أبو عائشة الجزء الثالث

من تأليف Soukaina Ahnani
2020

محتوى القصة

رواية أبو عائشة

رد مغدد عليه: داك الجن الزرگ غاكايطير من هن لهن ياالاطيف..شتي ديك الخطرة فاش رجعت عدكم من المدينة محروق فيدي

هزات حجبانها: آاااه فاش كنت كانقرا فالتاسعة ياك نهار عيشورا؟

بوبكر: اييوا راهواا اللي حرگها ليا بالقنبوول "برگم داير ايديه ورا ضهرو" بن الكلب لاخر 

جمعات فمها شادة الضحكة وهو كايخنزر هنا وهنا غامقنش و لامشا تاطلع صعيب ينزل للرض ويتفش 

خرج عندهم تاج الدين لابس الجاكيط ديالو وهاز سوارت فيدو ابتاسم ليهم وقال: الله زيدو 

مشاو هوما جيهة الطوموبيل وهو داز للدار اللي قدام باب دارو..حلها ودار لقاهم واقفين حدا الطوموبيل تايتسناوه يحل ليهم، ضحك وقال: من هنا ااعمي

بوبكر: فيين!!؟

تاج الدين: هادي هي الدار ههه زيد زيد

بوبكر شاف فعائشة وزاد وراه طالعين مع الدروج

بوبكر: ولكن اولدي على معرفت هادي دار ميمتك لالة عيشة!

تاج الدين: اه بصح ولكن الواليدة دابا فبوزنيقة عند ختي وقليل فين كاتنزل هنا..سولتها البارح وقالت ليا مرحبا بيهم يگلسو فيها شحالما بغاو

حل الباب الخشبي ودخل.. بوبكر قوص حجبانو وامتانع الدخول بقات عائشة وراه تترمي نظراتها لداخل وساكتة

بوبكر: لا اولدي ماديرهاش مني قلة الصواب ولايني هادي دار ميمتك منقدرشاي نسكن فيها..غير شوف ليا شي دويرة على قد الحال ولا وريني شي سمسار زين نتفاهمو معاه

تاج الدين: سي بوبكر، صلي على النبي

بوبكر:اللهم صلي عليك ارسول الله

تاج الدين: هاد الدار اصلا كانت غاتتكرا حيت ماحدها مسدودة غير كاتزمت وتجمع الغبرة.. الواليدة معندها حتا مشكيل بالعكس بغاتكم تبركو فيها

بوبكر: ولايني اولدي مجاتش..السيدة الى بغات محالها ديك الساعة اش ندير نبدا نقلب من الاول

تاج الدين: الواليدة مكتجي الا فالعطل والاغلبية انا اللي كانمشي نزورها ..غير توكل على الله ودخل راه بنتي عائشة عيات بالوقوف ههه

بسمات وعيونها كايبرقو للداخل، عجباتها الدار بالجهد واخا باقي حتا مدخلات حساتها انيقة متولة وتتريح النفس

بوبكر حك لحيتو كايخمم وتاج واقف كايتسناه يحسم قرارو..حتا نطق وقال بتساؤل: وشحال باغي فيها؟

زفر وقال: سي بوبكر..ارا يدك

قوص حجبانو وايديه ورا ضهرو: لا لا لا لا انا لامكريتها من عدك مانسكنشاي فيها لا

تاج الدين: دابا واش حنا عائلة وحدة ولا لا بغيت غير نعرف

بوبكر: اييه ولد خويا وفمعزة بنتي ربي شاهد.. ولايني باش نسكن فيها بلا كرا بلا جوج ..الاا



..عائشة دخلات مخلياهم تيدويو وطلعات مع الدروج المزلجين تتحسس بيدها الحائط ..لقات بيت مقابل مع الدروج حداه حمام مفتوح.. دخلات كاضور عينيها ولقاتها غرفة نوم انتوية صباغتها مزيج بين الأبيض والوردي مع سرير عريض بنفسجي وكوافوزات بيضين مع بلاكار نفس اللون.. طابل دونوي بيج بمراية عالية مقابل ليها بالكو طويل، بسمات بفرحة فورما شافتو ومشات ليه كاطير حلاتو ودخلات ليه حاطة يديها على الحافة مطلعة راسها ومخلية اشعة الشمس تتلعب فوجهها
كاينة بيوت كاضيق نفسنا وحنا داخلين ليهم وحس الراحة مافيهاش..وكاينة بيوت من الخطوة الأولى كاتحسسك بالانتماء واستقرار روحك..كاتحس أن هادي هي دارك فيها راحتك وفيها يهنا بالك وكلو راجع للطاقة الايجابية اللي كاتجول فهاد الدار

وسعات بسمتها كتر وضارت كاطير لتحت لقات باها مقصح راسو هو يحلف حتا يخلص كراها وتاج الدين يححلف ماياخد عندو شي ريال حتا نزلات عندهم وتلاحت على حظن باها معنقاه بفرحة عارمة كاضحك..شاف فيها بوبكر باستغراب و تاج قال كايضحك

تاج الدين: عجبك البيت اللي الفوق

ردت كاضحك: ااه كايحمق ههه

تاج الدين: كان ديال ختي نجاة قبل ماتزوج ههه "شاف فبوبكر بنص عين" والى باك بغا غايولي بيتك نتي

عائشة: الصراحة عجبني بزااف ههه " شافت فباباها مسبلا عينيها ككل مرة فاش كاتبغي طلب منو شي حاجة" بابا عافاك خلينا نبقاو هنا..عاافاك


تهزات فاليزتها الفوق كاضحك..دخلاتها وبدات كادور فالبيت العريض بحال الحمقة فرحانة بيه ومتحمسة للقادم

فحين انو لتحت بقا بوبكر كايدور من قنت لقنت يتفقد شنو ناقص الدار ..احسن حاجة بالنسبة ليه هي أنها مفرشة على حقها وطريقها خاصينها فقط المواد الغدائية 
..طلع عند عائشة دق وفتحات ليه عنقاتو فجأة وهو مبسم برضى

عائشة: الله يخليك ليا ابابا ههه

بوبكر: ههه وحتا نتي انوارتي الله يرضي عليك " حيدها من حظنو وقال بهدوء" غانمشي ابنتي نجيب مناكلو وندوز للسوق نتقدا للدار راتاحاجة مكاينة ..تمشي معايا؟

عائشة: لا لا بلاش انا غاننقي شوية الغبرة ونستف حوايجي

بوبكر: ايه اللي بغيتي..وانزلي ورايا تسدي الباب 

عائشة: واخا ههه

نزل وهي وراه حتا خرج وطرقاتو عاد طلعات كاتفرفر لغرفتها الجديدة..جبدات الطيلي اتاصلات بكريمة ودارت اوط باغلوغ حاطاه فوق السرير

عائشة: كوكوتي ههه

كريمة: ههه لاواه گاميلة، شفتك كاضحكي اش فالبلان

ضارت فالبيت بسعادة: ااحح المدينة شحال زويينة..سكنت فدرب سلطان فخبارك ههه

كريمة: واايلي ومالقيتو الا داك الدرب

عائشة: علاش مالو ههه

كريمة: واالو غسمعتو من داكشي الرفيع ههه عمي بوبكر غاينتف شيباتو مسكين

عائشة: لا لا بالعكس جينا فقنت زوين والناس واخا باقي متعاشرت معاهم ولكن كايبانو ضريفين

كريمة: غاقولي الله يحفظ ههه شبان لك نتلاقاو؟

عائشة: داكشي علاش صونيت ليك، بصراحة مكرهتش نشوفك ههه وغير يجي بابا غانگولها ليه

كريمة: إن شاء الله احبيبة مزية نيت اللي جيتي منها تحضري للخطوبة تاعي ههه

عائشة: مگلتيش ليا ايمتا؟

كريمة: فهاد الايام إن شاء الله،غاتجي ضروري ياك؟

ضارت كاتحل ڤاليزتها: نشوف مع بابا "شافت حوايجها وكشرات" كريمة!

ردت: نعام ازين

غبنات صوتها: معندي منلبس اوفف

كريمة: علاش فين حوايجك ههه

عائشة: قدام وغير كساوي كاشفين..عرفتي مرت ولد خو بابا شنو تتلبس غير الهبال اما بنتها واخا مسيميمة خلاااص


ضحكات كريمة وقالت: مسيميمة ههه ياكما دارت لك شي حاجة

ردات وهي كاتهز الحوايج وتستفهم فالبلاكاربا: ش يالله نزاوطها من الدروج 

كريمة: ايوا مالكم؟

عائشة:: منعرفحسها غير كاتخنزر فيا تگولي غاتقسم معايا الورت

كريمة: مفششة واقلة..ياك باها لاباس عليه؟

هزات حجبانها: لاباااس عليه عرفتي دارهم تحلي فمك ماتسديه واعرة واعرة واعرة..وتيتييز تحلفي لاعدو شي تلاتين هاكاك ههه حتا مرتو غزاالة للصرااحة وبنتو تاهي منكدبوش ولكن السم تايقطر منها

عائشة: ههه دابة راكي جارتهم بعدي منها لادير لك المشاكيل مع عمي بوبكر

عائشة: غير شتيني مسوقة ليها..اجي نسولك كاينة هنا شي جوطية

كريمة: عطاهم الله..باغا تشري شي حاجة؟

عائشة: ممم "سمعات الدقان وقالت" واقلة بابا رجع 

كريمة: واخا بيزو..ومتنسايش دوي معاه باش غدا نتلاقاو صافي؟

عائشة: واخا باي

قطعات ونزلات كاتجري للباب وصلات ليه وقالت: شكون؟؟

جاوباتها هيام: انا ابنتي حلي

دورات الساقطة وحلات لقاتها هازة طاجين مغطي ومبتاسمة فوجهها

عائشة: عدبتي راسك اخالتي هههه

مداتو ليها: مكاين حتا عداب، طلعيه انا غانجيب الخبز

عائشة: واخا ههه

طلعات هازاه للكوزينة وهيام رجعات للدار جابت تلاتة الخبزات ورجعات عندها داخلة للدار وللكوزبنة تحديدا: عجباتك الدار ههه

شافت فيها عائشة: فنة ههه

هيام: نتي هي الفنون ههه "حركات يدها على شعرها بحنية" حتا هضرتك مبدلة على ناس الدواور علاش؟ ههه

هزات كتافها: ههه ممولفاش كندوي معاهم.. كانجمع غير مع صاحبتي كريمة

هيام: ساكنة هنا فكازا؟

عائشة: ااه..وحتا الليسي فين كنت تانقرا مكانوش فيه بنات الدوار داكشي علاش

هيام: ههه مزيان احبيبة الله يوفقك.. شحال جبتي فالباك

ببسمة عريضة: سبعطاش

حلات عينيها مبهورة: تباارك الله.. كون درتي شي ايكول حسن ليك 

هزات كتافها تاضحك: لا لا مابغيتش من ديما باغا ندير لافاك 

هيام: ايوا شوفي نتي هههه خاصني نمشي دابا تهلاي فراسك

عائشة: ء ء خالتي هيام..بغيت نسولك عافاك

هيام: وي احبيبة سولي

عائشة: كاتعرفي شي جوطية قريبة لهنا؟

هيام: جوطية؟؟ علاش


قدام مقهى فالصونطرفيل فرانا مطورو باحترافية نزل حيد الكاسر ودخل هازو فيد ويد كايلعب فيها السوارت وعينيه تايدورو، حتا نادا عليه واحد من الشلة المجموعة فالقنت مخلطين ولاد وبنات وتوجه عندهم بابتسامة.. سلم بيدو وهوما ضاحكين عاد تشبح گالس حدا بنت زعرة لابسة دجين مطرطق عليها وشوميز حمرة قصيرة ضاربة لشفايفها تعكيرة من الطرف للطرف وبعينيها قريب تاكلو..وقف عندو السيرفور وقال 

بلال: شي نص نص وفطور كامل اخاي عادل

السيرفور: هي اللولة ابا بلال

بلال: الله يحفظك

واحد من صحابو قال: ايوا ابلال شگلنا على غدا

هز فيه صبعو بطنز: نتا بالدات بلاناتك ديما فالصو غابلا ماتسول

ضحك وقالت البنت اللي حداه: اشمن بلان تاني؟

ضار غمزها: بلان بيناتنا حنا الدراري 'جر بصبعو خصلة من شعرها" سبغتيه تاني

ردت بغنج: ممم عجبك

حرك راسو ببسمة خفيفة وشاف فحجبانها: جات مفروشة لا؟..الشعر صفر وهادو كحلين

سارة: نن عادي كلشي كيدير ليهم هاكا

بلال: هه نتوما البنات

كمل صاحبو خالد: عالااام ههههه

حط ليه السيرفور قهوتو وفطور كامل تحنا عليه وبدا بطبسيل البيض بالخليع مختشع فيه ..تال الماكلة معندو فيها قياس، وكال ديال الصح وكون ماكان رياضي عزيز عليه الحديد كون خرج الكريشة من هادي شحال.. عينيه فالطبسيل وودنو معاهم هوما اللي تايدويو مرة على البروف اللي تيقريهم مرة شي ليلة زاهية مرة على بلاناتهم، والبنات كلة وحدة وعلامن شادة النميمة الا البنت اللي معاه يدها فظهرو العريض كادوز عليه وبابتسامة تتشوف فيه
..حتا سالة وجغم قهوتو عاد رجع اللور راد يدو ورا عنقها

خالد: ابصحتو طبيتي فالپلاتو ازيتون هو اللخر هرفتيه هههه

بلال: غاتخلصو عليا؟

خالد: ههه لا

بلال: وازمو "ضحك خالد وهو شاف فيهم" ايوا شدرتو

واحد من الشلة: شوف نتا اخاي بلال راس العام بلا التوش ديالك كايجي ناقص

قالت وحدة من البنات: خليونا نتافقو كل واحد باش يتكلف

بلال: نتوما كترات فيكم الهضرة كتر من العيالات هههه انا غانتكلف غاتهناو

نطقات البنت اللي حداه: وشنو بان لك نديروه فالمنتجع ديال باباك ههه غايجي طوپ

شاف فيها كايضحك وضحكتو ليها جادية خاصة: ديال من المنتجع الغزالة

رمشات بابتسامة: ديال باباك

بلال: بابل ماشي انا هههه والعوماري يستحيل يعطيه ليا واخا نعواج


-ناري داك باك الرعب بنفسو"خنزر فيه بلال قالب النقشة هو يمحيها" غاضاحك اصاحبي تقلقش

ناض فحالو تاينزل التيشورت: نوض فحالي حسن مايجي يوريك الرعب

خالد: انا جاي معاك توصلني؟

بلال: شيفور باك انا

خالد: والله يستر عليك غاهاد المرة مازال

ضحك باستهزاء: زيد زيد اگواضالو

هز سوارتو والطيلي ..ضار للبنت باسها فحنكها وقال بينو وبينها هاز حاجب: متبقايش تسبغيك واخا، خلينا نولفوك فلون واحد

سارة: ههه اوك

زادها بوسة خفيفة لفمها ودار تابع صاحبو 

_اماتغبرش ابا بلال

بلال: واخا احبيبة

خلاهم كايضحكو على داك الدري وهو كمل طريقو كايتعنكر فالمشية، بشوية عليه وزينو مطلوق هنا وهنا جامع الانظار واللي داز من حداها تتنغز اللي جنبها تشوف، تاداز على جوج بنات غمزاتو وحدة فيهم وحتا هو معطلهاش ردها ليها بجوج خفاف وبقا كايشوف فيها كاضحك..ضور وجهو وبسمة خفيفة فشفايفو مصغر عينيه وتايفكر مع ابتسامتو اللي تتوساع حتا وصل للموطور ديالو ولقا صاحبو واقف تما 

خالد: مالك كاضحك غاوحدك ههه

بلال: غاشفت وجهك وانا نضحك

حل ايديه: تيتيز اخويا تيتيز ههه ااجي بعدا فين الطموبيل هههه

بدا كايحل الموطور: طيرها الواليد 

خالد: ههه اوااه

هز الكاسك لبسو: طلع طلع 

طلع وراه وقال: اهيا بشوية راه عاد فطرت

بلال: هههه شكاتعرف عليا اخاي خالد

بوجه خائف قال: والاا ابلاااااااا.....نير مخلي الدخان وراه وطالق ضحكة من القلب صعيب تتسمع من صوت الموطور القوي وصعيب يتسمع حتا صوت صاحبو اللي وراه


دخل تاج الدين للدار حيد من رجليه ولبس بانطوفتو عاد طلع الفوق 
لقا هيام مرتو باركة فالصالون تتبرد صفارها حاطة رجل فوق رجل بجلسة انتوية مبينة اناقتها والبريستيج اللي فدمها كايجري

حنحن وتم داخل عندها عين: السلام عليكم

بابتسامة شافت فيه: وعليكم السلام هههه

باسها وحداها گلس مشبح كايتنهد بعياء وكايشوف الفوق..ضربات عليه طليلة وقالت بابتسامة: وليتي كاتعيا بزاف 

جرها معنقها عندو كايتشكا: كانعيا الحبيبة ديالي كانعيا..ولدت وسهرت وكبرت فالاخير خلاو كلشي عليا

وسعات بسمتها وهي فحظنو متكية: عز الدين راه بخدمتو احبيبي..مبعد على الدومين ديالك وقرر يأسس حياتو فايطاليا..وبلال راه مازال صغير لا هو لا منعم

قال باستهزاء: مازال صغير هه الله يجيبك على خير امدام، داك زنطيط تايعرف العجب اللي منعرفوش أنا ودماغو فرفارة ولد الحرام ..ولكن مباغي خدمة

شافت فيه مهدنة صوتها: ادن صافي خليه على راحتو بلا متضغطش عليه اتاج راك عارفو كايتقلب دغيا

حرك راسو واخا كلامها مقنعوش وناض كايحرك كتافو: غانطلع ناخد شي دوش خفيف..وجدي الغدا انا نازل

هيام: واخا اعمري "بغا يمشي وقالت" بلاتي راه اليوم غانخرج

قوصهم: فين؟؟

هيام: غادة مع عائشة نشري معاها شي حويجات.. راك عارف دوقي ههه

هز حاجبو بتفاجأ: وباها خلاها تمشي معاك؟

هيام: بصراحة مسولتوش..مي گالت ليا باللي غادوي معاه هي

تاج الدين: واخا الالة سيري..وتقداي ليها اللي بغات بلا ماتحشيها "غمزها" راك عارفة الحالة ديالهم

هيام: كون هاني انا قاديت داك الشغل.. البنت عزات عليها باينة فيها دريوييشة وفنيونة 

بسم نازل عندها: نتي هي الفنون الحب ديال تاج " باسها بخفة ففمها وحلات ليه وهي بدات ضحك وتغنج.. نسا داك الحمام اللي كان ناوي يطلع ليه حتا تم نازل منعم بشعر فازگ عاد مدوش حتا هو لابس بيجامة ديال الدار خاشي فيها ايديه وجاي كايتعنكر..شافهم وقلب عينيه بملل

منعم: ارااعيو للسيليباتير اللي فالدار عيب عليكم عيييب

طلق منها تاج الدين غمزها وهي رجعات عادي لضفارها كاتبسم..ضار كايمسح فمو وتم طالع لبيتو: مالنا نتا

هز ايديه ببسمتو الجميلة: واالو گلت لك واش كاين شي غدا

تاج الدين: لعبتو شي ماتش ناضي

منعم: واايه خسرتيها مللي ماجيتيش

تاج الدين: مرة خرا نمشي مع صاحبي ههه

لعب فشعرو وطلع مخليه هو داخل عند مو وشد التيليكمونظ تايتفرج..حتا سمع صوت الموطور لتحت وناض ضاحك: الواليدة انا جااي


حيد الكاسك وشعرو على جبهتو نازل رطب مع خصلات زعرين كاضرب فيهم الشمس
تحل الباب هز راسو بعدما نزل من الموطور ولقا خوه الصغير اللي لايقل عليه تبوگيسة واقف حداه كايضحك وقال: نديرو دورة

طلع حاجب بجدية: شحال درتو

منعم: عشرة لزيرو

زاد طلع داك الحاجب ممصدقش ومنعم ضحك وقال: تلاتة لجوج

بلال: وشكون دار تلاتة؟

منعم: حنا بالتأكيد وخوك اللي ماركا بيلانتي

عطاه يدو هاي ڤايڤ كايضحك: ماعليكش..يالله طلع طلع 

منعم: ههه الرجوولة اجاي

طلع وراه بعدما لبس الكاسك وبلال قدامو ملابسوش..ڤنڤن بيه وقال: نطيرو ولا نففرفرو

منعم: طييييير 

بلال: هههه 
..عفط عفطة وحدة حتا خلع عائشة اللي گالسة مع باها تايتغداو وسرجم الصالون اللي تايطل على الزنقة محلول ..خنزر بوبكر وحيد عضم الزيتون من فمو

بوبكر: هاعلاش تانگول عليه فرطوطو يخخ تايطير تايطير حگل باه معاه

سرطات دغمتها وقالت تترمش فيه تحت شفرانها: با!

بوبكر: نعام اابنتي

لوات صبعانها تتفركهم: بغيت نخرج مع خالتي هيام نشري شي حوايج

جمع حجبانو: شمن حوايج

عائشة: شي حوايج ديال البنات وصافي

بوبكر: وعلاه هادوك اللي عدك مالهم ابنتي مزينااتهم حوايج

تغبنات: لا ابا هادوك مايصلاحوش للافاك قدام وباهتين

بوبكر: بنيتي زينة البنات تلبس اللي لبسات تتبان فيك كي النوارة

عائشة: هههه ودابة غاتحشمني..ولكن خاصني نشري شي حاجة


بوبكر: واخا ابنيتي شري اللي عجبك غاهو لاش تصدعي المرا حشومة..انا نمشي معاك وانا نتخير لك

غير سمعاتو غايتخير على دوقو خرجات عينيها ونطقات: لا لا لا بلا مانعدبك والله ههه هانتا غانممشي معاها وغاتردني بنفسها راه عندها الطوموبيل

نفا براسو قطعا: لا ابنتي مانتهناشاي عليك ..غانوصلكم رجلي برجلك رالمدينة هادي الله يحفظ تمشي توقع لك شي حاجة

سكتات تتعض فداك الخبز وهو قال الحمد لله وناض يدو على كرشو: الله واللهيلا طويجين واشمن طويجين الله يعطيها الصحة..ايمتا ابنتي غادين

كاتاكل: فاش تسالي غادوز عليا

بوبكر: انا غادي نتكا شوي فاش تجي فيقيني واخا

حركات راسها وهو داز لغرفة جنب الصالون..سد الباب ورضات ضهرها كاتفكر ..هادي غير خرجة مع مرت ولد خوه وماخلاهاش صاحبتي كيف غادير ليها..خلاتها فيد الله تاتخمم فيها مزيان وتاضت تتجمع فداكشي


خرج من الحمام هاز فيدو الطيلي مبدل حوايج الخدمة بحوايج الدار و تايمسح راسو..صونا على على رقم بلال وحطو على ودنو..

عاد الاخير اللي داخل مع باب الدار ضاحك ومنعم وراه الدوخة شاداه واخا هاكاك عجبو الحال والنهار الزين عندو هو فاش تايرجع بلال للدار كايدوزوها زاهية بالمعقول
سد الباب وجبد الطيلي، لقا تاج اللي كايصوني ضحك وقطع عليه داخل للصالون فين باركة مو، شافها وبسمو ملتمحو كتر فتح ايديه وقال: دستوور السلطاانة هيام العومارية ههههه

طلعات عينيها مبسمين بفرح: ههههه احيانة عليك الغابر

خدا يديها باسهم بجوج وبرك معنقها عندو وتايطنز: والله الحبيبة ديالي الى راني مشغول مااعندي فين نتڤننڤن

ضحكات وشافت فيه: ااااي كاتصدر البيترول لامريكا الجنوبية ههههه انووض خبارك كاملين تايوصلوني

ضحك كايحك رقبتو: داك راجلك مكايحملنيش كايبغي يخسر السمعة ديالي معاك اما هضرتو كاملة زيرو.لاما تقتيش يالله معايا

ضحكات حتا تسدو عينيها وقالت: باش يالله يطلقني يااك اولدي علاه دوك البلايص يمشيو ليهم الناس بقيت غير انا


غمزها ودوا هامس: وشكون غايگولها ليه ااصلا.. يالله فوجي على راسك فالبواط داكشي وااعر بالجهد هههه"دار ايدو على وجهو وفعلا جاتو بانطوفة من باه خداها فيدو ورد ضهرو اللور تايضحك

بلال: ودنين الخفافيش الواليد ههههه

تاج خنزر فهيام نازل من الدروج: نووضي نتي حطي لينا ماناكلو عااجباك هضرتو ياك

وقفات تاضحك: غير كايضحك اتاج واش تيق بهاد الحمق

شافت فبلال مشبه كايضحك ودخلات للكوزينة توجد الغدا..تاج دخل عليه مقندش مشا ليه نيشان وهو وقف بعد والضحكة كاتفلت ليه: ااا لا ماضربش الواليد حشوومة هههه غاضاحك واابالله تاضاحك هههه

هز يدو تايتحلف : شي نهار غانفرق لك الرااس لا مافرقتيش علك مرتي

غمزو بمباغتة: وراا مي هااديك ااو

بغا يمشي ليه وطار من جنبو طالع لبيتو كاضحك وصوت ضحككو فالدار كاملة مسموع..ضحكة رجولية تقيلة تخليك تتبسم بلا هواك وتريح قلبك بشوفتها

..دخل تاج للكوزينة حل التلاجة يشرب وهي تتحط الكيسان فالپلاطو..شافتو لابس فردة وحدة من البانطوفة وضحكات: ههه واش منيتك باقي تتشير عليه بالسناضل ااويلي

كب ليه الما: ااويلي نيت..ااشغنضرب اصلا فداك الحيط واخا نبققا نعطيه تال غدا كيبحالا تانهرو

هيام: وابرد بررد راك عارف ضحكو كيداير

شرب وحط الكاس: مشابه ليا فواالو لا لا حسام مصور محطوط

مدات ليه البلاطو: هههه هااك دي هادا وخلي علك راجل ختك فالتيقار

تاج الدين: ااش درت فالدنيا تانولد بحاالو ااش اعباد الله

تابعاه بالطاجين من اللور: اتاج نعل الشيطان ويلي راه صاحبك وشريكك زعما هههه


گلس معاجبو حال ومنعم حداه حط تليفونو وبقاو تايتسناو حسناء وبلال ينزلو

خرج من بيتو مبدل حوايجو بدجين زرق وتيشورت گري جار كلاكيطة فرجليه وتلقا حسناء حتا هي خارجة..شافتو وبدات تتخنزر فيه ضحك وخلاها تانزلات عاد تكا عليها بايديه متقل عليها: ماالنا على التخنزير اكوليخة

غوتات بنرڤسة: وااطللق مني يخخخ

عوجها: طلق مني يخخخ.. نتي غاتعواجي غابالسم اللي فيك 

نزل مخليها تتغدد وگلس بلاصتو بهدوء: الواليدة عمرك توحمتي على لفاعي

ردت باستغراب: لا علاش

بلال: غير سولت

منعم: هههههههههههه

حسنااء كرزات سنانها وتجاهلاتو بالتيليفون اللي فيدها..فرق تاج الخبز والطاجين محطوط مسدود و كايفور

تاج الدين: يالله بسم الله"رمق حسناء مخنزر"حطي نتي داك التيليفون

حسناء: واخا ابابا

حطاتو جنبها ومنعم نقز قال: مامشيتيش معاها لليكول؟

خنزرات فيه وتاج رد: كنت مشغول مع عمي ..ولكن اياام الله طويلة دابا نجي

هيام: خليونا من هادشي وبسم الله "طلعات على الطاجين" دوقو طيابي اليوم هههه

غير سمعو طيابي تحناو كاملين تايشوفو فداك المنظر ..الريحة كاينة ولكن الديكور معرفاتش ليه واللون مايكسابوش البيوضية فقط بحالا باقي خضر

خرج تاج عينيه ومعدتو بدات تشطح احيدوك بالجوع: وفين الطاجين اللي وجدت فالصبااح؟

رمشات فيه: ديتو لعند عمك حشومة يبقاو بلا غدا وهوما عاد جاو

خنزر بلال: علاه هاد عمو فين كاين تاياكل لينا غدانا مايعرفش يطيبو

منعم: لا لا الواليدة لا نتي راه دوك التويشيات تاع البيتزا وليباط وليسوب تتصررعيهم ماگلنااش.. ولكن البلدي بينك وبينو غير الخيير والاحسان خليه لماليه حسن

خنزرات فيه: نتا بالداات سكت فكرتيني بعدا فديك التحاشيمة اللي درتي ليا مع الراجل محشمتيش؟

هز كتافو ببراءة: گلنا زعما باش مايشكش راك غاشارياها من برا ..هههه

حسناء؛ دابا واش مغاناكلوش؟

هيام: طولو هااهو الطاجين، كولو راه مطيباه بالشهوة تلاتة السوايع وانا واقفة عليه وطبقت گاع داكشي اللي شفت فالانترنيت ..غير دوقوه متأكدة غايعجبكم وماغاتسخاااوش منو

شافت فيهم ببسمة ومنعم حط داك الخبز: اليوم الخميس انا صايم اجر الله يتقبل

حسناء: خاصني نراجع عندي ايگزامان غدا

بلال حك حاجبو بصبعو الصغير تايحنحن: احم انا لافاك تتسناني بلاتي نمشي ماحد الوقت باقي

هيام: يااكووو "غبنات ملامحها تبكي وشافت فتاج اللي عينيه تايدورو, قلب على شي كدبة باش ينوض وفاش ملقاش قال: گللسو للرض

رد منعم: من نيتك الواليد بغيتي نبوشي لك الطواليط

تاج الدين: قرردو بلاصتكم..حشوومة من الصباح وهي واقفة عليه وفالاخير تنوضوو 

خنزرات فيهم ورجعو گلسو كايحنززو فداك الطاجين وبلال مخسر ملامحو بجدية..الاا الماكلة ماعندوش فيها اللعب وكرشو عزيزة عليه لامتغداش مزيان مصيبة كحلة


هيام: واكوولووو غاتبقاو تشوفو فيه

وجهو شوفاتهم كاملين لتاج كايتسناوه يبدا هو اللول، حنحن وقال: بلال كول اولدي كول ياك كان فك الجوع

كحز ليه الطاجين ورد: وتگووول اسي العوماري واش نبدا من وراك فين الاحترام حشومة

رد تحت سنانو مخننزر فيه: علاه نتا اصلا تتحتارم

هيام: وااكولو خلاص "شافت فراجلها" تااااج

زفر وهز طرف الخبز الانظار كلها عليه وهو تايبرگم: بسم الله ياربي تستر ياربي

... دار الدغمة ففمو جمد ملامحو للحظة وكمل كايندغها عادي..

ضحكو ملامح هيام وشافت فيهم: ههه ايوا كولو حتا نتوما

هزو كايغمسو فيه ويتقلو ماأمكن..غير حطو ديك الدغمة ففمهم وحلات ليهم وسط اللسان كونما منعم اللي دوا كون دفلوها: الما الما اماما

شافت فالطبلة وحطات ديك الدغمة باقي حتا مداقتو: نسيتو احبيبي انا راجعة

هي ناضت من هنا وهوما طارو من هنا كلها ومنين زاد

منعم طالع بالجرا فالدروج : لااشكر على وااااجب

خرج تاج تابع بلال للتحت وباللدغمة اللي سرط حاس بمعدتو غضبانة عليه: هاد مك ككلشي فينا زين الا الطياب

رد بلال وهو كايلبس سبرديلتو: اصاحبي كي درتي ليها معرفت.. شتي أنا المدام المستقبلية أهم شرط هو تكون كاتصرع الطباب والله وماكانت يدها بنينة لاديتها

تاج الدين: ااه لا قبلات على واحد بحالك ماتگولها لحد

داز خارج وهو وراه تايضحك: تاكل الشوا

تاج الدين: كاتعرف شي واحد مزيان؟

بلال: زيد زيد داكشي من تخصصي، غانديك فين تاكل صباعك

....كملوها على رجليهم مجمعين، واحد مخنزر والتاني مبشور فوجهو ..نفس الطولة نفس باحة الصوت الحرشة جاو حتال الفورمة والفعايل والملامح تما عواجو..معروفين فالدرب واخا من الميسورين ربا فيهم تاج الدين التواضع وقيم التعايش مع الاخر كيفما كان..عزاز على ناس درب سلطان خاصة وعلى باقي الدروبا دكازا عامة ومسميين دارهم بالدار الكبيرة، گاع اللي عندها شي ولد بيطالي بديبپلومو ولا محتاج لأضحية العيد ولا باش يحرك الوقت، تايقصدو العوماري ولا ولادو والغادي مههموم عمرو بخيب ولا يرجع بلاش، الشي اللي خلاهم محبوبين عند الكل وفارضين احترام وهبة

..دخلو لمطعم صغير خاص بالشوا وحداه تاگزارت ،شدو بلايصهم و هز بلال ايدو تاجا عندو السرباي كايضحك عارف الكنصوماسيو مبهرة هاد النهار 

السرباي:مرحبا بالدار الكبيرة مرحبا

تاج ابتاسم وبلال ضحك وقال: جيب جيب شي طبلة مشكلة كيف العادة وتهلا رامعانا الحكومة

تاج عطاه للكتف والسرباي قال كايضحك: الله اودي اخاي بلال اللحيمة المخيرة ديالكم مرحبا هههه

ضرب على كتفو: ههه العز 


لبسات كسوتها الموڤية ووقفات قدام المراية تتسدها من اللور..هاد الكسوة بعدا فيها الضو شوية وتتبان هي الزوينة فيهم اما الشي لاخر لاعلاقة مع الموضة ولا مع ناس المدينة
..مشطات شعرها وعلى طولتو طلقاتو .. ناضت نازلة للتحت لقات باها كايدور بالكومپلي تاعو مخنزر وكايققاد الگرافاط

سمعااتت الدقان وقالت مبسمة: هاهي جات 

بوبكر: يالله زيدي ابنتي منتعطلوش على المرا

نزلات تتجري وهو وراها.. حلات الباب ولقاتها بكسوة بيج فايتة الركبة مفضفضة وفريش سلمات عليها بابتسامة وسلمات على بوبكر باليد

هيام: سي بوبكر لاباس

منزل عينيه كالعادة ومبسم: الحمد لله ابنتي شخبار الدراري ههه

تفكراتهم وسرطات غدايدها: الحمد لله ربي يخليك..يالله احبيبة باس منتعطلوش

بوبكر: اييه زيدو


زاد لطموبيلتو المخرششة وهيام كمشات حجبانها مستغربة وضارت لعائشة اللي مافيدها حيل سولاتها

هيام: واش غايمشي معانا باباك؟

قالت متأسفة تتسبل عينيها: اه..طلبتو ومابغاش يخليني نمشي بوحدي واش تقلقتي؟

هيام: ههه لا ماشي مشكيل..نتي ركبي معاه وتبعوني من اللور واخا

ضحكات مسرورة وردت: واخا نركب معاك ؟

هيام: اياه اللي حبيتي ازين ههه

مشات سابقاها وعائشة طلات على باباها اللي ركب وقالت: بابا غاانركب مع خالتي هيام

بوبكر: وركبي حدايا مالها حفيظة معجباتكش

عائشة: لا ماشي هاكاك غير هو طلباتني نركب معاها باش متملش فالطريق ..هاحنا غير قدامك ماعندك مناش تخاف

سكت شوية وواخا ماعجبو حال قال: اللي بغيتي ابنتي سيري

باستو وطارت عندها لسيارتها ديكابوطابل بيضة ..حلات فمها وركبات تضحك فرحانة وعينيها غايخرجو..ضحكات هيام دارت نضارها وديمارات طايرة فالطريق وبوبكر وراهم..الديكابوطابل وراها باطة السردين بحال ديال اللي تايفرقو الخبز على الحوانت اللون هاهو بحال بحال بجوج بيضات ولكن لا علاقة.. لاااااعلاقة

...

تجمعات الطبلة من بقايا الشوا جا السربلي كايمسح الطبلة وقال تاج: شي براد عافاك وجيب ليا شي شواية اومپورطي

شاف فيه بلال كايمسح فمو: افين باغي تزيد هاد جوج اللي ضربتي ماقدوكش 

تاج الدين: لخوتك الهايش تسحابني بحالك

ضرب على كرشو اللي مكايناش بالاصل: المعدة هي كلشي اسي تاج اهم من القلب

تاج الدين: ههههه ربي لاما سكت وسمع راه عندي ليك شي هضرة

جا السرباي حط ليهم الصينية..ضورها ليه بلال وهز داك البراد كب اتاي بكشكوشتو مدو ليه وقال: بسم الله..شمن هضرة تاني

شرب وحطو قدامو.. شاف فيه وبصوت جدي قال: عندي شي خدمة مع شي ناس جاو فاس على قبل المنتجع

قاطعو مخنزر: باغي تبيع..من نيتك العورابي

تاج الدين: سكت غااسمعني واش انا مابنيتو تاشبت نجي ونبيعو..مهم سمع وحل معايا ودنيك..غانديرو معاهم شراكة وخاصهم شي حد جون ولد الوقت يتفاهم معاهم ويعرف كيفاش يمييلهم لجيهتنا

بلال: وهاد الواحد شكون؟

تاج الدين: نتا اولدي العزيز

بلال: عيار انايا نميلهم لجيهتك حيد حيد نوض فحالي

جرو من يدو: اااجي نكمل هضرتي بعداا "گلس بملل قالب عينيه وتاج كايدوي" هوما شركة سياحية "الفو" الى سامع بيها..السياح ديالهم من الطبقة الفووق وكايعطيوهم عناية خاصة فارقى الفنادق ..الى مشى حتا عجبهم المنتجع غانضربو يدينا فالسوق

شاف فيه: دابا انا مالي فهاد شي؟

تاج الدين: ماتوقفش مع بااك ؟ راه عارفك مطور وعندك مع الإقناع غير داك اللراس قااصح اولدي قاصح

بلال حك جنب فمو تايفكر ..شاف فيه ومد يديو: احم ارا دوك السوارت ارا

تاج الدين: شمن سوارت؟

بلال: ديك الجاگوار اللي مخلي سوكور..بغيتها


طاع حاجبو وقال باستنكاار: شمن جاگوار؟

غمزو: الكحلوشة التيتيزة اللي حاط فالگاراج تاع المنتجع

تاج الدين: كنت عارف طاسيلتك حاط عليها العين 

بلال: تمااما وبغيتها..متافقين

زفر مغدد ورد: نوصلو للدار ونزل لك سوارتها غاقضي لينا الغاراض

بلال: لا الواليد نوصلو للدار غاتجيب وراقها وغانطلعو عند النوطير تكتبها ليا

خنزر فيه: راانا باك البغل باغي تورتني حي

بلال: ههه نتا حاال وحوال متعرف تاني طير لك النقشة وتاخد سوارتها بحال كيفما درتي قبل..كونما خدمت فالصيف على فلوس الموطور كون رانا كانسلت فالطوبيصات

تاج الدين: ينعل جد بوك هادا مانگول

شرب من كاسو: امين واخا متانعرفوش. يالله شنو گلنا

تاج الدين: تقضي الغاراض؟؟

مد ليه يدو: اعتابرو نضا وتقضا

....قدام مول كبير وقفات الديكاپوطابل ديال هيام وعائشة حداها تتشوف بعينيها وقلبها تايرفرف من شوفة الحوايج اللي تايبانو فالزاجة

تلفتات ليها تاضحك وقالت: ههه غانشريو من هنا؟

هيام: سي هههه"حلات الباب" يالله نزلي

خرجو جوج موضفات مستقبلينهم غمزاتهم هيام ووحدة فيهم بسمات بمعنى خاص
..تسناو حتا وصل عليهم بوبكر شافتو عائشة وبدات بسمتها كاتمحى تدريجيا..مول بحال هادا كونراه ساك تايسوا طموبيلت باباها وايطرو ديال لاگريس فابور، كيغادير تشري منو وتكلف سي بوبكر فوق طاقت

وصل ليهم تايطلع عينيه فالمول والبنات اللي واقفين تما: غادخلو هن؟

هيام: ااه اسي بوبكر هنا

الموضفة: ولكن المول غير تاع العيالات سمح لينا اسيدي

تحرج وقال: ا ايه ماشي مشكيل ابنتي..دخلو نتوما انا هنا تانتسنا "شاف فعائشة' احم عايشة اجي ابنتي

قربات تتبربق فعينيها، عاد غاتكلم حساتو خشا ليها وراقي فيدها وقال بينو وبينها: خودي هادو ولاكانو خاصينك خرجي گوليها ليا

رمشات بارتباك: و واخا ابابا

باست يدو وقال: الله يرضي عليك شري اللي عجبك ابنتي ولايني يكون مستور وزين

حركات راسها ورجعات مغيرة عند هيام
..درعاتها هاد الاخيرة وتمو داخلات بجوج كاتوزع انضارها على المحل وعائشة مابقات تاحاجة تحلا ليها..طلات على الفلوس لقاتها عشرين الف ريال وفمول بحال هادا يالله غاتجيب ليها صباط ولا شي شوميز لااكترت

هيام: هههه مالكي مقلقة

حاولات تتبسم فوجهها: لا لا والو ههه

جات عندهم الموضفة كاتجري هازة صندوق صغير وقالت مبتاسمة لهيام: مدام العورابي مرحبا بيك..دايرين واحد المسابقة بمناسبة عيد ميلاد المول

هيام: اووه بصح

الموضفة: سي امدام ..المتسابقة اللي ربحات عندها الحق تشري اللي بغات بالكمية اللي بغات بلا خلاص

عائشة وساعو عينيها: منييتك؟؟؟


الموضفة: اه امدموزيل هاد المسابقة كانديروها كل عام

شهقات وضارت عند هيام: ياخالتي الى ماوقفش معايا زهري فهادي غانعواج

هيام: هههه "شافت فالموضفة" اري لينا الورقة احبيبة

الموضفة: تفضلي 
عطاتها ورقة كتبات فيها اسم عائشة العورابي ولاحتها فالصندوق 

عائشة تتشوف فيها بلهفة: ياااربي نتقبل انا يااربي

الموضفة: واحد الشوية وغانعلنو على الفائزة..حظ سعيد

مشات وهيام قالت: يالله بعدا نشوفو الجديد اللي عندهم

تبعاتها: اييه اللي ماشرا يتنزه

ضارت ليها: وي؟

بسمات: لا والو غير تندعي

هيام: ههههه

بقاو من هنا لهنا وعائشة تتقاقي بحالا غاتولد والدقيقة تتجيها طول من الساعة..باغا تربح وبشدة باش ترتاح وهي تتختار فاللي بغات وتشهات.. سمعات الكلام مجهد وقالت بسرعة: ششش هاهوما غايگولو

...: لهدا حتا هاد العام اعزائنا الزبائن درنا هاد المسابقة وبالقرعة اختارينا فائزة واحدة..واللي هي..عااائشة العوورابي

عائشة: اعععععع هههههه

عنقلتها كاضحك وتنقز ماقاداها فرحة بحالا خدات مليون والدموع قربو ينزلو ليها

هيام: هههه مبروك عليك احبيبة

عائشة: احححح زهري فن فن اخييرا زدق فشي حاجة

هيام: ايوا دابة عزلي وتخيري على خااطرك هههه شنو ناوية تاخدي

ضارت شافت فداك الصف تاع الحوايج والضحكة ففمها وعينيها مرسومة..گفظات مزييان وطفات ايديها عاد قالت؛ بسم الله على بركة الله...


.....بوبكر على برا كان واقف غادي جاي..قهراتو الشمس ودخل لطموبيلتو حاط يدو على خدو وتايشوف فالطريق ساهي..دازت ساعة..جوج.. تلاتة..تلاتة ونص هو يتشطن وطلع ليه الزاعف..نزل يديه ورا ضهرو كيف العادة وغادي ناوي يدخل هو يوقف فاش شافهم خارجات هازين اعداد من الساشيات وكراطن تاع السبابط..شافهم مقوص حجبانو وقال: اااش هاداا كاامل

بسمات عائشة وشافت فهيام تترمش: حوايجي ابابا ههه


وسع عينيه وفوق من عشرين كيس بعلامة المول قدامو: هااويلي وااشتك ابنيتي خديتي المحل كاامل ؟؟ هاادو كاملين دياالك

حركات راسها وبفرحة كاضحك..شاف فهيام بشك وقال خنزر: اجي هنا ابنتي

جات حداه بدا يهضر بينو وبينها وهيام ضارت عند الموضفات باش يحطو الاكياس فالكوفر تاع سيارتهم

بوبكر: ياكما خليتي السيدة هي اللي تخلص 
راه غانتفگع عليك

نفات براسها: لا لا ابابا والله مخديت من عندها شي حاجة

رد وباقي داخلو الشك: اييه وهادشي طلو بعشرين الف ريال واخا يكونو بدرهم للبپياسة

بضحكة ردت: الا هههه هادو فااابور

قوصهم كتتر: فابوور!!..وعلاه كاينة شي حاجة فابور سايرة تتمالغي معايا دروك..سيري الله يرضي علك رضي للناس حايجهم وشري بالفلوس اللي عطيتك ولا زيدي نمشيو لجيهة خرا

صفار وجهها وبدات تمتم: و والله ابا الى فابور هانتا كاتشارك فواحد المسابقة كاتكتب سميتك وتلوحو فالصندوق الى جات فيك كاتقدر تاخد اللي بغيتي بلا ماتخلص

نفخ م
صدرو معاجبو حال وصوتو حرش هرش: ولاايني عييب ابنتي عيب الناس شارين االحوايج باش يبيعوهم وتي تاخدينم بلا ريال بلا جوج

هزات كتافها: واهوما اللي بغاو انا مشفرت ماوالو

بوبكر: اري اري دوك الفلوس الللي عطيتك

جبداتهم من جيبها ومداتهم ليه .. حسبهم وهز من جيبو عشرالاف مازال ومشا لوحدة من البنات اللي تايحطو الحوايج فالكوفر، سحابو هي مولات المحال وقال مقوص عينيه فالارض متايطلعهمش فالعيالات عندو الاحترام هو الاحترام شي حاجة مربي عليها من الصغر: احمحم.. هاكي ابنيتي هادو شدي 

تضهشرات تترمش فيه بعدم فهم وتتشوفو ماد ليها الفلوس: ها؟؟؟

بوبكر: شدي فلوسك ابنتي حنا مانااكلوكومش فرزقكم ومابغينا حاجة فابور..خودي گولي بسم الله وتالا شاطت شي حاجة الله يربح

مدهم ليها بزز وهي تتبقلل فيهم، هيام حبسات الضحكة وشارت ليها تاخدهم وعائشة شدات جبهتها ماقداتش تهز فيهم الراس مازال..تلاتين ألف يلله تسوا واحد من السيكان اللي خدات ااش ايشيط ااش خسرهم على والو وبلا شك غاضربهم الموضفة فجيبها ..تم جاي عندها يديه ورا ضهرو نافخ صدرو راه خلصهم زعما كون ساق الخبار باللي شرات فوق من مليون كون سخف ليها تم وعواج بالصعرة

بولكر: يالله ابننيتي طلعي خلاااص رالدنيا ببدات ضلم 

هزات الساشيات اللي بقاو فيدها للكوفر تاعو ورجعات عند هيام..ركبات ساكتة وهيام مابغاتش تحرجها حدها دوزاات على كتفها كاتتبسم وديمارات اللوطو راجعين للحي 

..صونا تيليفون عائشة كاسر داك الصمت وعرفات شكون غايكون متاصل بيها..فتحات الخط وردات بهدوء

عائشة: الو

كريمة بصوت باكي قالت: عائشة هءهءهؤ تخنقت اختي تخنقت وتاحااجة متتزدق ليا هءهءهءهء


تقوصو حجبانها بقلق وقالت بسرعة: ک كريمة مالكي شنو واقع

كريمة: هءهءهءهءهءهءهء

عائشة: برردي شوية عافاك وحبسي البكا فهميني شنو طااري؟؟

بصعوبة فرزات عائشة كلامها: ي ي يااسر هءهءهءهء

عائشة: ياسر خطيبك؟ ماالو

كريمة: تلاقا معاه لؤي هءعؤ وبدا كايحشي ليه الهضرة عليا هءهءهء مرضاش باللي خليتو وبغا يخلق المشاكل بيناتنا اعائشة هءهؤهءهؤ

وساع فمها وضربات فخضها بالفقصة: ولد الحرااام..گنس بني كلبوون كنت كانگولها لك راه باينة فيه مااشي رااجل شمااتة ديال الخلا وسلووگي مقطرر "ضربات فيها هيام طليلة ورجعات شافت فالطريق كاتتبسم"

عائشة: ششش سمعيني وباراكة من البكا.. گلسو ودويو بجوج راه عادي يكون عندك ماضي شنو فيها.. المهم هو تكوني صريحة معاه وماتخبي عليه والو

كريمة: هءهءهء مابغاش يسمعني ودابزنا هءهؤ كنبغيه بزاف أعائشة ومنقدرش على فراقو والله تانموت

تنهدات بأسى وقلبها ضارها على صديقتها..سكتات شوية وقالت تترمش بحيرة: واش تبغي نسيفط لك العنوان تجي لعندي

كريمة: هءهؤ منقدرش نخرج دابا..عمي مللي تخطبت وهو مانع عليا الخروج فالعشية ولا نمشي لشي بلاصة بعيدة

عائشة: واخا غدا غانشوف كيندير نتلاقاو، صافي؟؟

شمرات بنيفها تتنخصص: شكرا بزاف احبيبتي.. ماتصوريش شحال محتاجة ندوي معاك، نتي الوحيدة اللي كانرتاح فالهضرة معاها

ردت بحزن وقلبها كايتحك: حتا نتي والله..ماتبقايش تبكي صافي اللي وقع وقع غادة غير تمرضي..اجي ياكما داك الكلب باقي كايصوني لك

ردت: مكانجاوبوش ودابا راه بلوكيتو

هزات صبعها كأنها قدامها: واياك تعطيه فرصة وايااك.. ملي كنتي معاه كان بحال صعصع داير ما بغا وديما مبكيك ودابا فاش بغيتي تشوفي حياتك عاد هو بان منييين جاتو بالسلاامة منيين

كريمة: كررهتو وكرهت النهار اللي عرفتو فيه هءهؤهؤ

عائشة: الله يعطيه الغاراق ولد الحرام..مسحي خناينك غدا نصوني لك ونشوفو فين نتلاقاو

كريمة: هء واخا بسلامة

عائشة: الله يعاون
..قطعات مغوبشة وضارها خاطرها بالجهد..شافت فيها هيام وقالت: هادي صاحبتك

حركات راسها تتنهد: وقع ليها واحد المشكيل مع خطيبها

هيام: مايكون باس

تنهدات: امين

وصلو للدرب وسيارت بوبكر فرانات وراهم..نزلو كاملين وعائشة نزلات داكشي اللي شرات بمساعدة بوبكر وهيام.. طلعوه للدار ونزلات عندها لقاتها عاد غادخل، عنقاتها مبتاسمة والفرحة اللي زرعات فقلبها عمرها تسناها: شكرا بزاف مرة خرا وسمحي ليا عدبتك معايا

هيام: هههه مافيها باس احبيبة بصحتك..تصبحي على خير

عائشة: ونتي من اهلو ههه

رجعات ضارت داخلة لدارهم وهيام مبسمة حاضياها من اللور
..شي حاجة فيها تتريح النفس..عفوية واللي فقلبها على لسانها..مرة سليطة مليطة ..مرة سكوتية متحركش الدجاجة من بيضتها.. ومرة عافية شاعلة الحفيظ الله..حال واحوال ديك البنت وتميز شخصيتها البريئة والصريحة المشاغبة واللطيفة الجامحة هو اللي تايخلي الناس ترتاح معاها..متتجامل متتنافق اللي كاين تگولو واللي بغات ديرو تاديرو بگانتها..هي وگانتها

#عائشة


دخلو سد الباب ومد ليها هادوك اللي شاد: هاكي شدي..وهادوك اللي عدك دابا شغاديري ليهم

خدات البلاستيكات وخلات البعض محطوط عند العتبة حيت كتار: معرفتش ابا واقلة غانصدقهم

بوبكر: حسن نيت خودي فيهم اجر "ضرب على كرشو ضرو الجوع والعيا غالب عليه "

عائشة: ههه فيك الجوع

بوبكر: والله ابنيتي ايما كرهت شي زلافة ديال الحريرة مسگدة بايدين هنية.. ايييه ديك مك واخا لسانها سليط يدها بنينة بنت الحرام

عائشة: ههه صونيت عليها فاش تغدينا لقيتها مقلقة وخليتها على راحتها

بوبكر: انا مابغات تاتجاوبني..الحافيظ الله عافية صافي

عائشة: هههه ماعليش دابا تبرد..انا غانطلع هادو ونززل نطيب

ضار ليها: وتي تعرفي طيبي

حسات بشنو گالت وبدات تمتم حشمانة منو: ا اه اه معلوم هه غاندير لك حريرة من داكشي

بسمو ملامحو برضى : الله يغطيك بالرضا واللهيلا نفسي مهاوشة عليها ههه كتري ليها الحرور عافا بنتي ولا بغيتي شي حاجة من الحانوت گوليها ليا

حركات راسها: واخا ابا
باست ايدو وهو فمو تايرضي عليها..طلعات النص من حوايجها للبيت وهو ضار داخل لبيتو يحيد داك الكومپلي ويستاراح شوية..نزلات طلعات داكشي اللي بقا وعاود هبطات كاتجمع شعرها الفوق والطيلي فيدها داخلة للكوزينة، حلات التلاجة لقاتها عامرة باها ماخلا ماشرا لامن الخضرة ولا الفروي..المشكيلة شكون يطيبهم وهوما بجوج زرگينن فالطياب

طلعات عاجب ويدها على خصرها تاتحنزز فديك الخضرة شنو تهز وشنو تحط: مالوو صعيب؟؟ ..لا لا الحريرة هادي مافيهاش الملاغة؟ وشنو ندير شنو ..

فكرات فكريمة تعتقها لكن البنت معالم بحالها الا الله حشومة تصدعها..اليوتوب عمرو سگدها معاها غادة غاتخربق الى مادواتش شي حد مباشرة وتسولو على كل حاجة فالمقادير ..ادا مها هنية هي اللي بقات فالحساب ..هزات الطيلي كاتقلب على نمرتها: ياربي غاتكون باقة فايقة

تفتح الخط وجاباتها منفخة: هاالو

بابتسامة ردت: الو ماامااتي هههه ااش خبارك بيخير

جاوباتها بتبعكيك: وللااااه الحمد تهنييت ونفسي رتااااحت اختي عاااد بديت نرجع الشبااب فاش غبرو عليا شي قماقم

جمعات الضحكة: ااو ااو نزلي نزلي شوية اهنية المعيور هادا


ردت كاتجبد عينيها وتتلوا: ايوا الصاااارحة عااااد تهنييت..داااك الگرد ديال باك كان تايعرف يگول غا في ما لوضو.. حطي مانحنجر..فين سنظالتي فين كيلوطي ..فين مشطتي ..وتي ياابلارج الدوواار گاع النهار داايعة وانا وراك تانجري ونقلب بين الجنانات بحاال حليمة الهبيلة

عائشة: اوووووف دابة هادشي علاش عيطت ليك باش ندابزو اماما ..حشوومة والله

ميقات بعينيها: ايوا خياار كلام لصح ماتبغيوهش

عائشة: واماامااا

هنية: شبااااغاني مالك

رمشات: بغيت نطلب

هنية: مممممم

عائشة: بغيتك توريني كيفاش نطيب الحريرة..عييت نتفكر ووالو واش عرفت منين نبداا

طلقاتها بضحكة كاتشفا فيهم: ههههههههييهيييه..دابة عاااد عرفتو بحق هنية يااك.. ملي كتو تهرفو على الزلايف وتنوضو بلا كلمة بلا جوج عااجبكم الحااال سااهلة مااهلة، اييوا هاااربي كايخلصكم تستاااهلووو هههههه

عائشة: واصاافي اماما واش بغيتينا نبقاو بالجوع ورين دابة كيفاش ننصبها

سكتات هنية نافخخة الريش وعائشة مغبنة صوتها وتطلب: وعافاك اهنية عافاك ..بابا مسكين من قبيلة وهو يدور فالدار توحش حريرتك والله غير غادي ويتمتم بيك، اييه فين هو طيابك اهنية الحبيبة هنية فين حريرتك فين عافيتك ءء زعما ريحة طيابك

هنية: الله يمسخك فين عمر باك نطق بهاد المسخ

ميقات: ااه نسيت را كايعجبك غافاش تتگولي ليه خوويي وهو يعاودها لك بخيتي..مافهمتش اناا شمن رومانسية هاديك شمن مفهووم عندها بالظبط

هنية: ياااك اابنيتي ساايرة تعاايريني داابة عاين بااين.. وااشووووري نگطع تااناا ماالي نشرگ معاك اعصاابي 

وسعات عينيها وبسرعة قالت: لا لا لا والله تا غير كانضخك

هنية: لا لا غاگوليها بصح نيييت 

ردت: لا والله العظيم تاغا كانضحك مال قشابتك ضيقة اماما ماالكي

سكتات تاني وهي قالت: وااداابة گولي خلاص التسعود هادي وباقي مبديت فواالو


هنية: يخخخ صدعتيني..كاين الحمص

بدات تقلب: الحمص الحمص الحمص

هنية: ايه عيطي عليه هاهو شوية ويگولك نعام

عائشة: واش تايكون فالتلاجة؟؟

هنية: لا ابنتي كانحطوه فبيت الرگاد جيهت الرجلين فاش كانبغيو رگدو

جمعات حجبانها: كاطنزي عليا ياك؟

هنية: والله ابنتي لازرگة زررگة وماتصلاحي لواالو "غوتات تاقفزاتها" تي قلبي الپلاكاارااات ااويلي

سدات التلاجة تتنفخ وضارت بعصبية تتحل فالمجورة وتسد ..حتا لقاتو وقالت: هاهو لقيتو..شنو مازال

هنية: خضر ولا مرقد

ترمش فيه: لا لونو بيض غادي للصفورية

هنية شدات راسها وقالت: واااش قااصح ولا رطب

وركات عليه بيدها: لا قااصح بحال الحجرة

هنية: جبدي الكوكوط

طلعات راسها تتقلب عليها: الكوكوط الكوكوط الكوطو

هنية: گالت للك نعاام ولا باقي

عائشة: وصاافي امي هاني تانقلب..هااهي لقيتها "جبداتها وحطاتها فوق الپوطاجي" شنو مازال

هنية: هزي داك الحمص كبيه فيها

عائشة: كلو؟؟

هنية: شحال كاين تم

عائشة: وا شي كيلو هاكاك

هنية: كوبيه كامل ودوري جبدي ماطيشة 

عائشة: واخا.. بلاتي ندير اوط باغلوغ باش نخدم وندوي

هنية: شغاديري؟؟

عائشة: والو والو "حطات الطيلي فوق البوطاجي وگفضات ..ضارت للتلاجة جبدات الشبكة ديال ماطيشة وقالت: ها ماطيشة جبدتها شحال ندير

هنية: عشرة الحبات..غسليهم ولوحيهم على الحمص

عاايشة: نقطعهم؟؟؟

ردت: گلت لك قطعبهم

عائشة: لا

غوتات تاقفزتها تاني: ومااالكي تتنقزي كي البزقة لوحي ماطييشة فووق الحممص هي لووحي مااطيشة فوق الحمص تتتعرفي حسن مني

عائشة: واابلا ماتعصبي عليااا اووف

هزات الماطيشة غسلاتها ولاحتها فوق الحمص وقالت: شنو مازال؟

هني :عمريهم بالما وحطيهم فوق البوطة..كاين الدگيگ؟

بدات دور حتا لقاتو : اه علاش

هنية: جبديه نوريك علاش


حطاتو حداها وقالت هنية: شحال كاينة تم

عائشة: خنشة ديال خمسة كيلو

هنية: هزي منها تلاتة الزلايف..ولا عرفتي شنو ديري عشرة

عائشة: ماشي بزاف

غوتات: لااا صاافي ااناا غانگطع حررحري تي نييت اااختي لااش تتشااوريني مللي عاارفة القيااس

عائشة: لا لا لا والىه مانبقا ندوي غير كملي اماما مالكي على نقشة مالكي

هنية: واازمييه..درتي الدگيگ

هزات زلافة موكللة امرها ليها،بدات تعمر وتكب تعمر وتكب حتا كملات عشرة: هاني درتهم

هنية: كاينة القطرية

عائشة: ااه هاهية قدامي فالقراعي ديالها

هنية: هزي السكنجبير وكبيه كلو

هزات القرعة لقاتها عامرة تال الپلان.. بغات تستفسر منها لكن دارت بناقص هي تعرف حسن منها..كباتو وقالت: صافي درتو

هنية: كبي عليها قرعة سكنجبير قرعة والكامون والتحميرة والقرفة وليبزار وديري سبع دروس تاع التومة ..هاااو خلطي ككلشي بالما وسدي عليه يطيب

عائشة: صاافي

هنية: شبغيتي مازال؟

عائشة: ههه ساهلة واللهيلا

هنية: اييه ساااهلة.. وفاش تبغي تحطيها گولي لبوبكر، الغلا لا غلا جااات معااه وماتعرف بحقو تاعليه تجلا

قطعات مخلياها تترمش ..ضحكات و بدات تكمل فشغلها تخلط وتكب العطرية وإحساس انها حادگة كايزنزن عليها


....
نازل من الدروج بتيشورت خفيف وشورط جامع حجبانو بنرڤسة و هاز الطيلي فيدو كايقلب هنا وهنا على مو..لقاها فالكوزينة كاتحرك ليپاط دخل وبلا سلام لا والو قال مخنزر

بلال: درتي الشوپينگ اليوم؟؟

شافت فيه بهدوء: ااه احبيبي

جبد حجبانو: ومابانلك تخلصي غير من حساابي انا داك المزقررم ديال راجلك شنو كايدير بالسلاامة فين تايحطهم

هيام: وصافي ابلال توضرات لي الكارطة ديالي وهزيت تاعك ضيپانيت بيها

بلال : ضيپاانيتي ؟؟؟ مليون ونص تايديپانيو بيها النااس..خلااص ديال تلت الشهور تالصيف طبيتي فيهم فساعة الوااليدة سااعة

هيام: وانوو غير عائشة كانو خاصينها شي حوايج و بغيت نعاونها مسكينة أما انا متانشريش داكشي كلو

زاد تعصب وطلع صوتو: وشكوون هااد عاايشة فين كانعرف اانا شي عاايشة تانحط عليها مليوون ونص وااش صاڤااا


هيام: دابة بلا ماتبدا تغوت عليا غانلقا الكاغط ديالي ونردهم ليك صافي

زير فمو مغدد وضار نازل للبيرو ديال باه فالسفلي..دخل جاعر ولاح ليه الطيلي فوق البيرو فين مفتوح الحساب ديالو

تاج شاف فالطيلي وطلع فيه الشوفة: مالنا شكاين

بجدية رد: مليون ونص خداتها مرتك ردها دابة

حرك راسو: وانا مالي

شير لنفسو جااعر نيت: انا اللي مااالي، دمرت الصيف كلو باش نسافر بيها الشهر الجااي جات عايشة داتها

باسغراب: شكون عايشة؟؟

بلال: بااش غانعرف سول مرتك..ليلة واوطيل فايڤ سطار وساطة مقوودة بخمسة لاف درهم، تجي وحدة مقست تازغبة نيفها و نزدق مخلص عليها مليون ونص ملكة البرطقيز هي

تاج الدين: ايه ايه ايه احتارمني راني باك الكيدار ااو

رد بحدة: حط ليا فلوسي الله يرحم باك

تاج الدين: اخويا لهلا يرحمو غيير گلب عليا زلاڤتك ماعدييش

بلال: الواليييييد

تاج الدين: مصييبة هاادي..سيير حتا نجبدهم سير مليون ونص شغادير عندي فالدار

خنزر وهز داك الطيلي خارج ويبرگم..مصروفو كايدبر عليه فالصيف والبريكولات اللي تايدير مع باه تاج الدين وداكشي اللي كايصور كايخلص بيه ليصانص تاع الموطور والزهو مع صحابو
..لبس سبرديلتو وخرج مخلي الموطور حدا الدار ومتاجه للقهوى اللي فراس الدرب يتجمع مع عشرانو ويبرد شوية دمو الفاير..مليون ونص تلت شهور ديال طلع نزل فالمنتجع ديال باه مكلف بالسياح مقابل الخدامة مقابل الحسابات الداخلة والخارجة والنعاس حدو كاينعس تلاتة السوايع ربعة.. فالاخير طارت باردة.. على وحدة عمرو شاف تاوجهها


....
غادة جاية فديك الكوزينة وحجبانها بقلق عاقداهم..الحريرة التي لا تشبه الحريرة محطوطة على النار تتغلي وعائشة وقتما طلات عليها تتبدا هي اللي تتغلي
..اللون حمر قاتم وفيها كويرات ديال الدقيق تقاال تايتفرگعو كل مرة وقشور الماطيشة غامزلغين..لا ريحة.. لا منظر ..بقا غالمداق الله يستر مع الله يحفظ..غطاتها وحكات رقبتها بقلق واضح وحتا بغات تعاود تصوني وحبسات مايمكنش غاتكون ناعسة دابة..فتفكيرها غارقة معارفة شنو دير تاقفزها باها اللي تايعيط

بوبكر: عااائشة

عائشة: ه هااا 
..خرجات صفرة طلات لقاتو فالصالون بارك بفوقية بيضة: وجد العشا ابنيتي

عائشة: ا اه ابا نحطو

بسم: اييه رانا قاتلني الجوع ومصارني مزيرين عليا ههه حطي نشوفو حريرتك كي دايرة حطي الله يرضي عليك

حركات راسها ببسمة بزز ودارت للكوزينة تاني..اللي ليها ليها والمداق اكيد هو الااهم


هزات الكوكوط حتال عندو فالطبلة ورجعات للزلايف..بوبكر قرب عندو الكوكوط تايشمشم ووالو واش ريحة الحريرة تاضور..هز الغطا وخرج عينيه تاقربو يتفقعو وسط ديك الخولاطة وتكمل الباهية نيت

جات كاتزرب حطات الزبايف وگلسات حداه كاضور عينيها هنا وهنا قاطعة النفس

شاف فيها مبهوض وقال: تي شهادشي؟؟؟؟

برققات فيها عينيها وقالت: ح حريرة

بوبكر: حريرة هاادي دابا هادي حرييرة ساايرة تگجمي عليا

بتوتر ردات: ل لا ابا رااه المنظر ماشي مهم المداق هو الاهم ..بلاتي بلاتي 
..ناضت هزات زلافة كبات ليه ومداتو ليه بابتسامة

عائشة: بسم الله

خرج عينيه مخلوع وداكشي فالجبانية كايتحرك غاوحدو: ا غااابالصحة ابنيتي والله ماعدو منين يدوز

تغبنات: تلاتة السوايع وانا مقابلاها باش ماتشربهاش.. عافاك غيير دوقها

بوبكر: لا لا لا حجاارو يشدووه بسعيي علياا داك المخلووق لهييه

كاتزيد تقربها ليه: والله حتا حريرة ابابا هانتا دووق
عمرات معلقة خشاتها ليه ففمو ديريكت.. كيف سرطها بزز وكيف عاق بمداقها تحرق ليه حلقو ومعدتو لداخل تتهددو بتقديم الاستقالة

بوبكر:كح كح كح كح كح كح كح كح كح كح كح كح كح كح كح كح كح كح كح

خرجات عينيها وحطات الجبانية بسرعة تتشوف مالو: ااتيلي باا ماالك

تزير وكلو حماار: كحكحكحكحكح الما الماكحكحكحكح

مشات كاتجري للكوزينة جابت ليه كاس ديال الما شرباتو ليه كامل عاد شوية ارتاح.. بدا كايرد النفس و الموت دازت من حداه ورا ديك المعلقة..
ضرب طليلة على الكوكوط وقال بسرعة: غطي عليا هاد المسخ غغطيي واالدييه وبعدييه عليااا لهييه.. تي ااش مطييبة ليااا الجراان

تلوا لسانها وحتا باش تفهم السبب مافهماتش: م مافهمتش انا داكشي اللي وراتني مي طبقتو

شاف فيها مخرجهم: گللتي لمك ماطيبنااش العشا؟؟

بارتباك قالت: ا ا اه حيت معقلتش على المقادير ..وراتهم ليا ودرتهم كيما هوما والله ابا وبليمارة گالت ليا نگوليك.. الغلا لاغلا جات معاه ومتعرف بحقو تا "حبسات والكلام عاد سرا معاها..بوبكر بدا يدور فوجهو قدامها بحصرة

بوبكر: ااودي يااودي وبيمن محزم تررر

حط الكاس وناض يقلي بيضات على قلبو مخليها گالسة و البكية شاداها تترمش قدامها ماراضياش


حط مقلة البيض فوق الطابلة گلس وقال مخنزر: حرحري دابل حرحري

ء ء ابا والله مايسحابني كاطنز عليا 

بدا ياكل بالغدايد وهي ساقلة كادوزها بالصامت

بوبكر: ديك مك لاما سمحت ليها قبرها ينبتو فين اللفااعي..بالحق باقي حسابي معاها زيين ابلاتي

ندغ وسرط وجمع لقمة خرا ففمو كايشوف فيها: المروورة باقا تامابغات تحيد كتي غاتبيتيني فالانعاش شااد السربيس.. اش بغيتي عدي فهااد الليل

سكتات تاسكتات وفالاخير ماقدراتش تصبر وطلقاتها: هههههههههههخ

طلقها تاهو بضحكة والدغمة ففمو تايسرطها بزز: ههه لا حول ولا قوة الا بالله

عائشة: هههه الحريرة بحلا سكنها جن

هز فيها صبعو: تعااودي دوري بجيهة الكوزينة نتفاهم معاك هااااودني راماقادين على سبيطارات

عائشة: وعلاش انا نعااود هههه 

نزلات راسها كاتكمل ماكلتها وهو كلا مرة وشنو يگول..حتا سالاو و جمعات داكشي للكوزينة ..طرفاتو دغيا ورجعات عندو كان شاد امبيسي بوليود وگلسات حداه ساكتة..شاف فيها وجرها لحظنو كايدوز على يدها بحنية

عائشة: سمح ليا ابابا

باسها فراسها وسكت وهي عينيها فالتلفازة مع الهنود عشقها هي وباها وبلاها بيهم من الصغر 

....
جبد سوارتو داخل للدار محيد السبرديلة وبالحفا طالع..كلشي نعس وفبيتو مخشي وحتا هو دخل لبيتو نيشان تزامنا مع الطيلي اللي فإيدو كايصوني..هزو ولقا اسم "عز الدين" خوه الكبير..بسم ورد ببشاشة: Hoola

عز الدين: وعليكم السلام هههه

.....

عيا بوبكر وغلب عليه النعاس..ضور وجهو ولقاها ناعسة جاابدة عليه من زمان باس راسها وهز التيليكومونض طفا ديك التلفازة وبقا ضو المراح هو اللي شاعل..

بوبكر: عايشة..عايشة

تململات ميتة بالنعاس بقا شحاال كايعيط: وااعايشة يااتي متي ولا رگدتي

جاوباتو فعز نومها: عائشة

بوبكر: ههه نوضي ابنيتي لبلاصتك نوضي

حلات عينيها بزز وناضت ملاوطة وباها وراها شادها لاطيح مطلعها لبيتها 
.....
بلال: بالله تاكنت ناوي نطلع عندك الشهر جاي ولكن مك خرجات فعودي

عز الدين: معدك قراية ابنادم كيفاش بلانك

كايلبس التيشورتءة بلاني بلان..."داز على السرجم ديالو وحبس الهضرة فاش بانت ليه شي حاجة كاتتحرك فالدار اللي قبالتو"

عز الدين: ههه منعن شنو خبارو..وحسناء بيخير

بلال: ششش بلاتي بلاتي

عز الدين: شنو كاين مالك؟؟


قوص حجبانو تايشوف فالسرجم ديال الدار قدامهم اللي هي فالاصل دار جداه وخيال بوبكر اللي نازل لبيتو فداك الضلام تايبان ليعم مضوبل على جوج
..وسع عينيه تايتأكد وبعاود وعز الدين مفاهم والو

عز الدين: واادوي اابناادم شكااين

بسرعة قال والعاصاب تايطلعوه: جااوب واش الميمة رجعاات للداار

عز الدين: لا عاد قطعت معاهم هي وعمتي..شكااين ماالك

بلال: الشفاارة فالداار ديالها ااصاحبي

عز الدين: شناهية من نيتك؟

خرج عينيه تايعاود يتأكد والخيال كايبعد: بالله حتا كايبان ليا خيال شي حد لدااخل

عز الدين: شفارا؟؟ وضارنا مازاال شكون هادا اللي ساخية عليه روحو

ضار خارج: ماشي من الدرب مايديروهااش.. تهلا غانقطع

قطع نازل بسرعة لغرفة باه دق بالزربة كايغوت: واااخرج الواليد الشفاارة الشفاارة فداار المييمة

زاد مع الطريق بلا مايتسناه نازل ودمو حاار بالمعقوول.. لبس سندالتو وحل بلاكار معلق فالحيط فيه محطوطين جميع للسوارت..جبد تاع الدار قبالتهم وخرج غادي ليها بحدر ناوي يشدو بالجرم المشهور قبل مايهرب
حل الباب التحتاتي ودخل بانت ليه بلانشة حدا الدروج هزها تحسبا لايكونو كتر من واحد وتم طالع بشويا ملا مايدير الصوت ومزير ايدو 

.. وصل للباب الخشبي خشا الساروت وكيف دور الساقطة تحلو عينين بوبكر اللي كان ناعس وتقوصو حجبانو ..ناض من فراشو ماد ودنيه مزياان وتايسمع الساقطة تادور فالباب
..حرك راسو تايتحلف على هادا اللي زغبو الله وجا حتال عندو يشفرو ماداروها تالشلاغمية الكباار، نزل بشوياااا من السرير حنا يدو كايقلب على سنظالتو هز فردة ومشا حل الباب بالمهل
..تما حبس بلال اللي كان داخل فداك الضلام مراقب باب الغرفة قدامو كايتحل..ضار هنا وهنا وبان ليه غير الصالون دخل ولسق على الحيط مزير البلانشة وكايتسناه..خرج بوبكر محني ضهرو وكايقلب عليه غادي بالحفا وهاز سنظالتو اللي ماتقتل تانملة ولكن على الاقل مايبقاش بلاش
..فات الصالون شويا وتحنا بلال طل عليه بان ليه غادي عاطيه بالظهر تايتسكل للباب ..قرب بالشويا وغير حس بوبكر بشي حد وراه عطاه للراس تاطاح مجبد: اااااي

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.