حفيد لالة منانة الجزء الثاني

سارة:(سدت عليها لباب)يا ربي اش كاندير انا افففففف اش داني ناخذ شي نمرا(بدات تدمع)بناقص من شي زواج غايمرضني فحياتي يااا ربي اش هاد الزهر عندي

(سمعات الدقان)بسمة سيري تنعسي حتا لغدا ونهضرو(ماعاوداتعاش معاها عرفاتها ملبكة)يا ربي تعاوني يااا ربي

ناضت توضات و لبسات عليها و استقبلات القبلة نوات تصلي استخارة و دعات ربها يسهل عليها القرار و يبعد عليها كل ماهو شر ليها 

غسلات سنانها و سرحات شعرها وتلاحت بلاصتها بعدما قررات انها تخلي الامر بيد الله داتها عينها دازو ثلاث ايام و ابطالنا كايتعاود.غندهم.نفس الروتين المهدي بحالا كايتسنا جداتو تاخد القرار فبلاصتو و بطلتنا الحنينة كاتحاول تنسا وتخلي القدر يتصرف فاقت على صوت المنبه غسلات وجهها و طرفات حالتها صلات و هبطات تفطر لقاتهم مجموعين و زياد كايعاود لباه صوتو هو لي مسموع

سارة:(شدات ليه حناكو)مالك مصدعنا على الصباح

الطاهر:(مسح فمو)الحمد لله تكلمت معا المهدي هاد الصباح

خديجة:اهااه ايوا اش قالك 

الطاهر:عرضونا نتغداو معاهم و نتكلمو فامور العقد و الصداق و داكشي

خديجة:الله يكبر بيهم ماجاوكش زربو شوية ا الطاهر

الطاهر:مازربو والو هادا هو الوقت 

خديجة:ايوا نتوما تعرفو عرضاتنا لغدا

الطاهر:اييه غدا قالك مرحبا بينا عندهم للغذا 

خديجة:(كاتقرقب لكيسان)ايوا يكون خير 

ناض الطاهر لخدمتو و خديجة تجمعات معا بناتها 

خديجة:سارة بنتي(شدات فيديها)مرتاحة لهاد ولد الناس

سارة:(مرتبكة)م مرتاحة 

خديجة:منين نمشيو غدا عندهم حاولو تهضرو بيناتكم و تتعرفو على بعضياتكم كثر قبل العقد

سارة:ان شاء الله 

عند المهدي لي فاق طرف حالتو و فطر و لبس عليه و خرج لخدمتو نهار كامل وهو غارق بين الضوسيات لي تجمعو عليه عاد الفترة سالا فوقت متأخر تكسل على 

الكرسي وهز تيليفونو

المهدي:(كايشوف فسميتها)سارة يا سارة واخا ا لالة نعطيو لراسنا فرصة كتب ليها -اه مرحبا-وطفا تيلي

تلاقاو العائلات معا بعضياتهم كلاو و شربو و منانة كاتعاود ماسكتاتش حتا دازو للمعقول تافقو على ان العقد يكون بعد سيمانة وفضلو انه يكون فالدار باش عائلة خديجة و الطاهر لي ماساقوش لخبار يجيو جلسو مجمعين العيالات و الرجال فجهة اخرا

خديجة:(بينها و بين سارة)نوضي كلميليا باك

سارة:(هزات تيليفونها)نصوني عليه

خديجة:(خنزرات فيها)نوضي تهضري معا راجلك هادشي لي كاديرو فيه ماشي معقول هضرو و عرفو بعضياتكم كيدايرين فوقاش ناويين تتكلمو و تتفاهنو

سارة:(بهمس)ماما واش انا غانمشي نتلاح عليه(تنهدات)حتا يجي هو و يكلمني و نهضرو باقي الوقت قدامنا

خديجة:اشمن وقت كادوي عليه هادشي را مايبغيه لا الله لا عبدو نهار يتضرب العقد ماغايبقاش مجال نفكرو عاد

لالة منانة:(شافتهم كايوشوشو مشطونين)ياك لاباس ا لالة خديجة ياكما كابن شي مشكيل ا بنتي

سارة:(ابتاسمات ليها)لا اخالتي ماكاين حتا مشكيل

خديحة:(بزعامة)غير لقيتيني كانهضر معاها كانقوليها نوضي هضري معا راجلك و تفاهمو بيناتكم باقين عمرهم دواو ولا تعرفو على بعضياتهم

سناء:(ميقاتها)نووغماال باقي ماكاين والو بيناتهم اولى حتا يزيد ونسميوه سعيد

لالة منانة:(كاتبرد السوق)لا خصهااا تهضر معا راجلها قالاك ا سنا 

خديجة:وا هانتي فهمتيني اشريفة نديرك فمقام الوليدة ومانخبيش عليك انا عندي راحة بنتي هي اللولة من نهار جيتو مادوات معا الولد ولا تعرفات عليه كيغايكون هاد الزواج

سناء بقات غا تبلق فعينيها اما واحد الجوجات غير كايتغامزو على مهم عطاتهم القاسح

لالة منانة:(تنهدات)عندك لحق ا لالة خديجة انا نهار شفت بنتك قلت هي لي غاتصلاح للمهدي وهي لي غاتفهمو و تقدرو و تهز ليه همو وتوقف نعاه فالحارة و الحلوة المهدي خصو غير لي تفهمو و تعرف تتعامل معاه و ماايخصصرش ليها يديرها فوق عينيه 

خديجة:(ضارت عند بنتها)اش بانلك ابنتي 

سارة:(مرتبكة)اش غايبان لي اماما الهضرة لي قلت النهار لول هي لي غانقوليكم دابا لي درتوها نتوما انا معاكم و مستاخرة ربي هو اللول(بتردد)

سناء ناضت طافجة ماحملاتش هضرتهم عليه بحالا ناقصاه شي رجل و البنات كايبتاسمو لختهم و يشجعوها

لالة منانة:(عنقاتها)تبارك الله و صلى على النبي العقل و التباتة الله يكملك بعقلك ا بنتي(ناضت)اجي معايا اجي

ناضت تابعاها ماعارفاها فين غادة بيها وقفات فالباب د الصالة و منانة ضارت لعندها

لالة منانة:(شدات فيديها)بنتي الغزالة نتي عارفة معزتك عندي و نانبغي نخبي عليك والو مابغيتش نهضر حدا مك باش متأتريش بهضرتها قرارك هو المهم

بدات تعاود ليها على المهدي و المشكل لي عندو و عاودات ليها حتا على ولدها وكيفاش مات وسارة غير مخرجة عينيها تحطات فموقف خاايب من ديما مها ولا خواتاتها كاياهظو الرأي فبلاصتعا حيت هي كاتغلب عليها العاطفة دابا ماعرفاش ماتقول عينيها تغرغرو وهي كاتسمع ختا عنقاتها منانة

لالة منانة:(كاطبطب عليها)والله ابنتي غيرك ماتصلاح للمهدي نتي لي تخممي ليه و تراعي ليه(بتاسمات)بلاش ماتجاوبيني انا عارفاك قابلة غير نوصيك نتي جبدي معاه الهضرة وريه معدنك و غايبغيك و بيني ليه الرزانة ديالك و تصرفي بحكمة معاه و غاتعيشو مواتيين

سارة غير كاتبتاسم من فوق النفس قربات تبكي ماعرفات اش دير من واخد الجيهة العضرة دمنانة ريحاتها عرفاتو ارا ماشي متجاهلها غير هو داير هكك معا كلشي 

لالة منانة:(هبطات صوتها)غير نوصيك ابنتي هضرتنا تبقى بيناتنا غير حتا ديرو العقد بعدا صافي(حركات ليها راسها بايجاب)الله يرضي عليك

رجعو دخلو ومنانة غير كاضحك 

لالة منانة:وريتها غير شي لبيسات هههه

خديجة ضحكات ديك.الضحكة الصفرة و بالعا مامهنيهاش على بنتها ضارت كاتشةف فبنتها كي مزيرة و طمأناتها غير بعينيها

خديجة:(تيليفونها كايصوني)ايوا نخليوكم هاد الساعة

ناضو جملة تلاقاو معا الطتهر و المهدي فلباب توادعو دو زادو خلفة لدارهم غير وصلو بدات خديجة كادير ليها لونكيط

خديجة:(يالاه جلسات جراتها لعندها)فين داتك ديك الشارفة

سارة:وراتني غير شي حوايج

خديجة:(بتشكيك)امممم الله يجعلني نتيق

سارة:(طالعة لبيتها)وا صافي اماما 

منين مشاو جلسات منانة هي و المهظي كاتوصيه وتعاود و تشكر ليه سارة وصاتو يهضر معاها فاقرب وقت باش بمشيو يشريو خواتم الزواج 

طلع لبيتو كايحاول يخوي راسو من التشاش لي فيه صدرو مزير عليه وباغي يبقا بوووحدو يمشي لشي ثلث خالي يبقا يسمع غير السكات هز تيليفونو كتب ليها -السلام سارة كيوصلتو- و مسحها و خلا غير -السلام عليكم-

هزات تيليفونها كاتقلب فيه حتا طلع ليها المسج هو اللول جاوباتو 

سارة-وعليكم السلام-(و بقات كاتسنا)

المهدي(جاتو فشكل جاوباتو بالزربة وعاود كتب)-صافا-

سارة:خاصني نزعم خاااصني نزعم(كتبات)-الحمد لله ونتا-

المهدي(جاتو عجب تسولو)-الحمد لله-

تسنا مدة ختا طلغات ليه لڤي و غاود كتب-كنت غير باغي نقولك غدا فالعشية الى كنتي مسالية ندوز عليك نمشيو نشوفو لخواتم معا لعزيزة-

سارة(كاضور ديك لكلمة دلعزيزة فراسها)-اه ان شاء الله اغير نهضر معا بابا و نرد عليك-

المهدي-خودي راحتك-

لاحو تيليفوناتهم وحدة كاتنش على وجهها و واحد مزير بحالا واكل الزعبول(الفول كايتعطا غا لي ماعندو ضراس تف تف)

سارة:(هبطات بهدوء)بابا فين ماما بغيت نهضر معاكم

الطاهر:(تكعد)خديجة اجي كلسي(جر بنتو معنقها)ياك لاباس

سارة:(حشمات)و والو باس غ غير بغا ببغيت نمشي انا و المهدي و ج جداتو نتقضاو زعما ناخدو الخواتم

مروة:(مدات ليها لما كاطنز)هاكي غاتكوني سخفتي

الطاهر:بعدو ليا من بنتي(ضحك معاها)ماقلتي عيب يجي و تمشي معاكم مك ولا لالة منانة و سيرو

خديجة:(كلسات)را هضرات معايا منانة غايمشيو غدا فالعشية 

الطاهر:صافي الله ييسر

سارة بقات كاضور فعينيها حتا قالتليها مها غير سيري لبيتك حسن

طلعات وجلسات كاتأمل فالتيلي و بدات تفرنس و تتخايل المهدي كايلبس ليها الخاتم كتبات ليه-الى مناسبك تجي غدا فالعشية مور الغدا-

طلع ليها الڤي مدة عاد كتب-ان شاء الله-

حطات تيليفونها تالفة كاتشوف هنا و لهيه فاللخر تكات بلاصتها و غمضات عيتيها كاتتخايل راسها معاه و شادة فيه حتا كاتزير على عينيها كاضحك ضرباتها بخمرة حتا فاقت معا اذان المغرب رتاحت و ريحات راسها هبطات كاتحط معا مها اتاي فالطبلة كلات حتا شبعات ومها مستغربة ليها حيت مرتاحة هاد الساعة بقات جالسة كاتفرج هي وخواتاتها و خوها كايلعب حداهم 

خديجة:(كاطوي لحوايج)غدا منين تخرجو ماتبقايش غير مسهوتة هضري و قولي هادا عجبني هادا لاا ختاري شي حاجة مزيانة و قيسي و عاودي هااا صافي

سارة:يكون خير لبنات يالاه طلعو معايا نوريكم شي حاجة

مروة:(ساهية فالتلفازة)وريها لينا هنا

سارة:(كاتجرهم)وا صافي نوووضو 

طلعو معاها كايخبطو فالبيبان

بسمة:(هزات حاجبها)اش بيتي

سارة:(حلات لماريو)شوفو معايا اش نلبس

مروة تنفخات نليوحة على النموسية و بدات سارة تقيس و تحيد حتى استقرات عند كسوة كحلة معا فيست حمرة وااسعة

مروة:لكحل من اول لقاء اويلي

سارة:(كاطويها)انا اختي عجباتني 

بسمة: فرجليك لبسي ديك السبرديلة البيضة معا درة بيضة(نقزات كاتصفق)صااافي غاتجي فنننة

سارة:اففففف متوترة

مروة:لاواه مزمرة لاش غاتوتري لاااش عادي تلقاه هو مبررد مامسوقش كااع(لهلا يوريك مبرد كيداير)

سارة:يالاه نهبطو يكون بابا جا 

طفات ضو و سدات بابها و هبطات كاتعاون ماماها باش تتلاها على مايوصل وقت النعاس

سارة:(كاتفكر)انا شبعانة ديري غير دجاج معا بصلة و يدوزوه معا الخبز ورا اتاي باقي لي ماشبعش ياكل لخبز و زيت

خديجة:(مسحات يديها)هي لادرتيه نتي انا عيااانة

سارة:(حنات كاتجبد البصلة و فلفلة و ماطيشة)سيري ترتاحي سيري

بدات كاتوجد فالعشا و شبعات بكا بالبصلة ومرة مرة كاتبتاسم 🙈🙈🙈🙈🙈

احلامها بريييئة و طموحاتها على قدها مابغاتو لا عندو لفلوس لا عندو طونوبيل نهار جاها رزقها تخطبات للمهدي وافقات بلا شروط الفم لي غايقول بغيت و مابغيتش بحرا كايخرج جوج كلمات عمرها هزات صوتها على باها ولا مها و حتا معا خواتاتها ديما كاتميل للهدوء و كاتفاهم غير بالعقل نهار تلاقاتها منانة فالحمام ماتنكرش عجباتها بزينها و فورمتها ولكن منين طلباتها و شافتها ماخصراتش ليها وكاتجاوبها غير بالعقل و غير "واخة اخالتي" "هي اللولة اخالتي" "ماشي مشكيل ا خالتي" تمناتها لحفيدها و مامشات حتا خطباتها ليه منين سمعات الهضرة عليه وشنو عندو ترددات ولكن خلاتها على الله وربي ماغايخيبهاش

كملات توجادها للعشا جات مروة كاتعاونها فغسيل لماعن هزو الخبز و الما و مشاو كايتعشاو انا هي داقت و طلعات فحالها لبيتها تنعس اولا تبدا سهرتها معا احلام اليقظة 😜😜

فاق بطلنا مخنزر كاينهج نفس الكابوس كايتعاود عندو سيمانة هادي السيناريو ديال موت باه كلو كتيتعاود قدامو ناض عنقو ضارو غسل وجهو لبس سورفيت كحلة و نزل لقا السكات خرج ديمارا و زاد للمقابر نص ساعة وهو جالس حدا قبر باه حتا ضربات فيه الشمس وقف كايطرطق عنقو و ودع الحارس و زاد للرياض 

#دخلات عندها ختها لقاتها منشورة على ناموسية و شعرها هابط على وجهها معنفجة هههه

بسمة:(كاتفيقها بشوية)سارة واا سارة نوضي ا حبيبة ل 11 ونص هادي(حيدات عليها لغطا)وا نوووضي

سارة:(كاتقلب)اممممم خليني 

بسمة:واااتي نووووضي(خبطاتها)

سارة:(ناضت مسوطية)تفووو اش درت لك.انا دابا

بسمة:(ناضت)ماترجعيش تنعسي هبطي فطري باش توجدي راسك بكري

سارة نضات للحمام عينيها منفوخين و حمريين و شعرها بايت محلول سرحاتو وغسلات وجهها و نزلات لقاتهم فطرو جلسات بوحدها كاتشرب غير قهوة 

خديجة:(جايا محزمة بفواطة)صباح الخير ا لالة لعروسة

سارة:صباح النور(كاتجمع الطبلة)كاين مايدار فكوزينة

خديجة:غسلي غير داكشي لغدا مردود

غسلات الماعن و جلسان هازا تيلي كاتقلب فيه

تحط لغدا نقبات منو عاود وبقات جالسة مجمعة معا خواتاتها 

خديجة:ايوااا فوقاش غايدوز عليك قالك

سارة:م ماعرت قلنا فالعشية مور لغدا

خديجة:وا عيطي ليه باش مايجيكش على غفلة عاود 

سارة:و واخا

انستحبات بهدوء لغرفتها بقات متناقضة غير معا راسها نعيط لو مانحيطش لو حتا دارت بناقص ناضت دوشات لحمها و بدلات عليها و لبسات كسوتها و جلسات كاتسنا نص ساعة... ساعة.. ساعة ونص.. حتا قفزات منين صونا تيلي لقاتو هو

سارة:(يديها تفالجو هزاتو بزز وحطاتو على ودنيها) ا االو

بعد مدة ديال السكات عاد وصلها صوت منانة

لالة منانة:االو سارة بنتي واجدة

سارة:(تنهدات)اه اه وااجدة

لالة منانة:مزيااان الله يرضي عليك هاحنا جايين

حطات تيلي و شدات على قلبها نهار على نهار كاتزيد تصدم فيه حيت ماجاوبهاش لبسات درتها بزربة و هزات صاكها صغيور وتيليفونها ودقات على بسمة ومروة 

بسمة:(كاتصفر)اووووو الطيطييز اختشي(باستها)جاي دابا

سارة:اه ااااه يالاه بسلامة الله يدوز هاد الخرجة بيخير

بسمة:اميين مايكون غير لخير ان شاء الله

هبطات مزروبة شافتها خديجة كحلات بالعما 

خديجة:اوييلي على غدايدي واش نتي عروسة ولا هجالة 

سارة:مااالي

خديجة:لاش لابسة لكحل

سارة:راغير الكسوة لي كحلة وفيها هادشي حمر ماشي مشكيل(كاضور)كيجيت

خديجة:فننة ابنتي الله يحجبك غير هو الكحل من نهار لول 

سارة:(سمعات الصونيط فالباب)ماعليش اماااما

مشات طايرا حلات لباب لقات منانة واقفة و سي المهدي واقف بعيد على لباب رجليها بردو فشلو تشللو حتا عنقاتها منانة وهي تلوح تقلها عليها

لالة منانة:(كاتبوس و تعاود)بنتي الغزااالة الله يحجبك

دخلات كاتسلم على خديجة و المهدي بقا فلباب 

سارة:(ماعرفات تدخل ولا تخرج و لا تسد لباب)د دخل مرحبا

المهدي:(كايشوف فيديها)كاين الواليد

سارة:(حادرة عينيها)لا بابا ماكاينش خدام

المهدي:ص صافي ماشي مشكيل 

بقات واقفة فلباب حشمات تدخل و تخليه حتا سالات منانة سلامها عاد خرجات ركبو فلوطو على انظارالجيران منانة كلسات لقدام حدا المهدي و سارة لور الصمت سيد الموقف غير منانة لي كادوي باش تنعتليه الطريق

لالة منانة:(كاتنيش)غاطلع لشارع لكبييير و تزيد نيييشان حتا لرومبوان و تهبط على الطريق جديدة عرفتيها(حرك ليها راسو)تما كاين فين تحط طاموبيل(ضارت عند سارة)بنتي لغزالة كيدايرا لاباس 

سارة:(كاتحس براسها فكوكب زحل غير وجود منانة ليمطمأنها)الحمد لله

لالة منانة:باباك لاباس عليه خدام مسكين ياك

سارة:(كاتلعب فكسوتها)اه الحمد لله

لالة منانة:ايوااا الحمد لله

كملو طريقهم و منانة مرة مرة تلوح كليمة حتا وصلو نزلات سارة و حلات لباب لمنانة و هي عاااجبها راسها فرحانة بمرت ولدها

لالة منانة:(شدات فيها)المرضية ديالي

زادو كايتمشاو و المهدي مساير جداتو كاتقوليه غير قربنا قربنا وهي ملاهية معا سارة كاتعاود ليها وسارة غير كاتساوي معاها وبالها معا المهدي لي غادي سابقهم حاط يديه فجيابو شي بالو معا شي حتا وصلو

لالة منانة:(دخلات سابقاهم للمحل)السلام عليكم 

الدهايبي:وعليكم السلام ا لالة مرحبا اش حب الخاطر

لالة منانة:(كاتشير ليهم يدخلو) زيدو زيدو بغينا نشوفو موديلات د خواتم االزواج 

الدهايبي:بغيتو خواتم المارياج

لالة منانة:اييه ايه جبد لي عندك

الدهايبي:(كايوريها من الزاجة)هاهوما الالة شوفي لي بغيتي و نجبدو لك

لالة منانة:(كاتسوط)جبد الموديلات كاملين خلي العرسان يشوفو 

الدهايبي:هههه على ماكايشوفوهمش من هنا

دخلو شي ناس للمحل وهضر المهدي

المهدي:(جر جداتو)ماعجبوناش ا شريف الله يعاون

لالة منانة:(خرجات كاتنفخ)وييل الشيييطان على شووهة هاهوا كايجري على الكليان دابا

المهدي:(كايمسح على شعرو)زيدي نمشيو عند واحد اخر 

زادت منانة و المهدي شاد فيها و سارة موراهم كاتقول علاش مادايرينش ليا اعتبار علاش هو كايعملني بحال النكرة بقات غادا بخطوات صغار و عينيها تحجرو فيهم الدموع

لالة منانة:(كاتوريهم)ها هاادا اجيو نشوفو عندو 

دخلو عاوتاني بدات يتعزلو ومنانة باغا شي حاجة تقيلة لعروستها فلخر خرجو عاود و المهدي باقي صابر 

دخلو للمحل لي بعدو وكان عصري شوية

الدهايبي:مرحبا لالة شحب الخاطر

لالة منانة:ترحب بيك الجنة بغينا نشوفو موديلات خواتم الميرياج

الدهايبي بدا يجبد و يحط و منانة كاتقول للمهدي شفتي النااس 

الدهايبي:(شاف فسارة لي واقفة بعيدة شوية)مرحبا ا زوينة خصك شي حاجة

المهدي كايقول واش هادا هضر معا سارة ولا كايشوف فجيهة اخرا

لالة منانة:(بغات تعتق الموقف)اااا شرييف سبحان الله

البنت معايا معااايا

المهدي:(جر سارة من يدها جابها حداه مخنزر)علاش واقفة بعيدة غاناكلوك

سارة تبكمات و دوك جوج دمعات لي كانت حابسة هبطو فصمت 

لالة منانة:(هزات خاتم كاتشوفو)سارة شوفي هادا 

الذهايبي:انا نعطيك موديلات يجيو معا الانسة(جبد بلاطو اخر فيه خواتم سامبل و زوينين)هانتي الالة

سارة:(هزات عينيها كاتشوف بان ليها واحد زويين بحجرة كبيرة)هادا زوين

المهدي:(جمع وطوا)صافي غاناخدو هادا

لالة منانة:جمع لينا هادا عندك ديال الرجال

الذهايبي:عندي ا لالة

كملو معا الذهايبي وسارة حانية راسها ماعاوداتش بعدات على المهدي

لالة منانة:(هازا البوشيط)بصحتكم ا ولادي

سارة:(حابسة البكية و صوتها كايتسمع مرعود)الله يعطيك الصحة

زادو راجعين فحالهم طلعو للوطو يالاه غايديماري كاتسمع كرش سارة كادير غرررر كغغغغغغ وهي غاتموت بالحشمة 

المهدي:(طل عليها من المراية)فيك الجوع

سارة:(كون لقات الارض تشق وتبلعها)لا م ماجيعاناش

المهدي:(ضار عند منانة)يالاه ا لعزيزة نهبطو ناكلو شي حاجة

لالة منانة:(شادة رجليها)غير سيرو نتوما انا عييت بالمشي

سارة:(توترات) ص صافي ب بلاش انا ماعنديش مشكل

خنزر فيها ورجع ديمارا وزاد مسافة و حبس

المهدي:(حل لباب)لعزيزة انا غانزل ناخد لسارة شي حاجة تبغي حتا نتي

لالة منانة:لا لا غير شوفها اش بغات هي

المهدي:(شاف فيها)شنو تبغي ا سارة

سارة:(حشمها)لي كان

المهدي:(حل ليها لباب)نزلي و يالاه خودي نتي لي بغيتي

نزلو بجوج غاديين قراب لبعضهم وقفو عند مطعم دالاطمعة السريعة خدات شاورما و عصير و رجعات هي وياه 

وصلها للحي ديالهم نزل حل ليها لباب 

سارة سلمات على منانة لي عطاتها الخواتم

لالة منانة:(مدات ليها الساشي)هاكي هادو خبيهم عندك 

سارة:(شداتهم وباست ليها يدها)تبقاي على خير ا ل لعزيزة

لالة منانة:(عنقاتها)الله يرضي عليك 

سارة:(ضارت عند المهدي)ش شكرا على الماكلة 

المهدي:(مسح وجهو)العفو مع السلامة

دورات الساروت فلباب و لقات بسمة قدامها خلعاتها

بسمة:(جاراها)على السلامة تعطلتووو وريني اش خديتو

سارة:(رمات الساشي فوق الطبلة)راهوما شوفوهم نتي وماما انا عيانة غانمشي نرتاح

خديجة:(جات كاطبطب عليها)سيري ا بنتي 

طلعات لبيتها وكاع الدموع لي كانت جامعا طلقتهم بدات كاتنخصص و تشهق بكات حتا بردات على راسها ناضت غسلات وجهها و بدلات عليها لبسات بيجامة سخونة و تكات بلاصتها 

وصل هو وجداتو هبطها معاونها دخلو للصالة تلقات ليهم سناء

سناء:ايوا خديتو شي حااجة

لالة منانة:تقضينا الخواتم

سناء:(مدات يديها)وريني نشوف

لالة منانة:(تنهدات)بقاااو عند العروسة

سناء:وييلي غلى عند العرووووسة حنا ماغانشوفوهم ماغانعطيو رأينا كي درتي ليها

لالة منانة:(توگضات ليها)الخواااتم ا سناااا كايبقاو عند لعروووسة نهار ضريب الصداق ااارا ماتشوفي فييهم

طلع المهدي معصب مافيه لي يسمع نكيرهم دوش و بدل عليه جلس فناموسيتو كايقلب فتيليفونو لاحو بملل وهز نضاضرو لبسهم كايقرا كتاب ماحس حتا داتو عينو 

فاقت على وجيع فكرشها ناضت جبدات اولويز من المجر و دخلات للحمام لقات نقيطات ديال الدم قادات مسائلها و هبطات عندهم لقات مها كاتوجد لعشا و خواتاتها كايعاونو

سارة:(مغوبشة)مروة اجي عطيني كينتك

مروة:(ضارت عندها كاتمسح يديها)جاتك

سارة:اممم سربي را بدا يشدني لوجع 

دازت المدة لي كانو دايرينها على نهار العقد و كلها فالتوجاد و التخمال و سارة عقلها مخربق و الهرمونات زادوها

سارة:(دقات و حلات الباب)بسمة يالاه معايا نتصخرو

بسمة:(لاخت تيلي من يديها قافزة)ه هاا هانا زيدي

سارة:(بتشكيك)هانا كانتسناك لتحت

خرجو لبنات دازو عند الحلوانية جابو من عندها بلاطويات مشكلين دخلو للدار لي كاتنغل بالهضرة خوالات سارة بجوج و بناتهم كلهم مجموعين عندهم 

بهيجة خالتها:(كاتضحك و ترشق)سكتيييي يشويييني فييك(طلات فالبنات لي عاد جاو)فين كنتو

بسمة:(جلسات مهدودة)جبنا غير شي صخرة

حياة خالتها الثاني:كون ديتو معاكم البنات قنطو

سمية بنتها:واييه 

مروة:(جايا كاتمسح يديها)را لباب الى قنطو يخرجو يضورو عارفين الطريق 

بهيجة:ويلي ا بنت ختي مالك كاتقوليها بحالا كاتجري علينا

مروة:حاشا ولكن راعيو شوية الشغل هاد الايام مضوبل و غدا الفرح ونتوما عاد خصكم تخرجو

الطاهر:(خارج حادر عينيه)مرحبا بيكم مروة كلمي ليا مك

خديجة:(جايا كاتزرب)هانا اش خصك ماتعطلنيش مشغولة

الطاهر:(كايهضر بشوية)علاش عيطتي ليهم 

خديجة:بلاش ماتبدا تخطب عليا عاوتاني خواتاتي هادو جاو دابا ماغانجريش عليهم مايحضروش لفرح بنت ختهم

الطاهر:(حط يدو على راسو)مرحبا بيهم على الراس والعين ولكن حشومة ضريب الصداق كايبقا بين المقربين

خديجة:(حطات صبعها على حنكها)انا عارضاهم لفرح بنتي و بغيت حبابي يكونو حدااايا

الطاهر:(زاد زاعف)ضبري راسك 

سارة بقات جالسة معاهم حتا صدعوها و طلعات و هما كايتغامزو عليها حلات باب بيتها لقات فيه شوانط خالاتها ماحملاتش راسها كحزاتهم لواحد القنت وجلسات حتا دخلات عندها مها

خديجة:ويلي ويييلي دارو ليا الشوووهة معا خواتاتي(نغزاتها)اري ليا الخواتم نخبيهم عندي

سارة:(كاتنفخ)افففف اماما(جبداتهم)هاكي هاهما(سمعات الدرديك فالسطح)الله يعطيك الستر لاما هضري معاهم قوليهم يجلسو الارض شوية باغا نرتاح بحالي

خديجة ميقاتها وخرجات يالاه حطات راسها على لمخدة دخلات بسمة كاتضرب فالارض معصبة 

بسمة:(مغبنة)تفووو تفو تفووو يخ على عائلة كيدايرا ماعندهم نفس يالطيييف

سارة:(غمضات عينيعا وحلاتهم مكرهة)ماالكي حتا نتي

بسمة:قالتك(كاتعيبها)مالقاتش بلاصة فالصالة غاتنعس فبيتي حيت عندها الترابي واش اعيباد الله 4 سنين ترااابي البوااال لاخر غاينعس ليا فوق ناموسيتي يكسر ليا بيتي بريحة الخرا تفووووو

سارة:(ناضت)مروة ماقالت والو

بسمة:حيحات عليهم مايقرب ليها حد لناموسيتها وانا تجيي فياااا الدقة يخخخ عائلة ديال الزمر 

سارة:حشومة ماتقوليش هكك غير هاد ايام الصداق و يمشيو 

بسمة:الله يجيبك على خير ابنتي ناويين يجلسو حتااا يروحوك لدارك 

سارة:(نفخات)اففف ايوا صبري ماعندك ماديري

بسمة:(جات تكات حداها)كحزي لهيه نعس حداك

سارة:بسمة بعدي مني باغا نرتاح

بسمة:(حطات يدها على عينها)نعسي و سكتي 

داز داك النهار فالشغال و التوجاد ماسالاو حتا ل 1 دليل لاغدليه فالصباح فاقو على صوت حياة و ولدها

حياة:اويييلي على غدااايدي منيين نتا فيك البولة نوووضني ديك السااعات البوال لاخر

بهيجة:(جايا كاتحزم حروزها)مالكي صابحة كاتغوتي دري باقي صغير ماكايعرف والو(كاتجرو مخبياه وراها)بعدي منو

ناض كلشي كايستفسر على اش واقع تجمعو على بيت بسمة

بسمة:(قربات تسخف)ويلي بال ليا فنااموسيتي ناااري مي شدوني عليه

كوثر بنت حياة التانية:اش غاديري ليه كاع باقي صغير اش كايعرف 

بسمة:(بغات تهضر و جراتها مها دخلاتها للبيت)مااااماااااا خرجي عليااا الزممر دولاد ختتك(باغا تبكي)شمي الريحة شمي ماااما اوييلي بال ليا فبلاصتي 

خديجة:(كاتسكتها)صااافي سكتي داابا نصبن بيك الفراااش حشوومة غير هاد الايام و غايمشيو بحالهم نصبرو عليهم

بسمة:الااالة صبري عليهم نتي وبيتيهم فبيييتك يبعدوو ليا من بيتي اناااااا

خديجة:صافي شششش سكتي سكتي

خرجات بحالها وخلات لاخرا كاتنفس الشراجم وكاتبكي دوزو داك الصباح مقندشين و بسمة و سارة فالبيت ماخرجوش غير مروة لي كاتعاون طلعو كايطيبو فالسطح الدجاج باش ماتبقاش الريحة فالدار 

خديجة:(كاتحط ليها العطرية)ايوااا الله يعاون الى بغيت يشي حاجة عيطي للبنات يجيبوها ليك(شيرات فبنت بهيجة لي نهار وماطال وهي فالسطح)هاهي يسرى حداك تتسخر ليك 

يسرى:(صوتها بحال الزوفري)كوني هانية اخالشتي

عند المهدي 

فاقو معطلين على غير العادة وجلسو كايفطو مجموعين

سناء:الياس حط داك التيليفون حشووومة

الياس:(حطو)هاهوا(ضرب لخوه على كتفو)مولاي السلطان غوفلتي(كايلعب ليه فلحيتو)

المهدي:(نتر ليه يدو)شغلك خليها عاجباني

سناء:بالصح اولدي وليتي كاتخلع نقص منها شوية بحرا تبان 

المهدي:(مسح يدو وناض)واااخا(طلع لبيتو صونا ليه تيلي)الوو...سي اسماعيل متفرغ هاد الساعة....الله يكبر بيك...انا غاندوز عندك 

قطع و بدل عليه رش ريحتو هز سوارتو و شي وراق وركب و زاد حبس عند مكتب العدلية تفاهم معا السيد لي بارك ليه بحكم معرفة قديمة عطاه الوقت لي غايدوز عليه فيه و ودعو 

7 دلعشية خديجة معا خواتاتها وحدة كاتكحل وحدة كاتحزم وهي غير كاتشوف بعينيها

اما لبنات را هارفين على مروة و بسمة فمكياجهم 

سمية:(كاتعكر)هاد العريس عندو شي خوه

بسمة:(طلعات فيها حاجبها)عندو ياكما ناوية طيريه

سمية:غير سولنا و صافي 

مروة:(بالغوات)ياالاااه الكلبة لي سالات فيكم تخرج 

كوتر:(زدحات الباليط معا الارض)مروة عيييت صاااابرااا ليك نهار كامل و نتي تمعني وتعايري الى كنتي باااغا دااابزي قوووليها

مروة:اااه باااغا ندااابز اختي عندك شي مشكيل

بسمة:(شافتها غاتشبك)البنااات نعلوووو الشيطان واش دابا حنااا فهادشي

سارة:عافاكم غير بالشوية تفاهمو هانتوما لي سالات تجي تكلس باش نقادو حتا حنا

كوتر:(هزات قفطانعا وزادت)انا غادا نلبس فبيت خالتي

تبعاتها سمية بقات يسرى شادة تيليفونها

مروة:(كاتدفعها)تبعيييهم حتا نتي(خرجاتها و زدحات لباب)تفووو على گنس(جبدات البابيليز)ميكروبات ماخلاوني حتا نديها فراسي

سارة:(كاتجبد حوايجهم)كون كنتو تعرفو تفاهمو غير بالعقل ونتوما كلشي عندكم بالصداع 

مروة:(ضارت فيها)لبسييي وسكتييي نتي

قادو لبنات راسهم وهاد لمرة بلا صداع لبسات سارة قفطان فالصومو غير كراتو معا درة بيضة كاتلمع و وجهها قادتو ليها بسمة مكياج هااادئ وركزات ليها على عينيها طلعاتهم بماسكارا تقلاااتهم و خط عريض ديال الايلاينر اما مروة لبسات قفطان خفييف فالزرق غامق وماكياج تقيل معا عكر بوردوو و شعرها جمعاتو و بسمة حتا هي تقادات و ماكات لراسها خلات شعرها مطلوق على راحتو 

بسمة:(هازا تيليفونها)لبنات سربيو قربو يجيو الناس

مروة:(كاترش ريحة)هاحنا كانسربيو(ضارت بالعرض البطيئ)شعرفك نتي

سارة:(طيرات ليها تيلي من يديها)بنت الحرااام شادا جموووع معا الياس

بسمة:اري تيليفووون لهنااااا والله حتا نقولها لمااما

مروة:(خدات تيلي من عند سارة)انااا لي غانقووولها لماما لاما گلستي للارض(كاتطلع ل conversation)هاهااااي هاي على البرغوووتة حتا هي ولااات تجمع ليا مع الدرااااري

بسمة:(گلسات غاتطرطق)وااا صافي ا لبنااات هضرة عاادية و صافي

مروة:(كاتقرا)شكرا يخليك ليلي حتا هي هضرة عاااادي(كاتصغر عينيها)وشوووفيلك لعناااااب لاخر

بسمة:(خدات من عندها تيلي)وارا غير كانتعارفو

مروة:(هزات صبعها فوجهها)والله ونلقاااك باقا تدوي معااااه حتا نوصلها لبابا

كملو لبنات توجادهم انا خالاتهم و ولادهم تصااافو فالصالون كايتسناااو هاد سي العريس يدخل و خديجة طالعة هابطة عند الطيابة حتا صونا تيلي ديال بسمة

بسمة:(مفافيا و عينين خواتاتها عليها)ا ااا الو ويي اوووكي صافي(فرنسات)هههه

مروة:(خطفات ليها تيلي لقات نمرة بلا سمية)شكووون هادا الياااس ياك وصلنااا حتا للنماااري ا بسمة

بسمة:لا لااا لا ماشي هو هادي غير ل لبنى(سمعو صونيط)ها هوما جاااو 

دخلات منانة مقدماهم و موراها ولدها ومرتو و بنتهم لكبيرة صفاء و عاد سناء و بنتها و المهدي موراهم 

سناء:(تصدمات بالمنظر)وييل الشيييطان شكون هادو

ناضو كايتسااالمو و بهيجة و بناتها يعنقووو و يعاودو اما المهدي بقا فباب الصالة كايسلم غير بيديه و وقف حداه الطاهر

الطاهر:مرحبا بيكم (شاف المهدي محنسر جرو للصالة تانية هو و عمو)زيد اولدي زيد تفضل جلس المهدي غير كايضور فيعينيه تخنق و ولا كايقطر بالعرق 

تجمعو كايتعارفو وصفاء كاتوشوش لسكينة

صفاء:(كاتغرزز سنانها)شكون فيهم العروسة

سكينة:(عايفاهم)حتا وحدة لعروسة و خواتاتها كايمتلو علينا دور بنات دارهم الحشوميات(هزات عينيها فمروة داخلة)هاوحدة

دارت مروة كاتسلم وصلات لصفاء مدات ليها غير يدها هي و سكينة

سكينة:(كاتلوك مسكة)هاهي جات هي مولات الصومو

جاو البنات كايسلمو و سارة كاتسلم حشمانة وصلات لعند صفاء و هي تنوض سلمات عليها و عنقاتها كاضحك فوجهها ضحكة صفرا 

جلسات سارة حدا عگوزتها كاتجاوب غير بالعبار و النميمة كاضور و هضرة العيالات معروفة 

سمعو الصونيط ناضت بسمة كاطير حلات لباب لقاتو الياس معا جوج ديال الناس واحد بالجلابة و واحد لابس عادي هازين شكاراتهم 

بسمة:(عينيها فالياس)زيدو مرحبا

طلعات قدامهم حشمانة زعما و دخلاتهم عند باها والمهدي 

رجعات تجلس و مروة غاتاكلها بعينيها تحط اتاي و الحلوة و تهزات الطبلة حتا جا الطاهر كايعيط لبنتو 

الطاهر:اجي ا سارة الله يرضي عليك

ناضت و تبعاتها مها و منانة جلسو فالصالة ديال الرجال شوية تزادت عليهم حتا سناء ومروة و بسمة واقفين فالباب

گلسو سارة حدا المهدي و فجنبها باها و هو فجنبو عمو 

العدول:بنتي لاباس عليك 

سارة:(بشوية)الحمد لله 

العدول:ارو ليا لاكارط ديالكم الله يرضي عليكم

مد ليه المهدي لاكارط ديالو جبدها من جيبو و خديجة عطاتو ديال بنتها كنش فكتابو شي تخربيق و بدا فهضرتو المعتادة 

العدول:نبداو من عند البنية(بمزح)اليمين هو اللول ههههه(حنحن)احم بنتي سارة بنت الطاهر بن الهاشمي العلالي قابلة تزوجي بسي المهدي ولد عبد العالي الغزواني على سنة الله ورسوله ولي حط فالصداق 15000 درهم 

قابلة؟قابلة؟تعاود صدى الكلمات ق

السكااات سارة كاتسمع صوت دقات قلبها و زفيرها لسانها تعقد هزو عينيهم كايتسناوها تجاوب وهي تزير فيها النفس قربات ترض كاع لي كلات كاع اللحظات لي شافت فيهم المهدي جاو قدمها حتا لليوم جبهتها بانو عليها حبيبات العرق و عينيها ضببات فيهم الرؤية يديها بداو كايترعدو و ناضت كاتجري وكاتنهج كاع الاعين تبعووها ولي كانو فالصالة كلهم قفزو ماعرفو اش واقع 

تبعوها خواتاتها و البقية بقاو كايحاولو يستوعبو اش واقع حتا تكلمات مها

خديجة:(باحراج)س سمحووولينا انا غانمشي نشوفها

لالة منانة:(كاطمأنهم)كاتوقع كاتوقع للعرايس قبل عقد القران 

ناضت مها تابعاها و المهدي ماحملش راسو بقا غير كايسوط و كايحل فصدايف قاميجتو ديجا معصب و زااد 

سارة:(كاتنخصص)ماعرفتش خفت بزااااف صافي مابقييتش باااغا ماااابغيييتوووش

بسمة:(معنقاها)نعلي شيطان ا سارة نتي مولات العقل را غير الضغط لي كايخليك تقولي هاكا 

مروة:(عطاتها تشرب و دفعات بسمة)الله يعطييك الذل ا لحمااارة لهاد الدرجة سخات عليك ختك(شدات لسارة فيدها)شوفي الى مابغيتيش باقي مادرنا فالطاجين مايتحرق ندخل نفرتك كلشي

خديجة:(دخلات شاعلة وصرفقاتها)سكتي سكتي مااااتزيدي حتاااا كلمة خرجو خليوني معاها 

مشاو لبنات طمأنوهم و بقات خديجة معا بنتها كاتبرد عليها

خديجة:كاتوقع ابنتي نتي غير الدهشة لي دارت لك هاكا(شدات فيديها)هادي سنة الحياة حتا نتي غاتزوجي وديري دارك و وليداتك وتبني عش لراسك و الولد ماشفنا منو مايتعاب الله يعمرها دار لا هو لا اهلو(عنقاتها)يالاه ابنتي باراكة من لبكا نمشيو عند ناس خليناهم مفزوعين 

سارة:(ابتاسمات ليها بزز و هضرات بصوت جااف)وااخا اماما 

خرجات معا مها من الكوزينة هزات عينيها لقات خوالاتها كايبرققو فعينيهم و يتغامزو بيناتهم دخلات جاراها مها و كلساتها 

لالة منانة:شوية ابنتي لاباس عليك ا لحبيبة 

سارةالحمد لله 

العدول:احم بنتي سارة الى كنتي قابلة على هاد الزواج سيني ليا هنا بلاش مانتعطلو(مد ليها الكناش و ستيلو)

سارة سنات و هزات عينيها فالمهدي لقاتو ساهي ومخنزر

العدول:(شد من عندها الستيلو)السي المهدي بن عبد العالي الغزواني قابل تزوج بالانسة سارة على سنة الله ورسوله

المهدي:(هضر بزز)فين نسني

مد ليه الكناش بلا مايهضر سنا و رض ليه الستيلو 

العدول:الله يجعل كلشي مبارك و مسعود 

طلقاتها خديجة بتزغرييييتة وحدة و تبعاتها منانة واخا مافيها جهد والمهدي سد عينيه معصب حتا ردات ليه البال سارة و نغزات مها تسكت وقفو العرسان يركبو لبعضهم لخواتم جابو بلاطو مدهب فيه التمر والحليب مدات سارة يدها للمهدي لبسو ليها و عينيه على يديها حتا هي نفس الشيء مدات ليها مروة التمر تعطيها لو هزاتها كاترعد خشات ليه النص و جرها كاملة كلاها شرباتو لحليب ونفس الشيء معاها غير هي خلات النص فالتمرة طارت بيه بسمة كلاتو دارت لفال لراسها 

تجمعو العيالات على العشا وغير ساكتين كلشي مقروص من تصرف سارة وغير كايوشوشو بيناتهم 

كلاو و شربو و كايتسمع غير صوت المضيغ و تقرقيب الكيسان حتا ناضو العدول غاديين بحالهم تجمعو الطوابل و لي عندها شي ولد شداتو فحجرها كايكمع بالنعاس حتا ناضو عاود تفرقو و التهاني كايتسمعو للعروس والعريس 

واقفة كاتودع منانة حتا هزات عينيها نيشان فعينيه مدات يدها كاتحييه حتا نطق

المهدي:(متمر)تصبحي على خير 

انطلقو كل واحد فطونوبيلتو خلاو موراهم غير الدخان 

خديجة:(لمروة)جيبي لفراش لخالاتك و الهياضر باش يفرشو فالارض

فرشو فالارض كل وحدة فين تزاوطات معا ولادها و البنات سدو عليهم فبيت سارة كايمسحو المكياج

بسمة:(مجبدة عينيها)صافي ماديريش فبالك حتا حد ماتسوق 

سارة:ماشفتيش مو كانت غاتاكلني بعينيها

مروة:(ناضت من بلاصتها)المكمممشة لاخرا غير ديال التريااااش تفوووو لاهي لا لي جاو معاها

بسمة:(شافت فسارة)نتي دابا خصك ترتاحي هاد السيمانة مابقاش بزاف باش يطيح عليك السر ا لهبيلة

سارة:(ترونات)ماتفكرينيش سمعتي اش قالو نهار الاحد جاي الليلة ديال لعيالات

بسمة:(دلات شنوفتها)زربو علينا هاد الشعب

مروة:(كاتحسب)باقي تسعيام ماتعمريش راسك من دابا 

بسمة:هاد ياجوج وماجوج لي عندنا غايبقاو هنا

مروة:سمعت حتا عمتي غاتجي 

بسمة:لا كملاااااات 

سارة:(جمعات شعرها)نوضو ننعسو ا لبنات عييت

ليل كامل و هي تتقلب فينما تغمض عينيها يجيو قبالتها عينين المهدي و تخنزيرتو 

صبح الصباح على منانة و هي فالسوق كاتختار و تتعزل معا مرت ولدها البيجامات و توابات د الجلالب 

سناء:(منفخة)زوينين كترنا واقيلة تلاتة دالبجامات ماشي بزاف

لالة منانة:بااااقي مادينا والو زيدي

كملو تقضيتهم و خلاو البقية حتا تكون مغاهم العروسة باش تختار رجعو للدار هازين السيكان ديال و تلاقاتهم سكينة عند لباب كاتبقشش فضولية 

دازو دوك الايام غير فالتوجاد ومرة مرة سارة كاتخرج معاهم ياخدو ليها العبار ولا تتعزل اش خاصها ماخلاو ماخداو حتا من الملابس الداخلية و شوميز خداوهم ليها😳😳😳

ليلة الفرح العيالات معاونين كايخملو و يلمطو طلامط جدااااد كلشي عندهم بليل 

مليكة عمة سارة:درتو معا النقااشة

خديجة:اييييه درت معاها غذا ورا العصر بحرا تجيني معا الوقت 

مليكة:مزياااان 

كالسين لبنات مجمعين معا بنت عمتهم لي صغر من مروة بعام مفاهمين معاها اما حتا لاخرات شادين ريزو فالسطح 

اميمة:لبنات نخرجو 

مروة:ماكاينش لخروج غاتعتبي برا الدار تخرج لك وحدة من دوك السلكوطات تلصق فيك.سيمانة و هوما فارعين لينا راسنا نخرجو معاهم

اميمة:(جرات تيلي لبسمة)مالكي نتيا ماعبرتينا ماديتيها فينا ماشي من عوايدك

بسمة:غير لي ماقا مايدار تبان ليه فتيليفوني اري لخرا لهنا

مروة:(كاطوي بلاصتها)غييير خليها هاديك حتا نسالي ليها را بداو رجليها كايخرجو من الشواري

بسمة:(حنات على تيليفونها)مالي باقا صغيرة كل واحد يديها فسوق مخو بقاو حاضييني انا

مروة:را غانووض لك ا بسمة كاتجبديني

سارة:هنيونا صرعتو ليا مخي(قادات بلاصتها)تكعدو تركدو لي غاتنعس معايا تفرش فالارض و تسقر

اميمة:حنا ناويين نقصرو وهاد باكورة منونخة خصها غير فوقاش تخمد 

غمضات عينيها و صوت البنات مونسا بيه ونعسات احسن نعسة ليها من ايام

ناض على الصدااع و الهراج لتحت هبط تصدم بالمنظر لي شاف الصيكان ملاوحين و الصالة عامرا خت منانة الصغيرة سعاد و جوج بناتها زيد عليهم مرت عمو و بناتها بربعة صفاء و ياسمين و بثينة و رجاء الصغيرة 

جر سكينة لي كانت دايزا هازا تيليفونها

المهدي:(شادها من يدها)اش كايديرو هادو هنااااا

سكينة:(عينيها فتيلي)عيطاتليهم لعزيزة(كاتمسح ليه على كتافو باستفزاز)يحضرو ليك عرسك اخويا لعزيز

المهدي دفعها و داز فيهم ماعبرهمش والا هضر معاهم

زكية:مال هادا نسا على السلام

صفاء:(نغزاتها)ماما حشومة(ناضت تابعاه)المهدي كي صبحتي

المهدي:(ضار عندها ماكايشوفش فعينيها)ماكاتعرفوش تهضرو بالشوية

صفاء: ا اه ااهههههه سمحلينا و صافي فيقناك بصداعنا واقيلة

ماعاودش هضر معاها حدو خرج لبرا جلس على كرسي حتا جا عندو الياس

الياس:(وقف قدامو)امالك صابح مخيخ

المهدي:طلع ليا هاد البعر فراسي 

الياس:(جلس حداه)صبرتي صبرتي مابقا والو غاتدي مرتك وغاتفرتك الجقلة وتكالما فدارك 

المهدي:(كايحك عينيه)تما فاش بقات 

الياس:(ناض هربان)العفووو منك يا خوووويا الله يصبرها معاك

بقا جالس مدة حتا توكض دخل للكوزينة طلب قهوة شربها وخرج بحالو باغي يبقا بوحدو

سارة فاقت كاتقطر بالعرق بدا كايسخن الحال والزمت عندها فالبيت جات تحط رجليها مالقات فين البنات بتلاتة منشورين فالارض كايخلعو كل وحدة معبجة فجيه ناضت على طرف صباعها كاتسمع تقرقيب برا حلات الباب لقات سطولة د الحمام فباب بيتها وخديحة واقفة عليها بحال قباض الروح 

خديجة:صباح الخير فيقي دوك المعفونات لي لداااخل و جمعو حوايجكم تمشيو للحمام

سارة:(كاتكسل)يالاه دوشت اماما اش غاندير فالحمام والله حتا نقية 

خديجة:(بزعاف)غاتمشي للحمام نتي و بنات خوالاتك كيفما قلتلك ماتطلعيش ليا القردة على الصباح ا سارة 

دخلات كاتفيقهم وحدة بوحدة بالشوية حتا عصبوها و هي تقندش

اميمة:(ناضت للطواليط كاتحزق)صباح الخير 

مروة:(سمعات حزيقها وناضت مقلشة ودنيها)وانا كانقوووول شكون الخانزة لي كوخااااتنا بليل واكلة التقاااشر يالطيف(شافت فبسمة كاتفوه)سدي فمك اعععععع خانز 

بسمة:(زادت حلاتو)حسن من ديالك 

بداو بالنگير و الدباز على الصباح سكتاتهم سارة بزز

سارة:(كاتخشي الحوايج فالساك)نوضو غانمشيو للحمام لبنات كايتسناونا

مروة:(ببرود)ماغانمشيش معاهم اختي

سارة:(دخلات كاتجمع مسائلها)قوليها لخديجة وشوفي لاما دارتلك الشوهة

اميمة:(خارجة)نمشييي نجمع حوايجي 

خرجو جملة ستة دلبنات هازين سطولاتهم و صيكانهم و خديجة كاتوصي

خديجة:غسلو مزيان را وصيت عيشة و الزمورية مخليين ليكم بلاصة(غمزات اميمة)عنداك تنساي داكشي لي قلتلك 

اميمة:(فرنسات)كوني هانية ا طاطا 

داخلين تلقاوهم الطيابات بالصلاة و السلام حيدو حوايجهم و دخلو كايكركرو معا بنت عمتهم خالقينها شدو القنت و بسمة كاتعمر السطولة و بنات خوالاتها ضاربين الطم 

سمية:(كاتدهن الصابون البلدي)الله على حمام غزاال

ناضو لبنات يسخنو فالبرمة كايقشبو على يسرى لي كاتحك لواحد المرا

يسرى:(كاتفرنس ليها)نعمر لك السطولة اخالتي بقات كاتحك ليها وتقول ماحكيت حتا ضبرات ليها جنابها

شوفلك هاد المعوقة باغا ضبر على راسها حتا هي😂😂😂😂😂😂😂😂😂

يتبع...