العنوان مكفي وموفي ...هادي ماشي هي صديقات في الخليج ، ولا العشق المتمرد ولا كوبرا ولا منقذي الأسمر ولا دليلة .... هادي الحب أقوى من أي اتفاق قصة خيالية لكن الخيال الغير مبالغ شي قصص مدخلة فيها واقعين وشي حوايج من دماغي ، مغندويش عليها بزاف حيت هي داوية على راسها حتى تبعونا وتحكمو
✍️ ندى العمر
🌸تقديـــم🌸
- عيونك تسافر بي الى مجاهل الجنون ،تعبر بي الى ثنايا السكون وتهزمني الظنون فلا ادري من اكون... ؟؟
- على الرغم من أننا لا نبدو على وفاق ,ولم يكن بيننا أي اتفاق, ولا يظهر اننا يجمعنا اشتياق ...
- على الرغم من اننا جربنا البعد ،
وصار بيننا الصد، ومدار احاديثنا
لا تنكر الهزل ولا تثبت الجد....
- على الرغم من اننا لن ننف ما بيننا من اختلاف وشقاق، الا انه الحب بيننا ....
والحب اعجب واغرب وأقوى من أي اتفاق ..!!
تا واحد فينا معارف شنو مخبية ليه ليام للقدام ...واش غيفرح ولا غيحزن ،غيتغرم ولا غيكره ...كاين فينا لي كيعيش النهار بنهارو ومكيفكرش فغدا ، وكاين لي كيقتل راسو تخمام ويضرب حساب للي جاي ..
كاين لي عندو هدف في حياتو وكاين لي كيتسنى كلشي يجي تال عندو بلاما يمحن راسو
كاينة انا وكاين نتا ،كاينة هي وكاين حتى هو ، واحد فينا ماشي بحال لاخور، حيث كلها وحياتو وكلها وصفاتو وكلها وحكايتوو...
كيف ديما جايا معطلة للمدرسة ، رحيلها ثقيل وزادتها زحمة طريق براكات الطوموبيل فين موالفة تحطها وقبل متنزل هبطات المرايا تشوف وجهها ... لكحل مزال فبلاصتو ، لعكر هو هاداك ، شعر كيف بغات...حلات صاك خدات عطر خفيف وزوين رشات منو ونزلات ...
اطلالتها ميختالفوش عليه زوج ، زينها فتان وتزادها حتى قبول الرحمان ..غير كتضحك وكلشي كتعطيه وقت من لكبير في المدرسة حتى لصغير فيها ، وجماعة لي دازت عليها تخليهم يدويو فيها
~~~
_ نطقات واحدة سامة وباغا غير منين دوز ليها~ هاهيا تاني جايا تبوزق لي شافها يقول مولات شي ماشي كتقرا بحالنا بحالها
_ جوبتها وحدة داخلة سوق راسها ~ واش دارت ليك وشنو بغيتي عندها ، لبنت الله يعمرها سلعة مشفنا منها لا لخيبة لا زينة مالك معاها ؟؟
_ كلها وظروفو كنعرف ناس تا شابو وقراو نتي اش مشى ليك !!؟
بقاو مني ومنك وهي ممدياها فحد طلات على القسم بان ليها خاوي كيصفر وگاع لي كيقراو معاها على برا ، وهي ترجع على طريقها وقفات مجمعة مع شي دراري كلشي كيسول علاش مجاش لبروف ، مدات ايدها لصاك تاخد تليفونها تدوز بيه لوقت ملقاتوش ، اكيد بقى في طوموبيل ؟؟ هاكدا قالت ، خرجات بزربة غادا وتقرقب بصباطها
"هي مريام بلحاج ... بنت القاع والباع كيف كنقولو ،البنت البكر والوحيدة عند والديها ،كانت لي بغاتو ماديا يجي تال بين يديها ولكن الجانب المعنوي غايب ، الاب كان تابع لفلوس ، والأم عيات تغطي غيابو ومعرفاتش ....
كل بنت منا كتبغي تسمع كلمة زوينة من الناس لي دايرين بيها سيغتو الا كان الاب شكون فينا مكتفرحش الا سمعات _جيتي كتحمقي ابنتي ولا عندي اللب دلبنات !! وتاتك اللبسة وغير انا لي والد زين !!
ولكن هادشي مكانش فقاموس كمال بلحاج ، كان كيعرف يخرج غا الفلوس من جيب اما كلام لحلو عندو كان غاايب ، تبع لفلوس والمحلات لي عندو ومتسوقش لعائلتو ومنهم بنتو كانت ذات العقدين وخمس سنوات ومزالها كتفرح الا سمعات كلمة زوينة من برا وكتأثر ...شخصيتها وصفاتها كانو عاكسين ملامحها... من برا كتبان قوية وصارمة ولكن من لداخل كانت هشة تفرحها بكلمة وتسرقها باهتمام وجيست صغير منك تخليها بين يديك
حلات باب السيارة ومدات ايدها لبواط ايكون خدات تليفونها ، تكات على طوموبيل كتبقشش في تليفون ولكن صوت صداع المحركات نغصو وقفتها ، تمات راجعة منين جات وقبل متكمل الخطوة الثانية تسمع صوت فرامل قوي تضرب عند رجليهاا
فوق موطور من نوع هارلي سايق بسرعة خيالية ممخليش لوقت لبنادم باش يدقق النظر فشكون راكب عليه ، جاي مكسيري موقف تال حدا رجليهاا... معرفات باش تبلات رجعات باللور كطلع فيه وتنزل ، قوة الفرملة خلات كاع لي كانو لداخل يخرجو على برا يشوفو مصدر صوت منين جاي وشكون مولاه ، قفز من فوق منو ممسوقش ،وقف برجولية كان لابس سبور وحاط على راسو خودة... قدر يخطف أنظار العذارى بطلتو ، وغير عرا على وجهو وتخلص من شنو حاط على راسو تفتحو الافواه وكثر توشويش فصفوف الفتياات.....ومعاه التساؤلات شكون هاد ؟؟ واش طالب جديد ولا جاي فزيارة خفيفة
الاعين كانت متبعاه وهو كيلبس نظارتو الشمسية ،تم داخل للمدرسة وكيرجع شعرو المهمل للور غادي جامع حجبانو وكيتمشى بثقالة لقى التحية براسو على الحارس ودخل نيشان للقسم ، لاح سوارتو ونظاراتو وهاتف فوق المكتب وجلس فوقو حاط ذراعو على ركابيه محافظ على نظرتو القاصحة....گاع لي كان واقف على برا تمو داخلين تلقائيا واحد مور لاخور من بينهم مريام
"هو زيدان لخليفي ، همة وشان ولد قاع فاس مأصل ،غادي بمنهج العين بالعين والسن بالسن والبادي أظلم ، باقي ليه على الربعينات حوالي اربع سنوات ، ذو كاريزما وجاذبية ، مثير للجدل وهادا راجع لشخصيتو لقوية لي كتخلي الكبير وصغير يدوي عليه ... معندوش مع لبسالة ومكيعرفش يتناقش ومكيخممش ، الحب عندو شبه موجود هادشي لي خلاه بلا زواج لدابا، كيعرف غير خدمتو والسهير بعد عائلتو...مكيسمحش في حقو ومكيتنازلش عليه وكياخدو بأي طريقة كانت ولو بعد حين .."
كان محافظ على جلستو منطق بحتى كلمة ، غير بان ليه للقسم عمر وقف وحيد جاكيطو مخلي جسمو الرياضي يبان كثر من ورا تريكو لي كان مزير عليه ، علقو على الكرسي وتوجه للباب سدو ونطق بصوت خشن قبل ميدور
_ زيداااااان لخليفي ، مهندس معماري ... " وقف لوسط مقابل معاهم حاط يدو على خصرو "
لحسن حظكم انا لي غنقريكم هاد الموديل ولمدة شهر
" قوس عينيه وقال بافتخار "......اسمي بوحدو ضمن سيرتكم الذاتية بمثابة توصية ليكم لا هنا لا خارج المغرب ، هادشي لي غنعطيكم غيغنيكم عن سطاجات لي غدوزو من بعد ولي غتشدوه من عندي غيخلي اي شركة متفرطش فيكم داكشي علاش ، "هز ايدو وبدا كيحسب ليهم بصباعو "....
قبل متدخلو من هاد الباب ، لبسالة تبقى برا ، تركيزكم يحضر ، قوة لفهامة لي ماشي فبلاصتها معندي مندير بيها ، وتنائيات معنديش معاهم
كنظن كلامي واضح ...
"رجع لبلاصتو فوق المكتب جلس مكمل كلامو "
قبل منبداا الحصة غنضيع واحد عشرة دقايق ، كل واحد فيكم فأقل من ثانية يعطيني اسمو الكامل وسنو
حرك راسو عاطيهم الاشارة توالاو الاسماء ورا بعض بدون توقف ...رنا محمد 18 عام ، فاتي المالكي 19 عام ، احمد الغزواني 20 عام ، مريام بلحاج 25 عام
كان حادر راسو وغير سمع اخر اسم هزو مضيق عينيه رفع حاجبو وقال بصوت قوي
زيدان بتساؤل ~. شكون فيكم مريام بلحاج ؟؟
عضات على شفايفها وبنظرة حادة هزات ايدها وقالت
مريام~. هي أنا واش كتعرف هاد الاسم ... قمعها بجوابو وقال
وهو كيحك على لحيتو وكيدوي بنوع من استهزاء ~. معندي منعرف فيه ، لي وقفني امدموزيل ولا امدام هو سن ديالك خمسة وعشرين عام ؟؟ حرك راسو بمعنى عاد طفات عليك الشمعة ، فهماتو اش بغى يقصد وصرطات كلامو بزز منها .. كلشي كان كيشوف فيها وكاين لي بغاها فيها وتشفى ، متسوقاتش وجاوباتو بثقة عارفة راسها شكتسوى ~. متشوفش السن وشنو كنظير بيه هنا شوف شنو درت قبل ، بتاسمات وقالت انا مدموزيل مريام بالحاج
وقفها بايدو قامعها ووقف على طولتو وقال~. الا قريتي وساليتي وواخدة هادشي فوق شبعة "دوز صبعو على لقسم كيوريها". كاينين ناس واخدين هادشي جد ماشي تحدي بلاما ضيعي ليهم وقتهم ابنت بلحاج
مشى لصبورة وكتب عنوان الدرس وبدا في الشرح مخليها كتبلع ريقها صحةة
كيف عادتو كيخلي كلشي حال فمو وبالو معاه ، العينين مكيتزاحوش ،عندو طريقة في الالقاء رهيبة كان من نوع الخاتر مكيدويش بزاف والا نطق كيسكت البشار ، طرح تساؤلات وعطى الكلمة لتلامذ فاتح باب المناقشة كلشي عطاهم وقت وهي لا ، تعامل معاها بحالا مكايناش تعصباات وجاها تصرفو مستفز ، جمعات وراقها وهزات صاكها مغادرة الحصة كرد فعل ، مكلفش نفسو لا يوقفها ولا يسولها كمل على درسو كيف بداه...
مريض ،معقد ، عايق وحاس براسو وبخدمتو ... كانت غادا وكتسب بصوت مسموع حلات طوموبيل وركبات ،شوية وطرطق وضروري كيخصها تدوي هزات تليفونها ودوزات رقم صاحبتها وبنت خالتها في نفس الوقت
مريام شاعلة ~. فيينك اصحبتي راه غنطرطق !!
نادية حطات ستيلو من يدها وركزات معاها ~. في لبيرو مالك اش بغى يفرگعك ياكما باك ثاني ؟؟
تنهدات وقالت ~. اودي كون غا كان بابا ، هادا واحد خينةة عطاني شي قمعات متبغيهمش لعدوك
شافتو خارج وهي توسع عينيها مخنزرة
مريام ~. حتى نرجع نعيط ليك تهلاي
حطات ايدها على الفولون مقابلاه حتى ركب على دراجتو بنفس الهبة باش جا بيها بقات حاضياه موعات على راسها حتى خلى غا ريح وراه وحتى هي ماشي من العاگزين كسيرات تابعاه ...باش تجري وراه حسات براسها داخلة لسباق سيارات ولايني محساش بشنو كدير القمعة والمعاملة المزفتة مزال يطلعو وينزلو فيها وهي لي مولفة كلشي يضحك ليها ، خفف سرعتو ملي شافها مهداهاش الله كان راد ليها لبال فاش يالله تحرك ومهتمش نجحات وقطعات طريقو نزلت لعندو جايا وهو حاضيها حيد الكاسط وتكى على الموطور مقوس عينيه وبارم حجبانو كيعبر فيها مزيااان
كانت لابسة سروال مزير وشوميزة خاشياها فيه ، صباط عالي مخليها تزكك في مشيتها بتاسم جنب وحط ايدو على ذقنو كيحك فيه وقبل ميزرب عليها قالت
مريام ~. ممكن نعرف علاش تعاملتي معايا بديك الطريقة ، واش شفتي مني شي حاجة ماهياش ،ولا بيني وبينك شي حاجة ومعارفاش !!؟
معبرهاش بقى ساكت وهي ترطى تسول غا راسها حتى عيات وملات ~. واقلة سولتك اموسيو بلخليفي "وركات عليها "
هز ايدو رجع ليها واحد الزغبة برزطاتو ورا وذنها وقال
زيدان ~. انتقاداتك خليهم داخل الحصة ماشي برا اوك ، لخفة معنديش معاها "غمزها ونهى كلامو ، محملاتش راسها وندمات لي تبعاتو معفر وزادت سطرات عليها كحازت لجنب خلاتو تا مشى عاد ركبات طوموبيلتها نيشان لدارهم مغددة
كانت غزالة من برا ومن لداخل روعة بفراشها التقليدي وجليسات العصرية لي فيها في القنات ، ولكن باردة مافيهاش حس الحركة والحياة فيها مملة لاقصى درجة والوحيدة لي مزيناها في عينيها هي مها .. كانت جالسة كتفرج وقدامها كويس دأتاي وكعب غزال مشات حداها بلاما تنطق بكلمة باستها وجلسات حاطة ايدها على حنكها وسهات حتى فيقتها
مريام عدلات صوتها وقالت ~. لا والو اماما غير بروف مجاش ، واش بابا مزال مجا
نزهة هزات كويسها مكملة عليه ~. شوية ويجي راه علمني بلي غيتغدا هناا وقاليك جايين معاه شي ناس
رجعات شعرها اللور ضاحكة ~. دخلني شك ملي قلتي غيجي وكون مكملتي نقول شي يهودي مات في الملاح
هزات نزهة ايدها طبطبات على ظهر بنتها كتقاد وتصاوب لخواطر
نزهة ~. طرف الخبز صعيب ابنتي
حركات راسها بمعنى تيقتك، طلعات لبيتها كلام مها حفظاتو من ديما كتلقى ليه مبررات حيت كتبغيه وقلبها بيض....نزهة نسخة مصغرة على بنتها من ناحية الجمال شوفة فيها كتبعثك بالراحة ولكن شخصيتها ضعيفة، كانت متسامحة لأقصى درجة والا كان لصبر عنوان غتكون هي .....
صبرات على كمال وخدمتو مع غيابو ، عمرها هزات الراس ولا عارضات واول مولدات مريام عوضاتها فكلشي وزادت تشبتات فيه ، كانت ديما هي لي شادة الميل وبسبابها الاسرة بقات مجموعة ،وصل وقت لغدا طلعات بحال ديما تعيط علىها لقاتها حاطا قدامها وراق كتخطط فيهم وترسم ،مريام كتموت على شي حاجة اسمها التصميم المعماري ، من صغرها كانو ناس يرسمو شمس والبحر وهي ترسم ديور وفيلات بشكل ذواق وخرافي ، هزات نزهة ورقة شافت فيها مبهورة وقالت
كنت غنكون ولكن اليوم ومن ورا اش وقع ليا فقدت الامل
قالتها تحت منها وكتافات تبوس خد ماماها ونزلو بزوج لقاو رب الاسرة جالس في طبلة مع ناسو كيكركر وبادي الماكلة ممسني حد ، باست ليه مريام على يدو وسلمات على شخص لي معاه وباشرو في الاكل ،كيف ديما الهضرة على الخدمة وحوايج والسلعة وديوانة حاضرة، دماغها تتبخ والغدا وحل ليها في الحلق ناضت من على طبلة خلاتهم حتى سالاو وحلاو بان ليها باها خارج من جديد شقماتو قبل ميخرج موقفاه باغا تستفسر على زيدان وربي كبير
مريام ~. بابا بغيت ندوي فشي حاجة !!
كمال خشى يدو في جيبو وجبد بزطامو وقال ~. شحال خصك ؟؟
شحال خصك و فين باغا تسافري ...مكيعوضوش لينا غنسافرو بزوج ويالله نخرجو تاخدي لي حبات خاطر بنتي وشنو كيعجبك....
سي كمال تسولو على عمر بنتو ولا فاش كتقرا وشنو كدير في حياتها ببساطة مغاديش يعرف حيت مكيجلسش معاها ومكيتحاورش عند بالو فلوسو دايرين الواجب عليه ومعندها مدير بيه ... غير كمل كلامو وهي تنطق مغرغرة
مريام ~. خاصني نتا ؟؟ نجلس معاك وندويو ممكن
مردش ليها البال ولا لعينيها لمدمعين كان مشغول كيحسب فلوسو حدو مد شي ورقات حطهم في يدها وقال
كمال ~. الا جيت بكري نديو ، ولا عودي لمك وتقوليا شنو كاين
ضرب على كتفها وخرج وتاهي ودعاتو بابتسامة باهتة مبردة بيها على راسها... طلعات لبيتها خاكرها بارد وممقلقاش حيت تعودات على هاد الهضرة وولفاتها منو فين عمرو تسوق ليها ولا قاليها مالك ؟؟
ملقات قدامها غير نعاس وتا من الحصة لي كانت عندها في لعشية ممشات ليها باراكا لقميع لي خدات صباح من عند لبروف شنو تزيد لعشية...
داز نهارها عادي وجا نهار تاني ولاول مرة فايقة محاملة گاع تمشي للمدرسة لي كانت غتسطى عليها شافت الساعة بان ليها مغيقدهاش الوقت كيف ديما ولكن متسوقاتش لبسات على خاطرها وتأنتكات خرجات غادا في طريق طلقات اغنية انديلا وغادا موسقة معاها حتى وصلات ، تنفسات الصعداء وبتاسمت حتى بانو سنانها ملي مبانتش ليها دراجتو ، هبطات بشوية عليها عابرة خطوتها وكيف العادة سلمات براسها على حارس الباب وشيرات للمدير وهي كتضحك وغير بان ليها لقسم بابو مسدود الضحكة غبرات وقلبها بدا يضرب
ووجدات راسها لقمعة ثلاتية الابعاد ...قبل مدخل دقات في الباب و حتى سمعات تفضل عاظ حلاتو، كسرات صوت صقيل بطالونها غادا بتيك تاك تيك تاك وريحتها مخلياها فاي بلاصة دازت منها كان كلشي متبع ليها العين من غيرو هو لي متكي على الحاسوب غير شدات بلاصتها وهو يقول
زيدان ~ باش تكون مهندس ناجح كيخصك تكون ضابط وقتك هذا اولا ، وثانيا خدمتك تكون رقم وااحد في حياتك..
دار يديه على ظهرو وكمل
هذا علاش ومن رأيي شخصي نبغي نشووف مهندسيين رجال في هاد المجال والعيالات بلاصتهم الدار مع احتراماتي للواحد نسبة قليلة ، حيت لي تضيع الوقف قدام لمرايا تزوق وتلعب في وجهها "شاف في مريام لي وجهها ولا حمر " ...بزاف عليها الهندسة ، تخطيط في الوجه ماشي هو الوراق
بدات تدوز لسانها على شفايفها بارتباك ونرفزة كلامو كان كيف السم قطر على قلبها ... نبضها ارتفع ووذنيها حسات بيهم كيصفرو، تزيرات وبانت عليها طرطقات صباعها مرجعة شعرها اللور وقالت بتحدي
مريام ~. اول جامعة في المغرب وأقدم جامعة في العالم هي جامعة القرويين "باستهزاء " وبنائها نساائي مية فلمية ، فااطمة الفهرية...وكنظن كون ماهيا ميكونش عندنا مهندسيين كبار لي قراو المهندس الواعر على قولتو زيدان بلخليفي
"بلعات ريقها ورجعت قالت "...جامع الاندلسيين لي من اعرق مساجد المدينة العلمية شكون بناتو " بثقة نطقت اسمها "...مريم الفهرية ....دار اوبرا غوانزو ،مركز الالعاب المائية لي تميزو بتصميمهم الخرافي كانو لرائعة زها حديد وتاهيا مرا ...
هي كتدوي وهو قاضب حجبانو حيت معندو فاش يعارضها كلامها صحيح كتفى يهز ايدو بأمر وقال منفاعل
تم جاي مقرب لعندها كيلعب في مگانتو ، وقف قدامها وجرها من ذراعو موقفها
زيدان ~. قوة لخبرة معنديش معاها ، كاين استاذ واحد هنا هو انا ونتي طالبة عندي لا اقل ولا اكثر ، وملي فيك هاد الفهامة بزاف نتي فغنى عن حصتي " رجع بزوج خطوات اللور خوا ليها طريق "....تابعني حصة متعطليناش لباب
صاطت بسخط وهزات اغراضها مرضاتش يجري عليها قدام صحابها وقفات دمعتها فطرف عينيها ومشات قاصدة مكتب المدير ، دخلات لعندو كساكشها خارجين مزال مسولها نفاجرت فيه كانت باغا معامن
مريام ~. موسيو فتاح...واش انا مخلصة فلوسي باش يتجرى عليا من الحصة
_ وقف بموسطاجو دافع كرشو لي شبعانة غا فلوس قرب منها وقال بتساؤل ~. شكون جرا عليك ابلحاج
مريام بلاما تشعر قالت ~. داك المهندس الخلافي ولا خلفي معندوش الحق يرميني برا ....تسمع صوت قوي قفزها من الخلف وقال باندفاع
-زيداااان لخليفي وعلى قبل هاد قلة الاداب لي فيك عتابري راسك نو ڤاليدي
بدا المدير يزقزق عارفو جلاخة مكيتفاهمش قرب منو شاد يديه بترجي ~. نعل الشيطان اموسيو زيدان مقصداتش ، راه عامها تاني ومدموزيل مريام من الأوائل في المدرسة
نتر ايدو مشربن موجه ليها الهضرة ومتجاهل كلامو
زيدان هاز سبابتو في وجها ~. قريتهم بشلاغمهم وكانو كيحتارموني تجي نتي تبزّْق ِعليا هناا ، كنقول الهضرة مرة وحدة موديلي عتابريه انيلي سيري شري ليك ديبلوم
خرج بحالو وخلاها مصدومة فهاد بنادم لي معرفات فين كان مخبي ليها ، لملمات شتات نفسها وخرجات بلاما تزيد تنطق كلمة...
كانت صايگة ومرفووعة ،ماشي ساهلة حتى يبقى ليها اقل من شهر وتاخد ديبلوم لي كانت كتحلم بيه من الصغر ويتضرب ليها كلشي في زيرو ، بلاما تشعر مشات قاصدة باها حيت معندهاش من غيرو لي غياخد ليها حقها ويدافع عليها
وقفات قدام قساريات أنوال ،المختصة بالملابس نسا ورجال وعيال كانت عامرة بنادم وصوت اللغى لي فيها كيثقب الطبال ، صحاب لمحلات كيلقيو عليها سلام وهي مكايناش هنا وغير وصلات حداه وقبل متكلم سبقوها دموعها
مريام ~. هء هء بابا
تقواي قدام البراني حتى تعياي ولكن حدا والديك كتصرفي على سجيتك حيت غير كتشوفي فيهم كتضعافي وكترجعي بنت صغيرة ... مريام غير وصلات لعند باها متحكماتش في دموعها نفاجرت ، كان جالس كيدوي في تليفون وقدامو كارني كيقيد فيه حتى قاطعو بكاها
كمال ~. غير قولي دغيا الله يرضي عليك منقدش نخلي لمحل ، شكون حگرك واش ضاربتي مع شي حد
عودات ليه كلشي من طقطق لسلام وعليكم شي سمعو وشي لا حيت دماغو فبلاصة اخرا ،
كمال ~. دابا شنو بغيتيني ندير
حلات فمها مشرعاه وقالت
مريام ~. دابا انا لي غنقوليك اشنو ندير
طبطب على كتفها وزاد طين بلة بكلامو لي خلاها خرجات بلاما تلفت
كمال ~. صافي غدا ندوز لعند سي فتاح ندهنو بشي بركة ويلقا ليك حل ... كيف شفتي راني مبرزط راسي ملاقيش ليه الوقت نحكو .
هاكدا يكونو الاباء والا فالا ،مأثروش فيه دموعها ولا بقات فيه وقال بنتي الوحيدة تحگرات ومعاش لي يهز صوتو عليها جاها من التالي وختار طريق سهلة كيف ديما ، خرجات من تم وركبات طوموبيلتها بلاما تحرك كانت تابثة ورا الفولون شادا راسها بيديها حاساه غيتفرگع معارفة مدير ...فخضم تفكيرها صونا تليفون هزاتو لقات نادية لي معيطة ليها دوزات الخط وغير قالت ليها الو بدات تبكي من جديد وتعاود ليها كتشهق
نادية ~. ديماري وسبقيني لكافي فينيزيا ، انا جايا
مريام شغلات المحرك ~. واخا متعطليش
داخلة هازة شنطة في ايديها كانت بلباس كلاس ، شعرها هازاه شفنجة لفوق نظاراتها الطبية فعينيها مكتفرطش فيهم ، جايا داخلة برشاقة وكبرانية وكتقلب بعينيها عليها
نادية مروك ثمنية وعشرين عام محامية معروفة ، دايرة مريام بحال ختها صغيرة مكتخسرش ليها لخاطر وفينما تبغيها تلقاها مشاكيلها كيتحلو على ايديها .. لمحتها جالسة في القنت حاطة يديها على خدها وكتخمم لاحت سوارت فوق طبلة مقفزاها ودوات
نادية عنكشت ليها شعرها ~. لي عطى الله عطاه متخميش بزاف
نادية ~. هذا هو زيدان لخليفي ، لقاصح وسيغتو مع ناس رطبين بحالك " ضيقات عينيها مستغربة وردات عليها "
مريام ~. واش كتعرفيه
نادية شيرات لسرباي طلبت قهوة عاد جوبتها ~. ومعرفة شخصية نيت ، راني خدامة معاه ،مهم مسحي عليا دموعك وثقلي هاهو داخل
جاي كيلوح فرجليه بتباث ، متأنق بلباس كجول جينز مع شوميز خزي وحذاء رياضي ، ساعتو الفخمة كيف العادة فيديه ، خاتم غليض في اليد ونظرات شمسية فبيديه ريحتو لخفيفة ومتميزة كانت سابقاه لعندهم ...وقف وبلاما يدوي حط سوارتو ونظارات والهاتف كيف العادة فوق طبلة وسلم على نادية بلابيز لي وقفت لعندو اما هي سرق فيها شوفة وجلس مدور وجهو عليها كانو عينيها حمرين وشفارها ساردين قلعها باكية ولكن مدار حتى رد فعل ، شير لسرباي يجي لعندو وقال موجه كلامو
زيدان ~. شنو تاخدو
نادية ~. قهوتي طلبتها وختيييي "ضغطات عليها زعمة راه متي وفيا " هاهو عصيرها كيشوف فيها مزال مشرباتو ، غير خود ليك نتا
زيدان ~ نو انا مخصنيش "غمز سيرفور بعينيه بمعنى سير ورجع قال " اش تم ؟؟
شابكات صباعها بين ايدها ودوات ~. على مفهمت وقع بينكم سوء تفاهم ، لي بي سبابو جريتي عليها من حصصك بصفة نهاية وقطعية
زيدان بحدة~. استاذة نادية جيت هنا حيت قلتي عندك شي خدمة مهمة "فتح ايديه بمعنى " فيناهيا ؟؟
مريام متحكماتش فراسها ~. واش مستقبل الناس عندك گعما مهم ، واش كنبانو ليك حشرات
حسات بيد نادية كتضغك عليها باش تسكت
زيدان شاف ليها فعينيهااا وقال ~. مكتبانيش ليا اصلاااا "كان كيدوي ببرود وبدون انفعال عكسها هي لي كتعض على شفايفها كيف العادة ". محد لسانك سابقك مغطفريهش ونبصم ليك عليها
جمع اغراضو ووقف محمر فنادية ~. اخر مرة تجيبيني على تفاهات . عطاهم بظهرو وزاد
نادية ~. واش انا معيطة لسيد وكاذبة عليه باش نتي تهبطي كواريك ونلقاو حل وعاد مطالعة لسما ...ابنادم راه انا لي عارفاه واش تسطيتي واش باغا ضيعي عامين باطل "خنزرت فيها " تسنيني هنا انا جاااااياااا
تبعاتو تجري شداتو كيحلل سيارتو " موسيوو زيدااان ، الله يخليييك وقف
زيدان ضار لعندها مكالي الباب بيديه ~. اش كاين
نادية بترجي~. متقصحش راسك على وجهي راه ختي وهاد ديبلوم هو حيااتها وكون مقراتو تجهل ، نفسيتها ربي لي عالم بيها ميغركش كلامها
زيدان ~. راك خدمتي معايا وعارفاني الا قلت الكلمة مكنرجعش فيها ، تقرا عندي لاااااا
بغى يركب طوموبيلتو وعارضات طريقو
نادية ~. اسيدي خرجها نتا للميدان وخليها موديل تدوزو تدريب داكشي لي يقراوه تلامذ كتابي تاخدو هي تطبيقيا بهاكا مغترجعش فكلامك وهي مغتضيعش فهاد الاعوام الله يخليييك
بقى شحال عاض على شفايفو فلخر لبس نظارتو وقال ~. غنعيط ليك
نادية ~ وملي نتي محروقة هاكدا مالك عايقة مهم عطيتو حل غيفكر فيه وملي يجوبني نعلمك
في المساء ،داخل فيلا لخليفي جالس فوق طبيلة في جريدة لواسعة قدامو كاس القهوة كحلة بلا سكر ، كان رامي ثقلو على الكرسي ورجليه حاطهم على كرسي اخور كيحرك فراسو وكيشووف بعيد ، حجبات عليه الرؤية الحاجة امينة الأم
مرا كبيرة في العمر باينة من شيبات لي غطاو شعرها والتجاعيد لي غزاو وجهها ، حارة وديال زمان غير مات راجلها عرات على ذراعها وشمرات حتى قراتو ودمرات عليه حتى وصلاتو ، وتاهو ملي كبر ووصل عوض ليها كلشي تاني ومتني ... كانت هازة تسبيح في ايديها كتذكر الله وتستغفر ، جلسات حداه مطبطبة على ظهرو ،بعدما تقاد في جلستو وميل راسو لعندها
زيدان ~. لواليدة محرك ريح دخلي دفاي ليك لاش خارجة
مينة ~. ونتا مالك شاعل من داخل
زيدان حك على ذقنو مبتاسم وقال ~. انا واخد دوا البرد متخافيش عليا
"هز راسو لبيت ضواوو طافيين وقال بتساؤل ". نعسات ؟؟
مينة حركات ليه راسها بأسى~. شربات دواها بزز تاني
زيدان هز تليفونو ووقف عاقدهم ~. الصبررررررر ،الصبررررر ، "عطاها بظهرو وزاد " تصبحي على خير الواليدة
بان ليها قاصد طوموبيلتو عرفاتو كيف العادة غادي يسهر، هزات ايدها وشافت فسماا كتدعي ~. ياربي حفظو ليا ورعاو هو وگاع وليدات المسلمين
اما هي كانت جالسة فأمان الله حاطة راسها في حضن مها كتلعب ليها فشعرها وكيتفرجو بزوج بيهم حتى صونا تليفونها ، بانت ليها سمية نادية عضات على ضفارها بتوثر وجوبات في الحين
مريام ~. امم
نادية ~. ستة فيقي ..سبعة تكوني لبستي وفطرتي ..تمنية تكوني قدام شركة تيييم الخليفي وجدي راسك نفسيا ومعنويا وجسديا غتكوني ايدين ورجلين ودماغ موسيو زيدان ، قدامك مظة شهر يا اما تخرجي بديبلوم فيدك يا إما غتخرجي بيهم خاوين ،نتي ختاري يالله بون شانص
تشكلات على فمها ابتسامة رضى ، وظهرات لمعة فرح على عينيها ، وعلاش لي متفرح وهيغتكمل في مشوارها واخا طريقهاا غتكون وعرة بوجود ديك الشخصية الصعيبة لغير المتفهمة لي كتقمعها في طلعة ونزلة بالحق تا واحد فينا مجازم بلي هاكدا غتبقى شخصيتو القدر بوحدو عندو الحق يتحكم فيه ...فإذا نزل القدر عمي البصر
نعاسها تخربق ليل كلو وهي تنوض قافزة عند بالها مشى عليها الوقت ...باتت مرفوعة وراودوها كوابيس عليه مرة مجري عليها ،مرة محشمها من جديد مجات فين ترتاح فنومها حتى وصل الوقت.....
ستة دصباح ، فاقت على رنة المنبه وريحة الفطور لي ختارقت غرفتها ، لاحت عليها لغطى وشنقات راسها تجري من قنت لقنت ، غسلات وبدات توجد ...لبسات كسيوة خفيفة و غامقة بألوانها و شكلها المتميز بالنمر لي كتبين مدى قوتها و ثقتها فنفسها من اختيارها لهاد النوع الناذر مع سميطة سوداء جلدية فخصرها لي برزات قوامها .. شعرها البني المسحوب بخصلات ذهبية رداتو فالجنب جا مواتي مع مكياج خفيف يبين مدى روعتها فرجلها ستقرات كيف العادة على طالون اسود جلدي مع حقيبة سوداء االللامعة من سان لوران بسلاسل ذهبية...
سبعة الا ربع لقاتها واجدة هزات صاكها لي خشات فيه شنو كتحتاج عاد نزلات لتحت.. لقات قدامها طبلة زوينة كيف ديماا من تحت ايدين لالة النسا نزهة ، سي كمال على راس الطاولة كيفطر وتليفون ممفارقش يدو صبحات عليهم وجلسات، سمعات الرد من عند مها مع بوسة على الخد ومن عند باها بفمو بلاما يشوف فيهاا
نزهة وهي كدوز على شعرها ~. تبارك الله على بنتي فايقة بكري "بتساؤل " شبغيتي نكب ليك اتاي ولا قهوة
مريام ~. لي عطيتيني اماما !!
كبات ليها كاس حليب مخلط وحطات قدامها طبيسيل مْشكل ، كلاو في جو عائلي باارد بلا روح
كان كيتسمع غا تقرقيب الكيسان
هاد الجو الكئيب تعودات عليه ومبقاتش تشكات منو حيت سرا معاها سي كمال اول من غادر الطبلة وقف وشاف فيها وقال
كمال ~. واش مزال غتبغيتي نمشي معاك لمدرسة ولا قاديتي امورك !
مريام جوباتو ببرود ~. صافي راه حليت المشكيل .
حرك ليها راسو كان طالب عليها ، هز جاكيطو وخاطب نزهة بأمر
كمال ~. غدا نوبتي في اللامة ،بسطيلة غنوصي عليها من برا ولحم وشي لاخور تكلفي بيهم ، وديري فبالك غتكون بليل
قال اش بغى وخرج ، حديثو ناشف وتعاملو مگلاصي مكاين لا الله يخليك ، ولا الا جات على خاطرك ، مريام هادشي كتحكر عليه ومها كيف ديما مكتبغيش تلومز
خبطات الكاس منثرة وكتأفاف ~. زاد فيه بزااف ومبغاش يعيق خلاص ، واش نتي مرتو ولا خدامتو ، واش انا بنتو ولا لاقيني
نزهة ~. نهاك الله ابنتي باك هاداك لي كتدوي عليه
مريام تنهدت باسى ~. ايه بابا وكنموت عليه ولكن راه كنحسو كيبعد وبزاف واش خدمتو حسن من عائلتو
"هزات راسها فدار كتشوف فيها وقالت " شنو فايدة هاد الدار وهاد لفراش الا كان بلا معنى ، وداك صالون لاش مديور الا مكناش غنتجمعو فيه على لعشى ونتفرجو ونضحكو
قاسها كلام بنتها وحجر الدمعة فعينيها وعندها الحق حيت الاشياء حنا لي كنعطيوها قيمة والبيت يصنع جماله من يقاسموننا الاقامة والمرح فيه
ملقات باش تبرد عليها من غير تخشيها فصدرها دوز ت على شعرها وقالت ~. الله يرضي عليك ابنتي متمرضيش راسك بهادشي نتي ديها فقرايتك هادي هي دنيا ومافيها عندي
بدورها باست لمها على جبهتها ~. الله يخليك ليا ياربي
حنان مها نساها فاش كيتسناها مفيقها غا تليفونها لي كيصوني قفزت طايرة خارجة لبرا مودعة نزهة بيديها ، حطاتو على وذنها كتدوي ويديها مشغوولة كتكتب عنوان في جي بي اس حيت معارفاهش .....
جالسة كتفطر على برا بطبعها انسانة مواضبة ومنظمة وقتهاا وكل حاجة كتعطيها حقهاا مسحات فمها وهزات تليفون دوزت نمرتها ، وقت قليل وسمعت الرد
- الوووو
نادية~. ريحيني وقولي ليا انا فشركة
مريام مفيكسية شوفة في طريق ~. راه كازا اصحبتي هاظي كنوقفو فيعا كثر مكنتحركو وعندي غا طوموبيل ماشي طيارة
مريام كان شادة تليفون بيد وللايد لخرا على الفولون ~. ويي
نادية ~. راه مخالفة الالة من درجة تانية تخلصي فيها خمسية درهم
بعدات تليفون خلاتها حتى سالات غواتها عاد قالت ~. راه غواتك غيخليني ندير كسيدة ونمشي فيها جنايات
مجوبتهاش كتافات تكروشي عليها ، بتاسمت مريام من رد فعل صاحبتها عارفاها تموت في القانون واحترام القوانين ،كملات على طريقها حتى وصلات قدام مبنى تيم لخليفي
"إن أجمل مايحدث لنا لا نعثر عليه، بل نتعثر به."
وقفات قدام بناية عالية وكلها زاج فزاج كتوسطها شاشة الكترونية مكتوب عليها
" تيم لخليفي للبناء والتصميم "
حلات فمها في الشكل الهندسي لي قدامهاا وعرفاتو من جاب الغرور ، ترجلات من سيارة لايحة صاكها على كتافها وهازة ووراقها بين يديها ، غادا ومعارفاش اش كيستناها معاه ولا كيفاش غتصبر راسها قدام استهزائو منها المستمر ،مشات عند البنت لي في استقبال وبابتسامة قالت
مريام ~. غير قولي ليه ، مريام بلحاج لي جات على ود تدريب
قاطعات كلامها ~. اه قولي كتقلبي على سطاج هنا ... ايوا كيخصك تقصدي الموارد البشرية وتحطي سي ڤي تاعك تمْ ولا اريه ليا موسيو لخليفي معندو علاقة
طلعات فيها ونزلات كتخنزر وقالت متحججة
مريام ~. واخا اختي انا جايا
خرجات على برا كتصوط ، حدرت راسها كتقلب على تليفون تعيط لنادية وهي تسمع صوتو لمبحوح
- معطلة بربع ساعة ، واش مزال متردعتيش
صوتو ميخفاش عليها ،هزات عينها فيه كان قريب منها بزااف ،كيف عادتو مأنتك بلبس كلاس ولايح عليه مونطو طويل بالبيج ،هبط نظاراتو شمسية من على عينيه وشاف فيها حتى وتلفها بزروقيتهم
غادا وراه وكتدقق في تفاصيلو كيف كيتمشى، وكيف كيوقف وتصرفاتو كيف دايرين ، مكيقول لا سلام ولا كلامو الا كثر يهز راسو ولا يشير بيديه ...وقف قدام الاسانسير وضغط على اخر رقم تم وتكى على الحيط كيطلع فيها وينزل واذيه على ذقنو ، حافظت على وقفتها وتبتاث راسها ملي حسات بيه كيشوف فيها لعبتها مكايناش هنا ومموسوقاش ليه ، بتاسم وهو ودخل تبعاتو من جديد ووقفات بجنبو هاد المرة كطرطق في صباعها وتعض في شفايفها
تحل لباب وعطاها طريق خرجات ، سبقها فاتجاه لبيرو وهي وراه حالا فمها في شكل الشركة من داخل تلقات ليه سكرتيرة بابتساامة وقالت
- موسيو زيدان ، انسة منى لي رجعنا لبارح كتسنى فيك
حط يديه على خصرو كيحك جبهتو بعياء ،خلاها حتى سالات وقال ~. هادشي كلو لي قلتي مسمعتوش ، "طبطب على ذراعها " قهوتي الله يرضي على بنتي ، جيبيها ليا ونشوفو هادشي من بعد
بقات غير حاضياه كيف كيتعامل ومكيعرفش يدوي ،كلمة مقادة مكيخرجها من فمو مكاين غا القرطاس ،ولي داز من حداه ميفلت ،سمعات صوت تصفاق هزات راسها لقاتو هو مشرع لباب وواقف كيستنى فيها
زيدان ~. خدمنا بكري
مريام تحركت جهتو ~. عند بالي
زيدان جرها من ايدها حتى تعترت بطالون وتخشات فيه قال بصووت رجوولي ~. فيك الهضرة بزاااف
حط يدو على خصرها مزير عليها ~ شدي فراااسك
بدات تكحب بارتباك جمعات راسها وبعدات عليه متوثرة وكتقاد في حوايجها ، قلبها بدا يضرب وتوثرات منو قربو ليها بزااف
مشى لبيروه جلس ،عاد تبعاتو كتقرقب بطالونها بدورها جلسات في الكرسي لي قدامو وحطات وراقها حدااه ، كان ملهي يقلب هنا ويشوف هنا دارها بحالا مكايناش ، فلات البيرو بعينيها وملي كملاتو دازت ليه....سميمر وعينيه ناعسين شعرو مخربق ، لحيتو ممقاداش حجبانو عامرين وتفاحة ادم كتطلع وتنزل كل ما بلع ريقو، زينو كان حرش مية في مية فيقها صوتو فتليفون من تحليلها وطمرات
زيدان~. صيفطي ليا البنت لي على برا !!
دخلات في الحين لابسة كسوة حد الركبة وطالقة شعرها الماكياج لعلك ترضى زين زينة والمشية قتالة وسي زيدان هادشي مكيأثرش فيه مهزش راسو گاع فيه ، اشار ليها تجلس ومد ايديه وهي تحط ايدها وسطهم مسلمة عليه ...هز راسو فيها وقال بانزعاج ~. بغيت لوراق الالة !!
حسات بالاحراج من تصرفو مريام بقات مخرجة عينيها صدمها ، قرا سيرتها الذاتية مزيان فلاها كيف بغى الخاطر ولاحها ليها
زيدان~. سن بين تمنية وعشرين تال تسعة وعشرين ، خديتي لباك بميزة مقبول وجلستي وراها سنين عاد دخلتي قريتي هاد دومين وبفضل لفلوس لي كنتي كتحطي نتي قدامي هناا باش تخدمي " هز يدو قدامها بتساؤل "و كتسناي مني نقبلك ؟؟
منى ~. كنضن غفلتي على واحد الخبرة كاينة تما قبل منقصد هاد شركة خدمت عامين في جايكووب
زيدان نقر بستيلو فوق المكتب وقال موقفها ~. جايكوب كشركة مكنعتارفش بيهاا " خشا ليها وراقها ومدهم ليها ". الا بغيتي تخدمي معانا كيخصك على اقل قد الفترة لي خدمتي تما تدريب هنا وشوف تشوف
منى جمعات الوقفة ~. الله يهنيك اموسيو لخليفي يمكن جيت لعنوان الغالط
زيدان مبتاسم جنب ~. سدي معاك الباب !!
خلاها تا خرجات ودور لكرسي داير رجل على رجل وكيشوف في مريام لي محملاتش الموقف لي تحطات فيه البنت بقات فيهاا بزااف
زيدان ~. تبغي ندير راسي كنعرفك ولا اول مرة كنشووفك !!
مريام حنحنت وقالت ~. لي ختاريتي انا موجودة ليه
مسح نيفو وقال ~. نفضل اول مرة كنشوفك حيت الاختيار اللول غيخليني بلاما نتردد نعاود نجري عليك
مسكات اعصابها صحةة وقررات متجاوبوش حيت الا كانت حاجتك عند الكلب تقوليه تا سيدي ، بقى ما يقارب نصف ساعة خدام ممسوقش ليها تقول محداهش
صبرات حتى عيات ومقدراتش.. زفرات بجهد وخاطباتو بحدة
-مريام ~. موسيو لخليفي ، كنتي مشغول علمني نخرج فحالي متخلينيش جالسة هناا بلا حتى كلمةة ، تا انا شلا ميدار عندي
ضربات على المكتب دقات متتالية وهي كتردد بصوت منرفز ~. موسيوو زيداان لخليفي
بلاما تردد هزات الملف وناضت فحالها ، كانت معصبة بجهد ومعارفاش فين باغي يوصل ، قبل متوصل لباب وقفها صوتو وهو كيقول
- زيدان ~ الا كان صبرك قليل ، نبغي نهنئك من دابا ونقوليك غتكوني مصممة فااشلة. "لاح ستيلو فوق لبيرو وكمل " ....ولا وجود للفاشلين فهاد شركة
باستهزاء قالت وهي دايرة لعندو ، لقاتو منزل راسو كيشوف شي وراق قدامو لكن كلامها خلاه يشوف فعينيها
- مريام ~. لو كان كلفتي راسك وشفتي شنو قدامك وعطيتينا شوية من وقتك كنتي غتزيد وحدة ضمن تييم الناجحين لي عندك هناا
جرأتها خلاتو شحال يحقق فيها ، كانت واقفة باستقامةة وعارفة اش كتخرج من فمها... من شوفاتها عرف بلي مكدويش من فراغ ... بدا يتزعز في الكرسي لي جالس عليه ويتكلم ~ معندك لا خبرة لا هم يحزنون وكتدوي ليا على النجاح ؟!
عضات على فكها من لدااخل وجوباتو بخو كلامو وصلات بيها الحد وولات كتقول الله يلعن بو هاد ديبلوم ~صراحة النجاح لي تمنيت ندوي عليه مستقبلا هو اني نكون ضمن شركة العراقي نستافد من موسيو حاتم لكن قراري مكانش بيدي ، لخبار فراسك
حك على فمو ومد يدو ليها تعطيه لملف
-زيدان ~. نبغي يكون قد فمك قد ذراعك ....جات تجاوب وقفها كيشوف تصاميمها ، ملامحو كانو خاويين معرفاتش ردة فعلو شنو هي .. كتفى يهز تليفون وتكلم مع سكرتيرتو توجد ليها فين غتخدم ، وبعد اهتمام رجع قال ~. سيري عند لبنت لي برا توريك بلاصتك غتبداي دابا وفين منبغيك لقاك واجدة ،نعيط ليك نقطع لقاك حدايا ،وملي غنكون خارج تكوني معايا ، ووجدي راسك كنسافرو كثر مكنجلسو وكنخدمو كثر مكنرتاحو
نزل راسو مكمل خدمتو فهمات بلي سالا معاها النقاش ، تاهيا مزادتش حرف ومعلقاتش خرجات على خاطرها كتقرقب عليه فطالونها لي صدعو وغير سدات لباب ، هز راسو محرك عنقو وراخيه على الكرسي وكيخمم
بيرو صغير وزوين على قدها اطلالتو فنة كيشوف على برا واخا جا على طريق وبلا باب لي داز تبان ليه لكن حمقها... هزات تليفونها وعيطت لنادية تعود ليها كيف دازت المقابلة
نادية كانت صايگة غادا اجتماع وقفت سيارتها جنب طريق باش تدوي ~. امدرا قتلتيه نعيط لشرطة لعلمية ولبوليس ونوجد راسي نترافع عليك
مريام بدا تضحك ~. كنت علاين شديت راسي صحة ، سيد باينة مكيحملش صنف لعياالات ونبصم عليها سبابو مرا
نادية ~. اديها فخدمتك خودي لينا ديك الكرطونة لي صدعتينا بيها وشوفي اش ديري وراها ، مهم باش تكون فبالك راه تحرش الجنسي عقوبتو من شهر حتال ستة ولا غرامة من ميتين درهم حتال مية ألف لي تكاول عليه غا ثوني عليا نزمم ليه
مريام قشعاتو جاي لعندها وهي تبدا تحك في عنقها وتدوي تحت سنانها ~. قطعي تا نعيط ليك رموك جااي داخل فيا
قطعات عليها وحطات التليفون ...قرب لشرجم وقف ورا كرسيها وقال
زيدان ~. عجبك المنظر !! مرتاحة في هاد الكرسي
حركات ليه راسها بالايجاب على نيتها وهو ينزل لمستواها ونطق عند وذنيها حتى تبورشت ~. ايوا خدمي ماشي تقابلي تليفون
من هنا لغدا نلقى شي حاجة تحمر لوجه ولي تخليني نبقى مجلسك هنا " دار لعند سكرتيرتو " لي سول عليا قوليه عندو اجتماع
~~~
رجعات شدات طريق غادا فين دايرة مع زيدان على ود الخدمة كانت مركزة مع القيادة بكل الانتباه واخا عقلها كيدورو فيه الف بلان وبلان ... الا عندهاوقت جد جد وقت ضحك تاهو جد وقتها كلو تركيز.. سايقة بسرعة ستين داخل المدينة احترام القانون واجب عليها وعلى جميع الناس ولكن ضروري من الجاهلين لمكيعرفوش القانون ومكحيترموهش منهم هاد لحمار لذخل فيها من لور ..تسمع صوت اصطدام قوي ... مشات وجات لول حزام سلامة لي كانت دايرة تخرج من زاج..هزت عينها في لمرايا وشافت شكون تافه لضربها ولي محترمش المسافة القانونية ....لمحات سيارة من نوع فيراري باينة ديال شي واحد لباس عليه وعاجبينو فلوس باه بتاسمت بشر وقالت في خاطرها ~~ ايو هانا نازلة ليك نخلي باك في عوض يشري ليك في طومبيلات يسيفطك تقرا شوية القانون~
قبل ما تهبط لعندو جبدات نظارتها العملية لكتعطيها جمالية من نوع اخر قدات شعرها عاد نزلت وهي في كامل اناقتها توجهت عندو عاقدة غوباشتها وجهها مكيبشرش بخير ..
ضربة الزاجة بدقات خفااف باش يهبطو حيث كان فيمي ...نزل الزاج ومكاينش هنا... ريحة كارو كتخنق .. وزايدة معنق حداه وحدة وهي مخشية فيه منظر كيجيب جلطة ولكن مع نادية جاها على كانة عندها متكتب في ذاك المحضر مزيان ..اما هو كان مغمض عينيه وعايش الحياة ماكينش هناا
حل عينيه بتثاقل هاد الاخيرين كانو في لوون العسلي ومقلوبين وحمرين دور وجه شاف فيها مزياان ... لقى قدامو بنت زوينة بزاف وغير تغوبيشة لكانت دايرة فيه عجباتو اما نظرتها خلاتو يجمع راسو وينوض يخرج لعندها وعينيه معسلين ..
نادية شافت لبنت لي معاه بغضب وبعدت على طوموبيل...اما هو كان نازل كيتمختر على راحتو وماعند مريضو باس..
مراد~ زين نخلصو معاينة ودية ولا نعطيو ليهم ؟!
نادية بكل غضب ضارت لعندو شافت فيه حتى كيصدمها كان متوقعاه ولد صغير ولكن كان شاب في مقتبل العمر ديك ثلاثين سنة غيير اناقتو خلاتها تبلع داكشي لكانت باغة تقول... داير ضحيكة على شفايفو ومبين سنيناتو لبويض ...سكتت مبقاتش هضرت ولا تكلمت ... استدركت وضع وهي تحنحن بغضب
نادية ~ ودية قال ليك ... اسمع اشريف راك ذخلتي فيا ومحترمتيش المسافة القانونية زائد غادي بسرعة مفرطة... وعاد كتشيش في طوموبيل و هاديك لمعاك باينة فيها قاصر...ايوا اسيدي الا جمعنا ليك هادشي كامل ...عدم الاحترام قانون السير ، زيادة في ااسرعة وتجاوز ستين داخل المدار الحضاري، كذالك عدم الاستعمال حزام السلامة، استعمال الممنوعات و تغرير بقاصر.. مهم الا كان عندك سوابق عدلية عندك ظروف تشديد اما الا فايت وقع ليك هادشي غادي نذخلو هنا في حالة العود ونمشو ديريكت جنايات ولقليلة يعطوك واحد عشر سنين مع باك يعطي فلوس وطلب هذا وذاك ودير الاستناف "حطات ايدها كتفكر " اممم غادي يهبطوها ليك لستة ايوا اسيدي عندك ما ضيف ولا نسد المحضر ...
بقى غير كيشووف فيها فهم غير ديك عندك ما ضيف ولا نسد المحضر
مراد ~ قبل ما تسديه ضيفي الاغتصاب لي غتعرضي ليه القاضية عاد نطقي بالحكم
القانون عندها فوق كلشي مكتعرفش تنازلات ولي تمادا معاها يمشي فين يتربى ... هضرتو الباسلة ستفزاتها وهاد نوع كتموت عليه
نادية خنزرت فيه مزيان ومحملتش جرأتو الزايدة خاكباتو معصبة ~ عرفتي شنووووو والله الا وجهك ديال لحباسات نيت ،"ميقت فيه " وزايدها حتى بتحرش وتهديد من لفوق
مراد بعوينات معسليين ~ مال زين مقلق علينا راه ما يكون غير خاطرك حكمي حتى بعشرين عام غا متقلقيش غتكمشي ليا
جبدات التلفون وعيطات لمعرفة عندها في لبوليس واول مقال.. واش كاين دم باش يخرج بوليس ولا كسيدة عادية ؟؟..
نادية كتلعب فشعرها بتوثر وكتدوي~ لا جرح لادم
_قاطع كلامها ~ دونك كي عارفة القانون جديد كيخصنا نعيطو غير لتأمين هما يتكلفو
متسرطاتش ليها وبغاتها فيه ~اسمحمد راه سكران ومعاه قاصر وزيد وزيد
عمرات ليه مزيان وكان ولا بد يجي البوليس فهاد الحالة ...مراد مكانش هنا ومواعيش وباش يزيد يستفزها شاف فيها مزياان وحقق وتم غادي لسيارتو متقل.خدمهاا وكسيراا مخليها حالة فمها حتى بان ليها راجع بلووور وقال
مراد بغمزة ~. قيدي بلاكة القاضية
عفط وخلاه وراه غا ريح
تصرفو كان كفيل يشعل البراكين في الداخل ديالها ،بقات واقفة شحال وكتشوف منين داز، قوة شخصيتها وطبعها العنيد والمتمرد ميقدرش يسرط هاد الوقاحة فحقها
نادية ضربت على الارض وقالت بصوت عالي ~. غيررر عقل علياا الحيواااان انا نوريك
تسنات حتى جا البوليس عمرات ليه مزيان المحضر ودفعاتو عاد قصدات وجهتها
في طريق تليفونها صونا عضات على شفايفها حيت تعطلات عليه وهو من نوع لي على سبة عملات سبايكر ودوزات الخط وسبقاتو قبل ميتكلم
نادية تشوف في لمرايا لي قدامها ولي فجناب رادا لبال مزيان ~. موسيو زيدان عارفة راسي تعطلت ولكن درت اكسيدون عشرة دقايق انا عندك
قطع بلاما يتكلم بالفعل دغيا وصلات حيت كانت قريبة لقاتو واخد قهوة كيف محطوطة على طبلة ، وجالس منشوي راخي ثقلو على كرسي
وكيبقشش فتليفون
نادية جايا تنهج~. كنعتاذر خليتك تسنى
زيدان هز راسو ~ هادو هما لعيالات سربيسهم لاروب
حطات صاكها في الكرسي لفجنبها ~. كنهز لهم لصاحبتي كيف غدير في الخدمة معاك وهي من نوع نعاس تعكل خمسة دقايق تسمعها خل وذنيها
بتاسم جنب بلاما يبين ~. غنگادهاا ونبردها موياان
نادية بحدة ~. لواه تكايس راه على سبة كتقلق وتسمح فكلشي وتزيد
زيدان رشف من قهوتو ~. غاا تفشااح داكشي ، مهم خلينا منها هاداك سوقي انا وقولي ليا فين وصلتي في الدعوة
حطات نظاظر على عينيها وجبدات لوراق كتوريه ~. قريب يطيعو المخزن ممعاهش اللعب
زيدان برضى ~. داكشي لي بغيت باش نوريهم اللعب بشحال كيتقام قبل ممنسى ...صاحبي وقولي خويا عندو ملهى
نادية علات حواجبها ~. بار يعنيي
زيدان ~. ملهى بار ديسكو داك الهم الكحل فين كنترفعو مهم بغيتك تقاديه ليه قانونيا حيت صحاب الحال مرة مرة كيزفو
مشى خلص قهوتو وخلص فطورها وخرج شد طريق لشركة ...كانت حادرة راسها وقدامها شلا وراق مكمشين تا حاجة معجبتها ورسم لي بداتو تلوحو ، تعنزت وعيات لاحت القلم وتكات على الكرسي كطرطق عنقها سمعات جرس ...ومن وراه گاع لي فبيروه خرج عرفاتو وقت الغدا جمعات الوقفة هزات صاكها ومشات نيشان لحمامات غسلات وقادات عكرها ونزلات تلاقات في طريقها سكرتيرة زيدان لي قالت
زهور ~. لمطعم من هنا ازين !!
مريام بامتناع ~. اختي معنديش مع ماكلة الشركات نخرج ناخد شي حاجة من برا حسن ليا
بتاسمت ليها وزادت....غادة بشوية عليها مشيتها متولة بحالها مرة مرة تطير على عينيها شي زغبة وترجعها بيدها جات تقطع وهي توقف قدامها سيارة من نوع رانج روفر كحلة قطعت عليها طريقها كيف غتسب وهو ينزّل الزاج وقال
زيدان حاك ايد على الگيدون ولوخرا على ذقنو ~. فين غادا اشريفة !!؟
حسات بصهدة طلعات معاها ولا يخلعها معرفات منين خرج ليها ... قربات شوية من طوموبيل وهبطات راسها باش تقاد معاه
طلعات حداه كتنثر ركبات السمطة وتكات على زاج كتشوف فيه بنص عين ...غادي مركز في صوگانو ومرة مرة يضور وجهو يشوف فيها صونا ليها تليفون لقاتو باها ستغربات ممولفاش ليه
مريام ~. بابا !!
كمال بدون مقدمات ~. كنعيط لمك مكتجوبنيش مكيناش حداك
مريام نقصات من صوت تليفون حيت كيتسمع ~ انا فسطااج عيط ليها فتليفون دار
كمال ~. مكاين لاش مهم راني مبايتش فدار عندي شي خدمة علميها مني تمشي لدار... واكدي عليها على ضياف لي جايين غداا بغيت تحميرة لوجه جاي ناس ثقال.. وديري فبالك تكوني حاضرة كاين لي باغي يتعرف عليك
مريام بحزن ~. واخا ميكون غا خاطرك
قطعات معاه مقلقة وزاد عليها كلام زيدان ~. شفتك كلشي معصباه تا من باك
مريام بدون شعور~. كتعرف مساخيط الوالدين .. ايوا راه انا وحدة منهم
حرك راسو محسبن وكمل طريق موقف حتال قدام مركز تجاري فخرجة المدينة
زيدان بأمر ~ نزلي ؛!
مريام كتدوي على نيتها ~ اش جايين نديرو هنا ياكما ناوي تشري متلبس !!
زيدان ~. هادا لي كتشووفي فيه انا لي مقادو شوفي شكل كيف داير وخودي ليك افكاار وغني داك دماغ راه بان ليا هاز غا لخوا لخاوي
مريام طلع ليها الدم وقفات قدامو ~. دابا حتى وقت لغدا كبرتيه فياا
زيدان ~. تبعيني وبلا بسالة
افأفات معندها مدير بقات معاه غادي ويشرح ليها تنكر الا قالت مستافدت ومفهماتش ..معلوماتو مفيدة وقيمة وماشي اي حد يعطيهم، مبخل عليها بوالو من طريقتو وكيفاش كيتكلم كيبان بلي عزيزة عليه خدمتو هي لي كانت غير كتهز راسها عيات اما هو وتقول سخفها تا مبقاتش قادرة تزيد...بقات فيه ودخلو لمطعم كاين تم
زيدان ~. خودي اش بغيتي
مريام وجهها ولا مزنگ بكثرة الحركة وصدرها كيطلع وكينزل تنفسها تقطع عيات بالمعقول ، بلا متشوف لقائمة ختارت ستيك دجاج وشلاضة وستأذنات منو للحمام
غسلات وقادات حالتها عاد خرجات لعندو كانو جابو ليه لغدا ، بان ليها واخد ليه شلاضة كينقب منها جلسات وباشرات الاكل في صمت حتى كسرو
مريام قهرها بقميعو ~. راني كندوي معاك واش ماشي من خقي نسول... انا عمري سافرت مع شي حد مكنعرفوش
زيدان دار لعندها محمر فيها ~. واش قلت ليك غنمشيو نزهاو
غادي مكسيري وهي حداه مكونة طالعة ليها النقشة ..مسافرة غدا ومعاه وعاد قالو بسم الله وزيد لعراضة لي عندها ، راسها تزير وبدا يتبخ حطات ايدها جهة نواظرها وقالت بترحي
مريام ~. موسيو زيدان ممكن تعفيني هاد زوج سوايع لي بقاو من شركة وتخليني نمشي لدار ، يالله نوجد راسي
زيدان بانفعال~مالنا فين غادين لعرس ، طريق لي داتنا غتجيبنا ، وغتباتي فداركم ...
شافها سكتات وهو ينطق متقي فيها وجه الله~. اري العنوان !!
ملاتو عليه بفرحة ، نهار اللول سواء تاع الخدمة ولا لقرايا كيدوز قاصح بجهد ، وصلها حتال باب دار تشكراتو ونزلات تبع ليها العين حتى دخلت وتحرك نيشاان لفين ساكن ، كان مسخسخ على اللخر طلع نيشان لبيتو لاح المونطو وفك ازرار القميجة حطها زول سمطة ونصل سروال بقى بالبوكسر عاد دخل تحت من رشاشة حاط يدو على الحيط ومنزل راسو لتحت... حس بعظامو بداو يترخفو وعنقو مبقاش مزير عليه
غسل شعرو وكمل متبقى وخرج لاوي عليه فوطة ..يالله جبد سروال سيرفيت كيلبس فيه وهو يسمع لغوات ...حرك راسو بأسى ملي سمع صوتها وبالخف كمل لبسو وخرج قاصد بيتها كيجري
مينة كتحزر فيها ~ نهاك الله اصباح هاكي دواك شربيه
صباح كضرب ليها فيديها ~. بعدي مني نتي " كتغوت وكدور في البيت " مغنبقاش نشربو .. عيييت مننعس انا ممريضااش نتونا لمرضتوني جريتو ليا على راجلي نتوما سباب نتوما
حل باب البيت بجهالة ومشى لعندها نيشان معنقها وكيقول
داكشي لي كان جلس فوق فوطوي مقابلها وكيضحك ليها وخاطرو عالم بيه الله ..كانت كتعزل في الحوايج وتوريه ..دخلت ليه الخدامة كاس العصير لاح فيه الحبة تاع دوا وحتى تاكد بلي دابت عاد مدو ليها
زيدان ~. هاكي قبل منخرجو شربي هاد كويس باش تلقاي طاقة
صباح خداتو من عندو بلا متردد وشرباتو فدقة وعطاتو لكاس خاوي ~. يالله نزل تسناني لتحت تا نبدل
حرك ليها راسو وخرج من لبيت عاقد حجبانو ..تكى على الخيط بالقرب من غرفتها حالتها كتقطعو طراف...كون يتشرا عقل ياخد ليها واحد ولا هاد العذاب لي عايش فيه هو اما هي ختارت لا وعي ولقات فيه راحتها مبعدة على ظلم الدنيا ...
"صباح لخليفي في بداية الخمسينات عمة زيدان وصديقتو وختو كلشي مجموع فيها ، كان بئر اسرارها وهي المثل مقربة منو ومتقرب منها بزاف ..شاءت الأقدار ومرضات والسبب عدة صدمات لي خداتهم في حياتها داو ليها لعقل ..ولات وراهم تنعس كثر متفيق ودوا ميفارقاش لدرجة كرهاتو ومبقاتش حملات تشربوو فكل مرة زيدان كيستخدم الحيلة معاها حتى كيعطيه ليها حيت معندوش خيار اخر يا إما دوا يهدنها ولا تبقى تغوت ولي جات قدامها تهرسها وتعرض راسها للاذى ...
حس بالحركة نعادمت وهو يدخل عليها لبيت لقاها تخشات في فراشها وتغطات كتفرج غير شافتو وهما يلمعو عينيها بالفرحة
صباح مادة ليه ايدها ~. زين ديالي جيتي من سفرررر
رسم ابتسامة مزيفة وقرب لعندها شاد في ايديها لممدودين ليه
زيدان ~. عاد وصلت دابا ونتي اول وحدة دخلت لعندها " باست ايدو وقالت "
خرج مخليها غا كتشووف هزات صاكادو تاعها وقبلات مها وخرجاات كاعية غادا مرفوعة موعات غير على صوت تسمع كلاكصون قوي و فران صيك تضرب حداها خلاها تغوت على جهدهاا وشادا قلبها مخلوعة
"يمكنك إغلاق عينيك كي لا ترى ما لا تود مشاهدته ، لكن لا يمكنك إغلاق قلبك أمام ما لا تريد الشعور به"
خارجة كاعية ومرفوعة بطريق كلشي كيبان ليها محدود والاصوات بعاد عقلها خدام كيدي ويجيب في كلام باها ويحلل تصرفاتو لي مبغاتهمش يكرهوها فيه ، مفطنات غير على صوت كلاكصون مجهد وفران صيك تضرب عند رجليها .. حطات ايدها على وذنيها وغوتات قلبها بدا يضرب بالخلعة معرفت باش تبلات ...
ترجل من السيارة الشخص لي كان سايق هو ومرتو لي كانت فجنبو ...خرجو لعندها كيجريو
مريام مزال كتحاول تستوعب ~. هاا لا لا بخير موقع ليا والو
_ نطق الزوج ~. سمحي ليا خلعتك ولكن لولا لطف الله كنت غنضربك
مريام بعد ملتقطت انفاسها ~. صافي موقع باس !!
كانو ضايرين بيها كتدوي معاهم وعينيها على سيارة مغريباش عليها كانت في جهة الاخرى بانت ليها وقفات وتم نازل منها خرجات عينيها كتحقق فيه كان هو نازل بنخوة وعينيه فيها ،تم جاي لعندهم ملامحو مكيتفسروش باينة فيه صابح ساخط اول موقف قال
زيدان بتساؤل ~ اش واقع هناا ؟؟
- جاوب سيد كيتأسف ~. الا كنتي كتعرفها راه حفظها الله شوية ونضربهاا والخطأ منها
زيدان خنزر فيه ~. كيفااااش الخطأ منها ؟؟ ونتا مالك صايگ ولا طاير حتى كنتي غضربهاا ، هاذا شارع عادي ولا اوتوغوت
مريام قلبها بدا يضرب ملي شافت زيدان محمر وعينيه في سيد باغي غينوضها معاه بدات ترطب ~. صافي اسيدي موقع والو ...انا لي كنعتاذر الخطأ ديالي سهييت
عض على فكو من لداخل محرك راسو لراجل ~. تيسر لفين غادي اشريف ونتي "جرها حداه وكمل كارز على سنانو " هاد المرة عينيك يكونو على طريق خوي داك الراس من تخربيق "ضربها ضربات خفاف لظهرها " سيري ركبي تابعانا طريق
سبقاتو حايرة فيه وفتصرفو وكتقول مع راسها لا واش بصح غوت على سيد على قبلي !!
ركبات معجبة ...ركب حداها وقلع بعدما دور وجهو لعندها ورجع ركز مع سياقة~ اري تليفوونك !!
"بقات كتشوف فيه بلاما تهضر تا رجع دوا بحدة ". مكتسمعيش قلت ليك اري تليفونك !!
دورات وجها مخسرة سيفتها وكتلعن في خاطرها جبداتو من صاكادو ومداتو ليه
مريام ~. هاهو مالك محتاجو !!
زيدان خداه منها بنثرة ~. معندي مندير بيه وكيبان ليا تانتي مبغاش غنلوح مو من شرجم
خرجات فيه عينيها وبغات تاخدو ليه ~. نتا فعار الله " برقة " مالك ااستاذ؟؟
حط ايدو على فمو مخبي شبه ابتسامة فلتات من ردة فعلها ومن كلمة استاذ وكيفاش خرجتها ... لكن بقى محافظ على هيبتو ورجع تكلم بصرامة وهو كيوريها ايكغون دتليفون لي كان عليها اتصالاتو
مريام حلات فمها بعفوية وقالت ببرود~. اااه والله مسمعتو , راه كنت كنزرب باش منتعطلش ومديتهاش فيه داكشي علاش....
مدو ليها بلاما ينطق ولا يشوف فيها ورجع ركز مع الطريق ...الوجهة كانت مدينة القنيطرة ....صونا ليه تليفون تشغل معاه غادي وكيدوي على خدمة كيف ديما مرة يغوت مرة يتهدن لحال سخن طلق لكليمة وحل شوية شراجم....وبغى يتخلص حتى من لافييست لي لابس زول يديه على فولون وبدا يحيد فيها ولايني تعنكش دور راسو لعندها ومد ايديه جهتها واشار ليها بعينيه باش تحيدها..
حركات راسها بواخا مقربة لعندو كتعاون فيه ...ريحتو كانت خفيفة وفنفس الوقت مميزة عجبتها بزااف ....حناكها تنزگو معرفاتش واش من حر الصهد ولا بسباب قربها منو كان ذراعو على ذراعها اقل من دقيقة لي ستغرقات حسات بيهم طوال ...حطاتها في الكرسي ورجعات لبلاصتها دغيا مدورة وجها جهة زاج شاغلة راسها بطريق كتحسب شجر ولبلايك مبغاش تشغل راسها بيه محساتش براسها حتى غيبات.....دور وجهو لعندها بعد مسالا الاتصال لقاها حالة فمها وناعسة مكيناش هنا بقى شحال كيتامل ملامح وجهها لي كانو مختالفين على صفاتها ...واخا عينيها كيوحييو بالحدة والصرامة ولكن باينة من نوع المطيع لي دغياا كتنسى ومكتحكرش بزاف وغير كتصنع القوة ...خرج يدو من شرجم وشاف قدااموو مركز في سياقة وغادي عافط باش يوصلو دغيا محنش في السرعة وهو في الاصل من نوع لي كيموت عليها ...وقت قليل ودخلو لمدينة القنيطرة وقف عند اول بقال خرج خدا قرعة لماا شربهاا وخلا شوية حل الباب من جهتها مكالي راسها بيديه ...نعاسها ثقيل محسااتش بيدو لي شادا وجها منفع معاها غير لماا لي تخوى عليها خلاها تفيق مفزووعة وشهقات بصوت عالي
صبرات وسكتات معودتهاش معاه بقات حداه كتمشى فجنبو لي شافهم من بعيد يقول مصاحبين ولا كيتحابو ....دخلو لقهوة وجلسو في طبلة كيفطرو كانت عاقلة على ماكلتها ومتسوقاتش ليه كلشي الا جوع ..كلى شوية ورجع باللور كيشرب قهوتو اما كانت كتكاكل وكتدوي معاه على الخدمة باش تلهي الوقت
مشى خلص وخلاها كتجمع الوقفة تابعاه خرجو على برا بان ليها كيدوي فتليفون من جديد مشغول وهي تسبقو لطوموبيل حل ليها لباب من بعيد وطلعات ..نزلات لمرايا لي قدامها وخدات گلوز دوزاتو على فمها وذهنات ايكغون على وجها وايدها تصرفها طبيعي ومولفة هاكدا ولكن هو محملش لبلان عقدهم فيساع وقطع التليفون زاعف وتم طالع ليها مشربن..
زيدان خبط لباب ودار لعندها كيغوت ~. واش انا بلاكة لي غادا معاه ، ولا ممولفاش برجال فعائلتكم لي يحكموك شوية...
عمر شي حد دوا معاها بهاد الطريقة تاليه ، بينها وبين راسها مدارتش شي حاجة اوفر حيت مولفة تعكر تكحل تريح في طوموبيل وتبدل گاع ، ستفزها بهضرتو حساتو كيقول ليها طاي طاي نتي ممربياش وخاص لي يربيك
مريام ~. ايوا الله يجازيك بالخير اسيدي شفتك وليتي كتعاير ومرتاح ومحاس بحتى حاجة مالي شدرت ليك ملي شدينا هاد الخرجة ونتا تنهزر فيا ...رجلتك ديرها على مرتك ولا ختك اما انا مزال ملقيت لي يحكم فيا بدات تحيد في سمطة ~. اسيدي خليت ليك هاد زبل وهاد السطاح وهاد لقراية تاع لويل لي ولات كرامتي تمرمد على ودها ندمت على نهار لي قريت فيه انا گاع
حلات لباب بغات تنزل وهو يمد يدو سدو على جهدو وطرق وقال بالغواتت
زيدان عينيه حمارو دغيا ولا يخلع ~ هييييييييه دوك الافلام لي كتفرجي فيهم تاع تنزلي ويتبعك يحزر راه غا خيااال ، لي قدامك راه الواقع.. غتبثي الارض شوية انا لي جبتك وانا لي نرجعك واش كتسمعي ولاا نعااااود
عيات تلعن شيطان هضرتو متسرطاتش ليها ولات باغا نهار يدوز على خير وترجع بحالها وعمرو باقي يشووف وجهها
كمل على طريقو عادي بحالا لي حداه حيط مكيحسش.. السكون غيم عليهم تا حد مكينطق كيتسمع غير صوت طريق دخل لمنطقة خاوية كلها اراضي...
موقف تال وجهتو لي كان جاي قاصدها كانو شي سيارات تما كيتسناوه نزل وقبل ميسد الباب قال
زيدان ~. هزي فاش تقيدي وتبعيني !!
معبارتوش وحلفات لنزلات صافي كتافات منو شنو غيجيها ورا هادشي غير المرض بقات في بلاصتها كتشوف فيه كيفاش نازل يتعنگر ولايح لافيست على كتافو مغرور وحاس براسو ولكن كلام الحق يتقال الزين زين ...كان كيتمشى بهيبة والاناقة كتقطر من بدلتو الرسمية بألوانها الزاهية لغالب عليها اللون الارزق المميز لي كيدل على شخصيتو الرزينة والذوق الرفيع اما شوميز كانت بلون السماوي و مسحوبة بخطوط رفيعة بيضاء لي ضايفا رونق خاص لشخيصتو المتقلبة و سروال رسمي بلون ابيض عكس قلبو الكحل كان مقاد شعرو بشكل عشوائي هاد الاخيرطاغي عليه لون لكحل على الرغم من خصلات شيب لي مفرقين عليه...سلم على صحاب المشروع وقبل ميبداو يتذاكرو في تفاصيل دور راسو ليها لقاها مزال فطوموبيل ستأذن منهم وقصدها كيصوط معندوش مع فعايل دراري صغار كيكرههم
حل عليها لباب وقال
زيدان ~. نزلي تاخدي مينفعك هاظشي ناس كيخلصو عليه لفلوس ونتي الا جات عندك الفرصة ستغليها !!
مريام بجدية ~. مبقيتش بغيت ... انا هنا حتى تكمل شغلك ونرجعو منين جينا وديك ساع عمر هاد لوجه مزال تشووفو
حط يديه بزوج متكي على سيارة خلاها تدوي على خاطرها حتى سالات وحل ليها لاسانتير
زيدان ~. عتابريه اخر درس ومعلومة تاخدي يالله نزلي !!
قصح معاها وزاد فيه بنسبة لينا ولكن ممعتارفش بيها بينو وبين راسو ...عندو ربعين عام شارب عقلو بجهد ، مكيعرفش يزوق الهضرة ...نقدرو نعتابروه دقة قديمة ولا متخلف بنسبة ليه لي كيدير فيه هو الصح ماليها حتى معنى وحدة تكون مرافقاه تقلل من قيمتو وتعدا خطوط هو راسهم ،تقاد وجهها في سيارة ووسط الشارع لي كان عامر بنادم واغلبيتهم عينيهم دازو ليها هادي مكايناش ...
شافها هزات وراقيها كتستعد تنزل عاد تحرك غادي ويتذاكر ومرة مرة يدور لعندها يعطيها ملاحظاات
زيدان ~. كيف سمعتي هناا غتكون مجموعة مدارس... اولا غنلعبو على مسااحة لي عندناا نستغلوها مزيااان
.. جرها من يديها ووقفها حدااه باش توضاح ليها الرؤية ~. شوفي مزيان وحلي عينيك لحساب خاصو يكون في دماغك ، المهندس ديما نظرتو كتختالف على البقية الا كانو هما كيشووفو هاد الارض خاوية ...حنا لا خاصنا نبداو نعمرو فيها فدماغنا وكل قنت نعرفو اش غيجي فيه وشنو ميصلاحش ليه واش مفهوم
مريام هزات راسها مبهورة ~. مفهوم !!
حط يدو على خصرها بعفوية وزيدها قدامو كشرح باقي تفاصيل
كان كيدوي بطريقة سلسلة خلا كلشي موافقو الرأي ....قنعهم وهادشي معروف عليه...دماغو عامر بزااف يغنيك معلومات ازيد من ساعتين وهما واقفين كيتافقو على تفاصيل والشروط والمدة وفي الاخير ختموها بغداء عمل لي كان فجوايه المغرب دگدگات ولات باغي فير تحط راسها طريق العودة جاتها طويلة سيغتو مع سكات لي كان لا من طرفو ولا من طرفها من اول مركبو ...تحلو عينيها ملي وصلات لدار بانو ليها من بعيد ضواو شاعلين للحظة نسات اش كاين ليوم عاد ستوعات ...شلا طونوبيلات مستفين على براا ووحدة عاد كتبراكي بان ليها كمال خارج بنفسو كيستقبل الشخص لي عاد وصل ... زيدان ضيق عينيه كيشوف في فيلا سي كمال لي قدامو وقال بتساؤل
-عندكم شي حفلة
مريام حيدات الصمطة وحلات الباب ~بابا عارض على صحابو هذا مكان الله يعاونك..... قالتها موركة عليها ومشات فحالها بقى واقف شحال متبع ليها العين بانت ليه سلمات على باها لي عرفو من سنو وشبه لي بيناتهم ومدات ايدها سلمات على الشخص لي كان عاطيه بظهروو ومن خلال اشارات ايدين بلحاج فهم بلي كيعرفهم على بعض
قصة الحب أقوى من أي إتفاق
محتوى القصة
التنقل بين الأجزاء