تاج راسي الجزء السابع

من تأليف Soukaina Ahnani
2020

محتوى القصة

رواية تاج راسي

تشعلو ضواو خفاف فڤيلا "العوماري" واخا مازال ماضلام الحال.. كان غداء متأخر ومن بعد حفلة بسيطة بين العائلة..

بلاصات الرينج ديالها فالواجهة ديال الباب نزلات بكسوة بالاخضر القاتم بلا يدين طالع ليها العنق للنص مغطية صدرها ورقبتها.. الشعر مجموع شفنجة مرخوفة اللور وخصلات متمردين خلاتهم نازلين على وجهها والطالون كان متلت من القدام باللون الاسد ..نفس لون البوشيط اللي فيدها


..دخلات مع الباب كاضور عيونوها فالحضور اللي اغلبهم من العائلة القليل فقط اللي كاتعرف بحكم شهرتهم فمجال الاعمال نفس مجال الاب ديال أميمة .. 

-هياااام

ضارت لقات اميمة جاية جيهتها هازة كاميرة كاضحك لابسة كسوة وردية حتا هي بلا يدين وشعرها مسرحاه على طولتو .بسمات وهي كاتحل ايدها حتا لخرا تلاحت عنقاتها كاتكركر

أميمة: فرحت اللي جيتي هههه

هيام: بغيتي غدا تخرجيني فالجريدة متلا ههه

ضحكات وطلعاتها منباهرة: جيني فنة كاتحمقي

هيام: حتا نتي الغزالة ديالي..شفت الدنيا عامرة عندكم

أميمة: هادو كااملين والله ماعرفتهم شكون اما العائلة راك حافضاها

هيام: ههه هادو رجال اعمال الحبيبة ديالي صحاب باباك

أميمة: عرفنااهم صحاب بابا ولكن الوااحد كايجيب معاه ولدو بحال هاكا باش زعمة الحفلة تزيد تحلا 

هيام: ياختي باااز باااز حگلو جمال فيك هههه فين بعدا خالتو

اميمة: محلفة على بابا من قبيلة وهي كاتتسناه قودها هههه..فراسك خالتو زينب كاينة هنا ..غير ماعرفتها فين غبرات ؟

حلات عيونها: واش جات.. ايمتا؟

أميمة: بحالي بحالك فاش جيت لقيتها فالدار 

هيام: وميلين؟

أميمة: كاينة فبيتي كاتبدل لولدها..اطط شدي هادي نمشي نقلب عليهم

خدات من عندها الكاميرة واوما رجعات داخلة للڤيلا..بقات كاضور عينيها على الناس وتشوف فالكميرا اللي فيدها حتا رمقات مرجان مخنزرة فشي حد.. ضورات وجهها ولقاتو زوجها "أدهم العوماري" رجل خمسيني وسيم بنيتو ضخمة كايبان رجل رياضي وهبة 
السن ديالو حاضرة من الشيب اللي متخلل ليحيتو وشعر راسو

..ابتاسمات مصغرة عيونها بفضول ..دائما كاتشوف علاقتهم بجوج فيها نوع من الدفئ غريب ومموالفش ليها ..طريقة الكلام بيناتهم طريقة المعاملة والنقاش حتا الرومانسية عندهم فشكل.. وباقا تعقل فصغرها قبل موت باباها كانت كاتجي عندهم بزااف واخا اميمة باقي ماتزادت كانت كاتجي عند جمال حيت عندهم نفس السن وكايبقاو يلعبو بججوح غير بسبة انها تبقا معاهم مدة أطول حتا انو احيانا كانت كاتتساءل بينها وبين راسها.. واش هاد كمية الحب اللي بيناتهم ممكن يكون ليها منو نصيب شي نهار؟؟ واش الحب الحقيقي كاين حقا..وممكن يتدق بابها من طرفو يوما ما؟



نزل التيشورت على عضلاتو وخرج للبالكو ديال بيتو كادوز رقمو..لحظات وجاوبو فاللوطو

تاج الدين: الو

جمال: الو تاج.. فينط اصاحبي

تاج الدين: هاهو جاي ..شوف نص سااعة هاني كانعاودها نص ساعة ماغانفوتهاش

ضحك ورد عليه: واصافي غاطلق..وداك بنادم فين هو

تاج الدين: خليتو فالشركة راه غارق فالخدمة 

جمال: هههه ولايني راك ماكاتسواش

تاج الدين: شتي كون كانت شي حفلة من دوك الحفلات اللي موالف بيهم والله واخا ندير ليه مينوط لا گلس ههه راه غير حيت عارف راسو غايمل غايمل اللهم يكمل دوك
الضواصا اللي مجموعين عليه

جمال: ههههه سربينا غانتا بعدا الغدا غايتحط ونتا باقي ماهداك الله

تاج الدين: هاني قرييب عندك ..العميم تما؟

نزل جمال عيونو صدفة لتحت ولمح بيهم هيام مبتاسمة وكلا مرة ضرب طليلة على ادهم اللي مضور ايديه على خصر مرجان ..بسم حتا هو كايشوف فيها بحال شي بنية كاتسرق الشوفات وشوية رجع تيشوف فيها ككل شنو اللي تبدل فيها فهاد الاشهر شنو تزاد وشنو نقص

تاج الدين: جمال..جماال

فاق من سهوتو طايحنحن: نعام هاني معاك

تاج الدين: فين سهيتي

جمال: والو غير كنت كانفكر..گلتي شي حاجة

تاج الدين: لا غير تلاح دابا و فاش نوصل غانعيط ليك

جمال: الله يعاون

قطع وشاف فيها قبل مايضور خارج من بيتو ونازل عندها..فحين هي قربات جيهة دوك العشاق اللي قدامها كايتمعشقو تقابلات معاهم هازة الكاميرا وقبل ماتصور سمعات أدهم نطق لمرجان بهمس وصل حتال عندها 
:كانبغيك ؟.كنت ..وباقي ..وغانبقا

بسمات على الانسجام اللي كايشكلو وحلات فمها تكلمات: كوكو

ضارو عندها فديك الوضعية خدات ليهم صورة حلوة جامعاهم..ضحكو بجوج مرة خرا وخدات صورة اخرى قبلما ينغزها من اللور باش ضور على صورتو المبتسمة وهو كايتمعن فيها وغوتات بفرحة

هيام: جمااال

عنقاتو كاضحك وهو زيرها عندو ساد عينيه وهمس بأنفاس حارة على ودنها: توحشتك ..توحشتك ماتصوريش قداش

ضحكات وردات عليه: حتا اناا "حيدات منو ومحات الضحكة فاش ضرباتو لكتفو مغوبشة فيه" ويالكدااب بارك عليا ماغانجي حتال الصيف مالك مبرهش

غمزها بالضحك: توحشتيني زعما

هيام: واهي وبلا كدوب توحشت قصارتنا بجوج

جمال: الطمااعة ههههه تعالي نشربو شي حاجة 

جرها بيدو اللي على رقبتها وهي مضورا يدها فضهرو ماكاين غير گولها وارا ما ضحك عليها

★★★★

دخلات العشية والشمس بدات تغرب كاتمهد لليل يدخل...

خارج الفيلا حبسات سيارة تاج الدين نزل لابس تيشورت كحلة مطراسية عليه مع سروال دجين بنفس اللون
.. مع الدخلة دوز نمرت جمال وحطو فودنو داخل وعينيه كايفيليو الناس اللي تما ..

★★★★

جمال: متأكدة بعدا؟! داك راجل مك ماكايتسرطش ليا گااع

هيام: ماكايهمنيش قدما كايهني داكشي اللي غانستافد منو..ديك الفرصة ماكاتتعوصش والى ضيعتها غانكون وحدة حمارة

جمال:واخا.. يعني صافي دابا غاتهزي راسك براسك

هيام: هاكدا مخططة..طبعا الى ماعتراتنيش شي حاجة 

جمال: مزيان الالة " غمزها تاني " تمجهدتي ء

هيام: انا ديما هاكا ابب ههه

ضحك وقاطعهم كلامهم رنة الطيلي جبدو يشوف شكون هو يضور راسو فاش حس بيدو على كتفو وحل عينيه مبسم

جمال: تاااج.. واخيييرا

-سمعات سميتو هي طلع معاها السخونية وطلعات حاجب ضاير بالزربة مع شوفاتو المبنجة مصوبين ليها نيشاان

جمال: تعطلتي اساط

تاج الدين: ولكن كايبان ليا عندك الوناسة واخا نتعطل 

جمال: هادي عندك هههه "شاف فيها كايعارفهم على بعض وهوما غير ساقلين كلها وكيف كايشوف فالتاني"

جمال: هيام هادا تاج الدين.. صديق الطفولة المهمشة وزدنا تلاقيها وحنا كبار..تاج هادي هيام ..صاحت أميمة وفنفس الوقت " شاف فيها" عزيزة بزاف


مدات يدها ببسمة خفيفة على شفايفها ونطقات بلباقة: فرصة سعيدة مرة خرا 

وعينيه فعينيها هز يدو كدلك سلم ..بغات تحيدها ولكن غوبشات فاش حساتو غايهرسها فيدو من كترت ممورك عليها واخا وجهو مهند ومكااالمي

تاج الدين: الشرف ليا امدموزيل العلالي

باستغراب تام نطق جمال وعينيه عليهم:: كاتعرفو بعضياتكم ولا كيفاش؟؟

أميمة: هااااي مي زاموغ 

وصلات عندهم ضاحكة مدات يدها لتاج سلمات عليه دازت لهيام باستها ووقفات مخنزرة فجمال

أميمة: گالك بابا رد ليا تيليفوني

ببرود جاوبها: گولي ليه گالك جمال لا

اميمة: گوولهاااا ليه نتاا نييت

جمال: لا غير سيري نتي مافيا اللي يمشي

أميمة: واداابااا اراا لياا زمرري ماالك على هااد الفعاايل 

جمال: اري ليا لكود وفاش نقلبو ونردو ليك عاادي

أميمة: اوووف والله لابقاات فييك.. اجي معايا نتي

جرات وراها هيام كاضحك.. فحين جمال جمع التغوبيشة وبسم شاف فصاحبو لقا عينيه بحدة مصوبين عليه

طلع حواجبو: مالك ؟

تاج الدين: منين كاتعرفها؟

شاف جيهتهم غادين ورجع شاف فيه: داوي على هيام ولا اوما ؟

قرب ليه كتر مزير على فكو..شوفاتو جامعين الجدية والحدة مع شرارة قوية خلات جمال يتجمع حاس براسو غايسمع شي حاجة اللي ماغاتعجبوش: نتا صاحبي واخا ..عشيري وعزيز عليا ..حتا هادي واخا..ولكن حتال لعشقي..وحياتي..ورووحي.. خط حممر هاديك واياك تفوتو 

طلع حاجبو: شنو؟؟ كيفااش زعماا والصحبة شدخلها فهاد الشي

شير جيهتها براسو: هادي هي البنت اللي كنتي كاتعاود لياا عليها بالليالي.. وهي مامدياهاش فيك وكادا.. ياك؟؟

زاد خنزر: ومن بعد فين باغي توصل..وفين كاتعرفها اصلا؟؟

تاج الدين: ماشي مهم دابا..وباش بلا مانخسرو اجمال حيت بالرب ماغانتردد ندوز عليك

جمال: بان ليا شوية بديتي كاتخوور

تاج الدين: غانبدا نقوود السواايع

ضرب على كتفو وداز من حداه كايقلب بعينيه..خلاه مزير على يدو وشوية بالشوية بدا يخنزر قدامو بحدة ونطق بسؤال بدا يصدعو وينوض بيه التزنزينة فالدمااغ: زعما كايبغيها؟ لا..لا مايمكنش


فاش الافكار كاتكون متضاربة فالعقل وغير كاتخبط ..وفظل التشويشات والروينة اللي كاتنوض فيه ..القلب كايولي هو المسير ..هو المتحكم وهو الحاكم..
ببساطة فينما مشاك كاتمشي وحق الرفض ماشي فصاليحك فديك اللحظة..الاجدر انك غير توافقو حسن مايتولد فيك شي انفاج..احتمال تخرج من فمك هضرة كاتعنيهاا ولكن ماباغيش تگولها..احتمال دير شي تصرف متتلدد ديرو ولكن ماباغيش طبقو..احتفال تنساحب ولا تتقدم من شيء خط احمر بالنسبة ليك ولكن رجليك هوما اللي كايقودوك ..هادا هو القلب..وهو السبب فكلشي..مرات كاتكون قيادتو نافعاك..ومرات.. كاتحس بيها غادة بيك للهلاك .

خرج للجردة بعيد على الناس وبقا واقف كايفكر فوق منو السما مليئة بالنجوم والقمر منور عليه...
تفكير يديه وواحد يجيبو وغليل حاار شاعل فداتو مصدرو هو القلب..داك القلب اللي كرهو كتر من اي حاجة فالدنيا.. كون غير كان بيدو .كوون غير قدر يتمنى امينة وحدة كانت هي يقطعو طراف وينتاقم لراسو على گاع الحوايج اللي طاح فيهم بسبابو واللي بلاا حسااب..كان غايخسر حياتو..خسر رجولتو ونفسو الحارة اللي من طفولتو وهو كايرممها..خسر اللمة اللي كانت بينو وبين اسرتو الصغيرة.. ودابا دور على من؟؟..صاحبو..داك الولد اللي تعرف عليه وهو صغير..كان كبر منو شوية ولكن فالعقل والتفكير متقاربين وحتا الحياة قساة عليهم بجوج..اللول جداتو كانت كاتعدبو بالمعقول وباش يضبر على راسو كان خاصو يخرج يخدم وينسا شي حاجة سميتها الدراسة..والتاني تخلا عليه الاب ديالو وخلا ليه هم ومسؤولية حاملها لراسو قبل مايتسنا شي واحد يعاونو..تلاقاو بجوج فواحد المضاربة اساسها شي شماكرية كانو بغاو يشفرو جمال وتما بان تاج ودافع عليه واخا كلا الدق..ومن تما وهوما واكلينها بجوج خدامين بجوج ضاحكين بجوج وباكيين بجوج..حتال نهار غايقرر رجل الاعمال "ادهم العوماري".. يتبنا جمال، باش تتبدل حياتو مية وتمانين درجة..ويبقا تاج على ديك الحال حتا بانت عصفورة المشاكل فحياتو باش تتبدل هو كدلك مية وتمانين درجة..

..تلاقاو من بعد سنوات ورجع داك حنين الطفولة مرة خرا ورجعو عشران ديال الصح.. ولكن شنو دابة.. وهي داخلة للخط شنو ناوي دير السي تاج..غاتعاود تخليها دمر هاد الجزء اللي باقي مصلح.. ضحك بسداجة على سؤالو.كأنو الامر اصلا بيدو ..كأنو ماشي هو اللي عاد دابا هدد صاحبو يلمح ولو طيفها..كأنو ماشي هو اللي حس بنيران الغيرة مزندة فيه وهو كايشوف ايدين على رقبتها وضحكتها مرسومة فعينين صاحبو..حط ايديه على راسو ضاغط عليه وعينيه مسدودين صافي حتال هنا وباراكة..قاطع هلواتو ورجعو للواقع صوت تيليفونو..زفر بضيق وجبدو لقا اسم ختو

تاج الدين: الو

نجاة: تاج الدين فينك. واشفالدار

قوص حجبانو: لا خارج ..مالك صوتك شنو واقع ..ياكما الباشيير؟؟؟؟

نجاة: لا لا غير بغيت نهضر معاك ضروري

تاج الدين: غدا فالصبااح ندوز عندك

نجاة: ضروري اتاج الله يخليك

زفر ورد عليها: انا دابة فدار جمال.. عرفتيها؟؟

نجاة: اه عرفتها واصلا قريبة لتما..خمسة الدقايق ونكون عندك

تاج الدين: واخا انا كانتسنا

نجاة: بسلامة
لاحت الطيلي حداها مخنزرة وزادت على الكسيراتور متجاهلة اتصالات هدى المستمرة..دقائق ولقات راسها قدام الڤيلا هزات البوصلة وتيليفونها وتمات داخلة كاضور عينيها بصدرها اللي طالع نازل ناوية على خزيت ..حتا قشعاتو من بعيد فين واقف وتوجهات لعندو


زادت على الكسيراتور متجاهلة اتصالات هدى المستمرة..دقائق ولقات راسها قدام الڤيلا هزات البوصلة وتيليفونها وتمات داخلة كاضور عينيها بصدرها اللي طالع نازل ناوية على خزيت ..حتا قشعاتو من بعيد فين واقف وتوجهات لعندو

نجاة: تاج

ضار عندها بتساؤل والتخنزيرة على حجبانو: ياك لاباس شنو كاين

نجاة: بغيت نگولك شي هضرة ..ولكن قبل 

...حلات يدها ومدات ليه البوصلة..تحلو عينيه كتر فاش شافها ودغيا خطفها من يدها مخنزر ونطق بصرامة: نتي شنو قربك لحااجتي هضرري..شنوو وصلك لحاجتي

نجاة: ماشي انا اسي الشريف.. من شحاال هادي وانا عارفاها تماا وعممري هزيتها ولا سولتك عليها

تاج الدين: و بالسلااامة دابا علاش وااخدااهاا

نجاة: گلت ليك ماشي انا.. شوف نتا شمن نوع ديال البااشاار اللي وليتي مدخلو لدارك ومخلييه كايخلوض وراك

تاج الدين: جيني نيشان المررض هااادي فين لقيتيها

بنفس حدتو ردات عليه: عند هدى فالداار

تاج الدين: هدى؟؟؟

نجاة: ااه هدى و حتا ..."قاطعها الطيلي كايصوني بفات تقطع هي تلقاها عيشة"

تاج الدين: شكااين

نجاة: عيشة..واقيلة تشوشات عليا حيت باقي مارجعت للدار..انا نجاوبهاا ونجي عندك

بعدات عليه وردات..فحين هو بقا كايفكر راسو عاطيه الصداع والحريق وغير كايضورو..حتا بانت ليه صاحبت دعوتو واقفة مع أميمة كايدويو وعاوتاني بلا تفكير مسبق وبلا تردد قادوه رجليه لعندها

أميمة: گلتها لييك.. وهانتي شوفي حالت خالو كيف دايرة

تنهدات بألم: شي حاجة صعيبة .. ضرني خاطري فاش عرفتها حيت حاسة بيه

أميمة: معلوم صعيبة وخصوصا هو بحال باه.. هيام عافاك بدلي رأيك بخصوص داك الموضوع عافاك

حركات راسها كاتشوف قدامها بسهوة: دوك الفلوس كتت محتاجاهم كتر من أي واحد وكانت حياتي محطوطة تما..ولكن ماغانقدرش بعدما عرفت باللي حتا هو محتاج.. انا ماشي هاكة اأميمة..وهو مايستاهلش بصح..فشكل..شوفاتو..هصرتو..طريقت تفكيرو..كلشي فيه فشكل

أميمة:بلاتي بلاتي بعداد. مافهمتش كيفاش حياتك محطوطة تما؟؟

هيام: ماشي وقتو دابة.. المهم خاصني نفكر فشي طريقة ندبر بيهم على الفلوس 

أميمة: وبالتخلويص تاتي..رجعنا لنفس المووضوع مرة خرا يااك "وصل عندهم تاج وطاحو على ودنيه كلماتها اللي نزلو بااردين على داتو " ... صافي حاولتي مرة ومازدقاتش ادن باراكة وزايدون غير فكري هانتي گاع قدرتي ضحكتي عليه وخليتيه يبغيك فنضرك غادي يخلي ليك ادارة المشروع غير هاكاك..بالعكس داك الوهم اللي ناوية تگيديه بيه يقدر يتقلب ضدك نتي وممكن تولي نتي....

قاطعاتها بصدمة: تاااج الدين


ضارت أميمة بسرعة لقاتو وراهم مخنزر فيها.. شوية ضحك وسفق عاد ضار غادي فحالو دمو فااير وكايغلي غلياان ..قبل ماتلحق عليه خنزرات فأميمة اللي شافت فيها بأسف ومشات هي تابعاه كاتعيط عليه من اللور.. وقبل مايطلع شداتو من ايدو نترها بالجهد دافعها ومغووت بحرر جهدوو فوجهها

تاج الدين: مااتقييصينيييش

سرطات ريقها وعروقو بغاو يخرجو غير كاينهج ويزير على فمووو

هيام: تاج عافاك خليني غير نشرح ليك.. نتا فهمتي غلط والله العظبم ماقصدت انا بالصح فالاول..ء ء ااه كانعتارف كنت كانحاول ناخد ديك الخدمة بوحدي حيت بصح محتاجة..ولكن دابة ..مقدرتش.. سمح ليا عافاك سم..

قااطعها قاارن حجبانو ومقرب ليها:: بغييت غيير نفهم ابناادمة غيير شرحي ليااا من إيناا طيينة نتي ؟؟؟ منإيييينة طيييينة واااش بناادم نتييي "ضاار كايضرب واجهة سيارتو" كلااا مرة كلااا مرةةة نففس الحاااجة واااش ماكاتحسييش

صوت زئيرو المجرووح خلعها وخلا علامات التساؤل تبان على وجهها وعدم الرضا على كلامو

هيام: ااه اانا غلطت واخا ولكن زدتي فييه مااعندكش الحقق تهضررر علياا هااكا

شدها من ايديها مورك ووجهو على وجهها: وماازااال عندك الوجه بااش تهضري ؟؟؟ صاافي كللشي باان اهياااام وهااد قنااع البرااءة غييير حيييديه ..اناا واللييت كانعرفك مزياان تااج ديال شحاال هاادي مااشي دياال داباا كاتفهمي... ماغااتعااوديش ضحكي علييه مرة خراا ..ماغاتقدرييش

هيام: بعد منييي "دفعاتو بكل قوتها حتا رجعات اللور وهزات فيه راسها بعصبية " نتااا مرييض فرااااسك.. شهااد التخربيييق كاتگوول انااا فين عممري عررفتك اااصلا

تاج الدين: ماكاتعرفينيش؟؟؟ ههههههههه
عندك الحق ااه..مريض انا مريييض.. عرفتي علاش "رجع للغواات تاتي" حييت بااااقي منسيييتك كيفمااااا دررررتي نتي..مرييض حيبت سمحت لقلللبي يگيييدني گااااع هاد السنييين..ومرييييض أكتررر حاااجة ..حيييت كنبغيييييييييك 

بقا واقف قبالتها كاينهج وهي جمدات فبلاصتها مابقات قادرة تزيد ولا تحبس.. كلمة وحدة من گاع كلامو خلات دبدبات قلبها يخدمو ويزنزنو عاطينها الحريق..كلمة وحدة خرجاات من فمو خلات الكاس يفيض ولهنا وحبس..صافي باراكة، وهادشي نيت اللي نطق بيه بهدوء وتعب

تاج الدين: صافي باراكة.. لحد هنا وباراكة..نتي مابقيتيش فحياتي اهيام.. عمرك كنتي وعمرك غاتكوني..وكانقسم ليك باللي خلقي حتا ننساك كيفما درتي.. واخا ماعرفت شنو يوقع غانمحيك منو "حط ايدو على قلبو".. بقا تواني كايشوف فيها بعدها جبد من جيبو لبوصلة ..شاف فيها وبسم قبلما يهز يدو ويلوحها ليها حدا رجلها ..زاد كمل على مابيها وزادت الرعدة ركبات فكيانها

تاج الدين: مابقيت بغيت حتا حاجة تجمعني بيك..حنا سالينا 

ضار ركب فسيارتو وديمارا غادي فطريقو بعينين مغرغرين حمريين وقلب محروق مجروج ..مخلي نصفو التاني وراه كاينزف دم بخناجر كلماتو..مخلي نصفو التاني وراه كايلهت من شدة الاختنناق والروح كاتبغي تخرج منها..مخلي نصفو التاني وراه راسمة على عينيها ضبابة حتا طاحت على طولتها وسط الشاريع ..مخلي نصفو التاني وراه بحريق..وهو محروق


تكسرات..شتات وشظايا وأطراف زجاجية منتورين فكلا جيهة من قلبها ..
مجرد التنفس صبح موجع حد الموت ليها..
.....اييه الحب زوين ! الحب خيال لادع الروعة..الحب إحساس متالي مرهف وهش.. وشكوون فينا اللي مايتمناهش؟ داك الحب الصادق اللي يحسسنا باللي صح كاين اللي مهتن بينا حق الاهتمام دون مقابل.. داك الحب المرهف اللي باستطاعتو يرسم بسمة سعادة على شفاهنا دون عناء.. داك الحب اللي باستطاعتو يرسل لقلوبنا نسمة باردة و الى لامساتو ماكايتسكتش من الخفقان.. وشكون فينا اللي ماكاينتمناهش.. ولكن مع دلك ..كانتغاباو ..كاننساو مانتفكرو باللي لكل شيء جانب ابيض وأسود..اي حاجة ايجابية الا وعندها سلبياتنا 
..وحتا الحب 
..كيفما كايدير لينا جناوح ريشية ويطيرنا الفوووق بحال ورقة شجر ط تنقلات بيها الريح فالجو ..
بامكانو يملأ اكتافنا هم وغم ويتقل قلبنا عداب حتا نطيحو لتاااااحت وبقوة
..طيحة خايبة قاصحة موجعة..
قاصحة لدرجة واخا تنوض مرة خرا ماكاتبقاش قطعة واحدة !!! 
شي حاجة كاتبقا فالارض ولو فتات ولو غبار..
ضروري ماكاتموت فيك شي حاجة اولا كاتتهرس اولا كاتفيق اولا كاتحيا وتتولد من جديد ..
وشكون عرف شمن تغيير سرا فيها بعد هاد الوقعة..
هي بنفسها مافاهماش.. مافاهما والو من غير الصداع اللي غايفرق ليها راسها وعينيها التقاال بصعوبة باش كاتحلهم ..
ودنيها اللي كانو سااقلين رجعو كايتاقطو اصوات متداخلة بعيييدة ومن بينهم آلة تخطيط القلب ..
عرفاتو دغيا حيت سامعاه شحال من مرة وماخداش منها الامر بزاف حتا وضاحت ليها الصورة ولقات راسها فوحدة من غرف الكلينيك ناعسة ..رمشات مرات متعددة فالسقف..
حلقها تاشف، فمها ناشف، عينيها ناشفين والحياة نشفاات عليها، كلشي جاف وشحاال متمنية اللي يرويها فهاد اللحظة

..تحل الباب ودخل جار رجليه التعب باين على وجهو من عينيه اللي ماشافو نعاس حالهم غير بزز..دخل كايتفوه وكيف بانت ليه حالة عينيها وموجهاهم عندو وسع عينيه والبسمة كاترسم زرب عندها شاد يدها بلهفة ووأخيرا ابتاسم

جمال،ة وااش صاافا كيكااتحسي دابا مزياان؟؟؟

ماقدراتش تحل فمها وتهضر غير كاتشوف وتسد عيونها بالتقاالة.. عاود باس ايدها ونطق بخوف واضح فعينيه

جمال: خلعيتي عليك بزاف الحممقة ههه.. الحمد لله ماشي شي حاجة كبييرة غير ارتاحي ..انا غانعيط للطبيب ونرجع ليك 

باسها فجبهتها غطاها ضاحك فوجهها ورجع خرج لقا عاليا وعمر قدام وجهو جايين وفيدهم القهوة

عاليا: امضرا فاقت؟؟

طمنها بابتسامتو: اه فاقت اخالتي كوني هانية راها بيخير..غانمشي نعيط على الطبيب يشوفها 

تنفسات الصعداء وهمسات: الحمد لله .. الحمد لله ياارب

عمر: واخييرا ..سبقهم داخل عندها وموراه عاليا كاتزرب حتا هي و بقا جمال كايشوف فيه من اللور وضاغط على فكو..
من بعد ضار جيهت مكتب الدكتور اللي مكلف بحالتها


بجوج واقفين حدا راسها والخلعة على وجههم غيرها هي اللي ساهية بجموود .. 
عاليا يدها على شعرها كادوزها بحنية وعيونها مرققين بدموع حارقة

عاليا: يااكما كاضرك شيحاجة ؟؟؟ ياك مزيان بعدا

بسم عمر بزز كايشوف فحالتها فداك السرير: هيام قوية اعاليا "شك يدها باسها مطول ورجع تكلم" حبيبتي ماكايناش الحاجة اللي طيحها الارض.. عارفك قدها وماغاتخلي حتا حاجة تغلبك 

شافت فيها عاليا بتساؤل: ولكن انا مافهمتش شنو وقع؟؟ مالكي حتا جاك انهيار عصبي ..واش شي حد دار ليك شي حاجة ؟؟

...زيراات هيام عينيها على اتر تساؤلها وفنفس الوقت تحل الباب ..دخل الطبيب ومن وراه جمال اللي داز للجنب لاخر حدا عاليا ووقف

الدكتور داز كايقلب آلة تخطيط القلب والسيروم: انسة هيام.. صافا شوية؟

حركات راسهة ببطئ كاتسرط ريقها باغاا تهضر وبشدة

الدكتور: صافا دابا مزيان..حالتك مستاقرة خاصك ترتاحي مازال وماتجهديش على راسك..نوصيك بالراحة الراحة الراحة ههه

جمال: لا كون هاني ادكتور "غمزها بشر" واخا نعرف نكتفها

الدكتور: ههه مزيان اسيدي اللي بان لك ديرو ..المهم تبقا محافضة على اعصابها

-نطقات بصعوبة ..كلامها كايخرج مقطع والصوت مبحوح: بغيت.. نخرج

الدكتور: لا اانسة خاصك مازال ترتاحي.. وهنا انسب ليك

هيام: لا "سرطات ريقها وكملات" كانتخنق هنايا ..بغيت نمشي

جمال: بلا ماتقصحي راسك اهيام صبري شوية..غير حتا تستاقر حالتها بعدا

عمر: دكتور الى بغات تمشي خليها.. الى ماكان حتا خطر على حياتها

الدكتور: لا بصراحة ماكاينش.. غير خاصها ترتاح مازال

عمر: ادن نديوها للدار وتما حنا غانعتانيو بيها

الدكتور: واخا اسيدي اللي بغيتو.. شي واحد فيكم يمشي معايا نعطيه الادوية اللي خاصها تاخد ويسني بعض الاوراق ..ومايكون عندك باس اانسة 

بسم ليها ومشا خارج.. عمر تحنا باسها فجبهتها كايتنهد ومشا تابعو

..فحين جمال شد يدها وتكلم زعفان: راسك قااصح داابا شنو فيها الى تسنيتي مازال 

قلبات عينيها مافيها اللي يسمع شي حاجة: سكتني عافاك.. اففف

عوجها: سكتني عافاك 

عاليا: ولدي جمال ..صافي تقدر تمشي ترتاح شوية.. من البارح ونتا سهران حداها والعيا باين فوجهك

جمال: لا انا بيخير اخالتي.. بغيت نوصلها باش نطمن عليها كتر

عاليا: بلا مانعدبوك كتر اولدي انا غانرد ليها البال

بانت على وجه هيام ضحكة استهزاء وهو رد عليها بهدوء: ماكاين حتا عداب بالعكس هاكدا غانتاح كتر "صونا تيليفونو وشاف فيهم" انا راجع

عاليا: خود راحتك اولدي

.. خرج ساد وراه الباب..شافت فيها عاليا وهزات يدها كادوزها على راسها وحرقة فقلبها بالمقابل هيام سدات عينيها بقرف وقلبات وجهها محدتاها بصعوبة

هيام: ماتقرصينيش

جاوباتها بصوت مغنن بالدموع: هيام ماديريش هاكا ابنتي ..كون تشوفي حالتي البارح كنت غانموت

هيام: كانعرفك مزيان امدام عاليا . كانعرفك مزيان

عاليا: انا كانبقا ماماك.. يوقع اللي بغا يوقع بيناتنا نتي بنتي وقطعة من روحي وأنا ماماك

هيام: خرجي

عاليا: هيام عافا حبيبتي

هيام: گلت ليك خرجي..برا

..مسحات دموعها وقربات باستها واخا بزز وضارت خارجة بدموعها اللي كاينزلو


جمال: فين غاتجي راحنا اصلا راجعين..وصاافي واش غاتبقاي دمعي عليا تماا بلا ماتنيرڤيني على الصباح

أميمة: واحلف بالله حتا راها بيخير

جمال: كانتمالغ معاك انا دابة هادشي فيه الضحك

أميمة: واخا انا غانلبس حوايجي دغيا ونسبقكم للفيلا ..عشرة الدقايق ونكون تما

جمال: عاد فايقة؟؟

أميمة: اه .. مابغاش يجيني النعاس البارح

زفر مهدن صوتو ورجع دوا معاها بحنية: هي بيخير ااوما بلا ماتتشوشي..دابا سيري فطري.. وخودي دوش سخون ترتاحي فيه بينما جيت للدار باش نوصلك

أميمة: لا ماعندي شهية للماكلة 

جمال: هضرت معاااك صااافي واش باغا تجي طيحي حداااها؟؟ 

أميمة: واداابا ماالك كاتغووت عليااا؟ اناا باغة نشووف صااحبتي غاتمنعني عليهااا

جمال: بغييتي تشووفيها تسنااي حتا نجي انا ونوصلك هاادشي الى لقيتك درتي اللي گلت ليك عليه شي حاجة خرا لا..يالله تهلاي 

قطع كايتمتم بعصبية بعدها رجع عندها للبيت

★★★★★

بالمكتب ديالو ووسط الوراق والبلانات اللي بات كايرسمهم كان غارق .. لابس تيشورت ابيض فوقو ڤيسط گرية ودجين كحل..
تدق الباب وهز راسو مغوبش ناطق بحدة وصوت حرش قوي

تاج الدين: دخل

تحل الباب ودخل حسام كايصفر راشقة ليه ولابس الرسمي فالابيض: صباح النور شريك

نزل عينيه لخدمتو: عاام باش توصل . مزيان اسي مزياان

حسام: حيت صاحبي هو مول الشي ادن عادي هههه

تاج الدين: بقا تفرنس حتا نهجرو ليك شي نهار ..ارا داك الزمر هنا

عطاه الملف كايضحك: اماالك تاني على الصباح.. شفتك ماشي على بعضك

تاج الدين: تلت يام باقي ماوجدنا فيها تا زمرة ..دابا الوزاني فاش غايتاصل شنو غانگولو ليه بغيت غير نفهم..تفوو العكس

حسام: بشوية عليك باش تعرف تقاد داكشي راه مازال الحال

تاج الدين: فين مازاال فيين كون كنت بوحدي دغيا غانغيز الشغل ونوض نايض.. ولكت ملسق فيا البراهش "مد صبعو وصونا على المساعدة ديالو تجي "

حسام: بعدا راخاصنا ندوزو للسبيطار.. اليوم غادوز الدكتورة تشوف حالت الباشير

تاج الدين: عارف ..نسالي هادشي ونمشيو بجوج

دقات المساعدة الباب سمعات منو الادن ودخلات هازة الاجونضة ديالها: وي ميو العورابي

بحدة جاوبها: العلالي جات

المساعدة: لا امسيو مازال

ضحك باستهزاء: مزياان ..وعلاش بالسلامة

المساعدة: ماعندي حتا شي خبار امسيو وماخلات حتا ملاحظة عند المساعدة ديالها

تاج الدين: اتاصلي خبريها باللي غدا فالصبااح غايكون اجتماع بيني وبينها ياويلها ماتجيش..وهاد الوراق قاديهم معاك حتا نرجع واللي خاصو يهبط للادارة لتحت هبطيه

المساعدة: داكوغ امسيو

خنزر فحسام اللي ضاحك كايشاطي : نوض نتا يالله 

حسام: هاهو نايض غامتعضش ههه

مشا من وراه كايحاول يلحقو وهو زربان مخنزر وغير قارن العشرة


عيشة: اهااد البنت راااه السككر غايطللع ليااا والله وطحت لييك حتا تكووني نتي السبااب

نجاة: السيينتاا ماجاتكش لا؟؟؟

خرجاات عينيها بالغداايد: وااش باغا تسطيني باغا طرررطرقي فياا شي عررق

نجاة: حيدي عليا غاننسا شي حاطة.. ويلي فين حطيت بزطامي؟

مشات كاتقلب فالبيت لابسة حوايج الخدمة وعيشة وراها ببيجامة ديال الدار كاتنگر 
بالعاصااب وحدة راسها قاصح والتانية گالت ماتعرفيييش 

عيشة: اناا بغييت غيير نعرف واش انا مك ولا ولا عددوتك علاااش ماكاتسمعيش ليا علاااش

بهدوء وابتسامة بااردة ردات عليها: امي.. ااالحبيبة ديالي شتي نتي كاتقطري ليا من عوينااتي حبي وقلبي ورووحي اييه ماگلنااش لا..واااالكن حتاال انو خوويا انا يتزووج بدييك خاانزة الرجليين ومااشي بهااديك اللي عشر سنيين وانا كانشووفو كايتمررمد على قبلهااا..لا.لا.لا

عيشة: هدى هيااا اللي تصلاااح ليييه. بنت النااس والاصل عارفين مهاا الله يعمرها داار وحتا باها الله يرحمو كان رجل حقااني والدرية من صغرها وهي حاطة عينيها على خوووك بسباابو رجعاات شحال من واحد كان ناوي يخطبهااا..هااادشي ماكاافيش بالسلاامة

نجاة: اه اه مسكيينة بقاات فيا واحيدي حيدي خانقلب فالبلاكاار

عيشة: وايااك شفتي غادييك خيتي اللي حااطة فدااك الطانطوون؟؟ بلااا ماتحلمي خووك برااسو ماابقاااش بااغيهااا جنااافو علييهااا وعلى ماايجي منهاا

ضارت ليها حاطة يديها على خصرها: ويااك شتي غاديك هدهد اللي حااطة فرااسك ؟؟ وانووون كحل العيون لا دااها وبلا ماتكملي ليا الكاسيطة ديال البارح راه زنزنتي ليا غير ودنيا أما اللي فرااسي فراااسي ماكاين اللي يبدلو 

عيشة: نتي راااه بنتي ليااا كااتقلبي على السخخخط ورااه غااتلقاايه

نجاة: عرفتي شنو.. هاد البزطام ماابقينش باغااه انا الا زدت معاك دقيقة هنا مازال راسي غايتشتت

دازت خدات ساكها غادة تخرج وكاتسمع الدعاوي الزينة موراها 

عيشة: بغييت لييك تشتييتة نييت الحماارة بغيت الليي يركب فييك هاد العاصااب اللي مركبة فيااا 

نجاة: حتا كانبغيك اعويشتي

.....سدات الباب نازلة كاتزفر قارنة حجبانها بحييرة.. حلات اللوطو بالكونطاكط وطلعات رادة ضهرها اللور ..
خدات تيليفونها جبدات سميت هيام ودوزات رمقها ولكن لقاتو طافي.. عاود صونات ونفس الشيء هي تلوحو حداها زامة فمها وكاتفكر 

نجاة:خاصني ضروري نهضر معاها..ولكن كيفاش كيفاش؟؟

حلات عينيها تاني وهزات الطيلي دوزات رقم ودارتو فودنيها: حساامو صباح النووور

★★★★

دخلها جمال لبيتها وهي مسندة عليها كاتجر رجليها بعيااء.. حطها على السرير بالشوية حتا تكات وغطاتها عاليا وعمر 

عاليا: نطلع ليك الفطور دابا ءء فيك الجوع

حركات راسها بالنفي وفنفس اللحظة دخلات اميمة كاتجري عندها ووقفات حدا الباب كادمع فاش شافت وجهها الصفر وجرحة خفيفة على حنكها


وقفات قدام الكلينيك سيارة ميرسيديس سوداء كاتبري..
تحل الباب ونزل منها طالون عالي اسود موراها بانت كلها بطلة انيقة بهية" الدكتورة الجميلة جميلة" بلباسها النسائي الانيق وشعرها الاشقر مسرح طويل والتسبسيبة نازلة معاه..

سدات الباب وتمات داخلة هازة راسها حتال عند للاستقبال: السلام

البنت : بون جوغ لالة باش ممكن نساعدك

جميلة: بغيت نزور واحد المريض وفنفس الوقت بغيت الدكتور اللي مكلف بحالتو

البنت: الإسم ديالو عافاك

سكتات كاتسوف فيها تواني.. خدات نفس متقطع ونطقات اسمو اللي سنين ماستشعر لسانها حلاوت نطقو

جميلة: الباشير ..ايت الحاج

البنت: دقيقة عافاك..الطابق الخامس الغرفة رقم 108 ..والدكتور ديالو هو الاستاد شكيب

جميلة: شكرا ليك

البنت: العفو ههه

مشات ركبات فالاسنسور دارت رقم الطابق كاترمش قدامها تقوي نفسها. تحل وبقات غادة ساهية ودقات القلب اللي كانو شبه ميتة عندها حاسة بناقوس الخططر كايقرب ليهم ماحدها كاتزيد خطوات ليه 
..دارت للكولوار وبان ليها تاج الدين وحسام گاسين حدا بعضياتهم كايدويو شافوها وناضو بابتسامة عندها هي نيت اللي كانو كايتسناو

جميلة: السلام

تاج الدين: وعليكم السلام.. شكرا حيت جيتي

بابتسامة ردات عليه: عطيتك كلمتي و كون هاني انا كانوفي بوعودي

تاج الدين: مافيهاش شك.. تفضلي 

حركات راسها وزادت للغرفة مدات يدها حلات الباب بتوتر ودارت اول خطوة للغرفة الباردة فين كان ناعس عريان من الفوق وقناع الاكسجين على فمو مغطي نص وجهو..
قربات جيهتو خطوات متتالية ومعاهم كاتشوف الزمان اللي فارقهم شنو خدا منو..من غير العمر شنو تبدل فيه مازال شنو تزاد فيه من غير هاد التگلضيمة اللي كاتشوف وشنو نقص من غير اللون الاسود اللي كان فشعرو ورجع معصمو بيض؟
..طول السنين اللي فاتو وهوما مفارقين كانت صورت داك الولد الخدام عند باها هي اللي مترسخة فدماغها فقط.. دابا وهو ناضج خمسيني كي غايكون ؟

تاج الدين:الطبيب ديالو غايجي واحد الشوية باش يعاينو وهو اللي غايعطيك تفاصيل ادق على حالتو

حركات راسها بالزربة: الدكتور شكيب هو اللي متبع الحالة ديالو..من الاحسن نمشي نتسناه فالبيرو

حسام: انا غانديك للمكتب.. تفضلي

..مشا معاها سابقها وهي وراه كاتعراق وتنشف حاسة بالغلط هو اللي كادير فهاد اللحظة وبلا تفكير كاتتحرك بدون دراسة لخطواتها..اللي حاسة باللي غايطيحوها فمالا يحمد عقباه

.....

تاج شاف فيه شوفة مألمة حمارو عينيه ككل مرة كايشوفو فهاد الحالة وقرب باسو فراسو مبسم نص تبسيمة كايهمس بينو وبين نفسو: نوض اصااحبي خلاص.. نوض صافي راه خلعتينا عليك ..الى ماشي على قبلي على قبل جمولتك هه هاني قلبت ليك عليها وجبتها حتال عندك باش تعرف راسك شحال غالي عليا..وانوض باراكة من العگز "سكت شوية مزير فمو حتا حمارو عينيه كتر ونطق" انا محتاجك.. محتاجك فهاد المدة بالدات ماتصورش شحال..راسي غايتفرق اخالي ومحتاجك تگوليا شنو ندير
..... تنهد بحرقة رجع باسو ساد عينيه وحيد كايجر رجليه وخارج فحالو..تسد الباب..معاه تسارعو خطوط آلة القلب بسرعة والباشير هز صباعو كايحركهم


والدمووع نازلين على خدودها حجر زاادت تكوورات على رااسها فوق نامووسيتها كلشي خرج من غير اميمة اللي تلفات مابقات عرفات شنو تگول بعد هادشي اللي سمعات 

أميمة: البكاا دابا لااش غاينفع اهياام غير فهميني.. عاد خرجتي من السبيطار ماديريش هاد الحالة فراسك

ردات عليها بحرقة حاارة فقلبها: كون غير مافقتش ..كوون غير بقييت ناعسة تما "انهارت بالبكا كاتغوت" علااااش تفكرتوووو علاااااش علااااااااش

أميمة: شششش عافا حبيبتي باراكة فففف انا دخت والله حتا دخت.. علاش گاال ديك الهضرة متلااا علاااش

هيام: رااجع يممررضني فحيااتي هءهءهءهء حتاا گللت نسييتووو وعااود فكرني فدااك العداااب هءهءهء علااش يوقع ليا هاكا ااميمة علااااش 

أميمة: عاجلا ام اجلا كنتي غاتتفكري والدوا ماشي حل ..زاايدوون مااشي نتي اللي خاصها تبكي ..هو اللي طلع شمااتة كايلعب بيك ومستاغل ضعفك وهو اللي خاصو يتعدب مااشي بالعكس 

ترعد صوتها بالكاامل وشهقاتها كايعلاو كلما كاتتفكر كلامو وغير كاتهضر ماكاتسمع حتا حرف من عند اميمة : كاااان هو النوور اللي عاود نور حياتي، عممري حليت قلبي لشي حد من غيرو واخا ماما عممري حسييت تجااهها هاكااك هءهءهءهءهء فالاخير طلع كلشي كدووب ومن ورا ضهري كايضحك عليااا وجاا كايگووليا كااايغيني علاااش علاااااش هءهءهء بسباابو دمررت صحتي وتبليت وبسباابو دخلت للمصحة وشفت فيها العدااب دياال بصح هءهء الله يااخد فيه الحق علاش رجع علاااش

اميمة: هياام واعافاك باراكة راه كاتخلعيني..السبب الوحيد فحالتك هو داك الدوا اللي كانو كايعطيوك الاطباء كون خلاوك عاقلة على كلشي كون راك دابا ناسية الموضوع ورجع ماضي.. اما دابة فااش جا وفكرك فكرتيه غاتحسي بحال الى غير البارح

هيام: ماافهمتينيش ااميمة هءهءهء انا عمرري غانقدر نتساه عممري هءهءهء

كملاات البكا وكلها كاتتهز..حريق الماضي فاش اداها وحديق كلامو الليلة الماضية وحريق الشووق اللي كانت كاتحس بيع وحريقة الوحدة اللي شعلات النار فقلبها عشر سنين وحريق الفراغ اللي كان مكتاسحو وبسباب العلاج من الادمان وكترت الادوية اللي كانت كاتاخظ فالمصح تمحا البعص من الدكريات الاليمة اللي نمكن تخلبعا ترجع لااعاطي المخظرات ولكت ناكافيييش..تجمع عليها كلشي وكلشي لاحو ليها دقة وحدة غير داري بالي رما ليها قنببة ماسي غير كلام عادي..قنبة فيصات كاسها وطيحاتها بالاعصاب هز ها اورجونص للصبيطار وكونما التدخل السريع كانت غاتمشي فيها..واخا حالتها دابة لا تقل على حال الميت النق اللي كاطلع لداخل كاتخرقها بحال اي حاجة خرا فيها...

تنهدات اميمة وخاطرها مزير عليها مابقات عرفات كيفاش تواسيها: غانمشي نجيب ليك تضربي واخاا.. ونشوف نيت جمال واش جابليك الدوا ديالك

بقات على ححالتها مارداتش عليها ..باستها وناضت كاتزفر نازلة لتحت..خلاتها ضارت كاتشهق والما ناازل من عينيها حيدات الغطا جاارة رجليها للحمام..سدات الباب وراها ومشات للبلاكار ايديها ميتين عليها وبزز باش كاتحركهم على الفوطات فالاتو كامل وااالو مالقاتش داكشي ديالها عرفات باللي مها اللي هزاتو..
زادت فوتيرة البكا وجرات شعرها بالغداايد ولاات كلها حمراا سخووونة حالتها كاتقطع القلب..مسحات وجهها بالنترة وضارت فاس تفكرات لبلاكار لاخر..
حلاتو و جبدات بواطة فيها دواور ملونين كايطلقو الريحة فالحمام لاحتهم فالارض وفالقنت كانت ملسقة واحد الگارو وبريكة هزاتو بلهفة ومشات للباب گلسات متكية عليه ودارت الگوارو ففمها شعلاتو جبداات مزياااان عاد نفخات الدخاان فالجو داير على ووجهها اللي فازگ دموع و نطقات بعتاب كتأنبو على حالتها: علاش رجعتي.. علاش


عاليا: وزعما نتي ماعارفاش شنو طرا ليها ولا كيفاش حتا وصلات لديك الحالة؟؟؟

اميمة: لا اخالتي.. بحالي بحالكم حتاا انا تصدمت فاش شفتها هاكاك البارح

رمقها عمر بدون تصديق ودوا بحدة: ولكن نتي صاحبتها وماكاتخبي عليك والو زعما ..مايمكنش تكون ماگالت ليك والو

دوات مع عاليا: داكشي اللي عندي گلتو اخالتي غيرو انا ماعارفة والو .. هيام دابا خاصها غير ترتاح شوية.. وبينما جاب ليها جمال دواها انا غانطلع ليها تشرب 

عاليا: واخا احبيبة..و شكرا معدبينك معانا

أميمة: ماتگوليش هاكا هيام غالية عليا
.....بسمات ودخلات فإتجاه الكوزينة فحين عاليا وعمر شافو فبعضياتهم الحيرة غاتقتلهم وحتا واحد ماعطاهم راس الخيط..تنهدو بجوج وكلها فين داز يتلف..
..

فحين تدق باب الفيلا ومشات الخدامة حلات لقلت نجاة فوجهها كاتبسم

نجاة: السلام

الخدامة: وعليكم السلام الالة شحب الخاطر

نجاة: هادي هي دار هيام ياك اختي

الخدامة: اه هي هادي

نجاة: انا صاحبتها..كاينة ياك

الخدامة: اه دخلي الالة زيدي مرحبا

نجاة: شكرا ... دخلات كادور عينيها غادة تابعة الخدامة .. وفنفس الوقت كانت اميمة خارجة من الكوزينة هازة كاس الما شافتها وطلعات حاجب مستاغربة 

أميمة: السلام!!!!

انتابهو ليها بجوج ودوات الخدامة: لالة اميمة هادي صاحبت لالة هيام..جات بغات تشوفها

شافت فيها مستغربة: صاحبتها؟؟

مدات نجاة يدها بابتسامة: انا نجاة
ابا عاد تحلو عينيها فاش سمعات السمية وسلمات عليها غير بزز مرتابكة: ا اميمة 
"شافت فالخدامة" صافي نتي تقدري تمشي 

الخدامة: واخا الالة 

مسات وهي ابتاسمات فوجهها : بصراحة هيام عيانة دابا..عاد خرجواها من السبيطار وماتقدر تشوف حتا واحد

بخوف ردات عليها: السبيطااار ؟؟ ياك لابااس شنو عندها

أميمة: ماشي شي حاجة گغاف غير شوية العيا وصافي

نجاة: مايكون عندها باس.. بغبت نطمن عليها فين هي؟

أميمة: كيف گلت ليك هاد الساعة هي ناعسة بسباب الدوا اللي كاتاخد وماتقدر تشوف حتا حد..رجعي عندها مرة خرا

نجاة: واخا ماشي مشكيل سلمي ليا عليها الى فاقت ومايكون عمدها باس

أميمة: ماتشوفي باس احبيبة وشكرا على الزيارة

نجاة: بسلامة
خرجات مرة خرا كاتزفر راجعة فطريقها


ضلم الحال وعتم والقمر استوطن السمام فداك نص الليل...
خرج تاج من حمام بيتو بشورط قطن گري مع تيشورت ديالو كايلوي راسو حتا كايطرطق..
صونا ليه الطيلي هزو ولقا عيشة اللي متاصلة تبدلو ملامحو للتركيز وبقة كايشوف فالاسم شحال ..حتا زفر وجاوب بصوت عيام

تاج الدين: الو مي

عيشة: مسا الخير اولدي لاباس

تاج الدين: الحمد لله ونتي

عيشة: الحمد لله ..غير نتا اللي شاغلني هاد الساعة

تاج الدين: أنا بيخير ..وكوني هانية باقي شاد فكلمتي 

عيشة: الله يرضي عليك اولدي..مازال تفهم باللي هادا هو الصح وتگول كون غير درتو شحال هادي كون ارتاحييت

تنهد عيان ورجع رد عليها: غدا غاندوز عليك نمشيو نطلو على خالي

عيشة: واخا احبيبي.. تصبح على خير

تاج الدين: تصبحي على خير

قطع وزفير حار كايخرج من نيففو توجه لفراشو حط الطيلي فوق الكوافوز وتكا كايتنهد من العيا بسباب الليلة الماضية اللي حس النعاس ماشاف
...تنهد ساهي فالسقف وتفاحة آدم بوتيرة بطيئة كاتتحرك. ... 

ضارت هيام على جنبها ليمن مزيرة على الكوڤرلي ودموعها على خدها باقين سييال وااسبب كلامو الجاارح اللي كايتعاود على مسامعها حرف حرف ...

مجروحين ومقهورين كل واحد على التاني لايح اللومة 
وشكون الضار وشكون المضرور..شكون فيهم الظالم وشكون المظلوم..شكون اللي خاصو يتعدب وشكون خاصو يبكي ....

"
إلى متى وحنينُ الشَّوْقِ يقتلني
ومن يداوي جِراح الروح بالتَّلفِ؟

مازال قلبي برغمِ البُعْدِ يوجعني
كم من غيابٍ بلا عُذْرٍ ولا أَسَف 

ناشدتكَ الله هل بات الهوى ألمًا؟ 
ومن لنبضي إذا أسْرفتُ في شَغَفي؟ 

أحْيَا الحياةَ بلا رُوحٍ كَأنَّ بها 
طعم الممات بلا نَزْعٍ ولا وَجَفِ


أصبحنا وأصبح الملك لله...يوم جديد..جو مشمس جديد باعت معاه اجزاء جديدة

تحل المصعد ومنو خرج طالون جلدي بني اللون مقمقم من القدام ومغطيه شوية ديال سروال التوب وااسع و طااالع حتال خصرها النحيف تما تزير على بودي اسود مطروز بالدونطيل مماركي ليها الجزء العلوي من جسدها الفاتن .
شعرها الاسود منتور على كتافها بتمرد كايتحرك على خاطرو وعاملة لوجهها ميكاب خفيف حاولات تحيد بيه الصفورية و الخدوش على بشرتها زيد عليها عينيها اللي صبحو منفوخين حمريين بردااتهم حتا تفشو ووجهاتهم دابا امامها بعجرفة وكل تقة فالنفس 

.....

تاج الدين: ركز ليا كتر على الفينيسيو الواجهة هي اللي كاتجدب وهي الاهم

حسام: واخا هاني قيدتها .. فالعشية نعاود نرتبهم على حساب هاد المعايير 

تاج الدين: مز... "تدق الباب" دخل

..حلات ودخلات زامة فمها وبوجه ممحي نطقات ببرود: السلام

حسام: بون جوغ هيام.. ياك لاباس مال وجهك

هيام: نن ماكاين والو 

طلع نص عين فيها شاف فالجروح الخفاف اولا من بعد نطق: البارح اانسة علاش ماجيتيش؟

زمات فمها كتر وطلعات حاجب: باغدون..بحلا خدامة عندك ولا شنو

زير على فكو ومطق: خدامين بجوج اانسة والمفروض عليك تلتازمي بالوقت وتحضري كل يووم

هيام: حتا نتا نهار مرض خالك غبتي النهار كامل وكنت انا هنا فبلاصتك.. سمعتيني اشتاكيت ؟ لا ..ببساطة مكبرة عقلي وعارفة بلاصتي وبلاصة كلا واحد شنو كاتسوا

تاج الدين: اناا عندي اللي ماكايحتارمش الوقت ماكايسوا حتا بصلة.. وواخا ماحصرتض ديك النهار خدمتي كلها موجودة ومحظرة فوق الطابلة ارايلينا نتي اللي كااتنقزي شنو موجدة

هيام: غانعاود نگولها لك باش يالله تعرف تستوعبها.. انا ..ماخداماش ..عندك..التازم حدودك وعرف راسك معامن كاتتكلم

تاج الدين: معاامن هه ..اه باغدون بنت بابي 

كزات سنانها ترد عليه كونما هضرة حساام اللي فرعو ليه راسو

حسام: واااا الاخوان واااه وااش نص الوقت داز غير مناااگرة! فحماام حناا ولا شنو "ضارو ليه مخنزرين خلعوه بديك الشوفة حتا خفظ نبرة صوتو"

حسام: غير گلت زعما راه هادشي ماخاصوش يكون نتوما شركاء ولازم تتافقو

تاج الدين: حسام دخل سوق جواك

حسام: هاهو اسيدي سررري

دقان خفيف فالباب تبعو دخول الوزاني بكوسطار اسود مبتاسم بهدوء شافوه ووقفو كاملين

الوزاني: تفضلو تفضلو گلسو ..جيت نشوف فين واصلين كلشي مزيان بعدا ياك؟؟

بغا يرد وسبققااتو مبسمة: وي كلشي في امان الله امسيو رضوان.. اطمن البروجي بين ايدي امينة

تاج الدين: حنا دايرين كتر من جهدنا باش نطلعو شي حاجة نيو كون هاني

الوزاني: مزياان ههه هاد الحماس هو علاش كانقلب برافو عليكم.. ممكن نحضر معاكم لهاد الجتماع ياك ماكاين باس

بغا عاود يرد وسبقاتو: وعاد غاتسول امسيو ههه معلوم تفضل

الوزاني: ههه ميغسي


بعد ساعتان ، انتهى اجتماع مقاتلة العيون بين التلج ولهب النار.. خاص غير واحد يشوف فلاخر وتبدا الريكاطة بالعينين وشرارة الغل والاعصاب كل واحد مستفز التاني..هادشي لاحظو الوزاني وبلعاني بغا يحضر معاهم باش يعرف مدى توافقهم لكن خاب ظنو.. ابتاسم ليهم وتم غادي للباب كايخمم فصمت وهوما وراه خرجو من غرفة الاجتماعات وقبل مايمشي كلا واحد فطريقو وقفهم

الوزاني: بلاتي بلاتي.. بغيت نگوليكم شي حد مادام باقي مانسيت..الارض اللي غايتقام فيها المشروع خاصكم تمشيو تشوفوها وتعطيوني رأيكم حتا نتوما.. يمكن گاع تزيدو شي تغييرات تناسب الموقع شكون عرف

تاج الدين: اه واخا..ولكن ايمتا

الوزاني: انا غانعلمكم بالوقت ..الاهم عندي فهاد اللحظة هو..
خدا يد هيام و تاج الدين تحت استغرابها وتحت عقودة حواجبو هو ..حط وحدة فوق التانية ويدو هو فوقهم مزيرها للحظة سرا ماص مُرعش لصباعهم والوزاني نطق بابتسامة

الوزاني: التصميم يكون كيفما بغا يكون..الاهم هو انكم يد وحدة، تفكير واحد، وقلب واحد.. ياك عندي الحق

بارتباك ابتسامات ليه هيام مأيدة كلامو .. فحين تاج الدين خنزر فديك اليد اللي حاط عليها الوزاني كايطبطب عليها

الوزاني: كاينة هاد الهضرة ولا لا اتاج

شاف فيه وبالريط نصل يدو وجار حتا يدها معاه شابك صباعهم بتملك وشف فيها بجمود عكسها هي

تاج الدين: حنا شركاء.. المهم عندنا هو الخدمة اللي جامعة بيناتتا داكشي علاش خاصنا نتحملو بعضياتهم واخا يكون الطرف التاني ماكايتستحملش.. ولكن نصبرو على قبل نجاح المشروع

خنزرات فنظراتو التاقبة ليها فحين الوزاني بسم ونطق كايحرك راسو: صحيح.. هادا هو المغزى اللي بغيت نوصل

هيام: نخليكم 
...مشات فاتجاه المصعد زاامة فمها والجمرة محطوطة على قلبها.. وركات على الزر وضارت جيهتو لقات عيونو حادة عليها كدلك زادت عصباتها وركبات فيها اللي مايتركب .. المفرووض يحدر عينيه ويحشم على عارااضو فالكلام اللي سمعها.. المفروض يجي يطلب منها السماحة اضعاف المرات على المصائب اللي تبب ليها فيهاا والطريق اللي دوز منها يقلبها هو گاااع .. مااشي يزييد فيه كتر وكتر ويدير فيها هاكا

..هو فالمقابل مخنزر على عسلياتها المصوبة جيهتو.. هي اللي خاص تحنيهم من الخجل.. واش درة ندم على كلامها ماعندهاش شمن نوع ديال الضمير عندها.. شمن نوع من القلوب كاتملك حتا صبحات عندها هاد الجرأة..الجرأة ديال شي واحد قتل الميت وبلا حشمة بلا حيا غادي فگنازتو هي ديالها دابا

..ساطت من نيفها وطلعات للاسنسور وهو ضور عينو كايزفر فحين الزاني مراقب تصرفاتو وتكلم بعد صمت 

الوزاني: تقدر ترافقني للمكتب ديالي اسي تاج .. محتاجك فواحد الامر

تاج الدين: معلوم .. تبعو فإتجاه المصعد .. اللي تحل فالطابق فين كاين مكتبها خرجات كاتخبط فالارض باغا تحرق وتغوت وضرب ماكرهاتش گاع تقتلو ولا تزف بين من شي سرجم 
..ناضت مساعدتها تهضر هي تحبسها بصرامة

هيام: مايصدعني حد و اللي سول فيا انا ماكاينااش
..دخلات خابطة الباب وعاد غاتخطي لبيرو لقات نجاة باركة قدامو و مبتاسمة ليها

نجاة: تعطلتي شوية ..ولكن بقيت كاتتسناك


دخلو لمكتبو العريض وبدون مقدمات ضار عندو وسولو بجدية: كاينة شي حاجة بينك وبين انسة العلالي

قوص حواجبو قبل مايرد وقال: لا علاش

تنهد ومشا گلس على البيرو ديالو عادد نطق بجدية: نتمنى ماتقاطعنيش وتاخد هضرتي على محمل الجد..دير بحالا الاب ديالك اللي كايتكلم معاك وعاطيك هاد النصيححة..عمرك تخلط بين حياتك الشخصية والعملية ..عمرك

زاد استغرب من كلامو: انا فين خلطت امسيو..

الوزاني: تاج الدين.. كاين شي حوايج ماشي بالضرورة تتقال..انا من الشوفة كانعرف الانسان شنو فيه ،بحال اول مرة شفتك وعرفت طينتك ..وحتا دابا.. كانشوف واحد البهاتة شعلات فعينيك..شعلات فاش كانت حدانا ..ودابا طفات حيت هي ماشي هنا..وهاد البهاتة عافها مزياان شنو كاتعني

زير على سنانو ولسانو تلجم ..شنو غايبرر وشنو غايگول واش لهاد الدرجة فاضحو وجهو..لهاد الدرجة كلشي كايشوف شنو واقع عندو لداخل لا من مو والا ختو والا الوزاني ايوا وهي ..عمية متلا

الوزاني: حنا حياتنا من ورا باب الشركة خاصها تتنسا، واخا بعض المرات ماكانتحكموش فنفوسها وكانديرو بعض الاخطاء.. نتا باقي للآن عاد بادي.. عاد گلتي بسم الله فهاد المجال وتيقني مجرد خطأ واحد الا صدر منك.. نزاهتك والفطنة ديالك وتفانيك فخدمتك كلشي غايتنسا..داك الخطأ هو الوحيد اللي غايبقا موشوم فيك ..والتقة ديال الناس التانيين غاتتزعزع ..الى وقع هادا غير ودع خدمتك

تاج الدين: سي الوزاني ..ماعرفتش شنو غاتكون لاحظتي ولا شنو بان ليك فيا ..ولكن انا ماكنخلطش بين خدمتي وبين حياتي الشخصية ..ومابيني وبين الانسة العلالي حتا علاقة

الوزاني: متأكد

تاج الدين: كل التاكيد

شاف فيه مدة ونطق: واخا غانتيقك، وغانتغاضا على الاستنتاجات ديالي ..ولكن ماتنساش هضرتي وبقا مفكر باللي رجل الاعمال الناجح ماكايتقاسش بالرباح اللي كايطلع..رجل الأعمال الناجح هو اللي كايتفانا فخدمتو..وكايديرها فالمرتبة الاولى

حرك راسو ورد عليه: نقدر نمشي دابا

الوزاني: تفضل

خرج ساد وراه الباب وخرج من الشركة كاملة ماردش البال للسيارة ديال نجاة طلع دغيا ونيشان ديمارا كايسوط من نيفو نفس حارقة ..انتاشلو من افكارو صوت الطيلي دار الكيت وجاوب

تاج الدين: الو الواليدة

.......


نجاة: غاتبقاي واقفة تما ههه ماغاتسلميش

جمعات نفس طويل ودوات ببرود متخطياها: السلام .. بركات على الكرسي ديالها ومجاة جمعات الضحكة

نجاة: غير ماللي درتي فيا هاد الشوفات ادن عرفتيني ..ياك ؟؟

ضحكات باستهزاء: كنتي عارفة شكون انا 

نجاة: اه بصح ..وباش نكون واضحة معاك..ماكانت هاماني لاا صحبة لاوالو..كنت غير باغا نزيد نعرفك

هيام: هه.. بحالك بحال خوك ..ولا ياكما هو اللي سيفطك تكملي داكشي الللي بدا

قاطعاتها بغضب: خوويا عممرو داار معاك شي غلط من غير يبغيك من كل قلبو 

وقفات قاطعاتها حتا هي: بااراكة سككتي.. نتي ماعااارفة والو اادن على الاقل ماتبقايش داافعي علييه

نجاة: ماكاندوييش غير هاكاك ..انا عاارفة كللشي وسمعت كلشي اهياام نتي اللي طلعتي دمدوومة فهاد القصة كااملة

هيام: لااياااش بااغاا توصلي ءءء؟؟ شنووو بغييتووو مني مازاال شنووو

جبدات البوصلة من جيبها ولاحتها ليها فوق المكتب: فاش خرجت من الفيلا لقيتها مليوحة فالارض و دغيا عرفتها ديالك عرفتي علااش؟؟ حيت عشر سنين وانا كانشوفها عند شخص واحد ..حاميها بحياتو وعمروو خلا شي حد يقررب منها..حاامي اخر دكرى بقات ليه منك..داك الولد اللي تيقتي القيل والقال وتخليتي عليه علاش فنضاارك غايبقاا محتاافض بيهااا ؟؟

شداات راسها كاتحركو بالنفي: نتووما بااغين تحمقوووني..صاافي بعدوو مني بااراكة غيير داكشي اللي وقع عشر سنيين هااادي

نجاة: غاانگوولك جووج كلماات.. بغيتي تبقاي دمدومة ومكلخة مرحبا ..غايتعدب شوبة ولكن ضروري ينسااك وعطا الله اللي كايضورو بيه باش ينسيوه فيك.. بغييتي تعررفي الحقييقة بصح وشكون للعب عليكم.. تيليفوني راه باقي عندك ..ديك الساعة خاصك تكوني مستاعدة تسمعيني وتيقي فيا

هزات ساكها وخرجات معصبة وخلات وراها انساانة متضاربة مع افكارها حايرة بين المنطق والخيال عقلها وقلبها متقاتلين والبوصلة اللي قدامها زادت فيقات عليها مواجيع الماضي


فالكلينيك وقدام الزاج اللي كايطل على الناموسية فين ناعس الباشير.. كانت الدكتورة جميلة واقفة كاتشوف فيه ساهية فدكريات الماضي واتارو الحاضرة..غير شوفة منو فكراتها فبزاف وبزاف وشكون هادا اللي گال باللي الماضي كايتمحا ..
هو فقط بحال شي شقة كانكفحو عليها التراب مع مرور الوقت الكمية كاتتزاد وعند بالنا باللي صافي تمحات ومابقاتش باينة..حتا كايفوت الحال عاد كاطلع معانا الشاهدة وكانعرفو باللي الامر محتاج غير لضربة برق ورياح هائجة باش طير كلشي وتعاود تفيق فينا ديك الشقة..وهاكدا هو حالها..مجرد لمحة فوجهو الهادئ تدكرات اول لقاء كتر من عشرين عام هادي..اول نهار ليها فالليسي فاش بغات تدي لباها الغدا وكانت مزروبة كاتهضر بالزربة وكاتجري بالزربة ماحسات براسها تادخلات فيه وختل توازنها حتا كفحات على لحمو المرقة وخلاتو كايتقلا فبلاصتو..داك المتعلم الجديد اللي خدا باها باش يعاونو شوية ماعرفش باللي خدا حتا قلب بنتو وهي كاتشوف فيه كايرقص رقصة الهنود الحمر من حرارة المرقة اللي صلقات لحمو واللي زاد عصبو هو انها سااهية فيه كاتحنزز

..تدكرات فاش كاتكون راجعة من قرايتها وبلعاني كادوز من طريق المحال باش تشوف دوك الحجبان اللي كايبقا عاقد فاش كايبغي يحسب شي حاجة..وكيفاش بسرعة كايطلقهم 
فاش كادخل شي كليانة ومرة مرة كايلوح شي كليمات ديال المغازلة
كاتخليها هي تحرق فبلاصتها وتتغدد عليه..ديك النهار عرفات باللي حبها طاح على زهوااني كايقطر
..عمرها شافتو مع وحدة ولا جوج بالعكس
عندو البنات بحال التيشورت اللي كايلبس كلا ساعة وحدة فشكل وهاادشي اللي مزرضها فحياتها وكايخليها فاش تكون جايبة ليهم اتاي تاتخلي باها حتا يهز كاسو وضور ليه تقلب على طاسيلتو الصينية زعما راه تعكلات وتخليه كايترعد ..هاكدا فبالها كاتنتاقم منو واخا كايبقا فيها ..وهاكدا كلا مرة وباش حارقاه كلا مرة وشنو كابة عليه حتال للنهار اللي غاتكون داخلة للمحال كاضحك مع شي واحد ماعقلاتش بالضبط واش ولد خالتها ولا ولد عمتها المهم كان كايجيها شي حاجة ..ديك النهاار ماكانتش قادرة تكمل فين الشوف فسباب الرصاص اللي عاطيها سوا هي ولا اللي معاها واستنتجات باللي كونما حشم من باها كان غاينوض يفرقو على جوج..
الغد ليه وهي داخلة حطات الغدا وبغات تخرج ماحساتو حتا جرها لداخل زادحها مع الحيط وعينيه حمرين ماشاافووش النعااس اللليل كامل زيد عليها عرووقو اللي بغاو يطرطقو خلعوهاا كتر من كلامو: "انا اللي صاابر على حريق ماكلتك ةعلى حريق غيابك وعلى حريق نخييلك.. تخليني وتمعشقي مع ز**** ااخر..بالررب لاكاانت لييك ولا كنتي لييه بالرررب"
...كون غير يعرف شنو نوع الحريق اللي شعل فيها عشرين عام هادي..حريق باقي لدابا ماطفا خصوصا بعد داكشي اللي وقع....


تاج الدين: دكتورة

..دارت عندهم قافزة ووجهها مبهوظ مافاهمة والو وحتا عيشة هازا فيها حواجبها

تاج الدين: سمحي ليا خلعتك

جميلة: احم لا لا ماشي مشكيل 

تاج الدين: هادي الواليدة ديالي..مي هادي هي الطبيبة اللي غادير ليه العملية

عيشة: السلام عليكم اختي

جميلة: وعليكم السلام بسمات كاتشوف فيها من الفوق للتحت" نتي مرتو ياك

زرب تاج وسولها باهتمام: ممكن نشوفوه عافاك 

جميلة: اه معلوم..تفضلو 

دخلو وهي بقات اللور ..عيشة كيف شافتو نزلو دموعها تلقائيا ومشات جنبو كاتبوس على راسو ودعي الله ينوضو على خير .. 

رمقاتهم بتنهيدة حارة خارجة من اعماقها..كايبانو عائلة سعيدة ومرتاحة من غير نغصة المرض اللي غاتحيدها هي من طريقهم باش يرجعو لحياتهم السعيدة عادي..نزلات من عينها الدمعة اللي كانت حابسة دمعها داك المنظر وضارت بالزربة منساحبة من تما


كانت خارجة من الشركة بعدما عطاتها خيارين ومن اعماقها تمنات لو توافق تسمع ليها ..
مستحيل وميمكنش تعاود تشوف خوها معدب عشر سنين خرا..باراكة غير الباشير اللي عاش فعزلة لا حياة مقادة لا عيشة هي هاديك لا ولاد لا وتاد وفالقريب الى بقا تاج الدين على هاد المنوال حاساه غايولي نسخة طبق الاصل منو ..
جبدات الكونطاكط من ساكها كليكات عليه وفاش تحنات تحل الباب تحطات يد رجولية على يدها ضارت مخنزرة وزادت قصحااتها فاش شافتو مبسم

عادل: هاي

نترات يدها وحطاتها فوق اللوطو: شحب الخاطر ياك لاباس

عادل: صدفة زوينة هادي ياك..هاحنا طلاقينا مرة خرا ههه

نجاة: داك الورد ..نتا اللي حطيتيه ليا ياك؟

حرك راسو مبتاسم وهي كشرات كتر: ومنين جاك عنوان دارنا..كاتبعني ولا شنو

عادل: يعني مااشي شي حاجة اللي صعييبة..ولكن بقات حاجة وحدة مازال ماعرفتها

طلعات حاجب تجاوبو فيساع طير ليها الساك جبد منو الطيلي اللي لحسن حظو كان بلا كون ودغيا ركب رقمو وصونا على راسو ماحس حتا جاتو دقة للراس

نجاة: يااالللله تشفاريت هي اللي بقات ليك

عادل: اححح دقتك قااصحة

خرجااو عينيها بسم: عطيبني تيليفوني

مدو ليها حلات اللوطو لاحتو فيه ورجعات وقفات قدامو مقصحة فيه الشوفة وشوفات خرين تاع حسام مراقباهم من زجاج المكتب ديال تاج 

نجاة: ماالنا شكااين ءء...علااش فينماا درت نلقااك جيني من لخخر وگوول شنو باغي

بهدوء نطق ليها: عقلتي المرة اللولة فاش شفتك..هازة الطالون كاتجري ورا الشفار وزفيتي عليه بلاا ماتترددي ههه وفاش قبلتي نوصلك گلتي ليا باللي راك بنت درب سلطان كادوزي على الواحد من الودن للودن

نجاة: بزعطاا وهادشي مااشي جواب

حرك كتافو بلا مبالات: مابغيتيش تنسااي ليا "علات داك الحاجب حتال السما وهو كمل بنفس النبرة" حاولت ولكن والو..سوا بهضرتك..قصوحيتك..جرأتك وحتا ضحكتك واخا شفتها مرة وحدة فالبيسري وغير صدفة.. هادشي اللي واقع فيا من نهار شفتك خلاني نبدا نغير شي حوايج من حياتي..الى مشيت حتا بدلتهم غانقودها بالمعقول ولكن ماهامنيش 

نجاة: من هاادشي كااامل "غمزاتو" شبااغي

قرب وجهو وهمس ليها بابتسامة: نتي

دارت رايها مصدومة: گوول واالله

عادل: واحق الله

نجاة: لا لا عاار ربي لا زييد حلف

عادل: قسمما بالله

ردات عليه بهدوء: ايوا سممعني ارووميو..شفتي هاد الكمارة.. هاد المكياج هاد الطالون والميني جوب والخزبلات لخرين..موراهم كاين عبد المولى..الااا طوول ليك الله فالعمر وبقيتي على هااد الفعايل معايا غاتتشرف بلقاؤو ومننصحكش ابب..داكشي علاش كمل حياتك عاادي مع گنس كيلمان اللي كاتعرف وانا فووتني..قبل مانگلب الڤيستا

ضحكات ضحكة صفرة ورجعات لطوموبيلتها ركبات وديمارات مكسيرية فالطريق وعيونو هو متبعينها..
احيانا ماكانبغيوش الظروف اللي مسيرين بيها حياتنا وضروري من حبل الانقاد ينتاشلنا منها..هو لقا هاد الحبل..ويستحيل يتخلا عليه...بسم حاضي الطريق منين دازت وهمس للريح بمرح: عبد المولى ههههههه ..ضار هو كدلك ركب فسيارتو راسم نفس الضحكة وديمارا من وراها..مخلين جمرة شاعلة وراهم..جمرة ممكن تحرق الخصر..واليابس


""بغيتي تبقاي دمدومة ومكلخة مرحبا ..غايتعدب شوبة ولكن ضروري ينسااك وعطا الله اللي كايضورو بيه باش ينسيوه فيك.. بغييتي تعررفي الحقييقة بصح وشكون للعب عليكم.. تيليفوني راه باقي عندك ..ديك الساعة خاصك تكوني مستاعدة تسمعيني وتيقي فيا""

بالغداايد لاحت المشطة فالارض وبقات گالسة قدام المرايا بكولون لاسق وميني بوط كايبين شوية من كريستها..زفرات بالجهد رادة شعرها اللور وكلام نجاة مابغااش يتحيد من ودنيها دور دور وتعاودو بحال الكااسيطة فحين دمااغها كان ليه كلام ااخر وبدا كايهدنها بهضرتو: ماديهااش فييها..رااه خوها هاداك طبيعي داافع عليه.. صاافي كملي حيااتك وخلييه يضبرر لمخووو ..باارااكة اهياام اللي فيك يكفيك بلاا ماتزيدي تعمرري راسك بالتخربيق دياالهم 

..تدق باب بيتها وغوتااات بالعصاب: ماابغيت نشووف حتا واااحد

حلات زينب الباب وخنزرات فيها حاطة يدها على خصرها: لا تعااالي ضربييني تعاالي اختي غاازيدي مااتحشمييش 

بعد ديك الحظاش اللي كانت راسمة فحجبانها اخيرا بسمات وناضت غادة عندها: خاالتو؟؟؟

زينب: يخوووي لييك الجنااب 

هيام: زنووبة هههه ..تعانقو بجوج ودخلات اميمة كدلك هازا ساشية عامرة وحداها خالتها لخرا تيتريت اللي حتا هي مبسمة ونطقات بمرح

تيتريت: هااحنا جينا نصدعوووك ممكن؟

زينب: وييلي على ممكن ماالها لخااطها.. اابزز على طوااسلها غاانطلعو ليها المورال 

هيام: ههه مرحباا بيكم دخلوو 

طارت زينب للساشي اللي كان عامر بأنوااع وأشكال من الشكلاط كفحااتو فوق الناموسية وتلاحت حداه: الحيااات والنعييم اححح زيدو زيدو مماتحشمووش

تيترتيت بدات تاضور راسها وگلسات جنبها: ااودي يااودي على الشيب

زينب: الشيب فيك نتي نيت اختي أما انا باااقاا ندگ وندردگ الله يخليني ديما جوون

عنقاتها اميمة: خاالتو باقاا لاجونيس هههه

تيتريت: الله يستر..هيام..زيدي احبيبة گلسي راه على قبلك جينا

تنهدات وگلسات فوق السرير مدورينو برببعة بيهم وتكلمات بأسف: سمحو لياا هاد الليلة ماشي على بعضي ..وشوية متوترة

زينب: وحنا ااااصلا ااش مخرجنا فهاد نصايص الليل والبروودات كانقلبو على الشكلاط من هنا لهنا وجاايين مصدعينك لاااش..باش نعرفو داك الانهيار العصبي منييين جا وناصلو المشكيل من جدورو

تيتريت/أميمة: نستأصلو

زينب: بحاال بحاااال المهم فهمتو شبغيت نگوول..يالله دابا احبيبة عاودي ليا عليه

هيام: علامن !!!

زينب: على ولد الحراام المقططر اللي وصلك لديك الحالة

تيتريت: زينب نعلي الشيطان ويلي البنت يمكن عندها مشكيل كبر من هاداك

زينب: ااوالله ماكاين اللي كايفوڤرنا وينيرڤينا ويشعل فينا اللي مايتشعل قد الرجااال ولااد الكلااب و تارا بالله حتا الموضوع فيه راجل..غاعودي لينا عااودي انا راه خبرة فهاادشي ونصايحي مماكايزگلووش الهددف


يتبع...

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.