لأنك سماح الجزء السابع

هرسها ومحى كل لحظة زوينة عاشتها معاه..بقات فطريق كي الحمقة غادية وتبكي وتنخصص..فالاخير خدات طاكسي لدار بغات هي تنفارد براسها وتبكي بحسرة ..كي وصلات ديريكت لبيتها جاب الله كريمة مكايناش خرجات تقدا مقدية الشهر اما كون تفرشات..

تلاحت فوق السرير تتبكي بصوت مسموع ظنا منها مكاين حد..تتبكي وتشهق تا دخلات عليها يسرا مخلوعة..هاد الاخيرة لي كانت تتحفظ فبيتها..شافتها هاكاك تخلعات مشات عندها تتنوض فيها من فوق ناموسية لتتفاجأ بوجهها مشلل بالما والحمورية..تتبكي علاين تموت بالبكية .. فلاخير وخراتها بكحات كثيرة وتجيفات..سرعات يسرا جابت ليها الما شرباتو ليها وعنقاتها تتواسي فيها رغم انها معارفاش علاش تتبكي ولوخرا هي تحطات على صدر وبقات تتبكي بألم وحسرة وتزير على بيجامة تيسرا مكرهاتش تغوت وتصرخ بأعلى صوت..كرهاتو لدرجة ممكن تشوفو كيموت ومترحمووش..عاملها بقسوة ومحنش فيها وسمعها كلام كون سلخها وميقولوش..

بكات جهد ساعة تا طابت كتسكت وتعاود تبكي ويسرا عاطياها الخاطر مسولاتها لا علاش ولا كيفاش..حيت بعض المرات تيكون المواساة الوحيدة هي احضنك الواحد واسمع ليك فقط..لكن فحالة سماح مكانتش بغات تهضر حيت الهضرة وحلات ليها فحلقها..بغات هي على من تحط الراس

بردات غدايدها فالبكا مزيان وفلخر غطاتها وباست ليها راسها وخرجات محسرة علييها..تنهدات ومشات جابت ليها كاس تعصير تليمون خلاتو ليها شرباتو ليها بزز وهي ساكتة ودموع حرقة كينزلو من عينيها..

يسرا:(بتساءل)منصور!!!

سماح:(كي سمعات سميتو وهي تنقز دمعة من عينيها)هءهءهء اه

يسرا:صافي رتاحي..تا تبردي ونهضرو

سماح:(تتنخصص)عفاك متقولي لتاحد شي حاجة..

يسرا:هي نعسي انا نقوليهم عييتي وبيتي تنعسي

سماح:هءء واخا

غطاتها وخلاتها متحسرة عليها..حتافظات بالصمت مقالت لحد شي حاجة مخليا سماح كتعيش الحزن داخلها.. 

****

تنكسر الاجنحة حينما تخلف الوعود

وتعدو الحياة مثل سابقها

انك يا سيدي تقطف كل زهرات حياتي

تدمر كياني وتعيديني الى مرحلة الصفر

كيف لك ان تكون بتلك القسوة؟؟

ان تعطي لعيني دمعة

****

مرت ليلة كئيبة على سماح دوزاتها بكا كلها فصمت..وأصعب شيء هو تكبح صرخة فداخلك..تتعصر ففراشها وتنخصص..عينيها ولاو حمرين ومنفوخين بالبكا..وقلبها كيتقطع..كأنما مات ليها شي حد..كلشي توقعات منو الا انه يسالي معاها يدون سبب وللسبب تافه..مسمعش ليها وعاملها كأيها ناس والاكثر لوى ليها يديها بحال شي وحدة دايزة وصافي

ناضت مع الفجر تتمسح دموعها والدوخة فيها لأنها مكلات والو..تتمنعهم يسرا اجيو لعندها وقنعاتهم انها حزينة بسبب رحيل عادل لي غيمشي غدا..

توضات وتوجهات للقبلة تتصلي ومع كل نطق لايات الله تتطلق بكية وتنخصيصة..تدمرات كلها ..بكلمة كيطيب بخاطرها وبكلمة كسرها ولي دارو مغيشفعش ليه غلطو ..

رجعات لبلاصتها تكات وعينيها كيشوفو فاص وسط الضو الخفيف وتنهد..هزات تيليفونها لقات مكاين تا شي إتصال منو دخلات بلوكاتو من كلشي ومسحات نمرتو ورجعات بوضعيتها متكية كتقلب على نعاس من جديد..

مع الصباح فاقت على يد يسرا تتخبرها باش امشيو اودعو عادل فالمطار..ناضت بدون جواب مكسورة الخاطر..وعينيها منفوخين بالبكا وراسها تيزدح بالشقيقة بلا نيوفها لي مسدودين..لبسات عليها دغيا وهي تدخل مها وقالت: ميمحة واجدة

تلفتات شافت فيها وقالت:اه

زينب:(انفوا لمحاتها تخلعات)سماح مالكي ابنتي؟؟(قربات منها وعنقاتها سماح)مالك اماما..

سماح:(حطات راسها على كتف مها وطاحت دمعة صغيرة على خدها)والو اماما هي مسخيتش بعادل..

زيني:(بريب)وتبكي ابنتي هاكا؟(بعداتها عليها وشدات وجهها)مالك..

سماح:(تتحني عينيها وتهزهم)خفتو امشي تما وانساني..

زينب:هه حمقة عادل كيحماق عليك معمرو انساك

سماح:(تتحاول ترسم ابتسامة خفيفة والدموع تيزلقو من عينيها)عزيز علي هو صاحبتي وختي وكلشي..

زينب:دعي معاه يسر ليه الله امرو واجيب ليه الرزق وارجع ديك ساع

سماح:هه ياربي امين..(بغات تقلب الموضوع مسحات دموعها)بابا كاين؟؟

زينب:لا خرج..نمشيو نسلمو على عادل 

سماح:واخا

خرجو لقاو يسرا تتسناهم مع الياس لي هي شاف سماح باكية ستغرب وقال:مالك؟؟

يسرا:(دغيا نطقات)مسخاتش بعادل

الياس:كاع مدارتها هادي لي ختو هههه متكونيش تتبغيه؟؟

سماح:(ببرود)براكا

يسرا:ياله 

مشاو كاملين فاتجاه المطار وسماح منطقات بوالو تاوصلو لقاو اهلو تيتوادعو معاه..سلمو عليه وهو لي ضاحك ناشط باغي هي امتا اخرج من المغرب..قربات ليه سماح وعينيها مغرغرين تتشوف فعينيه فرحة عارمة..عنقاتو بلطف وهو يزير عليها وقال بهمس فوذنها:دوزيها على كلشي الا انا..نوصل وندويو

سماح:(زيرات عليه وطلقات دموعها)مكرهتش كون مكنتيش مسافر..

عادل:متبكييش الحماارة(بعدها عليه ومسح دموعها وتيهضر بجدية)ديجا قلت ليك ميصلاحش ليك

سماح:(حركات راسها للجنب باسف)عارفا هء(مسحات دموعها)صافي سير..دير طييسة ورجع

باسها فراسها وقال:تهلاي فرااسك ولي وقعات نبيها توصلني..

سماح:(تنهدات)ان شاء الله..طريق السلامة تهلا فراسك كول مزياان وإلى تزيرتي فالفلوس عيط ليا واخا

عادل:ضروري

توادع مع مو لي دارت ليهم جنازة ودخل للمطار فرحان وشحال تمنى هاد الرحلة لي فيها بغا يبدا حياتو

اما هي بقات واقفة تتشوف ودموع يتساقطو من عينيها ..عنقاتها مها وقالت:سماح..

سماح:(مسحات دموعها) هنن نعام..

زينب:عادل هاهو مشا..ولاش تتبكي

سماح:راكي عارفاني بكااية هه ياله نمشييو

زينب:هانتي اماما انا نوصلكم ونمشي للمدرشة

سماح:بلاش اماما انشد طاكسي

يسرا:اخالتي انا وسماح نمشيو فطاكسي هي سيري

زينب:ردو البال..الياس بسلامة اولدي

مشات زينب وتبعها الياس وكذلك اهل يسرا وبقات هي وسماح راس فراس..تأبطات ذراعها وتمشااو مع بعض تا قبطو طاكسي ويسرا مهضراتش بتاتا..انسانة هادئة وكتعرف ان الواحد لبغا يعاود غيعاود ميحتاجش تسولو..خلاتها على راحتها..

****

عاشت تجربة الحزن والفراق الموجع من جديد..والدمع لي ذرفاتو مذرفو حد..مع اهلها تتعيش دور انها مزيانة وملي تنفارد براسها كتحطهم دم..ليالي نهارت فيهم وبكات فيهم وتنخصصات..خاصة فاش كتلقى اتصالات من نماري مكتعرفهمش..

عارفا هو لي معيط حيت تتطلع ليها ابيل ديالو شدها البلوك..كرهاتو وكرهات راسها وكان كيخصها ايام حزن طويلة باش تجمع راسها..

حالتها كحالة اي انسان خسر شخص عزيز عليه فالموت ودار عليه عزو..نفس الشيء عاشتو حساتو مات فداخلها..وعزلات راسها على الناس ..

اليوم العاشر باش معتاكفة فالدار ..متتخرجش نهارها كولو فالبيت بين الافلام والكآبة..تتفرج فافلام درامية وتجلس تبكي معاهم وتزيد طين بلة..

دخلات عليها يسرا مبتاسمة وقالت:ميمحة ياله نخرجو

سماح:مافياش والله

يسرا:نوضي ازين راه عيطات ليا ضحى لقات نمرتك طافية

سماح:طفيتو

يسرا:سولاتني واش نخرجو مجموعين انا ونتي وهي ونهيلة ومروى مرات خوها

سماح:(بامتناع تتاكل فشكلاط)مافيااش(بغير نفس)

يسرا:(جلسات حداها بهدوء)ميميحة تسنيتك تجي عندي تعاودي ليا وماجيتيش..مكتحسبينش ختك؟؟

سماح:(بحزن)حااشا..نتي راك ختي والله ولكن(تنهدات)ماقاداش نهضر..

يسرا:(بابتسامة)معلييش غير هو انا هنا ديما وقتما بيتي تهضري..واياله خرجي شوي اضربك البرد 

سماح:(تنهدات)فف واخا انا نلبس..

خرجات يسرا وخلاتها تتشوف فاص ليها..تنهدات ومسحات على وجهها..وقفات حدا المراية تتشوف فراسها كي ذبلات..عشر ايام كافية باش تذبال فيها الوردة وكافية باش تحيى فيها

مشطات شعرها بشوي تافكاتو حيت عشر ايام متمشط داك شعر تهمل ..ماحدها تتفك فيه وتعكس وتبكي تتنخصص بحالا تاهو شاد معاها زكير..دارت ليه سبولة خفيفة وهزات حوايجها لبساتهم..وعكير خفيف صافي..

خرجات عند يسرا لقاتها جالسة كتسناها برحابة صدر..بتاسمات ليها وناضت تأبطات ذراعها وودعو كريمة لي طالقا شعبي تتركز ممسوقاش للعالام..

شدو طاكسي وسماح هي ساكتة تاوصلو للكافي فين دارو معاهم..كافي راقي وزوين..سلمات عليهم بابتسامة صفرة وجلسات مجمعة معاهم بالقليل ماشي بنفس الحيوية لي فيها...

كيتشاركو الاخبار والاحداث..يعني جمعة نسائية..ومن بعيد كاينا عين متبعاها ملي دخلات..عين ثاقبة ومليئة بالشوق ملي دخلات وهو حاضيها

كان برفقة خوه عبد المالك كيشربو قهوة وملي لمحها وهو مرفوع حاضيها من بعيد كي ساكتة ومرزنة..مطفية بهاد المفهوم.. مكانش قل منها لأنه اصلا هو ديما باين فيه الحزن والتعب..

عبد المالك:هيي فين غطستي..

منصور: (مسح على وجهو)والو معااك..شنو قلتي

عبد المالك:كندوي معاك على الحاج

منصور:(بانزعاج)واش انا مسالي راسي نبقا نديها فيه اش تيدير؟؟اتزوج ولا اجلس

عبد المالك:اصاحبي راه شرف وهتر..ويتزوج

منصور:(مكمش عينيه فسماح)نتا سقتي الخبار هي لهادي..

عبد المالك:(دور وجهو تيقلب فين تيشوف)شكون حاضي(دار بتسامة خفيفة)شي وحدة.. 

منصور:لالا..معااك(بجدية)عبد المالك قلب علي موضوع بااك..ينتاحر هو كاع انا مالي..

عبد المالك:سعداتك بهاد برودية القلب (تنهد)انا ماحيلتي ليه ولا لمراتي لي باقي مأزمة..

منصور:(شاف فيه مخنزر)من نيتك اصاحبي..مراتك هي لولة..واسيها و وقف معاها حيت محتاجة ليك واش عارف شناهيا تخسر كبدتك راه تولد عشرة ومتسناهاش..

عبد المالك:انا هي مصبر راسي وصافي هي لي تصدمات..تاخرج ليا هاد الموضوع من جنب

منصور:اضبر لمخو..اتزوج ولا يجلس(بانزعاج)عفاك متبقاش تجبد ليا مواضيعو لهلا يقلب بيه..جومونفوو..

عبد المالك:الله يهدي ماخلق وصافي..ففف(بتاسم)با منصور شكون حاضي..

منصور:صبر هاني جااي

عبد المالك:تبرع ماحدك سليباطير

ناض منصور من بلاصتو تابع سماح لي مشات لطواليط تغسل وجهها..

متبعها من لور كيزرب شوي باش الحقها..هي لي تتمشي بشوي كيف ديما..مكرهش اتلاح عليها اعنقها من شدة الشوق..ياله بغات تدخل لطواليط وهو يجرها من دراعها تا شهقات مخلوعة..هي شافتو وهي تبدل نظرتها لتخنزيرة واكبر نظرة باردة هي لي عطاتو..

حقق فيها الشوفة..فعينيها لي منفوخين ولي سيغن لي كيشوفهم هي فراسو منفوخين..والفيم لي معكر وديك الوحمة الحمرا والخلفة..كلها على بعضها توحشها بزاااف..

نطق بصوت هامس:صافا؟؟

عطاتو نظرة باردة وجرات يديها ودخلات لطواليط ممسوقاش ليه..قضات حاجتها وهدنات راسها بزز..هي شافتو بحالا شافت الجنون..تعطلات شوي على امل تلقاه مشا ولكن بقا عاس عليها.. غسلات وجههة وجمعات شجاعتها وخرجات متجاهلاه بحال الحيط لي فاص ليها..عاود جرها من يديها وهي تصيح فوجهو:طلق منييي ابناادم

منصور:بشوي عليك..اجي نهضرو

خنزرات فيه بحقد وقالت: غتبعد مني ومتعاودش توقف فطريقي.. 

منصور:(تيقرب ليها)خلينا نهضرو 

سماح:(بنفور)مابقا لينا علاش ندويو اسي ران..(هزات صبعها فوجهو)انقوليك كلمة وحدة واحلة ليا فحلقي(بمرارة)حسبي الله ونعم الوكيل فيه..

زادت وخلاتو مصدوم من دعوتها..كتحسبن الله فيه..مظنش غتوصل لهاد درجة..خلاتو حال فمو وتيسرط فريقو بصدمة..فحين هي رجعات لبلاصتها بحالا موقع والو..توترات اه تخلعات بزاف لكن خلاتها فقلبها ومبيناتش ليه..بغات توصل ليه باي طريقة انها تتكرهو..

فحين هو عض على شفايفو وزاد معاودش شاف جيهتها جلس حدا عبد المالك وقال:نمشيو

عبدو:ياله

خلص وزاد مغير وكلمتها الاخيرة تتعاود فدماغو..تما عرف راسو اذاها بزاف وعطاها القاسح..والاخضر من عمرها حرقو..

مغيخفاش عليه انها كتعاني..حيت التعب واضح عليها وكذلك العينين خسرو بريقهم بالدموع..كانت متدمرة وباين عليها التعب والعياء..العياء النفسي والجسدي

تفارق مع خوه وشد الطريق للانهاية..شاعل كارو تيكمي فيه مغدد وعينيه فيهم حزن كبير..حس براسو انه داير ذنب كبيير وبغا يكفر عليه..

اما هي هي شافتو خرج رتاحت نسبيا وكملات جلستها مع البنات مغيرة شوي حيت شافتو..كملو وناستهم وناضو رجعو فحالهم بعد جلسة نسائية فوجات عليهم شوي

****

فدارو جالس بوحدو حاط قدامو الغبرة كيسطر منها وارتاح شوي من هم هضرتها ..كيعيش حزنو على طريقتة مغينكرش انه توحشها بزااف وكثر ماكتصور..كانت هي الشمعة لي مضوية داك الظلام فحيااتو

ولكن دائما بكثرة مكنشوفو الشمع ضاير بينا كنبغيو نجربو نطفييوه..

نفث من سيجارتوو وعينيه مضببين من شدة التعب..ضغط على زر من لاشين لي حداه طالق فيها اغنية فوضيل مع عساف..كيحس براسو فاش كيسمع ليها راه سماح حدااه..

سماح الحنونة لي شافت فيه لي مقدر حد اشوفو..لي بقات معاه واخا كيدير ليها لي كيعصبها ولي تتفكرو ديما وتهتم بيه..سماح لي جرحها وعطاها هضرة كون سلخها ومقالهاش لكن واحد بحال منصور اش غيعرفو فهضرة خايبة ولا زينة

ناض ديك ساعة بعدما طفا اخر كارو هز سوارتو ومسائلو وخرج فداك ليل جوايه الحداش..مهم اشم الهوا..من شارع لشارع من زنقة لزنقة ومراكش باقي مسكتاتش الا بعض الاحياء..محس تا لقى راسو قدام دارهم واقف بعييد بالاوطو وعينيه مترقبين الشراجم بلهفة..كيدعي الله هي تبان ليه..لكن خاب املو ..بقا تماا متحركش بتاتا تا طفاو ضواو وهو باقي تما.. كما باكي كاملة تالكارو تا ولات طونوبيلتو بحال شي مبيخرة..وعينيه على دارهم..عقل تيقوليه دق عليها وعقل تيقوليه تشريها ليها الى دقيتي وبين هضرة العقول المفرقة عندو لقا راسو صباح طلع وهو ممحركش من تما..صونا عليها بضع مرات لكن تيلقا راسو مبلوكي..

الصباح صبح والشمس شرقات وهو باقي مقرق عينيه من طونوبيلتو..حدو تحرك تا جاب باكي تالكارو احل بيه عينيه لي اصلا متسدووش..

واحد التعب فيه ميمكنش اتصورو الواحد..تعب نفسي وجسدي وهو لي ضعفو كتعيشو سماح..نفس حالتو غير هي سهرانة مع فيلم تتنخصص عليه تتفكر منصور..تجلس لي تجلس وتبكي وتنذب زهرها..تمنات كون متعرفاتش عليه زكون بقات منفخة عليه نهار لول كون مطيحش فهادشي..

فالاخير نعسات بعدما صلات الفجر سويعات قليلة وضرباتها الفيقة بالوجع تليغكل لي داير فيها حالة..مخسرة سيفتها واوجاعها زادت..ماحيلتها للقلب ولا للرحم ولا لراسها..ناضت غسلات وجهها الشاحب وملامحها مخسرين مع الالام..ستغربات من مجيئها المبكر..بقات واقفة تتذكر اخر دورة عرفاتها جات مسبقة بخمسة ايام..خيبات سيفتها ناضت بدلات عليها بزز وشربات كينة ورجعات تتلوا فبلاصتها والوجع عاد مزايد..دخلات عليها مها لي كانت دايزة وسمعات انينها...

زينب:سماح..مالك اماما؟؟

سماح:(تتبكي)هءهءهءهء الوجع اماما الوجع

زينب:تليغيكل؟؟(تتقلب فيها)شربتي دوا؟؟

سماح:(مزنكة وتتوجع)ععععع شربتو اماما

زينب:انا نجيب ليك كمدي شويي(بقلق)معمرها دارت ليا هاكا فاش كنت بنت فففف 

سماح:كنموووت اماما

دخل عليهم عثمان وقال:مالكم؟؟

زينب:فيها وجع الييغكل

عثمان:(جا جلس حدا سماح كيدوز على شعرها)بزاف ابابا نديك تضربي لبرا هاا؟ 

سماح:(ناضت تخشات فحضن باها ونهارت بالبكا)هءهءهءهءهء ااه ابابا هءهءههء

عثمان:(تخلع عليها)نوووضي ابنتي نوضي تمشيي لسبيطاار

سماح:هءهءهء لا لا(مزيرة عليه)خليك حدايا ابابا اه شربت دوا..

عنقها لعندو وهزها بشوي تا جابها فحضنو بحال البنية الصغيرة وباس راسها وحضنها وقال:الله يشافيك ابنتي بقاي تلبسي حوايجك..

زينب:خليك معاها اعثمان نجيب ليها ماتشرب ادفيها

عثمان:صافي هي سيري

بقات فخضن باها تتبكي ويدها على كرشها مزيرة عليها ..تجمع عليها كلشي..منصور الوجع الشقيقة ولات كطلب هي تعادل بغات هي تنعس

بقا عثمان حاضنها وكيمسح على ظهرها تا ترخاات والدوا بدا كيعطي مفعولو ولات مرتاحة على الوضعية لي هي فيها..رتاحت جزئيا ولات شبه ناعسة..دخلات مها طابخة زعتر وقالت:سمااح

عثمان:ششش خليها راه فاتها الحال

زينب:(حطات ليها زعتر حدا راسها)صافي خليها ترتاح حطها بلاصتها

هزها بشوي صايبها ففراشها وغطاها باس راسها وقال:مبقاش عاجبني حالها..منهار جلسات من لخدمة مبقاتش كيف كانت

زينب:غدا لولات شوي نديها معايا للمدرسة

عثمان:احسن باش ترتاح..(جرها)ياله نخرجو

خرحو مخليينها ناعسة فأمان كلشي الا وجع ليغيكل..مفاقت منو تال العشرة تصبااح عاد فاقت...وهو يبداها الراس بشقيقة..ناضت غسلات وجهها وسنانها وخرجات برا لقات هي كريمة بوحدها..جلسات شادا راسها وقالت: ففففف راسي بيطرطق..

كريمة:نصايب ليك قهيوة ازين هاا

سماح:(بتعب)بديري فيا خييرر

جمعات شعرها سفنجة لفوق وقالت متضايقة:فففف تاهاد شعر زادني هموو خزيييت

كريمة:(تتصايب القهوة)كرضيي بوه اش جايب ليك؟؟

سماح:مكرهتش والله(تتنش)كاين صهد

كريمة:كاينا زملة ههههه

سماح:اباااز

وجدات ليها قهوة شرباتها عاد خدات كينة ترااس وقالت: انا فبيتي ننعس شوي 

كريمة:سيري ازين الله يشافيك..

مشات لبيتها وتكات تاتقلب على نعاس تاغفات شوي..

تدق الباب مرتين وتمات كريمة نازلة فدروج وتتبرح:اصبر الي فالباب

حلاتو وتتلقا منصور قدامها.. معرفاتوش فوجهو وستغربات وقالت:نعام اشريف؟؟

منصور:حمم كاينا سماح؟؟

تعوجات وقالت:شكون نتا؟؟

منصور:الى كاينا كلمييهاا ليا

كريمة:مريضة

منصور:(بريب)مالها؟؟

كريمة:مريضة وصافي..صبر نشوف لفايقة نكلمها لييك

منصور:شكراا

سدات لباب حيت خافت ليكون شي شفار هه.. وطلعات فيقاتها بشوي وقالت:نوضي تكلمي

سماح:(مشابعاش نعاس)ففف لمن؟؟

كريمة:واحد سيد بغاك لتحت

سماح:(تتحك عينيها)شكون هاد سيد؟؟

كريمة:(تتحل شراجم)انا باش بنعرف..نوضي تكلمي

ناضت محاملاش وكرشها باقي فيها شوي تصداع..لبسات فرجليها وتمات نازلة بسروال بيجامة خفيف توبو.. وتيشورت بيض شعرها نازلة ليه السفنجة بإهمال..هبطات للتحت لقات الباب مسدود..حلاتو تتفوه هي شافتو وحلات ليهاا وخرجات عينيها..اما هو هي شافها تفاجات عليه بزااف..تنهد وقال:سماح...

سماح:(شافت وراها وخرجات راسها تتشوف جناب دار)اويلييييي اويلي اش كدير هنا؟؟

منصور:خرجي نهضر معاك

سماح:(بغضب صاحت فوجهو)سير بعد مني حسن ليك..طوالو ليك رجلين تاوليتي تجي تال دارنا ولا باقي تتقلب تكمل علي وتشريها ليا مع دارنا

منصور:(زفر)عارف داركم مكاينينش..مك وباك خرجو خوك ومراتو تاهوما..بوحدك فداار

سماح:(بغات تسد الباب)سير فحالك ابنادم

شد لباب ودخل اول خطوة للدار وقال بحدة:يهديك الله ..خلينا ندويو

سماح:(عاد مكتزيد تصعر)تهضر من جنابك ان شاء الله..ياك بيتي الفراق اوا هاحنا مفارقين اش باقي بغيييتيي عندي..

منصور:ممفارقييينش(قرب منها ودخل)باغيا شوهة نتشاوهوو هناا..غوتي ياله غوتي اخرجو الجيران اسمعووونااا(غوت فوجهها)ممفارقييينش والله لتفرقت عليييك ولا فرقتك

سماح:(بحدة خرجات فيه عينيها)والله فيك لباقي شفت شتي نشوفك تتموت منحنش فيييك اعدو الله...جايا عندك كي الهبيلة وتنشرح ليك ونهضر من نيتي ونضتي كبيتي فيا سمك ومسمعني لي عمر شي ولد المرا سمعوووو ليا(كشاكشها خارجين)ودابا جاي تتبعصص علي خليناا نهضرووو(تتهز عليه فيديها وعينيها خارجين)مابقا فاش نهضرو بحالك تا سلام تالله منقولوش ليييه..

متسوقش لهضرتها بتاتا عاد مزعم ودخل زسد داك الباب وشدها من ذراعها عيان تقيسو اطيح كااو وهضر بهداوة تيزفر: سماااح عرفي ااش تتقولي

سماح:(دفعاتو بكل قوتها منها وتجننات عليه)علاه نتا عرفتي اش تاتقول داك نهاار؟؟بقا ليك شوي وتقوليا قحبة..وعلى تصرف مايستاهلش ولايني شكون اسمعك؟؟سي منصور فاش اتعصب خص سماح تسمح ليه وفاش اغضب خص سماح تحزر وفاش اميك خص سماح تسول..عييييت منك ومن فعااايلك(بالغدايد لي فيها)عرفتي شنو احسن حاجة درتيها هي تفرقتي علييي(قالتها بمرارة مرضاتش)حيت كون مدرتيهاش كنت انا غنديييرهااا ..

منصور:(مسح على وجهو)سمااح

سماح:مكاين لا سماح لا زمر..خرج عليييي(تتغوت لربي لي خلقها)خرج الله ياخد فيك الحق حسبي الله ونعم الوكيل فييك الله ياخد فيك الحق ..

منصور:(مع ذلك مصر شد يديها جابها قريبة لعندو وشاف فيها بحزن)متحرمينيش منك اسماح..لسان مافيه عظم..

تنترات منو وبدات تتدفع فيه بغاتو اخرج: نتا لي مافيك نفس ومافيك قلب..عيييت نردك بنادم ولايني لي بحالك مريييض بيبقا حياتو كاملة مريييييض (تتغوت بصوتها وتضرب فراسها)واااخرررررررررج

منصور:(شافها غطيح)سمااااح صاافي براااكااا انا نمشييي صافي تكالماي

سمااح:خرج خرررج(تتنهج تخنقات)خرررج الله ياخد فيك الحق حسبي الله ونعم الوكيل..

نزلات كريمة لي سمعات صداع تتجري مخرجة عينيها فيهم مفهمات والو..

كريمة:اش وااقع(شافت سماح بطيح)سماااح

سماح:(جهدها تسلاا)خرجيييه خرررج علي الله يعطيك شي مصيبة خرررررججج

كريمة:سماااح بشوي عليييك اتسخفيييي..خرج اسيدي فحالك 

منصور:(مسح على وجهو بعصبية)فففف صافي واخا بقاي معاها عفاااك..

خرج وسدات عليه الباب وهي تنشر فالارض تتبكي وتنذب كأنه عاد جرحها..بكات وندبات وتنخصصات على كريمة تا سخفات وناضت الاخرى تتجري جابت الما وسكر شرباتو ليها تتوكدات عاد نوضاتها داتها لبيتها مخلوعة...ولوخرا هي تتبكي..

اما هو فإحساسو فهاد اللحظة لا يحسد عليه..منبوذ من طرف اكثر الاشخاص العزاز عليه..يكفي دعواتها لييه يكفي انها تتحسبن عليه هذا بحد ذاتو يقدر يدمرو..طلع لطونوبيلتو سايق معاقلش هي تيضور فالمدينة..بدون نوم وبقلب منفطر ماشي من كلامها لانه كان متوقع الاسوأ لكن من الحالة لي وصلها ليها..

*****

يوم جديد بعد حادثة البارحة لي خلات فقلوبهم بجوج حزن عمييق..هو مجروح مزياان حيت جارحها وهي راه تتعاني من كلشي..تا عظم فيها ماصحيح..لا من قلبها المجروح ولا من نفسيتها المزفتة..

ناضت بكري طافجة وتتغسل فوجهها بنرفزة..حكات سنانها وشافت راسها كي ذابلة ..زفرات ولبسات عليها وخرجات لقات عائلتها تيفطرو..نضامات ليهم فصمت تانطق الياس:معرت مال بنادم ولا ساكت..

سماح:(شافت فيه)اش بيتي؟؟

عثمان:فرقها عليك(جرها عنقها)شويا ابابا؟؟

سماح:(لبسات قناع الهدوء)الحمد لله ابابا..انمشي مع ماما للمدرسة

يسرا:حسن ليك نيت..سيري وشغلي راسك بالخدمة الجلسة فالدار مقناطة..

زينب:(بابتسامة)ياله ابنتي ونخلي ليك كلشي حيت انا عييت

عثمان:الى كنتي غديري مزية هي تخلي ليها كلشي وياله نسافرو بجوج..

زينب:والله الى مكرهتش نطلع هي البلاد توحشت نزور با ومي فالقبر

يسرا:سيري اخالتي ونمشي معاك نيت تانا نفوج..

الياس:ياك اختي..وانا لمن نبقا

كريمة:انا نيت نمشي ههه ندي ولادي ونمشيو..

زينب:والله الى من داكشي..نمشيو كامليين

سماح:انا عفيوني ..بيت نبقا هي هنا

الياس:نبقا انا وياك ماعلييش..سيرو نتوما

عثمان:لالا ضروري سماح تمشي..تفوجي شوي ابابا

سماح:(بابتسامة)ياختي وفين ندير انا هاد الحنانة كااملة(طارت عليه باستو فحنكو)

عثمان:ههه الله يرضي علييك ياربي

سماح:اميين..سيرو نتوما احبيبي انا بغيت نتلف شوي هنا وعاد تما كنقنط..

زينب:ولكن الياس متيباتش فداار شنو ديري ونتي تتخافي بوحدك..

الياس:مالها صغيرة تتعلم تبات بوحدها

سماح:اباااز ففف انعيط لضحى تجي تجلس معاياا

زينب:تاهذا نظر..عيطي ليها ونيت توانسوو

سماح:صافي واخا

فطروو مجموعين وتفرق مجمعهم كل واحد مشا لشغلو..ركبات سماح مع مها وشدو طريق لمدرسة ديالها ساكتين تانطقات زينب:شخبار منصور؟؟

سمعات سميتو وهي تنكر وقالت بدون ماتعيق:لباس عليه

زينب:سلمي عليه

سماح:(بهدوء)مبلغ

تنهدات من بعدها شادا راسها من شعرها باينا فيها مهمومة رغم كل محاولات مها بفهمها باءت بالفشل..

الدوامة لي دخلات فيها صعيب تخرج منها..دارت عزاء فقلبها عليه وحسباتو مات..دخلو للمدرسة ولقات ترحيب من العاملين فيها..كانت مدرسة عادية فيها من الحضانة تال السادس ابتدائي على قد الحال ماشي كيف ديال منصور..

خدات بيرو ديالها لي موالفة تجلس فيه ونهكات راسها فالخدمة..من هادي لهادي..

هاكا كدوز ايامها كلها عمل وانشغال بالخدمة..تتدير بزاف تاليطاش باش متفكرش فيه..باش متخلواش براسها..تتعب راسها باش فلليل ملي تحط راسها تنعس بدون تفكير من فرط التعب..

ملي المرا تتوصل لمرحلة تتدير شحال من حاجة باش متطيحش فالتفكير عرفها وصلات فيها للعظم.. نقاطعات اخبارو عليها ومبقاش كيتاصل بتاتا من نهار جا عندها لدار.. لي دازت عليه اسبوع بالتفصيل..اليوم الاحد كانو دارهم كيوجدو امشيو للبلاد..لدار زينب لي بناتها من جديد بعد وفاة مها وصلحاتها ..دارت ليها هي سفلي مصلوحة ومفرشة فراش تقليدي تيطلعو ليها اصيفو فيها مرة مرة..

جمعات معاهم كلشي وخداو طريق بعد توصيات منهم لسماح..

بقات هي والياس فدار مجموعين تيتغداو فالاخير مشا لخدمتو حيت الويكاند تتكون خدمة العراسات مزيرة..بقات فالدار بوحدها...نفاردات براسها دارت قهوة وجلسات تتفرج فتلفازة مدوزة الوقت فانتظار ضحى تجي عندها فالعشية..

ساعة بالكثير صونا الباب ناضت تحل مشعككة لابسة هي ديباردور صيفي فالازرق مبين صدرها الصغير مجموع بسوتيان تكتبان الفرقة وسروال بيجامة خفيف..بيضة وعنقها خاوي من اي اكسسوار..والشعر مطلوق على طولو معنكشها تتجر فديك صنيدلية بتثاقل..حلات الباب وهي تفاجأ بيه هو..منصور بشحمو ولحمو ضارب سورفيت صيفية وكاسكيط..خرجات عينيها انا هو طلعها ونزلها باشتياق..ياله بغات تهضر ونطق: بردتي ولا مزال؟؟

جرات الباب بغات تسدو وهو يحبسو ودخل عليها وسدو عليهم بجوج

خنزرات فيه خايفة وفنفس الوقت محاملاش تشوف فيه:خرررج علييي اويلي واش مسطيي داخل علي لداار درووك اجي شي حد

منصور:مغنخرجش تانهضرو على راحتنا..ونحلو مشااكلنا(ببرود)

سماح:(بعصببة)واش بيتي طرطق ليا شي عرق هاا؟؟بيتي تحطني فالركنة عااد تبرد..شبيني وبينك تاتجي عندي لدااار..

قرب منها لابس قناع الهدوء:لي بيني وبينك ماعارفو حد من غيرنا بجوج..ودابا اسماح غتحبسي هاد تنطار وتخلينا نهضرو ترونكيل كي نااس..

سماح:(حلات لباب)راه ايما اتخرج ولا اقسم بالله تانجمع عليك امة محمد

منصور:غوتي غوتي ياله

سماح:(جننها وبدات تتغوت عليه)واااش مريييض مريض فعقلك بيتي تشري ليا الصداع مع دااارنااا خرج فحالك ازمر..

منصور:(طالع مع درووج)الخريج مغنخرجش تانهضرو ونرجعوو..

خلعها فاش طلع وهي تبعو تتجري هي شافها تتجري زرب تاهو باش متشدوش موقف تال لقاع داار وهي تشدو من ذراعو معصبة علاين طيح: وااش مريييض واش حمق اويييلي(كضرب فحناكها)ايجي شي حد هااويليييي..

منصور:سمااح(شد يديها باش كضرب وجهها)متبقايش تديري هاكا تتخلعيني عليييك..

سماح:(تنطرات منو ونفاجرات عليه بالبكا)وااعباااد الله بعد منييي بعد منييي واش متتفهمش يااك نتا لي بيتينا نتفارقوو؟؟لاش جاي عندي درووك لاااااااش(بح صوتها بالغوات).. 

قرب منها تيشد يديها احاول اجرها لعندو لكنها تتنطر منو وتبكي:الله يعطيك شي مصيبة ياربي...وكلت فيك الله هءهءهء خرجتي عليييي

منصور:(داير ليها يديها عندو)سماااااح انا لي قلت ليك نتفارقو ولاكن قلتها هي من فوق خاطري.. كنت معصب ومتنشوفش قداامي..كون خليتيني تا نبرد كنت نهضر عادي ونفهم اش كاين..جيتي عندي فظرف كنت معصب ودزت فييك..

سماح:(طيحاتهم بحرقة قدامو)دزتي فيا حيت شنو؟؟حيت معندك فمن تبرد سمك وغدايدك من غيري..مبان ليك تاحد ممكن تبرد فيه سمك من غيري من غير سماح..سماح(تتبكي بحرقة)لي تتمسح فيها رجليك وتسمح ليك..سماح لي تدير ليها فالكعية وتعطي العربون فالخرى..سماح لي متتخلي مادير باش ترضييك..

منصور:(باس يديها بعمق ومعنقها بيد وحدة)كون مكنتيش هاكا والله منجي نبقا نطلب فيك كي الكلب

تنطرات منو ودفعاتو ورغم دموعها لكن الشرار تيخرج من عينيها:وراااك كلب نيييت..وحيوان وبغل ومتسوا عندي تا قد ظفري صغغير..تعاود لشي حد شنو درتي ليا غيقلل فايدتك ..غيحتااقرك

منصور:(مسح على وجهو بعصبية)والله يهديك انا مبرد معاك وتنسايس معاك ونتي تطلعي للسما.. 

سماح:(ولات حمرة بالغوات)اسيدي محزرك حد متسايس معايا.. متجيييش عندي كااع عطيني بتييساااع وكلت عليييك الله حسبي الله ونعم الوكيل فيك..قضيتي علي وطفيتيني الله ياخد فيك الحق(نهارت بالبكا)معمر شي حد ماهرسني ولا خسر خاطري كيما درتي لياا عمري نسمح ليييك

مسح على وجهو بيديه بجوج وقرب منها شدها من ذراعها تتبكي حلفات لسكتات وقال:عارف غلطت ومادرت فيها مايصلاح ومنسوا بصلة ولكن والله تانادم..راني بحالك وكثر مكنشوفش النعاس..معارفش نعييش ونتي بعيدة عليا(شد وجها من ذقنها وبدا كيضور عينيه عليها بلهفة)اقسم بالله تا غتحماق الى تفرقت علييك..راك معارفاش راسك شنو تكوني نتي عندي؟؟راه بلاصتك معارفها حد من غير الله

سماح:(بدموع)باينا ...صراحة باينا..حيت فاش بقيتي علي بدوك الهضور تاع بنات الزنقة باينة بلاصتي شنو هي عندك...مرحمتييينش ومخليتينش تانهضر وتانا دررووك(دفعاتو من عليها)مغنسمعش ليك ومغنسمحش ليك ومعمري مغنشوف فوجهك مراا خرااا..

صغراااتو وهو يصيح فوجهها بحالا مزعزع وغوت باعلى صوت:كيفااااش منشوفش وجهك؟؟شنووو زعمة؟؟تبعديي علي(شدها من ذرعانها مزير عليها ومبقاش واعي على راسو)والله منتفرق معاك..اقسم برب الكعبة منتفرق معاك اتفرقني معاك هي الموت(تينخض فيها بهوس)انا لي كااين وومغيكونش من غييري..كيفااش متسمحييش لياا؟؟علاش كلكم بحال بحال؟؟تاواحد مبغا يشوف فياا؟؟اش ذنبي واش نبقا حياتي كاملة فالضلام..منستاهلش نخرج للضووو(كينخض فيها تا خلعها)منستاهلش نعيييش تانااا..نتي لي كنتي تتفرحيني اتمشي وتخليني ولا؟؟(بعنف تيصيح فوجهها)والله لخلييتك تعيشي فراحتك..اتبقاي معايا وترجعي معاياا ونتزوجوو وبتبقاااي معايااا(زير عليها تا دفعها على التليق وتنشرات مخلوعة من منظرو كاع الزعامة ديالها تبخرات)تانتي بغيتي تخليني بغيتوووني نحماق نتسطاا..نمووت..منلقا تا لي يترحم علييي هااا..

بقا غادي جاي قدامها كي شي حمق وتيهضر معصب وبضعف وهي مقنتة تتشوف فيه خلعها خافت تدوي واسلخها..تتنخصص فصمت 

منصورر:اشنوو ذنبي هاا؟؟عشت حيااتي كااملة بوحدي وملييي لقيييتك(جا بسرعة بهوس تحنا عند رجليها راكع بضعف قدامها وهي مخبية منو)ملي لقيتك نتي تخليني هاا لمن تخلينيي اسماح لمن؟؟(تغرغرو عينيه وطاحو دموعو على خدو)لمن تخليني..

***

تولد النساء جبالا اما الرجال يولدون مجرد رجال..

بعض الرجال تبكي لانها انكسرت والاغلبية منهم تبكي لانها تموت انكسارا كل يوم

***

سماح:(زلقات ليها شهقة صدمة)

منصور لي الهمة والهيبة تيبكيهم قدامها بضعف..بقات هي تتشوف فيه ونقاطعات دمعة من عيينها من منظرو..ضعيف وكيترجاها باش متخليهش

منصور:(تيطيحو دموع خفاف على لحيتو)نتي ماشي بحال ناس لوخريين..نتي سماح(شد يديها باسها من الوسط وبترجي نطق)عفااك..منتفارقوووش..نتي راه هي الهوا لي عندي..متخلينيش ..كنت ضايع ورديتيني للطريق

طيحات دموع كثار على خدها بانهيار..وعضات على شفايفها بالم مقدراتش تحمل تشوفو هاكاك..مالقات تاحل من غير تدير وجهها بين يديها وتجهش فالبكاء..عييات ومقدراتش مزال تحمل.. كان ضعفو قدامها وبكائو حداها اكبر دقة جاتها..طلع لمستواها وحاوطها بذرعانو معنقها وهي تغوت فحضنو بالبكا..غوتة فحضنو لاحت فيها كاع الالم..

عيات وتهدات حسات براسها ولات بحالو فاش بكاتو..هي هكذا..حنينة وتتنكاسر دغيا..هضرتو دمرااتها ولكن ضعفو قدامها خلاها تنهار تماما..

عنقها عندو وزير عليها مزياان دارها وسط حضنو وتنهد ودموعو كتسقطر من عينيه..حاس بضعف كلشي الا تمشي لانها ببساطة #سماح

شافت فيه لي معمر شي حد شافو فيه..وملي بكا قدامها راه وصل لاضعف حالاتو..

غمضات عينيها وطلقاتهم حاريين على كتفو وهو أيضا بقاو دميعات صغار كيطيحو منو فلحظة ضعف انه افقدها حيت عارفها الى فات تا طلع ليها الخز تسمح فيه وتزيد..

طال العناق من طرفو لمدة دقائق وشفايفو كتردد عبارة وحدة وهي :متخلينش..متخلينيش

ماحسات براسها تاهزات يديها بضعف دوزاتها ورا ظهرو معنقااه حيت بقاا فيها ونطقات

باالغوات: اهءهءهءهء كنبغيييك كنبغيييك وكتعذبني معاك هءهءهء مبقيييتش قدرت هءهءهء ماقادراش نكمل معاك..

منصور:(زير عليها وزاد تحنا عليها عاصرها )متقوليش هاكا..انا واعر ونتي لي تتصبري لياا(باس فوق راسها)اتسالي حياتي لخليتيني..نتي كلشي عندي

سماح:(اتبكي)مرحمتينيش امنصوور كيفاش بيتيني نرحمك هءهءهء سبيتيني وهنتييني بحالا لقيتيني معاه فلفرااش..

بعدها عليه تاتقابل وجهها مع وجهو..عامر بدموع وهو مع لحية مباينينش يكفي عينيه لي حمرين..وشفايفو تيترعدو : لالا مقصدتش هاكاك..اقسم بالله عارفك اش كتسواي..نتيي(تيداعب حنوكها)نتي نقطة بيضة ميمكنش تديري شي حاجة..متحكمتش فرااسي حيت محملتووش اقيسك..(دوز على شعرها بهستيرية)انا لي كنقييس شعرك وانا لي نقيسك ماشي شي واحد اخر.. 

سماح:(غمضات عينيها مخليا الدموع تينزلو وشفايفها تيتلصقو بالبكا)هءهءهء منقدرش هءهء مابقيتش قدرت عليييك..معاطينيش نيتك(خلات عينيها فعينيه فاص)مكتعاود ليا والو(مخنوقة)مكتبغييش تشاركني والو هءهءهء كلشي انا لي كنديرو

منصور:(بصدق)نعاود ليك..لي بغيتيها نعاودعا ليك هي متسمحييش فياا

غمضات عينيها هاربا من عينيه وكملات موسم البكا ديالها..فحين هو دارها وسط حضنو وزير عليها كأنه رتاح حيت كسبها..منادمش حيت بين ضعفو قداامها لانها انسانة طيبة

بقا معنقها دقائق طويلة هدات فيها النفوس من الطرفين..سماح تيتسمع هي تنخصيصها..وهو جمع وطوى من دموع بقا هي معنقها مباغيش اطلق..تاقفزات هي وقالت:ويلي ضحى جااياا..

منصور:(رخف عليها وشاف فيها بشوق)عيطي ليها قوليها متجييش..

سماح:اويلي لااا(مسحات وجهها وناضت)خصها تجي تبات معايا

منصور:(بتعب كيمسح على وجهو)بغيت نرتاح..ياله معايا نتي

سماح:اويلي واش تسطيتي؟؟

هز فيها عينيه تيشوف فيها بشوق وحب..كانت فاجمل حالاتها واجمل النساء هي لي تتكون زوينة مور البكا..حمرة كلها وعينيها منفوخين وشفارها فازكين..جرها بخفة من يديها جابها حداه وقال مقرب لوذنها:خليني ننعس عييااان

سماح:امنصوور راه ميمكنش اتجي ضحى..خصك تمشيي

منصور:(عينيه فعينيها بحب)عيطي ليها شوفيها فينها..

هزات تيلي ديالها من جانب الطبلة ودوزات نمرتها بتوتر..ولاخر حاضيها بشغف..تشد الخط وبدات كدوي معاها وهو بدون وعي حط يدو على شعرها كيداعب خصلاتو لي توحشهم..تاسلالت وقال: اش قالت؟؟

سماح:حمم باقي معطلة 

منصور:(تسرح باريحية)اوا خلينا نجلسوو شوي ونمشي

سماح:(تتلف شوفة فيه)تشرب شي حاجة؟؟

منصور:تأ..فيا جوع

سماح:(صوتها مغنغن)بصح!!

ناضت من حداه مخلياه متبعها تا فدار تتبان زوينة..دار راسو بين يديه متعب بزااف..فحين هي دخلات للكوزينة غير مرتاحة بوجودو معاها فدار خايفة اجي شي حد..حلات ثلاجة وجبدات كفتة ويدها تتدوز نمرة الياس..سولاتو فين راه بدون ماتحس لقاتو مشغول..عاد طمنات...لوات ديك الكفتة كويرات وبعصاتهم وهي تتنهد..هي براسها كانت متعبة لكن ريحة حضنو رجعات فيها الروح

جبدات طوماط سوغيز تتقطعها هي والخص والخيار تتصايب ليه شلاضة..ودارت بغات تخرج لعندو تا لقاتو عند باب الكوزينة واقف تيشوف فيها باشتياق يمكن لو كانت مراتو كان غيدوز معاها اجمل وقيتة..

سماح:(متوترة)تتاكل الكفتة؟؟

منصور:همم..سيي

سماح:(تتبعد من نظراتو)ولا بيتي نطيب ليك دجاج..

منصور:(قرب ليها داير بتسامة)لا متعذبييش راسك..

سماح:(تتسرط ريقها)لالا هاا ما كااين تا عذااب..شنو نوجد ليك؟؟

شد يديها باسها من الوسط وقال:مرتاح خاطرك من جيهتي؟؟

سماح:(تنهدات)خاصني وقت..

منصور:خودي وقتك هي متجبديش الفراق

سماح:(مكمشة عينيها)بفمك لي ختاريتي الفراق اولا؟؟

دار ضحيكة خفيفة وقال: عندكم شي سودانية حكيها ليا لفمي هه 

زلقات ليها ضحيكة خفيفة وقالت:خصك العصاا نتاا

جرها لعندو تا لاصقها معاه ووجاهم ملاصقين وقال:خاصاني نتيي..

سماح:(بضعف)متبقاش تجرحني بهضرتك امنصور..راني كنت غنموت

عنقها مزير عليها وقال:نموت انا وتعيشي نتي..سمحي ليا كنواعدك غنعوضك..

سماح:(تنهدات)الله يهديك

منصور:اجي خليك من هادشي واجي نجلسوو

سماح:صبر بلاتي نوجد ليك متاكل

منصور:واخا

كورات ليه ديك الكفتة وشواتها ليه فمقلة الشواء فوق بوطة وساهية فحين هو جر كرسي وجلس حاضيها..متسوق لا لكوزينة لا لشنو داير بيه ..دايها فيها بوحدها..حطات ليه كلشي وزادتو عصير هي تتحرك كي شي جثة..رجع عليها تعب البكاء لي بكاتو بغات هي تنعس..صايبات ليه عصير وحطات ليه كلشي..جرات كرسي وجلسات حداه ساكتة

منصور:مغتاكلييش؟؟

سماح:(بغير نفس)هي باقي شادة فخاطرك مني

سماح:(بعتاب)نكذب عليك؟؟اه حيت صعيب ننسا شنو وقع

منصور:عارف دقتي قاسحة ولكن مع الوقت تنساي هي صفي خاطرك من جيهتي(شد يديها)وخلينا نتجمعو

سماح:(بتساءل)تبغي نتا تجمع مع وحدة مكتعرف عليها والو..انا مكنعرف عليك والو

منصور:(هز خبز قطعو وبدا تياكل)عارفك كتدوري على قضية عبد العظيم

سماح:(بستاءل)شكون هذا؟؟

منصور:(ببرود)باا..الكفتة زوينة تتعرفي طيبي

سماح:حاكرني ولا؟؟(ناضت جابت الما حطاتو ليه)عاود ليا شنو مشكلتك بينك وبين بااك

منصور:هضرة كثيرة ماشي وقتها(غمزها)خلينا فبعضنا داباا

سماح:(حركات راسها بيأس)اصلا نتا تتعرف تقلب الهضرة..انا كي الحمقة لي درتها تانقولها ليك ونتا تا شوي مقادرش تعاودو ليا

منصور:(كياخد سلاد)نعاود ليك ولكن منلقاهاش عند شي حد

سماح:الى مثايقش فيا بلاش..انا الى بغيت نعرف هي باش نشاركك مشاكلك وصافي

منصور:عارف ازوينة..(وقف)صايبي شي قهوة واجي نعاود ليك

سماح:معول تعزب ليا هنا..

منصور:(متوجه لسيجور)عاجباني دار نسيبي

سماح:(مسحات على وجهها)الفقصة فففف

صايبات قهوة ولتاحقات بيه عارفا ضحى معطلة نييت حيت تتعرف بلاناتها..لقاتو مرجع راسو لور مغمض عينيه باينا فيه مرتاح فالنعسة..كي جلسات فاق وقال بتعب:هي لي خاصاني..

سماح:مناعسش واقلة

منصور:(جرها جلسها حداه)مالكي بعييدة؟؟(شد شعرها شمو)توحشتك

سماح:حمم شرب قهوتك

مداهاش فيها جرها تا حطها على صدرو وقال:توحشتك بزاااف اسمااح

سماح:(بهدوء باقي شادة فخاطرها فقط دموعو لي شفعو ليه)هديتيني معاك..والله

منصور:عارف راسي واعر ولكن نتي سمااح

سماح:(شافت فيه بعتاب)شي نهار تقتلني بالفقصة

منصور:نموت انا وعيشي نتي(دار شعرها ورا وذنيها)باقي باغية تسمعي بلاني مع الحاج

سماح:ممم

منصور:(جغم من قهوتو)الواليد نهار جا لمدينة كان عزري هو ولد الرحامنة مبانتش ليه فالفلاحة وجا لمراكش قال عالله نضبر فصرف..جا عزري ودوز فيها عامين تقريبا هادشي لي عاودات ليا مي..من وراها بغا جدي لي هو باه ازوجو..والو عياو معاه مبغاش فلخر رما عليه سخط ودا مي(بحرقة)تزوج بيها وخلاها ومشا لمدينة تيجي مرة فربع شهور فخمس شهوور تا توفاو والديه وداها معاه للمدينة..سكنها فبيت مع جيران ومع ذلك صبرات معاه تاخرجات حاملة بيا..ولداتني وبقات عايشة معاه مدة ديال خمسطاش العام..خمسطاش العام تالعذاب..كبرت وانا تانشوفو تيضربها وتيعاملها خايب..شي مرات تتبات بلا عشا حيت كان حاضي هي القصاير والزهو مع المسخات بحالو..ميجي تال نصاصات الليل واسلخها واتعدا عليها(مسح على وجهو وعنقو حمار)تنعقل مزيان فاش كان تيشدها صحة واغتاصبها(شاف فيها باسى)تغتاصبات مي قدامي ومهضرتش..مقدرتش نهضر حيت تنخاف منو..كنت صغيير اسماح معارفش لي عارف هو مي تتاكل العصا كل مرة اجي سكران..ضربت سطاش العام وحصلاتو مي مزوج..اييه مزوج بالحاجة مت خوتي درووك..سطاش العام تللكذوب كان معيشها فيهم..سطاش لعام وهي تتبات تتسناه ارجع فليل وهو ممسوقش بايت مع مرااتو ولا مع القحبات..وقتما تسولو كان تيضور فيها..وقتما تهضر معاه وتظعي معاه كان اضور فيها..بغيت هي نتفكر شي مرة ..مرة وحدة با عامل مي مزيان..والو مكاينش..العيد ماهو عيد..كيديها للعروبية تعيد مع باها وارجع هو لمدينة..كنت كنعقل تتشكي لباها وتيقوليها صبري..تشكي لخوتها واقولو ليها صبري اش غديري ونتي مطلقة وبولد..كانت صابرا على قبلي وتتدعي الله اتكود شي نهار(سكت شوي تيفكر)تالنهار لي حصلاتو مزوج..سطاش العام تزواج وبربعة تدراري..الكبيرة فيهم البنت لي قدي فالعمر كان تيضرب هنا ولهيه ولدو ليه فعام واحد..ومخلاش مي تولد بااقي ..براكا عليه هي ولاد الحاجة(بشمتة)كان كيحيد لمي واعطيها هي ولولادها..

سماح:(بتأثر)ولكن علاش هادشي؟؟

منصور:(بغضب)حيت اكبر ولد القحبة ممكن تعرفييه

سملح:منصورر لاا(بهدوء)تيبقا بااك

منصور:الى هي هاكاك بناقص منو..

سماح:(تنهدات)كمل..

منصور:(ستأنف كلامو)عرفاتو مزوج وتا الحاجة مكانتش عارفة تا صدمهم بجوج وجمعهم فدار وحدة..كان ديك ساعة مسك عليه الله ودار شوي لباس..جامعنا فدار وحدة..كان داير فيها سي سيد..جمعهم فدار وحدة وكل ليلة مع وحدة فيهم ونهار ترشق ليه راهو مشا للخانزاات ..

سماح:اوا

منصور:داز عام حملات مي وملي عرف مبغاهاش تحمل قاليها عندي خمسة تالولاد فين غتزيدي..بالفقصة طاح ليها وشدات الفراش..قابلاتها الحاجة حجيبة تاوكدات شوي ولكن فقصة با بقات فحلقها..تا مرضات وجاها كونصير فالوالدة..حيدو ليها الوالدة ومرضات شدات الفراش وهضرة ناس تالعروبية اثراث فيها غتموتي لي حيد الوالدة ميعيش وهي تتفكر لمن تخليني..كنت تنسمعها تتطلب فالحاجة الى ماتت تتهلا فيا..تتبوس ليها يديها وتطلبها متخليهش يديني لخوالي حيت عارفاهم اكرفصووني..ديك ساعا انا كنت كاااااره راسي وكاره باا وكاره العالام..تاخوتي كرهتهم واخا المعاملة كانو تيتعاملو بحالي..كان قااسح ومحنينش وديما العصا..وداير الفرزيات بين مي والحاجة..مي تا فاش مرضات بقات تتاخد دوا تالعصب ....تجي تهضر معاه اضور فيها تدوي معاه الحاجة اضور فيها..كان تيعاملهم كي لكلاب

سماح:(مدات يديها شدات فيديه)اوا

منصور: مي مصبراتش هزات حوايجها وهزاتني وزادت..قصدات العروبية وردوها خوالي ليه وهو حس بيها قللات منو ونفرها مبقاش كيطوف بساحتها..وتيقوليها كون ماخفت الله كون صيفتك لداركم وولدي انا قاد بييه..

دازت الايام وكبرت انا وليت تنتقابح معاه..نتجابه معاه واعطيني العصا..ونتغاوت معاه..حسيت براسي وليت راجل وخرجت من داار و وصيت الحاجة على مي..مابقيتش حملت نعييش معاه كااع..تما تبليت الكارو الشراب ولكن مفرطتش فقرايتي..قبل مانهرب شفرت ليه خمسة تالمليون..(بسخرية)خليتو غيحماق وهربت..ولقاني عطاني سلخة فزنقة وداني للبوليس قاليهم شفرني وكدا..جاب الله البوليسي راجل مزيان بقا عليه لا وولدك وكدا ورييه وديه لدار تتفاهمو..كي خرجنا تبرا مني ولاحني وقاليا بغيتي زنقة سير لزنقة

سماح:(طاحو دموعها)اويلي على لاحك لزنقة؟؟شحال كان فعمرك؟؟

منصور:(بحرقة)16 لعام اسماح..مكنتش عارف تا حاجة لا فين نمشي لا منين نجي..عيطت لولد خالي كان فالمدينة سكنت معاه فدار كاريها مع صحابو..هوما كلهم كبار انا لي صغير..مرضت فراسي حيت بعدت على مي ولايني وكدت..

منصور: مرضت فراسي حيت بعدت على مي ولايني وكدت..كريت معاهم بشوي من الفلوس لي شفرت وخبيت الباقي..وبقيت تنقرا.. السيزيام الباك شديت الباك لافاك

قاطعاتو سماح:ومك؟؟مكنتيش تتشوفها؟؟

منصور:سي تنعس عليه تا كيخرج ونمشي نشوفها ونجلس معاها..كانت تتبكي تتطلب فيا نرجع وتنرفض..كرهتو وحقدت عليه..درت لافاك وفنفس الوقت خدام فسونطر تندير لي كوغ..وكل نهار نمشي نشوف مي نلقاه سالخها بحالا غدايدي تاايخرجهم فيها..تتعاود ليا زهيرة ديك ساعة بلي تتاكل العصا والى تدخلات الحاجة تيجمعها معاها..كانت لوات عليه شي وحدة ديك ساعة ومابقاش حاملهم بجوج

سماح:وعلاش الحاجة مرجعاتش لدارهم؟؟

منصور:فين غترجع..زمان كان طلاق عيب وعاد هو كان بدا كيممسك عليه الله ادي ليها دراري فرمشة عين..خافت على ولادها وبقات حاضناهم

سماح:اوا

منصور:خديت لاليصونص وخدمت فايكول بريفي تالفرونسي..ومن بعد كازا فسونطر دابيل..هي فاش عيطو ليا مك مريضة(غرغرو عينيه)مشييت لقيتها تشللات..كي وقع ليها وامتا معرفتش..لي سولتو تيقولو ليا الفقصة العصب..حقدت عليه وهزيت مي وضرت فيه هي فاش صخط علي..هزيت مي وزدت ديتها معايا لكازا يوماين وعيطو ليا خالك ماات ..ديتها للعزو تاني وزادت حالتها تكفساات..مات خالي وتفرق ورث جدي لي كان حاضن عليه وجاتها فحقها شي بركة هي باش بديت المدارس وصاافي(مسح على وجهو)فهمتي علاش متنحملش تا الشوفة فيه..

سماح:(طاحو دموعها)معرفتش مانقولليك(جراتو بشوي عنقااتوو وطلقات دموعها)الله ياخد فيه الحق..الله ياخد فيه الحق

منصور:(عنقها مستمد منها الحنان)معمري نسمح ليه..حيت عذبها ومرضها فحياتها..معاشت مشافت ماتشوفات..

سماح:ربي غيجازيه على فعايلووو

منصور:فهمتي علاش انا واعر..عذريني راني كابر فظروف مزفتة كابر بوحدي..مي ماحيلتها ليه ولا ليا ..ماشبعتش حنان اسماح...مي كانت تتحن فيا وتتهلا فيا ولكن فسن صغيرة خرجت من دار

سماح:(بصوت مغنغن)باش كنتي عايش فاش كنتي تتقرا؟؟

منصور:تنهز صنادق فالمارشي ولا نخدم فالبني..شلا فاش خدمت

سماح:(دارت وجهو بين يديها)كاع هادشي هازو ومخبيه علي؟؟علاش؟؟كون عاودتي ليا كون راك مزيان

منصزر:مغيتبدل والو..مغترجعش صحة مي ومغنتبدلش انا

سماح:ولكن غترتاح

منصور:(شد يديها باسها)الى فغيمون باغياني نرتاح..خليك معاياا..حياتي ضلاام ونتي لي ضويتيها

سماح:(تنهدات)قاسيتي بزااف امنصوور(شافت فيه متأثرة)انا بلاصنك كنت نموت

منصور:علاش كنت عايش؟؟دروك نيت راني والو..عايش بسخط باا..خوتي مضارب معاهم مي مريضة نتي تنمرضك..شنو عايش ندير؟؟

سماح:انا معاااك(شهقات)هءهءهء واخا تعصبني ومتتهتمش بيا ولكن ماعندي ماندير(حانية عينيها المدمعين)بغييتك ولي عطا الله عطااه..

داز بتسامة خففة وجرها عنقها مزير عليها مرجع راسو لور مغمض عينه وقال: لهلا يفرقنا..خلينا نتزوجو اسمااح..بغيتك معايا فدار وحدة..بغيت نبدا معاك هادشي لي بقا من عمري

سمااح:اكون خييير(حطات يديها على صدرو)

بقاو ساكتين تيسمعو نبضات قلوب بعضهم وكل واحد فيهم كي تيفكر..هي تصدمات ومظناتوش عايش هادشي كولو ومخبيه عليها..

يمكن دموعو قبيل وقصتو خلاتهم اشفعو ليه على شنو دار عندها

بعد لحظات ناضت بشوي وهو يحل عينيه بتعب وقال:خلييك

سماح:(بحنان)عياان!!

منصور:ناعس ساعتين صافي فففف(حيك عينيه)

سماح:نعس ترتاح ليك شوي

منصور:وضحى!!

سماح:معطلة هاديك انا عارفا بلاناتها..تكا شوي

مد ليها يدو وقال:الى غتكاي حدايا مرحبا

سماح:هه ولايني راك مااسخ

منصور: والله مقصدت فيها شي حاجة..مترديهاش فوجهي

تكا فوق تليق بعدما تخلص من سبرديلتو وجرها حداه تاهيا تكات بخوف وبتردد تاتسول راسها شنو تدير؟؟كي حطات راسها على صدرو حسات براحة خطييرة اما هو راه محس بمثل هاد راحة من زماان..مجرد لحظات وغمض عينيه راح فسابع نومة مهضرش باقي مواالو حدو صدرو لي تيتحرك واتهز واتحط بالتنفس..بقات متكية تتخمم فهضرتو وتحلل..عاش ظروف مزفتة وكبر فوضعية مقودة عليه خلاتو اولي هاكا..عذراتو ودارت ليه عذر حيت #هي_سماح..

كي تأكدات بلي نعس تسلتات من حضنو بشوي..شافت فيه كي مرتاح وهي تنوض بالحس جابت ايزار خفيف لاحتو عليه باش ارتاح..وبقات جالسة حداه تتشوف فيه كي هادئ.. 

زوين الى قربتي ليه..خطوط رفيعة تحت عينيه لي فيهم حديقة سوداء خالية من الحياة مع انتفاخات..لحية كثيفة باين انه ممحسنهاش شحال هادي..باين التعب فوجهو لدرجة كبيرة...

تنهدات تتفكر وراسها بين يديها عاطيها الحريق..هزات تيليفونها صيفتات ميساج لضحى علماتها تعطل بحجة خرجات تقضي شي غرض مهم ومغتلقاهاش..خدات كينة ترااس ومشات جلسات حداه في صمت..مرة تشوف فيه مرة تبعد نظرها عليه ودماغها خدام تيحلل وافكر..

قرابة ساعة عاد بدا كيتحرك وهي تفيكسي نظرها فيه تتسناه يفيق

بعد لحظات حل عينيه مغوبش بحالا كان مضارب..هي شاف وجهها وهو ينوض تقاد فالجلسة مضهشر..حك عينيه وتفوه وقال بصوت مغنغن:فين الحمام..

سماح:(نعتات بيدها)لهيه

ناض بتثاقل لبس صندالتها ودخل لدوش غسل وجهو عاد خرج لقاها جالسة كي الامانة..

جلس حداها وقال:شحال نعست؟؟

سماح:(بهدوء)شي ساعة هاكاك

منصور:ممم محسييتش كنت عياان

سماح:منعستيش بزااف..ساعة متقضي ليك والو..

منصور:كنبغي هي نكسر(تفوه)ضحى باقي مجاتش..

سماح:لا علمتها تعطل..الى شافتك ممكن تشك ..

منصور:حيدي ليها الشك(شد يديها)خليني نهضر مع باباك

سماح:(بتوتر)شبتقوليه؟؟

منصور:(عوج راسو فيها)اعطيني بنتو

سماح:والا مباش؟؟(تتحاول تحجج)

منصور:علاش مغيبغييش..خدام وعندي ديور ماشي هي دار..وغنعيشك مزياان وزائد باغيييك ومن نيتي... هادشي مكافيش؟

سماح:(تنهدات)منصور مجاكش بلي زربنا؟

منصور:تعطلنا كااع!!عاجبك نبقاو هاكا تتلاقاو مخبيين..اللهم نتزوجو(باس يديها)مغتندمييش اقسم بالله مغتندمي..انا ماشي خايب

قاطعاتو: مقلتش ليك نتا خاايب..كون كنت عارفاك خايب مغنبغييكش..

منصور:وشنوو؟؟

سماح:(بحيرة)معرفتش

منصور:بان ليا خايفة من المعقول(دار بتسامة خفيفة)بغيتي نبقاو مصاحبيين معنديش مشكل..

سماح:الله يمسخك

منصور:اوا نتي لي مبغيتيش المعقول..خليني نهضر مع باباك وديك ساعة هضرة خرا

سماح:(باستسلام)صافي واخا..تايرجع من سفر ودوي معاه

منصور:واخا ان شاء الله(بابتسامة)اتفرح الواليدة

سماح:(بابتسامة)كي بقات؟؟

منصور:صافا..خصها هي نتي

سماح:اندوز نشوفها شي نهار

منصور:دوزي غدا..ندوز عليك ونمشيو..

سماح:تانشووف

منصور:واخا

بقا كيشوف فيها شحاال تاتورتات وقالت:ياك لبااس؟؟

ضحك وقال:والو(جرها عنقها دافن وجهو فعنقها)معمرك تفكري تبعدي مرة خراا

سماح:(بهدوء بادلاتو العناق)نتا لي ختاريتي وانا نفسي خايبة

منصور:الصمت

بقاو معانقين مدة دقائق و هي تنطق:منصور خصك تمشي خفت اجي شي حد

منصور:واخا

لبس سبرديلتو وهز سوارتو من الارض وتم نازل للتحت وهي معاه مشادين اليد..حلات الباب وطلات مبان ليها حد وهي تقول:صافي هي سير

منصور:(هايم فيها)ديبلوكيني امنانة

عوجات فمها: اوا تانشووف اش قال ليا القران تراسي

قرب ليها وهي ترجع لور جامعة ضحكة:صافي واخا ههه سييير ايشوفك شي حد

منصور:هاني غادي..بسلامة

سماح:باي باي

طلع لطونوبيلتو وتحرك من تما غير كي جا..مرتاح بزااف حيت تصالح معاها..فبالو دروك فقط اهضر مع بااها واياخدها..

اما هي رجعات لبلاصتها قدام التلفازة تتفكر وتخممم فهاد الفكرة..فالاخير رجعات لفيلمها وعقلها فقنت اخر ..تتفكر كيفاش بكا قدامها وقصتو مع باه..قدرات تستنتج ان منصور واعر شابه باه وباه اكبر ولد الحرام ..من نوع القديم لي تيدير فعيالاتو مابغا بحجة معندهم فين امشيو لطلقو وادي ليهم دراري

تا جات ضحى وتوانسات معاها حاولات ماامكن تتناسا شوي..دوزات ديك ليلة معاها ليلة بنات صافي..كل وحدة فيهم محتاجة لوخرا

****

يوم جديد كانت سماح فبيروها فمدرسة مها دايرت اجتماع مع بعض الاطر تالادارة وتتناقش معاهم تا صونا تيليفونها بنمرة ممعروفاش..شدات الخط وجا صوتو:علاش مديبلوكيتينش؟؟

شافت فلي حداها وستأذنات بلطف وخرجات وقالت:سلام

منصور:سولتك

سماح:نسييت وصافي..صافا؟؟

منصور:حمد لله ونتي؟؟

سماح:لبااس الحمد لله

منصور:مسالية اليوم؟؟

سماح:معاياش؟؟

منصور:لوقت الغدا ازين

سماح:سيي

منصور:اوا ندوز عليك نمشيو نتغداو مع الواليدة

سماح:(بارتياح)وااخاا

منصور:فين نتي؟؟

سماح:فمدرسة ماما..دابا نصيفت ليك لوكاليزاسيون فالواتساب

منصور:واخا ازين..(بعد صمت)توحشت نجلس معاك

سماح:توحشتي نكيري؟؟

منصور:تأ لا..توحشت ديك التعنيقة لي تتعنيقيني بيها فيدي

سماح:(بخجل)ههه تنتعلق فيك كي القردة

منصور:وتعرفيها شتدير فيا ههه

سماح:شكدير؟؟

منصور:من بعد ونشرح ليك..سيري درووك الطناش نجي عندك

سماح:واخا بسلامة

قطعات معاه صيفتات ليه لوكاليزاسيون ورجعات لاجتماعها مبتاسمة وناشطة..مرتاحة انها عرفات نص حياتو شنو فيها..وانه فتح ليها قلبو.. وصلات الطناش صونا عليها وخرجات تتقلب عليه تا قشعاتو..طلعات وقالت:سلام

جرها سلم عليها بوجهو..كان داير نظارات وكاسكيط وقال:مزيانة؟؟

سماح:اه فيا جووع؟؟

منصور:(شاف فيها وبتاسم)كيعجبك كسكسو

سماح:(بلهفة)تنحماق عليييه هه هو لي غناكلو..

منصور:سي.. عارفك بلدية فماكلتك هه

سماح:مكاين ماحسن من البلدي

منصور:اوا هاحنا نمشيو ناكلوه

شد الطريق للخرجة تمراكش وقالت:مابقيتوش فالبارطما؟؟

منصور:لا مولفاتش ليا مي..تتبغي تخرج وتجلس فالجردة والطبيعة..تتقنط..

سماح:واصراحة ديك الفيرما واخا صغيرة راه شهوة..زوينة داير فيها شي بهيمات ههه

شاف فيها حيت ضحكات ليه وتنهد براحة مجاوبهاش..كتفى اجرها من يديها دايرها فحضنو وسايق بيد وحدة صدمها وقال:الله يدومها ضحكة

سماح:(بخجل)امين حمم مغتعرفش تصووك..

منصور:لا مرتاح هي خليييك

بعدات شوي وردات شعرها ورا وذنيها وقالت:لا حشوومة اصلا..حمم

منصور:واخا

طلق موسيقى انشطو بيها الجو..كانت ديال كناوي اسمها سقسي العاشقين..

بتاسم ليها وبدا كيغني بشوي مع الاغنية ناشط..وهي تتضحك هي بشوي وقالت:سبحان مبدل الاحوال ههه

منصور:راني بنادم هه

سماح:مقلت تالو

وصلو للفيرما ديالو ..دخلو تاوقفو قدام الدار..هي نزلو وهي تنهد براحة تضور عينيها فالطبيعة وقالت:زوين هناا بزااف بعيد على صداع المدينة

منصور:بغيتي تعيشي هنا ولا فالدار لي فمراكش؟؟

شافت فيه حميمرة بخجل وقالت بدلع:اوا تانشووف

شد يديها ناشط ودخلو للدار لي تحلات من طرف البنت لي خدامة..سولها :فين مي

الخادمة:فالصالون تتسناكم

جر سماح لي متوترة من جديد بحالا اول مرة غتشوفها من جديد..تاقربو وهي تطلق من يديه وتقابلات مع مراية فطريق وقالت:شو كي تشنتف ليا شعري (تدوز على حجبانها)مزيانة؟؟

منصور:خاايبة ههه

سبقها دخل لصالون وتبعاتو حمرة من شدة الخجل..صالون تقليدي مئة بلمئة جالسة وسطو راضية..بقفطان كيف العادة وشدة خفيفة..زين مشا وبقاو حروفو..لاتحرك ساكن من غير عينيها لي تكمشو من شدة السرور..قرب ليها وباس راسها ويديها وقال:لالة راحتي..

راضية:(تتشوف فسماح)نننن

تقدمات سماح حشمانة باست راسها ويدها وقالت:خالتي هاني جيت تاني هاجمة عليك هه

راضية:(تتحرك يديها بشوي تا حطاتها على يد سماح)مممممىررررررر مررررررححححح

سماح:(فهماتها)ترحب بيك جنة والخير الكثير..(جلسات حداها)كي درتي اخالتي؟؟صحيحتك شوياا؟؟ 

راضية:(تتحرك هي راسها وتنين)نننن حممممممددددد (عيات)

منصور:متعييش راسك اميمتي..(بابتسامة)هاني جبتها ليك تالعندك 

سماح:كانت بغات تشوفني؟؟

منصور:سييي

سماح:سمحي ليا اخالتي هي الخدمة(تحرجات)وكثرة تبرزييط

راضية:(بتاسمات ليها)

دخلات لطيفة مبتاسمة سلمات عليها ورحباات بيها وموراها الخادمة هازا قصرية عبدية ديال كسكس بسبع خضاري حطاتها وجابت اللبن..

سماح:(بعفوية)الله كسكس مممم

بتاسمات راضية وتا منصور..هز معلقة وقال:بدااو

المعلقة لولة بردها وعطاها لمو فحين سماح تتاكل حشمانة وهي تتشوف فمو وتتفكر شنو دوز عليها عبد العظيم..تتعز عليها صحتها كاملة مشاات..

لطيفة:مكلتيش اولدي؟؟

منصور:معنديش مع كسكس(كيشرب للبن)

سماح:اتبقا بلا غداا

منصور:مافيااش جوع(كيوكل مو)عجبك امي

بتاسمات راضية فرحانة مكرهاتش تنوض تطير وتزغرت..اكبر متمنياتها درووك هي ولدها اتزوج..

كلاو داك الكسكس مجموعين واغلب وقتهم ساكتين خاصة سماح لي حشماانة..موراها جابو ليهم اتااي ودوازو ..تلفتات سماح عند راضية وبقات معاها على جموع واخا راضية هي تتنين لكن باينة فرحانة..مرة تسولها الصحيحة مرة على اللباس حيت قشعاتها مرا بلدية مرا تعاود ليها شي طريفة..فوجات عليها بلبااقة ومنصور هي تيشوف وساكت..وللمرة المليون تيتأكد انه مغلطش فاختيارو..

شربات راضية دوا وداتها لطيفة تنعس حيت تيرخيها دوا فحين هو بقا هو وياها وقالت:الله يشافيها

منصور:اميين(شد يديها)ياله تتمشاي شوي

ناضت متفاجئة من تعاملو..شدات يديه وخرجو برا فين كاينا الطبيعة..جريدة متحدهاش بعينيك مغروسة ومصايبة على حقها وورا دار كاينة الفيرما الاصلية لي فيها الكوري فين كاينين جوج عيودان وبعض البهائم..

عجبها الحال وحسات براسها تفاجات..جلسو فجليسة فالجردة بعد عودتهم من تجوال..كي جلس جبد كارو من جيبو وقال:نكمي؟؟

سماح:عاد نهضرو(حيداتو ليه)حيد زمر اتمرض رااسك

ستسلم ورضخ لطلبها..دوز يديو على كتافها وقربها ليه وقال:تبغي تعيشي هنا؟؟

سماح:زويين هنا صراحة..كيفاجي(سكتات شوي)منصور نسولك

منصور:(كأنه متوقع اسئلتها)سولي نسمع

سماح:عمر ندى جات هنا؟؟

منصور:نتي زعما لمعرفتيش هاد ندى مغتبردش فيك ديك دودة

خرجات فيه عينيها وبعدات عليه:ولايني راك مكتحشمش..

منصور:اوا شنو؟؟لاش باغا تعرفي 

سماح:فضول وصافي فففف جاوب دابا

منصور:(حرك راسو باستسلام)لا

سماح:(براحة)وعلاش؟؟ثلث سنين ونتا معاها ومعمرها جات؟؟

منصور:(باستغراب هز فيها حاجبو)شكون قاليك هاد الهضرة؟؟تتقلبي مورايا اسماح

سماح:مالقيت مندير نقلب من وراك..عرفتها بصدفة منها

منصور:(هز صبعو فوجها مقندش)هاديك السيدة بضبط متبقاش تشركك معاها تاهضرة..اش بينك وبينها؟؟

سماح:مابيني وبينها والو..بغيت هي نعرف قصتك معاها؟؟

منصور:كنت معاها وتفرقناا

سماح:علاش تفرقتو؟؟

منصور:(ساط بنفاذ صبر)وشكون عقل فففف مباتش مي

سماح:(هزات حاجبها)ياك قلتي ليا عمرها شافت خالتي

منصور:سي مي بكثرة ماكنت تندوي ليها عليها نهار طلعت ليها دم قالت ليا نهز ليك الهم نتا ونهز هم مك بزااف علي و تانا نسوسها

سماح:هاكا قالتها؟؟

منصور:(بدا كيتعصب)لا زوقااتها..سمااح(بنفاذ صبر)سدي علي هادشي

عوجات فمها وسكتات تتحلل هضرتو وتاهو سكت ..تا قالت عاود: منصور كون مثلا مثلا مك معجبتهااش كنتي غتزوح بيا

منصور:(ضحك ماسح على وجهو)الالة منانة(جرها على غفلة لعندو وحط يدو على خصرها مقرب ليها)الله يهديك علي..نقصي من هاد الاسئلة

سماح:(توترات من قربو)هاا واخا

هو عاد ستحلاها دوز شعرها ورا وذنيها وتحسس بصبعو نواضرها لي فيهم زغب رطب وقال:داكشي فاات..نتي لي كاينا درووك ولي غتكوني فالمستقبل..(عينيه فعينيها )

سماح:هاا واخا

شد فيديها وقبل راسها قبلة رضى وقال:نجيك الصراحة كون مثلا كنتي شي وحدة لي مبغاتهاش مي مكنتش نتزوح بييك

سماح:اوا ودابا؟؟

منصور:عجبتيني كاع انا لي واعر عسااك مي..مي تيعجبوها ناس زوينين يحالك

بتاسمات بخجل تاتسدو عينيها وقالت:ههه احيانا عليك الشويطين ههه

منصور:(نشط)اري بوووسة اشيطانة

قرصاتو فيديه ووقفات:الله يمسخك نوض وصلني لخدمتي ههه

منصور:(وقف)عقلي عليها..البوسة تنطلبك عليها وتبقاي تبعصصي علي(بطنز)فين يامك امنصور؟؟

تلفتات ليه بشك وقالت:شمن ايام؟؟

منصور:(مسح على لحيتو)الله يعطيني اللقوة ههه تحركي ندييك الالة منانة

سماح:الله يعميها ليك..نمشي نسلم على خالتو

منصور:بتكون نعساات ماعلييش

سماح: مك شحال حلوة..كون كانت كتهضر متشبعش من الهضرة معاها

منصور:(كيديماري)دارتها الصحة..مي شويا بلدية

سماح:(كدير لاسانتيغ)نوو بزااف..مرا بلدية مرزنة وديال تعول عليها(بابتسامة)الله يخليها لييك

منصور:امييين..دابا شنو فين خدام باباك؟؟

سرطات ريقها هي تيجبد ليها المعقول تتولي تفيبري..نطقات:فلمسيرة..ولايني تا يجي راه مسافر

منصور:امتا ارجع؟؟

سماح:(تتبعد شعرها ورا وذنيها)واقلة الحد جااي

منصور:بزااف تاني

سماح:(دارت بتسامة)مالك مزروب؟؟

منصور:سي مزرووب..باش نلحقو كلشي قبل رمضان

تفافات بلاصتها وشافت فيه:كيفاش قبل رمضاان؟؟

منصور:اتجي معايا قبل رمضاان..نكونو درنا لاكط سيتو

سماح:(دارت صباعها عند راسها)شوي لبااس اشريف؟؟اويلي على قبل رمضان مالك على هاد زربة

منصور:واشنو بغيتي؟؟نهضر مع بااك نديرو لاكط سيتوو

مسحات وجهها بالفقصة وقالت:معامن انا؟؟اويلي على لاكط وصافي والعرس؟؟

منصور:بغيتي تديريه ديريه؟!!انا مبغيتووش

سماح:كيفاش قالب قبل رمضان..

منصور:وراقيك دغيا اطلعو نعقدو وتمشي معاياا والعرس تالمن بعد

سماح:ههه اويلي اويلي على ولد راضية ومداير فياا..بغيتي تحمقني ولا؟؟بغيتي تزرب علي ..لا عرس لا توجاد لا لباس لا حنة لا والو

منصور:(مفاهم والو)انا باش غنعرف ففف ديري لي بغيتي لي تنعرف انا لاكط قبل رمضان وصافي

سماح:(تقادات بلاصتها)تاتدوي مع باابا وديك ساعا يحن الله

منصور:خص هي يطلقناا..

سماح:لاصق فزينب هههه متيخليهاش تمشي بوحدها اححح الحب سعداتهم

منصور:(شاف فيها وغمزها)ونتي ناقصك؟؟

سماح:لا شبعااانة منو صراحة(جاتها الضحكة)الله يمسخك ههههه

منصور:لله يستر.. 

وصلها حدا الخدمة ونزلات ناشطة ماشطة و تتغني..دازت للحمام هو لول قادات عكرها وشعرها عاد قصدات بيروها..اما هو شدها عفطة وحدة لعند عبد المالك لي داير معاه فكافي من لبارح

باركا الاوطو ونزل تيحك نيفو بلباقة وهذا ما هو الا دليل على رغبتو فالحصول على جرعة من الغبرة..

دخل تيقلب عليه لقاه وتوجه لعندو..لاح سوارت وتيليفون والباكي تلكارو

عبد المالك:اهلا

منصور:(بطنز)وسهلا..

عبد المالك:لبااس؟؟

منصور:(شعل كارو)تخي بياان..كي راها مراتك؟؟

عبد المالك:حمد الله..انسافرو غدا ان شاء الله عالله تنسا شوي

منصور:امتا راجع؟؟(تيتكيف)

عبد المالك:على حسب مي المينيموم نجلس دو سومين..

منصور:ففف صبر شوي اصاحبي محتاجك فبلان

عبد المالك:شمن بلان؟؟

منصور:(منغم مع الكارو)باغي نخطب

عبد المالك:(باستغراب)اش غتخطب؟؟

منصور:شجرة..اش غنخطب اصاحبي..انخطب خطاب ملكي..

عبد المالك:(دار بتسامة عريضة)متقولش ليا باغي تزوج هههههه اسيدي مبرووووك

منصور:سي..وبغيتك ضروري تمشي معايا

عبد المالك:الله اودي ههههه شكون هاد سعيدة الحظ؟؟

منصور:متتعرفهاش...(تينفث الكارو ببرود)اتمشي نتا وعبد الغني

عبد المالك:ضروري باك تاهو؟؟(شافو غوبش وقاطعو)ضروري واش اصاحبي باك فالحياة وتمشي تخطب بنت الناس بلا بااك..اتجي ناقصة..

منصور:(باستهزاء)سالا شهر العسل ديالو

عبد المالك:طلقها ..

منصور:على سلامتو...شنو دابا؟؟

عبد المالك:انا نمشي معاك ماعنديش مشكل ولكن ضروري الواليد..

منصور:(مكره)بناقص من شي خطبة كاع نبقا ديال راسي الى غنبدا هاد زواج على يديه

عبد المالك:راه ماشي عليك نتا راه على قبل البنت..تمشي نتا ومك وانا وعبد الغني وشكون بيدوي مع باها؟؟انا مثلا راه نتا الكبير

منصور:نديو الحاجة 

عبد المالك:مكافيااش..ضروري بااك..فكاع الحالات راه بيجي راك ولدو

منصور:(طفا كاروه )واخا اسي ولدي..وشكون ايعلمو؟؟

عبد المالك:هضر معاه نتا نييت..سير عندو ودوي معاه راه ميرضهاش فوجهك واخا هاكاك راك عزيز عندو

ننصور:(بسخرية)بحال معزتو عندي سبحان الله

عبد المالك:الله يهديك وصافي..انا نأجل سفري..امتا غنمشيو نخطبو؟؟

منصور:خصني نهضر مع باها بعدا

عبد المالك:واش كتسنا؟؟

منصور:ارجع من سفر..بغيت ندرك كلشي قبل رمضاان

عبد المالك:ميمكنش اصاحبي..داكشي تيبغي الوقت

منصور:مالي غنطلع الفيزا راه هي عقد

عبد المالك:معارفش نتا فشغل العيالات..امل نهار بغيت نخطبها راه شحال تطلوع والهبوط والنكافة وتريتوور وزيد وزيد

منصور:تخربيق....بون انا باشما كان نرد عليك..تحرك فحالك..

وقف خلص قهوتو وخرج هو وياه وكلها شدها فحالو لاشغالو

اما سماح كانت خرجات من الخدمة ورجعات للدار لقات إلياس وضحى جالسين تياكلو ..لقات السلام وجلسات حداهم

الياس:شتك ناشطة؟؟

سماح:بغيتيني نبكي

ضحى:هه الله ينجيك

الياس:حيت ايام ونتي اختي دايرا لينا جنازة حسابك معايقش بييك؟؟

سماح:(عوجات غمها)دخل سوق راسك..اهيا امتا ايرجع بابا؟؟

الياس:تاترجع زينب!!!

سماح:وامتا ترجع؟؟

الياس:تايقولها ليها راسها هههههه وانا باش بنعرف

سماح :ههههه انا لي دايرا فيك عقلي..ضحى كي داز نهارك؟؟

ضحى:صافا كنحاول نولف خدمة صالونات

سماح:اللهم هي ولا لجلاس فدار هههه 

الياس:انا هاني مشييت عندي عرس

سماح:سير الله يسر

خرج الياس وخلاهم مدهيين فاعمالهم المنزلية وجماعتهم..كل وحدة تتعاود للوخرا على يومها

مرت خمس ايام عادية جدا بيناتهم...لقاءات فمقاهي جموع عادي ونقاشات ضروري..

دخلات سماح بعد يوم متعب للدار تا كتلقى عثمان مريح فسيجور ومعاه ضحى والياس تيشربو قهوة

فرنسات:بابا

عثمان:مونيكة ديالي

تلاحت عليه عنقاتو بعدما تخلصات من اغراضها ..بحرارة تخشات فحضنو وقالت بدلع:توحشتك 

عثمان:تانا ابنتي..وبزاف كاع..كيدايرا لباس؟؟

سماح:الحمد لله يخير ونتا لباس؟؟فين ماما لاش مجاتش معاك

عثمان:باقي مسخاتش ببلادهم..وانا جيت..

الياس:وفين مرتي اسي؟؟لاش مجبتيش معاك مرتي

عثمان:هههه جبت تامرتي بقا هي مرتك..راه تلاقو عاطينها للضوران من درا لدار ها مرت عمي ها بنت عم با ها مرت خال مي ههه..

ضحى:سعداتهم..بلاد حبيبتي زينب زووينة

عثمان:وا الجو صراحة زوين الهوا نقي وماكلة زوينة ولايني المشاغل

سماح:ماعلييش مرة خرا نطلعو كااملييين

عثمان:ان شاء الله..كي دايرا وكيغادا مع الخدمة؟؟

سماح:بخيير ابابا(عاودات تخشات فحضنو)والله الى توحشتك ابابا 

عثمان:(معنقها عندو)المشة ديالي

الياس:تبوحيط قتلة لزي هههه

عثمان:دخل سوق راسك تتولد البنات وعطيهم العصا نييت

ضحى:هذاا راه هبيييل ..

الياس:ها الهبيل نايض لخدمتو فففف عيييت بالعراسات

عثمان:قلبها تاشياخت هههخخ

الياس:(تيعيب العيالات)نكذب عليك اخويا عندي مانقول فيها هههههه

عثمان:الله يمسخك سير خرج لخدمتك قبل لنتكل فيك عالله. .

خرج الياس كيضحك مخليهم ضايرين بيه وتيضحكو خاصة ضحى لي تحسنات علاقتها مع خالها بعد فراقها مع صاحبها

دارو عشيوة دايزها الكلام تعشااو و دخلو ينعسوو.. 

صيفتات ليه ميساج: كوكو 

منصور:الزوينة صافا؟؟

سماح:(تتفرنس للخلا)صافا الخويب ههه نتا مزيان؟؟

منصور:تخي بيان..باقي ممشاتش بنت عمتك باش نهضرو ابيل

تتكتب وتضحك: هههه لا ..مكنبغيش نهضر قدامها غتأثر امنصور..ولات تتكره جنس الرجال

منصور:نصبر ماعندي ماندير

ترددات تعلمو فالاول لكن كتبات ليه: منصور بابا جاا

جاوبها فالبلاصة:امتا؟؟

سماح:هاد العشية دخلت ولقيتو فداار

منصور:(تيكمي وتيكتب براحة)على سلامتنا..فين خداام؟؟

سماح:اتمشي للمسيرة عندو محل تماك تاع ثلاجات تما فين كيعمر بزااف

منصور:داكوغ ..انا غدا ندوز عندو ونهضر معاك

سماح:ان شاء الله

منصور:مبقااش بزاف الالة منانة ونخرج منك داك نكييير

ضحكات بخجل وكتبات:على مافخيلك ركبوو ههههه

منصور:دابا سيري تنعسي وغدا نعيط ليك تعطيني لادريس اكزاكت فين كاين المحل

سماح:واخا...تصبح على خير

منصور:انتي الخير

صيفتات ليه قليب وجمعات مع عادل شوي عاد طفات تيلي ولتاحقات بضحى لي نعساات قبل منها وعقلها كيرسم الاحلام لوردية وحياتها الزوجية كي غتكون مع منصوور

****

وما الزواج..الا أن أراك في نفسي كلما نظرت اليك

****

"الصباح هو اشراقة الشمس من عينيك والمساء هو غروبها من ثغرك.."

على نغمات اغنية شيرين وزوجها حسام بدات سماح نهارها فالمدرسة..عايشة فوق السحاب..هي تتضحك و تتفرنس ومولاها ربي..حيت منصور شاد ليها الخاطر كاع هاد الايام وبين على حسن نيتو فانه اخطبها.. 

تتشوف شي برامج فالملفات قدامها من طرف الاساتذة وشعرها منسادل على كتافها مع طوينكات طوال واصلين لطول كتافها.. لبيسة رائعة مواتياها..مؤخرا ولات هي تتشري فالحوايج وتلبس وتبرع على عكس قبل كان لباسها عادي..

فالواقع الى بدلتي ستايل لباسك كتبدل نفسيتك وتا سماح نفس الشيء..بدلات ستايلها دخلات لوينات جداد لحياتها صونا تيليفونها كانت نمرتو..بتاسمات وجاوبات بحب: الزين الصافي

منصور:صباح الخير

سماح:(عوجات فكها)لبااس؟؟

منصور:بخيير فين راه محل باباك انا فالمسيرة

سماح:ف**** اتلقا مكتوب عليه *****.. 

منصور:واخا ..بسلامة

قطع معاها وهو يجيها التوتر..بحالا جالسة على شوك تتسنا وتنوض وتجلس..طرطق صبعانها وتعاود

فحين منصور تبع نعت لي عطات ليه تاوقف قدام المحل ..مجاهش صعيب القاه حيت فالشارع وبااين

نزل وحك نيفو بلباقة..تيشوف فالمحل واعبرو بعينيه..دخل ليه مبرد بحالا جاي اتبرد واخرج..لقا المتعلم وقال:السلام وعليكم..كاين سي عثمان؟؟

المتعلم:وعليكم السلام اخويا..اه كاين اش بيتيه؟؟

منصور:فينو؟؟

المتعلم:راهو(نعت ليه )جيهة لاكيص

منصوى:شكرا..

دخل مكمل مشيتو لعند عثمان لي كان كيحسب شي فلوس فلاكيص..تاوقف عليه كي الزلط: السلام وعليكم

هز الاخر راسو وقال:وعليكم السلام شحب لخاطر اولدي؟؟

منصور:معقلتيش عليا اسي عثمان؟؟

عثمان:(مكمش عينيه)صراحة لا ..ولايني فايت شايفك هههه فكرني الله يفكرك فالشهادة

منصور:(دار بتسامة خفيفة)منصور الدين ران..كنا تلاقينا فالكوميسارية على قبل المشكل تبنتك..

عثمان:(عاد تفكرو وبتاسم وهو تيحط الفلوس فلاكيص)اااه تفكرتك..اهلا وسهلا(خرج لحداه حيت حابسهم الكونطوار)مرحباا اولدي.. 

منصور:(طمن نوعا ما انه ماشي نوع صعييب)الله يكبر بيك اسيدي

عثمان:كيداير اولدي لباس؟؟

منصور:الحمد لله..نتا بخير ؟؟

عثمان:نحمدو الله ونشكرووه

منصور:الحمد الله..حم سي عثمان الى كان ممكن نهضر معاك

عثمان:مرحيا اولدي..دوز معايا للقهيوة هنا حدا المحل نجلسو وندويو

منصور:اهاه واخا..

خرج هو وياه من لمحل بسكوت وجلسو فقهوة حدا لمحل نيت..دار منصور رجل على رجل ونطق بكل ثقة:سي عثمان راك ديجا عارفني..واخا تعارفنا فوقت ماهواش

قاطعو عثمان:الله اودي وقت نييت معمري نسا وقفتك مع بنتي..

منصور:ماشي مشكل..حمم ملي ذكرتي بنتك..انا جيتك اليوم على قبلها..انا اسي عثمان جيت باغي نخطب منك بنتك

عثمان:(هز حاجبو)نعام؟؟

منصور:(محافظ على ثقتو فنفسو)الى كتاب بغيت نتزوج ببنتك سمااح

عثمان:كتعرفها من قبل؟؟

منصور:سي..شفتها فعرس خويا هي لي خدمات ليه وتا فسبوع بنت خويا..ولاقاتنا الظروف مرة خرا عجباتني..وبغيت الى كتاب وافقتي نتزوج بيها..

عثمان:(جاب ليه الضحكة حيت متيعرفش اهضر )ههه اولدي زربتي علي..الزواج دقة وحدة..على هاد الحساب مفاهمين جاي هي تعلموني..

منصور:(رد بهدوء)لا هي مفراسها والو..كي قلت ليك تلاقينا هي ظروف..وصافي..شفت فيها صفات ديال بنت الناس وبغيت نكمل معاها حياتي

عثمان:(مسح على لحيتو البيضاء)دابا نتا بيتي تقوليا بلي نتا وبنتي مابينكم والو؟؟

منصور:لا..مابيناتنا والو..ياله بغيت تكون بيناتنا شيحاجة لكتاب

عثمان:(قنعو)اش نقوليك اولدي..انا منعطيك مانحيد ليك..الشوار ديالها..الى بغات راه منزيدك هي الخير

منصور:مكرهتش صراحة شي زيارة خفيفة للدار عندكم ونذاكرو ديك ساعة..بغات هذاك هو نهار الكبير عندي..مبغاتش الاقداار

عثمان:مقلتي عييب..واخا انا بنتي متتفكرش فزواج ولايني جيتي قصدتيني منردكش..خيرك ساابق..خلي ليا نمرتك انا نتشاور مع مها ومع البنت ومرحباا بيك ديك ساعة

منصور:مرحباا(عطاه كارت فيزيت ديالو جبدها من الجيب)نتسنا تصالك فالقريب

عثمان:ان شاء الله اكون خيير

وقف منصور مسلم عليه وقال:نخليك هاد ساعة

عثمان:جلس بعدا هي نشربو قهوة 

منصور:(بابتسامة)القهوة نشربوها فدار ان شاء الله ملي تقبل بنتكم 

عثمان:ماقلتي عيب اولدي..بيناتنا تيليفون

منصور:شكراا

زاد وخلاه متبعو بعينيه تا ركب فطونوبيلتو عاد ضحك وقال:اودي هاد جيل ههههههه (تيشوف فكارت فيزيت)ههههه اييه تاهذاا نظر

شرب قهوتو على اقل من مهلو عاد رجع لمحلو عادي..اما منصور هي طلع لطونوبيل قلع وجبد كارو شعلو ونفث منو براحة ..بتاسم فاش سمع تيليفونو تيصوني باسم:"لالة منانة"

جاوب وهو يقول:لالة منانة

سماح:امدرا؟؟

منصور:شاعلة فيك العافية مافيك لي يصبر(ضحك)هادي هي باقي الحال ههه

سماح:(غوبشات)كطنز علي؟؟شقاليك بابا؟؟

منصور:قاليا نتشاور مع مها ومع البنت

سماح:(تنهدات بارتياح)حمد لله بعدا مرفضش

منصور:علاش يرفض؟؟جيتو للباب

سماح:تانرجع لدار نشوف اش بيقوليا

منصور:داكوغ هي متنسايش سولني واش بيني وبينك شي حاجة وقلت لاا..تانتي غديري راسك مابيني وبينك والو

سماح:(بابتسامة)ياك المنافق مابيني وبينك والو؟؟

منصور:كان خصني نقوليه راني مصاحب معاها وتنضل معاها نهار كولو وجيت لدارك وتاهيا ديتها تشوف مي والما دايز تحت منك ونزيد ليك حتا بستها واحد البوسة وندماتني عليها..

سماح:(طلقات ضحكة عالية)هههههههههههههههه طيرتيني ههههههههه باش اخرجني انا وياك فجورنال الخميرة ههههههههه صافي انا نضربها بنكرة ونخليك تاتجي لدار ونقوليهم مموافقاش 

منصور:(بهدوء)الى سميتك مرا ونص ديريها..اقسم برب الكعبة اسماح تانسلخك قدامهم

سماح:هههههههه اويلي على نديرها ههههه مهم مزيان ملي ماقلتي ليه والو ههه (بحنان)كنت عارفك مغتقولش ليه شي حاجة..

منصور:وانا نقدر(بحب)نشريها للالة منانة ديالي

سماح:(كتعوج راسها)علاش تتقول ليا لالة منانة؟؟

منصور:حيت نݣارة...نتغداو اونسوبل اليوم؟؟

سماح:اوك..ياله بسلامة واقلة راه صايݣ بلا منشدك

منصور:بسلامة

قطعات معاه مرتاحة حيت دار اول خطوة..ورجعات لخدمتها عادي تتفرنس للخلا وكلها غرام

وصلات الوحدة جا ليها للخدمة..طلعات معاه مفرنسة وقالت:ولد راضية

منصور:لالة منانة

سماح:هههه شتك ناشط؟؟كاع هادي فرحة حيت غتزوج بيا

منصور:(مركز فالسياقة)والله الى اكبر تخويرة هي هادي ههه

سماح:(تتعوج ففمها)ياك الشرف ههه

منصور:(شاف فيها)مكذبتييش

سماح:كيجاك بابا؟؟

منصور:بحال بنادم الله يعمر ليه دار

سماح:ضرييف ياك وحلو هههه(راشقة ليها)

منصور:اوا هداي علي انا ماشي بركاك ههه هي عجبني فيه انه كيدير بحساب ماماك فكلشي ملي قاليا راه نشاور مها

سماح:هههه تيموت على زينب واخا تشوفو قاسح راه واحد عنيبة منو مكايين

منصور:مزياان..فين نمشيو؟؟

سماح:فينما بيتي..فيا جوع؟؟

منصور:فين كتمشي ليك هاد الماكلة الله واعلم..

سماح:المهم هو الرشاقة هههه

منصور:(شد يديها)خلي فورمتك هاكا..عنداك اقوليك راسك تغلاضي

سماح:اصلا انا واخا ناكل سم متنغلاضش

منصور:(بمزح)عندي ليك دوا اغلضك 

سماح:(على نيتها)الله ينجيني من شي دوا..انا عاجبني راسي هاكا 

منصور:هاد دوا راه زيين والله..وفابور نعطيه ليك لله فسبيل الله

سماح:يااك الحااج؟؟

منصوى:اييه الحاجة..ايرضك عودة هههه تانتزوجو ونعطيه ليك

سماح:معندي ماندير بييه

منصور:(وقف لمطعم قريب لخدمتها)تيديرو عليه البنات الصف ونتي مابغيتيهش ههه(حيد الصمطة)نزلي ازين نزلي اتولي طلبي علييه وترغبي..

نزلات تتقاد فحوايجها والخلاخل تيضربو فرجليها هي قشعهم..دور يدو على كتفها وهمس فوذنها:لابسة ليا الخلاخل الالة منانة..

سماح:(حشمات)هه تيعجبوك؟؟

منصور:رجليك لي زوينين..

دخلو للمطعم لايح يدو فوق كتافها..خداو طبلة وجلسو حدا بعضهم كيهضرو او بالاحرى هي سماح لي تدوي وتعبر وتضحك فيه وهو هي كيشوف واضحك..تتحسو معاها تيكون اليز..

سماح:عندك ضحيكة زويينة ولايني مكضحكش بزاف

منصور:الضحك بلا سبب من قلة الادب

سماح:ممم برد بيه على راسك..ضحك راه تيفوج وتيبرد القلب..شو نتا دابا(دوزات يديها على جبينو)عندك مكمش بكثرة تغوبيشة..وشو انا عندي تحت عيني مكمش بكثرة ضحك

منصور:اوا نتي ضحكي وانا نغوبش 

سماح:(تتشرب عصير منغمة بيه)تأ..ضحك ضحك كنفرح فاش تنشوفك تضحك هاكا وراشقة ليك..اما فاش تتكون ساكت تتولي خالعني

حرك راسو داير بتسامة وقال:نتي كتخافي نتي؟؟

سماح:(بجدية)والله فاش تتكون معصب ولا ساكت وتقمع فيا تنخاف منك تعطيني شي كلمة ترضني فجوايا

منصور:والله مكتخافي هه الرجال شلاغمية تيخافو مني..وتيحنيو راسهم ليا نتي جيتي تال هنا(حط يدو فوق راسو)وجلستي وخريتي علي من لخر

سماح:هههههههه الله يمسخك ياربي

منصور:ها لي قلنا..عمر شي حد مامسخني تاليك نتي..وعمر شي حد هز علي صوتو تاليك نتي وعمر بنت المرا هزات علي صبعها تاليك نتي..نتي راك زااعمة ومكتحشميش مني

سماح:عبرت عليك هههههههه تبقا تضسار علي ..راه كل فول تيجيب ليه ربي كيالو

منصور:ولايني واخا هاكاك غير تنصبر ليك شي حوايج متنبغييهمش 

سماح:ههههههه ماعندك مادير تبليتي بيا عععههه

منصور:بلية صاافي

شربات عصيرها وجلسات كتسناه ياكل على خاطرو وتتشوف فيه بنص عين..مكرهاتش تبقا هي تشوف فيه..

منصور:عجبتك؟؟

سماح:مالك مزوينش؟؟مكتشبهش لمك؟؟

منصور:كنشبه لعبد العظيم فالوجه والوقفة

سماح:بصح!؟!قوليا شحال عندك من خوتك

منصور:(ببرود)ربعة..

سماح:شنو اسمهم؟؟

منصور:لاش بغيتي تعرفي؟؟

سماح:(تحرجات)هي فضول وصافي(حطات يديها على يديه)منصور(شاف فيها)خوتك ماعندهمش ذنب فشنو وقع!!باك لي منو المشكل مكاين لاش تعادى معاهم تاهوما..

منصور:انا ممعادي مع حد..هي شاد تيقاري وصافي ..داك كثرة خويا ختي ماعنديش معاها حيت تاواحد معقل علي فيهم من بعد

سماح:(بهدوء)عارفة..ولكن الخاوة حدها دنيا

منصور:من جيهتي انا حاسب هي عبد المالك وعبد الغني لي خوتي..حيت هوما لي حنان فيا وتيسولو فيا وهادشي هي مؤخرا اما قبل ماكانش تيسولو..

سماح:يمكن نتا لي سديتي عليهم الباب تتسوال؟؟

منصور:سديتو ولا حليتو ماعندي ماندير بتريكة داك سيد..براكا هي انه بيجي معايا للخطبة فففف

سماح:شوف منصور(قربت لعندو)الى كان هادشي غيمرضك بلاش ماتجيبهم..انا نقول لبابا راه والديه مطلقيين وعندو هي مو

منصور:ضروري اجي..شحال ماجلسو بيعرفو انني مضارب معاه

سماح:(زيرات على يديه)كلشي غيكون مزيان والله..حاول تصلح علاقتك مع خوتك ومع مرات باك..نتا براسك قلتي ليا ماعمر كان عندك معاها مشكلة

منصور:يكون خير..هاد ساعة لي ضارني فراسي هو نتزوج بيك وصافي..اما عبد العظيم وولادو مداخلين ليا من تا قنت

سماح:(تنهدات)يكون خير(بتاسمات)انا معاك ديماا(حطات راسها على كتفو ويدها تتلعب فيديه)

منصور:نتي لي عندي

بتاسمات براحة وبقات متكية عليه تاكمل ماكلتو عاد خلصو وخرجو مشادين..بصمت حيت منصور تبدل ليه المود دغيا فاش جبدات ليه عائلتو..

وصلها لخدمتها ونزلات بعدما ودعاتو..ومن عادتو كيبقا اتسناها تا كدخل..هي فطريق جبدات تيليفونها كتبات ليه ميساج فيه:كنبغيك

مع دخلات مع تحرك وهو يوصلو الميساج قراه وبتاسم ولاح تيلي تيحرك فراسو قايل:منانة صافي... 

**** 

فالمساء واقفة سماح فالكوزينة تتصايب كيكة وعقلها خدام ومتوتر تتسنا دخول باها..خلطات بغرير هو الاخر طيباتو وعمرات اتاي..وجدات كاسكروط زوين..حطاتو بعدما دخل باها وجلسات معاه هي وضحى وإلياس لي دخل مور باه بشوي..كيهضرو عادي وباها مذكرش ريحة الزواج ولا منصور بتاتا..ولوخرا جالسة اعصابها تتسناه اهضر و والو..كلاو وتعشاو عاود .. جمعو الماعن ودخل كل واحد انعس ..تغددات وخافت باها يكون هي سايسو تا يسرسبو..

كي دخلات لبيتها كتبات ليه:منصور

جاوبها بميساج عادي:وي

سماح:بابا مهضرش؟؟ما قال والو!!

منصور:سي فغي؟؟ملمحش ليك كاع

سماح:(تتكتب بخوف)لا والو

منصور:معليش ..يقدر تايفكر

سماح:خفتو ارفض

منصور:نونو جوبونص باا..كان مرتاح وعاجبو الحال عطيه وقت

سماح:ان شاء الله

منصور:كيفاش بلانك نتي قبيلا تانزلتي عاد خدامة علي تنبغيك. .

فرنسات وكتبات ليه: تنشحم نقولها فااص

منصور:قيديها عندك ههه سيري تنعسي

سماح:بونوي

حطات تيلي لقات ضحى تتشوف فيها وقالت:يا سبحان الله

سماح:خههه مالك

ضحى:اش تما؟؟مع المعلم تاني

سماح:اويلي على معلم راه مول مدرسة ههههه

ضحى:بحال بحال كلهم كلاب ..اش كيخبر عليك

سماح:(بسعادة)نقوليك ههه هضر مع بابا اليوم

ضحى:بصح؟؟بغا تتزوجو.. 

سماح:(حركات راسها بفرحة)ااه ههه

ضحى:متيقيش اسماح..تايجي لدار عاد ثيقي

سماح:علاش؟؟

ضحى:راهم كلااب..اقوليك دويت معاه وكدا واصدق كاذب عليك

سماح:الله واعلم..هو لي بغا زواج اصلا بقا مصر عليه

ضحى:الى فيه رزق ابنت خالي الله يرزفك..

سماح:امين واجيب ليك تانتي ماحسن ياربي

ضحى:الله ينجيني..انا مرتاحة هاكا ولله الحمد..اجي معمرك وريتيه ليا؟

سماخ:معندييش تصويرتو هه ومعندوش لا انستغرام لا فيسبوك

ضحى:قلتي عندو مدرسة ياك؟؟

سماح:ممم

ضحى:دخلي لباج ديالهم وقلبي فتصاور..ميمكنش ميكونوش لايحين تصاورو فشي ايفينمون

سماح:والله الى فكرة..

كتبات اسم المدرسة فالفيسبوك وخرجات ليها لباج وبدات تتقلب وتتفلي فالتصاور بحرا وبحرا مالقات تصويرتو مع واحد الاستاذ كبير فالعمر باينا من شي حفلة تقاعد..وساعو عينيها من شدة الفرح وهي تتشوف حبيبها ومتشوقة توريه ليها

دورات تيليفون وقالت ليها:هاهو

ضحى:(تتشوف فيه)زويين عندو حقو..عندو كرييشة ههه

سماح:(بخجل)ااه هه

ضحى:تيكمي؟؟

سماح:(باسف)اه

ضحى:وكي غديري معاه ونتي ازاماتيك

سماح:مكيكميش حدايا كااع

ضحى:اوا الله يسر..مهم انا لي غنماكي لييك ازين ههه

سماح:(بفرحة عنقاتها)وعلاه انا غنمشي للبراني

ضحى:(بسرور)الله يكمل عليك ابنت خالي ياربي

سماح:امييين ياربي

تخشاو فالفراش وبقاو عاطينها للجموع وسماح تتعاود ليها عليه وعينيها تيبرقوو تا داهم النعاس..

*****

مر اسبوع كامل..روتيني وفيه لقاءات كثيفة بيناتهم فانتظار عثمان اهضر..هاد الاخير لي مجبدش الهضرة مع سماح بتاتا فضل غياب زينب..اليوم الحد مكاين حد..سماح واقفة فالكوزينة تتوجد غديوة ديال الحوت والشلايض..وعثمان فالبيت تيتفرج بهدوء..

وجدات غداء زويين مشكل بالحوت بجميع انواعو وشلايض فانتظار وصول زينب ويسرا وكريمة وولادها لي مشا الياس اجيبهم..

جات جلسات حدا باها بتعب وقالت:فففف واا عاد ساليت

عثمان:تبارك الله على لحادكة ديالي

سماح:(بفخر)طيابي زوين ابابا ياك؟؟

عثمان:بحال ديال مك ههه زوين وبنين..معرت مالهم تعطلو(شاف فساعتو)

سماح:دروك ادخلو..دويت لماما قالت ليك قربو

عثمان:مزيان(شاف فيها)

صونا الباب وهي تنوض منقزة وقالت:جااو

نزلات كدردك ببيجامتها الصيفية هي حلات الباب وهي تلاح على مها بحرارة تتعنق فيها وتعاود

زينب:هههععع الخايبة

سماح:توحشتك ازينب ههه

زينب:الكبيدة ديالي..توحشتك

سلمات على يسرا بالعناق وعلى كريمة ودراري..ودخلو تسالمو مع عثمان لي خداهم كاميلين بالحضن..

جلسو مع بعضهم مجموعين على الغدا لي حطاتو سماح والضحك والتكركير..وحديث عن الحال والاحوال والعائلة الكبيرة ديال زينب لي رغم وفاة امها وباها لكنها بقات متشبتة لأصولها وبعائلتها من اصغرهم تال اكبرهم.

دازت عشية مليئة بالجو العائلي..ضحك ونشاط لا حدود له..

ناضت سماح جمعات الماعن ونضات الكوزينة وجات تلاحت حدا كريمة وولادها لان زينب فبيتها مع عثمان ويسرا مع راجلها

كريمة:بقيت انا وياك ازين..كلشي ملهي برجالو

سماح:نتي طلقتيه!!

كريمة:ونتي تزوجي بيه هههه

سماح:الله يمسخك

اما فبيت عثمان وزينب كانت جالسة فوق رجل عثمان لي كيتمازح معاها

عثمان:خليتي بلاصتك امعيسلة

زينب:ههعهههه تانتا(تتلعب فلحيتو)مالك درتي ليا النار فالمسمار تا جيت

عثمان:منتوحشكش ولا؟؟

زينب:توحشني عندك صح هههههه ولايني قلتي ليا زربي فالمجية

عثمان:مممم(باسها فعنقها)بنتك جاوها الخطاب

زينب:عععهههه وايلي..شكون هاد زين الصافي لي جا خطب فلالة بنتي؟؟

عثمان:تعقلي على سيد لي حاما عليها فاش ضربها داك الحمار فالعرس

زينب:(بدات تتفهم ولبسات الهدوء)ممم عقلت مي معمري شتو

عثمان:عاارف..هو لي جا عندي بغا يخطبها

زينب:واش قلتي ليه؟؟

عثمان:اش عندي منقول ليه..الهضرة لولة ولخرة ديال سماح

زينب:قلتيها ليها؟؟

عثمان:لا لا مقلت والو..منك ليها..مابغيتش نبزز عليها شي حاجة

زينب:عاجبك؟؟يعني كي جاك؟؟

عثمان:واسيد تيبان شارب عقلو ..تيهضر بالمعقول واخا متيعرفش اهضر هههههههه باينا معندووش مع الصواب ههه

زينب:هههههههه اوا هاد جيل..انا نهضر معاها ونشوف اش تقول

عثمان:اتبغييه ازين(غمزها)تدوزها علي؟؟

زينب:(مطمرة)اش غدوز عليك؟؟

عثمان:تقولي ليا مكانتش تتعرفو؟؟

زينب:يقدر تكون تتعرفو علاه فين بيكون شافها....عادي اكون شافها فشي قنت اه سماح تتخدم فليزيفينمون بزاف دونك نوغمال اشووفها

عثمان:مممم دابا بغيتي تقولي ليا بلي سماح مكتعرفووش؟؟

زينب:الى شافتو تعرفو راه عادي..زايدون هاد الوقت البنت هي لي تتجيبو

عثمان:(ضحك)اوا اجي ازين جيبيه هو لول ونشوفو بنتك..

شدها من خصرها وقلبها فوق داك السرير..بحنية مارس معاها كي ديما وهي مولات اللسان الحلو دافعات على بنتها وحيدات ليها التهمة حيت الى شك عثمان هي بشوي نهارها مطلع فيه شمش

فالمساء..بعدما خرج عثمان للجامع والياس راه خدام..بقاو هي نسا بينهم وهي تنطق زينب تتضحك:هي سي منصور تقدم لالة سماح؟؟

كلشي هز راسو وهي تنطق سماح باحراج:قالها ليك بابا؟؟

زينب:هههههههه قالها لياا.. 

كريمة:واش جا خطبك من عزيزي؟؟

يسرا:وانا تنقول مال سيدة تتفرنس وطايح عليها السر هههه

سماح:(حشمات)ههه حشومة عليكم(قربات لزينب)اش قاليك بابا؟؟

زينب:قاليا جا عندو وشك بلي مصاحبة معاه؟؟

سماح:اويلي

زينب:ولكن على حساب مابان ليا منصور جمع وطوى ليه على الهضرة..وتا انا قلت ليه راه ممكن تكون تتعرفو مي عادي شافتو فشي بلاصة حيت تتخدم بزااف..

يسرا:(بفرحة)الله هنية عليييك اختيي ههه فرحت ليك

كريمة:هي نوجدوو هههه ههههه

زينب:ههههههههههه باك صيفتني لعندك وقاليا نسولك..مبغاش احرجك نتي وعيط ليا

سماح:مممم حشمت والله(ولات حمرة)راه باينا موافقة..راه شاداه الدودة فاش تعطل بابا عليه فالجواب

زينب:ههههههههه ثقلي ثقلي. ..انا هي بغيت نثبث باك بنسولها اما انا عارفاااك باغياااه 

سماح:(بخجل)اماما راكي عارفاا

كريمة:(طلقاتها بتزغرية)لولولولولولولو..

قفز ولدها من نعاس حيت كانت حاطاه انعس وهي تربث يسرا عليه وقالت تتضحك:رجع اماما بسم الله عليك 

كريمةة:وناااري شحال فرحت ليييك اسمااح

زينب:اصبرو لتسبقوش الفرحة ههههه نقولها لعثمان يعيط ليه اجيو واكون خير

يسرا:(ناضت عنقاتها)الله يكمل عليك بالخيير ياربيي

سماح:(بفرحة مخفية)امين 

دخل عثمان ديك ساعة وجمعو وطواو واخا سماح الضحيكة فالتا ليها..ناضت باش متفرشش للكوزينة توجد العشا والفرحة غتخرج من عينيها..اتجمع هي ومنصور فدار وحدة ممصدقاش

جات عندها يسرا وقالت:الحادكة ههه لالة لعروسة

سماح:ههههه ناري ياختي قلبي تيضرب بزاااف واش هاكا وقع ليك؟؟

يسرا:كثر من هاكا هههه لله يسر ليك انا ملي هي رجعات الضحكة لوجهك هذااك هو نهار لكبير

عنقاتها بجهد وقالت:لهلا يخطيك..خصني نعلم عادل هههه

ضحى:سيري علمي بعدا العرييس وعادل من بعد..اجي بعدا اش سميتو؟؟

سماح:(حمرو خدودها)منصور

يسرا:واسمية هي هههه سيري ياله

سماح:انكمل العشا

يسرا :وا هي سيري انا نتكلف هههههه

مشات تتفرنس دخلات لبيتها هزات تيليفون لقات تصالات كثيرة منو..دوزات ليه الخط بسرعة تترعد وعينيها تيبرييو.. كي تشد الخط نطقات بفرحة:منصوووور

منصور:(باستغراب)مالك

سماح:بابا وافق هههه هضر مع ماما وهضرات معايا هههه

منصور:(براحة)على سلامتنا ...شنو امتا نجي

سماح:صبر اعيط ليك هههه ناري متخيلش شحال فرررحت بزاااف

منصور:(حاس بفرحتها)بصح فرحانة؟؟

سماح:بزااف ههههه الحمد لله

منصور:صافي هي يعيط ليا نجي..

سماح:(تتعض شفايفها)نتسناك ههه

منصور:نقصي من تحلوين شوي

سماح:هههه الله اسمح ليك راه صوتي هوكاك داير

منصور:(كيكمي)علي انا ..قلتها و نعاود نقولها صوتك مقحبن من لخر 

سماح:(معجبهاش الحال)منصووور براكا من للمعيور

منصور:حاسباها معيوور..انا عندي راه شكرتك..حيت ماشي مثلتك بيهم تأ لا..صوتك مقحبن زعما رقيوق وحنين وتتحلوني وتتخرجي على طاسيلتي بييه

سماح:(رطابت)وانا هاكاك داااير صوتي..

منصور:خليه هاكاك..تا يعفو علينا الملك..

سماح:هههه امين..ياله سير نوجد العشا 

منصور:سيري مبقاش بزااف 

سماح:واييه باي باي..

قطعات معاه وشافت فالمراية كتشوف بنت فرحانة ناشطة تيبان ليها كلشي زوين..حمرات بالخجل وهي تتشوف فراسها ..قربات تتزوج تاهيا وتولي مرا مزوجة مع شخص لي تتبغي

دخل باها كسر سكونها وهي تفافا وقالت بخجل:بابا

عثمان:لالة العروسة

سماح:هااا(تخشات فحضنو حشمانة)

عثمان:صافي ازوينة سخيتي بباباك

سماح:(ولات حمرة وهي ساكتة)

عثمان:مكنتش بغيت نسولك انا قلت منك لماماك..ولايني بغيت نسمع جواب من فمك وبصراحة

سماح:حمم لي بان ليك لبابا

عثمان:(شدها من ذقنها)انا ابابا بيتك هي تكوني فرحانة..عارف مكنتيش تتهضري معاه قبل ولايني راك بنت وعادي اعجبك شي حد

سماح:(حانية راسها)اه ابابا

عثمان:البنت شحال ماجلسات تتزوج..وانا نهار الكبير عندي هو نهار نزوجك ابنتي

سماح:(باست يديه)الله يطول عمرك

عثمان:نعلم سيد غدا اجي وديك ساعة جلسو وهضرو..معمرك هضرتي معاه؟؟

سماح:حمم الكذوب عالله حراام..ابابا انا جا عندي للخدمة وقاليا بغيتك للمعقول وهذا.. وبين ليا بلي عاجباه وعطيتيو نمرتك تالعنوان..

عثمان:الله يرضي عليك ابنتي..هادشي لي فكرت فيه تانا..تيبان ولد نااس وميسور..خص هي معاملتو تكون مزيان

سماح:ضريف ابابا

باس راسها وحضنها وقال:الله يرضي عليك واكمل عليك بالخير ياربي..انا غدا نعيط ليه ونعلمو اجي

سماح:ان شاء الله

تسمع صوت زينب موراهم:وياله ابابا وبابا تعشااو ههه

عثمان:معيسلة نتي هنا

زينب:من قبيل ملي بدات عليك ببابا بابا هههه

تخشات سماح فحضن باها فرحانة وحشمانة وهو معنقها وقال:خليني راني مساخيش ببنني

زينب:تاواحد مسخا بيها ولكن خصها تاهيا تزوج وتحب وتتحب

عثمان:حم ياله زيدو

خرجو مجموعين وهي واحلة ليها واحد التنقيزة بالفرحة فجسمها..مكرهاتش تهز تعريجة وتضرب وتقول واديتو ديتو والله ماخليتو..ولا تهز ميكرو وتغوت واعباد الله واراه غنتزوج

تعشات معاهم ناشطة وماشطة خصها هي تشطح..تتضحك وتفرنس مزيااان وفلخر ناضت غسلات الماعن وكون عطاوها تجفف دار وتحكها بالفرحة اديرها..

اما هو كان فجلستو المعتادة حاط كارو وتيبرم فالحشيش مع قهوة كحلة حيت شراب ممنوع مع قرب رمضان..

تيتنغم بموسيقى الشاب خالد وانفث الدخان بمتعة..مستغني تماما على المخدرات..

منعس تاقرب الفجر عاد ناض تلاح ففراشو وريحة الكارو كتعطعط منو..مفاق هي على رنة هاتفو مع العشرة تصباح..فيقاتتو مغوبش وخصو هي معامن..مشافش فالنمرة مزيان دارو فوذنو:الو..

عثمان:السلام وعليكم

منصور:الو

عثمان:سي منصور هذا..انا بابات سماح

هي سمع سماح حل عينيه ونطق بادب:اهلا سي عثمان..كيداير لبااس؟؟(راسو تيزدح)..

عثمان:الحمد لله اولدي ونتا بخير؟؟

منصور:الحمد لله..تسنيتك تعيط ليا قلت واقلة مبغاتش البنت

عثمان:لا حاشا اولدي هي تسنيت مها تا جات من سفر..راه دوينا معاها وقبلات تشوفك..جيب والديك ومرحبا بييك

منصور:الله يكبر بيك..امتا مناسب ليكم؟؟

عثمان:وقتما طلقاتك الوقت مرحباا

منصور:غدا ان شاء لله فالعشية

عثمان:مرحبا اولدي..نتسناك

منصور:(بذكاء)غدا نعيط ليك تعطيني لادغييس ديال الدار

عثمان:مرحبا بيك..ياله نخليك نهارك مبروك..

منصور:الله يعاون

قطع عليه وخلى فوذنو جيب والديك..اشمن والدين غيجيب؟؟عبد العظيم وراضية لي مابينهم هي الصداعات..زفر وناض من بلاصتو راسو غيتشقق..دخل لحمام دوش وحيد عليه ريحة الكارو وجمع رواين لي حداه مكيبغي حد اشوفو شنو كايدير..كيخلي هي الماكلة فقط..اما الحشيش وداكشي تيجمع كلشي..

لبس حوايجو ونزل تيحاول اصحصح تلاقا الخادمة وقال:جيبي ليا قهوة كحلة..

زاد وتوجه للجردة فين غيلقا الحنانة جالسة وبالفعل كانت جالسة كي القايدة..متولة كي ديما برفقتها لطيفة كيشربو اتاي..باس راسها وقال:لالة راحتي(بتاسم ليها)

راضية:نننن وووووللللللل(عيات)

منصور:مرتاحة اميمتي؟؟

راضية:حممممد الللللله

منصور:وجدي ليا راسك تمشي تخطبي ليا سمااح

طلعات تنهيدة خطيرة بالفرحة تاغرغرو عينيها مكرهاتش تحرك يديها وتعنقو وتنوض تزغرت ومتخلي مدير..

منصور:(لمح الفرحة فعينيها)وكدي غدا نمشيو نخطبووها امي واخا

لطيفة:مبرووووك الله يكمل كلشي على خير ياربي

منصور:امين(باس مو فحنكها)واخا الحنانة..

راضية:ننننن اللللللللللللله الللللللخ ففففففففففررررررررر(عيااات)

منصور:فرحتي ياك هههه(باس راسها)فرحي ازين غدا نمشييو

انا هاني مشيت نقضي شي اغراض..

بتاسمات ليه مخليها طايرا بالفرحة..خدا قهوتو فطريق من الخادمة جغمها دقة وحدة وخرج كيشعل كارو..هي طلع وصونات سماح وهو يقول:اوا نشوفو بلان عبد العظيم كي داير

مجاوبهاش خلا تينضي الاغراض..طلق موسيقى وشاعل كارو وشدها ديركت للشركة ديال عبد العظيم واخا محاملش اشوفو لكن الغاية عندو مهمة..

وصل باركا الاوطو ونزل امام مبنى كبير ومكتوبة فيه:راان

زفر وطفا الكارو برجليه ودخل مرتجل من غير مايضور عينيه على المكان..وقف على سكرتيرة وقال:كاين؟؟

السكرتيرة:شكون؟؟

منصور:المدير ديالك؟؟

السكريتيرة:عندك شي رونديفو اموسيو؟؟

منصور:قوليه منصور ولدك

وقفات باحترام وقالت:واش ولدو؟؟سمح لي مكنعرفكش..واخا انا نقولها ليه

دقات السكريتيرة وخرجات من جديد هي وسيدة فمقتبل العمر زوينة..لاحت نظرها لمنصور لي طلعها ونزلها وحرك راسو بسخرية..دخل بلا متقوليه لوخرا والو..

لقا عبد العظيم جالس فكرسيه بنخوة وهيبة كبيرة..لابس جلابة صيفية خفيفة مع سلهام خفيف هو الاخر وضروري من طربوش..هاز فيدو التسبيح كيلعب بيه..فرنس ليه وقال:مرحبااا بسي منصور

جلس فكرسي محاملش اشوف فيه وقال:لباس؟؟

عبد العظيم:بشوفتك اولد راضية..اش حب الخاطر حيت مجايش باش تشوفني لله فسبيل الله

منصور:(دار بتسامة استهزاء)تتفهمني بعدا..بغيتك على واحد الغرض

عبد العظيم:خاصك فلوس؟؟

منصور:(ضحك كيمسح على وجهو)ههههههه لا نتا بزااف

عبد العظيم:جمع راسك ..راه باك هذاا

منصور:(ببرود)اسي با بغيتك تمشي معايا تخطب ليا 

عبد العظيم:(تفاجأ)نتا غتزوج؟؟

منصور:بنت ليك مراجلش؟؟

عبد العظيم:(خنزر)راه عيقتي بهاد قلة الادب..ولاد عبد العظيم كاملين رجال من طرف تالطرف..انا هي تعجبت..

منصور:سبحان الله..دابا شنو؟؟اتمشي؟؟

عبد العظيم:مظنيتش فيك تجي تطلب مني نمشي معاك..

منصور:ميمشيش بالك بعيد ..بات البنت غيبغي اشوف با وصافي

عبد العظيم:شكون هادي؟؟كنعرفوها؟؟

منصور:شكون وكيفاش ماشي مهم..غدا غنمشي اتمشي اييه لا؟؟

عبد العظيم:جاي تعلمني ليلة بليلتها اسي منصور..ناوي تزوج ومعالمني تال ليلة بليلتها

منصور:(جبد كارو شعلو)علاه نتا علمتيني فاش بغيتي تزوج؟؟تزوجتي جوج مرات ومعلمتينيش..الحاجة ولخراانية..

عبد العظيم:ممفلت والو

منصور:الحوتة الخانزة دغيا تتعطي ريحتها غدا مع ستة ضروري..(وقف)ارا ليا نمرتك نعلمك

عبد العظيم:سير اولد راضية..انا نعيط ليك ونعلمك..غتكون تا الحاجة

منصور:(بلا مبلاة)مرحبا..عبد المالك وعبد الغني فرااسهم

عبد العظيم:انا اخر من يعلم؟؟

منصور:(بلا مبالاة)متجيبش معاك داك فتاح حيت غنرضووو

عبد العظيم:(وقف مخنزر)خووووك هذاااك..خصو يحضر

منصور:الى غيجي دير بناقص ومتجيش نتا نيييت

عبد العظيم:سير سير اولدي الله يرد بييك

خرج مخليه كيستغفر الله واتعجب لحال ولدو..لكنو فرح انه قصدو اخطب ليه..الى بغينا نحققو مزيان منصور هو المفضل عند عبد العظيم حيت هو لي حرش فولادو..كون مكانوش ضروف كون هو لي شاد خدمتو

خرج من عندو مكره..هي وصل حدا لاوطو دفل ولاح الكارو من جديد وقال:خزيييت تريكة القحوب

طلع وتوجه لخدمتو ديركت محاملش راسو تجبر اهضر معاه واخا محاملش لكن على ود سماح كلشي يهون 

تاصلات بيه من جديد وجاوبها فطريقو للبيرو..وقال: الحووب ديالي

سماح:ههههههه سعداااتييي..شنو سر هاد النشاط؟؟

منصور:(دخل لبيروه)ديما ناشط ازين...فين راك؟؟

سماح:فالمدرسة..شنو درتي؟؟

منصور:عيط ليا باباك صافي غدا هاني عندكم

سماح:(بفرحة)مرحبا بيكم..(بحماس)شحال اتجيو؟؟

منصور:انا ولالة راحتي..خوتي بجوج..الحاج والحاجة

سماح:مرحبا بيكم هههه 

منصور:حشمتي ولا غي جاب ليا الله..

سماح:(بخجل) صافي براكا هههه لبارح دوا معايا بايا راني غرقت فحوايجي..

منصور:سماح والحشمة والله منتيق

سماح:والله تا كنحشم ههههه 

منصور:دابا نشوف ههه ياله وسيري نتشاوفو غدا

سماح:ان شاء الله..

قطعات معاه وكتبات ليه.. فميساج:"كنبغييك"

قراه وبتاسم وحط تيلي مدهي فخدمتو..اما هي طارت عند مها لبيروها دخلات عليها كي العجاجة: ماما منصور ودارهم جاييين غدا

زينب:(تتسني شي وراق)عرفت هههههه

سماح:خصنا نوجدو اماما..الحلوة وشنو غنلبس..

زينب:عيطت لعمتك وعلمتها تصايب الحلوة، الماكلة راه خوك تريتور هو يتكلف..

سماح:اوا ولبااسي

زينب:انا ندي بنتي درووك عند عليا تختار القفيطين لي حبات..

سماح:علاه انلبس قفطان؟؟

زينب:واضروري..مي ماشي شي قفطان نييت هي شي حاجة خفيفة سيتو..

سماح:وخصني سوان لوجهي 

زينب:(ضحكات)ههههههههه ويلي شيطان راه غي غيشوفوك هادشي درتيه درووك فالعرس اش ديري؟؟

سماح:معرفنش(مدات ليها يديها)شوفي يدي عركانين

زينب:عادي ابنتي..تانا كنت بحالك فاش بغا باك اخطبني..خفت هي نطيح ونجي على راسي وانا داخلة عندهم..

سماح:يااربي يكون كلشي هو هذااك...المعقول كيخلع..

زينب:هههه ولكن زوين..ياله دوزي هزي صاكك وياله لعند عليا ختاري شي قفطان زوين والباقي راه محلول

سماح:واخا

مشات هزات ساكها وتأبطات ذراع مها بحب ومشاو قاصدين الخياطة لي مولفين اخيطو عندها اسمها عليا..كيمشيو عندها تال دار وتوريهم كلشي

ختارت من عندها قفطان ساامبل مطروز..جاي معاها زوين فالزرق بارد

مختارت داك الققطان تا شغباتهم حيت هي من نوع لي يختار دغيا.. ولكن مع هاد ظرف بقات تعزل وتخير

رجعات للخدمة وعقلها تيفكر واعاود اهندس..اش تدير واش تشري..تا منصور نسات ماعيطات ليه

فالعشية رجعات هي ومها لدار وهو يتلقا ليها الياس تيضحك زغرت وقال:حسابني اتبوووري هاااا(عنقها)جلستي تا جلستي وجبتيه ملعق ههههه

سماح:الله يمسخك هههه

الياس:كيفاش قالبك؟؟الزواج كااع خههههه ممتيقش نتي البرهوشة اتزوجي

يسرا:(تدخلات)مالها كي جاتك هههه من هنا نقولها ليك كيما وقفات فعرسك اتوقف معاها..

الياس:وايلي اتوصيني(عنقها)عرس ختي ومنوقفش فيه...احسن عرس ايكون ديالك..واللباسي لي باقي مالبساتهمش شي وحدة تلبسيهم

سماح:احفظك ازين ههههه

خرج عثمان من الحمام وقال:علاش تتدويو؟؟

الياس:والو هي لقيتينا بينا نهزو صلا وسلام وتنتسناوك تعشق نتا لول اسي عثمان..

عثمان:(ضربو للكرفادة)والله الى خاصك شي قتلة تربى هههههه(جر سماح)لالة العروسة

سماح:(بخجل)باقي موليتش عروسة ابابا هههه

عثمان:(باسها فحنكها)لا لا قربتي هههه..

زينب:بعدو منها تقتلوها بالحشمة

كريمة:(جايا من الكوزينة هازا اتاي)باينا الحشمة على وجه الطرااح نهههه زيدو تاكلو زيدوو غدا عندنا بزااف مايدار..

الياس:أ لي سمعك يقول هادي راه غتطيب ولا تصايب الحلوة

بجقات فيه وقلت:ابااازز انا راني هي العريفة تالعرس ههههه(كتكب اتاي)قولينا اعزيزي زوين هاد العرييس؟؟

عثمان:هههههه عندو حقو هههه خصو هي يكون ولد ناس واتهلا فبنتي اما زين ماشي سوقناا

زينب:واييه هي يتهلا لينا فيها ههههه

تجمعو على داك اتاي وموضوع الساعة زواج سماح وهي كالسة وسطهم بكثرة الحشمة بغات طرطق...كيطلعوها عليها تاكتولي حمرة..

*****

يوم جديد..بأحداث جديدة

فاقت سماح مع العشرة تالصباح..غسلات وجهها وسنانها وفطرات فانتظار ضحى تجي هي ومها لي ضلات لبارح وباتت تتصايب فالحلوة ليها حيت فاتي هي لي معروفة عليها حلايوية فالعائلة وكانت شي ايام تصايب لي كوموند للناس

صونا تيليغونها لقاتو منصور ودخلات لبيتها فرحانة وقالت:الو

منصور:نستيني لا؟؟

سماح:وانا نقدر ههههه هي تبرزطت

منصور:اش مبرزطك؟؟

سماح:اوا توجاد ههههه

منصور:زين ديالي تيوجد راسو ليا

سماح:(بخجل)شويا وصافي خهههه

منصور:اش بديري كاع؟؟

سماح:اوا تاويل تلعيالات...الحلوى وتوجاد لاخر ههههه

منصور:واخا الغزالة..متوجدي مزيان تانعقدو وديك ساعة (تنهد)ارا متوجدي..

ضحكات بخجل وتقطع صوتها ونطق:مشيتي المشة؟؟

سماح:معااك هههه صافييي حشوووومة هخهه

منصور:دابااا نشووفووو..اجي نسيت علاش كنت بنعيط ليك..اشبان ليك نلبسو الخواتم اليوم

سماح:هااا..ياك جايين هي تدويو؟؟يعني هي اتعارفو العائلات

منصور:(كيحك راسو بعدم فهم)بصراحة انا مكنفهمش فهادشي حيت معمري حضرت بحال هادشي..وتا الواليدة لي توريني مريضة..معرفت صراحة اش ندير.. 

يتبع...