وقف قدام الواد العريض..الغابة الخاوية والجو المضبب ماكاين حتا بني آدم واحد ماكايدور من ديك الجيهة واخا زوينة وهادية..وهو زاد ردها من داكشي الرفيع..
طبلة طويلة قدام الواد مباشرة مفرش عليها غطاء ابيض فوقو اطباق مغطية وجوج طباسل مقلوبين وشميعات صغار منتورين عليها وعلى البلاصة اللي دايرة بيها زيد عليها وريقات من الورد الاحمر مشتتين فالارجاء بطريقة عشوايئة
..ماعرف الإبداع منين جاه واش من كترت المسلسلات اللي كايلمح مرة مرة مو كاتفرج فيهم ولا هو أصلا شخص رومانسي وجات الفرصة فين يبين حداگتو..تنهد والبسمة على وجهو هز الطيلي كايصوني فيدو وجاوب بسعادة
تاج الدين: وي با خاليد كلشي واجد؟
خاليد: كلشي واجد وهو هااداك عطيني العنوان ونجيبو لك بنفسي هههه
خاليد: كون هاني من السيمانة اللي فاتت فاش عطيتينا الشكل وحنا كانصممو فيه حتا طلع كيف رسمتيه تماما
تاج الدين: سير الله يخلي ليك المدام عهههههه تهلا
خليد: واعرض علينا للعرس ماتنساناش ههه
تاج الدين: نتا اللول كون هاني هههه
...
قطع مبسم وشاف قدامو تاتي..البريق فعينيه واضح وشعلة خفيفة سارية فقلبو من الخطوة اللي غادي فيها .. ضرب الرعد فالسما وزادو الغيوم تجمعو هو يهز عينو فيها وقال مككشر وجهو بصدمة: لا لا يااربي يااربيماطيحش الشتاا ويتروون كللشي يااربي لا
.....
وقفات سيارتو بعيد عليهم شوية وقدام ريسطو شيط وسط المدينة..نزلات نجاة وعادل وراها ضاحك دخلو وخلاو بركان وراهم قريب جدا غايتفرگع
..ماكرهش ينزل ويدير شحال من حااجة كادور فبالو ولكن باشمن حق تاني..الوعد اللي عطا لتاج الدين بين عينيه واقف ماقادش يتخطاه وحتا لو زعم ماغايضمنش راسو شنو ممكن يدير
تما فكر فحاجة وحدة.. طلع حواجبو بجوج وهز الطيلي بسرعة دوز رقم وبعد تواني ردات بصوت رقيق
-الو حسام صاڤا
حسام: وي وي الحمدلله..احم نانسي مسالية دابة
نانسي: عاد خارجة من واحد لوپيغاسيو ..بغيتي شي حاجة؟
قطع كايزفر ونزل من اللوطو غادي جاي وكايتسناها على الجمر وعينيه على الباب
وقف بسيارتو قدام باب العمارة
.. نزل بشوميز حريرية بيضا مطلع ليها الكمام والصدايف اللولين حالهم.. سروال توب اسود على فصالتو داخل فيه الشوميز وحداء بني لامع مطلع شعرو الاسود على حجبانو العرااض وعيونو العسلية مبسمة
..تم داخل وريحتو وتبوگيصتو سابقينو اما الضحكة اللي راسم طيرات العقل لمول العقل واللي مايكسابوش خلاتو بلاش..
خرج من الاسنسور حل باب الدار وهو داخل بدا يعيط
تاج الدين: هياام..حبيبتي ..الصممكة فيينك هياام
طل على الكوزينة والصالون والبالكو ساعة مالبها أتر فحتا بلاصة وتم طالع الفوق.. دخل للبيت وعينيه كايدورو تما
..غاتكون دابا كاتقرا رسالتي وأنا ماكايناش..ومن هنا للقدام ماغانبقاش اتاج..
سمحليا بزااف ولكن منقدرش نزيد على هاكا..ماتستاهلش نظلمك معايا فالظلام اللي تلاحيت فيه..عارفاك كادير كلما فجهدك باش هادشي اللي بيناتنا يبقا مستامر ولكن ماكافيش..ماكافيض احبيبي وعقلك غايبقا ديما خدام كايفكر وديما مضغوط من جيهتي..انا يستحيل نخليك ضيع حياتك ولا تخربقها كيفما كان الحال..سعادتك عندي اهم..وسعادتك عمرها تكمل مع وحدة بحالي..سمحليا بزاف..سمحليا اتاج وعيش حياتك..كملها بحالا عمرنا تلاقيتينا وعمرنا تشاوفنا مرة خرا..غانتعدبو شوية ولكن من بعد غانرتاحو حسن من كلا مرة تشوف وجهي قدامك وتتفكر موضوع الاغتصاب اللي عمرك غاتقدر تمحيه..هاد الموضوع اللي مرضني وخدا مني سنين باش نتعالج من كوابيسو وأنا متأكدة باللي جاك صعب مني وضرك فرجولتك كتر..حاسة بيك احبيبي وحاسة بالضغط اللي وليتي فيه..انك تربط راسك مع وحدة مغتصبة شي حاجة ماساهلاش انا متفهماك واخا ماقادرش تگولها...ولكن راحتك أهم عندي واخا تكون على حساب تعاستي
..بدل حسام البسمة اللي كانت على وجهو بتخنزيرة فوجه عادل ..حاط ايدو على الطبلة كايقرقب وعاطيه المدافع باغي غير منين يدوز ليه وعادل عيا يتجاهلو فالاخير دوا
عادل:نعام اخويا شي حاجة؟
بسم بغل وناض من بلاصتو تحت نظرات نانسي وفمها العامر..جر الكرسي ديال نجاة وگلس حداه حاط ايديه على كتفو وخنزر
حسام: دابا نتا علاش كاتقلب بالضبط
بعدم فعم جاوبو: نعام؟؟
كمل ببسمة خفيفة: الواحد كايبغي يدير عقلو ويفكر شوية ولكن خصارة بنادم كايجي ويزعزعو على طوعو..ديك الساعة منضمنش ليك شنو ممكن يدير
عادل: نتا شكون بعدا فين كاتعرفني
حسام: سمع اسي و لوجه الله..غاتنوض بوحدك منك لراسك تغبر من هنا ومن قدامي..ولا أنا بهاد گرام تالصبر اللي باقي هاز غانوضك ونغبرك من هنا ومن قدامي
عادل: هه نعام؟ حمق نتا ولا شنوو "ضار وراه" السيكيريتي
حسام: الدرك الملكي هو اللي غايجي..اناا ماخويتش البلاصة باش تعمرها اسي المكلمن واخا..ياأنا..ياتااواحد
عادل: نتاا علامن دااوي
..قلب بسمة البرود لجمود فوجهو وناض وقف...
نزل ظن سيارتو كايجري قدام مطار محمد الخامس.. داخل مع الزحام ديال الناس وغير كايدفع بكتفو ماحاس بحد وماكايسمع حتا صوت من غير قلبو اللي كايزدح بوم بوم بوم
..طار عند الفتاة اللي كاتاخد ليپيي وقف قدامعا كايلهت وقال بسرعة وكلمات متقاطعة
تاج الدين: اسبانيا.. الرحلة لاسبانيا..ايمتا؟
-عاد دابا غاتقلع اسيدي.. سربي ولا غا......
قاطعها ومشا كااايجري جيهت الركااب وكمالت جملتها ضارت فبالو بحالا قالت: سربي ولا غاتفقدها..سربي ولا غاتمشي وعمرك مازال تشوفها..سربي ولا غاتموت تاني
خرجها لبرا ولاحها على اللوطو بالجهد والفوار كايخرج من فموو: علااش اااصلا نتي خليتيينا ندوييو؟؟ فييين عمممرك تشاااورتي ولا دوييتي فييين دييما ساااكتة وغااادة كااتهربي.. دييما نفففس الغلللط نفففس الغلللط نفس الغللللط وشكووون كااايخللص انااا.. كل مرة اناااااا الضحية والسببب دااك التكبببر اللي فيييك
هيلم: نتا ما..
قاطعها مغوت: طلللعي
..حل الباب ولاحها لداخل حتا توعتات خبطو وراها عاد داار طلع وعفط حتا تحكو الروايض مع الارض غادي بسرعة خلعااتها بزااف
.......
بقات أميمة گالسة على الگازو فالجردة ديال الڤيلا..ساهية قدامها وكلشي فيها محروق خصوصا فاش كاتفكر باللي ممكن تكون كاتبغيه وممكن يحرقها بزااف هاد الحب وتبات مألمة بسبابو
..نزلات من عينها دمعة يتيمة حارة وقبل ماتمسحها سبقها جمال ومسحها..گلس ملاسق معاها ماشافتش فيه ونزلات راسها بهدوء ، فحين هو ضور يد على كتافها ويد خرا فحنكها كايدوزها بحنية وملامح الانزعاج مرسومين عليه
جمال: شكون قلق حبيبتي ممم..مالكي هاد النهار شي حاجة وقعات..ياك؟ هضري مالك
تزيرات كتر وضارت شافت فيه بعتاب والدموع مجموعين فعينيها..بقا كايشوف فيهم مدة جامع حجبانو حتا نطق فالاخير
جمال: انا السبب؟
بهدوء هامس قالت: نتا السبب فكلشي
جمال: و ..علاش شنو..
قاطعاتو بتساؤل: نتا علاش بستيني
..ضرب البرق فالسما ومعاه نزلو قطرات المطر فوق ريوسهم مباشرة..حتا حد مازاح عينيه على التاني ولا رمش فوجه التاني ولا حس بشنو داير بيه من غير الطرف التاني
..بقاو ساهيين فبعضياتهم حتا نطق بهدوء مماتل ليها
جمال: بصح باغة تعرفي
نزلو الدموع اللي كانت حابسة وقالت برجفة: باغا نرتاح اجمال..هاد الليالي مابقيتش عرفت النعاس وكلو بسبابك نتا هءهءهء انا منقدرش على هادشي ريحني عافاك وگول
جمال: حيت كنبغيك
خرجات من الطواليط بعينين حمرين غادة وكاتنفس بعمق حتا وصلات للطبلة ولقات كلشي غبر من غير حسام اللي گالس كايتسناها بوجه جامد والكاس قدامو كايدور..
ضورات وجهها عااقدة حواجبها وتتقلب على عادل ونانسي هاادو فين غبرو؟
..مشات لطبلتها مخنزرة هزات ساكها وفنفس اللحظة وقف قدامها مخنزر
حسام: كااينة حاجة وحدة مازال غانتفاهمو عليها ومن بعد الله يعاوني ويعاونك ..انا اول مرة كنت صرييح وگل.....
ضارت كاتزرب وخرجات بلا ماتسمعو ..نفسها مجروحة من كلامو الجديد عليها ماتقبلاتش بتاتا يرجع هاكا ويتبدل وعادباش البنت اللي شافت معاه زادت الطينة بلا وعمرات كاس الصبرر نييت
..شيرات لطاكسي والشتا فوقها كاتنقط مغطية الدموع اللي بدات طيح بألم لكن على غفلة جرها وراه لواحد الخوية حدا الريسطو فيها البركاسات ..وقفها كايقطر بالما وقال
حسام: غاااتسمعي اللي غانگول بعدااا عااد غانوصلك ولكن قبل خااصك تسمعييني
أميمة جاتها اللقوة وقلبها خبط لبرا مرة وحدة وسقل تااهو..بقا كايشوف فيها مقوص حواجبو وكيتمنى مايندمش حيت گالها وهي بزز خرجات الكلام وقالت: و ..واش كادوي من نيتك
تنهد وبعد تردد قال: نتي بغيتي الصراحة..وانا عمري كدبت عليك..عمري شفت فيك ختي من أول نهار تزاديتي فيه..ومن ديما حبك مزروع فقلبي نهار على نهار كايكبر ونهار على نهار كايزيد يعدبني..دابا مابقيتش قاد نصبر وماهامني حد.. من غير قلبي
رمشات بعد مدة وتلفتات عندو كلها بلهفة: يعني نتا مكتبغي حتا وحدة!؟
جمال: شنو؟؟
اميمة: ماكاتبغي حتا وحدة..حتا وحدة گااع
سكت شوية بعدما شاف ردة فعلها..كان متووقع دخل فصدمة تغوت تهرب تشكيي بيه عند واليديها ولكن لا..زدق هو اللي تصدم من اللشي اللي كايشوف وقال بعد صمت
جمال: كنبغيك نتي..كانموت ونتسطا عليك نتي..نتي
رفرف قلبها وفكرشها لعبو الفراشات حتا هروها ورسمو بسمة دهشة على شفايفها..بسمة خلات بسمة جمال تبان وبدون وعي يقول:علاش؟علاش متصدمتيش
شافت فيه كاترجف..حلات فمها مرعد وهو كايلهت حاضي شبغات ديك حتا بانت ليه بدات تهضر هو يطيير عندها
هيام: خاصنا نتفار...
...قطع منهاا الكلام بقبلة فرنسية بامتيااز خلط فيها فمها وخوا فيها السم اللي رواتو بيه، كايدور وجهو مع زوايا فمها وهي مابقاتش قادرة تصبر و ضورات على عنقو يديها زادت جراتو ليها وزاادت غرقااتو حد النخاااع..حيد بصعووبة وخيط الريق بين افواههم بقا كاينهج مدة ويقاد انفاسو لملتاهبة حتا مد يدو لجيبو جبد بواطة كحلة مربعة وشاف فيها بعينين منيمين معسلين وكلامو خااافت شبه هامس: نتي مايصلاح معاك غير حااجة وحدة ، وهي نربطك حدايا حياتك كااملة اهيام وعمرك تحلمي تبعي
قرنات حجبانها بعدم فهم وهو تحنا على ركابيه بجوج ومطلع عندها راسو ..عااشق غريق مسحوور كلهم تجمعو فيه بهااد اللحظة ولمعو بؤبؤ عينيه وهي ممتيقاش حاسة براسها تواني وتفيق من الحلم
نطق مرة خرا كايلهت بعدما حل البواطا قدام وجهها: باش عمرك تبعدي..عمرك تفكري تخليني ولا تهربي كيفما كان الموقف اللي غانطيحو فيه..باش ديك التيقة اللي ماعرفت فين هي تزيد تقوا وتتكبررر..بااش تحطي عليا رااسك..نشدك فيه وأنا عارفك ديالي كياانا وشرعا وقانونا.. باش تريحي قلبي وتعطفي عليه .. تزوجي بيا؟
هي كلمة فقط..كلمة وحدة قادرة تخلق ليك سعادة دائمة لليوم كامل
..وكلمة وحدة فقط .. ممكن تفسدو من اساسو وتخليك مهموم لبقية اليوم
كلشي مقرون بلساننا شنو كايخرج .. قلبنا اللي هو الاساس وعلى حسب احساسو كايرسل الكلمات المعنية للسان .. واصدق كلمة كاتخرج منو هي كلمة كنبغيك .. ماشي بالسهل كاتخرج منو ..وماشي بالسهل كاتوصل للسان .. وماشي بالسهل كايخرجها على شكل حروف ..-لا-..
احيانا كايسرطها ويردها داخل القلب خائب الامل..وهو بألم كايحتاضنها ويتسنى فرصة اخرى..علاما يكون شجاع اكتر
هي كلمة فقط كاتلعب على الادريلانين وتخليه طالع فالجسم..وجسمنا ساعتها كايبدا يتحرك كالفراش طاير من هنا لهنا بسعادة وحيوية .. كلمة "كنبغيك" ..و احسن ترجمة ليها هي ..
بغيتك فحياتي..طول حياتي ..تقبلي تزوجي بيا؟
.......حلات عيونها العسلية ولمعة دايرة على جوانبهم..خدود ممتلئة بيضاء وشفايف وردية منتافخة فوقهم خالة صغيرة القد زادتهم إغراء واثارة
.. جسم ممشوق فوق الفراش وشعر كستاتي طويل ومتموج ..
صباح منعش وقلب مرتاح ودهن صافي وحب مغرقها حد النخاع ..حب خلا بسمتها تترسم فورما تدكرات بطل حياتها تاج راسها وحبيبها الواحد والوحيد .. وعلى اتر تدكرو دورات وجهها جنبها كانت بلاصتو خاوية وريحتو الاخادة فايحة منها..جرات المخدة توسدات بيها خدها وعطرو على جيوب أنفها كايدور .. هزات أصبع يدها اليسرى كاتتمعن فعربون الحب اللي جامع بينهم..خاتم من الدهب الابيض بسيط كتتوسطو تاج صغير براق كلو كايبري .. ناسب اصبعها وهز قلبها من لداخل سدات عينيها والكلام اللي سمعات منو مازال لاعب عليها تأتيرو
..مدات يدها للطيلي جنبها قلبات على اسمو ودارتو فودنها بسعادة كاتسنا الرد ... على الجاب الآخر من الخط وتحديدا فدار عيشة .. جالس تاج الدين فالصالون شوميز سوداء حال صدايفها اللولين وجزء من صدرو العريض كايبان منو زغب خفيف .. دجين اسود بسطمة جلدية نفس اللون حاط رجل على رجل وكايشوف فعيشة جامع حواجبو وهي ضامة يديها مخنزرة كل مرة تشوف فيه بنص عين والسكات كايحوم عليهم
.. سمع صوت تيليفونو هزو وفاش شافها كاتعيط تنهد مطول ودارو صيلونص .. طلع عينيه تاني فعيشة وقال بهدوء
تاج الدين: على الاقل جاوبينا امي..جاي نتشاور معاك زعما ماشي باش تعطيني النخال
رمشات بتردد وشافت فيه بنص عين: و ونوافق ولكن عندي شرط
حل عينيه بسرعة متفاجأ: داوية بصح؟ هههههه "ناض باس راسها وايديها بجوج" اامري كيف بغيتي الحبيبة ديالي لهلا يخطييك عليااا
زقزقة عصافير مغرردة فالبالكو ديال بيتها الاميري وزقزقة مغاايرة كاتهر كرشها من لداخل..هي زقزقة الحب وماأدراك مازقزقة الحب..
ناضت كاضحك المورال مپلاني والحيوية ياسلام
.. اول ما دارت هو ديسك راغب علامة انا اسمي حبيبك جهداتو حتال الآخر وناضت كاتمايل عليه وتغني واقدامها غادين للحمام
..خدات دوش من داكشي خففات فيه كتافها وخرجات ببينوار قصير وفوطة على راسها..دخلات للدريس روم طاحو عينيها على كسوة زرقة كاتجي طويلة للتحت ومن الفوق سميطات..عريضة وعندها سانتور غوزية رقيقة ..هزاتها بسعادة حطاتها فوق السرير وضارت للاطابل ديالها كاتنشف شعرها بالسيشوار ودندن على المراية وكل دقيقة ضحك
..الضحك عامل مشترك بينها وبين نجاة اللي باقا على فراشها ناعسة وفمها مبسم كلا دقيقة ضحك فعالم الاحلام الوردي اللي كانت عايشة فيه..قبل ماتحس بشحطة قوية ففخدها قفزاتها وناضت كاتفتف
نجاة: فيين مشااا فييين فيييين
حطات عيشة صبعها على خدها وخرجاتهم فيها: هاااويلي تي شكووون هااادا ؟؟
هيام: ههههه حيت خاصني نمشي عند اوما ضروري وصونيت لك ولكن ماجاوبتيش
تنهد وقال: كنت عند الواليدة..عاودت ليها عليك وعلى قضية الزواج
جمعات الضحكة وسرطات ريقها بارتباك: وشنو گالت؟؟
تاج الدين: وافقات.. ولكن خاصنا نهضرو فشي امور
تنهدات براحة وردات عليه: اووف شحاال ارتاحيت متصورش شحال كنت متوترة بسبب هاد الموضوع هههه "باستو فخدو" انا انمشي دابا نتلاقاو من بعد
تاج الدين: ماتعطليش "تم داخل كايضحك" وجمعي داك المونطو نسيق لك الخبار حيدتيه غاننصلهم لك كاملين
عضات شفايفها حابسة الضحكة وقبل ماطلع فسيارتها ضارت عندو: تاااج
وقف قدام الباب وحرك راسو
هيام: كانبغيك بزاف اعمري..بزاف
...ضار كلو وتم جاي جيهتها قبل ماتستوعب كان حاط ايدو على عنقها وجرها ليه جامع ليها فمها ببوسة حلوة خطيييرة حل عليها العساس عينيه مزيااان وطرطقهم بدهشة..مصو كامل من الفوق للتحت عاد بعد مخنزر وهي شادة الضحكة بزز
القْلوب علاّمة.. الداكرة كاتمحا.. احاسيسنا كايبردو و عيوننا كاتكدب ولكن قلوبنا كاتعلم..كاتفيق احاسيس غريبة باش تنبهنا من القريب القرييب .. مرات كانتيقو بالحدس اللي كانحسو بيه.. ومرات كانتجاهلوه
..تباعدو يديهم بعد السلام ورجعو راسهم للإناء اللي قبالتهم..مرجان كاتشوف فيهم بنص عين بعيونها المصغرة وهوما بجوج ساكتين سكوت غريب .. القلب عالم وداري .. كيفاش يوصل ويحكي ويفسر تما فين حصل
...دخلات أميمة من الجردة حمرة وهازة قنوفتها للسما طلقاتها فورما شافت هيام ومشات فإتجاهها مبسمة..باستها وجلسات كاتقول: على السلاامة هههه
شافت فيها وضحكات: تاانتي معااهم ههه ياك عاد البارح شفتك
أميمة: ماشي عليا على ماما اللي توحشااتك ههه شحال هادي وهي كاتحلف
مرجان: غير بلاتي مازال نتفاهمو ههههه ..كملو فطوركم نتوما انا عندي شي شغل نقضيه ونرجع
ناضت طلعات فالدروج وكيف غابت على الانظار ضرباتها أميمة للرجل
أميمة: نووضي لبيتي عندي بزااف مانعااود ليك
ردات وفمها عامر: حتا نفطر ههه
أميمة: ياااا على بناادمة هزييه معاك وزيدي .. واهياام وااعاافاك راه غايدخل
...طلعو لسيارتها وديمارات كاتهرب ليها الضحيكة وتشوف وجهو اللي ولا حمر من المراية ..خلاوه كايحك راسو ويزفر بضيق تضرب ليه الصباح فاالصو وضار رجع لسيارتو
قدام العمارة ديال تاج الدين وقفات طاكسي صغيرة ..نزلو منها اقدام انتوية بالطالون وجلابة كحلة مغطايهم ومغطية حتا وجهها بزيف ونيقاب اسود مشبك..دخلات مع الباب كادور عينيها ويديها كلا مرة مطلعاهم تقاد بيهم النقاب ..وقفات على العساس وحنحنات حتا شاف فيها مبهوض وقالت ببحة رقيقة
-سمح ليا اسيدي بغيت نسولك
ناض كايطلع معاها وينزل: اها الشريفة سولي
-نتا هو العساس ياك؟ زعما اللي مكلف بگاع هاد الديور
العساس: واا هو هادا ..اش حب الخاطر
تسدو عينيها على اتر ابتسامة ترسمات على شفايفها وجبدات بزطامها كاتحلو وتجبد منو ورقات زرقين وحدة تابعة وحدة جداد وريحتهم فايحة ..خلات عينيه يحوالو وغريزة الطمع توقف
جمال: واخا "تنهد مرة خرا" انا غانبدا نهضر ونتي ماتقاطعينيش عافاك..شنو ماكان يكون الحقيقة لابد منها تعرف واخا تبقا مخبية طول العمر.. وحنا خاصنا نتقبلوها
....گلسات فالارض منزلة راسها ويدها على عينيها..تنهد هو وضور وجهو بألم لقا مينة واقفة فالباب مسندة عليه ودموعها دايزين شلال كاتشوف فجيهة هيام فقط..دخلات عليهم الخدامة هي توقف مصدومة وعينيها عليهم بتلاتة مشرعين..شافت فهيام اللي گالسة فالارض وشهقات بخوف
-م مدموزيل هيام؟
جاوبها جمال بحدة: خررجي
مازادتش الهضرة وخرجات موسعة عينيها وكادور تشوف فيهم بفضول..فحين هو قرب جيهتها، گلس القرفصاء ودوز يدو على شعرها هي ضربها ليه وشافت فيه بوجهها حمرررر بغا يطرطق وعينين خاارجين
هيام: مااتقيصنييش..مماااتقينصنيش
جمال: واخا سمحي ليا..اجي شربي الما ولا غير غسلي وجهك بعدا
ناضت بعصبية طلعات فيه صبعها ونطقات بين سنانها: هاد الهضرة دخلها لدمااغك الى بغيتينا نبقاو مزياانين..انا ماعندي لاااا أم لاا اب..مااعندي حتاا حد ومابااغا حد..غااتعاود تجبد ليا هاد الموضوع اقسم بالله حتا نضرب عليك من حيااتي
حيدات من حظنها كاتمسح دموعها وقالت بصوت باح: فين هي؟
مرجان: الحبيبة ديالي انا عارفة الموضوع ماشي ساهل عليك.. ولكن نتوما بجوج مضرورين.. بجوج تلاعبو بيكم ناس معندهم ضمير وفارقوكم على بعضياتكم..راه حتا هي عاد عرفات اليوم وحتا هي حالتها حالة ماكاتسكتش من البكا وخايفة تتواجه معاك.. كون تشوفي شحال خايفة
هيام: بغيت غير نشوفها..غير نشوفها
تنهدات وقالت: خرجات للجردة..وا الله يرضي عليك احبيبتي ساعفي شوية راها ماماك..باراكة عليكم غير داكشي اللي عشتو
طلقات من يديها خارجة من باب البالكو الكبير قدام الصالون للحديقة الخلفية..تحرك البرد وخشات يديها فالمونطو شافتها قدام نافورة الما ساهية وعينيها كايدمعو..مرة تهز يدها تمسحهم ومرة تخليهم دايزين حتا حسات بشي حد وقف وراها ضارت ووسعات عينيها
مينة: با هو السباب..خداكم مني بزز وداكم عند مت باباكم وخلاكم عندها باش يقدر..يقدر يتهنا مني و يزوجني لشي حد
هيام: ونتي عاودتي قلبتي علينا؟ ولا صافي تهنيتي
جاوبات بحرقة ودموعها نزلو: لا ابنتي لا هءهء عمر حرقتكم طفا فقلبي وكنتو كلا نهار بين عينيا..بست ليدين والرجلين باش نقدر نجي نشوفكم..طلبت ورغبت وماخليت لمن شكيت عاد خلاوني ، وفاش جيت هءهءهء لقيتكم مشيتو..كل واحد وفين داتو الدنيا وبقيت كيف الهبيلة شاربة المرار ماعرفة فين نمشي ولا نجي
.........
تاج الدين: ونتا تقتي بهضرتها
تنهد جمال وقال: ماعرفتش.. شي حاجة بغاتني نتيق وحاجة خرا لا..ولكن باش نقطع الشك غانقلب فالموضوع
شاف فيه بجدية ورد: حقيقة قاصحة..قاصحة بزااف
جمال: ماشي غير قاصحة..لدابا ماقادرش نستوعب واخا عارف مدة هادي
تاج الدين: وهيام كيفاش عرفتيها ختك؟
جمال: اصلا معتابرها ختي..داك احساس الاخوة عشتو معاها هي واخا باقي ماعرفت الحقيقة..ولكن فاش كانت كاتعالج واحد المرة حتاجت للدم وانا تبرعت ليها..خرجو النتائج وگالها ليا الطبيب..گاليا باللي المريضة ختك اولدي..تصدمت بزاف ديك النهار وماتقتش گاع حتا درت تحاليل خرين عاد عرفت باللي بصح..هيام بصح ختي
تنهد تاج كيتفكر حالتها كي كانت وناض غادي: هادشي مشبك..اجا مايفكها دابة
مينة: و واخا ابنتي "مسحات عينيها وبدات تتبسم"عمري تتخيلتك هاكا ههه ماعرفت كان يسحابلي غانلقاك بحال كيفما خليتك باقا صغيرة ومكتعرفي حتا تتمشاي
هيام: علاش شحال كانت عندي ديك الساعة
مينة: صغيرة بزاف..تقريبا عاد كملتو عام "تنهدات مكملة كلامها " الله يسامح اللي كان السباب وصافي
هيام: اجي ندخلو تحرك البرد
مينة: و واخا
ضارو بجوج داخلين لمحات مينة تاج الدين بشوفة ناقصة وزيرات على يد هيام
مينة: زيدي ابنتي تدفاي لداخل
هيام: لا خاصني نمشي..بسلامة
بأسى قالت: الله يعاونك ابنتي
..طلقات منها ومشات جيهتو..ابتاسم لمينة وحرك راسو وهي حاوطها بيديه حاط راسها على صدرو وغادين خارجين
تاج الدين: صاڤا؟
حركات راسها وباسها ففروة شعرها محتاضن وجهها بيدو ..باسها مرة خرا وبنبرة هادئة قال
تاج الدين: حبيبتي الحنينة
طلعات فيه راسها كاترمش: بصح انا حنينة اتاج
تاج الدين: معلوم احبيبتي..قلبك بيض ومكتعرفيش تخبي فيه ..عرفتي علاش..حيت كاتغوتي..كاتبكي وتخوي گاع اللي عندك ماشي بحال الناس الخبيتة اللي كايكون قبلها كحل..كايديرو راسهم حنان وساكتين على اي حاجة حتا مكتعرف الدقة منين جاتك
تنهدات بحزن ونزلات راسها: معرفتش؟ شي مرات كانتحط فواقف ..كانحس براسي باغا نقتل شي حد ولا ندير فراسي شي حاجة..و شي مرات ممكن إلى شي حد دار لي شي حاجة خايبة نكرهو بمرة ومانعاودش ندور جيهتو، واخا شكون ماكان ..هادشي كيأزمني وكنحس باللي كلشي ولا عندي عادي وبارد
شد وجهها مقطب حواجبو وقال بهدوء: شي مرات فاش كانتعصب، عينيا كايعماو وحتا دماغي الللي خاصو يفكر كانسكتو..مرات خرا كانبعد فحالي ومكنبغي نسمع لحد ولا ندوي مع حد ..كلنا عندنا عيوب احبيبتي و تاواحد ماكامل ..كلنا فينا شي حاجة ناقصة.. ونتي اللي فيك ناقص هي كاتشدي فخاطرك ومكتسامحيش دغيا.. ياك؟ ادن حاجة عادية
حركات راسها وقالت: الطبيب صونا عليا شحال من مرة البارح وسيفطلي شحال من ميساج بخصوص حالة م..عاليا..ولكن داك الفضول باش نعرفها كيف بقات مابقاش عندي..تأزمت لدرجة محيتها من حياتي وأنا براسي تخلعت..ماعرفتش هاد الصدمات اللي عشت مؤخرا خلاوني نبرد ونبدا نزيح عليا بنادم بسهولة ولا شنو كايوقع بالضبط
رد بهدوء: ولا يمكن تقبلتي باللي عاليا ماشي ماماك..جاتك عادي تكون ماشي هي اللي ولداتك..انا عارف عالاقتكم متوترة ..ويمكن هادا علاش قدرتي تنحيها من حياتك بسهولة حيت ماكانش عندها تأتير
هيام: معرفتش؟
باسها وحل باب اللوطو: غانمشيو نرتاحو شوية ..غاناكلو بعدا من بعد ندويو فهادشي كامل ونلقاو ليك حل واخا احبيبتي
حركات راسها وركبات ضارها قلبها وتنهيدات مألمة كاتخرجها من فمها..ركب حداها وشد يدها مزير عليها قبل مايديمارا من تما
.......
مرجان: خاصك تخلي ليها شوية ديال الوقت ..هيام قلبها بيض دغيا كاتقلق ولكن دغيا كاترجع تسامح..واكترية فاش عرفاتك معندك حتا دنب فالموضوع اكيد غاتفكر فهادشي خاصها غير شوية الوقت
تنهدات بألم وقالت: وعلى الله اختي من فمك لله..هي بعدا فين ساكنة؟ واش عايشة مزيان ياكما الناس اللي مربيينها ماكيتعاملوش معاها مزيان
توترات مرجان ورجعات دوات: وا فالحقيقة المرا اللي رباتها ..دخلات للمصحة تتعالج عندها مرض نفسي الله ينجينا..وراجلها مشدود فالحبس
شهقات بخوف وخرجو عينيها: الله يااربي الله معامن عااشت بنتي هءهء الله يااربي الله حگللها گالت باللي معدبة هءهءهء الله يااخد الحق فاللي كااان السبااب ممسامحااهووومش اختي ممسمحاهوومش كيف كوااووني فولادي الله ياخد فيهم الحق هءهءهء
نااضت مرجان كاتزرب گلسات حداها وعطاتها كاس الما: وا لاواه اختي مينة رااه واخا هاكاك هيام عاشت حياة مزيانة معاهم غير الضروف اللي كايدوزو منها فهاد الفترة صعيبة شوية
حركات راسها بالنفي وصوتها بح بالبكا: لا لا اختي انا قلبي حااسسني بشي حاجة ماشي هي هاديك هءهءهءهؤ بنتي معدبة مسكينة الله يااربي الله
شربات من الما ونفسها مرعدة..حطات الكاس وشافت فيها مرة خرا: و وفين ساكنة دابا..ياكما مشات ليهم الدار
مرجان: و ا ..بصراحة وعلى معرفت..ساكنة مع تاج الدين
بخوف قالت: شكون هادا اختي؟
مرجان: الراجل اللي مشا معاها..راه قريب يتخطبو وحاليا گالسة معاه فالدار بينما لقات فين تسكن غير مؤقتا
مينة: اااويلي..اااويلي على مسكنهاا معااه..قبيلة هاجم على وولدي قريب يقتلو ودابا كايتفلا ليا على بنتي؟؟؟ ااويلي اااشهادشي اااويلي
جمال: مالكم ياك لاباس
....جوص حجبانو باستغراب وهو نازل مع الدروج عندهم.. مرجان تلفتات صفرة عند مينة وكاتمعني ليها تسكت عاد شافت فيه مبتاسمة بارتباك
مرجان: و واالو غ غير كنا كاندويو
جرات مينة حنكها فصمت والمرورية واقفة ليها فالحلق.. شنو غادير وكيفاش تفك بنتها من يدين الدياب، بقات غير كاتشوف قدامها حتا تخطاهم جمال ودخل للبالكو يدوي فالطيلي عاد ضارت عندها كاتبكي
مرجان: كون غااگلتها ليه اختي خلي خوهاا يعرف ويعتقها من داك ولد الحرام
خرجات مرجان عينيها: اويلي على يعتقها وولد الحرام.. واش اختي كادوي من نيتك واماتندمينيش حيت جيت و گلتها لك ويييلي..تاج الدين باقا مكتعرفيهش مزيان زايدون مبززش عليها تمشي عندو كون ماكانتش كاتبغيه..وعارفة شغايوقع لادخلتي جمال فهاد شي..راه ديك الساعة القتيلة غاتنوض واحد غايبغي يجر ختو والتاني كانعرفو مزياان والله حتا يقتل على قبلها
مينة: ااختي رااه بنات الوقت دغيا كايلعبو بعقلهم هءهءهء والله انا ماغانعس ولا نشوفو غانبقا هازة همها فقلبي ومحروقة جيهتها
مرجان: وااكوني هاانية راه تغرب فعقلها تااااتغربو ماغاتكونش كادير داكشي اللي فعقلك غير كوني هانية
حلات عينيها واللون مشا من وجهها: كيفاش؟؟؟؟ زعما تكون كات...
مرجان: لاااحول ولا قوة الا بالله..سيري سيري شربي ليك كاس آخر ديال الما اناا فمي كااياكلني والله حتا كايااكلني حوگلو الراجل كايگولها ليا
ناضت من حداها كاتنفخ وتلوم راسها
..خلاتها گاالسة والحيوط كايخبطوها من كل جييه شنو دير شنو تعمل..هاهية لقات بنتها الوحيدة
.. بنتها اللي كلات على ودها العصا وسمعات اللي مايتسمع باش تقدر تشوفها.. بنتها اللي خدات السخط على قبلها ورفضات شحال من واحد تقدم ليها وكونما زوجها باها بزز عمرها دخل عليها الراجل
..ودابا فاش لقاتها و ارتاحت..لقاتها غارقة فموصيبة من ساسها لراسها..والنظرة اللي خدات على تاج الدين لا تساعد ابدا وكحال وجهو عندها..ولات كاتويل بوحدها وراسها عاطيها الحريق شنو دير وكيفاش تفكها من هاد الموصيبة وكيفاش تبعد عليها داك الراجل
مينة: يااربي لاما شوف من حالي يااربي..ياسيييدي ربي عاونني يااربي
......
ام هدى: حنا اختي عيشة النهار اللول ماتافقناش على هادشي..گلتي باللي باغين البنت لولدكم! قبلنا و كبرنا بيكم وفرحنا وفرحنا عائلتنا وفاميلتها، فالاخير شنو؟ ديري هاد الحالة للبنت نتي وولدك ماحشوماش
تنهدات عيشة محرجة منها وماعرفات مازال فين دير وجهها: والله اختي ايلا راني حشمانة منك..ولاد اليوم كايديروها قد راسهم ويخليونا حنا نوحلو فيها..انا عارفة راسي غلطت تسرعت وضغطت على الدري وداكشي علاش جيت..بغيت نشوف بنتي هدى كيف بقات ونريح بالي من جيهتها
ردات الام بغضب: ولدك ماادار فيها ماايصلاح..شنو گااع يسحاب ليه راسو بنتنا االف وااحد يتمنااها بااش يجي هو ويمسح فيها رجليه
عيشة: نعلي الشيطان ااختي نعليه الله يستر عليك..هو ماتفلا عليها ماحادا جييهتها وحتا علاش تفرق عليها راهدى تعاود ليك علاش..بلاش الله يستر عليك من هاد الهضرة الناقصة
على داك الكلام خرجات هدى من البيت لابسة بيجامة ديال الدار مع بينوار غليض من الفوق وزيف لاوياه على راسها..وجهها صفر وتحت عينيها كحال وفمها يابس كايتقشر للحظة خلعات عيشة وبقات غير كاتشوف فيها طلع وتهبط وتقارن بينها وبين هدى اللي كانت تشوف شحال هادي
ناضت معاها حتا الباب التحتاني وقبل ماتشي ضارت عندها: هدى بلاتي ابنتي نگولك شي كلام وديريني مييمتك واخا..نتي راك كابرة على يدي وحاسباك بحالك بحال نجاة هاربي شااهد "تنهدات كاتشوف فيها بحزن وقالت"حالتك اليوم ابنتي راه قطعات ليا قلبي ومابغيتش نشوفك هاكا..راه فهاد الدنيا ماكاينش غير تاج الدين عطا الله شكون يستاهلك ماديريش هاد الحالة فراسك على وديت راجل.. راه ابنتي الدنيا كاتفوت وماكاتسنا فينا حد..الى بقيتي هاكة غايجي نهار تلقاي التران مشا عليك لا حياة لا راجل لا دراري..ياك فهمتيني شبغيت نگول
عيشة: الله يرضي عليك..وكيف گلت ليك هاديك دار ميمتك عيشة مرحبا بييك فأي وقت ياكي متافقين؟
..باسهتها ومشات كاتتنهد بضيق..حاسة باللي هي السباب هي اللي بززات عليه يخطبها وعطاتها آمال خاوية على والو..وفالاخير رداتها فهاد الحالة..شيرات لطاكسي صغير ركبات كاتخمم وتعاود وطول الطريق وضميرها خدام كيأنبها
على الرمال الدهبية وقدام البحر كانت جالسة هيام مربعة رجليها..بوحدها فالمكان حيت ضلام الحال محيدة المونطو وبقات بالپيل الاسود وشعرها مجموع الفوق بعشوائية..
قطع تاج الدين ورجع عندها مبتاسم والفرحة فعينيه گلس وراها حال رجليه وهي وصطهم حاوطها وباسها فعنقها قبلة دافية حتا عوجات راسها بابتسامة وقال: بردتي شوية ..هم؟
تاج الدين: كنت كلفتو بواحد الملف الى خرج يعلمني ..دابا گال ليا باللي تقبل وفأقرب وقت غايبداو التنفيد
ضارت عندو نص دورة مستغربة وقالت : شمن ملف؟
تنهد كايشوف فامواج البحر وقال بسهوة: خالي قبل مايموت الله يرحمو كان كلفني بواحد الحاجة..نهار يموت ندفنو حدا واحد الشجرة فين كان كايسكن..ودابا كانحاول ماأمكن ندير بوصيتو
حلات عينيها: بصح گالها لك.. علاش؟
شاف فيها بابتسامة: بسباب واحد ولد الكلبة سميتو الحب "ابتاسنات وكمل" يامات المراهقة كان تما كايتلاقا هو وجمولتو ههه عزازت عليه ديك البلاصة بزاف لدرجة بنا حداها براكة وتمنى يتدفن تما
نزلات راسها مبتاسمة وقالت بهدوء: نگولك واحد الحاجة
ضحك بخبت وخشا وجهو فعنقها: يالله گري گري
هيام:هههه ماشي داكشي اتاج..انا..كنت كانعرف خالك
حيد وجهو وشاف فيها بدهشة: بصح !!
حركات راسها: كنت هو اللي كانعاود ليه كلشي..عاودت ليه على حياتي كاملة من اللي عاد خليتك ودويت عليك حتا نتا
قوص حجبانو ورمش: وكنتي عارفاه خالي
هيام: لا ابدا..كون عرفتو ديك الساعة خالك مانعاودش نضور جيهتو هههه
تاج الدين: ياك الالة ههه
ضحكات وتنهدات بأسف: ولكن نهار عرفتو مات تأزمت ديال بصح..الباشير ممنوش جوج..وانا كانهضر معاك حسيتو بحال بابا
تاج الدين: وبالنسبة ليا كان كتر من اب..كان كلشي
....تنهدو بجوج وعينيهم على امواج البحر الهادية والهوا كايتسارا حداهم.. ناضت هيام على غفلة وشافت فيه بحناس
هيام: اجي يالله نعومو
طلع حاجب: شناهية؟
هيام: هههه ماكاين حد اصلا وغانبقا بحوايجي.. وازيييد
ناض كايسوس حوايجو: لا سحابلي غاتنصليهم اختي
هيام: هههه انا سابقاك
تاج الدين: ب بلاتي هيااام...هيااااام
گالسة حدا عيشة فالصالون كايتفرجو فالمسلسل ديالهم والعشا فالكوزينة كايطيب..صونا لينا التيليفون فوق الطبلة لاحت عينيها تشوف شكون هي تلون ومها حاضياها بنص عين
عيشة: مالك ابنتي صفاريتي عيطات ليك الضريبة ولا شنو
عيشة: تسحاابوني نااعسة على ودني ولا جاية من ورا الجبل لا؟ قرردي لارض ولا راه غاندير شرع ايدي واخيليني مميكة حسن ليكم
نفخاات بغل ومشات حداها كاتخبط گلساات جامعة شنايفها وكلا دقيقة تنفخ
..........
خرجو من الما كاايقطرو وحوايجهم تقاال بااردين..جمعات شعرها الفوق كاضحك وهو وراها شبعها نگيير كلا مرة دور وتشوف فيه
تاج الدين: عرفتي الى مشييت حتا مررضت قوودتيها
هيام: هههه ماالك خوااف غير ما هاداك ههه
تاج الدين: واش كاتحسي بهاد البرد ولا واالو شووفي بعدا حالتك كيف ولات
هيام: ههه واخا هاكاك كان عاجبك الحال متنكرش باللي زويين تعوم بالليل ههه
تاج الدين: دابا نهجرو
...حل الكوفر ديال اللوطو وهي ركبات بلاصتها..نصل التيشورت ولاحو لداخل جبد فوطة طويلة و بدا يمسح بالنص ..دار عندها حل عليها الباب لقاها حتا هي بدات تقفقف ومدها ليها مخنزر
تاج الدين: مسحي بهادي ممسحي كاديريها قد رااسك
ردات عليه وسنانها كايتكزو: دابا عاد حسيت بالبرد
لواها عليها وقال بصرامة: بقاي شاداها حتال الدار وبدلي..زيريها عليك هاحنا غادين للدار وتما دفاي
هيام: اوك
...ضار لجيهتو وركب خدم اللوطو وديمارا مكسيري يوصل دغيا على حسابها باش مايسوطهاش البرد..
دقائق ووصلو حدا الباب نزلو شاد فيدها وغادي طالع للدار..
حل الباب ودخلو بجوج كلا واحد وكيفاش راكباه الترعيدة اكترية هو اللي معري صدرو وقال بسرعة: سيري بدلي حوايجك انا غانصيب شي قهوة نتدفاو بيها
هيام: واخا
تاج الدين: وعقلي على بلاناتك العوجين عققلي
..مشات كاضحك وهو دخل للكوزينة دار الما يسخن وقاد الكيسان..سمع الطيلي ديالها فجيبو كايصوني جبدو ولقا أميمة صاحبتها اللي كاتعيط..طفا للما وتم طالع عندها وكايعيط
تاج الدين: هياام..هياام "حل باب البيت"هيـ.... وقف مبلوكي كايطلع معاها ويهبط وهي دارت دغيا كاتجمع الپينوار وتسدو رجعات حمرة بالسخونية وحاسة بنظراتو المتفحصة على جسدها
هيام: م مكتعرفش دق "شافت فيه مغوبشة لقاتو ساهي فيها الشوفة وانفاسو متصاعدة وخفيفة" تااج
بدا يقرب ليها وقال بهمس: كان كايصوني
هيام: خ خليه حتا نعاود..وجدات القهوة؟
حط صبعو على فمها: شششش
..سقلات وقلبها كايضرب بالجهد متناغم مع دقات قلبو..تحركت تفاحة آدم فحلقو ونزل راسو ببطء شديد لعنقها خشا راسو تما وبدا يفرق قبلات ساخنة لسخووة انفاسو وجسدو اللي كان جامد حسات بيه دفاا بحرارة ملتهبة اجتاحتو وكيف سمع تنهيداتها الخفاف فودنيه طلع لشفايفها متعطش كايبوسها ببطء وحنية دافعها اللور حتا تكاها بشوية على السرير وبيدو هزها و سرحها مزيان على فراشو وشفايفو مافارقوهاش لحظة..حيد من فمها وداز لحنكها و لودنها باسها بعمق تما وقال بصوت متقطه ملتاهف: كنبغيك
تاج راسي الجزء 14
محتوى القصة
التنقل بين الأجزاء