سيدها الجزء 27

هذا الصباح كأنّه يحمل في طياته ملامح الشتاء، الأجواء باردة ولطيفة وكأني بالشوق الملتهب ليس له إلّا وجهك وهذا الصباح..

#فدار_رشيدة

حطات الفطور فطبلة..

- بغيت نعلمكم انعرض على جواد وماريا لغدا شنو بان ليكم؟؟

يحيى : مرحبا بيهم..

فرح : ولكن انا خدامة..

رشيدة : حتى تجي وقت الغدا ياك عندك ساعتين تجي انت وماريا مع بعضياتكم يجيبكم جواد..

فرح(كتدهن فالخبز) :

- أهاه واخا صافي...(وقفات) انا خاصني نمشي تعطلت..

يحيى : واكلسي أبنتي غير حتى تفطري بعدا كملي فطورك..

فرح(عنقاتو) :

- لا ابابا انكمل فطوري فالقهوة يلاه بسلامة(باست ماماها)..غادية خارجة تساطحات مع خوها خارج من بيتو..

- بلاتي نوصلك مالك زربانة؟

فرح : غير خليك اخويا انمشي فطاكسي ختك ولات بالمانضة معتامدة على راسها...

ذياب : اهاه يالالة واخا..

فرح(باستو فوجهو) :

- يلاه بسلامة...خرجات كتجري...سدات الباب وراها...

رشيدة : دوز تفطر أولدي..

ذياب : صباح الخير..

- صباح النور..

يحيى : معاش عندك رونديفو مع طبيب؟

ذياب(كيتاوب) :

- مع ل10 مزال ساعة...الواليدة خوي ليا قهوة بزايد..

رشيدة : واخا..

يحيى : وكي كتحس براسك دابا؟؟

ذياب(كيدهن الفرماج فتلخبز ديالو) :

- صافا الحمد لله كنحس بتحس كبير ماشي بحال لول وليت نعس مزيان مابقيتش كنحلم بزااف اليوم فالعشية جايا لاكوموند لي دوموندينا على ديكوغاسيو ديال المطعم ديال ماريا...

رشيدة(حطات ليه الكاس قدامو وكلسات) :

- لقيتيني كلت ليهم نيت انعرض عليها وعلى جواد يتغداو عندنا..

ذياب : مزيان مرحبا..

رشيدة : تزيد نيت تعرف على خوك كتر وتقرب ليه راكم خوت..

ذياب(كياكول) :

- مزال حشمان من راسي الواليدة على قبل داكشي لي فات اما انا ماعندي مشكيل..

رشيدة : لي فات اولدي مات وحنا راه ولاد اليوم نسا الله يرضي عليك باش تقدر تعيش غدا..

ذياب(تنهد) :

- يكون خير..

يحيى : وعلى هاد الحساب انا انأجل سفر ديالي..

رشيدة(غوبشات) :

- ماعرفتش انت ايمتا اتكلس معانا فخطرة هادشي ولا كيطلع ليا الدم..

يحيى : هاشي لي بغيت نكوليك نيت غير انت زربانة

رشيدة(شدات حنكها) :

- واخا اسيدي انا كنسمع كول..

يحيى : قررت نبيع المحالات لي عندي وناخود شي محل يكون كبييير هنا ماكازة كبيرة يوليو يجيوني توابات من الخليج لهنا وندير معايا لخدامة حيت المحل ايكون كبيرر..

رشيدة(فرحات) :

- والله الى مزيانة أحسن مدرتي..

ذياب : فكرة واعرة الواليد دير هير فيك وفينا وفالواليدة..

يحيى : إيوا يكون خير إن شاء الله..

رشيدة(مبسمة) :

- إن شاء الله..

^^

فشارع الرئيسي واقفة فرحة كتسنى فطاكسي والو حتى واحد مابغا يدوز...

فرح(غادية جايا وضرب برجليها الحجرة لي بانت ليها) :

- على زهر نهار نخرج بكري منلقاش طاكسي وفاش نخرج معطلة نلقاه زوينة هادي ياربي طاكسي طاكسي...داز واحد خاوي شيرات ليها اشر ليها بيديه ومشا..

فرح : علاش علاش مكتوقفوش واخا خاويين...صافي اليوم نبات هنا يخرج دياب ومزال ياقاني هنا...كلسات فوق تروتوار حاطة ساكها بين رجليها شادة حنكها بيد ويد كتلعب بشي حجيرات خميسة...سمعات حس طوموبيل جايا وهيا دور بانت ليها طوموبيل فالبرو مارين ... خاب أملها وحنات راسها من جديد..سمعات صوت خبطة ديال باب...مهزاتش راسها كتلعب تسلي وقتها بينما وصل طاكسي..جاها صوت رجولي من ليسر ديالها :

- قدك مزال كيلعب خميسة؟؟

هزات فيه راسها كتلقا ياسين واقف عليها شوميز زرقة فوق منها تريكو مع سروال دجين وسبرديلة فالبيض...مابغاتش تناقش ولا دابز على صباح نخلاتو وضورات وجها..

ياسين(بجدية) :

- البرد هذا والجو ديال شتا لاش كالسة فالضس شنو كتسناي...وقفات ساست حوايجها وشافت فيه عينيها لعينو :

- شحال هادي توحشت الصغر وكلت نكلس نلعب راه باينة كنتسنا طاكسي..

ياسين : مكتعرفيش تجاوبي بحالك بحال الناس ياك..؟...حدرات راسها ومجاوباتوش عاوتاني

ياسين : نقدرك نوصلك لخدمة الى بغيتي؟

فرح(رجعات شافت فيه بعويناتها المشفرين وشفايفها لي حمرين بالعكر بوحدو هو لي دايراه كتموت على لعكورة مدير والو ولكن تعكر) :

- لا شكرا بلاما نعطلك على خدمتك وتلبية النداء آلالاف المرضى كيتسناوك..

ياسين : مكلت ليك فكريني درنا مع غير لوجيست سمعتينا جريدة بشوية عليك لا طيري كالم توا..

فرح : ياربي شكون لي بدا هاد المدابوة انا ولا انت..

ياسين : بجوجنا الالة داكشي فات ومات وغاديش بقى داير عقلي فيك ونتناكر معاك بحال لعيالات...زيدي الى بغيتي نوصلك براكة من نفاخة..

فرح(قلبات وجها)...حاضيها كيفاش كدير جامعة يديها وتلعب برجليها دايرة فيها معصبة..شدها من يدها وجرها..غادي بيها..

فرح(ماعرفتت باش تبلات كتنطر) :

- واهدا اويلي واطلق هذا راه اختطاف والله الى ختطاف العقوبة ديالو 70 عام وطلق مني...مداهاش فيها ركبها فطوموبيل وسد عليها..بزربة طلع حداها مخلاش ليها الفرصة ديمارا وزاد..

فرح(كتغدد بوحدها) :

- ياسين هاشي لي كدير فيه راه مامزيان..ضار شاف فيها بعينيه زورق وضحكة على وجهو كيتمعن فالملامح ديالها..

فرح(بستغراب) :

- واش كلت شيحاجة كضحك؟؟..

ياسين : سميتي خرجات من فمك..(قاطعاتو).. :

- بحال لعسل هاد الكلمة غير بدلها والله طلعات فراس هيا اول كلمة كيبداو بيها الى بغاو يرسمو على شي بنت..

ياسين : كيضحك) يرسمو عليها بحالاش زعمة؟

فرح(كتشرح لصباعها) :

- زعمة الى بغاو يخليو شي بنت تبغيهم كيبداو بهاشي هاد الهضرة هادي

ياسين(كيضرب فالفولون بصباعو) :

- أياه الالة وانت مناش عرفتي هادشي جيتيني بحال الى عرفتي شحال من واحد وكالو ليك نفس الهضرة ولا كذبت..؟؟

فرح(تنهدات وسهااات)..

ياسين(شاف ملامحها تبدلو كيحاول يختارق عينيها لي ولاو كحلين بحال الى دازت عليهم غمامة كحلة ورداتهم لحالها فلون تنهيدتها وملامحها كيعبرو على حزن فالداخل ديالها).. :

- (بجدية) واش فايت وقعات ليك شيحاجة ياك غير هضرت ليك فهادشي تبدلتي فرح واش فايت شي واحد ضحك عليك..

فرح(ضارت بزربة عندو عينيها شاعلين فيهم العافية) :

- مكاينش فهاد الدنيا كلها لي يقدر يضحك عليا ومانخليش انا هاد الواحد يضحك عليا ومزال متزادش لي يضحك عليا حيت تربيت على يدين الرجال بابا وخويا مكانو مخصيني من والو لي بغيتها كنلقاها وموفرة ليا مكايخليونيش نشوف على برا بابا فيه كولشي وخويا فيه كولشي قنوعة الحمد لله وتربيت فجو أسري حنين قريت وتعلمت وعمري خليت ولد المرة يتجرأ ويحط صبعو الصغير عليا فنظرك انت وحدة بهاد المواصفات يقدر شي واحد يضحك عليها..؟؟

ياسين(تصدم فيها معرفهاش هكا دايرة) :

- لا

فرح : وهكاك يقدر نكون تشمت ويقدر نكون نية كتر من اللازم ولكن باش يضحك عليا شي واحد عمرها غادي تكون..

ياسين(عجباتو شخصيتها) :

- فرح كلنا كندوزو من تجارب وكنتشمتو فيه سوا نسا سوا رجال الفشل إسم ممقرونش فقط بالمراة بالعكس حتى برجل وكاين حالات عديدة شحال من راجل بغا من قلبو وفالاخير غدراتو حبيبتو ولا خطيبتو وحتى مراتو كيفما الخيانة مقرونة برجل مقرونة حتى بالمرأة والعكس صحيح متكوليش فشلت ولا تكولي تشمت بالعكس هاديك مجرد تجربة وانت لي خرجتي منها رابحة ماشي هو...شافت فيه بعينيها بلاما تهضر نظرة إستحسان وتقبل..سكتات تقدات فبلاصتها معنقة الساك ديالها مقابلة طريق مابقاتش ضارت جبهتو نهائيا عكسو هو لي مقابلها من طرف عينيه...غير بانت ليها القهوة حيدات لحزام..مع وقف فتحات الباب...رجل داخل ورجل برة..

فرح(شافت فيه) :

- شكرا بزااف

ياسين(تبسم ليها) :

- العفو مرحبا فأي وقت...ردات عليه بالإبتسامة خرجات سدات الباب وراها ومشات ماتلفتاتش...بقا فبلاصتو ساهي حتى بانت ليه دخلات عاد ديمارا ومشا..

خارج جواد من دار سونا ليه تيليفون..طلعات ليه نمرة رشيدة...

جواد(بصوت مبحوح) :

- وي

رشيدة : سلام ولدي لباس عليك..

جواد(كيكح) :

- الحمد لله وانت؟

رشيدة(بقلق) :

- الحمد لله اولدي ياكما مريض؟

جواد : لا غير شوية ديال البرد وصافي

رشيدة : خود الدوا أولدي

جواد : إن شاء الله كاينة شيحاجة؟

رشيدة : بغيت غير نكوليك عارضة عليك انت وماريا لغدا

جواد : كون غير أجلتيه..

رشيدة(تقرصات) :

- لي عجبك اولدي انا وجدت ولكن انت وخاطرك..

جواد(حس بتأنيب ضمير ضرب على جبهت واقف كيمسح على لحيتو) :

- مدامك وجدتي بلاما يضيع جهدك هكاك أشمن وقت؟

رشيدة(فرحات) :

- مع 2 إن شاء الله

جواد : داكوغ إن شاء الله..

رشيدة : الله يرضي عليك اولدي

جواد : أمين..قطع مع رشيدة بقا واقف كيفكر...فتح باب طوموبيل لاح تيليفون طلع دار الحزام ديمارا وشد طريق..

^^^^

#المطعم..

دخلات سومية لقات ذياب...كيقاد فشي ديكورات...وكيقيد فواحد الدفتر..

- صباح الخير...

ذياب(هز فيها عينيه) :

- صباح الخير سومية صافا؟

سومية(مشافتش فيه كلسات فالكرسي لي محطوط) :

- صباح الخير..سمح ليا الى برزطك بغيت نهضر معاك على الاجزاء الاخيرة لي عاودات ليا ماريا بغيت نداكر معاك الى ممكن؟؟..خلا داكشي بي فيديه وجا لعندها جر الكرسي وكلس..

- وي كنسمعك..

سومية(بتردد) :

- ماعرفتش واش تبغي داكشي لي وقع ليك معاها هيا وجواد يتدكر ولالا خاصني ناخود موافقة الاطراف كلها داكشي باش جيت نسولك...شاف قدامو شابك يديه كيفكر عاقد غوباشتو..رجع شاف فيها :

- ماعنديش إشكال انا بديت صفحة جديدة مع راسي بغيت دكريها دكريها..

سومية : الى دكرتها انضطر ندكرك انت ولماضي ديالك لي فات..

ذياب(هز كتافو) :

- مكايهمش خودي راحتك..

سومية(وقفات) :

- شكرا هادشي لي جيت على قبلو..

ذياب(وقف) :

- تبغي تمشي معايا لحصة..؟

سومية(بستغراب) :

- ماعرفتش انديرونجيك

ذياب : كون غاديرونجيني مغاديش نكولها ليك..

سومية : واخا..

ذياب : سلقيني نجيب سوارت نجي..سبقاتو لبرا فرحانة واخا غير هاد شوية فرحها بزااف وقفات حدا طوموبيلتو كتسناه..خرج سد المطعم..وخلط عليها فتح طوموبيل...طلعو بجوج..ديمارا وزاد..

#فطريق

سومية : شخصيتك غامضة فخبارك..

ذياب(شاف فيها بنص عين وتبسم فاش كيضحك كتبان تفاحة أدم كتحرك حركة لي تير اي وحدة وتير الجنون ديالها)..

ذياب : بحالاش زعمة الالة سومية؟

- ماعرفتش الوجه الخارجي ديالك كيخلي الواحد مايتقربش منك كتخليه يدير مسافة بينك وبينو..

ذياب(عوج فمو) :

- عادي ماعرفتش غير كيبان ليك هادشي وصافي

سومية(سكتات شافت قدامها وبدون سابق إنذار رجعات شافت فيه) :

- من ورا لي وقع مارجعتيش بغيتي؟

ذياب(تنهد) :

- صعيب الانسان يبغي من اول وجديد خصوصا الى قلبو تجرح وسال دمو وهاد الجرح سبب ليه فخسائر كبيرة..

سومية : ولكن خاصك تعطي لراسك فرصة ولالا؟؟

ذياب(ضحك بستهزاء) :

- معامن مع بنات اليوم وهاد الجيل هههه يكدب عليك الكداب تلقى شي وحدة باغياك لشخصيتك كولشي تابع مصلاحتو ولفلوس عندك مرحبا ماعندك الباب وساااع من كتافك غير جاو ها لي واخداه سعودي كويتي والقائمة طويلة..

سومية(تعصبات) :

- البنات ماشي بحال بحال وانت مناقصك والو بخيرك الحمد لله

ذياب : ابنتي كولشي ولا طامع مكاينش ماشي بحال بحال كولشي مسقي بمغرفة وحدة..

سومية(الفار طلع ليها ولا تحس براسها سخونة..) :

- إيوا لبنات كامل راه داخل فيهم ختي وختك وزيد وزيد

ذياب(بعدم إهتمام) :

- ختي انا لي مربيها وعارف أش ربيت

سومية(علات صوتها) ؛

- وحتى بنات الناس مربينهم الرجال ماشي مربينهم شمايت ولا لقاوهم حدا باب جامع...وقف عفااك وقف..

- شاف فيها بستغراب :

- علاش؟؟

سومية(كتغوت تعصبات بزااف) :

- راه كتليك وقف ولا قسما بالله نحل هاد الباب ونتلاح منو وقاااااق...وقف ذياب جتب الطريق ..زولات لحزام.. فتحات الباب وخرجات..وجها حمر ولات كلها كترعد...

خرج بزربة من طوموبيل تبعها جرها من يديها دورها عندو...شاف العافية شاعلة فعينيها وهو من نوع لي كيعرف الإنسان من عينيه باش حاس...وهادشي شافو ايام هادي ولكن كيتجاهل عند بالو كلشي غلط ..

- ياك لاباس اش واقع(سولها)..

سومية(كتنفس بجهد حيدات دراعها من يدو) :

- لا مواقع والو غير انت كالس تعاير فالبنات عند بالك بلي كاع لبنات خايبات ومامربياتش خاصك دير واحد الحاجة فبالك راه كاين بنات يبغيوك على شخصيتك وعليك انت ماشي على مالك وجاهك..

ذياب(سكت هاز حجبانو كيشوف فيها وعاض على شفايفو برودة نطق 2 كلمات لي هزوها) :

- بحالك انت..

سومية(توترات ولات كلها كترعد بردات كتحس براسها فيها تبوريشة مابقاتش قادة تشوف ليه فعينيه هزات راسها مغوبشة) :

- أش هاد تخربيق مكاين من والو من هادشي كاع..

ذياب(ضحك بستهزاء) :

- ياك الالة وهاد العافية لي شاعلة فيك وجهك ولا حمر والاسئلة وهاد الايام كاملة لي فاتت داك الاهتمام داكشي كلو تخربيق مكترضعش صبعي اسومية راه فعمري 31 عام ديريها فبالك بنادم كنحس بيه من عينيه كنعرفو علاش طاوي..

سومية : وهادشي مبانش ليك فاش كنتي مع حبيبتك لولة..

ذياب(بعدم اهتمام) :

- مكنتش كنشوف الحب عماني..دورات وجها لجهة لوخرا ضور وجها عندو مقدراتش تشوف فيه..عينيها مفيكسين على تجاكيط لي لابس..

ذياب(بصوت رجولي) :

- انت بنت زوينة بزااف وهادشي لاحضتو شخال هذا عفوية وظريفة وكتصرفي بطبيعتك كيما انت ولكن انا منصلاحش لحب نهائيا اللهم نبغا صولو ديال راسي كانضحك على حد مايضحك عليا حد..(هو كيهضر وهيا تزيرات وكتحس بوجها سخون وعينيها كيحرقوها بدموع لي يقدرو ينزلو فأي لحظة)..

- تستاهلي واحد حسن مني ماشي واحد مريض..علات عينيها فيه مخنزرة :

- ياك كتعالج ياك وليتي لاباس شنو فيها الى عطيتي لراسك فرصة وخليتي واحد أخور يعاونك ويخرجك من هادشي لي أنت فيه..

ذياب(مفيسي عينيه على عينيها) :

- انا وانت تقربنا بزااف هاد الشهرين لي فاتو..منكرش بلي الخدمة معاك فرحاتني وعمرات ليا وقتي وخرجاتني من الحالة لي انا فيها وكان عندك فضل كبير باش فت المرحلة الخايبة وغادي فمرحة الشفاء منقدرش نواعدك بشيحاجة مغاديش تكون وندي ذنوبك اللهم هكا حسن وزايدون حنا صحاب..كنحتارمك وكنقدرك..

سومية(تعصبات ديال بصح) :

- واش انا كتليك حتارمني متحتارمنيش اسيدي..

ذياب(بجدبة وصرامة) :

- سومية بلاما تعدبي راسك وتعدبيني حتى انا معاك راه مغتصوري مني ومعايا والو مزال ايجي لي يستاهلك ديال بصح..

سومية(برودة أعصاب المومو دعينيها كيترعد) :

- منحتاج تكولها ليا عندك الصح نيت انا مانستاهلكش نستاهل واحد حسااان منك عندو شخصية ماشي واحد ضعيف بحالك باعتو وحدة وشافت حياتها وهو مزال ساد على راسو فبيت مظلم مابغاش يخرج لنور على ودها وناسي حياتو وماملاحضش بلي حداه ناس كيبغيو كتر ماهيا بغاتو واخا هيا كون فعلا بغاتو عمرها مغادي تخلى عليه ولكن هو مكايشوفش هادشي مابقاتش فيه إنفصام الشخصية ولكن ولات فيه حتى الانانية لي ظلمات ليه عينيه عل الناس لي كيبغيوه..وحتى دابا ماوقع والو دير راسك ماوقع والو وحتى هاد الكتاب لي جمعنا قربت ندير ليه نهايتو مكاين لاش تشوفني ولا نشوفك مزال خليت ليك الراحة..ضارت وخلاتو واقف مبلوكي متحركش حتى غابت على أنظارو...تنهد تنهيدة طويلة بزااف..حط يدو على جنبو كيدوز يدو لوخرا على شعرو بعصبية...كيضور فبلاصتو...ناسي رونديفو لي عندو مع طبيب ماتفكرو حتى لاخر..مشا طلع فطوموبيلتو ديمارا وكسيرا بجهد..

- شيرات سومية لتاكسي وعينيها معميين بدموع ..وقفات طاكسي ركبات عطاتو عنوان الدار... نزلو دموعها بلاما تحس سخوني حارين نار الخيبة والخدلان .. ماعندهاش زهر هكا كالت لراسها ماعندها زهر لا مع لول لا مع الثاني كيف كالت ماريا تسرعات تشوف حياتها ومستقبالها وتحيد فكرة الحب نهائيا من دماغها ولكن مشاعرها هاد المرة صادقة ومن كل قلبها منين كتبغي بصح ومن قلب أعماق قلبك انت بوحدك لي كتحس بلي هاداك الحب حقيقي ماشي إنبهار ماشي إفتتان ولا إعجاب لا حب صافي ونقي هاد الحب ايبقى فقلبها بوحدها اتحتافظ بيه حياتها كاملة حيت الحب الحقيقي النابع من القلب صعيب يتمحى ولا يتنسى...

ﻋﻨﺪﻣـﺎ ﺗﻨﻮﻱ ﺃﻥ ﺗﻘﻮﻝ ( ﺃﺣﺒﻚ )

ﻳﺠﺐ ﺃﻥ ﺗﻜﻮﻥ ﻭﺍﻋﻴﺎ ﺑﻜﻞ ﺣﺮﻭﻓﻬﺎ ....

ﻓﺎﻷﻟﻒ ﺗﻌﻨﻲ : ﺃﻧﺎ ﻟﺴﺖ ﺇﻻ ﻟﻚ ...

ﻭﺍﻟﺤﺎﺀ ﺗﻌﻨﻲ : ﺣﻴﺎﺗﻲ ﻣﻠﻜﻚ

ﻓﻲ ﺣﻴﺎﺗﻚ ﻭ ﻣﻤﺎﺗﻚ ...

ﻭﺍﻟﺒﺎﺀ ﺗﻌﻨﻲ : ﺑﻴﺘﻚ ﻗﻠﺒﻲ ﻭ ﺇﺣﺴﺎﺳﻲ

ﻣﻌﻚ ﻟﻠﻨﻬﺎﻳﺔ ﻓﻲ ﺳﺮﺍﺋﻚ ﻭ ﺿﺮﺍﺋﻚ ...

ﻭﺍﻟﻜﺎﻑ ﺗﻌﻨﻲ : ﻛﺮﻣﻨﻲ ﺑﻚ ﺭﺑﻲ ﻓﻠﻦ ﺃﺗﺮﻛك :) ..

^^

قدام باب القهوة وقف جواد هز تيليفون ديالو...كيسوني لماريا :

(بصوت باح مخنوق) :

- وي حبيبي خرجي انا على برا كنساينك جيبي معاك فرح..قطع معاها لاح تيليفون دار يدو على جبهتو كيحس بيها سخونة..ونيفو مخنوق مكايشم والو..

شاف فالمرايا بانت ليها ماريا جايا هيا وفرح..طلعات فرح هيا لولة لور..

(بخجل) :

- سلام

جواد(بحيوية) 

اهلا فرح صافا أمورك مزيان؟

فرح(بضحيكة) :

- الحمد لله اخويا وانت؟

جواد(عجباتو كلمة خويا) :

نكولو صافا .. طلعات ماريا سدات الباب وراها..

ماريا : سلام(بغات تسلم عليه بالوجه بعد عليها) :

- غير بقاي بعيدة حسن مخنوق ومروح بلاما تعاداي حتى أنت..

ماريا : وايلي بلاتي نشوف(حطات يدها على راسو) اويلي سخون ماشربتي والو؟

جواد(كيديناري طوموبيل) :

- مكنحملش دوايات مكنشربهمش ..

ماريا(ضارت شافت ففرح ورجعات شافت فيه) :

- واش حماقيتي ضروري دوا صوتك مخنوق وسخانة وجهك حمر لا ضروري تاخود دوا ولا قسما بالله لا هضرتك..

جواد(غمزها) :

- زعمة وتقدري؟

ماريا(بضد) :

- نديرها ونفوتها لهيه على قبل مصلاحتك نديرها ادوا لاش داروه الناس عير على قبل المرض..

جواد(بدون إهتمام) :

- الرواح عطيه 3 أيام ديالو وهاهو مشا نرجع ردار ناخود دوش بارد وهانا بيخير..

ماريا(غمضات عينيها) :

- ياربي صبر من عندك الما لبارد والجو اصلا بارد وشتا ودنيا بدات كتلج جبال كلها ولات بيضة وبيغيتي تعوم بالما الباردلا واش باغي تحمقني جواد الله يهديك براكة من داك الضد ديالك وقسوحية الراس انا فاش كتنصحني مكندير بكلامك وانت لا..

جواد : الله شكون كيدير بكلامي خليني ساكت حسن..

ماريا : اتشرب دوا هيا اتشرب دوا ولا قسما بالله حتى انخرج لشتا وانا ملابسة والو ويضربني البرد وتولي فيا الرية..

جواد(كيطنز عليها) :

- وراه فيك الرية وانا فيا وفرح فيها كاع الناس فيهم كاين شي واحد زايد بلا رية ولا عايش بلا بيها ؟؟..فرح اللور ماتت بضحك..

ماريا(ستسلمات) :

- مابقيتش غادي نهدر حتى تسالي لمزاح ديالك وتريكيل ونهضرو..دورات وجها لجيهت السرجم...مابغاتش تشوف فيه ولا تهضرو .. عرف راسو قلقها تنهد بستسلام وشد ليا يديها ماعندو غراض لا فختو لا حتى واحد كرام ديال الحشمة ماكيكسابوش..

جواد(عين على طريق وعين عليها) :

- شوفي فيا..مابغاتش تشوف فيك كدور فمها..

جواد(بجدية) :

شوفي فيا..

ماريا(الصمت)..

جواد (بحزم) :

ماريا شوفي فيا بلاما نبقا نعاود فهضرتي...ضارت كتشوف فيه :

- نعام..

جواد : صافي احبيبي متقلقيش مايكون غير خاطرك دوا نشربوه الالة تهنيتي عمري درتها وعلى ودك نديرها تهنيتي..؟

ماريا(رطابت) :

- راه على قبلك حتى انت ماشي غير أنا راه كنخاف عليك الما خفت عليك انا علامن غادي نخااف؟..

جواد : جربي خافي على شي واحد اخور ونتفاهمو..صافي أحبيبي سمحيليا نشربو هاد دوا صافي..

ماريا(تبسمات وتسدو عويناتها) :

- صافي☺..

هز يديها لشفايفو وباسهم..

ماريا(حشمات وخطفات يديها من يديه بزربة) ..

احم(كتحك فعنقها)..

جواد(هاز حاجب ومهبط الثاني) :

- لاش ديك أحم وخاطفاك يدك كنسرقو راه غا ختي لي لور فيها شي عيب مراتي وكنبوسها ونبوسها قدام العالم ولي هضر نسوس لمو سنانو ..

ماريا(كضحك هيا وفرح) :

- اش داك اودي تسوس سنان شي واحد مالنا عليها هاهيا يدي اسيدي ههههه ناري جوج كلمات كتبغي دابز..

جواد(شد يديها دخلها فيديهوحطها على قلبو الما دارش هكا مايرتاحش) :

- وهكاك كوني كتسمعي الهضرة الله يرضي على حبيبي ..

ماريا(ضحكها كيعجبوها تصروفاتو معاها عندو تصرف خاص معاها مع الناس قاصح وجدي بجديتو كيخلي الناس تحتارمو ودير ليه ألف حساب ولكن معاها هيا كيكون حنين بزااف كيحسس بلي أميرة فقلبو أما على قبلها كيولي وحش يقدر يفتارس اي واحد قرب ليها او يفكر يأديها..) :

(بحب كتشوف ليه فعينيه) :

- أمييييين ...

#عند_رشيدة

- خرجات كتمسح يديها وقفات على يحيى لي كالس فصالون :

- جاوني بحال الى تعطلو ياكما مابقاوش جايين؟؟

يحيى : الله يهديك ارشيدة راه يلاه ل1 قل خمسة مزال ليهم 5 ديال دقايق ويكونو هنا

رشيدة : ماعرفتش جاني راسي بحال ديك العروسة لي جايين يخطبو فيها وحتى بنت او ولدك مزال مجاوش شفتي على فعايل كيدايريين؟؟

يحيى(كيتنهد) :

صبر من عندك ياربي الله يهديك راه الولد مشا عند الطبيب وضروري مايتعطل مع الحصة والبنت راه خدامة واش عند بالك ديال ريوسهم هوما أرشيدة ديري عقلك شوية واااه ياربي صبر من عندك..

رشيدة : صافي صافي ماكلنا والو...يلاه اترجع لكوزينة سمعات سونيت ديال الباب..مشات كتجري حلات لباب...ضارو عندها بجوج ليهم اما فرح مقابلاها كتشوف فردة الفعل ديالها...اول وحدة سلمات عليها هيا ماريا :

- سلام خالتي كيدايرة لاباس عليك 

رشيدة(عنقاتها) :

- الحمد لله أبنتي وانت كيدايرة والديك...دخلي دخلات ماريا وتبعها جواد...مد ليها يديه شداتها وقرباتو منها عنقاتو بجهد باست ليه راسو حتى هو بادلها نفس العناق مع شوية ديال توتر أحاسيس فشكل كيختابرهم...شداتو من إيدو مدخلاه لدار بحال شي ولد صغير يلاه جاي من المدرسة... 

رشيدة(فرحانة) :

- دخل اولدي دخلو مرحبا..

يحيى(مد ليه يديه) :

- مرحبا بيك اولدي مرحبا أبنتي دخلو..

فرح(من وراهم) :

- انا نساتني ماتفكراتنيش خلاتني لور سمحات فيا😕

رشيدة(كضحك) :

- باز ليك ابنتي وراه انت مولات الدار...

فرح(كضحك) :

- غير كنضحك..كلسات ماريا وجواد فبلاصة وحدة..

يحيى : كيداير الامور اولدي كيغاديين مع توجاد كولشي مزيان؟

جواد(حرك راسو) :

- الحمد لله غاديين دقة دقة..

رشيدة : مابقا والو ليكم بسلامة الأيام غادية وكتجري..

ماريا(حشمانة) :

- اه بصح

رشيدة(كضحك) :

- الله يكمل عليكم بالخير وإن شاء الله تفرحومة بشي عزيري ولا شي بنية ولا بجوج كاع إن شاء الله☺

ماريا(وجها ولا حمر وحدرات راسها) :

- إن شاء الله...نقز يحيى :

- اتبقاي كتهضري بزااف وسيري وجدي لينا الغدا راه ريحة شهاتنا ولالا أجواد..

جواد(ضحك) :

- وياااه..مشات رشيدة هيا وفرح دخلو لكوزينة..

رشيدة (بهمس) :

- خوك مزال كاعما جا تعطل سوني ليه

فرح : ماما مع اتحطي ايكون دخل

رشيدة(بصرامة) :

- كتليك سوني ليه ماشي حتى نبداو نحطو يلاه يتم داخل هو سوني ولا نسوني انا..

فرح(بستسلام) :

- واخا أماما واخا هاني غادي نسوني...هزات تيليفونها يلاه طلعات نمرت ذياب.. بدات كتسوني تفتح الباب...مشات طل لقاتو هو..

فرح : يلاه كنسوني ليك..

ذياب : جاو؟

فرح(حركات راسها بالايجاب) :

- اه راهوم لداخل دخل عندهم انا وماما كنوجدو لغدا..

ذياب : واخا...مشا ذياب دخل عندهم لصالون وفرح رجعات عند مها...

فرح : درتي البسطيلة؟

رشيدة : اه وديال الحوت كلت يمكن جواد مايكونش عندو مع الحلاوة بزااف داكشي باش مادرتش ديال الدجاج..

فرح : مزال خاصك شيحاجة نوجدها معاك ؟؟

رشيدة(كتحط فطباسل وتقاد فلاصلاد) :

- لا غير قادي طبلة مزياان كولشي واجد بغيت نشدهم حتى لكسكروط ولكن خوك مامساليش وحتى خوك ذياب مامساليش عندو شي سلعة جاياه هاد العشية..دخلات عليهم ماريا :

- ياكما نعاونكم فشي حاجة..؟؟

رشيدة : لا أبنتي كولشي واجد بلاما تعدبي راسك..

فرح : علاش نضتي؟

ماريا(كضحك) :

- بقاو الرجال مع بعضياتهم وانا غير ساكتة داكشي باش كلت اللهم نجي نونسكم..

رشيدة(كتقاد) :

- مرحبا بيك ابنتي دار داركم..بقات واقفة ماريا مجمعة معاهم وجدات فرح الطبلة قاداتها حطو لي صلاد هوما اللولين...

رشيدة : فرح سيري كولي لخوتك وباك راه الطبلة واجدة..

فرح : واخا...مشات فرح وبقات ماريا مع رشيدة...شافت رشيدة فماريا وهيا فرحانة :

- اليوم انا دايرة بحال شي وحدة جايين يخطبوها ههههه ماعرفة راسي من رجليا..

ماريا : كضحك حتى جواد هكاك ولكن حسيت بيه مرتاح

رشيدة : الحمد لله داكشي لي بغيت ياربي غير يتفاهم هو وخوه اما فرح كتبقى غير بنت وختو صغيرة بقات فذياااب..

ماريا : بعدا خليتهم كيهضرو عادي دغية ايتعودو على بعضياتهم دابا تشوفي مايكون الخير...

رشيدة(ضربات ليها على ظهرها) :

- إن شاء الله أبنيتي الله يرضي عليك..

ماريا(تبسمات ليها) :

- أميييين ياربي..

داز الغدا زويين بزااف فجو عائلي لي كان فرحان بزاااف هيا رشيدة ولادها كاملين مجموعين حداها بالخصوص فاش شافت جواد كيفاش تطلق مع ذياب وكيتعاودو على الخدمة وعلى البلدان لي زارو بجوج ولصدفة بعض الحوايج بجوج بيهم كيبغيوها...

- جواد : الله يعطيك الصحة الغدا كان زوين ماسخيناش ولكن خاصنا نمشيو..

رشيدة : مزال الحال..

جواد : عندي ميدار وخفت نتعطل على شي كليان

رشيدة : اولدي اتمشي لخدمة وانت حالتك بحال هكا خليني غير ندير ليك شي كاس ديال الليمون اينفعك..

جواد : لا بلاما تشقي راسك غير نمشي لدار اناخود الدوا(شاف فيحيى) سي يحيى خلينا ليك الراحة وشكرا..

يحيى : الله اودي مرحبا فأي وقت انا راه فمقام الوليد ديالك..

جواد : عارف لي كاين..

فرح : انا انمشي ناخود الساك ديالي باش نرجع معاكم..

ماريا : خالتي الله يعطيك الصحة وسمحيلينا عذبناك..

رشيدة(شدات ليها فيديها) :

- متكوليش هكاك أبنتي راه بحالك بحال جواد هو ولي وانت بنتي الله يرضي عليكم..

ماريا : أمييين ..

ذياب(داير يديه فجيابو) :

- اليوم اتدخل السلعة لي دوموندينا عليها الى كنتي مسالية فالعشية دوظي لمحال تشوفي السلعة..

ماريا : مغانشوف والو حتى نهار كولشي يكون واجد انا تايقة فيك وعارفة داكشي غادي يكون مزيان..

جواد(مد يدو لذياب ويد شاد بيها كتفو) :

- يلاه تهلى فراسك ونتلاقو من بعد إن شاء الله ودير بحسابي ورا العرس انجي نتيجل عندك فلاصال..

ذياب(كيضحك) :

- بلاصتك كاينة من دابا فأي وقت مرحبا..جات فرح هازة ساكها...خرجو جميع قدام الباب...ركبات ماريا وفرح وجواد فطوموبيل ولوخرين شيرو ليهم بيديهم حتى ديمارا جواد وشد الطريق عاد دخلو لدار..

ذياب : انا انعس واحد الساعة ديال المكانة توصل الخمسة انوض على قبل نتلكا لمالين السلعة..

رشيدة : واخا أولي سير...طلع ذياب لبيتو..وبقات غير رشيدة او يحيى..

يحيى : جواد تفاهم مع ذياب الحمد لله فالأول فاش دخل ماهضرش معاه مشافش فيه ولكن شوية بشوية طلقو وهضرو وناقشو بزااف ديال الحوايج..

رشيدة(هازة كفوفها لسما وكتدعي) :

- الحمد لله ياربي حمدتك وشكرتك مابقيت باغية والو منين رجعتي ليا ولدي وجمعتي الشمل داكشي لي بغيت الحمد لله..

يحيى : إيوا الحمد لله انا انطلع نرتاح وحتى انت سيري رتاحي راه عييتي ولا الفرحة يمكن مغاديش تخليك..

رشيدة (كضحك) :

- بحال الى علمك الله ولكن انحط راس واحد الشوية عيييت..

يحيى : يلاه اانا مشيت...طلع يحيى لبيت اما رشيدة دخلات اكوزينة غسلات الماعن مسحاتهم طرفاتهم وطرفات الكوزينة ومشات ترتاح..

...

هبطات فرح من طوموبيل من بعدما سلمات على خوها ودخلات لقهوة بقات غير ماريا..

جواد : هاد السيمانة وجدو ريوسكم إن شاء الله انطلعو لسعيدية..

ماريا(بستغراب) :

- ياك مزال الحال؟

جواد : انبقاو كاملين فلوطيل على قبل التجهيزات ديال العرس باش تختاري وتفاهمي مع السيد على راحتك والى ماعجباتك شيحاجة تبدليها فهمتي..

ماريا : صافي واخا انعلم الدار باش يظيرو بحسابها..

جواد : صافي مزيان وانا انكولها لدار ونعيط على لذياب وسي يحيى والواليدة باش تكون فراسهم..

ماريا(تبسمات) :

- جواد : مالك كضحكي(بستغراب) ..

ماريا : عرفتي من نهار عرفتي خالتي رشيدة ماماك وانا كنتسناك تكول الوليدة

جواد : ععلاش انا كلتها(نكر)..

ماريا : أه كلتيها سمعتك(بتأكيد)..

جواد : يلاه احبيبي سيري ماتبقايش بزااف راه أتشمي مني ونصدقو مراض بجوج..

ماريا(خطفات بوسة من وجهو) :

- ماعندي مندير ماشي شغلي غير نمرض..

جواد(بغا يشدها وهيا تهرب ليه) :

- واخا الالة نتفاهمو من بعدد..

ماريا(كضحك عاجبها الحال :

- أهاه نتفاهمو نتفاهمو يلاه احبيبي بسبامة الله يشافيك وشرب دواك..

جواد : ضروري أحبيبي وماتبقايش بزااف قبل 8 سدو راه البرد وحالة الشتا..

ماريا : واخا حبيبي...سيفط ليها بوسة فالهوى ديمارا طوموبيل ومشا..

#بليل_فدار

دخلات ماريا لبيتها لقات سومية كالسة عند السرجم لاوية عليها كاب ديال الصوف ومطلعة راسها لسما وساهية..

ماريا(قربات ليها كدوز يدها قدام عينيها) :

واا سومية أختي فين ساهية؟..

سومية(شافت فيها وتقادت فالكلسة) :

- ماشفتكش إيمتا جيتي؟

ماريا(بغات تبدل حوايجها) :

- ويدي اختي داك سرجم راه الموت ديال البرد ... سدات سومية السرجم وتكات فبلاصتها..

- جييت كبيلة ماسمعتيناش كنهضرو؟

سومية : لا والله ماسمعتكم..

ماريا : هاد السيمانة انطلعو لسعيدية العائلة كاملة ..

سومية : ياك مزال الحال؟

ماريا(كدير حوايجها فالماريو) :

- وراه حيدي هاد السيمانة أتبقى 8 يام مابقى والو..

سومية : عيطي لوسيم كلتيها ليه؟؟

ماريا : اه عيط ليه فالخدمة وعلمتو .. قبل مغانمشيو ايجي بحال والو يكون هنا بعد غدا إن شاء الله ..

سومية(سكتات ورجعات سولاتها) :

- حتى فرح وماماه ايكونو؟

ماريا(لبسات حوايج الدار وتكات على نموسيتها) :

- وعلاش الا ضروري كلنا انزلو فلوطيل ديال جواد هادشي لي كاليا..

سومية(تنهدات وحطات راسها على المخدة كتفكر كيفاش اتشوف ولا تلقى مع ذياب وجه لوجه..قاطعات تفكيرها ماريا بهضرتها :

- ماما مليكة مقلقة بزاااف وماعندها خاطر مسكينة

سومية (بستغراب) :

- علاش؟؟

ماريا : أدم ولدها عاودت ليك عليه كان خطب رابحة كانت خدامة عند دار جواد شافها وعجباتو وعجبات حتى ماما مليكة .. إيوا راه يمكن وقع بيناتهم شي مخاصمة ماعرفتش بضبط ديالاش هو مابغاش يكول وهيا سونات ليها ماما مابغاتش تكول... إيوا كيبان ليا داك العرس مابقاش غادي يسالي..

سومية : وانت فنظرك شكون الغالط؟

ماريا : ماعرفتش صراحة أدم طايش شوية وعقليتو كاورية شحال وهو فسبانيا مننين كان صغير مزال وهو تم ... ماعرفتش والله بغيتونهضر معاه ولكن ماما مليكة كاتليا خليهم يحلو مشاكلهم لراسهم..

سومية : بصح بلاما دخلي فمشاكيل بعاد هو بعقلو عارف اش كيدير كانو مكتابين ايكملو مكانوش راه ايتفارقو..

ماريا : بصح.. رجعات سومية سهاات..

ماريا(بشك) :

- سومية واش ضراك شيحاحة شفتك ماشي حتى لتما غير ساهية أش واقع؟

سومية : ماواقع والو مافيا لي يهضر أختي والله قلبي وعقلي مضرورين ومابغيتش نزيد نهضر اللهم نسا ونعس حسن ليا ..

ماريا (بتساؤل) :

- ذياب ياك؟

سومية : اه هو لي نقدر نكوليك اختي خرجت لي فقلبي ورتاحيت ورحعت لكلامك .. من هاد النهار أهم حاجة بنسبة ليا هيا مستقبلي صافي...يلاه اختي انا انعس راسي ايطير من بلاصتو.. تصبحي على خير..

ماريا (بحزن) :

- وانت من أهلو..

ضارت سومية لحهة الحيط وتغطات خاشية راسها تحت المانطة بقات ماريا مدة حاضياها .. ناضت طفات الضو وتخشات حتى هيا فبلاصتها..

^^

المشكلة ليست في قلوبنا كما يظن البعض!

قلوبنا لم تخطئ عندما أحبت ، 

قلوبنا لم تخطئ عندما وثقت ،

ولم تخطئ عندما سامحت..

قلوبنا فقط لاتزال تظن أن العالم جميل ... وأن البعض يستحق الحب والثقة والتقدير ..💙

^^

أشرقت شمس الغد تارة تختفي وتارة تظهر من جديد شمس حزينة ملبدة بغيوم سوداء تحدر بنهمار أمطار غزيرة...

- #فالقهوة

مجموعين كاملين كايفطرو.. ماريا ..وردة ..سومية .. فرح ولبنات لي خدامات تم ..

وردة : هضرت مع النقاشة لي نقشات ليا ماعندهاش إشكال تجي لمدينة خرا اصلا هيا كتنقل ماشي بحال النقاشة لي نقشات لهاجر مابغاتش..

ماريا(كتشرب فالقهوة) :

- ماشي مشكيل عندي غير تقن ليا النقش كنموت على الحنة ..

فرح : حتى أنا بحالك ..

وردة(تفكرات شيحاحة خلاتها تنقز) ؛

- وانا كنكول أش نسيت فخبارك الالة رحال عائلة الإبراهيمي شنو غادي يديرو ؟

ماريا(بستغراب) :

- ماتخلعينيش عاوتاني اش واقع؟

وردة(خشات نص ديال كرواصة لي بقا فمها حتى كلاتو عاد هضرات) :

- سمعت أمين كيهضر مع جواد على حفلة توديع العزوبية الالة..

ماريا : من نيتك داكشي اديال البلدان لاخرة

وردة : انتي لي نوضي فيقي حتى لمغاربة كيديروها وسمعت امين كيخطط مع جلال...

ماريا(خرجات عينيها) :

- واش كاليهم جواد ؟؟

وردة : ماسمعتوش كان خاصني نبدل ليليا ماسمعاش اش كال المهم اوجدي راسك..

ماريا : عادي ويحتافلو شنو فيها ..

وردة (كضحك شافت فسومية ولبنات) :

- لا عااادي كولو ليها اش فيها ؟..

نقزات وحدة من لبنات :

ندى : انا كنشوف فالأفلام كيجيبو لبنات

وردة : سمعتي الالة كيجيبو لبنات ويجيبو حتى رقصات .. ماريا وحلات ليها وخرجات فيهم عينيها :

- كيفاش ؟؟ رقصات ؟؟

حطات ماريا كاسها من يديها وخنزرات فيهم..

وردة : اااه الالة كيما كتسمعي الشطاحات ولبنات حيت الراجل كتكون اخر ليلة ليه فالعزوبية ضروري خاصو يودع الأيام ديالو ويبدا حياة جديدة..

ماريا : ومال أمين مداروهاش ليه؟

وردة : امين كان مريض الى عقلتي ديك ساعات وزيد عليها ماعندو صحاب ماسي بحال جواد

ماريا(بشك) :

- واش دابا شادة فيا ولا كاتهضري بصح؟

وردة : الله اختي الى معاك بصح ولكن ويااك تكولي ليه شيحاجة خلي حتى يعاود ليك هو يكوليك كنجيب لخبار...

- بقات ماريا كتفكر فديك الهضرة ضرها راسها غادي تحماق وتسطى..

ماريا : وانت فرحانة مطفراه انت زعمة وراه حتى راجلك ايكون تما ورقصات نصهم كلو خارج خاغفي عليه وانت فرحانة وعاجبك الحال..

وردة(بشك) :

- هاء زعمة يديرها لا منظنش أمين ميديرهاش

ماريا : مالو مايديرهاش ماشي راجل غير جواد لي يديرها أمين لا كون بصح مايديرهاش مايكونش فرحان بديك الليلة الزاهية مكاين غير النشاط حتى يصبح الحال..

وردة : والله حتى نوريه اويلي لالا هادشي مابقاش عاجبني..

ماريا : لا غير يعجبك دابا نيت ياربي صبر من عندك ياربي...

- جا وقت الخدمة كل وحدة مشات لخدمتها وماريا فعقلها غير الحفلة...الأيام كدوز بزربة وصل نهار لي غادي يمشيو فيه كامل لسعيدية وجدو حوايجهم وكاع داكشي لي غادي يديو دهاز بوحديتو فطوموبيل ديال جواد...شدو طريق مع صباح بكري لسعيدية طريق كاملها وماريا غير ساكتة...

جواد(شاف فيها) :

- حبيبي مالك غير ساكتة؟

ماريا : لا والو مامخبي عليا والو ياك؟

جواد : لا حبيبي شنو انخبي عليك مثلا أش واقع هضري نيشان؟

ماريا(شافت قدامها) :

- ماواقع والو غير سولتك سؤال جاني فراسي صافي..

جواد : سؤال جاك بوحدو مكاين وراه والو مايمكن

ماريا : الله يهديك اش غادي يكون سولت صافي عادي..

جواد : اوك يالالة تيقناك..

ماريا : خسارة ماتسنيناش وسيم

جواد : مالو غادي يتلف راه نهار يكون جاي نسيفطو ليه لوكاليزاسيو مغاديش يتلف..

ماريا : إن شاء الله..(واخااا وليتي تخبي عليا هيا فراسكم لعجينة كون كانت نيتكم صافية كون عاودتي ليا ولكن الا واخا (كتهضر مع راسها))...من بعد عدة ساعات ديال الطريق وصلو أخيرا لسعيدية المدينة السياحية بمتياز أول مرة ماريا تحط فيها رجليها حلات السرجم واخا البرد وخرجات راسها كتمنضر...حتى كيبان ليها أوطيل قدامها كدو كداش الدخلة ديالو كلها شجر كيتوسطو نفورة طويييلة بزااف كيطلع الما ديالها حتى لفوق ويرجع لتحت كيتقطع شوية يتطلق على شكل تموجات...عجبها بزاااف الخدامة واقفين عند الباب...أما طول لوطيل عالي الفوق كاع كيتربعو خمس نجمات فوق منهم عدة ريات لدلة مختلفة العربية والأجنبية... أما إسمو متربع على العرش إسم خلاها توقف قدام طوموبيل لي خرجات منها وتبقى مصدومة كان لقبها وإسم ديال القهوة ديالها أوتيل بالوما...شافت فيها تبسمات وبادلها الابتسام...غير شافوه الخدامة لي على برا جاو كيجريو هز لي فاليز ديال العائلة لي وقفو حتى هوما قدام لوطيل مبديين إعجابهم بهاد الفخامة لي قدامهم... خرج جلال من لوطيل هو لي ستقبلهم كان كيتسناهم...

جواد(شاف فماريا) :

- اتبقاي هنا ولا غادي دخلي؟..

ماريا(كضحك) :

- لا اندخل...شدات ليه فيديه ودخل بجوج وراهم العائلة كلها من غير هاجر وهشام لي موال ماوصلوش من فرنسا مغادي يكونو فالغرب حتى يبقى لعرس 3يام او وسيم تورية وأروى اما العربي عمها والعائلة كلها دون إستثناء كانت..

- الأوطيل من لداخل كان سحر أخور وعالم أخور يحسابليك راسك كاين فأفخم أوطيل فأوروبا الإستقبال كيداير انا تعامل كولشي مرايا تشوفيها راسك...الموضفين غير شافو جواد وقفو ونزلو راس إحتراما ليه ولعائلتو عائلة ماريا كيتسمع الهمس ديالهم عينيهم كيبريو بالإعجاب لهاد الفخامة ورقي لي قدامهم ...

جلال ورا لكل واحد الشومبر ديالو مليكة وأحمد بوحدهم رشيدة ويحبى حتى هوما حوربة ومحمد كل واحد شومبر شومبر...أما ماريا وسومية خداو شومبر ليهم بجوج وفرح لي محاملاش تشوف ياسين جا بيتها ملاصق مع بيتو...

- من دورة شرفية فلوطيل المطعم البيسين الصبا وزيد وزيد كل واحد دخل يستف حوايجو فالبيت ديالو ويرتاحو من السفر باش يتلاقاو على الطبلة ديال الغدا..

دخلات ماريا لشومبر ديالها النموسية كبيرة بزااف ديال جوج بلايص نيت وكثر غطاها بالبيج وذهبي البالكون كبير أما الحمام غزاال بزااف ماتسخايش تخرجي منو عامر بلي بغودوي وزيوت ... خرجات ماريا حوايجها رتباتهم فالماريو وتكات كتحس براسها عيات.. شوية وقفات غادية جايا.. سمعات الدقان فالباب وصوت لبوانيي ضار تمات داخلة وردة وسومية دقة وحدة المنظر ديال وجهم بحال رايا وسكينة..

ماريا :😦 وجهكم مكايبشرش بالخير غير لوحوها فوجهي أش كاين..؟؟

سومية(بتوتر) :

- هانتي أختي أهم حاجة جواد راه كيبغيك وحق الله فهمتيني هادشي راه عادي غير ضحك وتفلية ..

وردة(كالسة ودوز يديها على فخاضها بتوتر) :

- انرجع مطلقة من هنا مافيهاش انا اصلا معصبة وحمي معصبني وزاد كمل عليا لي خاص..

ماريا(كتشوف فيهم بجوجات) :

- اهادوك جوجات ياتكولو اش كاين يا انتفكم وحدة وحدة..

سومية : هانتي انا نكوليك وردة سمعات أمين كيهضر مع جلال ياك وو..

ماريا(توترات) :

- ووووو أش أش؟

سومية(طلقاتها فوجها) :

- كاليه الحفلة تكون فيها حكيمة العروسي ونور(كالتها وكلسات)..

ماريا(بستغراب) :

- نور الرقاصة عرفتها ولكن شكون هاد حكيمة؟.. هنا وردة وقفات كتولول :

- حكيمة الالة واحد الرقاصة معرية كتر مامغطية وكدير شي شطيح خليني ساكتة الله يرحم باك راه كولي كنترعد..

سومية : انا كنظن مغايجيبوهمش بجوج حيت كانو بينو بلي نور دابزات مع هاد حكيمة مدابزة خايلة تعايرو كاع..

ماريا : واش حنا انصالحوهم انا دابا فراجل لي بغا يجيب الشطاحات كالها ليا وماتيقتوش لا انتشلل قبل عرسي انا مافيهاش..

وردة : والله حتى نمشي ليه نوريه وجهو فقفاه غير بلاتي..تمات غادية جراتها ماريا :

- كلسي الأرض عند بالك اديري مزية الى دابزتي معاه اتخاصمو ويمشي يحضر لحفلة ويدير مابغا ديك ساع..

وردة : ونبقى واقفة نشوف راجلي كيضيع مني أختي هاديك الفورمة لي عندها ماعندي أنا لي مرة بلاتي تشوفيها وتشوفي الصدر مبندر تعطيها غير نافخاه اما لباس تحشمي تشوفي انت لي بنت خلي هوما لي رجال..

ماريا(مغمضة عين وحال وحدة) :

- وانت فين شفتيها؟

وردة : كنت كنتعلم فيوتيب وشديت فيديواتها شحال من مرة...واش حنا دابا فين شفت هادشي ..

ماريا : موحال جواد يكون عارف هادشي..

سومية(بلاما تحس وتشد لسانها كضحك) :

- وراه سمعنا جواد كيكوليهم سيفطو ليهم التسبيق وحددو معاهم النهار فالكلوب ديال لوطيل😂😂

ماريا(كتخنزر فيها)..شافت فيها سومية وجمعات الضحكة وحدرات راسها... وردة غادية جايا فالبيت تكول باغية تولد لا هيا لا ماريا .. وقفات وردة شافت فماريا شوفة ديال الشر ..

- لقيتها عرفت شنو غادي نديرو بثلاثة بينا ..

سومية(رجعات بالور وربعات) :

- لالا أختي شنو اديرو انتوما اما انا مامزوجة مامطلقة ليبر وبيخير..

وردة(شافت فيها بشر) :

- والله يا بنتي ياسومية وماتعاونينا الما فضحكتك مانتسماش ونكوليهم كاملين بلي كتبغي ذياب... سومية شافت فماريا..

وردة : بلاما تشوفي فيها مكالت ليا والو راه عندي العينين باش كنشوف .. ودابا سمعوني مزيااان...

^^^

جلال(كمل المكالمة وشاف فجواد وأمين) :

- نور مغاديش تقدر تكون وقتها عامر اون بليس عندها مشكل مع حكيمة..

أمين : هيا اش؟؟

جلال : حكيمة بوحدها براكة علينا..

أمين : وحدة صافي فكرت بوغكوا با مانعيطوش على ديك الراقصة صافيناز عرفتوهت عندها شطيح خطييير..

جواد(غير ساكت وكيتسنط ليهم)..

جلال : زعمة تبغي تجي؟

أمين : أصاحبي حرك غير لفلوس كولشي يحضر وزبد عليها فلوسنا طالعين تم تعطيها اي مبلغ تجيك على رجليها..

جلال(شاف فجواد) :

- أش بان ليك؟

جواد(بصوت رجولي بااح) :

- انا بان ليا اتوقع شي كارثة وطيح علينا انا وداك راس طارو لي حداك..

أمين : وايلي حتى انت على كارثة مكاين والو كولشي في أماني ليها اكون هاني... تم جاي عندهم ذياب هو وياسين ..

أمين : هاهو سي ذياب وياسين جابهم الله

ياسين (بشك) :

- أش كاين تما؟(كلسو)..

أمين : جلال وأنا بغينا نديرو حفلة صغيرة لجواد بمناسبة زواجو كلسة وحفلة رجالية ومن غير واحد جوج عناصر ايكونو عيالات..

جلال : لا حتى صحابنا لقدام أيكونو حاضرين ..

جواد(خنزر فجلال) :

- ماتفقناش على هادشي..

جلال : انت خرجك السوق عرسك هذا حنا لي انتحكو ذابا خلي لينا راسك أيعجباااك الحال(غمز دراري😉😉)..

ذياب(شاف فيهم وماشي عادتو يهضر ويندامج) :

- اتجبدو على ريوسكم النحل الشباب كنهضر مع لي مزوجين..

أمين : الله يهديك مكاين بو نحل انت عارف العيالات الى تلقاو على جماعة يلاه يكونو كيوجدو لعرس شكون ايحس بينا كاينين ولالا..

ذياب : أخويا انت تعرف..

جلال : المهم لخلاص والمسائل خليهم عليا كونو هانيين من ديك النحية..

ياسين(كيضحك) :

- خطااار أنتوما الى مشاو حتى عرفو مشيتو فيها..

أمين : متخافش أدوز ليلة مفركعة دابا تشوف 

ياسين : إيمتا اديروها؟

- جلال : نهار قبل ليلة الحنة..

ياسين : الله يعينكم ولكن مزيانة شحال هادي ماسهرت الصراحة فرصة مزيانة..

جلال : واشتي(وقف) المهم نخليكم دابا نمشي نقاد لومور وباش مكاين انكوليكم الى وقعات شيحاجة..خلاهم ومشا..

أمين : حتى انا نوض عييت مع طريق نضربها بشي نعسة واعرة..بقا غير جواد وياسين وذياب ..

ياسين : حتى انا نخليكم الإخوان نرتاح واحد شوية(خلاهم بجوج بلعاني) ..

جواد(شحال وهو ساكت) :

- فين وصلات الأمور مع طبيب؟

ذياب : الحمد لله ماشي بحال قبل كاين تحسن كبير الحمد لله

جواد : داكشي لي كنشوف مابقيتيش كيف كنتي نهار لول

ذياب : شكراا بزااف على كاع داكشي لي درتي معايا بسبابك انت مدخلتش لحبس وحتى على قبل دوك ولاد لكلاب صراحة وقفتي معايا بزااف..

جواد(حط يدو على رجلو) :

- حنا خوت ضروري الخز يوقف مع خوه واخا تعرفنا فشكاال او وقع بيناتنا بزااف ديال لحوايج ولكن ماهما كان راه كتبقا خويا من دمي ولحمي..

ذياب : عاارف لي كاين 

جواد : من هتا لقدام الى خاصاك اي حاجة انا موجود ماتبقاش دير ديك الحساسية داكشي لي داز مات صافي نساه حنا ولاد اليوم..

ذياب(تبسم ليه) :

- الله يحفظك..بقاو مجمعين شحال من وراها كل واحد فيهم مشا لشومبر ديالو..

^^^

ماريا(مخرجة عينيها) :

- لا واش من نيتك هاد المرة جواد ايخرجني فجورنال مافيهاش

وردة : مغادي يخرجك والو بالعكس انت اتبعيني اتربحي واش بغيتي يدوز ليلتو مع دوك خياتي بغيتيها تديه ليك..

ماريا : تدي جنابها اشمن تديه اش كلتي نعيط لوسيم يااك؟

وردة : اه سوني ليه وصيه ضروري..

سومية(كتشوف فيهم وحدة بوحدة) :

- انا هادشي ديالكم مبانش ليا فيه اتخرجو علينا انا بعدا ماما اتعلقني من شفار عينيا

وردة : انت لي اتفضحينا كون كانت فرح معانا كوراه وازعمات خوافة كوني زعيمة شوية..

هزات ماريا تيليفونها وسونات لوسيم :

- الو وي زغلولي(كتهضر وتشوف فوردة) :

- بغيت نطلبك طليبة ماترضهاش فوجهي..

وسيم : هاد ماترضهاش فوجهي فيها شي مصيبة كحلة انا عارفك تمسكينك وراه شيحاجة..

ماريا : ياااااك انا عروسة خاص أواميري تنفدهم..

وسيم : واخا الالة كنسمعك هضري..

ماريا : بغيتك تجيب ليا نعاك شي حوايج شي 4 ديال اللبسات هكاك..

وسيم (بستغراب) :

- ديالاش هاد اللبسات؟؟

ماريا(كتشوف فالبنات) :

- أحم ديال رجال ..

وسيم : رجال؟؟ وعلاش لاش زعمة؟؟..

ماريا : وسيم كتسول بززاف بغيتهم من بعد ونعاود ليكم المهم هوما بغيتهم ديال الرجال فوقية وشد وشي عكاكز عفااك..

وسيم(وقف من بلاصتو مافاهم والو) :

- واش كتريكلي عليا دابا ولا كيفاش منين انجيب ليك انا هاد لفاقة وهاد لعكاكز ولا شطاطب؟؟

ماريا : زعمة انت متقدرش تجيبهم ليا باااز أخويا بااز المهم بغيت فاقة وعكاكز وشدودة بحال دوك لبسات ديال صعايدة ديال مصر هادوك لي بغيت تحضرهم ليا فينما كانو وبلاما تسزلني مغاديش نفدر نشرح ليك فتيليفون حتى تجي واجي قبل نهار الحنة واخا..

وسيم : الله يحفظ منك الله يحفظ وصافي..

ماريا : وعفاك خليها بيناتنا مابغيت حتى واحد يعرف واخا؟؟

وسيم (بستسلام) :

- واخا الالة..قطعات معاه الخط وشافت فسومية او وردة كتبرقق فعينيها..

تجهيزات العرس واقفة عليهم ماريا وجواد ليد فليد من نحية ديكور ديال القاعة لكبيرة الخيالية فين غادي يكون عرسهم من نحية طوابل ولي ناب ديالهم طباسل معالق فراشط كولشي الإضائة ديكور طولشي وقفات عليه ماريا وجواد هوما يختارو ويخططو ومنظم الحفلة ماعليه غير ينفد ... كتسالي ماريا كتاكل دخل لبيتها ترتاح العيا ديال العرس مكاينش بحالو واخا كتكلفي الناس ولكن الما وقفتي على شغلك بيديك حتى حاجة متكون هيا هاديك وكاتبغي عرسك يكون بشكل لي انت بغيتيه... وصل وسيم وأروى وثورية يوماين قلل من نهار الحنة ...ستغلات ماريا الفرصة ديال جواد مكاينش شدات وسيم من يديه وجراتو لبيتها سدات عليهم ..

ماريا(بحماس) :

- جبتي داكشي لي كتليك؟؟

وسيم(بشك) :

- جبناه ليك الالة ولكن كولي ليا فالأول أشنو بغيتيه؟؟

ماريا : وريني بعدا ونعاود ليك من بعد

وسيم : لا دابا بغيت نعرف ولا دوك لحوايج والله لا ديتيهوم..

ماريا : اووف واخا...جواد بغا يدير حفلة ديال لعزوبية وغادي يكونو فيها لعيالات وشطاحات..

وسيم(هبط يديه على جنابو) :

- صاااافي فهمت ماريا بلاما ديري شي مصيبة الله ييك راه عرسك هدا..

ماريا : واش عارف شكون جايبين ولالا حكيمة أه حكيمة..

وسيم(بستغراب) :

- حكيمة حكيمة وايلي بصح هيا نمشي نتفرج حتى انا؟

ماريا(ضرباتو لكتفو) :

- والله حتى نوصلها لثورية جمع راسك.. هادشي يبقى بيناتنا

وسيم : اشنو غادي ديري؟

ماريا : دابا تشوف شنو غادي ندير غير صبر دابا فين داكشي؟؟ هز واحد بوشيط كبيرة مدها ليها..

ماريا(فرحانة) :

- شكراا بزااف يخليك ليلي..

وسيم(غادي جيهت الباب) :

- انا بعدا بالي مهانيش على هادشي وانت تعرفي انا مشيت وخلي داك الوجه يزراك عرسك راه بقا ليه 3 جوغ..

ماريا(تابعاه) :

- عراافت متخافش عليا...سدات الباب وراه شدات ديك البوشيط خباتها وكلسات على طرف النموسية كتلعب برجليها..تدق الباب تفتح ودخلات وردة هيا وفرح وسومية ...

وردة : وسيم جا جاب معاه داكشي؟

ماريا(أشرات ليها بالإيجاب) :

- وانتوما خديتو المباقي؟؟..

سومية(كلسات على نموسية عيانة كتحرك رجليها) : 

- وردة حرتات بينا سعيدية كاملة بالكشايف باش لقينا داكشي لي بغات..

ماريا : المهم لقيتوه؟

وردة : اه لقيناه ..

ماريا : خايفة غير نحصلو..

وردة(تلاحت على لكرسي) :

- هاهيا بدات عاوتاني ...

فرح(كضحك) :

- انتوما يتخاف منكم ولكن برافو عليكم..

وردة(شافت فماريا وسومية) :

- شفتو لي كتفهم لحالكم ارباعة الخوافات ..

سومية : أختي لي خاف نجا..

وردة : انا عييت بغيت نرتاح المهم غدا مع صباح انبداو الخطة ديالنا عنداكم شي وحدة تعطل ولا تبقى ناعسة نلقاكم واجدات باش نبداو بالخطة لولة وندوزو لثانية يلاه أنا مشيت...خرجات وردة هازة معاها جوج ساشيات كبار شوية ...ودخلات لشومبر ديالها غبراتهم طلات على بنتها لي خلاتها مع المررية لقاتها ناعسة ...بدلات حوايجها وتكات ترتاح شوية ...

فرح... حتى هيا نفس شي خرجات من عند ماريا دخلات لبيتها..

سومية(لماريا) :

- تاخدي حليب بشكلاط؟

ماريا : واخا ناخود ..ناضت سومية قدات حوايجها وخرجات من لبيب غادية لمطعم طلب جوج طاس ديال حليب بشكلاط ...غادية حتى كتسمع سميتها شي حد تابعها كيعيك ليها ..وقفات وضارت لقات ذياب ..كتشوف فيه برودة حتى وصل عندها ..

ذياب(كيشوف فيها) :

- صافت سومية شفتك زربانة مكاين باس؟

سومية(برودة وصباع يديها بحال الثلج) :

- وي الحمد لله نو مكاين باس كاينة شيحاجة؟

ذياب(ستغرب من لافاصو ديال لهضرة باش تكتهضر) :

- نو مكاين والو واش عيب نسول فيك؟

سومية : لا مرحبا أخويا سول انت صافا خالتي كولشي مزيان؟

ذياب(دور ديك خويا فراسو) :

- الحمد لله الله يكبر بيك كولشي صافا..

سومية(تبسمات ليه) :

- يلاه نخليك دابا نشوفك من بعد ..ضارت وخلات من وراها واقف متبعها بالعين حتى ضارت وغابت على أنظارو..

طلع النهار ودنيا شقشقت طال الإنتظار يا حبيبي أنا على نااار ...طلع النهار النهار طلع نهار انا على نار ياحبيبي دانا على نار(فتحات ماريا لبالكون كتمتع بالمنظر لي قدامها وكتسنط لوحدة من الأغاني لي كيعجبوها ...ضحكات ضحيكة زوينة كتشوف فسما وفنفورة لي قدامها ...رجعات لداخل خدات دوش خفييف ..لبسات حوايجها وخرجات .. تلاقات مع وردة فالباب ... تغامزو بيناتهم وهبطو لتحت ... كلسو على طبلة كيتسناو افطور هلطو الما باقي وتجمعو كاملين ...

الحاج(كيقلب بعينيه) :

- فين جواد مزال مفاقش؟؟

ماريا : لبارح سمعتو كيهضر هو وجلال وأمين بلي عندهم شي غراض فصباح بكري ماعرفتش فين مشاو مكال ليا والو وسونيت ليه الخط مشغول ... جا سرباي حط ليهم العصير ... فطرو فجو ززين كيناقشو أمور العرس ... ياسين(وقف) :

- سمحوليا انطلع ناخود واحد لاسبيرين ونرجع..

محمد (بقلق) ؛

- ياك لاباس؟؟

ياسين : سهرت لبارح بزاااف وماشابعش نعاس كنحس براسي ايتهرس عليا ..

ذياب(حتى هو ناض) :

- دبلاتي ديني معاك حتى انا راسي ايتهرس عليا... نقزات رشيدة :

- شاي لي كيسهر بليل شنو كيوقع ليه؟؟..مشا ذياب مع ياسين ولوخرين كملو فطورهم ... جتى هضرات ماريا :

- أنا ولبنات غادي نخرجو واحد شوية نتسراو فيعيدية منين جيت وانا فتوجاد بغيت نرتاح ونضور شوية ..

وسيم(بالهمس) :

- الله يجعلني نتيق ..

أروى : أنا بعدا والله مافيا لي يخرج مشابعة حتى نعاس لبارح بقينا على جماعة حتى صبح الحال بغيتوغير نفطر ونرجع نعس غير عفيوني...

ماريا : عيقتي أصاحبتي صافي تمشي معانا ثورية ... شافت فيها ثورية(وجها صفر كتشير ليها لجهة كرسها بمعنى راها مريضة فيها لوجع)..

ماريا : ولا واش متافقين؟؟

ثورية : والله أختي كونما مريضة حتى نمشي ولكن مع البرد راه ماعندي فين نخرج بلاما نكوليك ..

ماريا(تنهات وتفهمات ) :

- صافي مرة خرا إن شاء الله .. هضرات مامات ماريا :

- حنا شارفات مكاين لي كالينا زيدو تخرجو أيه الأيام ولينا نحشمز بيكم ..

ماريا : اويلي أماما متكوليش هكاك انتوما هوما كولشي..

سومية : ماما انتوما عندكم رجالكم يخرجوكم أما حنا لا😂😂

حورية(كتخنزر فيها) :

- والله يمسخك أبنتي زعمة مابقيتيش تحشمي كاع..

العربي(كيضحك) :

- هذا هو جيل اليوم مابقا لا كيحشم ولا يرمش تسحابي يام زمان هادو احورية...

حورية : والله ماكدبتي أخويا لعربي الله يحفظ من هاد لجيل ..

سومية : راه كل جيل وجيلو كل وقت او وقتها حنا زاعمين على والدينا كتر وكنتسارو معاهم فيهم والدينا وخوتنا وصحابنا اللهم نعاود ونضحك مع ماما ولا نهضر ونضحك مع لبراني صحابات ولا فيهم الغدر قليييل فين تلقاي شي وحدة بحال راسك ونفسك ... وقفات وردة :

- ويلاه أختي أتبقاو تعاودو يلاه نخرجو بكري ونرجعو شوية بكري ...

أحمد(لماريا) :

- لبسي مزيان أبنتي راه هاد الجو دغية كيشدك رواح ..

ماريا : كون هاني أبابا غادي نلبس مزيان ...من ورا مسالة لفطور طلعات ماريا وردة سومية فرح لفوق ...ياسين وذياب مابقاوش رجعو ... ثورية وأروى طلعو لي شومبر ديالهم ولوخرين بقاو على طبلة كالس وسيم وسطهم بحال ليتيم حتى عيا تسلت من بيناتهم ومشا يتأكد من نكافة وترتيبات ديال لعرس ...

سدات وردة باب البيت وجات متجري عندي لبنات ..

ماريا : أمضرا؟

وردة(بمكر) :

- كولشي هو هداك الشيفور لبارح كان فكازا باش يجيب الأميرة ديال حكيمة وعرفتو شكون تاني جايبين فبلاصة نور صافيناز رقاصة لمصرية الرجال ناويين يزهاو هاد الليلة ايااااه وانا هاد ليام بارك عليا حبيبي عيان حبيبي الخدمة حتى لراسي دابا نوريه جا وقت الانتقام نيييت ويشوف ديك وردة لكتيوتة كيدايرة ...

ماريا : وعرفتي بعدا أشمن شومبات ايمونو فيها؟...

وردة(كضحك) :

- طبيعة الحال عرفت سولت فالاسقبالات وعطاوني داكشي لي بغيت فلول سولوني شكون أنا لي كنسول ولكن واحد فيهم هضر مع ديك لخدامة تم مع يلاه دخلات من كنجي كاليها عائلة سي الابراهيمي سرسبات ليا كولشي...

ماريا : مزياااان الديسكو لي لتحت ايكون وجدو سي جلال بكولشي ليه..

وردة : حتى هو طليت عليه لبارح موجدييين راه كنكوليك الليلة كانو نعوليين يكونو هوما أمراء الخليج ..سومية وفرح ساكتات مرة بشوفو فهادي مرة فهادي عنقهم تعنز بكترت مكايشوفو هكا وهكا ....

فقاعة كبيييرة بزااف كلها فتويات كتوسطها ثلاجة كبيرة كلها مشروبات غازية ومنصة كلها ضواو ... بداو الضيوف كيوصلو واحد بواحد كيتلقا ليهم الكارد ولخدام لي مسؤول على حوايجهم .. كيخليو ليه لي مونطو ديالهم وكيخلو الأغلبية شد بلاصتو الهضر ولكلام لي مدوموندي على عواصر ولي مدموندي على مشروبا الطاقة كل واحد وشنو واخد كتسمع صوت همهات وهضرة الضياف لي كيتساو فجواد وجلال الصحاب لقدام يوصلو ... سكتات الموسيقى ديال ديدجي... من لباب لور بدات كدخل فرقة موسيقية هازين الألات ديال لعود دربوكة كيتار آلالات موسيقية ... حطوها على لاصين وبداو كيقادو فالمتريال إختبار الصوت واش هابط طالع بزاااف ... الحفلة مزال مبداتش وشباب العائلة ولعريس مزال مبانش ليهم أثر ...

- فبيت قريب من الديسكو .. :

- ماريا(ضارت عندهم) :

- كيجيتكم ...شافو فيها لبنات ماتو بضحك عليها ...

وردة : جاااات معاك😂😂

ماريا : كضحكي طلي على راسك أنت..

سومية(بخوف) :

- خفت غير يطيح ليا هذا..

وردة : ماعندو مايطيح راه لصقتو ليك مزيااان ...

وردة : ويلاه الحفلة أتكون بدات خاصنا نمشيو ماتنساوش داكشي علاش وصيتكم ..

ماريا : وهادوك خياتي فين غادي يكونو دابا؟

وردة : أيكونو كيوجدو ... شكون بحالهم ...

ماريا : صافي براكة من لهضرة يلاه خلاص ... خلاوه حوايجهم تما فتحات وردة لباب أول خطوة رمات رماتها مع عكازها تبعاتها ماريا فرح وسومية ...ضورو راسهم يمين وشمال باش يتأكدو مبان ليهم والو مشاو فصف واحد دخلو لواحد البيت كبير ...مجهز ومأتت محطوطين فيه جوج باليزات كبارر...هزات وردة عكازها دارتو تحت باطها وبدات كضرب الرش طلات وحدة براسها ززينة شعرها كحل طويل رطب عينيها زورق :

- أيوا مين إنتو وإزاي دخلتو هنا من ذون إذن ...

وردة(بصوت رجولي) :

- ياباي اتركيلنا مجاااال نتكلم يا عصفور مصري يا زبدة الكشطوة يابااااااي عليكي... طلات حكيمة عليكم كتقاد فكسوة القصيرة الصفرا... 

- شنو كاينوهنا شكون نتوما داخلين بدون إستأدان ..

ماريا(لا تتزنرفزي يا كلبي يا كتعطة الكشطة انا أحمد عويس وهذا خايي هاشم وهاد خيي النتوسط صابر وهاد الصغير أخر التنكود أيمن ... نحنا رجال أعمال جينا من السعودية عشان مشارييع كوي كوي مشاريع ونحنا شركاء جدد لا ميستر جواد .. وهاي الحفلة على شرفنا خصوصي لينا يلاه يلاه قومو رقصو يالاله الفرجة ولحيحة لغاية الصبح يللااااااه إيحن أني وهاشم نستناكم ....سكتو الرقصات هزو شيلان ديالهم ومشاو لديسكو دخلو لبنات هوما لولات ومن وراهم وردة ولبنات منتنكرات وحتى واحد ماعرفهم ...

تلفتو ضياف لهاد الناس لي داخلين بجلاب ديال صعايدة بشلاغم كبار وشدودة على كتافقهم وطاكيات على ريوسهم كولشي كيسول شكون هادو وفين مالين الحفلة جواد وجلال .... بدات الفرقة الموسيقية كتعزف :

- أه يالالي ياعيني يالالي عالي تغرب راه ولا قالي ... بدات الموسيقى ورقص الرقصات الناس ناشطين مع راسهم اما الجماعة ديال السعودية واخدين صف واحد وكالسين على شطيح هاك براك برجليه وبالعصي لي فيديهم خداو الدور مزيااان الفلوس كتفرق على الرقصات او وردة تجمع من لتحت وترجع تلوح عليهم وتعلق ...

ماريا : ايوا كديه ايوا يا كطعة الكشطة هيهيهي(ضرب ليها فرش بحال شي واحد مفتون بشي وحدة او واخدة ليه عقلو)

وردة : اتحزمي اتحزمي ورينا الرقص على أصولو زغرتو يا حريم زغرتو..

ماريا (كتلعب بحجبانها) :

- أنا بحبك كوي كوي يا بنت يا صفيناز ايوي ايوي تتجوزيني يا قطة...صافيناز كتشوف فيها بستغراب وكتهرب منهم وتشطح حيت جايا على قبل الفلوس مايمكنش تمشي من هنا بلا والو ومع هاد الحمقين لي هنا باغية غير إيمتتا تسالي وتمشي فحالها ... هكاك حكيمة حتى هيا كتشطح وحاضية جنابها ...

وردة : يا واد أنت يا أحمد هاي الحرمة شكلها طبيعي ولا عاملة سيكيلون؟؟

ماريا(كضحك وتلصق الموسطاج لي باغي يطير ليها فأي لحظة) :

- سيليكون يا هاشم لا ماضونيش دي مرة كيشطة كيشطة طبيعي مش زاي زاي ولا أيي أيي...

وردة(كضرب الرش) :

- ولعووووها راااكيصوها ولاعوها ركيصوها(شاف فصفيناز) :

- تتجوزيني انا عندي بهايم كثيرر وبكر كثييير بتكوني انت البكرة السابعة ايش كولتي..

ماريا(لحكيمة) :

- وانا كمان وانا كمان وحياة ابوكي عندي 19 معيز تتجوزيني وتكوني انت المعزة ال20 ايش كلتي يا زبادي انت يا سمنة بلدي..حكيمة طلع ليها هادشي فراسها هزات شالها دارتو على كتافها وخرجات..

صفيناز : عالم بتستحيش على دمها كاتكم الأرف(خلاتهم ومشات حتى هيا)..

وردة او ماريا(دقة وحدة) :

- ماحدش بياخودها بي ساهل نيهاهاهاهاهاها ... كملو شطيح مع راستهم كلاو وشربو ظياف بداو يمشيو واحد بواحد ماعجبهمش الحال فاش سوناو لجلال وجواد وحتى واحد مجاوب فيهم حطو لي فيديهم ومشاو بحالهم بقا الديسكو خاوي غير ماريا ورباعتها ...مشات وردة لجيهت الديدجي جهدات فالاغاني وكلسو على الشطيح بردو غدايدهم ودوزو ليلة ولا في الأحلام غير بوحدهم خلقو جاو واااعر كلاو نشطو لعبو شطحو حتى عياو وتلاحو على الفوتويات ..

وردة(وقفات هازة تيليفونها) :

- ودابا جا وقت سيلفي..(تسيلفاو مع بعضياتهم وسجلو فيديو حتافضو بيه وكملو سعرة قصارات على ضحك ماريا فرح سومية وردة غير كعدة بناتية مابحالهاش كعدة)...لحكات 4 ديال الصباح كل وحدة فيهم رجعات لبيتها خدات دوش وغبرات دوك لحوايج ونعسو فبلايصهم بحال الى جتى حاجة مكانت ولا وقعات...

#الصباح

#شومبر_جواد

فايق كيتكسل كيحس براسو كيضرو شوية عينيه كيتلاصقو هو الساعة ديالو طل بانت ليه 8 ونص مافهم والو هز تيليفون كايبان ليها لادات ديال نهار لحنة مافهم والو ياك الحفلة اتكون قبل نهار الحنة كيفاش وصل نهار الحنة بهاد الزربة واش دارت لحفلة وحضر ونساها ولا شنو...سمع الدقان فالباب 

جواد(بصوت رجولي) :

- بلات ... ناض من فراشو غير بشورط قصير ولفوق عريان .. فتح لقا جلال وأمين قدامو .. خلى ليهم الباب محلول وسبقهم

جواد : أش واقع على صباح؟

جلال : واش فهمتي شيحاجة انا بعدا راه مابقيت فاهم حتى لعبة ..

أمين : ياك خاص ليوم تكون الحفلة ولادات ديال ليوم هيا ديال لحنة فين مشا نهار الحفلة انا راه دخت نكدب عليك...

يتبع...