غا ذكراتله الكذوب علا فيها حاجبه بطريقة مريييبة .. حركلها غي راسه بالإيماء و تمتم بجدية:اممممم و على هاد الكذوب غاندويلك انا دابا، الحوار زوين خصوصا بين زوج يلاه باديين .. غاندويو و نشوفو انا وياك شنو خاصنا نديرو من هنا لفوق، اي مشكلة جات كانواعدك من عندي انا تنستفسر و نسول عااااد غانتصرف و نتي كذلك، الكذوووب مكانحملهمش أصفاء الكذووب ثم الكذوب ثم الكذوووب، تكوني دايرة شي حاجة و نسولك عليها تنكريي و عينك فعيني راني غانتصرف بطريقة مغاتعجب تا واحد فييينا .. هاد القضية عندي فيها مشكل و انا ماشي من النوع اللي كل مرة ندوز الحاجة بسهووولة..!!
طولاات فيه الشوفة بحيرة، حساته تيمعنيلها لشي بلان دايراه ولكن ماعرفاتش شمن واحد..!!
عضات على سنانها غي تتومأله براسها .. هو تبسملها بهداوة و قبطلها فيدها
قربها من فمو باسهالها حتى زيراااتلو على يدو و بادلاته بابتسامة خفيفة
ركز الشوفة فيها بديك الابتسامة الخفيفة، كايشوف فيها قبالته و يتخايلها هي ديك البنوتة الصغيورة دايرة گرينات فشعرها اللي مزين بفيليلات ملونين .. تتبسمله ابتسامة بريئة و واحد السنة عندها عاد تتكبر حيداتها من مدة ماطويلاش .. مد يده تيقيص فخذوذها بشووية و هي تتغمض عويناتها الكبيبرين بنعوومة .. قرصها فواحد الخذ ودوا بنبرة هادئة:بقاي صغيورة و درويشة ماتكبريش كاترجعي فحال مينو مللي تتخلعيها و تقمشك
صفاء بابتسامة:ههههههه انا راني ظريفة غي نتا ماعرفتيليش، شوف انا واخا فاللول ماكنتش باغا نتزوج بديك الطريقة ديال زواج تقليدي و كدا ولكن مللي عقدنا صافي عرفت راسي خاصني نجمع و نطوي، كنت كانحاااول نثبت نفسي معاك ولكن نتا كنتي تتعصبني، راني شحال من مرة كنت تنقولها لسلوى انا متزوجتش باش نطلق ولا نزيد المشاكيل .. لا تفاهمنا غانكونو احسن زوج مزوجين، يعني كان خاصني غي الجو المناسب
صفوان صغر فيها عينيه:أحياااني على الشويطنة
صفاء بابتسامة:ههههه انا ظريفة والله
صفوان:اه ظراااايفة هه، (قاد جلسته و تحنحن بالهداوة) احممم ولكن باغي نسولك على واحد الحاجة مهمة!!
صفاء باستغراب:اه شنو؟؟
صفوان:الطفولة ديالك كي دوزتيها!! قالولي أغلبيتها دازتلك عند خالتك علاش مابقيتيش هنا مع واليديك؟؟
عقدات حواجبها بطريقة منزعجة نوعا ما .. تحنحنات بثوثر و شافت فساعة تليفونها:هذا الوقت نمشيو واقيلا!!
شاف فردة فعلها الغريبة و تهربها من الجواب على هاد السؤال هذا .. عقد حواجبه باستغراب:واخا زيدي
شافت فنظراته ليها مستغربين، حنات عينيها عاقدة حواجبها و هزات حاجياتها .. خرجو من الريسطو بعدما خلص و غي حاضيها مستغرب لديك ردة الفعل اللي دارت
دوزات يدها مع خصلات شعرها كاتقاد فالشال و طلات برات الطموبيل من الشرجم تطل على الطريق و سهاااات دخلات لعالم مابقات حاسة بوالو حواليها، من غير السكون و الهدوء
،
،
،
جالسة فالصالون تتشوف فتليفونها طالعة نازلة معاه بملل .. هو طول النهار و هو فالبيت ماخرج لعندها و لا قربلها و هي كذلك
شدات راسها بين يديها تتماصيه حاسة بالشقيقة شاداها فيه .. الجلسة معاه تحت سقف واحد خانقاااها..!!
تفكرات أياماتها قبل ماتشوفه و ديك الحياة اللي كانت عايشاها، إعجابها بفراس اللي خرج عليها و محاولاتها باش تتقرب منه .. كاتلوم فنفسها علاش كانت بديك الكمية دالغباء هاديك و خلاتله المجال يلعب عليها بزوج كلمات طيحها فشباكه اللي كانت اصلا طايحة فيهم..!!
هزات تليفونها و دارت رقم ماماها .. جاوباتها من الرنة اللولة
غي تفتح الخط عينيها دمعو و قلبها حساتو تزييير كثر ما هو مزير .. زيرات على قبضة يدها حاطاها على قلبها على شكل عقدة .. شهقاااات شهقة طويييلة و همسات بخفوت
-ماما..!!
لبنى سمعات نبرة صوتها و ديك الشهقة هاديك جاوباتها مخلوعة:بنتي ياك لباس؟؟ كي بقيتي مالك شنو طاري معاك!!
سلوى بهمس و نبرة صوت مخنوقة:و والو هه (مسحات دمعة تسللات من عينيها هاربة) توحشتكم على داكشي جاتني الخنقة
لبنى:ويلي يا بنتي و سحابلي غي شي حاجة ههههه خرجتيها مني خلعة، قوليلي كي دايرة و مولا دارك تا هو بخير شكاتعاودو!! واش نتوما مزال مسافرين بعدا!!، كنا ناويين نجيو عندك فصباحك ولكن راجلك قالنا مشيتو تدوزو شهر العسل
سلوى عقدات حواجبها:اممممم
لبنى: راجلك كي داير معاك تيعاملك مزيان؟؟
سلوى تتمسح الدموع اللي تيتسابقو باش ينزلولها:اممممم ههه نتي عارفاني انا كي دايرة
لبنى:اييييه يا فليفلة تلقايك مشيبة داك الراجل!!
سلوى:هممممم حمقتو معايا
لبنى:ايوا تكايسي عليه تكايسي
سكتات شحاااال تتشوف فالفراغ، عينيها مابقاتش تتمسح دموعهم خلاتهم يخرجو براحتهم .. عضات على شفتها السفلية بقوة و تمتمات بصوت مخنوق:ماما بغيت نرجع فحالي
عضات على شفتها السفلية بقوة و تمتمات بصوت مخنوق:ماما بغيت نرجع فحالي
لبنى:حتى تكملو شهر عسلكم ابنتي صبري شوية ههههه
سلوى حركات راسها بالنفي:لا بغيت نرجع لدارنا عندكم
لبنى طلقات ضحكة عاالية:هههههه ويلي ضحكتيني، شهاد الضحك يا بنيتي فين ترجعي و نتي بدارك و راجلك دابا
سلوى بدات تتبكي بالجهد و تشهق:م م اهئ مبغيتش نبقى معاه اماما مباغاش نكذب و نخبي انا ممرتاحاش مباغاهش انا تزوجتو بالزز مني هو كان كايهددني .. هددني على كولشي و أصلا كنت دايرة مع دري آخر يجي يخطبني ولكن خوا بيا و اسماعيل ماشي هو هداك اللي قلتليك عليه فاللول .. انا صافي تهديت و كتافي طاحو .. عييت و كرهت عيشتي معاه واخا غي فايامات قلال، هو اماما، ه هو هو هو غتاصبني ووو
و هي تتعااود مخشعة غاتسخف بالبكا و الشهييق، تنترلها تليفونها من يدها بالزربة .. علات فيه عينيها مخلوووعة و هو يبانلها عاقد حواااجبه بغضببب و حدة .. شاف ناحية شاشة الهاتف و هو يفرد حجبانه و خنزر فيها
-كنتي داوية مع الخوا ولا تدربي شنو غاتقولي لمك؟؟
عقدات حواجبها فيه بحدة:قلتلها كووولشي و غانتهنى منك، انا ماشي شايطة على واليديا باش يخليوني مع مجرم فحااالك، غايجيييو مورايا بعدما سمعو هادشي
اسماعيل ضغط على البوطون اللي فالجنب دالتليفون و قابلو معاها:طافي!! دعي لله يكون طفا قبل ماتسمع داكشي .. حيت لا جاو بغاو ياخذوك مني غانرتاكب جرييمة
سلوى وقفات مخنزرة فيه:مباااغيهمش يعرفو بتاحيوانيت اللي فيييك، باغي تخبي الخبث و الشررر اللي فيييك .. مباغيش تبينلهم انك ولد الحراااااااام مقطر مكاتسواااااش ولد الكلااااب مامربيييش .. شمكااااااار مافييييك نفس و تتستقوي على البنات بطريييقتك الخااانزة، مككككك ماعرفاتش تربيك، جايبة حيوان لهاد الدنيا ماشي بنااادم .. كللللب تفووووووو عليك و على النهار اللي شفتك فيه ، لا كان باك عارفك غاتخرج هاكا كان يمسح طواسلك فكاااشة متستاهلللش تكون بنااادم ييييخ عليك الجيييفة
"طراااااق"
كف قااااسي نززلللل على خذها سخوووون خلاها تحس بالتصميكة و التزنزين فوذنيها .. شافت فيه تتنفس بقوووة و تنهج و الدموع مزالين ماحبسوش بالعكس زااادو تينزلو و نيفها تيسيييل و عينيها حمرييين فيه
سلوى:هادشي اللي تتعرففف ياك..!!
اسماعيل شارلها بسبابته عاقد حواجبه و دوا بحدددة كايضغط على الحروف بين سنانه الرععععدة شداتو:خلييييني نتاااقي فيك وجه الله، خليييينيييي مانرجعشششش داك اسماااعيييل اللي راك عااارفاااه مزياااان
سلوى بغضب:غييييي رجع رجعععع مالك غاتخلعني!! راني شفت اسوء مافيك مابقييتش غانتعججججب .. نتاااا مووووتك حسن من حياتك، ماتستاهلش تعيييش لاكنتي غا متتي البارح و هنيتيني منك
بقا كايشوف فيها بنظراته القاسية، تيتنفس بقوووة و كلماتها اللاذعة كيف السم..!!
يمكن قصحاته فأعماقه كثر من اللي مقصحة هي..!!
كلامها و كرهها الظاااهر ليه، معيورها و سبانها خلاوه يعرف بأنه تعلق فالشخص الغلط..!!
بغا وحدة ماتستاهلوش يمكن..!!
وحدة ماتستاهلش هاد الحب الكبييير اللي كايحسو ناحيتها..!!
مادواش، مجاوبهاش، ماهزش يدو عليها مزال .. دار راجع لبيت النعاس حاس براسه تيدور بيه .. غي دخل للبيت سد عليه الباب، خلاها هي جلسات تتنفس بقوة و تمسح على وجهها بيديها
كلماتها ليه استاهلهم و يستاهل كثر و كثر فنظرها حيت هو ماشي داك الشخص اللي يستحق تتعامل معاه بحنية و تعطيه خاطرها و قلبها..!!
واحد مغتصب فحالو حرام يجي لهاد الدنيا و يذوقها العذاااب من تحت يديه..!!
،
،
،
بعد يوم طوييييل و عريض و هي متكية تتشوف فالفراغ، حتى الماكلة ماكلاتش .. ساكتة و ساهية و كلام منال لاعب عليها مزياااان .. سمعات الباب تتحل، علات عينيها فيها صاقلة
هو دخل تيشم فريحة داره اللي تتحسسه بالراااحة بعد يوم متعب، قرب تيقلب عليها بعينيه حتى بانتليه ملوية بديك الطريقة ناعسة على جنبها .. قرب ناحيتها مبسم ابتسامة خفيفة تحنى عليها وشاف فوجهها و شحوبها و دموعها .. قوص حواجبه باستغراب
عماد:حبيبة!! مالك؟
اميمة بذبووول تتشوف فيه، سااااهية وهو مترقبها باستغراب!!
ناضت غادية ناحية الكوزينة، حتى شداتها دوخة فشكل .. شد فيها هو مستغرب .. غي قاااصها قفزااات مبعدة منه و ملامحها فيهم واحد الخوووف غرييييب منه
حطات يدها على بطنها تحسساتها بشوووي وتتشوف فيه وتهاجمه بنظراتها اللي مافهمش معناتهم
عماد باستغراب:اميمة شنو واقعلك؟
اميمة حركات راسها بالنفي:والو (خلاته باغا تمشي ناحية الكوزينة حتى جرها من يدها بالزز منها و قابلها معاه)
عماد:كيفاش والو!! شهاد الشوفات درتي فيا و شنو طاري معاك؟؟
أميمة صرطات ريقها ببطئ كاتطلع و تنزل فيه عينيها ... نظراتها مستصغرة فحالا تتستصغر منه .. عضات على شفتها السفلية بقوووة و مشات من قبالته تتهرب من الشوفة فيه، مقادراش تشوف فملامحه فمه وجهه عينيه..!!
كاتخايلو تيبوسها و يدير معاها داكشي اللي تيديرو معها هي..!!
دخلات للكوزينة حاسة بالبكية شدااتها .. شعلات على البوطة بيديها تيترعدو، هو جا من وراها غفلها عنقها بقوووة و جرها ليه
عماد:مال الحنينة ديالي مقلقة مني؟؟ اشنو درتلك و مافخباريش!!
اميمة بغات تتهرب من بين يديه و هو يجرها ليه كثر زيرها معاه:بعد منيي دابا راسي ضرني بغيت نرتاح
تبسم ابتسامة خفييفة و قاصها فكريشتها بشووية تيتلمسهالها:شنو دبا!! بنتي دايرة شغلها معاك ؟؟ هذا هو اللي تيقوولو تتوحم على راجلها هههه
نترات يديه من كرشها بقوووة و شافت فيه مقابلة معاه ، بنظرااات مشتعلة غاااضبة و قلة صببببر:قوليا الصراااحة ماتكذبش علياااا!! انا مقادراش نخبي هاد الشك وسط قلبي كايغزز فوووسطيييي بقووة قلبي ضرني من هاد الوسواااس
عماد عقد حواجبه باستغراب:مالك شمن شك و علاش داوية؟؟
اميمة بنبرة خافتة باكية و عيون حمراء عامرين دموع:نتا تتخوني أعماد يااااك؟؟ تتخوني مع شي وحدة قريبالنا. !! كاتسناني نولد و تاخذلي ولدي و تمشي عندها هييي..!! ناويلي على الغدر و تنسى العشرة..!! باغي تقتلني وانا حية أعماد؟؟
عماد تيشوف فيها مستغرب من كلامها ..!! ملامحها ..!! نظراتها و أنفاسها المتسارعة المرتعشة
قرب باغي يشد فيها و هي تهرب يدها من عنده بقوة مخرجة فيه عينيها:متقربليييش، جااوبنيييي متهررربش فحال ديييما .. دازو عليا بزاااف دالفلاشات و تنكذبهم ماااشي حيت متنفهمش حيت تنتيييق فيك و لكن نتااا شنو درتي..!! تتخوووني واش انا لهاد الدرجة متنسواش عندك؟؟
عماد غزز سنانه مقربلها، شد فيها بالزز منها و خرج فيها عينيه:شكوون خراااا عليك هاد الهضرة الغييير منطقية!! واااش من نيييتك تتشكي فيا تنخووونك؟؟ علاااش غانخووونك وانا مرتاح معاك و باغيك و مناقصني والو معاااك وااااش سحابلك غير اجي و خووووون؟؟ لهاد الدرجة حاسباني ماشي راااجللل!! واااش ولدنا اللي تنتسناااوه عاااام و الزيااادة غانسخى نعطيه لشي خااانزة..؟؟ شكووون لعبلك فمخك بهاد الزبل هذا
اميمة مخرجة فيه عينيها:قالوهالي شي نااااس و بطريقة غييير مباشرة ولكن انا فهمت كوووولشي، المرااا عندها علاقة براجل مزوج و مرتو حاااملة و بزاااف دالحاجات طراو معانا طاريين معاها تا هييي!! اذن نتااا راك معاها؟؟
عماد بحدة و غضب و عصبية:القلااااااوي (ضررررب الكوكوط و هي فوق البوووطة بيدو بقوووة تا طاااحت و مع كانت العافية شاااعلة سخنات تا شوطاتو .. شافت فيه اميمة مصدووومة و هووو مشااا للماااعن تيهززز و يلوح للأرض تيشعط و يهرررس و يخرج فيها عينيه صاااعر) هاد التقلوييين دال*ببببب ماعنديش معاه آ أميمة .. انااااا مياااات مرة داير معاك الخاطر و نتي فكوووول مرة شنو تدييري؟؟ الشك و الوسوااس و الخياانة و النم الكحلللل!! وااش عاقلة مللي يلاه تزوجنا كي كنتتيييي؟؟ ختي كنتي تتصرفي معاها بطريقة ماهياش غي حييت كنت قرييب منهااا .. اناااا كاااري هاد الدااار بعييد على العائلة غي على قبل غيييرتك المريييضة هادي .. مجلسك بووحدك داايرلك الخاااطر مهلي فيك مكانشووووف فحتى وحدة من غيييرك (ضرب بقبضته بقوة مع الحيط و هي تتشوف فيه مكمشة فالقنت و تتبكي و تشهق) تندييير فوووق جهدييي معااك و نتي ديما الشششك و تطيحي عليا البااااطل؟؟
أميمة تترجف و تبكي و تقيص فكرشها و تشوف فديك الروينة اللي دار و الزاج مشتت، الرجفة شداتها و الشهقة غاتخرجلها القلب:متغوتش عليا اهئ هنننن ماااتغوووتش انا ماجبتش شي حاجة من راااسي، ج جااارتنا راها...
غي سمع ديك جارتنا زاد شعل:شمننن جارتنا و شمن قلاااويييي، ياك كانحذرك ماتدويش مع الزمررر!!!
اميمة بصوت عاالي:ماتبقاااش تغوووت و تهرررس، منااال جارتنااا قالتلييي هادشييي و كاتعطييني شي حاجات تيجييبو الشك، حتى النهار اللي جات عندك سكرانة تتعنق فيك ماخليتيلناش مجال ندويو داك النهار، علاش مباغينيش ندوي معاها هااا؟؟ علاااش
قربلها شاااد فكتااافها بقوووة .. تينخضهااا بيديه، تخلعاات من حالته اللي وصليها مخرجة فيه عينيها المدمعين حلقها شاحف:هااااديييك قحححبة هاديك سلگوووطة شااابعة بيران و سكااايرية!! انا شايف عليها هادشي و باغااانيييي نخليك تمشي و تجي معااها، اصلا السيدة تتدور عليا باغا تتقرب مني تتصرف بمياااعة و شحال من مرة دارت حركات ماشي هوما هادوك غي تندير عين ميكة و مباغيش ندخلك الوسواس لراسك باش ماتعصبييش و نتي حااااملة (قربها ليه كثر تيشوف فعينيها مباااشرة) لهاد الدرجة متثيقيش فيا و ثيقي فديك الكلبةةة؟؟ عرفتي شنووو؟؟ غانمشييي دااابا نقتل الزاملبوووهاااا
طلق منها باغي يمشي حتى جراتو تتحرك راسها بالنفي:ب بلاتي ل لا ماتديرهاش اويلي اجي لهنا ش شوف انا ثيقتك دابا ثيقتك والله حتى ثقت اعماااد غاتقتلنييييي (عماااد نتر يدها من يدييه مخنزر باغي يمشي مصررر، حتى جراته كثر واقفة قبالته) لا مشييييتي حسببني انا خرجت من حيااتك .. ماتخرجش بهاد الحالة غاترتاكب شي جرييمة
اميمة تتصرط فريقها و تثبته:صافي رصاااا و جلس أجييي (جراته من يديه تتشوف فديك الروينة فالأرض و تمسح فعينيها .. جلسو فالصالون و شداتلو فيديه اللي تيترعدو بالاعصاب) انا ثيقتك دابا غي تهنى راها دخلاتلي الوسواس و ماضنيتهاش خبيثة هاكا، ش شوف انا وياك مغاندويوش معاها مزال، غاتفك هاد الازمة اللي عندنا و نقلبو على دار اخرى نكريوها .. صافي حتى واحد فينا مغايقربلها نتا غي ماتديرش شي حاجة اللي تندم عليها من بعد
عماد بحدة:لا قتلتها و طلعت روووحها مغايبقاش فيا الحااال بالعكس!! واش فآخر ايامي نخليك نتي نقية و نمشي عند موووسخة سكايرية؟؟
اميمة قرباتولها عنقاتو بقوة تتمتم بصوت مخنوق:سمحلي حيت شكيت فيك واللهيما بغيت نديرها بلعاني (باسته فجبهته بقوة) انا مانقدرش نتخايل شي وحدة تشاركني فيك .. لا وقع هادشي نموووت تتعرف شنو هي نموووت .. مانقدرش نتخايل شي نهار نعيش هاد الموصيبة
تنهد بقوة محاوطها بيديه تا هو و تمتم بجدية:واديري عقلك و ماتخرجينيش عن طوعي مزال، راني تجننت كايبانلي غا نقتلها و نشرب من دمها
تخشات فيه كثر تتبوسو من كتفو:صافي مانعاودش نشك صافي، اصلا انا اللي حمارة دويت معاها (عقدات حواجبها بقووة تتفكرها) بنت الحرااام دايرة راسها ظريفة و هي شيطانة
عماد بعدها عليه و شاف فعويناتها بهدوء:تنشك واش باقي شي حد بالنية ديالك شي بعد المرات تتبغي تحمقيني
تبسمات ابتسامة خجولة شادة فخذذه و عاودات تخشات فيه معنقاه بقققوتها كاااملة و تتلعن فراسها على تسرعها ديما و تتحكم على الحاجة بلا ماتأكد...!!
حانية على بعض الاوراق و الدفاتر .. تليفونها جنبها و جالسة قدام الطبلة دالصالون .. واحد الدري عندها فالواتساب بعد المرات تيسيفطلها محاضرات .. هي غابت شي يوماين و مللي رجعات لقات محاضرات مهمين فاتوها و دابا تيصيفطلها، دايرالو سمية بنت و تتشوف اللي تيصورلها و تكتب فدفترها
صفوان جالس قبالت التلفزة ساااكت مينو مكونة حداه .. شاد تليفونه تيدخل للواتساپ ديالها من نظام التجسس اللي دايرلها و يقرا الميساجات اللي واصلينها..!!
دخل لميساج الدري هذا معلي حاجبه عارفو بل متأكد منو ماشي بنت و سبقليه سولها و عاود واش عندها دراري فالواتساپ و تتقوليه لا ديما...
كذبة أخرى محصلها عليها و مفوتها و اللي مبرده على هاد الدري هو انه مضاسرش و تيدوي معاها فإطار المحاضرات ديالها و صافي .. عمرو تجاوز حدوده معاها و تا هي تتحتارمه فالهضرة و مامخليالوش المجال
تحنحن تيحك على لحيته و يشوف فالتلفزة و هي غااارقة فقرايتها مداتهاش فيه هاد العشية كاملة مللي جات و هي مع الكتوبة..!!
جاتو الغيرة منهم..!!
علا فيها عينيه معبس بطريقة اشبه للطفولية و نطق بجدية:مغانتعشاوش؟؟
ماعلاتش فيه عينيها تتكتب، قالت بهدوء:اه جاني الجوووع، عفاك نوض صاوب شي حاجة ولا طلبلنا من على برا!!
علا فيها حاجبه:مكافيينش الكريديات اللي علينا باغيا تزيدي فلوس دالمطاعم صباح و عشية
علات فيه عينيها بجدية:ايوا نوض طيب لا مابغيتيش تطلب و كانو عزاااز عليك فلوسك لهاد الدرجة
صفوان:لا كانو عزاز و داير الفلوس فقلبي كنت نهرسلك رجليك من زماان على شنو درتي
عقدات فيه حواجبها باستغراب و هو ناض للكوزبنة مصغر راسو معاها، تبعاته مينو كاتموء و تدور فجوانبو .. بدا كايطيب و مرة مرة يشوف فمينو تيدوي بالهداوة و يتملغ معاها، و هي تتكتب على برا و تقلب و تدخل تسول داك الدري و تخرج .. حتى الغروب ديال لافاك فالواتس مابقاتش فيه باغا تتفادى الصداع معاه حيت تيكونو مخلطين
داز وقيت .. خارج من الكوزينة دار صوص د مطيشة و قلا الفريت مع شلاضة، حط داكشي جنبها و رجع مور الخبز اللي سخنو
قرب جلس جنبها و شاف فيها كانت تتكتب و مشغولة ماعلاتش راسها فيه
مد يدو ليها سدلها الدفتر و مدلها طرف دالخبز:كولي و كملي
دلات شفتها السفلية تتشوف فيه:عندي بزاااف دالكتبة
صفوان:قدامك ليل طويييل، شدي كولي (مدلها طرف دالخبز)
شداتو من عندو مبتاسمة .. بدات تتاكل معاه و هو كذلك، ساكتين .. هي عقلها فالكتبة و هو تيشوف فيها و يتبسم و يرجع ياكل و السكون بيناتهم .. سالاو ناض جمع الطبلة، شلل دوك الطبيسلات و مشا للبيت نيشان مدارش بيها بغا يخليها على خاطرها تا تسالي
تكا فوق الفراش تيتنفس .. جر التليفون تيدور فواتسابها ثاني تيحماق على التخنتيش فميساجاتها ، لحد الآن عندها كولشي نورمال .. تدوي أغلبية مع شي بنات غي من الفايس مدخلاهم معاها للواتس يعني ماعندهاش شيي حد اللي مهم بزاااف .. دار التليفون تحت راسو و تكلم بصوت عالي باش تسمعو
-مللي تسالي دوزي لبيييتك، و بييييتك هو بيت راااجلك
سمعاته من مكانها، حطات الستيلو عند فمها تتدوزو و تبسمات ابتسامة خفيفة يدها عند خذها و سهااات تتفكر ملامحه و صوته..!!
ابتسامته جديته عصبيته..!!
كولشي فيه تفكراتو و هي ساااهية فهاد اللحضة
حنات عينيها لداكشي اللي بقالها رجعات تتكتب و كل شوية تشوف ناحية البيت و تضحك .. تقريبا ساعة اللاروب عاد سالات، جمعات كتوباتها خداتهم لبيتها حطات كولشي مستف .. دازت لمينو عطاتها حليبها و هزاتها بسليلتها دخلاتها معاها لبيته..!!
كان ناااعس مغمض عينيه و عاطي بضهره للباب .. سداته بشووووية طفات الضو الرئيسي بقا غي دالفيوز .. قربات ناحية الفراش تتمشى على بنان رجليها .. طلعات جنبه و قربات بشووووية لعندو .. تخشات فيه عنقاته و هو عاطيها بالضهر .. غي حس بيها طلعات جنبه دار عندها مع دورته طلعات فوق صدره معنقاااه بقوة و تا هو زير عليها بين يديه .. قرب باسها فخذها قبلة خفيييفة و تا هي شداتلو فخذه .. تلمساااته برررقة و حطات شنايفها على خذه باستو بوسة قووووية و همساتله بخفوت
-تصبح على خير
زير عليها كثر بين يديه و همسلها بدوره:تصبحي على خير ❤️
الدموع فخذوذها تيسيلو فحالا تيتسابقو فشي شلال شكون غاتنزل اللولة و تبلل خذوذها و وجهها بديك القوة كاااملة، حاطة يدها على بطنها .. لابسة لباس طبي و جالسة فوق فراش ديال مشفى خاص..!!
عمرها تخايلات انها غاتطيح فهاد الموقف..!!
عمرها تخيلات انها كانت باغا أمنيتها الخبيثة تتحقق فأميمة ولكن تحققات فيها هي..!!
فقدات جنينها..!! ولد كان تيتكون فأحشائها!!
مللي جات من السفر مؤخرا عمرها شربات و لا زگفات رشفة من المشروب حتى للنهار المشؤوم و بسبابه فقدات ولدها و حتى قدرتها على الإنجاب مرة اخرى...
🔙🔙
تتوجع شادة فكرشها بقووووة و تتشوف فالنزيييف اللي تتنزف و تعصصر:ااااااه عتقوووني عفاااكم عتقووووني
الطبيب عطاها ورقة و ستيلو:عفاك امدام، بما انك قلتي ماعندك حد من عائلتك هنا ف انا محتاج توقيعك هنا و موافقتك باش نتصرفو فأي وضع طحنا فيه و اي مشكلة
الطبيب خذا الورقة:سي بون مدام دابا غاتدخلي لقاعة العمليات و اي مشكلة واجهاتنا غانتصرفو من عندنا
🔚🔚
مكانتش عارفة بداك القرار و داك التوقيع هداك غاتحرم من إحساس الأمومة مزال..!!
بسباب النزيف القوي و الغزير اللي ماسيطروش عليه .. حيدولها البيبي اللي مكانش مزال ماتكونش مزيان و حتى الوالدة كذلك..!!
اضطر الدكتور يتصرف فهاد المسألة باش يعتق حياة المريييضة..!!
عينيها حمارو كثر تتبكي بدموووع غزيييرة و تتنفس بقوووة .. شهقااات شهقة مسموعة فالأرجاء و شدات راسها بين يديها .. حاسة بالدوخة من كثرة البكا .. حاسة بانها تقاضات و مابقالها جهد لوالو..!!
.
.
.
خرج من الغرفة دياله بعدما دوزو ثلثيام كاااملين فمشاحنات، هو معاودش جبد معاها الهضرة و هي كذلك متجاهلاه و عاطياه النخال .. مادوات معاه ولا تكلمات فقط ساكتة .. كلامها اللي قالتو لمها ديك النهار كامل ماسمعاتوش منها التليفون طفا فوذنيها و مللي دواو من جديد خبراتها انها كانت كاتضحك معاها .. لهاد النهار هذا تتفكر فشنو خاصها تدير و معارفاش
هو هز تليفونو تيصوني .. جاوب على رقم الأم دياله اللي طلعلو عاقد حواجبو:الواليدة كي بقيتي؟
لالة سامية:هانا اولدي هانا، نتا اللي كي بقيتي و مرتك شكاتعاودو؟؟ دوزو عندي اليوما تغداو معايا اوليدي
اسماعيل تحنحن كايحك على جبهته:احممم واخا توحشت ماكلتك
سامية:أجي يا وليدي راني موجدة سكسو تاكل عليه صبيعاتك
قهقه بخفة:واخ هاحنا جايين
قطع معاها و داز للمراية دالبيت، شاف فالضمادة اللي فراسو .. حيدها بشووووية تيطل على جرحو .. كان برا شوية .. حيدها و غطا على الجرح بخصلات شعره .. بدل عليه حوايجه و خرج لبرا دور عينيه عليها كانت جالسة فالصالون..!!
تما فين ولات تتنعس و تجلس نهارها كامل، حتى لافاك ماعندها گانة تمشيلها .. نطق بجدية من مكانه بلا مايقربلها
اسماعيل:نوضي بدلي عليك غاتمشي معايا للدار عند الواليدة عارضاك
شافت فيه عاقدة حواجبها:مابغيتش
شاف فردة فعلها، عقد حواجبه و شارلها بسبابته، واقف بعيد و تيدوي بواحد الهداوة استفزاتها:غاتنوضي تلبسي عليك حويجاتك و غاتزيدي معايا دابا ولا مغايعجبك حال!! ديري الزوين فراسك ماحدي زوين دابا، مللي نخياب ماتلومينيش!!
زيرااات على قبضة يدها بقوووة منرفزة من نبرة صوته و طريقته فالكلام معاها، خنزرات فيه تتنگر:شنو فجهدك ماتدير غي تضربببب..؟؟؟
علا حاجبو فيها و دار عاطيها بالظهر:نوضي براكة من الهضرة الخاوية
خلاها باغا تتلاح علييييه، ناضت جيهت الڤاليز تتنتررر و تخبط رجليها مع الارض بقووة، حلاتها كاتطل فوسطها .. جبدات مونو ثوبو طااايح و بارد دالصيف طويول .. مع صباط طالون و هزات لاطخوز ديالها و مشات ناحية الحمام زادحة الباب عليه بلاما تزيد تدوي، غا زدحات الباب هو عقد حواجبه كثر كايتمتم بحدة
-الصبر كايضبر ابنتي، الصبر كااايضبر
داز وقت ماطويلش، خرجات عنده طالقة شعرها و بديك اللبيسة جاتها غزالة مع لاطاي .. مكياج خفيف دارته كيفما موالفة ميكب نو ميكب
طلعها و نزلها بعينيه بنظرته جامدة، كان ولهان عليها و باغيها بكل جوارحه .. بغاها كاملة ليه بعيوبها و كل حاجة فيها و لكن مللي تزوجو و طراو هاد المشاكيل و شاف تصرفاتها معاه غاديين و ينزلو و حتى كلامها كذلك، ولا تيبعد شوية بشوية منها يخليها براحتها و يزيد يحسب حسابه معاها..!!
بغاها و دقلها قلبه بلا مايحبس نفسه عليها و بلا حواجز او قيود، تلهف عليها كان باغيها غي تعبره بشوفة وحدة منها ولكن فالميزان لا ثقلات شي كفة كثر من القياس تتهبط اما الكفة اللي خفيفة و مدايرة اعتبار لوالو تتبقى عالية لفوق و هادشي اللي مباغيش هو .. مابغاش يهبط على قبلها و يولي الكفة الخاسرة فالموضوع..!!
مدواش معاها ماعبرهاش .. خرج لبرا و هي غي شافتو تحرك مشات تابعاه
جرحو ليها ماشي ساهل..!! بنت تتعرض لإغتصاب ماشي ساهلة عليها فوقت قصييير تدير عين ميكة و تنسى كولشي و تبدا معاه كأنها ماطرالها والو..!!
واخا تبغي تديرها مغاتقدرش، اصلا من اللول كانت كارهاه و بالفعلة اللي دار زاد الطين بلة و خلاها مطايقاهش..!!
وصلو للزنقة .. شاف فالموطور كان مطقر شوية بسباب الطيحة اللي طاح منه .. خلاه بلاصتو و مشا سابقها .. هي موراه معبسة تا وقف فالشارع تيستنى طاكسي
قربات وقفات بعيدة عليه شوية .. مربعة يديها و تتشوف فجنابها .. وقف طاكسي و حلها الباب اللورانية، غي حلها طلعات و هو ركب القدام
ما هي إلا مدة قصيرة كانو واقفين قبالت باب الدار د لالة سامية، دق هو و تحلاتلهم الباب من طرف ختو .. تسالمو و دخلو و هي تتضحك و تقشب مع سلوى اللي الابتسامة بالزز باش خارجالها من شفايفها
سلوى:شكرا اختي
اخته (مروى): مابيناتناش الدار دارك احبيبتي هههه
دخلو لداخل الدنيا كانت متولة مجموعة و الدار هادي كبيرة على دارهم هوما .. جلسات جنب سامية اللي كانت كاتسناهم، و من معزة مرات ولدها عندها عنقاتها هي اللولة عاد عنقات اسماعيل اللي غي مبتاسم ابتسامة صفراء شبيهة لديال سلوى
جلسو مجموعين و مروى تتضحك و تقشب و تضرب فيدين سلوى، هاد الأخيرة ماعندها خاطر غي تتحرك فراسها و تتحنحن و اسماعيل خشا وجهو وسط تليفونه ساكت
الجو كان باين بيناتهم ماشي هو هداك، خلاو سامية تعيق ان شي حاجة ماشي هي هاديك طارية بيناتهم
سامية تبسمات برزانة:ايييه يا وليداتي الزواج فاللول بعض المرات تيكون مررر و مذاقو خايب متيتحملش
شافو فيها بزوجهم دقة وحدة
سامية:ولكن واخا هكاك و واخا مروريتو .. التعاون و النقاش و شوية ديال السكر بينات الزوجين تيزيدو الحلاوة و يحيدو المرورية
سلوى سرطات ريقها ببطئ عرفاتها شكات فشي حاجة و بغات تحيدلها الشك و ترد بلاصته اليقين:السكر أخالتي ماشي ديما نافع و المرورية ديما غالبة الحلاوة
اسماعيل علا فيها حاجبه: (الصمت)
شافت فيه سامية مبتاسمة:همممممم، اذن حاولي يا بنتي تديري للما منين يدوز، سخونية الراس تترجع بالبرودة و القلب شحالما قصاح غايلين لداك اللي عرف كيفاش يتعامل معاه و يبغيه و يحن عليه
سلوى تنهدات بحسرة:هادي المشكلة أخالتي!! مشكلتي انا قلبي تايتعامل غي بالقصوحية مزال مالقيت اللي يحنلي عليه و يعرف يتعامل معاه
شافت سامية فاسماعيل:يا وليدي واش بنت الناس من السيمانة اللولة تتشكى!!
اسماعيل بحدة:عندي مايدار غانمشي بلاتي و نرجع (شاف فسلوى) زيري الروبيني و عرفي شحال من نقطة دالما مخلية يدوزو غا هكاك
خنزرات فيه سلوى و هو يمشي، خرج لبرا خلاها مع عگوزتها .. جلسو مجمعات و مروى معاهم، بغاو ينصحوها و يردولها عقلها لراسها حيت شافوها من أول زواجها تتعامل فحالا عاشت معاه سنين و سنين و فاض بيها الكاس
مروى:والله حتي خويا حنين، خاصك غي تعرفيليه تاكليه بحوايجو .. و تالعصبية مكانش هاكا غي مشاكل دوزناهم من زمان صعروه و اضطر يهز مسؤوليتنا بعدما خلانا بابا
سلوى:الله يرحمو
مروى شافت فيها بجدية:ماماتش باقي عايش
علات فيها سلوى حاجبها و سامية تبسمات بهداوة
-مانعييولكش راسك بمشاكل قدام، يا بنيتي انا مربية اسماعيل كبرتو حتى ولا راجل و حمل مسؤوليتنا و لكن اللي هرسو هو الحبس، مللي دخليه زااااد تعصب كثر و ولا هاكا ولكن..
قاطعاتها عاقدة حواجبها باستغراب:حبس؟؟
سامية:اه ابنتي، مافخباركش!!
سلوي:ل لا هو كان كايذكر هاد الموضوع ولكن ماضنيتوش مدوز الحبس ديال بصح
سامية:ايوا يا بنتي راه دخل بسباب عصبيتو النيت، كان خدام فواحد الشركة فالمحاسبة كولشي بخير كانت عندو دار حسن من ديك اللي شادها دابا و طموبيل راه الطموبيل تباعت فاش دخل للحبس قالي باش نمشيو راسنا بدوك الفلوس و حتى القفة مكانتش ساهلة، واخا باه ميسرلو الحال ولكن هو سامح فينا من زمان و ماحاسبلنا حساب .. كان خدام تا جا شي حد جديد حسدو ولا ماعرفت يا بنتي الولد كان غزااال و مجتهد فالخدمة ديالو، شدلو شي ورقة خربقهالو زاد فيها واحد الزيرو و دار راسو فرشو بأنه تيختالس فلوس الشركة
سلوى شدات على فمها مصدومة:اويلي و بسباب هادشي دخل للحبس؟
سامية:لا، هادوك الناس جراو عليه بعدما تبهدل مزيان و تشوه فديك الشركة كانت عندو فيها سمعة مزيانة .. غي علاقته مع المدير ديالو اللي شفعاتلو .. الموهيم يا بنتي شي نهار تقابل مع داك اللي لعب فالوراق و ماعرفتش شنو طرا ولكن انا كنت جالسة فداري ماعليا مابيا تا وصلوني خبار اسماعيل تسبب للسيد بعاهة مستدامة، عييت نطلب و نزاوگ باش يسمحوليه و لكن والو يا بنتي، السيد لاخر راه عوار من واحد العين و جوج صبعين صعيب باش يحركهم واقيلا تشللو و وجهو عندو فيه واحد الضربة بالموس خلات اثرها بالغراز ديالها
سلوى:الله يا ربي السلامة
سامية:ايييه دوز الدگاااگة و الحسد دالناس خرج عليه، دابا مللي خرج من الحبس و بغا يدير عائلته فرحت ليه حيت باغي يتبدل و يدير عقله (شداتلها فيدها مبتاسمة) ماترخيلوش من يديه ابنتي .. ولدي راه محتاج غي اللي يحن عليه، لا لقى معاك راحتو يجيبلك اللي بغيتي من فم السبع، راااجل و قاد بدراااعو
سلوى تحنحنات بصوت خافت:اممممم
مروى:ياختي و نتي جيتي معاه حسن من واحد الزبلة كانت معاه و...
شافت مروى فمها تتحركلها راسها بتسائل و مها خرجات فيها عينيها تنوض .. داكشي اللي كان ناضت خلات سلوى حاضياها و ذماغها بقا واحل فديك الجملة اللي كانت تتقولها .. عضات على شفتها السفلية و عقدات حواجبها باستغراب لشكون هادي اللي قصداتها زعما و سامية مابغاتهاش تعرف بيها..!!!
من لافاك دازت مباشرة للدار د واليديه فين تافقو باش يتجمعو اليوما كاملين عائلة كاملة .. غي دخلات عليهم كحلات بالعما خصوصا من اللي لقات خولة بنت عمته معاهم .. جلسات مغزززفة و ديك خولة مغددة عليها مامصروطالهاش كيفاش جرات عليها بديك الطريقة من دارها و قدام صفوان اللي ماعياش نفسه بعدما شعطات عليها الباب يعاود يحلها و يسول فيها..!!
خديجة باستغراب:مرحبا بيكم عمرتو عليا اليوم والله تنقنط بوحدي (شدات فيد اميمة اللي سبقات جات عندها من قبايلة)
صفاء علات فيها حاجبها:ساكنة مع راجلي فينما مشا غانكون معاه ولا جا لهنا على الراس و العين، أصلا متنسخاش بخالتي خديجة (تبسمات لخديجة اللي بادلاتها ببتسامة خفيفة)
خديجة:هذا المضنون فيك يا بنيتي
تبسماتلها صفاء، سمعو صوت الأنترفون .. شافت فخولة غاتنوض و هي تسبقها
صفااء:غي خليك راك ضيفة ماتعييش راسك
دفعااتها من صدرها بلا ماتعييق، و لكن الدفعة كانت قوية علي خولة زدحاتها مع المطربة حتى شافت فيها تتسوط .. هي قلبات عينيها عليها و مشات حلات الباب من الانترفون .. وقفات فراس الدروج مربعة يديها كاتسنى، كانن صفوان و عماد طالعين تيدويو عاد جايين من المحل بعدما دازت صلاة الجمعة
داز عندها عماد هو اللول عنقها و باسها فخذوذها و هي تعلقات فيه عنقااته بققوة كاتبسم .. خلاو صفوان معلي فيهم حاجبه بطريقة حااادة و عض على شفته السفلية تيغززها و يحسب فالثواااني فوقاش تبعد من حضنه..!!
ماعجبوش الحال كيفاش سبقو ليها و عنقها قبل منه..!!
غار منه و غار عليها و راسو حسو تبلوكا عليه..!!
طلق منها عماد مبتاسم:غاندخل دابا نخبر أميمة بالبشرى السارة، السيمانة الجاية غانبداو و نردو المحل حسن من اللول
صفااء:مبروك عليكم ألحبيب ديالي تستاهلو كل خييير (عاودات باسته فخذوذه)
تراجعات للوراء تتشوف فيه ضاحكة و هو دخل، خلاها نتاقلات بنظرها ليه .. قرباتله مبتاسمة:مالك مغوبش؟
صفوان:لا كنتي غا زدتي بستيه مزال؟؟
تبسمات باستغراب:كيفاش هه؟؟
صفوان بعبوس:داك خوك كيتسابق معايا ولا مالو
قهقهات بخفة تتشوف فيه و جراتلو يديه شافت فيهم، غا شافتهم عقدات حواجبها و خنزرات فيه
صفوان:مالنا على التخنزير؟
صفاء قاصتله صبعو البنصر:فيييينوووو؟؟
صفوان باستغراب:شنو هو؟
صفاء:خاتمك فييينو!! ديك القردة الشارفة راها هنااااا و مابغيتهاش تشوف فيك بلا خاتمك
صفوان شاف فصبعه و رجع شاف فيها:ماعقلتش فين حطيتو صراحة
صفوان تحنحن كايشوف فيها معلي حاجبه و هي حاضياله يده اللي خاوية من الخاتم كاتغدد
صفاء بعصبية:لا مكانش الخاتم غي خرج سير فحالك بلا مادخل لداخل توريهم كمارتك حيت غانرتاكب فيك جريمة نتا وياها، غاتبدا تنقز عليك الحمارة بلا سليب
صفوان تنهد عاض على شفته السفلية:صفاء، جاي عيان غاندخل لبيتي القديم نرتاح فيه غا بلا ماديري منها قصة
خلاها تتشوف فيه و جر يدو عنده، مشا مباااشرة جيهت بيتو القديم مخلي الصالون اللي مجموعة فيه العائلة .. هي تبعاته بعينيها حتى سد عليه باب بيت النعاس و قربات جلسات جنبهم كاملين، عينيها بلا ماتحس تيمشيو لديك خولة تتخنزر فيها تا كاتبادلها حتى هي التخنزيرة .. حشمات غي من عگوزتها أما ماكرهاتش تنوض تغززها و توريها تحط عينيها على راجلها
بقاو جالسين شحااال و الغداء تيطيب عاطي ربحة غزالة فالأرجاء
الضحك و التقشاب بيناتهم، أميمة شادة فعماد و هو شاد فيها .. متعلقين ببعضياتهم لدرجة كبيييرة و حبهم لبعض تيقوى مع الأيام
أميمة بابتسامة عينيها تيخرجو القلوبة:والله حتى فرحت مللي شفتو هههههه و تا عماد كان خاصكم تشوفو وجهو و هو حاضي التلفزة و تيغوت، (قلدات نبرة صوته الحماسية) ها هو ها هو شوفي شحال صغييير هههه
صفاء بابتسامة:انشاء الله الله يفكك على خير و يجي بالصورة المكمولة
اميمة:اممميييين يا ربي ياختي و تا نتييي الله يرزقك الذرية الصالحة
تبسماتلها صفاء بهداوة تتردد امين فداخلها
خديجة:ايه تا نتوما الله يرزقكم وليدات يعمرو عليكم
صفاء:انشاء الله، دابا مع قرايتي تنضن مزال الحال شوية
خولة:ويييلييييي الناس تيتزوجو باش يديرو دارهم و يأسسو عائلتهم ولا باش يقراو
صفاء خنزرات فيها:ايوا هاد الكلام قوليه لراااسك و للي فحالك، أكبر طموحهم رااجل تسوليييها شنو إنجازك فهاد الدنيا تقولك تزوجت و ولدت
خولة تحنحنات تتشوف فيها مغوبشة و هي تدوي ماماها بحدة
-مالك نتي ابنتي مللي شفتي خولة و نتي شاعلة بوحدك و اللي قالتو تدوري فيها؟؟
صفاء شافت فيها بجدية:تندوي معاها و نتي شدخلك؟
خديجة تحنحنات تتسايس و بغات تقلبها ضحك:احم نعلو الشيطان و الجمعة هادي ههههه، راه صفاء ضحكها هاكا
اميمة:نعلو الشيطان اويلي
عماد:صفاااء (شاف فيها بجدية و هي تنفخ كثر، ولات حمراااا تقييصها تطرطق)
شافت فيها صفاء معلية حاجبها، و بلا ماتزيد تتفقص ناضت وقفات:نمشي نشوف صفوان
مشات ناحية البيت عندو خلاتهم تيتشاوفو و يبيضو فعينيهم .. عرفوها تفقصات ديال بصح .. دخلات للبيت اللي مشالو هو .. مع الدخلة تكوانسات تتدور فعينيها فيه...
البيت ديكوره كان قديم شوية و معلقين بعض الصور ليه من الطفولة و المراهقة .. مصبوغ فالبيض و الفراش عادي باهت و قديم هو كان ناااعس بلاصته ماحسش بيها .. تمشات بشوووية لتصاورو تدور معاهم عينيها و تبتاسم على منظره كي كان و هو صغير
دوزات مع الصور يديها تا وصلات لصورة ليه فالمراهقة .. كان هو و اسماعيل تيضحكو بزوجهم هازين حوتات باينة عليهم يلاه صيدوهم ديجا لابسين غي شورطات و فازگين شوية
بدات تتلمسها بشوووية عليها و بالهداوة و ذماغها خدام .. سهاات فديك الصورة بطريقة عجيبة تتفكر هاد الوجه .. جاها فحالا مألوف فذاكرتها ولكن صعاب عليها تعقل عليه..!!
عقدات حواجبها بشوووي و دارت براسها ناحيته .. قرباتله بخطوات بطاء و جلسات جنبه .. حطات يدها على ضهره تتلمس فيه بشوية
تحنات عليه باستو بوووسة خفييييفة فكتفه و همساتله بخفوت:غي نرجعو للدار غاتقلب الدنيا على داك الخاتم (شافت فصبعها هي و خاتمها) شوفني انا وليت نديرو مللي تزوجنا عمري ماحيدتو
شافت فيه ناعس ماسمعلهاش .. جمعات رجليها جنبه و عنقاته كثر مزيرة عينيها
،
،
،
رجع لعندهم بعدما دوز بعض الوقت على برا .. الغداء وجد و تجمعو كايتغداو بربعة .. سلوى تطلقات معاهم شوية تضحك و تاكل و مرة مرة تدوي
حتى سالاو و رجعو جلسو مجموعين .. هي جالسة جنبه و هو حاضيها بنص عين
سلوى:صراحة هاد الدار مريحة و عجباتني كثر من الدار لوخرى
علا فيها حاجبه تيتصنت لتلميحاتها ساكت: (الصمت)
سامية:انشاء الله بالمشروع اللي غايبداه مع صاحبو صفوان يربح فلوس كثر و تديرو داركم ديالكم (شافت فيه) ماشي تعطلتو بيه اولدي؟؟
اسماعيل بجدية:صفوان خرجولو شي مشاكيل و المصاريف تقلبو، كنا مخططين لحاجة فشكل .. دابا تا يقاد أمورو و نشوفو مزال فهادشي، تا المحل اللي كنا شفناه طلقناه
مروى:مشكلة هادي دابا، نتا غاتبقى هاكا بلا خدمة راه الفلوس تيتسالاو و تدوز فدوك اللي مخبيهم!!
اسماعيل:تنحاول منديرهاش، تا مصاريف العرس خداو مني
سلوى شافت فيه قالبة وجهها و بدات تبرگم بصوت خافت:حبايسي شمكار
كملو عشيتهم فحديث نسائي خفيف بينما اسماعيل عاود ناض خرج يكمي برا و مع خرجتو وصله اتصال من صفوان .. يتلاقاو فالقهوة هوما و عماد
وافقه و مشا يشوفهم
كانو سابقينو قرب عندهم جلس معاهم
اسماعيل:فين شادينها؟
صفوان:هاحنا، العشية دوزناها عند الواليدة تغدينا عندها و جا هاد الوقت قلت لعماد نضربو دويرة و منها بغيت ندوي معاك فمشروعنا بانلي راحنا معطلين فيه..!!
اسماعيل جبد گارو شعلو و بدا يسف فذخانه بعدما شير للسيرڤور يجيبلو قهوة كحلة:تانا راني نقصت من الميزانية، تقريبا جوج دالمليون خسرتها غي مؤخرا مع العرس..!!
عماد:تا مشكلة المحل اللي تحرق عكسلكم البلانات
صفوان:غانكملو فيه غا محتاجين وقت و صافي
عماد:يتعاود يتحل المحل غايزهى، راه تيجيو طلبيات دالعراسات و كبار .. لا نجحات فيه اميمة نقدرو نكبروه كثر
صفوان:تا تساليو و نشوفو
اسماعيل:دابا انا خاصني نتسنى، ولكن لا بقيت هاكا غاندخل فالميزانية مزال حيت ماعندي منين نصرف
صفوان:نتا غاندويلك مع مول المحل اللي راني خدام فيه نلقالك بلاصة نقضيو دابا هاد الشهراين..!!
اسماعيل نتر نترة مجهدة من الگااارو تا حس بريتو عمراات ذخان عاد بخو:هاااحنا صابرين
كملو قهوتهم بحديث طويل و تخطيط للمشاريع اللي عندهم باغيين يطورو من نفسهم و حياتهم .. ماخرجو من القهوة تا ضربات العشرة دالليل .. دازو عماد و صفوان مور مراواتهم و تا اسماعيل رجع للدار عند مو .. لقا سلوى ب پيجامة د ختو لااااصقة عليها لابساها و بانتله فحالا معولة تبات هنا مترجعش لدارها..!!
داخلين لعش زوجيتهم بزوج تيتنهدو بعد يوم طوييل و مفوج دوزاتو مع ماماها و العائلة و حتى صفاء فوجات عليهم ببعض فلاشاتها مع خولة
النهار كولو و هي قامعاها حتى طلعلها الدم و ناضت خرجات بلا متشوف وراها
عماد شاف فيها و عينيه فواحد القنت فالدار:شبانلك نبدلو بلاصة التلفزة نجيبوها لداك القنت حسن؟؟
شافت اميمة فداك القنت:هممممم نديروها!! غدا؟
عماد بنفي:لا دابا نيت بانلي نديرها بلاتي (قرب حيد جوج ڤيزان من داك القنت، رجع جمع الزربية من الأرض هزها .. و قرب الطبلة دالتلفزة كاتتجر .. كانت فيه پلازما ولكن ممعلقاش محطوطة فوق طابلتها اللي زايدة ديكور للدار .. غي قادها بلاصتها دار شاف فأميمة) كي جات هنا
اميمة قربات للفوطوي و طبطبات عليه:واجي قادو مع التلفزة
قرب عماد قلب الفوطوي قابلو مع التلفزة .. ركبو الپريزات و شعلوها
اميمة:التفريجة هنا حسن
عماد:اه تبدلي شوية الديكور
اميمة:دابا خاصنا نفكرو فالمنطقة اللي غانكريو فيها من بعد!!
شاف فيها عماد بجدية:علاش حنا اللي نخويو!! ساكنين هنا من زمان باش نخويوها على قبل خانزة .. لا ماطججتهاش من هاد العمارة مانكونش عماد
أميمة تأفأفات بصوت مسموع:اووووف انا مباغا صداع واش هاد الضغوطات كاملين اللي عشناهم وانا حاملة راه غايموتلي ولدي فكرشي و ساعتها نتا اللي تتحمل المسؤولية، انا باغا غي يتحلو المشاكل نهزو رحيلنا و نمشيو هي بغات تدور بيك ولكن مادات منك لا حق ولا باطل خليها هكاك حيت لا عطيتيها وجه غاتزييييد، عطي لبنادم النخال
صاط أنفاسه بغضب تيتفكر النهار اللي قررات اميمة تواجهو و كيفاش دوات معاه و بغات تبعد منه..!!
داكشي اللي مخليه يتهرب من قول الحقيقة ليها ... مابغاهاش تقطع علاقتهم الزوينة بطريقة قاسية بسباب الماااضي ديالو..!!
عندو يقين ان منال شحالما بغات تفارقهم ولا تعمرلها راسها غايجي النهار اللي تعيا فيه و تغبر من حياتهم حيت تمسكهم ببعض كبير و حبهم أقوى من منال و من غير منال..!!!
لحد الآن مزال ماتصرفش معاها تصرف ماشي هو هداك و لا دارلها شي حاجة فقط على قبل أميمة...!!
الخطرة اللي فاتت هددها بالعصا و ماسمعاتلوش و لكن هاد الخطرة بجرأتها و كلامها مع اميمة زادت عصباتو عليها و باااغي غي يقشعها يگددها و يطججها كيفما خبر اميمة..!!
يوريها يا هو يا هي فديك العمارة و مزاااال يشوف شكون يربح فهاد الاختبار هذا..!!
.
.
.
واقفة قبالت الثلاجة تتشوف فالتحلية اللي غي دخلات للدار دخلات تقادها .. خلاتها تجمد وخرجات لبرا عندو بپيجامة منزلية زويونة .. بانلها جالس كايتفرج و هي تضرب بيدها على الفوطوي جنبه:اسي نوض تقلب على خاتمك نوض
علا فيها عينيه:غايكون غا فالحمام دابا نمشي نشوفو
علات فيه حاجبها و مشات ناحية الحمام بلاااا عگز عليها باغا تشوف هاد الخاتم هذا .. حلات الباب تدور فعينيها على لاڤابو و الدوش مكانش..!!
علات حواجبها بحدة و مشات مباااشرة للبيت ديالهم تتقلب فيه تا هو .. تتقلب و تدور فعينيها فحال المجنونة مخنزرة حتى قشعاته ورا واحد القرعة دالريحة .. هزاتو بالزربة تتشوف فيه و خرجات من البيت لعندو هازاه فيدها
-ها هو جبتو (جلسات جنبه و شدات يده) يلاه لبسو و لا حيدتيه مزاااال عرفتي شغاندييييرلك؟؟ هاد اليد نقطعها كااااملة .. (خنزرات فيه) نتا ديالي و اللي تتجرأ تاخذك مني مغايعجبها حال
تبسم ابتسامة جانبية شد من عندها الخاتم وخشاه فصبعو و لا فيها حاجبه:عاقلة مللي ماكنتيش تتلبسيه قبل الزواج؟؟
عوجات فمها فيه:و قباااااااال الزواج هاديك ماكنتش مرتك نتا دابا راجلي دير عقلك معايا حسنلك حيت لمدرتيهش غانفگسلك عينييييك و هاد العنق نقرطووولك و هاد الرجليين نعلقك منهم و ديييك الفلقة اللي عطيتيني ديك الخطرة لطرمتي غانردهالك تااانا و هااااوذني منك و حضي هاد العويييينات (هزات صباعها ناحية عينيه فاجآته بيهم قرييبة تخشيييهم بضفااارهم وسط دوك العينين عندو حتى بدا تيصرط فريقه بالزز منه بشوووية و تيتنفس بالمهل حاضيها ب بؤبؤ عينيه مصدوم من حماقها هذا..!!)
خلاتو جالس بلاصتو تيستوعب كلامها الجنوني معاه و غيرتها الوحشييييية كذلك، سطاجها هو و ماوصلوش..!!
تتغير بطريقة شاااعلة كثر من القياس و هو ديك الطريقة..!!
عجباته منها..!!
تبسم ابتسامة جانبية عجبو يفقصها و يشوف دوك التعابير من عينيها و ديك الشعلة داخلها..!!
ناضت هي ناحية المطبخ، هزات التحلية اللي وجدات .. كانت دايرة بيض من الشوكولا و مزوقة بطريقة تتسر العين .. هزاتهم مبسمة بخفة و خرجات لعنده دايرة ملامح البرائة فعوينااتها
جلسات جنبه و مداتله واحد البيضة:هاك حلي شوية
شاف فيها معلي حاجبه:؟؟ .. مرة تفگسي العين مرة تجيبيلي نحلي
صفاء:واحلي لا بغيتي، مابغيتيش نتا حر؟؟
صفوان:بانلي دايرالي شي سم هنا واقيلا!!
صفاء بنرفزة:عرفتي شنو انا الحمااارة معذبة و مصاوبالك هادشي اما خليك مصدي اشداك لشي حلاااوة (ناضت باغا تمشي و هو يعطيييها بشحطة لمؤخرتها و جرها من خصرها جلسها فوق حجره)
صفوان صغر فيها عينيه:ياكي!! (جرها من شعرها بالجهد و تكاا على فمها ببوسة قوووية تيدور فراسه معاها فكلا الإتجاهات خلاها تزيير عينيها مغمضاااهم و حاوطاته بواحد اليد من عنقه مغمضة عينيها باستسلام لقبلته اللي كانت بكل ما للكلمة من معنى "جنونية")
تراجع براسه للوراء ببطئ اول ماحس بيها محتاجة تتنفس، حط جبهته على جبهتها ببطئ و همسلها بخفوت:خوك يقدر يبوسك فحال هاكا؟
تزنگات مغمضة عينيها مع عينيه و دوات بنبرة خااافتة بالهدااوة:نتا ماشي خويا
قاص بيده شعرها تيتلمسو بشوووية و بهمس:قوليها لراسك..!!
شافت فيه مبتاسمة و هزات بيضة حطاتهاله ففمه:و هاك تحليي!!
شدها من يدها و غمزها:فمك فيه الحلاوة كولها، هادي متتسوى والو معاه
تبسماتله بخجل و تحنحنات حاضية ديك البيضة اللي غادة لفمو و تتوجد راسها توقف و تهرب، غي حطها بين سنانو عض عليها و هو يخرج عييينيه تيشوف فالبيضة اللي تفقصات وسط فمه و الضحكةةة اللي سمعععع منها
ناضت وقفات تضحك عليه بصوت عااالي:واااا هههههههههههه واااشدلك ليماك باش تتعلم تعاود تنسى خاتمك
شاف فيها مشربن غايتلااح عليها و هي تطيييير ناحية غرفتها .. دخلات و سدات عليها الباب تضحك اما هو فداز للحمام يغسل فمه عاد رجع تيدق عليها و يتحلف
خلاها مزال تضحك عليه و مشا لبيتو يبدل عليه حوايجو اللي توسخو بالبيض .. دارت شافت فمينو اللي تتلعب مع ذيلها و تبسماتلها
-سحابلو دخول الحمام بحال خروجه .. مدام راه دخل للقفص ديالي مايحلمش يخرج منه و هو كايزيگزاگي
،
،
،
دخلات للبيت اللي غاينعسو فيه هي وياه هاد الليلة اللي ختارت ماتمشيش لدارهم باش ترتاح منه و لكن هو مصر يكون فحال ضلها لاصق فيها..!!
مشات ناحية كرسي دواحد الشخص جلسات فوقه مغوبشة و هو تلاح فوق السرير مداهاش فيها و ماحزرهاااش تجي لجنبو تنعس..!!
خلاها على خاطر خاطرها، عرفها من اانوع الكاموني خاصها تتحك و تجرب هاد النعسة فوق داك الكرسي كي غاتجيها عاد تقرر تنعس فوقو
تكات بيدها على خذها تتشوف فالفراغ ساكتة و هو حاضيها بعينيه بشبه ابتسامة .. تيتأمل فيها بشوووية و بهداوة ...
ولا تيتفادى يتحاك معاها باش مايزيدش يغراااق معاها و يعطيها التيقار اللي باغاه منو...!!
منها يزيد يطيسطي حتى احساسه اتجاهها حتى هو واش حب ميتقاضاش ولو شنو مكان ولا غي نزوة كانت دايزة و تعاند معاها لفترة من الزمن و دابا برد عليها..!!
حرك راسه بالنفي اول مراوداته تلك الفكرة اللي ماتقبلهاش، ابدا مايمكنش تكون فتون بالنسبة ليه غي نزوة فايتة .. بالعكس هي ديك اللي كان باغيها من زمااان و مالقاهاش فبزاف دالبنات ..!!
تأفأف بنبرة صوت مسموعة و عض على شفته السفلية بقوةة .. غمض عينيه باش ينعس و هي تتعواج فوق داك الكرسي .. تا كاتديها عينيها و تتكون غاطيح .. كاتشوف فيه و تعاود تجمع رجليها
تسناته يقولها اجي لفوق الفراش و يحزرها ولو مرة وحدة فحياته مكانتش غاترفض طبعا بعدما تديرلو بعض الحواجز بيناتهم ولكن هو ماعياش راسو يديرها..!!
متتهموش لهاد الدرجة و تيقول على راسو تيبغيها..!
أذاها بطريقة عمر شي حد فهاد الدنيا ما اذاها بيها و دابا تيزيييدها اصرار باش تبقى مبعدة منو و تنفرو من حياتها..!!
غمضات عينيها بغضب مربعة يديها لصدرها، بدات تتغفى و تنتاقل لعااالم الأحلااام ...مالت بشوووية لجنبها حتى قفزااات و شهقااات و غوتااات بالجهد .. حسات فحالا كانت غاطيح من شي مرتفع عااالي تخلعات..!!
غي سمع غواتها علا فيها عينيه مخنزر:آسكتينا اسميتك يسمعو غواتك يقولو غا راني بايت تنحرث فيك!! باغا تلصقيلنا الشنعة على خلاها و شي حوا ماحوينا؟؟
خنزرات فيه بقوة:خرااا عقلك فتحتك
اسماعيل:واسكتينا بلا غوات
سلوى:نتا اصلااا الرجلة بزاااف عليك (هزات المخدة اللي كانت معاونة بيها و قربات لفوق الفراش لطخاااتها و ترضخات جنبو) تقربلي ولا تقييسني نغووووت و نقولهم تيغتصبني
مزادش جاوبها .. دار عطاها بضهرو مزير يديه عندو بقوووة .. حس بصدرو سخن مع وذنيه اللي حمارو..!!
عمرو كان يضن غي نعاسها جنبه فوق نفس الفراش غايخليه يتلهف و يتشوق بهاااد الطرييقة باش يقيصها و يتقرب منها..!!
عمرو ضنها فحياتها انه يطرالو فحال هاكا و ها هو طرالو..!!
غزز سنانه بقوووة كايصوط و تمتم بنرفزة و صوت خافت:ماحوينا مانعسنا، غا هاد ولد الحرام اللي ديما شاد معانا الضد قلشلنا...!!! (شاف ناحية البازاگلو مخنزر و زير على شفته السفلية بحدة)
كايدوزو أيام و يجيو أياام فحياتنا، بين العمل و الدراسة و الروتين البيتي و النزاعات بين ابطال قصتنا دوزو تقريبا أسبوع
أسبوع كامل مافيهش شي حاجة اللي مهمة بزاااف، ولكن الحدث الأبرز هي أميمة اللي عاودات فتحات المحل ديالها
هاد الخطرة بلا حفلة افتتاح بدات مباشرة بطلبيات، تتوجد الحلوة و بنات عمتها معاونينها كذلك دايرين جهدهم باش يمشيو المحل على أحسن ما يرام و داكشي اللي كان
تتنقش واحد الحلوة بين يديها .. حطاتها فوق اللاطة كملات السطورة و دخلاتها للفران .. سدات عليها و شافت فشيماء بنت عمتها لوخرى جلسات تترتاح وتفوه
اميمة بابتسامة خفيفة:ههههه عييتي!!
شيماء كتكسل:ريحت الحلوة گهماتني .. بعدا طلي على دوك الشوصون!!
أميمة:واخا
قربات للفران كاتطل عليهم و رجعات لمكانها:يتحمرو شوية مزال و نخرجوهم
خولة جبدات لاطة من الفران و حطاتها تبرد:بعدا شنو عندك دابا، بنت ولا وليد؟
سمعات صوت سلوى:فأنا لافاك و جايالها بالنتيييف و النگير
قهقهات أميمة بخفة:ههههههه نتوما خاطااار، و دابا غاتخرجو بلا خبارهم؟؟
صفاء:مغانقولوش
سلوى:تانا
اميمة:واردو البال
البنات دقة وحدة:كوني هانية
قطعو مع بعضهم و شافت اميمة فيهم تضحك:والله حتى هبيلات
خولة علات فيها حاجبها:هادي مرات صفوان؟
اميمة حركاتلها راسها بالإيجاب:اااه
ومآتلها خولة غي بهداااوة و حنات راسها تتستف واحد الحلوة فالطبسيل و تدور هادشي فعقلها..!!
.
.
.
راكبين فالطوبيس بجوجات تايدويو بصوت خافت
صفاء:دابا انا باغا البحر..!!
سلوى علات كتوفها بعدم اكتراث:نمشيو صافي
صفاء:والمايو؟؟
سلوى علات فيها حاجبها:احاي على المايو!! ناوية تعومي؟؟
صفاء ومآتلها براسها:كاين شي بحر بلا عومان، أصلا غانمشيو غي شوية مانطولوش
سلوى:وانا داك الزبل لا حصلني يقتلني .. راني اليوم مللي شافني تنلبس جايا نلافاك بغا يقجني بالفقصة
صفاء:يمشي يقاود الزامل لاخور، يدو فالعرش
قهقهات سلوى بخفة تتشوف فيها، تنهدات تنهيييدة عميييقة تتفكر فحديثهم هاد الصباح أول مفاقت ناوية تخرج من روتينها و البرود اللي اكتسى حياااتها من اللي رجعو فصباح نهار السبت اللي فات لدارهم..!!
الهضرة قليلة مباغيش يتقربلها و يتلقى الرفض منها من جديد، كلماتها مزالين واحلين فذماغه تيتراقصو رقصات عنيييفة قااسية..!!
الماكلة متياكلش معاها و الجلاس كذلك و حتى النعاس..!!
السيمانة الفايتة كولها و هو تيقلب على خدمة جديدة النهار كااامل تيجي تا نالليل نيشان لبيتو ينعس و ينوض الصباح ثاني..!!
سيمانة دازت عادية تا لصباحها هذا مللي شافها قبالت المراية تتوجد فراسها..!!
اسماعيل قرب عندها مخرج عينيه، غي شافته قربلها بزيااادة تراجعات للوراء تا شدات فالحيط وراها .. قلبها تيضرب بخوووف من قربه منها .. تتعطي للتسنطيح قتلة و لكن غي تيبغي يقرب جنبها تتخاااف .. عنداك يشدها و يعاودلها ماطرا بيناتهم داك النهار..!!
شاف تصرفها و هو يوقف مكااانه تيغزز حنكه من لداخل بسنانه حتى تدمى ليه:الخرااااا واش باغا تجهليييينييي!! علاش انا فاش تزوجتك دويتيلي على هاد القراااية؟؟ كنتي تتجااوبيني على اتصالاتي باش تعرفي موقفي من هاد الزعتر؟؟
سلوى بنرفزة:مغاتقدرش تمنعني على قرايتي
اسماعيل بغضب:شوفي ديك القراية فديك لافاك بالضبببط هي اللي غاتنسااايها تا للعام الجاااي و ديري شي مدرسة أخرى .. تبقاي غادة جايا قدام داك الزامل ، راني مزااال مانسيتلوش لا هو لا رباعتو شنو دارو و مزااال حسابهم ثقيييل
سلوى بنبرة خافتة .. ماعندها جهد للتجابيه و كثرة الصداع:وراه امتحانات عندي بغيت ندوزهم غي هوما من بعد نجلس غا تهنى، أهم حاجة مانضيعش العام هكا!!
اسماعيل طول فيها الشوفة معلي حاجبه بحدة:امتحانات!! عرفتي شنوو غاتعطيني الوقت دهاد الإمتحانات فوقاش و غانديك و نجيبك بيدي
سلوى زيرااات على قبضة يدها بقوة بالسيف باش كتمات عصبيتها:اليوم عندي امتحان شفوي
علا فيها حاجبه:و باش غانتأكد انا؟؟؟
سلوى بغضب:تأكد ولا لااا انا ماشي سوووقي، اهم حاجة غانمشي و بالززز منك (قالتها و تكمشات خايفة لا يصرفقها)
اسماعيل طول الشوفة فيها بحدة، عض على شفته السفلية تيسوووط و يفكر و يعاود .. فكر يتعامل معاها بالسياسة و التي هي أحسن لا علّى و عسى تدير معاه عقلها، متبقاش مغانة معاه
صاط بقوة و غضب و دار هز سوارتو:زيدي قدامي نوصلك
شافت فيه تتنفس بالجهد و تدور فعينيها .. هزات صاكها بالزربة كانت موجداه و مشات وراه و هو نازل لتحت
اسماعيل:نشم ريحة انك دويتي معاه (علا فيها عينيه عاقد حواجبو) غاتكون ليا معاك هضرة اخرى و غاتشوفي اللي عمرك ماشفتيه
خرجو بزوج للزنقة و هي غي مغوبشة .. بغا يركب فالموطور و هو يسمع تليفونه تيصوني .. غي هزو شاف الرقم اللي ممسجلوش عنده ولكنه حااافضه عن ظهر قلب من كثرة اتصالاته ليه فالفترة الأخيرة .. عقد حواجبه بقوووة و ردو لجيبو .. هز الكاسك مدولها و نطق بجدية
اسماعيل:طلعي
تنفسات بقووة تتشوف فجنابها .. طلعات وراه بعدما دارت الكاسك فراسها .. حطات يديها على ضهره بشوووية، غا حطاااتهم جرهوملها كثر و دورهم على خصره
خلاها تزييير عليه و انطالق فطريييقه بسرررعة، غي زاد فسرعته زيرااات عليييه بدووون ماتحس حاسة بقلبها تيترعد و هو صايگ مخنزر محاملهاش تمشي لديك الجامعة المنحوسة...
🔚🔚🔚
وقف بيهم الطوبيس فواحد الشارع .. نزلو بزوج و شدو فبعضياتهم غادييات بزوجات تيضحكو و يدويو بالجهد
صفاء:وراه فقصني اويلي ههههههه السيد حاضيلي حوايجي و لباسي وكولشي
سلوى بتسائل:و دابا راكم متفاهمين؟
صفاء:لا لا السيمانة دوزناها مزيان، تندويو و نضحكو وانا بعض المرات تنعطيه شي قمعة ولا شي بلان من بلاناتي راكي عارفة هههههه
سلوى ضحكات ضحكة خفيفة:نتي هبيلة و اللي غايعيش معام غاتصطيه
تمشاو لمدة ماطويلاش .. وصلو للبحر .. بقاو تيشوفو فيه من على برا مبتاااسمااات .. الدنيا مكانتش عامرة بزاف حيت العشية قربات و الناس عامو و غاديين فحالهم .. نزلو للرملة تيتزافطو و يضحكو بيناتهم
صفاء بصوت عالي:ايوا شبانلك دابا اللي سبقات فينا للما زوينة و كاتحمق واللي لا خااايبة ههههههههه
غي قالت كلامها بدات تتجري و تضحك .. سلوى غا شافتها طلقات رحليها معاها تتجرييي و تجررر فيها من حوااايجها تا كطيحها و تكمل هي و مع الرملة الجرية صعييبة، تا صفاء مكاتستسلمش ناضت طااايرة تابعاها كي الزاااواااق .. دفعااتها بالجهددد تا طاااحت على ركاااابيها وقفات ثاني تضحككك و مشاات تابعااها كاطير .. وصلو للبحررر قد قد مع الوصلة تلاحو على بعضياتهم تعانقو كاينقزووو و يقهقهو بصوت عاااالي فحال شي برهوشات
بداو تيضحكو و يتملغو و يعومو مع بعض .. تا شبعو عاد خرجو .. خداو من عند ديك المرا حاجياتهم و غاديات تيتزقرمو بالبرد فزگو و حوايجهم لصقو عليهم .. مشاو لواحد القنت بعيد على الناس و خاوي .. فيه الشمس بغاو ينشفو .. غا وقفو فيه تسلطو عليهم جوج دراري من حيث لا يدرون...
وقفو فبلاصة تحت الشمس باغيين ينشفو شوية .. ماحسو غا بزوج دراري وقفو عليهم من حيت لا يدرون
شافو فبعضياتهم مخنزرات و بلا مايدويو بعدو من جنبهم و وقفو فقنت آخر، بغاو غي ينشفو شوية و يخرجو يرجعو فحالهم
غا بعدو عاودو قربولهم دوك الزوج تيطلعو و ينزلو فيهم
-مالكم معفرات علينا
-الغزالة نتي متعطيناش النمرة
صفاء خنزرات فيييه:آااااخر واحد قالي هاد الهضرة تنعقل على راسي سلختو..!!
علا فيها حاجبه و نغز صاحبه:الدريات صعاااب اخويا ولاو يسلخو ههههه
صاحبو ضحك معاه و بزوجهم من نظراتهم تيجيبو الشك واش معولين لشي خزيت
سلوى شدات فيها:زيدي فحالنا دابا، هادو مناويينش على نية زينة
صفاء بعناد:ينويو ولا لا الزوامل نقرط بوهم
سلوى:اصاحبتي ماخصنا بو مشاكل زيييديييي
-هههههههه سخيتو بينا تمشيو؟؟
علات صفاء عينيها فيه، مع علاتهم مع شهقات و صرطات ريقها بصعووووبة و بالمهل تتشوف فيديه هاز فيها موس، شدات فسلوى تتنفس بصعوووبة و كايدورو فعينيهم .. يلاه بغاو يمشيو من الطريق لوخرى و هو يجي صاحبو لاخر حبسهم تا هو عندو موس
البلاصة اللي وقفو فيها خاوية شوية و الناس بعاد حد مشافهم، زيرو على يدين بعضياااتهم بقوووة كايتهامسو
سلوى بخوف:صفاااء، عتقيي
صفاء تتصرط فريقها و تدور فعويناتها:ش شنو دابا نديرو (علات صوتها ملينة نبرتها) اخوويا حسبنا حواتاتك و....
قاطعها واحد منهم:خواتاتي فالدار جالسات ماشي فحالكم نتوما
سلوى بخوف:انننننن ديري شي حاجة
صفاء بانفعال:شغاندير و هاد الزبل عندو مووووس (شافت فيه عاقدة حواجبها) واش نتوما ماعندكمش العقل .. هادشي راه تتحاسبو معاه فالبوليس
ضحكو بزوووج تيتغامزو بيناتهم:واتاتخرجو مقادات من هنا عاد قولو بوليس هههههههه
شافو فبعضياتهم و تكرشخو بالضحك، البنات شافو فبعضياتهم ريقهم شاحف .. سلوى حاضية مع داك اللي من جيهتها .. بانلها مامركزش معاها نييشان .. دارت عندووو نييييشاان دفعااته حتى طااااح فالرملة و جرااات صفاء من يدددها .. مشااااو تيييجريييو تيقربو للناااس و البلاصة اللي عااامرة و دوووك الزوج تابعييينهم تايتغااوتو
-شددد القحبة شدهااا
-جرهااا من داك الشعر
سلوى تتغوووت و تجرييي:واااااع وااجريييي
صفاء تتشوف وراها و ترجع تشوف فالطريق عينيها خارجين:اييييي افففف عييييت
طاحت معكلة فالرملة، شافت لوراها مع الشوفة مع تلاااح عليها واحد منهم عطااااها تصرفيييقة قااااصحة تا حسات بحنكها تنمللل .. علااا يدووو بالموووس تاا علاااها و نزل بيها عليها
بدون قيود الجزء 14
محتوى القصة
التنقل بين الأجزاء