عذراء ساقطة الجزء التاسع

تذكير بالاحذاث

غندكر بآخر الاحذاث باش متنساوش.. كانت مريم هربات لمغرب من بعدما ضربت يحيى بفاز خلاتو مغيب فسبيطار وخلات ليه رسالة معتارفة بكلشي.. وفنفس الوقت كانت سايرا كتعالج على ايد أويس لي تزوجها باش ميتسماش عيش معاها فالحرام ويتحمل مسؤولية هاداك ليختاصبها بسبابو.. لانه خلاها فالغابة فحط المسؤولية على نفسو ولام راسو..داكشي علاش سافر معاها القسطنطينية او المدينة العائمة وطلع راجل بتصرفاتو وقصصو الدينية.. أما لالاهم جيلان ليوقعات على كونطرا عاهرة محددة الوقت يعني لمدة شهر قدرات تهرب منها بحال الشعرة من العجينة ملي دارت ليه داك الدوا وخلات رجلتو تفشل ومقادر يدير والو.. وأخير ندوزو لسيهم اياد ليكان تشلل فحاذث انقاد كارلا.. ودابا يلك قرر يدير عملية باش يخرج من الشلل ديالو.. ونوعا ما لمح لكارلا قبل من العملية انه غيطلبها لزواج واعتارف ليها بحبو وتاهي شاركاتو الفرحة فاش علنات على اسلامها.. ولكن الفرحة مكملاتش ملي هو دخل لعملية وهي خرجات وبأن ليها صديق عمرها المسخ ديال جون واقف مع هاداك ليكان غيقتلها وفهمت لفيلم كامل.. دارت تلاقا بيه تفهم اش كين وتاهو صدق ولد الحرام نيييت كثر وتلاقا بيها حدا واحد الجرف.. لاحها من تما ومشا بلا ميتلافت

بعد اسبوع

مريم عرفت راسها حاملة وحملها ممقادش مزيان.. ونهار لي عرفت راسها فيه حاملة وطاحت فالطريق سخفانة.. ناضت بين ايديه اكيد هو سيهم يحيى ليكان مراقبها هاد المدة كاملة من بعدما فاق وقرا الرسالة.. وقاليها عندو طريقتو باش كيوصل ليها.. تبدل بزااف بحالا هزيتي يحيى وحطيتو يحيى وولا كيعااملها مزيان.. ونوعا ما اعتارف لنفسو بانه هادشي لكيوقع ليه معاها ماشي عادي وكيلمح ليها واخا كيستفزها وتاهي ممقصراش من حقها فالاستفزاز.. دازت أيام بيخير ولكن اي شمس تتغرب..طلباتو تشوف عائلتها بينما هو هنا.. وداكشي ليكان وملي شاف علاقتها مع يحيى الفلسطيني راجل ختها وحبها القديم بدا كيتفكر ديك الكلمة لفرسالة "غلطت فك" وبدا كيأول واش غلطات فيه داك نهار ونعسات معاه اول مرة على اساس شخص آخر.. فقرر يسولها هي نيت.. ملي سولها حگا والواد ضربتها بنكرة وخرجت من كلشي وقالت ليه انخرج مع دينيز وفاتي نتقداو وندورو.. تاهو مرفضش ولكن بالو بقا ضارو.. والحقيقة مهيناش على الله.. كان كيقلب على مگانتو تالقا تصاور يحيى فلكاوفوز لي نساتهم مريم عندها من ايام مراهقتها.. ونسات واش كينين.. يعني فهم انها شمتاتو ودابا مغيفكها فكاك

نمشيو عند جاد ليغبر كيقلب على سبب فشلو داك النهار تاعرف راه غير شي دوى ورجع ناوي على خزيت مع جيلان.. لي لقاها فموضع متحسدش عليه خوها كيحااول يخااصبها بحال شحال هادي.. عاد فهم عقدتها من الرجال وشخصيتها الباردة.. طلب منها السماحة وبقا معاها طوال هاد المدة تاصدق السيد طيح كثر ماهو طيح.. واعتارف ليها فاالاخير فبرج الحرية ألالة سمعتي برج الحرية.. واعتارف تابكدبتو عليها بانها قتلات داك الراجل.. هاد الكدبة باش خلاها تسني ديك كونطرا وكان لاوي ليها ايدها بيها..خليناها هنا

بالنسبة لسايرا ليعاشت مع أويس ألذ الاوقات وهي كتعالج معاه غابدكر الله والقرآن.. قررات انها ترجع بحالها بلا متعرف انه مزوجها هاد المدة كاملة ولكن هو وقفها وقاليها معندك فين تمشي.. لادابا لا من بعد واعتارف انه مزوج بيها.. دابا تنتسناو ردة فعلها

اييه أما لالاهم كارلا ليلقاوها جوج الناس ايخوانيين.. رجل ومرتو كبار مبعدين على المدينة ومسخها وعيشين فالتلة هو طبيب اعشاب وهي معلمة اسلاميات.. داواوها وقالو الا فاقت ومكان عندها حد ايتبناوها.. وداكشي ليكان فاقت ولكن فاقدة الداكرة وقبل ميدخلوها الإسلام فهمو بلي هي مسلمة قبل يمكن.. كتافاو انهم يعطيوها اسم جديد لي هو توبة ويشدوها على اساس بنتهم وهي دايرا الخمار.. فحين ان سيهم إياد ليفاق وهو كيقلب والناس كيقنعوه بلي غير هربت منو.. تحول من إياد الضحوكي لوحش الرائدين ومبقاش كيف كان بتاااتا.. ولا وحش وخدمتو أولى

أراك نرجعو لحريرة يحيى ومريم.. ملي خرجات تدور وتلاقاو بمروان.. أشكون هادا.. هادا هو لييييكان معاها فلحفلة فاش سكرات وعندو عداوة مع يحيى وهو ليطيح بيحيي ونشر صور مريم سكرانة فالحفلة.. والسبب فاش كان يحيى ايقتل مريم وهي دافعت على رأسها ضرباتو بفاز وهربت لمغرب.. ولكن مريم شافتو ونااسياه واخا داكرتها ضاراها وكتقول شيفاه قبل.. شكون عرفو.. عرفاتو دينبز واشنو علاقتو بيها.. هو ليجا اول نهار وخطب مريم من خوها عصام.. وعصام قالها ليها ولكن هي رفضات بلا متشوفو.. دابا ولات اللعبة أكبر من هاكا.. وكنتسناو رجوعها واش غيدير يحيى والاهم اش غيدير هاد مروان.. داكشي ايولي الشكلي فالعكلي 🙂 هاه حگا اشمن كوونطرا سنات عليها ههه...

_جاد: داك السيد مقتلتيهش غير كدبت علك كان مزال عيش كنت باغي غير نرد لك الصرف ولكن ندمت.. ندمت وعرفت بقيمتك (همس فودنها) سمحي ليا وبغيني كيف كنبغيك دابا

لارد.. كيتسنا فيها تحرك دور وتجاوبو او ضربو وتغوت المهم داك السكات او بالأحرى ديك البرودة كتقتلو كثر من كلامها القاصح.. سرط ريقو بعد منها شوي ودورها عندو كيشوف فيها وعينيه علي عينيها لامعين

_جاد(شدها من دراعها) :مكنتش قاصد.. مكنتش عارف داكشي واقع لك كامل.. سمحي ليا

بقات حادرة راسها وساااكتة.. كيتسنا فجوابها والو.. عاضرها لان كدبتو مكانتش ساهلة.. تنهد وهو حادر راسو هو التالي ندمن

_جيلان (هزات راسها فيه ببراءة ممعهوداش عليها وابتسامة بسيطة.. عينيها مغرغرين) :كنت عارفا

حول شوفتو ليها وهو فاتح عينيه على آخرهم.. كيحاول يستعوب اش كتنطق واشنو ليكانت عارفا

_جاد :كيفاش اش كنتي عارفا

_جيلان:كنت عارفا داكشي ليدرتي.. كنت ساكتة مخلياك كترجع دقتك

_جاد:وملي كنتي عارفا علاش محبستينيش

_جيلان(تنهدات وهي كتشوف فالزاج) :واحد الوقت كنت باغا نرد ضقتي ولكن مكنتش قادرة.. ديك متكونش قادر ترجع حقك هي كفن بنادم.. مبغيتكش تكفن

شاف جانب اخر من شخصيتها الباردة.. جانب آخر من عقلها المحكم.. قلبو زاد نبض ليها بحدها.. عنقها عندو كثر وكثر

_جاد(بهمس) :مكنتش قاصد

_جيلان(هزات ايدها كطبطب عليه) :صافي فات داكشي

بعد منها وشد وجهها بين ايديه.. كلشي فيه معاها دابا.. ابتاسم على غير عادتو.. ابتسامة بعقلها هاد المرة.. ابتسامة حب وشوق ممزوجة بالخوف

_جاد : كنبغيك وباغيك تكوني حلالي

_جيلان(خرجات عينيها فاش سمعات كلمتو لخرة.. سرطات ريقها كتحس بنبضها خدام) :الصمت

_جاد : وقتي كلو ليك الا مبغيتيش دابا

_جيلان :ولكن نت كتبغي الشراب كثر مني.. مبغيتش نتعدب كثر اجاد

_جاد: من ليلة نتي عادتي.. غندمن علك نتي فبلاصة المخدرات.. غتكوني نتي شرابي ونتي مهلوساتي الا بغيتي.. اتكوني نتي تاج تسطيتي وهبالي

بلا متحس ابتاسمت وعينيها عامرين دموع.. كتشوف كيفاش كيهضر.. كيفاش كيبتاسم وهو كيشوف فيها. كلماتو لخرين توشاوها بلا متحس..مقدرات تخرج حتا حرف من غير هزات ليه راسها بآه

من عينين لامعين لعينين عالنين على فرحتهم.. هزها بين ايديه معليها وهي كضضحك.. بدا كيدور بيها وهي معلية رجليها وشعرها مطاير معاها.. قهقهاتهم مسموعة حتا لتحت.. حتا بدات كتغوت باش ينزلها عاد وقف..كينهج وهي كدلك.. تلاحت معنقاه..من واحد مكتحملوش لواحد كتحس بالامان غير فصدرو.. فقط سبحان مبددل الاحوال.. بعدات منو كتشوف فيه.. وهو كدلك.. حول شوفتو لشفايفها ليديما كيثيروه بجد.. هبط ببطء لعندهم.. كرزات على جنابو ليشادا فيهم.. وغمضات عينيها كارزة على شفايفها.. حتا هزات نفسها بشهقة خفيفة فاش حسات بشفايفو عليها.. غير مزادت كتكرز ليه على حويجو.. اول مرة ليها بالخاطر والهدوء.. بدا كيحرك شفايفو ببطء عليها وهو مدورها جيهة الزاج..بقا مدة كيلعب بيه من وحدة لخرة حتا ترخات معاه وبدات كتنساجم معاه.. هزها عندو قداموو فاش حسها كتمص فشفايفو هي الاخرى.. حط ايدو تحت مؤخرتها كيهزهز فيها ببطء وفنفس الوقت منغامس معاها فقبلة تحت عنوان الحب والشهوة.. تاحس بيها تخنقات عاد بعد مبتاسم كيشوف فيها.. سمع صوت رنين فهاتفو.. ابتاسم كثر وكثر.. حطها ودورها لداك السرجم وهو معنقها من لور.. هز صبعو مقابلو مع نقطة فالسما

_جاد:شوفي

علات عينيها كتشوف.. حتا كيبانو ليها المفرقعات على الألوان والناس كتغاوت من لتحت وهي ضحكتها معرت فين واصلة.. وأخيرا لقات الاهتمام فقلب شي رجل.. عاود هز صبعو لنقطة اخرى.. وهبط لودنها هامس

جاد: كنبغيك

هاد الكلمة بالضبط لحسات بيها فقلبها وهي كتسمعها من فمو.. وفنفس الوقت تكتبات فسماها ديك الليلة بالألوان.. عالن لأمة امريكا انه كيبغيها

عند يحيى ليكيقلب على مگانتو.. حل المجر كيقلب يلك غيسدو ملي لقاها حتا وقف ورجع حلو ملي شاف الصورة..هزها بين ايديه وملامحو كيتبدلوو. كليا.. هاد المرة ماشي غير استحمراتو هاد المرة خرجات على حياتها.. كيشوف صور يحيى الفلسطيني لينسات متخلصاتش منهم معمرين قنت من مجرها.. هاد المرة على غير العادة وهاد المرة بالضبط هي لغتقلب ليهم ولينا كلشي

مدة وهو واقف فايديه الصور.. كيشوف فيهم داخل فنوع من الصدمات.. كيحس بالبخور كيخرج من ودنيه.. تلوحي عليه قتيلة يتفرگع.. بدا كيكمشهم وسط ايديه لمكنزين بلا ميحس..باغي يضرب شي حاجة باغي يحيح وفنفس الوقت خاصو يفكر.. خرج لبالكو جبد گارو وهو كيشووف بعيد كيحاول يرخي نفسو وميتهورش.. خاصو يخدم بعقلو هاد المرة..رغم ان ديك الشمتة باقا واقفة ليه فالنص.. كانت كتخايلو راجل اخر وهي ناعسة معاه.. كانت كتخون ختها مع راجلها.. ابتاسم باستهزاء على نفسو فاش فكر كيفاش لولهة ونزل عليها تهمة #ساقطة.. بقا كيفكر فالتالي هز هاتفو وعيط لمحمود

_يحيى (بنبرة جامدة) : من هنا لساعة باغي يوصلني عقد فيه هادشي لغنقول لك

_محمود:واخا اسي يحيى واش لدار الزعيم

_يحيى :اه.. بغيتو يكون كيهضر على ******

محمود بقا كيسمع مستغرب مقدرش يقاطعو وهو كيسمع ديك الحدة.. بقا ساكت كيسمع مفاهم والو.. كيف بغا يسولو يفهم اش كين قطع عليه وشافها كيفاش داخلة من باب القصر مع لبنات كيضحكو بحالا مخاصهم خير.. متافقين انهم ميقولو والو.. وميعيروش لمروان اهتمام

_يحيى (مصغر عينيه وكينثر آخر نثرة.. بشبه همس) : مريم الزعيم

كأنه مبقاتش محسوبة عليه...ومبقاتش كتهمو كمرتو.. دابا ليهامو ولدو لفكرشها غالمتعماوش ليه العينين عليه.. ولا نقول اكثر من هاكا هامو يندمها على شمتتها ليدايرت ليه

دخلات لبيت كأنه تاحاجة مواقعة.. هزات نفسها ودخلات مبتاسمة ماباغا تحسسو بحتا حاجة وماباغا تعاودليه والو

_مريم(بابتسامة) :هانا جيت

تلافت عندها كيشوف مطاااول.. كيشوف فعينيها فيكس الشيء ليخلاها تبدا ترتابك منو.. سرطات ريقها وهي كتشوف كتحاول تفسر شوفاتو.. بدا كيقرب منها شوي بشوي.. خطوات موزونة وهو باقي فيكس فيها.. واحد الفص من عقلو كيقوليه تقدر تقتلها دابا وتحيد علك الشمتة والفص لاخر كيقوليه كلشي بالعقل وهي حاملة.. بدات كترجع لور وهي حاسة من شوفاتو بلي واقعة شي حاجة.. وكتقول مع بالها وش يكون عرفها كذبات عليه ولكن منين ايعرف.. موقفات حتا حبسها لباب وراها.. هو باقي غير زايد القدام بحالا مخدر.. حتا وصل عندها وهز ايدو.. بلا ادراك غوتات وغمضت عينيها

_يحيى (بهدوء.. حط ايدو على شعرها كيلعب فلخصلان الاماميين وهو كارز على سنانو باغي يحرگو ليها.. حلات عينيها فيه وهو ابتاسم ابتسامة هادئة وعينيه مزال حومر) :مالك أحياتي خيفة ؟ واش كينة شي حاجة

_مريم (كتحس بقلبها كيطيح من الخبيط.. هزات نفسها) :لا لا والو

_يحيى (عنقها) :متخافيش

عض على شفايفو ووتيرة نفسو كتزايد وهو قريب منها.. بلا ميحس كرز ليها على ضهرها حتا غوتات مرة خرى

_مريم : احح اي يحيى كتوعتني.. يحيى طلق

سرط ريقو وبعد شاف فيها عاود بابتسامة خفيفة

_يحيى :يالله غنمشيو لدار

_مريم (باستغراب) :هاه كيفاش ولكن حنا يلك جينا وقلتي اتبقاو هنا شي ايام

_يحيى :يالله امراتي عندي واحد الخدمة يالله انا هبطت

_مريم :ولكن اشمن خدمة وفين غنمشيو

زاد خارج ونطق تحت سنانو وهو مرجع تخنزيرتو

_يحيى (بشبه همس) :لعذابك

تنهدات وهي مفاهمة والو.. مبغااش تغاوت معاه قدام عائلتعا وخصوصا من بعدما كدباا عليه فكتحاول تكفر على ذنبها.. هزات داكشي ديالها وهبطات لقاتهم مزالين مجمعين كيتسناو العشا.. حتا صدموهم بلي غيمشيو

_الزاهية :الله ياولدي يلك جيتو

_يحيى :خرجات لي واحد الخدمة خاصنا نرجعو.. ان شاء الله نساليها وراه نعاودو نجيو

يلك بغات تنظق حتا دخل يوسف

_يوسف : خدمتو أولى

بداو كيتعانقو ومريم حابسة بكيتها.. اما يحيى كيشوف شييي تخنزيراات فيحيي الفلسطيني مخليه غير كيشوف مفاهم والو.. توادعو معاهم بالعناق.. غير وصلات عند يحيى راجل ختها وهو يجرها من ايديها خلاها مخرجة عينيها ونفسها تزيت اما هو ابتاسم بحالا مواقع والو وقبل حتا من العائلة يستغربو نطق

_يحيى : نخليوكم دابا تصبحو على خير

_الكل :طريق السلامة

جرها وهز صاكها مخرجها مخنززر وهو غادي خارج وكيزيد يكرز على ايدها وهي كتنتر ووالو

_مريم :يحيى طلق ويحيي طلللق ايدي.. اش واقع يحيى اتفلعصها طللق اي طللق

هو بحالا مسامعهاش حتا قمشاتو شي 3 لمرات عاد طلق وهو محاسش تابقميشها

_مريم :اش واقع لك

_يحيى : والو

طلع لسيارتو وتاهي طلعات معاه وهي نفسها كتزيد تزير عليها.. وكتحس براسها اترجع لجحيمها غير هو كثر من لول يمكن.. ولكن هاد المرة السبب مجهول

داز الوقت

فأمريكا فنفس الفيلا المنحوسة.. كيجمع هو فحويجو وهي حداه مفاهمة والو.. بسيف وهو الطريق كاملة غير ساكت من المغرب لأمريكا

_مريم: دابا فين غنسافرو وعلاش كتجمع غاحويجك

يحيى كيجمع فليفاليز فصمت فقط كيخطط وهو عالم بيه غالله.. ايدو متحكم فيها بزز باش ميقتلهاش ولكن عارف راسو مغيستافد والو...فقرر يلعب بعقلو

_مريم :يحيى علاش مكتجاوبنيش فين غنسافرو دابا.. جبتيني من دارنا بزربة ودابا تتجمع حويجك فين غادي

سد على لافاليز وتلافت عندها جارها من ايدها وحط عقد قدامها فطبلة زجاجية

_يحيى (ببردوة مكيشوفش فيها ) :سني

_مريم:ديالاش هادشي.. اش واقع مفهمت والو واشنو هاد الوراق

_يحيى(علا راسو عندها وملامحو جاااامدين) :سني

_مريم:وبلاتي غير نقرا اشنو هادشي

وقف مخنزر وجرها عندو رادخها وكارز على دراعها..ميل راسو وهو قريب ليها

_يحيى (كارز على سنانو) :المرة الثالثة مغنعاودهاش.. قلت لك. سني غتسني وفمك مسدود

مفهمات والو فقط قلبها بدا كيتزير عليها وهي كتشوف هاد التحول غير مبين ساعة وختها.. رجع كيف قبل ولكن بصيغة كثر

_يحيى (ابتاسم ليها ببرودة) :سني أمرتي

سرطات ريقها وتحنات كتسني وهي على الاقل كتحاول تقرا العنوان.. كيف سنات جر الورقة من تحت ايدها وتلافت غادي جار فاليزتو

_مريم(وقفاتو. بصوتها) :ديالاش داك العقد ايحيى

_يحيى (تلافت عندها مبتاسم) :ديال الزواج

في الصباح.. فاقت هي اللولة ومشات كتجمع حويجها فلافاليز باش تمشي.. حتا شي ايد كتشدها قبل متكمل جميعها

_اويس (ليفاق ضاحك غاشافها كتجمع وخسر ملامحو) : معندك فين غتمشي

_سايرا : كيفاش

_اويس: نتي مرتي دابا على سنة الله ورسوله (هز هاتفو موريها صورة العقد) وحتا فالقانون.. يعني بلاصتك حدايا وحتا الطلاق مكينش لأنني حاط شرط الطلاق يكون الا لاطلبتو انا

لافاليز من ايدها طاحت وهي كتشوف فيه

_سايرا :مفهمتش

_أويس : ليخاصك تفهمي دابا بلي نتي مرتي وغتبقاي مرتي.. وهنا حدايا.. ودابا ملي وليتي مزيان انقدرو نهضرو مع عائلتك باش يعرفوك معايا انا

غير كتشوف مفاهمة والو.. وقلبها كيزيد يضرب.. اما هو خرج من لبيت غادي هابط.. كيقاد نفسو وهو كيمسح على راسو باش يتهدن.. هبط كيقاد فلفطور وهي مزال على نفس وضعيتها كتحاول غاتفهم ومفهمت والو.. حتا هبطاا عندو كتجري

_سايرا :اش كتخربق نت

_اويس :سايرا راني شرحت لك.. اجي دابا تفطري وشربي دواك ومن بعد ونهضرو

ضربات ليه الطبسيل ديال لكريب من ايدو معصبة

_سايرا :اش تتتخخخربق نت

هبط راسو كيشوف فالطبسيل ليتهرس والماكلة المرمية.. كرز على ايدو وهو عارف راسو مغيقدرش يأديها لأنها اول حاجة مريضة وثاني حاجة مرة.. عض على شفايفو وهبط كيجمع فالماكلة فايدو

_سايرا (عاودت جراتو من لبيل ديالو مخنزرة) : متتتعصبنيييش اشمن زواج واشمن طلاق ممنوع اسمحمد

كأنه مسمعهاش عاود كرز على راسو وكمل جميعو.. وهي غير مكتزيد عصبيتها.. كأنها باغا تخرج طاقتها فيه

_سايرا :كننننهضر معاك اااازبل

وقف مخنزر وقرب لوجهها تانفسو ضرباات فيها

_أويس :سايرا قلبي ساعة بخرا.. سيري تفطري

داز من حداها وخلاها كتشوف.. مشا كيكمل تحوالو لطبلة.. وجلس كيفطر.. اما هي فقررات ديرو مكينش وطلعااات جرات فاليزتها وهبطت غادا خارجا.. حتا كتنتر من ايدها

_أويس: كنضن هضرنا.. راه معندك فين اتمشي

_سايرا (نثرت ايدها) :مسوقكش اصلا وداك لخير مبغيتكش ديرو فيا انا قادة براسي

_أويس (بقا مطول فيها الشوفة ونطق بهدوء) :شكون قالك كندير فك خير

_سايرا (صغرات عينيها) :نت اصلا علاش تزوجتيني.. علاش.. غير باش متبقاش تلوم راسك ياك

_أويس (ابتاسم بهدوء كيف عادتو) :اه..

_سايرا (سرطات ريقها وشافت فيه بحدة) :متبقاش تلوم راسك اذن.. مدرتي والو وانا بيخير.. صافي باغا نمشي بحالي

_اويس(شد وجهها وسط ايديه) :اه بصح باش منلموش راسي(رجع كيبتاسم بحب) ولكن هادشي قبل ماشي دابا

هبط باس ليها على راسها وزاد قدامها مخليها حمرة وكتحاول تأول هضرتو لكلمات مفهومين.. بعمنى لاعتراف مفهوم

_أويس :اجي تفطري امرتي باقي تابعنا السفر لسانغافورا

بعد يوماين من الفيقة

جالس كيف عادتو فبيروه مخنزر.. كيكمي ويخدم.. مبقات تاحاجة اخرى شاغلاه من غير خدمتو وتاحد مكيقرب لبيروه اصلا.. حالتو ولات كتخوف.. وهو حاني راسو كيسمع الدقان على باب المكتب.. بصوتو ليولا حرش كثر من لول

_إياد :دخل

دخل أحد الضباط دار التحية ووقف

_الضابط: جبنا مشتبهين جداد أسيدي

_إياد (هز راسو.. تحت عينيه كحل وتخنزيرتو واضحة) : الا مرة خرى كنتي جبتي ليا شي ناس جداد غير حيكاش مسلمين انفني زامل بوك بلاصتهم

_الضابط(سرط ريقو) : لا اسيدي هادو لقيناهم معزولين ومن لباسهم والوراق لعندهم بينة غيكونو من ضمن ديك الخلية

_إياد :احنا انشوفو

ناض ضرب گاروه فالسلة جنبو وخرج مخنزر

_إياد : فين كينين وشحال من واحد

_الضابط: كينين جوج راجل ومرة معاه.. راه فرقناهم فغرف الاستجوابات

هزهز راسو باه وهو باقي جامع حجبانو.. وقف قدام لباب ديال الاستجواب لول.. حتا سمع الغواث من البيت الثاني.. بصوت انثوي زعزعو من لداخل.. هبط ايديه من على لبواني والتافت لجيهت لباب الثاني

_إياد (مع الشوفة غوت بالانجلش) :حيد ايديك عليها

وهي كذلك تخنزيرتها بينة على عينيها لكيبانو غير بحدهم وهوما كيحاولو يحيدو ليها خمارها.. هاد اليوماين كانو كافينها.. كأنها كانت مسلمة سنين وحتا النقاب من لللقطة ليجرباتو فاش جات تحيدو ليها السيدة رفضات.. وهادي نعمة الاسلام التعلق بالدين بالفطرة.. لان المرء كيتولد مسلم فالأصل

_إياد(وهو كيشووف فيها كذلك.. وجه كلامو لضابط ليواقفين) :خرجو

خرجو وسدو لباب خلاوه معاها.. هو كيشوف فعينيها بااردين اللون والشاعلين بالغضب.. وهي مخنزرة فيها كتشوفو كعدو فقط.. بدا كيقرب ليها بشوي ونفسو كتزيد تزير.. نطق بهمس مسموع

_إياد :اشنو سميتك

_..... : ثوبة

يتبع...