و تكوين عرسك انا نكون جنبك ! وتافقو على لباسي و ها اش ندير !! نتي غتكوني اول وحدة بطبيعة الحال نتي ختي و صحبتي

ضحكات فرح ب إستهزاء وهي كتفكر هاد لهضرة لي كانت كتسمعها من عند ابتسام

فرح : لله يكمل عليك ب لخير احبيبة

ابتسام : امين ازين نخليك راجلي العزيز غيكون كيتسناني باي .. وعفاك منين تلقاي فشي مكان متبقايش تجي تسلمي عليا

الصدمة صدمتين .. الكلام لي قالت بالفعل صدمها و كمل عليها !! الكلام وحل ف حلقها مقدراتش تنطق ولا تهضر ..وعينيها مجمعين فيهم بريق الدموع مزلجين باغة غير تبكي وعلى شوية تنزل دمعة

هزات أتاي و خلصات و ضارت غادة حتى ضربات فجسم حديدي ..

هزات عينيها بتثقال من قوة الزدحة فاقت من الصدمة و عينيها دمعواا

الصحابات !! العشرة فين مشات !!

فين لي كنا كنقولو فين وفين !!

هزات عينيها فيه بتثقال كتشوف ف الشخص لي تزدحات معاه .. كان هو لي كتكرهه وكان هاد الشخص طبعا عهد الدين ..

خرجات ف إتجاه دارهم كتجري كاتمة شهقاتها و الدموع من عينيها باش مينزلوش ..كاملين كنمثلو القوة ف الأمور لكن ف بعض الأمور كنكونو ضعاف وبزااف ..

دخلات لدارهم من بعد مافتحات ليها بشرى ..

بشرى : اويلي مالك اش وقع ليك افرح ؟

مجوبتهاش .. فقط حاطة وجها على ركبتها كتبكي و تشهق بسرعة كبيرة حتى تخوفات .. حماارت .. النفس تقطعات و لأسف هي مريضة بالضيقة و مشكل الخنقة

فرح : ا .. ما .. ما .. غن..موت (شهقات) مبغيت..ش نموت .. دا..با

بشرى شافت حالت بنتها خرجات عينيها مخلوعة على فلذة كبدتها غوتات كتحرك ف فرح بسرعة ..

بشرى : شربي شربي عفا بنتي

هزات كاس د لماء كتشربها و فرح غير كتكح مقداش تنفس ولا تحرك ..

أما بشرى شافت الحال تزاد عليها وهاد لمرة بزايد صونات على حسن لكن لا مجيب ! من كثرة خوفها على بنتها الوحيدة نور عينيها معرفات راسها اش دير ..

خرجات كتجري لباب دار كتغوت ب أعلى صوت على لله يعتقوها و يديرها لسبيطار

ولحسن حظها كان عهد الدين جالس كيف لعادة على لكرسي جنب الحانوت .. محس غير ب بشرى واقفة عليه كطلب منه المساعدة

بشرى : اولدي لله يرضي عليك بنتي كتمووت كتموت

بسرعة دخل تابعها وهو كيشوف الخلعة و تؤثر فوجه بشرى خايفة تخسر بنتها ..

توجه لصالون كانت فرح شبه مغيبة هزها بدون شعور المرض هذا و اي واحد طاح فهاد الموقف أكيد غيدير مثله!

حطها فالسيارة وركلات بشرى جنبه غادي ف اتجاه لمستشفى ..

دقائق قليلة وكانو وصلو .. نيشان دخلوها دير التنفس الإصطناعي

بعض عدة فحوصات .. لي طول الفحص وعهد الدين واقف مع بشرى مانساحبش فضل يكمل خيره و يمشي فحاله !

متكية على سرير المستشفى و أصوات عالية جنبها .. الأكسجين الإصطناعي ف فمها و الصيروم فيديها .. عينيها فالسقف كتفكر وتعاود .. صدمة كبيرة دخلات فيها

كاملين غنقولو مشكل ميستاهلش يوصل حتى لهادشي ونعس عليه أنا فالسبيطار كاع لكن فرح حاجة أخرى ..

المستشفى العمومي معروف الأصوات عالية .. فين مكاينة شي قطة راها عايشة معاهم تم

مكاينش المريض ينعس بوحده ف الشومبر لا !!

دخلات بشرى من بعد ماتكلمات مع الدكتور وشرح ليها حالة فرح .. دخلات لعندها .. جلسات جنبها شادة ليها فيديها و الأنضار كلها موجهة ليهم هذا حالنا !!

بشرى : علاش درتي ابنتي هاد لحالة فراسك

شافت فيها فرح من بعد حيدات ليها لفرملية التنفس الإصطناعي ..

فرح بإنكسار : ابتسام تزوجات وقالت ليها منين تشوفيني متبقايش تجي تسلمي عليا .. واش انا خايبة اماما لهاذ الدرجة ؟

بشرى : لا أبنتي افرح اش هاد لهضرة نتي غزالة وأي واحد يتمناك ..

تنهدات بعمق كبير كتحس بقلبها كيحرقها باغة تشم الهواء ..

فرح : ماما يالاه نخرجو صافي قهرتني ريحة د هاد البيت

بشرى : واخا ابنتي يالاه نيت خليت عهد الدين كيتسنانا وقف معانا لله يجازيه بلخير ..

فرح : اش دخل هداك واش وصله لهنا ..

بشرى : هو لي جابنا ابنتي

فرح : نمشيو لطاكسي اماما..

بشرى :سيد من قبيلة وهو كيتسنا سمح فشغله وجا معانا

فرح : انا غنمشي فطاكسي ونتي رجعي معاه

بشرى : اش هاد لخصايل لي ولاو فيك زيدي قدامي ..

أحيانا منين كنشدو ف قلبنا بزاف كنخبعو ونبينو الإبتسامة ونضحكو ونشطو

و أشخاص كيقولو لينا سعداتكم ضاحكين ضاربين الدنيا بركلة

هداك هو الأكثر واحد لي كيكون ربي لي عالم بحالته

و منين كيحط راسو على لوسادة هي لوحيدة لي كتعرف اش داز ..! فديك ليلة وشحال من دمعة نزلات بسبب كلام الناس ! ومواقفهم

~ارحموا من في الأرض يرحمكم من في السماء ~

طول الطريق وهي كتشوف غير ف المراية شوارع مراكش .. من بعد ما قنعاتها أمها معندهاش فلوس الطاكسي وصباح هذا و الحرارة بسيف باش تقدري تشدي .. طاكسي

هز عينيه من المراية لقدامي كيحقق فيها و فحالتها .. الحديث لي كان بيها وبين ابتسام تقريبا كبه سمعو

عينيها حميمرين بسبب البكاء لي بكاتو و خدودها حمرين و مزنكين ..كذلك

وصلو لحي .. بدون متشوف ناحيته خرجات غادة ف اتجاه منزلهم ..

بشرى : سمح ليا اولدي عذبتك معايا خيرك عمري نساه ليك لله يسهل عليك

عهد الدين بإبتسامة : لله ياودي مرحبا (حك على لحيته ) وميكون باس بالشفاء

بشرى : أمين ..

دخلات لدار مجبدة على السداوي تترد النفس .. فاتحة السرجم كتشمش ..

بشرى : طايرتيها مني خلعة ..

‎ فرح ضحكات : اواااه علاه نتي أبشرى كتخلعي !!

بشرى : عمر الشيخة متنسا هزت الكتف ، هادي هي ديالك رتاحي ليا مع راسك ومتفكري فوالو ..

فرح : ان شاء لله .. اوا نوض من النعاس نلقا شي بيتزا يحفظاااك العشيرة

حركات ليها راسها متفهة حالها وباغة دير ليها خاطرها ..

تعاشات العشية و الشمس تقريبا غربات .. ف منزل با علي كيف العادة مجمعين على كاس أتاي و زيت وزيتون و المسمن معمر إلى أخره ..

كوثر دايرة لفولار و الحنوك حمرين الحمام باين عليها هي ومريم !!

عهد الدين : بالصحة الحمام لوليدة بان عليك أما شي ناس وتقووول ..

كوثر : ولله مانجاوبك بابا زيد ليا أتاي احح وشحال غزااال

لمة العائلية الصغيرة الضحك و النشاط مايخطى دار با عي دار الكرم ..حتى نطقات مريم ب إبتسامة

مريم : عهد الدين لقيت ليك عروسة واحد لبنية شهوة منها ياوليدي

هز يديه كيحك لحيته بتوثر محاملش الموضوع ..

الخمسة د لعشية .. الشمس غربات والمغرب قرب يؤذن عاد فايقة كتكسل .. شائعة نعاس مع الصيروم و النهار المتبع لي داز عليها طاحت نحيدها بنعسة من صباح حتى لعشية

فرح : بشرى اتي فينك

حطات ليها بشرى البينات عاد خارجة من الفران مكرملة و سخونة ..

بشرى : ا بشوية عليك أهاد لملهوفة .. كولي بشوية لا ترحل ليك

فرح : هههه لا تخافيش أبشرى عندي سبعا د رواح ..

بشرى : نسيت مقلت ليك راه غدا غنشدو طريق لعروبية عند جدك .. مريض بزاف وهاد لمرة بغيناك تمشي نيت معانا تبدلي لجو

فرح : شحال غتجلسو ؟!

بشرى : 3 أيام يمكن يالاه تبدلي الجو و الروتين عفا بنتي ..

فرح : واخا

بشرى : نوضي جمعي حوايجك غدا ف الصباح بكري نشدو الطريق

فرح : اوكي غنمشي عند عيشة نجيب سروالي ..

صباح جديد .. هواء نقي و الحال مزال ظلام .. الفجر كيأذن ، توجهات بشرى لبيت فرح ناعسة كل رجلي فين محطوطة شي ف الشرق وشي ف الغرب ..

بشرى : فرح نوضي لبسي راه باك غيبقا يزعف نوضي

فرح : أمْا عاد نعست خليني عليك !

بشرى : اويلي على لمصيبة نتي نوضي كملي نعاسك ف الطنوبيل

فرح : لا مبقيتش غادا صافي غير سيرو

بشرى : اوا هذا هو البهلان اتنوضي ولا شي سطل مكلاصي دابا يتگب عليك

فرح : اوووف صافي ها انا نايضة ..

خرجات بشرى تلبس جلابتها ..أما فرح تقريبا هادي جوج سوايع باش نعسات تحت عينيها كحل بقلت النعاس ..

ب بيجامتها بقات .. دارت كاب خفيف و قدات شعرها بيديها وخرجات عندهم مخنزرة ما عجبها حااال ..

فرح : هاا انا صافي نمشيو

حسن : هاكا تمشي ؟

فرح : ايه ابا ودغيا ..

عيات بشرى تغوت و تنكر تلبس حوايجها وهي واش بغات فقط بغات تنعس !!

دخلات نيشان لسيارة لور خرجات معاها وسادة و ليزار خفيف حطات لوسادة نعسات عليها وعطلت راسها مكملة نعاسها ممسوقة لحد !

الوجهة كانت ل ايت ايمور بعيدة على مراكش ب 25كيلومتر ..طريق صعيبة عامرة فيرمان وفيراجات .. على أثر وقفة و وفران قوي وقع فاقت كتمسح عينيها مضهشرة ..

فرح : ارسول لله اش كاين احسن ؟

هزات راسها مزيان تشوف اش كاين كان الحال صباح و الشمس شرقات .. بان ليها الغنم فوسط الطريق قاطع الطريق باش يدوز حسن ..

حسن : وا صباح هدا دابا نتسناو ولا شنو ؟

فرح : شوف انا نزل نجري عليهم دوز وستناني

حسن : تكلسي لا ..

متسوقاتش ليه وهبطات كتجري على لغنم وتجري تابعاهم حتى شافت حسن داز و وقف عاد مشات كتجري ركبات كتنهج ..

فرح : يالاه كسيري ابْا حسن وشي أغنية ديال بنت الستاتي يحفظك !!

بدات كتغني بصوتها .. نطيحو وما نميلوش (معارفهاش فقط سامعة بيها )

حسن : ارجوع لله .. مال بوك واش هبلتي رجعي نعسي رجعي

فرح : ايحفظك

طول الطريق وهي ناعسة .. حتى حسات بشي قرصات ف فخضها فاقت كتحك فعينيها ثاني ..

بشرى : نوضي راه وصلنا ..

فرح : اه على سلامتنا ..

المنظر كان رائع مكان يشبه لصحراء المغربية .. مكان جميل ..الجبال .. اي حاجة راحة نفسية

كان منزل مبني ب الثراب مقاد و البئر قدام باب الدار و الفران .. المبني ب الرملة

بشرى : قادي راسك وكوني لآلة و مولاتي !!

مجاوبتهاش فقط تابعاها .. كانت العمة فباب الدار ب إبتسامة بشوشة ..

العمة : مرحبا و ألف مرحبا ب الغالي جا وجاب معاه دخلو دخلو ..

من بعد السلام و تكلم على أحوال الكل .. وفرح كتعرف على هادي و هادي كتعقل عليهم و تفكرهم ..

بثينة (بنت عمها ) : فرح اجي تمشي معايا نرعاو الغنم و النعاج !

بغات ولكن فنفس الوقت مبغاتش حيت ممولفاش بهادشي كاع .. وفنفس الوقت باغة يالاه جات ترد عليها حتى كانت سبقاتها بنت عمها اخرى اسمها ريهام ..غليضة و زوينة شابها لمها لي أصلها شلحة ..

ريهام : ياكما مراضياش بينا

ضحكات بخفة واخا معجبهاش تهضر معاها هكاك ومن قبيلة وهي كتحشي ليها لهضرة من لتحت لتحت ..

فرح : نوضي ا بثينة

ناضت بثينة وتبعاتها فرح مخلين ريهام كتقلي فسمها ..

دازو لغرفة كيف كيسميوها (الصالون ) قالتها لمها وخرجو الكوري يسرحو الغنم و النعاج ..

فبلاصة كبيرة عامرة ربيع و فصة

جالسين هي وبثينة على الربيع و الغنم حداهم

بثينة : مكاين حتى واحد فحياتك ؟

فرح : لا .. ونتي

بثينة : ممم

بثينة : قولي اش تما خوي لمزيودة ا لمسخوطة احح الحب ياك

بثينة خدودها حمارو بخجل : أشرف

فرح : شكون هذا ؟

بثينة : اويلي حلفي بالله الا مكتعرفيهش

فرح : ولله مكنعرفو شكون هذا

بثينة : ولد عمك وعمي

فرح : عمري عرفتو واش عايش هنا لا!

بثينة : لا .. لا ف فرنسا عايش هو وخوك هشام ..

فرح : كنت كنشوف شي واحد ديما كالس معاه كان كيصحاب ليا صاحبو واش هو عارفك كتبغيه ؟

بثينة : لا اختي وعفاك عنداك تمشي توصل لشي بلاصة هالعار

فرح : اويلي منيتك حتى نتي انا ماشي من داك نوع

بثينة : عارفاك افرح ..

فرح : انا نصوني على داك دحش د هشام نشوف حبقلبك هههه

بثينة : توحشتو عرفتي شحال مشفتو بزااف

~ هشام 29سنة الأبن الأكبر ل حسن و بشرى و فرح هي الصغرى .. مستقر ف فرنسا ~

دخلات لواتساب كتقاتل باش تشد ريزو لقاته فاتح .. نيشان صونات أبيل فيديو حتى جاوبها هشام حروفه حرشة لحية كحلة و شعر اسود كان لابس نص كم ويديه لمزغبين فيه ساعة

هشام كيشير بيديه : افين ا دحشة صافا هانية

فرح : وا البغل توحشتك

هشام : وباينة اصكعة عليها تسولي الا مصيفطتش لا تسولي

فرح : اودي حتى نتا غا لكونكسيو

هشام ضحك على كذوب ختو : يعطيني وجهك ادحشة اجي فين راكم بالي الخضورية ..

فرح : راني ف العربية هاد صباح جينا جدك مريض

هشام : وشكون جالس حداك !

فرح : بثينة

هشام : معقلتش عليها هههه مهم سلمي عليها

جا جلس شخص جنبه مسرح رجليه وهاز تلفون كيتكونكطا فيه دارت سكرين وأي لقطة شاف ولا شاف كتصوره

حتى قفزها صوته كيغوت شاد كرشه بالضحك ..

هشام : أجري أ لمسخوطة شي نعجة راها هاربة !!

ضارت كتشوف حتى بانت ليها بعيدة و بثينة حتى هي قفزات خرجات عينيها غادة كتجري وبثينة كتجمعهم !!

غادية مور النعجة كتغوت وتجري ف لخر لحقاتها وشداتها كتنهج و حتا حمار ب الجرا لحقات عليها بثينة جامعة النعاج مع تهناو حتى دخلوهم لكوري وسدو عليهم ومشاو جالسين بعد ما نقاو حالتهم مسرحين كيرتاحو ..

نعسات من بعد ماتغداو و السهات ف الدوار وقت القيلولة دابا ..

ممولفاش تنعس ف العشية قتلها الملل بجهد وكلشي طايح بحال السردين حداها ..ماجا فبالها غا هضرت عهد الدين لدابا مزال مبردات ليها هضرته ولا والو طاحت عليها فكرة شيطانية ..

مشات لواحد القنت كان شاد الريزو مزيان دخلات الفيس كتقلب عليه دارت سميته وكنيته شافت لكونط هزات تصااور كلهم .. وخرجات داخلة لفيس قديم عندها بدلات ليه سمية ودارت سمية عهد الدين و نفس الشئ لي داير .. وكتبات كونط جديد

صيفطات لبنات لحومة كلهم لي كتعرف وحتى لي مكتعرفش ..

بداو وحدة مور الأخرى تقبل و كيتفاعلو مع الحساب مكاين غا طوب ..إلخ

شافت الكونكسيو قريبة تسالي دخلات عند وحدة مبتاسمة بشر ..

فرح بصفة عهد الدين : الزين بيخير !

البنت بسرعة : منين هضرتي معايا راني فوق بيخير ونتا ؟

فرح : مزيان .. مم الزين محتاجك

كتكتب وهي كتفرشخ بضحك .. غير شادة ضحكتها بيديها لا يفيق شي واحد

البنت : مرحبا لله ياودي

فرح : بغيت 50dh روشارج دابا ..

البنت : دقيقة وتكون عندك

ضحكات بجهد حتى فيقات بثينة كتشوف فيها ب إستغراب ..

بثنية : تي مالك ؟

فرح : اجي تشوفي

وراتها لمساجات .. شداتها الضحكة ونطقات ..

بثينة : لقيتي روشارج دابا احي عليك المسخوطة تخيلي يدعيك هادشي راه خطر افرح

فرح : لي فجهده يديرو..

شافت البنت لي ردات عليها كانت روشارج نيت محكوكة دخلاتها ..وزادت تبسمات بشر كبير

شافت مساج من بنت عبوش ..كانت كاتبة فيه ..

بنت عبوش : اليوم بالنسبة ليا عيد منين صيفطتي ليا انفطاسيو ..

تبسمات بشر كتقرر اش دير فكرة طاحت عليها هي تقول ليها تصور راسها بدوبياس ..

تراجعات .. بعد تفكير عميق تحرك ضميرها تحرك فداك لحضة مسحات لكونط وكلشي بصفة نهائية عارفة لقضية فيها البوليس .. والشرطة القضائية وهي ماشي ديال هادشي ..

حطات تلفون فشارج وخرجات تابعة بثينة عجبها جو البادية .. الهواء نقي ومع الصيف كلشي مجمع تما ..مشات دخلات لصالون عيالات عمامها كانو جالسين شادينها بالضحك عجبها الحال بجهد و اندامجات وسطهم ..

كريمة (مرات عمها ) : اجي افرح نقولك نتي عزيزة عليا هاد لوصفة متبعينها حنى جميع صباح تشربيها على الريق و تفطري واه كتغلط شيرات ليها كانت طاسة كبيرة محطوطة صباح فيقي وسيري هزي .. ولا هزي وعزلي وديري طاسة بوحدك وان شاء لله متمشي من هنا حتى تزيدي تباني زين ..

فرح بصواب : ربي يخليك ..

عجبها الحال .. ومشات معاها كتوريها وصفات اخرين ..

وهاكدا داز النهار عند فرح .. زوين وعجبها الجو بزاف وفوجاات على قلبها ..

~منزل با علي ~

جالسين مجمعين على كاس أتاي كيف العادة و الفاكية ..

كالس يالاه دخل هاز تلفونه حاط يديه على فخده .. معرفت كيف دار حتى داز لمسنجر وبضبط بلاصة لمساجات لي مداخلينش عنده مطاح غير فسكرين الكونط ب إسمه و الهضرة .. عقد حواجبه بعصبية كبيرة ..

ناض نيشان طلع لبيته .. لكونط كيهضر ب إسمه منتحل ف شخصيته و بالنسبة له هو ك راجل .. نزلو من قيمته وبان كأنه مدلول ..

مسح على لحيته بعصبية كبيرة كيسب من السمطة لتحت بقوة الأعصاب شعره قرب ينتفو ..هز البيسي داخل لداك لكونط لي طلع ليه كيخرج ليه مسارنو هكرو و ولا مفتوح عندو ف البيسي عندو خبرة كبيرة ف مجال المعلوميات ..

داخل لجهة الإعدادات يشوف النمرة ولا ل إيميل ويعرف صاحبه مقرر يطبق المسطرة ..

وفنفس الوقت صونا الهاتف دياله أبيل فيديو واخا معندو خاطر و طالعة ليه ومعصب لأقصى حد من هادشي و هاد الفتائل د البراهش كيف سماهم هوا ..

حتى تسمع صوت رجولي ببحة رجولية كذلك ..

هشام : كتبانلي عاقدهم مالك اش ف لبلان .. اصاحبي

حنحن كيحاول يتهدن و ميسبش ..

عهد الدين : التبرهيش حق الرب اصاحبي جاين نرتاحو زدقنا ف التبرهيش د البزز

هشام : سيفطلي هادشي .. اشوف راه غدا جاين أنا و أشرف اجي عندنا لمطار .. واا دحش سمعتيني

عهد الدين تبسم : على سلامتكم القنط بلا بيكم ..

هشام : ياك وا تلاح نمشي نعس غدا عندي طيارة بكري ..

عهد الدين : تصبح على خير ..

مسح على عنقة بتعب .. كيحاول ميديرش رأسه ف هاد التبرهيش ولكن ميتهنا حتى يعرف مول لفعلة ..

حيد تيشرط بقا عريان من لفوق وعضلاته السداسية باينة .. كانت النمرة مكايناش غير إيميل و بسمية دري ..

دخل لكونط لي محتل شخصيته ودوا مع البنت .. كيشرح ليها الموقف واخا مراضياش

صباح جديد ب أحداث جديدة .. الشمس يالاه غتشرق .. الهواء النقي و السكون خالي من ضجيج المدينة و تلوث الهواء ..

كيتسمع فقط صوت الطيور .. كلشي فايق على الصباح كيوجدو الفطور باش يفطرو بكري هادي هي عادتهم .. إلى الأنسة فرح مزالة مجبدة ناعسة .. محسات غير بقرصة جاتها مع لفخض ..

بشرى : نوضي غتحشميني مع عباد لله

هزات راسها ف السرجم بان ليها الضلام ورجعات تجبدات ..

فرح : واش أبشرى بايتة كتحلمي بيا ولا سيري اختي سيري خليني عليك ..

دخلات بثينة ب إبتسامة بشوشة

بثينة : خالتي غير خليها غتكون مزال ماولفات الجو شوية بشوية وتولي تفيق بحالنا ..

بشرى : يرضي عليك أ لمرضية ..

تبسمات بخجل .. وخرجو ف اتجاه الكوزينة كل وحدة و اش كدير و باش مكلفة !!

الشمس شرقات !! والفطور فطرو وعجنو ونصبو الغذاء .. فاقت كتحك فعينيها كيف لعادة مضهشرة ..

قادات حالتها واخا عارفة غتبقا الهضرة عليها ممسوقاش ..

سلمات عليهم ..ودازت فطرات ومشات جالسة جنب جدها المختار كيعاود ليها على فترة الإستعمار و يوم وفاة الحسن الأول ..

يتبع...

قصة المفروحة ومول الحانوت

محتوى القصة

التنقل بين الأجزاء