تاج راسي الجزء الثاني

من تأليف Soukaina Ahnani
2020

محتوى القصة

رواية تاج راسي

فوقت متأخر دخلات عاليا للدار حيدات المونطو والطالون وتوجهات للبيت عند هيام ..حلاتو وشعلات الضو لقاتها ناعسة مغطية كلها سدات الشرجم لا يدخل عليها البرد من بعد خرجات وغير تسمعات السدة ديال الباب تحلو عينين هيام وناضت واقفة كاتلهت وترعد بالخلعة، الجاكيط على كتافها بسباب التيشورت الخفيفة اللي كانت لابسة خافت يعاود يتبسل عليها شي حد وهي راجعة .. حيداتها بالنترة لاحتها على السرير وبقات غادة جاية كاتغزل بالخلعة وكلا مرة طل على الزنقة...

........

صبح صباح مغيم جديد دخل على عيشة بالمرارة وهي طالعة مع دروج الكوميسارية بجلابة كحلة عاقدة زيفها والصابو كايهرب من رجلها بالتلفة لبساتو عوج..تلاقات مع اول كوميسير وقفات عليه كاتلهت شادة قلبها حتا عو ماعرفها منيت تسلطات عليه

عاافاك اولدي يرحم بيها الواليدين راه ولدي جابوه هنا البارح وبغيت نشوفو انا ولدي والله حتا مربي مايقيسش اللي ماشي ديالو

-بلاتي بلاتي الحاجة خليني غانفهم شكون ولدك

عيشة: تااج الدين اولدي سميتو تاج الدين جاابووه البارح بالليل مع شي دراري ولكن ظلم والله حتا ظلم ولدي مايديرش

"باتهزاء"هه اودي كلكم كاتگولو هاكا ..راه الزيارة دابا ممنوعة حيت عاد غايطلعوهم يحققو معاهم والقضية صعيبة داخل فيها فيها طرف صحيح ديال الحشيش

خرجات عينيها وبدات تندب: اااويلي على الحشييش ..انااري ياميمتي شهااد المكتااب الله ياربي غانترزا فكبدتي الله اهيااا سيدي ربي شهاادشي "عاود شافت فيه" الله يرحم بيها الوالدين من البارح وانا هنا واحد كايدوزني لواحد راه مابقاليا والو ونطيح ليك فهاااد البلااصة

-تم الباشير داخل هو ونجاة مزروب كايقلب عليها

نجاة: راها فين واقفة..اااويلي شكاادييير هاادي؟؟؟

شافها كاترطا على الكوميسير خلعاتو مشا عندها نيشان شدها مخنزر: فين كنتي نتي سااعة وانا كانقلب علييك

ضارت كاتغمزو وشافت بنص عين فالكوميسير وجهها قريب يبكي: اخوويا وياااولد ميمتي من الليل وانا بايتة هنا راه تاج الدين النويويرة اللي نكساب ولدي اللي بااقي مالايكة ديال الرحمان مايقيس حد ماحداهي لحد شدوه البارح ظلم والله ماداار علاش اخويي والله مادار اسي الكوميسير

-الشريفة را ماعندي ماندير ليك راممنوووع

عيشة: انااا مزااوبة راوالله حتا نطييح لك هناا رانا مرييضة والنعمة ماطايحة فكرشي من البارح 

الباشير ربع ايديه مضور وجهو ونجاة حجبانها طلعااااتهم فيها..بقاات تاطلب وتعااود الكوميسير شاف حتا شاف وشير ليها تتبعو بالفرحات عليها تمشات وراه كاتزرب وخوها من اللور كايضور فراسو ..طلعو مع الدروج بربعة لواحد المكتب اخر شير ليها جيهة الكراسا

-گلسي هنا شوية ويطلعوه ياخدو اقوالو.. انا غاندوي لك مع الكوميسير لآخر يخليك تشوفيه ولكن هااه ..ماتفوتييييش خمسة الدقايق

گلسات كاتبسم: الللله يرحم ليك بيها الواايدين الله يخلي لك ميمتك الله ينصرك الله ي..."شافتو دخل للمكتب هي تخنزر" الله يلگيها لك اتريكت القنب بخخخ

الباشير: ساليتي..واش عندك شي عقل غااهضري مشيت ندوي فالتيليفون دقيقة غبرتي

حزنو ملامحها وهي كاتهضر: ماصبرتش اخويا هادا لله..كون تعرف فالصباح فاش گلتيها ليا راه الرعاادة ركباتني والله واخا نعرف نجرو معايا ولا خليتو ليهم هنا

الباشير: واراه البوليس هادا ياهاد المرا تسحابيهم لعب دابا كون تلاقيتي مع شي واحد حمق را ينزلك معااه سحابك غايحن فيك

عيشة: نننزااال والله حتا نننزل انا ولدي مانخليهش يعاود يبات بعيد علياا

الباشير: "تنهد" تاج الدين ماشي ديال هادشي راماشي عاد غاتوريه ليا..كوني هانية دابا انا غانتكلف فالعشية هاهو عندك

-كملها هي تنوض كاتشوف من وراه كانو جايبينو باقي بحووايج البارح فيديه المينوط هو وهادوك مع من ضارب ..ساهي قدامو مخنزر ورجليه تقاال جنب فمو شوية مضروب ضربة حديتة والدم باقي كايقطر شوية منها



مافيقو من سهوتي غير غوتتتها: ولللدي 

وسع عينيه فيها وشاف فالباشير مخنزر كايوصل ليه الميساج غير بالعينين

عيشة: ولدي تااج "قربات تعنقو وماخلاوهاش"

الالة بعدي لهيه حتا يخرج ونعسييه حداك گااع نتي

ضور تاج وجهو مخنززر ماباغيهااش تشوفو: الوليدة سيري.. خاالي خرجهم من هنا علاش جايبها علاااش صاافي سسيييرييي

دخلوه كايتنتر عند الكوميسير رجع كايفور فبلاصتو معصب حيدو ليهم المينوط كاملين وخرجو سادين وراهم الباب

-شاف فيهم الكوميسير اللي كان راجل كبير بعينين مكمشين سكاناهم من رجليهم للزغب اللي فالراس بشوفة وحدة قدر يفرق بينهم وبين تاج من لبسو باينة فيه شي واحد اللي شارب عقلو ومن فمو الحمر سنانو البيضين ولحمو الاسمر الصافي مستحيل تگول راه حشايشي ولا يكون كايضرب غير گارو على الأقل..حط الستيلو وبدا بدوك الربعة سولهم مخنزر

الكوميسير: دويو نتوما شنو وقع البارح

-ناضو كايتغاوتو كلهم ويشيرو لتاج ماتفهم من هضرتهم تا حاجة الشي اللي خلاه يضرب فوق البيىو بعصبية: وااحد بواحد الاه يحرقهم

-هانتا اشاف انا نهضر دابا حنا كنا گالسين هاانيين جا هاد بنادم وقف علينا السلام السلام جبد من جيبو واحد الطرف گاالك بغا يبيعو ملي گلنا ليه حنا لا وبدينا معاه فالهضرة ناض هو كايهلل غابوحدو وبدا كايضربنا

-اه اشاف حنا حق الله مادرنا شي حاجة داك الطرف دياالو

ضور الكوميسير وجهو لتاج الدين: نتا هادشي اللي كايگولو صحيح

رد بحدة مخنزر فيهم: لا

الكوميسير: واخا وشنو كنتي كادير معاهم

بقا مدة كايشوف فيه عاقد حجبانوو حتا عاود سولو: امعاك كانهضر شنو قربك ليهم

حنحن بارتباك: كنت.. "سكت منزل عينيه ملي مالقا باش يبرر ..حرك الكوميسير راسو ورجع سولو: واخا والحشيش ديالمن

تاج الدين: ماشفت حتا حشيش انا

-ادياالو اشاف حق الرب اشاف لاديالو هااهو فااش سولتيه شكان كاايدير معانا سككتر باس تعرفوو كدااب

الكوميسير: صاافي سكتوونا..ماللي دياالو علاش كان فجيبكم هااا

-وا تخلعنا اشاف فاش شفنا البوليس ودرناه فجيبنا هادشي علاش

زفر الكوميسير بعصبية وورك على بوطونة حدا البيرو دخل من وراها واحد من لي جوندارم عطاه التحية

الكوميسير: خرج عليا هاد الربعة

-..: وي شااف. ... دار ليهم المينوط وخرجهم لبرا قشعهم الباشير اللي كان منزل راسو كايفكر فير شافهم هو يتهز من بلاصتو بالريط تابعهم .. ..
بقا تاج واقف ضام ايديه قدامو.. ناض الكوميسير من البيرو تاعو وقف مقابل معاه 

الكوميسير: غانعاود نسولك والى بغيتي نتساعف معاك جاوب بصراحة..علاش ضاربتو "بقا ساكت مزير على فكو ماجاوبوش" بهاد السكات غاتجنيها على رااسك..هادو بعدا منين كاتعرفهم

تاج الدين: غير ولاد الحومة

الكوميسير: يكونو حتا خوتك الى كانو بحال هاد الخلائق عطيهم شبر التيساع.. وفالمحضر مكتوب بالي تشديتي نتا كاضرب فيهم علاش؟؟

تاج الدين: تزايدنا فالهضرة وصافي 

تنهد الكوميسير وخرج ..شاف فعيشة اللي دغيا ناضت عندو كاتبكي

عيشة: وليدي مااايديرهااش اسيدي والله مايديرها

الكوميسير: دخلي الالة شوفي ولدك قبل ماينزلوه 

عيشة: اويلي فييين

مشا مامجاوبهاش دخلات هي عندو مخلوعة ..ضار شاف فيها وفيساع عنقاتو وهو كااره كايردد غير كلام واحد : علاش جيتي علاااش تحطي رجلك هنا الوااليدة علااش


گلسات حداه كادوي وتشكي بالدمووع وهو غير كايسوط راسو غاينفاجر بالتفكير جسدو معاها ودماغو كايفصل ويخيط

عيشة: ونتا علااااش ماتخرجش معاك لاكاارط علاااش كون ديتيها كوون گاع مايهزوك معاهم "شافتو سااهي" تااج

انتابه ليها: هممم

عبشة: تااواش معاياا 

تاج الدين: اه امي اه..بفف ماعرت يمكن نسيتها عند الباشير ولا الدار والله ماعقلت

عيشة: "بشك" لا ياوليدي نتا ماعاجبنيش مخبي شي حاجة؟؟

تاج الدين: الله يهديك الواليدة شنو غانخبي گااع..نوضي الله يرحم باك سيري للدار اصلا كاعي علك علاش تجي لهنا واش بعقلك

عيشة: نخلييك بووحدك مالك مااشي ولدي

نفخ بنرفزة وناض: دابا نوضي للدار يالله ومانعاودش نشووفك فهاد البلاصة هانا علمتك..يالله يالله

زرب عليها تاناضت كادعي معاه وتواعد توكل ليه احسن محامي وبلي غايخرح وهو غير مسايسها حتا خرجات قبل ماتسد الباب غمز نجاة دخل فهماتو وشافت فمها:انا نگلس مع خويا واحد الشوية

دخلاات عندو بالزربة عنقاتو وحتا هو عنقها شاف الدموع فعينيها وخنزر

تاج الدين: غاطيحيهم غانسمطك

خنزرات كاتنخصص: هانا والله لاطيحت علك دمعة ..گنس

هز ايدو: راغننن

نجاة: وصافي دابا شنوو

تاج الدين: گلسي گلسي دغيا نسولك قبل مانمشي

گلسات وهو حداها بجدية: ركزي معايا مزياان المسألة ضرورية..بغيتك توصفي ليا البنت اللي ساكنة قدامنا كي دايرة

طلعات حاجب: مالك عمرك شتيها

رد بعفوية: شايف غير شعرها من اللور..احم ودابا شرحي ليا كي دايرة

نجاة: من نيتك ؟؟فهاد النهار وهاد الموقف كاتسولني على البنت تاواش واكل شي حاجة

ضربها لراسها: جاوبي المررض بلا ماتنيرڤيني

نجاة: وعااادي بنت بحال گاع البنات "خنزر فيها هي تأفف وبدات كاتسرسب ليه" بلقة وعينيها كبار عسليين الفم عندها صغير شوية وعامر شعرها منعرف عمري حنززت فيه ولكن فورمتها عامرة شوية وطويلة شوية 

تاج قوس حجبانو كتر وناض وقف كايفكر ويحك فكو..رجع شاف فيها وتكلم: غانطلب منك واحد الحاجة وغاديريها بالحرف متافقين

نجاة: وشناهية


عاليا: هياام ..هيااام

-فااقت قاااافزة من الفراش شادة صدرها وتأتير الحلمة السئية اللي شافت باقي شاد فيها

عاليا: "من الكوزينة كاتعيط" هيااام

-ناضت دغيا لبسات بانطوفتها وخرجات عندها مخرجة عينيها بخوف

هيام: شنو ؟ شنو واقع

طلعات حاجب وهي كاتحط فالفطور فوق الطبلة: مالك صفرة

سرطات ريقها وعينيها كايضورو: م ماصفىاش علاش مالي

عاليا: درتي شي حاجة ياك.. غير هضري گولي شمن تزبيلة درتي

هيام: وامادرت والو اماما دابا علاش مفيقاني

قلبات عينيها: زيدي تفطري خلاص واش ماقارياش رالحظاش هادي

بارتباك: القراية؟ ء لا..لا ماقارياش

بشك: هيااام شوااقع لك

هيام: اوووف واغير حلمة وبقيت متأترة بيها

ضارت تمشي لبيتها هي تسمع دقان مجهد فالباب.. قلبها مشا وجا فديك اللحظة وگالت بصوت مرعد: ا انا نمشي نحل

هبطات لتحت كاتجري قبل ماتحط ايدها على البواني طلبات الله مايكون والو عاد حلاتو لقات نجاة فوجهها

نجاة: "طلعاتها مخنزرة" صباح الخير الاميرة ياكما فيقتك

قوصات حجبانها كاتشوف فيها باستغراب

نجاة: واصباااح الخير

هيام: وشكون نتي

نجاة: هه اللي باغة تلاح عليك ولايني ملااقات لك جهد

هيام: شنو

نجاة: طلعي الحبيبة جيبي ليا الجاكيطة طلعي

سرطات ريقها موسعة عينيها: ا اينا جاكيط نتي على اشنو كاتهضري

نجاة: على خزييت..انا هي خت الكانبو اللي بغا يدير الخير البارح بالليل ورجع ليه ببوم زوين راااه داابا كايتگلاصا فالحباسات 

هيام: كيفاش الحبس؟؟؟ علاش شنو وقع

نجاة: طلعي بعدا جيبي ليا جاكيط رانا مزروبة

-ضارت كاتجري لبيتها تحت نظرات عاليا خدات الجاكيط ونزلاتها ليها كاتلهت: دابا گولي شمن بوليس

نجاة: وقفو عليهم البوليس فاش مشيتي شدوهم كاملين وحتا خويا بمسبتك

هياام: وانا يااكماا گاال عليا شي حاجة واش جبدني شي حد

نجاة: بااز هادشي اللي هامك..ولكن حتا حاجة ماكاتخبا والحق كايبان "ميقات فيها ومشات خلاتها كاتغزل فبلاصتها"


طلعات للدار ساهية لقات مها قدامها مربعة
ايديها: اشنو كاين هادي لاش بغاتك

-دازت من حداها ماقاداش تهضر رجعات شداتها بعصبية

عاليا: هضرت معاك جاوبيني

هيام: طلقي مني ماكاااين واالو "بدات كاتبكي"

عاليا: ملي ماكاين والو علاش رجع لونك هاكة ااا وعلاش البكا

هيام: وااش حتا البكاا مانبكيييش

جرات ايدها ودخلات لبيتها سادة الباب وگالسة وراه كاتبكي بالصووت خايفة وكاتزيد عليها هضرة مها من ورا الباب كاتغوت.. "غااانعرف غااانعرف وديك الساعة نتفاهمو مزياان اانسة هيام"

........ ........

غربات شمس هاد النهار وتعاشات العشية ..عيشة واقفة برا الكوميسيارية كاتتسنا بقلة صبر بانت ليها نجاة جاية جيهتها 
:هاهو خالي جاي

عيشة: شكاين كايدير

نجاة: بان ليا كان كايهضر مع شي حد تما وعطاه شي فلوس

سكتات كاتسنا ورجعات شافت فيها منوية: ونتي بعدا فين لقيتي لاكارط

نجاة: فبيتو نيت امي.. قلبت جيوب الجاكيطات تاعو ولقيتها فديك الكحلة..هاهو خالي جاي هاهو.. يااربي 

عيشة: الله يسمعنا خبار الخير

وقف عليهم الباشير كايطلع النفس

عيشة: امدرااا

الباشير: هاهو خارج

عيشةة: روووويوووري هههه

نجاة ضحكات مطلعة فيه حاجبها: كيدرتي ليها اخالي

عيشة: المهم هو خرج ورجع ليا وليدي حمدتك وشكرتك اسيدي ربي ههههه ايمتا واش دابا

الباشير: خليتو كايسني واحد الالتزام هو دابا يخرج نقصي نقصي عليه شوية الهضرة را الدري من البارح ماداق النعمة ولا رتاح

عاشة: زيدي زيدي نتي قدامي هاحنا سابقينكم نوجد ليه شي حاجة ياكلها غايكون فيه الجووع مسيكين

الباشير: يكون حسن نييت

مشاوهوما خداو طاكسي صغير للدار وهو بقا كايتسنا لحظات قليلة قبل مايبان ليه جاي فإتجاهو هاهاك طويل ايديه فجيابو حالو مغير

الباشير: على السلامة هههه

تاج الدين: الله يسلمك اخالي الواليدة مشات ياك

الباشير: مشات اصاحبي مشات..زيد زيد حتا حنا ترتاح لك شوية

تاج الدين: "شيرو لطاكسي وطلعو اللور كايدويو: بففف والله حتا كلي مدگدگ ولاد الحرام مفيقينا الليل كامل واخا يكونو لقاو عندنا الننووي


الباشير: دابا نسا هادشي المهم دازت على خير

تلفت ليه تاج هاز حجبانو: بلاتي بعدا.. كيدرتي تاخرجتيني

الباشير: من بعد من بعد

تاج الدين: خاالي

زفر وشاف فيه: واحد من هادوك معامن ضاربتي هضرت معاه وتافقنا يگول الحقيقة ويشهد ضد فصحابو

خرج عينيه بصرامة: كيفاااش؟؟ شمن حقييقة هو شنو غايگوول

الباشير: "بحدة" الحقيقة.. باللي نتاا غيير دافعتي على بنت صغيرة كانو غايغتاصبوها

ضرب الزاج منرڤس بالجهد: لا اخالي لا لاااا

الباشير: كيفاش لا واش بعقلك

تاج الدين: غايدخل الدرية فالموضوع اصاحبي تفووو على زهر..ايمتا غايقدم هاد الشهادة واش دابة

خنزر فيه : فالصباح ..نتا اصلا مالك راك عاونتيها ترد ليك خيرك 

تاج الدين: واالا اصاحبي لا تفووو كوون بغيت ندخلها فالمووضوع كنت انا اللي غانهضررر مانتسنااش داك الز***

ضرب رجلو وضور وجهو للزاج كايعض شفايفو بعصبية وصلو للحومة وشاف الباشير فالشيفور بنرفسة حتا هو: ضور من هنا الشريف..وقف حدا هاد الدار صافي شكرا..زيد نتا دابا راه مك كاتسنا من بعد وندويو فهادشي

حل الباب ونزل ومن وراه نزل تاج الدين كايحك راسو ويزفر كل حين وحين..طلع راسو بعفوية للسرجم ديال بيتها لقاه مسدود تنهد وضور وجهو طالع لدارهم


عقلووو على هاد الشرجم مزياان عقلوو عقلوو راه لاعب دور مهم مسكين وراكم عارفيني عاشقة للحب وراء الشبابيك غامن سيد الليل وجبد😂


نهار جديد جا كانت فبدايتو هيام گالسة على طبلة الفطور لابسة حوايج المدرسة وساهية قدامها..طلعات عاليا عينيها وانتابهات باللي ماكاتكل والو غير كاتشوف هاايمة فتفكيرها مسحات فمها ودوات: هيام..هياام

شافت فيها بصمت

عاليا: شنو واقع تاني مالك

تنهدات بحزن: والو "شربات من الما وناضت" انا غادة

عاليا: حتا انا غانخرج واحد الشوية فاش تجي غاتلقاي فلوس الغدا فبيتك شري شي حاجة تتغداي بيها

-هزات الكارطابل بلا ماتجاوب وخرجات نازلة فالدروج بتتاقل..حلات باب التحت سداتو وبقات كاتشوف فالدار اللي قدامهم بارتباك عارفاه هنا فين ساكن حيت كانت شافتو نهار كان كايدوي مع هدى وبزاف ديال المرات خرين..بقات واقفة شحال كاتاخد نفس سمعات الباب تحل ومعاه تحلو عينيها لكن سرعانما بانت قدامها عايشة قلباتهم شافت فيها هاد الاخيرة وخنزرات 

عيشة: باغا شي حاجة

-نزلات عينيها وقلبات الطريق غادة لمدراستها والتفكير فموضوع البارح غايسطيها فحين عيشة من وراها كاتلوي راسها مصغرة عينيها حتا سمعات تاج الدين نازل كايتفوه لابس تريكو بيض ودجين جار غير كلاكيطة معاه

تاج الدين: صباح الخير

بغير نفس: صباح الخير ..ماغاديش لخدمتك 

تاج الدين: عندي واحد الشغل من هنا لساعة خاص نقضيه بعدا

طلعات حاجب وهي حاضية عينيه اللي كايهربو للدار قبالتهم: بالسلامة شنو هاد الشغل

تاج الدين: شغل عادي امي غير سيري لخدمتك دابا 

عيشة: ونتاا سووقك انا واقفة هنا حدااك نشوفوو شنو هاد الشغل

ضحك متفاجء: هه وقفي انا مالي ..بقاو بجوج واحد حاضي لاخر بنص عين هي مابغاتش تمشي من تما وهو كايتسناها غير ايمتا تتحرك ..
نزلات نجاة كاتلبس سبرديلتها مع كل درجة شافتهم هاكاك هي تستغرب

نجاة: أماالكم

تاج الدين: والو غير عيشة مابغاتش تمشي للخدمتها يمكن

عيشة: سير سسيير وصل ختك للمدرسة راتعطلات كون رالباب تسد

نجاة: لا را....

قاطعاتها مخرجة عينيها بحال السم: سكتي تي انا اللي عاارفة.. يالله ياك ماعندك خدمة اليوم سير وصلها حسن ماتبقا واقف هنايا بحال البوطو 

تاج الدين: ههه عيشة مالك عاللصباح بانت لك فيا

عيشة: واتااسيير اويلي

نفخ وسد الباب بقلة حيلة: يالله نتي

مشات وراه نجاة شادة الضحكة وعيشة حاضياهم حتا غبرو عاد هزات الميكة غادة لشغلها وتتلفت ياكما رجع


نجاة: الضربة برات لك شوبة؟

تاج الدين: ماشي شي حاجة

نجاة: ايوا الله يعطيه الگرض هادا اللي ضربك

ضحك وضار كايلعب فشعرها: امين

شاف قدامو مبتاسم لكن بدات كاتختافي فاش قشعها قدامو بخطوات تقااال غادة حتا هي للمدرسة..نزل عينيه فشعرها النازل على ضهرها مجعد كل خصلة لاوية بوحدها 

نجاة: فيها قوة الصداع والبخ

فاق من السهوة وشاف فيها: كيفاش

نجاة: ماتصلاحش ليك تفكيرك غيير تفكيرها هي..متكبرة بزااف

تاج الدين: كاتقرا معاك

نجاة: لا كبر مني بعامين كاتقرا فالسيزيام ههه 
والى بقات هاكا غايجريو عليها بنات درب سلطان من المدينة كلها هههه

قوص حجبانو ووقف: ومال بنات درب سلطان شدخلهم فيها

شاف فباب المؤسسة: ويلي غايتسد ويلي ويلي ..

مشاات كاتجري للباب مخلياه عاقدهم قدامو بسهوة فهضرتها..تضرب ليه شوية الشعا فعينو نيشان، رمش وضور وجهو لجيهة الربيع بانت ليه شي حاجة كاتبري بسباب الشمس..مد ايدو حيد عليها التراب وهزها كايشوف فيها بتركيز مصغر عينيه: هادي فين شفتها فين

حك راسو كايحاول يتدكر وعينيه على تفاصيل البوصلة حتا وسعهم متفكر اول نهار تضرب فوجهو الشعا بسباب هاد البوصلة نهار بغا يقاد باب البلاكار تاعو وشاف فالشرجم لقاها هازاها..زاد عقد حجبانو كايربط الخيوط ويتفكر البارح الطريق فين لقاها هي نفس طريق المدرسة ادن كانت كاتقلب على البوصلة تاعها..تحطات ايد على كتفو دار البوصلة فجيبو وضار لقا أيوب مبتاسم وراه

تاج الدين: "بتفاجأ" ايوب

...............

دخلات مع الباب والتشاويش عليها وحدة ضحك وحدة دوي وحدة تشير وهي راسها اصلا مامعاهاش وماملاحظة والو..دخلات للقيسم وهي غادة لبلاصتهها نطق واحد الدري بصوت انتوي: ايووووب 

تكرشخ القسم بالضحك وهي شافت فيه باستغراب قبل ماتگلس بلاصتها متاجهلاه ناضت الاستادة ضربات على البيرو يسكتو : هنييونا خلاااص جبدو المقررات الصفحة 30 وحطو التهييء على الطاولة يالله


ايوب: فين الساط بيخير..اوااه مالك فوجهك؟؟؟

تنهد: اخليها على الله وصافي.. نتا مزيان

بابتساامة عريضة: مت بيخير ههه شتادير هنا

تاج الدين: جيت نوصل ختي نتا اللي شتادير هنا

أيوب: جيت نشوف حبيبة القلب ههه

تاج الدين: ههه حالتك هي حالتك والله يعفو

ايوب: لا لا الى كان من هادي لهلا يعفو هههه

تاج الدين: حيد حيد را عندي مانقضي حتا نتلاقاو فالدرب

أيوب: تهلا ههه

مشا كايضور فراسو مخليه وراه كايشوف فالباب ويتسنا

............

داز الوقت صوناات الطناش وتحل الباب كلا واحد خارج بالزربة بحالا كانو فالحبس ،كل مجموعة بوحدها سوا جوج صحابات ولا صحاب ولا كتر من تلاتة خارجين مجموعين الا هي خارجة جارة رجليها بوحدها غادة مع الطريق مقوصة حجبانها حتا قطعها عليها مبسم 

أيوب: الزين صافا

زفراات بضيق وتخطاتو تكمل طريقها ولكن بقا تابعها

أيوب: واغابلاتي خليني غير نهضر معاك..تي مالك هاكة واغاسمعيني ابنادمة

شافت فيه معصبة: شكااين

أيوب: احم.. سمعت بداكشي اللي وقع ليك مع دوك ولاد الكلاب دابا راهم كايترباو.. على سلامتك بعدا

رمشات فيه بخوف : و وشكون گالها لك 

أيوب: تاج الدين..ههه راه داير فيها بطل معامن ما تلاقا كايعاود ليه كيفاش عتقك

وسعات عينيها: هو خرج

أيوب: خرااج ولكن ضروري تشهدي ليه حيت گاليهم علاش ضارب

شهقات حاطة ايدها على فمها وعينيها بغاو يدمعو: صافي مشيت فيها مشيت فيها

أيوب: بلاتي بلاتي بشوية علاش مالكي 

كاضور راسها ودوي بوحدها ساهية: نااري الى عرفات ماما ماغانبقاش نحلم حتا بهاد العيشة هءهءهء صافي مشيت فيها

.. رجعات كاتبكي وضور هنا وهنا وهو غادي معاها كايهدن ويعاود: غير بشوية عليك راه ماغايگول والو والله ويگول شي كلمة حتا نريب ليه فمو.. هاااا غاتهناي حق الرب مايگول شي حاجة انا معاك وداك ولد الكلبة ماعندو مايدير لك 

ودنيها صماكو مابقات كاتسمع والا تستوعب من غير قضية العروبية فين غاتتسيفط وتما كلشي مشا وحتا الامل ديال ترجع للعيشة اللي قبل ماغايبقاش والو ..رجعات كاتنفس بالزربة شوية مسحات عينيها بالنترة وتمات راججعة للدار كاتحاول ماتبين والو وتتهدن باس تلقا شي حل وهو تابعها كايرغي ويرغي ويعضم فراسو ويعاود حتا وصلو للدرب رجلو برجلها ودخلات للدار عاد وسع ضحكتو وضار راجع فحالو..الفوق فالصالون كان گالس تاج وعينيه فالشرجم جامع غوباشتو وقبضة ايدو ففمو حاضيهم ..تحل الباب ودخلات نجاة حيدات سبرديتها وتلاحت حداه لايحة الشكارة

نجاة: كاين شي غدا احح ميتة بالجووع

بلا مايشوف فيها: سيري سخنيه راه فالكوزينة

ناضت عندو شافت لفين كايشوف لقاتو حاضي باب دارها هي تميق

نجاة: ضعتي ياخويا ضعتي.. انا غااادة ناكل

شاف حتا عيا وناض عندها للكوزينة لقاها كاتخشي فوجهها وقف فالباب ودوا بتساؤل ضارو راسو: كنتي گلتي ليا شي حاجة على ديك البنت ياك ..مالها مع بنات درب سلطان؟

وفمها عامر: وعلاش كاتسول

تاج الدين: والو غاسؤال..واجاوبي

نجاة: تزايدو فالهضرة ونوضوها فالقيسم وفاش خرجات بغاو يضورو بيها تاني ولكن ايوب ماخلاهمش

تاج الدين: وايوب مالو فهادشي

نجاة: واانتا اللي مالك فهادشي

تاج الدين: سولتك جاوبي ازمر

نجاة: صحيبها تهنيتي 

عقدهم بغير تصديق: شنوو


نجاة: شنو اللي شنو

تاج الدين: دابا أيوب مصاحب معاها؟؟ كيدار والدرية عاد سكنات جديدة؟

نجاة: خويا سوقهم هاداك راه صاحبك سولو

حك راسو وصار يمشي ورجع ساف فيها: نتي بعدا شكون گالك هاد الهضرة 

ببملل: كوووولشي كايگولها..اجي اجي تتغدا ونسا علك هاد الموضوع اجيي

تاج الدين: بالصحة عندي مانقضي دابة ..ماتسوطيش فكلشي

دخل لبيتو للبلاكار كايجبد حوايجو ويفكر

..............

دخلات لبيتها لاحت الكارطابل وگلسات على السرير كاتاكل شنيفاتها بالتوتر والارتباك..الى مشات حتاا عرفات عاليا دقيقة وحدة ماغاتفوتهاش فهاد المدينة ماحدها مازال مادارتش لاكارط تقدر تتحكم فحياتها كيفما بغات بلا مايهموها العواعق ...

ناصت حلات الشرجم كاتاكل دفارها وطل منو كاتحاول تلقا حل سلمي تخرج منو كيف الشعرة من العجينة .. سمعات باب صاحب دعوتها تحل وهو خارج منو بدجين كحل وتيشورت شيبي مخطط شاد تيليفونو فيدو ..قبل ماتحل فمها تعيط ليه كان هو بالصدفة مطلع ليها عينو لقاها كاتشوف فيه ..زاد قوصهم كتر مامقوصين فاش شارت ليه يتسناها مشات نيشان هزات فلوس الغدا اللي خلات ليها عاليا وخرجات من الدار كاتجري حلات الباب ديال لتحت لقاتو واقف كايتسنا.. عاد غاتمشي عندو هي دور ليهم عيشة قاصدة الدار شافتها جاية هي تنفخ بصييق وقلبات الطريق غادة للسناك كاتخبط وتتلفت ليه فحين هو حنحن وبقا واقف كايشوف الفووق

وقفات عليه عينيها على هيام ورجعات خنزرات فيه: ياك لاباس كاتسنا شي حاجة تاني

تاج الدين: انا؟ لا.. يالله تهلاي 

باس راسها ومشا فالاتجاه لاخر وهي من وراه مخنزرة.. طلعات للدار كاتبرگم ونيشان للكوزينة عند نجاة لقاتها جمعات فين كلات وكاتنقي تفاحة

عيشة: اجي لهنا نتي باغاك تبعيني

نجاة: الله يسمعنا خباار الخيير

-حطات اللي فيدها وتبعاتها لبيت النعاس سدات عيشة الباب وعگدات حجبانها بحدة

عيشة: دابا غاتگولي ليا شكوون ديك خيتي اللي ساكنة قدامنا ومنين جاية 

نجاة: اينا خيتي امي

عيشة: هادي اللي عاد سكنو قداامها شكوون هي شكوون

نجاة: توووما ماالكم غاللي سخن عليه راسو يجي يسولني عليها مقدم الحومة انا

عيشة: يااك ابنتي..وشكون اخيتي سوولك من غيري

دورات عينيها: تاواحد حيدي راماعرفة والو وفيا الجوع

عيشة: تاكلي جغديد الحمارة تسناي "جبدات من صدرها خمسين درهم مطوية وبدات كادورها على عينيها اللي حوالو"
هانااا خمسيين درهم خمسييين ..خضرة كاتبري من ايدي ليدك.. ودابا غاتگوولي ؟


ويحدت .. بمرحلة زويينة من حياتك، فاش قلبك كايكون صحراء قاحلة رمالها حارقة ولكن هااني طرونكيل مرتاااح

يحدت .. ان حياتك اللي هي ملكك وديالك نتا بووحدك غادة بواحد التوازن سلس نتا اللي شادو ومتحكم فيه مگيدها كيف بغيتي

يحدت .. ان الجانب العاطفي عندك رغم الجفاف والتصحر الا انو مستااقر راضي بيه ومرتااح ليه هاكاك

ولكن فجأة .. يحدت مالم يكن في الحسبان .. مالم تحسب له حساب .. يحدت اضطراب غايخلل ليك الموازين ويقلب كل شيء ولا شيء يبقى على شيء ..والبدية من قلبك اولا اللي غايرجع جنة ورود مشوكة بين اللحظة والتانية من الضرووري تنغزك باش تزيد تغرق وتغرق وبهاكا الحياة اللي هي حياتك كاتقلب.. لا النهار عندك نهار ولا الليل بالنسبة ليك ليل كاتخلي الاحاسيس عندك مخلطة شي داخل فشي وعقلك كايبغي يخرج من بلاصتو بالتفكير شنو وقع شنو تبدل شهااااد الزممر لمزمرر..ديك الساعة مسكين كايطفا..او يمكن كايتسوطا وكايبدا المتحكم الوااحد والوحييد هو قلبك..فديك اللحظة ..يحدت .. ان زارك الحب الأول
...

دخل للدار فوقت متأخر كايلوي عنقو بتعب.. داز على الصالون مالقاش مو كاتسناه على العادة ديالها مشا لبيتو سد الباب وجر التيشورت حيدو هاز تيليفونو كايشوف الاتصالات اللي جاوه..
.....

دخلات كدلك عاليا للدار والطيلي فودنها كاضحك بالعمس

عاليا: همم ( .......) هههه ( ....... )بصح ( ....... )ههه ايوا مانعرف حتا نشوف مرة خرا ( ........ )وادابا خليني نمشي ننعس عييت هاد النعار ( ......... )واخا ابب ( ..... ) باااي ههه 

- قطعات غادة لبيتها دخلات ساداه وراها وفنفس الوقت تحل بيت هيام بشووووية..
خرجات راسها لابسة مونطو ودايرة القب هازا وراقي وفوطخ فيديها...شافت ايمين ويسار وطارت للباب حلاتو بالحسس وخلاتو شوية محلول ونزلات تاني فالدروج كاتسلت حلات باب الزنقة

...حط تيليفونو يتشارجا ولاحظ البوصلة فوق البلاكار ..هزها فيدو كايضورها لاحظ نقش اسم غريب على مسمعو مكتوب بالعربية ركز فيها وصغر عينيه كايحاول يقراه 

..سمع دقة فالشرجم ديالو حط البوصلة وناض ليه حلو طل لتحت ووسع عينيه مستغرب فاش شافها واقفة تحتو كاتشوف فيه والقب مغطي النص فوجهها..ضهرات على شفايفو ابتسامة صغيرة زاد كبرات فاش ضارت هزات ورقة من الارض كتبات فيها وطلعاتها كاتوريها ليه

"ممكن ندوي معاك"

-حرك راسو بمعنى شنو؟

"الموضوع مهم ..عافاك"

-تنهد مطول وضار لبس تيشرت وهز سوارتو ،خرج بالشوية من البيت حتا هو..نزل عندها وبلا مايهضر تمشا قدامها وهي تابعاه حتا لواحد الخوية حدا ضارهم باقي منبنياش وقف تما ودار ايديه فجيابو كايشوف فيها

-حكات ايديها بتوتر وهو بالتقاالة كايسرح فيها بعينيه ودوا بنبرة تساؤل: بغيتي شي حاجة؟

تنهدات وقربات عندو كتر كاتشوف فيه بيه شفرانها: فالاول ..انا بغيت نشكرك..ماللي خرجتي من الحبس وأنا كانحاول نلقا الفرصة المناسبة ،باش نعبر ليك على الامتنان ديالي لداكشي اللي درتي على قبلي.. شكرا بزاف ..بزااف

نزل راسو كايكبح ابتسامة خجلة فشفايفو: هدا واجب.. اي واحد يقدر يدير نفس الحاجة و...

قاطعاتو كاداعي الامتنان: لا لا ماتگولش هاكا بالعكس.. نتا ماكاينش بحالك وفنفس الموقف مانضنش كان غايتدخل شي حد آخر "سبلات عويناتها مبتاسمة تلفاتو" انا بصح أول مرة نشوف شخص شجاع بحالك

حرك فمو بارتباك مضور عينيه هنا وهنا مالقا مايگول، اول مرة يتحط فموقف حرج بحال هادا هو اللي ديما عندو حدود تجاه الجنس اللطيف وماموالفش حتا بالوقوف طويلا معاهم ..تمتم بارتباك وگال: شكرا هه..غير هو نتمنى ماتعاوديش تخرجي بوحك مرة خرا خصوصا فداك الوقت

نزلات عينيها والحزن فملامحها: كنت باغا نجيب غير البوصلة ديال بابا "طلع فيها راسو بجدية" انا ماكانتش غانخرج كون ماكنت مضطرة، ديك البوصلة هدية من بابا قبل مايموت وكاتعني ليا بزااف.. للأسف طاحت ليا ماعرفتش فين ولكن اللي ماكنتش ضاربة ليه حساب هو انو غانصادف بحال دوك الدراري ..

نزلات دمعة من عينيها هز صبعو متردد يمسحها ورجع نزلها كايشوف فيها بأسى: مايبقاش فيك الحال ..حتا حاجة ماوقعات دابا الحمد لله دازت بيخير

هيام: لا وقع.. بسبابي انا دخلتي للحبس وطحتي فمشكل كبير "طلعات شوية عينيها فيه" حتا الى بغيتيني نعاونك ونمشي نشهد معاك ماعنديش مشكيل باغا غير نريح ضميري..واخا عارفة ماما ماغاتسكتش على هادشي وعقابي غايكون وخيم ولكن مانقدرش نخليك تتحمل الممسؤولية بوحدك

"زاد نزلو دموعها وهو ابتاسم: ماكاين لاش ..هادشي غايبقا غير بيناتنا ماتخافيش

جمدو ملامحها مستغربة: ك كيفاش؟؟

رد بهدوء: انا حليت معاهم الموضوع وحتا واحد فيهم ماغايجبد سميتك.. من غير الى بغاو عقوبة خرا تتزاد عليهم

بدهول وعدم تصديق حلات عينيها: واش؟ واش كادوي بصح.. ي يعني صافي الموضوع تحل ..تحل بمرة

ضحكو عينيه على الصدمة المرسومة فوجهها: ااه البرانسيسة ديري بحالا ديك الليلة ماكاننتش و..

قاطعاتو مغوتة بفرحة وبدون شعور تلاحت معنقاه كاضحك وتخرج اتار الخوف اللي كان ملازمها غافلة على داك الشخص اللي خلات واحد الحاجة تولد فيه وتبان.. حاجة خلات ابتسامتو مختافية وريقو ينشف فجاأة ،فاقد القدرة على ايديه اللي طلعو مع ضهرها بوحدهم مزيرها لصدرو العريض وملاسق عينيه بخموول وهِيام

هيام: كانشكرك بزااف ههه شكرا شكرا ليك 
ماتتصورش شحال فرحاتني هضرتك

حيدات من حضنو وخلات عينيه يتحلو بالزربة كايحنحن ورجليه رجعو شوية اللور للحفاظ على الأمان

هيام: شكراا بزااف.. بصح نتا مامنكش جوج 

قلب وجهو متوتر: احم دابا..خلينا نرجعو البرد ..يالله

-حركات راسها كاضحك وزادت قدامو كاتتنهد براحة وهو موراها كايحك عنقو.. وقف عند باب الدار كايشوف فيها غادخل

تاج الدين: هيام؟

-ضارت شافت فيه

تاج الدين: تصبحي على خير

ابتاسمات ودخلات للدار عاد ضار حتا هو طالع فحالو..حل بيتو ودخل ساد الباب وحاط راسو عليه ..الجسد اللي خرج معاه هادي خمسة الدقايق ماشي هو نفسو اللي دخل..لا الكيان والا القلب والا العقل بقاو على حالتهم خصوصاً قلبو قريب بداك الخبيط اللي جاري فيه يخرج يجري ..
مشا للشرجم بتتاقل مغوبش حلو كايشوف وهي داخلة للبيت انتابهات ليه وعطاتو ابتسامة حلوة عاد سدات الشرجم وهو تلاح فسريرو كايشوف فالسقف وريحت بارفانها لاسق فصدرو إتر العناق الغير متوقع

تاج الدين: هيييام ..نطقها بين شفايفو والنوم مغادر جفانو ..

..فالطرف الآخر سدات هي الشرجم وضارت قدامها بوجه جاامد ماحية التبسيمة كاتحيد المونطو وتتنهد براحة.. هالمشكيل تحل وأخيرا وهالهدوء المؤقت رجع لحياتها الرديئة ..حيدات الغطا على السرير ونعسات كاتشوف فسقف بيتها بسهوة.. جمعات نفس عمييقة وخرجات من فمها امنية واحدة ككل ليلة "يااربي ايمتا غايسالي هاد الكابوس.. ايمتا". ...دارت على جنبها كاتفكر وسرعان ما نعسات ..


الفراشات ..دائما لطيفة ومحببة عندنا جميع بألوانها المبهجة وهوما واقفين فوق شي وريدة ولا شي زهيرة...
لكن فراشات الحب غييير تماما..هدفهم هو الادرينالين يبقا طالع فالدم وكترت الهران جيهت كرشك فاش كاتشوف الشخص اللي كاتبغي..فراشات يقدرو يخليو لك المورال يااسلام وممكن فديك اللحظة عدووك اللي ماكاتحملش فيه الشعرة تمشي تبووسوو فرحااان..والعالم كايولي عندك وردي..لا مجال للأسود فيه..
..........

صباح الخير والخمير وريحت المسمن كادور فالدار حتال جيوب أنف تاج الدين اللي ناعس على كرشو خاشي وجهو فالمخدة..حل عينيه متنهد طلع راسو للمگانة وناض كايتكسل ضااحك وخارج من البيت للكوزينة عند ماماه ..واقفة كاتدلك العجينة وفنفس الوقت تقلب المسمن اللي فوق المقلة ..ابتاسم ووقف موراها معنقها

تاج الدين: الحب دياالي..
"بااسها بالجهد فحنكها حتا ضحكها وضار هو كايقلب ليها المسمن

عيشة: اصباح النوور ..شهاد النشااط

جاوبها مبتاسم: صباح الخير

عيشة: شتك راشقة لك اليووم بايت تحل بمالايكة الرحمان ولا شنو ههه

تاج الدين: اللي عندو سلطانة بحالك فالدار ماينشطش؟

عيشة: يااك هههه 

كلا شوية من المسمن كايضحك: الله يعطيك الصحة اميمتي.. خلي ليا وحدة ندوش ونجي ليها

عبشة: غادي للخدمة؟

تاج الدين: اه دويت مع الحاج البارح وگاليا دوز غدا فالصباح

عيشة: الله يسر ليك احبيبي انا غانحط ليك الفطور

رجع لبيتو كايندغ فالمسمن جبد حوايجو وعينيه طالعين كلا مرة جيهة الشرجم..خدا فوطة ولاتروس ديالو وتم خارج للدوش تلاقا بختو لابسة حوايج المدرسة كاضفر شعرها قرب نتفها منو حتا غوتات وخنزر فيها

تاج الدين: الناس لمك فاش تايفيقو فالصباح شنو كايگولو آآ شنووو

نجاة: وااله ينعل ترابييك الحماار طلق لياا شعرري تفووو

تاج الدين: گولي صبااح الخيير خوويا گوولي

نجاة: واامااماااا طللق لياا شعري

تاج الدين: واگوولي لمك گوولي

نجاة: واصباح الززفت يالله

-خرمزو ليها مزياان ودخل للدوش كايكركر مخليها كادمع ودعي فيه


خرجات من الطواليط باقا بالبيجانة مشات لطبلة الفطور وگلسات مخنزرة

عاليا: ماقارياش اليوم؟

بدون اهتمام: داخلة حتال الربعة "شافت فيها" باقي مالقيتي شي حل

عاليا: لشنو؟؟

هيام: لهاادشي اللي ولينا فيه ولا عاجباك هاد الحالة..انا صاافي مليت من ديك المدرسة ومن هاد الكمامر اللي كانشوف كل نهار مليت من كللشي 

قلبات عينيها: تحملي مازال شوية.. قريبب غانطيرو تاني

نزلات راسها بعصبية: فيك غير الهضرة امدام عاليا هادشي اللي كاتعرفي 

عاليا: ممم..وتي فااش فالحة اا؟ مازال ليام توريك ومازال نگولك جمعي حوايجك حنا غادين من هنا..غير ديري فيا التقة

رمقاتها بشك: غانشوفو

رجعات كاتفطر وعاليا ناضت لبيت النعاس..بقات هيام كاتشوف قدامها بسهوة وتاكل . سالات وهزاتهم للكوزينة بغات تمشي لبيتها هي تشوف عاليا سادة بيت النعاس ولابسة حوايج الخروج

هيام: لفين تاني

عاليا: للوعد اللي عطيتك ابب..غانخ..

قاطعاتها بملل: غانخلي ليك فلوس الغدا شري شنو تاكلي.. يااك

بابتسامة: تماما..واخا الفلوس بداو كاينقصو لينا.. وحتا المدرسة القديمة ديالك رفضات ترد ليا الفلوس اللي ماكمليش فالشهر

ميقات وتمشات لبيتها: ماتعطليش بالليل

دخلات وجبدات كتاب لاحتو فوق السرير تقراه هي تسمع دقان فالباب التحتاني..
غوبشات وخرجات حلات باب الدار ولقات عاليا كادوي مع شي حد ..خرجات بفضول غادة عندهم وشوية توقفات فنص الدروج كاتشوف تاج الدين واقف مبتاسم لمحها كاتشوف فيه وتكلم: بغيت غير نعطيها واحد الحاجة اللي كانظن مهمة عندها

عاليا طلعات حاجب: وشنو هي هاد الحاجة؟

جبد من جيبو البوصلة ومدها ليها.. شافتها هيام رجعات صفرة عينيها خرجو وغير كاتسرط الريق..فحين عاليا وسعااتهم وضارت شافت فيها طاالقة ضحكة عالية فالارجاء عاد خداتها كاتلويها فيدها وتردد: واللهيلة هي ههه

هضر تاج وعينيه على هيام: لقيتها حدا المدرسة ديالك.. تما يمكن فين طاحت ليك

ماجاوباتوش غير كاتشوف فالبوصلة مصدوومة وقبل ماطلع كاتجري للدار رمقاتو بنضرة كااارهة كاتغزز سنانها مافهم من خلالها والو

عاليا: شكرا بزاف اولدي.. بصراحة ماتصورش الخير اللي درتي فينا قداش

تاج الدين: لا العفو 

سدات الباب وهو حك راسو وضار غادي للخدمة مقوص حجبانو بتشويش 

......

طلعات للدار كاتنهج والدموع فعينيها غادا جاية حدا الصالون.. دخلات من وراها عاليا كاضخك: شفتي! حتااا حاجة ماكاتخبا الحبيبة ديالي..حتا حاجة

وقفات قدامها كاتنهج ودموعها ناازلين: ردييها ليا هاادي ديااالي

عاليا: ماابقااااتش ديالك..وحتا انا مجوهراتي كلهم مشااااو 

هيام: ماااشي سووقي اناا خاطرت بااش نااخدها من ايدييهم رديهاا لياااا 

عاليا: ماااتحلميييش

ضورات راسها كاتبكي وتغوت وعاليا مربعة ايديها بعصبية: علاااش كاديري هاكاا علاااش..هاادي الحااجة الوحيدة اللي بقاات لياا من بابا حراام علييك حراام

عاليا: حتااا حاااجة ماابقات ديال باابااك كلشي رجع للبنكة.. فيقي اهياام فييقي خلاااص فعوض ماتجيبيها ليا فاول فرصة باش نستافدو منها.. كنتي مخبيااها؟

هيام: وااخا يعطيوك فيها اللي عطاو تمنها غايبقا قليييل ..وهي اصلا ديااالي انااا

عاليا: هاحنا غانشوفو ...خرجات خابطة وراها الباب وهيام طاحت على ركابيها كاتغوت وتبكي عشرة للعين متألمة ومكررهة 


انقلبت حياتها ..لتدير بقدره من البساطة نحو التعقد..انقلبت حياتها لتودي بهدوء احاسيسه الى هيجان المجانين.. فبحي شعبي اشمأزت حتى النظر إليه ترعرع هو ..بمنزل كرهت المكوت فيه كان منزله مقابلا لها..حتى أن أول لقاء بينهما كادت به أن تفقد شرفها وأن تطيح بمستقبله نحو الهلاك..مع كل هده التناقضات ... أيحدت....؟

.......
هيام: "بتأفف"سربيني اخويا عافاك

-هانا اختي هانا معاك

ربعات ايديها قدام المكتبة كاتسنا البحت ديالها يوجد ودوك الرباعة اللي كانت مضاربة معاهم مقنتيت فواحد الحيط غاياكلوها بعينيهم وهضرتهم عليها

-كاتسحاب كر** شي حاجة دابا.. شووفي شووفي كي كاتنفخ..

-النخوا عالخوا لد**مها ..شيسحاب ليها راسها؟

-غابلاتي البنات مازال نقاد ليها البلان راها فالباال

-وايوب؟؟

-يمشي يتح***..شتي داك الزين اللي فرحانة بيه انا غانحيدو ليها

...خدات وراقيها خلصاتو وتمات غادة دايزة عليهم مخنزرة ..قلبات عينيها وسهات فطريقها ككل الايام.. رجع عندها كلشي سواد وفقدات شي حاجة سميتها الامل وفنفس الوقت باش أنها ترضا وتحاول تتكيف مع الحياة الجديدة احتمال غير متاح... سمعات سميتها من اللور سميتها اللي تكرهات فيها من فمو المسخ وهو كلا نهار تابعها كايعيط عليها .. كملات طريقها متجاهلاه لكن بدون مفر وقف قدامها مشرع فمو كاينهج

أيوب: افين ازين كي صبحتي

جاوباتو مخنزرة: كنت بيخير حتا وقفتي عليا مرة خرا

كملات الطريق راجعة لدارهم وهو زايد معاها ويدوي بالهداية: ودابا مالك على هاد التعفيرة كاملة ها ؟..اشوفي هيام عنداك تشوفيني هوكا تحگريني تارا والله حتا تعيشي معايا اميرة حق الرب

باستهزاء طلعات فيه: واحد بحالك شكايعرف اصلا على عيشة الامراء اا ؟؟ خليك غافأحلامك حسن

أيوب: واتي رانا داوي من نيتي دابا مالكي ماباغاش تيقيني ..انا را تانبغيييك الله يرزيني فمي تاتانبغييك

بملل: عاودها لراسك انا مابغيتش واش مباغيش تفهم مابغييييتش "وصلو للدرب وهو غير كايدوي"

أيوب: اهانتي والله مع الوقت حتا تولي تموتي عليا خاصك غاتعطيني شي فرصة حق الله

- نفخات مدورة وجهها جا نيشان على وجه تاج واقف كايشوف فيهم وصدرو طالع هابط ..بحال العادة وككل الايام عطاتو تخنزيرة وشوفة غل..شوفة كاتخليه يبات سهران الليل عينيه ماكايشوفوش النعاس ..شوفة سادة ليه الشهية ومخلية تنغيصة قاصحة فحياتو.. تخنزيرتها فيه كاتوحل ليه الضحكة فالحلق وتخلي حجبانو معقودين گاع النهار وحلقو واحلة فيه حجرة مراا قااصحة ..ضارت عند ايوب اللي باقي كايرغي وغوتات فوجهو بغضب: سااليتي

أيوب: واماالك دابا شاعلة غابحدك واصاوبي معانا شوية

هيام: بسلاااامة 

دخلات للدار خابطة عليه الباب.. دار هو كايتنهد شاف فتاج الدين كايخنزر فيه ومشا عندو


وقف قدامو كايتأفف: العفوو مع هاد البنات حق الله.. بالرب مابغاو يتفهمو ليا انا بعدا

جاوبو بحدة كايحط داكشي اللي فيدو: ايووب "وقف قبالتو كايسد ليه صدايف القاميجة مخنزر ويورك على هضرتو حرف بحرف نقطة نقطة" غانعاود نشوفك كاتبسل عليها ..غانخسسسرو.. وغانبدا نخسسسر اخاي..واخا؟

ضحك متوتر كايرمش: وتا لا اصاحبي شمن كانتبسل را رافم بالمگلوب تارا حنا كانب..

-قاطعو مغزز سنانو: سالات الهضرة.. وانا ماشي عور "بغا يدخل للدار ورجع ضار ليه بنفس الحدة" وآخر مرة نسمع من فمك ديك حنا..حيت ماغاتكونش "ورك عليها" اعشششيري

دخل حتا هو ساد فوجهو الباب خلاه كاينهج وفمو تيترعد بالعاصاب طلع عينيه للشرجم ديال بيتها ودوا متحلف: هاحنا غانشوفو..اعشيري

داز كمل فطريق طريقو معصب...

دخل تاج للدار مقلوب ليه المود وغير كايزفر دخل على مو وحط ليها السخرة.. بغا يخرج هي تعيط ليه

عيشة: تعالا نتا زيد نهضر معاك

تاج الدين: مافياش امي غانمشي ننعس

عيشة: واش تا داك البيت وليتي داير فيه اعتكاف ولا شنو ءء..مالك اوليدي من الخدمة للبيت ومن البيت للخدمة شكاين

تنهد مضور عليها وجهو: الساعة لله

عيشة: ايييه الساعة لله ولكن بنادم يساعف شوية..واش الخدمة مابقاتش عاجباك ؟ الى هاكا بالفرحاات عليا اولدي ترجع لقرا..

قاطعها مغزف: واامي شمن خدمة عااود شمن وااش ترجعي لنفس السيجييي.. انا القرااية ضربت عليها فههميهااا

ضار مكرره رجع لبيتو ساد الباب بالجهد وگلس على السرير كايزفر..تنهد مطوول عاد ناض بديك التخنزيرة حل الشرجم ديال بيتو حاط عليه ايديه وكايشوف فباب بيتها اللي مقابل معاه ..لحظات وتمات داخلة كاتاكل تفاحة طلعات عينيها صدفة فشوفتو المخنزرة ..كلها عتاب وحسرة وكلام كتيير ماتايتقالش بالحروف ..طلعات حاجب ومشات سداتو گاع مقوصة حجبانها وكاتبرگم: ياإما نتا يا داك صاحبك تفوو.. كرهتوني فحياتي

عاليا: هياام

هيام: وي ....عضات التفاحة وحطاتها خارجة عند ماماها اللي عاد داخلة جايبة معاها الغدا وكاضحك

ربعات ايديها كاطلع فيها: على السلامة عاوتاني

عاليا: هههه الله يسللمك

هيام: ياك لاباس شفتك فرحانة اليوم

بتعاالي: اااه احبيبتي اااه كون تعرفي ماماااك وافكارها هاد الاياام تبوسي ليا رااسي

هيام: مممم..ايوا المهم هي النتيجة ابب

عاليا: ههه النتيجة غاتشوفيها فهاد الايام

حلات عينيها ودوات بهدوء: داوية بصح

عاليا: بيان سووغ كوني هانية ..مازال تشوفي حياة النعيم مرة خرا

هيام: انا بعدا مابقيتش غانتيق حتا نشوف بعينياا

عاليا:اوك ههه..سيري غسلي ايديه وتعالي تتغداي جايبة لك شهيوة من داكشي هههه


تعاشات عشية داك النهار وفور ما غربات الشمس بدا تيليفونو كايصوني ..مد ايدو للكوافوز قطع بلا مايشوف شكون ولكن ماسكتش من الغناا ترن ترن ترن...
طلع راسو مخسر وجهو شاف فالساعة كانت التمنية ديال الليل هز التيليفون شاف شكون كايعيط وزفر مدوز المكالمة وصوتو مدعدع

تاج الدين: االو

الباشير:ايوا الكيضاار شهاد الفعايل؟ من الصباح وانا نعيط علاش ماكاتجاوبش

نفخ راد راسو للمخدة: شكاين اخالي مالك

جاوبو كايضحك: ماتگولش ليا نااعس هاد الوقت ههه اماالك فروج 

تاج الدين: واعياان اخالي شنو باغي

الباشير: باغيك دوز عندي نهضر معاك فشي حاجة يالله يالله

نفخ بعگز: ماف..

قاطعو الباشير: ابلا ماتبدا تغبن عليا لا عيان لا كدا غاتتهز داابا تجي عندي داابااا يالله ..

قطع مخليه كايشوف فالتيليفون.. رمش مدة وناض على سعدو كايتجبد.. حل البلاكار وجبد تيشورت بدل بيه هاداك اللي لابس اما حتا الدجين خلاه كيما هو..رش من ريحتو وهز تيليفونو وخرج داز على مو ونجاة بلا مايهضر وحل الباب خرج تحت نظراتهم..شافت عيشة بشك فنجاة اللي كاتفرج وتاكل الزريعة نغزاتها ودوات: تي زعما ماعارفاش خوك مالو هاد ليام؟

نجاة: "هزات كتافها بلا ماتشوف فيها" ختي اللله اعلم ولدك هاداك نتي تعرفي

عيشة: اياياي علك.. زعما تي ماتعرفيش الشويطينة

نجاة: ااش غانعرف ااش على موالف كايگول ليا شي حاجة.. الدعوة فخوك اللي وصلتي ليه الخبارات هو يجبد ليك اللي فراسو

عيشة:لا لا حتا الباشير والله لاودا انااا اللي عارفاه "حطات ايدها على حنكها ساهية" احياانا حااسة بيه شي سحوور هادااا 

ضحكات نجاة خلسة وهي كاتشوف فالتلفازة: وهي من ناحية سحور راسحوور واشمن سحوور مايفكوه فقهة مايقضيو فيه بخور هه

ضربات عيشة فخادها مخرجة عينيها: اااويلي شكاتگولي سحوور!!!!!

بزقات الزريعة مخرجة حتا هي عينيها: لا لا لا لا لا لا لا غادااوية والله حتا غادااوية

ماداتهاش فيها: انااري اميمتي وانا نگوول الدري ماالو هاد ليااام اااويلي ياااوييلييي گوولي القضية فيهااا السحوور

نجاة: وااالا اعيشة لا والله حتا غااااضاحكة والله واااش انا كااايديوهااا الناس فهضرتي

عيشة:نووووضي.. نووضي ابنت الحرام جيبي ليا جلابيتي داااابا نمشيو عند شي فقيه هو يگول لينا شنو كااااين تتهزي

ندبات حناكها: انااري على فقيه واااش تي بعقلك راوالله تا غاضااحكة والله

عيشة: وااالبليييمين تاساااحرين ليه علاااه مالوو غاجااا وولا هوكااك

سرطات ريقها كاتبرد فيها: هاانتي ماما غاگلسي دابا انا نگولك ماالو صافي ودابا بردي الله يرحم باك 

ضمات ايديها عاطياها ودنها: هانا كانسمع يالله گولي

نجاة: وراه مااااشي سحوور هادي راه هادشي عاادي يوققع ليه 

عيشة: تي ااشمن عاادي اشمن الدري هزيتي وااحد حطيتي واحد ااخر وتگوولي ليا عاادي

نجاة: واراه داخل فالتمنطاش ضروري يبدا يطرا ليه هوكااا

عيشة: شنااهياا هااد ضروري تاني ماالي عااد غاتووريني فولدي

بدات تتفكر وتمتم ليها: وا وا..وآراه راه كانقراو عليه تء.. هاانتي ياك حنا العيالات فاش كاتجينا الدورة الشهرية نفسيتنا كاتگلب يااكي ..ايوا حتا الدراري حتاهوما عندهم واحد الدورة كاتجيهم

حلات فمها مخسرة سيفتها: ايوا الله يمسخك يالحماالة الخاانزة ويلي على الدوورة الشهرية ويييلي استغفييرة الله ماحشمتييش

نجاة: والااااا.. ماشي الشهرية هوما الدورة اللي كاتجيهم سميتها الدورة القمرية

خنزرات فيها: ساايرة طنزي عليا

نجاة: واوالله ماتانطنز حق الله حتا بصح ..شتي دابا القمر ياكي القمر فاش تايولي دواارة ويولي كايشعل كايبانو ليك الدراري مجاجهم بوحدو تگلب

رمشات فيها بشك: تي واش سايرة تگولي هاد الهضرة بصح

نجاة: وااييه هادشي راكانقراو عليه فالتربية القمرية راه العلم امي تطوااار 

عيشة: حلفي تا بصح

نجاة: بغيت لمي ماتمنيتي تا بصح..واتفرجي دابا وهنينا تفرجي

سكتات عيشة كاتشوف قدامها وقاتطعة الحس وتمتم ونجاة حاضياها بنص عين وطلب الله تيقها


دق باب البراكة سمع صوتو عاد دخل عندو كايضور عينيه وايديه فجيابو

تاج الدين: معاك شي حد؟

الباشير: بووحدي غاادخل دخل هههه

مشا گلس حداه راد راسو اللور وكايشوف فالسقف ..شاف فيه الباشير وتبسم كايضور فراسو: تهنيتي المسخووط جبتيها فراسك ههه

شاف فيه بنص عين : شنو 

الباشير: بدا دوخ عليا ههه هااد الشوفة اللي داير دقة شي وحدة المسخووط هههانا اللي عارف غيير گول شكون هي

تنهد كايشوف قدامو: ماكاين والو اخالي غير منيرفي شوية مع الدار وصافي

الباشير: ههه احيااني سولني انا "شعل جوان ونتر منو ونفخ الفوق" ااه اصاحبي على كوية الحب.. واخا ماعرفت شحال يكون عندك من عام عمرها تنسا

تحنا تاج على ركابيه كايشوف فيه بهدوء: ونتا باقي مانسيتيهاش

ضحك محرك راسو بالنفي: والا عمري ننسا

تاج الدين: ومالك ماتقلب عليها ماللي لهاد الدرجة كاتبغيها 

الباشير: علاش غانقلب عليها ء؟ باش نگلب ليها حياتها عاوتاني 

تاج الدين: مانعرف 

...سها فيه الباشير كايشوف لعينيه وبسم شوية: حتا نتا حالتك بدات تولي بحالي..ياك 

-خدا نفس ورجع بضهرو اللور: ماعرفتش.. مابقيت فاهم حتا وزة وماباغيش اصلا نفهم

الباشير: هه شكون هي

تاج الدين: هي؟ "بانت ابسامة خفيفة فشفايفو" هي اللي ماعرفتش كي دارت حتا دخلات لحياتي..كي دارت تاروناتني من الداخل

الباشير: اه اه اه ههههه كمل كمل

تاج الدين: راأنا اللي تقاديت اصاحبي ونتا كاضحك..مالي على هاد الزمر كاامل 

الباشير: ههه زسحابك بخاطرك اصاحبي ..ابلاهلا يطريه ليك الشريف راه العياالات اوووف

تاج الدين: وأاووووف نييت

الباشير: دابا المشكيل فين كاين؟

خنزر: فيها هي..ماعرفت مالها حتا تقلبات بوحدها فينما نبغي نهضر معاها كاتقمعني مرضت گااع..ماشي لخاطري وماشي بيدي تمنيت نگلب عليها وجهي ولكن.. مانقدرش..ديك البنت شي حاجة..شي حاجة ماعرفتش كيفاش نوصفها..فِتنة


الباشير: هههه فتنة ههه

تنهد: وايااه بنت الحرام ..فتنة وجيا تحمقني فحياتي

الباشير نتر من الجوان وسهاا قدامو: فاش فكرتيني..هادي عشر سنين دابا كنت گالس بحال هاد الگلسة ديالك ففمي گوارو وكانتهرس غير بوحدي..

ضار شاف فيه: هههه بجميبة

الباشير: بجمييلة هههه.. احح على جمولتي..كنت ديك الساعة متعلم عند باها فالنجارة وكانت هي كاتجيب لينا الغدا حتال الماحال..من نهار شفتها..وأنا ماشي هو أنا.. كلشي تبدل ديك الساعة

تاج محا الضحكة راد راسو اللور وتنهد بفمو اللي تايدوي غير بوحدو: كلشي فيها زوين..كلشي حلو وعسل ..العينيه ..الشوفة ..التغوبيشة ..أما المشية والتعفيرة اوووف

الباشير: هه كاطيح وتغرق تغرق حتا مايبقا عندك فين تزيد..من بعد كاطير من ايدك وتخلي دماياتك غارقين..حتا هي كانت كاتبغيني وناوية تصبر معايا ..ولكن باها ولد الحرام..انا سيفطني للحبس..وهي زوجها لواحظ لاباس عليه

ضار عندو راسو تقيل: تزوجات؟

حرك راسو وزاد نتر: داها واحد آخر ..وأنا كيف الحمق كانضرب راسي مع الحيوطة ديال الخبس عامين

شرد قدامو وطبطب على كتفو: صافي سكت اصاحبي..سكت

الباشير: هههه ماالك ضرك خاطرك..دابا لنفترض حتا نتا...

قاطعو بحدة : البااشيير سكككت..سكت "سد عينيه مدة وناض بصعوبة" انا غادي

الباشير: ههه فين اصاحبي بقا معايا

تاج الدين: لا لا خاص نمشي "شد راسو" آااي

الباشير: امالك ههه

تاج الدين: هههه والو..تهلا

-خرج من البراكة غادي فالطريق لدربهم.. ملاوط فالمشية رجل تديه ووحدة تجيبو والحاجة كاتبان ليه منها ربعة..
ضحك كايدندن غاادي فديك الطريق الخاوية وصوت صداه اللي كايتسمع حتا وصل ووقف كايضحك..

طلع راسو للشرجم ديالها لقاه مسدود والضو طافي بدات الضحكة كاتمسح بالشوية بالشوية وصورتها مع أيوب طاحت ليه بين عينيه ،ضار مخنزر مقابل مع باب دارهم وغوت بالجهد حتا فيق النص فالظرب: هياااااااااااام

قفزات من نعاسها مخسرة وجهها وصوتها مبحح بالنعاس

هيام: اشواقع؟؟

تاج الدين: هياااااااام 

وسعااات عينيها ومشات تتجري حلات الشرجم هبطات راسها هو يبان ليها واقف قدام الباب غير شافها ضحك وتكلم بلسان عوج: مسا الخيييير ههه

- شهقات حاطة ايدها على فمها كاضور راسها يمين وشمال

- خنزر تاني وهو كايحاول يحل عينيه: اجي اجيي نزلي نتفاهمو نزلي

هيام: ااويلييي 

ضارت بالبيجامة حلات الباب نازلة لتحت كاطير خرجات عندو وغير شافها بغا يهضر هي تحط ايدها على فمو وجهها صفر تالفة

هيام: "بالهمس" اجي معايا زيد واش واكل شي حاجة

بقات كاتهمس وهي غادة بيه للخوية فين وقفو آخر مرة وهو مسايرها تديه لفين بغات..
غبرو على الانظار وفنفس الوقت تحل الفدريش ديال دار تاج وبانت عيشة كاتلبس زيفها حتا هي عاد فايقة من النعاس..

طلات مزيان وملي مابان ليها حد رجعات دخلات كاتبرگم موسوسة: لا لا ويلي غاتخايل ليا...

ناضت تاني كادوي بوحدها لبيتو حلات الباب لقات فراشو كيفما هو.. هزات راسها فالساعة وبانت ليها التلاتة ديال الليل جمعات النفس ورجعات لبيت النعاس دور دور وتگول: ااويلي اعيشة نعلي الشيطان مالكي ماكاتعرفيش ولدك ؟..ويلي لا غايكون شي شمكاار هااكار ..ايوا وفين هو حتال الوقت؟ صافي غايكون غير بايت الباشير ااه ..ننعس حسن ليا
...........

حيدات ايدها من فمو وربعاتهم كاضور راسها بخوف وتتسناه يهضر..شافت فيه لقاتو مفشكل فشوفتو غير حال عينيه وبسمة خفيفة مزينة شفايفو

غوبشات مقصحة شوفتها: وااهضر خلااص شنوو بااغي؟؟ 

بقا ساكت كايشوف فيها ورموشو كايرمشو بالتقااالة

هيام: اييوا وعلاش منزلني ملي غاتبقا سااكت..هيييه "دوزات ايديها على وجهو رمش فايق من السهوة ورجع شاف فيها مخنزر كايشير لراسو" 

تاج الدين: دابا اناا..انا اشنو درت ليك..ءء؟ شنو

قوصات حجبانها بعدم فهم: كيفاش؟


تاج الدين: كيفاش كيفاش نتي اللي كيفاش مرة ضحكي معايا والغد ليه قلبتي وجهك 
فخطرة وكلا مرة ملصقة فيك داك بنادم ااو كيفااش

قلبات عينيها وشافت فيه بحدة: دابا هادشي علاش مفيقني فهاد الليل؟ نتا اشنو واكل شنوو شوف غير حالتك وباغي تهضر

تاج الدين: ماااالهاااا حااااا....

نقزات سادة ليه فمو كلها كاتغزل بالخوف وهو حال فيها عينيه: شششش صافي سمح ليا سمح ليا والله مامالها والو

تاج الدين: همندهنهنمهنهزهنهن

حيدات ايدها عاد دوا: دابا انا اشنو درت من اللللخر

نفخاات شهاد المصيبة طاحت عليها فهاد الليل .. رمشات فيه مالقات باش تجاوبو من غير تسايس: شوف.. انا غير كنت معصبة منك..حيت..حيت داك أيوب گال علك هضرة خايبة وانا تيقتو داكشي علاش..اوصافي دابا ماشي مشكيل والله

بجمود شاف فيها مدة شوية قرب ملاسق معاها كتر خلعها وهو منزل راسو حتا قرب نيفو يلمس نيفها ودوا بجدية: كاتكدبي..

نزلات عينيها بالزربة: لا انا بصح..

قاطعها بهدوء: كاتكدبي.. بحال ديك النهار فاش گلتي باللي باغا تمشي تشهدي معايا.. عارفك باغا غير تسلكي راسك ..ولكن عينيك كيعاودو ليا كلشي

طلعاات بالزربة عينيها وقلبها ضرب من قربو ..رمشات دغيا منزلاهم وقبل ماتهضر مد ايدو لخصلات خفاف كايلعبو فوجهها حيدهم وميل راسو بحنية وصوت هامس: شنو وقع..علاش ديك الشوفة ءء؟؟ خليتيني نحس باللي ضريتك فشي حاجة غالية بزاف

طلعات عينيها فيه ودوات بتردد: وراكا اصلا خديتي شي حاجة اللي غالية

تاج الدين: شنو هي؟

تنهدات: مانقدرش نگول.. مهم خديتي

تاج الدين: تيقي فيا غير هضري..والى كنت انا الغالط غانصححو

بقات مدة ساكتة وهو كدلك شاد خدها كايلمسو بلمسات خفاف ويشوف فيها حتا تنفسات مزيات ودوات بغير حيل: المشكيل هو البوصلة صافي؟

بهدوء جاوبها: رديتها لك

خرجات عينيها بعصبية: ماشي ليا لماما..وهي غير ماغايبقاوش عندها الفلوس غاتمشي تجري تبيعها ماغايهمهاش الى كانت اخر حاجة ليا من عند بابا ولا لا..انا خبيتها من نهار طاحت فيدي ونتا بسهولة عطيتيها ليها

تاج الدين: انا ما..

قاطعاتو مبعدة عليه: صافي نسا دابا اللي وقع وقع ..مادام دوينا صافي خلينا نمشيو

بغات دوز تمشي ردها قدامو وصدرها على صدرو مطلعة فيه راسها

تاج الدين: "بهمس" غانردها ليك.. وعد على رقبتي غاترجع ليك

سرطات ريقها وهي ماقادراش تحيد عينيها عليه: والى ماقدرتيش؟

بنفس الشوفة: ديري فيا اللي بغيتي

نيم فيها عينيه المعسليين بالتبويقة تاروها كتر وتاهت فيهم، بديك الشوفة ماقدرش يمنع راسو ويقرب ليها كتر حتا ...

يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.