فالطريق الغابات المازوط يطحن والرويضات هاربات .. متكي اللور ومدورها قراعي بيرات ... جميلة تجري فالطريق ماحنات .. الموسيقى مجهدة ومن السراجم علات ... الطرق طويلة والنشاط والجلسة حلات .
المرسيديس طاحنة الطريق طحين .. اللي دازت من حداه كتخليه يطل يشوف شكون .. وشكون من غيرها ؟ جميلة اللي متكية بيد وحدة على المقود كانها فسباق .. ضاربة مية فلكونتور فطريق عادية بين الفيراجات ... طالعة بين الجبال كتغني وتشطح وهوا مكسل حداها ناشر رجليه قدامو والكوسان اللور كيشرب ويضحك معاها ... وهي عينيها على الطريق ... وكتشطح بكتفها مع الموسيقى المغربية .. وداعا الخوف ... اهلا بالحرية .. لابسة بودي كحل من مشترايتها مايل من الكتف واسع ودجين وسيرديلة وهوا جالس بشورط مخطط والصدر عريان .. العينين تقال والنغمة طلعات .. عينو فالزاج ومع جميلة كل مرة يسها فيها ..
مهدي: نقصي كتكلبي منا من هاد الجبل
جميلة: هههه قربنا؟
مهدي: وصلنا ماشي قربنا
جميلة : بنادم حاضينا ههه
هز حاجبو فيها كيحرك راسو ورد : اللي شاف خليه يشوف ...واطلق ... ابنت عمي من وجهك نخلق ..وا حنزز...وا الحيط عيا منك ونتا ماعييت وا حنزز .. واقيلنا ماخفا عليك جهاز .. وابركك... (شد فيدها) حالف منها منطلق حالف نوصلها بيدي لدارها نتا ونتا طرطق ... حالف نسميها ونركد هاني على صدري تغني لحاني ونتا في عينيك بلق ... نبغييها وتبغيني ونتا روووح موت از **... هزك الماء وكلاك الحوت ... ضربك عجاج راك داير لافوت .. (غمزها) صاحبك دوروجين فالنسا طاحنو ونتا حنزز .. كيفك كي الذبان اللي طاح فاللبن تا زنزن ... حااالف نسميها ونركدي هاني على صدري تغني لحاني ونتا محن (هز يدها باسها )
جميلة: علامن كتهضر ههه؟
رد : على الحنزازة اللي حاضيينا انا وياك
جميلة: وشنو غتسميني
تنهد : غنسميك مراتي . حالف نسميها واخبار الجزيرة فوتها وا سجل ... وارد بالك لا تتخلل ونتا كطل ..رد بالك لا تتفركع ههه فخاطر الحضاية
جميلة : خطير مع راسك
رد كيضحك بتتاقل: كيفهم كيف المجمر شاعل بلا جمر وا حنزز... شحال من نفاخ وطاح فالبحر وا بركك.. حالف من جميلة منطلق
خرجات فطريق مسرحة وهوا مجبد ضهرو شاد الكرسي كامل والكاسكيطة على راسو .. وقفات الطموبيل بين الطموبيلا فسيتي فاضمة ونزلات كتقاد سروالها من اللور وخرج حتى هوا وقف برا لبس تيشورط رمادية ديالو وسرح يديه كيتكسل ويلوي عنقو وزدح الباب ولاح يدو على كتفها كيشعل كترو مصغر عينيه من تحت الكاسكيط ومشا كيقاد كتافو وهي مدورة يدها على خصرو كينقزو الحجر وكل مرة يسبقها قدامو لا طيح .. قطعو الواد بين المطاعم الشعبية اللي على الواد وجلس كيسوط قلب الكاسكيط اللور تحت ضل الشجر فجلسة تقليدية بسيطة ملونة ولاح يدو ورا ضهرها وهي كتقاد شعرها للجنب وتكا على كتفها هاز رجلو على ركبتو كيكمي
جميلة: ناااري من قبيلة وانا مزيرة واش عندهم طواليط ؟
هز عينو فيها : البول فابور مالك حابساه .. نوضي نشوفو ضاروري تكون .. الى مكانتش طلقيها على ل*** دمهم باش يديرو لنا طواليط
لقات الراحة والسياحة .. اللي طانت محتاجة ليهم طاحت فيه .. نساها العالم باللي فيه وضحكات للدنيا واخا مزال مابغات ضحك ليها.
رجعات لبلاصتها جلسات كتغدا هي وياه فطبلة وسط الماء دايز .. مكفضين على رجليهم بجوج كيتبردو من حرارة الجو .. الطبلة مزقة اكل والطواجن كتشهي .. ريحتهم طالعة كتجيب الجوع للشبعان .. شلايض مغربية وخبز الفران من داكشي باقي بسخانتو .. اللحم كيبقبق وسط الطاجين والفريت غليض مربع فالطباسل .. الخضرة معسلة والدجاج بالزيتون مرق .. عواصر الليمون والموناضة كيبردو الجوف ويرطبو الحلق .. وهادشي ميكونش لذيذ وبنين بلا ضحك وتقشاب المهدي على جميلة اللي واحلة مع دفارها كتنقي بالفرشيطة .
هزات تيليفونها كضحك قابلاتو معاها وخدات صورة كضحك والواد دايز وراها والناس جالسين .. المنضر شهوة منو . ردت على سلوى اللي بعتات ليها مسج على لواتساب .
مهدي: حطي تيلي نتي معايا ولا معاها ! وفين كتعرفي عاد ختنا اصلا ؟
جميلة: وصاحبتي اويلي
مهدي: ماعندك ما ديري بصحابات
جميلة: نتا حماقيتي ... مالي ماعنديش الحق زوينة هادي !
بعد الغدا ناضو كملو الدورة كيتساراو .. شراو تذكارات كثيرة ودوزو النهار كامل وشدو الطريق فلعشية راجعين بقيادة مهدي والموسيقى مجهدة .. القرعة حداه محطوطة فيها النص وجميلة حداه كترغب يطلق ليها الويفي لاكن معامن .. قصح من راسو مكاين .. حلف ميطلقو باش تبقا شادة معاه الخط متميكش عليه وتخليه بوحدو. ثمل وسخن وحيد تيشورط بقا بالصدر عريان وتكا شاد طريق لوتورت راجعين لسلا والضلام كيطيح .. تلفتات عندو جامعة رجليها فرحانة بالجو مع مهدي .. النشاط حتى شاط والحرية مكاينش كلمة لا ... الوقت مكيضربش ليه حساب .. عندو كي النهار كي الليل عايش عالم بوحدو ودخل ليه جميلة حتى هي معاه اللي مشات معاه فالخط ولقات شنو بغات .
شعل كارو ودلى يدو من الزاج زاطم فالطريق بلا ميحن فالسرعة والكاسكيط على راسو
جميلة : مهدي غني غني ههه غني ليا
نقص شوية فالموسيقى ساهي فالطريق : شنو نغني ليك
جميلة: غني ..
هز حاجبو ضاحك كيشوف قدامو عينيه تقال وقال
- في لوطوروت يطحن كوكا وكاسكروط حوت ... نسا لا روت والطرقان فالليل خاويات ... في بني ملال وا تبعونا البوليس فالجبال ... ويلي ويبلي جمييلة مشاات
هزات راسها كضحك : زيييد زيييد
مهدي: الجلسات حلات ناري ناري وصطافيط جات .. هربو البنات وحصلت انايا مع الخاويات .. شدونا بيييلا وسط الليل يا وضوو طافي .. وصحاب الحال خلطو ناري والسكرة مشات
جميلة : ههههههههه
جاه اتصال ودور عينيه جر تيليفون رد وجميلة حاطة يدها على خدها كتشوف فيه ساعية وضحك والهضرة مجهدة كتوصلها
مهدي: اش كاين
الشخص: خاي مهدي باك راه جاب البوليس للقهوة دخلو علينا وهزو عشرة دشيشات داوهم .. وقف ليهم عرفة فالباب كيتجاحد معاهم صدق مشاد هوا واحد وداوه للكوميسارية
بقا مهدي ساكت كيشوف قدامو باشمازاز وعقد غوباشتو ورد
- وعلاش جاو البوليس ؟ شي مطايفة؟
الشخص: وا خاي مهدي راه طايف عرفة مع واحد على ماريا وناضت لكيرة وجا باك جاب لبوليس هز لحزاق كامل
مهدي: هاد بنت ل**** هادي بغاتني ن*** داوها ؟
الشخص: لا مداوهاش داو عرفة حيت دابز تا مع البوليسي
هزات حوايجها وضارت عندو باستو ونزلات وقلب الروايض بسرعة كيجري للكوميسارية في حين طلعات فرحانة والمورال طالع والسعادة باينة على وجهها .. دخلات لدارها مباشرة للبيت حطات اغراضها وحيدات حوايجها لبسات بيجامة وبدات تستف فحوايجها كل حاجة فبلاصتها .. جبدات صندلة من المشتريات ديالها .. كانت صندالة خفيفة من توب الدجين اورق فيها جوج سميطات ديال البزيم فالجناب .. بدات تلعب برجليها فيها عاجباها ولبسات ليها كولون كحل خفيف وتيشوط كحلة ومشات هازة بزطامها خارجة وهي تصادف مع فاطمة خارجة من الدار حتى هي بجلابة كحلة .. طلعات فيها فاطمة وهبطات كتشوف فيها وسلمات عليها
ديمارا الطموبيل غاديين كيتجاحدو فالهضرة فثلاثة مباشرة للقهوى فين جالسة ماريا فبلاصتها كالعادة فالقنت وسط الدخاخن هي وصاحبتها نسرين ..لابسة كسوة طويلة معرية من اليدين فالاسود فيها ورد احمر غامق وشادة الشيشة دايرة رجل على رجل هازة خنافرها وكدور عينيها فالناس اللي حضرو للمشكل في حين وقفات الطموبيل دمهدي برا على الشارع ونزل وقف متكي على سطحها كينفخ مقابل مع باب القهوى وقال
- سير عيط ليا على ل**** تجي عندي لهنا حسن مندخل نفرع ز*** بوها وسط القهوى
مشا عرفة معبس دخل للقهوى كيشوف فالارض بصرامة ونيشان عند ماريا وقف وقال
- تكلمي لمهدي برا كيتسناك
حلات عينيها فيه معجبة وشافت فنسرين وقال : مهدي جا!!!
قال عارف وهوا عاطيها بالضهر بقرف
- وا تكلمي ولا غيدخل ليك هنا
عضات ماريا شنايفها كتشالي بيدها وقالت
- ناااري يا مك جا ليا ههه ...
نسرين : سيري سيري كوراه طالعة ليه عويشة
شدات فيها ماريا وقالت بهمس كتغمز : كوراه دابا وصل ليه عرفة الخبار ومارضااااش جاي كيجري .. انا مشيييت .. الى تعطلت ديكلاري ههه
ناضت بسرعة قادتت حوايجها وشعرها الاسود و نفضات يديها عاضة شنافها ومشات كتمايل بسرعة وتشوف فجنابها.. غير شافتو واقف يدو على سقف الطموبيل كيشير ليها بيدو معصب ويردد وبدات ضحك وتغنج وتهز فكتافها
- زيدي زيدي .. زيدي لمك لهنا
ضارت على طموبيل هازة كتفها وقبل ميهضر قالت بغنج
- والله ما درت شي حاجة هوا اللي تبعني ولسق فيا بزز مني ... عييت نهرب كن ماعارفة كن ماعرفت اشنو دار
صغر عينو بقرف كيشوف فيها وقال بغضب
- واش انا مكنشوفش الق*** دمك كفاش كتمشاي وتلوزي وسط القهوة يا بنت الق**** كتقولي ليهم اجيو ح**** ني ... جايا تشيشي ولا جايا تسلكطي ليا هنايا يا بنت الق*** راه طالعة ليا باغا نفرع ز*** بوك .
ردت بغنج هازة كتفها : والله مادرت شي حاجة واش انا خارجة نهضر فتيليفون وهوا تابعني لسق فيا بزز منك
هزات كتفها ومشات كتجري بغنج كرشها سابقاها ومأخرتها كتهز كلها وصدرها كيطلع كيتنفض عاجبها الحال وكترجع شعرها لور بغنج في حين دور وجهه ساخط على الوقت وجبد تيليفون كيصوني مرة اخرى على جميلة اللي ماكانتش كتجاوبو خوفا من فاطمة تعيق بيها .. عيا يصوني ويعاود فالاخير جاوباتو بسوط منخفض ورد هوا بجنون وسط الشارع اللي غادي كيشوف فيه واللي جاي كيشوف فيه
قطع عليها خلاها واقفة ويدها على جنبها كتسوط عاقدة حاجبانها .. ولايني ولد لحرام مقطر ! تسبيطة دار ليا الله يعطيه موصيبة . حلات الباب مشات عند فاطمة ودخلات عليها للكوزينة لقاتها حاطة القصرية وبدات فالشباكية كدلك
جميلة : بريوات وجدو ؟
فاطمة : باقي راه خليتهم تا نحيد عليا لعجينة دشباكية من الطريق
فاطمة : وشنو غديري مع داركم ؟ لعواشر هادي عيطي سولي فيهم
جميلة : عيطو هما يسولو فيا اللي جالسين فداري كياكلو فرزقي مجموعين وانا هنا بحال ال... (تحول صوتها من خدة لحزن وغرغرو عينيها) بحال شي يتيمة .. بوحدي تقول مقطوعة من شجرة
تنهدات فاطمة كتشوف فيها وقالت : راه كتبقا مك ونتي بنتها .. واخا يوقع اللي بغا يوقع
جميلة: هادي ام اللي مخلية بنتها مالاقيا ماتاكل ! ... واخدين ليا رزقي كيتبرعو بيه وانا هنا كندور لا خطاوني دوك شوية دلفلوس اللي فالبزطام مشييت ... كاع رزقي حطيتو فديك الشركة دالويل مع رشيد ومزال ماشفت منو والو .. كل مرة يقول ليا غنسيفط غنسيفط وشي حاجة ماسيفطها وحتى حاجة ماشفتها
جميلة بغاو نحني ليهم الراس .. شنو حساب ليك زعما الى درت ليها خاطرها غترجع ليا رزقي ! نتي راه مريضة هاديك راه مي وليت عاارفاها وحافضاها .. تصرف عليا اه ولاكن باش ترجع ليا رزقي لا .. واصلا انا ماباغاهاش تصرف عليا من رزقي ويتحكمو فيا .. انا بغيت رزقي .. رزقييي يرجع ليا راه واحد اخر بلاصتي راه غيتسطا ويلوح حوايجو .
فاطمة : واعيطي لرشيد بعدا ياك نتي وياه شركة ... راه القهوة كدخل لفلوس كدخل الزبابل
توحدات فالبيت بحال العادة .. حاطة راسها على المخدة ساهية كتبكي وتشوف فالناس كفاش مجموعة ... كفاش متلامة مع بعضها .. كفاش كيعيشو اجواء رمضان وكفاش فرحانين بالعواشر .. الا هي اللي رزقها عندها وكطلب عليه .. فراس مالها دار وفراش .. مابقاو ليها فلوس مابقات ماكلة فالثلاجة .. الوحدة صعيبة والدار عليها باردة .. الشوق لحضن الام حرقها واللمة مع الخوت شواتها .. تيتمات فحياتهم قبل ماماتهم وتقطعات بحال الجدع اللي طاح وكرم حدا الشجرة المثمرة.. كفاش تقلبات حياتها بين ليلة ونهار .. كفاش حتى صبحات حياتها بعاد الشكل.. تايهة .. ماعارفاش اخرت هادشي شنو .. القطار غادي والمحطة ديالها مازال واصلات .. يا ثرى شنو مصيرها ؟ شنو مصير حياتها اللي مابغاتهاش ضيع .. حياة وحدة اللي عندها بغات تعيشها بحال الناس .. اشمن غلط دارت ؟ اشمن دنب دارت .. تمحات تسع سنين من حياتها رغما عنها .. ما عاشت فيها ماشافت ما فرحات .. الضحة كانت كطلع غير بالزز .. ولاكن كما كان الحال اللمة مع الحباب كانت كتسعدها .. اما الان شنو ؟ مجرد التفكير انهم كيضحكو فرحانين فدار وحدة بحال كل عام كماايرة فاطمة وعائلتها وكيوجدو لرمضان كيقهرها قهر .. علاش هما مجموعين وهي لا .. جرات تيليفون بغات تكتاشف الوضع ديالهم وشنو كيديرو فبحال هاد الوقت وصونات واتساب على رشيد .. رد باستغراب من الرقم
- الو شكون ؟
ردت بصوت مبحوح : انا جميلة... هادي نمرتي الجديدة ارشيد
رشيد : اهلا جميلة .. كي دايرة سافا ؟ هانية ؟
جميلة: الحمد لله على كل حال .. نتوما لاباس؟ شكتعاودو؟
جميلة : لا والو .. غير كنسول وصافي ... قول ليهم عواشر مبروكة .. والله ياخد الله ... بسلامة عليك هاد الساعة
قطعات عليه وهبطات راسها على المخدة بألم كتبكي وتنخصص..احساسها كان فمحلو .. تماما كما ضنات . مجموعين فدارها الكبيرة فعين عودة وعايشين الاجواء برزقها وثمن سنينها اللي ضيعات بسببهم .. ماسولو يشوفو شنو واقع ليها ؟ واش واكلة ؟ واش شاربة ؟ واش ميتة ولا حية ؟ الحاصول كل واحد كيقول اراسي يا راسي مابقا اهل ما بقاو حباب وما اصعب داك الشعور.
نوضها من البيت الصونيت فالباب ومشات بوجهه متعوب تشوف شكون .. اكيد عادي سلوى اللي دايرة معاها تجي عندها .. وقفات مورالباب ببيحامة بالشورط والديباردور وطلات من العين شافتها وحلات ليها الباب بابتسامة كضحك
جميلة : اهلا مرحبااا
كانت سلوى لابسة كسوة قصيرة والطالون والصاك فيدها وقالت
- غا سمحي ليا جيت عندك فهاد الوقت
سدات جميلة الباب : ماتقوليش هاكاك بلعكس انا نيت بوحدي خاصني الي يونسني
دخلات سلوى .. كانت محسونة فوجهها عندها حقها من الزين حتى هي .. شهبة وبنت الوقت كتبان فيها نقية ومهلية فراسها .. ضاربة تعكيرة حمرا متيلة للارونج والكسوة بيضاء والشعر قصير مطلوق .. ريحة الكارو والشراب عاطية منها .. حطات حوايجها فوق كنبة حدا الباب دايرة بالكنبات والطبلة والزربة مقابلة مع التلفازة وتنهدات بتعب كتحرك رجليها فين طلعات جميلة فوق الكنبة بياضاء فيها خيوط من الوان الطبيعة باردين وهزات رجليها كتشوف فيها بإعجاب وابتسامة
- سلوى: ناري اختي قتلني الصباط .. هلكني
جميلة: ولاهيلا نهار كبير ... احسن مادرتي جيتي عندي..
سلوى: ترحب بيك الجنة الزين معرفتك كنز احبيبتي والله .
ناضت جميلة للكةزينة جابت من تما قطعة من الحلوى صغيرة وكاس ديال العصير معلب حطاتو ليها كترحب بيها وقالت
- نجيب ليك بيجامة تلبسيها
وقفات سلوى : لالا جايبة بيجامتي الزين
وقفات سلوى نصلات الكسوة بقات بملابس داخلية و خرجات بيجامتها كانت شورط تاهية وتيشورط لبساتهم وقالت
- طواليط عتقي... عتقي غنطرطق
جميلة : هاهي سيري
مشات سلوى لاطواليط كتجري مزيرة ورجعات خرجات كتسوط بارتياح اخيرا تنفسات .. لقات راحتها فدار جميلة المتولة الزوينة والريحة فيها غزالة .. جلسو قاصرين كيتجمعو مع بعض فقلب الدار ويتعاودو . .ماخلاو حتى موضوع ماجبدوه .. دازت ساعة ونص وهزات جميلة راسها بتوثر كتشوف فالدار وقالت
- اختي راه هاد الوقت صعاابت ... واش حساب ليك الوقت ساهلة ... مكاين اللي يعقل على مك الى ماكنتي لا ومالي والله تاتمشي بين الرجلين .. انا بابا مطلق ماما مشا تزوج خلانا مجلوقين عقل علينا ! مد لينا شي واحد الكفة ؟ جا سول فينا شي واحد واكلين ولا شاربين .. كيعرفو غينعتو فينا .. ق*** وبنتها ... هادشي اللي خاسرين علينا .. لقح** يقدو عليه ولاد ل*** البلاد كلها غادا فداكشي المخير كيدخل خبزة محرمة مكيشوفهاش كيشوف غا حرام جارو الله ينعل ل*** دمهم ... وحدة بالحجاب كتنعت فيا بالق*** قدام العائلة هي المأمنة ... فاللخر لقيتها فبواط مع صاحبها كضرب الطاسة والشعر مطلوق .. ولغد ليه تصبح عليهم باحيجاب وباش كملاتها وجملاتتها طلعات فيا وهبطات فالبواط ونضت لق*** دمها ضربت ليها نتفة .. وجالسة تقول لصاحبها هادي راه غير ق**** ... وازيدي معاها بنت الق*** تقولي هي جايا تصلي
حميلة: شكتجيك هادي؟
سلوى : بنت عمي .. تشوفيها تقولي متهزش العين ... ولحرام كتشوفو فيا غير انا بنت العاهرة .. اودي اختي جميلة راه الميكروب عايش معانا الى بقيتي تابعاه كما تابعك والله تا تشنقي راسك ... عيشي كي بغيتي تا نتي ماتسوقي لتا ق*** .. وتا ديك عاىلتك ضربي على مها حسبيهم جيران وماتنازليش على حقك
هضرة تدي هضرة وسلوى راسها تقال بالقصارة مع الصاحب وكملاتها بالجموع مع جميلة حتى بدا الضوء يطلع وداهم النعاس بجوج فوق الفوطويات .
جميلة: فين غطلع فين النهار القهار بغيتي تشوهني مع الجيران
مهدي : ويالاه نزلي نمشيو نفطرو توحشتك
جميلة: واسير بلاتي حتى نوض على خاطري
مهدي: مهم انا غنضري لاجونص.. كنت جاي عندك وغنرجع بلاتي شوية ونعيط ليك
جميلة : اوكي.
هبطات تيليفون مع ودنها ميتة بالنعاس وكملاتو مع احلام جديدة راوضاتها كالعادة حتى بدات تبكي فنعاسها وتنخصص ، راس سلوى التقيل وصلو الانين .. هزات راسها كتشوف قدامها حالة عينيها وترمش عاد فهمات فين هي وفين بايتة .. شافت فجميلة بانت ليها كتبكي وهي تنوض بسرعة ليها تحنات عليها كتفيقها وضرب فحناكها حتى حلات عينيها
سلوى : واسيري عند شي واحد يفسر ليك شنو هادشي لا يكون مديور ليك شي حاجة ول افيك شي حاجة
جميلة : وراه فاش كنت فمراكش درتها بالضحك عند هادوك اللي جالسين فجامع الفنا ونفس الهضرة اللي قلتي نتي قالتها ليا واحد المرا .. وعاد واحد الكلمة كنسمعها فالنعاس وديك المرى عيطات ليا بيعا
ردت سلوى وهي كتشعل كارو : واسيري شوفي راسك مالكي ماتبقايش جالسة تا يفوت فيك الفوت
جميلة : وفين غنمشي؟ مكنعرفش؟
سلوى: خاصك شي واحد اللي تيقة ماشي الكدوب .. انسول ليك ماما ونرض عليك هي كتفهم فهاد التخريبق
جميلة : صافي سوليها وردي عليا الله يسهل عليك
سلوى : كوني هانيا
حيرة هي واشمن حيرة .. وحريرة محرحرة طاحت فيها جميلة مابقات عارفة راسها من رجليها . مها وجوج قضايا من جهة .. مهدي وحكامو والخوف منو من جهة .. وعاد زيد هم الاحلام والمخفي اللي مزال ماعرفات حتى شنو قصتو . كثرة المطارق فالراس كيطقطقو حتى نفخو ليها راسها . فين تعطي بالراس؟ شنو دير ؟ شنو المعمول ؟ الناس كتوجد للعواشر .. شي كيخيط الجلالب شي كيتقدا السلعة وهي واقفة فبلاصتها كتشوف .. مصدومة .. مشاكلها كيدورو بيها .. تايهة ماعارفاش فين تعطي بالراس ... كن كانت الدقة من البعيد كانت تقدر تواجهها بسهولة .. البعيد كيبقا غريب .. ماشي بحال دقة القريب ، ولاكن واخا هاكاك ... بالرغم من الضغوطات اللي عليها واللي كتزيرها احيانا حت ى كتخنق .. بارغم من الماشكل اللي عايشاهم الا وكتعيش وتعايش وسطهم وكتحاول تقاوم بكل قوة باشو تكون بحال جميع الناس .
النهار الاول فرمضان والناس صايمة .. العشية وكل واحد كيوجد فطورو .. الاسواق عامرين والشوارع مزداحمين .. المحلات مافيهمش النوبة وكل واحد خارج يقضي غرض .. وجميلة وحدة منهم حتى هي خارجة تقضي غرضها واخا الطموبيل مكايناش ومكتقدرش تخرج بلا بيها ولا تحرك ... بلا طموبيل كتشدها الدار .. وبالطموبيل مكيشدها حد ميقفل عليها حد فين هي.
حطاتها الطاكسي فلعشية قبل المغرب بساعتاين حدت الصالون اللي مولفة تمشي ليه .. فيدها صاك من الاغراض ولابسة جلابتها البيضاء المخزانية وبلغتها الصفرا .. جامعة شعرها ودايرة نضاضرها فعينيها مابغا تجي عينها فعين حتى واحد . وقفات كدور عينيها فالشارع وتقلب من بعد قصدات العساس مباشرة وقالت
- السلام عليكم اسيدي... الله يخليك بغيت نسولك واحد المرى كتكون جالسة هنايا عندها وليد صغير كتسعا ... واش مابقاتش كتجي؟
العساس: مابقاتش كتجي تجلس هنا غتلقايها حدا الجامع ولا حدا المخبزة الكبيرة جالسة .. هاديك هي بلاصتها .
جميلة : الله يجازيك بيخير شكرا .
قطعات الشارع كتقلب ودور بداك الصاك .. دازت للجامع مالقاتهاش وقصدات المخبزة اللي نعت ليها العساس .. لقاتها عامرة كليان من لداخل النوبة مكايناش .. كل واحد كيهز ويشري ويوصل لدارو ولعائلتو باش مع المغرب يتجمعو فطبلة وحدة .. ماشي بحالها هي .. تخرج ولا دخل مكاين اللي يعصط ول ايسول ولا يقول راه خاص وخاص واجي بكري نفطرو مجموعين .. الحاصول.. الناس حال واحوال ماشي كلشي عايش نفس الضروف . لقاتها جالسة مربعة رجليها وجهها محروق بالشمس كالعادة مادة يدها كطلب وداك الوليد جالس فحجرها بنفس الحوايج ونفس الحالة .. السروال كحل باهت متكي كيشوف بعيوناتو والناس خارجة مقدية هازة ما لذ وطاب من المأكولات . قصداتها مباشرة بابتسامة حتى وقفات عليها فاجآتها بالصاك وقالت
- عواشرك مبروكة الاللة هادي واحد الصدقة لولدك ودعي معايا ربي يوقف معايا ويعاوني ويخرجني من المحنة اللي انا فيها
تفاجآت المرأة كتشوف فيها والدموع فعينيها وقالت
الله يرزق الصحيحة والسلامة .. الله يعطيك طولة العمر وينور طريقك ويفك وحيالك .. الله يغلبك علامن عداك ..
وقفات جميلة حلات بزطامها كتشوف فيه واخا فلوسها قلال لاكن تنهدات وقالت متعاطفة مع الوضع .. الرزاق الله ماتعرف الخير منين يجي ونهار نوقف عليه غادي نلقاه .. عمر ربي يضيعني . حيدات ديك 300 درهم من البزطام ومداتها ليها بتخبية وقالت
- شري حتى نتي شي حاجة لوليداتك يفطرو بيها وسمحي ليا كن كان عندي كثر مانعزو فيك
هبطات المرأة راسها كتبكي وولدها الصغير كيجر فالصاك بلهفة ويطل على شنو فيه .. اما جميلة خلاتها وعطاتها بالضهر غادية بحالها وكتوف فيها من بعيد كتمسح دموعها وضحك لودها وتوريه الحوايج من داخل الصاك بسعادة . . تنهدات جميلة بعمق ومشات ركبات الطاكسي غادية بحالها وسط الناس وعقلها ساهي كيفكر... شنو غندير لهاد الفطور.. شنو ياسيدي ربي غندير ومنين غنسرف ..تنهدات بعنق ونزلات من الطاكسي فلحومة ... يالاه بغات دور وهي تسمع لكلاكصون موراها كيناديها .. تلفتات بعفوية لقات مهدي فالطموبيل جالس ومشات عندو وقفات حدا الزاج لقاتو بالفوقية فلكرونة وكاسكيطة كحلة .. طلع وهبط فيها بنضرات خاسرة مافيه اللي يهضر .. ولا اللي يتعصب تكفيه القطعة اللي مقطوع ماناقصو صدع يخرجو على طوعو .
مهدي : فين كنتي؟
جميلة : مشيت تسخرت وصافي عاد فقتي ؟ باينة فيك!
مجاوبهاش ودفع الباب خرج هز ديك الفوقية البلدية من الجنب خشاها فالشورط النايك اللي الاسود اللي لابس من لتحت مع البلغة صفرا وتقاشر بيضين قصار وداز نيشان للكوفر حلو وهي موراه لقات صاك قدو قداش ديال التقدية .. وصف ديال الحليب مجموع والزيت والطحين .. تقدية ديال شهر والساشيات ديال البلاستيك .. بدا يهز ويحط فالارض وهي كتشوف فداكشي فرحانة وضحك وقالت
- ليا هادشي
هز راسو فيها : شوفي شكون يطلع معاك هادشي للدار... ولا نطلعو انا
جميلة : لالا الجيران غينويوها فشكل
مهدي : وشنو غتقدي طلعيه بوحدك ؟
جميلة : وصلو ليا غير لاسانسور وصافي انا ندخلو الدار .
هبط على ديك السلعة كلها وصلها لاسانسور وهي واقفة فيه كتشوف فرحانة حتى سالا ووقف قال برا الاسانسور
- مو الفطور غندوز عليك نخرجو نتحركو
ردت بسعادة: نشاء الله .. شكرا امهدي
عطاها بالضهر مابغاش يزيد يشوفها ومشا خلاها كدور بين داكشي والاسانسور طالع
وصلات للطبقة ديالها فين ساكنة هي وفاطمة وبدات تجر مقاتلة معاكشي وكتوصل للدار .. حلات فاطمة الباب وريحة الحريرة كطبخ لداخل لقاتها كتجر ووقفات عليها كتشوف داكشي اللي عندها وقالت كضحك
- مشيتي تقديتي ؟؟
جميلة : جابهم واحد السيد فعائلتي .. جا بحال درهم دلحلال
فاطمة : من عائلتك !! شكون فعاىئلتك عمامك ولا خوالك ؟
جميلة : مكتعرفيهش .. مهم جاب ليا هاد الخيرات كاملة ...مرجان وصافي ههه
بدات دخل وحتى فاطمة كنجر معاها ودخل للكوزينة .. بالفرحة بدات جميلة تستف السلعة فالكوزينة وتحط وقالت كتنفض يديها من الطحين بلهفة
رجع تكا داير يدو تحت راسو : ناقصينا حنا مشاكيلها هي ومها .. كن كان فيها الخير كوراه شدوها هما نيت ميرميوهاش .. شوف هي شنو حصلو عليها
فاطمة : وصااافي هنينا دابا .
دقات عليهم جميلة مع اذان المغرب هازة فيدها طبسيل ديال لكريب بالشكلاط وابتسامة ودخلات لقاتهم مجموعين على الطبلة .. هز عينو فيها "ابراهيم زوج فاطمة وقال بترحيب كيضحك والدرسة كتبان ليه "
- كنا جاييبين فطورنا وجايين نفطرو معاك
ردت كضحك : مرحبا بيكم هههه (شافت فحمزة ) هاك لكريب احمزة .. دوقو دوقو لكريب جا غزااال (مدات يدها لتمرة ) بسم الله ... حتى انا راه جاني التمر .. جاني واحد التمر غزااال
رد ابراهيم كيفطر: وهااانيا تا نتي فين ما جا الخير ينفع
ردت فاطمة وهي ساهية فالتلفزة : شوية متحرق ليا المقلة
الناس من الجوامع خارجة كبار وصغار .. كاين اللي جاي كيفرق صيامو والتمر فجيبو وكاين اللي خرج ووقف يجمع شوية مع صحابو .. شكون كان يقول شماكرية و اولاد الدرب والقبيح فيهم يكون كيصلي ... العجب وقع ! ... اللي كيضل يغوت ويدابز .. واللي كيضل يتحشش فالركاني .. واللي نعار ومطال تابع العيالات وتابع الزهو والنشاط ... اللي كيهز ويحط فالبنات .. واللي يدو خف من رزقة كتسبق للجيب وللصاك وتخطف وتنهب.. حتا سكايري اللي كيضل شارب ميسحا فير من لرمضان لرمضان .. اغلبيتهم الساحقة صدمو الامام فاش شافعم بسجاداتهم فوق كتافهم و الفوقيات واخا وجهم وجه الشرع .. حتى هما جاو موضين كيجرو فصنادلهم ... نسا من السراجم شافوهم ... طاحو عيينهم عليهم وهما كيتسناو رجالهم يدخلو يتجمعو معاهم على الطبلة .. على فمهم دارو يدهم معجبين كيشوفو.. هاي هاي هاي على ولد عيشة الشميكير خارج من الجمع زعما !... هاي هاي على ولد فاطمة اللي شافو يقول فقيه .. وشووف ليك فلان حتى هوا ... اييه على ولد فلانة . بالرغم من بعض اولاد الدرب اللي كانو مركنين فالقنات كل واحد يدو على كارو ديالو كيتسناه يودن ما سوقو لا فجامع ولا فشكون مشا يصلي.. همو الوحيد يودن ويحيد القطعة بالزربة .. ولاكن هاد النوع كيتسنا مكيبانش حيت ركانيه مخفية ... اللي باين هوا طالع مع الشارع وسط الناس واخا شفار .. واخا شمكار... واخا بزناس واخا مسخوط الواليدين ... اييه حتى هوت صلى وطالع فحاالو .. وحتى ياسين اللي واحد من ولاد الدرب القباح .. حتى هوا طالع لايح على كتفو السجادة كيضحك هوا وصاحبو مكفضين الجلايل وكيتبادلو الثمر وحتى لكارو مع بعضياتهم ، موراهم مهدي عن بعد جاي عاقدهم بحال اغلبية قرانو اللي وصلات ساعتو .. اللي دوا يرعف .. الودنين مصمكين كيشوف قدامو بزز جنب الفوقية لكرونة مخشي فالشورط والغربي كو بيه رجليه.. شعرو فازك والسجادة على كتفو وكارو فممو غادي قاصد الدار . وصل هوا وياسين واحد مكيهضر مع لاخر كل واحد لاح بينتة ديالو زطم عليها وطلعو متابعين دخلو على مينة اللي جالسة بنص كم والبيجامة كالعادة.. لكولون قصير وتيشورط والطبلة فالصالون البلدي متولة على حقها وطريقها شاعلين التلفزة كيشوفو الكامرة الخفية .. مقابل معاها بناصر كيرمش .. كيوفيقاتو حل عينيه ناض جلس سما الله وفطر معارفش اش كيدخل من فمو .. وكانت المفاجاة لياسين ومهدي اللي حسابهم غيلقاو مينة وبناصر فقط .. حتى تصادفو مع الخالة تورية جالسة فالطبلة ببيجامتها وبنتها حداها جالسة بالادب والصواب كتفطر
مد ياسين ومهدي يديهم سلمو وجلسو جهة باهم متكيين على ركابيهم كيشوفو فالطبلة ماهزوش الراس .. ماشافو لا فشكون حداهم لا فتلفزة لا فوالو بحالهم بحال باهم تقول راهم فسباق .. اما مينة وختها تورية كيفطرو ويتجمعو ويضحكو مع التلفازة وكل شوية تقرب مينة طباسل لبنت ختها .. حتى هي عندها حقها فزين وزينها مختالف .. وجهها طويل وفمها مرسوم .. عينيها مجبدين صغار وحروفها كحلة جامعة شعرها الرطب حتى هي بمقبط وحاطة مكياج خفيف .. لابسة كندورة وعامرة شوية بحال مها وخالها ومن شكلها باينة عندها تقة فالنفس زايدة وغير كدور فعينيها وتميز
نفض مهدي يدو وناض كيجبد تيليفون دخل للبيت كيصوني لجميلة
ردت من قلب دارها هي واقفة كدوز الجفاف للارضية وقالت بسعادة
- مهدي .
رد : شكاديري ؟
جميلة : كندوز الجفاف ونتا ؟
مهدي: كنتسنا العشا تودن
ضحكات كدور راسها: اممم الايمان ! .. باز
مهدي: سيري يا بنت ل*** راه رمضان انطلبو الله يعفو علينا
جميلة : اسييير نتا واحد النمرود منك مكاين ... تخاف ماتحشم ... ماسولتيش فيا الصباح كااع تا دازت العاصر عاد جيتي شنو كنتي كدير؟
مهدي : شغاندير بيك الصباح غادي غا نخصر الصيام معاك وصاف ... نتي ديال ورا الفطور الصباح غا فوتيني
جميلة : هههه وشنو دابا واش غتجي؟
مهدي: تالمور تراويح .. ديك الساعة هانا معاك .
جميلة : صافي يالاه الله يقبل
مهدي : ااااححح ونشدك اجميلة ...
ردت كضحك : واسييير عاود الوضوء الله يمسخك راه رمضان هادا
مهدي: غنغتاصبك نهار العيد وهانا فين قلتها ليك
ردت بسخرية كضحك: الله يعفو عليك ... مايدوز هاد الشهر تا تموت اربي السلامة . يالاه سير راه كيأذن .
قطعات وكملات مسيح الدار كدور وتنقي .. الى كاين شي حوايج يتصبنو والى كاين شي ماعن دوزاتهم وحتى هي مشات توضات وقصدات القبلة .
مور لفطور عالم اخر .. كل واحد فاش كيغطس .. كل واحد فاش كيتشطن وكل واحد فاش كيتلها .. ماشي كلشي عندو نفس السيستيم ، وماشي كلشي عالم على شنو كيوقع مور الفطور عند ناس اخرين ... فئة كتفطر وتكا تنعس ولا تبع المسلسلات .. وفئة كتخرج للشارع تسارا عند بالها هاداك حد الدوران والمسارية .. وكاينة فئة اخرى عالمها بوحدو فبلايص اخرى وفيها كتلقى راحتها ومتعتها وفيها كتحلى ليها الجلسة .. من هاد الفئة كاينة ماريا اللي شللات يديها من غسيل الماعن بسرعة وخلات النوبة لختها دير العشا ومهم مشات للجامع تصلي ومنها نيت تنمم شوية مع العيالات فالخصة مور الصلاة .برطمة متوسطة بصالون بلدي وكوزينة ومراح بالسدادر وبيت النعاس كدور ماريا بسرعة وتشوف فالساعة مزروبة .. جرات الفوطة ومشات لادوش كتجري دوشات وخرجات كتنشف شعرها .. هادا حال ماريا .. الوقت عندها كالسيف ديما قاطعاه من الجدر قبل ميقطعها .. ماعندهاش وقت للفراغ نهائيا .. لبسات جلابتها كالعادة والزيف على شعرها وجمعاتو بزيف حياتي وخرجات كتجر البانطوفة والجلابة مزيرة لصالون شعبي فالحومة .. دخلات لقات السلام وجلسات كتجري فوق الكرسي طلقات شعرها كيتصايب وكتجمع مع بنت جيراهم اللي خدامة تما واللي مولفة تعاود هي وياها .
ماريا : خيطت ليك واااااحد الجلابة ... واحد الجلاااابة كتعيط يا ليييل ياعين فالكحل باخياطة مخزامية ولعقيق يالاه جبتها الصباح من عند الخياط
فنواحي من مدينة سلا بعيدا على الحداثة والضجيج ... وعلى طريق لوطوروت فين عايشين ناس اخرين اجواء بعيدا عن الاجواء العائلية ... مكان تجمع فيه غير اصحاب الليل .. محبي السهرات والاماكن والنغمات " كلوب تير " المكان اللي مكيطفاش لا ليل لا نهار لا فاعياد ولا فمناسبات ... مطان من الاماكن الخاصة بالشيشة المرافقة للسهرة واللي كيعمر حتى مكيبقا للاخير فين يجلس. وقف السيارة على برا بين السيارات فالباركينك ونزل كيقاد الشور حفيان واقف فوق الكياس الابيض .. جبد السبرديلة ديالو من اللور لبسها ونزلات هي وقفات كتقاد العنق ديال الجلابة وطلقها من اللور وتقاد راسها وشعرها .. زدح بيبان طموبيل وضار عندها وهي كتقاد حالتها مد ليها يدو شدات فيه غادية وكتشوف فجنابها .. ضرياتها ريحة الشيشة فالباب فساحة فاضية بحال المقهى القليل دالناس اللي جالسين .. لاكن صوت الموسيقى الشعبية مجهدة جاية من اعماق داك المكان .. تمات غادية فوق الرخام كتقرقب وهوا كيسلم ويمد يدو على الناس اللي كيصادف بابتسامة عريضة وخرج بيها من باب اخر لجردة كبييرة جدا مكيبانش ليها حد .. نصفها الاول مخطي بسقف عالي بحال الخيمة ونصفها الاخر عاري من غير المنصة الكبيرة اللي كترأسها اللي مغطية بحديدة كبيرة واضواء... والوسط كراسي منتشرة كبيرة بلا عدد وفوطايات والناس عاطية بالضهر كتفرج وكاين اللي نايض كيشطح والشيشات محطوطين فكل طبلة ... كان فراس المنصة عادل الميلودي والفرقة شاخدين الجو شطيح ونشاط والاشجار فجنب الساحة عاطية منضر وجاذبية للمكان .. مشا معاهم نادل مباشرة وهي كتشوف الاجواء قدامها والناس ناشطة .. رجال كبار ونساء بمكياج قوي وشباب وبنات بملابس عصرية منوعة . فوسط الحضور كانت طبلة خاوية مكتوبة عليها réservée " مثل بعض الطاولة القليلة المحجوزة ، جلسات كضحك وتشوف موراها فالناس ورجعات شعرها للجنب كتقادو .. لاح يدو وراها وطلب ليه شيشة ومشروبات من غير الخمر الممنوع فداك المكان وليه جناح خاص بعيد .
تلفت شاف فيها بابتسامة قاد ليها الحلقة المقلوبة فودنها وقال
- عجباتك البلاصة؟
ردت باعجاب وسعادة : زوييينة
زيرها من خصرها عندو باسها فخدها وعينو على وحدة اخرى كتشوف فيه بنص عين واعجاب وترمي بحركات باش ثير الانتباه .. قلب عينيه بسخرية وعاود باس جميلة بمعنى ها لالاك فين تباني نتي.
الجلسة حلات والدنيا زهات... جميلة عجباتها الجلسة والراحة اللي وخدة فحضن المهدي وهوا متكي كيشيش .. المصور كيدور ويصور الناس اللي باغا تصور مع الفنان فوق المنصة .. قطري كيشتت فالدولار على رباعة دالبنات دايرين بيه والفلوس كترما فالسما وجات على مهدي وهوا يدور راسو مخنزر نفض رجلو وقال كينكر
- حاايد از** عليا فلوسك سير لهيه ورمي ..
جاو الدراري كيلقطو بسرعة حدا رجليه وهوا كيرميهم ليه من تحت الطبلة بنرفزة ورجع تا كيتمتم بوحدو .. قنعات جميلة بالجلسة وراسها ضرها بقوة الصدع والموسيقى وقالت
- مهدي .. يالاه نمشيو بحالنا عييت
شاف فيها عن قرب كيتأمل ملامح وجهها وقال
.- عيتي؟
ردت : امم .. يالاه صافي براكة
حط الشيشة ناض وقف دار ليها الطريق قدامو غادية كتعوج وتقرقب وهوا حاضيها .. تلفتات عندو فجاة وقالت
- مهدي فين طواليط ؟
شار براسو جهة الطواليط وداها لغرفة فالهواء الطلق بابها مقلوب جهة الشجر والاضواء والبنات داهلين خارجين للمرحاض.. دخلات قضات حاجبها وخرجات لقات لبنات حدا المرايا اشكال وانواع بشورطات مقزبين والشعورات كيتجمعو ويقادو مكياجهم .. شافت فيهم بنص عين قادات العكار ديالها وخرجات كتمشى وتقلب بعينيها جهة الطبالي حتى للباب الزجاجي اللي كيخرج للخرة وهي تشوفو واقف مع ثلاتة ديال البنات كيضحك معاهم ويديه فجيابو .. عبسات وعقدات حجبانها وبدات تعيط ليه .. تلفت شاف فيها وشار ليها بيدو تمشي عندو لاكن مارضاتش وربعات يديها بغيرة وقلبات وجهها كتسناه وتسوط وتنفخ .. شار بيدو ليها تسناه ومشا بسرعة جهة المنصة هوا وبنت من البنات كيهضر مع شي واحد فيهم والبنت كضحك فرحانة .. حطات كتفها على مهدي وهوا حاط رجلو فوق واحد الحديدة متكي عليها وكيهضر مع الشخص اللي جالس فوق الكرسي فالطرف .. شعلات نار الغيرة فجميلة وتزنك وجهها تا بعا الدم يطوش وخرجات من تكا بسرعة كتنتر وتنفخ .. تبعها واحد كان حاط عليها العين كيجري ويعيط ليها توقف وهي دور عندو نترات يدها بغضب غوتات عليه تا طاح الصاك فالارض وتحنات هزاتو بعصبية ومشات كتجري حالفة فيه ماتخليها على الفعلة اللي دار وخلاها واقفة .. وكملها وجملها تسناي هانا جاي ومشا خدا وقتو كيهضر ويضحك على خاطرو .. بدون شعور وبغضب شافت واحد هوا وبنت طالعين فطموبيل ومشات كتجري عندهم والدموع محجرين فعينيها وقالت
- عفاك واش غاديين جهة سلا ؟ توصلوني معاكم ؟
شافت فيه البنت باستغراب والشاب كذلك وقال بارتباك
- غاديين رباط اختي ولاكن نوصلوك فين غادية نتي؟
ردت بتوثر وصوت متقطع مخنوق : حطني غير حدا بلاصة فيها الطاكسيات نكمل راسي
هبطات راسها بخجل ورد الشاب : واخا ماشي مشكل طلعي ..
طلعات بسرعة للور كتجري والبنت كتشوف فصاحبها بميوعة ماراضياش على اللي دار وكتحرك ليه راسها وتحلف فيه .. انا جميلة ماهمها حد همها غير تمشي ويقولو اللي بغاو ديك الساعة . مع سدات الباب عليها اللور والطموبيل البيضاء زجاجها كحل تلفتات وراها بسرعة كتشوف جهة الباب وهوا يبان ليها خارج كيجري ويدور فبلاصتو مخلوع كيقلب
طلع الشاب فالطموبيل سد عليه حتى هوا وديمارا السيارة خارج وجميلة قالبة وجهها كتنهج وتسوط وتشوف فيه كيجري فبلاصتو ويقلب .. جهة الطموبيل اللي كانت قريبة ليها قبل متحرك السيارة .. بردات حرقتها شوية وهي كتفرج وبدون شعور قالت
- يالاه واقلب عليا دابا .
بعدات الطموبيل مشات وشافتو رجع لداخل كيجري ويجبد تيليفون من الجيب .. ضارت ربعات يديها والشاب حاضيها كم المرايا .. اما هي تقول جالسة بوحدها .. العقل مرفوع والفقصة كطلع وتهبط فصدرها .. صونا تيليفون وجبداتو من الصاك بسرعة لقاتو كيصوني .. قطعات ليه الحس وقالت بغضب
- صووني تما حتى تشبع ... الى متخليتك دور كي لحمق ماسميتيش جميلة
هز فيها الشاب عينيه خوا والبنت مصدومين وطفات تيليفون فخطرة خشاتو فالصاك سدات عليه وربعات يديها كتنهج وتشوف فالزاج حتى ماحسات لا بطريق ولا والو وحتى الحوار ماسمعاتوش اللي دار بين الشاب وحبيبته
الشاب: نوصلك نتي اللولة باش متعطليش على دراكم صافي
جميلة الجزء التاسع
محتوى القصة
التنقل بين الأجزاء