الحب أقوى من أي إتفاق الجزء الخامس

من تأليف ندى العمر
2020

محتوى القصة

رواية الحب أقوى من أي إتفاق

مع سالا جملتو هزت ايدها باغة تعطيه لوجه وهو يشدها ليها محمر فيها الشووفة واصل لقمة الغضب عينيه مغورين كوحل من لتحت وحمارو ترهبات منو منواتش بإسم نطقاتو غيردو فهاد لحالة 
مراد واصلة فيه لطوب ~ متفكريش فيها حتى بضحك كتسمعيي ،جييتييني ناادية اما نوريييك ،وحدة أخرى نجلسها على قرعة تشوف لويل طويل معايا بلحق انتما لبنات كتمشيو عكس التيار كتبغيو لي يزوق لكم لهضرة ويضحك عليكم بإسم الحب ولي هرهوري وكيجي فاص كتبقاو تلواو عليه خصك تعرفي انا سميتي بن زين ماشي ميخي لي كنتي معاه خلاقيت راجل ونبقى راجل من أولي مكنضحكش على بنات ناس كنخاف من عقوبة ربي كنعرف ندوز ليلة وتكون بتفاق موراها خويا مايعرف ولد عمي ..
صدرها كيطلع ويهبط كتنهج وداتها كترعد من قوة العصاب والاهانات وكلام ا لي تغلل فقلبها كتشوف فهاد الإنسان لي حداها كيفاش تسلط عليها وقلبها ساس على راس.. متقبلتهاش ليه وضروري توقفو عند حدو واخا شد ليها ايدها حكمها ولكن فمها ميقدرش يلجمو...بدات كتعير فيه وتنثر عليه ..
نادية ~بزااف عليك الا كان عقلك مسخ كيهيأ ليك شي حاجة ماشي شغلي ولكن باش تغلط فيا غنذمك كتسمع نذمك !!....انا فعلا غلطت في سميتك ولكن ماشي حيث مزال في بالي شماتة فحال هاداك ابدا صفحة وقطعتها وكتاب وسديتو.. دورات وجها وبزقات ،حيث بكل بساطة ريح وداز من حياتي ولحتو بحال هاد لبزقة معمرو يرجع لحياتي كتفهم ومكاينش شي واحد لي مزال يلعب بيا ولا بمشاعري.... انا كنت كنفكر في علاقتنا كيفاش غادي تكون وعلاش الا تنجح فالمستقبل خصوصا لوقت ل معنديش فيه تقة في جنس رجال ولكن بان ليا كنت غنتسرع فهاد القرار وغنغلط من جديد ..خنزرت فيه وشافت ليه فيدو لي مزيرة على معصمها وقالت بأمر ~ طلق مني مزال محياش ولد المرأة لي يهز يدو عليا ولا يحكمني واحد لي يحكمني هو لي خلقني !! بدات تجبد معاه باغا تحيدها ..راه قلت ليك طلق !!
ايد كان مزير بيها على يدها والايد لوخرا لگارو شاعل كيحرق فيه بلاما يحس ~كشاكشو خارجة وصل لقمة الأعصاب داخلها خافت ولكن وجها عكس شنو عندها لداخل مبينة لقوة وحجبانها معقودين فيه وجها رجع حمر ~ متجمعينيش فنفس الهضرة مع داك الحيمااري ،حيث انا راجل عليه كتسمعي وماشي ولد القاف 
بدات تحرك رجليها بعصبية خلاتو تا سالا وقالت ببرود ~ صافي ساليتي يالله رخي مني وعتيني في يدي !!
رخف عليها وقال ~ الا طلقتها دابا مرة جايا مغنطلقش سمعتي !! واخر اخر مرة تشركيني مع شمايت
ساس يديه من باقايا لگارو وضرب فيها وزاد ...كفو محروگ ولكن ممسوق ليه حيت محاسش بيه فطريقو داز على زيدان لي غادي لايح يدو على كتاف مريام وقال وهو غادي ~. مغاديش غير سيرو
مريام دارت متبعة ليه لعين باينة من مشيتو ورجليه لي غادي يخبط فيها معصب شافت قدامها وهزت عينيها لزيدان مسولاه ~. اش واقع مال مراد؟؟
زيدان عنكش شعرها مكملين طريقهم ~. خليك منو وديها فيا انااا 
مريام بدلع ~. وايلا مديتهاش فيك فيمن نديها راك عندي غاا نتا الروح الا كانت تعطى نعطيهالك بعيني مغمضين 
زيدان دار نظاظر فوق عينيه وشاف نيشان بذهن مرفوع ~ ياك الالة 



مريام تنهدات بحب وتمات غادا تلعب بشعرهاا وتعبر ليه ~ اياه ، نتا استاذي و حبيبي وروحي "تزنگت وهي كتقولها "
زيدان جبد گارو من جيبو لاحو ففمو شاف فيها مطول شوفة ممفهوماش ونطق ~ وقريب راجلك ...
قلبها نبض وفرحات بزاف من كلامو شحال كتسنى هاد نهار واللحضة لي اسمها يكون جنب اسموا وتحمل اسم الخليفي وربي يسرع فالأيام لي تجمع هي وياه فيه وتكون فدار وحدة عشهم لي يعيشو فيه لحضات حياتهم الماجية تكون مملكة صغيرة وهي سلطانتها وهو حبيبها وبطلها المغوار ينعسو بزوج ويفيقو بزوج ويعيشو فدار وحدة
مريام عينيها كيبريو ~ واش بصح باغي تزوج بيا !!
زيدان حيد يدو من على كتافها وجبد بريكة شعل گارو ~. علاش هادشي فيه اللعب ولا نتي مبغيتيش 
مريام بلهفة ~. كنتسنى داك نهار بحالاش ، شكون قدي نتزوج من لي كنبغي ونكمل عمري معاه 
زيدان نتر من گارو ~ مبقاش بزاف غا وجدي راسك تانا زربان وبزااف .. 
ساط الدخان مضيق عينيه ، حتى دخلات ريحة مع نيفها خلاتها تكحب ~ من امتى كتكمي ،
زيدان مداهاش فسؤالها ~. سيري عند بنت خالتك راه فين واقفة حتى نسالي هاد لگارو ورجعي لعندي
تعلات باستو في حنكو ومشات كتلعب بشعرها لي كانت هازاه لفوق جا مواتي مع لبيسة لي لابسة ، سروال لاصق عليها بالكحل مع تي شيرط قصير شوية نص كم وعريان من صدر دايرة حلقات وسنيسلة رقيقة بيها اول حرف من اسمها ،وفرجليها كانت لابسة بالغين خفيفة ومريحة في لبسة
وقفات على نادية لي شوية وتحرت ديك الارض برجليها ، عصبيتها تلاشات نوع ما وبردات شوية على كيف كانت محسات الا وظل واقف وراها عند بالها مراد بغات تدفع شوية كبير وتدخل بحالها بغات دور وهي تلقاها مريام 
نادية بخيبة~. هادي نتي !!
مريام رفعات حجبانها ~ وشكون غيكون ؟؟ واش بينك وبين مراد شي مشكل شفتو دخل طالع ليه دم 
نادية زفرات ~ يطلع ولا ينزل شغلو هاداك ، مريام مافيا لي يخرج ضارني راسي منعستش مزيان تبدلات عليا لبلاصة انا غندخل دابا نتكى 
مريام ~. علاش اصحبتي يالله معانا تفوجي شوية 
نادية طبطبت على كتفها ~ غا سيري نتي فالكفاية ولايني ردي لبال لراسك
دخلات لدار ولوخرا مشات لعند زيدان لقاتو واقف وشاد فيدو
لجام للعودو المفضل لي كان من نوع فريزيان كحل بحال ليل وطويل وعامر نوعو رفيع ورياضي ...كان حاط يدو على شعرو وكيدوي معاه تا وقفات عليه بفم محلول عجبها وخلعها فنفس الوقت 
مريام جات ورا زيدان وتخشات فيه ~ هادا هو لخيل ديالك 
زيدان هز راسو بالايجاب ويدو مزالا كتلعب في لعود ~ هو هادا la perle noire
مريام ~ غزال تبارك الله 
زيدان نقز فوق منو بخفة مخلي ليها بلاصة قدامو.. مد يدو ليها وقال ~. اري يدك !!
مريام بتردد مدت يدها ليه ~. خفت ازيدان !! عوجت فمها ..ولا طحت ؟؟
زيدان شدها من يدو صحيحة مزير عليها باش يجرها لعندو ~. معندو ميوقع ليك غير رخي راسك 
مدات ليه يدها وتعلات فورصة على كتفو وجبدها ليه حتى وقفات على رجل السرج ويديه على يدها وعينيهم مقابليين كيشوفوا فبعضهم نضراتو كانو سحر او تعويدة لقاها عليها خلاها تنسى لوقت والمكان فقط دقات قلبها لي كيتسارعو نفسها تعالات اما هو شوفاتو كانو مشتين فانحاء وتقسيم وجها نضراتو كانو كأنه أسد كيتربص لفريستو وثرها بشوفاتو لي كيسحرو وعينيه النايمين قرب ليها بطئء وحكمها من خصرها حاط شفايفوا على شفايفها بدون حركة خلاهم هكاك َمن غير ميحركهم غمضات عينيها وتنهدات تنهيدة طويلة مدة وهوا على داك لحال حيد شفايفوا وفلحضة هزها حتى جابها قدامو ريحتها كضرب فيه وريحتو تخلطات من انفاسها... شعرها لي كيعجبو كيطير عليه شدو بيدو حتى بان ليه عنقها بيض ومبورش كمل على مابيه وباسها فيه ونطق بفحيح ~. وااجدة !! 

جابها قدامو ريحتها كضرب فيه وريحتو تخلطات من انفاسها... شعرها لي كيعجبو كيطير عليه شدو بيدو حتى بان ليه عنقها بيض ومبورش كمل على مابيه وباسها فيه ونكق بفحيح ~. وااجدة !!
مريام حالة فمها وعقلها غايب وغير لقلب واحاسيس لي حاضرين ، جاوبات ببلاهة ~ لاش ؟؟
زيدان حط يديه على جنابها ودوا فعنقها بشوية~ لشنو ما بغيتي !!
مريام حشمت وتزنگت وهادي حالتها وهي معاه هو استاذ في الغزل والكلام لحلو وهي تليمذة كتعلم على يدو ~ حم كحكح 
زيدان بتاسم بجنب وخشا كل يد تحت من باطها شاد لجام وطبطب على عودو ودوا معاه باش يتحرك ،~. متخااافيييش 
وبحالا قاليها خافي ملقات كيف دير تدور تشد فيه وتعلق...ولات صفرة وفمها بيض محد العود كينقز وروحها كتنقز معاه ولات تشهق ليه تما تخلعات بزاف بسيف اول مرة ليها...مكرهاتش دور لعندو تزير عليه عاطياه بظهرها معرفات كيف دير ولات شادا على يدو كاع قمشتها ليه وترعد ~. غا بشوية ازيدان عنداك عنداك غنطييح 
زيدان قال فوذنها ~ ششش واش كتيقي فيا 
مريام بلاما تفكر كثر ~ اه 
زيدان ~ رتاحي انا معاك وشادك مزيان معندو ميوقع ليك بدأت ترخى ومستمتع باللحضة وكتمتع بداك لمناضر والخضورة لي كتغدي العين وتمتعهااا ،شافت شجرة كبيرة تبهرات بيها وقف تحت منها كتستنشق ريحة الطبيعة وتشوف قدرة الخالق وابداعو فالكون
علاش لا متكونش مرتاحة وهي مع روحها لي كانت مفتقداها واخيرا لقاتها 
زيدان بشوية دورها لعندوااا
جلسات براحة كتنهد مقابلة معاه وضهرها على وجه العود خشى وجهو فعنقها كيستنشق ريحتها بأريحية تقول لعالم عايشين فيهم هما بزوج نساو المكان ولا الزمان ولا الأشخاص لي ممكن يكونو كيتفرجو فهاد المشهد الرومانسي باشر بتقبيل عنقها بطء شديد ممسوقش ، خلاها تبورش وتحس بدغدغات خفيفة فكرشها وعنقهااا شوية بشوية زاد فلوتيرة مباشرة طلع لودنيها وخلاها تلفت اكثر وأكثر ماهي ولهانة بيه ، كان كيعض عضيضات خفاف فوديناتها ترفعات فقط اهاتها لي ولات كتسمع هو ولا هو هنا خدام هدفو لوحيد يرفعها ويخليها تنسى كلشي عقلها وقلبها يبقى غي معاه فقط طلع لشفايفها كيبوس بوسات حنينة وبوتيرة أخف كل شفة كيعطيها حقها مصات وعضات، حلات فمها تنفس لقاها فرصة وجر لسانها كيمص ويعاود لحضة حسات برودية فصدرها على مجات تستوعب الامر وتشوف شنو هاد طرف دالجليد لي تحط على صدرها حتى نزل شفايفوا بسرعة خلاها تعض على شفايفها وتشوف هاد دونجوان للي عندها كيفاش زرب عليها خلاها متعرف شنو كيدير ولا فين باغي يوصل...... هز يدو لي صحيحة حطها على عنقها كيماصي فيه وشفايفو مزال على ثديها كيمص ويجر باحترافية
~~~
أنفاسك خمر مباح يثملني
حد الهذيان فهي تجعلني 
أتذوق لذة الهواء بنكهة شفتيك..

هي وهو وشيطان حاضر كانت بين يديه كيشكلها ويگلبها كيف بغى ، ويقدر يدير فيها ما تشهات خاطرو ، عينيها مغمضين وكتلوى تحت منو مرة تنهد مرة تشهق هادشي جديد عليها واول مرة تعيشو ايديه رفعتها وبوساتو قتلاتها ونساتها راسهاا
وهو كثر منها غرق فيهاا وترفع مزياان ولولا صهلة لعود كان يكمل على مبداا ويزيد يغطس كثر وكثر ، باسها بقوة وناض من عليها ناعل شيطان گعدهاا لاحها على صدرو كيقاد ليها في حوايجو ،عضات على شفايفها لي رجعو حمرين ببوساتو وتخشات فيه مقاداش تطلع فيه عينيها حشمانة وعاد سرات معاها فين وصلو ...مبغاش يحكر ويزيد يحرجها كثر عنقها ورجع سرج عودو غادين بالمهل حتى نطقات ببراءة~. عجبااتني الركبة فوقو
زيدان بتاسم جنب ~. انا عجبتيني نتي كثر 
ضحكت ليه وزادت تمخشات....كملو مساريتهم جهد كثر من ساعة ونص عاد رجعو نزل هو الاول عاد رفعها من خصرها منزلها ، تقدر تقول بلي الوقت لي كدوز معاه من احسن الأوقات ل دوزات في حيااتها كاملة ،لطرجة كيطير دغيا ومكتحسش بيه وحلاوة الحياة عاد حسات بيها وهي بين يديه
دخلو لدار لقاوها صاقلة ضربها بخفة على مؤخرتها وقال ~. انا ندوش ونززل 
نريام بابتسامة ~ تا انا نطلع نشوف نادية
دخل لبيتو كينصل في حوايجو تخشى تحت رشاشة منتعش خرج بدل وسكسف على الحالة ومشى نيشان لعند مراد داخل عليه لبيت لقاه منغم ومكيف ~. اش تمم اسي مراد ...تلاح قبالتو في الفوطوي 
مراد لابس غا شورط وعريان من لفوق مجبد رجل وطاوي لوخرا جوبو ساخط وعلى نقشة ~ نتا لي جات معاك ناشط ماشط وانا منكدة على ملتي ، حياتي كاملة مسلگط ونهار نويت لمعقول بنادم تعفر 
زيدان بغمزة ~ يكما نادية ؟؟
مراد طفى لگارو وتقاد في الجلسة حاط يدو على قلبو ~ وشكون غيرها عششت هناا اصحبي ووليت كنحلم نمشي معاها بعيد ...
وقف قدامو مضيق عينيه ~ وشنو كتسنى 
مراد بعزم ~ معندي منتسنى غتخوي ليا راسك شي ليلة تمشي تخطب ليا
زيدان ميل راسو موافق ~ علمتيها بعدا تافقتو 
مراد لبس صندالتو ووقف ~ انا مكنعلمش كنغفل نتا غا وجد ليا راسك نحطها قدام الامر الواقع ...

نزلو لتحت يتغداو كانت مكلتهم لي طلبو وصلات عيطو على لبنات ل وقت قليل ونزلو مريام مبدلة ولابسة كسيوة حد الركبو اما نادية لابسة بيجامة بيتية زوينة وعينيها منفوخين حناكها موردين وشعرها مجموع بإهمال ، جلسو في طبلة لي غير شافتها وميقات ~. غا بصحة انا مقاداش على هادشي
مراد زفر وقال بجهد ~ ضسارة تاع والو 
ميكت بلاما تجاوبو دارت راسها مسمعاتش وهي تدور لعندها مريام ~ وشنو غتاكلي اصحبتي وقت لغدا هاذا 
مراد بحدة~ لي بغى ياكل ياكل ماكلة قدامها شنو غنحزرو بنادم على كرشو

ضربت فيهم وطلعات لبيت كانت كتشعل بالعصاب والعافية شاعلة في قلبها ..شدات في راسها وتحكمت في عينها بزز ولكن كلامو كان قاصح عليها بزاف وعلى اي وحدة ،حشيان لهضرة كل مرة مقداتش عليه ومقدرتش تزيد تصبر عليه كثر بدات كتجمع فحوايجها باغا تمشي فحالها مبقاتش قادرة تستحمل اهانتو ليها ....تحل لباب ودخلات مريام لي تبعتها كتجري غير شافت شنو كدير وهي طير لعندها شدات ليها فيدها 
مريام ~ شنو كديري اصحبتي !! ..نادية
بصوت مغبن ~ انا غادي نمشي فحالي اما انتي الا بغيتي تبقاي بقاي غادي نقول لخالتي راك مزال معايا ..
رجعات تجمع في حوايجها معطاتهاش وقت فين تجاوبها 
مريام تقلقات ~.اش كتقولي اصحبتي وعلاش هادشي 
نادية لي فراسها فراسها ~ عفاك مافيا لي يهضر دابا 
بدات تبدل فحوايجها فزربة اما مريام معرفات باش تبلات ومبقات عارفة مدير من غير تنزل تجري لعندهم تقوليهم اش كاين حيت مستحيل تخليها تمشي مقلقة وبوحدها جاو بزوج يمشيو بزوج ...
مراد مسح على راسو مشربن ~. مغاديش تمشي غاا تهدني انا غنتصرف 

هزات باليزتها ل جمعت فيها حوايجها وتخربيقها كامل ..مكانتش حاسة براسها اشنو كدير غير كتجمع وروحها باغة تخرج من بلاصتها ..كملت ونزلت كتجري توجهت نيشان الباب باغة تحلو حتى جرها من ايدها دورها لعندوو ..غوتات بلما تحس نادية~بعععععدددد مننننني!! ..جوبها بنبرة عكس باش كان كيدوي معاها شويا هذا ..
مراد~فين غادية ؟؟
نادية~ماشي شغلك !!
مراد~نادية قادي هضرتك معايا واخا !!.سولتك فين غادية ،جوبي !!
نادية ببرود ~ غادية فحالي ياك غير متقلة عليك ومباغيش تهضر معايا زائد انا كنجيب ضسارة ومفشة ، ايوا صافي علاش اسيدي كتسول فين غادية خليني نخوي ليك بلاصتي باش ترتاع 
عوج سيفتو فيها وهو يجرها من ايدها داها الكوزينة گلسها فوق كرسي ومشا لثلاجة خدا عصير وخواه ليها وحطو قدامها اما هي غير كتشوف فيه ~ شربي بردي ليك راه بنتي ليا شحفتي ..شافت في لعصير وفيه وهي تنطق باستهزاء نادية~ساليتي من ضحك لباسل ديالك حيت تابعاني طريق وبغيت نمشي قبل ما يظلم الحال وملقاش فاش نركب ،مهم كنشكرك على العصير جات تنووض وهو يرجع يشدها وزير على ايدها مزيان حتى قصحها ودوا بنبرة تهديد ~ بلاما تزيدي فيه حيث صبري تقادة معاك ابنت الناس وشفتي هاد الدار وبربي لا خرجتي منها ولا عتبتي برا الا مخليتك انا ..

ربعت ايدها وگلست عينيها عامرين دموع ،حسات بيه قصح معاها بزااف ، مجوباتوش صوتها تخنق وحتى الهضرة الا بغات تخرجها غتسبقها لبكية ...شاف فعينيها لبكى وعرف راسو زاد فيه معاها نفخ بغضب وطلق من يدها لي تصورو فيها صبعانو...دوز ايدو على وجهو كيمسح لعرق وكيهدن في راسو ..خدا لكاس تاع العصير حطو ليها بين يدهاا وقال 
مراد كيشوف في عينيها ~ هاكي شربي 
مشداتش معاه زگير ابدا خداتو من عندو وشربتو منو باغا تسايرو حيت مبقاتش قادة تهضرة محتاجة غا بيت تسد على راسها فيه وتبكي حتى تبرد ...شربتو كامل وحسات براسها تنفست شوية وهي تدوي بلاما تشوف فيه ~. بغيت نرتاح
مراد جوبها وهو مركز فيها الشوفة ~ واخا فاش ترتاحي نهضرو انا وياك ،قرب منها حتى باسها فجبهتها وعطاها طريق دوز ...جمعت الوقفة بزربة حطات الكاس وطلعت الفوق كتجري ودموعها هابطين ..اما هو بقى واقف كيشووف فيها وكيتنهد ..غير غبرت من قدامو سمع صوت تلفون ديالها، بلاما يتردد حل صاك وهزو كانت نمرة بلا سمية ..شوية ووصل مساج من نفس النمرة طلع ليه مجبد في الشاشة وغير قراه جمع يديه مكرهش يلقاه قدامو يشخشخ لمو لملامح 
" نادية عطيني غير فرصة وحدة نجلسو وندويو عارف راسي غالط فحقك نتمنى متبلوكيش تا هاد نمرة ...عماد"
قيد النمرة في تليفونو مشربن ورجع تليفون لبلاصتو ، بقى جالس كيكمي باش يتكالما جهد نص ساعة ولا كثر حتى ولات الكوزينة كلها دخان عاد هز ليها حوايجها وتم طالع لعندها نيت يفك معاها الجرة مقادرش يصبر دق وتسناها تجاوب وداكشي لي كان دخلهم ليها ونطق مبعد ~. خاصنا ندويو !! 
نادية كانت جالسة فوق الكرسي ~ معندنا فاش امراد قبيلة كنت باغا ندوي دابا نسيت الهضرة لي كنت باغا نقول 
مراد بشوفة قاصحة ~. ممحتاجكش تهضري باغيك تسمعي ، قرب منها وجلس قفازي حاط يدو على ركابيها
سمعيني مزيان انادية ، انا ملي قلت ليك بغيتك وديك الهضرة لي خطبت عليه بيها لبارح ماشي كنت شارب كاس وجايب لكاو وباغي نطيحك بدوك لكليمات ، " بالغوات " ....لا كل كلمة قلتها عنيتها ، انا باغيك لزوااج ماشي لتفلية 
نادية قاطعاتو ~. ولكن حنا مكنعرفوش بعضياتنا
مزيان باش نتزوجو
مراد ~ الالة انا كنعرفك نادية محامية عندها نيشان وجوابها على نابها هادشي كافيني 
نادية رفعت حاجبها ~. ايوا وانا اش عارفة عليك من غير بلي واحد خارج على قانون وعندو بار ؟؟
ضحك باستهزاء وجر كرسي تاني جلس عليه مقابل معاها ~ مراد كماي ويكايري وعندي بار وغنفتح واحد اخور ، معندي لا عائلة لا ل يخاف عليا من غير زيدان ، دوزت لي فات من حياتي بوحدي ومباغيش ندوز تا لي جاي هاكداك ، اش باغا تعرفي اخور ؟؟
معرفات متقوليه وهو يجمع الوقفة وقال ~ انا غنبعد عليك شي يامات وغنخليك تفكري على خاطر خاااطررك ومزيااان وديري فبالك انا مراااد مرااد 

قال كلامو وخرج مخليها حايرة معاه 

دازت ديك لعشية ماشي هي هااديك تا حد مبقات عندو لگانو وقررو لغد ليه مع صباح يرجعو بحالهم ومعاهم زيدان ل كيخصو يرجع يقابل خدمتو وعائلتو سيغتو مو لي هراتو تعيااط وتسوال فينك ؟ اجي ؟الدار خيابت وظلامت بلا بيك ؟؟

كانت جالسة الحاجة مينة مهمومة وحاطة يدها على خدها مرو تفكر صباح وتدعي معاها مرة تفكر ولادها طلب الله يشوف من حالهم ... حتى تم داخل اخر العنقود نصر لولد لي شاهمها وجاب ليها تمام ، جاي يلاوح في رجليه وراسم على جبهتو الله يقربلها ما يصبح ما يمسي يضحك معامن بغى وينكد على من بغى
رمى سلامو وجلس حداها كيصووط
مينة بعتاب ~. تالين غتبقى هاكدا اولدي ، واش عند بالك باقي تاع راسك راك ببنتك ومرتك سول فيهم وخرجهم ونتا هاملهم 
نصر وقفها بيدو ~. لواليدة كامي جوان باغي نتفيجط بيه ومتضربيهش ليا فلخوا... راني واقف ريال مبقى يدور
مينة بصوت مرتافع ~. هي الا خدمتي وعولتي على راسك وداك لبلا بعد منو هو لي مخليك اللور اللور 
نصر جلس مقاد ونطق بجدية ~ واش عمتي خلات شي فلوس حقها في الورث فيناهو ؟
مينة تصدمت ~. اش كتقول 
نصر خنزر ~. لي سمعتي علاش ماشي من حقي ولا باغين تاكلوني تا انا ولد خوها وكيف زيدان عندو الحق في فلوسها تانا عندي 
مينة ~. اشمن حق وعلاش داوي ، واش على ديك دار لي ففاس ولي كنتي ساكن فيهاا ياك خديتي حقك وخير من زيدان خلاك جالس نتا ومرتك تما 
نصر بالغوات ~. اياه حقي وخديتو ودابا باغي حقي من نصيب عمتي 
مينة بعدم رضى ~. غتسد فمك ومتعاودش تخرج هاد العضرة وخصوصا قدام خوك كتسمعع !!
نصر عوج فمو باستهزاء ~ ... غنقولها و غنعاودها تا اناااا نصر لخليفي و من حقي ناخد نصيبي و دابا غا نفضي يديك من هاد الهضرة حيت مغتكونش معاك 
مينة هزت صبعها فيه بتهديد ~ ... سمع نقوووليك راه انا لي والداك و الى متربيتيش نعاودها لولدي وداك الموضوع غير سدو حيت غيكون موضوع اهم من هادشي و هي شكووون لي حل البالكون و هي لجمعتي فمك حيت زيدان مغيدوزهاش بالساهل ...
خلاتو و ضربت فيه وزادت طالعة لبيتها شاف حتى عيا و هو يدفل ناعل جدها الحياة و الدار لي جالس فيها ... تم طالع لهناء لي كان كتبدل حوايجها و يا لاه لبسات تيشورت الفوقاني حتى تم داخل بعجاجتو اما هي غير سمعت الحس عضات على فمها و غمضت عينيها بألم متمنية ولو لحضة ترتاح فيها منو 
نصر تلاح فوق الفراش ناشر رجليه ~... الشريفة نتي داك البزطام مافيه تا خرية 
هناء ~ لا والو معنديش غير لي بغيتها خالتي تتجيبها ليااا مغنحتاجش الفلوس 
نصر تم نايض ليها ومصغر عينيه فيها ~.. وعلاش يا ديلمك مطلبيهش هااا علاااش .. شدها من شعرها تا داها و جابها الجلدة ديال راسها مبقاتش قادرة عليها كلها تتحرقها بقوة العصى 
هناء تتألم و تحاول تفك راسها من يديه ~... الله يعطيك الستر لما طلق مني ،ايييي راسي و غير طلق وهضر 
عينو فيها و هي لي تتبرد ليه اعصابو كلهم كيخرجهم فيها شدها تا خبطها مع الحيط جات جبتها فيه حست بيها تنفخت ديك الساع اما هي عطاتها غير لبكا و الدموع لي كيهبطو هوما لي كيبردوها شوية ...شنق عليها تا قابلها قدامو بانت ليه سنسلة رقيقة ديال الءهب هدية مينة ليها نهار ولدات بنتها ... نتفها ليها من العنق تا خلاه جاي بالدم ~ايوا راك تتنفعي كوميم ،شافيها مطلعها من الفوق لتحت مخسر كمارتو...سيري غسلي حالتك ونتي تعيفي ...

خرج وخلاها ونادم على نهار لي عقد عليها بنسبة ليه كانت غلطة فحياتو و كيدفع تمنها ، اما هي بطات ونشفات دموعها حيت هي لي دارتها لراسها وتبعاتو وكوراه جهلات لو مداتو 

صباح جديد تا واحد معارف شنو كيتسناه فيه ....نازلين لبنات هازين حوايجهم خداهم من عندهم مراد بلاما ينطق اما زيدان كان على برا كيدوي فتليفون تا وقفات قدامو مريام عنقها بيد وكمل اتصالو لي كان على الخدمة غير صالا وهو يتحنى لعندها بقدو وقامتو وبلسها في حنكها ~ لغزالة نعستي مزيان ؟؟
مريام دلات قنانفها ~. نعست مزيان ومبغيتش يجي صباح حيت مسخيتش نمشي من هنا ؟؟
زيدان بغمزة ~. مرة جايا نجيو غير بزوج ونجلسو حتى تعيااي 

هزت ليه راسها بموافقة ، شد فيدها وقصدو طوموبيل لي كانت مديماريا ،مريام جلسات حدا نادية لي متكية على زاج لا هي دوات ولا مراد عبرها ، غير طلع حداه زيدان خدم ديسك راي "جيت بارازار ولقيت فلبار معنگة صاحبي " ..باش يكسر الصمت ...كسيرة واكل الطريق لي دوزوها بهضرة قليلة وسكات كثير، وقت قليل ودخاو لكازا ، اول وحدة وصلو هي نادية ...
ترجل من سيارة حتى جبد ليها باليزتها ومدها ليها وطلع، تسناتو يودعها ولكن مقال والو وهي تنطق
نادية ببرود ~ شكراا على توصيل عذبناكم 
مراد بلاما يشوف فيها ~ واجبناا ودرناه 
شيرات ليهم بيدها وتحركو موصليين مريام
ل مسخاتش تنزل وتبعد عليه غادا توحشتو هاد ليومين زادت ولفات عليه كثر وكثر صعيب لحال تمشي وتخلي روحك موراك روحها ولات معلقة فزيدان ، حلات الباب بتنهيدة ودارت لعندو بدورو حل لباب وشد يدها باسها وقال 
زيدان ~ نتلقاو نهار حفلة دالمدرسة 
مريام بصوت حزين ~. واخا ، بغات تمشي وهي ترجع تشوف فيه ، عنداك تطفي تليفونك 
زيدان حرك راسو بنفي ~. متخافيش يالله سيري ولا ندير بناقص ونرجعو منين جينا 
ضحكات ،تشكرات مراد لي مد ليها حوايجها ودخلات
حلات لباب وكتنهد وموجها مبشور وباين مرتاح، سمعات صوت باها عالي فصالون كان كيدوي فتليفون ويكركر دخلات لعندو هو لول شيرات ليه بيدها بلاما تدخل ~. سلام ابابا 
كمال اشار ليها بيديه باش تدخل
تحنات تحيد سبرديلتها وهي تسمع صوت مها جاي كيقرب نزهة بفرحة عنقتها ~ مريام بنتي جيتي 
تعانقو وتباوسو مساخينش ببعضياتهم 
نزهة كتمسح ليها على وجها وتفلي فيه بغينيها~ توحشتك بزاف ابنتي، الحمد لله كتباني على خير وبخير فادتك هاد لخريجة 
مريام بحماس ~. حمد لله انا فرحانة بزااف اماما ورتاحيت 
نزهة باستها من حناكها بزوج ~ الله يزيد ففرحك وراحتك كثر وكثر 
كمال نطق من اللور بعد مقطع التليفون ~. هي نزيد تانا نفرحكم 
نزهة دخلت لعندو معنقة بنتها ~. ياك لاباس اسي كمال خبار الخيى 
كمال سلم على بنتو وجلس مبحبر ~. مكاين غا الخير 
كنت كندوي مع سي عدنان وقاليا بلي وجد گاع شنو كيخص الخطبة لي غتكون كبيرة وفيها تركاب لخواتم وجدو راسكم وخرجو تقضاو اش خاص هاد ليامات غنعلقو علام لفرح 

الخبر نزل عليها بحال صاعقة جمدات وطاحت فوق سداري على وقفتها مقاداش تستوعب ، الا ضحكت شوية كتهجرو بزاف ، كانت طامعة فباها ينسى الموضوع ويعطيها وقت تقنعو بلي زواجها من عدنان ملايقش ليها ، ساعة هو مصمم ،وقفت على كولتها كتبكي وتغوت وتقول ~ مبغييتوووووش كتسمععع مغنتزوحش بيه انا كنبغي واحد اخووور وهو لي غنكمل معاه حياااااتي 

قرب منها شادها من ذراعها ومزير عليها ~. شكون هادا هاا ؟؟ وفين كتعرفييه !!

بدات كتبكي وترعد ~الا الا ميمكنش ميمكنش ابابا غي كضحك معايا
كمال بصووت مرتافع ~. راه قلت ليك شكوون هذا 
مريام عقلها غيخرج بلبكى ~ واحد عرفتو ونموت على ودو كتسمعني ، رتاحيت ليه عطيتو قلبي وعمري وكنبغيه اكثر من كلشي وهو لي كنشوف راسي نقدر نكمل معاه حياتي ماشي مع واحد قدك 
كمال عصباتو بكلامها وزاد زير على يدها حتى غوتات ~. هادا لي قد باك غيعيشك في النعيم ويفششك ،شارب عقلو وكلشي كيدير ليه حساب ...أما باش تجيبيلي برهوش معندو عشاء ليلة يلعب عليا معمرها تكون وطوال لك اللسان وليتي تجابدي معايا وتقوليها فوجهي 
نزهة كتفكها من بين يديه وكتبكي~. هء هء حرام عليك اكمال تفرق من لبنت وخليها تعيش حياتها كيف بغات معيتيش من تبهديل فينا ديما جاي ضدد مصلاحتنا ليوم باغي ضحى بنتك لهاد درجة قلبك ميت جهتنا 
كمال بالغوات ~ انا لي كنقرر وانا غنعرف مصلاحتها فين كاينة ماشي نتي ولا هي 
مريام عرات على نيابها قدام ظلمو ~. فين عمرك ابابا عرفتي مصلاحتي ولا فقتي ليا من نعاس هاا ؟؟
ياك ناس كانو عندهم الاباء وانا عندي نتا غا بسمية ، واش عارف شحال فعمري ولا شنو كيعجبني وشنو لا باش تجي دابا تقول ليا عارف مصلاحتي 
لاحها من بين يدو تا طاحت فوق سداري وغوت فوجه نزهة ~ هادي هي اخرة ترابيك باركة تقابل معايا كلمة بكلمة 
مريام عياات بزاف ومبقاتش قادرة تصبر~. نتا لي طيرتي لحيا اسي كمال ، واش على ود لفلوس باغي ضيع حياتي وتدفني، شنو درت ليك ؟؟
كمال هز صبعو بتهديد ~ شفتي على هاد تطوال لسان وقلة العراض لي كتقولي فيها كلامي هو لي غيمشي كتسمعي بزز بغيتي ولا كرهتي باش نوريك

مريام بتهديد ~. والله وتزوجني ليه صحة حتى نقتل راسي
نزهة تحدرات حداها كتبوس فيها ~ الله ينجيك ابنتي اش كتقولي هء هء "شافت فراجلها " نعل شيطان وبدل ساعة بخرا 
كمال كشاكشو خارجة ~ تساليني ندير ليك لعشى ونعلم ليك قبرك باش ميتوضرش 

وهذا هو وجه كمال بلحاج وكلامو من اول متزادت عندو مريام معندو كبدة عليها كي ناس ولا هم يحزنون كيهمو راسو وراسو وراسو ، خرج كيسب وخلاها وراه شادة وجهها بين يدها كتبكي ندمات لي رجعات لهاد دار لي مافيها حتى حاجة كتفرح ، بكات فيها كثر مضحكات شافت فمها بعوينات كي جغمة الدم ووجه فازگ بدموع وقالت ~ متلومينيش اماما سمعتي متلومينيش على لي غندير انتي َنبع الحنان على ودك بقى هنا وعايشة مع واحد ميت قلبو تابع غي طمع الدنيا من اليوم غيشوف لوجه الاخر ديالي منخليهش يتحكم فيا مزال وانا لي مغنفرطش فلي بغاه قلبي وخا نعرف نتنفى على ودو ولكن باش ناخد شيبة عاصية يزيدني مع عيالاتو عمرها تكون 
وخا اسي كمال بغيتي تبهديل هنا معاك فيه والتحدي انا مولاتوا

غادي داخل لمحال كينفخ ومعاجبو حال مراضيش على الهضرة لي عطاتو بنتو ،كان كيتسناها تقوليه كلامك هو الكبير ابابا ولي بغيتيها هي لغتكون ساعا عرضاتو ووقفات فوجهو ،جلس قدام لاكيس وشير لولد خدام عندو
-كمال مد ليه قرفية ~. جيب ليا شي براد ديال اتاي وجي 
جبد روجيستر يقيد ويحسب ويعاود ودماغو خدام حتى تم داخل سي عدنان نافخ ريشو وعاجبو راسو لابس لبس ماشي قدو وداير ضحك فيه وتسبيح لي فيدو عند بالو عاطيه هيبة وهو غا مقلل من قيمتو 
عدنان بصوت مبحبح ~ سي كمال !!
كمال وقف ملي سمع صوتو وتم خارج من ورا لبيرو جا قدامو ~. اهلااا سيد الحاج "تسالمو برجولية ". جلس جلس ،عاد لقيتيني وصيت على كويس تاع اتاي 
عدنان داير رجل فوق رجل ~. كانت عندي خدمة هنا وجيت ندوي معاك فاص حسن ونذاكرو فداكشي لي قلت ليك صباح فتليفون
كمال تنهد وجهو مهواش ~. ايه مرحباا لي بغيتيه هو لي غيكون 
عدنان جمع تسبيح دارو فجيبو وقاليه ~. اش كاين وجهك معجبتيش ، ياكما لبنيتة مبغاتش 
كمال سرط ريق ~ مكاين منخبي عليك قاليك مكتفكرش فزواج دابا ولكن ري ريي وشوار تاعي
عدنان بلا مقدمات ~. انا عارف لي مخليها تقول لا 
كمال بعدم فهم ~. مفهمتش اش كتعني اسي عدنان
عدنان ~ باش نجيك نيشان معندي منخبي عليك سيد لي كان ضربني لي خدامة عندو ، انا شاك تكون بيناتهم شي حاجة
عدنان لاح النشبة وكمال شدات فيه ربط هضرتو بكلام بنتو صبح وبملامح ممحية حط يدو على راسو كيخمم ~. اياه ايااه حولها كتقول 
سكت ممكملش هضرتو وهز راسو فيه متسائل ~. كتعرف هادا شكون وفين كيكون نمشي ليه نعرفو مقامو ؟؟
عدنان قاد ظهرو على لكرسي وجاوبو ~. مهندس عاجبو راسو قلبت عليه ولقيتو بلي ولد فاس وجا لكازا شحال هادي هنا فين وقف على رجليه حتى جمع ليه شوية لفلوس .. وسميتو زيدان لخليفي
لكنية لي تناساها صحة ترجعت تقالت قدامو ، حس بقلبو تزير عليه شدو مقادرش يتنفس مد يدو كيحل صداف قميجتو باغي لهواا ، كلشي بدا يتجرا يجيب ليه لما واولهم عدنان لي معرفو مالو ...كان مرفووع ومكيسمعش شنو ضاير بيه من غيير اسم زيدااان لخليفي ، ل عرفووو مزياااان وابداا مضربش لييه لحساب يبان قدامو فيوم من لياام وكتاب تشد من زمان يرجع يتفتح ومعامن مع بنتوااا 
لخليفي اسم صباح لي تطبع فقلبو وعقلو ولي ابدا منساهش ولو دقيقة ريحة لحبيبة لي تحرم منها بسباب تقاليد العائلة وكلمة من باه َمحات كل مكان جميل بينهم لحضة توقف لوقت عندو نفسو تقطعات كيحس بروح غطلع هاد نهار عمرو ضرب ليه لحساب ولا جا لبالو يولي يسمع شي حاجة عليهم 

مخشية ففراشهاا ، كانت مبدلة حوايجها ل حوايج لدار ...هازة تليفون فيدها مترددة ومعارفة مدير واش تعيط ليه وتعاود ليه شنوو وقع معاها ولا تسكت حارت وتلفت وداخت حاجة وحدة لي متيقنة منها بلي كلام باها دير لمستحيل وميمشيش عليها...دوزات نمرتوو معيطة ليه كيف ديما تعطل شحال عاد جوبهاا 
زيدان حاط تليفون فوق طبلة داير مكبر صوت وكيلبس في حوايجو ~. توحشتيني دغياا 
مريام ضحكات فعز حزنها ~ وبزاف گاع ، فينك وشنو كدير ؟؟
زيدان كيلبس فساعتو ~. غادي خارج نشوف خدمتي واش فاتني... علاش كتسولي مالك بيك شي حاجة 
مريام تنهدات ~. لا لا والو غير قلت نسول فيك 
هز تليفون حيد مكبر صوت ودارو فوذنو غادي خارج ~. يالله سيري رتاحي انا خارج دابا غنقطع 
توادعت معاه ولاحت تليفون معنقة لمخدة عيانة وهجرات گاع ضحك لي ضحكاتو يالله بدات تديها عينيها وهي تم طالعة مها كتجري
نزهة وجهها صفر ولخلعة شاداها ~. بنتي نوضي نوضي عيطو ليا من لقيسارية ، باك طاح على وقفتو وداوه لكلينيك 
مريام ناضت قافزة ~. اشنووو
كيفاش .....نزهة مسبقة لبكية ~ هء هء معرفتش معرفتش 

حلات لماريو لاحت عليها عباية وتمات نازلة كتصوني فنمرة باها على وعسى يجاوب شي حد تعرفهم اشمن سبيطار فيه
مريام بخوف ~. الو بابا 
عدنان حنحن ~ معاك عدنان الالة 
مريام عوجت فمها وقالت بصوت عالي ~ فينو بابا و فاشمن سبيطار حنا جايين
عدنان ~. مكاين لاش تجيو معذبين انا جايبو لدار غا جلسو تسناو راه ولا بخير 
كانو جالسين على اعصابهم وغير سمعو صوت طوموبيل مشاو بجراا ..تم نازل كمال حاط يدو على قلبو وجهو صفر وفمو بيض نفس عندو قليلة وجهدو مقادي تلاقات ليه مرتو وبنتو هاد الاخيرة لي كيبقى باها واخا يعيا ميدير بصح قلبها جفر شوية جهتو ولكن دم عمرو يرجع ماا
مريام شاداه من يديه مسنداه عليها ~. بابا ماالك اش وقع ليك 
كمال اشار ليها بيديه بمعنى والو مقادرش يدوي وهو يجاوب بلاصتو عدنان ~. كنا مجمعين حتى شد فقلبو ، غيكون معصباه شي حاجة ، راه دقو ليه برا خاصو غير يرتاح وان شاء الله غدا يولي مزيان
عطاتو النخال دوا تا عيا وسكت ، وصلات باها لبيتو قادوه فوق ناموسية غطاوه وخلاوه يرتاح ..قبل ميخرج عدنان جرها من يدها بلباقة حتى نترتها منو وخنزرت ~. اخر مرة تقيس فيا 
عدنان كيحك فذقنو ~. زعمة قريب تولي مرتي خاصك تولفي 
مريام باستهزاء ~. بصاح واخا هاحنا غنشوفو ...مشات لباب حلاتو ليه وقالت ~. نزوروك في المرض ان شاء الله
عدنان بعيون زايغة كيطلع فيها وينزل بگاع حالاتها عاجباه ~. مقبولة منك الالة لبنات ، الا خصاكم شي حاجة عيطو ليا متردديش، غنرجع مزال نجي نشوف الحاج بغيتي شي حاجة 
ميقت فيه وقالت ~ بغيت تيسااااااااع 

ملي رجعت لدار وهي طايح عليها الضيم معرفت اش هاذ الحالة لي فيها ،واش عيانة ولا متألمة ولا فرحانة ..لقات ماماها قدامها سلمت عليها وجمعت معاها شويا وطلعت لبيتها حيدات حوايجها لبست بيجامة وتلاحت فوق ناموسية ..درات ايدها من ورا راسها وكتشوف في سقف وكتأمل فيه وعقلها هايم فكرة ديها وفكرة تجيبها...كلام الحق يتقال مراد قدر يأثر عليها ويقلب ليها لمفاهيم في راسها والاخطر انو شغل تفكيرها ..بقات كترجع سينتا لور كيفاش تلاقات بيه وكيف كانت علاقتهم من نهار لول لي اغلبيتها شد ليا نقطع عليك لا من عندو ولا عندها ....صدمها فاش قاليها كنبغيك كان عند بالها ما كتحمل ليه حتى مشاعر حاجة واحدة لكتحس بيها من جهتو هي لكره وكيعصبها ولكن في نهار قلب ليها راسها وخلا فكرة ان ممكن تكون شي حاجة بيناتهم واردة .. مغاديش تنكر اعجابها بيه لي زاد هاد اليومين ولا حتى تأتيرو لكبير ل ولا عندو فحياتها .ولكن واش هادشي كافي باش تزوج بيه وهي مكتعرف عليه والو من غير انه خدام في بار ؟؟..
بقات تعاود هاد الكلمة في بالها كثر من عشر مرات ، لبار يعني لبنات والشراب وكل نهار سهير واش غادي تربط حياتها بواحد بحال هاكة لمجرد انه باغي يتزوج بيها وهي عارفة الزواج اشنو هو عارفة لخايب فيه كثر من الزوين ياما دوزات شلا قضايا وديما كتسمع هادي راجلها كان سكران وجا ضربها ووحدة مبغاش يصرف عليها ،وفي الاخير كلهم كيفكرو في الطلاق ..تنهدت بصمت ..وبدات تفكر من جهة اخرى انو عمرها غادي وكيجري وكل نهار لخدمة وصداع وجري من هنا لهنا ايوا وحياتها امتى غادي تشوفها سيغتو انو كلامو لمسات فيه الصدق ؟؟
غمضت عينها باغا تخرج بقرار حيت مية تخميمة وتخميمة ولا ضربة بلمقص

~
صباح يوم جديد، فاقت من نعاسها مقلوبة شركت نهار مع الليل محسات براسها حتى فيقتها مها ..ناضت كتشبح وعضامها ضارينها وراسها عاطيها صداع من كثرت نعاس ..ذخلت دوشت بزربة وصحصحت مزيان لبست حوايجها ديال خدمة كيف ديما هزت تلفونها واول حاجة دارت هي صيفطت مساج لمرااد 
بارح فكرت واليوم قررت ..

"سلام مراد معاك نادية مبغيتش نهضر معاك ابيل قررت نكتب ليك بصراحة ماشي من عادتي نحرج لواحد ولا نرفض شي طلب ولكن صراحة طلبك مقدرتش نقبلو فكرت مزيان ومبغيتش نشغلك اكثر معايا انا حاليا مكنفكرش في الزواج ،الله يسهل عليك بشي بنت ناس تفاهم انت وياها انا وياك منليقوش لبعضيااتها مكنتافقوش 

كتبت الميساج وقراتو شحال من مرة معرفت تصيفطو ولا لا ، خافت تندم من بعد وتلوم راسها ولكن في الاخير غلب عليها المنطق وتحكمت في احساس الندم لي بدا ياكل فيها وهي تصيفطو ..وغير طلع ليها بلي وصل قلبها ضرب وايديها بدات ترجف ....تكون حسات براسها تسرعت وضيعت فرصة تقدر متعاودش ترجع ليها من جديد ولا الاختيار لي ختارت غتندم عليه طول حياتها ...تنهدت متحسرة على راسها وعلى سرعة القرار لي خداتو ، وشافت فتليفون بعيوون مضيقة كان عند بالنا غادي يقراه ويجاوب ساعة والو ، سمعت صوت من لتحت كينادي عليها كانت ماماها كتعيط ليها لفطور ....على لواقف خدات شي حاجة خفيفة وخرجت كتجري لمكتب ديالها مبغاتش تعطي لذهنها فرصة انو يهرب لجهة مراد او
يفكر فيه
~~~ 

الا كانت نادية قدرات تنعس مريام مجاهاش ابدا اولا من ناحية لخبار لي تزفت عليها ولي معارفة باش غتفاريها وتانيا من ناحية حالة باها لي بداات كتلوم راسها انو كلامها هو لي وصلو ليها ، حسات براسها محطوطة بين نارين ...ناضت بزز من بلاصتها راسها ضارهاا وعينيها عيانين وتحت منهم كحل من قلة نعاس ، لبسات لي كان وخرجات من لبيت اول حاجة مشاات لبيت مها وباها تشوفو كيف صبح ...كان محلول ومها مخرجة صينية تاع لفطور من عندو
نزهة صبحات عليها ~. دخلي ابنتي انا نهبط هادشي ونجي 
مريام كتحك في شعرها ~. بابا شرب دواه ولا نعطيه ليه 
نزهة غمضت عينيها ورجعت حلاتهم ~. لا عطيتو ليه ، الله يرضي عليك 
دخلات لبيت لقاتو مجبد فوق ناموسي. ممولفاش تشوفو بهاد الحالة ، بحال هاد الوقت راه فايق وقاصد خدمتو وكلو نشاط وصوت هضرتو فتليفون واصل لفين اما دابا كيبان ليها غا ساهي وعينيه تايهين وباينة فيه مهلوك قربات منو وجلسات جنبو ..
مريام هزات ليه يديه ~. بابا كيف صبحتي شويةة ليوم ؟؟
كمال دور وجهو لعندها كيدوي بشوية ~. حمد لله ابنتي ، ليوم صبحت حسن 
مريام بدات كتبكي ~ هء الا بسبابي وصلتي لهادشي سمح ليا ولكن انا مقصدت نتا عارفني شحال كنبغيك ومغاديش نبغي ليك المضرة ولكن نتا بغيتي تفرض عليا شي حاجة مباغاهاش 
كمال زير على يد بنتو وقال بتعب باغي يتاكد من كلام عدنان ~. شكون هادا لي فحياتك وفين عرفتييه ؟؟
مريام تحمسات وبدات تعاود عليه ~. هو فلول كان استاذ ديالي ، ومن بعد وليت كنسطاجي عندو فشركة يعني لمهندس لي خدامة عندو 
كمال قاطعها ~. واش هو لي ضرب سي عدنان لي سميتو لخليفي 
مريام بعينين مدمعة وبصوت مترجي ~. هو هاداك زيدان لخليفي ، كيبغيني بزاف وناوي يتزوج بيا يعني مكيتفلاش وباغي يجي لدار 

كمال بغى يوقف على طولتو مكرهش يغوت ولكن صحتو خانتو مقدرش ، مسح على وجهو كيتفكر اخر لقاء بينهم قبل سنين وبالضبط من ورا كثر من ربع سنين على ليلة العرس 
كان كمال عاد نازل من طوموبيلتو حتى معرف بلش تبلى ،خرج ليه زيدان من لور وقاطعو ودنيا خاوية كان قانى عليه فين كيكون ومشى ليه واخا كان فسن صغير فداك الوقت ولكن يدو كانت سابقاه ودمو كان كيفور 
زيدان شنق عليه وضربو براس تا تلاح فالارض ~. يااا شمااااتة هاذا هو بلانك ضرتي بيها زناقي وخليتيها ؟؟
كمال باغي يشرح ليه حيت عرفو وجهو ميخفاش عليه~. غاا سمعني انا كنبغيها 
نزل عليه لفم لو هزو من لكول ~ يحرق عدوو ربككك الهرگاوي ،ملي معينكش في زواج لاش جاي تخطب من اول ومطمعها وخليتيها دابا فركنة وعايش حياتك ، فاش كان عينيك هاا ؟؟
نزل عليه بكروشي وراه ضربات مخلاش ليه ...كمال مقدرش يدافع على راسو لا بيدو لا بفمو ،ستقبل الاهانة وسب وضرب حاني راس ، ولا كيف شرويطة مليوح في الارض محاسش بعظامو واخر حاجة سمع في وذنيه 
زيدان بالغوات ~ عقل علياا مزيااان ومتنساش سميتي و حقي غنردو ..ليام بيناتنا غنخليك تا تنسى وغنزل عليك غاا هو دقتي غتكون صعيييبة 

شد فيد بنتو بالغوات وبدا يدوي بحالة هستيرية ~. غير كيضحك عليك متيقيش بيه رجال غداارة كتسمعيني ابنتي 
مريام كترجعو بلاصتو ~. رتااح ابابا دابا ماشي وقت هاد العضرة 
كمال ~. لا وقتها ، بغيت نعرف علاش راسك عاصي ومبقيتيش باغا تسمعي هضرتي وديري بيها
مريام بعينين معمية ~. ابابا واش نتا كتحكم على واحد شخص بلاما تشووفو وااش كتعرفووو ؟؟ هاا كتعرف شكون هو فايتك تلاقيتيه جلستي معاه ديتي وجبتي معاه في الهضرة
ملقى باش يجاوب شنو غادي يقول ليها ، اه تلاقيتو وبغيت عمتو وخليتها نهار عرسها وهددني وهاهو جااي ليك يفدي دقتو ، شنو يخيب صورتو قدام بنتو ويقوليها باك طلع مكيسواش وتبع لفلوس ...بدا يكحب وكلو ولا عرقان ، كيحس براسو عاجز ومعارف ميديير ..عمرو دار بحساب هاد نهار ..لحد ساعة معرفش واش لقاء ديالو ببنتو صدفة ولا جاي ينفد كلام لي قالو ليه من كثر من عشرين عام
دخلات نزهة كتجري وكتقلب فيه بعينيها ~. مالك اسي كمال واش دزاد عليك الحال ، نمشيو لطبيب 
كمال بنفي ~. لا انا مزيان ، مدي ليا داك تليفون وخرجو وخليوني بوحدي 
عطاتو ليه مريام قالبة وجهها وقالت ~. هاك ابابا ورتااح دابا حيت مكاين ما حسن من صحتك فهاد اللحظة 
خرجات هي ومهاا وسدو عليه لبيت 
نزهة كدوز ايدها على دراعها طلوع وهبوط ~. واشقاليك شي حاجة فاش دويتو 
مريام تنهدات ~. سولني على زيدان .."هزات فيها مها عينيها بمعنى شكون هادا ".....هذا هو لي قلت ليكم لبارح كنبغي. وهو لي غنتزوج بيه وتا حد غيرو مغنشرك معاه حياتي ونعطيه راسي فبلا ميتحمقو راسكم وهداك بابا وخا يوقع لو لي وقع عمري نقولو وخا هوا باغي يلوحني لواحد قدو فالعمر 
نزهة بترجي ~. ابنتي سايسي باك تا يرجع لصحتو واش مكتشوفيش حالتو ، لي قاليك قولي ليه اه تا يوقف على رجليه ولها مدبر حكيم مغيكون غا لي بغيتي ولكن ماشي على حساب صحة بااك 
مريام تنهدات بصوت مسموع ~. ان شاء الله انا ف لبيت

دخلات لبيت كتخمم شنو سبب هاد ردة فعل لدار باها كاملة وشنو ممكن يدير من بعد علاش هادشي فاش كيسمع سميتو بحال كيشوف شي جن ....اما كمال بلحاج مكاينش عندو من بعد لوقت بنسبة ليه مبقاش والخطر بدا يضور عليه هز تليفونو ودوزو لعدنان باغي يتهنى عليها ليوم قبل من غدا 

كمال ~ سي عدنان بغيت نقوليك بلي مكرهتش الخطبة يكون معاها ضريب صداق وفأقرب وقت ممكن 
عدنان فرح حيت هاداك هو نهار لكبير عندو ~ كلامك هو لكبير ولكن زينة لبنات شنو رأي ديالها 
كمال شاد على قلبو ~. انا لي كنقول راك على عينك شفتي حالتي ، انا مضامنش عمري من هنا لقدام داكشي علاش بغيت نرتاح عليها وتا الا دا مول الامانة امانتو نمشي مهني
عدنان ~ الله يطول لينا فعمرك ، مزال باغينك اس كمال تشووف ولادنا ، واخا اسيدي تهنى وتا انا متسالني غا نديرها فعيني ولي بغيتيه هو لي غيكون لخر ديال هاد سيمانة نتكاتبو ان شاء الله وجدو لوريقات ومتعييو راسكم بحتى حاجة كلشي نجيبووه واجد انتما غي تأمرو والاميرة تشرط وانا نفد من مليون لعشرين هداك نهار السعد لي تعمر فيه داري 
كمال~وعليه من غدا بذا توجاد باش نتكلوا عالله ونزربو مبقاش لوقت بزاف اصلا صحتي ولات فالنازل وبنتي وليت خايف عليها خصوصا من هاد لبرهوش لي قتلتيلي عليه وسبق وضربك يعني خوفو غي من لي خلقو مكيخاف ميحشم 
عدنان بتنهيدة ~ ايه اسي كمال واحد الشرايط ولكن لهضرة معاه ماشي دبا نهار ندير للات لبنات فداري وتولى محسوبة عليا داك ساع نفرجك فيه ولعاطي باقي يعطي عمري نسى ضربتي فيه 
كمال~وعليه المهم نخليك قاد امورك وانا وكذلك خير البر عاجله 

دوزت نهارها بين الوراق والمحاكم وصداع الناس ولكن بلما تحس كتلقى راسها هزت تلفون وتشووف باغة تعرف ردة فعلو اش غادي تكون وباش غادي يجوبها واش يتمسك بيها ولا لا ....بالحق بلا فايدة مكتلقى منو والو وفي كل مرة ظنها كيخيب ..وصلت لعشية وقصدت دارها وهي في طريقها وصلها مساج مكتوب ، نسات القانون ومخالفات وهزات تليفون متلهفة تشوف شنو مكتوب ولقات 

حتى نتي الله يسهل عليك ابنت الناس ، يمكن حلمت بزااف بيك تولي مرتي وام ولادي وكيف قلتي كلشي بالمكتاب ، كنعتاذر الا صدرت متي شي حاحة ناشي هي هاديك الله يوفقك فحيااتك 

غير وصلها وقراتو ايدها تنملو عليها وقلبها بداا كيضرب بجهد احساس في شكل وغريب تملكها ..احساس بالندم ل من صباح وهي تكبح فيه فداخل ذاتها خرج في ديك لحظة بدوون شعور ونطقت بألم .. علاااش انااادية علاش تسرعتي ومعطيتيش راسك فرصة اخرى ...مقدرتش تجوب على لمساج حيت معندها متقول ليه وأي كلمة ترد عليه بيها غتكون بايخة ...وقفات في جنب الطريق تتهدن حاسة براسها عيات من قوة الافكار المتراكمة فعقلها ..جهد نص ساعة وهي سادة عليها ومرجعة راسها اللور تا بان ليها الحال ظلام مزيان .. ديمارات الطوموبيل ورجعت بحالها ترتاح مبقى عندها جهد ..مسافة الطريق ووصلت ، براكات في بلاصتها خدات وراقها في ايدها وسورات كذلك ..غادا فاشلة وايديها طايحين بزز قدرات تحل الباب ...
مع دخلة بانو ليها ضواو شاعلين على غير عادتهم وصوت الضحك عالي ..قصدت الصالون كتعيط على ماماها حتى كتلقاها جالسة وفجنبها مراد كتكركر هي وياه وفجهة لوخرا زيدان والأم ديالو مينةة ....
نادية بصدمة مبقاتش عارفة متقول ~. واش مات شي حد ؟؟

عايشة عضات على فمها كتغمز فيه ~. هه وها عرووستنا جاات ، سلمي ابنتي 

تقدمت لعندهم مدهشرة حطات شنو فيدها وبدات تسلم 
نادية تحنات كتسلم على ام زيدان ~ اهلا اخالتي كيف دايرة لاباس عليك ، لخاطر شوية 
مينة لابسة جلابة ولايحة عليها فولار وجهة صافي ومافيه حتى حاجة لولا غلاوة مراد متجيش معاه ~. الحمد لله ابنتي يسول فيك الخير 
مدات يدها لزيدان لي كان جالس بفخامة فوق سداري لابس كوسيتم زرق وحال لافيست باش يجلس على راحتو سلمت عليه وهز ليها راسو وقال ~ استاذة صاافا 
نادية ~ حمد لله 
ضورات وجهها لمراد مزال مصدومة معارفة باش تبلات ~. شنو كدير نتا هنا فهموني 
مراد هز ايد عائشة باسها ~ ملي مقبلتيشبيا جيت نخطب ماماك 
"ضور وجهو لماماها وقال جالس على ركابيه ~. تقبلي بيا الالة عائشة نكمل معاك حياتي بحال ولدك 
عائشة كتموت بضحك ~. قابلة بيك عريس لبنتي ل لمشات حتى فلتاتك نغسل عليها يدي 

تصدمت معرفت متقول بقات غير كتشووف فيهم مزال كاع مستوعبت صدمة ديال لميساج حتى لقاتو صدمها صدمة اخرى ..جاي يخطبها وبلا خبارها وهادي زوينة، ريحت فوق سداري جات عيب تبقى واقفة عليهم لانظار كلها كانت عليها ومراد متلهف يسمع جوابها ..قطعت هذا الصمت غير ماماها لحافظة بنتها مدام سكتت هذا الوقتْ كامل غادي تقول شي قنبولة... قررت تذخل قبل ما تخرج شي حاجة ماشي هي هادي ..
لالة عيشة~بنتي بدلي حوايجك واجي راه قريب نحطو العشا ..هزت فيها راسها وهي مغيبة ..
نادية ~ماااما واخ غير هو ممكن نعرف اش واقع كيفاش خطبة كاين شي واحد كيتخطب بلما يعرف ..هنا تذخلت مامات زيدان لالة مينة ~بنتي نادية انتي عارفة مراد ولدي الثاني واخا مولدتوش راني مربياه مني جا عندي وقال ليا ماما مينة بغيت نتزوج فرحت ليه وخا انتي عارفة صباح عاد ماتت ومزال قلبي مشوي عليها وجرح مزال مبرى ولكن مراد مني طلبني منقدرش نرفض ليه شي حاجة وكيف كبر بيا بغيت نكبر بيه داكشي علاش حنا اليوم جينا طالبين وراغبين في ايدك لولدنا مراد اش قلتي ابنتي ..
صدمتها معرفت متقول ليها واش تجوبها باه ولا لا ولكن هذا راه زواج وخاصها تفكر ..ومراد وسيغتو خدمتو ممسروطاش ليها... حسات براسها كيشطخ من قوة الافكار مجوبتش بقات ساكتة شحال حتى هضر مراد ~نادية اشنو جوابك ابنت الناس انا باغيك وباغي نعيش معاك ونكمل معاك عمري شفت فيك داكشي لتمنيت في حياتي اشنو جوابك ؟؟ ..
كمشت ايدها مع بعضياتهم وقادت كلستها اكثر عاد نطقت بجدية كيف موالفة وكلامها كان موجه لمامات زيدان ~ خالتي كلامك فوق راسي ومراد ولد الناس ونيتو زويينة ولكن حنا هنا كندويو على الزواج والمسؤولية ومراد شخص معرفتش كيجني طايش ومزال مشارب عقلو ، تأسيس بيت كيبغي جوج تاع الناس يكونو واعين وعارفين راهم تزوجو وذاك دخول وقت لبغيتي وتخرج وقت لبغيتي مكيبقاش كيوليو عندك براف تاع الالتزامات مع ذاك شخص وكذلك عندك حقوق معاه وخدمة مراد ممساعداش وصعيب عليا نتقبل راجلي س... قبل ما تكمل جملتها قطعها زيدان قبل ما تبدا تزبل فالهضرة ..
زيدان قرب من حافة سداري وقال ~ الاستاذة نادية كاينة واحدة الحاجة سميتها خطوبة تعرفي عليه مزيان مهم تكون شي حاجة رسمية بيناتكم ، متحكميش من بعيد بلش عرفتيه ماشي معقول واش جربتيه فصح وملقيتيهش 
نقزات ماماها حتى هي ~ والله الا عندو صح ديرو خطوبة ونفرح بيك ابنتي ونتهنى عليك وان شاء الله انا متاكدة غادي يكون غير لخير .. وافقي ابنتي الله يرضي عليك ،
كثرو عليها الاراء بزاف حاولت تهرب وتفكر مرة اخرى بوحدها ..
نادية ~نطلع نبدل حوايجي ونفكر شويا راكم عارفين لقرار ماشي ساهل ..جمعت وقفة نايضة من قدامهم... طلعت كتجري لبيتها باغة غير ذخل وتسد عليها ولكن شكون خلااك 

طلعت كتجري في دروج باغة غير توصل لبيتها تذخل وتسد عليها ..وصلت د جات تفتحو حتى تحطات ايد عليها دارت مخلوعة حيث محست بوالو كانت ايد مراد ل تبعها كيجري ..خرجت عينها فيه وضارت فيه بحدة..
نادية مخنزرة فيه ~ مراااد من نيتك تابعني اش بغيتي ماما تقول؟؟ ..
مراد بعينين تالفين فيها ~ قبل مانطلع خديت الاذن ديالها غا تهدني ، ودبا بغيت نهضر معاك ..
كدور في عينها لتكون ماماها تابعاها ديرها وتفوتها لديك الجيه ..ربعت ايدها ورسمت غوباشتها كيعصبها بهاد التصرفات الغير موزونة نطقت وهي معصبة ~ ..اشنو بغيتي دوي خلاص قبل ما يفهمو شي حاجة غلاط ..
دورها في راسو وفهم قصدها وهو يقرب لعندها عاض على فمو ومثقل في المشية ~ اش غادي يفهموو زعمة نكونو كنديرو شي حاجة حلوة ، بغمزة رجع قال ...عرفتي عجبني فين مشى تفكيرك ...
دفعاتو وحطات ايدها على خصرها معوجة سيفتها فيه وكطلع وتنزل فيه فاقصاها هضرتو الخاسرة شافت فيه في عينيه نيشان وهي تدوي منرفزة ~مراد اشنوو باغي .؟؟
مجوبهاش وانما دفع باب بيتها ودفعها حتي هي معاه وتبعها لداخل وسد الباب بساروت ..
غوتت بلاما تحس ~مرااااد راك كتعيق بهاد الزعتر ديالك ، خرج برا !!واش حماقيتي داخل معايا لبيت بغيتي ماما ليوم تخرجنا في جريدة الصباح راه معندهاش مع هذا البسالة الخاوية ديالك ..
جاوبها وهو كيشوف في بيتها كيفاش منظم ومرتب وكل حاجة محطوطة بعناية في بلاصتها مراد~وانتي عندك مع بسالتي ؟؟ بون نادية نسولك وجوبيني واش كتحسي بشي حاجة من جهتي ..
جوباتو بسرعة البرق ~لا مكنحس بوالو من جهتك
بتاسم وقرب ليها جارها من ايدها لعندو وخشى ايدو في شعرها وايد على خصرها بتملك عاد هضر بصوت مخدر من ريحتها لكتحمقو .~.قربي ليا وشوفي في عينيا وقولي ليا مكنحس بوالو من جهتك امراد .
مقدرتش تنطق ولا حتى تشوفيه كتحاول تستجمع نفسها هي عاد مزاد ذوبها بلمسات ايدو ل كيدوزهم على يدها بطريقة وهمية.... زاد لعب في شعرها كثر ونزل لعنقها خلاها ترخى وتغمض عينيها وقال بتريگيل ~ كيف ديما !! ونتي ملي كتموتي وكتسطاي عليا ، علاش دافعة كبير ولا دايرة ليا فيها عزة نفسي ما بتسمح لي ..وعات علي راسها باغة دفعو ولكن حكمها~صافي صافي غير بقاي كنضحك معاك احبيبتي تعفري كيف بغيتي ودفعي كبير كيف بغيتي ..زاد قرب راسو لجهة وذنها ونطق بتهديد ....انتي ديالي وعمرك في حياتك تكوني ديال شي حد من غيري مكاينش لي يفرقني عليك ولي فكر يدور بساحتك نفنيه ونحسب ربي مخلقوش غير الا داتني الموت من غيرها ديريها حلقة فودنيك ممفاكش معاك 
خرج لسانو ودوزو بتقالة على ودنيها عوجات عنقها حسات بتبوريشة في داتها خشات راسها فيه وهو زير عليها هز راسو باسها بوسة مطولة فراسهااااااا وقال بفحيح ~ عطييني فرصة عمرك تندمي

تنهدات بين يديه وبقات ملتازمة السكات شحال وهو معنقها وكيدوز يدو على ظهرها وكيدوي ~. عيت من تجلويق وحياة الليل حتى انا ، مكرهتش نأسس عائلة وندير ناس يخافو عليا نجي بكري على ودهم وملي نبغي ندير زبايل نتفكرهم وننعل الشيطان ونرجع اللور ، انا ماشي خايب كيف كتخيلي ظرووفي لي حكمات عليا نكون هاكداا ومستاعد نتبدل على يديك

بكلامو بدا يقنعها ..مسخاتش بحضنو ولكن بعدات عليه بلباقة وشافت فيه وقالت ~. يكون خير مهم انا شوية وننزل خليني بوحدي مرااد كنحس براسي مخربقها 
مراد باس جبهتها مطول ~. واخا انا لتحت 
حل لباب ونزل ، يالله حيدات لافيست وكتفك في القميجة وهو يرجع يتحل ضارت عينيها خارجين ناوية تصبنو وهي تلقاها عايشة ،ساطت وقالت ~. هادي نتي اماما!!
عائشة مشات جلسات حدا ناموسية ~ ايه انا ابنتي ،خليت ناس وجيت نشوف اش فعقلك 
نادية تنهدات وجلسات حداها ~. قولي شنو باغا تقولي انا كنسمعك ؟؟
عائشة دارت جنب لعندها ~. بغيت نتهنى عليك ابنتي ، گاع خوتك مزوجين وكلها ملهي فلي ليه الا نتي صحتي وعمري مدايمينش ، راه حنا غادين ونكبرو فلعمر وتا نتي هاكداك فكري فراسك ، امتى غتولدي لولاد امتى غتكبريهم وتوصليهم هادا هو لوقت شحال قدك تبقاي خدمة دار دار خدمة 
نادية بعتاب ~. لعمر ماشي سبة اماما نقدر انا نموت قبل منك حيت تا واحد فينا مضامن حياتو ولكن 
عائشة قاطعتها~ ابنتي غنجيك من التالي الولد الله يعمرها سلعة شنو تاهو بغيتي ترفضيه بحال لي قبلو بلا تا سبب 
نادية شادة راسها بين ايدها ~ لي عضو لحنش كيخاف من لحبل 
عائشة ~ ايه وكيقوليك تاني سبب اعبدي وانا نعينك ديري توكيلك في الله تخطبي لاق ليك ورتاحيتي معاه داكشي لي بغينا ملاقش ليك بسلامة والله يعاون 
نادية ~ ماما واش تبغي بنتك تزوج واحد خدام فبار 
عائشة وقفات موجهة ليها سبابتها ~ سمعيني ابنتي ، داك لي كيكمي ويعرعر ويشرب منخافش عليك منو قد منخاف عليك من هاداك لي ساكت وداير فيها دريويش ، راه بيدك تبدليه وشحال من بار راب ودار فبلاصتو جامع
تاحاجة مكتبقى تابتة وتوبة طريقها مفتوح، الولد كيدخل لخاطر ومطلوق وضحوكي ومن اللخر دخل ليا لخاطري وكنقوليك الا فلتيه من يدك عمرك تلقاي بحالو وعنداك نسمعك تبكي عليه ولا نادمة انا علمتك 
عطاتها بظهرها وتمات غادا محصرة ~ مهم انا ننزل نحط لعشا ونقوليهم جوابك 
نادية ~ متقولي والو انا نبدل وتابعاك يسمعوه من فمي
كتبدل وتفكر ، لبسات قميص خفيف جمعات شعرها ونزلات لعندهم لقاتهم مجموعين والعشى محطوط جلسات عاد بداو كياكلو كانت جنب مراد كيقطع من حداه ويمد ليها ،كيضحك ومجمع وكيبان فرحان حس براسو وسط عائلتو وهو من نوع لفروجي لي دغيا يدير بلاصتو .. تهز لعشا وتحط الديسير هز تفاحة ومدها ليها وقال ~ قشري ليا معاك معنديش مع تنقيا 
خداتها من عندو كتقشر وتقطع وتمد ليه محاساش براسها اش كدير دماغها مرفوع شاركتهم لهضرة وعطاتهم صوابهم حتى نطق زيدان كيشوف في ساعتو ~ ايوا ااستاذة كلينا وضحكنا بقى نسمعو غا جوابك
نادية حطات الموس من يدها وزيرات على حوايجها من تحت الطبلة بتوثر ~. حم مهم انا موافقة 
مراد وقف وقال بالغوات ~. قولي وحق الرب
جاتها الضحكة وطمرت ~. خليني نكمل بعدا !! انا موافقة ولكن على الخطبة لعرس مزال عليه لوقت تاا نشوفو اش غيخرج من تحت راسك 
مراد بارتياح رجع جلس ~ اللللله غيخرج غا لخيييير كوني هانية "ضار شاف فعائشة " ميمتي زغرتي عفاك حسيت براسي ربحت قضية قدام بنتك 
تاهيا مكانتشمن العاگزين طلقتها بتزغريتة حاارة من القلب 
روروروروروروروي 

بعد ليلة متعبة بنسبة ليه تم داخل لبيتو تعبان ، كيحس بنفسيتو مريضة ماعرفش مالو ولا شنو ضارو من غير دنيا كحلة فوجهو ،دارهم ولات كتجيه باسلة مافيهاش حس الروح،وغيمت عليها الكآبة....وغير كيدخل من بابها عينو كيمشي نيشان لبالكون لي تلاحت منو لعزيزة لغالية على قلبو ،ذكرى داك نهار كتحفر فيه وتوغل وتجدر ودير لعروق كيحس براسو حاقد وبزاف وعمرو يشفع ولا يسمح ....حيد لفيسط وتلاح على ضهرو فوق فراشو كيشوف فسقف وسارح بتفكيرو مكايناش شي حاجة أكيدة وموكدة يخمم فيها ولكن عقلو كيدور بحال الطرونبية،و كيف كيقولو سيادنا لوالا الراس لي ميدور كدية، سهى بتفكير ومخرجو منو غي رنات تيليفونو ل سمعو ومكلفش راسو يشوف شكون ، كيسمع ومخليه خارج عقلو مرة وزوج وثلاثة حتى لرابعة عاد تاففف مد يدو لجيب سروال خرجو لثواني وهو كيشوف فشاشة عاد جاوب 
زيدان بصوت عيان ~~وي ؟
ميريام ~لحبيب ديالي خلعتيني عليك ؟؟ من صباح وانا كنعيط مالك فين كنتي !!
زيدان من غير نفس كيهضر ~ علاش مالييي !!
ميريام تفافات. ~ الا غي مكتجاوبش وخفت تكون طاريا ليك شي حاجة وليت كنخاف ؟؟
زيدان مغمض عينيه وكيدوي ~~اممم كنت كنخطب....
ميريام بحال تكب عليها سطل بارد دوخة شداتها ودمعات فلبلاصة شهقة كطلع وتهبط فحلقها.....كي كيفاش كتخطب
زيدان تبسم حتى بانو ضروسو وطلق قهقة خفيفة ونطق ~ آمالك ابنت كمال مفافية غي بوحدك ... مشيت خطبت بنت خالتك لمراد معندك لاش تخافي 
مريام براكة ~~اااه افففففف حرام عليك نفس تقطعات ...رجعات سرات معاها وقالت ... نادية نادية ومراد كيفاش مفهمتش 
زيدان ببرود ~ كيف كيديرو ناس جا قالك بغيت نخطب منخصر ليه خاطرو هزينا لواليدة ومشينا
مريام بدات ضحك ~ نادية ومراد العافية والغاز بلييييز عاودلي شنو وقع بالضبط 
زيدان مافيه ميدوي معندوش مع قوة الهضرة بزاف ~~لي كاين قولتو صافي خطبنا والعروسة وافقات لله يكمل عليهم بلخير 
ميريام~~آميييين فرحتيني ...بحشمة نطقات.. عقبال لينا ان شاء
زيدان سكت شحال عاد جاوب متجاهل هضرتها ~ ايوا شكاديري ؟؟
ميريام كل مرة كيخلي قلبها يتزير وتخاف من لي جاي ولكن مكتبينيش حبو عاميها ~ والو غا جالسة...تنهظات وسط كلامها وقالت ...باباااا مريض ازيدان صحتو فنازل جاتو كريز وداوه لسبيطار 
زيدان عض فكو وحس براسو ماهواش ~ لله يشافي لجميع ،انا غنقطع عيان وبغيت نرتاح 
مريام بلعات ريقها وقالت بصوت فيه شوية دلع ~~امين ، قوليا فوقاش نشوفك 
زيدان حك لحيتو ~~ مكاين شوفان دبا الخدمة شاغلاني وعندي شلا ميدار تال نهار الحفلة ونتلقاو 
مريام فرحت للحظة ~ يااه و شحال متحمسة لذاك نهار لي تعطيني ديبلوم تاعي بيدك ، زعمة متغششنيش وتقوليا شحال حطيتي ليا 
زيدان طفاها بهضرتو ~. لي كتستحقيه غتاخدييه يالله تصبحي على خير 
قطع ممخليش ليها الفرصة فين تجاوبو ، بقات شحال حاضية تليفون ،زيدان كشخص مبغاش يتفهم ليها ملي كتكون قدام عينيه وقريبة ليه كيكون تصرفو فشكل ،اما كلامو معاها فتليفون كتحسو ناقص وبارد .. مرة كيبن ليها بلي باغيها ومرة كتحسو محاملهاش ، ساست راسها من هاد الافكار لي مباغهمش يسيطرو عليها بحجة انها غير باغة تضخم الموضوع على والو 

من بعد ما خرجو ،شمرت على ذراعها كتجمع دار وروينة ولا عندها جهد فوق جهدين كتحس براسها راشقة ليها وباغا تغني ..سالات وطلعت لبيت غير دخلت وهي تسمع تليفونها كيصوني كانت مريام ..جوبتها بزربة وحتى الو مقالتها ليها ..
نادية~ سمعيني بعدا و بلاما تعيريني ولا تقلقي مني والله حتى كنت باغة نعيط ليك ونستاشر معاك حتى انتي وتعطيني رأيك ولكن مراد تبعني سلا هو تبعتني خالتك ايو نساوني منعيط ليك وقلبو ليا دماغي ..
جوبتها وهي منفخة ~ بسيف وعلاش تفكريني اصلا كون ما زيدان كنتي تقوليها ليا حتى تمشي عندو لدار عاد نسمع الخبار ..
ضحكت نادية على كلامها عاد هضرت ~ مريام عارفة راسك نتي شنو عندي ، وزايدون كنقسم ليك بالله ما كنت عارفة راهم جايين واش انا كون درت خطبة مغاديش ندور بحالتي راني داخلة من لخدمة لقيتهم قدام وجهي و غير طجاو هضرو كيف كيقولو مزال مدرنا حتى حاجة ..
جوبتها مريام بضحكة~ ولكن عبر عليك كون قالها ليك كاع مكنتي واقيلة تجي ليهم لدار ، قولي ليا انتي كيف درتي حتى وافقتي راه مزال مذخلتش ليا لراسي ..
كلست فوق ناموسية وبدات تعود ليها ~ انا براسي معرفتش كيفاش حتى وافقت مهم حسيت براسي خاصني شخص في حياتي ويكون راجل وهادشي حسيتو في مراد نقول ليك واحد حاجة وتبقى بينتنا ..
مريام طالقة وذنيها وكتسمع ~ امممم قولي اشنو ؟؟
نادية~ معرفتش كيفاش نشرح ليك ولكن هاد اليومين مبقيتش كنسخى بيه خصوصا فاش كيقرب ليا مكنبغيهش يبعد عليا وحتى ديك لغيرة ديالو كتعجبني ولكن منكرش ديك ضسارة لخاوية ل فيه هي لكتمرضني فهمتني ياك ؟؟ 
جاوبتها مريام لكانت ساهية في كلامها ~ فهمتك وبغيت غير نقول ليك طحتي ابنت خالتي نادية بغات تجوبها وهي طلع ليا ابيل اخرى ديال مراد قلبها ضرب بجهد تصيفطت مع مريام ~ من بعد ونغيط ليك عندي واحد الابيل 
مريام كطنز عليها ~ اممم واش هاد اللهفة هه مهم سيري ندويو من بعد 
قطعت معاه جات تجاوبو قطع ، تنهدات حاطة يدها على قلبها لي كان كيضرب ونطقت ~ بدينا في تبرهيش عوتاني 

معيطاتش ليه ومرجعت تا هو صونا مني فقط صيفط مساج فيه ~تصبحي على خير امرتي العزيزة كنبغيك .
تقرا فيه وتعاود ..تقلات ومجوباتش ، كبريائها ديما خارج عليها ومخليها تدفع كبير دارت تليفون حدا راسها ونعست من الغنضة اللولة كانت عيانة ونهار داز عندها مجبد ..
صباح الحال فاقت ناشطة وفرحانة بارح عاد كانت تفكر واش تقبل و اليوم راه مخطوبة ..لبست كسيوة حدا ركبة مزيرة عليها ومبينة فصالتها طلقت شعرها وقدات لمكياج على خاطرها دارت عكر حمر بين حجم فمها وشكلو وفي رجلها صندال عالي كيف ديماا باش يحسسها بأنوثتها ،هزت صاكها وهبطت لتحت ..فطرت مع عائشة لي جل كلامها غا مراد ولدي مراد
عائشة ~ تكايسي على لولد وباراكا من شغل لمحاكم معاه تلحلحي راك مرا 
نادية تسدت ليها شهية ~ بديتي اماما تاني وموحال تسالي من دابا كدافعي عليه 
عائشة ~ وشحال غزال ومقبول مكرهتكمش تجيو تسكنو معايا من ورا لعرس 
نادية جمعت لوقفة مخرجة عينيها ~. نوضي نوضي حلي لباب واقلة دفوع وصل 
عائشة كتحلف عليها ~. والله مابقى فيك ابنتي كضحكي عليا هاا 
جات باستها في حنكها وراسها وقالت ~. الله يخليك ليا اشهدة ديالي يالله انا مشيت 
عائشة ~ سيري الله يرضي عليك

ودعتها وخرجات وفي باب دار لقاتو قدامها واقف ومتكي على طموبيلتو مربع ايديه كان لابس كلاص على غير عادة مقاد شعرو بطريقة زوينة ومرجعو لور ...صدمهاا وخلعها نطقت وهي شادة على قلبها ~خلعتني امراد اش كدير هنا..
مجوبهاش جا لعندها طلعها وهبطها عاد هضر وهو كيشوف في صدرها لبيناتو كسوة بشكل معيق وعاد فتحة صدر هابطة بزااف ~اش هذا اللبس ا استاذة انا غير شفتك ووقف واحد اخور اش بغيتيه يدير
تعيا تهدن وتقول نهدر معاه مزيان ولكن مكتقدرش ~. شنو غتبدا حاضي لبسي وتحكم فيه 
مراد مد يدو كيطلع لكسوة من جهة صدر كتقزب من لتحت ~ لا واقلة بغيتيني نغمض عيني ونخلي لي دااز يسقي عينيه فيك ،راك بفمك قلتي ليا بعد على لمصايب وبان ليا مكاينش قدك لي غيطيحني فيهم 
نادية حطات ايدها على جنبها كتهز وتحط ~. شنو دابا 
مراد بحدة ~ دخلي لوحي عليك شي حاجة وخرجي لعندي 
نادية بحدة كثر منو ~ والا قلت ليك لااا ؟؟
مراد طوا كمام لافيست مگفض وقال ~. وجدي راسك تبعيني لكوميساريات حيت اي قواد يشوف فيك نفخ لمو عينيه

يالله غتشعل معاه كيف لوقيدة وهي تحل لالة عايشة لباب بعد ما سمعات كثرت لغى ~. ولدي مراد !! ...فتحات ليه ذراعها ...مرحبا بيك اش موقفك على برا دخل تفطر معايا 
نادية دارت نظاظرها على عينيها وقالت ~. دخلو فطرو انا غادا لخدمتي تهلاو 
قبل متفوتهم شدها من ذراعها مزير عليها ~. وا خلينا زوينين راني دويت معاك ديري ل قلت ليك وانا لي غنوصلك تال خدمتك غا تهناي 
عايشة باستغراب ~. مالكم ياك لاباس واش مناقشين ولا شنو 
نادية بنفخة ~. سيد قاليك معجبوش لبسي ودخلي بدليه ...بعصبية قالت وهي كتشوفيه ..شفتي ماما ل من حقها تدوي عمرها قالت ليا هادي معيقة وهادي مقزبة 
مراد مسح على وجهو ~. واادخلي الله يرضي عليك حيت تا يكون معنديش لگلب لي نخليك لابسة ليا كسوة كلها شراجم 
دخل ودخلها ومقدرتش تملص من بين يدو كان مزير عليها
موقفو حتال وسط الدار وعائشة وراهم عاجبها الحال ~ طلق مني واش تسطيتي خليني نمشي لخدمتي 
مراد مشى ريح ليه وحط يدو على سداري وقال ~. تعالي اخالتي جلسي بينما بدلات وجات 
هز راسو فنادية وقال بطنز ~. وملي تحيدي لكسوة نزليها معاك عطيها لماماك تحطها فلكوزينة تقطع زيوفة تقدر تحتاجهم 
بغات تسبو وتعرق ليه دارت بحساب انو فدارهم وبحساب مها لي كتغمز فيها وتحلف عليها بعينيها بمعنى ها سخط عا رضى الا قلتي شي كارثة ...لاحت صاكها وطلعت كتنتر لاحت عليها كويرة عاد نزلات
مراد وقف وعلى عينيه نظرة رضى ~ ودابا اياه الله يرضي عليك ..زرب عليها وشابك يدو مع يدها ...هاحنا مشينا اخالتي كيف قلت ليك وجدي ليا راسك نقاد شي وقيتة هاد ليام ونديكم نتعشاو على برا 
عايشة نطقات قبل من بنتها ~ كون هاني اوليدي من دابا نتسنى فيك تعيط راه نمرتي عندك 
نادية ضورت عينيها ليه بتساؤل ~. اشمن عشاا علاش كتدويو 
مراد جرها وراه وتم غادي خارج ~ نوصلك لخدمتك وفطريق نقوليك
تأفأفات بصوت مسموع ومشات وراه غادي بحالا جار بنتو غادا تقرقب بطالونها وهو سابقها وحاط يديهم بزوج على كرشو توجه لطوموبيلتو حل ليها باش تركب جات تعقب كيف ديما وهو يدوي بصوت خشن ورجولي قح ~. ناادية قلت ليك عطيني فرصتي وهادي هي طريقة 
لجم ليها فمها بكلامو سايراتو وخلاتو يصنع ويدير لي فجهدو حتى تشووف شنو مخبية ليهم ليام بزوج

~~ 
دازت ليلة ونهار ووصل ليوم لي باغا مريام ولي تسناتو مدة كثر من عامين كانت واقفة قدام لمرايا كتشوف فراسها وكتخيل ردة فعل زيدان ملي غيشووفها وبين وبين راسها كتقول اكيد غنعجبو ....لابسة
كسوة بالفضي كتلمع نازلة حتال لتحت من ظهر عريانة ومن لقدام مبينة گاع صدرها ، كانت لاصقة عليها ومبينة مفاتنها وبارزاهم بشكل زوين وعاطي للعين شعرها صيباتو بشكل مموج وجمعاتو من الجنب ببروش بنفس لون لكسوة...قادات وجهها وتفننت فيه كل بلاصة عطاتها وقت وقداتها بشكل زوين وجريئ
لبسات كعبها العالي ورشات من الريحة ل كتعجبو، اي حاجة كانت كديرها كيطيح فبالها هو لول مهامهاش تشوف راسها كيف جات في لمرايا قد ما هامها تشوفها فعينيه قبل متخرج دارت الحلقات وهزات البوشيط عاد تمات نازلة حتى كتفاجئ بسي كمال بقدو وقامتو واقف بزز ولابس عليه كومبلي ومقاد على اللخر وفجنبو نزهة بدورها لابسة لبسة عصرية محطبة زوينة ووجها طبيعي وغزال كتبان منور ..
مريام قصدات ماماها ~. ماما واجدة يالله نمشيو 
كمال فاجئها وقال ~. غنمشي معاك ابنتي نحضر لهاد لحفلة 
مريام تعجبات حيت عارفاه عمرو تسوق لهادشي ولا سالا ليه ~. عند بالي غا ماما لي غادا 
كمال بانفعال كان على سبة ~. شنو مباغانيش نمشي كنضن دعوة كتجي لعائلة كاملة ماشي من خقي 
مريام مشات تأبطات دراعو وقالت بفرح ~. بالعكس متصورش شحال فرحت ،تانا محتاجاك معايا ليوم كلشي غيكونو والديهم وانا كنت نخمم ..زيرات عليه بابتسامة ...يالله نمشيو 

عند بالها فكر فيها وبدا يغير من نفسو على قبلها وهو غرضو واضح وباين سمع بوذنيه ودابا باغي يتأكد بعينيه باغي يتلاقاو فاص ويتأكد منو واخا بينو وبين راسو كيدعي تطرا معجزة ويكون غا تشابه اسماء


وقفات طوموبيل جنب قاعة المناسباات لي كانت اروع مايكوون دنيا كانت عامرة وشلا طوموبيلات ديال لفريع مبراكين قدامها ..اكيد ما گاع لي كيقرا فهاد المدرسة شبعان حبة ولا والديه صارفين عليه دم جوفهم ...ترجلات مريام هي الاولى بعد مشافت راسها في لمرايا ...قدرات تخطف الانظار بعد اول خطوة ليها.. كاع لي كان واقف على برا كيشير ليها ويسول واش بلحاج هاديك ، شحال مشفناها، زيانت غلاضت اش كدير هنا ؟؟
تبعتها مها لي كانت جالسة اللور وعاد نزل سي كمال كيقاد في حوايجو وعينيه كيقلبو مرفوع ومكاينش هنا ، موعى غير على ايدها شدات في ذراعو والضحكة مزينة فمها فرحانة من قلبها ~ يالله ابابا ندخلو
ضحك بزز منو وحط يدو على يدها داخلين... من بعيد كانو كيبانو اسرة متكاملة مناقصهم خير عايشين حياتهم بالضحك والنشاط ومفاهمين ولكن ما خفي كان اعظم ..دخلو لداخل لي كان مزين على حقو وطريقو من ديكورات حتال البوفي لي مطرطق من راس تال راس ...الاساتذة والاطر كلشي حاضر ومقاد على الحالة والطلبة والاهل ديالهم كلها شاد بلاصتو وكاين لي مجمع ،لگروب كيدندن والشواهد واجدين ...
قادت مها وباها لطابلة لمكتوب عليها كنيتهم هما جلسو وهي خدات تليفونها وخرجات على برا تعيط عليه وتسولو فين حيت ردات لبال لطموبيلتو مكايناش... 
غادا هازة لكسوة من جلايلها معرية على صيگانها خايفة طيح ، تليفون على وذنها يصوني ويعاود حتى فقدت الامل عاد جاوب نطقات بلهفة وقالت ~. الوو فينك واش مغتجيش
زيدان بثبات قال ~. قريب نوصل 
مريام بفرحة ~. كنستناك حتى بابا كاين جا معايا 
زيدان بتاسم جنب ~ مزيااااان ، شحال وانا كستنى هاد نهار مغاديش نتعطل
قطعات معاه وتمات داخلة وهو يوقفها صوت كتعرفو مزيان وكتكره خليقتو 
عدنان ~ لالة لبنات 
مريام ضارت لعندو مخنزرة ~. شنو كدير هناا ؟؟
عدنان كيقرب لعندها وفيديه بوكي ديال لورد حمر ~. عيط ليا باباك هو لي عرضني ، ودار مزية حيت خاصني نكون معاك بهاد نهار لي غتخرجي فيه مهندسة 
مجوباتوش دخلات وخلاتو جاي وراها قلبها كيضرب ،غادا وتطلب الله يدوز هاد نهار بخير سيغتو ملي غيشوفو زيدان متاكدة غتشبك ...سلم على كمال لي عاد بانت ضحكتو ملي جلس حداه ، اما هي كانت جالسة حدا معا كتميساجا هي ونادية وتسولها فين وصلت

كلشي جا ،كلشي كيشطح ناشط فرحان الا هي عينيها على لباب كل مرة تشوف واش وصل ، تعطل بزااف والحفلة كتبان ليه باقا مكملاتش لگانة معندهاش
خاصها هو يحضر وربي كبير ، عيات تصوني ليه كيقطع ، هضرات بالهمس مع نادية لي كانت وصلات من مدة قليلة مع مراد تاهيا مسكسفة على لحالة وممخلياش من حقهاا دوات ليها فوذنها وقالت ~. قولي لمراد يعيط لزيدان يشوف فين وصل تعطل بزااف ياكما وقعات ليه شي حاجة !!
نادية ميقت فيها ~. اش عندو ميوقع ليه اصحبتي ؟؟ كوراه جاي نتي ثقلي باك وصاحبو كيشوفو 
مريام كتمسح فايديها لي عرقو من توثر ~. هذا بعدا معرت اش جابو هنا غيشوفو زيدان يكحل بالعمى ، الله يدوز طرح بخير

الحفلة زندات مزيان ولحيحة كثرات، مرة مرة يجي عندها شي ولد ولا بنت ملي معاها يديوها معاهم ياخدو تصاور مجموعين وترجع تجلس 
نادية وقفات وجراتها من يدها باغاها تعيش اللحظة حيت هاد النهار مغيتعوضش منها تفقص مراد وتركب فيه السكر ~. نوضي نشطحو 
مريام بلا خاكر ~. غا سيري نتي والله ماراشقة ليا 
لبقها مراد وخطف يدها من يد مريام ~. تشهيتي تشطحي امراتي لعزيزة ،انا في ذمة 
خنزر فيها عينيه مطرطقين وهي كضحك ...زيدي قدااامي !! شاف في مريام وقال ....هذا حال زيدان ميبقاش فيك الحال

جر نادية شادها من وسطها مقربها منو وملصقها عليه وقفو الوسط جات قدامو ويدو محيدهاش من عليها ، معندناش مع شطيح ومكتعرف منين تجيه بغات غا تفقصو ساعة شقمها ، كتلوى حداه وهو كثر منها النشاط كيموت عليه ، كيشطح برجولية وعينو كيشوفو فيها ومرة مرة يشدها من شعرها الطايح على كتافها
هي تهدت وهو لا موقفاتو غا الاغنية لي سالات قرب باسها فحنها وقال ~. لعقبال عرسنا ونشطحو فوق العمارية
رجعو لبلايصهم ...تهز الميكرو وبدا ترحيب بتلاميذ من طرف ندير المؤسسة لي علن على وقت توزيع الشواهد تحت اشراف ضيوف الشرف لي نطق سمياتهم مع المدح واخر اسم كان لزيدان لخليفي
توسعو الاعين ،قلوب البعض تهزات من بلاصتها كلها وعلاش شي بحب وشي بخوف وشي بتحدي ، كمال تكحاز من الكرسي وولا جالس على جنبو حاضي الطريق لي دخلو منها لوخرين ولي غيجي منها باغي يشوف وجهو وطالب الله يفرح من قلبو لكن شحال ما طال زمان ولا قصار غيجي يوم وتلاقا بناس مباغيش تشوفهم وهادشي لي وقع معاه 
جاي داخل بالنخوة والهمة ، مقاد ولابس من اغلى الماركات ، ميمكنش تهز عينك فيه ومتطولش الشوفة ، الشعر مقاد اللحية مرتبة ، على عينيه نظرة شموخ وعلى فمو ابتسامة ثقة ، وقف وسط المنصة جنب الباقي وعينيه مشااو نيشاان ل كمال بلحاج ضيقهم ومنزلهمش من عليه شوفاتو فيه كانو كيركبو الخوف كيبان ساخط على حاقد على ناوي على خزيت

ياه دنيا شحال صغيرة ، وشحال متناسيتي وخبيتي غيجي نهار وتفكر وليام واخا تمشي غترجع تولي وتلاقيك 
كمال مكانش كيشوف قدامو زيدان لخليفي بوحدو لا كان كيشوف صباح وكيشوف نهار خطبها وحتى نهار فاش خلاها، هاد النهار فيق فيه حب قديم شحال رگدو فقلبو وحيا ليه جروح هو سبابهم ، هاد اللقاء خلاه يحشم من راسو ويعرف شحال كان رخيص وطماع نهار تخلى على اول واخر بنت عرفها وبغاها من قلبو ....
تكون تزوجات ، تكون نساتو ، باقا حاقدة عليه ولا سامحاتو ...
هادشي كلو فكر فيه وهو فبلاصتو ل غير جنازتو لي حاضرة فيها اما عقلو مكاينش هناا
خشا زيدان يدو فجيب سروال وتحرك لعندهم بخطاوي ثقال ومرزنين ، حجبانو كانو معقودين وشوفاتو حادين
وصل لطبلة ووقف قدام كمال بالحاج لي جمع وقفتو وناض قلبو كيضرب وفمو بياض ، رجليه كيترعدو وتانيب الضمير راكبو من ساسو لراسو
جات بزربة حداه مريام لي مفاهمة والو عند بالها واحد كيبغيها وباغي يتزوجها وجاي يسلم على باها حطات ايدها على كتف زيدان وقالت ~ نعرفكم ببعضياتكم 
قطعها زيدان بيدو وجرها لعندو سلم عليها بلابيز ايديه كانو على خصرها وكل حنك كيبوسو وكيطول فيه مستمتع كمل وقال ~ لغزاالة صافا ؟؟
مريام حشمات وتزنگات ولا تدخل وتخرج بالهضرة مبقات عارفة متقول ~. حم ها لاباس ، شيرات لباها كتورك وهي كتنطقها ...زيداان هذا بابا
زيدان كيلعب فالكول تاع لافيست تاعو ونطق بوضووح وهو كيشوف فيها ~. كنعرفوو ومزياان ....قرب لجهتو كيجمع فقبضة يديه ويزير عليها
شاف فيه وقال عند وذنيه بنبرة تهديد ~. صحتك مزيان ، مرتاح فحياتك ، بالك هاني ،وضميررررك .."ضغط عليها "...هو هاداك
كمال كلامو خلاه يطيح على وقفتو تا حد مفهم شي حاجة قربات منو مريام كتجري مخلوعة عليه ونزهة تاهيا اما عدنان كان كيستوعب ...خدا زيدان قرعة الما من فوق طبلة وتحنى لعندو وقال ~. مزال باغينك ا "باستهزاء ". كمال شد فرااسك ،عاد قلنا بسم الله 
مد لمريام قرعة الما وقاليها بابتسامة ". ...عوني باباك يشرب

رجع لبلاصتو حيت كلشي كان كيتسنى فيه كمال مكرهش يطير من تما رجليه فشلو ولي خاف منو غرق فيه عدنان قرب منو وقال بينو وبينو ~ واش كتعرفو 
كمال نكر ~ لا فين غنكون كنعرفو غير محملتوش قريب من بنتي ..شاف في مريام وقال ~. بنتي هادشي مزال معطل عييت وبغيت نرتاح 
مريام ~. صافي مبقى والو ابابا ، هاهما غيبداو يفرقو شواهد
جلسات حداه نزهة كتطمن عليه ~. الا عييتي بزااف نمشيو تا تجي ورانا توصلها نادية 
كمال بقلق ~. لا رجلي على رجليها
عم الصمت في القاعة كلشي كان كيستنى يسمع سميتو ، باش يمشي يستالم ديبلوم ديالو ، توالاو الاسماء حتى وصلت نوبتها لي تنطقات بحلق زيدان قرب من الميكرو وقال برجولية وصوت حرش ~. الانسة مريااام سكت شحال عاد قال بلحاج وهو مراضيش يخرجها من فمو 
ضحكات تا بانو ضروسها فرحتها كانت كبيرة ، فرحة نجاح وفرحة استلامها لشهادة من عندو ...قرب متحرك لعندهم لبساات لبسة التخرج لي جابتها ليها نادية هي وطربوش كهدية ...
غادا هازة على جلايلها وشعرها كيتحرك معاها ..مد ليها يدو شدات فيه وطلعات زوج لدرجات تال عندو بغمزة مد ديبلوم وقال فوذنها ~. مبروك عليك ازوينة ، وكادوك غنختم ليك بيه هاد نهار
قالها ويديه كيدوزو على حنكها سلمات عليه فرحانة وقلبها غينقز من بلاصتو عليه ~. الله يبارك فيك ، الله انا فرحانة بزااف 
زيدان مطمر ~. سيري حدا صحابك مزال غتفرحي
نظمات لزملاء ديالها شي كيبارك لشي ، فرحانين حيت سالاو ولي تابرو عليه وصلوه ...تعالات تصفيقات وشطحو مجموعين على اغنية مبرروك وهو كيطيرو طرابش في سماا 

نهار سالا ولحلاوي تفرقو ، كانت واقفة مع نادية ومراد كيتسيلفاو حتى وقف عليها عدنان جرها لعندو مبعدة عليهم 
عدنان شادها من يدها بزز منها ~. شنو انا معنديش حق فيك 
مريام بتعصب ~. اشمن حق ، مليي ارض ولا محال من محلاتك 
عدنان بضحكة ~ نتي راك مشروع ،مشروع زواج شخال وانا كنستنى فيه .مد يدو لوخرا لجيبو وجبد منها بواطا ل كانت فيها سنسلة ذهب زوينة باينة فيها ساوية ~. هاديك ليك الالة لبنات كادوو دنجاح ديالك 
مريام كضور وجها كتقلب على زيدان ليكون كيشوف ~. كادوك خليه عندك وسير من هنا 
بغات تبعد وهو يرجع يشدها مغدد يالله غيتعصب عليها وهو يحس بيد شداتو من معصم ايدو ل شوية ويطرطق ~.اشكدير ؟؟
عدنان ~. ونتا ماالك وا مع خطيبتو ونتا باشمن صفة كتدخل بيناتهم 
زيدان باستهزاء وسخرية ~. خطييبتك متاكد من رااسك ياااك ؟؟

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.