توعت فيديه حس بيها غتهرس عيا يجرها بلا فايدة كيف غيدير وقدامو واحد جاهل وملامح وجهو تخربقوا وعينيه خارجين كشاكشو من بين شفايفو كثناتر معندوش لحباسات ومكيفكرش قبل ميدير لحاجة ~. اش كدير اسي زيدان عند بالك الا دوزت ليك تهريسة نيف غندوز ليك هادي
زيدان باستهزاء طلعو ونزلو مزيان وقال بنبرة تهديد ~. شفتي هاذي لي قدامك بديني وماأعبد يا غتفوت ساحتها ومتبقاش دور بيها ولا غادي نوريك ونعطيك فاش تلهى مزيان كتسمع !! وهادا ... " خدا لبواطا رجعها ليه لجيب ". لكادو زيدو فيك ولا خليه ل ايام الخايبة تبيعو وتنفع بفلوسو ...
نادية بانت ليها القضية حماضت والحفلة غترجع جنازة وهي تنغز مراد لي مكاينش هنا مجمع مع نزهة...جراتو حتى بعداتو عليهم عاد قالت ~. مرااد عتق صااحبك ،سير فك الشارف من بين يدو
بزربة مشى لعندو ، جا وراه كيدوي في وذنو ~. اش كدير اصحبي طلق لخرا يصدق ساكت ليه القلب فيدك وتوحل فيه كون غا يستاهل بعدا ...
زيدان عض على لسانو وجا لعند وجهو وقال بتحذير ~.دور تقود من قدامي قبل منوسخ فيك يدي ..شارف لي حطك داير راسك فبنت قد حفيدتك لله ينزل على ديلمك الغضب
غير رخف على يدو وهو يغبر من حدااه ...مريام كانت مزال مصدومة معرفات متقول كتشوف في زيدان بنص عين كيبان ليها مشربن مقدراتش تدويه هربات من حداه مشات لعند نادية لي كانت واقفة قريبة ليهم ~ ناري اختي اش هاد زهر عندي واش انا صگعه ؟؟
زيدان من جيه وبابا من جيه وهاد الگنس تاهو معرت اش جابو ومكملها قاليك خاطيبتي
نادية بهمس ~. عرفتي كيبان ليا زيدان كان غيهزو ويلوحو مع الباب غا حفظ الله
مريام تنهدات بخوف ~. غا سكتي شحال وانا نتمنى هاد نهار لي يتلاقا فيه بابا معاه ويتعارفو ويديو ويجيبو في الهضرة ساعة شوفي اش وقع اووفففف
مريام .. مريام ....كان صوت كمال كيعيط عليها مشات لعندو لقاتو مخنزر ومعاجبو حال خصوصا ملي مشى عدنان بلا خاطر شاف فيها وقال بحدة ~. ساليتي يالله زيدي نرجعو بحالنا
مريام طامعة تدوز وقت كثر مع زيدان باقا مشبعت منو ما جمعو ما تغزل بيها ،لي جات على قبلو موصلت ليه ~. ولكن ابابا مزال لحال " بدات تحك فعنقها وقالت مغمضة عين وحالة لوخرا خايفة من ردة فعل. "...حم الا بغيتو غير سيرو نتوما حنا غنديرو حفلة نهاية سنة مع دراري وبنات راك عارف مغنبقاوش نتشاوفو
كمال قاطعها بصوت مرتافع ممخليهاش تكمل ~. كتسمعي اش قلت لا ، قلت ليك يالله بحالنا معندك متزيدي تجلسي هنا
وقف شاد في نزهة حيت حاس براسو مهواش ...اما هي كتنفخ وتصوط معصبة يالله غيتحركو وهو يوقف قبالتو زيدان داير يديه وراه وكيشوف في بمعنى فين غادي ~ كماال ا فين غادي ، مزال لحال ومزال عندي ليك شي هضرة خاصك تسمعهاا ؟؟
كمال تفافا وسرط ريقو ، دماغو تقلب وراسو داخ عليه وبدا يزدح ويفكر اش غيقوليه ، مريام كانت واقفة مطمرة باغا تسمع ونزهة مكانتش قل منها وحتى من مراد ونادية كانو فجنبها واخا عياا يقنع فيها يمشيو ويخليهم يعومو بحرهم ولكن مبغاتش خايفة توقع وراها شي موصيبة
جر ليها لكرسي وقال ~ جلس جلس !! بنتي ليا عياان ومافيك لي يوقف
بلهلا يتبتو ليه جلس حيت رجلين لي هازينو مبقاوش ، قرب زيدان حدا مرياام وقال وهو كيشوف فباها ~.معاك زيدان لخليفي مهندس معماريي وقفت على رجلي بذراااعي وخدمتي بعرق كتافي ومافياش خصايل شمايت حيث رضعت حليب الرجال ا كمال وانا وانت كنعرفو بعضياتنا من زمان واخا لخدمة لدازت بيناتنا مزال ما خدينا خلاصها ولكن غير رتاح داكشي لفي بالك بعيد غير خوي دماغك ودير لينا نهار نشوفوك فيه نصفيو لخواطر ونقويو العلاقة ونشركو الدم مع بعضياتنا
كمال شابك يديه مع بعضياتهم وقال ~ اشنوو كتقصد ؟؟
زيدان بتاسم ~ لي قصدتو فهمتيه ...دار شاف في مريام وقاليه ....ناوي نتزوج بنتك ف لحلال وبغيتك تحدد شي نهار نجي فيه انا والواليدة تال عندكم...
كمال ركباتو الخلعة والاسوء تحط قدام عينيه ملقى باش يجاوبو ، نقذات نزهة الموقف وقالت بلسان كيتقطر صواب علاش لا وسيد ناوي المعقول مع بنتها وعاد هو لي كتبغيه ~ مرحباا بيك اولديي فأي وقت
كمال وقف شاد على قلبو مقادرش يدوي ~. انا عياان دابا مقادرش نصبر بغيت نمشي لدار
زيدان ميل راسو وقال بغمزة ~. ايه علاش لا ، رتاح دابا وندويو من بعد ...باستهزاء ...يكما نوصلك ؟؟
كمال شد يد مرتو ~. لا متعذبش راسك ....شاف فبنتو وقال بصوت خشن ~. يالله ابنتي نمشيو
دارت شافت في زيدان وذبلات عينيها بمعنى معندي مندير ، هز ليها راسو باش تمشي وهي تقوليه بالهمس ~. تا نو صل ونعيط ليك .....رجعت شافت فنادية مخاطباها ~. يالله غتمشي معانا
مراد جاوبها ~. ها هي معايا غا سيري بسلامة
مشاو وخلاو وراهم ريوس حايرة وبالخصوص نادية لي قالت بتساؤل ~. زيدان اشمن خلاص داوي عليه ، واش كتعرف عمي كمال
زيدان حرك راسو بنفي ~. ماشي شي حاجة متبرزطيش راسك غير شي خدمة كنت قاديتها ليه شحال هادي وبقيت كنستالو الصرف ..مهم مرااد انا مشيت حتال نتلقاو فلبار
مراد بصياعة كيف عادتو ~. واش صااحبي غينفعني ايام البرد وشتى ورعد ، هو باغي يدير علاش يرجع وانا تعشش فيا لبرودة ...لاح يدو على كتافها وقال ~ زيدي قدامي نمشيو نتعشاو ونباتو حنا گاع
ضربتو لكتفو وقالت ~. باسل كيف داير
قالتها فوق القلب اما كتموت على بسالتو
دخل لدار لقى مو وخوه ومرت خوه جالسين في جردة رمى سلامو وتم طالع بلاما يشوف جهتهم ...طلع نيشان دوش ولبس لباس مريح ونزل غادي قاصد طموبيلتو من جديد وهي تنادي مينة بسميتو حتى دار ~. اش كاين الواليدة
مينة بابتسامة ~. تعالى اوليدي بغيت ندوي معاك يعطيك الرضى
مينة شدات ليه فيدو ~. شووف لخوك شي خدمة معاك فشركة....جا يدوي وقفاتو بيدها مكملة كلامها ..سمعني بعدا ، راه خوك هاذا يعني دمك ، مدغو ومتبلعو شكون غيرك غيحن فيه متنساش عندو بنية ومسؤوولية
زيدان جمع الوقفة ~. يترجل بعداا ويكوون خيير
نصر مرضاش قدام مرتوو دفع الكرسي لي كان جالس عليه زيدان برجليه تا طاح وقال بالغوات ~ مالي كي جيتك ، عند رااسك غا نتا لي راجل وحنا كيادر حداك ...صلح كلامك معايا اخويا ولا نسى راك كبر مني
زيدان تحنى لعندو مخنزر فيه ~. وريني اش عندك مدير
نصر وقف حتى هو حتى تقاد معاه فالوقفة ، طولتو من طولت خوه وتا فورمتو بحالو الفرق الوحيد بيناتهم واحد كيفكر بعقلو ولاخور لعقل معندوش ~. غندعيك !! وااكل ليا حقيي
زيدان ضحك ساخر منو ~. علاه نتا شحال من حق مزال عندك باقي
نصر بتحدي ~. حق عمتيي صباح ولا باغي تكوش عليه بووحدك
اش غيقوليه وبشنو غيقنعو بلي معندها والو هادشي الحيط غيفهمو ونصر مغيدخلش ليه لراسو ، وحيت زيدان بالو مشتت وذهنو مصافيش ختار طريق لقصيرة قاليه ستنى وطلع لبيتو هز شي فلوس لاحهم على وجهو وقال ~. هاهما وفوق من حقك دابا تطلع تجمع شراوطك وكمارتك ملقاهاش هنا عندي فداري سير بهاد لفلوس وقف على رجليك ووريني رجلتك لي فاضحني بيها
مينة وقفات كتنهي فيه ~. اش كتقول ازيدان فين غتجري على خوك ،وفين غيمشي هو ومرتو وبنيتو فهاد ليل
زيدان ~ يمشيي هو اما مرتو هادي دارها تبقى فيها مكاينش لي غيخرجها تا وكان يتقاد هاد لبهيمة ويجي يديها
حسبن فسرو وعطاه بظهرو ومشا فين كان ناوي اما نصر تم طالع كيصفر وناشط ومخلي لا مو لا هناء ربي لعالم بحالهاا
~~
كمال داخل لبيتو ومطرق عليه موصيبة وطاح فيها وكلام زان ممشاش من بالو ، هز تليفونو وعيط لحبل لنجاة الوحيد لي كيبان ليه قدامو ~ حم سي عدنان ،كيف بقيتي ياكما تقلقاي
عدنان دافع كبير ~. اش غنقوليك اسي كمال بنت تصرفاتها مكتعجبش ومشنتة داك الضاسر
كمال جلس على طرف الناموسية ~. والا كان هو سهمو الهضرة نتا لجم ليه لسانو بالافعال
عدنان ~. يعني شنو اسي كمال
كمال ~. يعني كيف تافقنا بعد غدا ضرب البيض في الكحل ودي مرتك معاك وديك ساع يوقف قدامك نديوه لحبس
عدنان كيحك لحيتو كبرات ليه البعرة ~. اييه حتى هذاا نظر
صباح يوم جديد ..فاقت نادية كيف عادتها لبسات وقادات وغادا نازلة قاصدة لخدمة كتلقى قدامها مرااد مبراكي حدا دارهم منزل الزاج ومرجع الكرسي اللور متكي علي ومخرج يديه من شرجم كيكمي ...غير بانت ليه وهو يلوح الگارو ونزل لعندها كيقاد في تريكوه وكيفلي فيها ~. صباااح الخييير
نادية ربعات ايديها ~. اش جاابك هنا يكما بتي لبارح حدا الباب
مراد قرب منها باسها فحنكها ~. لا جيت مع لفجر ،طلعي !! مشهي نفطرو بزوج
نادية هزات ايدها فوق راسها ~. مرااد عندي لخدمة وغارقة فيها
يعني الا عندك شي شغال سير قديهم .
مراد تكلم باستفهام ~ هاد الساعة عندي غير انتي جرها من ايدها مكمل هضرتو~ ياله ياله احبيبتي نوصلك ونطلع معاك نطلبو لينا شي فطور ومنها نيت نشوفك كيفاش كتخدمي ..
ضعفات قدامو ركبت معاه ومشاو نيشان لمكتب تاعها دخلو مشادين من ليدين صبحات على سكرتيرة عاد دخلات لبيروها ، اول حاجة دارت شعلات لكليمة وحيدات لافبست ديالها بقات مقزبة عليه غير بديباردور وصدرها كيبان اما هو كان كيشوف في ديكور المكتب وكيفاش مقاد وكل حاجة مرتبها في بلاصتها ...قاطعات تأمل ديالوو سولتو ~مراد اش بغيتي في الفطور
دار شاف فيها لقها كتشهي قدامو وهو ينطق ~باغيك انتي نفطر بيك
تجاهلت كلامو وميكات عليه طلبت ليهم بزوج فطور وجلست في بلاصتها ،جبدات شي وراق تراجعهم ...ليوم مكاينة عندها حتي شي جلسة من غير شي ملفات خاصها تقراهم موزيان ..تقدم لعندها مراد حط ايديه على لمكتب وهبط لمستوها كيدوي في وذنها ~نادية .....جوباتو وعينها في لوراق~امممم
ضورها لعندوو وقابلها معاه ..شاف في عينها وفي شفايفها لكانو بلون الدم عاد نطق ~في خبارك واحد حاجة مني شفتك هذا الصباح وهي معصباني ..هبطت عينها ووقالت بتساؤل ~اشنو هي ؟؟
خدا خصلة من شعرها وضورها على صبااعو وهي متبعاه بي عينيها حتى ضربت ليه ايدو وغوتت عليه ~طللق من شعري وبراكة من تضياع الوقت
جات باغة دور بالكرسي شدها من كتفها مطلع ايدو جهة وجها وحاط صبعو كبير على شفايفها وبداا كيدوز عليهم وكيمسح فيهم ساعة مبغاش يتمسح ليه .طلع عينو فيها لقاها مغمضاهم ومستمتعة بلمساتو لكانو عن غير قصد منو ...مقدرش يقاوم شكلها وهبط اكثر باش يوصل لمستواهم خداهم بزووج بين فمو كيبوس ويعاود وايديه على عنقها معندوش الجرأة يهبط لشي بلاصة ويصدق ضارب كلشي في الزيرو.. ولكن غير حطات ايدها بزوج على عنقو استغل الفرصة، فصل القبلة لكانت عميقة ومخلطة ببزاف د الاحاسيس واخا حتى واحد فيهم ما سخي يبعد على لاخور ..
تكلم بشويا وقرب ليها ~نادية بغيت نهضر معاك في واحد الموضوع
ايده كانو مزال على عنقها كيتلمس فيه غير بصباعو هابط طالع غير بالمهل باش متخدمش عقلها ..حركت غير راسها بشنو مقادراش تجوبو
مراد بنفس سخون كيضرب عند وجهها ~ اش بان ليك نديرو عقدنا هاد السيمانة ..
حلت عينيها فيه وهو يرجع يبوسها بزربة وايدو هابطة لصدرها بحركة خفيفة خلات نادية تفشل بين ايده ومتقدرش تقاومو ...بادلاتو لبوسة وهي لكانت متحكمة ولكن معامن بعد عليها مخليها كيف جرثيلة بين ايديه تبعاتو بي راسها مغمضة عينيها وهو يبعد عليها ورجع عاود سؤالو ~جاوووبيني اش بان ليك ..
نطقت وهي مرفوعة~اشمن عقد مراد كيلعب في شعرها ~عقد زواجنا هبط ايدوو من حناكها لعنقها كيتلمسهم برفق وفي نفس الوقت خايف من ردة فعل ديالها ولكن صدماتو فاش نطقت ~وااااخا
كيف قالت واااخا كلا شفايفها من جديد بقوووة حيد ايدو من صدرها وقاد ليها اش لابسة و طلعهم لوجهها باش يتحكم كثر هاد المرة كان احترافي بزاف عليها لدرجة قطع انفاسها عاد قطع لبوسة ..طلع لوذنها كيهضر وهو كينهج وانفاسو حارة كضرب في بشرتها ..~ حبيبتي بزز باش قدرت نتحكم في راسي ... انا نمشي قبل ما فرانات عندي يتقطعوو ..
هي كانت كتر منو عرقانة وايدها كيترعدو وغايبة علي الوعي هاد الحالة لهيا فيها عمرها وصلتها وحتى عماد عمرو مقدر يخليها تنسى راسها ومبدأها وحتى شجاعتها كلشي مشا بحالا كان مخدرها مقدرتش تشوف فيه ولا حتى تكلم ..عتق الموقف غير سيد ل جاب الفطور مني دق عليهم الباب ..بغات تنوض ساعة حبسها قاد حالتو وخرج عندو خلصو ودخل حطو وهي مزال على حالتها ،عارفها وحافظها ...ملي كتدير هاكدا ...مشا لجهتها ..عنقها من اللور وهضر معاها بضحك
مراد~مالك دباا رابطة علينا غوباشتك مجوباتوش غير ساكنة رجع هضر معاها وهاد المرة بجدية شد يدها بين يدو وقال ~نادية عادي يوقع هادشي بيناتنا وزيدون انا ماشي واحد غريب عليك راني قريب نولي راجلك وانا بعدت عليك حيث مقدرتش نزيد مزال نتحكم ماشي شي حاجة اخرى يعني ذاك العقل ديالك بلما يمشي بعيد ..واخيرا نطقت وهي منفخة ~ماشي على هاشي علاش انا مقلقة ..مراد بستغراب ~ وعلاش مقلقة
نادية نفجرت فيه ~ مقلقة حيت فاش بغيت نبوسك انا انت بعدتي زعمة اشنو عنيتي فيها باغي تسيطر.
مقدرش يصبر هو يتفركع قدامها بضحك ..كيهضر ويضحك ~ انا راه نتعرى ليك كامل كوني غير مرا وقادا ،مهم هاحنا غنضربو لعقد وبيني ليا
نادية عاد سرات معاها وتفكرت داكشي لقالت وانها وافقت على العقد ،وقفت بلما تحس ،شافت فيه وتكلمت بجدية ~ مراد بلاما تقول ليا زعمة حيت قلت اه راه هي اه راه كنت غي
"حكت شعرها مارگة من راسها وهو يكملها ليها "
مراد~ كنتي مغيبة مكنتيش حاسة غير لا وعي ديالك هضر حيث هو باغي يكون معايا ياك ؟؟ ايو صافي انا هادشي كافيني مدام قلتي اه راكي باغة يعني بلما تبقاي تعفري ..طارت عليه ~ ماشي شغلك ومكاين بو عقد
جوبها ببرود~ شغلي ومدام قلتي اه يعني هاد سيمانة كاين ضريب صداق "باسها فحنكها صحة " ...يالله تهلاي ليا فراسك
...
تم خارج من عندها كيضحك على منظرها حتى كيتعكر دمو ويتقلب عندو لمزاج ملي شاف عماد قدااامووو
نادية غير بان ليها عماد وجها هرب منو لون خصوصا انو مراد كاين .... معرفت متقول غير كتشووف اما مراد كان ناوي يمشي غير شافو وهو يطمر دار يديه وراه وعلا حواجبو مخنزر عاض على فمو ... عماد كذلك تصدم بمراد بقاو غير كايشوفو في بعضهم مدة قصيرة حتى حنحنح عماد وقطع الصمت بكلامو...
-عماد~ سلام نادية سمحي ليا جيث عندك ...ولكن فرحت بزاف البارح فاش جوبتيني وعطيتيني فرصة مرة خرا.. غمضت عينها وبدات كتشوف في الارض كتبقلل ... اما مراد جاتو الصدمة من داكشي لكيگول ....عينيه تقلبو في ديك لحظة جمع ايدوو وعروقو تنفخو ونطق هو شاعل
مراد~كيفاش ؟؟ عاود نسمع اش كتقول ... دارت معاك ياك ؟؟ خرج عينيه وكمل ... وعطاتك فرصة مرة اخرى ؟؟ اممم ..
رد عليه عماد بصوت عالي باغي يبان ~ مكنهضرش معاك كنهضر مع مدموزيل نادية
تعمد يقول ديك مدموزيل باش يستفزو ..
جوبو مراد وهو كيغلي حتى خبط ايدو مع ااباب الشيء لي خلا نادية تقفز من بلاصتها ~ اسمها مداااام نادية ...ومتشوووفش فيها هبط عينك !! قبل ما نتقبهم ليك .. !!
جات نادية كتجري عرفت القضية غادي تشبك ومراد كتعرفو ايدو سابقاه وباينة فهم الموضوع غلط ..
شدت في مراد باغة تهدنو زعمة اما هو غير ما زاااد شعل اكثر وضار ليها معصب وعروقو باينين .~ هذاا القواد اش جاي كيدير هنا...
هضري نسمع وقولي ليا اشنو كيخور ؟؟ باستهزاء قال...
فرصة اخرى !! كتبيدقي فيا ابنت الناس مرجعاني قواد عندك ولا اشنو ؟؟
نادية ملقات باش تبررر ليه اش غادي تقول ليه وكيفاش تشرح ليه راه ماشي داكشي لي فبالو حطات ايدها علي صدرو عاد نطقات
نادية~ ماشي داكشي لي ف بالك غير تهدن وغادي نشرح ليك...بترجي .. عفاك امراد ..!!
مبقاش كيسمع ليها دفعها من قدامو وشد في عماد عطاه بكروشي لول زادو ثاني جعر عليه بقى كيذخل ليه غير لوجه دوخو مزيان ولا كيدور كيف سكران فبلاصتو
استجمع مبقى منو وتبت راسو دفعو بزربة وهرب من قدامو مراد جهل حس براسو طعناتو وصغراتو وكتلعب من ورااه.... كيسب فيه مخلا لا جد لاطاسيلة كان باغي يتبعو ولكن شداتو صحة ومبانت بيه غا هي قدامو ...دار ليها شادها من شعرها وكلاها مع الحيط حسات بزغبات راسها طارو....مراد من نوع لي عندو گود معندوش مع نوع لي كيتفلى وكيسايرو وكيقلل من قيمتو ...فينما كيبغي يضربها كيرجع يخبط شي قنت ..بدات كتفركل بين ايديه ودموعها هابطين شلال طلقها بستين كشيفة ...طلقات عليه حلقها وبدات تسب فيه دايراها قد رايها وتخرج فعينيها
نادية~ اخر مرة تحط عليا ايدك الهمجي ولا غادي نوريك اش كنسوى ؟؟..
رجع قرب ليها تصحابو باغي يضربها غطات وجها وهو يتحكم في راسو شويا عاد نطق بنبرة شاعلة ~ شفتي هذا الهمجي لمعجبكش ومرادياش بيه غادي تكوني ليه وديالو بغيتي بخاطرك ولا بزز عليك ....
دفعها وخرج مع الباب ناضت تقاد في حالتها ومسحت دموعها وهي كترعد خافت منو .. قدر يزعزع ليها ذاتها من الداخل ولكن ماشي هي معامن يتعامل بحال هاكة باغي غير الضد هي لغادي تعلمو ليه وزايدها كيتهدد عليها مرضاتش نفسها صعيبة ومبغاتش تسرط ليها... فين ديك القوة لكتبين ذغيا تلاشات فاش حكمها كان يقدر يدير اي حاجة وهي متقدر دير والو ..مقدراتش مزال تفكر داكشي لوقع عقلها مبغاش يستوعب قدر يخليها ترعد قدامو وانه قادر يتحكم فيها كيف بغى خدات فطورها كتاكل فيه باغة غير تنسا وتحيد من بالها اي حاجة تقدر تفكرها بيه ..
دوزت نهار كامل في لوراق وشاغلة تفكيرها معطاتش اهمية لموضوع كان عندها امل في ليل غادي يعيط ويعتاذر وديك ساعة غادي تعلمووو كيفاش يتعامل معاها ..وصل ليل والو مصيفط متكلم نعست وهي عندها امل غذا تلقاه قدامها ..
في صباح ناضت اول حاجة كطل عليه مبانش ليها كاع ..بدات نهار ومزال امل ولكن في كل مرة كيخيب ..يومين هادي لا تلفون لا مساج ..مبقاتش قادرة تصبر خلت قلبها هو ليتحكم مشات بار ملقاتووش ولكن عطات فلوس لحارس تما غير يشوفو يعيط ليها كذلك الدار مشات ليها ملقاتوش عيطت لزيدان سولاتو معطاها خبار عليه كتصوني ليه والو ..قلبها تزير وتفكيرها عليه تشطن مبقى عندها عقل ..رجعت لدار محطمة وطالع ليها الدم معندها مورال لوالو باغة غير تشووفو وتعنقو توحشت ديك ضسارة لفيه توحشت اهتمامو الزايد بيها ..طلعت لبيتها نعست فوق الناموسية بحوايجها بلما تحس داتها عينها ..صونا ليها تلفون ناضت قافزة ومخلوعة هزت تلفون بلما تشوف جوبت كانت مريام لي كتبكي وتغوت
مريام ~ عتقيني انادية ليوم غيزوجني بابا بسيف عليا
لا حياة عاشتها ميف بغات ولا سعد جاها كيف حلمات ....باها فنظرها ولا عدوها وشناقها لي غادي صايگها لحبل مشنقة
بيديه وبلاما يفكر ...من نهار سالا حفل التخرج وهي كتحاول تقنعو بلي بغاه قلبها....وهو كيضرب من تحت لتحت
ولفراسو فراسو....الا كان زيدان بنسبة ليها راجل حياتها ....فبنسبة لباها هو معذبها لي غيرزيها فشبابها داكشي علاش اهون ليه يشوفها مع عدنان ولا معاه.....دوزات يومين على لجمر كون كانت كتقنع حجرة كون لانت ... فلخر دارت بكلام مها وسايراتو كيف قالت ليها تخليه يبرد شوية على الله يقتانع بالحق فلخر صدمهاا وقال وهما على طبلة لفطور ...
كمال خلاها حتى لاخت الدغمة وبللات ريقهاا ووحلها ليها ~. وجدي راسك خطبتك ليوم !!
مريام لاحت الدغمة من فمها ووقفت على طولها عينيها خارجين ~. اشنووووو ، اش كتقول ابابا واشمن خطبة كتدوي عليها ؟؟
كمال ببرود كيهز لكاس يشرب منو ويرجع يحطو ~. عدنان جايب عائلتو وجاي وديرو فبالكم لخطبة غتكون كبيرة.... "دار لعند نزهة شافيها "...شوية غتجي لمرا لي كتعونك راه عيط ليها باش تجمعو دنيا...اما لماكلة وصيت عليها من برا ، قبل ميجيو الناس التريتور غيجيب كلشي ....حتى تكشيطة لي غتلبسي شوية وتوصل...
مريام غير مزيرة على سنانها وكتشوفيه ، عينيها عامرين حقد من جهتو عمرها شافت اب كيوقف فوجه سعادة بنتو تاليه ~. اشمن تريتور ولا تكشيطةة ابابا ...معامن تشاورتي غا قوليا ، ياك دويت معاك وقلت ليك على سيد ل انا باغاه ومافيه ميتعاب الا على لفلوس راه برزقوو... علاش معجبكش وعلاش باغي تكرهني فحيااتي واش مكنهمكش تاا شوية
كمال جمع الوقفة وهو كيكحب كان لابس حوايج دار عاديين.. هز عينو فيها بتحذير وجاوب ~ داك سيد ميليقش ليك ، واخا تنطابق سما مع الارض ميكونش نسيبي ،حسن ليك تطيعيني وديري شنو غنقوليك انا باغي غير مصلاحتك ابنتي
مريام بانفعال ~ مصلاحتي ، هاء نعيش مع واحد قد باا هادي هي مصلاحتي يااك ؟؟
كمال ضيق عينيه ~. غير غيتعيي راسك على والو دابا ناس موطدين وجااين وهادا ما كتاب عليك ،طلعي لبيتك وريحي دماغك الا بغيتي رضايا
زاد وخلاها وراه تغلي وتسوط ..عضات على فمهاا حتى داز دم وبدات تبكي بصوت مسموع ~. لا لا قولي ليا اماما راه بابا كيكذب ، اش هاد زهر عندي واش انا بنتكم ولا لاقيني
قربات منها نزهة كتهدن فيها ~ سكتي ابنتي باراكا من لبكى ولي بغيتيها غنديرها معاااك ، لي قلبك باغيه هو لي يكون ليك غاا سكتي
زيدان جلس على لبيرو كيشوف بعيد~. ديري شنو قلت لييك وصافي يالله سيري وباراكا من لبكى
كلامو واخا كان كيطمن ولكن هي قلبها مزال كيحرقها ..هادي خطبة ماشي تفلية وهي لي عارفة كمال شكيسوا مزياان رجعت هزات تليفونها وعيطات لنادية توقف معاهاا وجي تكون فجنبها وداكشي لي وقع غير عيطات ليهاا وقالت ليها شنو كاين جات لعندها طايرة
وصلات نادية مع كوافورة لي جايا تقاد ليها وهازا ليها شنو غتلبس فيديها ..دخلات على مريام لبيت لقاتها عاطياها بظهر كتشوف في القفطان لي معلق قدامها وكتحسر على راسهاا ...نهار لي من المفروض يكون اورع يوم فحياتها دايز عليها كي لفاخر ...محسات غير بيد نادية على كتفها غير ضارت لعندها وشافت فيها وهي تلاح عليها كتبكي من جديد
بقات معاها حتى تهدنت وجلسو عودات ليها كلشي من جديد حتى مكالمة ديالها مع زيدان قالتها ليها
مريام مكونة فوق الناموسية وكتحرك بعصبية ~. شفتي انا الا مديتش لي كنبغي نتسطى اناديةة
نادية تنهدات ~. يكون خير اختي ان شاء الله هو لي يكون ليك
دخلات عليهم لكوافورة كتخبر على مريام تنوض تقاد ولوخرا مبغاش ، بزز قتانعت حتى رجعات عودت ليها نادية على بشنو تافقو
" خلي كلشي يدوز هو هاداك ليوم ..."
تفننت ليها في وجهها وطلعتها غزالة مشات لشعرها قاداتو ليها، وملي سالات عاوناتها تلبس عليها ...مريام مشافتش وجها في لمرايا كيف جاات ، كتحس بالقفطان على لحمها كي شوك
وجاها راسها غادا للموت ، اما نزهة لي خاصها تكون فرحانة وتزغرت فبحال هاد نهار ، وجهها كان شاحف والضحكة كانت غااايبة عليه جات مامات نادية باعتبارها العائلة الوحيدة لعندهم ... وتاهيا عرفات شنو وقع حيت واخا يعياو ينكرو وجههم فاضحهم...داز الوقت وعاد تسمعت الهيلالة والحيحة لتحت ، زغاريت والدقة المراكشية ، نزلات عايشة ونزهة يستقبلو ناس اما نادية ومريام كانو كيطلو من شرجم
بان ليهم عدنان جاي بسلهامو كيشالي وهاز مشموم لورد وراه لهزازة كيلعبو بطيافر موقفين الشارع ..جاي وجايب معاه عائلتو لمخلطة بين نسا ورجال وكبار وصغار ...دخلو مع الباب لكبير وتحطو طيافر قدام لباب صغير ...كيبانو عامرين ومطرطقين من لحوايج لسبابط وحتى من ذهب منسااهش ...كمال ضحكتو كانت مشرعة، اما نزهة غير كتجامل وصافي ....عوجات فمها وسدات الشرجم ودخلات ...بقات جالسة فداك البيت ونادية معاها مباغاش تنزل وتاهما معيطوش ليهاا على شحال عاد طلعات مها ...
زيرات على داك القفطان ووقفات بلاما تدوي حيت معندها متقول
نزلات على تعشاق وصلاة على النبي غادا شادا في ماماها ونادية وراها والدمعة فطرف عينيها وكتمنى من قلبها متعيش بحال هاد اللحظة ...تمات غادا لصالون وكلشي كيشوفيها وكلها اش كيقول
خداها صغييرة ، ويلي قد بنتو ، ميمتي هادي لي غتجيب ليه تمام ، تبارك الله عامرة ،ناري عينيها باكين واقلة مراضياش عليه
وكيف كنعرفو القيل والقال وتبرگيگ عند البعض في دم ...بغات تجلس وسط لعيالات وهو يشدها كمال من يدها ومشى بيها لجليسة مطرفة كان جالس فيها لعريس وحداه تلاتة رجال ...مفهمت والو بالحق نادية توقعات وفمهات خصوصا ملي شافت روجيستر فوق طبلة ..جات حداها ولعند وذنها قالت بلاما يسمعوها
مريام ~. مبقاتش خطبة ولا ضريب صداق من هنا شوية غنولي مرات واحد اخوور ، بغيتيني نساك هادشي لي غيكون
صيفطاتو وفشات قلبها فلبكى
كان جالس على الكرسي مرجع راسو اللور وهاز تليفون فيدو كيشووف في تصويرة لي داير في ايكغون وعينيه كيقولو بزااف وهو يوصلو مساجهاا
كيف قراه هز لافيست ديالي وخرج وقبل ميركب كتب ليها
-انا جاي لعندك مدييري والو !!
غادي طاير في طريق وتليفون فيدو مرة مرة يصوني ومكتجاوبش ...زاد فسرعةة حاط يدو على فمو مكرهش طريق تقصار زيكون وصل لعندها ...صونا تليفونو هزو لقااها ناديةة
زيدان جاوبها بسبان من سمطة لتحت يعاير ويتوعد ~. شفتي الا كان غا باها حق من خلقني وخلقو بلشماتة لاخور الا منوريه لحوت منين كيبول ونوري لي حطو لفعايل ديال زو**** بشحال كيتقامو .. الا منخليه يشوف كمارتي يقلب الدورة راني غي محسوب على الرجال ...
قطع عليها بلاما يجاوب وهي تطلع لعندها كانت كتدوي على برا باش تا حد ميمسعها ، طالعة وتخمم كيف دير تخرجها من وسط هاد ناس كاملة بلاما يعيقو ، دخلات عليها لبيت لقات وجهاا حالتو لكحل دايع ولعينيه حمرين شعرها مبقاش مقاد ..كانت جالسة في الارض وتبكي عاضة على يدها تا خلاتها كلها معلمة
ونزهة حدااها قلبها كيتقطع طراف على كبدتها ملقات ليها جهد ومباغاهش تعيش لي عاشت مها من قبل
نزهةة جمعات لوقفة وقالت وهي كتبكي ~. لا ، انا مغاداش نخلي بنتي ترزا في شبابها مع واحد هي مباغاهش ومع واحد قد دباها نهائيا وخا نعرف روحي تخرج ليوم نقد بنتي وخا اخر حاجة نعملها ليوم ، حياة الدل والقهرة لي عشت فيها مغنخليهاش دوق منها شوية ...نزلات لعندها كتوقف فيها ...سمعيني امريام انا حملت بيك ولدتك وتعذبت عليك وربيتك باش متجيش في لخر وتنغصي في حياتك عشت فدل ولمحنة وكنت نكرة فحياة باك هادشي كولو بش متضريش انتي وتعيشي مرتاحة ولكن حد هنا وبركا، انا بغيتك تعيشي حياة حسن مني انا مك وبغيت سعدك يكون حسن من سعدي ، باك الا حطنا قدام للامر الواقع تاحنا غنجاوبوه بخو جوابوا بغا يطيحك انا لي غنطيحو ونخلي مناخرو يتحكو فالارض
نزهة باصرار ~المديرة دالله ... غتهربي ...سيري عند لولد لي بغاك وبغيتيه غنحطوه أمام الأمر الواقع مغتخطاي صواب مغتخرجي على دين ولا ملة ، يطير حتى يعيا ومصيرو يتراجع نهار يشوف اصرارك ويعرف بلي مغتفرقيش على زيدان هاكدا مغيبقى عندو تا خيار من غير يواافق
مريام تنهدات معگورة ~. هو براسو قاليا غير تزوجي ونساينيي
نادية ~ كيف سمعتي ، دابا خاصنا شي طريقة تخرجي لعندو بلاما يشووفك شي حد غيكون وصل على برا ومبغيتوش يدخل هنا ويكبر لموضوع وراك عارفاه الا دخل يخلط زمر كامل بلا ميحشم ولا يرمش وراك عارفة منين كيطلعو ليه
وسط تفكيرهوم صونا تليفون مريام هزاتو وجوبات دغيا كان هو
مريام سبقاتو قبل ميدوي ~. زيداان هء فينك واش نتا لتحت ....زيدان كان متكي على طونوبيل مقابل مع لباب
زيدان ~لتحت وهنا داخل نريب لحزاق عليهم
مريام بخوف ~. عفاك لا ، تسنى انا نازلة....
قطعات معاه وجمعات شعرها لوات عليها شال، لوقت باش تبدل معندهاش ...
نادية ~. دابا شنو نديرو منين تخرج
نزهة ~. من بيتي تنقز من بالكون قريب بزاف للارض هبطي نتي انادية بنتي قولي لباها بلي هاهيا نازلة ومنها غتلقاي سلوم كاين على برا قاديه مع شرجم وردي لبال ليتم خارج شي واحد وانا نعاونها من لبيت وعلى متهبطي نجمع ليها شي حاجة فصاك تلقى بش تبدل
مشات نزهة جبدات صاك جمعات فيه لي قدات من لحوايج ولاطخوس فيها مواد الاستحمام وكدا كريمات خاصين بيها وملابسها داخلية حاولات ما أمكن تجمع ليها بش تقدي جبدات ليها لبزطام فيه وراقها بش متوقفش عليهم
اما نادية هبطات كتضحك وترحب بناس گعما مبينة كتسطانع ضحكة وتبين تبسيمة ليهم، مشات لعند كمال وبتاسمات لعريس وقالت ~. صبرو على عروستنا شوية وهاهي ماجية ههه لخلعة والفرحة تجمعواا ووجها مع لبكى راكم عارفين...
عدنان كيلعب بي تسبيح ويفرنس ~. تاخد راحتها ليل كلو ديالناا وقت لي نزلات
تسلتات من حداهم وخرجات قلبات على سلوم لي قالت ليها عليه نزهة لقاتو محطوط تم نيت قاداتو مع لبالكون لي غتنقز منو وعينيها مرة مرة كتشوف ليجي شي حد
سرباي لي بان ليها كلفاتو بشي حاحة ولبعلوك لي كان خارج دخلاتو ..ومع دنيا بدات تظلم لقضية كانت ساهلة شوية
نزهة كانت ديك ساع فلبيت تاعها سادة على بنتها تم كتعنق فيها وتبوس وتوصي ~ عندك تمشي بخطرة ابنتي ، انا مرضياش على هادشي لي غنعونك فيه ولكن كيهمني غير نشوفك فرحانة واش هاد الولد هو لي غيخليك ليا ضااحكة ؟؟
مريام باستها من ايدها بزوج ~. هو اماما لي غيخليي حياتي كاملة ضااحكة كنبغيه بزاف ومنقدرش نعيش بعيدا عليه راك غتكوني مجربة الحب وحاسة بيا
نزهة هزات ليها راسها وبتاسمات مشات لماريوها جبدات منو فلوس كانت مخبياهم مداتهم ليها مع صاكهاا~. هادو ليك ابنتي ديريهم تحت منك متعرفي لوقت اش تجيب
مريام رداتهم ليها ~. عندي اماما ، وراتها صاكها لي هازة فيه تخربيق قليل ولوراق لي دارتهم ليها ماماها ..كارت گيشي فيها كلشي
نزهة قبلاتها فجبهتها وحناكها ورجعات عنقاتها لكبيدة دالام صعيبة تصرطك متمدغك عكس بعد الآباء لي ممكن لحنان غي كيسمع عليه ~. ان شاء الله ابنتي يالله زيدي دغياا
عونتها وجمعت ليها جلايها وقادات ليها شال على شعرها لهابط على وجهها شوية باش متعرفش ..قبل هي حيدات گاع اكسسوار لي دارتو ليها نگافة ولتحتو فبيتها فوق ناموسية
لاحت مريام صاكها لنادية لي شداتو عاد تمات نازلة بحذر وعارفة فين تحط رجليها، قلبها كان كيضرب وكلشي فيها مخلط الفرحة والخلعة والرهبة كانو راكبينها فدقة ...حطات رجليها فالارض خدات صاكها وتلاحت على نادية بتعنيقة كتشكر فيها ~ شكرا بزااف اختي عمري ننسى شنو درتي معايا
نادية كتوصي فيها ~. ردي لبال لراسك ومتقطعييش الهضرة معايا غنتاصل بيك عند زيدان ولا ديري رقم اخور وعيطي وانا غنبقى نطمن خالتي عليك كيخصني نعرفكم فين مشيتو واخا ...هزات ليها مريام راسها باه ...يالله سيري لعندو الله يفرحك
بتاسمت ليها وخرجات كتزرب على برا شافتو واقف كيكمي باينة فيه على اعصابو غير سمع لباب تحل هز راسو كتبان ليه قدامو بالقفطان لي واتاها وشال لي زاد من زينها ...جرات لعندو بلاما تحس وتلاحت عليه معنقااه ~. يالله من هنا دغيااا
باسها ففها بقوة بلاما يدوي وركبها وركب مكسيري حتى تسمع صووووت على الجهد
دقيقة ولات ساعة ، لعريس ولا مقروص اما كمال دخلو شك ..ضياف بداو يتوشوشو ويسولو لش واقع وفيتها لعرووسة ...صبر عدنان تا عيا ودوا
عدنان~. نسييبي ،فين هي عروستنا واش مزال معطلة مشى الحال
كمال وقف من على الكرسي وضرب على رجليه ~ انا نطلع لعندها ومنزل تا نزلها معايا
تم طالع ونادية ونزهة جالسين على لكراسا ميتغامزو وحاضين طريق لي داتو كيتسناو يسمعو عيطتو ...
طلع لبيت حلو ودخل بان ليه خاوي كيصفر ولحوايج مزلعين فالارض هما و الاكسسوار ، خرج على برا شافها فبيتو دخل لحمامات تسارا على لبيوت ووالو ، عرق ونشف ويديه بداو يترعدو بدا يعيط على نزهة ورجليه مهازينوش ...طلعات عندو كتجري دايرة راسها تصدمت
مستاجبتش ليه وهو كيعيط عليها باش يوقفها نزلات لتخت حتى وقفات على طبلة رجال وقالت بصوت مرتاافع
نزهة ~. الله ياخد فييك الحق ، حسبي الله ونعم الوكيل بسبابك بنتي هربات، عرفتيها مبغاتكش وبقيتي لاصق ، اش دارت ليك حرام عليك غا هي لي عندي ومشات وخلاتني
كلامها كان خارج من القلب أم مجرووحة على بنتهاا زاها بيدها صيفطاتها ولكن فوق الخاطر دارتها ، كون ما عدنان لي حكر على كمال كانت غتعيش حياتها كيف كانت وميوقعش لي وقع
نزل كمال يجري ملي سمع غوات مرتو ،راسو كان محني الارض مقادش يهزو تحشم قدام ضياف لي بداو يتسلتو واحد ورا لاخور تا حد مكان عاجبو الحال بيما فيهم عدنان لي لسانو تلجم وتعقد حدو هز عينو في كمال وقال ~. عند بالي حاكم بنتك وصدقت غالط غندمك مزيان على هاد تحشيمة لي درتي ليا قدام لي يسوا ولي لا ...هز صبعو بتهديد ...غندمك !!
كلشي خرج بقا غا كمال حاني راسو وحاط يدو على طبلة حاس بالشمتة وعايشة لي كتصبر في نزهة لي منهارة ونادية لي متكية على سداري وعقلها مرفوع ، كلشي تكب عليها فخطرة ومبقات عارفة منين تلقاها ، صونا ليها تليفون كلشي ناض قافز معاها بيما فيهم كمال لي قال ~. واش هي هاا !!
نادية لبسات صندالتها في رجلها ~. لا اعمي غير واحد كليان
كمال بتشكيك ~. كليان يعيط ليك فزوج دليل ولا داك شماتة ل هربات على ودو ولا يمكن معاه اويلي اعباد الله تا ل بغيت نعلم لبوليس اش نقوليهم
شكراتو وقطعات ~. صافي رتاحيتي اعمي ...قالت مخاطبة مها ~ ماما انا خارجة وغنمشي نبات فدار بقاي نتي هنا مع خالتي واي حاجة وقعات علميني
غادا فطريق وكتفكر واش تمشي ولا لا مقدرتش تصبر كثر من هاكدا ..واخا المساكيل لي هي فيها لكن تا مراد ضمنهم وبالها مهول عليه مشات لدارهم باش تبدل عليها بدلات حوايجها بكسيوة قصيرة بلون اسود عريانة من لفوق وهابطة مزيرة عليها حتى الركبة طلقت شعرها ودارت سنيسلة مزينة عنقها في رجلها كان سبيبط طالون ...لمهم واخا لخاطر مكاينش تفركسات و خرجات
وقفت قدام البار ..ذنيا كانت زاهية وناس عاد فاقت وجاية ..ركنت طموبيلتها قادت حالتها عودت رشت من ريحتها لي ديما في طوموبيل ولا صاك شافت راسها في لمرياا كانت كتبان هي هاديك نزلت كتعوج في ميشتها لي هي هاكداك..بنادم كان حضيها وينگ عليها ..ذخلت من باب ديال البار وصلت حتال لداخل صوت لموسيقى مجهد وضواو كثيرة وناس ناشطة ..دورت وجها في لبار كامل مبانش ليها قررت تكلس حتى تشوفو ..جات عندها بنت تشوف اش بغات طلبت عصير بارد وغير حيدت من قدمها كيبان ليها واقف قدامها كيشطح خالق السعادة ولبنات ضايرين بيه وحدة كتحكك مع رجولتو وهو شادها من ظهرها ولايد تانية كتهبط وطلع عليها..حلت فمها من صدمة مقدرتش تيق انه هو، الصدمة شلت ليها نص في جسمها مقدرت لا توقف لا تنوض بقات غير كتشوف فيه كيفاش فرحان وضارب ذنيا بركلة وهي يومين النعاس مشافتوش منين غبر عليها ....بدات تلوم فراسها علاش جايا لعندو واخا ربي لعالم بيها من جهة بنت خالتها.. حطت ليها البنت لعصير هزاتو تبرد بيه العافية لشاعلة فيها ودموع لشادة في طرف عينيها... قلبها تزير عليها وضرها وراسها حتى هو بدا كيعطيها الصداع ..كتشرب وتقفقف مقدرتش تحمل الغيرة ولا تشوف شي وحدة حاطة ايدها عليه ولكن لدمرها وزاد فشلها هو انه عاجبو الحال وضاحك وناشط ..جمعت الوقفة وقررت تخوي لبلاصة بزز عليها وعلى نفسها ..ناضت وهزت صاكها وتلفون وسوارت وغادية خارجة حتى وقفت في النص وعقلها ضار وافكار بدات كتنزل عليها
~علاش غادي تمشي وتخليه هو ناشط وراك علاش غادي تهربي واجهيه ماشي انتي لتقبلي هادشي بشكل عادي ..حوار كان كان بينها وبين دماغها ..خدات نفس عميق ..قدات شعرها وهي ترجع ما وقفت حتى لعندو ..وقفت بكل شموخ نغزاتو في ظهرو ..ضار شافيها طلعها وهبطها ورجع كمل داكشي لكيدير مع بنات .. دفعت لبنت ل معاه وجبداتو من دراعو لعندها ..
هضرت بعصبية ~ اجي معايا !!
حيد ايدو من ايدها بعصبية وخرج عينو فيها وهضر قاصح ~ حيدي ايدك عليا ممساليش ليك باش نجي معاك والا كانت شي حاجت مهمة بزاف سيري تسنايني حتى نسالي على خاطري يالله، دفعها من كتافها بطريقة خلتها تمشي من حداه ورجعت جلست تتنفس حيت مبقاتش قدرت تزيد حسات براسها تخنقات ونفسها ضاقت بيها..مطولش بزاف ورجع كلس حداها في بلاصة مجموعين فيها بنات وولاد ..تحط ليهم شراب قدامهم كيضحكو ويشربو وهي مقابلة معهم كتشوف ..رجلين لوقفو مبقوش عندها صدمة شلاتها ..كشرب ويشوف فيها ..غير حست براسها شويا جمعت الوقفة وخرجت.. جهدها سالا ومكرهتش ل يوصلها لدارهم وتنعس مباغة والو فديك اللحظة ..نهاىها كان مكفس بالمزيان ..غير شافها و هو ينوض تابعها حتى شدها وجرها من ذراعها خالعها ومشى بيها حتى لبيروه سورتو عاد دوا معاها ~ دبا انا ساليت اشنووو باغة ااستاذة ..
بزز باش جوباتو وبلاما تشوف فعينيه ~ مابغيت والو امسيو مراد .ابتسم بستهزاء عاد نطق~ شفتك مشربتي عدنا والو ولا لخدمة معجباتكش جيتي حتى لهنا غير باش تشربي عصير ..مقدرتش تصبر ليه جاوباتو وهي شاعلة وكترعد ..~ جمع فمك امراد نتا عارفني بزاف على ذاك الوسخ لكتعرف ..شاف فيها وفي صدرها لكان باين وزگى الشوفة فيه ودوا معصب ~ محشمتيش تخرجي هاكة من دراكم ..شافت فيه لقات عينه في صدرها طلعت لكسوة بزربة عاد نطقت ~ وانت حشمتي خاطبني وجاي تشرب وتسهر مع لبنات يعلم الله يمكن من تساليها هنا تكملوها في دار .
سلات هضرتها وشافت فيه لقاتو كاع ممسوق ليها وعينه في تليفونو كيقرا مساج بصوت مسموع~ فينك احبي ..
هنا شعلها كثر ومبقاتش قادرة تصبر ليه على هبالو ..ضورت ليه وجها عندو ونطقت وهي عينها كيقطرو بالشر وناوية على خزيت ~ يا ويلك وياويلك تقلل مني مرة اخرى انا راه نادية
خنزر وشاف فيها وهو حااقد حيد ايدها بشويا من وجهو ..ودوا وهو مكنزز على سنانو ~ انتي عيطي لحبيب القلب القديم وديري معاه في لبيرو عندك من ورايا وهابطة كلك عريانة ومهامك حد ونعرف انا هادشي غير بصدفة ونتقبلو عادي حيث لالة نادية محامية ومتقفة ونتقبلو طبعها وتصرفاتها وحنا حانين الراس ومعدناش لحق نعارضوها حيث هي لعندها الحق وهي لي ديما كلامها على صواب ...حيث مراد مقاريش وهمجي وماشي كول هانية يااك
.قاد وقفتو وقرب ليها هاز صبعو فراسها خبطها فيه بخفة عاد هضر ~ اسمعي نقول ليك هذا لقدامك يقتل لقلل منو ومن رجولتو سميها انتي همجي مقاريش مواعيش مكلخ ل عجبك وبصراحة ابنت ناس انا هاد الزواج مبقيتش باغيه حيت انا باغي نتهنى ماشي نحرق دمي كل نهار... انا واحد سيد مغيار وبزااف ومكنعرفش نتفاهم خصوصا الا كانت ل حاجة ديالي ولكن عندي النفس ل ميبغيناش مغاديش نشدوه بسناسل ودبا انا وياك سالينا وخطوبتنا عتابريها مفسوخة من دبا ابنت الناس وكل واحد في طريق ..
كتسمع ليه مقدرتش تيق كلامو اكيد كيكذب ماشي مراد هذا بدات كضحك حتي عينيها غرغرو عاد سرات معاها وعرفتو انه كيهضر بصح .تكلمت وشفيفها كترعدو ~ اكيد كتفلى معايا الا كنتي شاد فيا امراد تيق بيا راك باسل ..بدات كتلمس فيه ..وكتهضر ونفسها مخنوقة~ مراد عفاك اش هذا الهضرة كتقول، كيفاش تفسخ الخطوبة واش حتى علقتيني بيك وباغي تجي هاكة تحطمني ماشي حشومة عليك.. حيد ليها ايدها من على وجها وتكلم قاصح مشافعش ل انهيارها ~ اه عارف اش كنقول ..غمضت عينها بألم وبقهر نطقت ..شداتو من تريكووه مبقات عارفة اش كتقول ولا اش كدير.
نادية~ انت ديالي وغادي تبقى ديالي بغيتي بخاطرك ولا بزز عليك ..
ابتسم باستهزاء كيتكلم مهدن عكس داكشي ل شاعل فقلبها ~ سمعي نقول ليك انا مضحكتش عليك ولا تفليت عليك ولكن باش تستحمريني وترجعني بيدق الا هاظي منتقبلهاش كرامتي هي راس مالي ونفسي هي عزتي ورجوليتي هي كلشي في هاد الحياة تفوتيهم نضرب عليك ابنت ناس ..
كتسمع لكلامو وهي كترجاه غير بعينها يسمع ليها صدماتها ردة فعلو متوقعاتوش يكون قاصح لهاد الدرجة جمعت نفسهاوحيت هادي قضية حب وصراع لقلوب وهي خاصها تربحها سيغتو الغلط منها ..قادات لحروف في طرف لسانها ونطقت بترجي~ مراد اي كلمة عندك فيها الصح وكلامك كلو على راسي وعينيا ولكن من حقي ناخد فرصة دفاع على راسي وانت واجب عليك تسمع ليا باش متخدش واحد لحكم خاطئ هذا راه زواج ماشي مصاحبة باش تجي وتاخد قرار بحال هاكة لا خاصك تفكر... وي انا فعلا غلطت حيث هضرت مع عماد وغلطت حيث جوبتو وغلطت حيث قلت ليه جي عندي وغلطت فاش خبيت عليك...ولكن انا هادشي منكرتوش حيت لكل حاجة عندها سبب عماد درت معاه يجي على قبل المكتب ل انا كارية حيث سيد مشا شراه من عند مولاه وانا وصلني الاشعار ولكن مشفتوش معندي حق ندير والو ايوا وسيد بدا كيهدد فيا يا نزيدو في لكرا انا كارية بي مليون ونص في شهر هو باغي جوج ولا نشري من عندو بي بواحد ثمن خيالي ولا يخرجني مهم هو يهرسني معرفتش علاش هاد شي كلام واش بلعاني ودارها سبو مفهمتش
بقا غير كيشووف فيها وملامح وجهو متبدلتش ..حيد ايدها من صدروو ونطق بتهكم ~وعلاش مقلتيهاش ليا ؟؟
جوباتو وهي مندلية قنانفها ومدورة ايديها على عنقو مبقاتش قادرة تصبر على بعادو ولا حتي تقليقتو ~ خفت عليك امراد واش نقول ليك راه لحمار كيهدد فيا وانا عارفاك كيف دير ايوا والا دار ليك شي حاجة ولا لفق ليك شي تهمة ولا منعرف... الا انت مخايفش على راسك انا منقدرش نصبر توقع ليك شي حاجة ،حس بيا وفهمني انت ماشي مجرد راجل داخل ل حياتي لا انا وليت كنحسك سند ليا والاب و كلشي
غمض عينه ونطق بإسمها ~نادية
شافت فعينيه وهو يقرب ليها باسها بوسة خفيفة على شافيفها عاد نطق ~ مزال تعقلي نهار قلت ليك هذا الهمجي غادي تولي تموتي عليه
قلبها ضرب بجهد وهو يضحك مقرب لعند وذنها عاد كمل كلامو ~ وها انا وفيت بوعدي ...
اول مخرج من لحي عندهم مشا نيشان لشارع الرئيسي كيقلب بعينيه حتى انتابه لمحل فاتح وقف وهي غي كتشوف بعينيها مقدرا لا تهضر ولا تكلم خافت منوا ...شوفاتو كانو حارين ولعرق لي نازل من جبهتو منفوخ اما وجهو كان حمر وغي كيسوط .....نزل مدة خمس دقائق ورجع محمل فيديه ساشيات فيهم شوية دسقاطة ولماء ولموناضة وريدبول معاها رجع لبلاصتوا دار سانتور مدهم ليها من غير مينطق ولا حرف توكل عالله وشد طريق لوتوروت هي غكتبقلل بعينيها مقدات لا تسول ولا تهضر خافت تنطق بشي حرف تجيها شي قمعة تخربق ليها دماغها سيغتو هو معصب لدرجة كبيرة داكشي علاش فضلات السكات ..كانت
كيتسمع فقط صوت انفاسهم... بعد طول سكات نطق
زيدان ~ عطيني لماء
هزات عينيها فيه كتشوفيه وترمش بعينيها
زيدان هز راسو وقال ~ واش فيا شي حاجة زايدة قلت لك بغيت الماء !!
ميريام بدات تجبد في القرعة ~ ها ااه وخا
هزاتها وحلاتها عاد مداتها ليه .. نزل عليها دقة وحدة كان شاحف شاحف
زيدان حاط يدو على جبهتو كيماصي فيها ~ حلي لبواطة جبديلي گارو
دارت داكشي لي قال جبدات گارو مداتو ليه لاحو ف فمو خدا بريكة شعلو وسكت كان كيتسمع غير صوت نثيرر ولبخان مكرهش ياكلو ماشي يكميه داك لگارو
زيدان باستهزاء ضحك ~ قولي باك بغا يزوجك.. زرب عليه سرف عليه
ميريامتنهدات بقوة وساطت نفس سخونة~ هادشي لي عطا الله ،حمد لله جيتي فلوقت كون راني دابا
قبل متكملها هز صبعو حطو على فمها ~ شششش متكمليش.. لي غتگوليه شفتوا بعيني ،باك مبغاش لكبرانية بغى تبهديل وبغى لحرب وانا معاااه فيها جا لعندي وبغى يلعب ومعارفش اللعب والتحراميات انا مولاهم
مريام دارت بشوية عندو حطات يدها على كتفو ~عفاك نسى.. لمهم انا معاك ميهمش شنو بغى هو الاهم انا بغاك وكنبغيك وغنبقى نبغيك حياتي كلها حتى نموت ..
زيدان اكتفى بابتسامة خفيفة ترسمات على وجهو وسط داك العصبية لي فيه حطات راسها على كتفوا وغفاات بكثرة لبكاء وستريس ولعيا دليوم عينو مع طريق وعين عليها كيشوف فيها بحال شي بنيتة معنقة يدو خايفة لا يهرب ويخليها طفلة كتستنجد بالاب ديالها ...تمنى ضروفهم كون كانو حسن وتلقاو فضرف أحسن من هكا كانو غيكونو كوبل مثالي وغيبادلها بشنو كتحس جهتو ولكن الرياح تدهب بما لا تشتهي السفن...
طريقهم طالت غادي منير محبس ولا وقف ،هي بقى فوضعها ناعسة مكايناش هنا... بدا صباح كيفجر ونهار بدا يطلع والهواء العليل نقي بدا يدخل ،حل شرجم لي حداه وشم لهواء وتنهد بجهد تنعديتو غارقة وكتبين شحال كاتم في صدرو ...
غي ضرب فيها ريح بدات تعنكش وتفتح عويناتها بهدوء تحلهم وتعاود تسدهم هزات راسها شافت فيه وحتى تاكدات بلي راها معاه عاد تعلات بايساه فحنكو
ميريام كتكسل ~ نعست بزاف !!
زيدان مركز مع طريق ~ بصحتك
ميريام ~ فين حنا دبا طولنا فطريق !!
زيدان مجاوب على قد سؤال ~ طريق افران
حلات عينيها على وسعهم وقالت بعفوية ~ حلف !!
زيدان علا حاجبو فيها ~ مالي كنتفلى
رجعات تقدات فبلاصتها وحلات شرجم لي حداها كتسمع تغريدات الطيور وكتشم هو الصباح ،عاجبها لحال مفكرات فحد من غير حبيبها ل معاها شبغات اخور لي تمناتو لقاتو ...
مدة ساعة ونصف عاد دخلو لمدينة افران الجميلة او بما تسمى سويسرا المغرب مدينة هادية ونقية لا بناسها ولا بشوارعها كتشوف ودور فعينيها هنا ولهيه عجبها لمنضر كتشوف فشجر كيف مستف.. وخا كان شوية د لبرد ولكن عجباتها وقف جنب طريق هز تيليفون ودوا كتسمعو كيفصل ويخيط ويتافق رجع كسيرة بعد رجع تيليفون لجيبو .. مدة وجيزة ودخلو وسط الڤيلات ل كانو كلهم بلقرمود شكل واحد مصبغوين بلبيض غي شافو سكيريتي وحل ليه لباب هز ليه يديه كسلام
وزاد وقف طونوبيل جنب لڤيلا محيد سانتير
زيدان پامر ~ يالاه نزلي
ميريام بلا متزيد حتى كلمة حلات لباب هازا جلايلها وقفات كتشوف بعينيها ...دورات راسها لقاتو كيحل فيها تبعاتو داخلة كتكتاشف لبلاصة زوينة وتقريبا كولها بلخشب حيدات زيف من على راسها وعينيها فصالون صغير ل كان فيه فوطوي بيض وحداه شوميني
بقات دور هنا ولهيه وهو واقف مراقبها فصمت واقفة عاطياه بضهر لاحضة دورات وجها تتغزا بلڤيلا مع دورات وجها حل فمو فيه وعينيه ولا حمرين لعرق كان نازل مع وجهو بغزارة بحالا خويتي عليه لماء تخلعات عليه عمرها شافتو فهاد الحالة ~ زيدان مالك.. بغات تقرب منو و هو يبعد عليها وكيشوف فيها صباح بلبستها ومكياجها نفس لون اللبسة نفس لمشطة لي كانت لابسة نهار عرسها كيشوفها هي بتفاصيلها واقفة قدامو تفكر نهار عرسها تفكر بكاها وغواتها وصدمتها نهار تخلا عليها كمال... سينتة كلها رجعات ليه لنهار نتاحرات قدام عينيه وماتت فيدو ...قلبو كان كيتعصر كيحس بدنيا كدور بيه معرف باش تبلا ميريام قربات ليه بثقالة كيف غتحط يديها عليه فرمشة عين دفعها بقوة جات فوق لفوتوي مزلعة معرفات باش تبلات وهو ينطق بنبرة حادة وصوت غليض وباح مغزز سنانو متقربيش ليا ..بصوت زعزعها.. غبريييي من قداميييييي داابا منبغيكش دوري حدايااا
صوتو رعدها بقات كدور فبلاصتها معرفات فين تمشي هزات جلايلهااا هربات بجلدها كتجري... كانت غدا لباب شوية تفكرات معندها فين تمشييي لمحات دروج حداها طلعات فيهم واول بيت لقات قدامها حلاتو ودخلات سدات عليها لباب حاطا عليه ظهرها.. كتاخد نفس عميق صدرها طالع نازل بحال لميزان دموعها خانوها معرفات مالو ولا ش كيدور فبالو علاش تقلب عليها ،مئة سؤال واستفسار كان كيدور فبالها، بقات مدة وهي هكاك عاد بدات تراجع مشات لفوق سرير رخفات عليها لقفطان وبقات تفكر وتعاود حتى صبح لحال وهي مزال صابرة علة نفس الوضع عيات بزاف عضامها ضروها فلخر تشجعات و ناضت واقفة مشات لباب حلاتو دورات راسها ..كانت دنيا صااقلة .. نزلات فدروج على صباع رجليها وعينيها كيقلبو مبانش ليها لقات غي ساروت طوموبيل فوق الطبلة وتيليفون ديالوا محطوط تما هزات اللول و مشات لباب بخطى بطيئة حلاتو و خرجات لسيارة نيشان لكوفر خدات صاكها ورجعات لفوق لنفس لبيت ل كانت فيه حطات شنو غتلبس فوق لفراش كانت بيجامة حرير وبملابس دلتحت.. هزات مستحضرات لحمام من فوطة لشي لاخور .. حيدات داك لقميص لاحتوا ومشات مباشرة لحمام طلقات لماء لقاتو سخون تخشات تحت منو طلقاتو عليها وستحلاتوا... هزات شمبوان بدات بشعرها مرورا بجسمها كملات غسيلها وضورات عليها لفوطة وخرجات كتنشف فلحمها وكتفكر فيه
فين غيكون مشى ؟؟ واش صبح بخير ؟؟
مدة قليلة ديال تفكير ل خدات و زعمات تشوف فين هو تحاول تهضر معاه أصلا مكيهمهاش شنو دار لها لبارح باغا غا تشوفو لباس وبخير ومرتاح...
خرجات من لبيت بانو لها زوج زوج بيوت خرين حدا بعضياتهم حلات لول ملقاتوش وتاني دخلات ليه غا بشوية لقاتو مظلم وهو منشور فوق الناموسية ناعس على كرشو وقفات كتشوف فيه كان ناعس بالعرض فوق السرير لايح عليه ليزاار ... جلسات حداه كتشوف فيه بحب وكدقق فتفاصيلو كيفاش ناعس وعاقدهم حتى فنعاسووو ..هزات ايدها وحطاتها على شعرو كتدوز عليه بحب ومقربة منو كتشم ريحة شعرو وريحتو المميزة بيه
سهات فيه وفهات كضور عينيها عليه وكتنهد...ولات كتبغيه كثر من راسها وكتحس بروحها متعلقة بيه ..مكتفكرش حياتها ميبقاش فيها زيدان بضحكتو لقليلة وتخنزيرتو المعهودة ...
جمعات ايدها ملي حسات بيه بدا يتحرك ...كيف جات تنوض وهو يشدها من حواايجهاا
زيدان بصوت مدعدع ~. نعستي مزياان !!
مريام مقدرات دور لعندو كانت كارزة على يدها وعاطياه بظهر ~. اه مزياان ونتاا
زيدان نقز من فوق ناموسية وقف قدامها بكتافو لعراض كان عريان من لفوق اما لتحت لابس شورط قصير ...فورمتو مغليض مرقيق باينة فيه من نوع رياضي وماكلتو قليلة ~. شووفي فياا !! واش مقلقة عليا
مريام هزات فيه عينيهاا بان ليها عيان وعينيه منفوخين باينة فيه مشابعش نعاس ~. لا ممقلقاش منك غير تهولت عليك وصافي ، نتا صافي
زيدان رخى يديه وتكا عليها محني لعندها وقال بصوت حرش ~ عنقييييينييي
دورات يدها بزوج على خصروو وعينيها كيلمعوو اما هو خشا وجهو في عنقهاا وغمض عينييه
فاقت ضاحكة وكتكسل على ناموسية وغطير بالفرحة علاش لا وهي قادات امورها معاه وكلشي عال لعال ...تلغات ضحكتها فور متفكرات مريام وهي تهز تليفونها تعيط ليها لقاتو طافي عيطات لزيدان تاهو نفس الشي ...محكراتش على الموضوع سمعات صوت تقرقيب لتحت وناضت كتجري هابطة كانت عايشة لي كتسد في الباب ودخلات سلمات عليها ونطقات بنشاط
دخلات لكوزينة كتدندن ومرة مرة تفلت ليها الضحكة وقلبها كيخفق ملي كتفكر بلي مبقى والو وتولي على سمية مراد
~~~ فلاش باك
مزال تعقلي نهار قلت ليك هاد الهمجي غادي تولي تموتي عليه ..قلبها ضرب بجهد وهو يضحك مقرب لعند وذنها وعاد كمل كلامو ~ وها انا وفيت بوعدي...
نطقت وهي حيرة ~ اشنو عنيتي بكلامك مفهمتش ..بدا كيلعب ليها بشعرها وهو مزال مقرب منها وتكلم بصوت هادي~ اشنوو قصدت خليني من داكشي لقصدت وجوبيني على سؤالي هو لول بعدا ،فاش ذخلتي دبا وشفتني مع البنات كنشطخ باش حسيتي ..!!
مجوباتوش غير خنزت فيه وبعدات عليه اما هو بدا كيضحك وتكى فوق الفوتاي عاد نطق ~ واخا الالة انا غادي نجاوب في بلاصتك ...حسيتي بلعافية شاعلة فيك وقلبك مزير عليك ونفس بزز باش كطلع ولخاطر خاسر، مكرهتيش تجي تهرسي الايدين لمحطوطين عليا وايديا حتى انا وتشديني وتدخليني لداخل وتسدي عليا وتقولي انت ديالي بوحدي ولي قرب ليك نقتلو ياك ؟؟
بدات كدور في عينها بلاما تقزل حتى كلمة...وهو غير كيشووف هز راسو وجرها لعندو جات فوقو حيد ليها شعرها من على وجها وتكلم معاها بجدية ~هادشي لحسيتي بيه دبا ميجيش قدام داكشي لحسيت بيه مني لقيت عماد قدامي وهو كيقول ليك شكرا حيث عطيتني فرصة...تعصب وكمل .. تيقي بيا مني تحكمت فراسي راه غير حيت كنبغيك واخا بعض لمرات كديري شي حاجة يغرق فيها باركو مكنقدرش نأديك..بعدت راسها شويا عليه وقالت بنبرة طفولية ~اه باينة غير من دبا
جاوبها وهو كيعيب فيها~ اه باينة... تيقي بيا مكانش في نيتي ندير شي حاجة غير عصبتيني مني شفتك لابسة هاد لبس..قالها مكنزز... صدرك عريان وكسوة مزيرة عليك مبينة فورمتك زدتي كرهتيني عوتاني داكشي علاش تصرفت خايب معاك اما والله ماكنت مع شي بنات ولا كانو فنيتي ..وانا لي قلت لگارد يعيط ليك حيت كنت باغي نشوفك ..هز ايدو دوزها على حنكها ...توحشتك كنت باغي نشد معاك ضد ولكن ماشي بديك طريقة ولكن لبسك هو ل مرضني حيث ثاني مرة كنهضر ليك عليه وكضربي كلامي في لحيط وهاد القضية مكنحملهاش فيك انادية كتعصبيني وهاد الموضوع اخر مرة غادي نهضر معاك فيه بنسبة لحوايجك راك مزوجة راجل ماشي رعواني ليخلي مرتو تخرج ولحمها باين لمشرى يتنزه فيه...
راك مزوجة راجل ماشي رعواني ليخلي مرتو تخرج ولحمها باين لمشرى يتنزه فيه ونزيدك حاجة اخرى اخر مرة انادية اخر مرة ديري شي حاجة من ورايا ولا تهضري معاه واخر مرة تلبسي بحال هاكة واخر مرة تخرجي من داركم فهاد الوقت حيث شي حوايج كنكون فيهم قاصح وهضرتي مكنبغيهاش تنزل الارض حيث انا عارف راسي داكشي لمكنبغيش بنادم يخسر ليه الخاطر فيه تا انا مكنبغيش لي يخسر ليا خاطري ، وباس تعرفيني فشكل انا كنطلب منك سماحة على هادشي ل وقع اليوم واخر مرة ندير شي حاجة تخسر ليك الخاطر حيث انا براسي معجبنيش الحال نطيح منك ولا نعاملك خايب حيث عندي نتي هي كلشي ولكن هادشي عتابريه قرصة وذن كيف كيقولو ..دفعات ليه ايديه من على شعرها وجمعت الوقفة قدات حوايجها عاد بدات كتهضر وهي شاعلة ~كيفاش زعمة قرصة وذن، مالنا لاعبين هنا واشمن مسامحة كتهضر عليها وانت كالس عليا انا وياك سالينا ايه اسيدي سالينا وماشي شغلك نخرج ولا نذخل ولا نلبس.. .
بقى غير كيشووف فيها داكشي لفيها بدا كيخرج عارفها مكترضاش وذغيا كتشعل جوبها وهو مزال متكي ومبرد~نطلب ليك شي عصير يبردك راك بديتي كديماري ..
جوباتو وهي شاعلة~طلب ليا شي حاجة من خدمتكم ..دار شاف فيها بنص عين وجمع لوقفةة لعندها وتكلم في وجهها~ هي لولة الحب اش بغيتي ويسكي، فودكا انتي غير آمري وانا نفذ .قالت ويسكي بزربة مشافتش فيه وحتى هو ماشي من العاكزين مشا جابو ليها وعطاه ليها في ايدها ..وجرها من ايد لوخرى اجي تجلسي بعدا وعاد شربي ..جلست وجلس قدامها وهو مترقب ردة فعلها باغي يعرف اش غادي دير خدات الكاس ونظرة تحدي في عينيها وصلاتو لشفايفها وهزت راسها تجغم منو وهو يضرب ليها ايدها حتى تلاح الكاس وشدها من فكها بشويا وقرب منها ناطق بتهديد~ هذا شفايف نقطعهم ليك احبيبتي هاي هاي على المحامية ديالنا مبقاتش ساهلة باغة تشرب كاع ...نوضي نوضي نوصلك راه جيتيني سكرتي بلا شراب.هضرت وهي مخنزرة وماعجبها حال~بعد مني نمشي راسي ،قرب ليها أكثر وايدو على وجها كتلمس فيه بحنان وهضر معاها بهمس ~ فمك زوين وعاد كتزيده بهاد العكر عقلي كطيريه من بلاصتو كديرها بلعاني ياك~ ابتسمت بخبت وقربت ليه أكثر حتى لمست شفايفو وهضرت ~ اه كنديرها بلعاني ..ابتسم ليها حتى هو بخبث ~ غير ديريها بلعاني وانا نطيرهم ليك بصح خداهم لعندو في بوسة طويلة تعنكش في الجلسة وهزها ورجع جلس وجلسها فوقو ... حتى تحل الباب عليهم ونادية ناضت قافزة من فوقو كتقاد في حوايجها ..
تحل الباب كانت بنت معامن كان كيشطح.. نادية تصدمت من هاد الجرأة لي فيها دارت كتشوف في مراد اش غادي تكون ردة فعل ديالو اما هو خنزر فيها ونطق مكنزز على سنانو~اشنووو علاش مدقيتيش ؟؟
جوباتو وهي كتشوف في نادية ~ سمح ليا عند بالي بوحدك مكنتش عارفة عندك شي حد بغيت غير نقوليك حنى غادين مجموعين واش تمشي معانا حيت شحال هذا مخرجتي معانا هنا نقزت نادية بلاما تحس هضرت وهي مخنزرة فيهم بزوج~ فين غادي تمشي معاهم امراد .... جاوبها كيشوف فيها~ ايهديك الله فين غادي نمشي معاهم .. شاف في البنت وعيط ليها بسميتها ~ رجاء انا غير حيدوني من المجمع بصفة نهائية واخر مرة دخلي عليا بلاما دقي واخا .. انا خارج دابا تهلاي.. جر ايد نادية وتم خارج وهو يتفكر صدرها لي عربان هز كاشكول عندو تم ولاحو عليها ونكق بغدة ~وانتي ستري عليا هذا الصدر ل عاجبك
كمل على طريقو مخلي وراه وحدة عينيها كيخرجو شر وكتوعد في خاطرها ..
وصلو لحدا طوموبيل وهي تفاجئ بيه بدلها بوحدة اخرى بقات غير كتشوف
نادية~ بدلتي طوموبيلتك علاش؟؟
جوبها وهو كيحل ليها في لباب باش تركب ~ عندي جوج ماشي بدلت ،
هزات ليه راسها وركب هو وياها مديماري ومخدم اغنية دارت شافت فيه كان مرتاح وكيسوق غير بايد وايد لخرى حاطها على شرجم وكيلعب في لحيتو وكيدندن ابتسمت بلما تحس وقربت ليه عنقاتو هو يدوي~ كنت كنتسنى فيك ديري شي حركة وتحسي بينا راحنا كاينين حدااك ،ضرباتو لصدرو بخفة ونطقت ~ وانت مالك مهرس ~ جوبها بغمزة ~ لا ولكن ما فيها باس تجي من عندك كطلع حلوة بزاف .. الراجل كيبغي الاهتمام بزاف واخا ميقول ليك والو على هاد القضية ولكن راه كيحس بيها وكيحسسها ليك بطريقة غير مباشرة ونزيدك احبيبتي حاجة اخرى عجباتني فيك اليوم كتعرفي تناقشي وكتعرفي كيفاش تعتاذري وكتسمعي لكلام وهادشي زاد خلا قيمتك تكبر عندي اكثر وكنعتذر منك مرة اخرى على طريقي منبغيش هادشي يتأتر على علاقتنا ..
تخشات فيه اكثر وزيرت عليه عاد جوباتو~ اكي ولكن جوبني بعدا شكون هاديك لدخلت قبيلة عندك حيث شلا زعامة بيناتكم
مراد~ اه رجاء هاديك كابرة فلخيرية وكانت خدامة عندي ولكن بيناتنا صداقة وصافي حيث نهار جات كانت مزال صغيرة وسكنت عنذي مدة عامين ومن بعد كونت راسها وكملت قرايتها ودبا خدمت في واحد شركة شفتها ليها.. الصراحة مبغيتهاش تكرفس شفت فيها اختي وصافي هذا مكان داكشي علاش زاعمة شويا ولكن ضريفة .بعدت عليه ونطقت بتسأل~ كيفاش سكنت عندك ؟؟
مراد~ والله مكانت شي حاجة بيناتنا ابنت ناس راه صغيرة عليا و كنت كنعتبرها ختي ،عمرني ما شفت فيها شوفة ناقصة ومكنتش كنمشي لدار قليل الا كان شي غراض مهم وصافي، قوست عينها فيه ونطقت بتشكيك~ ومنعرف اسيدي ..
وقف طوموبيا ودار لعندها وبدا كيتعصب~ واش عند بالك غير شادو وكنرش بيه راه واخا تشوفيني ضحوكي وشراب ولكارو ولكن لبنات عادي ماشي ديما مرة مرة بحال اي واحد فاش كيحس براسو مزير وباغي يخوي ..ماشي ديما كتكون راشقة ليا عليه راه صداعات كانو عندي يوميا ومشاكل كنبغي غير ننعس نرتاح ...كيقنعها كتبقى غير كتشوف فيه
تفكر حاجة وهي تهضر بلغوات~ اجي فكرتيني اشنو عنيتي بكلامك ديال انا وفيت بوعدي كيفاش زعمة ؟؟
الحب أقوى من أي إتفاق الجزء السادس
محتوى القصة
التنقل بين الأجزاء