سيدها الجزء 19

قهوتي حائرة مرّة كـ غيابه ،

وحلوة كـ لقائه ..

رشفة من حب و أخرى من ألم ..

حتى إذا ما فرغ فنجاني ،

سكبت صوته العالق بذاكرتي و تحليت به...💙

****

بعدها عليه شوية شاد وجها بين إيديه كيشوف فيها ومبسم.. :

- وأخيرا جانا العفو ونطقتي بيها واخا انا ديجا سمعتها من قبل ولكن دابا عندها حلاوة خراااا😉...

ماريا(بستغراب) :

- هاء سمعتيها من عندمن سمعتيها ها؟

- هههه مالك دغية تسيفتي من عندمن انسمعها من عندك انت

ماريا : انا انا عمري ماكلتها ليك حتى ليوم

جواد : لا فايت كلتيها السخانة كتخلي الواحد يكول كاع داكشي لي كاين بحال سكايرية كيحطو ليك ضوسي بلا عصا😂

ماريا(بعدات منو) :

- انا انا كلت ليك كنبغيك؟

- أيااااه الالة وكنت كدابزي وتكولي جواد ديالي بوحدي كنبغيك أجواد...ماريا خرجات عينيها وحسات بوجها ولا حمر ضارت وعطاتو بضهر شادة وجها والحشمة قتلاتها...حسات بيديها ضايرين بيها معنقها... :

- هاي هاي على الحشومية ديالي مافيها باس ياك سمعتها غير انا ماسمعوهاش الناس والى كاع سمعوها الناس الحب ماشي عيب انا عليا نخرج لشارع ونغوت بجهد ونكول بلي كنبغيك...ماريا جاتها الضحكة ضارت عندو كتشوف فيه بنص عين :

- زعمة زعمة جواد الإبراهيمي الريفي بجلالة قدره وسموه يتنازل ويدير تصرف ديال المراهقين فشارع مانتيقهاش...بعد عليها جواد كيخنزر فيها... :

- كتحدايني يااااك؟

ماريا(بتصميم) :

- أااااه أسيدي أتحداك تم اتحداك

جواد : واخا عقلي على هاد النهار مزياااان الى ربحت الرهان شنو اتعطيني فالمقابل؟

ماريا : انت دير شروط الى ربحتي غادي ندير لي بغيتي

جواد : واخا الشرط ديالي الوحيد هو لي طلبت منك تكولي واخا تفاهمنا؟

ماريا : إيوا فحدود المعقول وصافي

جواد(كيضحك) :

- بغيت غير نعرف هاد العقل ديالك شنو فيه كنهضر فشكل كتحوليها لشكل شنو كلنا دابا؟

ماريا : همم واااخا صافي انا موافقة..

جواد : مشااات يلاه اري تيليفونك نصورك باش نمشيو تابعنا بزااف مايدار اوك حبيبي

ماريا(حدرات راسها حشمانة) :

- اهاه...

جواد : يخليلي لي كيحشم...خدا تيليفون ديالها صورها شحال من صورة مع الصخور الكلسية وكرسي الملك...من بعد رجعو إيديهم فبعضياتهم لطوموبيل...خداو طريق الرجعة للأوطيل..

ماريا : فيا الجوع بزاااف

جواد : ادوزو ناكلو شيحاجة ومن بعد بغيت نهضر معاك واخا..

ماريا : الله يسمعنا خبار الخير ولكن ناكول هو لول صافي...دخلو لوطيل نيشان لمطعم طلبو شنو بغاو كلاو ورجعو طباسل خاويين بكترت ماتمشاو هلكهم الجوع...

ماريا : ماكلتيش ليا فاش بغيتي تهضر معايا..

جواد : المهم العلاقة ديالنا خاصها تكون مبنية على الصراحة الكدوب ممنوع انت عارفاني مكانبغيش لي يكدب عليا ولا لي يخبي عليا شيحاجة وانا وانت خاص تكون الورقة بيناتنا بيضة اي حاجة ضراتك اجي كوليها ليا مابغيتكش تخبي عليا حتى حاجة واخا تكون صغيرة

ماريا : انا اصلا لي فقلبي على لساني دغية كنكول كولشي 

جواد(ضحك) :

- عاااااارفك مزيااان داكشي باش بغيت نكوليك بلي وسيم ماعندو حتى علاقة بهاد الرحلة

ماريا😲 : شنو كيفاش؟

جواد : من بعد لي وقع فالبحر كان خاصك ضروري تخرجي وانا ضبرت هاد الرحلة مع وسيم بحال الى هو لي دارها ليك...

ماريا : نااااري لعبتو من ورايا داكشي باش داكشي جا سلم عليه زرب عليه دغية لقيت راسي فالمطار بلاتي بلاتي دابا عااااد عراااافت فاش لقيتك حدايا فطيارة ماشي صدفة وفنفس الاوطيل وفتران نااااري وانا كنكول ولايني ماساهلش مع راسك

جواد(غمزها) :

- شنو كتعرفي عليا لي بغيتها كنوصل ليها ونديرها

ماريا : ناااري على مغرور ههههه...شدات إيديه بين إيديها...

- داكشي باش كنبغيك وهادشي لي كيعجبني فيك شكرا بزاااف على كلشي والله كانت أحسن رحلة فحياتي عمري ماغادي نساها..

جواد(تنهد تنهيدة طويلة) :

- أحم خليني شاد راسي راه صبري قرب يتقادة

ماريا(خطفات إيديها) :

- ههههه صافي هاني 

جواد : كاينة حاجة خرا

ماريا : شنو هيا؟

اھتمام الشخص یجعلكَ تُحِبُّ وُجُودَهُ رغماَا عَنْكَ.

اَللَّهُمَّ اِحْفَظْ لي مَنْ اشعرنيَ بأني أَجْمَلُ مَالَدَيْهُ صِدْقًا وَلَيْسَ تصنعا..

****

جواد : من الأحسن نأجلو الرحلة ديال متاحف ألمانيا

ماريا : ولكن علاش؟بغيت نشوف برلين ونشوف المتاحف لي عاودتي ليا عليهم

جواد : عرفت ولكن كيف كتعرفي عرس هشام وهاجر قرب وحتى من رابحة وأدم قرب العرس ديالهم ماعندناش الوقت بزااف

ماريا : واش بغيتينا نرجعو؟

جواد : لا مغاديش نرجعو دابا بقات لينا واحد الحاجة غادي نديروها

ماريا : وناري كتسقرم على الهضرة طلق كلشي خلاص كدير ليا سوسبانس

جواد(كيضحك) :

- بحال هكاك المهم انا وياك غادي نمشيو لبرازيل...ماريا طرطقات عينيها فيه بصدمة...

جواد : مالك شتك سكتي شنو وقع؟

ماريا : واش كتهضر بصح البرازيل البرازيل؟

جواد : أه البرازيل غادي نمشيو عندي شي شغال تما

ماريا : يلاه هضرنا على الصراحة كتريكل عليا أش ايديك انت لبرازيل وشنو علاقة خدمتك بالبرازيل

جواد : واش انت لاباس شنو كتعرفي بعدا على خدمتي غير داكشي لي كتعرفي لي هو قليل شنو كلت ليك فصباح بلي انا زاير كاااع دول وكل بلاصة عندي فيها علاقة ديال الخدمة كلت نستاغلو الفرصة وتمشي معايا عمرك مازرتيها تشوفيها

ماريا : وهيا صراحة عمري شفتها غير فالأفلام ريو ديجينيرو والمناظر زوينة طبيعية لي عندهم

جواد : إيوا شفتي مغاديش نتعطلو بزااف غادي نفوتو غير 4يام ونرجعو لمغرب هضرت مع الدار وعلموني بلي من هنا ل10يام ايخصنا نكونو فإفران...

- صافي واخا إيمتا أيخصنا نمشيو لبرازيل زعمة؟

- عندنا طيارة من هنا لساعة يلاه نقادو حوايجنا

ماريا : دغية ماعلمتينيش قبل؟

جواد : علاياش انعلمك تيكيت مقطعين وبلايصنا محجوزين ايبقى غير الباليزة ديالك لي خاصك تجمعي

ماريا : اااااخ منك ااااخ..

****

أروى(والفرحة كتنقز من عينيها) :

- والله حتى فرحانة ليكم بزااااف مبروك عليكم خاصنا غير ماريا علم الله شنو كدير فألمانيا😕

وسيم(شاد فيد ثورية) :

- ماريا مكايناش بوحدها مكاين لاش تشوشو عليها من هنا لواحد 5يام هكاك اتلقاوها هنا😉

أروى : كيفاش مكايناش بوحدها معامن كاينة؟

وسيم : كاين معاها جواد...

أروى(بصدمة) :

- جواد جواد؟

وسيم : ايااااه الالة هو

ثورية : ولكن لي كنعرف هو مكيهضروش مع بعضياتهم ولالا؟

أروى : حتى انا غير كنجبدو ليها كتنقز

وسيم : كاااان زمااااان هادشي اما دابا كلام خور ايجيو مشادين ليدين

أروى(كتخنزر فيه) :

- ماعرفتش علاش كنشم ريحة شياط وريحة بلي انت عندك يد فهادشي مافيهاش شك

وسيم : طبعا منكونش وسيم الى مكانش عندي يد فهادشي انت حمقة لا 

أروى : وخويا منين كتلقى حلول لناس لقى حل لختك مسكينة...

وسيم(خنزر فيها) :

- مالها ختي؟😡

أروى : مامالها والو الله اودي اكنضحك اخويا ابرد وانتوما ايمتا عرسكم؟

وسيم : كايبان ليا هاد العام اديال العراسات نحيدو بعدا عرس خت جواد وخو ماريا وديك ساع نشوف ريوسنا حنا بعدا خاصني نمشي نشوف والدين ديال ثورية نهضر معاهم من صواب وديك ساع يحن الله ولالا ثورية؟

ثورية : بصح مايمكنش ندير شيحاجة بلا بيهم شوار شوارهم هوما مساكن لي كبروني وضربو عليا تمارة حتى وصلت لهاد الكد

أروى : بصح أختي الله يسمح لينا من الوالدين

ثورية(تنهدات) :

- أمين..

وسيم(طبطب على إيدها) :

- مايكون الخير إن شاء الله

أروى(بشر) :

- أحم أحم نحن هنا...شاف فيها خوها هز مخدة مجا فين يلوحها عليها حتى هربات..

أروى(كضحك وتهز فسروالها) :

- صافي صافي أكنضحك معاك

وسيم : وتبتي ولا نفلعص ختي من شي قنت

أروى : هههههه صافي هاني هاني...

تحاصرهما المشاكل ولكن هو مطمئن .. 

لأن ما بينهما أجمل من أن تفسده الظروف💖

****

واخا غابت الشمس وقرب الحال يظلام ولكن مزال الجو سخون حتى الهوى لي كيضرب مابين بارد او دافي...

ماريا(كتنش) :

- وناااري ياربي الموت ديال الصهد😥

جواد : مكايبقاش الجو بحال هكا المناخ ديال البرازيل مناخ إستوائي دابا كيبان ليك هكا تقدر تصب الشتا فأي لحظة واخا الحال سخون

ماريا : سبحان الله بحال المكسيك ديما الصهد وكتصب الشتا وكيبقى الصهد

جواد : تقريبا بحال هكاك...حبيبة ديالي غادي تكوني عييتي يااك؟

ماريا : بزاااف كنحس براسي بغيت غير ندوش ونعس حيت مارتاحيناش من دوك الجبال لي ديتيني ليهم لطيارة لهنا..

جواد : غير صبري 5 دقايق غادي يجي شيفور ديال واحد الصديق قديم عندي هنا يدينا لوطيل اتاخدي دوش تعشاي وتنعسي

ماريا : كتعرف الناس هنا؟

جواد : أه كنعرف الناس شحال هادي ونهار جيت لبرازيل أول مرة تعرفت بواحد السيد معروف هنا فالبرازيل كولي مساهم فالاقتصاد ديال البلاد مكانش كيعيش فالبرازيل عزيز عليه الخلى داكشي باش ختار يعيش فالأدغال ديال البرازيل

ماريا : ناري شكون الحمق لي يعيش فالادغال خصوصا كيكولو بلي كاين سبوعة ونمورة ولفاع

جواد : بالعكس كون تشوفي البلاصة لي ساكن فيها ماتسخايش بيها 

ماريا : وعلاش مايعيش فالمغرب علاش ختار البرازيل بضبط؟

- حيت هو برازيلي ماشي مغربي سميتو رافايل كورديرو...قاطعهم صوت ديال الطوموبيل لي وقفات قدامهم..

جواد : من بعد ونكمل ليك الشيفور وصل...هبط الشيفور هز ليهم البالز دارهم فالكوفر طلع جواد وماريا لور من بعد ديمارا الشيفور وخدا طريقو بين شوارع البرازيل...طريق كلها وماريا ملصقة وجها فالسرجم كتمتع بالمناظر لي حداها فعلا البرازيل زوينة بزاااف كيف كتشوفها فتلفازة..

ماريا : هاد صاحبك لي سيفط ليك الشيفور برازيلي حتى هو؟

جواد : لا مغربي مزوج ببرازيلية او والد معاها بنية 

ماريا : أول مرة نسمع مغربي واخد برازيلية

جواد : عادي أحبيبة كيما كاين مغربية واخدة ايطالي وزيد وزيد كاين مغربي واخد برازيلية واخا عائلتها مزال لحد دابا رافضين خصوصا جدها عندهم شي عادات فشي شكل عائلة مراتو ساكنين فريو دي جينيرو فواحد القرية تما تنسات ليا سميتها جدها لاباس عليه بحال الى كلتي كلمتو مسموعة فديك البلاصة رفض بلي حفيدتو تاخد واحد ماشي دمهم وبلادهم ودينهم ولكن هيا تحدات كلشي وهربات وتزوجات بيه

ماريا(بستغراب) :

-مزال بحال هاد الأفكار؟

جواد : مزااال فبحال هاد البلايص مزال عندهم هاد العادات وتقاليد ديالهم

ماريا : زعمة منين ولدات بنتهم صافي خاص يتسامحو

جواد : ماعندهمش داكشي هوما مدام رافضين ايبقاو رافضين علامة عاود ليا بلي جدها حرم مها وباها مايشوفوهاش نهائيا

ماريا : ناري زيدك شيبة العاصية حتى هو ماتشكة عليا شكيكو البلا...الحمد لله ياربي لي حنا مسلمين ماعندنا هادشي

جواد : عندنا حتى حنا غير هو ماشي كيف كيف هادو ديال هاد المناطق زايدين نغزة علينا شوية...وقف بيهم الشيفور قدام لوطيل هبط هبط ليهم الشوانط وعاونهم حتى دخلو لوطيل سلاو الإجراءات ديالهم عاد مشا..فتح جواد الباب لماريا دخل الخدام ليها الباليزة وخرج...

ماريا : دخل

جواد(هز حاجب ومهبط التاني) :

- زعمتي البعلوكة مابقيتيش تحشمي الى دخلت مانتي فخير

ماريا : انا ماقصدت وا...سكتها بيديه :

- عارف أحبيبة ماقصدتي والو غير ضحكت معاك سيري دوشي انا انوصيهم يجيبو لينا العشا لهنا غادي تعشاي وتنعسي باش نخرجو غدا واخا

ماريا : ياك عندك الخدمة؟

جواد : أه عندي ولكن غدا انزرو صاحبي لي عاودت ليك عليه فدارو ومن تما عندي ليك واحد المفاجأة صغيرة صافي

ماريا(حلات عينيها) :

- شنو هيا؟

جواد : وصافي صبري متكونيش زربانة كل حاجة فوقتها زوينة..(قرب شفايفو لجنب فمها باسها ورجع راسو لور)نشوفك من بعد(غمزها)...خرج رد الباب وراه وخلاها واقفة حالة فمها بحال شي هبيلة...حتى وعات عاد فاقت...مشات لجهة باليزتها حلاتها جبدات حوايجها ودخلات لدوش خدات دوش دافي ريحها وحيدات بيه العيا نشفات شعرها بالفوطة وخلاتو مطلوق لبسات بيجامتها...ومشات تلاحت على النموسية هزات تيليفونها كتشوف فتصاور وضحك مع راسها...حاولات تفتح الواتساب ولكن الريزو قليل ماعرفاتش علاش

ماريا : مالك مكلخة انت فالبرازيل والكارطة عندك ديال تصالات وبغيتيها تخدم هنا هيا فالمغرب وتقيلة خلي هنا...تسمع الدقان فالباب..ناضت بالخف فتحات الباب كان الخدام جار واحد الطبلة فيها بزااف ديال الطباسل...ماريا ماعرفاتش كيفاش تكوليه يخليها غير حدا الفوطوي خلاتو على راحتو يحطها فيما بغا..قبل مايخرج تبسم ليها وسد الباب من وراه...

ماقرباتش لماكلة حتى يجي جواد...ماعطلهاش بزاااف ديك ساعات تدق الباب ودخل جواد..

- جابو العشا؟

ماريا : اه يلاه جابوه غير دابا يلاه راه فيا الموت ديال جوع...قرب الطبلة لحداها وكلس مقابل معاها على طبلة...كلاو وهوما ساكتين ماريا حتى لماكلة كيغيب عقلها ومشاعرها مشاعر وحدة لي كتبقى هيا ديال كرشها...

ماريا : الله الحمد لله واخا هاد الشعب كيضحكو علينا بطرف ديال الخبز قد الفرماجة ولكن نعديو

جواد : الناس هنا مكايكلوش بزااف ديال الخبز حيت بنسبة ليهم كيغلض أوروبا كاملة هكا

ماريا : ومال المكسيك غلاض يلاه؟

جواد : مكايستهلكوش الخبز بزاف كيستهلكو الهمبرغر بزااااف وكوكا عندهم جوج حوايج ياكلوهوم 3المرات فنهار ماعندهمش مشكل اللحم وكوكا داكشي باش كتشوفيهم غلاض هادو سكان الاصليين خلي عليك دوك لي كتشوفو فالمسلسلات هادوك غير مزورين أغلبيتهم عايشين فأمريكا اما الاصليين كيكونو غلاض بزاف..

ماريا(بستغراب) :

- هكاااك ولكن واخا هكاك كتجيني هاد الماكلة فشكل مازويناش ماعندها بنة

جواد : الى بغيتي تاكلي ماكلة بنينة من غير المغرب والبلدان العربية خاصك تزوري إيطاليا وفرنسا الماكلة زوينة والمطبخ الفرنسي والايطالي من المطابخ العالمية لي معروفة...ماريا عينيها حمرين ودابلين

ماريا(بصوت مرخي) :

- أه سمعتها حتى سبانيا ماكلتهم زوينة

جواد : يلاه أحبيبي نوضي ترتاحي كتباني ليا ترخيتي وغدا عارض علينا السيد لي كلت ليك عليه..

ماريا(تلاحت بلور وشبحات رجليها) :

- اه والله حتى عيييت وفيا واحد النعاس عينيا كيتلاصقو...وقف وقرب ليها نزل لعند راسها كيشوف فيها ومبسم وحتى هيا كتسناه شنو باغي يدير...قرب تاني لجنب فمها وباسها بوسة طويلة...

جواد : ماشي دابا أحبيبة ديالي ماشي دابا يلاه رتاحي...بعد منها لجهة الكرسي هز إيزار ورجع غطاها...باسها تاني فجبهتها جر معاه الطبلة وخرج...

****

#إفران

أمين : أنا والله مافهمت فيك والو شنو فيها الى درنا عيد ميلاد لبنتنا

وردة : انا مغاديش ندير عيد ميلاد لبنتي او ماريا مكايناش غير حيدها من بالك هادي

أمين : دابا الى بغيت نفرح بنتي خاصني نتينى حتى تجي ماريا ياك؟...وقفات وردة كتخنزر فيه وعاقدة حجبانها :

- متكونش نكار الخير وتنسى شنو دارت على قبلنا أسيدي نهار انت كنتي موضر وانا دايرة كسيدة فغيبوبة مكنتش عارفة راسي انعيش ولالا هيا لي تكلفات بليليا فاش مرضات شكون كاينعس عند راسها كوليا ونهار دارت العام شكون حتافل بيها شكون حضنها وحارب على قبلها خوك بسنانها حتى من ماماك لي هيا خالتي الله يرحمها ويسمح ليها ماقبلاتهاش كونما ديك بنت الناس كون بنتي فالخيرية فهمتي ولالا هادي راه ماماها ماشي غير صاحبتي تفاهمنا ومغادي ندير والو حتى تجي من السفر بغيتي ولا كرهتي

أمين : انا مانكرتش هادشي ولكن ليليا قفلات عامين هادي 3يام اش بقى من عيد ميلاد

وردة : واخا يفوت عليه عام أخور لي عندي أأمين راني كلتو ليك وزيدك واحد الحاجة كول لديك المساعدة ديالك تدخل سوق راسها راه سمعتها كتكول ليك انا نعاونك كنعرف نضم الحفلات مزيان دخل سوق جواها هاديك بنتي وانا لي انقاد ليها عيد ميلادها

أمين : مريم مكالت حتى عيب غير بغات تعاون وصافي

وردة(وقفات) :

- أمين انا مرة ومكتفهم المرة غير المرة انا انتبرا منك هاد المرة وبالخاطر مرة خرة قسما بالله حتى هاديك مريم أتشوف مني واحد الوجه عمرها شافتو فحياتها وأنا علمتك....

**** 

- أحم ماما بغيت نسولك نهار تزوجتي بابا شحال كان عندك من عام؟...

حورية(دورات وجها من تلفازة لبنتها) :

- علاش هاد السؤال؟

سومية : لا والو غير بغيت نعرف جاني الفضول

حورية : كانت عندي شي 22

سومية : هكاك دابا أماما فرضا جاني شي واحد تقدم ليا توافقو عليه؟...شافت فيها مها بشك وتقادات فالكلسة :

- أجي شفتك هاد اليام ماشي على برجك زعمة أش واقع

سومية : والو اماما غير سولتك وصافي

حورية : سالي سونطر ديالك بعدا مزال الحال على هاد الهضرة وانت مزال صغيرة

سومية : ماما راه فعمري 21 دابا وانت تزوجتي عند 22

حورية(بصرامة) :

- سومية نوضي من حدايا شوفي ليك ابنتي شيحاجة ديريها طوي داك الماريو لي سفاه على علاه

سومية : واخا اماما كتصدريني واخا هاني مشيت...ناضت سومية كترطا دخلات لبيتها وسدات عليها..

حورية(كضحك) :

- هاي على البنت كبرات وبغات حتى هيا تزوج كاتليك..نباها محمد :

- شكون بغا يتزوج؟

حورية : هههه اواحد الفيلم كلس كلس تفرج...

على_طبلة_ديال_الفطور...

ماريا : شنو خاصني نلبس واش شي حاجة ديال المناسبات ولا سروال دجين وتيشورت؟

جواد : لالا بطبيعة الحال لا لبسي شي كسوة حيت هادي عراضة فهمتيني

ماريا : واخا...وقفات :

- انا انطلع ندوش ونوجد راسي واخا

جواد : واخا سيري انا غادي نوجد راسي ونهضر فتيليفون وغادي نجي نديك

ماريا(عطاتو بوسة فالهوى ومشات..)..

- من بعد مادوشات كلسات قدام المرايا جبدات اسيشوار ديالها نشفات شعرها هو لول عاد سرحاتو بالبلاك..سلات شعرها جرات الباليزة ديالها فتحاتها كتجبد حوايجها وحدة بوحدة او وقفات كتشوف وتفكر شنو غادي تلبس...فالاخير لبسات صايا تحت الركبة فالبيضة مزوقة بوريدات من التحت مع شوميز فسومو وصندالة سومو وساك سومو...دارت لوجها مكياج خفيف لبسات 4 الحلقات على شكل نجمة وجمعات شعرها مشيطة صغيرة وزوينة رشات من ريحتها وشافت آخر مرة فالمرايا...هزات ساروت ديال بيتها وخرجات مشات لعند جواد دقات مرة لولة وتانية وهو يفتح ليها الباب...طلعاتو ماريا من سروالو ازرق مخطط شوميز فلون أزرق سماوي...

جواد : اوووه حبيبة ديالي كتبان زوينة اليوم شنو هو السر؟

ماريا : انا ديما زوينة

جواد : تواضع بنادم هو لي يشكر راسو...

ماريا : مزال كاعما ساليتي وحلتي غير فالعقاد ديال القميجة بلاتي بلاتي...حيدات ليه إيديه وتولات هيا المهمة ديال العقاد...وقف جواد كيشوف فيها عاجبو الحال...سلات القميجة وخدات لافيست لبساتو ليه...من بعد هزات المشطة مشطات ليه شعرو ولحيتو...وراها خدات الريحة ديالو رشاتو..

ماريا : اشنو كنتي ادير بلا بيا غير كوليا...جرها جواد بالخف لصقها مع صدرو..

جواد : انت نعمة من عند الله الحمد لله لي ربي رزقني بأحسن هدية...تم هابط بفمو جيهت فمها بلعات ريقها ودفعاتو وهربات..

ماريا(كضحك) :

- يلاه راه غادي نتعطلو

جواد(تنهد) :

- واخا الالة تخلصي من بعد صبرتي تسناي..هز تيليفون ديالو وساروت ديال البيت..

جواد : يلاه أحبيبي باش منتعطلو...جرها جواد من إيديها وخرجو بجوج..

-#فطريق

ماريا : ماكلتيش ليا واش ناس متواضعين ولا صحاب الشيكي

جواد : لا بالعكس قربنا نوصلو وتشوفيهم كيدايرن...دخلات بيهم طوموبيل لواحد الطريق ضيقة أول حاجة كتبان ليك نفورة صغيرة داير بيها الطبيعة والورد قبالتها دار بتيت فيلا الضاو ديالها شاعلين وقف بيهم الشيفور...نزل جواد وتبعاتو ماريا شاد فيديها خطواو جوج خطوات تفتح الباب وخرج منو واحد الراجل يكون فأواسط الثلاتينات ماطويلش بزااف الملامح ديالو بريئة والضحكة على وجهو فتح إيديه وبتحية ديال ترحيب عنق جواد..

- صاحبي شحال هادي ماشفناك غبرتي غبرة وحدة 

جواد : ههههه غير مع الخدمة راك عارف بلاما نكوليك..

- أحسن حاجة درتي والله هو جيتي لهنا وشفناك

جواد(كيعرفهم) :

- جمال هادي ماريا خطيبتي ماريا هادا جمال صاحبي لي عاودت ليك عليه

ماريا(سرطات ديك خطيبتي عجبها الحال دار ليها قيمة) :

- مشرفين

جمال : شرف ليا الالة صافي درتي عقلك وخطبتي ولكن بحال الى سمعت شحال هذا كنت مزوج ولا غير إشاعة

جواد : حتى لمن بعد ونعاود ليك

جمال : يلاه ندخلو أنا ماريا كتسنى لداخل متشوقة تعرف عليكم...دخلو لدار لداخل كيف كانت متوقعاها ماريا لون صباغة باج مايل لبيوضة تريا كبيرة مدلية من السقف دروج فلون الكريم فوتويات فلون البيج مزينين بمخيدات فالكرونة صالة مونجي كبيرة ديكورات وألواح لرسامين مشهورين...تمات جايا واحد السيدة تكون عندها 30سنة هكاك طول من جمال بشوية البشرة ديالها دهبية ولون شعرها عسلي لابسة كسوة تحت الركبة فلون الخضر راسمة ضحكة على وجها...مدات إيديها لجواد وحياتو بالانجليزية ضارت لعند ماريا عنقاتها وحياتها حتى هيا بالانجليزية..

جمال : مراتي أنا ماريا العربية عندها قليلة بزااف الى هضرات غير غادي تهربو تقدرو تفاهمو معاها بالإنجليزية

ماريا : ماشي مشكل..

جمال : أجيو لصالون...كلسو فصالون ماريا حدا جواد او أنا ماريا جنب جمال شادة ليه فيديه

أنا : كيف كانت الرحلة ديالكم مزيانة

ماريا : اه مزيانة واخا الجو سخون شوية

أنا : هنا فسان باولو كيكون الجو بحال هكا ولا فريو ديجانيرو الحرارة كتوصل ل26 ماباردة ماسخونة مزيانة وفليل كيتحرك البرد...تفتح الباب وتمات داخلة واحد البنية كتجري واخدة شبه من باها ولكن بشرتها وشعرها بحال ماماها...ترمات بين يدين باباها عنقاتو وباستو يكون عندها ديك 7سنين هكاك...

جمال : سارة ماما بوسي عمو جواد وعميتو ماريا...دارت عندو بإبتسامة عريضة وباستهم بجوج

جواد : ماعندي مايسالك كتعرف العربية؟

سارة : دادي تيعلمني العربية ديما وفاش كنمشيو لمغرب عند جدي وجدة كيهضرو معايا بالعربية غير ماما بوحدها لي مكتعرفش ليها كتهضر بالإنكليش والبرتغالية كتبغي تهضر بالعربية ولكن كدير أفدعيس صافي

ماريا(كضحك) :

- أفدعيس هههههه حلوة هاد البنت حلوة(كتبوس فيها)

جمال : يلاه بنتي سيري مع إيستيل تبدل ليك حوايجك ودوش ليك واخا

سارة : اوك دادي...

تحط الغدا وتجمعو على طبلة كيهضرو فبزاف ديال المواضيع ماريا غير كتسمع ليهم ومرة مرة كضحك ومتبعة معاهم لي عرفات هو أنو أنا كتفهم راجلها شنو كيكول ولكن باش تجاوب مكتقدش حاولات تعلم او والو..

جواد : ماكلتيش ليا فين وصلات الامور ديالكم مع عائلة أنا؟

جمال : لحتى بلاصة والو أنا هربات وهيا عندها 20 عام جات سكنات معايا موراها تزوجنا كانو حاولو يقتلوها كاااع جاو خوتها قلبو عليها ولكن كنا بدلنا المدينة من وراها تزوجنا وتزادت عندنا سارة ولكن الأمور هيا هيا

ماريا(نقزات بستغراب) :

- يقتلوها اويلي واش الدنيا سايبة هادو حمقين يمكن..تبسمات أنا وجاوباتها..

- هوما هكاك كولشي عندهم كيتحل بزز داكشي باش هربت جدي كان باغيني ناخود ولد عمي ولكن انا مابغيتش عائلتي ساكنة فمدينة دوك دي كاسياس هي مدينة فريو ديجينيرو فالجنوب الشرقي للبرازيل كطل على بحر كوباكابانا مدينة زوينة جدي تزاد تم زكان كيحكم واحد القرية تم وكولشي كيدير ليه ألف حساب جاه الرفض ديالي بحال جريمة داكشي باش انا عارفاه عمرو مغادي ينسى هادشي ولا غادي يسمح ليا مرات كنخاف واخا داظ لي داز دابا ولكن بعض المرات كيشدني واحد الخوف كنخاف على جمال وعلى سارة..شد ليها راجلها فيديها وباسهم..

جمال : ماعندك مناش تخافي عمر شي واحد مغادي يأديك ولا يفكر يأدي ليا بنتي غير حيدي داك الوسواس من راسك..

ماريا : اه عندو الصح حيدي الوسواس والى بان هاد جدك عيطي عليا والله حتى نعطيه من المنقي خيارو...

أنا وجمال كيضحكو..

جواد : هادي راه هبيلة ديرها والله

ماريا : خرجات عينيها) يااااك انا هبيلة وراني هبيلة نيت لي قبلت بيك

جواد : يحصليك الشرف...

ماريا : من بعد ونتفاهمو من بعد...ضار جواد عند جمال..

- جمال معنديش وقت بزاااف هنا كمت بغيت نسولك واش عندك شي خبار على رافايل؟

جمال : رافايل كورديرو؟

جواد : أه نمرتو مشات ليا كنت بغيت نشوفو

جمال : هو حدو أدغال الأمازون تما فين كاين فدوك نواحي فواحد الجزيرة سميتها سميتها إيطاكواي..الى بغيتي ممكن نخلي ليك الطيارة ديالي تديك لتم شنو بان ليك؟

جواد : بصح ادير فيا خير كبير

جمال : إيمتا بغيتي تمشي لتم؟

جواد : ماكرهتش هاد العشية واش بعيد من هنا؟

جمال : لا بالعكس شي 20دقيقة هكاك غادي توصل صافي انا غادي نهضر مع الطيار لي يديك ويتسناك وماريا اتخليها هنا؟

جواد : لا ضروري خاصني نديها معايا

جمال : صافي انسيفط شيفور يجيب ليكم حوايجكم من لوطيل خليكم هنا وفالعشية تمشيو..

ماريا : ولكن حوايج الحمام خليتهم فالحمام مامجموعينش

جمال : كاعما ترفدي الهم سيباستيان كيدير كولشي..غير تهناو..

كملو الغدا ديالهم أما جمال عطا سوارت لشيفور وكلفو باش يجيب شوانط ديال جواد وماريا ويخلص الحجز من بعد جهد كبير مع جواد لي مابغاش حتى كانو أيتخاصمو فالأخير ستسلم جواد وخلاه على راحتو...رجع شيفور وفيديه شوانط ديالهم مناقصين والو..

- دات أنا ماريا لواحد البيت باش تبدل حوايجها وتوجد لسفر...دازت نص ساعة وكانو واجدين بجوج لسفر..

جواد : خدينا غير جوج تبديلات البالز ايبقاو هنا حتى نرجعو واخا

جمال : بلاما توصي هادي كتبقى دارك سيباستيان ايوصلكم حتى لطيارة اوك غير توصلو ايتلقى ليكم جورج سول على جورج راه ايوصلك حتى لعند رافايل..

جواد (عنقو) :

- شكرا بزااف أجمال

جمال : مابيناتناش الشكر...تسيفطو معاهم ركبو فطوموبيل..وداهم سيباستيان حتى لطيارة الخاصة ديال جمال...وركبو...

كيف لي ان اعبر عن شعوري نحوك كيف يمكنني ان اصفك بعد كل ما هديتني من كان يقول يوما أن ذاك الرجل القوي الجبل المتين سيصبح يوما طفلا يبحت عن حضن معشوقته ليرتوي منه. كيف لي ان اتحمل كل هذا الحب والعطف و الحنان اعشقك أرجوك خـذنـي لأرتاح في عينيك مـن غبار الحرب وتعب اللجوء..💙...

****

ماريا(بدهشة كتأشر ليه بيديها) :

- وااااو شوف على مناظر كيدايرة وااااو شوف داك التمثال كداش بحال تمثال الحرية لي فأمريكا..

جواد(كيضحك) :

- هاداك سميتو تمثال السيد المسيح الفادي cristo retendor من أهم وأجمل المعالم فالبرازيل مهم بزاااف عندهم هنا طول ديالو شي 30 متر ودرعانو فيهم 28متر كيجيو سياح باش يشوفوه من كاع انحاء العالم تيكولو بلي شوفة فيه كتسيفط رسالة محبة وسلام...

ماريا : العجب تمثال دايرين عليه هاد الحالة جاني انا اديكور وصافي هو فعلا زوين كبير ولكن يقدسوه لهاد الدرجة

جواد : وراه كل بلاصة وتقاليدها ودين ديالها هوما عندهم شيحاجة مهمة

ماريا : دابا هادي هيا ريو ديجينيرو؟

جواد : هيا هادي لي كتشوفي قدامك حنا دابا شوية انوصلو لأدغال غابة الأمازون..

ماريا : صاحبك فغابة الأمازون؟

جواد : لا ماشي فالغابة حداها قريب منها فدوك نواحي فواحد الجزيرة أسمها إيطاكواي فهمتي دابا ناري شحال فيك ديال الأسئلة غير ماخدمتي صحفية

ماريا : وراه ضروري نسول نبقى كي لهبيلة

جواد : لا حاشا الله أودي

ماريا : وا هكاك...رجعات حطات راسها على زاج السرجم كتخضر عينيها مابقاتش شافت المباني والعمارات دابا كتشوف غير الشجر والخضورية والما كيدي الما مناظر عمرها شافتهم عينيها...علن الطيار على الهبوط فواحد الساحة...بدات طيارة كتهبط شوية بشوية وقف جواد مد يديه لماريا هاز ساك صغير فيه حوايجهم تفتح الباب ونزلو ...ضربهم البرد ديال هاد البلاصة برد خفيف وزوين الشمس مكانتش ولكن السما صافية...لقاو واحد جيب واقفة كتسناهم راكبها واحد الراجل لابسة لبسة ديال كوبوي كبير فالعمر غير شافهم لبس طربوشو وجا لعندها...مد يديه لجواد وبلغة إنجليزية عرف على راسو..كان هذا هو جورج...علمهم طيار بلي غادي يرجع عندهم لغد بحال هاد الوقت باش يديهم...

جواد(موجه كلامو لجورج) :

- رافايل كاين فدارو؟

جورج : أه أسيدي عندك زهر هاد المدة مستاقر هنا حيت مراتو حاملة وجابها لهنا ترتاح نفسية ديالها حسن من المدينة...

جواد : اااه مزيان...ركبو مع جورج فطوموبيل غادي بيهم فوسط الشجر وطبيعة دازو من حدا شحال من شلال طيور أشكال انواع وبالألوان سبحان الله على هاد النعمة وعلى الطبيعة لي عطا الله مابحال مثيل...كيبان ليهم واحد دار كلها زاج واقفة طوموبيل رباعية الدفع فالكحل مولوار صغير مصنوع بالحجر فلون الأخضر..والقهوي..وقف جورج ونزل فتح ليهم الباب..

جورج : موسيو رافايل مافخباروش بلي انتوما هنا انا اندخل نعلمو سمحوليا..

جواد : لا خود راحتك...خلاهم ومشا..

ماريا(بحماس) :

- شفتي على بلاصة كيدايرة زوينة بزاااف ناري مكرهتش نعيش هنا

جواد : تقدري تعيشي مع الحناش القرودة أما البخوش منهضروش عليه ها نموس ها شنيولة وماشي ديك لي عندها فالمغرب هادي راه كل وحدة قد الصندالة..

ماريا : كتفلى عليا ياك؟

جواد : فين عمري تفليت عليك والله العظيم حتى كنهضر بصح...جاهم صوت من جهة لوخرا..(بصوت رجولي)..

- جواد؟!!...تلفت جواد وماريا دقة وحدة تبسم وتم جاي جيهتهم...

جواد : هو هدا

رافايل : ماتبدلتيش أنت هو أنت...ماريا واخا جواد حداها مابقاتش داتها فيه كتشوف غير فهاد عارض الأزياء لي قدامها وكتهصر مع راسها :

- ياحليلي على سمورية وضحيكة وحفرة الزين والعينين وطولة وتجريدة انا فحلم ولا فعلم واش بحال هاد الزين مزال كاين كون اكنت حاملة نتوحم عليه بعدا..

جواد(بصرامة) :

- مااااريا...نقزات ماريا عاد نتابهات ليهم :

- هاه شنو؟

جواد : رافايل ماد إيديه بغا يسلم عليك..

ماريا(عاد عاقت) :

- ااااه سمحليا هههه سلام لاباس هههه

رافايل : خطيبتك زوينة عرفتي تختار...ماريا عينيها ترسمو فيهم القلوبة عجبها الحال

رافايل : يلاه مانبقاوش واقفين دخلو...سلقهم وماريا تابعاه بحال الى واكلة مخ ضبع ماحسات بدقة منين نزلات عليها لظهر نيشان حتى عواجت..

ماريا(غوتات) :

- اااااي واش تسطيتي ولا مالك؟

جواد(بعصبية) :

- هادي باش تجنعي عينيك وتشوفي كدامك راه لي معاك راجلك ماشي فروج

ماريا : مالي مشيت خطبتو راه غير كنشوف بعينيا منشوفش علاش ربي عطانا العينين اباش نشوفو

جواد(مخرج عينيه فيها) :

- ماريا خليني مكالمي أحبيبة بلاما تجعري ملتي عاوتاني راكي عارفاني بلاما تخليني نهضر...عوجات فيه فمها وجات من وراه...دخلو لدار رافايل دايرة بحال شي غابة زارعة شجرة وسط الدار بالأغصان ديالها بكلشي ليها واصلة حتى لفوق الزاج كيخليك تشوف كاع لي كاين على برا بحال الى مكاينش فدار كونماشي الكوزينة والفوطويات وزيد وزيد ماتحيش بلي انت فدار..

رافايل : تفضلو مرحبا شوية واتجي مراتي غريس

جواد(بستغراب):

- إنجليزية؟

رافايل ضحك :

- أه قصة طويلة حتى من بعد ونعاود ليك عرفتي مدة هادي ماشفتكش صراحة توحشتك وتوحشت الخدمة معاك...قاطعاتهم واحد السيدة لابسة كسوة بلا إيدين مفضفضة كرشها باينة بشرتها بيضة وشعرها صفر عينيها كبار لونهم زرق...

رافايل(وقف) :

- هادي مراتي غريس...غريس هذا صاحبي وكان شحال هذا شريكي جواد وهادي خطيبتو ماريا..

غريس : مشرفين انتوما عرب يااك؟

جواد : أه من المغرب

غريس(حلات عينيها بصدمة) :

- واووووووأي لاف موروكو

ماريا : مرحبا بيك فأي وقت..

رافايل : غريس كولي لخوان يوجد العشا...ويجيب ليكم انت وماريا القهوة..انا وجواد بيناتنا هضرة طويلة جواد تمشي معايا لمكتب

جواد(لماريا) :

- شوية وغادي نجي واخا

ماريا : واخا...مشا جواد هو ورافايل لمكتب وبقات ماريا بوحدها حتى جات عندها غريس... :

- عمري زرت المغرب كنتمنى نزورو جيتو سياحة لبرازيل؟

ماريا : أه ونفس الوقت جواد عندو شي خدمة هنا

غريس : هكاك مزيان ايعجبك هنا انا نهار جيت لهنا فالأول ماولفتش ولكن هاني دابا ساكنة هنا كيفاش تعرفتي بخطيبك؟

ماريا : صاحبتي بنت خالتو ومزوجة بخوه تعارفنا بحال هكا فالأول مكناش كنبغيو بعضياتنا هو مكيحملني وانا هكاك هههه..

غريس(كضحك) :

- حتى انت هكاك وانا كنكول غير بوحدي ناري نهار لاول مرة انشوف رافايل متقديش تحمليه دقيقة وحدة

ماريا : وايلي مابيناش فيه كيفاش تعرفتو؟

غريس : ههههه انا كانت عندي شركة صغيرة وكنت محتاجة لي يعاوني حيت كانت غادية وكضيع مني وكان عندي حل واحد هو رافايل بغيتو يسلفني واحد للقرض وجيت لهنا باش يعاوني تصوري عطاني 5دقايق بالحساب وكيحسب ليا بدقيقة كان غادي يجري عليا ولكن مع انا ملحاحة بقيت ختابرني واش انقد على لعيشة هنا تمشيت وجريت تحت الشتا وطحت فالواد وكانت اتعضني لفعة ومع دلك ماستسلمتش هههه ولكن فالأخير بغيتو وبغاني هو كان واخد عليا فكرة غلط بلي انا نصابة ولكن الله يسامح لي كان سبب بعد المرات كتلقاي طعنة من أقرب الناس ليك...

ماريا(بأسف) :

- بصح...جا الخدام هاز فيديه القهوة ومورسويات ديال الكيك...

غريس : شكرا خوان ماريا خودي القهوة والكيك وزيدي عرفيني على راسك كثر..

****

رافايل : دابا تأكدت بلي طحتي على ساك غرقتي فالحب أصاحبي هههه

جواد : وانت طالبني فين مشا رافايل الواعر لي مكيرحم حد ومنعازل على العالم الخارجي

رافايل : مااات غريس علماتني بزااف ديال الحوايج

جواد : شنو كلنا دابا؟

رافايل : مغادي يكون غير خاطرك عارفني منقدش نرفض ليك شي طلب غدا نمشيو أسيدي مجموعين صافي كلتيها ليها؟

جواد : لا خليتها ليها مفاجأة

رافايل : هههه ماعليكش صافي كون هاني يلاه خوان دغية كيوجد العشا..

****

فالبيت لي عطاو لماريا واقفة حدا السرجم ومعاها جواد 

ماريا : هاد الناس ظريفين بزااف

جواد : أه وحتى قصة ديال غريبة

ماريا(ضحكات وعنقاتو) :

- ماتكونش بحالنا...عنقها جواد وخشاها فصدرو مزير عليها جاها نعاس وهيا بين إيديه وفعلا نعسات وهيا واقفة هزها بالخف وحطها فنموسيتها غطاها وباسها وخرج..

****

صباح فالأدغال كيكون فشكل أخور زوين ريحت تراب وريحت الما كيخليك تفيق بلا ساعة...فاقت ماريا على صوت طيور دخلات لدوش دوشات خرجات لبسات سروال دجين فضفاض وتيشورت وسبرديلة خلات شعرها فازك...وخرجات من بيتها هبطات التحت كتسمع الضحك ديالهم..

جواد : صباح الخير أنعاسة

ماريا(للكل) :

- صباح النور

غريس : دابا الفطور ايتحط يلاه نمشيو لصالة مونجي..شد جواد لماريا فيديها بتملك جر ليها الكرسي كلسات وكلس حداها...

رافايل : غريس انا وجواد وماريا انخرجو انزورو عائلة فلومينا

غريس : مزيان سلم عليهم..

ماريا : شكون هادو..رافايل قاطع غريس لي كانت بغات تهضر :

- شي ناس عندنا معاهم شي خدمة ومنها تشوفي الأجواء هنا

ماريا : أه واخا...سكتات غريس بستغراب مافهمات علاش رافايل قاطعها كملو الفطور ديالهم من بعد طلعات ماريا تجيب السكادو ديالها ونزلات لقات الرجال بجوج كيتسناوها...خرجو على برا كانت متوقعة تشوف جورج ولكن رافايل لي أيديهم بطوموبيتو ركبات هيا لور وجواد القدام..ديمارا رافايل وبشوية طوموبيل خرجات من داك الكولوار لطريق لي أيشدو...

رافايل : هادو محميات طبيعية لي كتشوفو ديال ماليهم الأغلبية كنعرفهم وكتربطني بيهم صداقات وخدمة..

ماريا(مبهورة) :

- صراحة هاد المناظر شيحاجة كتر من زوينين والله

رافايل : مزال ماشفتي والو هذا غير جزء بسيط...شوفي داك شلال اي تم هداك معروف هنا بالما ديالو صافي لدرجة كيبان كاع شنو كاين تحت الما من خضورية وأحجار..

ماريا : سبحان الله...طريق كلها ورافايل كيوريهم بلاصة بلاصة..حتى وقف عند واحد الشجرة..

رافايل : ايخصنا نكملو على رجلينا...سبقهم وجواد تابعو شاد لماريا فيديها ماشي مدة طويلة حتى بانو ليهم شي أكواخ من الخشب دراري كيلعبو وشي عيالات هازين خناشي كيدخلوهوم لدار ماحد ماريا كتقرب وكاشم ريحة زوينة بزاااف فاينة شاماها...وقفات مرا كبيرة وراجل تبسمو لرفايل وعنقوه..ماريا وقفات

كدور فراسها وتشوف فهاد الشجر لي نصو مغطي بحال الى خايفين عليه من الشمس ونص لا حيت كاين فظل من بعدما سلم على داك السيد ومراتو شاف فيها رافايل :

- ماريا : عجبك المنظر..؟

ماريا : بزاااف ولكن واحد الريحة كنشمها ماخفاياش عليا ريحة بحال القهوة بحال الكاكاو..

ضحك رافايل :

- أه الالة انت دابا واقفة بين أشجار البن(القهوة)...شافت ماريا فجواد بصدمة مخرجة عينيها :

- القهوة القهوة؟😲

جواد(كيضحك) :

- ااااه الالة القهوة القهوة...

ماريا كتهضر بحماس :

- نااااري عرفتي شنو هيا القهوة بنسبة ليا شيحاجة كبيرة بزاااف فاش كنت صغيرة 18 عام كانت عندي وكان بابا بعيد على دار كانت هيا صاحبتي ديما مونساني مايمكنش ندوز نهاري بلا بيها يكفي غير الريحة ديالها كتخليك فعالم اخةر كتسافر بالأحلام ديالك ريحتها كتحيد الكآبة وكتخليك فرحان بزاااف كتحس براسك فشي بلاصة زوينة بزاااف بحال بحال الى طاير فسما والله أما الى كانت مع الحليب ولا بالعطرية يا سلااام والله كنا كنمشيو عندي خالت صاحبتي وكانت كتصايبها لينا وتحط لينا الحرشة ولا كيكة معاها مكنشبعش مكنخرج حتى كنسالي التيرموسة كاملة دالقهوة عرفتي والله لي مكيشربها مضيع النص فحياتو وف...قاطعها جواد حيت عارفها مغاديش تسكت مدام جبدات هاد الموضوع اليوم أيباتو هنا..

جواد : عارف أحبيبة عااارف حيت حتى انا كتعجبني القهوة..

ماريا : لالا انت اكتعجبك انا كنعشقها ريحتها مداقها لونها ولي طاس فاش كتحط لدرجة تيليفوني عامر غير بتصاور ديال لي طاس ديال القهوة ولكن بلاتي علاش جينا لهنا...هاد المرة رافايل لي هضر :

- أنا عارف اتكوني كتسولي علاش جينا لهنا واخا عضرتي بالعربية ولكن انا انجاوبك فلومينا هيا وراجلها او ولادها وحفادها عندها هاد البقة الأرضية كينتجو حبوب القهوة كيف كتشوفي القهوة كتنبت فهاد الأشجار لي ضروري خاصهم يكونو مغطيين ماتمسهمش الشمس وتربة خاصها حتى هيا تكون رطبة البرازيل معروفة بجوج حوايج القهوة والكاكاو علاش البرازيل هيا لي معروفة بالقهوة حيت الأراضي ديالنا خصبة يعني مزيانة لنمو ديال القهوة داكشي باش بلادنا كتعتابر المنتجة ومصدر للبن لدول العالم بسبب جودة البن البرازيل..

ماريا : واوو أول مرة كنعرف هاد المعلومة واخا عارفة بلي كتجي من هنا ولكن مكنتش عارفة بزااف ديال الحوايج..

رافايل : فيلومينا اتعاود ليك وانا انترجم ليك حيت هيا كتعرف غير البرتغالية...هضر رافايل مع فيلومينا لي تبسمات وجاوباتو بشيحاجة..

رافايل : جواد فلومينا بغاتنا ندخلو أجيو معايا...شد لجواد ماريا فيديها وتبعو رافايل دخلو لواحد الكوخ كبير مفرش فيه غير لحساير وشي زربيات قلال فراش على قد الحال كلسو على فوتويات غير بالخشب...شافت فلومينا فماريا وبدات كتهضر...

رافايل : فلومينا كالت ليك بلي القهوة هيا عبارة على حبوب كتكون مجففة ومحمصة ومطحونة والى مكانش ممكن تجفف ممكن الزراعة ديالها والحصول على شجرة البن كولشي ممكن ليه يميز الحبوب المحمصة..سكت وشاف ففلةمينا لي كتشوف فماريا وتهضر رجع شاف فماريا وكمل :

- أشجار البن قليل لي يقدر يميزها حيت طول ديالها يقدر يوصل حتى ل9 الأمتار والوراق ديال خضرة داكنة والملمس ديالها بحال الشمع البراعم ديال القهوة كتنبت على الأغصان ديال الشجر و كتبقى عام كامل باش تولي واجدة يحيدوها...شدات فلومينا ليد ماريا وكملات كلامها لي ترجمو رافايل ديك ساع :

- الأصل ديال القهوة جا من واحد النبات معروف بسمية الكوفا فيه كثر من 500صنف و6000 نوع من الأشجار وشجيرات الإستوائية الى بغيتي قهوة مزيانة خاص تكون الشتا صبات العام كامل ويكون الجو ماسخون ما بارد حيت أشجار البن مكتقدش تزاد فالجو بارد..وكاينة حتى القهوة العربية ولكن هاديك مكتكونش فالبرازيل كتكون فأتيوبيا تما كاينين الأشجار الأصلية ديالها كيكون المداق ديالها خفيف وبين وبين ومعطر 70 فالمية من إنتاج القهوة فالعالم كامل من هاد النوع...ماريا بقات مبهورة ومسحورة صغرات عينيها وشافت فرافايل ..

ماريا : سمح ليا نسولك كيفاش كتحيدو القهوة زعمة فاش كتولي واجدة واش كتحيد من بعد عام واولي تباع ولا كيفاش؟

رافايل : لا بطبيعة الحال مخاصش غير تجي وتحيدها لا كل شجرة وهيا كاين لي كتفوت عام عامين حتى لربع سنين كاااع فاش كتحةل البراعم لي ناضت فوق الغصون للون الأحمر خاص يكون أحمر زاهي غااامق كتكون واجدة للحصاد فالأول كانو ناس كيحيدو هاد الحبوب بيديهم ولكن هاد القضية كتعيي ولكن مع طورات الوقت ولااو ألالات خاصة باش نحيدو حبوب البن منين كنساليو من هاد العملية وكنكونو حيدنا كاع الحبوب كنفرزوهم كيف كتكولو نتوما كيتنقاو وخاصهم يكونو ناشفين مزيااان باش مايخسروش كاينين جوج طرق باش يتنشفو حبوب البن اللولة التجفيف وتانية الحفظ الرطب من وراها كتجي عملية التجفيف غير لشي أنواع اما الانواع لوخرا كيدوز من واحد المرحلة أسميتها التقشير كيعطينا حبوب بن مقشرة هيا لي كتسمى بالقهوة فهمتي دابا..

- تنهدات ماريا تنهيدة طويلة :

- شوووف شحال وحنا كنشربة فلقهوة كتعجبنا وكنبغيوها ولكن عمرنا كلفنا راسنا نقلبو منين جات وكيفاش كتصايب والو راسنا خاوي شكرا بزاااف رافايل والله عمري نسى خيرك وكول لفلومينا شكرا بزاااف والله..شافت فجواد بي كان حاضيها :

- شكرا بزاااف حيت جبتيني هنا أحسن كادو جاني فحياتي والله 

تبسم جواد :

- مزال ماسالينا شنو بان ليك تولي تاخدي القهوة من هنا؟

ماريا(بستغراب) :

- كيفاش زعمة الى بغيت نشرب القهوة خاص نجي حتى لبرازيل لهنا هههههه ضحكتيني..

جواد(هاز حاجب ومهبط تاني) :

- مالك مكلخة مالك

ماريا : وهادشي لي بان ليا أنا مافهمتش

جواد : ياك حلم حياتك ديري قهوة بسميتها وتكون مخصصة غير لقهوة بجميع أنواعها

ماريا(حلات عينيها شركاتهم) :

- اهاه ولكن انت باش عرفتي هادشي عمري كلتها ليك كلتها غير لأروى نها...بلاتي بلاتي كنتي كتسنط عليا ياااك😑

جواد : واش حنا فهادشي دابا المهم هو حلم حياتك ديري قهوة ولالا؟

ماريا : أه بصح هذا هو حلم حياتي واخا درت معلمة ديال الموسيقى منكرش بلي عزيزة عليا ولكن درتها غير حيت تعلمتها فإسبانيا ومكان عندي حتى بديل أخور اما الحلم ديالي هو نفتح قهوة تكون خاصة غير للقهوة وتكون ديال العيالات ممنوع الرجال😈

جواد : شنو عمري سمعتها هادي تاني

ماريا : وهانتا سمعتيها من حقنا تكون عندنا قهوة خاصة لينا انتوما فاش كتعصبو كتخرجو لقهوة انشطو مع صحابكم وحتى حنا من حق اي مرة منين تعصب او يوقع ليها شي مشكيل تحس براسها مهمومة تجي تاخد كاس قهوة مع الكيك وبيخيييير وممنوع شي راجل نشوفو فالقهوة لي كنحلم ندير وعارفاك اتكوليا مغاديش تمشى بلعكس حنا العيالات مقدرو نخسرو الفلوس فسبيل نرجعو لدار مرتاحين وفرحانين😉

جواد(بستسلام) :

- واخا الالة انا انسايرك فهادشي وغادي نعاونك باشتفتحي القهوة ديالك

ماريا(بقا ليها شوية وتسخف) :

- بصح بصح ولكن ولكن كيفاش؟

جواد : رافايل صاحبي وكان شريكي هادشي انت عارفاه داكشي باش انوليو ناخدو من عندو القهوة ديال عااام يعني اتكفينا لعام ومايجي فين يدخل العام الثاني حتى تدخل لينا الطلبية الثانية وحتا غاديين شنو بان ليك..ماريا سكتات غير كتشوف ومصدومة 

جواد : مجاوبتيش؟

ماريا : واش كتهضر بصح بصح زعمة ياك مكتكدبش عليا الحبيب ديالي

جواد : ماريا فين عمري كدبت عليك أصلا المجية ديالنا لبرازيل غير على المشروع ديالك بغيتك تعرفي على البلاد منين كتجي القهوة وتشوفي منين انوليو نجيبوها حتى حنا فهمتيني دابا ولالا...بلاما تحس بدات كتنقز وتغوت وتشطح بحال شي هبيلات نقزات تنقيزة وحدة وناس كيشوفو فيها على وجواد كتعنق فيه وتبوس فيه...

جواد(بصرامة) :

- ماريا ماريا صافي براكة حشومة ناس كبار معانا ماريا..ماريا عاد حسات بشنو دارت ونزلات كتقاد فحوايجها وتبسم لناس وتحك فشعرها..

ماريا : وااااااااااع سمح ليا تحمست مامايقاش راسي والله...جواد شاف فرافايل باش يمشيو ودعو فلومينا ورجعو منين جو..

رافايل : فخبارك أماريا غريس عندها شي 4 ديال القهاوي فالندن دايراهم لطلبة وحاطة فيهم كيفاش كتصنع القهوة

ماريا : وايلي بصح هيا بحالي

رافايل : بحال كتحماق على خدمتها وبسبابها تعارفنا مكانتش مستعدة نهائيا تخلى على هادوك القهاوي واخا تعرف تبيع لي قدامها ولي وراها

ماريا : صراحة راه من حقها والله انا كون كنت فبلاصتها ندير بحالها حتى انا فاش نفتح قهوة انحط فيها واحد البوسط على القهوة باش لي جا وشرب يعرف لقهوة لي شربها منين جات..

رافايل : good luck...

- منين وصلو لدار تلقات ليهم غريس عاودو ليها لي وقع فىحات لماريا وزادت عطاتها معلومات بزاااف ينفعوها فالمشروع ديالها...ستأدن جواد منهم وطلع لبيت يدوش من العرق ديال الطريق...

غريس : باين فيه كيبغيك بزاااف لي كيدير هادشي على قبل حبيبتو عرفيه كيموت عليها ماتخايهش يضيع من إيديك جا البرازيل على قبلك غير باش يحقق ليك الحلم ديالك ويعاونك عليه..

ماريا(تنهدات) :

- حتى أنا كنبغيه بزااف والله

غريس : انخليك ترتاحي نشوف رافايل واش بغا شيحاجة😉...خلات غريس ماريا لي بقات كتفكر فهادشي لي دار معاها جواد تبسمات وناضت طلعات لفوق دخلات لبيتو كدور فوجها...سمعات صوت الما عرفاتو مظال فدوش..

ماريا : انتكا نتسناه حتى يجي...تكات فبلاصتو كتلعب فتيليفونها وتشوف فتصاور حتى سمعات صوت الما وقف بقات شوية تفتح الباب وخرج لاوي عليه الفوطة شعرو كيقطر وجسمو كيبري عضلاتو غير مازادو على لي كانو او واحد الوشام صغير حدا كرشو...ماريا صغرات عينيها كتشوف فيه..

ماريا : فخبارك راه الوشام حرام ولا مافخباركش؟

جواد : هادي هيا بصحة وراحة فبلادكم الالة الله يعطيك الصحة أه فخباري حرام ومن بعد؟

ماريا : راه ايعدبك سيدي ربي وزيدون ماتقدرش تبرع بدم ديالك..

جواد : فخباري

ماريا : كتهضر برودة انا لي هبيلة جاية نهضر معاك...وقفات تمات غادية تخرج رجعاتها إيدو وقفها مقابلة معاه..

جواد : شحال كتكوني ززينة منين كتعصبي أول حاجة أحبيبي هاد الوشام غير مؤقت يعني ماشي الوشام لي كيتخلط مع الدم الى بغيت نحيدو غير بقريعة صغيرة انحيدو فهمتي عجبني ودرتو من دابا دابا نحيدو نحيدو فهمتي

ماريا(كتغبن) :

- وعلاش مكلتيهاش ليا وشديتي فيا؟

جواد(كيجر ليها فحناكها) :

- بغيت نشد فحبيبة ديالي مامنحقيش؟

ماريا : لا من حقك...جرها لعندو معنقها وسط صدرو

جواد : كنبغيك بزاااااف

ماريا : حتى انا كنبغيك بزاااف شكرا على ك..

لا اعلم بماذا يمكنني ان اصفك؟؟ بطلي حبيبي مغامري من كان يقول اننا سنغرم ببعض لهذه الدرجة؟من حرب لحب ابدي خالد

كيف يمكنني العيش بدونك

"كنت دائما عند سقوطي اعيد الوقوف لوحدي لكن عندما وجدتك اصبحت سندي قوتي روحي

انت أدخلت لونا جديدا لحياتي واعطيتها معنى..

كل الكلمات لن تصف شعوري نحوك"

" احبك "

****

مخلاهاش تكمل كلامها الفم لي اينطق خداه وشفايفها لي كانو على شفايفو باسها بوسة طويلة خطواتها رجعو بلور إيد على وجها وإيد شادها من ظهرها ماحساتش براسها حتى طاحت على نموسية وهو فوق منها إيديه مع آيديها مشابكين غارقين فعالم أخور غير هيا وهو...

✊✊جوج دقات متابعين على الباب خلاتها تكمز وطير من تحتو...خلاتو كيضحك..

جواد : لالة ماريا أش وقع؟😉

ماريا(متوترة) :

- شنو غادي يوقع بسالمة والو شي واحد كيدق ايكونو بغاونا نهبطو يمكن...انا انشوف شكون..مشات بجرا فتحات الباب لقاتو رافايل :

- سمحو ليا ولكن الغدا واجد

ماريا : انا انهبط دخل عند جواد انشوف غريس...هبطات كتجري خلات رافايل ميت بضحك حيت تحرجات قدامو..

رافايل : كونما دخلت كنتي غادي تحمل البنت يمكن

جواد : مع ماريا كولشي ممكن

رافايل : لبس حوايجك دغية غريس مكتحملش الماكلة تبرد...خلى رافايل جزاد وهبط لتحت...داازت 10 دقايق وتم هابط جواد سروال دجين قميجة فشيبي هاز كمايمها جامعهم وريحتو كتعطي من بعيد..مع كلس غمز ماريا لي حدرات راسها كدوز يديها على عنقها حشمانة...

ماريا : فيا جوع صراحة وقيلة نبداو الماكلة ياك

جواد : حين لينا نبداو ماريا الما كلات فالوقت غادي تاكلنا كاملين😂

ماريا(خنزرات فيه) :

- شحال ضريف تبارك الله بااااز...ضحكو كاملين وبداو الغدا الجو كان زوين بيناتهم ماريا حسات براسها فوسط ماس كتعرفهم مزيان كتهضر وضحك مرة مرة كتسهى فجواد ضحكتو هضرتو رجولتو وهو مرة كيسهى فيها العفوية ديالها وضحكتها عينيها شفايفها...

📞📞📱🎵...قاطع كلامهم صوت تيليفون ديال جواد...

جواد(هز تيليفون ديالو وشاف فيهم) :

- سمحوليا..فتح الخط وهوما سكتو..

جواد : جمال وي جمال وغير بشوية أصاحبي مافهمت منك والو أش كتخربق كيفااااااش هانتا غير تكالمة واخا انا جاي ودابااا صافي داااابا هضرت معاك...قطع مع جمال او وقف مخنزر 

ماريا : يااك لاباس؟

رافايل : جواد شنو واقع؟

جواد : خاصنا نمشيو دابا جمال صاحبي مغاديش تعرفو كتسمع بمجاهد؟

رافايل : اه فايت سمعت بهاد السمية مالة

جواد : بنتو تخطفات...ماريا وقفات شادة على فمها مصدومة :

- لا مايمكنش سارة تخطفات وشكون ؟

جواد : مابغا يكول والو مسكين خايف وكنسمع صون أنا ماريا كتغوت وتبكي خاصني نمشي

رافايل : نمشي معاك تحتاج شي مساعدة؟

جواد : لا أصاحبي مرتك واحلة فراسها قربات تولد خاص لي يكون معاها انا كاد بشغالي ماريا طلعي دغية جمعي الحوايج رافايل الى ممكن تعيط لينا لجورج يوصلنا

رافايل : انا انوصلكم حتى لفين كاينة طيارة

جواد : واخا انا انعلم كونزاليس(هو لي جابهم فطيارة)...طلعاات ماريا بالخف جمعات كاع الحوايج فساك وهبطات...

جواد : مانسيتي والو؟

ماريا : لا والو

جواد : خاصنا نمشيو دغية...توادعات ماريا مع غريس وتمنات ليها فكاكة ديال الخير عنقاتها وتبادلو الأرقام واعداتها غريس غير تولد اتجي لمغرب وتزورها وصلهم رافايل لفين كاينة الطيارة توادع معاهم وتمنى ليهم رحلة مزيانة..

رافايل : الى حتاجيتي اي حاجة سوني ليا راه عندك نمرتي

جواد : ضروري يلاه بسلامة وشكرا على كولشي غير انوصل لمغرب انهضر معاك بخصوص داكشي 

رافايل : واخا يلاه سير ماتعطلش...طلع جواد وماريا تسد الباب وقلعات الطيارة...

ماريا : أنا ماريا كانت حاسة مسكينة ومخلوعة كانتوعارفة هذا مايكون غير جدها هو مول هتد الفعلة

جواد(معصب) :

- ماعرفتش اماريا ماعرفتش

ماريا : وعلاش ماعلموش البوليس؟

جواد : جمال مكاليا والو غير طرطقها ليا فوجعي وخلاني هكاك

ماريا : صافي غير تكالمة تهدن مافهمتش انا والله واش معندو معارف زعمة سينين وهو هنا؟؟

جواد : جمال انسان مسالم بزااف كيخاف من صداع وكيبعد من المشاكل داكشي باش عيط عليا أنا عارفني ماعندي نتكيل..

#فيلا_جمال..

أنا ماريا(كتبكي هازة دبدوب بنتها وتبكي) :

- بغيت بنتي أجمال بغيت بنتي جيب ليا بنتي عفااك

جمال(شاد فراسو وكيشوف فالأرض) :

- الصمت...سونا الباب وقف جمال مشات الخدامة كتجري فتحات الباب دخل جواد كيجري موراه ماريا..

جواد : شنو واقع بضبط ؟؟

ماريا مشات عند أنا عنقاتها كتسكت فيها..

جمال : ماعرفتش كيفاش وقع هادشي كان عندي اجتماع واليوم كنت انا لي خاص نجيبها من المدرسة ماخليتش انا تجيبها ولا شيفور كنت ناوي نجيبها ونمشي انا وياها لمول ناخود ليها شيحاجة حيت عيد ميلادها قرب...ولكن تعطلت 5دقايق عليها منين مشيت لمدرسة كالو ليا بلي تسناتني وجات طوموبيل محلة كبيرة داتها..

جواد(معصب) :

- ولكن سمحليا كيفاش المدرسة خلاتها تمشي مع ناس غراب ماعندهم مسؤولية

جمال : انا سباب اجواد انا لي معنديش مسؤولية على بنتي علاش نتعطل كون جيت فالوقت كون راها معانا دابا شنو اندير شنو غير كوليا شنووووو(كيغوت)

جواد : صافي صافي انلقاو الحل كون هاني أصاحبي ماتخافش ماعلمتوش البوليس؟...وقفات أنا ماريا كتغوت :

- لا عفاك البوليس لا البوليس لا

جمال(كيحاول يفهمو) :

- أنا ماريا مابغاتش تعلم لبوليس حيتاش عرفنا بلي جدها هو لي خدا البنت

جواد : شنو وباش عرفتوها؟

جمال : سونا لينا كاليك البنت خاصها تربى معاه هو باش أخلاق مها ماتخسرهاش وماتخرجش ليها عصاتو وخرجات من دار حيت ماعرفش يربيها سيد عارف أخبارنا شحال هءا وهو كيهندز ويخطط..

ماريا : لا واش هذا شوية لاباس ماشي من حقو راه بنتها هاديك عنري فحياتي شفت شي واحد بحال هكا والله حتى مريض هذا بالله..

جواد : ماريا بلاتي نفهمو بعدا وانتوما شنو كلتو ليه؟

جمال : علاش هو خلانا نهضرو سكتنا وقطع وكاليك الى حاولنا نشوفوها ولا نديرو شيخاجة أيديها لشي بلاد مانعرفوش فيناهيا حتى أخر يوم فعمرنا وعمرو أنا مابغاتش تبلغ البوليس..

ماريا(شافت فأنا بستغراب) :

- واش من نيتك راه بنتك هاديك لي تخطفات خاصك تعلمي لبوليس

أنا ماريا(كلسات كتبكي) :

- مانقدش راه مانقدش واخا دار فيا لي مايدار راه جدي كنبغيه بزااف واخا دازت سنين هو لي رباني وكبرني دوزت معاه أجمل أيام حياتي يحيد اللقمة من فمو ويوكلني يموت بجوع ويوكلني يبات سهران حدا راسي الى مرضت واخا كانو والديا مكيخليهمش يمسوني هو فيه با ومي وكولشي مانقدش كنتفكر أيامي معاه كات كات😭😭😭...مقدراتش تكمل عطاتها غير لبكا...عنقاتها ماريا كتسكت فيها وكتشوف فجواد...جمال كلس وشد فراسو ماعارف شنو يدير...جواد دار يديه على راسو كيدور ويفكر بانت ليه بكية ديال الكارو لي شحال هادي ماكماه حتى كال راه مساه جبد منو واحد كانت البكية محطوطة قبالتو هو البريكة وشعلو كيكمي بالعصاااب لي فيه...جمع غوباشتو طفا داك الكارو فطفاية بجنون لي فيه ورجع كلس حدا جمال..

جواد : عندي حل...كولشي شاف فيه..

جمال(هز راسو فيه) :

- شنو هو الحل عتقنا بيه أخويا عييت يوماين دازت عليا كحلة كوليا الحل لي عندك

جواد : غادي نمشي عند جد انا ماريا نهضر معاه نحاول نتفاهم معاه بالعقل

جمال : كضحك على راسك أجواد راه معارفوش كيداير أصاحبي واش بغيتي تمشي ماترجع...جواد غمز جمال باش يسكت على قبل ماريا..

جواد : بنت ليك مونيكو هنا زعمة عارفني أش كنسوى والى درت الحاجة فراسي كنوصل ليها بزز ولا بالخاطر يكون هاد جدها كيما بغا يكون كاع انهضر معاه بزز ولا بالخاطر بغا ولا مابغا ماكيهمنيش

جمال : اتعدب راسك واتسمع شيحاجة مغاديس تعجبك خايف عليك أجواد ماشي كدهم راه البرازيل هادي ماشي المغرب

جواد(بإصرار):

- تعاملت مع كتاااار منهم انا مكنخافش والمخير فيهم يوقف قدامي انحش لمو ركبابي العصب ديال رجليه انقطعهم ليه انخليه زحاف كتليك غادي نمشي غادي نمشي...وقفات ماريا :

- وأنا أنمشي معاك

جواد(بصرامة) :

- ماريا ماغديش ندور غادي على غراض

ماريا : وانا انمشي معاك كضحك عليا راه سمعت جمال اش كال عليهم واش بنت ليك هبيلة نخليك تمشي بوحدك تمشي طرا ليك شيحاجة نحماق..

جواد(وقف كيغوت) :

- ماريا ماتزيديش على لي فيا ديري عقلك واااه

ماريا : ماتغوتش عليا كتليك غادي نمشي غادي نمشي دبحني وقتلني الى بغيتي تمشي بوحدك والله مانتزحزح ليك من هنا انت عارفني هبيييلة وبجوادي ومالين المكان ديالي والله حتى نمشي طرتي ونزلتي...تنهد تنهيدة طويلة وقرب لعندها يلاه ايشد فيديها تنطرات وبعدات..

ماريا : داك تبلحيس راه والله مغادي ياكل معايا انا نكولها ليك ديرها فبالك انمشي أنمشي..

جواد : اوووووووووووف...واخا صافي واااخا جمال بغيت شي طوموبيل تكون عملية كتر انمشي نبدل عليا اخا وانت سيري بدلي عليك من هنا لساعة انتحركو...

ماريا : واخا خلاتهم وطلعات كتجري..

جواد : ماعنديش الوقت ماريا غير سايرتها عطيني كاع المعلومات انخرج دابا..

جمال : عمري مغادي نسا ليك خيرك أصاحبي

أنا : رجع ليا بنتي عفاك عفااك😢😢

جواد : كون هاني

جمال : طوموبيل فالباركينك جيب فالزرق شيفور عندو سوارت انهضر معاه يفتحها ليك ويعطيك السوارت

جواد : واخا انا جاي طلع بالخف لبيتو فتح الباليزة وجبد منو واحد الفردي ديالو مرخص..دارو فجيبو وهبط كيجري قبل لا تخرج ماريا خدا المعلومات من عند جمال وخرج على برا خدا السوارت من عند الشيفور طلع لطوموبيل بالخف ديمارا وكسيرا بجهد.

خدم جواد جيبي إس باش يعرف فين غادي...

جواد : أتكون ماريا نوضاتها تلقاها معصبة دابا وكتحلف عليا ولكن مانقدش نخاطر بحياتها..

- لالا أحبيبي انا كاعما ترفد ليا الهم أعصابي درتهم فثلاجة...جواد فرانة بجهد دور وجهو كيخنزر فيها..

- أنت شنو كدير هنا كيفاش حتى ركبتي؟

ماريا : ربي ونية ديالي وقلبي البيض وراني بلانك ابوراس عند بالك أضحك عليا دابا انت سمعني وكول سبحان الله..

جواد : سبحان الله

ماريا : دابا انت كلتي ليا نطلع نبدل ياك؟

جواد : اااه كملي

ماريا : ماكلتيش سبحان الله

جواد(بدا صبرو يتقادة) :

- سبحان الله

ماريا : طلعت انا مع دروج يااك كول سبحان الله

جواد : سبحان الله

ماريا : يلاه انرجع باش نسولك واش مغاديش يمشي معانا جمال وانا نسمعك 

جواد : سبحان الله

ماريا : وعرفتك كتبلاني تخليني أش درت انا سباقتك لعند شيفور وكتليه جمال كاليك فتح طوموبيل زرقة نوع jeep وتخبيت لور حتى ديماريتي سبحان الله شفتي

جواد : يا سبحان الله دابا انرجعو وتهبطي وترجعي فحالك راه مغاديش نلعب أماريا

ماريا(كرزات على سنانها) :

- وقسما بالله لا هبطت من هنا واخا تجرني من رجليا انشد بيديا وتجرني من يديا انجر من رجليا

جواد : والى جريتك من راسك؟😕

ماريا : انشد بصباع رجليا وبودنيا..

جواد(بصرامة) :

- ماريا كنضيعو الوقت راه اكتخربقي وتروني

ماريا : راه انا مكاينش ماقصح من راسي راه حلفت والله لا هبطت ياربحة يادبحة يانموتو كاملين يانرجعو لبنت كاملين دير لي بغيتي انا بت نبت فهاد الكرسي وانت لي كضيع فالوقت دابا ماشي أنا..

بقا ساكت جواد حتى عيا ودار ضرب الفلون بيديه حتى نقزات ماريا ولكن دارت راسها متبتة وكتشوف فيه بتحدي...رجع ديمارا طوموبيل وكمل طريق..

ماريا(من بعد سكات طويل) :

- أيكون جدها بحال دوك رؤساء ديال العصابة لي كايبانو فتلفازة ياك لابس كلاكيطة وشورط حيت هوما ديما عريانين وفمو يكون زرك وسنانو مخزين وكيكمي داك الحشيش ديالهم كيكون طويييل كدو كداش يكمي هو وقبيلتو كاملة...شاف جواد فالمرايا وماهضرش..

ماريا : جواد شحال يكون عندو ديال الولاد والحفايد ايكونو عندو رجال هازين الكابوس زعمة داك الفردي دوك طوااال لي بحال ديال عاشورة اجي نكوليك زعمة يقتلونا ويدفنونا..

جواد(عصباتو وهو أصلا معصب حيت لصقات فيه ماحيلتو لبنت لي مخطوفة ماحيلتو لماريا طرا ليها شيحاجة وهاد الناس باينين ماساهلينش.) :

- واش كنت معاهم واش جاك الحماق تاني😡

ماريا(كتخرج فعينيها) :

- وغير سولناك كولني ياربي سلامة على راجل مالك معصب😡

جواد : ماريا حبيبة ديالي الله يعطيك الستر خليني نسوك ونديها فطريق لانصدقو مجليين خلينا نكملو لي بقا لينا على خير وبيخير...رجعات سكتات جامعة يديها مربعاهم وكابحلق فسرجم نطقات بلاما تشوف فيه :

- تلقاك دابا كتكول أش جابني لهاد البرازيل ولا كوانتانامو كاااع انا عارفة راسي طريقي كحلة زحلة...

جواد(تنهد تنهيدة طويلة) :

- حبيبي انا عمري منكول هكاك اتهناي مايبقاش الوسواس كيلعب ليك بداك نص عقل لي عندك الناس عندهم عقولة كاملين وانت نصو ماعرفت فين وضرتيه واش حنا فين وانت فاش كتفكري..

ماريا(شافت فيه) :

- زعمة مكتكولش هكاك مع راسك؟

جواد : لا مكنكول والو لي كيهم دابا نرجعو سارة لوالديها

ماريا : بصح...(ماريا كانت كتهضر فأي حاجة غير باش تنسي وتلف الخوفة ديالها على جواد متوترة وخايفة حيت هادو ناس كبار خطار الواحد يلعب معاهم مدامهم خطفو البنت راه مابقى مايتكال)..

ماريا : نسولك واش جد أنا دابا من عصابة؟

جواد : أستغفر الله العظيم الله يهديك أش داه لشي عصابة 

ماريا : ومالو خطف بنت حفيدتو؟

جواد : واش عند بالك اغير لي خطف راه من العصابة هو راجل عندو كلمتو فديم البلاصة حتى واحد مكيرفض ليه طلب عندو رجال كأي واحد عند هيبتو وسيد ديال ديك القبيلة هذا مكان راجل عادي بحال ايتها ناس فهمتي دابا

ماريا : هممم وياااك انت سيد إفران وسيد القصر وكلشي كيكوليك سيدي علاش ماعندك رجالك؟

جواد(صافي فاض بيه) :

- الالة انا ماسيد حد أنا سيد راسي وكانو عندي رجال هادشي لي بغيتي تعرفي كانو وحيدتهم ماعندي مندير بيهم ماشي لعبة انا نديرهم باش يكاليو عليا وهاد دراع لاش مديورين..

ماريا(صغرات عينيها كتغبن) :

- شفتك بحال الى مكتحملنيش

جواد(تنهد) :

- متكوليش هكاك احبيبي راه حتى انا معصب شوية مافياش لي نهضر...من وراها تنهدات وسكتات مابقاتش هضرات طريق لي كانو غاديين فيها كلها شجر والما كيبان ديال البحر من بعيد...جيبي إس بدات كتعطيه الإشارة بلي وصلو للقرية الظلام بدا كيطيح وشمس غابت وقف طوموبيل...ودار عند ماريا لي شافت فيه..

جواد : وصلنا..

ماريا : متأكد هادي هيا البلاصة؟😓

جواد : أه هيا هادي خاصنا نهبطو نسولو قبل لايطيح الظلام..

ماريا(كتمتل الزعامة) :

- واخا يلاه...

‏وفي عينيها جمال

بمقدار ‏خيانة العرب لـ فلسطين و بغداد و صنعاء و دمشق ...!💜

****

جواد : أحسن حاجة نهبطو نسولو على رجلينا الناس ديال هاد البلاصة فشكل على حساب مكاليا جمال..

ماريا : ولكن واش انضورو هاد الدوار كامل على رجلينا؟

جواد : الى سولنا بطوموبيل ايحسابلهم ماعرفت شكون حنا حسن نبلاصيو طوموبيل قريب من هنا ونمشيو على رجلينا..

ماريا : واخا لي بغيتي...هبطات ماريا هيا لولة لابسة سروال دجين كحل مع سبرديلة فنفس اللون وقبية فالكري جامعة شعرها سفنجة...وقفات كدور فعينيها دايزين ناس فشكال على لمدينة سمرين لابسين غير كومبليزوات وشورطات فشيشكل كيشوفو فيهم عارفينهم غراب...

جواد : يلاه مشينا؟

ماريا : يلاه...شد ليها فيديها وتمو غاديين لي وقفوه يسولوه كيكون كيعرف غير لبرتغالية اللغة ديال البرازيل...

جواد : اوووف واش حتى واحد مكيعرف الانجليزية..

ماريا : شوف هداك بوساعة دهبية كيبان متقف بحال والو يكون كيعرف انا انسولو..وقفات ماريا داك الراجل وسولاتو...فعلا كان كيعرف يهضر بالانجليزية شوية...

- علاش كتسولو عليه..قاطع جواد ماريا لي كانت اتجاوب.. :

- حنا عائلة قريبة ليه جينا من أمريكا ومعرفناش الدار..

- اه الى كان هكاك واخا انا انعت ليكم واحد السيد ايديكم لعندو...عيط بلغة ديالو على واحد كان داخل لقهوة دري باقي صغير يمكن سرباي...هضر معاه ورجع شاف فجواد.. :

- بيتشو ايوصلكم لفين بغيتو سيرو معاه...شكرو جواد وشد فماريا وتبعو داك دري لي كيأشر ليهم براسو حيت معارفش يتفاهم معاهم بلوغتو بقاو تابعينو مدة كل مرة يشوف وراه واش جايين ويكمل طريق ديالو...طريق لي كانو غاديين فيها خاوية مافيهاش الناس غير شجر صافي...وقف داك بيتشو وشاف فيهم تبسم واشر بيديه لقدام...جواد هز راسو عو وماريا فين نعتهم ليهم كيبان ليهم واحد الدار كبيرة بزاااف تقليدية باينة وقديمة ولكن كبيرة ماشي دار هذا راه قصر...شافو فبيتشو لاقاوه مشا كيجري بحال الى تهنى من شيحاجة وهرب..

ماريا : كيبان بحال شي قصر ديال الأشباح..

جواد : بحال هكا كيكونو ديور ديال هنا قداام صعيب يسمحو فيهم...جرها من يديها وكملو طريق...شوية بشوية كيبانو رجال بسروال ديال دجين وطرابش بحال كوبوي هازين سلاح كل واحد سلاح فيديه..

ماريا(بخوف) :

- ناااري كنحس براسي بحال شي فيلم ميكسيكي

جواد : ششش ماتبينيش الخوف ديالك توكضي معايا كتليك كلسي فدار ولكن معامن أنا...الرجال لي كانو حدا دار شي غادي وشي جاي كيتمشاو...واحد فيهم غمز تاني حيت لمح جواد وماريا من بعيد...لاخور كاز طويل موستاجو طول منو مغوبش عز السلاح وتم غادي لعندهم..

ماريا : قفرناها شوف هاد موسيو بغوبغ كداش بطول والعرض موستاجو تربط بيه شجرة ومزال يشيط الخير

جواد(تحت سنانو) :

- ماريا هنينا مانسمعش حسك حين ليك عارفك كترونيها وتغرقينا...وقفهم داك بو موستاج كيخنزر فيهم هضر مع جواد بلغتو وجاوبو جواد بالانجليزية...خنزر فيه وشاف وراه اشر على واحد أخور من الرجال...جا كيجري هضر معاه لاخور شاف فجواد وسولو :

- انت ماشي من هنا مكتعرفش اللغة ديال هنا شكون انت؟

جواد : بغيت موسيو خواكين كونزاليس..لاخور غوبش وشاف فصاحبو وهضر معاه رجع شاف فجواد :

- شنو بغيتيه سينيور خواكين مكيشوفش من والا عندك شي موعد معاه..

ماريا : داك شيبة العاصية حتى هو خاصنا معاه موعد

جواد(تحت سنانو) :

- سكتينا حمدي الله وشكريه ماعرفوك اش كلتي...رجع شاف فهاداك وكمل :

- ضروري خاصنا نشوفوه المسألة ضرورية بزااف كوليه جواد الإبراهيمي بغا يشوفك...خنزر فيه لاخور ونطق..

- عربي؟

جواد : اه...

- أجي معايا تبعوني...لاخور تبعهم من لور وتاني من القدام..ماريا مزيرة على يد جواد بحال الى غادي يهرب...فتحو ليه رجال لوخرين الباب ودخلو...جردة كبيرة باين مقابلينها مزيان..كاينين 5ديال الدرجات كبار طلعوهم..ودار هداك وقفهم بيديه...دق فالباب شوية تفتح...هضر هداك مع الخدامة ودخل..جواد وماريا بقاو...كتشوف فيه وي شوف فيها...

ليس المهم أن تتواجد مع ( أشخاص كثيرين ) 

لكن الأهم أن تتواجد مع شخص يهتم بوجودك 

ويفتقد غيابك .. ويصون فؤادك ,, كن مع من

لايكون لحياته معنى بدونك...

****

- خرج هداك صعصع شاف فجواد عطا فردي ديالو لصاحبو وبدا كيقلب فجواد حتى وصل لحزام سروال جبد الفردي تبسم بستفزاز وعطاه لصاحبو يلاه دار عند ماريا ايحط يدو عليها دفعو جواد..

- هيه حيد إيديك انكرضها ليك من بلاصتها...نباه لاخور خنزر فيه بغا يضربو وقفو لاخور...فتح الباب وخلاهم يدوزو...تمو غاديين تابعينو دار أتاتها تاريخي عريق العيالات ماباينش الحس ديالهم باين ننوض فيهم الخلعة حسهم مكيدورش فدار مساكن هادشي لي ستنتجات ماريا مع عقلها...وصلو قدام واحد الباب دق هداك وفتح الباب خلاهم يدخلو...مكتب كبيييير بزااف كلو كتوبة وجاجو ديال سلاح معلقين فالحيط وراسو ديال نمر حال سنانو معلق هو وجلد ديالو وجهة لوخرا محطوط نسر محنط..

ماريا(بالهمس) :

- هدا مكتب ولا محل ديال العطار عاهدي ابلعطارة كيعلقو هالبةية ها جلد اللفعة ها ضبع..

جواد : هنينة...تشعل الضو ديال المكتب وبان واحد الراجل كبييير فالعمر باين من شعرو لي بيض ولحيتو البيضة ولكن البنية الجسدية ديالو ديال واحد فالخمسين طويل وكتافو عراض لابس سروال توب وكوستيم هابط من جيبو جوج خيوط ديال الجلد وداير طربوش فالقهوي ديال كوبوي على راسو بجنبو عكاز طوييل على شكل نمر...بطلاقة نطق :

- جواد الابراهيمي صدقة غريبة هادي كنسمع عليك بزااف ديال الحوايج شنو سر ديال هاد الزيارة هادي..

جواد : سينيور خواكين جينا نهضر معاك على قبل الحفيدة ديالك...خواكين غوبش او وقف...:

- وشكون انتوما لي تهضرو معايا فهادشي زايدون انا ماعندي حفيدة حفيدتي ماتت..

جواد :سينيور خلينا نهضرو بالعقل حفيدتك ماعندها حتى شي دنب من غ(قاطعو بصوت صارم) :

- بطبيعة الحال ادافع عليها حيت بغات واحد من دمك وأصلك ياك جيتي لهنا على والو غير تعدبتي حسن ليك تمشي..

جواد(بصرامة) :

- مغاديش نمشي من هنا حتى نهضر معاك واش عارف حالت حفيدتك كيدايرة مسكينة خطفتي ليها بنتها وانت كالس هنا بدم بارد...شاف فيه خواكين بعينيه كطير منهم العافية :

- سي جواد تجاوزتي حدودك ماتخلينيش ندير معاك شي تصرف اتندم عليه ماكتعرفش معامن كتهضر وزايدون البنت اتعيش معايا هنا بيخير وعلى خير معزة مكرمة انقريها ونربيها أحسن تربية حسن ماتبقى مع مها تفسد ليها أخلاقها...

جواد : واش(قاطعاتو ماريا لي غير هضرات شافيها جواد لقا حداه بركان ديال العافية شاعل صافي عرف بلي اتزبلها مافيها شك) :

- واش انت شوية لاباس ولا مالك بغيت انعرف مناش مصنوع انت مناش قلبك قاسح ودير الخير وانت بقا ليك شبر لقبر حشم غير على داك شيب لي فلحيتك عيب وعار عليك ماضرني غير عندك جيش ديال الرجال كل واحد هاز مدفع فيديه كون مشيتي تحارب بيهم كون درتي خير فراسك اكوليا هداك وجهك ولا مسلفو حفيدتك حفيدتك من دمك ولحمك شحال دوزتي معاها كتر من والديها لي ولدوها كنتي تسهر على راحتها تخرج معاها ضحك معاها انت لي ربيتيها وكبرتيها مكتكلسش مع راسك وتفكر فهادشي لي داز وتنعل شيطان لا كوليا راه انت شيطان فسيفة انسان كضحك على الناس بداك المضهر ديالك كتكول على حفيدتك فاسدة ايوا هيا انت فاسد حيت انت لي ربيتيها رديتي تربيتك فاسدة عرفتي شنو انت قلبك كحل وغادي تموت مكوشم ونهار تموت ايديرو الناس زردة حيت تهناو من راجل بحالك سعدات أنا لي تهنات من واحد بحالك والمشكل مابغاتش تبلغ عليك البوليس حيت كتبغيك وعمرها نساتك مابغاتش دخل جدها لي مافقلبو لا رحمة لا شفقة لحبس جيتيني راجل اما اما كون درت فيك شرع يديا...كملات هضرتها وصدرها كيطلع ويهبط خلات خواكين كيشوف فيها مصدوم وكيخنزر فيها ولا كلو كيترعد...غوت بجهد على دوك رجال ماعرفت شنو كاليهم دغية حاصروها هيا وجواد كل واحد شد الثاني...جواد بالخف دار كيضارب مع لي شادو طيحو الأرض واخا طويييل عليه ودار لاخور حيدو من على ماريا وتولاه ولكن دغية البيت عمر برجال لوخرين شدوهوم بجوج...وخرجوهم غاديين بيهم جواد كيضرب بيديه وبرجليه واخا محاميين عليه خرجوهوم على برا وفتحو باب واحد البيت فجردة ودخلوهم لاحوهم على الارض وخرجو سدو الباب بساروت..

مشات كتجري ماريا لباب كضرب فيه وتغوت باش يحلو الباب ولكن والو طابو يديها وحتى واحد مجاوبها ولا هضرها...بدات كتعاير وتزبل ضارت عند جواد لقاتو واقف كيشوف فيها وساكت ..

ماريا : شفتك واقف مكدير والو أجي فرع هاد الباب وريهم اش كتسوى اش كتسنى..

جواد(برودة) :

- لالا فرعيه انت نيت وحليه الالة أش كتسناي منزيدش خطوة قدامك الله أودي

ماريا : كضحك عليا ياااك واش شفتي هاد الهبوش أش دارو لينا..

جواد(كيغزز فسنانو) :

- دار لجواد الدار ليه فيامو ودار ليه فراسو وفعقلو بغيت لجواد يغرق ومايلقاوهش رتاحيتي دابا عجبك الحال لالاهم ماريا يلاه رتاحت وعجبها الحال دابا بردتي يااااك كتحسي براسك مزياااان بيخير ياااااااك(غوت)

ماريا(تخلعات منو) :

- مالك انت واش لاباس علاش كتغوت عليا غوت عليهم هوما..

جواد(مخرج فيها عينيه وكيقرب منها بحال شي واحد باغي يصفيها لاخور) :

- اش دارو هوما أش دارو انت تابعينك المصايب انت اش كلت ليك سكتي وخليني نحل المشكل بلاتي هيا أحسن كلتها ولا ماكلتها هضريييي واش كلتها؟

ماريا(كتبلع فريقها) :

- اه كلتيها

جواد : هااااااااا أش درتي انت كلستي على الراجل بسبان والمعيور وماخليتي فيه غير لي نسيتي عند بالك كدابزي مع العيالات وسط الحمام الراجل كدو كداش كولشي كيدير ليه ألف حساب سيري انت الالاهم ماريا وعايريه وماتخلي فيه غير لي نسيتي وكاتكوليك مالي انا هيا سباب لا لا طاسيلتي انا سبب انا انا لي عايرتو وماخليت ماكلت فيه عند بالك ايفرش ليك الحرير من بعد ماكلتي فيه اليوم انا وطاسيلتك انتدفنو فهاد الأرض حايين باش هاد المرة داك الفم عندك ديري ليه سودانية وسديه...

ماريا : ماشفتيش هو لي كالس كيعاير فسيدة؟

جواد(كيغوت) :

- واااش شغلك الالة يعايرها ولا يكلس حفيدتو هاديك دوز معاها لي مدوزتيه انت جيتي البارح وكالسة طلقي فداك الحلوق ديالك عرفناه عايرها وماخصوش يدير هكاك ولكن هليني نهضر انا ونقنعو كون حلينا المشكل ولكن انت لا فمك كياكلك انا شاااك فيك فاش كنتي صغيرة وكلوك قزيبة الدجاجة داكشي باش جيبها فم وكول..ياربي رحمتك ياربي باش بليتيني اش درت تحتك ياربي...

ماريا : دابا انا مصيبة ياك ندمتي ياك ياك..

جواد : ماريا الله يرحم جدك هنينة وتركني فشي قنت خليني نفكر شنو اندير مابغيتش نسمعك حسك قطعيه مابغيتش نسمع حس ذبانة كتزنزن حدايا

ماريا : أنا ذبانة دابا يااااك؟😡

جواد : لاااا حاشاااا انا لي دبان وسراق الزيت وبوبريص اااانا عرفتي شنو انا مجموعين فيا كاع الحشرات انا راه حشرة نيييت لي جبتك معايا كون خليتك فنص طريق وجيت بوحدي..يااااااااخ(ضرب يديه مع الحيط)حتى من الفردي ديالي حيدوه ليا أش انديرو فهاد الوحلة دابا...ماريا تكمشات فواحد القنت كتخنزر فيه...سكتااات حتى سكتات ونطقات.. :

- حتى انت عندك الفردي علاش زعمة واش مالف بهادشي؟شاف فيها كيخنزر ومجاوبهاش

جواد : أستغفر الله العظيم وأتوب إليه..

ماريا : شفتك اكتبربص بوحدك سولناك جاوبنا دابا صافي لي عطا الله عطاه اه نفاعلت واحد شوية ولكن راه عصبني وبقى فيا الحال حنا كنهضرو معاه بالخاطر وهو منفخ علينا ويعاير فسيدة أش كيكون فملك الله كاع بحال بحالو وبيني وبينك غزيت فيه فشيت قلبي مزيان ولي ليها ليها واخا تحبسنا بردت من جيهتو...شاف فيها جواد بنص عين كيخنزر فيها غلياتو الضحكة ..

جواد : لاحول ولاقوة إلا بالله نهار على نهار كنكتاشف فيك شيحاجة جديدة والله

ماريا : شكون بحالك سعادتك بيا ماتحسش بالملل مع ماريا موش حاتقدر تغمض عينيك

جواد : كولي حسن عواني معاك انشيب قبل الوقت ولكن اش ندير لمكتوبي صكع هذا بغاك(أشر لقلبو)...ناضت عند ماريا دارت إيديها على عنقو..

ماريا(كتحلون) :

- بصح أحبيبي امم

جواد : كيبان ليك هذا وقت مناسب زعمة لرومانسية ديالك 

ماريا : ماعندنا مانديرو واخا نغوتو حتى لغدا مغادي نديو منهم لا حق لا باطل اللهم نترومانساو انا وياك..

جواد : نترومانساو ياااك

ماريا : اااه شنو بان ليك

جواد : ماشي وقتو أحبيبي خاصنا نلقاو حل نخرجو من هنا ضروري حلفت مانرجع حتى ندي البنت فيدي الكلب عندو بزااف ديال رجال ولكن انلقى شي طريقة لي يخليني ندي البنت بلاما يشوفني شي حد غير بلاتي

ماريا(بستغراب) :

- شنو كتفكر دير مكاين حتى شرجم لي نهربو منو والو 

جواد : ضروري انلقاو شيحاجة لي تخلينا نهربو غير صبري وخليني نفكر...

يتبع...