تاج راسي الجزء الخامس

من تأليف Soukaina Ahnani
2020

محتوى القصة

رواية تاج راسي

نزل الليل اخيرا لابس سلهامو الكحل مغطي بيه السما..
فنهايتو كانت "هي" على طبلة الميكاب گالسة ..ببيجامة وردية قصيرة كاتمشط شعرها قدام المرايا، ساهية فإنعكاسها وكاتفكر فماجرا

هاد النهار من الحبس اللي باتت فيه للشريك الجديد اللي لسق فيها بزز من خاطر سيادتها.. هاهي مشاكل خرا تزادت على حياتها المعقدة وهاهي تاني خاصها تبدا تزيگزاكي وتخدم المخيخ ضروري..على الله تتفك خلاص وتوصل لداكشي اللي بغات ..

تنهدات كاتجمع شعرها هضرة تديها وهضرة تجيبها حتا طاحت فبالها عبارة اميمة قبل ماتخرج عندها.. خلات عقلها مشوش ساارح مافيقها غير صوت الطيلي ،طلات وفاش شافت سميت Adiil تفكرات العشا اللي كانت دايرة معاه زفرات وهزاتو مجاوبة بتعب

هيام: وي عادل

عادل: حبيبة فينك..انا حدا واحد الكافي فالسونط.. غاتجي ياك ؟

هيام: نو عيانة اليوم..وغدا خاصني نفيق للخدمة بكري

عادل: ممم ..صافي صيبا گغاف 

هيام: تصبح على خير

قطعات وهزات قطن وديماكور كاتمسح وجهها..فحين هو شاف قدامو مخنزر كايزفر و ضار للوطو ديالو يركب ..
فالبيسري اللي مقابلة مع طوموبيلتو خارجة نجاة بعدما قفلات الباب ..ضاربة دجين بيض فوقو تيشورت حمر وطالون مقمقم وردي خاشية وجهها فالساك كاتقلب على الكونطاكط ديال سيارتها الصغيرة وتمتم: تء فين هو هااد الزمر..يخ باقي حتا مافرحنا بيها هاهو الساروت طار ايوا ز .. (دازو من حداها جوج راكبين فموطور وفرمشة دااو معاهم ساكه وخلاوها مصدومة كاتغوت وجارية وراهم واخا طاايرين فالطريق

نجاة: شفااار شفااار واشفااار..عااونوني

حيدات الطالون بالفقصة شيرات عليهم بيه وبقات كاتلهت شاداها البكية وتاالفة.. حتا تمدات ليها قرعة الما ضارت دغيا عندو هو اللي واقف مبسم

عادل: صافا

حركات راسها كاطلع فيه وتهبط ..شافت فالقرعة وخداتها شربات النص كاضور عينيها بقلق

عادل: واش كانتي حاطة فيه شي مبلغ كبير 

نفخات كاضور راسها: ااودي ..مافيه حتا ريال وحتا لاكارط ماحاطاهاش فيه..اللي بقا فيا هو الطونطاكط ديال الطوموبيل عاد خديتها اليوم تفوو على نحس

عادل: الى بغيتي نوصلك

شافت فيه مغوبشة ولاحت ليه القرعة تا شدها: لا شكرا اخويا 

..ضارت غادة لجيهة فردة الطالون كيف لبساتها لقاتو تاني قدامها

عادل: شوفي انا بغيت غير نساعدك ماتفهمينيش غلط..نتي هنا غير بوحدك وفهاد الليل.. خطر عليك..وحتا باش تاخدي طاكسي صعيب تلقاي شي وحدة فهاد الوقت ابار فلوسها اللي معندكش 

بقات كادور عينيها وتفكر وهو بإصرار كايشوف فيها ..حتا جاوباتو بتحريكة راسها مترددة: صافي واخا.. شكرا

ابتاسم سابقها للوطو حل ليها الباب وقبل ماطلع ضارت عندو مخنزرة هازة صبعها: الى كان عقلك فيه شي عجينة ناوي تخبزها ولا معرت شنو.. نحب نبشرك انا راه بنت درب سلطان ندوز علك من الودن للودن الى غييير نويتي معايا التعواج ماعاساك ولاد دربي ..غايگرصوك إربا اربا

عادل: واخة ماعرفتش هاد الحي ولكن ماعندك مناش تخافي

نجاة: سول عليه تعرف خبارو

طلعات وهو سد الباب كايضحك عاد ضار ركب بلاصتو

**********

جمعات شعرها وناضت للسرير كادوز صباعها على رقبتها بعياء..حطات راسها على المخدة ناعسة على ضهرها وساهية فالترية الفووق..الوجه بريء فاتن والجسد جداب اخاد، ولكن الى عمقتي الشوفة فعينها كاتلقها ضيقة وخنقة ..كاتلقا فراغ وعتمة لا نور شاعل ولو مجرد فتيلة، غير الضلام الداسم



حطات راسها على المخدة ناعسة على ضهرها وساهية فالترية الفووق..الوجه بريء فاتن والجسد جداب اخاد، ولكن الى عمقتي الشوفة فعينها كاتلقها ضيقة وخنقة ..كاتلقا فراغ وعتمة لا نور شاعل ولو مجرد فتيلة، غير الضلام الداسم
..
بداو عينيها كايتلاسقو شوية بالشوية حتا تسدو فخطرة ومشاات فسبات نااعسة براحتها ..ضارت على جنبها كاتحرك فمها متمتمة ومن بين شفايفها خرجو حروف اسمو لاإراديا ( تاج ) .. طارت خامية البالكو فبيتو من النسمات الباردين اللي دخلو.. ضور وجهو ليها حاط الطيلي فودنو وگال بالزربة: يالله اخالي تهلا

الباشير: واش ماغادوزش گاع.. البارح درت معاك فالقهوة ديال الشيشة ماجيتيش واليوم تاني ؟؟

تاج الدين: عندي خدمة غدا اصاحبي.. مرة خرا

تنهد وجاوبو: واخا اسيدي..دابا تخلص الخطية غا عقل

تاج الدين: ههه تصبح على خير

قطع معاه مبدل الضحكة بالجموود ومشا سد البالكو ..ضار لفراشو تكا مغطي نصو التحتاني وهز رواية فرنسية فيدو حلها لفين وصل كايقرا بين السطور ويتنهد كلا مرة محاول انو يتبت معاها ..لكن التركيز هارب عليه واخا عيا مايحاول الدماغ وتگول واش حاضر..
زفر وسد الكتاب كايشووف انعكاسو فمراية مستطيلة مقابلة معاه شادة من الفوق للتحت ..بقا غير ساهي كايخمم فشنو سرا اليوم وشنو غايوقع من بعد.. حتا طاحت بين عينيه مشهد خلاه يكشر حجبانو.. اللقطة فاش خرجو من المحكمة ومد ليها ايدو

(تاج الدين: انا تاج.. تاج الدين ونتي

دغيا رمشات وجمعات انفاسها مادة ايدها ليه

هيام: متشرفين 

"حيداتها بسرعة ومشات خلاتو واقف و متبعها بعينيه.. غادا خارجة حتا تلقا ليها شاب وسيم فنفس سنو حل ايديه وعنقها بحرارة كايسول فيها وهي غير كاتحرك راسها..)

تسرح ففراشو ساهي الفوق وكلو تساؤل واش بصح نسات؟ باينة نساتو ونسات كلشي متعلق بيه..وعلاش غاتتفكرو وشنو كان جامعهم أصلا..حرك راسو كايضحك ومد ايدو للمجر حداه حلو وجبد منو البوصلة كايشوف فيها متمعن وكايقرا حروف سميتها المنقوشين على ضهرها..حتا ضروه عينيه وتنهد رادها بلاصتها باش ينعس

★★★★★

صبح الحال وصبح هو سايگ طوموبيلتو والوجهة شركة الوزاني للإعمار والبناء.. صونا ليه الطيلي فالطريق دار الكيت وجاوب بهدوء

تاج الدين: عويشتي صباح الخير

عيشة: مممم..كي داير بيخير

جاتو الضحكة حبسها عاد رد عليها: الحمدلله ونتي

تنهداات مطلعة عينيها: ايوا هاحنا ..رجل هنا ورجل فلاخرة اوليدي

تاج الدين: ماتعرفي شكون السابق اميمتي

عيشة: ممم..ولكن الواحد كيحس فاش ماكايبقا ليه واالو فالدنيا ..والاحسااس مااكايغلطش

تاج الدين: اييوا كلنا ليها الدنيا هي هادي 

نفخات كاتغدد : دابا مانااويش تجي تشوف ميمتك

تاج الدين: دابا واش تسحابيني نااعس شاد تيليكومنض وحال عينيا ماعندي مايدار..راه خدام امي خداام

عيشة: ايواا خلااص هاد الخدمة اللي ماتخليك لا تجي تشوفنا والا حتا تسول بالنااقص منها..وعلم الله بعداا واش اللي شاادك بصح الخدمة ولا شي حااجة خرا

تاج الدين: ههههه يهديك الله اعويشتي راه غير اللي كاينة هاد الساعة

عيسة: دابا بلا كترة الهضرة.. غاتجي اليوم تشرب معايا شي كويس ديال اتاي بيما وجدت الغدا وناكلو مجموعين صاافي

تاج الدين: ديري نتي واحد القضية.سيري للدار عندي راه باقي عندك الضوبل ديال السوارت..التلاجة راها عامرة طيبي اللي بغيتي وفاش نجي نتغداو الراس فالراس الالة وباتي معايا گاع

عيشة: ااالا ..غاتجي هي غاتجي ..

قطعات خلاتو غير كايشووف..
بلاصا طوموبيلتو ونزل متوجه للاسنسور طلع للمكتب ديالو كايصوني على حسام عارفو بااقي مافاق..
حل الباب ببطء وهز عينو صدفة مجبدهم فاش لقاها گالسة فالكرسي ديالو كاضرب بالستيلو على المكتب مخنزرة والعصبية باينة فوجهها وفنبرة صوتها: على السلامة اسي العورابي.. كنتي تتعطل مازال واحد الساعتاين خرا


زجاة: هاادشي اللي كاديري راه ممسلكش اعييشة عقلي فين گلتها ليك

عناصت للكوزينة ممسوقاش ليها ونجاة تبعاتها من اللول باغا تموت بالفقصة: وااش اعبااد الله كاندوي ظع الحييط..كون دويت معاه كورااه فهم حسن من رااسك نتي اختي باااز 

ضارت ليها: الاااالة بععدي مني.. ويلي سيري لخدمتك فرقيني عليك

نجاة: ماغادة فيين قبل ماتحيدي هاد التخرميز اللي ولا فيك وييلي حشوومة حشوومة زاايداها بالكدووب من الفووق

عيشة: وولدي هاداك والى مافكرت فمصلاحتو انا ماكاين اللي يفكر فيها.. شنو فيها الى تزوج ودار دارو ووليداتو شنو ؟؟ التلاتين هاهي كاطل عليه شوية غانوليو فالربيع من بعد الخمسين ضبتات ايديها ببعضياتعم" وهاا الدري ضااع

زجاة: وامااشي سووقك وااش شكاا علييك خلليه هو يختاار 

عيشة: الاا عوولت علييه بقييت هنا هاادشي الى ماجابش ليا شي نفييخة بحاال هاديك اللي كان يضل يهترس بيها فالسبيطاار
..دعييتها لله يااخد فيها الحق فيينما كاانت الله يااخد فيها الحق

ميقاات فيها: مممم يخيتي يخيتي..اووودي الله يجييبك على خير ماعارفة واالو وكاتخيطي غابووحدك

عبشة: يااك شتي خووك.. انااا اللي غانرصو كي كان وداابا تشوووفي

نجاة: هاهااااي ضحكتيمي يامسكيبنة معوولة على دييك الشاطة ماطة هي اللي تردو لييك زعما

عيشة: وماالهة ياختي كيجاتك.. بنت الحومة كابرة على يديا زيين والتبااتة زعارفاها مزيان اش كاتسوا بخدمتها ودارها وكلشي فيها زوين ماالها ماافيها مايتعااب؟

نجاة: يمييلوو ليهااا ان شاء الله..شتي غيير ديك هدى.. اولله لاداات خويا ووالله لادخلات لهاد الدار

حطات ايديها على خصرها مخرجة عينيها ونجاة بحالها: يااك شتي غيير ولدي.. اناا اللي غانزوجو وبهدى مازاال

نجاة: اوللله لاكاانت ليه

عيشة: اولله حتا تكوون لبه

نجاة: واداابا نشووفو

عيشة: داابا نشووفو

نجاة: داااابة نشووفو 
..هزات ساكها بالنتير هابطة مع الدروج تلاقات حسام عاد داخل 

حسام: صباح الخير

نجاة: حيد عليا حتا نتا
خرجات مخنزرة جبدات النسخة ديال الكونطاكط اللي بقا عندها حلات بيه طوموبيلتها وديمارات تحت انضارو مستغرب ..طلع الفوق لقا عيشة حتا هي دور من هنا وهنا ودعي ..ليها بالداات طالعة نجاة..
حنحن عاد رضات ليه البال وهو باس راسها كايضحك: اش كاين تاانتي


عيشة: گلس گلس الساعة لله 

حسام: ومال ديك المسعورة خارجة مخنزرة

عبشة: هاديك غير بلاتي عليها باغا دير فيا السكر ولكن غابيا ولا بيها..سير اولدي گلس جابك الله تفطر معايا

حسام: ههه يا بسم الله

********ة******

شاف برا ورجع شاف فيها مخنزر خبط الباب وتم غادي ليها كايحرك صبعو: نوضي نتي من تما

بالتخنزيرة ناضت من الكرسي عندو مطلعة رااسها: هاادي ساعتاين وانا كانتسنا حضرتكم تجيو باش نبداو المشروع ونتا مت..

قاطعها خابط ايدو مع المكتب حتا قفزها:.. االلولة ..تعاودي دخلي للمكتب ديالي بلا إدن غانتفاهم معاك بواحد الطريقة مقووودة "وسعات عينيها فيه" التاانية ..غاتعاودي تتهزي وتحطي عليا بحال الى راني خدام عند سيادتكم ماغاتحسي براسك حتا نفزعك من داك الشرجم رااه شفتيه ..والتالتة.. درردبي يالله

حلات فمها بصدمة وبزز باش نطقات: ن نتا كيفاش تهضر معايا ب..

قاطعها مغوت: برااا

عقداات حجبانها حتا عقدااتم رجعات كلها كاتغلي بالاعصااب وهو منزلش منها عينيه

هيام: غانندمك مزيان غير بلاتي

دازت فيه حلات الباب وخرجات خابطاه بالجهد كاتسمع صوتو من لداخل كايغوت: ديييه معاااك لا لا غيير ديه معااك

ضحكات مغددة على معامن طااحت ومشات كاتخبط رجليها للبيرو ديالها مزيرة على يدها بالغداايد
..فحين هو نفض كرسيه عاد گلس مخنزر وهز تيليفونو مدوز ابيل لحسام

حسام: نعام العشير

تاج الدين: والله ينعلك الكيدار.. فيينك؟؟؟

حسام: وااغابشوية ماالك كاتغوت..راه كانفطر 

تاج الدين: يااك المرضي بالصحة بالصحة

حسام: الله يعطيك الصحة احبيبي

تاج الدين: شوف حسام..عندك عشرة الدقايق ..الى ماكنتيش هنا قدامي وفيديك الحسابات اللي طلبت منك البارح غير بلا ماتجي..وكانقصد ببلا ماتجي يعني غير اعتابر راسك شومور ..احبيبي

حسام: ههه لا لا ماديرهاش

طلق ليه ضحكة ركبات بيه الرعب: ههه واخا ... قطع فوجهو خلاه مشرع عينيه وعيشة حاضياه

عيشة:ياك گلت ليك گوليه يجي 

طلع فيها عينيه: نااري امي عيشة واقلة قودتها ...جمع الوقفة كايهز الوراق للملف وهي كاتشوف فيه مافاهمة حتا طار من قدامها خارج: والو اويلي تا مالك قفرتيها عند من

حسام: ولدك امي عيشة ولللدك

عيشة: وااغااا زييد فطر

حسام: تسدات الشهية



بيسري نجاة ... كان عادل بتيشورت بيض ودجين زرق مع كونفيرس كحلة گالس فوحدة من الطبالي كايفطر وهاز الطيلي كايرسل اوديو

"بب ..شوية وندوز عليك للشركة نتغداو بجوج..ومنها تعوضي ليا البارح ..اوك؟"

سيفطو وهز الكافي تاعو كايشرب وعينيه على السرجم ..حط الكاس وناض هز صبعو للسرباي جا عندو باش يخلص لكن حبسو مبتاسم

السرباي: هادشي مخلص امسيو

عادل: كيفاش؟.. ولكن انا ماخلصت والو

السرباي: المادام هي اللي طلبات منا مانتخلصوس من عندك

عادل: المدام؟؟ وشكون هادي

السرباي: مولات البيسري امسيو مدام نجاة..دابا صافي الفطور راه مخلص

حك جبهتو فاش تفكر: ااه ههه صافي فهمت.. بغيت نشكرها الى كان ممكن فين هي

السرباي: فالمكتب ديالها..ولكن ممنوع للكليان يطلعو الفوق

عادل: انا صديق ديالها غير تهنا 

..ضرب ليه فكتفو وطلع مع الدروج للمكتب الوحيد اللي كاين تما.. دق وفاش سمع الادن دخل هي هزات عينيها موسعاهم بتفاجئ

عادل: صباح الخير ههه

نجاة: ا مم ..صباح النور.. احم
ناضت مدات ايدها وسلمات عليه 

نجاة: ياك لاباس واقعة شي حاجة

رد عليها مبتاسم بهدوء: لا ماواقع والو..جيت غير نشوفك كي بقيتي من البارح.. ديكلاريتي بعدا

تنهدات: لا ماديكلاريت ماوالو عگزت نمشي..و اصلا ماتشفراتش شي حاااجة يعني ماعندهم مايصورو

عادل: دازت بعدا على خير ههه ولكن ماشي بخلاص الفطور غادي تعوضي 

رمشات مطلعة حاجب: نعوض؟؟

عادل: وي ..الى بغيتي تشكريني ممكن تعرضي عليا لشي عشا متلا ولا شي حاجة بحال هاكا 

نجاة: اهاا.. وعلاش غانشكرك بالسلامة

عادل: على داكشي ديال البارح

ضحكات بعصبية كاتقرب ليه وهو راجع اللور : انا البارح امسيو واش شكيت عليك..ياك نتا اللي جاي كاطلبني نطلع معاك انا ماحاديتك ماقربت ليك ياك..بووحدك ومن راسك بغيتي تعاوني يااك..مادام هاكا ماعندي علااش نشكرك ولا نعوضك..و دابا الباب

-سداتو على وجهو ورجعات لخدمتها عادي ..وهو فالجيهة المعاكسة حال عينيه و
مافاهم والو..فالاخير ضحك بسداجة وضار نازل مع الدروج غادي للسيارتو قبل مايطلع ضرب طليبة للسرجم ديال مكتبها وتكلم: 
(نوعي المفضل) My favorite type ههه 

"طلع وديمارا للشركة ..

******ة*****

حسام: جبت ليك جوج نمادج منسوخين ليكم بجوج ..شوف شنو خاصكم مازال وانا غانقادو

-هز تاج الفيكس اللي فوق المكتب معيط للكاتبة ديالو: كلمي ليا الآنسة علالي

الكاتبة: واخا امسيو

-قطع ومشا للطاولة الطويلة وسط المكتب فين جالس حسام كايشوف فشي وراق

تاج الدين: عاودتي راجعتيهم

حسام: كتر من مرة ..مبلغ التمويل هو هو كون هاني "شاف فيه بنص عين" نقص شوية ديك العصبية نقص

گلس حداه: ماكاينش اللي كايعصب قد بنادم 

حسام: ممم

-سكت تاج كايشوف قدامو وصبعو كايضرب فوق البيرو ،حسام ضرب عليه طليلة وتكلم بلا مايشوف فيه

حسام: راكم غاتخدمو بجوج اصاحبي ..غاتجي ناقصة الى بقات هازة من جيهتك

تاج الدين: تهز ولا تحط انا مالي

حسام: ولكن اصاحبي حشومة عاود.. هي دخلات باش تخدمو ماشي باش تتفلاو ونتا جريتي عليها بديك الطريقة حشومة

رد بعفوية كايشوف قدامو: هاديك انا اللي كانعرفها شنو كاتسوا وعاارف دماغها مزياان مناش مصايب

حسام: عاد شفتيها نص ساعة وبديتي تعرفها شنو كاتسواا؟؟

تاج الدين: نسا عليا هاد الموضوع الله يرحم باك ..بنادم كانتعاملو معاه على حساب شنو كايستاحق .. شوف دابا هاهي غاتتعطل بلعاني باش زعما ترد ليا الصرف ...تحل الباب ودخلات مبتاسمة هازة ملفها فيدها وصوت الطالون مقرقب الاجواء

هيام: السلام ..سمحو ليا تأخرت كنت كانجمع ليكم بعض من تصاميمي القدام

جاوبها حسام وعينيه على تاج: لا ماكاين حتا مشكيل عاد گلسنا نيت.. تفضلي

هيام: ميغسي 

..گلسات بأدب كاتحنحن عينيها على تاج اللي مركز بحدة فالملفات.. قبل مايبدا يهضر قاطعاتو بهدوء ولباقة: فالحقيقة وقبل مانبداو.. بغيت نگولك شي حاجة اسي العورابي


تاج طلع حاجبو وهي كملات بأسف كاتسبل عينيها: كانعتادر منك.. سمح ليا عافاك على الصباح انا ماكنتش عارفة الموضوع غايزعجك لديك الدرجة اما ماكنتش غانفكر ندخل بتاتا..وحتا الطريقة باش هضرت ورفعت صوتي عليك كانعتادر عليها بزاف..

بقا ساكت كايشوف فيها وهي بابتسامة ضافت: كانعتادر منك..نتمنى ماتكونش هاز فخاطرك من جيهتي

على هاد الجملة تسمرو عينيه الهايمين على عينيها المبتاسمين وزير على ايدو.. فحين حسام شاد الضحكة بقبضة يدو 

هيام: سي العورابي..ماغاتگول والو..انا اعتادرت منك زع..

قاطها بحدة؛ اعتدارك مرفوض 

بجوج بيهم هي و حسام كانت نظراتهم مصدومة على ماخرج من فمو

وسعات عينيها فيه كاترمش بعدم تصديق: ك كيفاش!!!!

بنفس نبرة الحدة: ماشي اي حاجة نقدرو نعتادرو عليها اانسة هيام كاتتسامح ..وماشي اي جرح باعتدار كايتمسح

بعدم فهم : مسيو انا .. م مافهمتش علاش مكبر الموضوع لهاد الدرجة.. انا ماقللتش عليك الاحترام ولا شي حاجة يعني الموضوع مايستاهلش هادشي كامل

طول فيها الشوفة كتر من القياس كايحلل هضرتها حتا زرع فداتها القليل من التوتر .. رمش مضور راسو اللي تاالف غير كايزفر ويجر لحداه الوراق كايتلف راسو

تاج الدين: هادو مجموعة من الحسابات على المبلغ اللي غايتمول بيه المشروع ..إلى عندك ماتزيدي زيديه ..نخليكم دابا

هز تيليفونو وناض خارج تحت نظراتها اللي رجعو مخنزرين ..

حسام شاف فيها مرتابك مافاهم تاوزة هو كدلك: راه غير ماصابحش على المود ديالو هاد النهار ههه..هو بصراحة ماشي هاكة ولكن ماعرفت مالو.. يمكن المشروع اللي وترو؟!

حركات راسها زاامة شفايفها: ماشي مشكيل..انا متفهمة الوضع، عادي

حسام: ك
بصراحة كانعتادر ليك بلاصتو ..بلا ماتقلقي منو 

هيام: ماكاين باس..مرة خرا ونكملو 

ناض مبتاسم وخرج حتا هو كايزرب فالكولوار لقاه غادي باتجاه المصعد بخطوات سرااع 

حسام: تااج الدين ..تاااج الدين

ماضارش عندو ولا رد عليه.. طلع للاسنسور مخنززر ورك على طابق الاسفل زدار ايدو على عنقو تعباان كايزفر غير بوحدو وينفخ.. تحل الباب وغادر لسيارتو طلع وديمارا طاير فالطريق ومن حسام تابعو حتا هوا

.......

من وراهم مباشرة وقفات سيارة عادل..
نزل غادي يدخل هو يلمحها جاية عندو هازة ساكها ونضاضر كحلين على عينيها
..قربات سلمات عليه حل ليها الباب طلعات
وهو حداها مبتاسم هز ايدها باسها عاد ديمارا 

عادل: فين تبغي نتغداو؟

وعينيها على الطيلي: ماما عارضة علينا بجوج

عادل: مي بغيت نتغداو غير بجوج احبيبتي ..شحال هادي ماخرجنا غير انا وياك
طيط اطيط

شافت فيه بشبه ابتسامة: ماما وجدات كلشي وحشومة نگوليها لا..ياك؟

زفر بضيق واخا ممبينش وحرك راسو: اوك اللي بغيتي

هيام: ممم 
حيدات ايدها من عندو كاتخربق فتيليفونها والتخنزيرة على حجبانها مرسومة..هزات راسها بحدة ساهية ..سنانها كايتغزو ودماغها كايدور ويعاود


عيشة: هانتي سگيه نتي وعرفي كيفاش تزوقيه مزيان.. انا غانمشي نحط اللبن

جاوباتها البنت بابتسامة: واخا اخالتي

عيشة: يرضي عليك

ضارت عيشة للتلاجة تجبد اللبن وخلاتها كاتقاد الگصعة.. بنت متوسطة الطول جسد ممشوق ناضج ملامحها جميلة جاو معاها وشعرها طويل شاداه بمقبط وبعض الخصلات على وجهها لابسة دجين وتريكو اصفر خفيف ناازل ..

...خرجات عيشة هازة صينية فيها الكيسان وقرعة الزاج ديال اللبن، للطبلة فين كان گالس تاج الدين ساهي قدامو وحسام مقابل معاه ..حطاتها مبسمة غير كاضحك

عيشة: هانتوونا هاهو اللبن طرري ياوليداتي وراه وصيت عليه من البگرة لعندي

حسام: هههه الله يحفظك امي عيشة

عيشة: انا غانمشي نجيب 
المعالق بينما بنتي هدى جابت داكشي لاخر ههه

..مشات راجعة للكوزينة خلات حسام محا الضحكة وشاف فيه بجدية: تاج.. واش واقعة لك شي حاجة؟ مالك اصاحبي هاد النهار

نفخ ورد عليه: ساعة لله

حسام: لا لا حالك اليوم ماعاجبنيش.. شنو كاين

بسم بجنب فمو: ماكاين والو احسام غير عيان شوية..بلا ماتتشووش انا بيخير 

حسام: واهوكاك ونتا مكمشهم بحالا ماعرت شنو كاين

.....

عيشة: الله يرضي عليك ابنتي سگيتيه؟؟

هدى: ااه اخالتي كيف جاك؟

عيشة: زيين عالله غير المدااق يكون بحال وجهو.. راه ولدي تاج الدين كايحمااق على كسكسو

ضحكات حشنانة: ايوا على الله يعجبو طيابي

عيشة: عالله يعجبو كسكسو ومولات كسكسو هههه ...زيدي يالله هزي ديك الگصعة 
وتبعيني

تبسمات هازاها: واخا ..

.....

تحل باب الدار من طرف نجاة اللي دخلات ليها ريحة الطياب مع نيفها استنسقاتها مزيان سادة عينيها

نجاة: اححح الله على رييحة

حسام: ها السلوگي جااا ههههه

بغات تجاوبو هي تركن فاش شافت مها خارجة من الكوزينة.. دازت من حداها هازة خنافرها لحدا حسام تگلس هي تبلوكا فاش بانت ليها هدى خارجة جاية وگصعة كسكسو فيدها حطاتها على الطبلة

هدى؛ هالغدا وجد.. قبلو عليا هههه

عيشة: الله يرضي عليك

هدى: امين اخالتي ...مشات تگلس فالكرسي اللي حدا تاج هي تسبقها نجاة خاطفاه ليها مغددة : بلاااصتي احبي

جاوباتها عيشة تحت سنانها: گلسي حدا حسام فين مولفة

نجاة: داارنا هادي ونگلس فينما بغيت "طلعات فهدى وهبطات" شي مشكيل؟؟

هدى: لا.. خودي راحتك

نجاة: مممم ..
گلسات كاتخنزر فعيشة اللي بدورها كاتحلف عليها وهدى قبالتها مبتاسمة برقة وعينيها مرة مرة كايطلعو لتاج الدين..حتا دوات بصوت هادئ: تاج.. شنو خبارك شحال هادي ماشفناك فالدرب

سبقاتو نجاة قبل مايبجاوب: مشغوول السيد مشغوول

هدى: ااه الله يعاونو ههه بعدا كي غادي مع الخدمة بيخير

نجاة: الحمد لله يسول فيك الخير

تاج الدين: "شاف فنجاة" مالنا نتي

نجاة: مالك

تاج الدين: گالو ليك فمي عليه اللجام ولا شنو

حبسات هدى الضحكة وعيشة مبسمة بغااتها فيها 

نجاة: ايواا نفس الهضرة اللي غاتگول گلتها انا عاادي

حسام: بسم الله بسم الله رالماكلة غاتبرد


تهزات الگصعة وتمسحات الطبلة والعشية دخلات.. 
حسام مشا للصالون كايتفرج ممسوقش ليهم هوما اللي حدا الباب واقفين هدى وعيشة ونجاة كايتسناو تاج ..شي مخنزر فشي وهدى مبسمة بخفة ممدياهاش فيهم ولا فعينيهيم اللي كايطلق القرطاس..

نجاة: دابا شنوو فيها الى اناا وصلتها طوموبيلتي ماالها 

عيشة: االليل هتدااا شدي لااارض

نجاة: ماللي الليل كاانت تمشي لدارهم كبيييلة لاش باركة حتال ها. الوقت

هدى سكتات ماجاوباتهاش فحين عيشة خرجاات عينيها: سووقك جاايا عندك بالسلااامة داارك هادي وانا مافخبااريش

نجاة: ايول جرري عليا اعيشة وجيبيهااا هي تنفعك راه هي اللي بنتك

....خرج من بيتو لابس تيشورت كحلة دجين كحل ومونطو تقيل فالباج على حساب البرد ..بينو قتاال نييت زاد علق عينين هدى فيه وتخنزيرة نجاة وابتسامة عيشة توسعات

هدى: بصراحة بلا مانعدبك اتاج الى ماكنتيش خارج بلاش نمشي بوحدي

عيشة: لا لا اويلي ابنتي والليل هادا ..الله يرضي عليك اولدي راه الطريق صعيب عليها حسن نتا توصلها

رد عليها تاج هاز الكونطاكل: ماشي مشكيل 
غادي ندوز نيت عند الباشير ..وراه يمكن نبات معاه

عيشة: ايااه راه عاد كيف سول فيك

نجاة: سير نتا عند الباشير وانا نوصل البنت ..ااصلا شحااال هادي مقرقبنا الناب انا وياها..ياك أهدى

هدى: ماباغاش نعدبكم بجوج ماعليش غانمشي بوحدي

عيشة: سير اولدي وصل البنت سييير ونتي دخلي خلاص ماعندك فين تخرجي هاد الوقت دااركم

حك راسو بعياء وتم خارج كايزفر: يالله اهدى 

عيشة: رد البال للطريق

خرجو وسدات الباب مبسمة عكس نجاة اللي مربعة ايديها كاتخنزر وضور راسها: تاعت الله وجهك هااداك ولا مسلفااه..ماامشيتي حتا دررتي دااكشي اللي فباالك تبارك الله عليك

شافت عيشة محنية تهز سنضالتها هي تهرب لبيتها ولكن نيشات عليها للطرمة نيشات مازگلاتهاس ووقفات دايرة يدها على خصرها كاتحللف: واتاااطيحي فيدي وتشووفي غابلااتي الى بقاات فيييك رانا ماشي عووويشة

نجاة: واتي واخا تسلخيني لاكاانت ليك لانتي لاديك الشيطاااانة

عيشة: واوقفي لمك وقفي هانا جااية ليك

هربات نجاة سدات باب بيتها كاتحك جنبها وتبرگم: بنت الحراام بقالك غير خويا الشاايطة ..ولكن والله لاكانت ليك دابا تشوفي

هزات تيليفونها وتكات على السرير كاتكونيكطا مع راسها متلفة الوقت باس ماتبقاش كاتفكر فوصوع هدى ومها لا تزيد تتعصب

*********

وصلها قدام العمارة فين سكنو جديد ووقف اللوطو..
حيدات السمطة وشافت فيه مبتاسمة: شكرا بزاف ..وسمحليا عدبتك

تاج الدين: ماتگوليش هاكا ..سلمي على مالين الدار

هدى: هههه مبلغ ..بغات تحل الباب تنزل هي تحبس ورجعات شافت فيه: تاج..بغيت نسولك؟

حرك راسو وكملات كاترمش بارتباك: فالليسي انا وياك كنا صحبة بزاف.. كنتي عزيز عليا وكلشي كانعاودو ليك راك عارف ماعنديش خويا وحتا بابا الله يرحمو..داكشي علاش قيمتك عندي كانت كبيرة بزااف ديك الوقت..وباقا لدابا

ابتاسم ليهها بامتنان:عارف.. وحتا نتي عزيزة على قلبي


هدى: شنو تبدل دابا ؟؟ تباعدنا حتا مابقيناش كانتشاوفو الا مرة فالشهر! وحتا اتصالاتنا تقطعو..توحشتك اتاج..مانكدبش عليك توحشت نخوي عليك قلبي وتعاود ليا حتا نتا اللي فقلبك ..حاولت نعوضك بشي صديقة ولا صديق ولكن حتا واحد مابحالك حتا واحد

تنهد كايحاول يلملم الهضرة اللي خاصو يگول امام كلامها الصادق: هدى سمعي..المشكل ماشي فيك ولا فالوقت..هو فيا انا..وبصح شحال من واحد گال باللي تبدلت ومابقيتش تاج ديال شحال هادي..انا براصي كانگولها وحتا بنادم مابقاش عندي معاه من غير حسام ، راك عارفة..

قاطعاتو ضاحكة فرمشة عين مشات التقليقة من وجهها وتبسمات: ادن خاصنا نحييو الصحبة القديمة.. وراه واحد المتل زويين كايگول "يامن دار الصحاب لاتنسا الحباب" هههه 

تاج الدين: سبحان الله عمري سمعتوو ؟؟

هدى: لا لا كااين جدة جداتي كانت كاتگولو ههه "جبدات تيليفونها مداتو ليه" و اول حاجة هي رقمك الجديد باش نبدا نصدعك شوية 

خداه بشبه ابتسامة قيد نمرتو وردو ليها:خودي راحتك.. تصبحي على خير

باستو فحنكو مبتاسمة: ونتا من اهلو ههه...نزلات بالضحكة ففمها وعينيها كايلمعو بالفرحة ..غادة ببطء للباب باغاه يتسناها حتا دخل كنوع من الاطمئنان عليها ولكن خاب ظننا فاش سمعاتو ديمارا مرة خرا غادي فالطريق و ضارت لقات غير الدخان اللي خلا وراه
تنهدات مطولا وعاودات رسمات بسمة امل فشفايفها قبل ماتحل الباب ودخل
******

تحل الباب على نجاة اللي على سريرها مكونيكطيا هزات عينيها فيه داخل بالبيجامة ديال تاج اللي موالف يلبس فاش تايكون بايت عندهم.. ايديه فجيابو وواقف على راسها مغوبش

نجاة: ياك لاباس

حسام: ملييييت تعالي نتفرجو فشي فيلم

نجاة: مممم گول زغبك الله تاني وشعلتي شي فلم ديال الرعب وخايف تكون بوحدك

حسام: ودابا بلا فرشة ونوضي

زمات فمها كاتفكر ورجعات شافت فيه: الدرا؟

حسام: موجود

نجاة: الموناضا؟

حسام: حاضرة

نجاة: السقاطة ؟؟

حسام: حتا هي كاينة

حطات الطيلي ومدات ليه ايديها هازة نيفها الفوق: يالله زيد هزني مافية مااينوض

حسام: زدتي فيه لا 

ميقاتو: زتي فيه لا ..حيد حيد تاتكون بعدا قاد تهزني خايفة غير لانهر....

قاطعها بهزة وحدة عندو شهقات مضورة يديها على رقبتو وعينيها موسعين فعينيه لمبتاسمين برقة 

نجاة: حمااقيتي نتاا اوييلي 

ضار غادي للصالون: هانا الالة هزيتك دابا شكااين

نجاة: واانززلني الخراا راه غاانطييح نززلني

حسام: هاد الخرا الخرية شحاال من مرة دوينااا عليها.. ءء ؟؟ فمك خااصو الحاار

وصلها للصالون وگلس هاكاك وهي على فخاصو بعدات دغيا مخنزرة وحمررة فحين هو تحنا هز من الدرا وعينيه على الفيلم

نجاة: بلخوااف لاخر 

حسام: تفرجي وسكتي

عيباتو ومدات يدها بالنترة للطاسة ديال الگلية.. بدات كاتاكل وتتفرج فالفلم حتا اندامجات معاه منغاازسة مع احداتو على عكسو هو اللي عين فالمشاهد وعين عليها وتنهيدات متتابعة كاتخرج من فمو


وقف طوموبيلتو قدام براكة الباشير نزل والدخان خارج من فمو بالبرد ..
دق عاد حيد القزديرة اللي مغطية الباب ودخل كايعيط

تاج الدين: الباشيير ..واخاالي

جاوبو من البيت لداخل: وانعام المررضي.. زيد زيد

حط الكونطاكط وطيلي على الميدة قبل ما يدخل عندو ..
لقاه فالفراش مغطي وكايتفرج حاط حداه قرعة وكاس مرة مرة كايجغم جغيمة

تاج الدين: ههه شكادير هنا موالف كاتكون مقصر برا

الباشير: اخويا السم ديال البرررد يالاطيف وخالك عدوه البرد إلى مشيت حتا مرضت كانبقا شاد الفراش تلت يام

تاج الدين: بحالي نيت ..ليك طالع ههه 
....حيد المونطو ومشا الجيهة لخرا فالسرير تكا هاز راسو فللتلفازة ودوا

تاج الدين: كب كب معاك سي كاس

تلفت ليه الباشير كايشوف فيه 

تاج الدين: الله يخلي ليك ختك بلا ماتبدا تاني ..غير كب راه عندي مانگول ليك و الى ماشربتش مانقدر نعاود والو

******ة******

...على طاولة العشاء كانت عائلة هيام گالسة ومعاهم عادل كاياكلو فصمت صوت المعالق اللي كايضور عليهم وهي عينيها فالتيليفون كلا مرة طل عليه بترقب حتا وصلها ميساج خلاها تتبسم

عادل هز فيها عينيه بتساؤل: سمعت مؤخرا باللي المشروع اللي غاتخدمي عليه غايكون معاك فيه شي واحد.. واش بصح؟

غوبشات هي ورد عليه عمر: للأسف صحيح "شاف فيها مبتاسم ومد ايدو ليدها حتا تكنزات بغات تحيدها ولكن زيير" ماعرفوش بقيمة الجوهرة اللي عندهم ..خصاارة

عادل: هوما الغالطين بلا ماتتقلقي..انا شفت رسوماتك قبل شي حاجة سبيسيال ومميزة ..واخا هاكاك سميتك غاتنحت دابا تشوفي احبيبتي ههه

عمر: هههه علاه فيها شي شك

نترات ايدها مخنزرة فيه: عندك الحق..مازال تبان سميتي ومازال ندخل لسوق الشغل بقوة و نستاقل فحياتي حتا انا ..وبهاكا ماغانبقا ساكنة عند تاحد ولا محتاجة لشي حد..ولا لا اعمر

زير على فكو وهي بسمات 

عادل: وانا من جيهتي الى بغيتي شي مساعدة بلا ماتحتاجي طلبي

هيام: ميغسي "مسحات فمها وناضت" بالادن غانمشي ننعس ..غدا فايقة بكري

عادلة: تصبحي على خير

هيام: تصبح على خير

طلعات مع الدروج هازة تيليفونها زحلات الميساج تتقراه "هاهي نمرتو **********07" ..


ضحكات و دخلات لبيتها مرجعة الباب وراها وبدات كاتركب النمرة ببسمة خبيتة على شفايفها

*******ة******

شرب من كاسو كايتنهد بتعب تحت ضحكات الباشير اللي شاد القرعة عامرة فيدو

الباشير: زهرك مكووز اولدي مكوووز ههههه 
عشر سنين داازت ماشفتيها ماريتيهاا وفاش باانت لسقات فقزيبتك .. و صباح وعشية غاتبدا تشووفها هههه

تنهد من اعماقو وتكلم بخفوت: يمكن هاكا حسن .. فاش كانشوفها مكملة حياتها عادي و ماعاقلاش عليا گاع ..كانزيد غير نضحك على راسي.. 

قوص الباشير حجبانو: واالو زعماات ..واالو گاع

تاج الدين: تء..السمية فاش سمعاتها تاترات شوية كانت باينة فوجهها..ولكن من عينيها باينة باللي ناسية كلشي.. 

الباشير: تاحاجة ماكاتنسا اتاج..دير فبالك باللي بنادم واخا يبرد ويسحابليه راسو قطع الواد ونشفو رجليه ولكن لقطة وحدة كافية ترجعو يتفكر كلشي

تاج الدين: الى بقات قدامي طول الوقت بالعكس غاننسا.. غانمل وغاننساها مع الوقت ..يمكن حيت مشات بديك الطريقة ماكرهتهاش بما فيه الكفاية .. وواخا كانكرهها لحد الساعة..ولكن ماشي لدرجة ندمر خدمتي على قبلها..خليها هي فبحر وانا فبحر 

الباشير: حتا يهيج على والديكم هههه

تاج الدين: حتا نساليو هاد الشهر ديال الخدمة اللي جامعانا.. والله يعاون كلا واحد فطريقو ....كمل كاسو وضار عندو ياخد القرعة

الباشير: احيد الشرييف شبااغي

تاج الدين: واتا أرا كب ليا

الباشير: حيد لهيه راه تابعاك الطريق 

تاج الدين: ماغاديش غانبقا معاك هنا..دابا ارا القرعة

الباشير: تتسالها ليا اخويا..شريتيها ..دياالك ؟؟

تاج الدين: دابا غانبداو نتحاسبو
اراا لخراا اخاالي بلا ماتعصبني غانزدق غاادي بحاالي نجيبها من جيهة خرا

الباشير: شربتي كاس الله يجعل البركة هانتا بسباب هاد ولد الحرام قطعتي تااني الصلا الكافر بالله

تاج الدين: دابا ارا غ... "قاطعهم تيليفونو برا كايصوني" انا راجع لك ..عنداك تكملها بوحدك

خرج بالتيشورت ومع فات العتبة زمطو البرد حتا ترعد.. هز تليفونو دغيا،شاف رقم ماكايعرفوش وجاوب فيه التقفقيفة ديال البرد

تاج الدين: الو

ردات عليه بصوت حنين هادئ ورقيق : بون صواغ..ياكما صدعتك

حبس من الحركة ..وسكت شوية عاد جاوب كايرمش قدامو: شكون معايا

هيام: هيام .. دغيا نسيتي صوتي هههه

سخن دمو مع الضحكة الرنانة اللي ختارقات مسامعو منيشة على داتو نيشاان كتر من تنييشة عيشة لنجاة وتفاحة ادم كاطلع وتنزل بالتقااالة كتر من تقولية لساانو

هيام: ألوو..تاج واش معايا؟؟

زير على فكو و صدرو طالع نازل كايضور راسو وجاوبها بحدة: شكاين باغا سي حاجة

هيام: لا والو..بغيت نسول فيك وصافي فالاجتماع كنتي معصب شوية

تاج الدين: الحمد لله بيخير..صافي هادشي

هيام: ههه دابا مالك معصب غير بوحدك كالم طوا شوية..وغدا قبل ماتمشي للشركة اجي نفطرو بجوج ونتعرفو على بعضياتتنا كتر..زعما حنا تنائي دابا نوغمالمو خاصنا نكونو امي ههه شنو بان لك

بسم بعصبية وجاوبها ببروود: هادشي اللي بان ليك

ردات عليه: وي 

تاج الدين: Ok.. غدا مع التمنية.. فبيسري كويزلاند اللي فالسونطر 

ضحكات عاضة شفتها: غانكون تما فالوقت

تاج الدين: صافي غير هادشي؟؟

هيام: ممم..تصبح على ....غوتاااات فاش حسات بشي حد قاس رقبتها الطيلي طاح ليها من يدها وطفا..

...

حيد الطيلي من ودنو شاف فيه بملامح مستغربة فاش لقاها قطعات..طلع عينيه وخرجات من فمو تنهيدة قوية قبلما يرجع اللور داخل للبيت، لقا الباشير جاابدها بنعسة و القرعة خاوية معنقها ..تحنا هز المونطو والكونطاكط وخرج من البراكة ركب فطموبيلتو وديمارا فداك زك الليل الدبانة ماكادور تما..
غادي وعينيه بااهتين ماشي على مودو بتااتا وغير سااهي ، حتا فجأة حبس اللوطو فواحد الشارع كايدوز عينيه على كل حيط وكل قنت تما

فلاش باك.. قبل عشر سنوات🎬🎬🎬🎬🎬🎬🎬🎬🎬

- وابلا مادير لينا فيها زورو ختي راها فدارهم كاتشخر هاد القح*** هي اللي خارجة عندنا برجليها فوتنا علك وگلب حسن لك

تاج الدين: غاضوووور فحالاااتاتك تقووووو*** ولا راه غانق***دوووها فهاد الليييل 

-واتاحيييد 
..دفعو من كتفو هو يشدها ليه عوجها و فيساع تجمعو عليه الصحاب لخرين شد جوج كايعطيهم لوح واحد دوز للاخر وواحد فيهم ناض خدا واحد البلانشة هزها حتا الفوق يضربو شافتو هيام خرجات عينيها وغوتاات: عنداااك

ضور عندها راسو والضو ضارب فيها شعرها منتور بعفوية وعينيها اللوزوية مخرجاهم فيه ..سرح بالشوفة ونزل عينيه لفمها الصغيور كايتحرك ولكن شكايگول الله يجيب مافاق وحس حتا نزلات عليه دقة للراس من حيت لا يدري جابتو ممغط فالارض

عودة للحاضر🎬🎬🎬🎬🎬🎬🎬🎬🎬

..جمع النفس وززفر مديمااري بالزربة حتا تحكو الروايض بالأرض


ضورات وجهها جيهت
كتفها كاتنفخ ويدها على قلبها

عمر: بالشوية عليك مالك تخلعتي

رجعات خطوة اللور وخنزرات فيه عاضة سنانها: نتاا شنو كاادير هنا؟؟ 
علاش اصلا دخل لبيتي بلا ادن؟؟؟

بابتسامة مهدنة رد عليها: طبعا مانحتاجش للادن، هادي كيف كاتعرفي داري ؟؟
و الى بغيت نشوفك "قرب ببطء كايتفحصها تلقائيا رجعات اللور سارطة ريقها" غانديرها..راكي بنتي الحبيبة ..ديالي

هيام: ماااشي بننتك 
..وغااااتهز داابا تخرج عليا ولا راااه غاندير فييك شي حااجة 

عمر: هههه هياام..

قاطعاتو بغل: مااتنطقش سمييتي.. برااا يالله خرررج

هز يدو يهدننها
وهي زاادت تخشات فالحيط: ششششش بلا غوات

هيام: گلت لييك براااا

عاليا: شنو كاين نتوماا؟؟؟
..دخلات مخنزرة كاتشوف فيهم

عاليا: مالكم على هاد الغوات

شاف فيها عمر بهدوء وضور عينيه لهيام: كانت متوترة شوية على قضية الخدمة.. جيت نهدنها ولكن بنتي الغزالة باقا ماتعلمات تاخد النصائح من باباه

غزاات سنانها فيييه وزاد تكلم: تصبحي على خير الحبيبة ديالي 

ضار مشا بهدوء
عكس عاليا اللي مقوصة فيها حجبانها: نقصي شوية من هاد العصبية اللي ولات فييك نقصي

نهضات فيها: براا تبعيه حتاا نتي
..خررجي

عاليا: لا صافي نتي حمااقيتي 

-خرجات سادة وراها الباب خلاتها گلسات فالارض انفاسها مخربقين وداتها كاتترعد لوحدها


على الرمال الدهبية لدااك البحر الهاادي قداامو..واقف تاج بعلي مرة اخرى كايشوف فأموواج مهدنة كاتوصل حتال رجليه وماكاتقيصوش..
الشمس حااارة مقابلة معاه وعيونو البنية ماحاسينش بالحروقة ديالها والا نظرتو الصقرية اللي ساكنها الهيام 
..حس بنسمات خفيفة كايلعبو فضهرو عارف دلالتهم مزياان وشكون مولاتهم..
بانت على شفايفو ابتسامة شبه ممحية
قبل مايضور بكامل جسمو وراه فين كانت واقفة هيام..
بنفس الفستان الابيض وشعرها الاسود مطلوق كيف العادة
.. بقا جامد فبلاصتو كايشوف ملامحها الناضجة وهي مبتاسمة ليها برقة و
بداو خطاويها كايترسمو على الرملة الحارقة وهي غادة عندو حتا وصلات حداه وبقات واقفة سارحة فعينيه ..
حل فمو واااخد نفس وتنهد بحرارة حتا طارو خصلات من شعرها ضحكها وتكلمات بتساؤل وصوتها كلو صدا كايتعاود فودنيه
هيام: مالك؟

رد: نتي

هيام: مالي؟

سكت وتنهد بخفة: حنا !!!

هيام: مالنا؟؟

نفخ وهز ايدو بتردد لوجهها الحليبي عينيها فعينيه..
قبل مايقيسها رجعات فُتات وطارت كلها فالسما حتا اختفت..
بانو علامات الضيق على وجهو سد عينيه بالجهد من التقل اللي فرجليه ..ومرة تانية طاح على ركابيه هز راسو الفوق حال عينيه وغووت مرة تانية بحر جهدوو ... هياااااااااام

....

.....تهز من فراشو عرقان كايلهت فالمراية قدامو ..الشمس داخلة عندو للبيت و معاها صوت حسام من براا وهو كايعيط: تاااج ..تافيق اصاحبي جاي نفطر معاك زعما.. (دق دق دق) تاااج الدين.....

مسح وجهو كايخرج انفاس مررعد من الداخل..ناض للحمام غسل وجهو مزيان مسحو لفوطة وهو غادي ناحيت الباب كاينفخ بوحدو ويسوط ..
حلو بالزعفة وهز فيه صبعو: عررفتي النهااار اللي خطييت فيدك داك السااروت ندمت عليه ندمت

بسم ليه: صباح النور.. الفطور لتحت هاني غانتسناك 

تاج الدين: واااقوود 

سد الباب على وجهو خلاه رمش شوية وزاد هبط مامديهاش فيه متعود على عصبيتو فالصباح فاش عاد كايفيق واغلب الوقت هاكا كايكون ..
...گلس على الطبلة المتواضعة من ناحيت الفطور اللي فوقها كب لراسو قهيوة بدا كايشربها وجبد تيليفونو طالع نازل فالصفحة الرئيسية ديال شركة الوزاني، حتا لمح صورة هيام تما كانت واقفة مع عمر والوزاني مبتاسمين.. فنفس الوقت سمع باب البيت بيتو و بلا مايضور حسام عندو تكلم: خاصك تعتادر من البنت اساط، هادي اول حاجة.. البارح خليتيها مصدومة مسكينة الهضرة تقطعات فيها ..واه قبل مننسا راجمال عيط سول فيك البارح وگالك علاش ماكاتجاوبش و ....سمع خبطة ديال الباب ضار لقاه خرج فحالو 

حسام: والفطوور ؟؟؟
حط داك الكاس بقا كايشوف فالطبلة بحزن زفر وناض هاز تيليفونو يخرج وفنفس الوقو كايدوز رقمها

خرجات نجاة من دارهم كاتلبس جاكيطتها ،قبل ماتوصل للوطو قوصات حجبانها وقربات للزاج فين كان محطوط مشموم ديال الورد حمر وبطاقة وسطو مكتوبة.. كشرات ملامحها وهزات البطاقة مستغربة كاتقرا فيها حتا صونا ليها الطيلي شافت سميتو هي تجاوب

نجاة: الو

حسام: صباح الخير.. فقتي ياك

نجاة: مممم.. انا دابا قداام الطوموبيل وقدام الورد.. غاهو زدتي فيه شوية

باسغراب: ورد؟ شمن ورد ؟؟!!

نجاة: شمن ورد تسطى عليا تسطى.. فينك نتا؟؟

حسام: غادي عندك للبيسري باغي ناااكل

نجاة: هههه نتلاقاو تما..يالله باي

حسام: بسلامة

قطعات ورجعات شافت فكلمات البطاقة 
"ماشي اجمل منك.. وحتا وريدة فيهم متوصل ليك.. ولكن نتمنى يعجبك ويرسمو ابتسامة على وجهك" 

ضحكات : هبيل 
...طلعات للوطو وديمارات غادا فإتجاه خدمتها

....

حطات كاس القهوة من يدها وشافت فالساعة كاتنفخ خايفاه مايجيش .. لابسة كسوة لاسقة عليها سوداء بلا يدين وشعرها جامعاه كعكة.. خلات جوج خصلات هوما اللي يبانو وحدة فليمن ولخرا على ليسر كلا مرة تقيسهم وتقادهم، حتا حسات بشي حد قدامها طلعات عينيها ووسعاتهم بصدمة

هيام: عادل؟؟؟؟

باستغراب هو كدللك: صباح الخير

هيام: نتا شنز كدير هنا

عادل: موالف كانفطر هنا.. نتي فين كاتعرفي هاد البلاصة

زيرات على ايدها كاتلعن حضها قبل ماترد عليه بقليل من الحدة: كانتسنا واحد الضيف مهم..ساليتي فطورك

گلس حداها بهدوء: شكون هادا؟ كون گلتي ليا غاتفطري برا نجيو بجوج

بلاصات سيارتو قدام البيسري نزل منها كايسد الفيسط ودخل مع الباب كايدور عينيه حتا قشعها فالقنت ..ومعاها شخص اخر كايدويو، صغر عينيه فيهم بجوج وصورت الشخص اللي معاها مغريبش عليه شافو حط ايدو على يدها وهي هادية فتصرفاتها .. تحركات تفاحة ادم فالحلق عينيه ضياقو وخطواتو رجعو اللور رجع للوطو حلها بغا يطلع .. ساعا حبس وبهدوء حيد الفيسط لاحها فيها وسدها وتم داخل كايحل صدفة القاميجة مع بسمة خفيفة فشفايفو

تاج الدين: بون جوغ

طلعو بجوج عينيهم فيه وحدة موسعاهم بصدمة هاالي مابغاتش..والتاني مستغرب لكن رد عليه بهدوء

عادل: بون جوغ

سرطات ريقها كاتتبت راسها وحاولات تتبسم ليه: تفضل جلس احم "گلس قدامهم بجوج كلا مرة وفيمن كايشوف حيدات بالزربة يدها من يد عادل وبدات تحنحن

هيام: هادا عادل صديق العائلة ..عادل هادا تاج الدين العورابي، هو شريكي الجديد فالمشروع

عادل مد ليه ايدو: متشرفين

كان هو كايشوف غير فعينيها اللي كايضورو ماتابااش فجيها وحدة.. مد يدو ليه وسلم محرك راسو


واضحة انتي كالشمس..
إن أقتربت منكِ أحترق.. و إن أبتعدت عنكِ أختنق..
بين الإحتراق، والإختناق ...اخبريني انتِ ماذا أفعل؟ 

السكاات والهدووء هو حليفهم بتلاتة بيهم عكس البيسري كامل غير ديك الطبلة فين باركين اللي ساقلة .. 
هي قدامو كاضور عينيها مكنززة على يدها وتتفكر فشي فكة لللي خرج ليها من الجنب وماضربات ليه حساب .. عادل مهدن تيليفونو فيدو مشغول بيه ومن ملامحو باينة انو غير مهتم گالس معاهم غير هاكاك..
اما صاحب العيون الصقرية مُخَنزر الحاجبين فكان حاط يد على الطبلة كايطرطق عليها صبعانو وعيونو كلا مرة ولين متلفتة مرة عند البرانسيسة اللي ماكاتشوف فحد وفمها مانعاه ينطق بشي كلمة احسن ماتخسر الديكور اللي راسمة فدماعها..ومرة كايمشيو للمسيو الضيف ضاحك مع تيليفونو بوحدو، حتا وصلو ميساج بسم وناض يمشي تما عااد انزاح حجاب الخطر من قلب هيام وبسمات بخفة قبل مايزبلها ماللي هز جاكيطتو ونزل باسها فخدها تحت شوفات تاج ..هاالي مابغاتش واللي زاد عصبها وكملها ليها الجملة اللي نطق: حبيبة انا غادي ..نوصلك معايا للشركة

حكاات سنانها وعينيها قرطاس: لا اعادل ميغسي

عادل: اللي بغيتي "مد يدو لتاج" تشرفت بمعرفتك اسي العورابي

سلم عليه: ليا الشرف

تبعاتو بعينيها وكيف خرج مع الباب تلفتات لتاج بالزربة كاترسم بسمة خفيفة على شفايفها تخفي بيها التوتر 

هيام: هههه خصارة خسرات لينا الگلسة..كنت كانفطر حتا وقف عليا فجأة..وحيت صديق عزيز ماقدرتش نمنعو يگلس معايا 

هز قهوتو يشرب منها: ويشد فيدك حتا هادي ماقدرتيش تمنعيه عليها؟..خطيبك ياك

حكات عنقها بابتسامة: نوو ممخطوباش..هو اعز صديق عندي تقدر تقول الانتيم ديالي

تاج الدين: الله يدومها.. شنو الموضوع اللي بغيتيني فبه

-ربعات ايديها وتنفسات كاتقاد الكلام فحلقها: قبل مانبدا.. اول حاجة نتمنى متكونش باقي مقلق مني.. انا بصح احيانا كانگوول شي هضرة ماشي حتال لهيه وكاندير شي تصرفات.. ماعرفتش، يمكن بايخين بحال البارح ..كتر من ساعتين وانا كانقلب على للرقم ديالك ..ومقدرتش ننعس ونتا مقلق مني

طلع حواجبو: وعلاش؟ شنو الفرق ..هانا گاع تقلقت

هبطات عينيها كاتحرك المعلقة فقهوتها: ماعرفتش.. انا براصي مافهمتش، يمكن متحملتش تبقا مقلق وهاز فخاطرك من جيهتي..وزيد عليها الناس اللي كانرتاح ليهم كانتصرف تيجاههم بداكشي اللي كايمليه عليا قلبي بلا مانفكر

تاج الدين: هادشي عندو عواقب.. عارفة ياك

تحنات قربات لوجهو بابتسامة: وانا ماكانخافش من كلام قلبي..كيفما كايوجهني كانمشي..تايقة فيه وفقراراتو

صوخر كاسو للجنب وتحنا عندها بدورو حتا قرب نيفو يلامس نيفها لدرجة شوفتها الواتقة تبدلات قدام نظراتو وهدوء هضرتو: القلب ضعيف..كايقويك ويرجع اللور يتفرج، وفاش كاتتجرح وتتسناه يوقف معاك فصفك..تما كاتعرفو على حقيقتو..شحالما تجرح وتهان وتكسر..الشخص اللي حب عمرو يكرهو واخا تعيا تحاول..ماتبقايش تيقي فقلبك بزاف اانسة ..حيت مغتتحمليش من بعد


رمشات بسهوة قبل ماترد عليه: القلب ماكايغلطش..ماكايتكا على طرف اخر الا لاكان بصح هو اللي مناسب ليه

بسم بجنب فمو وبنفس نبرة الهدوء جاوبها: القلب هو اكبر ولد ***** .. والحاجة المقودة هو انو طرف منك .. كونما هاكا تيقيني فالفعايل اللي فيه ممكن بزااف تحيديه بيدك وتزمطي عليه بلا ماترددي

زادت حيرتها وسط شوفاتو اللي كلهم صدق وجدية قاصد كلا حرف خرج من فمو و بلا متشعر خرجو من بين شفايفها: شكون جرحك ؟

تاج الدين: نتي. ...
گالها وراقب انقباض عيونها الحائرة الامعين فعينيه وهو اكتر ..شرارة قوية سرات بيناتهم، هضرتو كاتحلل فدماغها نقطة بنقطة حتا رجعات الرويينة نايضة عندها لداخل بقات غير كاتشوف فيه ماعرفات لا شنو تنطق لا شنو دير والا كيف تتصرف ..ولما الشخص الواتق فنفسو كايفقد السيطرة، ببساطة كل ماكايوقع هو انو كايدوخ.. وداكشي اللي وقع ليها مقابل نظراتو الهائمة بلا مايشعر حتا هو بقا هايم فيها بوجه جاامد، حتا دخلات للبيسري صاحبة الشعر البرتقالي والورد الاحمر بيديها ..دازت للاكيسط نيشان كاتهز الحسابات والجيروم حداها دغيا وصل ليها باللي خوها هنا.. بسمات كاتقلب عليه حتا قشعاتو وقشعات اللي گالسة معاه الراس فالراس وشوف فيا نشوف فيه اطجين الحوت ..حطات الورد على الكونطوار ومشات كاصداهم كاتصكاني الاخت من الفوق للتحت حتا حبسات عند كتف تاج وتحنات حاطة ايديها على ركابيها كاتشوف فيهم بجوج و ماكاينش بتاتا اللي حس بيها تاقفزااتهم

نجاة: هاااواحد السلام عليكم الاخواان

-"هو" ضور وجهو كايحنحن فحين "هي" بدات تقاد شعرها وهزات كاسها كاتشرب منو تسقي ريقها اللي نشف

نجاة "بابتسامة وعينيها عليهم": ياكما قاطعتكم شي حاجة

حنحن وشاف فيها: نجاة 

نجاة: تاج الدين

تاج الدين: ايمتا جيتي

نجاة: عااااد دابا "تلفتات لهيام وابتاسمات كتر مادة يدها: انا نجاة.. مولات البيسري

سلمات عليها: انا هيام ..متشرفين

وسعات عينيها: هيام؟؟ سميتك هيام؟؟ 

هيام: وي علاش؟

بسمات وعينيها على تاج: سميتك زوينة تبارك الله.. ياك اتاج

ناض هز تيليفونو والكونطاكط: انا غانمشي دابا "شاف فهيام" اليوم ماغانجيش للشركة عندي شي خدمة خرا.. غدا نتلاقاو باش نهضرو على التصاميم..

بالزربة قاطعاتو: ولكن باقي مكملناش هضرتنا

تاج الدين: نكملوها فالمكتب.. الله يعاون

ضار غادي فحالو وهي متبعاه كاتشوف فيه، سرحاات مع ضهرو العريض وبدات تتعبر ليه مشيتو المعنكرة حتا غبر عاد ضارت لقات نجاة فوجهها مبتاسمة ابسامة عرييضة 

نجاة: بوگووص ياك


هيام: نعام؟؟

نجاة هههه كملي قهوتك كملي ونيت نزيدو نتعرفو على بعضياتنا

هيام: نن ميغسي خاصني نمشي 

بغات تنوض ورجعات شداتها برجاء: ولكن علااش؟؟ هاهو ماغاديش للشركة ..ياك نتوما كاتخدمو مع بعضياتكم؟

هيام: وي شركاء

نجاة: اااه نتي گولي نتي هي الشريكة اللي غاتكون معاه ههه ماشاء الله عليك غزالة

ابتاسمات بمجاملة: ميغسي .. نتي شنو كاتجيه؟

نجاة: ختو وصديقتو المقربة عارفة عليه للشادة والفادة 

هزات حاجبها والضحكة كاترسم على شفايفها: يااك 

نجاة: ويي بب ههه

هيام: متشرفين مرة خرا.. غزالة البيسري ديالك حمقزي الديكور ديالها..وعلى مابانلي غانولي زبونة عندكم

حلات عينيها :مرحبااا بيييك عههه

حسام وقف عليهم مستغرب من هيام شنو كادير تما: السلام

نجاة: وعليكم متلها

مد يدو لهيام: انسة العلالي ..شنو كاديري هنا

هيام: كانفطر 

حسام: ههه بالصحة الالة

هيام: الله يعطيك الصحة ..بون دابا ز
نخليكم دابا خاصني نمشي "وقفات هزات المونطو وساكها" تشرفت بمعرفتك انجاة ..نتمنى مايكونش آخر لقاء بيننا

نجاة: ربي يخليك ازين الشرف ليا ولكن قبل ماتنشي غاتعطيني نمرتك 

حسام طلع حاجب وهيام تفاجآت حتا جاتها الضحكة، وگالت: مرحبا اري نقيدها ليك

خدات الطيلي قيداتها وسلمات عليها بالحنك

نجاة: باي زورينا مرة خرا ههه

هيام: بيان سوغ ...مشات ونجاة فيساع دارت عند حسام تهضر ساعا لقاتو مطلع حاجب

نجاة: مالك؟؟

حسام: مالييش نتي اللي مالك؟؟

نجاة: مالي اخويا كي جيتك

حسام: بغيت غير نفعم نتي فين عمرك حملتي شي وحدة من اللي كايخدم معاهم خوك ..وفين عمرك اصلا تصاحبتي مع البنات ولا طلبتي نمرت شي وحدة

قرصاتو فحنكو: هادشي بعييد عنك ياحلو واخا..دابا تبعني عندي ليك شي اسئلة ضرورييين..تبعني يالله

مشات طالعة للبيرو نفخ هو وضور عينيه تابعها حتا طاحو على البوكي ديال الورد فوق الكونطوار ..شاف فنجاة وفيه ومشا هزو باستغراب سول الجيروم: هادا ديال من

مدموزيل نجاة هي ل

قاطعو بنرفسة: مدام..مداام واش غانبقا نحفصها ليكم سميتها مدام نجاة

الجيروم: مدام نجاة..فاش كانت داخلة جابتو معاها

حسام: ياك شاف وسطو ورقة هزها كايقراها وشوية بشوية بدات غوباشتو كاتتجمع حتا كمشها فيدو ونطق تحت سنانو" لوحوه للزبل

الجيروم: واخا اسيدي

تم طالع عندها مزير ايدو وفنفس الوقت كايتنفس شهيق زفيير يبرد النار الخاامدة داخلو..وقبل ما يدخل مع الباب بين البسمة المعهودة عاد حلو ودخل

حسام: هاهو جا شكااين

نجاة: گلس گلس..بغيت نعرف كللشي على هاد هيام شنو هي شنو كادير فحياتها كيفاش خويا تعرف عليها كيفاش كايشوف فيها..كلللشي

حسام: شربتي دواك هاد الصباح يااك

نجاة: حساااام


فالكفيتيريا ديال لافاك..گالسة اميمة وقدامها هيام قارنة حجبانها ويدها على جبهتها حاسة براسها غايتفرق..بعدما عاودات ليها كلشي حطات اميمة المعلقة سرطات اللي ففمها ودوات بتهكم

انيمة: انا وعلى مبان ليا..السيد حااضي صوارو مزياان

ردات عليها: ممم هادشي اللي بان ليا حتا انا.. واخا هضرتو كلها الغاز، معرفتش ..شي حاجة ماشي هي هاديك

مسحات جنب فمها وصغرات عينيها: اجي بعدا؟ هو زوين ؟؟ كيداير فوجهو

طلعات حاجب: ونتي مالك الغزالة

أميمة: مماليش اختي غاسولت

هيام: هههه الله يستر..واش داخلة دابا ياكما معطلاك

اميمة: لا لا هاد الساعة عندي خاوية غير گلسي معايا..غاتجي بعد غدا ياكي

باستغراب: فين ؟؟ ااه الحفلة ..بففف

أميمة: كيفاش بففف..واا جي اصاحبتي تفوجي شوية وتبدلي الجو والله حتا صحابات ماما الهباال

هيام: خلي حتا نشوف راه ماواعدتك بواالو..فين جا الحمام؟

أميمة: طوول وضوري على يدك ليمن

هيام: انا راجعة ...هزات ساكها متوجهة ليه دخلات وبعدما تأكدات باللي ماكاين حد سداتو ..حلات الساك جبدات منو بواطة مسدودة فيها حبيبات حمرين لاحت وحدة ففمها سرطاتها بعينين مسدوودين وبقات مدة واقفة كاتلوي راسها..حتا بدا وجع الراس شوية بشوية كايخف عاد خرجات غادة عندها ..گلسات وكملو هضرتهم على حوايج خرين ، اميمة اللي كاتهضر بزاف عكسها هي اللي كلا شوية ساهية تتنهد ماكاتحس حتا كاتلقا راسها متفكرة عينيه كيفاش حتا بلوكاوها ووتروها وزادو من ارتباكها لديك الدرجة.. كيفاش؟
....

قدام البراكة ديال خالو بلاصا اللوطو ونزل محيد الفيسط وصدايف القاميجة محلولين ..تم داخل ايديه فجيابو وكالعادة كايعيط بعدا قبل مايدخل

تاج الدين: الباشير..البااشير ..وااخالي

بدا يدق فالبيت لكن بلا مجيب .. جبد تيليفونو دوز نمرتو والصونيت جاية من البيت لداخل قوص حجبانو ورجع كايدق

تاج الدين: الباشيير (دق دق دق) اصااحبي واااش باقي ناعس ولا شنووو ..واخاااالي

..جهاد الدقان ديالو وغواتو شوية بشوية كايرتافع.. تخلع وتفعفع لاتكون شي حاجة واقعة رجع خطوات اللور وتقدم بالجهد دفع الباب حتا تفرع وحل عينيه بصدمة حس بالما باارد تكب عليه فاش شافو كيف خلاه البارح معنق القرعة وجسمو وصدرت تابتين ماكايتحركش كأنو جامد


شافت فيه نجاة باستغراب: هو هاكدا تصرف معاها؟ ولكن علاش

حسام: انا براصي مافهمتش .. تنيرفا عليها غيير بوحدو وحتا فاش طلبات منو السماحة ماقبلش ..وناض خلا عينيها كايضورو

نجاة: لا لا تاج الدين ماشي هاكا

حسام: ديك النهار اصلا ماكانش على بعضو ..يمكن شي حاجة كانت شاغلاه

نجاة: يمكن ! منعرف 

- طلع فيها شوية عينيه ودوا بتهكم: واحد البوكي ديال الورد شفتو لتحت ..ديالك؟؟

نجاة: داك الحمر؟

حسام: مممم

حلات عينيها وضحكات: هههه ..غيير نسيت ،شووكرا احساام

طلع حاجبو: شكرا على اش؟؟

نجاة: على مشموم الورد..اليوم فالصباح لقيتو فالزاجة ديال طوموبيلتي واش ماشي نتا اللي مسيفطو

خنزر مزير ايدو وكلامو من تحت سنانو كايخرج: وانا علاش غانسيفط ليك الورد؟همم؟

صغرات عينيها مقوصاهم: لاهيلا ..نتا اصلا علاش غاتسيفطو ليا ولكن.. الا ماشي نتا ادن شكون

حسام: شوفي نتي..يمكن تكوني كاتعرفي شي حد وعجبتيه "زير على ايدو" ويمكن باش يعبر ليك سيفطو. "باستهزاء" ألي ماتوصل لحتا وردة من داك الورد هه

سهات وراسها ضرها شكون غاينوض يسيفط ليها ديك الهضرة ومشموم حمر شكوون وهو عينيه غير ماكايزيدو يتزيرو تا حمااارو..ضربات ليها طن فراسها وعادل هو الاحتمال الوحيد هاد الساعة فيساع وساعو عينيها وخدودها حمارو ماقدراتش تشوف فيه ودوات بارتباك

نجاة: ي يمكن غير شي غلط

حسام: غلط.. ومالك سهيتي

نفخات فيه: اووف داابا شنوو غادير ليا لونكيط.. صافي گلت ليك غايكون غير شي حد غلط ولا منعرف فين بغا يوصل..مهم دابا عندي شلا مايدار بلا مانبرزط راسي بهاد التخربيق

.. ناضت تمشي بلا مايحس وقف مزير على يدها ونظراتو مفشكلين استغربات منهم

تحت سنانو مقصح فيها الشوفة: ماتكونيش زعما مخبية عليا شي حاجة

بنرڤزة حاولات تحيد ايدو: ااش غانخبي ااش..طللق ايدي حييد

حسام: عنداك انجاة، ديك الصورة الزوينة باش كانشوفك ماتبدليهاش لياا واياك تكوني كاتلعبي ورا ضهري 

دفعها وخرج من البيرو نازل وكايحك فراسو غادي جاي حتا بغا يتفرق على جوووج.. طلع لطوموبيلتو وبقا گاالس عينيه جمرة حمريين هز ايديه و رجع كايضرب الفولون بالجهد حتا تنفس شوية عاد ديمارا مكسيري


داز هاد النهار وجا نهار جديد..
صبحو تاج الدين فالكلينيك منزل راسو اللي تشقق عليه وسط ايديه حاس بالخنقة ورجلو بوحدها كاتزعز
..سمع غوات مو اللي جاية كاتعيط رجليها هازينها غير بزز وجهها صففر مصدووم وعلى فمها غير سميت "الباشير" ..نجاة حداها حتا هي دموعها نازلين كاتحاول تهدنها وشاداها لاطيح وقف بعياء تسنا حاا وصلات عندو وطاح عليها عنقها وهي مخشية فصدرو كاتبكي

عيشة: ماواقع ليه والو يااك خويا بيخيير هضضر خلاااص خاالك بيخيير ياك

باس رااسها مهدود ودوا بصوت باح مبسم واخا الدموع فعينيه: ماغايوقع ليه والو اميمتي واالو.. واش بعدا بعقلك الباشير يخلينا ههه هاديك هي اللي عمرها تكون داك بنادم يدفنك نتي وانا وهو يبقا حي يرزق ماغاتقيسو حتا حاجة هههه

هزات رااسها كاتخبط صدرها بحرقة: يااربي ..ياااربي لاكانت عوينة هاادي يااربي رحمنا ..رحمناا يااسيدي ربي وماتوريني باس فخويا يااربي

تاج الدين: شششش 
رجع باسها وداها بركها حداه كايطبطب عليها وكلا مرة يبوس راسها ويمسح دموعها..نجاة گلسات مقابلة معاهم حتا هي محروقة وكاتبكي فصمت..
لحظات و خرج عندهم الطبيب ناضو بتلاتة واول من دوا بلهفة هو تاج الدين

تاج الدين: دكتور كيف بقا.. ياكما شي حاجة صعيبة

الدكتور: شنو كايجيك المريض

تاج الدين: بابا

تنهد وحرك راسو: تفضل معايا اولدي نهضر معاك

عيشة: ياااك لاباس واش وااقعة ليه شي حاجة

تاج الدين: صبري امي انا نمشي نشوف شنو غايگول ليا واخة ..نتي گلسي حتا نرجع ونگولك شنو كاين

عيشة: واخا اوليدي انا غانهبط لتحت نصلي شي جوج ركعات ندعي معاه فيهم

تاج الدين: مزياان هاكدا حسن ...باس راسها ..ومشا تبع الطبيب كيحرك صباعو بتوتر وكل خطوة كايتزير معاها قلبو
..دق الباب ودخل

الدكتور: تفضل اولدي گلس

تاج الدين: ياك لاباس ادكتور.. شنو واقع

شابك ايديه بجدية: ماعندي مانخبي عليك ..مادام نتا ولدو ادن غاتكون عارف باللي الوالد ديالك عندو ادمان على المخدرات والكحول..والافراط فيها هو اللي وصلو للحالة الخطيرة اللي هو فيها دابا

سرط الريق وسول بلسان تقيل: علاش..شنو عندو

تنهد باسف: سرطان الكبد وللأسف فمراحلو المتأخرة


فبيتها ووسط فراشها.. فين كانت هي مشرعة ايديها غارقة فنوومها وعقلها غايب..غايب على تواجد عمر حداها..گالس وصباعو متخللين خصلات شعرها السوداء قرب فمو باس حنكها الدافئ بالشوية وبدا نيفو كايسرح على شعرها ويشم ريحتو بهوس..رعد شفايفو وهو كايتمتم باسمها سرط ريقو وبصعوبة ناض كايشوف فيها قبل مايخرج مبسم نازل للتحت ..فين كانت عاليا جالسة على طاولة الفطور مع عادل كايدويو حتا وقف عليهم

عمر: صباح الخير

عاليا: صباح النور حياتي

عادل: صباح النور

عمر: عادل ممكن تجي معايا.. بغيت نهضر معاك فشي حاجة مهمة

عادل: اه معلوم

..مسح فمو وتبعو للمكتب دخل عمر وعادل وراه كيف سد الباب جاتو تمرميقة قااصحة فحنكوو خلاتو حممر بالعصبية: شنوو هادشي درتي

نهض فيه عممر بغضب: حييت حمااار ..نتااا حماار ..شحاال من مرة تبريت منك ءء..يااك گلت ليك ركز على هياام توافق عليك مااشي تبقا تابع ليا البنات

رد عليه كايغوت: يسحااابليك ماحاااولتش ..ديك بناادمة راسها قااصح وعندها زاايد نااقص حتااا حاجة ممهمة عندهااا

غمر: هاااد الهضرة كووولها ماكاتهمنييش..وبزز غاتخليها تبغيك وتوافق بزز منها تزوج بيك كاتفهم

عادل: نيييت هادشي اللي بقا خاص غيير نبزز عليهااا

عمر: بززز ..وغاادي تبعدها من وااحد الشخخص الحمااار هو بالدااات ماخاصوش يعااود يقرب جيهتهااا

عادل: شكون هادا

عمر: هااداك اللي بركتي كاتفرنس معااه الباارح ..تاج الدين..هو بالخصوص ممنووع تخليييه يقررب ليها ممنوع

رد عليه بعصبية: وأنااا ماالي من هاادشي ..هو خداام معاها وااش حمااقيتي 

شنق عليه رادو للباب: شووف.. راه والله القسم ومشات حتا بغات واحد ااخر.. الى خليتي لينا الفرصة تشوف فراجل اخر غانقبررك كاتفهم.. ولا عرفتي شنوو..غانرجعك للوسخ منين جبتك "دفعو" داابا ضررگ عليا زلااافتك.. ونسمع علييك مرة خراا كاضور بشي وحدة ظظ غاتشوف مني اللويل

شاف فيه بغل مزير سنانو.. وزاد مع الطريق خخبط الباب ورااه وخرج لطوموبيلتوو ركب وديماارا معصصب
..

عمر دار للبيرو حيد الگرافاط وگلس كايمسح فكو بتوتر وهو كايشوف فملف مسدود قدامو مكتوب عليه"تاج الدين العورابي".. هزو بغضب رماه فالبوبيل حداه وخبط المكتب بعصبية ،بغا يزيد يضرب لكن سمع خطوات جايين هو يحبس
..دقات عاليا وحلات الباب داخلة لقاتو مبتاسم بهدوء وجهو تبدل مية وتمانين درجة وولا سااكن تماما

عاليا: شفت عادل خرج معصب مالو؟

عمر: حتا حاجة..غير الخدمة

عاليا: اوك..ماغاتفطرش

عمر: فاقت هيام

عاليا: لا مازال

عمر: ادن حتا تفيق ونجي ناكلو بجوج..
بسم ليها وهي حركات راسها وخرجات ..


يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.