بقا صاحبو قدام الباب غادي جاي وينفخ بلباس رسمي مبين عضلاتو وكلا مرة يرض شعرو الزعر اللور ويسووط حتا تفتح باب البيت وخرج تاج كايسد صدايف الشوميز السوداء فوقها لابس فيسط وسوال نفس اللون وسباط جلد بني مع خيط رقيق ملوي على يدو
هز ايديه: على سلامتناااا
- طلع فيه تاج حاجبو كايدوي بهدوء : الافتتاح ديال مي وختي ياك؟ نتا ماالك على هاد التزنزينة كاملة ماخفتيش ندخلك فشي حيط
حسام: واكونما مك مسكينة اللي طلباتني والله لاديتها فك
تاج الدين: يااك اخويا..وامرة خرا تجي تفيقني وشوف لاما نعاود ليك الطهارة زيد دابا زيد
سبقو هابط فالدروج وهو شاف حتا شاف وضحك: والله يمسخك هانتا غابلاتي دابا تاكلهم من عند خالتي
بسم تاج مكمل طريقو خرج من البارطمة ديالو الصغيرة وركب فالاسنسور هابط للتحت ..عمارة زوينة عصرية جات فحي نقي جديد كانت واحد لوطو من نوع فورد كحلة مركونة برا سلم على العساس غير براسو وطلع كايدير السمطة...
حسام مشا قصد ميرسيديس بيضة ركب وديماراو بجوج غادين فالطريق طايرين كلا مرة سابق فيهم واحد وتاج كايهز الطيلي مخنزر يطل على الساعة .. الشعر كحل قوي داير ليه حسانة مقادة موحدة مامقلل الجناب مضارب السطورة حسانة عادية جات مع وجهو ومع لحيتو الحرشة ضايرة على فكو كامل وعلى شنايفو الحومر طول الوقت بسباب انو فاش كايكون كايفكر ولا شاغلة بالو شي حاجة لاإراديا كايبقا يعض فيهم..حجبانو غلاص منتورين فوق عينيه على شكل خط أفقي محدد من الجنب وعينيه باقا عسوليتهم هي هي اللي تزاد هي الحدة فالشوفة بلا مايقصد كاترسم عليه...
فرانا اللوطو فالسونطر ديال المدينة قدام باتيسري Kuiz lind ..بسييط شكلو زوين وعصري.. نزل كايقاد الكول وحسام حداه حتا هو دخلو وسط داك الحشد ديال الناس الدنيا مخلطة رجال وعيالات صغار وكبار شي عيالات بالكساوي قصار ماركة والشعر والسيكان غير المضخم على خووه وشي وحدات ضاربين البلدي وزيف حياتي.. واقفين وكلا واحد وطبسيلو فيدو هاز شي نوع من الكيك شاد بيه الجموع.. بقا كايضور عليهم عينيه ويقلب وحسام حداه كايضحك
حسام: تبارك الله على خالتي بعدا مانساتش جاراتها
كايضور راسو بتساؤل: وافين هي بع... "بسم وهو كايشوفها جاية كاضحك لهادا وهادا لابسة جلابة مليفة خضرة مطرزة بالغوز وصباط بلا كحل وزيفها أسود مقاداه على راسها..الزمان دا اللي دا والتكامش شوية بين عينيها زادو وضاحو ولكن الشوفة ديال الهم مابقاتش تمحات ورجعات الضحكة هي اللي منورة هاد الساعة..
ضربات فيه الشوفة هي تعطيه تبسيمة صفرة مزيرة على شفايفها وهو عاد ماضحك وتم غادي عندها
-خبطاتو ليدو وهو شدها كايتوجع زعما: ياااك ااولدي ؟ داباا هاادي هي التمنية مااحضرتي فاش قطعنا الخيط ماحضرتي فاش استقبلنا الناس لااش جاي دابا لااش
الشيف:"والقفقفة شاداه" م م ممادموزييل مادموزييل ا انا والله مادرتها بلعاني هانتي غير طلقيني امدا مدموزيل والله حتا نعااود لك وحدة خرا الله يرحم الواالدين
نجاة: واااليوووم يجمعو عضامك غبرة اليوم نگطعك اربا اربا
-دخلات عيشة اللي كانت كاتقلب عليها شافتها هي تحل عينيها كتر وشهقات غادة كاتجري عندها تفك وتقرص باش طللقو: واااتي طلللفي ادييك الزووفري طلقيي الله ينعل اللي مااايحشم طلللقي
حيدات منو مغبنة وضربات رجلها مع الارض: واامي راهو اللي طيح ليا الحلوة ديال لاكريم من الصباح بكري وانا واقفة كانصيبها وشووفي كي ردها گااع تجللخاات.. دابا اناا شنوو غانقدم للناس شنوو
نجاة: اللي هي ؟؟ ....وقفات عليهم كاضحك وتلاحت على خوها عنقلتو بابتسامة لابسة جاكيط ديال العسكر مستيلية وطويلة مطلعة ليها السلسة حتال النص
بعدها تاج من حضرو مبتاسم: تباارك الله هادشي زوين
ضحكات بغنج: بصح ههه
تاج الدين: دابا ولا عندك بروجي ديالك ديك اللعيبة ديال الفياق حتال الطناش ومنعس حتا يوصل الفجر غير حيديها من بالك صداع الراس بدا
نجاة: قدها وقدوود اخويا ماتخافش
حسام: "باستهزاء" مممم غير االي يتيق فيك راه بحالك بحالها تموتو على السهير والخمير بجوج
ميقات فيه: دابا نتا اصلا شكون دواك مالك كاطير غابوحدك
حسام: تاج الدين دوي مع ديك البعبوكة راغانوريها
فلقو مخنزر: ختي انا بعلووكة ..بعلووكة لمممك زيد رامن الصباح وأنا كانجمعهم لك
شدو بالضحك من عنقو وايدو لخرا كايحك ليه بيها راسو وهو تحتو كايغوت نجاة ميتة عليه بالضحك وكاتزيد تفقص حسام
**********
فالجزء التاني من كازا..وتحديدا كاليفورنا
..بلاصة معروفة بالفيلات الواعرين والناس الهاي اللي ساكنين تما ماكاين غير السقييل والحديد الواعر هو اللي تايدوز من الشاريع ..كلا قنت واقف فيه عساس مع كلبو وكلا ككلب وياااكلب غير من الشوفة كايخلع...
فوحدة من دوك الفيلات فالطابق الفوقاني ومن البالكو تحديدا اللي تحل وطارو الخوامي بسباب البرد والشميشة اللي داخلين عندها وهي على فراشها الاميري نااعسة ماجايبة خبار للدنيا وفينما تصوني الساعة تمد ايدها البيضة المعرية طفيها وترجع تخشي وجهها فالمخدة وشعرها الاسود المتموج مسرح على ضهرها قايس اللحاف الحريري اللي مغطية بيه..
غرفة ديال الاميرات كبيرة بل ضخمة ناموسية ضايرة قصيرة حداها جوج كوافوزات حتا هوما نفس الستايل وقدام السرير مراية طويلة فكادر دهبي كاتبينك واقفة من الشعر للرجل وحداها طبيلة ديال الميكاب عامرة من القنت للقنت كلها الوان وبودرات وعكورة فوق منها فالحيط تصويرة كبييرة ضاحكة للكاميرة حتا تسدو عينيها.. من الجيهة لخرا كان باب الحمام عصري وبلدي وحداه ديريسين جامع كلشي و غير هو بوحدو تحلفي عليه ماحال فباب قصبة..
تحل الباب بلا مايتدق ودخلات عاليا كاتقرقب بالطالون مخنزرة باقا بطلتها باقا بتعجرفها وباقا بجمالها كأنو غير البارح سكنات هنا...جامعة شعرها اللور ولابسة كسوة باليد كحلة على طايتها فايتة الركبة بشوية وملامحها معصبة قربات عندها كاتفيقها بنفسها مزيرة على فكها
عاليا: هياام..هيااام نووضي هياام
زادت خشات وجهها وسط المخاد: هممم
عاليا: نووضي راه عادل غايجي يتغدا معانا ونتي باقا نااعسة ماوجدتي حتا راسك
خرجات عاليا كاتنفخ وبقات موراها هيام مجبدة كاتخسر وجهها بصعوبة باغة تفيق وماقاداش ..حلات عينيها اللوزويين عسليين والرموش طوال ضايرين من عند الخالق مززينهم حجبان حادين مقادين وشنيفات كايتفوهو ورديين والسنينات بويض تحت الشنيفة التحتية خالة صغيييرة مزينة وجهها كتر..
حيدات الغطا وناضت بشوميز قصيرة كحلة بينات البيوضة ديال جسدها كتر لبسات عليها بينوار طويل ووقفات كاتحك شعرها دازت للحمام غسلات وجهها بما بارد وحلات البالاكار ديال الفوطات ..طلات على باب البيت ياكما شي حد جاي وبحدر مدات ايدها تحت الفوطات المطويين جبدات منهم كريطينة صغيرة مربعة دارتها فالجيب ديال البينوار وخرجات للبيت غادة للبالكو حتا سمعات تيليفونها كايصوني.. هزاتو كاتشوف الرقم بريفي هي تخنزر ساهية فيه وسناتها كايتحكو
-تحل الباب ودخلات الخدامة جارة كروسة صغيرة محطوط عليها الفطور ضارت ليها هيام بعصبية وغوتات؛ حطي دااكشي وبراا
الخانية: لالة.. گالت لك المادام سربي نزلي عندها
هيام: صافي برا.. يالله
خرجات سادة وراها الباب وهي سيفطات ميساج ولاحتو فوق الناموسية دازت خدات كاس ديال القهوة ودخلات للبالكو سداتو وراها وگلسات على كرسي تما مع الطبيلة ديالو ..
حطات الكاس وجبدات الكرطونة اللي فجيبها حلاتها وجبدات منها ورق النيبرو وحداه خنشة صغيرة فيها الحشيش حلاتها وسرحات النيبرو نترات عليه شوية وبرماتو وبللات الجنب بلسانها عاد سداتو وجبدات من نفس الكرطونة بريكة شعلاتو بيها ونتراات مزيااان سادة عينيها..
تقطعات الحلوة الكبيرة من طرف نجاة ضااحكة من الودن للودن حداها مها شريكتها فالمشروع وخوها مساندها فأي حاجة.. كانو كلهم مجموعين على طبلة وحدة الفرحة معتالياهم كايضحكو ويجمعو ومرة مرة يشدو فنجاة حتا كاتتعصب وتحيد مضهر الانوتة فرمشة عين تمحيه وتتحول لعبيقة الله أعلم منين نزل...
تفرتك الشغل وبداو شي ناس كايفهمو راسهم ويمشيو وشي ناس من جارات عيشة باقي مابغاو يتقاداو لامن الماكلة ولا من الهضرة ..تاج شاف فساعة يدو باس لعيشة راسها هي وختو وهز الفيسط خارج كايصووني لحسام اللي كان سبقو
تاج الدين: افينك وصلتي
حسام: وي عاد دابا باقي فالحفلة؟
تاج الدين: لا انا جاي .. غير سير الى باقي باغي تقضي داك الشغل
حسام: صافي مزيان نيت وفالعشية نگول لك شكاين
تاج الدين: مشات ...قطع معاه وطلع مديماري من تما للشركة ديالو المتواضعة اولا نگولو عليها مقاولة صغيرة..بداها من الصفر وخضر لأول طوبة تبنات بيهاا وعينيه كلهم أمل وطموح يزيد يوسعها ويزيد يعرف بإسممو فميدان التصاميم والبناء ويدير سيتو بين المهندسين الكبار فالبلاد..
رغم أنو ربح منها بزاف ودار من خلالها شحال من حاجة باقي طموحو كبيير وحلموو كبيير باغي يحققو والله كبير...
وصل للباب ركن طوموبيلتو ونزل داخل و اللي داز من حداه كايتبسم ليه ممضسرهمش وفنفس الوقت محتارمينو دخل لآخر مكتب منقوش عليه "تاج الدين العورابي" .. دخل سد الباب ومشا للبيرو لاح الفيسك زتكا على الكرسي بتعب راسو بضهرو اللور..حل البلاكار خداه جامع فيه غير القراعي بالشكال والاحجام حل وحدة وكب لراسو كاس حطو حداه وحل البيسي كايطالع على البلانات اللي راسم ويهز مرة مرة جغمة من كاسو
نزلات من الدروج هازا الطيلي كاتميساجا فيه والشعر وراها مطلووق ملوي هاكا زغبة زغبة .. لابسة مونطو فوق شوميز بيضة حريرية وسروال جلد اسود مع طالون نفس اللون..
ردات الطيلي للساك وسداتو متوجهة للباب تخرج تاوقفات عاليا قدامها مربعة ايدها وفمها مزيرة عليه بعصبية :
للرانج الحمرة ديالها..فنفس الوقت كانت سيارة سوداء بالشيفور داخلة مع باب الفيلا ..وقفات و نزل السائق حل الباب للشخص اللي راكب اللور ومشا لليڤاليز ينزلهم..هبط منها رجل خمسيني شعرو كلو بيض وحس اللحية ماعندوش مهلي فراسو ولابس الرسمي وفعينيه نضاضر كحلين مغطيينهم وواخا لابس الشيك ولامارك ولكن القبول ماكاينش فوجهو بتاتا..
شاف فهيام وابتسامة كاتنوض على شفابفو عكسها هي اللي تبدل فيها اللون رجعات صفرة كاتعض شفتها من لداخل وعينيها مرفووعين كايتخيلو .. حلات بالزربة الباب وطلعات مديمارية بالجهد حتا تحكو الروايض وايديها فعينيها كاتمسحهم بالنترة .. حبسات جنب الطريق حلات مجر فاللوطو جبدات منو بواطا فيها حبيبات ملونين لاحت جوج ففمها وسرطاتهم كاتنهد وتقاد أنفاسها ..ارتاحت بصعوبة وهدات عاد ديمارات مرة خرا فالطريق
*****ة******
تحل عليه الباب وهو خدام دخل حسام ضاحك غير شاف الويسكي محا الضحكة وحاول يميك كايحنحن
تاج الدين: "وعينيه فالبيسي" قضيتي الغاراض
گلس مبسم: خباز زوينة الشريف
رد ضهرو اللور : ارا ماعندك نشوف
حسام: السيد اللي مشيت عندو باغي شي حاجة نيو تكون بووم وماعندوش مشكيل يعطي فرصة للشباب ولكن خاص الخدمة تكون متقونة
تنهد وناض ضار گلس حداه : هادشي خمس شهور وانا خدام عليه ..فيما كاطيح عليا شي فكرة زوينة وجديدة، كانخبيها تما، حتال فاللخر جمعتهم كااملين فهاداك التصميم اللي بان لك تما .."Adaiiva" ..غايكون منتجع ضخم جامع شوية من كلا حاجة وكايرضي گاع الادواق ناوي غير نضبر على التمويل وشكون يدعمو وغايكون شي حاجة ماضايراش
بقا كايشوف فالتصميم: وارااه شي حاجة ماضايراش نييت "صونا التيليفون ديال تاج ناض يهزو" هادشي فيه الفلوووس ولكن وااعر اساط مجهااد
هيام: تانتي كيووت يالله تبعيني ...ناضت وراها اميمة كاتنفخ طالعين فالدروج فين كاينة لاصال ميكس كبيرة .. دخلو للفيستييغ بدلو حوايجهم بلباس سبورتيف بحال بحال وخرجو لفين كايترينيو مجمعين ضااحكين وكلا وحدة لإينا آلة دازت واغلب الاعين تما عليهم
****ة******
دخل للبراكة ديال الباشير مبتاسم وكايعيط : خاالي..واااخالي
خرج عندو هاز طويجين صغير فيدو وكايضحك بتعب هزل ورقاق على اللي كان وحتا الشيب بان عليه..تاج باس ليه راسو ودخل كايغسل ايديه ويضحك
تاج الدين: ولاو فيك القوالب اصاحبي بحالك بحال ختك
كايفرق الخبز: كون ماگلت ليك راني مريض ماتجيش گاع طل عليا راه لمك ماينفعو معاك غير القوالب
خرج عندو وگلس: ديك الساعة اجي عندي نتا ياك شحال من مرة گلتها ليك ..اجي گااع نتا سكن معايا مالك على هاد العيشة
الباشير: لا لا براكتي مانفرطش فيها يوقع اللي وقع.. ههه كول كول
تاج الدين: باااز .."بداو كايتغداو مجمعين على داك الطويجين وفنفس الوقت تاج الدين حال ليه فمو وكايعاود ليه على الصغيرة والكبيرة اللي وقعات فهاد الايام اللي ماشافوش فيها.. ضروري يعاود وياخد ريو فكلشي وحتا راس الباشير عاامر وشااايف الدنيا بكل الوانها والنصائح اللي كايعطيه ديما نافعينو وكايدير بيهم حيت من الناس اللي كايسمع كتر ماكايهضر وعزيز عليه اللي يزيد ينصحو خصوصا الى كان شي حد قريب ليه بحال الباشير...
دخلات لبيتها كاتزفر سدات الباب مسورتاه من اللور ..لاحت الساك فوق الناموسية هو والمونطو عاد غاتبدا تحيد الشوميز هي تسمع خطوات صباطو جايين فإتجاه بيتها.. ضارت مخلوعة كاتشوف ظل شي حد واقف تحت الباب والساقطة كاضور بشوية باش يتحل ولكن مع مسورت مابغاش ..سرطات ريقها راجعة اللور حتا طلق من الساقطة بهدووء مكمل طريقو عاد سدات عينيها تنهدات وطاحت گالسة فوق السرير كاترد شعرها اللور وساهية قدامها كاتنفس برعشة
★★★★★
شرقات الشميشة وصبح نهار جديد فبدايتو كان تاج واقف قبالت السرجم ديال بيتو القديم كايشرب قهوة كحلة وعينيه قدامو.. حاد فالشوفة وساهي كايخمم حتا سالا كاسو وضار خارج للكوزينة فين كانت عيشة كاتوجد الفطور.. حطو فلافابو وباس ليها راسها مبتاسم بهدوء وباقة فيه البحة ديال النعاس: صباح الخير عويشتي
بابتسامة ردات عليه: صباح الخيير.. سير راه وجدت ليك الدوش غسل عضيماتك وخرج تفطر معانا
حرك راسو نافي: لا امي خاصني غانمشي
شاف فيه: فين؟ واا فطر بعداا
-دخلات عليهم نجاة قبل مايجاوب لابسة ومقادة حالتها كاتزرب فالماكلة وتمتم: نااري تعطلت تعطلت
تاج الدين: ههه عاد التمنية بشوية عليك
وفها عامر جاوباتو: ورااه خااصني نكون تما انا اللولة ولكن اللي عول على عيشة عول عالخلا
خرجات عيشة عينيها: ايواا الله يخلييك يالخلااا يابنيتي علاه ماشي سااعة واناا نعيط ونتي شخيرك قرب يووصل عند الجيران ..ماباغا تفيقي ماباغا تنعسي مگااد
نجاة: باااز باااز
...خرجاات كاتجري فالدروج تلاقات مع حسام عاد كيف نزل من اللوطو تاعو شافها هو يضحك: وااشد شد شد
ردات عليها بملل: بلااش اماما نتي اصلا فين عممرك فهمتيني
عاليا: واخا الالة وااخا.. يااك البارح بفممك گلتي باغا خدمة ءء؟؟ ايوا هاهي جات حتال عندك خدمة مخييرة وماشي عند اي واحد
سدات عينها بقلة صبر وضارت عندها: داك راجلك ماعندي ماندير لابفلوسو والا بحتا حاجة كاتفهمي.. من الاحسن ليه يعطيني بشبر ديال التيساع حتا نخرج من حياتو
عاليا: ويااك فايت ليك خدمتي معاه شنو المانع داباا
ضحكات بالفقصة :خدمت معااه ؟؟ گولي خدمت مع رااسي بووحدي وسهرت على دوك التصاميم ليالي وفالاخير شنو .. مشاا نسبهم ليه هو وداارهم بسميتو وأنا رماني للتوش ..مزياان هاكااا؟؟
عاليا: ولكن تخلصتي فييهم ..شنو باغا مازال هانتي بدوك الفلوس شريتي طوموبيل آخر موديل وشحال من حاجة
- شافت فيها مدة وزفراات خاجة فحالها وهازة ساكها نازلة فالدروج ووراها ماماها كاتعيط ..حتا حبسات جامدة ملامحها وهي كاتشوفو واقف قدامها مبتاسم ابتسامة عريضة وحال ايديه
عمر: الحبيبة ديالي "عنقها وهي كارزة على ايديها وعينيها" توحشتك بزااف "حيد منها كايوزع عينيه على ملامحها" واخا غير شهرين ولكن ماتتصوريش شحال توحشتك
جاوباتو تحت سناانها بغل: كون غير بقيتي ماتجيش
ضحك على هضرتها: واخا هههه " وقفات عليهم عاليا كاتنفخ شاف فوجهها وفهم شنو وقع" غاتكوني رفضتي ياك
هيام: وااو برافو بعدا عارفني ماغانعاودش نفس الغالاط ونحط رجلي فديك الشركة.. دابا سمح ليا عندي غونيڤو مهم
حبس عليها الطريق وهي نفخاات : تسناي بلااتي.. هيام شوفي..بصح داكشي اللي وقع آخر مرة ماكانش خاصو يطرا انا كانعااود نعتادر منك ..ولكن كان ضرووري ليا نرجع الشركة ونبين اسمها كتر داكشي لاش مادكرتش سميتك نتي فالتصاميم
هيام: هاد الهضرة غير سير كولها اعمر.. حيد من الطريق
عمر: لا لا بلاتي ..هاد المرة وقدام ماماك كانواعدك..وعد حر..غانخليك نتي تسيري كلشي وكلشي نتي المكلفة بيه وبإسمك..حتا حاجة ماديالي..نتي غاديري خدمة مزيانة تبيني بيها سميتك فسوق المعمار والمهندسين وأنا الاسهم ديال الشركة ديالي غايزيدو يطلعو فهاد الصفقة..اشنو بان ليك
طلع حاجبها وهي كاضورها فدماغها وتخمم بشوية.. محتاجة لبحال هاد الفرصة ومحتاجة دير سميتها من أول مشروع ليها وحتا انو من مصلاحتها تكون هاد الشركة هي ديال عمر حيت مكانتها مهمة فالسوق..خنزرات وشمرات بنيفها هازة نيفها: خلي حتا نفكر دابا مزروبة
بسم ليها وحيد من الطريق: ههه واخا اللي حبيتي .. حتا انا غادي عند السيد اللي غانديرو معاه شراكة الى بغيتي نمشيو عندو بجوج
هيام: لا غير سير بوحدك مامسالياش ..
دازت فيه وهو بسم بجنب فمو ..ضار باس عاليا وخرج لقاها ديمارات وحتا هو حل ليه السائق الباب وطلع
عمر: ديني للشركة ديال رضوان الوزاني
السائق: واخا اسيدي
وقفات اللوطو ديال حسام قدام شركة كبيرة زجااجية من برا فأحد شوارع كازا..نزلو بجوج مأنتكين على الحالة كالعادة زاازلووز و دخلو مع الباب بابتسامة توجهو عند الاستقبال ووقفو عليها
مشا تابعو كايجمع النفس ويبرررد للفطوي بعيد على المكتب شوية ..گلس النائب وتاج مقابل معاه طلعو عينين الوزاني شاف فيه ورجع نزلهم على وراقو
النائب: تفضل تقدر تبدا
حنحن وجبد تصاميم البنات من الملك كايعرضهم عليه: المشروع ديال المجمع السكني والمرافق اللي مترابطين معاه وجدتو على حسب الطريقة باش وصفتوه وزدت عليه بعض اللمسات ديالي..غاتكون المساحة كيف طلبتو 500 متر مربع وكل..
قاطعو مبتاسم: سمح ليا نقاطعك اسي تاج الدين ..ياك تاج الدين "تاج حرك راسو مغوبش وهو كمل كلامو" ..احم سمح ليا ولكن غير 200 متر كافية
طلع حاجبو: الوتائق مكتوبة فيهم 500 والميزانية ديال المشروع غاتقدو
النائب: ههه وحنا شنو همنا بهادشي اسي تاج "غمزو" الى ماربحناش من وراه شي حاجة
- زير على فكو كايشوف فيه وحنحن مقرب براسو عندو: سمح ليا واقلة فهمت غاالط.. عاود شرح اسي النائب
النائب: واخا شوف.. حنا محتاجين لشي حد موهوب وعندو بصمة زوينة وجديدة..وفاش جيتينا كإقتراح مابغيناش نرفضوك ولكن غاتنسا داكشي اللي مدكور فالوتائق وطبق غير داكشي اللي كانطلبو منك..وبحلاوتك حتا نتا
وقف الوزاني وعلى وجهو نفس الابتسامة ووقف معاه تاج كايشوف فيه ويشوف فاليد اللي مدها ليه: يعني مرحبا بيك معانا اسي تاج الدين..المشروع اللي شفتي فالاعلان غير نساه من بالك.. حنا كانطمحو لحاجة كبر ومشرووع ضخم...ودابا اكبر عاقبة اللي كانت مهندس نزيه حيدناها من الطريق حيت لقيناك وأخيرا
مد ايدو مرفوع كايرمش: داوي من نيتك ياك..بغيتي تقصد زعما مشروع كبير من غير السكن وداكشي
الوزاني: مشروع غايخليك تبصم سميتك فهاد المجال ههه كانواعدك
زير ليه تاج على ايدو وسلم عليه بحراارة حابس انفاسو.. مالقا مازال مايگول ولحد الساعة باقي ماتيق لدرجة گاع دوك الاعصاب رجعو ليه بروودة
الوزاني: ههه غدا غانعلم المساعد ديالي يتواصل معاك على قبل اجتماع مهم كايخص المشروع ..وتما غاتعرف گاع المعلومات.. مرحبا بيك معانا اسي العورابي..دابا تقدر تتفضل
حيد ايدو كايحنحن: كانشكرك.. غدا إن شاء الله
ضار فحالو خارج مصدووم بااغي غيير يغووت وكايزرب فالمشي تلاقا مع حسام غادي جاي متوتر غير شافو هو يوقف مخرج عينيه شير ليه تاج زعما برا برا وخرجو زربانين حتال حدا الللوطو عاد ضار عندو بوجه جامد وحساام مرتابك
حسام جببد عينيه وطلق حتا هو غوتة فالسماا مزير عليه كاينقز معاه ويضحكو بالجهد ماقاداهم فرحة.. شركة بحال هاديك فعلا مشروع واحد ناجح معاها وهالشهرة كاتنادي والمقاولة الصغيرة دياال تااج غاتولي يتضرب ليها الف حساب مع الشركات الكبار وكنية لعورابي غاتنقش حدا اكبر المهندسين ديال البلاد
..وقف تاج كايضحك شاد خصرو وكايشوف فحسام اللي قلبها شطيح وغنا كايحتاافل حتا هو بالمجهوود اللي بدل من الناحية الادارية ،ماخلا حتا شركة ماتواصل معاها وبحت وقلب باش يطيح فشي وحدة اللي طلعهم الفوووق وهاهو طاح فيها اخيرا
دفعو للوطو وهو باقي كايضحك فحين هو دخل دار السمطة وديمارا....فنفس الوقت وموراهم مباشرة توقفات السيارة ديال عمر نزل السائق حل ليه الباب نزل وتم داخل للشركة
عمر: ولكن اسي الوزاني نتا مولف تتعامل مع الشركة ديالي فهاد الامور.. كيفاش وقع حتا بدلتينا
برزانة حط قهوتو و شاف فيه : الموضوع ماشي بدلتكم ولا شي حاجة لا اسي عمر ..ولكن حضرتكم بفمك گلتي باللي اللي كان خدم ليك التصاميم مابقاش خدام معاك ..وممتأكدش واش غايرجع ولا لا.. شنو كاتسنا مني نبقا نتسناك
عمر: دابا راه رجع ونديزك المصمم هو بنتي وراك شفتي خدمتها شحال متقونة ودكية.. شنو المانع دابا
الوزاني: انا عطيت الكلمة للسيد وحتا هو موهوب ودوفكر بعييد..مانقدرش بعدما عطيتو كلمتي نتراجع..ماشي من شيمي
زفر عمر كايفكر ويصور عينيه ..الوزاني شاف فالنائب ديالو ورجع عينيه لعمر: سي عمر
عمر: نعام اسي رضوان
الوزاني: عندي ليك واحد الاقتراح مغاير..غايكون فمصلحتنا كاملين الى قبلتي
خرج من الشركة دايخ كايفكر ..السائق جاب ليه الطوموبيل ونزل حل ليه الباب ..طلع عمر هز تيليفونو مدوز رقم وحطو فودنو
-نعام اسي عمر
عمر: واحد خينا سميتو تاج الدين العورابي ..راه مهندس حتا هو بغيت نعرف عليه كلشي
-واخا اسيدي كون هاني
قطع عليه مخنزر ساهي قدامو ..حتا رجع هز التيليفون جبد نمرتها وبدا يصوني عليها
طبطبات مرجان على ضهرها وشافت فأميمة: حبيبتي..نوضي جيبي ليا تيليفوني نصوني على باباك
حطات كاسها: اوك.. ونتي ماتنوضيش من بلاصتك
مشات ومرجان شدات فيدها بحنان: ياكما باقا كاتفكري فالموضوع..ولا هو حاول مرة خرا؟؟؟
هيام: لا "سرطات ريقها منزلة عينيها" غير شوية متوترة
زيرات على ايدها ودوات: هيام.. نتي قوية احبيبتي تجاوزتي بزاف وتقدري تتجاوزي حتا هادي.. واخا القرار اللي خديتي ماتافقتش معاك فيه ولكن نتي مسؤولة عليه..و باقي الحال الى بغيتي تاخدي حقك
ابتاسمات بانكسار: باغا غير نبعد ..من كلشي وحتا من راسي "شافت فيها وتنهدات مهربة عينيها" من الاحسن نمشي
رمشات كاتحرك بؤبؤها بين عينيه مستفسرة: ديك الليلة واش كنتي كتهضر بصح.. كتبغيها لديك الدرجة
الباشير: هه ماللي كانتلاقاو مع شي واحد غريب ماكانكدبوش ..داكشي علاش عاودتي ليا كلشي بلا ماتخافي من شي حاجة ولا تترددي، حيت عارفة ماغاتعاوديش تشوفيني الا الى نتي بغيتي ..وحتا من سميتك باقي ماعارفها..داكشي لاش كلا كلمة خرجت راها بصح
هيام: بصح عندك الحق ...
تنهدات وشربات من كاسها وهو كدلك كلا واحد وفين ساهي حتا دوات ساهية
هيام: ماقادراش
دوا بلا مايشوف فيها: على شنو
هيام: كلشي ..حاسة براسي داكشي اللي مهرس فيا مابغاش يتجمع شي حاجة عندي ناقصة باقا مابغات ترجع ليا
الباشير: خاصك تخرجي من ديك الدار.. بعدي من الدياب قبل مايزيدو ينهشوك
هيام: لفين؟؟ فين غانمشي وباش غانعيش و انا حتا الخبرة ماعنديش باش نقدر نعول على راسي
الباشير: ماعندك صحابات صحاب والو گاع
نزلات عينيها وضارت قدامها مطلعة راسها: ماعندي حد
الباشير: نتوما العيالات هاد النفس الخاوية هي اللي كاتخرج عليكم..
هيام: انا ماباغا نتتقل على حد ولا حتا يشفق عليا ..داكشي باش عمري عاودت لشي واحد على المشاكل ديالي الا نتا..حيت ماكاتعرفنيش ونضرتك ليا ماكانتش بحال لخرين
الباشير: يمكن حيت فهمتك ههههه
"ضرب كاسو مع كاسها ضحكات حتا هي وهزات تشرب حتا وحل ليها وهي كاتشوف الشخص اللي كايتسالها الفلوس واقف مع وحدة مع شي رجال..
طلع رااسو فيهاا حمممر بالعاصااب وشدهااا بزز كاتنتر وتغوت لشي حد يعاونها وجوج من صحابو كايدفعوها معاه مدخلينها مرة خرا للقهوة ديال الشيشة..ضورات وجهها صفر ومدمع كاتقلب على الباشير وتغوت بسميتو على الله يعتقها وفنفس الوقت كاتزير برجليها على الارض ماباغاش تتحرك ليهم ..
حتا زااد تعصب االلي كان جارها وشدها جمعها معاها بتصرفيقة حتا ضارت طايحة بالدووخة، بغا يعاود معاها برجلو كونما تجر من كتفو بيد صحيحة وتخشات ليه كرووشي فوجهو خمجاتو ليه..
طلع تاج الدين عينيه مخنزززر فيهم واحد واحد باقي بحوايج الخدمة اللي تزيرو عليه والعروق غلااضو فعنقو كاينفخ كي التور
...شافو فبعضياتهم وتجمعو عليه كلا ومنين داز وحتا هو بدا عليهم لوح هادا عطي لهادا واخا كايجيو فيه ضربات صحااح ماحااس بواالو بكترة مامعصب وهيام ساقلة شادة الارض وكاتشوف فيه شد واحد من رااسو وزدحو ليه مع طبلة عامرة شيشة حتا شتتها وناضت الروينة كلشي هارب كايغوت والهايلالة ولات تما حتا من السكايرية نااضو كايشطحوو ويشجعووه حالين فمهم وكلا مرة لايح ليهم واحد
..ناض على غفلة واحد من هادوك بصعوبة هز عصية وكيف ضار تاج لاگاها ليه مع وجهو للجبهة حتا داخ وماطاح غير على عنق هياام متوجع وهي كدلك غوتات فاش حساتو لسقها مع الارض .. صمكاتو فودنو وهز راسو كايرمش الضبابا فعينيه وودنيه كايسمعو السطافيط كاتزوك بقا كايرمش فيها والصورة بالشوية كاتوضاح ليه حتا صفات صورتها وهي حاالة عينيها العسليين على عينيه الحمرين بعصبية شي ساهي فشي والعقل كايمشي ويجي
ويحدت..ان ماضيك المدفون يقوم من قبرو ويلاحقك طيفو من جديد
طرف ناض..حط قلبو اسفل قدمو ورجع بقوة للقدام باغي يتبت ليها أولا ولنفسو تانيا..تعدب وقاسا المعاناة من أول يوم حل فيه عينيه فالسبيطار على دموع امو وكسر حيل اختو وتعب خالو..
تما عرف باللي الالم ماكانش من نصيبو هو فقط بل تزرع تلقائيا فاللي دايرين بيه..فناض هز راسو ورجع هز قلم الدراسة كايلوح بيه باجتهاد سهران بالنهاار و الليالي وبريق حاد فعينيه حارق لكل واحد ناوي يوقف فطريقو
..ولو كان قلبو..قلبو اللي باقي ماقدر يروضو ولا يديرو تحت امرتو ويبين ليه شكون هو المتحكم..قلبو اللي باقي بين الحينة والتانية كايفيقو من عزة نومو يفكرو فيها وفأدق تفاصيلها ويسولو باستهباال "اجي باقي عاقل على فلانة هه" حتا رجع معتاد على المسألة. .
قلبو اللي باقا جهة منو مكسورة كاتنزف ولو كان معتاقد باللي مجرد حب مراهقة طفولي غايقدر يتجاوزو ..لكن بعد مرور سنة..وسنة ..وسنة..وسنوااات ..ضحك بألم على تفكيرو وعرف باللي اسمها موشوم على جهة اليمين من صدرو وكايجري فدمو..صعيييب يتنسا ..وفاش كايسها احيانا كايسول نفسو واش حتا هي نسات.. نسات القلب اللي جرحات من وراها ودازت مرور الكرام ولا باقا عاقلة..نسات؟ ..
...ماعارفش باللي هي عكسو تماما.. ماكانش عندها داك الحيل والقوة باش تقاتل..عكسو تماما اللي كانت اسرتو الصغيرة مشجعاه فكل خطوة ومسانداه فكل كسر..عكسو تماما هي .. لقات حداها غير الريح وأم متعرجفة جل طموحها المكانة والسلطة والمال
..لقات واقع آاخر مر خرج صباعو الخمس خانقها حتا بغات روحها تخرج ومخلي وراه اتار قوية صعبة تمحا...
وخلاها مهدودة القوى ومستسلة ..تاركة الكسر كيفما هو والجرح مفتوح ..ماربما يجي اللي يطبطب ليها عليه..يجي اللي يداويه ليها ويخرجها من المستنقع اللي رمات فيه راسها بإيديها..ربما
صبااح جدييد..و قدام البيسري وقفات الميرسيديس ديال حسام نزل كايقاد الشوميز فالشوميز داخل مع الباب والبسمة بادية من الودن للودن مطيحة اللي مابغا يطيح وتحطات عليه الانضار فكل جيهة من بينهم واحد السرباية كي قشعاتو مشات لطبلتو كاتجري وتماطي شفايفها يحمارو وتحنحن بصوتها يرقاف
حل الباب بالشوية وطل عليها كانت ساهية على شي فواتر كاترتبهم بكل تركيز وماحساتو حتا جمعها معاها للضهر عوجها وزااد طلق ضحكة فالسماا كايطنز: هاايهااي الناس والبيروو
خدات نفس وجاوباتو: كنت كانتسنا واحد الصديق.. حتا ماعرفت منين خرجو ليا هادوك.. احم عموما شكرا على البارح وسمح ليا
حرك راسو ورجعو عينيه بوحدهم كايشوفو فيها مرة خرا.. حل فمو يعاود يهضر هو يتم داخل واحد من ضباط الشرطة هاز سوارت
الضابط: غاتخرجو دابا
حل عليهم بجوج وخرجو مرتاحين نسبيا حيت تحل المشكل.. سبقهم غادي وهوما وراه تاج دار ايديه فجيبو مركز وزاوية عينو كادور عندها هي اللي غير كاضور عينيها محتاضنة نفسها بارتباك
عادل: احم .. إلياس كان داير حفلة وتجمعنا فيها كاملين.. بغيت نعرض عليك ولكن بحال العادة ماغاتبغيش
هيام: مممم.. بصحتكم
عادل: نعوضوها اليوم فالعشية؟ نمشيو نتعشاو فشي بلاصة شنو بان ليك
هيام: نشوف..دابا رد البال للطريق
*******ة*******
بلاصات الطوموبيل بسرعة قدام الشركة نزل منها تاج والباب موراه محلول غادي كايجري للاسنسور شاد الفيسط فيد والملف فيد..
طلع حط الملف فالارض وضار للمراية كايقاد الصدايف المخربقين ..فنفس الوقت دخلات حتا هي كاتزرب حبساتو قبل مايتسد وطلعات كاتشوف الساعة فتيليفونها وتنفخ بضيق..سد الصدفة الاخيرة وتحنا هز الملف تزامنا مع المصعد اللي تفتح وخرجو بجوج بيهم هي غادة على ليمن لمكتب اخر فين كايسناها عمر...
وهو على جهة ليسر لقاعة الاجتاماعات كايزرب..قاد الفيسط وتنفس عاد دق الباب ودخل بملامح جامدة والتقة مرافقاه حرك راسو للاعضاء لخرين وسلم على الوزاني اللي حنحن وشاف فيهم
الوزاني: ادن اسيادنا نبداو..سي تاج الدين هو المهندس الجديد كيف عرفتو..وإن شاء الله هو اللي غايتكلف بتصميم المشروع ديالنا
ناضت من الكرسي مصدومة: كيفاااش..هههه لا لا هادشي اللي بقا خاص
عمر: گلسي بلاصتك
هيام: نسييتي شنو گلتي ليا؟؟ التصميم اناا اللي غانديرو بوحدي واسمي غايكون عليه ..ياك هادشي اللي گلتي؟؟؟
عمر: وحتاا دابا كون قدرت كون عطيتو ليك غيير نتي
هيام: ودااك الشريك منيين خرج منيين ..ماللي ماعندك كلمة اسي عمر تكمش حسن ليك
شاف فيها بعصبية: الموضوع ماشي بيدي اهيام داك الحقير هو اللي خرمز هاد التخميزة وعطا ملف المشروع لواحد آخر..شنو باغاني ندير
دارت ايديها على عنقها كاتحكهم بعصبية فحين هو فالجيهة التانية على طبلة الاجتماع كايعاود الهضرة فمخو ويخمم..رجع دوا بهدوء: ولكن علاش ..انا قادر نتكلف بوحدي واخا ماعنديش مشكيل يتعاون معايا شي واحد لكن كنت متمني تيق فيا
الوزاني: عارف هاد الهضرة اسي العورابي..الموضوع هو اني كنت مرشح واحد تاني قبل منك فاش ماجاوبش قلبت على البديل ولقيتك نتا..ودابا رجع ومستاعد يخدم على التصميم داكشي باش مالقيتش حسن من هاد القرار
تاج الدين: "تنهد" واخا ماشي مشكيل..وشكون هو هاد الشخص؟
....
هيام: ودابا علاش معيط ليا اصلاا ماللي مابقا فيدك والو بلا مانتعدب ونجي حتال هنا
عمر: كيفاش بلا ماتجي؟؟؟ التصميم ديالكم بجوج وبجووج عندكم الحق فيه
........
تحط الملف قدامو حلو كايقراه وزادو تحلو عينيه موسعهم فالاسم اللي الفوق "هيام العلالي"..تزعزع بؤبؤ عيونو ونزل دغيا للصورة متمعنها ويالا الصدفة ويالا القدر ..دغيا خنزر مركز على حروفها حرف بحرف كايشوف ودماغو كايدرس الفرق والتغيير شنو تزاد شنو نقص واخا راه الانسان الى غير غبر علينا عام كانگولو ليه تبدلتي، غلاضيتي، رقاقيتي زيانيتي ودائما فعيوننا كايجينا واحد اخر ..ماعساك يكونو سنين وسنين دازو ..سنين زينوها وزادو فيها انوتة صارخة..سنين غيرو كلشي من غير بعض الملامح وشوفت الكبرياء والجاديةاللي فيهم.. كايتمعن ويدقق والتخنزيرة على وجهو ساهي والصدمة طاالعة معاه حتا رجع غير كايشوف مخلي الاعضاء اللي حايطين بيه و الوزاني مستغربين..
.....
هيام: ماباغا نتشارك مع حتا واحد ولا نخدم عند شي حد فهمتي..خليتو ليكم هااد المشرووع
عمر: تؤ تؤ تؤ خدمي شوية عقلك "ناض عندها" وعرفي كيفاش تنحيه من الطريق ..خلي اللعبة دور لصالحك نتي اهيام عرفي غير كيفاش تتحركي ..وبعدا اش هاد الحوايج لابسة كاينة شي وحدة كاتجي لإجتماع مهم بحال هادا بدجين وجاكيط
طلعات فيه وهبطات بلا ماتتكلم و ضارت غادة لغرفة الاجتماعات كاتقاد شعرها وتخمم فهاد الزهر العوج الي عندها.. من ديما وهي كاضرب الف حساب لفرصة بحال هادي وعلى قبلها سهرات شحال من ليلة.. المرة اللولة تحطمات فاش كلشي ضاع من يدها وواخا گاع الجهد اللي بدلاتو ماستفادت والو .. ولكن دابا الحياة رجعات عطاتها فرصة خرا وفرصة ما بعدها فرصة قادرة بيها توصل للحاجة الوحيدة اللي بقات متمنياها فهاد الدنيا.. ولكن باش هي تخليها لواحد تاني؟ أكيد لا ..
دقات قبل مادهل بابتسامة كاتشوف فيهم واحد واحد وهو عاطيها بضهرو ماضارش بتاتا ..حتا تسمع صوتها فودنيه وهي مادة ايدها لوزاني حداه
هيام: هيام العلالي.. سمحو ليا على التأخير كنت مع الاستاد عمر وهو اللي گال ليا باللي عندي شريك فالمشروع..ياك؟؟
بابتسامة شار ليها جيهة تاج: تاج الدين العورابي..سي العورابي هادي هيام..الشريكة الجديدة
سد الملف وناض مد ليها يدو بابتسامة: متشرفين
تمحات منها الابتسامة من هاد الموقف..هزات يدها تقيلة كاتحاول تتبسم وتخرج الكلمات: م متشرفين
تاج الدين: صدفة زوينة نتلاقاو مرة خرا "غمزها" ياك
الوزاني: كاتعرفة بعضياتكم؟
بسرعة جاوباتو: ء تلاقينا هاد الصباح فالباب ديال الشركة.. احم .. ولكن ماتعارفناش مزيان ..فرصة سعيدة اسي العورابي
بسم وضار حرك الملف لجيهة الوزاني: نتمنى تطالع عليه اسي رضوان.. فيه بعض الافكار
بغيت نخدمو بيهم وغدا إن شاء الله ندرسو داكشي اللي باقي
تاج الدين: الله يبارك فيك "شاف فيها" ومتشرفين مرة خرا
بابتسامة: الشرف ليا
حرك راسو ومشا خرج ..سد الباب ووقف مدة قدامو ساد عينيه كايتنهد ..وهي لداخل عينيها على فين داز ساهية بدورها وقبل ماتبدا تتعمق فالتفكير قلبات وجهها واستأدنات منهم عاد مشات حلات لباب.. لقاتو فوجهها واقف حنحنات وسداتو مطلعة عينيها فيه
هيام: ماتاحت ليا الفرصة باس نعاود نشكرك على الشي اللي درتي على قبلي "مدات ليه يدها"..شكرا بزاف
طلع حاجبو وشاف فيدها وفعينيها مطول داير ايديه فجيابو و على وجهو ضهرات ضحكة استهزاء قبل مايدوز فيها ويمشي مخليها مصدومة وايدها فالهوا ممدودة مارضااتش و وجها رجع حمر ..
الكاتبة: تفضل اسيدي هادا هو المكتب ديالك
تاج الدين: كانشكرك
سد الباب كايوزع عينيه على المكتب وبسمة رضى على شفايفو.. كبيير ومبهج وديكوراتو عصريين البييرو كلو خشب اسود عريض بزاف محطوط عليه بيسي موضيل نيو وورا الكرسي الجلدي مباشرة حيط زجاجي كلو كايطل على منظر الشارع من برا..زيد عليها فوطوي كبير ديال الجلد الاسود قدام البيرو وطبيلة ديالهم محطوط فوق منها شامبانيا ومكسرات...ضحك وتلاح فوق الفوطوي كايتنهد بالتقااالة حتى عاود تحل الباب وتم حسام داخل كايضور عينييه
تلاح حداه مسرح ايديه حتا هو وغير حال فمو كايضحك: شنو درتو عجبهم التصميم يااك ههه
مد يدو خدا من المكسرات كايلوح لفمو: گالك ولات عندي شريكة جديدة غاتخدم معايا..مابقيتش بوحدي اللي مكلف
تصدم و محا الضحكة قرب عندو وجهو بتساؤل: كيفاش زعما؟؟..واش بصح ؟؟
تاج الدين: وي.. كانت قبل مني فاش عيطو ليا وقررو يجمونا بجوج هادشي اللي فهمت.. المهم بغانا بجوج فداك التصميم ولكن على ماشفت الخلاص ماغايتقسمش بالنص كلا واحد ونصيبو..كانفكر مورا مانسالي هادشي وبالفلوس اللي غانربح نزيد عليهم شي قرض ونمول داك المنتجع اللي وريتك ..اش بان ليك
رد عليه حسام دايخ كايضور راسو: وبلاتي اصاحبي بلاتي واش بصح غادي تخدم مع واحد آخر ..هادشي مخلوض اساط وباينة فيه غير المشاكيل نتا مهندس منفارد فشغلك وكلا واحد والطابع ديالو كيغاديرو تخدمو بجوج مايمكنش
شاف فيه بحدة: حسام..بدل عليا هاد السيجي الله يرحم الوالدين وخلينا هانين هاد الساعة..الخدمة خدمة واخا.. نتوافقو.. حنا ماشي غانتزوجو مابغاتش تتوافق ضبر راسها سوقها هادلك انا خدمتي غانديرها
تاج راسي الجزء الرابع
محتوى القصة
يتبع...
التنقل بين الأجزاء