خبط الباب برجليه حتى تفرع و دخل كيقلب عليه مالقاهش ولى فحال شي مجنون لي جات قدامو كيلوحها قلب البيرو بكلشي ليه و هبط لتحت كيدور حدا هارون كيف الحنش المقطوع راسو يديه كيرجفو و شنايفو كيترعدو هز ديكور بالحديد على شكل پيسطولي و صيفطو ديريكت لسور دزاج لي قبالتو حتا تشتت و هبط كلو فالأرض ..
هارون مافهمش مالو و لكن ديك الحالة لي كان فيها ديال ان شي حاجة جهلاتو بالمعقول هو ماكينوضش و يتعصب بحال هاكا و فاش كيتعصب مكيبينش من طبعو كيعتمد البرود دائما ..
ناض بشوية شاد صدرو و دار إشارة لحنان باش تطلع الفوق حتا هي معاوداتهاش معاه طارت بلا ما تشوف وراها و خوفها أوس وهو فديك الحالة طلعت بسرعة عند فريال لقاتها مكمشة فبلاصتها شادة ظهرها و كتبكي ..
حنان : نوضي لديلمك أوس جن جنونو الڤيلا كاملة دگدگها اجي نتي مالك هاكا كتعواجي؟! ..
فريال : ( كابرت ووقفت بصعوبة ) قودتها قودتها انا واحد القحبة مني ما كان ..
حنان : تي اش درتي المسخوطة ؟!..
نورة : ( دخلت على غفلة حتى هي شادة قلبها و كتنهج ) اش واقع اويلي هذا مالو ..
خرجت فريال كتجري فين ما دازت كتلقى شي حاجة مهرسة حتا وصلت لتحت فين بان ليها سور د الزاج كلو مهرس ركابيها فشلو عليها و جلست فوق الدرجة شادة راسها كتخمم للموصيبة لي جاياها ..
هارون دخل كيعكز لقاها جالسة فوق الدرج قرب عندها و طبطب على ظهرها...
نورة : علاش غتسكت خليها تدوي !! علاش غتتنازلي واش يحساب ليك حنا ناعسين على وذنينا ماباغاش تقولي و لكن حنا را فاهمين ..
حنان : نتي مانقصكش ضغط نفسي ا فريال اوكي هذا هو مكتوبنا و ماعندنا مانديرو و لكن ماشي حيت غنبقاو محبوسين هنا غتولي قحبة ديالهم كل واحد يخبش فيك من جهة كاپو و لا أوس و لا زبي جمعي كرك و قلبي على الخرا كامل ..
دخلو بنيامين و فيروز شابكين فيدين بعضياتهم تسمع اقتراب خطاهم عن طريق داك الصوت المزعج إثر ضغطهم على الزجاج لي فالأرض كيوزعو نظرات الصدمة فكل مكان ..
بنيامين : اش واقع هنا؟! ..
فيروز : داز شي إعصار و لا شنو ؟! ..
هارون : نو نو ماتخافوش داز غير أوس ..
حنان : ( جاب ليها الضحكة و حبستها كتشوف الجدية فوجوه الكل ) حتا فهاد المواقف كتطنز على عباد الله ..
بنيامين : أوس مالو؟! ..
فريال : ( طلعت ختها و هبطتها بطريقة غريبة ) نتي مالك؟! ..
فيروز : ما مالي والو !! ..
فريال : ( ضربت على يديها بانت ليها شي حاجة كتلمع ) شنو داكشي لي فيديك ؟!..
فيروز : ( خبات يديها و حركت راسها بلا ) والو !! ..
بنيامين : ( استغرب علاش فيروز مابغاتش تقولها و نطقها هو مخلي الجميع مذهولين ) تزوجنا ..
حنان : شنو ؟! اويلي كيفاش درتيها ..
فريال : ( قربت عندها بهدوووء شديد و تأهب ) شنو درتيي ؟! ..
فيروز : سمعيني بعدا أنا ...
فريال : شنوووو درررتيييييي ؟! ..
فيروز : ( تنهدت باستسلام ) تزوجن...
قبل ما تكملها تلاحت عليها فريال بواحد النتفة و بقات كتعطيها غير فالتصرفيق و كدخل ليها فالكروشيات بردت فيها العصاب لي فيها كامل و جمعت ليها البالي و الجديد .. بنيامين كيحاول يفكها وتقول بغات تطلق منها و هارون مريض و كيجر فيها من لور حتا كتبغي تبعد و ترجع تجرها عاود .. البنات بقاو غير كيتفرجو بلا ما يحركو ساكن ..
بنيامين : ( دفع فريال حتا طاحت فالأرض و خشى فيروز فحضنو ) آخررر مرة تقيسيها كتسمعي ؟! ..
فريال : و الى قستها آش غدير بالسلامة ؟! ..
بنيامين : داكشي لي غنديرو احسن ليك ماتعرفيهش من اليوم لي ما احتارمش مراتي ماغنعقلش عليه ..
هارون : بنيامين من الأحسن ماتتدخلش هما اخوات بينات...
حنان : ( حبساتو و قربت عندو ) لا لا بلاتي بلاتي شكون نتا اصلا اشرييف؟! الى كنتي نتا راجلها هي را ختها قبل ما تكون و بعدا نتا ماخاصكش تدوي بالمرة ملي عارف راسك غدي تتزوج بيها علاش درتي فينا و فوالدينا هاد الحالة ولينا عايشين كل نهار مسلسل جديد كنتي تديها هي و سدينا ..
نورة : سكتي ا حنان !! مبروك عليكم ربحو ببعضياتكم و نتي نهار لي تجي تدويني غنتفاهم معاك ..
طلعت نورة و تبعتها حنان بعد ما ضربت تخنزيرات ففيروز و جرت فريال عطاتها هاذ الأخيرة للبكا و النحيط و بنيامين كيسكت فيها خلاهم هارون و طلع لبيتو ينعس ..
دخل الكاپو على غفلة قشعاتو فيروز وزولات الخاتم دارتو فجيبها مسحت دموعها بسرعة و هزت راسها باش يعيق بنيامين ..
الكاپو : اش واقع هنا ؟! ..
بنيامين : مافهمتش أوس لي دار هادشي ماعرفتش علاش ..
الكاپو : ( ابتسم بخبث و مشى جلس حط رجل على رجل ) إذن ملي مالقانيش برد أعصابو فالأثاث..
من مورا هاد الجملة دخل أوس بحال شي عجاجة عينيه كأنهم اضرمو فيهم النار قصدو حافر الأرض برجليه و شدو من الكول وقفو و قادو معاه مزيان عطاه كروشي و رجع هزو و عاودو الثاني و الثالت الكاپو حتا هو مكانش من العاگزين رجع ليه الضربات و بقاو دقة فيا دقة فيك حتا فكهم بنيامين ..
أوس : غنحذرك لآخر مرة خليها عيك فالتيقار ..
الكاپو : مستحيييييييل !! ..
أوس : ( بغا يرجع ليه و حبسو بنيامين ) غنقتلكككك !! ..
الكاپو : هي عارفة شكوون باغا نتا لي كتضغط عليها !! رولاكس خلي الأمور تمشي كيفما هي ..
أوس : ( هز حديدة و لاحها عليه ) الى ماسكتش غنقسم عدو ربو اشمن اموور غتمشي اولد القحبة ؟! هي ماباغاكش ..
الكاپو : ( هز حاجبو بتحدي ) خليها هي تقول هادشي !! نسولوها ؟! ..
أوس : ( هز راسو حتا هو و هز صبعو عطا إشارة للگارد ) سيير كلم ليا فريال..
وقفو كيشوفو فبعضياتهم حتا بدات جاية و معاها البنات كترمش فعينيها و يديها كيغزلو وقفت فجنبو خايفة و هز ليها هو راسها بشوية كيمقلها بنظرات حاملة فطياتها بزاف الأحاسيس كأنه كيطمئنها انها معاه و ماغيقدر حتا حد يقرب ليها ..
الكاپو : ( كان ثايق فراسو و عارف انه خلعها مزيان ابتسم و نطق بصوت مرتفع ) واش أوس كيضغط عليك ولا لا ؟! ماعندك مناش تخافي!! قولي ليهم داكشي لي قلتي ليا ..
أوس ماكانش مسوق لداكشي لي كيقول الكاپو كيشوف غير فعينيها و كيحرك راسو بمعنى دوي .. عرفها خايفها لاحظ هادشي من بؤبؤ عينيها لي كتحرك بزاف و يديها لي كيرجفو فريال حست بالحرارة طالعة معاها ..
حنان بحال الى حست بيها بغات بأي طريقة تنقدها من داك الموقف شافت فنورة و حتا هي فهمت زيرت على عينيها مستصعباها و رجعت هزت راسها بموافقة ..
فريال غير سمعتها طلقت من يد أوس و بدات كتحرك راسها بلا و كتبعد عليه جات فيروز بالزربة شداتها و عنقتها و هي تدفعها بقوة عليها و طاحت فالأرض شادة عنقها و ماقادراش تتنفس ، بدات كتضرب فالأرض و تنتف فراسها ..
أوس : ( قرب عندها و شاف فحنان ) اش قلتي ليها ..
الكاپو : ( حتا هو شدها من يديها ) بنيامين عيط للاومبيلونص ..
فريال : ( حطت يديها على صدرها كتطلع النفس بصعوبة ) خرجوني خرجوني حلو الباب حلو هاد الخرا ديال الباااااااااب..
حنان : ( قربت ليها و بعدتهم بزوج شدت ليها يديها و عنقتها كتهمس فوذنيها) ششششششت تهدني حنا خرجنا تحل الباب و رجعنا للدار ..
نورة : تفكري ا فريال راه رجعنا داك النهار ..
فيروز :(ولات كلها كترعد خايفة على ختها ) تحل الباب تحل صافي صافي قولو ليها تفيق ..
فريال بقات على نفس حالها حتا غيبت حنان تخلعت هاد المرة و تنادم معاها الحال علاش فكرتها فداك النهار و نورة جاتها البكية هزها أوس بين يديه و خرج داها كيجري بيها حطها لور و ركب حتا هو انطلق مخلي غير الغبار وراه ..
فيروز : ( دارت لحنان و نفضتها من يديها ) واااش نتي حمقة ولا شنووو؟! كيحرقك فمك علاش فكرتيها فداكشي...
نورة : صافيي راه حتا هي ندمانة ماكتشوفيش حالتها ..
فيروز : نتي ديها فراسك مكندويييش معاك ..
نورة : وا سيريي تقودي ماعرفت شكون لي مخاصوش يدوي مع لاخر ..
الكاپو : ( جبد سلاحو و ضرب قرطاسة فالسقف ) برااااكة من النگييير طلعو تقودو لي عندها شي بيييت تمشي ليه يالاه ..
حلت عينيها فغرفة فاضية كتتكون من سرير هي ملقاة عليه و جهاز صغير كيقيس معدل نبضات القلب و حداه سيروم معلقينو ليها و تلفاز صغير قبالتها استوعبت شنو وقع بعد ما انتهت من اكتشاف الغرفة و ناضت بشوية، قفزت فاش حست بقلبها فيه نغزة غريبة كملت دافعة معاها داك السيروم و حطت وذنيها على الباب فاش سمعت صوتو..
أوس : شنو وقع ليها بالضبط ؟! ..
الطبيبة : انخفض معدل خفقان قلبها كان من الممكن انها يوقف بغيت نعرف شنو وقع ليها قبل ما تجيبها ..
أوس : ماعرفتش كانت مخلوعة بزاف و ماقادراش تتنفس ..
الطبيبة : عندها شي رهاب ؟! ..
أوس : ( سكت لبرهة و تفكر نهار الاوطيل ) اه يمكن عندها كلاوستروفوبيا ( رهاب الأماكن الضيقة و المغلقة )..
الطبيبة : شكون كان ساد عليها؟! ..
أوس : ماكناش فبلاصة مسدودة ..
الطبيبة : ممكن تكون تفكرت شي حاجة من الماضي حاول فاش تفيق ماتسولهاش و ديها فأقرب وقت عند طبيب نفساني ..
فريال هزت راسها على الباب و توجهت للسرجم حلاتو و تنفست بعمق حل هو الباب و دخل لقاها عاطياه بالظهر قرب ليها ببطئ و حاوط خصرها بيديه بزوج خشا راسو وسط شعرها كيشبع كيانو بعطرها وورك على سرتها بقوة حتا تأوهت ..
أوس : ( زير على شعرها و قلبها لعندو بسرعة ) علاش ما دويتيش ؟! ..
فريال : ( عصرت عينيها بألم و حطت يديها على قبضتو كتحس بشعرها غيطير ) كنت غندوي ..
هز فيها عينيه بواحد الشوفات كون كانو قرطاس كون قتلوها و ضربها بظهر بدو حتا تلاحت رجع جرها من شعرها و سطح ليها راسها مع السور ..
أوس : هاد الهضرة كوليها انا غنعرف بطريقتي ( و شد فكها بقوة كينشر فيها الرعب بغضبو لي كتخليه يبان ضحل و لئيم ) و آاااخرررر مرة تهزي يديك عليا نقطعهم ليك ..
لمس أديمها بكفوفو و أنفاسو الساخنة كيلهبو فبشرتها غمض عينيه بندم و تقلب 180 درجة كان كيبان مهدن و ساكن بزاف عكس الداخل فحال شي لهيب جهنمي كيفترس فأعصابو ..
رمشت فيه عينيها بأهدابها الطويلة و زرقتها اللامعة و فمها المرتجف كيرسل أنفاس محترقة تنم عن ما بداخلها و التوتر لي كيحكمها و هو قربها فشل جسمها مع ارتعاشة غريبة إثر تلك النظرات الذبلانة لي كيرمي ليها ..
رجع شعرها لور و طبع قبلة ساخنة على رقبتها تلونو خذوذها بخجل و بغات تبعد عليه رجع قربها اكثر و حط شفايفو على شفايفها الجافين و بعد عليها باغي يشوف ردة فعلها رجعت للخلف مع انتفاضة متشنجة و مع كل خطوة كتسحبها كيتقدم هو باتجاهها ..
زدحها مع الباب و شرع فتقبيلها بتملك ماكانتش قادرة تبعدو عليها حيت فعلا حست بشعور غريب اتجاهو عكس الكاپو لي كل ما قرب ليها كتعيفو .. هذا لا !! كانت كتلذذ بكل قبلة كيقدمها ليها و جسدها كيرتجف بين يديه فركت شفايفها محاولة ان تفرج عنهما قليلا و تستجمع أنفاسها..
حط جبينو على جبينها مع مداعبات جريئة تحت التيشورت كيتنشق عبق رائحتها مزيج بين الياسمين و رائحة العود الرائعة ، لالة فريال ولات كتتلوى بين يديه مابقاتش قادرة تصبر عرف يلعب بيها مزيان حتا لقى جميع نقاط ضعفها هزها بين يديه بسرعة و لوات رجليها على خصرو متجاوبة معاه ..
حلت الممرضة الباب مابغاش يتفتح ليها و كتسمع شي حاجة كتخبط فيه من الداخل .. فريال غير سمعت الپوانيي ديال الباب كيتحرك نقزت للأرض و مشات جلست فوق الكامة ..
دخلت الممرضة كتفرق نظراتها عليهم أوس خشا يديه فجيبو و بقا كيخنزر فيها حرماتها عليه 😂 و فريال ماكرهتش الأرض تنشق و تبلعها .. رتبت هاد الأخيرة خصلات شعرها بعدما لاحظت تحديق الاخرى و ناضت قصداتو ..
فريال : بغيت نمشي فحالي !! ..
أوس : غنمشيو أصلا .. ( قرب و خدا من الممرضة الورقة) غنخرجو دابا ..
الممرضة : اوكي..
خرجو ركبو فلوطوو رجعو للڤيلا لقاو كلشي جالس كيتسنى فيهم ناضو البنات بسرعة دارو بيها و لكن ما بغات تهضر مع حتا وحدة طلعت نيشان لبيتها دخلت دوشت و تلاحت كتفكر فداكشي لي دارت حتا غفات و داتها نعسة ..
وصل وقت العشا و مكانت واكلة حتا حاجة من صباح دخلو عندها البنات باش يفيقوها مالقاوهاش فبلاصتها فجأة خرجت من الدريسينغ..
لابسة سروال سيرڤيت واسع مي بارز طرماحتها مع ميني ڤونتخ فالبيج و من الفوق كاپ دالصوف فنفس اللون جامعة شعرها كوپ شوڤال الفوق و حاطة ميك أپ خفيف مجبدة عينيها اكثر ما هما مجبدين و گلوز تخونسپاغون على شفايفها ..
رمقوها البنات باستغراب هي آخر وحدة توقعوها تنوض تحلق على حالتها سيغتو فنهار بحال هذا سدو الباب و تستفو وحدة مور التالية كيسكانيو فيها ..
فيروز : أ ياك لاباس الحاجة فضيلة ؟! اش با يجيك حتا درتي فراسك هاذ الحالة ؟! ..
فريال : ( قبطت فدراعها و بدات خارجة ) لا ماغنتقلق ما والو غير يالاه نهبطو ..
تركبو رباعة الحمقات مع الدروج حتا لتحت ضحكهم سابقهم قبل لا يوصلو شدو بلايصهم فالطبلة كان غير فران لي جالس شافتو نورة وجهها تخطف منو اللون ماعرفت ترجع و لا تكمل..
جلست حداه ابتسمت ليه و هو غير ساهي فيها يومين ماشافهاش هو متأكد ماكيبغبهاش و لكن علاش حس داك الاحساس بحال الى توحشها و قلبو تسارعو دقاتو كل ما قربت حداه تلف و غمض عينو كيحاول يهدن راسو و يوهم عقلو بلي الرجفة لي كيحس بيها عادية ..
فران : ( سكت شحال كيفكر و رجع قرب و همس ليها فوذنها ) خاصنا نهضرو فشي حاجة مهمة ..
نورة : ( سرطت ريقها بصعوبة و رمشت عينيها فيه هي الاخرى انتقلت ليها الصعقة الكهربائية ) همم؟! ..
فران : فاش نساليو العشا سيري لبيتك غنجي عندك ..
نورة : واخا ..
جاو البقية اجتمعوا فوق الطبلة عاد شرفنا أستاذ أوس داير يديه فجيابو و كيبقشش فالتيليفون الهزة لي غيهز عينيه غتبان ليه هي من غيرهم كاملين ماشعرش على راسو حتا قصدها نيشان و جلس حداها هي كانت قشعاتو قبل ما يسبقها و سدت ذاك الكاپ باش ما يجعرش عليها..
جر الكرسي و تحدر حتا لعندها ضرب أنفاسو فعنقها عاد جلس غمضت هي عينيها و بورش لحمها دوزت يديها على عنقها فاش حست بالصهضة طلعت معاها و جغمت شوية من كاس الما لي قدامها ..
استغل هو انشغال الكل بأحاديثهم التافهة و شد يديها بقوة قربها لعندو و نطق فمسامعهاا..
أوس : من بعد و نتفاهم معاك على هادشي لي لابسة تحت من هذا ..
فريال : ( تصمرت فبلاصتها موسعة عينيها ) اويلي حي أعوذ بكلمات الله التامات من شر ما خلق واش نتا جنون ولا اش بغيتي تكون ؟! ..
أوس : اه و غنسكنك ان شاء الله لا ما سمعتيش الكلام ..
فريال : وا صافي رخي من يدي راه وعتيييييني ..
دخل الكاپو على غفلة و عم الصمت أرجاء المكان تقدم معرض على كتافو بنظرات واثقة و عيونو كتتسارا بينهم .. جر كرسيه و جلس على رأس الطاولة كان كيهز راسو كيلقى أوس فالجهة المقابلة هاد المرة مكانش..
حول عينيه لقاهم بزوج حدا بعضياتهم كيمقلو فيه ببرود ماكرهش يقلب عليهم داك العشا كامل و لكن تحكم فأعصابو عطاهم لاوطوغيزاسيو و بداو ياكلو .. حنان كتكركر هي و هارون مامسوقينش لآش واقع و فيروز خايفة الكاپو يكون شك فيهم و يمشي يدير ليهم شي حاجة ماعيقاش بلي عقلو كان مع فريال فديك اللحظة ..
الكاپو : ( نطق و هو مدابز مع الموس و الفوغشيط كيبرد فداك الستيك الفقصة ) فران فين كنتي هاد اليومين ؟! البارح ما بتتيش هنا ..
فيروز : هذا مالو داير بحال العگوزة اتفوووو ..
الكاپو : عفوااا !! ..
فيروز : ( لاحت ليه ابتسامة باهتة ) لا والو !! ..
فران : كانت عندي شي خدمة خاصة كان خاصني نقضيها ..
الكاپو : كنظن ماغتخبيش علينا هاد الخدمة الخاصة اولا انا غالط ؟! ..
فْرَان : ( ابتسم ابتسامة خفيفة كيدرق بيها ما تبقى من صبرو ) لا بلاش !! ..
الكاپو : فييييييييين كنتييي نتا و هاد القحبة( جبد سلاحو و مشى قصدها شدها من شعرها و لصق ظهرها مع صدرو جهز السلاح و حطو على جبينها ) دوييي فين كنتو؟! مثلا غنعطيك توقع ..( عطيو توقعات و ديرو اشهارات حتا نتوما يا الشيخات راكم قهرتوني بنعاسكم 😂) مثلا مثلا مشيتي تزوجتي بهاد القحبة ..
بنيامين حس بقلبو هبط عند رجليه فديك اللحظة على صوت شهقات الكل و صراخ فريال لي تعالى فأرجاء المكان ..
بنيامين : ( حط يد على سلاحو متأهب و يد هزها باش يسني معاه السلام ) ماتخلييش الغضب يتحكم فيييييك ..
دخلت بخطوات بطيئة كل ما كتقرب كيزيد صوت الصراخ فمسامعها قذفت جدائلها الشقراء للخلف ووقفت عند الباب كترمقهم و ملامح بشرتها القمحية كيتحركو بدهشة حركت شنايفها المنفوخين بالبوطوكس و نطقت بصوت مقحبن " حياتي" ..
دارو كلهم متفاجئين ملي سمعو صوتها و زادت علت دهشة وجوههم فاش لمحوها واقفة بشحمها ولحمها .. عمرو الدموع بعينيها و مشات كتجري عنقاتو قدام عيون الكل لوات يديها على عنقو و زيرت عليه بقوة ..
دارو البنات و هارون لي باقي تحت تأثير الصدمة كيرمقو فيها و الكاپو طلق فيروز و جرها بنيامين لعندو، تقدم لعندها بخطوات سريعة و جرها من حضن أوس ضامها لحضنو و كيبوس على راسها ..
إيزابيل : ( شدت أوس من يديه جراتو و هي كتتمشى باتجاه الطبلة ) حتال غذا و نتعرف عليهم.. هارون كيف الأحوال كلشي مزيان؟! ..
فيروز : ( شدت فحنان و حكت شعرها بنرفزة ) ماتشدونيش على هاد القحبة..
حنان : تهدني تهدني ..
هارون : صاڤا الله يحفظك نتي مزيان ؟! !! ..
ايزابيل : ( شافت فأوس و طبعت قبلة على خذو ) دابا و ليت أحسن من الأول ..
فريال و هي كتشوف داك المنظر لي قبالتها يديها ولاو كيرجفو شدتها البكية و ماقدرش تبقى واقفة تما انسحبت بهدوء بلا ما يلاحظوها و طلعت كتجري فالدروج دخلت لبيتها و سدت عليها بالساروت..
انفجرت باكية حاطة يديها على عنقها و كتحاول تطلع النفس و تهبطها بانتظام وسط داك التشتت النفسي لي طاح عليها فجأة بلا سابق انذار حست براسها بحال شي كذبة تخلقت لفترة و اختفت فاش ظهرت الحقيقة على غفلة كانت كتحس بالدنيا كحطام تتناثر أمامها ..
بكااات بكاات من كل قلبها و كل دمعة طاحت من عينيها تعصر معاها ذاك الفؤاذ الللعين نار الغيرة كانت كتحرق فيها بشكل سيء عمرها تخيلت غتوصل لهاد الحالة شي نهار بسبب الحب بل عمرها تخيلت غتبغي شي واحد لهاد الدرجة ..
زولت داك الشريط كانت جامعة بيه شعرها و طاحو خصلاتو منسدلين على وجهها، مسحت دموعها و ناضت لديك المكتبة لي أضافها لغرفتها نظرا لعشقها المفرط للقراءة بدات كطيح فدوك الكتوبة كاملين و كتغوت و كتزعزع فدوك الرفوف..
حتا بان ليها جاي هابط كامل و بعدت باغا تهرب و لكن طاح على رجليها تسمع داك الصوت الصاخب ديال سقوط الرف مع صرختها لي دوت فالڤيلا كاملة ..
سمع صرختها و طار من حداهم بسرعة ماعقلش على راسو كيفاش طلع ذوك الدروج كاملين حتا صدق قدام بيتها بغا يحل الباب لقاه مسدود و كيسمعها مزال كتبكي خبطو بقوة حتا تفرع و دخل لقاها طايحة فالأرض و شادة رجليها ..
أوس : ( قربت حداها بسرعة زول الشعر على وجهها و نطق بصوت رجفان ) فريال مالك؟! شنو كيضرك؟!..
فريال : ( شدت فيه بقوة شانقة عليه و مغمضة عينيها كتحس بألم لا يطاق ) رجلي رجلي تهرست ..
أوس : صافي واخا صبري صبري شوية ..
هزها بين يديه و طار بيها تساطح معاهم جايين مادواش معاهم كمل طريقو بسرعة و هي متشبثة فيه و كتنين بحال شي وحدة كتزحم باغا تولد ركبها فلوطو و ركب حتا هو طاير من تما ..
وصلو لوپيطال بسرعة حطها فوق الباياص و دخلوها كلشي بدا كيجري فاش سمعو سميتو لا من ممرضات و لا أطباء دخلو لعندها كيتسابقو شكون غيداويها الاول بقا هو كيتسنى دازت ساعة عاد خرج عندو الطبيب ..
أوس : مهرسة ؟! ..
الطبيب : لا ا موسيو مالِك غير مفدوعة ماعندنا مناش نخافو ولكن ماخاصهاش تتمشى عليها على الأقل 15 يوم و من بعد ترجع..
أوس : اوكي غندخل نشوفها ..
الطبيب : وي أكييد تفضل ..
أوس حل الباب و دخل كانت مغمضة عينيها كتحس بشوية الراحة فرجليها بعد ما خدروها و لكن قلبها كان مزال شاعلة فيه العافية حست بوجودو فالغرفة و هادشي من ريحتو لي سابقاه تغلغت بين أنفاسها و كابرت مانعة نفسها تضعف ..
أوس : ( جلس حداها و شد يديها بين كفوفو حس بيها ارتعشت و نطق ) كنت باغي نقول ليك كلشي مي ماجاتش الفرصة ..
فريال : ( حلت فيه عينيها، نطقت بعصبية و شفايفها كيرجفو ) مابغيت نسمع حتا حاجة ..
أوس : ماتنسايش شنو قلت ليك ..
فريال : قللتتت مااابغييت نسمع حتا حاجة ( أشارت للباب و يديها كيترعدو ) خرج تقود مابغيتش نشوفك!! ماتقربش ليا ..
رمى ليها نظرات خالية من اي تعبير و زاد خلفة مع الباب بقات بوحدها وسط ديك الغرفة و احتضنت الوسادة كتدمع فعينيها دازو ساعات و مازارش ديك الزرقة البراقة النوم أبدا خداو حمرة خفيفة و مابقاتش كتبان ليها الصورة واضحة عينيها تضببو ..
فريال : ( صرخت مفزوعة مخبعة وجهها ورا يديها ) اعننننن بسم الله الرحمن الرحيم ..
رجعت هزت راسها كتقلب عليه حتا خرج من واحد القنت مظلم كانو كيبانو غير عينيه لي كيعكسو ضوء القمر المتسلل من الشرفة ..
أوس : فين باغا تمشي ؟! مخاصكش تتمشاي عليها ..
فريال : منيييييين دخلتيييي نتا؟! من امتى و نتا هنا؟! ياك قلت ليك غبر ماتبانش قبالتي ..
أوس : ( تحدر لمستواها و دار فيها شي شوفات خلاوها تلبد ) الى سكت ليك شوية ماتعيقيش ..
فريال : عيط على شي وحدة باغا نمشي للحمام ..
هزها بببطئ و داها للحمام وقفها بحذر شديد و نزل ليها السروال على غفلة هي حشمت و زيرت على فخاضها كانو نايضين ليها شي زغيبات مابغاتوش يشوفهم ههخخ جلسها و خرج راد موراه الباب ..
بعد ما خرج أوس بديك السرعة بلا ما يعبرها ذاك المنظر كيفاش كان هاز فريال و هي معنقاه و متشبثة فيه ماتسرطش ليها ولات غير كتحك فنيوفها و كتحاول تصبر راسها، استغلت انشغال الكل بموضوع فريال و خرجت على برا دوزت نمرتها ..
إيزابيل : الو ..
... : الو حبيبة وصلتي بيخير؟! ..
إيزابيل: اه وصلت غنحماق ماقادراش نتحمل!! ..
... : شنو واقع؟! اصلا هاد المشية لي درتي على غفلة جاتني غريبة مادخلتش ليا لراسي ..
إيزابيل: غير سكتي جيت فوقتي كون مشا خويا للمكسيك و عرفني مكايناش تما كان غيكويني ..
... : شنو واقع تما؟! ديك القحبة لقيتيها ..
إيزابيل : فاش شافتني معاه ماقدرتش تصبر و مشات دارت براسها مهرسة خلاني و مشى داها لسبيطار غدي نقتلهم بزووووج كون تشوفي شحال كانو قراب لبعضياتهم .. مخاسوش يخليني خاسو يكون معايا انا ..
... : تهدني ا صحبتي و ديري شوية قيمة لراسك من شحال هذا و نتي تابعاه خليه هو يتبعك شوية .. انا غنجي عندك و نشوفو شي طريقة كيفاش نفرقو بيناتهم ..
إيزابيل :أوس تبدل بزاااف حتا نظراتو ليا تبدلو مابقاش كيف كان ماهتمش لوجودي نهائيا حسيت بيه بالو مع شي حاجة اخرى ..
... : صافي سيري ضربي ليك شي سطير تهدني انا غنسالي مع الكليان ديالي شي سيمانة و نلحق عليك..
إيزابيل : اوكي تشاو ..
... : تشاو ..
الداخل كانو البنات كيخمموا ففريال و كيتحدثو بيناتهم حتى بانت ليهم داخلة كتلوز فطرمتها رجعت شعرها لور و قربت عندهم جبدت گارو شعلاتو سفت منو شوية و ساطت فالهوى كطلع و تهبط فيهم..
فيروز : ختي هي فريال لي ذاها أوس ( دارت ليها إشارة بيديها بحال الى كتلعب بشي بيبي صغير ) بين يديه ..
إيزابيل : اجي واش خويا كيبغي فريال؟! ننووو واااي ماتقوليهاش ( قربت و طبعت قبلة على خذها ) شكرا على المعلومة ..
فيروز : ( مسحت مكان القبلة بيديها وظغطت عليه بقرف ) و لكن ماتفرحييش بزاف ..
إليزابيل : ( دوزت كوعها تحت من مناخرها و نطقت ) كيفاش؟! علاش ؟! اش بغيتي تقصدي؟! ..
بنيامين : ( وقف من بعيد كاره داك الحديث لي داير بيناتهم واخا معارفش موضوعو ) فيروووووز !! اجي هنا ..
فيروز : ( وقفت و قربت عندها كتشوف فعينيها بنظرات ثاقبة ) شوفي غنقوليك زوج كلمات ديريهم حلقة فوذنيك ماشي حيت نتي هي خت الكاپو غدي تفرعني علينا هنا غتجمعي كرك معانا و غتهبطي كواريك مزيان و لا غنهبطهم ليك انا .. و يااا وييييييلك يسخن علييييييك راااااااااسك و تقربييييي لختي و لا ديري ليها شي حاجة ( دوزت ابهامها على عنقها بتهديد ) نقتللللكككك و نشرب من دمك سمعتيييي؟! إلا ختييييي و دابا پاغدون راجلي كيعيط ليا ..
حنان : ( تبعت فيروز بعينيها حتا مشات و ناضت حتا هي وقفت قبالتها ) يااا ويلك يسخن عليك راسك من الأحسن خليه ديما بارد ..
نورة : ( خلات حنان حتى تنحات جانبا و دارت ليها نفس الاشارة لي دارت فيروز و رجعت شافت فيها كتحقق فملامحها ) دابا عاد عرفت علاش كيقولو كاين الطون و كاين إيزابيل .. غير هو سؤال واحد واش نتي زيت و لا مطيشة؟! انا كتعجبني مطيشة ..
حنان : ( تكرشخت بالضحك و جرتها ) زيدي كون فهماتك كون عواجت هههههههه ..
صبح صباح جديد هبطو البنات بعدما دوشو و وجدو راسهم .. لتحت فين كانت الموسيقى عالية و بنات كيقادو فالماطيريال ديالهم فالبهو بحال الى جايين من مركز التجميل ، فيروز قصدت وحدة فالخدامات تسولها ..
فيروز : اجي شكون هادو ؟! ..
خ.م : هادو جاو من الأوفيس الالة على قبل مادموزيل اليزابيث ..
فيروز : اشمن اوفيس ؟! ..
خ.م : اوفيس ديال لاماغك ديالها ..
حنان : على هي عندها ماغك ديال الماكياج ؟! ..
خ.م : اه الالة و قالت ليا نعلمكم بلي الفطور غيكون على برا ..
فيروز : اوكي صافي سيري ..
كملو طريقهم لبرا دخلو الجردة الأمامية جلسو كل وحدة شادة تليفونها كيسناپيو و يلوحو باش يبينو ان الوضع عادي .. وقفت لوطو و نزل منها أوس عاون فريال باش تخرج و تمشى معاها حتال عند البنات جلسها حداهم و دخل ..
حنان : ( تبعتو بعينيها حتا اختفى و دارت عندها ) هذا مالو ؟! ..
فريال : (هزت عصير جغمت منو و رجعت شعرها لور ببرود) خليييه من عندي انا يتفرجع الى بغا يمشي يتقود ..
حنان : گاعما سولناك واش بصح رجلك تهرست و لا درتيها بلعاني ههههخخ ..
فريال : من نيتك حتا نتي ؟! رجلي راه مفدوعة ..
فيروز : نوضي اجي نعاونك نوضي بدلي هاد الحوايج ..
فريال : غير خليني عافاك ماباغاش نشوف كمارتها ..
فيروز : نوضي يا القحبة ماتحققيش ليها أحلامها باغا الزامل ديالك وقفي ليها عصبة ديري ضد و تهلاي فراسك ماتخليش ليها فرصة تديه ليك ..
فريال : لا الى بغاها غير يمشي عندها ماعندي ماندير بيه ..
نورة : راه فهمنا انه ماباغيهاش و لكن نتي جمعي كرك ماتخليهش يولي باغيها ..
فريال : (قلبات عينيها و زفرت بملل ) هوووف واخا ..
عاوناتها فيروز توقف و تمشاو بشوية دخلت من الباب مشات عينيها نيشان لالزابيث فوق الباياص بدو پياس و دايرين بيها البنات من كل جهة ها لي كدير مساج ها لي كتقاد الظفار ها لي كتقاد الشعر ..
الكاپو كان شاد واحد القنت كيقرا فجوغنال حتا بانت ليه ناض بسرعة شدها من يديها كيتفحص فيها بنظرات اهتمام ..
الكاپو : فوقاش جيتي ؟! كيبقيتي شوية !! ..
اليزابيث : ( سمعتهم و هزت راسها كتتأكد ) اووه فريال جيتي (وقفت و مشات باتجاهها ) الحمد لله على سلامتك ..
فريال : (ابتسمت ليها و نطقت ببرود ) الله يسلمك ..
كملت طريقها بلا ما تعيرها اي اهتمام و فيروز غير كتخنزر فيها بمعنى انا لك بالمرصاد ..
بقاو نورة و حنان على برا الرأس فالراس كيفطرو ، حنان كتخربق فتيليفون .. و نورة غير ساهية و كتخمم ..
نورة : الله ينعل لي مايحشم نوضي تهزي نخلطو عليهم باش مايجيكش الملل ..
دخلو لداخل لقاو البنات لي جاو من مركز التجميل جمعو ماطيريال ديالهم و خارجين و الخدم كيتحركو بخفة من بلاصة لبلاصة كيزينو فالطابق الأرضي من الڤيلا ..
حنان : اش واقع هنا ؟! ..
خ.م : كاينة اليوم حفلة بمناسبة رجوع الآنسة اليزابيث ..
نورة : وا خريتو نتوما و هاد اليزابيث ديالكم ..
حنان : اودي خلينا نحتافلو حتا حنا و نعيشو حياة الرفاهية ..
نورة : عيشيها غير نتي ازين ..
طلعت الفوق و حنان تابعاها كتحاول تقنعها حتى تساطحو مع اليزابيث فالدروج لاصقة فأوس كيف العلگة و سرقت مسامعهم جملتو لي كتبعث فالانسان الفضول " خصني نهضر معاك فشي حاجة مهمة " مشاو كيتسابقو شكون غتقولها لفريال الاولى فرعو الباب و دخلو ..
فيروز : امالكم ؟! ..
حنان و نورة : أوس قال لاليزابيث باغي نهضر معاك فشي حاجة مهمة !! (التقطوا انفاسهم بصوت مرتفع ) ..
فريال : (ابتسمت بخبث ) كنت عارفاه مايقدرش يصبر ..
فيروز : عرفتي هذا الى طاح فيك شي طيحة خايبة ما نتي فخير ابنت ميمتي ..
فيروز : (سكتت كتشوف فيها و انفجرت بالضحك ) عاودي اش قلتي ليلة الدخلة ههههههخخخ و نوضي الله يجيبك على خير !! واش سيد شابع فيا كوا و مزال كتقولي دخلة ..
حنان : اش درتو عاودي لينا ؟! ..
فيروز : سيري ا بنتي هادشي كبير عليك خليني غير انا و ختك حتا توصلي لهادشي و نعلموك ..
نورة تقرصات من هدرتها تحجرو عينيها بالدموع فاش تفكرت داكشي و جاتها هيستيرية ديال الحكة فعنقها و لحمها ، فيروز حست على راسها شنو زبلت و بغات تقرب ليها دفعتهم كاملين و بقات كتبكي و تنتف فراسها و كتزول شي حاجة على لحمها لي كتبان ليهم هما فراغ مابغاتش تهدن بالمرة ..
من مورا هاد الجملة بحال السلو موشن طرأ على اللقطة كلشي تصدم حتى من هارون دار فيه نظرة ساخرة كيحساب ليه غير كيكدب عليها ملي شاف ملامحو جدية وقف لوطو و شد راسو بالصدمة سيغتو انه عارف فرانسيسكو مايكدبش فبحال هادشي ..
هبطت كتتمختر لابسة كسيوة طويلة و مفتوحة من الظهر جامعة شعرها الفوق و دايرة ماكياج خفيف ..كتراقب الوضع كيداير و الديكوراسيون كيفاش قادوه حتا كتتفاجئ بفران و هارون طالعين كيجريو عرفت انه كاينة شي حاجة ولكن مابغاتش تكشف حقيقتها دابا خاصها تلعب دور الضحية عليهم كاملين باش تفوز بأوس ..
تمشات كتحرك فالوريدات و تشوف شنو ناقص و فهاد اللحظة كان داخل الطبيب البيطري المكلف بگوست داه شي أيام باش يتعالج و رجعو ..
إليزابيث غير شافتو صرخت بقوة و و مشات كتجري هربانة گوست يالاه با يكسيري باش يتبعها وقفو الطبيب و طلعو عند أوس حل ليه الباب و مشى كيجري تلاح عليه ..
الطبيب البيطري : (كشف على الساعد ديالو فين كان جرح غميق ) ولى عدواني بزاف و عذبني معاه ..
أوس : مزياان صافي غير سير دابا ..
*****************
كانو كلهم جالسين كيراقبو ردة فعل نورة و هي كتقلب فالوراق و دموعها نازلين كيتلاقاو عند ذقنها ملامح الصدمة لي كانو على وجهها و كيفاش كانت كتقلب فالوراق و كتعاود بحال الى مامتأكداش كان الصمت سيد المكان حتا تهزت الڤيلا بالعواء ديال گوست ..
فريال قفزت و ترسمت ابتسامة عريضة على ملامحها .. فرحانة فحال الى لقات كنز بغات توقف و هو يحبسها هارون ..
أوس : (هز تيلي كيدير فيه نظرات غريبة بحال الى كان عارفها غتتصل و جاوب ) صيفطتو عندك ..
فريال : كيفاش غيجي ؟! ..
أوس : الذيب ما كينساش الريحة ..
فريال : (ابتسمت فاش فهمت قصدو و حست فحال الى الفراشات كيلعبو فبطنها رجعت جمعت ابتسامتها و عبست ) هادشي قولو لايزابيل و لا جولي ديالك ماتقولوش ليا ..(قطعت عليه و نغزت حنان ) نوضي حلي الباب ..
ناضت حلت الباب لقاتو جالس قدامو شافها و ناض كيتمختر و كيدور فعينيه بين البقية ملي كيكونو الناس بزاف كيتشوش قرب عندها و طلع جلس فوق رجليها و بقات كتلعب ففروو و كتعنق فيه بحال شي بنيتة صغيرة ..
فيروز : علاااش كتتعصبو فاش كندويو عليها و لا كنقربو ليها كتوليو هاكا البارح بنيامين و اليوم نتوما مالكم ؟! ..
مشاو الاولاد وجدو راسهم باش يخرجو و علمو بنيامين باش يدوز عندهم من الشركة .. و البنات حتا هما قادو ريوسهم فريال لبست جيپ كاروات و بودي فالبيج طايح على الكتاف خشاتو تحتها و دارت ليها صميطة فالنواغ و لاحت على كتافها كويرة قصيرة و فرجليها بوتس طوال دارت مكياج خفيف جبّدت الايلاينر و جمعت شعرها كوپ شوڤال ..
فيروز لبست كسيوة صوفية فالنواغ و لكن مستيلية دايزة منها صميطة رقيقة من الخصر واصلة فالطول تحت الركبتان دارت شعرها كيرلي و قادت مكياج ثقيل ديال سهرات و فرجليها بوتس بطالون ..
حنان لبست شورت قصير جينز و تيشورت كيجي طول منو و كلو مقطع بحال الى خابشينو القطوط و فرجليها صبادغي فالبيض و شعرها خلاتو على راحتو مع ماكياج خفيف من يدين فريال ..
نورة لبست ميني ڤونتخ فالنواغ فوقو شوميز طايحة على كتفها اليمين تخونسپاغو ( شفافة ) و سروال فالنواغ مع صباط طالون دارت ماكياج شبه ثقيل و خلات شعرها مطلوق ..
هارون و فرانسيكو كملوا و صيفطو ليهم ميساجات باش يخرجو هبطو متتاليين كيف سردين فالبواط تابعينهم تساطحو مع أوس لابس طوكسيدو و محلق على الحالة عطرو هابط قبل منو ..
أوس : ( مشات عينيه ليها ديغيكت و عقد حواجبو ) هاذو فين غاديين ؟! اكيد ماغيهبطوش للحفلة ..
هارون : لا حنا خارجين على برا ..
أوس : ( طلع فريال و هبطها و نطق بصرامة ) و نتي فين غادة ؟! ..
فيروز : غيييير يخاااف و لا يسطح راسو حتا مع الحيط انا اختي ماغنخليكومش تزطمو عليها .. نتا عرفتي فيمن غتديها ؟! و علامن غتخاف ؟! يالاه تخاف على ديك المنفوخة لي عندك و بعد من ختي احسن ليك ..
أوس : (قرب عندها بخطوات بطيئة و نطق مزير على فكو ) مرة اخرى فاش تبغي تهضري معايا بقاي تفكري مزيان ..
فريال : (جرت ختها و بعدتها عليه ) صافي يالاه نمشيو ..
هبطو كاملين مجموعين لتحت مكانوش ناس بزاف غير شي بنات قلال ملابسين والو و ولاد وشي وحدين ماعرفناهم اشمن جنس كينتميو ليه نص نص .. كيشطحو على موسيقى صاخبة و كيشربو أنواع فاخرة من الخمر ..
تقدمت إليزابيث بتفاخر كتحرك ثوبها الحريري و كتتعوج باتجاههم ظنا منها انهم جايين يشاركوها السهرة ..
إليزابيث : جيتو زوينين مرحبا بيكم ..
فيروز : لا احبيبة شكرا حنا خارجين ..
إليزابيث : (تغيرو ملامح وجهها و نطقت بعدم فهم ) كيفاش ؟! فين ؟! ..
هارون : غنخرجو على برا بلاما نديرونجيوك مع ضيوفك ..
إليزابيث : ( لمحت أوس جاي و سرطت ريقها ) و أوس حتا هو غادي معاكم ؟! ..
فريال : ( هزت عينيها فيه و نطقت بتحدي بلا ما تزولهم ) ماعرفناش حنا سوليه !! ..
إليزابيث : غتمشي معاهم ؟! ..
أوس : ( خشا يديه فجيابو و حركت راسو بالنفي ) لا ..
ترسمت ابتسامة عريضة على محياها و لمعو عينيها بفرحة لوات يديها عليه و طبعت قبلة طويلة على شفايفو حط هو الآخر يديه على خصرها و قربها ليه هز عينيه ففريال لقاها مبتسمة ليه بطريقة مستفزة ..
خرجت من تما كتحاول ماتبينش داكشي لي حاسة بيه فالداخل ديالها خشات يديها فدراع فيروز و جبدتها هاد الأخيرة لعندها معنقاها تمشاو حتال للوطو ديال فيروز و ركبو بزوجات منطلقين من تما تبعوهم حنان و هارون فلوطو و فران و نورة فاوطو اخرى ..
غير خرجت فريال من داك الباب طلق من إليزابيث و طلع لبيتو بلاما يزيد حتا حرف خلاها غتموت بالفقصة عرفاتو دار هادشي غير باش يخليها تغير ..
رجعت بسرعة وسط صحابها و خدات من عند واحد كيس صغير عامر بلادغوگ و جرت باتجاه الحمام دخلت حطت زاجة صغيرة و قادات فيها سطر جراتو مزيان و ضغطت على مناخرها قالبة عينيها ..
نرجعو عند الكليكة هبطو مجموعين دخلو للنايت كلوب تبعو هارون و فران لنفس البلاصة لي كيجلسو فيها ديما خداو البنات دي كوكتيل بلا كحول و الاولاد اكيد البلودي ماري يا سلاااام ..
حنان كانت فايت ليها جات معاه اما البقية فعاد بداو كيتعودو على المكان و الجو كلشي كيجدب و الموسيقى كتصم الآذان ..
دازت شي نصف ساعة و لحق عليهم بنيامين و لكن مكانش بوحدو كان معاه شخص آخر كتتمشى وراه حادرة راسها بخجل و عينيها فالأرض محرجة و ماقادراش تهزهم ..
بنيامين : سلام ..
فيروز : (طلعتها و هبطتها و ميلت راسها ) شكون هادي ؟! ..
هارون : خلينا ليك الخدمة كلها هاد الأيام غتكوني عييتي ..
لبنى : باش مانكونش كذابة شوية كثر عليا الضغط مي سي پا گغاف ..
فيروز طلعتها و هبطتها مالقات منين تعيبها البنت زوينة و أنيقة مافيها مايتعاب و من الفوق كتبان كيوت و ظريفة دغيا كتدخل للخاطر ولكن لي فيها مامهنيها الغيرة و ما دير ..
فيروز : ايوا راك كتخلصي ياك ..
فريال : (وسعت فيها عينيها و نغزتها بمرفقها ) اويلي كوني تحشمي ..
لبنى : لا غير خليها عادي والله ..
نورة : ماتديش عليها ازين راه هي حتا معانا هاكا ..
هارون : ايوا ماجيناش باش نجلسو نوضو تشطحو ..
نورة : (حركت راسها بلا كتشوف فحنان ) لا لا انا غير خليوني عافاكم مابغيتش ..
فران : (وقف و مد ليها يديها ) يالاه ..
ناضت نورة مع بنيامين و حنان مع هارون بقات فيروز متبعاهم بعينيها و كتبتسم ماطاحتش ليها على البال انه غيبغي ينوضها تشطح مد ليها يديه هو الآخر و تبعو البقية لحلبة الرقص ..
هارون دار إشارة لديجي و قلب ليهم القضية شعبي المغاربة لي كانو تما گاع ناضو محيحين و الاجانب كيصفقو ليهم معجبين فطريقة رقصهم ..
لبنى : (ابتسمت و هي كتشوف فيهم من بعيد ) هههههه ..
فريال : هارون و حنان زوج حماق و تلاقاو طاح الحك و صاب غطاه ..
فريال : (سمعت سميتو و تقادت فالجلسة ) أوس !! ااه سبحان الله حتا انا مكنحملوش ..
لبنى : كتعرفيه ؟! (ضربت على راسها بخفة ) شوفي السؤال كيف عامل ههه اكيد غتكوني كتعرفيه ..
فريال : شنو دار ليك نتي ؟! ..
لبنى : أول مرة ندخل للشركة كان كيجي بزاف كانو گاع البنات كيهدرو عليه تقريبا نصف البنات لي كانو تما نعس معاهم و لي مشات معاه الغد كيصيفطها و مكيعاودش يدور بيها و حتا هما كانو كيموتو عليه مافهمتش شنو عجبهم فواحد بحال هذاك ..
فريال : (سرطت ريقها و علامات الدهشة واضحين على ملامحها ) و نتي عمرو تحرش بيك ؟! ..
لبنى : لا انا ديما ماعاجباهش خدمتي واخا مانعرف شنو ندير كان عندو واحد الجانب صارم بزاف كلشي كيخاف منو و كلامو قلييييل مانعرف هاد شهرين لي دازو مابقاش كيجي بزاف جاني دخل سوق راسو ..
فريال : ( حركت راسها باستيعاب و هزت عينيها حتا بان ليها جاي وسعت عينيها و حدرت راسها كتفكر شنو غدير فهاد الوحلة) الله يا ربي شنو غندير ..
لبنى : همم ؟! دويتي معايا ؟! ..
أوس :(وقف عليهم كينتقل بنظراتو بيناتهم و شدها من يديها ) اجي معايا ..
فريال : ( هزت مناخرها لسما و عقدت يديها عند صدرها ) مابغيتش واش ماكتفهمش ..
أوس زفر بفاذ صبر مابقا عندو فين يزيد و جرها بقوة هزها بين يديها و هي كتفركل باغا تنزل زير عليها مزيان حتا تخشاو صباعو فعظامها و غمضت عينيها متألمة خرجها لاحها فلوطو و سد عليها الباب ..
أوس : ( ركب حداها و سد الباب باش ماتحاولش تهرب ) انا عارفك باغا تسوليني ..
فريال : ماباغاش نسولك حل عليا هاد الباب باغا ننزل ..
أوس : (عقد فيها حواجبو و شاف فيها بنظرات حادة و عينيه ولاو كيخوفو) نتي مستحيل تنسايني !! ..
فريال : علاش بسلامة ؟! مالك نتا هو مالوما ..
أوس : (قبط فكها بقوة ضاغط عليه و زير على كل حرف خرجو ) متبقايش تقارنيني بشي واحد آخر ..
فريال : (بداو كيخلعوها تصرفاتو و لمعو عينيها بالدموع لي تراكمو تحت جفونها ) صافي بعد مني (رخى منها و هي تتسيف عليه و هزت يديها كتعطيه فين ما جات ) بغيتي نسولك ؟! واخا علااااااااش تفليتي عليا ملي مصاحب معاها الزااامل دويي علاااش ؟! ولا دايرني سوكور !! علاااش مزال مابغيتي تبعد مني ياك رجعااات ..
أوس : (شد يديها مزيان و قربها عندو أكثر كيشوف فعينيها مباشرة ) انا عطيت كلمة لخوها باش نتزوجها ..
فريال : (جمدو ملامحها و هي كتشوف فيه و هاد الجملة كتعاود فمسامعها ) كيفاش ؟! ..
أوس : اليزابيث مريضة و مهووسة بيا كتظن بلي كتبغيني و انا واعدتو نتزوج بيها مي من بعد جيتي نتي .. ( رجع شعرها ورا وذنيها و تحسس خذوذها بأناملو ) كلشي تبدل ..
فريال : قال ليا بلي صاحبتي مزال حية و غيجيبها ليا ..
أوس : (غمض عينيه و نطق كأنو عارف الاجابة ) و نتي شنو قلتي ليه ؟! ..
فريال : قلت ليه داكشي لي قلتي ليا !! نتا كذبتي عليا ياك !! الكاپو ماشي هو لي قتل ..
أوس : انا لي عطيت الأوامر .. (قبل ما يكمل كلامو جاتو صفعة للوجه )
فريال : نتا ماشي بنادم !! نتا حيوان ..
أوس رجعها ليها فالبلاصة حتا خبطت راسها مع الزاجة داخت و شنوفتها الفوقانية تنفخت و كسيرا لوطو مبعد من تما بسرعة .. طلع للڤيلا لي فالجبل هزها بشوية و تلقى ليه پاولو دار ليها اشارة بيديه بمعنى ماشي دابا و دخلها لبيتو حطها و غطاها من ثم هبط عندو ..
لقاه جالس فالصالون هز قرعة كب ليها الويسكي و كب لراسو جبد أوس الگارو شعلو سف منو مزيان و ساط فالهوى مشكل سحيبات دخانية و كيفكر ..
پاولو : إذن قررتي تقول ليها الصراحة ..
أوس : هادشي لي كان خاصو يوقع من الاول ..
پاولو : هاد البنت هي لي غتخرجك من الظلام لي نتا عايش فيه و كتتخبط وسطو هاد البنت هي القدر ديالك أ أوس مالِك ..
أوس : هادشي غير تخربيق ..
پاولو : نتا خايف ، خايف بزاف لا تعيش خيبة أمل اخرى و حتا هي تمشي و تخليك ..
أوس : (كمى من الگارو و حرك راسو بتساؤل) شنو كتشوف نتا دابا ؟! عند بالك بصح داكشي لي كيقولو ليك دوك الشياطين .. كاين واحد هو لي عارف المستقبل (هز سبابتو للسماء) الله سبحانه و تعالى عالم الغيب و الشهادة لا إله إلا هو الذي يعلم الجهر و ما يخفى نتا شكون ؟! نتا خاصك تكون عبد من عباده هو لي خلقك اش كتخور عليا ..
نرجعو عند لبنى لي بقات حاطة يديها على خدها مصدومة فداكشي لي وقع قدام عينيها و كتسب فخاطرها علاش ثاقت فيها و بدات تعاود ليها حتا جاو البقية رجعو لبلايصهم ..
فيروز : فين هي فريال ؟! ..
لبنى : (زولت يديها و نطقت ) داها !! ..
هارون : شكون لي داها ؟! ..
بنيامين : اكييد أوس !! استغربت فاش خلاها جات معاكم اذن ما صبرش و جا داها ..
فيروز : بنيامين هادشي زاااااد عن حدو و بزاااف صافي قوليه يجمع راسو ..
بنيامين : (وسع فيها عينيه باش تسكت و ووقف هاز الكونطاكط ديالو ) يالاه نمشيو ..
ناضو كلهم خارجين من تما وصلو لبنى لدارها و كملو طريقهم للڤيلا لقاو الحفلة سالات و كلشي تجمع فحال الى عمرو ماكان .. حست فيروز بتيليفونها كيڤيبري فجيبها جبداتو لقاتها مها دارت للبنات اشارة بعينيها و تبعوها بسرعة دخلو للبيت و سدو عليهم عاد جاوبو ..
فيروز : الو ماما ..
سناء : علاش مكتجاوبونيش الكلبات ؟! واش باغين تسكتو لينا القلب ولا شنو مافهمتش ..
فيروز : لا ا ماما را غير ماسمعناش !! ..
سناء : فيروز انا را كنعرفك مزيان يحساب ليك دخلت ليهم للراس ديك الكذبة لي كذبتي راهم ناويين حتا تجيو و يتفاهمو معاكم قطعو و هبطو لهنا فأقرب وقت ..
فيروز : ماما را والله ماكنكدبو ..
سناء : فيروز راك بعقلك و حنا ماشي دراري صغار ضحكي علينا بزوج كلمات واخا نقولو كلامك صحيح و هادوك لي جاو قلبو لينا الدار سفاها على علاها اش يكونو ؟! ..
فيروز : ماما ..
سناء : فيروز سمعيني مزيان غتجيبي خواتك و غترجعي لهنا اللهم تبقاو قدام عينينا راه من نهار مشيتو و قلبي مامهنيني النعاس مابقيناش كنشوفوه ها العصابة ها كورونا جيو ابنيتي حدايا ..
فيروز : وا غير سمعيني شنو باغا نقوليك ..
سناء : واخا تقولي لي قلتي رأيي ماغيتبدلش فين هي ختك بعدا ؟! ..
قطعت معاها و ناضت بشوية جارة رجليها للحمام غسلت وجهها باش تصحصح و رجعت لقات مها كتتاصل بيها حتا هي جاوباتها ..
فريال : الو ماما لاباس عليك ..
سناء : بصحة الدوش .. لاباس الحمد لله ..
فريال : توحشتك ..
سناء : ايواا جيو ابنتي جييو حدايا و بعدو من المشاكل و صداعات ماباغينش تقولو و لكن انا حاسة بيكم ا كبيدتي انا ماربيتكمش و كبرتكم باش يقتلوكم ليا العصابات ..
سناء : كلشي خايف عليكم ابنتي و الهضرة داعت فالعائلة جيو بناقص من هاد اوروپا صافي جيو ..
فريال : صافي صافي تهدني و ماتفكريش فهادشي راه مكاين والو حنا بيخير ..
سناء : قلب الأم ماكيخطأش انا حاسة بشي وحدين كيديرو ليكم الشونطاج تما واش هما لي جاو كيقلبو عليكم ؟! غير قولي ماتكذبيش ..
فريال : ماما راه مكاين والو من هادشي كان واقع سوء تفاهم و تحل هادوك ماشي عصابة (داخت و ماعرفت شنو الكذبة لي غتقول ) اممم قالت ليك فيروز راها باغا تتزوج ؟! ..
سناء : (هزت راسها فاش تفكرت ) اه قالتها ليا شكون هذا ياكما واحد منهم ..
فريال : لا اماما هاذا ولد الناس (هزت حواجبها لا طاقة لها تزيد تمدح فأخلاقو) زوين و قاري ميسور الحال عندو اوطيلات ولا مانعرف..
سناء : تي اش كتقولي ؟! عندو اوطيلات و ميسور الحال الله يعطيك عقل ابنيتي شفتي اللفعة بقات تتطرطى حتا دارتها ..
فريال : (غمضت عينيها كتتأسف لحال مها مسكينة لي مزال هازة ليها الهم ) لا مزال ..
سناء : وا سيري نشفيه اش كتتسناي .. سلمي على بنات خالتك تصبحو على خير ..
فربال : كنبغيك تصبحي على خير ..
حطت تيلي و جلست فوق الكامة حادرة عينيها المتراكمين بدموع الشوق و شقت شعرها بأناملها كتفرك فيه بعصبية .. دخل هو لقاها على تلك الحال قرب عندها و شمت فيه مزيج بين عطرو و ريحة الگارو تأففت بقرف و قلبت وجهها ..
أوس : (جرها من دراعها بقوة ) نتي بلاصتك حدايا !! مايمكنش ليك تمشي و تخليني (زاد ضغط على يديها اكثر ) ممنوع ..
فريال : (عصرت عينيها بألم و نطقت بصوت شبه باكي ) طلق .. طلق مني وعتتيني ..
أوس : دابا غدي نرجعو للڤيلا و غادي نعلن على اننا غنتزوجو قدامهم كاملين ..
فريال : (تجمدو ملامحها و هي كتشوف فيه بصدمة ) كيفاش ؟! ..
أوس : كييف سمعتي تحركي قدامي !! ..
***************
خرجت من غرفتها بمشيتها المعتادة لي كلها كِبْر و تفاخر كانت قاصدة غرفتو و الابتسامة مامفارقاش وجهها حتا اختفت فجأة فور رؤيتها لگوست جاي فالاتجاه المقابل .. شافت فيه و هز فيه عينيه تبادلو نظرات للحظات قصيرة ثم شرع فمطاردتها و هي هربانة و كتصرخ هبطت بسرعة لتحت و وصل عليها تلاح عليها و خبشها فعنقها تسمع صوت الرصاص و جاو لي گارد بعدوه عليها ..
رجع مسدسو ورا ظهرو و قرب عاونها توقف و جلسها فوق الفوتوي و هي كتتبوحط عليه و تتغبن تحت من مناخرها ..
الكاپو : عيطو للمسعفين يجيو دابا ..
إليزابيث : خويا هئ هئ عنقي كيحرقني ..
الكاپو : صبري شوية الاميرة ديالي غيجيو دابا ..
البقية سمعو صوت الرصاص كلهم هبطو يشوفو شنو واقع الفضول لي فيهم باش يتخبعو هابطين يبرݣو شنو واقع ..
بنيامين : (صرخ على فيروز صرخة مدوية حتا قفزت ) فيررررووووووز !! واش نبقاو نعاودو نفس الهدرة ..
الكاپو : مدااام هاد گوست هو لي مفتعل هاد لي بخوبليم كاملين غنهنيكم منو .. (جبد سلاحو و صوبو باتجاهو ) ..
على برا نزل أوس و فريال من لوطو قرب لعندها و شبك يديه مع يديها ..
أوس : (هز صبعو بتحذير ) عارفة شنو غتقولي الى سولوك !! الحل الوحيد الى بغيتي نمشيو من هنا هو تقولي اه اوك ؟! ..
رمشت فيه عينيها بلاما تجاوب و دخل هو سابقاها و هي تابعاه مع الدخلة غتلمح عينيها داك المنظر صرخت بصوت عالي حتا بح حلقها " لااااااااااا " تسمع صوت الرصاص ..
غمضت عينيها و سدت وذنيها ضاغطة عليهم بقوة بسرعة نزلو دموعها حتا سمعت صوتو حلتهم لفاتو مزال حي الرصاصة مجاتش فيه مشات بسرعة كتعرج واخا رجليها مقاداش تمشي عليها ما انتابهتش للألم و عنقاتو بقوة حتا هو بقا كيشم فيه و كيحرك فراسو مع كل لمسة من يديها ..
إليزابيث مابقاتش منتبهة لعنقها بقدر ما مصدومة بعلاقتها مع گوست .. قفزت على صوتها فاش تگعدت ليهم ..
فريال : وااااش نتا حمق ولااا مالك علاش بغيتي تقتلو ؟! شنو دار ليك !! ..
الكاپو : (حط يديه على بشرتها كيتحسسها بحنان ) تهدني ما وقع والو ..
أوس : (غمض عينيه و جمع قبضتو بنفاذ صبر كيحس بعروق راسو غيطرطقو ) فريياااااااال !! اجي هنا ..
فريال بغات تمشي عندو ولكن حبسها الكاپو بيديه و شاف فيه بتحدي ..
الكابو : والى ماجاتش شنو غدي دير !! ..
أوس : (قرب عندو بسرعة و جرها لحضنو ماقدرش يتحمل لمسة وحدة زيادة ) صبري قليل و نتا عارف هادشي جيت نقول زوج كلمات و غنمشي انا و فريال غنتزوجو ..
إليزابيث غير سمعت هاد الجملة ماقدرتش تزيد تقاوم و سخفت حيت ضاع منها دم بزاف ولكن حتا واحد ماداها فيها حيت كلشي كان تحت تأثير الصدمة ..
أضاعك عني الهوس الجزء السابع
محتوى القصة
التنقل بين الأجزاء