...الحمد الله و الشكر لله !! كلمتين تيرددهم من الفرحة و السرور لقلبو ، اخوتو فرحو ليه و خديجة تتصلت بيهم فرحاتهم !! جلس فالكرسي تينتظرها يطلعووها و نفس الوقت يشوف وليداتوو
نوصير : ( صوتو هرب بتعب ) الله يحفظهم ليك ! انا نمشي راه نطيح
نبيل : ( شاف خديجة شاف ساعة لقاها علاين الفجر ) غير سيرو ! وديو خديجة ترتاح ، غدا الصباح رجعو انا مانتحركش من هنا
خديجة: ( سمعاتو ) غير خليني نبقى معاها
نبيل : ( بخجل منزل راسو ) لاختي غير ارتاحي و شوفي وليداتك ، سمحينا بزاف عذبناك الله يكرمك
خديجة: دنيا هانية اسماء اختي صغيرة ! حمد االله لي تفكت على الخير
...ودعوه وخرجوو من الباب و هو رجع واقف تينتظر و يمشي ويجي ، قلبو تيضرب بقوة من الفرحة ، جالس تيتخيل الشكل وليداتو لكن حتى الشكل ما استقر عليه ...خرجت عندو فرملية مبتسمة و قفت امامو
ف : انت مسية القباج نبيل ؟
نبيل : وي انا !
ف : تبعني تشوف الزيادة ديالك
....تبعها غادي و تيمسح وجهو من العرق لي تيعاني معاه من الاعصاب او الفرحة تيتصبب عرق، فالغرفة طبية خاصة بالاطفال من بعد ماعطاتو للبسة طبية و عقم يديه و لبوني على راسو ..اول خطوة خطى اسمع صوت بكاء صغير خلا قشعريرة فجسمو ، تاظهرو ليه فوق الطاولة نفس طبيب توليد تتفحصهم
دكتورة : ( بسماعات تتفحص دقات القلب و تتفحص كل انش فجسمهم ) سي القباج ها العزارة
نبيل جمد مكانو هو تيشوفهم بجسمهم الصغير و يداتهم تيتحركو و شنافتهم تحتية تترعد و يبكي واحد يسكت لاخر ، عويناتهم مغمضين وملامحهم منفوخين ..قرب بطئ و قلبو تيضرب تيضرب للدرجة دقات قلبو تخالط مع بكائهم ..نزل براسو و قبل رجيلاتهم
دكتورة: حمد الله ! تيتنفسو مزيان ،فقط وزن ناقص شوية ( اشارت بيبي اول تتقرا باندا بلاستيكة فمعصم ديالو ) هدا تيوزن جوج كيلو و تلتمية غرام هو لي لي تزاد اول
دكتورة : نعم توام متشابهين ( اشارت للثاني ) هدا تزاد موراه بخمس دقايق وزنو جوج كيلو و ميات غرام
نبيل : ( قرب ليه تيشوف فيه و يشوف فتوام اول ) مشاء الله تبارك الله ...
دكتورة : الله يسخر ! دبا يدوشو ليهم يرتاحو ! االامور هانية نعس على جنب الراحة
نبيل : ( عقلو قرب يطير بيهم جبد تلفون و صورهم ودار فيديو ) و اسماء الدكتورة ؟
دكتورة : شوية طلع شومبر ديالها ..حمد الله على سلامة
..شكرها بزاااف ؛خرج وخلا فلذات كبده ورائه و اخيرا حلمو تحقق مع زوجتة الصغيرة، حلم لي تعذب عليه لكن حمد الله فالاخير ، ومر بعدة نكاسات و عثرات الحياة حتى انه رجع من الموت .....بعد مدة اخبروه بالرقم الغرفة و اتجه للحسابات اخلص ليها الولادة و التكاليف و عمر اوارق لي يحتاجهم فالحالة مدنية و جبد تدويرة صحيح و اطلب اونفلوب و حطها فجيب تايعطيها الدكتورة معتبرها هدية...طالع ايطاج اول و تبحث على الغرفة تادق وادخل بانت ليه لابسة حوايجها و سيروم فيديها و ناعسة وجها شاحب و شفايفها بيوض ..قرب و قبلها فجبهتها تا فتحت عينبها
اسماء : ( بصوت مجروح من صراخ ) نبييييل
نبيل : ( عزت عليه و حس بآلامها ) عوينات نبيل ؟ على سلامتك و الله يسمح لينا من الوالدين
اسماء : ( تتحس براحة عجيية ) فيا نعاس ! انا راه ولدت جوج وليدات خاصك تحضيهم
نبيل : نعسي ماتفكريش ! فامان الله
اسماء : ( تتنعس و تهضر) ماشبعتش شوفات فيهم !
نبيل : نعسي صباح قرب يصبح ! ( قبل راسها )
..جر كرسي اجلس نفس الراحة لي تتحس بيها اسماء حس بيها هو ! يلاه جا يغمض هو يسمع اذان الفجر ، ناض داخل حمام تما توضى و خرج هو شال ديالها و سرحو صلى عليه و كلو تفائل و الشكر و حمد لله
...مع الصباح الباكر ، بعد مانامو على الفرحة عارمة ، استقيظو بكل فرح ، وجدات لها اللويزة و الملاوي و بيض بلدي مصلوق و شوربة تشيشة باعشاب ، و تتخدم لكل تفاني ..
الوازنة : ( جالسة فكرسي تتعمر تمر بالكركاع) اوا حمدتك ياربي وشكرتك ، الا بغات تجي الموت مرحبا ، نحلي وحيدي مع وليداتو
فطوش : بطول العمر ، واكولي ليا كي غادي نص عقل مع هاد الخلفة توام
الوازنة : ( هزت حواجبها بامتعان ) الصباارة والعقل مع الوقت يكبر ؟ لي صبرت لنبيل راها بالعقل ، عندك هو و الفاروق الحبيب مايصبر لهم احد
فطوش : اوا انا اش بغيت لها ؟ تكون المراة و كادة و الحارة ، ما يضحكوش عليها و مادار بيها
الوازنة : الله يهديك افطووش ! راها كبدتك و بنتك من ريحة المرحوم لي بقات ليك ، ( هزت صبعها بازعاج ) لله يرحم لك الوالدين خليها دوز نفاسها بخير ، ماتغوتي ماتنتثري ، راه نسيبك وخ قاصح معاها؟ مايبغي لي يبكيها ليه
فطوش : ( بنفخة ) الله يعاونهم الالة ، اولاد اليوم لا حْيا لا حشمة
الوازنة : يااا الالة الله يهديك ! كلها يعيش عمرو مع عصرو ...
فطوش : اوا اليوم يخرجوها ؟
الوازنة : مع تيسير الله ! ( تتجمع الفطور فطاسات ) اوا لبسي جلابتك
فطوش : (حطت صبعها على حنكها مهبطاه ) حشوومة ! فين نمشي بين اولادك
الوازنة : باغة ديري الحشمة لابنتك ؟ عريسات ولادي اخرين نسابهم من الطبيب هما يراريو بانتهم تا تكميلة السابع ..
فطوش : اوا هدا الله ! نجلس نخمل و نوجد لتلتيام
الوازنة : الخدامة راها جاية ! شكون يقدر بهاد الفيلا ؟ انا شرفت العريسات سي موحول و زاينة ولدها صعيب، خديجة الله يسمح لينا مننها ، كولشي ملحوق ابنتك تتسناك
...علاقة فطوش و الوازنة من صغر ! لي يتقال فظهر يتقال فالوجه ، فطوش من دقة الناس زمان ، ماشي اي الناس زمان ؟ هيا من الفئة لي تحشم و ماتسلمش و ضحك و حجابها على فمها هادشي الا ضحكت ، اغلب الوقت معبسة و مراقبة الحيوط و سقف لا يتسخ ...نزلت لبست جلابتها و هزت دمليج ذهب لي عندها دارتو فزيف ابيض و دارتو فجيب الفواطة و خرجو الصالون ينتظرو الكل يتجمع ....فسيارات كلشي اركب تامن دراري الصغار لي غيبو لهم مدرسة ، و تجهو لوبيطال ، فرحانين اسماء ولدت توأم ...
*****
فرملية : ( هازة توام واحد ) مدام ترضعيه ؟
اسماء : ( نزلت عينيها صدرها ) ااه !!
نبيل : ( تيلعب مع توام تاني لي ناعس ..تاهز راسو فيها ) اسماء رضعي ولدك !
...كلنا تتنسمعو هادي ولدات ! تنشوفو هادي تترضع ! لكن عمرنا فكرنا اننا نمرو بتفس التجربة ..حطاتو ليها بين يديها تتشوف فيه و تتشوف فاتوأم لاخر ، تتحس كبدتها تتفيبري عليهم ، ساعداتها فرملية و نبيل مراقب بحب كبير اول رضاعة ليهم ..جبدت ثذيها تحت تعليمات فرملية مجرد توأم شم ريحتها بدا يتحرك بوجهو و يفتحو فمو ، فطرة تتزرعها الله فيهم ..التقط رأس ثذي وجبد اول جبدة لي خلاتها تغوت
اسماء : ااااااااي
فرملية : ( تتحك بصبعها على ثذيها ) صبري راه تيجبد حليب من عروق
أولاد الوازنة الجزء 49
محتوى القصة
التنقل بين الأجزاء