سيدها الجزء 25

من تأليف سناء الصنهاجي
2020

محتوى القصة

قصة سيدها

كنبغيك اخويا كنبغيك بزاااف..
جواد(كيضرب ليه على كتافو) :
- حتى أنا كنبغيك كاين شي واحد فدنيا ماعزيزش عليه خوه...ناض عندهم أمين وعنق خوه تبسم جواد وسط دموعو ودخلهم بجوج وسط صدرو منظر مؤثر بزااف خلى كاع لي كالس يتأتر ويبكي...تنهد جواد تنهيدة طويلة بعد عليهم..وبخطوات كبيرة طلع لبيتو...رجع امين ويوسف كلسو كولشي ساكت كيفكرو فهادشي لي كال الحاج صعيبة بزااف صعيب لي داز على الحاج غير جا وبنا إمبراطورية على قدها غير جا ودار سميتو وطبعها فسوق كيلقى راحتو فالخدمة وكان كيحاول ينسي جهدو كامل دارو فخدمتو حتى ولا كيما هو دابا...تم هابط جواد وفيديه ساك هازو على كتافو..غير شافتو ماريا وقفات خوتو عمو العربي كولشي وقف..
ماريا(بستغراب وقفاتو) :
- فين غادي ديالاش داك الساك؟
جلال : خويا ياك لاباس
أمين : جواد فين غادي أخويا...مجاوبهمش بقا واقف وساكت عضلات الفك ديالو هيا لي كتحرك..
جواد(بملامح باردة) :
- بغيت نبقى بوحدي واحد شوية...جات عندو ماريا وقفات قدامو :
- الواحد خاصو يواجه المشاكل ديالو ويحلها ماشي يهرب منها..شاف ليها فعينيها :
- انا مكنهربش بغيت نبعد بغيت نفكر واش عند بالك ساهل هادشي صباح الخير السيدة لي كنتي مربي معاها ماشي مك هاهيا مك وكادبين عليها من الفوق مألفين قصص وخرجو ليا على حياتي وعليها وعلى لواليد جاتك ساهلة عقلتي نهار سقتي لخبار بلي ماماك عايشة شنو درتي هظيتي حوايجك وخويتي خاصني الوقت اماريا لي نبقى مع راسي...جا يتخطاها رجعات وقفاتو شدات ليه فيديه... :
- نمشي معاك نكون معاك مغاديش تسمع حسي غير نبقى معاك تلقى علامن تخوي قلبك عفاك...نمشي لدار نعلمهم ونجي..
جواد(بصرامة وجدية) :
- لا غير خليك هنا عفااك اماريا بغيت نبقى بوحدي غير أنا وراسي بغيت نفكر فهادشي لي وقع ليا فظرف يوماين تقلبات حياتي سفاها على علاها فاش انحس براسي مزيان غادي نجي عفاك مابغيت حتى واحد يتبعني...هز ساكو من فوق الأرض... فتح الباب وخرج طلع لطوموبيلتو الجيب دار ساكو لور...ديمارا ومشا تحت أنظار الكل..
العربي(عنق ماريا من كتافها) :
- عندو صح ابنتي ماتقلقيش منو خاصو يرتاح ويفكر انت اكثر وحدة اتعدريه حيت دزتي من هادشي لي كيدوز منو هو واخا الفرق صغير بيناتكم ولكن صعيب خصوصا تعرفي بلي خوك كان غادي يقتلك عطيه وقت ابنتي ومايكون الخير إن شاء الله..


#القهوة
مليكة : بنتي واش أتبقاي غير ساهية الله يهديك ماكليتي والو
ماريا(تنهدات وشافت فيها) :
- ماعندو منين يدوز وحق الله
مليكة : لاواه ابنتي نعلي شيطان دابا يبقى هادشي غير نعاويد ضروري من ورا المحاين كيفرجها الله خلي إيمانك بالله قوي
ماريا : ونعمة بالله...10 يام أماما حتى تيليفون لاخر والو مكاينش حتى ميساج ماسيفطوش ليا
مليكة : واش قليل لي داز عليه مسكين راه بااز ليك والله الى باز عقلتي انت فاش عرفتي ماماك موال بالحياة اش وقع هزيتي حوايجك ومشيتي بمرة وراه حتى هو انسان من دم ولحم راه صعيب غير هلى لي مجرب مخاصش تكوني أنانية..
ماريا(كتغبن) :
- والله ما انانية توحشتو بغيت نكون معاه مشيت لفيرما لفيلا مالقيتوش حتى جلال ماعارفش فين هو وبحال والو عارف ومابغاش يكوليا..
مليكة : أجي أمضرا هذاك خوه خرج من سبيطار؟
ماريا : شكون عرف مابقيتش تسوقت لداكشي منين مشا جواد بحال والو يكون خرج حتى فرح مابقاتش رجعات
مليكة : دابا ترجع شحال قدها خوها سباب انت مادرتي لا بيديك لا بسنانك كولشي منو هو...هزات ماريا راسها فشكون داخل بانت ليها فرح هازة سكادو ديالها وكتشوف فيها عينيها فيهم واحد الاعتدار وخجل...خرجات ماريا من كوزينة وجات عندها...
ماريا : فرح لاباس عليك؟
فرح(كتشوف فالأرض) :
- الحمد لله نكولو بيخير
ماريا : خالتي رشيدة لاباس عليها؟
فرح(هزات عينيها فيها) :
- الحمد لله لاباس كتحاول تكون لاباس
ماريا : وذياب؟
فرح : غدا عطاوه يخرج ولا بيخير...طبيب لي فالكلينيك عطانا نمرة واحد طبيب نفساني باش نديوه عندو يتعالج فاش فاق ماعقل على والو كاع لي وقع ماعقلش عليه...عاودات ليه ماما كولشي ماتيقش راسو شنو دار داكشي باش انبداو العلاج غير يخرج إن شاء الله كالينا طبيب هاد المرحلة خاص تكون العائلة كلها معاه باش توقف معاه ومايحسش بالفراغ لي يخليه يفكر فحوايج خايبة...
ماريا(تنهدات) :
- إيوا مزيان الحمد لله على سلامتو..
فرح(بتردد) :
- ختي ماريا سمحيليا عفاك على تصرف لي تصرفت معاك فالكلينيك انت عارفة خو واحد لي عندي بغيت نكول لي كان فبالي بلي عندي هو راه حنين قسما بالله مكاينش بحالو فهاد الدنيا دمو يعطيه ليك كيبغي عائلتو بزاااف لي داز عليه ماشي قليل حنا كلنا راه برا ولكن هو مزاال مازم من داكشي لي وقع ليه داكشي لي خلى عندو إنفصام فشخصيتو وكيدير شي حوايج بلا إرادتو والله وتعرفيه حتى يعز عليك سمحيليا اختي بزاااف..

ماريا : والله مامقلقة منك بالعكس عادراك صافي نساي هادشي عاودات ليك ماماك كولشي؟
فرح : ماما أصلا عمرها خبات علينا شيحاجة فاش كبرنا عاودات لينا على ليداز عليها غير هو راكي عارفة كتصدمي منين تعرفي بلي خوك عايش خصوصا الى كان شي واحد معروف عند الناس كتجيك فشكل شوية...واش هو فخبارو؟
ماريا(ربعات يديها وشافت جيهت سرجم) :
- فخبارو هادي 10 يام وهو غايب جاتو قاصحة بزااف 
فرح : عندو الصح صعيب يتقبلها تعرف بلي ماماك عايشة وبلي لي كنتي مربي معاها ماشي ماماك وعند خوت اخرين ولي صعيبة هيا ذياب حريرتو حريرة
ماريا : عرف اش واقع ولالا؟
فرح : مزال اتمشي عندو ماما ليوم وتعاود ليه..
ماريا : حتى هو شوف واش يتقبلها ولالا يكون خير ايوا ايمتا ناوية ترجعي لخدمتك
فرح : يحسابلي مابقيتيش بغيتيني
ماريا : انت حمقة رجعي لخدمتك براكة من لعكز
فرح(ضحكات) :
- عطيني اليوم غدا من ورا مانخرجو خويا انجي
ماريا : واخا وتيليفون بيناتنا..
فرح : ضروري شكرا بزاااف(عنقاتها)
ماريا : مابيناتناش سلمي على خالتي رشيدة
فرح : بلغ الله سلامك..بقات واقفة ماريا حتى خرجات فرح ورجعات لكوزينة
مليكة : ضريفة هاد البنت
ماريا : بزاااف
مليكة(كتقاد فالكيك) :
- هاجر فخبارها لي وقع؟
ماريا(كتصايب فالقهوة التركية) :
- سونات ليا وردة لبارح كالت ليا بلي جاو من شهل العسل وعاودو ليها لي وقع راكي عارفة كي غادي تكون كاتليهم علاش ماسونيتوش ليا
مليكة : وهاهوما سوناو ليها اش غادي دير ماعندها مادير..
ماريا : بحال ماما تقلقات مني تقليقة ديال لغدايد حيت ماعلمناهاش وماكلنا ليها والو تاعنداك واش هيا مشات على غرضها وفيها سكر نسونيو ليها طيح فالبلاصة
مليكة : ايوا قلب الوالدين ماعندك ماديري ابنتي غير انا واش وقع ليا خلي هيا
ماريا(عنقاتها) :
- مكاينش فرق بيناتكم هيا ماما وانت ماما لهلا يخطيكم عليا ياربي...
- هاني جييييت(نباتهم سومية)
ماريا : على سلامة أختي فين كنتي؟سخرة كلستي فيها عامين
سومية(دخلات حطات تقدية) :
- تلقى ليا يوسف؟
ماريا(هزات حاجب وهبطات التاني) :
- أشنو بغا؟
سومية(دارت طبلية) :
- والو كاليك سمحيليا وماقصدتش وعطيني فرصة وديك الهضرة ديال والو
ماريا(كتسناها تكمل) :
- أهاه؟
سومية(شافت فيها) :
- كتليه لا مابقاش عندي كيف كان صراحة خرج من قلبي ومن بالي بغيت نتلفت لراسي ونديها فيه ونشوف مستقبلي هو اهم حاجة عندي اما الحب خليتو لماليه غير صداع الراس
ماريا : مزال يجيك رزقك حتى ليديك
سومية : نكدب عليك مابقاش كيهمني زايد ناقص جا مرحبا مجاش مرحبا..وردة مدازتش؟
ماريا(كضحك) :
- وردة كتوحم ههههه جاتها على امين او واحد سيدة خدامة عندو ولات تهز ليليا وتمشي تعس عليه فالبيرو هو خدام وهيا كالسة حاضياه ماكتفرق عليه حتى يحيو مع بعضياتهم شاد ليها لخاطر مسكين...
مليكة : جاها لوحم صعيب يمكن؟
ماريا : أه ماشي بحال فليليا مجاهاش بحال هكا باينة شي بوراس هذا
مليكة : الله يفكها على خير ويكمل حمالتها على خير ياربي...سومية دي ابنتي هاد القهوة لديك السيدة لي لهيه...هزات سومية القهوة خداتهت لواحد السيدة كالسة شادة كتاب كتقرا فيه..
سومية : بصحة وراحة
- الله يعطيك الصحة شكرا..
****
الواليدة واش كتفلاي عليا بغيتي تحسسيني بتأنيب ضمير أتهناي ضميري كيأنبني بلا هاد الهضرة لي ماعندها معنى..
رشيدة : بغيتي تيق شغلك هداك عاودت ليك كاع لي وقع من لول لأخر...
ذياب : هادشي راه مايمكنش تخربيق الواليد هضر كول شيحاجة(كيشوف فيه مصدوم)
يحيى : مك اولدي كالت ليك الي كاين خوك لكبير ماميتش كيف كان كيحساب لينا عايش وهو جواد لي خطفتيه وخطفتي خطيبتو وعلى شوية كنتي باغي تصفيها ليهم..
رشيدة(شافت فراجلها باش يسكت)..
يحيى : بلاما تشوفي فيا خاصو يعرف اش دار ويتقبلو باش يتعالج البوليس شوية وغادي يجيو لهنا بحال والو يديوه..
ذياب : واش حنا فالبوليس دابا الواليدة راه راه انحماق انا قسما بالله الى انحماق مقادش نتقبلها والله ماقديت نتقبلها بالله..
- (بصوت صارم)خاصك تقبلها كيما انا تقبلتها حتى انت خاصك تقبلها...بثلاثة بيهم ضارو عند مصدر الصوت..

ليس المطلوب شخص نشعر معه بسعادة مطلقة
بل شخص نشعر معه بأقل قدر ممكن من الألم ..
****
أجمل إحساس تشوف ولدك لي تحرمتي منو 34 سنة وزيادة واقف قدامك بطولتو رااجل بكل ماكتحمل هاد الكلمة من معنى...مكتعرفي تبقاي كالسة ولا توقفي تعنقيه وانت خايفة من ردة الفعل ديالو واش تقربي ليه ولالا كتحيري هادشي لي كاتحس بيه رشيدة وهيا كتشوف فولدها قدام عينيها لي كيبريو بدموع ديال الفرحة...
جواد(بصرامة) :
- واخا تخليوني انا وذياب بوحدنا؟
رشيدة(غير كتفتف) :
- واخا اولدي واخا يحيى نوض اجي معايا...خرجات هيا وراجلها غادية وكدور تشوف فولدها دايرة يديها على فمها مابغياش تبكي...خرجات وسدات الباب وراها...جر جواد الكرسي وكلس بكل ثقة كيشوف فخوه..
جواد(ضحك بستهزاء) :
- جاتك غريبة تصدمتي السيد لي كنتي ناوي تقتلو طلع خوك خايبة حتى لتعاويدة ياك؟
ذياب : انا راه معاقل على والو ومعارف والو انا انا كنعتارف بلي كتجيني حالات فشكل ولكن من بعد مكانبقاش عاقل على حتى حاجة عمري مأديت حت...(قاطعو جواد)...
- عارف هادشي بلاما تحتاج تكوليا كونما كنتيش مريض واهلي شنو كان ايوقع ليك معايا ماعليناش نسدو هاد الموضوع اندير بحال الى ماوقع والو انسا اسيدي انا داك نهار اندير راسي بحال الى كنت كنحلم..ولكن بشرط واحد😑
ذياب(بستغراب) :
- شنو هو؟
جواد : الإنفصام فشخصية كيخلي الجانب الشرير ديال الواحد ينسى شنو دار الجانب المزيان فيه والعكس صحيح ولكن مكاينساش الوسخ لي عايش فيه والمعلومات لي كيعرف ولالا؟
ذياب : وضح كلامك
جواد : انت خويا بغيتي ولا كرهتي انا مختاريتش هادي وكيما قسمت وعطيت عاهد على راسي نحني عائلتي حتى انت من عائلتي واجب عليا كا خوك لكبير نعاونك ونوقف معاك بغيتي هادشي ولا كرهتي دابا شوية ايدخلو البوليس من هاد الباب بطبيعة الحال واخا معاقل عاودو ليك أش درتي لقليلة لقليلة تاخد فيها واحد 25 عام حتى ل30 عام ديال الحبس الخطف والحبس الضرب والجرح وتجارة فالممنوع الى بغيتي تخرج راسك من هادشي ساهلة تعاون مع لبوليس
ذياب : جواد انا والله أقسم لك يمينا معاقل على شيحاجة انا راه مستحيل ندير هادشي كون كنت فطبيعتي راه مايمكنش ماتربيتش هكا
جواد(بحزم) :
- كلت ليك عارف هادشي الى بغيتي تعاون معانا ونعاونوك وترجع كيف كنتي وكيف تربيتي ديال بصح يجيو لبوليس تعاون معاهم كاع داكشي لي كتعرف على ريوس لكبار كولو ليهم عندك شي ملفات اي حاجة عطيها ليهم هكا اتكون درتي شيحاجة مزيانة فحياتك..
ذياب(شاف قدامو كيفكر) :
- انا والله ماعاقل لي عارف بلي لي دخل لديك طريق وعرف عليهم شيحاجة ينحيوه
جواد : ماعندك مناش تخاف الى مشاو حتى طاحو هادوك مايمكنش يأديوك وزايدون شكون ايكوليهم انت لي شهدتي فيهم يقدر يكون اي واحد مكايحملهمش شهد عليهم تعاون مع البوليس الله يرضي عليك وتهنى..
ذياب : هانتا انا اي حاجة مهمة كنخبيها فالكوفر فور فبيتي الكود ديالها هو 135 تما اي حاحة مهمة كنخبيها تقدر تلقا كولشي تما...جواد(وقف) مزيان هادشي اتعاودو حتى لبوليس الى جاو دابا مدام عاونتيهم ايعاونوك ومغاديش تحاكم وسميت الثعلب مابقاتش اتسمع مزال ماتت فهمتي...ضار باش يخرج هو يوقفو ذياب :
- سمحليا بزااف الى صدرات مني شيحاجة مكنتش قاصد..ضار جواد شاف فيه تبسم ليه بتسامة شبه خفيفة وخرج...تلاقا مع عز الدين عند الباب :
- أمضرا؟
جواد(داير يديه على جنابو) :
- معاقل على والو ولكن كاليا على شي كوفر فور فبيتو رقم ديالها 135 تقدر تمشي لدارهم وتقلب انلقى كاع المعلومات لي بغيتي تما..
عز الدين : شكرا بزااف أجواد عدبناك معانا انكملو معاه وديك ساع نشوفو هاد لبلان ديال الكوفر..
جواد(ضرب ليه على كتفو) : 
بون شونص..خلاه دخل عند ذياب وهو تم خارج سمع سميتو وقف وضار عندها كتبان ليه واقفة لا حول ليها ولا قوة تحت عينيها كحل وجها دابل دموعها هابطين كتبان بريئة بزااف...كيحاول يكون تابت قلبو كيضرب كان كايتهرب من هاد اللحظة وهاهيا جات...ماحساتش براسها إحساس الأمومة غلب عليها مقدراتش تشد راسها بدون مقدمات جرات عندو واخا رجليها مطاوعوهاش فاشلين عليها تلاحت عليه وعنقاتو شدات فيه بيديها بجوج بجهد بحال شي غريق كيستنجد بالمنقد ديالو...كايتسمع أصوت شهيق ديالها ودموعها بحال شي ينبوع ديال الما تفجر...واخا يكون قلبك حجر اتحن...ماعرفش شنو يدير فهاد الموقف كيحس بشي حجرة واقفة ليه فحلقو هاد 10يام لي دازت دوزها غير فتفكير فعلا لا باه لا هو لا مو ماعندهم دنب لي عندهم دنب راهم تحت تراب الله هو لي ايغفر ليهم..بغا يعنقها ماقدش كايجي حتى يهز يديه ويهبطهم ولكن وراء كل رجل قاسح قلب كيقطر بالحنان والمحبة عنقها اه عنقها يديه مسو كتافها وشعرها...إحساس زوين بزاااف صعيب ولكن زوين...زادت فالبكا منين حسات بيديه وحسات بالحنان ودفىء ديالو...كاع لي فالكلينيك كيشوف مافهمو والو...بعدها عليه غير بشوية حادرة راسها مقاداش تشوف فيه...شدها من دراعها ويد دارها على ظهرها ومشا بيها لقهوة ديال لكلينيك تما غادي يهضرو على خاطرهم بباما يصدعهم حد..

#فالقهوة
- مليكة : إيمتى ناوي وسيم يمشي؟
ماريا(عبسات وتقلبات سيفتها) :
- كاليك الالة ناوي غدا يمشي الله يستر كولشي جا من ورا شي ماكلست معاهم حتى بخاطري..
مليكة : أبنتي لي كالس كالس ولي غادي غادي ماعندك ماديري حتى هو راه عندو خدمتو خاصو يقابلها...ومزال تابعو الخطبة ديالو وعرسو يوجد ليهم..
ماريا : عرافت غير الولف وصافي ايبقى فيا الحال مزال مزال كايجيو هاد الايام فاش كيمشي كولشي كنسدو علينا ونكلسو مجمعين كينسيوني بلي جواد مكاينش واخا مانسياهش ولكن مكنبقاش غير نفكر...
مليكة : إيوا ابنتي ماعندك مديري صبر هادي هيا سنة الحياة حتى واحد مدايم لحد..
ماريا(تنهدات) :
- انا اندخل لداخل نقرا شوية الى بغيتيني عيطي عليا
مليكة : واخا ابنتي سيري..
****
فالكافي ديال لكلينيك طبلة معزولة كالس جواد ورشيدة حادرة راسها ماعرفة ماتكول..
جواد : تشربي شيحاجة؟
رشيدة(تزنكات) :
- واخا اولدي خود ليا لي بغيتي...ناض طلبس جوج كيسان ديال لقهوة ورجع عندها كيحرك رجلو بتوتر فهاد الموقف مكايعرف الواحد مايكول..
رشيدة(كتهضر بلاما تفكر) :
- تبارك الله خرجتي كتشبه لباباك فطولتو حتى باباك كان طويل ادابا مع لكبر بنادم كيقصار زعمة كيهبطو كتافو احم عندك خوتك ياك واحد لي شفتو داك نهار
جواد(كيشوف قدامو) :
- نو كاينين جوج خوت وبنت أمين إي يوسف إي هاجر..
رشيدة(تبسمات) :
- اااه الله يخليهم ليك او او ماماك لي رباتك(كتهضر وترعد)
جواد : ماتت
رشيدة : الله يرحمها ياربي...شاف فيها جواد كيقرا ملامحها لي باين عليهم التوتر..
- مكدبكش إحساسك وكاليك بلي ممكن ولدك يكون حي غير كاليك باك الله يرحمو راه ولدك مات ستسلمتي للأمر الواقع
رشيدة : ماضنيتش با يكدب عليا وتوصل بيها يشد الفلوس من عند الحاج كنت عارفاه صعيب ولكن يكدب عليا عمري درتها فبالي خلاني فالمدينة ماعرفة حتى حاجة فين نمشي ولا نجي...تيقت هضرتو مكنتش قارية حدي المدرسة وخرجوني منها كاع لي كيكولو ليا كنتيقو واها كنت كنبان فدوار مطورة ولكن كنت نية بزااف عند بالي مايمكنش با يغدرني...لر كالها ليا كنديرها وراها خدمت عند واحد السيدة كتخيط وتعلم لبنات لخياطة دخلاتني عندها تعلمت لخياطة وليت نخيط لناس باش ناكول ونخلص لكرة...واحد المرة كالت ليا هاديك السيدة علاش مانمشيش ونسول على باك لايكون ماتزوج ماوالو وغير الحاج الله يرحمو كدب على با...مشيت وركبت مع حطني الكار تلاقيت مع واحد جارتنا سولاتني على راسي وفين غبرت راك عارف لعيالات بلاما نسولها كالت ليا بلي باك تزوج تما تيقت هضرت با ورجعت فحالي لمدينة أيست وتما تعرفت على راجلي يحيى وتزوجت بيه..
جواد(تنهد تنهيدة طويلة عينيه تبدلو وملامحو) :
- فاش كنتفكر بلي جدودي بجوج دارو فيكم هكا دمي كيسخن المشكيل معامن اتحاول وشكون اتلوم ناس ماتو وشبعو موت...حطات إيدها على إيدو :
- أولدي هادشي مكتاب ديال الله الحاجة لي حرام مكدومش واخا حنا كنا كنبغيو بعضياتنا بزااف كتر من لقياس ولكن مع عقل الصغر وانا معارفة والو طرا لي طرا...ماعند الميت مايدير كدام غسالو تعدبنا بجوج انا بعدت عليك وعشت بلا ولدي لا انا لا انت لا باك عندنا يد فهادشي...
جواد(ساهي) :
- كلنا تعدبنا انا تحرمت من حنان الأم واخا رباتني الواليدة الله يرحمها ولكن زرعات فيا شي حوايج خايبين بلاما نجبدو هادشي...(شتف فيها) واخا صعيب نتقبل هادشي ولكن كوميم الحاجة زوينة هيا نعرف بلي الواليدة عايشة ماميتاش إنسانة حنينة ومزيانة منقدرش نواعدك ونكوليك انتعامل معاك بحال اي أم مع ولدها حيت صعيب بين ليلة ونهار تعرف بلي ماماك عايشة كتجي قاسحة وزوينة فنفس الوقت كنواعد انعطي فرصة لعلاقتي بيك داري هيا دارك فاي وقت ممكن تجي لا انت لا راجلك وحتى من ختي هادشي لي مقدر نواعدك بيه والايام هيا لي تحكم مابغيتش نظلم حتى واحد معايا بغيت نبدا صفحة جديدة وبيضة فحياتي اتكوني انت وخوتي فيها بطبيعة الحال يعني لي بغبت نكوليك تعطيني الوقت وتصبري معايا مغاديش نجي ونبغيك دقة وحدة شوية بشوية باش نتعود عليك أما بنسبة لذياب واخا كاع لي وقع عادرو وعارفو مناش داز...(قاطعاتو) :
- والله اولدي وتعرفو حتى تبغيه ربيناه انا وباه أحسن تربية حنين كيبغي الخير لناس ولكن مدازش عليه قليل كان كيقرا ويخدم فنفس الوقت غير باش يجمع ويكون راسو ويتزوج واخا باه مسك عليه الله ولكن مكانش كيبغي يعتامد عليه...كان كيبغيها بزااف مايخلي بيها بلاصة الحاجة الغالية وزينة ديالها راه صعيب تبقى ليك سيمانة لعرسك وجدتي ودهزتي وكاع دهاز خداتو على دوقها الخاتم الغالي خداه ليها خاصها تكول غير بغيت يحضر قاديتي كولشي مع تريتور ونكافة كولشي راه بقات ليه سيمانة جاي من لخدمة حتى كتبان ليه القاعة كدها كداش بلعاني دارتها قدام دارهم باش يشوفها...راه مشا يموت ليا الانتحار كان اينتاحر شحال نداوي وندورو بيه عند الأطبة كلنا راه ولا بيخير ولكن هو ديك ساع فاش تصدم ولات عندو شخصية خرا...

انا عارفة اولدي داكشي لي دار مكايدارش ولكن ماشي بيديه اولدي المسامحة وكيبقى خوك الما وقفتي معاه شكون ايوقف معاه عاونو حتى هو محتاج لخوه لكبير..
جواد(تنهد وشاف فيها شرقات وجهو بإبتسامة) :
- إن شاء الله اندير جهدي البوليس كاينين عندو الى تعاون معاهم مغاديش يشدوه غادي يطلبو ليك ساروت ديال الدار عطيه ليهم..
رشيدة : واخا اولدي لي حبات خاطرك...قشعاتهم فرح لي كانت راجعة من عند ماريا وتمات جاية عندهم حادرة راسها :
- (بخجل) :
- سلام..
رشيدة : بنتي تعطلتي
فرح : دزت لقهوة عند ختي ماريا..(شافت فيه وحدرات راسها حشمانة)
جواد(بصوت رجولي) :
- فرخ صافا كولشي مزيان؟
فرح(علات عينيها فيه) :
- أنا الحمد لله وانت بيخير؟
جواد : الحمد لله(ناض وقف دار نضاضرو وهز سوارت وتيليفون ديالو) :
- ألي نخليكم دابا نتشاوفو من بعد..
رشيدة : ولدي الى خرج ذياب إن شاء الله بغيت نعرض عليكم عندنا لدار
جواد : اها علاش لا (جبد بزطام ديالو خدا منو كارط وعطاها ليها) هادي لاكارط فيزيت ديالي فيها تمرتي ديال تيليفون وديال شركة سوني لي فأي وقت باش نيت نقيد نمرتك عندي ألى انا مشيت(لعب بصباعو فوق شعر فرح ومشا)...شافت فمها وعينيها كيبريو :
- شفتيه اماما اش دار ليا كيما كيدير ليا خزيا ذياب؟
رشيدة(فرحانة قد حقها فدنيا مسكينة معنقة لاكارط فيزيت لقلبها) :
- وراه خوك وانتوما خوت شوية بشوية تولفوه ويولفكم حمدتك ياربي وشكرتك اللهم لك الحمد كاع دوك دموع لي بكيت وصبر لي صبرت جازيتيني عليهم الحمد لله الحمد لله..
****
”قد تُسعدنا أشياءَ ﻻ قيمةَ لها 
وقد يكونُ هُناكَ شيءٌ ثمين لا يعني لنا شيء 
غالباً ما تكونُ البساطةُ طريقَ السّعادة”
~~~
ماريا(كالسة كتحسب شحال دخلات فلاكيس) :
- الحمد لله لكليان غادي وكيكتار كنت خايفة قضية العيالات بوحدهم ماتنجحش ولكن الحمد لله
سومية(حاطة يديها على حناكها) :
- أجي نكوليك فكرة فواحد الحاجة ماعرفتها واش تعجبك ولالا
مليكة(حيدات طبلية وحطاتها) :
- هاهيا بدات تاني هيا وأفكارها..
سارة(هزات ساكها) :
- بسلامة عليكم حتى لغدا إن شاء
الكل : بسلامة
ماريا : شكرا بزااف اسارة
سارة : هانية مابيناتناش...كاع لبنات مشاو بقات اماريا وسومية ومليكة كيتسناو فاحمد يجي يديهم..
سومية : غير سمعوني والله حتى تعجبكم...كيف كتعرفو دابا الأغلبية ديال لي غيسطو فيهم غير المأكولات الهاي كلاص غير من 100 درهم 200 لفوق وحتى من لي سناك فيهم غير بيتزا شوارما بانيني الناس ولاو كياكلو غير هاد الحوايج لي مافيهمش فايدة
مليكة : عندك الصح ابنتي داكشي الله يستر باش كترو الامراض وكنكولو مالنا داكشي البلدي وتقليدي مابقاش...
ماريا(منزلة عينيها كتحسب او ودنيها معاهم) :
- ممم
سومية : هانتي فهمتيني اخالتي علاش لا مدام الحمد لله القهوة هاهيا تمشا نفتحو ريسطو للماكولات التقليدية يكون مديكوري بحالو بحال لي غيسكو الهاي كلاص ولكن ايكون فيه غير المأكولات التقليدية طويجنات أشكال وأنواع كسكس لوبيا عدس بيصارة شلايض مغربية حلويات اتاي شنو اخور الرفيسة حريرة اي حاجة تقليدية نديروها ويكون داكشي نقي ديال الدار الناس يعرفو شنو ياكلو وبتمن مناسب....شافت فيهم كتسناهم اش ايكولو..
مليكة(كتفكر) :
- والله الى عندك الصح فكرة زوينة وقليل فين مديورة خصوصا هنا كاينين قهاوي ولكن واخا هكاك ماشي بحال الشمل لي كلتي كيديرو غير مرقة حريرة عدس لوبيا بيصارة 
سومية : حنا لا نديرو خبيزة البقولة حوايج مامديورينش وفيهم المنفاعة...(هزات ماريا فيها راسها سادة عين وحالة عين كتفكر فهضرتها) :
- عجباتني الفكرة ولكن هادشي كيديروه العيالات فديورهم
سومية(هزات فيها حجبانها) :
- واش كاع الرجال مزوجين كاينين اساتدة ولي خدامين فالبني وزيد وزيد كيوصل وقت الغدا كيطلع ليهم داك بانيني وداكشي فراس راه واخا تشوفي طبقة بورجوازية راه كيحماقو على الماكلة مغربية وحتى لعيالات كاينة لي خدامة مكتساليش طيب كاتجي وقت لغدا كتبغي تغدا بحاجة نقية بيتوتية..
مليكة : انا بعدا معاك 
ماريا : صراحة فكرة وااعرة انشوف شي محل نكريه ونجهزو إن شاء الله يكون قريب لهنا موقع زوين ونبقاو دقة دقة نجهزوه نشوفو شي وحدة لي تكون يديها بنينة وكاع شهيوات كتقنهم..
سومية : ماما مانلقاوش ماحس منها كتبقا افدار ونضبرو على شي وحدة تعاونها عاد نشوفو لي بقا
ماريا : والله الى مزيان ماما تبغي زعمة؟
سومية : تبغي تبغي بالفرحات عليها
ماريا : انشوف شي مرة من الفيرما يكون كيعرفها سالم الماكلة ديال تما بنينة مابحالها ماكلة نخدموها معاها والله حتى تحمست ماعندي مانسلك اختي الى بغيتي تخدمي داك لعقل كتعرفي فاش تخدميه
سومية(كضحك) :
- كنلعبو هنا حنا اسومية هادي...وقفات طوموبيل قدام القهوة بدات ماريا كتجمع فالفلوس وتقاد.. :
- يلاه بابا جا اري هاد سوارت وهادي انحطها هنا صافي كولشي هو هداك..
سومية : صافي البيبان لداخل راه مسدودين كولشي مجموع..دخل أحمد :
- واجدين؟

ماريا : اه ابابا بلاتي نلبس تجاكيطي ونجي...خرجات سومية او مليكة لبسات تجاكيط ديالها هزات ساكها سوارت فيديها وخرجات سدات هيا وباها القهوة...وطلعو فطوموبيل شدو طريق...ماريا خاشية وجها فتيليفون حتى نغزاتها سومية..
ماريا(مزال عينيها على تيليفون) :
- ااااممم..
سومية : وشوفي فيا وانت اتحوالي مع داك تيليفون..سداتو دارتو فساكها وشافت فختها :
- هاني اختي شفت فيك اش حبات الخاطر؟
سومية(نعتات ليها بصبعها لشانطي) :
- هاد ضواو عمرهم مكانو غير لبارح دزنا مكاينيش ياكما شي وزير جاي؟
ماريا : كتسوليني واش كنت خدامة معاهم فالوزارة شوف يقدر جاي شي واحد وكيقادو ويحلقو...
سومية : لعجب دغية دغية من هنا لصباح صايبو كولشي..
ماريا(غمضات عينيها) :
- عيييت بغيت غير نوصل ناكول شيحاجة ونعاااس...
أحمد : كولشي غادي مزيان؟
ماريا : الحمد لله ابابا بيخير سومية عطاتنا واحد الفكرة ديال قهوة زوينة حتى لغدا ونهضر معاك عليها..
أحمد : إيوا الله يسخر
ماريا(كتاوب) :
- أمين ياربي..دارو مع زنقة لي كتدير لدار وهيا تنحركها سومية :
- وهانتي شوفي هاد البولات علاش مامشاوش مع شارع نيشان وغاديين معانا..؟
ماريا : خافو علينا من ظلام مساكن الله يهديك الله يهديك...قربو لباب دار ودوك البولات غاديين لحتى حدا دار..
سومية : ودابا هادشي جاك عادي؟..ماريا متفهمات والو
أحمد : سومية عندها الصح اش هادشي؟
ماريا : ماعرفتش؟؟؟...بلاصة أحمد طوموبيل نزلات ماريا وسومية ومليكة كيطلو ويقلبو قدام الباب كلو بولات شاعلين مشكلين حمرين وبيضين
سومية : شوفي شوفي..دورات ماريا راسها لقدام باب الدار مبلاصيين بزااف ديال لي بوكي دالورد فالألوان جردة ديال الورد
ماريا : منين جا هادشي؟...لفت إنتباه ديالها خيال جاي قاصدها هزات عينيها بتساؤل عاقدة غوباشتها حتى كيبان جواد جاي وفيديه بوكي ديال الورد كبير فالحمر كيشوف فيها ومبسم...تصدمات وحسات بواحد الفرحة وراحة وجاتها البكية غلبوها دموعها توحشاتو بلا قياس...بقات واقفة بلاصتها ماقدراتش تحرك..
أحمد(جر مراتو وسومية لي حالين فمهم اشر لجواد براسو ودخلهم لدار)...تم جاي عندها عينيه مافرقوش وجها الضحكة على وجهو سنيناتو البويض مزينينو كيشوف فكل بلاصة فيها عينيها فمها شعرها كيروي العطش ديال الاشتياق ديالو منها قداش توحشها كايحس براسو ومتأكد بلي مايقدرش يعيش بلا بيها هيا روحو تخلقات ليه وهو تخلق ليها سمياتهم مكتوبين فسما قلوبهم توحدات وتلحمات هو لداخل ديالها وهيا فالداخل ديالو حب اسطوري مخملي حب تخطا الحواجز تخطا العادات وتقاليد تحدى السلطة والغرور تحدا السيادة تخطا العناد والكبرياء...
جواد(بصوت رجولي حنين) :
- أتبقاي واقفة الى ماتوحشتينيش نرجع...محا فين يكملها حتى كانت لين يديه معنقاه كتبان صغيرة فوسط صدرو دموع هابطين سخان من عينيها..
جواد(كيسكت فيها) :
- ششش دابا علاش كتبكي بغيت غير نفهم؟
ماريا(خاشية راسها فصدرو كتبكي) :
- حيت سمحتي فيا 10يام هادي ماسولتيش فيا ماتوحشتينيش مكلتي خليتها ماوالو..بعدها شوية عليه شد وجها بين يديه...
- شكون كاليك خليتك وشكون كاليك مكنتش كنسول عليك ماشي بضرورة نسولك انت عندي مصادر ديالي لخاصة لي كايجيبو ليا خبارك صوت وصورة
ماريا(كترمش) :
- جلال؟
جواد : مكاينش توحشتك احبيبي مانسمعش منك شي كلمة زوينة ام؟؟رجعات عنقاتو وتمخشات فيه...
ماريا(كتغبن) :
- كاين شي واحد فهاد الدنيا مكيتوحش حبيبو انا الوحش ديالي فات كاع الوحوشة...بدا كيضحك :
- الوحوشة كاع ولينا فغابة..
ماريا(شافت فيه رموشها مدمعين) :
- جواد كضحك عليا :-(
جواد : كاين لي كيضحك على حبيبتو وبنتو وروحو..
ماريا : عمرك تعاود تخليني مزال والله حتى نهز ساكي ونتبعك واخا نعرف نتخشى فالكوفر
جواد(ضحك وقرصها فحناكها) :
- عارفك ديريها
ماريا : كنهضر بصح..
- واش عمرك شفتي شي جسد كيتفرق على روحو غير الى طلعات عند الله..حطات يديها على فمو سكتاتو :
- الله ينجيك الله يخليك ليا ومايحرمنيش منك
جواد : امين احبيبي حتى انت عمري مغادي نخليك ولا نسمح فيك ولا نخلي شي واحد يفكر يدخل بيناتنا ولا يادينا ديريها فبالك انت راه نور حياتي وضو عينيا باش كنشوفك بلا بيك مكاينش جواد...براكة علينا من هادشي طلع ليا فراسي والله
ماريا(بستغراب) :
- كيفاش؟
جواد : خاصنا نتجمعو خلاص صبري تقادة مابقا عندي فين نزيد مزال خاصنا نبداو نوجدو لعرسنا
ماريا(جاتها تبوريشة ورعدة ولخلعة) :
- عرسنا؟
جواد : واش اليكلتها تعاوديها اه عرسنا وديك لا بلاتي مزال بلاما تعدبي راسك وتكوليها دابا مشا لحال غدا اندوز عندك نديك لدار انت ولافامي تغداو معانا ونحددو نهار لعرس كنتينا غير إيمتا نتجمع انا وياك فدار وحدة وبيت واحد فراش واحد او وسادة وحدة..ماريا غير سمعات فراش واحد بيت واحد كتحس بدوخة ورعدة..
جواد(عاق بيها ودار راسو ماعيقش) :
- يلاه احبيبي دخلي على البرد نشوفك غدا كنبغيك بزااف(خطف بوسة من شفايفها...ركب طوموبيلتو وخلاها واقفة مصدومة غادي وحاضيها من المرايا كيفاش مزال واقفة جابت ليه الضحكة بتصرف ديالها عجبو الحال كيفاش حشمات وتوترات هادشي الى كيدل كيدل غير على صفاء ونقاوة روحها..
سومية : ماريا اتبقاي واقفة بوحدك جواد مشا متلفك حتى لهاد الدرجة؟😂😂
ماريا(هاد فاقت) :
- هاه مشا هزي معايا هاد الورد هزي كترات فيك الهضرة
سومية(كضحك) :
- كترات فيا الهضرة اممم معايا أنا واخة يالالة...هزات معاها كاع لي بوكي ديال الورد دخلوهم لدار وماريا مرفوعة غير هضرت جواد لي كتردد فودنيها...

أحمد(حاضي ماريا بنص عين ساهية) :
- بنتي ياك لاباس شفتك غير ساهية ماكليتي والو...حطات الخبز من يديها وشافت فباها :
- جواد بغانا نوجدو لعرس..نقزات مليكة فرحانة :
- وهادي راه خبار زينة..
ماريا : جاني بحال الى زربان شوية..
أحمد : مازربان والو ابنتي ماشي انتوما عاد تعرفتو غير لبارح راه عام دابا وانتوما كتعرفو بعضياتكم وكنتو تحت سقف واحد وجمعاتكم الخدمة وهانتوما دابا مع بعضياتكم ديك الخطبة طويلة راه كتبسال وكدير غير المشاكل وابنتي ماتنسايش هضرت الناس انا مكايهمتي حد عارفك اش كاتسواي ولكن منبغيش شي واحد ينعت ليا فبنتي فهمتيني يلاه يلاه توجدو..
مليكة : باك عندو الصح أبنتي حتى ليمتا اتبقاو بحال هكا السيد راه عندو الصح جاك نيشان..
سومية : اش كتسناي الخطبة كايجي من وراها الزواج والعرس..
ماريا(كتفكر ساهية حاوطوها من كاع الجوانب) - انوض نعس صافي شبعت يكون خير يلاه تصبحو على خير...كحزات كرسي ديالها مشات لحمام غسلات يديها ودخلات لبيتها..
مليكة(شافت فأحمد لي تبع بنتو بالعين) :
- غير لخلعة هاديك كاملنا دزنا فيها كنكونو فرحانين حيتاش انتزوجو غير كيوصل المعقول كنولو نتفتفو الماكلة ماتبقاش دوز لينا كاتبداي تفكري واش اتنجحي فحياتك الزوجية واش اتقدري توفقي بينها وبين خدمتك الى كنتي خدامة حيت مكاتبقايش فداركم كتولي فدار راجلك سيستيم اخور وعادات وتقاليد أخرة..
سومية(كتشوف فيها بستغراب) :
- هدا زواج ولا جهاد؟
مليكة : أياه ابنيتي الى بغيتي تزوجي وتولدي وليداتك وخاصك تصبري ماشي على أقل حاجة وأبسط حاجة تهزي حوايج وتغضبي لداركم ولا تبقاي كل نهار أ انا غادية عند ماما انا فدارنا فينما يجي يلقاك انت خارجة وفداركم لا الى هكاك ابقاي فداركم حسن مرة فسيمانة سيري وسيري انت وياه الى كنتي حدا داركم بطبيعة الحال وتصبري على لحاجة المزيانة ماشي على المعيار وضرب بين راجل والمرة خاص يكون الاحترام هو يحتارمها وحتى هيا هكاك ماتقللش منو قدام عائلتو وحتى هو هكاك..وتصبري عليه راه مرة عندو مرة لا..واهم حاجة هو المحبة وتفاهم تاخدي داك الراجل على اخلاقو وحيت كتبغيه ماشي على شيحاجة خرى..
سومية : كيفاش أخالتي زعمة مافهمتش؟
مليكة(دارت عندها وحطات يديها على إيدها) :
- شحال من بنت ابنتي مكتبغيش تاخود الراجل يكون على قد الحال كتبغيه بطوموبيلتو ودارو كتكوليك منعيش انا فجوع ونصبر مالي على حالتي هاديك أبنتي طماعة وداخلة على طمع شكون كال تديه بدارو وخيرو وطوموبيلتو وغدا يطب فكولشي ويبيع كولشي وتولي ساكنة معاه فبيت مع جيران اشنو اتكوليه طلقني مثلا الى جاك ولد الناس واخا يكون على قد الحال شتي غير يحطك فعينيه يبغيك ويحن فيك ويصونك ويكون زوج صالح قبلي بعينيك مغمضين حيت انت وياه اتبداو بشوية بشوية وربي ايعاونكم ويفتح عليكم بيبان الخير ابنتي أهم حاجة هو الزوج الصالح يخاف عليك ويبغيك ويعرك عليها ويجيب ليك طرف ديال الخبز اهم حاجة يكون حلال وربي ايعاونكم ويسر ليكم وتوليو بداركم وبطوموبيلتكم راه حنا ليكنديرو الفلوس ماشي لفلوس لي كاديرنا شحال من مسكين ولا عندو وشحال من واحد لاباس عليه ولا مسكين عمرك دخلي على طمع عمرك نوصيك ابنتي عمرك تكوني طماعة ويغرك المظهر ولفلوس وطوموبيل راه عمرهم يدومو ليوم معاك وغدا مع واحد أخور كوني قنوعة ربي عمرو مغادي يخيبك اما طماعة نهار لاخر اتبقى يد لور ويد القدام..
أحمد : سمعي ابنتي لي يفيدك ويعاونك ماينصحك غير لي كايبغيك كون كان هاد الجيل يتسنط واهلي يالخبار..
مليكة : وعوتاني مايكونش هامك أزواج لا مديريهش فراسك ابنتي وتخليه من أولوياتك لا خاصك تقراي وتوصلي لي بغيتي وتخدمي وتحققي داكشي لي انت كتمناي حتى الى تزوجتي اتكوني حققتي داكشي لي بغيتي وحتى هذا لي كيبغيك خاصو يدعمك فالحلم ديالك توصلي ليه منين تولدي وليداتك تكولي ليهم ها ماماكم اشنو دارت فهمتي أبنتي راه المرة ماشي غير لطياب ولكوزينة وراجل لي كيشوفها هكا مكايفكرش ومكايبغيهاش..
سومية(عجباتها هضرت مليكة سهات معاها) :
- عندك الصح اخالتي مكدبتيش انا نيت كنفكر شنو بغيت ندير انا خدامة مع ماريا دابا ولكن اشنو هيا الهواية لي كايعجبني نديرها وبغيت نطور منها مكرهتش نولي كاتبة صراحة
أحمد : حاجة مزيانة هادي علاش لا بداي تكتبي وحطي فالانترنت الى عجب الناس داكشي لي كتكتبي فيه راه مزيان تقدري طبعيها وتنشريها علاش لا..
سومية(تحمسات) :
- عندك الصح اعمي غادي نفكر فهادشي(وقفات) نخليكم تصبحو على خير ولهلا يخطيكم ياربي...
مليكة : امين أبنتي تصبحي على خير..

"يشعُر المرء بالامتِنـان كُلما وجد من يهتّم لتفاصيله الصَّغيرة، تلك التي لا يُمكن لأحدٍ أن يُلاحظها"..

#طبلة_الفطور..
- بابا جواد غادي يجي يدينا نتغداو عندهم اليوم هضر معايا غير الصباح اكد عليا..
مليكة : على قبل تهضرو فالعرس؟
ماريا : اه ايكون كولشي مجموع حتى وسيم اجل المشية ديالو لغدا على قبل باش يحضر ويعرف ايمتا ايكون العرس باش يبروكرامي الخدمة ديالو الى كان مطول راه يقدر يسبقني..
أحمد : يكون خير أبنتي...ناضت هزات ساكها وتيليفونها..
ماريا : يلاه اسومية انتعطلو
سومية(خشات طرف دالخبز الخر فمها وتبعاتو بأتاي هزات ساكها وتيليفونها حتى هيا وتبعات ماريا وهيا كتندغ)...
ماريا : بابا ماتنساش 12 ونص تكون عندي فالقهوة باش نمشيو واخا
أحمد : صافي ابنتي غيري سيري الله يعاونك..خرجات ماريا وسومية...مع الخرجة كتبان ليها طوموبيل ديال ذياب وقفات نزلات منها رشيدة وفرح...شوية ذياب نزل شادة ليه مو فيديه وفرح هازة ساك ديالو شافتها رشيدة تبسمات ليها وماريا حتى هيا رظاتها ليها...ضار شافيها ذياب ورجع حدر راسو..
سومية : حشمان عارف اش داير
ماريا(جراتها) :
- زيدي راه تعطلنا..جراتها لجيهة شارع اشرو لطاكسي وقف ليهم عطاتو لادريس نيشان لقهوة..
****
جواد(كيفطر) :
- وصيت هنية دير بحساب الغدا
عبد الرحمان : مزيان اولدي خير البر عاجله مكاين لاش الواحد يتسنى
جواد : لبارح شفت(سكت ماعرف يكون سميتها حرفية ولا الواليدة ولا شنو ايكول سكت)..
عبد الرحمان(كيتسناه يكمل هضرتو) :
- شكون شفتي اولدي؟
جواد(مسح فمو) :
- رشيدة..
عبد الرحمان : اهاه..
جواد(رجع بالكرسي لور وشاف فيه) :
- والو هضرنا على داكشي لي وقع كلت ليها تصبر عليا شوية حيت صعيب بين ليلة ونهار تعرف بلي المرة لي ولاداتك عايشة تقبلاتها ودرنا باش نتلاقاو مرة مرة تجي وقتما بغات لهنا وراه نيت عرضات علينا فهاد الايام لدارها ماعرفاش ايمتا ولكن كالت غادي تاصل..
عبد الرحمان(عجبو الحال منين ولدو تقبلها) :
- مزيان اولدي مزيان الله يرضي عليك..
جواد(وقف) :
- يلاه الواليد انا مشيت
عبد الرحمان : الله يعاونك...هز جواد سوارت ديالو وتيليفونو وخرج...هبطات هاجر هيا وهشام..
- بابا جواد خرج؟
- اه ابنتي ماريا وعائلتها ايتغداو عندنا اليوم
هاجر : هيا ناويين يحددو نهار العرس؟
عبد الرحمان : الله اعلم راكي عارفة خوك ماتقدري تهضري معاه فوالو هو لي كيعرف انا مكنسولوش
هشام(هز الخبز دار فيه الفرماج) :
- إيوا على الله يديروه ماحدنا هنا قبل لا نمشيو
عبد الرحمان : يكون خير يكون خير..
****
ماريا(معصبة فتيليفون) :
- بغيت غير نفهم علاش كضحكي معيطة عليك انا باش ضحكي؟
وردة : وحق الله الى غادي تشلليني انت نهار لي باسك عجبك الحال كنتي فرحانة ودابا منين وصل وقت المعقول وليتي خايفة
ماريا(كتمشي وتجي متوترة) :
- هاداكشي بوحدو وهادشي بوحدو انت ماشفتيش السيد كيفاش كيهضر وكيفاش كالها بعدا بحال الى شي واحد محلف عليك هكاك
وردة : وراه من حقو الهبيلة السيد راه كيبغيك عادي
ماريا(كتهز فيديها) :
- لالا شكون كاليك عادي معاديش جواد ولا فشكل بحال شي وحش كون غير هربت لشي جزيرة مايعرفني فيها حد
وردة : واش من نيتك ديري عقلك شوية راه كيبان ليا داكشي بي وقع ليك أتر ليك على دماغك يمكن تبتي الارض واش كتبغي جواد ولالا وبقاي ديري عليه هاد الحماق يسمح فطاسيلتك راه كي جبح دنحل باغيينو حيدي نيت من طريق باش يلقاوها خاوية..
ماريا : جواد كيبغيني انا مغاديش سشوف فشي وحدة من غيري
وردة : وغير جربي اخيتي وغادي تشوفي بهاد تصرفات والله حتى يسمح فجمل وماحمل ويزيد خلفة مايبقاش يتلفت وراه هاد الخلعة وتوتر راه ضروري مع اي عروسة جديدة داخلة على حياة جديدة ستغفري الله ومايكون غير الخير...
ماريا(عيات وكلسات) :
- أمين ياربي أمين كنتمنى والله اوووووف..
وردة : متخافي والو كولشي ايدوز مزيان دابا تشوفي...
ماريا : يلاه نخليك دابا بوسي ليا ليليا حتى لمن بعد...حطات تيليفون وسهات فكلام وردة شوية تفكرات هضرتو ليها وشوفاتو ركباتها الخلعة من جديد..
ماريا(وقفات) :
- لالا هادشي بزاااف(خدات تيليفون ودوزات نمرة وسيم)..
- ألو وسيم انا وقت الغدا انجي انا وظار اه مغديين تماك بغيت نشوفك ونهضر معاك فشيحاجة ضرورية...وحتى نجي مايمكنش نشرح ليك فتيليفون...يلاه بسلامة حتى نتشاوفو اوك بسلامة...قطعات مع وسيم..يد دايراها على جنبها ويد كتحك بيه راسها رجليها كتلعب بيهم دايخة معارفة ماتقد ولا توخر..

فرح : غير هنا عفاك...وقف طاكسي بفرح نزلات خلصاتو...رجعات الصرف لساكها...يلاه بغات تقطع شانطي بانت ليها طوموبيل جايا جيهتها نيشان...كونما خطفات رجليها كانت اتكرضهم ليها..الخلعة شللاتها خلاتها كتعاير بلاما تحس..
- بغيت ليك موصيبة تصيبك حيوان تكول واش طريق ديالك بوحدك منين مكتعرفوش تسوكو لاش واخدين بيرمي العيب على لي علطيينو ليكم...حتى هو ماشي من العاكزين رجع بلور...او وقف قدام رجليها...هبط الزاج كيخنزر فيها...
- عاودي شنو كلتي؟
فرح(ضحكات بستهزاء) :
- كان خاصني نقلع شكون راه باين العربون..
ياسين : تعلمي تهضري بحترام شوبة لي شافك مايكولش عندك هاد المستوى
فرح(خرجات فيه عينيها) :
- اشمن مستوى حسن منك انا بعدا مكنسوكش بحال لهماج..فتح باب طوموبيل بجهد ونزل ليها كيبان طويل عليها وهيا قدامو بحال القزمة..
ياسين(هاز حاجب ومهبط التاني) :
- عاودي اش كلتي ضاسرة مع راسك البرهوشة ماشي غير حتارمناك تزيدي فيه جمعي راسك والى مالقيتي لي يجمعك انا نجمعك..
فرح(خرجات فيه عينيها وكشاكشها خرجو) :
- عند بالك خلعيتيني انا الحمد لله جامعة راسي شوف انت راسك غادي تكول واش شانطي مكتوب بسميتك ماشي أدكتور دير لي بغيتي غير حشمت على وجه ماريا اما انسمعك خل ودنيك
ياسين(كيضحك بستهزاء ويطلعها ويهبطها) :
- علاش انت مزال كاعما هضرتي الى كان هادشي غير سكاتك علم الله الى زدتي هضرتي مكاين لاش نضيع وقتي مع وحدة حمقة بحالك..طلع لطوموبيل ومع ذلك ماسكتاتش ليه..
- مكاين شي هبيل ولا حمق بحالك انت كان خاص تكون طبيب ديال الحماق ماشي ديال ترويض الطب بزاااف عليك الخير لي دير هو درق وجهك كتشدني ضيقة سير سير غبر..
ياسين(خنزر فيها ديمارا ومشا)..
- على ماركة كيدايرة ياربي على صباح أستغفر الله العظيم ياربي...قطعات الشانطي لجهة لوخرا ودخلات لكافي..
****
فمكتب كبير بيرو بلون قهوي داكن مع كرسي من الجلد الفاخر كالس جواد...كيدقق فالحسابات محيد لافيست ديالو مطلع كمايم ديال شوميز...وخدام...دقان فالباب :
- وي ...دخل واحد الشاب فأوخر العشرينات هاز ملفات فيديه حطهم لجواد :
- سي جواد اتلقا الشحنات لي صدرنا أخر هاد العام شحال من شحنة خرجات من عندنا ديال الفواكه بوحدها والألبان والحليب والأجبان بوحدها...أما الملف لي فلون اسود هاداك فيه جميع المشاكل لي وقعو على طول السنة وحتى من الاخطاء لي وقعات..
جواد(بهتمام) :
- الشحنة الاخيرة ديال هاد الشهر خرجات من المعمل ولا مزال؟
- لا أسيدي خرجات وتلكا ليها لكليان وراه خلص الملف الأزرق اتلقى فيه كاع المعلومات إيمتا سلمنا السلعة بالوقت والملف الأبيض اتلقى فيه شحال من شحنة خاصنا نخرجو فهاد العام طالعت عليه ولقيت بلي من بين الفواكه طالبين التفاح بكثرة...خاصنا أنوجدو ليهم السلعة ديالهم نهار 1 ف le mois 11...
جواد(كيقلب بين الملفات كيقراهم بهتمام) :
- جلال مشافش هاد الملفات مطالعش عليهم؟
- لا اسيدي مزال مطالعش عليهم...
جواد : داكوغ صافي انت دابا غير سير كمل خدمتك..
- واخا سمحليا...حدر راسو فتح الباب تلاقا بجلال داخل...
جواد(شاف حط الوراق وستيلو وناض) :
- بغيت انعرف فين كتغطس أصاحبي؟
جلال : داتني عيني مع سهرت لبارح مانعسش كنحس براسي مدكدك..
جواد(غمزو كيضحك) :
- خاصك شي حمام تركي فاعل تارك وشي ماساج😉
جلال(بخوف) :
- لالة الى كان على داك المساج مابغيتش اخويا اخليني نمشي لحمام بلدي مغربي وناخود كسال يكسلني ولا داك الحمام تركي واخد الشنعة غير هكاك بااارد نمشي باش نسخن نرج بالبرودة بلااااش...سونا تيليفون جواد هزو طلعات ليه نمرة عز الدين 
جواد(تكا على لكرسي كيلعب فيه برجليه) :
- وي عز الدين الحمد لله الامور حاليا مزيانة أمضرا لقيتو شيحاجة..؟
عزي الدين : وي جواد لقبنا شي ملفات فدارو او واحد لكلي عرفتي قسما بالله هاد الناس حاشة نكول عليهم حيوانات هاد الكائنات ماعرفتش منين جاو..
جواد(مغوبش وبصوت رجولي) :
- هيا طحتي كاع على ريوس لكبار؟
عز الدين وكتااااار صراحة ذياب دار معانا مجهود ودار فينا خير كبير الكيرا كانت اتنوض
جواد : اش كتكول أصاحبي لهاد الدرجة؟
عز الدين : حتى من بعد ونعاود ليك المهم تاصلت على وديت نزار او ربيع...عطاو أقوالهم وتحولو لمحكمة..
جواد : بشحال ايتحاكمو؟
عز الدين : ماعرفتش داكشي كيبقى ديال المحكمة المهم نخليك دابا حتى لمن بعد...قطع جواد وشاف فجلال لي كايتسناه يكوليه اش واقع..
جلال : اهاه اش كاليك؟
جواد(بدون إهتمام) :
- نزار وربيع ايدوزو لمحكمة
جلال(بلا مبالاة) :
- لي دار ذنب كايستحق لعقوبة..
جواد(هز لافيست ديالو) :
- انا غادي دابا ماريا ودارهم مغديين عندنا اندير بحسابك..
جلال : كون غ...(قاطعو) :
- ديك كون عازدها لراسك ماشي ليا يلاه الله يعاون نتسناك..خرج وسد الباب وراه قبلما يجاوبو جلال..
****
الشدائد ﻣﻬﻤﺎ ﺑﻠﻐﺖ وتعاظمت ﻻ تدوم ، ﻓﺮﺣﻤﺔ الله أعظم وفرجه أقرب 
ﻓﻼ تيأس ولا ﺗﻘﻠﻖ ، وقل ﻳﺎا ﺣﻲ ﻳﺎا قيوم ﺑﺮﺣﻤﺘﻚ أستغيث.. ياارب 💙

فطاج لتحت كالسة ماريا دايرة رجل على رجل وشادة حناكها كتلعب برجليها وتفكر..سومية مقابلاها وشاداها الضحكة..
- ماريا فخبارك انبدا نكتب..
ماريا(الصمت)
سومية(غوتات) :
- ماريااااا..
ماريا(كمزات من بلاصتها) :
- اويلي مالكي كتغوتي؟
سومية : اختي راه بسيف مانغوت من صباح وانا كنهضر وانت والو الى جاوبني داك الحيط ماتجاوبيش انت..
ماريا : شنو كلتي؟
- كلت ليك انبدا نكتب بغيت نولي كاتبة
ماريا : كاتبة ديالاش الشعر روايات ديالاش؟
سومية : روايات أشمن شعر..
ماريا(رجعات بلور وشافت فيها) :
- مزيان ولكن باش اتبداي روايات ديال الحب ولا دراما ولا رعب ولا روايات بوليسية؟ راه كاين بزاف ديال الانواع خاصك تحددي اشمن نوع
سومية : لا ويلي على بوليسية الرعب ماعنديش معاه اساسا إن شاء الله انكتب روايات عاطفية تقدر تكون خيالية ولا حقيقية..
ماريا : مزيان الالة مبروك مسبقا غير بيني حنة يديك جاتك شي فكرة فراسك ولا مزال؟
سومية(كتشوف فيها) :
- جاتني صراحة منقدرش نكوليك دابا ولكن من بعد حتى يدوز عرسك وشهر العسل امم هههههه وديك ساع نكوليك..
ماريا(تقبض قلبها وجاتها الخلعة) :
- غير كدكري حس العرس كتشدني سخامة الباردة وتبوريشة وقلبي كيضرب 180 درجة
سومية(شافت فيها بستغراب) :
- لا من نيتك ياك كتبغيه وكيبغيك ومن بعد مناش خايفة مافهمتش؟
ماريا : انا لي عارفة انا أخليني ساكتة
سومية(كضحك) :
- صافي فهمت
ماريا(هزات حجبانها) :
- اش فهمتي؟
سومية : اي بنت راه كتخاف من داك النهار اكوني هانية ماشي غير انت بوحدك ولكن ماعندك مناش تخافي اصاحبتي التفاهم هو اساس كولشي ..
ماريا(وقفات) :
- وراه عراااافت هادشي ولكن راه ماشي بيدي الخوف فيا اه فرحانة مغاديش نكر ولكن الخلعة..
سومية : مكاين لاش تخلعي مغايكون غير الخير...يلاه نطلعو لفوق شوية وغادي يجي بابا ويجي جواد يلاه..حدرات ماريا يديها وطلعات لفوق هيا وسومية...دخلات ماريا لحمام وخرجات بزربة حيت سمعات تيليفون كيسوني هزات لقات جواد..
ماريا(صوتها فيه الرعدة) :
- ألو
- وي حبيبي صافا؟
ماريا : الحمد لله وانت؟
جواد : مزيان خرجي انا كنتسناك..
ماريا : ولكن بابا مزال ماجاش؟
جواد : هاهو هنا حتى هو كيتسنى كاينة شيحاجة خرى..
ماريا : لا صافي انا جايا..دارت تيليفونها فساك ومشات عند مليكة وسومية :
- جواد وبابا على برا كايتسناو خاصنا نمشيو..لبنات غادي يتكلفو بينما رجعنا..
مليكة : واخا النتي سبقينا احنا جايين..خرجات ماريا هيا لولة وتبعوها..طلعات حدا جواد سلمات عليه بحال شي واحد باغي يكير عليها..
جواد : حبيبي يكما مريضة؟
ماريا : انا لا وقيلة ايضربني لبرد
جواد : صافي فكريق ناخود ليك دوا
ماريا : لا ماتعدبش راسك حتى لدار وانشرب دوا كاين فدار..
جواد(بصرامة) :
- عمري مزال نسمع منك هاد الهضرة ديال نعذب راسي اول حاجة انت اتولي مراتي يعني مسؤولة مني فهمتي مابقاتش ديك القضية ديال نشري لراسي ولا منكولش ليه نخبي عليه فهمتيني😑
ماريا : مابغيتيش تنسا ياك؟
جواد(ديمارا) :
- لا مكنساش غير كنتناسا...سكتات مجاوباتوش ..حاضيها بنص عين المنظر ديالها ضحكو مابغاش يبين ليها كيبان فيها الخوف ديال دنيا كلها تكول غير بغا يغتاصبها..
- حبيبي شنو بان ليك نهبطو لفاس ناخدو دهاز ولا نهبطو لرباط؟...دارت عندو :
- علاش انمشيو ختى لفاس ولا رباط ناخدو غير هنا نيت
جواد : فاس معروفة بالبلدي وتقليدي كولشي فيها حر اما الرباط فيها حوايح عصريين...خصوصا لي بوتيك ديال لي شوميز ولي غوب خطيرين...طلعات معاه تبوريشة بانت على عينيها كيفاش كتشوف فيه...وجها ولا بحال مطيشة..
جواد(داير راسو مكلخ) :
- علاش سكتي؟
ماريا(كتبلع ريقها) :
- وباش عرفتي انت هاد لي بوتيك؟
جواد : انا ماشي ملاك احبيبي هابط من السما باش نكونو مفاهمين كل واحد وعندو ماضي ديالو عارف شنو كيجي مع النرا عندي دوق كيما كيكولو(غمزها)😉😉...

ماريا(حالة فيه فمها مصدومة) :
- دابا انت بغيتي تديني فين كانو كيشريو صحاباتك لقدام لي شوميز نتقدا من تما ياك لا زوينة هادي وشكون كاليك انا اصلا كيعجبني دوق ديالهم وشكون كاليك دوقك انت غادي يعجبني اممم..
جواد(عاجبو لحال كيلعب ليها على أعصابها عوج فمو بعدم هتمام) :
- المرة كتبغي تكون جريئة فالفراش ديال راجلها ولالا كتبغي تبين كاع المفاتن ديالها داكشي باش كتاخود لي شوميز لي هوما قصار مشبكين حرير اما الالوان كتاخود لوغوج ولو نواغ كرونة مثلا يعني قليل فين تاخد غوز ولا بلو
ماريا(تبسمات بخبث) :
- لا احبيبي انت غالط الله مافرق الريوس حتى كل واحد كيفاش كيفكر كل وحدة وهيا انا مكنحملش لقصير انا عوالة ناخود لي شوميز يكونو طوااال حتى لحظا رجلية ويكونو مستورين بالبينوار ديالهم ومايكونوش مشبكين يكونو طالعين اه ولحمر ولكحل مكيعجبونيش كيعجبن الخوخي ولخنوني...جواد تفركع بضحك من قلبو كيضحك ماقدرش يحبس...هيا كتشوف فيه ملامحها باين فيهم الاستهزاء حاضياه حتى سالة الضحك ديالو :
- صكعة انت وحق الله كيفاش هاد قضية خنوني تاني مافهمتش شي لون جديد هذا خرجوه وانا مافخباريش ولا شنو؟
ماريا : بحال هكا المهم اناخود خونوني ولخوخي ولكاكي..
جواد : هادشي عندك ولا ديسير عالام انت والله مافهمت فيك والو واخا يالالة مايكون اخاطرك...المهم هو ناخدو لي بغيتي وكاين حتى بةتيك خاص بالحوايج الداخلية دوبياس إيكسيتيغا...
ماريا : ياربي صبر من عندك ياربي
جواد : شنو كلتي احبيبي؟
ماريا : كتليك ماعنديش معاهم
جواد(شاد فيها مزيان) :
- لا حبيبي حشومة وخاصك تبرعي راجلك خاصني نسقي عيني ولالا
ماريا : عينيك ولات جردة غرس هيا باش تسقيها جواد واش باغي تحمقني هاد النهار؟
جواد : علاش انا شنو كلت واحد كيتفاهم مع خجيبتو خاصنا نتفاهمو من دابا باش نبظاو نوجدو ياك غير انا لي غادي نشوفهم احبيبة ماشي البراني نمتع عينيا بمراتي حلالي اناخد ليك حتى ستغينك واحد الصديق عندو ديموديل واعرين ايعجبوك
ماريا(خرجات فيه عينيها صافي حسات بوجها ولا ماطيشة) :
- لا لا مكنلبسش انا داكشي
جواد : كيفاش داكشي مافهمتش؟
ماريا : هادو سترينغ ولا ماعرفت ليهم مكنلبسهمش دايرين بحال صنادل ديال صبع لا انا انا السليب الى مكان طالع حتى لكرشي منلبسوش لبسو انت..
جواد(ميت بضحك) :
- ههههههههههههههه كيفاش لبسهم انت واش انت بعقلك ولا مالك؟
ماريا : لا راه واش انت لي بعقلك واش محرشك شي حد عليا ولا كيفاش
جواد(كيشوف فيها بحنان) :
- أحبيبة هادشي راه عادي جاري بيه العمل فهمتيني متاخديش الأمور بحساسية انمشيو رجلي برجلك وناخدو هادشي كامل بغيتي نسافرو على برا ماعندي حتى إشكال احبيبة المهم تاخدي كاع لي بغيتي وشيحاجة تكون واعرة باش نمتع عويناتي بحبيبي😉
ماريا(دورات وجها لسرجم) :
- أستغفر الله ياربي تصبرني ولايني مقزدر(دارت خنزرات فيه وهو حابس الضحكة غير بزز)..نزل راه وصلنا نزل واقيلة اليوم ماخديتي عصير الحامض ديالك داكشي باش كتبان ليا ماهواش..
جواد(بدلال وحنان) :
- بالعكس احبيبة عمري مكنت بيخير بحال هاد النهار عرسنا قرب وانتجمع مع حبيبة ديالي ومنكونش مزيان خايبة فحقي...جرات السمطة وهبطات كتبغم...بغات تنتف راسها سبقاتهم سونات فالباب فتحات هنية ودخلات دافعة راسها ماكرهاتش تخبط راسها مع اقرب حيط وتنسى هادشي لي كاليها..هو وقف حاضيها حتى دخلات كيدور فعينيه مبسم وعاجبو الحال..نباه احمد من لور..
- ولدي ياك لاباس؟
جواد(شاف فيه) :
- لالا اعمي مكاين والو يلاه ندخلو..سبقو احمد وسومية ومليكة عاد تبعهم هو من لور..
- ماريا(تفاجآت) :
- ماما انت هنا؟
حورية : داز ولدي جلال الله يكتر خيرو جابني انا وعمك سيفطو جواد..
عبد الرحمان : مدنهار كبير هذا مرحبا بيكم الالة حورية مرحبا أسي محمد..
محمد : الله يكبر بيك لهلا يخطيك..
ماريا : فين وسيم او وردة كاعما شتهم؟
عبد الرحمان : شوية ويهبطو ابنتي...مجا فين يكملها حتى هبط امين هاز ليليا لي غير شافت فماريا بدات تنطر بغاتو يهبطها باش تمشي عندها...وردة ثورية وأروى وسيم هاجر او هشام...كولشي هبط..مشات ليليا كتعكل تلاحت على ماريا هزاتها حطاتها على رجليها كدوز ليها على شعرها وتعنق وتبوس فيها..جواد مقابلها داير رجل على رجل وحاضيها..حطاتها ماريا او وقفات..
ماريا : وسيم اجي معايا بغيت نهضر معاك..
وردة(بشك) :
- أفين غاديين بلا بيا
ماريا : واخا الالة اجي لي بغا يجي ايجي نوضات وسيم جراتو لجردة تحت انظار جواد لي عارفها علاش بغات تهضر معاه ضحكاتو خايفة على والو مركبة الرعب فراسها بوحدها...

جواد شاف فأحمد :
- عمي بغيت نستغل الفرصة ماحدنا غير بوحدنا نهضرو على الصداق
أحمد(تحرج) :
- اش غادي نكوليك أولدي الحمد لله حنى ماشي باغيين نبيعو بنتنا وماشي طماعة بخيرنا وخميرنا الصداق كيبقى رمزي أهم حاجة عندي أولدي هو تهلا فيها وديرها فعينيك وتبغيها كيما انا كنبغيها اما الصداق وغيرو كيبقى غير ثانوي...هنا هضر الحاج :
- عندك الصح أسي احمد ولكن الصداق واجب هداك ضروري منو خاصها تاخدو...
أحمد : تبارك الله جواد راه دار ليها كثاار من الصداق باقي كاعما تزوج بيها حقق ليها الحلم ديالها وخدا ليها قهوة وجهزها ليها انا منقدرش نكوليك كيف كلت البنت مكتباع مكتشرا حنى ناس باغيين الراحة ديال ماريا هاديك هيا أهم حاجة...عرفتي شنو اولدي خلي حتى تفاهم انت وماريا وتافقو اما باش نكوليك انا منقدش اولدي حنا مابغينا منك والو..
عبد الرحمان : كلامك اسي احمد هو لكبير
أحمد(شاف فحورية) :
- ولالا أحورية؟
- بصح عندك الحق الصداق فلوسو كيمشيو تقدر دير بيهم دهبها ولا تخبيهم وزيد وزيد ولكن بقات فالعشرة ودوام شحال من واحد عطا الملاين ولكن فالاخر العشرة حرارت دوك الملاين مابقاتش حلاوتهم...وكاين لي عطا القليل وعاش هاني اولدي راه بقات فدوااام زواج ليلة راه تدبيرو عام وكيف كال أحمد تفاهم انت وياها وديك ساع قررو وحنا معاكم فيه..
جواد(اشر براسو) :
- ماريا تستاهل اي حاجة فهاد الدنيا وحتى حاجة ماتغلى عليها فلوسي كاملين وكاع لي كنملك مايغلاوش عليها نعطيها لي قدامي ولي ورايا ومايجيوش قد ماريا..
أحمد : الله يكبر بيك اولدي عارفين ليكاين
جواد(دار رجل على رجل) :
- ماحدنا مجموعين عندي منكول ليكم
عبد الرحمان(بتساؤل) :
- الله يسمعنا خبار الخير..
جواد : نساحبت من المجلس
أمين : وايلي وعلاش؟
جواد : تضغطت بزاااف الخدمة مابين هنا وعلى برا والمجلس وطلبات ديال الناس بزاااف حسيت براسي تضغطت بزااف
عبد الرحمان : وشنو أدير؟
جواد(كاعما هامو ملامح الامبالاة على وجهو) :
- خدا بلاصتي الناجي 
عبد الرحمان : الأستاذ مصطفى الناجي؟
جواد : هو هداك دابا رتاحيت هكا نقدر نوفق بين الدار والخدمة والخدمة لي على برا وللاوطيل لي فسعيدية...نقز امين :
- اجي شحال بقا على الإفتتاح ديال لوطيل؟
جواد(كيفكر) :
- شي 3شهور هكاك علاش؟
أمين : علاش مايكون عرسكم نهار الافتتاح وديروه تماك فسعيدية شنو بالك؟
عبد الرحمان : فكرة مزيانة هادي
جواد : ماعرفتش نشوفو لعروسة بعدا شنو بغات الرأي ديالي بوحدي مكافيش..
أحمد : فينما كان اولدي غير الله يتاويكم لخير ويجمع بيناتكم بالخير..
جواد(تنهد وتبسم لأحمد ) :
- أمين ياربي..
****
كالس وسيم داير راجل على رجل شاد فحناكو كيخنزر فيها غادية جايا وكولشي مجموعين كالسين مقابلينها وردة سومية ثورية وأروى او وسيم ..عصباتو وطيرات ليه داك شوية ديال لعقل لي كان عندو مابقاش قاد يصبر خبط الطبلة حتى نقزات او وقف :
- واش اتبقاي غادية جايا عليا بحال داك البوليسي لي فيه النوبة ديال العسة راه الحماق هدا 
ماريا(وقفات كتشوف فيه) :
- واش انا مخلوعة وعلم الله بحالتي وانت كتغوت عليا فبلاصة ماتلقا ليا حل
وسيم(تبسم كيصفق بيديه) :
- الالة الحل ساهل ماهل فسخي بوها هاد الخطبة انت اش بغيتي بيها غير صداع الراس والمشاكيل اش بسنك الالة وبين شي زواج غير الخير والاحسان مالك كتعلقي فين تفلقي كنتي هانية بلا راجل بلا زواج ولا ولاد ديري بكلامي وفرتكي هادشي كامل وعطي لسيد خاتمو ومريضنا ماعندو باس😉
ماريا(كتخنزر فيه مامتيقاش شنو كيكول عينيها تفيكساو عليه ماكرهات طير عليه تقجو بالفقصة لي حاسة بيها) :
- واش من نيتك ولا كتفلى عليا اويلي أستغفر الله العظيم انا نتفرق على جواد بغيتيني نتسطى..
وسيم(ولا كيغوت بحال شي واحد صافي تسطى) :
- وراه انت لي اطيري ليا شوية ديال لعقل لي كنكساب واش بنا ليك فالبلان واش انت شوية لباس انت راه خاصك شي حصة فبويا عومار ولا برشيد عيني فيه يخ منو شدوها عليا قسما بالله حتى بغات تشللني هاد البنت كون امشيت اليوم وماسمعت هاد تخربيق صبر من عندك ياربي تصبرنا مع هاد الخلقة..
وردة : ماريا وسيم راه عندو الحق كاملنا تخلعنا عرفنا هادشي عادي ولكن انت زدتي فيه بزااف وزايدون اش فيها الى مشا معاك وتقديتو عادي ومكاليك غير صح مالك اتلبسي ليه جلابة وعاي شوية...كلسات ماريا شدات حناكها كتفكر..
- اوووووف..
ثورية : ختي ماريا جواد راه كيبغيك وعمرو مغادي ياديك شتي أختي مدام كتبغيو بعضياتكم كاع داكشي لاخور مكيهمش هو راه باغيك انت فهمتي اختي كاع الوسواس والخلعة حيديها من راسك خاص تكوني فرحانة وكتوجدي السيد لي كتبغيه اتزوجي بيه ايكون ليك وانت ليه بالعكس راه خاص تكون مقاداك فرحة اما هادشي كامل راه غير خوف نعلي شيطان وحيدي كاع الوسواس من راسك او وجدي لنهارك وفرحي بيه..شافت فيها ماريا وبان على وجها الراحة فعلا كلام ثورية ريحها بزاااف..
ماريا(تبسمات) :
- بصح عندك الحق كلامك معقول..(شافت فوسيم)شفتي الناس لي كتعرف تهضر وانت بغيتي تاكلني الله يستر بالعكس خاصك تهضر معايا بحنان وترجع ليا عقلي
وسيم : الحمد لله لي عرفتي راسك ماعندك عقل ياربي إيمتا هاد البنت تزوج ونتهتى منخا خلاص ياربي...

ماريا : بحال الى حاطني على ظهرك بااز...خرجات هنية عندهم علماتهم بلي الغدا واجد...دخلو تجمعو على طبلة وماريا كتحاول تفادا تشوف فجواد...الجو العائلي لي على هاد الطبلة عمرو مكان فالقصر من ايام المرحومة ومن نهار تبنا هاد القصر بحال هاد الفرحة والبهجة مدخلاتش ليه(هكا كال عبد الرحمان) :
- كنا فين وفبن الى تجمعنا على طبلة وحتى الى تجمعنا شي مكيهضر مع شي السكات وفاش كنساليو كل واحد كيسد عليه فبيت انا فبيت ودراري فبيت وجواد فالمكتب...هذا الى كان هنا أغلبية ديال الوقت كيكون برات المغرب كيجي غير الى عندو شي خدمة والى ايطل علينا مرة مرة صافي..أما دابا شوف كيف ولينا الأمور تبدلات الحمد لله اول حاجة حيت دخلات بنتي ماريا لحياتنا(حط يديها على يديها) الله يرضي عليها بدلات بزااف ديال لحوايج بضحك ديالها والعفوية ديالها رجعات فينا الروح...(شاف فوردة) وحتى بنتي وردة وحفيدتي الحمد لله الدار بدات كتعمر سي احمد ولالة مليكة من اطيب الناس وحتى لالة حورية وسي محمد كل واحد زاد شيحاجة لهاد الدار لي بنيتها طوبة طوبة من أول صالير خديت ولدي امين مستقل بخدمتو او ولدي سندي وكتافي سبع ديال الدار ههههه مابقاش داك الولد القاصح السلطوي الحمد لله تبدل وهادشي كيرجع لبنتي ماريا الحمد لله لي ربي مطول ليا فالعمر حتى كلست معاكم هاد الكلسة وبغيت ربي يزيد طوليا فالعمر حتى نشوف حفايدي كاملين...هاحر غرغرو عينيها لدموع :
- الله يخليك لينا ابابا ويطول لينا فعمرك ياربي
الحاج : أمين ابنتي...يوسف بقا ساكت متردد ولكن مايقدش يبقى ساكت خاص يبلغهم بلي كاين :
- مدام انتوما مجموعين بغيت نكوليكم شيحاجة...شاف فيه باه وخوتو دقة وحدة بستفهام وتساؤل :
يوسف : غادي نرجع لفرنسا إن شاء الله واحد صاحبي اسس خدمة ديالو تما خدا فيرما وغادي يولي ينتج الاجبان غادي نخدم معاه..ستغرب جواد لخوه :
- وانت اش فهمك فالاجبان وفين عمرك فهمتي فهادشي؟ وعلاش ماتخدمش معانا فشركة الى مابغيتي هادي نسيفطك لأي فرع اخور
يوسف : ماشي بضرورة نفهم اخويا سمحليا ولكن مابغيتش نخدم معاك ومابغيتش نتكل عليك ولا على العائلة كيما امين دار خدمتو راسو حتى انا بغيت نتبت داتي ونخدم راسي...مليت من الجو ديال لمدينة الفيرما اتكون مزيانة ليا خاصني نعاود نفورماتي راسي من جديد هاد السيستيم مامخرجني فين انا غادي وكنزيد فالعمر خاصني ندير شيحاحة فحياتي مانبقاش هكا مكنفيد فوالو غير زايد..
أمين : وأخيرا خويا بدا كيفكر بحالو بحال الناس
جواد(بحزم) :
- واش متيقن من راسك ماشي غير تمشي تعيا وتجي كتجري كلمة الرجال؟
يوسف : كلمة الرجال اخويا مغادي نرجع إن شاء الله حتى نحقق داتي كنواعدك..
جواد : مزيان داكشي لي بغينا..
أحمد : الله يعاونك اولدي مزيان راه كيكولو خدم يا صغري لكبري...خدم ماحدك باغي صغير وبصحتك ستاغل الفرصة...سومية حادرة راسها فطبسيلها ماهضراتش مشافتش فوجهو نهائيا لا هيا لا ماريا ماتسوقوش لهضرتو بحال الى كاعما هضر...سلاو لغدا وخرجو لجردة واخا كان البرد شوية ولكن الشميسة مجهدة...جر جواد ماريا وخلاهم هوما سبقوهم..
جواد(بشك) :
- واش كتهربي مني ولا غير جاب ليا الله؟
ماريا(دارت راسها مكاين والو) :
- أنا لا علاش انتهرب منك؟
جواد : كتجاوبي سؤال بسؤال أجي معايا بغيتك
ماريا : ولكن حشومة نخليوهم
جواد(خرج فيها عينيه بصرامة) :
- مااااريااا اجي معايا...جرها من يديها بحال شي بنية صغيرة....ورا لقصر وبضبط الكوخ لي كان سد عليها فيه...مع دخلات تفكرات نهار سد عليها شحال غوتات وخبطات وعايرات ودعات فيه مكانتش كتحملو ديك ساع ودابا هاهيا داخلة معاه بكل إرادتها والمشاعر ديالها تبدلو 180 درجة..حسات بيديه معنقينها من لور وصوتو بحال الهمس حدا ودنيها دار ليها تبوريشة :
- كتفكري نهار سديت عليك هنا؟..
ماريا(تبسمات) :
- كتعتارف بلي خطفتيني وسديتي عليا
جواد(بصوت مرح) :
- ممكن يقدر اه يقدر لا ولكن انت لي خليتيني نتصرف معاك بأسلوب همجي ولا نسيتي نفكرك؟؟

لالا مانسيت والو ولكن راه اللومة كترجع ليك انت ماشي ليا انا انت لي كتجنني وكتعصبني..
جواد : انت لي كنتي كتبغي ديري لي بغيتي ماكتبغي شي واحد يتحكم فيك ولا نسيتي امدام الإبراهيمي؟...ضارت عندو وصدمة على وجها مخرجة عينيها فيه..
جواد : مالك؟
- كلتي مدام الإبراهيمي
جواد(كيدوز صباعو على خدها وعنقها) :
- علاش مغاديش تولي مدام الإبراهيمي اممم؟...حركاتو خلات ماريا دوب ماعرفات تبقى واقفة ولا تكلس كتحس براسها شوية واتسخف بين يديه فمها نشف جاتها واحد الحشمة مكانتش فيها :
- مم بغيت نكلس كنحس برجليا فاشلين عليا...بعدات عليه ومشات كلسات جاها البرد بحال الى خواو عليها الثلج..حس بيها مخلوعة ومتوترة تبعها وكلس حداها..
جواد(كيشوف فيها بحنان وحب عينيه كيبريو بحال القمرة الى ضوات وسط الما) :
- حبيبي (شد ليها إيديها) واش خايفة مني؟..هزات ماريا فيه راسها وجها حمر :
- انا لا علاش غادي نخاف منك☺(ضحكات ليه)..
جواد(ماعجبوش الحال) :
- ماعرفت حسيت بيك من لبارح فاش دويت ليك على العرس وانت ماشي حتى لهيه باردة مابغياش حتى تشوفي فيا غير خايفة نمسك كتهربي...
ماريا(حسات بيه تقلق من شوفاتو ليها وملامح وجهو لي تبدلو) :
- لا ماشي هكاك مكاين والو...(قاطعها) :
- ماريا سمعيني مزيان شنو غادي نكوليك ديجا كلتها ليك مغانبقاش غير نعاود هضرتي انا ماشي دري صغير ولا عاد مراهق ولا لي جامع بيناتنا نزوة ولا كنتفلاو باغيك على فورمتك كنشوف فيك غير جسد بدون روح هادشي مافياش كون بغيت داك النوع عطاهم الله مغاديش نوحل فيه كناكد ليك تسميها غرور ثقة فنفس سميها لي بغيتي ولكن انا كنبغيك انت شخصيتك عقلك تصرفاتك تفاهمنا ماريا انا كنبغيك انت دخلي هادشي لدماغك الله يرضي عليك اه كل إنسان فهاد الدنيا عندو رغبات ديالو هادشي خلقو فينا الله منقدروش نبدلوه ولكن انا ماشي حيوان لهاد الدرجة لي نبغيك غير على قبل النعاس ماعنديش إشكال مانقربش ليك نهائيا حيت كيف كلت ليك باغيك انت انا ماشي مكبوث ولا هابط من شي كوكب عمرو شاف لعيالات باركة غير داكشي لي دوزت راه كافي أبنت الناس دخلي هادشي لراسك الى دويت معاك على لحوايج ولا كلت ليك ايمتا نتجمعو تحت سقف واحد غير ضحكت معاك نشوف ردة الفعل ديالك واش حتى انت متشوقة ايمتا نكونو انوصومبل ولالا اما قضية لحوايج نشوفك بيهم اه راه من حقي حيت اتولي مراتي ولكن ماشي بداك المفهوم الغالط لي عندك كتخططي وتهندسي غير بوحدك ودايرة حالة ومعيطة على وسيم راه ماشي اي حاجة خاصك تكوليها لناس لي حداك اه عارف بلي هادوك صحابك وعزاز عليك ولكن كاين شي حوايج كايبقاو بين المرا وراجل مخاصهمش يتكالو كان بإيمكانك تجي عندي...تهضري معايا راه داخلين على زواج اماريا ماشي كنتفلاو...حتى لعرس الى بغيتينا نأجلوه ماعنديش مشكيل الى ماكنتيش مستعدة فاش نخرجو دابا كوليها قدامهم بلي مامستعداش...شيحاجة خرا من غير هادشي راه مكايناش مابغيتش نبقى نعاود هضرتي جوج دالمرات وانت عارفة بلي اعدا حاجة عندي نبقى نعاود الهضرة...كلام واحد كنكولو مرة وحدة...فكري فهادشي مزيان...(حيد يديه من يديه ناض بزربة وخرج)...بقات كالسة وساهية هضرتو كتردد فودنيها..
ماريا(كتعاير فراسها) :
- كديري اماريا غير لفعايل...هاني قلقتو دابا وراه من حقو يتقلق ولكن حتى انا راه خايفة مافيتش عليا راه اول مرة انتزوج اي وحدة بلاصتي راه اتخلغ وتخاف وهو كيخوف فيا وبغاني منتخلعش راه مايمكنش هادي....اووووف ودابا فكيها اماريا فكيها هاهو تقلق منك...(ناضت وقفات كدور وتفكر فشيحاجة لي تصالحو بيها مالقات حتى حاجة خاصها تفكر مزيان مخاصهاش تخليه مقلق منها..خرجات من لكوخ...وتلحقات بيهم...مشات نيشان كلسات حدا وردة تحشات فالقنت ديال لفوطوي مقابلة معاه مكايشوفش فيها كيتسنط لوخرين شنو كيكولو كالس داير يديه على جناب لفوطوي مفرق رجليه جامع غوباشتو ملامحو باين فيه مقلق بزااف)..
ماريا : قفرتيها اماريا..تحدرات عندها وردة :
- اش كلتي؟
ماريا(نتابهات ليها) :
- أ لا والو ماكلت حتى حاجة😊...

الحاج : إيوا حددتو نهار العرس ولا مزال؟..
جواد(مغوبش) :
- ماريا بغات نأجلوه واحد شوية...هزات فيه عينيها مخرجاهم حطان الباطل ساهل..
الحاج(شاف فماريا) :
- علاش أبنتي؟
ماريا(تحرجات) :
- لا أعمي مابغيت لا ناجلو لا والو غير كلت زعمة خاصنا نوجدو وصافي(ولات دخل وتخرج فالهضرة)..
الحاج : كولشي دابا ولا موجود ماتحتاجي ابنتي لا تخيطي لا تفصلي..جاوباتو حورية :
- بصح عندو الصح دابا كولشي تاخديه طالع من غير الحوايج لخفاف قفيطنات هادوك راه حالهم ساهل..كل واحد كيعطي رأيو وجوتد ساكت وكيشوف فيها كيتسناها تهضر ولا تكول لا مزال الحال حاضيها :
وسيم : النكافة وتغيتوغ وتصوير ولميكاب هادوك ايبقاو عليا أنا شغلي هداك ودومين ديالي أحسن نكافة وأحسن تغيتوغ ايكون...من هاد النحية هادو حلهم ساهل..
أمين : ساماغش والعرس قتارحت على جواد يكون نهار الإفتتاح ديال لوطيل لي فسعيدية شنو بان ليك أماريا؟...ماريا غير مبهوضة كدور فعينيها... :
- إيمتا غادي يكون الإفتتاح؟
أمين : 1 فشهر 12 شنو بان ليك؟
ماريا(بلاما تفكر) :
- مزيانة انكونو وجدنا كولشي(شافت فجواد)شنو بان ليك؟...دور وجهو عند أمين :
- ممكن..
أمين : هادو جوج حوايج وجدو اما بنسبة لحلويات ولا الماكلة ايتكلف بيها تريتور..نباتو حورية : 
- لا أولدي حتى لهادي لا شحال وانا كنحلم بهاد النهار حلوة ينتي انا غادي نتكلف بيها..
ماريا : ماما شحال قدك تصايبي راه بزاااف عرفتي شحال ديال الناس ايكونو؟
حورية : انبقى نصايب كل نهار حاجة حتى الى عييت ديك ساع الماباقي يتكلف بيها تريتور ولالا أختي مليكة؟
مليكة : عندها الصح وانا نعاونها نتعاونو انا وياها خرجكم السوق انتوما..
ماريا : لي بغيتو بغيتو تصايبوها صايبوها غير كلت انا تغيتوغ يتكلف بكولشي..
حورية : ابنتي مغاديش تزوجي كل نهار عارفين هدا زمان أخور كولشي ولا يتكلف بيه تريتور من ماكلة وشراب وحلويات وليتي متحطي إيديك فوالو ولكن حتى انا بغيت نحس بديك الفرحة لي كتحسها كل أم فاش بنتها كتبغي تزوج كتوجد ليها كلشي واخا كاينة سومية نفرح بيها إن شاء الله ولكن انت لبكرة ليا..
ماريا(عطات لماماها إبتسامة عربون محبة وشكر) :
- واخا اماما لي درتيها عسل من عندك..
الحاج : إيوا مابقا والو كولشي باين وسيم ايتكلف بتغيتوغ ولي كتحتاج لعروسة وأمهات لعروسة ايتكلفو بالحلويات وبلاصة العرس أيكون فلوطيل ديال جواد بقات الموسيقى..
وسيم : حتى هيا أنتكلف بيها اتكون مفاجأة انا عارف ماريا شنو كايعجبها..
الحاج : إيوا شفتو كولشي ساهل غير حنا لي كنصعبوها وكيبان ليها هادشي وااعر...دهاز لعروسة راه تخرج عيا وخطيبها ويتقداوه مكاين لاش ندخلو فيه...
محمد : والايكسيسوارات خليوهم عليا دخلات واحد la collection جديدة أول وحدة تلبسهم أتكون ماريا إن شاء الله..
ماريا(حسات بالفرحة كولشي مهتم ليها ماخلاو ليها مادير مسهلين عليها كولشي أش بغات كثر عطاها الله أحسن عائلة) :
- لهلا يخطيك أعمي
محمد : شحال عندنا من ماريا غير وحدة..
سومية : أنا تاني انبدا نغير😄
محمد : بحالك بحالها أبنتي بجوجكم بناتي..
سومية : عارفة ابابا لهلا يخطيك عليا ياربي...
أمين : حتى انا خاص ندير يدي عرس خويا ضروري مانشارك ولكن الكادو ديالي من بعد وتعرفوه ماشي دابا حتى لوقتو..
الحاج : الله يكمل بالخير ويجمع بيناتهم بالخير ويسر ليهم ياربي ويبعد عليهم كل عين شافت فيهم بشر يارب تحفظهم وتنزلهم وترزقهم لي فبالهم يارب...بارك الله لهما وجمع بينهما في الخير يارب..
الكل : أميييييييييين..
جواد(شاف فأحمد وصوتو كل جدية وإحترام) :
- عمي الإنسان يعلى المقام ديالو حتى يعلى ويوصل لأكبر المستوايات ولكن مخاصوش ينسى أصلو وتقاليدو وعاداتو الصواب كيبقى صواب والإحترام مفروض...أنا واخا دوز عمري فأوروبا ولكن كنبقى رجل شرقي مغربي عارف لي يدار ولي مايدارش داكشي باش بغيتك تحدد شي نهار انجي انا والحاج ولافامي بطبيعة الحال وانطلبو ماريا منك بالقانون بحال كاع الناس أه واخا جات معطلة او واخا طلبت ماريا لزواج بطريقة موديغن أوروبية ولكن هادشي مايعنيش بلي ناسي أصلي هادي حاجة ضرورية اعمي وخاصها تكون قبل من العرس إحتراما ليك ولماريا...(أحمد عينيه فيهم واحد الفخر كبير بجواد كل نهار كيزيد يبغيه ويكبر فعينيه كثر وكثر...زاد إحترامو وتقديرو ليه) :
- ماكلتي عيب اولدي الله يرضي عليك ويكملك بعقلك كل نهار كتزيد تكبر فعيني انا دابا مرتاح حيت عارف بنتي وراها راجل ايصونها ويديرها فعينيه..
جواد(حدر راسو) :
- لهلا يحاشمنا...
أحمد : صافي نخليوها هاد سيمانة نهار الجمعة إن شاء الله؟
الحاج : مكاين ماحسن من داك النهار اللهم يسر..
أحمد : أمييييين..

حين أتحدث عن جمال الصُدَف 💙
سأكتفي بالصدفة التي جمعتني بكِ ..
****
من بعد مرور 4 أيام..
فوسط محال كبير مجهز بأجمل العباءات ولفراشات...
وردة : ماريا ذوفي هاديك تيركواز غزالة بزااف اتجي فنة...هزات ماريا فيها عينيها كتهندس فيها ...
- لا ماعجباتنيش مشارجية بزاااف بغيت شيحاجة سامبل اصاحبتي انت عارفاني ماعندي مع الحاجة تكون مشارجية...سمعهم مول المحل جاها جوابو من لور... :
- عندي شكيلات ايعجبوك بزااف يلاه دخلو مامنهم جوج مغاديش تلقايهم فشي بلاصة خرا..
وردة(تبسمات ليه) :
- واخا نشوفوهم اسيدي إلى جات على خاطر..
- اهاه هيا لولة الالة حميد جيب ليا الفرشات لي جاو لبارح...مشا الخدام دخل لداخل وهوما كيدورو ويشوفو السلعة لي معلقة كولشي مشارجي عقيق وتقيل ماتقدريش تمشاي ولا تحركي بيه...رجع دري لي خدام عند مول المحال وفيديه جوج بوشيطات كبار بالعلاقات ديالهم عطاهم لمول المحال..
- هانتي الالة كاينة هادي(كيتفح فالبوشيط بسنسلة خرج منها فراشة أنيقة فنة فلون الكاشير مخدومة بالعقاد حتى لتحت وعند الخصر مطروزة ومنبنة بالعقيق والموزون فالأخضر...
- كاين هاد اللون وهاد اللون لاخور(فتح البوشيط الثانية وجبد نفس الفراشة ولكن فالفيغ فليو بارد نفس الزواقة ولكن اللون فالموف...طويلة وأنيقة بزااف..
وردة : غزااالين..
- الالة راه ماتلقايهمش فسوق بضمانتي السيدة لي مصمماهم راه سميتها على لاكاغط سلمى بن عمر سلعة نقية بزاف وكيف كلت ليك ماتلقايهاش حيت انا الوحيد لي فهاد لمدينة كنتعامل مع هاد السيدة وبشهادة الجميع ويمكنليك تسولي...شافت فيه وردة :
- لالا الكتاب باين من عنوانو حنا غير جينا وقصدناك..
- لهلا يحاشمنا الالة مرحبا بيكم المحل محلكم..
وردة(كتسول فماريا) :
- اشمن وحدة عجباتك؟
ماريا : حرت بجوجهم غزالين..
وردة : خودي فيغ فليو حسن اما هاد اللون ديجا لبستيه فالحنة ديال هاجر بدلي وخودي ساك فالموف وصباط فالموف يجيوك غزالين..
ماريا : لاش الصاك وهوما ايجيو لدار
وردة(خرجات فيها عينيها) :
- فاش نكونو جايين من الصالون مغاتهزيش ساك ديالك خاصك تجي من تم مقادة وكاملة مكمولة..وبلاما تكولي ليا لا انا نقاد راسي عرسك هدا عطي الراحة لراسك وخلينا حنا نتكلفو بيك..
ماريا(ستسلمات لوردة) :
- واخا ديري الالة لي بغيتي انا ساكتة
وردة : وهكاك...(شافت فمول المحل) اناخدو هادي اسيدي وتصايب معانا انولي كليان ديالك إن شاء الله..
- الله اودي مرحبا كولشي ديالك...أياه واخا بلاتي نجمعها ليكم...تفاهمو على الثمن بحلاوة لسان وردة خداوها بثمن مناسب...واخا ثمنها غالي ولكن تستاهل...
#فطريق
ماريا : نمشيو ناكلو شيحاجة؟
وردة : ناخدو الساك وصباط
ماريا : ناكلو بعدا وديك ساع ناخدو لي بغيتي...دخلو لواحد مطعم سوري دومونداو على شوارما وديسير خداو مهلبية...
ماريا(باين عليها مقلقة) :
- فخبارك جواد ماسوناش ليا من نهار تجمعنا عندهم فدار..
وردة(بستغراب) :
- علاش؟
ماريا(تنهدات ورجعات بلور) :
- تناقشنا انا وياه ماشي تناقشنا صراحة هو لي هضر انا كاعما هضرت ولكن بيني وبينك كلامو كلو صحيح وقيلة زدت فيه..
وردة : واش على وديت تصرفات ديالك المرة لاخرة؟
ماريا(حركات راسها بأه كتلعب بصباعها) :
- كاليا بلي هو كيبغيني انا مكايهموش شيحاحة خرا زعمة داكشي لي كنفكر فيه كاليا ماعندوش مشكيل مايقيسنيش الما بغيتش انا مكايناش شيحاجة بزز هو باغينا غير نتجمعو المهم هضرتو قاصحة شوية خلاتني نحس بدنب والله..
وردة : اش غادي نكوليك انا عادراك حيت اي عروسة كتكون خايفة ولكن انت زداي فيه شوية وبينتي ليه..
ماريا(زادت حسات بتأنيب الضمير) :
- ياااك؟ عارفة راسي قفرتها بعد المرات كندير شي حوايج والله مكنشعر بيهم ولكن راه هو كلامو خلعني منين هضر بديك طريقة بحال الى ماعرفتش والله..
وردة(ضحكات) :
- بحال الى شي واحد ايتهجم عليك واش انت حمقة كون بغا يدير شيحاجة ايديرها نهار كنتو اراس فراس فاش كنتو مزوجين وكنتي حلالو ديك ساع وفاش كنتو مسافرين بجوج تاني غير انت مخدمتيش عقلك ديك ساع تدهشتي..
ماريا : دابا شنو اندير اوردة عارفة راسي قلقتو مني بزاااف خرجات من بالي هاد القضية ديال فاش كنا مزوجين ومسافرين ماعرفت فين كان عقلي..اوووف😔
وردة : علاش مديري ليه شي مفاجأة وجدي ليه شيحاجة بحال تعرضي عليه لشي بلاصة زوينة بلاما يعرف بلي انت تما بحال هكا يحس بلي مهتمة بيه فهمتيني زعمة انت عندك مع لي سوغبغيز غادي نوريك انا زعمة مغاتوحليش فبحال هادشي..
ماريا(بشك) :
- زعمة يعجبو الحال ويسمح ليا؟
وردة : جربي انت مخاسرة والو فكري فشيحاحة زوينة وديريها ليه سوغبغيز شيحاحة تكون مميزة باش يحس بقيمتو عندك خصوصا انت لي دايرة ذنب ماشي هو..
ماريا : صافي انمشي لدار ونفكر الهم هو مايبقاش مقلق مني..
وردة : مغايبقاش مقلق منك وماتبقايش تزربي وتغلطي بقاي فكري الرجال ماشي بحال بحال خصوصا جواد..
ماريا : عارفة راه غير تخربقت مابقيتش عارفة اش كندير غادي ندير هادشي لي كلتي ليا وخليه يسمح ليا قبل مايجيو لدار بغيت نفرح بنهاري وانا بخاطري..
وردة(ضحكات ليها) :
- إن شاء الله حبيبتي مغايكون الخير دابا تشوفي..

خدات ماريا ساك فالموف وصندالة عالية فنفس اللون فبلاصة السباط...ورجعات لدار حطات داكشي ومشاو لقهوة...
وردة : خاصك تنقصي من لمجي لقهوة انت عروسة دابا..
ماريا : زمان كانت العروسة كتحجب فدار وماتبان حتى لنهار عرسها اما دابا راه خاصها هيا توقف على شغالها بيديها وانا لقهوة مانخليهاش بوحدها ضروري نكون..
وردة : نجي الالة انا نقابلها وكاينة سومية وخالتي مليكة شنو بغيتي مزال؟
ماريا(تنهدات) :
- بغيت نقلب على شي محال يكون كبيير بحال القهوة نكريه..
وردة(بستغراب) :
- علاش؟...قاطعاتهم ندى حطات ليهم القهوة ديالهم ومشات..
ماريا : سومية عطاتني واحد الفكرة زوينة بزااف ديال مطعم بديكور وستيل راقي ولكن ماكلة شعبية مرتابط بالقهوة بحال سميتها غير هو اياكلو فيه رجال وعيالات..
وردة(تحمسات) :
- فكرة زوينة بزااف والله كنخرج مع أمين نتغداو ولا نتعشاو على برا العافيا وشوية ديال لماكلة فطبسيل كيضحكو على الناس وصافي...بحال ديك المرا كلنا نتغداو فماكدو...دخلنا يلالة دوموندينا خديت انا ديال كفتة وهو ديال دجاج...اش غادي نكوليك على دلك سوندويتش مقموع صغييير الفريت وكذلك منين حليتو ضنو لقيت تخايلي صوص طوماط فريميجة صغيرة جوج طريفات كورنيشو صغااار وديك الكفتة وخصة صغيرة وشحال 30درهم تخايلي وانا فدار كنصايبو واااعر وحسن منو..
ماريا(كضحك) :
- ومكاين فيه حتى فائدة عرفتي شحال ديال ليكالوري فيه داكشي باش كلنا نفتحو مطعم ماكلة تقليدية ديال دار 100 فالمية...هضرنا مع ماما هيا لي أطيب انزل لفيرما ونختار شي مرة لي تكون باغية تخدم ولا واحد جوجات يعاونوها عرفتي الماكلة ديال تم كيف كتكون ماتشبعيش منها فين يبان هاد بانيني وتخربيق كتاكل وانت عارف شنو كتاكول وزيد عليها الناس شبعو من ماكلة الزنقة..
وردة(شربات من قهوتها) :
- مزيان الله يسخر كولي ليا كتصايبو حتى القهوة تركية؟
ماريا(جغمات من قهوتها) :
- كاين كولشي نصايبها ليك؟
وردة(وقفات) :
- لا خاصني نمشي لدار ليليا اتكون فاقت دابا خليت معاها غير المربية انت عارفاني مكنحمل مربيات بنتي نقابلها لراسي ولكن مع كنخرج كنخليها تقابلها..
ماريا : واخا صافي المهم نهدرو من بعد تيليفون بيناتنا(سلمات عليها ورجعات كلسات سلمات وردة على مليكة ولبنات ومشات)...
دارت ماريا بانت ليها فرح حطات القهوة والكيك لشي عيالات وعيطات ليها..
فرح(بإبتسامة) :
- بصحة وراحة...رجعات حطات صينية على لكونتوار ومشات عند ماريا :
- وي ختي ماريا بغيتيني؟
ماريا : اه كلسي...كلسات فرح كتشوف فيها كتسناها شنو بغات..
- بغيت نسولك كيبقى ذياب؟؟..
فرح : الحمد لله مكنخليوهش بوحدو اليوم بدا العلاج النفسي
ماريا : مزيان وشنو كاليكم الطبيب؟
فرح(دارت يديها قدامها) :
- كالينا بلي ذياب عندو إنفصام فشخصية الجانب الشرير مكيعقلش على الجانب المزيان شنو دار وهادشي راجع لشي صدمة تعرض ليها خلاتو بحال هكا وريناه الوراق ودوا لي كان كياخود كالينا بلي كان غادي يتشافى نهائيا ولكن حنا كأسرة ديالو معاوناهش بحال الى كلتي خليناه بوحدو نصحنا بلي اي بلاصة كان فيها يكون مع ناس معانا مع صحابو مايبقاش بوحدو حتى يبغي ينعس ولا حتى ينعس عاد واحسن حاجة نعطيوه شيحاجة لي يلهي فيها راسو ويخدم فيها عقلو باش مايفكرش فشيحاجة لي هيا خايبة والحمد لله على كل حال...
ماريا(شداة ليها فيديها) :
- إن شاء الله غادي يبرا ويولي بيخير وعلى خير وسلقى بنت الناس لي غادي تستاهلو دابا تشوفي..
فرح(تنهدات وشافت فيها) :
- إن شاء الله كنتمناو والله حتى طبيب كالها لينا كالينا خاصو يحس براسو محبوب عند الناس لأنو صدمة لي تعرض ليها خلات عقلو يعطيه مؤشرات بلي هو ممحبوبش وبلي غير لفلوس لي كيهمو الناس..
ماريا(بحال الى جاتها شي فكرة) :
- عرفتي شنو عندي ليك واحد الفكرة وااااعرة اتعجبك تخلينا نعاونوه شنو بان ليك؟
فرح(الحماس باين فعينيها) :
- كولي ليا اختي كنسمعك 🥰
ماريا : اول حاجة انا كنفكر نحل مطعم ديال وجبات المنزلية ايكون راقي ولكن الماكلة 100فالمية ديال دار ديال زمان علاش لا منكلبةش من ذياب يعاونا بالأفكار ديال ديكور وزيد وزيد نحطو ليه كولشي فيديه هو يشري الكراسا طوابل هو لي يوقف على القهوة بيديه شنو بان ليك؟
فرح(الفرحة اتنقز من عينيها) :
- فكرة مزيانة وزيد عليها هو كان على برا عندو دراية بالمطاعم واخا هو فاتح لي سال هنا ولكن مافيهمش شي جهد لي يحتاج يفكر فيهم ماشي بحال المطعم خاصو يفكر شنو يدير وفين يمشي ويجي..
ماريا(الحماس فعينيها) :
- هانتي والفكرة الثانية لي نزيدو نضغطو عليه بيها ومايبقاش ليه الوقت لي يفكر فشي حاجة خايبة ختي سومية باغية تبدا تكتب اتولي كاتبة نخليوه يعاونها فهاد القضية يعني يعطيها أفكار وفاش تبغي طبع لكتاب ديالها يكون معاها يفكر معاها فالغلاف فدار النشر فكولشي هنا انضغطوه من جوج جوايه مغايبقاش ليه الوقت...فنفس الوقت ماشي بوحدو فدار...وتاني حاجة حصصو مع الطبيب...وزيد عليها الخدمة لي انعطيوه...

أنسدو عليه كاع البيبان..كيجيتك..
فرح : انت خطيرة وأفكارك خطار ولكن اجي الى كالينا علاش ختاريتوني انا بضبط خصوصا داكشي لي وقع ليه معاك ومع جواد؟
ماريا(سكتات كتفكر) :
- هانتي انكولو ليه بلي انت لي كلفتك بهادشي ومع ماقديتيش ترضيها ليا فوجهي قبلتي وانت عارفة راسك مغاتقديش عليها وطلبتيه يديرها فبلاصتك وعارفاه مغايرفضهاش ويردها فوجهك وانت مكيرفض ليك حتى طلب..
فرح(بنظرة شيطانية) :
- هممم والله الى عندك الصح صافي مشات...انا نوض نسالي خدمتي..
ماريا : بلاتي اجي بغيت نسولك..
فرح(رجعات كلسات) :
- اهاه سولي
ماريا : دابا فرضا مثلا درتي فالطة مع شي واحد كتبغيه وبغيتي تصالحيه شنو اديري؟
فرح(كتفكر) :
- خاصني نعرف هاد الشخص شكون خويا صاحبتي شكون؟
ماريا : نكولو خطيبك
فرح(شتفت فيها عاقت بلي كتهضر على جواد تبسمات) :
- انوجد شي عشا ولا غدا المهم فشي بلاصة زوينة تكون كتعجبو بزااف ولا ندوز النهار انا وياه فشي بلاصة زوينة مهم بحال هكا شيحاجة لي تخليه يكون فرحان ويسمح ليا..
ماريا(سهات كتفكر جاتها فبالها واحد الحاجة خلاتها فرحانة) :.
- يعطيك الرضا صافي لقيتها..
فرح(وقفات) :
- وغير سربي خلاص مابقا لخطوبتك والو😉..خلاتها فرح ورجعات لخدمتها هزات ماريا تيليفونوزات نمرة جلال :
- (من بعد ثواني) :
وي جلال صافا الحمد لله هانتا سمعني كوليا عند السوارت ديال دار دالفيرما...بغيتهم ضروري دوزهوم ليا دابا لخدمة عفااك ضروري بغيتهم اه عنداك تكولها لجواد متجبد ليه والو...صافي انا كنتسناك ماتعطلش...قطعات تيليفون...ناضت مشات جابت ورقة وستيلو فتحات الويفي..ودخلات ليوتيب كتقلب على شهيوات...قيدات كاع داكشي لي بغات...وناضت لبسات تجاكيط دايلها هزات سكادو..تيليفونها والورقة ومشات عند مليكة :
- ماما انا انمشي لحانوت نتقدا شي حاجة ونرجع صافي..
مليكة : واخا سيري...مع خرجات وقف جلال بطوموبيلتو..نزل جا عندها..
جلال(الشك باين على وجهو) :
- ياك لاباس؟
ماريا(كضحك) :
- والو غير بغيت ندبح جواد ومالقيتش فين ندفنو من غير الفيرما ههههههه أمالك مخلوع والو بغيت ساروت...وانت لي اتديني دابا لسوبير مارشي نتقدا...وتديني لفيرما نحط هادشي وترجعني وغدا اتديني بكري...تاني لفيرما وتجيب جلال لتم..
جلال(خربقاتو) :
- والله مافهمت حاجة اش كتروني؟
ماريا : من بعد وتفهم انكوليك فطريق..ماتسناتوش ضارت فتحات الباب وطلعات كتسنا فيه...شاف حتى عيا وطلع ديمارا طوموبيل وداها لسوبير مارشي تقدات كاع لي بغات...هزها طار بيها لفيرما حطات داكشي لي تقدات...ورجع ليها..
جلال : ودابا فهميني اش واقع..
ماريا : هانتا اسيدي سمعني...
***
وسيم : خرجات؟ وعارفاني جاي باش نتسيفط معاها عقل هاد السيدة مكاينش المهم لالة مليكة كوليها وسيم راه مشا حتى ترجع وتاصل بيا فتيليفون..
مليكة : اتقلق اولدي منين تمشي ومشافتكش
وسيم : وهانتي كتشوفي ماعنديش الوقت يلاه نوصلو وخدمتي مخليها مغانتعطلش إن شاء الله ضروري نرجع على ود العرس وتوجاد يلاه تهلاي فراسك وسلمي ليا على أحمد..
مليكة : طريق السلامة اولدي الله يديكم على خير...عنقاتها اروى وثورية..
- خالتي سلمي على ماريا نتشاوفو من بعد
مليكة : إن شاء الله ابنتي الله يحفظك ويعطيك ربي شي نقرة فاش يغبر النحاسك..
اروى : أمييين..
ثورية : سلمي بزااف على ماريا
مليكة : مرحبا بسلامك ابنتي الله يديكم على خير..تسيفطو معاها ركبو فطوموبيل شدو طريق...يلاه مشاو بشي 15 دقيقة رجعات ماريا..عطاها جلال الساروت ومشا..مع دخلات تلاقات ليها مليكة..
- انت دايرة مع وسيم ومشيتي راه جا هو وختو وخطيبتو..
ماريا(ضربات جبهتها) :
- ناااري والله حتى نسيت اوووف صافي مشاو؟
مليكة : شي ربوع ساعة..جبدات تيليفون من جيبها دوزات نمرة وسيم..
- شوف بلاما تغوت عليا قسما بالله الى عارفة راسي شنو درت والله حتى نسيت بزااف ديال لمطارق فراسي وزادتي جواد راه فراسك كولشي..
وسيم : عارف ماديري فراسك والو وزايدون غادي نرجعو راكي عارفة كونما الخدمة راه مانمشيوش انت اديها فراسك ابكيزتي..
ماريا(كتغبن) :
- حتى انت ازغلولي انتوحشكم فتح مكبر الصوت نهضر مع لبنات..
أروى : بب كنسمعوك..
ماريا : انتوحشكم تهلاو فبعضياتكم..
ثورية : كوني هانية حتى انت عطي الراحة لراسك ولخاطر..عرسك راه قرب حل عينيك فتحهم هاهو وصل..
ماريا : ماتزيديش تخلعيني حتى انت نوبتك من ورايا ولا نسيتي؟
ثورية(تنهدات كضحك) :
- لالا مانسيت والو..
ماريا : يلاه طريق السلامة وماتعطلوش عليا هاجر راه اتمشي غدا ومغاترجع حتى يبقا لعرسي يوماين كاينة غير انا او وردة حتى من إقبال راه مشات..
وسيم : انا غير نقاد أموري وتلقاينا عندك شحال عندنا من بكيزة غير وحدة..
ماريا(كضحك) :
- لهلا يخطيكم عليا يلاه الله يوصلكم على خير..
وسيم : أمين أكبيدة يلاه بسلامة وسلمي على موسيو منين تصالحو..
ماريا(كضحك جاتها موسيو فشكل) :
- مبلغ يلاه بسلامة...حطات التيليفون ورحعات سهات من جديد..

كتفكر فحياتها من نهار وعات على الدنيا حتى لدابا الأحداث لي دازت منهم حاجة بحاجة دوزات الخايب ودوزات ازوين تحدات راسها وغامرات تفكرات قرايتها تفكرات أسفي وزناقيها لافاك تفكرات كريم ورشيد تفكرات محمد مول الحانوت وتفكرات المحل لي كانت خدامة فيه ديال لبيتزا تفكرات المرا لي تلاقات ليها وشداتها ومن بعد غاب ليها الأثر فين كانت وفين ولات وفين هيا تعرفات على ناس شي مشا وشي مزال معاها ومساندها شكون كال تعرف على وردة وتكون هيا سبب حتى تعرف على حب حياتها..قاطعات سومية افكارها..
سومية(جرات لكرسي هازة مذكرة وستيلو) :
- هيهو فين سرحتي تاني؟
ماريا(شافت فيها) :
- والو اكنفكر فحياتي..أجي سومية بغيت نسولك
- الله يسمعنا خبار الخير سولي الالة سولي
ماريا : علاش متكتبيش قصة حقيقية وطلعي لرباط تقيديها فالمصلحة الفكرية..
سومية(بستغراب) :
- شنو هيا هاد المصلحة الفكرية؟
ماريا : هانتي الالة المصلحة الفكرية كتاخدي قصة ديالك يعني انت كاتبة السيناريو والحوار كيضمنو ليك جميع الحقوق ديالك بانو هاد القصة ديالك حتى الى نشرتيها وقدر الله شي واحد بغا يسرقها ليك مكايقدرش حيت ديجا هيا مقيدة فالمصلحة الفكرية بلي ديالك فهمتيني يعني كضمني فيها حقوقك...تمشي تقيديها تما ومن بعدما تنشريها الى بغيتي تنشريها مابغيتيش نشوفو كيفاش نعرضوها على شي مخرج ممكن دار فيلم او مسلسل..شنو بان ليك😉...سومية ولاو عينيها كيبريو من الحماس..
- زعمة زعمة يقبلها شي مخرج واوو تخايلي قصتي دار فيلم او مسلسل مانتيقش راسي..ولكن اشمن قصة حقيقية غادي نكتب أنا؟
ماريا(تبسمات) :
- شنو بان ليك تكتبي علينا حنا؟
سومية(بستغراب) :
- عليا وعليك؟
ماريا : ولااا علينا على العائلة من نهار تزاديت حتى لدابا؟؟
سومية(زادت تحمسات كتر وكتر) :
- والله الى احسن فكرة نبداو من دابا شوقتيني عرفتي حياتك تكتب قصة ودار فيلم انا اول وحدة ندخل لسينما نتفرج فيه..
ماريا : وكتبيها بعدا وتقنيها وديك ساع سجليها ونشوفو المخرج انت لي بغيتي بغيتي طبعيها طبعيها..
سومية : بغيتها دار فيلم ولا مسلسل وديك ساع نفكر نشرها..نبداو دابا؟؟.
ماريا : واخا يلاه نهبطو لتحت..نهضرو على راحتنا..هزات سومية مذكرة ديالها وسبقات ماريا متحمسة...حيت ادير شيحاجة هيا كتبغيها وكترتاح فيها...
***
#فدار
حورية(كتكتب) :
- عندك حلوة عين الجمل ورخامة الفقاص البهلة الكعب لغزال..همم اندير حتى حلوة رفاييلو وفيريرو روشيه...ونزيدهم صابلي بأنواع ديالو..حلوة لإجاصة بلوز معلك..شنو اخور..
محمد : وراه 9 شكال لي درتي ياك كلتي غير 8 كايكونو فالبلاطو..؟
حورية : كل واحد وشحال كيدير فلبلاطو بنتي خاص نكبر بيها حباب راجلها غير الناس الهاي امحمد خاصني نحمر ليها وجها...7 ديال الشكال راه هادوك ضروريين فالبلاطو بلا صابلي بريستيج عاد لحلاوي لوخرين ايكونو غير بلوز وشكلاط والعقدة ديال تمر زيد وزيد..
محمد : تمارة فهادشي
حورية : حتى حاجة ماتغلى على بنتي انتعاون انا ومليكة وغادي نشوف حتى واحد المحل غزاال كاين فكازا خاص بالحلويات ديال شكلاط كنا خدينا منو عقلتي انشوف يصايبو ليا شي 7 ديال لبلاطويات انشاكل بيهم شكيلات لاخرين...ونطلب ياسين يجيب لي البلاطويات من كازا..
محمد : احسن حاجة دارها هو ايشد الكونجي ديالو مع عرس ماريا
حورية : الله يجيب ليه شي بنت الناس حتى هو
محمد(تنهد) :
- أمين
حورية : ونوض من حدايا خليني نكمل شغالي اجي اتعرض على شي واحد فالعائلة؟
محمد : ماعندي علامن نعرض فين عمر شي حد سول فيا كل واحد صاحب حاجتو...خليني نوض نصلي راه المغرب وا وأدن..
حورية : الله يقبل حتى انا انوض نصلي..حطات داكشي من إيديها حتى تصلي وترجع تكمل..
***
#فبيت_ماريا..
واقفة مقابلة مع اللبسة ديالها كتشوف فيها علقاتها هيا وساك وحطات حداها الصندالة..
سومية(دخلات عليها) :
- فنة ياختي فنة اتجيك خطيرة..
ماريا : لعكوبة ليك إن شاء الله
سومية : إن شاء الله واخا مزال مكنفكرش فزواج انا دابا راسي فيه غير الرواية ديالي صافي..اجي واش زعمة الفكرة ديال ذياب مزيانة..
ماريا(كضحك) :
- مالك خايفة لا يخطفك حتى انت؟
سومية(ضربات فالخشب) :
برات الباس عليا ياختي ياربي سلامة ماتخلعينيش؟..
ماريا : بالعكس الهبيلة انا متاكدة ايعجبك الحال شفتيه انت يااك؟
سومية(هزات مذكرة ديالها) :
- مازكيتش فيه الشوفة بزااف..حتى نشوفو بعدا هو واش ايوافق..كولي ليا نكملو دابا؟
ماريا(حيدات لغطا وتكات فبلاصتها) :
- دابا لا بغيت نعس غدا فايقة بكري إن شاء الله عندي مايدار تصبحي على خير..
سومية(حطات المدكرة من يديها ونعسات فبلاصتها طفان الضو) :
- وانت من أهلو..

المرأة كالقمر تعكس ضوء الرجل الذي تحبه ♥
لا تصدر الضوء من ذاتها..
وإنما تعكس الضوء الآتي إليها من شمس
رجل يحبها بصدق ...
***
فاقت ماريا بكري قبل مايفيق كولشي..خدات دوش خفيف شعرها نشفاتو غير بالفوطة وخلاتو على راحتو...لبسات تريكو فلون الفوشيا معا صايا تحت الركبة فالكحل صبادري فنفس اللون مريحة باش تاخود راحتها اما وجها دارت إيكغون مع كلوس فوشيا وايلاينر هزات ساكها وتيليفون يلاه اتفتح الباب وتفكرات طوانك ديالها رجعات هزاتهم من لابواط ديالهم طوينكات طوال فذهبي عاد خرجات كتسلت حلات الباب بشوية...وسداتو بشوية...عاد رتاحت خرجات لشارع كتينى فجلال لي دارت معاه 8 لاروب يكون عندها...شافت تيليفونها 8 قل لخمسة ومزال مجاش واقفة على أعصابها سمعات حس طوموبيل هزات راسها كيبان ليها جاي..وقف حداها حلات طوموبيل وطلعات(كيبان ليها عينيه منفوخين وحمرين)..
ماريا : على سلامتك تعطلتي😑
جلال(صوتو مخنوق) :
- جايباني على نبوري ومانعسش بكري وحاس براسي مريض معاش بغيتيني نجي مع لفجر يلاه يلاه..
ماريا(بتساؤل) :
- واش عيان بحال الى ضاربك البرد.؟
جلال(كيمسح نيوفو بكلينيكس) :
- يلاه بنت ليها لبارح مانعستش والله جيت غير بزز..
ماريا : الى ماقديتيش ناخود طاكسي؟
جلال(كيديماري) :
- مكاين لاش دابا جيت نديك ونرجع نجبد عليه..
ماريا(كتقاد فسمطة) :
- معاش غادي تسوني لجواد لا تمشي تنعس وتنساني؟
جلال : كوني هانية مانساك والو انت يلاه تسالي شحال جهدك؟
ماريا(كتفكر وتحسب) :
- ديك الوحدة هكاك..
جلال : صافي كوني هانية الوحدة ونص ايكون عندك..
ماريا : شنو اتكول ليه؟
جلال(عينيه مدمعين) :
- ألف مرة كتسوليني الالة غادي نكوليه بلي بان ليا فتيليفون بلي شي واحد دخل لفيلا مباينش مزيان شكون هو ومع انا مسكين مريض وحالتي حالة مغاديش نقدر نمشي لفيرما باش نشوف شنو واقع ضروري خاصك تمشي انت تشوف..
ماريا(كضحك) :
- ومع انت مريض مكاين لي يقضي ليه الغراض ايخصو يمشي برجليه ويشوف شنو واقع وشكون هاد الشفار لي داخل لفيلا..
جلال : سويرتي يكوليا ياك بدلتي لقفولة كيفاش هاد الشفار ايدخل..
ماريا : كوليه بلي شفتيه كيدور حدا الفيلا بليل ملتم ماشفتيش وجهو انت متكولش ليه كاع بلي دخل ضروري ايجي يتاكد براسو المهم انت خاصك ضروري تقنعو..
جلال : صافي كوني هانية حسبي غراضك تقضا..
ماريا : شكرا بزااف وسمحليا عدبتك قبل ماتمشي لدار خود زيت الأوكاليبتوس ستنشقها راه مزيانة لرواح خديتي دوا؟
جلال(كيمسح نيوفو) :
- حتى نكون راجع وناخدو من لفارماسيان
ماريا : الله يشافيك..
جلال : أمين..وصلها جلال لفيرما بقا واقف حتى حلات لباب ودخلات عاد رجع..خدات الطبلية لبساتها وبدات كتوجد فالكليسة الفيلا كانت مجموعة مخاصها والو...قدات كليسة على برا فالبالكون كطل على الطبيعة بطبيلة ديالها والورد الي جابت لبارح ودارتو فالفاز...الطبيسلات كولشي على حقو وطريقو رجعات بلور كتشوف المنظر كيجا عجبها شنو دارت..خلات كولشي كيما هو ورجعات لكوزينة كتوجد فشهيوات سونا تيليفون ديالها...هزاتو لقاتها مليكة...سولاتها فين مشات...كالت ليها بلي خاصها تقضي واحد الغرض ضروري ومغاترجع حتى لعشية...قطعات الخط وكملات توجاد دارت كيك دخلاتو لفران وجدات لي سالاد دارتهم فثلاجة يبردو بقا ليها غير الدجاج..ماعمرها طيبات بحال هاد الشهيوات مالفة دخل تقلي غير البيض ولا شيحاجة خفيفة ماعندهاش مع الكوزينة ولكن على قبل جواد غامرت وكتمنى النتيجة تعجبو وترضيه..مجات فين توصل 1 حتى كانت سالات وقدات كولشي على حقو وطريقو...برونشات تيليفونها مع الباف..وخدات موسيقى خفيفة ديال(ياني) زادت الجو رومانسية ودفئ كثر..جمعات لي خاصو يتجمع طرفات الكوزينة...وقبل ماتكلس رشات من البارفان ديالها ودارت كريم ليديها..وكلسات كتسنى على أعصابها الخلعة شاداها من راسها لرجليها خايفاه مايجيش ولا يتعطل كاع الافكار جاو لبالها كتحس بحال الى داز عام وهيا كتسنى فيه..وهيا ساهية فأفكار كتسمع حس الروايض ديال طوموبيل نقزات بجرا طلات من سرجم كتبان ليها كوموبيلتو لجيب..مشات كتحري لبالكون سدات عليها..ودارت رواق كتسنى...
- فتح جلال الباب...بشوية عاقد غوباشتو لابس سروال دجين مع تجاكيط كوير كاط فالكحل ونزازر فعينيه تيشورت مفتوح عند الصدر كيبين سنسلة طويلة لي داير فعنقو وساعة رياضية فيدو..سد الباب برجليه...شمشم ريحة الطياب..دخل لكوزينة..كيبان ليه كولشي نقي ولكن ريحة الطياب جديدة ممزوجة مع ريحة بارفان..شك بلي شي حد كاين..طل فالكور مكاين حد الكولوارات والو...دخل لمكتب لبيت والو...يلاه حط رجلو فدرجة لولة كيسمع حس الموسيقى جاي من لبالكون رجع بخطوات تقيلة ممسموعاش وقف عند البالكون حط يدو على لبوانيي دورو وفتح الباب...وقف فبلاصتو مدهوش من هادشي لي قدامو...هز عينو كتبان ليه ماريا واقف شادة يديها كدور فيها ومبسمة ليه...مكانش متوقع ايشوفها وفين هنا..رجع كيشوف فطبلة لي مصاوبة ومتولة على حقها وطريقها والموسيقى لي زادت عطات لمنظر واحد الجو خاص...عجبو لحال بزااف وتفاجئ وفنفس الوقت مابغاش يبين ليها..
جواد(غوبش ودار فيها مصدوم ومزال مقلق) :
- شنو هاد...(بدون مقدمات وقفات قدامو بزربة عينيها فعينيها ونطقات) :
- كنبغيك( دارت إيديها ورا عنقو جبداتو لعندها ونزلات بشفايفها على شفايفو وباستو)...

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.