سيدها الجزء 26

رجعات بخطوة لور وحنات راسها خدودها توردو من لحشمة...جاتو الضحكة هز ليها راسها وعينيها مقادراش تشوف فيه..

جواد(شاد فيها) :

- اممم جاتك الحشمة حتى فات لي فات ودرتيها قدها قد راسك ولكن عجبني الحال..

ماريا(حيدات ليه يديه) :

- صافي ماتحشمنيش كلس قبل مايبرد هادشي ونصدق تعديت غير هكاك..

جواد(كيطنز) :

- اهاه نكلسو علاش لا من بعد هاد البوسة تحلات ليا شهية بحال الى ماكليت عام خلي كون كانت شيحاجة خرا يعلم الله...خنزرات فيه كدور فراسها وتقلب بانت ليها سربيتة لاحتها عليه مجاتش فيه خوا ليها كيضحك..

ماريا : وصافي حشومة عليك مالك وليتي مقزدر..

جواد : عادي احبيبي ياك غير مع مراتي ماشي مع البراني..

ماريا : كول احبيبي كول وكوليا كيجاك..

جواد(كيشوف فالماكولات لي قدامو) :

- اياااه علاش لا بسم الله..بدا كيهز ويحط فطبسيل ديالو يلاه ايهز لقمة ياكلها سبقاتو او وكلاتو من يديها...بلا مجاملة عجباتو الماكلة وطيابها..

ماريا(عينيها فيهم حماس كبير) :

- كيجاك؟

جواد : مابيهش كيفاش ايكون انت اول مرة دخلي لكوزينة(شاد فيها)...تقرسات وبقاوفيها الحال حس بيها من لون وجها لي تبدل ماقدرش يصبر...بدا كيضحك :

- غير كنضحك معاك احبيبي الله يعطيك الصحة واخا اول مرة دخلي لكوزينة ولكن يديك بنان...جر يديها لعند فمو باسها..

ماريا(عاد رتاحت وبدات ماكلتها فخاطرها) :

- هيا مني الكاينة..

جواد : لالا ماعندي منكول تبارك الله عليك احبيبي..كملو ماكلتهم ساكتين من غير نظراتهم لي حاضرة كل واحد فيهم كيبادل التاني بنظرات حب كبييير...حطات ماريا يديها وشافت فيه..

ماريا : حبيبي بغيت نطلب منك السماحة على داكشي لي وقع انا والله مخايفاش منك وعارفاك كتبغيني ولكن خاص تحس بيا راه اي وحدة فبلاصتي اي عروسة ايوقع ليها نفس الشي مكتبقاش تاكول كتولي مخلوعة وتفكر ماشي على وديت لفراش لا على قبل الحياة الجديدة لي هيا داخلة ليها فهمتيني..

جواد(حط يديه على يديها) :

- عارف احبيبي هادشي وفاهمو ولكن حتى انا بغيت نوضح ليك شي حوايج باش ماتبقايش غالطة حنا مغانشاركوش الفراش راه انشاركو الحياة كلها انا وانت ديريها فراسك هادي ماتبقايش تخليني نعاود هضرتي..

ماريا(ضحكات) :

- وانت مكتحملش تعاود الهضرة جوج ديال لمرات..

جواد : كتحفضيني شوية بشوية ودابا مكاينش باش نحليو😉شي حلوة بحال ديال كبيلة غير هاد المرة احبيبي عطيني مورصو كبير كرشي كبيرة...

ماريا(وقفات) :

- بااااسل...هربات مشات لكوزينة خدات الكيك لي وجدات ورجعات بيه حطات طرف ليه وليها..

جواد(من بعدما داقو) :

- أحسن كيك دقتو فحياتي

ماريا : هممم كدير ليا خاطري ماشي حتى لهاد الدرجة..

جواد : كنهضر معاك بصح بغافو طوب ماعندي مانكول..

ماريا(عجبها الحال) :

- بصحة وراحة...نزلات على طبسيل ديالها تهز بالمعلقة تخشي فمها وتلدد ودوز لسانها على فمها تلحس الشكلاط لي لصق فيه...وهو مقابلها حاط يديه على خدو وحاضيها...حس براسو ماشي حتى لتم بهاد التصرف لي كدير فيه..

جواد(بدون مقدمات) :

- حبيبي ماشي بضرورة تاكلي الحلوة بحال هكا

ماريا(بستغراب) :

- علاش زعمة؟

جواد : يكونو الناس وانت كديري هكا حشومة أحبيبي

ماريا(كتشوف فيه مافهمات والو) :

- ولكن دابا كاينين غير انا وانت

جواد : واخا انا وانت خاصك تعودي باش ماتنسايش فهمتيني احبيبي..

ماريا(على نيتها) واخا...كملات الحلوة ديالها بسكات...هو كلى غير شوية وحط الباقي ورجع لور..وقف شاف فيها :

- أنمشي لحمام نغسل إيديا ونرجع

ماريا : واخا...خرج من لبالكون...دخل الحمام سد عليه حط يديه على لافابو حادر راسو متوتر كيشوف فالمرايا ويدير يديه على جنابو غادي جاي...فتح الروبيني غسل وجهو ويديه ودوز على راسو حس بلي ولا بيخير شوية هز الفوطة مسح وجهو وخرج...لقاها واقفة كتسناه...والإبتسامة مضوية وجها...مع قرب ليها مدات ليه يديها..

- واش ممكن تشرفني بهاد الرقصة..؟

جواد(بينو وبين راسو) :

- لالا هاد النهار باينة بغات تسطيني وربي كبير...عطاه يديه...إيديه على خصرها ويديها ورا عنقو قريبة ليه ريحتها تخلطات مع أنفاسو حطات راسها على صدر دقات قلبو كتسمع تحت ودنيها بحال شي ساعة حائطية تيك تاك تيك تاك...ستسلمات بين يديها عقولهم ماوعياش من غير رجليهم لي كايتمشاو مع انغام الموسيقى...كل شوية كتزيد اقرب ليه وتلصق بيه...مابقاش مرتاح كيحس براسو يقدر يدير شي تصرف هو مباغيهش مابغيش يخلعها منو واكول بلي افكارها فمحلهم...خاصو يصبر ويزيد هادي حاجة عادية راه المراة لي كيبغيها وكيموت على تراب لي كتمشي عليه بين يديه وقريبة ليه بزااف(كيهضر مع راسو)...مابقاش قاد يزيد مزال...زول يديها من ورا راسو نزلهم وشاف فيها...

- حبيبي بلاش صافي وصلات بيا لهنا(اشر لعنقو)..مابغيتش ندير شيحاجة ندم عليها ولا نخليك تخافي مني خلينا بعاد حسن هاد 3شهور كلها..

ماريا(بستغراب) :

- علاش مافهمتش..؟؟

جواد(بعد عليها وكلس فالفوتوي لي حداه ناشر رجليه) :

- حسن ماتفهميش غير خلينا بعدا واحد الشوية..

ماريا : انا مافهمتش كيفاش خلينا بعاد؟

جواد : مايمشيش دماغك بعيد بعاد زعمة بعاد كون تفهمي زعمة ماتربيش بزااف مني وحتى انا هكاك من ديك نحية زعمة..

ماريا(عاد فهمات) :

- اااااااااه ههههه دابا عاد فهمتك...

جواد : على سلامتك..اجي حدايا بغيت نهضر معاك فشي حوايج

ماريا : يلاه كلتي خليك بعيدة بغيتي تحمقني؟

جواد : كلسي حدايا وبراكة ماتشدي فالهضرة...حنات راسها وكلسات مقابلة معاه شد ليها فيديها دارهم فيديه قربهم من شفايفو وباسهم..شاف ليها نيشان فعينيها..

جواد(بصوت رجولي حنين) :

- خاصنا نهضرو على الصداق أحبيبي انا عارف بلي واخا نوزنك بدهب مانعطيكش ومنوفيكش حقك..مال دنيا قدامك مايسوا والو ولكن هاد الامور ضرورية احبيبي 

ماريا(ماعرفات ماتكول) :

- انا مكايهمنيش الفلوس هادشي انت عارفو وزايدون درتي معايا احبيبي شي حوايج لي فاتو الصداق...كتبقى مسألة رمزية كون هضرتي مع بابا فهادشي

جواد : هضرت معاه وكاليك انت تقرري طلبي احبيبي لي بغيتي

ماريا(حطات يدها على وجهو) :

- انا بغيتك انت مابغيت والو مزال هادشي كافيني

جواد(شد ليها يدها باسها فالكف ديالها بوسة جابت ليها تبوريشة) :

- عارف احبيبي ولكن ضروري هادشي راه ضروري لا لعرس لا دهاز لا لخاتم صداق حوايج ضرورية

ماريا : لا حوايج تانوية ماشي بضرورة..

جواد : ولكن الصداق مهم ماتبقايش دخلي ليا وتخرجي ليا من هنا لهيه خاصنا نهضرو بالمعقول احبيبي فكري شنو بغيتي حددي صداقك براسك وكيف كلت ليك مال دنيا كامل مايتقدرش قدامك...دورات ماريا وجها كتفكر سهااات...هو كيشوف فيها كايتسناها شنو غادي تكول...تبسمات ورجعات شافت ليه فعينيه..

ماريا(فعينيها المكر) :

- لي بغيت لي بغيت وطلبتو تعطيه ليا؟

جواد : طلبي لي بغيتي انت مكتباعي مكتشراي عينيا نعطيهم ليك..

ماريا : متكولش ليا لا؟

جواد : جامي تسمعيها من فمي..

ماريا : شحال قدك تعطيني؟

جواد(بستغراب) :

- كلت ليك طلبي كاع فلوسي ومكانملك نعطيهم ليك..

ماريا : واخا نطلب 60 مليون..؟

جواد(عارفها مطماعاش) :

- نعطيك كثر منها الى بغيتي اي حاجة كنملك من هنا لقدام اتولي ديالك...

ماريا : صافي بغيت 60 مليون كلها فراش وغطا مانطات حوايج لكبار ولصغار بوطات سكر اتاي ماكلة اي حاجة ديال لماكلة لحم دجاج حوت...بغيت خدامة ديال لبني حتى هوما..

جواد(ستغرب مافهم والو) :

- اش كتخربقي انت اش كتكولي..؟

ماريا : صداقي هو نطلعو انا وياك لدواور لي هنا نواحي إيموزار وأزرو البرد جاي أجواد وثلج والشتا الناس مساكن مكايلقاو ماياكلو كيموتو بالبرد وشتا كدخل عليهم عمر شي واحد فكر فيهم خصوصا صحاب لفلوس خاصهم الضو والما شتياني داخلة ليهم من كل جيه مساكن حتى من لغنم كيموتو ليهم الى كتبغيني وباغي تعطيني صداقي وكلتي تزوني بذهب هيا دير هادشي لي كلت ليك صداقي هو تعاون هاد الناس ودير لي فجهدك باش تخليهم فرحانين الى فرحتيهم بحال الى جمعتي مال دنيا كلها وفرحة الدنيا كلها وحطيتيها فيدي...جواد بقا ساهي كيشوف فيها...جرها دغية لعندو وخشاها وسط صدرو مزير عليها...كيلعب فشعرها..

- كل نهار متزيدي تكبري فعيني وكنبغيك كثر وكثر ماشي أنانية ومكتفكريش غير فراسك كتفكري حتى فناس لي معاك بغيتي تعيشي وتعييشي (بعدها عليه كيدوز الظهر ديال يدو على وجها ويتمتع بشوفة لوجها عينيها وشفايفها) ..

جواد : من غدا غادي نبدا كوني هانية حسبي صداقك تنفد...

ماريا(دارت يديها ورا عنقو وعنقاتو بجهد فرحانة) :

- لهلا يخطيك عليا ياربي ومايحرمنيش منك أحبيبي..

جواد(خاشي يديه فشعرها كيلعب بخصلات منو ) :

- حتى انت أحبيبي..

فحضن بعضياتهم ساكتين...من غير انغام الموسيقى لي كتسمع...حاطة راسها على صدرو وهو كيدوز يديه على يديها..

ماريا(هرسات هاد الهدوء) :

- حبيبي سولت فرح على ذياب..

جواد(بلاما يفتح فمو) :

- امم..

ماريا(دورات راسها شافت فيه) :

- الطبيب كاليهم خاص عائلتو توقف معاه وماتخليهش بوحدو السيد عندو إنفصام فشخصية داكشي باش قررت..(قاطعها)

- قررتي قررتي كولي كملي عارف قراراتك انا كملي الالة

ماريا(تقادات فالكلسة) :

- غير سمعني وماتقاطعنيش سومية كتكتب كتاب قصة حقيقية ديال حياتنا 

جواد(بستغراب) :

- كيفاش؟

ماريا : اه كلت ليها علاش لا ماتبداش بقصة حياتي انا مافيها والو احبيبي وكلت لفرح طلب ذياب يعاون سومية فالكتاب باش تفكيرو يتشغل وحتى على المطعم لي كنت عاودت ليك عليه...كلت هو يتكلف بالاتات ديالو وتجهيز ديالو باش مايبقاش عندو الوقت لي يفكر فشيحاجة خايبة...راه مزيانة والله غير فكر فيها..

جواد(حط راسو على الفوطوي كشوف فسقف) :

- واخا الالة ماشي إشكال متافق معاك فهادي ولكن غير فهادي ماتبقايش ديري شيحاجة من دايتك لراسك الله يرضي عليك

ماريا : أخر مرة كنواعدك كون هاني..

جواد(شاف فيها بهتمام) :

- كنت بغيت نكوليك شيحاجة ولكن كنتشاور مع راسي واش نكولها ولا منكولهاش😕

ماريا(بحماس) :

- عفااااك ماتخلينيش هكا عارفني فضولية منقدش نصبر كوليا

جواد(كيحكها) :

- اممم حتى نفكر حتى لغدا بحال هاد الوقت ونقكر نكوليك..

ماريا(عصبها وجاها لفضول) :

- عفااااك والله حتى تاخود دنوبي😢

جواد(كيضحك) :

- صافي واخا وانت كتقطعي فلقلب الالة هاد الايام لي دازو كنت موصي واحد السيد يلقى ليا محل لي ممكن نديروه مطعم..او صباح هضر معايا وكاليا المحل واااجد وكيف بغيت وموقع واااعر شنو بان ل...(مجا فين يكملها حتى نقزات عليه عنقاتو كتبوس ليه فوجو)..

جواد(كيضحك) :

- وبراكة راه ايعجبني لحال وانت مافخير معايا اتكولي جواد كال خلينا هانيين الله عليك..

ماريا(بعدات عليه الحماس راكبها كلها).:

- انت أحسن رجل فحياتي الله يخليك ليا احبيبي ومايحرمنيش منك شفتيه كيداير وصفو ليا..

جواد : مابيهش طويل وعامر وزعر..

ماريا(ضرباتو لكتفو) :

- براكة من لبسالة وكول ليا

جواد : وراه مزال ماشفتو كلت حتى نشوفوه بجوج شنو بان ليك نمشيو دابا..

ماريا(وقفات كتجر فيه من يديه) :

- يلاه..ولكن اجي الخلاص انخلص أنا

جواد(زعف) :

- يلاه هاهيا بدات دابا الحسابات الخاويين وهيا انا براني ماشي راجلك مسؤول عليك..

ماريا : لا أحبيبي بالعكس ماتقلقش عليا ولكن تابعك شحال من حاجة يكفي مادرتي على قبلي براكة..

جواد(حاط بديه على وجها) :

- مانبقاش نسمع هاد العضرة الخاوية على فمك دخليها لدماغك انت مراتي محسوبة عليا تفاهمنا ظام تخربيق ماعندي مندير بيه بلاما تحسسيني بلي براني.

ماريا : لا بالعكس متكولش هكاك صافي واخا المهم نمشيو دابا نشوفوه حمستيني ليه...ولكن خاصني نجمع الطبلة ونغسل دوك الماعن..

جواد(جرها من يديها وراه) :

- مماين غسيل انكول لمينة تجمع داكشي تاكلو نيت هيا وراجلها ودوز معاها لماعن...يلاه..هزات ساكها من فوق الفوتوي وتيليفونها...وخرجو من دار... فتح ليها طوموبيل رمبها وسد ليها السمطة...قادها ليها...سد الباب ومشا عند مينة علمها بلي كاين...خلى ليها ساروت باش غدا يسيفط شي واحد يجيب من عندها الساروت...ورجع لعند ماريا...

”قد تُسعدنا أشياءَ ﻻ قيمةَ لها 

وقد يكونُ هُناكَ شيءٌ ثمين لا يعني لنا شيء 

غالباً ما تكونُ البساطةُ طريقَ السّعادة”

***

فرح(كتشوف فيه بترجي) :

- خويا عفااك مافيها والو دابا بغيتي تحشمني مع ماريا حرام عليك..

ذياب(مدور وجهو مخشي تحت المانطة) :

- راه كتليك بلاما تعذبي راسك

فرح(دارت عند مها) :

- ماما هضري معاه بغا يحاشمني مع ماريا هادي اقل حاجة ديرها على ودها داكشي لي وقع ليها وتبين ليها فعلا بلي انت ماشي هو لي كان خاطفها..ضار خنزر فيها مابقاش كيحمل يسمع هاد الموضوع..

رشيدة(جات عندهم) :

- عندها الصح أولدي مافيها باس تعاون ختك ومنها نيت تبدل الجو ودير شيحاجة وتشغل راسك عاونت لبنات مغايديش ليك بزااف ديال لوقت..

ذياب(شاف فمو) :

- الواليدة أجابني انا لشي ديكور ولا شي كتاب امةلي ليا منين طلعتو ليا بهاد لبلان..

رشيدة : واش نسيتي اش كاليك الطبيب حشومة البنت راه خطيبت خوك ماتردهاش فوجها..

ذياب : خويا لي مزال مجا هضر معايا ولا شافني

رشيدة : وانت عندك شي وجه باش تشوف فيه مابغاش يحشمك ويحرجك قدامو..

ذياب : الواليدة انبقاو فهاد سيجي بزااف راه حلفت ليكم معاقل على حاجة..

رشيدة : الى بغيتيني نسكت عاون ختك وماتردهاش ليها فوجها

ذياب(رد راسو لور) :

- اووووف صافي واخا الالة واخا 

فرح(عنقاتو) :

- لهلا يخطيك عليا أخويا غدا نعكيهم نمرتك باش تافقو على كولشي..يلاه انا مشيت عندي غير ساعتين ديال لغدا ونرجع..

رشيدة : الله يعاونك ابنتي

فرح : أمين ياربي يلاه بسلامة

رشيدة : بسلامة..

****

واقفة قدام المحل من برا كيبان أنيق بزااف مصبوغ بلون ترابي...الباب ديالو خشب فالقهوي داكن منحوت عندو قبضة على شكل يد نحاسية كبيرة...من لداخل عندو طابع تقليدي من نحية الصباغة وديكور لابات نحاسية واضواء تقليدية أيجي مطعم خيالي...ماريا نسات جواد لي معاها كتسقي عينيها بهاد المحل لي ايشوف النور ويولي مطعم معروف إن شاء الله...بدات تخطط فدماغها وتهندز كل بلاصة وشنو ادير فيها كل قنت عطاتو حقو..ضارت عند جواد لي واقف طاوي يديه داير رحل على رجل وكيشوف فيها..

ماريا(عينيها كيبريو):

- عجبني بزاااف والله ااااعر بزااااف أحبيبي

جواد : كنت عارف بلي غادي يعجبك..داكشي باش قاديت الامور مع الشاري

ماريا(بستغراب) :

- كيفاش الشاري شنو كلنا؟

جواد(قرب عندها شدها من كتافها) :

- بلاما ضيعي وقتك معايا فالهضرة لخاوية لي فراسي كنديرو...يلاه أحبيبي خاصني نوصلك لدار عندي شي حاجة ضرورية نقضيها..

ماريا(جارها وكتشوف فيه مصدومة) :

- جواد خلينا انهضرو راه...(مكايسمعش ليها كيصفر وداير راسو ماعلابالوش دخلها لطوموبيل وسد عليها..رجع للمحل سدو دار يوارت فجيبو ورجع عندها لطوموبيل...ديمارا وشد الطريق..

ماريا(كتحاول تهضر معاه) :

- جواد علاش راسك قاصح مافهمتش انا؟...خدم الموسيقى وجهد فصوت كيضرب بيديها فالفولون يصفر ويغني..راسو أقصح منو مكاينش وغير اتبقى تهضر فالاخر مغاديش يديها فيها اللهم تسكت..جمعات يظيها طواتهم وضارت لسرجم ساكتة...مانطقاتش وحتى هو ماهضرش ...حتى وصلها لقدام باب دارهم هزات ساكها ... فتحات الباب نزلات...يلاه سدات الباب شاف فيها ونطق :

- حبيبي نشوفك غدا(سيفط ليها بوسة فالهوى مع غمزة ديمارا طوموبيل وزاد)...بقات واقفة كتشوف فيه حتى غبر سلمات امرها لله..حيدات سوارت فتحات الباب ودخلات...لقات حورية ومليكة مجمعين..

ماريا : ماما انت هنا؟

حورية : حيت نعاون ماماك مليكة دوموندينا بلاطويات ديال الحلوة وقادينا لي كاطو لي ايتحطو غدا إن شاء الله..

ماريا : عدبتكم معايا الله يسمح ليا منكم..

مليكة : اويلي ابنتي مالكي برانية راكي بنتنا كلت لماماك نجيبو طيابة مابغاتش بغات طيب هيا لراسها. 

ماريا(شافت فمها وكلسات) :

- وعلاش اماما واش انت خاص تكلسي معانا ولا طيبي..؟

حورية : انطيب قبل ونقاد كولشي ايبغا غير يتسخن ويتحط انكلس معاكم ونشبع كللاس..

ماريا : لي بغيتي اماما امابغيت ليك عذاب

حورية : مكاين حتى عذاب...يلاه سيري دخلي انت رتاحي وديري شي ماسك لوجهك وحاولي تنعسي باش وجهك ياخود الراحة التامة ليه..

ماريا(وقفات) :

- عندك الحق فايقة نيت بكري كنحس براسي مدكدكة يلاه اماما انا خليتكم..

مليكة : سيري أبنتي..مهم حورية فاش خليناها؟؟..

قُلوبُ الْعَاشَقِينَ لَهَا وَقودُ فلو كانت إذا احترقت تفانت ولكن كلما احترقت تعود كأهْل النَّار إذْ نضِجَتْ جُلُودٌ أُعِيدَتْ-لِلشَّقَاءِ- لَهُمْ جُلُودُ

^^^

سومية واقفة كتسنا كل شوية تشوف فساعتها..بدات كتعيط :

- ماريا وسربي خلاص أصاحبتي تعطلنا وردة كاتساين..خرجات ماريا بزربة هازة بوشيط الفراشة ديالها وصندالة دايراها فكرطونة مع ساك..

- خودي هادومن عندي هزيهم..ماما مليكة فين بابا؟

خرجات مليكة من لكوزينة :

- راه من صباح وهو على برا كايتسنا فيكم سربيو خلاص يلاه تجيو مع الوقت قد قد..

ماريا : واخا انا مشيت...خرجات ماريا وسومية بزربة...طلعات ماريا حدا باها وسومية لور حطات حداها حوايج ماريا..ديمارا أحمد وشد طريق لصالون لي عطاتو ماريا سمية وفين جا..

#عند_وردة..

- زعمة مكيأتروش على زغبة ديال الشعر..

- لا أصاحبتي هاد النوعية عاد وصلاتني ماركة إيطااليا خطيرة 

وردة : سكينة كتعرفيني كنتيق فيك زعمة على ضمانتك..اختي انا الصبايغ الجداد مكنتيقش فيهم كناخف نديرهم ويتقطعو..

سكينة : الله يهديك واش عارفاني انوريك شيحاجة مازويناش وزايدون السيد لي كنتعامل معاه فإيطاليا هاد النوعية موجودة فسوق مكتأترش على الزغبة نهائيا شوفي لون لي عجبك انا نخدمو ليك...

وردة : واخا انا كان عاجبني الموف صراحة 

سكينة : كاين الوقت لي بغيتي انا معاك..

وردة : لهلا يخطيك عارفة لي كاين(شافت فساعتها) ماريا تعطلات..

سكينة : العريسات هكا دايرات مع ستريس والخلعة ماعندك مديري غير صبري

وردة : اليوم راه غير لخطبة اما نهار عرسها علم الله شنو ادير ليا..تحل الباب ودخلات سومية هيا لولة..

- سلام..

- وعليكم السلام

وردة : فين ماريا(كتقلب بعينيها)

سومية : هاهيا جايا...دخلات ماريا عاد رتاحت وردة ...

- ياختي فين هاد تعطيلة؟

ماريا(كلسات على الفوتوي) :

- ويلاه يلاه أصاحبتي..

وردة(شافت فمولات الصالون) :

- يلاه اختي بالي بيها..

سكينة : انكول لبنات يتكلفو ليها بشعرها وسوان لوجها والمباقس أنكملو معاها انا..أجي معايا أحبيبة وفيليسيتاسيو..

ماريا(وقفات مع إبتسامة على وجها) :

- ربي يخليك شكرا...سكينة أمرات لبنات يتكلفو بماريا شعرها او وجها ومن بعد تكلف هيا بلي باقي...

****

#فالقصر ..

خارج من دوش لاوي عليه غير لفوطة شعرو كيقطر فتح الدريسينك ديالو...جبد كوستار فلون لكحل..إيطالي الصنع هدية من عند صديق مصمم إيطالي هادي هيا المناسبة...فتح لمجر ديال الإيكسيسوارات جبد منهم سنسلة عريضة كدار خصيصا فالجيب ديال الكوستيم...ساعة أنيقة كلاسيكية...وجيلي فالأسود مخدوم بطريقة عصرية...حط اللبسة ديالو فوق من نموسية...وقف قدام لمرايا دار نن مزيل العرق ديالو وروائح الخاصة بالجسم ما بعد الإستحمام خلى راسو حتى نشف...وبدا كيلبس حوايجو...يلاه بدا كيسد فالعقاد ديال لا شوميز...تسمع دقان فالباب..

جواد(مشغول كيسد فلاشوميز) :

- وي...تفتح الباب ودخل باه...لابس جلابة ديال لحرير..مع بلغة فاسية هاز تسبيح فيديه...كيشوف فولدو بإعجاب وفتخار كبيير..

جواد(هز عينو فباه) :

- الواليد كولشي مزيان؟

الحاج : الحمد لله اولدي هدا نهارك ومانكونش مزيان..بغيت غير نسولك اولدي

جواد(هز عينيه فيه وأشر ليه براسو باش يسول)..

الحاج(بتردد) :

- ماهضرتيش مع رشيدة جات حشومة اولدي ماتحضرش لخطوبة ديالك شنو بان ليك؟؟..دار عندو جواد شاف فيه بملامح مامفهومينش...قرب منو وحط يديه على كتافو :

- أنت غير رتاح ليا بلاما تعمر راسك بهادشي..

الحاج : ولكن اولدي(قاطعو) ..

الواليييد انت غير رتاح وديها فصحتك ماتفكر فوالو صافي...

الحاج(شاف حتى هيا وسكت) :

- واخا أولدي انت تعرف..يلاه نخليك تكمل خرج الحاج من عندو...دار جواد كيشوف فالمرايا داير يديه على جنابو كيفكر مشا لجيهة لكوافوز هز تيليفونو شعلو بقا كيشوف كيخمم..شوية عاود رجع حطو ... وكمل لباسو ..

^^ هاحنا جينا حلو سراجمكوم لالة لعروسة جات ناري يا ناري^^... موسيقى خدامة وريحة البخور معطرة فوق من طبلة محطوطة مبيخرة كبيرة ديال النحاس منقوشة خارج منها دخان ريحتو عود ومسك ...مليكة بقفطان خفيف بالخضر مطروز لطرز الرباطي وفولارا فدهبي مع ساعة ذهبية فيديها.. وجوج براصليات فلبد لوخرا...واقفة فالكوزينة هيا وحليمة لي غير سمعات خبار الخطبة جات كتجري...باش تعاون حورية حتى هيا لابسة عباية فالبيج مطروزة بصم مع فولارا ديالها أنيقة مع سلسلة هالطة من عنقها طويلة خاتم كبير فيه حجرة خضرة وشرتلة ديال ذهب مزينة يديها...هبط أحمد من الفوق لابس جلابة فالقهوي خفيفة مع البلغة...مشا نيشان دخل لصالون عند محمد وياسين لي جاو هوما لولين..

أحمد : هاواحد السلامو عليكم..

محمد وياسين : وعليكم السلام والرحمة الله..كيداير اسي أحمد مبارك ومسعود والله يكمل بيخير..

أحمد : أمين ياربي ولعكوبة لوليدات ياسين وسومية..

محمد : أمين ياربي ولوليدات المسلمين كافة أجمعين..

أحمد : أمين ياربي ولدي ياسين مرحبا بيك نهار كبير هدا احسن حاجة درتي داك لكلينيك ايطلع ليك فراس

ياسين(لابس شوميز فشيلي مع سروال توب زرق سمطة فالقهوي مطلع يدين لاشوميز مبين على يديه لقاصحين وساعة جلدية فالقهوي ماشط شعرو لور من غير شي خصلات صغار على جبهتو...حشمان حيت اول مرة يدخل عندهم لدار)..

- الله يكبر بيك اعمي ومبروك على ماريا الله يكمل عليها بالخير..

أحمد : أمين اولدي الله يرضي عليك..شفت هاد لعيالات نساونا مكاين لابراد ديال اتاي لا والو..بدا محمد وياسين كيضحكو...نباتو مراتو من حدا لباب..

- ديما زربان وايوصلو الضياف بعدا اما انتوما راه مالين داار ولالا اختي حورية ؟؟..

- عندك الصح اختي الرجال متفيهم صبر...مابقا والو ويوصلو ضياف غير ضوية ديال صبر...رجعات حورية ومليكة لكوزينة...وبقاو الرجال كيهضرو بيناتهم على دنيا والأخبار وشنو واقع كل مرة وفاش كيهضرو...صونا الباب جوج ديال صونيت متابعين..

حورية : وقيلة جاو..

مليكة : خليك انا نفتح...نباها احمد لي وصل لكوزينة :

- أخليكم انا نفتح...هوما فالكوزينة وكيسمعو صوت رجال ماحسو حتى بزردة وقفات عليهم هازة ليليا فيديها..

مليكة(مدات ليها يديها) :

- ياختي على لحبيبة ديالي وشكون لابس ليا الفرشات اجي عندي اجي..(باست وردة وشدات من عندها ليليا)

وردة(لابسة جلابة فالغوز كلها منبتة بالحجر مع صباط عالي وساك فنفس اللون منبت).. :

- ماريا كاتليك بغاتها تلبس فراشة فنفس اللون باش تكون بحالها سلام خالتي حورية(عنقاتها) كيدرتو مع توجاد؟

حورية : سالينا كولشي

وردة : ياكما نعاونكم فشيحاجة؟

حورية : لا ابنتي سالينا كولشي جبتو كاملين؟

وردة : أنا وعمي وجواد وأمين يوسف مشا لفرنسا...وهاجر حتى هيا ماقدراتش تحضر شحال بكات كبيلة فتيليفون...مسكينة كانت بغات تكون هنا وتحضر لخطوبة خوها..

مليكة(هزات حلوة عطاتها ليليا) :

- ماعندها مدير ابنتي دابا خاصها تبع راجلها ولي مهم هو العرس اتكون فيه عمك العربي لي مزال ماجاش؟

وردة : مراتو اتمشي ليوم لفرنسا هو مابغاش يرجع ردات ليه اللومة على قبل ربيع لي تشد...كاتليه كولشي منك ومن بنت خوك على ماريا...واخا عارفة ولدها غالط ضار فيها ورجعات...داكشي باش تعطل شوية تلقايه هنا..

حورية : اش انكوليك ابنتي الله يهدي ماخلق..

وردة(شافت فساعتها) :

- ماريا تعطلات خليتها كتقاد ليها المكياج ومشيت لدار دغية وجدت وجيت لهنا باش نستقبلوها..

حورية : أمضرا تهلاو فيها مزيان؟

وردة : عاملوها بحال الأميرة اصلا ديك السيدة كنعرفها فاش قبل مانتزوج كنت كنجي لهنا عند أمين وكنت كنبغي نشوف خالتي الله يرحمها واحا هيا مكانت كتبغي تشوفني زكنت كنمشي لهاد الصالون معروف هنا..داكشي باش ديتها ليه..

مليكة : وقيلة غير نبداو نحطو العصر فات يبقاو الناس بلا والو هاكي ابنتي شدي ليليا وسيري كلسي ماتبقايش واقفة

وردة : اويلي مالي برانية انخليها مع باها ونرجع عندكم...شدات وردة ليليا ومشات لعندهم لصالون دخلات سلمات على محمد واحمد وياسين وعطات ليليا لباها دورات عينيها مبانش ليها جواد..

وردة(لامين) :

- فين جواد؟

أمين : جاه شي تيليفون وراه حدا دروج كيهضر..

وردة : ااه واخا رد البال ليها أنا جايا..

****

جواد(داير يديه فجيابو) :

- وي عز الدين أمضرا؟

عز الدين : لقينا يوسبي وشي ملفات خطيرة على ريوس لكبار الأغلبية كاينين فأمريكا...وإيطاليا...سيفطنا كاع الملفات ولمعلومات لبوليس لي تم وحنا تكلفنا بلي هنا...كلشي تقرقب عليه هاد الملف مسمار وطرقناه وأخيرا..

جواد : وعلى سلامتك وقضية الثعلب ذياب؟

عز الدين : كيما واعدناه وفينا بالوعد الملف ديالو تحرق دابا مابقاش كاين شي واحد سميتو الثعلب..

جواد : الله يحفظك أعز الدين شكرا بزااف

عز الدين : وامبيناتناش اصاحبي وزايدون كونما هو مغاديش نطيحو على هاد الناس واخا نبقاو سنين نقلبو عليهم..المهم الى كانت اي حاجة نحن فالخدمة بلاما نوصيك.

نوصيك اي حاجة غير صوني..

جواد(مبسم وكيشوف فالأرض) :

- عارف لي كاين وحتى انت بغيتي اي حاجة تيليفون عندك...(فديك اللحظة تفتح الباب ودخلات سومية بقفطان على شكل سروال فندريسي فالرمادي بارد مطروز بدهبي...طلقة شعرها لي زادت ليه اللون ولا أصفر رمادي...تابعاها ماريا من لور صوتوالطالون ديالها خلى جواد يهز راسو ويتفيكساو نظراتو عليها جمد لسانو نشف قلبو كيضرب بجهد...المومو ديال عينو متحركش واقف مامحركش كيشرب من جمالها من شعرها لي دارتلو مشيطة خفيفة مكاياجها لخفيف لبسيط وراقي...فنفس لون صباطها وساكها الحلقات لي طوال فدهبي ولموف بارد مايل لغوز هوما والكوليي ديالهم..نزولا مع لبيسة ديالها مع ساكها وصباطها كتبان اميرة وراقية بزاااف سلبات ليه عقلو مابغاش يشوفها حتى واحد مابغاش واليديها يشوفوها مابغاش ياسين يشوفها حتى من خوه مابغاهش يشوفها...مابقا حاس بوالو حتى من عز الدين لي عيا مايكول ألو حتى قطع مابقاش حاس بيه يدو فجيبو ويد شادة تيليفون وعينيه لي مفيكسيين عليها...هيا حشمات وخدودها توردو كتر من فراجو لي دايرة فوجها عينيها كيبريو أناقتو خطفات ليها عقلها وروحها...قربات لسومية وهمسات ليها فودنيها)...

- شفتي حبيبي ياك شفتي جمالو ولكن مالو واقف بحال هكاك واش فيا شيحاجة؟

سومية(كتشوف فيه وتشوف فيها مبسمة) :

- شفتو اختي شفتو وكتسوليني انا وشكون كيعرفو كثر غير كولي ليا وراه باينة بلي عجبتيه أصاحبتي كتسنايني أنا نكوليك...خلاتها سومية وقربات ليه..

- نسيبي ماغاندخلوش...

جواد(الصمت)..

سومية(كتهضر بالهمس) :

- حالة صعيبة واقيلة خاص الكبار يدخلو...خلاتهم شي كيشوف فشي هيا منباهرة بيه وبحضور ديالو وقفتو طولتو عضمتو أناقتو الصاروخية وهو كذلك منباهر بجمالها وأناقتها لي كتخطف الأبصار...خرجات مليكة وحورية مع سومية كل وحدة كتشوف فواحد مرة يشوفو فماريا ومرة يدورو عند جواد يشوفو فيه كان خاص لي يصورهم شداتهم الضحكة..

حورية(لماريا) :

- بنتي دخلي كلسي مع ناس ماتبقايش واقفة..

مليكة(لجواد) :

- ولدي دي خطيبتك ودخلو لداخل احنا جايين...ضار جواد عند مليكة عاد عاق لراسو...غوبش واحد الشوية ودار تيليفون فجيبو...

- أه وي واخا سمحوليا...دخل لداخل وسمح فماريا واقفة تلف وماعرف شنو يدير مابقا يفرق من باب الصالون ولا باب البيت لاخور...شوية لا يدخل فالباب...

سومية(شادة ضحكة غير بزز) :

- نااااري السيد تلف مسكين وحشم حتى من ماريا سمحوفيها وخلاها..

حورية : بقا فيا مسكين...الصلاة على نبي تبارك الله على بنتي راه بسيف مايتلف شوفو صلاة على النبي..

ماريا(حشمات بزاااف) :

- مانقدش ندخل عندهم كي غادي ندير..

مليكة : دخلي عادي اول مرة اتشوفيهم..سونا لباب...ضارت ماريا تفتح حيت هيا أقرب وحدة ليه...

ماريا(والفرحة فعينيها) :

- وأخيرا عمي...كنت خايفة لامتجيش...

العربي(عنقها) :

- ونخلي خطوبة بنت خويا عمرها تكون...سلم على حورية ومليكة وعنق سومية..

العربي : كولشي لداخل؟

حورية : كولشي كاين خاص غير انت...

العربي : واش كتسناو يلاه...شد لماريا فيديها وهيادارت يديها فدراعو ودخلو بجوج...نظرات الإعجاب والحب لش شافتهم فعينين جواد اول ما دخلات عينيه كيبريو بحال القمر الى كيبري فالما...مانزلهمش عليها حتى كلسات جنب عمها وباها...جاتها واحد الحشمة مكاينش بحالها ونور وسر طاح عليها...ماقدراتش تهظ عينيها فيه ولا فاي واحد فالبيت...دخلو العيالات لصالة وبديهم عامرين بالبلاطويات ديال الحلوة ...صواني ديال اتاي...والعصائر...الكبلة عمرات تبارك الله...كلسو كاملين مجموعين زمعاهم حتى حليمة لي عيطات عليها مليكة تكلس معاهم...هز جواد تيليفون ديالو بدون سابق إنذار...كيكتب ويشوف فماريا يكتب ويشوف فيها الإبتسامة على وجهو...باينة شحال هو فرحان علاش لا وهذا اجمل نهار فحياتو...ستغل جماعة ديال الكل ورسل ليها رسالة...حسات بتيليفونها سونا فساك...حلاتو وجبداتو...فتحات لقات ميساج من عندو.. حلاتو وكان كالآتي :

أقبلت تمشي رويدا

ودنت تنجز وعدا

وأتت بعد فراق 

زادني شوقا ووجدا

كم تمادت في عذاب

أكثرت صدا وبعدا

وقست حتى كأني

خلتها تضمر حقدا

لوترى حين تلاقينا

وكان الطقس بردا

دفئت أجسامنا

واستبدلت بالبوس سعدا

التقينا في سكون الليل

لا نطلب قصدا

غير قبلة التهاني

بدلت خدا بخدا..

تزنكو حناكها وحشمات تبسمات بلاما تحس تلقائيا هزات راسها شافت فيه قابلها بغمزة من عينو...عضات على شفايفها حركة لي أترات فيه وجنناتو...بلاما تحس كدير حركات كتأتر فيه كتخليه مشلول...هزات عينها فيه مرة أخرى...ورجعات شافت فتيليفونها كتكتب...مهزاتش راسها حتى كملات...حس بتيليفونو...فيبرا وسط من إيدو...لقاها جاوباتو فتح الرسالة وبدا كيقرا :

يا ذا الرذاء الأسود

ولما رأيته واقفا ما قلت الا.... الله

سبحان الذى خلق جماله وسواه

بردائه الأسود كأنه الليل 

والوجه ابيض هو القمر

غطى على الكون ضياه

رأيته فى وضح النهار وكانه

بدر تنزل إلى الأرض

وغادر مع النجوم مداه

نافس نور الشمس حتى خشيت

على بصرى إذا ما أبصرت

حسن عيناه

الدنيا انقلبت رأسا على عقب 

لا الأرض أرض

ولا السماء سماء

وكأني السكرانة بلا خمر 

وهل يفعل الخمر ما فعلت بي رؤياه

اهزو بالكلام كأنني مسني جن 

أو كالتائهة العطشانة فى فلاه

القلب زادت نبضاته ونسيت الكلام 

الا لفظ الجلالة الله 

أبشر انت ام ملاك منزل

فتنت رقيقة القلب فتاه

لو كان شيئا يحمد فيما حدث

فهو انى برؤيتك قد ذكرت الله

يحفظك الذى سواك من كل سوء

رقيتك بسم الله ما شاء الله

للقدر على البشر قضاء 

وسحرك للقلوب

بات قدر قد قضاه الله💙..

كلامها خلاه يضحك بلا هواه...خالقين عالم اخور بيناتهم ناسسين المكان وزمان ناسيين الناس لي معاهم...كاينة غير هيا وياه...هز عينو شاف فيها عض على شفايفو سنيناتو البويض خلاو وسامتو ضوبل 10 أضعاف...إبتسامتو خلات قلبها يضرب صباع يديها باش شادة تيليفون جمدو...رجع هبط عينيه...لتيليفون وكمل غزلو وفتيتانو بيها :

أصابني عشق أم رميت بأسهم

فما هذه إلا سجية مغرم

ألا فاسقيني كاسات وغني لي

بذكر سليمة والكمان ونغمي

أيا داعيا بذكر العامرية أنني

أغار عليكي من فم المتكلم

أغار عليكي من ثيابكي

إذا لبستها فوق جسم منعم

أغار عليكي من أبيك وأمك

إذا حدثاكي بالكلام المغمغم

وأحسد كاسات تقبلن ثغركي

إذا وضعتها موضع اللثم في الفم❤..

قرات الجواب ديالو ضحكات وهزات عينيها شافت فيه... كلمات نظرات أحاسيس مرهفة مشاعر نبيلة عشق محموم...تحكي عن قصة حب أسطورية...

الحاج(موجه كلامو لجواد لثالت مرة كيهضر معاه ولكن لا مجيب) :

- ولدي ... فاق جواد من أحلامو ومشاعرو المحمومة...عاد رد البال لباه لي كيعيط ليه..

جواد(دار تيليفون فحيب لافيست) :

- وي لواليد كلتي شيحاجة؟؟... الحاج شاف فيه وفماريا وجاتو الضحكة :

- سولتك اولدي واش تهضر انت ولا نهضر انا؟؟..

جواد(مزال مسحور بماريا حاسة بيها وبحرارة الجسد ديالها وريحتها ونظراتها) :

- الكبير ديال العائلة هو لي خاصو يهضر الوليد منتفضلش قدامك(كالها ودور راسو بشوية شاف فماريا غمزها...كاع لي كالس ملاحضينهم وكيشوفو فيهم)...

وردة(نغزات أمين) :

- شفتي أحبيبي تعلم من خوك جواد لي كنا كنكولو عليه معقد شوف شنو كيدير..

أمين(شاف فيها) :

- وعلاش انا كيجيتك احبيبي ولا نفكرك فلبارح اممم شنو بان ليك؟

وردة(حمارت وحدرات راسها) :

- باااز مكتحشمش صافي دير راسك مكلت ليك والو غير ضحكت معاك..

أمين : إيوا ماعرفت بغيتي نعاودوها دابا نيت انا موجود...

وردة : وصافي(قاطعهم سونيت ديال الباب)...وقف أحمد يشوف شكون وقفاتو حليمة

- أخليك اسي أحمد انا أنشوف شكون... مشات حليمة تشوف الباب ورجع أحمد كلس...ضار عندو الحاج :

- سي أحمد انا ماعنديش مع بزااف ديال الهضرة أنت عارفني...وعارفنا علاش جايين هاد نهار...(قاطعهم صوت من اللور)...

- السلام عليكم...

دارو جميع تجاه الصوت بان ليه يحيى راجل رشيدة ورشيدة وفرح ومعاهم ذياب لابس سروال دجيت فالرمادي مع تريكو كحل وداير نظارات كحلين كايشوف فالأرض...

رشيدة : سمحولينا الى جينا عندكم بلاما نعلموكم...فالاول تصدمو ولكن ناضت مليكة رحبات بيهم..

- مليكة : مرحبا بيكم الدار داركم...دخلو مرحبا...زيدي ابنتي مرحبا..

أحمد : مرحبا مرحبا...شاف فالحاج ولوخرين حدر راسو...

جواد(كيبرر ليهم) :

- بغيت حتى لالة رشيدة وخوتي يكونو حاضرين معانا فبحال هاد النهار

الحاج : أحسن مادرتي أولدي مزياان العائلة تعرف على بعضياتها واي سوء تفاهم مايبقاش..

رشيدة(حشمانة وماقاداش تهضر ولكن عندها جوج كلمات خاصها تكولهم ضروري) :

- بهاد المناسبة بغيت نطلب السماحة من بنتي ماريا على داكشي لي وقع وحتى ذياب بغا يطلب منكم السماحة على داكشي لي وقع...ذياب مزال حاني راسو كيحس براسو ماشي حتى لتم بحال الى شي واحد قاجو ولا شي واحد كيحاول يهضر معاه من الداخل ديالو مابغاش يتسنط ليه مخاصوش يضعف..

رشيدة(نغزاتو) :

- ولدي(أشرات ليه براسها باش يهضر)...هز عينيه شاف فيهم كاملين بلع ريقو وهو حشمان منهم..

ذياب : سمحوليا على لي وقع كونو متأكديين انا معاقل على والو وانا ماشي هكاك..(قاطعو الحاج)..

- عارفين اولدي لي فات مات دابا بلاما نبقاو نهضرو عليه هذا نهار كبير خاصنا نفرحو ونضحكو جميع العائلة مجموعة وجايين نخطبو لالة لغزالة بنتنا ماريا...ضار جواد بشوية هاز حاجب ومهبط الثاني كيخنزر فباه..بلاما يحس هضر :

- الوليد بنتنا اه وديك لغزالة لاش زعمة..ماريا خرجات فيه عينيها حشمات وحدرات راسها..

الحاج(قلبها ضحك) :

- وعلاش ماشي غزالة ديالنا وفنة ولالات لبنات...شافت فيه ماريا :

- لهلا يخطيك عليا أعمي..دارت خنزرات فجواد باش يسكت..

الحاج(شافيهم كاملين) :

- أسيادي مدام كولشي مجموع نهضرو فالموفيد...سي أحمد كيف كلت ليك انا ماعنديش مع الهضرة بزاااف لولاد راهم كيبغيو بعضياتهم وباغيين بعضياتهم وجينا هاد نهار باش نطلبو بنتك ماريا لولدنا جواد على سنة الله ورسوله...أش بان ليك؟..

أحمد(ضرب على فخضو بشوية وتنهد) :

- اسيدي مانزيدوهوم غير الخير الله يتبت الغرس ويكمل عليهم انا ماتسالني غير نبارك ليهم ونرضي عليهم..

الحاج(فرحان) :

- إيوا هذا كلام زين أسيدي الله يكمل بالخير..نقراو الفاتحة...(الكل هز إيديه كيقرا الفاتحة والعرسان فمهم كيقرا وعينيهم على بعضياتهم إحساس مكايتوصفش صعييب مايحس بيه غير لي عايشو)..

الكل(صدق الله العظيم)..

العربي(بضحك) :

- إيوا العيالات كاينة شي خطبة بلا زغاريت...؟؟

وردة/سومية/مليكة/حورية :

-(كيصليو على النبي) روروروروروروروروروروروورورورووروروروورويويويويويويويويويويو...

العربي : ودابا نشربو كاس ديال اتاي هو هداك...فجو عائلي محتافلين بالخطوبة...تسلل نظرات منها ومنو... ماكلة ديال الشيكي ولكن ماشي شيكي الحشمة لي غالبة ماخلاتهاش تاكول ولا تحط حلوة لاخرة فمها...ناضت سومية هيا وفرح كيفرقو الحلوة واتاي عليهم..

ماريا(جرات سومية من يديها قربات عندها ونزلات عندها)..

- عنداك ماتبقى حتى حلوة فطبسيل خلي ليا ديك لي عامرة شكلاط حتى يمشيو باش ناكول...رجعات سومية بلور مصدومة فيها فجميع الأحوال كرشها مكتسمحش فيها نهائيا...وقفات فرح قدام ياسين فيديها بلاطو ديال أتاي لابسة جلابة فأزرق ملكي طالقة شعرها شاداه بمقيبط صغير...مدات لبلاطو قدامو...مخنزرة..

ياسين(جكارة فيها بلعاني) :

- واقربي بغيتي تكبيه عليا بلعاني...قربات ليه لبلاطو كتغزز عليه :

- والله وكونماكان فرح ختي ماريا حتى نصلق ليك داك الراس لي عاجبك..

ياسين(هز الكاس وغمزها) :

- معتارفة بعدا بلي زوين كونما كنت ظين مايعجبنيش راسي ولالا أ أنسة؟😉..مداتهاش فيه تخطاتو وكملات تفراق ديال أتاي..

#من_بعد_جلسة_الشاي..

الحاج : كنظن دابا نهار العرس حددناه..

جواد(موجه هضرتو لماريا) :

- الى ماريا بغات تأجل ولا تحدد نهار اخور ماعنديش مشكيل...(شافو فيها)..

ماريا : لا نخليوه نهار 1 فشهر 12 مزيانة..

الحاج : وعليه أسيادنا الله يكمل بالخير..

ماريا(ستغلات الفرصة موجها كلامها لمها) :

- أخر الاخبار سومية اتولي تكتب وأتبدا بقصة حقيقية ولي غادي يعاونها هو ذياب...هز ذياب راسو فاش سمع سميتو تبسم نصف إبتسامة...حورية ماعجبهاش الحال مزال خايفة منو...لا هيا لا ياسين لي كيطلع ويهبط فختو..

محمد : مزيان أبنتي الله يوفقك حنا كاعما فخبارنا بلي عندها موهبة الكتابة..

حورية : وعلاش هيا شاوراتنا بعدا

سومية(كدافع على راسها) :

- خالتي مليكة لي نصحاتني ندير لحاجة لي بغيتها ونعتامد على راسي ومانعتامد على حتى واحد والكتابة كنبغيها بزااف ماشي بضرورة انها تعجب حد أخور اهم حاجة عاجباني أنا سمحوليا..(ناضت وقفات مشات لكوزينة...هزات ماريا فراشتها وتبعاتها)..

- واقفة دايرة رجل على رجل جامعة يديها كتخنزر..

ماريا(وقفات عليها) :

- مالكي دابا اش واقع؟

سومية(شافت فيها) :

- ماسمعتيش ماما شنو كالت بحال الى درت جريمة

ماريا : متزيديش فيه غير تفاجأت..كاتبقى ماماك هاديك اسومية يهديك الله حشومة

سومية : ماكلت والو ولكن ماتحشمنيش تخلي احتى يمشيو الناس وهيا ماعجبهاش الحال فاش دكرتي ذياب..

ماريا : من حقها راه خايفة عليك مغاديش تيق بيه بسهولة ضروري من هكا فلول فاش تعرفو اتيق فيه أصاحبتي درتي من الحبة قبة..شافت فيها سومية وسكتات...دخلات عليهم ماماها كتخنزر فيها :

- شفتك الالة مابقاتش كتعجبك هضرتي بدليني حسن..

ماريا : اويلي اماما نعلو شيطان

حورية : تنعلو هيا لي غير هضرت ناضت وقفات وخرجات وكالسة تعجبني انا...اش فيها والديك الى هضرو معاك فيها العيب هضر معاك البراني راه غير ماماك هادي لي هضرات معاك الله يعطيني لقوة لي هضرت اما نسكت ولكن دابااا تولي تقلبي على هضرتي بريق الناشف ماتلقايهاش وتكولي ندامتي...صارت سومية شافت فيها طارت عليها عنقاتها دموعها جايين :

- متكوليش هكاك اماما الله ينجيك الله يطوليا فعمرك نحماق توقع ليك شيحاجة سمحيليا والله مابقيت نعاود سوطيني انت ديري فيا لي بغيتي الله يحفظك ليا..

ماريا(جوها دموع) :

- الله ينجيك ماتبقايش تكولي هكا حشومة عليك باغية تبكيني فنهاري..

حورية(باستها) :

- سمحيليا أبنتي ماقصدتش ولكن هاد لحمارة كتخلي لواحد يتعصب ويكول شيحاجة ماباغيش يكولها..

سومية : صافي اماما الله يعطيك الستر

حورية(مدورة عليها وجها) :

- بعدي مني من لكدوبات

سومية : والله اماما لابقيت عاودت صافي..

حورية(شافت فيها):

- واش قضية داك ذياب كيفاش زعمة واخا تكولو ليا مريض وخو جواد انا راه خايفة بعدي منو..(قاطعاتها ماريا) :

- لا اماما والله حتى ظريف راه لي داز عليه ماقليلش وطبيب نصحو يخطالط بناس باش يبرا دغية انا لي طلبتها من سومية يعاونها وايعاوني حتى فتوجاد لقهوة على ضمانتي ماتخافيش..

حورية(بستسلام) :

- إيوا اش انكوليك ابنتي الى كنتي متيقنة ماعندي منكول ويلاه نرجعو عند الناس حشومة..

سومية : بلاتي اجيو مالحضتو والو لداخل ماشتوش فرح كيكانت كاتخنزر فياسين وحتى هو شفتو بعويناتي غمزها

حورية(بغات تقرصها) :

- الله يقلل حياك ابنتي ماحشمتي

سومية : وحق الله حتى شفتو

ماريا : فرح دابزات هيا وياه واحد المرة فدام القهوة

حورية(بستغراب) :

- علاش؟

حيت كان داخل لقهوة وماخلاتوش حيت ديال لعيالات ويمكن بغا يدخل بزز يهضر معايا وتشابكو فالهضرة..

سومية(كضحك) :

- وراه غمزها قبيلات شفتو ياك كيكوليك ما محبة إلا من بعد عداوة ماتعرفي شنو يوقع..

حورية(جراتها) :

- زيدي راه كتليك مابقيتيش تحشمي انت لا من كبير لا صغير...

سومية(كتحاول تفلت يديها منها) :

- وماما صافي مابقيتش انكول شيحاجة انسكت وصافي..

- مع دخلو بانو ليهم الضياف واقفين..

حورية : اويلي فين غاديين كلسو راه دايرين بحسابكم لعشا

مليكة : عييت نهضر والو

الحاج : خليت دوا فدار خاص نشربو..ضروري..

حورية : يمشي أمين يجيبو ليك ويرجع والله حتى دايرين بحسابكم لعشا كولشي واجد والله لا مشيتو سير اولدي لدار جيب ليه دواه ورجع(موجهة هضرتها لأمين)..

جواد(كلس) :

- وي أمين سير سير..شافيه امين مامتيقوش هذا هو جواد لي معندوش مع لكلاس مع الناس بزااف..

الحاج(شاف حتى عيا ورجع) :

- الى كان هكاك نكلسو...رجعو كلسو من غير رشيدة :

- إيوا نخليوكم حنا..

مليكة(شدات ليها فيديها رجعاتها) :

- والله لا مشيتي مالك برانية نعلي شيطان والله لا مشا شي حد..(رجعو كلسو)..

ياسين(وقف) :

- أنا خدام فليل ضروري نمشي نوجد راسي...

مليكة : ماسخيناش بيك أولدي الله يرضي عليك لي جيتي الله يعاونك ويفرحك حتى انت

ياسين : أمين ياربي يلاه بسلامة عليكم والله يكمل بالخير..

مارياوجواد(أمين)..

مليكة(موجهة كلامها لفرح) :

- بنتي اجي هزي معايا هاد طباسل...

فرح : واخا خالتي...

دخلات معاها طباسل لكوزينة وفاش كانت راجعة تساطحات مع ياسين فطريق..

ياسين : لهاد درجة مابقيتيش كتشوفي قدامك كون غير شفتي ليك شي نظاظر قبل ماحلاك تزيد تأزم..

سومية(كتغدد عليه) :

- راه أنت الى مامشيتي من قدامي لي غادي تزيد تازم..

ياسين(غمزها تاني) :

- انا غادي نشوفك من بعد أ أنسة😉...خلاها كتغلي فبلاصتها وخرج..

مليكة(من لور) :

- فرح بنتي مالك واقفة هنا؟

فرح(ماعرفات باش تجاوبها) :

- لا أخالتي غير رجلي تنملات عليا..

مليكة : ضربيها مع الارض وكولي ليها غادي نديك لعرس ايفوتك الحال...شافت فيها فرح بعدم تصديق :

- خالتي واش كتهضري بصح؟

مليكة : والله ابنتي الى هادشي لي كانو يكولو لينا كنديروها كيفوتنا الحال جربيها وشوفي..

فرح(كضرب رجلها) :

- فوتيني غادي نديك لعرس فوتيني غادي نديك لعرس(طرقات ليها شيحاجة فرجلها توعتات)..

- ناري ياخالتي اش داني اتخربيق هادشي

مليكة(غادية لكوزينة) :

- وكالو أبنتي...دازتها رجلها ورجعات لصالون..الرجال مجمعين بيناتهم والبنات حتى هوما هضرة كتجبد هضرة..وذياب ساكت..

ماريا(موجهة هضرتها لسومية) :

- سومية جيبي المذكرة ديالك وريها لذياب وتناقشي معاه خودي من عندو أراء وافكار ماحدو هنا...سومية حشمات كتحلف على ماريا غير بالفن...رجعات سومية وكلسات حدا ذياب ستغلات لفرصة ديال حورية لي فالكوزينة وباها لي مجمع..

سومية(بهدوء) :

- سلام..

ذياب(بدون مايشوف فيها) :

- سلام..بدات كتعاود ليه على القصة وشنو باغ دير...كان طالق ودنيه ليها..كالت ليه واحد النقطة هز عينيه فيها...شاف ليها فعينيها نظرة شتتات الانتباه ديالها..

ذياب(بوقار وبكل إحترام) :

-ولكن غلاف الرواية الى درتيه بهاد الشكل مغاديش يجلب القراء واخا راه اهم حاجة هو مضمون الرواية ولكن الواجهة ديال الكتاب هيا لي كتلفت النظر أول حاجة وفأي حاجة فاش كنمشيو ناكلو ولا فاش كندخلو لي محل ولا فاش كنبغيو نشريو اي حاجة الواجهة كتلعب دور خاصك تفكري فشي حاجة لي عندها علاقة مع مضمون القصة فهمتيني؟؟...

سومية(معجبة بكلامو) :

- أه عندك الحق نفكرو بجوج ونلقاو ليها حل

ذياب(حرك راسو بالإيجاب) :

- وي ممكن خلي عندك نمرتي ويبقى الاتصال بيناتنا عندي نمادج لخلفيات فالبيسي عندي نشوفهم ونفكر فشيحاجة لي تناسب الرواية ويكون خير ولكن خاصني نعرف الموضوع كامل هكا ناخود فكرة ولكن ماشي وقتو دابا كيفما كتشوفي..

سونية(تبسمات) :

- أه بصح عندك الحق..

**

وردة(حاضياهم ونغزات ماريا) :

- كيفاش قضيتك انت شفتك جمعتي دوك جوج هادشي بان ليا عندك فشكل..

ماريا(كضحك) :

- والله مافنيتي شيحاجة والى وقعات شيحاجة كاع راه من الخير 

وردة : ختك يلاه ناضت منها نسيتي؟

ماريا(ضارت عندها) :

- هيا ناضت منها وهو ناض منها شي يداوي شي كيجاتك؟😁

وردة(كتشوف فيها بعدم تصديق) :

- من نيتك؟

ماريا(كضحك) :

- راه غير كنضحك كولشي بالمكاتيب انا بغيت انعاونو باش يخرج من الحالة لي هو فيها وحتى هيا تعمر وقتها وحياتها دير شيحاجة لمستقبالها فهمتي..

وردة : واخا يالالة هاحنا انشوفو...من بعدما جا امين وجاب دوا لحاج...ناضت وردة وماريا لي متبعها جواد بالعين بغا غير ينفارد بيها ماقدرش ماخلاوهش كل شوية وحدة معاها ودارهم ماقدرش حاس براسو اينفاجر الما هضر معاها...غير يعنقها يبرد النار لي شاعلة فقلبو...خرجات من لليت وهيا عارفاه تابعها بعينيه مشات هيا وردة داووليليا لبيت ماريا حيت نعسات ورجعو لكوزينة عند مليكة وحورية وفرح لي واقفة معاوناهم بحال مولات الدار..

حورية(عجباتها فرح) :

- تبارك الله على بنتي مكرهتش يبغي لينا ياسين والله من غدا نجي لداركم نخطبوك ليه..فرح لي كانت كضحك وتاكل واحد الكعبة وحلات ليها...حتى خبطاتها ماريا :

- أبشوية عليك حتى واحد ماسبقك...مجاوباتهاش كتعاير فيه غير فخاطرها ومن برا مبسة دايرة فيها حشمانة..

مليكة : وسيرو هليتو الناس بوحدهم..

ماريا : ويلاه كاملين ماشي غير حنا..

حليمة : سيرو أختي مليكة لعشا هاهو كيسخن.. غير يوجد انبدا نحط سيرو..

مليكة(زولات طابلية) :

- واخا تخصك شيحاجة عيطي ليا نعاونك..

حليمة : واخا غير سيري...مشاو رجعو لصالة غير شافت سومية مها نقزات من حدا ذياب خرجات ترض لمذكرة لبلاصتها..

رشيدة(شافت ماريا وتبسمات ليها أشرات ليها بيديها لحداها)...ماريا حادرة راسها والحشمة على خدودها كلسات حدا حماتها حادرة راسها..جواد ماشي من لعاكزين ناض من بين الرجال وجا حتى هو كلس حداها فخضو ملاصق مع رجليها مزاحمها هاز حاجب ومهبط الثاني وداير راسو كيشوف فمو...

بإبتسامة حطات رشيدة يدها على رجل ولدها :

- مبروك عليكم أولدي الله يكمليكم بالخير برفاه والبنين إن شاء الله ويتاويكم ربي لخير..

جواد : أمين ياربي أمين شكراا...كان يحسابلي مغاديش تجيو(كيزيد يقرب لماريا وهيا كتكحاز عند مو)..

رشيدة : اويلي اولدي واخا ماعرفت اش يكون عندي كنت نجي خطوبة ولدي ومنجيش واخا نكون فأخر دنيا نجي وتبارك الله ختاريتي وعرفتي ماختاريتي الصلاة على النبي..

جواد(كيشوف فماريا وبسم بحال الى مزيود فعرس) :

- انا لي خديت الزين وعرفت شنو خديت(كيقرب وجهو منها ويستنشق العطر لي دايرة قدام مو ماحاسش)... ماريا مصدومة فيه وكتبعد عليه بالفن باش مايعيق حتى واحد..

رشيدة(كضحك) :

- الله يخليكم لبعضياتكم ياربي

جواد(عينيه اعلى ماريا) :

- أميييين أمييييين لهلا يخطيك الواليدة...رشيدة تصدمات المشاعر ديالها حبسو منين نطق هاد الكلمة...الدموع غلبوها ماتيقاتش راسها..

رشيدة(كترعد) :

- شنو كلتي أولدي دابا؟

جواد(مكاينش هنا) :

- أشنو كلت؟

رشيدة(شادة ليه فيدو كتورك عليها) :

- يلاه كلتيها اولدي كلتي الواليدة..مداهاش فيها ضارت شافت فيه ماريا لقاتو كيشوف فيها حركات يديها بشوية لجهة فخضو وقرصاتو حتى نقز من بلاصتو او وعا...شاف فماريا مغوبش وفمو...

ماريا(تحت سنانها) :

- خالتي رشيدة كتهضر معاك جاوبها...

جواد(بنفس تغوبيشة) :

- نعام شنو كلتي؟

رشيدة(بفرح) :

- انت اولدي لي شنو كلتي عفاااك عاودها الله يرضي عليك(دموعها هبطو)..

جواد : مابقيتش عاقل شنو كلت فكريني كنت ساهي..

رشيدة : كلتي ليا الواليدة أولدي

جواد(كيفكر ورجع شافيها) :

- الى كلتها راه كلتها..ماقدرش يتحمل ديك كمية الأحاسيس وناض..

ماريا(شدات فيديها) :

- شفتي شوية شوية الامور غادية وكتقاد جواد أخرتها ايتقبل انت ماماه ويعيط ليك بيها الصبر مدام عيط ليك لخطوبتو وكيعضر معاك براحة راه تقبلك ماماه وفحياتو حاجة مزيانة الحمد لله

رشيدة(شافت فيها بعينين دامعين وشحكة على لوجه) :

- عارفة أبنتي الحمد لله سمحيليا بكيت فهاد نهار

ماريا : متكوليش هكاك أخالتي خودي راحتك..

رشيدة : الله يرضي عليك...دخل لعشا تحط...نوضات مليكة الرجال لصالون لاخور ولعيالات خلاتهم فبلاصتهم...

ماريا(لسومية) :

- الحمد لله أخيرا اناكول براحتي ناااري تخنقت..

سومية : شفتي جواد كيكان كيخنزر ماكرهش كون حطو ليكم انت وهو راس فراس😂😂

ماريا : لالا أختي مغايخلينيش ناكول اللهم هكا حسن..

سومية(كضحك):

- وحق الله عمري ضنيتو هكا كيبان قاصح...نباتها وردة :

- ياختي راه الحب كيصنع المعجزات كيخليك دير شي حوايج بلا هواك بحال الى شي حد محكم فيك...تحط لعشا..

ماريا(دارت منديل على رجليها وعلات كمايمها)

- زيدو بسم الله انا بعدا راه جعت مغانتسناكم..

رشيدة : كولي بصحتك أبنتي

مليكة : مدار غير باش يتكال...تعشاو فجو من الضحك والحميمية والفرحة...الرجال بوحدهم وندامج معاهم يحيى كيهضرو على تجارة وأحوال لبلاد وأوروبا وزيد وزيد ذياب كيحاول يدخل معاهم مرة مرة فشيحاجة كيحس براسو ماشي بحال فاش دخل كبيلة لا مابقاش كيفكر فشخصيتو التانية بهضرتهم وبدون قصد منهم منسيينو فحالتو....

#عند_لعيالات

وردة(كتاكول فشي برقوقات) :

- ماريا ليزانفيتاسيو أشمن لون وشكل بغيتيهن باش يلاه يلاه يوجدو لينا..

ماريا(كتفكر فمها عامر وصباع يديها بثلاثة شادين فطريف ديال اللحم) :

- صراحة مكرهتش يكونو كيوجيو بالبرد والثلج

وردة(بستغراب) :

- علاش زعمة؟

ماريا : حيت اول نهار تعرفت على جواد كان فالبرد ونهار فاش عتارف بالحب ديالو ليا كان فوسط الثلج وحتى أول مرة تزوجنا تعقلي فاش كنا تزوجنا على وديت ليليا عرض عليا زواج فالفيرما وكان الثلج...نقزات رشيدة بستغراب :

- كيفاش زواج علاش انتوما ايمتا تزوجتو والى تزوجتو علاش اتزوجو دابا وكيفاش على ليليا شكون مافهمت والو سمحوليا الى دخلت ولكن تلفت..

ماريا : لالا اخالتي من حقك تعرفي قصة طويلة نساليو العشا ونعاودها ليك..

وردة(رجعات لموضوع الكارط) :

- فكرة زوينة صافي نكلسو ونشوفو تصاميم الى عجبوك نخدمو عليهم إن شاء الله..

ماريا : صافي واخا..

مليكة : وكولو دابا وداكشي خليوه من بعد مرحبا بيكم دار داركم ماتحشموش كولو

رشيدة : لهلا يخطيك أختي مليكة الله يكبر بيك

مليكة : الله اودي زارتنا البركة حنا دابا عائلة وحدة..

رشيدة : داكشي لي كاين الله يكمليهم بالخير

مليكة وحورية : أمين ياربي لعكوبة لبنيتك

رشيدة(مع إبتسامة) :

- أمين ياربي..

سلاو لعشا وضياف ناضو يمشيو فحالهم...عند الباب :

الحاج : الله يخلف والله يقوي الخير ويكمل على وليداتنا بالخير ياربي..

أحمد : أمين أسي الحاج..

الحاج : خلينا ليكم الراحة...تسالم مع البقية وطلع فطوموبيل...أمين هز ليليا داها لطوموبيل حطها فبلاصتها دار بيها الحزام ديالها اما ماريا مخبية لداخل بلعاني مابغاتش تبان لجواد قارياها فيه حسيفة...اما هو كيطل براسو وينفخ بحال شي ثور ويقلب عليها بعينيه...نباه باه..

- جواد يلاه اولدي..

جواد(مداهاش فيه تقزد) :

- لالة مليكة ماشفتيش ماريا؟

مليكة : بلاتي اولدي نشوف لداخل بقات نع لبنات يمكن..دخلات مليكة لقات ماريا كتهضر مع وردة..

مليكة : خطيبك بغا يهضر معاك

ماريا : كولي ليه انا فلحمام

مليكة : اويلي خرجي عند السيد

ماريا : وماما كولي ليه فالحمام هضرت معاك..

مليكة(حركات راسها بستسلام وخرجات)

وردة : حرام عليك كتقلي ليه سم كتحكيه

ماريا : خليه دارليا شوهة اويلي بقا ليه ايطير عليا قدام الناس حشمني

وردة : خليتي نمشي دابا لاخور حتى هو ينوض ليا انا مشيت حتى لمن بعد...مشات وردة خرجات لقات مليكة كتهضر مع جواد :

- فالحمام اولدي..

جواد(بغا يطرطق) :

- واخا تصبحو على خير...مشا طلع فطوموبيلتو محاملش راسو معصب بغا ياكول جنابو...وماريا حاضياه من سرجم هيا وسومية ويضحكو...ديمارا طوموبيل...وشد طريق عاد تبعو أمين من لور...

سومية : نااااري والله حتى يوصل يسوني ليك دابا تشوفي

ماريا : انطفي تيليفون

سومية : اويلي حرام عليك..

ماريا : انخليه يسوني ونجاوبو وندير راسي ناعسة هههههه خليه يتفقس شوية عرفتي كبيلة حشمت قدام خالتي رشيدة اويلي وقدام الناس وبابا مابقاش كيحشم داك السيد تقزدر كاع هو...

سومية(كتشبح) :

- عييييت والله

ماريا : حتى انا أجي شنو جابو معاهم...انا نع دخلت ماسولتش

ماريا : حتى تجي ماما ونسولوها...تسد الباب ودخلات حورية ومليكة وأحمد..

مليكة(كلسات ترتاح) :

- الله ياربي عضامي ضروني

حورية : حتى انا ماعرفت فين محمد خاصنا نمشيو

مليكة : بلاتي خليكم كالسين باتو معانا

حورية : لاواه يلاه يلاه نوصلو ونرتاحو..

ماريا : ماما فين داكشي لي جابو شنو جابو؟

مليكة : الله أعلم أبنتي الورد وشوكولا وكاع داكشي دخلتو لبيتك مامسيتوش..

سومية : حتى تنوضي وتشوفيه...سونا محمد على خورية باش تخرج عندو يمشيو..

حورية : يلاه الله يبيتكم فراحة(شافت فسومية) انت عجباتك الكلسة مانوياش ترجعي..

ماريا(عنقاتها) :

- ناري اماما خليها موانساني مابقا ليا والو ونخوي دار وتجي تكلس معاك..

حورية : اهاه وماشتيش الى تبعاتك حتى هيا..

ماريا : بالفرحات علينا الله أودي

سومية : لالا مزال عليا الحال دابا..

حورية : ويلاه نخليكم هاد الساعة الله يبيتكم فراحة...مشاو معاها حتى لباب...سلمو عليها خرجات لقات محمد كيتسناها سلم عليهم حتى هو بقاو واقفين حتى ركبات فطوموبيل ومشات..مع سدات مليكة الباب مشات ماريا تجري جابت طبسيل فيه الحلوة وفيه طارط جابوها دار جواد معاهم وكارطونة دالعصير هربات بيهم لبيتها..

مليكة(كتعيط ليها) :

- ابنتي حتى واحد ماتبعك ماالك على حالتك يلاه تعشيتي

ماريا(نباتها من البيت) :

- مزال بلاصة خاوية فكرشي محتاجة لحلاوة.

مليكة : ويلاه تصبحو على خير

ماريا وسومية : وانت من أهل الخير...طلعات مليكة تلحقات باحمد لي كان طلع قبل منها الماعن غسلاتهم حليمة ونشفاتهم رداتهم لببلاصتهم وباتت ديك ليلة تما..

سومية : فتحي شوفي شنو جابو ليك...

ماريا(حطات داكشي من يديها) :

- فتحات بواطة فالحمر...تصدمات من المنظر لي قدامها..ماقداتش تهضر..

سومية : ياااختي واااااعر بزااااف..

خطفات ليها سومية لابواط من يديها :

بلاتي نزيد نبركك..كتشوف فلكوليي لي قدامها ديال الألماس واعر سامبل ونفس الوقت راقي...

ضارت ماريا لجهة لوخرا كيبانو ليها بزاف ديال لي بوشيط دهاز على قدو هذا غير فالخطبة سمحات فالحلوة وبدات تحل كل كرطونة بوحدها وكل بوشيط بوحدها بعيدا على الأثواب لي كتشوف كلهم كيبريو راقيين بزااف وباينين غاليين..خلي صبابط وسيكانهم وصنادل وسيكانهم واحد كينسيك فتاني والالوان لي كيعجبوها الاخضر زرق كحل حمر كيحمقو...ناضت سومية كتشوف معاها حوايج فنين خلي الحنة وتمر هادوك بوحدهم صنيدلات عاليين كسيوات عصريين...بقات بوشيط وحدة مزال ماحلاتها...جاها ميساج فنفس لوقت لي هزاتها.. هزات تيليفون لقاتو من عند جواد(نتفاهمو من بعد على الهربة لي درتي المهم واحد البوشيط فالزرق فتحيها بوحدك ..).. مع دارت لبةشيط لي حطات بانت ليها سومية هزاتها وحلاتها...

ماريا : بلاتي بلاتي نجي صبري..مشات كتجري خطفاتها وضارت حلاتها... بقات واقفة مبلوكية فبلاصتها الحواس ديالها كلهم تخدرو فديك الوقت من قوة الصدمة..

سومية(كتسولها من لور) :

- وعطيني نشوف حتى انا مالك حشومة عليك...دارت عندها ماريا بحال شي روبو وجهو مامصدوم وهازة لبسة فيديها شوميز شبكة على شكل سوتيامات فالبيض وصايا ديالو محلولة من الجنب وفيها الموزون من عند الخصر...سومية سكتات حتى عيات وتكرشخات بضحك طاحت على نموسية شادة كرشها وكضحك..

سومية : وكواك انموت صافي جايب لي كسوة ديال شطيح فيفي عمدو فياماتها..

ماريا(جمعات غوباشتها) :

- عند بالو انشطح ليه ياكما يحسابني انا هيا مايا ولا دينا زوينة هادي والله حتى زوينة هزات البةشيط وجبدات الكسوة التانية فالحمر او وحدة بحالها عريانة حتى هيا فالحمر..

سومية(مخرجة عينيها) :

- والله حتى واعرين اصاحبتي

ماريا : والله لا لبستهم ليه..

سومية : وراه شافك داك نهار فمطعم مامون كتهزي البوط بسيف مايجيبهم ليك اللهم تشطحي لراجلك ولا البراني..

ماريا : واش كتفلاي عليا(خنزرات فيها)...داكشي لي بقا ليا نيت انهز البوش ونلبس هادشي ونمشي نيت لشي كباري ونكوليهم رقصني ياكدع..(قاطعاتها سومية كتشطح) :

- على وحدة ونص ايوا..

ماريا(كتشوف فيها ماكرهات تغزها) :

- لبسيهم نيت انت اويلي هذا بغا يجلطني..هزات تيليفون سيفطات ليه ميساج :

- حبيبي فيفي عبدو خليتيها فمصر انا غير ماريا..(ولاحت تيليفون هزات كارطونة دشكلاط كتسرط فيها وتشوف فسومية لي هازاهم كتحطهم عليها وضور بيهم...تنهد وتخشي فشكلاط وتاكول)...جاها اسمس من عندو..

- انت اتكوني مراتي احبيبي بغيت نشوفك بيهم..(هزات تيليفون قرات الميساج ولاحت تيليفون وقفات هازة الكرطونة وضور فبيتها) :

- اويلي كاليك بغا يشوفني بيهم سمعتيه هذا واقيلة موالااااف بالكبريات ومع انتزوجو يتحدو ليه كال اللهم تلبسهم مراتي خليت راقصة نلقى وحدة فدار زوينة هادي هدا انولي ندير ليه الأمداح فدار باش نقطعها فيه راه مايتقبلهاش العقل مانقدرش اويلي على اخر يامي نهز البوط

سومية : هاء وراه هزيتيه فالمامون..

ماريا(خنزرات فيها ومدخلة 3 شكلاطات فمها)..

سومية(سكتات) :

- ههه صافي هاني سكت مابقيتش اختي معاود ولكن راه واعرين والله...بدا تيليفونها كيصوني جات حتى طلات عليه بان ليها هو وخلاتو كيسوني وجواد عدوه ماتجاوبيه ايهرس داك تيليفون مع الارض...

سومية : جاوبيه

ماريا : دخلي سوق راسك...ياربي صبر من عندك ماتفاكيناش مع دخلة والرعب لي ركب فيا شوف العجب لي مخرج ليا انهز جلابتي بلا حوايجي ونطج نطلع لشي جبل متعرفوني فين صديت

سومية(مقداتش تحبس راسها) :

- هههههههه واكواك صافي عفااك صافي انيكت هانا هانا(تخلعات من شوفات ماريا).. والله ماقادة اوووف صافي صافي...ناضت هربات لطواليط سدات عليها ميتة بضحك..

ماريا : ضحكي انت لي طالعة ليك الله يخلي شي زواج ولي يجي منو كاع الى كان غير نتزوجو على شطيح بناقص...كلسات بزعاف كتاكول حتى كملات البواطة دقة وحدة...

مارجعش جواد سونا ليها نهائيا...حطات لبواطة من يديها ناضت جمعات كاع لي كادو لي جاوها فللخطبة رتباتهم فالماريو من غير البوشيط لي فيها بدلات الرقص خباتهم...بدلات الفراشة لي لابسة بالبيجامة غسلات وجها دارت ليه مرطب وتكات فبلاصتها..

سومية(كتشوف فيها) :

- صافي أتنعسي؟

ماريا : عيييت جاني نعاس

سومية(كتشوف فلأرض) :

- واخا هكاك هداك ذياب ضريف جاني

ماريا : اممم جاك ضريف اه ضريف صراحة...وخليني نعس اختي لحبيبة...هزات لغطا غطات راسها وخلات سومية لهلوساتها وكتابتها حتى طاب نعاسها عاد طفات الضو ونعسات...

****

رائحة القهوة .. وصوت المطر .. وسماء ممتلئة بالغيوم .. 

ودعوات من القلب .. اللهم يامن رويت الأرض مطراً 

.. أروِ قلوبنا فرحاً ..

صباحكم عطر الارض بعد المطر..

صبحات الأرض فازكة بشتا واخا شهر واخا اواسط شهر 9 صبات الشتا...سونا لماريا تيليفون ماقدراتش تجاوب غير بزز هزات تيليفون طلعات عندها نمرة جواد...

ماريا(حاطة تيليفون على ودنيها ونصها ناعس) :

- ألو..

جواد(بصرامة) :

- علاش مكتجاوبيش واش كنكول لمك منين نسوني ليك جاوبي مكنعرف طاسيلتك مالك ديما مجعراني مخلياني ضارب تيليفون حتى خبطت مو مع الارض..

ماريا(صوتها ناعس كتلحن فالهضرة) :

- واش مفيقني على صباح باش تكوليا هادشي أجواد حرام عليك..

جواد(منرفز ونفس الوقت مدوباه بهضرتها) :

- هضري مقاد ساعة نلقاك فقتي او واجدة ولبسي مزيان

ماريا : علاش؟

جواد : وقيلة الى نسيتي بلي لبارح دازت خطبتنا وبلي راه مابقا والو لزواجنا شهرين ونص اليوم 15 يمكن ولا انت وليتي كاتنساي ولا كتناساي نلقاك واجدة انهبطو لفاس...

ماريا(كتوكض شوية بشوية) :

- فااا(مخلاهاش تهضر قطع عليها)..

ماريا(اووووف) ::

- لاحت تيليفون وتقلبات على ظهرها كتشوف فسقف...ناضت كتعكل فالمانطة ديالها طلات من سرجم بان ليها الجو مغيم شوية دخلات لدوش غزلات غسلات حالتها...وخرجات..فتحات الماريو جبدات سروال دجين مع تريكو طالع ليه الكول ديال الصوف فالكحل وتجاكيط دجين وسبرديبة فالكحل...خلات شعرها مطلوق ودارت واحد الطاكية فيها الودنين مزغبة فالكحل...هزات سكادو ديالها...وتيليفونها وشارجور رشات من ريحتها وخرجات...

ماريا(لمليكة) :

- صباح الخير ماما كيصبحتي؟

مليكة(كتحط لفطور عيا وحليمة) :

- بيخير ابنتي وانت؟

ماريا : مزال محتاجة لنعاس والله 

مليكة : وكون بقيتي ناعسة

ماريا(كتهز فالخبز سخون واتاي وتغمس فزيت) :

- علاش جواد خلاني بغانا نمشيو لفاس على قبل الدهاز

حليمة : عندو الصح ابنتي مابقا ليكم والو يباه تلحقو..

ماريا : هادشي لي كال كاليا ساعة ويكون هنا يلاه نختارو على راحتنا..

مليكة : واعنداك تختاري داكشي كلو عصري ابنتي راه ضروري من البلدي راه زواج هذا خودي بليغات كيكونو بصم وسقلي فنين وفاس راه بلاصتهم تبارك الله تما راه الصناعة التقليدية موجودة على مزيناتها..

ماريا : ضروري أماما...شافت ماريا فساعة مزال الوقت شوية تفطر على خاطرها نيت...سلات وكملات سونا ليها...سلمات على حليمة ومليكة وصاتها على القهوة هيا وسومية لي مزال مفاقت..وخرجات لقاتو واقف بطوموبيلتو كايتسناها لابس سروال دجين تريكو كرونة وكاط فالقهوي...فتحات الباب وطلعات..

ماريا(شافت فيه مكشر وجامع غوباشتو) :

- صباع الخير

جواد(برودة وديمارا) :

- صباح النور...

حسات بيه مقلق مابغاتش تجبد معاه الموضوع نهائيا وحتى هيا نيت مزال مكلوبة بنعاس...حطات يديه على سرجم شادة جبهتها وكتفرج فطريق...سكاتت من غير صوت تنفس ديالهم...مدات يديها لبلاصة الموسيقى خدمات البلوتوت ..وخدمات الموسيقى ورجعات لوضعية ديالها...بقاو على داك الشكل هكاك...محسات بجواد حتى وقف طوموبيل...وشاف فيها مخنزر..

ماريا(كتشوف فيه بستغراب):

- مالك علاش وقفتي؟

جواد : واش كتريكلي عليا ولا مال ملتك غير كولي ليا،؟

ماريا : اولا براكة من المعيار لبارح طاسيلتك المك ودابا ملتك والديا قيلهم عليك وزايدون ماعرفت شكون لي خاص يتقلق لي جايب ليا داك لباس بحال هكاك..

جواد(معصب وزادتو) :

- مكنهضرش على دوك الشرواط انت عارفاني مكنحملش لي مايجاوبنيش فتيليفون واخا تحلي لخط وماتهضريش المهم جاوبي ودوك الشراوط راك حلالي ولا انت كتعرفي دردكي غير فالبيران ياك؟

ماريا(تقادات فبلاصتها) :

- وها لبسالات واش انت فينما دور تفكرني داكشي فات ومات وداز عليه شحال انا بعدا مغانلبسوش ديرها فبالك هادي واش انا هيا فيفي عبدو

جواد(كيفكر براااد) :

- اهاه حتى هدا نظر متلبسيهمش هانية حتى انا كل سبت نزل لكازا نسهر فشي ريسطو ولا كباري نتفرج حتى نشبع ونرجع ومربضنا ماعندو باس حتى انا ماعندي عقل قلقتك أحبيبي على والو(شد ليها فوجها) سمحيليا احبيبي غلطت ماتديش عليا انا نسيييت وخرجو من بالي عطا الله لوطيلات والكباريات ولي ريسطو لي كايكون فيهم الشطيح..خلاها كطلع فيها وتهبط مخرجة عينيها فيه...ديما طوموبيل كيصفر عاجبو الحال وهيا كتشوف فيه كتاكول جنابها مابغاتش دوز ليها..

جواد(شاف فيها بواحد الابتسامة) :

- مال حبيبي شنو واقع وصافي نساي غير هو ولي تجاوبيني اوك حبيبي..

ماريا : انت ناوي فاش نتزوجو تولي دور فالكباريات على رقصات..؟

جواد(برودة ممسوقش) :

- غير نهار السبت احبيبي ماشي شيحاجة نهبط انا وجلال شحال هادي مادرناها فاش كنت ففرنسا وكنفكر لوطيل ديالنا جديد نديرها فيه كل سبت تكون سهرة خاصة شنو بان ليك؟

ماريا(كضحك بالأعصاب) :

- تبارك الله تبارك الله(خنزرات فيه) واش كدوي من نيتك؟

جواد : وي حبيبي راه غير انتفرج عادي ماشي انخونك ولا شيحاجة نتعشا عادي بحال اي مطعم ونتفرج ونجي عند حبيبة ديالي الحشومية ديالي...المهم نساي دابا انمشيو ناخدو كاع لي اتحتاجيه ديال دهاز اه ولي شوميز دو نوي خودي حسن طوال انت مكايعجبكش داكشي لعريان ولقصير اوك حبيبي خودي المستور حتى هو ايجيك غزاال...اي حاحة تواتي حبيبي..ماريا ولات كتسمع الصفارات فونيها وقيلة بغاها تقلب هاد طوموبيل(كدوي مع راسها)..مجاوباتوش رحعات بظهرها اللور ساكتة طريق كاملة حتى وصلو لفاس...بلاصة طوموبيل قدام واحد الباركينك...نزلات هيا كتقاد فحوايجها ونزل هو شدها من يديها غير ساكتة وكتشوف بعينيها...لي دازو من حداه كيشوف فيهم باينين ماشي من لمدينة...دازو لمحالات ديال تقليدي...ختارو بزااف ديال توابات مع بعضياتهم...ختارت ماريا تصميم لي بغات فتكيشطات ديالها...خلصوهم وخلاوهم يتخيطو خداو نمرت مول المحال لي اتخيط عندو هو بنفسو عندمن دات توابات...وراها دازو لمول لبلاغي...ختارت 4 ديال لبليغات عصريين عجبوها...وخرجو...من تم عند محل ديال جليلبات خدات وحدة فالخضر ملكي وأزرق ملكي وحدة فالحمر..او وحدة فالكاشيري وفالبيج...كلهم عصريات وخدمة متقونة...محال كيديهم لمحل يتناقشو بيناتهم ولي تافقو عليها كيخدوها جواد عينيه كبيرة مكايبغيش ياخود جوج ولا ثلاتة هو بغا يجر المحال كلو...دخلو عند كحال كبيير ديال لي شوميز دو نوي..

جواد(لماريا) :

- ختاري غير شيحاجة قليلة داكشي كولشي وصيت عليه يجي من برا بلاما تخمي ليه..

ماريا : وباش عرفتي قياسي؟...قرب ليها لودنها :

- منين كنعنقك ونديرك على صدري عرفت قياسك(بعد وغمزها)... تلفات وماعرفات اش تكول دورات وجها..جات عندهم مولات المحال رحبات بيهم..

ماريا : عفاك بغيت نشوف دي موديل ديال هاد العام شيحاجة تكون زوينة

- اهاه مرحبا الالة طوال ولا قصار...علات ماريا فيه عينيها كان حاضيها احس بيها دور وجهو بحال الى كيتفرح فالمحل :

- لا بغيتهم قصار ويكونو مشبكين عفااك..

- اهاه مرحبا سمحيليا انا جايا...

جواد : حبيبي ياك كلتي اتاخدي طوال؟

ماريا : انت لي كلتي أما انا مكلت والو...

جواد(بدون إهتمام) :

- انت تعرفي...ضور راسو كيضحك بنتصار داكشي لي بغاه وصل ليه وغير بالحيلة معاها...جات مولات المحال وراتها موديلات جريئة بزااف ولكن خطيرين فلباس..

جواد(بلاما يسول ماريا) :

- عفاك بغيناهم كاملين...مولات المحال فرحانة النهار ايطلع عليها زوين...

ماريا(بالهمس) :

- بزاااف..😕

جواد(جرها لعندو بلا حشمة) :

- حتى حاجة مابزاف وحتى حاجة ماتغلى على حبيبي ديريها فبالك...وجها ولا حمر وتوترات...قاطعاتهم غير مولات المحل لي رجعات بقطع أخرين مستغلية الفرصة باش توريهم ليهم..

#فالقهوة

ماريا(كتغدا) :

- شريتي بزااف ديال الحوايج ماعرفتش علاش حسيت براسي بحال الى غادي ندير عرض الأزياء..

جواد(كيشوف فيها بطرف عينيه) :

- وعلاش مغاديش ديري عرض الأزياء قدام راجلك...؟؟.. شافت فيه مجاوباتوش وحدرات راسها جاتها الضحكة...

ماريا : عرفتي ماكرهتش عرسنا يكون بلون زرق ولبيض..

جواد(كياكول) :

- علاش زعمة؟

ماريا : حيت تعارفنا فالبرد ونهار عرضتي عليا الزواج لول كان فثلج وعتارفتي ليا بحبك ليا فثلج نسيتي..

جواد : اممم فهمتك صافي خلي داك الموضوع عليا

ماريا : ماكرهتش نوقفو على داكشي انا وياك بجوج بينا حنا نكلفو تريتور بداكشي بي بغينا وهو يقاد وحتى من ليزانفيتاسيون بغيتهم بحال داك الشكل شحال هادشي شفت واحد الشكل وعجبني شنو بان ليك..؟؟...حط يديه على يديها :

- الي بغاتو حبيبي انا معاها فيه..شنو بغيتي أخور فاش كتفكري؟

ماريا(تحمسات) :

- هممم فمرت فلي دغاجي لي كيكون فيهم الحلوة وكتفرق على الضياف الحلوة لي كتكون بحال اللوزة كيكون فيها يا لوز يا شوكولا نديروهم بجوج ونديروهوم فقريعات بحال دوك لي كيترماو فالبحر هادوك لي كيكتبو فيهم الرساىل عرفيتهم؟؟

جواد : وي عرفتهم وعلاش زعمة؟ صافي عرفت على وديتوالقرعة لي مونتي لقيتي واش مزالة عندك؟

ماريا : اه مزال عندي لحد الساعة هاديك عمري نضيعها حتى نكبر ونوريها لوليداتنا إن شاء الله..

جواد(تبسم) :

- إيوا الحمد لله غير منين اتخلينا نديرو وليداتنا..

ماريا(بستغراب) :

- وراه ضروري من لوليدات علاش انت عندك قتراح أخور..

جواد(كيضحك) :

- لا أحبيبي حيت لوليدات مكيلقاوهمش الناس كدام الباب ولا نابتين فالمحابق غير باش تعرفي

ماريا : جواد واش كتفلى عليا جايا انا من كوكب زمردة يمكن وراني عارفة هاء

جواد(هاز حاجب ومهبط التاني) :

- ياك عارفة كيفاش بلاما نوريك؟؟...ماريا يلاه فهماتو شنو كيقصد..خنزرات فيه..

ماريا : باااز انا كنهضر من نيتي وانت شاد فيا بااز طلب ليا حلوة ديال شوكولا روايال

جواد : شتي انت قسما بالله حتى باغية يتربى فيك السكر

ماريا : ياربي السلامة علاش كتكول هكا انا واخا هكاك مكناكلش السكريات بزااااف

جواد(مامتيقهاش داير يدو على وجهو وكيشوف فيها بنظرات ديال شك) :

- اه احبيبي متيقك انت الشكلاط لي جبنا لبارح تلقايك كليتيه غير بوحدك حتى مانكون كنعرفك حفظتك ما

ماريا(بنظرات بريئة) :

- أأ ناااري كتحط عليا الباطل دقت منها غير ديك ليها اللوز او وحدة ديال كاكاو المر صافي وديك لي فيها الكراميل هادو صافي

جواد : مامات غير خرجو مصارنو نسوني دابا لسومية ونسولها اتحطك بوجهك تلقايك حبة وحدة مداقتها منك..

ماريا(زعفات) :

- عرفتي شنو يلاه فحالنا مابقيت بغيت والو كول لا وصافي من هاد الهضرة كاملة

جواد : احبيبي ماشي كيستيون مابغيت راه خايف عليك اما انا بغيتي محل ديال شكلاط ناخدو ليك...جا عندهم السرباي خدا طباسل قدامهم طلب منو جواد يجيب لماريا شنو بغات...من بعد الخلوة لي مارجعات فيها فرتيتة وحدة...خرجو من المطعم...لمحالات أخرى يكملو التقدية ديالهم...بدات الشمس كتغرب...عاد رجعو...وصل جواد ماريا حتى لدار...

جواد(كيفك لحرام يهبط معاها)..

- لا احبيبي بلاما تعدب راسك

جواد : نهبط معاك احبيبي لحوايج

ماريا(كضحك) :

- لحوايج ايبقاو عندك باش منين تبغي تجيب ليا دهاز يكونو عندك الى ديتهم معايا ضروري انبقى نفلي فيهم ونلبس ونقيس ومخاص حتى واحد يشوفهم حتى نهار العرس إن شاء الله..

جواد(كيفكر) :

- اممم هادشي جاني فشكااال..

ماريا : يلاه احبيبي انا مشيت

جواد(بستغراب) :

- كيفاش قضيتك بسلامة حرفية بلا والو زعمة؟

ماريا(سدات الباب كضحك):

- اه احبيبي من هنا حتى لنهار عرسنا مكاين لا همس لا لمس...سوني عليا منين توصل جوتومبغاص باي باي😘😘(سيفطات ليه بوسة فالهوى وعطاتو بظهر غادية لدار..

جواد(مع راسو):

- اهاه حتى هذا نظر واخا دابا نشوفو...ديمارا طوموبيل وشد الطريق لدار...

في قلبي لك..

عبارات حب لا تكتب

ونبضات شوق لاتوصف

وخوف وحيره وكثير من الغيره

آغار عليك من ان يحبك شخص سراً 

آغار عليك من ان يأخذك النوم عمداً 

آغار عليك من أعين تراك وأنا لا اراك..^^

****

دازت الايام كتجري غير فتوجاد من هنا لهنا لي كارط خداو وقت بشكل لي بغات ماريا وشنو تكتب فيهم...ستغلات فرصة جواد لي مسافر على قبل الخدمة بغا يشالي شغالو باش يسالي لراسو وليها هيا...غير سومية او وردة لي واقفين معاها كل مرة مفكرينها فشيحاجة كترجع لدار مهدودة كتهضر مع جواد فيديو حتى كيطيح التيليفون من يدها...سومية خدامة على كتاب ديالها مع ذياب..أغلب أوقاتو..بين سومية وبين المطعم لي بغات تحل ماريا...الايام كيدوزو والوقت قرب يوصل نهارها قرب ومابقا ليه غير 15 يوم بتحديد..

فرح : ختي ماريا شي واحد بغاك على برا

ماريا : ماعرفتيش شكون؟

فرح(حركات راسها بنفي) :

- لا ماعرفتوش..

ماريا(ناضت) :

- واخا قابلي معاك لاكيس اوك..خلاتها وخرجات على برا...دورات راسها على ليمن ديالها مالقات والو دوراتو على ليسر كيبانو ليها نفاخات فالحمر وبوكي ديال الورد كبيييير...ودبدوب(جايا كتقرب بشوية حتى طل عليها من ورا النفاخات...الفرحة لي حسات بيها فاش شافتو مكتصورش طارت عليه عقاتو..

جواد(كيضحك) :

- بشوية اتلوحيني

ماريا(كتنقز ومعنقاه) :

- نااري توحشتك خليتي بلاصتك وحق الله كاع هادي خدمة بزااف..(هزها دار بيها وحطها كيشوف فيها بواحد الاشتياق كبير بزااف)..

جواد : توحشتك بزااف توحشتك توحشتك..

ماريا : حتى انا بزاااف

جواد(بخوف) :

- مال وجهك صفر معاجبانيش؟

ماريا : عييت توجاد ديال العرس مخلا ليا فين نرتاح بقا ليها غير ديكور ديال لوطيل كلت حتى تجي وتبقى ديك 4يام هكاك

جواد(جرها) :

- أجي معايا

ماريا(بستغراب) :

- فين عندي الخدمة بزااف

جواد(خنزر فيها) :

- مكابنة خدمة كاينة الراحة يلاه اجي معايا...جرها مكايسمعش الاحتجاجات ديالها

ماريا : تيليفوني ساكي😯..

جواد(دخلها فطوموبيل سد عليها وركب حداها) :

- من بعد تجيبهم سومية ولا ماماك ولا شي واحد

ماريا : بغيت انفهم فين غادي بيا؟؟..مجاوبهاش قرب منها حتى لصق فيها دار ليها السمطة شد وجها بين يديه عصر ليها وجها وباسها..ورجع لبلاصتو ديمارا وزاد..خلاها غير كتشوف فيه لعينيها مصدومة...جر ليها يدها دخلها فكف يديها مزير عليها حاطها على قلبو كل شوية كيبوس ليها الكف ديال يدها...كتشوف فطريق ديال دارهم مابقات فاهمة والو...وقف قدام الباب حيد السمطة ونزل..

ماريا(كتحل السمطة) :

- لاش جايبني لدارنا؟

جواد(الصمت)..خرجها وسد الباب برجليه...

- فين سوارت؟

ماريا(كضحك بستهزاء) :

- علاش انت خليتيني نهز ساكي؟

جواد : ماشي مشكيل...(كيدق فالباب)..

ماريا : راه مكاين حت(قاطعها الباب لي تفتح وحلات حليمة كتشوف فيهم لجوج)...حيدات من طريق جرها جواد ودخلها...

جواد : فين بيتك؟

ماريا : علاش راه(نعتات ليه)..جرها تحت انظار حليمة لي مافهمات والو...دخلها لبيت وسد الباب...حطها على نموسية وتحنى حيد ليها سبرديلة من رجليها...حطها جنب الكوفوز تكاها وهيا غير كتشوف وساكتة مسيرها...جر عليها لغطا وغطاها...ناض وقف كحز الخوامي على سراجم وغطاهم...رجع عندها وكلس..

- أتنعسي وترتاحي قسما بالله لي خلقني وخلقك وتنوضي ولا نسيق لخبار خرجتي أخرتها معاك اودني منك اتشوفي مني لي عمرك ماشتيه رتاحي انوصي حليمة ترد ليك الباب توجد ليك حليب بلويزة شربيه وغانتاصل بتيليفون ديال دار نشوف واش راك ناعسة ونلقاك فايقة وتشوفي يلاه غمضي عينيك ونعسي...كترمش بعينيها بحال الى كتشوف فشي كائن فضاىي نازل من شي كوكب..

جواد(بصرامة) :

- كتليك نعسي..غمضات عينيها لا خاطرها...بقا بلاصتو كيشوف فيها وفملامحها رموشها شفايفها لي بهاتو وجها دبلان بكترت اتوجاد وساريس ولخلعة...ناض وقف وتحنا على راسها باسو وخرج ساد الباب من وراه...حلات واحد العين تبسمات وتنهدات تنهيدة طويلة ورجعات نعسات...فعلا محتاجة ترتاح...

- جواد : حليمة مانبغي حتى واحد يصدع ماريا وجدي ليها حليب بلويزة مع معلقة ديال العسل الحر خليها تشربو مانبغي حتى واحد يبرزطها خليوها ترتاح..

حليمة : واخا أولدي مايكون أخاطرك..

جواد : انا مرة مرة انسوني فتيليفون ديال دار نشوفها واش مزال ناعسة..

حليمة : واخا ولي اياه واخا..خرج من عند ماريا ركب فطوموبيلتو هز تيليفونو حجبانو معقودين مغوبش مخنزر كتب ميساج وسيفطو ل 2 أرقام...وردة وسومية :

- مانبغي حتى واحد يصدع ماريا خليوها ترتاح مانبغي حتى واحد لا يسوني ليها لا يهضر معاها..لاح تيليفون ديمارا طوموبيل وزاد...

****

اھتمام الشخص یجعلكَ تُحِبُّ وُجُودَهُ رغماَا عَنْكَ.

اَللَّهُمَّ اِحْفَظْ ليٌّ من أشعرني بِأَني أَجْمَلُ مَالَدَيْه صِدْقًا وَلَيْسَ تصنعا ...💙

***

كالسة هازة ستيلو فيديها عاضة فيه وكتفكر...طلعات راسها كتشوف فيه هاز القهوة ديالو كيشرب فيها اللحية نابتة غير شوية شعرو الحرير خارج من طربوش ديالو التريكو لي لابز بارز عضلاتو...هز عينيه على غفلة حصلها كتشوف فيه...غوبش بستفهام وحرك راسو بحال الى كيكوليها اش كاين :

سومية(داركات الموقف) :

- كنت كنفكر علاش لا الغلاف نخليو عندو طابع رومانسي..

ذياب(شرب من قهوتو) : 

- بمعنى؟

سومية(كتشرح ليه لحماس) :

- فكرت علاش لا نديرو صورة الوسط فيها أشجار يكونو فالأحمر.. واشجار مايكونش عندهم الورق نهائيا الوراق ديالهم متساقطين وولوسط يكون راس ديال عود كحل شنو بان ليك؟

ذياب(حط القهوة من يديه وشاف فيها) :

- ومنين جا هاد العود تاني؟

سومية : ياك ماريا فاش هاجرت لبرا لقات ديك القرعة لي فيها إسم ماريا ونيفان فاش كانت كتعوم وهاد نيفان إسم ديال عمها يعني اللقب ديالو وصدق هو إسم العود ديال جواد...هادشي باش فكرت فهاد القضية..

ذياب(وسد يديه بجوج كيلعب برجليه) :

- اممم فكرة زوينة واحسن حاجة هاد المنظر الطبيعي يكون الوسط وجناب يكون بيض يعطي واحد الجو خاص بفصل الشتاء والثلوج كيف دكرتي ليا قبل بلي جواد عرض على ماريا زواج المصلحة فالفيرما وكان الثلج وعاوتاني عتارف ليها بالحب ديالو ليها فثلج ولالا؟؟

سومية(بفرحة) :

- فكرة زوينة بزاااف وإسم الكاتب سكون الفوق ولا لتحت؟؟

ذياب : لا نخليوه الفوق نعطيو المساحة البيضاء لي لتحت لعنوان الرواية..

سومية : والله حتى تحمست لغلاف كانتسنا إيمتا نساليها ونسجلها فالمصلحة الفكرية كيف وصاتني ماريا ونطبعها وتنشر إن شاء الله وعلاش لا كيف قالت ماريا دار فيلم ولا مسلسل

ذياب(وقف) :

- كولشي ممكن ماتعرفي شنو كاين(أشر ليها بصباعو)شوارما بيتزا بانيني شنو؟؟

سومية(كضحك) :

- مافهمتش؟

ذياب : انا فيا الجوع وانت؟

سومية : اااااه ههههه شوارما وكوليه يكثر لفريت...ضار مشا لجيهت التيليفون يتاصل وهيا متبعاه بالعين..

سومية(توكضات) :

- أش كديري وفاش كتفكري مكتحشميش من داكشي لي جرا ليك ماتفكري فحتتى حاجة من غير مستقبالك او كتابك...

فاقت ماريا من نعاس كتشبح كتحس براسها مرتاحة حلات عينيها بانت ليها سومية نازلة على المذكرة ديالها كتكتب ومرات كتسهى وترجع تكتب..

ماريا(فايقة مقلوبة) :

- شحال ساعة؟

هزات سومية راسها فيها :

- صباح الخير هادي 9

ماريا(حيدات عليها الغطا وكلسات) :

- اويلي نعس كاع هاد الوقت علاش مافيقتينيش؟؟

سومية : اختي مالي تسطيت جواد سيفط ليا ميساج أنا او وردة كالينا وياكم شي وحدة فيكم تفيق ماريا ولا تبرزطها اختي خفنا وبغيتيني نفيقك..

ماريا(كضحك) :

- ههههه يخليلي حبيبي لي كيغير عليا

سومية : كضحكي باااز ليك راه تيليفونك حداك هو وصاك وصاتني خالتي مليكة نجيبهم ليك

ماريا(ناضت تغسل وجها) :

- مزال مجاوش؟

سومية : مزال راكي عارفة مكنسدو حتى ل9 ونص

ماريا(من الحمام) :

- وهادشي فصيف الربيع دابا راه بدا كيبرد الحال 

سومية : بصح حتا يرجعو وكوليها ليهم..بدا تيليفون سومية كيسوني هزاتو لثدقات ننرت ذياب ..

- ألو

ذياب(بصوت عمييق) :

- فكرتي فالفكرة لي كلت انا وياك؟

سومية : وعليكم السلام أه فكرت فيها عجباتني

ذياب(سكت عرف راسو غلط) :

- سمحيليا انت صافا بعدا؟

سومية : ياحليلي تفكرني الحمد لله وانت؟

ذياب : بيخير الالة الى انت مزيانة انا مزيان

سومية : الحمد لله شكرا

ذياب : يلاه بون نوي

سومية : بون نوي...خبطات تيليفونها بزعاف مغوبشة علاش الله أعلم...طلات عليها ماريا براسها كتمسح فوجها :

- ذياب؟

سومية(مربعة يديها كتلعب برجلها) :

- اه

ماريا : وعلاش هضرتي معاه هكاك راه حشومة

سومية : الله يرحم ليم الواليدين اخليني هو عصبني واااه جايا لشهر وشيحاجة مابغاش يتطلق هو كاع مكنزز..

ماريا : مالو ولا لحم اجي ياكما؟؟؟..

سومية(دورات وجها مابغاتش تشوف فيها) :

- يكما اش ياكما شنو ..

ماريا : لالا راكي فاهمة وانا فاهمة واش انت دغية كتبغي وطيحي على راسك ولا كيفاش مافهمتكش قلب عندك هداك ولا فلوكة..؟؟

سومية(شافت فيها ملامحها جدية مفيكسية عينيها عليها رموشها مكيتحركوش) :

- ماريا منين كنحسو بالحب الحقيقي كنعرفوه واش فعلا حب ولالا يوسف عمري حسيت معاه كيفما كنحس مع ذياب نااضج رجل بمعنى الكلمة كاريزما وشخصية كتكوني حداه كتحسي بلي راكي فأمان مكتخافي من والو كاين فرق كبييير بزاااف ولكن معامن واحد قلبو كي لهجرة حتى شوفة مكيزكيها فيك الله يستر..

ماريا : يمكن كيحتارمك...

سومية(وقفات كتهضر بيديها) :

- الالة انا مايحتارمنيش مابغيتوش يحتارمني أقل حاجة ايشوف فيا واش انا خايب؟؟

ماريا(مشات عندها) :

- بالعكس انت فنة سومية كولشي بوقتو صبري ماتعرفي شنو كاين

سومية : ندمت على نهار لي وافقتك على هضرتك والله...مهم انا انمشي نشوف ليا مناكول بغيت نعس بكري وحتى انت خاصنا مشوفو ليزانفيتاسيو ديالك واش وجدو..

ماريا : واخا سيري وديري ليا معاك شيحاجة ولا تسماي انا جايا معاك.. 

يتبع...