ماقدروش يوصلو للباب بقا كيشوفو من بعيد والصدع نايض فالشارع .. الناس كيفكو ويطلو ماعرفو حتى شكون كيدير داكشي .. غير كمام الجلابة اللي كيبانو ... اما الصالحة جلسات حدا واحد الصور مقابلة مع الباب كتنهج بغات تموت بالفقصة .. احمد ورشيد جلسو فوق الطروطوارات والناس كتخرج ليهم الثلج والماء والاسعافات الاولية وايمان واقفة بعيدة هازة يدها وكتحلف فيها خايفة تقرب للباب وتخوي عليها شي حاجة .. فجأة بداو البالز كيهبطو بااط فوق الارض والناس كتهرب خايفة تجي عليها شي حاجة .. الصنادل نازلين والصبابط وقوامج رشيد واحمد كيطيرو فالهوا شي تعلق فالشجر شي لسق بشرفة الجيران .. اما سليبات ايمان ولبنى لفضيحة لكبرى بدات تلوح فيهم بالنقي بالمسخ والناس كيتفرجو فالالوان والاشكال هابطين .. شوهاتهم حتى ماقدات وبقات طل عليهم بنص عين وهما كيجمعو فدوك الحوايج .. اما لاللة لبنى جات مع سليباتها كينزلو نيشان .. شكات فالاول واش هما حتى شافتهم ميطيرو كي الرغوة من البالكون ديال الدار وبدات تلقط بسرعة من الشوهة . ناضت ليها ايمان وكيدابزو على الدار اللي خلاو خاوية والناس كيفكو .. لحضة جات قدامهم فالارض صندوقة ديال الذهب خاوية شافو فيها كاملين وطارت عليها ايمان كتغوت على ذهبها ومن موراها نزلات الصندوقة الثانية حتى هي وهزاتها لبنى بحال الحمقة كتغوت ومشات جهة الباب بالفقصة هزات الحديدة يالاه ضربات الضربة الاولى نزل عليها سطل دالماء سخون لاحها للور حدا احمد ورشيد كتكمد . ما تغداو الناس فديك الحومة ماداقوه بالحرب اللي ناضت اما جميلة بقات عساسة عليهم وهما لتحت كتمرض فيهم بالحوايج اللي كتلوح حتى سيفطاتهم بحالهم وخرجات كطل فالشارع من لفوق وتشير بيدها
جميلة: الولد ... هاااه الولد الولد
هز عينو شاف فيها وهوا دايز : انا اختي
ردت من الاعلى : اه اه نتا نتا تسخر ليا ؟
الولد : فين اختي؟
جميلة: تسخر ليا عند الحداد اللي فدورة الله يرحم الواليدين قوليه يجي لهنا دابا
الولد : واخا اختي
جميلة: انا كنتسناك هنا
مشا الولد جاب الحداد ونزلات كتجري عندو حلات ليه الباب طلبات منو يدير ليها باب اخر ديال لحديد مثين قدام الباب ديال الدار وماتشطراتش معاه فالثمن .. كل ما طلبات هوا يكون باب مثين يسد ويصاوبو ليها فلحين .. داكشي اللي دار الحداد مشا جاب الماطيريال والدراري اللي خدامين معاه بداو فالباب وهي سادة باباها عليها كطل من لفوق ومتبعاهم العشية كاملة حتى سالاو ونزلات قلبات الباب وخلصاتو مشا بحالو وسدات عليها بيبانها وطلعات حيدات جلابتها بقات بشورط مشبك وديباردور ديالو مدور فالدار .. حطات شي ماكلة لقاتها فالثلاجة وجلسات حاضية من الفوق كلاتها فالبالكون وسهرانة الليل موجدة ليهم ما ينفعهم الى رجعو . فعلا ضربات ثلاثة ديال الليل وسمعات حس السيارة ديال رشيد وقف حدا الباب وطلات بنص عين بان ليها نازل كيوشوش هوا واحمد هازين الماطريال يفرعو الباب ... خلاتهم حتى قربو وهزات قرعة فيدها قطرات عليهم بعض قطرات الماء القاطع شوية جا لاحمد فتكفو ولرشيد فراسو وودنو طيرهم من بلاصتهم كيغوتو ويطيرو وينزلو تا بداو يترعدو وهربو كيجريو للطموبيل تخباو يالاه سدو البيبان عليهم هاربين وهي تخوي القرعة كولها فوق الطموبيل دوبات ليها الصباغة كاكلة اللي فيها وقشراتها وخسرات ليها الجناب والسقف والامام ديالها كانها خارجة من فران .. شوهات الطموبيل وبقات تشوف فيهم حتى هربو كيجريو والسياؤة كتلعب فالطريق هاربة وجلسات كتنهج مغددة وحطات القرعة حداها
جلسات فالبالكون كتبرد وطل مرة مرة مقزبة .. طالعة نازلة مع الدروج فالدار بوحدها .. طلعات للطبقة الاخيرة وهي تسمع صوت نازل مع الدروج اللي كيطلعو للسطح .. جات طل وهي تغوت بأعلى صوت حتى لسقات مع الحيط وحطات يدها على قلبها مخلوعة كتنهج وعينيها خارجين من بلاصتهم فمهدي اللي واقف قدامها فالدروج كيشوف فيها ونازل على رجليه فضلام الدروج وقال
حيد لكاسكيطة ردها اللور وقال : كنت فالقهوى الصباح وجاو بجوج فيهم شي ضرابي وكدا وجلسو كيهضرو ... سمعتهم كيهضرو عليك وقاليه رشيد بالليل نمشيو عندها ماتكونش تما دابا تمشي لدارها
جميلة: ايييه !!! ونتا كي درتي عرفتيني هنا !!
مهدي: وا غابالزهر كنت جالس قلت نتبعهم نشوف البلان كي داير وجيت لهنا ... مالهم علاش كيفرعو فالباب وفهاد الليل ونتي شكديري هنا
.حميلة : وانتااااا اللي كي درتي دخلتي عندي الثلاتة دليل هادي
مهدي : واجاوبيني بعدا شداكشي اللي وقع وتخوا من لفوق ؟ !! دوب الطموبيل ماء قاطع ؟؟؟
جميلة: واقولي كي درتي دخلتي غتحمقني !!!
رد بلا مبالات : وصافي دخلت من عند هادو اللي حداك كان شي واحد خارج يصلي الفجر ولا ماعرفت اش خارج يدي وسلت مع الباب بلا ميقشعني وطلعت نيشان نقزت من السطح ... انا حساب ليا معاك شي واحد هنا اما ندق فالباب
هزات حجبها فيه وهي جالسة فالارض قدامو مقزبة والشعر مطلوق
- امم شي حد هنا زعما بغيتي تحصلني وابااز !
عاود دور لكاسكيطة كيلعب بيها فوق راسو ويضحك وقال
- لااالا ماشي هاكاك
دورات راسها : اممم ماشي هاكاك ! الناس فالناس والقرع فمشيط الراس قالك شي واحد معايا هنا قول جاي باغي تحصلني زعما ولاكن نيتك عوجة
مد يدو كيضحك مخرج لسانو وعاض على شنايفو جرها جلسات قدامو فالدرجة بين رجليه كتسوط من الخلعة ودور يديه عليها كيضحك وباسها فخدها
- توحشتك واخا فيك الفعايل
بدات كضحك وحسات بلحنين ليه رغم كاع اللي وقع وقالت
- كنتي فالقهوى مع رشيد؟
كمشها عندو ساد عينيه بشوق كبير وقال : انا كنقول ليك توحشتك ونتي كتقولي ليا كنتي فالقهوى مع رشيد
حطات يديها على ركابيه بجوج وتقلبات للجنب عندو شافت فيه وقالت بسعادة
- حكمات ليا المحكمة نرجع الدار والطموبيل ولاكن الفيرمة مشات ليا بقات فيا وحلات ليا فحلقي بغيت نموووت
هز عينو فالدروج : هادي هي دارك ؟
ردت : هي هادي كي جاتك ؟ زوينة ياك اجي نوريك كي دايرة
بغات تنوض وشدها جلسها : وصافي من بعد ونشوفها جلسي دابا خلينا ... بوحدك مامعاك لا ختك لا تا واحد
رد كيضحك: وراه باقا صغيرة ... بيني وبينها سطاش لعام ديال الفرق
ردت فدهشة : بصح !!! عليها كتبان صغيرة
تنهد: وا مسكينة تا هي راه داااازت عليها ... باها اللي هوا جدي كان صعيييب داكشي ديال شحال هادي .. زوجها بالواليد وعمرها شافتو ولا عرفاتو .. كانت قلة الشيء وهما كثار ... بيهم شي 12 لواحد وعاد جدي وجدة والدار مبنية غير المرطوب وسط الدار عريان والشتا فاش كتصب كتعمر الدنيا .. جدي كان غا بناي عطاش وكيصرف على قشلة دولادو .. اللي كبرات شوية كيصدرها وهما مكيهضروش تدوي ترعف مكانوش كيهزو العين فجدي وعندهم عاادية ديك القضية ديال زواج صغار وميختاروش هما الاب الى بغا يعطي مابغاش ميعطيش هي مسكينة غا جاو وعطاوها
جميلة بأسى: مسكينة وعمرها شافتو !!
مهدي: مكانوش كيشوفو العريس اصلا عندهم عيب .. غير الى طلو من شي تقبة ديال شي ياجورة ولا طوبية
جميلة : ايوا وباباك ؟
هز عينو فالسقف كيتنهد : الواليد كان فالصحرا عسكري تزوجها وداها لمو سكنها معاهم ومشا خلاها مع ربعة وعشرين واحد فدار وحدة .. خوتو كاملين اللي مزوجين ساكنين تم فديك الدار .. مكتعرف تا وزة اللي قالو ليها ديرها كيديرها ولادتني انا فالعام الاول وكولشي نايض كيربي معاها كل واحد كيفهم فشكل والصداع والمشاكل والحرب يوميا والعصاا كانت كتاكلها من عند جدة ومن عند جدي لا هي لا لخرين اللي كانو معاها .. كانت تشوف وتسكت .. لواليد كيجي كيجيب ليها بيجامة ولا سروال ويعطي المصروف لجدة وهي كتشوف وساكتة ماعندها مادير .. ديك الوقت كانت مق*** الحكرة وحشومة عندها فكلشي ... العام الثاني ولدات خويا زادتو عليا وجلسات حدانا كتبكي ماعارفة اش دير هي براسها خاصها اللي يربيها .. ولدات بنت ماتت ليها ومرضات من موراها صافي تعقدات ولات تقسم لكينة هي ومرت عمي .. وراتها شدير وكانت هي لكبيرة فيهم .. صافي مكان عندها عقل تا هي ... كنا كنشوفوها كتاكل العصى بالسمطة من عند جدي وفاش كيجي الواليد ويشكيو ليه كيعطيها قتلة وكيجي جدي لاخر باها يعطيها قتلة باش دير عقلها وهي اصلا مكانتش عارفة ومكانتش كتقدر تهضر .. دوزوها عليها والمشاكيييل تا رجع الواليد من الصحرا وكان مبلي بالشراب والقصاير كيخسر فلوسو مكيعتقهاش وكيتعدا عليها فديك الدار بلعصا ومكاينش اللي يفكها كولشي كيردوها ليها .. يجلس فالبيت حدانا وحنا حداها ويبدا يشرب ويسب وشي مرات كان كينوض ليها كيبغي يي.. قدامنا وكان كينوض الصداع ويعطيها العصا وتنعس كتبكي .. بقات هاكاك تا مات جدي وبداو يتسرسبو واحد مور لاخر كيخرجو يكريو ويشريو وكل واحد خدا رزقو فالورث اللي خلا .. هوا مشا شرا بيه حانوت والدار اللي حنا فيها دابا .. عااد ترخفات على الواليدة شوية ولاكن واخا هاكاك بقاات معدية عليها جدة ... كبرنا فداك الحي انا خويا
جميلة بأسى : شحال ونتوما تما ؟
رد : سنييييين فاش كانت عندي شي سبع سنين .. حتى لواليد تحول لهاد المدينة ... بدات قصة اخراااا ... الفساد والروينة ... ديييما جاي سكران ... ديما الهرس عندنا فالدار حنا ... ديما فايقيين مكنعسوش .. ديما هي سادة عليها معانا فواحد البيت بالساروت ...حتى كيصبح الحال وكنخرجو كنلقاو الدنيا مهرسة وهوا مكسل فوق شي سداري ... تجمع وتكرفس مع الجميع وكيجي يهرس ليها ويعطيها العصا .. الجيران ديما كيفكو ... واحد المرة جرها من شعرها باقي كنعقل خرجها للزنقة هاكاك وكنا كنلعبو حنا برا ... هزيت الحجر ومكان تما لاشارع لا والو وبديت نزف عليه بلحجر والجباد من البعيد جاتو حجرة فالراس دار الدم بففف فالسما ... علقت من الدار شي يوماين مابنتش والواليدة غتسطا
جميلة : وفين كنتي!!!
مهدي: كنت كنبقا برا وبالليل كنطلع السطح ... كانت عندي شي عشر سنين ديك الساعة ... ولاكن نهار شدني عرفتي شدار ليا ... بففف
جميلة: اوييلي شدار ليك
مهدي : دخلني لواحد البيت بواحد الكابل وبقا يعطي وانا كنقول ليه هاك ضرب ... ضرب جعرت وعطيتو ضهري بقا يضرب تا عيا والواليدة كتغوت ... خرجت فلعشية مشيت لديلمها ديك الطموبيل اللي كيطلع فيها لق*** فشيت لمو الروايض بربعة رزيتو فيهم وشقيت لمو الزاج ديال القدام وخليتو غيتفركع ... المرة الثانية عاوتاني كان زف عليها بالكاس وحنا كنتغداو جا فيها وقلب مها ديك الطبلة .. كانت دايرة لحوت مقلي للغدا ... زهقنا بواحد جوج حوتات عطاتهم لينا فاكوزينة انا وياسين بحال الى علمها الله مغنتغداو ... لقا داك الحوت وديك مطييشة (باشمازاز ) كلشي مشتت فالارض وهز السمطة ديال تريي ديك ديال الحديد عطاها قتلة تا زراق ليها اللحم وخرج يقصر وجا سكرااااان لقانا كنلعبو حدا الباب والصيف .. صخر ياسين يجيب لكارو من جموبيل نساه ومشا تاهوا لقا تريي ديالو ديال العسكر فطموبيل اللور وخرجو داه لواحد الهبطة وحرق مو تما وخلاه بلا لبسة ... صبح الصباح مسبيها فيا انا وانا عااارف ياسين اللي داه حرقو وكليت بلاصتو طحنة ديال العصا وخرجني من الدار جرا عليا وتبع ليا ياسين تا هوا بقينا برا والواليدة كطل علينا ... خلاتو تا نعس وحلات لينا الباب ... كانت كتوكلنا وفاش كيقرب يجي كتخرجنا باش مناكلوش العصا وكدخلنا فاش كينعس وتبقا سهرانا حاضية .. وواحد المرة تعصب مع ياسين كان محني على الصباط كيسيريه ليه باش يخرج يزها بيه وتعطل كلعب بالسيراج وصعر عليه الواليد ..مابان ليه غير لبروطكان هزو ومع تقيل زف عليه جابها ليه فلكلوة كان غيموت تهز ديك الساعة لسبيطار ...
بقا ساكت مطولا وهي كتشوف فيه بأسى وقالت : ايوا كمل
رد : صافي كنا كنلقاو الشراب فالثلاجة كنشربو تا حنا .. كنخليو الواليدة تاااا تنعس ونمشيو نعركوها وكيجي كيلقاه ناقص كيعطينا قتلة عاوتاني ... بقا هاكاك تاشد تقاعد ديك الساعة ضربت سطاش لعام .. حل قهوة ديال الشيشة فداك الكراج وبقا عاطيها للقصاير .. ضربنا 18 لعام بالضبط نهار عيد العرش والزناقي مزوقة شبكات عندنا فالدار ناض خلا دار بو الواليدة .. جيت هزيت عليه ساطورة ودخل ياسين بدا يربب عليه تاهوا وخرجنا من الدار حنا والواليدة وبقا هوا يدخل فل*** شي عماين وحنا كاريين بوحدنا ... خرجت من القراية كان عندي الباك بديت لبريكولات وكدا .. وياسين تا هوا خرج كان خاصنا نعتقو مناكلو .. كاريين مع الجيران والحالة وكدا فحي ق** من اللي كنا فيه .. السواطر يوميا ... كانو كيتعرضو للواليدة ديما وكانت زوييينة عاطية للعين وصغيرة .. واحد المرة شدها واحد بغا يتعدا عليها بزز جيت خشيت فمو جنوية بلا منقرى عليه السلام جانتو فالورك وجلس تشلل ومشيت ضربتها حبس
ردت فدهشة: دخلتي للحبس!!!
رد ببرودة وضحكة باهتة : دخلت للحبس كان اق** نهار فحياتي عمرني جربت الحبس ولا عرفتو ... طاحت البطانة فلحومة عاد عرفو ولاد لق*** يعطيونا التيقار حتى خرجو ليا على حياتي وعلى الواليدة ... البطانة طايحة فالارض والدم كيشرش مع الشارع .. مهدي طالع فالسطافيك كنبكي مخلوع ومي كتنتف شعرها .. تا دخلت للحبس عاد ندم الواليد على ديك الخرجة اللي خرجنا من الدار وردها هي وياسين
جميلة: وكفاش لقيتي الحبس؟!!!
رد بسخرية: مق**** ... اق*** بلاصة هي الحبس ... اللي كاين فلحبس ماعمرك تخيلو ... وعمرك تعرف الدنيا والحياة الم*** الى ماشفتيش الحبس .. الحبس كيورق ليك اللي عمرك شتيه ... تعيا تقول مق**** وكيبقا الحبس اق*** بلاصة دخل ليها
ردت : بحالاش؟!!!
رد: بزاف ... وشكون مجموع فالحبس ؟ راه غا ولاد ل*** .. مكاينش ولد الناس وكدا ... كاين غا ولد ل*** على خوه .. الحكرة .. الحكرة من البوليس اللي تما ... من بنادم اللي تما ... البوليس دايرين لفرزيات الى قناو عليك يدرو اليد مع ولاد لق*** تما ينفسوك وسط الحبس ... الليلة اللولة دوزتها مق*** .. لاحو ليا كاشة خانزة وسدو عليا فواحد البيت مع واحد الطبقة بقيت نشوف فيهم ويشوفو فيا .. فيهم اللي قاليا جلس الخوادري وفيهم اللي ناض بغا يحدها ليا باش نهبط الراس فنهاري ... ماعلينا .. مع جديد معارفش اش كاين .. ريحت عادي دوزت ديك الليلة وصبحت انا وياهم فواحد الكوزينة قد السخط فيها كاع الحباسة .. بقيت غا كنشوف .. شي وجوه .. شي كمامر .. كل طبقة كي دايرة .. شي حاضي من شي .. كيدويو غا بعينيهم ... البلانات بيناتهم والحسابات ... حسيت بالبلان ماهواش فهمت شي وزة تما .. كمارتي جديدة وكرنو فيا دوك ولاد الق*** اللي مقطعين ديال بصح دايرين خلية غا بيناتهم .. كانت تما واحد المرى كيتمد لينا القص وتعمر لينا الطباسل كيقولو ليها ماما اسية معرووفة .. مع وصلت عندها هزات عليا حاجبها وقالت ليا حضي مع بنادم . . تخلعت .. واحق الرب تا تزعزت شفت راسي فبلاصة دايرين بيا الدياب وماعارفش شكون .. دارتها ليها فراسي ومشيت ريحت كنقلب على شي واحد بحالي وكدا ندوي معاه يدوي معايا يقول ليا غا كي داير لبلان تما ... ريحت كندوي مع واحد صافي تعرفت عليه وداير بالي منو وحسيت بيه بغا يقول ليا شي لعبة ولاكن خاف على راسو .. خفت على ك*** قلت هادي شي قرعة فالطريق مع هاد ولاد ل*** قصينا العدس ورديت الطاسة بلاصتها وضربت المعلقة فجيبي ورجعنا للبيت ... هما خرجو مشاو لواحد الساحة كيدوزو فيها النهار ويتشمشو وانا بقيت فيك البيت بوحدي كنمضي فديك المعلقة مع واحد الحيط تا مضيتها مزيااان رجعات بحال المضا ودرتها فجيبي قلت ماتعرف الوقت اش تجيب
ضربت 15 ليوم كنشوف عا المطايفات بين الدراري والحساب وداخل سوق ك*** ماباغي نجبد تا واحد وماباغي صداع ولا مشاكل ... واحد النهار فالساحة جا عندي واحد لاح عليا يدو وقاليا اجي ندوي معاك .. قلت ليك شنو اش باغي؟ قالي غا ندوي معاك مالك .. مشيت معاه نشوف حيت ماعندك في تعلق تما .. دخلنا من الساحة فدوك البيوت ديال الحباسة .. دزنا حدا بوليسي شقتو مادواش قلت هاد والد ل*** داير يدو معاهم ... شداتني الرعدة وبغيت نهرب يالاه جيت نعلق شدني داك خونا صحة باغي يدفع فيا لشي شموبر من هادوك اللي تما حيت كولشي خارج للساحة وتا واحد مكيدخل راسو فالمشاكل .. ضربت البلان فدماغي طن طن شفت الشومبر فيها غا هادوك وخونا باغي يجرني لتما وانا نجبد ديك المعلقة غرستها ل*** دمو فلعين بقا كيتجبد ولد ل*** فالارض شاد عينو صافي وهي تشبك جاو البوليس ناضت الروينة البوليسي خاف على كرو حيت البلانات كولشي تحت الدف شي مكيسيق لشي لخبار واللي حصل يق*** داوني انا ديك الساعة عرفت ك*** قو*** سدو عليا فواحد البيت فيه طواليط خانزة نعس تم ... ضربت فيها شهر وتزادتنيي ست شهور اخرى على الحكم اللي محكوم عليا ... بقيت تاولفت لق*** دمها ديك الريحة وديك الحياة مابقيتش كنشم ريحة الخنز كاااع واخا يحط خرية حدايا منشمهاش .. شهر ديال ** فديك الطواليط فيها شبر بحال القبر ومضلمة تا بولة مافيهاش.. كول تما وخرا تما .. يرميو ليك الماكلة من تحت الباب بحال الكلب حتى كتنسا راسك واش بنادم ولا شنو نتا ... حتى كتولف مكتبقاش تعيف كتولي بحال الوحش ... تبقا جالس ماعندك معامن تهضر .. تبقا غا تخمم تا تيفركعو لمك لعروق دمخك وماتعرف النهار من الليل ... خرجت من تما وفاش شفت الدنيا فلحبس جاتني عادية بحال دارنا حسيت بالراحة وجاتني ديك الطواليط هي الحبس ديال بصح .. صااافي تما عرفت ك*** وليت حباس ديال بصح ... فاش تلقا راحتك فلحبس ودوز عادي ماخايف مامخلوغ وبااايع حياتك .. كيتسد كتابك مكتبقاش تفكر شنو دير من بعد ولا تخطط كترجع عايش النهار بنهارو ... ومن تم لواحد الشموبر اخرى غير مع الباجدية مابقيتش مع الدراوش اللي كنت معاهم فالاول ... ودااخل ليها وانا فرحاان حيت غنشوف بنادم غادي ندوي غادي نطلق رجلي ونتسرح نعس .. مشا الخوف مشا لق*** كاامل وليت نشوف كري انا الوحش وانا الحيوان اللي خارج من غار خانز وهما بشر
صافي مابقيت مسوق لتا وزة .. كانت الواليدة كتجي عندي كل سيمانة ... السيمانة اللي متجيش كنبغي نتسطا كنقول صافي وقعات ليها شي حاجة .. كتجي كتبدا تبكي كتبقااا فيا .. الحبس رجع عندي بحال دارنا ... كتريح كنتكيف كيجيب ليا ياسين الزطلة لتما الله يسمح لينا وسط الخبز كنصايبها ونطلعها طروفة ونبدا نبيع فيها تما ندور الحركة و نضبر على الصرف واخا كانت الوليدة كتصوفيني ولاكن لفلوس ضارورية فالحبس .. باش ندخل تيليفون لتما خاصك تدويرة يدخلو ليك بوليسي بك*** ويميك عليك ... وتا دوك الطروفة اللي كنت كنبيع خلا الحباسة يديرو مت زوين باغييت غا جوان يكمدو بيه الراس ويطفاو .. تا انا وليت حساسبي مع ك*** ونسيت كااع اش واقع على برا ... الحبس بوحدو راه مدينة ودولة وكوكب وحياة تنسييك فالعالم تبقا عايش غا نتا وبلاناتك تما خصوصا ماعندك مستقبل ماعندك طموح ما وااالو عارف كرك غتخرج دور وتشمكر .. قربت نسالي المدة تم ياسين داخل بتهمة الحشيش .. كان كيبيع الطروفة تاهوا وجمعوه جابوه وبغاو يديرو ليه نفس البلان ... قريتو فالساحة وبغيييت نجيبو عندي للبيت ولاكن ممنوع التهمة ديال انا م*** فريها وهوا غا مع الحشايشة مكيشركوش القتالة والغبارة والحشايشة واصحاب الفاسد النصب الوروينة الكحلة ... كل طبقة بوحدها
مهدي: ولف بزز من ل*** دمو واش اللعب هادا .. الى ماجمعش ك*** مع البشري تولي سميتو فتيحة .. وتا هوا اصلا قببيييح ميسواش خبلها غا مشاكيل ومضاربات من اللي دخل وداخل مزاحم معايا فالبيع والشرا فاللخر ضرب ديك ست شهور ديالو ق*** فحالو وبقيت انا
هزات راسها شافت فيه: وكفاش كنتو كديرو بلا بنات ؟
ضحك بسخرية: اللي عندو لفلوس راه ك**** واللي مقودة عليه راه يدو قاضية الغرض .. انا من المق*** عليهم كنضرب على الصرف غا معاهم ... كنت بغيت تا انا ن*** وضبرت على واحد من دوك البوليس كيديرو اليد مع البوليسيات ديال النسا ... عطيهم غا الصرف هما يضبرو ليك .. ضبرت عليه المرة الاولى وسلت بالليل لواحد الشومبر كيباتو فيها المزوجين .. دوك الحباسا اللي مزوجين كيجبو ليه مرتو لتما تبات معاه مرة مرة ..صافي تما كانت جات وحدة من البنات اللي فلحبس حتى هي باغا الصرف .. طحت معاها عجبها الحال رجعات ضبر هي على البوليس تما باش تلاقا معايا ..واش تزعطات ولا ماعرفت ليها
جميلة: هييه اوييلي
هز حاجبو: ومالكي جاتك غريبة.. وكاااين ماااكتر
جميلة: وتصاحبتي معاها؟
مهدي: لا انا مكنديرش ... مشدود تما مكنشوفش البنات ووحدة بغات طيح معايا نقول ليها لا !!
حميلة: ماخفتيش تهز شي مرض!!
مهدي: راه كيدوزو ليهم راه تا هما كيخافو على راسهم تعادي الحزاق كامل تما وتا البوليس .. راه كيدوز الكونطرول على كولشي عيالات ورجال واااصلا تادير حسابك واحتياطك
رد كيضحك : عااادي صافي صعيبة غا البدية ... رجع عادي دخل خرج سير اجي الولف ..شي مرات كتوحش الحبس كااع كيطلع ليك البشر فك*** وكتمل غتبغي تمشي ليه كتولي تقلب على السبة دخل .. شحال من واحد داخل هوا باغي ... عارف راسو غيتفاهم مع بنادن فالحبس ... الزطلة كاينة كولشي كاين الماكلة وبنادم عارفك ولد*** ميضورش بيك .. صافي كتهنااا .. كولشي كيوصلك كترييح نتا وعشرانك على التباوق والقص والضحك .. دير شي صاحبة من تما بقا تلاقاها وهاناا بيييخير مع ك*** ههه... راه تا لحبس ولف ... تخرج يطلع ليك البشر والتشوميرة فراسك كتمشي ترجع ... اصلا مكيبقاش عندك مع البشر كتولف واحد الحياة وكتلقا فيها اللي بحالك كترتااح ليهم كيرتاحو ليك صاافي الحياة السعيدة
ردببرودة: مي راه عندها راجلها كتشتف عليه كي بغات دابا .. رزقي راه غيوصلني فين ما كنت ... (عض شفايفو كيشوف فيها) ونتي .. نتي عندي دابا وخايف نخسرها وداير حسابي على قبلها .
صفار وجهها وبقات كترمش .. اش هاد الصباح هادا ... بايت شادها الليل كامل داير ليها التعذيب الجنسي باش الى كانت مشابعاش تقنع وتكهم حتى ماتبقاش تفكر فشي حاجة اخرى وصابح عليها بريحة الحبس ... هد ليها عضامها بالليل وكمل على تفكيرها . بغات تسل تنوض من حداه وجرها طيحها على ضهرها عاض شنايفو كيضحك وقال .
- فين غادية؟ باقي الحال
تنهدات بتعب: عييت عييت ... بغيت نوض
عنقها من تحت الفراش كيبوس باغي يحرك فيها الرغبة ودوز يدو على كرشها العارية وجنابها وقال
قال كيبوس ودنيها وعنقها : الدار الطموبيل الحانوت .... وفين كنتي ديك الليلة واللي قبل منها
قالت كتهرب عنقها بصوت تقيل : وراه قلللت ليييك
رد : ماقلتي ليا وااالو
ردت : مهددديييي .. يالاه نخرجو قبل ميجي شي واحد
جرها عندو وحيد الغطا كامل لاحو بشهوة وقال
- بلاتي مكاين اللي غيجي ..
ردت :: عيييت
نزل بقبل مع صدرها بشهية شراهة حتى لكرشها وقال كيقبل
- والله تا ولات عندك لكريشة
ردت كتلوى باستسلام وصوت تقيل : دابا نحيدهااااا
رد : خليييها.. جات معاك
دوشات هي وياه فالدوش ولبسات حوايجها .. جلابتها الجميلة بلغتها وطلعات سدات الباب ديال السطح وتأكدات من قفل جميع الابواب ونزلات تبعاتو هازة باليزتها .. طرقات باب دارها ومشات مع الشارع فالدروة فين موقف طموبيلتو لقاتو كيجلس متكي شاعل كارو ويسوط وينفخ بوحدو .. تلفت شاففيها وقال
- ديالاش ديك اللاليزة
ردت : غير حوايجي كانو تما وجبتهم
بغيض: شكون ضرب الطموبيل هرسها ؟
جميلة: احمد هوا اللي نزل عليها بواحد الحديدة فاش جاو هجمو عليا
دور وجهه قدامو كيزفر بغيض وقال : ولد لق**** .... واخا (حىك راسو بالايجاب) بلاتي على ديلمو هاهوا جا برجليه
ديمارا الطموبيل وهي كتنشف شعرها بيدها حداه دايرة رجل على رجل ساكتة .. دور التيليفون لياسين وقال
- الو ياسين ... شوف ضرب لعين عودة الى ماعندك ميدار راه لميني كوبر تما واكلة لعصا ديها لاجونص ... انا نسيفط ليك فين كاينة لوكاليزاسيون .
فلحين وصل ياسين سايق سيارة صغيرة معاه شخص اخر حتى للبلاصة كيقلبو لقاوها وحيت عندهم الضوبل ديال المفاتيح دالسيارات فالوكالة طلع الشخص ساقها وياسين موراه ردوها للكاراج فين كانت وتجمعو عليها كيشوفو فيها ويتحسرو عليها معارفينش شنو وقع .. كل واحد اش كيقول ، فين حين وقف مهدي حدا العمارة ديالها بالسيارة وقال
- دوك الكامرات اللي دايرة على برا فالدار خدامين ؟
جميلة : انا خليتهم خدامين غير الى خسروهم ..
مهدي: فين كاينة هاد الفيرمة دخوك ؟
جميلة: انا نطلع البليزة ونديك تشوفها .
مهدي: يالاه سيري
نزلات طلعات باليزتها للدار خباتها فالحمام فوق واحد الدفة وسط واحد البانيو ونزلات كتجري حلات الباب لقاتو كيهضر فتيليفون
مهدي: حدا البراج ... غتلقاني حدا الفيرمة دمولاي رشيد .
قطع وتلفت كيسوط مفقوص على الطموبيل وجميلة كتنكر
- منفطروش ؟؟ لبارح متعشيتش كليت غير شي تخربيقة
رد : بلاتي هاحنا غنهزو شي حاجة تاكليها
وقف حدا واحد الباتيسري خلاها نزلات راسها مشات جابت اش بغات وطلعات حداه هازة الرايب والحرشة بأملو وكاس دلافوما بفواكه مجففة وزاد بيها خارج المدينة على طريق لوتوروت ودخل مع طريق صغيرة دايز عليها الشجر ووقف جنب فيرمة بصور عالي وطالع معاه الشجر فالجنب ووقف خلاها كتفطر ونزل كيدور تما ويتكيف . دخلات سيارة بي ام بيضاء ديال جواد وكان حداه ياسين بان ليهم كيمشي ويجي ويكمي ووقفو موراه ونزلو كيتناقشو بيناتهم ماعجبهمش الحال على الحالة اللي وصلات فيها الطموبيل .. عطاوه جوان برد بيه على قلبو ووقف كيسوط
ياسين : معاك شي واحد فالطموبيل؟
مهدي: جميلة هاديك
ياسين : ااه
مهدي: راه خوها ولد ل*** اللي هرس الطموبيل
جواد : خو من ؟
مهدي: واحد البلان مفشكل تا لمن بعد ونعاود ليك دابا .. (لاح جوان) يالاه نتحركو
طلع فالسيارة وكمل مع الشارع الصغير حتا بداو يبانو الفيرمات وحدة حدا وحدة وسط الطبيعة باصوارهم وشارت ليه لصور طويل عندو باب ديال لحديد رمادية وقالت
- هي هااادي ... اححح على الفيرمة ديالي مسكينة توحشتها
مهدي : بقاي هنا متنزليش ت نجي
نزل زدح الباب ودار يديه فجنابو كيشوف الشجر طالع مع جناب الصور اخضر والصور طويل غادي مع الطريق .. كان الباب محلول وزاد كيشوف فديك الفيرمة كي دايرة في حين مول ياسين وجواد موراه .. خرج راجل كبير من داك الباب ووقفو مهدي قائلاا
- السلام عليكم السي محمد ... احمد مول هاد الفيرمة هنا ؟؟
شاف فيه الراجل حالتو حالة بالشمس والبوط فرجليه وقال : اييه شكون نقول ليه
مهدي: سير قول ليه شي ناس كيتسناوك برا يخرج عندنا
دخل الراجل مسكين وبقاو بثلاثة كيمشيو ويجيو كل واحد فين كيشوف وجميلة مراقبة كلشي من بعيد .. فجأة خرج احمد مع داك الباب بواحد السندالة دلميكة وشورط طويل فيه جياب بحال العكس فجناب وركابيه خارجين و تيشورط بيضاء مهرهرة عليه وداير فاصمة فعنقو
شفا فيهم بتساؤل : السلام عليكم
مارضتش عليه مهدي السلام ورد بنبرة حادة: جيتي دكدكتي الطموبيل زدتي خلفة اعشيري ديك الطموبيل شايطة ماعندهاش ماليها
احمد : اشمن طموبيل الشريف ؟ علاياش كتهضر ؟ (عقد حجبانو وهز راسو ) ااااه ماشي نتا اللي كنتي ديك المرة مع جميلة .. هادا نتا وجاي عندي حتى لهنا برجليك
دخل فيه ياسين طول وعرض : سمع السي ز** ... راه نفني ل*** تمك فقلب هاد الخربة ديالك ...
قال مهدي وهوا كيشوف جهة الباب بميوعة فملامحو : غنشوفو كفاش دير
قالها وهوا حاضي باه اللي خرج من القهوة ديالو يديه فجيبو كان جالس غير مع الرجال قدو وضرب طلة على القهوة دمهدي .. وحيت مكيحطش رجلو فيها وعزة نفسه مكتسمحش ليه كيوصل للباب ويوقف يطل ويشوف الحركة عندو كي دايرة .. تكا بيدو على الباب والفام دميناج كدوز الجفاف .. هزات راسها كضحك كالعادة وقالت
- كي داير الحاج لاباس عليك
ماردش عليها وبقا مسرح عينيه فالقهوة وهي خاوية بميوعة وكيدور فراسو
- امممم كتشمشو ..
ردت قائلة : ايوا راك عارف القهوة كتعمر اغلبية فلعشية الصباح قليل لي كيجي
رد بعجرفة حيت قهوتو عامرة وقال كيدور راسو بتتاقل : دابا نشوفو واش غطفروه ... مكاين لا جعفر لا بوكنيمة ؟
قالت كضحك وتكرط : لا خرجو يا الحاج
بفضول بغا يدخل يشوف وسرح عينو مخرج لسانو للجنب وزاد دخل بحذر كيبركك شوية ويدور .. شنو تزاد عليه شنو ماتزادش عليه ومهدي حاضيه من بعيد مور الجردة اللي قدام المحلات وقال بمكر كيضخك
مشا مهدي نيشان بسرعة دخل على غفلة داز حداه قفزو مع كان ساهي كيشوف فالتلفزة جديدة وقال حاني راسو فالارض
- صباح الخير الواليد
تلف بناصر بقا يشوف فجنابو وهز راسو بعجرفة وتم خارج كينكر على مولات الميناج
- فيين هي هاد مينة جالسين تكدبو تكلم لمينة تكلم لمينة الله يخليها سلعة
محنية على لكراطن جالسة فوق كرسي كتشو وتقلب السلعة وجوج دراري واقفين عليها كيحطو قدامها الكراطن .. جالسة وكتحل وتقلب شنو لداخل ..
جميلة : هادو هما البينوارات اللي قال ليا الصديق جداد ؟
رد الشاب: اااه هما فيهم عشرة ديال بياسات ... فيهم الموف والباج خمسة من هنا خمسة من هنا
حلات واحد البينوار ديال الحمام فوطتو محفرة كاملة باسم الماركة وكمامو ذهبية فالموف وبدات تقلبو وتشوفو عجبها وحطاتو فالجنب وبدات تقلب معاهم السلعة لخرى حتى سالات وناضت دورات معاهم مشاو اما الدفع فكيتم عبر فالبنك .
داخت وسط ديك السلعة كتقلب وتشوف حتى دخلات عليها بنت بخجل كطل دايرة الحجاب وقالت
- السلام عليكم اختي
هزات جميلة راسها بابتسامة : عليكم السلام ... مرحبا دخلي خاصك شي حاجة
ردت البنت بخجل كتشوف فالمحل وروعة الملابس
- لا الى كان ممكن نهضر معاك
ردت جميلة باستغراب: نعام ؟
البنت: انا بغيت غير نسولك واش محتاجة شي وحدة تخدم .. كنقلب على خدمة ومحتاجة نخدم .. عندي بنتي فلاكخيش وراجلي على قد الحال وبغيت نعاونو على الزمان
بقات جميلة ساكتة كتشوف فيها وكان ناقصها اللي يعاونها وعلى الاقل يحل ويسد ليها والى بغات تسخر تلقا اللي يجلس يقابل ليها .. دات وجابت معاها شوية فالهضرة وقالت اخيرا
- صافي جلسي بداي معايا من دابا .. ولاكن الدراري الصغار ممنوع هنا فالمحل ... يعني ماتجيبيش بنتك حيت تقدر طيح شي حاجة ولا تهرس شي حاجة ولا هي نيت طيح عليها شي حاجة ... الحانوت فيه الزاج وكلشي محطوط على سبة ومصالحش فيه الدراري الصغار
مدات ليها كاس ديال الماء وخي متكية على الفوطوي كترتاح.. شرباتو وناضت جلسات كتنفس
- ناري على دوخة شداتني
خديجة: ياك ما فيك فقر الدم ؟
جميلةذة ماعرفتش كل مرة كنقول نمشي ندوز وكتخرج ليا شي حاجة من الجنب وكنعكز .
ناضت كتنهد وتمشا حتى رتاحت وهزات البينوار اللي حطات فوق الفوطوي فاش خرجات السلعة لقاتو عليها وقالت
- الفاااين وخمسية درهم شكوون غادي يشريه فهاد الثمن ... ولاكن صحابات الشيكي ولعياقة موجودين .. هادا ديال شي تصويرة فالانستا فاعلة تاركة .. هزاتو وطلعات لفوق حيدات حوايجها ولبساتو بطريقة مثيرة وخدات بيه صورة مع المرآة وحطاتو فلحين .. مكاملاش عشر دقائق حتى عيط مهدي وردت
جميلة: الو
مهدي: حيدي ديك التصويرة داااابا ولا غنجي ل**** بوك نفرعك
ردت بتعجب: اشمن صورة؟
مهدي: حاااايدي ديك الصورة ابنت **** لي حطيتي حااايديييها دابااا
ردت : اوييلي وشنو فيها راه غير اشهار لبينوار يعرفوه الناس!!! ونتا مالك اصلا!
رد بغيض: هاداك اشهار ل**** ماضي لبينوار واحيييديها ولا بربي تا دابا غنبعت عليك نوريك ديلمك انا مالي
جميلة: بنرفزة ) وصافي يخ ... (قطعات كتنكر) تفوو على خرااا خارج ليا فعودي حيدي زمري المرض كي داير شداني كاع نوريه انستاغرام وهوا تا لفايس ماعندوش .. انا اللي حمارة جالسة نوريه شواقع فالدنيا
مسحاتها فلحين ورجعات جلسات كتقلب على شي وضعية كيوت تبان فيها زوينة وفنفس الوقت مايهضرش ولا يوقف عليها يكحل ليها نهارها .. قبل متصور وصلوها مساجات على ثمن البينوار وبدات تجاوب الناس وعاودات حطات صورة اخرى وتمت العملية بنجاح .. طارو البينوارات فنهار .. واحد خلاتو ليها تبرع فيه بحال ديما ولخرين جمعاتهم تسيفطهم لماليهم اللي اغلبيتهم عندهم شعبية وعايشين بالتصاور واللبوز .
كملات شغلها كتصور مرة يديها بالساعات اليدوية مرة رجليها بصباط وسبرديلات ودوز وقتها ... البيع رجع عندها فالمواقع اكثر من المحل .. كيدوز النهار اللي كتبيع فيه بياسة وحدة وشي مرات مكتبيع والو ولاكن عبر المواقع ديالها كتسيفط اكثر وكتبيع اكثر بلخصوص حسابها اللي عمر ورجع عليها الاقبال ورجعات تحط حتى هي احيانا مكياجها واخا مرون ومكتعرفش ديرو ودايرة الضحك فراسها لاكن قاضية الغرض وتلقات دعوات لشوتينغات وعروض الازياء بالتكاشط نضرا لفصالتها ونضارة وجهها وجمالها الطبيعي الهادىء اللي كيساعد على المكياج واخا كتحط ايلاينر عوج وهي فرحانة بيه والنا كضحك وتنتاقد ، والى زيغها الشيطان وقاليها كتعرف كتهز الالوان وتبدا دير فوق عينيها كتعلم الناس يديرو المكياج وكتخرج النتيجة فالاخير كأنها تكشيطة مغربية بالسقلي والالوان وكيختمها خط الايلاينر العوج .. وفوق هادشي كامل كترمش وضحك عاجبها الحال حتى صدقات ليها بصح وسيفطو ليها دعوات لفن المكياج على وجهها على الاقل يديرو فيها خير وتعطي التيقار للمكياج او تتعلم منهم شوية
دخلات عليها سلوى ومعاها جوج بنات حتى هما زوينات ومهليات فراسهم وسوارت الطموبيل فيديهم .. الشعر كحل بحال الضلام والسروال مزيرين والروايح والصيكان وليمارك درجة ثالتة عرفاتها جميلة من الشوفة .. بدات تسلم عليهم وترحب وهما بابتسامة كيشوفو فيها .. شي كيفلي شي وشي كيشوف شنو عند شي .. جميلة كتفلي فيهم بعينيها وهما كذلك كيفليو فيها وقاعدة البنات المعروفة لاتنتهي ابدا . بداو يشوفو ويدورو فالمحل وهي واقفة حدا لاكيس متكية بيدها كتهضر مع سلوى ويتجمعو
سلوى: هانا جبت ليك لكيان .. كانو غاديين يشريو من عند واحد خيينا قلت ليهم لا انا نديكم عند صاحبتي عندها داكشي زوين
بقات جميلة غير كتشوف حشمات تحيدو ليها من بعد ما عطاتو ليها فيدها وبقات ساكتة شدات ديك 200 درهم كتنهد عليها وبقات تشوف فالصاك غادي مع الباب وسلوى هازاه فكارطونتو بتقليقتها على جميلة .. اما حتى دوك البنات ماشراو والو بقاي يدورو ويشوفو واكتفاو بالماركة الثالتة اللي مولفين بيها وماقدوش على الثانية او نوقول الاصلية اللي معروف بيها محل جوليا
جميلة الجزء 16
محتوى القصة
التنقل بين الأجزاء