بلال زير فمو كايضحك وخالد بسم بروح رياضية وقال: اهانية والله راه الحياة كلها محاولات الواعرة هي انك متستسلمش من اول رفض
رد: ههههه شناهية؟
خالد: هادا راه هو الدرس التاني اصاحبي..لنفترض دابة گلتي ليها كانبغيك.. وهي خنزرات وگالت لك انا لا.
ااش غادير!
جمع الضحكة وفيساع خنزر فيه بشوفات ديال القتيلة: خالد..كاتقلب عليا نقبرك
خالد: وادابة خلينا فاللوجيك اصاحبي حط گااع الاحتمالات قدامك بلش ماتصدمش من بعد
بلال: ديك الساعة حفر قبرك حسن لك.. قلب عليا هاد السوجي الله يرحم باك ولا غانقلب وجهي
خالد: لا لا لا غاابقا هاكاك حسن
هز القهوة كايشرب منها وبلال وضور وجهو للجنب كايفكر ومع دماغو كايبلاني..والى كانت هي مكاتبغيهش؟..والى أول حب ليه كسر قلبو اللي بدا ليها كاينبض؟..الى كانت اصلا مشايفاهش كفارس أحلامها؟
تنهد وهضرة خالد كتاكل فيه وتهيج نارو..ندم حتا جبد معاه الموضوع وحتا سمح ليه يزرع الشك داخلو..طلع فيه شوفة مخنزرة وهو تايشرب القهوة
خالد: مالك
بلال: ندمت تادويتك حق الرب
خالد: اهانية هانية تمشي عايشة تجي نهى تمشي نهى تجي سكينة تمشي سكينة تجي مريم، هاانية والله "شاف واحد البنت دايزة وبس بس عليها تاضارت وبسم ليها قائل" كانبغيييك
خرج ليه راجلها من الجنب صلع قد السلوم وعريض عرض الباب جامع التخنزيرة حتا قالو حجبانو باراكة: نعاام الخااوة شگلتي
هبط قلبو بين رجليه بالخلعة وبدا يتمتم: ه ها ل لا لا و والو اخويا ا الله ينوركم ماشاء الله موااتيين
صفار وركابيه فشلو: لا لا لا اعايشة شوصلنا لعمي بوبكر الله يخلي ليه صحيحتو لاش نصدعوه بهاد التخربيق لاااش انا غااسولت وعليا بليمين لاعاود سولتك على شي حاجة
عائشة شدات الضحكة وهو زاد كشكش مللي مافهمهاش وبدا يتهز ويتحط: الالة الشوار شوااااري والحكاام حكاامي واخا تگووليها بالبرطقيزييية..النهاار اللول فاش كنا جايين بديت نطلب ونزااوب باش تجي معانا وتي شدرتي؟ " قلبات وجهها كاتعوجو وهو كمل"بديتي عليا لا مانسخااش بخيمتي..مانسخاش بجاراتي..مانسخااش يدواااري ..وداابة عااااد حلات لك المدينة ومع من ؟ مع عاد عشينة الشفنج
هزات كتافها مخنزرة وعائشة تنهدات وخرجات طالعة للسطح ديال دارهم..خلاتها مصغرة عينيها بالغدايد وتتخمم: لا لا لا انا خاصني نجوج الدرية بكري ونردو للدوار هاد العيشة فبلاد الفاساد ماامسلكانيش
الزوبير: دابا انا نمشي ولا مانمشيش؟
خنزرات فيه وضارت للكوزينة تسگي الغدا ..رجع تحل الباب دخلات منو عائشة ووراها بوبكر هاز نيفو الفوق والارض ماقاداهش، زادت هنية حتا هي خرجات هازة گصعة كسكسو وحطاتها على الطبلة مطلعة نيفها كتر وگالت ليه ماتعرفش..
تجمعو كاملين عليها ساكتين شي مكايدوي مع شي وعينين هنية وبوبكر فاش تايتلاقاو كاتبدا العافية والنار والقرطاس يتطاير
الشمس غربات وبدا الليل على الدنيا يخيم
وعلى مكتبها البسيط جنب الحائط جالسة عائشة.. شاعلة ضو فيوز صغير كاتحفظ بيه قدامها كتاب محلول وهي ممسوقاش ليه ساهية قدامها يدها على حنكها وتنهيدات حصرة كايخرو من اعماقها
..شافت جيهة التيليفون بغات تبكي وقالت: كون راهم بداااو الحفلة " تغبنات " يخ على زهري العوج يخخخ
تدق الباب ومسحات عينيها بالزربة: دخل
تحل وبان وجه بوبكر مبسم: ندخل؟
ردت: ههه زيد ابا
دخل و ايديه وراه شاف فالكتاب محلول وبرضى قال: الله يرضي عليك ابنتي قراي باش تجي تي اللولة
طبطب على راسها بهدوء وفوجهو منزاعج وممرتاحش : الله يرضي علك ابنتي..سيري لبسي حوايجك انا غانخدم الطوموبيل باش نوصلكم
ضحكات: وااخا
باست راسو ومشات لپلاكارها كاتجري وتقلب على شنو تلبس وأي كسوة تختار وبوبكر خرج قبل مايرجع فكلامو ويدير بناقص
حتا وقع الاختيار على وحدة بنية خفيفة بالكم وحد الركبة.. مع سانتور فضية كاتزين الخصر
عجباتها وعينيها بالفرحة برقو وبسرعة بدات تغير وتقاد من هنا وهنا
وجدات وجهزات وتقادات والكسوة غير عليها تواتات كأنوا على فصالتها تفصلات
طلقات شعرها مسرح وهزات گلوص وردي حلاتو ديرو ساعة تفكرات سي بوبكر غادي غير ينغصها عليها وهو ماقبل غير بستة وستين كشيفة..هي تسدو ورداتو بلاصتو مكتافية بشنيفاتها الورديين من عند الله
ضارت لساك اسود بسلسة طويلة هزاتو وهزات سبيبيط اسود پلا جات هي هاديك والكسوة كاتفرفر معاها مكملة صورة البساطة والاناقة
نزلات لتحت كاتقلب بعينيها على باها قشعاتها هنية اللي گالسة قدام التلفازة وببهطة بدات طلع فيها وتهبط والبسمة على وجهها كاتوساع
هنية: ياااسعدي ويافرحي يانا والدة الزيين
ضحكات بسعادة كاتتحرك: كي جيتك
ردت ضاحكة: كي النجيمة يابنتي مزيناااتك
كاتشوف فالكسوة: ولكن ياكما الكسوة قصيرة بزاف؟
هنية: راها فاتت لركبة اويلي تي باغاها تتجرجر لك فلارض..بلاتي نوض نفوسخك لايضربوك بالعين فديك الحفلة
حلات عينيها: لالا لا مزرووبة امي بسلامة
نزلات تاطير لتحت لقات باها عاد بغا يطلع والدم طالع ليه غاوحدو: اش هاد التعطيلة أو
رمشات فيه: سمح ليا ابا..يالله نمشيو
شاف فيها من الفوق للتحت وقال: فيناهو المونطو تاعك
عائشة: ا ا نسيتو ولكن بلاش منو مافياش البرد
بوبكر: اسيري گالا مافياش البرد تاترجعي شاداااك الكحة ديك الساعة بداي دمعي..عيطي على المرا تنزل وانا غادي نجيبو لك يالله
بلال طلع حاجبو مزياان وبوبكر عجبو الحال وبرضى غوت: اللله يرضي عليك هاادي هي بنتي اللي تانعرف..مزياان تبارك الله تاداك ولسيسة يبغيوه الناس جامع تاراسو بقات ليه غابنتي
ردت بميوعة: بصح ابااا الى كان غير على الزواج انا بغيت ليهم القطيعة" رجعات شافت فيه مخنزرة" كاااملين جملة
بوبكر: الله يرضي عليك ابنتي هااكا نبغيك الرضا..انا غاادي نخدم الطاموبيل ابنيتي الله ينجحك ..
ضار كايبرگمغادي يخدم سيارتو بعصبية من جيهة الزوبير، بغات تمشي وراه هو يوقف ليها فالطريق كايفرس سنانو شافت فباها بحدر وتحت سنانها قالت: حيد من الطرييق غايشوفك با
رد بخفوت: كاتحشي ليا الهضرة دابة
بسم قالت: عندي گود و انا غير دويت.. جات قدك ..لبسها
شمر بنيفو وضار طل على بوبكر اللي ركب عاطيهم بالضهر ورجع شاف فيها مغدد: عرفتي شنو
بتحدي: شنووو
خشا يدو فخلات شعرها وجرها عندو بقبلة عنيفة جياشة نفضات قلبها لبرا وخرجو عينيها وهو كايضور على شفايفها بجميع الاتجاهات حتا كلاه اكل وريقو على ريقها مخلط ماساخي يحيد وبصعوبة بعد كاينهج بوتيرة بطيئة وهي مصدومة تترمش ببهضة
وصدرو طالع نازل قال بعصبية: ياك شفتي غير نتي..يانديك..يالموت تديك
خرج بوبكر من سيارتو بتخنزيرة وعيط: وااعايشة
تنفصات فبلاصتها والكلام حلف لاخرج ليها وفمعا تايتمتم..فحين بلال ببسمة خفيفة نيم فيها عينيه وقال بهمس: مال الحبيبة مصدومة..نزيدو وحدة خرا قدام باك باش تفيقي
دازت فيه فالبلاصة سارطة لسانها وقاطعة النفس، حناكها حمارو وسخنو وكيف وصلات قدام بوبكر قال كايحقق فوجهها: اتي مالك حماريتي؟
سرطات ريقها بصعوبة وبزز نطقات: ل ل لبرد ابا
رد: طلعي طلعي لايسوطك وتصبحي مريضة
طلعي دغيا
وداشي اللي دارت طلعات بلا مادور وراها والتبوريشة شاداها من صبعها الصغير..ديمارا بوبكر وبالبعصبية اللي كانت فيه نسا مايسول على هيام..خدا غير العنوان وساق تا وصلها لفيلا خارج المدينة كاتسمع منها المزيكة من فين وفين تما حجبانو تعقدو وخنزرو
عائشة طلات شوية وخدودها باقين حومر وبوبكر الموسيقى دراتو فودنيه تاحبس وقال: ياتي هنا فين كايينة الحفلة
ضار بعدما دخلات وزع عينيه على جوانب الڤيلا بعينين حادين واللي فيه ممهنيه..عمرو خلاها تمشي لشي مكان بوحدها ودابة فاش خلاها ولا الشيطان الوسواس كلا مرة فعقلو كايخبر كلا خطرة وشنو كايگول ليه
سكت مطلع فيها راسو والبنات قدامو باركات كايتسنطو ليه..الموسيقا تقطعات وگاع اللي كانت كادير شي حاجة راه سمحات فيها وجات قدام بوبكر بركات وهو ففوطو بوحدو واخد راحتو..بسم لعائشة وقال: ااجي ابنتي زيدي بركي زيدي
جات لفوطوي قدامو وبركات حالة فمها مافاهمة والو وهو شاف فيهم وقال: فين خليناها ابناتي
....: باللي البس تاهو اخلاق اعمي بوبكر
رد برزانة: ايه الله يفكرنا فالشهاادة.. شتو ناس بكري ابناتي وبنات شحال هادي من ساسهم لراسهم تايتغطاو..كاانت البركة فالزواج وكان الجوهر هو اللي تليتبغا قبل من اللحم..لحمكم راكم غاتحاسبو عليه، خاصو يعز عليكم وتبغيوه كيما تنبغيو شراوطكم وماتبغييو اللي يشوفهم بشوفة ناگصة ولا يزبلو ليكم فيه.. كاينة ولا لا
بوبكر: هااا..ايوا علاش تعري وتزيري وتتعوجي.. شتي هاد فرطوطو اللي ديري عليه هاااد الحالة هاوجهي هاوجهكم لازدق، راهم ابنااتي مقطريين من زييت وحدة والله الى ماصنتو..وزيرتو اللجام..وقاا.يتو الكلام بالعبار والصوااب..لادار ليكم شي حد قيمة وگولو گااالها عمي بوبكر
بأسى نطقات وحدة فيهم: ماي بوي فريند اعمو كنا بجوج خمس سنين فالخير خسر عليا كلمة وحدة..گالك غاتجوجو مو
خنزر: ويلي ويلي على فطووش ااخر الزماان..ديك فردة مافهمتهاش ابنتي ولايني هاد الخليقة بينهم وبين تارجليت غالخيير ..واش اللي تزوجو مو وتزير عليه بحال البوطة.. راااجل هادااك..هادا هو اللي غاايربي الولاااد ويقاد الوتااد ويزيد بالبلاد..هاادا تعولي عليه هااداا
عائشة خرجات عينيها فيه الشوهة اون پيرصون انو باها يگلس وسطهم ويخبر عليهم خباير العگيزات فحين هوما شافو فبعضياتهم وقالو: كااينة اعمي بوبكر عندك الحق
....: انا اختي غادة داابة نقربلها مع داك بوركابي ماالي على حالتي من نهار عرفتو وانا كانشري خنشة تاع الدواا
....: انا غادة لدارنا عدي الباك اختي هاد العام وبمسبة داك كحل الراس مابقيتش مدياها فقرايتي.. حتا من مي عاد ولدات عمري قابلتها، واخا يكون ساحر ليا ماندير عليه هاد الحالة
.....: انا بعدا هاداك اللي عندي ماغاندوي مغانتكلم غاندوز ليه واحد البلوك من داكشي الرفيع نخليه فنارو كايتقلا..بغاني مرحبا راه كايعرف باب الدار مابغانيش لهلا يقلب
.....: هاكا نبغيكم وتانا يدي على يدكم ينعل بو الحب
تماسا الليل وتناص والنعاس على جفونها وجفونو حلف لازاد ولادق الباب
السهر زين وليه حلاوة مايعرفوها غير اسياد الليل فهدوء السما المضلمة والنجوم المبرقة..السهير زين وليه حلاوة فاش تتفكر فالحبيب وكايولي ليلك عليه داير وعقلك بيه مشغول..
ضارت على ضهرها ساهية فالسقف وضار على جنبو كايشوف فالسرجم ديال غرفتها المسدود ساهي ..حب جديد زارهم كايدق الباب ..شاغل بالهم وعلى جفونهم مطير النوم..حب أول مرة يشوفوه..كايخلع وكايفرح..حب محول حياتهم على الطريقة اللي كانو بيه عايشين..وراسم ليه طريق مختالفة جديدة
صبح صباح جديد
صبح فيه بلال حاط ساك ديال السبور كايحط فيه حوايج لاسال وفوطة نقية
بسم معنقها عندو وهي على صدرو كاتبكي..باس راسها وبسم فوجهها وصباعو كايمسح دموعها الغالية عليه: انا عمري نتقلق منك ولا نكرهك، ديري ليا اللي درتي.. لا نتي لا داك راجلك..غير ساعة الله وصافي
مسحات عينيها مبسمة: فرحتيني بهاظ الهضرة الله يرضي عليك ..حتا هي بنت الناس، ضريفة وغزالة.. دخلات لخاطري بزاف ومن قلبي فرحت ليك
حك ودنو بحرج: احم الشراب ولد الحرام..صافي الواليدة نساي علينا داكشي ..جابك الله بعدا محتاجك فشي حاجة
هيام: فشنو؟
خرج من بيت النعاس كايقاد جلابتو وهنية وراه هازة خنافرها تطلع فيه وتهبط
هنية: شتك كاتقاد وتزيز..بالسلامة فين غادي
ضار ليها: سي با طون شوا
طلعات حجبانها: ياااك ابووبكر
رد: ايييييه
خرج غضبان وحتا هي ضارت فحالها للكوزينة توجد للغدا..دخل عليها الزوبير كايمسح وجهو عاد فايق وقال كايتفوه
الزوبير: خالتي هنية كاين شي فطور
خنزرات فيه بشوفة ناقصة: تاتاعت الله واش جايباك للعلف ولا شنو..فينما ضور تخشي فداك الوجه واش اعباد الله مافيك نفس ..ماتعرفش دير عقلك وتبدا داكشي اللي اتفقنا عليه ولا صافي.. بنتي مابقاتش معمرة لك العين، مابقاتش خالتي هنية وانا نموت ونتسطا لاماديتش عايشة
رد مقوص حجبانو : و وخالتي علاه انا كرهت..عايشة رامتتحملنيش وتا عمي بوبكر الله يسمح ليه مني حاسو مكرهش يقتلني
هنية: هاااوييلي على الرويجل هاويلي..سير سيير غبر كمارتك الله يخليك بالخلا
الزوبير: عايشة كاينة
هنية: فمدراستها تسحابها بحالك لاشغل لامشغالة
رد: الله ينجحها..كاين الفطور
خنزرات: غااتغبر عليا وجهك ولا اللي نديرو فك ماتعاودو لحد
الزوبير: و و غير كويس تاع اتاي
...شيرات عليه بصفارة تاع الكوكوط تاطار من قدامها هربان وبقات هي مفقوصة كاتبرگم بوحدها ودوي
.....
دخل للمقهى ديال الدرب بدجين وتيسورت گري كايقلب بعينيه على خالد..حتا قشعو فالقنت داير فاصمة صغيرة على نيفو وحاط نوار قدامو تايتميساجا مفرنس..بسم ومشا جيهتو وفطريقو كايسلم خالد طلع عينيه صدفة وغير شافو محا البسمة ورجع لتيليفونو غضبان
برك بلال حط مسائلو على الطبلة وتساراح فوق الكرسي كايشوف فيه مزيان عاد قال: صاڤا اخالد
حيد ايديه ديمارا غادي من تما وهي تتعطيه للكتف وتغوت، جننها وعصبها وفقصها ديال بصح وهو تركيزو فالطريق، مخلي ليها الراحة دير اللي بغات وفيه تقول اللي بغات، راحة عمرو عطاها لشي بنت المرا وعمرهم تجاوزو معاه الحدود المسموحة، إلا عائشة.. اللي بالنسبة ليه انثى خاصة بمعايير خاصة حطمات قوانين حياتو وقلباتها حتا بدا يضحك على راسو كتر مكايضحك على هضرتها
عائشة: شتي والله لابقاات فيك الى مگلتها لبا راه مي حوولة
رد ضااحك: واخا الزين نوصلو وگوليها تال جدك
ضرباتو: مااتبقااش تگووليا الزين
ضار غمزها: واخا الخيبوعة هههه
................
خرج من الدار كايشوف هنا وهنا مخلوع وخايف يتلاقا بالسي بوبكر فالطريق ولا مع قباض روحو بلال، لكن كرشو بالجوع تتزقزق وماعندو كيف يدير يصبر بعدما حرمات عليه هنية الفطور
بقا غادي بالمهل ويدور وراه يحفظ الطريق لايتلف كآخر مرة.. ومن بعيد قنا عليه خالد اللي متكي على الپوطو ومصغر عينيه تايحقق واش هو ولا ماشي هو
..شاف هاكة وهاكة و تمشا جيهتو تايزرب حتا وصل عندو ودرعو ضاحك والزوبير قفز مخلوع ماعرفو منين خرجو وزيد عليها تايكركر
خالد: اماتخاافش ماتخافش الساط غاأنا هههه
كايضور وراه صفر: و وشكون تا
خالد: ماعقلتيش عليا..انا اصاحبي اللي كنت معاكم نهار وقعات ديك المناتفة بين خالتي هيام ومت عايشة
حل السولوفان وجبد الكتفة سرحها بحال الخبزة وهز من الكامون حداه كايرشو عليها ويخلط..شاف فيها صدفة ولقاها باقة غير تتشوف وتوزع عينيها بين الخضرة هو يطلع حاجب مستغرب: مالك؟
مارضاتش وطلعات راسها: ماماليش هانا غانقطع
هزات بصلة تترمش فيها وبدات بالقشرة، مرة بضفارها مرة تتقبها بالموس مرة تزلق ليها وطيح فالارض وهي تاتنزل تقلب عليها وتهزها تكمل مهمة التشريح وعينين بلال بصدمة حاضينها حتا قال: متگوليش ليا ماعدكش مع الطياب؟
برققات عينيها تترمش بتوتر: ا انا
رد: لا جدا..تتعرفي طييبي ولا لا
حكات رقبتها: ش شوية
تنيرڤا: الطيااب مافيهش شوية ابنتي واااش بصلة متتعرفيش تنقييها من اينا كوكب نتي منيين
ضارت تمشي مسح ايدو بسرعة وتبعها شدها بزز كايسايس: واصافي سمحي ليا غير گلسي لارض انا غانوجد كلشي
تتنتر بايديها: وااطلق مني مابغييتش
رد: وا گلللسي
گلسها على كرسي تما وبعصبية رجع لشغلو كايهز ويحط معصب..الااا هادي مكانتش ليه على البال ..كرشو تم كرشو تم كرشو الكلام اللي ديما تايتردد على فمو وديما حاطة معيار أول قبل كلشي، لكن على ماشاف انو الحب فوق كلشي وتستاهل يتغاضا على موضوع فحال هادا اما كون زاد وخلاها لهلا يقلب..كواها فقلبو وگال ماعليش قاد الكفتة بعطريتها شلض البصلة تشليضة رقييقة وبسرعة انباهرات بيها عائشة حيت غير فالتلفازة فين تتشوف اللي كايعرفو يقطعو بحال هاكاك ..خلط البصلة مع الكفتة وزاد عليهمالربيع مقطع، شاف فيها ولقاها مربعة ايديها حاضياها
بلال: تتعرفي تكوري
ردت: لا
رد: الماكلة كاتعرفي ليها ولا نرضعك
ميقات: حاشاااك
نفخ وقال: نوضي نوضي لهنا نوريك
ناضت عندو هازة نيفها ..جابها قدامو وهز شوية من الكفتة كايوريها كيفاش دير دواور ديال الكفتة: وكاندورو على راحة ايدنا ..ونحطوها هنا
عائشة: ماكاينينش القطبان
رد: لا غانديروها فوق الشواية نيشان..ياك فهمتي كيفاش
حركات راسها وهزات شوية تتحاول دير بحالو وهو مشا يشعل المجمر وعينو عليها..
.......
سي بوبكر خرج من دارو كايصوني لرقم عائشة وملامحو قلقة منزاعجة.. شافتو هيام من السرجم ودخلات نازلة عندو بسرعة وهو طلع فسيارتو..دور الساروت يديماري وبدون جدوى مابغاتش تزيد..عاود وعاود وتگول واشبغات تخدم، تما خنزر طالعة ليه القردة وخرج هاز نقشتو وهيام خارجة ليه تتبسم بتوتر وهازة سوارت طموبيلتها فيدها
هيام:سي بوبكر السلام
ضار عندها ماعندو نفس ورد: وعليكم السلام ابنتي
شافت لسيارتو: ياكما واقع شي مشكيل
بعصبية: والله ابنتي ماعرفت مال حفيظة هاد العشية عاد كانت خير وسلام تاحبسات
حرك راسو وشاف فيها مبسم: ماعرفتش شنو نصيب لك بالضبط..حتا اني دويت البارح مع واحد البنت باش تعاونني فيها ساعة قطعات فوجهي هههه ودرت اللي كانعرف.. على الله تعجبك فاش تشوفيها
خرجات عينيها فيه وخدودها بداو يحمارو: ا انا هي البنت اللي داير ليها المفاجأة
أبو عائشة الجزء الثامن
محتوى القصة
التنقل بين الأجزاء